20.KA CHANPUAL [A Becky Rafa Story]

20. KA CHANPUAL

Ziaktu: Becky Rafa Renthlei

-B®®

(Recap)

Min tuithlar tawhtu te ka la hnaih a, an biak pawh theihin ka la awm bawk a, Thlamuana tana a tha nat thlâk dan tur lam ka lo chhût tel lo atin ni.

Engkim hi keima thiam loh vek... 

Ka mittui hru hul sawk sawkin Thlamuana room lam panin ka chhuak ve ta tawp a. 

Ani mi lunglian leh ngawhngawl lutuk khan ka fapa tel lova min chhuah tîr a tum tak tak a nih vaih chuan, ka thi thei hialin a nia ka rin.

Ngaihdam ka dil ang nge, engtin nge ka va tih tâk ang?

'Lalpa, min pui hram rawh.." tiin ka phun chhuak sap a...

&&&

Thlamuana room kawngkhar ka nam a, chhunglamah a lo inkalh tlat bawk si. Vawi tam ka koh hnuah pawh min chhângtu an awm lo a, ka ṭah a chhuak ngawih ngawih a, min ṭantu ve ber a ni a, ani lung ka ti-áwi lo leh zel a nih chuan a nu leh pa nen min do rawn ang a, ka fapa ka chân ngei dawn tih ka hria.

"Thlamuan, kawngkhar hi lo hawng teh.." tiin ka chûm leh dat dat a, ka thâwm hriain Diki a rawn chho ve ta, pawr phanga ka lo ding chu min enin, "I va bengchheng em em ve, i nu leh pa an lo haw ṭep ang, thawm dim ve la," a rawn ti a.

"Kan inhnial deuh alawm, Bawihpuia a room-ah a luhpui daih a nia," ṭap lek leka ka tih chuan min khawngaih tih hriat takin, "A luhlul em mai, a hawng duh chuang lovang," a ti nghal tawp. Kei aiin a zia a hrechiang zawk a, a sawi dik ngei pawhin ka ring.

"Diki, engtin nge ka tih ang le, ka fapa tel lo chuan ka haw dawn lo," ka ti a.

"Haw turin a ti che a maw! U Mapuia room in tidanglam sauh sauh a, eng ati leh si nge?" tia a makti hmel meng phâwk vak chu ka en a. 

"Lokal teh," tih pahin a kutah ka kai lawk a, kan room-ah luhpuiin Thlamuana nen kan inhau ṭan dan leh auMami kan hmuh thu te, ka nuin min rawn biak avanga ka phone a vawm chhiat dan nen lam ka hrilh ta vek a.

Chhuata phone tla darh phung chhar khawm pah hian, "Tun ṭum chu i dik lo ka ti ve tlat, i chhungte'n he in chhungkhura u Mapuia an rawn ṭawngkhum dan leh nang an fanu ngei pawh an ngaihsak zui duh lo che a, lo tuamhlawmtu che chu u Mapuia te chhungkua tho hi an ni asin, ngun deuhin ngaihtuah mah teh, ka ṭawng ngai haw lem lo la, an mo tak tak anga pawm tur chein i man pawh tu kutah mah an la hlan lo a, u Mapuia a thi zui bawk si, eng lo..sawi dan tur ber pawh ka hre lo e a," tiin a thaw huai a, "Ka ning tlat, indang daih mai ang," a'n tia maw.. henu hian khua a va han tivar lo ve chiang tak.

"U Atei te inah ka zuk kal lawk ang a, ka nu leh pa an lo haw pawhin ka chhuak tih hrilh miah suh, ka rei lovang, inchungah an lo chho kher ngai chuang lo a," ka ti leh zung zung a, kan pahnihin inhnuai lamah kan inzui thla ta a.

Hmanhmawh takin U Atei te in lamah ka chhuk thla ta a, an ina ka luh chuan Tv a lo en a, phone-a be hmasa turin ka phone khati kha a ni bawk si. A chhia em ka hre bik lo a, Diki khan a remkhawm nawk nawk ringawt kha a ni a, min hmuh chuan mak a ti hle tih a hmelah a lang reng.

"Ehe, i va rawn chhuk zan ve," a lo ti a.

Muang khawtlai lovin Thlamuana nen kan intih thiam loh chungchang ka sawi ta zung zung a, "In va han ninawm tak, Ui leh Kêl thlun pawlh ang mai hian in awm a, Mama khan hetiang tur tih hi a hre lawk lo em maw ni le," ti nang nang chung hian a phone a phawrh chhuak a, tunge a biak dawn ka zawh chuan, "Lo ngawi reng rawh aw," tih chiah a sawi.

"Thlate, Nanovi hetah a riak dawn a, naktukah Lunglei pan tur Sumo be turin min hrilh a nia, zaninah haw rum rum a tuma ka remti lo a nih hi.." tiin ka sawi loh dan deuh hian a be ta a, lo ṭawng ve ka tum chuan ngawi turin min mitmei zauh a, lehlam ṭawng a ngaihthlak vang vang hnuah, "Awm lo, bathroom-ah a awm a, a hriat loh laiin ka lo be hmasa che," tiin dâwt chiang lutuk zu han sawia maw le!

"Aw le, aw le." Tia a ṭawng leh hnuah phone a dah ta a.

Nui var var chung hian, "In luhlul dun lutuk hi a buaithlak, tunah rawn chho nghal rawh se, minute 10 chhunga a lo thlen hman loh chuan kawngkhar ka kalh ang a ti," la nui reng chunga a tih chuan, "Lungleia haw turin min ti alawm," ka lo ti ve ṭâlh a.

