15.24-89[A Becky Rafa Story]

15.24-89 

Ziaktu: Becky Rafa Renthlei

[Recap]

"Vanlalṭana kha hriamhrei hmangin an that ka ti lo, hmanrua an nei zawk a ni, i pasal hian hmâ ka la dawn alawm, damlo anga lang siin, emergency-a zai ngai nghal rum rum kha chhui chian tham a ni." Tiin min hrilh fiah ta a.

Ni e, ani aia zu in nasa an tam lutuk, zankhat thil thu leka khatia a awm kha a mak a ni, a zaitu ka ni lo nain a dikhlel tih ka hria. Ka pasal Jehomalsawmkima thil chîk leh mi fimkhur hian eng emaw tak ngaihdan a neih ka ring reng a ni.

Ka Laljeho chauh hi ka innghahna neih chhun a ni a, a sawi angin a awkâ chu ka ngaichâng ngei ang.

Jeho bân chu lain, ka inkuah tîr a, "Min hliahkhuhtu i ni" ti rilru chung hian ka maimitchhing ve leh ta a.

-B®®

Ka û thih sârhu a zo a, inlêng pawh kan nei tam tawh lo, hman zana Jeho nen kan titi aṭang khan zan thum a liam tawh a, atu ve ve pawhin kan sawi lang ta rih lo a. Tin, tuna chhui nghal theih eng mah a awm hek lo, ka pasal kutah ka dah hlâwm tawp a, ka u thihna hian ka nunah nghawng a nei thui hle, a chhan chu tuna kan in hi Serchhipah daih a awm si a, keimaha va awm chi ninghal lo chuan.

"Ngurthan, hetah lokal lawk teh," tia Jeho min ko ri ka hriat chuan ka thawmhnaw thleh fel lai ka dah sawk sawk a, Rishan nen an ṭhu dun a.

A bul ka thlen veleh, "Rishan, i pi hi ka'n be lawk ang e," tiin ṭhu turin min mitmei a, ka ṭhu ve mai bawk a, a pawimawh hmel nasa mai si.

"Tih tur tam tak ka nei a, Aryan nen Aizawl panin vawiin hian kal kan tum a, i lo awm hreh em, Rishan pawh i bulah a awm dawn tho a," a ti ta a.

"Aizawlah eng nge tih tur i neih?" Tia ka zawh chuan, "Ni reilote hnuah Buatsaiha leh ka farnu an innei tawh dawn a, Buatsaiha laka ka rilru put hmang chu i hriat vek tawh kha, an inneihna tur hi ka dan a ngai tlat, Tleipuii tan pawh nakinah a la hnawksak thei a, chuvangin a rang lama hma ka lâk a ngai," tiin a thaw chhuak hawk a, a rilru a hah ve deuh a nih ka ring.

"Enteh Jeho, ka lo sawi ve tur chu a awm miah lo a, mahse, kârah fate an nei tawh a, an inneihna tur i ṭhulh tîr chuan tun âi hian Buatsaiha hi a tawrhhlelhawm zawk lovang maw, i tan a hnawksak dawn asin.." ka lo ti ve a.

A ngawih vung vung hnuah, "Samuel nen an ṭang kawp ang tlata ka hriat avangin ka farnu pasal atan ka ît ta vak lo, nizanah Bartho nen kan sawi dun a, ka ngaihdan ang tho hi a ngaihdan a lo ni ve atin ni." A ti zawi sup.

"Tleipuii nen innei se chuta ṭang chuan i thil hriat duh leh i patea nihna dik tak hi i hrechhuak hma zâwkin ka ring, tun ang hun chêp lutuk kâra inneihna ṭhulh leh tezawng thil tih chi a ni lo," ka la ti ve fan.

Buatsaiha hi a tîr aṭang rêngin ka ngaina lo a, Tleipuii nen an inneih loh chuan Jeho lakah a hel zual zela rinna ka neih vang a ni, an mâkpa a nih loh chuan a thil thup leh a rilru puthmang hriat a har tulh tulh dawn a, Tleipuii nen innei mah se pawi tihna ka nei lem lo.

"Eng pawh nise Aizawlah kan kal phawt ang a, Rishan nen lo awm ula, tunah thutlûkna chu ka siam rih lo mai ang, an inneihna tur lah ni li chiahin a dang tawh si a," a ti leh lawi a.

"Fîm takin thil ngaihtuah la, thutlûkna dik tak siam ang che, tumah rin ngam kan neih tawh loh hi," ka ti a, min melh vung vung ringawt.

"Nang pawh hetah i awm reng thei dawn lo a, i u thihcham kârkhat a tlin hunah Aizawl panin kan lêt ang, khawi hmunah pawh awm la, i mit leh beng hmang ṭangkai zel ang che, in chhuahsan lo bawk la.." tia a sawi zawh hnuah Rishan a ko a, "Aryan nen Aizawlah kan kal a ngai a, i Madam lo veng ṭha hle ang che," tiin a hrilh thlap.

Thawmhnaw siam vak ngai a neih loh avangin a inpeih thuai a, tûkṭhuan kan ei zui ta bawk nen thil dang eng mah kan sawi chhunzawm ta rih lo.

