16. 24-89 [Becky Rafa Story]

16.24-89 

Ziaktu: Becky Rafa Renthlei

[Recap]

"I hlutna ka hriat chian ang hian i tana ka hlutna hi hre ve rawh aw...thikthu chhenu.." a ti leh a.

"I kal daih emaw ka ti a.." ka lo ti niah niah a.

Nui kur kur chung hian, "Vawi sawmsarih hmun sawmsarih fiahna i paltlang meuh chuan min hmangaih tawh ang, min hmangaih ngei ngei ang," inringtawk taka tiin room lamah min kai phei a, a tih ang angin ka lo awm ve tawp.

Nichin khan a kal chhuak ngei khan ka hre si a, kawngkhar pawh ka kalh chiang. Ani hi engtia lo awm ringawt nge tih ka hrethiam ta hauh lo. Ka thluak hi ava han tibuai hneh ve tak hepa hi chuan...

-B®®

Ka naupaiin thla nga hmel a hmu pum ve ta a, ka u boral aṭangin thla a liam tawh bawk. 

Jeho duhdan angin Serchhipa kan in pawh kan kalh fel ta a, kâr khatah vawikhat tifaitu tur hlawh neiin kan be tawp a, bungrua kan neih nual avangin mi luah tîr chi a ni mang si lova a buaithlâk ve khawp mai.

Tleipuii leh Buatsaiha an innei fel tawh bawk a, Bartho leh Jeho khan a tîrah inneih tîr loh an tum deuh kha a ni a; mahse, an rilru an sawhsawn leh daih, kâr thum liam ta khan anmahni chênna hmunah an innei ve ta e, kei erawh ka kal ve ta lo a, Jehoa'n a lo sawi lâwk ang erawh a thleng ta lo. 

A farnute inneih zanah Samuel Pamei fapa a nih thu sawi lan kha a tum dan a ni a, chutia ti ta lo chuan Vansangi engkim a hrilh vek a, "Pasal i nei tawh a, nu leh pa thlazar hnuaia awm i ni lo hi i vannei asin, Bartho engkim hrilh la DNA kan test ang," a ti a, a tîr kha chuan Vansangi a thinrim viau, Samuel chhuahchhal tura kal nghal a tum a, a pasalin a khap beta a la ngawi ta rih.

Farm lamah Arun leh Buatsaiha an riak chawt a, Aizawla kan inah Rishan a chêng ve tawh bawk a, Aryan erawh thiam thil ngah ber a nih vangin Jehoa'n Aizawl leh Shillong kâr tawn turin a duh si a, hna hahthlâk thawk tawh lovin farm leh a chheh velah a duty tîr a, nuam a ti hle chuan ka hria.

Aizawla Jeho inah Rishan nen kan awm a, incheck up ka ngaih a piangin ani hian min hruai mai zel, naktuk lamah Jeho pawh a rawn haw thleng turah kan ngai a, Tleipuii te inneih zawh hnu khan zan thum riakin a lo chho a, Shisha, Richard-a farnu dinhmun a ṭhat loh avangin a chhuk leh a, chanchin kimchang ka la hre bik lo chu a nia, a lo haw hunah min hrilh turah ngai ang.

Khatia kan phone ve ve a chhiat hnu khan a thar pahnih a lei a, min pe ve mai, "Vawm chhiat tawh awih lo, thla tin phone lei ngai suh se," tiin a nui ruh ruh a, "I vawm chhiat loh chuan lei kan ngai tawh bîk náng," ka lo ti thuai a, a nui ṭha duh der tawh lo.

"Madam, inleng i nei a nia,"  tia Rishan an min koh lai chuan room-ah ka awm a, atu chu ni maw?

Ṭhutkhawmna pindana lo ṭhu chu tudang ni lovin Mawitei a ni tlat, a pawr fap a, kan inhmuh lohna chin a rei ta deuh, khatia ka u chungchânga zawhna ka zawh aṭang khan ka hnaihah a awm duh tawh miah lo a, a reh zui vang vang mai.

"Teh tlat che chuan?" Tiin a ep chiahah ṭhuthmun ka rem a, ka pum puar ve âl tawh chu a melh zeuh zeuh hnuah, "Ngurthan, Shillong lamah chhuk i tum hnai em?" Tiin min zawt thut a, teh daih chuan.

"Nau neih zawh lamah kan chhuk ang, tunah chuan helama awm hahdam hi ka tan a ṭha rih a," tiin ṭha tê hian ka chhâng a.

"Aizawlah hian awm tawh lo hrâm la ka ti, i tân a him lo, chumi sawi tura lokal chu ka nia," a ti zawi sap a.

"Mawite, i sawi awmzia ka hre lo a nia," ka lo ti vat a.

Hnuailam bih chung hian, "Tunah chuan engmah a kimchangin ka hrilh thei rih lo che, Jeho awmna hmun apiangah awm zel rawh, nangmahin kal hrang tawh suh," tia insût hraih chung hian a ding chhuak hliai a, ka rilru a tinuam lo vek.

"Eng nge i sawi tum, eng thil nge hriat i neih?" tiin ka zawt sek sek a, "Ka sawi ang khan awm tum mai rawh, Jeho hlatsan lo la i him a ni mai," tih pahin biak zui hman miah loh hian a chhuak vut a, a va buaithlâk e.

