17.24-89 [Becky Rafa Story]

17.24-89 

Ziaktu: Becky Rafa Renthlei

[Recap]

Buatsaiha nupui Tleipuii a nih chhung hi chuan a rilru a ṭha ngai dawn lo tih ka chhia leh ṭha hriatna hian min hrilh a ni. 

Tleipuii titau hmel sen ṭan chu ka melh zauh a, a hma ang chiah khan ka lakah rilru ṭha a pu lo tih a lang reng mai.

Â..he in chhungah hian lam ṭang pakhat mah ka nei lo tih ka inhrilh nawn fo a ngai dawn a nih hi...

-B®®

Zanriah ei hmain Vansangi nen kan ṭhu dun a, Farm house lama hnathawktute pawh an lo thleng kim thawkhat viau. Kan vaiin mi 30 chu kan chuang ngei ang.

"Tleipuii hi chu a zia a dang lutuka kei ka lo sual ve bawk nen kan inbe thei hlawl lo, u Ngurthan, nang chu ka rin âiin i dawhthei zawk ka tia," tiin Vansangi a ṭawng sap sap a, "Nia, a tîrah ka ngainat tehreng he in chhung ka luh tirha min ṭantu awm chhun kha a ni ve ṭhin a, thâwklehkhatah a zia a dang vek," ka ti ve bawrh bawrh a, Raguel leh Zonunthara'n toys an khâl dun a, an inngeih phian lehnghal.

"Tleipuii nen hi chuan inzawmna kan nei lo, Jeho nen hian kan pianna pa a inang thung a, ka nu (Nu Pianmawii) min en dan pawh hi a dang deuh tlatin ka hre ṭhin, ka ngaihbel zawk em maw ni," a ti niah niah a, a hmel ka en a, mi pawi hi a sawi dawn lo tih a hriat hliah hliah. Vansangi zia hi a zawng zawng hre lo mah ila, reilotê an kianga ka chên chhung khan ka hre ve nual hman.

"Jeho tan pawh hian a harsa ve asin, a nuin Tleipuii a hauh hlur a, a dik lohnaah pawh a thup mawi sak zel bawk si, an hahthlâk," ka ti ve ta a, Vansangi a lo bu nghat nghat a, "Mama'n min phût viau lo se chuan tunah pawh hian kan lokal lovang, zankhat bâk riah kan tum lo," tia a sawi laiin Buatsaiha a rawn lut a, min hmuh veleh a ding chawt a, a makti hmel kha ka hmuh hmaih teuh lo. 

A insiamrem vat a, Aizawlah ka la awm turah a ngai a ni mahna, Jeho hian min hruai thla tih atu amah a hrilh lo a nih ka ring, a pawi tawp náng.

Arun leh Aryan an lo lut a, an unau hian Jeho tan an ṭangkai hle tih ka hria a, kan kal dawna Aryan a biak dan erawh a lawmawm viau lo; a thîkthu chhe lutuk hi a buaithlâkna chen a awm ve tlat. Mipa tawh phawt chu a thik emaw tih mai tur a ni. 

"Jeho nen in inneih dan hi ka hre châk ngawt mai," tia Vansangin min zawh chuan ka nui tawi tak mai, sawi chhuah tlâk a ni si lova mahni intih mualphona chikhat a ni, midang bula sawi chi ninghal lo chuan.

Mahse, chhân loh ringawt chu a fuh bîk si lo a, "Kan innei ve tawp, court-a inneih erawh kan tum dan a ni lo," tih chiahin ka chhâng a, a ngawi zui ve mai.

Zanriah ei a hun tâk avangin, Jeho leh Bartho ko turin inchungah ka chho a, Vansangi erawhin a fapa Raguel chaw a hrai thung a, Zonunthara pawh a nuin a pawm a, ka che vel reng reng en zuitu nei ang tlata inhriatna ka nei a, ka nunkhua a ti nuam vak lo.

Kan room kawngkhar chu chhunglamah a lo inkalh tlat!

"Jeho, Bartho.." tia ka koh pawhin min chhâwntu an awm lova, kawngkhar bêng dat dat chung hian ka ko nawn leh a, kawngkhar kalhna a ri rak a, Jeho a rawn lang nghal a, room chhung chu zu rim hlir a nam. Anni pahnih hian zu no an dawm dun tih hrilh hranpa ka ngai lo.

"Lo chhuk tawh ula, kan nghak che u," tih pahin khum bul ṭhutthlenga ṭhu âwn duai Bartho chu ka melh a, "Kan lo chhuk ang, ka sawi kha aw, pawnlamah te khan i lo chhuak ang e," tia min hrilh chuan ner nâng chung hian, "Zaninah thil sawi tur i neih kha, i rui ang e," ka lo ti a, a nui huk.

"Ka nupui hian zu in a phal lo a, eng nge i ngaihdan Bartho? Innu hian a khap ve fo che em?" Tiin a zawt a, nui suk chung hian Bartho chuan min rawn en a, "Keini nupa te chu kan in dun lo chauh maw le, Raguel pian hnu hian a sim chauh alawm," tiin a nui hawk hawk a, awih tur nge awih loh tur pawh ka hre mai mai lo e a.

"Rawn chhuk vat ula a ni mai," tia inher nghauhvin step ka zawh thla leh ta a, Jeho hmel kha a dik chiah lo tih ka hmu thiam a, a mâkpa nen thil sawi dun pahin zu an in dun a, eng thil pawimawh nge an sawi ang hriat va ni suh.

