17.KA CHANPUAL [A Becky Rafa Story]

17. KA CHAN PUAL

Ziaktu: Becky Rafa Renthlei

-B®®

(Recap)

Ni e, ani hian min zawng dawn tih ka thinlungin a hre tlat alawm...

Engvanga min thlah zalen mai lo nge a nih tih zawhna chhânna neitu chu amah Thlamuana chiah hi a ni.

A kut lehlamin bag lian vak lo a khai a, a ding lam kut hnunglam aṭang chuan thisen tharlâm a chhuak bawk a, dârthlalang a hnek keh a ni ngei ang.

Kan Lalthlamuana hi a û khan ring turin min duh a, ka ring ngam dawn em? Kan la hria ang chu...

&&&

Ka hmazawnah tak a rawn ding a, amah a palianin a ruakhåu si a, a kuta thisen kâi pawh ngaipawimawh hmel a pu lo. Biak huphurhawm takin a rum úl a, ka tehkhin ber chu ṭo haw tur âi pawhin a hmel a dur zawk ang. 

"Hetah kan awm tih eng tin nge i hriat?" Tiin ka be hmasa ta a.

"Thil harsa a ni hleinem, Aizawl i chhuahsan lo tih tukinah ka hria a, he in satu Mistiri hi saw lai lawkah sawn a awm a, mi kan luah tîr leh tîr loh niminah min zawt a, bungraw thiar lut a hmuh thu a sawi miau alawm, Atei'n min hrilh lo aw.." a ti a, ka lo thaw huai. 

A chhan pawh min ṭanpuitu a ni a, keimah vanga an unau inkâr a ṭhat loh phah ka duh miah lo.

"In Mistiri chu a va ṭawngthei ve?" Ka lo ti nghauh a, khi suk chung hian, "Aniin sawi lo mah se, luahtu an awm a nih phawt chuan midangin min zawt tho ang, luah theih a ni tawh em tih zawhna kan dawng zing lutuk tlat, i thluak a thâwl em mai," min han ti erh a.

"Kan awmna i hre tawh bawk a, haw leh rawh, tihian kan nufain kan awm thei reng a nia, a tîra ka sawi tawh ang khan amah u Mapuia awm tawh loh hnu hi chuan in ina chen zui zel tumna ka nei lo, ka chanpual, ka enkawl tur a awm tawh lova atu ve ve pawhin sawi nawi lo ila kan ṭha tlang a ni mai, he in hi ka in a ni lo a, chuhpui che u ka tum hek lo; nakinah remchang a awm hunah in dang luah tur ka lo zawng dawn nia," ka ti duah a, a ner nasa mai.

"I va han sawi thui thei tak, ṭawng tur leh sawi tur te hi i hre zozai lutuka i kâ hi ṭhuipin ṭhen a nia ka duh ni," tiin khum mawng lamah a ṭhu ve ta a, hmun dang han ṭhutna tur îk awm hek lo. Ka khak duh ta bîk lo a.

"I zah loh chu a.." ka ti ringawt.

"Inbiak kan ngai a nia, hun thawl ka zawng ṭhin a, heti teh thuta in chhuah hi ka rin loh avangin ka nghak deuh a..mahse.." a tih mek laiin, "I nu leh pain chhuak tura min hrilh vanga chhuak ka ni," ka lo ti hmanhmawh a.

"Zaninah engkim kan sawi dun ang, chuan, ka ṭawng laklawh laiin lo tlazep ṭhin suh," tih pahin a kuta thi kâi chu Bandana-in a hru fai a, in chhung zau leh kawrawng tak enkual chung hian, "Mama khan thu tam tak min hnutchhiah a, a dam chhuak dawn lo tih hun eng emaw ti lai aṭang khan a inhre tawh," ti lehin ṭhen sak chung hian a kut pem chu hru leh tâwk a. 

"Va sil fai phawt mai teh, hetah damdawi hnawih tur engmah ka kawl lo a nia, min ko ve mai ta che, khatia dârthlalang hnek keh lo khan, che khir thei si.." ka lo ti zawt zawt a, nelawm vak lova min en chung hian a tho chhuak a, tap-a tui herh hawin a kut a sil leh rih a, nau ka pawm avangin han tuamsak pawh ka tum lem hlei lo a(h).

Ka ṭawngkam ngai haw duh lo hian, "Nano, hetah hian awm pawh ni ula eng nge in ei ang, Mama khan sum leh pai a hnutchhiah lo che tih ka hria a, nangmah chauh inngaihtuah thei i ni tawh lo a nia, rilru fîm tak leh ngun takin thil ngaihtuah a ngai," zaidam deuh zawka tiin a ṭhutna ngaiah bawk a rawn ṭhu leh a, ka pum a ri rak rak a, Bawihpuia pawh hnute ngenin a ṭap ta a.

