24.KA CHANPUAL [A Becky Rafa Story]

24.KA CHANPUAL

Ziaktu: Becky Rafa Renthlei

-B®®

(Recap)

"Min en rawh.. tunge ka nih i theihnghilh tawh loh nan ka mitah en rawh le," a ti hniam ruih a, a mitmeng thûk leh ril raih chu ka en ta a, ani pawhin chiang takin min en bawk.

"Ka nupui tereuhtê..." tia a sawi zawh rualin min rawn fawp a.

A vawikhat nan ka thiam ang tâwkin ka lo chhâng lêt ve ta a...

Thlamuana hian zún a nei chiang alawm.. A zúnah ka uai lovang tih hriat va ni suh. Ka lerh vang leh u Mapuia ka theihnghilh vang ni lovin amah Thlamuana hrim hrim hi hnar harsa tak mipa a nih vang a ni...

&&&

Mo neitu lam aṭangin lawmna ruai tih vel eng mah a awm hran lo a, ka nu leh pa unaute, kan mikhual tlem azawng leh u Ruata te nupa, ka u Ropuia bâkah keiniho nen zanriah kan kîl a, u Atei bulah ka fapa a tâl nileng ṭhak. 

U Ropuia pawh a hlim ve hle chuan ka hria, kei erawh ka chhungril a nui thei meuh lova, u Mapuia ka ngai a, chu mai ni lovin ka chhungte tel lova hetia pasal han neih rup hi ka lawm hleithei lo a ni ber. Mal riauva inhriatna ka nei bawk.

Ramdina leh Masangi pawh an inzui ve dat dat a, kan mutna tur te pawh an siam dun ve ngei. 'A ngai lo' tia ka hnial pawhin an nui liam mai mai a, anti zahthlâk hi ka tia.

Riak tura ka sawmna erawh Masangi'n a hnial thung. Naktuk lamah shooting kan la nei dawn a, rawn kal leh tho a ngaih vangin Ramdina nen an haw ta a. Thlamuana'n pâwn thleng a va thlah tain ka hria. A reh ve ruih mai.

"Mate, keini pawh naktuk zingah haw nghal mai kan duh a, chanchin a chhia a ṭha rawn sawina châng hria la, hun te han kal deuh se, Pathianin rem atih chuan palâi kan tîr ve ang, ka pa mit men lai ngeia nupui neih hi a ṭha a; ka rawn be zel dawn che nia. Thlatea te unau an fel a, a nu leh pa rilru kâwi satliah hi chu palzam ve hram hram tum rawh aw," tiin u Ropuia'n min chah thlap.

Dam raih hian, "Ka pa ka ngaihtuah viau tih hria la, ka nu leh auMami hi chu ka lakah an heti tlat si a, ka ngaih vena pawh a reh zo tawhin ka hria, zingkarah kan rawn thlah thei kher chein ka ring lova, bawihpuia rawn mangṭha ve zuai la," tiin inchungah ka chhohpui nghal a, midangin min ngaihven lem lo.

U Mapuia room-ah kan riak tawh dawn lo a, Thlamuana room-ah kan inzui lut a, khuma ka fapa muhil chu enin, "I vanneihna tur a nih hi, khatiang khawpa hmangaihtu che mipa i lo tawng kha inchhir lo la, a hun laia i natna te hi nakina i lawmna tur leh i nun tihlimtu a la ni ang. Mapuia khan thil tam tak min hrilh a, a hun ka tihah ka la sawi chhuak dawn nia. Thlatea pawh zah thiam tum hram hram ang che aw, eng emaw hleka tihtauh leh thinrim khum te kha chín loh tur a nia, i pasal, Pathian hmaa i thutiampui a ni tih theihnghilh ngai suh, bawihpuia tan pawh mihrang a ni lova, thisen inzawm dik tak an la ni a, ring ngam la, i nihlawh a ni mai.." ti deuh duahin ka fapa biangah a fawp zauh a.

"Nakinah chhungkua hlim tlâng taka kan inhmuh leh hun a la thleng ngei ang," tia min kuahin, "In enkawl ṭha hle ang che," a ti leh a.

"Ka tan hian i hlu ngawt mai.." ti ve sapin ka kuah lêt a, Thlamuana ṭawng thawm kan hriat tâk avangin min kuahna a thlah dul hret a, min mangṭha hnuah a chhuak ta a, Thlamuana rawn lut tur nen an intawk a, an inzui thla leh rih.

U Mapuia room-a riak reng ṭhin kan nih avangin Thlamuana kan han fin ta chu ka ni deuh húihin ka hria. 

A khum hlui a dah chhuak a, hmannia kan lei thar zawk kha a dah lut thung, kan nufa thawmhnaw pawh an dah phei vek tawhin ka hria, a hmain lo riak fo ṭhin mah se, ka khawr ru tlat, thil nuam pawh a ni chiah lo atin ni.

U Mapuia room-ah kha chuan mu tlâng kher lova riah hran theihna tur Couch a awm tal a, hetah chuan Semi sofa tih loh khum a ni leh tawp a. Â...ka lái kual vel vek. Inbual dawn pawh ni ila, bawihpuia a harh ṭepin ka ring si. Thlamuana nghâk anga lan ka duh bawk si lo. Huis..ka hah.

