8. KA CHANPUAL [A Becky Rafa Renthlei Story]

8. KA CHAN PUAL

Shadow of the life

Ziaktu: Becky Rafa Renthlei

-B®®

(Recap)

"Hlim hmel i put hma chu inah kan haw lovang," a la ti lehnghal a, a va buaithlak.

"Ka hlim lui thiam hleinem, ka nihna lo ang puiin ka lang thiam lo," ka ti nghat a, a nui huk.

"Lokal rawh, bazar daih ang.." a sawi zawh rualin ka kutah a vuan a, a ṭhianpa a biak leh zuai hnuah Clinic kan chhuahsan ta a.

Hepa mize mak dan êm êm hi, ka haw ta lo tihna ni lovin a mood inthlâk zung zung ṭhinte hi ka hriat thiam phâk bâk a ni. 

Thlamuana hi mi mak a nih hi mi mak...

070123

-B®®

Shadow of the life

Hospital aṭanga hla vak lo eitur leh thei chi hrang hrang zawrhna lam panin min kalpui dâwr dâwr a, a kal chak si, ka kutah a vawn tlat avangin ka ûm dat dat a, dawr pakhat zawna a din tâk thutah chuan thaw halh chungin ka ding ve a, ka thlan a tla phang mai.

"Rei lotê ding lawk ang ka hah lutuk," tiin ka thaw hak hak a, nêp min tih hmel taka ner núng chung hian, "Hahna tham êm pawh ka kalpui loh che kha maw le, i va infit lo ve," a la ti zui erh.

"En teh, naupai lai ka ni a, chak deuh deuha kal kha a ṭha ber lo, indim tur ka ni asin," ka tih veleh ka pum a rawn en vat a, dar san zauh chung hian, "Ka theihnghilh alawm, ka sawi awmzia chu i râi tih ka theihnghilh," inthiam lo hmel pawh pu hran chuang lovin min en rún a, "Indim i ngaih si chuan zan lamah nupa nun pawh in hmang ngai lo a ni maw?" Ngeiawm lutuka tiin a nui hul huk a, ka melh rum teh e.

"Khatiang sawi suh, i tenawm.." ka ti hmak.

"Ka tenawm maw? I ṭawngkam hman fimkhur rawh aw Zomuanzual, helai hmuna ka hruaina chhan che hi eng dang vak a ni lo a nia, nangmah ka ngaihsak vang che ni lovin, ka û ka ngaihtuah vang tih hre nawn leh rawh," tinghutin min vawnna a thlah a, dawr chhungah a lut nghal daih!

Mizoram pêla ka vawikhat kalna a ni a, helai mipui zi mur mur leh phu nuai nuai kârah hian bo ka hlauh êm avangin lungdam lo deuh hian Thlamuana ka zui ve ta tho a, a ṭawngkam tin hian ka thin a tirim nimaiin ka hria. Vawiin ni bîkah erawh chuan u Mapuia chungchâng ka hriatna khan min ṭhâwng êm a, loh theih lohvin he misualpa hnaihah hian ka awm leh phah.

Dr.Ibrahima list siam chu Thlamuana'n min rawn laksak a, nichina a lungawi lo hmel lutuk kha hmuh tur a awm tawh bîk lo a, "Min zui rawh, i bo chuan zawn hmuh i har dawn êm mai i tê si," a la ti hrâm.

Îhe lovin ka zui ve ta ringawt. Nia, ka bo chuan a buaithlâk thuah hnih dawn êm asin.

Min biaa min rawn der eih lovin a duh duh a lei hmiah hmiah a, minute 15 dawn min teikual pui hnuah, "Ei châk i nei em, i ril a ṭâm em?" Tiin min zawt ve mial.

"Ṭâm ve tho," tia ka chhân chuan, Expa-Restaurant tih inziahna lam panin min hruai leh a, helai hmuna seilian a ni bawk a, ṭawng a thiamin hmunhma a hre si a, a bula kal a zia phian. 