"Nang pawh hi a thil sawi zawng zawng zawm duh si lo hian a eng emaw lai hi i zawm leh duan duan a.. kal rawh..bathroom-ah va lut rawh a rawn chhuk dawn a nia," a ti zui a, keia pawh ṭawng tawh lovin bathroom lam ka pan ve nghal a, a va hahthlak tak.

Rei vak lovah Thlamuana ṭawng ri ka hre ta a.

"Ate, Zomuani chu khawiah nge?" tia a zâwt thawm ka hriat rualin bathroom kil lamah ka tawlh phei a, ka va nêp mai mai e. Min rawn luhkhung awm chai si lo a.

"Nang pawh i thin butut hi thunun tum ve ṭhin rawh, a kum zat ngaihtuah la, a thil tawn zozai te hi chhûtsak ve bawk la, dawhtheih a ngai a nia," tia ka thlavang min hauhsak chuan ka nui chhuak teuh hle. U Atei hi chu a fing ka ti thlâwt.

Bawihpuia tel lovin Lungleiah haw ka tum lo hrim hrim. 

"A fapa tel lova a haw duh a nih leh haw sela, ka dang lovang, chuti a nih loh chuan tunah rawn chho rawh se," a ti zui nghut nghut a, a thin a la rim hle tih hrilh hranpa ka ngai lo.

"Nano, lo chhuak teh.." u Atei'n a tih chuan nuam lo ti ru zet hian ka chhuak ve ta a, tukverh bula Thlamuana ding chu ka mit sîrin ka melh zeuh a, a meng rum ngei mai.

"Eng emaw hlekah inkhik khak reng mah ta che u, atu amah tih bîk ka nei lo. Mama thu hnuhnung zah saka inrem taka awm tur in nih laia hetiang thil ho tê têa in intihbuai zel te chuan in pahnih tan hian kum hnih hi a rei duh khawp ang aw," tia u Atei'n min zilh dun tâkah chuan ka inthiam lo thar hle.

"Haw chho ula, buaina dang nei tawh suh u, Bawihpuia pawh inti khawngaihthlak lutuk," a ti zui leh a, ka ding zum reng ringawt.

"Min rawn zui rawh..." Thlamuana'n a ti nghut a, ka hnial ngam tawh teuh lo.

"U Ate..." ka'n ti ṭan dêk dêk a, "Zomuan, ka nghak reng dawn lo che a nia," Thlamuana'n a ti leh a, engmah sawi zui ngam tawh lo hian kan inzui chhuak ta a, ṭawngkam khat mahin min be lo, a hnungah ka kal ve zel a, ngaihdam dil ngai lova u Atei'n min chin fel sak avang ringawt pawh hian ka lawm.

Ka nu leh pa an lo la haw lo a, ka vannei hlauh.

Kan room-ah ka lut tlang nghal a, Thlamuana ama room-ah a lut ve bawk a, ka fapa mah nise ka va la ngawt ngam bik si lo, min lo vin leh nek ang tih ka hlau a ni ber.

Khumah rei fe keimahin ka mu tawh a, u Mapuia ngaihtuah loh hram hram tumin thil dang rilru pekna tur ka dap kual a, a tawpah ka muhil thei ngang dawn lova ka inhriat avangin Thlamuana room lamah bawk ka phei leh ta a. 

Kawngkhar ka nam chhin a, a lo inkalh tawh lo, thawm dim takin ka pen lut ta a, khumah tukkhuma kut suih chung hian Thlamuana a bawkkhup a, a bula muhil ka fapa hmel chu ka en reng a.

"Zomuan, eng nge kha tah khan i tih reng?" Tia Thlamuana a rawn ṭawng chhuah chuan, rang fahran hian, "Bawihpuia hi ka lo mutpui ang aw, ka muhil thei lo reng reng," ka ti sap a.

"Ani a muhil thei thung alawm," a lo ti hmuk.

"Kan room-ah keimah chauha mut chu a nuam lo, ka pawm phei mai ang," ṭi dâkin ka ti leh a, a rawn zangthal a, nelawm loh taka min en chung hian, "Chuti a nih leh khumah khan mu ve mai rawh, zaninah khawiah mah a riak sawn dawn lo," a ti nghut. A va han sual tak e aw...

Thlamuana khuma han mut ngawt pawh chu ni chiahin ka hre si lo, â...a sual hi ka ti thlâwt.

Che lova ka din ngawih reng lai chuan, "Hetah i mut dawn loh chuan Mama room-ah phei rawh," a rawn tih leh thut a, mahni-a va mut men kur ai chuan tiin inthlahrung lutuk hian kan Lalthlamuana khumah ka lawn ve ta nge nge a, a kil lamah ka mu a, Thlamuana a tho daih; mahse, room chhuahsan lovin veranda lam a pan a, ka en zui duh ta lo.

Ka fapa kianga ka mut theihna tur leh ka hlatsan lohna tur a nih phawt chuan ka tuar thei zel e.

Ka lo chhing sek hman a ni ang, ka zun chhuakin min ti harh a, ka mutna ka hai ṭhelh. Ka ṭhu chhuak hlawl a, ka fapa a la muhil bâm mai.

A hnute siam tur leh feeding bottle side table-ah a lo awm thlap a, Thlamuana dah a ni tih ka hria; mahse, amah a mu ve miah lo a, room chhungah pawh hmuh tur a awm chuang lo bawk. 

Tho chhuakin toilet lam ka pan a, veranda thlanglamah zu no dawm chung hian Thlamuana a lo ding a, min hnungchhawn zawnga ding ni mah se, zu a in ngei tih a ke bula whisky ûm ka hmuh chuan hrilh hranpa ngai lovin a chiang reng mai.

A in lohna a rei ve riau tawh a nia, kan zanin boruak vanga in a nih ka ring. 

