9.KA CHANPUAL [A Becky Rafa Story]

9. KA CHAN PUAL

Shadow of the life

Ziaktu: Becky Rafa Renthlei

-B®®

(Recap)

A lehlamah chuan rilru natna tawpkhawk tuarin na fo ṭhin mah ila, pakhat tal min ṭantu ka nei ve zel hi ka vanneihna a ni. 

Atuni kha khatiang khan ṭawng lo se, u Mapuia bulah ka mut a ngai leh dawn a, kan inhau leh ngei ang, zanin atan chuan heta muta hahdam hi ka mamawh ber a ni. 

A bâk chu khawvar hunah a nih nih ni mai teh se. 

An unau mize mak deuh deuh hi hriatthiam a har em mai. Kei ve mai mai tan hi chuan. Mahse, zanin tlaia ka pasal chêt dan erawh ka damchhung sawi a tling ngei dawn tih ka hriaa ka theinghilh mai maiin ka ring tawh lo.

&&&

Lungawi vak lova u Mapuia a chhuah hnuah dím thei ang berin khum aṭangin ka tho a, room lehlam aṭang hian thawm hi a hriat vek lo nain beng chhi kar tân chuan hriat a har miah chuang lo. Chuvangin muhil anga ka lan vang khan thawm neih leh chi va ni suh.

Atuni'n Beer dang a rawn phawrh leh a, hmui phunin, "In leh rawh," a ti a, 'ka duh tawh lo' tih nan lu ka thing a, ka taksa a nat ṭhuam ṭhuam bâkah ka zun a chhuak sek a, ka ning. 

Thlamuana leh Atuni phone-ah an inbiaa an inbiak laiin room kawngkhar a rawn inhawng thut a, u Mapuia a lo lût hlawl. Khuma ka ṭhu chu min enin, "Kan room-ah lo phei rawh," a ti nghut a.

"Aih," ka lo ti hmak.

"Zomuanzual, ka thin i tihrim tam leh hmain rawn phei rawh," a ti leh hmuk hmuk a, Atuni a lo inrawlh vat a, "Mama, zanin chu ka bulah mu mai rawh se, inhau tawh lo hrâm teh u, nang pawh dam ṭha lo i ni a, ani naupai lai a ni bawk a, rilru hahdam in mamawh," a lo ti thuai thuai a. "Nanoi tel lovin ka mu dawn lo," a û in a lo ti tlat si. Kei lah Atuni khumah ka lawn sauh sauh a, ka chhungrila natna awm leh nichin maia ka laka a chêtdan khan a bula awm min ti châk lo hrim hrim.

"Lokal rawh, Nano.." dam deuh zawka u Mapuia'n min biak chuan ka ngawi reng a, vawikhat lek pawh ka ṭawnga ka chhâng a nih chuan ka ṭap dawn tih ka inhria, mahni inkhawngaihna hlirin ka khat a, ka mittui parawl ṭeuh chu khap kîr ka tum ve char char.

Chutia ka chhân duh tâk si lohah chuan, "Atun, kan room-ah va mu la, zanin chauh chu i khumah kan mu mai ang e," u Mapuia'n a tih leh chuan insum zo tawh lovin ka ṭawng chhuak ta a, "I bulah ka mu dawn reng reng lo, chhuatah pawh mut ngai mah se ka mu mai ang," ka lo ti ve táwn tawn a, nui suk chunga min enin, "Chhuatah chuan mu lo e, inbiak kan ngai, sawi dun tur kan nei," dam thluamin a ti leh a, ka lo ter at.

"I unaute hmuh laia hnial che hi ka duh lo, mahse, zanin atan chuan i bulah mut ka tum miah lo a nia, min nawrlui suh," tiin ka ṭang kawh ve tlat.

"Nano..." a ti leh sup a.

"Mama," Atuni'n a lo ti ve bawk a, kan pahnihin min en zuk a, "A ṭha alawm, zanin chauh ni rawh se," lawm vak lo awkaa tiin, vawikhat pawh min en lo hian room a chhuahsan ta a.

Ka u Ropuia hnen aṭangin call ka dawng a, Atuni hriat laia biak nuam ka tih chiah loh avangin, "U Ropuia a nia, pawnah ka va be lawk ang e," tiin Atuni ka hrilh a, a rui deuh tawh a ni ang, min ngaihsak êm êm lo.

