10.24-89[A Becky Rafa Story]

10.24-89 

Ziaktu: Becky Rafa Renthlei

[Recap]

Ka bulah a rawn ding khawng luh a, a mitmeng chang ta deuh leh a hmel dur khup chu ka hmuh hmaih lo naa ka hlau chhete eih lo.

"Ka hnuaia thawkte awm laiin khatiang ṭawngkam kha hmangin min vin tawh miah suh," a ti chang fuk a, ka lo ter ve at.

"Min rawn zui rawh.." tih pahin min pawt tho lawp a, pindan lamah min hruai phei ta a.

A insawifiahna ngaithla turin ka zui lut rêng ang, eng dâwt phuahchawp nge min hrilh dawn kan la hria ang chu...

-B®®

Khumah ka ṭhu a, ani thlanglam wardrobe bulah a ding thung a, room chhunga kan luh aṭangin a ṭawng leh tawh lo; kei pawh thinrim viau e, ti lo chuan ka ṭawng chuang hlei lo a, Jeho leh khanu awm dan kha ngaihtuah chhuah leh pawh ka duh tawh lo, a huatin ka hua.

Rei fê kan ngawih hnuah, "I thinrim chhan sawi tawh rawh le, ka inbengdai tawh a nia, eng nge i hriata khati fahrana thinrima i awm tâk mai?" Tiin Jeho chuan min rawn pan hnai a, "Ka kalsan lai che kha chuan ka kianga awm châkin i awma kan inkâr boruak pawh a ṭha, rilru puthmang thlâk thut thut ching hmeichhia i ni hauh si lo," thinrim pawh ni chuang lovin a ti dam thluam a.

Ka la ngawih reng avangin, "Ngurthan, kan inkarah engmah zêp leh thup a awm tur a ni lo tih ka sawi tawh kha, i lungawi lohna chu sawi la, eng nge i hriat sawi bawk la, dârkâr ruk chhunga i mood inthlâk vekna chhan kha hriat ka duh," awki hniam ruiha tiin ka ṭhutna khum bulah a rawn ding hnai sauh a.

"Eng mah ka hre lo, ka hmu zawk a ni," tihpahin ka phone khuma ka vawm thlâk kha kâwkin, "Ka thinrim chhan chu sawtah sawn a awm, en mai rawh," ka lo ti nghauh a, tlêm chuan ka thinrim zualpui a reh tawh.

Rang takin ka phone a ban a, a en nghal tih ka hre mai. Chek hluk chung hian, "Mai mai chuan, vawiinah hetiang thil hi ka ti awzâwng lo, ti pawh ni ila, ka rawn thawn kher lo ang che," tiin a chal a chuar nûng a, a insawi fihlim ka ring sa hrim hrim.

"Meeting dangdai tak a nih kha, khum laizawlah ngat.." tiin ka nui lui hak a, "Ngurthan, min ring miah na nge?" a tih chuan, "I hmel a lang chiang êm a, i ni lo tih chi rual ni hek lo, niminah hmanhmawh takin i chhuak a, nilêngin i thangbo bawk a, a rah chhuah chu kha thil kha a ni, engtin nge i tih theih?" Ka lo ti hmarh hmarh a.

"Insawifiah lam chu nakinah le, zanriah ei phawt teh ang," tiin ka bânah a rawn vuan a, ka lo tawlhsawn dâwrh, "Min khawih hlek suh, hmeichhe dang i khawihna kut khan min tawk suh," tihlar chung hian ka tho chhuak a, ngaihdan ni lo tih hriat takin, "I rin dan dan khan ring la, i ngaihdan danin ngai rawh, min ring lotu inrintîr tlat tum hi ka zia a ni ve lo," ti sup chungin a chhuak zui daih.

Ka va han ngei tak. Mahse, thinrim engphiara kan inhau lo leh kan inthunun thei ve ve kha lawmawm ka ti, ka rilru a nâ a, chutih rualin Jeho tan engmah ka nih lohzia ka hriat chian phah thung; rilru nei taka ka awm a ngai zawk a ni.

Ngawi rengin zanriah kan kîl dun a, a naute pahnih pawna duty te khan eirawng an bâwl vek a, kan eikham hnuah an ei ve chauh. Jeho an zah êm êm a, an hming ka la hre ta lo fo. Keimah min buaipuitu ber kha chu Aryan niin ka hria, an ko ri ka hriat vang a nia, keimah min vil tura Jeho rawih bîk niawm tak a ni. A hmelṭha vei fu lehnghal.

"Khumah mu tawh rawh le, thla thum tal hahdam tura hrilh i ni a, naute i neih hunah i hnathawhna tur keiman ka ngaihtuahsak ang che," tihpahin khumah a rawn lawn a, ṭawngkam khat mahin ka chhâng lo. Ka be châk lo a ni ber.

Ka ngawih reng avangin, "I video hmuh kha ka chin fel hunah engkim ka hrilh ang che, nang leh kei kan inṭhen theihna tur ngaihtuaha buai sek hi engzât nge awm i hre miah lovang, a hun hmaa rîk hluai erawh ka tum miah lo, a chhan chu kha thil ka tih nachhan kha a awm a ni," fel fai taka tiin khum kil lamah a lawn a.

