19.24-89[A Becky Rafa Story]

19.24-89 

Ziaktu: Becky Rafa Renthlei

[Recap]

Khum lam ka melh vat a, Jeho a lo ṭhu chhuak mek a, Dingngheti en chung hian, "I lokal elaw.. ṭhu ta che," tiin dam thlup hian a bia a, Dingngheti hmel chapo ta larh chu ka hmuh hmaih lo.

Jeho melh chung hian, "Ani hi chhuak turin i hrilh dawn nge, keimah ka chhuak zawk dawn.." ka ti ve ta a.

Jehomalsawmkima a ngawi run a, a hnu deuhah, "Choka lamah lo va phei la, ani hi a fâla biak lawk ka duh," hnial theih miah loh tur hian a ti nghet churh.

Ṭawng miah lo leh anmahni pawh en nawn tawh lovin kan room ka chhuahsan ta a.

-B®®

Thinrim ṭûnin choka lamah ka chhuak phei a, ka pum che dat dat chu ka kut pahnihin ka dawm a, ka thin a rim lutuka sawi ngaihna ka hre lo zâwk.

"Ka hmangaih che, de dei dei" a ti a, khatianga a sawi awlsam lutuk kha ka awih lo rêng a ni. Nge, Dingngheti kha hmanruaah a hmang dawn tih hriat va ni suh, ka huat ber zawk chu ani chhuah tîr lova kei min inthiarfihlim tîr lai tak kha a ni. Tlâwm ka inti a, ka chhungril chapona hian a paidam dawn lo tih ka hria.

Rishan leh Arun chuan Gurkha an lo silfai a, step zawh thlain an bulah ka va ding teh ngawt a, tih tur dang thlâwt awm hek lo.

"Madam, i huh vek ang, inchhungah lut leh  rawh," tiin Arun chuan min rawn en a, "Ka peih lo, Aryan khawiah nge?" Tiin ka zâwt zui zat a.

"Khawizu hralh chhuah a hun tawh a, an buaipuiin ka hria," a tih veleh khuai khâwina hmun lam panin ka kal ve ta a, farm house aṭangin a hla lutuk lo. 

Aryan awmna ka thlen rualin ka pan phei nghal vat a, min hmu miah lo hian a thiltih lai a chhunzawm mawlh mawlh a, "Aryan" tia ka koh thut tâkah chuan a phu zawk a, nui suk chung hian, "Madam, helaia lokal tur i ni lo asin, i pasal tih thinrim ka duh tawh miah lo a nia," a ti a, nuam ti chiah lo hmêl a pu deuh.

"En teh, ka thin a rim êm a, i hnena sawi tur ka ni em ka hre lo, mahse, helaiah ṭhian emaw ka lungawi lohna hrilh ve tur pawh nei lovin ka awm a, khawngaih takin min pui rawh." Ka ti ve tawp, Jeho hnathawk zinga lehkha thiam ber leh a nikhua ber a ni a, min duhsaktu a ni bawk.

"Eng thil nge ni ta? Farm chhuahsan leh tlan bo ang chi kha chu ka thei dawn lo a nia," a lo ti nghal a.

"Chulam chu ni lo ve," ka ti leh lawi si.

A ngaihna hriat loh hmel zet hian chîk zâwkin min en a, "Boss a damlo a ni lawm ni, eng nge tihsak theih che ka neih?" Tia min zawh chuan, "A dam tawh a ni ang," tiin Dingngheti lokal chungchang leh Jeho min tih dan, chhuak tura min hnar dan kha ka hrilh ve ta vek a, Aryan ka rinngam vang a ni pakhat.

"Kha nu lakah khan i ringhlel tihna a ni maw?" A ti leh a.

"Chutiang deuh chu a ni, nizan lawkah zu an in dun a, tikhan a damloh phaha kan buaipui nasat tehreng nen, a rawn harh a, a nupui aiin a zu in tura damdawi pawlhtu zawk a thlang a, "Ngurthan, Choka lamah lo va phei rawh," tiin Jeho ṭawng dan ka zir nawn leh kher bawk. 

"I boss lakah ka lungawi lova helai hmun chhuahsan kher hi ka tum dan a ni lo, mahse, ni hnih khat nipui chawlhbûkah sawn ka awm ang a, ei tur min lo pe ru thei ang em, naupai lai ka nih angin ka tan thil ei ṭhat a ngai a, Jeho hnenah ka awmna chin sawi rih lo bawk la," ka ti ta a, ka ruahmanna siam hi tun maia ka ngaihtuah chhuah a ni.

Nipui chawlhbûk hi JK farm-ah a awm nual a, nichina ka kalpelh inah tak kha chuan vawi khat mah ka la lut lo. Khuai khawina hmun aṭanga dinglamah kawng pêng a awm a, chu lai hmun chu Jeho tihtauh san nan a ṭha dawn riauva hriatna ka neih vang a nia.

A dang chawlhbûk fahrah tê tê ah hi chuan ka lût ve nual hlawm tawh a, tuna ka sawi lai hmunah tak hi chuan tumah an awm lo tih ka hria a, ka thinrimna bengdai tur leh inngaihtuah fîm tura inkhung hran ka châk zek zek.

