19.KA CHANPUAL [A Becky Rafa Story]

19. KA CHAN PUAL

Ziaktu: Becky Rafa Renthlei

-B®®

(Recap)

"Khawi, Bawihpuia kha.." tih leh a pawm lai chhuhsak ka rual a, "Chaw ei rawh, ka puar tawh," ti nghauhvin inchung lam ka pan chho ta a.

"Zomuani kha engtin nge in lo tih leh? Ka awm loh a pianga a laka sual in chhuah zel dawn chuan ka sawi ang khan ka awm dawn a nia, in fapa upa zawk in chân tawh a, kei ka awm loh leh chuan in duhthusam kha a hlawhtling har khawp ang," tia, Thlamuana'n a nu leh pa a hrilh lai chuan mittui nen kan room-ah ka pen lut ta a.

-B®®

Ka nu Biakliani ṭawngkam, "Bawngkawna a in saw nge, a pension nge, eng nge in la duha in rawn kir leh?" Tih ringawt chu ka bengah a ri nawn tlut tlut a. Sualah pawh hian chin tâwk a awm ve.

A nihna takah chuan kan nufa mamawh leina tur chêng khat mah hi an kut aṭangin ka la dawng lo mai nilovin; a der tak ngial pawhin pêk chhin min la tum lo. U Mapuia leh a naute an fel êm zawk a, ka sawi kher ngai lovin ka mamawh ni-a an hriat an rawn lei mai ṭhin.

Bawihpuia khumah ka mut tîr a, bang thlang lam melhin ka en ngai ka en reng a, u Mapuia lehkha hnutchhiah ka ngaihtuah chhuah a piangin ka thin a rim thar leh ṭhin. Engvanga khatiang thu kha ziak nge a nih tih hi vawi tam ka inzâwt tawh a, a chhânna pawh a ngai bawk, 'Ka hre lo' tih tho a ni.

Atuni a awm tawh bawk si lo,  Thlamuana hian ka thlavang hauh ṭhin mah se; a nihna takah chuan kan inpawh lo êm êm a, ka hrehawmna han sawipui tur a tan ani kher hi chu ka thlang lo ve chiang si. 

U Atei pawh ka ngainain ka lakah a ṭha viau, mahse, a nu leh pa aia min ṭan thu awm hek suh, mal intihna leh mahni inkhawngaihna avangin ka mittui a hnâm a, u Mapuia nen fa kan lo nei hman hi pawi ka ti rum rum. Chu erawh Pathian pawi sawina a nih avangin ngaihtuah loh hrâm hrâm ka tum lui ve tlat. 

Ka fapa vang hian ka retheihna khua a sei dawn mang e. Ka ban phâkah hlimna a awm lo a, inthlahrung leh mitmei veng reng renga kum hnih tawp han awm leh chu ka mihring mihrinna aṭang hi chuan a harsa ve thlâwt a ni.

Chutia ngawi renga ka ṭhut tlawk tlawk lai chuan pên thawm a rawn awm a, banga sana intâr ka melh zauh a, zan dar kua a pel tawh. In chunga ka chhoh khan a la hma viau a, kan nufain kan ṭhu rei hle mai, hetiang te chuan ka â thei hialin a nia ka rin.

"Nano..." tia Thlamuana'n min koh chuan insiamremin a hmel ka hmuh theih nân ka dâk chhuak a, ngun leh chiang deuha min en chung hian, "A hrehawm viau em, ka sawi awmzia chu, kan ina chen hi hrehawm i ti viau em?" Tiin min zawt ta a.

"Hrehawm e, a hrehawm ngawih ngawih, i u khan min lo hmangaih ve ngai miah lo a nih ka ring," ṭap ṭeuh chunga ka chhânna avang chuan a ner sawk a. "Khatiang zawngin ngaihtuah mah ta che, ka awm hi.." a lo ti sup a.

"Awm mah la, nitin zantin min awmpui thei chuang hleinem, i awm loh kâr an châng emaw tih turin an ri phat zel a, min khawngaih la, khawngaih takin u Mapuia inah khan min dah lêt leh mai rawh, tun aia upa deuh leh puitling ve deuh chu ni ila, i nu pawh ka chhâng ve ngam ang; mahse, ka la naupang si a, keima nu aia upa daih han chhan fawl fawl kha a nuam bik si lo, â.. a harsa ka ti a ni." Ka ti tlang tawp.

Ka awmna lamah a rawn phei a, khum mawng lama ṭhu ka ni a, ani Bawihpuia mutna a lu lamah a ṭhu thung a, "Nichinah khan engtin nge an tih che, dik takin sawi rawh le," tiin min zawt a, ka sawi ang nge sawi lo ang tih ka ngaihtuah leh tê tê hnuah, Atuni a awm tawh si lo a, Thlamuana tal ka hrilh ve zel loh chuan ka ipik dawn lutuk hian ka hria a, a nu min ṭawngkhum dan kha ka sawi chhuak ta a.

"A nih leh ka û i rawn pan chhan dik tak hi han sawi teh, sum leh pâi vang a nih si loh chuan, a natna khatiang kha a ni a, tupawhin i luhkhung hi mak an ti alawm, i tan sawi a hrehawm loh chuan min hrilh ve ta che, dâwt tel ka ngaina lo aw..." a ti sup a.