Ni e, amah Jeho hmel ngei kha siam chawp a ni lo a, anihna ang ang leh an chêt dan ngai ngaiin a lang a, kei hun reilote chhunga a nupui hian ka pawmzam mai a ngai a, thinrimin eng ang pawhin inhrosa mah ila, amah ṭhen thei dinhmunah ka la ding tlat lo; hriat chhuah tur ka la ngah êm asin.

Min rawn kuah a tum a, a bân ka vai sawnsak a, a nui huk. "Kan chêt tawh dan ngaihtuah chuan inkuah chiala mu tur kan ni asin le, buaina tlansanin ka nupui bulah hahdam ka tum ve a, Keite bula mut ka peih miah lo," tia tho chhuakin puansin tur pakhat a la a, ṭhutkhawmna pindan lamah a insawn phei daih. 

A pawi pawh ka tih si loh.

Chhun lamah ka mu hnem si a, ka mut a chhuak dêr lo lehnghal, ka pum puar miah lo chu ka chûl a, surgeon hlawhtling tak nih tum ṭhin kha tihian ka tâl mai mai ta chu a ni a, ka zirna aia dah pawimawh ka neih tam loh tehlul nen ka in-ui ru ve ngat ngat khawp mai.

"Sir, kan kal nghal a ngai a nia, Madam chu Aryan kutah awm rih mai rawh se," tia ṭawng thawm ka hriat chuan ka ṭhu chhuaka beng ka chhi kar. "Motor lo va buatsaih la, ka nupui kan be lawk ang e," Jehoa'n a tih veleh rang lutukin ka mu ṭha a, ka maimitchhing nghal daih.

"Ngurthan, ka chhuah leh nghal a ngai a, Aryan nen inah lo awm rawh u aw, ka patea a inhliama chumai ni lovin JK poultry lam zawk a kâng tel bawk," hmanhmawh hmel takin a ti sawk sawk a, "Âr farm a kâng maw?" Ka lo ti vat a.

"An rawn report dan chu a nia lawm, in hi chhuahsan miah lo la, nang leh ka fa kha inhim a ngai hmasaber," tihpahin min kuah thuak a, a hmanhmawh ngei mai. Tunah zan dar 10 a pêl tawh a, 'Umiam' thlenga tlan tur pawhin dârkâr khat chuang a ngai dawn a nia, ka ngaihtuah thar leh hnuhnawh.

"Engtikah nge i lo lêt theih ang?" Tia ka zawh chuan, "Ka thang chen tur ka hre tlat lo, Rishan leh Buatsaiha an thleng tawh a, ka sawi kha hrereng ang che number kha," tia a sawi zawh hnuah a jacket a ha sawk sawk a, Aryan tel lovin an tlan chhuak ta a. 

Veranda thleng tal thlah ve pawh a ṭhat nen kan inkâr boruak khatiang kha a ni si a, tlawmah lain ka thlah liam ta lo.

JK Farm-ah hian Bâwng, Âr, leh Kêl, Khuai tepawh an khâwi tel bawk a, an ram ṭhatzia ka mit ngeiin ka hmu bawk, chutah Super Care hospital aṭangin sum tamtak a la lut dawn tih a hriat reng, Jeho hi pa hausa leh intodelh tak chu a ni ve hrim hrim, kan inneih tîrh tê a, "Ka nupui tan hnathawh a ngai lo, ka châwm thei," tia a sawi kha ka hrechhuak rauh rauh.

A tawp nan vawiina ka video dawn kha uluk zetin ka ennawn leh ta a, Jeho sawi a nih vang nge eng emaw atana chan chawp ang riauva hriatna ka nei thar veleh a, amah lah khan chiangkuangin a sawi duh malêk a, a thinrim lutuk loh danah ama siam emaw ka ti hial zawk. Mahse, chutiang mipa niin ka hre si lo.

Zanlaiah pawh muhil thei lovin ka inlet kual sek a, ka whatsapp tone a rawn ri a, ka en nghal vat. Number hran daih aṭang hian, 24-89 tih a lo ni a. 

"Samuel nen kan boruak a ṭha lutuk lo a, Aryan kha pawnah duty sela nang chu inchhungah aw.." tih tê chiah a rawn thawn leh a, hei chu Jeho dik tak a ni tih ka hrethiam ve. Min ngaihtuah hle tih ka hriatna hian ka thinrimna a bengdai zel zawk a ni.

Khawvar dawn lamah ka lo chhing ve sek a ni ang, Tleipuii ṭawng riin min tiharh a, "Ka kai tho ringawt dawn alawm, sual viau zel suh.." tiin Aryan a be mawlh mawlh a, a u hnathawkte a nêlin a hre ve vek tih a hriat mai. 

Chumi hnu lawkah ka pindan lamah a rawn lut a, khuma ka mu min hmuh veleh, "Mahnia khawhar deuha awm ai chuan inpui lamah lo phei daih la, Mama ka hrilh tawh," nui var var chungin a ti a.

