20.24-89 [A Becky Rafa Story]

20.24-89 

Ziaktu: Becky Rafa Renthlei

[Recap]

Chutah zawi hniam set sawt hian, "Vauna i dawng tawh a, ngaihthah tur i ni lo asin," tih pahin rang zet hian Pistol a phawrh a, a dinglamin Vansangi lu ah a tin a, vei lamin kei min tin thung.

A reh duk a, ka thaw halh a, ka âwm dawm chung hian Vansangkimi hlauthawng hmel buai nak chu ka melh a, tho chhuak tur pawhin ka chak tâwk rih si lo.

"Tu nge i nih?" Ka ti ṭha leh hnuhnawh.

"Omar ka ni lo aw...ka hming i hriat a ṭul lo," ti sup chung hian rum takin min rawn melh a, a mitmeng hriam fahran chu hlau duh lovin ka lo melh let ve ngar thung.

Hospital-ah Pistol a hmet puak a nih chuan rang takin an man ngei ang. Ka thil ngaihtuah avang chuan ka thla a muang huai a, biak khawtlai dan tur ka dap ru nghal char char.

Ni e, invauna te, inrikrâpna te hian min kiansan thei tak tak dawn lo a, chuvang chuan fîm kara engkim ka ngaihtuah a ngai ṭhin rêng a ni.

-B®®

Pistol-a min tin rengtu mipa chuan Omar tih hming pu ni-a insawiin Cabin chhungah nurse a rawn zui lut a, a khabe hmul sei zet leh a mitmu lian lam dum tak zet te chu chîk leh uluk zet hian ka en a, Vansangi chuan ka fapa a kuah rân a, a che ngam tawh lo hrim hrim.

Hlau anga lang duh miah lo hian, "Min kah hlum i duh a maw, ti ta che, he hospital chhung i chhuahsan hmain an man tho ang che, kan lak aṭang hian eng nge i duh?" dam leh zawi raihin ka ti ta a, min melh rûn rûn chung hian, "I pasalin khawiah nge JK ram MAP original a dah, i hriatpui tih Barua hnen aṭangin kan hre tawh a nia, i nunna chhanhimtu Barua kha tunah kan kutah a awm," a tih tâkah chuan a thusawi awmzia ka hre fiah ve chiah.

"Ram MAP awmna i hriat duh chuan ka pasal zâwt rawh, ka kut hmawr pawhin kha thil kha ka la khawih chhin lo, i awih loh chuan i thu a ni mai," tiin ṭhut chhuah ka tum a, min zaina lai a thîp zawk mai. Ka ner sak a, chu pa chuan, "Hliam dang neih belh i duh loh chuan che hlek suh," a ti leh khur khur a, ka che zui ngam ta rih lo.

Ka fapa a rawn ṭap a, chu veleh Pistol a keng hniam a, che sawn chuang lo hian, "Naute ṭap kha tibâng rawh u," a ti hmuk a, Vansangi chuan hnute a siam nghal a, ka fapa Lalngurmuana lah chu a ṭap nasa tulh tulh mai si. 

Cabin kawngkhar ka va melh zeuh a, a inkalh lo tih ka va hmu a, nurse emaw doctor  pawh, â.. tu emaw tal lo lut hrâm se ka va han ti tak. 

Vansangi leh ka fapa an inbuaipui lai chuan chu pa chu ka mutna khum bulah a rawn kal hnai a, "I pasal lo zâwt chhuak ang che, tun hi min hmuh tawpna tur a la ni dawn lo a nia," a ti sup a, a kut veilamin ka biang a chûl a, "I hmelṭha hle mai," tih pahin ka khabe leh mitko a chûl kual a, a kut ka vai per sak lawp a, a mitmenga thinurna lang chhuak chung hian ka hrawkah a rawn rêk ta a.

"Thi turin inpeih rawh," a ti zawi ruih a, chutih lai tak chuan kawngkhar a rawn inhawng a, ka hmu ru reng; ka pasal Jehomalsawmkima a rawn lut ta a. 

Thawm dim takin kan awmna lamah a rawn pen phei a, a mitmeiin che lo turin min hrilh bawk, min rêktupa chuan Jeho thawm a hre lo a ni teh chêk ang chu, "I pasal awm lohna hmun apiangah kei hi min hmu zêl tawh ang," tia a sawi zawh rualin Jeho a che chhuak ta.

Chu pa tukkhumah Pistol-a chuktuah a, "A pasal Jehomalsawmkima chu ka lo thleng e," a ti thûm chhak a, chu pa chuan ka nghâwng aṭangin a kut a lasawn a, Jeho nen an inhmachhawn ta siah.

Ka pasal mitmeng ṭo hâw tur ang maia dur khup chu a râpawm zawk, a inseh ruh tlat bawk. Amah hrechiang hle lo ila chuan ka hlau ngawt ang, tualthah a hreh dawn reng reng lo tih pawh a hriat vek. Tun hmaa a zia kha a rawn lang ṭan ka ti mai.

"Ka nupui hi a melh pawh i melh thiang lo, a taksa i lo khawihna i kut bawlhhlawh zet kha ka tan chhum hmain i hming sawi la, helaia rawn tîrtu che hi sawi bawk rawh," thinrim vanga sehchilh nawk chung hian a ti a, "Naute, ani ka buaipui chhung hian security lo va ko rawh," tiin a farnu a be leh a.

Chu pa chuan chêt zâi a rêl lo, Jeho lahin a bânah nghet zetin a hmer a, a awmna hmunah hian tâl chhuah theih a inbeisei lo a nih ka ring, ṭawng miah lo hian a ding ngawi ngur a, a hmai a sen awp awp bawk. 

