14.24-89 [A Becky Rafa Story]

14.24-89 

Ziaktu: Becky Rafa Renthlei

[Recap]

"Jeho, eng thil nge thleng?" tiin ka zawt vat a, min rawn en a, mitmeng thim mâk hian, "I û Vanlalṭana'n beih a tawk a, tunah hospital panpui mek a ni...Mate.." tiin min kuah nghal thlawp.

Chêt mai nachang ka hre lo a, sawi tur ka hre hek lo. He khawvela ka neihchhun a ni asin..

A ni thei lo..

Jeho min kuahna aṭanga talchhuakin, "Nangmah vang a ni, nangmah vang vek.." ka ti ta a.

A ngawi reng ringawt.

Ni e, ani ka neih hian harsatna leh buaina, chhiatna hlirin min nangching a, a sawi angin nun râlmuang ka neih lohna chin pawh ka hre tawh lo. 

Tunah chuan keimah vangin ka û pawhin a tuar ta a nih hi..

Jehomalsawmkima chu rum âlin ka melh a, "Inṭhenna ka duh.." ka ti ta a..

-B®®

JK Farm kan chhuahsan laiin ṭawngkam khat mah ka chhâk chhuak tawh lo. Ka ngawi ngal a, Jeho pawh chuti tho.

Ka û phone-ah ka call ngial naa chhângtu an awm lo. Jeho rawn hrilhtu kha tunge a nih ka la zawt miah lo a, zawh pawh ka tum chuang lo, ka thin a rim ngawih ngawih a, Sawlad-a ka inluahah inthlâkna tur tlem lain ka pêng kawi zawk a, min hnial bîk lem hlei lo a.

Mawkasiang-a an inpui lam panin kan tlan zui leh nghal a, ka rilru hria niawm takin Jeho pawhin motor a khalh chak par par khawp mai; traffic jam-ah dârkâr khat chuang kan tâng leh a, rilru hmanhmawh nen a inmil lo teh a nia.

Ka phone a rawn ri a, rang takin ka pick nghal a, "Ngurthan, Ebenezer hospital kan thleng tawh a, a rang thei ang berin lo haw thei la kan duh khawp mai," tia min rawn betu chu ka cousin Mawiteii a ni a, harsat manganah chuan an lo buaipui ve tih a hriat mai.

Ka sawi hmaih miah loh tur chu, kan fahrah êm avang hian ka nu leh pa unaute lam hian min ûksák tehchiam lo a, kei phei chu zirna avanga hmun danga awm bo reng ka nih vangin atu amah hi ka nêl khuchûk lo. Ka u erawh chuan ṭhian a ngaina a, ṭhenrual pawh a ngah vei fu.

Jeho te inpui kan thleng a, nu Pianmawiin keini pahnih min han hmu phut chu mak a tih hmel hle a, "Eng, eng nge in rawn tih dawn?" A ti bah nak.

"Kan inah kan rawn haw a ni mai a, eng thil dang vak nge ni ang a?" Tiin Jeho chuan a chhâng hmuk a, Tleipuii naupaw chungin a lo chhuak ve bawk a, "In va hmanhmawh hmel ve" tia min lo biakna pawh Jeho nen kan chhâng lo ve ve.

Inchunga kan nupa room-ah hmanhmawh takin kan inzui chho hlawk hlawk a, khumah ka ṭhu a, ka mittui tla tur chu duh lovin ka khap sak sak a, ani Jeho thung chuan phone a hmang char char. Tunge a biak ka ngaihven peih lo hrim hrim, ani pasala ka neih vang hian ka tuar hnem tawh mah mah a ni. Ka biak thâ a tho hlawl lo a ni ber.

"Insiam rawh le, ṭhu khawmuang hman kan ni lo a nia," tiin ka darah a rawn vuan a, ka lo thingthla hmak.

"Ngurthan.." a ti sup a.

"Eng motor nge ka hman dawn, tunge min hruai dawn, i kal ve kher a ngai lo," ka lo ti hmak hmak a, ngaihdan ni vak lo chung hian, "I rilru a hrehawm ang tih chu ka hria; mahse, ka lakah thinrimna zawn kher a ngai lo a nia." A ti hmuk a, a ṭawngkam a dam bîk vak lo.

"Keimahin Mizoramah chuan ka lêt ang, i tan rawn kal buangbar pawh a ṭûl lo a nia, nang nena inzawmna neih hi ka duh tawh lo," thinrim awki fiak ṭhaka ka ṭawng lai chuan a thawmhnaw a lo siam mawlh mawlh a, ka thusawi ve eng atan maha a ngai lo ṭhin hi ka huat tâwk a tling viau.

"Insiam duh suh ka tih chu, i tel lo pawhin him dam takin ka thleng thei, enteh, ka rilru dik tak i hre duh em?" Ka ti leh hnuhnawh a, min rawn en nghal thuai a.

"I rilru dik tak i sawi dawn lo tih kei hian ka hria alawm, i chiâi a, i mangang a, ka thusawi tur hi ngun takin ngaithla ang che, i u Vanlalṭana hian zankhat mitchhin tawk ta se, nangmah chiaha hnutchhiah i ni dawn, chu chu a thlen ka remti dawn lo, i kianga ding tur pasal Jehomalsawmkima i nei a, engvangin nge ka nupui unaupa chu ka buaipui loh tehlul ang, ka mawhphurhna a ni," fiah fai faka tiin khuma ka ṭhu chu min pawt tho a.

