1.VANSANGTAWLI [A Becky Rafa Story]

1.VANSANGTAWLI

Ziaktu: Becky Rafa Renthlei  -B®®

Mitthi vuina hunserh an hmanlaiin inkuangkuah thún hian ka ṭhu a, hmelhriat hmuh tur an vâng pharh mai. In chhungah ṭhut luh ka peih loh vanga kal hma duh lo lui ka ni a, kâr kalta mai khan Mizoramah ka rawn haw chauh a, ka hnathawhna hmun Assam State-a District pakhat Jorhat-ah Scientific officer ka ni a, Biotech lamah ka awm a, kum13 zet chu ka thawk ve ta.

Vawiina kan mitthi hi High school pakhata ka thawhpui hlui Dinpuia a ni a, helaia ka awm lai a ni bawk a, ka kal ve thei hlauh.

Bartho Saingurpuia ka ni a, ka naupang chhe zawk zawk tawh lo hle, kum 9 kal ta khan ka nupui Mazawni'n min boralsan tawh a, raicheha thi a ni nghe nghe. Khata ṭang khan hmeichhe lam reng rengin ka nunah hmun an chang tawh lo a, ka hnaah insawrbingin Mizoram lam hian ka lung a len ta vak lo.

Ka hmaa hmeichhe pathum ṭhute chu an inbe leh sap sap zel a, an hmel ka hmu chiang thei lo, a laia ṭhu erawh chu ka hmuh hnu a ang ka ti a, sîr zawnga hmu ka nih vangin 'tunge' tih han hriat chian a har deuh.

Ka nu leh pain min la dampui a, ka nau mipa Biaknunga hovin kan inpuiah an khawsa a, farnu ka nei lo. Kei ka awm lo bawk nen ka nu leh pain Mizorama ka awm ve theih an beisei viau tawha mahse; ka bengkhawn lem lo chu a ni.

Vûina hunserh a zo a, thlalâkna hun an hman laiin ka hmaa ṭhute chu an ding sawn a, an zinga pakhat ka hmuh hnu ang tlata ka hriat ngei mai khan min rawn en a, a mitmeng a fiah kâk mai. 

Nia, henu hi ka hria alawm, ka la hre lutuk tlat. Ani pawhin min hria tih ka hria a, ka school naupang hlui niin, a hming pawh Vansangi a ni a, koh duhdah nan 'Táwli' tiin a ṭhiante'n fiam nan tak an hmang ṭhin. A ṭhiante zingah a danglam fâl nalh a, ka hriat rengnaah châm lo mah se, a hmel ka hmuh rualin ka hre chat.

Min rawn melh zeuh a, a biang a sen ap ap a, pawl sawm an zir kum khan lerh rual an ni ve tawh a, min Star viau ṭhin. A harh mai bâkah a phawsawlh em em a, lehkha a thiam vei fu lehnghal. 

Biakna tur remchang ka melh ru ta rán a, a hmel a ṭhain a khal reuh si, ka hmuh leh hian engtin emaw tal biak châkna ka nei tlat a, ka ngaizawng tihna a ni lo a nia, biak ve hrim hrim ka châk mai chauh a ni; kan awmna hmunin a zir mang si lo va.

An 'Sir hlui Dinpuia' thlahnaah an rawn kal ve tih a hriat mai a, thlanmual lama ruang zui tum miah lo kha Vansangi te kal ka hmuh vangin ka kal ve ringawt. Ka va tiho e.

An ṭhiandunin pawndum an inzáwn a, an hnungah zel ka kal ve bawk a, kuang zawntute nen kan inhlat viau, a hnung lama kal kan nih avangin tlemin mi pawh an thawl deuh. 

Chutia ngawi renga kan kal lai chuan, "Tete, en teh khi Rul..." a tih ruala Vansangi ri phat chu ding meuhin ka en ta a, eng khaw sawi set set lo hian kopang aṭanga rul rawn tleng thla chu a flat shoe bun lai hlipin a vaw nawk nawk a, insúm hman lovin ka nui huk.

A ṭhiannu chuan, "Rawn chhuk vat rawh.." tiin a ko a, ruang zui ve mtu hnunglama kal te chuan Vansangi chêt dan chu nui tet tet chung hian an en a, a mâwl ngaiin a la mâwl tluang zel tih ka hre mai.

A ṭhiannu bul a rawn thlen thlâk chuan, "A thih loh chuan a mak ngawt ang," a la ti hrâm. 

"Miin an en ṭhup che kha, ṭhing thei lutuk," tia a ṭhiannu'n a khak tâkah chuan a hawikual a, "Ui, ni tak, ka thider náng a.." tih pahin a pawndum sin lai chuan a lu a khuh nghal daih a, a va han nawi ngawih ngawih tak.

A kum zât dik tak hre lo mah ila, naupangchhia chu a ni tawh bik lo ang. Mahse, hmána a zia kha a la paih ṭhen lo a, a nihna anga lang pawp pawp mi leh lerh ve si, â bawk si kan tih ang tho kha a la nih hmel.

Kei ngei pawh an ṭhian zahovin min star rawn ṭhin a, a hun lai khan bialnu nghet Zonuni ka nei a, Vansangi phei hi chuan Zonuni kha a hmel-huat titih. Mahse, ka tana hnawksakin a awm ngai lo a, ka student an nihnaah ngaihzawn tinah ka tin chhin lo a ni ber mai. Ani pawhin min ngaizawng hran lo bawk; a ri huat huat a, a ṭhiante rualin min duh ve nimaiah ka ngai.