"Kha, lo pawm lawk teh, a hnute hnek tur ka'n siam ang e," tiin Bawihpuia ka hlanchhawng a, a lo la ve mai bawk a.

Gas dahna lamah pheiin tui ka chhuang a, ani'n nau a lo áwi a, kan ṭawng zawm ta rih lo. An ina kan awm lai leh tuna ka chêt dan chu innawm hleih tak a ni. Mahse, zalen ka nihna hian ka chhungrilah hlimna min pe lawi si.

Hnute ka hnêk tir laiin a bag rawn ken luh kha a hawng a, "He thil ka rawn ken kher nachhan chu ka thusawi i rin dawn loh avang leh dâwt sawi anga min ngaih ka duh lova, nangmah ngeiin en la, i hrethiam ang," tiin Envelope pahnih a rawn chhawp chhuak a.

"Thu pawimawh kan sawi tak tak hmain eitur siam la," a la ti zui.

"Haw phawt mai teh, kal mai teh," ka lo ti nghat a.

"Nang pawhin engmah i la ei bik loh kha, Novi, luhlul viau ṭhin lo teh, mahni intihrehawma chaw nghei kha a ṭha miah lo a nia," tiin Envelope a phawrh chhuah kha bag-ah a khung leh daih a, a va hneawm mai mai e aw.

Ka chêt chhuah lawk tâk si lovah chuan a ngaithei lo deuh nge a tho nulh a, kawngkhar hawngin a chhuak zui daih. A haw dawn a niang ti ila, a bag a keng chuang bawk si lova, Lalthlamuana khawsak phung hi chu a... ka tei theih zawng a ni lo.

U Atei hnen aṭangin call ka dawng zui ta bawk nen Thlamuana lam ngaihsak tawh lovin ka chhâng ta rih a.

"Nano, Thlatea a lokal em?" Tiin min zawt a, a lokal thu leh a rawn luh dan vel ka sawi zung zung a, "Ehe! A intina êm lo maw? Atuni ka lakah a lawm lo khawp mai a, Nanovi lakah hian rilru chhia ka pu ngai em ni, a kal dawn a nih pawhin min hrilh ṭha ve mai se a ti a, ka zêp thei ta ngang lo, min hrethiam rawh aw, nakinah in inhmuh pawhin thiam thu sawi lo mai rawh, Delhi-a chhuk pawh a tum leh ta lo a, ka nu leh pa a ânkhum nghek nghek ringawt a, a zia lo tak tak a ni, Thlatea pawh ṭha tein bia la, a rilru hneh tum tlat ang che, anni pahnih hi chu an inṭan si a, kan ngam lovang," a ti mawlh mawlh a.

Hlauthawng lo tur leh a hlimchhawn a nia 'an la hrethiam thuai ang' tiin ka ṭawng thlamuan a.

"Ka nu phei chuan kan inah rawn chho hlek tawh suh ang che min ti a, kan pa laka Thlamuana chet dan a mawi chiah lo bawk nen ka nu leh pa ina kal pawh a rem tawh rih lo ang," tia a sawi laiin Thlamuana ei tur khai chung hian a rawn lut a, "Ka dah rih phawt ang aw, rilru nuam deuh khan lo awm phawt rawh," tiin phone ka off a, chumi hnuah Thlamuana ka en ve ta chauh a.

"Tu nge i lo biak a?" Tia min zawh chuan, "In vai mistiri chhawr ṭawng thei deuh kha," ka lo ti a, awih lo tih hriat lutuk hian a nui lui huk, "Zomuanzual, Lalthanpari emaw i u Ropuia bak an ni dawn lo sa, dawt min hrilh lo mai teh," ti nghut chungin a thil lei chu chhuatah a phawrh a, chaw ei dawhkan kan nei tlat si lo a.

"Ei vat vat la haw rawh.." tih chiah ka sawi.

"Ka sawi tur ka sawi zawh hma chuan ka haw dawn lo, min pal luih tum duh suh, chuan, keimah chauha ei ka tum lo a nia, i ei ngei ngei a ngai," thupe aw taka tiin Juice leh Biscuit a phawrh a, a dang pawh a tam mai, a lei hnem bawk si. 

"Kha le, rawn ei rawh, Bawihpuia kha mut la, i ei duh loh chuan ka barh lui tho ang che," a ti leh a, a hmaa Thlamuana ka hriat ṭhin nen kha chuan inang tawh lo tak a ni.

"Nakinah ka ei mai ang, i duh leh nangmah khan ei zo rawh," luhlul takin ka ti ve tlat a, a rawn tho chhuak a, "I ei loh chuan ka ei dawn lo, nizan leh vawiin nilengin thil i ei mumal lo tih ka hria a nia, mahni inbuma rilṭâma awm rual pawh i ni tawh lo, â viau ṭhin suh aw," tiin a thil lei ho chu ka ke bulah a rawn dah hnai a, hnial theih pawh a ni ṭhin lo, ka luhlul viau nain kei aia luhlul a la awm cheu tih ka hriat phah.

