18.24-89 (Becky Rafa Story)

18.24-89 

Ziaktu: Becky Rafa Renthlei

[Recap]

Jeho hi a thîkthu a chhia ka tih tawh kha, kan inneih tirh aṭanga tun thlengin tu mipa pawh a thîk em em zel a, engtin ka va awm a ni lo, a hnathawk te lakah ngat phei hi chuan a mit a thí hma lehzual.

Aryan kut a thlâk loh hrâm beisei chungin pâwnah ka lo nghak a, a reh ṭhiap lawi si.

Aryan ka ngaina tih a hria a, ngaihzawng ang nilovin, amah hrim hrim a fel vang leh min duhsaktu ber a ni a, Jeho khan kut a thlâk vaih chuan ka ngawi dawn miah lo, a thiam lohna a awm lo a, thîkthu chhiat lutuk hi thil ṭha ber pawh a ni lo tih ka hrilh fiah ngei a ngai ang.

Rilru nuam lo ru zetin ka ding reng a, anni lah chu an lo chhuak har phian lehnghal...

Hmangaihtu dik chuan thîkthu a nei thiang. Mahse, a uchuak hi chu a ṭha kher lo.

-B®®

Minute sawm dawn ka din hnuah Jeho leh Aryan an lo chhuak a, Aryan ka ena kut tuar hmel a pu lova ka lo thaw huai. 

"Min lo zui rawh," a ti nghut a, Aryan ka melh zeuh a, nuam lo ti lutuk hmel a pu a, a kal sawn nghal vang vang bawk.

Jeho a kal hmasa a, min nghak lovin a pen pâwk pâwk a, a hnungah hmanhmawh zetin ka pên ve a, a tûm bûr bawk si, midang hmuh laia min hau lo ringawt pawh hi ka lâwm tâwk viau. A thinrimin pawisak a nei ṭhin si lova tumah hlauh a neih loh bâkah a thinrim hian khua a hmu tawh lo a, a ri pawp zel.

Farm house kan lut a, a la ngawi ngul tho. Biak hmasak ka hreh êm avangin lâi zet hian ka ding ngawi rân a, ka thiam loh chu a ni miah lo na a, a thinrim hmel ka hmuh hian ka inthiam lo teh ngawt a, a va ho ṭhin e.

"Ka hnathawkte hnimhnai lo turin ka hrilh tawh che a, a bîk takin Aryan hi ka duh âiin i nêl tlat, ani chuan a boss nupui i nih angin a zah der che a, i sawi a piang thuawih takin a ti zêl ang, mahse, a lakah hian eng rilru nge i put ve?" Thinrim anga lang ni miah si lo, zâwi fiah tak siin a ti ta a.

"Eng rilru danglam mah ka pu lo, inlêng i neih avangin ka lo va inthiarfihlim a ni mai a," tia thil thlen dan leh Aryan ka kuahna chhan chu thaw chham lek lekin ka sawi a, insawi fiah a ngai ziah hi ka ningin ka kham takzet.

"Dingngheti kha i thîk em?" Tiin min zâwt teh daih a, "Thîk tur ka ni em ni, ka tân thîk a ngaihna ka hre lo," ka lo ti vat. 

Chal chuar nûng chung hian min en a, "Thikthu te hi nei ve ta che, keiin mipa pakhat lek i hnaih pawhin ka thîk ngawih ngawih zel a nia, nang ve chu nula inlêng ka neih pawhin i chhuak nalh duh a nia, thîk ve rawh," a'n tiah. Jehomalsawmkima tak hi chu aw..

Thinrim viau angin a lang na a, chutia an ṭawng tâkah chuan za deuh hian ka nui ta hak hak a, ani pawh a nui suk suk a, "Aryan hi ring tâwk hle lo ila chuan nichina ka mitin a hmuh kha ka paidam hauh lovang, nidangah chuan khatiang ang thil kha thleng tawh suh se," a ti a, ka thaw huai huai thei alawm maw le.

"Dingngheti nen khan in inhresa em? Tlangnel takin a rawn ko chein i bânah a kuah a, i nupui mit a kham ve tho tih lo hria la, chuti a nih rualin nang anga thikthu tilang chiam chiam mi ka nih loh avangin ka hre lo der a nih kha aw.." ka ti ve ta a.

"Shisha cousin a ni a, a pa Gorkha niin Kolasib lamah an inbengbel tawh a, Bamos ramah hian tlêm a zawng chan tur an la nei alawm, Richard kutah an dah tawpa a hlâwkna an hûi ṭhen ve tih a sawi, Bamos lamin mikhual an nei tia kan sawi kha anmahni hi an nia, Raitong lam aṭangin Richard-a ṭhianpa Omar a awm tel bawk," tia sawi duahin tui a inzui khawlh khawlh a, hetia min hrilh fiah thlap hian min ring tawk hle tih sawi sawi ngai lovin ka hriat phah.

Zanriah tur buatsaih a hun a, Beram ching an talh a, Sameer te lamin ran chaw bag lo thleng an hlâng thla a, tukverh aṭangin an chevel ka thlîr reng a, Jeho hausakna hi ka chhût thiam lo nain a farm aṭang ringawt pawh hian sum tam tak a la lût tih hriatsa a ni a, Super care hospital aṭangin eng emaw zât chan a nei bawk. Mahse, a nupui hi an hospital-ah incheck up a phal leh bawk si lo a, a va khawlhkham ṭhin e.

