21.KA CHANPUAL [A Becky Rafa Story]

21. KA CHANPUAL

Ziaktu: Becky Rafa Renthlei

-B®®

(Recap)

Ani lah chuan, "Fahrah siam lo tur hian vawi tam ât ngai mah se ka â nawn zel mai ang," a ti duh chauh.

Kei leh Thlamuana hi kan innei anga kan indang ang maw!? Chu pawh u Mapuia thihcham kum khatna la thlen hma lehnghalin.

Kan Lalthlamuana hi a â tawh tak tak a nih loh pawhin a kâ a kuaa a ṭawng mai mai zawk a ni ang.

Ka thluak a buai veka inthing nak chung hian pawn lam ka thlir ta vang vang a...

&&&

Minute 10 aia tam a din khawmuan hnuah, "I ngaihtuah hah lutuk a nih kha, ka u vanga ti ka ni tih min hriatsak la, chuti rum ruma inneih ka ti hleinem. Kan inah kan haw a rem tawh si lo a, indan a ngai tih ka sawina mai a nia," dam deuh zawka tiin u Ruata te in lam panin a tlan leh ta a.

Ka rin dan vel chiah a nia. A û lehkha ziahah khan inneih lam a tel lo. Amaherawhchu, a nau ring tur leh a thlazar hnuaia awm turin thu a dah a ni mai a, Thlamuana rilru zawng zawng hre fai vek lo mahila; ka pa damlo rilru dam nân a ṭawng ve nimaiah ka ngai.

U Kimtei'n bawihpuia a lo bual fai vek tawh a, kan hmel a hmuh rual rualin, "I u Mami leh i nu an lokal a, min ṭawngkhum nasa lutuk, Nano, Mapuia hun lai ata tawh min hmusitin kan chhungkua min rêl phâr lo chauh tawh a, ka lawm lo viau a nia," tiin min lo hrilh nghal a, ani meuh ka laka a vûi a nih chuan a ngaihdan a ni lo hle tihna a ni mai.

Ka ṭawng chhuah ve hmain, Thlamuana zawkin, "Keiman ka kamkhat dawn nia, ka inrawlh lo ang ka tizet naa nangni chhung lehzel an hmer tel dawn che u a nih chuan ka ṭawng chhuah ve a ngai tawh a nih hi.." dam thlap leh nghet charhin a ti a. 

"A dik alawm, keini lo sawi ve âi chuan mipa i nih angin Mami te nufa hi chu i hrilh chian deuh an ngai a ni," u Kimtei'n a ti leh a.

"Zanin tlai ral hmaa ka haw lo a nih chuan ka rawn hnûk chhuak ang che a ti a, eng hi nge an huata heti tak maia ka laka sual an chhuah mai hi hriatthiam a har ka ti," ka lo ti ve nang nang bawk a, "An ngam chuan rawn kal rawh se, keimah min hmachhawn tawh ang," Thlamuana'n a ti hmuk.

Kan nufa leh Thlamuana inah kan awm a, u Kimtei bazar kal turin a chhuak lawk a, bawihpuia Sofa-ah ka ṭhutpui a, chutih lai chuan Atuni'n min rawn call teh tlat a.

"Nano, eng nge thil awmzia, ka nuin min rawn bia a," a rawn ti a.

Kimchang takin Lungleia kan kal chhan ka hrilh bâkah a nu leh pain Thlamuana an ṭawngkhum dan te ka hrilh ve ta vek a, "Awi awi, kan inah khan in haw leh loh chuan a chi loh, Nano, nangmah zawk khan Thlatea hrilh rawh, Mama a awm tawh lo pawh hrehawm kan ti a nia, Thlatea te nen in awm loh leh zel chuan a chi loh tak tak aw, bâkah a mualpho thlâk lutuk," a rawn ti hmarh hmarh a, "I nau be ve lawk mai rawh," tih leh Thlamuana phone pek ka rual a, Atuni nen an inbe ta a.

"Atun, ka nu leh pa rilru hi a ṭha lo êma an harh chhuah theih nan eng emaw tak ka tih a ngai si a nih hi, Mama nen a damloh lai khan kan sawi dun tawh a, upat lamah rilru kâwi an pu ṭha leh a ni ringawt alawm," tia a nau a chhan lai chuan ka lo ngawi reng a, Thlamuana leh u Mapuia kha a fâlin an inbe zeuh zeuh tih a hunlai ka ngaihtuahin ka la hre thei tlat.

Atuni nen an inbiak zawh hnuah min rawn en a, "Chawhnu lam hian i pa han tlawh leh lawk ila tichuan Aizawlah kan lêt dawn nia," a ti ta a, ka rilrem zawng tak a ni.