"Doctor-in chawlh hahdam min chawh a, mut tam ka mamawh rih a nih hi.." tia ka lo chhân chuan, "Sawtah pawh in room-ah i mu thei reng alawm, helai pindan zimtea inkhung reng ai chuan a nuam zâwk ang," tih pahin ka room zau lo zet chu a melh kual a, "Ka fapa pawhin hming thar a nei tawh, ka patea'n a phuah a," tiin a sawi siam siam a.

"Eng nge a hming?" Ka lo ti vat.

"Zonunthara.." tia a sawi lai chuan ka phone a rawn ri leh a, Tleipuii hnenah min lo hrethiam lawk rawh tih nan kut ka phar zeuh a, "Madam, Boss-in inpui lamah phei rawh se a ti a nih chu.." a rawn ti a, Buatsaiha aw a ang ka ti a, "Tunge i nih?" Tia ka zawh let chuan chhânna a awm tawh lo. 

Tleipuii hetah a awm a, amah Jeho a buai a nih ringin Buatsaiha min rawn biak tîr nimaiin ka hria. Mahse, nichin lawk khan ka in luah chhuahsan lo turin min rawn hrilh bawk si. Huis, ka hringnun hahthlak dan em em hi aw..

"Tu nge a?" Dilchhut taka Tleipuiin min zawh pawhin "Ka hre lo'' tiin ka chhâng mawl tawp.

"Breakfast ei la, ka lo nghak ang che, Aryan te chu hetah a duty thei dawn tho alawm," a la ti hrâm a, Jeho lo haw chin tur ka hriat loh avangin phei ve mai pawh pawi ka ti hran lo, kan nupa room-ah ka châwl hahdam thei dawn tho si a.

Tleipuii leh Aryan an inbiak mawlh mawlh laiin ka pum ruak ka lo hnawh khat ve a, he nau hi a fel ngawt mai, ka thawh hmain engkim a lo siam peih diam a, min be tuitam lo nain ka ngainat chi tak a ni.

"Tleipui, tihdan ka hria, vawiin nilengin hetah Jeho ka nghâk ang a, a lokir loh chuan tlai lamah zanriah nangin Aryan hi ka lo indah tîr dawn nia, a hrim hrimin engti turin nge i lokal?" Tia ka zawh thut chuan a mitmeng a buai nak a, a insiamrem leh vat tho.

"Jorhat aṭanga in lo lêt thu Vansangin min hrilh a, Mawkasiang lamah in lo tlang turah kan ngai a, in rawn thlen tâk si lovah chuan Buatsaiha ka zâwt maw le, heta in awm thu leh kan farm lamah buaina a awm tih min hrilh a, nangmah hruai tur chein min ti, Mama thupêk a nih thu a sawi a," a ti ta a. Nichina min lo call tu kha Buatsaiha aw a ang ka ti deuh reng a, Tleipuii nen innei mai tur an nih bâkah Jeho kut leh ke ber a ni ve bawk.

"Zonunthara chu i rawn hruai ve lova, hetah min awmpui zawk ula ṭha tur a nia," tiin ka thil eina vel ka seng fel a, Aryan a rawn che chhuak vat, "Madam, tikhan lo awm mai mai rawh, keiman ka lo ti vek ang," a ti thuai thuai a, ka chet ve a phal lo bur.

"Thil i ei tawh em?" tiin ka zawt a, a ei loh thu leh zinglam dar 11 hma chuan engmah a ei ngai lo tih a sawi a, mak ka hle.

Aryan nen kan inbe lai chu Tleipuii'n min en reng a, "Ka rual chuan i lo phei ve lo ang maw?" a ti leh a.

"Hetah awm la, i u a lo haw dawn loh chuan tlai lamah kan phei rual dawn nia," ka ti ve ta a, a lo bu nghat nghat.

Nilengin Tleipuii nen kan inkawm a, ka khumah kan mu a, "U Ngurthan, Mama hian engvangin nge a neih che, kan ina i lo awm tirh te khan amah kha i haw ngawih ngawih a ni si a," tia min zawh chuan, "Buatsaiha zawt rawh, engkim a hre vek," tih chiahin ka chhâng.

Vansangkimi chungchang te kan sawi kâi a, "A vannei ngawt mai, a hma chuan a tâl duhdah thei lutuk an ti.." tih vel a sawi a, chu erawh ka chhâng thui duh ta lo.

Tlailam dar thum a rik pawhin Jeho a la reh vung vung a, Tleipuii hnenah Buatsaiha tal chanchin zawt turin ka hrilh a, a lo duh lo nasa mai, "Farm-a an awm laiin biak buai a duh lo," a ti deuh tawp. A va buaithlâk e.

Aryan chuan Inpui lama ka phei tur chu a remti tehchiam lo a, "Boss-in kal tura a duh che chuan keimah min lo hrilh mai dawn alawm, Madam, hetah awm mai rawh.." a ti ve tlat a, Tleipuii a lo inrawlh vat.