Aryan khan Car a rawn keng emaw ka ti a, Gurkha zawk a lo keng chu niin! Tûkpumin a sil a, a'n bei fai leh mai mai khawp a, Force Gurkha ka hmuh apiang hian engtin emawni ka awm ziah, a mak ngawt mai.

Jeho leh Aryan Aizawl panin an chhuak tawh a, chhun lamah phei chuan inléng mumal kan nei vak tawh lo. Ka nu lama kan chhungte pahnih khat an lo tei lût ve zauh a, mi hrang phei chu an rêm titih tawh. Kan in luahlumtu ber ka û a awm tawh lo a, kei chu mithar chan ka chang deuh zawk a, tu khawkha khan min ngaina viau lo tepawh a ni mahna.

Mawitei leh Rinkimi an lo lut a, Rinkimi hi ka pa farnu fa a ni a, ka ngaina ve ber, a ri puat puat a, tu pawi mah sawi lo chi a ni.

"U Ngurthan, inpa kan lo rim dawn," rawn ti ham hamin a nui sâng a, Aizawla a kal thu ka lo hrilh a, "A va han pawi tak, inpa ang kha hmu ve ngat ila chuan ka luhkhung hmak ang," tia nui ṭhain Rishan a melh zauh a, Mawitei a la ṭawng ve lo.

"Kimi, Rishan nen khan lo inkawm ula, thingpui te kha lo lum rawh u, Mawitei nen room kan ching fel lawk ang aw.." ka ti a, Rinkimi lah chuan, "Rishan hi ka lo bêm ang e.." tih pahin a nui hak hak a, Mawitei ka hûi zauh a, room-ah kan inzui lut ta a.

"Hman zana i biak kha tu nge?" tiin pehhêl nei miah lovin ka zawt hmiah. A meng buai nak a, a mitah ka lo en kar thung.

"Ngurthan.." a ti sap a.

"Jeho awm lai khan ka zawt duh lo che a nih kha, i ṭawng zawng zawng ka hre vek," ka ti zel a, koki san âwk chung hian, "Bawiha pa a nih kha.." tiin min chhâng a, mahse, a hmêlah dâwt a sawi tih ka hria.

"Ka u thihna nena inkungkaih thil a nih chuan ka ngawi dawn miah lo a nia, Bawiha pa a nih pawhin eng ati nge bathroom-ah kher i va biak, unau kan ni a, thil dik lo eng emaw chu a awm a ni, min hrilh rawh," ka la ti hrâm.

"Chutiang eng mah a awm lo, Bawiha châwmna tur pawisa ka dil a, min lo thawn mai tur anga insawi siin a reh leh daih a, ka va be nawn alawm, a chhungte'n fa a nei tih an hre lo a.." tiin a ṭang tlat.

"A nih tak chu, dâwt min hrilh a nih chuan a pawi dawn a nia, ka pasal hi a ngawi hauh lo ang aw, pa zaidam tak lah a ni hek lo, ka u thihnaah hian i inhnamhnawih tih ka hriat vaih chuan Ngurthantluangi i hriat ṭhin hi i hmu tawh ngai lo ang aw," tiin dam thlap leh zawi raihin ka vau ve ta a, a mitmeng a pha dùi a, eng ang pawhin zâwt mah ila min hrilh duh dawn lo tih ka hre lutuk tlat; amaherawh chu, an inbiakna ka hria a ni tih hi hre ve hrim hrim se ka duh vang a ni pakhat.

"Min ring chhe hle mai," a ti sap a, "Ka ring chhia che a ni lo, unau kan ni a, ka u damdawi ina hruaitu i ni bawk, i lakah rilru chhia ka pu lo a, i ṭawng ri ka hriat avang leh i thil sawi dan kal hmang avang khan zawhna ka zawt mai chauh che a ni, mihrang daih chu ni la ka ngawih bopui em em ang," dam deuh zawkin ka ti a, a ngaihdan a ni vak lo nge a ner sak mai.

"Ramluaha kha ko la zawt chiang rawh," a ti nghat a, "Ka la zawt dawn alawm, ka la chhui dawn chauh," ka ti ve hmak a. 

Titau chunga kan room a chhuahsan lai pawhin ka dinna ngaiah ka la ding reng a, Mawitei hi ka rinhlelh zinga pakhat a ni. An inbiak dan kha thil dik nithei hian ka hre lul lo. 'Bawiha pa' tih vel te kha chu a chhuanlam mai mai a nih ka ring zawk. A fapa hian pa koh tur mumal a nei lo tih ka nîin min hrilh miau alawm.

Rinkimi leh Rishan pawh an inkawm thei viau a, Mawitei ber a tihtauh tâk avangin rei pawh awm lovin an haw ta a, a pawi pawh ka ti lo, rilru kheuhbeuh deuh bula awm hi chu ka thiam zâwng a ni ve tlat lo.

Ka phone a rawn ri a, Jeho hnen aṭangin a ni.

"Aizawl kan thleng tawh aw, inleng an awm em?" zangkhai takin a rawn ti a, Mawitei leh Rinkimi lokal thu ka sawi a, "Kan awm dan tur hriat thiam a harsa deuh a, shillonga kan haw a ngai thut mai thei," a tih chuan, "Kei chu ka kal ve tawh dawn lo a nia," ka lo ti hmanhmawh a. 