Restaurant nghâktu hnenah eng emaw a sawi a, chu pa chuan min rawn melh vung vung a, "A hmelṭha hle mai," tiin Thlamuana a en leh a, Veranda thlang lam fianrial lam chu kâwkin, "Khu lai khu aw.." tia a sawi zawh hnuah chu lam chu min panpui ta nghal a, thu ka va awih si êm. 

Polite takin ka ṭhutna tur min pawh chhuahsak thlap a, "Eng nge i ei duh?" Tia min zâwtin Menu min pe a, ka en ngiala thlan tur ka hre lo. 

"I chhiar thiam anga mahse, thlan tur i hre lovang," nui huk chunga tiin Menu ka ken lai min laksak lehin ama duhzawng order a ziak ta a, a ni lah tak a, khatiang thil ei tur hming mak deuh deuh kha chah sual ka hlau. Hria ang deuha awm a, chah sual leh si âi chuan hre lo anga awm mai kha a finthlâk zawk.

"Ka u dinhmun dik tak i hre ta a, i kalsan dawn em?" Ei tur kan nghah laiin a ti leh ta.

"Dawn lo, min zawt tawh suh. Eng dinhmunah pawh ding se, ka phatsanin ka kalsan dawn lo," tia ka chhân lai chuan ka phone a rawn ri a, u Mapuia a ni.

"Hello.." ka ti sap a.

"Ê, in va rei em em ve, a tlai tawh a nia, lo haw rawh u, eng em em nge in la tih?" Lungawi vak lo âw hian a rawn ti a.

"I eitur vel kan lei kual lawk a, kan lo haw ṭep, min ngai tawh a ni maw?" Nui hak hak chunga ka fiam chuan, "Lo haw vat rawh u, naupai lai i nih kha," ti nghutin phone a off daih. A va tiho mai mai tak. Thlamuana hriat laia han duat vel ka duh nen.

"Ka u dinhmun hi a khirh a, kum thum liam ta aṭanga Chuap Cancer hi nei ṭan a ni a, a mizia kan hriat chian avangin engmah kan hrilh tlang duh lo a..." tia a sawi mêk laiin, "Engah nge in zêp kher a, puitling a ni tawha hrilh tlang mai ta che u," ka lo ti hmanhmawh pek a. 

A sawi zawh hmaa ka lo ṭawng chu ngaithei lo niawm tak hian 'ngawi rih rawh' tih nan kut a rawn phar zuk a, "A hunlai khan hrilh ila a inpawm thei dawn lo, tun âi hian a chhiatpui zawk dawn asin, ka unaupa, ka ngaihsan leh ka hmangaih a ni a, a chhiatna tur ngaihtuaha min ngai a nih chuan i tisual duai ang, nang hi awm lo la, Lungleiah te khan zin khawtlai lo se chuan treatment lain Delhi kan pan hma tur hi a ni a, nang hian engkim i ti khawlo vek," tiin min puh tel hrâm.

"Min sawi tel zel lo la, kei pawhin engmah ka hre bîk lo a, ka naupai vanga neih tum ṭalh hi ka ni bîk lo, min hmangaihtu leh ka hmangaih hmasakber mipain natna khirhkhan lutuk a tawrh laia kalsantu nih hi ka tum lo mai a ni, hun kha lehchen min nghaka dawhtheihna nena ka lam ṭang tlattu hi ka phatsan dawn lo, kalsan tur chuan min tilui tawh suh, khawngaih takin," ka ti ve ta thlâwt a.

Ngawirenga min melh vung vung hnuah, "Engtik hunah nge naute i neih ang?" Tiin min zawt daih a.

"Ṭhatea ka paitlang thei a nih chuan tun aṭanga thla nga ral hnuah ka nei ang," hnuailam bih chungin ka chhang a, a thil order an lo dah tâk avangin engmah a sawi zui lo.

A ei tur chah chu rin âi takin ka ei tam phian a, ei leh in lam ka duh ve êm avang leh ka ril a ṭâm ve tawh vangin ka thun hnem thei phian. "Kha, hei in zo vek rawh," tih pahin Coconut tui min rawn pe leh a, "Ka puar tawh asin le.." ka lo ti nang nang a, "I pum chhunga naute tan a ṭha thung alawm inzo vek ang che," tinawn lehin a ding chhuak a, khua a tlai ruih tawh. 

