12.24-89 [A Becky Rafa Story]

12.24-89 

Ziaktu: Becky Rafa Renthlei

[Recap]

"Farm house chhuahsan loh tur, kan kal hlana eng emaw a thleng palh a nih chuan rang takin min lo call dawn nia," ti lehin ka kut pahnihah a chelh kawp a, "Mahni nunna chhanhim nan chuan tih hreh nei ngai suh ang che," tia a sawi zawh rualin ka chhipah a fawp zeuh a, Motor chhungah a lut ta.

A bân dinglam a rawn vai zauh a, "Ka lo haw leh ang tiin ka tiam thei lo che, mahse, nuthlawi i nih loh nan ka theihtawp erawh ka chhuah dawn a ni," nghet charha tiin chak fe hian an tlan chhuak ta a.

Ka ngai nghal ringawt.

"Lalpa, ka Jeho kha min venhim sak rawh aw..." tiin ka phun chhuak sap a, in lam ka pan ve ta hnak hnak a.

-B®®

Samuel Pamei pawh a hliam a nat deuh avangin khumah a mu a, a ṭawng tuitam lo khawp mai. A rilru chhiat leh sualzia ka ngaihtuah apiangin ka enkawl thá a tho hlawl lo. Mahse, thisenah Jeho pa dik tak a ni a; tin, ka pasalin haider sak tura min ngenna avang khan ka kovah dahin a hliam tepawh ka enkawl hrâm zawk.

Jeho te kal chhuah aṭangin dârkâr tam a liam tawh a, hnathawktute pawhin an dan pangngaiin hna an thawk leh suau suau tawh a, Buatsaiha leh Tleipuii an lo lang hlawl mai, Arun tia Jeho-in min hrilh pawh a rawn kal tel ve a, a mitmeng a hriam hrûk naa kei min melh chuan a men dan a dam thlup lawi si.

"Madam, Boss thupêk angin chawl hahdam la, in room-ah inkhung tawh rawh le," tiin Arun chuan min bia a, a hmêl en aiin a aw a sîn daih.

"Helamah hian buaina kan tawh i ring em?" Tia ka zawh lêt chuan, "A hriat loh, pi ber hi himdama hruai chhuah tum mah se, inkahna a thleng ngei dawn tho, helam pawh inralrin kan ngai," tiin a sawi tlang hmiah.

Kan vaia in tur Coffee sa ṭha tak Tleipuiin a siam a, kan la inbe lo hrim hrim; ka laka a rilru put hmang khan amah min hlat tîr sawt ka ti mai.

Tleipuii chuan min melh zeuh zeuh a, "U Ngurthan, ka nu hi an tina ang em le?" Tiin min zâwt a, "Hmeichhia êm chu kut an thlâk dawn em ni?" Tia ka sawi mêk laiin, Buhpawl dahna lam aṭangin thâwm a rawn awm a, hnathawktu pakhat hi hmanhmawh lutukin a rawn tlan phei chawn chawn a.

"Arun, saw lamah sawn pahnih an lokal a nia," a ti a, a hmanhmawh hmel ngang mai. Riffle puak riin a zui leh zat a, ka phu dâwrh, Tleipuii a ṭê chûl bawk. 

Samuel Pamei pawh harsa tizetin a rawn tho chhuak a, Pistol a hum bawk. Keini lam min rawn melh kual a, "Tleipui, Ngurthani nen khan pindanah lut rawh u," a ti vin hluk a. Îhe lovin Tleipuii kutah ka chelh a, kan nupa room lamah kan tlan lut ve nghal a, mipa ho zawng pawnlamah an chhuak vek tih tlan thawm leh au chul ri aṭang chuan a hriat mai.

"Bamos Farm Manager kha kâp hlum lo se chuan hetiang ang buaina hi kan tâwk hauh lovang," tiin Tleipuii khumah a ṭhu a, helai ka thlen tirh tê a, Samuela'n a kah hlum tâk kha Bamos Farm Manager a ni tak alawm, Buatsaiha'n engkim a hrilh hre zel tihna a ni ngei ang.

Pawnlamah silai puak thawm a ri zauh zauh tih loh thawm danglam hriat tur a awm rih lo. Jeho ka ngaihtuah êm êm a, message takngial pawh min la thawn îk si lo.

"I pa thattu hi i hria em?" Tiin Tleipuii ka zawt teh daih a, meng buai nak chung hian, "Hre lo, hriat pawh ka duh lo, Mama pa thattu erawh chu ka hria," hnuailam melh pahin a ti a.

"Tu nge?" Ka lo ti vat.

