7. KA CHANPUAL [A Becky Rafa Renthlei Story]

7. KA CHAN PUAL

Shadow of the life

Ziaktu: Becky Rafa Renthlei

-B®®

(Recap)

Nia, hlim angin lang ṭhin mah ila, ka pum chhunga awm naute hian a pa hmel a hmu hman lovang tih ka hlauhna hian ka chhungril a ti ṭap leh ṭhin.

Kan inhmangaih chhung rei lo têah hian a hlimna tur chauha awm hrâm hrâm ka tum dawn lo em ni? A naupang zawk niin hmeichhia ni mah ila, ka fâ pa hlimna thlentu nih ka tum ruh hle. 

Thlamuana tih vel avanga kan nupa inkâr a chhiata inhnial phahna tur eng thil mah a thlen ka phal lo. Thleng lul suh se.

###

Delhi kan thleng ta.

Atuni te unau Flat luah chu a nuam vei phian. 

Duh tâwka sum hman tur nei an ni bawk a, an tân thiltih a harsa lem lo. Delhi kal an sawi aṭanga nihnih hnuah tluang takin kan thleng ta kha a ni a, thlawhnaah ka vawikhat chuanna a nih bâkah ka naupai vang nge ka rui titih. 

Atuni a fel a, engkimah min buaipui fai vek a, u Mapuia pawh inthup tum hle mah se, a awm a nuam vak lo tih ka hre ru kar. 

An Flat luah hi a zau nuam ang reng a, amaherawh chu, Atuni room leh Thlamuana room bâk pindan chuang a awm lova a buaithlâk ta a ni. Choka a hranin a awma a fel fai phian, ṭhutkhawmna pindan pawh an nei hrang ve thlap a, bungrua a kim; mahse, an inpuia an hman ang em em chu a ni bîk chuang lo. 

Zana mut dan turah a buaithlak ta deuh. Atuni hmeichhia zawk a ni na a, a room min ken a tum a, u Mapuia'n a rem ti lo tawp. Thlamuana room-ah zawk kan nupain kan mu dawn a, ani Thlamuana ṭhutkhawmna lamah riak turin a inpuahchah thung.

"Mam, ka room a nuamin a fel fai zawk a nia," Atuni'n a la ti ve hrâm a, "Ni lo e, hmeichhia ṭhutthlenga mut chu thil tih chi a ni lo, Thlatea room hi a ṭha mai, chinfel erawh a ngai deuh dawn a nih hi," tih pahin u Mapuia a hawi kual a, mipa pindan tih takah Thlamuana a che fel viau lo. Ṭawp leh bál awm lo mah se, ram tinah thawmhnaw a zam darh a, ka chau bawk nen Atuni'n a tihfaia a chinfel lai pawhin ka mu tawp, luak chhuakin min la ṭham renga ka nunkhua a nuam lo. U Mapuia pawh chuti tho.

"Nano, lokal lawk teh.." bathroom-ah u Mapuia awmin min rawn ko a, rang taka ka va luh chuan la phuan buah chung hian, "Ka thaw a hah dawn tlat, min hnawh tur angin a awm, damdawi lo buatsaih rawh," tiin a thaw chhuak hawk a, saruakin a la awm bawk si, "Khawi, ka lo tleuh thuak thuak ang che," tih pahin shower ka on a, keimah chawpin kan huh vek a, mahse, ngaihpawimawh hman a ni tawh lo. Bathrobe a hâk laiin ka va chhuak a, a damdawi ka phawrh nghal zung zunga eng mah inrem fel leh phawrh mumal awm lovin kan la awm bawk si.

A híp chi leh ei chi ka pe nghal vat a, ani pawh khumah awmin a mitmeng a dul ruih, a thlawhna chuang kha a tifuh vak lo a ni ang, vawi hnih a luak ve tho.

Chutia kan lo inbuaipui lai chuan, Thlamuana a rawn lut a, "Û te, i va huh nasa ve, va intifai rawh, Mama hi chu ka lo buaipui ang," a rawn ti a, a û ngaihtuah hmel taka a en chuan mak ka lo ti deuh. A tider êm lovang chu maw, ka la chêt lawk loh avangin u Mapuia'n min rawn mitmei a, Thlamuana lakah hian rilru chhia ka pu laklawh a, ka ringhlel lo thei lo. 

