13. 24-89 [A Becky Rafa Story]

13.24-89 

Ziaktu: Becky Rafa Renthlei

[Recap]

"Thinchhe siah.." tiin khumah ka lawn a, "Nang ka tawn aṭang che hian ka inthlâk danglam nasa hle asin," tih pahin a rawn lawn ve a, "Kan hmaah hian thim hlir a awm bik lo a nia, êng a awm tih hrereng ang che," tia a sawi zawh rualin min kuah a, ka lo kuah let ve mai.

Inhniala inhau reng te hi a hrehawm a, a lung a awi tawh a nih chuan a lungawi lohna tura a liam tawh hnu sawi chhuahsak fo hi ṭha ka ti bik lo. Jeho hi ka hlatsan thei tak tak tawh lo tih ka hre chiang a, dawhtheih ka zir a ngai a ni mai.

Min la kuah reng a, a hmel ka en vat a, a lo muhil daih chu niin! A va mak bawk ve.

Dimtein a bân ka dah sawn saka thil ei turin ka thawhsan ta a..

-B®®

Zanlaiah eitur ka hmuh ang angin ka inhnawh puar a, helai hmun ka kal tirha damlo an dah Samuela'n a thah tâk, khami room âwl aṭang khan thawm danglam tak a rawn ri chhuak a, a ring hran lo. Mahse, zanlai a nih avangin leh mut reh hun a nih tawh vanga hre ve mai chauh ka ni.

Hmeichhe nuam tuar thawm ni berin ka hria. He inah hian kan nupa leh Rishan, Arun leh Aryan te kan riak a, Samuel Pamei a lokal chângin pindan hran a hmang a, kan room nen a inhlat viau bawk.

Nipui chawlhbûkah Buatsaiha leh hnathawk dang an riak leh a, tuna thâwm lo chhuahna pindan tak hi chu a ruak deuh reng ti ila ka sawi sual lovang.

Haider tumin eng emaw chen thil ka ei lui ngâng ngâng a; mahse, hriat loh theih loh hian ṭawng ri a rawn awm leh ta, ka tho chhuak ta nge nge e.

"Jeho hian a paah a pawm duh chein ka ring lo a, DNA test a tum dawn, a ti ngei ang tih ka hria a ni," tia nu Pianmawii ṭawng chu ka hre pha ta a, an room bang depah chiah ka va ding tawh.

"Nangma thiam loh liau liau a ni a, Ngurthani hrilh lo la chuan kan tum dan pangngai leh kan ruahman ang khan kan kal mai tur a nia, i hmui i veng sêng lo hi a pawi ṭhin," tiin Samuel a phun sup sup a, va bihthlâk êm chu thil mawi a ni lo nain en châkna leh fiahna ka duh miau si a, inhnung lam aṭanga hêl kualin tukverh darthlalang phen aṭangin ka va bih ta dâk dâk a.

Ka rin dan a dik chiah bawk.

Samuel leh Jeho nu chu saruak thawthângin khumah an awm a, Zu no an dawm dun bawk. Tenawm lutuk.

An vawikhat awmna a ni lo tih an chetzia aṭangin a hriat theih vek.

"Mizoramah Jeho hi chho phawt sela chumi hnu chuan Buatsaiha leh Tleipuii te inneihna kan buatsaih dawn nia, Vansangi pasal Bartho Saingurpuia khan sum eng emaw zât chu rawn thawh ve a tum bawk a, Jeho a hrilh kher lo maithei. Bamos Ram MAP kan neih theihna tur a nih chuan tumah hi kan ren tur a ni hek lo," tia Samuel a ṭawng lai chuan ka luak a chhuat ut ut a, hmui hupin ka kalsawn ta rih. 

An khawsak phung ka ten êm a ni. Mahni fate ai pawhin an nawmsakna tur an ngaihtuah zawk a, Jeho pa ni reng chungin a patea angin an zingah a tâl a, Tleipuii pa thattu a la ni cheu bawk, chu chu nu Pianmawii hian a thup ve thung a, Samuel hi a hliahkhuh zel tih a lang reng mai.

Ngaihdan ni lo lutuk hian choka lamah ka lêt leh a, Jeho kawngkhar bulah a lo ding reng chu niin! 

"Khawiah tehhrep nge i kal, mangang taka min siam hi a nuam viau em ni?" A ti nghut a.

Hmui hup chungin toilet ka pan rawk rawk a, Jeho min biakna pawh chhâng lovin ka va luak nghek. Ka thil ei ve te kha an rawn chhuak leh veka ka thin ava han rim e, ka mitthlâah nu Pianmawii meng phelh phang leh Samuela mitmeng hur hmel tak kha a rawn lang a, vawikhat ka uak leh pawp.

"Ngurthan.." tiin, hmanhmawh takin Jeho a rawn lût a, mittui tla phunga ka lo awm chu min thlêk vung vung hnuah, "Indim tur i ni asin.." a ti sup ringawt.

"Min dîm tur zawk i nia sin.." ka lo ti ve nghat a, a nui huk.

"Ka duat lutuk chea awmdan i thiam tawh lo a nih hi, i naupai vang hian ka dimdawih phah bawk che a, i laka ka lungawi lohna leh ka thinrimna pawh ka bengdai zel chu a nih ber hi," tih pahin ka darah a rawn dawm a, "Ka Ngurthani hi chuan ka thluak i tibuai hneh ve ngawt mai, i lo lan hma khan pawnah vawi hnih ka zawng hman tawh che alawm," a ti ta a.

"Min ko mai ta che, ka thawhsan lai che khan i mutui lutuka ka tiharh duh lo che a nih kha," tiin ka ding ngîl a, Jeho koki nghengin thâwk ka la zui hak. 

