15. KA CHANPUAL [A Becky Rafa Story]

15. KA CHAN PUAL

Ziaktu: Becky Rafa Renthlei

-B®®

(Recap)

An fapa thichháwngin damdawi inah a let reng a, anni nupa ve hi an fapa rosumah an lo buai a nia, tenawm lutuk. 

"U Mapui, i dam a ngai asin, kei leh i fapa tan i dam a ngai takzet," ka ti rilru nauh nauh a, ka mittui a hnai leh kuar tawh.

Nunna aia hlu khawvelah hian a awm thei dawn em ni? Thlamuana leh u Mapuia hian eng ruahmanna nge an siam hriat pawh va ni suh, a hunah engkim a lo lang chhuak turah ngai ang aw...

&&&

Zankhuain chanchin tharlâm hriat tur a awm lova, muhil thei chuang si lo hian ka let tawn sek a, ka tlaivar ve thuak tho; khawvar dawnah rei lotê ka lo chhing sek a ni ang, Bawihpuia ṭap riin min tiharh a, dâr sarih a lo pêl fê tawh, ka phone-ah missed call vawi li lai a lo awm a, Atuni leh u Ropuia min lo call na ve ve a ni nghe nghe.

Rang taka ṭhu chhuakin ka fapa ka'n titlei leh tê tê phawt a, chumi hnu chuan u Ropuia zawk ka call-back ta a.

"Mate, Mapuia a lo harha i hming a lam ngun em mai, lo phei dan tur dap mai ta che," a rawn ti sawk sawk a, a harh tih a sawi ringawt pawh chu ka lawmna tawk a tling viau. 

"Bawihpuia hi.." tiin, ka nu leh Diki kuta dah ka hreh thu ka sawi chhuak a, ani hmanhmawh lutuk tawh chuan, "Rawn paw phei hmiah rawh, i pasal âia pawimawh thil dang a awm lo, i nu lung tih-áwi a ṭhat rualin i tilawm seng tak tak dawn chuang lova..." a ti leh zung zung a, ani leh ni lo angin a ṭawng hmanhmawh viau.

"Ka lo tum dawn nia, a nih loh pawhin u Atei ka ko chho mai ang," ka lo ti a.

Hospital-a Bawihpuia hruai tezawng a risky lutuk. Thlakim lo a nih nâk laia Cancer hospital-a va hruai a tan chuan a la no mah mah. Mahni chhia leh ṭha hriatna hmang pawhin a hriat ve theih a; mahse, u Ropuia kha ka hnial thui duh lo mai chauh a ni.

Diki'n chaw ei tura min rawn koh hnuah u Atei ka call leh ta tawp a, ka inthlahrung buai peih ta vel lo law law. Îhe lovin a lo chhoh nghal tur thu a sawi ta rêng bawk a, ani hi chuan min hrethiam ṭhin êm asin.

Ka nu hnenah ka tum dan ka hrilh a, min chhân duh loh mai bâkah ka be ṭawng zo lo. A han sual dan êm êm hi aw, Vanram kâi tur list-ah a hming a chuang miah lovang. Â..a va ho tak, ka thil ngaihtuah te hi a...

U Atei a rawn chho thlenga Bawihpuia a bualfai laiin ka chhuahsan a, Taxi bawk ka hman leh mai loh chuan, ka fapa ka ngaihthah vang nilovin a pa a na êm a, a harh laia thlen hman hrâm ka duh ve atin ni. 

Nizana ka nu leh pa inbiakna khan ka rilru a luah lo thei bîk lova; eng vanga min huphurha ka hming hi lam ri ziah nge an nih ang? Keiin engmah ka hre ve der si lo hi a buaithlâkna lai chu a ni. U Mapuia thil neih leh a bank account-a awmzat ka hria pawh a ni lo a, a nihna takah chuan nau ka pai tâk avang leh a natna avanga luhkhunga enkawltu mai chauh ka ni a. Ka hmangaihna hian a hausakna a en lova, hlim taka a damchhung hun a hman theih nana atana awm ka ni chauh zawk. 'KA CHANPUAL' Ka enkawl tur atana Pathian min pêkah ka ngai a, chumi a nih vanga an ina khawsa ta leh nu leh pa, ka thisen zawmte kalsan ngam ka ni bawk a, a nu leh pa rilru kâwi ang hi chhete eih mah ka pu lo.

Tin, u Mapuia hian zankhat mitchhin tâwk ta chiah sela, ka chan a chhe dawn lutuk tlat. A awm loh rual ruala pêt chhuah theih ka ni a, dan anga ka pasal a nih miau loh avang hian kei pawhin sawi buai theih ka nei tam lo ang. A rosum aia hlu zawk kan kârah Lalnunfîma a awm tawh a, hei aia rohlu dang a awm thei chuang dawn em ni? An ngaihtuah a tlêm hi ka'n ti mai mai khawp a. A bul ber pawh an duhâm vang vek a ni. A ropui lo chiang êm mai. 

