11.24-89 [A Becky Rafa Story]

11.24-89 

Ziaktu: Becky Rafa Renthlei

[Recap]

"Hna i nei tawh lo bawk a, khawpui chhungah awm lovin Farm-ah kan insawn rih dawn nia, rilru hahdam i mamawh a, ka kiangah zêl i awm dawn aw doctor.. " tiin  ka plate-ah eitur min suah sak a. 

"Aw le.." zawitea ka tih chuan, "Thil tam tak zir tur i la nei a nia, nizan ang boruak kha kan nupa kârah awm tawh suh se, i thinrim a nih pawhin ka hnathawkte awm loh laiin i lungawi lohna i sawi dawn nia," dam thluamin a ti a, ka lo zak chem chem. 

Ka Laljehomalsawmkima kiangah zel ka awm dawn chuan eng hna mah thawk lo mahila pawi ka ti lo. Hei hi ka rilru dik tak a ni.

-B®®

Ka pasalin a sawi ang chiahin JK Farm panin a tûk chawhnuah kan kal ta a. Far thing ding ṭhupte chuan ka ngaihtuahna a ti thui hle.

He hmun ka thlen tirh lai leh tuna kan kal dan chu a dan a dang ta daih mai, Pistol-a min tin lai te, buhpâwl ina min khung ṭum te leh Far thingkunga min nawrbeh lai nen lam ka mitthlâah a rawn lang a; Jeho ka va melh zeuh a, "I ngaihtuah ka hria a nia, khatiang kha hnungchhawn tawh rawh, i lakah eng rilru chhia mah ka pu lo," a lo ti a, ka ngaihtuah ang chiah kha a rilruah a lo awm ve tepawh a ni mahna.

"Naute kan neih hunah khawiah nge kan chen ang, nge, min kaltîr tawh zawk dawn?" Tiin ka lo zawt daih a.

"Khawiah mah i kal dawn lo, ka kiangah, ka hnaihah zel i awm dawn tih ka sawi tawh kha Ngurthan, keini pahnih hi inṭhen hrang thei kan ni tawh lova, kan inkârah thil thleng a tam tawh lutuk bawk," tia a sawi mêk laiin Farm house kawt kan thleng ta a, khua a la êng uar a, hnathawktute pawhin anmahni hna ṭheuh ṭhanhnem ngai takin an lo thawk suau suau mai.

Jeho motor ri an hriat vang nge an rawn kal phei a, min en duh hle.

"Ka hnathawkte hmuh lai hian ka duatna che ka'n tilang ang e," tiin min pawm nawlh a, "Ka nghâwngah kuah rawh le, ka nupui an zah theih nan ka duatna leh ngaihsakna che hi an mitin hmu rawh se," a ti sup a, a sawi angin a ngháwngah ka kuah a, kan thawmhnaw inchhung lama thiar lûttu nui ruh ruh chu ka hmu reng.

An boss nupui ka ni a, a ṭhente hi chuan min hmuh vawikhatna a ni hial ta ve ang.

"Châwl hahdam la, tikhan mut chiah tih tur i nei?" Tiin khumah min nghat a, kan nupa room tur chu ka melh kual nasa mai. A zau hran lo, thil ropui leh changkâng hmuh tur a awm lo hrim hrim a, a fai êm êm thung.

"Nuamsa taka kan awm theihna hmuna khuahkhirh nih ai chuan zalen taka kan nupaa awm hi nuam i ti zawk ang, tihian keipawhin hna ka thawk ve ang a, i duh chuan min lo thlîr thei bawk aw," tih pahin kan thawmhnaw ṭhenkhat a phawrh chhuak a, ka en reng lai chuan a inthlâk zui mawlh mawlh a, Jean kekawr da lam leh tawnzau dum a inbel a, a inhmeh em em tho nia.

"Thing ka ek dawn a, tukverh aṭang khan min lo thlir rawh.." a ti teh daih.

"Ka lokal ve ang aw..." ka ti a. "Ni lo e, i hmuh phâk lekah alawm ka awm dawn, nakinah kan nau te hian ei tur an rawn siam ang che.." tiin room thlanglam tukverh a hawng zui nghal a, pawna thingtum tam fe intiang ûr(h) chu ka hmu ve chiah.

"I pasal thahrui neih tam lam lo en rawh le, zan lamah ka che chhuak duh dawn bawk a," tia nui suk suk chung hian min melh a, ka lo zak leh ringawt tawh. Jeho hi kei aiin kum ruk velin a upa zawk maithei a ni.