"Mate, i lo call lai khan ka nu leh pa an awm ve a, ka pick ngam lo a nih kha," a rawn ti a, u Ropuia aw ka hriat rualin ka hnuk a ulh titih.

Delhi kan thlen tawh thu te leh u Mapuia doctor nen kan inbiak dan zawng zawng ka hrilh ve ta vek a, "A hma ai zawnga i tawrhchhel a ngai dawn a nih chu, a nihna takah chuan hmangaihtu tak tak tan lo chuan khatiang dinhmuna din kha thil harsa tak tur a ni a, Mapuia i hmangaihna hi a tawp thlengin vawng nung zel ang che," a rawn ti leh dap dap tawh.

"A harsa a ni, a unaupa Thlamuana hi misual a nih hi.." ka'n ti leh tawp a.

"Khatiang zawngin sawi mah ta che, Thlamuana pawh dem lutuk tur a ni lo a nia, awm ve lo angah ngai lui la, in nupa kâr tikhi tura chêt lak tum apiang dodal ngam ang che, nakina i inchhir lohna turin i pasal chiah kha ngaihven la enkawl rawh.." tiin min fuih a, ani biak hi chu a hahdam thlâk bîk a nia.

Atuni chungchang min zawt a, ka laka a fel thu ka hrilh a, "An unau khan mi rilru kawi an ni lo, Thlamuana pawh a la zia chho mai ang, ka nu leh Mami te hi an lo nasa ngei mai, Mami hian Mapuia kha a lo ngaizawng ru reng a, ka nu pawhin a hriatpui a, i laka an lungawi loh chhan leh inrem an duh loh chhan pawh khatiang thuartham vel kha alawm," tia a sawi chuan ka hriat hnu mah nise ka thinrim thar leh sauh.

"An rilru chhiat man an la hmu ang," tih chiah ka sawi a, u Ropuia a nui huk. "Mai mai ṭhin che hian, nakinah an rilru a la danglam ve mai ang," a ti a.

"U Mapuia thih hunah engtin nge ka awm ang?" Ṭap lek leka ka tih chuan, "I va han â ṭhin e aw, khatiang zawngin eng mah ngaihtuah tawh suh, i u ka la dam chhung hi chuan ka venghim zel ang che," tia min ṭawng thlamuanna chuan min tinui leh thei ta.

Rei vak lo a ṭawng leh hnuah phone a dah ta rih a, in chhung lut tura ka pen ṭan chiah tihah hian, "Phone i hmang ru leh a ni maw?" Tih ri ka hriat chuan ka ding khawng lah a, Thlamuansuala nen kan inhmachhawn leh ta a. 

Rui tih hriat zet hian a meng sen rûm a, a chhip sam kir a ṭawn bo ṭhin kha a thlah thla vek bawk a, tlaia a thawmhnaw inbel pawh a lo thlâk tawh a, kawisawi deuha ding chung hian, "Nang hian buaina min siam belh zel a ni, nangmah vanga ka u Rinkima nen kan inkâr a chhiat chuan ka that khawp ang che," sehchilh nawk nawka tiin min rawn ban a, ka lo ding sawn daih.

"Zomuanzual, ka sawi chu i hria em? Nangtê reuh hian min tibuai khawp mai," a ti leh a, "I u nen kan inkâr tihchhiat tuma ṭan i khawh leh chuan ka nasa khawp ang," tia ka lo vau ve avang chuan a nui hawk a, a ha var rual ṭhap langin a nui leh a, "I tê si, i nasa si, zanin kha chu a nuam viau lo maw?" Tiin tlaia u Mapuia min tih dan kha a hria tih min han hriat nawn tir leh kher a.

"Nuam e, a nuam lutuk, ka pasal nen ngeia khatia awm kha a nuam, thinrim angin lang mah se, a thinrim rei dawn lo," ngeiawm takin ka ti ve sak sak a, "Kan la hria ang chu, khatiang kha nuam i tih chuan a dang i dawn leh theih nan chêt ka la leh ang," a ti hmiah. 