Aryan chuan, "Boss in min hriat chhuah vaih chuan ka dinhmun a nuamsa lo viau ang," a ti sup a, "A hre chhuak lovang, ni rei awm ka tum hleinem, zan khat chauh pawh a ni mai thei, Farm pawnlama min zawn a tum chuan i hre lo der tlat dawn nia," ka la ti zel a, chal chuar nûng chung hian min en leh vung vung a.

Chutah, "Tun ṭum chu ka hnial lovang che, mahse, boss in a hriat chuan min that duh dawn a nia," a ti ta a.

"Khalam kha chu ka kutah dah rawh, Dingngheti a haw ṭêp tawhin ka ring a, chawlhbukah chuan ka lova kal ang e, zanriah in ei fel hunah ka ei tur min lo pêk theih chuan a tâwk mai, a tana ka hlutna hi a hriat chhuah a hun ve tawh," tia tum ruh taka ka ṭawng lai chuan a lo bu nghat nghat a, min pui dawn tih ka hriatna ringawt pawh hian min tilawm tawk em em a ni.

Aryan nen kan inbiak rem hnuah chawlhbûk lamah ka kal ve ta a, min lo hmutu an awm nge awm lo ka hawikual leh tê tê phawt a, kawngkhar nam hawngin ka lut ve ta.

Ka rin ang chiahin a lo nuam reuh hle a, a dai raih mai. Ei in siamna tur awm lo mah se, bathroom zau vak lo a awm thlap a, mutna tur leh tui in tur dahna chenin a awm vek. Mikhual an neih a piangin helai hmunah hian an riah tîr ṭhin tih ka hria.

In tur dahna ka pan a, tui ka inkhawlh khawlh hnuah engthâwl rilru tak hian khumah ka lawn a, ka mu nghal hmak. 

Kan nupa inkârah eng thurûk mah a awm thiang lo tih min hrilh a, a ruahmanna zawng zawng min hrilhfiah vek thei lo a nih pawhin, hmeichhe dang laka a nupui min ti thangtlâwm lutuk kha ka lawm lohna ber a ni.

Chuta kârah Dingngheti bulah zu a in a, mahni insaseng thei lo khawpa rûiin a awm bawk a, nikhaw hre lova a awm laia buaipuitu chu keimah tho a ni. Ka lung a awi thei hlawl lo a ni ber.

Ka lo muhil zui daih chu niin! Tu emaw hian ka darah a rawn sawi dat dat a, ka meng chhuak ve ta a, Aryan a lo ni a, dawhkanah ka ei tur a lo dah diam a, "Thawm bengchheng siam suh aw, pawnlamah sawn nangmah zawngtute an tei reng a nia," tiin a nui suk a, khuma ka mu chu min kai tho a, ka pum a che leh dat dat mai.

"Jeho chuan eng nge a sawi?" Ka ti a.

"Khuai khâwina lamah ka awm daih avangin eng mah min zâwt rih lo, Arun leh Rishan hnenah a zawt a, an motor silna bula i kal thu an sawi a, a bâk an hre bîk lo alawm, tunah tak hi chuan kea i thlen phâkna tura a ngaih Bamos farm-ah a zawng mêk ang che, madam, a awm loh lai hian farm house-ah lêt leh la a ṭha lo maw?" a ti a, lu thing nar nar chung hian, "Zankhat na na na chu ka riah bosan ve ang, rilru hahin min awm tîr zing tawh bawk a, han tâlbuai ve det rawh se," ka ti ta a. A lo nui ve tawp.

"A nih tikhan ka chhuahsan che ang a, i phone i keng si lo tiraw?" Tiin min zawt leh rih, eng mah ka ken loh thu ka hrilh chuan, "Mut dawnah zingkara i lo inthun puarna tur ka rawn dah leh dawn nia, ka bo rei lutuk chuan min ringhlel palh ang," a ti ṭha mai a, ka lo bu nghat nghat.

Aryan ei tur min lo ken chu ka ei fai vek a, tiffin pawh ka awmna hmun an hriata an hmuh nghal mai loh nan khum hnuaiah ka thukru a, ka chêtdan nuihzatthlâk tak hi ka hlimpui phian.

Tukverh aṭangin pawn lam ka thlir a, hnathawkho min zawng niawm taka tei suau suau ka hmuh chuan hmui hup chungin ka nui a, ka hâklai nen chauhva chhuak ka ni si a, JK ram hnaih ber chu Bamos ka tih tawh kha, keia raipuar hi thui tak kein ka kal dawn lo tih Jeho hian hrethiam tur a nia sin le.

Zan dar sawm velah ka inbual a, farm house erawh a la êng iar mai, Jeho thinrim inhrosa vel tur mitthla chungin ka inbual ta a, nuam ka va han ti tak. 

Thil dang tih tur awm thlâwt hek lo, khumah bawk ka lâwn leh a, zinglama ka ei tur Aryan khan lo dah a tum thu a sawi a, tun thlengin a lo la kal lo.

"Ngurthan..." tia min ko thawm ka hriat chuan peih lo zetin ka meng chhuak a, ka blanket sin laia inkhuh ṭhat tumin ka pawt a, ka maimitchhing zui leh nghal daih, vawilehkhatah ka puansin tu emaw hian a rawn pawt hlîm a, ka meng chhuak ta nge nge e.