Traffic Jam kâra kan tán fe hnuah damdawi in ka thleng phei a, Atuni leh Thlamuana ka hmu lo a, u Ropuia chiahin u Mapuia a lo ṭhutpui! Min hmuh veleh, "A chau deuh naa, a biak theih reng tho a nia, Thlatea te unau erawh chu inhnawh puar turin an kal a nih kha," ka u-in a lo ti vat a. 

"Ka lo awmpui ang, thil i ei tawh em ni?" Tia ka zawh chuan, a la ei loh thuin min chhâng a, "Ka awm chhung hian va inthun puar ve rawh le, i chau lutuk palh ang," ka lo ti dam thlap a, min en vang vang chung hian, "Ka rin âiin i lo thleng hma daih mai, Bawihpuia tunge awm dawn a?" Tiin min zawt a.

U Atei ka koh thu leh ka nuin min be duh lo tih ka sawi a, ding chhuak paha nui vur vur chung hian, "A biak duh loh che chuan be lui tlat duh lem suh, inbiak loh tih mai mai a na lo êm mai, ka rin âi hian a sual tlat," a ti ve ta a. Mi a sawisel ve zen zen ngai lo a, ka nu Biakliani hi chu a tei thei bik vak lo a ni mahna.

Min chhuahsan fel a, ka pasal kiang hnaihah ṭhu hniamin, "U Mapui, ka lo thleng tawh a nia," ka ti sap a. Chau tak chunga rawn mengin nuih luih a tum ngial a, a hlawhchham titih. 

"Duatnu..." thâm chhalha tiin a bân a rawn ti chê a, a kutah ka lo hum vat.

"I harh tiraw?" Tia ka zawh chuan, min chhâng lovin mit a khap sawk a, a mittui tling kalh chu dimte hian ka kut hnunglamin ka hrûksak a, keia tak pawh ṭah loh tumin ka insum nasa hle. A hmuh laia ṭah kha thil tih chi a ni lo, min ngaituah si, ka dinhmun engkim a hria a, a rilru ti hnual zawnga awm loh hrâm ka tum ve fan.

"Duatnu... ka tel lova i awm a ngai dawn a nia aw.." chil lem khawlh chunga tiin a hmui ro rap chu a liak zauh a, "Ṭawng tum rih lo mai rawh, i bulah ka awm tlat dawn alawm, khatiang sawi ka duh lo tih i hriat kha," ṭah insûm ru takin ka lo ti a.

"Thlatea hi ring tlat ang che aw," a tih leh chuan ka thaw halh a, "Muthilh tum la, i harh leh hunah kan sawi ṭha dawn nia," dam thliama ka tih laiin a maimitchhing leh ta a, biak thui chi a ni lo tih a lang reng a, Thlamuana ring tura min hrilh erawh mak ka ti lo thei lo.

A hmai vel ka hrukfai sak a, lukhum phiar a khum reng ṭhin avangin a lu kawlh ta vek pawh a lang ngai lo, a chêrin a dawldâng hle a, thisen unit li dawng siin tisen a neih phah chuang hek lo, ka hriat ṭhin ka pasal Lalrinkima hmel kha a bo telh telh a ni ber mai.

Doctor-leh Thlamuana an rawn lang a, min hui zauh chung hian, "Ka room-ah kan inbe lawk dawn em ni ang," a ti a, Atuni leh u Ropuia pawh an rawn lêt leh tawh a. Thlamuana nen Dr.Cindy kan zui lût ta a. Thu lawmawm lam dawnsawn tur a awm dawn lo tih a hmelah a lang reng mai.

"Le, in dinhmun chu sawi ngai lovin inhrethiam thovin ka ring a, Mapuia hian hniam lam a pan zêl a, Pathian thu thu kan tih rualin mihring lam aṭang chuan beisei tur a awm tawh lo a ni ber mai, zawimuangin tihian a kal hret hret a ni tawh a, in rilru insiam theih nan tlang takin ka hrilh che u a ni, amaherawhchu, thil mak pawh a thleng thei tho bawk a," dam raiha tiin min en a, "Tunlaiah chuan thu zêp leh khuh hi kan nei vak tawh lo, a nihna anga sawi mai hi a ṭha ka ti a.." tiin nuam lo tih hmel tak hian Thlamuana a melh a, "In duh chuan in lamah pawh in haw thei tho a nia," a ti tlang ta hrâwk a.

Sawi mai tur hre lo hian ka ngawi ngal a, Thlamuana zawk rawn ṭawng chhuakin, "In lamah chuan haw lo ve, hetah awm rawh se, damdawi in nge nge chu a dan a dang a nia," a lo ti a, ka pawm zawng tak.

"In thu thu a ni mai aw, theihtawp erawh kan chhuah zel ang... chuan.." a tih mêk laiin ka tlan chhuak ta daih a, doctor thusawi tawp lam hriat leh pawh ka duh tawh lo. Khatiang tehtawpa inhrilh te chu dawnsawn dan ka thiam hleinem, Hospital opposite-lamah tlan pheiin ka ding vang vang a, ka mittui ka dang sêng lo. Hmui hup chungin ka ṭap khur ngat ngat a, thi tur atan ka dah phal lo a ni ber.

