22.KA CHANPUAL [A Becky Rafa Story]

22. KA CHAN PUAL

Ziaktu: Becky Rafa Renthlei

-B®®

(Recap)

Ka whatsapp message rawn lut chu enin Thlamuana a lo ni a,

"Mama kha i Chanpualah ngaiin i mawhphurhna i hlen chhuak a, tunah chuan Mama thu hnuhnung avangin ka Chanpual i ni ve ta, a tawp khâr tu nih ka tum bawk." Tih hi a lo ni a.

Lalnunfima pate Thlamuana Chanpual ka lo ni a nih chu. 

Kei Zomuanzuali hi ka vannei nge ka vanduai tih chu hunin hril teh se aw...

&&&

Ka ke nat zanah ber kher Thlamuana a riak hrang ta si a, a hun lo ka ti hlê.

Kan nufain kan inbuaipui a, a patea sual a chhuak a ni ang, hemi zan hian vawikhat mah a rawn lang nawn tawh lo reng reng.

Mihring rilru hi a lo mak khawp mai. Duhâm lutuk avanga mi hmai êng zahna te, mahni thisen zawmpui îtsîkna te, u leh nau inkâra rosum inchuh vanga hming hliau pawisa miah lo mihring hi a takin an awm ngei tih u Mapuia ka tawn aṭang hian ka hriat phah. Nu leh pa pawh an bâng chuang hek lo.

Hma hun thlîr thiam lo leh hmangaihna avanga thil thui tak dawn nachang hre lo kei hian; thil tam tak ka paltlangin ka tawngbua a, tunah chuan u Mapuia nu leh pa rilru puthmang dik tak pawh ka hrechiang tain ka inhria.

A nu leh pain a thu hnutchhiah leh ziaka a dah engmah an hre lo nain an fapa, thla reilote liam taa an sún tâk Lalrinkima chuan a rila rah a fapa tan a pension sum hlawm chu a lo dah diam niin! Kum 18 a tlin hunah chiah khawih theih turin ruahmanna fel fai tak a lo siam vek si a, a nu leh pa lung a âwi thei mawlh lo.

Chumai a la ni lo, thlatina a lâk ṭhin a thlabi hlawh pawh a fapa hming thovin a dah a, kum 18 a tlin hma chuan Lalnunfima hian a pa hlawh a ring thei dawn a ni. He thil avang hian chhungkua kan buai khaw lo zo a. Dem lah ka hlawh nasa!

Ka rin ang chiah khan kei chuan engmah u Mapuia hnen aṭangin ka dawng lo a, dawn ka inbeisei hek lo. A lehkhaah khan kum hnih an inpuia ka chêng a nih chuan Bawngkawna a in sak ka chang thei ang tih chiah kha a ni. Kum hnih chhung hian kan nunah thil tam tak a thleng thei tih ka hria a; ka ngaihtuah thui peih vel lo a ni ber.

"Lalrinkima thluak kha Cancer natnain a ti buai khaw lo a nih ngei dawn kha, a nih loh pawhin Zomuanzuali'n a ei zo tawh a ni ang e; kan fa hming koh tiin a naupan lai ata tawh kan duatin a unau dangte ai pawhin a zirnaah kan inséng hnema kan retheihpui tehreng nen, a hlawh aṭanga cheng khat mah a nu leh pa min han hnutchhiah lo hi chu..." tiin ka nu a âng dur dur a, ka ngaithla ning ngawih ngawih tawh a, ka khak phâk rual a ni si lo.

"Bawngkawna a in saw kan hralh sak daih dawn nia, a contract thawhna nise chan khat chauh min pein a dang khawih theih miah loh turin a dah vek a, a damlo kan buaipui hah tehreng nen, fapa nikhua lo lutuk kan nei a nih ber kha a.." ka pa pawhin a ti a, an nupaa an hlawh a tam tehlul vei nen mihrang kuta lût pawh ni lo, an tupa ngawih ngawih pawh an hmu mawh chu a ni si a, rethei bakberha awm an ni dér si lo. Tenawm hian a!

Thlamuana mi â ni lo ta chu a u lehkha lam sawi lang miah si lovin a nu leh pa hnenah, an tupa ka chhuahpui lohna tur leh Bawngkawna a in kum hnih hnuah ka chang dawn tih hrilhin an hnena ka awm reng theih nan tiin tu khaw-kha hriat lohvin a nu leh pa palâi tîr turin a tur sek a, Lalnunfima chan âi leh u Mapuia in sak an ît vang alawm, mi mitmei veng miah lo a Thlamuana min neihtîr an duhna chhan kha. Rúl chukna mi âi pawhin an chuk a na ta ve ang.

Thlamuana nen zan khat kan sawi dun a, dan anga a nupui nihna chauh ka nei dawn a, nupa nun leh inhmangaihna tih vel vanga nupaa insiam tur kan ni lo. Kum hnih a ral a nih chuan ka duhthua ka kal hran min rem tihsak dawn bawk a, duh lovin emaw a nu leh pa duh dan kalh zawnga chêt tum pawh ni ila, amah u Mapuia dán zam bawk khan min tibuaiin a khirh vel vek.