Ka rin ang chiahin bawihpuia a harh ta ngei a, a ṭap ring ngei mai. Vawiin lam boruak a zo lo deuh a nih ka ring, a meng ngui lap a, mipui tamna zingah kan chhuahpui ngai lo ve bawk nen a khawngaihthlak reuh a nia.

Hnute hnek tur ka siam sak a, "Bâng rawh le, vawiinah ânu kha min lo hmu em?" Tia ka biak laiin Thlamuana a rawn lut a, "Novi, a va ṭap nasa em em ve," tih leh khuma ṭhut a rual a, a la inbual bik lo a nih ka ring, a sam a thur chhap a, a chhîpah a la ṭâwn lo teh tlat.

"Vawiin boruak a zo lo ve deuh a nih hi, a rawn harh chiah a," ka lo ti a.

"Tlangvalte, ka intleuh zuai anga keiman ka pawm ang che aw," tiin bawihpuia biangah a fawp a, zu rim a nam thânin ka hria.

"Va intleuh vat rawh i rimchhia," ka ti hlak a.

"I hnar te hi a fing sia.." nui chunga tiin a tho chhuak a, "Inbual rual ila," a la ti zui.

"Thlamuan i chhia, kal rawh.." ka ti hmak a. Nui kur kur chung hian, "Chhia min ti lo chiang e, vawiinah pawh i mit i lasawn hleithei lo tih ka hre vek," tiin ka chhân leh hma hian towel nen bathroom ah a lut ta a. Zu a in hlek tih ka hre mai.

Bawihpuia hnute ka pek zawh hnuah a thawmhnaw ka thlâksak a, ka ke a kham ut ut bawk si, vawiina ka pheikhawk bunna kha a ni tih ka hria a, naktukah bun leh a la ngai dawn zui. A huphurhawm mang e.

Puakpuan ka zawnga ka hmu mai si lo, u Atei khan khawiah nge a dah le ti rilru chungin bawihpuia ka pawma u Mapuia room lamah kan va zawng ta a, a lo awm ngei bawk. Pindan chhung ka melh kual a, ka lung a leng thar hle, ka beisei loh dana ka nun hman chhoh dan ka ngaihtuah kual chiama Thlamuana hi ka pasalah ka la pawm hleithei lo chu a ni e.

"Eng nge in tih reng, lo pheipui rawh," tia Thlamuana ṭawng ri ka hriat chuan ka phu zawk a, a lo lût thawm ka hre lo hrim hrim.

"A puakpuan helamah an lo dah daih a, ka va la a nih hi," zawitea ka tih chuan ngun lutuk hian min en a, "He room-ah hian engmah tih tur in nei tawh lo, eng thil mah hnutchhiah suh ang che," ti hmukin a inhera a chhuak zui daih. A va han sual tak.

Ka la tâwi khawmuang hram a, Thlamuana sawi ang tak takin a lang thei chinah pawh kan nufa thil hmuh tur a awm tawh lo rêng rêng! Bawihpuia damdawi ei lai chenin an thiar phei fai vek a, eng chu hria ni maw.

Thlamuana room-a ka lêt leh hnuin amah a lo awm lo a, inhnuai lamah ṭawng thawm a awm avangin ka nu leh pa te an la meng a ni mai thei, Thlamuana nî Hmangaihi khan min melh no vak ṭhin lo a, ka chhuk ve peih lo. U Mapuia hming a lam sek lehnghal a, a nuam lo ka tih vang a ni pakhat.

Inbual lovin nau ka âwi leh ta rih a, dâr 11 dawnah a muhil ve chiah. Thlamuana a lo la chho lo a, a awm loh hlana inbual zawh hman tumin bawihpuia ka mut sawk sawk a, bathroom lam ka pan ta a.

A zau nuamin a fai sur a, shower pawh a awm tho, bangah cabinet a awm a, ka hawng leh deuh kher. Ka hman ang chi ho shampoo leh sahbawn a lo awm ṭhap a, towel pawh a faisa a inthlep nual. U Mapuia kha pa che fel tak a ni a, Thlamuana hi chu chutiang a ni ve lo nain bathroom-erawh hman chakawm takin a siam thung. 

Geyser a lo in on sa thlap a, tuilumin ka inbual ta a, ka harh sawng sawngin ka hria. Ka kuta Rangkachak zunbun chu tuai kualin ka thlêk vang vang a, min bun tîr laia Thlamuana hmel kha ka mitthlâah a lang zut zut a, 'kum hnih daih zungbun a nih hi' tia ka ngaihtuah chuan, a va ho tak.

Ka mut kawr inbel sain room-ah ka lut a, bawihpuia amahin a la mu ngât a, kan Thlamuana hmel hmuh tur a la awm lo cheu. A duh chen chen thang bo teh se, ka lawmthu tak a ni.

A lâi takah Bawihpuia ka mut a, a kil lamah kei ka mu a, a hmain khum khatah mu ho fo mah ila, a rukin ka zâm hle. A nuam lo a ni tawp mai.