"Zomuan..." tia ka hming lam ri ka hriat vangin insût hraih hraih chung hian ka inher a, ka hnung lawkah Thlamuana a lo ding reng chu niin! Mit nuai nawk nawk chung hian, "Keimah chauha awm ka duh," ṭap ṭeuh chungin ka lo ti a. Mit zim sana min en chung hian, "A hun tawp thleng a kianga awm i duh zâwk lovem ni!?" a ti ta a. Ka ngawi reng.

Chumi hnu chuan ipik zetin u Mapuia mutna lamah bawk kan lêt leh ta a, Atuni a lo inhnit fap fap a, "A hriat laiin khatiang khan awm ṭhin suh u," Thlamuana'n a ti hmuk. 

Ani lah chuan, "Ka ṭah a chhuak zel alawm..." a lo ti a,  a va hahthlâk ṭhin tak. A bul hnaiah ka ṭhu hniam a, Beer rim a lo nam leh tawh, a mak ṭhin teh e. Mahse, ka sawisel phâk a ni lo tih ka hria. 

U Atei hnen aṭangin Call ka dawng a, "Nano, i lo haw mai dawn em ni, Bawihpuia a tlei duh lo reng reng a, a ngaihna tak pawh ka hre lo," inthlahrung takin a rawn ti a, u Mapuia dinhmun min zawt zui nghal bawk a, "A ngai reng a ni mai," ka lo ti a.

"Lo haw mai rawh aw, ka nu a phun char char bawk si a,.."  a rawn tih leh chuan, "Aw le, aw le.." tiin phone ka dah zui ta a.

Atuni hnenah thil awmzia hrilhin haw ka tum thu ka sawi a, hetih lai vel hi chuan u Mapuia thâwk dan pawh a ziaawm lai tak niin tui taka muhil ang mai hian, a thaw sâk sâk a, kan fapa vang hian ka duh ang pawhin a bulah ka táltam thei lo chu a ni a, ka thin a rim hlur mai.

Hnute tui pangngai ring pawh a ni lo a, duh leh duh loh hre hrang rual lah a ni hek lo. A nu ni tho mahila, ka fapain a nu pangti lum pawh a la thliar thiam dawn lo tih ka hre ve ran bawk si. Damdawi in kal chhung lek pawh an titlei thei lo hi thil mak chu a ni ve. Mahse, u Atei'n dâwt a sawi dawn lo tih ka hriat vangin ka ngawi ta rih a. Ka thin a rim ru ṭûn a, inbunruaha ân hlawk hlawk ka châk ber.

U Ropuia'n min va thlah a tum a, Thlamuana'n a rem ti leh lo, "Inah thil pawimawh lâk tur ka nei a, keiman ka va dah ang e," tiin, u Mapuia Bolero awmna lam a pan nulh a, ka zui ve leh ta nge nge e.

"Zomuan, eng ati nge haw i tum a?" Tia min zawh chuan Bawihpuia a tlei duh loh thu leh u Atei'n lo haw mai rawh a ti a, tih vel ka hrilh ṭha ve mai a.

"An va nêp mai mai e aw, nausen pakhat lek pawh an awm tlei zo lo a nia, an buaithlak a nih hi, eng pawh nise, in lamah lo awm la, chanchin ka rawn hrilh zel dawn che nia, ka phone number kha saved tawh ang che," a ti hmuk a.

Insûm hman lo hian, "Ka saved peih lo.." ka lo ti hmak a.

"Eng vangin?" Tia kiai suk chung hian, "A chângin i inla puitling ve em em a, a chang leh i nawi ru riau a.." tih pah hian a nui a, "I number saved loh kha puitlin lohna a nih pawh ka hre lo," ka lo ti nghauh.

"Okay...saved malêk rawh...a ho..thil ho lutuk a nih kha i sawi," tiin ngun tak hian kawng a en a, ka chhâng zui duh ta lo.

In kan thleng a, amah pawh ngaichâng lo hian inchhungah ka luh san daih a, inhnuaiah a room a awm vangin inchungah a lokal khât ka tih tawh kha. Kan room panin ka tlan chho a, u Atei"n Bawihpuia a lo âwi a, ka nu tukverh bulah a lo ding bawk a, Diki hmel ka hmu lo.

"En teh, Nano.. a muhil duh lo reng reng a, a ṭap bâng ve chiah a nih hi.." tih pahin ka bulah a rawn ding a, ka fapa meng kiau chu ka zu bih dâk dâk a, a ṭah nasat vang a ni ngei ang a hnar a sen hlar. 

"Kâr hnih pawh la tling lo i fapa chhuahsanin dârkâr tam i thang bo a, Mapuia buaipuitu tur chu a unaute an awm reng, va inlan ve chhen pawh a ṭul lo a nia," ka nuin a lo ti nghat nghat a, ka ngei a nia.

U Atei kut aṭanga Bawihpuia lain, "Ka lo mutpui ang e, a sual reuh em mai," tiin ka nu pawh chhâng lo hian u Atei ka be daih a, min khawngaih hmel tak hian min en a, "Naupang School kal an lo bâng dawn tawhin ka ring a, ka haw ve lawk ang aw.." a ti ta a, a nu a be bîk miah lo. 