Khawpui boruak rit tlansana helai hmuna kan awm aṭang hian teichhuah ka peih ta vak lo. Ka naupai pawh thup tum eng ang mah ila, a harsa ṭan tawh a, ka inbual tur inhlip te hi Jeho hian min melh leh vung vung zel. Ngaiah ka la nei hleithei lo chu a ni e.

"MAP chungchang kha nang leh Bartho chiahin in hria a, khawiah mah a ri chhuak tur a ni lo a nia, Richard nen zaninah kan sawi dun dawn a, ani pawhin MAP ka kawl tih a hriat chuan ramri teh ṭhat a duh ve maiin ka ring," tia min hrilh pahin a insiam mawlh mawlh a, boot dum, shirt dum leh jeans dum nen a induang leh thlup tawh.

"Thawmhnaw dum lo hi i nei ngang lo em ni, ka hmuh chhun hi a dum zel a nia," ka lo ti a, "A dum lo inbel tura min duh chuan min leisak a ngai ang, keima thua ka lei ve chuan a dum bawk a ni leh dawn a," tiin a nui a, "Kan inneih ni-a i inbel pawh kha a dum suit a nia, kha kha khawiah nge i dah?" Tia ka zawh chuan koki san âwk chung hian, "Hmeichheho tak hi chu thawmhnawah te hian inbuai peih mang e," a ti duh lek.

A insiam peih a, Pistol a check fel hnuah a pâi leh thlap a, "Tun ṭum chu Rishan ka hruai ang, zan dar 11 a rîk hma chuan kan lo haw dawn lo a, veranda pêl suh ang che, Aryan nen in awm dawn a, ka sawi ang khan nêl dan chin tawk thiam rawh aw, ka mit tikham zawnga in awm chuan ngaihdamna a awm tawh dawn lo a nia," tia min hrilh nawn leh hnuah, ka bulah a rawn ding a, "24-89" kha theihnghilh loh tur." Ti sup chung hian ka hmuiah a fawp a, a kal zui nghal a ni deuh mai.

Jeho leh Rishan an liam hnuah Aryan leh Arun an lo lang ve nghal a, a hma khan Arun hian hliam a nei ka tih tawh kha.

"I ṭha em?" Tiin Arun zâwk chu ka melh a, nui var var chung hian, "Madam, lawmthu pawh ka la hrilh lo che a, min buaipuina zawng zawngah lawmthu ka sawi takmeuh meuh a nia," a ti ve ngei, "Indim la, tawh sual i tawh loh nan fimkhur ang che," ka lo ti a, Aryan pawh Veranda lamah duty turin a chhuak phei a, Arun tak chu inchhungah a awm thung.

Dârkâr a liam a, zan dâr kua a ri ta maw tihah Farm house kawtah motor a rawn ding dawt a, Jeho a nih tawh beiseiin tukverh aṭangin ka va en thlithlai a, in pui lam Car a ni tlat, insangmar ru at chung hian Arun ka melh a, "Tute emaw an lokal a nia.." ka ti sap a, ka sawi zo hman ṭâwk tihah pen thawm a rawn awm a, Buatsaiha a lo lang chawpchilh.

Jeho awm loh hria ang hrima a lokal avangin ka lawm teh chiam lo.

"Arun, i pi hi a fâla biak ka duh a nia, Veranda lamah i lo va chhuak dawn em ni ang," pehhel nei miah lo leh nui lui ṭhâw chung hian a ti a, ka lak aṭangin a mit a la sawn lo hrim hrim.

Arun chuan min melh zuk a, ka awkâ a ngaichang tih a hriat mai.

"Buatsaih, eng ti tura lokal nge i nih ka hre lo nain tihian i sawi duh chu sawi mai rawh, nge, Jeho biak i duh zawk," nelawm vak lova tiin Sofa lo hnai berah chuan ka ṭhu a, "Jehomalsawmkima hi hruai hran tumin kan lak aṭanga pawh pên tum mah la i thei chuang lovang, Ngurthan, ka rin aiin i fing mawh tlat," tiin Arun chu a melh leh rûn rûn a, "JK farm Manager ka la ni reng a nia, nangni chu ka awm loh laia ka âiawhtu mai chauh in ni.." chapo awkâ taka a ṭawng laiin Aryan a lo lut a.

"Buatsaih, eng buaina nge i neih? Madam kha a fâla kalsan kan tum miah lo a nia, Mawkasiang-ah lêt leh rawh," a rawn ti hmuk a.

Aryan aw nelawm loh tak chu eng teh vakah a ngai lo a ni ang, "Thu min pe turin tunge i nih, i boss mâkpa ka ni a, zah lo taka min be tur i ni lo, i madam hi minute 10 chiah a fâla ka biak theih nan hun min pe rawh u, in duh chuan Veranda-ah pawh khan in awm thei ang," a ti leh zawt zawt a, Aryan te unau chuan keimah min en tlat a, minute 10 chhunga Buatsaiha'n min biak a duhna chhan tur awm ang ka hrethiam lo.

"Aryan, veranda-ah khan lo awm ula, koh theihin in lo awm dawn nia," tiin Buatsaiha ka en leh a, "Sual chhuah emaw, kut thawh i tum a nih chuan a lêt leh tur tuar ngam ang che," tiin ka vau hmasa tê tê a, a nui huk ringawt.