"Bamos ram neitupa hian a that alawm.." a ti ta a. 

Umiam-ah hian Farm tam tak a awm a, ram inchuha buai pawh an awm nual. JK leh Bamos hi an nasa zual tih te a sawi kâi a. 

"Mama hian humhim a tum viau nain tualthah a duh lohna hian thil a ti buaithlâk vek," tia min hrilh lai chuan kan room kawngkhar tu emawin a rawn chûm dawt dawt a, Tleipuii a ding hluaia va hawnsak a tum teh ngawt a, "Hawng hlek suh, i û a nih loh chuan tumah kawngkhar hawnsak loh tur," a beng bulah ka va ti sap a, a ngaihdan a nih loh hmel hle.

"Buatsaiha pawh a ni thei tho asin.." a la ti ṭâlh a, nelawm vak lova melh chung hian, "Buatsaiha a nih chuan min ko dawn lo em ni," ka ti ve hmak.

Room kawngkhar a ri dawt dawt reng a, tihchhiat an tum tih hriat reng reng.

Jeho Pistol hnutchhiah kha ka chuh vat a, kawngkhar lam panin an rawn hawn ruala kâp nghal thei turin ka lo inruahman ve a, Tleipuii mita mak tihna lo lang chu ka hmu reng, ka haider hmiah thung. 

Ka pasal thu bâk tu thurawn mah lâk ka tum lo.

Arun-a aw ka hria a, veranda lam hnaih aṭangin a ni.."Madam.." a ti a, a ri dawt a, thaw hrâwk riin a zui nghal. Tleipuii chuan tukverh lam panin a va bih a, "Arun an vit a nia, u Ngurthan, kan puih a ngai," hlauthawng âw takin a ti a, ka dinna ngaiah ka la ding ngar.

"I duh chuan tukverhah khan chhuak la, va buaipui rawh, kei chuan Jeho lo haw hma chu he pindan hi chhuahsan ka tum lo a, an rawn tichhiaa min hruaichhuak a nih erawh chuan thuhran ni se," ka lo ti nghet charh.

Min melh râm râm a, "I hmâ i sial hle mai," a ti nghat, "Tumah hi ka ring zo tawh lo che u, ka pasal farnu ngei pawhin hmanni lawkah khatiang rilru kha ka lakah i pu a nia," ka ti ve sak sak a, Ka thusawi engah mah ngai lo hian thlanglam tukverh a hawng a, a chhuak lui ta.

Nichina kawngkhar hawn tuma lo buai chiam kha a reh daih a, silai ri pakhat mah hriat tur a awm tawh lo, Kêl be ri chiah ka hria a, Arun kha buaipui duh viau mah ila, Room chhuahsan ka duh miah lo thung.

Khua a thim chhawlh tawh a, choka lamah ṭawng thawm a ri nak nak a, "Ngurthani khan a ti thei ang, hospital panpui leh pawh a tlai zel," tia Samuel ṭawng ri ka hriat avangin room kawngkhar kalhna ka hawng dêk dêk a, ka va en nâk chuan chhuatah Arun Verma a lo mu zuar a, a malpui leh a bekah hliam a nei a, a meng â ruai mai.

Tleipuii leh Buatsaiha'n an lo buaipui ve nawk nawk a, ka inrawlh lo thei ta lo.

Rang takin ka chhuak phei a, "Buatsaih, a thih i duh loh chuan hospital panpui rawh u.." ka ti ta a, min melh zuk duh chauh.

A aia vin zawk hian, "Ka sawi chu i hria em, hospital panpui rang rawh u," ka ti leh ṭhawt a, Tleipuiin, "U Ngurthan, a inhliam chhan min zawt dawn asin, Buatsaiha a tâl âwk mai ang.." a lo ti a.

"A ṭha e," tih pahin ka doctor bungrua beitham zet chu ka va la a, chhuata mu hlawm reng Jeho hnathawk Arun Verma malpui kak duai chu a 'raw' in ka ṭhui hmiah. Thi lah a chhuak duh nasa mai si, a beka hliam erawh a thûk lo hlauh zawk a, nachhawkna sâng kan kawl loh avangin a na viau ang, tihngaihna dang a awm ngang si lo.

Samuel pawh khumah a mu hlawm reng a, ani hi chu hliam neisa kha a ni a, Tleipuiin a buaipui avangin ka va inrawlh duh lo. 

