23.KA CHANPUAL [A Becky Rafa Story]

23. KA CHANPUAL

Ziaktu: Becky Rafa Renthlei

-B®®

(Recap)

Ka hmuiah dam thlap hian min fawp ta a! 

Chutah min thlah lehin, "Tisa tel lo inneihna khan infawh a huam tel lo a nia..." tiin a nui suk a, ka fapa hnunglama ka puak chu biain, "I patea hian i nu fawh theihna dan ka nei a nia..." a ti leh a, a va han ṭul lo ber tak.

"Chhuak rawh..." ka ti sap a. Ka aw a khur lo chauh.

"Ka chhuak anga ka lokir leh ang, hetah ka riak bawk ang," inring tawk taka ṭawngin a chhuak zui ta a.

Tisa tel lo inneihnain infawh a huam tel loh chuan Lalthlamuana'n min fawp sek dawn a nih hmel...

Mahse, min fawhna khan thutiam a keng tel dawn si 

a.

&&&

Hun a kal a, ni a liam ve bek bek zel a, ka pasal neihna tur thlakhat chiahin a dang ta.

U Ropuia lo sawi lâwk tawh angin ka pazawn atan a college kalpui ṭhin fa pathum nei tawh; Vanlalthara a lo be diam a, kan awmna a inhlat lutuk lo. Mahse, thil buaithlak a awm ta tlat. 

Thlamuana'n mihrang ina va luh buai vel kha a duh lo bur a, "Pazawn chu nei rawh ka sawisel lo, mahse, bawihpuia nen mi ina va awm kha a ṭul lo hulhual, kan in aṭangin kan chhuak rual anga kan haw rual leh tawp ang," a'n tiah. A va hahthlâk ṭhin ve.

U Ropuia nen an inhnial ta chiah reng a, ka u in, "Kohhran hall-a inkutsuih tur chu ni ula a zia tak a awm a, Biak in hawnga inneih i duh bawk si, mi tih dan anga tih vek tum lo mah ula thil kal hmang a awm ve ngai a nia," tiin a hnial a.

Thlamuana lah chuan, "Biak inah kan va innei anga a tawk chiah, inkhawm zawng zawngte tan refreshment kan siam dawn a, i farnu nen hian tisaah kan la inzawm lo, mi sawi, mi ngaihdan tih velah ka buai ve lo a nia," a ti tlang hmiah.

A tawp a tawpah tihian ruahmanna an siam ta a.

Thlamuana te inah ka awm zui zel ang a, Biak inah ka u Ropuia'n min kai lut ang, inkhawm banah inkhawm zawng zawngte tan ei leh in tur an buatsaih thung ang a, heta senso hi ka pain hmun thuma ṭhena hmun khat a tum ve bawk ang. 

"Mate, i nun kan ti hrehawm rei lutuka keimahniin kan ṭawiawmin kan telpui thei dawn bawk si lo che a, hei tal hi chu ka tum ve min phalsak rawh, Thlatea hrilh la, i nu leh i u Mami vengthawng duh reng reng suh u," tia ka pain min ngen tlat avangin Thlamuana ka hrilh a, a tîr chuan a hnial deuh naa ka nawr luih fê hnuah a pawm ve ta hrâm.

Inkhawm banah mo lawmna hranpa awm tawh lovin an inah ka lut leh nghal ang a, chu zawng chu a ni mai. Ka inbel tur erawh chu kan hawh dawn a, Atuni kutah ka dah hmiah. Bungrua chhawm a ngai dawn lo bawk, an ina chêng sa reng ka nih vangin Thlamuana'n ṭul a ti lo a, ka nu Biakliani te nupa an inrawlh tam lo khawp mai.

Nauhlan chungchângah kei leh Thlamuana kan inhnial ve ta thung a, kohhran danah bawihpuia hlan a hun ve tawh rêng rêng bawk nen kan inneih hmaa hlan fel ka duh laiin, Thlamuana'n, "Kan inneih phawt loh chuan in nufa chiahin in ding dawn a, kan inneih hnua kan hlan erawh chuan Mama dinna hmun turah ka ding thei ang, mi zawng zawng hriatah a patea ka ni a, a pa ka ni tel bawk, in nufaa lo va din thawt thawt ka remti lo," a ti leh a, "Kan inneih hma hian tih fel ka duh alawm," tiin ka hnial ṭâlh a.

Ngaihdan ni lo tih hriat tak hian, "Tunah thla sarih a pum tawh a, khang hun liam tawh zawng zawngah khan i sawi chhuak hleinem, tun ataka sawi vul chûk mai, ka thu awih mai rawh," a ti bung nghut. 

Ka ṭawng zui ngam ta lo.

U Atei te inpuiah u Ropuia a innghat ang a, ka thisen zawm te aṭangin amah chiah a lokal thei dawn tih a sawi. U Ruata te nupain min telpui hram an duh thu sawiin, an lokal theih ka beisei bawk. A bâk zawng chu Thlamuana vuavang te vek an ni ang, kohhranah ka hming ka ziak lut ve ta a, tun Pathianni lo awm tur aṭang hian kohhranin an puang ṭan tawh dawn a ni.

Ka nuin, "Rilru khermei pu a, Thlatea indanpui te kha i lo tum ang e, chutiang boruak a awm a nih chuan ka duai lo viau dawn a nia," tiin min vau lâwk a, Bawngkawna u Mapuia in kha mi luah tîr a tum thu a sawi tel bawk.

An duh dan danin ti mai teh se. Ka inrawlh vena tur awm nghal lo chuan.