"I kal a ngai maithei a ni, ka nupui tel lo hian awm dan ka thiam mang tlat tawh lo," nui hawk hawk chungin a ti ve ngei.

"I kal dawnah keimaha ka awm a ngaih thu i sawi zuah zuah a, dârkâr tam pawh a liam hmain i rilru rawn thlâk reng reng suh," tiin nui chung hian ka lo chhâng a, "Tlangval inlêng neih ka remti lo a nia, nu i nih tawh kha," thutak deuh zawka tiin, "Ka ngai che a nih mai chu," a ti leh a, ka lâi ringawt. Jeho kâ aṭanga hetiang thu hriat hi chu ka inbeisei lo, a sawi ngai lo bawk a.

"Tunah pawh inleng pahnih ka nei, zanah an lokal leh ang," ka lo ti a.

"Ngurthantluang, tikhan rawn ṭawng reng reng suh," a ti hluk a, ka nui chhuak ta nge nge e.

"Chhe siah, inlêng ka ti ringawt a nih kha, tlangval tih ka sawi lo," tia ka nuih hak hak tâkah chuan, "I châk dawn lo maw le, ka Ngurthantluangi chimawm reuh zia hi chu.." tiin a nui ve ta a, a dik a dik chuan kan inhriat tirh leh kan chendun chhung hian a nui ri ka hre khât hle a ni.

Rei vak lo kan inbiak leh hnuah, Aryan nen chhuahna tur an neih thu a sawi a, a dah ta rih.

Kei pawhin putar inlêng ka nei zui ve ta bawk a, ka u râlna sum pawh rin ai takin ka dawng ṭha.

Rishan nen zanriah kan kîl a, zan tîr aṭangin ka awm a nuam vak lo nain ka sawi lang duh lem lo a, kan inchhung zau angreng takah chuan ka hawi kual a, engkim mai hi a ruak vek nimaiin ka hria, ka u thawhpui te'n râlna hun an lo hmang dawn a, Rinkimi pawh a rawn thleng phei leh tawh a, a ṭûl ang anga min buaipui turin ka sawm kha a ni a, Ramluaha pawh ka koh ni miah lovin a rawn lang ve leh ta.

Midang lo thlen hmaa a fâla biak ka duh vangin Veranda thlang lamah ka chhuah pui a, ani hi palian vak lo, hmelṭha vei fu a ni a, a hmel a dam thlup. Ka u nen office khata thawk dun an ni.

"Ngurthan, inpa ka va hmu lo ve," tih pahin zial a ṭan a. Aizawla a kal thu ka lo hrilh ṭha ve mai.

"Ka u i va hmuh tirh khan engtin chiah nge a lo awm?" Tiin ka zawt ta a.

"Office-ah a rawn kal lo a, zu a ruih pawhin office hi chu a kal zel ṭhin, a kal theih dawn loh pawhin min hrilh mai zel a, nilênga a rawn lan tak loh avangin ka va call ta ringawt a, phone a pick theih tâk si lohah chuan in inah hian ka phei alawm," tiin min hmachhawn zawngin a rawn inher a, chîk taka min en hnuah, "I rilru tina lo la, ka va hmuh lai tak hi chuan a kâ aṭangin thi a chhuak a, a mutna bul chhuatah thisen a awm nial bawk," tia a sawi lai chuan ka lo thaw chhuak hak. Ka mitthlâah a awm dan ka hmu nghal.

"Chuan, nikhua a hre miah lo ang tiraw, khumah nge a mut chhuatah?" Tia ka zawh leh chuan chhuata a mut thu a sawi ta a, ka rilru a na thar leh zual. Ngaihsaktu leh ngaihventu pawh awm miah lovin engtia rei nge a lo tuar ang, ka na ngawih ngawih teh e.

"A mak asin, ka ngaihtuah nawn leh pawh hian khatianga a awm ringawt kha mak ka la ti tho, a chhan chu zû in nasa mah se, chatthla khawpin a in ngai lo tlat a ni," a ti leh a, "U Ramluah, ka u khan hmelma emaw amah hawtu a neih i hria em?" Ka ti teh tawp a, mit zim san chung hian, "Chutiang an awm pawh ka hre lo, mi pawi a sawi lo em mai," tiin ṭha tak hian min chhâng a, ka rindan ve tho a ni.

Ka u Vanlalṭana kha mi ṭawngtam a ni lo a, zu a in a nih pawhin ngawirenga in chi a ni, a phalna tel lova pasal ka nei tih a hriat pawhin ṭawngkam vîn leh ngaihthlâk hrehawmin vawikhat mah min be lo, a zia a ni ve tlat lo tih ka hre bawk.

Thil dang kan sawi leh hmain midang an rawn thleng ta si a, inchhungah kan lut ta a.

Râlna hun kan hman laiin ka phone a rawn ri a, number lawng chauh a nih vangin ka chhâng lem lo, nakinah ka callback mai ang ti rilru chungin ka switch off ta daih a, a thawhpuite an felin min ṭawng thlamuan liam liama ka ṭah an ti chhuak, mahse, ṭah loh hram hram ka tum ve tlat thung.

Rinkimin min riahpui a tum a, Rishan pawh ka room-ah a mu a, keini ka u khumah kan mu fel tawh bawk.

