18.KA CHANPUAL [A Becky Rafa Story]

18. KA CHAN PUAL

Ziaktu: Becky Rafa Renthlei

-B®®

(Recap)

"Lalthlamuan...nang.." tia a nuin ṭawng zawm leh a tum lai takin, "Ka nu, vawikhat sawi kha ka duhtawk aw..Mama in thar sak saw mi pathum chenna atan a lian mah mah a nia, kan luah zo seng miah lovang.." khauh fara Thlamuana a ṭawng leh takah chuan tumah ṭawng zawm tur kan awm lo. 

Ngawirengin kan inmelh hrek hrek ringawt.

"Atun...i vahpa hi pawm rawh le, Diki, Bolero-ah kan bungrua a awma kan dah chho lawk dawn em ni ang," pawisak nei loh hmel taka Thlamuana a ṭawng laiin ka nu leh pa in chhungah an lut ta a.

Lalthlamuana khawsazia kha a va han pa ve le. Mipa chu a lo ni ngei e...  

&&&

U Mapuia te inpuia ka chên lehna pawh kâr hnih a tling tawh a, a hma kha chuan u Mapuia enkawl tura lut ka ni a, pu Zoliana leh pi Biakliani te fa hming koh Lalrinkima luhkhungtu Zomuanzuali ka ni. 

Tunah erawh chuan a dan a dang ta zak mai, an fapa naupang ber, Mizo dana inpui nghâktu tura ngaih, nu leh pa enkawla chawmtu tur Lalthlamuana enkawl leh venhim tur atan kan nufain kan lut ta a ni a, chhungkaw boruak a inthlâk ti ila ka sawi sual tam lovang.

Khatia min hruai tura Thlamuana a lokal khan intiamkamna fel fai tak kan nei a, a nu leh pa, Atuni pawh tiamin u Mapuia lehkha hnutchhiah chungchâng leh kum hnih chhung an ina ka chén tur thu kha tumah hrilh loh kan intiam a, a hre sa Atei leh u Ropuia bâk midang hrilh hriat belh loh tur tiin thu kan delhkilh thlap.

A chhan chu hmalam hun tumahin kan hre lâwk lo a, eng emaw palh thilah ka nu leh pa an hrâng ang tih min hlauhthawnpui vang a ni tiin Thlamuana'n a sawi a, ka pawm zawng tak a ni.

A ngai tê bawkin u Mapuia room-ah kan indah lut leh ta a. Atuni awm chhung chuan aniin min riahpui ang a, Delhi a chhuk hunah Thlamuana kan room-ah a awm thung ang, Thlamuana riah kher a ngai em ni? tih zawhna in nei maithei. Mahse, u Atei'n engkimah min fimkhurpui em em a, kan nufa chauha kan awm hi min ngaihtuah ru tlat a, hetiang ruahmanna hi Thlamuana a siampui a, eng chu hria ni maw. 

Kan khumah a mu ve dawn tihna ni lovin, Couch-ah khan a riah theih tur thu a sawi a, a tîrah ka hnial deuh naa; mahse, u Atei hmai ka zah vangin ka remti ta chauh. 

Kan haw zan boruak kha chu ka sawi thui peih tawh lo, a nuam lo a ni tawp mai. Ka nu leh pain ṭawngkam khat mahin min be lo a, zanriah kim ṭhapin kîl mah ila, an ṭawng duh eih lo, ngawi rengin an ei mial mial a, tumah kan inbe lova. Atuni takngial pawh ka lakah a lungawi lo ru deuh bawk nen a ngawi ngal a, hrehawm hi ka va han ti tak. Ka fapa vang chu ni lo se ka tlan chhuak daih ang maw le.

U Ropuia chanchin ka hrilh a, "I naupan ang aiin i tuarchhel tih ka hria a nia, lo ngai reng mah rawh, engtikniah emaw chuan i fapa kiangah lungkham nei lo leh hlim taka i awm hun hi a thleng ngei ang, tunah kum 22 i ni a, kum hnih dang kha ina i awm hun chhung a zawh pawhin i la nula ṭan dawn chauh a nia," tia fiamthua sawiin a nui mai mai a, a dik vei phian.

Kan riah luh zan hmasa berah kan nufain kan mu tawh a, Atuni a rawn lut hlawl a, "I ti mak ve ngawt mai, i chhuak duh a nih pawhin min hrilh ve ka ring a nia, i u Mami aiin ka fel zawk daih sia.." kâi phelh phawlha tiin a tum bûr a, ka nuih a ti za angreng.

"Hrilh che ka tum reng, mahse, ka nu leh pain min koha chhuak thuai tura min hrilh khan nang leh Thlamuana ka hrilh che u chuan inhauna a chhuak dawn ngei ngei tih ka hria, chuvangin, u Atei zawk ka hrilh ta ringawt a nih kha, Atun, dik tak chuan heta chén hi chu a hrehawm ve êm a ni," ka ti tlang tawp.

"Delhi-ah chhuk ila, i graduate tawh tho a, Bawihpuia awmtu tur kan la ang a, kan company ah thawh dan a awm ang," a ti liam leh puat a, dam thlap hian, "Tlemin han leikáng ve deuh se, i bulah kan awm daih ang, pasal min zawnpui dawn nia," tia nui chunga ka lo chhânna avang chuan a nui vei ṭhâ a, Beer Can hnih a rawn paipawn leh tawh. 