Jeho thinrim hmel dur khup nen kan inmelh chiang ngei mai. A mit a sen rûm a, kan inhriattirh laia a mit meng hriam zet ang kha a pu leh tawh, hawisawn hmakin bangkil lamah ka tawlh phei a, thaw hawk chung hian, "Min va han tihlauthawng ṭhin ve maw le, nau pai lo la chuan thin hrep tlâk i ni," awki hniam ruiha tiin ka dârah a rawn chelh a, ka la ngawi reng.

"Ngurthantluang, helaiah nuamsa taka i lo muthilh lai khan mutmu pawh tuah lovin kan zawng che tih i hre lovang tiraw?" nelawmna tel miah lo hian a ti leh a, a thin a rim ngang a ni ang, ka dara a vawnna pawh a nghet ṭha charh charh khawp mai.

"Engah nge min zawn, i mu duh a nih chuan farm house-ah kîr leh la va mu rawh, kei chu hetah hian ka mut a tui viau.." ka ti ve sak a, "I rawn lan hma kha chuan mumang bo ṭhakin a nia ka lo mut," ka tih zawm leh a, thinrim tih hriat taka min melh rum úl chung hian, "Khatia ṭawng zet zet lo khan tho vat mai rawh, buaipui ngai renga awm te hi i ning ve lovem ni?" Min ti zâwk mah a, ka lo ter ve at.

"Buaipui ngai zawk chu kei ni lovin nangmah i ni, min buaipui duh tawh reng reng suh, chhuak rawh.." ka ti hlak hlak a, min vawnna thlahin a ding khawng luh a, "He hmun hi ka ta a ni, ka duh duhin ka lutin ka chhuak thei," a ti hmuk a.

"Chuti chu ka ta tia ka sawi ve theihna hmun turah ka kal mai a ngai dawn a va nih hmel ve," tih pahin ka tho chhuak a, ka chevel ngun lutuka min en avangin zâm lo ang taka lan luih ka tum nasa hle.

"Ngawi hmak la min lo zui rawh," a ti nghut a, ka che chhuak duh der lo, khumah ka ṭhu ṭha leh ngat.

"Ngurthan, thil sawi thui vak ka tum lo a nia, min rawn zui dawn nge dawn lo,'' tiin a hawi kual a, chutah min rawn en lehin, "Ka hnathawkte pawh an zahawm tawh lutuk, kan hmuh hma loh che chuan tumah mut loh tur tiin thu ka pe a, min rawn zui ang che," tia a sawi zawh rualin a pên zui nghal a, ka la che chhuak duh ta chuang lo.

Kawngkhar bul a thleng tawh a, ka ṭhut dan ngaia ka la ṭhut reng avangin min nin hmel zet hian, "I luhlul dan em em hi.." tih pahin a rawn lêt leh a, ka lo en lêt ve kar.

"Kei nge chhuak dawn Dingngheti tia ka zawh lai che khan engtin nge min chhân kha? "Choka lamah lo va kal rawh ani hi a fâla biak ka duh i ti tiraw?" ka sawi zawh rualin ka ding chhuak a, kâwng dawm ál chung hian, "I nupui aiin ani kha i dah pawimawh zawk a, i zu in turah damdawi an pawlh a, keiin a thahna turin ka jection che a, chuti chung chuan Dingngheti kha i thlang zawk a ni lawm ni. Jeho, tun ṭum chu i lakah ka lawm lo hle a ni, ka rawn lêt dawn lo," ka ti ve tlat.

Thaw huai chung hian, "Awm tura ka hrilhna hmunah che chuan awm ta mai che," a ti sup a, ka ngaihdan a pêl leh ta.

"A tîr aṭangin nang leh kei hian thuthlun kan nei, englai pawhin thu min pe reng a, i duh duha i kawihher theih ka ni lo, tunah chuan i laka ka rilru puthmang a dang ve tawh, ka rinna che i tichhia a ni e," ka ti ve zel a, a ding ngawi ngul a, engtin mah min chhâng lo. 

Chutia Jeho nen kan lo indinchilh lai chuan, "Madam, ka rawn kal hma thei ngang lo a ni, i ril a ṭâm tawh em?" Tiin Aryan a rawn lang nghal a, keini pahnih min hmuh veleh a ding chawt a, Jeho nen min melh tawn sek bawk.

Jeho a insangmar a, a kut hûm ruh tlat chung hian Aryan dinna lamah a phei a, "Mangang taka ka nupui kan zawn lai khan nang hian a awmna hre reng chungin i zêp vel a maw, in inkârah eng nge awm, sawi rawh.." a ti vin ṭhawt a, Aryan sawi tur hre lova ding ngawi reng kawr âwmah ṭhâmin a hnek ta a, ka lo râk ṭhat.

"Boss..." tia Aryan ṭawng tum chu rum taka melh chungin, "Ka rin apiang te'n min phatsan zel a, nang hi ka ring che asin, ka nupui nen eng inkungkaihna nge in neih sawi vat mai rawh," tih pahin Pistol a phawrh chhuak a, Aryan chaldârah tak a nawr chilh rap a, ka inrawlh a hun ta chiah.

An pahnih dinna lamah ka phei a, Aryan bulah dingin, "Ani hi i tina a nih chuan nang nen kan inzawmna hi i duh emaw duh lo emaw ka ti tawp ang," ka ti ve sak a, Aryan en lovin keimah min rawn melh a, "Ngurthantluang, kalsawn rang mai rawh.." a ti khur khur a, Aryan erawh hlauthawng hmel a pu lo va, ṭawngkam khat mah a chhakchhuak hek lo.

