16.KA CHANPUAL [A Becky Rafa Story]

16. KA CHANPUAL

Ziaktu: Becky Rafa Renthlei

-B®®

(Recap)

Á..u Mapuia khan a nau Thlamuana hi ring tlat turin min chah a, engvanga khatiang thu kha sawi nge a nih hre lo mahila, tun hun atan chuan Thlamuana lo huata lo ngei deuh tlat kha thil ṭul ber a ni lo. Ka pasal unaupa a ni.

Bawihpuia patea neih chhun a ni bawk...

U Mapuia thihna hian eng chena thui nge chhungkuaah nghawng a neih dawn tih hriat a ni lo a, he in ka chhuahsan hun tur pawh ka ngaihtuah ṭan a hun.. ka chhuahsan ngei a ngai dawn tih ka hre si a.

-B®® 

Thihna hi chu a tawngtu tân lo chuan a nat dan sawifiah thiam rual a ni lo va. Keimah ngei pawh hian ka sawi fiah thiam chuang lo.

Ṭhalai zan kan hmang zo a, ka phal lo chungin u Ropuia pawhin haw zái a rel ta a. Inchelh theih ni bîk hek suh. Atuni a fel êm zawka inthlahrung lo taka a awm theih nan a be lumlam peih viau; thil sawi peih deuh ho chuan inngaizâwng chhuahin an chhuah leh tawh a, a bîkin ka nuin Atuni a khak lehpek, "Zomuani pawh tih tawh nâk laia a nuṭa ka be ṭha e lo tih kual, i nihna nen pawh a inrem lo," a ti leh kher. Atuni kamnamin a hlau dêr si lova, "I nihna nena inmilin khawsa ve la, duhâm chin tâwk hre rawh," a lo ti ve si. 

"Lalthanpui, râk râk lo khan Delhi chhuk turin inbuatsaih rawh," tih bâkin ka nu'n a chhâng ngam eih náng.

U Mapuia thih sârhu a zo a, zan lamah Atuni'n min riahpui a, kan nufa chauha mut kha ka ngaingam ngang lo a ni e.

U Ropuia haw tur Sumo counter thleng Thlamuana'n a thlah a, a hma âi ngawt chuan anni pahnih pawh an inbe thei tawh a, u Ropuia sawi dan phei chuan, "Mama awm tawh lo mah se, Nanovi te nufa hi ṭha takin ka lo enkawl ang, eng emaw harsatna a awm pawhin ka lo hrilh ve zel dawn che nia," tiin kan Thlamuana'n a lo hrilh a ni awm e, phone number pawh an inpe tawn tih a sawi.

Ka chhungte dang hnen aṭangin tuarpuina thu ka dawng lo mai nilovin min rawn be lo hrim hrim a, kei pawhin ka be bîk hek lo, a chan chhe zawk ni mahila, va belh emaw Lungleia kan inpuia hawn tumna rilru ka pu miah lo a, u Ropuia pawh ka hrilh tlang vek. "Mate, i awm zel dan tur min rawn hrilh la, a ṭûl a nih pawhin ka indan pui ang che," a ti hmiah a, min lo hmangaihzia ka hrechiang lehzual.

Ruang ni leh Thlan nghah ni-thlengin mi an tam êm êm a, râlna sum pawh kan dawng ṭha tih ka hria. Mahse, chêng khat mah kawl lovin ka kuta lût ve pawh ka nu ka pe vek. Atuni phei chuan, "I pe duh mai mai e a, amah hriatrengna tur thil te lei zawk tur alawm," a ti nghe nghe. 

Tunlai a nu khawsak phung hi a ngaithei vak lo tih chêtziain a tilang fo a, u Atei aia a kawlh zawk avang leh pawisak a neih tlem êm avang hian ka nuin Atuni thusawi leh ṭawngkam na deuh pawh a chhânglêt vak ngai lo. A ngawihsan mai zel. 

U Mapuia hian a pa Contract hna ni lo a pualin hna nghet a nei tih ka sawi tawh kha, Irrigation-ah Executive Engineer(EE) a ni a, a thawhpui te'n an rawn râl ni chuan ka mittui a tla nasa hle. 

A chanchin an sawinaah pawh hna thiam tak a nih thu leh mahni indahsang lova midangte ngaichâng zel mihring a nih thu te an sawi a, a Cancer tâk hnu hian âikal midang a chhawr ta kha a ni a, amah a awm tâk si lovah chuan pension buaipui chungchângah theihtawp kan chhuah tlang dawn nia tiin an sawi a, ka nu a lawm leh hle kha.

A chhan pawh eng emaw zât sum hlawm a awm dawn a, Service Seat-ah ka hming a chuang kherin ka ring lo. Dán hnuaia a nupui ni lovin hun eng emaw ti chhunga a nupui kawl ang chauh ka ni si a, man nei lo ka la ni reng tho. 

A damlaiin kohhranin min thunun hman ta lo a; kei pawhin ka duh rih lo bâkah a dam hunah remchâng ala awm tur thu ka sawi ngei. Mahse, a hnu-a u Ropuia sawi ka hriat leh dan chuan, Lunglei lama ka nu leh pain pasal ûm ka nih angin min lo thunun tîr diam tawh a, u Mapuia zawk hi thunun loh chu a ni. Kei phei chu an phelh leh hial tawh zawkin a nia ka rin.

