21.24-89[A Becky Rafa Story]

21.24-89 

Ziaktu: Becky Rafa Renthlei

[Recap]

Jeho, Omar leh Richard te inzui phei ṭhâm ṭhâm chu ka hmuh chhun an ni. 

An palian hlawm si a, an hmelma tan chuan beih huphurhawm tak tur an ni ve hrim hrim, meeting ni lovin inkahna a thleng dawn tih hriat reng reng. 

Jeho khan heng zawng zawng hi a hre lâwk vek tihna a nia, an pathuma an ṭan tlan te chuan eng nge ka tan hlauh tur awm, thil dang ngaihtuah zui duh lovin ka fapa ka pawm ta daih a...

-B®®

Chhun pachangah inkahna a awm dawn nge, thâwm a reh duk a, Farm luhna gate-ah duty an dah vek tih Jeho khan a sawi tawh a, JK ram chin tuna Bamos lamin an rawn nawrna lai tih loh hi chu chhim leh hmarah Barbed Wire zam vek a ni bawk, Fâr awmna lam phei kha chu a inhung ṭha hle si.

Nichina Riffle puak ri ka hriat kha tihpalh thilthu a ni thei hian ka hre lo. 

Khumah kan nufain kan inkuah rân a, kan hnaih bera awm nipui chawlhbûk lam aṭangin thâwm a ri chhuak a, mipa natuar ṭê rawng rawng ri a ni. Ka fapa muhil ṭan siar siar chu dimtea thawhpuiin tukverh lamah ka va dâk a, 12ft vela hlaah Lalit Kumar chu thi nuaiin lei chârah a lo tlu a, a bulah Jeho, Omar leh Richard an ding a, an ṭawng ri hriat phak a ni lo.

Farm house piah lawk aṭangin Aryan leh Arun hian mipahnih an rawn chhawm chhuak bawk a, Arun chuan Riffle pahnih a ak a, Jeho te dinna lamah an mi man pahnih chu an nawr kal dawt dawt mai.

Lalit chhanchhuak tura lokal kha Aryan te'n an man a ni ngei ang, 'Khatam' hmunah an dah tih an hre lo nge khatia Riffle te hmeh puah reng reng. Âtthlak lutuk, kei takngial pawh mi farm-ah lut ru ta ila, ṭûl tawpah lo chuan Silai ka hmet puak duhin ka ring miah lo.

Ngaih ṭha takin khum lamah ka lêt leh ta a.

Samuel Pamei thluak tlan khalh tur hian Jeho a fin tâwk ngei ka beisei bawk. A fapa a thisen zawm ngei mai hmanruaa a hmang duh tlat mai hi thil mak tâwp leh awihawm loh bawk si a ni, DNA result kha hmu lo ila chuan Jeho pa dik tak a ni tih hi ka ring thei miah lovang.

Ka fapa muthilh hlanin dârthlalang hmaah ka va ding a, min zaina lai kha uluk takin ka check ta a, a lo hil ṭha phian. Mahse, pawnlam dam anga a lan laiin chhunglamah a dam har phian tih ka hriat vangin indim hle ka ngai tih pawh ka hriat hnu tho a ni.

Dârkâr hnih a liam leh hnuah Jeho chuan min rawn ko a, room kawngkhar kalhna ka hawng thuai a, hah hmel zet hian tui vawt a inkhawlh khawlh bawk a, "Omar leh Richard te kha an haw tawh em ni?" Tiin ka zawt a, a lo bu nghut.

"Lalit kha engtin nge in tih dawn, midang pahnihte pawh kha," ka lo tih leh chuan min melh kâwk a, "Pawn lamah i rawn chhuak tih sawi miah suh," a ti zawi sup.

"Naa, pawnah chhuah kher a ngai hleinem, tukverh aṭangin a hmuh theih vek alawm," tih pahin nichina ka dinna tukverh kha ka kâwk zauh a, "Lalit leh a ṭhiante pahnih pawh Khatam hmunah dah luh an ni a, ka hriat duh ang min hrilh vek tawh bawk, naktuk hian Police station panpui an ni ang, helai hmunah hi chuan kan naute'n an sawp hlum duh mai dawn," tia a sawi pahin face towel a ban zui zat a, a hmai thlan dap chu a hru thuak thuak a, Lalit kha tu berin nge sawisa tih erawh ka zawt ta lo.

"I unaunu Mawitei hruai tur khan Aryan leh Sameer an kal dawn a, naktipa kal tura ka tih kha zanin tlaiah chhuak mai rawh se, boruak dangin min nangching zel a, Omar leh Richard kutah Lalit te ṭhianho chu an awm tawh ang, anniin police station lamah an hruai mai dawn a ni," tiin min hrilh ve thlap.

Chumi hnu chuan muangchâng tawh lovin a inbual zui nghal a, kei pawh choka lamah pheiin thei tui in tur ka insiam a, a nihna dik takah chuan farm house hi ka ngaina a, chhuahsan lova awm reng ka châk. Doctor ni mah ila, hospital-a thawh leh châkna pawh ka nei lutuk tawh lo.

Tlailam dâr thum bawr velah Tleipuii te nufa an rawn thleng ta a, Buatsaiha hmel ka zawng ru nghal vat a, hmuh tur a awm lo, an chhungkaw driver hlun Rishan Songbet helamah kan kawl daih si a, driver thar an lo nei leh diam tawh.