"Ka thlazar hnuaiah i him tih inhre nawn leh ang che," a tih lai takin a phone bawk a rawn ri leh ta. 

"Kan lo chhuk dawn e," a ti a.

"Thui tak motora chuang chi i nih loh avangin Helicopter hmangin kan kal ang, ka be fel tawh a, kan thleng hma zawk dawn bawk, Buatsaiha a rawn kîr mêk a, Rishan chu i u awmna Hospital-a kal turin ka tîr tawh," a ti leh zung zung a, a lakah lawm lo teh mah ila, engkim a ngaihtuah fel thlup a, ka hahdam huai.

"Keimah pawhin ka kal thei tho asin.." ka ti zawi raih a.

"I thei tih ka hria, mahse, ka nupui thlahthlam tumna ka nei lo, chuan, min hnial tawh lo la, Motor kan mamawh ve tho dawn avangin Aryan hi zaninah a rawn chhuak thung ang," tiin ka thawmhnaw inbel lai chu ka inrin hman hmain ka lu lamah a phih chhuak a, ka lo râk ṭhat.

"Eng nge maw i hriat le?" Ka lo ti hlak hlak.

"I muangchâng êm alawm, inthlak rawh le," tih pahin ka pum puar ve ṭan chu a thlêk vung vung a, a nui suk. 

A sawi anga ka inthlak fel hnuah ka card leh thil pawimawh min check fel sak thlap a, shirt dum leh cotton jeans dum a inbel ve nghal a, "Ngurthan, hlauthawng suh.." ti supin min kuah leh rih, ka hmuiah a fawp vang vang a, chu ringawt pawh chu ka thlamuanpui si.

Inhnuaia lo awmte pawhin min thlir ṭhap a, Jeho chuan kan kalna tur tumah a hrilh lo, kei pawhin sawi chhuah kher ṭulah ka ngai bik lo. Hetah kan chêng reng pawh nihlei lo, an rilru a chhe hlawm ropui si.

A nu hnenah, "Tleipuii te inneih nang tura lo lêt ka tum ang, Vansangi te an lo thlen hunah pawh an lakah ṭhat chhuah ang che," tih chiah a sawi.

Helicopter-in Aizawl kan pan ta a, ka unaupa hlirin ka rilru a luah avangin thildang ka rilru la pêng thei a awm meuh lo chu a ni e.

Aizawla Jeho te in pawh tlawh hmasa lovin Ebenezer hospital kan pan nghal a, Rishan leh ka cousin Mawitei ka hmu hmasa ber.

Ka u nat dan leh engtia mi kut tuar nge a nih pawh Jeho khan a sawi lang lo a, an zai zo chiaha Male Surgical ward-ah a awm thu min lo hrilh sawk sawk. Rei lote hmuh min phalsak a; mahse, a la harh loh avangin rei kan awm lo.

Mawitei chuan ka pasal a melh zauh a, "Tu nge?" Tiin min zawt a, ka pasal a nih thu tlang takin ka hrilh hmiah.

"Mawite, eng thil chiah nge thleng min han hrilh teh," tiin Jeho leh Rishan te inbiak hlan chuan ka zâwt ta a.

"Chiangkuangin ka hre bik lo, a hnaah a kal loh avangin an call a, a pick thei si lo a, a ṭhianpa Ramluaha kha in inah a va kal a, thichhawngin a va hmu ta niawm tak a ni, a kâ aṭangin thi a chhuah tam deuh avangin ka nu a rawn call a, tihian kan ni ta rum rum a nih hi, Ngurthan, dik tak chuan i u dinhmun hi a ṭha vak lo a nia," tiin a sawi ta a.

Police lamah an report em tih ka zawt a, kun lap chung hian, "Ka pain ṭûl a ti ta lo a nih kha, a chhan chu i u hian zu a in nasa em em a, a ṭhian tute nen emaw an intibuai a nih kan ring a, vantlangin a zu in an hre ve vek bawk si a.." a ti niah niah a, ka ngaihdan a ni ta lo.

"Eng anga zu heh leh sual pawh nise, mi kut tuar a nih chuan Police hnenah thlen vat ta che u, nêp lutuk.." ka ti hlawih hlawih a, ka lo ṭawng ring deuh nge Jeho ka lamah a rawn phei vat a, ka darah a rawn kuah a, "Inbengdai rawh, hospital a nih hi.." a ti hniam ruih a.

Mawitei pawh en tawh lo hian Jeho ka melh a, "Jeho, Police station-ah kal ang, ka ngaihdan a ni lo reng reng," ka ti leh a.

Zawi sup hian, "I rilru tur ka hrethiam lutuk tlat, mahse a nih tur a ni zo tawh a, mi kut tuar pawh a ni lo maithei bawk, a nawlpuiin an sawi dan chuan zu a in nasa lutuka a ṭhiante nen an zu in naah an intibuai a nih an ring mah zawk, zan tîr lamah pawh an thawm a ṭha viau an ti," a lo ti ve si. Khawi aṭanga a hriat nge tih zawh ka tum ûk a, ka ngawi leh daih, Jehomalsawmkima tezawng thil chîk mi leh chhui peih tak a ni tih ka hria a, ka hriat loh eng emaw zât a hre leh vek tawh zâwk ang.