Masangi whatsapp message ka chhiar a, a haw hnu deuh lawka a lo thawn a nih hmel, "Nano, i ṭhiana min ngaia min pawm hi ka thinlung takin ka lawm a nia, harsatna i nei emaw inbunruah i duh pawhin i tan ka awm zel ang," tih hi a lo ni a, ka nui var var. Ṭhian ka thlang sual dawn lo a nih hmel.

Thlamuana rawn luh laiin ka lo muhil lek lek tawh a, thâwm dim a tum viau naa ka hre kar tho. Kan nufaa kan mu chu min en reng a, ka mit sîrin ka hmu ru reng.

"Novi..." a ti sup a. Ka che duh ṭhak lo.

"I muhil lo tih ka hria a nia.." sehchilh naka tiin khum mawng lam ka mutna zâwnah a ding a.

"Mu rawh, a tlai tawh.." ka lo tih chuan, "Ka mu dawn, ka mu dawn..." tih pahin a pai dat a, a rûi tih hrilh hranpa ka ngai lo. Ka ṭhu chhuak hlawl a, ka en ta nge nge a, a meng hniam raih a, a shirt hak lai a hlip a, a kekawr a phelh zui leh zat a, a ding nghet lo nasa mai si a, a tlu ang tih mawlh ka lo hlau.

"I zu han duh dan em em hi...nawi thei bawk si.." ka ti sap a.

"I thin bawrlawk kha chhuak suh se, Mama nupui i ni lo aw, ka nupui zawk i ni," tia a sawi zawh rualin khumah a ṭhu hnawk a, a sam tuai puatin ka fapa a melh a, "Tlangval, i patea hi i pa ka ni tawh aw..." a'n tiah. 

"Thlamuan..." ka ti chhuak hliai a.

Khi suk chung hian, "Ûte, muhil rawh, ka ṭha aw.." a ti leh sup a, bawihpuia muhil bianga fawh a tum chuan ka lo dang vat, a hmuiah ka hup sak a, "A tlai tawh lutuk i tiharh palh ang," ṭawng ring ṭha ngam chiah si lo hian ka ti a.

A hmui ka hupna kut chu a kut veilamin a rawn bawhthuah a, a zungbun pawh a langsar khawp mai.

Rang takin ka kut ka lasawn vat a, khum lu lam aṭangin lukham ka rap phei a, Thlamuana bulah ka va ṭhu ta a, dam thlap hian, "Bawihpuia a harh ang, mu tawh rawh aw.." ka ti a, a nui suk. A meng chiai a, ka zungbun bunna kut veilam chu lakângin a hmui nen a chuktuah a, "Ka nupui i ni tih chhinchhiahna a nih hi, phelh a thiang lo aw...phelh thiang lo a nih kha.." tiin a sawi ngai a sawi nawn leh a, ka va ning tak.

"Aw le, aw le, ka phelh dawn lo," ka lo ti sawk sawk. A ruih laia hauvin awmzia a nei lo a, a thin butut a chhuak palh ang tih ka hlau a ni ber. 

"Bawihpuia hi a kilah mut tîr la..." a ti a, ka lo ner nasa mai. Ka zaidamnain a tlin lo lek lek tawh.

"Thlamuan, ka chau a nia, mut ka duh, râk râk lo khan mu ṭha rawh," ka ti a, a mu ve mai bawk a, ka lo thaw huai. A han nikhua loh dan em em hi aw...

Ka mutna lama kal tumin khumah ka ding a, ka kutah a lo vuan chat. Min pawt thuta amah delhin ka tlu thla ta a, a âwmah ka bei thlap. Ani'n nghet takin min lo kuah thung. 

"Novi..." tih leh min fawh a rual a, 'Ṭîk' pawh ka ti hman lo. 

Uar zeta min fawh mawlh mawlh lai chuan ka lo ṭang ṭung a, whisky rim a nam bawk si, min kuah ngheh êm avangin chuti maiin ka tâl chhuak thei lo, han ṭanga ti lêt ve deuh turin kan bul maiah ka fapa a mu bawk si. A va hahthlâk e.

Min fawhna a dam telh telh a, a inthlahdul tial tial bawk a, ka che duh miah lova; minute hnih hnu velah a thâwk dan a dik ta. Ka hmui si reng chungin zu han muhil thei a! Thinrim lamah pawh a kal lo. A dangdai thlâwt a ni e, min fawp reng se tihna ni lovin, a zu rui hi a nuihzatthlâk ka ti tlat.

A lo chhoh hmasaka a in kha duh tawk ve mai se ṭha tur, a tih belh leh khera a zo lo a nih ber hi. Ti hi chuan lungmuang takin ka muhil thei ta e, lawm lohvin ka nui var var mai alawm maw le.

Kan Lalthlamuana zet hi zawng a hahthlâk ve ngat ngat a nia, a û nena tehkhin râlah phei chuan chhim leh hmar ang vel an ni. 

Thlamuana'n min fawh apiang hian engtin emawni ka awm ve ziah, a hma kha chuan u Mapuia lakah ka inthiam lo ru ngawih ngawih zel a, tunah chuan ka inthiam chawp tawh. A chhan pawh a nau ringngamin a kutah min dah tlat a, ka hmangaih rin ngam chu ka ring ve mai tur a ni dawn lawm ni, min fawp turin dikna a nei tlat a, a nupui ka ni miau si.