'Habib' tiin Tleipuii khan a ko a, in chhungah an rawn inzui lût a, Habib chuan Zonunthara a pawm a, pa tê lam ngo vang mai a ni, a hmel a ngainatawm phian. Khasi hmel a pu hliah hliah bawk.

"U Ngurthan, zanriah min kêp ve mai rawh u aw.." tiin Tleipuii kan room-ah a rawn lut a, Jeho a awm lo thung, Âr in lamah a kal a, darkar chanve vel chu a thang tawh, Arun choka lamah a awm a, Tleipuii te lo luh lai pawhin ṭawngkam khat mahin a be lo, ani hi chu a zia a zâwi ve rêng rêng bawk.

"Tehreng mai," tiin ka hrawk chin chunglamin ka nui a, Zonunthara pawh a fel ve reuh tawh a, eng mah hrethiam tak tak lo mah se, Lalngurmuana muhil lai a en ve deuh sek mai.

"Mama khawiah nge?" Tia Tleipuiin min zawh chuan Jeho kalna ka sawi ve mai a, "Mama nen biak duhna che u ka neih vang a nia ka lokal," a ti leh a, "I lo thlen tawh thu sawi la, call rawh, chuti lo chu zanriah ei hmain a lo lêt lo ang," tia ka sawi mêk laiin a phone phawrhin a u number a hmet chhuak a, a be nghal vat, a hmel en hian hmanhmawh rûkna riau nei angin a lang.

Jeho nen an inbiak laiin Arun a lo lut a, "Madam, zanriah atan eng nge kan siam ang," tiin min rawn zawt a, "Rooster kha talh ula, puitling pahnih i siam kêp dawn nia," tia ka hrilh chuan, "Aryan leh Sameer hetah an ei ve dawn aw.." a ti leh a, ka lo bu nghat nghat.

Zanriah eikhamah Aryan te pahnih Aizawl panin an chhuak dawn a, Tleipuii hriat laia sawi ka duh teuh lo, Buatsaiha a lo hrilh leh emaw a ni ang a, Jeho ruahmanna tih sukuk sak ka duh lo hulhual.

Kâr lovah Jeho pawh a rawn thleng a, Artui eng emaw zât a rawn hawn bawk a, nui suk suk chung hian, "I theih loh chhung hian inlâk fit ka ngai tlat," tih pahin Sofa-a ṭhu a farnu chu a melh a, "Ka nu a ṭha em?" Tiin a zawt a, Tleipuii chuan, "Mama, thil pawimawh sawi tur ka nei a.." tiin a lo chhang daih. A nu ṭhat leh ṭhat loh pawh a sawi lang chuang lo.

Jeho chuan thutak deuh zawk hian, "Room lamah insawn phei ila.." tih pahin Zonunthara chhuata ṭhu chu a vawikhat nan a pawm ve ta, a hma khan a haw hlur a, en pawh a en duh lo kha a nia mak ka lo ti hle.

Kan room-ah kan pathumin kan ṭhu ṭhap a, Habib khan Zonunthara a pawm a, a chhuahpui tawh bawk.

"AuMam, i thu ka awih loh vang leh i rilru ka tih nat avangin min ngaidam rawh aw," Tleipuiin a ti hmasa tê tê a, ka lo ngawi reng, eng tak sawi ang maw.

"Nizan zanlaiah ka ṭhangharh a, Buatsaiha ka hmu ta si lo a, darkar khat a liam hnuah pawh a lo la mu chuang lo, ka tho chhuak a, Zonunthara a muhil tui bawk nen choka lam pan ka tum laiin ka nu room lamah ṭawng thawm ka hria a, a tîr chuan phone a hmang a nih ringin ka ngaihven lo, mahse, Buatsaiha aw ka hre ve leh ta a..." tiin a insût hraih a.

Heti hian a sawi zawm leh ta a, "Ngaih ṭhat loh rûkna ka nei a, mikhual pindanah lutin bang chhanah an ṭawng ka ngaithla ta a ni. Buatsaiha hian Aizawlah nupui angreng deuh a lo nei a, a hming chu Mawitei niin ka hria, fa pawh pakhat an nei tih Buatsaiha chuan a sawi ta a, ka nuin, "Rang takin Mizoramah chho la, a kâ han hup ang che, ka fanu rilru i tihnat thui hma hian hma la rawh, tiin Buatsaiha a hrilh a, Jeho beih a ngai lo, Ngurthani zawk hi tun aṭang chuan bitum tawh ang che," tia ka nu ṭawng ri ka hre zawm leh nghal a, Mama, eng nge ti tura min duh?" Tiin rilru nat hmel tak hian a u a melh a, Jeho a ngawi hmuk ringawt.

A hnu feah Jehomalsawmkima chu a ding hluai a, kan room chhung zau fahran lovah chuan a vei sek a, Tleipuii nen kan inmelh hrek hrek ringawt.

"Buatsaiha chu tunah khawiah nge a awm?" Tiin Jeho chuan a farnu a zawt a, "Samuel nen Super care-ah an kal, an chhuah veleh helam hi ka rawn pan ve nghal a ni, Mama, eng mah hi ka hrethiam tawh lo a nia," ṭap lek leka a tih tâkah chuan Jeho a ding chut a. 