Whatsapp message a lo awm dal a, nichina min lo call tu kha ka call lêt ta lo, mahse, msg a lo hnutchhiah a, "Vanlalṭana a awm tawh lo a, a dawt lehah chuan Jehomalsawmkima a ni tawh ang," tih tê mai hi.

A dp a awm bawk si lo, rang takin ka call nghal a, switch-off a inti tlat. Tu emawin min vau a tum tih hriat reng reng. Ka nunah mi pawimawh pahnih chiah an awm a, ka pasal leh ka unaupa hi an ni. U Ṭana ti hi a ni tawh a, Jeho nunna pawh a derthawng tih min hrilh an tum ni berin a lang.

Ka ṭhu chhuak hlawl a, Rinkimi a mutui hle, ka mut chhuak a reh vek bawk. Jeho number ka hmet chhuak a, ka call ta ringawt a, vawithum zet a ring hnuah hmeichhe aw fiah tak hian, "Eng nge ni?" A rawn ti ta a, phone ka en vat a, ka call sual emaw ka ti hman kha a ni a, Jeho number ngei chu a ni si!

"Jeho khawiah nge?" Ka ti a.

"A muhil.." a rawn ti a.

"Kai tho teh, ka lo be teh ang," ka ti leh a.

"Tunge i nih a, a muhil ka tih chu," tiin a rawn vin hlar a, ka va ngei e, keimah zawk hian vin hrep tur ka ni zawk, "A nupui ka nia, tunge i nih a?" Ka ti ve ta a.

"A bialnu.." zu han ti a!

"Ka pasal kha kai tho la phone pe rawh," ka ti fiak ṭhak a, phone a off hmak.

Vawi tam ka call nawn leh pawhin chhângtu an awm tawh lo, thinrim zetin ka tho chhuak a, zanlai vel a ni a, Rishan mutna lamah kalin kawngkhar ka kik a, rei vak lo hnuah a rawn hawng ve mai.

Phak chap hian, "Madam, buaina i nei em ni?" A lo ti vat a. Aryan call tura ka hrilh chuan mak a ti tih a hriat mai, mahse, min hnial lovin Aryan chu a call ta tho a, "Madam hian a be duh che a," tih pahin phone min pe a, "I bulah Jeho a awm em, tunah khan khawiah nge in awm?" Tia ka zawh chuan, "A pawi ka ti khawp mai ka hrilh thei lo che," a lo ti leh tlat.

Vin zet hian, "In awmna lai sawi mai rawh, tunah ka hre duh, tute nen nge in awm, khawiah nge in chhuah?" ka ti lui zel a, "Madam, hei chu ka sawi thei lo, min hrethiam rawh, muttui ule.." tia a sawi zawh rualin phone a off a, Rishan chuan min lo en reng a, "I rilru tihrehawm suh, hna an thawk a ni ang," tiin min hnem ve a, "Tun ang hunah eng hna mah thawh tur a awm lo, Farm-ah kan awm loh hi.." tiin a phone ka pe lêt a, "A ṭul a nih chuan zanlaiah pawh kan thawk mai zel alawm, a hun leh hmun kan thliar ve ngai lo, hna a awm chuan kan thawk mai," tiin Jeho ṭan tak hian a ṭawng a, "A nih chu, mu rawh.." tia chhuahsan ka tum chuan ka bânah a rawn vuan a, "Madam.." a ti sup ringawt.

Chhang duh tawh lovin kan mutna lamah thinrim insawh tau chung hian ka lut ta a, Rinkimi bulah ka va inthawlh a, ka tâwt up up, zankhat a riak sawn dêk dêk a, hmeichhe dang bulah a awm lehnghal a nia, Jehomalsawmkima hian min biak han tum leh vaih teh se, a châk lo ang.

Thinrim ṭûna mu ka ni nachungin ka lo muhil ve tho a ni ang, ka phone riin min tiharh a, 7missed call a lo awm tawh a, Jeho hnen aṭang vekin a ni.

Vawi za tam pawh rawn call mah se tun dinhmunah hi chuan ka chhâng dawn lo hrim hrim.

Zinglam dar 9 a lo pel tawh a, thawh ka hai chiang kher mai, Rishan chuan chhuat a lo nawt ngial a, "Madam, inpa call rawh.." tih chiah a sawi.

"Aih," ka ti hmak a, Rinkimi awmna ka zawta a haw tawh tih a sawi leh mai a, a bâk a ṭawng tawh lo hrim hrim, keimahin ei tur ka insiam a, Rishan Songbet chuan ka che vel ngun lutukin min en reng tih ka hria, a boss hnenah a report dawn a ni mahna, amah pawh hi ka ngei zo vek tawh.

Thlanmualah kal tumin ka insiam a, dâr 11 a pel tawh, ka ngenna angin ka nu leh pa thlanah ka u kha an phum tel ve a, a boral aṭangin vawikhat chiah ka la tlawh, Jeho khan kal a phal lo zel a, tunah amah a awm ta lo bawk a, kal ngei ka tum ruh hle.

Chutia ka lo insiam mawlh mawlh lai chuan Ramluaha a rawn lut a, "Ngurthan, zanin tlai chu kan inah zanriah lo ei ve rawh aw.." a rawn ti lut a, room aṭangin ka chhuak zui nghal a.