"Thlatea'n a phal leh chuang lo ang, mahnia zuk awm pawh ka peih tawh lo khawp mai," tihpahin a'n khiat leh zeuh a, Can khat ka lama rawn theh pheiin, "In zo vek rawh, i nu Biakliani kan ankhum dawn nia," a'n tiah. A va han nawi e..

A sawi anga in lovin dawhkanah ka dah a, a hre zui leh chuang lo ang. Zû leh a behbawm engmah hi ka ngaina lo.

"I nu Biakliani zawk alawm," tia ka ṭawng lai takin ka nu a rawn dâk a, "Atun, inhnuaiah lo chhuk teh, i pain biak che a duh," ti nghatin min en miah lo hian a chhuak zui nghal a, "I nu chu ava rum ve," tiin Atuni a nui a, a nu hi a ngaisang viau lo tih a thup lem lo. Mahse, a nu a nih tlat avangin ṭanna chin chu a nei tho bawk.

Atuni chhuah hnuah kan nufa thawmhnaw ka rem fel a, u Mapuia nena kan thlalak pawh a ngaiah bawk ka târ leh a, ka lung a lêng veng veng.

Kan khum zaupuiah kan nufain kan mu bal a, zan hnih lek kan awm lohsan a ni a, midang lut ve an awm tih hriat takin ka kalsan loh dan ang vekin thil a awm a, zawn an nei nge tih hriat va ni suh. 

Ka sawi hmaih miah loh tur chu khatia ka chhuah dawn khan u Mapuia safe chahbi ka keng daih a, a chhungah pawisa tih vel a awm hran lo. Mahse, file leh document a awm avangin ka kalh thlap kha a ni a, an duh ang an hmu lo turah ngai ila.. A nu leh pa te hi mak ka ti ve thlâwt.

Atuni rawn chhoh leh lai pawh ka hre tawh lo a, ka harh leh te chuan khua a var vek tawh a, ka fapa a muhil tui bawk a, a nî nen puan an lo inzawn thlap. 

Nia, ka haw leh zan hmasa ber chu khitiang thuartham vel khian kan tling tla a, ka nu leh pa lakah tlâktlum tuma inlâk mark ṭhat tumna ka nei lem lo bawk. 

A chipchiar deuha sawi hi ka peih lo a, a tawi zawngin, u Mapuia thihcham thlakhatna kan hmang a, kan nufa leh a naute pahnih nen Thlamuana'n thlanmualah min hruaiin kan va ṭap chiam a, nî a sat em avangin kei phei chu ka chau vek. Atuni'n haw lamah Car a khalh a, Thlamuana a ngawi ngul a, u Atei'n Bawihpuia a pawm thung, kan boruak a nuam lo a, kan ngui nghiai mai.

Tlai lamah ka nu leh pa tel lovin u Atei te inah zanriah kan ei ho dawn a, Atuni leh Atei'n eirawng an bawl a, naktuk hian Atuni a hna lamah a lêt tawh ang a, ka nau nei min awmpui tur chauhva chawlh la a nih laiin, a u a boral ta si a, a duh aia rei a châm ta. Chawlh dil belh a ngam tawh bik si lo a, a kal ve dawn ta nge nge e.

U Chhandama hian zu a in ngai lo emaw ka ti a, mahse, Thlamuana nen khatia inhmu thiam lo ang deuha lang si kha room-ah rei fe an inkhung a, an rawn chhuak leh chu an nawi nak mai. 

Nidanga ṭawng duh mang hlei lo leh biak lohva min biak tum miah lo kha a ṭawng ve luam a, "Nano, Thlatea hian nupui tur a hmu zo lo a niang, innei daih teh u.." tih angreng velin a ṭawng sek a, ka ning lek lek.

Thlamuana lah chuan, "A thinchhe em mai, ka nei peih lo," a lo ti ve zat a, "I chhia a nih chu.." ka lo ti hrâm.

Mihring hi en ang an lo ni vek lo tih zanin aṭang hian ka hriat phah. U Atei pawhin Beer a in ve teh tlat a, "Atuni nen kan tleirawl lai chuan kan indun ṭhin, pasal ka neih hnu hian ka chhunzawm ta lova," tia a sawi lai chuan, Bawihpuia paw chungin Diki a rawn chhuk a, ka inbual laiin a muhil laklawh si a, ka laksak ta lo kha a ni a.

"Nano, piin chaw eikhamah rawn haw nghal rawh se, Bawihpuia a ngaihtuahawm a ti," a rawn ti lut a, ka chhan hma hmain, Thlamuana'n, "Atuni thlah nan kan lengkawi dawna kan lo haw hma dawn lo u Thlatea'n a ti tirawh," a lo ti hmanhmawh a, ka ngawi tawp.

