5.24-89 [A Becky Rafa Story]

5. 24-89 

Ziaktu: Becky Rafa Renthlei

[Recap]

Tleipuii a ṭap fap fap a, an zavaiin an hlauthawng tih ka hria, mihring ve tho ka nih avangin ka lainat a; mahse, beisei awmin eng mah ka sawi duh lo, dam leh thih hi kan thu a nih loh zia ka hrechiang ve êm asin.

A dâr veilamah silai mu a tâng a, chumi tih loh hliam dang a nei lo. 

Jeho nikhua hre lova a awm chiah hian ka rilru put hmang a inthlâk dâwrh. A chhan chu a thlazar hnuaiah hian ka him tih ka hriat chhuah tâk vang a ni.

Ani hlutna hre tur leh atana ka hlutna a hriat chhuah ve theih nan, a kiangah ka chêng zel ang a, a patea lak aṭang hian tâl chhuah tîr dan kawng ka zawng dawn a ni.

-B®®

Dârkâr thum hnuah tluang takin Jeho kan zai zo a, amah a la harh lo thung. Doctor ka nih hnuah ka laina hnai ka zai hmasak ber chu ka pasal Laljehomalsawmkima hi a ni tlat.

A patea duhdanin Cabin-ah an dah a, a nupui ka nih miau avang leh ka thawhna Hospital a nih vangin keiman ka riahpui dawn a, a dik tak chuan Jeho kianga awm tam hi ka duh ber, a chhungte tumah nêl tak tak ka nei si lo. 

"Ka fapa rilru hneha kei min hlat tîr te kha i lo tum ang e, ka hnen aṭang hian lâk hran tum hlek suh ang che," tiin Samuela'n min vau lâwk a, "Lungngai suh, ani nen fa kan han nei ang a, a rilru a dang zak mai ang," ka lo ti ve hmiah.

"Ngurthantluang, ka fapa nen nupa nun in hmang tawh a maw?" A ti khur khur a, zâm map lo hian, "Min pawngsual tum lo la chuan a hmaa kan awm ang khan nupa satliah kan ni mai tur a ni a; mahse, ka laka i thil tum tenawm zet avang khan Jeho nen pumkhat kan nih phah ta a ni," tiin ka nui lui hak a, min melh rûn chung hian, "Hospital a chhuahsan rualin nang hi ka bân ang che," a ti leh hmuk a, a thinrim hle tih a hriat mai.

"Ê, min bân mawlh rawh, Mizoramah i fapa ka hruai chhoh theih nan a rilru hneh ka tum ang," ka ti ve zel a, min ben a châk hmel zek zek. Hospital Cabin chhung ni lo se chuan kut min thlâk tawhin a nia ka rin.

Nu Pianmawii leh Tleipuii pawh an rawn lût ve ta a, "Ngurthan, i duh chuan lo va haw la, zan riak turin i lokal leh mai dawn a lawm," tia Jeho nuin min biak chuan lu thing nar nar chung hian, "A harh hma loh chuan khawiah mah kalsan ka tum lo," ka ti tlang hmiah.

Tleipuiin min lo kheuh zeuh a, pawnlamah inbiak a duh thu min hrilh ru sap a, a nu hnenah, "U Ngurthani hi Coffee ka inpui lawk dawn aw.." tiin a hrilh a, a lo remti ve mai bawk a.

Coffee Bar kan thlen hnuah, "Tun hi i tan tlanchhuahna hun remchang a ni, ka u a che thei lo a, in lamah tu vak mah an awm lo a, ka patea leh Buatsaiha nise ka û kâptu chhui turin an kal dawn bawk a, i duh chuan ka pui ang che," a ti ta a.

"Ni lo ve, dan ang thlapa ka pasal a ni a, ka dam khawchhuah theih nana min puitu i u hi phatsan ka tum lo, ka hmangaihin ka duh ta tihna a ni lo a, amaherawh chu, ka kalsan dawn a nih pawhin dam ṭha phawt rawh se," ka ti dam thlap a, mak min tih hmel tak hian, "Tun bâk hun remchang i nei tawh lo maithei asin.." a la ti hrâm.

"Tleipui, i u hian nun pangngai a neih theihna turin ka pui dawn, min ring rawh, ka kal dawn ta a nih pawhin a phalna thlapa kal ka tum," tum ruh tih hriat taka ka ṭawng leh chuan a thaw halh a, "Aw le, i thu thu le, kei chuan kan bulah awm reng la tih hi ka duh, mahse, ka u mizia ka hrechiang a, dinhmun hlauhawma i awm ka duh lo a ni," tiin ka kutah a rawn vuan a.

"Naute chungchang a hriat hunah i lakah a lungawi dawn lo a nia," a ti leh a.

"Ka hrilh dawn hleinem, a hre lo ang." Ka ti sap a, rilru hah hmel takin a thaw hliai a, "I rilru thlâka Aizawla haw i duh chuan min hrilh vat dawn nia," tia a sawi zawh hnuah Cabin lam panin kan inzui phei leh ta a, kan piah hla deuh hleka Samuel Pamei leh kan team leader ding dun chu ka hmu reng. A duh leh min bân se la, thawhna tur dang ka zawng leh mai ang.