A farnu melh chung hian, "Saw inchhungah sawn tumah rin tur an awm lo, ka nu leh Samuel, Buatsaiha pawh tiamin an ṭang rual a, tumah ring tawh suh, kan hnenah i awm thei dawn lo a, fimkhur takin an ruahmanna lo hriat zel tum ang che," tiin a farnu bulah a ṭhu hniam a, "Buatsaiha hian a bum che a ni, JK ram neih a duh vangin a ngaizawng der che a, ka thu awih ni la chuan tun dinhmun hi i thleng lo tur.."a ti sup.

Tleipuii chuan min rawn melh zeuh a, "U Ngurthan, i laka ka chêtdan avang khan min ngaidam rawh aw.." ṭap ṭiau chungin a ti a, "I rilru tihrehawm suh, i dik a nih chuan i u nen i lamah kan ṭang zel ang," ka lo ti ve a.

"Buatsaiha hian JK ram a neih theih nan kei min bei a, Samuel ve thung chuan Bamos ram neih belh a tum thung, nupui neia inbenbel ka tum aṭang hian an lo ruahman lâwk kha an ti hlawhtling thei ta lawk lo a nih hi, Ngurthani ka nupui a nih hma kha chuan heng zawng zawng hi ka hrethiamin ka man thiam bîk lova; mahse, ka pa thi lo pui thi anga min rintîrin ka pa phuba ka lâk theih nan kei hi hmanruaah min hmang a, i pa, i pianna pa pawh hi thah a ni.." tia Jeho an Tleipuii a hrilh fiah tâkah chuan ka lo thaw huai. 

Hmelma leh hawtu ngah lutuk hi a hrehawm êm asin. Chu pawh duhâm luat vang lehnghal.

"AuMam, ka pa thattu chu i hria em, ka pa dik tak kha i hmu ve hman em?" Tiin Tleipuii chuan a û a zâwt ta sek sek a, ani lah a ngawi zui hmiah mai si. Han hrilhfiah zo law law se ka lo ti khawp mai a, ka inrawlhna tur niin ka hre si lo.

"I pa thattu chu Samuel Pamei hi a ni, fiahna ka nei lo a, mahse, Samuel ngei a ni tih ka hre thung, chuvangin, i dam chhung ni-ah ani hi ring ngai suh ang che, ka pa atan ka pawm lo, thudik ka haichhuah hunah Jail bang a zût dawn," Jeho chuan a ti hmiah.

Thil dang eng eng emaw an sawi leh hnuah zanriah ei a hun a, rilru helhkam nei ṭûnin zanriah kan kîlho ta a. 

Aryan leh Sameer pawh chhuak mai thei turin an inpeih tawh a, Tleipuii te driver Habib pawh ka rin ai takin a fel, min be ve luam a, a la upa vak lo tih a hriat reng reng.

Jeho chuan a farnu hnenah, "Ka sawi kha hrereng la, thu thar emaw chanchin danglam i hriat chuan min rawn hrilh vat dawn nia," tiin an car dahna thleng a zui a, Zonunthara a pawm leh a, "Tlangvalte, kan inhmu leh dawn nia," tiin a nu kutah a pe a, Tleipuii te tlan chhuak tur chuan bân a rawn vai lap lap a, ka khawngaih ang reng, atu ate mah hi nun râlmuangin kan awm lo a ni ber e.

Aryan leh Sameer kutah Jeho chuan pawisa a pe a, "Fimkhur ula, a rinhlelh theih turin awm hlek suh ang che u, Buatsaiha in thlen khalh ngei ngei a ngai a, Serchhip lamah a awm lo tih ka sawi tawh kha, ka awkâ ngaichâng ula, in rawn hruai thla ngei tur a ni," tia a hrilh leh hnuah Car chahbi Aryan a pe a, an chhuak a ni deuh nghal mai.

Jeho hian Gurkha bâkah Car dang pahnih a nei a, bike leh Bolero Camper te, ran chaw phurhna Motor lian pahnih a kawl bawk. Mahse, amah hian Gurkha a hawl chhuak tam ber a, tuna Aryan te ken tur hi chu New Santro niin ka hria.

"Tleipuii thil sawi kha i awih em?" Tiin khuma a rawn ṭhut ve hnuah ka zâwt a, "Awih e, dâwt min hrilh khât khawp mai, Buatsaiha lakah hian a hmin zân tawh lo tih ka hria alawm, nupa chu kan chengdun reia mizia kan inhre tawn mai ṭhin, nang pawh kan chendun hnu hian i mize tam tak ka hriat belh a, ka duhzawng zel a nih vangin ka ṭhen thei lo che a nih hi.." a'n tih zawm zat a. 

"Nang chu kan chengdun tam tulh tulh a, i ngeiawm ka ti telh telh," nui chunga ka lo tih chuan ka chalah a pen kawrh a, "Dáw daw lo mai teh, tukin zinga ka thawhsan lai che pawhin Jeho, Jeho.." tichungin ka mutna lam i dap den den lai ka hmu reng che alawm," tia nui suk chung hian ka biangah a rawn chûl a, "I nuna harsatna a thlen tam poh leh kei min mamawhna a sâng zel ang," inringtawk taka tiin ka biangah a rawn fawp a, ka lo maimitchhing nghal ringawt.

"Kan buaina te dah ṭha ila, zanin chu thil ka hrilh ang che," a ti ve ngei.