"Police station-ah chuan keimahin ka kal ang, ka kal lutuk ang," tih pahin ka pen sawn a, Jeho chuan ngaihdan ni lo tih hriat tak hian min pawt hrang vat a, "Rishan kutah engkim ka dah, min ring rawh, min ring tur hian vawi engzat nge ka hrilh tawh che, ka nupui natna chu ka natna a ni.." a ti zawi ruih. Lungawi zan lo hian ka û khum bulah ka va ṭhu ta ringawt a.

Doctor ve si ka chhungkua venghim tur pawhin ka thiamna ka hmang lo a, tihian ka u a awm lehzel bawk a. Ka inthiam thei hlawl lo, keimah ngeiin han zai thei ila ṭha tur, hmai hup chungin ka ṭhu vang vang a, ka hrehawm a ni.

Super care hospital-a ka lo thawk ta kher kher hi ka inchhir ngawih ngawih a, ka u kut vuanin a harh hun ka nghâk rân a, chutih lai chuan, "Ngurthan, nangmah i ni em?" Tiin ka bulah mipakhat a rawn ding a, mask leh tarmit a vuah avangin tunge a nih ka rin hriat thiam lo; mahse, a aw hi chu ka hriat tawh hnu a ni.

"Min hre tawh nange..?" Tiin a hmai tuamna a phelh a, ka hre chhuak ve chiah.

Ani hi ka zirpui ṭhin a ni a, Dr.Lalchhandama niin, Tete-tia koh a hlawh zawk. Surgeon ṭha tak a ni a, kan inrual khat vel mai thei bawk, Ebenezer-ah a lo thawk reng tih ka hriat chuan nui var var chungin ka ding chhuak a, tunhma aṭanga a ze pangngai, mi fel, biak nuam leh ngaihawm tak kha a la ni reng tih ka hre mai.

"He laiah eng nge i tih?" Tiin min zawt a, khuma damlo mu chu a melh zauh bawk a.

Ka û a nih thu ka hrilh chuan mak tih hmel tak hian, "Kan team lamin kan zai kha a nih hi..i u lo nireng chuan.." a ti ve ta a, "Eng nge i hmuh dan, dik takin min hrilh rawh aw.." ka ti a.

Min en vang vang hnuah, "A dinhmun a ṭha lutuk lo tih kan sawi mai ang e, doctor i ni tho a, ka sawi awmzia i hriat ka ring; mahse, Pathian thu thu a ni a, kan theihtawp erawh kan chhuah ve chuan ka hria." Dam thlapa tiin ka u bawk a melh leh a.

"Engtin chiah nge a awm?" Tia ka zawh chuan, internal bleeding a nei a, a thin hi a ṭha tawh lo hrim hrim, tuna kan zai rum rumna chhan pawh hi a pumah thî a tling a, neuh neuh a lo ngah khawp mai," tiin min hrilh ta a, ka hnual nghal rawih thei nia. A chhan chu a sawi dan hi doctor ka nih angin a chipchiar min hrilh lo mah se, zai loh theih loh a ni tihna a ni mai.

Chutia kan lo inbiak lai chuan Jeho a lo lut a, "Cabin-ah kan sawn mai dawn em ni, amah a harh hma hian," a rawn ti a, Dr.Tetea pawh a lo bu nghat nghat.

Jeho sawi dan khan beih a tawk a ti mai a, mahse, chutiang pawh chu a nih loh hmel ta riau, ka pa kha zu heh luat avanga thi a ni a, ka nu boral hma daihin kei ka awm tawh bawk si lo. A nun a zalena zu-ah a lo ṭuan nasa tih tunah ka hre chiah, kei lah a phalna la hmasa lovin pasal ka nei thut a, a bul ber chu a kianga awm tur ka awm loh vang a ni pakhat. 

Jeho leh Rishan an ṭangkai em em a, Mawitei erawh a fapa a ngaihtuah avangin in lamah kan tîr haw ta rih. Zanin tlaiah Aryan a lo chho ve bawk ang a, kan awm ve thei naw naw turah ngai ang.

Ka û a harh hma chuan kalsan ka tum lo bur a, a kiangah ka ṭhu deuh chawt.

"Ngurthan, intihfai tepawh i duh ve lo em ni, khatia ṭhut chawrh chawrh âi chuan ka inah han intifai ve ila, Rishan hi lo awm rih se, hahdam i ngai tih i hriat ve vek kha," tiin ka ṭhutna bulah Jeho a rawn ṭhu hniam ve a, "Tihian ka lo awm ang a, nangmahni zawk kha han intifai rawh u," ka lo ti ṭha mai.

"Nangmah ringawt inngaihtuah thei i ni tawh lo a nia, kan fa kha.." tih pahin ka bengbulah a rawn kun hniam a, "Indim i ngai takzet, a lo harh hunah a kiangah i awm hman em em ang, doctor i ni a, amah i en hian a dinhmun tur leh a harh hun awm ang chu i hriatthiam ka ring," tia sawi lehin ka u Vanlalṭana hmel chu a thlêk vung vung a, eng nge a ngaihtuah tih a hmelah a hriat theih loh.