"I ninawm si," tih pahin ka hmaa ei tur awm chu ka ban ve ta a, a dik a dik chuan ka ril a ṭâm lutuk tlat; a sawi ang chiah khan mumalin engmah ka la ei lo a, ka pum ri te kha a hre pha emaw ka ti hial.

Chumi hnu chuan ngawi rengin kan ei dun ta mial mial a, a dan pangngai tê bawkin chhangthawp leh butter a lei tel a, uluk taka tâtin ka ei ve tur min tahsak nghal a, sawi buai nei miah lo hian ka lo ban ve mai. Kan in ei puar hnuah amah bawkin a tifel leh vek a, thinrim takin kan inhmachhawn dawn emaw ka tih laiin a mize ṭha zawk min hmuh tîr ka ti mai, ka tana hnial harsa deuh hian a che leh nulh zel hi a buaithlak.

Khumah kan ṭhu ve ve a, a kil lamah ka fapa a mu a, va melh zeuh chung hian, "A tlai tak tak hmain haw phei rawh, ngaihtuahawm ka ni lo a nia," ka ti a, mit zim san chung hian, "I ninawm tehsek, ka duh hunah ka haw mai dawn alawm, inbiak a ngai tih ka sawi lovem ni?" A ti a.

"Ka lo lêt tawh dawn chuang si lova, sawi vak tur a awm lo, inhuata intih thiam loh kher hi thil ṭul ber a ni lo a nia," tia ka ṭawng mek lai chuan bag chhunga envelope kha a rawn phawrh leh ta a, "Kha, en rawh le, i rilru siam ang che," ti nghutin a tho chhuaka tukverh lam panin a phei zel a, hun thawl min pe te pawh a ni mahna; a envelope min pek chu hawngin ka chhiar ta a.

Kei, Lalrinkima hian Chuap Cancer natna ka vei avangin he thu hi ziak lo thei ka ni lo a, ka tawpna ní tur nitin ka hnaih zel avangin min hmangaihtu leh ka hmangaih Zomuanzuali tana ka ziak a ni. Tih hawrawp fel fai taka inziak ka chhiar lai chuan ka mengphawk nasa ngei mai. 

U Mapuia kut ziak dik tak a ni tih ka hria a, ka hai ngai lovang. A chhan chu lehkha min zirtir fo ṭhin avang leh hun reilote kan chendun chhung khan a kut ziak ka hmu fova hai theih ninghal lo chuan!

"Zan khat mitchhin ka lo tâwk ta a nih chuan ka fapa Lalnunfima leh a nu Zomuanzuali te hian ka in Bawngkawna mi hi an chang ang a, chuti a nih rualin ka fapain kum hnih a tlin hma loh chuan kan inpui an chhuahsan tur a ni lo thung. Kum hnih an chên tlin hunah ka in sak thar hi an chang thei ang.

Chuti ni lova ka fapa nen an chhuak lui a nih chuan Zomuanzuali kutah ka fapa hi a awm ka rem ti lo a, ka nau Lalthlamuana'n a enkawl tur a ni. Ka fapa leh a nu rethei taka an awm ka duh lo a; mahse, a nu hnute tui ring a nih loh avangin leh a châwmna tur thawhchhuah engmah a nuin a neih loh avangin Zomuanzuali kutah a awm a rem dawn lo bawk." Tih ziak ka chhiar lai chuan thinrim luat vangin ka thin a sa phat phat thei nia. Eng thu lawi lo nge u Mapuia hian a ziah ni, âtthlak lutuk.

Ka chhiar zawm leh ta a.

"Nano, ka hmangaih êm êm che a, i laka ka nu leh pa rilru put hmang pawh ka hria a nia. Amaherawhchu, dan ang leh thutiam neia inneia ka nupui tak tak i nih loh avangin hetiang thil ka tih hi a ngai ta a, i hmakhua ka ngaih vang a ni tih hria la ka duh, kan fapa Lalnunfima nen ka nau Thlatea thlazar hnuaia in awm chhung chuan in him ang a, in rethei dawn lo tih ka hria, kum hnih kan inpuia in chen hunah lehkha dang in ta tur in hmu leh anga chu chu a hunah tu emawin a lo pe ang che u. Engkim huama min pantu hi hrehawma i awm ka phal lo a, i thisen zawmpui te aia i thlan Lalrinkima hian i duhthusam te ka tih hlawhtlin sak thei dawn si lo che a, min enkawlna zawng zawng leh ka tana i tawrhna zozai te kha ka phu lo va, lawmthu sawi ngaihna ka hre hek lo; hlim taka hringnun hman i phu asin, thihhnu piahlam ram aṭangin ka lo thlir reng ang che u." 