Chumi hnu chuan Buatsaiha nen chiah kan awm ta a, mahse, Aryan te pahnih ka hmuh phâk maiah an awm a, ka hlauthawng lêm lo.

"I unaupa Vanlalṭana thih chhan dik tak ka hrilh che ang a, JK ram MAP awmna min hrilh rawh, a bâk eng mah ka ti lovang," a ti ta a.

"Samuel Pamei zawt la, aniin a hria ang chu, keiin engtin nge ka hriat ve ngawt ang," tia ka chhân chuan a mitmeng a rum sawt a, "I unaupa thih dan i chhui a ni lawm ni, i hriat duh ka hrilh ang che, MAP awmna chu min hrilh rawh," a ti nawn leh a, ka lo ner sak.

"JK farm chungchâng eng mah hriat ka nei ve lo, MAP leh lek phei chu a hmuhin ka hmu lo hrim hrim, i duh chuan Jeho zawt la, a hnuaia thawk i ni a, a rin ber leh a innghahna i ni tih i hriat kha, amah zâwt rawh a lo haw ṭêp tawh ang," ka lo ti ve zaih.

"Ngurthan, i u Vanlalṭana thih dan kha i hre duh lo em ni?" Tia min thlêm a tum pawhin ka rilru sawh sawn ka tum miah lo a, ka u thihdan kha ka hre duh lo a ni lo; mahse, ka pasalin a 'hmâwr ka bâwk ṭep' tia min hrilh kha ka la hriat reng avang leh Buatsaiha hi ka rin zâwng a nih loh avang hian hre châk anga lan ka tum chhete eih lo.

"Ka u chu a thi tawh a, a thih dan hria pawh ni ila, a lo nung leh tawh dawn hleinem, kal tawh rawh, nang nen engmah sawi dun tur kan nei lo," tia ka la ṭawng mêk laiin min rawn hnaih a, "He hmunah hian rim takin kum tam tak hna ka lo thawk tawh, Jeho chak lohna chu nang hi i ni a, tunah MAP awmna min hrilh dawn nge i pasal lâktlâk loh zet khawsak dan ka en tîr zawk dawn che," a ti zawi sup.

"Buatsaih, kal tawh rawh ka tih chu, eng mah i hnenah sawi ka tum lo, ka u thattu pawh nangmah bâk i ni lovang, Mizorama i kal lai hun leh ka u thih kha a in nang tawk a, rinhlelh tur awm chhun chu nangmah chiah i ni," ka ti ve hmiah.

"Ngurthantluang, i chaltlai reuh hle mai, ni e, i u Vanlalṭana kha keima thah a ni, a zu in turah tûr kan pawlh tih i lo hre dawn nia, khanglang che chuan, finfiahna i nei thei chai dawn si lo a, a dawt lehah chuan i pum chhunga i fa kha ka khei chhuak tawh ang," tia nunrawnna mitmenga min en chuan ka lo îp châwih a, Buatsaiha thusawi chuan min ṭhâwng takzet.

Ka pan hnai ruak a, "Zawnga, tuna i thusawi kha han sawi nawn leh teh, ka pasalin i mitmu a kher chhuahsak che i duh loh chuan helai hmun hi chhuahsan rang mai rawh," khur dat dat a tiin ka thaw chhuak halh a, amah ka hlauh vanga khûr ka ni lo. Ka u thih dan chungchâng a sawi kha dâwt a ni lo tih ka thinlung hian a hria a, a sawi angin finfiahna ka nei miah si lo lai hi a ni. 

Nui ṭhu chung hian, "Jeho hmeinu pawh Bamos lamah a awm kha, i hre leh pek tawp nang, zanin hian nuam an tâwl dun ngei ang," tih pahin a phone a rawn phawrh a, eng emaw a hmet zut zut a, ka lam hawiin phone a lek kâng a, Jeho leh Dingngheti inhnaih fe-a an ṭhu dun lai thlalâk a lo ni, zu no an dawm dun bawk a, ka thin a sa zak mai.

"Chhuak rawh, minute hnih chhunga i inthiarfihlim loh chuan Tleipuiin saw nuthlawi a ni ang," ka lo ti ve khá khá a, eng hu-ah a ngai lo a ni tehchêk ang chu, min rawn hnaih sauh a, ka sam sei ang reng tak chu a rawn ban a, a kut ka vaiper lawp. A hmel hian ka luak a ti chhuak. 

"Raipuar hi an lo îtawm zawk daih a nih hi, Jeho an a duh loha a thehthang hunah che chuan kei min pan loh pawhin ṭap chungin mahni nunna lak i tum ngei ang," inring tawk taka tiin a hmui a liak kual a, min ît hmel zet hian ka pum leh ka âwmbâwrah a mit a fu chut a, ka thinin a tuar ta lo.

"Aryan, Arun.." tia ka koh veleh ka hmui a hup chawt a, ka duh lo ṭang tâl vel chuan a thin a tirim sawt a nih hmel, ka tukkhum samah a man a, "Jeho nupui i ni, mahse, ani hian nang lo pawh hmeichhe dang a khâwi nual tih hre rawh aw, a hnuaiah kum 10 aia tam ka thawk tawha ka hriat chian êm hi..mi mâwl nu," a ti a, ka samah a la man reng a, ka hmui a la hup bawk.