Jeho tun hma nun pakhat mah hriat ka nei lo. Min thah tuma min vau lai khan khawngaih ka dîl a, vawikhat mah a patea thu hnial ngai lo a ni nachungin kei min humin a nupui ka lo ni ta a, kan inneih dan chu eng pawh ni rawh se; ka tana mipa hmasa ber a ni tlat si hi a ni. 'Ka Laljehomalsawmkima' tiin ka ngaihtuah a, ka nui hak. Hming nei common lova..

"Tui ka in duh.." tiin a rawn meng chhuak a.

"Jeho, tunah chuan tui in kan la phal lo a, a theih veleh keiman ka pe dawn che nia," tiin a samah ka chûl a, "Hetah i la awm elaw, min buaipui duh tawh suh," a ti sup.

"I kianga ka awm lohvin khawiah nge ka awm ang?" Tia ka lo chhân chuan, "An kâp ve lo che a nih a, him dam taka i awm a nih si chuan eng ati nge Aizawlah i haw loh?" Tiin min zâwt a, ani hi a la harh chiang lo a ni ngei ang.

"I harh em?" Ka ti leh rih.

"Harh e, helai hmun aṭang hian min hruai chhuak ta che, ina haw ka duh," a ti zawi ruih a, chek tlak tlak chung hian a theih rih loh thu leh a cham a thlen hma chuan kan chhuak dawn lo tih ka hrilh a, ner sawk chung hian, "Ka thu thu a ni, damdawi ina awm ka duh reng reng lo," a ti hmuk a, a va buaithlâk e.

"Zaipui i tuar a, chuti maia haw chi a ni lo, ka thu awih rawh.." tih pahin a Venflon vuahah damdawi ka thun a, "Ngurthan, engvanga min kalsan lo nge i nih, i tan hun remchang tam tak a awm reng si a," tih pahin ka mitah chiang tak hian min en a, hnuailam bih pahin, "Min venghimtu i ni a, nangmah avanga la dam ka ni, i chhiat ber laia kalsan che ka tum lo," ka ti ve ta a, a mitmenga mak tihna lo lang chhuak pawh ka hmu hman.

"He hmun aṭang hian min hruai chhuak phawt mai teh, min kalsan dawn loh chuan in lamah in enkawl zawk ang," a ti leh tu tu tawh.

"A theih loh.." tih chiah ka sawi. 

Chu veleh thei leh thei lo hian thawh chhuah a tum ta mai, "Min hruai chhuak dawn lo a nih chuan keimaha chhuah ka tum mai ang, ka patea ko rawh.." a ti vin hlur a, a rawn harh ve chiah a, a tawrhhlelhawm ṭan leh pang tawh.

A luhlul si a, chhuah phal lo mahila a tum leh tlat dawn tih ka hriat avangin Cabin kawngkhar chhunglamah rang takin ka va kalh sawk sawk a, thawh chhuah tuma a insiamrem lai tak chuan khumah ka lawn a, "Zanin chiah kan riak ang a, naktukah chhuah kan dil dawn nia," tih pahin a kâwngah ka kuah a, keima duh thu renga a taksa ka vawikhat khawihna a nih avangin a insangmar nghal ṭawlh ṭawlh.

"Mu ang, ka lo mutpui rih ang che," tih pahin rem lo deuha a ṭhu chu ka melh a, a zangthal zawnga a mut theih rih loh avangin, saisîrin ka mut ṭhat tîr a, min hnial lo teh tlat. 

Kei pawh a kiangah ka inthawlh a, kawr ha thei a la nih lo bawk a, a taksa ruak kûng chu ka kut lâwngin ka kuah ran a, nui lek lek chung hian, "I duhnaah chuan i huaisen ve ta hle mai," a ti zawi sup a, "Nupa kan ni alawm, i taksa kuah turin dikna ka nei," ka lo ti ve ngei.

Rei lote hnuah a thâwk dan a danglama a muhil leh ta tih ka hre mai. 

Dimtê hian ka thawhsan a, a che eih lo. A nu leh Tleipuii phone number takngial pawh ka la nei lo a, tui taka Jeho muhil chu thlirin, "I nun dan hi nuam i tih ka ring bik lo, nun pangngai tak i neih theih nan kei hian ka pui ang che," ti rilruin Cabin kawngkhar ka hawng a, ka u Vanlalṭana biak ka tum ta a.

Zan dâr riat a ri dêk dêk chauh a ni a, vawi thum zet a ring ral ṭep tihah min rawn chhâng ve hram.

"Mami, eng nge ni ta?" A rawn ti a.

"Shillong-ah lokal i tum tih Jeho khan a sawi a, lokal chu i tum tak tak em?" Tiin ka zawt ta a.

"Nangmah leh nangmah i inbuaipui thei ta a ni ang e, min mamawh lo em mai, i pasal nelawm loh zet kha ka ngainat zawng a ni lo, i hmangaih em?" Tiin chang fak hian min zawt a.

"Mam, nakinah hmaichhanah engkim kan sawi dun dawn nia, ka haw lo che a, hmana ka unaupa ka hmangaih kha i la ni reng, remchang hmasaberah lo haw ka tum dawn nia," ka lo ti a.