Jeho sawi pawh a dik reng, dârkâr hnih hnu velah emaw chauh a harh ang a, chu pawh biak tlâk leh biak theihin a awm ang em tih hriat a ni lo. Kei, Dr.Ngurthantluangi General Surgeon ve meuh hian ka theihna leh ka thiamnate ka thisen zawm teah ka hmang ve lo hi ka nâ a ni ber. Ka hnaivai ka zai ve chhun chu ka pasal Jehomalsawmkima chiah kha a ni.

Rishan ka en a, "Tikhan lo awm la, khawiah mah lo chhuahsan suh aw.." ka ti ve ta a, a lo bu nghat nghat. Ani hi chu a ṭawngtam lo khawp mai, Aryan nen ka ngaina deuh ber a, Arun pawh a sual chuang lo. 

Chumi hnu chuan Taxi-in Jeho in lam kan pan ta a. Khawi hmunah nge in a neih ka hre lo a, ka zawt lo hrim hrim.

Buatsaiha khan Car pakhat haw thlâkna atana a hman avangin Aryan lo thlen hma chu veivahna tur lirthei kan nei rih dawn lo tih Jeho khan a sawi a; kan in pui Serchhip lam pawh an kalh ṭhiap tih Mawitei khan a sawi bawk a, ka ngaihtuah ang reng viau.

Jeho in chu Khatlaah a lo awm a, Building pangngai tak a ni a, luahlum lai ang maiin a faiin a thar vûk mai. Mak ka ti hle.

"Luahtu an awm em ni?" Tiin ka zâwt ta nge nge a.

"A hnuai ber khu miin an luah a, an lo tifai ṭhin, bâkah nangnen kan inneih hma te chuan ka zin chho zauh zauh ṭhin alawm," tiin ṭha te hian min chhâng ve mai.

"Jeho..." ka ti chhuak hliai a.

A rawn lehhawi vat a, ngun leh chîk zeta min en hnuah, "I û chungah hian a chhe ber thleng thei a ni a, a dam leh ang tia thlamuan che ka tum lo, mi â kan ni lo ve ve a, chuvangin i rilru siam la, inti paukhauh ang che," tiin thu khuh nei map lo hian min hrilh a, ka bulah a rawn ding a, ka biangah a kut pahniha vuan chung hian, "Nang leh kei hi kan inrintawn a ngai a, min ring rawh tia ngen fo che hi ka tum lo, keimaha rinna nghat ngam turin i pasal mizia hi chîk ang che," a ti sup.

Mit khap zak zak chung hian ka melh chho hau a, a mitmeng thim raih chuan min lo en let ve reng. Chutah lo kûn hniamin dam thlap hian ka hmuiah a fawp a, rei phei chu a ni lo, min thlah lehnghal vat tho.

Inbual hmasa tura ka tih chuan, "Inbual vat zawk rawh, eng emaw inthunpuarna tur ka lo buatsaih ang e," a ti liam puat a, bathroom lamah min nawr phei dat dat a, ka lo nui hak. Tun minute rei lote chhung khan min duatna leh min ngaihsakna mitmeng ka hmu a, nuam ka ti ru hle.

Shower hnuaiah ka ding a, ka taksa thlan dap tui vawtin a phuh tâkah chuan ka harh sawng sawng thei alawm maw le.

Ka û bawkin ka rilru a luah leh a, min be khât lutuk te, pasal ka nei tih a hre chung pawha min ngaihsak zui lutuk ta lo te kha a thinrim lungawi lo titauah ka lo ngai kha a ni a; mahse, zû vang lek a lo ni tih ka hriatna hian min tina hle. Ka pa vang chauh pawh khan a in duh ka lo ring ngai miah lova mak ka ti lo thei lo.

"Mate, i rei lutuk..lo chhuak tawh rawh," tia Jeho min kohna chuan ka ngaihtuahna aṭangin min kâi harh a, shower hnuaiah minute engzat nge ka din tawh pawh ka hre lo. Rang taka intihulin ka chhuak zui ve mai bawk a.

Ka inthlâkna tur min lo dah chhuahsak diam a, a duh hi chuan ka Laljeho hi chu a fel maw le, Shillong kan chhuahsan hmaa kan inkâr boruak nuam lo zet ang kha a bo hmiah, chîmbuaitu awm lohna hmunah chuan min ngaihsak viau.

"Dawhkana ka dah saw lo ei la, ka inbual ve zuai ang, damdawi in lamah kan chhuk leh dawn nia," a ti zung zung a, ka chhânna pawh nghak lo hian bathroom-ah a lût zui daih.

Juice leh Omlette a lo dah chhuak a, Chhangthawp pawh a lo toast diam chu niin. Ka ril a ṭâm ve ta deuh bawk nen a dah chhuah ang ang ka ei zo duak a, ka inbual hlan khan a lo inthun puar tawh a nih ka ring.

Dawhkan chunga a phone dah a rawn ri a, lâk loh ka tum zet naa ka ban leh ta zawk a, Rishan a lo ni.

Ka pick rual rualin, "Boss, in lo hmanhmawh thei deuh ang em, madam unaupa hi a thâwk dan a dik lo deuh a, tunah Oxygen an pe mêk," a rawn ti ta mai. 

"Rishan, keimah zawk..." ka lo ti vat a, chiâi taka awm loh hram hram tumin ka insangmar a.

"Madam, ka sawi ang kha a ni mai, in lo hmanhmawh theih chuan.." tiin line a cut a, Jeho driver Rishan aw-ah khan manganna ri a tel tlat. Ka thil in lai dawhkanah ka nghat chawrh a, bathroom lamah ka phei a, Jeho ka ko ta a, a tui herh haw ri a rin em avangin ka kohna pawh a hre lo nge min rawn chhâng eih lo.