A tukah Dikin min rawn kaihthawh chuan ka inthlahrung hle mai.

"Nano, nizan lam inche na deuh a ni maw, thawh i hai danah," tiin a nui kar kar a.

"Chutiang sawi suh...khawnge bawihpuia?" Ka lo ti a.

"A piin a pua, u Thlatea gym room-ah a chhuk, kai tho lo tur chein min hrilh naa a tlai tawh si a," a ti ṭha ve mai.

Sana ka'n en chiah chu ka phu zawk. Dâr riat a pêl tawha vawiina kan thiltih tur nen ka che buai leh vek dawn a nih hi.

"Bawihpuia lo pawm chho rawh, ka lo bual ang," ka ti ta sawk sawk a, ka tho chhuak nghal bawk a, Masangi te lo thlen hmaa inpeih ngei ngei ka ngai asin.

Chumi hnu chuan muangchâng eih lo hian ka intifai a, Bawihpuia pawm chungin Thlamuana a rawn lut a, en pawh ka en ṭha duh lo, nizana a awm dan kha ka run thar riau. Amah vanga tho tlaiah ka inchan deuh tlat nia.

"Khawi," tih pahin bawihpuia ka ban a, "Nano..nizan kha.." a ti dêk dêk a, "Ka sawi peih lo, che ṭhing thei si," ti nghauhvin a nau pawm lai ka lâksak a, a khi suk duh chauh.

Thlamuana ngaihsak lo lêkin ka che buan buan a, ka fapa ka bual zawh hnuah inhnuai panin kan inpawm thla ta a, ani pawhin min be lova a inbual ta niin ka hria.

Ramdina a rawn thleng hmasaber a, nimina a inthuam ang chiah khan a rawn lut a, chaw a ei tawh tih a sawi a, a hnu lawkah Masangi a lo thleng bawk a,  Hruaisanga'n a rawn thlah ngei a, ka lo be ve luam.

"Min sawm ve lo hi ka vûi lo aw..." tiin a nui var var a.

Kei lah chuan, "I ṭhiannu kutah ka dah a, a ngaipawimawh lo che a niang," ka lo ti sam êt a, an nui tawp.

Thlamuana pawh Tuxedo nen a rawn chhuk a, nizanah a rui nawi tih a hriat loh. A nu style hi a copy ve deuh a, thil haider a thiam riau. 

"Novi...insiam ve tawh ula, bawihpuia hi Atei te inah ka zu dah lawk ang e," tiin ka pa pawm lai ka fapa chu a la a, Hruaisanga a melh rum teh ngawt a, a tiho ṭhin ania.

Keini pawh insiam turin inchungah kan chho ta a.

Dârkâr chanve hnuah Jeru hovin kan chhuak ta a, ka nu a meng no vak lo. Ṭûl lo a tih hmel khawp mai. Mahse, a fapa ruahmanna a dál ngam lo tepawh a ni mahna.

Beraw tlângah dârkâr li zet kan han thang a, Thlamuana ka ngei rûkna pawh a reh ta deuh.

Jeru nen an inbiak laiin ka phone a rawn ri a, u Ropuia'n Lunglei a thleng tawh tih rawn sawiin, Mami zan chhuak a lo haw loh thu leh ka nu zawng tura a kal thu a sawi tel a, ka rilru a nuam lo hle.

"Mate, Mami hian nun pangngai a nei zo tawh hian ka ring lo, pawisak a nei tlêm sâwt si a, mipa hrang hrang zu nei apiang a zui kâwi zel an ti a, ka pa rilru a tina lutuk.." a rawn tih leh phei chuan ka chhungril a na vawng vawng. Indemna chin ka nei ve lo thei si lo.

Shooting kan neih mêk thu leh zan lamah ka be dawn tih sawiin ka dah ta rih a, ka ngui nghiai mai. Ka unaunu a nihna a bo lo a, chhul khat kual kan nihna hian min tina tel lo thei lo atin ni. A mualphona pawh ka mualphona a ni tel ve tho si a.

Masangin ka hmelah a lo chhiar thiam a ni ngei ang, min zawt vat a, ka hrilh ve vek.

"Hrehawm tih phah nan hmang duh suh, insiam ṭhat hun a la nei em em ang," tiin min hnem a, ka ngawi reng.

Tlailamah Jeru-a an khaw lama haw a duh vangin kan duh tawk ve ta a, "A tawp nan, vawikhat te chu..." a ti zeuh a, Thlamuana a nui huk a, Ramdina'n, "Ṭhianpa, mit kan lo hup ang," a lo ti a, ka nui ve ta nge nge e.

Fiamthu titak deuha an nawr sek avangin Thlamuana a rawn che chhuak a, midang mitmei veng hlek lo hian, min rawn fawp a, Jeru pawh a nui hawk hawk mai, "A changtupa tan tlanchhiat a rem lo rêng a ni," tia nui var var chung hian a bike-ah a lawn ta a. 

Jeru Khiangte Photography aṭangin kan inneih thlalâk mawi leh nalh tak tak kan dawng turah ngai ang aw, amah a felin biak a nuam si a, u Ropuia te inneihnaah pawh ani hian telpui thei se ka va duh si êm..