"A pasal nau ka ni a, atana ṭha lo tur eng mah ka ti dawn lo, zinglamah pawh Buatsaiha kaltlangin ka u in a lo hrilh tawh a, lo inrawlh suh," a ti hmak a, Aryan a ngawi ta a.

Tleipuii'n car a rawn keng lova, Taxi a rawn hman avangin ka bag leh phone ka la a, Jeho te inpui panin Aryan remti vak lo chung kan chhuak lui ta a, ka inthiam chiah lo deuh chu a ni e.

"Kan hnathawkte hi chu an fel a, Buatsaiha leh Rishan tih loh midang zawng hian inpui an lo tlawh khât, tuna i ina duty kha kum li vel kan chhawr tawh," tiin min hrilh.

Kan chuanna Taxi driver chuan Tleipuii a en leh rulh rulh zel a, ngaihṭhat lohna êm êm nei lo mahila, nuam lo tihna keimahah a awm.

Kawng tluanin kan ṭawng phei a, Sawlad leh Mawkasiang inkâr pawh traffic Jam a awm chuan hun kan khawhral rei ṭhin hle. 

Jeho te inpui luhna tur kawng pêng ṭhuam kan tlân ṭan tihah Taxi chu a kâwi zawk a, kawng dinglam ngîl purh zawhin chak lutuk tak mai hian a tlan ta a, Tleipuii nen kan ṭê chul a, ding tura kan hrilh ngial pawhin awmzia a awm lo. "Tlanchak sauh rawh" tihna ang vel a ni.

Tleipuii a ṭap pur a, "Zuangthla mai ang, kan thi bîk nâng.." ka beng bulah a ti khur dat dat a, "Kan thi lo maithei, ka pum chhunga naute erawh hi chu a thi ang, ka ngam lo.." ka lo ti ve si. Dârkâr chanve dawn kan tlan leh hnuah in fâl reihrawih pakhat kawtah Taxi chu a ding ta a.

Sub Station hlui a ang zâwk mah. Chu in piah deuhah chuan in dang hlui ṭawp chhe tak pahnih a la awm bawk a; Taxi driver chuan keimah min melh ngur chung hian, "Finrawl chhuaha tlanchhiat emaw phone hman in tum vaih chuan in thi a ni mai," tia a sawi zawh rualin "Sahib" tiin tu emaw a ko tuar a.

Chu veleh mipakhat thâu dulkiar zet hi a rawn chhuak a, Taxi driver hnenah chuan, "A hrang ve vein em ni kan dah dawn?" Tia min melh zuk zuk hnuah, Tleipuii a melh leh rulh a, "Samuel Pamei hi i uncle tiraw?" Tia zawtin a va din hnaih a, Tleipuii ka lamah a rawn tlan pheia min kuah tlat. 

A samah ka chûl a, "Hlauthawng miah suh, hlau lo ang tak khan awm la, engtin mah min ti lovang, Samuel an huat vang emaw pawisa an duh vang zawk pawh a ni maithei asin," tia ka ṭawng thlamuan chuan min kuah nghet sauh a, "Ka fapa ka ngaihtuah lutuk tawh," tiin a insût zui hraih a, ka khawngaih veleh chhawng.

'Sahib' tia driver-in a koh khan min rawn hnaih a, Tleipuii a pawt sawk a, Khasi ṭawngin a be nawk nawk a, ka hrethiam fumfe lo.

Chutah, Driver zawk khan ka bânah a rawn vuan a, "I pasalin a rawn khul chhuah hma che chuan kan hnenah i awm ang," nelawmna tel miah lova tiin min melh rum ûl a, Jeho thusawi ka hrechhuak rauh rauh.

Tleipuii zawk chu Taxi-ah an nawr lût nawk nawk a, "U Ngurthan, lo hlauthawng reng reng suh, Mama a lo thleng vat ang, pawisa an phût a, an phût ang kan pêk theih loh chuan JK Farm Bigha 20 tal kan sem ṭhen ve an phût a, engtin mah an tina lovang che," zangkhai zawka tiin min rawn hrilh a. Nichina a hlauthawng hmel kha a bo vek.

Jeho farnu zâwk an kal tîr a, kei, a nupui min hrêng thung dawn a, thil kal dan hi a mak tlat. Aryan khan kal lo turin min hrilh mawlh mawlh a, ka thu awih lohna leh mi ka ring hma lutuk hi ka chêtsualna zel a ni.

Tleipuii leh Buatsaiha ka ringhlel lo thei lo. A chhan chu Jeho awm loh veleh a lokal a, an inpuia kal turin min thlêm chhuak a, Sawlad-a Taxi tam tak ding zingah engvangin nge kha Taxi driver kher kha Tleipuii'n a biak! Hlauhlawp tak angin lang mah se, a dik thei tlat lo.

Sahib chuan inchhungah min hruai lut a, bungraw dahkhawmna hmun a lo ni. A hnawk rem rum a, min be miah lo hian ka kut hnunglamah a phuar a, ka ke pawh mar ṭha takin a phuar leh thlap a, chair pakhatah min ṭhut tîrin ka ṭawng chhuah theih loh nan ka hmui a plaster leh hmiah.