Thawm pawh ka dim duh bik ta lo a, toilet ka chhuahsan rualin a rawn lut ve chiah a, meng si sap chung hian, "Ka khum chu a nuam meuh nange i va harh hma ve?" A ti thum chhak a, ka ngawi reng.

"Novi..ka biak che chu..." a ti leh sup a. Thinrim awm angin a lang leh tawh lo a, ka ngaih a ngam ta deuh.

"Bawihpuia ka pawm phei tawh ang aw.." ka lo ti daih a, ner suk chung hian, "A teuh lo, ka khumah khan mu hle hle rawh u, sawi buai tawh teh suh," a ti hmuk a, ka ṭawng zawm ngam tawh lo, a ruih loh lai pawhin ka hlau ru deuh a nia, a ruih phei chuan hlau tak ka ni.

Khum bulah ka ding a, ani pawh ka sirah a rawn ding ve a, Bawihpuia mu en vung vung chung hian, "Tun ṭum chauh chu ka hrethiam ang che, a lehpek a awm leh a nih chuan i fapa hmel i hmu tawh dawn lo aw.. mipa dawhthei tak ka ni lo a nia, inremna kan siam tawha a bawhchhetu chan a chau zêl ang," ti supin ka dârah min kuah a, ka lo phu zuk. 

Chutah, "Mu rawh le," a bân la sawn paha tiin min din hlat deuh a, khumah ka lawn vat. Zak map lo hian a thawmhnaw inbel lai a hlip a, boxer nen a rawn lawn ve ta a, lehlam ka hawi zui daih. Ka biang a sa nghal up up mai.

Kâr lovah a thâwk dan a dang lama a muhil ta a nih ka ring. Kei erawh ka meng kar a, ka fapa hnute ngena a ṭah pawhin Thlamuana a harh ta lo; mahse, ka lawm daih zawk.

Thil rit takin min delh ang mai hian ka ke a mu churh churh a, chêt sawn ka tum pawhin a nghet churh. Zawimuangin ka meng chhuak ta a, eng nge ka hmuh hi!?

Min khan chial chung leh ka káwnga kuah chung hian Thlamuana a lo mu a, a bawp sei leh thahrui ngah hmel taka phiar deuh fat chuan ka malpuiah a kherh bet tlat a, a taksa lumna ka tem pha vek bawk, min ur ham ham thei nia.

Nizana ka mut khan Bawihpuia a laiah a mu reng si a, kei aiin ani hi a muhil hmasa bawk nen mak ka ti hle, khua a la var lo deuh nain thim chhah a kiang tawh a, ka mal a delhna a rit lutuka ka ke a mu vek chu niin.

Dimte hian min kuahna a bân dahsawn sak ka tuma a rûm ṭuah ṭuah vei nen tihharh ka hlau si. Inher deuhin a hmel ka en ta a, a lang dam thluam a, a sam kir chiat chu a chal lamah uaithlain a landan a dang vek, a hnar ngul sâng ṭha tak te pawh chiang lutukin ka en a, a hmelṭha ve chiang a ni. A harh loh lai chuhin inthiam lohna nei miah lo hian ka melh vang vang a, a lang naupang sawt bawk.

Bawihpuia a rawn ṭê ṭhat ṭhat a, ka hawisawn ta a, Thlamuana a che hrut a, "Novi.." a ti chhuak sup.

A harh ve tih ka hriat veleh rang takin ṭhut chhuah tumin ka ché a, min kuahna bân a thlah dul eih lo. A ke pawh a la sawn duh chuang lo a, ka va en leh ta nge nge a, chiang lutukin min rawn melh ve chiah bawk.

"I ke hi..." tih leh a bân dahsawn ka rual a, a harh chhuak thut a ni ang, a insiam rem nghal a, ka lâi ringawt, thawmhnaw pangngai ka inbel hlauh zawk a, a zia ve tal alawm.

Inthiam lo niawm tak hian a khi suk a, "Sorry..." ti puatin khum sir lamah a tawlh phei ta a, nuam lo duh tak a ni. 

Han rikpui hluaia thinrimna turin engtin mah min ti bawk si lo a, ka hre lo der zui tawp. Ka fapa diaper thlaksakin ka buai zui ta a, ani pawh a muhil a niang a che zui lo. A ruih vangah ka puhsak ringawt a, khawvar hunah a hre zui lo turah ngai ang aw.

Ni e, Lalthlamuana thu ka zawm loh emaw kan inremsiam tawhna kha ka bawhchhia a nih chuan ka hmabâk a êng dawn lo nasa. U Mapuia khan chiang takin a ziak a, eng ang pawhin ṭan khawh ve mah ila; ka tan kawng a ping tlat, kei aia thil tithei zawk khing turin ka chak tawk lo tih ka hre si a.

Ni a ral a, hun a ral ve zung zung a, nunphung pangngai zawhin hringnun ka hmang chho ve bek bek bawk a, tunah chuan ka fapa Lalnunfima pawhin thla li a pum ve ta. 

Thlamuana room-a ka riah zan aṭangin sawi fak tur awm lo hian kan inkâr a hla leh zual a, min ngaihsak a ṭhulh lo nain ani pawhin a hna a thawk leh ta bawk a, kan inhmu khât ta pharh mai.

U Mapuia ngaia ka ṭah rûk châng lah a tam. Chuti a nih laiin ka phone a chhe ta si a, a dang lei tumna ka nei chuang lo a, kâr hnih tawp phone nei lovin ka awm ta kha a ni a, u Ropuia mangang chin hre lovin Thlamuana a rawn call tawp a, ka insawi mâm thei hrâm. Ka nu leh midang tumah ka be pawpin min rawn be zui thei ta lo bawka buaina a tam ta lo phian. Tawrhchhel erawh ka zir a ngai takmeuh.