"Mu teh ang, ei tur i duh a nih chuan min kâi tho dawn nia, nangmahin lo va inbuaipui tawh suh.." a ti a, ka ngawi reng.

A patea leh a nu chungchâng kha hrilh ngei ṭhain ka hre ve bawk a, khuma kan awm tawh hnuah a chin chhuakin ka hmuh dan leh an inbiak dan ka hriat ang ang Jeho ka hrilh ta vek a, thurûk neih a duh lova kei pawhin ka duh tawh bîk lo a ni.

Ka sawi zo hman ṭâwk tihah a tho chhuak nulh a, "Khawngaihin va tibuai suh aw.." ka tih chuan, "Tibuai lah lo e, ka mitin a hmuh ve a ngai alawm, thiamthu sawi tur an neih loh thleng rakin a nia ka la chêt dawn ni," a ti hmiah.

Chumi hnu chuan Samuel te ka hmuhna pindan lam pan khan a kal a, thawm a dîm ngang mai. Kei lah ka lo hlauthawng nasa; Jeho te ang hi chu an tih tawh lamah an ti tlut a, rilru pelhê an nei ve lutuk lo tih ka hriat tawh vang a ni.

Minute tam pawh a va thang lo, a lokir leh thuai a, "Ka nu hi ka hmangaih lo chu ka ti hauh lo, a laka ka rilru puthmang erawh a dang ta daih mai, Samuel hi ka pa a ni takzet a nih chuan ka tân chêt lâk a har dawn si a, ka pa a nih loh hrâm ka beisei," rilru nuam lo tih hriat ngawih ngawih hian khumah a rawn lawn a, "Ka dam chhan hi a va ho ve," tia nui lui hawkin min hnungchhawn zawng hian a mu a, hnaih emaw kuah emaw pawh ka tum hran lo, a rilru a hah tih a hriat hliah hliah.

Zinglam dar thum a ri tawh a, kan nupain kan la meng reng a, kan inbe lem lo. Kei pawhin biak buai tum lovin Richard kha ka ngaihtuah daih a; a farnu fa titla turin min hrilh a, a hna ka thawhsak chuan Bamos leh Jk an inrem tur thu min hrilh tak kha maw le, inngaihtuah harh thutin Jeho lamah ka tawlh phei a, zangthalin che eih lo hian a mu a, chunglam a melh reng; hetiang anga a awm tawh hi chuan thil a ngaihtuah mûk hle ti ila ka sawi sual vakin ka ring lo.

"Jeho.." tiin ka phun sap a.

A la che ta chuang lo.

"En teh Jeho, Richard tan kâr khat a farnu ka enkawl a nih chuan a tihbuai loh tur thu che a sawi a, eng vangin nge Shisha kha ka enkawl mai loh ang, buaina a kian chuan kan zalen dawn asin..'' ka ti ta a.

"Chutiang tunah sawi a hun lo, Richard kiangah ka awm tír che inbeisei suh.." a ti hluk ringawt. 

"Ngaihtuah chiang ve la, Aizawlah pawh kal ila, helaia buaina hi a reh chuan si loh chuan rilru hahdamin i awm thei dawn em ni?" Ka la ti hrâm.

"I kianga ka awm hian ka hahdam a ni mai, khawvelah hahdamna tak tak a awm lo, chuti a nih rualin Richard-a farnu Shisha hnenah khan thutiam ka nei a, tih hlawhtlin ngei ka duh bawk,  a fa i that dawn lo tih ka hria alawm," a ti teh daih a.

"Eng thutiam nge i neih? Ani nen khan inzawmna innei tih sawi hlek suh," ka lo ti nghat a.

"Tisa thilah chuan inzawm lo ve; mahse, Samuela hmei a nih angin ka tân a la ṭangkai dawn alawm, hmanraw ṭha tak tur a nih saw," tih pahin a ṭhu chhuak leh hlawl a, "Ngurthan, Richard-a lakah inbarh lut miah suh, ka nupuiin mipa dang a ngaihven tih ka hriat ruala ka tih hmasak ber tur chu tualthah a ni, in pahnihin ka that ang che u," a ti hem mai.

"Laljeho leh.." ti chhuak sapin kuah ka tum a, tawlh sawn pah hian, "Nunna hi a hlu a, chuti anih rualin thihnaa chinfel ngai chu ka chingfel hreh hauh lo a nia," tia a sawi zawh hnuah a tho chhuak leh a, "Min rawn zui suh ang che, thil tihfel lawk tur ka nei," a ti a, a thawmhnaw a inbel zui mawlh mawlh.

Ka zui lui ngam teuh lo mai, Aryan a ko thawm ka hre zui zat a, anni pahnih hi an inzui nasa deuh bîk. Buatsaiha khatia a pelhe aṭang khan Aryan leh Arun hi training a pe niberin ka hria.

Zinglam dar li a rik pawhin Jeho a la rawn lêt leh lo a, a kalna tur sawi lova a chhuak ringawt hi a ti mak ve ngawt mai; ka lakah a la lungawi zân lo tih ka hre tawh tho na a, nithum hnuah Aizawl kan pan dawn tih a sawi avangin ka phur hle, muhil thei lova ka leh kual sek lai chuan hmeichhe râk thawm ka hre leh ta. Tun ṭum ami chu nuam tuar ni lovin, na tuar ṭê ri a ni.

Rang taka ṭhu chhuakin thawm lo chhuahna lam ni-a ka hriatah beng ka chhi hrâ a, "Jeho hriata i sawi a nih chuan nang pawh hi i thi ang, mamawhna che ka nei tam vak tawh lo a nia," tia Samuel ṭawng ri chuan ka beng a verh zar mai. 

Kan room kawngkhar a rawn inhawng a, Samuel a lo lut ta chiah a, nichina Jeho a chhuah khan room kawngkhar ka lo kalh miah lo tih ka hre ve chiah bawk.

