11.KA CHANPUAL (A Becky Rafa Renthlei Story)

11. KA CHAN PUAL

Ziaktu: Becky Rafa Renthlei

-B®®

(Recap)

"Mama, kan laklawh, room-ah lut rawh u," inthlahrunna nei map lo hian Thlamuana a ṭawng a, hmeichhia zawk chu insiam ṭhain min rawn melh zawk a, a hmelṭha thlâwt.

"Nano...room-ah phei ang," tia ka pasalin min biak chuan ka phu zuk a, Thlamuana te pahnih melh zeuh chung hian u Mapuia ka zui phei ve ta a.

Mak deuhin engtin emawni ka awm. Thlamuana mitmeng dul ruiha hlim lohna lo lang kha ka chhiar thiamin ka hmu thiam ve tlat.

Khatia hmeichhia a lo awmpui khan min ṭhâwng lutuk nge, ka dik lo vekin ka hria. Inthing nak chung hian kan room-ah ka pen lut ve ta a.

&&&

U Mapuia lah chu lungawi lo lutuk tih hriat deuh hian khumah a ṭhu hnawk a, "Kan Lalthlamuana hahthlâkzia êm êm hi chu, ama in luah ni lo se chuan ka khak hlek tur a ni a, khatiang hmun ual-âu lutuka khatianga awm rêng rêng a zah pawh a zak lo em maw ni?" Thinrim takin ati nghut nghut a.

"A ruih vang mai mai a niang," ka lo ti a.

"Zingkâr aṭanga zu ruih a ṭhing lutuk, bâkah mi dukdak lo hi kawp fo lo se a ṭha a ni mai," a tih zawm leh a, Thlamuana hmeichhe awmpui kha mi dukdak lo a ni bik dawn em ni? A pangngai hmel riau khan ka hre si a.

"Mi dukdak lo a ni tih i hre ringawt em ni?" Tia ka zawh chuan, "Hmeichhe pangngai ni se khatiang hunah mipa nen an awm lo ang, zingkâr kârah lehnghal," a ti leh hluk hluk a, bengdaih rih ṭûla ka hriat vangin, "Tlangval a ni ve alawm, a ruih loh hunah i zilh dawn nia," dam thlapin ka ti ta zawk a.

"Ka mood anti off vek," a la ti hrâm.

Choka lam aṭangin âng thawm a rawn awm a, "Thlamuan, tunlai i khawsak phung hi hriatthiam a har hle mai, inah hmeichhia rawn hruai lut tawh suh, nizana i lo haw lai te kha kan hre lo emaw i ti ang e, ka harh reng a nia, Angela, nang pawh haw tawh rawh," Atuni'n a ti vîn hlar a. 

Kha hmeichhia kha 'Angela' a lo nih chu. Atuni'n a hriat chian danah a vawikhat hmuhna a ni lo tih ka hrethiam mai.

"Ka haw dawn, ka haw dawn, Thlaa, i û hi a nasa ve sia ka haw phawt mai ang," ring lèngláwngin Angela chuan a ti ve bawk a. An in zahpah lo dun ve chiang hi ka tia.

Thlamuana'n eng danga chhâng ta lo chuan, "I lokal lai ka hre miah lo," a'n tiah. A va hahthlâk ṭhin tak.

U Mapuia pawh a nui hawk a, nuihzat vanga nui erawh a ni lo, "Khatiang vel kha an nia, a ngaihna a awm lo, zilh deuh a ngai tak tak a nih hi," a lo ti ve bawk.

Atuni kan room-ah a rawn lut a, "Mama, Thlamuana hi hau ngei ngei rawh, khanu kha ka ngaina miah lo a nia, zû a duh si," a la ti veleh chhâwng.

"Ngawihsan phawt rawh, a harhfîm hunah keima'n ka la kamkhat dawn nia." Tiin u Mapuia'n a nau a chhâng a.

Kan zingkâr hun hman a nawma kan hlim tehreng nen, Thlamuana vangin kan boruak a chhe vek.

Sawi leh sawi hnu. Ka naupai vang hian insawiselna ka nei tlêm êm êm a, kum 22 ka pum âwrh chauh a ni na a; ka hun tawnin a zir miau loh avangin hun reilote chhung hian ka puitling sâwt viau. Ka hma hun thim ru tak angin lang mah se, u Mapuia ka hmangaih ve êm avang hian engmah ka pawisa zo tawh lo a, a hmâ zawng aiin ka tuarchhelin ka rilru pawh a paukhauh sawt.

Chemo vawi li khâi kan la bâk a, huphurhawm tîktêk tak a ni. U Mapuia taksaa danglamna awm pawh nitin ka hmuh hmaih lo a, dam ṭha anga lang si hian a rihna a tlahniam tih pawh ka hria. Tin, mak ka tih ve deuh chu a bân veilama Chemo-an khaina thisen zâmah khan fiah vak lo hian a dum raih a, Dr.Ibrahima ka zawhin, "A nih dan tur a nia lawm, a chemo khai hi a chak a, nakin lawkah a sam pawh a la tla kawlh thuai ang," tiin min hrilh kha a ni a, u Mapuia lû kawlh tur anga ka mitthla chhin apiangin ka hrehawm.