Chumi hnu chuan Hreipui hmangin thingtum chu a ek phel ta a, a bân thahrui ngah tih hriat fahrana phiar fat te chu ka lo en veng veng a, a taksa nisa em ṭhan tih hriat taka sen uk kharh pawh a lang chiang ngei mai. Shillong hi chu a boruak a dang êm a, a vawt reng ti ila a dik zawk mah ang.

Tukverh inhawng aṭang chuan ka pasal che-tla lai ka thlir dauh dauh a, kan inhriat tirh tê-a a nungchang rorum leh pawisak nei lo tawp anga lang ṭhin mipa kha hmuh tur a tlem telh telh. 

A thlan a tla nasa ta hle tihah a duh tâwk ve ta chauh a, a naute zinga pakhat a ko a, a thing eh sa chu an rem fel thlap. Khua pawh a thim titih tawh a, Jeho rawn luh laiin ka thawmhnaw ken ka lo chingfel ve a, "Inbual rual i duh em?" Tia min zawh chuan ka lo nui tawp.

"Nupa chu inpawh taka awm tur.." tiin choka lam a mi tuilum la turin a phei leh ta rih. An inpuia an khawsak dan nuam leh changkâng zet ang kha helaiah chuan hmuh tur a awm ve lo hrim hrim.

Bathroom erawh a zau ṭha a, "Ka nupui hian min han bual ve reng reng teh se.." a'n ti ve ngei a, ka hnial dawn teuh lo. Ka châk em em zawk.

Jeho taksa lian leh khauh ṭung chu tuiin ka leih a, saruakin awm mah se inthlahrung hauh lovin ka en ve ngam tawh bawk. 

"Ka nupui i la ni dawn tih hi kum tam tak liam taah khan ka lo rin hriat daih tawh, ka duh nei turin ka bei ṭhin a, ka patea thiltih sual zârah nupa kan ni ang tih erawh ka ring pha bîk lo. Kei hian ka duh che a, Super care hospital-a i thawhna chhan dik tak pawh keimah vang a ni," tiin a hnung ka nawhsak lai chuan a sawi ta a.

"Ka in luaha in lokal khan tum dan i nei sa tihna em ni?" Tiin ka zâwt a.

Ṭha tê hian, "Kha kha chu tihpalh liau liau a ni, a hranpaa rîm chea nula leh tlangval anga inkawp kha ka tum dan a ni a, doctor koh tur tamtak zingah ka Ngurthantluangi ka duh ber.." tia a sawi laiin a nui huk a, ka va ngei e.

"I patea khan kha pa kha that lo ta se kan innei lo ang tiraw?" Ka ti hé háw a.

"Kan innei ang a, mahse, tun rum rumah chuan a ni lovang," a ti liam puat.

A taksa uluk taka ka nawh fai hnuah keimah min bual ve ta. Ka sam uluk takin min sûksak phawt a, chumi hnuah ka hnungzâng a nâwt leh hauh hauh a, ka Laljeho hi a duh chuan a fel maw le.

Zanriah pawh tuihnai tak kan ei tâk kha. Beram sa kan hmeh a, ka ei hnem ve phian.

A hnathawkte riahchilh ho nen zan lamah Carrom board an pen a, an ri ham ham a, kei erawh ka ṭhiannu hospital-a ka thawhpui Sangeeta nen call-in kan inbe thung a; "I tan hmun ruak a awm reng a nia, i lokîr hun kan nghâk reng," a tih chuan nau ka pâi thu leh chumi zawh lam chu a ni ang tiin ka hrilh a.

"I pasal ang kha hmu ve i la chuan ka tlanchhe dawn lo maw le," tia nui hak hakin Jeho chhelo a tih thu a sawi ve ngial a, ka lo nui nasa ngang mai.

"Mate, mu ang aw.." tiin room chhungah Jeho a rawn lût a, a pheikhawk hrui a phelh zui mawlh mawlh a, hnunglam aṭanga kuahin, "Helai hmuna min hruai avang hian ka lawm e," ka ti sap a.

"Hahdam i mamawh tih ka sawi kha, eng emaw chen farm-ah kan awm ang a, Buatsaiha lokal hunah pawh i mit leh i beng chhi kar ang che," tia a sawi zawh hnuah khum lam min panpui a, "Zanin chu ka nupui nen hmangaihna chendun ka duh a, i thei ang tiraw?" a ti sup a.

