6.24-89 [A Becky Rafa Story]

6. 24-89 

Ziaktu: Becky Rafa Renthlei

[Recap]

Laljehomalsawmkima pa dik tak chuan kei a fapa nupui hi min pawngsual a tum chu a ni si a, Jeho lahin a patea thu hnial a tum der si lo. Â... ka â thei mai dawn.

"Eng pawh nise, Jorhat-a kal turin Jeho rilru hneh ka lo tum dawn nia, mahse, he i thurûk hi ka kâ aṭang kher lo pawhin an hre chhuak ve thei tih i hria ang chu maw.." ka tih chuan, "Ka thih hma chuan tuman thudik an hre lovang, Samuela pawhin a sawi hek lo ang, nang pawhin i kâ i âng tur a ni lo," ti lehin min en tawh lo hian Library room a chhuahsan nghal hmak a.

Kei erawh ka bul hnaia chair pakhatah chuan ka ṭhu hnawk a. 

Dr.Ngurthantluangi ka chau a ni. Ka chau takzet...

-B®®

Private Hospital-a thawk ve mai ka ni a, ka hlawh a tam viau lo. Mahse, engkimah ka hautak loh avangin ka intodelh phian zawk a, Jeho nen kan inneih hnu hian ei leh inah insensona ka neih loh avangin ka thlakhat hlawh ka pumbilh thei thung.

Ka in luahna neitute ka phone a, thla a thar tirh khan a luah man ka pe ta si lova pêk ka tum vang a ni pakhat; "I pasal JK Farm neitu khan kum khat atan a pe vek tawh," tia min lo hrilh chuan ka hrilhhai letling zawk a, ka lawm lo hle bawk.

In chungah ka tlan chho a, Jeho chu dum suit veka inthuam chung hian tukverh bulah a lo ding a, nizanah a rûi zankhua ṭhak a, tunah chhuak mai thei turin a lo inpeih leh diam si.

"Jeho, ka in luah man i pe tih eng ati nge min hrilh loh," tih pahin a bulah ka va ding a, a awm dan tidanglam map lo hian, "I pasal ka ni a, saw in saw i puala i luah a ni naa kan nupaa chendun nan kan la duh dawn avangin kum khat atan aman ka pe lâwk a nih kha," a lo ti awlsam êt.

"Chu pawh nise min hrilh ve tal tur a nia," ka la ti ṭâlh a, rawn inherin min hmachhawn zawng hian a ding a, "Kan chêt tawh dan ngaihtuah la, i râi lohna turin eng emaw ti ang che, doctor i ni a, naupai lohna tur i hriat ngei ka ring," tiin thil dang a rawn sawi daih a.

"Enteh, nangin fâ duh lo mah la, kei chuan ka duh, mawhphurhna i la duh lo a nih pawhin kei chu ka tlanchhe dawn lo, ka râi kher ang em tih hre lo mah ila, a lo awm mial a nih chuan ka titla hauh lovang," ka ti hmiah.

"Min hnial kha ka ring sa rêng a, kan inkarah hmangaihna a awm lova, tisa thilah nupa kan ni. Chu chuan naute a keng tel tur a ni lo," tiin min melh rûn a, a zamawm lek lek.

"Khalam kha chu hunin hril rawh se, damdawi inah min va dah phawt la, a nih loh pawhin Rishan nen kan kal thei tho a nia," tiin thudangah ka pakâi ta rih.

Min melh zuk chung hian, "Tleipuii leh Buatsaiha chungchângah chin fel tur pawimawh ka nei a, damdawi in lama ka dah zawh hnuah che JK lamah ka tlang ang, insiam rawh le.." ti puat a.

Amah ka melh vat a. "Buatsaiha kha tina suh aw, i tan nakinah a la ṭangkai dawn a nia, i mâkpa a nih vaih chuan tun ai hian i thunun thei zawk ang," ka lo ti thuai a, eng danga min chhâng lo hian, "I thluak i lo hmang rim ve hle mai maw doctor?" Tiin a nui suk a, Bra nen chauha ka ding chu min rawn melh a, "Taksa lang tam thei thawmhnaw inbel hlek suh ang che," tih pahin a chhuak ta a.

Hepa êm êm hi chu! 

Rang takin thawmhnaw ka inbel zung zung a, ka bag lain inhnuai lamah ka chhuk ve ta a.

Nu Pianmawiin, "Ngurthan, ka fapa hi Jorhat-a kal tur chuan hmin hrâm ang che," tiin min la hrilh hrâm. 

Nui lui chung hian, "Thil thup leh thurûk ngah lutuk hi chu a buaithlâk, keimahni kan hah mai mai," ka ti nghat a, koki san âk chung hian, "Jeho laka i rilru puthmang hi ka hria alawm, i thup ve tho kha.." a ti ve ngat. Ka chhâng thui duh ta lo a, pawnlama min nghâk rengtu ka pasal awmna lam panin ka chhuak zui ve ta a.