Thlamuana'n a room-ah min ko phei a, "Nupa kan nih hunah khawi room ah nge awm i duh?" Tiin min zawt a, rang fahran hian, "U Mapuia room-ah," ka ti vat a, a ner sawk.

"Mama room i thlan âiah keima room-ah kan awm ang, a zau zawk bawk a, sawi nawi suh ang che," a ti zui kher.

"Khawi hmunah pawh mu ila, ka tan a danglam lo, kum hnih chhung bak a ni dawn lo a, u Mapuia boral aṭangin thla tam a ral tawh bawk a, ka awm hun chhung a rei dawn lo em mai," ka ti ve ngat.

"Kan la hria ang chu.." a ti duh chauh.

Bawngkawn lama in thar pawh chhungkaw hnihin an luah ta a, ka nu leh pa an che rang hle mai, a hmaa ka va luah luh ve zuai kawngpui ân kha chu a la ruak thung a, chu pawh chu luahtu tur dang an awm leh tawh tiin an sawi a. A luah man a hniam hran si lo a, an hlim ru hle ang chu.

"Novi...rual i pawl lo ve si a, tunge ṭhianah i hman dawn?" Tiin Thlamuana'n min zawt a, ka lo ngaihtuah thleng pha lo reng reng, ka va han tlaw mai mai e.

"Ka hre lo..." ka ti hlawm tawp.

Aizawlah ṭhian ṭha tia sawi tur ka nei lo. Ka awm hun chhung rei loteah ka tuallîm lo em em a, u Mapuia tan ka hun zawng zawng ka khawh ral a, amah a awm tawh loh hnuah nise, kan fapa vangin ka chhuak ve ngai hek lo. Lunglei lama ka ṭhiante number ka nei lo a, nei pawh ni ila ka mualpho nasat em avangin atu amah ka hrilh hre ngam lo atin ni.

"Atuni hmang mai ta che..." a ti a, ani pawh a rilru a buai ve deuh niin ka hria.

"Nangmahni leh nangmahni ringawta innghah fai vek chu a ṭha lo, ka dinpui tur ṭhian ka lo dap dawn nia, biak pawh tur an awm mai ang," ka lo ti a, "Keimahnia i innghah lovin ṭhenawmte-ah em ni i innghah ang, â lutuk..." tihpahin a nui hul huk a, ka ngei a nia.

Ngun deuh zawka ka ngaihtuah hnuah Lunglei lama ka ṭhiante hrilh chawp leh ai chuan Ebenezer hospital-a ka awmpui, ka khum lehlama mu Masangi kha Aizawlah a awm tho a, 'Ṭhian ṭha' tia sawi tur ni lo mah se a fel ka tiin puitling ka ti a, biak pawh ka tum ta a, Thlamuana erawh ka hrilh ta rih lo.

Thlamuana room pawh hlawhfa chhawrin an siam danglam hlek a, kan nufa thawmhnaw dahna tur leh Sofa pakhat an dah luh belh bawk a, ka nuin, "Mama room khi chu tikhian khawih danglam lohvin awm rawh se, kan kalh daih dawn nia," a ti a, Thlamuana'n, "Kalh kher a ngai lo, hnathawh nan ka hmang duh alawm," tiin a lo hnial a.

"I inluling sawt riau mai a, Thlate, hre rawh, Lalrinkima ang mai maia rilru nêp kha pu hlek suh ang che, nupui te thusawi a kawi a ngila zawm te kha a ṭha lo a nia," tiin ka awm ve lai rengin a ṭawngkhuma a runawm thei a nia.

"Ka nu..i sawi thui thei em mai.." Thlamuana'n a ti hluk ringawt.

Masangi be turin inchungah ka chhohsan ta a.

Vawih hnih a ring zawh dawnah a pick ve hrâm a, "Nano, eng nge ni teh tlat?" Nelawm takin a rawn ti a.

Kan inneih tur chungchang vel leh ka dinhmun zualpui, ṭhian dinpui tur chungchâng vel ka hrilh thuak thuak a, nui hak hak chung hian, "Awi, nupa in ni emaw ka lo ti zawka inla innei dawn chauh amaw!" a ti a, mak a tih hmel khawp mai.

"Hmaichhanah sawi dun thei ila ka duh khawp mai, Thlamuana hi chuan a farnu dinpui turin min duha mahse, nuam ka ti vak lova," ka ti nang nang a.

"Zanin tlaiah chaw rawn ei ta che, i chhungte lo dil la, in ina lokala sawi dun âi chuan ka inah zalen deuh zawkin kan titi dawn nia," ṭhatea tiin School-ah a awm thu a sawi a, an ban hunah min rawn hrilh intiam chungin kan inbiakna kan ti tawp ta rih.

Diki a nawmsam loh avangin naupaw chungin eirawng ka bawl a, ka nu a la rawn tho chhuak lo nain ka pa zawk a rawn tho hmasa teh tlat. Thingpui a duh leh duh loh ka zawt a, a duh loh thua min chhân hnuah, "Mama file sen awmna kha i hre miah lo em ni Zomuan, i hriat ka ring tlat," tiin min zawt a.

Dâwt sawi ka hreh takzet tawh.

"Ka pa eng atan nge intih a, a hma pawh khan min zawt tawh si a," tiin dam thlapin ka ṭawng a.