U Atei chhuah hnuah ka nu nen chiah kan awm ta a. Minute 10 dawn kan inbe lo, khumah ka ṭhu a, tukverh bulah pawnlam thlirin a la ding reng a, hrawk thian kharh chung hian, "Eng tikah mah ka mo atan ka pawm dawn lo che tih hria la, Mapuia awm loh hun hun hi kan in i chhuahsan hun tur a ni tih hria ang che, ka fapa thluak i sûksak thei a ni mahna, keini erawh chu kan ni ve lo a nia," dam thlap leh ngeiawm taka a ṭawng chhuah chuan ka sa ve zak.

"Lungngai suh.. ka awm chhan ber i fapa a awm loh te chuan ka awm zui zel tawh náng. Bawngkawna a inah sawn ka in dang mai dawn alawm," ka'n ti chiah chu min melh rum teh e.

"Awi, awi... i han zah loh dan em em te hi, tum nei rana ka fapa hi luhkhung i ni tih ka hre lo emaw i ti ang e, engmah chan i nei lo tih inhre nawn leh rawh," a tih sak sak lai chuan kan room-ah Thlamuana a rawn lut a, "In bengchheng em mai, ka nu, nang pawh inhnuaiah chhuk rawh," a rawn ti ta a. 

"Thlate, i lo haw ve elaw..i u a zia deuh em ni?" Awihawm loh khawpa zaidam hian a'n ti zui a. A Biakliani thlâk mang e. Hetiang ze lem lutuk hi ka ngaina lo.

"In hnuaiah kan sawi dawn nia, Zomuani hi biak lawk ka duh," tia a nu a chhân lai chuan a phone a rawn ri a, "Atun, eng nge ni ta?" A ti zui zat.

"Aw le, ka rawn phei dawn nia," tia phone off-in, "Ka kal a ngai tlat, remchangah kan inbe mai dawn nia, ka nu nang pawh Zomuani hi khik-khak reng suh," ti sup chung hian kawngka lam a pan a, "U Mapuia a ṭha lo em ni?" Tiin ka zawt leh rih a, "Ṭha lutuk lo," tia min chhângin biak zawm leh hman pawh ni lo hian a chhuak zui ta a. Ka hrilh a va hai tak.

Ka nu pawh eng mah sawi tawh chuang lovin a chhuah ve tak kha. 

Atuni ka call a, phone a pick thei si lo. U Ropuia pawh chuti bawk. Thlamuana lah khan eng mah a sawi fiah bawk si lova rilru a khingbai ngei mai. 

Nia, min kalsan hun a hnai a, doctor te pawhin an sawi alawm. An thiamna aṭanga an chhut chhuah dan min hrilh a ni mai a, Pathian thil mak tih ka la beisei fan. Kan fapa Lalnunfima hi la piang lo se chuan damdawi inah a kiangah awmin a kut ka vuan tur a ni a, tunah chuan engkim hi a harsa vek; lawm loh leh duh lohna hmuna awm hi thil namai a lo ni lo a nih hi.

Tlailam dâr thum a ri a, nizan lamah ka mut ṭhat loh êm avangin reilote ka lo chhing ve hman sek a, damdawi in lam aṭangin chanchin thar eng mah ka la dawng lo. 

Eng emaw tâwk thut thei dinhmuna ding kan nih tawh avangin kan room hnawk zualpui chinfel ka tum ta a.

In chungah hian room chuang pakhat a awm a, hei hi Thlamuana room ṭhin a ni a, a lo haw hlim khan in hnuaiah a awm tâk avangin a ruak deuhthawin a awm kha ni a, kan room-piah chiah hi a ni nghe nghe.

U Mapuia fix-wardrobe, a hmaa file vel an dahna kha ka tifai hmasa ber a, ani hi zawng a che fel êm a, tih vak tur pawh a awm lem lo. Kei pawh mite anga thawmhnaw nei tam ni hek lo, bungraw chhawm pakhat pawh ka nei lo a, chhuat nawh leh dârthlalang hrûk a ni deuh mai. 

Bawihpuia a mu tui hle a, nichinah lem mu duh lovin a ṭap ngat ngat a, tunah a mu ṭha leh em em bawk si a, a mak ve ngawt mai. Shower hnuaia ka din laiin ka phone a ri a, ka laklawh viau bawk nen ka haider rih. Ka thin a phu ru zek zek a, chanchin chhe lam hriat ka hlauh vang a ni pakhat.

"Nano...khawnge i awm?" Diki aw ka hriat avangin bathroom-a ka awm thu ka hrilh a, "Hmanhmawh rawh, u Mapuia..." tia a sawi zawm leh hma hma chuan bathroom kawngkhar ka nam hawng rawk a, "Eng nge...engtin nge a awm?" Tiin ka zawt lêt a.

Ṭap ṭeuh chung hian, "Thlatea'n a lo call a, in lam lo singsa fel turin min rawn hrilh," a ti a, a sawi zawh rualin khumah a ṭhu hnawka hmai hup chung hian a ṭap ta a.

Ka hlauhthawn ang a thleng dik ta. Mahse, ka ṭap mai lo. 