Chumi hnu chuan midang zawng Ramdina carah kan lut a, in lam kan pan ve ta a.

Kan ṭhiante ve ve hian zanriah min kilpui leh se tih kan duh viau a; mahse, hun nei lo an inti ta deuh bawk nen kan sawm nawn ngam ta lo.

Inneih leh a behbawm a zo a, Atuni nen kan inbiakin, "Ka unaunu dik tak i ni ta, a hma kha chuan chhungril taka inpawh a harsa a, tunah chuan a dan a dang ta zar mai, Mama nupui atana Pathian ruat i ni lo a, Thlatea i neih theihna atana i kalkawngah Mama hi a ṭang zawk a ni," a rawn ti a, ka ngaihtuahna a ti thui angreng hle.

Ani hi chuan zêp nei lovin thudik deuh deuh sawi fuk fuk a chîng ṭhin. Kâi ang phelh phawlha a ṭawng tawh hi chuan nuihna tur a tam thei phian. Beer hehin duh viau mah se, midang tana hnawksakin a che ngai lo hi amah ti Atuni tu a ni. A rilru a ṭha viau bawk.

Kan inneih zana a nau awm dan kha ka hrilh a, a nui nasa hle. "A tih awm tawk chiah a nih kha, a bialnu hlui Angela kha Mizoramah a rawn chho dawn a, thlakhat vel châm a tumin ka hria a, a lo chhoh hun tur tak ka hre lo nain hmanzanah a rawn lut hlawl a, Thlatea rawn hmuh a tum a, nupui a nei tawh ka lo tih khum alawm," nui hak hak chungin a ti a.

"A lo chho tih i hriat chuan min hrilh rawh aw, zu an in dun leh ringawt mai ang, ka duh miah lo.." ka lo ti a, "Strick ṭan deuh ve.." a ti duh lek.

Kan inneih zan bâk kha a in leh ta rih lovin ka hria. A chêt dan pawh ka sawi lang duh lo a, ka be tam lo hrim hrim. 

Ka nu leh pa hmuh lai bâkin ani pawhin min be bik hek lo. Zanah nise ka mut hnuah a rawn mu a, zingah ka fapa pawmin a chhuak daih zel. A hna a la zawm bik lo a, ina awm dun e ti lovin kan inhmu khât viau. Chhunah u Mapuia room-ah a inkhung daih zel bawk si. A ze mak deuh hi ka hrethiam phâk lo a ni e.

AuMami pawh zu leh mipa nen a tâl hiar hle niin an sawi a, u Kimtei pawh vawi hnih keimah vangin a lo ânkhuma min rawn hrilh nghe nghe.

"Mami hi chu a chapo si, engmah ni si lo hian a inluling ve em em a, i u chu ni lo se ka ṭim hrep tawh ang," a rawn ti a, a va nuam lo ṭhin tak.

"Lo hrethiam hram hram teh, a buaithlak a nih kha," ka ti tawp. A bâk sawi belh tur pawh ka hre lo.

Kan inneih aṭanga Pathianni vawi hnihnaah nau-hlanna hun kohhranin a siam dawn tih ka pain a sawi a, bawihpuia hlan ve ngei ka duh avangin Thlamuana ka sawipui ta a, "Kan inkhawm dawn nia, nau hlan tur inreport na tur ka pa lo zawt ta che," a ti dam thluam.

"Inkhawm dawn pawh ni ila, thawmhnaw inbel tur ka nei lo a, puan bih tur takngial pawh ka nei lo," inthlahrung taka ka tih chuan, min en vung vung a, "Ka thiam loh a ni, Atei te awm se ṭha tur a nia, an lo chhuk hman tawh si a, nangmaha bazar kal i hreh em?" Tiin min zawt a.

Ka hreh loh thu ka sawi chuan, "Bawihpuia awm pahin hna ka lo thawk ang a, Taxi la mai rawh aw.." a ti leh mai a. Ka lo bu nghat.

Inhnuaia ka chhuk hnuah ka chhuah tur thu leh ka tih tur ka nu ka hrilh a, "Puan pakhat mah i nei lo amaw, awi awi, i nikhua lo ṭhin teh e," a ti nghat a, ka chhâng peih vel lo.

Ka dinhmunah hian ding ve ta se, puan ngaihsak hman bîk tak ang maw.

"Sum hmanna i hre chho ṭan hle mai maw, Mapuia thlabi hlawh i lâk pawhin ka kutah min pe ang che, ka tupain mamawh a nei tlem lutuk, a patea'n a ngaihtuah sak vek a, a hlawh lo pumbilh te kha ngaihtuah pawh ngaihtuah chhin suh," a ti tún tún a, ka thin a rim ngei mai.

Bazarna tur ka dil pawh a ni lo a, ka kalna tur ka hrilh ta kha ka inchhir rum rum. Puan lei tura chhuah châkna pawh ka nei tawh lo.

Masangi puan hawhsak mai ka tum rilru ta a, remchangah ka la lei ve mai ang.

Thlamuana bulah ka fapa pawh dah ta lo chuan, ka u Ropuia ṭhianpa, pazawn atana ka hman u Thara te in lamah nau paw chungin ka lêng ta daih a, ka phone pawh ka keng buai peih vel lo.