Car nghengin kut kuangkuah hian a lo ding a, ngun lutuka min en hnuah, "Hmanhmawh i zir a ngai a nih kha, hospital kal tur inchei vul chûk a ngai lo," a lo ti hmuk.

"Nang pawh Farm kal tur mai mai inchei angai bik em ni?" Ka lo ti ve zat a, nui ruh ruh chung hian, "Nalh min tih vang a nih kha," tia kiai leh sukin Car kawngkhar a hawng a, zaizir hian lût turin min hrilh a, Tleipuiin tukverh aṭangin min thlîr reng tih ka hria, a û a hlau mai siah.

Ka thawhna hospital kawtah min drop a, "Biak tlang theihin awm ang che aw, chuan, tunkâr i duty routine hriat vek ka duh a nia," tiin ka kut veilamah a rawn vuan a, "Ka chhungkua ka chinfel zawh hnuah kan inkâr leh kan awm zêl dan tur ruahmanna ka siam ang," a ti ta a.

"Aw le, ni rawh se..." tih chiahin ka chhâng.

Jeho tlan liam hnuah muangchângin hospital ka pan ve ta a.

Kan nupaah eng nge ruahmanna siam ngai chu ni ta ang?

Amah hlat tura min tih loh hrâm ka beisei.

Medicine Super Specialist Arjit nen dârkâr li hnuah kan chhuak dun a, coffee dawmpuia min sawm vang a ni.

Cafe bula kan lo din laiin Rinnunga ka va hmu phut a, a nupui leh a fanu kha a bulah an awm ve nge awm ve lo tih hriat tumin a awmna bul vel ka melh kual zung zung a, amah chauhin a nih hmel. Biak ngei ka duh avangin Arjit hnenah, "Min lo hrethiam la, thil tih tur pawimawh ka nei leh si a," tiin chhuanlam ka siam tawp a, ani pawhin min lo hrethiam ve mai.

Chumi hnu chuan rang takin Rinnunga awmna lam ka pan phei ta a.

"Rinnung," tia ka koh veleh min hmu chawpchilh nghal a, "Engtin nge min la koh ngam zawk a?" Zu han ti a!

A bul chêtah ka va ding a, "I fanu leh i nupui kha an haw tawh em ni?" Tiin ka nui lui hak a, a mak ti hmel chuan nuih ati za zâwk alawm le.

"Ngurthantluang, eng nge sawi i tum?" A ti zawi sup a.

"Nupui fanau nei reng chungin kei hi min hmangaih thei a nia, bumtu chu nang hi i ni," thinrim insûm taka ka ṭawng leh tâkah chuan, ka bânah a rawn man chawt a, "Min lo zui rawh, helaiah hian inhnial mualpho ka duh miah lo a nia," tih pahin min pawt sawk a. Hospital bul hnai a nih vangin mi teivâk velin min en duh ṭan.

Îhe lovin ka zui hmiah. A hnenah hian sawi tur ka ngah mai piah lamah a insawi fiahna leh thiam thu sawi tur a nei ve rêng em tih hi ka hre duh hrim hrim.

A Car hunna lam panin kan kal hlawk hlawk a, doctor ve tho a ni a, khawlaia inhnial mualpho a duh bîkin ka ring lo. 

Car chhunga ka ṭhut luh fel hnuah muangchâng miah lovin a tlanchhuak nghal a, "Rinnung, pasal nei lai ka ni a, hmun hla taka kan inbiak kher a ngai lo a nia, Car chhungah pawh kan sawi dun thei reng," ka ti a.

"I pasal kha eng atan mah ka ti lo, khatiang mi kha i duh a nia, i â zo tawh a nih hi.." tiin a hma aiin a tlan chak sauh.

"I nupui leh i fanu tan rinawm la, a tawk, ka pasal chungchângah sawi tur i nei lo," ka lo ti ve hmak.

"Kha mihring kha i kalsan lo a nih chuan lungngaihna leh ṭahna chiah i hmâah a awm, Jeho leh a patea te duhâm luat avangin Bamos Farm nen an intibuai a, tunah hian sawlai hmunah sawn ram inchuh vangin tualthahna a thleng mêk a ni, engkim ka hre vek a nia," duhthawh taka tiin min rawn vawn a tum a.

Ka kut ka lasawn vat. 

"Ka pasal chungchâng sawi lovin, hun kha leh chen kha engtin nge min bum theih, thlaruk tâl tawp ka bialpa niin inneih te kha i sawi ve a nia, nupui pahnih nei thei i ni em ni?" Ka lo ti ve sak sak a.