"Min lo zui rawh, âu chhuah emaw, thawm bengchheng i siam a nih vaih chuan ka tih tur dik tak ka ti ang," tih pahin min phih tho lawp a, hliam nei ang pawhin a awm lo. Mahse, a nei ngei tih chu ka hria.

"Min khawih miah suh.." tih pahin min vawnna thinthlâk ka tum a, a nghet churh mai.

Samuel Pamei chuan ka kut a hnungkhirh a, nu Pianmawii hnar thi zawih zawih chung hian a rawn lut ve bawk a, a kut veilamin a hnar a hup a, "Ani kha tina suh, ka fapa pawh eng mah ka hrilh lovang," tiin a kut dinglam a rawn phar chhuak a, "Piani, ani hian ka fapa hruai hran a tum a, ka lak aṭanga Jehomalsawmkima tihel tu a nih hi.." a ti khur khur a, a sawi mek laiin Jeho nu chu a nam vak a, a petek nghal nawk nawk.

"Ngurthantluang, min zui rawh, doctor nikhua lo tak i ni," a ti leh a, Scarf-a ka mit a tuam lai pawhin che lo hian ka lo ding reng ringawt. Ka hamhaih a ni ber e.

"Samuel..." ka ti hniam raih a.

"I pum chhunga mi nen khan ka zuah dawn lo che u.." tih chiah a sawi.

Chumi hnu chuan ka bânah vuanin min chhuahpui ta a, ka mit a tuam miau avangin engmah ka hmu thei lo. Jeho koh tumin ka kâ ka âng a, mahse, ka hmui a rawn hup leh chut. He putar hian eng nge a hriat ni!?

Motor chhungah min dah lut a, kan tlanchhuak a ni zui nghal mai.

Nu Pianmawii nen a hma lawk khan zu an in dunin tisa nawmna an inpe tawn a, tikhan kut a thlak leh si. Â..eng mah hi ka hrethiam tawh lo.

Rei fe kan tlan hnuah kan chuanna motor chu a ding ta a, "Ka sawina hmunah khan ani hi hruai ula, ka sawi ang chiah khan a chungah zahngaihna nei lovin hma la ang che u.." tia Samuel a ṭawng chuan, "Sir, 'Barua' pawh a awm reng tawh a, engkim kan peih tawh e," tiin mipakhat a rawn ṭawng chhuak a.

An tih tum hre lo mah ila, thil ṭha an ti dawn lo tih ka hrechiang hle si. 

Ka hmui an plaster vek tawh a, ka mit tuamna an la phelh lo.

Dawhkan niawm takah hian min muttîr a, ka bânpuamah min jection zui nghal bawk.

Ni e, helai hmunah hian ka thi ngei dawn tih ka inhria a, Jeho mitthlâ chungin ka chhing ta riai riai a.

Ka harh leh chuan ka mit tuamna an lo phelh tawh a, ka hmui pawh an plaster tawh lo, ka la thi si lo chu a nih hi! 

Ka mutna khum bulah mipakhat a ding a, mask a vuah tlat avangin tunge a nih ka hre mai thei bik lova, ka chauin ka zawi ngawih ngawih bawk a, ka kut an phuarna pawh an lo phelh vek tawh bawk, ka hmuh tum ber Samuel hmel ka hmu lo a, ka hawi hrek hrek thei chauh a ni.

Ka pum ka dap vat a, la puar lo mah se naupai lai ka nih tlat avangin ka rilruah a lo lang hmasa ber.

Ka serh ka dap leh a, nâ ka neih awm ka hre chuang hek lo. 

"Samuel khawiah nge a awm?" Tiin ka bula mipa ding chu ka bia a, "A kal tawh, Madam, ka hming ka hrilh thei lo che a, Jeho nupui i nih miau avangin kei hian i lakah sual ka chhuah thei ngang lo, chuvangin Samuel Pamei lokir leh hma hian tlan chhuak rawh, lirthei eng mah ka kawl lo a, i kalna tur kawng ka hrilh thei ang che.." tiin ka rin loh dan deuhin a ṭawng ta.

"Tu nge i nih? Eng maw i sawi?" Tiin ka zawt chawt a.

"Chu zawng hre lo zawk mai rawh.." a ti a.

Ka mutna aṭang chuan min kai tho zui nghal a, "Muangchang miah suh aw, Samuel lo kir hunah i tlan bo angin ka sawi ang, kha, hei hi la la, doctor i ni a, he damdawi hian min jection rawh, rei lote chhung chu ka muhil thei ang a, chhuatah hian ka mu bawk ang," ti leh zung zungin Syringe damdawi thun khah sa chu min hmehbel chawt chawt a, ka lamah Pathian a ṭang a ni ngei ang.

"Eng tikah mah i thil min tihsak zozai hi ka rul sêng dawn lo che a, i hmel tal min hmuh tîr ve rawh.." ka ti ve tlat.

Chu veleh a mask vuah a phelh a, a hmel chiang takin ka hmu thei ta.

"Ka lawm e, harsatna i tawk a nih chuan ka pasal Jehomalsawmkima i lo be vat dawn nia," ka ti a, a nui suk.

"Tuna kan awmna hmun hi Raitong Wood stock Farm a ni a, Bamos ramri dep a ni bawk, kawngpui sirah thing hmun zau tak a awm a, chu chu zawh zel la, Bamos ram i thleng ang, motor kawngpuiah kal reng reng suh aw, a him lo a nia, Bamos Farm i thlen hma chu châwl hauh suh ang che, GS road a ni a, Gang an tam lutuk," tia a sawi zawh hnuah, bag lian vak lo min ah tîr ta a.

Ka kuta syringe ka humna lam chu banin, "Jection-na lai tur chu i hriat kha.." inring tawk takin a ti leh hmiah.