"Thil pawimawh en tur a awm maw le, i hriat chuan min hrilh ta che, ka zawng nasa tawh lutuka ka bei a dawng titih, Mama nen contract kha a tîrah kan khawih dun a, zin veivah ka theih loh hnu hian aman a chhunzawm ta a, file-ah khan thil pawimawh a awm a, Thlatea lahin a hre lo ropui si a.." dam thluamin a ṭawng a.

"Ka lo dah thla dawn nia, a awmna ka hre tawh alawm, min zawt nawn tawh si lova ka lo theihnghilh daih a ni, ka han la ang e," ka ti ve ta a. 

Nui vur vur chung hian, "Khawiah nge i hmuh a?" Tiin min zawt leh a.

"Medical file nen a lo dah kawp a, mahse, ka hawng lo, ka tifaia a ngaiah ka dah leh daih," ka lo ti ṭha ve mai.

File sen ka lâk thlâk chu uluk deuh hian ka pain a keu a, a ner leh sawk zel.

"I hawng miah lo maw?" Tia min zawh chuan, ngaihdan ni vak lo hian, "Hawng lo, u Mapuia thil pawimawh reng reng kha a damlai pawhin a thu lo leh min tîr a nih loh chuan ka khawih sak ngai lo. A hna chungchangah pawh hriat ka nei tlema ka inrawlh lo rêng rêng," duhthawh takin ka ti a. A bu nghut nghut.

"Ka duh tak leh kan mamawh a awm tlat lo, khawiah nge a dah ang aw..." a ti sup a.

"Pa, nangman kan room ah han zawng mai rawh.." ka ti ta ringawt a, min en zuk chung hian, "I nuin a zawng hmu zo tawh lo chu a nia lawm," a ti hmuk. Chuveleh, "Ka nuin kan room ah a zawng tawh amaw?" Ka ti hâ a, ka hre ru reng nain ka pa kâ ngei aṭanga hriat ka duh ve hrim hrim.

"Umn..zawng e, mahse, a hmu lo..." a tih mêk laiin ka nu a rawn tho chhuak ta a, dawhkana file chu a melh chat.

"Zomuan, he thil hi khawiah nge i hmuh?" Tiin min zawt a.

Ka chhan hmain ka pa zawkin, "Kan duh kha a awm lo, Mama hian midang a kawl tîr a nih ka ring rum rum tawh," beidawn hmel takin a ti a, ka nuin rinhlelhna mitmenga min en chuan ka hawi sawn duh bik ṭhak náng.

Tûkṭhuan kan kîl laiin Masangi chungchang ka sawi chhuak a, tlai lamah an inah chaw ei tura min sawm thu ka sawi lang bawk a.

"Atuni dinpui mai la, a hautak lo zawngin.." ka nuin a tih chuan, "A lo haw hun tur a sawi chiang thei si lo a, mokawr hawh leh tih neuh neuh tur a awm ve bawk nen Masangi ka be ta ringawt a nih kha," ka lo ti a.

"Umn...ni mai mai teh se, Thlatea hi a zing chhuah leh em ni?" A ti zui daih.

Nia, Thlamuana hi chu a dangdai ve a, a tih tawh lamah a ti tlut zel tih ka hre tawh. 

Tukinah pawh hma takah a chhuak a, Side drain an siam tur endik turin a kal a, chaw ei tur takngial pawhin a lo haw lo, chawhnu lamah Retaining wall siam tur a en leh nghal dawn tih a sawi bawk. Tuna a khawih lai hi chu ama sawidanin a ṭhianpa hna a ni a, Stroke avangin hospital-ah a awm ta daih si a, Thlamuana kutah a dah a ni awm e.

Atuni'n min lo call a, "Nano, pawisa i indaih dawn loh chuan ka rawn thawn dawn che em ni, sawi hreh suh.." a rawn ti a, a rilru hi a va han ṭha tak.

"Nangmah lo haw la a tawk a ni mai, thil hautak tur vak a awm hleinem.." ka lo ti a.

"Ka lo haw thei lo thut mai thei aw, Car loan pek chhuah hunin min nang dawn a ang riau a, ka lo haw theih ka rin loh vang a nia, pawisa lo thawn che ka tum nachhan.." nui kar kar chungin a ti a.

"Phakar miah suh aw, lo haw tum phawt la, i thei ngang lo a nih chuan thuhran ni rawh se..." ka ti a, kan inbiak zawh hnuah Bawihpuia ka bual fai a, ka awih mut laiin, Masangin message min rawn thawn a.

"Zanin tlai chu ka lo ring ang che aw, ka haw hma dawn a," tiin an awmna location min rawn hrilh a, an in luahna neitu fapa, tlangval pawh min hruai tura a lo tirh theih thu a sawi tel bawk. Chu erawh ka hnial thung. Ka inzawng hmu ve turah ngai ang.

Ka nu leh pa rem tihnain Masangi te in lamah ka fapa nen Taxi-in kan kal ve ta a, Kulikawnah an lo awm chu niin! Rei pawh zawn ngai lo hian Tlangnuam pengah amahin min lo hmuak a, ka fapa min pawm chhawk bawk a, nui hak hak chung hian, "Nu pawh i ang lo, nula niawm tak zawk i ni," tiin min thlêk vang vang a, ka lo nui tawp.

A in luah chu a nuam reuh hle a, kan nufain kan leng halh mai.

Kan inneih dan tur vel leh a hun te, u Mapuia chungchang thlengin ka hrilh ve a, chek tlak tlak chung hian, "I rilru tur ka hrethiam, Thlamuana nen in awmdun ka hmuh khan i pasal emaw ka ti tak tak a nia, a ngaihsak dan em em che kha thil pangngai a ni lo, ani khan a duh viau che niin ka hria," a ti a.