Ka hmanhmawh tawh si. Bathroom kawngkhar ka beng dawt dawt a, rei vak lo hnuah a rawn hawng ta a.

"Eng nge ni ta..?" A lo ti hluk.

"Hospital-ah kan kal ran a ngai," tih pahin chhuah ka'n tum nghal ringawt a, ka bânah a lo man chat a, "Hahdam rawh, ka inthlâk ang a, kan chhuk dawn nia," tiin a inhru hul sawk sawk a, chumi kâr ringawt pawh chu a rei ka ti tawh.

Ka thinphu a rang sauh a, eng emaw hlauhthawnna hian min fan tlat.

Jeho ka tur sek hnuah Taxi bawkin Ebenezer hospital kan pan leh ta a, ka ṭawng tawh lo hrim hrim.

Ni e, kei hian thil ka hrethiam alawm, ka u nen damin kan inhmu dawn tawh lo anga hriatna ka nei tlat, ka malchunga ka kut dah chu ka hûm nghet sauh a, Jeho chuan ka kut a rawn hum hnan a, "Rilru no tak put loh tur aw, ka nupui i nih kha, engkim hmachhawn thiam turin zirtirna pawh i dawng ṭha a, a taka hman hun chiah a ni. Hlauhlawpa i awm khan kawngro a su lo," tiin a dâr ka nghen theih nan a lamah min kuah hnai a, ka thaw chhuak halh.

"A thi lo ang tiraw?" Ka ti sap a.

"Ka sawi thei lo, a thih ka ring," a'n tiah. 

"Jeho..." ka lo ti vin ṭhat.

"Beisei tur awm lo na na na beiseina siamsaka hnem che ka tum lo ka tih kha, a thi ta lo a nih chuan a ṭha lam a ni, Pathian thu thu.." a ti ve ngial.

Jehomalsawmkima hi chuan engtik lai mahin ṭawngkam thlum leh ngaihawm a chhâkchhuak ngai lo tih hresa lo ila chuan, tuna a ṭawng dan te kha a huatawm ngawih ngawih; mahse, 'Jeho' a ni miau si a, huat chi pawh va ni suh.

Hospital kan thleng a, Jeho pawh nghâk lovin ka pen sawk sawk a ni ber.

Ka hnungah min lo zui a, min ûmpha nghal vat tho. "Indim hrâm hrâm rawh aw, ka sawi nawn leh ang, a ruala pahnih chân i duh loh chuan fimkhur ve deuh teh.." tiin min kái a. A va han ngeiawm tak.

Ka u Vanlalṭana awmna Cabin kan lût chiah chu ka thaw a tawp mai dawnin ka hria, nurse pathum leh doctor pahnihin an lo buaipui a, Rishan chuan keini pahnih min hmuh veleh, "In kal hnu khan rei lote a rawn meng zawk a, a hnu lawkah tihian a awm zui ta a ni," zawi supa tiin min melh zuk a, ka khawngaih ang reng.

Doctor-in Jeho leh Rishan chu a chhungah awm lo turin an hrilh a, kei erawh doctor ve tho ka nih avang leh a farnu ka nih angin an bulah ka awm a, tih theih ka va nei tlêm ve maw le. Ka pa boral lai kha ka hre vuai vuai a, ka nu a thih kha chuan doctor ka zir hlan a ni a, a ruang pawh ka nang lo.

Tunah ka neihchhun takmeuh, ka engkim leh ka innghahna ka unaupa Vanlalṭana awm dan hian ka lung ati âwi mawlh lo.

Tlemin a thâwk dan a zia awm leh ta a, ka hmu thiam ve vek. "Pakhat aia tam a bulah awm loh tur," tia nurse a ṭawng lai chuan ka u bulah ka ṭhu hniama a kut ka vawn sak a, a Bp pawh a normal leh ṭan. Ka thaw huai naa ka chhungril erawh a pik hle.

A kutah ka chelh rân a, a hmel dawldâng leh zu ei tih hriat taka a hnar lian ta deuh te chuan a in nasat dan tur min rin thiam tîr ka ti mai.

Dârkâr li hnuah.

Rishan pawh Jeho in lamah a chho tawh a, keini nupa kan la awm thung a, khawvar lamah Aryan a lo thlen dawn avangin a lo hmuak dawn niawm tak a ni. 

Ka pa chhungte lam tuma hmel an lo lang lo a, Mawitei pawh a lokal nawn tawh lo. Ka nu lam aṭanga ka cousin pakhatin min rawn bia a, chanchin min zâwttu kan neih chhun chu a ni hi a ni mai, ka mal ngawih ngawih a nia, ka pasal Jehomalsawmkima hi awm lo se chuan chuti hlauh chu ka ni mai.

"Reilote mut hahdam tum la, ka lo ṭhutpui dawn nia," tiin extra bed awmna lamah min hruai phei a tum a, ka lo ṭang ṭung.

"Mate..luhlul chhuah ṭhin suh..ka awm alawm.." a ti dam thlup, chu chuan ka ṭah a ti chhuak ringawt a, ka inhnît hraih a, min lo kuah vat.

