INTANGIBLE WOMAN(M&B)

               
  INTANGIBLE WOMAN (M&B)
                 (Completed) 

by. Becky Rafa Renthlei


                       
 Chapter-1

Shower hmanga ka inbual lai chuan Phone a lo ri ral ral a, a rik danah chuan ngaihven vat ngai chi a nih hmel hle mai. Thlawhna ka rui deuh bawk nen rilru fim pawh ka pu hlei thei lo.

Towel chhah țha tawka ka lu tuamin; bathrobe ka ha nghal a, khuma phone ka dah chu ka han lakang a-

"Yes.."

"Hazel, dam takin i lo thleng leh ta alawm."

Boss aw dam leh ngaihawm tak han hriat leh chuan ka hahdam sawng sawng mai. A hnuaiah kum li ka thawh chhung zawng khan ka nu leh pa te aimahin ka boss Josh leh a nupui Becca te nen hian kan inpawh zawk daih. Mahse, Becca chu thlaruk kal ta khan a boral thut a, chuta țang chuan Josh hi ka chungah a innghatin, a nupui ngaih em em in a boral san vanga a lunglenna hnem hi ka tih ngei tur a ni.

Kan chhungkaw nun hlimawm loh tak chu an nupa hian min hriatpui vek a. A thih hma lawkin Becca chuan America lama ka nu leh pa te hmu turin min hruai a, an hnena cheng ve tura min duh lohna pawh ualau takin an lo tilang tawh nghe nghe a nih kha, ka pahrawn hi ka ngaina lem lo tlat alawm!

Ka kut awl lam chuan ka lu tuamna chu phelhin, Josh rawn țawng leh chu ka ngaithla a.

"Zanin tlai hian dinner min rawn kilpui thei ang em? Thlawhnaah thuitak i rawn chuanga i chau viau ang tih pawh ka hria a..."

"Sawi zui lo mai rawh! Lo kal chu ka tum tho tho alawm," dam thlapin engtin nge ka țawng chhuah theih zawk! Kar li lai ka awm bova, chumi chhung chuan Becca ngaiin a khua a lo har viau tawh a niang. A lunglenna ațanga Josh hi theih ang anga hnem ka duh, ka tan chuan unaupa țha tak ang mai a ni.

"Awle ka lawm e Hazel, tunah chuan engmah sawi ka tum lo, lo kal phawt mai teh." Phone a off hmak zui! Engemaw tak tibuaitu a awm aniang! Khatianga polite lo khan a awm ngai lo.

Kei hi Hazel Cade ka ni a, kum 18 ka tlin hnu lawkah ka pa (George Cade) min hmangaih em em tu-in car accident-ah min boral san a, ka nu Lauren chuan a tuar lo mai pawh ni lovin, thlaruk a ral chiahin pasal dang a ûm nghal daih a! Khata țang khan ka nun hi a danglam vek tawh; kum 23 ka tlin hnu pawh hian hmeichhe luhlul, vawt raih mai leh mahni thu duh tak ka nih phah ta a ni.

America ațanga England-a insawn chu namai lo tak a ni. Mahse, ka pa sum min hnutchhiah tlem a zawng nen flat lian lo tak luahin ka tal ve nawk nawk a. Thorne Electronics Company hnuaiah Mr.Josh Thorne-a secretary atan vanneihthlak tak a lâk ka ni hlauh a, an nupa hian ka harsatna te min hriatpuiin chhungkhat ka neih ve chhun anni ta reng mai. Becca boral hma lutuk hi chu hriatthiam har ka tiin Josh hi ka lainat tak zet a ni.

Dinner ei a chhuah pawh chu ka châk lo hle mai. Mahse, ka boss a ni miauva hnial pawh a țha ber chuang lo.

England July thla chawhnu lam boruak hi chu a vawt thei riau a, sweater hring duk  leh velvet kekawr dum hain ka sam pawh duhdah deuh takin ka țawn mawl tawp a, keima puala car ka neih loh avangin ka bike ken mai a ngai dawn a ni. Taxi koh buai vel hi laklawh fé anih loh chuan ka duh lem lo.

Kan chenna a inhlat lem lo bawk a hmanhmawh viau pawh țul ka ti lem lo. Dressing table hmaah țhuin nasa lo te in make-up ka hmang a, ka nu hmel ka chhun lutuk hi chu ka haw teh a nia. Ka hnar te fel ran leh ka mitmu lunghlu ang maia dumpawl râm mai chu darthlalangah chuan melh vang vangin ka khap sak sak a. Ka nu ka ngaihtuah chhuah apiang hian ka âwm hi a tawt up up zel, ka haw tak zet a ni.

Ngaihtuah thui duh lovin ka insiam chhunzawm ta zawk a.

Hall lian lo takah chuan a ngai ngaiin ka suitcase te chu a la awm a, ka flat-ah hian kum li lai ka lo cheng ve ta reng mai. Holiday hmangin California-ah ka kal kha a nia, engmah pawh ka ang lo chu a nih hi. Ka thawmhnaw pawh phawrh hman a ni tawh lo, duh leh dinner ei zawh lamah ka chingfel tawh mai a niang chu.

Helmet khumin chahbi leh bag ka la a, a tawk der! Garage ațangin bike ka nawr chhuak a, hrukfai thuak thuak pahin ka start a, mi țhenkhat leh ka thawhpui te chuan bike ka khalh hi an ngaimawh viau tih ka hria. Mahse, ka pawisa neihin a tlin tawk a nia. Tin, kei ang hmeichhia; nu hmangaihna dawng pha lo, pa thihsan, hlimna tem ve tur nei miah lo hian ka inhmeh tawk chiah bawkin ka hria. Khi sak chungin ka tlanchhuak zui ta a.

Josh leh Becca te chenna Thorne building pui ber leh Thorne office hi inhnaih taka awm a ni a, Victorian hunlaia sak te pawh a ang deuh, nuam leh zau țha tak niin kawtzawl pawh duhthusam a ni. America ațanga England ka pan tirh khan an hnenah thla thum ka cheng ve a, ka in ang maiin ka ngaina hman hial a ni.

Kawngkhar inhawng ațanga eng lo lang chhuak raih lam pan chuan ka helmet pawm țat chungin step thui lo te chu ka zawh chho a.

"Hello, Mrs.Spencer!" Tiin Josh-a house keeper lam hawi chuan ka nui var var a.

"Hi, Hazel kan inhmu leh ta maw, chawlh chu i hmang nuam bawk em? I vun te pawh a rawn thar haw sar mai alawm" nui var varin min chhang let vat a.

Ka ban vai zauhin Mrs.Spencer chu inchhungah ka luh san a, California ka kal chungchangah zawhna chhan sen loh a nei leh ngei pek ang chu.

Sitting room kawngkhar thinga pawh hawnna an siam chu pawtin ka pen lut a, tukverh bula mipa pahnih, min hnungchhawn zawng a lo ding te chu va pawh mai ngam lo hian ka ding deuh dat a.

Pindan chhung chu a lum deuh hak a, an meilum chhem chuan pindan chu a ti êng deuh bawk. Josh chu ka lam lo hawiin "I rawn thleng thei maw? Intur ka lo thlit ang che" a rawn ti vat a.

A bula mipa ding pawh muangchanga rawn inherin kan in melh ta ran a, a mitmeng tuifinriat ang maia paw muk raih chuan nelawm loh zetin chiang takin ka mitah min en a, a sang hle mai feet ruk a tling hialin ka ring. A darpharh hlai țha tak leh kawng fek, a bawp thahrui ngah hmel zet chu a kekawr dum hak chuan a khuh thla zuih a, a sam dum hlap; fai hmel zet  chu a sei lek lek tawh a, ka hmu kim hman deuh vek.

Ani pawhin ka pianhmang chu chiang zetin a enkual dan dan a, kut lawnga min khawih ang maiin a enna lai apiang chu sa ham hamin ka hre lehnghal! Kan boruak teh hrep chu a.. Josh a rawn khuh kharh chuan ka hawisawn ve ta hram a, ka helmet ken lai dah țhain sofa hnai berah chuan ka țhu thla a.

"Hazel, Matthew Faulkner, Faulkner Electronic chairman hi hmelhriat ve rawh. Matt, hei hi Hazel Cade, ka secretary a nih hi."

"Hazel," ti sapin ka kut chu a rawn tawk zauhva, ka khur dar dar mai, ka thin a phu dawt dawtin ka hria. Ka meng bial kal mai bawk a, a mi uap a na tak zet!

"Mr.Faulkner," ka ti ve sap a.

"Matt zawk le, a ni lawm ni Josh?" Josh melh pahin Matthew chuan a rawn ti a.

Josh chu lo bu nghatin intur a thli zui a, "Champagne nge i duh Vodka Hazel?"

"Khawngaihin Vodka zawk le," ka zam tur a ni lo hepa hmaah hian dâk vahin no chu ka ban a, mit zim san chunga min entu Matthew chu ka melh rum ngang mai, min nuihsawh hmel zeta a khi suk chu ka huat tawk a tling tak zet.

Josh chuan kan boruak țang ru zet chu hre ve awm hmel pawh a pu lo. Ka no a intur awm chu tem hlakin, ka che vel hmaih nei miah lova min en reng tu Matthew chu ka melh lui ve ngat a. Engvang mahin a bulah hian ka zámna tih lan ka tum lo bur, Hazel Cade mi luhlul ka ni alawm le!

Mrs.Spencer-in dinner ei tura min rawn koh takah chuan ngai ka awh leh hman der tawh. Mi pahnih te chu nghak duh lo lui ngatin house keeper chu ka zui a. Matthew-a ruangam lian leh inphut mawi tak, sáng bawk si nalh thlurh mai lak ațang chuan inthiarfihlim ka mamawh a ni.

Dining hall zau takah pen lutin țhuthmun ka rem vat a, napkin ka malchunga pharh diaiin ka ep taka mitmeng nelawm lo leh vawt raih mai chu ka melh duh lo lui tlat. A theih anga țhaa tlai hun hi hman ka duh a ni.

Mrs.Spencer-in Mushroom soup a siam ka insuah laia Josh lo khi sak chu ka nuih let var var a. Josh chuan engemaw a sawi a, engnge a sawi chiah ka hre thei lo. Matthew pawh chuan a lênna pa thusawi chu a hre hauh lo a ni tih hriat tak hian thu dang daih a rawn sawi ta a.

"Sumdawnna inzawm chungchang chu eng angin nge i ngaih Hazel?"

Makti zetin Josh lam ka hawi vat a, ka hrilhhai hmel chu lo hmu vat in, "Hazel kan company hian tlâkchhiat lam a pan mek a ni. Min pui turin Matt hi ka sawm a, a kimchanga ka hrilh loh che avangin khawngaihin min ngaidam ang che," a ti a.

"Ngaihdan ka siam thei mai rih lo Mr.Faulkner, Josh sawi ang khan a kimchang ka hriat hma loh chu..." nelawm loh tak chuan ka ti chhum ve hmak.

Ka âwka nelawm loh tak avanga Josh chu rawn dâk chhuakin a mitmeng chuan țhat chhuah hram turin min duh tih ka hria. Mahse, he mihring Matthew Faulkner inti vei zet hi ka ngainat zawng a ni hlawl lo. Ani pawh hian min ngaina lem lo a nih hmel.

Kan Company Managing Director leh Board Chairman a nihna angin Thorne Eletronics tlâk chhiatna chu ama mawhphurhnaah Josh hian a ngai tlat dawn a ni tih ka hria.

Kum khat leh thlathum liam ta khan Sales Manager-ah ka awm ve zawk tawh a. Kan thil hralh chhuah pawh a ziaawm chhova, kan hmasawnna avang pawh khan kan lawm ve viau a nih kha.

Mahse, thla nga kal ta ah khan Josh chuan midang rawih belhin, amah puitu tur atana a tih Richard Tempest nen chuan an inhre pawh hle a. Kha mi ațang khan kan thil hralhchhuah pawh a tlahniam chak riau mai. Chu chuan Josh rilru pawh a luah hle a, Richard kha ka ringhlel ru deuh viau a. A nupui thihna khan Josh Thorne hi tikeh chhiain a finna leh thiamna a hmang hleithei lo a nih dawn hi, hahthlak hian! Hemi hi remchangah lain Faulkner Electronic Company lam an rawn inrawlhah ka ngai hmiah tenawm lutuk mai!

"Matt hian min puih a inhuam a, holiday hmanga i kal khan rawn tihbuai che ka duh ta lo a ni Hazel." Josh rawn țawng chhuak leh pawh chu a tháwp deuh sat a.

"Engpawh ni se kan inremsiamna ang kha i kal tlangpui ka beisei Josh." Matthew țawngkam pawh chuan ngaihno a bei fahran lo.

Mrs.Spencer-in eitur a rawn dah belh pawh tumahin kan ei belh lo, dinner ninawm leh khamawm zet a ni. Ka rilțam zawng zawng a reh vek tawh, ka ding hluai a. "Ka lo va thawhsan ang che u," tiin țhutkhawmna pindan lamah ka phei ta daih a.

Chu tlailam hun chu tih tawp thuai a, ka flat lian lo taka awm hlan ka nghakhlel a ni!!

An pahnih a min rawn zawm ve meuh chuan boruak a dang leh nghal vek a. Josh lam hawiin "Ka chau riau mai naktukah kan sawi chhunzawm tawh mai dawn nia," ka ti a.

"Coffee tal kan dawm ho leh ang chu a ni lawm ni Josh?" Matthew chu ngeiawm zetin a rawn țawng a.

"Hazel hian thlawhna a rui țhin a, a chau viau ang zanin atan chuan duh tawk phawt ang Matt," ka thlavang hauh hi chu a tina ve a nia. Ka boss a nihna ai chuan ka unaupa niawm zawk a ni Josh nge nge!

"Ka lo thlah ang che," Matthew chu rum zet a melhin "A ngai lo ang ka lawm e, bike ka keng," tih hmak pahin pawn lam ka pan a.

"Hazel chu a inngaihtuah thei alawm Matt, i hotel thlenna bul lawk kha a chenna building a nia inchhawm phei mai rawh u." Josha'n a ti ta hlauh zawk a.

Ban vai zauhvin "Ka kal ania Josh, Mr.Faulkner good night."

Pawn boruak chu a nuam hle mai, ka hnung za mer mer ațang chuan zuitu ka nei tih ka hrethiam mai a. Ka bike-ah țhuin ka tinung a, helmet ka khum san hnuah Matthew rinloh dan deuh turin chak zet chuan ka phit chhuak a, mak min tih hmel zeta a hawi chu side glass ațangin ka hmu reng, ka nui var var mai.

College ka kal lai ațangin bike ka khalh tawh a, confi ve tak ka ni. Ka best friend Bruno Marton tih lohvah chuan ka bike tluk a ngainat ka nei lo.

Ka hnunga Sports car chak zet a rawn tlan chu Matthew Faulkner a ni chiang. Ka speed ti sang sawtin min umpha lo tawkin ka tlan lui ve zel a, ani pawhin min umphâk a tum khawp mai.

Ka chenna building kawt ka thleng a, ka indah fel chiah tihin a rawn ding ve chat a, hre lo der hmiah ila nimai alawm!

Step pana ka inher tur chiah chu, helmet ka pawm lohna zawk ka bân a min pawt tu avang chuan ka ding chawt a.

"Engthil teh hrep nge maw i tih le!?" Ka ti hman țâwk a ni.

Matthew chuan a lama min pawt hnai dâwrhin chiang zet hian ka hmuiah chuan a rawn fawp siah a..!

                        Chapter-2

Matthew chuan min fawp thut ang bawkin min thlah leh thut a, ten hmel zetin min melh zui bawk. Zak thei lo lutuk, a duh duh a fawh theihah min ngai emawni le! Hrep tak hian...

Ka chenna in kawtah chuan ngawirengin kan ding dun a; ka hamhaih vek sawi mai tur ka hre lo. Bah deuh nak hian "Engvanga min fawp ngam ngawt nge i nih Mr. Faulkner?" ka ti a.

"Ka ngam lohna chhan tur ka hre lo, Miss Cade lo inring rawh abul kan țan dawn chauh. Chuan chak zet zeta bike khalh hi i sim vat loh chuan i chesual lovang tih tunge sawi thei! Mawl viau hi a țha ber lo, tunlaiah tuma'n khatiang an ching tawh lo..huh."

Tham lo zeta min țawngkhum chu hre lo derin ka flat lam pan chuan ka pen a. A rawn țawng chhuah leh chiah chuan ka ke pen a ti tawp chat mai. "I mawl ang thovin i beng a chhêt tel tih ka lo hre lova.."

"Kal bo rawh".

Min ngaihsak zui tawh map lovin a car-ah a lut zui hmak a, chimawm lutuk mai. 'Lo ngai reng rawh, tunge game khel thiam zawk lo en ang hmiang Mr.Faulkner' ka ti sap a.

Ka bag-a kawngkhar chahbi dap chung reng chuan ka phun zui mawlh mawlh a. Ka mimal chenna hmun a hre kher kher chu pawi ka ti tak zet a ni.

Ka flat-ah hian Josh te nupa leh Gary te nufa, ka flat țhenawma mi te tih loh chu tumah an lo kal ngai lo. Ka hahdamna hmun leh ka neih chhun liau liau a ni a, midang pawlh buaitu an awm ka phal hauh lo. Bed room-ah lutin khumah ka țhu vang vang a, zanin tlai zet chu ka mood a off chiang hle mai. Kha mi zakthei lo pa vang khan...

Engvanga Josh pawh hian a țanpuina va dil kher nge maw a nih le? Min hrilh hauh lo lehnghalin ka lung a awi hlawl lo a ni, naktuk zingah ka zawh chian ngei a ngai ang.

Ka bike ațang chuan chhukin mipa walk-ho min lo thlir reng tute chu ka kalpel zel a, step-ah chuan ka tlan chho zui zat a.

Doorbell ka hmet ri ral ral a, mut ka hmu țha hauh lova, ka hmelah pawh a lang reng. Mahse nidang zawng aia nasain make-up ka hmang a, kawr hring dal raih leh office-a ka inthuamna țhin ang suit dum ka ha bawk. Ka sam kilh tawm ațang chuan sam chhawllêng a tla țan tawh a, helmet khum a ngaih miau avangin ngaiah ka nei a ni ber zawk e hetiang hi chu.

Hall sana-in dar sarih a kawh rik ral ral chuan Mrs.Spencer chuan kawngka min hawn sak ve chiah a, chuti taka hmaa ka va tlawh chu mak ti hmel pawh a pu duh bik lo. A chhan chu sumdawnna thil sawi tur a awm changa ka tih dan a ni tlat a, Josh leh Becca te nen breakfast kan ei ho fova. Becca boral tawh hnu pawh hian ka tlawh fo țhin a ni.

"Omlette em niang?" tiin mitko san âk hian min lo zawt nghal a.

"Coffee a tawk mai, ka lawm e" ka ti ve zat. Engmah ei theih pawh ka inring lo, ka kawchhungah hian min hnawh et et tawh, zawhna ka ngah dawn lutuk hi khawi ber ațanga țan tur nge ka hre lo zawk.

Breakfast room lian lo tak lam chu kan pan a, pen thawm a rawn ri phei khauh khauh a. Josh a rawn lang chawpchilh nghal bawk.

Nizan lama dinner ei tura ka va thlen lai te kha chuan a phurrit phurh chhawk huai hmel kha a pu a nia. Tunah lem hlauthawng hmel a pu leh bawk si, keimah vang a ni ngei ang hetia a awm chhan hi.

"I lo kal chu ka lawm ngawt mai Hazel" a rawn ti bauh a.

Ka lo bu nghat, zep țit țet neih hun pawh a ni lo. Ka ep-ah țhuthmun a rawn rem ve a, Josh chuan "Office lam ka pan hmain rawn phone che ka lo tum a, i lo kal hlauh chu a lawmawm tak zet e" a ti a.

"Rawn kal ngei a ngai tih i hriat kha, eng inremna nge in neih tih pawh hriat a châkawm alawm" ka lo ti thuai a.

Kun deuh lap chung a, "Hazel khawngaihin min pui hram rawh, nang chauh hi min pui thei tur i ni" a rawn tih chuan mak ka ti kher mai. A sawizawm leh hun chu ka lo ngaichang reng a.

"Kan company hian tun dinhmunah chuan țhat lam aiin hniam lam a pan a, nang pawh thawh zel duh mah la theih loh hun a awm dawn. Chuvangin ka sawi hi zawm la, Matt-a secretary nau neih a hun tawh avangin a chawl dawn a. A aia kal turin ka duh che a ni, keiin Julia hi i aiawh turin ka la thung ang tiin ruahmanna ka siam a" a ti deuh duah a.

"Mr. Faulkner-a secretary a ka țan chu engnge a țangkai viauna? Min hresa pawh a ni lova mak ka ti hle mai Josh" ka tih sap chuan min en vang vangin "Kan company pumpui hi a lei chhawng dawn a lawm. Mahse, keipawh ka nihna ngai chelh zuiin ka enkawl tho dawn a, ngai kan awh leh hunah share kan insem mai dawn a ni. Experience nei secretary kher a duh, interview chawp ni lovin i hrethiam thovin ka ring" a tih chuan sawi ve tur ka hre lo.

Tun hunah Josh hi ka pui lo a nih chuan ka inthiam thei ngai lo ang. Thorne Electronics hi ka ta ang maiin ka lo ngai ve a, midang kuta awm mai atan chuan ka phal bik lo. Matthew thil tum chu engpawh lo ni se ka beih let ve ngei chu a ngai dawn a ni. Nizan khan 'a bul kan țan dawn chauh' a ti a nih kha, tunge ka nih chiah a la hre ve ang chu.

Josh mitah tak chuan enin, "A țha a lawm, in remruatna ang chu ka pawm e."

Lawm tih hriat deuha nui var varin "I ti ngei dawn tih ka hria a ni, ka lawm tak zet" tih pahin breakfast pawh ei chhunzawm tawh lovin a tho nghal a, keipawh ka tho zui ve nghal mai kha a nia.

"Khatiang mihring kha ka tei thei lo a ni, hmanruaa midang hman tum chi a ni tlat. Mahse, nang ber i lung a âwi tawk chuan ațha a ni mai" ka tih chuan Josh mitmeng chu a ngui raih a.

Thudik a ni reng bawk a, Josh chuan  â min tih hmel zetin, "Matthew-a secretary nih châk hi mi engzat nge awm i hre lo a ang hle mai Hazel, ka nawrlui mah mah che i ti mai thei, i tana țha zawk tur a ni tih ka hria a nia"  tih leh insiam tura bedroom lam pan a rual a.

Office ka thlen chuan file țhenkhat ka check a. Tin, Josh leh Richard-a te secretary ințawm Mercy chu phone-in Matthew Faulkner chanchin ziahna ka mamawh thu ka hrilh nghal a.

Lunch ei hun theihnghilh țhakin hna ka thawk a, Mercy-in chawhnu dar thum vela file a rawn dah pawh chuan ka la thawk mawlh mawlh a ni.