Thlanmual aṭanga ka lêt chhoh hnuah pawh an hnungah ka kal a, a hma lawkah mi mitmei veng ṭhak lovin Rul a vua a, a Rul vuak kha ka hmuhpui lo naa a lian lem lo a ni ang; a hlau lo em mai. Dinpuia kuang thlankhura an thlâk laiin a inhnît fap fap a, a ṭap leh lawi si, a va han indaihzai mai mai tak. A zia hi zêp lovah chuan a common lo ve a ni.

Vanneihthlâk ka ti dawn nge, biakna hun remchang ka hmu ta hlauh!

A ṭhiannu Scooty dahna bulah ka Car ka hung ve si a, kan indin hnaih hle. Ka Car tiin ka sawi naa tuna ka hawl chhuah tak hi chu ka nau ta a ni a, kei chuan Scorpio ka nei thung. Ka thawhna hmunah thingtlâng khuaa kal te a ngaih ve ṭhin vang a ni pakhat.

"Vansang, i va nula tawh ve.." tia ka biak thut chuan, a ding mar awt a, ka mitah chiang taka min enin, "Ehe! Sir, i la thi nange," a ti a. Leh tawp mai a!

Nui suk chung hian ka pan hnai a, "Ka la thi lo chu a nih hi.." ka lo ti ve mai.

Chutah min en hâw chung hian, "Kan star tawh miah lo che a nia..." a ti sap a, a la nui zui. Biangsum khuar kalh khawpa a nuih tawh hi chuan thinrim a har ve riauin ka ring.

"Khawilaiah nge in awm?" Tiin ka zawt a, "A ho mai mai, kan star tawh lo che ka tih mawlh mawlh chu," tih leh a ṭhiannu bula kal a rual a, Scooty hnungah hmeichhe ṭhutin a ṭhu dawn emaw ka tia, a puan bih a phelh a, kekawrbul nen a lawn hmak. "Sir, a nih aw.." a rawn ti leh a, a tan chuan an 'Sir' hlui kha ka ni ve a, ka hmingin min ko ngam lo tepawh a ni mahna. 

Biak zui tur an awm ta lo bawk a, car-ah lutin ka tlanchhuak zui ve ta a. Vansangi hmel ka mitthlâah a châm rauh rauh. A khawsak dan enin pasal a neih ka ring lo a, a tâl kual vel mai mai a nih ka ring ber. A chanchin leh an chhungkaw khawsak phung hriat ka nei miah lo bawk.

Ṭhianpa Zuia te inah ka pêng kawi a, zanriah ei ve turin min sawm deuh tlat a, "I rawn haw ve chhunah no kan dawm dun ang chu maw le," tiin 'Rum' ûm chanve tling lo deuh a rawn phawrh a.

Zu lam hi ka in vak lo nain in duh lo chu ka ni lo, ṭhiante âk rualin ka âk ve thei mai a, Jorhat-ah pawh han lem sek ṭum chu ka nei ve. Amaherawh chu, helai vela an in ṭhin ang hi ka in ngai lem lova; 'XXX RUM' ang te phei hi chu ka vawikhat temna tur a ni hial ta ve ang.

Kan ti nek neka kâr lovah a neihsa kan in zo der, chaw ei nan a la hma si a, a dang la turin kan tei chhuak dun ta a, kei chuan an lâkna hmun ka hre ve hran lo a, Zuia zawkin a lo hre khiau chu niin! Thim dawn aruaiah kan va lam belh leh ta a.

"U Bartho..." tia min lo kotu an awm avangin ka ding leh rih a, kan zu lâkna in piah kâwiah tak Vansangi leh a ṭhiannu kha an lo ding a, an thawmhnaw inbel ngai reng an la inbel danah an la haw thleng lo tih a hriat reng. Min lo kotu pawh amah Vansangi tho a ni a, nui var var chung hian, "Kan va han inhmu thei em em, zu in la a ni maw?" A rawn ti lâwng lâwng a.

A ṭawng ring angreng bawk si, midangin an hre ve nge hre ve lo tiin ka hawi kual a, min bengkhawn an awm lem lo chuan ka hria.

Zuia lam hawi chung hian, "He nau hi kan be lawk ang e, motor-ah lo va ṭhu rawh," ka ti a, Vansangi te dinna lamah ka phei ve nghal a, nichinah biak thui hlau deuhin min tlansan a, tunah nêl takin min ko leh a, a rui ve em mawni zawk ni?

A bul ka thlen rual rualin, "In la haw nange, helaiah eng nge intih?" Tiin ka zawt a, rang fahran hian, "Zu kan la ve, zaninah birthday kan lawm dawna min lâktîr.." a ti liam puat a, ka lo ner sawk.

"Khua a thim dawn, haw tawh rawh u," ka ti hmuk a, "Kan haw dawn lo, birthday-naah kan kal tlang nghal dawna, u Bartho, min lo thlah mai la, Tetei Scooty a nauin a hmang duh sia," a ti leh bawrh bawrh a, a ṭhiannu 'Tetei' tia a sawi chu ka va melh a, nuam lo tihhmel takin a hawisawn daih.

"Khawilai hmunah nge in kal dawn, ṭhian ka nei a, in duh chuan ka lo thlah zuai ang che u," ka tih chuan, Tetei zawkin, "Kal ang, a zahthlâk, thlah kan ngai lo a nia," a lo ti sawk sawk a. Vansangi ve thungin, "Kein ka kal peih tawh lo alawm, u Bartho min lo nghak rawh, kan lokal dawn," a ti leh zung zung a. 