"Tun hnaia i awm dan hi hriatthiam a har ka ti. Doctor hlawhtling tak i nih theih nan theihtawp ka chhuahpui lo che em ni?" Tia a ṭawng lai chuan rum dat ri ka hria a, ka lehhawi vat. 

Jeho chu ka piah lawkah bang nghengin a lo ding a, a hmai dâng deuh leh a inseh ruh ṭeuh dânah a lawm lo tih a hriat hliah hliah.

"Mam, ka pasal a damlo a, ka thawhna hospital-ah admit a nih vangin zanin kan riak dawna ka rawn be leh ang che," tih pahin min chhânna pawh nghâk lo hian phone ka dah ta rih a.

Jeho chuan ngun deuh hian min rawn melh a, inthlahrung ru angreng takin ka pan phei ta a. 

Kiai suk chung hian, "I nuṭapa chuan eng nge a sawi?" Tiin min zawt a, kan inbiak dan ka sawi thuak thuak hnuah, "Zanin hian hospital chhuahsan ka duh, ka patea ka hrilh tawh a, insiam rawh le, Rishan a lo thleng ṭep ang," tiin ka dârah a rawn vuan a, min rin chhan chungin room chhungah kan lut leh ta.

"Ka thusawi zawm hi eng ati nge i hreh em em? a zaitu che ka ni a, i nat dan leh i hliam tawrh dan hrechiangtu ka ni asin, zan khat lek riah i tan a harsa viau em ni?" Tiin thinrim insum taka ka ṭawng chhuah chuan, "Thu min pe suh, helai hmun hi ka tân a him lo, tun hun rei lotea ka muthilh chhung pawhin Cabin i chhuahsan nghal a ni a, Ngurthan, nang ngei pawh hian zalen i duh a, damdawi hmangin min that lovang tih hriat a ni lo," zu han ti a.

"Malsawmkim leh..kei hian ka thah duh che i ring a maw?" Tiin khuma a ṭhu awn duai chu ka va din chilh a, "Kalsan duh che ila, thah tum tak tak che ni bawk ila, tunah hian ka ti daih tawh ang, nang ang mihring kha ka ni ve lo," ka lo ti ve sak sak a.

"Bengchheng vak vak suh, ka beng a ngawng lo," a ti hmuk a.

"A nih chuan i duh dan ang ang chuan awm rawh, sawi tur ka nei tawh lo, damdawi in i chhuahsan duh a nih pawhin chhuak la, engtin pawh awm la, a mawh ka phur lovang," tia ka sawi zawh rualin phone a hmang zui zat a, mahni tana ṭha tur pawh hre lova luhlul a chhuah tlat hi ka huat tawk a tling khawp mai.

Chumi hnu chuan Rishan leh Buatsaiha an lo thleng a, mi tih loh dan angin zan dar sawm velah a ruk deuh hlek in Super care hospital kan chhuahsan ta a, ṭawngkam khat mah chhâk chhuak lovin an chenna hmun kan thleng ta a. A patea hmel erawh hmuh tur a awm lo.

Tiang em ema mihring tuarchhel leh tum ruh hi an vâng viau ang, Jeho erawh mipa danglam tak a ni tih ka lo hre daih tawh.

Kan nupa room kan lut chiah a, ka mutna ṭhin Sofa kha a lo awm tawh miah lo! 

Jeho ka zâwt vat a, a hriat loh thuin min chhâng a, "Sofa a awm loh te chuan khawiah nge ka mut ve ang a?" ka tih chuan, a khum zau zet melh pahin, "Hetah hian i mu thei reng alawm," tiin chauh hmel takin khumah saisir bawkin a mu leh ta a.

"I kiangah ka mu dawn reng reng lo," ka lo ti hlar a, mahse, min chhâng tawh lo, a maimitchhing daih. Ni e, a chau ngawt ang, engtin nge na nei lo ang hmaka a lan zel theih zawk ni.

Chhuatah mutna ka phah a, Jeho hnungchhawn zawngin ka mu ve ta a.

Kâr khat hnuah.

Nitin inlamah Jeho hliam enkawlin hun ka hmang a, Tleipuii fapa kha Angelika fa angin kan bulah a awm ta bawk a, in hnuai lam room an hman avangin an thawm ka hre lutuk lo. Ka thawhna hospital-pawhin min la bân bîk em lo chu a nia, ka nung ve mawp mawp a ni ber mai.

"Ngurthantluang," tia vin zeta min kotu chu tudang ni lovin Jeho a lo ni a, thinrim lutuk tih hriat tak hian Tleipuii room aṭangin a rawn chhuak a, kei chokaah bawnghnute ka lo in thung.

"I insawi fiahna a ṭhat viau loh chuan kei hi ka ngawi ral mai mai dawn lo a nia," a ti leh khur khur a, a farnu a ko zui tuar tuar bawk a, ṭi dêka Tleipuii lo chhuak chu ka melh kar a, a u a hlau tih a hriat ngawih ngawih.

"Mam..." a ti sap ringawt.

"Le, sawi rawh le, he naute hi tu fa nge, dâwt min hrilh vaih chuan..." tiin Tleipuii a melh ngur a, kut êm chu a la thlâk lo.