Jeho hian a duh chuan tharum hmang pawhin ka taksa a nei thei. Mahse, engkimah min ngaichâng zel a, hei hian min tilawm ṭhin.

Mut kawr inbel ka tum pawhin, "I mamawh lo aw.." tih pahin a thehsawn daih a, ka lo nui leh nge nge e.

Thiam leh zei taka min fawpin a lumna tempha turin min kuah hnai sauh a, "Tisa nawmna inpek tawn ringawt hian rei a daih lo, kan thinlung a inzawm tel a ngai," tiin ka mitah chiang tak hian min en a, "Ka duhna che hian hmangaihna a ken tel hun a la awm ngei ang," ti supin kan taksa a inzawm ta.

Tuna a chêtdan hi chu hmangaihna chendun tiin a hming vuah mah ila, a dik lohna a awm lo. Jeho hi ka hmangaih tawh ni berin ka hria.

Tui taka ka muhil lai chu min sâwiin min ko a, "Ngurthan, vawiin tlaiah hnathawktute hlawh sem a ngai dawn a, Umiam lamah ka kal dawn, i lokal ve duh em?" Tiin hnai zetah a rawn kun hniam a.

"Naa, tihian ka lo mu mai ang, motor-a chuan leh pawh ka peih tawh lo," ka lo ti a, nui chung hian, "Ka nupui tel lova kal ka tum loh nen i thawh peih miau loh chuan tikhan lo mu mai rawh, kan nautê kha chaw i ei kêp a ngaih kha.." tia nui ruh ruh chungin Kamis dum a ha zui nghal a, he pa hian thawmhnaw dum lo hi a nei lo em mawni. Ka hriat tirh ata tawh a dum lam zel zu han inbel a.

A kal dawnah ka chalah fawpin, "Ka lo haw har lovang, helai hmun hi chu i tan a him aw.." a ti a, ka lo bu nghat nghat a. Umiam lamah Bank a dawr dawn tih a sawi a, min chhuahsan ta a. Maimitchhingin muthilh ka tum leh a, hnathawkho thawm riva hriat tur a awm lo, a reh ṭhiap a, choka lamah erawh chuan eirawngbawl an awm a ni ang, a ri ve rak rak mai.

Samuel Pamei âw ka hriat avangin ka ṭhu chhuak hlawl a, "Jeho chu dâr engzatah nge a kal," tia mi pakhat a be ri ka hriat rualin khum ka thawhsan a.

Vansangi hnen aṭangin call ka la dawng zui.

"U Ngurthan, kan lo zin ve maithei a nia," a rawn ti a.

Farm-a kan awm thu ka sawi lai chuan kan room kawngkhar a rawn inhawng a, Samuel a lo dâk a, min hmuh veleh, "Kan piah lawkah sawn nau khawih thiam a awm a, i incheck ve duh em?" tiin dam thlup hian min zawt a, Vansangi nen kan inbiak laklawh avangin ka bân ka phar zeuh a, Samuel min biakna pawh ka chhâng lem lo.

"Nakinah ka lo call leh ang che," tiin kan inbiakna ka titawp ta a.

Samuel chu kan room zimteah chuan a tei kual a, "Ngurthan, Jeho hi ka fapa a ni tih i hre reng si a, engvanga hrilh duh lo nge i nih?" Tia min zawh chuan amah ka en vat a, "Ka hrilhna chhan tur a awm lo, i fapa a ni tih a hriat i duh lova, ka lo inrawlh vena tur awm nghal lo chuan," ka lo ti a.

"Min lo zui rawh, i naupai kha ka tû tur a ni ve tho a, damdawi inah ni lo, Pinky hnenah a ṭhat leh ṭhat loh kan en tîr dawn nia" a ti ta a. 

"Eng mah chutiang a ngai lo, kan ṭha vek, i fapa thu lo chuan khawiah mah chhuah ka tum lo," ka ti hmak a, "Jeho chu keiman kan bia ang e, a remti em em ang," a ti leh mai a, a phone phawrhin loudspeaker a on nghal a, "Pinky hnenah innu hi ka hruai dawn a, i remtihna kan nghak," a ti deuh tawp.

