TAWN HRIAT [Becky Rafa Renthlei]

TAWN HRIAT 

Ziaktu: Becky Rafa Renthlei

-B®®

Tawn hriat ka han ti tak naa keima tawn ni loin nu pakhat a hming tarlan a rem lo a, ani hian kum tam tak liam taa a thil tawn min rawn hrilh hlauh mai a, veng leh khua thup sak tura min ngenna zahsakin tihian ka rawn ziak ta a ni.

Kum sawm kal taah khan ka patea hian nupui la naupang tak mai a nei a, amah aia kum 16 zeta naupang a ni nghe nghe! 

An inneih aṭanga rei vak loah nau an pâi nghal a, kum chhirin fa an nei a ni ber e, mipa fa hlir pathum an nei a, an fa naupang ber leh ka fa û ber hi kum khat chhuak an ni.

Amah la naupang hle mah se an chhungkaw dinhmun a harsain eibár zawn kawngah an awlsam tehchiam bîk si lo a, kan ina a lo len ṭum hian insiam a duh thu a sawi ta a.

Keilah chuan, "Hmeichhia in nei ve tawh mial maithei a, insiam rih lo mai rawh," ka lo ti a. "Â, kan tan a harsa em mai fa dang neih leh pawh ka zuam tawh lo," tiin min chhâng a.

Hemi hnu lawk hian Civil hospital lamah insiam tumin a kal ta a. Mahse, doctor ten "I la naupang lutuk," tiin insiam an lo phal si lova lungni lo zet hian a rawn haw leh ta rih a.

Thingtlânga awm ta ngang chu khawsak a lo harsa a, chhangchhiat nen pawisa khâwl tikni awm suh, ka patea nitin Lo lamah a feh a, eizawnna kawng dang a nupuiin dap ve ṭhin mah se nau no pawm a ni a, an chêt a khirh takzet a ni e.

An fa naupangber leh ka fapa hi kum khat chhuak an ni.

Insiam a duh luatah doctor dang a pan leh ta a, a pan hmasak ten a la naupan thu sawiin hnar mah se tuna a pan hi chuan an dinhmun a hriatthiam sak a, a lo remti a, ka nutei pawh a lawm khawp mai.

A inzai hma ni lawk pawh hian min rawn tlawh a, a dan pangngaiin a titi leh siam siam a, a bula awm hi a nuam vei phian. 

Nithum hnuah damdawi in pakhatah insiam tur chuan a kal ta a, a damdawi in pan hi a hming tarlan a rem tlat lo, min lo hrethiam mai dawn nia.

Chutia phur taka a insiam fel hnu chuan a pum lam a chiang thei tlat lo a, khum betin a na zui ta a, sum leh pai lamah an harsa ka tih tawh kha, a pum nâin zual lam a pan tâk zêlah chuan damdawi in anpan leh ta nge nge a, loh theih loh a nih tawh vang a ni. Endoscopy leh Ultrasound ti nghal turin doctor ten an lo ti a. 

A result a chhuah meuh chuan kan hrilhhai tlâng ngei mai. Khatia nau pâi thei tawh lo tura a insiamna lamah amah zaitu doctor khan a rîl a lo zai tel palh hlauh mai a, chumi avanga a pum pawh naa awmngaihna hre lo khawp hiala awm ta kha a ni a, a thinrim thlâk duh ngei mai.

Mahse, an dinhmun avang leh keini a chhungte pawhin sum leh pâiah puihna tur em em kan nei bik si lo a, a theih ang anga enkawl kha kan tih theih tawk a ni mai.

Zan thum damdawi inah an awm hnuin a fapa têber hian a ngai si a, an inla chhuak ta rih a, dam ṭhaa chhuak erawh a ni lo.

In lamah kârkhat dawn an inenkawl hnuah tlaikhat chu a kua a ṭha lo a, êk te a cheh phung a, mahni pawh insaseng hleithei lo hian chhuat laiah a lo mu hlawm reng a, rang takin an ṭhenawmte Taxi-hmangin damdawi in hnai ber an panpui ta a; mahse, kawnglakah nikhua a hre lo chho a, a hmun an thlen meuh chuan a mar an hmu zo tawh lo!

Doctor-in a thi tawh tih kha a lo nemnghet a ni deuh ber.

Ka patea nupui thih dan hian beng a verhin zawhna pawh kan dawng nasa a. Mahse, kan retheih luatah kan ṭawng huai ngam lo, a ṭhen lahin "Pathian remruat hi chu tuma dâl theih a ni lo a," titâwk an lo awm bawk a, a ruang hi an inpuiah nghah a ni a, doctor-te chhan hman lohin a thi ta a ni.

A kalsan tâk a pasal fanaute an khawngaihthlâk ngei mai.