"Nangin chhuak tura min hrilh lai khan eng rilru pu turah nge min ngaih, lawm tak leh thuawih takin ka lo 'umm e' liam mai mai ang maw, i hre sual a ni Jeho, Aryan i ring ngam ang chiah hian ani lo helaiah rin tur dang ka nei lo, i ngam chuan tina rawh," tiin Aryan ding khawng reng chu a inrin hman hmain ka nam vak a, a petek nawk. 

Jeho hamhaih chhung rei lote chu remchângah lain a Pistol ken lai ka chhuhsak thut a, ka beka intin chung hian, "I tih dik loh avanga midangin an tawrh zel lohna turin keimah hian hma kan la ang e," ka ti chang fak a, ka thinrim ve bawk nen ka aw a pangngai lo viau. 

Jeho a rum dut a, chutiang bawkin Aryan pawh.

"Thih hi ka hlau reng reng lo, a tîr aṭang daih tawh khan mitthi nen kan danglamna a awm lo, Aryan kal rawh, i thiam lohna eng mah a awm lo tih kan hrechiang dun alawm," ka ti leh a, Aryan hrehawm ti hmel chu mitmeiin chhuak turin ka hrilh nawn leh a, a boss a melh leh zuk hnuah a chhuak ve ta. Jeho chuan dan buai a tum lo a nih hmel.

"I pawi sawi miah lo thah i châk viau chuan i nupui aṭangin ṭan rawh le, min hmangaih thu i sawi lai khan ka awih lo rêng a ni. I duh neih nan min hmang a, Bamos ram i neih belh theih nan Dingngheti i hnaih bawk a, kal rawh..ani kha va pan rawh," khur dat dat chunga tiin Jeho Pistol chu chhuatah ka paih a, ka mittui a hnai kuar mai.

Eng mah pawh sawi lovin min en ngawt ngawt a, chhuata Pistol tla chu chharin, "I duh ang chu thleng rawh se," tih chiah a sawi a, a chhuak nghal nulh.

Ka sana bun laiin zinglam dar hnih a kâwk tawh a, ka thaw chhuak halh a, tukverh lamah ka va kal leh a, Jeho kal liam tur ka va hmu hman. Rilṭâmin thi dawn mah ila, tun dinhmun atan chuan a bula awm ka duh lo hulhual.

A tûk khua a var a, Aryan leh Arun an lokal teh tlat a, ka inthlâkna tur thawmhnaw min lo kensak chu niin!

"Madam, hetah hian thlamuang takin i chêng thei ang," nui suk chunga tiin ka phone leh thildang ka mamawh tur min pe bawk a, ka hamhaih letling zawk.

"I boss thupek em ni?" Ka lo ti a.

"Aw ni e, mahse, kei hian ka vil reng thei dawn lo che a, Arun hnenah mamawh i neih chuan i sawi zel mai dawn nia aw," dam thluamin a ti a, chhuak tura ka hrilh laia a hmel landan nen a dang hlawk tawh. Jeho khan engtin mah a tizui lo a ni mahna.

Ni a ral a, kâr a liam a, nipui chawlh bûkah pawh tuma chîmbuai lohvin kâr thum zet ka awm ve ta, farm house ah thil danglam eng mah thleng a awm lo a, Jeho nen vawikhat mah kan inhmu nawn tawh hek lo.

Mahse, nitin eitur leh ka mamawh engkim ṭha takin ka dawng char char a, ka naupaiin thlasarih hmel a hmuhna chiah a ni. Jeho thupek a ni nge ni lo pawh ka hre tawh bik lo, tuktin hma takah Aryan nen exer lain kan kal ziah a, Farm house lamah min kalpui ngai miah lo thung.

 Phone takngial pawhin Jeho chuan min be lo, a theih chhung chu biak ka tum lo ve tlat a, ka la phiarna hmanrua kha Arun hnen aṭangin a thar ka dawng a, nitin naute kawr tur ka phiar malh malh zel a, ka pasal ngai mah ila, ngai lo anga lan ka tum ruh ve hle.

Zan lamah pawh mut theih loh em em ka nei lo a, Arun leh Aryan an rawn inriah chhawk a, midang zawng aiin anni pahnih hi ka ngaina a, ka unaupa ang hialin a nia ka en tawh ni.

Ka incheck up ni a nih vangin zingkar hma takah ka inbual a, min hruaitu tur ka hriat bik loh avangin Aryan kutah ka dah deuh tawp. 

"Madam, insiam hma rawh aw, boss in a hruai hman dawn lo che a, Aryan nen in kal a ngai dawn a," tiin Arun chuan ka bawnghnute in tur a thli chhuak a, biscuit leh cake pahnih a chhawp chhuah leh hnuah, "Boss chu Raitong wood farm-ah meeting nei turin a kal dawn," tiin ka zawh pawh ngai lo hian Jeho tih tur a sawi leh zung zung a, hei hi a nitin tih dan a ni.

Chengdun lo mahila kan thil tih ve ve kan inhriat tawnsak vek tho. 

Report tu kan nei ṭha miau a.

Breakfast ka ei lai aṭangin ka pum a nuam lo riai riai a, sawi fak tur awm si lo hian ka ni nghulh bawk.