Nui ṭhâ chung hian, "I ngaihdan mai mai a nih chu, u Mapuia ka duh fê zawk.." ka'n tiah. 

"I va han â tak.. i pasal nimai tur a ni a, a hriat laiin khatiang sawi reng reng suh," thutak deuh zawka tiin ka dinhmun khirh a tih zia a sawi lang bawk a, "Mapuia'n a nau a ring tawk a nih chuan nang pawhin ring ve hmiah la, a ṭha a ni mai, hmeichhe tan hi chuan min hmangaihtu an hlu teh a nia," tiin Ṭhutthlengseia ka fapa mu chu a melh pah zauh a, "A pa ka hmu lo naa a patea ava chhun hmel si ve," a ti leh rih.

"An sam chiah a inang.." ka lo ti vat a, a nui nasa ngei mai.

Chumi hnu chuan mokawr hawh chungchang leh kan pahniha kan chhuah dun theih hun tur kan sawi a, a hma aṭanga lo inhre daih tawh niawm tak hian kan inpawh sarh mai. Ṭhian ka kawm lohna chin a rei tawh a, nuam pawh ka ti ve hle.

Eirawng kan bawl dun a, bawihpuia pawh chhuatah ṭhutna tur a phah saka a tlei ve mual mual khawp mai. Hnute a heh ta lutuk hi ka buai ru deuh ṭhin a, siam sek a ngai zel. 

Ka phone a rawn ri a, ka laklawh deuh avangin ka chhâng lawk hman lo. A rawn rik nawn leh takah chuan ka la vat a, Thlamuana a ni.

"Novi...khawiah nge in awm?" A rawn ti vin hlur a, ka phu zawk.

Kan kalna chin tur ka nu leh pa ka hrilh chian bakah Thlamuana pawh lo hrilh mai tur khan ka chah reng si a.

"Ka nu ten an sawi lo em ni?" Ka tih chuan, "Sawi e, khalaiah tu ṭhiannu nge i neih, chhungkaw chungchâng chipchiar te kha i lo sawi ang e," a ti hmuk hmuk a. A va han chhe tak. Mi hi a ngainep ve ngawt chuan ka hria.

Masangi chungchang ka sawi thuak thuak a, chaw kan ei nghal tur thu ka hrilh chuan a ṭeu nasa ngei mai, "A ṭul lo lutuk, nula nilovin naupawm lai i ni a, in awmna lai rawn sawi rawh, ka lo hruai ang che," a ti nghut a. Chhâng buai duh lovin phone ka off hmak.

Ninawm lutuk. A duh duh a lo sawi ringawt a, ka kham a nia. Ka phone a rik nawn leh pawhin Thlamuana tho a nih vangin ka switch-off zui daih.

"Inpa tur chu a lungawi meuh nange?" Tia Masangin min zawh chuan, "Chaw ei kher kha ṭul lo a tia, mahse, hrehawm ti suh, kan tum vek tawh a, ka ṭhulh dawn lo," luhlul takin ka ti ve ngar. Ani pawh a nui ve ringawt.

Tlailam dar nga pelh hretah zanriah kan ei a, bawihpuia chaw tur ka kensak tho avangin ka hrai hmasa tê tê a, "Mapuia thlan chu remchangah min tlawhpui ve rawh aw, i la naupan tehlul nen i tuar hnem kher mai, i nu leh i u Mami mawlh kha ka ngei, hmeichhia an ni ve si a, mi hriatthiamna nei lo lutuk.." Masangin a ti hlak hlak a.

"Nakinah engtikni-ah emaw chuan inhmuh chhuah hun an la nei mai ang," tih chauh ka sawi.

Kan ei-inna kan tih fel laiin mipakhat a lo lut a, Masangi chu nel taka biain, "Mikhual i nei dawn tih hriata chaw rawn ei tur a nia, chawhmeh i neih ṭhat ve mial tâkah..." tiin chu pa chu a nui a.

"Hruaisang...ngawi mai mai rawh..Nano..inchung tlangval Hruailerha a nih hi..'' nui var var chungin u Masangin a lo ti ve bawk a, an inngam hmel khawp mai.

Hruaisanga chuan ka fapa chhuata ṭhu melh chung hian, "A va ṭha reuh ve, i fa em ni?" Tiin min zawt a, ka lo bu nghauh.

"Ka lo pawm ve chhin.." tih leh pawm a rual a, Masangi thleng sil zo a rawn ṭhu phei ta bawk a, bawihpuia hian duh loh vak a nei lova, bakah a ṭahbelh lo bawka awm a nuam phian.

Masangi leh Hruaia titi kârah ka lo ngawi reng a, Thlamuana kha a thinrim viauin ka ring. 

Haw turin kan inbuatsaih ta a, khua a thim tawh a, tlai chhia chu a la ni lo.

Masangi chuan, "Nano, Taxi ka chânpui ang che, ke nei ve ila chuan ka thlah tur che a nia, Scooty takngial pawh ka khalh thiam lo," inthlahrun hmel tak hian a ti a.

"A ho lutuk, Taxi hman sen loh a awm alawm," ka lo ti vat a.

Hruaisanga chuan kan awmna min zawt ta a, ṭha têin ka hrilh a, "Ka lo thlah ang che u..." a ti a.