Pawnlamah ei tur an buatsaih a, an lo chhuak thâwl deuh vek tawh a, sawi tawh ang khan Jeho te hian kawt zâwl zau nuam tak an nei a, inchhung lamah ei leh in buatsaih lovin pawnlamah engkim an ti vek a, kan boruak heti hi ni lo se chuan nuam ka tih zawng tak tur a ni.

Farm lam aṭanga lokal te chuan a hranin an kîl a, keini a bâk zawngin dining table sei fahran kan kîl thung a, Buatsaiha leh Tleipuii an ṭhu dun a, Samuel Pamei leh nu Pianmawii an ṭhu dun bawk a, keini nupa, Vansangi te nupa leh Angelika te ṭhutna tur veilamah an siam a, Raguel leh zonunthara chu an nulain a awmpui thung.

Ei tur pawh a tuihnaiin a hnianghnar hmel khawp mai. 

Jeho leh Bartho an rawn chhuak ve tawh a, zu in hmel an pu lo, Buatsaiha lam hawiin Bartho zawk chuan, "Mâkpa thar chu in tur dawm hmana i lo haw ka ring a nia," a ti a, Buatsaiha chuan, "Farm lamah kan buai deuha ka rawn hma thei ngang lo a ni," a ti ṭha ve mai.

Jeho erawh a ngawi ngul a, Samuel Pamei a melh leh zuk zel, ani rui lungpuam hi a insûm thei lo ang tih mawlh ka hlau.

Dawhkan kan kîl kim ta maw tihah Samuel a rawn ding chhuak a, zanin tlaia chhungkaw chaw eikhawm an buatsaihna chhan heti hian a rawn sawi ta a.

"Hmun hrang leh in hranga awm kan nih angin inkoh khâwm hi thil harsa tak a ni a, zanin tlaiah Jeho te nupa leh Bartho te nupa in rawn tel theia a lawmawm khawp mai," tih pahin a hrawk a thian kharh a. 

"JK Farm hi Jehomalsawmkima hminga awm a ni a, a ram neitu a nu ni mah se, a fapa neihchhun tan engkim a dah tih kan hre tlâng turah ka ngai a, tunah hian kan elpui Bamos Farm lamin min nawr chêp a, kan ram lâk hêk tumin hma an la mêk a, chhungkua kan ṭan tlan a ngai tih ka sawi duh a ni," a ti dap dap a, a duh hi chuan ṭawngkam te hi a thiam a nia. 

Jeho patea angin a la ṭawng hrâm zel a, chu ringawt pawh chu ka huat tâwk a tling em em si. Zak lo lutuk.

"Chhungkua kan ṭan tlan loh emaw pakhat lek pawh a hel chuan tlâkchhiat hun kan la nei dawn tih hria ila, Bartho te nupa Jorhat lamah awm mah se, sum leh pai an theih ang angin an rawn thawh zel a, Super care hospital-a ka share pawh Jeho kutah dah ka tum a ni, ka upa tawha rorel ka harsat chhoh zel avang leh Piani pawhin upat lam a pan zel avangin Jehomalsawmkima kutah engkim a awm a ngai a, chu chu chhungkaw hriatah sawi lan ṭha kan tih avangin zanin tlai hun hi kan buatsaih a ni," a ti leh a, Jeho ka melh zeuh a, a hma lam ngun takin a en a, a ngaihtuah awm ang tur hriatthiam a har ngang mai. A ngêng ngulh a ni ber.

Samuel Pamei a ṭhut fel hnuah zanriah kan ei ta hlawm a, Buatsaiha hmel a nelawm fahran lova, ani hi en loh ka tum pawhin ka mit a la leh tlat zel.

Hnathawkho zawng zawng Jeho chuan a ko khâwm a, an hlawh bâkah bonus a pe ṭheuh bawk. Aryan beng bulah eng emaw a sawi a, ka awmna a hlat deuh avangin a sawi ka hre pha lo thung.

Chutia kan rík laih laih lai chuan Jehomalsawmkima'n a kut vawi thum a bêng a, thâwm ri bengchheng a reh hmiah, Farm house lamah ṭhenkhat an liam tawh a, a hmun nghâktute tan ei tur an hawnsak ve a, chu pawh Jeho ruahmanna tho a ni.

Pawnah kan la ṭhu ṭhap a, dessert kan ei mêk a, Jeho chu a rawn ding hluai a, kan lo en ṭhap.

A patea lam a hawi a, a nu a en leh a, a mitmeng chang fahran aṭang chuan a lo sawi lâwk tawh kha a tihlawhtling dawn tih ka lo hre thei.

"Ka pate tiin ka la ko zel dawn che nge ka pa tia koh i duh zawk?" Zawi hniam set sawta tiin Samuel Pamei chu rum lutuk hian a melh a, ka thin a lo phu dup dup. Vansangin a hmui a hup a, Tleipuii a mengphâwk nasa.

Samuel chuan tîm dui hian Jeho a melh a, "Ka fapa, eng thu lawi lo nge i sawi tâk mai le, midang thusawia buai tur i ni lo asin." A ti zawi ruih a, a kut a hum ruh tlat tih ka hmu ru reng.

"Midang thusawiah ka buai hleinem, fiahna ka nei zawk a ni, i fate tan i thi tawh a, i fate tân vêk an patea i ni leh  a, eng ruahmanna dukdak lo nge i siam ka hriatpui lo che a, nichina i thil sawi zawng zawng kha ka tan eng tihna mah a ni lo, a chhan chu roluahtu atana min siam ngai lovin ka nu leh pa rokhâwmtu tur dik tak chu keimah i fapa i thlauhthlâk tâk Jehomalsawmkima ta tur a ni e," a ti hmiah hmiah a, nu Pianmawii hmel a dâng lap a, Tleipuii leh Buatsaiha an inmelh hê-hâw bawk a, kei leh Bartho tih loh chu an hamhaih vek.