Rishan pawhin Mawitei chhuak ta chu a thlir zui vung vung a, "Mi ṭha a ni lo tawp ang, a lakah khan fimkhur rawh aw madam.." a ti ngial a, Jeho nauteho hi chu an fing hlawmin an fîm kar mai a ni.

Kan ṭhenawm aṭanga in pathumnaa an tlangval Muantea chu Bike-in a che sual palh hlauh mai a, Casualty an tlanpui hnuah in lama enkawl turin an lo haw tîr leh a, a bân ruh a tliak a, admit a duh miau si lo a, a nuin, "In lamah min enkawl sak la, nitin vawi thum jection a ngai a.." tiin min rawn hrilh a, hnial chi ni-a ka hriat loh avangin ka aw ve mai.

Muantea nen tak hi chuan kan innêl vak lo a, hmuh pawh ka hmu tam lo. Pollution lamah hian a thawk ve a ni awm e.

A nu min ngenna angin zanriah ei hmain Jection turin ka va kal a, Rishan lah chuan, "Nurse an tam alawm, nangmah ber kher han koh.." a ti nang nang a, Jeho thupêk a nih angin ka thiltih engkim min hriatpui vek ti ila ka sawi sual lo ang. 

"Kan inhnaih êma min ngam tlâk ve a ni mai," ka lo ti a, min zui a tum a, chu erawh ka hnial ta. Ngaihdan ni vak lo tih hriat takin, "Pawna chhuah tam loh a ṭha," a ti nghut. Ani pawh hi a ninawm lek lek ṭhin.

Muantea te in ka thlen chuan an lo ri nak nak a, ka lut min hmuh veleh, "Lokal rawh, helaiah nurse koh mai tur kan hre si lo a, kan rawn tibuai ringawt che a nih hi, doctor êm han koh chu tiin kan inthlahrung ru deuh a," a lo ti sawk sawk a, "A ho lutuk, thil harsa a ni hleinem," ka lo ti khawmawi ve a, an fapa Muantea room-ah min hruai lût nghal a, an fapa neihchhun a ni nghe nghe.

Muantea chu khumah a lo mu a, a chalah hliam a nei a, hmun thumah an chilh sak tih a lo sawi a, "U Ngurthan, kan tibuai hle mai che," tiin a mut dan a siam rem a, an damdawi chawh ka en fel hnuah a nuin min chhuahsan a, "Bike khalh te hi fimkhur tur a nia, tunlaiah accident a tam em hi...bawk rawh le.." ka ti zui zat a.

Saisir zawng deuh hian a awm a, ka jection zawh hnuah, "Harsatna i neih chuan min ko hreh suh aw, hei ka number a nih hi," tih pahin lehkhathemah ka phone number ka ziak zung zung a, antibiotic pawh ka pe nghal vek bawk a, nui var var chung hian, "Doctor ṭhenawm neih man a awm hle mai, ka lawm lutuk e," a ti a, na nei ni mah se, a hmel hmuh a nuam phian.

Zanriah ei tura min sawmna erawh ka hnial a, kan in lam panin ka lêt leh ta a, ni sarih chhung ka jection a ngai dawn a, midangte tana malsawmna ka ni thei hi ka chhungril takin ka lawm ve hrim hrim.

Rishan rilṭâm pawh a lo tei leh vut vut tawh.

Zan dâr sarih a ri tawh a, ngawi rengin zanriah kan kîl dun a, "Hmuaktu ka nei dawn nange?" Tia veranda lam aṭanga ṭawng ri ka hriat chuan ka ding chhuak thuai a, ka pasal a lo thleng tawh tih ka hre mai.

Kut ka sil laiin Jeho a rawn pen lut a, "I lo thlen hun tur i sawi si lo a.." ka lo ti a, nui suk chung hian, "Hei ka lo thleng tawh alawm, kan lo dam ṭha em?" Zangkhai taka tiin Rishan chaw ei lai chu, "Motor-ah thawmhnaw a awm a, nakinah i va la chhuak dawn nia aw.." tiin a hrilh a, zanriah a ei tawh thu a sawi a, "I puar hman em ni, ei leh rawh," tih pahin min rawn melh a, a mitmeng a sen râm mai. A hmel a dik tlat lo.

"Jeho i ṭha em?" Tia ka zawh chuan, "Ṭha angin ka lang em?" Tiin min zâwt let daih a. 

"I ṭha turah ngai ang," tih chiah ka sawi.

Kan nupa room lamah a lut phei nghal vut a, a lo haw hmasak nen a boruak hap a dang tih ka hmu thiam, room ah ka zui lut vat a.

"I nuam lo deuh em ni? Nge, rilru nawmlohna dang i nei zawk?" Tia ka zawh chuan mit zim san chungin min en a, ka pum a en leh a, "Doctor ni mah la, tun ang i dinhmunah kha chuan midang damlo buaipui kha thil ṭûl ber a ni lo, an mamawh che a nih chuan an rawn pan mai turah che ka ngai," a ti sup a, tlaia Muantea ka jection vel chungchâng kha Rishan hnen aṭangin a lo hre leh vek tawh tih hriat reng reng.

"Nia, amah a lokal thei lo a, ṭhenawm mai an ni bawk si nen ka va kalh chilh ta a nih kha.." tiin ka chhâng ṭha ve mai.