Ka lo rindan kha a dik tih tuna a ṭawngkam khan a nemnghet chiah. A u mizia a hrechianga a thikthu chhiatzia a hre bawk a, kan inkar tihchhiat tum ru rânin khatiang khan min awm khawtlaipui tih a hriat vek alawm, tenawm lutuk. 

"I chêt lâk dan a ṭhing em mai, nupui pawh i hmu zo lo ang nang hi chuan," ti lehin inchhunga luhsan tum hian ka pên a, ka kalna tur dál takah rawn dingin, "Nang ang hi nei duh ila chuan ka hmu hnem lutuk, ka duh lo mai pawh a.." a la ti zui.

"Kal sawn rawh," ka ti hmak a, ka chhâng buai peih tawh lo, "Nangni pahnih kha lo lut rawh u, Mama thin in tirim leh ang e," tia Atuni'n min rawn koh chuan ka va lawm si ve. Chuti lo chu he misual hian rei deuh min din khawtlaipui leh ṭâlhin a nia ka rin.

Atuni ka bulah a rawn kal a, a nau nam sawnin, "I rui a nih kha va mu rawh, Nanovi hi tibuai hlek tawh suh ang che,"a ti hmarh hmarh a, ka kuta vuan chung hian, "A vawt ṭan a nia mu ang," tiin inchhungah min luhpui ta a, Thlamuana pawh kan hnungah a rawn kal tih a pen thawm aṭangin ka hre thei.

Khuma kan mut hnuah, "Engvanga Thlatea nen hian inbakkaih reng nge maw in nih le?" Tiin min zawt a.

"U Mapuia tan hian min iai ve thlâwt niin ka hria," ka lo ti a, nui kar kar chung hian, "Chutiang a ni lovang, ka nau mah ni se, a luck a, a hmeṭha bawk a, ngaizawngtu pawh a ngah, chutiangin Mama pawh a ni tho, an hmeichhe duhzawng hi a inang thei riau a nia, nang hi a rukin a lo duh che emawni ka ti hial," thutak zawkin a ti ta a. Ka va awih lo ber êm.

"A ang lo lutuk, min hua alawm, min huatzia amah pawhin a sawi," puan sin ṭha paha ka tih chuan, "A ni thei ve tho mai, ka lo haw hlima ka hmuh hmasak ber che khan hmelṭha ka ti che a, mahse, i rawn luhkhung kher avang khan ka haw lutuk che, Atei'n engkim min hrilh bâkah i nu leh i u Mami vang khan ka rilru a dang ta vek zawk a," tiin zêp pawh nei hran lo hian a ṭawng bawrh bawrh a, bawkkhup chungin Beer a la in nia maw le, henu em em hi.

"Nang pawh ka hmuh tirh che kha chuan rapthlak hmel ka ti ve tho che," nui chungin ka ti a, ring zetin a nui nghek a, a beer in a phuh lo chauh.

Eng eng emaw sawiin kan titi a, an naupan lai leh Delhi an chhuk tirha ṭawng a harsat thute a sawi mial mial a, ka taksa a nain a nuam lo ve bawk nen ka lo muthilhsan daih chu niin!

Mipa ṭawng láwng láwng riin min tiharh a, nî a lo lang uar tawh. 

"Ka nau i ni a, ka hmangaih che tih pawh i hria, mahse, ka nupui lakah hian inthiarfihlim ang che, hnaih tawh miah suh, chuti lo chu ka nau i ni tih ka theihnghilh palh ang e," tia u Mapuia ṭawng ri ka hre ta a, keimah vangin Thlamuana a hau tih ka hrethiam mai.

"I nupui hi ka kut hmawr pawhin ka khawih lo aw, a tê si, a kawlh si, a ṭawng thei bawk si, khatiang hmeichhia ka ngaina lo, i nupui a nih vang chauha be ve mai mai ka nih hi.." zawi ruiha Thlamuana chhânna chuan ka thin tertek a kai chhuak ṭep.

"I ngainat loh chuan a ṭhat chu, nau angin en la, hmeichhia angin vawikhat mah en tawh suh, in pahnih hian ka mit tikham zawnga in awm leh a nih chuan, Lalrinkima hian nau mipa a nei tawh lovang, ka sawi awmzia i hria tiraw?" U Mapuia'n a ti leh a.