"Angelika fa anga sawi kha tum duh suh u, a ni lo tih ka hre chhuak tawh bawk, Laltleipui, tunge he naute pa hi sawi rawh.." vin lutuka a tih leh chuan nu Pianmawii a rawn inrawlh a, "Ka fapa, a nih tur ang a ni zo tawh a, i farnuin sâwn a pawm a, khawngaihin a lakah zah ngai hrâm rawh.." dam thlapin a lo ti a.

Chuta Jeho thinrim inhrosa thawm chu râpthlâk tak a ni. Pangpar khawina bur lian chu chhuatah a paih keh vek a, a farnu nghâwngah rêkin, "Hetianga tâl mai mai tur hian ka enkawl seilian che em ni? Thi la i tan a nuam zawk ang," tiin a thaw kâwk kâwk a, ka inrawlh lo thei ta lo.

"Jeho..ni lo..khatiangin ti suh.." tiin hnunglam aṭangin a kâwngah ka va kuah a, Tleipuii mittui tling pam chu ka lainat takzet.

"Ngurthantluang, nang pawh hian i hriatpui tiraw?" Tiin a farnu lak aṭanga kalsawnin kei min hmachhawn ve ta thung.

"Sawi rawh, sawi ta che. Kei min bumin ani fa hi thup bo theih i inring amaw?" Tia rum lutuk a min melh lai chuan Tleipuii a lo ṭap khur ngat ngat a, a nu pawh a ṭawng ngam tawh îk lo.

"Ngurthantluang, min rawn zui rawh," ti nghutin kan room lamah a chho zui nghal a, nu Pianmawii leh Tleipuiin min khawngaih hmel taka min en chuan, "Hlauthawng mahta che u, ka sawi fel thei em em ang ka pasal a nia lawm," tiin ka la ṭawng thlamuan veleh chhawng.

Kan room chhungah a vei nghut nghut a, "Engtik aṭangin nge ka farnu rai thu hi i hriat?" Tiin min zawt a, ka lo ngawi reng ringawt.

"Sawi vat mai rawh, nang hian nau i neih tîr tih pawh ka hre vek tawh a nia, ka lakah thurûk engzata tam nge i neih. Laltleipuiin nau a pai tih min hrilh hriat chu a har viau em ni? Ka hriat loh hlanin in lo inbuaipui a, kei hi min bum theih i inring reng reng amaw?" Tih pahin bangah min nem bet a, min that hreh lo tih a hriat reng mai.

"Jeho, i farnu rilru turte hi dâwn ve ta che, a râi chhung zawnga i hre lo kha i demawm daih zawk, engtin nge i hriat loh theih?" Ka ti ve ngat a.

Rum lutuka min melh leh kâwkin, "Ka farnu hi thi leh thau pawlha ka enkawl seilen a ni asin, a fa paina pa hming sawi tur pawh hre lo khawpa mi tenawm a nih hi ka ring thei lo, nang lahin ka buaipui e te i lo ti ve khanglang a," tiin bang a chum bur a, a hmai a sen awp awp bawk.

"Ka buaipui lohvin tuin nge buaipui se i tih, na tak tuara a awm lai khan ka en liam mai mai ang maw, i hresual a ni, i farnu a ni emaw mi hrang pawh ni rawh se, doctor ka nih angin mi natuar lai ka en liam tawp lovang, a nih leh tikhan a nau vei lai khan buaipui duh lovin thi se i duh zawk em ni?" Ka ti ve ta phiar phiar a.

"Min hrilh thei reng alawm, a ruk a râla buaipui lo khan min hrilh tur i ni asin. Ka rinna che i ti chhe zo ta a ni e, tunah hian insiam la, Mizoramah haw rawh, ka thlah ang che," a ti hmiah. Kut êm chu min thlâk bik lo.

"Jeho, hetah hna ka nei tih i hriat ve vek kha.." dam deuh zawka ka ṭawng chuan, "I hna chhete kha eng atan mah ka ti lo, ka hnena i lo awm aṭang hian buaina tam takin min belhchhah tawh, kal la, ka hmuh phâkah rawn inlan tawh suh ang che," tiin khum lam a pan a, a dar hliam a la dam fel lo tih ka hriat sak a, ka enkawlna a mamawhzia a inhre der si lo.

"Ka kal dawn lo, chuti maiin ka hna hi bansan ka tum lo a nia," tih pahin inhnuai lamah chhuk ka tum a, "I haw dawn khawp mai, ka hnaivaia awm atan ka duh lo che, i hna chungchângah buai a ngai lo ang, ka rawn tifel ang a, Mizoramah hna dang i hmu lutuk ang," tiin kawngkhar bula ka ding chu min rawn pan a, "Kha hengho hi i mamawh dawn,"  tiin ka thil pawimawh a kawl ho kha ka bag chawpin min rawn pe a, ka lo ban ve mai.

Inhnuaiah min chhukpui a, a chè hrim hrim hi a la khawr ru viau bawk.

Inhnuai a lo ruak hiau a, Rishan erawh pawnah a lo ding thung a, "Madam hi counter thleng ka thlah dawn a, ka farnu saw lo veng ṭha ang che," tia a hrilh hnuah, "Lut rawh" tiin ka luh theih nan Car kawngkhar a hawng zui zat a, ka lo ding khawng reng.