Hun kan neih tam loh avangin a bân puamah ka jection a, minute 15 hnu velah chuan nikhaw hre lovin a awm ang.

A la harh ṭhat viau laiin kan awmna room chu a theih ang angin kan tihnawk a, amah pawh chhuatah a mu zui nghal a, "Tlan rawh, kal rawh le, i naute kha venghim ang che," a ti zawi raih raih.

Ani hi khawngaihin hruai tel ve duh mah ila, Samuel chhawr lai a ni si a, a thu awihin chu in chu ka chhuahsan ta a, vengtu pakhat mah ka hmu lova a ṭhing ṭhuap a ni ber.

Tlailam dar thum velah Wood stock Farm ka chhuahsan fel a, Gs road zawh lovin, thing hmunah zel ka kal a, ka chau takzet tawh.

Lung hmun tia sawi tur chu a ni lo na a, lungṭhil a tam hle a, ka kal chak thei lo, ka tluk loh nan fimkhur takin ka kal ve zel a, ka dang a ro huam tawh. A bag min ah tîr chhungah khan eng nge awm tih hriat tumin ka zen a, tui bottle leh Biscuit, inzaina chemte pakhat a lo awm ran a, ka va han lawm tak.

Tui ka in khawlh khawlh a, khaw thim dawn hnaihah Bamos ramri ka rap ṭan ta, JK pawh a hnai tih hrilh hranpa ka ngai lova, ka nunah hlauthawng leh nêp taka awm a rem lo.

Ka hnunglam aṭangin tu emaw hian, "Ding rawh," a rawn ti vin ṭhawk a, ding duh lovin ka kal chak sauh thung.

"Ding rawh ka tih chu.." a hma aia vîn zawkin a rawn ti leh a, ka lehhawi ta nge nge e.

Ka awmna aṭanga 15ft vela hlaah mi pahnih hi an lo ding a, Pistol-in min tin emaw ka tih vanga ding mai chauh ka ni. Kut ruakin an awm tih ka hriat veleh chak theihpatawpin ka tlan ta thut a, "Lalpa, ka naute min vensak rawh" ti rilru chungin ka tlan zel a, ka hnunglama mite pawhin min rawn ûm tih an thawm aṭangin ka hre thei.

Bamos ram chin ka tlan thleng chiah tihah ka khup a zawi hnawk a, ka châwn thâ a na ngei mai, tlan lui tur pawhin thahrui reng reng ka nei tawh lo, thlanin min bual huh vek a, ka thaw a sa phat phat.

An thawm a lo hnai zel a, tlanchhe thei ziazâng ka ni tawh lo tih ka inhriat avangin zawimuangin ka ṭhu hniam a, maimitchhing chungin ka lo nghâk tawp.

"Ding turin kan hrilh che a ni lawm ni?" mipa aw thum lamin a tih rualin ka tukkhumah Pistol-in a rawn nawr a, ka hah lutuka ṭawng chhuak tur ka awm rih lo.

"Hmeichhia tê tê si, ka tlan chhia e, te i tih vei.." tih pahin min nawr sawk sawk a, ka bu dâwrh mai.

Ṭawng lova ka la ngawih reng avangin, "Helai hmunah hian i thi dawn, kan pawngsual hnuah che chuan thih i thlang tho tho ang," ti lehin pakhat zawk khan ka zak hnuaiah a rawn zen a, min kaihthawh a tum a nih hmel.

"Min kal tîr rawh u..khawngaih takin.." ka ti sap a, a nui hawk.

"I kal lutuk ang, kan duh tawk kan neih hunah i kal ang," a ti sup a, khua a thim ṭan a, hmeichhia ka nih vang hian min zuam hrim hrim nimaiin ka hria; ka kut dinglamin ka bag chhung ka zen a, anmahni ka hnungchhawn avangin ka kut ka dah luh lai an hre lo tepawh a ni mahna.

Inzaina chemte (Scalpel) lian vak lo chu ka hum rauh rauh a, min pawngsual an tum tak tak a nih chuan thih thâin ka ṭang kawh ang. Mahse, ka tha a zawi lutuk tawh a, ka ṭang rei thei dawn hauh si lo. Jeho ka haw hluah hluah a, min chhuahsan lo se chuan hetiang hun khirh hi ka tawng dawn si lo.

"Pankash, a kut kha chelh bet la, khaw thim tak tak hmain hruai sawn ang," pakhat zawk chuan a ti a. Ka chemte humna kut chu ka lek lang ve ta.

"In ngam chuan min pawngsual dawn nia, pakhat zawk zawk hi chu in thi ve tho ang aw.." tiin ka vau ve hmiah. Duhthlan tur ka nei ngang lo a tin ni.

'Pankash' tia a koh khan min rawn hnaih sauh a, keiin chemte ka lo lek khum a, a thim thut thut tawh bawk si, ka rilruah hlauhna a rawn awm thar a, ka thâ a khur ru zaih zaih.

"Anih min lo zui rawh, engtin mah kan ti lo ang che," tiin dam deuh zawk hian min be leh a, an hmel pawh ka hmu fiah mang tawh lo, ka la ngawi reng a, vawilehkhatah Pankash zawk khan min rawn phih thut a, chemte ka ken lohna zawk ka kut dinglamah a hmer vak a, inzaina hmanrua atana ka lo ken fo chemte hmang ngei chuan Pankash malpuiah ka vit ta a, a ṭê ring ngang mai. 

"I sahimna tur a nih chuan engmah tih hreh nei suh" tia ka pasal Jeho thusawi kha ka bengah a ri ring hle.