"Hria, ka hria, a ninawm, Zomuani avanga nang leh kei kan lo inhnial hi a ṭul lo, duh tawk rawh," Thlamuana'n a ti hmuk a, "Chemo chungchâng chu i lo ngaihtuah tawh em?" Tiin a zawt zui daih a, "Ngaihtuah tawh e, naktuk hian blood test kan nei anga ka fit chuan kan ṭan ang," tia u Mapuia ṭawng ri ka hriat veleh khum aṭangin ka tho chhuak ve ta a.

Nizanah lungawi lovin ka pasal lakah ka rilru na mah se, Cancer a ni miau si a, dawhthei tak leh na lo anga ka awm a ngai a nih ber hi, kei aia na zawk a awm a, hriatthiamna thinlung ka put loh chuan engtikah mah kan inremin kan inpum lo ang, ka neih chhan ber amah enkawl hi ka tih mâkmawh a ni bawk si. 'Ka Chanpual' ah Lalrinkima hi ka ngai tlat si a, ka hnungtawlh thiang lo.

Chokaah ka va pheia an unauin ṭhutkhawmna pindanah an lo ding a, u Mapuia'n min hmuh veleh, "Vawiinah blood test ka nei dawn a, kan chhuah a ngai aw," thinrimna nei miah lo ang maiin min lo bia a.

An sawi hre tawh tho mahila, "Test ngai te chu i test vek tawh a ni lawm ni, eng blood test nge la tih ngai a?" Tiin ka zawt lui ve ngat.

"Chemo lâk nan maw le, nizan khan sawi ka tum a, Atuni room-ah i riak daih a nih kha," nui lek leka tiin, "Breakfast ei la, intifai rawh le, kan chhuah hma a ngai si a," a ti leh zung zung a, Thlamuana'n min en reng tih hriaiin, "I zia deuh em tukin lam te, breakfast i ei tawh em ni?" Zangkhai fein ka tilui ve ngat a, an pahnihin min rawn en hû.

"Thlatea nen kan ei tawh a, inbuatsaih rang rawh le duatnu," ti leh zung zungin ka ei tur a rawn chhawp chhuak nghal a, Juice no hnih a thli zui zat a, "Atuni kaitho la, ani pawh kan rualin kal rawh se, bâkah kan zavaia tana hriat tur sawi ka duh bawk," a tih tâkah chuan thil ei hmasa lovin Atuni kaitho turin ka kal ve nghal a, u Mapuia khawsazia mak ka ti hle.

Thlamuana pawh a hawi buai nak mai tukin chu, kan nupa boruak a ṭha lo turah a ngai ngei ang a, ka lungawiin rilru dam famkim lo mah se, a hmuh lai leh hriat laia kan nupa inrem lohna tihlan ka tum lo bur. 

Atuni pawh phak chuapin a rawn tho a, "Eng ati nge a?" Mak tih hmel taka min zawtin, "Mama chu a thinrim tawh lo maw?" Tia min zawt pahin a inthlâk mawlh mawlh a, min hmaizah lem lo hian a inhlip tak ang sawk sawk a.

"Thinrim lo a ni ang, sawi tur ka nei a tia," ka lo ti a.

"A nei ang, a nei lutuk ang," nui chunga tiin choka lamah kan inzui phei dun ta a. Dining table kîlin kan ṭhu ṭhap a, nizan lam boruak atu amahin kan sawi chhuak lo a, u Mapuia sawi tur kan ngaichâng a ni ber.

"Le, ngun takin ka sawi tur hi ngaithla ula, puitling vek tawh kan ni a, inzilha inhaua intih thiam loh te hi thil mawi a ni lo a, nizan chungchânga Nanovi laka ka chêtdan a mawi lo viau, amaherawh chu, nupa niin pumkhat kan ni tawh a, ani pawh thinrim tawh lo se," tiin min rawn en a, ka lo bu nghauh.

"Ka natna in hre vek a, thutlûkna ka siam fel tawh bawk a, vawiin hian thisen kan test ang a, ka infit chuan chemo khâi ka tum ta a ni, Ibrahima nen nizan lamah kan sawi dun tawh a, hospital-ah Cabin min lo hauhsak tawh bawka lût turin ka inruahman tih kan sawi tel law law a ni e," a ti ta duah a.

"Mam, chemo khai kher lo mai la," Atuni'n a lo ti a. Kei leh Thlamuana kan ngawi reng.