Vansangi pawh Jeho bulah a va kal hnai a, "Mama, eng nge i sawi awm zia?" Thâm ṭiakin a ti a.

A farnu kuah chung hian, "Tihpalh aw, ka sawi chhuah ngei hi a ngai si a, nang leh keia pa dik tak hi a la thi lova amah chu saw.." tih pahin Samuel a kâwk a, a thinrim hmel dur khup chu a reh hian a reh lo hrim hrim.

"Mama..dâwt vek.." tiin Jeho a kuah lêt a; mahse, Jeho chuan Vansangi bânah a vuan a, "I fanu i thlauhthla a, kei min phatsanin min bum bawk a, ka pa ni tlâk i ni lo, phat buai tum duh hek suh," tih pahin a kekawr ipte aṭangin DNA test report kha a phawrh chhuak a, "Eng finfiahna dang mah kan mamawh lo," ti leh nghutin Samuel Pamei vawm nan a hmang ta a.

Chutah le, Vansangkimi chu harh chhuak thutin Samuel lamah a tlan phei a, a remna lai laiah a chûm bawrh bawrh a, "Tenawm lutuk, i hmel hmuh leh pawh hi ka châk nek lo e, nang hi ka pa tia koh che ai chuan fahrah nun kha ka tem leh zawk ang, tenawmpa.." a ti hlawih hlawih a, a pasal Bartho Saingurpuia'n a va pawt hrang ta a, kan boruak a sosang ngei mai.

Buatsaiha a rawn ding ve a,  Jeho rum taka melh chung hian, "I thil sawi hun leh a hmun hi a fuh lo a ni, i ti mah mah lo maw?" Tia a rawn ṭawng chuan Jeho thin bawrlawk a kai chhuak a ni tehchêk ang chu, Buatsaiha kawr âwmah ṭhâmin, "Lo inrawlh hlek suh, i ring ruh ṭhuai tliak tur hian minute tam ka mamawh lo," ti nghutin Samuel lamah a nam phei nawk a, Tleipuii lo ṭê chul chu engah teh vak a ngai lo a ni ang, "I pasal thunun rawh, he in aṭanga ka theh chhuah hma che u hian," a ti chang fuk a, Tleipuii a ngawi nghal hmak.

Jeho khap a hun tih ka hria a, Samuel ding khûr hluk hluk melh zeuh chung hian, "Jeho, duh tawk tawh rawh le, naupangte an awm ve si a, a ṭha lo, i duh ang i sawi chhuah tawh kha," tiin dam thlap hian a kutah ka vawnsak a, a insangmar nasa hle tih a taksa khawng luh aṭang chuan a hriat theih, a thaw hawk a, ka vawnna kut chu phelhin a nu a la pan ta cheu. A va buaithlâk e.

"I thil thup zawng zawng ka hailan hunah chuan ngaihdam min dîl mah la, awmzia a nei tawh kher lovang," tih pahin Samuel lam a hawi leh a, "I fapain a pa thattu phubâ a lâk theih nan training i pe a ni lawm ni, ka pa lakah eng phuba nge la tura min duh chu sawi rawh.." tiin a patea hrawkah a rêk a, a kâwng hnunglam aṭangin Pistol a phâwi a, Samuel chaldârah tak tin chung hian, "Thi tlâk i ni, mahni fate bum hlum ṭhak pawh pawiti lotu hian dam i phu lo.." a ti leh a, ka lo hlauthawng nasa mai.

Vansangi ṭap fap fap chu a pasalin a kuah a, he buainaah hian Bartho vawikhat mah a la ṭawng chhuak lo. Mahse, Jehomalsawmkima'n Pistol a phawrh tâkah chuan, "Duh tawk tawh rawh, tualthah thubuai neih âi chuan tikhan thlah zalen la, hremna a pumpelh chuang lovang," tiin ka pasal a kuah hrang ta a, ka lo ṭang lutuka ka hah vek thei alawm maw le.

A ri hluai a, a reh leh duk a, Samuel hmai dâng lup leh khur dur dur chunga kalsawn tum mêk chu nu Pianmawiin a va kuah a, Tleipuii leh Buatsaiha'n an zui bawk a, keini pali kan la ding khawmuang thung. Jeho thinrim hi vawi tam ka lo hmu ve tawh a, tun ṭum zet zawng, rilru natna nen thinrimna nen a inpawlh nawk a, ka khawngaih takzet.

A pa thi anga a lo hriat a la dam a, amah kaihruaitu leh enkawl seiliantu a lo ni lehzel si, a bul ber chu Samuel leh Pianmawii vek an ni. 

"Bartho, zanin chu farm house-ah riak ang u aw, kalsan tlâk kan nih loh hi.." tiin Bartho Saingurpuia ka va hrilh sap a, "Tehreng mai, i pasal thinrimna leh natna hi chhâwk zangkhai thei lo mahila, a lamah ka ṭang zel ang, ka nupui unaupa a ni alawm," a lo ti hmiah.

Chumi hnu chuan inchhungah pawh lut nawn tawh lovin nau awmtunu Vansangin a ko tuar tuar a, a fapa Raguela an rawn hruai chhuak a, anmahni car-ah an lut fel a, keini pawh Gurkha dinna lamah kan inzui phei a, an inpui êng uar chu vawikhat lehhawiin ka en vang vang a, inhnuai parda phen aṭangin Buatsaiha'n pawnlam a lo thlir reng chu niin! Hepa han hnawksak dan em em hi aw.. ka hua a ni tawp mai.