Hemi hnu hian, "Kha hei hi hmang la, i sim card vuah mai rawh," tiin u Mapuia phone hman ṭhin kha min pe ta a, a boral hnuah ka hmu zui lo ka ti rêng a, Thlamuana'n a lo kawl daih vang a nih hi!

"Zomuan, Thlatea vawiin tlaiah a lo haw dawn a, a room lo tihfai sak ta che," tia ka nuin min hrilh chuan, Bawihpuia paw chungin inchungah ka chho a.

Contract thilah Gujarat-ah a zin a, kâr khat a châm tling tawh a, thla hmasa lamah ka pa nen u Mapuia pension thil vel an buaipui a, sawi tawh ang khan eng mah ka hminga awm a awm ve chuangin ka ring lo bawk a, ka ngaihven lo hrim hrim. 

Ka nu leh ka pa pawhin min be ṭha huam lo nain u Mapuia damlai ngaihtuah chuan kan boruak a zia ve pah reng.

Thlamuana a rawn thleng ta. A pawr fap mai.

Ka fapa a chhawnchhaih hnuah, en pawh min en lo hian inchung lamah a chho tlang nghal daih. Muangchangin ka zui chho ve ta a, u Atei pasal Chhandama Mamit lamah an transfer tâk avangin an chhungkuain kal an tum a, naktuk hian an inah chaw eikhawm an buatsaih dawn a, Atuni a awm tawh si lo, u Atei leh zel a awm loh chuan ka tan a hrehawm zual dawn lutuka ka hnual nghal vek.

Bawihpuia khumah ka awm tir a, thawmhnaw sûk ka thleh fel laiin Thlamuana a rawn lut a, a inbual diam tawh a ni ang a lang thar sar mai, kan room-a rawn pen luh pah hian, "I phone khawiah nge i dah?" Tiin min zawt a.

Khum lu lama ka phone dah melh chungin, "A awm reng, eng ati nge?" Ka lo ti a.

"Ropuia'n biak che a duh a, a be tlang thei lo che a nih kha, insiam la, Lungleiah kan kal ang," a ti ta mai. "Eng..eng a?" ka ti vak a, tun ang zanah eng nge Lungleiah tih tur kan neih. Ani zin haw hian min haw tîr a tum te hi a ni lo maw? 

"Insiam phawt mai rawh, Bawihpuia thawmhnaw siam tel bawk la, inhnuaiah ka nu leh pa ka zuk bia ang e," tiin a chhuak zui nghal a, thil dang zawh hman pawhin a khawsa lo.

A sawi anga insiam ta mai lo chuan khuma ka fapa mu chu ka pawm nawlh a, inhnuaiah ka chhuk ve ta a, vawiinah a zinna aṭangin a lo haw ve chiah a, biak pangngai pawhin kan la inbe mumal lo va, u Ropuia nen eng nge an sawi tih hriat tum ai chuan tun rum ruma Lunglei kal tura min ti hi thil mak a ni alawm.

Ka nu leh pa te room-ah a lut a ni ang chu lam chu ka pan ve zel a, kawngkhar a inkhar phui lo a, Thlamuana ding ka va hmu thuak a, a ṭawng pawh ka hre pha ta, va pawh mai ngam lo hian ka táwi khawmuang leh rih a.

"Zaninah kan kal nghal a ngai dawn a, Nanovi pawh insiam turin ka hrilh tawh," a tih mêk laiin ka nu chuan, "Thlate, ngun takin ngaihtuah rawh, Zomuani kan huat vang ni lovin kan laka a chhungte rilru put hmang hrechiangtu kan ni a, a pa ngei pawhin a rawn ngaihsak duh tawh lo a, chuti chunga va kal leh kha a ṭul ber lo, i û nise khati khawp khan rilru nain an siam a, kal lo mai rawh, Zomuani te nufa erawh chu duh leh naktuk zing Sumo chhuakah haw ta mai se," a ti bawrh bawrh a, thil awmzia engmah ka hrethiam lo, ka bo tulh tulh.

"An nufa chauha kal tîr chi a ni lo, keiman ka hruai ang," Thlamuana'n a ti nghet charh a, ka pain, "Kan thu i awih lo sawt hle mai, Zomuani te nufa leh an chhungkua vang hian vawi tam kan inhauin kan inhnial phah tawh a, Thlamuan, hre rawh, i nu leh pa thu hi zawm tumna nei ve ang che..anni inah i kal a ṭul reng reng lo," tia ka pa a ṭawng laiin ka inhera inchungah hmanhmawh takin ka chho ta a.

Rang takin phone ka la a, ka off lai ka hre miah lo. A lo in swichoff daih chu niin, ka on nghal a, Thlamuana lo chhoh hma ngeia u Ropuia biak hman ka tum.

Vawi hnih a ring zawh dawn lamah min rawn chhâng ta ṭâwk a, "Mate, i phone-ah ka call tlang thei lo che a, in lo phei thei dawn ta em?" A rawn ti a.

"Engmah ka hrethiam lo a nia, Thlamuana'n Lungleiah kal a ngai tiin min rawn hrilh tawp a, eng nge thil awmzia?" Ka lo ti thuai a.

"Ka pa a ṭha vak lo a, a insawiselna a rei deuh tawh," tia a sawi chuan, "Tunah eng ati nge min hrilh chauh, a hma te khan min hrilh thei lo em ni?" Ka lo ti hmanhmawh a, "Ka nuin a remti tlat lo alawm, mahse, i hming a lam reng a, rawn phei hram dan ngaihtuah mai ta che, Thlamuana ka biak tawh kha," ti leh zung zungin thil dang sawi thui tawh lo hian a dah zui ta a. Ka mang vek.