An unauva an inbuaipui laiin inbual turin ka lut ve ta a, u Mapuia mitmei ka hmuh vang chauha kalsan ngam ka ni.

Naktuk tlaiah hian Dr.Ibrahim kan hmu tawh dawn a, Atuni erawh a hna zawm a ngaih vangin a kal ve thei dawn lo a, Thlamuana ve thung chuan min zui dawn a nih hmel.

Ka inbual zawh hnua room ka luhin an unauin khumah an awm a, Thlamuana'n Medical file a lo check mêk a, u Mapuia pawh a zia ta deuh a ni ang, "Lo mu rawh, i nawmsam bîk loh kha," tiin min lo be vat a, zan dâr 10 a ri dawn tawh a, mut hun a ni tawh reng; mahse, Thlamuana a la awm ve si avangin ka tâwi khawmuang a, kan luh tirh ai kha chuan pindan chhung boruak pawh a nuam tawh zawk.

"Tikhan lo awm rih ula, a la hma alawm, Atuni room-ah ka va kal lawk ang e," ka tih chuan, "Hnathawh tur a hawn ṭeuha i va tibuai mai mai," Thlamuana'n a ti a, kal luih ṭâlh ka tum bîk ta lo.

"Thlate, duh leh file kha keng phei la, naktukah engmah tih tur kan nei chuang hleinem kan ennawn ṭha mai dawn nia," u Mapuia'n a ti a, keimah min rawn enin, "Nang pawh lo mu rawh le, i chau lutuk ang," ti lehin ka mutna tur awl lai a bêng thak thak a, dik tak chuan man hlãna innei ṭha kan nih loh avang hian ka chhungril takah inthiam lohna lian deuh ka nei ṭhin. A naute hmuh laia a kianga han mut emaw pasal ang tak taka han duat vel pawh ka inthlahrung lo thei lo. 

Khumah lawnin ka mu ve ta tho a, min lo kuah vat. Thlamuana ka melh zeuh a, file bih ngur chung hian a mit sîrin min melh zuk a, a chhuak ve mai dawn emaw ka tih laiin file a en zawh hnuah ama thil pawimawh eng eng emaw a dap kual leh rih, a room-ah kan mu bawk si a, nuam lo ka tiru takzet.

Ka chau ve bawk nen u Mapuia âwm nghengin amah kuah chial chung hian ka maimitchhing ve ta a.

Thawm bengchheng zet riin min tiharh a, ka mutna hmun ka la hai zui. Ka bula u Mapuia mu ka en vat a, a la mutui hle, tihharh hlau takin min kuahna a bân lum thur thur chu dim tê hian ka dah sawn sak a, ka thawm bengchheng hriat pawh eng dang ni lovin Thlamuana hnar ring lutuk ri a ni. A ri kûk kûk ni berin ka hria.

Kan awmna room-ah hian Toilet leh bathroom a awm a, a zia viau. Zinglam dar hnih a ri tawh a, ka zun a chhuak ve deuh bawk nen ka tho chhuak a, eng emaw lai aṭang khan zan lamah hian vawi hnih vawi thum zungin ka tho ziah. 

Ka mut ṭhanna hmun a nih loh vang leh Mizoram boruak nen a inan loh lutuk vangin ka mu nghet tehchiam lo hrim hrim, bathroom ka chhuahsan hnuah khumah ka mu lehnghal a, Thlamuana hnar ri ring viau mah se, haider luih hrâm ka la tum fan a.

Ka nu leh pa, ka unaute ka ngaihtuah kâi a, khatia thinrim taka min chhuahsan hnu khan an sawi ang ngeiin vawikhat mah an hnen aṭangin phone call ka dawng tawh lo a, u Ropuia nen erawh chuan vawi hnih kan inbe tawh, ka ṭhat leh ṭhat loh min zawt a, chhel taka awma hmalam pan tum tlat turin min fuih bawk, remchâng hmasa berah min lo tlawh tur thu a sawi a, helam pang chhungte hi chuan u Ropuia rilru an hriaa Thlamuana tih loh hi chuan an hmu mawh viauin ka ring lem lo.

