3.24-89[A Becky Rafa Story]

3.24-89

Ziaktu: Becky Rafa Renthlei

-B®®

[Recap]

Ka thianghlimna min lâksak tumtu, Laljehomalsawmkima nâknêmah chuan ka vit ta a. 

Chuta a rawn dâk chhuak hmel chu hlauhawm tak a ni. A mit a sen rûm a, a mittui a hnâm sawk bawk, awih theih lohna, maktihna inpawlh nuai hian min melh a, "Min thah i duh a maw?" a ti ta a.

Keiin chemtê ka phâwi ve chiah bawk a. A nâk hup chunga a ding chhuak lai chu ka melh reng ringawt. Eng pawi lian tham nge ka khawih tâk?

A kut leh lamin a hliam a hup a, lehlamin khuma ka mu chu min phih tho lawp a, "Min that rawh, vit leh rawh," tih pahin chemte ka hûmna kut chu nghet tak hian a rawn hum thuah a, a thin zawnah tinin, "Ngurthantluang, ti ta che, ka thih i duh a ni lawm ni, vit rawh," tia a ṭawng chu ring lo mah se, thihna rim a nam tel.

"Ni lo, Jeho.. ni lo, khatiang ka ti duh lo.." ka ti bah nawk nawk a, chhuata thisen far te chuan ka thâuvah min man a, ka ding khur hlawk hlawk. Ka thluak a fîm telh telh a, ka kuta Chemte thisen kâi leh Jeho na tuar hmel te chuan ka thluak an luh ngut ngut.

Min vawnna a thlah riai riai a, chhuatah a ṭhingṭhi hnawk a, "Min that ta si che," tia a ṭawng chu a zâwi raih raih mai.

A bulah ka ṭhingṭhi ve vat a, ka vihna lai aṭanga thisen tharlâm lo chhuak ṭiam ṭhiam chu hup pinsak ka tum a, ka kut vaiper lawpin ka hrawkah a rawn rêk a, a thâ a la chak ngei mai.

"Jeho...min ngaidam rawh..." tiin harsa ti zet hian ka ṭawng chhuak a. A rûm dut ringawt...

-B®®

Chutah min thlah leh thut a, ngîl vak lova ding âwn deuh chung hian, "Tho rawh, ding rawh, i bialpa hnaisai lo vang khan min thah i duh ta a.." a ti sup a, nichina a na tuar hmel kha hmuh tur a awm tawh lo, thinrim vawrtawp tih hriat lutuk hian a thaw ri hrawih a. 

"Tunah chuan ka lak aṭanga tâl chhuah theih inbeisei tawh suh, kei leh nang hi mi inang, sa inang kan ni tawh. 'A pasal thah a tum' tia ka report che i duh zawk em ni?" A ti khur khur a.

"Thi chhuak kha i kutin hupbet rawh khawngaihin Jeho, ka tihpalh, thah che ka tum lo asin," ṭap chunga tiin a kut ka la a, a nâk aṭanga thi rawn hnâm chhuak chu ka hup luih tîr a, ani thung chuan ka mitah min enin, "I kut kha en teh, thisen hlir a nih kha, kan inremsiamnaah khan thisen a tel tih ka sawi lovem ni?" a ti ta a.

Ka kut ka en nghal vat a, ka Chemte ken chu chhuatah ka paih a, kut sil fai tura Wash basin ka pan phei lai pawhin ka hnungah min rawn zui zel a, ka tha khur a reh hleithei lo, eng thil ṭha lo nge ka tih tâk mai.

Ka kut ka sil zova ka hawi lêt rualin nghet tak hian min kuah bet a, "Lo ngaithla rawh, pakhatnaah chuan tualthah tumna thubuai nei thei i ni ta, kan pâwlah i rawn intât lut tih inhria la, kan lo lawm a che. Pahnihnaah chuan, doctor i ni a, mi natna tihdam hna thawk tur ni siin hliam i pe a, Police hnaih thei i ni tawh lo, pathumnaah chuan mahni pasal vih hlum tum doctor i ni, ka hlata awm i tum apiangin buainain a ûm zêl tawh ang che," a ti hmiah hmiah a.

Ka mittui far fap fap chu eng hu-ah ngai lo tih hriat takin a shirt hâk lai a hlip a, amah leh amah a inbuaipui zui a. Ka lo ding khawng reng ringawt.

Khum kotlangah ka ṭhu a, ka thil tih râpthlâk zia kha ka ngaihtuah chhuak thiam chiah. Ka vit thûk lo hlauh zâwk a, chuti ni lo se chuan ka tân tâl chhuah ngaihna a awm dawn lo. Jeho thi tur anga ka mitthla chhin pawhin ka ṭim sawk thei. Kei hi ka â zo tawh a nih ber hi.  

Kawngkhar panin ka phei a, "Khawiah nge kal i tum," tia min lo biak chuan ka ding chawt a, "Kei hian engtik hunah pawh Police ka hrilh thei reng a nia, finfiahna ṭha tak pawh ka nei tih i hriat kha," tiin ka vihna lai kha a hlim zauh a, Bandage in a lo tuam vek tawh. 

"Ka tihpalh, thah che ka tum lo," tiin mit ka khap sak sak a.

"Lokal la min lo zui rawh, helai hmun hi i chhuahsan teh ang," a ti teh daih a, zankhat êm pawh kan la riak si lova mak ka ti hlê.

Chumi hnu chuan ka kutah min chelh a, Hotel room kan chhuahsan ta a, na nei hmêl a pu duh ṭhak nang! 