Diki naupuak lai ka laksak a, a rawn harh zui ta bawk nen u Atei te room lamah hnute pe turin ka pheisan ta rih a, ka fapa pawh thlakhat leh kâr hniha upa a ni ve ta a, duh aiin kan chhuahpui tam tih ka hria, mahse, ka dinhmunin a zir miau si lova puak tham loh kha kan paw kâwi zut a ni ber. Amah a ṭah belh lo êm a, thlakim lova piang tih pawh a hriat bik loh.

Chutia hnute pe-a kan lo inpawm lai chuan, Thlamuana'n phone-a mi be chung hian a rawn phei a, kan awmna room-ah ni lovin mikhual room nena inkal pawhna laiah dingin, "Min rawn be tawh suh, ka kham a nia, nang nen sawi dun tur engmah kan nei lo," a ti hmuk hmuk a, atu chu bia ni maw! 

Ka hriat theih tirh ata ngaihzawng a neih awm ka hre lo a, u Mapuia khan a sawi lang ngai miah lo bawk a, tuna a ṭawngdanah kha chuan hmeichhia a bia niin a lang, ve ngei hian. Mahse, a hmelṭhaa a luck phianin a nia ka rin.

U Atei'n chaw a ei theih tia a rawn sawi tâk avangin nau pawm chung hian ka chhuak phei ve a, u Chhandama pawhin nui chungin min kal pelh tak kha. Zu an in leh dawn a nih hmel.

"Nano, nang chu tikhan lo ṭhu tawp rawh.." Atuni'n a ti a, naktukah min kalsan tawh dawna ka ngai ngawt ang, u Atei ka ngaina lo tihna ni lovin ani chu in hranga awm a ni tawha Atuni ang emin kan inhmu tam lova chendunpui nen chuan a in ang thei lo ve bawk a ni.

Sofa-ah Bawihpuia ka mut a, dining table kilin ka ṭhu ve ta a, an unauho hi hrechiang lo tan chuan an ngainatawm fahran lo, a bikin Atuni leh Thlamuana an ni lehzual, an ngêng si a, nêl an har.

"Tlangvalte...chaw kan han ei ang e aw.." inla polite zetin Thlamuana'n a ti a, ka fapa hi, 'Tlangval' tiin a ko deuh kher zel, a kam nam ve deuh bawk a, a meng leh chiai tawh. 

Zanriah kan ei laiin, u Ateii'n, "Thlatea leh Chhandama pawh zu in tawh suh u, in in reng chu ka ti lo a, mahse, thiltih khawm tih velah in lo nam ve hman ziaha a mawi lo," tiin thinrim nimiah si lo hian a khak a, a ti ṭha hi ka'n ti khawp a, inrawlh ka tum ve miah lo.

Thlamuana lehpekin, "Dama, innu hi a thinchhe riau lo maw, keini inchhungah khi chuan thinchhe bawrlawk hlir kan kawl," a'n tiah. Kan nui vek. Tih bîk a nei lo a, kei leh Atuni, a nu nen min sawi kawp vek tihna, a ngeiawm thei a nia.

Atuni pawh a ngawi mai mai bik lo, "Keini aia thinchhia i nei palh ang e, 'Ṭik' pawh ti ngam lo hian i zum dûk mai ang, Angela tih vel, ka ngaisang lo," a lo ti ve nghauh a, Thlamuana a nui ruh ruh ringawt.

Hlim tak leh inpawh tlâng takin zanriah kan eiho a, u Mapuia awm loh hnua ka ei tam ber ṭum leh ka nuih nasat ber a ni hial ta ve ang. Thleng vel kan seng fel laiin Thlamuana'n nau a pawm a, rin âi tak hian a duat a, nau khawih a zei fu roh nen a fel ve na tak niin ka hria, hemi kawngah hi chuan sawiselna ka nei miah lo. 

A boral thlakhatna cham ni mah se, u Chhandama zawkin, "Mapuia kan ngai a, kan rilru a na vek, chuti a nih rualin hmalam pan tum ila, unau inngeih phah nan leh inpawh lehzual nan hman tum bawk ila; ani chu natna awm tawh lohna hmunah a awm tawh a, keini a dama te hi kan pawimawh viau a nia, Nanovi pawh kan chhungkaw mi i ni tawh tih inhria la, i nu leh pa laka lawm lohna i neih pawhin min hrilh zel dawn nia aw, upa lam an ni tawh a, hriatthiamna chin neih ve a ngai a nia," tiin upa ber a nihna angin thu a sawi ve ngei, a rui ṭawngah ngaihsak chi a ni lo a, a in ve hlek khân a duh ang a sawi ngam zawk nimaiah ka ngai. 

Thlamuana pawhin pawmpui tih hriat tak hian, "Ka nu leh pa hi chu ngaihkhatah ngai ila a ṭha a nimai, chuan.. Novi, Atuni ka'n ride pui lawk dawn em ni?" A ti leh daih.

"Bawihpuia nen chuan a chi loh..inah kan lo awm ang," ka lo ti a. 

"A ho lutuk, tuam lum ṭha ila glass kan down dawn hleinem, kal ve rawh se," Atuni'n a lo ti leh zela ka ngawi rauh rauh. 

U Atei te chhungkua anmahni car-ah an chuang ang a, keini Thlamuana khalhah kan chuang dawn niawm tak a ni.