Sawlad-ah kan thawmhnaw kan lam kâwi zuai a, Jk panin kan tlan chhuak leh ta a, kan hnungah Bartho te chhungkuain Car dangin min lo zui bawk a, Jeho ngawi ngul mitsir zauh chung hian, "Hmelma kan neih belh leh ta, pawnlam mi âiin kan kiang hnaia chêngte hi an hlauhawm zawk tih hrereng ang che," ka ti ta a.

"Ka Ngurthantluangi chiah ka bula awm turin ka duh, a bâk ka mamawh belh lo," a ti sup a.

"Naute pawh i duh lo maw?" Ka lo ti hmanhmawh a, nui suk chung hian, "Ani te chu a la rawn chhuak ve hleinem, anu pum chhungah a la awm a," tiin a nui veleh ta.

Nichina a chêt dan zet kha zawng Mipa dik tak tih tur a ni, a pa a ni emaw a nu pawh nise an dik lo a nih chuan a hnialin a do hreh lo. Laljehomalsawmkima nge nge a rintlâk teh e, hlauh a nei lo a, a hunah a tlâwm hreh lo tih pawh ka hriat hnu tho a ni.

Raitong Wood stock farm zâwnah Motor a tiding a, horn vawi hnih a pêk hnuah mipakhat a rawn chhuak a, a head light-in a chhun chiang bawk a, a hmel ka hmu chiang kher mai, Barua kha a lo ni a, driver seat lamah a rawn ding a, Jeho kutah envelope a pe a, "Kha tah khan MAP chu a awm a, ka nunna atan hlauhawm mah se, i patea thil tih dan a dik loh êm avangin i lamah ka ṭang lo thei ta lo a ni, Mr.Jeho, fimkhur takin aw.." tiin a kutzungpui a tipir zauh a. 

Jeho chuan, "Eng emaw buaina i tâwk palh thei a, in farm lamah hian Riffle kah thiam tak pahnih ka rawn dah dawn nia," a ti ve ta a, nui ṭhâ chung hian Barua chuan min rawn en a, "Madam, i ṭha zel em, naute a ṭha maw?" Tiin min bia a, ka ṭhat thu ka sawi rualin lawmthu ka sawi nawn leh a, kan tlan chhuak leh ta.

"Ani kha awm lo se chuan kan nautê kan chân dawn si a, venghim rawh aw," tiin Barua tan ka dilsak ve hmiah. A nui suk a, "Ka nupuiin venhim a duh chuan kan veng mai tur a ni," a ti leh mai a, a nuih a za deuhin ka hria.

A mood a inthlâk zung zung a, nichin lawka a lan dan leh tuna a hmel te chu dang tawh tak a ni. A lungawiin a dam ta tihna a ni lo a, a inthunun mai chauh a ni.

Bamos ram kan thlenga a lo êng ut mai. Shisha kha ka rilruah a rawn lang nghal a, Jeho hnenah, "A duh vang renga naute kha paih an ni em?" Tiin ka zawt thut a, dar san âwk chung hian, "Samuel hi Shisha hian a hmangaih em em a, a tih ang angin a awm tawp a, mahse, a naupai kha Samuela'n a pawm duh ta lo a, ama duhthua titla a nih ka ring," tiin min hrilh.

"Mahni fa nunna êm han lak chu a râpthlâk ka ti," tiin keima hriat tâwk lek hian ka phun sep a, a lo hre pha tho a ni ang, "Ani dinhmun te chu a dan a dang alawm, a hriselna a chhe em em a, doctor pawhin paih mai kha atan a ṭhat zawk thu an sawi a, chuti ni lo se a u phal lo chungin a pai tlang ang," tia Shisha chungchâng a sawi mek lai chuan JK farm kan tlan lut ta a, kan ṭawng zawm ta lo.

Vansangi te Car a rawn thleng ve bawk a, Jorhat aṭangin zankhat riak turin an lokal ve bawk a, an rin loh dan deuha boruak a thlen tâk si-ah chuan Mawkasiang-a an inpuiah zankhat pawh riak ta lovin tihian a nuṭapa bulah an lokal chu a ni a, an lainat awm ang reng.

Farm house-a kan luh hnuin Jeho chuan Bartho hnenah, "In duh ber room âwlah khan indah lut mai rawh u, Raguel kha a muhil dêr e law?" Tiin a farnute nufa inpawm chu a melh zuk a, Vansangi hmel a la dik hleithei lo, a mit a sen râm a, a ṭap nasa tih a hriat reng mai.

Chumi hnu chuan Raguela pindan âwlah an mut vat a, kan paliin Veranda-ah kan ṭhu a, Bartho leh Jeho an titi a, kei leh Vansangi. Arun kan piah lawkah a ding a, Coffee in tur a rawn chhawp bawk a.

"Jeho, engtia hmalâk zel nge i tum, Samuel leh Buatsaiha hian an bei ngei chein ka ring a, min mamawhna i nei ang em?" Tia Bartho Saingurpuia'n ka pasal a zawh chuan inthing nawk chung hian Jeho a khi suk a. 

"Ka thisen zawmte zingah rin pakhat mah ka nei tawh lova, Vansangi hi ka farnu dik tak a nih avangin ani nen hi chuan pawh hran theih kan ni lo, chuti a nih rualin ka mâkpa lo ni ta Buatsaiha erawh chhui mêk a ni a, Aryan kutah ka dah a, Samuel hi chuan ka naupan lai aṭang tawhin hmanruaah min hmang char char a, tunah hian min tihchhiat dan tur a zawng ngei dawn, ka pa angin ka en thei ngai dawn lo tih min hriatsak dawn nia, Jorhat-ah lêt leh phawt ula, mamawhna che ka nei dawn a nih chuan rang takin ka lo hrilh ang che," ti duahin min rawn en vung vung a.