"Ni e, u Mapuia ka luhkhungna chhan dik tak keima kâ aṭang ngeia i hriat hi a hun tawh a ni," tiin, ka ṭhut dan ka siam rem tê tê a. 

"I û ka lo pan nachhan hi chu ka râi vang ni lovin khatih lai khan u Atei'n a dinhmun a ṭhat loh thu min hrilh avang leh rang taka lokal turin min rawn chah a, ka naupai thu ka u Ropuia ka lo hrilh hriat hman tawh avangin a rûk tak meuhin ka u nen kan rawn kal a, chêng khat mah kei phei chuan ka nei lo," tiin ka insut hraih a, ṭawng miah lovin ka thusawi ngun deuh hian a ngaithla a.

"Sawi zawm leh rawh.." a ti sup ringawt.

"Luhkhung tura lokal sa ka ni lo a, a natna dik tak min hrilh ve loh avang leh chhan mumal awm lo a, inṭhen a duh vang khan kan inṭhen chhan leh min ṭhen a tum chhan hriat ve phu ka intih vangin hmaichhana biak ka tum ta a, ani chuan naute enkawlna tur min peka amaha a natna tawrh kha a thlang a, Aizawl kan rawn thleng a, Chuap Cancer a ni tih ka hre ta chauh." Tiin ka thaw halh a, ka ngawi zui ta rih a.

"A nih leh kan ina awm tur hian a sâwm che em, naute titla turin a ti che em ka u khan?" Tia min zawh leh chuan, "Engmah chutiang a awm lo, nautê nen kan inenkawlna tur min pek a inhuama min hmangaih thu leh a natna avanga kan inṭhen a ṭhat thu chauh a sawi. Mahse, a hrehawm lai ber leh hun harsa amaha paltlang tir ai chuan tiin eng pawh huamin in inah ka awm lui ta a ni, pawisa ka nei lo a, ka thisen zawm te'n min kalsan ta bawk a, u Atei leh ka u in singkhat ve ve min pe a, tikhan ka awm ve tawp, u Mapuia sum leh pai duh ni ila a thih hmain ka dîl ang, min pe ngei bawkin ka ring, ka hmangaihna khan a hausakna a en lo a, a fâ hmel a hmuh ve theih nan leh hlim taka a hun tawp a hman ve theih nan chauha a hnen pan ka ni," tiin ka mittui tla chu ka hru nawk nawk a. 

"Mama khan cheng khat mah a pe lo che maw?" Ngaihtuah mûk hmel taka tiin min en vung vung a.

"Ka mamawh amahin min lei sak a, nangmah nen kan bazar ni khan bazarna tur min pe a, chuan Delhi-ah Atuni nen a card min ken tir bawk. Ka pe lêt leh nghal a," tia ka ṭawng lai chuan Bawihpuia a rawn harh ta si a, a hnute hnek tur siamsak ka tum chuan, "Keiman ka'n siam ang e," tih leh thawh a rual a, ka che chhuak ta lo.

Amah vekin a buaipui hnuah, "Mama nen kum engzat nge in inzui?" Tiin min zawt daih a.

"Class 12 ka zir laiin kan inngaizawng a, tunah kum 22 ka ni a, chhut ve mai rawh," ka lo ti a.

"Atuni nen inbazar ṭuma lukhum min leisakna pawisa kha Mama ta tho a ni maw?" Tia a nuih chuan, "Kei chuan eng mah ka nei ve hleinem, mahse..." tiin ka ngawi daih a...

"Mahse...eng nge..sawi zo law law la," tih pahin min rawn en leh a, "A result kimchang kan hriat a, nangmah nen kan haw tlai avanga min hrem ṭum khan, a thinrimin pawisa khumah a theh thla a, Delhi kan awm chhung hian hmang zo vek ang che, i daih loh chuan Thlamuana dil belh rawh, thinrim chunga tiin min chhuahsan a, khami pawisa kha Atuni'n ka account-ah min dahsak vek a, u Mapuia pek let ka tum khan a duh ta si lo a, chumi chu ka dah ṭha," tiin dik takin ka hrilh fai ta vek a, mit zim sun leh hmai tuai puat chung hian, "Chuvang chu a ni maw indan i tum?" Tiin min zawt leh a.

"Ni lo e, hna ka zawng ve ang, ka graduate tawha ka thawh awm tawk chu ka hmuh ve mai ka ring, in luah man chawi lova kan awm chuan kan nufa ei khawp chu ka thawk chhuak ve thei maiin ka ring bawk, chuvangin, min khawngaih la, i u lehkha ziah midangin an hre chuang lova, min kal tîr mai rawh," ka ti ta a.

"Midangin an hriat loh vang hian alawm i la chen a ngaih, hrehawm tuar hmasa lovin nawmna a neih theih loh a, hetah kum hnih i awm tlin hunah zalen takin hnathawh hah lutuk pawh ngai lovin Mama thawhchhuahsa ringin inkhawsa dawn a lawm.." a lo ti daih.

Rang fahran hian, "I nu leh pa bula awm ai chuan rethei taka ka fapa enkawl pawh ka thlang zawk, an duh leh u Mapuia in leh pawisa chu nei mah se ka pawiti lo..îtna ka nei lo.." ka lo ti zung zung a, nui suk chung hian, "A ngaihtuah tâwi thlak em mai," a ti duh lek.

