4.24-89 [A Becky Rafa Story]

4. 24-89 

Ziaktu: Becky Rafa Renthlei

[Recap]

Ka sual a chhuak ve ta. "Jeho kalna i sawi loh chuan i fanu hi ka buaipui lovang," ka ti ta a.

"Ngurthan.." a ti zawi raih a, "Jeho leh a patea hian..." tia a sawi lai takin, "Nu..." tiin Tleipuii a vial ngalh ngalh a, thudang sawi hman a ni ta lo.

Ni e, Jeho leh Samuel Pamei hian thil ṭha an ti dawn lo, mi an that hreh lo a, eng lai pawhin inring rânin an awm bawk a, an sum hnâr ber nia lang Farm house nise nizanah an chhuahsan fai vek a, Jeho khan an lo haw veleh in lama kan kîr tur thu a sawi laiin; ka hriat miah lohvin a room ah ka lo awm leh daih bawk si. Â...a dik lo vel vek...

Laljehomalsawmkima leh a patea hnathawh hi hriat chhuah ka tum tur a ni. Ka hre ngei bawk ang.

-B®®

Tleipuii nau vei chhung a rei ang reng si a, Jeho hriat an hlauh miau avangin an driver Rishan chu Gate-ah an duty tîr a. Nu Pianmawii pawh hlauthawng tih hriat takin inchung leh inhnuai in kal pawhna lai step-ah a ding rân mai. A fanuin naute pa a sawi duh tlat si lova, a buathlâk teh e.

Thawm bengchheng a chhuah loh nan a kâah puanchhia hnawhsak mah ila, a vawikhat nau neihna tur a nih vangin Tleipuii a inti pachang hleithei lo. 

Zan dar sarih rîk hma deuhin fapa a nei ve ta a. Ka thinlung takin ka lawmpui a, mahse, naute hi engtin nge ni ta ang. Jeho lakah insawifiah ngaihna a vang dawn êm asin.

Mahse, nu Pianmawii'n ruahmanna fel tak a lo siam diam chu niin! 

Dârkâr khat lek a ral hnuah Buatsaiha a rawn kal a, hmeichhe pakhat a rawn hruai tel bawk a; Tleipuii fapa chu chu nu kutah chuan an hlan ta a, Tleipuii mita rilru natna rawn lang chhuak pawh ka hmuh hmaih lo, chu nu chuan a kawl hlen dawn tihna ni lovin nakinah an lâk lêt leh tur thu an sawi a, ka inrawlh ve lo hrim hrim.

Buatsaiha bawkin Tleipuii chu a pawm nawlh a, ama room pangngai inchungah a dah chho leh ta a.

"Ngurthan, ka fapa hnenah i sawi chhuak tur a ni lo a, i kâ i âng a nih chuan a pawi viau ang," tia nu berin min vau tâkah chuan, "I fapa lak aṭanga ka zalên theih nan min pui la, ka sawi chhuak lovang," ka ti ve hmak.

"Ka fapa hnen aṭang hian khawi hmunah mah i kal sawn dawn lo, he in hi i in anga i ngaih hma poh leh i tân a ṭha a ni mai, ka fapa thu hnial kalhtu chuan thihna a pumpelh lovang," a ti ta a.

"Tleipuii fa paina pa hi i hria em?" Tia ka zawh nawn leh chuan a hriat bîk loh thu leh a fanuin a sawi duh tlat lo tih a sawi a, "Ngurthan, Mami hian a ngaina che a, lo zawh chhuah tum ta che, tuna naute rawn latu kha kan nula ti ila, Tleipuii nutei fanu Angelika a nih kha, nakinah naute kha hetah a rawn hruai kîr dawn a, ama fa angin kan sawi mai a ngai ang," a la ti ta deuh deuh.

"A râi sa em ni?" Ka lo ti khauh a.

"Rai lo e, mahse, Thlariat zet Jorhat-ah a awm a, Jeho hrilh dan a awm mai ang, Jorhat-ah hian Jeho farnu pakhat Tleipuii û a awm alawm," tih pahin a fanu room lam a melh zauh a, "A û in a hriat chhuah hun hun chu a nunna tawp hun a ni mai, Tleipuii khawngaihna i nei ve ngai a nih chuan i pasal hrilh hauh suh ang che," tiin min kalsan ta a.

Ka thaw chhuak halh a, thu rûk leh zêp rûk ngah lutuk chhungkuaah ka awm a nih ber hi. Jeho pa chungchâng nise pakhat tê mah an sawi chhuak duh der si lo.

Tleipuii muhil bâm chu ka thlir vang vang hnuah kan pindan lam panin ka chho ve ta a. 

Ka mu fel chiah tihin Jeho a rawn lût ve a, a hmel thim mâk leh rum ru riau avang chuan be hmasatu nih ka duh lo a, ka ngawi ngal.

Min be bîk lovin bathroom a pan a, rei fê a va inkhung hnuah, "I dressing leh dawn em?" tih pahin a nâk ka plaster sak kha a khawih zauh a.

"A la na em ni?" Tih pahin ka ṭhu chhuak a. Kiai suk chung hian, "A na tih thu ka sawi lo," tiin khumah a ṭhu a, a taksa ruak kûng hmuh fo hi ngaiah ka nei hleithei lo.