Kan ei man vel pek ka tum ngial pawhin a phal lo a, amahin a pe vek.

"A natna chungchang leh a ṭhat loh dan hria angin awm hlek suh ang che, a hmuh laiin ṭap lo la, Chemo chungchang pawh a duhthlanna kan zahsak ang, inrawlhin nawr miah lo bawk la," Car-a kan chuan hnuah a ti leh hmuk hmuk a, "Chemo lâk chu duh ta se kan lâk tír tho dawn em ni?" Tiin ka zawt let a.

"A duhthlanna a pawimawh ber," tih chiahin min chhâng.

"Chemo khai kher hi chu a tlin dawn em mawni le?" Ka ti leh a. "A tlin emaw tlin lo emaw, engah mah inrawlh tum suh, a duhthlanna ka tih tawh kha, ka û i neih vanga nuamsaa awm tur anga i inngaihna kha paih bo hmak ang che," zuk ti leh a!

"Thlamuan, min hua tih ka hria, nawmsakna ka ûm vanga i û hi neia pan ka ni lo tih vawi engzat nge ka sawi dawn? A nihna takah chuan in inchhung ka rawn rah ni aṭang khan nuihna tur ka hmu tawh lo asin, atu ate tan pawh huat rawn ka ni a, ka chhungte, ka thisen zawmpui te ngeiin min tuithlar tawh bawk a, man nei lo leh hlutna nei lo ang maia hetia awm te hi ka duh bîk lo, u Mapuia leh kan fa lo la piang tur tan ni lo se chuan min haw ngawih ngawihtute zinga chen hi ka thil duh loh ber a ni," tiin ṭap ṭeuh chungin ka ṭawng chhuak ve ta a.

"Ngawi tawh rawh, i ṭawng tam thei si, hmeichhe ṭawng tam deuh ka ngaina lo, ṭahbelh bawk si" a ti kher a, ka ṭah a chhuak leh ringawt tawh, ka rilru no lutuk leh eng emaw hleka ka mittui a lo tla ve zen hi ka ning, ka rái vang tepawh hi a ni mahna.

Traffic a jam nasa mai si a, ngawi tura min hrilh aṭangin minute tam a liam leh tawh ang tihah Thlamuana phone a ri a, a pick duh ṭhak nâng. Screen-a hming lo lang pawh ka hmu ve reng a, u Mapuia a ni. Kan haw har tawh si a, min ngaihtuah tawh viau ang. 

"U Mapuia'n a lo call che hi, ka lo chhâng dawn em ni?" Tiin dam thlapin ka zawt a, "Kan thleng ṭêp, a ninawm tehsek," a lo ti hlur. Ka ṭawng leh ngam tawh lo reng reng.

In kan thleng a, kan thil lei vel Thlamuana'n a khai a, a hnungah muangchângin ka zui a, ka taksa a chau, vawiin ka hun tawn hian min tichau takzet, Atuni a rawn chhuak a, "In va rei em em ve, Mama thin a rim teh a nia, Thlate, inhaupui miah suh ang che," a rawn ti a. Thlamuana lah chuan, "A ṭul a nih te chuan kan inhau anga a ni mai alawm, a thinrim chhan a zir te pawh a ni ang chu," a ti liam puat.

"Nano, nang pawhin Mama chhâng miah suh, in lo haw har lutuka a phun char char a nia," Tiin Atuni'n ka darah min kuah a, "Nia, rin aiin kan rei ta si a.." ka tih chuan, "Thlamuana nen in inhau em ni? Engah mah ngai duh suh ani hi chu," a ti leh zung zung a, in chhung kan luh tâk avangin kan ngawi ta rih.