"Ngurthan, Rishan call rawh le, pawnah a awm ang," tia a sawi zawh hnuah chu pa chu kawngkhar lamah a nawr kal dawt dawt a, "I nihna dik tak ka hriat hma loh chuan Police kutah ka dah dawn lo che a nia," tiin kawngka biangah chu pa chal chu a tauh tîr dawt a, a rîk danah a na thawkhat ang tih a hriat mai.

Rishan ka call hnuah Vansangi leh Security pahnih an rawn lût ve bawk a, "Kan hospital leh kan Cabin-a hetiang mihring rawn luh tîrtu hi rang takin zawng chhuak rawh u," a ti nghut a, Jeho chu ka rin âiin a la insûm thei tlat, kan mit hmuha kut thlâk a duh lo pawh a ni zawk mai thei. 

Security te'n chu pa an hruai chhuah dawn lai chuan Rishan leh Arun an lo lût a, rang takin Jeho chuan, "JK farm-ah ani kha hruai ula, na lua awm lovin helaia amah rawn tîrtu a sawi chhuah hma loh leh a hming dik tak a sawi hma chuan dâwpin sawisa rawh u, Barua awmna zâwt chhuak bawk ula, dîm hlek suh u," tiin a nau te pahnih a hrilh ta a.

Rishan leh Arun chuan kan misuala chu an chhawm chhuak a, a hmelṭhat tehlul nen a khawsak dan erawh a ṭhing hle si. Dingngheti te lam mi leh sa nge a nih a, Samuel Pamei ṭhuihhruai zawk tih hriat a châkawm kher mai.

Zanriah pawh kan la ei lo a, Vansangi hmel a dâng lap a, ngai a awh hleithei lo, a û melh chung hian, "Mama, hetiang nun râlmuang lo lutuka u Ngurthani te nufa an awm hi ka remti tawh lo, kan hnenah awm mai rawh se, i fapa ṭhanlen nân Jk farm hi a him tâwk lo a nih hi," ngaihdan ni lo tih hriat tak hian a rawn ṭawng chhuak ve hlawl a.

Jeho chuan keimah min en a, "A tina che em?" Tia min zawhna chu, "Na lo e, mahse, hlauhthawnnain ka khat thung," ka lo ti sap a.

"Naute, engtik thleng nge i châm theih ang? Hospital-a an awm chhung hi chu i châm ve thei ang tiraw?" Tiin a nau a zawt a, "Raguel kalsan a lokal ka ni a, kârkhat aia rei chu ka awm thei bîk lovang, Mama, ka thil sawi kha lo ngaihtuah ngun rawh aw," a ti nawn leh  ta.

"Kan la ngaihtuah dawn nia, ka nupui leh ka fapa te hi khawi hmunah pawh awm se, kan buaina kal mêk chinfel a nih loh chuan ka khingphel an ni tlat si a, an pumpelh chuang lovang, chuvangin, ka venhim phâka an awm a ngai zawk a ni, hriatthiam tum rawh u," nghet churha tiin kawngkhar an rawn kik tâk avangin lût turin a hrilh leh rih.

Tiffin khâi chungin Tleipuii a lo lut a, Vansangi a hmuh chuan a ner sak a, "I lo thleng tawh tih ka hre lo a," tiin ṭha tak hian a be tho a, thil tuiril lam tlem tlem ei phalsak ka ni a, hnute tui tamna tur Tleipuii chuan a rawn keng ve mial a, Jeho lam hawiin, "Mama, ka nuin naute a la têt deuh lai hi chuan inpuiah lo awm rih rawh se a ti a," tiin keimah min melh zauh a, ka lo ngawi reng.

Jeho chuan, "Farm hause ah kan awm ang, hmun danga awm buangbar kan tum lo, hmannia i pasal Buatsaiha chêt dan kha i lo hria em?" Tia Tleipuii a zawh chuan, " Eng mah ka hre lo," tiin a lo chhâng a. 

Jeho bawk chuan, Farm house-a Buatsaiha lokal thu leh kei min tihdan te, Aryan nen an insual thu pawh a hrilh vek a, "I pasal lakah hian innghat lutuk suh, ka la chhui bâng lo a nia, i u hian thil tisualtu chu hrem lohvin ka chhuah ngai lo tih i hriat kha," a ti hmiah a, Tleipuii nuam lo ti hmel chu a khawngaih thlâk zawk.

Vansangi leh Jeho chuan zanriah an ei a, Tleipuiin ka fapa a pawm thung a, "U Ngurthan, dârkâr nga an up hnua an lo dah chhuah khan a ṭap nasa lutuka i la harh si loa ka mangan hman zia chu," a ti ve niah niah a, Lalngurmuana an up tih Jeho khan a sawi ri miah lo a, amah ka fapa ber a ṭhat chuan sawi ngâiah a dah lo te pawh a ni mahna.

"Tleipui, i vahpa hming kha a mâwi a nia," ka lo tih chuan, min en hâ chung hian, "Ka nuin phuah a tum asin," a ti ta.

Ngaihsam awkâ zet hian, "A nî pakhat zawkin a hming a phuah fel diam tawh, Lalngurmuana a ni e," tia ka hrilh veleh, "A mawi hle tak mai," a ti ve ngial. 

Tleipuii haw turin a insiam a, engin nge a lokal tih ka zâwt miah lo a, Jeho awm loh lai chuhin, "Vansang, Tleipuii kha va enzui lawk teh tuin nge hetah rawn hruai tih hriat va tum rawh," ka ti a, thuawih deuh hian a kal ve mai. 

Ṭhat chhuah der viau mah se, kan laka an ṭhat poh leh hlauhawm a hnai tih hrethiam turin ka thluak a fing ṭan tawh, ka pasal ang hian chîk takin engkim ka thlithlai ve zel tawh dawn.