"Jeho awm loh lai chuhin an lo che chhuak satliah a nih kha, keini lam ai te chuan an tlêm daih a, tualthat turin an huaisen tâwk lo," tiin Buatsaiha'n Tleipuii a hrilh a, "Ka hruai haw ang che, kan fapa i kalsan rei mah mah tawh.." a ti leh sup. Jeho awm loh lai chuan Buatsaiha hi boss a ni mai, Samuel hi chu a upa ve deuh tawh a, mawhphurhna a la vak lovin ka hria.

Ka phone a rawn ri mial a, rang lutukin ka ban nghal a, Jeho hnen aṭangin a ni. "I pasal damlai hmel i hmuh duh chuan Bamos farm house-ah lokal ang che, tun aṭanga minute 10 hnuah nangmah hruaitu tur a lo thleng ang," mipa aw hniam ruih hian a ti a, Jeho leh Aryan an ni lo ve ve tih ka hria.

"Khawngaihin tina suh.." ka ti sap a.

"A nat i duh loh chuan i lokal a ngai rêng a ni." Fiah taka tiin, "Nangmah rawn hruaitu tur che kha zui la, midang an kal tel tur a ni lo," tia a sawi zawh hnuah phone a off ta a, a aw rîk dan aṭang kha chuan pa sual tak a nih hmel loh. Ka rin dan ve mai maiin.

Kan inbiakna chu an vaia hriat laiin ka sawi chhuak a, Samuel ngaihdan a ni lo nasa mai. "Ka fapa hi mahni in enkawl thei tura chak tawk a ni, a thachhang dawltu Aryan pawh chuti bawk, nang raipuar kha an mutpui châk vang lek che a ni ang," a ti tawn tawn a, ka kal a rem ti lo hulhual.

"Jeho himna tur a nih chuan ka kal ang, vawi tam ka nunna a chhanhim tawh a, keia nunna âi chuan ani hi a hlu zawk, a chhan chu phuba la tur tala a dam a la ngai," ka ti ve hmiah. 

Chumi hnu chuan an vaia remti lo chungin ka insiam ve ta a, kha pa sawi dan kha chuan minute 10 hnuah min hruaitu tur a lo kal dawn tih a sawi.

Farm house kawtah Jeho Gurkha a rawn ding dawt a, mipakhat leh nu Pianmawii an rawn chhuk a, "Ngurthan, i tan eng mah hlauh tur a awm lo, ka fapain a venghim ang che," tiin inchhungah a rawn lût a, him pialin a nia a awm ni. 

"Jeho chu ka hmu thei ang maw?" Tiin ka zawt a, "Kut inthlâkna lam engmah a awm lovang, inbiakremna in nei zawk dawn, kei chu ka ṭangkai lo," tiin a fanu Tleipuii a melh daih a, a mak leh ta. Zankhat leh nikhat an hrêng a, hlauthawng hmel a pu miah si lo. Anmahni chhawr lai ngeiin ngampa takin hetah a rawn dah thlap a ni a, thil dik lo chu a awm ngei a ni.

Min hruai tura an rawn tirh chuan, "Kal ang le," tiin min thlêk vung vung a, ka bag ah chemte leh phone ka ak a, Pistol erawh kha chu Jeho tihdan ang chiahin ka kâwng hnunglamah ka zep ve a, hlauhthawnna ka nei lutuk lo, ka pasal huaisenna ang kha nei ve lo mah ila, keima tawkah ka rilru a paukhauh sawt hle.

Gurkha seat-ah ka ṭhu lut a, Samuel Pamei chuan, "Mahni nunna hlutna châng hre lo chu thih chiah i hmabâk, kei hian ka ui lêm lo che. Mahse, ka tû tur erawh kha chu ka lainat ve aw.." ngeiawm taka tiin min ṭawngkhum a, nu Pianmawiin a melh kâwk a, "Ngurthantluangi a tira ka lo that lo kha chu ka tihsual liau liau a ni," a tih leh hmuk hmuk hnuah inchhung lam a pan ta a. Samuel nen hi chuan engtikah mah kan inrem dawn lo tih ka thinlung hian a hria a ni.

Bamos ram zau lutukah kan tlan lut ta a, JK ai mahin a ram a ṭha zawk emaw tih mai tur a ni. Âr in niawm tak panga a intlar zui a, Beram leh Sazupui nalh tak tak hmuh tur an tam mai. 

"Boss kan hmu phawt ang," tiin min hruaitu chuan a ti a, ka lo bu nghat nghat.

Heng farm pahnihte intihbuai chhan hi a lang uar, an ram a inhnaihchilh bâkah ramri ṭhenna hran awm lovin a inzawm vek nimaiin ka hria.