A thlenna hotel kawt kan thleng ta a, min chhâng lovin chhuk tura min mitmei veleh, "Keimah ang vek hi an ni dawn lo a nia, sual duh ila chuan i nupui hnenah kan chungchâng hi ka sawi thei; mahse, mi nupa kâr tihchhiat a, inrawlh âi chuan ka ngawi mai a ni. Chuvangin ka pasal chungchâng pawh vawikhat mah sawi chhuak tawh suh," ka ti leh tawn tawn a.

A thlenna hmuna min hruai luh a tum chuan ka duh ta bîk lo, khua a thim lek lek tawh a, Jeho hnen aṭangin phone call ka dawng lo a, min hruai tura a lokal dawn tawh ka rin vangin Rinnunga hnenah, "Nang leh kei hi mihrang kan ni tawh tih hria ang che," ti hmakin Taxi phar tumin ka pen sawn a.

Chu veleh Rinnunga a che phut a, ka bânpuamah manin, "Helai thleng thleng hian i duhthuin min zui tawh a, ka hnen i lo thleng dawn khawp mai," a ti chang rút a. Min hmer na viau.

Hotel kawta mi zi nuk nuk kârah min pawt deuh nawk a, "Ka pasalin kut a thlâk leh palh ang che fimkhur rawh," ka ti ve salh.

Nui lui huk chung hian, "Kan la hria ang chu.." a tih rualin min kalsawn pui a tum a, ka lo ṭang kawh ve tlat.

"Ngurthan, min lo zui rawh, ka thlah haw leh dawn che nia, sawi dun tur kan la nei," dam deuh zawka tiin mitmeng dul ruih hian min en a, hmana ka ngainat leh min ngaihsak em em ṭhintu Rinnunga kha a ang leh ta. 

Ngawi rengin a room lam kan pan a, khua pawh a thim chiang ta khawp mai. 

Jeho ka call a, a ring ral ṭhak a, ka call nawn duh ta rih lo.

"I lakah rilru chhia ka pu lo, ka nupui hi ka nu leh pa min thlansak a ni a, fanu pakhat kan nei a, mahse, nangmah ka hmuh tâkah che khan ka rilru put hmang a dang hlawk a, ka inthunun thei ta lo a ni, Ngurthan, ka tihpalh takzet," inthiam lo hle niawm taka tiin Fridge aṭangin in tur a rawn phawrh a, zu lam chi erawh a ni lo.

"Nia, a nih tur ang a ni tawh a, tun hi kan inhmuh tawpna leh kan inbiak tawpna ni rawh se, pasal ka nei a, nupui i nei bawk a, kan intluk tawk chiah," ka lo ti ṭha ve mai. 

Tukverh bula ding ka ni a, Motor tlan zut zut te thlirin Rinnunga hnungchhawn zawng hian ka ding a, amah ka en a, a hmaa ka duhna leh hmangaihna ang kha a awm tawh lo, mipa satliah ang chauhvin a ni ka en ni. A mak khawp mai.

"Kha le.." tiin thei tui in tur min pe a, ka lo ban vat a, "I duhthu renga pasal hi nei i ni lo tiraw?" Tia min zawh chuan, "Duh e, Jeho hi ka tan a hlu a, min venghimtu a ni," tiin ka chhâng ta a, a dik chiah bawk. 

"Dâwt vek.." a ti sup a.

"Kalsan rawh, pasal neih i duh pawhin ani saw chu ni suh se.." a la ti ṭalh a, a in tur ken lai a tem hleka kei pawhin ka lo in ve a, a tui phian avangin a zâtve dawn ka in nghal a, "Kalsan leh mai mai turin pasal ka nei lo, thutiam chu thutiam a ni, mahse.." tia ka la ṭawng lai takin ka phone a rawn ri a, Jeho hnen aṭangin a ni.

"Khawiah tehhrep nge i awm? Hospital-ah ka awm ti hlek suh, vawi thum ka en chhuak tawh" a rawn ti hem mai.

"Ka kal chhuak lawk a, ka lo haw dawn e.." tiin dam thlap hian ka chhâng a. 

Vin lutuk hian, "I awmna hmun sawi vat mai rawh, sawi ta che..'' a ti hlur a, chhân tuma ka âng chiah tihah Rinnunga'n ka phone min laksak a, "I nupui chu ka bulah a awm e, lo ngaihtuah duh suh.." tia Rinnunga ṭawng ri chu hla tak aṭanga lo chhuak nimaiin ka hria.

Ka beng a kiu chum chum a, ka taksa a zawi ṭan titih. Chhuata ka tlu tur chu Rinnunga'n min rawn vuan a, ka mitmeng erawh a harh lawi si!

"Laljeho te ang Ramhuai pawh i mutpui duh a nih chuan, thlaruk chhunga i kawppui hian vawikhat tal chu i taksa mawina ka chen ve theih lohna chhan tur ka hre lo," tiin khumah min mut a, ka meng reng naa ka taksa a che thei ṭhak lo.