Ka chhiar zo chiah a, ka mittui dan rual lohvin a tla a, ka âwm tâwt ru ṭun chu zawi te te hian ka chûm dat dat a, thawk la vakin ka khuh zui kharh a, ka thluak a nu but a, thinrimna sawi fiah theih loh hian min tuam hlup hlup a ni ber. 

'Lalrinkim, hetiang hian maw ka lakah i chêt dawn' tiin ka phun sap a, ka mittui lo tla ve chhen hi ka ning, thinrim lutuk vangin ka puakkeh thei mai dawn alawm le.

An inah kum hnih ka chêng ang maw? Sakeibaknei leh Sakawlh pûkah kum hnih tâl tawp eng tin nge awm thei tura min ngaih le? A natna khan a thluak a tibuai a ni ngei ang, a nih loh pawhin tihtîrtu an awm a ni ang, ti dawn ila, a kianga hun tam ber hmangtu chu keimah ka ni si. A ni thei lo, ka lêt leh duh tawh ngang lo.

Chutia mittui nen thinrim taka ka lo awm lai chuan Thlamuana a rawn kal hnai a.

"I chhiar zawh tawh chuan ka lo dah ṭha ang e, Mama hmangaihna che kha i ringhlel dawn em ni, i fapa tan kei hi mihrang ka ni lo a, a pa nau, a patea neihchhun ka ni asin, kan inah i rawn lêt leh dawn nge, hetia awm chung hian i fapa inchuhin thubuai neih i duh zawk, inngaihtuah rawh le," chiang fek fawk hian a ti ta a, ka ngawi tawp. Sawi mai tur ka hre hlawl lo a ni e.

Rei fe ka ngawih hnuah, "A thil neih engmah ka duh lo, zalen taka awm ka duh zawk," ka ti khur dar dar a, "A thil neih engmah i duh loh chuan Lalnunfima hi ka u vanga nei i ni, ka u fapa neihchhun a nih hi, Mama chanpual liau liau a ni a, i hnute tuia i chawm a ni lo a, dán hnuaiah chuan thiam kan chang zawk ngei ang. Naupang chawmna turin thawhchhuah i nei bawk si lo," nelawmna nei miah lova a ṭawng leh tâkah chuan ka sa ve phat a.

"A ni thu ziah kha eng atan mah ka ti lo, ka fapa, keima fa a nih hi," tiin khuma Bawihpuia mu chu ka en a, tunah kher hi chuan u Mapuia ka haw takzet, Lalthlamuana kuta min dah turin vawikhat pawh ka ngen ngai lo, ka ngen bawk hek lovang.

"Mitthi tawh thu hnutchhiah leh thuziakte hi court chuan an ngaipawimawh teh a nia, i la naupanga dán kalphung i hre lo mai mai a ni e. Mama, naute pa berin khatiang a ziah chuan thu pawmawm tak leh rintlak a ni a, chuan, ka u chu i hriat kha aw, mi mai mai a ni lo a, hna zahawm tak nei leh Central Highway hnuaia Contractor a ni bawk, thu sepsel mai mai leh belhchian tlâk loh ziak tura i ngai a nih chuan i â hle tihna a ni mai," uar taka tiin a jacket hak lai a phelh a. Ka lo en tawp. 

"Pakhat hi en leh rawh," tiin envelope dang ka kutah min hmehbel chawt chawt a, ka chhiar lo phal chuang lo. 

"Thlate, Nanovi te nufa i kutah ka dah a, ka hna chhunzawm loh leh hmabâk te, anni nufa nen khan i mawhphurhna an ni tih hria la, ka fapain nun kawng dik a zawh theih nan a patea i nihna kha theihnghilh ngai suh ang che. 

Ka nu leh pa rilru put hmang hretu kan ni a, i farnute pahnih pawh i kovah an tla tih hre bawk la, Atuni leh Atei tan innghahna tlâk nih tum ang che.

Nanovi te nufa kan inpuiah kum hnih an awm tling a nih chuan an duhdan angin an kal hran remtihna i pe dawn nia, chumi rual chuan ka Bank account pakhat kha an nufa puala khawih theih turin ka siam a, an chhuahpui thei bawk ang. A bâk chu kum hnih hnuah ni rawh se. He thu ka ziahna chhan chu a thisen zawmpui te'n keimah avanga tuithlara ensan ta an ni a, ka mawhphurhna leh ka kova tla an nih vang a ni bawk. Ka nau, ka sulhnu rawn chhuiin ka tih bâk chhunzawm turin insawrbing la, Nanovi te nufa kha an chhuak luia an kal hrang dawn a nih chuan i duh angin hma la ang che." tih chin zawng ka chhiar a, a dang tlem a la inziak a, ka chhiar zo ta lo. 