Mercy chhuah hnu chuan Matthew-a chanchin ziahna file chu ka keu țan ta a. Faulkner Electronics Company Chairman: Matthew Faulkner kum 34, Engineer a zawh hnuin a pa Logan Faulkner aiawhin company chairman atan lak a ni. Tlangval a la ni bawk. Haha...Hmun hrang hrangah sumdawnna tam tham zet neiin a hlawhtling hle a, ka chhiar thui peih tawh lo nula lamah pawh a tla na hle. Model lar zet Kelly Benison nen an inzui ngun hle tih vel ka ei loh zawng a chanchin a inziak tlar thla dul a. File chu khup thawkin ka sam hnawk niaih chu ka chul mam thuak a, ka chau tak zet a ni.


Office kawngkhar rawn kik ri-ah chuan ka phu zawk a. "Yes," ka tih rual chiah a kawngkaa rawn pen lut ka hmuh chuan ka insangmar nghal țun mai thung!

Ani chuan dawhkana file chu rawn ban nghal zatin "Ka chanchin i lo zir chiang vel a" Matthew rawn țawng chhuak chu a chang kher mai.

"I secretary a ka țan dawn chuan a ngai a lawm" ka ti ve hmak. Min ei loh hmel zet a ner sawk chungin "Ka kianga hna i thawh chuan min hrechiang chho zel mai ang Miss Cade, zaninah dinner kil dun ila kan awmdan tur sawi chian a hun tawh" fiah leh tham lo zeta min țawngkhum țhin hi ka huat zawng tak a ni.

"A pawi ka ti khawp mai, hei i hmuh ang hian tunah hna ka la thawk a, ka hman lo ang."

"I thawk rei tawh dawn lo; zanin dar sarihah ka lo lam ang che, ka thlenna hotel-ah kan ei mai dawn nia" tiin a chanchin ziahna file chu ka dawhkanah rawn theh thlain a chhuak zui nghal daih a.

'Tenawm, mahni thu duh lutuk' ka ti sap a.

A hmelțhain mi hîpna pawh a ngah a ni mai thei. Mahse, ka tan chuan engtihna mah a ni lo. Ka inhneh tir tur a ni lo bur.

Office chhawnghnuai ber ka then thlak chuan Josh nen kan intawk a, nuisuk chungin "Dinner nuam deuh nei turin duhsakna ka hlan a che," min ti a.

A lo hrilh leh hman a ni maw kan hmelphaka chuan! Polite lo zet a Josh chu kal pel pahin "Ka lawm e," ka ti liam puat a. Ka taksa a rawlțhum mai a, bike khalh pawh huphurh awm tak a ni. Ka neih tawk a nih miau avangin ka thehthang ngawt thei bik si lo.

Țhenkhat hi chuan min ngaihsan hmel zeta min thlir zui vawng vawng ka hmu fo bawk. Tun dinhmunah chuan pasal neih tumna rilru ka put loh avangin ka bike hi duat hle ila a ni mai e.

Ka chenna hmun ka thlen meuh chuan tlailam dar ruk a hnai kuar tawh a, hmanhmawh taka ka che a nih loh chuan ka inpeih hman dawn der lo mai. Shower neih zuai ka duh bawk si, hahthlak zawk hian!

Ka flat-ah luhtir ka tum hauh lo a nia kha mihring kha.

Insiam peihsa diama pawna lo nghah kha a finthlak zawk daih, ka kiai ru sak a. He mihring hian engnge tum a neih ka hre miau lo alawm. Kei mipa ngaihsak lo leh experience nei țhak lo hian dawnsawn dan tur ka thiam lo a ni.  Mahni inveng deuh râna awm a ngai dawn a nih hi.

Bathroom-ah lutin shower hnuaiah ka pen lut a, ka taksa ban deuh chuap chu gel ka hnawih phuan buah a, ka nunah hian mipa pakhatmah sawi tur an awm lo. Nizana Matthew-a'n min fawh ve ngawt pawh khan ka hrilhhai hle a nih kha. Dawnsawn dan tur ka thiam lo tlat alawm...

Bathroom ka chhuahsan meuh chuan a lo tlai duai tawh a, hmanhmawh zeta ka thawmhnaw bawm chu hawngin hâk tur ka en nghal a. Office party, dinner leh Josh te ina chaw ka ei tih loh chu ka chhuah ngai meuh loh avangin kawr hâk mai tur ka hre ta hauh lo mai. Umh, California-a ka lei ve tlailam kawrfual chu ka neih ve kha khawnge maw ka dah le..

Kei hi ka suitcase pawh ka la phelh darh reng reng lo! Dar zat ka han en a, dar sarih rik nan 15 minute chiah a awm tawh, ka hmanhmawh lutuk hi ka che buai vek!

Suitcase; chhuata mi chu ka phelh darh a, kawrfual sen tak hlar mai chu phawrh chhuakin ka inthawlh nghal a. Ka pianhmang tilang chiang zual tura țhui niawm tak a ni, ka khûp a khuh pha lo chiah chiah a, hetiang thawmhnaw hi ka hâk tam loh avangin ka 'confi' lo viau. Ka mit dum deuh hleka hnawihin mascara ka hmang hlek bawk a. Lipstick sen hlar mai chu inhnawih lehin ka sam chu ka chhipah ka bâwk khawm tawp a, high heel bun tur chuan ka chau mah mah. Wedge; a kaihna awm, a dum hi ka bun zawk mai teh ang.

Tichuan, ka inpeih chu a ni der mai.

Darthlalangah chuan in en leh thuakin dressing table-a ka 'clutch' dah ka la nghal bawk a, bike khalh chi chu ka ni ta lo tawp mai. Ka thawmhnaw hakin zir miau hek lo le.

Hall-ah chhuk thlain Matthew alo la thleng lo bawk nen, brandy nokhat ka zamna tireh tur tala in ka mamawh.

Doorbell alo ri nghal zat a, a va'n hun lo tak ka intur thlit sa chu table-ah dahin kawngkhar chu ka hawng a, ka thil hmuh chu phâwk zetin ka melh vang vang ringawt, hawi sawn nachang reng ka hre hauh lo mai ka ti!

©<++++[BeckirafARenthleI]++++>®

                     Chapter-3

Chu thil chuan min shock lutuk avang chuan sawi mai tur pawh hre lovin Matthew kawngkaa ding chu ka thlir ngawt ngawt a. Ani pawh chuan min en ve reng tho, ka lai tak zet a ni.

Diktak chuan a inthuam dan chu a nalh kher mai, dinner jacket uk deuh khak mai a hâk hnuaiah chuan kawr var sar mai hi a ha a, a taksa nalh zet chu hmuh hmaih har tak a ni. Hetiang hian mipa hi ka la en chîk ngai lo; a chhe lo thlâwt a ni, ka lungphu a rang nghal vek! A sam chu suk fai zawh hlim tih hriat tak hian ala hnawm chap leh nghal a alang sexy tak zet.

Thawhuai chungin lut turin ka sawm a; dawhkana ka no dah chu melh pahin "Nangmahin intur i lo dawm der elaw!?" A rawn tih chuan "I lo thlen hmain ka lo lem hlek ang chu ka ti deuh a."

Mitko san âk pahin "Kan kal nghal dâwn ami, khatiang thuamhnaw ha chung khan bike khalh chu i tum lo ang chu tiraw?" Min zawt ti tih deuh chuan a ti a.

Runluih ka châk thuta "Khalh dawn e, lo va chhuak hmasa rawh, kawngkhar ka lo kalh ange" ka sawi zo hman țâwk a ni. Rum lutuka min rawn enin "Teuh lo mai, ka rualin i kal ang, chhuanlam siam tum suh. I bike tel lo khan i țha fe zawk" tih pahin ka kutah a vuan chat a.

Kawngkhar ka kalh chhung chuan muang min tih hmel zetin "Car ka'n hûng rem ange," tiin step-ah chuan a pen thla pawk pawk a.

A car hunna ka thlen thlak chuan tawi khawmuang lovin kawngkhar min hawnsakah chuan ka țhu lut a. Ani pawh driver seat-ah țhu nghalin zawi sup hian "Seat belt hreng la, i bike kha chu theihnghilh hmiah rawh. Hmeichhe bike khalh ka ngaina hran lo."

Mai mai chuan, ka mawl hmel viau emawni le! "Bike khalh i châk ve a nih te chuan min dil țha ve mai la, Mr.Faulkner." Ka chhân let dan chu a ngei hmel kher mai, a hmui ner sawk chu ka hmu hman. Chhân tlakah min ngai lo nge, min chhâng duh lo zawk pawh ka hre lo, ngawi ngulin car chu a khalh mawp mawp a.

Traffic light vanga a din takah chuan nuam ti lo zet hian ka țhut hmunah chuan ka che sek a, eng inthlak hun chu nghakin steering wheel chu a kut chuan a tlir dat dat a. A thlenna Marton hotel leh ka flat hi inhlat lo khan ka hre ve sia, zanin zet chu kan thleng har ka ti kher mai.

A hmel țha tak leh 'pa' zet chu ka mitsir ralh a, engnge a ngaihtuahnaah awm hriat a har ang reng viau. Car a tlan tir leh takah chuan tukverhah dâkin pawnlam ka thlir vang vang a, min biak tum hmel a pu lo bawk a, biak hmasak ka tum bik lo.

A thlenna hotel kawtah car chu tidingin a chhuk nghal a, kawngkhar min hawnsak hun nghak duh lovin keimahin ka chhuk ve hmiah. Mahse, ka zam ru tak zet a ni, businessman hausa tih takah a thlenna hotel pawh a țha thei ang ber leh man to ber pawl a ni. Hetiang hmunah hian vawikhatmah dinner eia ka la kal ngai loh avangin ka huphurh ru viau a ni.

Matthew chuan ka bânah rawn chelhin ka beng bulah zawi fiah tak si hian "Thuawih deuhin awm tum rawh, mi mit-lâk ka duh hauh lo a nia" a rawn tih chuan engmah ka sawi tawh bik lo.

"A țha, hmeichhe ngawih hun hre deuh hi ka rilrem zawng tak a ni" a ti leh a. Chutia a tih veleh chuan ka pen lai chu tawp chawtin "Mr.Faulkner i huang chin hre rawh" ka ti ve hmak a.

Min chhuk melh run a, zanin atan chuan "Mister tih vel kha chu kan mamawh lo ang Hazel, Matt tiin min ko mai rawh, luhlul hun a ni lo a nia" a rawn tih leh takah chuan chhâng buai duh lovin min kaih ang ang chuan ka pen chhunzawm ve dat dat a.

Hotel ground floor kan pen luh chiah chuan waiter pakhat chu a hui zauha, a table hauh sa lamah chuan min hruai nghal a. Marton hotel hi a changkang tih piah lam a ni. Mahse, Matt-a tan chuan engmah a ni lo ang, ka zam ru viau tak nain tihlan ka tum bik hauh lo.

Dawhkan peihsa diamah chuan țhuthmun kan rem a, ka ep chiahah Matt chu țhuin waiter-in zah taka "Mr.Faulkner dinner hlimawm tak nei turin duhsakna ka hlan a che u" tiin menu a rawn pe a.

Wine var chi kan noah waiter-in lo thlikhatin, Matt chuan "Menu danglam vak a ni lo nain 'Chianti' hi a tui ka ring" tiin menu, a kawm leather a siam chu min pe a.

"Sangha hi ka ei a nge," ka duh reng vang pawh ni lovin, keima thu a eitur han thlan ve reng reng ka duh vang zawka ti ka ni.

"Eitur kan nghah chhungin kan awmdan tur ka sawi hi ngun takin lo ngai thla la; ka sawi zawh hunah zawhna i nei a nih chuan min zawt chauh dawn nia" intithu zetin a ti a.

"Awle, a țha lawm han sawi ta che," Ka țawng chhuak chu a chang fak mai.

Dawhkana eng an chhit chu a dahsawn deuhva.

"Heta ka awmna hi a la rei lova chu pawh i boss nge, bialpa ka ti zawk dawn!? In min ngen vang chauh a ni, in company ka 'run' sak dawn che u a nih ber chu. Nangpawh ka secretary aiawh turin ka rualin London-ah i kal ve a ngai dawn a. Naktuk hian London panin kal ka ngai a, zanhnih hnuah ka lo let ang. Friday-ah tihna a nih chu. Ka thang hlanin lo inpeih hman tum ang che" Wine chu tem zauhvin a mitmeng paw muk raih chuan min en reng a.

Za hauh lo hian ka nui a, chulaia hmeichhe dang awm zawng zawng chuan Marton hotel-a thleng zinga mipa țha ber maiin chaw leh wine-a ahrai hmeichhe sam dum chu hmuh chian tumin min rawn en deuh zauh zauh hlawm a. A țhen chuan châk ve hmel zeta min rawn melh rum tawk pawh an awm, ka dinhmun awhawm loh zia chu an hre der mai si lo!

"I sangha kha ei rawh," a rawn ti a.

"Thil awmdan... A dik tak chuan London-a kal kher angai a mi? Hetah pawh company chu i nei tho sia." Ka aw chhuak a dik hlei thei tawh lo, engtinnge ka chenna hmun chhuahsanin hriatchian loh ka zui ngawt theih ang? Ka thil ei pawh a tui nek lo ve, ka plate nawr sawnin wine chu ka lem zui khalh a.

"Engnge sawi i tum a Hazel? Kan inremsiamna ang khân kal ka tum mai a ni, secretary țha tak ka mamawh a, ka ring tawk bawk che a, i bialpa Josh Thorne tan chuan tih hreh i neih loh kha. Ka hriat loh i ring em ni?"

Teivet chuan! Josh chu ka bialpaah a ngai tih ka hre mai, haa..lo ngai mai mai teh se sawifiah ka tum hran lo.

Kan thil eina vel seng fel tur chuan waiter a lo lang leh ta bawk a, kan ngawi dun chiang hle mai. Sawitur ka nei hlawl lo nge ka ngah lutuk zawk pawh ka hre love a.

Hnial eng ang mahila awmzia a awm thui dawn chuang tlat lo a, Josh hnenah 'ka pui ang che' tiin ka intiam tawh tlat alawm. Inremsiamna anga kan kal mai hi a țha zawk, engtik thleng nge a secretary-ah chuan ka țan theih ang tih pawh hriat a châkawm alawm.

"Ka kianga thawh chu i remti tihna a ni maw?" tiin a țhu țha a, dawhkan bawha lo kun hniamin a mitmeng 'trick' chitin reng thiam ang maia thûk rilruih chuan ka hmel chu a en ta reng a.

"Remti lo thei lovin min siam miau alawm." Thinur ru tak chuan ka ti a, Matt chu a ner sak a.

"Chhânna duhawm tak zawng a ni hauh lo mai. Mahse, a pawimawh vak lem love, i bialpa tan engchen nge i inhuam kan la hria ang chu" tiin bill la tur chuan a signal zauh a, "Ka hruai haw tawh mai ang che, zing dar ruka ka chhuah a țul tlat." Tiin paper-ah chuan a hming a sign ta a, a pen chu chhin leh in a jacket ipte chhungah chuan a dah leh thlap a.

"Thil pakhat leh" tiin a nui deuh var var a. Mahse, a mitmeng chu ala vawt raih reng tho a ni. "Ka nawr deuh che pawh i ti mai thei. Mahse, Josh lak ațang hian inthiarfihlim ang che" a ti chhum hmak a.

"I fiamthu a ni ngei ang" thinur zet hian ka ti bak hlar a.

"Fiamthu-ah i ngai a nih chuan i thu le. Mahse, ni hnih chhung hun in nei alawm âm tak khan chen rawh u." Ngeiawm zetin a tih chhunzawm zat a.

Hotel hma lama Matt-a car dahna lam pan chuan kan chhuak phei tawh a. Thla eng hnîm deuh raih hnuaia Matt-a nui thawm chu hriain ka awm a nuam zân lo, nuihzat tur ka hre ve lo mai pawh ni lovin ka thinrim tet tet zawk a nia.

Ka hmaah kalin a pen chak zual sauhva, umphâk ka tumna lamah ka pheikhawk rap lekin ka balance chu ka hloh zui leh ta nghal a!

Matt-a lamah chuan bawh pheiin ani chuan min lo dawm vat a, rei lo te chhung chu a ruangam nalh tak leh khauh țang mai ngheng chuan min pawm bet a. Ka taksa chu engemaw hian a fan chiai chiai a, ka lungphu a su dup dup mai.

Nghet vak lo chung hian alak ațang chuan tal chhuakin, a taksa ka deh ruala min fan dan kha rei lo te mahnise ka 'feel' hman vek. Zahthlâk zawk hian! Rilrufim min puttir thei lo he mihring hian. Ka huatna erawh a belh chhah sauh thung.

Car kawngkhar ka luhna turin min hawn sak a. Mitmeng tur taka ka melh chhoh nghek hnu chuan car-ah chuan ka țhu lut ta nge nge a. A hmelah chuan zahngaihna nei lo lêk leh mahni inrintawkna a lang chiang hle a. Matthew Faulkner te ang mi hîpna ngah leh nula âtchilh rawn luai luai hian Hazel Cade hi min tibuai ve tur a ni lo.

"I lêi an phuar ta mai elaw?" a rawn tih chuan ka heh nêm thep mai chu ka pet fan fan a. A duh duh ngaihtuahin sawi mai mai teh se, ka chhang buai peih lo.

Ka chenna kawtthler kan thlen chuan ka flat kawtah dingin Car khawl chu a ti thi chuang hauh lova, lo luh ve a tum lo anih hmel e, sawm pawh ka tum bik a ni hek lo.

Vawilehkhatah alama min pawt hnai thutin ka inrin hman hmain ka hmui nêm zetah chuan a rawn fawp ta vawng vawng a, min fawhna dam zet leh ril tak chuan ka thisen a fan chhuak vek a. Tum loh deuhin ka chhang let ve a, a perfume hman rimtui zet te chuan ka hnar a verh zar mai. A kut lum thar thara ka kawr hak chhana ka kawr chhûng ami a rawn khawih chiah chuan...

Inngaihtuah fim thutin ka inlahrang nghal a, mengzim san chung hian "Ka rin ang chiah, fawh i nuam tak zet. Friday-a ka lo kir leh hunah kan chhunzawm thei ang" nuihzat hmel zetin a ti a.

"Theihnghilh hmak rawh, a thlen nawn tawh loh ngei ka beisei." Hui..ka thluak a chawmawlh vek, car ațang chuan chhukin "Good night, Matthew" ti a inherin min zui hlau tak chung chuan hmanhmawh fein step-ah ka tlan chho a. Car inher hrâwk ri pawh ka la hre thei. Mahse, hawi let leh tur chuan ka luhlul ve tawk a ni; kawngkhar hawngin ka flat zau fahran lovah chuan chau zetin ka pen lut zui nghal a...

©<++++[BeckirafARenthleI]++++>®

                       Chapter-4

Ni zungin ka hmai a rawn chhun chuan ka meng siar siar a, nizan khan wine ka inhnem bakah Matthew an min thlah haw hnuah ka flat-ah whiskey tak țha tawk tak ka inbelh leh a. Mumang nei lêk lovin ka lo mu a ni chiang mai.

Thawmhnaw siamfel ngai vak ka nei lem lo a, suitcase pahnih khat ka ken chuan a tawk maiin ka ring, Josh va tlawh ngei ka duh avangin thawh vat a țul bawk si. Bathroom-ah lutin ka inphihfai sawk sawk a, breakfast eitura inhnuai ka chhuk meuh chuan zinglam darkua a ri der tawh.

Ka lu na bûr tihreh na'n Aspirin mumkhat ka hmawm zauhva, engmah ei châkna ka nei lo. Toast leh Bacon, juice hetiang bak hi eitur kawlsa ka nei reng reng lo, bazar hmanin ka khawsa lo hrim hrim bawk nen kan Matthew vang vek hi a ni.

Ka phone ka kekawr ipte-a ka ah chu a rawn nghawr dar dar a. Number ringawt lehnghal! Lak loh ka tum zet naa, thil pawimawh alo nih tak mialin "Hello" ka ti a.

"Hazel, i tho ve tawh maw?"

"Matthew" ti sapin phone chu ka thlauh lo chauh! Engtikin nge ka number a lo neih hman ka hrilh hauh si lova, umh..Josh-a bak a ni leh lo tawp ang, nghal lutuk mai!

"Josh Thorne-a hnenah khan i banna theh lut ang che, nizanah ka lo sawi hmaih a tin ni" a ti thum chhak a.

"Thorne company hi chhuahsan ka tum reng reng lo! Ka hna chu min bansan tir thei lovang" thinrim lutukin ka âu vak a, Matthew hian a ti mah mah a ni.

"I bansan lovang maw? Chuti a nih leh ka ban mai ang che, Company chairman ka nihna angin Thorne Electronics hi ka hnuaia awm a ni tawh. Tunah chuan Faulkner secretary i ni tih theihnghilh suh, sawi nawn ngai tawh suh se, i banna arang lamin Josh hriattir ang che darling."

Darling maw! Haha, zam lo ve. Ka chhânna pawh nghak lovin phone a off hmak zui. Chapo lutuk mai! A țawngkam bung zet chuan ka thin a tirim lutuk; ka puakkeh thei tak ngial dawn alawm, a duh duhin thu min pe kual a, hna pawh ka la zawm êm hleinem.

Hetiang ringawtin Josh hi ka chhuahsan thei lovang, kawtthler reh raih lam chu ka thlir vang vang a. Duhthlan tur ka nei chau kher mai, a secretary-ah engchen nge ka țan dawn hriat a ni lo a, a thin ti ur-in min ban ta se ka tan hnathar zawn leh a har țalh tawh dawn si ka rilru a buai tak zet a ni.

Engnge Josh chu ka hrilh tak ang? Hun rei lo te atan Matthew-a secretary ni turin min duh a, chu pawh a secretary nauneih chhung chauh lehnghal, a lo zawm theih ve leh ka hna ngai ka chhunzawm mai turah ka ngai a. Josh pawhin chutiang tho chuan angai a nih hmel, banna ka thehlut a nih chuan a rilru a na khawp ang le.

London-ah daih office a nei tho sia, kan in kal pawh reng dawn pawh ni hlei lo. Matthew ruahmanna hian ka thluak a ti chawmawlh vek a, ngaihtuah zui pawh ka peih tawh lo. Ka breakfast eina sengfelin inchhung tifai daih ila nimai. Josh-a chenna hmunah pawh kal loh law law a țha mai ang. Naktukah kal zawk ila hun a la awm tho a lawm le, tunah rih chuan a thu ang diak diaka ka awm nachhan tur ka hre bik lo.

California-a holiday hmanga ka lo kal ta kher kher chu pawi ka ti a ni. Chuti ni lo se, ruahmanna an siam lai hian lo hnial turin ka awm ve tur a nia.

Ka nu leh ka pahrawn chu an hlim dun a, an fate nen pawh an inpawh hle. Kei erawh ka pa boral hnu lawka America ka chhuahsan ațang khan an chhungkaw zingah min ngai ta lo mai ni lovin min bepawp ngai ta meuh lo. Vawikhat erawh ka nu chuan min rawn phone ve mial a mahse, nikum lam daih a ni tawh. Rilru pawh anat phah tawh lem lo bawk. Keima ke-a dinchhuah hi ka tum ber a nih vangin mipa lam reng reng ka ngaihsak lova, ka chhungkaw thar neihchhun chu Josh-a te nupa chauh an ni.