A tîra min vau hmasa zawktu khan Pistol a hmet puak ta a; mahse, ka lam hawi ni lovin chunglamah zawk a ni. Min kâphlum hreh ve deuh pawh a ni mahna. A ṭhianpa natuar a buaipui dawn emaw ka tih laiin keimah bawk min rawn ban leh a. Chemte kha Pankash malpuiah ka vit bur a, ka phawi tawh si lo.

"Uichonu, thih i duh tak tak a ni maw?" Tih pahin thim thamah min rawn ban a, ka samah a man nghet tlat, ka luvun a na nghal ṭhawt thei alawm maw le.

"Min thlah vat rawh..." tiin ka tâl zui nghal nawk nawk a, ka dinna lai a rem si lo, Bamos farm lam aṭangin Riffle puak ri a rawn awm a, tlan thawmin a zui nghal bawk. Chu veleh min vawnna a thlah a, a ṭhianpa lei châra mu hlawm reng chu, "I kal thei ang em? He uichonu vanga thih hi ka la duh miah lo a nia," a ti khur khur a, ka thluak a fîm ve ta chiah.

Keimah min ngaihven lova an awm kâr lekah chuan ka tha neih tawpin ka tlan leh ta a, umzuitu ka nei ta lo. Mahse, hmelma ka insiam belh zel tih ka hre thung.

Bamos ram chhung Bawng in bulah ka ṭhu hnawk a, kawng peng ṭhuam Jeho te Farm house panna ka pawh thuak. Mahse, kal leh turin ka tlin tawh lo, ka ṭhut chawlh lai pawhin ka lu a hai mum mum a, ka hrawk leh hnar a thip hlur tawh nen ka khuh khak khak a, saisir zawngin ka âwn riai riai nimaiin ka hria.

"Ngurthan, i harh em?" Tia min kotu aw chu hla tak aṭanga ri chhuak a ang ber. Ka meng chhuak riai riai a, hnai feah Richard nen kan inmelh ta sak a.

"Hawh le, i him tawh aw.." tih pahin zo zet hian min pawm nawlh a, "Khawiah nge ka awm?" Tiin zawite hian ka zawt a, "Ka ram chhungah i rawn lut a, nikhaw hre lovin i awm a nih kha,'' tia ṭha tea min chhânna chuan a hma lawka ka thil tawn kha min hriat chhuah tîr leh nghal.

Richard âwm nghengin ka bei tlán a, rilṭam luat vanga ka pum ri rak rak pawh chu a hre pha hialin a nia ka rin.

"I hun tawng hre lo mah ila, helai hmunah hian harsatna hlirin a tlâkbuak che a nih hi, Jeho ka biaksak che i duh em?" Tiin ṭhutthleng lo hnai berah chuan min ṭhut tîr a, a hnathawkte zinga mi pakhat biain, "Madam tan bawnghnute leh cookies rawn la rawh u," tia a hrilh lai pawhin ka muhil lo chauh chu a ni e.

Inthing harhin Richard ka melh a, "Nichina min ûm tute kha i va hmu em?" Ka ti a.

"Bawng enkawltu te'n Pistol ri an hriat khan khalai hmun kha an thlithlai nghal a, Riffle an hmet puak a nih kha, khaw thim hnuah hi chuan eng mah a tih tak tak theih loh; amaherawhchu, ka ram chhung a ni a, thil fel lo a awm a nih chuan en fel kha an hna a ni," a ti duah a.

An nau pakhatin bawnghnute leh Cookies tharlam tak min rawn chhawp chu ban ka tum a, ka kut ding lamah thisen a lo la kâi chu niin! Richard ka melh zauh a, koki san âwk chung hian, "Va intifai hmasa ta che, chumi hnuah muangmarin i ei zawk dawn nia," zaidam tak leh thil hrethiam tak hian a ti a.

Thuawih takin ka ṭhutna aṭanga thawh chhuah ka tum a, ka lu a hai êm avangin ka pai dat a, aniin min lo dawm chat thung.

"Ngurthan..." tiin min ngaihtuah hmel tak hian min en a, "Keiman ka hruai ang che, min hnial suh aw.." tia a sawi zawh hnuah bathroom pakhat-ah min pawm lut ta a, "Helaiah hian thil changkang eng mah kan nei lo nain intifai zuai zuai rawh le..towel pawh a awm ang," ti sup chung hian ka kuta thisen kâi chu a melh zuk a, hnunglamah ka lo thukru vat.

Richard-a chhuah hnuah rang takin ka intifai sawk sawk a, helai hmunah hian him riauva inhriatna ka nei tlat, Jeho khan min zawng ang nge, hetia ka awm lo hi engah mah ngai lovin Farm house-ah a awm zawk tih hriat pawh va ni suh. Min venhim tur thu sawi reng chung siin a patea'n min hruai chhuak a ni si a, he mite pafa lak aṭanga ka inthiarfihlim hi a ngai takzet.

A zualpui ka intihfai hnuah ka thawmhnaw pangngai bawk inbel lehin bathroom ka chhuahsan a, Richard hmel hmuh tur a awm lo, nichina ka kalsan tâk ei tur kha ka ei a, ka in bawk a, ka harh huai mai.

Zan dar 9 a hnai kuar tawh a, nichina min ûm tute kha Samuel Pamei hnuaia thawk nge an nih ang a, khalai hmuna misual vâk rawlai mai mai tih ka hre lo. Min chhanchhuaktu hmel erawh ka mitthlâah a châm rauh rauh.

Chutia ka lo inngaihtuah ngut ngut lai chuan pawnlamah ṭawng thawm a rawn awm a, "Min hmuh tîr vat la a ni mai, i nupui ni lovin ka nupui a ni." Titu ka pasal Jehomalsawmkima awki nghet charh ka hriat rual chuan ka ṭhut dan ka siamrem vat a, Richard ve thung chuan, "I nupui hian hahdam a mamawh, engtin nge amah zawng lova hei leh chen hi i ngawih theih ni?" Tia a chhâng thawm pawh ka hre reng.