A hnu deuhah Vansangi a rawn lut a, "Buatsaiha nen an lokal.." a ti ta a, ka rin dan tâwk vel a ni, a pasal thil tih dik loh târlan a nih hunah a na dâwn lutuka a khawngaihthlâk lâwk ka ti.

Jeho te unauin min riahpui a, extra bed-ah Vansangi a mu a, "Ka nupui bulah lo chuan mut ka tum tawh miah lo," Tia Jeho a ṭawng laiin a farnu a nui hak a, "Ka bula mut a rem lo, ṭhutthlengah mu rawh," ka lo ti nghauh a.

Nui huk chung hian, "Engtin mah ka ti dawn hleinem che, ka tel lo hian tlei viau zel suh, hun thawl tam tak ka siam tawh che a, Jehomalsawmkima i hua a nih pawhin sawi theih ka nei lo, mahse, Lalngurmuana pa hi chu i haw tur a ni lo a nia, khum khata kan mut lohna chhan tur lah ka hre hek lo," tia a sawi zawh rualin khumah a rawn lawn nghal a, "I ṭawng thei zet zut," ka lo ti hlak.

"Tu emaw ka chhun pawh a ni mahna," a la ti hrâm.

Eng ang pawhin hnial mah ila, a tum a ṭhulh dawn chuang lo tih hriat sa a ni. Khum kil lamah ka tawlh phei a, ani a sîr têah a mu bawk a, ka sama chûl pahin, "Thlakhat dawn ka tel lovin i khawsa tawh a, i pasal kiangah zel i mu tawh ang," a ti sup a, "Farm house-a kan lêt hunah pawh nipui chawlhbûkah tho khan ka awm leh ang," tiin ka runluih ve sak a, a ner suk a, "I mumang a nih chu," a ti duh lek.

Min zai aṭanga kârkhat leh nikhatnaah chiah Super Care hospital kan chhuahsan ta a, kei pawh ka ṭha sâwt viau. Hnute tui tih tham ka nei lo hi kan buaina a ni a, 'Nan' kan la pe zui zel a, "Indim hle ang che, indim loh avanga side effect awm thei chu kei aiin i hrechiang zâwk turah ngai ang," tia Dr.Anita a ṭawng mawlh mawlh laiin keima ṭhiannu em em Dr.Sangeeta Kar leh he hospital-a ka thawh laia kan team leader ni ṭhin Dr.Pankaj Jain chu an lokal a. Min thlah ve tura lokal an ni.

Pankaj zawk chuan, "Fapa i neia ka lawmpui a che, hun han kal deuh se, hetah i lo thawh theih nan i pasal rilru hneh ka lo tum ang, nang anga Surgeon ṭha hi kan mamawh a nia," nui var var chungin a ti ve ngei.

Sangeeta pawhin Farm house-ah min rawn tlawh tur thu a sawi a, Vansangi nen pawh an inbe thei viau.

Min hruai chhuak turin Jeho a lokal a, a driver Rishan hmel ka zawng ru deuha ka hmuh mai loh avangin ka zâwt chawt a, "Barua hruai chhuak turin an kal tawh, Aryan te unau leh Rishan bâkah Sameer pawh ka kal tel tîr alawm," tiin min hrilh ṭha mai.

Gurkha front seat-ah ka ṭhu lût a, a hnungah Vansangi ka fapa pawm chungin a ṭhu a, ani pawh zanin bâk a lo riak thei dawn tawh lo a, naktuk zing hma takah Jorhat-ah lêt a tum tih a sawi. Jeho chuan motor a khalh a, Umiam kan thlen hma loh chuan ṭawngkam khat mah a chhâkchhuak lo teh tlat, Vansangi nen zawk kan ṭawng kawngtluan a, a lo ngawi ngul ringawt. 

"Barua awmna in hre tawh tihna em ni?" Tia Jeho ka zawh chuan, min melh zawk chung hian, "Wood stock farm-a an pindan pakhatah kalh khum a nih thu a sawi ta nge nge alawm, Cabin-a rawn luhchilh tu che u kha Lalit Kumar a ni a, tu hnuaia thawk nge kan la hre thei lo a, a sawi duh tlat lo, Barua awmna a sawi a, a bâk chu chuti hlauh, Aryan pawh a beidawng viau a ni awm e, keimah ngei hian dâwp chhuah ka tum," tiin a sawi fiah duah.

"JK leh Bamos ramri chu inteh fel tawh em?" Tiin ka zawt leh a, "A thui tham a, vawilehkhata tih nghal zung zung theih a ni lo, tunkar chho hian an teh bâk zawng an chhunzawm leh ang," tia min hrilh mek laiin Raitong woodstock farm kan thleng a, kawngpui zau lai takah Aryan chu Bike chungah a lo ṭhu a, min lo châng a nih ka ring.

Jeho chuan motor a tiding dawt a, Bike aṭangin Aryan a rawn chhuk a, driver seat lamah pheiin a boss hnenah, "Barua chu an lo sawisa nasa khawp mai, tunah hian hospital kan panpui dawn a, 'Khatam' hmunah khan Lalit chu kan dah aw," tiin a hrilh a.

"Khatam" tia an sawi hi JK Farm-a misual an man an dahna hmun a ni a, a chhung ka la hmu lo nain farm house aṭanga km1 vela hlaah a awm tih ka hria a, in lian vak lo leh phui mup mai a ni a, a nelawm viau loh. Heta an khunga an dâwp zawh hnuah a ṭhente chu Police kutah an pe a, thah a mual mual pawh an neih ka ring tho. Tlanchhuah theih loh tluk a ni e.