"Ni lo e, doctor thuawih hi a ṭha a, hospital-ah tuin nge min awmpui ang tih lai kha a ni, Atun, nang nge awm ang Thlatea? Nanovi hi chu naupai lai a ni a, indim se ka duh.." a ti leh a.

Ka awm theih thu leh enkawl tura kal ka nih thu ka lo sawi ve vat a, an unauin min en ṭhap a, chutah, Thlamuana a rawn ṭawng a, "Zomuanin awmpui hmasa ber che sela, a pasal enkawl tura kal a nih angin, duh leh a bâk chu kan inthlâk kual mai dawn nia," tiin thu a titlu ta a, Atuni pawhin, "Zan lamah phei chuan Nanovi tel lovin Mama a mu duh lo," a lo ti zeuh a, kan nui ta vek.

Tumahin u Mapuia chemo khai tur chungchang kan sawi buai lo a, a nihna ang kan hriat tlan vek tawh vang a ni pakhat, ama lungdamna leh hlimna kha a ṭha ber tiin sawi buai tum kan awm lo. 

Thlamuana'n Aizawl lam chhungte a hrilh bawk a, vawikhat mah nu Biakliani leh pa Zoliana hian min la be lo. Ka nu leh pa chu an ni ve si a, an mak ve ka ti. U Mapuia erawh a khât tawkin an call reng a, kei tih loh an be vek. U Ropuia leh u Atei hnen aṭang bakin betu ka nei lo. Ka vûi tawp lo ve.

Thlamuana hna kal turin Hospital thleng min thlah a, ṭawngkam khat mahin ka be lo, u Mapuia nen hlir kan inbia a, nizana u Ropuia nen kan inbiak thu pawh ka hrilh ve a, "Ropuia hi chu a puitling ngawt mai, hetianga nangmah hmangaih êm êmtu nuṭa i nei hi i vannei takzet," a tih ve luam hi.

"Naute ka neih hunah auMami leh ka nu hi chuan an pawm lo chiang ngawt ang, an en pawh ka phal dawn lo," ka tih chuan, Thlamuana a nui huk a, rum deuhin ka va melh a, "En tur pawhin an lokal duh lovang," a ti khera ka run tawk a tling viau. 

U Mapuia erawh chuan, "I thisen zawmpuite an ni a, hun a liam anga an rilru dam hun a awm mai ang, Kimtei te kha bia la, kan chin hrilh ve hrim hrim rawh aw, anni nupa pawh kan be khât lutuka min duhsaktute an nih kha," a ti dam thluam.

A sawi zawh rualin Kimtei a call a, kan tum dan vel a hrilh hnuah, "Nanovi nen inbe ve lawk rawh u," tihpahin phone min rawn pe a.

U Kimtei nen kan inbiak tâkah chuan sawi tur a ngah ngei mai. Ka chhungte chanchin a sawi bawrh bawrh a, "I u Mami leh i nu hian tun thlengin min be duh lo," a tih chuan, "A ho lutuk, nakinah naute kan neih hunah en turin in lo la zin ve ang chu," nui hak hak chunga tiin ka sawm a, "Aw le," phûr takin a ti a.

Hospital kan thleng a, Thlamuana a hna lamah a kal tlang nghal a, keini pahnih doctor room-ah kan lut a, muangchâng miah lovin thisen test-na tur min lo ziahsak a, chi ruk lai a la ni zui, a result hi chawhnu lam dâr khata chhuak tur an ni hlawm a, nghah chhung a rei dawn em avangin, keimah incheck-up ve nghal turin u Mapuia'n min ti ta a, ka hnial lem lo.

Thisen kan test fel vek hnuah, hmeichhe doctor kan pan leh a, ka naupai pawh a ṭha a, ultrasound thlakhat hnuah ti leh turin min ti a, u Mapuia lam hawiin, "Mut tam a mamawha rilru hahdam taka awm a ngai a nia, i nupui hi duat hle ang che," nui sânga a tih lai chuan ka banpuam duk ka lo thlêk vang vang a, u Mapuia inthiam lo hmel ka hmuh chuan ka inkhuh ṭha sawt sawt a.