"Ṭap duh mah ta che, kan phurhzawh loh leh kan tawrh theih bâk a liam hi kan chungah a thleng mawh viau a nia, hetiang tuar thei tur hian i chak tâwk a ni, i kiangah ka awm zel dawn tih ka sawi lovem ni?" Nghet charha tiin min kuah hlu hlu a, ka mittui tling pam chu a kut hnunglama min hrûksak pahin, "Thlem dan vak che ka hre lo, tihian a ni mai," tiin ka chalah a fawp zauh a, ka ṭah nuih titih. Hetiang kawngah hi chuan ka pasal hi a lâktlâk hlawl loh.

Kan inneih zungbun phuahchawp zeta min bun tîrna lam ka kut chu a chawikâng a, "He zungbun hian phatsanna a keng tel lo a, ka bun tîr lai che khan nang chuan dan ang mai maiah i ngai tiraw? A ni lo a nia, thutiam a keng tel zawk," ti supin khum lamah min hruai phei ta a, thu ka va awih si êm.

Ka u pawh tui taka muhil ang maiin a thaw sâk sâk a, oxygen erawh an la pe reng thung, a khât tâwkin an rawn check zar zar bawk a, a thlamuanthlâk hle.

Ka pasal duhdan angin khumah ka mu a, ani pawh Veranda lamah tei harh turin a chhuak ve zawk a, ka mut a chhuak miah lo naa kan chin hriat a nih loh avangin reilote tal muthilh ka tum ve ta zawk a.

"Bawihi, i pasal hi vuan tlat la, kei chuan ka venghim thei dawn lo che a, ka nau duat kha i la ni reng  aw," tia ka u Vanlalṭana'n min lo biak chuan ka harh hlawl.

A mutna khum ka melh phei vat a, a âwm insêp dat dat aṭang chuan a thâwk dan a mumal lutuk lo tih ka hre mai, khua a var lek lek tawh a, duty inthlâk hun a hnaih tawh avangin a reh ṭhiap.

Jeho chu khum sir bang nghengin a maimitchhing a, a chauh dan tur ka rin hriat mai. Shillong aṭang tawh khan a thluak leh thâ a hmang rim êm em a, kei pawh dik tak chuan ka chau ngawih ngawih a, ṭawng mâwi lo ni lo se, nau ka la chhiat lo hi thil mak a ni. Pathian min venhimna ka ti lo thei lo.

Ka naupai tîrh aṭang phatin chawl hahdam tura hrilh ka ni a, kan khawsak danin zir mawlh hek lo, tihian tun hi kan thleng a, eng mah insawiselna em em pawh ka nei bik chuang hlei lo chu a nia.

Ka u mutna lamah dimtein ka phei a, ka pasal tihharh loh hrâm tumin khum sira ṭhutnaah chuan ka ṭhu thla a, "Eng ang pawhin thâwm dim mah la, ka Ngurthani rimtui tak hian min kâiharh tho ang," tia Jeho a phun sup chuan ka inthiam lo ringawt.

"Ka tiharh tak tak che em ni?" Ka lo ti a.

"Ka muhil hleinem, ka maimitchhing mai mai..." tia a sawi lai mêkin ka u hrawk a rawn ri bawrh bawrh a, ka ding hluai ringawt, ka hamhaih lutuka chêt mai nachâng lah ka hre hek lo.

Jeho zawk a chhuak vut a, nichina ka mumang kha ka hrechhuak lehnghal. Ka theih ang angin ka lo buaipui a, oxygen pawh a sâng berin ka pe a, chutih lai chuan doctor leh nurse hmanhmawh takin an lo lut bawk. Jeho chuan min pawt sawn deuh a, "I u hian kal a tum a nih hi, inti pachang rawh le.." tia a sawi pahin ka kut nghet takin a vuan a, amah ka u pawh buaipui duh mah ila, ka inrawlh a rem tawh rih lo tih ka hrethiam ve mai.

A hnu leha thil thleng chu mumang ang ruaiin ka hria a, min hmangaihtu leh ka hmangaih, he khawvela thisen zawm ka neih chhun Vanlalṭana chuan zinglam dar nga leh minute 15 ah chiah he khawvel a chhuahsan ta. 

A awri vawikhat mah hre nawn lo leh a dam ṭha lai hmel hmu lovin min liamsan ta. Dr.Ngurthantluangi hi doctor ni tlâk ka lo ni lo. Ka lo nêp em mai.

"Doctor nikhua lo tak i ni" tia Samuel Pamei min ṭawngkhumna kha ka bengah a ri nawn tlut tlut a, a lo sawi dik a ni. Kum tam tak mahni in lum chhuahsana ka lo inzir vena te zawng zawng kha ka chhungkaw tan ka hmang lo a, a thlâwn vek a ni ta.

Oxygen pipe an phawi lai chuan ka ṭap chhuak phawng a, ka âwm a tâwt êm avangin boruak khamkhawp dawng thei lo ang maiin ka ipik churh a, ka awm dan a dik lo.

Zawitê hian Jeho ka ko a, min lo kuah vat.

"Inti chak rawh, ka nupui i nih kha..." tiin min kuah a, Jehomalsawmkima nupui ni tur chuan tawrhchhel a ngai tih min hrilh tawh tak kha maw le. Mahse, tun ṭum zet zawng thihna a ni a, a nâ a ni.