Aryan leh Jeho an inbiak zawh hnuah kan tlan chhuak leh ta a, ka sawi hmaih miah loh tur chu, ram inchuh leh innghirnghona dang tel miah lo hian, GS road lamah misual pâwl intelkhawm 'Gang' tia kan sawiho hi an awm bawk a, Umiam leh a bul hnaia farm an rawk ṭhin, ran vulh an ruk châng a awm bawk.

Bamos ram kan tlan lut a, Dingngheti leh mipakhat hi pawnah an lo ṭhu a, kan tlan tlang dawn emaw ka tih laiin Jeho a ding leh rih, Dingngheti bula mipa chu ngun leh chîk zawkin ka en a, a sâng ṭha hle a, Jeho ai pawhin a sâng zawk hial maithei, a hmelṭha hran lo naa a mitmeng a thûk ruih.

"Omar, Raitong lamah kan naute ka tîr tawh a, zaninah hmeichhe tel lovin kan farm lamah i lokal mai dawn nia, Lalit hmel pawh i hmu ve duh lo'm ni?" Tiin Jeho chuan a bia a, Omar-a dik tak chu hei ngei hi a nih dawn ni, Dingngheti ve thung chuan a hnung seat-a ṭhu Vansangi chu a lo thlêk nasa mai, ani Vansangi lahin a ngaithei lo nge glass a 'up' hmak a, ka nuih a za ru hlê.

"Lalit tih hmingpu ka hre lo a, mahse, a hmel hmuh ve hrim hrim ka duh, zanin chiah Bamos ah ka awm tawh dawn a, Raitong lamah ka lêt leh a hun tawh avangin lokal ngei ka tum dawn nia," tiin Omar chuan Jeho a chhâng a, inhaw hmel an pu miah lo hi mak ka lo ti deuh. Chu erawh zawh chi-ah ka ngai lo a, ngun fein an inbiakna ka lo ngaithla ve tawp.

JK Farm house kan thleng a, hnathawktu eng emaw zâtin min lo hmuak a, Jeho leh kei min lawmpuina thu min hlan sap sap a, Lalngurmuana muhil thaw sâk sâk chu an inbih chhawk hlawm a, a nuam dangdai ve mai mai.

Kan nupa room an lo tidanglam vek tih ka hmuh rualin ka thaw hliai a, kan khum kha a aia lian zawk leh zau zawkin an lo thlâk a, naute mutna tur a hranpa a la awm cheu, room zau leh changkang ni lo mah se, naupang thawmhnaw dahna tur pakhat a lo inhûng tel bawk a, Jeho melh chung hian, "I tih tîr em ni?" Ka ti sap a, a lo bu nghut.

Indim ngai ka la nih avangin khumah ka mu leh thân tawh a, ka sîra mu ka fapa hmel chu ka hawisan hleithei lo, kârkhata upa a ni ve ta a, khawvel hrehawmna leh a nu leh pa nun ralmuang lo zet a tem ve tur hi ka khawngaih lâwk a ni ber.

Vansangin ka inbualna tur min siamsak a, "Mama kha inbual tîr mai rawh aw, i inbual chhungin ka vahpa ka lo awmpui anga chumi zawhah ka inbual ve ang," a ti sawk sawk a, tlailam dar thum a la ri lo a, zanin tlai hian naute thar lawm nan chaw ei an buatsaih dawn a, pawnlam mi tumah an tel dawn lo thung 

Kêl leh Âr an talh a, an lo inbuatsaih nasa hle, Jeho ruahmanna vek a nih ka ring bawk.

"Ngurthan, i inpeih chuan inbual dawn rawh le.." tiin ka pasal khumah a rawn ṭhu a, a farnu a awm ve reng avangin nuam lo ka lo ti ang reng, "Keimahin ka inbual thei a nia," tiin ka lo hnial a, "Min hnial leh ka ring reng a, hawh le, muangchâng lovin.." tih leh min pawm a ruala min dîm ve ngang mai. A inhmeh lo zawk.

Uluk zeta ka lu min sûk sak lai chuan, "Fapa ka nei tih hi ka la awih thei lo, engtin emawni ka awm," a ti a, ka hriatthiampui lutuk tlat, zum leh hriam kârah nau ka pai a, in enkawlna ṭha pawh dawng hleithei lova nun ral ṭî reng rengin kan awm bawk a, ani nen hetia fa kan nei ta hi mak ve deuh asin.

"I nun dan ang hian Lalngurmuana hi a nun ve ka phal dawn lo a, he kan buaina hi chin fel vat tum rawh aw, chuti lo chu ka sawi ang khan Mizoramah ka chhohpui daih ang," ka lo ti a, nui hawk chung hian, "JK farm hi kan hralh vek mai dawn em ni, Mizoramah inbengbel ta ila," a ti teh daih a, "Chu zawng a hun a lo thlen phawt loh chuan ka awih dawn lo a nia," ka lo ti a, thil dang em em a sawi zui tawh lo.

Min bual zawh vek hnuah, ka pum an zaina lai la inplaster chu a melh vung vung a, "Thisena inremna chuan kha thil kha a keng tel rêng a ni, Nguthan, i hrehawm rei tawh lo ang," ti sup chung hian bathrobe min hâk tir a.

"Khatiang dinhmunah khan ding lo la chuan helai hmunah hian ka nupui i ni tih ka nemnghet ngei ang maw le, tiin ka âwmbâwr a tawk zauh a, rei phei chu a ni lo, bathroom aṭangin min pawm chhuak leh a, "Zanriah an peih hmain ka'n inbual ve ang e," a ti a, a hmaa kan boruak ṭha lo kha atu ve ve mahin kan sawi chhuak lo a; mahse, ka dam ta tihna a ni chuang lo, remchangah ka la zâwt leh tho ang.