Khumah kan mu a, a saisir zawnga muin ka lam a rawn hawi tê tê a, "I unaupa Vanlalṭana ka biak hmasak ber khan ka neih chhan che engkim zêp awm miah lovin ka hrilh vek asin, ka patea thil tum ka hrechianga chumi lak aṭanga i him theih nan ka nupui i nih a ngai tih zawng zawng ka hrilh a, a tîr chuan ka lakah a lawm lo hle; mahse, duhthlan tur dang a awm lo tia ka hrilh nawn leh hnuah ngaihngam takin ka kiangah a awmtîr ta che a nih kha," tiin min hrilh ta a.

"Khalai hunah khan i patea khan min that tak takin i ring em?" Tiin ka zawt chawt a, "Ring e, kha pa a that lai kha hmu lo mah la, a chhuah zalen kher lovang che, a chhan chu hmeichhe tel lovin a khawsa thiam lo, a kawp lâwr dun dun a, nang ngei pawh mutpui che a tum dawn tih ka hria alawm," a ti leh a, ka lo ner sak.

"Tenawm thlâk lutuk.." ka lo ti hlak a, "Ka nupui i nih avanga him i ni tih hi hre nawn ve hrim hrim rawh, i natna leh i hrehawmna tawrh zozai kha tikiang thei tawh lo mah ila, tun aṭang hi chuan a ṭha ber zel pek che ka duh, ka nunna chhanhimtu i ni ve tho.." tia a sawi lai chuan ka mitah min en tlat a, khawdang a hawisawn lo rêng rêng.

"Min hmangaih tak tak em ni?" Tiin ka zawt hê-hâw a, nui lek lek chung hian, "Engtik lai aṭanga inṭan nge hre chiah lo mah ila, Lalngurmuana i pai tirha titla tura ka hrilh zan che kha ni tain ka hria, khata ṭang khan ka nuna i pawimawh zia ka hre thar leh zual," tih pahin ka kut a tuai a tuai a, ani kâ aṭanga hetiang thu hriat hi a nuam dangdai em asin.

"Naktukah min zaina hi a ṭhuina phelh a ngai dawn a, hmanrua ka neih ṭhat loh bâkah mahni chuan ka huphurh ve deuh a," tiin thudangah ka pakâi ta a.

"Omar leh Richard te'n Lalit Kumar an hruai chhuah fel hnuah Bethany kan pan dawn nia, Rishan pawh kan hruai tel a ngai ang," a ti ta a.

"Jeho, engtikah tak kan buaina hi kiang ang maw, a hrehawm tawh em mai," ka ti ta thlâwt a, "Aryan te rawn haw phawt sela a fel chho duak mai ang, Omar leh Richard hi tun hma aṭanga ka ṭhian ṭhate an ni a, ka patea hnung ka zui hnu hian kan inkâr a ṭha ta vak lova tunah chuan ngai kan awh chho ṭan tawh," tia a sawi laiin a fapa a ṭap a, "Mipa fa chu ṭah ve vak vak loh tur, i nu pawhin mittui a nei tlêm tawh teh mai a nia," nui huk chungin a ti a, ka va ngei mai mai e.

An pafaa an inbuaipui lai chu ka thlir dauh dauh a.

"Ka dam chian hunah Pistol leh Riffle kah hi ka zir ve deuh a ngai dawn a ni," ka ti sap a, a rawn dâk chhuak thuai a, "A teuh lo lutuk, theinghilh hmiah rawh," a ti hmuk.

"I hrethiam lo a nih kha, farm house-a kan chén reng dawn chuan mahni invenna tur tala ka thiam a ngai, chemte hman chu ka thiam kha aw..." tiin ka nui a, min melh zuk chung hian, "Kan inneih hnuah mi pahnih chu i vit ve ta, doctor i ni tih hi rin harsa ka ti ṭhin.." tih pahin a fapa hnute a pe a, "Kan fapa tan nu ṭha tak nih tum la, i pasal tan nupui ṭha tak nih tum bawk la, a bâk thildang ngaihtuah suh," a ti hmiah.

"Dingngheti nen insual te pawh a la ngai maithei a nia," nui chungin ka lo ti a.

"Ngurthantluang, i kum leh i nihna kha hre ve la, thu ho mai mai sawi sawi teh suh," a ti tak nain a nuih a zat hmel hle.

"Jehomalsawmkima nupui ni tur chuan tum ruh leh huaisen a ngai tih i sawi a ni lawm ni, tual ka la that lovang tih hriat a ni lo," ka ti ve zel a, min melh kâwk chung hian, "I â ṭhin siah, ngawi mai mai rawh.." tiin khum lamah an rawn inpawm phei a, ka fapa ka lo ban vat a, "I nu hi a upa tulh tulh a, a laktlâk loh telh telh a nih hmel, Ngur-luhluli a nih hi.." tiin a nui ruh ruh a, ka va ngei ṭhin e. 

"Jeho-lungliana.." ka lo ti nghat a, a nui huk.

A tûk khua a var a, Omar leh Richard an rawn thleng ta bawk a, Khatam aṭangin Lalit Kumar leh midang pahnih chu an hruai chhuak ta a, "Police kuta inhlan fel hunah meeting kan nei dawn nia," tiin Jeho chuan Omar a hrilh a, Lalit te ṭhianho chu a mal tê tê-a a melh den den hnuah, "JK, Bamos leh Woodstock farm-a in hmel ka hmu leh a nih chuan Khatam hmun mai ni lo, Hremhmunah ka thawn liam tawh ang che u," tiin hriam hrûk hian a melh a, an hlauh hmel hle.