Arun ka ko a, tu nge hospital-ah min hruai dawn tih ka zawt a, "Rishan nen in kal ka ring, Aryan leh boss an chhuak tawh si a," tia a sawi mêk laiin ka tâi bawr vel a na kal ralh ralh mai.

Ka ding hluai a, "Tunah kal ka duh, Rishan chu va ko rawh," ka ti a, "Motor a lo la lêt lo, Gurkha an keng a, Rishan pawh a kal tel ve rih.." a lo ti si.

"Tunah eng motor nge kan kawl?" Ka la ti hrâm a, Bolero camper chiah a awm thu leh a dang chu an chhuak vek tih a sawi a, ka thaw huai a, ka pum che kual reng chu dawmin, "Arun, Rishan chu call la, hmanhmawh turin hrilh rawh, damdawi inah kan kal ran a ngai," tiin khum lam ka pan a, ka ding ngil hleithei lo.

Mahse, tawrh hrehawm khawpa na pawh a ni chuang lo a, ka ngaih erawh a ṭha zân lo deuh.

Ka phone phawrhin Sangeeta number ka hmet chhuak a, vawi thum zet a ring hnuah a rawn la ve hram. Jeho biak ka la tum ta lo fo.

"Ngurthan, ka duty a..." zangkhai takin a lo ti a, pehhêl nei lovin ka awm dan ka hrilh tlang nghal a, "Tunah lokal dan tur ngaihtuah rang rawh, Anita ka lo hrilh dawn nia," a ti nghal zung zung a, Anita tia a sawi hi Super care hospital-a hmeichhe lam doctor a ni.

Kan inbiak zawh hnuah Arun chuan, "Madam, boss ka hrilh ang aw, Rishan pawh a lo kir mek e.." a lo ti ve thuai a.

Farm house-ah min hruai turin ka ti ta a, a ngaihna a hre lo deuh nge min melh hû ringawt.

"Farm house-ah nau puan leh thil pawimawh lak a ngai a, ka dahna i hre lo ang, eng emaw palh thut thil awm thei a nia," tiin ka hrilh fiah leh a, bu nghut chung hian khuma ka ṭhu chu min kuah tho a, ka pum nuam lo pawh a zia leh ta rih.

Zawi muangin min kalpui a, ka kal muang a ti deuh nge, "Tihian kan thleng hma zawk ang," tiin min pawm nawlh a, "Eng thil nge maw i tih le.." ka ti a, "I hahdam zawk ang," a ti awlsam thên nia. Min pen pui pâwk pâwk a, min zo nawlh nawlh khawp mai. Kâr lovah kan thleng thuai a, kan room thleng zak min pawm lut a, ka pasalin min hmu se a thin a rim leh mai mai ang chu.

Naute puan leh ka mamawh tur bag-a ka dah sa chu Arun ka dah chhuah tîr a, Jeho hrilh turin min lo tir ve sek bawk.

"Meeting nei lai a ni a va tihbuai a ṭha lo, hrilh hlek suh ang che," ka ti a, a ngaihdan a ni vak lo deuh chuan ka hria.

Minute 10 hnu velah Rishan a rawn thleng a, muangchâng tawh lovin hospital lam kan pan ta a, Arun pawhin min ngaihtuah ve deuh a nih ka ring, "Madam..." a ti sup a, sawi zawm tur a hre leh tawp si lo a, lái zet hian a kal kiang ta a.

Dârkar hnih hnuah Super care hospital-a Anita clinic-ah ka mu zar a, Bethany pan a ṭhat rualin Sangeeta hmuh ngei ka duh si a, Jeho phal lohna hmun an hospital-ah ka lut ta tho.

"Doctor i ni ve tho si a, i naupai awm dan dik lote chu hriat ve awm tak, tunah hian kan zai nghal che a ngai dawn," a ti ta mai.

"Maw, ka neih a la hun hleinem i hriat vek kha.." ka lo ti a, "Thlasariha zai chhuah te chu an tam lutuk, ultrasound-a a landanah chuan i naute kut dah dan hi a dik lo a, hetiang hi 'hand prolapse' tiin kan sawi ṭhin." A tih tâkah chuan ka hrethiam ve nghal mai a.

A hnu leha thil thleng chu sawi thui vak tur a awm lo. Rishan bâk hruaitu tur ka nei lo a, Jeho hrilh ve turin ka ti nge nge a, dârkâr khat hnuah Emergency-a zai tur ka ni. 

Hlauhthawn ngaihna ka hre lo a, ka u ka hrechhuak vang vang mai, helaiah hmangaihtu awm lohna hmunah mahni tâl tâlin ka la awm ve nawk nawk a, lungngaih ngaihna pawh ka hre tawh lo a ni ber.

Thlasariha nau zai chhuah chu kei pawhin ka hre fo a, naute a ṭhat phawt chuan hlauhthawnawmah ka ngai lem lo.

"Madam, boss hian phone a pick up thei tlat lo, an laklawh deuh a ni ang," tiin khum bulah Rishan a rawn kal a, "A lo call-back mai ang che," ka tih chuan, a bu nghut ringawt.