Jeho hian min zawn a tum miah lo a maw!?

A Farm house aṭanga a patea'n min hruai chhuah aṭang khan dârkâr 18 vel a liam tawh a, chuti chung chuan min zawn a tum lo a maw? A mak a ni. Ka thin a rim êm avangin ka ding hliai a, anni pahnih inbe lai chu va pawh mai ka tum a; mahse, anmahni zawk an rawn luh tâk avangin ka ṭhu thla leh ta riai riai a.

Jeho chuan ka chhîp aṭanga ka ke hmawr thlengin ngun lutuk mai hian a en chhuak dap a, a mitmeng chang ta sawt leh nelawm lo zet chu ka lo en lêt ve ngar.

"Nasa taka kan zawn lai che khan helai hmunah hian nuam i lo tawl tihna a nia," a ti nghut a, ka sa ve phat.

"Malsawmkim," ka lo ti vin ṭhat.

"Ngurthantluang, Richard hian helaiah a thukru che tih hria ila chuan Rishan leh Buatsaiha Mizoramah ka tîr hauh lo ang," a ti ta. Ka lo meng phâwk nasa mai.

"Eng a?" Ka lo ti hluai a.

"Helai hmunah hian thil tam sawi ka tum lo, ka nupui chu ka kiangah a awm tur a ni, a chiang em?" Tiin min rawn ban a, ka lo tawlhsawn vat.

"Richard, zanin chu hetah ka riak ang aw, ka mutna tur a awm ang tiraw?" Ka ti lui ve ngat a, Jeho rûm dut chu ka hre reng; mahse, ani lakah hian chuti maia lungawi ka tum bik lo.

"I duh chen chen i châm thei ang, a hma pawhin ka hrilh tawh che kha, kârkhat ka hnenah rawn awm rawh ka ti rêng alawm," a lo ti ve a.

Jeho a che vut a, Richard kawngka biang nghenga ding chu eng khaw sawi set set lo hian a bekah a hnek chawrh a, ani a lo inring lo bawk nen kawngkhar a nghêng nghal rawk rawk a, "Ka nupui hi i kut hmawr pawha i lo khawih a nih chuan, Jehomalsawmkima hian i rîl ka khei chhuak ang," zu han ti a, ṭawngkam te hi a duh tui lo si.

Muangchângin Richard a rawn ding ngîl a, "Mahni nupui rai lai pawh venghim zo lo chu mipa i ni lo tihna, chutiang bawkin i patea pawhin ka farnu a rai a, a venghim hek lo, in lo inchhun pafa hle mai," a ti ve hmiah.

Jeho a insangmar ṭawlh ṭawlh a, a kut tum a lek chhuak leh a, mahse, ka va vuan hman! Eng tik laiin nge ka chêt chhuah ka inhre bik lo.

"Duh tawk rawh Jeho..." ka ti sap a, a ding khawng luh a, rum lutuka Richard melh chung hian, "Nang leh kei hi hmelma kan ni tawh ang, ka nupui lak aṭanga i inthiarfihlim dawn lo a nih chuan..." tiin a ngawi zui daih a, Richard erawhin thinrim hmel a pu hran lo.

"Min rawn zui rawh," a ti nghut a, a bânah ka la vuan reng.

"Hetah ka awm dawn, kârkhat hnuah ka lo haw ang," ka la tilui ve ṭâng ṭâng a, Richard a nui suk a, Jeho ve thung chuan, "Ngurthantluang," a ti vin hluk a, ka lo phu zawk.

"Ka nupui hian i farnu a enkawl dawn lo, Shisha naupai lai saw i duh lo a nih chuan nangmah ngeiin damdawi inah hruaiin va paih tîr rawh.." ngeiawm taka tiin Richard pawh ngaichang lo hian ka kut a vuan a, "I awmna tur lova i awm lui ṭâlh a nih chuan hremna i pumpelh bîk hauh lovang," ti sup chung hian min chhuahpui a tum a, ka lo ṭang kawh tlat.

"Ngurthantluang, ka sawi tam lovang.." thinrim insum taka tiin a thaw hulh a, "Jeho, hetah hian i nupui a him tih i hria alawm.." tia Richard a lo ṭawng leh tâkah chuan a thinchhe bawrlawk a insum zo ta lo.

A kut a phe vuai a, Richard pawh a lo indang ve naa Jeho tezawng insual thiam tak a nih avangin a hnek fuh lutuk tlat, an insual chu a ni deuh der.

"Richard, Jeho.." tiin ka lo ṭê chûl a, anni pahnih lah an la insual zui zel si, thinrim vin ṭhak hian, "Duhtawk rawh u ka tih chu maw le..'' ka ti leh a, Richard zawk chu thaw huam huam chung hian a inlahrang a, a kamsir a thi ser ser a, a hnar dinglam aṭangin thi tlêm a far bawk. 

Jeho ka melh a, a hmaiah pem a nei ve lo, a meng rum ûl a, a kut a hum ruh tlat.

Richard lamah ka pên phei a, "Khawi, i hmai kha ka lo tifai ang.." dam thlapa ka ṭawng chuan, ka pasalin min pawtsawn dawrh.

"Ani hnaihah hian awm han tum leh vaih teh..." thinrim awki zawi set sawta a ṭawng chuan ka ding chawt a, "Ngurthan, i pasal nen khan chhuak rawh u.." Richard chuan a ti ta a, a thinrim ve hle tih a hriat mai.

"Khati tur kha a ni rêng a ni, a lehpek a awm a nih chuan ka kut lâwngin ka that tawh ang che," tia Jeho ṭawng lai chuan Richard mitmeng a rum sawt a, a ṭawng chhuak lo thung.