Chumi hnu lawkah ka Car-ah an ṭhiandunin an ṭhu lut ta a, racksack a pawm rán a, Zuia hnenah thil awmzia ka hrilh puat a, Vansangi te thlah tur chuan kan tlan chhuak ta a, zanriah kan ei tlai deuh dawn a nih hmel.

Zuitluanga'n Vansangi a melh zuk zuk a, "A hmel hi chu a ṭha maw le, a nun dan a ho lutuk a..." ka beng bulah a rawn ti sup a, amah a ṭhut ve reng avangin ka chhâng thui duh lo.

Birthday an lawmna hmun tur in záwnah ding turin min hrilh a, ka ding ve mai.

"U Bartho, kan lawm lutuk, nakinah tha tharin ka star leh ang che," a ti ham ham a, "Haw har lo ula, nula zanah rei tak tak len a ṭha lo," ka tih chuan, nui var var chung hian, "Kan riak nghal dawn," ati awlsam leh mai. 

Zuia'n min koh tâk sek avangin, Vansangi hnenah, "Fimkhur rawh, sâwn i pai mai tur a nia," ka ti zawi sup a, rang fahran hian, "Ka pai duh tak tak, pasal neih ka peih si lo a.." a la ti zel a, eng danga chhâng lo hian, "I phone rawn la teh," ka ti a, min pe ve mai bawk a. Ka number ka type zung zung a, keimah ka incall nghal a, "Kha kha ka number a nia, riak lovin in haw duh hunah lo sawi la, ka thlah ang che u," ka tih chuan dar san âk chung hian, "Aw le, Sir..." nui kar kar chunga tiin a ṭhiannu a kuah a, an kalsawn ta a.

Ani kha ka ngaihven vul chûk tur a ni lo tih ka hria; mahse, mawlhtu awm ang maiin ka ngaihven ṭan dér chu a ni a, Zuia hmai ka zah ru viau. A chhan pawh kan in upat hleih ve a, pathlawi lung fing chin ka nih vang a ni. Hna zahawm tak ka nei a, min hmu nikhua lo ve thei tlat.

Keini pawh in lam panin kan tlan a, zan dâr sarih a hnai kuar tawh a, zanriah ei hmaa lem leh hlek kan tum avangin kan muang fân ta lo.

Ṭhianpa Zuia nupui hi a nikhua a, an fate pahnih pawh an fel viau tawh a, amah hian zu in zeuh zeuh ching lo phei se chuan khîta awm tawh tur an ni. Furniture workshop changtlung ve thawkhat tak a nei a, an chhungkaw ei bêl ber a nih rualin annu pawhin a phâk tawk ang a thawk ve tho.

Kan inhmuh lohna a rei tawh bawk a, sawi tur kan ngah dun khawp mai.

Zanriah kan ei kham hnuah ka la ṭhu khawmuang a, Vansangi chungchang a rawn sawi chhuah tâkah chuan ka beng a verh ru viau.

"Bartho, Vansangi nen khan in inhre ṭha em?" Tiin min zawt a, ka student hlui a nih thu ka hrilh a.

"Hnaih vak lo la ka duh, veng chung lamah khian an awm a, a phawhawr si, MA (English) kha chu a zo ve a, a nu leh pa an inṭhen hnu hian a tâl hiar lutuka pawisak a neih loh bâkah a awmna ngaiah a awm rei thei lo, a pa laka a lungawi lohvin a nu te khuaah a tlân a, a nu bula a lungawi lohvin a pa a bél leha chuti mai mai chuan a khawsa..." tia a sawi lai chuan ka lo ngaithla uluk viau.

"Pasal a la nei lo em ni?" Tiin ka zawt khauh a.

"Neih pawh ka hre lo, ṭhian chi hrang hrang a kawp kual a, mipa pawh hmeichhia pawh, tuna kan thil lamna hmunah te khan vawi tam ka hmu ṭhin," thukhuh pawh nei lem lo hian a ti leh a. 

Vansangkimi hmel ka mitthlâah a rawn lang a, Zuia thil sawi pawh dâwt a nih ka ring lem lo, a chêt phung leh a ṭawngdan puat puatah khan a ngaihsam tih a hriat reng.

Ka hna chungchângah kan pakai a, ani chanchin sawi chu kan duh tawk ta rih.

Dâr sawm dawnah kan veng lam panin ka inkhalh haw ve ta a, ka ngaihtuahna erawh a kal thui viau. A tleirawl lai khan ka hrechiang lutuk lo nachungin School-a ka hmuh nitin bâk a pawnlam nun ka hriatpui lo. 

In chhungah ka lut a, a lo reh ṭhiap. A tlai ve deuh tawh bawk nen mu tura ka inruahman laiin ka phone a rawn ri a, Vansangi number kha a ni tih ka hre mai, ka la saved lo a, mahse, ka hre tho; ngaihnobei fahran lo hian, "Eng nge ni ta?" Ka ti hniam ruih.

"U Bartho, kan riak khawm leh dawn si lo a, min lo hruai thei ang em, Tetei a chatthla daih," a rawn ti a, ṭawng dang ri a tam bawk si, "Ka mu tawh dawn asin.." ka tih chuan, "Khawngaihtakin...min lo hruai...Lalnunate hi.." tia a ṭawng bah nak lai chuan, "Táwli, haw bik lo ang, lokal teh.." tia mipa dang ṭawng ri ka hre zui zat a, phone ka off daih.

A rawn call nawn leh pawhin ka pick tawh lo a, rang tak hian ka chhuak leh ta. 'In haw duh hunah min lo call rawh u' tia ka lo hrilh ve khanglang chu a rawn bawhzui chat a, tlanchhiat erawh ka tum bîk lo.