Rang takin ka inthlâk zung zung a, inhnuai lama ṭap thawm tepawh hre mahila, ka bengah a lut lo reng reng, khum sîr dinglam u Mapuia mutna ṭhin zawnah ka ding a, thâwk lâk tumin ka awm ka dawm a, a sak ṭalh. Ka thinah min hnawh ni maiin ka hria. Diki pawh ngaihsak nachang ka hre lo rêng rêng a, mi â ang maiin ka ding ngawi ngul ringawt.

A hnu leh lama thil thleng eng mah ka hre mumal lo. Mumang ang ruaiin ka hria a, u Ropuia'n min kuah chunga, "I tan khawvel a tawp lo a nia, ṭap rawh, Mate, ṭap bawrh bawrh rawh," tia a ṭawng lai pawhin milim ang mai hian ka ding khawng at.

Ruang ala rawn thleng lova,  YMA Information-aṭanga an rawn áu lai pawhin ka mittui a la far eih lo. 

Keimah min ngaihtuah êm avangin u Ropuia a rawn haw hmasa a lo ni a, inhnuaia Thlamuana room kha an ṭhiat a ni ang, bungrua leh thawmhnaw ṭhenkhat in chung room âwlah an thiar chho zut zut a, ka nu Biakliani pawh a ṭap ring khawp mai, ka hre pha vek. 

Tlailam dâr 4:15Pm khan u Mapuia'n khawvel a chhuahsan ta tih hi ka awih thei dawn em ni? Ka awih phal lo.

Lalnunfîma a lo ṭap ve bawk nen ka hmalamah ka awrh a, u Atei te, midang hrim hrim tumah an rawn chho lova damdawi in lamah an la awm vek tih ka u Ropuia'n a sawi.

Ka dawm hlum loh leh a hun tawp pawh hmu lova ka awm hi ka inthiam lovin nêp ka inti ngawih ngawih. 

"Mate, inhnuai lamah chhuk ang le, an lo thleng dawn tawh ang," tia ka û in min biak chuan ka phu dâwrh a, ka ngaihtuahna kawmin minute engzata tam nge ka lo din tawh pawh ka hre lo.

Loh theih lohvin inhnuai lamah kan inzui thla ta a, ṭhalai tam takin a zualpui an lo singsa fel tawh a, ruang dahna tur an zuah áwl laiah chuan ka ding a, ka pa pawh a inhru fap fap mai. Diki leh ka nu ka hmu rih lo.

U Mapuia ruang a rawn thleng ta.

Morque Van aṭanga ruang an rawn zawn thlâk laiin, in kawtah nau hmalama awrh chungin ka lo ding a, Atuni leh Atei'n ṭap chung hian, 'Mama..Mam..." tiin an ko mawlh mawlh bawk a, ka mittui a rawn far ve ta.

Engkim huama ka zui leh ka innghahna mipa min hmangaihtu leh ka hmangaih ruang chu mittui far zung zung chungin ka thlîr a, Atuni'n min rawn kuah a, "Nano...Mama hi... Mama.. i nupui leh fapain an lo hmuak che a nia," ṭap râwih râwih chunga a tih leh meuh chuan awrâwl chhuahin ka ṭap ve ta.

In chhungah ruang an zawn lut a, a thawmhnaw inbel lai thlâk an duh vangin an zar hliah ta rih a.

"Novi....a thawmhnaw i duh ber han thlang la, kan inbel tîr dawn nia," tia Thlamuana'n min biak chuan, ka bu nghat a, a mit a sen râm a, a meng dul ruih bawk.

U Atei'n ka fapa a rawn la a, "Ka rawn zui chho ang che," a ti sap a, Thlamuana te nen kan pathum chuan kan room lamah kan inzui chho ta rih a.

A thawmhnaw thlâkna tur ka zawng fuh hleithei lo, ka kut a khur dar dar a, ka mittui a lo tla ve bawk si nen ka duh ang pawh ka dap hmu mai lo lehnghal. 

Thlamuana bawkin min rawn enpui ta a, Coat suit dum leh kamis dum a rawn phawrh a, "Hei hi a ṭha ang, tuna a thawmhnaw kan thlâk nghal loh chuan a buaithlâk, nakin nghahna chhan tur kan nei lo," tih leh chhuah a rual a, u Atei zawkin, "Nano, Bawihpuia hi Atuni room-ah ka lo awmpui mai dawn em ni ang, hritlâng a chhar palh a hlauhawm em mai," a lo ti a. 

Ka 'Umn e' liam mai mai.

Zanriah pawh ka ei ve lo a, Atuni a khawngaihthlâk ka ti velehchhawng, a ṭap chau vek tawh a, a âw a chhâng ṭiak a, mite anga chham thiam ni lo mah se, 'Mama.. Mama.. ka phal lo.." tiin a ṭap ngat ngat a, a kiangah u Ropuia a awm zêl a, anni pahnih chuan ruang an kîl.

Kuang chhunga ka pasal mu chu chiangkuang pawhin ka la en lo, ka en ngam lo a ni ber e. 