"Tuna i chhiar kha ka tana a ziak a ni a, ka thusawi zawm lova i awm a nih chuan hma ka la ngei ang, nakinah pasal neih i duh pawhin ka hnen aṭangin mawihnai takin i kal ang a, ka u duhthusam leh ziah te hi tih hlawhtlin ngei ka tum tih i hre dawn nia." Nghet charha tiin lehkha pahnih chu a thlep a, bag-ah a khung leh hmak.

Ka melh ngai melhin rei fê ka ṭhu a, ka fapa a ṭap; mahse, che chhuak turin thâ a lawi ka nei si lo, u Mapuia ka lo luhkhung ta kher kher kha a vawikhat nan ka inchhir ve ta. Min thungrulh dan a namai lo lutuk êm a, Thlamuana laka ka rilru put hmang hrechiangtu berin tihian a kutah min dah a tum leh si. Eng mah rilru fîmin ka ngaihtuah thei lova ka chawmawlh vek.

Ngawi reng leh che miah lova ka ṭhut ngat ngat avangin amah bawkin Bawihpuia a pawm a, an inbuaipui zui tain ka hria. Kei erawh ka thi nawn ni ber hian ka inhria a, nizan lawka ka chhuahsan tâk inah khan ka lut leh ang maw? Mi duhâm, mahni tû leh fate aia khawvel nawmsakna leh ropuina thlangtu u Mapuia nu leh pa hmuh leha chenpui ka châk lul lo a ni.

Mahse, eng nge ka tih ang, ka fapa chânin ka chhuak lui thei ngawt si lo. Â... Lalrinkima hi ka hua, an vaiin an chhungkua hi ka haw zo vekin a nia ka hriat.

"Novi..." tia Thlamuana'n min lo koh chuan minute engzata tam nge mahni ngaihtuahna kawma ka lo awm tawh pawh ka hre lo. 

Meng hnuai raih chung hian ka dâk chhuak a, ka mitah chiang taka min en chung hian, "I rilru tur ka hrethiam aw, ka nu leh pa pawh ka zawt tawh a, engmah sawi ṭha duh lo mah se, an awkâ hre lovin i chhuak ngawt dawn lo tih ka hria ania, min ring rawh tia, insawi rinawm ka tum lova, ka u thuhnuhnung zahsak hi ka tih tur a nih vanga rawn umzui che ka ni," dam thlap leh zawi supin a ti ta a.

"Haw phei phawt rawh," tia ka ṭawng mek laiin a phone a ri a, a chhâng ve nghal vat, "Ka lo haw lo mai thei, kawngkhar kalh ula, ka lo haw dawn ta a nih leh inhnuai room aṭangin ka lut chho mai ang," tiin a dah zui nghal daih.

"Hetah riahna tur a awm lo a nia," ka ti leh tawp a.

"A awm reng hi.." tih leh Bawihpuia mutna sir awl lai chu a kawk a, ka ner nasa mai.

"A teuh lo e, i lo riah nachhan tur ka hre lo, nichina kan thil sawi zawng zawng kha eng atan mah ka ti lo a, u Mapuia lehkha hnutchhiah tihvel avanga in ina haw leh tumna ka nei miah lo bawk, ka fapa chawmna tur chu ka thawk chhuak mai ang, hna ka zawng ang," ka la ti ve ṭâng ṭâng a.

"I thu thu a ni e, kei erawh chuan ka u min chah ang khan, Zomuanzuali te nufa an chhuak lui a nih chuan ka fapa Lalnunfima hi ka nau Thlamuanaa kutah a awm ang," tih lehkhaa inziak ang kha a sawi nawn leh kher a, a ngeiawm hi ka ti ngawih ngawih.

"Ṭawng tawh suh, ngawi reng rawh," vín lutuka ka tih chuan a khi suk duh chauh.

"Hetah ka riak dawn ka tih chu, i thinrim inhrosa velin Bawihpuia i lo vel palh ang, ka phal miah lo a nia, i nu têt ang ngawta en chi i ni lo, i kawlh si," a la ti zuiah. 

"Lalthlamuan lukir..." ka'n tiah. A bâk sawi ber tur pawh ka hre tawh lo.

"Tukverh saw en ta che, darthlalang a keh a, misual pawh an lo lut thei a nia, tuna i luah lai phei hi chu Bar a invuah miah lo lehnghala i hlau lo em ni, vai mistiri nghal deuh deuh an tam si a, an pawngsual hrep mai ang che," tia min sawi ṭhaih chuan ka hawi tang nghal hrâ a. Nia, helai velah hian vai Mistiri inzuah buk deuh deuh an tei sek ka hmu ngei alawm. Chutia a sawi takah chuan ka hlau deuh tak tak nia.