Atuni leh u Ropuia an inbe zeuh zeuh tih ka hre bawk. Dârkar chanve a liama ka harh tulh tulh, Thlamuana a la hnar bur bur a, ka hriat ṭhan a ni lo bawk nen ka beng a ti kham ngei mai, khum ka thawhsan leh ta nge nge a; Ṭhutkhawmna pindan lam panin ka phei a, tihharh ka tum êm êm vang pawh ni lovin a mut dan a dik lo deuh a nih ringa en tum mai ka ni, a khum kan luahlan ta si a, eng emaw tal ei ka rilrûk pah bawk.

Ṭhuthlengah kawisawi zetin a mu a, a mut dan enin a nawm loh hmel hi a ni tawp. Amah a palian bawk nen tawngchham zeta a mu chu a khawngaihthlak riau, a puansin chhuatah a titla vek bawk a, a thawmhnaw inbel ngai ngai nen a mu tawp tih hriat reng reng.

Chhuata blanket tla chu chharin ka sin ṭhat tîr a, a lu dah dan rem lo lutuk vang hi a nih chiah hi a hnar vak vak ni, dimte hian a lu ka her rem saka a rawn che thut. Chiang lutuk hian min en a; ka banrekah nghet taka hmerin, "Eng nge i duh?" A ti hniam ruih a.

"Eng lo, ih..i hnar ring lutuk a.." bah deuh naka ka ṭawng chuan mit khap miah lovin min melh a, "Ka û in i duh khawp a pe lo che em ni?" Min deusawh lutuk tih hriat fê hian a ṭhen sak a, "A natna hre sa chunga luhkhung i ni a, i khamkhawp a pe thei dawn lo che tih i hre vek ang chu.." ngeiawm takin a la ti cheu.

"Thlamuan.." ka ti hak a, ka thin a rim, mahse; midang an harh ka hlau si a, min vawnna chu phelh tumin ka ché phat phat a, min thlah duh der lo. 

A rawn ṭhu chhuak a, min pawt hnai salh a, ka mitah tak enin, "Ka dam chhung hi chuan i nuamsa dawn lo tih hria ang che," a ti sup. A hnu leha a chêt dan chu ka rin phâk bâk a ni! Min vawnna a nghet si a, a mal chungah min pawt ṭhuin min vawn lohna a kut âwl lamin ka khabe a dawm a, ṭawng tuma ka âng zuau tawh chu ka hmuiah a rawn fawp thut. 

Ka hamhaih chhung a rei lo, zak lo ka tih êm avangin a remna lai lâiah ka chum a, thawm ka chhuah ṭha ngam bawk si lo, hetiang em ema mipa sual leh rilru chhia hi an awm theih ka ring lo ve, min fawh chhung kha a rei lo; rei lo tê tak tak a ni, a chhip sam kir buk laiah ṭhâmin ka theihtawpa na hian ka phih a, ani pawhin thawm bengchheng a siam ngam bik lo a ni ang, "Kawlh lutuk.." ti sup chung hian min vawnna a thlah thut a, ka ding chhuak ve nghal.

Mittui parawl ṭeuh chung hian, "Misualpa" zawi tea ti sepin ka inher a, ka darah a rawn vuan a, "Sorry" tih chiah a sawi. Ka ṭah a chhuak lutuka inhnit hraih chung hian u Mapuia mutna lam ka pan ta a, ka khaw hmuh a phê vek. 

A nauin min fawp tih hria se eng ang takin thinrim ang maw, ka pasal muhil hmel ka en a, Thlamuana bula ka kal kha ka inchhir ngawih ngawih, min fawp thut ang chiah khan min thlah leh thut kha a ni a, a tenin ka ten, hetiang te chuan rei kan chengho thei lo ang. A hmel hmuh leh pawh ka châk tehhrep lo ve.

Keimah nge thiam lova Thlamuan zawk tih hriat pawh va ni suh, a pan hmasatu ka ni a, amaherawh chu, ka pan chhan leh ani rilru chu inpersan tak a ni lawi si. Sualin luhlul viau mah se khatiang ang êm kha chu a tih ngam ka ring lo hulhual a ni a, ka inten zo vek. Mahse, thiam ka inchantîr ru deuh tho. 