Kal dan tur vel an sawi laiin, "Diki, Mama te room-ah khan han kal la, Bawihpuia blanket pakhat rawn la ta che, nang pawh kan rualin lokal ve nghal la, ka nu kha hrilh mai rawh," tia Atuni'n Diki a biak lai chuan ka lo ngawi reng a, u Mapuia awm ve se tih hlir ka rilruah a awm.

Diki a rawn thleng thla a, kan kal mai dawn emaw ka tih laiin Atuni bawkin ro hran a'n rel leh a, a ninawm lek lek ṭhin.

"Thlate, Mama Bolero khalh la, keiin i Car ka lo lukleu pui ang, ka khalh khât tawh dawn sia, Diki..ka phur ang che aw.." a ti ham ham a. 

Thlamuana khalha chuan ka duh loh thu sawi ka tum lai takin u Ateii'n, "Nano, motor-ah lut daih rawh u," a rawn ti ta si a, Short cut lam aṭangin Thlamuana Bolero nen a rawn back a, engtik laiin nge a han chhoh hman ni, zu te kha a in ve si a, ka hlau ru deuh asin le.

Mahse, an hlimna tih chhiat ka duh loh avangin ngawih ka chuh ta zawk a, Atunin Diki a phur a, keini nufa Thlamuana'n min phur thung a, u Atei te chhungkua a hranin, an va indaihzai tak. An fate pahnih lah an phúr phian si a, a ṭha vek e.

A hnungberah kan tlan a, Thlamuana ka va melh zauh a, hnehsawh zeta car khalhin hmalam a en uluk viau. Sir zawnga en thuak phei chuan u Mapuia nen inang tak an ni, â...thil ṭul lo ka ngaihtuah leh ta, tiin ka thaw halh a, min rawn en zawk chung hian, "I hlau em ni?" a ti sup a.

Rang fahran hian, "Aih.." ka lo ti a, nui huk chung hian, "Novi, ka rui lo aw.." a ti leh deuh kher.

"Tlan mai mai teh.." ka ti nghat a, "Kei aiin Mama khan a khalh chak daih zawk..kei te chu ka fimkhur e.." a la ti hram.

"Mama, Mama, ti reng lo khan tlan vat vat mai rawh," ka lo ti hlar a, khi suk chungin, "Anih Bawihpui ti mai ang," a'n tiah. Ka nui ta nge nge e.

Kal tumna bik kan neih hran loh avangin Zampuimanga thlan lamah an tlan ta zel a, a hnungberah kan tlan bawk si nen kan ûm a, Atuni a tlan chak angreng, Chhandama pawh chuti tho. Naute nen kan nih vangin kan muang fâl deuh a, min lo nghâk zauh zauh.

Trinity hospital kawtah kan innghak khawm a, coffee an in leh tê tê a, ka chhuk ve ta lo. Coffee no keng chungin ka ṭhutna lamah Thlamuana a rawn kal a, "Kha le, kan haw tawh dawn nia," tiin Coffee chu min pe a, naupang thil an leisak leh hnuah muangchangin in lam kan pan ta a, a va ho tak. Ka tuipui zawng hi a ni ve mang si lo a, a ninawm ka ti.

U Atei te chhungkua kan mangṭha hnuin in lamah kan tlan chho leh ta a.

Ina haw ka va huphurh si êm. Sakawlh a lo hrâng leh ang tih mawlh ka hlau.

Ka ring sual dawn lo e. 

Thlamuana'n Motor a hun ṭhat chhungin, Atuni, Diki te nen inah kan lut hmasa a, ṭhutkhawmna pindanah ka nu leh pa an lo ṭhu a, kal pelh mai kan tum lai chuan ka pa a rawn ṭawng chhuak ta a.

"Atun, khawnge i nau?" Tiin Atuni a zawt a, Motor a dah ṭha, tia Atunin a hrilh lai mekin Thlamuana a rawn lut ta a. 

"Thlate, in khawsak dan hi ka duh miah lo a nia, Mapuia thihcham a nih vangin chaw in eikhawma kan hrethiam, in pui zawk awm renga Mâkpa ina zuk ei kher kha thil mawi pawh a ni lo, hlimhlawp bâwl ang hrima len davah te kha in zak lawm ni?" Thinrim hmai sen ṭûna ka pa a ṭawng lai chuan midang zawng kan ding zum dâk a, a bîk takin Diki nen hrehawm kan ti zual.

Thlamuana chuan, "Atuni naktukah a chhuk tawh dawn si a, kan teikualpui maw le," dam thlupin a chhâng a.

"Tun chinah chuan hre rawh u, in thu thuin awm tawh suh u, nu leh pa ina chen ve inla duh chuan min zahderna nei ula, in u Mapuia a fel tehreng nen a naute hi in laktlak loh em mai, zu in ka ching e te in tia, ka lawm miah lo a nia. Zomuan, nang pawh naupawm i ni a, inah tawm tam ang che," tiin min hmer tel hrâm.

"Zomuani sawi tel a ngai lo, Novi, inchungah Bawihpuia chhohpui la, Diki, nang pawh i room ah lut rawh," tiin mitmeiin kalsawn turin min hrilh a, îhe lovin ka lo zawm hmak. Hmanhmawh deuh hian inchungah ka chho ta a, Diki pawh a room lam panin a phei a, Beer rim a nam vut vut a, Atuni'n a pe ve tih ka hrethiam mai.