"Ka fiamthu lo a nia, Novi.. tunlaiah mi an sual tawha in nufa chauha in awm an hriat chuan an hlau dawn miah lo che, in luahpui emaw ṭhenawm hnaivai lutuk i nei si lo," a la tih zel avangin, "I va han hneawm ngawih ngawih tak," tiin khumah ka lawn a, ani erawh tui dehna lamah pheiin a kut nichina a tuam kha phelhin a va sil nawn leh a, a ṭawng zawm tawh bik lo.

Dik tak chuan Thlamuana leh Atuni zia hi chu a inang a, an duh lohnaah mi hmai êng an zahpah vak lo, an lung a lianin an luhlul dun tih ka hre ve kar. U Atei leh u Mapuia hi ze inang an ni thung. 

A hnu feah khum lam panin a rawn phei ve ta chauh a, khum sir têa ṭhut pah hian, "Zanin chu ka lo veng ang che u, inngaihtuah nan naktuk nileng hun ka pe che anga i thutlukna tlai lamah min hrilh dawn nia, in leh lo tih vel aiin Mama khan a fapa leh nang hi a dah pawimawh hmasa ber che tih theihnghilh ngai suh," a ti ta a.

"I nu hi a sual ve êm alawm," ka ti sap a, nui huk chung hian, "A mah aia sualin rawn awm la a khing rei peih lo ang che," a lo ti a, ka nui hak.

"Kan lêt leh hunah eng nge ka sawi ang, chhuak turin min hrilh tawha an thu awihin ka chhuak a, chhungte belh tur nei lo mahila, Pathian zarah kan awm ve thei maiin ka ring," hniam raih leh rilru na tih hriat taka ka ṭawng chuan min en vung vung a. 

"Ka nu leh pa phal lo chungin i rawn lut a, an thu in zawm chuang hleinem, tunah pawh chhuak rawh an tih vanga chhuak ngawt tur i ni chuang lo, Mama vanga lo lut i nih ang chiah khan Mama vang vêkin kum hnih i lo awm dawn tihna a ni mai a, a inang reng, ka û âiawha innei tur pawh kan ni loa, ka thlazar hnuaia i awm chuan i him dawn tih a sawi kha, min ring mai ta che, a har viau em ni?" Thu tak zeta tiin chunglam a melh vang vang a, a sawi dik phian bawk si.

"Â...duh tawk ang, muhil ang," ka ti ta ringawt a, ka thluak a buai vek.

"Khawilaiah nge ka mut dawn?" Tiin, nui ruh ruh chung hian min zawt let a, dam thlap hian, "A sirah khan mu la, a laiah Bawihpuia mu se, a kil berah kei ka mu ang," tih pahin puannuam pakhat chu a lamah ka thehphei a, a lo dawng chat. 

"I lo hlauthawng ang e, tui taka mut tum la, hahdam tum rawh aw, tihian in nufain ka lo veng ang che u," tiin a pheikhawk a phelh a, khumah pawh mu chuang lovin lukham ngheng hian a ṭhu âwn duai a, a mi uap a nâ. Ka ni húih mai.

An inpuia ka let loh chuan ka fapa hi min chuhpui dawn tih ka hrechiang nasa mai si a, u Mapuia anga zaidam leh mi hriatthiamna ngah tak ang kha Thlamuana hi a ni ve si lo. A tih tawh lam a ti tlur zel a, a u a hmangaiha a zah bawk a, a damloh leh buaipui ngai zawng zawngah pawh a phusa ber a ni a, chuti maia namnul theih a ni dawn lo tih ka hria. Nge, khawngaih ka díl zawk mai dawn em ni? 

Eng pawh nise zanin chu tihian han awm ve phawt ila, ani pawh riak rawh se, haw turin ka nawrlui thei dawn chuang lova, bâkah ka pasal unaupa a ni a, ka lakah sual a chhuah lem lo bawk nen, khua han var se u Ropuia ka râwn ve hrim hrim ang, keimah ringawta thutlukna siam pawh a fel ber chuang lo.

Mak deuh maiin ka mutui hle a ni ang, ka harh leh chuan khua a lo êng vek tawh a, zinglam dar sarih a pel tawh. Rang takin ka fapa mutna lam ka hawi vat a, a lo ruak vek, Thlamuana pawh ka hmu chuang lo a, mahse, tukverh bula ding chung hian hnute an lo inpe a, ka thaw huai.

Ka harh tawh a ni tih hre lo hian, Thlamuana chuan ka fapa a be mawlh mawlh a, "Hnute i nghei hunah ka bulah i mu dawn nia aw, tlangval...âpa bulah i awm thei si loa apatea hian ka venghim tlat ang che," tia a biak lai chuan ka lo nui hak a, ka harh tih hriain min rawn en ta a.

"I tho thei maw, hnar ring ropui si..." tiin a nui a.