Mipate chuan kawlh tak takin an lu an mêt fo a; mahse, ka hriat theih tirh ata vawikhat mah lukawlhin ka la hmu lo. Hrehawm atih phah ka ring bawk.

Atuni office kal turin min rawn koh tâk avangin room ka chhuahsan a, "Nano, ka lo haw hma thei dawn lo a, zanriah pawh min kêp duh suh aw," a ti a.

"Aw le, aw le, a nih Thlamuana ka kêp ang em?" Tia ka zawh chuan, meng kal ralh chung hian, "Amah saw zawt rawh ka be peih lo," a ti hmak.

Sofa-a Thlamuana mu chu ka melh zeuh a, Angela kha hmuh tur a awm tawh lo. Zu ûm pawh Atuni'n a dah fel a nih ka ring; hmuh tur a awm tawh lova hmun hnawk pawh a lo phiat fai vek tawh bawk.

"A harh hunah ka lo zawt mai ang e, kal tawh rawh i tlai ang," ka lo ti a.

"Mama khan Thlatea chu zilh ngei ngei rawh se, khatiang zu duh leh lerh lutuk mihring kha kan ina chuangkai atan ka duh lo, Angela te zawng ka hrechiang êm mai, Thlatea te pu ber fanu a nih kha," a ti leh hmuar hmuar a, "Kan la sawi ṭha dawn nia kal phawt teh," ka ti tawp. A in âng thinrim leh anga ka ning, a ngaithlatu tur ber a muhil daih si a, a ho.

Atuni chhuah hnuah kan nupa room-ah ka lêt leh ta a, u Mapuia pawhin hnathawh tur a neih vangin a lo inchhawp hnawk nuai a, ka va luh lai takin a phone a ri ve chiah bawk a.

'Hello' han tih khawmawi pawh awm lo hian, "Inah kan awm a, Thlamuana a tirh tlâk dawn loh tlat, keimah ka rawn kal mai ang," tiin lehlama mi ṭawng a ngaithla vang vang a, "Ka peih fel thawkhat tawh a, dârkar chanve hnuah ka rawn chhuak thei ang, Revenue office-ah min lo nghâk rawh," tiin an inbiakna a titawp a.

"Nano, ka chhuah a ngai tlat, kan contract hnuhnung ber tur hi sign tîr a la ngai a, Thlamuana kal se ka tih nen a sawti káwi mai mai si a, keimah ka kal a ngai ta a nih hi, i lo awm hreh em?" Tiin min zawt a.

Ka hreh loh thu leh 'room ka lo tifai ve ang' tiin ka chhâng a. 

"Hah lutuk khan che lo la, awm âwl lutuk pawh a ṭha chuang lo," tia nui sukin, "Thil tui deuh ka lo hawn ang che, chuan, ani saw a rawn harh hunah 'i u in khawiah mah lo chhuak suh se a ti' tiin i lo hrilh dawn nia," a ti leh zung zung a.

"Muhil char char se ka ti," ka lo ti zauh a.

"Sawtianga a awm lohna saw a rei tawh asin le, tun ṭum chu ka nu leh pa ka hrilh rih lo phawt anga a lehpek a awm a nih chuan a hna aṭang hian bâng rawh se, zu ruih leh a hna a inrem lo," a ti hmiah. Nia, an unau zia hi a inpersan ve êm atin ni. U Mapuia a smart em em laiin, a nau erawh street-boy a ni a, Atuni leh Atei zia pawh a dang hlak ka tih tawh kha.

"Ka inbel tur lo dah chhuak rawh le Duatnu," tih pahin bathroom-ah a lut zui a.

Kan châm rei dawn tâk avangin thawmhnaw pawh kan lei ve nual a, boruak a lum vangin ritsak erawh a awm lem lo. T-Shirt var leh Jeans kekawr dum ka phawrh a, khuma ka dah chhuah hnuah room tifai turin ka inbuatsaih ve ṭan ta a.

"Nano, Mate, lokal lawk teh." Bathroom aṭangin ka pasalin min rawn ko vak a, a awkí aṭangin thil dik lo a awm tih ka man thiam nghal.

Rang takin ka va lut a. Shower hnuaiah lo dingin a kuta a thil ken ka hmuh chuan a hmel ka en chho vat a, a hrilhhai hmel ngawih ngawih.

"Khawi, ka lo paih daih ang e," tiin a kuta sam awm ṭeuh chu ka laksak mawlh mawlh a, "Nano.." a ti zuai ruih.

Nui chung hian, "Chemo hnathawh a nih kha, hlauthawng mah ta che, i sam a tla ṭan tihna a nia, a tlâk kawlh tak tak hmain kan nawr kawlh daih dawn nia, i inhmeh phian maithei asin," dam thliama ka lo tih chuan, "Ka duh mai mai lo," a ti hmuk.