Car-a kan ṭhut luh hnuah, Buatsaiha leh Rinnunga Ambulance-a an lût tur ka va hmu hman hrâm a, ding rih lawk tura Jeho ka hrilh chuan, "Saw mihring kianga ka hmu leh che a nih chuan ka kut lâwng hian inpahnihin ka that ang che u," a ti thûm chhak a. Ka ṭawng zui ngam tawh lo.

Chak zeta min tlan chhuahpui lai pawhin a ṭawng tawh lo a, Jeho leh a patea te hi tualthah hmanga ei zawng nge an nih a, dán phal loh thil an ti zawk tih hriat chhuah ka tum ve tur a ni.

An in kawtah Car a tiding a, "Tun hun aṭang hian i hrehawmna a inṭan chiah ang, a hma kha chuan keima mimal chenna hmuna hruai che ka tum kha a ni a, mahse, dârkâr rei lote chhunga i pasal lo ni ta thah min tum tâk si-ah chuan Hremhmun tenauah i chêng tawh ang," nghet churhin a ti a. A ṭhen sak bawk.

Ni e, kei hi a hma aia thil ṭha lo zâwkah ka inhnamhnawih ta tih ka hrethiam ve a ni. Min hremna tur pawh nalua a awm thei hian ka ring lo, a nunràwng em mai. 

Laljehomalsawmkima sal dik takah ka inbarh lût chiang hle tih hrilh hranpa ka ngai tawh lova, ka hmâa thim chhah tak awm hi ka pal luih a ngai dawn ta a ni.

In chhunga lo awm te chuan zanriah an lo kîl a, Jeho farnu Tleipuii pawh ka hmu ve ta, a ngo hle a, a nu ang chiaha nu tê a ni bawk. Mahse, a hmelṭha hlê.

Honeymoon hmang tura kal, zan khat pawh riak lova kan haw leh chu makti hmel an pu miah lo va, kan inneih danah felhlel a awm tih an hre vek a nih ka ring ber.

Nu berin, "Ka fapa, zanriah rawn kîl ve nghal rawh u," a ti dam thliam a, kei min melh lovin a fapa chiah a en a.

Sawi buai nei miah lovin zanriah kan kîl ve nghal a, kan ei tlêm dun ngang mai. Tumah kan ṭawng lo, an driver 'Rishan Songbet' pawhin a mit sîrin min melh zuk a, a hmelchhe hran lo nain a ngainatawm bik chuang lo, atu te mah hi an ngainatawm loh fai vek.

Jeho nen kan pindan inṭâwma kan chhoh hnu chuan a kawr hâk lai a hlip a, a hliam tuamnaa thisen val kalh ka hmuh avangin ka pan hnai vat a.

"Ṭhu rawh, ka lo en dik ang e," ka ti sap a.

"A ngai lo.." a lo ti hmuk.

"Luhlul viau lo mai teh, i room-ah hian first Aid box a awm em?" Tiin ka zawt lui a. A awmna lai min kawh hmuh a, khumah chauh hmel taka ṭhuin a meng davá khawp mai. Ṭhui ngai êm ni lo mah se, a na dawn tih ka hriatpui tlat alawm.

Nachhawkna pakhat lain, "Hei hi ei rawh, nachhawkna a nih kha," tiin ka pe a, a la duh ṭhak lo. Mahse, ei tura ka nawr luih tlat avangin a hmawm ve ta tho a, a nâk hliam ka dressing sak lai chuan, "Min tih nat duhin min vit a, eng ati nge min buaipui leh si," a ti sup.

"Min pawngsual i tum a nih kha," ka lo ti ve nghat a, a nui huk.

"Hmeichhia ka mutpui duh a nih chuan ka tan pawngsual kher an ngai lo," a ti deuh kher a. Ka chhâng zui ta lo. Ka tuam fel sak hnuah khumah a mu duai a, kei Sofa-ah ka mu leh ta thung. A kianga mu tura min nawr lui lo hi a mak ve ngawt mai.

Zanlaiah ka harh hlawl a, Jeho a la mutui hle tih ka hmuhin inhnuai lamah ka chhuk thla ta a, ka tih tur ber pawh ka hre chuang lo. 

Choka bul lawka room pakhat kawngkhar chu a rawn inhawng a, Jeho farnu Tleipuii kha a rawn chhuak ta a, zanriah kan kîl lai khan a hmel chiah ka hmu a, a taksa dang ka en hran lo. Mahse, min hmu miah lovin Fridge a hawng a, zanlaiah Ice cream a ei ta mial mial a, ka hmu sual em ka hre lo naa, a mut kawr hak lian lam chuan a pum a khuh ṭhat viau rualin naupai a ang ka ti! Ka khuh kharh a, phu zawk chung hian min rawn en ta a, ka lo melh lêt ve reng.

"I muhil thei nange?" Tiin min be hmasa teh mial a, ka lo bu nghat. 

"U Ngurthan, i duh rêng vanga pasal nei i ni lo tih ka hria a nia," tih pahin chair pakhat a pawt chhuak a, a ṭhu zui zat a.

"I u zâwt rawh, a bâk sawi thui ka tum lo," tia ka chhân chuan, "Ka u hi chu tupawhin kan zahin kan hlau a, ka pa âiawha min enkawltu leh min venghimtu a nih hi.." tiin Jeho chungchâng a sawi a. 

Tleipuii hi kei aiin a naupang daih ang tih a hriat reng a, Jeho ve thung chu kei aiin a upa zawk a, an hmelah inanna han sawi tur an neih awm ka hre lo.