Ka nu nen kan inbiak hnuhnun ber khan ka pa damloh thu a sawi ngei a; mahse, Thlamuana'n ka phone a vawm chhiat hnuah chanchin ka hre zui ta lo kha a ni a, eng nâ nge tih zawhna châng pawh ka hre bawk si lo, ka va han nikhua lo tak.

Bawihpuia thawmhnaw ka siam hmasa a, chumi hnuah ka thawmhnaw tlem ka khung leh a, ka pa ringawtin ka rilru a luah vangin ka tâwt up up. Kan inzawmna tawp angin sawi mah se, ka pa a nihna a bo chuang si lo a, u Ropuia meuhin phei tura min chah a nih chuan a dinhmun a ṭha lo hle tihna a ni mai.

Thlamuana rawn luh leh laiin ka insiam peih thuak tawh a, "I lo haw ve chauh si a, motor khalh a va huphurhawm duh awm ve, kan nufain naktuk zingah kan kal mai dawn em ni ang, i chau awm si a," tiin ṭha takin ka lo bia a.

"In ina haw tur i ni lo a nia, i pa damlo kan tura kal i ni tih inhria la, an chhungkaw zinga mi ang mai khan inngai tawh suh, kan chhungkaw zinga mi zawk i ni," a lo ti hmuk.

"Chutiang zawngin ka ngaihtuah lo," ka lo ti ve hmak a.

"Ropuia hmai ka zah vang chauha kal tur kan ni a, an inah kan innghat dawn lo tih pawh hresa ang che," a tih leh chuan, "Eng lo, kan inah kan innghah lovin khawiah nge kan awm ang a?" Ka lo ti a.

"Khalam kha chu ka kutah dah rawh, i inpeih tawh chuan kan chhuak deuh mai ang, ka nu leh pa remti lo chunga hruai tum che ka ni a, ṭawngkam eng emaw an neih pawhin ngawihsan la chhâng hlek suh ang che," tiin min hrilh lâwk a, kan thawmhnaw dahna bag a ban zui nghal a, "Ka zuk dah hmasa lawk ang e, i pa dinhmun azirin kan châm reiin kan châm rei lo ang," ti sup chung hian a chhuak ta a.

Min hruai a tum ringawt pawh hi a lawmawm ka ti. Khatiang tehhrep hnuah kha chuan keimah chauha ka chhungte hmachhawn ka zuam bik miah lo.

Ka fapa puain a hnute tur ka siam lâwk bawk a, inhnuaiah ka chhuk ve ta a, zan dârkua a ri ṭep.

Ṭhutkhawmna pindanah ka nu leh pa an lo awm a, ka hmel an hmuh rual rualin, "An tuithlâr tawh che a, a awmzia chu an tan i thi tawh tihna a ni, an ngaihsak lohna che leh an thlahthlam hun chhung che hi kum a tling tawh dawn a, chuti chung chuan kan thu zawm lovin kal luih ṭâlh in tum ta chu a ni a, rawn haw tawh suh ang che u. Lalthlamuan, nang pawh hria ang che, kan thu zawm lova i kal lui a nih chuan he inah hian rawn lêt duh tawh suh," ka pain a ti hmiah a. 

"Novi...hawh le.." tiin Thlamuana'n ka bânah a vuan a, ṭawngkam khat mah kan chhâkchhuak lo ve ve.

Kawngkharpui kan thleng ṭêp tihah, "Lalthlamuan, i pa thusawi kha theihnghilh miah suh ang che aw," ka nuin a la ti hrâm, Thlamuana ka melh chho zeuh a, rilru na hmel a pu ve deuh. Mahse, ka dem lo, keimah avang hian a nu leh pa hmaisa a tawng nasa tawh a, a û thu awihin a thutiamah a la ding zel chu a ni si a, ka khawngaih ru ve hial tawh zawk. 

Chumi hnu chuan hnunglam hawi map lo leh a nu leh pa kam khat maha chhâng lovin ka bânah a vuana min chhuahpui ta a. Ka rilruah u Mapuia a lo lang ve nghal a, ani ni ta se tuna a nauin huaisen taka min hruai chhuah ang hian a ngam ve ang em? Tih ka lo ngaihtuah daih.

Bolero-in zan dar 9:30pm ah Aizawl kan chhuahsan ta a. Kan la inbe lo rêng rêng, a ngawi hmuk a, kawngpui ngun takin a en ngur a, Bawihpuia a muhil thung a, biak a huphurhawm ngawih ngawih. A nu leh pa ṭawng dan kha a na ve bawk êm a ni. Khatiang hun lo paltlang tawh ka ni a, dawnsawn thiam a har êm asin.

"Khatianga i nu leh pa phal lo chunga min hruai luih âi chuan, kan nufain min kal tîr mai lo a.." ka ti sap a, ngawi renga awm a hrehawm ka tih êm avanga ṭawng chhuak ka ni.

"Ka hruai ang che ka tih chuan ka sawi angin ka awm ang," tih chiah a sawi.

"Ka lawm e, min ngaihsaknaah lawmthu sawisen loh ka bâ a nia," ka ti leh a.

"Ngawi mai mai teh." A ti sup ringawt.

"Lo haw tawh suh an ti che sia engtin nge i awm ang?" Tia ka zawh chuan, "Kan haw lo tawp anga a ni mai alawm," a lo ti awlsam êt.

"Kan inah kei ka awm tlang nghal ang a, i nu leh pa te khan haw tawh lo turin min hrilh ve tho a; mahse, nang khawiah nge i awm ve tâk ang?" Tia thutak deuh zawka ka zawh chuan, a khi suk a, "Ka lak aṭanga talhran inbeisei suh, thutiam chu thutiam a ni a, kum hnih a ral hma chuan nang leh kei hi kan inṭhen hrang dawn lo," zu han ti a.