"Lukawlh te a nâ em ni, i ngai serious lutuk a nih kha, Mizorama kan haw leh hmain a ṭo hman daih ang, a kawlh i pu duh lo a nih pawhin lukhum i khum mai dawn alawm," ngaihsam taka ka lo tih tâk si avangin, nui lui ngial chung hian, "Nang berin i tih te chuan ka nawr kawlh vek anga a ni mai alawm," a ti ve ta zawk a. Mahse, a rilru a nuam chiah lo tih a mitmeng aṭangin ka hre tho.

"Le, ti vat vat rawh le i tlai ang, kun rawh, i lu ka lo suksak law law ang che," ka tih chuan thuawih deuhin a ṭhu hniam ve mai a, shampoo nen uluk takin ka suk sak tak hi. A sam pawh nichina mi aia tlem deuh a tla leh a, a hmuh hmain ka hlãwm zung zung a, ka ak tawp. Nakinah ka paih mai ang.

Nupa anga kan khawsak chhung hun pawh thla thum a tling thuak tawh a, a saruakna ka hmuh pawhin ngaiah ka nei ve ṭan tawh. A inbual laia thawhah leh buai zauh a chîn vangin loh theih lohva ka buaipui a ngai a, eng he-hu-ah ka ngai tawh lo.

Bathroom aṭanga kan chhuah hnuah nichina a sam tla ka ah tâk ngawt kha a hmuh loh laiin dustbin-ah ka paih zauh a, ani erawh chu dârthlalang hmaah dingin uluk fe hian a sam a keu a, "A lo tla thâwl tawh êm a nih hi, naktukah Thlatea ka nawr kawlh tir ang," a ti a. Ka sawi thuipui duh lo.

A insiam peih vek hnuin ka dinna lamah a rawn phei a, "Ka kal dawn aw, lo haw hma ka tum dawn nia," tiin ka hmuiah a fawp zauh a, "Veranda thleng ka lo thlah ang che," tihpahin kan inzui chhuak ta a. 

A ngaitein Thlamuana a la mu bawrh bawrh a, u Mapuia a bulah a ding dat a, "Ruih leh lutuk hi chu a nuam chuang lo, a lo harh hunah ei tur siamsak tura a tirh che chuan i lo siam dawn nia, a bia che a nih loh erawh chuan biak hmasak kher pawh a ngai lo a, khawiah mah lo chhuak tawh rih lo se a ṭha a nimai," tiin a kalsawn nghala a hnungah ka zui ve bawk.

Thlamuana Car hmangin a tlan chhuak ta a, a liam hma ka thlir reng a, bân rawn vai lap lap chungin a tlanliam ve ta. 

Na reng chungin na lo anga a lan a ngai a, damlo chungin dam ṭha pangngaite tih ang tih ve hrâm a tum bawk a, Lalrinkima niawm tak a lo nih hi. A chhungkua leh kei a nupui naupangtê pawh hian engkimah ani damlo hi kan ring êm êm a ni si a; ka khawngaih a ni. A tuarchhel tih a hriat ngawih ngawih bawk.

Kan nupa pindan lamah ka lêt leh tawh a, Thlamuana room luahlán kan nih avangin engkim kan thawmhnaw leh damdawi tih loh hi chu Thlamuana bungrua vek a ni a. Lehkhabu dahna aṭanga thian fai ṭanin a mal te tein ka hrufaiin a rem dan ang thlapin ka rem leh nghal zel a, lehkhabu pawh a ngah viau.

A Wardrobe lian ber chu ka pawt chhina a lo inhawng ve mai bawk a, a chhung han hnawkzia em em chu le(h). Thawmhnaw a inhnawh khat tun a, hawn rual rualin a ṭhen a rawn tla thla bawk a, ava nikhua lo mai mai tak e aw...

Ka tum em em vang pawh nilovin ka remfel sak tak kha. Thawmhnaw a ngah si, Sunday thawmhnaw hmuh tur a awm lo a, a nih dan tur anga ka tihfel meuh chuan ka kâwng a kham ve bawk nen khumah ka ṭhu chawl ta rih a, u Mapuia kal chhuah aṭangin dârkâr khat vel a liam leh tawh.

Ka cháwn leh mal vel kham ṭhûm chu ka chúm dat dat a, chutih lai tak chuan uak tuar tuar ri ka hre ta a. A'n ring leh mai mai khawp a! Thlamuana a nih ka rin sa avangin ka ngaihven duh lawk lo a; mahse, luak bawrh bawrh thawm ka hriat zawm leh tâkah chuan tho chhuakin ṭhut khawmna pindan ka pan a, a lo ruak hiau.

Common bathroom lam aṭangin thawm a rawn awm leh ta a, ka va kal ta nge nge e. Ka pasal unaupa a ni tlat si a, ka lakah sualin min tithinrim fo ṭhin mah se, ṭanpui a ngai a nih chuan ka tih tho tho tur a ni. Amah ang leka rilru chhia pu pawh ka nih si loh.