Unau piang hmun ṭheuh ṭheuh pawh mizia a inpersan thei hle tih ka hriat chian phah. Khawvar dawnah ka lo chhing sek a ni ang, ka phone riin min tiharh a, u Atei missed call vawi hnih a lo awm a, u Mapuia mutna a ruak hiaua a tho daih tawh tih hrilh hranpa ka ngai lo, u Ateii ka callback nghal a.

"Nano, ka rawn tiharh che elaw?" A rawn ti a.

Ka mut ṭhat loh thu leh khawvar dawnah ka chhing sek tih ka hrilh a, "Nia, khalam boruak chu a rit a nia, indim la, ka ngaihtuah riau che a nia," dam thlapa tiin, "Ka lo call chhan pakhat chu nangmah ngeiin doctor kha a fâla biak tum la ka duh a, Mapuia leh Thlatea hriat lohvin biak dan zawng hrâm la, engkim chiang takin zâwt vek rawh aw, i tan zin chhuah a harsa tulh tulh dawn a, tun kha hun ṭha a ni," a ti leh mawlh mawlh a, "Aw le, aw le, ka la tho chhuak lo a, kei pawhin a fâla biak ngei ka duh," ka lo ti ve bawk a, eng eng emaw a sawi leh hnuin kan inbiakna a titawp ta a.

Tûkṭhuan kan ei laiin vawikhat mah Thlamuana ka melh lo, kan in entîr dan tur leh ken ngai te, investigation tih ṭhat ngai a awm a nih pawha tih ṭhat leh vek a duh thu u Mapuia'n a sawi a, ka 'um e' liam mai mai. Atuni'n, "Kan eina vel hi i peih leh lo sil fel la, i peih loh pawhin lo dah tawp mai rawh," tia min hrilh pawhin mi â ang maiin ka bu liam vel mai mai.

"Hetiang silfai ringawt thil har a ni lo lutuk, Atun, kalsan tawp rawh," Thlamuana'n a ti kher a, ngei rilru viau mahila ka en duh lo lui tlat.

"Nia, kal rawh, ngaihtuah ngai ka ni lo a nia," ka lo ti ve vat a, u Mapuia'n chaw a eikham tawh a, ani erawh upa ber a ni bawka hetiang thuartham vela inrawlha sawi sawi mi a ni ve lo. 

Thlamuana ka thawh khalh daih. Min en tih ka hriaa ka en lêt ve duh ṭhak náng. A ṭûl tawpah lo chuan biak ka tum miah lo bawk, a û nen kan laka a rilru put hmang hi a dik lo tih ka hre chiang lutuka a kiang hnaiha awm pawh ka châk nek lo e.

Atuni chhuah hnuah muangchângin ka che ve a, ka nuam lo zualpui pawh a reh tawh bawk a, Thlamuana ngaihtuah duh lo lui tlatin kan eina vel hnawk ka silfai a, an unauin medical file an check leh tâk kha. A nauin min fawp tih engtin nge ka sawi ngam ang, ka ngam teuh lo mai, a natna avanga a tawrhna pawh engtih thu loh; rilru natna dang thlen belha tihhah chi nghal lo chuan, ka zêp Chatuan mai a ni ang chu.

"Nano, thingpui hâng lo chhuang teh aw," room lam aṭangin u Mapuia'n a rawn ti a, "Lawk aw, ka zo ṭêp," tiin ka chhâng lâng lâng a, ka laklawh ve deuh bawk a, thingpui chhuang tura ka phei laiin Thlamuana room aṭangin a lo chhuak a, ka awmna lam a rawn pan tih ka hmuhin ka lo insangmar ru at a, Gas dahna bula ka ding chu min chhuk melh run a, "Nizan chungchâng kha ka u in a hria em?" Tiin min zâwt ta a.

Chil lem khalh chung hian, "Hria se i duh em ni?" Zawi sapa ka zawh lêt chuan ka bân puamah hmerin, "I hrilh ngam a thu a ni mai alawm, eng mah ka hlau lo, i ngam phawt chuan hrilh rawh," a ti thâwp sut a, "Hrilh kher a ṭûl lo, a rilru tih nat belha nang leh kei min huat kher a ṭul lo e, mahse, thleng nawn tawh suh se, i u rilru tih nat hi ka duh miah lo, tin, ka fawp lo chea ka inring lo lai min fawptu zawk i nia, thiam lohna ka nei lo," ka ti ve ngat.