Nui vur vur chung hian ka thil inna no leh ka phone chu dawhkanah a dah a, "Tisa thilah ka hnaih ngai lo che a, tunah ka hun a inṭan ve ta.." ngeiawm zeta tiin a nui lui ngial a, ka lo en reng ringawt.

A thawmhnaw inbel lai a hlip a, khumah a rawn lawn zui nghal bawk. "Nula îtawm mutpui pawh a khât alawm.." tih pahin ka kawr hâk lai kilhna a phelh a, ka mittui luang ngiai ngiai hru tur pawhin ka che chhuak thei si lo. 

Dr.Lalrinnunga hian ka in turah damdawi a pawlh tih hrilh hranpa ka ngai lo a, ka thluak a fîm a, ka taksa a zawi a, hetiang damdawi hi ka hre lutuk tlat. Mahse, ka lakah rilru chhe lutuk a pu ang tih ka hriat miau loh avangin leh amah ka hmuh rual khan a laka ka thinrimna ka upbeh ka thunun zawh lohna rah chu ka têl dawn ta a nih hi...

"Jeho.." tiin ka phun sep a, ri chhuak tur erawh a awm lo. 

Rinnunga'n ka âwmbâwr a kut lâwnga a tawha ka taksa a zût kual lai te chuan ka meng ve reng a, tisa châkna avanga thaw huam huam chung hian ka kekawr kawng kilhna a phelh leh ta.

Saruak ngalngata awm ni mah ila, chuti mai chuan a che chhuak bik lo a, uluk fê hian min thlîr ngawih ngawih a ni ber. 

"Nupuia neih che ka tum reng reng lo, i taksa nei tura ka nghah chhung che kha a rei êm asin, Ngurthan, thlaruk hi rei deuh a nia," tiin a rawn kun hniam a, ka chhungril a rûm a, a ṭap a, ka tâwt up up ti ila ka sawi sual lovang.

Rinnunga'n a duh anga min sawngbawl a tum mêk lai chuan room kawngkhar a rawn inhawng rawp a, a ri chiah ka hria, tunge lo lût en tur pawhin ka hawisawn thei chuang lo.

"Ka nupui kha i kut hmawr pawha i khawih leh a nih chuan i thluak ka kâp darh vek ang," titu ka pasal hmel rum úl leh hriam fahran chu ka lo melh ṭâwk ṭâwk a. 

Rinnunga saruak thawthânga lo awm chu dimna nei miah lo hian a phih lêng lawp a, chu mai pawh duh tawk lovin a hrawkah a rêk a, "I kuang lo i nawr a ni, i nupui hnenah eng thiamthu mah sawi thei lo turin leh tû hmeichhia mahin an hnaih theih tawh lohna tur chein ka siam dawn che," tih pahin bangah a nawr bet a, Rinnunga a hamhaih nge Jeho a bei lêt ve miah lo.

"That rawh..." zawitê hian ka lo ti a, ka ṭawng a hre pha lo naa an pahnih insual lai chu en ngam lovin ka maimitchhing daih. Pistol êm chu a hmet puak ta lo.

Ka saruakna khuh turin thawmhnaw min inbel tir a, a khawih ang ang chuan ka awm tawp. Ka pasal thinrim meng dur khup chu ka en ngam lo a, mahnia kal thei ziazâng ka nih loh avangin min pawm nawlh a, chhuata Rinnunga mu hlawm reng pawh ka hmu, khawngaihna leh lainatna ka nei lo, Jeho lo thleng hman ta lo se ka chunga thil thleng tur kha ka ngaihtuah ngam lo zawk.

Hotel kan chhuahsan hun dârkâr hi ka hre lo a, mumang ang ruaiin ka hria a ni ber.

Ka harh leh chuan kan nupa room-ah keimah chiahin ka lo awm a, chhuatah thawmhnaw leh bungrua a darh phengphung a, nizan ka awm dan avang khan Jeho thinrim a inhrosa tih ka hrethiam mai.

Inthiam lo tak chungin ka tho chhuak a, ka lu a rit bûr. Ka phone leh bag pawh chhuatah a lo awm a, kan room chhung han hnawk zia mai chu!

Inbual ka tum ve bawk a, bathroom êm pawh ka thleng zo lo. Rinnunga damdawi hman kha a thawk chakin taksaah nghawng a nei nasa dawn tih ka hria a, khumah bawk ka lêt leh ta rih.

Room kawngkhar tu emawin a rawn kik a, lut tura ka hrilh hnuah nu Pianmawii a rawn lang hlawl a, "I chungah eng nge thleng ka hre lo, ka fapa thinrim inhrosa râpthlâk zia hre ve lova i muhil kha i lawm ngawt ang, tunah chuan a thupêk angin he room-ah hian thlakhat kan kalh hnan dawn che a, ei tur leh in tur erawh i nghei lovang, i hna aṭanga ban i ni bawk a, ka fapa Jeho tinatu chu hrem lohvin a chhuak lovang tih ka hrilh che kha.." fiah fakin a ti ta a.