Farm house changtlung zetah min hruai lût ta a, Cane Chair-a mipa lo ṭhu chuan, "Jehomalsawmkima nupui pawh a rawn thleng ta e," a ti sup a, phone-a min lo betu kha a ni.

A sângin a palian em em a, a hmel han ṭhat si zia chu. A vun a ngovin a lang thar sur a, Jeho hmuh tumin ka hawi kual a, "Hetah i pasal a awm lo, nakinah ka hmuh tîr ang che, hlauthawng suh.." tiin a rawn ding chhuak a, a taksa a inkhaithli nalh zuih mai.

"Khawiah nge Jeho?" Ka ti zawi raih a.

"Doctor kan mamawh a, i pasal i hmuh hmain thil pakhat min tihsak lawk a ngai ang," tiin min rawn din hnaih a, ka lo tawlh hla hret a, a nui suk duh chauh.

"Min lo zui ta che.." ti lehin choka lam hnaiha room pakhatah chuan min hruai lut ta a. 

Chu room-ah chuan hmeichhe pakhat hi a lo mu a, a hmel en rêng rêng pawhin a dinhmun a ṭha lo tih a hriat hliah hliah.

"Tu nge a, eng nge a natna?" Tiin ka zawt a, ka panhnai nghal ruak. Ka hmuh hnu ang ka ti hle bawk.

"Ka farnu a nih kha, tunah hian nau a pai a," tiin a farnu bulah a rawn ding a, "Doctor, a dinhmun hi a ṭha lo viau a nih loh chuan a naupai hi min paihsak rawh,  tichuan i pasal Jeho nen ka tibuai lovang che u, ka mi huat ber chu Jeho ni lovin Samuel Pamei zawk a ni," dam thlupin a ti a, min tihnat tum hmel a pu hran lo.

"En teh, hmeichhe lam doctor ka ni lo a, hetiang chu ka ti ve thei lo, i duh chuan Super care hospital-ah hruai ila, a buaipui theitu tur ka kawh hmuh ang che," ka lo ti a.

"Chu chu ka thil duh loh ber a ni, damdawi eng emaw chawh la, a naupai tlâkna tur hi ngaihtuah rawh, chu chauh chu a ni mai," tih pahin a farnu chalah a dawm a, a rawn men chhuah tâkah chuan ka hmuh hnu a ni ngei e. Ka lo en chiang lo mai mai a, a hmel lan dan a danglam êm avangin tu nge tih ngaihtuah nachang ka hre lo a, Jeho leh he khasi nula video hi ka nei alawm. Engtin nge a nih theih? 

"A naupai lai hi tu fa nge?" Ringhlel deuh taka tiin ka zawt a, rei fê a ngawih hnuah, a sawi duh dawn lo emaw ka ti hman tawh a, muang ban churh hian, "Samuel Pamei" a ti ta mai.

Ka mengphar âwk a, awih lohna mitmenga ka melh chuan, "I pasala nu ka hrên nachhan chu, Samuel hian ruahmanna tenawm tak siamin ka farnu a ti bawrhbâng a, Jeho hian a hriatpui em ka hre lo.." a ti leh nghut.

"Nangmahin i thei lo a nih pawhin i ṭhian doctor dang bia la, kawng dap rawh," thupe aw taka a tih laiin room kawngkhar a ri rawp a, Jeho a rawn lut ta.

"Ngurthan," a ti zawi ruih a, chutah, ka bula mipa ding chu a en ngur a, "Jeho.." ka lo ti ve sap.

"Richard, ka nupui hi engtin nge helaiah a lo awm theih?" Tiin a zawt a.

Bamos Farm neitu hming chu Richard a nih chu. Hming dang a la nei thova rinna ka nei.

Khuma damlo mu pawh a rawn meng a, "Jeho.." tiin a rawn ko ta a, a aw a thâm chhalh mai.

Rang takin ka pasal a kun hniam a, "Shisha, i ṭha leh vat mai ang," tiin a samah a chûl sak a, ka run lutuk tlat.

"I nupui hi tunkar chhung chauh kan hnenah chengin ka farnu enkawl se la, kan inkar buaina hi ka theihnghilh tawh ang," tia Richard a ṭawng lai chuan mit khap lék lovin Jeho ka en a, helai hmuna a kal nachhan kha dâwt min hrilh tihna a ni thei ang em?

Aryan hmuh tur a awm lo a, Rishan pawh chuti bawk. A nu nise dam ṭha takin an rawn dah a, ka pasal pawhin engmah lungawi lohna nei lo ang mai hian Richard-a farnu a bia a, â..eng mah hi ka hrethiam teh nuai lo. Ka thluak a châwl a nih ber hi.