Bathroom chhuatah Thlamuana a lo ṭhu sawp nuai a, a duh âia tam a in tih a lang reng. A sam a huh phung a, Commode-ah a lo luak ve tal alawm. Mahse, tuiril vekin a luak a ni ang bathroom chhung chu zu rim hlir a nam a, keia tak pawh ka luak a chhuak ve vek.

"I harh em?" Tiin a darah ka vuan a, harh fim ṭha lo tih hriat lutuk hian a meng phi chiai a, "Ka ṭha... umn..ka ṭha aw.." a ti bah nawk nawk.

"I luak a la chhuak em? Lokal rawh, khatianga awm te chu a chi loh lutuk," zaidam taka tiin a bânpuamah ka chelh a, din chhuah tumin ṭan a lo la ve bawk a, chutianga rui chhe lutuk chu a nih hmel si loh. A luak khan ati harh deuh tepawh a ni mahna.

Min rinchhan ve tho siin a kut leh lamin bangah a innem khalh a, a ding chhuak ve ta hrâm. A palian êma keimah ringawt chuan tihngaihna ka hre lo hrim hrim, "Novi... ka harh aw..." a ti sup a. 'Novi..' te a'n ti vel a.. A Lalthlamuana thlâk lutuk, ka nui chhuak ta hak a.

Bathroom aṭangin a chhuak mai dawn emaw ka tia, a kawr hâk lai hlih a tum leh ta, puih pawh tum chuang lo hian ka en reng ringawt a, a hlip thei chai bawk si lo. A pai deuh dat a, ka lo chelh vat. "Khawi," tihpahin a lu lam aṭangin ka phihchhuahsak ta a, a taksa láwng chiang takin ka hmu. Kan indin hnaih bawk si.

A dârpharh a hlai ṭha hle a, a dul thuartham vel pawh a nalh zuih mai. Ani hi chuan taksa sawizawi a peih tih ka hria a, a taksaah tisa chuangtlai hmuh tur a vang pharh bawk. A lâi hnuai aṭangin hmul a ṭo thla raih a, ka va en uluk si êm, inthiam lo zetin ka hawisawn vat a, a lo nui ri hawk. 

"Inbual ka duh.." a'n tiah.

"Inbual rawh ka lo va chhuak ang e," tia kalsawn ka tum chuan, ka bânah a rawn vuan a, "Min lo pui lawk thei ang em?" A ti leh sup a.

Common bathroom-ah hian shower a awm ve loh avangin, Tap-ami tui ka herh haw sak a, bucket hnih ka dawh khah sak hnuah, "Fai takin inbual la, i ei tur ka lo siam dawn nia," tiin ka chhuahsan ta a. Fel ka inti hle.

Ka chhuahsan lai hian bang nghengin a ding a, ka chezia min en reng tih ka hria. Huatna rilru ka pu duh lo lui tlat a, u Mapuia sawi ang deuh khan eng emaw amah tihrehawmtu emaw rilru natna a nei te pawh a ni maithei asin. Lo pawngpaw huat ve tlur kha thil ṭha ber pawh ninghal lo chuan.

Choka lamah pheiin Chhangthawp ka toast a, butter ka tât thlap a, zing lamah hetiang hi a ei ṭhin vang a ni. Mango Juice fridge- ami la chhuak lehin thlit mai theih tur hian ka chhawp sak bawk a, bathroom aṭanga a lo chhuah hunah a hmu ve mai ang chu maw. Ka thil tih fel lai kha a laklawh êm avangin room lamah ka luhsan leh ta a.

A pheikhawk dahna ka tihfai laiin pên thawm a rawn awm a, zawi muangin ka dâk chhuak ta a.

Ka hmaah Lalthlamuana a ding a, towel a bih ṭât a, a sam hnâwng leh kir chhap chu a tukkhum lamah a hûi liam a, a hmel fai leh thar sar chu ka en a, nichina a landan nen chuan inpersan tawh tak a ni. 

"Eng, eng nge i lo tih dawn?" Nuam lo ti ru taka ka zawh chuan a khi suk a, "Ka room a nia, thawmhnaw hâkthlâk tur ka mamawh a," ṭha tein min chhâng ve mial, chesawn zui nghalin a thawmhnaw dahna a hawng a, "Novi.. i lo tifel vel elaw?" a ti a, mak a ti hle tih a hriat mai.

"Umn..aw.. eng lo a nia, room chhung ka tifai a, a lo hnawk ang reng si a, ka tifel ta law law a nih kha," inthiam lo awkâ takin ka ti a, 'Novi' tiin min ko leh tawh, eng chu hria nimaw! mahni thil ni lo khawih ngawt kha thil nuam tak a ni lo a, a rûk tak chuan ka inthiam chiah bîk lo.

Min hau leh inring rânin ka awm a, mahse; min hau miah lo. "Ka lawm e" a ti sup a, ka hamhaih letling zawk.

"Inthlâk rawh, ka lo va chhuak ang e, i ei tur dawhkanah khan ka dah aw.." tih leh din chhuah ka rual a, "Chhuak kher duh suh, inthlâkna tur ka la anga ka chhuak leh nghal ang," a ti a.