Chumi hnu chuan eng dang sawi tawh lovin ka dressing sak ta a, min en reng tih ka hria; mahse, ka melh lêt duh miah lo a, "A dam ṭêp a nih hi, Antibiotic kha ei chhunzawm zel rih rawh aw," tih pahin ka tho chhuak a, "Tui nen khan min lo pe rawh," thupe aw zeta tiin a sam a hru hul sawk sawk a. Ka pe ve mai bawk a.

A ngaitê bawkin Sofa-ah ka mu a, doctor zir tura ka inbuatsaih nasat tehreng nen heti maia a thâmral tur hi chu ka ui ngawih ngawih a, Jeho mutna lam ka va hawi a, a pistol a lo hrufai a, a mú a thun nghauh nghauh a, ka ṭim ru er er.

"Jeho, nizan khan farm house khumah ka mu si a, ka harh lehin i room-ah ka lo mu daih a," tiin ka hriat duh em em chu ka zawt chawt a.

"I thil in turah mutna damdawi ka pawlh a, inah ka dah lêt che a ni e," zawi supa tiin a thil tih lai a chhunzawm leh a. 

"Midang lo thlen hunah kan haw dawn nia i ti khân ka hria a," ka la ti ṭâlh.

Ninawm min tih hmel tak hian, "I hriat tur atana ka duh chin chu i hria ang, i hriat loh tur erawh hriat luih ṭálh tum lo la, i tan a ṭha a ni mai," a ti zawi ruih a, a awrâwl hi a ring hluai ngai lo a, a thinrim poh leh a awki a hniam tih ka hre ve tawh.

Laljehomalsawmkima nen kan inneih aṭangin kâr thum a ral tawh a, khum khatah kan mu dun ngai lo a, kan inhmu zeuh zeuh a ni ber. Ka hna zawm a hun dawn tawh a, bâng turin min nawr ang tih mawlh ka hlau a, Tleipuii pawhin nunphung pangngai a zawh ṭan tawh a; mahse, a fapa an la rawn dah kîr si lo. 

Farm house lamah nitin Jeho a kal a, min sâwm ngai hek lo. Min be mang lo ti ila ka sawi sual lovang. Inah keima awm awmin ka awm ve nawk nawk a ni ber.

"Ngurthan..." tia min rawn kotu chu Jeho patea a lo ni a, kan room-ah intivei zetin a rawn pên lût a, "I hna bansan i duh loh chuan Jeho hi kalsan rawh, hmeichhia kan mamawh lo tih ka sawi tawh kha," a ti ta a.

"Ani hi kalsan ila min that ang em?" Tia ka lo zawh chuan a nui lui huk a, "That ang, ka that ang che," ti leh lawi siin, min thlêk vung vung a, lehlam ka hawisan hmak. "Mahse, ka thah hma chein kha i taksa îtawm zet kha vawikhat tal chen ve ka duh," tih pahin min rawn hnaih ruak a, bang kil lamah ka tawlh naa min rawn hnaih chilh titih.

"Tenawmpa.." ka ti vin ṭhak a, meng rum sawt chung hian ka dár pahnihah rawn ṭhâmin min fawh tum hian a rawn kun hniam zui nghal a, ka lo thle sawn vat.

"Ṭang buai duh lo mai rawh, ka fapa ka'n hmakhalh ang e," tih pahin ka tukkhum samah a ṭhâm a, min fawh luih a tum leh ta, chu veleh, "Jeho..." tiin ka âu vak a, ka hmui a rawn hup a, khum lamah min hnûk phei dawt dawt a, ka duh lo ṭang vel chu ngaithei lo tih hriat takin hawi sawk khawpin min bêng ta a. Ka ṭê ṭhat.

"Nang tar hur hian min mutpui lovang," tih pahin ka tal buan buan a, ka awrawl tawp tawpin ka râk bawk a, Samuel Pamei hmelah hlauhthawnna chhe te eih a lang lo nia! He in chhungah hian tumah an awm lo zawk em mawni!

Chutia kan inchai buai lai chuan, "Eng thil nge ni ngai ka pate?" Tiin Jeho aw ka hre ta thut a, a patea'n min bawhbet rûn a, "I nupui hian mipa a mamawha ka lo inpe ta mai," tiin inthiam lohna nei miah lo hian Samuel Pamei chu a tho chhuak ṭuih ṭuih a, rum lutukin ka melh ngial. 

"Jeho..." ka lo ti sap a.

"Ka pate, ka pindan hi minute hnih chhunga i chhuahsan loh chuan ka tih tur i hria e," tiin a patea a melh rum úl a.

Ka thin phu dup dup tih reh tumin thâwk ka lo la vak thung.

"Jeho ka fapa, i nupui doctor hian mipa a mamawh viau a nih ka ring, kei tarsen pawh min thlêm duh a nia," nui lui chunga tiin min melh rulh a, "Chhuak rawh.." tih pahin ka bula lehkhabu pakhat chuan ka vawm zui hrâm a,  Jeho erawh a ding khawng luh a, a patea pawh a be chhunzawm chuang lo.

Ngawi rengin minute tam kan awm tawh a, "Jeho.." tia ka pan hnaih chuan, "Khatah khan ding rawh," ti chang fukin amah zawkin min rawn pan ta a, a mitmeng hriam leh rum tak chu ka lo en lêt ve ngar a.

"Tisa thilah inzawmna neih ka duh lo tih ka sawi a, tunah chuan ka rilru ka thlâk ta e," tia a sawi zawh rualin min rawn ban a.