"Ngaihtuah tawi vang a ni lo aw..an duh duha 'i pasal tak pawh a ni lo, dan anga i neih a ni lo a, man leh mual inhlan in ni hek lo, engmah Mapuia hnen aṭangin chan ve tur i nei lo' tia min ṭawngkhumna dawnsawn reng ai chuan mahnia tâl hran ka duh zawk," ka ti nghat nghat a. Hetia engkim a bula ka sawi hian ka thâwl huai, ani leh ni lo angin a ngaithla uluk vei phian lehnghal a... 

"An sawi dik vek, amaherawh chu, ka û kha i hmangaih tak tak a nih chuan a thih dawna a thuziak hi i zahsak ve turah ka ngai." a ti daih a. Ka va hrilhhai si e.

"Thlamuan.." ka ti chhuak hliai a.

"Umn..." ti dútin min rawn en a.

"Hnathawh tur min zawnpui la..." ka ti ta a.

"A teuh lo lutuk..i mumangah pawh chutiang chu sawi tawh reng reng suh," a'n tiah. Ava buaithlak e.

Chumi hnu chuan khum thawhsanin, "Ka intleuh zuai ang a, khumah hian mu rawh, hmun danga insawn chhuah tih vel kha chu theihnghilh la, keimahah rinna nghat ngam ang che, i zir ngang lova i dik lohna a nih loh chuan ka thutiamah dingin i lam ka ṭang zêl dawn alawm," tiin ama room lamah a phei ta a, zanin chu riahpuitu ka nei dawn lo a va ang si ve.

Thlamuana-ah hian eng emaw riau ka sawi fiah thiam siloh hi a awm a, eng nge a nih chu ka hre lo.

A hnu lawkah towel bih ṭât chung leh kawr pawh ha lo hian a rawn lut leh a, ka lo en hû ringawt. 

"Hetah ka inbual dawn..." tih leh bathroom lam pan a rual a, a eng chu hria nimaw! Hetia thawmhnaw inbel mumal lova hmuh hmuh hi nuam ka ti lo, ka zak tlat. Ani lah hian eng teh vakah a ngaih loh hmel thei si a, min pal liam mai mai a ni ber.

A inbual chhungin mut kawr ka lo inbel ve thung a, pindan pakhat kan inṭâwm a ni ringawt alawm maw le. Ama room-ah inbual ve law law mai tur a nia.

Khuma ka lawn vek tawh hnuah a rawn chhuak a, mut dawn dawnah a lu a'n su leh rih bawk a, a va dangdai thei tak.

Keimah pawh min en chuang lo hian, "Hair dryer i nei em?" Tiin min zawt a. 

Ka neih loh thu ka hrilh chuan dressing table lamah a phei a, drawer pawt hawngin a va en leh hrâm.

"I nei lo tak tak elaw?" tih pahin min rawn en a, "Aw, nei lo, eng mah ka nei lo, i lo hriat ve mai mai atan, in ina ka lo luh khan ka thawmhnaw tlemte bâk luhpui ka nei lo tih ka sawi tawh kha, a bâk hi chu u Mapuia ka ring fai vek," ka lo ti sawk sawk a.

"A nih chu..." ti hmukin a chhuak leh nulh a, ama room lam panin a phei tain ka hria. Kei pawh Bawihpuia kuah chung hian ka mu ve ta a.

Thlamuana rawn lêt leh lai pawh hre lo khawpin ka lo mutui a ni ang, ka harh leh chuan zinglam dar thum a ri ṭep a, khum sîr teah ka mu a, ka fapa leh apatea couch ah an lo mu a, an muhil lo emaw tiin va lâk tum hian ka tho chhuak a;mahse, an mu tui ngang mai, a ṭap anga ka harh si loh avangin a pawm a nih ka ring ta zawk a, keimah chauhin ka mu leh ta a, ka lâksak duh ta lo law law, a harh leh chuan a buaithlak tam mai mai.

"Novi...tho rawh le," tiin Thlamuana'n min rawn sawi a, ka mit a thial ûrh. Dâr nga dawnah ka muhil leh chauh kha a ni a, tunah dâr sarih a ri dêk dêk chauh a ni.

"Ka mut a la chhuak asin.." ti chungin ka ham bái bái a.

"Diki zuk pui la, Bawihpuia ka lo awmpui ang, chuan a inthlakna tur dah chhuak sa rawh aw," a ti zung zung a, a eng chu hria ni maw!

A sawi ang chuan ka ti ve ta tho a, dik tak chuan Thlamuana bula ka fapa a awm tawh chuan ka ngaih a ṭha. A la tê viau nain tlangval tiha awihawm loh khawpin a khawih zei a, ka tluk lo hrim hrim.

Diki nen eirawng kan bawl ta a, ka nu a rawn tho chhuak a, thingpui chhuang tura min tirh hnuah, "Zomuan, bawihpuia vawiinah kan lo awm ang a, Thlatea nen bazarah kal ang che u," a ti a, nelawm taka ṭawng ni lo mah se, a hmaa min biak dan ngaihtuah chuan a ṭha vek e.