"Nia, Rishan nen chiah kan awm a, Jeho lo haw hun tur ka sawi thei chiah lo nain rawn ei ve pawh a ṭha," tluangtlam taka tiin ka sam ka phiar mawlh mawlh a, "Khawiah nge i kal dawn, kal chhuak tur i va ang ve?" Tia min zawh chuan thlanmualah kal ka tum tih ka sawi a.

"Ka lo zui ve dawn che nia, a hla tham si a, motor ka rawn keng alawm," tia nui var varin kan bula ngawirenga awm ve Rishan chu a melh a, "Inah hian lo awm la, keiman ka va hruai ang e," tiin a bia a, Rishan hmela lawm lohna lo lang chhuak chu ka hmu reng, "Thu min pe suh," a lo ti hmuk.

"Rishan.." ka ti hlak a.

"Thu min pe theitu chu ka boss leh nang chauh i ni, ani hnuaia thawk hi ka ni lo," a la ti cheu a, Ramluaha ngaihdan a ni ta lo deuh nge, "Mizo an nih lohna hi a lang leh ṭhin.." a ti sup a, nelawmna tel miah lovin Rishan chu a melh a, "I pi hi a u thlanah ka hruai dawn a, in lo nghâk ang che," a ti ṭha leh ngat.

Rishan a insangmar at a, insual peih atin a nia a awm ni, an boruak a ṭha dawn lova ka hriat tâk avangin, "Kal ang, ani hi chu ngaipawimawh duh suh, lokal lo mah la keimahin kal tho ka tum alawm," tiin a bânah ka vuan a, ka chhuahpui ta a, Rishan a rum nghat a, eng phei chu a sawi tawh lo.

Ramluaha nen a Car-in thlanmual lam kan pan ta a, phone pawh ka keng duh tingtang lo, Jeho bâk min betu tur an awm chuang lo a, nizana msg ka dawnna number kha tukin thlengin a la call tlang theih loh bawk.

Ka nu leh pa, ka û thlan ni bawk bulah chuan ngawi rengin ka ṭhu a, ka mittui far fap fap pawh hrûk buai ka tum lo, "I theih phawt chuan ṭap rawh, i u hi ka ṭhian a ni a, mipa ni mahila ka thinlung takin ka tuar ve asin.." tiin ka bulah a rawn ṭhu hniam a, ka darah min kuah a, "Ngurthan, i dinhmun khirh zia hi ka hriat thiampui che, doctor ni mah la, hna i nei lo tih ka hria a, Shillong lamah kal tawh lovin helamah in benbel tum zawk rawh.." a tih chuan ka dâk chhuak a, min lainat hmel taka min lo en rengtu Ramluaha mitah tak ka en chat a.

"Ka pasal awmna hi ka awmna tur zel a ni a, nautê ka neih zawh lamah Shillong lamah kan awm leh tho a ngai ang," tiin ṭha takin ka hrilh ve mai.

"Tunah nau i pai em ni?" A ti hû a, mak a tih hmel khawp mai.

"Pai e, ka u hetiang hi ni lo mah se lo haw ka tum hrim hrim a," tih pahin ka ding chhuak a, ka lu a hai chhalh, ni a sa bawk si a, ka ni nghulh maiin ka hria.

Ramluaha'n min lo dawm vat a, ka luak a chhuak leh ṭan tawh.

Haw a rawt ta vat a, a car dahna thlengin min kuah a, ka pum let but but tih reh tumin chil ka lem khalh khalh a, nizan ka mu ṭha lo bawk nen, ka taksa a chak vak bik si lo a, ka heti leh tlat zel.

Dimtein Car-ah min ṭhut luh tîr a, "Hetiang i nih chuan zanriah pawh lo ei rih lo mai rawh, hun remchang a awm leh mai ang, mut hahdam i mamawh a nih kha.." tiin ka hmai hliahtu ka sam chhâwlléng chu min huikiansak a, a kut a dam thlup. Ka u nen an inrual khat velin ka ring a, a fel ve ngawt mai Ramluaha hi chu. 

"Nia, hetah ka la awm rih dawn a, vawikhat tal chu in inah ka lo lêng ve ang," tiin tui in tur min pe a, "Ka nau ang tak takin ka en che a, ka lakah eng mah inthlahrunna tur a awm lo," tiin Car a tinung a, kan tlan chhuak a ni deuh mai.

Ramluaha ka lo ringhlel ve ringawt kha â ka inti takzet. A mitmenga min ngaihsakna lo lang ṭhin hi a der a ni lo tih ka hre ve tlat.

Kan in kawt kan thleng a, Gurkha dum lo ding ka hmuh veleh, "In inah kal ang," ka ti leh hnuhnawh a, "Eng..eng ati maw?" a tih chuan, "Ka la haw peih rih lo, in inah kal ang," ka ti deuh tlat a, thil dang min zawt thui lovin a tlân tlang ve mai bawk a.

Kha Gurkha kha Jeho ta tih ka hria, a lo lêt tawh a nih ka ring a, a lakah ka lungawi loh êm avangin pehhêlna tur ka zawng mai zawk a ni.