Lalit tak phei chuan hliam a tuar nasa em em a, a hmel ṭha vawr pawh kha a chhe zo vek tawh, a mit pahnihin khua a hmu mang lo tih theih a ni a, a hnar ruh a tliak bawk, a kawr âwmah thisen a val kulh a, tlem chuan ka lainat ve deuh, Farm house kawt maia ding an nih avangin engkim ka hmu ve vek bawk.

Ka inbual thuak thuak a, Jeho lo sawi tawh angin Bethany hospital panin kan kal dawn a, motor chuan ka huphurh hle. Hmanrua nei ṭha ila chuan keimaha phelh ka duh rum rum ta mai, nautê hruaia chhuah phei chu huphurhawm tak a ni.

Rishan chuan Gurkha a khalh a, a hnung seat-ah kei leh Jeho kan ṭhu a, kan fapa pawh amahin a pawm a, shirt dum leh jean dum bawk a inbel leh tawh, kei erawh chuan cotton kekawr thawl hnek hnawk leh shirt ka inbel tawp a, ka sam pawh ka chhipah ka vingvial tawp, tun hi Shillong lum ve lai tak a ni. Lum over erawh a ni lo.

"Zanin chu farm-ah kir lovin Sawlad-ah kan riak ang, kan fapa mamawh tur kha keng âm deuh la," tia min hrilh lâwk avangin bungrua kan nei ve nual.

Kawng lakah a phone a ri zing hle a, Aryan hnen aṭang leh Tleipuii hnen aṭangin a ni. Min hrilh ve zel bawk.

"Aryan te pawh an thleng tawh a, Mawitei in luahah an kal mêk a nih chu, ani kha kan kawl theih chuan hna pakhat kan thawk zo tihna a nia, Buatsaiha nen an inkungkaihna dik tak pawh kan hrechhuak thei turah ka ngai," a ti a, Tleipuiin eng nge a lo sawi tiin ka zawt a.

"Ka nu leh Buatsaiha Bank-ah an kal a, Samuel pawh Wood stock lamah a kal tih a rawn sawi, ka farnu hi a rilru a nêm a, Vansangi nen chuan inang lo tak an ni," tia a sawi lai mekin Umiam thlen dawna tuichhunchhuah bulah hmai tuam pathum an lo ding a, Rishan chuan tlan pelh mai a tum a, an lo tiding ta.

An zinga a lian ber chuan Rishan hnenah, "Motor a ṭang khan lo chhuak rawh," a ti nghut a, Rishan a che lo reng reng, Jeho erawh a ṭhut dan pangngai rengin a ṭhu a, ka thin a lo phu dup dup. Ka fapa ka ngaihtuah vang a ni.

Jeho chuan, "Rishan chhuk la, kei pawh ka rawn chhuk ang," zawi fiah taka a tih hnuah, a malchunga a fapa muhil chu min pawm tir a, "Hlauthawng suh aw, hetiang mi dukdak lo hian eng thil mah an ti ngam lo," ti sup chung hian a chhuak ve ta a, ka lo hlauthawng ru zek zek.

Rishan leh Jeho chuan chu mite pathum chu an hmachhawn ta a, Pistol an chuh dawn emaw ka tih laiin 'Rishan' tih pahin Jeho chu a che chhuak phat a, amah hnaih bertu hmai tuam pakhat chu a hnek thal tawp mai, hrilh nawn ngai lovin Rishan pawhin a tih tur a ti ve nghal.

A vawi khat nan ka pasal Jehomalsawmkima'n mi a sual lai ka hmu ve ta, ka lo îp châwih a, an inphêk sual ti ila a dik ber ang, Rishan Songbet pawhin insual a thiam ngei mai, Jeho insual thiam zia te chu midang ṭawngkâ aṭangin ka hre fo tawh a, hmaichhana ka'n hmuh tâkah phei chuan ka ngaisang ru hle, a huaisen em atin ni.

Kâr lovah chu mite pathum chu lei chârah an thal phung a, min lo tidingtu palian ber kha Jeho chuan vawikhat a chhuih leh pawp a, a vial ngawlh ngawlh mai.

"Helai kawngah hian kan rawn lêt leh dawn a, min lo châng emaw buaina siam zawnga in awm leh a nih chuan ka kut lâwngin in ring ruh ka ṭhuai chhum ang," hniam setsawta tiin a kekawr a beng fai a, Rishan nui suk suk chu melhin, "I duh phawt chuan an ke ruh kâp tliak vek rawh," a ti hem mai.

Zan thil ni lova hetia inlambun hi chu thil thleng zen zen a ni ngai lo a, tin, hetiang misual rual hi chu pawisa duh an ni tlangpui, silai an chelek ve tak nain an hmet puak khât tih a hmain ka lo hre tawh. Mahse, Lalngurmuana hruaia kal kan nih avangin ka hlauthawng ru em em tho.