"Ngurthani hian i farnu ang thovin nau a pai a, amah kalsana haw ka tum lo, damdawi in lamah Shisha hi hruai zawk rawh, ka patea'n a hriat chhuah chuan a pawi dawn a nia," thle buk chunga tiin Shisha kut a vawn sak a, "Jeho, i hrethiam lo a ni.." tih chiah Richard chuan a sawi.

"Ka nupui hi a fâlin kan be lawk ang e," tih pahin Jeho chuan ka darah a rawn vuan a, ka lo ṭang ṭung.

Farm house Veranda-ah min dinpui a, "Hetah, eng ti turin nge i lokal, Jk chhuahsan lo turin ka hrilh lo che em ni?" A ti khur khur a.

Phone call ka dawn thu ka hrilh chuan, "Richard farnu hi video ka siampui kha a ni. Ka patea hmei a ni bawk a, tuna a naupai lai pawh hi ka patea fa a ni, engtikah mah Richard hian a pawm ngai dawn lova; Ngurthan, i pum chhunga mi i hmangaih ang chiah khan Shisha pawh hian a fa a hmangaih a tihnat sak suh.." a ti ta a, a sawi tum ka lo hrethiam mai.

"I pa hian engkim a ti khaw lo vek a, ka nun a tichhe bawk a, midang nun nen lam a tihchhiatsak tawh a nih hi.." ka ti chhuak phawng a, Jeho a ding khawng luh.

"Eng maw i sawi, ka pa maw?" A ti hû a.

"Aw, i pa diktak hre lova i awm hi tu thiam loh mah a  ni lo, i nu vang vek a ni, Jeho, Samuel Pamei fapa i ni..." ka ti leh ta.

Chu veleh, ka ban puamah min hmer vak a, "Ngurthantluang, he thil hi khawi aṭanga i hriat nge, Samuel hi ka pa a ni tih tuin nge hrilh che?" A ti vin hlur a, a hmai a ruh ṭalh ṭalh bawk.

Zâm map lo hian, "I pa dik tak hi Samuel chu a ni ngei a, Vansangi pa pawh a ni, Tleipuii pa thattu dik tak pawh i pa tho, i chhungkua hian an bum hlum lo chauh che a nih hi.." zêp awm miah lova ka sawi tâkah chuan, a tukkhum a dawm a, "Nang pawh bumtu tho i ni, thudik hrereng siin kei min hrilh lovin hei leh chen hi i awm thei a nia," tih pahin Veranda-a Âr chaw bag intiang chu a chhuih pawp a, a kut a hum ruh nasa mai. 

Kan thawmah Richard a rawn chhuak a, "Jeho, tikhan haw phei rih ula ka rawn bia ang che," ti leh lawi siin keini pahnih ding dun chu min melh tawn sek a, "Inrem i duh takzet chuan i nupui kha kârkhat ka hnenah rawn awm rawh se, ka farnu enkawl turin," a ti leh ta a, sawi ve tur ber pawh ka hre lo.

"A theih lovang tih ka hlau khawp mai," tiin Jeho chuan min pawt nawk a, "Aryan lokir hunah kan Farm ah rawn tlang rawh se," tia Richard a biak leh hnuin Motor kawngkhar a hawng ṭhuai a, ka lut nghal rawk rawk.

Ṭawngkam khat mah chhâkchhuak lo hian chak lutukin a tlanchhuak a, Farm ka chhuahsan laia amah ka ngaihtuah tehreng nen; eng thil emaw tak ka hriat ve loh tur thup an nei a ni. Richard leh Jeho te kha hmelma angin an inbe lo a, midang bum tumna hmanrua a ang zâwk mah ka ti.

Ka va melh zeuh a, a hmel a dur khup a, biak a huphurhawm ngawih ngawih.

"Ngurthantluang, ka pa chungchâng kha tuin nge hrilh che?" a ti nghut a.

"A hrilhtu lam a pawimawh lo, i pa chu Samuel a ni tih pawm hmiah rawh.." ka ti ve ngat. Steering a bêng dawt a, rum lutuka min melh chung hian, "Lo ngai reng rawh, tu hnen aṭanga i hriat nge tih kei hian ka hre dawn khawp mai," a ti hmiah.

Kâr lovah JK kan thleng a dimna nei miah lovin Motor aṭang chuan min pawt chhuak a; a hnathawkte mitmei pawh a veng tawh lo hrim hrim.

Chokaah Samuel leh nu Pianmawii chiah an lo awm a, kan haw hun an lo ngaichâng a nih hmel.