An fapa upa zawk nupui atana min duh lotu khan sum leh pâi vang chauhin an fapa naupang zawk min hmehbel leh chûk chûk a, khaw êng an zah lovin pawisak an nei tlêm salh salh ta khawp mai. Kum hnih 'term' a ni tih erawh Thlamuana nen chiah a hretu kan ni a; Atei emaw Atuni, u Ropuia pawh kan hrilh duh ta lo. Hepa nen hian thurûk kan va nei tam sâwt êm!

"Ngaihzawng neih i duh emaw pasal neih i duh pawhin kum hnih hnuah chuan i duh danin i awm dawn nia," tiin Thlamuana'n a sawi.

"Nangin ngaihzawng i nei ve dawn em?" Tia ka zawh ṭum khan khi suk chung hian, "Nei ve ang, ka nghei reng peih hleinem," a ti a, ka sawipui thui duh ta lo.

An sawi lâwk tawh ang ngeiin thla a lo thar veleh u Mapuia thlan YMA in an siam kha tidanglamin ruah a lo sur pawha a tlâkhniam loh nan Rod ṭha taka phánin an slab nghal vek bawk a, Granite nalh pangngai taka ker an phun zui hmak. A thlalâk pawh an nem kâi thlap a, Thlamuana nen kan va en ni-ah ka ṭap nasa hle.

"Novi, i ṭah theih chhung chu ṭap rawh, i mittui hian hul nî a la nei dawn a nia, tun atan chuan han ṭap phawt mai teh le," tiin a chhakah min nghak hmak mai. A u a hmangaihzia hre lo ila chuan a khawsak phung hi ka ngei leh pek ngawt ang.

Thla thum hnuah palai tirh an sawi a, u Mapuia boral aṭanga thla riatna tur a ni chiah thung ang.

"Ka chhungte'n inneih an remti dawn chuang lo a, engtia hmalâk nge i tum?" Tia Thlamuana ka zawh chuan, "I pa leh i u Ropuia phalna bâk ka mamawh hleinem, anni lahin ka kutah an dah tawh che a, vantlang ngaihdan leh rindanin ka nun a ti buai lova; nang pawh inbawh buai tîr suh ang che,'' a ti hmiah.

"Tihian tuna kan awm dan pangngai ang hian awm ila, inkutsuiha mualpho kher a ṭul em ni? Ka tan pawh a zahthlâk dawn lutuk, kum hnih chhung chauh tur i ti bawk si a," ka ti leh hrâm a.

Nui suk suk chung hian, "Ka vawikhat nupui neihna tur a ni a, Biak in hawng ngeia neih ka tum, a neitu tur mah ka zah loh te chuan, lo zak duh reng reng suh, Biak inah ngei le.." a'n ti chiah chu ka ṭeu nasa teh e.

"Awi awi... khatiang kha theihnghilh rawh, Biak in hawnga nei thei ka ni ve hleinem," tiin ṭan ka lo khawh a.

Awlsam fahran hian, "Kohhranin an thununna che kha an phelh hman tawh dawn, i duh ang thâlin mo kawr fual i inbel thei ang, â...i te si a, i mawipui pawhin ka ring lo, ûte," tia nui kur kur chungin bawihpuia a pawm a. 

"Tlangvalte, hun rei lote hnuah i patea hi i pa ka ni ang a, mahse, âpa tia koh ka duh dawn lo aw, i pate Thlamuana tho nih zel ka tum," awmze nei lo zeta tiin bawihpuia a bia a, ka run thei a nia.

Diki lah chuan a khât tawk hian, "In inngaizawng chiang lutuk, ka hre vek," a lo ti teivet a, a ninawm a nia henu pawh hi...

Hna thilah Thlamuana a zin zing hle a, a lo haw hian thil hming hnih khat min hawn ve ziah a, hmanni lawkah pawh, Atuni tlawhin a kal a, a nîin bawihpuia thawmhnaw tur a rawn thawn ṭeuh. Kan inbe fo bawk.

U Atei te ve thung chu a'n tlei khawp a, a ngaih a ṭha ta a ni ang, thil ṭûl leh pawimawhah bâk kan inbe meuh lo a, "Ka nau Thlatea ka ring tawk a, aniin nupui atana a duh che a, a iai lo che a nih chuan sawi nawi sak ka tum lo, thiltih theihna tereuhte i nei a nih ka ring, ka nuṭa te pahnih awlsam takin i hneh thei a nia," tiin a nui kar kar a, huat chi va ni suh, ka nuihpui ve tâk mai mai kha.

Mahse, Mizo kan ni a, thil sawi peih fe fe leh ngaihdan chi hrang hrang tam ta chu, u Mapuia thlanlung hmanhmawh taka kan phun chûk chûk avangin sawisep kan kai nasa êm êm a, "Mi sawia buai rual kan ni lo, kan chaw vawikhat bár pawh min tumsak lotute hian min sawi min sawi lo teh se," tih kha ka nu ṭawng duh dan a ni a, a ngai serious lo ve khawp chuan ka hria.

U Ropuia pawh a bialnu Champhai lama mi Faki nen min tlawh turin an lokal a, a rang lama inneih an tum tih an sawi. Faki hi Hindi teacher a ni a, u Ropuia aiin kum 7 velin a naupang. AuMami nen inrem thei tak ang maw!