"Thlamuan leh.." ka lo ti hliai.

"Vak vak zel a che," tiin min rawn melh zauh a, "Kei hi eng hmuhin nge min hmuh ve, i eng nge ka nih?" Tiin min zawt thut a, nui chung hian, "Thlamuana hmuhin ka hmu che, Bawihpuia patea...'' ka lo ti a.

"I â siah..." tia nui kur kur chung hian kawng lam a melh a, a hnuah a rawn nui chhuak leh huk a, "I kum zât ka lo theihnghilh atin ni," a ti ta a. A sawi awmzia pawh ka hriat si loh. Mawl ver vur êm mai.

Sialsûk dâi kan thleng a, Bawihpuia a luak ta a, Motor tidingin kan buaipui leh rih, kei tak pawh ka luak a chhuak ut ut a, Bawihpuia thawmhnaw a thlâk chhungin ka uak tuar tuar a, ka luak hleithei bawk si lo, ava buaithlak ṭhin e. 

Mahse, phunnawi miah lovin aman a fapa a buaipui vek hnuah, "Thenzawlah kan chawl dawn nia, lo tuar hram hram rawh," tiin ka malchungah naute a rawn dah a, "Tlangvalte, muthilh tum rawh le.." tih pahin ka fapa biangah a fawp zauh a, a rawn dâk chhuak chiah chu ka lo melh ve reng si avangin kan mit leh mit a intawng sak a, min ngaihtuahna, ngaihsakna leh duatna niawm tak a lang dawt zut a, "Novi..." ti sup chung hian a inla hrang nghal a, engtin emawni ka awm, ka nghilh dup ni berin ka hria.

Kan tlan chhuah leh hnu pawhin kan ṭawng zawm ta lo.

A mitah khan min duhna niawm tak a lang vuai a, mahse, a rei lo. Ka hmu sual a nih ka ring ta zawk a, kan Lalthlamuana hian min duh lul lovang, â...a ho si ka thil ngaihtuah te hi a...

Thenzawlah kan châwl ta a, kan inphih harh hnuah, Beer Can khat hi a rawn phawrh chhuak a, "Ka mut a chhuak dawn tlat intih harh nan kan in lawk ang e," a'n tiah. 

"I rui ang e," ka lo ti a.

Nui huk chung hian, "Rui lo e a, nang chuan in la i rui ang, in ve ta che, i mut a ti chhuak maithei asin," ngaihsam zet hian a ti leh puat a, ka duh loh thu ṭha taka ka hrilh hnuah koki san âwk chung hian, "Atuni bula i awm tam nen i in ve duh miah lo hi i fel ngawt mai," tiin min fak ve ngial a, ka lo nui tawp.

Muangchangin kan tlan chhuak leh ta a, kan ina kan innghah dawn si loh chuan khawiah nge kan awm tâk ang? Ka thil ngaihtuah avang chuan Thlamuana en chung hian, "Khawiah nge kan riah ang, kan inah kan lut dawn lo i ti bawk si a," tia ka zawh chuan, "U Ruata te inah zanin chu kan riak ang, i pa awmna damdawi in kha Serkawn a ni a, kan pêng hmasa phawt ang a, chumi hnuah u Ruata te inah kan chhuk dawn nia, ka hrilhsa vek tawh a, min lo nghakin ka ring," tiin ṭha te hian min hrilh ve mai a, u Ruata leh Thlamuana te an inhre ṭha tak alawm le.

Kan in nen a inhlat vak si lova a nuam duh dawn lo mang e, kan vengah ka chanchin leh pasal ka ûm tihte an hre vek a, kohhran thunun hial ka ni tawh a, u Mapuia boral hnuah a nau tlangval nen min hmuh dun leh si chuan sawisep ka kâi leh nasa ang chu. 

"Kan thleng tawh a nia," tia min sawi dat dattu an awm avangin ka meng chhuak a, Serkawn hospital kawtah kan lo ding reng tawh. 

Thlamuan'n ka fapa pawm chungin phone a hmang a, "Ropui, kan lo thleng chiaha engtin nge ni ang, tunah amah kan hmu nghal thei ang em?" Tia ka û a be thawm ka ngaithla reng a, Buangpui kan pelh aṭang khan ka lo muhil daih chu niin! 

Kâr lovah u Ropuia a rawn chhuak ta a, min han hmu chiah chu lawm avangin a nui ṭhâ a, "Thlate, ka thinlung takin lawmthu ka sawi a nia, ka ngenna min zahsakin ka farnu i rawn hruai a," tiin Thlamuana a chibai veleh a, ka fapa muhil bêm chu thlêk vang vang chung hian, "A va lian tawh ve aw, ka tiharh rih lo mai ang, duty ka hrilh lâwk tawh a, rei lote chu luh an phal e," tiin Main Gate lam panin min hruai ta a.

Ka lu a haiin ka ni nghulh a, ka pum a let but but alawm maw le.

Male Medical Ward-a awm lovin Cabin-ah an lo dah tawh a, damdawi in khuma mu ka pa hmel ka'n hmu chiah chu ka mittui a hnâm sawk. 

Ka awm loh san aṭangin kum khat a la tling lo deuh nain a hmaa ka pa hmel nen chuan inthlau tawh tak a ni. A chêrin a dawldâng hle a, a ruh a Tb tih ka u Ropuia'n a sawi a, ka khawngaih lutuk. 