"Heti rum ruma nupui neih a duh ta thut hi a mak ve êm a ni," ti lehin ka mitah min en rán a, eng danga chhâng lo hian, "I pum kha a va puar tawh ve, engtikah nge naute i neih dawn?" Tia ka zawh thut chuan mit a khap fak fak a, a hmai a sen nghal ṭâwn ṭâwn bawk.

"U Ngurthan..." tiin hnuailam a bih daih a.

"Zêp tum mah la, kei hian ka hria a ni, nau i pâi a, i hrin a hun ṭêp tawh bawk, Jeho hian a hre lo nge i chhungte dang tumah hian an hre lo zâwk?" ka la ti zêl a.

Chutah a ding hliai a, a room lamah min pawt lut a, hnialna hman pawh a awm lo.

Tleipuii khumah ka ṭhu a, ani dressing table bulah a ding thung a. "Khawngaih takin ka u hrilh suh aw, min that duh mai ang," mittui parawl kiangin a ti ta a. Ka lo mengphâwk vak ringawt.

"Ka unaupa neihchhun hian sâwn ka pawm a remti dawn lo, chu bâkah naute pa hming ka sawi thiang si lo a, a hriat rual rualin min that mai ang, nang pawh thahah a vau che a ni lawm ni?" Tiin min zâwt a, ka lo ngawi reng.

"Kei leh ka nu tih loh he inchhunga mite hian ka naupai chungchâng an la hre lo a, thup ka tum viau nain engtin nge i hriat ka hre lova ka tan a harsa asin.." tiin a mittui a luang a, ka lainat lutuk. "Khawngaih takin min zêppui rawh aw, nakinah i tan ka la awm ve ang, ka u hi ka hlau a, ka zah bawk," a tih zawm leh a.

"Doctor ka ni a, i awm dan leh i pianphung landanah khan i râi tih ka hre mai, i neih hunah i zêp thei dawn chuang lova tunah hian hrilh mai rawh," ka lo ti a.

"Aih, ka ngam lo, ka duh lo..." tih pahin a thaw halh a, kei ang thovin Jehomalsawmkima chu a lo hlau ve a nih dawn hi. A nun chêp dan tur ka ngaihtuaha ka khawngaih veleh chhawng.

"Engtin nge i u hian a hriat loh theih le, i patea pawhin.." ka ti a, "Ka inthup nasa alawm, bâkah inah an awm tam lova Farm lamah an tâl tam zâwk avangin min ngaihven lo, min ring ṭha lutuk a, ka u tan chuan a naute duat ka la ni reng," tiin za vak lo hian a nui lui a.

"Kei chuan ka hrilh dawn lo. Mahse, a hriat chhuah hun a la awm ang a, chutah chuan engtia awm nge i tum?" Tih pahin khum ka thawhsan a, "Kan nula Anjelika a lo haw ṭêp a, tihdan kan dap dawn alawm," rilru hah hmel takin a ti hap.

Jeho mizia ngaihtuahin a nau pawh nise a tina hreh dawn lo tih a lang reng mai si a, "Hahdam takin awm la, damdawi ei ṭha ang che," ka ti sap a.

"U Ngurthan, ka u chu hrilh suh aw.." a la ti hrâm a, ka lo bu nghat nghat.

Sâwn pai hi thil ṭha a nih loh rualin a neih hun ṭêpah pawh a unaupa a hrilh ngam lo a nia, a pum a puar lian lo hlauh zawk a, a nuṭa neihchhun hi eng ang fakauhva tawhkhirh leh nunrawng ni ang maw! Kei chu sawi loh, a farnu pawhin Sakei aiin a hlau zawk a ni si a. A mak teh e!

Kan room inṭâwmah ka lut leh ta a, Jeho chuan a puansin a lo tlawh hlim vek a, ka panhnaia puansin ṭhat tîr ka tum lai chuan a rûm nghat a, a chal leh hmai velah thlan fîm a bawl ṭak ṭak bawk. Dimte hian a biang ka tawk a, a lo sa vur mai.

Ka inthiam lohna a nasa sawt.

Nachhawkna ka va la a, "Jeho, i harh em?" Tih pahin khum kotlângah ka ṭhu a, zinglam dâr hnih vel a ni.

Chiang lo ruai hian a rawn meng a, "Damdawi hi ei leh rawh le," tiin dam thlap hian ka bia a, a la che chuang lo.

"Hei hi ei la i muhil leh dawn nia," tih pahin ka sâwi dat dat a, a ner sak. Keimah vanga hetia awm hi a ni a, a sawi dik chiah, damlote ka enkawl theihna turin doctor hna ka zir a, mahse, ani erawh ka tina si. Chu pawh ka duhthu ngeia ka vih a ni a, ka inthiam lo ru ngawih ngawih.

A rawn ṭhu chhuak a, tui leh nachhawkna ka lo pe vat. Mitmeng phelh phunga min en chung hian, "Va mu rawh, ngaihtuah ka ngai lo," tih pahin damdawi a hmawm nghal a, kei pawh mu turin Sofa lam ka pan ve ta a, han ngaihsak viau tur pawhin ka nêl lovin ka ṭih deuh tlat a, rilru pangkhing zet hian ka mu leh ta rih.

Tleipuii mawlh khan ka rilru a ti hrehawm. Jeho hriat chhuah hun tur ka lo huphurh lâwk a, keimah ang khan thahah a vau ve dawn nge kut a thlâk zawk ang? Chutiang thuartham vel ngaihtuah chuan ka mu meng kar a, Jeho ka va melh zeuh a, a tukkhumah kutsuihin a mu zangthal a, a maimitchhing nain a muhil lo a nih hmel.