"I patea kha ka thlêm lo.." tiin ka hnungtawlh a.

"Hotel ka chhuahsan chhung rei loteah pawh i bialpa i lo ko hman a ni lawm ni, nang ka mutpui che hi thil thiang a ni a, nupa nun hman theihna certificate kan nei tih i hriat kha," tiin a shirt hâk lai a lu lamah a phih chhuak a, chutiang zelin a kekawr pawh.

"Ni lo, Jeho...min ring rawh.. i patea kha.." tia ka sawi zawh hma hma chuan min rawn ban a, min phih lawpin amah si chêt hian min kuah bet a, "Mipa ka ni a, tisa châkna nei thei ka ni bawk, dan hmaa ka nupui mutpui turin dikna ka nei aw.." tih pahin min pawm nawlh a, khumah min theh thla leh a, a khum dûp zetah chuan ka insawh na lêm lo.

"Midangin an mutpui buangbar ái che chuan i pasal hian a hmasaber dinhmun hauh ka tum, nge, nang hian mipa tam tak i lo mutpui tawh zawk?" Ti khur khurin khumah a rawn lawn a.

"Malsawmkim, mipa ka la mutpui lo," ti vin ṭhat chunga thawh chhuah ka tum chuan ka kut pahnih ka lu chungah a hmer kawp a, "Ka patea'n sual a tum che khan i vit ve lo tiraw? I tina miah lo, kei erawh chu hliam min siamsak a, a man i pe dawn a ni," ti hniam ruihin ka bân pahnih chu a kut khingkhatin hnehsawh zet hian a chelh a. A vei lamin ka kawr hak lai a nawr tawm a, ka bra kilhna a hmet pelh zauh bawk.

"Jeho, hetiang chuan ka duh lo, tilui suh.." tiin ka tâl phat phat a, "Putar ai chuan kei hi ka tih tlâk zawk ang," tia a sawi zawh rualin ka âwmbâwr a rawn tawk a, min hmer nat êm avangin ka mittui a hnâm sak. Au chhuah emaw ṭanpuitu koh tumna erawh ka nei miah thung lo.

A taksa rihna hmangin min delh rûn a, boxer bâk inbel a nei tawh lova, ka kekawr hâk a phih thla pawp a, ka mal a chul kual ruai a, a mitmeng danglam tial tial pawh ka hmuh hmaih hek lo.

"Ngurthantluang, ka taksaah ser min siamsak tawh a, ser mai ni lovin i damchhunga i theihnghilh leh ngai tawh loh tur kei hian ka pe ang che," tiin ka bawp chîp tlat chu dimna nei miah lovin a kuai kau a, ka ṭé ring ngei mai. 

"Khawngaih takin, Jeho.. hetiang chu a ṭha lo, ka duh lo," ka lo ti ṭâwk ṭâwk a, ka duh lo ṭang tâl vel chu engah mah a ngai lo, a chak êm a ni. A bân thahrui ngah tih hriat taka phiar fat te, a hmel rum ula tisa châkna rawn lang dawt zut leh inseh ruh ṭeuh chunga min tawhna te chuan min râp ngawih ngawih a, tunah hian thi thei ila ka va duh êm.

A hnu leha thil thleng chu ka tan hremhmun a ni. A duh tâwk a ngah hnuah bawlhhlawh ang maiin khum kil lamah min nam sawn a, ka thianghlimna min laksaktu hmel hi ka haw ngawih ngawih a ni ber. 

"Nula thianghlim ni lo la chuan kha aia tam kha ka tlingtla tur a ni a, Laljehomalsawmkima thin tirimtu chuan hremna a pumpelh ngai lovang," tiin a saruakna zahpui hauh lo hian bathroom-ah a lut a, ka ṭap chhuak lova ka mittui luang zawih zawih chu ka kut hnunglamin ka hru tâwk a, ka thawmhnaw chhuata darh phungte chu en kânin ka mu tawm cháih a, ka chhungril na lutuk hian ka âwm a hnawh tâwt vek ni maiin ka hria.

Zanriah pawh ka ei lo a, ka thawmhnaw hmuh hmasak ber inbelin tukverh bulah ka ṭhu khur hlak hlak a, Jeho erawh a rawn lang tawh lo. 

"U Ngurthan, ka lo lut dawn aw..." tia Tleipuii aw ka hriat rualin ka sam ka hui mâm thuak thuak a, "Ka ṭanpui thei lo che hi a pawi ka ti, min ngaidam rawh.." tiin min hmuh veleh min kuah a, min khawngaihtu pakhat lek a la awm ve alawm. 

Ka mittui dan rual lohvin a tla a, ka inhnit zui hlawp hlawp bawk a; ka hnungah chûlin, "I tlan chhuah theihna tur kawng ka lo dap dawn nia, hei hi tlem tal ei rawh," tiin dawhkana tray chu a melh zauh a.

Ei tur a lo keng lut tih pawh ka hre lo reng reng.

"I û leh i patea hi ka ngaidam ngai lovang," zawi raihin ka ti a, tray-a ei tur tuihnai tak awm chu ka ei lui ngâng ngâng a, lem a har ṭalh ṭalh khawp mai.

"Ka u hi misual a ni lo.." tih chiah a sawi. Ka lo ner sak a hmuh chuan, "Ka ti tak tak, misual a ni lo," tia a la sawi lai mekin Jeho a rawn lut a, "Mate, chhuksan rawh, ka lo buaipui ang," tiin Tleipuii a melh zuk a. 