Kan thawm hriain a rawn meng chhuak a, "Ka pa, Matei te an lo thleng a nia," tia u Ropuia'n a hrilh chuan min en kual diat diat a, a tawp berah Thlamuana pawm lai ka fapa chu melhin, zâwite hian, "Ka tupa..." a ti thâm chhalh a, Thlamuana pawh ka pa mutna bulah a ṭhu hniam vat a, a hmuh chian theih deuh nan Lalnunfima chu a pu bulah a pawm hnai a, ka ṭah a chhuak ringawt.

"Tunge a hming?" Tiin Thlamuana a zawt a, "Lalnunfima a nih hi.. tlangvalte, Lungleia âpu a nih hi aw.." tih pahin ka fapa kut chu a la káng a, a pu a vawn tîr ta a.

Rei tak awm an phal loh avangin, u Ropuia hnenah Thlamuana'n, "Kan haw rih phawt ang a, Novi te nufa hian motor an rûi pek a, naktuk lamah kan lokal ṭha leh dawn nia," tiin ka pa a mangṭha hnuah a chhuak a, kei ka la ding khawmuang a, ka Pa bulah kal hnaiin, "Pa, min ngaidam rawh aw.." ti sapin a kutah ka vawn sak a.

"Mate, ka naute duat, i hmel hmu lovin ka liam mai dawn emaw ka ti tawh asin," mittui parawl ṭeuha tiin ka kut a rawn hûm lêt a, "Chutiang sawi suh, i dam leh dawn tih ka hria a nia," ka lo ti a.

U Ropuia'n min lo koh tâk avangin ka pa bianga fawp zeuh chung hian ka chhuahsan ta rih. A chau ve êm a, biak reng chi pawh niin ka hre lo.

U Ruata te ina kan thlen tur thu Thlamuana'n a lo hrilh vek tawh a, "Kan inah ngei rawn innghat ula ka duh tehlul nen ka nu leh Mami hi an la buaithlakin ka ring a, ka pa hi chu i lakah a inchhir a, a inthiam lo lutuk a nia, nang pawhin ngaidam thei la ka duh khawp mai," tia a sawi laiin Thlamuana'n min rawn ko ta si a. 

A tûka inhmuh leh intiam chungin ka kalsan ta.

U Ruata te nupain min han hmu chiah chu an lawmin an ri chél chul a, zinglam ni tawh mah se, ṭawng kan inchuh a ni ber. Bawihpuia erawh a motor chuang a chau deuh a ni ang tui takin a mu a, Thlamuana ngaichâng lo lêk hian ka ṭawng bawrh bawrh a. 

U Mapuia nen a fâla kan inhmuh hmasak berna hmun ka han lut chu ngaihtuahna a kal thui ngei mai. Ka hmelah a lang a ni tehchêk ang, "Nano, a hnual zawngin ngaihtuah duh tawh miah suh, Thlatea hmuh lai leh hriat laia khatianga awm tur a ni lo," tiin u Kimtein min hrilh sap a, ka ngawi ta rauh rauh. 

Ka tân hi chuan theihnghilh theih a ni dawn si lo. Engkim a ngai ang diakin a la awm a, ṭap lo turin ka insûm fan fan.

Rei lote tal mu hahdam tura min tih avangin thuawih deuh hian ka lo 'Aw' ve thliam a.

An fapa hostel-a awm ṭhin kha Aizawl lamah a awm tâk avangin chumi room chu kan mut nan an lo ruahman diam a, khum lian vak lovah kan nufain kan mu ve ta a. 

Thlamuana Sofa-ah mut a tum thung a, u Kimtei'n, "I duh zawk chuan Nanovi te mutna room-ah sawn chhuatah mutna kan siam thei reng a nia, kan in hi lut chhuak an awm ve zut zel a," tiin a hrilh a.

Thlamuana lah chuan, îhe lovin, "A pawi hleinem, Novi hian mut a duh ṭhin si a, Bawihpuia ka ngaihvenpui thei zawk ang," tiin a lo chhang hmiah. A hnial ve dawn emaw tih lai a. Hepa tak hi chu aw...

Dârkar 3 hnuah.

"Ka fanu a ni a, i û avangin kan chân lo chauh tawh bawk a, hawsan rawh, in inah kan lêt tir dawn tawh reng reng lo," tia thinrim awki fiak ṭhak ri ka hriat chuan ka ṭhu chhuak hlawl a, ka nu aw a ni.

Thlamuana a ânkhum tih hrilh hranpa ngai lovin ka hrethiam mai.

"Ka û vangin in tuithlar tawh a, in fanu a nihna a awm tawh lo, kan chhungkaw zinga mi a ni tih vawi tam hrilh nawn ngai suh u," Thlamuana'n a ti nghut a, ka nu angin a râwl a ring ve lo naa a thinrim hle ang tih erawh ka rin hriat mai.

"Mapuia ber a awm tawh lo a, helai a rawn thleng ta sa sa, midang ina innghah te hi thil mawi pawh a ni lo, rawn haw rang se a ni mai," ka nu bawkin a ti leh hlawk hlawk a. 

"Ka û in hua a ni mahna, Mapuia ka ni ve lo, a nau Lalthlamuana ka ni a, ka u in ka enkawl tur atan infanu hi ka kutah a dah a ni, a chhan chu in fanu in ensan miau alawm, thinrima indawr ka duh lo a nia, ṭha taka ka hmachhawn lai che u hian haw phei rawh," thinrim insum taka Thlamuana a ṭawng laiin ka chhuak phei ve ta a.

Ka thawm an hriat chuan ka lam an rawn hawi a, "Mate, helaia riah hi thil tihchi a ni lo, duh leh Thlamuana hi awm se in nufa khan min zui haw rawh u," tiin ka nuin min rawn pan a, ka ding chat.

Thlamuana erawh chuan, "Novi..." a ti sup ringawt.