Duh lovin ka lo hnial ve ṭâng ṭâng naa Masangi nen min nawr deuh tlat avangin ka hnial hneh ta lo. In chung panin kan inzui chho ta nge nge a, ka inthlahrung ru hle.

"Nano, chawlh lâk te a ngai dawn si a, kan inbe ṭha leh mai dawn nia," bân vai lap lap chunga Masangin min mangṭha hnuah Hruaisanga pawh kan in lam panin a tlan chhuak ta a. 

Hruaia chuan fa engzat nge ka neih tawh tih leh Aizawlah kan awm rei tawh em tih te min zawt a, a rul tawk chauhin ka chhâng a. Amah hi sâng lam deuh, hmelṭha tia sawi tur a ni hran lo a, a ngo vang thung. Pharmacist niin Hospital road-ah dawr a nei tih a sawi a, tlangval fel tak a nih ka ring. A ṭawngkam a felfai em mai.

Sawi tur a vâng bawk nen kan in kawt kan thlen thlengin kan ṭawng zui ta lo a, bâkah bawihpuia pawh ṭap ni chuang si lo hian thawm a nei ve reng a, ṭawngna khua pawh a kaw bîk lo.

Kan chhuk dawnah, "Kan lawm lutuk aw.. kan tibuai hrep che a.." ka ti a.

"Masangi ṭhiante chu ka ṭhiante an ni ve mai, ani nen hi chuan kan inngaina alawm, remchangah lo lêng leh rawh u," tih pahin a rawn chhuk a, bawihpuia ka pawm a, a puakpuan ka lâk chhungin ka bag min rawn khai chhuahsak a, min pek pah hian, "I fapa pawh a fel khawp kha." Tihpahin a samah a tuaisak a, a nui sâng vei nen a bula awm a hahdam riau.

Kan inmangṭha fel a, a tlan liam hma loh ka thlir renga chumi hnu chuan in chhungah ka lut ve ta a.

Diki chiah a lo awm a, "Inchungah chho vat rawh, u Thlatea a thinur teh mai a nia," ka rin ang chiahin a lo ti a, ka nu leh pa awmna ka zawh chuan, "U Chhandama nu damlo an kan," a ti leh mai.

Hmanhmawh chuang lo hian kan room lam panin kan chho a, u Mapuia room leh Thlamuana room inkal pawhna laiah kut kuangkuah chung hian Thlamuana kawisawi zetin a lo ding a, ka hmu thut bawk nen ka phu nasa ngei mai.

"Zomuanzual, tunge rawn thlah tu che kha?" Tiin chang fak hian min zawt ta a.

"Hruaisanga.." tih pahin kan room lam ka pan a. 

Ka hnungah a rawn kal ve zel a, "Hruaisanga chu tunge, i eng nge a nih?" ram hmuka tiin min rawn din hnaih a. 

"Enteh, kan lo haw ve chiah a, kan kalna chin tur ka nu leh pa hnenah ka sawi bawk, an hrilh che em ka hre lo, hrilh tur che pawhin ka chah ngei alawm," ka ti ve hlak hlak a.

Eng dang sawi lo hian, "Kha pa kha tunge?" Hniam ruiha tiin ka bân puamah a hmer a, a la hmerna em em zui! 

U Masangi ṭhianpa a nih thu leh a in luahna neitu tih ka sawi chuan, "Khatiang mipa hriat chian hleih loh kha hnaih reng reng suh, i phone kha eng atan nge i tih, ka rawn hruai thei reng che alawm," a ti leh a. A meng rum úl bawk si nen a va nuam lo e.

"Mi sual a ni lo, a fel lutuk..." ka lo ti a.

Ner nawk chung hian, "A fel leh fel loh i hre lo aw, ngaihsam viau zel suh," tiin min vawnna a thlah a, bawihpuia khuma ka dah tur chu, "Khawi..." tih pahin a pawm nawlh a, "Biak tlang theih lohvin i phone han dah leh vaih teh, a pawi viau tawh ang," ti sup chung hian ka fapa biangah a fawp a. A hmel a lang dam leh thlup lawi si.

"Inbual rawh, kha pa rim te kha i lo nam ang e," ngeiawm taka tiin Couch-ah a ṭhu a, "Ka nam lul lovang, ka lo nam ta a nih leh a ṭha a ni mai," ka ti ve salh.

"Zomuanzual...ngawi hmak rawh, i ṭhiannu pawh chu keiman ka la bia ang, ka duh ang a nih loh chuan i dinpui dawn miah lo a nia, mi dukdak lo te hi a lo ni ang e," a tih leh chuan ka sa ve phat.

"I va han hneawm tak, i duh emaw duh lo emaw ka dinpui tur chu ka thu thu aw, i inrawlh sek a ngai lo," ka ti hlak hlak a, rum zeta min melh chung hian, "Ngawi hmak rawh," a ti hmuk ringawt, keima hriat tham lekin, "Ṭawng thei si.." tiin ka phun sep a, a hre pha lo hlauh.

Zanah pawh kan inbe lo tih theih a ni. Hnathawh tur nen a rawn inchhawp hnawk rum a, kan nufain khumah kan inchhaih a, file chungchang zawh ka tum deuh kha a ni a, biak a huphurhawm êm avangin ka zawt ngam ta lo.

Kha file senah khan u Mapuia LSC a awm ngei. Mahse, tukinah ka pa khan a awm loh thu a sawi a, ka nu pawhin a hmu zo lo tiin a sawi bawk. Thlamuana'n a la chhuak daih tawh tih ka hrilh duh bik teuh lo.