Tin, a rang tehthut lutuka atu amah kan inring hman lo a, amah ka nutei a harhvâng mi a lo ni a, a pum nâ kha a sawi vulchûk lo ve bawk a, a nat tawpkhawkah chiah keini lam pawhin kan hria a, hun rei inenkawl hmanin an awm lo hrim hrim ve bawk a.

Tlaivarpui a nih hnuah a tûk lamah vuiliam a ni ta a, a fa sên erawh a nu ngaiin leh hnute ngenin a ṭap ngat ngat a, kan in lamah ka hruai phei ta ringawt a, Nestogen leiin kan hnêk tîr a, vanneihthlak takin a lo hne duh mial a, hemi zan hian kan bulah a riak ve ta rih a, kan tlaivar titih a ni ringawt.

Hetia ka nutei a boral hnu aṭang hian thâwm riva hriat tur a tam riau a, a takin tawng ve lo mahila, kan ṭhian ṭhenkhat leh tlângkamah a thlâ hmu ang te a sawi rîk a awm fo a, keini chhungkua tak chuan eng thâwm mah kan hre lo mai nilovin a thlâ pawh kan hmuh ve miau loh avangin kan awih em em lo.

A thih cham kârkhatna kan thleng a, ka patea min ngen angin kan nufain riak turin inpui lamah kan phei ve ta a, ka patea hian a fate a duatin a ngaihsak a, kum upat hnu a fa nei a ni bawk a, tunah rih chuan an ngaihtuahawm loh.

Chutia keini nufa kan riak phei ve thei tur chu a lo lâwm ngei mai. "Nute, kan khua a har si a, thlakhat tal kan bulah awm ve thei ula ka ti mang e," a lo ti a.

"Pate, i dinhmun ka hrethiam a, mahse, kan buai ve lutuka inlêng in la nei rih tho a, sikul chawlh hunah kan lo riak zawk dawn nia," tiin ka lo chhâng a.

Hemi zanah hian an nupa khum zaupui maiah chuan ka patea fate pathum leh ka fapa nen kan mu ve ta a. Amah ka patea tak hi chu sitting room-lamah a mu dawn a, a ṭhiante an la lên rih avangin naupangho nen kan mu hma a, atu amah phei chu an muhil lem lo. Khumah an ninhlei kual vel a ni ber.

Zan a rei a, naupangte pawh an muhil ve ta a, ka patea fapa têber leh ka fapa inkârah ka mu a, ka chau ve bawk nen kâr lovah mutchhuakin min zém a, ka muhil ve ta a.

Tukverh inhawng ri ṭhuai thawmin min tiharh hlawl a, thlî a lo thaw vûk vûk chu niin! Kan khum piaha tukverh chu a lo inhawng ngei a, 'kan kalh theihnghilh a nih dawn hi' tiin dimtea tho chhuakin tukverh lam ka pan a, Parda fual tak inzâr chu thlîin a chhêm phe hlawk hlawk a, naupangho tihharh hlau tak hian tukverh ka khâr ṭhat hnuah khum lam ka pan leh ta a, thimthamah naupang an muthilh theih loh avangin light pakhat kan 'on' nghe nghe.

Ka mu fel awrh tihah parda chu a rawn phe leh ta hlawk hlawk a, tukverh a inhawng tawh dêr si lo. Thli thaw ri hre mahila pindan chhungah thli thaw a lo lût lo tih ka hrechiang ve tlat. Ka ṭhu chhuak leh a, parda inzârna lam chu ka thlîr ta reng a, ka en reng lai pawh chuan parda chu a phe hlawk hlawk a, hlimthlâ niawm tak hi a rawn lang ta a!

Hlauhna em em pawh nei lem lo hian 'Tunge?" Ka'n ti thlarawk a, a reh ṭhiap mai. Chu hlimthlâ chu a lang fiah telh telh a, a hmel hmu lo mahila a ruangâm aṭangin hmeichhia a ni tih hai rual a ni lo. Ka nutei thlâ an hmuh thu an sawi kha ka hrechhuak a, ka thin a phu nghal dawt dawt mai.

Chutia thâwm chhuah ngam si lo a ka ṭhut reng lai chuan parda chu tu emaw hian a rawn keu a, hlimthlâ pawh a rawn lang chiang ta! Ka nutei ngei a ni. Koh tumin ka âng zuau a, ka ṭawng chhuak thei ṭhak lo. Ka khà a chih tlat niberin ka hria.

Chiang lutuk hian min rawn melh a, chutah, a lû herin khuma naupang mu ho chu a melh diat diat a, a kil bera a fapa upa ber mu chu a en rei hle. A dinna ngaiah chesawn miah lo hian a ding a, a boral ni-a a thawmhnaw inbel ngai chiah kha a inbel nghe nghe.