 

Sual lêt dawn mah ila, ka samah a chelh nghet ropui si, chêt ngam chi ziazâng a ni lo. Chutih lai tak chuan Aryan a rawn lut ta a, kan awm dan a hmuh veleh rang lutukin Buatsaiha a pan a, a bekah a hnek chawrh a, min vawnna a thlah chiang kher mai.

Aryan chuan Buatsaiha kawr âwmah a ṭhâm a, "Kan zah derna che hi hetiang hian maw min thungrulh dawn," tih pahin a hnek leh a, ka hmui hup chungin ka lo en ve reng ringawt.

Buatsaiha pawh a rawn che chhuak ve ta a, "Bro, puih i ngai em?" Tia Arun a rawn lan lai chuan, "Ngai lo e, Madam kha lo buaipui rawh," Aryan chuan a la ti hrâm a, eng mah nâ ka nei lo a, ka sam pawh ka chûl mâm leh vek tawh, Aryan leh Buatsaiha insual lai chu hmuhnawm ti zet hian ka thlîr dauh dauh a, pâwnah an inhnûk chhuak tawh a; lei chârah an tlu dun a, atu ve ve pawhin Pistol an chuh lo teh tlat, an inhel nuai a ni ber.

Hnathawktute an rawn pung khawm a, ṭhelh pawh tum lovin hmuhnawm ti zet hian an kîl bial tuau a, keimah ber min hliah vek. Arun lam ka hawi a, "Duh tawk tír tawh ta che, Aryan khu a na lutuk palh ang e," ka tih chuan a nui suk a, "Madam, hlauthawng suh, mipa, ngam leh ngama insual ṭhelh te chu a chi loh, a tlâwm zawk chu a insaseng mai ang," a ti duh chauh.

Veranda kilah ka ding a, Buatsaiah hnar thi phung chu khawngaihna nei miah lo hian ka en ve reng, doctor ka nih angin thisen leh mitthi tih vel hian min râp ve vak lo, ngaiah ka nei hial zawk, chuti a nih rualin ka mit hmuha tual thihna erawh chuan min ṭhâwng ve mai chauh a ni.

Buatsaiha a insaseng ta nge nge a, a mit leh lam a vûng phui lûk a, rum taka Aryan melh chung hian, "A lehpekah chuan i chaldârah ka kâp tawh ang," tiin a la vau hrâm. Hnathawktute zingah amah puia ngaihsaktu pakhat mah a nei lo a, bâi suih suih chung hian car-ah a ṭhu lût ta a, min rawn melh leh ngat a, "Ngurthantluang, i la hre dawn khawp mai," tia a ṭawng zawh rualin chak zet hian a tlân chhuak ta a, Aryan pawh Veranda lamah a rawn chho a, a hmai a khem nual, a kut châng a thi phung a, a kekawr hâk a paw thûr bawk 

"I ṭha maw?" Nui chung hian a ti a, a chil a chhâk zui pharh a, a sen ngiai mai. 

Ka ṭhat thu ka lo sawi a, "Lokal rawh, inchhungah i hmai kha kan tifai dawn nia," dam thlap hian ka ti a, Arun chu First Aid box la turin ka tîr a, Aryan insual thiam zia leh a huaisen zia ka hriat belh leh ta. Buatsaiha âi thlâwt chuan a lâktlâk fe dawn a nih hmel.

Aryan hmai leh kut vel ka tihfai sak zawh hnuah mu turin ka hrilh a, ka phone msg tone ri char char avang chuan dawhkana phone ka dah chu ka ban leh rih a.

"*24-

89 Bamos-ah" tih vawi nga zet number lawng aṭangin a  lo awm a, Jeho a ni tih ka hria, Buatsaiha thlalâk min en tîrah kha chuan buaina tâwk hmel a pu hauh si lo. 

Dâr zat ka en a, zan dâr 12 a lo ri thuak tawh!

Jeho khan dar sawmpakhat hmaa an lo let loh tur thu kha a sawi a, ama phone aṭanga msg min lo thawn lovin number dang a rawn hmang bawk si a, ka ngaih a ṭha thei tawh lo, Arun ka ko a, Aryan erawh ama room-ah a kal tawh a.

"Madam, eng nge ni ta?" Tiin Arun chu ka bulah a lokal hnai a, "Ṭhian tu emaw sawm la, Bamos farm-ah i boss va ngaihven teh u, thil ṭha lo a thleng a nih ka ring tlat," ka ti zung zung a.

A ngaihna a hriat loh hmel hle.

"Vatin, hmanhmawh rawh, Bolero Camper saw hmang ula, hmanhmawh rawh u.." tiin ka tur leh a, harh chhuak thut ang mai hian, "A lo hrilh che em ni?" A ti leh rih, ka lo bu nghat a, chu veleh biak zui hman miah loh hian a chhuak nulh a, Aryan pawhin kan ṭawng ri a hria a ni ang a lo tho chhuak leh a, "Nang chu hetah awm rawh, i unaupa kha kal rawh se," tiin Jeho message chungchâng ka hrilh a.

Ngaihsam zet hian, "Ama phone hman a rem lo a nih dawn chu, hlauthawng suh, ani te chu a ngaihtuahawm loh.." a ti ṭha mai.