"Thlamuana nen kan bazar ang maw?" Ka lo ti hû a.

"Thlamuan ti lawl lawl zel suh, nang aia û daih a ni a, û tawh ang che," a ti leh hluk hluk a, kei lah chuan, "Ka koh dan ka thlâk thiam tawh lo, Thlamuana a ni tawp mai," ka lo ti ve tlat a, rum deuha min melhin eng mah phei chu a sawi zui tawh lo.

Tûkṭhuan kan ei laiin, Thlamuana'n, "Nano, chhuak ve lawk ila, ka nu leh Diki'n bawihpuia hi lo awm mai rawh se aw," dam thluamin a ti a, a hmain ka nuin a lo sawi lawk tawh avangin ka lo bu nghat a. Eng ti turin nge kan chhuah dawn tih pawh ka zawt hran chuang lo.

Ka pa zawkin, "Thlate, Zomuani pawh a duhzawng te rawn en sak la, kha, hei hi hmang rawh u," tiin pawisa Thlamuana kutah a pe a, tukin hi eng nge an hriat le. An khawsak phung a mak tlat. An fapa hian ka hriat lohvin a lo titipui a nih ka ring ta ber. Pawisa te hial hman tur min pe ve a nia, â...mumangte pawh a ang dawn dawn alawm.

Chumi hnu chuan kan room-ah kan inzui chho a, bawihpuia pawh a pi Sakawlhi'n a puak ve tâk kha. A vawikhat puakna a ni bawk a, kan chhoh hmain hnute siam dan tur leh a zât ka hrilh a, a ngaithla uluk vei fû. 

Kawr fual khup chen vel, a dum leh vara pâr inbelin converse dum leh var tho ka inthawlh a, Aizawla ka phei hnu hian ka sam vawikhat mah ka cut tawh loh a vangin a sei tawh angreng, dressing table hmaah dingin ka lo khuih dalh dalh a, Thlamuana pawh insiam peih sa apin a rawn lut a.

"I inpeih tawh em?" Tia min zawtin min thlêk vung vung a, ner zui suk chung hian, "Inthlak leh rawh, kekawr hâk tur i nei lo em ni?" A ti ta a.

"Nei lo, ka rai avang khan kekawr ka ha peih lo a," ka ti sap a.

"Khatiang te chuan naupang i ang em mai i tê bawk si," nui kur kur chunga tiin ka dinna lamah a rawn phei a.

"Thlamuan, i ninawm aw.. min zahpui leh ka kal ve lo mai ang," ka ti vin hlar a, a nui nasa zual sauh.

"Ka zahpui che ka tih loh kha, naupang nen kan bazar dawn a va nih hmel ve," ti leh hrâmin ka hnungah a rawn ding a, "Kan haw hunah i sam hi ka cut ang," a ti leh daih a, a va hneawm tak.

Kekawr hâk tur incheina tlâk ka nei miau si lova kan inah kha chuan ka nei, ka keng lo a tihian ka awm vel ta mai mai a nih ber hi.

In hnuaiah kan inzui thla a, Dikin Thlamuana a melh zuk a, a kuta min hûi zauhin min rawn din hnaih a, "Thlamuana hmelṭhat zia hi, in inhmeh lutuk," a'n tiah. Midang chuan an hre pha lo ang.

"I â siah..." tih pahin ka chhuak ve ta a. Ka nuin an room-ah bawihpuia a awmpui a niang an hmel ka hmu lo.

Ama car keng lovin u Mapuia Bolero a rawn khalh chhuak a, a sam pawh a chhipah a ṭawn fel leh thlap tawh a, shirt var leh Denim kekawr a ha a, Nike running shoe a var a bun bawk a, en thuak pawhin a fai hmel ngawih ngawih.

"Ka inpeih a nia," tia rawn dãk chhuakin ka ṭhutna tur passenger seat lam a rawn hawng zui nghal a, îhe lovin ka chuang ve ta a, a'n rimtui leh mai mai khawp a.. u Mapuia ka hrechhuak vang vang. 

Ni e, ngaihtuah loh ka tum pawhin ka mitthlâah a lo lang zel si a, a motor-ah a nau nen kan chuang a, Thlamuana kuta min dah ringawt hi hriatthiam a har ve êm asin. Ani lah hian a hmaa min mil lohna kha dah ṭhain min ngaihsak em em a, awm dan thiam a har.

A hmasaberin furniture zawrhna dawrah min luhpui a, min râwn der eih lo hian khum a lei a, tu ta tur nge tih ka zawh chuan, "Mama khum kan thlak ang, a dang pawh kan thlâk vek dawn," a ti ta mai.

"Keimah vang a nih chuan a ngai lo a nia aw.." ka lo ti thuai a.

"Naupang nena mut nan chuan a zim lutuk, bakah i tan pawh hmuh reng a hrehawm," a ti leh tawp a. U Mapuia khum kha 5/6Ft a ni a, a zîm lo hrim hrim, keini nufa mut nan a lian mah mah zawk.

Ready made khum 6Ft a lei hmiah a, dawr nghaktu hnenah kan in awmna lai a hrilh a, dah nghal turin a ti zui bawk. Lo sawi ve tur eih ka nei lo. 