Thlamuana te unau an la ding khawmuang a, an inhau ngeiin ka ring bawk.

Keini nufa erawh kan room-ah kan awm tawh a, Bawihpuia muthilh lai chuha intleuh zuai ka tum deuh. 

Ka fapa tui taka muhil hmel ka en a, "I pa ka va han ngai tak, eng pawh ti ila, i pa a tel ve loh chuan nuam ka ti lo a ni e," tiin a chalah ka fawp zauh a, bathrobe lain inbual turin-ka lut ta a.

Ka vanneih vena chu ka naupai lai khan dul râng leh hmelhem ka nei tlem a, ka vun a ngo a, a lang meuh lo niin ka hria. Lu su lovin shower hnuaiah ka ding a, u Mapuia nen kan inbual dun lai te, amah ka bual fai lai te ka mitthlâah a lang iar iar a; ka mittui a hnâm sawk. Ṭah êm chu ka ṭap lo. Min awm lohsan aṭangin thlakhat lai a lo ni ve ta a, ka tan chuan nimin ang lek nimaiin ka hria, ka ngai ngawih ngawih a ni ber.

Bathroom ka chhuahsan hnuah pawh Bawihpuia a la mutui hle a, mut nan chuan a la hma deuh si a, u Ropuia ka call ta a, vawi thum a ring zawh dawn ṭepah hmeichhia hian min rawn chhang ta a.

"Nano..." a ti thâm ṭiak..

Tu aw nge ka hria alawm, ka nu aw a ni. Engah nge ka hai tehlul ang ni.

"Nu..." ka ti chhuak sap a.

"Mate, i dam ṭha em, i u Ropuia a chhuak lawka a phone a theihnghilh a nih hi.." tiin ṭha te hian min bia a, ka ṭah a chhuak ringawt.

"Nakinah ka lo be mai ang," ka ti leh a.

"Mate, Mapuia a awm tawh si lova engtin nge i awm?" Tia min zawh chuan, u Ropuia'n ka chungchang engmah a sawi lo tih ka hrethiam mai. 

"An inah ka la awm, nang niin min duh tawh si lova kalna tur dang ka nei hleinem," ka ti sap a, ka inkhawngaih thar thut.

"Lo haw ta che, ka fanu...i u Mami.." tia a sawi laklawh lai takin tu emaw hian ka phone ken lai chu min phih thlâksak a, ka phu nasa kher mai.

"Eng nge i hriat a?" Tih leh hnunglam hawi ka rual a, Thlamuana mitmeng rum úl ka hmuh takah chuan ka ṭawng zui ta lo.

Thinrim lutuk tih hriat fahran hian, "Zomuanzual, i chhungte be lo tur khan ka hrilh tawh che a, vawikhat ka sawi nawn leh ang, i be leh a nih vaih chuan i chungah engtin pawh chet la ila i vui thiang lo ang aw," a ti hmuk.

"En teh, u Ropuia biak ka tum mai chauh a nia, ka nuin a lo chhâng si a.." ka ti sap a.

"In thusawi kha ka lo hria alawm, rilru nêp deuh pu mah ta che, an duh tawh lo che tih vawi engzat nge hrilh nawn i ngaih dawn? Ka u vanga in inzawmna chhu chat tute hi i biak ka rem ti lo.." ti nghut nghutin phone chu a ak hmak a, ka thin a sa ve phat.

"Lalthlamuan..ka phone kha min pe rawh.." tiin ka ding hliai a, ngeiawm zeta nui lui chung hian, "Ka hmingpumin min ko lawl lawl suh, Ropuia chu a ṭul a nih chuan ka be mai ang," a ti leh a.

"Min pe vat mai rawh," ka ti vin hlar a.

"Mu rawh, a tlai tawh.." tihpaha chhuah a tum chuan ka thin bawrlawk a chhuak ve ta, "Ka phone min pe rawh.." tihpahin a kal tur chu a kawr hnungah ka pawt a, a ding chawt. Ka chêt dan chu mak a ti deuh nge, pen zui lovin a rawn inher vut a, "I phone tel lo khan mu rawh, in ina i let emaw, i chhuak lui a nih chuan Lalnunfima hmel i hmu tawh lovang," a ti ta a.

"Phone kha min pe ringawt mai rawh," tiin ka va ban leh a, ka bânah lo manin na zet hian min phih dâwrh a, ka pai dat, ka tlu tur min dawm pah hian, "Ka zaidam lo tih i hriat kha, min fiah kher tum suh.." tia ding sawn deuhin min vawnna a thlah thut a, ka lo inring hman lo bawk nen khum mawng lamah ka tlu thla ta a, ka chal a rik chawrh rualin ka khaw hmuh a phe vek.

"Novi..." a ti sup a, a âw hlauhthawnnaa khat chu ka hriat hmaih bik lo.

"A na em.." tia rawn kun hniamin min kaih thawh tum hian min vuan a, ka lo vai kiang lawp. 