Vansangin phone a hmang a, ka fapa pawh a muhil leh tawh, ama khumah a mu vei bâm a, a pa a lianin a ruakhau viau a nia, Jeho fapa ni awm lo tak a ni.

Titla tura min hrilh lai te leh atira kan inremsiamna kha ka ngaihtuah kâi a, kâr lovah kan pahniha fa a lo piang ta mai hi thil awihawm pawh va ni suh.

Vansangkimi inbual hlanin naute hnute tur ka lo siam ve a, khawr deuh hlek chuan inchhung dungah pawh ka tei ve thei tawh a, doctor ka nih angin indim ngai leh ei leh inchung chângah pawh ka fimkhur ve hle.

Jeho inbual zo a rawn chhuak a, a taksa huh hluam hru mawlh mawlh chung hian, "Zaninah Lalit kha ka dâwp dawn a, Omar a lokal tel ve ang a, kan hriat duh tam tak hi chu kan hre thei tawhin ka ring," tia min hrilh chuan, "Bamos ram neih belh nan Dingngheti hi i kawp tak tak em ni?" tiin ka zawt ta, a ner suk a, thawmhnaw a inbel zui mawlh mawlh a.

"JK ram chin dik tak bâk eng mah ka duh belh lo, ka thil sawi zawng zawng kha i bengrawngah i thun lo zâwk nge, Dingngheti hi Samuel Pamei Sakawr duat lai a ni tih ka sawi lovem ni, kei hian Bamos ram ka duh belh lo a, kan ram chin humhim ka tum mai zawk a ni," a ti ṭha mai.

"Chuti si engvanga ani kha thlang nge i nih, kei min chhuahtîrna chhan kha i sawi fiah hma loh chuan ka lung a awi dawn lo," tia ka sawi laiin ka thinrim ṭha leh dâwn takngial.

"Samuel hi a fing a, ka pa a ni tih kan hria tih a hriat aṭangin amah a rawn inrawlh tawh ngai lo, midang a hnuaia thawkte a hmang zel a, Dingngheti hi a ni ve em tih ka hriat a ngai, Bamos ram awttu zawk chu Samuel Pamei a ni," a ti a, dâwt sawi hmel a pu lo.

"Kan nupa kar a ṭhata inrem i duh chuan ka lakah zêp nei tawh suh, min hrilh fiah vek sêng lo a nih pawhin ka hriat tur chin i tan sawi a har lo," ka lo ti ve zel.

"Le, helam chu duhtâwk ang aw, kan fapa hriata insawi fiah vak vak hi ka duh vak lo, min ngainêp palh ang," a'n tiah. Malsawmkima mai mai tak hi chu(h) a fapa an care der vela over lutuk.

"Bawiha, i pa insawi fiahna hi i ngaithla peih lo ang tiraw? I nu a dîlchhût ropui si," tiin Lalngurmuana mu lai chu a bia a, ka lo nui hak.

"Jeho, Buatsaiha hi hremna i pe ngam tak tak ang em?" Tiin ka zâwt teh daih a, a nau pasal a ni si a, a tihdik loh hre mah se a ngaidam ang tih ka hlauh vang a ni.

"Buatsaiha a ni emaw, nang pawh ni la, atu a pawh ni rawh se, thil tisualtu chu hrem lohvin a chhuak dawn lo tih ka sawi tawh kha," a ti hmiah. Kei pawh ka bâng chuang lo tih min hriat nawn tîrnaah ka ngai.

Vansangi a rawn chhuak a, zanriah ei a hun dâwn ták avangin Jeho hnathawkte an lokal khâwm ṭan a, kei pawh choka lamah zawimuangin ka chhuak phei ve ta a, Rishan, Aryan leh Sameer te an lo thleng a, an hnungah Barua pawh a lokal tel ve, a hmai a khem nuai a, a bân dinglam a awrh bawk a, min hmuh rualin a khi suk a, ka lo nuih lêt ve mai.

Vansangi leh ka fapa room-ah an awm a, Sofa-ah kei leh Jeho kan ṭhu dun a, a bâk zawng Veranda velah an awm a.

An boss a nihna angin Jehomalsawmkima chu a ding chhuak a, "Ka fapa Lalngurmuana thla hual nân zanin tlaiah zanriah kan buatsaih a, puar taka in ei ngei ka beisei. In hriat tawh sa angin farm house-ah hmeichhia kan chen tîr ngai lo a, ka nupui bâk hmeichhe dang lâk luh phal a ni lo bawk, ka nupui venhim hna hi number one ah in nei ṭheuh tur a ni," tiin a sawi a.

An lo bu nghat nghat hlawm mai. 

"Khatam-ah Lalit Kumar kan kawl a, ani hian ka nupui leh ka farnu tithlabâr zawngin ralthuam a chelek a, helaiah hian phatsantu tan hmun a awm lo, Lalit pawh zaninah dâwp chhuah tum a ni e," tiin an vaia hriatah a sawi leh a, Jeho an zah hmel hlawm hle.

Thil dang hna chungchâng leh an hlawh chungchâng a sawi hlek bawk a, chumi hnu chuan hlim tlâng takin zanriah an ei ta a.

Vansangkimi haw tur chu ka ui ang reng, zing hma takah Jeho a tho a, a farnu hnenah, "Eng emawah mamawhna kan neih leh che pawhin in nupa bawk ka lo tihbuai leh che a ngai mai thei, chuvangin tun ṭumah chuan haw phawt la, Raguel pawh i ngaihtuah tawh dawn tih ka hria a, harsatna i neih pawhin i u hi min hrilh hreh reng reng suh," tiin a farnu a kuah vang vang a, a hmangaih tih hai chi rual a ni lo.