Eng ati nge henu hi ka buaipui viau le, kha leh chen hmeichhe pakhat tê pawh be lovin ka awm kumtluan a nia, ngaihzawng neih chu sawi loh, a ngaihven hian ka ngaihven lo a ni ber. Mahse, Vansangkimi hmel ka hmu leh dêk dêk a, a chanchin ṭha lam hriat tur awm miah lo hmeichhia ka ngaihven ru tlat hi a Saingurpuia zia lo hle mai.

Zan rei lam a ni tawh a, khawlai a reh ṭan a, ka tlan muang viau lo.

Zuitluanga'n hnaih lo tura min hrilh hmeichhia hruai turin ka kal leh poh chu a nia, pawh phar mai mai theih mipa nih ka tum loh vei nen; ka zu in hnathawhah puh mai teh ang.

Kâr lovah ka thleng thla mai a, inchhung thawm a la bengchheng ṭha hulh hulh khawp mai. Muangchang lovin ka pên lût a, nula leh tlangval an lo awm far a, a ṭhen an lo infawp bawk a, Vansangi ka zawnga ka hmu mai lo. Atu amahin min ngaihsak lo a, a nihna takah chuan an rûi vek zawk niin a lang.

Ka phone phawrh chhuakin ka call ta a, a ring ral ṭhak. Khawiah phiangsen nge maw a lo chhuah hman ni. Helaia ka kal ta leh hruai ka tum ve ringawt hi ka mawl tawh a nih ber hi. Âtthlâk lutuk. 

Chutia ka hawi kual lai chuan thlanglam Balcony aṭang hian mipa pakhatin Vansangi a rawn kuah chhuak a, vawiina a kawr hâk kha inbel lovin tawnzau leh kekawrbul nen kelawngin a rawn thle phei bâk bâk a, ka lo melh rum úl ringawt.

"Khawiah nge i kawr leh i puan?" Tih pahin ka pan hnai a, min en lem lo hian, "Ka hre lo, ih..Lalnuna hian a hria ang," a la ti zui.

'Lalnuna' tia a sawi pa, amah kuahtu chu ka melh a, "A thawmhnaw dang rawn laksak la, ka lo hruai haw ang e," ka ti zawi ruih.

"Tu nge i nih?" A lo ti ve khar khar a.

"U Bartho a nih hi...kan Sir..." Vansangin a lo tih tâkah chuan Lalnuna'n Vansangi a kuahna a thlah a, an lo chhuah dunna Balcony lamah a kal pai nawk a, ani pawh kha sawi ngai lovin a rui tho. 

Rei vak lo hnuah racksack kengin Lalnuna a rawn lêt a, "Táwli... haw phawt la, naktukah ka lo bia ang che," tihpahin rawn kuah a tum leh nghal ringawta ka lo dang vat.

Vansangkimi meng phelhphung chu vawikhat melh rum lehin ka chhuahpui ta a. Lalnuna nen khan an inrualkhat velin ka ring a, a pa te rual pha tur êm chu ni lo mah ila; ka kum a tam ve tawh a, kha pa khan min hmaizah a nih ka ring.

Nikhua lo lutuk. Hmeichhe zurui leh zu in, ruihtheih thil ti chi hrim hrim hi ka ngaihsan zawng an ni lova; hmeichhe pangngai pawh eng tih thu loh, hetiang rui kawi leh che ṭawp deuhho hi chu ka hnaih tur mi an ni lo. Ka chapona hian a tei thei lo a ni ber. A hmelṭhata a nalh vei nen, ka hmuh dan a dang hlawk ti mai teh ang.

Car kawngkhar ka hawnsak a, a ṭhu lut vei tharh a. A bag pawh a hnung seat-ah ka theh phei lawp a, a taksa lang huai leh a sam pheng zet te chu en pawh ka en nawn peih lo. Ka lo zuk kal ta kher kher hi ka buai lohna turah ka buai phah erh zu nia.

"Khawi lai velah nge in awm?" Tiin ka zawt a.

"Kan inah ka haw duh lo.." a ti sap a.

"Vansangkim, inthing harh la, in in awmna lai sawi rawh," ka ti vin ṭhawt. Ka dawhthei lo ṭan pang tawh a khawsak phung hi.

"U Bartho, kan inah ka haw duh lo ka tih chu, ka ṭhiante in Ramrikawnah min dah mai rawh," a ti ta a.

"In in awmna lai sawi la a tawk, dârkhat a ri tawha nangmah vanga buai hrep tur ka ni lo," ka tih leh khur khur tâkah chuan, min rawn en a, a meng sen râm bawk a, rui chhe lutuk chu a ang lo deuh.

"Kan ina ka haw âi chuan Ramrikawnah kein ka kal mai ang, Siami te inah.." tiin car kawngkhar hawn tumin a che zui a, ka lock ve nghal hmak.

"Hetiang mizia hi i neih ka lo ring ngai lo a nia, insiam ṭhat tum rawh, kan ina hruai tur chein ka engmah i ni lo a, nang anga mualpho hlau lo leh tâl mai mai mihring ka ni ve lo," tiin ka ṭawng khum hrep a, a ngawi ngal a, hnuailam a bih tlat.

Vawiinah ka hmu ve chauh a, a hmelṭha ver vawr avanga ka biak châkna kha a bo vek.

An in awmna lai a sawi duh tlat si lo a, Zuia te nen vengkhat an ni tih kha ka hria a, Vansangkimi te in han zawh leh pawh chu ka hreh ang reng.