"Khawiah maw i chhuah dawn?" Tiin ka zawt leh rih. U Mapuia khan khawiah mah lo chhuak suh se tiin min chah si a, ka hrilh ngei a ngai.

"Thil ka ei anga ka chhuak ang, zanriah pawh min siam kêp lo la, pawnlamah ka ei dawn bawk a.." a ti ta chiah a, chuveleh, "Khawiah mah chhuak suh aw, inah hian awm ve la, zanriah pawh pawnlama ei loh tur," ka lo ti zung zung a, mit zim san chunga min enin, "Eng vangin, ka tih leh tih loh tur min hrilh turin ka eng nge i nih?" Thinrim ni miah si lo, kha fakin a ti ta a.

"I u Mama'n khawiahmah chhuah tir suh a ti alawm, i chhuak lui a nih chuan a ṭha lo zawk ang," tiin, u Mapuia min chah ang ka sawi chhuak ta a.

"Tih tur ka nei, chhuah ngei ngei a ngai.." tih pahin a inthlâkna tur a la a, "Chhuak lui lo mai rawh, u Mapuia a thinrim leh palh ang," ka lo tih chuan kâwng dawm meuh hian min en a, "Mama chu ka lo bia ang e, a hau lovang che, thil ṭul pawimawh tih tur ka nei alawm," tilui ṭâlhin a thawmhnaw hâk tur nen room a chhuahsan ta tho a, ka va ngei tak. A luhlul ṭhin bawk si a, han hauva tilui ve deuh turin ka hlau ru tho bawk sia ka va hah tak.

Khum hnuai vel ka háwl fai zawh hnuah ka chhuak phei ve ta a, a lo inthlâk diam tawh a, dining table kîlin Juice leh toast a lo ei a, min hmuh veleh, "Ka u in eng nge thil dang a sawi?" Tiin min zawt a.

Tukina u Mapuia sawi ka la hriat chhun chhun te ka hrilh chhawng a, "Atuni pawh a lawm lo a, Angela a tiin ka hria, khami pawh kha a hnar haw daih," ka lo ti a.

"Hetah Angela a lokal maw?" Zuk ti hû a.

"I lo hruai haw a ni lawm ni?" Tia zawt letin a mitah ka en a, a meng buai nak.

"Ka hre tawh lo reng reng, nizan ka in hnem deuh atin ni, a zia lo hle mai," a ti leh mai a. Ani leh ni lo angin a ṭawng dam vei phian.

"Tukinah incheck-up in kan kal a, in kan chhuahsan lai kha chuan nangmahin i mu reng a, mahse; kan lo lêt leh laiin khanu kha a lo awm ta si a," ka ti nang nang a.

"Eng tin chiah nge kan lo awm?" A ti leh zel a, kei lah thukhuh thiam lo chi ka lo ni ve bawk nen, "Kan hmuh lai tak che u chuan in infawp," ka lo ti hmiah. 

"Ka awih mai mai lo e a.." a ti a, mahni thil tih pawh hre lova han ruih te chu thil awihawm pawh va ni suh.

"I awih loh leh i û zawt rawh.." ti nghauhin, chhuat nawhna tur ka la a, ka chevel min en reng ṭhin tih hi hnunglama mit nei ang maiin ka hre zel nia maw le.

"Indim rawh, karleh aṭangin lânga kal tur tu emaw ka lo be dawn nia," a ti a, ani leh ni lo angin min ngaihtuah ve hmel tawp.

"Ka ti ve thei reng alawm.. chuan, ih..Thlamuan, chhuak lui suh aw, u Mapuia rilru tih hah belh lo hram rawh, min huaa min hmu peih lo a nih pawhin, insûm ve hrâm hrâm la, ka be buai miah lovang che," tlawn titihin ka'n tiah.

Nui suk suk chung hian, "Chhuat kha nawt suh ka tih kha aw, a bal viau em ni?" Tiin min zawt leh daih. 

A balh thu leh nawh ngei ngei ka duh tih ka hrilh chuan, "Va inbual fai ve la, keiman ka lo nawt dawn nia, nang pawh zu ṭhing rim i nam tlat," min ti zawk zamah a. Hepa em em hi chu a! Chhuat nawt tur angin ka mitthla chhina ka nui ta hak hak a.

"Novi.. min nuihzat miah suh.. puih che ka tum mai a nia," nui chungin a ti hluk a, "A nih chuan kha, va nawt rawh, kan inbual ang e," ka ti ve ta a, a chhuah lohna tur a nih dawn phawt te chuan a pawi reng reng lo. Ti ve lâwp lâwp teh se.

Chumi hnua Thlamuana che vel chu a awihawm loh zawk. Kan room, ama room ni bawk chhuat a nawt fai vek a, sûk tur kan neih leh neih loh min zawt ngial a, ka remti lo chungin min khâwmsak vek a, Atuni thawmhnaw bal nen lam Machine-ah vawm lutin a su ta a. Woofer-ah zâi play chung hian a'n che ta tak tak alawm.