Sangeeta a rawn lang zui ve nghal a, min hmuh veleh, "Naute ṭha taka an zai chhuah theih nan duhsakna ka hlan a che, hlauthawng lo la aw.." tiin ka samah a rawn chul a, "Ka harh hma chu ka bulah i lo awm thei ang em?" tiin ka pasalin meeting a neih thu leh Rishan chiah awmpuitu ka neih thu ka sawi a, "Aw le, aw le.." tia nui sâng chungin Anita rawn lût mek chu a be nghal a, ka thin phu dap dap tih reh tumin thâwk ka lo la thul, ka zâm lo ka tih chuan dâwt ka sawi tihna. Ka zâm ru takzet.

Surgeon ka nih angin engkim mi zai dan leh a kal hmang ka hre ve vek si a, rilru nuama awm a har phian.

Ka ke a mu churh churh a, dah sawn ka tum a, a rit churh, men chhuah ka tuma ka mit vun a chhah rit lûk a, ṭawng thawm ri nak nak ka hre nain an sawi ber erawh ka hre thei lo thung.

Ka harh fîm tial tial a, ka lo thawh tawhna damdawi inah min zai tih ka hrechhuak leh ta, "Mipa a ni e, a ṭha reuh khawp mai," tia hmeichhe ṭawng ri chu Sangeeta aw niin ka hria.

Ka nau neih huna min awmpui turin Vansangkimi kha kan be lawk kha a ni a, inrin lâwkna pawh awm hman miah lovin ti hi ka ni ta si a, ngaihsak tu mumal nei lova hetiang dinhmuna ka ding hi ka rilru a na ru tlat. Jeho nen kan inkâr a ṭha tâwk lo a, a driver Rishan Songbet nen hospital-ah kan awm tlawng a nia, ka inkhawngaih lutuk tlat.

Ka lo muhil leh a ni ang, ka harh leh chuan fel fai takin ka meng chhuak a, ka ke pawh ka ti che thei ta. Naute mutna bâwm bula ṭhu chu tudang ni lovin ka pasal Jeho a ni. Ka harh tih a hre lo a ni ka ring, ngun deuh hian naute a bih a, a hmel a pawr fap mai.

Min zai dawn lai tak tak leh a behbawm dang ka tarlang thui lo mai aw, ka hriatna a tâwi turh a, sawi thui teh vak tur ka hre lo atin ni.

Ka dang a ro huam a, tui in phalsak ka la ni dawn lo tih pawh ka hriat hnu tho a ni. Fapa ka nei tih ka mang hriat ruai a, thawm ka lo nei deuh a ni maithei Jeho a lo dâk chhuak a, khum lam a rawn melh nghal vat.

Ka harh tih a hriat rualin a ding chhuak hluai a, ka mita en tlat chungin khum lamah  a lo phei a, "Ka tihpalh..hrehawmna dang ka siam belh leh ta che a ni tiraw?" Ti supin a rawn kun hniam a, ka chal leh a hmui a sîktîr vang vang hnuah, "Mipa nêp ber chu ka lo ni e, ka nupuiin zaipui a tawrh lai pawhin a kiangah ka awm thei lo a nia, min ngaidam miah suh," tih pahin Venflon ka vuah lohna lam ka kut a rawn hûm a, ka ṭawng lo hrim hrim.

"Ngurthan, Mate...eng emaw tal sawi ve rawh," inthiam lo lutuk tih hriat ngawih ngawih hian a meng hnuai ruih a, ka chhungril chuan hnem a duh. Mahse,  a sawi angin a tel lova ka tawrhna zozai khan ka rilru a ti chawlawl si. 

"Jeho, ka tawrh tur ang te, ka paltlang ang tur zawng zawng tunah hian ka kal pêl mek a ni, i duh lam kawng zawh turin dikna i nei a, kan inneih dan dik tak hretu ve ve kan ni, tunah chuan i lakah sawi tur ka nei lo," zawi sapin ka ti a.

Khatia Dingngheti zawk awm tura a tih hnu leh nipui chawlhbûka kâr tam ka awm lai khan nitin min ngaihsak tura a lokal ka ring ṭhin. Ka mamawh eng pawh min pe mah se, amah ka pasal Jehomalsawmkima ngei hi ka mamawh a ni tih inhre lovin ngawhngawl a chhuah a, kan inkâr hla ta duai pawh hi ka thiam loh nilovin ama thiam loh liau liau a ni.

Kan fapa a ṭah tâk avangin a inher vut a, rang fahran hian naute mutna lam a pan a, khawr zeta rawn pawm chhuakin, "A ril a ṭâm a nih ka ring," tih pahin ka mutna lamah a rawn pawm phei a, tun hi ka fapa hmel ka hmuh hmasakna ber tur a ni.

A tê reuh hle a, a kim ve biai bawk si.

A sam dum hlap chu ka chûl a, ka mittui a hnâm sak mai. A hun hmaa piang a nih angin a lan dan a dang ve deuh a, a hmelṭha tia sawi vul chûk theih niin ka hre lo.

"Ka nu leh Tleipuii pawh an lo thleng ṭêp ang, an lakah ṭhat chhuah kher a ngai lo a nia," a ti sup a.

"Vansangi i hrilh tawh em?" Tia ka zawh chuan, kawngah a rawn thang mêk thu leh Raguel hruai lova a lokal thu a sawi leh a, Tleipuii te nufa chu rawn lang lo mah se pawi ka ti chai lo.