"Ka patea a la awm em?" Tia a u a zawh chuan, "Awm lo, ama chenna hmunah a lêt leh tawh," a ti ṭha mai a, Samuel Pamei ka huat rualin Jeho ka huatna a nasa zawk mahin ka hria.

A farnu a chhuah hnuah, "Ani hnenah khan eng thil nge i lo sawi?" a ti khur khur a, a farnu a biak dan leh kei min biak dan chu dang tak a ni. Chhân pawh tum lova ka ngawih reng avang chuan amah bawk a rawn ṭawng leh a.

"Luhlul i chhuah zel dawn chuan zanin zankhuain nichina thil thleng ang kha ka thlen tîr leh ang," a ti nghut a, rum taka melh chung hian, "Ti rawh, ti ta che, i duh duh ti rawh.." tiin dawhkan chunga tray awm chu ka beng thla a, bowl tla keh ri a ring kher mai.

"Umn..a ṭha e, ka duh leh alawm, ka zawngchhang riau.." ti lui ngatin ka inrin hman hma hian min pu nawlh a, khumah min keuh leh dawt a, hnial emaw ṭan lo khawh pawh ka tum tawh lo. Ngawi rengin min sawngbawlna chu ka dawh miah miah a, engvangin nge ka dan lem ang, ka nih tur ang ka ni pha tawh lo a, ka chhe vek tawh, phubâ ka lâk theih nan chauh ani ka la dam ni.

"Nupa chu nupa anga awm mai tur, mi famkim ka ni lova ka famkim hun nghak duh suh, engtikah mah ka famkim ngai dawn si lova," tia a sawi zawh rualin, na zet hian min fawp leh tâwk a, ka hmui a thîp vât mai.

Rawl ṭhûmin ka tho chhuak a, zinglam dar hnih a ri tawh. Bawkkhup zawnga mu Jeho tihharh hlau takin ka dingdihlip phei a, ka kap bâwr vel na ut ut chuan ka khua a tisik lo chauh.

Thawm dim takin inhnuaiah ka chhuk thla ṭhem ṭhem a, mut kawr nen chauhva awm ka nih avangin a vawt phian.

Jeho nu pindan lam aṭangin ṭawng ri ka hria a, ka ding dat.

"Ngurthani hi tibuai tawh suh, chuti a nih loh chuan i thurûk hi a him rei lo ang, Samuel, ka sawi chu hrereng ang che," tia nu Pianmawii a ṭawng chuan ka insangmar ṭalh ṭalh a, Samuel Pamei thuruk chu nu Pianmawii hian a hria tihna maw? Eng tak ni ang maw!

Tui ka in khawlh khawlh a, inchung room-a chhoh leh pawh huphurh taktein ka huphurh, kawngkhar pui ka hawng a, pawnah ka tei chhuak ta a, gate-ah mi pahnih an duty tih ka hmuh rualin ka inhera inchhungah bawk ka lut leh ta a.

Ka mut a chhuak hlawl si lova tukverh bul chhuatah ka ṭhu ta ringawt a, ka nu leh pa, ka unaupa neihchhun te hmel ka mitthlâah a rawn lang a, ka ṭap leh ta nge nge e.

"Khalaiah khan thawm bengchheng siam reng suh, mu rawh," tia Jeho a rawn ṭawng chuan ka ṭap uar sauh a, "Ngurthan, ka nin chin a thleng palh ang e aw," a tih leh pawhin ka la ṭap zel tho.

Khum aṭanga lo tho chhuakin ka ṭhutna bulah a rawn ding a, "Nupa kan ni tawh a, ka thil tih kha a dik lohna a awm miah lo a nia, ka patea nen khatianga awm dun kha i duh zawk em ni?" Tiin ka bulah a rawn ṭhu thla a, "Min hnaih suh," ṭap chunga ka lo tih veleh, "Ka la hnaih dawn chauh che, nitin ka hnaih zel ang che," tih pahin ka beng bulah a rawn thaw ham ham a, "Hmangaihna tih velah buai suh, tisa mamawhna erawh kan inpe tawn thei," tiin ka nghawngah a rawn chûl a, ka phu zuk.

"Jeho, min kal tîr rawh, eng mah chhuan tur leh chân tur ka nei tawh lo, ka unaupa hnenah min haw tîr rawh," tia beidawng taka ka ṭawng lai chuan, "Thihna nen kan insuihfin tawh a, thihna chauh lo chuan min ṭhen thei lo, theihnghilh tawh suh, mahse, ka thu i awih chuan i zalen theihna tur ka ngaihtuah ang," dam deuh zawka tiin min pawt tho a, "Min khawih suh..min khawih hlek suh," ka lo ti vin hlar.

"Mu rawh le, naktuk hian Bamos farm leh JK farm lam kan indawr dawn a, i kal ve a ngai," tih pahin Sofa lamah min kai phei a, "Ka tihpalh tia sawi ka tum lo, nupa kan ni tak tak a ni tih tharum hmangin ka nemnghetah ngai mai rawh, i dam deuh mahna.." tiin min mut tîr a, puan min sin tir leh thlap hnuah a khum lam a pan ve chauh.

A inthiam lo ve deuh te pawh a ni mahna.