"Thil buaithlâk deuh chu Ngurthani hi a ni, a nau neih a hun chho dawn a, kei chu mipa ka ni a, helaiah tih tur tam tak ka nei a, Aizawlah awm tîr dawn ila ka ngaihtuah bawk si, an tinâ ang tih ka hlau a, nangni chhungkua leh ka nupui hi ka lamṭang awm chhun in ni tawh a, Bawihi, ka nupuiin nau a neih hunah i rawn buaipui thei ang em?" Tiin a nau a zâwt leh rih. 

Vansangi chuan, "Mama, i inthlahrung a nih kha, ka theihna chin apiangah puih che u hi ka hnial reng reng lo," a lo ti ve thuai a, a fel reuh ngawt mai. Tleipuii teh ngawt ai chuan ka ngaina fê zawk.

A tûk zing hma taka chhuak tur an nih avangin mu turin mahni room lam kan pan ta a, Jeho khumah a ṭhu hnawk a, a chauh hmel êm avangin be buai lo hian a bulah ka ṭhu thla a, ka kut a lo hûm vat.

"Ka chhungril hi a hliam a ni, nang ka neih dan che kha a fair lo tih ka hria; hun harsa tam tak kan paltlang dun a, thihna kotlângah vawi tam ka awm tîr bawk che a, Ngurthan, nang leh i pum chhunga mi hian chakna thar min pe ṭhin, ka ta liau liau i ni.." tiin ka mitah min en a, amah hnem nan ka lo kuah ve vat.

"Kan inneih dan chungchâng sawi chhuak duh tawh suh, a liam vek tawh a, tih danglam theih a awm tawh chuang lo, he farm leh i in leh lo humhim tur hian i theihtawp chhuah la, nakinah he kan buaina hi chu a la reh ve mai ang," tia ka sawi lai chuan ngun deuh hian min en a, ka khabeah dawmin, "Zanin tlaiah khan tual ka that teuh kher mai, Samuel thluak ka kâp darh lo kha thil mak a ni," a ti leh hmiah.

"I inthunun a ngai a nia, ka lo lan ve hmaa i nun dan chu eng pawh ni se, tunah chuan i danglam hret hret tawh a, nakinah pa i la ni thuai dawn, tualthattu tia an sawi che hi ka duh lo a, Jail bang i zût loh nan engkimah inveng fimkhur ang che," tia ka hrilh lai chuan ka pum a rawn chûl a, kawrfual ka la inbel avangin a phun hluk a, "Hetiang kawr hi ka ngaina lo," tih pahin a hnung zipper a pawt phelh a, a va thinchhe ṭhin tak.

"Jeho.." ka lo ti sap a.

"Ka hnathawkte hi i ngaina a nih pawhin hnimhnai suh mipa an ni a, nang hmeichhia i ni, zanin tlai ang khan Aryan a ni emaw atu a pawh nise tîr tawh suh ang che," tiin tlaia a lungawi lohna kha a sawi chhuak ta a, ka chhâng buai duh ta lo.

Amah si chêtin min kuah a, tisa lam thil engmah kan ti dun lova, a muthilh dawnah ka hmui a fawp zauh a, "Muthilh tam i mamawh ve tho a nia," tih pahin ka mal a zût a, a maimitchhing nghal daih, hahdam rawh se, a phur hi a rit lulai lutuka chhâwk zangkhai theih ka châk takzet.

Khua a var a, ṭawng thawmin min tiharh ka ti mai. Choka lam aṭanga Bartho aw zawi sup ri ka hriat chuan ka ṭhu chhuak a, Jeho a lo mu tawh lo.

"JK MAP ka nei tawh a, nizan khan Barua kut aṭangin ka la a, min pe tih hi nang leh Ngurthani chiahin an hria, kâr tharah hian ngawi rengin Revenue lamah ka va kalpui ang a, Richard pawhin MAP a hmuh chuan a ngaihdan a sawhsawn thei maiin ka ring," tia Jeho a ṭawng lai chuan ka va tho chhuak ta a. 

Zinglam dar nga leh a chanve a pel tawh a, min lo hmuh veleh, "Ngurthan, Vansangi te kha va kai tho rawh le, kan kal a hun dawn hnai," tiin Bartho chuan min tîr zui zat a, ka kal ve mai bawk a.

Raguel te nufa tui taka muhil hmel chu ka thlir vang vang a, "Vansang...tho tawh rawh u le.." tia kovin ka sâwi dat dat a, a rawn meng chhuak a, min hmuh veleh, "Ka va han haw peih lo, helai hmunah hian awm ve reng thei ila.." tih pahin a ṭhu chhuak ta tho a.

"Nakinah, ka nau neih dawnah lokal i tum kha, ka lo beisei tlat dawn che a nia," ka lo ti ve a, nui chung hian, "Tleipuii sawm rawh," a ti a, ka lo ner sak, "Aniin min buaipui ai chuan kan driver Rishan koh pawh ka thlang zawk," ka ti a, a nui hak hak a, a hmel hmuh a nuam teh e.

Jeho chuan Raguel a pawm a, "Papa, vawikhat chiah sawtah sawn ka chuang thei ang em?" Tiin Jeho Gurkha ding chu a kâwk a, ani Jeho lah chuan îhe lovin Motor chahbi a la a, Bartho lam hawiin, "I fapa hi vawikhat ka'n tlan kualpui ang e," tiin Raguel chu motor-ah a hlâng a, amah pawh drivet seat-ah ṭhu lûtin an haw dawn aruaiah a tlanchhuahpui leh rih, a va buaithlâk e.