"Cabin-ah ka sawn tîr che a nih kha, ka tihsak ve theih chhun che chu nang leh ka fapa hian enkawlna ṭha ber in dawn theih nan hma ka la ang," a ti sup a, "Khawi hmunah pawh awm ila, ka vui lo," ka lo ti nghat.

"Nurse va ko rawh, a ril a ṭâm a nih hi.." ka ti leh daih a, îhe lovin a chhuak nulh a, hnute tui ka nei lo nge ka hnute a ṭang eih lo reng reng, ka harh hmain hnute tui siam chawp an lo pe a nih ka ring.

Jeho leh nurse an lo lut a, ka fapa hnute a pe lai chu ngun deuh hian ka en a, Jeho pawh chuti tho.

Nichin khan a ṭap ve tak naa a ṭap rei lo hlauh.

Jeho melh chung hian, "Sawlad-ah let la va intifai rawh, i chhe pawr lutuk," ka ti hlak a, ṭhen suk chung hian, "Ka nupui pawh a mawi mâm bik chuang hleinem, i hmel i hmu lo a nih kha," a ti ve zat a, ka landan nalh loh tur zia ka hrethiam chiah.

Ka fapa a muthilh thleng Jeho a bulah a ṭhu reng a, min be tawh chuang lo hian ngun taka thil ngaihtuah hmel a pu.

Ka chauh ve deuh avangin ka lo chhing leh sek a, "Mama, a tê reuh hle mai, Zonunthara pian hlim aiin a tê daih zawk a nih hi.." tia Tleipuii ṭawng ri ka hriat chuan ka meng chhuak a, keimah min ngaihven lovin a nu nen ka fapa hlir an ngaihven. 

"Ngurthani chungah ṭhat chhuah ang che u, a hmaa kan boruak ṭha lo ang kha neih ka duh tawh miah lo a nia, Tleipui, nang pawh, i u nupui a nih angin zah la, i zah der thei dawn lo a nih chuan kan hnaihah rawn awm suh ang che u, Samuel leh Buatsaiha hi ka ngaidam dawn rêng rêng lo a nia," tia Jeho a ṭawng mawlh mawlh lai chuan doctor Anita a rawn lut a.

"Mr.Jeho, ka lawmpui a che, i nupui leh i fapa duat aia thil pawimawh a awm miah lo a nia, staff te tan chaw ei khawm i buatsaih kan lo beisei ang," tia tlangnel taka ka pasal a biak hnuah khum lam a rawn pan a, "I lo harh tawh maw?" Tia nui var var chung hian min zaina hliam bul vel a check a, ka ṭhat thu ka lo hrilh ve mai.

"Kâr khat vel chu hospital-ah in awm a ngai dawn a, i hriat vek kha.." tiin Tleipuii leh a nu a melh a, "Hnute tui siam tam thei tur ei leh in tur in lo ngaihtuah sak dawn nia," tiin a hrilh a, anni pahnih pawh an lo bu nghat nghat a, kan boruak ṭha lo tilang zâwnga an awm lo hi an finna a ni.

Mahse, ka harh tih an hriat pawhin min be lumlam lova kei pawhin biak hmasak tumna ka nei bik lo.

Aryan leh Rishan an lo lut a, naute an bih ve ngial a, Aryan zawk chuan, "Madam, trainer ṭha lutuk ka nia, mipa fa i neih loh ka hlau teh asin," tiin a nui suk suk a, Rishan leh Jeho an ṭhu dun a, "Zanin chu hetah ka riak ang, Sawlad-a kan in ah khan ka inthlâkna tur min va lak ta che u, ka farnu Jorhata mi a lokal a, a lo thlen laia awm ka duh si a, farm lamah ka lêt lo mai ang," tia a hrilh zung zung lai chuan ka phone a rawn ri mial.

Aryan chuan min lo pe vat a, number lâwng ringawt.

Ka pick up ve ta tho a.

"Ngurthan, Jehomalsawmkima lak aṭanga i inthiarfihlim lo a nih chuan i nunna mai ni lo i fapa nunna khan a tuar ang," tia min lo vautu aw chu hrilh nawn ngai lovin Dingngheti a ni. Jeho ka va melh zeuh a, min lo en ve reng.

"Jeho be rawh.." tih chiah ka sawi a, phone ka off hmak.

Rum deuhin Jehomalsawmkima ka va melh teh ngawt a, Bamos ram neih ṭhen a duh vangin Dingngheti hi a hnaih lui a ni ngei ang, chuti ni lo se khatianga min lo vauna chhan tur kha a awm lo rêng rêng, kan awm hran lai khan an lo in 'chu e kha' viau te pawh a ni mahna.

"Thil dik lo a awm em ni?" Tiin Jeho chuan ka mutna lam a rawn pan a, melh râm râm pah hian, "I bialnu maw le, ka hlatsan theih nan che eng emaw a rawn sawi a nih kha, i va biak ngei ka beisei.." ka lo ti hmak.

Khatiang invauna satliah kha ka hlauh a ring reng reng em mawni.

"Atu chu maw ka biak ang," a ti vei hluk a.

"I hmeinu Dingngheti.." ka ti hmiah.

"Ngurthan, thu lawi lo mai mai sawi rual i ni tawh lo," a ti tak naa a ngaih a ṭhat hmel zân loh.