Âu chhuah tumin ka'n bei ngial a, ka âw a ri chhuak thei reng reng lo. Ka nutei chuan min rawn melh ve leh ta a, "Kan khumah engvangin nge i mut?" A rawn ti ta a, thinrim awki ring a ni hran lo. Mahse, a fiah em em thung si! Hlauhnain min man a, ka thâ a khûr nasa hle, naupangho pawh ngaihsak lo chuan thawh chhuaha tlânchhiat ka tum a, che chhuak tur reng ka awm lo.

Chuta kârah ka fapa chu a rawn ṭê chhuak ṭhat a, ka phu dâwrh a, ka fapa ka ngaihven ta a, meng miah lo hian a ṭap hlap hlap a, ka fapa ka ngaihven chhung lek chuan ka nutei thlâ ni ngeia ka hriat kha a lo bo hman daih! Ka hmu sual lo tih ka inhre chiang bawk si. Hlau tur ka ni lo tiin infuih ka tum sateh naa ka thà khûr pawh a la reh lo reng reng.

Muhil thei lovin ka let kual sek a, ka patea kaihthawha hrilh ka duh rualin a rilru a hrehawm ang tih ka hlau deuh bawk si a, "Engtin mah min ti chuang lo," tia inti huai luiin muthilh ka tum leh ta a, ka meng ngam lo ti ila a dik zawk ang.

Ka patea te fapa teber chu a rawn ngîk faih faih a, a muhil leh maia ka rin avangin ka 'chu e kha' hran lo. Ka la maimitchhin reng lai chuan, "Ka fapa kha ngaihsak ta che, ka phih tho dâwrh dawn che mawni le!" ti ri ka hriat leh chuan rang lutukin ka ṭhu chhuak a, ka patea te fapa chu ka ban nghal a, meng kiau chung hian a lo mu hle hle a, mak ka ti hle. Nausen mai ala ni a, chutia ṭap miah lova a lo mu meng ka hmuh phei chuan mi râp deuh tlat.

A û te erawh kahthlâk ang maiin an muhil siai siai a, muhil ve lo awm chhun chu kei leh nautê chauh kan ni. Nichina ka âw hriat kha ka hresual emaw ka ti hial, a chhan chu thâwm dang hriat tur awm lova a reh tâk tlawk vang a ni a, keini nufaza tih loh pindan chhungah midang hmuh tur an awm lo.

Sana ka bun loh avangin a dâr zât chiah ka sawi thei lo a, thim chhah zual a kiang a, thli thaw ri hriat tur pawh a awm tawh lo a, kei erawh muhil thei lovin naute hnute ka pe a, mahni nutei hlauh kha ka inthiam viau lo.

Ka ngaihtuahna kâwma ka mut men reng lai chuan sitting room lam aṭang hian ka patea a rawn âu chhuak thut a, "Lalpui..." tiin vawihnih vawithum a nupui hming a lam a, a âw thâm ṭuak chu hlauhthawng âw a ni.

Naupangho pawh ngaihsak ta lo chuan ka fapa hnute pêk lai pawm lawpin kawngkhar lam ka pan a, chhunglamah ka kalh loh avangin ka kut khingkhat naute ka pawm lohna lam chuan ka phih hawng rawp a,  sitting room chhuat laiah ka patea a lo let reng a, a hmai leh nghâwng vel chu thlantui hian a bual huh vek!

"Pate, ka pate..." tia kovin ka ṭhingṭhi a, naute pawh ka la pawm reng, mak deuh maiin zu han ṭap miah lo a!

Ka patea chu meng â ruai chung hian a lo meng chhuak a, "Lalpui...." a ti leh a, a âw erawh a zâwiin ka hre pha chang chang chauh a ni.

Midang pun tur awm chuang hek lo, puakpuan ka la leh tê tê a, naute ka puak fel hnuah ka patea chhuat laia mu hlawm reng chu ka ngaihven chhunzawm a, tui in a hmai te ka phihsak a, kan thâwm a ṭhat tehlul nen pindan lama naupang mu pakhat mah an harh lo! 

Rei vak lo hnuah ka patea pawh a lo harh pangngai ta a, mak tih hmel deuh hian min en a, "Chhuatah elaw ka mut?" A ti heu mai. Ka lo bu nghat a, "Pate, eng nge i hmuh a?" Tia ka zawh chuan, "Eng hmu lo e, i nutei ka mumangah ka hmu a.." mitmeng pha deuh dui hian min chhâng a, ka hmuh ang kha a hmu ve a nih ka ring ber.

Rawn tho chhuakin, "Va mu leh rawh..kha i nau puak a hám nasa a nia.." a ti zui leh a, ka fapa ka puak lai hi hetia kan inbuaipui chhung hian a ṭap miah lo a, thâwm engmah a nei hek lo. 