U Ruata te ina awm reng pawh kan tân a inthlahrunawm ve a, ka pa a zia deuh chuan Aizawla lêt leh ka duh tawh zawk. Thil pakhat chiang taka ka hriat chhuah tâk chu, ka nu leh auMami hian an rilru an thlâk a nih loh chuan kan inah hian ka lêt tawh ngai dawn lo tih leh engtikah mah chhungkhat angin kan in en tawh dawn lo tih hi a ni.

Bawihpuia ka âwih mut hnuah tih tur em em hre lovin phone ka khawih mai mai a, ka bulah Thlamuana a rawn ṭhu phei a, "Mama nen hetah hian in inhmu ṭhin tiraw?" Tiin min zawt thut. 

"Umn..aw..engtin nge i hriat a?" Ka lo ti a.

"Nizana i hmel landan ka hmuh khan he in hi i tan a pawimawh viau a nih loh pawhin eng emaw hriat reng tur thil hnutchhiah in nei tih a lang reng alawm," a ti sup a, "Khatiang ka sawi peih lo," ka ti vei hmak.

"Bawihpuia insiamna hmun a nih vang a nih chu a.." tiin a nui kur kur a, ka va ngei tak. 

"Thlamuan.." ka ti vin hlar a, la nui reng chung hian, "Ka ring dik a ni maw, i hmelah a lang vek a nia, i chalah a inziak bawk," a la ti hram. 

"Ṭawng tawh miah suh, i chhe zet zut," ti lehin ka ṭhutna aṭangin ka tho chhuak a, "Chhe siah, sawi awm leh awm loh hre bawk si lo," tiin keima hriat tham lek hian ka phun sap a, "Novi..ka fiamthu aw.. ka fiam che a nih kha," nui chunga tiin bawihpuia muhil a rawn bih a, ka lo tum bûr. 

U Kimtei a rawn haw a, damdawi ina chhoh kan duh thu Thlamuana'n a lo hrilh a, "Nau ka lo awm leh ang, damdawi ina nau hruai kha ka duhpui lo che u ka tih tawh kha," tiin bawihpuia ka puak lai chu min lâksak a, a harh miah lo lehnghal. 

Chumi hnu lawk, thingpui in tur ka chhuan laiin ka nu leh auMami an rawn lut ve chiah a, damdawi in lamah an kal lo nge, tun ang huna an lokal chu mak ka ti viau.

"Mate, kan lo hruai dawn che u a," tiin dam thlap hian ka nuin min bia a, auMami ve thung chuan u Kimtei nau puak ka fapa chu ngun deuh hian a en a, keimah lam min ngaihsak lem lo.

"Nu..." ka ti sap ringawt.

"Kan fanu naupang ber i ni a, hun kal tawh dah ṭhain kan inah rawn lêt tawh rawh aw, a hma ang khan chhungkua hlim takin kan awm leh thei a nia, i fapa pawh kan tupa a nih angin kan enkawlpui vek ang che," zaidam taka tiin ka bulah a rawn ṭhu a, sawi tur ka hre mai lo. Thlamuana pawh hi khawiah nge maw a awm daih le? Nichin lawkah pawh a awm reng si a.

"Ka lo lêt thei tawh hleinem, u Mapuia te inah ka awm ngei ngei a ngai," zawitein ka ti a, lehkha chungchâng lah sawi rîk chi a ni si lo.

Ka nu bawkin, "I â mai mai em mai, i pasal ber a awm tawh lo a, anni hnenah i awm a ngai tawh hleinem, i man pawh chêng khat mah kan dawng lo tih i hriat kha.." a tih mêk laiin Thlamuana a rawn lut ta a, ka nu leh auMami a hmuh chuan mit zim san chung hian a en a, "Eng nge in rawn tih leh dawn?" A ti nghut.

"Kan fanu hruai turin kan lokal, min dan tum hlek suh," ka nuin a ti chang fak a, u Kimtei naupuak lai chu melhin, "Mami, Kimi kha lâk chhawk rawh a tlai zel," a ti zui leh a.

Thlamuana a che phat. 

U Kimtei hmel buai naka ding chu panin, "In room-ah luhpui la, chhunglamah kawngkhar kalh rawh aw, ka rawn koh hma che chuan i awm tlat dawn nia," tiin auMami'n u Kimtei bul a thlen phei hma chuan a ti ta a. Rang takin ani pawh an nupa room-ah a lut nghal hmak, chu êm chu an umzui ta rih lo.