"Ka fiamthu emaw i ti ang e," tiin Dingngheti rawn sawi dan ang chiah kha ka hrilh chhawng ve ngat, a ner suk ringawt.

"Kan nufa nunna derthawnga a awm ai chuan ani kha pan rawh, damdawi in kan chhuahsan hunah Mizoram kan pan ang," ka ti sap a, "Muhil rawh, i muthilh khan a zia ber," a'n tiah. Ka ngei a nia.

Rishan leh Aryan chuan Jeho thupek angin a inthlâkna tur an rawn dah a, rei pawh awm lo hian an chhuak leh nghal.

Ka muhila ka harh leh a, chutiang deuh hlir chuan ka awm zankhua a ni deuhthaw. Jehomalsawmkima'n a fapa a buaipui tlaivar ṭhak a, khawvar hlim teah Vansangkimi a rawn thleng ta bawk a, ka thaw huai huai mai.

"An zai lai chein awm thei lo mahila ka sawi tawh ang kha tihhlawhtlin ngei ka tum," tiin a nui var var a, naute pawh a pawm nghal a, "A hming tur ka phuah dawn, Mama ka hrilh vek tawh," tiin a u a melh a, a lo nui suk ringawt.

"A nîin phuah i tum tlat te chuan kan hnial ngam nâng," ka lo ti ve a.

Jeho farnu duat Vansangkimi chuan a vahpa hming atan Lalngurmuana tih hming a sa ta a, a mawi ka ti hle, sawi buai nei miah lovin ka pawm hmak.

Jeho pawhin a sawi nawi bik miah lo a, ka hming tlem a tel ve a, ka lung a awi em em zawk a ni.

A farnu a lo thlen tâk avangin Jeho pawhin JK lamah haw zuai a tum thu a sawi a, tun hi nithum damdawi ina kan awmna a ni ta.

"Nurse leh doctor an lokal dawn a nih loh chuan Cabin kawngkhar hi chhunglamah kalh tlat zel ang che u, duty ka lo hrilh dawn nia," tiin a nau a chah thlap.

"Hospital em emah te chuan tibuaitu kan nei dawn em ni?" Vansangin a lo ti a, "Fimkhur em em tur a ni mai," tih pahin ka chalah a fawp a, "Min huatna thinlung kha paih tawh la, i fapa Lalngurmuana pa ka nihna angin min en rawh," ka beng bulah a ti sup a, ka tûm nghal hmak.

Jeho chhuah hnuah ka lo muhil leh hlek a, Vansangi a awm vangin ka ngaih a ngam sawt. Jeho âi thlâwt chuan nau khawih a zei zawk a, ka ring tawk hle.

Nilêng deuhthawin Vansangi nen kan inkawma, Bartho nen an inzui lai leh an inneih hlim te nui ar ar chung hian a sawi a, ka hlimpui hle.

Dar thum a ri vel chiah tihah Cabin kawngkhar an rawn kik a, nurse duty a nih thu a sawi a, Vansangi a tho chhuak vat a, kawngkhar kalhna a va hawng ta a.

Nurse chu a lo ni ngei e. Mahse, a hnungah mipakhat a rawn kal tel a, ka hmuh hnu a ni lo, a hmel ṭha ver vawr khawp mai.

Damdawi min pêk zawh hnuah, "Tlawhtu che u in nei a, ka rawn hruai lut mai," tia nui sâng chung hian kawngkhar bula la ding reng mipa chu a melh a, "Mr.Omar, tikhan lo inkawm rawh u aw.." tih leh chhuah a rual a, 'Omar' tia a sawi pa chu ka vawikhat hmuhna a ni a, Bamos lam mikhual kha a ni thei ang em?

Hlauhthawnna rilru ka pu thut a, "Jeho awm hunah lokal mai ta che, tunah chuan a awm lova," tiin dam thlap hian ka bia a.

Ṭhen suk chung hian, "Jehomalsawmkima hmu duh ni ila, Jk farm-ah ka kal ang chu, tunah chuan naute thar hmu tura lokal ka ni," tih leh Vansangi ṭhutna lam pan a rual a, ka fapa hnute a pe mêk a, a rawn inrawlh ve lem lo.

Chutah zawi hniam set sawt hian, "Vauna i dawng tawh a, ngaihthah tur i ni lo asin," tih pahin rang zet hian Pistol a phawrh a, a dinglamin Vansangi lu ah a tin a, vei lamin kei min tin thung.

A reh duk a, ka thaw halh a, ka âwm dawm chung hian Vansangkimi hlauthawng hmel buai nak chu ka melh a, tho chhuak tur pawhin ka chak tâwk rih si lo.

"Tu nge i nih?" Ka ti ṭha leh hnuhnawh.

"Omar ka ni lo aw...ka hming i hriat a ṭul lo," ti sup chung hian rum takin min rawn melh a, a mitmeng hriam fahran chu hlau duh lovin ka lo melh let ve ngar thung.

Hospital-ah Pistol a hmet puak a nih chuan rang takin an man ngei ang. Ka thil ngaihtuah avang chuan ka thla a muang huai a, biak khawtlai dan tur ka dap ru nghal char char.

Ni e, invauna te, inrikrâpna te hian min kiansan thei tak tak dawn lo a, chuvang chuan fîm kara engkim ka ngaihtuah a ngai ṭhin rêng a ni.

240423

B+>[BeckirafARenthleI]<+®®