Gurkha seat hnungah ṭhut ka tum a, Jeho a rum nghut a, "Ka thin tirim zawng hian chêt la ziah suh.." tih pahin a hnung kawngkhar a nam khar ṭhuai a, a front seat-ah min nawr lût a ni hrim mai.

Bamos Farm kan chhuahsan fel ta a. Jeho ngawi ngul chu ka mitsirin ka melh zeuh zeuh a, a hmel a dur khup. 

JK kan thleng a, min chhuksan nulh a, kei pawh hmanhmawh hauh lovin ka chhuk ve a, Samuel leh nu Pianmawii an awm tawh loh hrâm ka beisei.

Zanlai a nih tawh avangin thawm a reh ṭhiap a, inchhunga ka luh chuan Jehomalsawmkima chu kut hnungsuih hian a vei nghut nghut a; ka lut thawm a hriat veleh, "I pum chhunga awm kha eng nge a nih i hria em?" Tiin min zawt a, a ngaihna ka hriat loh êm avangin ka hawi â hû.

"Eng nge i sawi awmzia?" Tia ka zawh lêt rualin a pen lai a tawp chawt a, "I pum chhunga awm kha ka fa a nih kha, keima fa.." a tih leh tâkah chuan ka hrethiam ta deuh.

"Ka hre ve reng alawm maw le.." ka lo ti a.

"I hriat reng te chuan engvanga ani kha va pan nge i nih si, 'i naupai lai kha ka faah ka lo pawm ang' tiin a thlêm che em ni?" A ti ta a, ka lo ter ve at.

"Malsawmkim, i duh duh sawi ringawt suh, i patea'n ka pumchhunga i fa paih tuma min hruai bo lai khan khawiah nge i awm, vawikhat pawh min zawng turin i lokal em?" Ka ti ve ta phiar phiar a.

"Ngurthan.." a lo ti mawl tawp.

"Ni e, sawi tur i hre hauh lovang, min lo zui suh tia min chhuahsan hnu khan Samueala'n..." tiin thil thlen dan kha ka sawi chhuak ta vek a, zêp ka tum reng reng lo. 

"Dâwt vek, dâwt i sawi thiam lo hle mai, Bamos ram neitupa kiangah kha chuan i hlim hle si kha.. hlauhlawpa tlanchhia pawh i ang lo," tiin min nuihsawh tih hriat ngawih ngawih hian a nui lui ngial a. 

"Ka patea leh ka nu laka ka hel theih nan i thluak kha i lo hmang rim ve hle a ni ang maw, i awm lo tih ka hriat veleh zawng tur chein ka chhuak a, ka beidawn hnuah Buatsaiha leh Rishan Mizoramah ka tîr tih ka sawi lovem ni? Mahse, nang erawh chu kha pa kiangah hahdam takin i lo awm zawk si a, Ngurthantluang, i pum chhungah khan ka fa awm lo se chuan hremna ka pe ngei ngei ang che..mu rawh..." a ti zui bawrh bawrh a, ka va han ngei tak.

"Laljeho.." tia hnial leh ka tum pawhin, "Ka inbengdaih lai hian va mu rang rawh, naktipah Aizawl pan tur kan ni a, zin kawng thui tak kan zawh dawn avangin mu hahdam ang che," a ti dam leh thluam tho.

"I patea hian kan fa thah a tum a nia.." ka la ti zui hrâm.

"A that lovang, a pa hian ka venghim dawn alawm," a ti nghet churh.

A hma lawk te kha chuan a lakah ka thin a rim em em a, tâlchhuah dan tur ka dap hman rum rum a nia; tunah lem, ka thlâ a muang leh viau lawi si, ka va han nikhua lo mai mai e.

Mut kawr ka inbel a, khumah ka mu fel thân a, ka hun tawng buaichuar zet hian awm dan min thiam tîr thei lo. Naktipah Aizawl kan pan dawn si chuan ka unaupa Vanlalṭana ka hmachhawn dawn a nih hmel a, ka va huphurh tak.

Ka hmai bul sêtah Samuel Pamei a rawn kun hniam a, "I tan khawi hmun mah hi a him lo, i tlanchhiat thui poh leh ka umzui hla ting che a ni mai, Ngurthantluang, Jeho hi min pe lêt leh rawh.." tiin ka pum zawnah Chemtein a tin run a, ka râk ṭhat a, ka thin a phu nghal zaih zaih.

"Ngurthan...Mate.." tia mipa bân lum thur thurin min kuah chuan ka phu leh zawk a, "Min khawih suh.." tih pahin min kuahtu bân chu vaisawn sak ka tuma min kuah nghet sauh thung.

Ka inhnît hraih a, "Min kalsan rawh, mawh..kal rawh.." tia ka ṭawng mawlh mawlh lai chuan, "Ngurthan, i harh em, i ṭha em?" titu Jeho aw ka hriat veleh chiang lo ruaiin ka meng chhuak a, "Keimah i Laljehomalsawmkima.." ti thum chhakin min kuahna a thlah dul hret a, ka meng chhuak ve ta.

Ka mitah tak min lo en a, "I nun a râlmuang lo êm a ni tiraw, ka thiam loh a ni, thin thi pawhin i muhil thei tawh lo a nia," ti supin ka biang a rawn chûl a, "Jeho.." ka lo ti thâm ṭiak.

"I kiangah ka awm aw..muthilh tum leh rawh.." tiin dam leh duat zet hian ka bekah a chûl a, ka maimitchhing leh mai. A taksa rim faisar ka hîp vang vang a, ka Laljeho chu a ni ngei e, a ângchhungah hi chuan ka him a, ka thlâ a muang ṭhin rêng a ni.