"Jeho rawn ko teh.." ka lo ti a.

"A pawi ka ti khawp mai, i hmêl hmuh a duh rih loh avangin thlakhat chhung a thang bo dawn, room pawnlamah hian vengtu an awm reng tawh a, i awih loh chuan nangmah ngeiin i fiah thei ang," a ti leh hmak hmak a. 

Room chhung hnawk nuai chu a melh kual a, "Thlakhat chhung chu nang leh kei pawh kan inbe tawh dawn lo, Angelika khan i ei tur leh i mamawh tur a vil ang che, Tleipuii leh Buatsaiha laka a lungawi lohna pawh tawrh har kan tih tehreng nen, nang leh zel hetia i awm hi chu ka hrethiam thei lo," tiin min huat hmel tak hian min melh rum âl a, thiamthu sawi tur ka nei si lo.

Mahse, thlakhat tawp tûma hmel hmu lova han inkhung hran chu ka thei dawn em ni?

Nu Pianmawii chhuah hnuah a sawi ang chiahin ei tur dahin Angelika a lo lut a, min be lo hrim hrim. Chhuata ka phone tla reng chu ka chhar a, Sim card a awm lo bawk. Min kal tîr a tum laia a pawisa min pek pawh a lo awm tawh lova, a thawmhnaw dahna a ruak nual; Jeho te ang mipain thutlukna an siam tawh a nih chuan tih danglam mai mai theih a ni dawn lo tih pawh ka hre ve kar.

Ka lo muhil leh a ni ang, ka harh hlawl a, room chhung a lo fel fai duak tawh, engkim a nih dan tur ang vekin a awm tawh a, ka muthilh hlanin tu emaw berin an lo tifai tih hriat reng reng.

Inthing harhin ka inbual fai a, Rinnunga mitmeng hur leh tenawm zet khan ka luak a ti chhuak ngei mai. Jeho ka dem lova min hmangaih lo mah se, a nupui ka nih miau avangin mipa dang bulah ka saruakna hailanin a awm si, zah luat vangin ka biang a sa up up thei alawm maw le.

Ni a ral a, kâr a ral a, kan room-bâk khawi hmun mah chhuah phalsak ka nih loh avangin ka nun a ho hle. Ka pasal leh a chhungte hmel ka hmu ngai lo a, tuman min be pawp lo, room pawnlamah viltu ka nei reng bawk. Jeho ka ngai a, ka thiamthu sawi ngaithla tur tal pawhin a rawn lan ka ring ṭhin. Mahse, a teuh lo, a reh hian a reh tlawk tlawk.

Tûk khat ka tho chhuak tur chu ka luak a chhuak a, ka lu a hai deuh bawk nen, Angelika ei tur rawn dah pawh pakhat mah ka khawih lo a, vawi li zet ka luak hman tawh. 

Room pawn lama duty ten ka thawm an hria ni ngei tur a ni, Jeho an be ri ka hre viai viai a, an sawi tak erawh ka hre fumfe lo thung.

Tlailam dar nga velah kan room chhungah Laljehomalsawmkima a rawn lut ta a, khuma ka lo mu bâm chu min melh ngur a, "Thlakhat tlin nan ni li ila inkhung a ngai..." a ti sup a.

A hmel hriam leh chêr ta deuh te, a mitmeng thim raih te chuan a ti lang hlauhawm zual a, "I lungawina tur a nih chuan kum khat pawh min khung mai rawh, i hnen ka lo thlen aṭang hian hlimna tur ka nei tawh lo a, ka hna ka chân tawh bawk a, eng mah ka ni tawh lo," ka lo ti ve a.

"I eng nge na, nâ i nei em ni?" Tiin min zawt daih a.

"Ka thinlung a nâ a, thah min tum laia ka nunna zuah tura ka lo ngen che kha ka tisual a ni, dam chhan ka nei lo, i duh chuan i patea kutah min dah la, ani khan min that mai rawh se," beidawng taka ka ṭawng chhuah chuan khum lam a rawn pan a, min en vang vang hnuah, "Tho la, intifai rawh, hospital-ah kan kal ang," a ti ta a.

"Eng mah nâ ka nei lo," tih pahin bang lam hawiin ka inlet thak a, "Insiam rawh ka tih chu.." a tih leh pawhin ka la che duh chuang lo, a zaidamnain a tlin ta lo a ni ngei ang, min tung tho lawp a, ka luak a chhuak nghal up up, ka lu lah chu a hai nasa mai si, ka uak pawp a, ka pum a let nghal but but.

Ka awm dan avang chuan, "Ngurthan.." tiin min kuah vat a, ka thaw a sa phat phat. 

"I ṭha em..." a ti leh sup a.