"Mate, i u Mami a nikhua lo tulh tulh a, a chhúl an paihsak hnu hian zu in a ching zeuh zeuh bawk a, vawi thum vel ka khak tawh; mahse, ka nuin a ṭan tlat si a, ka pa phei chuan en liam mai mai rawh, min tih vangin ka khak tawh lo," tia min hrilh chuan ka pa ka lainat hle.

Upat lamah hrehawmnain a delh chho a, a hriselna pawhin a tuar nasa tih ka hria a, ka nu ka dem lo thei lo. Tb damdawi a ei ṭha a, a hma anga bawksawp kha chuan a awm leh ta rih lo tih te a sawi tel a, ka ngaih erawh a ṭha deuh.

"Mapuia nupui tur anga ka hruai phei kha, a nau nupuiah i ṭang daih dawn si a, a mak ngawt mai, Pathian remruat tepawh a ni zawk ang e, hetianga u te nupui chhawm ta hi sawi tur ka hre ve nual a, i vanneihpui ngei ka beisei tlat, thuawihna hian rah ṭha a chhuah fo a, Mapuia thu i awih hi i inchhirin ka ring lo," a ti dap dap a, ka u Ropuia nge nge, a fel ṭhin a nia.

Ka nu Biakliani pawhin a hma âi zawngin u Ropuia a be ṭha a, chaw eiah a sâwm nghe nghe. 

Zanriah kan kîl lai chuan a kâah pawh zen ila min seh lovang tih tur khawpa zaidam hian a ṭawng a, bawihpuia chaw eipui ngai hlei lo khan hemi zanah hian a'n pawm ngei a(h) fing phakar thei si.

"Ropui, Thlatea lah chuan palâi tirh a sawi sek tawh mai si a, i nu leh pa te nena kan boruak lah a chuti viau si lo a, engtin nge ni ang le?" Tia ka nuin ka u a zawh chuan, "Mapuia lakah sual an chhuah tawh a, tun ṭum chu keiman a man ka dawng ang, inneih chungchâng erawh in duhdanin in kalpui dawn nia, helaiah in lo tuamhlawma keini lam aṭang chuan an tuithlar daih tawh alawm. Mahse, ka farnu hian man a nei ve a, a nuṭa neihchhunin ka dawng mai tur a ni, ka tlanchhe dawn lo," tiin a chhâng dam thlup a, nu ber a nui tak ang vur vur a, a ṭha vek e.

Faki nen an inneih tur chungchangah an pakái ta a, ka pa zawkin, "Nupui nei rual i ni tawh a, neih mai a ṭha, nu leh pa thlazar hnuaia awm rei hi a ṭha ber lo a nia," a ti ve ngial.

U Ropuia te haw hnuah, "Zomuani nuṭapa hi chu a fing fel ngawt mai, unau ṭheuh ṭheuh hi mizia a lo dang thei riau a nih hi!" Ka nuin a ti leh hrâm tho. 

"A dik chiah, u Mapuia leh Thlamuana pawh hi an zia a dang ka ti," ka lo ti ve hmak a, Thlamuana'n min melh rum teh e.

Inchunga kan chhoh hnuah, "Mama nen min tehkhin tawh suh, Mama ka ni ngai dawn lo a, a mizia ang kha neih tumna rilru ka pu lo a nia," ti nghut chungin kan room-ah a vei thuak thuak a, kut hnungsuih chunga hetia a teikual chhên hi chuan lawm loh rûkna a nei tih ka hre ve kar tawh.

"U Mapuia nen ka tehkhin ngai lo che," tiin dâwt chiang lutuk ka sawi a, ka tehkhin rûk nasat zia hria se chuan min kuk lawlh duh ang chu maw le.

"Novi..dawt sawi i inhmeh ve lo.." tiin ka bulah a rawn ding a, "Ka u nupui anga i inngaih tlatna kha paih ṭhen hlek hlek ang che, a nupui ni lovin a hmeichhe kawl ang chauh i ni a, sawi nawn chhên ngai tawh lo rawh se, nupui nihna chanvo i nei lo aw," tiin min ṭawngkhum erh.

"I ṭawng thei hle mai, mipa ṭawngtam ka ngaina lo," ka lo ti hlar a. Kiai suk chung hian, "I ngainat zawnga ka awm chuan kum hnih hnuah i chhuak duh si náng," tiin a nui huk a, rang zetin, "Ka ngaina chatuan lovang che, lukir..." ka ti vîn ṭhat.

A nui nasa zual sauh a, "Nupui nihna dik tak chanvo i neih hun tur chu nakin lawkah a ni ang, ka la hrilh ang che," a ti a. Ka ngawi ta rauh rauh ringawt.

"Zanin chu hetah ka riak ve tawh ang, bawihpuia ka ngai tawh.." ti leh daihin a kamis hak lai a phelh a, a zin rawn haw aṭangin zan khat mah a lo la riak lo, ka sawm bawk hek lo.

"Riahpui kan ngai tawh hleinem.." dam thlapa tiin hot pot-ah tui ka dah a, "Ka riak ang ka tih chuan ka riak dawn a ni mai, a naupang zawk hian min hnial zet zet zêl suh," a ti hmuk a, ka ngawihsan hmak.

Chumi hnu chuan Couch-ah a va mu thân a, a phone phawrhin tu emaw a be zui daih a, ka mutsan ta zâwk a.

Khum khatah kan mu tlâng tawh ngai lo a, a lo riah chhunah pawh Couch-ah zel a mu ṭhin.