"Sorry... ka tih luih a ni lo.." inthiam lo tih hriat fahrana tiin min pawt tho thut a, amah ka ngheng nghal rawk rawk. Hnai zetah kan inmelh ta a, a mitmenga hlauhthawnna leh min ngaihtuahna niawm tak lang dawt zut chu ka hmu hman vek.

A kutin ka chal a dawm a, "A na em?" Tia min zawh nawn leh chuan, "Na lo, ka engmah a na lo," ka lo ti nghat. 

Ka bânah a vuana khumah min ṭhut tîrin, "Khawi maw ka lo en chiang teh ang," a rawn ti a, a ṭawng zawnga zu rim nam hak chuan ka hnar a verh zar. A in belh leh a ni ngei ang.

"I rimchhia kal rawh.." ka'n tiah.

"Ka kal dawna min pawt tlat a nih kha.." nui chungin a ti ta a, ka va ngei mai mai e.

A kekawr ipte zenin ka phone a phawrh a, khuma theh thlak pah hian, "I u Ropuia tih loh tumah i chhungte dang be tawh suh ang che, hria maw.." a ti leh kher.

"I thu lo, i thu lo thlâwt..." tia ring zeta ka ṭawng lai chuan, ka hmui a rawn hup a, "Au vak kher a ngai lo, Bawihpuia a harh anga sin, thluak thawl nu.." a ti nghut a, a sawi zo hman ṭâwk tihah ka fapa a rawn ṭap ta a, ka inthiam lo leh hnuhnawh.

Khumah ka lawn a, ka fapa mu chu banin, ka pawm kâng a, a ṭap uar ngei mai. "Khatia ding reng lo khan a hnute hnek tur va siam rawh," tiin ka tir a, phun nawi miah lovin a kal ve mai bawk a. 

A hnute tur a siam chhungin kan lo in awia a bang duh der lo leh nghal. 

"Khawi ka lo pe ang, i chal kha vur tlangin va dep rawh, ka room ah Mini fridge a awm," a ti a, chutiang a awm tih pawh ka hriat si loh.

"Ka peih lo, a na lo.." tiin ka ṭang ve tlat a.

"I daw peih mai mai e, a pâwng úl alawm," tiin Bawihpuia ka pawm lai chu min laksakin khumah a ṭhu a, aman hnute a hnek tir a, ka lo en tawp.

Ka chal ka dap a, a lo páwng tak tak nia. Min tur et et naa a hriat kher ka duh lem lo.

"I nu han kawlh zia em em hi, chhun miah suh aw, keimah min chhun daih rawh..i nu Zomuanthinawrhi ai chuan ka duat zawk che a nia," tih vel mai maiin a bia a, "I ṭawng thei.." ka lo ti leh pek.

Khi suk chung hian, "A Sam hi zuahsak ang aw.." zuk ti a!

"A teuh lo, nang pawh khan i lu met rawh, a chhe bepbup si," ka lo ti nghat nghat a, a nui huk.

"Bawihpuia nen kan zuah ang a, a inangin kan ṭâwn bawk ang a, inhmeh i ti viau ang," a la ti tak deuh deuh a, hepa em em hi chu..(h)

"Ui ui..a teuh loh dan chu teuh lo tak a ni, i bulah a awm tam dawn lo..." tiin ngawi duh bik lo hian ka lo chhâng ve zel a, keimah min be tawh lovin, "Tlangval...i nu ṭawng kha i hria em, ka bula i awm a phal lo a nih chu, kan la hre dawn alawm tiraw," tiin Bawihpuia a be daih a, ka tan chhan a rem chiah tawh si lo a, a va han phakar tak.

Dressing table awmna lamah pheiin dârthlalangah ka va in en a, ka chal a lo pawng duk raih. A va chhe tak. A mawi lo bawk si a, ka ner nasa mai.

Bawihpuia a pawm tho sia tiin suk tur ka khâwm a, "Atuni hi a lo riak dawn lo em ni?" Tiin ka zawt a.

"A chatthla a niang, ka ko harh zo lo.. Beer in chin tawk hre hek lo," lawm lo awkâ zetin a la ti veleh chhawng, an hahthlak unau a nia.

"Nang pawh i room-ah phei tawh rawh," ka ti a.

"Hetah ka riak dawn.." a ti hmuk a.

"Riahpui kan ngai lo, kan inbuaipui thei alawm," dam deuh zawka ka tih chuan, "Kan sawi fel vek tawh kha, Atuni a riah loh chuan keimah ka riak ang sawi buai tawh suh," nghet charh a tiin Bawihpuia a mut a, a thawmhnaw inbel lai hlih an tum ringawt a! 

"Hei... eng nge i hriat a?" nuam lo ti ru zetin ka ti chhuak hliai a. Kiai suk chung hian, "Ka mu dawn maw le, khumah hian ka mu dawn" tih leh a Jeans kekawr kawng phelh a rual a, ka hawi sawn rang teh e.

"I lo hawi thei tawh ang," nui kur kur chunga tiin khumah a lawn a, rui lo hai lo nise hetiang hian a che dawn lo tih ka hriat avangin ka ngawi tawp. 