Doctor room kan chhuahsan hnuah, "Nizan kha pawi ka ti lutuk, vawiinah ka hruai chhuak leh bawk si chea i bân vel kha a na viau em?" Tiin min zawt ta chat a.

"Na hran lo e, mahse, ka rilru a nâ, Thlamuana suahsual vangin ka lakah tiangkhan i che a, ka rilru a na, engtikah mah i nau hi chu ka ngaina ngai lo ang," ka ti let érh a, ka dârah min kuahin, "I lakah hi chuan ka thîkthu a chhe hma bik a, keimah ni lo mipa dang nen hlim taka in bazar kual tur vel ka mitthla khan ka thîk ngawih ngawih, ka nau pawh nise ka thîk tho," a ti tawp.

"Kum 22 chauh ka la ni a, nangmah ni lo ngaihzawng ka la nei lo tih i hre vek, min duh vetu pawh nangmah avangin ka hnar zel a, i thîk peih e a," ka lo ti a.

"Chân che ka hlau, i tel lo chuan eng mah ka ni lo, dam chhan ka nei lo, nang leh ka fa tana dam tuma bei hrâm hrâm ka ni," a tih chuan ka khawngaih leh si, a nat dan engkim ka hre vek bawk si a, sawi chhuah chi a ni bawk si lo, ka hah, Lalrinkima hi chuan hmân aṭanga tun thlengin min tihah takzet.

"Nangman min duh lova min ṭhen a nih loh chuan tu mipa lakah mah ka phatsan lovang che, tunah phei chuan nau ka pai tawh a, tuin nge min duh ang? Mahse, Thlamuana hi chu hau ve rawh aw, a ngeiawmin a ṭawngthei si, a ṭawngdan a ngeiawm ziah lehnghal," ka ti leh bawrh bawrh a, min en chungin a nui ruh ruh a, "Ani pawhin ṭawngthei a ti che," a'n tiah. 

"A ṭawngthei fê, mipa ve si.." ka lo ti vat a, la nui reng chung hian, "Nizan kha chu ka inthiam lo lutuka chuti ni lo se chuan Atuni bula i mut ka phal miah lo ang, i luhlul tih ka hriaa ka inthiam lo ve bawk nen ka sawn phei duh ta lo che a nih kha," tiin Hospital Corridor-min zawh pheipui a, Mizo niawm tak tak ka hmu nual.

"Kan naute vangin nizana i chêtdan kha chu ka ngaidam ang che, a lehpek awm tawh suh se aw," tiin a biangah ka tawk zauh a, a hmel hi chu a ṭha a ni. A sam dum hlap te, a taksa cher deuh mah se, a sâng ṭhain a inkhaithli nalh zuih reng a, Cancer vei atan hi chuan a uiawm thlâwt a ni.

"Min ngaidam dawn tih ka hria alawm," ti supin a phone a phawrh a, "Thlâ la ang aw, kan la nghak rei dawn em mai," tiin chulai hmuna kan ṭhut lai chuan thlâ a la ta mial mial a, selfie-a kan lak nual hnuah hmun hrang hrang hospital aṭanga hnai tê têah min kal kualpui a, midang min lâksak pawh a tam khawp mai.

Restaurant-ah min hruaiin thil kan ei dun bawk a, nizana a pawisa min pek chungchang kha a sawi chhuak miah lova remchangah pek lêt ka tum ran. 

Result lam turin kan lêt leh ta a, a lo chhuak fel vek tawh a, Inbrahima kan hmuh tîr a, vanneihthlâk takin a fit vek, a chemo khâi tur hi dârkar 24 chhunga khai zawh tur a ni a, a huphurhawm ang reng. Kâr hnih danah zel khâi tur a ni a, vawi ruk lai a ngai dawn lehnghal. Cabin hauh felsa vekah kan lut ta a, zanin dâr 8 aṭanga ṭan tur a ni a, in lama haw buangbar kha u Mapuia'n ṭul a ti ta lo. 

A dik a dik chuan ka huphurhpui a ni. Tuna a dinhmun hi a phâk loh ka hlauhpuia a chau vek ang tih mawlh ka hlau. Mahse, a duhthlanna a ni tlat si a, Cancer natna hi chu ka haw ngawih ngawih a ni.