Inrinni zan a ni a, ka pum a nat êm avangin khawvar ṭan tirhah ka harh a, ka chalah thlanfîm a bawl ṭak ṭak a, ka thaw a sa nghal phat phat mai.

Ka dang a ro huam bawk si. 

Thlamuana ka ko a, a harh thei der lo, khum bula tui bottle chu ban tumin ka tawlh hret a, bawihpuia tihharh hlau ru tak hian ka thaw chhuak halh a, ka kut veilamin ka pum ka dawm a, dinglamin tui bottle ka ban thung a, ka chêt zawng ringawt pawhin a na vawng vawng thei alawm maw le.

Tui bottle ka lak hnuah ṭhut chhuah tumin ka insangmara ka thâ a khur dar dar. Ei sual ka nei nge heti em ema a nat ni! Harsa ti zetin ka ṭhu chhuak hram a, tui bottle chhin ka hawng tur chu ka tâi zawnah a rawn na leh zawk a, ka bottle ken ka thlauh zui nghal. 

Room reh takah chuan a ri ring kher mai.

"Novi..." tih pahin Thlamuana a rawn phei nghal a, "Novi... hey...engti zia nge?" Ti lehin khum kotlanga ka ṭhu kun ngawih ngawih chu min rawn kuah vat a, "Ka tâi a na lutuk..." zawi tea tiin ka thaw chhuak hak a.

Nichin kha chuan ka pum a na nimaiin ka hria a, tunah erawh ka tâi zâwnah a na daih a, ka rum chhuak dat.

Ṭawng ring ṭha ngam bik lo hian, "A na viau em, ka nu kan ko ang e," tih leh chhuah a rual a, "Ko duh suh" pawh ka ti peih tawh lo.

An nufaa an lo chhoh thlen chuan ka nu a phî chung a, "Hospital-ah kal ang, hetia awm ringawt a ṭha lo," tiin min kuah tho a, Thlamuana Motor la chhuak tura a tirh hnuah, "Bawihpuia hi ka lo mutpui ang a, Thlatea nen kal mai rawh u aw, Diki kuta dah ngawt zawng a ṭha lo," ti zung zungin ka fapa a pua a.

Thlamuana'n kawr lum a hmuh hmasak ber min hâk tir hnuah, inhnuai lamah min pawm thla ta a, ṭawng pawh ka ṭawng peih tawh lo.

"Thlate, a ṭul a nih pawhin riahpui mai rawh," a ti ve ngei a, rin aia a fel phian chu a.

Ebenezer hospital min panpui ta a, a khât tawkin, "A na viau em, tuar hram hram rawh aw," a ti âwl lo a, ani leh ni lo angin a che buai vek. 

Casualty-ah min pawm lut a, nurse ho nen an inhre ṭha a nih ka ring, "U Thlate, engtizia nge?" tih pahin duty pakhat chuan min lo buaipui vat a, ka Bp an check nghal a, a hniam hlek, mahse, hlauhthawnawm a ni lo tih an sawi a, nachhawknain min jection zui ta a.

Minute 20 hnu velah ka pum leh tâi nâ pawh a ziaawm ta. Doctor-in "I zun kan test dawn nia, hnâi a awm a nih ka ring, thil dang test ngai pawh a awm," tiin min hrilh a, ka fapa ka ngaihtuah êm avangin Thlamuana hnenah, "Ka zia deuh tawh tho a, haw rih mai ang," ka ti a.

"Zanin chu kan riak ang," a ti hmuk ringawt.

"Bawihpuia ka ngaihtuah êm mai," ka tih chuan, "Ngaihtuah duh mah ta che, an tupa rangkachak a nih hi, an tina hauh lovang," a ti deuh tlat.

Mut chhuakin min zém a, ka lo chhing sek hman. 

Ka harh leh chuan Semi Cabin-ah kan lo awm tawh a, ka khum piah chiaha hmeichhe mu chuan min lo thlîr reng a, Thlamuana ka hmu mai bawk si lo. Chutia ka hawi kual lai chuan, "I pasal kha inah a haw lawk a, i lo harh thut chuan lo hrilh rawh ati," tiin chu hmeichhia chuan min rawn bia a, Thlamuana kha ka pasal emaw a ti a nih ngei hi. Sawifiah erawh ka tum hran lo.

Tiffin khai chungin Thlamuana a lo lut a, a hnungah Diki'n ka fapa paw chungin a rawn zui bawk a, bawihpuia hmel ka hmu chiah chu ka harh sawt sawtin ka hria.

"Khawi, ka lo pawm ang," tiin ka ban vat a, "Novi...pawm rih lo mai rawh," Thlamuana'n a ti sup a, ka lo melh vak ringawt.

Drip bur hnih ka khâi zo tawh a, "Diki, Novi chaw ei siam sak rawh le, bawihpuia ka lo pawm ang," tih leh Diki puak lai lâk a rual a, "I ngaihtuah êma ka rawn hruai lui mai mai a nih hi, naupang hruai kha ka nuin a rem ti lo a," ṭha tein a ti a, a dik ve reng.

Tûkṭhuan ka ei a, ka zun leh thisen an test a, result erawh a la chhuak lo. Na lutuk tia sawi tur nei lo mah ila, ka tâi bawr vel erawh a nuam chiah lo thung.