"U Ngurthani hi thlahthlam suh ang che, nangmah vangin dinhmun khirh takah a awm a, i mawhphurhna a ni," tia a u a hrilh chuan Jeho pawhin, "A hmâwr kan bâwk ṭep tawh, Lalit hnen aṭangin eng emaw zât chu ka hre tawh," a ti ve mai.

Nizanah Omar nen Khatam hmunah dârkâr hnih zet an va thang a, an lo haw laiin ka lo muhil tawha eng mah zawhna hun a la awm rih lo. 

Amah ngeiin Sumo counter thleng a farnu a thlah tur thu a sawi a, ka hnial lo hrim hrim. Vansangi chuan min kuah a, chumi hnuah a vahpa a pawm leh tê tê a, "Lo dam ṭha rawh Bawiha, a nî hian ka hmangaih che a nia," tiin a chalah a fawhsak zeuh a, a mitmeng a nungsarh mai. Mi rilru ṭha ngang a ni a, ka ngaina em em bawk.

Jeho te unau hma takah an chhuak a, counter panna a hlat tham avanga chhuak hma an ni.

Rishan leh Aryan ṭhutkhawmna lamah an riak a, sawi lang dawt lo mah se, Jeho hi a hma aiin a fimkhur leh zual. Gate-ah pawh nizan aṭangin an in duty chhâwk tih a sawi a, ka thla a muang ve deuh. 

Hospital kan chhuahsan aṭangin ni thum a liam tawh a, dam takin Vansangin Jorhat a thleng tawh a, Jeho pawhin a mâkpa Bartho hnenah lawmthu a sawi ve nual kha.

"Ngurthan, i muhil em?" Tia Jeho min kohna avang chuan ka meng chhuak a, hnai zetah min lo en chu niin! 

Ka meng chhuak a, hâm bái bái chung hian Jeho khum kotlanga ṭhu chu ka melh a, a hmel a thim mâk mai.

"Ngurthan," a ti leh sup a, sawi tur nei, sawi hreh si ang hmel a pu, ka ngaih a ṭha lo lehnghal ringawt tawh.

"Eng nge, hmun leh hmunah min koh sek le.." ka lo ti a, nui lek lek chung hian, "Nitin i thin hi a chhe tulh tulh nimaiin ka hria, ka lakah eng lungawi lohna dang nge i la neih?" Tih pahin ka kut a rawn hûm a, kan inneih zungbun ka bun tâk loh vanga ka kutzungṭang ruak hiai chu a melh nghal chat.

"Khawiah nge?" A ti nghal a.

"Eng maw?" Tiin ka hre lo der tlat a, ka hmai zâwnah ka kut a rawn lakâng a, "Kan inneih zungbun ka bun tîr che kha khawiah nge i dah?" Tia min zawh tâkah chuan min zai dawnah ka phelh thu leh ka purse-ah ka dah tih ka lo hrilh ṭha ve mai.

"Khawiah nge i purse chu a awm.." a la ti zel a, a awmna ka hrilh hnuah a tho chhuak vut a, a va zawng nghal. 

Kan inneih zungbun ti ila, dan ang leka min bun tîr kha a rawn lek lang vâ vâ a, "A ṭûl tawpah lo chuan phelh tawh suh ang che, tuna ka bun nawn tîr leh aṭang chiah che hian ka laka i lawm lohna te leh i lungawi lohna zawng zawng kha theihnghilh tum la, ka hmangaih che tia ka sawi lai khan dâwt ka hrilh lo che a nia, Jehomalsawmkima hian hmangaihna thu ka chhâkchhuak a nih chuan a rin tlâkin a pawm tlâk tih theihnghilh tawh ngai suh," a ti nghet charh a, zungbun pawh min bun tîr leh ta, a kut ka en a, ani chuan a la bun rân mai.

"Hmeichhe dang melh reng chunga hmangaihna thu sawi hi ka pawm zawng a ni ve lo, i nupui ka ni a, i awm ang hian awm ve ta ila i lung a awi ang em?" Ka lo ti nghat. 

"Nang ka tawn hnu aṭang che hian vawikhat mah ka pelhê lo aw, inremna thutiam siamtu ka nih angin bawhchhe hmasatu nih ka tum miah lo, min rinna chin apiangah thudik i hre chho zel mai ang, nang kalsan duh tur khawpa hmeichhe îtawm leh ka mit la zâwng ka hmu lo, Dingngheti leh Shisha erawh chu ka hmanrua an ni a, an lakah ṭhat chhuah der a ngai ve, mahse, tisa thila inzawmna neih pui ka tum lo a nia, i tan thîk a ngai lo ang," tiin a tawp a tawpah chuan kan Laljeho pawh a insawi fiah ve ta hrâm alawm.

"Nang pawhin Aryan hi thîk tawh suh, nang tih lohah chuan an unau hian ka rin ber an ni, chumi zawhah Rishan.." ka lo ti ve a.

"Ṭawng ṭawng lo khan min fâwp phawt la a nih chu, mut hmunah i ri zet zet zel a, i pasal hian ka thlahlel che tih te hre ve la," a ti a, ka nui var var a, a rawn kun hniam lai pawhin ka la nui ṭhâ.

Min fawp a, a'n uar leh mai mai khawp a, "Hmangaihna chéndun thei tura i dam vat a ngai a ni," tiin ka âwmbâwr a zut kual a, tisa châkna lam âi mah chuan min fawha ka kianga awm a thlahlel tih a hriat hliah hliah.

Khumah a rawn lawn a, "Vansangi a awm tawh si lo a, i dam ṭhat hma chu chawlh ka inpe ang, chhungkua kan din tawh a, thihna chauh lo chuan min pawt hrang suh se," tia a sawi zawh hnuah, khum a thawhsan leh rih a, a fapa muhil lai chu pawm kângin ka ding lamah a rawn mut a, "Chhungkaw kimin mu ang aw, zanin chu.." a ti ve ngei. Ani a kil lamah a mu a, kan fapa muhil chu inbengkâng meuhin a thlir a, "Ka fapa hian a ṭha ber zel a dawn theih nan tun aia ṭan lâk kan ngai a ni," a ti ta a.