Amah ka en a, vawi ruk ṭhak, chu pawh kâr hnih danah zêl a nih chuan ava chau duh dawn ve aw, ṭhulh tîr leh mai ka duh rum rum a, ka'n sawi lang dêk dêk a, "Nano, ka ṭha reng alawm, engtin mah ka awm dawn hleinem," a ti deuh tlat bawk si.

Atuni ka call a, kan mamawh leh thil ṭul dang ka inthlâkna tur te ka chah a, a u chemo khai zat tur ka hrilh chuan, "Ui ui, a va zing em em ve, Thlatea kha bia la, Mama hriat loh laiin Ibrahima be ṭha rawh se, a ni em em lovang," a rawn ti hlawih hlawih a, "Nangman Thlamuana chu be mai rawh, ka be peih lo," ka lo ti ve hmak.

"In va hahthlâk dun tak, hospital chaw ei lo ula, ka rawn siamsak dawn che u nia," a rawn ti a, ka lawm hle. Vai rim nam deuh deuh ka ei châk lo tih a hria a ni ang.

Doctor in chawl hahdam tura a hrilh angin u Mapuia pawh damdawi in khumah a mu zar a, a bulah ka mu ve bawk a, "Min nei hi i inchhir em?" Tiin min zawt thut a, ka inchhir loh thu ka hrilh a. 

"Min kuah la, rei lote muthilh kan tum ang e," a ti leh a, Chemo ṭan hmaa drip khai a ngaih vangin a khâi ṭan mek tawh a, "Damlo tak tak i ang ve e," ka tih chuan, nui var var chung hian, "Damlo tak takah min ngai thei meuh nange? I â ve ṭhin si a.." a ti a, a bân Venflon a vuah loh lamin min kuah a, ka hmuiah fawp zauhin, "In tan dam ka tum dawn alawm, Pathianin rem a ti êm êm ang," a ti sup a, dimtein a biangah ka fawp ve a, "I dam a ngai reng a ni," ka rilruin ka ti a, a ri erawh chuan, "Muhil rawh le, kei pawh ka muhil ve lawk duh," tiin ka maimitchhing zui daih.

Dârkar thum hnuah.

"Nano, Mate, harh rawh le, doctor a lokal ṭep, Atuni leh Thlatea pawh an lo thleng tawh," tiin u Mapuia'n min sâwi harh a, rin loh deuhin ka muttui phian chu a. Khua a lo thim vek tawh a, zanriah pawh kan la ei lo.

Atuni thawmhnaw rawn kenho pawh an lo dah fel nghal vek a, an unauvin hmuh tur an awm lo. U Mapuia hnenah an awmna ka zawt a, "Ibrabima an be lawk, an lo lêt ṭep ang," a ti a.

Khum thawhsanin Tiffin an lo ken locker chunga an dah chu ka va hawng a, "Chaw ei phawt ang hmiang," ka tih chuan a lo "Aw" ve mai.

Drip bur hnih a lo kal zo vek tawh a, tun aṭanga dârkar chanve a ral leh chuan chemo a khâi ṭan tawh dawn si a, rang takin zanriah tur an lo dah chu ka buatsaih ta a.

Atuni te unau leh Ibrahima lo luh laiin kan lo in eipuar hman tawh a, "Mapui, Bp check zawhah kan ṭan ang aw," tiin Nurse pahnih lo lut mek chu a melh a, nui vur vur chung hian, "Innu hian a enkawl ṭha che a ni ang, i Hb pawh a ṭha viau a nia, eng mah hlauhthawn tur a awm lo aw," nelawm taka tiin a ṭawng thlamuan a.

"Nano, eng pawh nise a zan khatna tur a ni si a, nangmah chauha awmpui chu a fuh chiah lo kan tia, Thlatea riak tel ve se, Cabin-a awm man a ni ve alawm," Atuni"n a tih chuan ka ner sawk. 

Thlamuana nen berkhera awm chu ka peih lo sa. Mahse, u Mapuia zawkin, "Nia, Nanovi hi muthilh tam an chawh ve tho si a, Thlatea a awm theih chuan a lawmawm viau ang," a lo ti ve bawk si.

"Atun, nangmah awm la, i ṭangkai zawk ang chu," ka ti sap a.

"Zing lama in ei tur siam a ngai dawna Thlatea awm zawk rawh se," a ti a, sawi buai theih ka nei ta lo. Thlamuana hian eirawng a bawl lul lo ang tih ka hria.