Mahse, Matthew vang hian ka ruahmanna neih sa a buai vek tawh. Ka thawhna company tlachhe mai tur sumin a pui a; chuta karah a kianga  thawh a la ngai zui! A hmelțhain a hausa a, amahah hian hmeichhiate duhthusam a kim tih theih deuh thaw a ni. Mahse, thlamuang taka ka lo nun ve tawhna leh ka ngainat em em, kum li lai ka luah ve tawh ka flat chhuahsan a țul phah a; ka kir leh hun tur hriat a ni bawk si lo.

Zawi zawia che țanin ka thuamhnaw leh lehkhabu te percel-ah dahin tlailam dar nga a rik meuh chuan ka flat chhung chu a ruak huai tawh mai.

Buaina pakhat ka la nei fo, ka bike hi engtin nge niang? Kan Matthew misuala khan ken a phal dawn si lo. Hralh dawn pawh ni ila tun ang hun tepter lutukah hralh mai na tur avang khawp ang le! Ka mangang ru tak zet a ni. Engpawh ni se amah rawn thleng phawt sela, ken a phal mial mahna. Ka bike tel lovin engtin nge ka khawsak ang? Thil harsa tak tur a ni.

Ka inbual zo a, bar-ah rilru ti thawveng turin kal ila ațha ang. Dinner pawh pawnlamah ei nghal law law ila a zia deuh mahna.

Ka flat țhenawm chiaha cheng Gary Seymour ka rualpui vel tho a awm ve a, kan inkawm ve fo țhin a, chu chu phone- in 'bar' kalpuiah ka sawm a, a phur ngang mai 'dinner min  show sak dawn te chuan' a rawn ti ham ham zui a.

T-shirt dum body fit leh Jeans kekawr  bul pawl da lam ka ha a, boot dum bunin ka sam chu sang takah ka țawn a, Restaurant changkang taka kal tur kan ni lem lo bawk nen ka inchei ho ang reng viau. Helmet leh ka bag lain garage lam ka pan ta a.

Kan kawtah chuan Gary pawh inpeih sa thlapin alo ding vang tawh a. Min hmuh veleh "Wow! Hazel, i chhe lo tak zet'' min ngaihsan hmel zetin a ti hluai a, a sambuang kir deuh chu a thur deuh chhap bawk nen a duhawm reuh tawp. Min duhna hi a ti lang zauh zauh țhin a, mahse, ka hre lo der tlat thung a ni.

Bike nawr chhuaka tinungin "Ka phur dawn che nge, min phur zawk dawn?" ka tih chuan nui var var chungin "Min phur ang chu le, nula chhe lo zet phurhah ka chuang châk alawm, bakah i khalh thiam zawk a" ti chungin ka lamah a rawn phei a.

"Khawi bar-ah nge kal i duh?" ti a ka zawh chuan "Marton hotel thlen hma Landong bar-ah khan aw, dinner pawh an siam thei nghal" tiin bike hnungah a rawn lawn kai zat a.

Ka kawngah nghet zeta kuahin kan tlanchhuak zui nghal a. A chimawm ve thei a nia, tunlaiah mipa bike hnunga chuangin mi an kuah țut țut ngai lo tih a hre lo nge, min runluih pawh ka hre lo. A țha vel vek e.

Chak taka tlan hi nuam ka ti viau țhin a. Mahse, midang ka phurh erawh hi chuan ka tlan chak vak ngai lem lo.

Gary chuan nuam tih hmel zetin "Hazel, Cheshire lamah kan ride law law dawn a mi?" a tih chuan ka nuih a za hle; naupang chhia zet zeta chet châng hi a ngah ve a nia.

Ding tura min hrilhna hmunah chuan dingin bike ka hung fel a 'Langdong' tih intar kulhna lam pan chuan kan inzui phei a, Chinese Restaurant nena inzawm bar-ah chuan ka rin aiin mi an tam lova, a nuam dawn e.

In tur a lam chhungin tukverh bula an hun stool sang zetah chuan țhuin Gary chu ka lo nghak a, no pahnih kenga rawn kirin; ka no tur min pe a, wine leh champagne a nih loh chuan tlemte tea in hi ka thiam ve lo. Intur min pek pawh chu ka lo thâwkkhat nghal pap a, ka pum a sa thla nghal ham ham mai, mak min tih hmel zetin "Khai a, khatiang te chuan dinner kil tur i awm lo ange muangchangin aw..!" a ti a.

Kan țhutna chu sawnin bar dawhkan kan kil dun a; thil hrang hrang sawidunin ka hna chungchang vanga London-a awm rih ka ngaih tur thu te pawh chu ka hrilh ve a. Bartender chuan kan no chu min lo chhunkhah sak zel vang chuan kan in ve nual tawh. Gary pawh a meng phelh phang mai a, keipawh chutiang tho chu ka landan a nih ka ring.

Dinner eitura room lehlam kan pan chuan zan dar sarih a ri tawh a. Chinese restaurant tih takah an menu pawh a dang zar mai. Kaikuang leh Spaghetti ka chah a, Gary erawh chuan Arsa leh thil thlum lam chi a order thung.

Order a lo thlen chuan kan ril a țam dun bawk aniang kan plate a mi ve ve chu kan ei fai vek a. Nui hak hak chungin Gary chuan "London-a i kal hunah chuan ka ngai ngawt ang che" a ti a.

"Keipawhin mawle, bike hi ka keng thei lo mai thei a, duat takin min lo enkawl sak theih chuan ka lawm viau ang" ka ti ve a. Gary chuan min duat sak dawn tih ka hre tlat a lawm.

"Lutuk tlat, rawn ngaihtuah reng reng suh."

"Ka ring che a nia" tiin ka tho a; bill pe tur chuan counter lam chu pan pheiin, ka hnungah Gary pawh a rawn kal zui ve mai bawk.

Țhenkhat chuan min enzui vang vang tih ka hria, ka inchei dan holam tak hi mak an ti deuh a niang. Chulaia hmeichhe lo awm ve ho thawmhnaw hak nen chuan a inthlau kher mai lah tak a! Kawrâwm zau fe fe leh kawrfual tawngchham zet te, pheikhawk sang tak nen an bun deuh fur a, ka inthuamdan chu a dang zar mai. Ho emai, min lo en ve mai mai teh se. Gary bânah chelhin pawn lamah kan chhuak a, ka luhai deuh chiai vang chuan bike pawh khalh peih lovin amah chuan a khalh ta zawk a, kan flat lam panin kan haw ta a..

A rui ve deuh bawk nen kan tlanchak  khawp mai. Rui lo hai lova chuanna atan chuan hlauhawm tak a ni. Mahse, sawisel erawh ka tum hran lo.

Kan tlanpelh motor dang ho chuan min thlir zui ve nasa, a nuam dangdai ve tlat nia! Zan boruak a ni bawk nen a vâwt ve lek lek a, thlithaw chuan min chhem harh sawng sawng bawk si.

Ka flat kan thlen chuan Gary chu lêngah ka sawm a, min hnial lo chiang kher asin. Ka tan chuan 'țhian' bak a ni chuang lo, hmeichhe țhian neih duah aichuan mipa kawm mai hi ka duh zawk fo reng a ni.

Inchhung kan luh chuan Gary-an cupboard lam melhin "Zanin chu inthlahna hun hman pahin 'Tequila' kan in insiak dawn mi?" a rawn ti a.

Meng phelh phang chung hian "In chiah ila" ka chhan dan avang chuan phur zet hian shot glass pahnih leh Tequila umkhat cupboard a mi chu a phawrh zui nghal a.

Gary, mipa ngaihawm tak leh fel tak midang 'care' thei tak kha a la ni reng a ni. Bialnu țha tak nei se ka ti tak zet. Kan thil in chuan ka luak a ti chhuak hlui tawh a, tlâwmzawka țan ka hreh si ner nâng nâng chungin ka la inlui ve ngang ngang a, Gary pawh a rui tak zet tawh. Ka phone a rik chuan kan phu dun zawk a. Shitt, a va hun lo țhin ve maw le.

Gary-a rui phur chuan min lak khalh a, enchiang mang lovin "Hello," a tih chuan phone chu chhuhsakin "Keimah Hazel-i" lehlam a mi aw vin zet ka hriat chuan ka harh kawk mai!

"I awm mai mai lo hle chu a ni maw! Tunge mipa awm ve kha?" Matthew aw rilruihin a rawn tih chuan "I hriat ve a ngai lovang" tiin ka chhang a.

"Hazel, kha pa kha haw tir rawh, zu in indun a ni maw, tunah khan hawtir nghal rawh" thinrim taka a tih chuan phone chu ka off daih a. Mood a ti off vek a lawm, kan zan hun hman boruak a tichhe zo vek. Gary chuan hriatchian châk hmel zetin min en a.

"Ka boss thar tur a nia" tiin sofa-ah chuan ka țhu tawm chaih a. Mak tih hmel taka mit khap fak fak chunga "Ka lo chhang ve ringawt sia i tan a pawi thei angem?" inthlahrung aw zeta a tih chuan ka khawngaih reuh kher mai.

"Pawi love kan duhtawk mai dawn mi? Ka mut a chhuak tlat" tiin ka ham zui bai bai a.

"A țha lawm; ka phei ange, good night" ka bianga fawp zauhin min chhuahsan ta nghal a. Keipawh mu turin ka pindanah ka chho ve ta a, ka lu na ut ut chu haiderin khumah ka let thla tawpa ka chhing zui ta vang vang a.

Kha mihring, tawhkhirh leh ngeiawm zet mai nena kan inhmachhawn leh hun tur chu ka huphurh tak zet a ni. Zanin lah kha kan boruak kha ti kha a ni bawk si...

©<++++[BeckirafARenthleI]++++>®

                     Chapter-5

Zinga ka țhanharh chuan dar riat alo ri der tawh; hmanhmawh taka intifaiin breakfast ka ei thuai thuai a, banna thehluh chu ka huphurh tak zet a ni. Josh pawh a rilru a na ngei ang. Ka bâng lo a nih chuan Matthew a'n min ban a tum tho bawk si.

Josh chenna hmun ka thlen chuan a reh deuh țhap a, khawiah nge maw an awm vek le! Choka leh sitting room inkalpawhna corridor chu zawh pheiin veranda-a Josh ding chu ka hmuh ve leh "Morning Josh" ka ti a.

Ka lam rawn hawiin "Morning, i reh daih a, min haw ta viau emaw ka tia sin" ngui zetin min chhang a.

Veranda-a țhutna an dahah chuan kan țhu a, ka bansan tur thu ka hrilh chuan a ringlâwk bik lo hle anih ka ring.

 "Rin harsa ka va ti em!" a ti chhuak hlawl a. Ka lo bu nghat a, ka țang ru țeuh bawk, a la na hle aniang "Chutia tih kher angai a mi Hazel? Inremsiamnaah engmah chutiang Matt a'n a sawi tel lo" a ti a.

Ka lo ner sak. Thil awmdan dik tak 'Matthew hian kan inngaizawng emaw ati a'  tih hrilh kher chu țhaa ka hriat loh vangin engmah ka sawi lang duh ta lo.

Ka mittui tling pam chu khap sak sakin, hlim hmel put hram ka tum a. "Min shock deuh a ni, keima remtihna ania, a bula thawk tura titu che ka ni bawka inthiam lo duh suh" min tih leh chuan Josh chu ka en vat a.

"Keipawh hetiang teh thuta hrilh che leh ka chhuahsan tur che hi pawi ka ti hle a ni" ka ti ve sap a.

"Engmah lungkham duh suh, mahse.." tiin a lu a thing a, a mitmengah chuan tawrhna a lang chiang hle bawk. "Engtik hunah pawh ilo let thei reng a nia Hazel duhtak, ka buainaa ka hnuk lut ve che hi ka inthiam thei lo" a sam chu a tuai thuak a, min khawngaihna mitmeng chu ka hmu thiam ve vek.

''Josh..'' ti-a a kutah vuanin "Ka hmelhriat dang zawng zawngte leh i staff-te aiin nang leh Becca te kha ka ring zawk che u a ni. Chhan țha tawk tak awm lovin Matthew-a hnuaia thawk tur hian min tir lovang tih ka hria asin. In nupain min ngaihsak em em a; mahnia ka tih theih ngai reng reng loh tur, keimah leh keimah inhrechiang thei turin min pui a, inrintawkna leh zahawmna ka neih phah asin." Ka tih chuan thaw huaiin "Lo tlawh ve ngei che ka tum dawn nia, Matt hi misual a ni lo a, Company-in ngai a awh hunah ka hnenah i lo let leh ngei dawn nia" a ti a.

"Tehreng mai, ka rawn be fo țhin dawn che nia" ka tih chuan mitmeng buai nak hian "In kal hun tur chiang takin ka hre si lova, i chennaah lo kal ka tum a..." tiin min pawt tho va, ka dara kuah chungin inchhungah min hruai lut ta a.

Kawngka lam ațanga âwri lo chhuak chu thlipui ang maia hlauhawm niin min ti hlauthawng tak zet a ni. Matthew chu a lo ding reng niin, mit khap eih lovin chiangtakin Josh nen chuan min en a.

"Ka secretary thar hruai turin ka lo kal a ni Josh. In inthlahna lungchhiat thlak tak chu ti tawp tawhin a kal theih tawh ang chu ka ti mai a?" ngeiawm zetin a ti a.

"Ah! Matt" Josh chuan alo ti hluai a. Matthew-a hmel thinurna avanga dur deuh khup chu a hmu a nih pawhin a ngaipawimawh duh hauh lova. Min en vang vang hnu chuan Matthew-a lam chu hawiin nui hmel a pu bawk a. Kei erawh a țawngkam rawn chhâkchhuah avanga thinurin ka heh ka pet fan fan thung, Josh thinrim khum tur hian eng dikna mah a nei lo. Zak lo lutuk mai!

"I inpeih tawh em Hazel?" min en pah chuan a ti sup a.

"Peih a ni deuh mai, kan office lamah thil pahnih khat lâk leh lawk ala ngai tlat mai. Damtakin ka ti rih mai ang che Josh" tiin dingdihlip âk âk-in a biangah ka fawp zauh a. Matthew meng rum ul chu ka hmu lo der hmak thung.

Matthew hmel landan chu nelawm loh tak hi a ni a, țo haw tur te pawh a ang dawn dawn alawm. Pawi chai hleinem! Amah vang hian Josh ka kalsan a ngaih phah a, rim taka ka lo thawh ve tawhna pawh engatanmah ti lovin ka hna ațangin min la hrang bawk a, chuvangin a ke hnuaia min rahbeh tumtu mipa hi ka theihtawpin ka bei let ve dawn a ni.

Matthew hmel nelawm lo tak chu en pawh en mang hlei lo hian ka kal pel a, kawta ka bike inhûngah chuan lawnin chak mangkhengin Thorn office lam pan chuan ka tlan chhuak a.

Office ka thlen chuan ka dawhkan drawer-a ka mimal thil bik te phawrh chhuakin, chutiang dahna tur atana ka ken plastic bag-ah chuan ka khung nghal mawlh mawlh a.

Ka hnung lama thawm awm avang chuan ka hawi let a, kawngka biang nghenga hmel rum tak pu chungin Matthew chu alo ding reng tawh a. Min zui pawh ka ring chiah lo asin le! Lungawi lo ru deuh tak chuan ka thiltih lai chu ka chhunzawm a, saturday-a chhuak turah ka lo inngaia tunah a lo kir chauh a nih hmel si a, hmanhmawh vut vuta kan chhuah ka ring hauh lo asin mawle!

"Tunah kan chhuak nghal dawn em ni?" ti a ka zawh chuan a din ngai chuan a ding reng a, a mitmeng erawh chuan ka che vel reng reng chu hmaih nei hauh lovin a thlir reng thung.

"Saturday-ah kan chhuak ang chu ka ti deuh na a, vawiina kal ka ti leh ta zawk si a ni, nang nena zinkawng zawh dun pawh a châkawm tawh alawm le Hazel duhtak" ti-el tih hriat zetin a ti a.

Ngei zet hian ka melh a, "Nang nena car pakhata chuan dun chu ka châk viau ring duh suh Matthew Faulkner" ka ti ve salh a.

"I thawmhnaw vel kan lâk hunah kan chhuak nghal mai ang" a rawn tih zawm zat a. Ka ngaihdan tur lam reng reng a dawn lova, ama thu thua min awmtir a tum hi ka kham tak zet. Kawng dawm meuha meng rum âl chung hian Matthew chu ka hmachhawn ta nge nge a.

"Inpeih ta lo ila, engtin nge ni ang?" ka ti a. Ka thinrimna chu ka thunun thei meuh lo; ka thaw a rangin, ka thâwk zâwng chuan ka âwm chu a insêp deuh darh darh bawk a. Chu chuan ka kawr hâk chu rawn tawnin, Matthew mitmeng chu a hîp tlat emaw tih tur a ni. Hmanhmawhna nei hauh lovin ka taksa chu a enkual dan dan a.

Min en reng tih ka hriatna chuan ka marphu ti rangin; a kuta min khawih ang mai niin ka hria, ka taksa chuan mak taka lo dawngsawngin, ka âwmbawr han kawh ta deuh te chu hmuh hmaih hauh lo tih hriat takin a melh vang vang a. Mahni inzahpui zeta ka inher chu min nuihsawh tih hriat fe hian a nui ri hak a.

Ka taksa a thunun dan chu mak ka ti kher mai, mipa dang lakah a thawi pawhin ka la awm chhin lo. Mahni intennain ka khat a, chu chuan ka thinrimna a chawk tho thar leh viau.

"I secretary-a țan ka remtih vang mai hian min zuam suh ang che" ka'n ti ve ngawt a, chu aia țha chu tun hunah hian sawi tur ka hre hlawl lo a ni.

"Hazel..." ti a thaw huai chung chuan a ruangam sei tak chu kawngkhar bul ațang chuan a kal sawn ta a. "Min do hi bansan teh, i thei ngang lo em ni? Hna kan la thawk dun dawn chauhva, i inti hrehawm mai mai a ni. Nula vâwt tak leh ngaihawm loh zet hi hna thawhpui ka châk fahran bik lo tih hria ang che" tiin ka chhanna pawh nghak lo chuan "I insiam peih tawh chuan kan kal thei a ni mai" a ti zui  a.

A sawi dik leh ta pek e, hrep tak chuan! Hetah hian tihtur ka nei tawh lo, hna ka nei tawh lova, chuvangin a țul bak chulaia hun hman chu hrehawmna ka insiam belh mai mai a ni. Mahse, chu chu Matthew hriatah chuan sawi ka tum hauh lo. A tawpna atan chîp hmak chung hian hawi let tawh hauh lovin office chu ka chhuahsan ta a.

Ka flat panna kawng tawite ka tlan chhung chuan ka hnungah Matthew chuan Ferari car dum tle zak chuan min zui a, ka hâk tur thawmhnaw siamfel bak tih tur pawh ka nei tawh lo. Hmanhmawh chûng angai kher emawni le?

Ka chenna kan thlen chuan kawngkhar kalhna hawngin ka hnunga ding Matthew hnenah chuan "Ka inthlak chhungin intur i duh chuan lo inlâk mai rawh" ka ti a.

Ka room-ah lutin, kamis senduk leh a hnuaia haktur tawnzau dum ka dah sa chu ka inbel a, velvet kekawr dum ha leh in flat shoe ka bun nghal bawk a, ka bag pawh ah nghal mai theih tura dawhkana ka dah sa vangin ka inpeih thawkhat ta. Ka lung a lêng lawk tak zet a ni.

Hall ka thlen thlak chuan ka suitcase lian tak tak pahnih chu car lamah Matthew chuan alo keng thla der tawh.

Cupboard leh fridge vela awm chu chahbi pek pahin Gary-a te ka pe tawh mai aniang chu. Hawi pawh ka hawi kual duh lem lo, hun rei tak thlamuang taka ka lo awm ve tawhna a nih vangin ka hawi kual zau thui lutuk chuan ka chhuahsan mai tur chu lungngaiin naupang chhia ang maiin ka țahpui thei dawn tlat a ni.

"I zo dawn tawh em? Bike hi engtin nge i tih dawn, ken ka remti lo tih i hre sa tho chuan ka ring a..." tiin tukverhah chuan a dak vung vung a.

"Tum lo ve, ka țhianpa kutah ka dah rih mai ang, ka mamawh ta viau a nih leh London-ah pawh man châwia hawh tur a tam ang chu" ka ti a.

"Nizana i zu inpui pa kha maw! Mipa engzat chiah hi nge i kawp Hazel? London-ah chuan bike khalh inbeisei suh" ram hmakin a ti a.

Huh..ka chhâng awm lo emai; a duh duh hian min ring mai mai teh se, inhnial ka peih lo.

"I lo sawi ve tur leh hriat tur a awm lo, lo buai ve duh suh" ka tih chuan ka lama lo inherin nelawm loh tak hian min rawn en a, zam map lovin ka lo en lêt ve bawk a.

A kut chu a vai zauhva "Kal ang le, kan tlai dawn" tiin room chu enkual thuakin pawnlam panin a pên chhuak a, a hnungah ka zui ve nghal bawk a.

Gary-a chahbi pek angaih vangin Matthew chu 'car-ah min lo nghak mai rawh' ka ti a. Mahse, step tawp kan thlen thlak chuan Matthew-a  Ferari car bula Gary lo ding reng chu ka hmu a, chîk zetin kan pahnih chuan min en a, makti hmel a pu deuh bawk!

Makti awm réng pawh a nia lawm; ka kalpuipa hi Faulkner Electronics Company Chairman hausa leh lar lutuk kha a ni miauva! Chanchinbu-ah a hausak zia leh a hmelțhat zia an ziak kur nguai a, a nula kawp thar model nalh leh hmelțha zet Kelly Benison nen pawh an tarlang chuai chuai alawm le.

"Hazel, i kal dawn ta maw,? Min lo phone ngei ka beisei" tiin ka chalah a fawp zauh a.

"Weekend remchang hmasa berah min rawn tlawh ve dawn nia" nui var var chungin chahbi chu ka pe a, "Tehreng mai, ka ngai dawn che" ti chungin Matthew chu a melh zauh a. A lo tûm hmuk leh nghal, ngeiawm zawk hian! Ka inchhung lo en zauh zauh tur leh fridge, cupboard-a thil awm te lo inlâk vek tura ka hrilh hnu chuan in mangțhain car-ah chuan ka lut ve ta a.

Kan tlan chhuak chu a ni ta der mai, ngawi ngal chungin ka țhu a, min bia anih loh chuan țawng ka tum bîk der lo.

Kawng chu ngun takin a en a, ka chuang ve tih hre lo ang maiin a la awm zui leh ta nghal a. Ka chau ve deuh bawk nen mutthilh tumin ka chhing ta daih a.

"I bialpa zawk chu tu kha nge, Josh nge Gary zawk?" a țawng chhuah ve chhun pawh ngeiawm chi leh bawk.

"I hriat ve tur a awm lo ka tih kha"  ti hmakin ka chhinsan leh daih a.