"Ka inbual dawn.." a ti hmuk a, a landan a nelawm tehchiam lo.

"Doctor pasal i nih chuan rilru zau deuh put ve te a ngai a nia, Muantea pawh a zia deuh chuan min rawn pan mai dawn alawm," ka ti leh a, bathroom bulah a ding chut a, "Tu Muantea maw?" A ti ram hmuk.

"Nichina ka va jection chu maw le aw, tu dang nge nise i tih?" Ka ti hlak a. Ner suk chung hian, "Nanga raipuar lo pawh koh tur an tam lutuk, zanin tlai kha i kal tawpna ni rawh se," tiin ka chhânna pawh nghak lo hian inbual turin a lut zui daih a, thaw hliai chung hian room ka chhuahsan ta a.

Rishan bulah ka va ding a, "Jeho hnenah engkim report vek kher a ngai lo," ka ti a, "I awm loh lai khan a lo call a, a lo thleng ṭep tih hrilh che a tuma dâwt ka sawi duh hleinem," a lo ti ve si.

"Chu pawh nise.." ka la ti hrâm a, koki san âwk chung hian, "A thin tirim lo la a ṭha a ni mai, in nupa inkar a ṭhat lohvin kan tuar ve zela a ninawm.." a ti hmiah. Sawi leh tur ka hre tawh teuh lo, a chhe zet zut sia ka ngei lek lek ṭhin.

Jeho a inbual zawh tawh ringin room-ah ka va lut a, zu no dawm chung hian tukverh lam a lo thlir veng veng a, kawr pawh a ha lo. Boxer a inbel tawp a, a taksa ruak kûng chu hnunglam aṭangin ka thlir veng veng a, ka lut thawm a hre lo nge a din ngaiin a la ding reng a, eng emaw tak a rilru kaptu a awm a nih hmel, zawh chhuah ngei pawh ka tum.

Ka pan hnai a, min melh zuk ringawt, a sam huh hlap chu a kut veilamin a tuai puat a, "Mizoram nuam ti hle mah la, a rang lama Shillong kan pan a ngai aw, hruai thla tur chea lo chho ka ni.." a ti zawi sup a.

"Ka chhuk ve kher a ṭulna ka hre lo, Jeho..i thusawi hi thlâk zung zung zel lo la.." ka lo tih chuan, "Ngurthan, min hnial reng hi bansan teh, ka kham a nia," tih pahin a no ken laia intur awm zawng chu a thâwkkhat pawp a, a ner nasa mai.

"Rishan nen kal ula, ka lo awm ang," ka ti a, "Min hnial lo mai rawh, kan awm hran kher a ngai lo a nia," a ti leh a.

Ngaihdan ni vak lo chung hian, "Naute ka neih zawh lamah ka lo chhuk mai dawn alawm, a tîra i sawi dan a nia," ka lo ti ve tlat a, nin hmel zet hian, "Shillong ah kan chhuk dawn ka tih chuan kan chhuk ang, inhnial ka peih tawh lo," ti sup chung hian zu a thlit belh leh a, ka thin tertek a chhuak leh dawn e.

"A châng leh chawlh hahdam i mamawh Aizawlah i awm ang i tia, tunah Shillong lama hruai min tum leh a, i â zo tawh a nih hi, duh duha sawpkâwi theiah min ngai deuh em ni?" Ka ti ve ta.

Zawi sup hian, "DNA result a chhuak tawh.." tih pahin nokhat dang a tlâk leh pawp a, a thaw zui hawk bawk.

A dinna aṭanga pensawnin a zin bag kan la phawrh darh loh chu a dap rawk rawk a, envelope pakhat a rawn phawrh chhuaka ka kuta min hmehbel chawt chawt chung hian, "Chhiar rawh, Shillong kan chhukna chhan tur chu khami vang kha a ni e," a ti a.

A lehkha min pek chu rang takin ka en nghal a, ka mengphawk nasa. Vawi khat dang uluk deuh zawkin ka chhiar leh thlapa a inziak a pangngai reng.

Samuel Pamei fapa chu Laljehomalsawmkima a lo ni ngei a, a farnu Vansangkimi pawh, ka thaw halh a, ni lo tura ka duh em em kha thudikin min nangching ta si, Jeho tana a harsat dan tur ka ngaihtuah kâi nghal. Vansangkimi tak pawh a khawngaihthlak ka ti a, a pa thi tawh anga a lo hriat kha Samuel Pamei hi a ni tih a hriat hunah a na dawn em asin. A pa a la dam tih a hriatna hian a ṭhâwng nasa khawp ang le.

"Samuel hi thlah zalen la, keini chu lêt tawh lo mai ang," ka ti sap a.

"A theih loh, JK farm hi ka nu ram a ni a, Samuela'n pumbilh a tum tih i hria a ni lawm ni, ka thlen tîr dawn lo, ka pa ni mah se, ka pa a ni lo," a'n tiah. A va khawlhkham e.