"Ka pate, ka pa dik tak i ni em?" Tiin chang khelkhawl hian a zawt ta a, a nu hmela hlauhthawnna rawn lang chhuak chu ka hmu reng.

"Bawiha..." a ti sap a.

"Ngurthantluang, tu kâ aṭangin nge kha thu kha i hriat sawi rawh," tiin min vin ṭhawt a, a hmaa Jeho kha hmuh tur a awm tawh lo. Thinrim lutukin chair lo hnai bera a patea ṭhu chu a ṭhâm tho nawk a, "Eng anga tam hi nge thurûk i neih? Ka pa i ni meuh maw?" Tih pahin keimah min melh leh a, ka hlau lo ka tih chuan dâwt ka sawi tihna. 

"Jeho, i nu hi zawt rawh, Piani, i fapa thudik hrilh hi i bat a ni," Samuel chuan a ti sup a.

Nu Pianmawii a khuh kharh a, "Ka fapa, kei hian pasal pahnih ka nei tawh a, i pianna pa chu tuna i patea hi a ni, Tleipuii pa erawh chu a thi tawh.." tia a sawi lai chuan Jeho a che chhuak phut a, a nu Pistol-a tin chung hian, "I himna tur ngaihtuahin ka hmanhlel a, hetiang thu lian tham ka laka i zêp avang hian dam i phu lo," a ti a, Samuel a lo thaw hawk a, kei pawh hmui hup chungin ka ding khawng reng ringawt.

"Jeho...inbengdai teh.." ka ti chhuak sap a.

"Ngawi hmiah rawh, i thawmhnaw siam la, ka hmuh phâk lovah kal rawh..kal ngei ngei ang che.." a ti leh tuar a, ka hlau ngei mai.

Mi â ang maia Jehomalsawmkiman a patea leh a nu a chhuahchhal lai chuan kan room ah ka lut phei a, min ngaihsak lo hrim hrim.

Ka thil sawi chhuah hun kha a fuh chiah lo a ni. A hma te khan dam deuh zawkin lo sawipui ila a ṭha tur a nia.

Jeho...Malsawmkim.." tia nu Pianmawii a râk tuar tuar lai chuan ka va dâk chhuak leh a, Far thing bulah ka pasal a ding a, chin tawk awm lovin thingkung chu a hnek mial mial a, pawi hi ka va han ti ngawih ngawih tak.

Kan room kawngkhar a rawn inhawng a, Samuel a rawn lut a, "I thil tih pawizia hi a tak ngeia i hmuh hunah i inchhir khawp ang," tih pahin hawi sawk khawp hian ka biangah min bêng ta a, a thîp ṭha khawp mai.

Ka mittui a hnâm sawk thei nia.

"I fapa bumtu chu kei ni lovin nangmah i ni, a pa a thi tawh tia hrilhtu in ni a, min mawhpuh tum hlek suh.." ka lo ti ve khá khá a, ka thin a rim êm avangin, Samuel kal pelin nu Pianmawii bulah ka va ding a, "I fapa lakah thuruk i ngah lutuka a sawhkhâwk i tuar lêt zel dawn," tia ka ṭawng chuan min melh rum âl a, pawna Jeho thinrim inhrosa bengdai turin ka chhuak leh ta.

Ka biang dinglam a na ut ut a, Jeho chu hnunglam aṭangin ka va kuah bet chawt a, a kut châng a thi phung tawh.

"Lokal rawh, i thinrimna bengdai la, i sawi ṭha teh ang," ka ti a.

"Min hnaih hlek suh, i kut hmawr pawh khan min tawk suh." Tia a sawi zawh rualin amah ka kuahna kut chu a pawt phelh a, "Ka hmuh phâkah awm lo turin ka hrilh lo che em ni, Ngurthan, nang nen kan inzawmnaah thuruk a awm tur a ni lo ka tih kha, i thil hriat leh hmuh te min hrilh âi chuan i ngawihbopui duh zel a ni lawm ni?" A ti zawi ruih.

"Kal la, lokir leh tawh suh.." tiin ka vawn phâk lovah a ding sawn a, ka mitah chiang taka min enin, "Inrin tawnna a awm loh chuan nupa a inrem theih loh, ka pa a la dam tih i hriat ni leh ka laka i zep tlat chhan hi i tan engmah ka nih loh vang a ni e, kal rawh, i nunah ka rawn lang ngai tawh lovang," hnial theih miah lova tiin min hnungchhawn zui hmiah.

"Malsawmkim, i ti tak tak em? Helai hmun hi chhuahsan turin min duh chiah maw?" Ka la ti ve zel a.