"Mama hi chuan unau kan ni tih a hriat tirh aṭangin min ngaihsak a, min hmangaih tih ka hria.." a ti sap a, Jeho hi a ngaisângin a hmangaih tih a hriat hliah hliah.

"Tleipuii pawh a tîr kha chuan ka ngainaa a nau neih dawnah pawh Jeho lak aṭangin ka chhan mai bâkah Zonunthara saw ka chharsak a ni bawk a, Jeho thinrim bengdaitu ka ni tih leh an tân theihtawp ka chhuah tih a hre duh miah lo hi ka tan a ngeiawm, ka lakah rilru chhia a la pu lehzel a, ngaihdam a har a ni," tiin Tleipuii nena min kidnaped chungchâng kha ka hrilh ve ta vek a.

Chek tlak tlak chung hian, "Kei chu ni ila ka kêk hrep ang," a'n tiah, kan thusawi lo hre phatu a pasal pawh a nui huk ringawt.

"Tleipuii laka ka rilru put hmang hi chu a dang hlawk tawh," tia ka sawi laiin Jeho te an rawn lêt leh ta a, Raguel hlim âu thawm ngaihthlak a hrehawm loh hle. 

Bartho hnaah kal a ngai tawh si a, ngai tak chungin kan vai liam ta a, an lan theih chhung ka thlir a, an kal dawnah min kuah vang vang a, "Huaisen taka i awm zel a ngai a nia, Mama tan i hlu hle bawk.." a ti a, chumi hnuah a û a kuah leh a, "U Ngurthani himna hi i kuta awm a nia, duat hle ang che.." tiin a hrilh ve bawk.

An kal liama a ruak huaiin ka hria. Jeho pawh kâwng dawmin a ding vung vung a, zinglam dar ruk a pêl âwrh chauh a ni.

"I duh chuan mu leh rawh, hna tlem thawh tur ka nei a, a nih loh pawhin exer la pahin min zui thei ang," tia rawn inherin min lo pan a, i thawmhnaw va thlâk rawh le, Fâr hmunah kan kal dawn nia," a ti ta a.

A sawi angin Shirt thâwl hnekhnawk ka inbel a, ka sam ka ṭâwn sâng vah a, running shoe ka bun bawk a, min lo thlêk vung vung ringawt. Chutah, "Doctor inthlahdah ve tak i ni, tun ang hunah te hi chuan ka sawi ngai lova exer la ṭâuh ṭâuh tawh tur i ni a, hmun hla a kal pawh a ngai lo, helai velah hian tuktin reilotê tê kan tei kual tawh ang," a ti ta.

"Exer lâk pawh ka ti vak lo, zan lamah ka la ṭha tho a.." nui chungin ka lo ti a, "Ngurthantluang leh.." tia nui hawkin ka dârah a rawn kuah a, Fâr hmun lam panin min kalpui ta a.

Tuna min hruaina hmun tur hi a hmaa min thah a tumna hmun kha a ni. Ka kal châk viau lo.

Shillong boruak hi chu a nuam ve hrim hrim a, Fâr kûng ding thelhsung hmunah chuan min kâi dat dat a, "Helai hmuna ka hruaina chhan che hi chu eng dang vang a ni lo, ka nupui ni tura kan inremsiamna hmun kha a ni a, thisen a tel ka tih tawh kha," tiin a ding chut a.

"Jehomalsawmkima hian hrehawmna tam tak ka pe che a, keimah avangin i nuṭa neihchhun i chân bawk a, i hna i ngainat em em thawk zawm thei lovin ka siam bawk che a, i tan hi chuan ka huatawm ngawt ang; mahse, ka hmangaih che.." tia min hrilh chuan ka melh chho hau a.

"Jeho..eng maw i sawi?" Ka lo ti thuai a. 

"Ngurthan, ka hmangaih che," a ti nawn leh sup a, Jehomalsawmkima kâ aṭangin min hmangaih thu ka hria a nia, a mak a ni!

"Hmangaih che hi ka tum a ni lo, mahse, ka taksa thunun thei mah ila ka thinlung erawh ka thunun thei si lo chu a nih hi.." hniam ruiha tiin min vuan nghet sauh a, sawi tur ber pawh ka hre lo.

"Jeho..ih.." ka lo ti niah niah a.

Ka ṭawng tur min lo pawt chatin, "Engtikah emaw chuan nang pawh hian min la hmangaih ngei ang, ka hmangaihna che i hriat fiah hunah chhânna min pe dawn nia," tia a sawi zawh rualin ka chalah a fawp a, ani hi a â tawh a ni ngei ang, a thilsawi hi ka awih thei dawn em ni, a thutak ropui mai si a...!

Kan indinchilh rân a, ka pum puarin a dul a nêk rân a, ka mitah khap miah lo hian a en bawk a, ka lo khap zak zak a, "Ka hmangaih che" ti nawn leh supin ka hmui a tawk zeuh a, chhân tuma ka âng zuau chu, "Ngurthan..." ti ṭhawtin min kuai hniam nghal a, amah pawh a ṭhu hniam zui nghal.

Fâr thingah Chemte fawng dum a bur chat a, ka thin a phu nghal dup dup.

"Che suh aw.." tiin min ṭhut hliah a, "Atu phiangsen chu nimaw?" Tia phun sup chung hian, a tawlh sawn hret a, min vawnna a la thlah ta lo fo.