Ka lakah ka nuin lawm lohna a nei tam tial tial a, ṭhian lêng leh mi nawlpui awm ve lai chuan a ti lang viau lo. An haw tawh hnuah ṭawngkam meinei leh kan nufa tana inthlahrunawm deuh deuh tura ṭawng a chîng a, hetiang hunah hian Atuni leh Thlamuana an awm ve chuan min chhan ziah. Ka pa erawh a nguai ruih a, kan nufa tan a sual hranin ka hre lem lo.

U Mapuia awm loh zan aṭangin ka fapain zan ṭah a vei a, kan mu tlêm thei khawp mai. A pa a sûn ve a nih ka ring hial, chu erawh rin thu mai mai chauh a nia.

Kan nufain khumah kan awm a, ka phone a rîk sek avangin en chiang lem lovin ka pick teh ngawt a, "Nano.. Mate," rawn titu chu ka û, auMami âw a ni tih ka hai lo.

AuMam..." ka ti chhuak sap a.

"I pasal ûm chu a nuam em? I fapa nen engtin nge in awm zêl dawn tih hriat a châkawm ta hle mai," nui lui hak chunga a rawn tih chuan, ka ner nasâ. A ṭawng dan aṭangin min diriam tur leh u Mapuia ka inghahna a awm tawh si lova 'Chawh' min ti hle tih a hriat mai.

"Ka awm zel dan tur chu hunin ala hril ang chu, lo buai duh suh," ka ti ve ngat a, chek tlak tlak chung hian, "Kan ina lo haw te kha i tum ngawt ang e, i tan kan kawngkhar hawn kan tum tawh lo," a ti leh zat zat a, ka thin a tirim kher mai.

"Eng anga zau pawhin kawngkhar chu hawng ula, ka lut nguar ang," tiin ka lo chhâng ve zel a, ka ngawi peih bik lo, a duh duh leh a hman hman ina min ṭawngkhum tur pawh ka ni bîk hleinem maw le. AuMami ngat phei chu hetianga ṭawng tur hi a ni miah lo, ani pawh chhúl paih tawh, fa pawh nei thei miah lo tur a ni a, midangte hmusita chapo tur pawh a ni lo asin, a â ve ngawt mai.

U Ruata te nupa kha ruang nangin an rawn thleng a, u Kimtei a ṭap nasain min khawngaih ve hle, "Lungngai reng reng suh, Mapuia tana i inpêkna leh i tawrhna zawng zawng hi nakina i hlimna tur zawk a ni mai thei asin, thil reng reng hi a hunlai chuan a na a, mahse, kan ṭhatna tur a nih châng pawh a awm a nia, Pathianah innghat tlat ang che," tia min hnemna leh min fuihna chu hriatreng pawh ka tum. In nghâktu an neih loh avangin ruang thlâk hnuah an haw leh ta a. An ina kan inhmuh lai te ka hre chhuak ram ram.

Thlamuana pawh a buai thei zak zak khawp mai, a û thihna a tuarin a hmel hmuh a nuam vak bîk lo a, kei nen pawh ṭûl tawpah lo chuan kan inbe bik lo. Kan in ṭha en vel mai mai a ni ber.

U Mapuia boral aṭangin kâr a liam tawh a, inlêng pawh kan nei meuh tawh lo. Chutih rualin an in chhuahsan tumin ka inruahman ru ve mêk a, 'Chhuak rawh' an tih hun kha nghah kher ka tum bîk lova. A chhan chu engtikniah emaw chuan min la pêt chhuak dawn tho tih ka hria a, chutiang hun nghah thlen kher chu ka tum a ni lo, Delhi kan awm laia u Mapuia thinrimin pawisa min pek;  Atuni'n ka account-a min dahsak khan engtin emaw bul ṭan theih ka inbeisei a, ka fapain hnute pangngai a rin loh avang hian nau awmtu laa hna zawn ka rilruk ve deuh a ni.

Ka mittui a la hul lo nain hmalam pan ka tum ruh ve tlat a, ka thawmhnaw ṭhenkhat sûk tur inhnuai lamah ka keng thla a, tumah hmuh tur an awm lo. Bawihpuia muthilh hlana insuk tum ka ni a, chokaa Diki thleng lo sil chu pan hnaiin, "Insuk ve lawk ka duh sia, Bawihpuia min lo ngaihven sak rawh aw," tiin ka hrilh a.

"Ka insu dawn tho alawm, tikhan lo dah la..." ṭha tein a ti a, ani chu ka tan a ṭha thlâwt. Awmpui mah nise unau ang deuhthawin min en ka ti mai.

Chutia chokaa Diki nen kan lo indinchilh lai chuan ka nu a rawn lut a, "Zomuan, khawnge Bawihpuia?" Tia min zawtin Diki thingpui lum turin a tîr zui zat a. A muthilh thu ka lo sawi chuan, "Kan room-ah inbiak lawk a ngai, thil pawimawh sawi tur ka nei," a ti ta a. Min ko har tawh ka ti rêng a ni. 