Lumen tur a nih vangin tlem chuan ka rilru a dam deuh. Rei lote tal kan hnena ala awm ve tur ringawt pawh ka thlahlel a, tih tur ber hre chuang si lo, ṭap ṭha thei bawk si lovin ka tei sek a, a tawpah kan nupa room ah ka lut leh ringawt.

Ni e, Lalrinkima a awm tawh lova ka hma hun thim tak ngaihtuah chungin khumah ka ṭap leh ta a, ka ṭah nasat tawh êm avangin ka chau vek tawh, ka nau neihna a la rei si lova chuvang te chu a ni mahna ka lu a hai chhawlh chhawlh a, ka khaw hmuh a phe vek. In hnuaia zâi thawm te chuan ka thluak an luh ngut ngut a, ka lu ûm a puakkeh mai dawnin ka hria. 

"U Mapui... ka awm lohna hmuna awm i duh lo a ni lawm ni, zan khat lek ka riah bosan che pawhin hrehawm i tih kha.." ti sapin ka ṭap leh ta nge nge a.

Kan thlalâk ka rai laia Delhi hospital-a kan lak khum bul dawhkana kan târ chu ka melh a, "I hmanhmawh êm mai, engtin nge kan awm tâk ang le," tia ṭap chunga ka ṭawng lai chuan, "Novi..." ti sup chung hian Thlamuana khumah a rawn ṭhu hniam a, a mittui a tla tih hrilh hranpa ka ngai lo. A mit hnawng chap chuan min en a.

"Eng ati nge a hun tawpah tal a bulah min awm tîr ve loh, ngatinge eng mah min hrilh loh," tia thinrim ṭha lehin a bânah ka chúm a, a che sawn map lo.

"Nangmah vang vek a nih hi.." ti lehin ka ṭap chhuak leh ta a, "Ṭap rawh...i duh tawk khan ṭap rawh," hniam ruiha tiin ka bân puamah a rawn chelh a, "I sual, misual tak i ni, a thih dawn dârkârah khan min mamawh asin, ka tel lovin a awm thei lo tih i hriat kha..." tia mi â ang maia ka ṭawng mawlh mawlh lai chuan, a âwm nghengin min kuah ta a, ka mittui avangin ka hmu phé ruai a, ani pawh a ṭap tih ka hria.

Ni e, kan nâ a ni. Thihna hi chu a na êm a ni.

Rei tawk tak Thlamuana awm nghenga ka ṭah hnuah, "Zan a la rei dawn si a, eng emaw tal thil ei ang che aw," a ti a, insût faih faih chung hian, engmah ka ei châk lo tih ka sawi a, "Khatianga i awm kha Mama'n a phal lovang, rilṭâma awm turin a duh miah lovang che" ti lehin min kuahna a thlah a, a tho chhuak ta a. A phone a ri sek lehnghal.

"Aw, in lokal theih chuan a lawmawm ngawt ang, naktuk dâr 12 ah vûi tur a ni a..in rawn nang hman lutuk tlat," tia a ṭawng zawh hnuah min rawn enin, "Lunglei ami a ṭhiante nupa an nih kha, Ruata te an nia," a tih tâkah chuan ka harh chhuak zawk. U Kimtei te nupa ka hrilh miah lo tih ka hrechhuak a, engtin nge an lo hriat theih le? U Kimtei pasal kha Ruata a nia.  Ka nikhua lo ṭhin hle mai.

A hnu deuhah ka ṭah chhuak zualpui a reh a, Thlamuana leh Diki an rawn lut a, ei tur min lo kensak chu ei tura min nawr tlat avangin tlêm ka ei ve tâk kha.

"Nano, rei lote mut hahdam tum la, Bawihpuia pawh a khawngaihthlâk tawh em mai puak reng ringawt chu.." tiin u Atei a rawn lut a. 

Nia a dik. Puak tham pawh a la ni lova a pa a hetih vang hian kan paw tawp kha a ni a, a khawngaihthlak.

Kan nupa khuma mut leh pawh thil châkawm a ni lo. A ruak êm a ni.

Naute nen chauha kan awm tur min ngaihtuah deuh avangin, Diki a ṭhu ve ta a. A ṭap nasa ve ngang mai. Tu tan pawh u Mapuia hi chu a ṭha a, midang khawngaihna leh lainatna a ngah tih ka hria a, uitu pawh a ngah viauin a nia ka rin. A thawhpui ṭhenkhat lokal tepawh ka hmu nual bawk a, ka be lem lo. Ka nu zawkin a lo be zel a, a ṭha vekah ngai mai ang aw.

Zingkârah chhungkaw bilin thlalâkna hun kan hmang a, ka pasal hmel chiang takin ka hmu ve ta.

Nunna nei tawh lo tih hriat taka a hmai dâng var pap te, a khaberuhkual bandage-a an ṭawn zawm ka hmuh ringawt pawhin ka kawchhung a na ngut ngut. Naupangte ni mahila zah pawh dawn lo hian a hmai zawnah ka kún hniam a, a pang dai dak tawh chu ka bianga sîktîrin ka mittui far zung zung pawh ka hru peih tawh lo. 

Hringnunah a nuam vek nei thei lo mahila, 'Ka Chanpual' tia ka lo sawi ve ṭhin. A dam chhuah beiseina nena ka lo thlir Lalrinkima hmel hian ka lung ati âwi mawlh lo a ni.