Puan sin tur a hran lain ngawi reng hian ka pe a, ka sin lai pangngai ka la thung. Amah pawh be tawh lo hian Couch ah mut hmun ka rem ve ta a. 

Eng ang pawhin hnialin chhuah tîr tum mah ila, ka nawr lui thei dawn chuang lo tih ka hriat vangin ka ṭha en tawp. 

A phone a kheuh zui mial mial a, Bawihpuia a selfie pui vak vak hnuah, a chhip sam ṭawn a phelh a, inthing deuh nawk chung hian a mu ve ta a, a chezia ngawi renga ka en chu hria ang pawhin a awm chuang lo. A ngawi ve hmiah tho.

Atuni a awm loh phei chuan a ruih phur châng a piangin kan heti dawn chu a ni si a, ka va han hah lâwk tak. Zanin kan boruak ka kham zia hi..a hnein ka hne.

Ka nu nen kan inbiak dan ka ngaihtuah let a, a hma kha zawng zawngah min be duh lo a ni a, zaninah tiang khan a rawn ṭawng ta si a, ngaihtuah loh ka tum pawhin a âw kha ka bengah a châm tlat. Min haw tawh lo tihna nge ni a, damlohna a nei zawk tih pawh hriat va ni suh.

Atuni ṭawng ri lawng lawng ka hriat avangin ka meng chhuak a.

"Nangmah khuma mu lo khan Nanovi mut tîr ta che, nikhua lo lutuk, en rawh, a mut dan nawm loh hmel zia saw, i khawngaih lo em ni?" Tia Thlamuana a hau bawrh bawrh lai chuan ka che duh miah lo a.

"A mu nuam a ni ang, nizanah pawh vawikhat mah a harh lo, keimah hlirin alawm hnute pe le..." Thlamuana'n a ti a, ka nui chhuak teuh hle.

Dâwt a sawi miau lo a, zanah hian vawi hnih thum tal hnute siama thawh a ngai ṭhin a, nizanah ka harh lo hrim hrim, Thlamuana vekin a siam tih a hriat mai. A inthlahrunawm ve det.

"An room-a i riah chhan alawm, mahse, zan dangah chuan khumah mu tawh suh, keini chu kan mu tlang mai a, a mutnaah sawn mu ziah tawh ang che, i rui nawi em ni?" Tia Atuni a ṭawng lai chuan ka ṭhu chhuak ve ta a. An rawn hawi nghal ve ve a.

"I lo harh tawh elaw, nizan ka bushing deuha ka muhil tlang daih alawm," tiin Atuni a nui kar kar a, "Vawiinah i kal tawh dawn si a, i lo riah ka ring deuh a nia," ka lo ti a.

"Nia, a zia lo tak tak a ni, Thlate, nang pawh tho la, motor check rawh, Lengpuiah min dah ka ngai a nia," a ti leh daih a.

An unauva an inbiak chhungin bathroom-ah ka luhsan ta a. A châng hi chuan an nun dan hi a nawm hmel ka ti, an inhau bawrh bawrh a, a hnu lawkah an infiam leh a, zu pawh an in dun zeuh zeuhin ka ring hial. U Mapuia leh Thlamuana pawh khan in dun zeuh ṭum an nei. 

Dârkar li hnuah.

Delhi pan tura Atuni a kal dawn meuh chuan ka mittui a tla lo chauh. Ani pawhin a hreh ve hle tih a hmelah a lang reng mai. 

"I lo awm hma kha chuan ka haw khât a nia, tunah chuan kal leh châkna pawh ka nei tawh lo, Bawihpuia nen ka ngai ngawt ang che u. Thlatea helamah a awm tawh dawn bawk si a, ka khua a har dawn em mai," a ti ve ngial a, ka khawngaih hnûp hnûp lutuk.

"Kan rawn be ṭhin dawn che nia, Bawihpui, i nî hi bye bye rawh le," tih pahin engmah pawh la hrethiam lo ka fapa kut tetaktê chu lain a nî hmuh theih turin ka dah chhuak a, a ṭah a chhuah hmel tawp. 

Thlamuana Car-ah an chuang ṭhap tawh a, ka nu leh pain tun ṭum chu an thlah ve dawn teh tlat. Kei leh Diki inah kan lo awm dawn a, ka nu pawhin tukin chu hmel pangngai min hmuh ve tak kha. A tupa pawh a chhawnchhaih ve mial. 

Nizan lamah Thlamuana ruiin a zilh a ni mahna. An zia a dang ve riau.

"Novi...eng nge ka lo hawn ang che?" tia Thlamuana'n nui suk suk chunga min zawh chuan ka zak ru hle, kan kim teh ṭhap bawk si a, a nuam viau lo.

"Eng mah.." ka lo ti a.

"Mama file kâwm sen kha min lo zawnsak hman ang em, ka lo haw hunah ka en duh dawn a," tia min biak leh chuan ka lo zawn tur thuin ka chhang a, a nu leh pa hmuh laia min be sek hi ka ngei. A ṭul lo hi ka tia.

Chumi hnu chuan Atuni'n Bawihpuia a fawp zeuh a, in enkawl ṭha tura min chah leh hnuin Car-ah a lut ve ta a, an tlan liam hma loh Diki nen kan ding reng a, a khawhar thlak ang reng.