Koki san âwk chung hian, "Thiam thu sawi dan tur i lo ngaihtuah fê tawh a nih dawn kha, zanlaia min pantu chu kei ni lovin nangmah kha i nia," tiin min vawnna a thlah a, "I pasal thingpui tur chu siam rawh, ka duh ve bawk," a'n la ti zui a, a zâm lo nasa a nia.

A kal kian hnuah pawh ka la ding ngawi reng a, min tham lovin min hmusit ve ngawt chuan ka hria; mahse, ka tuar ve ṭâng ṭâng zel ang chu.

An unauin thingpui ka pe a, "Insiam ṭan tawh rawh le duatnu, kan kal hma a ngai a nia," tiin u Mapuia a nui a, a hmel a hlim sarh mai. 

Tukinah min thawkhalh a, nizan lam aiin a hmêl hmuh a nuam tawh bawk. A sawi ang chuan thuawih deuhin bathroom lam ka pan a, "Nanovi kal kher a ngai lo a nia, a lo awm hma pawhin kan pahnih thovin a lawm kan kal," tia Thlamuana ṭawng ri ka la hre pha. 

Mipa ve si thil a sawi nawi peih lutuk te hi ka hua.

"Ka nupui a ni tawha a kal ve a ngai, kan pathumin kan kal ang," u Mapuia'n ati nghet charh. Tui ka herh haw tâk avangin an ṭawng ka hre zui ta lo a.

Inbual lovin ka insil thuak thuak a, in entîr zawh lama inbual mai ka rilrûk zâwk. U Atei khan a fâla doctor be tur khan min ti tak naa, u Mapuia chu ka namnul thei mai ang a, Thlamuan ber zawk hi a ni tawrhhlelhawm leh dawn ni, min dan a tum tlat lovang tih tunge sawi thei? A fâla ka hmu duh tih ka sawi rual rualin a phal dawn lo tih ka hresa a, engtin nge ka tih ang aw...

Room-a ka luh leh laiin u Mapuia chauh a lo awm tawh a, a thawmhnaw a lo thlâk diam a, nui suk chung hian, "Delhi kan thlenga i ṭawng ṭha duh tlat tawh lo," tia min lo fiam chuan, "A boruak hi ka zo meuh lo, ngaiah ka la nei thei lo achhâ chu a ni e," tiin thawmhnaw hlip pahin ka chhâng puat a. 

"I pum pawh a puar ve ṭan tawh a nih kha," tihpahin Bra leh Underwear nena ka ding chu min rawn hnaih ruak a, ka pumah chûlin, "Ânu hi ka bulah ngaihngam takin a inthlâk ve duh tawh a nia, mak ve!" Tiin a nui leh ruh ruh a, a ni chiah reng bawk a, a hmuh lai hian ka inthlâk zen zen lo ve khawp mai. Hmangaihna kan chendun laiin loh theih lohvin ka taksa a chûlin a hmu a ni mai a, a bâkah hi chuan Bra leh Underwear nena ka awm lai min hmu khât ve viauin ka ring.

"Eng lo.. i ho.. min lo en suh.." ka'n ti ṭha leh a, nui hawk hawk chung hian, "Mi ho pasalah i nei tihna, lo tawlh hnai teh," tia a sawi zawh rualin min rawn hnaih a, ka kawnga kuah chung hian, "Vawikhat chiah," ti supin a rawn kun hniama dam dapa min fawpin ka âwmbâwr a chûl zui a, ka inthlahdul ve nghal. 

"Kan haw hunah kan chhunzawm leh ang," tia min thlah hnuah, "Hun kan nei tam tawh lo a nia, inthlâk rawh le," a ti leh zung zung a, amah pawh dârthlalang hmaah a va ding leh tawh a, a sam uluk takin a siam a, min rawn ngaihven tawh bîk lo.

"U Mapui, i doctor hi a fâla biak ve hrim hrim ka duh êm mai," tiin ka sawi chhuak ta nge nge a.

"Eng thilah?" A lo ti vat.

"Nangma chungchâng bâk eng thil nge ni ang aw," tiin ka nui lui hak a.