Ka lo ṭap muhil a ni ang, ka harh leh chuan room-ah keimah chauhvin ka lo awm leh tawh. Inhnuai lam aṭanga awki sâng tak ri chuan ka beng a verh zar a. Hmanhmawh takin ka intifai sawk sawk a, inhnuaiah ka chhuk ve ta a.

Hmeichhe pakhat hian naute a lo pawm a, kawngkhar bulah dingin Jeho nen an lo inhnial chu niin!

"Jorhat-ah kîrpui leh rawh, helaiah naute kan mamawh lo," a lo ti khur khur a, a hmeichhia zawk lah chuan, "Jeho, i hrethiam lo a nih kha, hetah, keiman ka enkawl dawn, kum a tlin veleh ka chhuahpui em em ang," a lo ti ve bawk a.

Nu ber a rawn inrawlh a, "Ka fapa, Angelika sawi kha a dik a ni, keiniin kan enkawlpui lohvin tuin nge enkawl ang, rawn luh tîr rawh," tiin ngenngawl tak hian a fapa a bia a, Jeho erawh a lungnih loh hmel hle.

Zawi sup hian, "Lut rawh, sâwn pawm lovin pasal nei ta che, mi hur ang maia tâl kual lo hian, Vansangkimi hnenah chuan lêt leh la i nihlawh ang," tia a ṭawng khur khur lai chuan tukṭhuan kil turin dining table ka pan daih. An chhungkaw buainaah inrawlh ka tum lo hulhual.

Vansangkimi chu tunge ni ta ang? Hriat pawh ka tum buai peih lo.

Naute pawm chungin Angelika a rawn lut a, ani hi chu nu Pianmawii'n a chungchâng min hrilh thuak a, a nau fanu a ni tih pawh ka hria, tuna a naute pawm hi Tleipuii fa a ni bawk.

"Ngurthan, in ei puar ila kan chhuah a ngai a nia," tiin Jeho chuan min rawn melh a, nizana kan boruak ngaihtuahin a kianga kal ka châk hlawl lo.

"Inah ka lo awm thei mai lo em ni, Farm-ah tih tur ka nei lo," ka lo ti a.

"Ka inah alawm kan kal dawn, Farm lam chu a hmanhmawhthlak loh," a ti a, midang an ṭawng ve lo.

Tleipuii erawh a nui sâng a, a fapa hmel a hmu miau a, a hlim rêng ang chu. Anjelika zawkin hau a tuar daih a, Jeho an bum ta phawt chu a nia, engtikah tak hrechhuak ang maw.

"Ngurthan, i chaw ei rawh.." tia Jehoa'n min biak chuan ka thlenga mi pakhat mah ka la khawih lo tih ka hre ve chiah.

Chhâng tawh lem lovin ka ei zui ve mai bawk a.

Jeho chenna hmun kan pan laiin Vansangkimi tia a sawi kha tunge tih hriat tumin ka zawt ta a.

"Ka pa fa bîk a ni a, ka nu shillonga a zin hlanin ka pa khan ngaihzawng a nei a, chumi nena an fa chu a nia, kei aiin a naupang zawk," tiin min hrilh ṭha ve teh mial.

"Tunah khawiah nge a awm?" Ka lo ti vat a.

"Jorhat-ah, an chhungkuain an chêng.." a ti a.

"I pa hi a la dam nge a thi tawh?" Tiin ka zawt ve zel a,  ka laka a chetdan fair viau lo mah se, a kiangah ka la tâl dawn chauh si a, lungawi lo ru chungin lungawi anga ka lan a ngai lawi si.

"Ka pa a thi tawh a, ka patea enkawl seilen ka ni. Vansangi tak hi chu hnuchham inah seilian lovin miin fa atan an la a, ka pa thisen kâi a nih tlat avangin ka zawng chhuak a, pasal a lo nei hman tawh, zalen i duh takzet a nih chuan Vansangin a ṭanpui thei ang che, kei chuan ka patea thu hnial hi ka tih loh tawp tur a ni, ka pa aiawha min enkawl seiliantu anih vangin a thu hnial ka tum lo," a ti duah a.

"I patea nen dan phal loh thil in khawih em ni?" Tia ka zawh veleh a hmel landan a inthlâk hlawk a, "Hriat tam tum suh, tuna i hriat chin bâk hi ngaihven lo la, i him ang," a ti hmuk.

A chenna hmun chu Bamos Farm aṭanga km 4 vel leka hlaah a lo awm a, in ropui leh mawi tia sawi tur a ni lo. A tê fel khar a, a hmanlai raih mai.

Car aṭanga kan chhuk hnuah, "Zanin chu hetah kan riak ang," a ti sup a.

Ka lo ner nasa mai. 

In chhung bungrua a kim ve biai a, pindan hrang pawh awm lovin choka leh sitting room, bedroom a inzawm veka a langtlang huai mai.

"I unaupa Vanlalṭana i be thei ang," tih pahin ka phone min rawn pe a, a Jacket hak lai a phelh leh hnuah, "I mitmenga min hlauhna kha paih bo rawh, khatiang thil kha i duhthlanna a nih loh chuan a thleng nawn tawh lovang," tiin single khumah a ṭhu a, kei erawh ka la ding thung.

Huaisen chhuahin, "Invenna hmang lovin min mutpui a, ka rai vaih chuan a pawi khawp ang," ka lo ti ve hmiah.