Jeho thu angin Rishan chuan Pistol a phawrh a, amah lo betu kha a tin rap a, "I ke bâi mah se i ṭhiante ke a bai ve dawn lo a nia," tia a sawi zawh rualin Pistol a hmet puak a, chu pa na tuar ṭê thawm chu a ring ngei mai. A ṭhiante pahnih khur dur dur chu a tin leh a, "Nung dama awm in la duh chuan tlan rawh u, tlanchhe ta che u.." ti vin ṭhawtin chunglam hawiin vawikhat a hmet puak leh a, Rishan hmel dur khup chu a nelawm loh ngang mai. 

Motor chhungah Jeho a rawn lut a, tui bottle a ban a, a kut a sil nawk nawk hnuah, "Dawihzep hmel hi chu a hai theih loh," a ti duh lek.

Rishan pawh driver seat-ah a ṭhu leh thân a, mipathum te inbuaipui lai chu melh zukin tui bottle chhin a hawng a, a va theh leh hrâm. Sual thiam hi ka'n ti mai mai khawp a.

"Boss, in inpeih chuan kal ang aw," a ti zui zat a, Jeho chhânna pawh nghâk lo hian kan tlan chhuak leh ta. Ka thaw huai huai mai alawm maw le.

"Kha mite kha tu pâwl nge an nih ve," naupangchhia zetin Jeho ka zawt a, khi suk chung hian, "Tu pawl mah an ni lo, anmahni siam chawp pawl an nih kha," tiin za lutuk hian a nui a, "Pawisa an duh a, mi rawk leh rukrûk chiah an thiam," thutak deuh zawka tiin a fapa a pawm leh nghal a, a va han ngai ho tak. A hlauthawng ve miah lo zawk nge, hepa tak hi chu(h)

"Sawlad-ah chuan kan riah ngei a ngai dawn a nih kha, min lo tibuai leh palh ang" ka lo ti a.

"An thluak ka kâp darh lo kha an lawm ngawt ang, Gurkha an hmuh hian JK farm lam kan ni tih an hre lutuk tlat, keiman motor khalh ila chuan min tiding lovang, kei chu helaiah kum tam tak ka tei vâk tawh a, mi thar an nih loh chuan min hria alawm, ka chuang ve lo turah ngaiin an lo tiding a nih kha, Rishan te chu kan inpui driver a ni ṭhin a, helamah a tâlna a la rei lova an zuam a nih hmel..." a ti zui duah.

Bethany hospital kan thleng a, dressing room-a kan luh hlanin Rishan chuan Lalngurmuana a lo pawm ve ngial a, hmeichhia pakhat mah kan kawl tel lo hi hrehawm ka ti ve deuh ta. Nakinah Jeho la sawipui ngei ka tum.

Min zaina lai pawh pawnlam a hil ṭhain a ṭhuina an phelh fel a, min pawt khawr deuh naa tawrh hrehawm chu a ni ta lo, Jeho chuan nurse pakhat a hmelhriat a bia a, "Helai hmunah hian ka nu a lo la kal ṭhin em?" Tiin chu nu chu a zawt a, a biak nu chuan, "A lo la kal zeuh zeuh, a hma ang kha chuan a regular ta lo," tiin a hrilh a, an sawi awmzia pawh ka hriat si loh.

Hospital kan chhuahsan fel hnuah, "Motor-ah lo awm la, helai hnaiah hian Rishan nen kan han teikual lawk ang e," tiin Jeho chuan motor kawngkhar a hawng a, ka ṭhu lut ve mai.

An rei dawn leh dawn loh ka zawt leh rih a, "Zanriaha siam tur lei te a ngai a, bâkah mi hmuh lawk tur ka nei," tia a sawi hnuah Gurkha a lock vek a, min kalsan ta a, kan nufain kan ṭhu rân a, darthlalang phen aṭangin Rishan leh Jeho kal liam tur chu ka thlir reng a, nichinah an insual hrep a, na nei hmel pawh an pu duh der si lo.

Bethany hospital aṭanga lo chhuak mek te ka hmuh chuan ka ṭhut dan ka siamrem nghal vat a, nu Pianmawii leh Angelika inchei nalh tak hian an rawn chhuak a, Jeho khan nurse hnenah a nu a la kal ṭhin em tih zawhna kha a zawt a, eng emaw ka hriat ve loh thil a awm tih ka hrethiam mai.

Gurkha dinna zawn an lo thleng a, nu Pianmawii a ding dat a, motor chu a thlêk vang vang hnuah koki san âk chung hian an kal leh ta a, Tleipuii ka ngaihtuah kai a, a nu hian eng anga tam nge thuruk a neih tih a hre der si lo a, a khawngaihthlâk ngawt mai.

Ka phone ah lai a rawn ri a, Aryan a lo ni.

"Madam, Boss kan call tlang thei lova naktuk zing hma takah lo haw kan tum a, Mawitei pawh kan lo hruai thla dawn e, a fapa tel lova hruai thlâk kan duh si a, pawisa pawh kan seng hnem viau mai, amah Mawitei kan lo phur tawh dawn si a, phone call kan lo hmang thei dawn tawh lo tih lo hrilh rawh aw, min be duh a nih pawhin whatsapp lamah ni rawh se," a ti fel fai thlap.

"Ka lo sawi dawn nia, fimkhur takin lo tlan ula, a rinhlelh theih tur anga in awm loh kha a ngai a nia," tia ka hrilh hnuah kan inbiakna a titawp a, hmasawnna thar kan neih belh ve ta. Ka unaunu mah ni se, ka u Vanlalṭana thihnaah a inhnamhnawih tak tak a nih chuan nalua awm lovin chêt ka la dawn tih ka inhria.