Helai Cabin zim lutuka Thlamuana nen zankhuaa han awm chu ka va han huphurh tak. U Mapuia awm tho mah se, ka peih lo hi a ni tawp mai. A hmel hmuh reng te hi ka hne.

Zan dar riatah chiah chiah Chemo an ṭan ta a, Ibrahima pawh kan doctor a nih bâkah Thlamuana ṭhianpa a nih angin a ṭhu ve deuh reng a, u Mapuia'n a bula mu tura min tih deuh tlat avangin midang mitmei veng lutuk lovin ka mu ve hmak bawk. 

Atuni pawh a la awm ve tho a, ani leh ni lo angin Beer rim a nam lo ve tlat. Thawmhnaw thar min lo leisak nual a ni awm e. Atei pawh kan Video call a, "Mama, awmpuitu i nei ṭha bawk a, dam deuhin in lo haw dawn nia," tiin a nui kar kar a, a nihna dik takah chuan, Thlamuana tih loh hi chu ka ngaina hlawm vek. 

"Nano, naute a che ve tawh em?" Tiin min rawn zawt a, "Ka hre lo e a," ka'n tiah.

"Awi awi, henu hi aw... khawi maw i pum ka lo en chhin," a rawn tih chuan, thuawih deuhin ka kawr hâk ka hlima midang an lo nuih takah chuan ka inhrechhuak, ka hawikuala u Mapuia chawp chawpin an nui vek. A bîkin Atuni a nui nasa zual. Thlamuana'n min lo melh kur a, a nui suk suk.

U Atei nen kan inbe zo chu zah luat vangin ka biang a sa vek. Ibrahima te an chhuak hman hlauh zawk a, chuti ni lo se chuan ka zak hlum ṭhak ang chu maw le.

Chutia ka zak lutuk hmel u Mapuia'n a hmuh chuan, nui ruh ruh chung hian, "Duatnu, zak mahta che, chhungkua alawm kan nih," a ti a, ka zak tho tho.

"Novi, min lo thlah rawh le..." Atuni haw turin a tih vangin khum aṭangin ka chhuk a, u Mapuia hnenah, "Ka va thlah lawk ang aw," tiin ka hrilh a, "Coffee no hnih lo la ta che," tia min chah avang chuan ka purse nen kan chhuak ve ngei a.

Cabin kan chhuahsan fel tihah, "Thlatea nen Ibrahima chu kan zawt a, tuna a chemo lâk hi a ngeih chuan a ṭhatpui mial thei a tia," tiin an inbiak dan min hrilh a, ka ngaih a ngam ve deuh. 

Taxi-a a haw dawn avangin ka thlah thui ta lo a, u Mapuia Coffee min chah ka lam leh hnuin Cabin lam ka pan a, ka hming an lam ri ka hria a, ka ding khawmuang leh rih, va pawh mai kha nuam ka ti lo deuh atin ni.

"Nanoi lakah ṭhat chhuah hram hram ang che, naupang mai a la ni a, khin tham pawh a nih loh hi, ka awm loh hnuah pawh i mawhphurhna a sâng tih hria la, dawh hram hram tum ang che, a upa zawk leh mipa i nih angin dawhtheihna i neih a ngai, bâkah a thinchhia te hi chu sawi sawi tlâk pawh a ni lo, a naupai vang a nih hi.." tia u Mapuia ṭawng ka hriat chuan, 'Thlamuana hau ve rawh' tia ka hrilh kha ka hrechhuak nghal. A hau ngei e.

"Mam, innu hi i ṭan ve sia e, a thinchhe bawrlawk ve e..." Thlamuana'n a tih lai takin, "Ehem" tia hrawk thian pahin ka lut lui ve ngat. 

An ngawi nghal hmak.

Kha kha a ni mai. Zomuanzuali hi ka chimawm thiam ve tho tih an unau hian hre rawh se...

Coffee chu an pahnihin ka pe a, an hamhaih deuh a ni ang, ṭawng nachang an hre lo.

An ṭawng kha ka hre hman nge hman lo an ngaihtuahte pawh a ni mahna.

090123

-B®®

Shadow of the life

B+>[BeckirafARenthleI]<+®®