Ramluaha te inah pawh kal ta chuang lovin an office lamah min tlangpui ta a, eng mah ka sawisel chuang lo, ka u sulhnu chhui nan a la hma deuh na a, kalna tur dang ka hre miah si lo a, darkar khat aia tam Ramluaha nen kan teikual a, ka luak chhuak leh luhai pawh a zia ta deuh.

"Ka hruai haw tawh ang che," tiin ka dinna bulah a lo phei a, ka kokiah a kut a rawn nghat a, "Harsatna i neih phawt chuan min hrilh zel dawn nia, tih theih nei tam lo mah ila, i tan ṭangkaina ka lo neih ve tâk mialah," tiin a phone number min hrilh zui nghal a, chutih lai tak chuan kan dinna bulah Gurkha a rawn ding dawt a, ka phu nasa kher mai.

Jeho a lo chhuak dawn emaw ka tih laiin Rishan zawk a lo ni a, "Madam, haw a hun tawh.." ti supin ngaihnobei lo zet hian Ramluaha a melh run a, a hmaa ka hriat ṭhin Rishan kha anna a nei lo, a meng hniam ruih a, Ramluaha chu huat hmel taka melh chung hian, "Nula a ni lo a, mi nu a nih hi.." a ti nghut.

"Rishan, ṭawng fimkhur rawh.." ka lo ti vin ṭhat.

"Ka sawi dik a ni lawm ni, Boss a lo thleng tawh a, a thinrimna i bengdai thei dawn em ni? Ti hmuk chung hian ka bânah a rawn vuan a, "Keimahin ka kal thei.." ka ti ve bawk a, min vuan nghet sauh.

Ramluaha zawkin, "Kal phawt mai rawh, zan lamah lokal ka tum dawn nia," tiin car-ah a lut a, Rishan ka melh râm râm a, eng teh vakah a ngaih loh hmel, hmui chîp hmuk chung hian driver seat-ah a ṭhu lut a, kei pawh ka lut leh ta nge nge e.

Kan in chhung ka lut chiah a, Jehomalsawmkima thinrim hmel dur khup nen kan inhmachhawn chiang teh e, kawngkapui pawh ka la kân fel hma hmain, "Ngurthantluang, phone i mamawh lo tawp a nih hi.." zawi supa tiin cement chhuatah ka phone chu a vawm ṭhuai a, a phel darh chuai! Ka phu nasa lutuka Rishan ka ngheng nghal rawk rawk mai.

Mahse, a laka ka thinrimna kha a nasat êm avangin a thinrim hmel dur khup chu hlauhna em em ka nei bîk tawh lo, chhuata ka phone darh nuai chu kalpelin ka u room-ah ka lut tlang nghal a, ṭawngkam khat mah ka la chhâkchhuak lo.

Jeho chuan min rawn zui lut vat a, kut kuangkuaha ka ding chu ka dârah manin min sawi nawk a, "Mipa tel lova awm thei lo i nih ka lo hre lo atin ni," a ti nghut a, ka la ngawi ta fo.

"Ngurthantluang, i hmui an ṭhui pin sak che em ni?" Ti lehin khum bul bangkilah min nawr phei a, "Hmeichhe dang i khawihna kut khan min tawk hlek suh," tiin ka ṭawng chhuak ve ta. A rum nghut a, "Thlanmuala in awm dan pawh kha ka hmu vek alawm, min bum lovang," thinrim sehchilh naka tiin min vuan nghet sauh a, "Mipa dangin an khawih ai che chuan thi zawk mai rawh," thum chhaka tiin ka chalah Pistol-in min tin rap a, a mitah ka en ve ta.

"I duh phawt chuan min that rawh, dam chhan ka nei tawh hleinem, ka hlau lo, Malsawmkim, eng mah ka hlau lo.." ka ti ve phiar phiar a, amah aṭanga ka chhawm thinrim pawha rîk hluai loh dan kha ka zir tawh a, ka awki a ring bik miah lo.

"Ka kalsan lai che khan i lung a awi, Aizawl aṭanga ka rawn biak lai che pawhin i lung a la awi tho, mahse, kha mihring kianga i awm khan kei min phatsan a ni," tih pahin ka khabeah a kut veilamin a rawn chelh a, a hmer nghet nasa mai si.

"Nizana i mutpui nu bulah khan va mu leh rawh, kal rawh, helai hmun hi chu i lalna ram a ni lo, kan in a nih hi, i in a ni lo.." ka ti ve sak sak a, a ner sawk a, chutah thaw hawk chung hian, Pistol a pai ṭha a, "I luhlul ta mah mah a ni, engtia han tih chi nge maw i nih le..?" Beidawn hmel taka tiin khum lamah a phei a, min hnungchhawn zawngin a va ding ringawt.

"Nang leh kei hi awm dun thei kan ni lo a nih ber hi, hmeichhe pakhata lungawi lo mipa hi eng atan mah ka ti bîk lo a nia, i driver Rishan zawt la, ka rinawm nge rinawm lo tih i hre thei ang, nang erawh chu nizanah hmeichhe dang kiangah riakin i hun i khawhral a, uirena a nih kha..." duh thawh zeta tiin khum bula Jeho ding chu ka pan hnai a, a inrin hman hmain a kekawr ipte ka zen thut a, a phone ka phawrh chhuak ta.

"Eng nge i hriat a?" A ti sup.