An fapa hi engtikah mah an tlânkhalh dawn lo tih an hriat lohna hi an âtna a ni. A nu leh pa a hua tihna ni lovin an rilru sûkthlêk a hre chiang lutuka kan nufa min humhim a tumna lamah tun hi kan thleng tawh a ni a, a lehlamah chuan Thlamuana hi zah ngawih ngawih tur ka ni.

Kan inneih hun tur pawh a hnai ve zel a, a tawi zawngin sawi mai ang. Atuni a lo haw thei dawn ta lo ngei a, u Atei te chhungkua erawh an rawn thleng tawh a, a thinlung takin min lawmpui tih a sawi.

Ka inbel tur thawmhnaw kan thlang fel tawh a, keimah ka nu lian si lova ka hâk tawk tur a vâng pharh. Masangi nen kan kal a, chawhnu lamah Thlamuana'n min rawn fin a, kan thil lei reng reng a man a pe vek a, ka hnial ve pawhin, "Ngawi mai mai teh Novi..." a ti duh lek.

Ka fapa inbel tur erawh chu Thlamuana'n a thlang a, a duh khirh si. Ṭhian atan Ramdina a hmang dawn a, ka vawikhat hmuhna a ni. Thlamuana aiin a nelawmin biak a nuam zawk a, kan innel chawp ve mai, a hmelṭha fahran lo. Masangi nen pawh an inbe thei fu a, a lawmawm ve hrim hrim.

Ka nu leh pa a langah an phur viau a, sawi tawh ang khan mi sawisep eng atan mah an ti lo bawk a, an pallui thei viau. Chuti a nih rualin ka pa Zoliana farnu Hmangaihi erawh a âng nasa hle a, "Kum khat êm pawh a ral hmaa hetianga tih, infapa thlarau a zahawm lutuk," tih velin a ṭawng a. 

Thlamuana'n, "Mama duh dan a nih vang chauha kalpui kan ni, ka nî.. sawi nawiin awmzia a nei lo a nia," a ti hmiah.

An neihin a tlin vangte pawh hi a ni mahna sawisel hlawh viau e ti lo hian inneih dawn hnaih tak takah chuan inleng an awm zut a, min chibai tâwk lah an kat nuk.

Masangi zankhat a rawn riak a, ka nu leh pa a hmuh rualin, "An hrawn a nuam vak dawn lo a nih khu.." tiin a sawi thei. A mit a vâr bik a ni ngei ang.

INNEIH NI

Hma takah ka tho a, thlanmual lam panin kein ka phei nal nal a, ka hlau eih lo. Nizan lamah ka muhil thei miah lo bawk a, Masangi"n bawihpuia a lo awmpui theih tho dawn avangin ngaihngam takin ka kal ta a ni a.

U Mapuia thlanah ka ṭhu vang vang a, a boral aṭangin thlariatna a lo ni ta reng mai.

"Ka awm lohna hmunah i awm ta si a, ka kawng thlan hi a sual lo ang tiraw.. u Mapui, i thuhnuhnung avang hian awm dan tur ka thiam lo a ni e..." tia phun sapin ka mittui dan rual loh hian a far zung zung a.

Thlamuana pasal atana ka nei tur hi ka hlim emaw in lo ti ang e, a teuh lo. Ka mihring mihrinna hian u Mapuia nau pasala neih hi a thlang mawlh lo. Mahse, kei, chhungte ensan leh fa enkawl tur nei hian duhthlan tur ka nei tlêm êm a ni.

Thlanlung bawhin minute engzat nge ka ṭah tawh ka hre lo. Kan inzui tirh aṭanga vawiin ni thleng hian ka ngaihtuah kual zut zut a, a hnen ka pan a, min boralsan a, fapa min hnutchhiah a, an chhungkaw zingah inthlahrung reng renga ka chen a ngai leh bawk a, tunah, min hmangaih miah lo tu leh ka hmangaih pawh ni lo, a thisen zawm ngei pasalah ka nei dawn chu a ni si. Ka ṭap lo thei lo a ni e.

"I awmna hmun kan lo thlen ve hma loh chuan min lo nghâk reng ang che.." tia ka sawi zawh rualin thlanlunga a hmêl an nem kai chu ka melh vang vang a, 'mitthi' tia sawi atan chuan ka phal thei lo.

Muangchangin in lam panin ka haw leh ta a, dan ang a ni emaw, eng dan pawh nise vawiin hian Lalthlamuana nupui ka ni dawn ta. 

Kan inkawta vei thuak thuak mipa chu Thlamuana a ni tih hrilh hranpa ka ngai lo. A lungawi loh apianga a tih ṭhin danin a hnunglamah kut a suih a, ka thawm hriaa rawn dak chhuak chung hian, "Khawiah tehhrep nge i kal?" Thinrim awki hniam ruiha tiin min hnaih ruak a, ka banrekah vuanin min ngaichang hlek lo hian inhnuai lam min panpui a, ka ṭang deuh tih a hriat chuan min pawt na sauh.

Garage sir kilah min nawr pheiin, "I kalna sawi vat rawh, nizanah khawiah nge i chhuah?" A ti khur khur a. 

"Thlanmualah," ka ti sap a.

"Zomuanzual, dawt min hrilh hlek suh," a ti vin hluk a.

"Dawt ka sawi lo, u Mapuia thlanah ka kal alawm.." thinrim miah lova tiin hnuailam ka bih a, ka ṭahna avang khan ka âwm a la tawt ru lutuk.