"Ka pi, haw leh zawk rawh u, kan thlenna tepawh an zahawm alawm, i fanu Zomuani hi a rawn lêt dawn tawh lo," dam thluama Thlamuana a ṭawng chuan ka u a rawn ṭawng chhuak ta a, auMami zawkin, "Thlamuan, Mapuia leh ka nau hi nupa tak tak anni lo tih i hre lo em ni, a man kan dawng lo a, inkawl satliah ang chauh an ni. Chuvangin, i u a awm tawh loh hnu hi chuan sawi theih i nei lo a nia," thinrim takin a lo ti hlak hlak a, ka nu a ngawi ve mial.

"Chutia a man dawn in duh te chuan keiman ka pe ang," Thlamuana'n a tih laiin ka nuin ka bânah a vuan a, "Lalrinkima i lo nei hi kan chhungkaw tan chhiatna a ni ringawt, mualpho chu sawi loh.." tih pahin min phih sawk a, ka ṭê ṭhat.

Chu veleh, Thlamuana a rawn inher a, "I vawnna kha thlah rawh, Novi... i duh chuan i nu te hi zui haw rawh le, hetianga buai hrepa mi inchhungkhura buaina siam ai chuan kal rawh, mahse, Bawihpuia erawh chu ka kutah a awm ang, kan sawi chian tawh kha.." a ti nghut a, ka nu te khawsazia hi a dawh theihnain a tlin tawh lo tih ka hrethiam mai.

Rang zet hian, "Aih...ka duh lo, ka haw dawn lo," ka lo ti vat.

"Zomuanzual..." tia ka hming a lam rualin auMami'n ka biangah a rawn bêng ta a, theihtawpa min bêng a ni bawka ka hawi sawk. 

Ni e, auMami hian a hma aṭang tawhin kut thlâk min châk tawh a, u Mapuia te inah pawh kut min thlâk tawh bawk, Mahse, Atuni'n min chhan ta kha a ni a, mittui tling pam chung hian Thlamuana lam ka pan a, min lo kuah vat, a taksa a inlek khawng luh a, a thinrim hle tih a inseh ruh dan aṭang chuan ka hre mai.

"Mami, i nau kut i thlâkna man kha engtikniah emaw chuan i rulh a la ngai ngei ang, hmeichhia chu ni lo la.." a ti sup.

Boruak a reh duk a, Thlamuana thinrim awki hniam sat kha an chhâng ngam tawh lo a ni mahna. 

"Ka pi, i fanu man chu ka rawn pe lutuk ang, chuan, chhuak tawh rawh u, i pasal phalna thlapin i fanu hi ka nupui a ni bawk ang," a ti hmiah. 

"Zak thei lo lutuk, Rinkima kan duh tawh lo a, a nau kan duh nachhan tur a awm chuang lo, zah nachang in hriat loh leh in mualphona a thui ting a ni mai alawm, mahni hringtunu te aia midang thlang tlat fanu kan nei hi ka vanduai a nih ber hi..." ti hlawr hlawrin ka nu a ner kawisawi vel a. 

Ka mittui kâr aṭang chuan ka nu hmel ka va melh hrâm a, a sen ṭân mai, auMami kuta chelh chung hian, "Mami, Zomuanzuali leh Thlamuana aia pawimawh tih tur kan ngah êm mai, i haw teh ang," tih pahin rum deuh hian min rawn en a, "I lo tenawm em mai, mipa tel lova khawsa thei lo chu tikhan chawh kumkhua rawh," duhthawh takin auMami'n a ti ve leh a, ka mittui a far zawih zawih.

An chhuah fel hnuah Thlamuana âwm nghengin ka ṭap chhuak ta a, duat taka ka samah chûlin engmah phei chu a sawi lo. 

Rei fê ka ṭah hnuah, "Duh tawk tawh la, i mit a bûi leh vek mai ang," tih pahin amah ka en theih nan min kuai dâk a, ka mitah chiang taka min melh chung hian, "I man ka pêk ngei chu a ngai dawn e, man nei lo anga an sawi fo che ai chuan hmingchhiat leh mualpho huam pawhin hma ka la mai tur a ni, i pa berin phalna min pe tawh a, lungngai reng reng suh," tia min hnemna chuan ka thla a ti muang ngei mai.

U Kimtei a ko chhuak zui a, min kuahna a la thlah chuang lo, a âwm nghenga ka ṭah khan mak tak maiin ka hahdama him hliah hliaha inhriatna ka nei tlat nia. 

U Kimtei a rawn chhuak a, keini pahnih inkuah chunga kan lo ding a hmuh chuan, "Nanovi nu hi chu misual a ni lo asin, Mami hian a kuaiher hneh lutuka a zia a thlâk vek tawh a nih hi, Mapuia a ngaihzawn avang leh amah thlang lova a nau a nei ta kha a ngaithiam thei lo a ni ber, phubâ lâkna chikhat ka ti mai," a rawn ti bawrh bawrh a.