"Kei hian phone ka mamawh lo a nih chuan nang pawhin i mamawh bik lo," tih pahin na zet hian a phone chu chhuatah ka vawm ve ta a, min en tawp.

"Ngurthan.." tiin mitmeng dul ruih hian min en a, "Nizan khan vawi engzat nge ka lo call che, engkimah a thiam lo zawk ang hian min puh fai vek tawh suh, eng mah pawisak ka nei tawh lo tih i hriat kha," tih pahin chhuata phone darh phung chu ka melh zauh a, "Hei hi lo hria ang che, ka dikna a nih chuan a tawp thlengin ka ṭang zel ang, thi dawn mahila a tawp thlengin le.." ti lehin makti lutuka min enna haider chung hian room ka chhuahsan ta a, min dang chhin eih lo, a hamhaih hmel kha a khawngaihthlak zawk.

Inthunun tumin thâwk ka la vang vang a, Rishan leh Aryan lo ṭhu ngawi reng chu en pawh ka en duh lo. Jeho vanga ka tawrhna hian min ti chawlawl tawh a, ka sawi ang deuh tak tak khan dam chhan nei hian ka inhre mawlh lo a ni.

Zanriah tur pawh Aryan te pahnihin an siam a, room aṭangin Jeho a lo la chhuak lo, va ngaihven emaw ngaihsak tumna ka nei lo a, nizana hmeichhe chungchang ka sawi khan insawifiah pawh a tum lova, nupaah thuruk a awm tur a ni lo tia min hrilh tu kha amah Jeho tho hi a ni. Eng thuruk nge a neih leh si?

"Rishan, i boss chaw ei turin va ko rawh," ka ti hmak a, koki san âk chung hian a kal ve mai a, Aryan ka va en a, "Nizanah ka zawhna min chhâng duh lo a, i lakah ka lawm lo hle a ni," ka tih chuan inthiam loh hmel tak hian, "Madam, thupek ka zawm a ngai alawm," a ti a, ka nui lui ngial.

"Helai hi chu farm house a ni lova ka in a ni, keimahni in liau liau.." ti ve ngatin dawhkan ka kîl a, atu amah chaw ei zai rêl an awm lo, a pawi tawp nang. Ka ril a ṭâm tawh a, ka eisan hmak.

A hnu feah Jeho a rawn chhuak a, ngawi ngul chung hian an pathumin dawhkan an kil a, kei erawh room-ah ka lut leh daih tawh. Inleng an lo awm leh tâkah tiin ka intleuh thuak thuak a, bathrobe nen ka chhuah lai chuan Jeho a rawn lut ve chiah.

"Naktukah Shillong kan pan ang.." a ti ta a. Ka lo ter ve at.

"Kha chu i thu thu aw, hetah kei chu ka awm dawn," ka lo ti nghauh a.

"Ngurthan, ka rualin i kal ang," tiin tukverh bulah ava ding a, "Ka kal dawn lo, ka u a awm tawh lo a, he inah hian ka chêng zel ang, khawi hmunah mah kal ka tum tawh lo," ka ti ve tlat a, a dinna aṭanga rawn pen sawnin, "Nizan chungchangah khan thupha ka chawi e, i lawm lo a nih chuan i duh leh min hau rawh.." dam thlupa tiin min en reng a, hnuailam ka bih daih.

"Nupui nei chunga ngaihzawng i nei thei a nih chuan i thu a ni, kei erawh chuan pasal nei chungin ngaihzawng ka nei ve lo a, i duh leh khanu kha Shillong-ah chuan hruai rawh, ka thîk lo a nia..." ka la ti zel a, min nin hmel zet hian, "I va han ṭawngtam thei e aw, nizan chungchangah khan insawifiah ka tum lo a nia, ka rualin i kal ngei ang, i kal dawn khawp mai," ti nghet churhin a chhuak zui leh daih a, ka va han ngei tak.

Eng rilru pu a lo let leh nge a nih hriat pawh va ni suh. Phone ka pick theih loh vang emaw ruahmanna dang a nei leh tawh pawh a ni mahna.

Ramluaha a lokal leh ta a, Rishan leh Aryan chuan ṭawngkam khat mahin an be lo a, Jeho pawh chuti tho. Inleng dang pahnih khat kan nei bawka kan Laljeho pawh a insûm rih a nih ka ring.

"Ngurthan, engtikah nge inpa hi a lo kîr a," tia Ramluaha'n min zawh chuan ṭha takin ka hrilh ve mai.

Inleng dang an haw hnuah Ramluaha a la ṭhu khawmuanga Jeho a rawn lut ve ta bawk a, keini pahnih lo ṭhu dun chu min en lo hrim hrim, ka u room-ah a lut tlang nulh a, a thinchhiat teh lul nen eng mah a sawi lo ve teh tlat. Aryan an min vil run a, kan duh ang pawh kan sawi thei chuang lo, Jeho thupek a nih ngei pawh ka ring.

"Ngurthan, lo phei lawk teh.." tia ka pasalin min koh tâkah chuan Ramluaha pawh haw turin a ding chhuak ta a, tlai chhia phei chu a la ni lo. Mahse, pasal nei lai ka ni tlat si a, veranda thleng ka thlah hnuin room ah ka lut ve ta chauh a, khumah a zangthal zawnga muin chunglam a en reng a, "Inṭhen i duh tiraw?" Tiin min zawt thut a, amah ka en vat.