"Ngurthan, ka sawi tam dawn lo, lut rawh.." tiin amah pawh driver seat-ah a ṭhu lut nghal a, min haw tir a tum tak tak em mawni le! Car khalh a la tum lehnghal a, lawm tak leh lungawi taka kal mai tur ka nih laiin ka lung a âwi miah thung si lo hi a mak a ni. Tlan bosan tumin vawi hnih ka bei a, ka hlawhchham a, tunah a phalna thlapa min kal tîr a tumin ka duh leh si lo. Kei pawh hi ka â tawh a nih ber hi.

Sumo Counter lam kan pan laiin, "I thawmhnaw leh i bungrua chu i u Vanlalṭana ka lo thawn ang, ka nupui i la ni reng a, ka farnu chungchâng ka chin fel hunah inṭhenna ka lo buaipui dawn nia," a ti ta a. Ka la ngawi reng.

"Jeho, min kal tîr a nih chuan i patea mi thah chungchâng kha police ka hrilh ngei ngei ang," tiin ka lo vau ve kha kha a, a nui lui hawk a, "I hrilh dawn lo tih ka hria alawm, buaina dangin a umzui che i duh loh chuan i ngawih mai a ngai," inring tawk zeta tiin Car a khalh par par a, ka va ngei tak.

"Ka nun i tihchhiat man hi engtikah emaw chuan i la rûl ngei ang," tiin beidawng tak hian ka thaw hak a, "Phun nawi reng lo la, ka lak aṭanga i tâlchhuak tur hi lawm hle la a ni mai," tih chiah a sawi. 

Eng ati nge Jeho kalsan hi ka hreh tâk em em mai le, inṭhen ka duhin kalsan kha ka duh ngawih ngawih ṭhin a ni si a, ka rilru puthmang pawh hi ka hrethiam nek tawh lo e.

Counter kan thleng a, pawisa tam angreng tak ka bag-ah a rawn hnawh lut a, "Ka phone number i duh chuan ka pe thei che.." a ti tawi tuk a, kha leh chen thlakhat aia rei kan chengduna a phone number pawh ka lo nei miah lo chu a nia, a va mak bawk ve le.

"Kal rawh le, Ngurthan, hnunglam hawi lêt lovin i hna, i ngaihsan leh bansan i hreh em em i chhunzawm theih nan kal rawh le," tiin Car nghengin a ding âwn deuh a, ka ṭah a chhuak ringawt.

Jehomalsawmkima hmel ka en vang vang a, chîk zet hian min lo en ve bawk a, a hmelah eng nge a ngaihtuah hriat a har ngang mai. Kei erawh ka hnuk a ulh titih.

Ka inluah aṭanga min hruai chhuah hun lai te, reilote chhunga kan chendun te leh tharum hmanga ka thianghlimna min laksak zan te, ka nun chhanhim tuma min ngaihsak lai zawng zawng nen lam ka mitthlâah a rawn lang a, kawngpui ka kân ṭan chiah tihin ka va hawi lêt leh hrâm.

Mit zim san chung hian min lo la thlir reng a, ka pen lui thei ngang lo, ka bag hrui nghet taka vuanin ka tlan lêt leh ta a, a bul ka thlen dawnah a bân pahnih a rawn phar chhuak a, min lo kuah chat.

"Jeho.." ṭah aw ṭiaua a hming ka lam chuan a âwm nghengin min kuah a, ka samah fawpin, "Ka kal tîr dawn lo rêng che a ni, Mate.." tiin nghet tak hian min kuah a, ka lo kuah let ve vat.

Ka khabeah dawmin, "I rilru ka en chhin a nih kha, nang leh kei hi thihna chauh lo chuan min ṭhen hrang dawn lo tih ka sawi lovem ni? Ka nupui dik tak i ni a, eng harsatna pawh tâwk dawn mah ila, ka hlata i awm ka phal ngai lovang.." nghet churhin a ti ta a. 

Ka lo nui hak a, ka mitah chiang fahrana min enin, ''Ka rilru ang hi i pu ve nge pu ve lo ka hriat theih nan hetianga ka chêt hi a ngai rêng a ni," nui suk chunga tiin min kuahna a thlah a, kan inneih zungbun ka bunlai chu a tawk zauh a, "Jeho tan bun zel ang che," tiin car kawngkhar a hawng a, ka ṭhut luh fel hnuah amah pawh a rawn ṭhu lut a.

La nui reng chung hian, "I in luahah vawiin chu ka duat ang che," a ti a, ka lâi ringawt.

"I dar kha a la na viau em?" Tiin ka zawt daih a, koki san âk chung hian, "Ka nupuiin dim leh duat taka a enkawl miau avangin a dam chak khawp mai," tia nui ruh ruh chung hian a kut dinglamin ka mal a tawk zauh a, "Super care hospital-ah pawh i thawk zawm zel ang," a ti ta a, ka va han lawm tak.

Ka in luah zau fahran lovah kan lut a, a farnu chungchâng min zawt leh ta.

"Engtikah nge Tleipuii naupai kha i hriat chhuah a, i buaipui?" A ti a.