Ṭhutkhawmna pindan zau fahran lo-ah chuan u Mapuia a vei nghut nghut a, kan lût thawm hriain min rawn en vat a, lungawi lo tih hriat ngawi ngawih hian, "Eng êm êm nge in tih, in pahnih khan khalaiah khan ding rawh u," ti khur khurin Thlamuana nen min melh tawn a, "Atun, i room-ah lut rawh," a ti zui leh zat.

Mi mah hah nâk laia ṭhut chawlh ka châk tehreng nen ding tura han inhrilh leh rih chu ka rilrem zawng pawh a ni lo.

"U Mapui.." ka'n ti dêk dêk a, "Lo ṭawng rih suh. Thlamuan, ka nupui nen hian eng nge in tih khawtlai?" Tiin ngaihno bei lo zet hian a nau a melh a, "Eng kan tih pawh ka hre lo, kan thil lei saw en la, innu hi naupai lai a nih vangin a kal chak ve vak thei loa kan rawn tlai phah a nih hi.." dam thluama a nau chhânna chuan a lung a tiawi fahran lo a ni ang, keimah min melh lehin, "Room-ah min lo zui rawh." A ti bul hmuk.

A kal sawn nghal bawk a, Thlamuana ka va melh a, mitko san âwka min enin, "Inpa kha va thlêm lungawi la, ka sawi kha hrereng ang che," zawi supa tiin a thil khai luh nen choka lam a pan ve nghal daih.

He mite unau uap hi a na si. Khawi hmunah pawh awm ila tu hlim hmel mah hi ka hmu lo a nih ber hi.

"Zomuan, i va muang ve.." room lam aṭangin vin lutuka u Mapuia'n min lo koh leh tâk avangin nuam ti lo ru takin ka lût ta a, khum sir tukverh bulah a lo ding a, "Ka nau nen in inkârah hian eng nge awm?" A ti ram hmuk. 

"I sawi awmzia ka hre lo," ka ti sap a, khum tlângah ka ṭhu thla nghal a, ka ke a kham ut ut.

"Doctor a fâla hmuh i duh a, hun ka pe che a, Ibrahima awmna in chhuahsan hun pawh ka hre vek, khawi hmunah nge in kal?" Ngun lutuka min en chung hian min zawt leh a. "Ka nau i ngaina lo ni khan ka lo hria a, nge, ani i hmuh tâk hnu hian kei aiin i lo duh ta deuh zawk em ni?" A tih leh tâkah chuan, "Lalrinkim," ka ti vin ṭhak.

"Kan ruala haw thei reng kha i khawmuang lui a, ani nen eng nge in tih?" A sawi zawh rualin min rawn pana khum tlânga ka ṭhu chu min pawt tho lawp a, "Ka rin ang i ni dawn hauh lo mai, Delhi kal i châk chhan hi kei min enkawl tur ni lovin ka nau nen hun fâl in zawng a ni tih sawi ṭhak suh, ka that hreh dawn lo che a nia," awki hniam chhaka a tih chuan ka phu zawka hlau chung chungin ka melh chho a, "I ngaih ang kha a ni lo, min thlah phawt teh," ka ti thâm ṭiak.

"I tan ka upa lutuk tawh i ti leh deuh em ni, ka natna vang hian i duh khawp i hmu lo em ni, eng ber nge ka lak aṭang hian i duh, sum nge sex nge, sawi rawh.." a auvin a au a ni ber tawh, ka hamhaih êm êm a, hetianga a thinrim hi ka vawikhat hmuhna a ni! chu pawh mi ramah lehnghal.

Chhán ngaihna hre lo hian, "U Mapui..." tiin a hming ka lam ringawt.

Ka kohna chu eng hu-ah ngai lo tih hriat lutukin a nui lui a, "I duh ka pe ang che, i duh engkim, i sawi loh thleng pawhin ka pe ang che, ka nau i mitmei lai hmu lo tur khawpa mipa â ka ni lo," thinrim lutuka tiin khumah min hlang chho dawrh a, amah rawn lawn zui vein, "Sum chu nakinah aw, Sex erawh tunah ni rawh se," ti chhum hmukin ka thawmhnaw inbel lai a phih sawk a, ka rak ṭhawt.