"A țha lawm, ka penthouse-ah i cheng ve rih dawn a, awmhran lam te i lo ngaihtuah takin..." a rawn tih leh chuan ka țhungîl zawt mai. Hotel-ah ka innghat phawt anga chuta țang chuan in luah tur ka zawng ang ka ti kha a nia. Ani nena chendun lam chu ka ngaihtuah loh mai bakah ka duh hek lo.

"Hotel-ah min dah phawt la, inluah tur chu muangchang lovin ka dap mai ang" ka ti a.

Min chhang duh map lo, ngun zetin kawng lam chauh chu a en a, a hmel luhlul leh tihmawh hmel zet te, a hnarngul sang vah mai leh a khabe ruhkual invuah nghet tlet tlawt te chu en nin a har thlâwt a ni. Matthew hi ka duh tur a ni lo, rilru natna bak min thlen lovang ti a ngaihtuah chungin ka muhil ta a.

Kut lum leh sa ham hamin ka hmai a rawn tawh chuan meng mang lovin ka rum țiah țiah a. Aw rilruiha "Hazel darling harh teh, kan thleng tawh a nia" a tih chuan peih lo zetin ka meng chhuak ta hram a, hnai fahranah Matthew chuan min lo en reng chu niin ka lai kher mai.

Tukverhah chuan dâkin Faulkner building car park-naah kan lo awm reng tawh a, ka muhil kawngtluan a nih dawn hi. Pawi tawp nang! Car ațangin Matthew chu chhuakin ka țhutna lamah lo kal kualin kawngkhar min hawn sak a, zawi muanga chhukin Penthouse suite lama private lift-ah chuan min luhpui a, kan țawng loh ve ve avang chuan kan boruak chu sawithiam theih hauh loh hian a țang ru viau thung.

Lift ațang chuan chhuakin hmanhmawh lo zet hian țhut hahdamna pindanah chuan kan lut a, chu pindan zau tak chu ngun leh chik tak hian ka enkual a, hlauthawnna ka nei deuh thut, a chhan pawh ka chenna hmun ni lova Matthew nen chauhva han awm chu ka ngai ngam ta mang lo a ni ber mai. Ka ke te chu a khur deuh dar dar a, ka awm a nuam ta vak lo.

Pindan chhung chu a zauh mai bakah a cheidan chu tunlai thei ang ber a ni a. Carpet leh bang var thianghlim sar chu hmuh a nuam hle bawk. Puan zar leh thil khuh mawina ho chu vut rawng ang deuhin a paw deuh phât a, țhutthleng vel erawh chu leather-a khuh vek an ni.

A reh raih bawk si, a reh lutuk mah mah zawk a ni. A hnuailamah thung chuan khawpui tih takah kawngah chuan motor a tamin a tlan nuaih nuaih a, kan awmna ațang erawh chuan thâwm a bengchheng phâk lem lo thung.

"A nuam hle mai" ka aw chhuak hul deuh hak avang chuan Matthew chu a lo nui a, engemaw tal ka sawi chhuah loh chuan ka zamna leh hlauhthawnna te hi a hria ang tih ka hlau a ni.

Ka hna vanga helaia awm hi ka ni tih ngaihtuah ran chungin "Kan pahnih chauhin em ni kan awm a?" ka tih leh chuan, "Ni e, vawiin chu Donald-a chawlh ka pe a ni. Chu chuan a tibuai deuh che em ni?" a ti a. A hmela engmah tilang lo in min en a, kan pahnih chauhva kan awm chuan min ti buai ru hle a ni tih chu a hmuh loh hram ka beisei.

Matthew chuan, "Kan eitur chu a lo dah tho ka ring, pawn lama ei i duh zawk te a nih loh chuan,"

Ngaihsak awm lo fê hian ka dar san âk-in, ei loh tawp pawh ka duh zawk Matthew- a bul a nih chuan; kan inkar boruak țang ta riau chu hahthlak ka ti tak zet. A inchhung ka rah ațanga hlauhthawnna riau ka neih kha a zual tulh tulh mai lehnghal a. Mahse, lanchhuahtir ai chuan thih pawh ka thlang zawk.

"Lo awm ta pawh ni se, Donald chu tunge a nih a?" tiin ka zawt let a.

"A hming pum tak chu Donald Challoner a ni a, kum ruk chhung ka in enkawltu atan ațang tawh a ni."

"House-keeper mipa han neih chu a dangdai hle mai. Nge, bodyguard a ni zawk em ni?" ka tih chuan ka suitcase khai pahin a lo nui mai a.

"A titu tur ber Donald a awm loh avangin i bedroom tur chu keima'n ka kawhhmuh mai ang che. Tin, hei hi ka hrilh lawk nghal ang che, Donald chu zahawm tak a ni a,  he aparment-ah hian ro a rel a, dawhtheihna a nei tlem viau bawk" a ti a.

Hall lam pana kan inzui lai chuan ka thin chu phu nasa viau lo se chuan ka nui hnem ngawtin ka ring a ni.

"Nangmah enkawltu che chuan ka pindan tur min buatsaih sak ka beisei?" ka ti a. Meng de sar chung hian Matthew chuan mipakhat mut theihna tur lam chu kawkin, "Hei hi i khum tur a nia, i mamawh engkim chu room-ah hian a awm ka beisei" tiin ka inrin hmain a lamah min pawt hnai a, min fawp thawi thuak a...

Chu pindana carpet hring dap chungah chuan min kuah chungin minute thum vel chu chesawn lovin kan ding a. Kan lungphu rang ta sawt chu kan hre dun ve vein ka ring, ka ngaihtuahna te chu a chawl ta țhup nimai hian ka hria a, ka chesawn hleithei bik lo. Matthew lah chu ti tho chu!

Penthouse kan thlen chiah khan hlauhthawnna ka nei a. Mahse, Matthew-a lakah hian mipa dang bula ka awm dan ang lo takin ka marphu a rang vek zel. Diktak chuan min hîp chiang alawm, ka ngaihtuahna chu duh lovin ka inla hrang ta thuai a, hepa hi hnaih loh hram dan ka zawng tur a ni.

Ka inlâk hranna chuan Matthew chu a ti hamhaih ve deuh nge țawng mai nachang a hre bik lo a, min en deuh vang vang hnu chuan zawi leh fiah fak hian "Ka 'ta' ah ka la siam thuai ang che" tiin chak zet hian room chu a chhuahsan nghal a.

Reife chesawn thei lovin ka dinna ngaiah chuan ka ding reng a, min kalsan takah chuan ruak deuh huaiin ka inhria, a 'ta' a min siam a tum amaw!? Kan la hria ang chu.

Ka pindan tur chu ka en kual a, a cheidan chu a mawl nain a nuam hle tho va, carpet chhah leh dup nuam tak; wardrobe mihring luh theihna chi pakhat a awm tel bawk a, dressing table lian zet leh sofa tunlai zet tukverh bulah a in hûng tel a, room chhung cheina ringawtah pawh sum tam tak a seng ngei ang tih a hriat mai.

"Thingpui i in duh angem?" ti a pawisawi lo aw zet a kawngka ațanga Matthew-an min rawn zawh chuan hmuh theih hian ka phu dawrh a.

"Duh lo ve, a ngai lo ka lawm e" bah lek leka ka țawng chuan mitmeng zim san, hriatthiam har zetin min en a. A suit jacket chu phelh tawhin a kawr âwm a hawn mai bakah a 'tie' pawh chu a phelh thawl tawh bawk a.

A hahdam hmelin a hlauhawm ru riau bawk, a hmui hmai chu dam thlapin nui hmel a pu deuhva, chu chuan a tilang naupang sawt leh nghal; mi hip theihna mak tak hi chu anei chiang alawm.

Mi chunga lêng a nihna leh min nuihsawh fo țhinna hian a 'charm' a hliah khuh chuang lo.

"I la in dahfel nange darling?" tiin ka suitcase, a ngai ngaia la inhûng te chu a en a. "A hmanhmawh thlak lo ve, dar sarihah chaw kan ei dawn nia. Eitur tam tawk Donald a'n a lo dah alawm, kal chhuah i duh lem lo a ni lawm ni?" tiin min be mawlh mawlh a, duhthlan tir min tum ve niawm tak a! Thutawp siamtu chu amah vek a ni leh tho dawn tih ka hriat sa vangin ka chhang buai duh lo.

"Titi chu i phur vak rih lo a ni maw? a ti leh a, a awka chhuak dam tak phenah chuan min nuihzat riauna alan tel vangin ka lo in hum ruh leh țeuh hman a, chu pa hrep chu!

"I chau deuh em ni Hazel duhtak?" tiin duat hle ni awm tak hian min la rawn be zui cheu a, ka ding khawng nghal lah mai. "In tih hahdam nan engah nge shower hmanga i inbual mai lo vang? I khum te takte-ah khan i mu hahdam anga, i him lutuk ang tunah rih chuan."

A aw dam thlap kha a chang ta deuh hlek a, "A ngena min ngen hma chuan i khum ka țawmpui lo vang che" a ti a.

Huh, ka ngen hun a nghak a nih chuan a thleng ngai lovang! Chhuah paha kawngka a khar ri chu ka hria a, țap lo turin ka insum hram hram a ni. Ka nun zalen lo ta lutuk leh ka flat te, Josh ka ngaihtuah leh lek phei chuan ka lung a leng tak zet.

Phur lo deuh chung hian ka thawmhnaw chu ka phawrh țan ve ta a, hetiang thiltih a ngai ringawt pawh hi lungchhiat thlak a ni, helai hmuna cheng hlen tur ka ang riau a, chu chu ka duh hauh loh thil a ni bawk si.

Kum li chhung nasa takin hna ka thawk ve a, tunah lem Matthew hian min nawr kualin a thuhnuaia min dah a tum hle tih a hriat bawk nen; ka hah hluah hluah! Ka hmui chu pet ruhin kawrhnuai vel ka dahna drawer chu ka khar a, suitcase ruak chu wardrobe; mihring luh theihnaah chuan dah lutin ka hawi kual thuak a, engkim chu a țha chi vek tih a hriat hliah hliah mai a ni.

Wardrobe leh bedroom kawngkhar inkar chhuara lehkhabu inrem țhût chu ka hmu ta a. A thupui te en lâwrin ka chhiar duh a tam hle mai, a vai mai chuan tumahin an la khawih loh a thar diai a ni hmel leh nghal a. Heng zo zai hi Matthew chuan ka chhiar turin a lo lakhawm tihna em ni ang? Chu zawng thil theih a ni lo ang, ka chungchâng leh chanchin engmah hriat a nei lo. Awih awm loh hian a!

Lehkhabu chu ka chhiar tur atana lakkhawm a ni ngei ang tih rinhlelh rual a ni si lo. Matthew chuan Josh a zawt a ni ngei ang, chuti ni lo se a thar ka lehkhabu duh zawng hlir leh nghal alo awm ngawt nachhan tur  ka hre lo. Chutiang thil ati a nih chuan min ngaihtuah ru hle tihna a ni mai. Ka nui ta var var a...

Ka thawmhnaw chu phelhin under-wear chawpin ka phelh vek a, tichuan robe hain ka sam kilh tawmna chu ka phelh a, ka dar velah ka sam chu a darh ta niai a.

Bathroom-ah chuan lutin a pui hle a ni tih ka hmu nghal, bualin chhuat fai sar mai han rah chu ka inthlahrung lek lek nia. Towel hring nghalh mai hi a awm sa bawk a, darthlalanga siam chhuarah chuan lotion chi hrang hrang leh shampoo, sahbawn rimtui tam tak a awm țeuhva, a chikim lutuk leh ka ngainat chi hlir a awm chu mak ka ti kher mai!

Dinner ei tur chuan thawmhnaw naran tak inbelin, hun special niawm fahrana inchei ka tum hauh lo. Ka sam chu kilh tawm vekin, make-up pawh ka hmang uar lova, taksa pum lan theihnaah chuan dingin ka in en vang vang a, silk kawr vâr ka hak hnuaia cotton pawnfen ka fen chuan ka pianhmang chu a thup hauh lo mai. Ka inchei fai țhat tho chuan mi min thlir dan tur chu ka ngai pawimawh vak lem lo.

Mahse, tunah chuan engvang teh reng nge ni mit thara in enin ka pianhmang leh nihna chu ka inhmu thiam ta tlat nia. Matthew tana nalh thlarha lan ka duh ta tlat a, ka rilru put hmang inthlâk chhoh dan chu duh lovin ka lu ka thing deuh nar nar a.

Nur nâng chung chuan ka țhi chu ka awrh a. Mahse, ka phelh leh thuai a, a chhan chu ka kawr nghawng 'V' chu duh aiin a zau hret a, ka țhi awrh chuan ka hnute bul vel tilangin Matthew mit a la dawn tlat. Chu chu duh lovin, ka kawr nghawng zau thupna tur scarf zawnga drawer ka hai nawk nawk lai tak chuan kawngka kik thawm ka hre ta a.

"Dawhkanah chhawp diam a ni tawh a, rawn pan ve tawh mai rawh" dawh thei lo aw tak hian Matthew chuan a rawn ti a. A kal leh thawm hriat tumin beng ka chhi hra a, pen thawm hriat tur a awm tak lovah chuan min lo nghak a ni tih a chiang, ka chhuah vat loh chuan alo lut ngei dawn a ni. Lo lut turin ka duh lova, rang zetin ka chhuak ve ta zawk a.

"I ril a țam viau ka beisei" a lo ti a. A room kawngka ep chiah bang ngheng chuan kawi sawi zetin a ding a, a mitmeng chik tak leh hriatthiam har tak chuan min en a. "Kei chu a țam tawh teh a nia!" a la ti zui.

Ka kiu chung maiah chuan vuanin min tawhna chuan ka chhungril a fan chiai chiai a. Mipa a nihna chu ka hre thar ta riau mai. A ruangâm nalh leh lian tawk tak khuh tur chuan kekawr leh kawr dum ha-in, a kawr âwm inhawng ațang chuan a âwm pharh țha takte chu alang a. Ka laka mi thunun theih riauna a neih chu duh lovin keimah zawk chu inthunun tumin thawk ka la hak a, min hruai phei zelin sofa hunna thleng chuan ka kal san hlau awm takin min vuan tlat a.

Dawhkanah chuan eitur tuihnai tam tak a inchhawp țeuh a. "Engmah pawh ka ei theih ka ring lo" ka ti sap a, "Chuti a nih chuan kan pahnih atan ka ei mai angai dawn anih chu, wine tal chu i in dawn lo'm ni?" tiin mitko a san âk a, lo bu nghatin sofa-ah chuan ka țhu thla hnak a, Matthew kalsawn lai chu ka en reng a.

"Champagne em ni? Kan hun tawng hian lawm a phu viau alawm, ka inah hian ka lo lawm a che Hazel" Matthew chuan a rawn ti a.

Champagne thlit pah chuan "I rilru i thlak lo ang maw, wine ringawt in chu a țha hauh lo. Mahse, i thu thu le!" tiin no chu min pe a, luhlul zet hian lu ka thing nar nar a, min timualpho tura ka pum chu a rik loh hram ka beisei. An eitur siam chu tui hmel viau mahse ka țang laklawh ve tlat.

"I awmdan naupang chhia zet kha i bansan anih loh chuan engemaw tal ka tih chu a mngai ang" ka lam hawi chuan inherin a plate chu dawhkanah chuan nuisâng hian a dah a; a mithmul sei țha tak chuan a mit paw muk raih mai chu hliah deuhvin a meng sî deuh sap a, a huhâng chuan min hîp tak zet, chu erawh hmuh tir kher ka tum lo.

Matthew-a mitmeng nelawmna leh ngaihawmnaa khat chu vawt raih hian ka lo en reng a, ka awka chhuak pawh a bung țha hle.

"Mu tawh mai ila țhain ka hria, ka chau riau" tiin mahni inthunun zetin ka thova, ka chet zâwnga ka pawnfenin ka chawn vel zên thlarh mai a tihlan te chu ka hre lo der hmiah. Mahse, Matthew chuan a hmuh hmaih hauhin ka ring lo.

"Chuti maw?" ti a chip deuh hmakin, a hma lawka a nelawmna chu a bo zo leh ta! A țhutna ațang chuan inthazo zeta lo ding chhuakin ka bânah a rawn hmer ta tlat a. "Ka la sawi zo lo, bakah ala hma lutuk, inthiarfihlim phêt i tum hian sâwtna a nei lo" a ti thum chhak a.

"Min tina a nia Matthew!" nelawm loh zeta tiin cho takin ka melh kar a.

"Tunah tak hi chuan tihnat satliah mai che ni lo hian i chungah ka ti duh ngei ang" tiin a taksa lian leh khauh țang mai lamah chuan min pawt hnai dâwrh a. Ka âwmbawra ataksa ka va nghen takah chuan a 4meng thim deuh raih a.

Chutia kan taksa a indeh chuan zahpuiawm zeta lo dawngsawngin ka thaw a rang nghal a; ka bân a chelh chu thlahin ka kawngah nghet takin min kuah a, a kut awl lam chuan ka taksa chu chûl thlain a khawihna lai apiang chu a sa ham ham leh nghal! Ka â zo tak ngial dawnin ka hria.

"Zahngaihna i ngen ruai thlengin hmangaihna ka chenpui zawk dawn che em ni?" ka biang bula tih sup pahin ka mitko chu a fawp thuak thuak a, ka bengkawmah nen a chhuk thla zel a; a chetdanah chuan hmanhmawhna anei hauh lova, ka ir lamah fawp thla-in ka dâk tial tial lo thei si lo.

Ka thin phu dawt dawt leh Matthew-a rim nam cham cham te, a sam nem thap leh dum hlap mai te tih loh chu thildang pawh ka hrechang ta meuh lo...

©<++++[BeckirafARenthlei]++++>®

                     Chapter-6

Kan inhnaih tawnna chuan ka chakna te chu la bo zovin, ka chau deuh nghulh a. A kut che vel reng chuan ka khel bâwrah dawmin amah hnaih leh zual tur chuan min kuah bet a, ka âwmbawrah chuan fawp hniam thla zelin min mamawh ngawih ngawih tih a lantirna chuan phurna min siam belh sawt bawk si.

Ka kawr hâk chhungah chuan zen lutin a kut lawngin ka taksa chu a chul lâwr dan dan a. Ka hmuiah bawk chuan duhthawh zetin min rawn fawp leh tawn tawn a, ka thiam ang anga ka lo chhan lêt ve zel vang chuan min fawp uar zual sauh a. Thawchham lek leka kan infawh hnu chuan inla hrang hlekin "Hetiang hian hmangaihna ka chenpui thei che a ni. Josh-a i theihnghilh thlengin; a hmaa mi zawng zawng nen, kei tih chauh loh chu i theihnghilh vek thlengin..."

Chutia Josh hming a sawi ri-ah chuan meng chhuakin ka thunun theih loh engthilin emaw min zem vel chiai chiaina tibo tur chuan ka khap sak sak a. A kut leh hmui ang maiin a âw chuan min ti tuiral  thei a, ka la neih ngai loh zauthauna mak tak mai tuipuiah min hruai lut thei hial bawk mahna! Rum hawk pahin ka kut pahnih chuan ka nem sawn a, "Min kalsan rawh" ka ti lawi deu rât a..

"Hazel..." a âw chu a fiah lo ve hle a, "Min mamawh ve tho a ni tih chu pha lo mai teh"

"Ni lo" tiin mahni inzahpui zet hian hmai ka hup a, ka zak lutuk hi ka â thei takngial dawn.

"Tunge bum i tum a?" Matthew țawng chhuak chu a kha fak mai; a in thunun leh der tawh tih ka hriat chuan ka chi-ai tulh tulh a, chhâng lova ka ngawih tâk reng avang chuan "Tisa thil taka hmeichhe sosâng chu ka hre ve bawk, zah der angai lo ang" a ti deuh hmuk a, intur awmna lamah chuan a phei a.

Zak derah min ngai a maw!? Mipa ka la mutpui lo mai ni lovin vawikhat pawh tisa thilin ka hnaih ngai lo. Min duhtu ka hmu lo pawh a ni bik lo. Ka nuin ka pa boral hnu thla rei lo teah mipa dang a ûm a, a fanu min thlah thlam țhak phah a, kha thil ka hriat rengna avang khan inlaichinna chungchanga ka ngaihdan hi a ti dang ta vek zawk a ni. Chu erawh hriattir ka tum lo.

Dawhkana Champagne ka theihnghilh tawh chu lain ka in zo ta vek a. Tawn hriat ka nei lova, ani ang experience nei tawhin min thlêm te chuan tunge hnial thei ang?

"Ka mu tawh dawn" tiin Matthew mit de sar chu ngaihsak awm lo tak hian ka en a, ka in thunun thei a ni tih lantir ka tum hle bawk.

"Mu ta che, engtik thleng nge min hnar theih ang ka hre châk khawp mai" ti salh in, a kekawr ipte chu a zen a, chu chuan a mal pianhmang chu ti lang chiang leh zualin zauthauna engemaw tak hian min fan leh der tawh. Thin phu dawt dawt chung chuan pindan ațang chuan ka chhuak ta a, Matthew thinur hmel chu ka hmuh hman zauh avangin. Mipa, a chapona tihchhiat saka awm hmel hi a puin ka hria.

Mak ang reng takin chumi zan chu min tibuaitu awm lovin tui takin ka muhil tlat! Min rawn ûmzui ka ring deuh kha a nia..

A tukzing ka harh chuan tukverh kawngkaah chuan nizung a rawn lut chiai a, Matthew chuan office lam a pan tawh ka beisei hle. A office chu Penthouse hnuai chiaha awm a nih ka ring bawk. Kei erawh chu monday ațanga hna zawm chauh turin mi ti a, weekend a ni bawk nen chawlh hahdamna hun a ni mai.

Țhutkhawmna pindan sana ka en chuan dar sawm a ri der tawh a, ka mu rei hle mai zahthlak zawk hian a!

Nizan lamah chaw ka ei duh lo vel a, ka ril ațam tawh hle mai. Choka chhunga lo ding ka hmuh chuan ka pen lai chu ka tawp chawt a. Donald Challoner, apartment enkawltu chu ka lo theihnghilh hmin der a ni. Palian tak a ni a, Matthew ai pawhin a lian zawk. Mahse, a hmel chu sawifiah theih chi pawh niin ka hre lo, a țha lo ve thlawt a ni.

"Good morning Mr. Donald," ti a nui sângin ka kut chu ka phar a, "Hazel Cade ka nia."

"Tunge i nih chu ka hria a lawm Miss" a âw pawh a thum țha hle mai, Matthew hnuaia thawk awm tak a ni.

"Dar riatah breakfast ka chhawp țhin a, muttir rih tur i nih thu Mr.Faulkner a'n a sawi a; ''I tho tlaiin breakfast i ei tlai țhin reng em ni?'' tih hi hrethei ila ka lawm ngawt ang Miss Cade" a ti leh a.

A țawng dan chuan ka nuih a ti za hle mai, nui chhuak lo turin ka insum nasat a ngai viau. A breakfast chhawp huna ka ei ve hman loh chuan ei lova ka awm mai a ngai dawn tih min hrilhna a nih hmel.