Dik takin ka hrilh ve mai.

"I nu min ngenna ka zah em avangin inhnuai room ruakah khan kan inbuaipui a, i farnu nun hi a chêp asin, khawngaihin a lakah sual chhuah lo hram rawh aw," dam thlapin ka ti a. 

"A fa paina pa hriat chhuah i lo tum ve dawn nia, Ngurthan.." tiin a ngawi leh daih a, ka lo melh vat.

"Ka pa thattu ka hriat chhuah hma chuan ka hna hi ka bânsan thei dawn lo a, ka patea thu ka zawm rih a ngai a, ani kha i hua tih ka hria, mahse, ka kianga i awm chhung chuan i him zel ang," tih pahin a jacket hak lai a hlip a, ka khumah ṭhuin min en leh vung vung a. 

"Lokal teh mate.." a ti sup a, nelawm takin lang lo mah se, min koh duat hian a nuam ka ti.

Thuawih takin ka pan hnai a, a malchungah min pawt ṭhu nghal a, "Min hmangaih turin ka ti dawn lo che, mahse, keini pahnih inkârah hian induh tawnna erawh a awm a, chu chu kan hre ve ve bawk," tih pahin ka biang a tawk zeuh a. 

Ka hmai sen ap ap chu a kut phah hlai hlupa chûl kual dan dan chung hian, "Dan phal loh chu ka ti hauh lo; nakinah a hun ka tih hunah engkim i la hre vek ang," tia a sawi zawh hnuah, "I duh thlanna a nih chuan tunah hian hmangaihna chenpui che ka duh," tlang hrêk hrâwkin a ti leh hmiah. 

"I la dam ṭhat loh kha.." tih pahin khumah ka lawn a.

"Ka dam ṭha nge ṭha lo i hriat duh chuan i fiah thei ang aw doctor?" Nui suk suk chunga tiin a thawmhnaw inbel lai a hlip a, "I thawmhnaw inbel chung kha chuan ka thil tih tur hi a tih theih dawn loh aw.." a la ti zui.

A saruakna chiang taka ka hmuh leh tâkah chuan ka zak lutuka ka maimitchhing tawp.

"Zak duh suh, i pasal ka ni" a ti thum dút a, ka thawmhnaw inbel lai ka hlip ve ta nge nge e, tun huna ka tlanchhia a nih chuan engtikah mah inpawh takin kan awm thei ngai dawn lo tih ka hriat vangin zak chung chungin a hmaah ka inphelh ve ta.

Dim leh duat taka min fawh pawhin ka thiam ang tawkin ka lo chhâng ve zel a, a hmaa dim lo taka min sawngbawlna nen chuan lei leh van ang hlauh a ni. Ka hlauhthawnnate dah kiangin ka pasal Laljehomalsawmkima'n a ta dik taka min siam nawn leh tâkah chuan ka chhoh melh a, a hmel hriam leh pa hrâk chu nidang zawng aiin ka hmu hmelṭha. 

"Ka ta chu ka venghimin ka enkawl ṭhin, Ngurthantluangi hi ka ta a ni, tuman min chuhpui thiang lo," a ti leh sup sup a.

Duhthawh taka khum laizawl nun kan hman zawh hnuah amah si chêtin min kuah a, "Ka nu leh pa an inneih hian fa an nei thei lawk lo a, an inneih aṭanga kum 5 naah kei hi min pai ve ta chauh a, mipa ka lo pian tâk si avangin ka pa a lawm hle, 'Jehova' kan Pathianin fapa min pe a, a malsawmna kan dawn liau liau leh malsawmna danga min la vûr leh dawn avangin ka fapa hming atan Laljehomalsawmkima tih ni rawh se, tiin ka hming sei tak leh mi put ve zen zen loh hi ka pain a lo phuah a ni awm e," tiin a hming an phuah chhan min hrilh a, ka hriat tirha ka nuihzat êm avang khan min hrilh fiah nimaiah ka ngai.

"Tun aia hun harsa leh khirh  hmachhawn tur pawh ka la nei dawn, chuvangin rilru nêp tak pu lo la, nakinah i u Vanlalṭana pawh thil awmzia dik tak ka la hrilh hre dawn nia," dam thlupa tiin ka sam a chul a chul a, ani leh ni lo anga a la ṭawng thui ve ber ṭum a ni hial ang.

"I pa hmel dik tak i hre hman em?" Tia ka zawh chuan a hriat loh thuin min chhang a, mak ka ti kher mai.

"Vansangkimi kha i pa fa a ni tih chu i chiang si amaw?" Ka lo ti leh a, "Umn..ani kha chu finfiahna ṭha tak a awm alawm, ka unaunu ngei a ni e," a ti leh lawi si.

Nilengin ka in luahah kan awm dun a, a dar hliam kan ṭhuina pawh karkhat a tlin tawh avangin ka phelhsak ta a, rin ai takin a hil ṭha phian.

An chenna hmun kan thlen erawh chuan boruak dangin min lo nang ta tlat mai.