"Reilote ka mu leh lawk ang, hetia ka awm hi i duh a ni lawm ni, ka hrehawm lai hmel hmuh i duh vanga hetiang thil ti hi i ni a, min ngaihtuah ang taka lan der tum duh suh," ka tih chuan a ner sawk a, eng mah sawi lovin a chhuak nulh. Pawnlamah kawngkhar a kalh leh daih bawk a, a va han sual tak.

Bathroom-ah ka uak pap pap a, ka chalah thlanfîm a bawl ṭak ṭak bawk a, ka hmai ka phih thuak thuak laiin Jeho ka bulah a rawn ding a, "Kha, hei hi a hman dan i hriat kha..." tih pahin Test kit ka kutah min hmehbel chawt chawt a, ka lo melh hû ringawt.

"Ka râi i ring amaw?" Ka ti sap a. Thil ka ei ṭhat loh luat vangah ka puh deuh kha a ni a, Jeho rilru teh daih chu.

"Test vat mai teh.." a'n tiah.

"Lo va chhuak rawh ka lo test dawn nia," ka tih chuan a ding ngur a, a che duh ṭhak náng.

"Jeho, ka test dawn reng alawm, i awm ve kher a ngai lo.." ka tih leh pawhin, "Mipa dang hmaah pawh saruakin i mu a ni lawm ni, ka hmuh hnu leh ka hriat hnu vek a ni a, ti mai mai rawh.." tiin a ding sawn deuh a, beidawng zeta thaw hak chung hian, "I awm chhung chuan ka ti dawn si lova tihian kan awm reng anga a ni mai," tiin luhlul ka chhuah ve tlat a, phun hluk chung hian a chhuak ve ta nge nge a.

Inrinhlelhna châng reng reng ka hre lo kha mâwl ka inti takzet. Doctor nikhua lo leh nêp ber ka nih ber hi.

Ni e, test kit-a rin sen pahnih chuan ka râi ngei a ni tih a ti fiah a, Laljehomalsawmkima fa ka pum chhungah a awm tih hrilh nawn ka ngai lo. Min duhna a tilanga kan inkar boruak a ṭha ve ṭan dawn chauh tihah buaina dangin min tlâkbuak leh a, tunah a duh loh a fa ka pai leh si.

"I va rei ve..." tih pahin a rawn lut chawpchilh a, ka kuta ka thil ken chu lain a en vung vung a, "Kan pahnih inkârah fâ a awm thiang lo, paih ang che.." a ti hmiah.

"Ni lo, Jeho..." tiin ka ûm chhuak a, chhuata vei nghut nghut chung hian, "Paih ang che, zaninah paih ang che.." tinawn lehin min rawn melh a, "Jeho, khawngaih takin ka thusawi tur hi lo ngaithla rawh.." tih pahin chau zet hian khumah ka ṭhu hnak a, a vei lai a ding chut a, "Ka rilru hneh tum duh suh, i thawhna hlui hospital-ah i kal hreh a nih pawhin hmun dangah kalna tur a tam a nia, nang nena fa neih ka duh lo, tu hmeichhia nen mah ka duh lo.." ti nghut nghutin bang a bêng pawp a.

"Doctor nikhua lo tak i ni, a tîr aṭanga hrilh sa che ka ni a, damdawi ei tur tam tak i hria ang chu, tuna tualthah ngai lo tur hian i invêng lâwk thei.." tiin demna a khatin min melh a, engkim hi ka thiam lohah a puh leh vek tawh.

Ka thin tertek a chhuak ve ta.

Ka ding hliai a, "Fa duh lo tur chuan invenna hmang ta che, a nih loh pawhin min pawngsual lo la hetiang thil hi a thleng lovang, ka paih dawn chuang lo, ka fa nunna ka lâk âi chuan kan pahnihin naute nen kan thi dun zawk ang e.." ka ti ve ta piap a. Rum lutuka min melh chung hian, "Thlakhat emaw chauh a la ni a, i tan thil harsa a ni lo, Ngurthantluang, vawikhat ka sawi nawn leh ang, zaninah, tunah hian Rishan nen damdawi ei chi emaw, eng pawh a tlâkna tur hrim hrim ngaihtuahin kal ang che u.." tiin a phone a phawrh zui zat a, ka thusawi ve te kha a bengrawngah a thun lo reng reng.

"Rishan, Car la chhuak la, i Madam hi Bethany hospital-ah va hruai rawh, rang takin...'' tia a biak hnuah, ka lam a rawn hawi a, "Phakar chhuah emaw min bum i tum vaih chuan a pawi dawn a nia," tiin min vau zui leh a, ka hlau hran lo. Mahse, a thu anga ka awm lo a nih chuan a sawi ang a ti hlawhtling zel si a, ka tan pawh a pawi thei.