Jeho te pahnih pawh inkhai bâwr lûk chungin an rawn lêt ve ta a.

"I lo ning tawh em?" Tih pahin a hnung seat-ah a lo ṭhu lût a, a nu leh Angelika ka hmuh thu ka lo sawi thuai a, a ṭhut dan a siamrem hnuin ka malchung aṭangin a fapa a la leh phawt a, "Kâr khatah vawi hnih an kal a ngai ziah alawm, ka nu hi a chi kawng lam a fel lo a, Samuel hriat lohvin a rukin a incheck up ṭhin, Bethany hospital-ah hlir a kal a, hei hi chu a hma aṭanga ka hriatpui sa a nia," tiin min hrilh a.

"Tleipuii leh Vansangin an hre ve em?" Ka tih chuan a bu nghut ringawt.

Aryan nena kan inbiakna ka hrilh leh zung zung a, "Eng hmanrua tak han hmang ang maw, Aryan te unau hi chu an fing fel a, ka tan an ṭangkai em em bawk.." tiin a fak ve luam.

Kan awmna hmun aṭangin Sawlad a hla lem lo a, kâr lovah kan thleng mai.

Ka chauh deuh avangin inchhung kan lut fel awrh tihah khum lam ka pan nghal a, ka awm a nuam lutuk lo. Jeho hnenah, "I fapa kha lo awmpui la, rei lote mut hahdam ka ngai," ka ti a, ner nawk chung hian, "Kan fapa zawk maw le, Bawiha hi Jehomalsawmkima fapa a ni bik lo a, Ngurthantluangi nena kan fapa a ni," a ti leh deuh kher.

Ka hah hluah hluah a, ka mut a chhuak em em bawk, ka maimitchhing ta nge nge a.

"Ngurthan, zanriah ei a hun a nia," tiin Jeho chuan min lo sawi dat dat a, peih lo zetin ka meng chhuak a, ka taksa chau lutuk pawh a zia deuh.

Choka lamah Rishan a zai rût rût a, Lalngurmuana pawh ka mutna bul chiahah a lo mu a, a muhil tui ngang mai, a pa sawi dan takah 'mipa chu ṭah vak vak loh tur' tih kha a zawm nge a ṭahbelh lo reuh khawp mai a, kan hahdam phah viau.

"A muthilh lai khan kan va ei ve lawk dawn em ni ang, Rishan nen no dawm kan tuma i phal tiraw?" A'n ti nghal ringawt a, ner sak chung hian, "Thil ṭul ber chu a ni lo, zan lamah naute buaipui a ngai leh dawn a," ka lo ti nang nang a.

"Khalam kha chu ngaihtuah suh, kan fapa ngaihthaha ngaihsak lo khawpin ka in lovang," a ti leh mai a, a sawi zawh rualin min kai tho zui nghal a, ka hnial thui peih lo, a sâwt leh dawn chuang lo tih ka hria.

Ka intih fai chhungin intur an lo dawm a, Rishan thil sawi chuan ka beng a verh hle, "Sir, Aryan hi nangman hrilh fiah la ka duh, ka sawi lovang ka ti nain i hriat ve ngei a ṭha bawk si a, Bamos mikhual farm-house a lokal nen khan hman zanah an inhmu a, vawi hnih ka manna a ni tawh," tia Jeho a hrilh chuan mak ka lo ti hle.

"Rishan, dâwt i sawi em?" Jeho chuan a ti hluk a.

"Khuai khâwina hmunah an awm dun ka hmu alawm, an thusawi erawh ka hre lo," tiin Rishan a ṭang ve tlat si.

"Aw le, a ṭha e, tikhan lo ngawi tlat la, keiman fiah ka lo tum dawn nia," tia Jeho a ṭawng laiin ka chhuak phei ve ta a, Aryan leh Dingngheti an inkawp ang maw, Jeho laka a beidawn avangin a manager lakah a ṭuan ta tihna a va ni mai awm ve.

Ka chhuah phei tak avang chuan eng mah an sawi zawm tawh lo a, zanriah kan kil lai pawhin tumah kan ṭawng lo. Rishan pawhin thil ngaihtuah mûk tak hmel a pu.

Khuma kan awm hnu daihah Aryan chungchang min hrilh a, "Ka lak aṭanga hel duhna rilru a pu a nih chuan ka ngaidam ngai lo ang," tih chiah a sawi.

"Thu chiang i hriat hma chuan thutlûkna siam suh ang che," tiin a kâwngah ka kuah a, min lo kuah lêt vat a, "Inphatsanna hi ka hua a, min phatsan ai chuan thi zawk mai rawh se," a ti leh hmiah, rilru hah hmel takin a thaw hawk a, a biangah ka chûl a, "An zavai hian phatsan vek che mah sela, i tan ka awm zel ang," tia ka hnemna chuan hna a thawk ṭha hle.

A kut pahnihin ka biangah a dawm a, ka mitah chiang takin min en bawk a, "Ka neihchhun tak meuh meuh i ni, mipa dang lakah ka ringhlel lo che a, mahse, buaina nasa lutuk avang hian a rukin min kalsan ka hlau ṭhin, Mate..Ngurthan.." ti sup chungin ka hnar hmâwrah a fawp zauh a, "In nufa hian ka kiangah in awm reng ang tih min tiam rawh," a ti ta a.