"Kei leh nang hian fa kan nei dawn lo, thim fá neih i duh em ni? Thimah i awm a, ênga chhuak tur chuan fa kan nei thiang lo aw, damdawi ei rawh," a'n tiah. Khawia damdawi nge ei se min tih ni. Âtthlâk lutuk.

"Damdawi lei tur pawhin ka chhuak thei lo chu a nih hi.." tiin ṭhutthlengah ka ṭhu thla hnak a, a vawikhat nan za lo zet hian a nui hawk a, rei pawh a ni lo.

"I nuṭapa be phawt mai teh, a sawi dan chuan thla tharah lo zin a tum a, helaiah a lokal tur a ni lo, chhuanlam siamin a lokalna tur dâl rawh," a ti ta a. 

"Lokal se eng nge pawi, a rualin ka haw mai dawn a lawm," ka lo ti sam êt a, min melh run chung hian, "Ani ruala haw i tum a nih chuan in thi dun ang, kei ni lovin, ka patea zawkin a that ang che u, ka sawi hi awih mai rawh," thutak zeta tiin khum a thawhsan zui nghal a.

"I patean min thah lohna turin chêt la mai ta che," ka ti ve fan.

"Samuela thu hnial lo tura zirtir leh fuih ka ni. Ka pa thattu laka phubâ ka lâk hma chuan a hnung ka zui zel ang," a ti nghet churh.

Ka thaw halh a, boruak a vawt si, kan thil sawi lah hi inthah, invau tih vel hlir a ni bawk nen ka kham hluah hluah.

Whisky ûm khat a rawn phawrh a, "Khawpui chhung aiin helai hi a vawt a, hei hian inti lum mai rawh," tih pahin zu no hnih a thli chhuak a, 'Ka in duh lo' ka lo tih chuan, "Min hnial reng lovin in la muhil mai teh.." a ti duh lek.

Nia a sawi ang hian in ila a ni mai alawm, ner sak sak chungin ka lem ve ta a, ani erawh chu eitur siamin a buai hle.

"Eng zat nge ka in dawn?" Tia ka zawh chuan, "I muthilh hma loh chuan in zel rawh," zu han ti a, a ngaihna a awm lo. Amah pawhin a lem hlek hlek a, pa ṭawngtam hi chu a ni lo ve chiang ngawt mai.

Min hnungchhawn zawngin a ding a, a ruangâm sei thlurh chu ka en ve reng a, a dar pharh hlai angreng tak leh a kawng fêk raih te, a tukkhum sam sei lek lek chu a dum ṭha hle a, a khán a sang ve chiang alawm. A hma khan ka phêk en vel mai mai kha a ni a; mipaah pawh pa tak a ni. Nui hmel a pu ngai lo a, hei hian a ti nelawm lo zual.

Ka lu a hai chhalh a, ka mut a chhuak ṭan der.

"Khumah hian mu rawh aw, hawh le," tihpahin ka ṭhutna aṭang chuan min kuah tho a, ani leh ni lo angin a ṭawng dam vei fû.

Min ko ri ka hriat leh chuan khua a var dêt dêt tawh a, "Ngurthan, i harh em? Tho rawh le," tia Jeho aw ka hriat rualin peih lo zet hian ka meng chhuak a, "Ka la mu duh asin," tia ka lo chhân chuan, "A theih tawh loh, i thawh ngei ngei a ngai," a ti leh a. A hmanhmawh hmel phian bawk.

Tukverh bulah a ding a, pawnlam a thlir vang vang hnuah ka bulah a rawn phei a, "Bamos Farm lam aṭangin tlawhtu kan nei dawn a ang riau mai, i kawrlum ha la, i bag pawh ak nghal rawh," tiin lukham bula ka kawrlum dah chu min hâk tîr sawk sawk a, a thil sawi awmzia ka hre dêr lo.

"Enteh, tlawhtu kan neih dawn te chuan hetia lo hmanhmawh vak a ngai em ni?" Ka lo ti vat a, ka rûi a la reh fel chiah lo lehnghal.

"Mikhual ṭha lo, khual chhia, silai hmet puak thei chi ka sawina a ni e," tia min hrilhfiah tâkah chuan ka mengphar âwk a, "Jeho.." ka ti chhuak hliai.

"Hlauthawng mahta che ka venghim dawn che alawm, hetah hian lo awm tlat la, keimah ka nih loh chuan kawngkhar hawng hlek suh ang che," tia a sawi zawh rualin Pistol a phawrh a, kawngkharpui panin a phei ta a. A rawn lehhawi leh a, ka hlauthawng hmel a hmu a ni ngei ang, "Thawm bengchheng siam loh hram i tum dawn nia," ti zawi ruihin pawnlamah a chhuak ta.

Kei erawh hlauthawngin ka lo thaw dêp dêp a, tlanchhuak mai thei turin kawngkhar bulah ka va ding ve ringawt. Silai vawi hnih a puak a, ka phu chiang kher mai, ka âwm dawmin ka la ding rân a, thawm a reh zui vang vang. 

Jeho pasala ka neih aṭang hian ka nun a râlmuang hlawl lo chu a ni ber e.

Ka bag hrui nghet takin ka hum a, tu emaw hian kawngkhar pawnlam aṭangin pawh hawn a rawn tum a, Jeho chu nise min ko ngei ang; kawngkhar a rawn inhawng riai riai a, bân a rawn lawr hmasak avangin na zet hian kawngkhar nen ka khar chilh a, ka nem zui bawk; mipa natuar ṭê ri ka hriat rualin ka ke bulah Pistol a tla bal mai.