"Pathian zarah kan dam ang a, kan ei tur chu kan thawk chhuak thei lutuk ang, Jeho, ka lêt leh duh tawh lo.." ka ti  thlâwt a, ka bulah a rawn ding a, min kuah a, a âwm nghenga min kuah bei hnuah, "Mipa awm chhun ka nih angin ka mawhphurhna ka hlen chhuah a ngai a, tu kutah mah ka dah thiang lo, Samuel nen kan indo a ngai a nih pawhin ka tlanchhe dawn reng reng lo a nia, Ngurthan, ka mitah hian min han en teh.." tiin amah ka en theih nan min kuai dâk a, a mit meng tawrhna a khat chung hian, "Thisenah ka pa ni mah se, ka pa chu a thi tawh, Samuel hi ka pa angin ka en thei ngai dawn lo," a ti hmiah.

"Eng harsatna dangin nge min delh leh dawn hriat a ni lo, ka chhuk duh tawh lo," ka la ti ve ṭâng ṭâng a, min la kuah reng chung hian, "I pasal awmna chu i awmna tur a ni, thutiam kan neih kha i theihnghilh ta em ni? Kan fa lo la piang tur hi fahraha siam lo turin i Laljeho hian ka venghim dawn che alawm, min rin a harsa viau em ni, mawh sawi teh..min rin hi a har viau em ni?" A ti ta sek sek a, inlâkhran ka tum pawhin a hma aia nghet zawkin min kuah a, ka pum a rawn che dat a, a phu chiang kher mai.

"Eng, eng ati nge?" A ti hé-háw a. Min kuahna a bân a thlah dul nghal a, ka nuih a lo za ru deuh.

"Kan naute pawhin Shillong kal a duh lo a nih hmel," tih pahin a kut ka pum zawnah ka dah sak a, "A la nung ve miau a, kan thusawi zawng zawng kha a hre vek a nia" tia ka sawi lai chuan ka pumah a kut nghatin a ngaichâng a, a ṭawng tawh lo rêng rêng.

Hetia ka pum a rawn len tâk deuhah hian kan awm hrang zui ta mai si a, a hrethiam lo deuh niin ka hria.

"A rawn che ve a nih kha, eng mah hlauhthawn tur a awm lo aw.." tiin ka hrilh fiah vat a, a la ngawi reng.

A hnu deuhah khum lam min panpui a, "I doctor hian nupa nun hman min phalsak em?" Thutak zeta min zawhna avang chuan ka nui hak a, nichina a lungawi lo hmel kha a bo vek tawh.

"Phal teh nang aw, thui deuh deuh motor chuan a phal lo bawk a, ka indim a ngai tih min hrilh," ka lo ti vat a, ka nui ve duh ṭhak náng.

"A phone number min pe rawh, keiman kan bia ang e.." a tih chuan, "Tun angah inbiak hun a ni tawh lo, i rui a nih kha mu rawh.." ka ti a, a nui suk. "Ngurthan, ka rui lo aw, ka rûi a nih chuan nang ka ruihchilhna che hi a ni ngei ang, thil dang eng mah ruih ka nei ngai lo," a ti a, a khi suk suk bawk a, khuma ka phone dah chu banin, "I doctor number hmet chhuak rawh le.." a ti ta a, ka nui lo thei ta lo.

"Malsawmkima tak hi chu aw.." ka ti tak naa ka thin a rim awzâwng si lo a, a mitmenga min thlâkhlelhna lang chhuak chung hian, "Mipain a nupui hmangaihna chenpui a duhna hi sual a ni lo," tia a sawi zawh rualin ka lamah a rawn tawlh hnai a, ka kawr hâk lai a hlim zui zat.

A kut ding lamin ka pum a chûl a,veilamin ka âwmbâwr a chûl thung. A kut dam thlupa min tawhna hi ka thlahlel lo ka tih chuan dâwt muhlum a ni. A kun hniama ka âwmah a hmai phumin a fawp lawr dan dan a, ka thin phu a rang sauh.

"Vawikhat chauh te chu a pawi dawn em ni?" Ti sup chung hian a boxer a phelh leh tê tê a, dan buai ka tum lo, a duh tawh chu a duh a ni mai, eng ang pawhin hnial tum ila ka thlâkhlelhna avang chauh pawh hian lo dan ka tum lo.

Dam thlapin min fawp a, a kut pawh a awmna tur hmunah tak a nghat a, a mitmeng thim raiha min thlâkhlelhna leh tisa châkna lo lang chhuak chu ka hmuh hmaih lo a, ka lo insiamrem ve zel. Mipa a ni a, mipa phur thei tak leh a nupui chawkphur thei tura zei leh chinchâng hria ka Laljeho kha a ni tlat a, a ângchhunga nawmna tem turin ka thluak ka sawrbing ve ta.

Min dim a tum viau na a, a thei bik vak lo. Inthunun tumin a thaw hawk a, "Ka tina lo che tiraw?" Tih pahin ka pumah bawk a chûl leh a, a chalsam dum hlap a chala rawn tla thla chu ka huikian sak a, a hmelṭha thlâwt a ni.

A hnar ngul sang tak leh a mit thim raih te, phurnaa khat mitmenga min en hian a ta ni hliah hliaha inhriatna ka nei ṭhin. Tun hunah kher hi chuan kan nunah thildangin hmun a chang lo a, ka pasal a nihna leh min thlâkhlelhna hi a taka tem tir ka duh ber a ni.

Kan taksa a inzawma nupa kan ni tih kan nem ngheh rualin a rum dat a, a insangmar ṭawlh ṭawlh bawk. A bân thahrui phiar fat chu ka mitsîrin ka melh zeuh a, a nalh a ni. 