Minute nga hnu velah Sameer leh Arun pawh Bamos Farm lam panin an tlan chhuak ta a, Aryan tan damdawi eng emaw ka siam a, a hmai a vûng ve ṭan. A hmel ṭha tak pawh a ti chhe vek thei alawm maw le, kan Buatsaih misuala vang vek. Ka phun hlak a. Ka mut pawh a chhuak mai mai lo.

Ngun zawka ka inngaihtuah theih veleh Buatsaiha lokal ve ngawt nachhan kha ka ngaihtuah a, Jeho a awm dawn lo tih tu emaw hian an hrilh a ni, inpuia chaw kan eikhawm aṭangin an reh vang vang a, buaina eng mah kan tâwk lo, tunah Jeho awm loh zanah a lo lang chat hi ruahman lâwk thil a ni. 

Ka u thih dan a sawi pawh kha dâwt a nih ka ring miah lo a, finfiahna mumal neih theih dan ka dap ve ngei chu a ngai dawn a ni, keia raipuar hi ka hmantlâk loh nasa mai si a, a hahthlâk teh e. 

Zinglam dâr khatah Gurkha leh Bolero Camper a rawn ding dawt a, rang takin Aryan nen kan chhuak nghal a, ka thil hmuh chu leh!

Arun leh Sameer chuan Jeho an rawn kuah chhuak a, rui lutuk tih hriat takin a meng mang lo reng reng, amah a lian si a, anpahnih pawhin an kuah hneh lo lek lek chu a ni e, "Aryan, i naute khu zu pui lawk mai teh," ka ti sap a, kei erawh ka dinna ngaiah ka la ding reng.

Kan khumah a vângtan zawngin a mu phar duai a, a harh lo hrim hrim, zu rim a nam hum hum bawk a, hetiang êm êma han ruih mai chu(h).

Arun hnenah an va hruai laiin tu nge awm tih leh Richard a awm tel ve em tih ka zawt a, nuam lo tih hmel deuh hian, "Hmeichhia bâk ka hmu lo, midang tumah an awm lo," a ti ta a. Rin dan ka nei thiam mai.

Bamos Farm house ah hian Richard leh Shisha, an hnathawk ṭhenkhat bâk an cheng lova, tuna an mikhual Dingngheti leh Omar kha an ni deuh mai. Kan Laljeho hian chin tâwk awm lovin zu a va in tih hriat reng reng. Mipat hmeichhiatna lamah an tâl tih lam sawi ka tum lo, hetiang khawpa rui hian engtin nge a awm theih tih zâwk kha ka buaina a ni. A duh thu renga awm nise msg min lo thawn hauh lovang. Chu chu hriatsa a ni bawk.

"Richard leh an mikhual mipa kha an awm ve lo em ni, in va hmuh laiin engtin chiah nge a lo awm? Thu dik tak min hrilh rawh," tia ka zawh leh chuan, "Madam, hmeichhia nen khan khumah an mu a, mahse, thawmhnaw a inbel vek," a ti leh a, dâwt a sawi lo tih a hmelah a lang tlat.

"Mu hahdam tawh rawh u le, i boss chu keiman ka lo buaipui tawh ang aw," tiin chhuak turin ka mitmei a, an kal ve mai bawk a.

Jeho khuma muhil bawrh bawrh chu ka en a, a kekawr ipte ka zen sak a, a phone leh lehkha a lo la ak a, a phone erawh a in-switch off thung, lehkha inthlep chu ka pawt pharh a, JK ram MAP kha a lo ni a, mahse, original ni lovin Xerox copy zawk a lo ni.

A zangthal zâwnga mu a nih vangin a kâwng hnunglamah harsa zet hian ka zen lût a, Pistol pawh a la pai lawi si, a va mak tak. Pistol chu phawrh chhuakin ka check ve ngial a, a mu pakhat mah a awm lo, a ruak vek!  

Amah a harh hma chuan thil awm dan ka hre thei dawn chuang lo a, a bulah pawh mu lovin ṭhutthlengah mutna ka siam a, ka inpeih fel meuh chuan zinglam dar thum a hnai kuar tawh.

Laljehomalsawmkima, mipa thluak fîm tak ni ṭhin khan a Pistol pai lai a mu awm lova a rawn hawn hi thil awihawm pawh va ni suh. Kut tuar hmel a pu lo a, ram MAP original kha khawiah nge a awm tâk ang? 

Mut chhuakin min zém a, ka maimitchhing ve ta a. 

Kêl be ri leh Âr khuang âl âl riin min tiharh a, ka mutna ṭhutthlengah ka lo mu tawh reng reng lo, kan nupa khumah ka lo mu daih chu niin! Jeho hmuh tur a awm lo a, bathroom lamah uak tuar tuar ri ka hre zui zat.

Zing dar ruk a ri dêk dêk chauh a, nizan lama a thil in result a chhuak ta a ni hmel, a duh tawkin han luakin uak teh se, ka ngaihven dawn lo a ni tawp.

Pawr phung chung hian a rawn chhuak a, "Luak danna kha kan la kawl chuan min lo jection mai ta che," tiin khum bulah a ding a, a hmai a huh hluam mai.

"Khatiang zu in vanga luak chhuak kha eng luak danna mahin a chhâwk nguar ang," ka lo ti hmak a, "Ngurthan...ka fiamthu lo a nia," a ti sup.