Rang takin chhuata Pistol tla chu ka chhar vat a, hlau chung chungin ka hûm ve ta ran a. 

Inbul hnai takah silai a ri leh ta, ka phu dâwrh a, ka Pistol ken lai chu hmet puak mai thei turin ka lek kâng a, ka thâ khúr ru mah se, nêp taka awm hun a ni lo tih ka hrethiam ve; kawngkhar a rawn inhawng ta. Mahse, Jeho hmel chang tak leh hriam hruih ka hmuh tâkah chuan, "I la thi lo a.." tihpahin ka Pistol ken lai chuan ka tin ta a, "Kha thil kha khawi aṭanga i neih nge, paih rang rawh.." tiin min rawn din hnaih a, min chhuhsak nghal hmiah.

"Lokal rawh, helai hmun hi kan chhuahsan vat a ngai, Bamos mi leh sate an lo hnai zel a nia," tiin inhnung lam kawngkhar panin min nam phei dat dat a.

"Engtin nge helai hmunah hian kan kal tih an hriat theih ni!" Ti supin, a phênah zel min awm tir a.

"Jeho..engtin nge kan tih dawn," tia hlauthawng ru taka ka lo zawh veleh, "I kut kha ka vawn theih nan min rawn pe rawh le," a ti nghut a, a sawi zawh rualin ka kut dinglam a rawn hum a, nghet taka hmer chung hian, "Thih i duh loh avangin pasalah min nei a, i himna tur ka ngaihtuah ang, eng pawh ka chungah thleng se, hnunglam hawi lovin tlân zel ang che," nghet churha a tih rualin kan piah hla tak lam a thlir a, ka kut a vawnna pawh a thlah hek lo.

"Ngurthan, keini chu pahnih chauh kan ni a, ka Pistol-ah a mu pahnih chiah a awm tawh bawk, anni lam kha engzata tam nge an nih ka hre si lova, him dam taka i awm hma chu i hmalamah zêl tlan char char ang che," tia min hrilh leh chuan, "Ni lo, i tel lovin ka kal duh lo, ka kal dawn lo," ka lo ti ve tlat.

Min melh zawk a, a mitmenga min ngaihtuahna leh min duatna rawn lang zuai chu ka chhiar thiam ve. Mahse, a rei lo êm a, a hawisawn daih bawk si.

"Vawi thum ka chhiar veleh i tlan dawn nia," a ti sup a, ka kut a hmer nghet sauh bawk.

"Jeho, kan pahnihin tlân mai ang, nangmahin ka hnutchhiah ngawt thei lo che," ka la ti ve fan.

"Ka thusawi awih rawh, tun ṭum chauh chu ka thu awih hram rawh aw, i tlan hmasa anga i hnungah ka rawn zui dawn che alawm," hnial theih miah lova tiin min vawnna a thlah riai riai a. 

Ka hlauhthawn em avangin a mitah ka en kalh a, mit zim san chung hian, "I dam a ngai, damna duhin a ni lawm ni pasal atana min neih, hnungtawlh suh.." tia a sawi zawh rual chiahin min nam det a.

"Pakhat, pahnih, pathum," tia a chhiar zawh chuan hnunglam hawi tawh miah lovin ka tlân ta a. Hnial eng ang mah ila, min kal luih tîr dawn tih ka hre ve kar.

Ni e, nungdama la awm ve ka duh miau si a, hnunglam hawi lêt miah lova ka tlân lai chuan Silai vawi hnih a puak leh a, ding duh lovin ka la tlan zel a, ka hah tawh êm avangin ka ding ta nge nge a. Pistol puak ri ka hre zui leh zat a, min mawlhtu awm miau hek, ka inher nghal zawk a, Jeho tlu tur ka va hmu hman chiah. 15ft vel zetin kan inhlat a, an kâp fuh tih hrilh hranpa ka ngai lo. 

"Lalpa," tia phun chhuak sap chung hian ka theihpatawpa chakin Jeho lamah ka tlan kír a, a hnung lamah mi pathumin an rawn ûm mek a, hlauhna pawh ka nei tawh bîk lo, Jehomalsawmkima hi a thi tur a ni lo. Ka himna a ngaihtuah vangin hnung a dâwl a, a heti leh si.

Amah umtute'n min hmuh reng laiin Jeho bulah ka ṭhu sawp hnawk a, ko mawlh mawlh pah hian a nghâwng vel ka dap a, a mar a la phu dat dat. A maimitchhing tlat thung a, "Jeho..thi suh aw..thi miah suh," ka ti mial mial a, ka mittui lo far ve chhen hi ka ning. Ka lakah sualin nunrawng hle mah se, thi tur atan chuan ka phal miah lo tih ka inhria.

A dar veilamah an kâp fuh tih ka hre ta bawk a, kan awmna aṭanga hla loteah mi pathumin Pistol-in min tin reng a, Jeho a thi nge thi lo tih ngaichâng niawm fahran hian an ding chat bawk. Kei erawh min kah tum hmel an pu lo.

Jeho beng bulah, "Ṭang fan fan rawh aw," ka ti sap a.

Zawitê hian, "Ka harh a nia, anni ho sawn ka thi emaw an tih hma chuan che sawn miah suh," a rawn ti ta a. A âw aṭangin a hliam a na thawkhat ang tih a hriat reng. Mahse, a la thi lo tal alawm.