"U Mapui, hetiang chuan ti suh, i nau nen kan inkârah eng mah a awm lo...i hre dik lo..." tia ka sawi zawh hma hmain ka thawmhnaw a pawt phelh sawk sawk a, lo dangin lo sual lêt ve mahila ka thusawi a ngaithla duh lo reng reng.

"Ka hnen i rawn pan ni khan ka ta i ni, tumahin min chuhpui dawn lo," ti nghut nghutin Keipui rilṭâm ang maiin a che buan buan a, mi â ang maia a chêt lai chuan ka mittui tla tur duh lovin ka lo khap sak sak a, room lehlam maiah a naute pahnih an awm si, thawm chhuah mah ila, a naute pahnih hian 'Ṭîk' pawh an ti duh tawp nang.

Ka mipa hmangaih leh min hmangaihtu ni-a ka hriatin nupa nun hman dan pangngai pawh ni lo, thinrim inhrîkthlâkna atana ka taksa a chen meuh chuan ka chhungril hi chemtea vih âi pawhin a na zawk.

Cancer ni si, mihring chhût dana hun rei pawh nei tawh lo hian, dam ṭha pangngai leh khawvela la awm reng tum ang maiin sual a chhuah chu a ni si a, ka thinlung a na vawng vawng; chu zawng âi chuan kei, a nupui naupangte hi dimna leh duatna pakhat mah tel lova min han khawih hi nâ ka ti a, ka chhungril a rûm takmeuh.

Mahse...

'Ka pasal a ni a, a nuamah pawh a hrehawmah pawh a tan ka awm zel ang' tiin ka nu leh pa in ka chhuahsan tawh a, eng anga nâ pawhin min siam mah se, ka nghîng lovang.

A duh tawka a chêt zawh meuh chuan khum kil lamah ka melh ngai melhin ka mu kawm ngal a, ka mittui far zung zung chu hrûk ka tum buai peih lo. Ka pum chhunga naute hian tawrh chhelna min zirtîr zel zawng a nih hi, ka taksa a na vek a, ka chau tih hian a sawifiah zo lo. 

Ani erawh chuan khum thawhsanin, "Ka laka i duh pakhat chu ka ti zo chiah a, a dang leh chu kha..." tiin ka mutna lam sîrah ₹500/- Note Clip chhah ṭha zet pali a rawn theh thla a, "Delhi i châm chhungin hmang zo vek ang che, i daih loh leh Thlamuana dil belh la," ngeiawm lutuka tiin a kalsawn ta a. Ṭawngkam khat mahin ka chhang lo.

Sawi tur ka nei reng reng hleinem.

Room kawngkhar inkhar ri ka hriat rualin lukham pakhat chuan hmai ka hup a, chhuak lutukin ka ṭap ta a, ka hrehawmna leh tawrhna in up nasa lutuk a puakkeh a ni ber, min hmangaihtu, ka pan ve ber pawhin ka lakah khatiang khan chêt a lain min puh chhia a ni a, engah nge ka nat loh teh lul ang.

Eng hi nge ka dam chhan? Tih min zawt se, 'ka fa' tiin ka chhâng ang.

Zanriah kîl tura Atuni'n min rawn koh pawhin ka mut dan ngaiin ka la mu reng a, "Nano, tho la intifai rawh aw," a tih pawhin chêt ngam loh khawpin ka taksa a nâ.

"Eng mah ka ei châk lo," tiin zâwitein ka chhang a, "In thawm ka lo hria a, a pawi ka ti lutuk, nupa inkâr thil ni lo sela ka inrawlh tur a ni a, ka khawngaih lutuk che a nia, ka unaupa te pahnih mizia hrechiang hle lo ila chuan ka inrawlh ngam mai thei, min hrethiam hrâm rawh," tiin a in sût hraih a, chu chuan ka ṭah a ti chhuak zual. 