"I sâpṭawng thiamin a daih chuan i be fâl thei ang" fiamthua tiin a nui a, ka va ngei e. Hindi ka thiam der si lo a, English erawh chu ka duh tawk hmang theiin ka inhre ve. Lehkha ka zir lai khan thiam thei lo viau angin lang mahila School ṭhaa kal leh Hostela awm ṭhang ka ni a, rinaiin English ka thiam phian, chumi avanga tun hi thleng ka ni reng a, u Mapuia hian a hre kilhkelh lo a ni mahna.

Fiamthua sawi ni mah se, "I phal chiah maw?" Tia ka zawh chuan, "Phal e, i duh phawt chuan vawi nga i be fâl dawn nia," nui kur kur chungin a ti leh a, min ring lo ve chiang siah. Mahse, a phal tih ka hriat avangin ka hlim ru hle.

"Ka enkawl thiam theih nan che eng eng emaw zawh ve ka duh mai a nia," ka ti ve zaih a.

"A ṭha alawm, ka luhpui miah lovang che," a la ti zel. Eng tak hria ni maw. 

Hospital lam panin kan inphur chhuak ta a, Thlamuana'n Car a lo kawl leh zel a, Atuni te Company a mi Second hand an laksak a lo ni a, anni chhungkua zawng an nei êma engmah hi mak pawh ka ti tawh lo. 

Thil pakhat ka hriat chhuah thar chu Thlamuana hi zirlai ni lovin Company pakhatah hna a nei a, Business line lam hi a tuina a nih vangin tuna u Mapuia hna khawih lai Central lama tih ngai leh office dawr ngai apiang Thlamuana'n a lo ti zel chu lo niin! 

Ka hriat nachhan pawh tukinah khan Medical file an en lo va, Highway chungchang daih a nia an sawi. Mi thusawi ngaihthlâk ruk a mawi lo tichung zelin ka ngaithla ta kha a ni a, Thlamuana leh u Mapuia hian engkim avaiin an ti dun deuh vek a, Mizoram chin zawng hi u Mapuia kut a ni a, zin ngai leh a bâk zawng Thlamuana'n a chang. Mahse, û zawk leh experience ngah zawk u Mapuia kutah sum a lut a, a pa a la tel cheu bawk. A vaiin hrethiam lo mahila ka man thiam ve ṭan. Atuni nen chendun a awlsam bawk a, a graduate hnuah tihian a la awm zui zel tih thlengin ka hre tawh. Vairamah a seilian a nih ber chu.

Hospital kan thleng a, kal chhung a rei ngat ngat ngei mai, a lum bawk nen ka thaw a sa phat phat.

Dr.Ibrahima Clinic chu a lunin an zi nuai nuai a, u Mapuia'n ka kutah chelh tlat lo phei se chuan min nêk sawn nasa ngawt ang. Appointment neisa kan nih avang leh Thlamuana ṭhianpa a nih vangin kan lût hma thei hlauh zawk a.

Kan doctor hmel ka hmu chiah chu ka rin loh lam daih! 

Vai phakar leh sum duh zet, thau lampang a nih ka ring kha a ni a, a teuh lo. A felfaiin a ngo vang a, Tarmit a vuah vâ bawk a, a palian bawk si, u Mapuia âi mahin a la sâng zawk ang, vai hmel a pu tho tak nain a nelawm suah mai a, min lo hmuh veleh a nui vur vur a, Thlamuana'n min inhmelhriattîr lai pawhin nelawm takin a la nui reng.

Innêl sa an ni bawka an titi bawrh bawrh a, incheck-up tura kal kan nih angin rei vak lovah room pakhatah doctor leh u Mapuia an inzui lut ta a, kei leh Thlamuana erawh kan lut ve ta lo, nakinah biakna hun ka la nei dawn thovin ka hria a, luh luih tlat tumna ka nei bîk lo a.

Minute sawm dawn ngawi renga kan ṭhut hnuah, "Ka u tih loh ngaihzawng engzat nge i neih tawh?" Tiin Thlamuana'n min zâwt thut a, chhân mai ngaihna ka hriat loh avang leh min biak thut avangin ka ngawi reng.

"An tam lutuk tawha i ngaihtuah chhuah deuh a ngai a ni maw?" A ti leh a.