Eng pawh nise kawngkama din ngawt âi chuan tiin ka tlan chhuak ta a, a seat hnung nghengin a maimitchhing daih. Tihian car-ah awm se, kan ina hruai haw ngawt chu ka tum lo. Zing lamah a duhna hmunah kal se a ni mai.

Kekawrbul chiah hnuailamah a inbel a, vawt ti hmel pawh a pu chuang hek lo, a ke te lah chu a bâl paw em em a, a ke ṭhiah mawi mah se, a balh hmel ngawih ngawih.

Kei mipa chîmlîm leh mi chengvawng tan chuan a hmuh mawh awm hluah hluah. Kan zia a inpersan lulai êm a ni.

Kan in lan phâkna kan thleng ta a, a muhil nge a thaw sâk sâk mai a, kaihthawh ka duh rualin hetia a muthilh theih chuan a harh phah deuh ka beisei a, minute 15 dawn ka dinpuiin ka nghâk leh rih. Biak tlâkin han awm phawt teh se.

A hnu dârkâr chanve velah, "Vansang..." tia kovin ka sâwi a, a rawn rúm ṭiah ṭiah ringawt.

"Vansangkim.." ti nawn lehin ka sâwi nawk nawk a, phelh phang hian a rawn meng chhuak ta a. Nichin âi chuan a mitmeng pawh a fím ta deuh.

"In ina i haw duh si loh chuan tihian Car-ah lo awm la, naktuk khawvar hunah i duhna hmun i pan dawn nia," ka tih chuan a meng phar âk a, chutah nui lui ngial chung hian, "In inah ka mutna tur a awm ve awm e, i va uikawm chiang.." a lo ti hlar.

"Ka chhungte an awm a, mi pangngai an ni bawk, tun ang hunah ka nupui tih loh kan inah tú hmeichhia mah ka la hruai lût lo e.." tiin ka chhâng hmuk.

"I nupui chu inah a awm em ni?" Tia min zawh chuan ka insangmar ṭawlh ṭawlh a, a mitah chiang taka en chung hian, "He khawvelah hian a awm tawh lo, a thi tawh," tia ka sawi chhuah rualin a thaw chhuak halh a, "Ka tihpalh, ka hre lo a.." inthlahrung hmel pawh pu chuang miah lovin a ti sap a, ka ngawi hmuk.

"Ka thusawi zawm la, zing dâr hnih a pel tawh, i haw duh lo a nih pawhin ka nawrlui lo ang che, tikhan lo awm la, khawvar hunah i ṭhiannu te awmnaah chuan i kal dawn nia, mi pangngai i nih ve chuan ka thusawi i zawmin ka ring," tia ka ṭawng leh hnuah min chhânna pawh ngaichang tawh lovin car kawngkhar ka hawng a, ka chhuak zui nghal daih.

Kan Veranda step ka rap ṭan chiah a, car kawngkhar inkhar khap ri ka hriat rualin ka lehhawi vat a, ka ding chut bawk.

Hmanhmawh zet hian Vansangi a rawn tlân a, ka inrin hman hma hauhvin ka hnungah a pakâi nawlh a, kan tlu dun lo chauh. Ka nghâwngah nghet zet hian a kut pahnih a suih a, a bawpin ka kâwngah a kherh hmak. A chêt dan maksak lutuk avang chuan hamhaih zetin ka ding ngil a, 'chhuk rawh' tih nachâng pawh ka hre lawk bîk lo.

"Keimaha Car chhunga riah âi chuan in inah ka zui lût mai ang che," tih pahin min kherh nghet sauh a, ka harh kâwkin ka hria.

"Rang takin chhuk rawh, chhuk vat rawh," ka ti zawi sup a, kan in kan hnaih tawh êm avangin ka ṭawng ring ṭha ngam bîk si lo.

"U Bartho, ṭhutthlengah pawh ka mu thei reng alawm.." tia a ṭawng leh pawhin ka nghâwnga min kuahna chu phelh tumin ṭan ka la a, a bawp a sei si, ka kâwngah a kherh nghet tulh tulh. 

Thaw huai chung hian, "Zuruih pawh hian chin tâwk a awm, i chhuk loh chuan..." tia sawi zawm duh lo luiin ka ding ngawi rún a, reilote chhunga he mihring ka hné hmanzia hi! Mipa ni phei se chuan ka rêk duh maiin a nia ka rin.

Nula lian pangngai tak a ni a, tháwm bengchheng siamna chi a nih tawh loh avang leh chhuk duh lova luhlul a chhuah tlat si avangin inchhungah ka paw lût tawp. Hmeichhe huaisar leh ngampa tak a ni.

Dimtein ka room-ah kan lut ta a, 'Ṭawng hlek suh' a beng bulah ka ti sup. A ngawi ve mial a, ka khumah ka nghat a, sam tuai puat chung hian, "Mu rawh, khatah khan mu la, thawm bengchheng siam suh ang che," tia ka hrilh nawn hnuah a ṭhutna aṭangin a rawn ding chhuak a, dingdihlipin bathroom a'n pan a(h) a vawikhat tihna chu a ni lo phawt.

Bathroom-ah a va insil ta nge ka hre lo. Ka nu leh pa an harh ka ring lo a, ka nau erawh chu Games khêlin rei tak men a chîng a, kan thâwm a hriat loh hrâm ka beisei. Saingurpuia hian hmeichhe ṭenghneng lutuk kan inah ka hruai lut chu a ni si a, zingah ka chhungte thawh hmaa ka tirh bo ngei a ngai ang.