"Shillong-a min zuina chhan tur dang leh chu kha kha a ni, ka nupui kianga ka awm hian chakna thar ka nei a, ka rilru hahna a kiang ṭhin," tiin a tawlhsawn det a, min la kuah reng tho. 

"Zu in tawh suh.." ka lo ti teh daih a, a nui huk.

"Hmangaihna chen dun laia sawi tur leh a hnu lama sawi tur i zir deuh a la ngai a nih kha," tiin a nui huk a, ka va ngei e.

"Kal mai teh.." ka lo ti sap a.

"Inbual zuai ila kan mu dawn nia, thui tak motor ka khalh avangin ka chau a, tunah ka thahrui châmbâng ka pe leh vek che a, i chak phah sawt ang," tia nui ruh ruh chungin a saruakna zahpui hauh lo hian a tho chhuak a, a saisira ka mu chu dimtea min pawmin bathroom lamah min hruai ta a, hetiang hunah hi chuan ani aia min duat thiam hi an awm kherin ka ring lo. 

Ni tam tak a liam hnuah Jehomalsawmkima'n uluk leh duat takin min bual hauh hauh a, "Ka ta chu ka uluka ka duat ṭhin, a chhiat mai loh nan ka veng fimkhur a, midangin min rûksak lohna turin hmun himah ka dah ṭhin bawk, chuan, Ngurthantluangi hi ka ta chu i ni," tiin ka hnung Scrubber-in a nâwt a, "Ka awm lohna hmunah rubber hi i lo mamawh viau si ang e.." tiin ka fiam hlak a, za lutuk hian a nui hawk hawk a. 

Chutah, "I u boral hlima Aizawl kan kala hmeichhia ka phone lo pick tu kha i hre duh tiraw?" A ti teh daih a, "Umn" ka lo tih chuan, "Buatsaiha unaunu a nih kha, tisa thilah inzawmna kan nei lo a, Aryan nen ruahmanna siamin a u chanchin ka hriat duh hriat nan kan hmang alawm. Mahse, vawikhat kha chu ka fawp vein ka hria," a ti a.

"I zak lo lutuk...chutiang thil tenawm.." tia ka sawi zawh hmain, "A mak thei, kawlh lutuk teh suh, ka fawp zuai ringawt alawm, chu pawh Aryan awm laiin," a la ti cheu.

"Jehomalsawmkim, tun ṭum chu ṭha taka min hrilh avangin ka ngaidam ang che, a lehpek a awm leh a nih chuan raipuar chungin ka uire ang," ka lo ti hlar a, a nui huk. "Ka hriat tirh lai che kha chuan tuna i mizia hi hmuh tur a awm lo, tunah chuan Sakei note i ang tawh.." a ti duh chauh.

Bathroom kan chhuahsan hnuah, "Ka chau lutuka no khat chiah ka in leh ang aw, muthilh ka mamawh," tia a sawi zawh rualin nichina a in bâng kha a thli zui zat a, "Aw" pawh ka ti lova, "Aih" pawh ka ti hek lo. Sual chhuahna atana a hman phah loh chuan in poh teh se. Thil ṭha a ni lo naa a duhnaah hnialin awmzia a nei lo tih ka hriat vang zawk a ni.

Zinglam dar rukah ka phone a rawn ri a, Muantea a lo ni.

Jeho tihharh hlau takin ka tho chhuak a, zinglamah damdawi pek a ngai tih ka hria a, amah Jeho kai tho lovin ka intifai sawk sawk a, Muantea te in lam panin ka kal ta a, tun bâk ka thei tawh dawn lo tih leh midang koh tur zawng mai tura ka hrilh a ngai reng reng bawk.

Ani pawh a lo tho tawh a, damdawi ka pek fel hnuah, "Shillong-ah kan kal a ngai thut dawn a, midang lo be ta mai che u.." tiin ka hrilh a, "Eng nge in tih dawn a, nizanah i sawi lang bawk si lova," tiin min zawt a, Jeho lo haw thu leh Shillong-a in kan neih thu ṭha takin ka hrilh a, "U Ngurthan, i ngaihawm ngawt ang," a ti sup a.

Nui var var chung hian, "In enkawl ṭha la, lo dam vat vat ang che," tiin kawngkhar lam ka pan a, "Doctor ve si ah chuan biak i nuam, i bula awm a hahdam.." a ti leh a, ka ding chat a, "Ka lawm e, lo dam zel rawh aw..." tiin ka chhuak ta a, min melh dan kha ka rilrem zawng a ni lo. 

Mipa dang ngaihven ka tan a rem lo a, Jeho hriatah phei chuan mipa hming sawi lan ngam chi a ni lo hrim hrim. 

Ina ka let leh pawhin Jeho a la mutui hle a, a chau ve ngang a nih ka ring.

Rishan a lo tho tawh a, tukṭhuan tur a lo buatsaih mêk a, min hmuh veleh, "Madam, in tur i duh em?" a lo ti vat a, Juice ka duh thu ka hrilh a.