Jehoa'n min lo kaih thawh chuan ni a lang ut tawh a, ka lo chhing ve sek a nih ka ring.

"Hospital-a kal turin insiam rawh," a ti sup a.

"Maw! Tunah maw?" Ka lo ti hû a.

"Umn.. insiam rawh," a ti leh tawp a.

"I nuam lo viau em ni?" Tia ka zawh chuan, ner sawk chung hian, "Hmanhmawh mai rawh, keimah vanga kal tur ni lovin, meeting pawimawh i nei a, ka patea'n min rawn hrilh," a ti vin hluk a, chawlh min pe si a, tunah meeting an ko leh a, a va mak bawk ve maw le.

"Chawlh min pêk kha.." ṭhut chhuah pahin ka la ti ve fan. Mahse, rum zeta min melh tâk avangin bathroom lamah ka luhsan ta a. Ani kha chu a insiam peih diam a, dâr zât ka en a, zinglam dar 10 a lo pêl tawh. 

Hmanhmawh lutukin ka inbual ta sawk sawk a.

Bathroom ka chhuahsan laiin Jeho ka hmu lo a, thawmhnaw hâk turah bawk ka buai leh ta. Chutih lai tak chuan Tleipuii a rawn lût a, "Kha aw, ka u in han pe rawh min ti a," tih pahin Kurta suit khumah a dah a. Min en vang vang chung hian, "Ka sawi ve tur a awm lo nain, tlan bo tumin hun khawhral duh suh, Mizoramah pawh in kan nei a, ka u hi a kal zauh zauh ṭhin," a ti teh daih a.

"Tlan bo tur ka ang em ni?" Tiin ka zâwt lêt a, "I hlim lova, engtik lai pawha tlanchhuah inpeih atin i awm tih ka hria alawm, khawi hmunah pawh awmin biru mah la, ka u hian a zawng hmu zel tho ang che," a ti hmiah. 

"Kan inneih dan chungchângah hriat rûk i nei em ni?" Tiin ka zâwt ta a.

Meng kal ralh chung hian, "Nei hran lo ve, mahse, Court-a inneih ngai hial khawpa hmanhmawhthlâk leh kalh khum fo ngai hmeichhia i ni a, i duh thua pasal nei i ni lo tih ka hrethiam ve mai,'' inti fing taka tiin kawngkhar lam a pan a, "Ni e, engtikniah emaw chuan ka la zalên em em ang," nghet charhin ka lo ti ve sak.

Tleipuii chhuah hnuah thawmhnaw ka inbel sawk sawk a, eng mah pawh ei lovin, Jeho min lo nghahna hmun lam ka pan a, thawmhnaw dum vek a inbel leh tawh! Tun ṭum chu Jacket ha lovin Coat suit a inbel teh tlat.

"Hospital-ah thil i ei mai dawn nia," tiin ani leh ni lo ang hian a ṭawng dam dup a, nimin lawka ka vihna khan a chêt a tikhawr eih lo a nih ka ring.

"Ka ril a ṭâm asin.." ka lo ti sap a.

"Ṭâm suh se.." tih bâk a sawi lo.

Doctor ei leh in duh tui tak leh fimkhur tak ni ṭhin khan chaw mumal pawh ei lovin ka thawhna hmun ka pan chu a ni si a, keimah ka nihna hi nitin ka hloh ṭhen zel chu a ni ber e.

Ka thawhna hmun kan thleng a, "Farm-ah ka lêt dawn a, driver i inthlah haw tîr dawn nia," tiin ka phone min pe a, "Thil dang vak sawi ka tum lo a nia, kan inremna anga i awm lo a nih chuan ka sawi tawh ang zawng zawng kha ka tihlawhtling vek ang," ti nghutin a inhera a kal nghal daih.

Meeting ṭan hmain ka inhnawhpuar ve luklak a, ka û hnen aṭangin eng mah message ka dawng tawh lova min rawn call hek lo. Rinnunga pawh a reh hmiah. 

Conference Hall-a lo ṭhute zingah Samuel Pamei ka hmu hmasa ber a, ani pawhin min lo en chiang kher mai. A hmuihmul buk zet kha a mêt fai vang a, min vauna mitmeng chu haider rual a ni lo. Ka damlo enkawl lai kâp hlumtu kha a ni miau a, engtikah mah ka ngaina ngai lovang.

Dárkâr hnih leh tlem hnuah kan zo ve ta hrâm a, Ward fang tur ka ni lo nain hmannia kan zai kha 'eng nge a an' tia ngaihven turin Surgical ward ka pan a. Male medical ward lam aṭanga mipa ṭawng ri chuan ka beng a verh zar mai.

Kawngkhar a inhawn sa avangin ka va en kher a, ka thil hmuh chuan min ṭhâwng takzet!

Damlo khuma mu Rinnunga chu chiang takin ka va hmu a, "Papa, Champhaiah haw daih ang u, helai chu a nuam lo," tia hmeichhe naupang pakhatin Rinnunga a be lai chu ka thlir reng a, khum bulah hmeichhe pakhat keimah ang rual vel tur a lo ding bawk a.

"Bawihte, i papa dam veleh kan haw dawn alawm," tiin hmeichhe naupang samah a chûlsak a, hmui hup chunga ka thlir reng lai chuan, "Zote, kan fanu hi a fing mah mah a ni," tia Rinnunga a ṭawng leh lek phei chuan thinrim luat vangin ka inhûm ruh ngat ngat.