"U Thlatea ninawmzia hi aw, ka eirawngbawl min tur sek a, nizanah i pum a nâ tih ka lo hre ve si lova tukinah piin a sawia ka hre chauh alawm," tiin ka thil eina vel a dah fel a, "Riah kher pawh hi a ngai lo a nia, haw mai ka duh," ka tih laiin Thlamuana nau pawm chungin a rawn lut a, "I zia deuh chuan naktukah kan chhuak dawn nia, chimbuaitu awm lovin zan hnih khat chu mu hahdam ve rawh," a ti a.

"A pite bula mut tir leh ringawt ka duh lo," ka lo ti hmak a.

"A pite bulah a mu dawn hleinem, keiman ka mutpui ang, inriahpui an phal si lo a, nangmaha awm i hreh em?" Tia min zawh chuan ka hreh loh thu ka lo sawi vat a, "Bawipuia i mutpui theih dawn chuan kei chu min rawn ngaihtuah suh, na dang em em ka nei lo," ka ti sawk sawk a, nui ruh ruh chung hian, "Ka ngaihtuah loh che chuan ngaihtuahtu mumal i nei si lo alawm, a ni lawm ni Diki?" Tiin Diki a melh a.

Ani ta pek chuan, "In tenawm, induat lang vak zel suh u," a ti hlak a, a va buaithlak e.

Rei tak an awm theih loh avangin min hawsan ta rih a, tlai lamah chaw min rawn kensak tur thu a sawi a, "Hnathawh tur tlem ka nei a, kan haw chho rih ang e.." tih pahin a rawn kun hniam a, ka chalah a fawp zauh a, ka lâi ringawt.

Ka zunkawngah hnâi a lo tam bakah ka nau neih aṭang khan ka la period miah lo a, chumi inṭham chho na vel chu a lo ni awm e. Investigation mumal tak kan nei lova, Sunday a nih vang a nia, zunkawng damdawi ka ei nghal bãkah drip an khai leh bawka chu zawng chu a ni mai. zunkawng chiang lo hi chu ka naupan laiin ka nei zauh zauh ṭhin. 

A hnu lawkah ka period zui ta bawk nen ka va han ning tak. 

Tlailamah Thlamuana a lokal hman ngang loh avangin Diki zawkin chaw min rawn pe a, "En teh, Nano..piin, u Thlatea hnenah nangni pahnih hi in lo chesual tawh a ni lo maw, Zomuani khan nau a chhiat em? tiin a zawt a." A tih chuan ka ner nasa mai.

"Thlamuana'n engtin nge a chhan?" tiin ka zawt a.

"A nui ringawt, engmah a sawi lo," a ti leh tawp a, "Lalthlamuana mai mai chu han sawifiah ve awm a nia. Mawl lutuk mai" ka ti hlak hlak a, la nui reng chung hian, "U Thlatea hi chuan a duh che tih ka hrechiang e, hmanniah pawh hmeichhe pakhatin a rawn bia a, nupui neih a tum tih a sawi, a ngaihsak dan em em che hi.." a ti leh zat zat a. Ka lo nui tawp.

Diki haw hnuah ka piaha hmeichhe mu nen chuan kan titi ve a, ani pawh a chhulah bâwk a awm a lo ni a, an zai dawn a nih hmel.

Hming te inhrilh tawnin phone number kan inpe a, awmpuitu a nei bik lo nen kan titi thei phian. Masangi a ni a, Hortoki a mi niin Aizawlah hna a nei a, mi in luahin an khawsa tih a sawi a, kei aiin a upa hret ang. A fel reuh khawp mai.

Zan lamah Thlamuana'n min rawn Video call ve ngei a, Bawihpuia nen an mu a, rei phei chu kan inbe lo.

A hnu daihah whatsapp aṭang hian, "I awm loh chuan a nuam lo, naktukah ka rawn hruai ang che," tih min lo thawn a. A va ho mai mai e.

A tuk chawhma lamah Ebenezer hospital kan chhuahsan a, damdawi min chawh nual a, ka awmna bill leh thil lei ngai Thlamuana'n a buaipui vek.

In chhunga kan luh rualin ka nute room lam aṭanga ka fapa ṭap ri ka hriat chuan ka ding dat a. 

Thlamuana lam hawiin, "Va en chhin teh, a va ṭap nasa em em ve," ka ti sap a.

"Lokal rawh," tihpahin ka bânah a vuan a, ka nu leh pa room lamah min kai lut ta a.

Awi leh, a piin a lo bual chu niin! A lu suk a duh loh vanga ṭap a lo ni a, min hmuh veleh, "I nu Zomuani a lo haw a nia, bâng rawh le.." a ti a, a ṭawngkam te hi a no lo thei si. Mahse, huat enah ka en tawh bik lo. A pi Sakawlhin a bual ve a, a lawmawm hrim hrim.

Thlamuana zawkin, "A inbual zawhah khan i rawn dah chho mai dawn nia, a nu bulah awm tawh rawh se," a ti a.

"Zomuan, nau i chhiat chu a ni em lo maw?" Tia ka nuin min zawh chuan, ka sa nghal phat.

"Chhiat mai mai lo," ka ti hmak a, min en kur chung hian, "Thlatea nen in awm dun tam si a, thil thleng thei a ni alawm," a la ti hrâm.