A thleng rang fahran lutuka ka hamhaih deuh tih lohah chuan engmah hlauhthawnna ka nei lo. Ka bag leh phone min chhuhsak lo ringawt pawh hi ka lawm hrim hrim, ka la ak ve rân a, min lo call tu an awm chuang hlei lova.

Sahib nen minute 10 vel kan awm dun tawh a, khua a thim chhalh tawh, Tleipuii kha an hruai hrangin hmun dangah an dah turah ka ngai deuh kha a ni a; mahse, chutiang ni lovin Taxi driver-in a phur lêt daih a, kawng pêng ṭhuamah khan a va hnutchhiah emaw ruahmanna an nei dun a nih ka ring rum rum tawh. Chu erawh finfiahna ka nei si lo.

Mawkasiang hmuna awm te leh Jeho hnaiha awm te rêng rêng tumah rin tur ka hre tawh lo. A hmaa a lo sawi tawh, "Kan pahnihin khawvel kan hmachhawn tawh ang," tia ka pasal ṭawngkam kha ka bengah a ri nawn tlut tlut a, ka inthing harh a, ṭawng chhuak thei ka nih miau loh avangin rem lo zet hian min chhan chhuaktu tur lo thlen hma chu muthilh ka tum ta zawk a.

A hmaa Dr.Ngurthantluangi kha chu mitthi ang mai a ni ta. Ka khawsak dan leh ka hun tawng a inthlâk danglam vek tawh a, Jeho leh khasi nula video pawh kha 'trick' chikhat a ni leh tho ang. Chuvangin, keimah ti keimahtu zawk hi a pawimawh tawh tih ka hrethiam chho zel.

Jorhat aṭanga kan lêt thu sawitu pawh Buatsaiha a nih ka ring ber a, Tleipuii a hmangaih avangin an kawng dâltu Jeho hi hnawksak an ti a nih ka ring ber. Jeho a hnawksak chuan a nupui pawh ka hnawksak dawn lovem ni?

Ka rilru kâwmin thil hrang hrang ka ngaihtuah kual a, ka lo chhing ve sek a ni ang, silai puak ri dawtah ka harh ta a.

Rang takin ka meng chhuak a, ka hma lawkah ka pasal Laljehomalsawmkima chu thinrim insehruh ṭeuh chung leh a kut pahniha Pistol hum chungin a lo ding a, Sahib chuan min pawt thovin inphen nan min hmang zui nghal a.

"Ka nupui kha i kut hmawr pawha i tina a nih chuan..." tia a sawi zawh hmain ka bek leh Pistol a insi zui zat. Sahib chuan, "I farnu him dama kan chhuah avang khan i nupui hi a him ve kher dawn lo. Mr.Jeho..kan phût ang kha kan hmuh loh chuan tun aṭang reiloteah nupui koh tur i nei tawh lovang.." tiin a vau zui nghal a.

Kei erawh khawng atin ka ding thung.

"Ka nupui kha rawn kal tir rawh, pawisa ka lo keng a, Ram pass pawh ka keng tel e.." hniam chhaka tiin ka mitah chiang takin min melh a, "Hlau suh, ka mitah chiah en rawh," a tihnaah ka ngai.

Sahib ve thung chuan, "I pistol paih la, pawisa bag kha hawng rawh.." thupe aw takin a ti a, Jeho ke bula bag chu ka hmu ve chiah, a lian hran lova, a puar mar ṭang thung.

"Ka nupui kha thlah phawt la a ni mai," a ti fiak ṭhak a, min thlah te chu sawi loh ka bekah Pistol hmawrin min nawr sawk a, ka thle bak.

Jeho a thaw hawk a, "Ngurthan..." tia min ko ri chu ka bengah a ring hle, min warning tih hrilh hranpa ka ngai lo, nidanga min koh dan nen a ri a dang miau a, che miah lo hian ka la ding reng a, ka ke a kham ṭan bawk.

Jeho chuan a dinglama Pistol a hûm chu zawimuangin a khêl zâwnah a dah thla riai riai a, a veilama a ken ve thung chu a hum nghet sauh thung.

A dinglamin a khêl bawr a deh rualin, "Ngurthantluang, 24" tiin min ko leh a, Sahib tan pawh ka hming a ni a, thil dang eng mah a sawi belh loh avangin Pistol-in min tin reng mah se, a ṭawng lo teh tlat! 

Jeho chuan ka mitah chiang mangkhengin min en a, ka lo en ngun ve ngang mai. Hmui phunin 24 tih a sawi zo chiah tihah ka kûn hniam a, Silai puak riin a zui nghal.

Ni e, 'number tlem zawk ka sawi a nih chuan hnuai lamah aw..' a ti a nih kha. Tuna kan position-ah hnuailam bâk ka tan himna a awm lo, Sahib a tlu tawp a, kei pawh a sir lamah ka petek a; mahse, ka tlu tur Jehoa'n min kuah hman. Ka ke an phuar tel miau avangin pensawn thei ka ni tlat lova tlûk chiah ka hmabâk a ni.