Ni zungin ka hmai a rawn chhun a, peih lo zetin ka meng chhuak a, Jeho chuan min lo la kuah chial a, a la mut tui hmel hle, ham bâi bâi chungin ṭhut chhuah ka tum a, "Eng mah thawh hma nachhan tur kan nei lo, tikhan che lovin mu rih rawh.." a lo ti a, a lo harh reng tawh chu niin!

"Ka ril a ṭâm.." ka lo ti teh daih a.

Nui huk chung hian, "A va buaithlâk e, min hlatsanna tur chhuanlam fahrah tê tê hi i nei ve ziah.." ti supin a tho chhuak ta nge nge a.

"Ka ril a ṭâm miau a.." ka la ti ve fan.

"Ok.." tiin a chhuak nulh a, ka la tho chhuak ve lo.

A hnu lawkah a rawn lut leh a, "Vawikhat ka sawi nawn leh ang, Richard hnaihah saw chuan awm suh, tu mipa mah hi keimah ka nih loh chuan ring tawh ngai suh.." ti lehin khumah a rawn ṭhu a, "Ka patea leh ka nu ruahmanna hi ka hriat chhuah hma chuan anni pawh hnaih lo la, ka thu hnial kalh zawngin awm lo phawt mai rawh..'' tia a sawi zawh hnuah, "I chunga an chêt dan zawng zawng hmaih nei miah lovin han sawi teh le.." a ti leh lawi a.

Ei tur châwi chunga Aryan a lo luh tâk avangin kan ngawi ta rih.

Thil ei pahin Samuela'n min hruai dan leh Raitong hmuna Wood stock Farm-a thil thleng zawng zawng chu a chin chhuakin ka hrilh vek a, min puitu erawh a hming ka hriat loh thu ka sawi ve mai a, "Barua a nih kha, Pharmacist-a ni a, ka patea tan a thawk ṭhin," tiin a chal a chuar nûng mai.

"Richard nen khan engtin nge in inhmuh theih?" Tiin min zawt leh a.

Pankash ka vih hnua ka tlan chhiat dan ka sawi lai chuan a nui huk a, amah ka en vat, la nui reng chung hian, "Nang ka tawn chea ka inthlâk danglam ang chiah hian, nang pawh i lo danglam ta, ka nupui hi a lo huaisen ta hle mai," tih pahin a plate-a ei tur awm chu a hmawm zauh a.

"Thih ka la duh lo alawm, ka thi dawn a nih chuan pakhat tal an thih ve phawt a ngai ang," ka ti ve ngial.

"Ngawi mai mai teh, thih chungchâng chu dah ṭha rih ang aw.." a ti a.

"Ka dah ṭha thei lo, inring renga awm hi ka kham takzet tawh, eng ati nge hetiang nun nei tur hian nupuiah min neih?" Ka'n ti ṭha leh a.

Mit ko san âwk chung hian, "Zingkar aṭanga inhnial ka peih lo, i ei dawn tawh lo a nih chuan intifai la, i tei harh teh ang, thil en tîr tur che ka nei," tia tho chhuakin ka malchunga tray awm chu dawhkanah a seng phei a, kei pawh ka tho chhuak ve nghal.

A hnu minute 10 a liam leh chuan nipui chawlhbûk lamah min hruai phei a, "Ngurthan, kar leh khian Tleipuii leh Buatsaiha an innei tawh dawn a, nang chu i awm ve kher ka remti dawn lo a nia, Vansangi te nupa an rawn kal dawn bawk a, hemi zan hian Samuel Pamei hi ka pa a nih thu ka sawi chhuak ang," a ti ta a.

"Jeho..chutiang sawi nan a la hma lutuk, Vansangi pawh a hrilhhai dawn asin.." ka lo ti thuai a.

"Vansangi nen kan pa a thuhmun a nih si chuan ani pawh Samuel fa a ni tihna a nia, DNA test ka rawt dawn," tia min hrilh lai chuan a phone a rawn ri a.

"Aw, sawi rawh..." a ti tlang tawp.

"Ni lo, chutiang a ni thei lo ang, engtin nge a nih theih," a ti zui nawk nawk a, ani leh ni lo angin a chiâi hmel tlat.

Lehlam ami ṭawng a ngaihthlak leh vang vang hnuah, "Kan lokal nghal ang," tiin an inbiakna a ti tawp ta a.

A meng buai nuk a, a thaw chhuak hawk bawk. A tukkhumah a kut suihin van lam a en a, ka ngaih a ṭha thei tawh lo.

"Jeho, eng thil nge thleng?" tiin ka zawt vat a, min rawn en a, mitmeng thim mâk hian, "I û Vanlalṭana'n beih a tawk a, tunah hospital panpui mek a ni...Mate.." tiin min kuah nghal thlawp.

Chêt mai nachang ka hre lo a, sawi tur ka hre hek lo. He khawvela ka neihchhun a ni asin..

A ni thei lo..

Jeho min kuahna aṭanga talchhuakin, "Nangmah vang a ni, nangmah vang vek.." ka ti ta a.

A ngawi reng ringawt.

Ni e, ani ka neih hian harsatna leh buaina, chhiatna hlirin min nangching a, a sawi angin nun râlmuang ka neih lohna chin pawh ka hre tawh lo. 

Tunah chuan keimah vangin ka û pawhin a tuar ta a nih hi..

Jehomalsawmkima chu rum âlin ka melh a, "Inṭhenna ka duh.." ka ti ta a..

170423

Note: He story hi ka tluang thlawt lo, damlohna leh harsatna neuh neuh vangin ka chawlh a ngai leh ṭhin hi a pawi ka ti. Min lo hrethiam hram hram a ni ang chu, Pathian zarah kan dam anga chawlh loh hram kan tum tawh dawn nia.

B+>[BeckirafARenthleI]<+®®