"Vawiinah kal chhuahna tur i nei ang em?" Tia min zawh chuan, "Jeho lo tho phawt se kan sawi ṭha dawn nia," tiin ka chhâng a, kan sawi lai mêkin amah Jeho pawh a rawn lang chawpchilh a, "Vawiin lamah i doctor kan hmu ang a, i condition azirin tlai lamah Mawkasiang kan pan ang," a rawn ti a, ka hnual nghal vek.

"Ka kal ve kher chu a ngai tak tak dawn em ni?" Ka la ti ve fan.

"Nizanah kan sawi tawh kha, mahse, i hriselna dinhmun a ṭhat dan a zirin aw, i thei lo chung chunga hruai luih che chu ka tum ber chuang lo," tiin dawhkana juice chu a inthlit ve nghal a, a lang thar sur tawh.

A sawi tawh angin ka doctor hmu tur chuan hospital road ah kan kal ta a, ka incheck up la hun chiah lo mah se, Jeho duhdan a ni tlat si a, kan inzui chhuak ta nge nge e. Rishan kan hruai lo thung.

"Doctor, Shillong-ah hun reilote atan haw kan tum a, motor chuan a pawi ang em?" Tiin ka doctor a zawt a, Jeho ngun deuha a en hnuah keimah min melh leh a, "I huphurh em?" Tiin min zawt leh tê tê a, ka lo bu nghat.

"Eng mah hlauhthawn tur a awm lo, damdawi kha ei ṭha la aw.." a ti a, Jeho a nui suk suk a, min hruai loh dan tur ka lo dap ru ve ngar ngar a, chhuanlam a vang nasa mai si. Doctor berin min phalsak tâk si-ah chuan kan Laljeho pawh a hmel a lang dam thlup.

Nupa nun hman chungchâng thlengin dilchhut zet hian a zawt a, ka lo zak ru chem chem thei nia, ani doctor lah chuan, "Thihpui khawpa hmang nasa an awm ka hre lo. Jeho, innu hian a peih phawt chuan han rík ve det te chu a sualna a awm lo a nia," nui hak hak chungin a ti a, "Kan lawm e, i hria maw.." tiin min han melh kher a, ka va zak tak.

"Indim tluk a awm lo a, a awm ang chu in thliar thiam turah ka ngai," tia min hrilh hnuah ultrasound hmangin min en leh a, Jeho pawhin a thlîr ve reng a, a mita lungawina lang chhuak chung hian, "Harsatna kan nei emaw biak duhna kan neih che chuan kan lo la tibuai leh ang che," polite taka tiin min kuah tho a.

Doctor clinic kan chhuahsan hnuah, "Min zui loh dan tur dap kual eng ang mah la, chunglamin min zui a remti a nih kha," a'n ti ve ngei a, ka lo nui tawp.

Mahse, zin kawng thui tak zawh kha min huhphurhpui ta deuh a ni ang, Helicopter- a kal a rawt leh ta zawk a, "Rishan hian motor rawn khalh thla sela," a ti a, "A ngai kher chuang hleinem, ka ṭha tih doctor in a sawi kha," ka lo ti ve a.

"Khulai kan thlen thlâk hunah pawh hrilh nawn ngai lovin i pum kha a lang lo thei ang berin i thup hrâm dawn nia, thawmhnaw lian lam pang pahnih khat chu kan en nghal ang," a ti teh daih a.

"Min zahpui deuh em ni?" Ka lo ti nghat.

"Chutiang lam a ni lo, midang mit la zawnga awm kha ka duh lo mai chauh a nia, thup hlen theih chu a ni hauh lo ang, ka nupui i nih tlat avangin eng emaw palh thleng thei a ni a, invenna chikhatah ngai rawh.." tiin Mc-ah min luhpui a, ka kutah nghet takin a chelh bawk.

Ka inbel tur thawmhnaw a thlang zung zung a, ka duh leh duh loh pawh min zawt lo, "Jeho, a ngai ṭeuh ṭeuh lo.." tia ka hnial pawhin, "I la mamawh dawn chauh," a ti leh mai a, ka hnial zawm ta bîk lo.

Kan kalna tur Helicopter a be fel leh vek phawt a, vawiinah chuan kan chhuk dawn ta rih lo, chu ringawt pawh chu ka thlahlel a, naktuk tun ang hunah hi chuan Mawkasiang-a an inpuiah kan inmelh leh hrek hrek dawn a nih hmel. Ka peih lo sa. Nu Pianmawi tak kha ka hmu peih lo lehzual.

In kan thleng a, a phone a ri zing malh malh khawp mai. 

Rishan nen rei fe room-ah an inkhung a, keiin ka thawmhnaw ka lo siam ve thung a. 

Jeho hian a pa phuba lâk a tum vang khan Samuel kaihhruaina hnuaiah engkim a zir chhuak tih kan hriat kha; mahse, a phuba lâkna tur ber a pa a la dam si a, thil kal dan hi a mak lulai deuh chu a ni. Engvangin nge Samuel khan Jeho pa thi tawh anga a sawi tlat! Phuba la tur te chuan a la nawr leh ta nghal a, thil dangah hman ṭangkai a tum ni berin a lang, keima tawkah ka lo ngaihtuah kual ve chiam a, Tleipuii pa thattu hi Samuel tho niin an sawi bawk si. 

An pahniha an lo chhuah hnuah Rishan a insiam zui mawlh mawlh a, Jeho ka melh vat a.