Atuni nghawngah kuahin ka ṭap leh ta a, ka hrethiam vek, a tan chuan a unaupate ve ve an ni a; kei min ṭanin lokal dawn se, u Mapuia tih thinrim a hlau dawn tih hriat sa, Thlamuana pawh mipa nasa tak a ni bawk si.

AuMami leh ka nu ka hrechhuak vang vang a. "I la chawh dawn khawp mai" tia hmai sen ṭeuha min kalsan lai kha ka mitthlâah a lo lang a, ka mittui far tîrtu a ni lo thei lo. 

Ka nu leh pa, ka unaute thu awih lovin leh ngaihtuah chiang mang hlek lova ka thutlûkna siam chuan min vaw lêt mêk chu a ni si a, inchhîrin haw tum ila, Mizoram pawnah ka awm a, chutah ka la rai zui. Ka chan han chhiatzia hi sawi ngaihna ka hre lo. Thawhchhuah ka la nei lo cheu bawk.

Atuni pawh ṭawngkam khat mahin ka chhang lo a, ka saruakna khuh tur takngial pawhin thâ a lawi ka nei lo. Atuni'n min chhuahsan dawn khan rizai pantein min khuh a, ka taksa lang huai tepawh ka ngaipawimawh zo tawh lo. Pawnlam aiin chhungril a na a, u Mapuia natna ka ngaihtuah lêt a, ka laka a chetdan hi ngaihdam a harsa dawn mang e, mahse; a dinhmunah ka indah chhina thîkna rilru a ni tih ka hria. A natna hian eng emaw chenah a rilru a kaihruai tel ve vek tih ka hrethiam lawi si.

Thlamuana leh u Mapuia inkâr engtin nge a awm ve ang tih hriat phâk va ni suh. Thisen inzawmna hi chu a chak a, kei mihrang nen chuan tehkhin chi rual a ni lo. 

Peih lo chung chungin bathroom lamah ka kal ve ta ṭâwk a, shower-a intleuhin mit ka nuai nawk nawk a, ka taksa, ka bânpuam leh nghawngte, ka malpui tepawh a duk thliahthluah a, ka pum puar ve âk chuan ka thinrimna leh natna a bengdai chauh zawk a ni.

Zaninah hian a kianga riah tumna ka nei lo a, a ṭûl a nih leh chhuatah pawh ka mu mai ang. Zomuanzuali hian dik lohna leh tih dik loh eng thil mah ka nei lo a, ka lo in ei puar sa hlauh hi ka lawm. Chuti ni lo se, rilṭâm dangchâra ka awm a ngai maithei asin.

Fai takin ka inbual a, khumah bawk ka lawn leh ta a, ṭhutkhawmna pindan lama ṭawng nawk nawk leh inhnial thawm hre mahila beng ka chhu ngawng lui tlat. Eng thilah mah inrawlha insawi thiam tumna pawh ka nei tawh lo, ka chawmawlh vek a ni ber mai.

"Nano, tlem tal thil ei la..." tia Atuni'n min rawn koh chuan ka la mu lui ngâng ngâng a, "Naute leh nangmah tal in ṭhat a ngai a nia, tinge in luhlul dun êm êm le?" Tih pahin room chhungah a rawn lut zui a, inlet thak chung hian, "Zanin chu i room-ah ka lo riak dawn a nia, i u bulah mut ka tum lo," ka lo ti hmiah.

"Awi awi, ka hah, min ti hah, pakhat lah thikthu chhe si, mahni naute thik bawk..." a ti hlak hlak a.

"An insual êm lo maw?" Tia ka zawh chuan, "Thlatea a chhuak daih alawm, Mama amahin a awm," nui lui chungin a ti a.

"I bula riah i phal chuan ka lo riak anga i phal loh chuan ṭhutthlengah ka mu ang," ka ti leh a, "I lo riak dawn nia, ka chhan ngam tawh ang che, i taksa duk vel en kha chuan Mama ka hneh thei mai ang," a ti ve ta a. Upa ber na na na chu an hlauin an zah nge nge e.

Khuma pawisa let phung chu kâwkin, "I va ngah ve a, khawi ami nge?" Nui chungin a ti a.