Chumi hnu chuan Parda min thlan tîr ve thung a, "A ngai lo, engmah thlak danglam a ngai lo aw, a hautak mai mai," tia ka lo hnial vena te chu engah mah ngai lovin, "I duhzawng i thlan dawn loh chuan ka thlang ang, i phunnawi leh vaih si chuan," ti chunga parda a enkual tâkah chuan ka thlang ve ta nge nge a. 

A bâk chu e, ka sawi thui peih tawh lo. Ka thawmhnaw inbel tur eng emaw zat enin min kal kualpui leh a, kekawr paruk vel min hak chhin tir a, ka ning lutuk hi ka luak te a chhuak hlûi tawh. Pheikhawk leh kawr nen lam ka duhzawng pawh ni lo ama duhzawng vek a la hmiah hmiah a, "Ka enkawlna hnuaia awm tawh tur i ni a, i mamawh pawh keiman ka hria," a ti hmiah.

"Bawihpuia thawmhnaw kan en ve dawn em?" Tia ka zawh chuan, "A la tê em mai, mamawh a la ngah rih lo, thla thum a tlin hunah kan en dawn nia," a ti leh lawi a. 

Vawiina kan chhuak ve chu keima pualin a ni ringawt, hair dryer leh lotion te, â.. a lei kim lutuka ka hre seng lo, darkar li zet hun kan khawhral hnuah, "Thil ei pahin MC ah lut lawk ang," a la ti nia. Êm êm hian a.

"Hey, Thlate...helamah i awm elaw?" tiin hmeichhe pakhat hian kan dinna lam a rawn pan a, a sângin a ngo vang a, kum 30 bawr vel a nih duh hmel..

"Aw, hetah ka awm nghet tawh dawn, nang zawk?" Tiin chu nu chu a zawt let a, "Kei pawh kâr hmasa khan ka rawn haw alawm, i lo la leng dawn nia," tih pahin min rawn en ta a, min en chîk mah mah, "I nau ka tih dawn chuan a ni chiahin ka hre si lo a, tunge a?" Tiin Thlamuana a zawt ta a.

"Zomuani a nih hi, a room siksawisak kan tum a, kan bazar a..." tia a chhânna avang chuan chu nu chu a meng phar âwk a, "Novi, Zodini a nih hi, ka classmate hlui.." tia min hrilh chuan ka nui sak a, biak erawh ka be lo.

Zodini bawk chuan, "Innu maw?" A ti leh a.

"Aw, kan nu tur a nih hi..." tiin Thlamuana'n zuk chhâng a, ka lo ner ru nasa mai. "Ka ni lo" tia lo sawi mai ka duh a, "En teh...ka..." ka ti hman ṭâwk tihah, "Kan kalsan ang che, lei tur a la tam si a," tih leh ka kut vawn a rual a, Zodini hmela mak tihna rawn lang kha ka hmu reng, nuam ka va han ti lo tak.

A hnu daihah, "Eng nge khatianga i chhân kher a?" Tiin ka chhuahchhal ta a.

"A ho...Mama nupui kawl a nia, Mama a thi tawh si a.. ka ti dawn em ni?" a ti nghut a.

"Ka nau ti ta mai che," ka lo ti ve hlar a.

"Ka nau i ni si lo alawm, ka u nupui kawl i ni a, ka nau chu i ni lo.." ti leh nghutin min vawnna a thlah a, dawr pakhatah min luhsan daih. A va han ngeiawm tak.

Ka zui lut ve ta tho a. Tun ṭum chu ama thil tur a lei ve ta mial, "Novi...a ṭha em?" Tiin min en tir zel a, tum loh deuhin ka thlansak ve nual tak hi. A thinrim rei theih loh a bulah hi chuan.

A phone a rawn ri a, "Aw, ka room-ah sawn phei vek rawh se, kan lo haw hunah ka lo chingfel ang," tiin a chhâng a, a nu emaw a pa emaw a bia tih ka hre mai.

"Bawihpuia ka ngaihtuah tawh em mai, haw tawh mai ang," tiin kan thil eina man pe tura a tho chhuak chu ka be ding leh rih a, "Kan haw ṭêp, ka nu leh Diki an awm alawm, a ngaihtuahawm lovang," ti puat chung hian a kal sawn ta a, a ngaih te hi a sam si a, ka kham leh thut zel.

"Phone ka hman chhungin saw lai dawrah sawn i mamawh tur shampoo tih vel va lei ta che, chumi zawhah kan haw tawh dawn nia, ka nu khan chawhmeh lei ngai a rawn sawi bawk si a," tiin ka kutah pawisa min hmehbel a, a dik a dik chuan a ngaihtuah kim ve chiang alawm. Atuni nen an awm dun rei tawha hmeichhe mamawh leh bazar tih velah a ngaihtuahawm loh. A mize dang ka hriat belh leh ka ti mai.

A thu awihin shampoo leh bathroom-a kan mamawh tur ang ka lei ve ta a, kan inpeih meuh chuan chawhnu dâr hnih a pel tawh. A pi bulah awm mah se ka fapa ka ngaihtuah ngawih ngawih tawh a, ka rilru a hmanhmawh takzet.