Tlaia ka zu in ve te kha chu in lo ang chiah ka ni. Vansangkimi hian ka lu kâi ve deuh pawh a shock harh vek. Amah pawh kha rûi angin a lang tawh lo a, a rûi der hialin a nia ka rin. 

Bathroom aṭanga a lo chhuah leh chuan khumah ka la ṭhu reng a, nichin aiin a lang fai ta. A hmel pawh a thar ta deuh, ka chapal a inthawlh a, dím fahrana rawn pên pheiin ka hmai bulah a lo kún hniama zawi sap hian, "Chhuatah ka mu mai ang, phah tur min lo pe la," tiin khum sîr teah a ṭhu a, ka be châk lo mai nilovin ka kham lutuk tlat.

Tlem tal mut ka duh ve si, bedsheet leh lukham pakhat ngawi rengin ka pe a, sin tur ka zawnsak laiin a mutna tur a lo siam thung a, khuma mut tîr ka tum lo hulhual. Blanket pakhat ka thehthlaksak chu a lo ban vat a, a mu nghal hmak! A inkhuhphui nghal vek bawk.

Chhuat láwngah Bedsheet chiah a phah a, a mutui lo khawp ang, a phu tawk chiah a nih hi, tia ngaihtuah chungin ka thawmhnaw inbel lai ka hlip a, ka mu ve ta.

Zinglam dar li a rik pawhin chhin khat mah ka chhing lova ka la meng kur. Chhuata mu erawh a che zui miah lo a, thawm lah a chhuah hek lo, a mut tirha a awm dan ngai ang khan a la mu ngar ngar bawk a, biak emaw pawh ka tum chuang lo.

Khatiang êm êma mahni ina haw han hreh mai chu thil mak a ni ti dawn ila, a nundanin a zir miau loh chuan tu nu leh pain nge ngaithei tehlul ang. Mipa zaidam ni lo mahila, ka ngaihtheih zawng hi a ni lo tawp. Dârkâr 14 vel kan inhmuh aṭangin a liama, Class 10 a zir laia ka hmuh leh tun inkârah kum tam a ral tawh bawk; vawiinah ka be dêk dêka tihian ka room-ah a mu ta mai chu a nia, a mak a ni. 

Ka lo chhing ve sek a ni ang, ka nauin min rawn kai tho a, "U Sai, tho teh, nula i lo hruai haw em ni?" A tih chuan thawhphan awm miah lovin ka ṭhu chhuak vut a, ka harh chiang ngei mai.

Vansangi mutna chhuat ka melh zuk a, a lo mu tawh awzawng lo. A mutna pawh a lo tifel diam tawh a, ka nau melhin, "Khawiah nge?" tiin ka zâwt mawl tawp.

Ani lah chuan, "Eirawng a bâwl.." a la ti zui.

Rang lutukin ka tho chhuaka kawr pawh ha lo hian choka lamah ka phei ta a, ka thil hmuh mai mai chu lë! 

Vansangi'n Anṭam chhum tur a lo thian a, a sam a ṭâwn sâng vah a, nimina a inbel thawmhnaw kha a lo ha fel thlap. Puan dum plane chu a châwnpuar khuh tawk velin a bih a, ka chapal a bun a, thawveng zet hian, "U Bartho-an min chhawr dawn a," ka nu leh pa bulah zu han ti a! 

Ka pain min hmuh veleh, "Bawiha, engmah i sawi lâwk si lo a, nizanah in lo haw lai reng reng ka hre lo, awmpui tur i lo hawn dawn tih sawi ve tal tur a nia, i nuin nupui i ru emaw a tia lawm," nui vur vur chungin a ti a, eng chena tam lo titi tawh ang maw. 

Ngaihdan ni lo lutukin Vansangi ka va melh a, pawisawi lo niawm tak hian a dár a sán âk duh chauh. 

"U Bartho, i nu leh pa ka lo hrilh tawh a, i hnathawhna hmunah awmpui angin min hruai ve dawn tih ka lo sawi aw..." nui duh miah lovin a ti zung zung a, ka ding khawng luh ringawt.

Ka nu leh pa ka zah a, ka nau pawh. Ka tho tlai chu pawi ka ti kher mai, Vansangkimi pawh a thawh hma te chuan chhuah ve mai tur hi a nia, min tibuai lutuka ka ngaihdan a pêl ta.

"Pa, ani hi kan be lawk ang e, Numami a lo la thleng lo em ni?" Tia ka zawh chuan a lo thlen tawh thu leh bazar turin a chhuak tih min hrilh a, Numami hi lânga lokal ṭhin a ni a, zanriah eikhamah a haw mai zel.

Ka nu leh pa mitmei veng ru chungin Vansangkimi Anṭam thian mek bulah ka va ding a, "Min lo zui lawk teh," ka ti nghut a, "Nakinah inbe zâwk ang," tia min lo hnial chuan a lakah ka lungawi lo sa nen ka vín hrep ṭêp a ni. Ka insûm hman hlauh.

Tûk pumin ka be zui ta lo. Ka nau Biaknunga lah chuan hmelṭha a tih thu a lo sawi ve sek a, khawia awm nge tih leh engtin nge kan inhriat tih zawng zawng hriat fai vek a tum bawk si.

Numami lo haw hnuah tûkṭhuan kan ei a, ka nu leh pain zawhna min zâwt vak lo. Amah Vansangi zawk hi ka thawh hmain a lo insawi fihlim a nih ka ring ta ber. 

Ka pa hi a pension tawh a, Saitual khaw chhuak kan ni nain ka pa hna vang leh kan zirna avangin Aizawlah kan pêm a, ka nuin engmah sawrkarah hna a nei lo a, a pasal fanaute enkawl kha a hnapui ber a ni mai. 