Ka taksa nuam lo leh ka luhai te haiderin ka insiam ve ta a, mi nunna ka chhan theih nana ka thil lo zir ve te bawhchhiain ka fa, ka rila rah ka that dawn chu a ni a, Pathian ka zah ngawih ngawih.

Duhthlan tur ka nei si lo.

A tawp nan Jeho kutah ka vuan a, "Kan fâ thisen mawh hi i phur ngam ang maw, tual i lo that tawh pawh a ni thei, i tana ṭangkai lo leh i pawi sawitu chu i that a nih pawhin i thu a ni; mahse, he ka pum chhunga i thisen leh ka thisen ringa lo nun ve tumtu hian i pawi a sawi em ni? Ngaihtuah chiang rawh.." ka ti leh hrâm a. Min en lovin a ding khawng luh ringawt.

Reifê a ngawih hnuah, "Ti tura ka hrilh ang che chuan ti la, kal la, ṭawngkam khat mah chhâkchhuak tawh suh," tiin kawngkhar lam panin min kâi phei a, min nawr kal a ni mah zawk.

Nu Pianmawii leh Angelika hrilhhai hmel chu en pawh ka en peih lo, a fa duh lo tu fa hi engvangin nge humhim ka tum tlat bik ang, eng pawh nise, a sawi ang hian Bethany hospital-ah chuan damdawi ngaihtuah turin ka kal poh a ni ang chu.

Rishan chuan Car bulah min lo nghak reng tawh a, Jeho pawhin min zui ve zel a, car chhunga ka ṭhut luh veleh a inher nghut a, a kal nghal vang vang nia!

Driver nen vawikhat mah kan inbe lo a, Hospital kan thlenin pawnah min lo nghak turin ka hrilh a, hmeichhe doctor ka hmuh tur thu leh ka rei deuh ang tih ka hrilh chuan a bu nghat nghat a, ani hi chu Buatsaiha âi khan ka nêl deuh zawk.

Nau tihtlâkna damdawi ei tur ka hria. Mahse, doctor ka nih angin ka fimkhur a ngai a, he ka pum chhungah hian naute a awm ngei em tih te ka finfiah hmasa vek tur a ni. Test kit aṭanga lang kha rin mai ka tum hauh bik lo.

Dr. Amala ka hmuh theih tâkah chuan ka kal chhan kimchang takin ka hrilh a, "Lungngai mah ta che, minute reiloteah kan hre thuai ang," tiin a nui var var a, test pawh ka nei nawn thlap. Phat rual lohvin nau ka pâi a, thlakhat leh kâr hnih a lo ni tawh bawk. 

"Ka pasal nen kan inkâr a ṭha lo a, kei chuan he naute hi ka duh, aniin a duh si lova min pui rawh khawngaih takin.." ka ti tlang hmiah.

"Eng tia tih nge i duh le?" zaidam taka a tih chuan ka mittui a hnai kuar mai. Ka pasalin kan fa a duh lo a, ka dam chhunga ka tih duh loh ber ka tih a ngai si, 'tualthattu' tih ka thinlungah a ri tlut tlut a, ka ngaingam ngang lo.

Mittui tling piaua doctor chu melhin, "Ka fa nunna hi ka hlut a, doctor ka nih angin a nun chhan nan ka tawrh ngai mah se, ka titla lovang," ka ti ta a. Ka samah a rawn chûl a, "Hahdam takin awm la, ṭhat lohna dang i nei emaw insawiselna i neih chuan i lokal leh dawn nia," a ti dam leh thliam a, ka thawl huai mai.

"Ka pasal Jeho a lokala a zawt che a nih chuan khawngaih takin min lo thupsak thei ang em, mifing tak a ni a, a rawn chhuizui duh mai thei; chuvangin, min hum ka ngai rih a nih hi.." tiin ka hrilh chiang thlap a, a bu nghat nghat.

Dr.Amala room ka chhuahsanin zan dar 9 a ri tawh a, ka chauh êm avangin ka taksa a khur dar dar thei nia! Tiang em em hian ka derdêpin ka lo derthawng tih ka inhre chiah.

Hospital kawt ka thleng a, Jeho hmanhmawh lutuk hian a rawn tlan thleng ve nghal! Hah hmel takin a thaw hawk hawk a, zawi muanga ka kal chu min rawn kuahin, "I ti ta em? I paih em?" Tiin ka bengbulah a rawn ṭawng a, "Min hnaih suh, ka hua che.." tih chiah ka sawi.

"Ngurthan, i ti tak tak elaw, nang hian kan fa chu i paih phal tak tak a maw?" Mak tih hmel takin a ti a, a awkî a dik loh em avangin amah ka melh hâ a, "I fa duh lotu chu kei nilovin nangmah i ni, ka paih tawh, a awm tawh lo," tia dâwt ka sawi rualin ka dârah a vuan a, "Ka tlâi a ni maw, ni lo, i rilru en chhin ka tumna a nih kha.." a tih chuan mak tih luat vangin ka meng phâwk vak a, "Min en chhin i tumnaah ka lawm e, mahni fa duh lotu fa pai turin ka chak tawk lo." Ka ti hmiah.