"Chutiang thil tenawm kan ti lo, i ngaihtuahna dum a nih chu," ti nghauhvin ka chhuak zui daih a, Thlamuana'n a nu a be ri ka hre pha vuai vuai.

Mi fel famkim chu ka ni lo. Mahse, khatiang rilru a pú leh min zawt teh ngawt kha ka ngaihdan a pel lutuk a, ka tûm bûr. Ka nu Biakliani nen hi chuan kan in 'chu e kha' thei ngang lo a nih ber hi.

Thlamuana rawn luh laiin inthlakna tur thawmhnaw ka lo zawng mek a, khuma ṭhut pah hian, "Ka nu ṭawngkam satliah hi chu nuih liampui mai mai rawh, chuti a nih loh chuan i inti hrehawm zel a ni mai," a ti sup a.

"Nau chhiat tura min han rin rikngawt, tenawm lutuk," ka ti tán tán a, nui kur kur chung hian, "I lo chhiat tak tak te hi a ni lo maw, i huat dan em emah khan.." tiin min rawn en a, "Thlamuan, min chhaih kawlh hlek suh," ka lo ti vin hlar.

La nui reng chung hian, "Chhaih kawlh ngai lovin i kawlh sa reng alawm," a ti sup a, ka thin bawrlawk a chhuak leh ta, ka thil ken lai chu amah vawm nan ka hmang a, a lo dawng chat. 

A thil ken thlêk vung vung pah hian, "Hei hi i ha tawk em ni," tih pahin Bra sen amah vawm nana ka hman tak chu ka lamah a rawn lek lang a, "Rawn la vat rawh," ka ti leh lawi si. 

"I inbual laia ka hmuh kha chu hei hian a tuam zo dawn lo tih ka hria," tih pahin a nui huk a, bathroom-a ka tluk ṭum kha a sawi tih ka hre mai.

"Lalthlamuan," tih pahin chhuhsak tum hian ka va ban a, a lu chung lamah a khai sâng zui daih. Chutah, nui ruh ruh chung hian, "Ka mitthlaa mi hi a dik a nih chuan hei hi chu a tê lam hret.." a ti leh a, chhuhsak tumin kei ka lo buai thung.

Vawilehkhatah min pawt hnai thut a, amah si chêta min kuah chungin, "Novi..." a ti hniam ruih a, a bra ken lai khuma dah pahin, "Vawikhat chiah.." a ti sup a, a sawi zawh ruala rawn kun hniamin ka hmuiah a rawn fawp ta a, ka che zui ngam tawh lo.

Chhân lêt phût zeta min fawhna chuan ka thâwk dan a ti danglam a, inlakhran ka tum veleh ka tukkhumah vuanin min pawt hnai leh salh.

Ka hmui chip hmak chu nawr kau tumin a che a, ka thluak a châwl vek a ni ber. Min fawp thut ang chiahin min thlah leh thut a, ka hamhaih lutuka chêt sawn nachang ka hre lo.

"Mama nen min tehkhin leh em ni?" Ti sup chung hian a malchung aṭang chuan min chhuk tîr a, sawi tur hre lova ka ding ngawi reng chu min enin, "Theihnghilh rawh," tinghutin a chhuak zui ta a, ka thaw chhuak halh.

Thlamuana min fawhna ka hmui chu ka tawk zauh a, ka biang a sa up up nimaiin ka hria, inthing nak chung hian bathroom-ah ka lut ta a.

U Mapuia ka ngaihtuah a, ka inthiam lo ru ngawih ngawih bawk si. Khatianga a nau a chêt fo te chuan kei mi derthawng lutuk hian ka hnial thei dawn em ni. Ani tlangval hmelṭha; mipaah pawh pa tak a ni a. Â... Lalthlamuana hian min ti â thei takngial dawn..

Atuni'n damdawi in ka awm chungchâng velah min rawn bia a, a nuin a lo hrilh ve a, "Nano..indim ve deuh la, a ṭul a nih chuan nau awmtu tur la rawh u, Thlatea ka lo hrilh ang," a rawn ti a.

Ka ṭhat thu leh damdawi in ka luh chhan ka sawi chuan, "In inneih hunah ka lo haw thei chauh ang," a lo ti daih a, henu em em hi chu a..

Atuni leh Atei vang hian lungngai deuha ka awm tur pawh hi ka nui leh nge nge ṭhin

Khatia Thlamuana chhuak ta kha dar li rik dawnah a rawn lut leh chauh a, Bakcheh a rawn hum lut bawk nen ka lo meng phawk nasa mai.

"Ka room-ah Bawihpuia a muhil rih a, i sam kha a ro tawh chuan ka lo cut teh ang," tih pahin min rawn din hnaih a, nichina kan boruak kha hre awmin a awm leh tawh lo.

"Aih...tunah chuan ka peih lo aw..." ka ti sap a.

"Thisen a heh si, i hriselna i ngaihtuah a nih chuan ka thu awih rawh, bâkah a sei tawh hrim hrim a mawi tawh lo.." ti leh supin ka hair clip a pawt phawi a.

"Remchangah ka cut mai ang..." tia ka lo hnial ve pawhin, "I ti leh chuang lo ang, lokal rawh le..a na lo lutuk khatiang.." nui chunga tiin Samkhuih a ban zui zat a. Veranda thlanglamah kan inhruai thla leh nge nge e.