Kei chuan kan room chhuat chiah kha nawh ka tum a ni a, ani ve thung chuan inchhung pumpui chhuat a nawt vek. "Atuni room pawh kan nawhsak ve ang e," a la ti tak deuh deuh a. A rui a la reh lo zawk nge a tho â thut ni ang, thil mak a thleng a ni ringawt alawm.

Inbual tura min nawr tâk sek avangin a insûk chhungin ka inbualsan ve ta a, u Mapuia a la haw ta lo fo. Min rawn call miah lo a, hna thila kal chhuak a nih vangin ka call hmasa ngam chiah bik lo.

Hmanhmawh hauh lova ka inbual hnuah bathrobe nen room-ah ka pen lut a, bál bawm pawm chungin Thlamuana a rawn lut ve chiah a, kan in melh chiang teh e.

Ka chhip aṭanga ke hmawr thlengin a en chhuak dap a, keia pawh hawisawn nachang hre lovin amah ka en ve kar a, nichina a thawmhnaw inbel kha a lo thlâk vek tawha tawnzau leh boxer nen ka hmaah a ding a, a dan pangngaiin a chhipsam pawh a ṭawn leh vek tawh. Khuh kharh chung leh lái zet hian, "Ka inbual zo chiah," ka lo ti teh ngawt a.

Chutih lai tak chuan Thlamuana phone a rawn ri ve chiah bawk a, choka lamah a dah a ni ang, bál bawm chhuatah a nghat sawk sawk a, a phone rikna lam ngaihvenin a chhuak ta nulh a. Ka lo thaw huai.

A dik a dik chuan Thlamuana hi chu a hmelṭha a ni. Ka lerh vang leh rilru kâwi ka put vang pawh ni lovin mipa hmelṭha hi chu a ni ve chiang a lawm. Mahse, u Mapuia ka duh fê zawk, an hmelṭha ve ve a, an ṭhat dan erawh a hrang thung.

Dârthlalang hmaa ka lo din laiin, "Nano, inthlak vat vat rawh," Thlamuana'n a rawn ti vut a, a ngaihna hre lovin ka lo hawi hâ a.

"Atuni'n min lo be zo chiah a, Mama a chau deuh thut a nih chu, tunah Ibrahima te hospital-an panpui mek a, insiam rawh le," dam thlapin a ti ta a. 

"Eng maw i sawi?" Ka lo ti vak.

"Mama a chau deuh a, hospital an panpui tih ka sawi a nih chu, hlauthawng lo la, keini pawh kan kal ve nghal a ngai," dawhthei takin a ti leh zung zung a, chêt mai nachang hre lovin ka ding khawng reng.

Ka dinna ngaiah ka la din reng avangin, "Novi..." tiin min rawn pan hnai a, ka chiâi zo vek tawh. Sawi mai tur hre lo hian khumah ka ṭhu hnawk a, ni lo, tukinah pawh a ṭha vek si a, chutia chauh thut te chu a ngaihna ka hre hlawl lo a ni ber. Tunlai phei chu ama tawkah a fit ve lai a ni a, ka ngaihtuahna a tâwi turh. 

"Ih...a thi lo ang tiraw?" Ka ti leh rih.

"Thi lovang, a chau a rawn ti ringawta thil dang engmah a sawi lo, Ibrahima ka biak chhungin lo inthlâk fel rawh aw, Cancer hi chu an heti thut zel a nia, eng êm a ti lovang. Le, lo inthlak vat vat rawh le," tiin naupangchhe biakin min bia a, ka thâ a khur ru zaih zaih.

Ka hmuh hmasak ang ang ka phawrh a, ka sam sei angreng tak ka sûk zawh hlim hlawl pawh chu tiro hman tawh lovin, ka chhîpah ka vingvial tawp a. Make-up te chu sawi loh. Bathrobe hlipin khumah ka theh phei tawp a, ka chê reng reng a dik thei lo. Phone-a midang be chungin Thlamuana a lo lut leh a, hun dang chu nise ka vín hrep ang. Mahse, tun hun a ni miau a, saruak thawthânga ka lo awm lai min hmu pawh ka ngaipawimawh zo tawh lo a chhâ chu a ni e.

Khur dar dar chungin ka inbel tur thawmhnaw ka pharh a, muang min ti deuh a niang, a phone ak ṭhain ka kawr fual ken lai chu ka lu lam aṭangin min thawlh sawk sawk a, "Inher rawh," a ti sup a, ka inher veleh ka kawr hnung suihna a suih nghal mawlh mawlh a; a hrui a sira uai thla a lak rual khan ka pum a tawk zauh a, ka haider lui hmak. U Mapuia engtin nge a awm ang? Tih bâkin ka rilru a luah lo.

Khumah ka ṭhu leh tawh a, Sandal bun tura ka kûn hniam rualin ka pum a rawn che dat dat a, ka ṭhu ngil zawt. Ka pum ka dawm nghal vat a, "Nâ i nei em ni, eng ati nge?" Tiin, Thlamuana a rawn ṭhu hniam nghal a, ngaihtuah chiang mang hlei lo hian, "En teh, kan naute hian a rawn tlawh leh tawh," tih pahin a kut ka vawnsak a, ka kuta vuan bet chung hian ka pum puar dat dat zâwn ka dawm tîr vang vang a, a meng phâwk nasa.