Zan rei lamah thawh a ngaih pawhin Jeho zêlin engkim a ti a, min ngaihsak vut vut viau.

Zinglam dar hnih velah ka harh a, Jeho mutna âwl duai ka hmuh chuan ka harh deuh kâwk. 

Kan nufa tê chauhin kan lo mu a, toilet lamah a kal a nih ringin ka ngaichâng deuh vang vang a, chutih lai tak chuan choka lamah inbe thawm ka hre ta. 

Ka zun a chhuak ve tho bawka thawm dim thei ang berin ka tho chhuak ṭhêm ṭhêm a, nichin ai chuan an ṭawng pawh ka hre chiang thei ta deuh, Jeho leh Aryan an lo ni a, ka va zung leh tê tê phawt a, chumi hnu chuan an thusawi hriat tumin kawngkhar lamah ka phei ve ta.

"Ni thum a ral leh hnuah Aizawl panin Sameer nen kal ta ula, Mawitei kha rawn hruai thlâk ngei in tum dawn nia, a ṭul a nih chuan ngaizawng der mai rawh, pawisa a duh a nih pawhin a duh ang ti zel la, Vanlalṭana thihnaa inhnamhnawihte kan chinfel hnuah ka patea kan bitum leh ang, Buatsaiha hmanrua chu Mawitei a ni a, Buatsaiha tih tîrtu kan hriat chhuah leh phawt a ngai," tia Jeho ṭawng thawm ka hriat chuan ka hmui hupin ka khap zak zak a.

Ka cousin Mawitei kha ringhlel mah ila, a fiahna ka nei si lo. Jeho hi a ngawi ral mai tawh dawn emaw ka lo ti a, a teuh lo. Ka u thihna a lo la chhui ru ngat ngat tih ka hriatna chuan min tilawm hle.

An thusawi pawh ngaithla zui tawh lovin khum lamah ka lêt leh ta a, ka pasal ka rinngam a ngai takzet. A hma anga boruak ṭha lo kan neih loh nan kei ngei pawh ka insiam ṭhat a ngai ve tho.

Jeho rawn luh laiin ka fapa hnute ka lo pe a, "Ka tiharh che em ni?" Tiin kan nufa inbuaipui lai chu min thlir vung vung a, "Tiharh lo e, ka zun chhuakin min tiharh zâwk a," ka lo ti ṭha ve mai.

"Ngurthan, Lalit Kumar khan eng kim a sawi tawh a, Barua kan lamah a ṭang tih leh a kut aṭangin MAP kan nei tawh tih kha ka patean a lo hre vek tawh bawk, amah che chhuak lovin Lalit hi a ruai a ni, a fapa ka nih tlat avangin kei chu min thah a tum lo a, a bitum zawk chu nang leh ka fapa in ni, hlauthawng lo la, ka nu pawh a inrawlh tih a sawi tel bawk, thil mak ve deuh chu tun ṭumah hian Buatsaiha a inrawlh lo tlat hi a ni," tia min hrilh chuan ngun takin ka lo ngaithla a.

"Min that dawn a nih pawhin hospital-kher nilovah hun a tam nen," ka lo ti a. "Vansangi a awm tih a hriat loh vang a nia, he a ruahmanna hi amah leh Lalit bâk hretu an awm lo a, ka nu inrawlh vena zawk chu i u thihnaah khan a ni," a ti teh daih.

"I nu a inrawlh a maw?" Ka lo ti hluai a, bu nghut chung hian, "Buatsaiha ruahmanna siampuitu kha ka nu a nih lohvin tunge ni se i tih, a lak aṭanga a fapa la hrangtuah a ngai che a, i u a awm loh chuan Mizoram lamah i lêt a beisei vang a ni, ka thisen zawm pawh ni se, an dik lo a nih chuan ka ngaidam dawn lo," a ti leh hmiah.

"Aryan leh Sameer pawh ni reilote hnuah Aizawl panin ka tîr dawn a, i cousin Mawiteii kha mamawhna ka nei a, an rawn hruai thlâk ngei ka ring, i lo khawngaih tur a ni lo a, fiahna kawltu ber a nih avangin alakah ṭhat chhuah hauh suh ang che," tiin min hrilh lâwk a, ka lo bu nghat nghat.

Khawvar dawn aruaiah thil tam tak kan sawi dun a, "Ka nupui leh ka fapa in him dawn a nih phawt chuan ka thih ṭhak thlengin ka bei mai ang," tum ruh tih hriat tak hian chunglam a melh a, "Vawikhat ka thlang tawh che a, nupui pakhat aia tam neih ka tum lo aw..Ngurthantluang," nui chungin a ti ta a, a thil sawi a serious teh reng nen a tiho zo leh vek tawh.

"Muhil rawh.." ka lo ti a.

"Min hmangaih ve tawh zâwk rawh.." a'n tiah, a samah ka va man a, a inrin hman hmain ka fawp ta. A meng buai nak a, mahse, a inthlahdul nghal vek, uar leh duhthawh zeta kan infawh hnuah ka mut dan siamremin Lalngurmuana a kil lamah ka sawn tîr a, ka pasal Jehomalsawmkima kuah rân chungin ka maimitchhing ta a.

Khua a var a, zan lamah ka mut ṭhat loh avangin ka tho tlai hle, Jeho te pafa an lo inbuaipui ve nawk nawk a, zinglam dar sawm a lo ri der tawh.