"Kha chu Ngurthani thu thu a ni mai, a hla chuang lova amahin a duh chuan va kal rawh u," a lo ti awlsam êt a, Pinky tia an sawi chu nau chin hre tak leh mi khawih dam theihna nei ang chi kha a nih thu Samuel chuan a sawi leh bawrh bawrh a, "Jeho berin a remtih chuan kal ila.." ka ti ve ta zawk a.

Chumi hnu chuan tûkṭhuan tlai feah ka ei a, Samuel leh Buatsaiha ding dun ka hmuh chuan ka ngaih a ṭha lo nghal ringawt. Engvang nge ka hre lo naa he mite pahnih hi ka nêl thei lo a ni ber mai.

Kei leh Samuela chauh kan kal dawn emaw ka tih laiin Buatsaiha a rawn kal tel ve a, min biak a tum sateh nain a rúl tawk lek lek chiahin ka chhâng a, Farm aṭanga hla lote, Bamos ramri depah chu nu chu a lo chêng a, pitar kum 70 bawr vel a nih ka ring.

"Ka monu a nih hi.." tia Samuela'n a hrilh lai chuan chu nu chu a nui hak. "Jeho nupui maw?" A lo ti nghal.

"Umn..Ngurthani a nih hi, tunah hian nau a pai a, kan lo pan chhan che chu i hriat kha.." a ti zawi sup.

"Tikhan ka chhuahsan che u anga, lo inbuaipui mai rawh u aw.." tiin Pinky nen chauh chuan min hnutchhiah ta a.

"Mu rawh le.." a ti a, khum pakhat awm chu a melh zeuh bawk a, nu nelawm tak a ni hran lo, a mitmeng a hriam tlat.

Thuawih takin khum âwlah chuan ka mu a, ka pum a dap dawn emaw ka tih laiin ka bawp a nawr kâu a, ka hmeichhiatna chu a kut lâwnga zen a tum ta mai. Ka duh îkhaw lo, ka lo tâl but a, pitar ve si a thâ a chak phian.

"Pinky hetiang chu ka duh lo.." ka tih veleh ring lutukin Samuel a ko a, rang takin a rawn lut nghal.

"I monu hi chelh bet rawh le, i sawi ang chiah khan a pum chhunga nautê chu kan paih ang e," a ti ta mai. Ka râk tuar tuar a, Samuel Pamei lah chuan ka chêt theih lohna turin min chelhbet tlat si. "Ka naute kha tina hlek suh u, ka that dawn che u.." tiin ka râk tuar tuar a, ka serhah eng emawni rawn hnawh a tum a, thih thá meuhin a nia ka ṭan ni.

"Samuel, khawngaih takin hetiang chuan ti suh, min thlah rawh.." ṭap chunga ka tih pawhin a ngawi ngula min vuan nghet sauh. 

Ka zawi raih raih a, ka khaw hmuh a fiah lo ṭan. Mahse, chuti maiin Ngurthantluangi hi ka zâm chhe dawn lo, tiin ka infuih ru sauh sauh a, Pinky chuan ka pum nem tumin khum mawng lam aṭang chuan a rawn lawn a, theihtawpa nain ka tlawh ta a, chhuatah a let thla tawp. Ka kut pahnih chelhtu Samuel Pamei chu rem leh rem lo hian ka melh a, "Ka that dawn che," zawitea ka tih rualin min vawnna a kut veilam chu ka sehsak ta a, a al pap. Ka sehna thawkhat bawk. Ka serh a rawn lum pup a, hrilh hranpa ngai lovin thi a chhuak tih ka hre mai.

"Jeho..." tia ka phun ri chu a ri chhuak zo tawh lo. Pinky a rawn tho chhuak leh a, rum fea min melh chung hian, "Ka rin aiin a luhlul tlat, Samuel, hmeichhe pakhat lek pawh i vuan bet thei lo a nia," a ti ram hmak a, Samuel ve thung chuan a kut ka sehna chu a tuai vut vut a, a thi nasa mai.

"Ngurthantluang," a ti sup a.

Thawhchhuah ka tum ve a, ka thei ngang lo. Ka thâ a zawi vek a ni ber.

Chutih lai tak chuan kawngkhar a rawn inhawng a, Jeho leh Buatsaiha an rawn lut hlawl a.

"Eng thil tenawm nge in tih?" Tih pahin a patea hrawkah a rêk a, a khuh nghal bawrh bawrh.