An upat ve tawh avangin inchhung chêt ngai pawh an ti meuh tawh lova, Numami hi kan hnenah kum tam a awm tawh a, pasal a neih hnu pawhin lânga kalin kan la chhawr reng tho. Ka nupui Mazawni nen an inmil vak lo ṭhin kha a ni a, a boral hnu lawkah lungawi takin a rawn thawk leh mai bawk.

Ka room-ah Vansangi nen kan ding a, midang hriat laia hau emaw hnar haw kha ka duh chiah bik lo atin ni. Ka zahawmna tichhiain min chhâng lêt erh ang tih pawh ka hlauhlel lo ve.

Thu nepnawi sawi lo hian, "Haw tawh rawh..." ka ti sup a, rui lo hai lo-a awm a ni tawh bawk a, ka insumkár duh lem lo.

"Ka sawi tawh kha, kan inah ka haw dawn lo, ka pain min vaw dawn sa," a ti sap a.

"A vuak che leh i tuar anga a ni mai alawm, hetiang mai maia i tâl hi ka awih thei lo, i nu leh pa rilru a na rêng ang chu.." ka ti nghut a.

"Engmah i hriat chian loh chuan sawi ve suh, khawngaihtakin inremsiamna nei ila, i bulah min kal tîr ve rawh, i tân hnawksakin ka awm lo ang," a tih chuan ka ner sawk.

"Vansangkim, ka sawi nawn leh ang, kan ina awm turin ka duh lo che a, vawiinah chhuak ngei ngei ang che, ka nu leh pa bulah eng pawh lo sawi tawh mah la, ka lo hrilhfiah mai ang, min tibuai zui tawh suh," ka ti hmiah.

"U Bartho..ka sawi tur hi min lo ngaihthlâksak la, a bâk ka ngen lovang che, ka ti tak tak," thaw halh chunga tiin min melh kar a, ka ngawih reng avangin khuh kharh chung hian, "Hetia awma mi hmusit nih hi ka duh bik lo," zawitea tiin a hawi sawn a, hmalam ngun taka melh chungin, "Ka vawikhat sawi chhuahna tur a ni a, tun bâk ka sawi chhuak leh tawh ngai lo ang," tia insût hraih chungin tukverh lam a pan a, zingkara enghelh nei lo zet Vansangi kha chu a ang leh ta lo.

"Sawi vat la, chhuak tawh rawh..." ka lo ti chang fuk.

"Tuna ka pa tia ka koh ṭhin hi ka pa tak a ni lo a, falâk ka ni, ka nu tia ka pan ṭhin pawh ka nu a la ni lo fo a, ka nausen laia min latu leh min enkawltu chu an ni tehmeuh mai. Mahse, College ka zawh dawn hnaih khan ka nu leh pa hi an inṭhen ta a, chutah chuan falâk ka nih thu leh ka nu leh pa awmna an hriat loh thu min hrilh a, an hrin, an rila rah ka lo nih tâk silovah chuan an inṭhen khan awmna tur zawk ka hre lo a, ka zirna a laklawh avangin ka pa hnenah ka awm ta phawt a," tiin a nui lui hak a, ka ṭawng ve lo hrim hrim.

"Hun rei tak min enkawla min duattu ka pa a nih vangin kum hnih dawn chu harsatna nei lovin ka tal ve mai; mahse, nupui a neiha fa an neih aṭangin ka nun a hrehawm a, ka nuhrawn nen kan inmil ta lo bawk nen, ka nu ka pan leh ta a ni. 

Ani phei chuan enkawlna tur che sum ka nei lo, i pa hnenah lêt leh rawh min ti tawp a, khalai huna ka rilru natzia kha! Mahni inchawm turin chêng khat mah ka nei si lo, MA ka zo ngawr ngawr a, tihian belh tur mumal nei lovin ka awm a, hnate han thawkin in te pawh ka luah ve; ka vanduai a kal tluang nge, ka thawhna te'n mí pa emaw tlangval pawh nise ka nihna an hria a, min zuam phah zel si a, ka nun dan a ho zo a, ṭhian ka ngainat phah bawk a, keiman ka zir lo chu thuhran ni se, ka tâlchhuak thiam tawh lo, ka thei lo..." tia fel fai taka a ṭawng lai chuan ka lo thlir reng a, dâwt sawi hmel a pu lo, thudik a nih leh nih loh ka la hre thuai ang chu.

"Ka lo lan hma pawhin i tâl theia nimin maia inhmua inbe ve satliah kan ni a, i awmdan turah sawi theih ka nei lo a nia, sawi pawh ka tum lem lo, tuna i nun dan hi sim la, hmalam pan tum rawh," ka ti a.

"Thil pakhat chauh min tihsak rawh, pakhat chauh..." a ti nawn leh a.

"Eng nge?" Ka lo ti hmuk.

Fiah fak leh zâm map lo hian, "Ka lakah fa nei rawh, pasal nei lova sâwn pawm ka duh," a tih chuan, "Vansangkim.." ka lo ti nghut a, zak lo ka ti. Min zah lo ka ti bawk a, mize mak deuh a nei leh a hmelṭhatna ka hmuin ka hria a; mahse, hetianga pawisak nei lo lutuk leh rilru tenawm a pu hi ka huatna tizualtu a ni. 

"U Bartho, pasal nei chi ka ni lo a, heti reng hi ka ni dawn lo, min enkawl vetu tur fá ka duh.." a la ti cheu nia.