Ka dam khawchhuahna tur atana Jeho pasala ka neih vanga Rinnunga rilruna hmel ka hmuha hrehawm ka tih zia te, ani erawh chuan nupui fanau neiin min lo bum ngar ngar chu a ni si a, an fanu pawh kum 5 a tling hial tawh ang chu! Tenawm lutuk. Kei hi thla ruk chhung min bum a nia, hetiang mihring hi a ni ang tih rin ngaihna ka hre lo.

Hmui hup chungin ka kalsawn a, ka luak lo chauh.

Pasal ka neih thut avanga na tur ang te khan ka lo suangtuaha hrehawm ka tih vei nen, ka unaupa tih lova ka mipa rin ngam awm chhunin min lo bum tih ka hriatna hian min tinâ a ni. Ka nain ka zak ngawih ngawih.

Ka hmangaihna te kha infiamna atan lek a lo hmang a ni si a, ka mittui tla avangin ka khawhmuh a fiah lova ka pai dat a, cement bang leh ka chal sîktîrin ka thaw hak hak a, ka chau a ni. Chutih lai tak chuan ka bânah tu emawni hian min rawn chelh a, mittui tling pam chunga ka en chuan Jehomalsawmkima, ka pasal a lo ni.

"Ngurthan, i ṭha em?" Tia min zawh chuan amah hnaih fein ka ding a, "En teh, Rinnunga khan nupui fanau a nei," tiin pehhel awm miah lo hian ka sawi chhuak ta phawng a.

"Inngaihzawnna kawngah tumah hi rin loh tur, tumah rintlâk an awm lo.." a ti sup.

"Ni lo, ka hmangaih asin, ani pawhin min hmangaih.." ka ti sap a.

Min en rún chung hian, "A hmangaih lo che tih alang reng alawm," a ti nghut a.

"Aih, min hmangaih, min hmangaih tih ka hria," tiin ka mittui a luang ngiai ngiai a, ka innghahna apiangte'n min kalsan a, mahni inkhawngaihna avangin ka ṭap lo thei lo.

Jeho chuan a âwm nghengin min kuah a, "Ani hnaihah awm suh tih ka hrilh che kha, i mittui hru hul rawh," nelawmna tel chuang miah lova tiin min kuahna a bân a la sawn a, ka banrêkah vuanin hospital aṭangin min chhuahpui ta a. Ka hnial lo hrim hrim.

A driver Rishan kha a lo awm tawh lo a, "Khatiang mittui tlâkna tham a ni lo, nang pawhin pasal i nei tawh a, aniin nupui leh fa a nei bawk a, in kawng ve ve zawh rawh u," tih pahin driver seat-ah a ṭhu lut a, kawngkhar a rawn hawn veleh ka ṭhu lut ve nghal vat. 

"Mipa rinawm lo chu an rinawm thar thut thei lo, chutiang bawkin hmeichhia pawh," ti supin chak zet hian a tlanchhuak nghal a, ka maimitchhing daih.

Ni e, ka nâ a ni. Jeho hi nei lo ta ila, kan la inkawp reng dawn si a, kan Mizo danah nupui pahnih neih a rem lo, engtia min tih nge a tum tih thlengin ka ngaihtuah kâi a, Rinnunga ka huatna leh mahni inzahpuina hlirin ka khat a ni ber. Mî pa ka lo kawp hi ka zak thlâwt a ni ber.

Car a ding dawt a, "Chhuk rawh le, dârkâr hnih hnuah ka lo hruai ang che, i duh chuan zû pawh i in thei ang," tia Jeho a ṭawng chuan ka meng chhuak vat a, ka in luah kawtah kan lo awm reng tawh.

"Maw..hetah ka awm thei ang maw?" Mawl hmel zeta ka tih chuan a ṭhen suk a, "I rilru natna kha helai hmunah hian bun ruak vek rawh, dárkar hnih aia tam awm ka phal lo a, ka rawn hruai leh ang che, Mizorama haw tih vel kha chu ngaihtuah thleng duh suh, Buatsaiha'n i inkawtah a veng reng dawn che," a ti leh lawi si.

Car aṭanga ka chhuk hnu leh ka in luah kawngkhar ka hawna ka luh thlengin Jeho chuan min thlîr reng a, ka ina kal min phalsak vang ringawt pawh hian ka lawm lutuk tlat. 

A Car tlan liam thawm ka hriat rualin Sangeeta ka call ve nghal a, rang takin min lo chhâng a, ka ina lokal tura ka hrilh hnuah, zan tam ka awm lohsan ka room chhungah ka lut ta a, chau zetin khumah ka ṭhu hnawk a, ka khawvel hun tawng hi ka kham hluah hluah.

Kan inneih zungbun chu ka tuai kual a, 'Jeho Sal' ka ni tih chhinchhiahna a ni. Kei Ngurthantluangi hi bum ka ni bawk, dam chhan nei hian ka inhre mawlh lo.

Rinnunga fanu leh a nupui hmel ka mitthlâah a lo lang a, ka mittui a tla leh ta. Hnêmtu ka mamawha ka nei si lo, ka û thudik hrilha min lo hruai turin ka ti ngam bawk hek lo; ani chuan hmabâk êng tak a la nei a, kei erawh chu thim zîngah ka tâng si.

Sangeeta a rawn thleng a, ani hi helaia ka ṭhian neih chhun a ni a, Vodka ûm khat leh ei tur eng emaw zât a rawn khâi lût a, Jeho khan darkar tam hun min pêk loh avangin ka hmanhmawh ru hle.

Zu far khat pawh lem ngai lo kei hian Vodka no ruk zet ka'n in meuh chuan ṭap chungin Rinnunga chungchâng ka sawi mial mial a, Sangeeta pawhin, "Pasal i nei a, mahse, i hlim si lo, Ngurthan, thil dik lo a awm em ni?" Tia min zawh chuan Jeho nen kan inneih chhan ka sawi ngam lo. Thihna nen thu kan thlung miau si a.