"Nano.." a ti zawi ruih a, a kut lakiangin, a ṭhingṭhi thla a, Sandal chu min bun tîr ta a. A kut a khûr ve deuh tlatin ka hria.

A phone a rawn ri leh ta a, "Ibrahim, sawi rawh..." a'n ti nghal tawp a, ka lo thaw dép dép. "Aw le, kan rawn chhuak dawn chiah," tiin khuma ka ṭhu chu min pawt tho a, ka bag leh phone ka ban ve hman hram. Hmanhmawh takin in kan chhuahsan ta a. Mahse, a Car kha u Mapuia'n a khalhsak daih si avangin kalna turah kan buai leh ta.

Min vawnna thlah chuang lovin, "Ti hian lo ding la, Taxi ka zuk phar lawk ang e," a ti leh rih a, ṭawngkaa chhâng lovin ka lo bu nghauh. 

Taxi phar tura a kal hlan chuan keimahin ka lo ding rân a, Atuni'n engmah min rawn hrilh loh danah a dinhmun a ṭha vak lo a nih ka ring rum rum a, ka phone phawrh chhuakin Atuni ka call a, vawihnih a 'ring' zawh dawn ṭêpah, "Nano, i rilru tihrehawm suh aw, test an nei mek a, a Hb a lo hniam bâkah a Bp a 'up' deuh thut alawm maw le," a rawn ti sawk sawk a.

Taxi-la tura Thlamuana kal thu ka hrilh a, "A hlauhthawnawm loh maw?" Ka lo ti leh hrâm.

"Dik tak chuan sawi thiam a har ve alawm, rawn thleng phawt teh u, thisen unit hnih pêk a ngai dawn a, Thlatea khan a pek theih ka ring, unit khat chu kan thawhpui Mizo ve tho Hmangaihtluanga'n a pe dawn a, ih...ka dah rih lawk aw," tih leh phone off a rual a, ka hrilh a hai angreng.

Thlamuana'n min lo koh zui tâk avangin Taxi lo dinna lamah ka chhuk ve nghal a, ka lû a hai mai dawn alawm maw le. Ka ni nghulh mai.

Nia, dam ṭha anga a lan phênah a dinhmun khatiang kha a nih vangin duh aiin kan lo inthlahdah deuh a ni mahna. Engkimah amah kan ring fai vek a, thawhah leh na lutuk tia insawiselna a neih loh avangin ka lo ṭha en leh ringawt atin ni.

'U Mapui, engtin mah awm suh aw' ka ti chhuak sap a, ka bula ṭhu Thlamuana'n a lo hre pha reng chu niin, "Hahdam rawh, ka u te chu a tuarchhel asin, engtin mah a awm dawn lo," tiin ka kut a rawn hûm a, lâksawn pawh ka tum bîk lo.

"Thisen unit hnih pek a ngai dawn a, i pe thei ang em?" Tiin ka zawt a.

"Atuni nen in lo inbe tawh a ni maw," tih chiah a sawi.

Kan inbiak thu leh unit khat petu tur an hmuh thu ka hrilh ve mai a, "Ka hria alawm," a ti leh tawp.

"Nizanah zu i in nasa sia i pe thei dawn em ni?" Ka lo ti pek a, nui lui chung hian, "Ngawi mai mai teh, zawhna i ngah thei lutuk," a ti hluk. A ṭawng zawh rualin ka kut a vawnna a la sawn nghal bawk a, pawnlam a thlir zui daih. Ka be lui ta bîk lo a.

Traffic Jam kârah kan tawlh ve det det a, rilru hmanhmawh nen a inmil viau lo. Thlamuana phone a ri sek tawh bawk si. Â.. ka hah, hetiang hunah hian nêp deuha awm ka tan a rem lo tih hriain thâwk ka la hawk a, ka chalah thlanfîm a bawl ṭak ṭak thei alawm le.

A tawp a tawpah Hospital kan thleng ve ta ṭâwk a. Thlamuana a chhuak vut a, min kalsan zet tawh naa, ka koh avangin a lo ding leh rih a, harhchhuak thut niawm tak hian, "Ka hmanhmawh lutuka hawh le.." inthiam chiah lova tiin ka kutah bawk a vuan leh a, Hospital Main Gate panin min penpui ta a. 

A hmaa kan pahnih boruak ngaihtuah chuan vawiin leh tun huna a caring ta viau hi a mak ve thlâwt. Mahse, hetia inngeih taka kan awm hian a nuam ka ti, inbe chiam chiam lo mah ila, kan boruak a dik ru tlat.

U Mapuia chu Ward-ah awm lovin Cabin-ah Atuni'n a lo dah fel diam tawh a, kan luh lai tak hian Oxygen an lo pe mêk a, a maimitchhing tlat a, Thlamuana pawh ngaihsak zui tawh lo hian khum lam panin ka tlân a ni hrim mai.