"Tun aṭanga minute 10 ral hma hian kan in chhuahsan ang che, i hmel hmuh leh pawh ka duh tawh lo, hetiang hmeichhia hi Mizo zingah in lo awm ve thei tawh a nia, râpthlak lutuk, chhuak ngei ngei ang che," ti khur khurin room ka chhuahsan nghal. 

A thluak a buai a nih loh pawhin a chhûl a ṭha lo hial ta ve ang.

Ṭhutkhawmna pindanah ka nu leh pa an lo awm a, "Bawiha, i nula rawn hruai haw kha khawilam mi maw?" Ka nuin a lo ti a.

"Vansangi a nih kha, Numami puitu tur atana ka tih a nia, ngai leh lo mai teh se, hnathawh tur dang a hmu tho," tiin dâwt ka sawi ringawt. 

"Nia, kan inah chêtna tur a tlêm em mai, i duh leh i thawhna hmunah hruai la, a ṭangkai phian maithei asin," ka nuin a tih laiin Vansangi a rawn chhuak a, hawi valh valh pahin, "Zankhat min lo mikhuala ka lawm lutuk. U Bartho, ka thil sawi kha aw..." tiin biak zui hman miah lohvin a chhuak nal nal a, ka thaw huai mai.

Nichina lawka a lungngai hmel te kha hmuh tur a awm tawh teuh lo. Mizia engzat tak nei ang maw!

Ka nu leh pain an sawi zui ka hlauh em avangin ka kalsawn nghal daih a, dâwt ngialngan sawi hi ka thiam loh zawng tak a ni. Pa ṭawng tam lo nih nâk alaia dâwt ka sawi ve chuan ka hmelah a lang vek. Ka kum leh ka hna ngaihtuah phei chuan Vansangkimi buaipui hman ka ni lo.

Vansangkimi'n kan in a chhuahsan aṭangin kâr a liam tawh a, ka thawhna hmun Jorhat-pana ka kal hun pawh ni li chiahin min dang tawh bawk.

Khatia a chhuah khan ka ngaihven zui lo a, a chanchin a sawi zawng zawng pawh thudik a ni tih a hnuah ka hre vek tho. Mahse, lehkha thiam leh nula pangngai tak a ni a, a ei tur dap chhuak thei tura mi vengva a ni bawk. A tum a ruh tawk lo a, a nikhua lovin a puitling lo ka tih êm avangin ngaihven zui tlâkah ka dah lo a ni ber.

Vawikhat mah min rawn call lo a, kei pawhin ka be chuang lo, a tawk a ni tawp.

Chanmari kawna ka awm laiin ka nauvin min lo call a, "I ṭhiannu kha a lokal leh a nia, hmanzan ami kha, a haw duh bawk si lo," a rawn ti ta mai.

'Haw tîr rawh' ti eng ang mahila, Vansangtawli pawisak nei lo lutuk kha a haw dawn lo tih ka hrechiang.

Kan in lam panin ka haw ta nge nge a, kan Veranda-ah ka nau nen an lo ṭhu dun a, a hmel tereuh hi chu a ṭha thlâwt a ni. Biangsum langin a nui var var a, a ha var rual tak pawh a lang ṭhap. 

Min hmuh veleh, "U Bartho..ka insiam vek tawh a nia..." a lo ti a. Ka lo melh kâwk ringawt.

Ka nau inchhungah a lut a, kan pahnihin Veranda-ah kan awm a, "Ka lakah hian eng chiah nge i duh?" tia ka zawh chuan, mitmeng dul raih hian min en a.

"Ka sawi ang kha a ni mai, i hnenah kum khat min awm tîr ve la, a bâk engmah ka duh lo, thluak ṭha tak nei leh Scientific officer i ni tih pawh ka hria, fa ka nei thei nge thei lo nangnena en chhin ka duh a, i inchhung enkawltu angin ka awm ang, hlawh ka phût lova; ka lo râi a, fa ka nei thei hlauh a nih chuan ka damchhungin ka tibuai lo ang che, ka tibuai miah lo ang che," uar leh duhthawh takin a ti ta a.

"Ngawi hmak rawh, mipa dang zawng rawh," ka ti hluk a.

"Mipa dang ka duh lo, nang chuan min ngaizawng lo a, ka lak aṭangin engmah duh i nei lo, i hna kum khat ka thawk ang a, ka duh ang hi min tihhlawhtlinsak rawh," a ti mauh mai, ani leh ni lo angin a thutak em em a, a mitmenga tawrhna leh zahna lo lang pawh ka hmu ve tho. 

"Eng nge kei kher kher min tihbuai," tia dam deuh zawka ka zawh chuan a nui hak a.

"Thluak i nei alawm, Mizoramah mualpho nawn ka duh lo a, i thawhna hmunah engkim kan chingfel thei ang, helaiah chuan mi hmusit ka ni a, kum khat chhung ka hrawk i chawm ang a, i tisa mamawh ka pe ang che," inringtawk lutuka tiin a dâk larh a, sawi ber tur pawh ka hre tawh lo.

A hmêl, a pumrua ka en a, a nalhin a hmelṭha si. Kei, nupui neih ngaihsak lo leh hmeichhe ngaihven miah lo pathlawi hian ka nêp phal dawn em ni? A îtawm nasa mai si a. 

Tuna a landanah phei hi chuan thisen vawt khang tawh pawh minute khat lek chhunga tilum theia mâwi a ni.

"U Bartho..." a rawn ti chhuak sap a. Ka phu zawk, ka lo suangtuah leh vak pek a, a va ho e.

"Blood test kan nei ang, min zui rawh..." tih chiah ka sawi.

090223

-B®®

B+>[BeckirafARenthleI]<+®®