Chawhmeh kan lei leh zuai zuai a, amahin a enin a lei vek a, a hnungah ka zui ve dat dat a, a hmel hriat te'n an lo be khawtlai ve leh zauh zel bawk a, 'Tu nge' tia keima chungchâng an zawh pawhin, "Zomuani" tih chiah a sawi ta. Nichina ka khak vang tepawh a ni mahna.

Ka nuin min ânkhum leh inring ranin ka lut a, mahse, a teuh lo. "Zomuan, vawiin chu a nuam em, ka rin aiin in inpeih hma," a lo ti a, ka hamhaih letling zawk.

"Thlamuana'n lei tur a hre lutuka pawisa kan hmang nual," inthlahrung ru takin ka ti a. 

Nui chung hian, "Ani te chu a dan a lawm, thil a lei ve zen zen ngai lo a, a kal ve chhunah chuan a khati ziah," dam thlapin a ti leh a. Bawihpuia a la paw ngat ngat a ni ang, ''Ka bual laiin a ṭap duh malêk a, Mapuia nausen lai aiin Thlatea a ang zawk tlat, an sam te hi i lo hmu em, a patea a chhun êm a nih hi," a ti zui bawrh bawrh a, ka nui ve tawp.

"Han intifel ula, nidanga khawih leh ngai lovin Thlatea nen ti law law rawh u, Atei ko chho ula induh leh," a la ti tak deuh deuh nia.

U Mapuia room-ah Thlamuana nen kan awm a, a khum hlui kha fix a nih loh avangin a ṭhiat vek a, keiin parda hlui ka lo hlip ve bawk a, engmah ka sawi buai lo, sawi sawiin awmzia a nei lo tih ka hria a, a lehlamah u Mapuia nena kan mut ṭhinna khum hmuh reng te kha a hrehawmna chin a awm ve a, kum hnih chhung ka la chêng ve dawn a nih si chuan hmalam pana rilru nei taka ka awm a ngai, amah ka theihnghilh ta tihna a ni lo. Lalnunfîma ka neih chhung hi chuan a pa ka theihnghilh ngai dawn lo tih ka inhria. Ka hmangaih hmasak ber mipa âiawh turin tu mipa dang mah ka mamawh lo e.

Khum húnna chenin a ti danglam vek a, kan inbe em em lo nain puih a ngaih hunah min ko leh tawp a, "Novi..." tia min lo koh leh chuan inhnuaia chhuk tumin kawngka ka thleng tawh a, ka va hawi lêt a, "Eng nge?" Ka lo ti a.

"Dunlop kan lei reng reng lo, engtin nge ni ang, kan va kal leh zuai dawn em ni?" A ti ta a. 

"Nangmahin i kal hreh em?" Tiin ka zawt a, "Hreh e, keimaha kal ai chuan kal loh a ni mai," a ti hmuk. 

"A nih leh lokal rawh, a tlai tak tak hmain," ka ti ve ta zawk a, a thawmhnaw inbel ngai nen, kei pawh inthlâk tawh chuang lovin kan inzui thla leh ta a.

Ka nu hnenah kan chhuah leh tur thu a hrilh a, ka va inthlahrung tawh tak. Mahse, "Rei lo ula, kan tlai lutuk ang e, zaninah i pa nen Zonuamah kal kan ngai a nia," a lo ti sam êt a, kan inzui chhuak leh ta.

U Mapuia kha an hmangaiha an duat a, a han awm lo chiah chu Thlamuana thu an hnial ngam meuh tawh lo a ang, u Mapuia sawi aiin a thu a tlang a, ka tan pawh a hahdam thlakna lai a awm tho.

Chanmari lamah kan inphur phei a, lei duhna dawr bik ka neih leh neih loh min zawt a, ka neih loh thuin ka chhâng a, ama duhna hmunah min hruai a, awlsam tein duh ka thlang fel thuai a, kan lei zo chu a ni der. Ka duh zawng ka sawi ve chhun a ngaipawimawhin min hnial ngai miah lo hi a fel vena tak a ni bawk.

Chutia dawr kawta kan lo din lai chuan ka hmingin tu emaw hian min rawn ko a, ka hawikuala min kotu ka hmu mai bawk si lo, Bolero-a ka lut tur chu ka darah mipakhatin min rawn chelh a, lut ta mai lo chuan tunge tih hriat tumin ka inher ta a. AuMami nen hnai setsawtah kan inmelh chiang teh e.

Ka hmuh hnuhnun ber ai khan a lo chêr ta deuh a, a hmel erawh a ṭhat ngai rengin a la ṭha a, "Nano, inbe lawk ang," a tih mêk laiin Thlamuana'n min lo ko ve chiah bawk si a. "AuMam...'' ka ti chhuak sap a, sawi ber tur pawh ka hre lo.

"Novi...i la hman lo em ni?" Tih pahin, Thlamuana kan bulah a rawn ding a, keini pahnih ṭawng lova lo ding ngawi reng chu min melh tawn a, "Tu nge a, i ṭhiannu em ni?" Tiin auMami a melh a, ani pawh chuan Thlamuana chu ngun fe hian a lo en bawk a.

"Eng lo..auMami a nih hi.." zawitea ka tawng chuan, "Zomuanzual, Mapuia awm lohna pawh hun rei lote chauh a la ni a, mipa dang i kawp lehnghal amaw?" Tiin Thlamuana chu ei lo tih hriat deuh hian a ner khum nak a, a sual a chhuah leh dawn a va ang ve.