"I thiltih lai chhunzawm zel rawh, ka eitur chu ka lo insiam ve thei a lawm" ka tih chuan lawm lo tih hriat deuh hian a ngawi ngul a, a thuneihna hmun choka ațanga nawrchhuah tumah min ngai deuh aniang. Matthew-a chungah awm ve tak ang maw! A awm ngam ka ring hauh lova, ani chu mahni thu ngata kal țhin a nia, tuma'n an dal ngam lovang.

Mahni chauha țhutkhawmna pindana breakfast ei chu a khawhar thlak riau hian ka hria a. Matthew teh hrep hian ka ngainat thil lak ațangin min pawt hrang a; ka flat, ka hna leh bike thlengin... A hnena thawk ve tura min duhna chhan hi ka hrethiam thei lo, tenawm lutuk mai.

Nizana thil thleng ang kha thlentir tawh loh hram ka tum tur a ni. Ka tum loh dan hlir hian tunlai chu ka awm a, hahthlak hian a!

Breakfast ka ei zawh chuan tray chu chawiin choka lamah ka phei a. Donald-a mizia hriat chu ka tum tur a ni. He apartment-ah hian ka awm ve dawn a nih chuan țhian țhaah tal ka siam tur a ni. Tin, ka chhuah ve duh châng pawha Matthew tibuai kher lo a ka vei vah theih na'n man chawia hawh tur bike awmna te pawh min kawh hmuh thei mial mahna.

"Puih i ngai angem Donald? Tih tur i ngah hmel riau."

"Ngai love, ka lawm e Miss" a ti a, a aw chuan ngaihno a bei fahran lo. Mahse, chutianga tih zam mai mai theih ka ni bik lo. Zang vah leh ram deuh hmak hian, "Chu chu i duh dan a nih chuan a țha a lawm. Mahse, engmah ti lova awm mai mai hi ka tih dan a ni vak lo a tin ni, Mr.Faulkner chuan lunch a rawn ei dawn em?" ka ti a.

"Dawn lo Miss" tiin Donald chu a thova, "A chennaah hian ka pu chuan thil a ei ngai mang lo," a țawng chhum deuh hmuk hmuk chu hre lo derin ka be lui ve zel a.

"I pu hi tihbuai loh hram ka duh a, ka mamawh tlem azawng lam angai dawn a, man chawia hawh tur bike i hre lo maw?" ka tih chuan mak ti lutuk hian a meng phâwk vak a! Mahse, a reh leh vat tho.

"Hriat te chu hria e. Mahse, i tan a țha ber lo mai thei a ni. I mamawh ta viau a nih chuan ka lo zawn sak ang che" chu a ti ve ta tho a, tlem chuan hma ka sawn ve hret e.

Donald chu kalsanin ka room-ah chuan ka vei chhen a, tun ang reng hian mal leh khawharin ka la awm ngai lo. Ka chhungte ka kalsan lai pawh khan chhel takin ka awm țhin kha a nia, Josh te nupa kiangah hlim takin ka nun ka lo hmang țhin anih kha.

Tunah chuan hmelhriat loh karah mal leh khawhar takin hna ka thawk dawn chu a nia, mahni inkhawngaihnain ka khat zo ta vek zawng a nih hi. Ka tuar a zuau țan tawh tlat, intih paukhauh a ngai thar tak zet a ni.

Chau zetin ka sam ka tuai a, intih thawven ka ngai tak meuh a ni. Ka boruak hip hi a rit mah mah, Josh-a phone ila a țha tak ang. Office a kal ngeiin ka ring a.

Mahse, Thorn office ka va phone chuan Josh-a secretary thar (ka ai âwhtu) in min lo chhang a, Josh nen min inbiak tirin ani pawh chu a âw a dang ve deuh hlekin ka hria, ka dam țhat thu leh monday-ah hna ka zawm dâwn tih ka hrilh chuan a thaw huai a.

"Hazel, min puihnaah hian ka lawm tak zet a ni, ka la rul lêt vek ang che" a rawn ti hul hak a.

"Ka rawn tibuai che em, zanah kan inbe leh zawk dawn a mi? Office-ah chuan thil sawi a remchang lo deuh tlat" ka tih chuan, "Ka hman dawn tlat lo min hrethiam rawh" a ti a.

"I hman dawn lo maw, i lêngchhuak dawn em ni?" thil dik lo chu a awm a ni, Becca boral hnuah khan office kala a chhuah bak kha a chhuak ngai reng reng si lova.

"Hazel, remchangah kan inbe dawn nia, tun țum chu min hrethiam rawh" tiin phone a off daih a. Chutih lai chuan kawngka lam a țangin thawm a lo awm a, ka va en chuan kawngka-ah Matthew chu a lo ding reng tawh a, a mitmeng paw muk raih chuan chiang takin min en bawk.

"Tunge i biak a?" a ti thum chhak a.

"Josh" dâwt sawi ka tum zet nain țul ka ti leh ta lo. Matthew hmel han rum ta deuh chu ka hmu reng a.

"Tun țum chu ka hrethiam ang che, i be nawn leh a nih chuan ka tih tur chu i hriat kha" vawt raih hian a ti a.

"I thusawi apiang zawm tur chuan min beisei hauh suh, duh duh ka bia ang."

"Min hnial kalh zawnga i khawsa lui a nih chuan zirtirna pek che ka châk viau a nia duhtak."

A hmel ngeiawm zet chu en duh lovin hnuailam ka bih tlat a, chu chu a huat tawk a tling viau a nih ka ring; a țawng chhuak pawh a ram deuh hmak a.

"I house keeper khan lunch ei turin i haw vak ngai lo tih a sawi a, nge dâwt a sawi zawk? In inchhun pûtu khawp mai, tunah lem i rawn haw leh bawk sia" ner sak chunga ka tih chuan "Keimah ang bawkin aparment-ah hian thu a neih zia ka hrilh tawh che kha. A thin tirim hauh suh ang che; lunch ei pui tur che-in ka rawn haw a, insiam na'n minute sawm hun i nei" a ti deuh hmak a.

"Nangmahin kal mai rawh, ka peih ve lem lo" ka țawng chhuak chu naupang lungawi lo titau te pawh a ang dâwn dâwn a lawm le. Amah ngaihsak loh hmel tak chuan ka lang lui tlat a.

"Naupangchhia ang mai hian awm teh suh, i in hmeh lo a nia, inchei tehchiam a ngai lovang kekawr i ha dawn nia" tiin min chhuah san nghal hmiah. A mize hriathiam har zet hi ka kham hluah hluah.

Kekawr maw! Ka hâk tur thleng thlenga sawi turin tunge maw ni a, a inhriat teh hrep le! Kekawr hâk te chu ka duhthusam alawm, a sawi vang kher nilovin ka ngainat ve vang zawkin ka ha ang. Huh...

Ka inthlak zawh veka ka chhuk ve meuh chuan minute sawm a ral daih tawh. Hall-ah min lo nghak reng tawh a, cream rawng jacket a hâk chuan a vun nisa em țhan tih hriat taka sen uk kharh chu a tilang sar hle a, cotton tho jean kekawr dum hain a inhmeh tak zet. Ka hâk tur hre sa ang hrimin kan inthuam dan chu a in ang hle lehnghal!

Apartment kawta kan chhuak chu mak tiin ka khêk raih a! Redfol company siam bike nalh zet mai lo inhûng chu mit khap miah lovin ka en a. Ka awih thei lo, hepa hi bike ka ngaina lo a ti vel a, tunah lem ka hmaah a rawn dah leh si. Khalh a tum chu a ni em lo ang chu!

"Tikhan i ding reng dawn nge kan kal dawn, ka ril a țam tawh viau a nia" Matthew a'n a tih chuan ka phu zawk a.

"Umh... Ka hamhaih vek a lawm, ka khalh i phal tak zet maw?" nui var varin ka chhâng a.

"I ngainat zia ka hria alawm. Mahse, ka thu lo chuan khawiah mah i kal tur a ni lo" tiin helmet chu a khum a.

Haha... Ka ring reng a, engemaw tak intiamkamna awm lo chuan min hmantir ka ring lo reng a ni. Khalh a la tum zui a, ka chuang ngam dawn emawni le!?

"I khalhah chuan ka tum lo, i thiam tih pawh hriat va ni suh" ka tih chuan ning tih hriat zet hian "Lo chuang vat mai teh kan tlai zel a nia, in tur no dawm ka tum wine emaw brandy emaw... Chawhnu lam ka chawl bawk a, kal lamah ka phur che anga, haw lam erawh chu i khalhah ka chuang thung ang, țha em?" tiin min hui zauh a, rilru nuam fahran lo chuan a hnungah chuan ka lawn a, a khalh ngam phawt te chuan ka chuang ve ngam awm emai!

Ka kut chu lain a kawngah min kuah tir a, a helmet khum chu a dum leh sen a ni a, a in ang chiah kan khum lehnghal! Kan thawmhnaw hâk a in ang deuh bawk si nen ka lo dream ang chiah kha ni maiin ka hria. Partner chhe lo zet neiha ride vel ka châk țhin a nih kha. Matthew bul kher chu ni lo se chuan hei ai hian a nuam ang mawle.

Kan tlanchhuak chiah chu Matthew hnungah chuan beiin nghet zetin ka kuah a, a taksa lumna chuan min ur deuh ham ham nen nuam ka ti vang vang hle mai. Ti hian awm reng theih se, bike khalh chu a lo thiam teh meuh mai. Ka rin phâk bakin a thiam a, ka hahdamin mak deuh hian ka thla a muang nghal hliah hliah mai, a kiangah hian him riauva inhriatna ka nei tlat pek! Kei hian ka lo thlahlel ru viau tawh zawk em ni?

Robertos restaurant-a lunch kan eilai chuan bike chungchâng chu sawi ka duh hle a. Mahse, tih lawm har tak anga ka lan a țul rih tlat. A laka ka rilru put hmang nêm tial tial ta hi hriattir ka tum hauh lo a, Hazel Cade mi luhlul leh vâwt raih ka nihna kha lan chhuahtir ka tum ve fan fan a ni.

Min hruaina restaurant chu a changkang hle a, min lo dawnsawn danah leh chu pindan mawi tak chhunga dawhkan țha ber awmnaa min hruai chat danah chuan Matthew chu a kal ngun thawkhat hle a ni tih ka hre thei mai.

Kan ei duh zawng te kan chah hnu chuan ngawi rengin kan țhu a. Wine kan in lai chuan "In tam ve hauh suh ang che, haw lamah bike i khalh dawn kha..." Matthew chuan nuih insum tih hriat zet hian a ti a.

"Ha...rui khawpin ka in lovang hlauthawng suh, i apartment chu him takin ka thlen pui ngei ang che" tiin ka lo chhang ve vat a.

"Lawm thu pawh min hrilh i tum miah lo a ni maw! Hazel, i luhlul ve ngawt mai"

"Ka lawm e, bike nalh zet min hman tir dawn avangin Matt" ti el zeta ka tih chuan a nui suk ringawt a.

"Hmeichhe nalh zet leh hmelțha tak, hna zahawm tak nei ve bawk si chu engvanga mahni puala car nei lo a, bike nei tlat zawk nge i nih le!?"

"Haha, Bike ka duh zawk tihna a ni mai lawm, ka hlawh mila ka khawsak a ngai bawk" ka tih chuan a mitah min  ngaihsanna niawm tak lang zuai chu ka hmu hman a mahse, a rei lo.

"Josh khan hlawh a pe tamtawk lo che em ni, nge khawhralna dang i nei zawk? A bialnu te chu car țha tak lei sak ve awm che a nia" ti zui leh in a ner sak a.

"Ka mamawh chu ka nei ve e; tin, midang puihna tel lo hian ka hlawh hi ka kham tawk alawm, ka lungawi e. Car tel lo pawhin bike hian ka duhna hmun min hruai thleng ve tho a nia" tin ka nui deuh sak a. Ani pawhin hriatthiam hmel tak hian min thlir vang vang a.

Kan inkâr chu nidang ang lo takin a nuam ru riau nia, ka inthlah dul ve hret hret bawk.

"Darling...." ring zet a rawn ti ri avang chuan kan hawi chhuak dun vat a.

"Kelly...'' Matthew chuan tiin mak ti hmel a pu bawk a!

                      Chapter-7

Kelly Benison; mi â ber paw'n he nu hi an hria ang chu mawle, model lar leh hmelțha kha a ni miauva. Matthew-a hmei huangtau zet mitmeng hring nghalh mai chuan huat hmel zet leh tham lo hmel takin rum fahranin min en a. Huh... ka hlau lo chiang emai a, a aia rumin ka melh lêt a, ka nui lui deuh kher bawk a.

"Matt darling, i lo lêt leh tawh tih i sawi lova!" Kelly chuan Matt lam hawiin no zetin a țawng a.

"I hriat ang hian lunch kan ei mêk a, nakinah ka lo bia ang che Kelly." Matthew țawng chhuak chu a nêm fahran lo, kei ni ila ka kal san daih ang mawle. Kelly erawh chuan engahmah ngai lo niawm takin chair awl chu pawt chhuakin a rawn țhu a.

He mi te induat vel hmu tur hian ka awm peih teuh lo.

"In pahnih khan lo ei chhunzawm rawh u, ka ril a țam tawh tlat lo" tiin ka ding hluai a. Kelly chuan mak min tih hmel zetin ka kal sawn lai chu min thlir reng a, Matthew erawh chu thinrim insum tih hriat tak hian a ngawi ngul thung.

Darkar chanve lek kal ta a restaurant kawngka a min lo dawngsawngtu khan min en reng tih ka hria, pangai taka ka lan a ngai a ni. Ka peih lo chung min hruai chhuak a, a bialnu hmuh tel a lo tum vang vek a nih kha. Bike chahbi lah chu min pe bawk si lo. Taxi ka hman ngei a ngai dawn a ni.

Bike ka ngaihtuah chhuah ve leh ka ding deuh vang vang a, ka khalh châk ve asin le. Kan chhuah dawna ka phur ve teh reng nen; pawi lo, 'hire' tur ka zawng ve tawh mai niang chu. Hetiang hmunah chuan nalh fê fê changkang tak tak atam awm emai!

Ka hnung lam ațanga zawi fiah taka țawng ri ka hriat avang chuan muangchangin ka inher a. Matthew thinrim mitmeng nen chuan kan in hmachhawn ta ran mai, chahbi chu min pe a "Haw ang" ti deuh hmukin engmah thil dang sawi zawm tum lo tih hriat zetin ngêng fahran hian bike dahna bulah chuan a kal phei a.

Kan tlan chhuak chiah chu ngaihtuahna dang ka nei thut; ka speed ti sângin chak mangkhengin ka tlanpui a, loh theih lohvin ka kâwngah nghet zetin a kuah a. Haha, ka 'plan' pakhat chu a hlawhtling ta phawt! Min kuah mai loh chuan atla mai anga sin!

"Tlan muang deuh, rawh i nunna kha i hlut lo viau a nih pawhin kei chuan dam ka la duh a nia." Ring zetin ka beng bulah a rawn ti a, ka tlan muang awm lo chiang e mai a! Kan lunch boruak a bialnuin a rawn tih khaw loh vanga hremna a nih hi, a hlau a nih chuan a duh leh zuang thla mai ang hmiang. A aia chak a ka tlan nghal loh...

Westminster Faulkner building kawt kan thlen chuan Matthew hmel chu țo haw tur ang maiin a dur khup a, ka nghawnga reh mai duh hmel a pu tlat, hlau lo ang taka lan tumin ka helmet chu ka phelh a.

"Thil tih khaw loh leh mi run luih hi chu i thiam ve ngawt mai" ti ram hmukin private lift lam pan chuan min kai dawr dawr a. A hma lawk kha chuan kan in ngeih ve țep asin le, kha nu teh hrep vang vek kha a ni!

Lift chhungah chuan min nawr lutin bang ngheng chuan min nawr bet a, zawi muanga lift a chhoh lai chuan dimna tel miah lovin min rawn fawp nawk nawk a, ka theih tawpa lo indang vein chu chuan a thinrimna a belh chhah sauh ni ngei tur a ni. Ka kut pahnih chu hmer kawpin chunglamah min dah chhoh sak a, min fawp chhunzawm leh nghal zat bawk.

Ka thinrim rilru na bawk si chuan ka lo sual let ve at at a, min thlah duh der lo. Engatan mah ngai lo tih hriat zet hian ka âwmbâwr chu a kut âwl lam chuan a țham bawrh bawrh a, a ngalah ka pet sak chawrh chuan min thlah chiang kher mai.

"Kawlh sen lutuk, engtikah mah i khawsa zia hi ka hrethiam thei dawn lo a nih hi!"

"I hriat thiam kher angai lo tihna a nih chu" thinrim aw khur dar darin ka chhang let ve a.

"Office-ah ka kal leh mai ang, i bula awm hi hun khawhralna mai a ni"  a ti sup a.

 "Awm lo mai rawh, awm turin  ka sawm che lah a ni hek lo" ka chhan dan avang chuan a ner sawk a.

"Apartment-ah tlang nghal ang che, khawiah mah lo chhuak suh, ka thinrimna hi i cho chhuak tak tak palh ange, bike nen khan ilo chhuak anih chuan..." sawi zawm duh lo lui ngatin lift kawngkhar a inhawn veleh chuan hawi lêt hauh lo hian a chhuak nghal nal nal a, a thin ur hle a ni tih hai rual a ni lo.

A hnu lawkah chuan apartment chu thlengin, kan eitur chah pawh ei mumal hman lova restaurant kan chhuahsan kha, restaurant a lo awm ve ho mak tih a hlawh viauin ka ring. Matthew hre lo chu kha mi hmunah khan an tam lo viau ang, Kelly hnawh kian nan min hmang chu a ni em lovang chu maw!

Apartment chhuahsan lo tura min tih chu zawm ka hreh viau nain, vawiin atan chuan a thin ka tirim tam ve tâwk tawh bawk alawm, ka duhtâwk thei tawh mai ang chu. Ka nui ru sak a.

Rei fe room-ah ka inkhung tawh a, dinner peih anih tawh thu Donald a'n kawngka ațanga a rawn sawi chuan peih lo zetin ka tho chhuak a, lunch tih tham ka ei loh avangin ka ril a țam tak zet tawh a ni.

Choka lam pan chuan ka chhuak a, study room ațanga lo chhuak chiah Matthew nen chuan kan insu lo chauh. Kawr dum leh kekawr, a inhmeh tur tak a hâk chu ka hmu thuak hman chauhva, ennawn duh lovin ka kal tlang lui hmak. Ka hnungah min rawn zui tih erawh chu ka hriatna thazâm te hian min hrilh thung.

Kan eitur dawhkana chhawp mêktu Donald lam chu biain, Matthew chuan a fak a. "Nidang ang bawkin a tui hmel leh hle mai" tiin. Ka ril a țâm bawk nen Donald thil siam chu ka ei châk thar ta riau mai a, an pahniha mak tih tur khawpa tamin ei ila nimai lawm le.

Sangha kan phei chu a tui tak zet, ka plate a mi ka ei zawh meuh chuan mak tih hmel zetin Matthew chuan min lo en reng a, a tui ka tih teh lûl nen ani chuan a ei tlem hle tih ka hmu a. Soup phei chu a khawih lo hrim hrim a ni tih hriat tak hian a bowl chu ala khat pap a.

"Ka plate-a mi pawh hi i ei thei ang Hazel, puar takin ei rawh hmeichhia nalh loh hlauva insum vel hi ka ngaisang teh chiam lo" a ti a. Chair nghenchhan chu ngheng ur ur-in mitmeng hriatthiam har zet hian min en a.

"Ka ei tam tawk tawh viau tih chu i hmuin ka ring, coffee ka lo thlit dawn che'mi?" Ka ti daih a.

Bu nghatin "Hetiang hian i nelawm loh țhin reng nge, ka bulah tiang mizia hi i nei zawk. Min chhuihna kha a na khawp mai" tiin a ke lam chu a bih zauhva.

"I phû tawk chiah anih kha" tiin a coffee tur a hmaah chuan dah sakin, ka ta tur erawh chu kengin ka kal sawn daih a. Ka nuna a lo lan hma kha chuan; nula vawt leh ngawichawi mahni induh zet kha ka ni a, tunah chuan ka thinchhiain inthunun theihna ka tlachham telh telh zel anih tâk hi!

"I dinhmun nawmna tur chu nangmahah hian a inghat a ni." Ka hnung maiah Matthew chu a lo ding reng tawh a, a kal sawn thawm ka hre lo reng reng, banga lemziak intar chu hmu miah lovin ka melh vang vang a.

Ka nghâwnga min thâwk khum deuh ham ham chu hriain, ka hrawk chu a tâwt deuh up up a. Hetianga ka laka nghawng a neih zel chuan kei hi ka invêng rei thei hauh lovang. Ka thinlung pindan kilkhatah hian Matthew hian hmun a chang tih ka hre ru kiau tawh a ni. Ani pawh hian tisa thil tak chuan min pawh a tum hle niin ka hre bawk.

"Ka thu anga i awm dawn lo a nih chuan Hazel, nang leh i bialpa Josh chungah hian enge ka tih theih lo en ang che." Matt țawng chhuak chu a hlauhawm mah mah a ni.

Huh... ka bialpa maw! Ve ziah hian ka insawifiah dawn chuang lo.

"I secretary nih bak hi tum dang ka nei hauh lo, i mimal nun ka ngai pawimawh hran hek lo, ka nunah inrawlh tum bîk suh ang che" ka ti ve hmak a.

"Vawiina i awm dan te kha ngaihtuah chuan secretary țha tak i ni tih hi ka awih lo rum rum a ni. Ka ngaih dan ang lo a i kal lui anih chuan Thorn company hi ka ti chhe vek ang" khauh deuh far hian a ti leh a.

"I hnena thawh ka remtihna chhan hi company leh Josh vang chauh a ni. Thorn hi i tichhia nih chuan kei pawh min tichhe tel vel tihna a ni" a thinur thaw lo la hawk chu ka haider hmiah thung.

Engemaw chen kan ngawih vang vang hnu chuan, "Ka chhoh san mai ang che zanin atan chuan kan duh tawk thei em?" ka ti a.

"Duhtawk lo" tiin rang zet hian ka banrekah chuan a rawn hmer a.

"Min thlah rawh!"

"Ni lo ve, ka la duhtawk lo" ti leh in min khawih lohna tura ka kut phar chhuah chu Matthew chuan min man beh sak leh ta a. Min hmer nâ tawh hle bawk a, mahni inkhawngaihna nei deuh thutin ka mittui chu a tling pap a, țap lo turin ka heh ka pet fan fan a.

"Min dodal tlat hi tawp tawh teh Hazel, kan inhîp tawn dun ve ve a ni tih hi pawm la, hun nuam tak kan hmang dun thei reng alawm." Aw ril leh sexy ru riau hian a rawn ti a.

Ka rilru nêm țan chu thunun ka duh viau nain a har lam hret a ni.