"Jeho, i nupui hian nau tihtlâk a tum a, ka pui mai chauh a ni," tia Pinky a ṭawng chuan Jeho a rûm dut a, Buatsaiha hnenah, "Ani ka thah loh nan hian a inah dah ang che, thi tlâk a la ni lo," tih pahin a patea chu a nam kat nawk nawk a, khuma ka mu chu min rawn pan a, "Mate..." a ti zawi sup.

Ka lo ban vat a, min pawm nawlh a, bed-sheet-a thisen kâi chu melhin, "Ka fa hi a thi a nih chuan nang hi ka zuah hauh lovang che," tiin pitar chu a melh a, a lo ner nasa mai.

"I nupui khan i fa a duh lo, kei hian titla lo turin ka hrilh alawm," tiin dâwt chiang lutuk a sawi a, ka va ngei mai mai tak.

Mahse, chhâng turin ka âw a ri chhuak thei tawh lo.

Jeho phun hluk ri ka hria a, Buatsaiha leh a patea chhuak lai chu ka hmu vuai. 

A motor seat hnungah min mut tîr a, amah pawh a rawn ṭhu lut nghal bawk a, Aryan ka hmu ve chiah, "Hospital pan rawh le, Super care aw.." tiin min kuah a, ka mit sulh a, ka maimitchhing ta.

"Mr.Jeho..in vannei hle mai, naute pawh a ṭha e, an damdawi hman kha nau tihtlâkna a ni lo a, amah nikhua a hriat loh nan a serh aṭanga thun chi an hmang hmasa hlauh a ni e.." tia doctor ṭawng thawm ka hria a, ka meng chhuak a, ceiling var vûk chuan ka mit a ti vai rum rum thei alawm.

"Ka nupui dinhmun a ṭha em, hlauhthawnawm a la awm em?" Tia ka pasal aw nghet charh chuan min va thlamuan si êm.

"Chutiang eng mah a awm lo, damdawi in rawn panpui nachâng i hria a, in vannei a ni ber," tiin Jeho darah a bêng thak thak a, ka tui a hâl êm avangin, Jeho ka ko a, min rawn hnaih nghal ruak.

Tui ka duh thu ka sawi chuan rang takin min lâksak a, "Samuel Pamei hi ka haw lutuk.." ka'n ti leh rih.

"Ka hria alawm, a thih a la hun lo, a thi dawn a nih pawhin muangchângin le.." a ti duh chauh.

Khumah a rawn lâwn a, "Keini pahnih tan hian hmun him a awm lo, Jeho, ka himna tur ber chu Mizoram a ni, min dah chho mai rawh, kan naute nen kan him em em ang," ka lo ti sap a.

"Aih, a theih loh, ka ngaihven phâkah awm la, chu chu i himna tur a ni mai, Buatsaiha khan i ṭê ri a hria a, min lo call vat a, ka rawn haw ta a ni," tiin khalai hmuna a rawn lan thutna chhan kha a sawi fiah a.

"A va ti ṭha ve.." tih chiah ka sawi.

"Buatsaiha hi chuan min tichhe ngam tawh lovang, warning ka pe zing bawk a, ka hnuaia a thawh loh chuan eizawnna tur a nei lo, a chhan chu Police lamin a rukin an veh reng, chuvang a nia, ka farnu pasal atana ka duh lohna chhan chu," ti duahin ka bulah a rawn mu a, "An hau ang che," ka lo tih chuan a nui suk a, "Kan hospital a nia lawm, ka mu duh a nih chuan ka mu mai ang," a ti leh hmiah.

Min kuah hlu hlu a, "I natin ka na a, i ṭah pawhin keimahah hriatna eng emaw tak a awm ṭhin. Ka patea ka lo ring leh ṭhin hi ka tisual a ni, i lâka a chet dan kha theihnghilh turin ka ti dawn lo che, mahse, tunah chuan haider rawh aw, a thil tih sual man têl tur a ngah tawh a, keiman ka bitum ang," tia min hrilhin ka pum a chul a, "Hetiang em em hian ka duh ang che tih hi ka ring pha lo," a'n tiah.

"Kei pawh..." ka lo ti ve a.

Nui huk chung hian, "Kan induhna hian hmangaihna a ken tel hun a la awm dawn.." inringtawk taka tiin ka sam a zût a, "Nang leh ka fa venhim hi ka dam chhan pakhat a ni." Tia a sawi zawh rualin ka hmuiah a fawp zeuh a, nuam ka va han ti tak.