AuMami lam hawiin Thlamuana chuan, "Tunge i nih a, khatianga Novi ṭawngkhum tur khan a eng nge i nih?" A ti nghut a, ka u lah chuan, "Ka nau a nih hi, Zomuanzuali hi ka nau aw.. tunge i nih zawk?" A ti ve kha kha a, hrehawm ka lo ti ru lutuk.

"Novi hian unau hmeichhia a nei lo," Thlamuana bawkin a ti leh nghut a.

"Novi a..?" Ti hliaiin auMami a nui lui ngial a, Thlamuana ngaihdan a ni lo a ni ang, "Novi hian Ropuia bâk chhungte a nei lo," tiin ka bânah a rawn vuan a, "Lokal rawh le, Bawihpuia hnute hnek tur lei kan la ngaih kha," tiin min kal sawn pui ta a, auMami hrilhhai hmel chu a khawngaihthlak zawk.

Nia, u Mapuia a hrechianga a unaute a hrechiang lo tih ka hria, Atuni leh Atei chu a hmu tawh a, Thlamuana hi a la hmuin a hriat ka ring lo. Ṭha taka inzawh fiah hmasak pawh awm lovin tikhan min han ṭawngkhum nghal ringawt a, a nau ang te khan min la sawi ve zui a, a hmaa min ṭawngkhum tawh dan ka ngaihtuah lêt phei chuan ka vin hrep lo kha a mak zawk.

Kan haw leh lamah pawh a ngawi ngul a, biak a huphurhawm ngawih ngawih tawh. 

"Kha nu kha tu maw a nih a?" Tiin min zawt nawn hmuk a.

"AuMami..ka u chiah a nih kha.." tia ka chhân chuan a thaw hawk a, "Vawikhat dang ka sawi leh ang, Ropuia bak chhungte i nei lo aw, hmun danga i hmu a, an biak che pawhin haider zel tawh ang che, in inzawmna an chhu chat tawh a, nghet taka din ve tur, rilru nêp deuh put loh tur ka tih tawh kha.." dam deuh zawkin a ti ta a. Ka ngawi reng.

In kan thleng a, ka nuin zanriah ei hmasak a rawt tâk avangin bawihpuia ka lâksak a, an inawm nilêng ve ṭhak chu a ni a, a lawmawm dangdai ve hrim hrim.

Thlamuana erawh kan room lamah a la ri bur bur a, nichina auMami nen kan inbiak aṭang khan a mood a inthlak hlauh. 

Kan rualin chaw pawh a ei lo a, ka kham hnu fêah Diki'n a han ko a, a rawn chhuk ve hrâm, hmalama nau awrh chungin Atuni room-ah ka awi a, a ngaihawm ka ti thar hle, a chhuk hnuah vawi thum vel chu kan inbe ve tawh; a chawlh rei êm avang khan a hna lamah a buaia hunawl a nei meuh lo a nih ka ring.

An sawi lâwk tawh angin ka nu leh pa pawh zanriah ei kham hnu lawkah Zonuama kal turin an chhuak a, Atuni room aṭangin ka chhuak ve ta a, ka fapa pawh a muhil tawh. Thlamuana khan 'Nan' case khat a lei haw a, "A zawh dawnah i sawi leh mai dawn nia," tiin kan room-ah a chawi chho nghal daih.

Thawh chhuah engmah ka nei si lo a, nau no pawm ka nih angin ka thâ a tlêm ve bawk nen a inthlahrunawm ve det ṭhin.

Kan room chhuat Dikin a lo nawt vek tawh a, engkim a thar sur mai. U Mapuia nena kan thlalak khum bul dawhkana ka dah ṭhin kha ka hmuh tâk loh avangin Diki hnenah a awmna ka zawt a, a hriat loh thuin min lo chhang bawk si. 

Tukinah pawh a la awm chiang ngei tih ka hriat avangin Thlamuana zawt turin a room lamah ka phei a, kawr ha lo bawkin a lo ding leh tawh, inbual tur niawm takin towel a bât bawk a, "I u nena kan thlalak dawhkana ka târ kha i lo hmu em?" Tia dam thlapa ka zawh chuan, en pawh min en lo hian, "Ka dah bo tawh.." a lo ti hmuk.

"Eng a, eng maw i sawi?" Vin lutuka ka ṭawng tâkah chuan min rawn en a, ngaihno bei lo zet hian, "Ani chu a thi tawh, rilru thar i put a hun tawh a, i hmuh phâkah a thlalak dah tawh suh, i theihnghilh thei lo a nih pawhin i thinlung khan hria sela a hmel mitthla mai rawh," tiin, bathroom lam a pan a, ka dawhtheihnain a tlin ta lo.

"Lalthlamuan leh...khatiang thu kha i sawi leh chuan i châk lo ang, rawn dah chhuak rang rawh thlalak kha..." ka ti ve ta phiar phiar a, thlakhat emaw lek a liama min control fai vek a tum hi ka lawm lo lutuk tlat.

"Bengchheng vak vak zel suh, nau i puak kha," a ti duh lek. 