Minute sawm dâwn kan ṭhut hniam hnuah, "Hawh le, hmanhmawh miah suh, ka hnungah zêl i kal dawn nia," tiin a ding chhuak a, min phén nghal bawk. Ka âwm ka dawm a, helai hi chu a ram chhung a nih vangin a hlauthawng lo tepawh a ni mahna.

Thingkunga Chemte búr vâ chu a la a, ngun leh chîk zet hian a en a, "Pistol a pai lo a nih dawn hi, chemte vawm thiam tak chu a ni lo phawt a..." tia ṭhen sak chung hian a kut veilamin min kâi a, lehlamin chemte a keng a, fâr hmun aṭang chuan min kalsawnpui ta a.

Tun hma ang te kha chu nise ka râk bengchheng leh chûl tawh ang; mahse, vawi tam hetiang hun hi ka lo paltlang tawh a, hlauhlawpin ka awm lutuk ngai ta lo, hmeichhia mah ni ila ka rilru a paukhauh sâwt hle.

A phone a phawrh chhuak a, "Fâr hmunah mi pathum lokal rawh u, Riffle keng ula.." tia tu emaw a biak zawh hnuah, "I hlau em?" Tiin min zâwt leh hnuhnawh a.

"Ka thin phu a tirang," tiin dik takin ka chhâng ve mai.

"Aryan leh Arun an lo thleng thuai dawn a, helai hmunah hian lo nghâk ang aw," tih pahin Fâr kung lian ber phenah chuan min dinpui leh ta rih a, "Min thah tum hrim hrim an ni lovang, invauna chikhat a nih kha.." a ti sup a, ka samah zûtin, "Hmangaihna thu sawi lai lai a, khatianga rawn chêt te chu an tiho tlat," tiin a nui a, ka rilru lâkpên nana sawi a ni tih ka hre ve reng.

"Khum laizawla sawi chi a nia, thinghmuna han sawi lan tlat kha i tiho fê zawk, nizana kan mut lai te khan sawi ta che," ka lo ti a, ka nuih a za naa ka nui ring ngam si lo.

"Ngurthantluang, zantin ka sawi vaih chuan i ning leh si ang e," nui ruh ruh chunga a tih laiin Arun hmel kan hmu ta a, a hah hmel ngang mai.

"Boss.." tiin Jeho a rawn ko a, "He chemte neitu hi hriat chhuah lo tum rawh aw, i pi hi farm house-ah kan lêtpui lawk ang e," a ti leh zung zung a.

Arun chuan Jeho kutah Pistol a pe a, amahin Riffle a pu thung a, Jeho hian mutna leh chaw eina tih lohah englai pawhin Pistol a pâi reng ṭhin a, tukin tehreng hi a pai lo teh tlat, Vansangi te haw tur nen a mangnghilh a nih ka ring.

Farm house-kan thleng a, hnathawkho ti ila, Kêl vulhtute pahnih khat hi Jeho bulah an rawn kal a, "Sameer" tia a koh pa chu in chhungah a rawn lut a, "Vawiinah ran chaw a lo thleng dawn a, i lo buaipui a ngai aw," tiin a kutah pawisa a pe a, tûkṭhuan ei a hun ta bawk nen kan nupain kan bâr ve luklak a, chaw ei châkna pawh ka nei lo.

Khawi hmunah pawh awm ila, min beitu emaw min thah tumtu an kat nuk niberin ka hria; nichina thil thleng kha kan sawi chhuak tawh lo a, "Vawiinah Bamos Farm lamah ka kal a ngai a, hetah lo awm la, ka hnathawkte tih loh tumah biak loh tur," tiin min hrilh thlap. Hnathawktute hmel ka hre ve fur tawh a, an hminga koh theih ka nei tlêm thung.

"I lo haw har ang em?" Tiin ka zawt a, a haw har loh tur thu leh Richard nen an indawr dawn tih min hrilh hnuah room lam a pan a, kan eina vel tifai turin mipakhat a rawn lut ta bawk a, Jeho room-ah ka zui lut ve ta.

Min hmangaih thu a sawi zo chauh a, a sawi loh lai nen khan a mizia a inang reng, kei hian ka hmangaih em ka hre lo; mahse, ka duhin ka thlahlel tih erawh phat buai ka tum miah lo thung. 

Kâr thar kan chuangkai a, Samuel te lam an reh hmiah a, Buatsaiha pawh farm lamah a rawn lang lo. Sawlad-ah lêt lovin keini pawh farm-ah kan la awm ta rih a, nitin Jeho hnathawk thlir kha ka hna a ni mai; an hnathawk damlo leh inhliam palh an awm chuan keiin ka lo buaipui thung a, tlêm chuan ka inthlahdul ve thei deuh tawh.

Ka incheck up hun a hnai tawh a, Jeho ka hrilh a, "Revenue office-a ka kal ni-ah i kal ve dawn nia, keimah chuan ka hruai hman dawn lo che a, Aryan kal tel ve rawh se," a ti a.

"Keimah pawhin ka hreh chuang lo, Sangeeta biak ka duh rêng rêng a," ka lo ti a.

"Super care-ah incheck up ka remti lo a nia, Bethany in pan dawn nia, Samuel hming lan theihna hmun hrim hrim hlatsan hi a ṭha.." a ti leh mai.

Kan lo inbiak mawlh mawlh lai chuan, "Malsawmkim.." tia hmeichhe pakhatin Jeho a rawn koh chuan ka hawi phâwk kher mai. A chhan chu Farm-ah hian vawikhat mah hmeichhia an lo la kal ngai lo a, nu Pianmawii leh Tleipui te tih loh tu hmeichhia mah ka hmu ngai tlat lo atin ni.