Ka kawng thleng ṭep tawh ka sam chu ka dar chen aia fual hlekah a chhuah ta a, a hnehsawh khawp mai. Kan Thlamuana hi zawng, kan hnial thei lo zel zawng a nih hi.

Bawihpuia thlaruk a tlinin Thlamuana nen kan bazar pui ve ta a, a dik a dik chuan ka fapa a duat êm a, amah pawh hi ka ngaina ṭan ti ila ka sawi sual lo ang.

Palai tirh tur chungchângah rei fe ka nu leh pa an inhnial a, a tawpah u Ropuia biain aniin ruahmanna a lo siam tur thu a sawi ta a.

Ni e, ka la dam ve miau mai si a, kan nufa hmakhua ka thlir lo thei si lo a, Thlamuana ka neih a ngai a; ka nu leh pain min tur sek te hian zan lamah u Mapuia ngaiin ka ṭap leh tawp zel. A sâwt der si lo.

"Palai ang pui puia lokal kha a rem dawn lova, ka nu leh Mami an hel tlat si a, Zomuani chungchangah inrawlh kan tum tawh lo an ti bur mai a, chuvangin Ruata kaltlangin man leh mual kan inhlan mai dawn nia, ziaka dah ve te pawh a ṭha ang," tiin u Ropuia'n Thlamuana a hrilh.

Ni thum a ral leh hnuah ka man hlan turin Thlamuana Lungleiah a phei ta a, u Mapuia ṭhianpa, u Kimtei pasal Ruata nen ka pa kutah an va hlan dawn niawm tak a ni. Sawi buai leh hnial buai ka tum lo.

Thlamuana sawi dan takah, hmingchhe leh tur chuang ka awm tawh lo a, amah Thlamuana a zah loh phawta a chhungte'n sawi nawi an neih loh te chuan ka â dawn tawh bik lo. 

A farnute pahnihin an thlâwp ṭha em em bawk nen huaisen taka hmachhawn hi ka dam khawchhuahna tur zawk a ni. "Kum hnih term" in pasal ka nei dawn a nih ber hi. Nuih te pawh a za mai dawn alawm maw le.

Zan khat Lungleia a riah dawn avangin Thlamuana'n, "In nufa khan ka khumah mu phei rawh u," a ti a, a chhan ka zawh lahin, "A ho...ka sawi ang chuan mu mai ula, in thi lo ang.." a ti leh puat ringawt.

Thlamuana room-ah kan nufain kan mu phei ta a, a nuam viau lo. 

Bawihpuia pang a lum deuh a, nachhawkna la turin u Mapuia room ah ka phei a, zan dar 11 a pel tawh. Kawngkhar pawn lamah ka kalh hran chuang lova mahse; ka kalsan lai khan kawngkapui ka khar ṭha vek si a, a lo inhawng tlat!

Inhawng zau lo mah se, ka khar ngei tih ka hriat chian êm avangin tunge awm tih en turin ka bih dâk dâk a, ka nu Biakliani'n u Mapuia fix wardrobe a lo hawng dun dun lai ka hmuh chuan mak ka ti ngei mai.

Mahse, an zawn ber file dahna safe chahbi kha ka thukru daih a, lo buai ve mai mai teh seh. 

Thlamuana'n a room-a riak tura min hrilh zanah kher a nu a lût chat hi thil inhmu remsa a va ang si ve. Nge, ka nu hian a finrawl chhuahin Thlamuana hnenah riak sawn turin min ti zawk tih hriat pawh va ni suh. Eng pawh nise, u Mapuia Lsc tih vel an zawng tih a hriat mai. File senah a awm tih pawh ka hre kar.

Damdawi pawh la ta chuang lovin ka lêt leh ta a. Ka phone a ri ve chiah.

Thlamuana a lo ni a, "Hello.." ka ti hman ṭâwk tihah, "Novi...Bawihpuia tel lo khan in room va en dik lawk teh.." a rawn ti ta chiah a.

"Eng atan?" Tiin ka zawt lui ve ngat.

"Tu nge lut ka hre duh alawm, ka rindan hi a dik a nih chuan ka nu emaw ka pa emaw an lut ang," inring tawk takin a ti ta a. Hepa han ât loh dan em em hi chu. Businessman ni awm reng a lo ni e.

Ṭha takin ka kal tawh thu leh ka nu ka hmuh thu te zawn a nei tih nen lam ka hrilh fai vek a, "Umn...a ṭhat chu, tikhan ngawi tlat la, engmah hria angin awm suh aw.." a ti sup ringawt.

Ka pa nen an inbe tawh em tih ka zawh chuan, "Naktuk zingah in inah kan kal ang, i u ka hrilh tawh a, i pa tak chu a natna avang hian room-ah a tawm reng a ti a, kan kal chilh a ngaiin ka ring," dam thluama tiin, "Tui deuhin mu rawh aw, ûte.." tiin phone a dah ta a.

A nu leh pa a lo ringhlel sa tihna a nia, a lo haw hunah zawh chian ngei ka tum ruh tlat.

Tukṭhuan kan kil laiin ka nuin, "Thlatea'n Biak in hawng ngeia inneih a duh si a, i thawmhnaw inbel tur ngaihven ṭan la a ṭha ang," tiin nizanah eng mah ti lo ang hmakin a ṭawng leh nia!  A mak ve ngawt mai.