"I hmelțhain i nalh tak zet a ni Hazel duhtak" tiin a lamah min pawt hnai sauhva. "I nalh tak zet" ti nawn sapin ka bek vel chu a nul a, zei tak leh thiam tak hian ka taksa chu a chûl lawr a, ka lo dawngsawng țha nghal hle chu ka in haw rum rum mai. In 'control' tur erawh chuan harsa ka ti hle thung. Rilru fim, chhia leh țha hriatna te chuan min thlawh bo san zo ta!

Ka thisen kal te chu lo danglamin inveng turin ka taksa chu fuih ngial ka tum a. Mahse, ka taksa chuan duhdan te lo nei vein, kan inkara thil awm min hîp em em tu chauh chu a ngaihtuah tlat si...

Matthew chu chhoh melhin, a mitmeng tuifinriat ang maia paw muk raih, tisa châkna vanga phelh phang mai chu ka melh vang vang a. A kut chuan dam te hian ka khabeah dawmin fawh rem turin min kuai dâk hlek a, rawn kun hniamin dam leh ril raih hian min fawp ta vawng vawng a, a kut leh lam chu ka sam karah rawlhin ka sam kilh tawmna pin chu la thlain, ka dar velah ka sam chu a tla thla ta hniang a.

"Hazel..." thaw hawk chungin a ti a. Harsa ti chung chunga țawng chhuak a ang. Chutah lo kun hniam leh in a inthununna te chu keh chhe ta niawm khawpa uar leh duhthawh hian min rawn fawp leh ta mawlh mawlh a. Ka ruangam nalh thlarh mai chu a taksa lian leh khauh țang mai ngheng chuan min pawt bet a, insum karna nei miah lovin ka lo chhang let ve zel a. Tisa nawmna min fan chiai chiai tu chauh lo chu thildang reng ka hre thei ta lo.

'Hm,hm' tiin ring tawka khuh lui tih hriat zetin thawm a rawn awm ta a. Matthew-a âng chhungah chuan ka lo ding khawng awt thung, hreh tak chunga min fawhna chu thlahin thaw a la hak a. Min rawn tibuaitu chu tupawh nise hawihhawm takin a hmachhawn hauh lovang tih ka lo hre mai.

"In eina vel tifel tur leh zaninah thildang in la mamawh dawn leh dawn loh zawt turin ka lo kal a ni, Sir."

"Thildang kan mamawh tawh rih lovang Donald" Matthew chuan chhum hmukin a lo ti a. Chutianga a in enkawltuin min rawn tibuai chu a lawm lo hle a ni tih sawi chhuah kher ngai lovin a hriatthiam theih mai.

Donald a'n kan eina vel sengfela a chhuah hnu chuan ka lam rawn hawiin "Hazel, ka room-ah inthiar fihlim teh ang, kan zawh hman tâk loh kha chhunzawm duhna ka la nei tlat" tiin ka bânah vuanin a room lam kan pan dun ta a.

Mak tak maiin hnial duhna thinlung ka pu miah lo, ka hriat ngai loh tisa nawmna kha tem châkna ka nei tlat nia mawle. Matthew kiangah hi chuan ka danglam zel mai zawng a nih hi.

A pindan chhung cheidan chuan mit a la hle a, a lai taka khum zau zet chu bed-sheet sendukin a inkhuh dulh bawk a, khum chungah chuan dimtea min țhut tirin min fawp zui leh zat a, inthlahdul hnakin ka lo chhang let ve tawn tawn bawk. Min fawh kar lakah chuan ka hming a lam sap sap a, ka kawr hâk phelhin ka âwmbawr chu a kut lawnga khawihin min tawhna chuan ka chhungril thlengin a fan chiai chiai a.

"Matt" rum țiah țiah chunga tiin awlsam taka min chul vel theih nan ka lo insiamrem ve zel a.

"I nalh tak zet a ni Hazel; ka nula lo kawp tawh te aiin ka duh chein, i mizia vawt raih mahni in control thei i nihna hi ka duhin ka ngaisang a, i kianga ka awm loh chang te hian nang lo chu ngaihtuah dang ka nei thei lo."

"A tawk rih e, tun atan chuan" ka ti a, a sam dum hlap chhah țha tak karah chuan ka kut rawlhin ka khawih sak niap niap a.

Matthew chu rawn dak chhhuakin min rawn en a, "A tawk maw!?" a ti thum chhak a.

Fiam ka châk tlat "Aw ni e," tih pahin a hmuiah chuan ka fawh sak zauhva, "Hun chu kan la nei dawn chauh alawm Matt, zankhuain" ka tih sap chuan Matt hmel chu lo eng nghal sarin insumkarna awm lêk lo hian min fawp leh a, a kut pawh a awm mai mai lo, khawih tur lai hre takin a chettir reng a.

A jacket chu hlih sakin a kawrkilh ka phelhsak a, thawmhnaw tel lovin kan taksa chu a insi chial tawh. Matt-a taksa khauh țang mai leh ka âwmbawr chu a insi rem thlap a, a va hlimawm em! A nihdan tur chiah a ni. Kan taksa lâwng innâwk chuan phurna nasa tak min thlenin, ka tisa pêng tin mai chu a fan chhuak vek a.

Matt pawh chu keimah ang tho a ni tih a thâwk dan mumal vak lo ațang chuan ka hre thei mai, meng de sarin tisa châkna mitmeng tih hriat tak hian min melh a.

Ka pheikhawk tlawh phelhin khumah ke ka hlâng chhova, chumi chhung chuan Matt paw'n a thawmhnaw la inbel tlêmte chu lo hlîpin khumah chuan alo lâwn zui leh a, min fawp pah reng chungin ka kekawr hak chu min hlih sak a.

Khumah chuan min nem mu; in, ka chungah a rawn bawk a, kan taksa chu tisa châkna leh phurnain a fan chiai chiai tawh chu inzawmtir tumin a insiam rem a, keipawh lo insiamrem ve zelin Matt-a mipatna in min rawn zawm takah chuan nâ tiin ka phu zawk. Ka taksa chhûng na lutuk avang chuan ka mittui a tling nghal pam bawk a.

"Hazel duhtak, ka awih thei lo" ti a phun sapin Matt chuan inlâk hran a tum a, a kawngah ka lo kuah bet a, "Matt chhunzawm rawh" zawite a ka țawng chhuah chuan a hmel inthiam loh naa khat chu ka hmu a.

"I lo la thianghlim reng sia Hazel, min hrilh lâwk ni la chuan tun ai khan ka dim deuh tur che" tiin ka biangah a rawn fawp thuak thuak a.

"Ka lawm e, a hmasa ber ka nih vangin" ti a ka sam chûlin a chet chhunzawm leh ta a, duhthawh taka a chêt hnu chuan lungawi tih hriat fahrana ka sira lo mu thlain a âwmah chuan duat taka beiin min kuah bet chial a, keipawh lungawina famkim nen amah chu kuah lêt chial chungin  ka muhil ve ta a...

©<++++[BeckirafARenthleI]++++>®

                       Chapter-8

Ka țhanharh chuan keimah chauhin ka lo mu tawh a, Matt mutna hnu khuar kalh avang chuan nizan lama kan chetdan kha ka ngaihtuah rauh rauh a. Ka duh thlanna a ni a, mipa ngaihsak ngai hauh lo kha vawilehkhatah Matt vangin ka nun a in thlak dâwrh chu a nia, ka danglam tawh tak zet a ni.

Matthew hian min duh zia leh kan inhîp tawnna chak zet min hriattir a tum hle tih pawh nizan ațang khan ka hre thei a ni. A nghawng tur ngaihtuah thui duh lovin ka hmaa awm chu ka hmachhawn zel mai aniang chu. A tawpah nà dawn mah ila hlim tak leh thlamuang taka min awmtir theitu chu Matt chiah hi a ni tih ka hria, chuvangin lo hnar emaw pawh ka tum tawh lo.

Muangchânga tho chhuakin bathroom-ah ka lut a, bathtub-ah inchiah vang vangin ka sam pawh fai takin ka su a, nalh thlarh leh mahni inringtawk taka lan chhunzawm zel ka tum a ni.

Ka taksa sil țhûm chu tuiluma ka inchiah chuan a reh sawt sawt a, nizan khan ka la thianghlim tih a hriat khan Matt a'n mak a ti hle a nih kha, ani chuan Josh kha ka mipa kawpah a ngai tlat a, engmah chu min zawt hauh lo naa a țhâwng hle tih ka hria, min la hrechiang zel ang chu.

Ka inbual zo chu ka harh sawng sawng mai, bathrobe ha-in tukverh bulah chuan ka ding a, Matt pawh hi khawnge awm daih le.

Room chhung zau zetah chuan keimahin ka awm renga chhuah ka huphurh tak zet. Kawngkhar inhawng thawmah chuan inherin tray chawia Matt lo lut chu mak ti zetin ka en a!

"Good morning, Hazel" nui var vara atih chuan ka lo nuih let ve sak a.

Kawr naran tak pawbuang deuh leh jeans dum a ha a, a hmelțha tak zet. A tray chawi dawhkana dah pahin "Min lo ngai em? Ka thawhsan vang che khan i lunghnur loh hram ka beisei, keimah ngeiin i breakfast tur siam sak che ka duh a tin ni" a ti leh a.

Mak tia mengphawk hra chung hian ka breakfast tur asiam chu ka en zauhva, a tui hmel em em leh nghal!

"Ngai teh reng mai, ka lawm e" tiin khum bula chair-ah chuan ka țhu a.

"Ei rawh le, ni nuam tak a nih hi sunday a ni a, natuk ațang chuan hna i thawh ve tawh dawn kha, puar deuhin ei la, nizana i hloh tawh chakna kha nei leh turin thil i ei a ngai a nia." nui chungin a ti zung zung a.

Thuawih tak chuan breakfast chu eiin ka ei hnem kher mai! Matt paw'n lawm hmel zetin ka ei lai chu min hawisawn san thei meuh lo. Nuam ka lo ti veng veng thung, nizan avang khan kan inkâr chu a danglam dâwrh a, Matt chuan min duatna leh ngaihsakna a lantir reng bawk.

Kawngka kik ri-ah chuan kan hawi phâwk dun hle a! Donald thusawi chuan ka nuih a ti za tak zet, he house keeper hi a lawmawm ru riau.

"Vawiin hi Apartment chhung ka tihfai hun a ni a, in ei zawh tawh chuan țan nghal mai ka duh, a pawi ka ti ngawt mai Sir," a rawn ti a.

"Mahni inah pawh fianrial hun kan nei thei dawn nange maw Hazel!?" tiin rang zetin ka țhutna ațang chuan min pawt tho a, ka room lamah min hruai pheiin "Inthlakin i mamawh tur la la, pawn lamah hun hmang teh ang" a ti ta a.

"Ngaihdan țha tak a nih chu" tiin ka hâk tur zawngin wardrobe ka hawng a, Matt pawh insiam turin a chhuak ve nghal bawk a.

Kawrbah sen hlar mai hain a chungah jacket dum ka ha, Jeans tight angreng tak ka hâk chuan ka mal chu a phuar țang a. Mahse, hâk nuam lo chu a ni hauh lo, boot dum ka bun leh hnu chuan ka hmai ka chei thuak thuak a, ka bag lain ka inpeih chu a ni mai.

Matt chuan hall-ah min lo nghak reng tawh a, ka inthuam dan a hmuh chuan "Engpawh ha la i inhmeh zel mai a nih hi, Brighton lamah kan kal dawn nia, car chuan darkar hnih tlan a nia" a ti a.

"Darkar hnih maw? Matt a hla deuh lo maw, anih loh pawhin bike-in kal mai ila..."

"Ok, i tih dan dan le. Mahse, chak taka tlan loh tur, i tilui dâwn anih chuan ferari car hi kan keng a ni mai."

"Ok, ka khalh hmasa anga," phur zeta ka tih chuan a nui var var a.

"I duh zâwng leh lawm zâwng hi a mak ka ti a ni, hmeichhe danglam tak i ni chiang alawm Hazel Cade!" tiin pawnlam min panpui ta a.

Bike chu min khalh tirin kan chenna hmun kan pel fel tawh a, Matt chuan ka kãwngah nghet taka kuahin min si thlap bawk nen nuam ka ti hle a ni. Zaidamna, ințhian țhatna, induat tawnna leh hmangaihna chendun thlengin ka chungah a lantir vek a, hmeichhe bike khalh ngaisang lo leh hmu mawh em emtu kha ka phur ta mai chu a nia. Chu pawh darkar hnih dawn lehnghal ka lung tih awi loh chu a duh bik lo hle a ni tih ka hriat hian amah tih lawm leh duat hi ka châk ve phah sawt a ni.

Kawng chu ngun takin ka en a,  ka tlanna lam tur chu min hrilh pah zauh zauh bawk a, chumi tih loh chu kan inbe lem lo, min tihbuai a hlau ve deuh pawh aniang. Kan inkâr boruak chu a nuam veng veng tho, inbe lem lo mah ila, kan chhungril nun a inpawh miauva.

Brighton khaw daifem kan thlena kawng bula, 'Brick' hmanga sak in hlui angreng tak bulah Matt chuan ding turin min hrilh a. Kan thawm hriain chu ina cheng niawm tak mipakhat lo chhuak chu a bia a.

"Motor chu i lo peih fel tawh em, Jeff?" tiin a zawt a, an sirah ngawi rengin ka lo ding ve reng thung.

"Peih tawh e, in hnung lamah sawn ka dah a, ka rawn la chhuak ange" tiin in hnung lam pan chuan a kal nghal a.

"Bike hi hetah kan dah ang a, car-in kan kal tawh dawn nia, i chau lutuk ang" ka kawnga kuah pahin a ti a. A sawina hmun kan thleng tawh emaw ka lo ti ve a, khawiah tak chuan min hruai tum chu ni maw?

Jeff tia a koh pain Jaguar car dum a rawn khalh chhuah chuan ka hawihai hle a, zawh erawh  ka tum hran lo.

Jeff chu car ațanga lo chhuak tawhin passenger seat lamah alo kal kuala kawngkhar min hawnsakah chuan țhu lut turin min mitmei zauhva. Matt pawh driver seat-ah țhuin glass a tihniam nghal a.

"Bike hi lo dah țha la, kan mamawh hunah ka lo be dawn che nia" tia bân vai zauhvin Jeff chu a hrilh a.

"Awle tehreng mai Matt, hun nuam tak inhmang dawn nia" tiin inchhung lamah chuan min luhsan ta a.

Matt hmel chu alang dam thlup a, chuti chung chuan mi hîp riauna a neih chu a bo chuang lo.

"Bike i khalh rei tawh sia, a vawt i ti em? Brighton khaw chhung aia hmun reh deuh kalna tur ka hria a nia, kan mamawh tur pawh car-ah Jeff a'n a dah sa vek tawh" Min ngaihtuah hmel zel chuan a rawn ti a.

Ka lo bu nghat ringawt, țawngkam pangai taka min zawt a ni tho nain, a âw-ah chuan min ngaihsakna leh duatna a lang tel tih ka hria a, chu chuan min tihlim hle a ni.

"I chanchin min hrilh teh Hazel" Matt chuan min rawn en zauhvin a ti a.

"Chanchin sawitur teh chiam ka nei lo" tiin, ka pa boral tawh thu leh America ațanga England ka kal thleng chuan ka sawi a, Josh te nupa nena kan in kungkaihna lam erawh chu ka sawi lang tel lo thung.

"I mal hle dawn a ni maw, secretarial course i zawh hnuah Josh hnuaiah hna i hmu nghal mai tihna em ni?" a tih leh chuan, "Hmu nghal mai e, secretary tur an lâk tur thu chanchinbuah ka chhiar a, ka interview ve ta rawih a nih kha, vanneihthlak takin min la hlauh mai a, tichuan nang i rawn lan hma loh kha chuan ka thawk ta reng a ni." Nuisaka ka tih chuan mak ti hmel a pu deuh!

"I nu leh i pahrawn chuan fa engzat nge an neih?"

"Pahnih mipa leh hmeichhia an nia, an hlim khawp mai. Kei erawh ka chhuahsan tak ațang khan ka la mal ta reng a nih hi" ka âw-ah chuan lungawi lohna a ri tel tawh tih ka hria a, chu chu a hrethiam a ni ngei ang min en ta veng veng a.

"Hazel, khawngaihthlak! Ka awm alawm ka veng him tlat ang che, tuma'n an tihnat che hi ka phal lo." Tiin a kut awl lam chuan ka ka bânah atawk zauhva.

Car a tihdin takah chuan ka seat belt chu phelh pahin "Helai hi em ni i tihna hmun chu?" tiin thil chiang sa reng chu ka zawt lui ve țalh a. Bike ka khalhna leh ka chanchin ka sawichhuah vang khan ka lo țang mar țun chu niin!

Car ațang chuan chhukin ka tihrawl kham țhêm țhûm tireh tur chuan ka zi mar vel a, Matt paw'n ka tih ang tho chuan ti vein min en pah reng a.

"Lunch kan ei hma ang a, tichuan kein kan lêng vak mai mai ang chu" tiin Matt chuan car hnunga basket leh wine bottle te chu a phawrh chhuak a, Jeff khan a lo dah sak a ni ngei ang. Puan pakhat chu la in ka lamah a rawn theh phei a, car kawngkhar a kalh fel hnu chuan dil lian lo tak hmuh theihna laia phaitual hnimah chuan țhuthmun kan rem a, hnim chu a ro țhat êm avangin puan chu kan phah duh ta lova.

Ni pawh a tla dawn ruai tawh nain vawt tihna pawh ka nei lem lo. Ka meng chhuak hauh lo nain Matt chu ka bulah a la țhu reng tih ka hria a ni. A taksa lumna pawh ka la hre pha tlat. Lunch kan eizawh khan wine ka lo inhnem deuh bawk nen ka lo muhil daih chu niin, a zia lo hle mai.

Ka mutthilh laiin puan kan ken khan min lo khuh a ni ngei ang, vawt pawh ka tih loh ni. Dîl ațanga thlifîm lo tleh leh thing rim te Matt-a rim nena inpawlh niai chu hriain, ka hnar a verh zar mai a, ka taksa chu ti che in Matt lam hawi chuan ka inlet thak a.

"Mumang i nei țha bawk em?" tiin thawp sat hian min zawt a, "I chau bawk a niang, chêt pawh i che hauh lo mai" a tih zawm leh a.

"Lunch einaah khan wine ka lo inhnem deuh aniang" tih pahin ka țhu chhuak a, kan thil ei chhung zawnga ka inthlah dul dan kha la hre rengin ka nui deuh var var bawk a. Ka rilruah thildang a lo lang thut a.

"Kelly Benison nen khan in la inkawp em?" Ka tih chuan hmel danglam pu deuh hian "Engvanga rawn sawi chhuak nge i nih? Kan inkar a tâwp fel vek tawh" a ti sup a.

"Ka ta midangin min țawmpui an tum hian ka ngaithei vak lo" ka ti salh a.

"Lungngai suh, kei pawh chu chiah chu ka ngaihdan a ni, chuvangin Josh i be tawh tur a ni lo. Gary erawh kha chu i la serious viau lo tih ka hria" ngeiawm lam lek lek hian a ti leh a.

"A țha alawm" tiin cho hmel zet hian ka en a. Nui suk chungin "Kan la hria ang chu"

Engmah sawi zui tawh lovin kan ngawi dun vang vang, Matt mimal chanchin leh an chhungkaw chanchin hi hriat ka nei tlem khawp mai. Mahse, chu lam chu zawh ka tum rih chuang lo.

Kan thil ei vel pai tih nawm nan ke a len vah vel a rawt pawh chuan hlim takin ka lo pawmpui nghal thei mai a ni.

"Helai kan thlen hnu lawkah ka muhil daih a, boruak leh wine vang te pawh a niang. Mahse, i lo ning hle ang a?" ka ti a.

"Ning lo ve a, i bulah țhuin ka lo inngaihtuah bawk a, i hmelțha tak kha ka lo thlir veng veng mai mawle..." nuih za insum zetin a ti ve mai.

Ka bânah kaiin keiin basket ka khai a, ani'n puan chu a kut leh lama kengin kan kal dun a. "A tlai tawh sia, haw a hun tawh ang a" ka tih chuan, "Umh, dar sarih a ri tawh" tiin car hunna lam chu min panpui leh ta a.

A thim deuh raih tawh, thinghnuai vel chu a vawt deuh raih bawk a, hnahthel ro kan rah rik tih mai loh chu thawmdang hriat tur pawh a awm tawh lo. Inngeih taka kan ni hman chu a lo tawp dawn ta, naktuk ațang chuan office-ah kan buai kartluanin ka ring a, ka huphurh hle a ni.

"Ka lo ngaihtuah a" tiin Matt chuan ka darah kuahin alamah min pawt hnaia, "Car thlen nan minute sawmpanga vel kan kal a la ngai dawn a, kan chenna kan pan hmain coffee leh sandwich tal kan mamawh ang, chutiang a nih chuan in kan thlen meuh chuan zan dar sawm vel a ni tawh dawn a ni" a ti a.

Buk nghat pahin Matt darpharh hlai țha takah chuan ka lu lo nghat a, chutia ka tih vang chuan thawk ala ham ham a.

"Jeff-a inah khan zanin chauh chu min riah tir theih leh theih loh engahnge kan zawh mai lovang? Vawiin chu hahdam takin hun kan hmang ta sa sa, muangmar in naktukah haw zawk ila, bike khalh tur chuan kan chau hret a ni" rawt pah titih deuh hian a rawn ti a.

"Engahnge chutiang chuan kan tih mai lovang?" ka lo ti ve sap a.

Car kan dahna hmun kan thlen chuan, Jeff-a in panin hmanhmawh lutuk ni hauh si lo hian kan tlan chhuak ta a. Kawng a thui lutuk lo bawk a, inbe lem lovin kan ngawi dun reng a, Matt erawh chuan kawng chu ngun taka enin chesual lo turin fimkhur takin car chu hnehsawh ru tak siin a khalh a.

Jeff chenna hmun kan thlen chuan ka ril a țam hle tawh a. Nu thau ang reng tak hi lo chhuakin min lo welcome vat a, riahna tur kan duh thu leh ei leh in lam pawh kan mamawh thu Matt chuan a hrilh nghal zung zung a.

Inchhungah min hruai lutin, "Step-ah khan chho ula, kawngkhar lo lang hmasa ber kha a ni mai Matt, Jeff chu khawpuiah a kal lawk a, riah induh mai theih thu a sawi lâwk vangin pindan pawh ka lo buatsaih diam tawh e" a ti fel than a, nu fel tak chu a ni tih a hriat theih mai.

Kan lunch tui tak min siamsaktu kha amah hi a ni ngei ang tih pawh ka hria, ka ril a țam deuh bawk nen ka ni deuh nghulhin ka hria, chawlh hahdam ka mamawh tak zet a ni.

"Sandwich leh wine chu minute sawm hnuah ka lo dah chho ang" tiin Jeff-a nupui niawm tak chuan min hrilh a. Step-ah chuan Matt chu zui chhovin kawngkhar chu kan hmu ve nghal mai a, tuiluma inbuala khuma mut vang vang ka châk tawh kher mai.