Ka ngawi reng ringawt a, a zawhna teh daih hian min ti hamhaih mah zawk.

"Inṭhen chu i duh nge duh lo?" Tia min zawh nawn leh tâkah chuan, "Aw duh e, nang leh kei hi nupa tur kan ni lo, kan inremnaah thisen tel mah se kan awm hran hi a ngai a ni," ka ti ve ta a.

Muangchâng hian a rawn ṭhu chhuak a, "Naute a pian fel hunah inṭhenna chu a awm ang, min ring lotu nupui vawn reng hi ka kham ve ta e, i kal dawn nia, kei pawh ka kal ang, ka kal a nih chuan ka lo kîr tawh dawn lo.." tih pahin a pheikhawk a bun a, tunah kal nghal a tum em maw ni!

"Jeho.." ka ti sap a.

"Helai hmun hi ka in a ni lo a, duh lohna hmunah awm reng ka tum lo, kha hei hi la rawh," tiin pawisa khumah a dah a, "Hna i nei lo a, inenkawl nan i hmang dawn nia," ti supin a ding chhuak hluai a.

Rishan leh Aryan a ko a, "Insiam rawh u le, minute 10 hnuah kan chhuak ang," tia a hrilh rualin ka dinna bulah a lokal leh a, "I hlimna tur a nih a, i lungawina tur a nih phawt chuan ka kal ang," ti supin dam thlup hian ka chalah a fawp a, ka ding khawng auh ringawt.

Thil dang sawi tawh lovin a chhuak zui ta.

Ka inrin hman hmain Jehomalsawmkima lak aṭangin ka zalen chu a ni ta si a, a mak a ni. Gurkha tlan liam thawm a reh hma loh chuan ka dinna ngaiah ka ding reng a, chêt mai nachang pawh ka hre lo.

Mumang ang mai a nia lawm maw le.

Court-a innei kan nih angin inṭhenna bawhzui tur a la awm a, mahse, a kal ta.

A lokir leh dawn tawh lo tih a sawi bawk.

Zan dar sawmpakhat a ri tawh a, keimahin ka tei rak rak a, mut nachang pawh ka hre lo, Jeho hlirin ka ngaihtuahna a luah a, inṭhen hi ka lo duh rêng em, a tel lo hian ka awm thei tak tak ang em? Keimah leh keimah ka inzawt tlut tlut a, chhânna mumal ka inpe thei si lo. 

Khumah hmai hupin ka ṭhu a, keimah chiah tak taka hnutchhiah ka ni. Jeho pawisa dah khuma mi chu ka melh a, a tam ngang mai. Chu erawh chuan hlimna min pe si lo.

Chutia ka indawm kun reng lai chuan pen thawm a rawn awm a, kawngkhar ka kalh ngei khan ka hre si, hlauhna hian ka thauvah a man ka ti mai, ka thin a phu zaih zaih thei a lawm maw le.

Hmanraw chuh mai tur ka melh ruai a, a vâng phian bawk si. Pen thawm a reh a, choka lam aṭanga rawn ri chhuak niin ka hria, va en turin ka huaisenna ka sawmkhawm a, dimtea tho chhuakin kan room kawngkhar ka nam hawng a, ka thil hmuh chu leh!

Sofa lo hnai berah chuan Jehomalsawmkima a lo ṭhu a, ka chhuak thawm hriain a rawn dâk chhuak a, a mit thim raiha min enin, "Ka kal tak tak i ring lo ang tiraw? A chhan chu kalsan che ka tum tlat lo alawm," nui suk chunga tiin a rawn ding chhuak a, "I naupai thin tertek ṭawngkam chhe tleuhna nih pawh a la châkawm ve alawm," tih pahin min rawn hnaih sauh a, ka nuih pawh a za mai mai lo.

"Ngurthantluangi hian ka lakah thîkthu tepawh a nei ve ta, hma ka sawn hle mai," a ti duh chauh.

"Malsawmkim.." ka lo ti a.

"Jeho zawk maw le, I Laljeho.." ti supin hnai feah min en a, "Thihna nena suihfin ka nupui hi a hlu êm asin, ka kalsan hauh lovang," tia rawn kun hniamin ṭawng tuma ka âng chu a hmuiin a rawn khâr hmak.

Dam thlupin min fawp mial mial a, ka lo insangmar nasa mai.

"I hlutna ka hriat chian ang hian i tana ka hlutna hi hre ve rawh aw...thikthu chhenu.." a ti leh a.

"I kal daih emaw ka ti a.." ka lo ti niah niah a.

Nui kur kur chung hian, "Vawi sawmsarih hmun sawmsarih fiahna i paltlang meuh chuan min hmangaih tawh ang, min hmangaih ngei ngei ang," inringtawk taka tiin room lamah min kai phei a, a tih ang angin ka lo awm ve tawp.

Nichin khan a kal chhuak ngei khan ka hre si a, kawngkhar pawh ka kalh chiang. Ani hi engtia lo awm ringawt nge tih ka hrethiam ta hauh lo. Ka thluak hi ava han tibuai hneh ve tak hepa hi chuan...

190423

B+>[BeckirafARenthleI]<+®®