"I daw mai mai em mai," tia ka chhan chuan nui suk chung hian, "Bawihpuia ṭap pawhin a kai harh zo lo che a nia, hnar tluk tluk ringawt," a la ti hram.

"Intifai la, tukṭhuan tur lo siam rawh, tukin chu chaw pangngai ei ang aw, chumi zawhah ka chhuak ang," a ti leh zung zung a, buhfai kan neih leh neih loh pawh ka hre lo hrim hrim, u Atei'n a dah tel turah ngai ang.

Khum thawhsanin ka intifai a, nau pawh lâk chhawk chuang lovin ka che zui ve mai. Vanneihthlak takin buhfai a lo awm hlauh a, chhum mai theih turin ka siam nghal a. Mahse, chawhmeh tur pakhat mah a awm leh si lo.

"Chaw chhum tur a awm a, chawhmeh a awm lo," tia ka sawi lai chuan, "Kha maw, kha maw, eng tia khawsak hi nge i tum le," a ti nghut.

"Ka indang ve chiaha thil engkim ka neih sa ring duh suh, inah haw la va ei mai rawh," ka lo ti nghat a.

"Thinchhe si.. Bawihpuia hi khumah ka mut a nia, chawhmeh tur ka va en ang nge," tih leh khum lam pan a rual a, nuam lo ka tiru ve det.

Nau a mut fela min be tawh chuang lo hian a chhuak zui nghal a, pa ṭawngtam hi chu a ni chiah bik lo, min hua ang em em pawhin a lang lo a, a lehlamah chuan Bawihpuia min hmangaihpuitu leh min ngaihsaktu a ni ve tho a, a laka ṭhat chhuah ve hram hram ka duh. 

Rei vak lo hnuah inkhaibâwr zetin a rawn lut a, ka sawi ngai miah lo hian ama'n a siam  zung zung a, Dàl a chhum tawp a, Artui kang lehin, "Novi, hmarchapui kan i ngaina em?" Tiin min zawt a, "Aw' tia ka lo chhan chuan, "Chaw hi chu nangman chhum rawh," a ti a, ka lo bu nghat.

A chet vel chhungin khumah phone ka lo khawih mai mai a, a chhuah hunah Bawihpuia ka bual ang. Atuni hnen aṭangin whatsapp message a lo awm ṭeuh a, "Lo haw leh rawh aw.. Bawihpuia ka ngai, ka nu leh pa chu ka hau hrep tawh.." tih vel, a dang pawh a tam mai. A upat ve tawh nen a nawi ve thei ngawt chuan ka hria. Ka thil ngaihtuah avang chuan ka nui hak hak a. 

"Eng nge a?" Tia Thlamuana'n min rawn zawh chuan, Atuni message vel chu ṭha tein ka hrilh chhawng a, "In lo haw hma chu Delhi chhuk a tum lo bur, nizanah khan lokal ve a tuma ka phal lo a nih kha, Atuni hi chuan a ngaina tak tak che a nia," dam thluamin a ti ve mai.

"Ka hria alawm.." ka ti sap a.

Nizana kan thusawi kha atu mah mahin kan sawi chhuak ta rih lo a, sawi ngaiah pawh ka dah lo. 

Dar 9 dawnah a vawikhat nan Thlamuana nen chauh tûkṭhuan kan ei ve ta. A thil siam ka sawisel sak lo a, ka chaw chhum a nêm deuh nain ani pawhin ngawi rengin a ei ve mai. A mize mak leh dangdai tak hi ka hrechiang thei lo a ni ber e.

"Khawiah mah lo chhuak lo la, tlai dar li velah ka rawn bia ang che, i thutlukna min hrilh dawn nia, ngun takin inngaihtuah la, duhthlanna siam sual lo hram ang che," tia a sawi zawh hnuah min chhuahsan ta a. A reh ruih mai. 

Bawihpuia bual faiin ka timu leh phawt a, u Atei ka call hmasa a, Thlamuana nen kan inbiak dan leh u Mapuia lehkha chungchâng ka sawi thuak thuak a, ani lah chuan, awlsam te hian, "Mama'n Thlatea a ring ngam a nih chuan ring ve hmiah rawh, Mama kha mi â a ni lova, ka u a nih vang ni lovin eng emaw tak intan tih duh a nei a ni ngei ang, Nano, lo haw leh rih ula, Thlatea chinfel turah dah hmiah rawh," a rawn ti thên. 

Haw lo tura min tih ka ring a nia, ka rindan a sual leh ta. Khati tehhrepa min buaipui hah avang khan, 'Haw duh tawh suh u, in lamah ka ṭang zel ang,' tia a sawi ka rin nen ava ho mai mai e.

U Ropuia ka call leh ta a.

"Mate, khawiah nge i awm, rilru i va tihrehawm ṭhin ve, biak tlang theihin i awm bawk si lo," a rawn ti nghal a.