Chu pindan chu a nalh mai bakah a nawm hmel hle a, Matt bul ațang chuan kal sawnin khum bed-sheet nalh zeta inkhuh chungah chuan ka țhu a. Mahse, pindan kan ințawm dawn tihna emawni le!? Ka thil ngaihtuah avang chuan ka buai ru ta viau mai, mudun tawh tho mahila pindan pakhat ințawm chu ka duh hauh lo.

"Khawiah nge i mut ve ang?" Matt lam hawia ka tih chuan a lo ner sawk a.

"Hetah tho hian mawle Hazel, vanduaithlak takin pindan awl pakhat bak an neih loh thu Susan kha'n a sawi tlat a lawm. Ka mut ve mai a ngai dawn a ni" a ti hmak a.

"Sofa-ah tal pawh sawn i mu thei alawm" tiin tukverh bula sofa inhûng chu ka melh zauhva.

"Ka chau tak zet a nia, inhnial nan hun khawh ral lo teh ang, i duh lo chung chu khawih luih tumna che ka nei lo a nia" tiin a kawr chu a hlîp a.

"A țha lawm" ti ve hmakin leh lam ka hawi a, chutih lai chuan kawngkhar chu rawn kikin Susan-i chu tray chawi chung hian a rawn lut a. Matt chuan alo pan thuai a, a tray chawi chu lâksakin dawhkan hniamte-ah chuan a dah ta a. "I ti lawmawm e, a tui hmel hle mai Susan"

"A lawmawm a nih chu, inthlâkna in mamawh tur chu wardrobe-ah khan ka dah kha" tiin min rawn melh zauhva, ka zak ru chem chem nia. Matt-a nula kawp pakhatah min ngai tih a hriat hliah hliah bawk nen ka awm a nuam lo hle a ni.

"Mamawh in la neih chuan min rawn au vak mai dawn nia" Susan-i chuan a la ti zui a.

"Hazel?" tiin Matt chuan tray lam chu a bûk khum nghat a; tray-a eitur awmho chu ka lo enkual a, sandwich, salad leh wine te chu a tui hmel hle mai. A bulah chuan toothbrush leh toothpaste inpack thlap a lo awm tel bawk a.

"Thildang mamawh tur kan neih pawh ka hre tawh lo ve a" tiin Susan chu ka nuih a, thil hrethiam tih hriat tak hian a nui sâng lehnghal a, ka lai tak zet a ni.

"Chuti anih chuan ka kalsan tawh ang che u, hlim takin hun inhmang dawn nia" tiin a chhuak ta a.

" I sen țan țan alawm le" Matt chuan  ka bula lo țhut thlâk pah chuan a ti a.

Ka biang sa hat hat chu ka kuta dawmin "Min ngaihdan tur kha amawi fahran lo a lawm, i khum țawmpui reng țhintu ka ang tlat" lungawi lo âw taka tiin ka tum hmak a.

"Midang ngaihdanah buai duh suh, khawiahmah an sawi chhuak lovang, lo sawi pawh ni se ka veng him ang che" ti a, min pawt thovin "Ei ang le, ka ril a țam ve tawh viau a nia" tiin chair-ah chuan min țhut tir a, amah pawh a țhu zui ve mai a. Plate a eitur ka chhawp mawlh mawlh lai chuan Matt chuan noah wine sen chi chu a lo thli ve thung a.

Ka zam deuh riau mai, ka kutte chu a thlan dap a, ngaihtuah hlek lo chuan wine no chu lain min lo enreng a ni tih hre chungin ka in ta pawp a, sandwich chu ka țhial zui nghal a. Matt chuan a wine in hlek hlek pah chuan min en reng bawk nen ka zam zual sauhva.

"Oh, awle..." tiin ka zamna ka aw a lang tur chu thunun hram hramin sandwich, a zât ve chauh ka la ei hman chu plate-ah dah lehin, "I ei chhungin bathroom lamah ka lo va intifai ang" ka ti a.

"Wine kha in leh la, i plate a mi kha ei zo rawh, zanlaiah i ril ațam anih chuan adang a awm tawh dawn lo a nia" tiin a ei chhunzawn mawlh mawlh a, kei pawh chuan thuawih takin ka plate a ei tur awm chu ka ei zo ve ta vek a, wine pawh no thum lai ka in a, ka lu a hai deuh chiai chiai lehnghal bawk nen inbuala mut vang vang ka châk tawh ber a ni.

"Saw lamah sawn" tiin khum piah lama kawngkhar lian vak lo chu min kawh hmuh a, "I inbual hlanin tray vel hi ka zuk dah ange" Matt chu tho ve nghalin kei pawh bathroom-ah ka lut nghal a.

Bathroom chu a lian lo hle a, shower hmang chuan inbualin ka ha pawh ka nawt fai nghal a, Matt chu a lo kir thut thei reng tih hriain under-wear vel ka sufai thuai thuai a, towel dahnaah chuan ka zar ta a. Thawmhnaw inbel hauh lo hian bed room lamah chuan lut lehin ka thawmhnaw chu wardrobe-ah ka khai a, mutkawr hring dal raih lo awm chu inbelin ka ha tawk chiah lehnghal, light ka off a khumah chuan muin ka inlukhup ta daih a.

Matt chuan he hmuna riah hi alo duang lawk vek tih ka hre mai, engkim ka mamawh tur mutkawr chenin ka hâk tawk chiah a awm leh zel a, mak ka ti lo thei lo! A lo kir thawm bengkhawn chuan ka beng ka chhi deuh hra a, a rei hle mai. Nge, kei hi min lo kalsan daih zawk! Hlauthâwng zet hian ka țhu chhuak hlawl a, ani hian infiamna hmanruaah lek hian min lo hmang mai mai a ni thei a ngem?

Minute sawm dawn thim zinga ka țhut tawh hnu pawh chuan Matt-a thâwm reng reng ka la hre ta chuang lo. Ka rilruah thil chi hrang hrang lutin mangang ru deuh tak hian thâwk ka la ham ham a, ka hriat chian hauh lo mipa ringin ka chhuahpui a, nizana kan mutdun vang khân ka lo ring em em a nih kha.

Kei hi ka lo â tak zet a ni.

Matt hian ka chungah enge tih a tum? A vawikhat nan mahni inkhawngaihna avangin ka mittui chu a luang ta zawih zawih a, ka pa boral hlimchhawnah tih loh chuan kan in ka chhuahsan pawh khan ka țap lo, rilruna zetin ka insut ta hlawp hlawp a...

                        Chapter- 9

Vawilehkhatah ka țap chu bang hmakin, khum ațang chuan ka tho chhuak a, hetianga kalsan mai mai atan hian em ni riak tura min hruai. 'Ve mai mai chuan' tiin light ka on a. Ka mutkawr chu hlîpin wardrobe a ka dah luh tawh chhun lama ka hâk kha phawrh chhuak lehin ka inthawlh nghal sawk sawk a.

Dawhkan chunga ka bag dah chu la in light pawh ka off leh thlap. Hmanhmawh zetin step chu ka zawh thla a, Choka lama thawm awm avang chuan lutin Susan-i chuan cake a lo ûr a, min hmuh ve leh mak ti a; âng pam chung hian "Engtizia nge Miss? In mut daih tawh ka ring asin"

"Khawnge Matthew?" ka tih chuan dar san âk hian "Ka hre mai lo, helamah chuan alo chhuk hauh lo, ka pasal nen in tur an dawm dun emawni le" chiang ngam chiah lo hian a ti a.

"Khawngaihin i pasal chu min va zawn sak lawk dawn mi, bike chahbi a kawl a" ka ti a.

"Ni lo ve Miss, a tlai tawh tun ang hunah kal chhuahna chi a ni lo, dar sawmpakhat a ri țep a, Matt chu lo nghak zawk mai rawh"

"A pawi ka ti khawp mai, chahbi min lâksak dawn lo anih pawhin kal tho ka tum tlat, good night" ti a inherin kawngkhar lam ka pan nghal a.

"Miss, kal i tum lui țalh a nih chuan bike leh garage chahbi chu khalai drawer-ah khan a awm" tiin dawhkan hniam chenchawn chu a kâwk a, pan nghal vatin pawhdawh chu ka hawng a, kal lama ka bike khalh chahbi ngei chu lo awmin garage chahbi pawh alo awm tel a, lawm avangin ka thaw huai thei nia. Susan-i lungawi lo hmel chu haiderin "Ka lawm e" ti sapin pawnah chuan ka chhuak a.

Min ngaihven tak tak lo tu bulah ka lo in hawng zau mah mah a ni. Matthew tel lo hian kum tam tak ka lo nung ve tawh a, tun ataka ka theih loh nachhan tur ka hre lo.

In hnung lamah chuan kalin garage kawngkhar chu ka hawng a, achhung thim mup mai chuan ka awm ati nuam lo lek lek hman. In sangmarin ka bag a ka phone dah chu ka dap rak rak a, phone light ka on a helmet zawngin garage chhung chu ka chhunkual thuak thuak a, Jaguar car kan hman pawh kha a lo in hûng tel a. Bang sira chhuar an siamah chuan helmet chu a lo awm vang bawk a, hmanhmawh zeta la thlain ka khum nghal a, ka chhungril chuan kal lo turin min duh. Mahse, ka induh tâwk ve na chuan kal turin min nawr thung si...

Hmanhmawh zeta bike chu nawr chhuakin ka tinung a, garage kawngkhar ka kalh fel thlap hnuah, bike-ah chuan lawnin ka tlan chhuak zui ta a. In hmalamah chuan Susan-i lo ding ka hmuh avang chuan ding datin garage chahbi chu a lamah chuan ka theh phei a, rilru nawm loh hmel zet hian "Khawilam nge i pan dawn tih tal chu khawngaihin min hrilh hram teh" a ti a.

"Min ngaihtuah duh suh, puitling ka ni tawh alawm, ka in enkawl thei e. Matt chu lo hrilh fiah mai rawh" tia ka bân dinglam phar zauhvin ka tlansan chhuah san ta a.

Ka bike thawmah pawh chuan Jeff leh Matthew chu an lo chhuak miah lo. Eng thil chiah nge maw ka hriat ve loh hian an tih ni! Susan-i hlauthawng hmel taka la ding reng chu side glass ațang chuan ka hmu a. Matthew chuan engtin tak ti ang maw?

Khawilam nge ka pan tak ang, Westminster-a Matthew apartment-ah nge ka kir ang a, Brighton khawchhungah hotel ka zawng mai dawn? Tun ang huna hotel zawn leh chu thil tih chi a ni lo. Tin, pawisa tih tham ka bag-ah hian a awm hauh lo bawk. Umn, apartment lam pan zawk mai teh ang naktuk office ka kal țan ni a ni tawh a, chawlh hahdam ka mamawh tawh tak zet a ni.

Apartment thlenna'n darkar khat leh a chanve vel hun hman a ngai dawn a, ka speed pangaia aia chak hleka ka tlan chuan darkar khatah ka thlen hman ka ring deuh a ni. Matthew lam chu ka ngaihtuah duh lo hrim hrim a, hlim takin zan hun kan hmang dawn emaw ka tih laiin, engmah min hrilh hauh lovin a bo vang vang a, chu chuan atan engmah ka nih loh zia min hriattir ni maiah ka ngai.

Engahmah min ngai lo tu chu engatan mah ka ti bik lo ve. Hazel Cade hi vawikhat min mutpui avang khan a lakah ka tlâwm tihna a ni lo. Min ngaihtuah ve viau chuan ka ring, a chhan chu London-ah hian ka la  tlangnel lo hle tih a hre tlat alawm, hmelhriat sawi tur mumal ka neih hauh lo bawk.

Ka hmalam kawng chu chu ngun taka enin chak fê chuan ka tlan zel a, nuam ka ti ta phian zawk! Hetiang bike changkang leh 'smooth' hi khalh phâk ka inbeisei lo hrim hrim. Ka bike nen chuan inthlau tak a ni ringawt. Huh, tun ang zan rei lam tawha tlan hi a nuam dangdai fe zawk a nih hi. Kawngpui eng uar chuan min ti phur sawtin Matthew ngaihtuah lêk lovin ka tlan theih phaha Gary kha awm ve se, nuam atih dan tur chu...ring zetin a au leh awm sia.

Matthew apartment kawt ka thlen chuan zinglam darkhat a ri thuak tawh a, private lift hmang duh lovin step-ah ka chho ta zawk a. Step tawp ka thlen chuan, Donald chu vei nei tih hriat zet hian alo vei nghut nghut a.

Ka thawm hriain a ding chut a. "Miss, pu-in angaihtuah tak zet che, i lo thlen  tawh thu kan hrilh ange" a ti a.

"I la mu nange, kan lût dawn nge 'tah hian ding rengin kan inbe dawn?" ka ti hmak a.

"Sorry, lut ila eitur emaw intur pawh i duh chuan ka lo la dawn em niang?" a tih chuan bu nghatin "Brandy no khat min lo lâk sak theih chuan ka lawm khawp ang" ka ti a.

Hall zau zeta sofa-ah chuan țhuin Donald-a intur min pek chu ka thâwkkhat pawp a, ka hrawk a sa thla ham ham mai. Him dam takin ka thleng ta chu a nia...

"Pu chuan a ngaihtuah khawp mai che, i phone-ah a be tlang thei lo che a, keimah min lo call a ni. I lo thlen veleh amah be nghal turin a duh che"  min ngei hmel lek lek hian a ti a. A pu hi chu a țan ve teh e.

Ka bag a ka phone chu phawrhin on ka tum a, a 'battery' a low vek tawh, a thi hmak mai. A wm ve reng tawh nilengin, zan thlengin ka charge lo hrim hrim a, pawi loh tawp hi a.

"Donald, nakinah Matt chu ka phone mai ang, tunah chuan mut hahdam ka mawh tak zet tawh, ka pindan ka pan hmain brandy nokhat ka lo in leh lawk ang chu" nui lui sâng chung hian ka ti a.

"I phone loh chuan keima'n ka call ngei a ngai dawn anih chu. Mahse, a thinrim viau ang. Nangmah ngei a be duh che a" tiin intur chu min pe leh a.

"Ok.. Matt chu lo hrilh mai rawh"

Brandy chu in zovin ka pindan lam pan chuan ka chhoh san ta a. Ka boot bun chu ka tlawh phelh a, inbual tawh lovin ka inthlak sawk sawk a, ka khum dup nuam zetah chuan ka inkhuh ta hmak a. Matthew chu a lo haw peih ka ring chiah tawh lo a, ka hawsan tih a hriat chhuah meuh chuan a buai ve fê ang chu. Mahse, ka thlen tawh thu a house keeper rinawm zet hian a hrilh leh tho chuan ka ring.

Sana chu melh zauhvin zinglam dar hnih a ri tawh a, mutthilh tumin ka mit chu ka chhing ta vang vang a.

Thawm bengchheng zet avang chuan ka mutui lai ka harh hlawl a. Ka mit thip hlur leh kham ut ut chu mengțha thei lovin ka khap sak sak a, tu tehhrep nge mawni le!? Ka room kawngkhar chu ring zet hian a ri leh a.

"Hazel, i harh tih ka hria a nia" Matt-a aw ring tak chu ka hre thei ta.

"Sir, darkar tam ala mu lo; a chau viau ang, khawvar hunah be mai rawh" Donald aw pawh chu a zawi fahran lo bawk.

Donald leh Matthew maw! Ka pindan pawnah tun ang hunah, enge an tih? E, nitak! Nizanah ka haw san tak alawm le!

"Donald chahbi spare khan kawngkhar hi hawng rawh, tunah ka be duh ka tih chuan min hnial suh" ati chhum hmuk a.

"Awle Sir,"

Kawngkhar chu ri hrawkin Matthew chu room chhungah chak zetin a rawn pen lut a, ka puan sin chu a pawt hlim nghal dâwrh a.

"I harh tih ka hria a nia Hazel, luhlul chhuah tawh suh" tiin min dinchilh run a. 'Ka hlau tur a ni lo' ti a infuih rilru mawlh mawlh chungin ka mut ngaia muin ka chesawn duh map lo va.

"A țha e, tuna thilthleng tur hi i cho chhuah liau liau a ni" tiin khumah a rawn țhu a, a pheikhawk phelh ri leh thawmhnaw hlip thawmin a zui nghal a. Ka țhu chhuak hlawl chu mitmeng rum fahrana min melhin "I tlai hret a ni, ka koh mawlh mawlh lai che khan tho ni la chu hetiang hi tih a ngai lo tur" tiin ka darah chuan nghet zetin a hmer a, min melh rum ul bawk a.

"Enge maw i hriat teh hrep le, min thlah vat rawh" tiin a âwmah chuan ka theihtawpa nain ka chum a. Min vawnna chu thlahin ka kut pahnih chu a kut pakhat chuan hmer kawpin khumah chuan min bawh tlu a. A taksa rihna chuan min delh bet bawk a, ka hmuiah na zet hian min rawn fawp a. A thinrim thaw ri hrawih chu hai derin, ka theihtawpa tal chung chuan ka sual let a, chu chuan a thin a tirim zual sauh tih hriat tak hian a aia nâin ka hmuiah chuan a fawp leh bawrh bawrh a.

"Hrep tak che hian! Awm țha hle hle rawh" ti hlukin ka hmel chu la hmu ngai lo niawm tak hian chiang zetin a en a. A mitmeng vawt ruih leh thinrim vanga thim deuh khup chu melh lêt ngam lovin a âwmbawr chu ka melh daih a.

Awki hriam hraih hian "Min tih mangan zia hi i hria em Hazel?" Chhâng lova ka ngawih reng avang chuan "Engvanga ngawi renga lo haw ringawt nge i nih ka thin i tirim hle a ni"  a țawng chhuak ram hmarh mai chu hlau ru viau mah ila tihlan loh hram ka la tum ve tlat a.

"Room-ah ka rawn luta i lo awm si lo, Susan-i'n apartment lam kawngah i tlan tih min hrilh lo phei se chuan Brighton-ah nangmah zawngin tunah pawh hian kan la buai hle ang. Min tih hlauhthawn hi chu nuam i ti ve a ni tiraw?" a ti leh a.

"Nangmah alawm ngawi renga min kal san zawk" ka tih chuan mitmeng hriatthiam har deuhin min en a.

"Inbual turin Jeff-a pindanah ka kal alawm, a ruala inbual i duh chiahin ka ring si lova"

"Chupawh nise rei tak ka nghak che a, keimah chauhvin kha pindanah khan min hnutchhiah anih kha" ka ti ve tlat a, min kal san ni a ka hriatna khan ka rilru ti na thar lehin ka mittui atling pam a, chu chu ka duh lo tak zet a ni.

"Ka tihpalh a ni Hazel, khawngaihin tiang kha chuan min ti mangang tawh suh. Bike nen i tlanchhuak tih ka hriat phei kha chuan ka hlauthawng tak zet a ni" tiin min kuaha a thinrimna zawi zawiin areh chho tih a thâwk dan ațang chuan ka hre thei a ni.

"Hazel?" tiin ngaihsak aw tak hian min ko leh a. "Ka thiam loh a ni min ngaidam rawh, reitak ka kalsan che vangin. Jeff khan intur dawm puiah min sawm tlat a, i rilru tihnat ka tum lo" ka sam hnawk niaih mai chul mâm pah chuan a ti a.

"Matt, kha pindana mahni chauhva awm hrehawm zia kha i hria em? Min ngaihsak tak tak tu an awm ve lo a hriatna ka nei asin."

"A thleng tawh lovang, engthil mahin a tihnat che hi ka phal lo ka veng him ang che ka tih kha" tiin mitmeng duatnaa khat chuan min en a.

"Tun hi atawpna ni rawh se, hetiang thil hi a thleng leh anih chuan ka ngaidam mai tawh lovang che. Min hriat kha, Mr. Faulkner" ka ti ve ngat a.

"Awle, ka tiam a che Miss Cade" nui lek lek hian ka âwki ang chiah chuan alo ti ve a. Chimawm ru phian!

Ka thinrimna leh rilru paukhauhna te chuan zawi zawia min kian sanin, Matt kianga hlim taka awm chu ka duh ta zawk a ni.

Hun ngah tawka inngai nimai awm hian, puan a theh hlim tawh chu min sin țhattir lehin, ka bulah chuan a inthawlh ve nghal a. A kut chuan ka darah chûlin ka âwmbawr leh ka mawngbâwrte chu a chul kual dan dan a, dan tumna rilru pawh ka pu tawh bik lo.

Ka mutkawr chu phelhin a lamah chuan min pawt hnai a, kan taksa chu a insi chial bawk nen a taksa lumna chuan min ur ham ham a. Muangchânga min fawpin, a lei leh hmui che vel chu a dam thlap a, chu ringawt pawh chuan phurna nasa tak min siam a ni.

"Hazel duhtak, min tawk ve rawh" zawi sap hian a ti a.

Zak deuh tak chung hian a dul thep zaih leh a khel bawrah te chuan ka khawih ve lo thei ta lova, lungawi tih hriat reng hian thâwk la hak pahin Matt chuan min fawp uar zual sauhva.

Kan hun hman dan nuam lutuk vang chuan thi thei mai dawn hian ka inhre hial a! Matt pawh chu insum zo lovin a rum hawk a, "Hmeichhe vawt raih i ni emaw ka lo tih țhin kha mi tiphur thei tak leh mi hîpna ngah zet i lo ni reng sia, Hazel ka duh tak zet che,"

"Ka mamawh nasat ang tluk zet che hian min mamawh ve a ni tih min han hrilh teh duhtak" thâm deuh sap hian a ti leh a, a ngenin min ngen a ni deuh ber, " Min hrilh rawh" a tih leh chuan țawng chhuak lovin ka lo rum hak a, a taksa thlanin a bual huh hlap chu fawh sakin ka mamawhna chêt zia in ka lantir ta zawk a. Nawmna  vawrtawp min thlenpui hnu chuan lungawia zeta ka sirah rawn mu thla in min kuah chial a.

"Muhil rawh le, a tlai lutuk dawn khawvar hmain tlemtal muthilh kan tum dawn nia, ka ta i ni, ka ta chauh" Matt chuan chau âw zetin a ti a, a samah chûlin muthilh tum chuan thawk ka la ham ham a.

Ka harh meuh chuan alo tlai tawh hle a, nizan lama nawmna vawrtawp thlenga hmangaihna min chenpuina khan ka lo duh thusam zawng zawngte chu a khûm vek tih ka hria. Ka bula tui taka muhil Matt hmel chu ka thlir ta vang vang a.

Mak tak maiin ala tho bik tlat lo. Vawiin hi ka hna țan ni hmasa ber tur a ni a, chu lam chuan ka rilru a luah thei meuh lo chu a nih hi!

"Min thlir reng dawn nge hmangaihna ka chenpui leh zawk dawn che?" Matt rawn țawng chhuak chuan min ti phu zawk a.

"I harh tih ka hre lo a" ka tih chuan nui var var chung hian "I harh hma khan i muhil hmel ka lo thlir veng veng tawh mawle" tiin ám zet hian min rawn fawp a. Inlahrang vatin "Matt a tlai tawh office kal kan ngaih kha" tiin thawh chhuah ka tum a, "Office kal lo hian kan inkhung nileng mai zawk dawn em ni?" tiin alamah chuan min pawt hnai a.