Nikhat leh zan khat Super care hospital-a kan riah hnuah Farm house panin kan lêt leh ta a, min duat êm avangin damlo reng mah ila pawi pawh ka ti lo. Â..a va ho e, ka thil ngaihtuah dan mai mai chu.

Ka naupaiin thla thum hmel a hmu ve ta. Farm aṭangin kan chhuak ngai lo a, Samuel Pamei pawh ka hmu nawn tawh hek lo, nitin Jeho hnathawk lai ka en a, ka hriselna pawh a ṭhain a boruak ka ngeih a ni ber.

A thawhrim zia nitin ka hmuh phei chuan ka ngaisang leh zual. Tuktin exer lain a chhuak ziah a, min sawm ve naa ka peih ngang lo.

"Ngurthan, kan Kêlpuiin nau a vei tlat mai, i lo buaipui thei ang em?" Tiin Jeho chu  ka ṭhutna bulah a lokal a, naute kawrlum tur phiarin keima tawkah ka buai ve hle. Pathum ka phiar zo tawh bawk.

"Ka thiam dawn em ni?" Ka lo ti a.

"Lokal rawh le, doctor i nihna kha han hmang ṭangkai la a ṭha a ni mai," tiin ka bânah a vuan a, Kêl in lam min panpui ta a.

A hnute sâwr dawnah pawh min hruai ve fo ṭhin. Kêlpui natuar bulah chuan ka ṭhu hniam a, a pum puar tak chu ka chûl a, nei mai thei dinhmunah a ding tih a hriat reng.

Chhangphut ang deuh hi Jeho chuan a chawk kâwi a, Kêlpui kâah a thun a, a lo tep chap chap mai, "Eng thil nge?" Tia ka lo zawh chuan, "Aklama Davai, a nih kha, nau an neih dawnah kan barh ṭhin," tia min hrilh fiah hnuah ka ṭhutna tur a rawn la a, Kêl inah kan nupain kan ṭhu ve ta rân mai.

A hnu dârkâr khat a liam leh chuan Kêl note dum ṭha tak mai ka chhar ve ta. Hmeichhe lam doctor ka ni lo nain a zira zir ta ngang chuan ka thiam nghal mai a.

Jeho pawh a ni leh ni lo angin a ri hlut a, a lawm ve ngang a ni ang. Zan dar 8 velah Farm house panin kan lêt leh ta a, kan zanriah tur an lo peih diam tawh a, Aryan khan min melh zeuh a, "Madam, i inbual hmasa dawn em?" Tia min zawh chuan, chaw ka ei phawt dawn tih ka hrilh a, Jeho erawh inbual turin a lut tawh thung.

Chaw ka bâr ṭan chiah tihah mipa na tuar ṭê thawm ka hre zui zat a, ka ding nghal hluai.

Samuel Pamei hmel ka hmu nghal a, Samuel hmai a duk thluah a, "Jeho ko rawh..Bamos lam an rawn hnai a nia," tiin chair hnai berah a ṭhu hnawk a, ka'n enchian deuh chuan a bânah hliam a lo nei chu niin. 

"Aryan, i boss va ko rawh, bathroom-ah a awm.." ka ti zui zat a, Samuel natuar ṭhen sak sak chu ka lainat ve deuh avangin, "Nachhawknain ka jection ang che aw," ka ti a, a lo bu nghut.

Jeho khan damdawi an dahna hmun min hrilh vek tawh a, Farm aṭanga thil tê tham lam tura chhuah fo kha buaithlak an tih avangin an in lamkhâwm sa vek zel tih a sawi.

Samuel ka buaipui laiin Jeho a rawn chhuak a, "Bamos lam an ni tih i chiang maw?" Tia a patea a zawh chuan, "Ka fapa va fimkhur ang che, paruk lai an niin ka hria," a ti a, ka lo hlauthawng leh tawh.

"Kal lo mai rawh," tiin Jeho ka melh a. 

"I bulah ka nupui ka kalsan dawn a, ka mit tikham suh ang che," tiin a patea a be leh a, chutah keimah min en a, "I tih tur i tih zawh tawh chuan kan room-ah lut rawh, keimah ka nih loh chuan tumah kawngkhar hawnsak lo la, chhunglamah kalh tlat ang che," ti supin ka chalah a fawp a, a Pistol pahnih a en dik leh tê tê hnuah Aryan nen an chhuak ta a. Ka ruak huaiin ka hria.