"Mama kha i u in a ngaizawng amaw?" Tiin min zawt a, ka bu nghauh a, a ner sawk.

Thlamuana'n u Kimtei hnenah, "Helaia awm reng pawh hi a fuh lo, an duh duh hunah an rawn kal tawp zel si a, Aizawlah a rang lama kan lêt mai a ṭhain ka hria, duh leh damdawi inah kan pêng chho mai dawn nia," a ti ta a.

"Ka pa hi..." ka lo tih chuan, "Pathian zarah eng êm ati lo ang, chin fel tur tam tak kan nei tlat, i u Ropuia leh i pa pawh ka bia ang," a ti leh mai a, ka hnial ta lo.

Thawmhnaw kan keng tam lo bawk a, kan inpeih thuai.

Min kuah chung hian u Kimtein, "Thlamuana neih hi inthlahrung miah suh, mualpho leh hmingchhiat i hlawh fai vek tawh a, belh tur dang i nei bawk si lo, chuvangin i fapa nen inhmakhua ngaihtuah la pallui zel ang che," a ti a, ani pawh hian Thlamuana nen kan inneih a duh tih a sawi leh ta. Atu mai pawh hian min tinzawn sak zel mai si a, ka hrethiam teh nuai tawh lo.

"Thlamuana nei tur hian tinge min tih zel a!" tiin ka zawt ta tawp a.

"Thlamuana i belh loh chuan i tan a harsa dawn lutuk, pu Zoliana te nupa zia ka hre ve alawm," a ti duh lek.

U Ruata lo haw hun pawh nghak tawh lovin kan chhuak ta a, damlo kan hun dar thum nang hman ngeia damdawi in thlen chhoh kan duh avangin Thlamuana'n min tur sek a, kan inpui kan tlanpelh lai pawhin ka melh duh bîk ṭhak náng. 

Damdawi in kan thleng a, u Ropuia hmel ka hmuh rualin ka pa a ṭhat leh ṭhat loh ka zawt vat a, a zia thu leh ngaihtuahawm lutuk a nih loh thu a sawi a, ka thawveng huai.

Ka pa mutna bulah naupaw chungin ka ṭhu a, u Ropuia leh Thlamuana an ding thung a.

"Ka pu, sawi loh theih loh a ni a, Nanovi i ngaihtuah zia ka hria.." tia hrawk thian kharh chung hian nichina ka nu leh Mami min tih dan kha Thlamuana'n ka pa a hrilh ta a. 

"Mami te nufa hi chu Pathian aṭanga an inhmu chhuak a nih loh chuan a ngaihna a awm tawh lo, an rilru a kal sual laklawh tawh a nih hi, hrehawm tih phah nan hmang lo ula, Ropuia nen in lamah kan ṭang tlat ang." Ka pain a ti ve ta a.

"Kan inah kan lut thei bik dawn lo a, Mama in tharah kan indan mai loh chuan kawng dang thlan tur kan nei bik lo, mi mitmei ven emaw a lang amawi pawh kan zawng thei dawn bik lo a, nangni pawhin min hriatthiam mai a ngai a dawn a ni," ti dap dapin Lunglei kan pan dawna a nu leh pa ṭawngkam a sawi chhuak ve ta vek a.

U Ropuia'n ngaihdan hran a lo nei ve teh tlat.

"Thlate, ka farnu i kutah kan dah lo thei si lo a, Aizawl in thlen hunah pawh innei rawh u, innei suh u, tih lam ka sawi lo aw, Mapuia thu ang khan kum hnih chhung chu han awm phawt mai ula, thil ṭha zawk a lo chhuak mai ang, mi zawng zawng tilawm vek thei lo mahila, mawihawih zawn te pawh a ṭha, nupui pasal neih hi namnul mai mai chi a ni lo a, inhmangaihna a tel loh chuan awmzia a awm lo tih hre tel ula ka duh," a ti ta a.

"Ni e, Pathian zarah kan dam ang a, kum te han vei se, kan awmzel dan tur a lo lang mai ang," Thlamuana pawhin a ti ve mai.

"Nu leh pate hi kan lei Pathiante an ni a, an thu a kawi a ngila zawm a ṭhat rualin, a dik lo zawk annih chuan dodal ngam ve mai tur, a ni lawm ni Nano..." ka pain nui chungin a ti ve bawk a, ka lo nui ve tawp.

Rin ai taka ka pa a zia avang leh pafa dik tak kan nihna anga kan inbe leh thei hi ka va lawm si êm. Ka nute ka lakah hel mah se, engtikniah emaw chuan hlim taka kan la inpawh leh beiseina lian deuh ka nei ve tlat.