Sahib ka zuk melh a, a pistol humna bân puam aṭangin thisen a far zawih zawih. Ka doctor rilru chuan chhan a duh, mahse, ka haider ve ta.

Ṭawngkam khat mah chhâk chhuak lovin Jeho chuan ka hmui plaster-na a phelh a, chair-ah min ṭhut tîr leh tê tê phawt a, chhuata mu hlawm reng vai dulkiara pistol chu a mu zawng zawng a phawrh sak hnuah a, "Tunge he thil ti tur hian hrilh che?" Tiin a hrawkah a rêk ta a.

Sahib a ṭawng duh lo reng reng.

"Sawi vat rawh..a nih loh chuan," tih pahin a chal leh Pistol a nawr chilh a, "I thi ang," a ti thum chhak.

Chutah meuh chuan Sahib pawhin Jeho vauna leh a awki hriam hrâk chu a hlau ta a nih ka ring, pai zet hian, "Siamthara" tiin Mizo hming a sawi ta a, ka lo mengphawk hle.

"Tu nge chu chu, khawi ami nge?" Tia a zawh leh chuan a hriat bîk loh thu leh amah pawh a la hmu lo tih a sawi a, zawh chhuah ngaihna a awm lo, Jeho pawhin a dâwp ngial naa sawi thui tur a hre ngang si lova, vawi thum na zeta a hnek hnuah a rawn ding chhuak a.

Ka ke an phuarna a phelh dawn emaw ka tia, chutia ti ta lo chuan a kâwng hnunglamah Pistol a zep a, min pu nawlhin chhuata bag a ban zui nghal a, bungraw dahna in chu min chhuahsanpui ta a. Ka ṭawng ngam lo hrim hrim.

Biak ngam loh khawpa hmel dur leh a mitmeng hriam lutuk chuan min tihlau a ni ber.

Gurkha seat hnungah min ṭhut tîr a, ka kut an phuarna chu chemtein a phelh ve chauh. "Kha, i hmang thiam bawk a, i ke kha chu nangman phelh rawh.." tih chiah a sawi.

Ka inpeih fel hun pawh nghâk lo hian chak lutukin a tlanchhuak a, ka sawisel ngam der si lo.

Ka in luah pan lovin an in kawtah a ding dawt a, min ngaichâng lo hrim hrim. Amah a chhuk a, in lam panin a kal nghal vut a, muangchânga chhuk vein ka zui lût ta a.

"Laltleipui, rawn chhuak teh.." tiin Jeho chuan a farnu a ko tuar tuar a, Rishan leh nu Pianmawii an rawn lang a, naupawm chungin Angelika a rawn chhuak bawk. Amah Tleipuii ber a lo la chhuak ve lo.

Vawikhat ring zeta a koh leh hnuah pawh Tleipuii a la reh hmiah a, Jeho thinin a tuar tawh lo a ni ngei ang, a farnu pindan lam panin kawngkhar a chhuih bur a, a boot bun a lawk ropui si, ka lo phu zawk alawm maw le.

"Ka fapa, inbengdai rawh.." tia a nu a lo ṭawng chuan rum lutukin a melh a, "I fanu i ko chhuak dawn nge a room kawngkhar ka tichhe dawn?" A ti thum dút a, "Bawiha, hlauhlawpa siam kher a ngai lo, Ngurthani pawh himdam takin i rawn hruai kîra duh tawk rawh.." tia a fanu thlavang a hauhna chuan Jehomalsawmkima thin a tirim sauh tih a hriat mai.

Tleipuii room kawngkhar a chhuih leh a, a ko pah bawk a, ka lo íp zawr zawr tawh zawk.

"Lokal rawh, khatianga chêt chu a ṭha lo.." ka'n ti dêk dêk a, vin lutuk hian, "Lo ṭawng suh, ngawi hmiah rawh.." a ti hlur mai. Ka ṭawng ngam tawh awzawng lo.

Vawi tam a farnu a koha thawm bengchheng a siam hnuah kawngkhar kalhna a ri rak a, pawr fap leh mit bûi châkin Tleipuii a rawn chhuak ta a.

"Mama, ka tih a ni lo.." a'n ti nghal ringawt a.

"Tu thuin nge ka nupui i hruai chhuah, sawi rawh..?" Tih pahih a dâr pahnihah a chelh a, a thing nawk nawk mai.

Ṭap ṭiau chung hian, "Mama, ih..eng lo.." khabe inkhâwng dat dat chunga ṭawng a tum pawhin a thei lo a chhâ chu a ni e.

"Aryan hnen aṭangin engkim ka hria a nia, kan nupa nunah inrawlh tum tawh suh, Buatsaiha leh nang hian kei min do leh min dâl zawnga khawsak in duh chuan chhuak rawh u, chhuak rang rawh u.." tia a sawi zawh rualin bangah Tleipuii a nawr bet a, kut êm chu a la thlâk bik lo.

"Aryan phal lo chung nang hian ka nupui i hruai chhuak a, Buatsaiha hrilh ang che, in inneihna tur atana phalna ka pêk che kha ka sût leh e.." tiin a farnu a vawnna a thlah a, a nu a melh ve thung.