"Ka fapa tan nang hi i ṭha tawk chiah em? Tih ka lo ngaihtuah a, i ṭha a nih hi," a ti ve ngial. Ka'n awih lo mai mai khawp a, hetia ka buaipui tâk avang hian min fak derah ka ngai, hepa hi ka ring hlawl lo.

Ka phone a rawn ri a, Tleipuii a ni tlat.

"U Ngurthan, Mama ka be tlang thei lo a, ka nu hi nizan aṭangin a lo la haw lo.." a rawn ti ta mai. 

"Eng a?" Ka lo ti vak a.

"Ka nu maw le, a lo la haw lo, a kalna chin sawi lovin a awm ngai lo a, Mama lo hrilh rawh aw," mangan hmel takin a ti a, Jeho a awm loh thu leh a chhuah lawk thu ka hrilh a, "I patea hetah a awm," tiin ka hrilh hrâm. Chu veleh, biak a duh thu a sawi a, Samuel phone ka pe ve nghal.

Silai puak ri ka hre zui a, a ri deuh zawt zawt mai, a rîkna a hla deuh thung.

"Lo haw thei ka ni lo a, i u a lo lêt hunah tih dan tur kan dap dawn nia, tikhan lo awm phawt rawh u..." tia an inbiak zawh hnuah phone min pe a, "Pianmawii an tina a nih vaih chuan," tia a phun hluk ri ka hre pha reng.

A nupui hlui nisiin Jeho patea angin a awm a, a nun hahthlâk dan tur hi ka chhût thiam vein ka hria.

Zan dar 12 hnulamah chauh hmel takin ka pasal a rawn lut a, min be miah lovin chhuatah a ṭhu hnawk. 

"Jeho.." tiin ka pan hnai a, "Ka nu an kawl tlat mai, JK farm hi an kutah kan pe a nih loh chuan ka nu damin kan hmu tawh lovang," a ti zawi ruih a, ka khawngaih lutuk.

Ka kuah vat a, "I lamah ka ṭang zel aw, eng thutlukna pawh siam la, ka pawmpui zel ang che," tiin ka âwmah ka kuah bei a, a thaw chhuak hawk. A rilru a hah ve ngang a ni ang.

"Khua han var se, tih dan a awm mai ang, mu phawt ila.." tiin ka kuahna ka thlah dul a, rang takin min kuah lêt vat a, "Tualthah kher hi ka duh lo, he farm hi ka nu ram ni mah se, a hming putu keimah ka ni, ka nu ka hruai chhuak dawn a nih chuan keimah ka inbarh lût dawn a, ka kalsan che a ngai dawn," tia a sawi lai chuan ka lo thaw halh.

Ka pasal tel lovin engtin nge ka awm ang, ka ngaihtuah duh lo hrim hrim. 

Zinglam dar khat a ri tawh a, Jeho phone a rawn ri a, rang takin a pick nghal vat.

"Aw le, ni rawh se, Aryan nen darkuaah kan lo chhuak ang, Buatsaiha leh Arun kha Farm ah awm sela.." a ti zung zung a, tu nge a biak ka hre lo.

"Naktuk hian Raitong hmunah ka nu khulchhuak turin ka kal dawn a, kei tih loh tumah hnaih suh ang che, kan kal hlanin JK ram hian beih a tawk thei a, helaiah hian Pistol ka dah a, a mu awm sa vek a ni, a ṭul hunah hmang ang che aw," tiin 'dunlop' a keu a, Pistol chu phawrh chhuakin, "Tunah chuan i pum chhunga mi leh nangma himna tur a nih chuan tih hreh nei suh ang che," fiah kâka tiin a ṭhu chhuak a, "Chemte pawh hman hreh loh tur," a la ti hrâm.

"Jeho...min hruai ve mai rawh.." ka lo ti a.

"A theih loh," a ti hmiah.

"Hetah hian i lo awm ang a, Buatsaiha leh Arun an awm tel bawk ang, ka patea hian a bia che a nih loh chuan i tan biak hmasak a ṭul lo aw.." tiin a mu leh a, min kuah pahin, "Zanin chu ka che lo mai ang, rei lote muhthilh ka duh.." a ti a, amah si chêta min pawh hnaih hnuah min kuah chungin a maimitchhing ta a.

Buaina a kiang a, buaina dangin min tlâkbuak leh a, nun hahdamna tur helai hmunah hian a awm hlawl lo. 

Jeho muhil hmel ka en a, a mu nghet lo reng reng, a phu leh zawk zel a, ka lo kuah nghet sauh thung.