Buatsaiha leh nu Pianmawii an lo inhnial a, "Ka ring tawk che a, chuti chung chuan ka fanu naupangte mutpui duh khawpa rilru chhia i pu hi ka awih thei lo," thinrim hmai sen ṭeuha tiin ṭhutkhawmna pindanah an lo ding a, Jeho an min vawnna a kut lasawnin, "Eng thil nge ni leh ta?"

"Ka fapa, Laltleipuii fa paina pa hi kan Lalbuatsaiha lek alawm maw le, nupuia neih te chu min dil ve leh nghal a, a teuh lo lutuk," a ti hlawk hlawk a, chu veleh Jeho a che chhuak phat a, "Tleipuii nen in room ah kal rawh u," tiin a nu a bia a.

"Buatsaih, tuna ka nu thusawi kha thudik a ni em?" Thinrim awki fiak ṭhaka a ṭawng ri chu hlauhawm tak a ni. Ka lo phu zawk a, "Mama, ani kha kal tir rawh..." tiin Tleipuii a lo inrawlh ve bawk a.

"Lo inrawlh reng reng suh, kal sawn vat mai rawh u," tia a farnu leh a nu a vin khur khur hnuah Buatsaiha kawr âwmah ṭhâmin, "Kum 12 zet ka enkawlna hnuaiah i awm tawh a, ka farnu hi i unaunu anga i en thei lo a nih pawhin hetianga a ruk a râla inkawp hi i tih tur a ni lo, thih i duh a nih hi.." tih pahin Pistol a phawrh a, a chalah a tin ta rap mai. Ka lo âu chhuak ṭhat a.

"Jeho..." tia a bânah ka va ban chuan, "Lo inrawlh hlek suh," tiin min nam sawn dawrh a, ka petek nawk.

Thinrim insûm tih hriat fahran hian, "Ka rin i ang lo lutuk, ka ring che asin," tihpahin dâk áwrh khawp hian a khabeah a hneksak ta a, Buatsaiha erawhin khawih lêt ve pawh a tum lo, "Ka thiam loh a ni, i farnu hi ka hmangaiha ani pawhin min hmangaih bawk, kan inneih remti hrâm rawh.." inthlahrung tih hriat takin a la ti ve hrâm a, chuta Jeho thinrim mitmeng chu hlauhawm tak a ni.

"Laltleipui, rawn chhuak teh...' a ti vin tuar tuar a, a farnu hlauhlawpa awm chu rum lutuk hian a melh a, "Buatsaiha nen he in hi chhuahsan rawh u, ka thlazar hnuaia awm duh lo chu mahnia in enkawl mai tur," a ti nghut nghut a. 

Buatsaiha a rawn ṭawng ve ta a, "Jeho, i farnu chungah eng mah ti suh, tawrh a ngaih pawhin keiman ka tuar ang, ka thi dawn a nih pawhin Tleipuii leh ka fapa hi chu tina suh," a ti khur dur dur a, hetiang em ema Jeho a hlau hi thil mak tawp a ni.

"Kan room-ah chho teh ang, an inhmangaiha an innei duh a nih chuan chu aia thil ṭha a awm em ni, Buatsaiha nise i tana rinawm taka thawka i thachhang dawltu a ni a, i farnu tan ani aia ṭha mipa an awm thei lovang" tiin hlau chung chung hian ka lo inrawlh ve a.

"Ngurthan, nang pawh kan room-ah chho rawh," a ti chang fuk. Ka lo melh haw a, "Lokal phawt teh, nakinah kan sawi ṭha dawn nia, Tleipui, i room-ah lut la, nang pawh, farm house ah kír leh rih rawh," tihpahin Buatsaiha bangkil lama ding chu kawngkhar lam panin ka nam phei dawt dawt a, Jeho a ding khawng luh ringawt.

"I duh tawkin kei chu min sawisa rawh; mahse, Tleipuii leh ka fapa chu tina lo hram rawh ka thiam loh a ni," ti chungin a chhuak ta a. Jeho vawikhat mah a ṭawng chhuak tawh lo, Buatsaiha chhuak kha a umzui a, thil pawi a thlen palh ka hlauh êm avangin ka zui ve vat bawk.

An in hungna gate thlen hma deuhin ka va nangching a, "I thluak kha hmang ta che, i hma hunah eng nge thleng dawn i hre lo, Buatsaiha mamawhna pawh i la nei thei, chuvangin rilru fîm tak pu la, thutlukna i siam hmain inngaihtuah ṭha leh rawh," tiin a kutah ka vawn sak a, "I inrawlhna tur a ni lo, ka chênpui leh ka hnaivai te'n ka lakah zêp an ngah lutuk hi ka lawm lo a ni." A ti nghut a. Nichin ai kha chuan a thinrim tawh lo deuhin ka hria.

"Lokal phawt rawh, hlim takin hun kan hmang zo chauh a, i thinrimna bengdai phawt rawh le.." tihpahin a kâwngah ka kuah a, a Pistol paiin ka bân a rawn kam deuh. Mahse, ka haider thung.

Kan nupa room-ah kan chho a, whisky bottle khat a rawn phawrh chhuak a, "I in ve dawn em?" Tia min zawh chuan ka duh loh thuin ka chhâng a, "Naktuk aṭangin i hna zawm rawh aw, ka hruai ang che," a ti teh daih a.

"I patea khan min bân a tum deuhin ka hria," ka lo ti a.