"Aw le," ka ti sap a.

Khatia Bawihpuia riahpui tur anga a insawi hnu khan a rawn ngaihsak leh chuang lo a, a kâ a kuaa a ṭawng ve mai maiah ka ngaihsak. Mahse, keimah ber min hmuh mawh miau avangin min chhuahtîr hun a la thleng dawn tih a hriat sa vek.

An room-ah kan inzui lut ta a, ka pa khumah a lo ṭhu bawk a. 

"Engtia awm zel nge i rilrûk, Mama ber a awm tawh si lova..." ka nuin a ti ta chiah a.

"Engtia awm turin nge min duh?" Tiin ka zawt let a. 

An pa melh zauh chung hian, "I inenkawlna tur sum kan pe che anga Lunglei lamah i haw phei mai dawn em ni ang, a lehlamah Bawihpuia kan tupa tho a ni a, rethei leh hrehawm taka in awm ka duh miah lo, ka thusawi hi a kâwi zawngin ngai lo hram la, man leh mual inhlana innei in nih loh avang hian dan ang thlapa inṭhenna tih vel a ngai chuang lo a nia," thinrim ni miah si lo, mahse, thupe aw taka a ṭawng chuan an nupain an lo sawi dun fê tawh tih a lang reng.

Eng danga chhâng lo chuan, "Engtika chhuak turin nge min duh?" Ka ti ve ngat a. 

Rei fe a ngawih hnuah, "Khalam kha chu a hma thei ang ber ni rawh se, kan huat hrim hrim vang che nilovin i rawn awm chhan kan fapa a awm tawh miau lo a, i tan pawh heta chen zui zel hi thil nuam a ni dawn lo a nia," thiam inchan tîr tum rana a ṭawng chu ngun takin ka lo ngaithla a, ka pa a la ngawi reng. A va nêp mai mai e.

"Pathian zarah kan dam anga kan nufa inenkawlna tur chu kan nei ve mai ang, pawisa min pe duh suh u.." dam thlapa tiin, ka hawikual a, ṭah loh hrâm hrâm ka tum. An hmuh lai hian nâ anga lan ka tum lo bur.

Ka pa a rawn ṭawng chhuak ve ta a, "Zomuan, tun vut vutah chhuak rawh kan ti lo che a nia, in nufa inenkawlna tur pawh kan pe ang che kan tih kha, a hma te khan ka thusawi awih ni la hetiang hun hi a thleng lo tur, mahse, ka fapa i enkawlna, i inpeknaah lawmthu sawi kan ba takzet, Mama thlarau a zahawm êm a, in nufa dam khawchhuahna tur pe lo che u chuan in hi chhuahsan tir che kan tum lo a nia," dam thluama tiin min en vung vung a, ka lo melh let ve kar.

"Eng mah in tan inthlahrunna tur a awm lo aw, in sawi zawng zawng kha a dik vek alawm. U Mapuia ber a awm tawh lo a, sum leh pâi aia hlu zawk fapa min hnutchhiah a, eng dang mah ka beisei lo, ka fapa hi min chuhpui loh chuan a tawk mai," ka ti ve tlat.

Ka nu zawkin, "Kal tawh rawh le, i chhuah duh hunah sawi la, i mamawh kan pe dawn che nia," a ti hmak a, chhâng zui tawh lovin ka chhuahsan ta a.

Ni e, ka chhuak ang.

In chungah ka chho leh tê tê a, ka phone lain u Atei ka call ta a, ani lo tihbuai tur dang ka nei si lo a, Atuni nise an ṭhiante nen an chhuak daih a, Thlamuana kalna chin ka hre lo thung.

"Nano, eng nge ni ta?" A rawn ti a.

"Inbiak kan ngai," tiin a nu leh pa thusawi zawng zawng ka hrilh ve ta vek a.

"An mak êm êm e, Mama boral cham thlakhatna êm pawh a la thleng lova an ti ve mah mah a nih chu, ka rawn chho dawn," thinrim takin a ti hlak hlak a, "Nia, lo chho rawh. Mahse, engmah hria angin awm miah suh aw, ruahmanna min siampui la, i nu leh pa hi dem lutuk chi pawh an ni lo, an sawi dik ve tho..." ka lo ti a.

"Ka rawn chho nghal..." tih leh phone dah a rual a, a rawn âng chiam lo turah ngai ang.

Bawihpuia hnute ka pêk laiin a lo lut ta a, khumah rawn ṭhuin, "Ka nu leh pa chu keiman ka sawipui ang, a ni lutuk lo, sualah pawh a chin tawk a awm," a ti nghal mawlh mawlh a, a zaidam ṭhin tehlul nen a thin a rim ve ngang a ni ang, a biang a sen ṭân bawk.

"En teh, bia pawh ni la awmzia a awm lovang, chhungkaw boruak a chhe mai mai dawn a, kei chu mihrang ka nia, nang leh kei kan inang lo, chuvangin kan nufaa kan awmna tur in min dappui la," tiin, a hmaa u Mapuia pawisa min pek chungchang kha ka hrilh ta vek a, "Nuaihnih bawr vel a ni a, in luah man tlawm deuh kan hmuh chuan kan tal thei rih mai ang," tia ka tum dan ka hrilh rual rualin, "I â siah.. Bawihpuia a la no si, â... in awm thei lovang," a ti hap a, rilru hah hmel tak hian a thaw chhuak halh.