"Ka rinna che a chhe zo tawh a, i tel lovin kum 30 chuang ka lo nung tawh bawk, tunah ka theih lohna chhan tur ka hre lo," inringtawk taka tiin min melh chhin eih lo hian Khuai khâwina hmun a pan zui daih. A va beidawnthlak ngai ve le.

Ka pasal rilru lian leh ngawhngawl tak hi chuti maia hneh chi ninghal lo chuan. Atan kei hi bumtu ka ni. 

JK farm chhuahsan turin ka rilru ka siam fel a, khawiah nge ka kal tâk ang? 

Richard kha khawngaih ka va dil mai dawn em ni, Umiam thleng tur pawhin thui tak a la ni a, Bamos Farm thleng chu kein ka kal theih ka beisei ve tawp.

Kan room-ah lutin vawikhat ka hawi kual thuak a, Jeho Pistol kha ka bag ah ka ak a, ka thawmhnaw hâkthlâk pakhat mah la chhuak lovin zan dar sarih velah Richard awmna lam ka pan ta a, zanriah ei chu sawi loh, vawiin hian eng thil mah ka ei lo reng reng.

Farm house a reh ṭhiap a, hnathawkte an chawlh hahdam hun a ni ve tawh a, Samuel leh Pianmawii pawh ka hmu chuang lo. Jeho phei chu hmuh tur a awm lo hrim hrim.

Thim thamah ka kal zel a, hlauhna hian ka nunah hmun a chang tawh lo a ni ber. Ka pum ka tawk zauh a, Jeho khan a fa pawh ngaihtuahna a nei lo, a thinrimin khua a hmu lo a nih ber kha.

Muangchângin minute 15 vel ka kal tawh a, ka piah lawkah ṭawng thawm a awm a, thawm dim takin ka pan hnai a, a thim êm avangin tute nge tih ka hre thei lo. Mahse, ngun zawka ka ngaihthlâk chuan Aryan aw a ni tlat.

"Madam chu khawiah nge a kal ang aw, helai lo hi kawng dang zawh tur a awm si lo a, nghâk leh chhin phawt ang," Aryan chuan a ti a, "Boss hian a kal tîr phal tak tak dawn lo, chuti ni lo se zawng turin min tîr hauh lovang," a biak pa zawk chuan a ti veleh a.

Kan Laljeho chuan ka awm lo tih a hre tawh a ni ngei ang, min zawng turin a naute a tîr leh tho si a, ka tum ka ti ruh sauh. Anni pahnih hmuh loh hian Richard-a awmna kha thlen ngei ka tum a, Jeho rilru hriat chian nan pawh ka kîr tur a ni rih lo.

Anmahni va pawh lo tawk velin ka ṭhu a, kawng pêng ṭhuam kha ka thleng titih tawh.

Anni pahnih lah chuan zial an zu a, ka kal thlen hun nghâk ang maiin an ding tlat bawk si. 

Tihdan tur ka dap ngat ngat a, a tawpah anmahni chu ka va hnaih a, "Aryan..'' tia ka koh chuan a phu nasa kher mai.

"Madam," a ti lawi rût ringawt.

"Tun ṭum chauh chu min pui ta che, Jeho hnenah a awmna chin kan hre lo, kan hmu zo lo..tiin lêt leh rawh u.." ka ti ta a, "A theih loh madam, helai hmun hi a him lo tih i hriat ve reng kha.." a ti a.

"Bamos Farm-ah Shisha damlo enkawlin kârkhat ka awm ang a, i boss rilru a inthlâk veleh min lo call dawn nia," tiin ka thusawi a zawm ngei theih nan ka thlêm ve ngial.

"Aih..." a ti nghut a, a ṭhianpa erawh a la ṭawng ve miah lova.

"Aryan, tun ṭum chauh min khawngaih rawh, i boss hi kalsan ka tum lo a, thil hriat duh tam tak ka nei bawk si;  a thinrim a reh veleh ka lokir ang," ka la ti ve ṭâng ṭâng a.

Min chhân tumin a âng zuau a, a ngawi leh daih. Ka hnunglam a melh zui leh a,  ka inher a, Jeho nen kan inhmachhawn ta a.

"Aryan, kal tawh rawh u le.. ka nupui hi chu ka rawn buaipui ang," a ti sup a, ṭîk pawh ti lovin an kalsawn nghal hmak. Ka va ngei e.

"I kalna tur kawng i kea chhui lovin i mitin thlîr zawk rawh se, Ngurthan, Richard i pan dawn tih ka hriat loh i ring rêng rêng em ni, kha pa kiangah khan minute khat lek pawh hnutchhiah che ka tum lo," a ti hniam chhak a.