Bawihpuia a ṭah tâk avangin ka chhuak ta rih a, Thlamuana leh ka pa an la inbe khawtlai rih a, u Ropuia'n min lo zui chhuak a, "Mate, Champhai lam mi nupuia neih ve ka rilruk deuh a, Aizawla kan lo zin theih veleh kan rawn tlawh dawn che nia, Thlamuana kianga i awm avang hian Mapuia i hmangaih ta loa i theihnghilh ta tihna a ni lo, nangmah hmangaih ngawih ngawihtuin a nau kuta a dah tlat che hi chhan a awm ngei ang tih ring tlat la, Thlatea thu awih hram i tum dawn nia," tiin min chah nawn leh.

Ka pa kan mangṭha hnuah tlailam dar li rik hma deuhin Lunglei kan chhuahsan leh ta a. Mahse, khawiah nge kan innghah tak ang?

"Novi...Haulawngah zanriah kan ei ang aw, kha hei hi ei la, Bawihpuia hei hi pe ve hlek rawh, in ruih leh khan a buaithlak a nia," tiin Thlamuana'n damdawi mum leh a tui min pe a, ruih lohna damdawi tih ka hre mai.

Kawng a ṭhat vak loh avangin kan tlanchak tehchiam lo.

"Ka pain min rawn bia a," a ti sup a, rang fahran hian, "Eng nge a sawi?" Ka lo ti hmanhmawh.

"Kan haw hun tur min zawt a, kan ina haw turin min hrilh," a ti leh lawi a.

"Kan haw dawn em?" Tia ka zawh chuan, ngun taka ngaihtuah niawm takin a chal a chuar náng a, "Umn..kan haw ang, an fapa neihchhun ka ni tawh a, hrehawm i tuar leh deuh a ngai dawn a ni," zawi sup hian a ti a. Ka thaw halh.

"Ka kianga i awm zel dawn chuan ka hreh hleinem, mi mitmei ven a na a, i u boral hnu lawka kan indang a nih vaih chuan kan mualphona hi kan damchhungin kan hliahkhuh zo tawh lo ang," ka lo ti tawp.

"Mualpho tih vel ka pawisa lo, chuan...kan ina kan haw leh a nih pawhin ka nu leh pa lakah thu delhkilh ka nei ang," tiin min melh zuk a, ani leh ni lo angin a thutak em em a, motor khalh ni mah se, a ngaihtuahna hmun dang daihah a awm nimaiin a lang.

"Mama nupui angin kan inah i awm a, in inneih dan fumfe lo zet te hian sawi a ti tamin zawhna kan dawng nawlh nawlh ṭhin. Chuti a nih rual chuan ka u a boral ta bawk si a, i chhungte lamin i man chungchang an sawi chhuak fo a, nangmah kar nan tak che an hmang fo ṭhin hi ka ngaihdan a ni lem lo, chuvangin i man kan pe ang," a ti ta a.

"Naa..tunah ka man in pe leh rih ang maw, an dawng duh awm lo em mai.." ka lo ti a.

"I u Ropuia leh i pa rilru kan hmin chuan a tawk, hmeichheho thu kha engah vak ka ngai lo," a ti leh tawp.

"U Mapuia awm tawh loh hnua ka man han pêk leh te chu a va mak dawn ve," ka ti chhuak sap a.

"Mama nupui man ka pe dawn hleinem, ka nupui man zawk a ni ka pek dawn ni," a ti hmiah.

"Thlamuan leh.." ka ti hliai a.

"In kan thlen hunah kan sawi zawm ang." tiin a ngawi zui daih.

A sawi angin Haulawngah zanriah kan ei a, rin ai takin ka ei tam phian. U Kimtei leh ka u Ropuia kan thlen chin ka hrilh a, phone ka hman laiin Thlamuana pawhin a nu a be vein ka hria. Ka pa pawh a harh sâwt viau a, kum upa lam a nih tawh avang leh TB damdawi a chak êma a hneh lo deuh niin ka u-in a sawi. 

"Mate, ka pain i hmel a han hmu chiah kha chu hmuh theihin a kâng awk awk alawm maw le," nui chunga u Ropuia'n a tih chuan, "Nakinah, hun remchang kan neih hunah lo zin leh kan tum dawn nia," tiin phone ka dah ta rih a.

Dârkâr li hnuah.

Tluang takin zan dâr sawm pelhah Thlamuana te in kan thleng ta a. Hmuaktu kan nei lo.

Keimaha luh hmasak ka hreh êm avangin Thlamuana ka nghâk a, chutih lai chuan kawngkhar inhawngin ka pa a rawn chhuak ta a.