"Kan inah in lo awm mai dawn em ni?" A'n tiah.

"Ni lo ve, hmalam kan pan a ngai a, tunah chengho thei rih mah ila, kan chhuah hun a la thleng tho tho dawn, chuvangin tun aṭanga ruahman fel hi a ṭha zawk," dam dapin ka ti a, a ngawi rauh rauh.

Harh chhuak thut ang mai hian u Atei a ding hluai a, ka lo en hû.

"Tihdan ka hria, engtin nge ka theihnghilh theih le.." a ti sap a.

"Eng maw?" Ka lo ti hû.

"Bawngkawna Mama in sak kha an zo vek tawh a, Delhi in kal hlan khan a hnuaiber tui pek ngai leh bathroom siam zawh loh la awm kha kanpa lo en fel turin a chah alawm, wiring an zo fel tawha current lamah buaina tur a awm miah lo; chahbi pawh Chhandama kutah a dah tak e," tiin a nui ta var var a, kei ka bo telh telh.

"Chu chu engtin? Eng tin nge kan tih chuan anga?" tiin ka zawt leh a.

"Mama inah chuan in awm ang, in luah man chawi a ngai lo ang a, a vaiin in luah zo dawn chuang hleinem, kawngpui ân zawna mi kha luah rawh, eng pawh thleng se i tawrh âi ka tuar vek ang," a ti ta hmiah a, ka lo nui tawp.

Bawngkawna u Mapuia in luah leh luah loh tur chungchângah rei fê u Atei nen kan inhnial a, "Nano, ngaihtuah chiang ta che, amah enkawltu leh a fâ nu i ni a, tupawhin hria se an dem lovang che, ka hriatpui vek tho che a, midang in luah kâwi lovin awm rih phawt mai rawh u, bungrua chu tihdan a awm mai ang, chhuah ṭalh i duh bawk si chuan, hei aia ngaihdan ṭha a awm lo," a ti leh zung zung a, a dikna chen a awm.

"Kan sawi ṭha dawn nia.." ka ti ve ta a.

"Sawi ṭhat tur eng mah a awm lo, ngawirengin chhuak la, kan lut hmiah dawn nia, a mawh ka phur vek ang," a ti leh zel. 

Anpa a lo biak tur thu leh ka mamawh tur ang te lo ngaihtuah a tum thu a sawi a, "Ka nu leh pa mah nise, i laka an chêtdan hi a fair lo em mai, ka haw ngawih ngawih," a ti ve thlâwt.

"I thawmhnaw lo pack fel vek la, Diki pawh engkim hrilh ang che, i tan a la ṭangkai dawn a nia, Thlatea leh Atuni bula i sawi chuan chhungkuaah buaina a thleng ngei ngei anga chumi kan duh loh chuan ngawirenga engkim tih fel a ni mai, ka haw thla anga kan pa ka lo be nghal ang," tih pahin Bawihpuia biangah a fawp zeuh a, min chhuahsan ta rih a.

Ngun deuhin ka ngaihtuaha a ṭha dawn riauva hriatna ka nei. Vawi tam a in chungchâng hi u Mapuia'n min sawipui tawh a, kan lungawi loh leh a nu leh pa laka kan lawm loh apiang khan, "Bawngkawna kan inah kan awm daih dawn nia," a ti ziah a, ka phur thar ta riau.

Muangchangin ka thawmhnaw ka pack ṭan ta a, thil ropui han lâk chhuah tur ka nei bik lo a, ka fapa nena kan thawmhnaw tih loh chhuahpui tur ka nei lo hrim hrim. U Mapuia tel lova kan awm tur erawh ka va huphurh si êm.

Dawhkana kan nupa thlalak chu lain hnai zetah ka bih a, "I awm loh hun ka huphurh vang hi alawm hlim taka awm harsa ka tih ṭhin, nang chu i awmna a nuam tawh si a, Cancer natna tihbuai phak lohna hmun aṭang khan kan nufa hi min lo veng tlat ang che," tiin ka ṭap leh ta. Ka mittui pawh ka hru buai peih lo, kan hlim hun chhung kha a rei lo ve êm a ni. 

Mit bûi chûkin inhnuaiah ka chhuk a, Atuni a rawn lut ve chiah. Ruih nei tih hriat fahran hian a meng buai nak a, "Nano.. Bawihpuia ka lo mutpui ang," sehchilh naka tiin a ding bu lâk lâk a, Beer heh viau mah se, hetianga a rui lai hi ka hmu ngai lo. A u boral aṭangin a zia a inthlak hlauh a, min ngaihsak tho nain a lo riah ve pawhin Beer a inchhawp ṭeuh zel. Ka sawi nawi sak ngai hek lo.

"Kan room-ah han chho la, han mu rawh.." ka ti a, nui var var chung hian, "Mu dawn, ka mut a chhuak..ka vahpa bulah ka han let tawp ang e," a ti ham ham a, a va buaithlak ṭhin e. 