"Vawiinah ka nupui i ni dawn tih hre nawn leh la, ka tel lovin vawikhat mah Mama thlan tlawh tawh lo bawk ang che, i hria em ka sawi chu.." tih pahin min thing nawk a, ka ṭe ṭhat.

"Min rawn zui rawh..." ti leh nghutin min vawnna a thlah a, a kal nghal nulh. Hun dang chu nise thinrimin ka chhâng ve ngei ang. Mahse, ka nunram a chau a, u Mapuia hlimthlain min hual vel ang tlata hriatna ka neih avangin ṭawng pawh ka châk lo. 

Ngawi rengin a hnungah ka kal a, ani pawh a ṭawng tawh chuang lo. Mahse, a lung a la awi lo tih a hriat tho.

Chawhnu dar 1 a inkutsuih tur kan ni a, mikhual kan nei ve nial a, u Ropuia leh u Kimtei te nupa u Atei te in lamah an awm bawk a, nimin tlaiah an lo thleng fel tawh.

Masangi ṭhiannu Hlutein min chei dawn a, kei phei chuan ṭul ka ti lo nasa. Mahse, Thlamuana zawkin a lo ngai thutak riau a, "A dera innei tur kan ni lo, a tak tak a nih hi...Zomuan, namnul mai mai tum suh," min tih avangin 'Aw' ka pawh ve chauh.

Ramdina leh Thlamuana an room-ah an insiam a, keini ṭhiandun u Mapuia room-ah kan awm thung a, ka fapa erawh u Atei kutah kan dah a, an lo buaipui dawn tih a sawi.

"Nano, hlim hmel put tum rawh, pasal neih hi tih mai mai a ni lo a, i damchhunga ni chhinchhiah tlâk a nih theihna turin hlim takin awm la ka duh, hun liam tawh avanga i natna te kha bo vek lo mah se, tuna i thil tih hi Mapuia pawhin a pawmpui ngei ang che. Chuti ni lo se, a nau kutah ngaihngam takin a dah dawn che em ni?" Tia Masangin min hrilh chuan ka nui lui a, a dik ve reng mai.

"Thlatea dinhmunah hian han indah chhin teh, a u nupui naupangtê, chu pawh nau no pawm lehnghal; ani Tlangval ṭhalai leh mi pangngai takin mualpho huamin a nei dawn che a ni a, a chhungril a hlim bik ring suh, mipa a nia a tilang ve lo mai mai a nih hi," tia a sawi lai chuan Thlamuana ka mitthlâah a lo lang a, tukina a thinrim hmel te kha!

Ni e, a rilru tur ka lo ngaihtuah tel ve ngai lo a, keima hma zawn chiah ka lo thlîr atin ni. A û a hmangaih êm avang leh a kalsan tak a nupui leh fapa hmakhua a ngaih vanga min nei tur a ni tih ka lo theihnghilh a ni e. Tlangval ṭhalai hmelṭha bawk si, thluak ṭha leh sum deh chhuah thiam tak mipa hi a nihna takah chuan ka phu lo. A û vang chauha min nei tur a ni a, a hlim bik miah lo ang.

Ka hmai an chei zo a, ka sam pawh an siam ulukin ka dár chenah a kâwi thla chiat a, Mokawr fual var ka'n inbel meuh chuan hnuk a ulh mai dawn alawm le, ka lan dan simple tak leh nalh ru riau si chu ka lungawipui viau. Thlamuana a sâng êm a, Pheikhawk pawh min tilang sâng thei tur ka thlang tawp. 

Dârthlalang hmaah dingin ka inthlêk vang vang a, u Mapuia nen innei tur anga ka lo suangtuahna te kha mumang ang mai a lo ni ta. Nui lui chungin vawikhat ka inthlêk leh zuai a, Masangi khuma ṭhu chu kovin ka inpeih thu ka hrilh a, inhnuaiah kan chhuk ta a.

Mahse, Thlamuana'n ka hriat miah lovin ruahmanna a lo siam reng mai. A ṭhianpa Ramdina nen Bolero in Biak in lam an lo pan daih tawh a, ka nu leh pa te pawh a phur phei tel daih! Keini ṭhiandun chu u Ropuia'n min phur dawn a, Thlamuana Car pawh pangpar nen an lo chei diam. Kan Lalthlamuana mai mai chu.

"Mate, hlim takin aw... ka nu leh pa âiawhin..." tihpahin min kuah a, ṭap lo turin ka insûm nasa hle. Ka u pawh a hnuk a ulh deuh niin ka hria.

Biak in lam panin kan tlan chhuak ve ta a.

Thlamuana nu leh pa tih loh an fate hi kohhran leh khawtlangah an tel tam lo em em a, Atuni leh Thlamuana nise Delhi-ah an awm daih a, ina awm ber u Mapuia khati kha a nih si avangin veng chhungah an common lo hle. Inkhawm pawh an tam ka ring lo ve ringawt.

Mahse, u Ropuia ban kuah chunga Biak in chhung ka'n lut chu zah luat vangin ka biang a sa vek thei. An khat ṭhup a, atu amah en ṭha ngam lo mah ila, an tam hle tih ka hre mai.

Inneih hunserh kan hman laiin Thlamuana hmel ka en lo tih theih a ni, zungbun min bun tîr thlap a, 'Tiam tlat e' tih a chham lai phei chuan a awki a hniam naa a fiah fak mai. Kei erawhin hriat tham takmeuhin ka chham a, dâwt sawi lovah chuan ka zak êm a ni.