Jeho a ding chhuak a, "Tun ang hunah eng ti tura lokal nge maw a nih le?" Tia phun hluk chung hian veranda lamah a phei a, ka la chesawn chuang lo.

Hmeichhe sam dum hlap, inhnawih sen zet hmel ka hmuh chuan ka ṭhu khawng at a, a hmelṭha angreng viau, tlângnel zet hian Jeho bânah a kuah a, "Richard phal lo chung ka rawn chhuak a, in farm hi min fankualpui ve ka beisei," tia nui har har chung hian ka ṭhutna lam a rawn hawi a, "Jeho, tunge sawnu saw.." tia a phun sap ri chu ka hre pha reng.

Zawi fiah tak si hian, "Ka nupui a nih saw, Ngurthani..chuan, Ngurthan, Dingngheti a nih hi aw, Bamos lam aṭanga lokal a nia," tiin ka ṭhutna bulah an pahnihin an lo phei a, chunu hmela min thîkna niawm tak rawn lang chhuak chu ka hmuh hmaih reng reng lo. 

"Nupui i nei tih ka lo hre miah lo a," tia nui lui sângin Jeho hnaihah zel a awm a.

"Tikhan lo inkawm ula, Aryan ka va be lawk ang e," tiin ka ding chhuak a, Dingngheti chuan min en chîk hle, a bîk takin ka pum zâwnah a mit a fu chat a, dâk larh chung hian ka kalpel hmak.

Jeho erawh chuan, "Aryan chu khuai khâwina lamah khan a awm ang, a aia thui kal suh aw," a la ti hram a, "Aw le, aw le..boss" tia nui chungin ka chhuahsan ta.

Ka pasalin min hmangaih tih ka hria a, hmeichhe dang laka min phatsan duh tur khawpa mipa nêp a ni lo tih ka hrechiang ve tawh tlat.

Aryan awmna ka thleng a, khawizu a lo chawk nasa mai. Min hmuh veleh, "Madam, ṭhutna ka lo pe ang che aw," a ti sawk sawk a, hepa hi chu a fel a nia.

"Eng nge i lo tih dawn, i lokal tih boss in a hria em?" Tia min zawh chuan a hriat thu ka hrilh a, khawizu thlum hmel tak chu ka kuta pirin ka ei chhin leh rih, Aryan a nui hawk a, "Ka rawn tei harh mai mai," tih pahin ka ṭhut dan ka siamrem a, ka rit ve ṭan tawh a, ka ke a vûng titih.

"I ke kha, a na lo em ni?" a ti a, a aw-a min ngaihsakna lang chhuak chu ka hre reng, nui chung hian, "Naupai lai chuan hetiang hian a awm ṭhin alawm," tiin ka hrilh fiah a, "Naktukah Police bazar lamah kan kal a ngai dawn a, incheck up pahin.." ka tih zawm leh a, min en zuk a, "Boss thu lo chuan khawiah mah ka hruai thei lo che tih i hriat kha.." a lo ti hmuk.

"Ka hrilh vek tawh alawm, amah pawh a kal tel dawn tho a.." tiin ka ding chhuak a, pensawn ka tum a, chhuata khawizu bottle awm chu ka pal a, ka pai dat, ka tlu tur Aryan chuan min lo dawm a, ka hlauhthawn êm avangin Aryan kâwngah ka kuah lêt a, ka chelh nghet ngang mai.

Aryan a thaw hawk a, "Madam.." ti supin ka pum puar âl chu a en a, a hlauthawng hmel chu ka khawngaih ang reng, chutia kan lo din lai chuan, "Aryan..eng thil nge i tih?" rawn titu Jehomalsawmkima aw vin ṭhak kan hriat rual chuan Aryan an min thlah vat a, kei erawhin a kâwngah ka la chelh rân thung.

"Boss..Madam hi.." tia a sawi zawh hmain Aryan lak aṭang chuan min pawtsawn a, "Ngurthantluang, lo va chhuak rawh, ani hi kan be lawk ang e," zawi set sawt hian a ti a, kut êm chu a thlâk lo.

"Jeho...ani khan ka tlu tur min dawm mai chauh a ni.." ka lo ti ve a.

Rum fahrana min melh chung hian, "Ka sawi ang khan chhuak phawt mai rawh, ani hi ka be dawn tih ka sawi kha," a ti hmuk a, hnial zui ngam tawh lovin ka chhuak ta ringawt. 

Jeho hi a thîkthu a chhia ka tih tawh kha, kan inneih tirh aṭanga tun thlengin tu mipa pawh a thîk em em zel a, engtin ka va awm a ni lo, a hnathawk te lakah ngat phei hi chuan a mit a thí hma lehzual.

Aryan kut a thlâk loh hrâm beisei chungin pâwnah ka lo nghak a, a reh ṭhiap lawi si.

Aryan ka ngaina tih a hria a, ngaihzawng ang nilovin, amah hrim hrim a fel vang leh min duhsaktu ber a ni a, Jeho khan kut a thlâk vaih chuan ka ngawi dawn miah lo, a thiam lohna a awm lo a, thîkthu chhiat lutuk hi thil ṭha ber pawh a ni lo tih ka hrilh fiah ngei a ngai ang.

Rilru nuam lo ru zetin ka ding reng a, anni lah chu an lo chhuak har phian lehnghal...

Hmangaihtu dik chuan thîkthu a nei thiang. Mahse, a uchuak hi chu a ṭha kher lo.

210423

B+>[BeckirafARenthleI]<+®®