"Mualpho nawn leh i duh loh chuan Zomuanzual, ka thu awih tawh ang che, min ti zak nawn tawh suh," tia ka nu a ṭawng laiin ka bulah Thlamuana a rawn ding a, "Ka pi haw phawt zawk mai rawh, in ina lêt leh turin ka lo hruai lo a, a pa damlo kan tura lokal kan ni," ti lehin ka dârah min kuah a, "Hawh le, chaw bâr ve lawk ila, damdawi in lamah kan chho dawn nia, u Kimtei'n bawihpuia a lenpuia an lo lêt ṭep ang," ti zung zung chung hian choka lamah min pheipui ta a. Ka nu a meng râng nasa ngei mai.

Kei erawh ka la ṭawng chhuak ve miah lo a, ka nu melh ngar chung hian, "Ṭawngkam ṭha hian kan indawr thei ngang lo em ni ka nu?" Ka ti sap a.

"Lo haw ringawt la a ni mai, zanin tlai ral hmaa kan inchhung i rawn rap lo a nih chuan ka rawn hnûk chhuak tho tho ang che," tihpahin a chhuak tau ta a, ka thaw chhuak halh a, ka ipik ngawih ngawih.

Ka ril a ṭâm viau naa ka ei hleithei lo. 

"Tlem tal ei tum rawh aw, i chau lutuk ang, i nu kha a va han nasa ngai ve le!" Thlamuana'n a tih chuan, "I nu nen an inang reng," ka lo ti nghat a, a nui huk.

Chutah, dam deuh zawk hian, "I pa kan tlawh leh phawt ang a, a awm dan azirin Aizawlah kan lêtin kan lêt lo ang," a ti ta a, ka ngawi reng.

Chumi hnu chuan ka intleuh zuai zuai a, Thlamuana pawh chuti tho. U Kimtein nau a lo awm dawn avangin Thlamuana nen damdawi in lamah kan chho leh ta a, naupang hruai a rem teh ṭeuh lova damloh palh a hlauhawm an tih vang a ni pakhat.

Nizan lam aiin ka pa pawh hmuh a nuam ta deuh a, min lo hmuh veleh, "Novi... i lo puitling ta hle mai," tih pahin a bula kal turin min mitmei a, Thlamuana pawh kovin kan pahnih chuan ka pa kiangah kan ṭhu ta a.

"Mihringin hmalam hun kan hre lo a, fapa hial i nei ta chu a ni a, Mapuia awm tawh lo mah se, a âiawhtu tur Thlatea a awm a, Ropuia'n inchungchang te min hrilh tawh bawk a," tiin thawk a la leh rih a.

"Mate, i tan kan ina awm leh kha thil nuam a ni dawn lo, kei ka awm loh phei chuan i hrehawmna a thui dawn a, i u Ropuia nise nupui neih mai hmabâk a ni bawk nen lokal hram tura ka chah nachhan che chu," tia Thlamuana melh chung hian, "Ani thlazar hnuaiah hian awm la, Mapuia thu zawmin a kiangah awm tlat ang che," a ti ta a. 

Ka hrilhhai ngei mai. Thlamuana pawhin ka pa kut vuan chung hian, "Ka pu, lungngai reng reng suh, Nanovi te nufa hi ka thlahthlam dawn miah lo a nia, a ṭûl a niha rem i tih phawt chuan nupui atana ka neih min phalsak ta che," tiin ka pa a dîl hmiah! 

Ka lo meng phâwk vak a, Thlamuana ka va en a, chiang takin ka mitah min melh ve bawk a, sawi ber tur pawh ka hre lo.

Ka pa a nui suk a, "Kha lam kha chu in thu thu a ni e, kei chuan ka fanu himna leh hlimna tur chauh a ni ka duh tawh ni, Mapuia avanga a tawrhna a reh phahna tur a nih chuan ka mâkpa atan ka pawm ang che," a la ti tak deuh deuh nia. 

U Ropuia ka melh a, a lo nui ṭhâ a, rawn kun hniamin ka beng bulah, "Ka pa hi engkim ka hrilh vek alawm, hlauthawng suh, Thlamuana hi ring ngam la, a tawk a ni mai," a ti sup.

Ka pa a zia deuh bawka inkan hun chhung a rei lo bawk nen ka nu leh auMami lo chhoh thlen hmain damdawi in kan chhuahsan ta a.

Kawng lakah pawh kan ṭawng eih lo a, u Ruata te in kan thlen hma deuhin kawngsîrah Bolero a tiding a, ka lam rawn hawiin, "I pa bula ka thusawi kha ka ti mai mai lo a nia, Lunglei kan pan dawna ka nu leh pa ṭawngkam kha i la hriat chuan kan inah kan lêt a rem tawh lo, chutiang chiah chuan nang pawh in ina i haw a rem tawh chuang lo a, kan pahnih hian kawng hran kan zawh thiang si lo a, Mama duhdan leh i pa duhdan ang ngeiin ka kiangah ka venhimna hnuaiah kan indang tawh ang," a ti ta a. 

"I â tawh a nih hi..." ka lo ti tawp a.

Ani lah chuan, "Fahrah siam lo tur hian vawi tam ât ngai mah se ka â nawn zel mai ang," a ti duh chauh.

Kei leh Thlamuana hi kan innei anga kan indang ang maw!? Chu pawh u Mapuia thihcham kum khatna la thlen hma lehnghalin.

Kan Lalthlamuana hi a â tawh tak tak a nih loh pawhin a kâ a kuaa a ṭawng mai mai zawk a ni ang.

Ka thluak a buai veka inthing nak chung hian pawn lam ka thlir ta vang vang a...

240123

Shadow of the life

B+>[BeckirafARenthleI]<+®®