"I û hian pawisa vanga neiah min puh alawm, chêng khat mah hi kawla hman ka tum lo," ka ti hmak hmak a.

"Khawi, ka lo dah ṭha ang, ngawi reng la, ka ngawi reng bawk ang a, a zawh che pawhin, ka hman turin min pe a, ka hmang tawh ti tlat ang che," phur zeta tiin khuma pawisa chu a la khâwm sawk sawk a; Atuni kiangah hi chuan a thinrim theih loh, a ho si. Beer rim a nam leh vut vut tawh.

"Eng tia tih nge i tum?" Ka lo ti hak a, nui rah rah chung hian, "Ka kawl ṭhatsak dawn che maw le, a hausa em mai Mama te chu," a ti liam puat ringawt.

"Tak takin, tihian ka lo dah ṭha anga inboruak a zia hunah i pe lêt dawn nia, Thlatea khan ngaihven tur chein min chah a, ka room-ah ka lo va awm ang a, i duh hunah i lo phei mai dawn nia, i lam ka ṭang tlat ang, i u Mami anga sual ka ni lo aw, Beer kan tauh dun dawn nia," a ti leh ham ham a, ka nui tawp.

Atuni chhuah hnuah ka u Ropuia ka call a, a pick thei ṭhak lo. 

Zan dar kua a ri a, room-ah ka la tawm ngat ngat a, ka mittui a hul vek tawh. Thlamuana ka ngaihtuah kâi a, a û nen kan boruak kha a hre ve vek awm si a, a lawm ang chu, tum nei râna hma la te pawh a ni maithei. A û nen kan inkâr tihchhiat hi a tum ber a ni a, a hlawhtling lo chauh chu a ni e, ka harh chhuak chiang kher mai.

U Mapuia thikthu chhiatzia hre ran chungin khatiang khan min awm khawtlaipuiin min ngaihsak der vel a, a thluak ka man mai lo kha â ka va han inti tak.

Ka laka u Mapuia chetdan chu eng pawh ni sela ka lungawi ta tihna nilovin, eng emaw chen hrem ka tum ru rân a, chutih rualin Thlamuana lawmna tur siamsak ka tum miah lo thung.

Atuni khumah ka mu kâk a, ka ril a ṭâm ṭan.

"Atun, eng emaw tal ka ei a nih loh chuan ka pum a ruak vek tawh a nia," tiin dawhkan bula Atuni ṭhu chu ka va bia a, Beer a lo in leh tawh. Zu pangngai a in em ka hre lo naa beer erawh a duh hle tih kan chenho chhung reiloteah hian ka hre ve hman.

"Ka in bâng hi in la ei tur ka siam ang che," a'n tiah. Henu tak hi chu...

"A chi loh, naute tan a ṭha lo ang," tiin ka lo hnial a, "A ṭhat lohna a awm lo, i lakah rilru chhia ka pu lo a nia," tih pahin Beer Can keng chungin khum lamah a rawn phei a, "I taksa nâ leh rilru hah tlêmin a chhawk ang, mahse, naktukah i luak a chhuak thung ang," tiin a nui kar kar a, ka nui lo thei bik lo.

Chumi hnu chuan a inbâng chu ka in ve ta alawm, awi awi, a tui si lo, ka ner nasa bawk nen Atuni'n min nuih khiah khiah a, ka hlim tak phian chu a...

"Zomuanzual, lo phei la, rawn mu rawh.." lehlam aṭanga u Mapuia aw ri kan hre ta a, hetih lai hian Atuni Arsa fry ka ei mêk a, u Mapuia min kohna pawh ka haider lui hmak. Ka titau miau alawm. 

"Ei mial mial rawh, a rawn koh leh che pawhin chhâng duh miah lo la, kawngkhar kan kalh daih dawn nia," ngaihsam lutukin a ti a, a inhnawih dum si, a meng lian bawk si a, a rui tih a hriat ṭan. Kawngkhar a va kalh zui nghal a, thawm nei miah lovin ka lo awm thung.