"Ka dahna ngaiah chiah Frame kha rawn dah ang che," tih chiah ka sawi, thinrim zetin ka chhuahsan ta a, ka thaw a sa phat hman alawm le.

Khumah ka ṭhu tum bûr a, ka la intifai bawk si lo a, bawihpuia pawh khumah mut chuang lovin ka la awrh a, ka phone a rawn rîk pawh chuan ngaihsak duh lovin ka ṭhut ngai rengin ka la ṭhu a, vawiin kan hun hman dan kha a hrehawm hran lo. Kan inngeih ve dawn ṭan chiah a, kan heti leh si, ka hah hluah hluah.

Vawi li zet ka phone a rik tâkah chuan ka ban ve ta hrâm a, number lawng a ni a, a tu chu ni maw!?

"Hello.." ka ti sap a.

"Mate, lo insiam la, kan rualin haw ang che aw, kha inah khan engmah tih tur i nei lo a nia, amah Mapuia ber a awm tawh lo bawk nen inrem a hun tawh e," tia dam thliama ka nu a rawn ṭawng chuan ka ngawi ta rauh rauh a.

"Ka ṭawng i hre thei em?" Lehlam aṭang chuan a rawn ti leh a.

"Tunah khawiah nge in awm?" Tiin ka zawt a.

Aizawla an awm thu leh auMami in check-up a huna an hruai tih a rawn sawi a, u Ropuia nen kan inbiak khât deuh avangin engmah ka lo hre lo chu niin.

"Mate, i fapa pawh kan enkawlpui ang che, ka fanu i la ni reng a nia," ṭap lek lek a, a rawn ṭawng leh tâkah chuan, "Nu...ka lo haw thei tawh hleinem.. bawihpuia.." tia ka sawi zawh hmain Thlamuana a rawn lut a, ka ṭawng zawm ngam ta lo.

"Mate, Zomuan, i pa pawh a dam a ṭha lo a, nangmah ngaihtuah reng rengin a hun a hmang a, lo haw rawh aw.." tiin a ṭawng zawm leh a, "Maw? Ka pa maw?" Ka ti chhuak sap a, chu veleh Thlamuana a rawn phei fua a, ka phone ken lai min phihthlaksakin thlanglam bang vawm nan a hmang ta a. 

A vawmna thawkhat a ni ang, chhuatah a tla darh chuai a! Ka fapa a rawn ṭap chhuak ta a; mitmeng rum úla min en chung hian, "Ka sawi tam tawk tawhin ka hria," ti sup chung hian, hmalama ka nau awrh chu rawn banin a suihna rang fahran hian a pawt phelh a, nghet takin ka fapa ka kuah tlat thung, "Lungleiah chuan kal rawh le, i fapa tel lovin kal ang che," a ti ta hmiah mai le.

"Thlamuan!?" Ka ti lawi rât a.

"Lalnunfima tel lo hian chhuak ang che, ka enkawl thei tih ka sawi tawh kha," a sawi zawh rualin ka fapa chu a la sawn hmak a, a ṭap nasa si, a khawsak dan pawisak nei lo lutuk chu ka hlauh êm avangin ka ding ngawi reng a.

"Kal ta che, Zomuanzual...ka thusawi eng atan maha ngai lotu chu ka zah der a ṭulna ka hre lo, kal ngei ngei ang che," ti nghut nghut chungin ka fapa pawm chung hian a chhuak ta a, a chhuah pahin kawngkhar a rawn nam khar ṭhuai a, ka lo phu dâwrh.

Ka thin a phu dawt dawt a, ka fapa ṭap ri hre mahila che chhuak tur ka awm lo. Chhuata ka phone tla darh nuai chu ka melh ngawt ngawt a, hrehawm tih luat avang leh rilru nat lutuk vangin ka biangah mittui a rawn luang a, ka thiam loh nge Thlamuana zawk thiam lo tih pawh ka hre tawh lo.

Ni e, vawi tam ka chhungte be tawh lo turin min hrilh a, ani chuan ka laka a mawhphurhna hlen chhuah tumin ka lakah ṭhat a chhuah lo vem ni? Kei lahin a thusawi ka lo zawm bik si lo a, Thlamuana hian ka fapa a duat zia hrechiangtu ka ni. 

Ka fapa, a û fa vangin min dawhin min ngaihsak hram hram a, a nu ka nihna min zahsak tih ka hria, a thin butut a'n chhuah meuh chuan ka ngam lo nasa si a, ka thiam loh vek a ni. 

Min tuithlar tawhtu te ka la hnaih a, an biak pawh theihin ka la awm bawk a, Thlamuana tana a tha nat thlâk dan tur lam ka lo chhût tel lo atin ni.

Engkim hi keima thiam loh vek... 

Ka mittui hru hul sawk sawkin Thlamuana room lam panin ka chhuak ve ta tawp a. 

Ani mi lunglian leh ngawhngawl lutuk khan ka fapa tel lova min chhuah tîr a tum tak tak a nih vaih chuan, ka thi thei hialin a nia ka rin.

Ngaihdam ka dil ang nge, engtin nge ka va tih tak ang?

'Lalpa, min pui hram rawh.." tiin ka phun chhuak sap a...

230123

Shadow of the life

B+>[BeckirafARenthleI]<+®®