Ṭap chungin Jeho chu ka ko lui ngat ngat a, Bamos Farm lam mite an kal kian hma loh chuan chhum lo chat lovin ka ko zel a, a che eih lo.

Mi pathumte an kal liam tâk hnuah, "I harh em? an kal sawn tawh a nia," tiin ka kun hniam a, min chhâng tawh lo. A mar erawh a la awm.

A Jacket hak lai ipte ka dap vat a, ka rin ang chiahin a phone a lo awm a, rang takin Samuel Pamei ka phone ta a, duhthlan tur ka nei tlat si lo, Jeho an kah thu leh Ambulance kan mamawh thu ka hrilh a, "Tikhan lo awmpui la, Farm lam aṭangin Buatsaiha ka rawn tlan tîr ang," tiin kan inbiakna a titawp ta a.

A dar hliam aṭanga thisen chhuak chu ka theih ang angin ka hup phui a, nikhua a hre tawh lo. Eng anga sual leh tualthah hmang pawh nise kei min humhim tuma a tawrhna hian ka thinlung a tawk che lo thei lo. Jeho tan eng teh ual ka ni lo, thihna lak aṭangin vawi hnih min chhanna a ni ta.

Minute sawmhnih hnu velah Buatsaiha a rawn tlan thleng ta a, Gurkha bawk kha a rawn khalh chhuak leh a, Jeho motora kan hlan chhung a rei hle mai, a rit si a, hliam a nei bawk nen a zawi vek tawh a, harsa takin kan hlâng chho thei hrâm.

"Madam, amah kâptu hmel i hmu hman em?" Tia Buatsaiha'n min zawh chuan ka hmu loh thu leh hnunglam aṭangin an kâp tih ka hrilh a, a rum dut ringawt.

JK Farm pêngah Ambulance in min lo nghâk tawh a, Samuel nge nge, thil a ti thei teh e.

Jeho a harh zeuh zeuh a, rem lo zetin ka âwmah ka kuah bei a, a sam chulsak pahin, "I tel lo chuan ka hmabâk a thim zual a nia, harh rawh aw.." tiin ka be sap sap a.

Thei leh thei lo hian a rawn meng a, a kut veilam ka humna chu a rawn hmer ve hrâm hrâm a, ka ṭawng a la hre thei tih ka hriatna hian min va tilawm si êm!

"Chhel takin aw, i dam chhuah theih nan kei hian ka theihtawp ka chhuah ang, i nupui hian i thih ka remti dawn lo," nghet charhin ka ti a, ṭawng chi ziazâng a ni tawh lo.

Super Care Hospital kawtah Tleipuii, Rishan leh nu Pianmawii an lo awm a, Samuel Pamei hmel ka hmu tel tho.

Jeho pawh hospital chhungah an nawr lût tawh a, "Ngurthan, ka fapa hi thih tir suh," tia nu Pianmawii ṭawng chu ka chhâng lo hrim hrim. Samuel Pamei pawhin, meng hnuai ruih chung hian, "I pasal tan theihtawp i chhuah ka beisei," a ti ve sup.

"Ani tawrh ai hi nang hian tuar zawk la ṭha tur a nia," ka ti ve ngat. Min melh run run ringawt.

Laljehomalsawmkima tharum hmanga ka thianghlimna min lâksaktu leh tihluihnaa nupuia min neitu hian hliampui a tuar a, a patea hospital-ah kei a nupui Dr.Ngurthantluangi hian ka zai dawn chu a ni si a, ka mawhphurhna a sâng ngei mai.

Tleipuii a ṭap fap fap a, an zavaiin an hlauthawng tih ka hria, mihring ve tho ka nih avangin ka lainat a; mahse, beiseiawmin eng mah ka sawi duh lo, dam leh thih hi kan thu a nih loh zia ka hrechiang ve êm asin.

A dâr veilamah silai mu a tâng a, chumi tih loh hliam dang a nei lo. 

Jeho nikhua hre lova a awm chiah hian ka rilru put hmang a inthlâk dâwrh. A chhan chu a thlazar hnuaiah hian ka him tih ka hriat chhuah tâk vang a ni.

Ani hlutna hre tur leh atana ka hlutna a hriat chhuah ve theih nan, a kiangah ka chêng zel ang a, a patea lak aṭang hian tâl chhuah tîr dan kawng ka zawng dawn a ni. 

Note: He thawnthu hi kum 2018 khan ziak tura request ka dawng tawh a, ka irâwm chhuak hlira thâikawi ṭhin ka nih avangin ka ngaihsak lutuk lo. Tin, he thawnthu ka ziah dawn apiang hian rokhawlhna ka nei ziah bawk a; mahse, tun hnai hian min request tu lam te'n min nawr nasa si a, a plot duansa min hrilh angin ka ziak ta chu a ni a.

Post Comment ṭhenkhatah a movie ka en tawh tih te ka hmu nawk a, request ka ziah awm chhun a nih vangin ka tui lo lek lek. Eng pawh nise keima irâwm chhuakin ka her danglam daih dawn, in chân loh khânah ka rawn chhuak keuh ang. 

Chapter 5 aṭang chuan request cancell-in ka thluak ami ka rawn chhunzawm dawn tih ka rawn sawi e. 

240223

-B®®

B+>[BeckirafARenthleI]<+®®