"Ani thu nilovin ka thu zawk," tiin whisky a inthlit a, ner nawk chungin no thum tawp a in a, ka lo en reng.

"Zanin aṭang chuan ka bulah hlir i mu tawh ang, nupa chu khum khatah mut tur, ka bula i mut theih nan Sofa ka dah chhuah tîr a, chhuatah tho i mu leh si.." tiin a nui huk a.

Thil awmzia ka man ta uar mai. 

Kan inneih tirh aṭanga ka mut ziahna Sofa awm ta miah lo kha a bula ka mut a duh vangin a lo dah chhuah tîr tihna. Phakar lutuk mai. Tunah a rûi a, a sawi chhuak ta chiah bawk.

"Chhuatah ka mu leh tho ang," nui chunga ka lo tih chuan, "Ka awmna apiangah i awm anga i awmna hmun a piangah kei ka awm bawk ang, a chiang em?" Tiin khumah a vâng tan zawngin a mu phar duai a, a thinrim a reh phahna tur a nih phawt chuan rui chhum hmawk mah se pawi ka ti lo. A chhan chu a thinrim inhrosa thawm hi a hlauhawm ṭhin êm a ni.

Inbual turin ka luhsan ta rih a, thawm eng mah a chhuah lo a, a muhil ta niin ka hria.

Ka inbual zawh vek hnuah zanriah ei turin nu Pianmawiin min rawn ko a, a fapa khuma mu melh vang vang chung hian, "Ngurthan, Aizawl lamah hun rei lote chhohpui dan tur dap ta che, an unau inkâr a chhiat vek hma hian eng emaw tal kawng dap teh, a nih loh pawhin a farnu pakhat zawk Vansangkimi te awmna Jorhat-ah nipui chawlh hmanga kal turin a rilru i hmin thei ang em?" A ti a.

"Jeho pa dik tak hi min hrilh la, i duh ang ngeiin engkim ka ti ang," ka ti ve ta a.

"Nangnu hi..." tia a sawi zawm leh hmain Jeho a rawn rum ṭuah ṭuah a, a harh dawn emaw ka tih laiin a inlet thuk a, a dar na lo lam delh zawngin a muhil leh ta a. Ka lo thaw huai.

"Min lo zui lawk teh, ani rûi hi chu a harh mai mai lo tawp ang," tiin ka banah a vuan a, Library room-ah min luhpui ta a.

Inhmachhawnin kan ding rân a, "Tuna ka thu hrilh tur che hi i dam chhungin i sawi chhuak tur a ni lo, i sawi ka hria emaw Jeho leh ka fanuin an hriat chhuah chuan keimah hian ka that ang che," a ti ta a, a mitmeng a rum âl a, pawisak nei hmel a pu hek lo.

"I sawi tur a zir tepawh a ni ang chu," ka lo ti liam puat a.

"Samuel Pamei hi Jeho pa dik tak a ni." A tih chuan dâwt min hrilh nge hrilh lo tih hriat tumin a mitah tak ka en a, a lo thutak ngang mai.

"A pa a nih si chuan engvangin nge i hrilh mai loh, eng ati nge thurûk hi inngah em em mai le?" Ka ti chhuak phawng a.

"Tleipuii pa dik tak thattu hi Samuel Pamei a nih vang a ni. Kei hian pasal vawi hnih ka nei tawh a, Vansangkimi leh Jeho hi pahmun an ni a, Tleipuii pa a hrang thung. Chuvangin an unau inkâr a chhiat loh nan an pa dik tak ka zêp sak ve ve a ni," tiin rilru nat hmel tak hian pawnlam a thlir a, "Ngurthan, Samuel hian ka pawi a sawi a, Jeho pa ni mah se, ka damchhungin ka ngaidam ngai lovang.." a tih leh meuh chuan mak tih luat vangin mit ka khap fak fak mai.

Laljehomalsawmkima pa dik tak chuan kei a fapa nupui hi min pawngsual a tum chu a ni si a, Jeho lahin a patea thu hnial a tum der si lo. Â... ka â thei mai dawn.

"Eng pawh nise, Jorhat-a kal turin Jeho rilru hneh ka lo tum dawn nia, mahse, he i thurûk hi ka kâ aṭang kher lo pawhin an hre chhuak ve thei tih i hria ang chu maw.." ka tih chuan, "Ka thih hma chuan tuman thudik an hre lovang, Samuela pawhin a sawi hek lo ang, nang pawhin i kâ i âng tur a ni lo," ti lehin min en tawh lo hian Library room a chhuahsan nghal hmak a.

Kei erawh ka bul hnaia chair pakhatah chuan ka ṭhu hnawk a. 

Dr.Ngurthantluangi ka chau a ni. Ka chau takzet...

Note: He thawnthu 24-89 hi ka chawlhsan lawk a ngai dawn a, ka type-naah problem ka neih deuh avangin in mi hriat thiamna ka rawn ngen e. Pathian zarah kan dam ang a, ka rawn lêt leh ang.

Ka mit lam a chiang lo nasa bawk si a, a thawnthu a la inṭan dawn êk êk chauh a ni e.

130323

-B®®

B+>[BeckirafARenthleI]<+®®