Anni lah an lo lawm em em a, bawihpuia min lâk chhawk hmak a, "Kan rawn lang nawn thei ta mang si lo a, i rawn kal hlauh chu a tihzia hle mai," annu u Duhsakin a ti a, u Ropuia nupui neih tur chungchang vel kan sawi a, an ina len a nuam viau.

U Duhsaki chuan, "Mapuia kha a fel a, mi pawi a sawi lo viau asin, mahse, a nu leh pa zia hi vantlâng hriat a ni a, kan inpawh lutuk lo. Thlatea leh Atuni te hi chu an awm khât a, a hriat pawh ka hrechiang lo, Atei pawh a fel," a ti bawrh bawrh a.

Atuni leh Atei fel ka tih thu leh thisen zawm ang maia ka ngainat thute ka sawi ve bawk. 

Dâr thum dawnah kan haw ta chauh a, "Lo leng leh ngei ngei ang che u," tiin nu berin kawtkai thleng min thlah a, ka kal ta hi ka inchhir lo, ka nu Biakliani laka ka lungawi lohna pawh a reh titih tawh.

Kan in kan thleng a, páwnah Dikin puan pho a lo seng a, "I kalna tur i sawi si lova u Thlatea'n a zawng che a nia, a chhuahna a rêi tawh.." a ti ta mai.

"Khawi lamah nge a kal?" Tiin ka zawt vat a. 

"Motor nen a chhuak a, ka hre bik lo.." a ti leh tawp a, chhâng tawh lovin inchhungah ka lut nghal a, ka nu nen kan la intawk zui.

"Thlatea phone rawh, i awmna a hre lo a, a thinrim teh a nia, han hau deuh che ila i chhuak tâu ang bâr bâr a, chhuak rawh tih laia chhuak duh mang si lo, i luhlul dan em em te hi...naupang tê si.." tia min ânkhum lai chuan ka ding ngawi reng ringawt. 

Ka ṭawng ve a nih chuan ka insum thei dawn si lo a, ngawih mai a ṭha zawk.

Ka phone inchungah ka charge kha a ni a, ka'n en nâk chuan 7 missed call Thlamuana hnen aṭangin ka dawng. A thinur a vei leh fua fuain a nia ka rin.

Ka call a, rang lutuk hian, "I awmna sawi rawh," a ti nghal tawp. 

Ina ka awm thu ka sawi chuan, "Dâwt min hrilh hlek suh aw, in aṭangin alawm ka chhuah le," pawr fe-in a ti a. 

"Min vín vak vak suh, ka thinrim ve tho a nia, inah ka haw tawh..." tih leh phone off ka rual a, ani chawp chawpa min vin ziah zel, ka hne lutuk.

Diki eirawng pawh bawlpui duh lovin ka titau ve tlat a, ka dik vek ka ti lo, inkhawm ngei ngei a ngai dawn a, helai hmun ka thlen hian neih ka neih lo; thawmhnaw pawh a tlachawp takmeuhin ka awm a, naupang te ni mahila, ka dinhmunah ka lungawi ve ṭhin. 

Tun ṭum chu ka nu min ṭawngkhum dan kha nidang zawng aiin ka ngai hua. U Mapuia hlawh pawh ka la thei tih ka hre reng reng lo a nia, an fapa Thlamuana'n a buapui tih an hre ve vek.

A hnu dârkâr chan ve a ral vel tihah Thlamuana a rawn haw ta a, kan nupa room-a ka ṭhu ngawi reng chu min enin, "Min tihah ṭhin hle mai, Thlanmualah te, Masangi te inah te ka zawng che a, i kalna chin sawi lovin chhuak tawh suh," a ti nghut a.

"Min zawng rawh pawh ka tihleinem," ka ti ve hmak.

"Novi.. thinrimna i neia i lungawi lo a nih pawhin pawnlamah chhuah kher loh tur, bawihpuia i hruai a, phone i keng bawk si lo, ka ngaihtuahzia che u i hre lo em ni?" Dam deuh zawka tiin ka bulah a rawn ṭhu a.

"Ka titau a nih kha, titau chungin tumah ka be lui thei lo, ka nu ang khuan ka ṭha der thiam lo," ka'n tiah.

Ani pawh thinrim viau e ti lo chuan a khi suk a, "Khawiah nge i kal reng reng?"tiin dam thlupin min zawt leh a.

"Ka sawi duh teuh lo, nidangah ka nuin min hau leh hunah ka kal leh dawn," ka tih chuan, za lutukin a nui ta a, a ha vâr ṭhap langin a nui leh ta. "I â sia maw...ka nupui tak hi chu.." tiin ka dârah min kuah a, la nui reng chung hian, "Ka nuin engtin nge a tih che?" tiin min la kuah reng a.

"Ka sawi peih lo, Sakawlh dik tak a nih khu, puan pawh kha ka lei dawn lo a nia, Masangi ta ka hawh dawn," ka lo ti zung zung a.

Amah en tura min kuai herin, "Puan lei a phal lo em ni, engtin chiah nge a ṭawng?" tih pahin ka mitah min en a, ka sawi ve vek.