U Ropuia'n min rawn kuah chuan a âwmah beiin ka insût hlap hlap a, "Mate, a hun lai a nia, tumahin an dem lovang che," tia min duatna chuan ka ṭah a ti chhuak sauh. 

Atuni sawi dan chuan, khatia ka hawsan hnu khan danglamna êm êm pawh nei chuang lovin a muhil a, tlailam dâr thum pelh hnuah a thaw rawn hah zualin Oxygen a sâng bera an pek pawhin awmzia a nei tehchiam lo a ti.

"A hnuk chat tur pawh hmuh a hrehawm loh, zawimuangin a kal a ni e, a lehlamah ama tan pawh a nuam tawh zawk ang," tia Atuni'n a sawi lai khan kut ka lo hum ruh ngat ngat.

Ka hnenah sawi tur a la ngah dawn lutuk hian ka hria a, engtikah emaw chuan hetiang hun hi kan la tawng dawn tih ka hria; mahse, ka inring hman hlawl lo. Ani pawhin dam chhuah inbeisei lo mah se, hetianga a kal mai hi chu a ring pha bîk dawn em ni?

Vûina hunserh kan hman laiin Lalnunfîma a ṭap leh ta a, engmah hrethiam hek suh. Kan nufain ruang kan kîl ve a, a hnathawhin a zir bâkah vuavang an nei ngaha mipui an tam kher mai, kan in hi a lian ve hle a nia, a chhung a khat vek a, pawnlam pawh chuti tho. Ka hmuh phâk chinah lu hlir ti ila ka sawi sual lovang.

Ka fapa a ṭah nasat tâk êm avangin mi mit ka chungah a fu lo thei bîk lova. Chhungkaw âiawha thusawi tura ka pa a din chhuah lai pawhin a la ṭap ngar ngar, ka hah vek a, ka thaw a sa phat phat. Mi mitmei veng ru viau mahila inchungah ka chhohpui ta ringawt a, a chanchin kimchang leh a nat dan a sawi lai takin kan room-ah ka lut ta a.

Thusawi erawh ka hre pha vek tho.

Ka chungchâng leh a fapa neih chungchâng pakhat mah a sawi tel lo chu thil mak a ni. An unau zat leh thil ṭul dang sawi kim hle siin, kei thla tam amah lo chenpuitu Zomuanzuali hming hi vawikhat mah zu han lam ri lo a! A pawi chai hleinem. Ka fâ pa Lalrinkima a nih chhung hi chuan engkim huaisen takin ka pal zel ang.

Vuina hunserh a zo a, thlalâknaah erawh chuan ka tel ve hrâm kha. Kei leh ka fapain a hrangin kan lâkpui ve dawn emaw ka tih laiin 'A chenpui chhungkuate' tihah chiah min teltîr ve a, chu êm êm zawng ni bika ka hriat ngang loh avangin; zak leh inthlahrung ru tak hian hming puangtu lamah ka va kal a, ka huaisenna sawmkhawmin, "A la theih chuan khawngaih takin Zomuanzuali te nufa tih kha min lo belh sak thei ang em?" Ka va ti ve tawp a, a ziah belh tain ka hria. Tu mitmei mah ka vêng duh bîk tawh lo. 

A tawp berah mittui nen kan nufain kuang bulah kan ṭhu a, kan lâkpui ve ta hrâm. A hnu lehlama kan boruak tur ka ngaihtuah peih lo, ka nu a hrâng dawn tih hriatsa a ni.

Thlanmualah pawh ka zui ve zêl ang, nautê min lâkchhawk tuma Atuni a lokal pawhin ka pe duh ta lova; Pathian zarah eng em ati náng ti rilru chungin Thlan thleng rak, kuang an thlâk thlengin ka awm ve. Ka ṭahna avanga ka mit bûi chûk te chu thup buai tum lovin ka inhru fap fap a, ka dâra min dawmtu kut nghet charh chu en turin ka dâk chhuak ta a. 

"Haw ang u le.." Thlamuana'n a ti sup a, ka la ding ngawi reng.

"Zomuan, kan haw a ngai a nia.." a tih leh tâkah chuan, "Ka rawn haw tawh dawn lo, in ina ka awm chhan ber u Mapuia a awm tawh hleinem," ka lo ti ta a. Ka sawi zawng ringawt pawhin ka mittui a tla leh nghal a.

"Khatiang sawi hun a ni lo, inah haw phawt ang," ṭawng ring ṭha ngam chiah bik lo hian a ti leh a, "Aih" tiin ka ṭang ve tlat a. A ṭûl a nih chuan khawthim thleng rakin helai hmunah hian din ka pawisa tawh lo. 

"A ni lo zawngin thil ngaihtuah miah suh, i fapa kha i khawngaih lo em ni?" Tiin min din hnaih sauh a, kei lah chuan, "Min hmangaihtu awm lohna inah ka lêt peih tawh lo, tihian thlanah kan awm rih dawn," tiin ka ṭang ve tlat si. Thaw hawkin a sam a tuai puat a, "Lokal phawt mai rawh, miin min thlir ṭhup a nia, nakinah helam chu kan sawi ṭha ang, khawngaihtakin min zui rawh," a ti ngial a. 