Dârkâr hnih a ral chiah tihin ka in luah kawngkhar a rawn inhawng a, Jehomalsawmkima a lo lût ta a. Sangeeta lam hawiin, "Ka nupui i lo awmpui avangin lawmthu ka sawi e, ka hruai haw a ngai tawh a," a ti ta a.

Keini pahnih min melh tawn sek hnuah, "Zanin chu a inah hian ka riak mai ang, Ngurthani kha duat rawh," tia Sangeeta a ṭawng laiin, Jeho chuan ka bag leh ka thawmhnaw ṭhenkhat a khâwm sawk sawk a, "A ṭha alawm, chahbi dahna chu i hriat kha," tiin ka ṭhiannu ka lo chhâng ve a, Jeho che vel ngun taka en pah hian, Sangeeta chuan min mitmei zauh a, ka haider hmak.

Ka rûi lo ka tih chuan dâwt ka sawi tihna. Ka lu a hai chhalh a, ka thluak a nu but bawk, Sangeeta kan mangṭha hnuah Jeho chuan min pawm nawlh a, Car front seat-ah min ṭhut tîr a, "Rui la, ṭap kher suh," a ti hmuk. 

"Umn..aw le.." ka ti ve mai.

An chenna hmun kan pan laiin ka ngawi tluan parh a, tukverah dâkin pawnlam ka thlir vauh vauh a, kan hnungah Buatsaiha'n Car dangin min lo zui bawk a, ka ina ka awm chhung zawng khan min lo vêng reng tih ka hria. Jeho fimkhurzia ka hriat belh leh ta.

In chhung kan lut a, a lo reh ṭhiap, ka pai dat a, in chung panna step zawh ka huphurh kher mai, "Ka pawm chhoh i duh em?" Tiin min zawt a, ka lo bu nghat. Pên tur pawhin ka thâ a zawi vek.

Min pawm leh nawlh a, step-a min chhohpui lai chuan ka tum rêng vang pawh ni lovin a nghâwngah ka lo kuah ve vat a, a insangmar nghal ṭawlh ṭawlh.

A room kawngkhar zâwnah min nghatin a hawng tê tê a, "Mipa pakhat vanga tawrh reng tum suh ang che," tih chiah a sawi. 

Room chhunga ka lut tur chu ka petek leh nawk a, min lo dawm vat. "Doctor, i nâwi ve hle mai," tih pahin ka mitah chiang zet hian min en a, a nelawm chuang loh rêng rêng!

"I bialpa ni ṭhin khan nupui a lo nei reng a, a bialnu ni ṭhin khan pasal a nei thut bawk a, thil mak vak a ni hleinem tiraw?" Tiin min nuihsawh tih hriat tâk hian a ṭhen suk a, "Ka hmangaih ka tih chu, ka hmangaih.." ka lo ti vín hlar.

Chu veleh min vawnna a thlah thut a, chhuatah ka ṭhu thla hnawk a, "I duh leh tikhan muhil nghal rawh, khum i nei zau alawm," tiin bathroom-ah a lut zui daih. A va han sual tak. Min duata min ngaihsak phût lo mah ila, min kaihthawh tal tur a nia.

Kawr ha lova a lo chhuah leh lai pawhin ka ṭhutna ngai chhuatah ka la ṭhu niai a, min melh zawk chung hian, "Tho la, mu ṭha rawh.." a rawn ti nghut a, "Min kâi tho ta che maw le, keimahin ka tho thei lo," ka lo ti ve hlar a, a ner nûng a, ka ṭhutna bulah rawn kun hniamin phunnawi miah lo hian min kâi tho ve mial.

Min chhuk melh rûn a, a mitah ka lo en ve chiah bawk. 

A mitmeng thim leh hriam hrâk chu mit khap lêk lovin ka en a, a hmui chhah lam deuh leh a hnar ngul sang vah te pawh ka hmuh hmaih lo. A rawn kun hniam a, ka hmuiah dam thlapin a rawn fâwp ta a.

Rei ngial kan infawh hnuah ka thluak a fîm telh telh a, ani infawh tîr hi ka tan thil thiang a ni lo. Misual tak a ni si a, ka thil ngaihtuah avang chuan ka inlahrang vat a, "Eng, engvanga min fâwp ngawt nge i nih?" tih pahin ka kut hnunglamin ka hmui ka hru tâwk tâwk a, a hmel rum ta sawt leh dur khup chu ka melh a, "Ka tihpalh" ti supin a inher a, room a chhuahsan nghal hmak.

Ka nun tichhe vektu mipa ka infawh tîr a nia, ka va nêp êm êm ve. Zû ka in vang a ni, ka sam ṭhâm nawk nawkin, "Thi ila a nuam zawk ang," tiin ka ngaihtuah a.

Ka chatthla ta nge ka hre lo, ka harh leh pawhin chhuatah ka la mu kawm ngal a, khum ka en vat a, a ruak hiau! Khua a la var hek lo.

Ka dang a ro huam si a, ka ril a ṭâm bawk nen ei tur dap turin inhnuaiah ka chhuk ta a, a reh hian a reh tlawk tlawk.

Choka dârthlalang phên aṭangin pawnlam êng uar chu ka bih a, Garage sirah Jeho kut hnungsuih hian a ding a, mak ka ti hle, a bul velah tumah hmuh tur an awm bawk si lo. Ka lo thlir reng lai chuan a rawn inher a, in lam panin a lokal a, chokaah ka lut zeuh. 