"Thlate, in motor thawm ka hre miah lo," dam duama tiin min rawn en a, "Zomuan, inchhungah lo lut ta che, khatia i din reng a.." tiin min hui zauh a, ka rilru tê tê chuan 'an fapa chân ai chuan min biak ṭhat an thlang leh ta a nih hi' ka ti a.

Mahse, Thlamuana ka nghâk lui ve tlat a, ani pawh kan bag vel khaiin a rawn phei a, "Lut ila.." tih leh kal a rual a, ka zui vat.

Sakawlh inchhungah kan lut leh ta. 

Diki ka hmu lo a, ka nu choka aṭangin no dawm chung hian a rawn chhuak bawk a, min en lo mai ni lovin min hmu lo der zui zat. 

Inchungah ngawi rengin ka chho tlang nghal a, u Mapuia room-ah ka lut ta a.

Mi pangngai chu nise ka pa damlo kana kal kan nih angin chanchin min zawt ngei ang; mahse, ka phût lo e.

Bawihpuia a muhil tho a, khumah mutin muangchang miah lo hian inbual turin bathroom-ah ka lut nghal a, a lo harh hman ka hlau ru hle.

Shower-a ka inphuh tir lai chuan a tawp thut a, tui far tur a awm lo, shower gel ka inhnawih phuan buah bawk si. Tab ka herh a, tui haw tur a awm chuang lo, ava hahthlak e.

Keima buai buaia ka lo buai lai chuan, "Novi.. i zo dawn tawh em?" Tiin Thlamuana'n min rawn ko a.

"Eng lo, tui a haw thei lo, engtin nge ka tih dawn?" Tia ka ṭawng láng láng hnuah, bathroom kawngka bul lawk aṭang hian, "Tui an pump lo a nih dawn kha, i laklawh loh chuan kawngkhar lo hawng rawh tui ka rawn dah ang," a rawn ti a.

"Ka laklawh...ka taksa a phuan vek.." ka lo ti si.

Nui huk chung hian, "Min lo nghak rawh," a tih rualin a kalsawn nghal a ni ang, a reh zui hmak.

Minute 5 hnu velah, "Lo hawng rawh le, ka lo dahsak zuai ang che," a rawn ti a.

"Aih," ka lo ti tlat a.

"Hawng mai mai teh, inbual ve ka duh a nia," tiin kawngkhar a rawn sawi a, bathrobe ka hâk chuan sahbawn phuan a kai dawn si, towel pakhat phawrh chhuakin ka bih ta ringawt a, kawngkhar ka hawn veleh bucket pahnih khaiin a rawn lut a, min en chuang lo hian, "Hmanhmawh ve deuh la, bawihpuia a harh ṭêp ang," ti sup chung hian chhuatah bucket a nghat a, kei pawh ka dinna aṭanga insawnin a chhuah ruala kawngkhar kalh nghal thei turin ka pen a, ka hmanhmawh deuh nge ka ke chhep sualin ka tawlh zawt a, tluk ka hlauh luatah Thlamuana chhuak tur kawr hnungah ka ṭhâm a, a hnung zawngin a rawn kat nawk a, ka tlu thla ta nge nge e.

Chhuatah ka ṭhu sawp niai a, ka towel bih lai inhlim vek leh ka awmbâwr lang huai pawh ngaihsak lo hian ka kerêk na vut vut chu ka dawm nghal a.

"Novi..." tiin a rawn ṭhu hniam a, ka mittui ka khap per sawk.

"I khawi lai nge na?" Tihpahin min rawn en a, mit zim san chung hian ka taksa lang huai chu a en ta a, "Min en suh.. ka ke hi..." ka lo ti vin hlar a.

"Ka en loh chein ka hmu thei dawn che em ni..khawi," tih leh min pawm a rual a, bathroom kil sira ṭhutphah hniam chu a ke-a chhuih pheiin min ṭhut ṭhat tîr ta a. Ka taksa phuan a reh zo titih tawh.

Ka ke rek a hmet nawk nawk a, ka lo ṭe leh ṭhat.

"I rap lek a ni maw, a ulh deuh a ni mai thei, fimkhur ve deuh tur a nia," ti hmukin ka mitah tak min en a, "Ka bual che i duh loh chuan rang takin intleuh rawh le, kawngkhar hi kalh tawh suh.." ti lehin a chhuak ta a.

Ka ke vei lam ka rap ṭha ngam lo, ka towel bih lai thehsawnin ka intleuh ta puat puat a, ka fai pawh ka ring mai mai lo e a.

Bathroom bang nem chung hian ka ding thei hram. Bathrobe ka inbel thuai a, "I zo tawh em," tia kawngka bul mai aṭanga Thlamuana a rawn ṭawng chuan ka phu zawk.