Ka inhnît hlawp hlawp a, ka pasal âwm nghengin ka ṭap khur ngat ngat. Ruang an sawngbawl laiin Rishan leh Aryan an lo lut a, "Boss, engkim kan lo buaipui ang, Madam kha lo buaipui rawh.." an tih ri ka hria a, mittui kâr aṭangin ka va melh a, Aryan mitmenga min khawngaihna lang chhuak chu ka chhiar thiam ve.

Chin tawk awm lova ka ṭah lai pawhin ka kiangah ka pasal a awm zel a, eng mah sawi lo mah se, a bân lum thur thura min kuahna ringawt pawh hian min thlamuan êm asin.

Nasa taka ka ṭah hnuah, "Aryan, i madam lo buaipui la, Serchhip lam YMA ka'n hrilh ang e," tiin Jeho a kal sawn a, ka u ruang bulah ka kuna a biang ka chûl ka chûl ringawt. Mite anga chham thiam nih ve a, ka rilrua thil awm te hi chhâkchhuah ka châk. Chu zawng harsa ka tih zâwng tak a ni.

Zingkara thi a nih avangin lumen tur a ni dawn lo a, Serchhip lam YMA hruaitute pawhin keimah min lo call a, duhdan ka nei em tih min lo zawt a, "Khawngaihin a harsat loh chuan ka nu leh pa thlânah khan ka û hi phum ve ka duh," tiin ka lo hrilh a, anni lam pawhin min lo pawmpui hmiah.

A tawi zawngin aw..

Serchhipa kan in puiah ka u Vanlalṭana vuina hunserh kan hmang mek a, a hma ang khan ka ṭap thei ta lo. Chhungkaw âiawha thusawi tur keimah ka ni naa ka pasal Jeho kutah ka dah ta zawk a, min hnial dawn emaw ka tih laiin, "Sawi tura min duh chuan ka sawi ang," a lo ti hmiah.

Eng tak sawi ang maw?

Kei ruang bulah ka ṭhu a, ka cousin te pawh an kim thawkhat, atu amahin min be lumlam lo a, an ṭap hek lo. 

Ka pasal Jeho a rawn ding chhuak a, "Tuna in hmaa ding hi min hre kher lo maithei a, Vanlalṭana mâkpa, Dr.Ngurthantluangi pasal Laljehomalsawmkima ka ni a, Shillong lamah kan khawsa a.." tia a ṭawng lai chuan mipui lam an phun sup sup a, a reh leh thuai tho.

Lawmthu sawina leh khawtlâng kan tihbuai chungchâng te, ka rin phâk bâkin a sawi ṭha. A thusawi reng reng a nghet churh a, amah a palian vei nen an en duh hlawm hle, kan inneih dan chungchâng tlêm a tarlang bawk a, Mawitei kha ka bulah a ṭhu a, "I u leh inpa hi an inang ṭep.." a'n tiah. Leh rih chuan..

Vuina hunserh a zo a, a tlai tawh hle, thlanmual thleng zui ka tum a, chu erawh ka pasalin a phal ta lo.

"Naktuk lamah kan kal dawn nia, tunah chuan chawlh hahdam i mamawh tawh.." a ti a, a naute pahnih leh ka pa unau fate inzui lai chu a melh zuk a, "Mizoramah awm hlen an tum mai ang a," tiin a khi suk a, a va hahthlâk e. Laljeho tak hi chu(h).

Inlêng kawm leh mi biangbiak chungchângah pawh ka pasal a zahpuiawm loh hle. Shillong lama a nun dan nen chuan inpersan tak hi a ni ringawt. 

Inriak tur kan duh em tih min zawt a, chu erawh chu Jeho an a hnial thung. Ka inrawlh ve lo hrim hrim.

"He inah hian khum pawh i nei ve lo a nia," tiin mutna tur an siam dawnah a phun hluk a, "Ka nei reng a, an dah chhuak a nih kha, chhuatah mu mai ang," ka lo ti ve a, nuam lo ka ti ang reng.

"I u khumah hian kan mu mai dawn nia, Aryan te pahnih chhuatah mu se, Mawitei pawh a lo riah dawn kha," ti leh zung zungin ka u khum lamah min hruai phei a, ka lu a na fak fak mai, ka luak lah a chhuak em em bawk a, a va hrehawm ngat ngat tak.

Sawi buai nei miah lovin ka u khumah kan nupain kan mu a, chhuatah Aryan leh Rishan an mu bawk a, Mawitei ṭhutthlengah a mu thung. 

Ka u boral lai leh a behbawm hi chu sawi thui vak ka tum lo, in lo ning palh ang e.

"I pum chhunga mi leh keimah chiah hi i neih chhun kan ni ta, ka chhungte nen in inkâr boruak hrethiam lo ka ni lo a, rilru puitling tak i put a ngai a nia, kan dam anga i hna pawh i la thawk leh ngei ang, Bamos lam ram hian min nêk chêp tulh tulh a, i kiangah awm reng duh mah ila, ka theih loh hun a la thleng dawn, chumi a nih pawhin i pasal Jehomalsawmkima awkâ chiah ngaichâng ṭhin ang che," tiin min kuah a, ka lo kuah lêt ve vat.

"Ka u kha mi kut tuar angin i sawi si a, a chungchâng engtin nge i hriat theih?" Tiin min kam rengtu ka rilrua zawhna awm chu ka zâwt ta a.