"Kei pawh ka fiamthu bîk hleinem, i duha i ina mahni pawha insaseng thei lo khawpin i rui a nia, luak nilêng rawh," ka ti leh hlak hlak a, a nui huk ringawt.

"Nizan kha chu ka tihpalh tak zet zet a ni, engtin nge msg te kha ka lo la thawn theih che ka hre lo, ka phone pawh ka hmu zo lo a, Dingngheti phone aṭangin ka rawn hrilh che a nih kha," ṭha tein a ti a, ka lo ter at.

"I phone i rawn ak haw tho a, Pistol a mu awm lovin i pai a," tiin ka nui lui hak a, "Ram MAP original i keng em?" Tiin ka zawt a, "Ka ken duh i ring em maw ni! Xerox copy chiah ka keng," a lo ti thên.

"A ṭhat chu," ti hmakin ka tho chhuak a, min lo zui nghal vut a, "Ngurthan, thinrim suh aw, ruahmanna fel fai nei lovin ka rûi lovang tih hre tur i ni asin," a ti leh a, ka chhâng thui duh ta lo.

Aryan hmai vûng leh khem nuai a hmuh chuan a ding chut a, "Nizanah buaina in nei em ni?" Tiin a zawt a, Aryan chuan min melh zuk a, "Madam zawt rawh.." tih chiah a sawi.

Breakfast kan ei laiin, "I ruih kâwi mai mai lai khan.." tia nizana thil thlen dan kha chipchiar thei ang berin ka hrilh a, a ngaithla ngun ngang mai. Chutah Aryan melh chung hian, "I kâp hlum law law lo a nih chu, mai mai a.." a ti ta a, Aryan chuan min rawn en leh a, "Madam hi vawiin kha a incheck up hun a ni tawh si a, kan kal hma a ngai ang," a ti teh daih a, Buatsaiha chungchâng sawi zui a duh lo tih ka hre mai.

"Keiman ka hruai ang e, Cadastral lam an la inpeih chuang lo a, kâr leh tawpah ram an rawn teh ṭha chauh dawn," a ti leh a, ka lo ngawi reng.

Aryan hnenah ve thung chuan, "Farm-ah awm la, Richard leh Omar te an lokal ka ring a, i lo dawngsawng dawn nia, nizana ka awm loh tur thu sawitu chu ka rin hriat mai, keimah ka awm dawn lo tih an hriat chian avangin Samuela'n Buatsaiha a rawn kal tîr tihna a ni a, i khawih sil-awng viau a nih phei chuan an rawn lang nawn ngam rih lovang," tia a sawi zawh rualin a ding chhuak hluai a.

"Keiman incheck up turin ka hruai ang che, naute thil tur mamawh kan neih pawh lei nghal vek kan tum dawn nia," a ti zui leh a, a luak chhuak kha a reh ta nge eng mah a sawi nawn tawh lem lo. A hmel a dik chiah lo mai pawh a! A zu in vangah puhsak mai ang.

Darkâr li hnuah Farm house kan chhuahsan ta a, Super Care hospital-ah incheck up a remtih loh avangin Bethany Hospital kan pan hmasa ta zawk a, "I naupai hi tlemin a fual deuh a, kâr tharah lokal nawn leh rawh u," tiin doctor in min hrilh.

Insawiselna dang ka neih leh neih lo min zâwt a, Mizorama ka in entîrna hnuhnung ber kha ka keng a, a en vek hnuah damdawi tlem a zawng min chawh belh a, thil hlauhthawnawm em em a awm hran lo chuan ka hria.

Doctor room-a ka awm lai pawhin Jeho chuan min zui lût ve zel a, doctor thusawi a ngaithla ngunin zawhna a zâwt zeuh zeuh bawk a, "I nupui hian rilru hahdam a mamawh a nia," tia a hrilh chuan a lo bu nghut ringawt.

A hnu daihah inkai rialin Police bazar lamah kan tei kual dun ta a, naupuan ṭhuisa leh thil dang kan mamawh tur kan lei nual a, Shirt var leh Jeans pâwl duk pakhat ka thlansak a, "Ka thinlung a dum chuang lova thawmhnaw dum ka inbel pawh chu i va ngaithei lo ve maw le," tiin a nui suk suk a, kan kalpelh a piang te'n min enzui leh zuk zel. 

"Buatsaiha chuan i u a thah thu a sawi chiang ngei tiraw?" Tiin min zawt leh daih a, 'Aw' tih nan ka lo bu nghat.

"Ka rin dan a dik a nih chu, Mawitei nen khan an ṭang duna fiahna ka nei thuai ang, lo lungngai lo la," tih pahin tui bottle min pe a, "Ka hmangaih thu ka hrilh che kha ka ti mai mai lo a nia, Dingngheti pawh hi kan lam ṭang nilovin Samuela Sakawr pakhat zinga mi a ni, Richard hian a la hre chhuak thuai ang," tiin Motor dahna lamah min pheipui a, kan lei tur ang kan inlei zo thawkhat tawh.

"I hmei a ni lo maw?" Ka lo ti vat a, min melh hû chung hian, "Ka nupui raipuar bâk hmeichhe dang ît ka nei lo, ani kha ka kut hmawr pawhin ka tawk lo ve," a ti nghut.