Kan chhuah thu leh u Mapuia nu leh pa min tih dan zawng zawng te, u Atei min puih vel dan kimchang taka ka sawi vek hnuah, "Nia, Atuni'n min hrilh alawm," a lo ti a.

"Mate, ngun takin ngaihtuah la, Mapuia khan in tana ṭha lo tur eng ruahmanna mah a siam lovang, a thusawi zawm la, a nau a ring ngam a nih chuan engah nge i rin ve mai loh ang," a ti deuh tlat.

"Mahse...an ina let leh kher te chu.." ka lo ti a.

"A nu leh pa rilru hrechiangtu leh an ina in chenho laia engkim hmutu, indanpui hial tumtu che i pasal khan i hmakhua tur a ngaihtuah hle dawn lovem ni, ngaihtuah chiang rawh, in fapa leh nangma tana ṭha zawk tur eng emaw ruahmanna a nei a ni ngei ang, dam te chuan kum hnih chhung a rei lo lutuk." A ti leh a.

"Rilru siam dan pawh ka thiam lo e a.." ka ti tawp.

"Thlamuana kha ring la, mipa a nih kha, i fapain nu koh tur a neih loh ai chuan hrehawm huam pawhin kum hnih chu i awm leh mai tur a ni. In tan thil ṭha zawk a lo chhuak maithei asin, Mapuia khan a hmangaih êm che kha, a nu leh pa ina inla chen nachhan tur ṭha tê a hria a ni mai lo'ng maw?" Tia thaw leh hawkin, "Mate, ka thu awih la, lêt leh rawh, Thlamuana leh Mapuia lamah tun ṭum chu ka ṭang nimai teh se," a ti leh a.

Thlamuana a'n ṭan leh vel a.

Ui... ka â mai dawnin ka hria.

"Aw le, i thu ka awih ang" ka ti ve ta zawk a. Min hmangaihtu ka u Ropuia a ni tlat si a. A thu hnial ka ngam lo.

"Nangmah hmangaihtu dik tak khan i chhiatna tur leh in nufa hrehawmna tur a ngaihtuah dawn lo tih ka hria alawm," a la ti leh zel.

U Ropuia thu zawmin u Mapuia te ina kîr leh tur chuan rilru ka siam ta a, a hrehawma ka tuar thei ta ngang lo a nih leh hunin hril mai teh se. Ka fapa nena awm hran ka zuam mawlh lo. A pa thu hnuhnung khirh zet hian eng ram ropuiah nge min hruai thlen dawn kan la hria ang chu.

Tlai lam dar li-ah Thlamuana'n min lo call ta chiah a, dam thlap hian, ka lêt leh dawn tih ka hrilh ta a. 

"Ka rawn hruai ang che u.." tih bâk thudang a sawi belh lo teh tlat.

Darkar hnih hnuah.

Kan bungraw ṭhenkhat nen u Mapuia te in kawtah kan ding rân a, Thlamuana'n Bawihpuia a pawm a. Ka bag bâk eng mah ka keng lo thung.

Motor thawm hriain ka nu leh pa, Atuni, Diki an lo chhuak a, ka thin a phu dup dup thei nia maw le.

"Lalthlamuan, Zomuani te nufa kha tu thuin nge i rawn hruai haw?" Tia ka nu Biakliani a ṭawng chuan kut ka hum ruh ngat ngat a, midang tumah ṭawng ve an awm rih lo.

"Keima thuin maw le, tu thupêk mah ka mamawh hleinem, Mama hmangaih taka enkawltu a ni a, in tupa hian he in chhunga chén theihna dan hi a nei a nia, sawi buai in awm emaw an chén ve rem ti lo in awm a nih chuan, he in hi kan chhuahsan ang. Anni nufa enkawl tur hian ka u Rinkima'n mawhphurhna min pe a ni." A ti thum chhak a, a nu a mengphar âwk a, a pa hmel landan ka sawi fiah thiam lo.

"Lalthlamuan...nang.." tia a nuin ṭawng zawm leh a tum lai takin, "Ka nu, vawikhat sawi kha ka duhtawk aw..Mama in thar sak saw mi pathum chenna atan a lian mah mah a nia, kan luah zo seng miah lovang.." khauh fara Thlamuana a ṭawng leh takah chuan tumah ṭawng zawm tur kan awm lo. 

Ngawi rengin kan inmelh hrek hrek ringawt.

"Atun...i vahpa hi pawm rawh le, Diki, Bolero-ah kan bungrua a awma kan dah chho lawk dawn em ni ang," pawisak nei loh hmel taka Thlamuana a ṭawng laiin ka nu leh pa in chhungah an lut ta a.

Lalthlamuana khawsazia kha a va han pa ve le. Mipa chu a lo ni ngei e...  

200123

Shadow of the life

B+>[BeckirafARenthleI]<+®®