"Kei Lalthlamuana hian, nang Zomuanzuali hi ka nupui tak ni turin a nuamah pawh, a hrehawmah pawh..." tih thleng bâk ka hre mumal lo, ka khur ru dar dar nimaiin ka hria.

Ka hma zawna ding Lalthlamuana hmel chu ka en a, Delhi aṭanga Atuni lo thawn Tuxedo dum inbelin a hnuaia a kamis var hak chuan a tilang thar sar a, a sam kir kha engtin nge atih ang tih ka lo buaipui ruk em em mai chu a cut hlek a ni ngei ang, kir tho mah se, a lan dan a dang daih, a ṭâwn tawh miau lo a! A inhmeh ve chiang alawm.

Amah a lianin a sâng si a, pheikhawk sâng ka bun chung pawhin ka chen lo nasa. Ani pawhin min en chîk hle. 

"Lalthlamuana leh Zomuanzuali hi nupa an ni tih ka puang e, Pathianin a zawm tawh chu mihringin ṭhen suh se" Pastor-in a tih lai chuan ka kut ka hum nghet lutuka a na thei hial.

Mak deuhin u Mapuia hmel mitthla ka tum ngial a, Thlamuana hmel a lo lang zel si.

Kan inneih dan chu eng pawh nise ka rin phâk bâkin mipui an tam a, Thlalakna hun kan hman laiin ka fapa Lalnunfima ka hmu ve chiah. A patea nen an hair style a in ang a, an thawmhnaw pawh chuti bawk, a la kal theih loh avangin u Atei'n a pawm a, ka nui ve thei ta.

Cake tepawh kan zai ve tak hi... 

"Novi, i nalh lutuk," tiin ka beng bulah Thlamuana a rawn phun sup a, lái zet hian, "I chhia a nih chu," ka lo ti a. A nui ruh ruh ringawt.

Inneih buaipui a hautak nen ka hriat lohvin Thlamuana a buai hle ang tih ka hrethiam ta mai. Holam mai maia tih a tum emaw ka tih laiin engkim a ṭha thei ang ber zel a duh a, refreshment lam pawh an hnianghnar khawp mai. 

Thlalâk hun chhung a rei lutuka ka ke a kham ut ut a, ka inbun sâng bawk si. Ka nu Biakliani te nupa pawh chibai semin an nui var var reng a, an fakawm thlâwt.

Lalrinkima nupui ni tura inpe Zomuanzuali kha a nau Lalthlamuana nupui ka ni ta daih hi miin mak tiin sawi pawh nise thil mak a ni tlat alawm.

"Kan Cameraman hi naktuk atan kan la hmang thei dawn a, Ramdina ṭhianpa Lungdar khua Jeru-a a ni e, photographer ṭha tak a ni a, amah ka va bia ang a, naktuk lama chhunzawm turin ka hrilh mai ang, i chau tawh a nih kha," tiin Thlamuana'n ka kâwngah a kuah a, 'Jeru' tia a sawi pa chu ka va en nawn leh a, bawihpuia thla a lo laksak mek a, ka nui chhuak hak. 

Kan thlâ a lak lai khan ka phek en mai mai a, ka'n en chian tâk deuhah chuan a fel hmel hle, "Nano..vawikhat dang leh.." tiin Thlamuana ka en chhoh lai tak chuan a rawn hmet leh a, amah a nui ṭhâ a, a ngainatawm takzet.

Thlamuana nupui ka ni a, ani pawh ka pasal dik tak a ni ta. Sawi buai theih a awm tawh lo.

Dârkar li hnuah

Chau zetin khumah ka ṭhu hnawk a, ka ke a kham em avangin ka chum dat dat a, chutih lai chuan Thlamuana a thawmhnaw inbel ngai nen a rawn lut a, midangho inhnuaiah an la awm thu a sawi a.

"Nuthlawi ka hriat tawh zawng zawngah i nuthlawi rei lo ber," nui suk chunga tiin khumah a rawn ṭhu a, "Vawiin kha i nalh aw, ka sawi thui lo mai ang," a'n ti ngei a(h.)

"Ka ke a kham lutuk.." ka lo ti daih a.

"Novi...i inthlâk hma khan hei hi min bun tîr ve rawh le," tih pahin zungbun a rawn phawrh a, ka lo ban ve vat a.

"A chham lam kha chu ka phut lo a nia," tiin a nui huk a, zungbun ka bun tîr theih nan ka hmaah a kut a rawn pharh a, ngawi reng hian ka bun tîr ta a, a inhmeh thlup mai. 

"Ka ta i ni a, i ta ka ni. Ka chanpual i ni ngei a ni tih fiah nân..." ti supin ka khabeah a rawn dawm a, a tih tur ka hriat lâwk avangin ka lo maimitchhing tawp.

"Min en rawh.. tunge ka nih i theihnghilh tawh loh nan ka mitah en rawh le," a ti hniam ruih a, a mitmeng thûk leh ril raih chu ka en ta a, ani pawhin chiang takin min en bawk.

"Ka nupui tereuhtê..." tia a sawi zawh rualin min rawn fawp a.

A vawikhat nan ka thiam ang tâwkin ka lo chhâng lêt ve ta a...

Thlamuana hian zún a nei chiang alawm.. A zúnah ka uai lovang tih hriat va ni suh. Ka lerh vang leh u Mapuia ka theihnghilh vang ni lovin amah Thlamuana hrim hrim hi hnar harsa tak mipa a nih vang a ni...

270123

Shadow of the life

B+>[BeckirafARenthleI]<+®®