Diki'n a en zui vung vung a, "Atuni pawh hi a khawngaihthlak, u Mapuia a ngai si a, zanah a ṭap ru ṭhin asin," a tih chuan, "A naute a hmangaih êm a, an zahin a thu an awih bawk a, a awm ve reng," ka lo ti ṭha mai.

Zanriah ei laiin Thlamuana a rawn haw a, ani pawh a ngawichawi leh zual a, nau pawm chunga chaw ka lo bâr a hmuh chuan, "Ka lo pawm ang," tih leh rawn ban a rual a, "Ka eipui thei reng alawm," tia ka lo hnialna chu hria ang pawhin a lang lo.

"Thlate, i rawn kîl ve nghal dawn em?" Tiin ka nu'n a bia a.

"Ka ei tawh," ti hmuk chung hian inchung lamah Bawihpuia a pawm chho ta daih a, u Mapuia boral hnu aṭang hian chhungkaw kimin vawikhat mah chaw ei dawhkan kan la kîlho leh lo. Zanin tlaiah pawh hian Atunin a ei lo a, Thlamuana khati kha a ni bawk a, boruak a rit churh.

Ka nu leh pa, kei leh Diki chiahin kan ei a, ei tam a har duh ngei mai. Mahse, ka chhuahsan thuai tawh dawn avangin an huat zawng leh an ngaimawh ang zawnga awm ka tum lo ve tlat.

Zan dar sarih velah in chungah ka chho a, ṭhenawm hnai pahnih khat inlêng an awm avangin ka chho hma thei lo a, kan room-ah kan khumah Thlamuana leh Bawihpuia an lo muhil chu niin! A patea chuan a bân veilamin ka fapa a khuap a, tui taka an muhil hmel ka hmuhin u Mapuia ka hrechhuak lo thei lo, la dam se chuan tihian kan awmho dal dal tur a ni a, â...thil sâwt lo ngaihtuah ka peih tawh lo e a.

Thlamuana han kaihthawh leh pawh chu ka inthlahrung a, tih harh hlau takin Atuni room lamah ka chhuksan ta rih a. 

Mahse, room ka luh hma lawkin ṭawng thawm ka hria a, ka ding dat.

"Nang chu kan fanu i ni a, Zomuani nen inanna in nei lo, engtin nge chengho reng tur anga i lo inngaih theih zawk le?" Tia ka nu ṭawng ri ka hriat chuan va chimbuai loh law law ka duh ta zawk a.

"Nu, in la inchhir ang maw le, Mama'n khati khawp khan a hmangaiha he in chhungah hian a chen tîr a, Mama leh an fapa vang tal pawh hian inrilru thlâk teh u, Setana zia hi i kâi tam mah mah," tia Atuni'n a nu a chhân chuan ka nui teuh hle. 

"Lalthanpui, vawikhat mah zû rawn in tawh suh ang che, i Beer heh lutuk pawh eng tih thu loh, kan thu i awih loh chuan i la chawh dawn a nia," a la tih mêk laiin ka pensawn ta a, ngaihthlak zel tlâk pawh va ni suh. Ka nu Biakliani ṭawngkam hi chu a chhe ve mai siah, copy loh hrâm ka tum.

A la hma bawk si nen inchungah ka chho leh ta a, Thlamuana room inhnuai ami kha an ṭhiat tlang rih a, inchungah a mu ve a nih ka ring. Ka va bih dâk dâk a, khum pakhat leh fix wardrobe a awm phei zui a, kan room aimahin a la zau maw le. A hnawk viau tih lohah chuan a nawm hmel ka ti a, a hma khan chutiangin ka en chîk lo mai mai a lo nia, bathroom pawh a nei hrang a, dawhkanah file tam tham zet leh Laptop a awm bawk.

Ka phone a rawn ri a, kan room-a lut lovin Thlamuana room verandaah ka chhuak phei a, u Atei hnen aṭangin a lo ni.

"Sawi rawh," ka'n ti nghal tawp a.

"Kanpa chu ka be tawh a nia, chahbi pawh a lo kawl ngei alawm, a spare erawh Thlatea kutah a awm thung a, naktuk hian hlawhfa pahnih hruaiin kanpa nen kan lo tifai ang, nang chu i awm pangngai reng khan awm la, bungrua pawh i mamawh zualpui tur kan lo dah dawn nia, Mama nupui tan eng pawh ka huam tih hre nawn leh ang che," inring tawk taka a ṭawng chuan ka lo nui hak hak a.

"Khum leh Gas tih vel te..." tia ka zawh chuan, "Khalamah chuan buai duh suh, kan nupa khum hlui inhnuai ami hi hmang rih la, Gas stove a thar ka lo lei ang, Cylinder chu kan ta i hawh dawn nia," tiin za deuh hian a nui a, kei aiin thil a ngaihtuah kim daih.

Thutak deuh zawk hian, "Ka tana i ṭhatna hi ka hrereng ang," ka ti sap a, "I ho mai mai e a, ngun takin ngaihtuah la, Mama hnena kal tura hrilhtu che kha keimah ka ni a, chuvangin, keimah vanga hetiang dinhmun paltlang hi i ni ve tho, inthlahrunna tur engmah a awm lo," a lo ti dam thlap.