"He buainaah hian i inrawlh ve a nih vaih chuan nang pawh ka zuah lo ang che tih hre rawh," a ti leh hmiah.

Awrâwl chhuah meuhin Tleipuii a ṭap a, "Ngurthan, i thawmhnaw han siam la, he in hi chhuahsan teh ang" a ti hmuk a, Zonunthara a lo ṭap ve bawk si, Angelika melhin Jeho chuan, "Kha naupang kha ka hmuh phâkah rawn inlan tawh suh se, ka ngaina lo.." tiin Tleipuii fapa chu vawikhat pawh melh nawn lo hian inchung step a zawh chho a, a pen thawm a ring ṭha ngang mai.

Jeho zui chhoh ka tum lai takin, "He ina i rawn luh aṭang hian buaina a tam ta khawp mai, ka fate pahnih inkâr siam ṭha tur khan kalbo pui turin ka hrilh che a ni lawm ni, i naupai chhuanlamah hman tum reng reng suh.." a ti zawi sap a.

"A dik zawk lamah ka ṭang zel ang, i fanu a him a, i lawm tiraw, i famo ka him lo tih i hriatin i lawm ve thung," ka lo ti ve sak a.

Nu Pianmawiin min melh râm râm a, ka hlau der si lo.

Tleipuii hnenah ve thung chuan, "Ka lakah eng rilru nge i put ka hre lo, ka in aṭanga min hruai chhuah khan remruatna fel tak i lo siam tawh a ni ngei ang, min bum thei a ni mahna, i û erawh i bum dawn lo a nia," ti nghauh chung hian min chhânna pawh ngaichâng duh tawh lovin inchungah ka chho ve ta a.

Jeho chu kawr ha lo hian a lo awm a, kekawr a ha thung.

A bân hmun hnihah a kak a, ka hnaih nghâl ruak.

"Engti zia nge?" Tiin hnai zetah ka bih a.

"I himna tur a nih chuan ka taksa hi ser nek-nuk mah se ka pawiti lo," a ti teh daih a, a awka dam lo mah se, nichin ang em kha chuan a thinrim tawh lo.

"Ka thusawi i zawm lo hi ka lawm lo ṭhin khawp mai, keimah ka nih loh chuan tiin engkim ka hrilh chiang che khan ka hria a, Farm lamah buaina awm bawk, in lamah chuti bawk," tiin rilru hah hmel takin a thaw huai a, ka inthiam lo thar ngei mai.

Ina ka awm laia phone call ka dawn thu leh Buatsaiha aw ang ka tih thu te, a hnua Tleipuii lokal dan leh min sawm chhuah dan thawchham dawna ka hrilh zawh meuh chuan a bu nghut nghut a.

"Ka thu chiah ngaichâng tawh ang che, tute hi nge kan hmelma leh nangma tana hlauhawm pawh i thliar thiam lo a, Ngurthan, zanin zet zawng min tihlauthawng lehzual hle mai," ti supin a bân pem lai chu a melh zuk a.

"Khawi, keiman ka lo tifai ang e.." ka tih chuan, "Nizan lamah ka tawh che emaw ka sík hlek che pawh i duh lo kha a ni a," a ti leh kher a. 

"Theihnghilh rawh, khanu nena in awmdun chhan kha i sawi fiah hma loh chuan nupa anga kan awm beisei suh," ka lo ti ve hmak.

"Ni e, thurûk a awm tur a ni lo. Kha nu video-a i hmuh hmeichhia kha ka patea hmeichhe khâwi a ni a, nangmahah ka rilru ka pe lo tih leh hmeichhe dang ka kawp anga a rin theih nan lem ka chang a ni e, hmeichhia ka mamawh a nih chuan nupui phur thei zet ka nei reng alawm," tiin a nui lek lek a, a hmel rum ûl kha a bo ve hret hret.

"I patea hi i la ringhlel reng em ni?" Ka ti a.

"Rinhlelh loh theih a ni lo, a bul aṭanga a tawp thlengin engkim hi ka ching fel dawn lawm," nelawm vak lova tiin a hliam ka tihfai zawh tawh avangin kawr a ha zui mawlh mawlh a.

"Siamthara kha tunge ni ta ang?" Tiin ka zawt thut a, mitmeng danglam deuh hian, "Chu tak chu alawm ka buaina, Ngurthan, i mit mai ni lo, i beng pawh hmang ṭangkai ang che, thi thei lo ka ni lo a, hetianga beih kan tawk reng a nih chuan kei pawh hian engtikniah emaw chuan ka kalsan che a la ngai ang, chuti ni mah se, kan inremnaah khan thihna chauh lo chuan tih a nih kha, ka thi a nih loh chuan nang venhim leh nun pangngai zalenna pek ngei che ka tum.." ti duahin, a thawmhnaw bag-ah a khung mawlh mawlh a.

"I kal chhuak dawn em ni?" Ka lo ti sap a. 

"Kan pahnih inah khan kan haw ang, Laltleipuii leh a fapa hmel hmuh ka kham rih," a ti tlang hmiah.