A bulah kun hniamin, a beng bulah, "U Mapui, ka lo thleng a nia," ka ti sap a. A che eih lo.

"Tun aṭanga minute 20 hnuah thisen kan pe ang a, unit hnih pêk phawt tur a ni a, Thlate, blood test turin lo va inring rawh le," tiin Dr.Ibrahima'n min rawn en a, "Madam, lo ṭhu hahdam rawh, muthilhnain kan jection rih a, a ngaihtuahawm loh a nia," ka dara bêng thak thak chung hian a ti a, Atuni hmel ka la hmu lo. Nurse pahnih leh kei, Ibrahima leh Thlamuana Cabin chhungah kan awm a, doctor-in min ṭawng thlamuan mah se, ka ngaih a ṭha thei chuang lo rêng rêng.

Khum bulah ṭhuin u Mapuia kut ka vuan rân a, mak deuh maiin ka ṭah a chhuak miah lo. Hetiang hun hi kan la tawng dawn tih hmânah ka lo ngaihtuah daih tawh a, bâkah ṭap ringawt ila awmzia a awm lo. A kianga amah awmpui thei tura ka dam ṭha hi ka lawm em em a ni.

Atuni pawh blood bag keng chungin a rawn lût a, min hmuh veleh, "Ka nu leh pate ka hrilh tawh a, naktuka rawn thlawh thlâk an tum rum rum a, engmah tih theih in nei lo tiin ka lo hnial a nih kha," ti zung zungin ka ṭhutna bulah a rawn ding a, "Nano, thil i ei tawh em?" tiin min zawt a, ka ei loh thuin ka lo chhâng a.

"Zanriah tur chu kan order mai dawn nia aw, i rilru te kha a lo hnual ngawt ang e, a taksa chak tawk loh vang a nih hi, thisen a han dawng anga a harh sawt sawt mai ang," a ti a.

"Office dawr tura kal kha a ni a, a kal dawnah pawh ṭhat lohna a neih awm ka hre lo, tukinah pawh kan pahnihin kan chhuaka engmah insawiselna a nei der si lo a," ka lo ti a.

"Sawmtluanga, a ṭhianpain min rawn bia a, Thlatea te office aṭanga a chhuah hnu khan Revenue office-lamah a kal leh a, Sawmtluanga nen intur an dawm laiin a lu a hai a, tihian nikhua a hre lo zui niawm tak a ni. Chiangkuang pawhin ka hre bik lo, Sawmtluanga'n min rawn hrilh rualin Vishal-a nen kan tlan phei nghal alawm," tiin a sawi ta a.

'Vishal' tia a sawi pa hi, Atuni hnuai chiaha thawk a ni a, a hruai tel ve tihna a nih chu.

"Eng pawh nise, tihian ngaichang phawt ila, thisen an pek chhung hi chuan kan vaiin awm ta rih ila, duh leh ama condition azirin zan riak tur chu kan sawi ṭha leh dawn nia, nangmah kha indim phawt mai teh," a ti leh a, ani hi zawng; ho viau angin lang ṭhin mah se, thil a ngaihtuah kimin lehkhathiam a nihna a lang ka ti mai.

Doctor sawi angin minute 20 a ral leh hnuah thisen an pe ta a, dârkâr thum chhungin unit hnih pek zawh hman tur a ni a, Thlamuana khan a pe thei lovang tih mawlh ka lo hlau.

Tui taka muhil ang maiin u Mapuia a mu chiah chiah a, hetianga chak lo leh derdêp anga a lang hi hmuh hrehawm ka ti, kan intawn leh hnuah hetianga biak theih lohva a awm hi ka vawikhat hmuhna a ni a, a Heart-rate a khât tawkin an en zauh zauh bawk a; Thlamuana pawhin thisen a pe thei a, ka lawm takzet. Mahse, a la rawn chhuak lo thung.

Atuni chuan, "Tikhan lo awmpui la, kan zanriah tur ka va order ang e," tiin a tho hluai a, a phone a ri zui ta bawk nen min chhuahsan ta rih a.

Ni e, a tîra ka hlauhthawn ang aiin ka hmu ṭha a, ka thaw huai huai. Ka ke a vûng ṭan a, a kham leh ut ut tawh. Mahse, kei aia ngaihtuahawm leh ka innghahna mipa damdawi in khuma mu bal chu ka en vawng vawng a, a hmel ka hmu chul rap mai. Ka ngaihbel nge a vun te pawh ka hmu dâng deuhin ka hria.

Mihring kan nih chhungin kan la heti zel dawn chu a ni si a, dam ṭha emaw kan intih laiin kan thih hun nitin kan hnaih si. 

Chuvangin, Thlamuana nen pawh inrem taka awm hrâm hrâm ka duh tawh. Vawiin anga a fel zel phei chuan ka la ngaina thuaiin a nia ka rin ni.

Unau anga inngainat ka duh.

120123

-B®®

Shadow of the life

B+>[BeckirafARenthleI]<+®®