Amah ka lo ngeisa ve bawk si a, chhân ka tum miah lo, ka hre lo der tlat a, chutia ka ṭawng duh tâk si lovah chuan min hnaih fein a rawn tawlh hnai a, "In la ngêng ve vak suh, i chanchin ka chhui mêk a, ka û tan hian ka duh lo che tih ka sawi nawn leh ang, in kal thui tak tak hma leh a natna a zual tak tak hma hian kalsan rawh, nge, a ṭhen ngei ngeina tur chein chêt ka la zawk dawn," a ti leh ta a.

Ṭawng loh ka tum tehreng nen insum hman lêk lo hian, "Ramhuai i nih hi ramhuai dik tak, rilru chhe si," ka ti ṭhawt. A nui huk.

"I la naupan tehlul nen, ka u hi enkawl ngai a nih hi, inenkawl âi pawhin nangmah a dah pawimawh hmasa zela i awm loh chuan kan hnenah awmin ṭha takin treatment a la ang, i awma i zar buaia a ngaihtuah tel lo thei si lo che hi a chhiatpui a nih hi, a dam i duh chuan kalsan rawh, naute nen in inenkawlna tur ka tumsak vek ang che," hniam ruih leh khauh fara a tih leh chuan, "Ngawi mai rawh, a dam leh thih chungchângah thu i nei lo," ka lo ti ve hmiah.

"I u Mami leh i nu âi pawhin i nasa zawk, naupangte si i nasa hle mai," tiin rum zetin min melh a, ka lo melh lêt ve râm râm a, "Ka chhungte chungchang sawi ve lo mai teh, ka nunah inrawlh tum miah suh," ka ti hlak hlak a, a dik a dik chuan Thlamuana hi ka hlau ru deuh tak tak. Pawisak a nei dawn lo tih a hriat ropui si.

Min chhân lêt hmain doctor leh u Mapuia an lo chhuak a, CT-Scan tih nawn leh a ngaih thu te, FNAC tih vel, blood test neuh neuh a ngai zui ta bawk si a, Thlamuana nen kan ṭawng zawm ta lo.

Test chi hrang hrang 12 zet kan nei a, a tawp berah X-ray kan ti leh a, ka chau hnawk. U Mapuia pawh chuti tho. A dâng deuh lap a, a dam ṭha zawk leh test nei ve lo pawh ka chau a nia, ani tan phei chuan a hahthlâk ngawt ang.

U Mapuia incheck-up lai vel hi chu a tawi zawngin ka sawi mai ang. Nihnih chhungin doctor sawi ang thlapin test kan nei a, result pawh kan nei kim thawkhat a, Mizorama in enkawl chi ziazang kan lo ni lo. 

Thlamuana phal lo chung chungin doctor a fâlin ka hmu thei ta hrâm a, ka nunkhua a zuai nghal vek.

Ni e, Cancer ni mah se treatment a lâk ṭhat chuan tia a dam chhuah beiseina chhetê ka lo neih vena zawng zawng te kha Dr.Ibrahima'n result kimchang nen a nihna ang chiaha min hrilh meuh chuan ka tliak hnâwp. Zah pawh dâwn lovin doctor hmaah ka ṭap a, ka mittui ka dang sêng lo a ni ber.

U Mapuia ka mitthlâah a lo lang a, a taksa pêng pawimawh a Kal(Kidney) thlengin a ṭâi darh tawh. Mahse, chemo ei chi a ei hma avang leh Pathian venna avang liau liauin tihian a la awm a, Chemo pawh kan duh chuan kan khâi thei a, a taksa a infit vek tho. Mahse, kan duhthlanna a ni tiin min hrilh fiah ta a, amah u Mapuia an hrilh lo tih a sawi tel bawk.

"Thlamuana'n engkim a hria a, a û hi a hmangaih êm avangin eng mah hrilh a phal lo," tia a sawi leh phei chuan ka ṭap tlawk tlawk.

Ka thu hriat tawh zawng zawng leh u Mapuia natna neih ṭan tirh lai te, an hriat chhuaha an enkawl dan ka zawt chhuakin ka thiam ang angin ka be ve zel a, min hrilh tam poh leh ka nâ. 