"Beer ka in tih a hriat vaih chuan min vaw duh ang," ka lo ti sap a.

"A vuak hma chein ka chhan hman chiah chiah ang che," nui ring ngam chiah lo chungin a la ti zela ava hahthlak tak. Kei pawh ka lu a dik lo ṭan a, zu leh a kaihhnawih in ngai lo ta chu ka ni huih mai. 

"Zomuanzual, Lalthanpui, kawngkhar hi hawng rawh u," tih ri kan hriat leh chuan, rang lutukin Atuni'n Beer ûm a thukru nghal a, Atuni hmingpum ka vawikhat hriatna.

"Vawi thum ka chhiara in rawn hawng lo a nih chuan," tia min lo vau tâkah chuan kawngkhar kalhna hawn tumin ka tho chhuak a, ka pai dat. Ka ke chheh a fuh thei lo, kei hi ka rûi chiang mai.

"Mama, zanin chu nangmaha i mut mai a ngai ang, Nanovi a muhil tawh, rawn tibuai suh," tiin dâwt chiang bal Atuni'n a sawi a, a ṭawng zawh rualin khuma lawn turin min pui nghal vat a, a kil lamah puan sin thânin ka mut tak hi. 

"Lalthanpui, nangmah khan kawngkhar hi rawn hawng rawh, a nih loh chuan ka tichhia ang," pawnlam aṭangin a rawn ti leh a, kawngkhar hawng tura Atuni kal thawm ka hre zui nghal bawk.

"En ta che, a mu tawh ka tih ka tih kha, i thikthu chhiat luatah i ti na a nih hi, a bân te a duk a, a ke pawh a vung vek, i ti mah mah a ni," tia Atuni ṭawng lai chuan thin phu dup dupin ka lo mu a, a rawn keu thut ang tih ka hlau ber.

"Lalthlamuana phone la, rawn haw rawh se, Zomuanzuali pawh zanin chiah i bulah a mu ang, a bâk eng mah sawi belh ka tum lo, a harh hunah damdawi ei sela, thil ei tir bawk ang che," thupe aw taka tiin ka mutna lamah pen thawm a rawn awm a, ka chalah kut lum thar tharin a rawn dek a, u Mapuia kut a ni tih ka hria.

"Nano..." a ti sup a, ka ngawi reng.

"Mama, i tiharh ang e, tikhan mu rawh se, naktukah ngaihdam dil ngei ngei rawh aw, Aizawlah haw a tum a nia," tia Atuni thil sawi avang chuan nui chhuak lo turin ka insum nasa.

"Ka hnen aṭangin tuman an hruai hrang lovang, ka dam chhung hi chuan ka kiangah, ka bulah a chêng reng ang, Lalthlamuana hrilh la, ka nupui hnaihah awm tawh suh se, chuti lo chu atan a pawi viau ang," a ti ta.

"Aw le, aw le...va mu hahdam tawh rawh, thîkthu chhiat lutuk pawh a ṭha lo a nia, Nanovi hian nang aia Thlatea a thlan ring mahta che, i â ṭhin em mai..." tih paha Atuni'n u Mapuia a chhuahpui thawm ka hre zawm nghal a, ka thaw huai huai mai mai.

A lehlamah chuan rilru natna tawpkhawk tuarin na fo ṭhin mah ila, pakhat tal min ṭantu ka nei ve zel hi ka vanneihna a ni. 

Atuni kha khatiang khan ṭawng lo se, u Mapuia bulah ka mut a ngai leh dawn a, kan inhau leh ngei ang, zanin atan chuan heta muta hahdam hi ka mamawh ber a ni. 

A bâk chu khawvar hunah a nih nih ni mai teh se. 

An unau mize mak deuh deuh hi hriatthiam a har em mai. Kei ve mai mai tan hi chuan. Mahse, zanin tlaia ka pasal chêt dan erawh ka damchhung sawi a tling ngei dawn tih ka hriaa ka theinghilh mai maiin ka ring tawh lo.

070123

-B®®

Shadow of the life

B+>[BeckirafARenthleI]<+®®