"Duh lohna hmunah awm reng ka tum bik lo," tih pahin ka kal sawn a, ka kutah a rawn chelh vat.

"I kal duh ṭâlh a nih chuan ka fa kha hruai ka rem ti dawn lo," a'n tiah. A va han sual tak.

"Malsawmkim..." ka lo ti hlar.

"Haw ang, helaiah tih tur engmah a awm lo," ti leh lawi siin min rawn ban a, "I hmuh phâk lova ka awm i duh a ni lawm ni, min tawk hlek suh.." ka lo tih chuan, "I va ninawm mai mai e.." tih pahin ka inrin hman hmain min pu nawlh a, chak zeta min penpui pâwk pâwk pah hian, "Inhnial nan khalai hmun kha a thim lutuk, thim hi i ngaina ṭan riau mai," tiin a nui huk a, ka lo tâl ve bat bat naa a sâwt eih lo.

Hah hmel pawh pu miah lovin Farm house thleng rak min pu a, ka lu a hai vek alawm maw le.

Aryan a nui ṭha a, midang pahnih pawh chuti tho.

Arun leh Aryan hi unau an ni a, chupawh ka hriatna a la rei lo. Tleipuii sawi ka hriat veleh chhawn a ni.

Jeho chuan khumah min nghat a, "Richard hi hnaih hlek suh ang che, Shisha chungchang pawh Samuel hrilh lo bawk la, ka pa dik tak a ni ngei em tih ka finfiah hma loh chuan inthusawi kha ka pawm dawn lo," a ti ta a.

"Chuti si eng nge i thinrim chiam a?" Ka lo ti a.

"Ka lakah zêp i nei tawh tur a ni lo, a lian emaw, a tê emaw kan inkarah thuruk a awm thiang lo tih vawikhat ka sawi nawn leh ang." Tih pahin a vei nghauh nghauh a.

"Tun aṭanga nithum hnuah Mizoram panin kan chhuak dawn a, i unaupa bia ang che.." a ti leh a.

"Mizoramah kan kal dawn maw?" Ka ti hâ a.

"Ka sawi zawh chiah kha maw le, chimbuaitu awm lovin i nau neih hma chu kan awm ang, Aryan leh Arun Verma kutah engkim ka dah a, Rishan erawh kan hruai tel ang," ti leh duahin a pen lai a tawp chawt a.

"Ngurthan, thlaruk Mizoramah kan awm dawn a, chumi chhung chuan keini pahnih hi kan inzir tawn ang, helai hmuna i tâl ve reng hian i tan a ṭha dawn tlat lo," dam deuh zawka tiin khumah a rawn ṭhu a.

Vawiin lama a thinrim teh reng nen a rilru vawilehkhatah a thlâk nghal vek a, a sawi dik a ni.

Keini pahnih hi kan inzir tawn a ngai takzet a ni e.

"Niminah Bamos Farm i pan dawn khan, inkahna a thleng ang, tiin min hrilh a, ka lo hmuh lai che u kha chuan eng thil hlauhawm mah a awm si lo, dâwt min hrilh tiraw?" Tiin ka rilru kap rengtu chu ka zawt ta a.

"Tunah eng mah sawi fiah ka tum rih lo a nia, Samuel vek hi a bul leh a tawp chu a ni, ka pa a nih ka ring thei lo," a ti thlâwt.

"A ni tlat si a..." ka ti a.

"Ngawi hmiah rawh.." a ti leh nghut tawh. A thin a rim leh ringawt em mawni.

"Thinchhe siah.." tiin khumah ka lawn a, "Nang ka tawn aṭang che hian ka inthlâk danglam nasa hle asin," tih pahin a rawn lawn ve a, "Kan hmaah hian thim hlir a awm bik lo a nia, êng a awm tih hrereng ang che," tia a sawi zawh rualin min kuah a, ka lo kuah let ve mai.

Inhniala inhau reng te hi a hrehawm a, a lung a awi tawh a nih chuan a lungawi lohna tura a liam tawh sawi chhuahsak fo hi ṭha ka ti bik lo. Jeho hi ka hlatsan thei tak tak tawh lo tih ka hre chiang a, dawhtheih ka zir a ngai a ni mai.

Min la kuah reng a, a hmel ka en vat a, a lo muhil daih chu niin! A va mak bawk ve.

Dimtein a bân ka dah sawn saka thil ei turin ka thawhsan ta a..

050423

-B®®

B+>[BeckirafARenthleI]<+®®