"Ngurthan..." tia min ko ri ka hriat avangin ka hawi kual a, kan piah lawkah Dr.Rinnunga a lo ding ve reng, chîk zet hian min en a, ka hmuh lohna chin a rei ve ta.

"Ani saw biak ka rem ti miah lo a nia, motor-ah lut rawh," a ti hmuk a, Rinnunga pawh be chuang lovin thuawih deuh hian ka lût ve mai a, "Keini pahnih hian paltlang tur tam tak kan la nei a, mipa dang, hmeichhe dang tih velah buai loh tur, inrintawnna chiah kan mamawh," tia a sawi zawh rualin kan tlan chhuak ta a, Buatsaiha khan Jeho ka rinhlelh theih nan Dingngheti chungchâng khatiang khan sawi mah se, dâwt leh thu tak ka thliar thiam ve tlat.

Tlai lam dar li velah farm house kan thleng a, Arun ka hmu hmasa ber. Kan thil lei vel a thiar lut a, Jeho erawh kut hnungsuih chung hian buhpawl dahna in lam hawiin a ding a, a bulah ka va ding ve a, "Helai hmunah hian engtia rei nge kan chên ang?" Tiin ka zâwt chawt.

"Kan dam chhungin.." a ti a, "Sawlad-ah kan kîr dawn lo em ni?" Tia ka zawh leh chuan min hmachhawn zawngin a rawn inher a, "I pasal awmna apiang hi i awmna tur tih ka sawi tawh kha, Sawlad-a i in luah saw kum khat a ral hnuah kan chhuahsan ang," a ti a, ka lo ner nak. 

Nichin lawk aṭang khan a mood a inthlâk daih a, Rinnunga kan hmuh vang ti dawn ila, ka be eih bawk si lo. Biak nawn leh a châkawm loh êm avangin inchhungah ka luhsan ta rih.

Kan thil lei vel ka lo singsak laiin room chhungah a rawn lut a, "Ngurthan, ka awm dan hi a dik tlat lo..." tia a sawi lai mêkin a âwn ruai ruai a, "Jeho.." tih pahin ka va dawm a, khum bul maia ding a nih vangin khumah a tlu thla ta a, ka chelh hneh ngang lo.

"Jeho, Malsawmkim i harh em.." tiin a biangah ka bêng dat dat a, Rishan leh Aryan ka ko chûl bawk, chiang vak lo hian a rawn meng chhuak leh a, a meng â ruai ringawt.

Tui vawtin a biang leh a chalah ka dep nghal mawlh mawlh a, a thâwk dan a pangngai hle bawk si.

Aryan leh Rishan an lo lut a, Aryan hnenah, "I boss hi lo awmpui lawk la, a chal leh a hmai vel kha tui vawtin lo dep char char rawh.." ka ti a, hlauthawnna lutuk ka nei hran lo.

Rishan ka ko hrang a, "Nizanah Jeho zu in laiin khawiah nge i lo awm, nangmah nena kal dun in ni a, thu dik chiah sawi ang che," zawi sapin ka ti a.

"Madam, kei chuan pawnah ka nghak ringawt alawm, inchhungah ka lut ve lo," a ti a, "A nih leh Shisha emaw hmeichhe dang hmuh i nei em?" Ka ti leh a, chal chuang nûng chung hian, "Bamos mikhual hmeichhia chiah kha ka hmu," a ti leh mai.

Chutih lai chuan Aryan an min lo ko a, Rishan kalsanin room-ah ka lut nghal a, Jeho chu a bawkkhup zawnga awmin a lo luak nasa mai. A luak lah chu a rimchhe em em bawk si a, mahse, kei hian ka hria a ni. A in turah damdawi an pawlhsak tih hrilh hranpa ka ngai lo.

Vawiina kan bazar chhung leh ka incheck up chhung zawng te khan hrehawm rêng rêngin a hun a hmang tih a hriat vek a, min tih hlauhthawn a duh loh vanga tuar ṭâng ṭâng a ni tih pawh ka hre mai.

Room chhuahsanin damdawi dahna ka hawng rawk rawk a, ka mamawh ang damdawi pawh pahnih a lo awm ve rân, ka lawm em avangin ka khi sak a.

Jeho mu hlawm reng chu ka jection ta a, Aryan leh Rishan ka bulah an awm ve bawk a, chhuata a luak baw nuai pawh an lo thian fai vek tawh bawk.

"Nizanah khan a zu in turah damdawi an pawlhsak a, nikhua a hriat lohna tur a ni a, mahse, msg min lo thawn hman avangin an duh anga an chêt theih hmain Arun te kha an va thleng hman tihna a nia, Rishan, tun aia kan fimkhur lehzual a ngai dawn aw.." tia ka hrilh chuan a lo bu nghut nghut a, nuam lo a tih hmel hle.

"In va reh ve.." tia hmeichhe ṭawng thawm kan hriat tâkah chuan Aryan a chhuak vat a, Jeho pawh tui taka muhil ang maiin a thaw sâk sâk a, a mar ka khawiha a pangngai viau, a mit ka keu leha a dâng deuh. 

Muthilhna damdawi leh zu inchawhpawlh in hian mut hlum a awl hle, kan Laljeho erawh tukin lamah a luak nasa a, a vannei takzet. Luak danna khan lo jection ta ila, a tan a pawi mai thei. Tuna hetia a awm nachhan pawh hi a tei hah a, a taksain a zo lo a ni ber.