"Zo tawh.. ka ke hi ka rap ṭha ngam lo reng reng.." tih pahin khawngkhar ka nam hawng a, a rawn che chhuak vut. Ka inrin hman hmain min pawm nawlh a, "I beng chheng leh vak ang e, i fapa tihharh i duh loh chuan i kâ ang suh," ti nghut in khum lamah min pawm phei ta nawl nawl a. 

Thawmhnaw ka inbel chhungin a chhuak nulh a, nichinah khan ka saruakna a hmu hman tih ka hria, mahse, ka hre lo der tlat a, ani pawh hria angin a awm duh lo. A pawi tawp náng.

A hnu feah Crepe Bandage leh Spray tur kengin a rawn lut leh a, ṭawng lovin ka ke a khawih zui mawlh mawlh a, "I dim ve deuh a ngai dawn a nih hi, a vûng ṭan," ti supin a rawn dâk chhuak a.

"Ka nu leh pain eng pawh sawi se, hnial lovin i ngawi dawn nia aw, an rawn chho ṭep ang," a tih chuan a ngaihna hre lovin ka lo melh hú ringawt.

"Ka intleuh ve zuai ang a, ka rawn phei nghal ang, ka sawi kha hre reng ang che," tiin min chhuahsan ta a. Eng thil tak ni leh ang maw.

Tunah zan dar 11 a pel tawh a, naktuk nghâk thleng thei lo khawpa thil hmanhmawh thlak chu eng eng ni ta ang?

Ka nu Biakliani rawn luh laiin Bawihpuia a ṭap a, hnute siam tura ka bâi phei auh auh chu min enin, "I ke engtin nge i tih a?" A ti nghat a.

"Ka rap sual palh a..." tia chhângin bawihpuia hnute tur ka siam san a, zaninah an inah kan lut leh chiah a ni a, sawi tur an neih ngei chu ka ring tho nain thil danga min 'chu e kha' duh mang si lo hian a duh hunah zan rei pawh sawi lo hian an rawn chho leh tawp a, an zia hi a mak ve ngawt mai.

"I naupai lai khan mipa nge a nih hmeichhia tih inhre lâwk em? Ka sawi awmzia chu doctor in zawt sa em?" Tia ka nuin min zawh chuan ka mengphar âwk a, teh daih chuan.

"Hre lâwk lo, eng mah ka hre sa lo.." uar takin ka ti a.

"A nih leh Mapuia khan a service seat-ah a fapa hming a dah tih i hriatpui em?" A ti leh ta a, ka va ning e, engmah ka hre der bawk si lo.

"Ka nu, u Mapuia hna chungchang leh a thawhdan a mik a mak pawh ka hre lo, bawihpuia te chu a pa boralin kâr hnih êm pawh a tlin loh kha.." ka lo ti sawk sawk a, ngeiawm taka nui lui chung hian, "Ni e, ka tupa kâr hnih pawh tling lo kha a pa boral hmain a pension chang thei tura ziah luh a ni, tu tih nge tih kan la hre thuai dawn alawm, i hming chu a awm lo. Mahse, Lalnunfima hian kum 18 a tlin hunah a pa pension a khawih thei dawn a ni. Zomuanzual, i inrawlh emaw, i inhnamhnawih a ni tih ka hriat vaih chuan a pawi viau ang," a ti ta a.

Ka thin a phu dup dup. Engtin nge a nih theih?

A hmain u Mapuia hian tunge a awm loh hnuah a pension leh thil dang hrim hrim khawihtu tur a dah tih ka hriatpui lo a, Lalnunfima hming hi Thlamuana phuah a ni. Mahse, u Mapuia'n fapa a nei dawn tih a inhre lâwk hauh lo. Kei pawhin ka hre chuang lo, a pian hnu lawkah a va thlâk a niang ti dawn ila, ani damlo kha a chhuak ngai meuh si lo. Â..ka hriatthiam phâk bâk a ni e. Ka mâwl huih mai. 

Tukverh bula ka nu ding chu enin, "Eng mah ka hrethiam lo takzet, Thlamuana zawt mai teh.." ka ti ta tawp a.

A rawn inhera chiang taka min en chung hian, "Bawngkawna a in pawh i hmingin a dah a ni lawm ni, nang hian ka fapa thluak i sûksak a, amah enkawl seiliana a mamawh tumsaktu a nu leh pa thlauhthla turin i fuih a ni, Zomuan, hei hi lo hria ang che, ka dam chhung hi chuan Lalrinkima thawh chhuah chêngkhat mah hi i chang dawn lo," a ti hmak hmak a. 

A buaina te hi ka buaina a ni ve ṭhin si lo hi ka va hah tak êm.