Ka hua a, ka huat rualin amah ka hlauhna hian min ti zâm zêl zawng a ni e.

Dawnfawh ka lo ei laiin chokaah a rawn lut ta a. 

"Hmanhmawh rawh, Farm lamah kan kal a ngai a nia," a ti nghal tawp a.

"Tunah maw? Tunah hian maw?" Ka lo ti vak a.

"Aw ni e, tunah hian kan kal nghal a ngai, hmanhmawh ang che, car ka lo va la chhuak ang," a ti sawk sawk a, ani leh ni lo angin a hmanhmawh hmel viau.

Ka thil ei lai nen pawnah ka chhuak ve ta tawp a, vawiina ka thawmhnaw inbel ngai reng kha ka la inbel bawk a, chapal pan zet ka bun a, Farm kalpuina chi ninghal lo chuan. Mut hun a ni tawh a, a nu leh a farnute an lo tho ve bawk si lo, â..an khawsak phung hi ka hriatthiam phâk rual a ni lo ve.

"Ka thawmhnaw hi ka thlâk ve dawn lo em ni?" Ka lo ti leh rih. Vin zet hian, "Ngurthantluang, hmanhmawh mai rawh," a ti ṭhawt a, ka phu zawk.

'Ṭîk' pawh ti ngam lovin Car kawngkhar ka hawng rawp a, ka ṭhu lût ve ta a, zing dâr khat velah eng ti turin nge JK Farm kan pan tih pawh ka zâwt ngam tawh lo. A hmel a dur nasa mai si a, biak a huphurhawm ngawih ngawih, ka rûi penṭawng nen ka luak a chhuak ut ut bawk si.

'Umiam' kan thleng a, JK ram kan la tlan thleng lova, hmar lam aṭanga kawngpui rawn pawhtu kawng pêng ṭhuam aṭang chuan Car dum a rawn dawk chhuak zawk a, kan hnungah min hlat deuh hlekin a tlan a, Jeho a hmanhmawh sauh.

"Tinge, tute nge a?" tiin ka zâwt ta nge nge a.

"Bamos Farm lam annih saw, inring rengin awm ang che," a ti sup a, a âw a nghet churh naa hlauhawm a hnai tih ka hrethiam ve mai.

Kan tlan chak poh leh kan hnunga Car chu a rawn tlanchak ve zel a, "Farm-ah tute nge awm?" Tia Jeho ka zawh chuan, "Tumah, tumah an awm lo," a ti ta a.

"Hnathawktu pawh an awm lo maw?" Ka la ti hrâm a, min chhâng dawn chiah tihah Silai a puak a, kan chuanna Car hnung a rawn dêng dawt. Chuvelah, Jeho chuan a Pistol pái lai a phawrh a, rem leh rem lo hian a kâp lêt a, ka beng hupin ka lo ṭê nasa mai. 'Lalpa eng thil nge ni ngai' tia ka phun sap ri chu keimah pawhin ka hre pha chang chang.

Jeho tan pawh Car khalh chunga kah lêt chu thil buaithlâk leh harsa tak a ni. Hliam dam fel lo a la nei leh ta nghal. Kei lah ka ṭê bengchheng nasa mai si. Ka hlau tih hian a sawi fiah zo dawn em ni?

"Ngurthan, kâp lêt rawh," tiin Pistol min rawn hmehbel a tum a, "Aih, ka duh lo, Jeho, ka ngam lo.." ka lo ti ṭâwk ṭâwk chung pawhin, "Duhthlan tur kan nei lo," tih pahin ka malchungah a rawn theh thla a, ka kut a khûr nasa ngei mai.

Kan hnung lam aṭangin min la rawn kâp zui zel a, zan thil ni lo se chuan min kâp fuh tawh hialin ania ka rin.

"Ngurthan, Mate..vawikhat..vawi hnih.. kâp rawh le," tia a sawi zawh rualin tukverhah ka dâk chhuak a, a vawikhat nan Pistol ka hmet puak ve ta, ka thâ a khur zawih zawih na a, dam ka duh miau si a, a ruah thleng ṭhakin ka kâp chu a ni ta reng mai!

A mù thun belh turin ka thiam lova hun a awm tawh hek lo. Laljehomalsawmkima chuan ka dârah a rawn kuah a, "A hniam thei ang berin kûn rawh le," a ti sup a.

JK Farm tih intarna kan tlân thlen tâkah chuan min ûmtute thâwm pawh a reh ta. Kei erawh beng hup chungin Jeho malpui lehlam ka chalin a si rân a, a taksa insangmar leh ṭang ṭung te chu ka hre thei vek.

Ka khurh nasat êm avangin ka che sawn ngam lawk lo a, "I him aw, kan him e.." ti sup chung hian ka sam a chûl a, kan inkah chhung kha hun rei a ni lo.

Farm House-a min kuah luh lai pawhin ka la khur hlak hlak a, a vawt bawk nen ka tirilah min ṭham er er a, ka thidang thei mai dawnin ka hria.

Farm house reh ruihah chuan kan pahnih chiahin kan awm tih ka hria, an hnathawkte leh a patea te awmna zâwt turin ṭawng pawh ka ṭawng chhuak thei lo.

Long chair hnai berah min ṭhut tîr a, "Ka kiangah chuan i him ang," tih chiah a sawi leh.

Mei a chhêm a, ka thawmhnaw inbel holam tak melh zuk chung hian, a Jacket hâk lai hlipin ka dârah a rawn bât a, "Engtikniah emaw chuan Mizoramah him dam takin ka la hruai thleng ngei ang che," a ti nghet charh a, ka thlâ a muang huai huai.