"Lungleiah ka puan la turin ka kal dawn em ni, ka mamawh ka sawi khât tehlul nen," ka ti sap a.

"Le, duhtawk tawh rawh le, ka nuin a leisak dawn hleinem che, Mama hlawh hi keiman ka la ang a, in nufa mamawh lei nan hmang ang che u, ka nu te pêk a ngai lova, a fapa mamawh leina tur thlatin Mama'n a la tum zel dawna anni sawi theih a awm lo," tiin ka samah a chûl a, "Ka hau dawn em ka nu chu," a'n ti ṭha leh a(h.)

Nui chunga sawi a nih vangin, a fiamthu tih ka hre ve tho a, "Hau duh suh, a zia a thlâk phah dawn chuang lo," ka lo ti ve ta tho.

"An fa mo i ni tawha a hma ang mai maia an ṭawngkhum chhen lohna tur chein nang pawh huaisen ve deuh la, ka nu leh pa, min chawm seiliantu an nih avangin ka tan chuan an hlu a, chuti a nih rual erawh chuan an dik lohnaah ka hauin ka zilh tur a ni, a pawimawh berah chuan i pasal thu hi awih la, i tan a him ber.." thutak zeta tiin min kuahna a thlah a.

"Naktukah dam chuan i mamawh enin kan chhuak dawn nia," a ti ta a.

Min duatna leh min ngaihsakna ṭawngkam avang hian ka thinrim lutuk tur pawh a zia ta.

A sawi ang chiahin hun a insiam a, bawihpuia hruaiin kan va chhuak ta a, kan kal dawnah ka nuin thil min chah kûr leh nguai si a, ka ngei a nia. 

Sunday-inkhawmnaa ka inbel ve tur mawi hnai deuh ka lei ve ta a, ka hlim takzet. 

Thlamuana pawhin, "Hlim taka i awm hian ka tan a nuam a, thinrim leh lungawi lohna neih fo a, huatthu chhiat lutuk te hi a ṭha lo. Novi tih takah i rilru te hi a no lutuk ṭhin a..." tiin a nui ruh ruh a, ka ngai haw hran lo.

Ka nu thil chah a lei hlanin phone call ka dawng a, u Ruata a ni. A number ka lo nei si lo a, min lo call thut chu mak ka ti viau. U Kimtei zawk nise ka hrethiam ang.

"Nano, i u Mami zan hnih a haw tawh lo a, a awmna chin an hre bawk si lo nen lo hre ve mai mai rawh aw, Ropuia nen zawng turin kan chhuak a, YMA han hrilh ngawt pawh chu kan hreh ve deuh si a, chanchin inhrilh loh aiah i u in hrilh ve teh atia ka lo sawi," a rawn ti a. 

"A lawmawm lutuk e, in chin lo sawi rawh u aw.." ka ti ve a. 

Thlamuana a rawn lêt tak avangin phone ka dah a, ka hlimna te kha a ral riai riai nimaiin ka hria. Ka pa a damlo si a, auMami lah ti mai mai hian a tâl bawk si, a hrehawm hle mai.

Thlamuana hrilh ka tum ûk a, motor la tura a kal zui tâk avangin ka hrilh ta lo.

Zana kan mut hnuah bawihpuia pang a sa vur a, a ṭap ngat ngat mai si a, nachhawkna ka ei tîr pawhin a chhawk lo. Thlamuana'n u Mapuia room-ah hna a la thawk a, a ṭap ri a hre lo nge a rawn dîkdâk lo reng reng.

Bawihpuia ṭap paw chungin u Mapuia room-ah ka va lût a, Thlamuana a u khumah tui takin a lo muhil a, ka hmuh tirh phei chuan u Mapuia emaw ka ti zawk, saisir zawnga mu a nih vangin min tiphu a lawm maw le. 

Ka fapa ṭap ri pawhin zuk tiharh zo lo a!

Ka khawngaih viau nain ka kai tho ta a, a meng phelh phung mai. A hna thilah Estimate a siam a nih ka ring, hetiang zanah hi chuan u Mapuia pawh kha a mengrei thei khawp mai.

"Bawihpuia hi a khua a sika a tlei duh lo rêng rêng nachhawkna pawh ka pe tawh," tihpahin puakpuan ka phelh a, thawhphan awm lovin a lo ban ve nghal a, a pawmin a kuah ngun naa puak tak hi chu a ti khât.

"Tlangvalte, i khawi lai nge na?" Tiin khumah a ṭhutpui a, a ṭap uar sauh.

"Insiam rawh le, damdawi inah kalpui ang, nâ a nei te pawh a ni maithei" a ti sup a.

Chumi hnu chuan midang pawh ko harh lo hian kan hnaih ber Civil hospital casualty kan pan ta rum rum a, kawngtluanin a ṭap a, ka ṭahpui lo chauh a ni e.

Casualty kan thlenga rang takin an lo buaipui a, naupang doctor a awm loh avangin Medicine doctorin a en a, a thil ei leh in min zawt a, ka lo sawi vat a.

"A pum a nâ a nih hi, hei a ruh ṭül alawm," tiin eng emaw a ziak mawlh mawlh a, Thlamuana kutah pein, "Hei hi va lei rawh aw," tiin a kal sawn a, Thlamuana rang takin a chhuak nghal a.