A chhungkua venghimin a hmanhlel a, a sual vang em em pawh ni lovin JK ram humhim a tumna zawkah misual nih a hlawh zawk nimaiin ka hria.

A hmuiah ka fawp zauh a, a rawn meng kâwk.

"I duhthu renga min fawhna hmasa ber a ni hial lo maw," tih pahin duhthawh zet hian min fawp nghal nawk nawk a, ka lo phur leh viau tawh.

Min lehthal pah hian, "Ka chêt a ngai leh si, zinglamah ka nupui raino ka ît tlat hi sual a ni lo," a ti sup a, ka lo nui var var.

A hnu leh chu ka sawi thui peih lo, Jeho âng chhungah nawmna famkim ka dawng a, kan rilru hahna bo vek lo mah se, kan duh kan inpe tawn a, a hmel dam thlup leh a mitmeng thim mâk chu tawrh a har ka ti. A 'Pa' thlâwt a ni.

"Doctor niawm tak i lo nih hi.." tiin ka âwmbâwr a chul hauh hauh a, "Eng vangin?" Tia ka zawh lêt chuan, "Zirlai thiam thei tak i ni, nula thianghlim nupuiah ka nei a, tunah chuan pe chhuaktu nih dan pawh i thiam ta," tiin a nui suk. 

"Zirtirtu ṭha tak i ni..." tih pahin a kâwng hnuailamah ka kut ka dah thla a, "Ka thahrui zawng zawng min lâksak i tum chu a ni êm lo maw?" Tia ka kutah manin a fawp zauh a, khawvar hma loh zawng kan titi dun ngial a, Jeho ngaihawmna ka hriat belh thar leh ta.

Khua a var fel a, a ei tur ka chhawp sak chu ngawi rengin a ei mial mial a, a nu Bamos lamin an kawl tih ka sawi tawh kha, tukina kan hlimna te kha chu mumang ang mai a ni leh tawh.

Coat suit dum a ha a, a hnuaiah Shirt dum a inbel bawk a, "Fimkhur takin aw, i tel lo chuan engmah ka nih loh hi, kan fa hian pa koh tur a neih loh ka hlau teh a nia," ka ti a.

"Kan la thi vek dawn alawm," tih chiah a sawi.

"Jeho, khatiangin ṭawng suh.." ka lo ti ṭhat a.

"Thi turin kan nung a, nung leh tur chuan kan thih tho a ngai, eng mah ka tiam thei lo che a, i sahimna tur kawng erawh dap thiam la ka duh, kei tih loh tumah ring suh ang che," a ti duah a, nidang angin min ṭawng thlamuan pawh a tum lem lo. 

"Min hruai ve mai rawh, ṭangkaina ka lo nei mial thei asin.." ka la ti ve fan.

"Naupangchhia ang maiin ṭawng ṭhin lo teh, inkahna a thleng ngei dawn a, Aryan nen chiah kan kal bawk ang, ani hi Pistol kah thiam tak a ni a, a hlah ngai lo, Buatsaiha âiawh tur a tana train a ni," tiin a tho chhuak a, Aryan pawh a rawn lut ve chiah bawk.

Gurkha dinna lamah an inzui phei a, kei pawhin an hnungah ka zui ve dat dat a, min ngaihsak tawh lo hrim hrim. 

"Ngurthan, hetah lokal teh.." tiin Motor bulah a ding a, "Secret code kha aw.." ka beng bulah a ti sup a, ka lo bu nghat nghat. 

"Farm house chhuahsan loh tur, kan kal hlana eng emaw a thleng palh a nih chuan rang takin min lo call dawn nia," ti lehin ka kut pahnihah a chelh kawp a, "Mahni nunna chhanhim nan chuan tihhreh nei ngai suh ang che," tia a sawi zawh rualin ka chhipah a fawp zeuh a, Motor chhungah a lut ta.

A bân dinglam a rawn vai zauh a, "Ka lo haw leh ang tiin ka tiam thei lo che, mahse, nuthlawi i nih loh nan ka theihtawp erawh ka chhuah dawn a ni," nghet charha tiin chak fe hian an tlan chhuak ta a.

Ka ngai nghal ringawt.

"Lalpa, ka Jeho kha min venhim sak rawh aw..." tiin ka phun chhuak sap a, in lam ka pan ve ta hnak hnak a.

030423

-B®®

B+>[BeckirafARenthleI]<+®®