"Nano...Atuni khan a ngai ngawt ang che," Diki'n a ti a.

"Nia, kei pawhin ka ngai dawn, u Mapuia tih lohah chuan ka nêlin ka ngaina ber, u Atei nen hian an ngainatawm," ka lo ti a.

"I lo awm tirha a sual nen, a inthlâk ve chiang ngawt mai," a ti leh a, ka nui tawp.

Diki nen inchhungah kan inzui lut ta a, Thlamuana sawi file sen kha ka zawng poh a ni ang chu. Eng file nge tih hre lo mahila, a pawimawh a nih ka ring ve ringawt a.

U Mapuia lehkhabu dahna aṭangin ka zawng ṭan a, a vaia ka en chhuah hnuah pawh ka hmu lo a, a safe pakhat ka kalh tâk daih kha hawngin ka en leh a, a awm chuang lo. Kil tin ka dap hnuah pawh ka hmuh tâk ngang loh avangin ka beidawng titih a, ka zawng zui ta lo.

Thlamuana hian a u hna a khawih vek tawh a, Sawrkarah hna nghet nei lo mah se, business line na na na hi chu a thiam tih ka hria. A thawhna hlui bansanin a insawrbing dawn chu a ni a, a inhmeh lo ve chiang alawm.

Lengpui aṭanga an rawn let leh hnuah Thlamuana a chhuak leh nghal a, file chungchang pawh min zawt chuang lem lo, min be lo hrim hrim, a nu leh pa a rawn drop zuai a, a tlan chhuak leh daih kha a ni a, zanriah ei hunah pawh a lo haw bawk si lo. Ka nu leh pate nen chauhva dawhkan kîl ka huphurh hle. Va phone hmasak êm chu niin ka hre bik si lo a, rilru pangkhing deuhin zanriah ka kil ve ta a.

Ka nuin, "Zomuan, Mapuia safe chahbi khi i kawl em?" Tia min zawh thut chuan ka hamhaih viau. Ka rin loh lam daih a rawn sawi vang a ni pakhat.

"Aih..ka.. chutiang ka hmu lo.." tiin dâwt var ka sawi ve tawp. Hrilh ka tum lo hrim hrim, ka lakah rilru ṭha an pu lo tih ka hrechiang tawh êm a ni.

"Lo dap ngun deuh teh aw, thil en fel tur kan nei tlat," ka pain a ti a, "Aw le" ka ti ṭha mai.

"A unaute rilru hi i hmin pawh a ni thei, keini chuan i laka kan rilru puthmang kan la sawhsawn miah lo a nia," ka nuin a ti hmak hmak a, chhân dan tur hre lovin chaw ka bâr lui ngâwng ngâwng a, "Eng ber hi nge i la beisei...Bawngkawna a in sak saw nge..a pension nge...eng nge i duh a i rawn kîr leh chhan?" ka nuin a ti leh a, ka thin a rim ru ngawih ngawih tawh.

Ṭawng lova ka ngawih reng avang chuan a thinin a tuar lo nge, a chaw bar lohna lam a kut âwl chuan dawhkan a bêng pawp a, ka phu dâwrh, "I zia hi ka ngaithei lo," a ti leh a, Bawihpuia a ṭap zui si, ka chaw ei ka helh lo chauh, ka mittui a parawl ṭeuh a, ka ṭah chhuah vang nilovin chaw ka hmuam laklawh si a, ka hrawkah a tâng ni berin ka hria.

"Diki..." tiin zawite hian ka ko a, rang taka rawn thovin ka hnungah a chûm dat dat a, ka fapa ṭap ri nen thaw ava han veng lo tak. Chutih lai tak chuan Thlamuana a rawn lut a, kan awmdan a hmuh rual rualin hmalama ka awrh Bawihpuia chu eng mah sawi lovin a la sawk sawk a, ka thawl huai.

Chaw pawh bar zawm tawh lovin ka tho chhuak a, common bathroom-ah ka luak nghek, ka va han thi teuh ve le. Â.. thi pawh ni ila ka tan a nuam zawk daih ang. 

Bathroom aṭanga ka chhuah hnuah Thlamuana a rawn kal hnai a, chîk zeta min en chung hian, "I ṭha em? Eng tin nge an tih leh che," tiin min zawt hmiah. A nu leh pa pawh an awm ve renga a ṭawng an hre pha bawk.

"Anmahni saw zawt ta che.." ka lo ti thung. 

"Khawi, Bawihpuia kha.." tih leh a pawm lai chhuhsak ka rual a, "Chaw ei rawh, ka puar tawh," ti nghauhvin inchung lam ka pan chho ta a.

"Zomuani kha engtin nge in lo tih leh? Ka awm loh a pianga a laka sual in chhuah zel dawn chuan ka sawi ang khan ka awm dawn a nia, in fapa upa zawk in chân tawh a, kei ka awm loh leh chuan in duhthusam kha a hlawhtling har khawp ang," tia, Thlamuana'n a nu leh pa a hrilh lai chuan mittui nen kan room-ah ka pen lut ta a.

210123

Shadow of the life

B+>[BeckirafARenthleI]<+®®