Min ngaihsakin min duat vul chûk lo mah se, ka himna tur a ngaihtuah zel tih ka hre ve tlat tawh.

Mipaah pawh pa tak leh hruanghrau tak a ni a, hmeichhia han duata ṭawngkam dam leh thlum chhâkchhuak mi a ni lo, a nui lai pawh vawikhat mah ka la hmu miah lo a nia, mak ve tak a ni.

Khua a vâr lek lek tawh a, mut chhuakin min zem ṭan a, ani erawh ṭhutphah sei pakhatah a ṭhu thluang duai a, mûk taka thil ngaihtuah hmêl a pu.

"Jeho, khawnge an awm zawh vek a?" Tia ka zawh chuan, "Thil zawng zawng hriat tum lo la, i tan a ṭha a ni mai," a ti leh hmuk tawh.

"Anih engtik thleng nge kan inneih dawn?" Tiin ka zawt leh tawp a, rum lutuka min melh chung hian, "Ka thih hma loh chuan ka nupui i ni ang," a ti hmiah. 

"I patea hnenah min dilsak la, Aizawlah ka haw ang a, vawikhat mah ka rawn inlan tawh ngai lovang, ka hna ka chân a ni thawthâng tawh a, khawngaih takin ka hma hun min tihchhiatsak lul suh," ngenngawl taka ka tih leh chuan min ning tih hriat lutuk hian, "I va han ṭawngtam mai mai e, khawi hmunah mah i him tawh lo. Samuel Pamei hian nungdama a chhuah che beisei suh, ka tel ve lohnaah i him kumkhua dawn lo," tia ding hluaiin, "Muthilh tum rawh, an rawn thlen fel hunah kan haw dawn nia," dam deuh zawka tiin puansin tur min pe a, ka lo ban ve mai. 

Mu tura ka inbuaipui laiin in tur eng emawni no khat pap min pe a, "I hlauhna leh i tha khûr a tiziain ka ring," a ti ta a, ka lo ban vata ka in zo nghal vek.

Thawm bengchheng zetin min tiharh a, eng thawm nge tih hriat tuma ka ṭhut chhuah chuan Jeho room-ah ka lo awm daih! 

Nizanah khan Farm house khumah ka mu ngei si a, mak ka ti kher mai. Sana ka ena tlailam dâr thum a lo pêl tawh a, mak ka ti telh telh! 

Hrilhhai taka ka lo ṭhut lai chuan pawnlam aṭangin Jeho nuin min rawn ko a, a âw-a hlauhthawnna ri tel chu hriat hmaih chi a ni lo.

"Ngurthan, Nguri..." a la rawn ti fo a, hmanhmawh miah lo hian kawngkhar lam ka pan a, Jeho nu mangang hmel taka lo ding nen kan inhmachhawn ta a.

"Khawngaihin min lo pui thei ang em?" A ti sawk sawk a.

"Eng thil nge ni ta?" Ka lo ti a.

"Ka fanuin nau a vei a nia, Ngurthan, a unaupa lo haw hma ngei hian min buaipui sak rawh.." ṭap lek leka a tih chuan, "Driver hrilh la, hospital pan ang," ka lo ti daih thung.

"I â em ni, chutiang thil theih a ni lo, Jeho hriat hmaa kan chinfel a ngai khawngaihin lo chhuk rawh.." tiin ka bânah a vuan a, a va han manganthlâk ṭhin tak.

Jeho te inah, a room ah ka harh hlawl a, amah a la awm lo zui. A farnu neihchhunin nau a vei bawk a, he mite chhungkaw khawsak dan leh kalphung hi a mak vel vek.

Farm house aṭanga kan kîr lai reng reng ka hre bawk si lo. Ka â thei takngial dawnin ka hria.

Tleipuii chu inhnuai ber room ruakah a lo awm a, chhuatah thlan tla phunga lo muin nau a vei chu a ni si a, ka khawngaih lo thei lo. 

A rûkin an lo inpuahchah ve nasa a ni ang, naute puan leh ka mamawh tur a awm ve nial a, thaw hawk chung hian, "Lungngai suh, damtein naute hmel kan hmu ngei ang," tiin ka ṭawng thlamuan a, a mittui a tling kalh mai.

"Jeho hi zanin dâr 10 hma chuan a rawn kîr dawn lo, chumi hma chuan kan intihfel a ngai," nu Pianmawiin a ti leh a.

A fapa kalna ka zawt ta tho.

"Hre lo zâwk rawh," a ti vei hmak a.

Ka sual a chhuak ve ta. "Jeho kalna i sawi loh chuan i fanu hi ka buaipui lovang," ka ti ta a.

"Ngurthan.." a ti zawi raih a, "Jeho leh a patea hian..." tia a sawi lai takin, "Nu..." tiin Tleipuii a vial ngalh ngalh a, thudang sawi hman a ni ta lo.

Ni e, Jeho leh Samuel Pamei hian thil ṭha an ti dawn lo, mi an that hreh lo a, eng lai pawhin inring rânin an awm bawk a, an sum hnâr ber nia lang Farm house nise nizanah an chhuahsan fai vek a, Jeho khan an lo haw veleh in lama kan kîr tur thu a sawi laiin; ka hriat miah lohvin a room ah ka lo awm leh daih bawk si. Â...a dik lo vel vek...

Laljehomalsawmkima leh a patea hnathawh hi hriat chhuah ka tum tur a ni. Ka hre ngei bawk ang.

240223

-B®®

B+>[BeckirafARenthleI]<+®®