Ka insawn chhuah theih hun tur min rawn hrilh ang tih sawi lehin kan inbiakna a titawp ta rih a. 

Kan room panin ka chhuak phei a, Thlamuanate pahnih an lo la muhil, zan dar kua a hnai kuar tawh a, ka mut a chhuak ṭan bawk si, Bawihpuia ka tihharh chuan a suakbâk leh vek ang tih ka hlau a, puansin tur pakhat lain Couch-ah ka mu ta ringawt a, an han muttui dan em em hi a awihawm loh zawk. 

Ka mutna aṭangin ka hmu pha reng tho a, Thlamuana hmel chu uluk deuh hian ka en ta alawm. U Mapuia ang lo takin ani hi chuan hmul a ngah deuh a, a bek aṭanga a khabe thlengin sintein a zuah kual vek a, a sam a dum naa a kir êm avangin a chhip zuahin a bek lam a nawr kâwng thung. A hma pawhin a hmelṭha tih ka sawi tawh kha, a mizia hian zir phei se chuan chuti hlauh tur chu. 

Kei aiin kum 6 in a upa zawk a, a kum zat hi ka hriatna a la rei lo. A taksa hrim hrim a hrisel tih a hriat a, eng lai pawhin a rúi a nih loh chuan a fai sar reng bawk. A rui náwi lai ka hmu ve zeuh zeuh tawh a, a nikhua lo ve chiang alawm. 

U Mapuia nen an zia a dang hlak a, unau ta na na na chu eng emaw châng hian in anna riau an nei thung. Nia, ka belchiangin ka hnimhnai lo ve ema Thlamuana chungchang hi chu a landan tih loh sawi vak tur ka hre lo. Ka fapa hian a patea sam a chhun a, hmelah phei chuan an inanna sawi tur a awm miah lo bawk.

Mut chhuakin min zem a, ka chhing ta riai riai a.

"Báng rawh le, ânu i tiharh ang," tia Thlamuana ṭawng thawm ka hriat chuan ka ṭhu chhuak hlawl a, Couch-ah rem lo zetin ka lo muhil ve daih lo niin! Ka harh tih a hre lo a ni ang, khuma ka fapa mu chu diaper a lo thlaksak a, Bawihpuia a ṭap a, an lo inbuaipui fe tawh a nih hmel. Inthiam lo taka tho chhuakin ka pan hnai a.

"Min ko harh mai lo a.. ka lo muhil pek a nih hi.." tiin khumah ka ṭhu thla ve nghal a, "I mutui em alawm," a ti sup ringawt. 

"A hnute tur lo siam rawh, ka thlâk zo ṭep.." tiin min be leh a, hnial buai miah lovin ka kal ve nghal.

An inthlak fel thei ta a ni ang, ka fapa pawm chungin a rawn ding chhuak a, "Khawi ka lo pe ang e," tih pahin feeding bottle ka ken lai chu a rawn ban a, "Aih...a ngai lo.. va mu tawh rawh," tia ka lo hnial chuan ner sawk chung hian, "Novi.. min hnial hmasa ziah ṭhin suh," a ti nghut a, hnute bur chu min laksakin aman a pe ta a, kei aiin a zei fe zawk. 

"Tlangval chu ṭah miah loh tur aw, i patea hian ṭahbelh a ngaina lo a nia," tiin khumah a ṭhutpui a, Bawihpuia pawhin hnute a hne dak dak a, mak deuhin hetia an inpawma hnute an han inpe ka hmuh hian ka hnuk ati ulh tlat, en hrehawm ka ti. U Mapuia min hriatchhuah tîr vang a ni pakhat.

Bawihpuia muthilh leh thleng a nghâk a, khumah dimtea a mut ṭhat tîr hnuah, "Ka pheisan ang che u aw, dar thum a ri ṭep, nang pawh muthilh tum rawh," a ti dam thluam a, "Ka lawm e," tih chiah ka sawi, min en zuk chung hian, "I ho...lawmthu sawi sek pawh a ngai lo," tiin a chhuak nulh. Hepa tak hi chu(h).

Ka fapa bulah ka inthawlh sawk sawk a, ka dan pangngaiin u Mapuia hmel mitthla chung hian ka maimitchhing ta a.

A tûk nilengin ka thawmhnaw chin fel nan hun ka hmang a, u Atei nen tum rûk kan neih avangin ka phur hle. Ka nu mitmei kâwi pawh ka la haider hram hram a, tukṭhuan kan kil lai khan Atuni'n kâr tawpah Delhi pan a tum tih a sawi a, "Nano, ka bulah in awm daih duh em?" Tia min zawh khan ka chhan hma hmain, Thlamuana'n, "Thil ṭul lo a nih kha i sawi, Bawihpuia zinpui tham a la ni lo," tiin a lo chhang hmuk.

Hetia chhungkaw kim taka kan awmho hi chuan min hmu mawh angin ka nu leh pa an lang miah lova an ngawi hmiah zel. An fing hi ka tia, keipawhin tum dan ka nei ve bawka kan inṭha en mai mai a ni deuh ber.