Meng dul ruih chung hian, "Eng pawi nge ka tih tîr tâk mai che le.." tiin ani leh ni lo ang hian car bulah min kuah chial a, "Ngurthan, engtin nge nang hian i tih theih, naute tihtlâk ka duh lo tia i lokîr leh ringin minute tam ka lo nghâk che asin.." a ti thâm ṭuak a, ka insangmar nasa mai. Ka luak lah a chhuak leh ut ut tawh bawk si.

"Min thlah phawt teh, haw ka duh, ka chau.." ka ti sap a. Min thlah ve mai bawk a.

A driver min lo nghâk rengtu chu biain, "Ka nupui nen kan haw rual ang a, ka car saw nangin i khalh haw dawn nia," tia hrilh zung zungin ka luh theih nan kawngkhar a hawng a, ani pawh a ṭhu lût zui ve nghal bawk.

Kan chenna hmun pana kan tlan lai te chuan rilṭam vangin ka pum a ri raih raih a, "I rilru thlâka i lo lêt ka beisei asin.." inthiam lo tih hriat deuh hian min melh zuk a.

"Khatiang infiamna chi a ni lo, rilru enchhinna tur pawh a ni chuang lo, nunna leh thihna a ni, i fâ, i thachhang dâwltu tur leh nangmah enkawltu tur i duh miau si lova, a thisen mawh i phur ngam dawn em ni? Tia ka hrilh lai che khan i rilru thlâk mai ta che.." ka ti ve zel a, thudik hrilh ka tum rih teuh lo. Ka rilru puthmang fiah a tum nasa bawk a, tun ṭum chu ka hun a inṭan ve ta.

"Ngurthan, ka tihpalh a ni..kei hian thil pawi tak ka ti a ni.." zawi ruiha a tih leh lai chuan ka chhungril a nui thung.

Jeho hian min duh a, a fa pawh a duh. Mipa dangte anga thu thluaithlum chiam mi a ni lo a, chêtziaa lantîr tur pawhin a 'pa' mah mah. Chuvangin, kei hian rilru fîm tak pu chunga a thluak hi ka sâwi danglam hret hret a ngai zâwk a ni.

"Thlakhat room-a min khung i tum a, ni tlemte ka la bâk a, zanin chu kan room-ah keimahin ka châwl hahdam leh dawn sia, a nih phawt aw," ka ti lui ve ngat.

An inkawt kan thlen tawh vanga hetia ṭawng hi ka ni.

"A teuh lo, i paih tâk hnawhkhah lehna tur kha kei hian ka zawng dawn alawm, zanin aṭangin khum khatah kan mu leh tawh ang," a ti a, ka lo ner sak.

In chhungah kan lut a, Angelika hnenah eitur buatsaih turin a hrilh a, chutih lai tak chuan Tleipuii naupawm chungin a lo chhuak ve chiah bawk a, a û a hmuh veleh inherin an room lam a pan a, "Tleipui, hetah lokal teh.." tia Jehoa'n a koh chuan a ding chat a.

Kan nupaa min melh tawn sek hnuah ṭí dêk hian Jeho a pan a, naute chu kan chhuhsak hlau ang maiin a pawm nghet sauh tih ka hmu reng.

"Khawi, ka lo pawm ve chhin..." ka tih chuan mit khap zak zak chung hian a û a melh leh tê tê a, "Ka nupuiin i fapa a pawm duh a nih chu, pawm tîr rawh le.." Tia Jeho a ṭawng chuan Tleipuiin mak a ti viau. Mahse, a fapa ka kutah a rawn hlan a, ka lo ban vat.

"Mâm, eng nge?" Tiin a û a melh a, "Zanriah eikhamah naute hi kan room lamah kan lo awmpui ve lawk ang aw.." tiin a nau a chhâng a, kei âi mahin Tleipuiin mak a la ti zawk.

"Umn...ih..aw le.." a ti bah niai a. 

Kan Laljeho hian eng nge a hriat tâk? A thluakah eng nge awm tih hriatsak lo mah ila, naute hi a lo duh ve tak tak tihna em ni dawn?

Â..ngaihtuah dan pawh ka thiam mai mai lo e a, thudik erawh ka hrilh ran a ngai dawn a, ka hrilh hriat hmain a rilru ka enchhin ve phawt tur a ni dawn lo'm ni? 

-B®®

Ka chawlhsan keuh a, dawhtheihna nena min lo nghâk ṭâng ṭângte chungah lawmthu ka sawi e. In mi hriatthiamnaah ka lawm hle bawk, kan kal dan pangngaia kal kan tum leh phawt dawn nia aw...

280323

-B®®

B+>[BeckirafARenthleI]<+®®