A ngawih vang vang hnuah, "Ngurthan, i u nen hian kan inbe pawp fo a, tuna a nun dan pawh hi ka hriatpuina chen a awm, a nau pasal ka nih angin a ngaihtuah che a, ka neih chhan che hre vek lo mah se, min ring tawk," tih chiah a sawi.

"Ka u nen in inbe ṭhin a maw?" Ka lo ti a.

"Engah nge kan inbiak loh ang, a ngaihtuah em em che a, mipa a nia a lo sawi ve chhên lo a ni mai," a tih leh chuan ka û hlim hmel ka mitthlâah a rawn lang a, ka ṭap leh ta.

"Mittui te hi ngah lutuk loh tur, honeymoon kan hman laia chemtea min vih ṭuma i rilru paukhauhna ang kha nei la ka duh, chuan, hmanni lawkah mipakhat malpuiah i vit bawk a, i duhnaah chuan i inthunun thei tih ka hria a nia," a tih tâkah chuan ka ṭap bâng hmak.

"I chhe zet zut.." ka ti hlak a. A lo nui huk a, ka khêl bâwrah chûlin, "Tlem tal muthilh tum rawh, naktuk nilengin mutna hun i nei dawn lo a nia," a ti a, ka maimitchhing ve nghal mai bawk a.

'Kan in' tia ka lo sawi ve ṭhinah keimah chiah hnutchhiahin ka awm ta. Ka na êm asin.

Phun sap sap thawmah ka harh a, Jeho chuan min la kuah rân mai. A mutui ve hle a ni ang, a che miah lo a, phun thawm ka hriatna lam chu bathroom a ni tlat!

Ngun zawkin beng ka chhi a, an sawi erawh chiang takin ka hre thei lo. Mawitei aw kha ang ka tih avangin ka tho chhuak ta a, tui in ka duh ve pah reng reng.

Ka rin ang chiahin ka cousin Mawitei mutna ṭhutthleng chu a lo ruak hiau a, Aryan leh Rishan an hnâr sûk sûk a. 

"Ti tura min hrilh ang kha chuan ka ti ngei alawm, min bum a nih chuan a pawi viau ang," tia zawitea ṭawng thawm ka hre leh a, tui pawh in ta lo chuan ka ding ngawi reng, tun ang hunah atu chu bia ni maw!

"Pawisa chu min lo thawn vat la a ni mai, a nih loh chuan ka kâ ka âng dawn a nia," a la ti cheu a, ka ngaih a ṭha thei tawh lo, Mawitei hian pasal tia sawi tur mumal a nei lo a, fâ a nei thung. A fa pa hi kei chuan ka hre hauh lo a, kan inhmu ngai lem lo bawk nen zawh enah ka en lo a ni ber.

Ka u ṭhianpa Ramluaha kha biak ngei ka tum ta a, ani khan a va hmu hmasa ber a, engin nge min mawlh ka hre lo, ka u thih danah hian thil felhlel awm ang tlata hriatna ka nei. Mahse, fiahna ka nei si lo lai hi a ni.

"Kha tah eng ati nge i din reng, lo mu rawh.." tia Jehoa'n min lo biak thut chuan ka phu zawk a, ka âwm ka dawm vat.

"I ṭha em?" Tiin min zawt leh hnuhnawh a, ka lo bu nghat ringawt.

"Thawh nan a la hma lutuk, thil ngaihtuah vak vak suh, a la hlimchhawn tih chu ka hre tho naa i u khan amah vanga i hrehawm a remti hauh lovang," tih pahin khum lam min panpui a, Mawitei ṭawng thawm kha a hriat ve loh ka beisei. A hriat vaih chuan a ri leh phat dawn a, chu chu tun atana ka thil duh loh ber a ni.

"Jeho..." tia ka koh chuan a lo rum dút a.

"Ka û kha thah a nih i ring em?" Tiin ka zawt leh ta chawt a.

"Ka nupui i nih angin engkim ka rindan ka hrilh ang che, mahse, rindan chauh." Tiin a ngawi leh rih a.

"Rinhlelh i nei em ni?" Ka ti leh a.

"Ngurthan, nangmah zawng tura Rishan leh Buatsaiha ka tirh kha i la hria em?" Tiin min zawt let a, ka hriat thu ka sawi chuan, "Buatsaiha leh Samuel hi ka ringhlel a ni," a ti ta a.

Ka lo thaw hak ringawt.

"Vanlalṭana kha hriamhrei hmangin an that ka ti lo, hmanrua an nei zawk a ni, i pasal hian hmâ ka la dawn alawm, damlo anga lang siin, emergency-a zai ngai nghal rum rum kha chhui chian tham a ni." Tiin min hrilh fiah ta a.

Ni e, ani aia zu in nasa an tam lutuk, zankhat thilthu leka khatia a awm kha a mak a ni, a zaitu ka ni lo nain a dikhlel tih ka hria. Ka pasal Jehomalsawmkima thil chîk leh mi fimkhur hian eng emaw tak ngaihdan a neih ka ring reng a ni.

Ka Laljeho chauh hi ka innghahna neih chhun a ni a, a sawi angin a awkâ chu ka ngaichâng ngei ang.

Jeho bân chu lain, ka inkuah tîr a, "Min hliahkhuhtu i ni" ti rilru chung hian ka maimitchhing ve leh ta a.

180423

B+>[BeckirafARenthleI]<+®®