"I pa hi a la dam ti ta ila, i awih ang em?" tih ka zawt leh a, koki san âwk chung hian, "Awih lo ang, a thi tawha a lo nung leh dawn tawh lo," tih chiah a sawi. Samuel Pamei chungchâng sawi ka tum ûk a, ka ṭhulh leh ta phawt.

Inhnuai panin kan inzui thla a, ṭhutkhawmna pindanah Buatsaiha leh Tleipuii an lo ṭhu dun a, midang tumah ka hmu lo.

An pahnih ṭhu dun lai Jehoa'n a hmuh veleh, "Buatsaih, helaia awm tur i ni lo a nia, ka farnu nen ka thu hnial kalh zawnga in khawsak leh chuan ngaihdamna a awm tawh lovang, JK Farm Manager nih zel i la tum a nih chuan i rilru puthmang thlâk ang che," chang fek fawka tiin a farnu a melh leh a, "Nang pawh, ka farnu la nih zel i tum chuan ka nupui lakah rilru chhia pu tawh suh ang che, i fapa a lo pian dawn khan tunge i mamawh? Zanin anga ruahmanna tenawm kha in siam leh a nih chuan 'Ka dam duh tawh lo' in tihnaah ka ngai ang," ti leh hmiah hmiahin, ka darah min kuah a, an inpui kan chhuahsan ta a.

Vawiina ka thil tawn leh khatiang boruak thuartham vel kha Buatsaiha leh Tleipuii ruahmanna vek maw lo ni. Engtin nge Jeho khan chiang fahrana a sawi chhuah theih? A mak hle mai. 

Motor-a kan chuan hnuah ka zawt ta a. Sawi hreh hmel a pu deuh.

"Ngurthan, Aryan hnen aṭangin engkim ka hria tih ka sawi tawh kha, ka farnu nen Taxi pakhatah in chuang dun a, ani him taka a lo chhuah laiin ka nupui an hrêng thung a, phût lêt an la nei zui, chutah, sum fai leh Ram Bigha 20 an phût a, Bamos lam tih nise khatiang zât lek an phût hauh lovang, mimal ruahmanna a ni a, mi â ka ni hleinem.." tiin min melh zauh a, "Buatsaiha hi ka enthlâk lai a ni," tiin min hrilh ta a, ka vâr ta uar.

Thil dang zâwt tawh lovin kan tlan par par a, Jeho hian engkim min hrilh ve zel tawh tih ka hria, kei hian a pa chungchânga ka thu hriat ka la hrilh ve si lo lai hi ka buaina a ni ta.

Ka in luah kan thleng a, Aryan pawh rinawm takin gate bulah a lo la ding reng.

"Boss, madam, ei tur in duh dawn em?" Tiin min lo zawt a, a va fel reuh tak.

Jeho zawkin, "Zanin chu in tur kan dawm dawn nia, Farm lam an ṭha tlâng a, engmah rilru tihhahna tur a awm lo aw.." tih pahin Aryan dârah a bêng thak a, ani pawh a nui var var mai.

Eng emaw harsatna a awmin kan ri hluai a, Jehomalsawmkima a rawn lan tawh chuan a fel leh duak zel. Huat ka tum poh leh ka thei lo a, min tih lawm tumin chêt a la hran lo. Mahse, atan number 1 ka ni zel tih ka hriatbelh zel thung.

Tukina kan boruak ang lo deuhvin ka pasal nen zanriah kan buatsaih a, whisky a in pah bawk a, ka hau duh lem lo; ka tana a tih tawh zozai ka ngaihtuahin ka zah ru ngawih ngawih.

Jeho hi a landan phenah mipa dawhthei tak a nih zia ka hriat belh bawk a, a thinrim inhrosa thawm na mah se, mipa rilru chhe tak chu a ni mawlh lo. Buatsaiha leh a farnu thil tih namai lo takah te khan kei ni ila ka nasa ngawt ang, ani zawng a hunah a inbengdai leh tlat thei a, a fakawm ka ti lawi si.

"Hna i nei tawh lo bawk a, khawpui chhungah awm lovin Farm-ah kan insawn rih dawn nia, rilru hahdam i mamawh a, ka kiangah zêl i awm dawn aw doctor.. " tiin  ka plate-ah eitur min suah sak a. 

"Aw le.." zawitea ka tih chuan, "Thil tam tak zir tur i la nei a nia, nizan ang boruak kha kan nupa kârah awm tawh suh se, i thinrim a nih pawhin ka hnathawkte awm loh laiin i lungawi lohna i sawi dawn nia," dam thluamin a ti a, ka lo zak chem chem. 

Ka Laljehomalsawmkima kiangah zel ka awm dawn chuan eng hna mah thawk lo mahila pawi ka ti lo. Hei hi ka rilru dik tak a ni. 

Note: Request zawng zawng hi tih hlawhtlin a har a, Jehomalsawmkima point of view request ka dawng tam viau mai, comment lamah in duhdan han sawi ve reng reng ula, a ṭul dan angin kan che chhuak ang aw...

100423

-B®®

B+>[BeckirafARenthleI]<+®®