Mipaah pawh pa tak kha a ni a, a fapa buchip zet buaipui hi thil inhmeh lo tak a ni. Ka nui hak a, a rawn dâk chhuak a, "I nu thinawrhi pawh a lo harh ta alawm," tiin khum lamah an rawn inpawm phei a, Lalngurmuana a lo meng ve kiau a, "Hnute tui nei bawk si lo, phunchiar thikthu chhe tâk bawk si, i nu hi doctor tlawngâwl a nih hi.." tia nui suk suk chung hian, "Tlem tlema i insawizawi a ngai tawh a nia, chawlh ka lâk chhung hian ngai awh tura ṭan lak i ngai, an ṭhuina kha engtik nge a phelh hun?" Tiin min zawt a, "Nakinah keiman ka en dawn nia, a hil riauvin ka hria," ka lo ti ṭha mai.

"Intifai la, Bawiha hi lo la rawh aw, Omar leh Richard an lokal dawn a, vawiin chu in nufain lo inbuaipui mai rawh u, nau awmtu tih vel lâk kha ka rilrem zawng a ni ve lo a, tlai lamah Tleipuii te nufa lokal an tum bawk," a ti leh zung zung a.

"Eng nge an lo tih dawn?" Tia ka zawh chuan koki san âwk chung hian, "Zonunthara'n naute a hmu ve duh a, lokal suh u tih teh ngawt chu a zia lo deuh a," tiin khumah a fapa a mut a.

"Lokal lo mah se pawi ka ti lo," ka lo ti hmiah.

"I rilru tur ka hria alawm, an hnawksak dawn a nih chuan khak mai tur, ani pawh hi a mâwl chhi chhe lutuka hrilh fin a ngai a ni," a ti leh puat a, Vansangi a treat dan nen chuan inang lo ve tak a ni. Tleipuii khawsak phung hian zir mawlh hek lo le.

Omar leh Richard an lo thleng a, naute en nan Richard chuan toys leh an Rooster vulh lai a rawn keng ve ngial.

Shisha chungchang te ka lo zawt ve a, Jeho melh chung hian, "Nupui neih mai a châkawm ve ta riau mai," tiin a nui vur vur a, Jeho pawh a nui suk suk mai.

Omar chuan min en chîk hle a, "Ka hmuh tawh hnu i ang, khawiah emaw tak ka hmu tawh che a ni," tia a sawi chuan Super care hospital-a ka thawh ṭhin thu leh Jeho nen kan inneih hnua ka bân tâk thu ka hrilh ve a.

Chal chuar nûng chung hian, "Chumi niloah chuan ka hmu tawh che a ni," a la ti lehzela a ngaihna ka hre ta lo, Omar a ngawi vung vung a, chutah harh chhuak thut ang mai hian, "Raitong wood farm-ah Samuel Pamei nen ka hmu dun che u," a ti ta a, Jeho a insangmar nghal ṭawlh ṭawlh.

Omar hi Raitong wood farm-a Manager a ni a, Samuela'n kha hmuna min hruai ṭum khan min lo hmu a nih ka ring thiam mai.

"Omar, kha lam kha chu duh tawk ang aw, kan tih tur kan ṭan thei tawh e," tia Jeho a rawn inrawlh tâk avangin eng mah kan sawi thui ta lo.

Richard leh Omar an chhuak hmasa a, Jeho ka bulah a rawn ding a, "An Kidnap chungchâng che kha tumah hrilh rih suh aw, Omar hian a hriat leh lek phei chuan a ṭha dawn lo a nia," a ti sup a.

"Min hmuh thu a sawi kha.." ka lo tih chuan, "An hriat dan chuan Samuel Pamei hi ka patea a ni, ka pa a ni tih leh kan inkâr boruak a ṭhalo tih a hriat kher a la ṭul lo," tih pahin ka samah a fawp zauh a, "Nipui chawlhbûkah kan awm dawn a, min mamawhna i neih chuan..." tia a sawi lai mekin Riffle puak ri a rawn awm a, Jeho a ding khawng luh.

"Pawnlamah ka kalh hnan ang che.." a ti sup a, "Eng thil nge thleng?" Ka lo ti ve bawk.

"Lalit an rawn zawng a nih chu, hetah a awm tih an hre tawh a ni ngei ang, i tan hlauh tur eng mah a awm lo, an Manager Omar pawh hetah a awm a, langsar takin an rawn che chhuak duh lovang..." tia min ṭawng thlamuan a tumna chuan ka hah a ti dam hlawl lo.

"Ka ko che a nih loh chuan kawngkhar i pel tur a ni lo a, phone hmanga chanchin ka rawn sawi hma loh chuan kan room-ah hian tawm tlat ang che," a tih zung zung hnuah, Pistol a check fel a, "Ngurthan, engmah hlau suh aw.." a ti nawn leh ngat.

Ka kutah a hmer a, "In himna tur a nih chuan eng pawh ka ti hreh lo," tiin a fapa chalah a fawp leh a, kan room a chhuahsan ta.

Thawm danglam hriat tur a awm zui lo a, khum thawhsanin tukverh bulah ka va ding teh ngawt a, pawnlam a reh ṭhuap.

Jeho, Omar leh Richard te inzui phei ṭhâm ṭhâm chu ka hmuh chhun an ni. 

An palian hlawm si a, an hmelma tan chuan beih huphurhawm tak tur an ni ve hrim hrim, meeting ni lovin inkahna a thleng dawn tih hriat reng reng. 

Jeho khan heng zawng zawng hi a hre lâwk vek tihna a nia, an pathuma an ṭan tlan te chuan eng nge ka tan hlauh tur awm, thil dang ngaihtuah zui duh lovin ka fapa ka pawm ta daih a...

250423

B+>[BeckirafARenthleI]<+®®