Tlailamah u Atei hnen aṭangin call ka dawng leh ta a, "Diki kha hrilh la, zaninah i thawmhnaw kan inah rawn thiar thla rawh u aw..kan nupain Bawngkawnah chuan kan dah phei che ang a, engmah hlauh tur a awm lo," a rawn ti chiah chu ka lawm lutuk a, ka nui var var.

"Midang hriat lohvin a rukin ka chhuak dawn tihna mi?" Ka lo ti hû a.

"Yes, mangang ve hrim hrim rawh se, chhuak turin an duh bawk che a, kha ina i chèn châk bik loh zia an hriat a ngai alawm, pawisa pek an tum che pawhin an hnen aṭang khan cheng khat mah dawng lo la ka duh, an sawi thui tam mai mai," a rawn ti zung zung a, ka va rilrem si êm.

U Mapuia thawmhnaw inbel ngawrh deuh pahnih thum vel ka khung tel bawk a, kan nupa thlalak kan târ pawh ka khung hmak. Ka inpeih thawkhat tawh a, a tawp nan u Mapuia nena kan lo chettlatna kan room ka enkual leh tê tê hnuah mittui far chung hian khumah ka ṭhu a.

"I awm lohna hmun ka tan a nuam lo a, kan fapa hi ṭha takin ka lo enkawl zél ang," ti chhuak sapin phone ka phawrh chhuak a, Diki ka call ta a.

Duh chuan ka ko chho thei reng. Mahse, min rinhlelh ka hlauh vanga call chauh zawk ka ni.

Rang takin a rawn chho vat a. Zan dar riat a ri dêk dêk chauh a ni.

Ka tum dan leh ka nu leh pa min ṭawngkhum dan te, u Atei nena kan ruahman dan zawng zawng ka hrilh meuh chuan mittui parawl ṭeuh chung hian, "Nano... engmah ka sawi chhuak lovang, he ina i lo luh tirh aṭangin hrehawmna i hmachhawn a, hun te han kal deuh se i bulah ka lo awm daih dawn nia aw," a ti awlsam ét. 

"Inhnuaiah tute nge awm?" Tia ka zawh chuan, Thlamuana leh Atuni an chhuah thu leh ka nu leh pa room-ah an awm tiin min hrilh a, "Vawikhatah kan inkeng sêng dawn lova a ruk deuhin i thiar thla ṭhen mai dawn em ni?" Ka ti a.

"Lungngai suh khalam kha chu, ka ngaihtuahawm loh," a'n ti ve ngei a. A fel a nia henu hi...

Bal bawm kan room ami a bun ruak sawk sawk a, Bawihpuia thawmhnaw ṭhenkhat a khung a, blanket-in a khuh fel thân a, "U Atei chu call la, an inpanna step-a min lo châng turin hrilh rawh," ti lehin bal bawm nen chuan a chhuak ta a.

A sawi anga u Atei ka call hnuah Bawihpuia paw chungin a ruk thei ang ber chuan thawmhnaw ka thiar thla ve ta a, tam tham a nih loh bâkah thil ritsak eng mah a awm lo a, mutbu kan mamawh hmasak ka rin avangin chu erawh chu kan sinlai leh a spare u Mapuia ta ka tel khawm chu Diki'n a keng thla bawk a, zan dar sawm a rik meuh chuan kan inla chhuak fel der.

Thlamuana leh Atuni an lo haw hman ka hlauh êm avangin ka che sawk sawk a ni ber. Thlan tla phungin kan room-ah ka hawi kual a, theihnghilh ka neih leh neih loh ka en pah bawk. 

Diki a rawn lut a, min kuah vang vang chung hian, "Min mamawhna i neih phawt chuan min rawn be tawp zel dawn nia, ka khawngaih êm mai che u, tih theih ka nei si lo," tiin min kuah chung hian a ṭap ta a, kei pawh ka ṭap ve tho.

Thihna avanga ka ṭhen tâk, hun reilote hlim taka ka chenpui Lalrinkima room chu mittui far fap chungin zan dar 10 leh a chanve velah kan nufain kan chhuahsan ta a. 

U Mapuia boral aṭanga kâr khat leh ni 6 na chiah a ni. 

A hnu leh lam chu sawi thui vak tawh lo ang, u Atei te nupa nen rang takin Bawngkawn lamah kan phei nghal a, kan bungraw beitham zet kha Taxi-ah a leng vek a, ka va rethei si ve le.

Zinglam dâr khatah ka fapa Lalnunfima nen a pa in, ṭhahnem ngai leh uluk taka a lo sak ngeiah chuan retheih huamin kan mu ve ta. U Mapuia in hi chhawng li laia sang a ni a, kawngpui án a hnuaiber dawttu-kan luah ve ta rawih a, mittui nen kan mu leh ta nge nge e.

U Atei te nupain min riahpui an duh viau laiin an fate an ngaihtuah si a, min hawsan ta rih.

Chhin khat mah chhing lovin ka tlaivar ṭhak a, inchhung kawrawng tak chu enin ka hawi vel a, ka chhungril a rûm takmeuh. 