"Atuni emaw u Atei pawh ka lo be dawn nia," ka ti sap a.

Ka phone a rawn ri a, u Ropuia a nih vangin dining table thawhsanin ka kalsawn nghal a, ka nuin min melh zui tih ka mit sirin ka hmu ru reng.

"Mate, i man kan dawng fel ta a, keini lam chuan kan rawn buaipui thei dawn si lo che a, engtin nge ni ang aw, Mami lah a âng tûkpum ṭhak a, Thlatea nen pawh an inchhâng deuh a, ka khap alawm," tiin rilru hah hmel tak hian a thaw hawk a.

"I rilru tihah duh suh, ka hman tur pawisa te chu Thlamuana tibuai lovin ka nei ve a nia, an duh dan anga an thu awih hi a ṭha mai, ka nuin engtin nge a tih ve?" Tiin ka zawt a.

"Kan be ṭawng zo lo..ka pa nen inthurualin kan lo dawnga chu zawng chu a ni e," a ti mai a, nuam lo a ti hle tih a aw aṭangin ka hre thei.

"Kha leh chen min buaipui tawh a, ka lamah i ṭang zel bawk a, ka u i ni lo ang tih hi ka hlau ngawih ngawih.." ṭah chhuak insum taka ka ṭawng chuan, "Mai mai ṭhin che hian, ka nautê i la ni reng alawm, Thlatea kutah engkim awm se a fel a ni mai, i pazawn tur erawh chu ka lo be dawn nia," a ti ta a.

Kan inbiak zawh hnuah chaw bar zawm tawh lovin ka tho zui daih. Ka nu leh pa hnenah u Ropuia nen kan inbiak dan ka sawi thuak thuak a, "Kan mo nih châk fe fe an tam laiin, Zomuani kher Thlatea'n a nei leh dawn chu a ni si a, khawvel hi a zîm teh e," tia ka nu a ṭawng chuan ka chhâng teuh lutuk; mahse, ka ngawihsan ta zawk a.

AuMami leh Thlamuana chu engtin tak in chhâng ang maw?

Zan dar 7 velah Thlamuana a rawn haw thleng a, kan nufaa kan lo hmuak a ni tih a hmuh chuan hlim tih hriat deuh hian, "Novi...ka ngai che u..." a ti sup. 

"Bawihpuia'n a ngai che.." nui chunga ka tih chuan, "Zomuanzual...ka awm loh san hlek chein hrehawm i tih êm kha aw.." tiin a nui ruh ruh a, in chhungah kan lut ta a.

Ka nu leh pa an inkhawm avanga lo hmuak ngam chauh kan ni a, chuti ni lo se room-ah kan tawm leh daih tawh ang.

Zanriah ei sa-a lo haw a nih vangin inchungah ka zui chho ve ta a. A room-a ka luh ve zel avang chuan kawng dawm meuha min en chung hian, "Min lo ngai êm a nih hi..min zui zel mai alawm," tiin a nui huk.

"I sual siah.." tih pahin ka inher nghauh a.

"Novi...titau lo teh.." tiin min rawn ban a, ka banreka vuan chungin, "Ka ngaih vang che a nia, Mizorama ka rawn let leh aṭangin i kiangah ka tâl tam a, i awm lohna hmun hi nuam ka ti lo..." tia a ṭawng lai chuan, "Thlamuan..." ti ṭhatin a room aṭang chuan ka tlan chhuak ta a.

Kha ṭawngkam, "I awm lohna hmun hi nuam ka ti lo, ka tân a nuam lo." tih u Mapuia'n min hrilh ang chiah Thlamuana'n a sawi chhuak ve ta kha ka insum hman lo a ni ber.

Tukverh bulah dingin pawn lam ka thlir a, u Mapuia ka mitthlâah a lang zut zut a, ka mittui ka dang zo lo.

"Nano.." tia min ko chung hian Thlamuana a rawn pen lut a, tukverh bula ka ding chu min rawn panin, "Mama ka hriat chhuah tîr leh ta che em ni, ani theihnghilh rawh tiin ka nawr dawn lo che a, ka nupui dik tak i nih hunah chuan..." tia sawi zawm lovin min din hnaih sauh a.

"Thlamuan..." ka ti hliai a.

"Umn..Lalthlamuana ka ni, Lalrinkima ka ni lo," ti nghut chung hian a rawn kun hniam zui zat a, chêt sawn nachang pawh ka hre lo.

Ka hmuiah dam thlap hian min fawp ta a! 

Chutah min thlah lehin, "Tisa tel lo inneihna khan infawh a huam tel lo a nia..." tiin a nui suk a, ka fapa hnunglama ka puak chu biain, "I patea hian i nu fawh theihna dan ka nei a nia..." a ti leh a, a va han ṭul lo ber tak.

"Chhuak rawh..." ka ti sap a. Ka aw a khur lo chauh.

"Ka chhuak anga ka lokir leh ang, hetah ka riak bawk ang," inring tawk taka ṭawngin a chhuak zui ta a.

Tisa tel lo inneihnain infawh a huam tel loh chuan Lalthlamuana'n min fawp sek dawn a nih hmel...

Mahse, min fawhna khan thutiam a keng tel dawn si a.

260123

Shadow of the life

B+>[BeckirafARenthleI]<+®®