Ka fapa kuah chungin ka ṭhu a, ka thâw a sa vek. Khatiang êm êma nasaa an ṭap mai kha ka chhungril a tawk ché ka ti mai.

Nachhawknaa an jection hnuah a muhil ta siai siai a, minute 20 aia tam Casualty-a kan awm hnuin kan haw leh ta rih a, an admit ta lo.

Zinglam dar hnihah kan mu ta chauh a, ka ṭawng tawh lo hrim hrim, auMami chanchin eng mah min rawn hrilh bawk si lo a, ka ngaihtuahna a vâk vel a ni ber mai. Ka thaw chhuak hliai a,  ka hah ru ngawih ngawih.

"Muthilh tum rawh, engtin mah a awm dawn hleinem," Tia Thlamuana a rawn ṭawng chuan ka lehhawi vat a. 

Zangthala muin ngun taka thil ngaihtuah hmel a pu.

"Naktukah entîr ka duh.." ka ti sap a.

"Han ngaichâng deuh ila, a awm dan a zirin kan en tîr dawn nia, muthilh tum phawt rawh," dam duamin a ti a, "Ka mut a chhuak tawh lo, eng lo..." tiin auMami chungchâng kha ka hrilh ta a.

Chal chuar nûng chung hian, "Ropuia ka lo be dawn nia, hmeichhe zu duh laklawh tawh chu a buaithlâk," ti supin bawihpuia mu chu a sir lamah a sawn nulh a, "Eng nge i tih a?" Ka lo tih chuan, "Zanin chu ka lo kuah ang che," tiin ka bulah a rawn tawlh phei a, "I ho..." ka lo ti ringawt.

"Eng tin mah ka ti dawn hleinem che, ka kuah ringawt dawn che alawm, Thlamuana hian ka nupui Novi hi ka Thlamuan a ngai tlat," a'n tia e.. A nuih loh theih loh.

Min rawn kuah ta a, ka lo ṭang ṭung. "Inthlahdul la, bawihpuia muttui lai hian muhil rawh kei chu zantîr lamah ka muhil tawha ka lo veng ang che u," tiin a bân lum thur thur chu ka pumah a rawn nghat a, ka va zak tak. A ruih lai kha chuan amah a ruih miau avangin ka zak lutuk lo deuh a, tunah erawh chuan a harh fîm mah mah atin ni.

A taksa lumna tem chunga ka mut tâk rengah chuan ka inthlahdul hret hret a, ka lo muhil ta a ni ang. 

Diki ṭé vak vak riin min tiharh a, min kuah chungin Thlamuana a muhil a, ka fapa pawh chuti tho.

Kan room kawngkhar tu emawin a rawn chúm dawt dawt a, "U Thlate, Nano...pi hi.." tia Diki thlabâr taka a rawn âu leh tâkah chuan Thlamuana mu ka sâwi a, kei pawh ka ṭhu chhuak nghal a, phak zet hian, "A va bengchheng ve tunge?" A ti dút a.

Ka sawi hmain Diki a rawn ṭawng leh a, Thlamuana hmanhmawh takin a tho a, "Bawihpuia pua la lo chhuk ve mai rawh," tiin a chhuak nghal a, a intifai hman tawh bîk lo.

Kei pawh hmanhmawh takin ka che sawk sawk a, ka intifai thuak thuak a, bawihpuia mu chu dimtea pawmin ka hnung puak a, a rit ve nulh mai.

Inhnuaiah ka chhuk a, Thlamuana leh ka pain ka nu an lo ko vak vak a, khumah mitthi ang mai hian ka nu Biakliani a lo mu a, "Thlate, damdawi inah kal ang, Zomuan, Atei leh Atuni be rawh," chiai zetin ka pain a ti a.

Diki ala ding khur zaih zaih.

Thil awmzia tihian a sawi ta a.

"Ka zing tho kha eirawng ka bawl nghal a, pi hi a rawn tho ve a, thingpui ka pek hnuah pawn lamah a chhuak a," tiin a thaw halh a.

"A rawn luh har em avangin pangpar tui pe turin ka chhuak a, Garage panna Step tawp berah a lo let reng alawm," tiin a sawi ta a. A va mak bawk ve.

Ka pa leh Thlamuana'n damdawi in lamah ka nu an tlânpui dawn a, kal ve ka tum deuh kha a nia, "Bawihpuia nizan lamah a chiang bîk si lo a, inah lo awm mai rawh u, chanchin ka rawn sawi ang," Thlamuana'n a ti a, ka hnial ta lo.

Hmanhmawh taka an tlan chhuah dawnah ka nu ka va bih hrâm a, a awm ngai rengin a la awm. Nikhua a hre lo tih a lang reng a, ka pa malchungah a lu nghatin ka pa pawh a hmel a buai nak.

Engvanga khatia awm ngawt nge a nih ang. Nizanah bawihpuia kan tlanpui tawh a, tunah a pi nikhaw hre lovin a awm leh a, a mak hle mai.

Ka nu Biakliani chuan eng êm ati lo turah ngai ang.

280123

Shadow of the life

B+>[BeckirafARenthleI]<+®®