"Bamos ram MAP awmna an hre tawh a, Richard khan a lo kawl reng reng hleinem, wood-stock farm lamah kan zawn a ngai dawn a, Rishan hi tunah kal nghal mai rawh se, keini chu kan tum dan pangngai angin kan kal ang, hlauthawng suh aw, Barua hnen aṭangin information kan dawng a, Barua chu Wood stock aṭanga chhanchhuaktu che kha a nia, ani hi Samuel kut ke ber a ni tho, ka lam a ṭang dawn ta a nih ka ring," tia min hrilh fiahin sofa-ah a ṭhu a.

"Richard-a farnu kha engtin nge i tih tâk?" Tia ka zawhna chu min chhân a hreh hmel hle, a ngawih vung vung hnuah, "Shisha in nau a pai tawh hleinem, Super care hospital-ah an paih tawh.." a ti ta a, mak ka ti ngei mai. Engtin nge Shisha pawhin a duh reng reng ni.

"Tu nge paih tura hruai?" Ka ti lehzel a, Jeho ka rinhlelh rûk deuh vang a ni pakhat.

"Richard maw le, dang turin ka chhuk ve bawk a, ka thlen thlâk chuan an lo paih fel vek tawh, chuvang a nia nang pawh fimkhur tura ka duh nachhan che, Samuela tum dan kan hriatpui si lo a, nangmah vengtu tur atan Aryan ka ruat fel tawh.." a ti leh mai.

Hetiang nun zalen lo hi a nia ka nin em em chu, Farm house-ah tal chuan awm thei ila a zia deuh chuan ka ring.

Jeho hnenah, "In inpuiah kan cheng lovang tiraw?" Ka lo ti a.

"Sawlad-a i inah khan kan awm ang, kâr tawp apiangin Farm lamah kan awm thung ang a, ka kiangah zel a nia i awm dawn," tiin a bula kal turin min mitmei a, ka hnaih nghal ruak.

A malchungah min ṭhut tîr a, "Hrehawmna a tam poh leh nawmna a hnai an tih kha, Aizawlah nangmahin kalsan che ila rilru nuamin ka awm dawn lo, ka hriat duh tam tak ka hre tawh a, i u Vanlalṭana chungchang pawh a hmâwr ka bâwk ṭêp tawh.." tia min hrilh chuan ka melh chho hau a.

"Ka u chungchang chu sawi lang lo teh ang, ka na vek zel.." ka ti sap a, min hrethiam tak hian ka pumah a kut a dah a, "Venhim tur pahnih ka nei che u a, i pasal rin chiah hi i tih ve tur chu a ni,'' tiin ka biang leh a biang a sîktîr a, Rishan kal tur a rawn chhuah tak avangin, "Ka'n thlah lawk ang e, lo chhuak ve duh suh," tih pahin a malchung aṭang chuan min chhuk tîr a, Rishan thlah turin pawnlam a pan ta a.

Jehomalsawmkima hian thil tam tak ngaihtuah tur a nei a, a patea laka a lungawi lo viau chung pawhin a tilang lutuk lo.

Zanriah ei tur kan pahnihin kan siam dun a, "Kan buaina zawng zawng hi reh vek pawh ni se, Shillong lamah kan awm a ngai dawn tho a, Aizawl hi chu kan khualzinna angah ngai rawh," tiin min hrilh.

Zan lamah pawh chimbuaitu awm lo ta chu nupa kan ni leh zual. Hetiang hun thawl ṭha hi kan neih lohna chin pawh ka hre tawh lo, naupai lai ni mah ila, Jeho lakah hi chuan insum a har ṭhin rêng a ni. Min duata min ngaihsak poh leh a lakah ka tâng nghet sauh tih ka inhria a, ani pawhin a hma ang ngawt kha chuan min namnul tawh bik lo. 

Dârkâr sawmparuk hnuah Sawlad kan thleng ve ta. Jeho thu angin ka dul puar thup nan thawmhnaw lian fe ka inbel a, Aryan chuan min hmuh veleh, "Madam, i ṭha maw?" Tiin min lo bia a, ka ṭhat thu ka hrilh ve mai.

Jeho en chung hian, "Bamos farm lamah mikhual tharlam an awm, hmeichhia leh mipa," tiin a boss a hrilh a, Jeho chuan, "Khawilam mi nge i hria em?" Tiin a zawt let a, Aryan nui hmel a reh riai riai a, "Hmeichhia kha chu Kolasib lam mi a ni a, mipa zawk erawh kha chu Raitong lama mi niin ka hria," tia a sawi laiin Jeho phone a ri leh ta.

"Aw, sawi rawh.." a ti teh tawp a.

"Zaninah lokal ka tum dawn nia, Ngurthani pawh ka rawn hruai tel dawna zanriah lo kêp ang che u," a tih chuan tunge a biak tih hriat tumin ka lo ngawi reng.

Phone a dah a, "Kan inpui lamah chaw eikhawm an siam a, kan tel ve a ngaih hmel," tia a sawi hnuah, "Tlanchhe nun kan neih a rem lo a, DNA chungchang pawh ka sawi chhuak tawh ang," a ti nghet churh.

Ka lo hlauthawng sa ringawt.