Chutia kan lo indinchilh lai chuan u Ropuia kan bulah a lokal a, "Mate, haw ang u, helaiah awm chhan tur a awm tawh lo," tiin hnial theih miah loh hian ka bânah a rawn vuana min chhohpui ta a. 

Ka ṭah pawh a chhuak tawh lo. 

Nichina Thlamuana bula ka sawi tawh ang khan, ka awm chhan ber leh ka enkawl, u Mapuia a awm tawh lova Sakeibaknei pûkah sawn chen zui zel tumna ka nei miah lo. Ka tum lo tak tak.

U Ropuia ka hmaizah vang chauhin ka haw leh ta rih a, Thlamuana kan bulah a kal ve zel nain a ṭawng tawh miah lo a, in kan thlen hnuah pawh tumah be kâwi lovin kan nupa room-ah ka lut tlang nghal a, khumah ka ṭhu hnawk. Ka chau ngawih ngawih.

Vawiina ka hun tawn hi ka mumang nise ka ti êm a ni. 

Room kawngkhar tu emaw hian a rawn kik a, chhunglamah ka inkalh hnan tih ka hre chhuak chiah.

"Tu nge?" Ka ti vin ṭhak a.

"Zomuan..keimah..." rawn titu chu ka nu Biakliani a ni.

Ka hawnsak lo tawp náng a. Chu êm chu ka ngam chiah bîk lo, khum thawhsanin kawngkhar kalhna ka va hawng ta a. 

Mitmeng alh phâta min en chung hian, "I lo huaisen hle mai," a ti salh a.

A sawi tum ka hria. Thlalâk chungchânga ka chet dan kha a paidam dawn lo tih ka hria alawm.

"A ṭúl hunah chuan huaisen e.." ka lo ti ve hmak.

"Mapuia a awm tawh lo bawka eng chena thui nge i kal theiha i huaisen kan en zêl ang chu," tih pahin khuma  Lalnunfîma mu chu a melh a, "Ani khu ka tupa a ni a, zanin aṭang chuan kan bulah a riak tawh ang, a hnute hnek tur leh a mamawh pawh keiman ka leisak zel tawh ang," nui lui chunga tiin min melh kur a, ka hlau chhete eih lo.

"I ngam chuan i mutpui dawn nia," tih chiah ka sawi.

"Ka nu, Zomuani kha chímbuai rih suh," tia, Thlamuana a rawn pen luh tâkah chuan ka thaw huai thei nia. 

"Ka fapa, henu lakah hian i lo inhambuai ve ang e, ka hrilh lâwk che a nih chu.." ti leh hrâmin kawngkhar lam a pan a, "Lo buai suh, Mama thlarau te pawh zah ve la, ka u hmangaih Zomuani hi i tinâ a nih chuan nang leh kei hian boruak dang kan ṭan a ngai ang," a ti ta hmiah mai le!

Thlamuana ka va melh a, min en lo hian a nu mitah a en a, a landan rum úl mai leh pawisak nei lo hmel pu fahrana káwng dawm chung hian a nu hmazawnah tak a ding run a, "Ka sawi nawn leh ang, chhungkua inrem taka awm i duh chuan Mama nupui hi tibuai tawh suh," a ti nghut, a inhera ka awmna lamah a rawn phei ta a. A hmel a lang dam leh thlap tawh.

Khuma naute mu chu banin, "Kan pawm ve lawk ang aw.. va intifai rawh..inleng kawm te a ngai a nia," a ti sup a. Nichina a nu a biak dan leh kei min biak dan chu inpersan tak a ni.

"Ka chau.." ka lo ti tawp a.

"Tuilum sa ṭha ver vawr khan intleuh la, a nih tur ang a ni zo tawh a, chak ṭha taka i awm a ngai a nia, Bawihpuia hi chu Atuni te room-ah ka lo pawm thla ang, ṭah te kha i lo tum leh ang e..." tih pahin Bawihpuia a pawm káng a, a hnute bûr leh puakpuan lain ka chhânna pawh ngaichang lo hian a chhuak zui daih.

Ka hamhaih letling zâwk. A duh hunah min hau a, a duh hunah min ngaihsak leh êm êm a, a nu lakah ka thlavang vawithum vel a hauh tawh bawk. Eng chu hria ni maw!?

Á..u Mapuia khan a nau Thlamuana hi ring tlat turin min chah a, engvanga khatiang thu kha sawi nge a nih hre lo mahila, tun hun atan chuan Thlamuana lo huata lo ngei deuh tlat kha thil ṭul ber a ni lo. Ka pasal unaupa a ni.

Bawihpuia patea neih chhun a ni bawk...

U Mapuia thihna hian eng chena thui nge chhungkuaah nghawng a neih dawn tih hriat a ni lo a, he in ka chhuahsan hun tur pawh ka ngaihtuah ṭan a hun.. ka chhuahsan ngei a ngai dawn tih ka hre si a.

180123

Shadow of the life

B+>[BeckirafARenthleI]<+®®