Eng thil pawh zâwt ila a sawi duh dawna ka hriat loh avangin pindan lamah ka luhsan ta a, khua a vâr titih tawh. Chhin khat mah ka chhing lo tih theih a ni. Muthilh pawh tum buai duh tawh lovin ka patea fate muhil chu ka en vang vang a, ka lainat thar hle.

Zankhat chauh riak tura kal kan nih avangin a tûk hma takah kan haw phei ta a, ka patea berin engmah a sawi chhuak duh si lo a, kei pawh ka ngawi ta a, rilru erawh chu a nuam lo khawp mai. Kanpa bulah takngial pawh ka sawi lang duh ta lo a, khaw êngah phei chuan ka hmu sual ngaihbel velah te ngaiin ka ngaihtuah chhunzawm duh ta vak lo.

Ni a ral a, kâr a ral a, ka patea'n riak tura min sawm leh pawhin chhuanlam fahrah tê tê siamin ka hnial zel a, an fate an rawn lêng reng bawk a, khaw thim hmain ka haw tîr zel.

Ka nutei thihcham thlakhatna a lo thleng a, chhungkua kan ṭhu khâwm ve a, khami zana kan riah bâk kha zan lamah an inah ka kal ngai tawh miah lo a, ka inthiam vak lo.

Hemi zan hian riah kan tum hran lo a, naupangho khumah awmpuiin thawnthu ka hrilh a, choka lamah kanpa te leh ka patea te, midang pawh an awm nualin ka hria, an titi hlawm a.

Dâr kua a pêl det tihah naupangho pawh an muhil a, khum hi an dawh zawm avangin a zau ṭha hle. Khum thawhsanin choka lamah phei ka tum a, kan pa teho titi pawh ka hre pha vek, ka nutei thawmhnaw dahna Almirah chu a chîk ṭâwt ṭâwt a, an harsa ve ka tih tawh kha, wardrobe pangngai tak pawh an nei lo a, plywood hian Almirah an khawrpum ve a, chutah chuan ka nutei thawmhnaw leh a puan te an dah ṭha ve a ni.

Chumi a thawmhnaw dahna chu hawngtu awm ang chiahin a rawn inhawng riai riai a, kawpza a ri ṭuah ṭuah bawk a, a hmaa ka thil tawn nen a rûk tak chuan ka hlau.

Khar ṭhat pawh tum lo hian chhuah mai ka tum a, kawngkhar hawn tuma ka ban veleh, "Ka'n phih chhuak law law teh ang che..." tih ri ka hriat rualin ka kawr hnungah hian min pawt nawk a, âu chhuak tur pawhin ka hamhaih lutuka ka ding khûr zawih zawih ringawt.

Tuma min hrilh ngai lovin ka nutei a ni tih ka hria, thâwm ka chhuah lo emaw ka inti a; mahse, choka lam aṭangin kanpa a rawn tlan lut vat a, "Nute..." tia min rawn sawi nawk nawk chuan ka phu leh zawk a, ka hawi kual chiama kanpa leh ka patea hian khum sîrteah min lo ṭhuttîr tawh chu niin. Khalai hun reilote chhunga thil thleng kha ka hre miah lo. Kawngkhar bulah hlau thlabârin ka ding khûr zawih zawih tih ka hria.

Zawhna min zâwt sek sek a, ṭawng chhuak tur pawhin ka thâ a la khûr nasa lutuka ka sawi hlei thei lo.

Tlema ka pangngai deuh hnu an nghâk a, inlêng te pawh an lo haw zo tawh. 

An ina kan riah zana thil thleng leh zanina ka thil tawn zawng zawng chu hreh chung chungin ka sawi zo ve ta hrâm a. Ka patea'n muang ban charh hian, "Nute, khawiah mah sawi loh a ṭha ang, i nutei hi a thih danah a lungawi lo tih a hriat a," tiin hman zana a hmuh dan te kha a sawi ve ta a. 

"Khatia ṭhutthlenga ka muhil kha i nutei hian min rawn sâwi nimaiin ka hria, ka mang hriat ruai a, min phih tho lawp a, Lalpui..tia kovin kuah ka tum a, a lo duh lo nasa mai a, min nam a, chhuatah ka tlu ta a nih kha.." tiin a sawi a, kanpa a thaw chhuak hawk a, tuma hnena sawi loh tur tiin kan intiam ta hial a, chhungkaw mualphona a thlen palh kan hlau a ni.

Hemi hnu hian ka patea chuan eng eng emaw tawn zeuh zeuh chu a la nei. Kei erawh chuan vawikhat mah ka tawng nawn tawh lo a, a thlân bul velah tepawh tleirawl hoin hmu ang tein sawi awm bawk mah se ka bengkhawn duh ta vak lo.

Kum sawm lai a lo liam ta a, kha thil thleng kha ngawihbopui mai lovin tihian ka hrilh ta che a ni. Tiin a sawi.