Dârthlalang hmaah ka ding a, kawr fual ka hnute hnuai aṭanga arh thla laih a hring no ka inbel a, a hnung zipper ka pawh chhoh theih loh avangin Jeho ka ko a, a tui herhhaw ri bâk hriat tur a awm lo.

Aryan ka ko leh vat a, rang taka lokalin, "Eng nge ni ta?" A ti vat. Amah ka hnung chhawn a, "Ka zip thei tlat lo min lo pui lawk mai teh," ka tih chuan, "Boss tih tîr rawh," a ti sup.

"Ti mai mai teh ka hmanhmawh a nia," ka ti vin hlar a, ṭi dui chunga ka kawr hnung zipper a rawn khawih lai takin, "Eng thil nge Aryan?" tia Jeho aw hniam ruih kan hriat rualin Aryan a ding khawng at a.

"Ngurthan.." tia min rawn dinchilh chuan ka kawr hnung zipper chungchang ka lo sawi vat a, Aryan melh run run chung hian, "I kalsawn thei tawh ang," a ti hmuk a, Aryan a inthiarfihlim rang ngei mai.

"Ka hnathawkte hnimhnai suh.." tih pahin na zet hian ka kawr zipper a pawt tâwka a thinrim leh ringawt em maw ni.

Ka inchei dan a thlêk vung vung a, eng mah sawi lovin a kalsawn leh daih.

Minute 15 hnu velah Mawkasiang panin kan chhuak ta a, biak huphurhawm khawpin a ngawi ngul a, Aryan lakah khan a lawm lo deuh nge a tiho thei a nia.

An inpui kan thleng a, "Samuel hlatah zel awm ang che," a ti sup.

In chhungah kan lut a, ka rin ai daihin an tam. Vansangi te nupa ka hmu bawk a, an fapa Raguel pawh ka hmu tel a, "Vansangi te bulah sawn lo va awm la, hmun dangah kalsawn hlek suh ang che," tih pahin min vawnna a thlah a, inchunga kan nupa room lamah khan hmanhmawh deuh hian a chho zui nghal hlawk hlawk a.

"I hmel kan hmuh leh avang hian kan lawm viau i ring lo ang chu maw," tia ka beng bula mipa aw vawt raih ri ka hriat chuan ka inher a, Samuel Pamei nen kan inhmachhawn siah mai.

"I hmel ka hmuh avang hian ka nuih a za bik lo a nia," ka lo ti ve ngat a, ṭhen suk chung hian, "I huaisenna hian eng chen nge a daih dawn kan lo thlîr ang aw, indona hmachhawn tura lokal i ni bawk a, tlan chhiat awih loh kan ti a ni ang chu.." ngeiawm zeta tiin a kalsawn nghal a, Jeho khan a hnaiha awm lo turin min hrilh zo chiah a nia, kan inhmachhawn nghal der.

Zaninah DNA test chungchang Jehomalsawmkima'n sawi chhuah a tum si a, eng boruak tak thleng ang maw.

"U Ngurthan.." tia min lo kotu an awm avangin ka hawi kual a, Vansangkimin nui sâng hian min lo hûi a, ka lo nuih lêt ve var var a, Bartho erawh hmanhmawh deuh hian Jeho chhohna lamah khan a pen chho pâwk pâwk a, ka ngaih a ṭha chiah lo.

Tleipuii leh Angelika an lo chhuak ve bawk a, Vansangi nen min melh tawn sek hnuah, Tleipuii zawk chuan min rawn pan hnai a, "I pum kha thup tum eng ang mah la, a hriat viau tho a nia," a ti sap a.

Kei lah chuan, "Nang anga inthup thei kha ka ni ve lo, tin, pasal nei ka ni a, ka tan thup kher a ngai hran lo.." ka ti vei hmaka a ner sak mai.

"Tunah chuan pasal ka nei tawh alawm, kan inneih niah i lo lang ve lo kha Pathian hnenah lawmthu awm rawh se, buaina râl lian i ni si a," a ti deuh kher a.

"Laltleipui, i fapain khawvel êng a hmuh theihna chhan kha i la hriat chuan hetiang mai mai hian min be lo ang maw le, nge, ṭap chunga min ngenna kha i theihnghilh tawh zawk?" Zam map lova ka tih chuan a meng kal ralh a.

"Nangnu hi i va chapo..." tia a sawi zawh hmain Vansangkimi kan bulah a rawn ding a, "Ani biak aia thil pawimawh tih tur leh sawi tur kan ngah a nia lokal rawh helamah hian.." tiin ka bânah a rawn vuan a, Tleipuii a meng no lo khawp mai.

Vansangi ka zui phei ve ta a, chhungkaw chaw eikhawm an buatsaih a, mahse, kan boruak a ṭang ru riau thung si.

Buatsaiha nupui Tleipuii a nih chhung hi chuan a rilru a ṭha ngai dawn lo tih ka chhia leh ṭha hriatna hian min hrilh a ni. 

Tleipuii titau hmel sen ṭan chu ka melh zauh a, a hma ang chiah khan ka lakah rilru ṭha a pu lo tih a lang reng mai.

Â..he in chhungah hian lam ṭang pakhat mah ka nei lo tih ka inhrilh nawn fo a ngai dawn a nih hi...

Laljehomalsawmkima Motor kan tarlan ve ziah Gurkha kha a ni e. 

200423

B+>[BeckirafARenthleI]<+®®