Ka phone lain ka on a, u Atei ka call vat a, "Nano, vawiinah pawn chhuak hlek suh ang che aw... awi...ka thin a phu nasa lutuk.." tiin thâwk a la halh a, chutah, "Thlatea a rawn chhuk a, a thinrim lutuk, kanpa nen an insual lo chauh alawm. I awmna min zawt a, kan hriat loh thuin kan lo chhâng a, Atuni pawh chuti tho.. ka rawn be ngam rih lo che a nih kha," a lo ti nghal bawrh bawrh a.

"Sawi reng reng suh ang che u, kan hre lo eng mah, ti tlat ula a tawk a ni mai," ka lo ti a.

"Nano...chutiang a ni lo, kan hriat a ring tlat a, Lalthanpar, dawt i sawia Zomuani te nufa i hruai chhuak tih ka hriat vaih chuan ka that khawp ang che atia," a ti leh a. Ka lo hah hluah hluah.

"Min lo call tawh rih lo la, Diki pawh hrilh rawh aw.." ka tih leh hnuah kan inbiakna ka titawp ta rih a, phone ka'n en chiang chu Thlamuana missed call leh Atuni call vawi 65 zet zuk awm a, rapthlak zawk hian a! Ka switch off daih kha a ni a, a va lawmawm e, an thin a rim ang chu aw..

An rin loh dan zel hian a nia Zomuanzuali hi ka awm dawn ni.

Eirawng pawh bawl lovin u Atei thil ei tur dah chuan ka inhnawhpuar ve mai a, theitui lam a lo dah tel bawk a, ka ti ve naw naw thei mai.

Thlamuana chu engvanga thinrim viau nge a nih ang. Ani te chuan min ngaina lovin min hua a, a tîr tê aṭanga kan inrem loh dan ngaihtuahin thinrim ve tur a ni lo. Atuni zawk erawh englai pawha ka lamṭang a ni a, ka inthiam lo ve det.

U Ropuia chanchin ka hrilh rih lo a, nakinah, hun thawlah ka la hrilh ve ang chu.

Inchhung bungrua eng em em a awm lo nain kan mamawh tur a kim ve biai a, u Atei te nupa chungah ka lawm takzet.

Ka fapa nen kan inawm ve rak rak a, ka phone charge lai a rawn rik leh chuan ka phu dâwrh a, tunge tih hriat tuma ka en chuan tudang nilovin kan Lalthlamuana a ni.

Ka chhâng dawn lo zet naa ka tana a lo ṭhat tawhna leh a nu laka ka thlavang a hauh ve ṭhinna avang khan biak mai ṭhain ka hre ta a.

"Hello.." ka'n ti chiah chu.. ring lutuk hian, "Zomuanzual, khawiah nge in awm, sawi rawh.." a ti nghal ṭhawt a, ka phu zawk.

"Kan tlanbo..." ka'n tiah.

"I awmna sawi rawh, phone kha dah hlek suh," a rawn ti leh a.

"U Mapuia awm ve lohna hmun, min hawtute chhungkuaah khan awm reng tumna ka nei lo, i engmah ka ni lo a, ka engmah i ni hek lo," ka lo ti hmiah.

"Sawi vat mai rawh, police ka hrilh hma hian," tia min vau chuan, "Ê, i duh tawkin hrilh rawh ka hlau lo, i nu leh pa phalna thlapa chhuak ka ni a, sawi buai theih a awm lo aw.." ka lo ti ve si, thaw hawk chung hian, "A ṭha e, a ṭha e, Lalthlamuana hian eng nge tih theih a neih i hre dawn alawm," ti nghut chungin phone a off hmak.

A ve lutuk hian a. A ni nen eng inzawmna mah kan nei ikhâw lo, ka hlau lo nasa em mai.

Mahse, khua a thim ṭan tihah kan kawngkhar tu emaw hian a rawn kik a, parda eng mah ka zar si lo, tukverh dârthlalang phen aṭangin ka bih dâk dâk a, pawnlam a thim tawh avangin tunge ding tih ka hmu thei lo.

Vawi ruk vel a rawn kik leh hnuah pawh kawngkhar hawng duh lovin ka la ding ngar a, tumah min kotu an awm chuang der bawk si lo va, ka hlau lek lek.

Rilru nuam fahran lo hian ka fapa hnute ka pêksan a, tukverh darthlalang keh ri chhuai leh a kalhna inhawng ri ka hre zui zat.

Tukverha lo lut mêk chu mit khap miah lo hian ka lo en kal a, kan nufa ṭhutna zawnah rawn pheiin kawng dawm chung hian, "I awm lohna tur hmuna i awm chuan kei hian ka zawng zel ang che," thawp sata tiin Lalthlamuana nen kan in hmachhawn ta a.

Ni e, ani hian min zawng dawn tih ka thinlungin a hre tlat alawm...

Engvanga min thlah zalen mai lo nge a nih tih zawhna chhânna neitu chu amah Thlamuana chiah hi a ni.

A kut lehlamin bag lian vak lo a khai a, a ding lam kut hnunglam aṭang chuan thisen tharlâm a chhuak bawk a, dârthlalang a hnek keh a ni ngei ang.

Kan Lalthlamuana hi a û khan ring turin min duh a, ka ring ngam dawn em? Kan la hria ang chu...

190123

Shadow of the life

B+>[BeckirafARenthleI]<+®®