"Mapuia'n Service seat a tih danglam chungchânga i inrawlh tih ka hriat phawt chuan i dam chhunga nui leh ngai tawh lo turin ka siam ang che, Thlatea nen tun aṭanga thla thum a ral hnuah in innei dawn tih hria la. Kan monu nih châkin i hun leh thâ i khawhral hnem tawh bawk a, dan ang chuan ka mo ni mawlh ang che," tiin a nui hawk a. Min hmusit tih a hmelah a lang reng.

"Thlamuana nen kan innei dawn maw?" Ka lo ti he haw a.

"Ka sawi zawh chauh kha maw le, i duh chuan ka fapa zawt rawh... thla tharah Mapuia lung kan phun ang," a ti ta hmiah a, thil awihawm pawh va ni suh.

Ka nu Biakliani chhuak tur leh Thlamuana rawn lut tur an intâwk a. 

"Thlate, Zomuani chu ka hrilh tawh kha aw.." awihawm loh khawpa zaidam hian zu han ṭawng leh si a. Ka va ei lo ber mai.

Thlamuana rawn lut chu en pawh ka en peih lo. A nu nen an intiam rual a nih teh chuan ka dam chhungin ka ngaidam lovang.

"I va tûm nasa ve?" Tih pahin a nui huk a.

"Nui miah suh, eng thil mah nuihzat tur a awm lo," ka ti nghat a.

"I thluak hmang ta che Novi... ka laka thinrim mai lovin," a ti sup a. Khumah rawn ṭhuin min ṭhut hnaih mah mah.

"Inneih tih vel te kha eng nge a awmzia? U Mapuia nen kan inneih an rem ti lo a, tunah i u lungphuna nang nen innei tur angin min sawi leh bawk si. A Biakliani thlak lutuk êm mai.." ka ti hmak a, a nui kur kur ringawt.

"Mama ka ni lo a, kei chu a nau ka ni. Ka nupui i nih loh chuan kan inah hian nun nuam i nei ngai dawn lova, Mama nupui anga i awm zel chuan a rosum duh vangah an puh zel bawk ang che, ka nupui ni lo mah la kum hnih kan chen dun a ngai tho tho a, i fapa i kianga a awm reng theih nan kei min neih hi a ngai a ni," a ti deuh duah a.

"A ngai kher lo.. inneih a ṭulna a awm lo, u Mapuia bâk mipa dang ka nunah an awm dawn lo," ka lo ti zung zung a.

"Nupui tih lémah, dan anga ka nupui i ni ang. Nupa nun lam a tel dawn lo, i lo ngaihtuah a nih chuan, tin, i nu leh pa hnenah i man ka pek a ngai, man nei lo leh hlutna nei miah lo pawhkâwi mai mai theih hmeichhia ni turin ka duh lo che," tiin a ding chhuak a.

"I duh ngang lo a nih chuan ka nawrlui lo ang che a, i hmakhua i thlir thiam a nih chuan ngun takin ngaihtuahna sêng ang che. Zanin chu in nufain mu rawh u aw..hnathawh tur ka nei," tih pahin khuma ka fapa mu chu a en a, "Fahrah nun a tem loh nan a nu i pawimawh tih hria ang che," tiin a chhuak zui ta a.

Ṭawng ve nachâng pawh hre lovin ka ngawi vung vung a, mit ka khap fak fak ringawt.

Tun aṭanga thla thum hi ral lo mai se ka va han ti tak.

Chhungkaw pangngai tak an ni a, Atuni leh Atei te nupa hriatpuina a tel ve nge tel ve lo hriat ka duh êm avangin zan rei pawh sawi lo hian Atuni ka call ta tawp a.

Ani lah chuan ngaihsam zetin, "Ka nu leh pa ka finchhuah a nih kha, anni sum mena meng chuan an tupa rokhawm tur pawh an ît leh dawn asin. Nano, Thlatea kianga i awm ngei ngei a ngaihna chhan i hre zel mai ang, Atei pawhin engkim a hria aw..." a rawn ti sam êt.

Chhungkaw mak leh dangdai tak chu an ni e.

Atuni nen kan inbiak zawhah ka mu ve ta a.

Ka whatsapp message rawn lut chu enin Thlamuana a lo ni a,

"Mama kha i Chanpualah ngaiin i mawhphurhna i hlen chhuak a, tunah chuan Mama thu hnuhnung avangin ka Chanpual i ni ve ta, a tawp khâr tu nih ka tum bawk." Tih hi a lo ni a.

Lalnunfima pate Thlamuana Chanpual ka lo ni a nih chu. 

Kei Zomuanzuali hi ka vannei nge ka vanduai tih chu hunin hril teh se aw...

250123

Shadow of the life

B+>[BeckirafARenthleI]<+®®