Thlamuana a fak teivet a, ka ngaithei lo lek lek. Mahse, doctor fel leh biak nuam, mi khawngaihna ngah tak a ni tih erawh ka thinlungin a hria a, treatment dik lo pe anga ka lo ring leh an enkawlna damdawi chungchang vela ngaihdan ka lo siam ve kha chu thil awm ang lo lutuk a ni. Engkim a nih dan tur dik tak veka enkawl a ni tih file chi hrang hrang min enpui paha a sawifiahin ka hrethiam ve mai.

"Nano..." tia min kotu an awm avangin ka dâk chhuak a, mitmeng thim raiha min lo entu ka hmaa mipa ding chu mittui luang zawih zawihin ka melh chho a, "Ṭap suh, khatiang hmelpu chung khan ka û hmachhawn suh," Thlamuana'n tiin ka ṭhutna aṭang chuan min pawt tho a, a âwma min kuah bei chung hian, "Ka hrilh rêng che kha, a thi ṭêp tawh tih ka sawi lo em ni?" A ti zâwi ruih. Chu veleh Thlamuana âwm nghengin ka inhnît leh ta hlawp hlawp a, ka mittui a hul thei lo.

Ka beisei loh dan hlirin tun nihnih chhung lek khan thil a thleng zung zung a, ka lo hlim rûk vena pawh vawmbo ang duak a ni ta.

"I hmai va phih rawh aw..." tih pahin wash basin lamah min hruai a, Ibrahima a be zui bawk a, ka hmai ka phih mawlh mawlh lai chuan an ṭhiandunin eng emaw sawi hian an phun sup sup a, ka hre phâk chiah lo, a zâwi fahran lutuk a.

"Ka û lakah chhuanlam ka siamsak ang che, khatiang hmelpu kha chuan i hmachhawn ka rem ti lo, tikhan lo awm la, Atuni nen haw hmasa turin kan hrilh ang e," a sawi zawh rualin a chhuak vut a, eng chhuanlam tak va hmang ang maw!

Ka rilru no zualpui a reh a, hmel hlim put hram hram tum hian ka'n intuai ve bawk a, eng ka ang lo khawp mai. Ka thil tawn leh hmachhawn hi kei ang kum atan chuan a turu lam hret a ni e, ka nu leh pa min tuithlar chhan leh pasal atana ka luhkhung chuan rei min dampui dawnin a lang ta lo. Ka nâ a ni.

Ka nâ ngawih ngawih.

Thlamuana a rawn lut a, "Ka haw tîr tawh aw, amah kha a chau ve pah nen a thil ei dan tur list doctor nen insiam angin ka hrilh a nia," nui lek lek chungin a ti a, Ibrahima lam hawiin, "Ka sawi kha i hria maw, ka û ei leh in tur daily routine rang tak khan han siam teh," ngaihsam zetin a'n tiah. Ka nui ve ta nge nge e.

Mahse, ka hrawk chin chunglam chauh a ni nui.

Ka pum chhunga mi hian a pa hmel a hmu dawn lo a va ang si ve. 'Lalpa, u Mapuia min laksak suh' tia rilru ṭawngṭaina ka neih laiin Thlamuana'n ka darah a rawn vuan a, "Hlim hmel put tum la, amahah danglamna chutiangin a awm thut hleinem, i hlauthawng leh lutuk a nih kha," tiin min hnem a tum ve ngial. 

"A harsa a nih hi, harsa ka ti.." ka ti sap a.

"Hlim hmel i put hma chu inah kan haw lovang," a la ti lehnghal a, a va buaithlak tak.

"Ka hlim lui thiam hleinem, ka nihna lo ang puiin ka lang thiam lo," ka ti nghat a, a nui huk.

"Lokal rawh, bazar daih ang.." tia a sawi zawh rualin ka kutah a vuan a, a ṭhianpa a biak leh zuai hnuah Clinic kan chhuahsan ta a.

Hepa mize mak dan êm êm hi, ka haw ta lo tihna ni lovin a mood inthlâk zung zung ṭhinte hi ka hriatthiam phâk bâk a ni. 

Thlamuana hi mi mak a nih hi mi mak...

050123

-B®®

Shadow of the life

B+>[BeckirafARenthleI]<+®®