"Malsawmkim, i nupui ni tura ka inpek lai leh tharum hmanga ka taksa i neih lai pawh khan ka thinlung hian a phatsan ngai lo che, i lakah thinurin lungawi lo ṭhin mah ila, ka tana mipa hmasaber i nih avangin ka hlatsan thei tak tak lo che, engtikah emaw chuan min hmangaihna hi hmangaihna vêkin ka la chhâng lêt ang che," nghet charhin ka ti ve ta a, a nui suk a, thil dang sawi miah lovin a mit thim mâk chuan min melh vang vang a, min fawp zui nghal.

A hmui hnawng chap leh lum ham ham chu ka thlahlel tih phat buai ka tum lo, nupa nun hmang thei lo mah ila, thil danga a lungawina siam sak tum ru rânin a kekawr kâwng ka dap a, "Ngurthan..." a ti hniam ruih a, "Lo che lo la.." ka tih chuan a khi suk ringawt.

A thawmhnaw inbel ka hlihsak lai pawhin a mut ngaiin a mu reng a, ka kutin a kawng hnuailam a deh ruala a hmel phurnaa khat chuan ka chhungril a tihlim si.

Ni e, nupa dik tak kan ni a, ka pasal lungawina siamsak turin a nupui hi ka pawimawh, tisa thila inzawm kher a ngai lo. Dr.Ngurthantluangi hian thiam thil ka nei ve tlat.

Jehomalsawmkima lungawi hmel ka hmuh rualin thawh chhuah ka tum a, min lo chelh vat. Ka kut dinglam lakângin a hmui zâwnah a dah a, "Doctor hman tlâk loh chu i ni miah lo," tia nui ruh ruh chung hian a lamah dimtein min kuah hnai a, "Lalngurmuana nu aia duh leh hmangaih ka nei lo, ka dam chhung daih ni rawh se," tia a sawi zawh rualin amah si chêtin min kuah hnai a, "Ka Ngurthantluangi ni zel ang che," a ti ta a. 

"Ka Laljeho.." tiin ka lo phun ve sap.

Khawvar dawn hnaihah Jeho phone a rawn ri a, amah a muttui em avangin ka lo pick sak a, bâkah kan fapa a harh ka hlauh vang a ni pakhat.

"Hello..." ka ti sap a, lehlama mi a ngawi vang vang mai. 

"Tu nge aw...?" Ka ti nawn leh a, a ri rak rak a, a reh leh vung vung, dah mai duh lovin phone ka la keng reng a, chutih lai chuan, "U Ngurthan...Mama..." tia thei leh thei lova Tleipuii ṭawng ri ka hriat chuan, "Tleipui..i hrethei em?" Ka ti vat a. Line a incut zui nghal.

Vawi hnih ka call nawn a, a ring ral ṭhak.

Jeho mutui lai chu ka sâwi dat dat a, "Tho teh...tho vat rawh.." tiin ka ko leh a, a rawn meng chhuak chiang ngei mai, thawhphan pawh awm lo hian a rawn ṭhu chhuak nghal a, "Eng thil nge ni ta?" Tia min zawh chuan a phone ka pe a, thil awm dan ka sawi zui nghal bawk.

Khum aṭangin a tho chhuak a, Rishan muhil lai a kaih thawh hnuah, "Mawkasiang-ah ka kal a ngai a, i pi hi lo awmpui ang che," tiin a hrilh a, Tleipuii phone kha chu a call tlang theih tawh loh hrim hrim.

Ka phone a rawn ri ve leh a, nu Pianmawii hnen aṭangin a ni.

Jeho chuan ka phone ken lai min chhuhsak a, a pick nghal bawk.

"I va nep ve, i fanu chhanhim tur pawhin i pen chhuak ngam lo a maw?" Jeho thinrim awka vin ṭhawt avang chuan ka lo phu zawk a, "Kap hlum rawh, a nih loh chuan keiman ka that tho ang," tiin phone a off a, boruak hîp tumin a thaw kâwk a, Rishan nen a ngaihna hre lo zet hian kan inmelh hrek hrek ringawt.

"Ngurthan, kan vaiin Mawkasiang-ah kan kal ang, insiam rawh u, hmahmawhin," a ti vin ṭhawt a, "Jeho...eng thil nge thleng?" Ka lo ti lawi rât. 

Heti khawpa ti thinrimtu leh Sakawlh ang maia a awm thut nachhan hi kan hriat ve a ngai a ni.

"Samuel Pamei khan ka farnu pawngsual a tum a nih chu..ni lo..a pawngsual tawh zawk mai thei.." ti supin a meng rum ûl a, a bâk zawh belh ngai ka ti ta lo.

Lalngurmuana ka pawm nawlh a, "Kha ani hi lo pawm lawk rawh," tiin Rishan ka hlan chhâwng a, kan mamawh tur zualpui ka khâwm nghal sawk sawk a, Jeho hmanhmawh lutuk phi sek chu, "Motor va la chhuak rawh," ka ti a, a rum dut ringawt.

Samuel Pamei a thih phawt loh chuan keini nupa hian nun hahdam kan nei ngai dawn lo a nih hi...

260423

B+>[BeckirafARenthleI]<+®®