Dingngheti aw ka hre zui zat a, "Madam nen an awma va tibuai duh suh," tia Aryan nen an inbe thawm chu Rishan nen kan ngaithla reng a. "A damlo a nih chuan ka hmuh ve ngei a ngai ang.." Dingnghetin a tih laiin ka chhuak phei ve ta.

Duhdah zetin Sofa-ah a lo ṭhu a, min hmuh veleh, "Jeho chu a damlo tak tak em ni?" A lo ti var a, ngaihtuah tak tak hmel te pawh a pu ve lawi a.

Zawi sap hian, "A zu in tura damdawi i pawlh sak kha a hneh lo deuh a, mahse, a thahna turin ka jection tawh, a rawn harh thuai ang, a thi dawn lo aw.." ka lo ti hmiah. A meng buai nak a, min en hâw chung hian, "Eng thu nge i sawi, kei hian i pasal in turah damdawi ka pawlh a maw?" Thinrim hmai sen ṭân chung hian a ti a. 

"No indawm dun lai pawh ka hmu alawm, Dr.Ngurthantluangi hian ka pasal ka ring tawk a, chin tawk awm lova zu in ching mipa a ni lo, a lak aṭang hian eng nge i duh, engvanga hetiang thil hi ti nge i nih min hrilh rawh, thudik i sawi loh chuan farm house hi i duh hunah i chhuahsan dawn miah lo a nia," ka ti ta a.

A meng kal ralh a, zâm hmel pawh pu chuang lovin, "Amah hi ka duh maw le, Jehomalsawmkima ka duh a ni," zu han tia maw le. 

Ka kut ka hum nghet sauh a, "I duh apiang i nei thei pawh a ni mahna, mahse, Jeho hi bungrua ni lovin mipa a ni, a nupui leh a fa lo la piang tur kalsanin nang hi a vuan hauh lovang che," tiin ka melh râm râm a, a nui hak a, "Kan la hria ang chu.." a ti ve ngat.

"Tunah i chhuak dawn nge, ka theh chhuah tîr zawk dawn che," ka ti chang fak a, a la che duh ṭhak lo.

"I pasal chhuhsak tur che hian Bamos rama ka chan âi hi a tâwk viau a nia, nizanah kan sawi fel tawh. Jehomalsawmkima hian Bamos ram hmun thuma ṭhena hmun khat ka pêk chuan ka hnen a pan tur thu a sawi miau alawm," tiin a nui lui hak a, ka bêng châk a nia.

"Han tum chhin ta poh che.." tih chiah ka sawi.

A ding hliai a, ka dan hman hmain kan nupa room-ah a phei nalh a, ka dang hman ta lo...

He nu hi kan nupa tan a la hnawksak dawn chiang a ni. Mipa chin fel chi a ni lo a, keimah Ngurthantluangi hian ka hnawh bo ngei a ngai dawn e...

Rang lutukin room-ah ka lut ve nghal a, kan nupa khumah Dingngheti a lo ṭhu a, Jeho muhil biang leh hmai vel chu a lo zût kual a, ka sa zak mai.

"Eng thil nge maw i hriat le? Chhuak rawh.." ka ti vin ṭhat.

Ani lah chuan, "Rai puar chêtpui a peih vak lo a ni ang, nizan lamah a duhthawh em mai," tiin min runluih niawm tak hian Jeho sam a chûl a, ka thin tertek a chhuak ve ta.

"Vawi thum ka chhiar tlin hmaa he room hi i chhuahsan lo a nih chuan,'' tih pahin hawi sawk khawp hian a hmaiah ka bêng ta a, ka kut phah a thîp ṭhak.

A mittui a parawl ṭeuh a, a ṭhutna aṭanga rawn ding chhuakin, "Ka chhuak anga ka lokir leh ang, Jehomalsawmkima hi ka ta tur a nih hi," a ti sak sak a, ka lo inhum ruh nasa mai, bêng nawn leh lo turin ka insum nasat a ngai viau.

"I lokir leh tawh lo turah ngai ang aw.." ka ti nghat a.

"I lo thlir reng dawn nia, duhthlang theitu chu nang ni lovin Jeho zawk a ni, nang leh keiah hian a duh zawk a thlang dawn alawm," a ti hmak.

"Kal phawt mai teh," tiin a hnungah ka nam a, ka lo nam na deuh nge a pai dat a, "Ngurthan, eng thil nge i tih?" rawn titu chu Jeho a ni.

Khum lam ka melh vat a, Jeho a lo ṭhu chhuak mek a, Dingngheti en chung hian, "I lokal elaw.. ṭhu ta che," tiin dam thlup hian a bia a, Dingngheti hmel chapo ta larh chu ka hmuh hmaih lo.

Jeho melh chung hian, "Ani hi chhuak turin i hrilh dawn nge, keimah ka chhuak zawk dawn.." ka ti ve ta a.

Jehomalsawmkima a ngawi run a, a hnu deuhah, "Choka lamah lo va phei la, ani hi a fâla biak lawk ka duh," hnial theih miah loh tur hian a ti nghet churh.

Ṭawng miah lo leh anmahni pawh en nawn tawh lovin kan room ka chhuahsan ta a.

210423

B+>[BeckirafARenthleI]<+®®