"I sawi tawh ang khan hna ka țan vat angai alawm, i kiangah tho alawm le ka thawh dawn"

"Ok, hun kan la nei dawn chauh alawm tiraw Hazel, intihfai te pawh kan mamawh e" tiin min kai tho a, bathroom-ah chuan min pawm lut a.

Darkar khat aia rei mah shower nan chuan hun kan hmang a, Matt chuan hmangaihna min chenpui leh in chumi hnuah a pindan lam panin inthlak tur chuan min kalsan ta a.

©<++++[BeckirafARenthleI]++++>®

                     Chapter-10

Faulkner Electronic Company chairman Matt Faulkner-a Secretary thar ka nih ang ngeiin zahawm taka ka lan a ngai tih ka hria.

Business suit buang thak ka taksa rem zaiha țhui chu ka ha a, high heel dum bunin, diamond bengbeh ka mit râwng ang chiah chu ka beh a. Ka sam dum hlap chu ka vial tawm vek bawk, confi hmel taka ka lan kha angai miau alawm. Ka mit dum deuh hleka ka hnawih chuan ka mitmeng chu ati lang fiah hle a. Ka private file dahna plastic bag chu lain ka inpeih ta.

Ka hna leh ka mimal nun hi chawhpawlh ka duh loh vangin chiang takin Matt pawh ka hrilh tur a ni. Office hours-ah chuan secretary țha tak leh rintlâk, mahni lu zo veh vawh Hazel Cade kha ka ni reng tur a ni.

Hall ka thlen thlak chuan Matt pawh alo inpeih thlap tawh a, buisiness suit dum ha in necktie pawl a awrh a, a sam dum țha zet leh buk lam lek lek chu sukfai hlim tih hriat takin a hnawm chap bawk a, a landan nalh zet leh a hmel pa hrâk mai chu 'a chhe lo hle' tih hian a khaikhawm ber mai.

Ka pen thâwm hriain alo dâk chhuak a, mit ko san âk hian "Wow, ka secretary thar chu a danglam zar mai a!" min ngaihsan hmel zeta nui var var chungin alo ti a.

"Matt, office hun chhung chuan boss leh secretary kan ni, kan mimal nun nen kaihkawp loh hram kan tum dawn nia" inringtâwk zeta ka tih chuan nuihzat hmel takin min en a.

"I intithu țan der elaw Hazel? I kianga hnathawh chu a hlimawm ngawtin ka ring" a ti a. Dawhkana a briefcase chu lain "Kal ang le, kan tlai dawn" ka hmuia rawn fawp zauhvin a ti a, a hnungah ka zui ve nghal a.

Faulkner Electronic building kan thlen chuan staff te chuan Matt chu zah takin chibai an buk a, a secretary thar tur ka nih thu a hrilh pah zel bawk a.

Ka shorthand leh typing chak tak te, office a ka nungchang zahawm ru tak leh ngêng ngalh te avang khan Thorn company-ah kha chuan ngainat ka hlawh ve viau țhin a nih kha. Chu chu he company-ah pawh hian ka chhawm nung zel tur a ni. Ka mimal nun nen ka kaihkawp tur a ni lo bur.

Lift-ah chuan chuangin chhawng sawmpahnihna button chu a hmet a, he company hian Matt nen kan inkar hi an hriat ka duh hauh lo. Naktuk ațang chuan a hrangin kal tawh nghe nghe ila a țha ang.

"I zam deuh em ni Hazel?" a țawng chhuak chu a zawi hle a.

"Zam ve deuh; i secretary hlui a thiam viau tih ka lo hria a, a ai ka awh zo kher lo mai thei a ni"

"A thiam khawp mai 'Lisa' chu. Mahse, chawlh angai rih miauva, theihtawp i chhuah dawn nia"

"Awle Sir," tiin ka bu zauhva, chimawm zet hian min melhin a nui suk a.

Lift a din takah chuan Matt chu chhuak hmasain a hnungah ka zui a.

A office chhungah chuan in zui lutin sofa pakhatah chuan țhu tur hian min mitmei zauhva, a dawhkan zau zet leh hnûm hlarh 'Oak' thing ațanga siam niawm tak lam panin Matt chu a kal a. A briefcase dawhkanah dahin phone-in tu emaw a be nghal zat bawk.

Office kawngkhar chu lo inhawngin hmeichhe inchei fel veh vawh, Matt- secretary hlui Lisa chu raipuar dul kawh lâh hian a rawn pen lut a. "In lo thlen hun a dik chiah Matt" a sana melh zauh chung chuan a ti a.

"Lisa, Hazel Cade, anih hi a office turah lo va hruai la, a theih anga tam inhrilh hriat in lo tum dawn nia. Meeting dar sawmpakhata nei tur ka ni a, tun țum chu ka assistant kha ka hruai rih mai ang, vawiin bak inhrilhfiahna hun in nei dawn lo tih hria ula" ti zung zungin dawhkana paper ho chu a sign pah mawlh mawlh bawk a.

"I office turah chuan ka hruai ang che" tiin Lisa chu nelawm tak hian a nui a.

"Awle, ka inpeih e" ka tho chhuak ve vat a. Matt buk khum zauh pah chuan ka office tur lam chu Lisa nen kan pan dun ta a. Lisa hi nu fel tak leh ka ngainat tur tak chi a ni tih ka hre mai.

Ka room tur chu a zau nuam hle a, engkim mai chu felfai thlarha rem thlap a ni, ka duh zawng tak a ni bawk. Company kalphung leh meeting duan lawk tawh te, stock neih sa leh share holder te thleng chuan min hrilh a, a duh chikimin a kher mei reuh phian a. Ka hriat hman loh hlau fêin min hrilh nawn zauh zauh bawk.

Dar hnih a rik meuh chuan ka hriat tur țul chin chu min hrilh kim khawp mai. A  kianga awm a hahdamin a âw dam thlap chu ngaihthlak a nuam tak zet. Hun lam reng reng kan lo hre chang hauh lo.

"Lunch ei hun a pel daih tawh, office canteen-ah kan chawl ve mai dawn nia, nakin zelah pawh i hriat ve hrim hrim a țha" Lisa chuan a ti a.

"Ok, ka ril a țam tawh viau a ni" ti vein kan inzui chhuak a. Canteen chhungah chuan mi an tam ang reng viau a, Lisa chuan dawhkan pakhat awl lam chu min pan pui dawr dawr a, mithar ka nih vang nge mi mit chu ka chungah a fu deuh țhup hian ka hria a, nuam ka ti chiah lo. A raipuar zawk lah chuan engahmah ngai lo tih hriat zet hian a kal hmiah hmiah mai si.

Lisa nen chuan in ep chiaha țhu dunin, "Tumah hriat i nei lovem ni?" zawi sap hian a ti a.

"Ka file-ah khan ka chanchin chu a inziah vek kha, helaia piang leh seilian ka ni lova, kar hmasa khan ka rawn thleng ve chiah a ni" ka tih chuan mak ti hmel a pu deuh.

"Matt nen hian inhre sa in nih ka ring deuh ngawt a, ka aiawh tur tam takin interview an rawn hmachhawn a, tumah a la duh țhak lo" a tih chuan mak ka lo ti hle mai, chutiang engmah Matt khân a sawi lang hauh lo.

Eitur order kan nghah chhung chuan zawhna leh chhânna ka dawng reng dawn a nih hmel. "In hre sa bik lo ve, ka thawhna hlui Thorn company-a ka boss nen hian an inhria a, ka boss kal tlang chuan i ai ka rawn awh ta a ni e, an pahnih inbiak remna a nia" ka ti țha ve mai a, a vai chuan ka hrilh duh bik lem lo.

"A nih chu, Thorn Company chhuahsan chu i hreh ve hle ka ring," min hriatthiam hmel tak chuan a ti leh a. Kan eitur chah a lo thlen takah chuan țawng chhunzawm tawh lovin kan ei dun mawlh mawlh a.

Office lama kan lêt leh hnuah Lisa chuan "Min zawh duh i nei a nih chuan min lo phone mai dawn nia, ka haw san mai ang che kan zo thawkhat tawh a, incheck up ka ngai a" tiin a phone number chu lehkha themah ziakin min pe a. "Ka lawm lutuk e, naute hmelțha tak nei turin duhsakna ka hlan a che" ka tih chuan nui var var chung hian "Kan inhmuh leh ngei ka beisei Hazel," tiin min kalsan ta a.

Ka office chhungah chuan nui sâng chung hian ka pen lut a. A chhunga lo ding ka hmuh chuan ka pen lai tawp chatin "Matt" ka ti sap a.

"Khawihah teh hrep nge maw i lo kal hman hmawh le Hazel, meeting zawh veleh lunch eipui tur chein ka lo kir a, nang lah chu i kalna chin sawi hauh lovin i bo pil hmiah a, i phone kha hman țangkaina zawng ve rawh" thinrim zet hian a ti a.

"Sorry, Lisa nen canteen-ah kan ei alawm" dam thlapa ka tih chuan "Lisa tehhrep pawh chu!" ti leh supin sofa-ah chuan a țhu thla a.

"Donald ka va phone a aparment-ah i haw leh haw loh, i haw bawk si lo. I ni hmasa ber a ni sia tiin hmanhmawh takin ka lo lêt ve a, min tih hlauhthawn zia hi i hria em?" a ti zui bawrh bawrh a. Ka inthiam lo hle mai, min ngaihtuah vangin a lo kir vat a, kei lah chu midang nen lunch kan lo kil dun daih sia, a sawi angin office a ka kal hmasak ber ni a ni ve a, hmelhriat ka nei hauh si lo, min ngaihtuah ang tih lo hriat ve tur a nia.

"A pawi ka ti tak zet" tiin a bulah chuan ka țhu thla a, ani erawh a ngawi tlat thung.

Reifê ngawi renga kan țhut hnu chuan lungawi ta niawm tak hian min fawp zauhvin " I haw teh ang, in lama awm ka châk tlat" ti a min pawt tho zui nghalin hmanhmawh zet  hian min chhuahpui a.

Ke-in aparment lam chu kan pan a, chak zeta a kal chu ûm ve dat datin, "Min nghakin ka rualin i kal dawn nge, ti hian ka ûm reng dawn che?" Ka tih chuan nui suk hian a kawng dawmin a ding a, "I fit viau emaw ka tia" min fiam pah titih hian min chhang a.

Chulaia office tur an sak zawh loh bula dawr pakhat darthlalanga ka thla lo lang chu ka hmu a. Chu dawr chu a changkan hmel mai bakah an thil zawrh chikim hmel zet chuan ka mit a la hle bawk. Ka enna lam chu Matt chuan en ve in "Mamawh i nei a mi? Kan lut chhin thei reng alawm" tiin ka bânah vuanin dawrah chuan min luh pui a. Hnialna hman pawh a awm lo.

Dawr nghaktu chuan Matt chu a hria a ni tih hriat zet hian min lo chhawn vat a. Perfume tamtak an dah tlar țhûtnaah chuan kal pheiin ka en lâwr dan dan a. Matt chu pakhat tal lei sak ka duh tlat, ka hnungah min rawn zui ve zelin "I mamawh miah lo" a rawn ti sap a. Mipa ho hman chi an dahnaah kal phei zelin pakhat chu ka test a, Matt lo ner sawk ka hmuh chuan "Hei hi i hman angai tawh ang Matt" nui saka ka tih chuan a hawihai țepin ka hria.

"Hazel, khatiang lam kha chu ka nei țha viau duhtawk teh, i mamawh tur chu en la haw vat zawk teh ang" a ti sup a.

"Oh... Matt ka romantic viau lo tih chu ka hria. Mahse, hei hi hmang la ka duh alawm" tiin perfume bur pakhat ka thlan sa chu ka pe a.

"Ok, ka lawm e Miss" ti a nui var varin a la a, "Secretary intithu thei zet ka ti dawn che nge ka bialnu intithu ka ti zawk dawn che?" A la nui sâng renga a nuih zawnga a ha var sar lo lang chu a inhmeh tak zet.

Kan inkar boruak chu a nuam ru riau, ka mamawh țhenkhat ka thlan chu Matt chuan phunnawi miah lo hian alo keng zel a, bazar tura kal kan ni lo bawk nen a zualpui ka lam khawm hnu chuan a man te pe felin dawr chu kan chhuahsan ta a. Matt chuan min pek sak a tum viau nain ka duh bik der lo, ani paw'n min nawrlui duh ta lo aniang, inkai riala kan chhuak chu dawra lo awm ve te chuan awh hmel zeta min thlir chu ka hmu reng, ka nui sak.

Ka sâng ve viau a, pheikhawk sang tak ka bun chung pawhin ka bula kal Matt chu ka chen lo hle a. A koki ka pel awrh chauh a ni, ka pheikhawk bunin a zir lo ve bawk nen ka kal chak thei thlâwt lo. Apartment lift kan chhuah san dawnah Matt chuan min pawm nawlhin inchhung thleng min pawm ta daih a, ka hnial buai vel peih lo. A sâwt dawn chuang si lova.

Ka room thleng min pawm a, rit ti hmel leh hah hmel pawh a pu chuang lo. "In tifai la in tur kan dawm dun dawn nia, kei pawh shower neih zuai ka mamawh" ka biangah fawp zauhvin min chhuahsan ta a.

Matt hi mipa danglam tak a ni tih ka hriat belh zel a, mipa tamtak chu ni se vawikhat kan mutdun tawh chuan an beisei zutin ka ring. Ani erawh chuan dawhthei takin min nghak a, min nawr chûk chûk lo bawk. Min care huamin a lang lem lo naa min ngaihsakna erawh chu a lantir fo thung, hei hian amah ka duhna ati pung sawt thung a ni.

Ka inbual zo pindana ka luh chuan khum bul dawhkanah wine bottle leh shot glass pahnih lo inhûng ka hmu hmasa ber a, Matt erawh hmuhtur a awm miah lo thung. A lo lut leh ngei dawn tih ka hriat avangin ka in thlak sawk sawk a, kawr bah dum hain achungah cotton kamis bânbul pante ka ha bawk a, cotton kekawr thawl hnek hnawk inthawlh leh in awmhmun slipper ka bun a.

Dressing table hmaa ka sam ka lo phiar mawlh mawlh lai chuan Matt chu  tray chawiin a rawn lut a.

"Beramsa hem hmin a nih hi, zanin tlai chu kan in 'bet' ang" tiin dawhkanah chuan tray chu a dah a.

"Engmaw kan tih dawn?" Ka tih chuan, khum lam chu kâwkin "Lo țhu phawt rawh" a ti leh a.

"Hazel, white wine hi kan in insiak ang chu ka ti" atih chuan mak ti zet hian a hmel chu ka en vat a!

Ani hian min cho a maw? Ka intheih zia hria se chuan mak min ti ngawt ang! Ka phur viau mai.

"Wine in ringawt a ni lo ania" tiin a kekawr hâk ipte ațang chuan playing cards thar zet a phawrh chhuak a, "Card khelh dan chi engzat nge i thiam" ti leh in khumah chuan a lo lawnkai nghal a.

"Ka thiam vek, i duh duh thlang rawh" cho zet hian ka ti ve zel a. Nui suk chung hian "A țha alawm vawikhat chak lohah thawmhnaw inbel pakhat zel kan hlîp ang aw"

"Aw le, i fair dawn phawt chuan" ka nuih a za tak zet a 'game' hriat ve chu a dangdai tawp. A inhmeh hlawl lo.

Wine chu shot glass pahnihah chuan a thli khat ve ve a, khumah in hmachhawnin kan țhu a, ka ta tur chu min pein, ani erawh chuan a thâwk khat nghal pap thung a. A tih ang chiah chuan ti ve zelin ka no pawh ka tlâk ve nghal hmiah. In thei lo bik nih ka tum hauh lo.

Playing card chu sawm ve ve a semin kan inkhel țan ta a, vawikhat chak lohah thawmhnaw pakhat zel hlih tur. Huh, round khat kan zawh chuan Matt chu chak lovin a kawr hâk chu a phelh a, kekawr nen chauh chuan a awm ta.

"Intur ka thlit chhungin lo sem ve rawh le, i thawmhnaw kha i hlîp ve dawn khawp a nia Hazel"

"Kan la hria ang chu i zam deuh der elaw?" Ka nuih a za tak zet, intur min pek chu in lehin beramsa zai lep pakhat chu ka hmawm zauh a.

"Țan ila, i inbel zawng zawng kha hlîp fai vek turin țan ka la dawn alawm duhtak"

A  sawi ang tak tak chuan round kan țan leh ațang chuan Matt chu chak zelin under wear nen chiah ka awm tawh a, ani erawh chuan a tir te a kawr a hlih bak chu a ala inbel thlap. Kan thil in chuan min hneh bawk nen ka biangte chu a sa hat hat tawh a. Diktak chuan chutia saruak deuhthaw a țhut chu nuam ka ti fahran lo. Mahse, zak lo anga ka lan hram hram angai chuti lo chu Matt hian min hmusit dawn tlat.

Round hnuhnung ber kan khelh chuan vanneihthlak tak hian ka chak ve ta hlauh mai a, intithei zetin " I kekawr chu thehthang ve tawh rawh le" ka ti a.

Nuih insum zet hian "Ka phelh hun chu ilo nghakhlel hle a ni maw!"

Ka hmui tipawrh tarh chung hian wine chu kan no ve veah ka thli leh a, engzata tam chiah nge kan inpawh ka hre tawh lo. Beramsa lah chu ka eitui phian a, dinner pawh ka ei thei dawn lo nih hi ka puar vek tawh alawm le!

Matt pawh a intam thawkhat aniang, a mit paw muk raih țhin kha a sen deuh râm a, a de sar bawk nen a taksa inphut mawi tak tisa chuangtlai hmuh tur awm hauh lo chu a nalh tak zet a ni.

Saruak deuh thaw a kan awmna chuan phurna min siam ve ve tih a hriat mai, a hmaa kan game khelh boruak țang tak kha rehin kan in en dun vang vang a, Matt chuan âw thawp deuh sat hian "Cheers" tiin ka no chu a rawn khak zauh a.

Wine bottle chu melh zauhvin "Kan duhtâwk dawn nge, kan lâk belh dawn?" ka ti a.

"Naktuk office kal tur kan awm lo palh ange, weekend-ah kan chhunzawm dawn nia" tiin a no chu dawhkanah a dah a.

"Ok, i chak zawkah ngai ang aw, a lehpekah chuan hnehna ka chang tawh ngei ang" lo ti vein khumah chuan ka mu a.

"Zanin chu i khum te zetah hian ka riah ve ngei a ngai ang, min hnial hauh suh"

Ka sirah chuan a mu ve nghal zat a, min kuah chial a, a țawng dan sehchilh deuh hlek avang chuan a rui deuh a nih ka ring,  keipawh ka dik vak bîk chuang lo, Matt ang êm chuan rui lo mahila chesawn tur paw'n tha ka neih meuh lo.

Khua athim vek tawh a, dinner kil tura Donald a'n min ko miah lo chu mak ka ti deuh. Nge, Matt hian alo hrilh sa pawh ka hre tawh chuang lem lo.

Matt hmel chu chiangtakin ka en a, a thâwkdan ațang chuan a muhil nghet hle tih ka hre bawk. A hmel pawisawi lo zet hahdam ta thlupte chuan Matthew Faulkner induhtawk zet țhin kha anna pakhatmah a nei lo, a ngainatawmin duat a châkawm hliah hliah a ni. Ka nuna mipa ka lâkluh hmasak ber a ni a, engtikahmah ka theihnghilh tawhin ka ring lo.

Rilru hlim leh engthawl tak chuan Matt kuah chungin ka mit ka chhing ta chial a.

Ka harh leh chuan tukverh inhawng ațanga ka hmai nizungin a rawn chhun vang chuan a hma vak tawh lo tih ka hre mai. Ka lu na deuh bur chuan nizan kan hun hmandan min hriatchhuahtir zawk a, zan lama kan hnuhma wine bottle leh tray vel chu hmuhtur a awm tawh lo. Dawhkanah chuan Aspirin mumkhat leh tui alo inchhawp sa a, Matt dah a ni chiang mai, ani paw'n a mamawh ve tho a niang.

Matt hmel hmuhtur a awm lova, min kaihthawh ve tal tur asin le...

Inbual sawk sawkin ka inthlak nghal vek a.Lemon rawng business suit ka hâk chuan ka vun chu ati langsar hle a, breakfast ka nang hman lo anih chuan Donald alawm hauh lovang. Kawngkhar kik ri ka hriat chuan nalh thlarh leh vawt deuh raih hian ka lang leh hman tawh, hei hi ka landan tura ka duh ber pawh a ni.

Matt chuan kawngkhar rawn hawngin, ka luchhip ațanga ka ke hmawr thleng chuan uluk zet hian min en a, a mitmeng han danglam ta deuh pawh chu ka hmu reng. A suit thim lam hâk chu a inhmeh hle a alang nalh tak zet.

"Breakfast ei turin kan chhuk dawn a mi, i mutui sia ka kaitho duh ta lo che nih kha, i lang thar sar mai Hazel," nui var varin  ati a.

"Min thawhsan manah tukin chu bike in kal ila enge i ngaihdan?" Ka tih chuan "Mi vehthlem hi thiam viau suh, kan tlai deuh hrim hrim a, tukin chauh chu kal ila, nidangah chuan beisei tawh suh" ti deuh duahin inhnuai lamah chuan kan chhuk thla a.

Breakfast room kan thlen chuan Donald chuan ei mai theih turin alo chhawp sa diam tawh a. Inbe tawh lem lo chuan kan ei dun mawlh mawlh a, Matt chuan engtham mah a ei lo. Ka eitam viau thung.

"Kan kal dawn a mi, kan tlai lek lek tawh a nia" ka tih chuan "Boss leh secretary  thlen hma chu an engthawl deuh dawn tihna nimai" ati duh chauhva.

Matt chu chhuak hmasain bike chu alo dahchhuak fel vek tawh a, ka bag leh helmet pahnih ken chu nuihzat hmel fê hian min en a. "I duhnaah hi chuan i che buai lo mawle Hazel" a ti a.

Ner nâng hian helmet pakhat chu ka pe a," I khalh ngei angai ang Matt, i staff te hmel engang takin awm ang maw! Car manto leh changkang ber ber nei khan bike khalhin company i pan dawn chu a ni sia" ka lo ti ve zat a.

"Nangpawh mawle, secretary vawt raih kha, nula pharvar niawm hrimin ka phurkual dawn che nia" a nuih a za tak zet tih ka hrethei mai ni hlimawm tak kan hmang dawn chiang e...

Matt hnungah chuan amah si thlap hian ka țhu a, Faulkner building lam pan chuan hnehsawh zeta a bike khalh chu thununin kan tlan chhuak ta a...

™©<++++++[BeckirafA]++++++>®™

                     Chapter-11

Mathew-a company a ka thawhna pawh thlakhat zet a ni ve ta. Kan inkâr boruak pawh a nuam viau, min ngaihsak chhunzawm zel a. A hnuaia hnathawh a nuamin a hriatna lo zau zia leh hnathiam tak a ni tih ka hriat belh zel a, tunah hian America lamah sumdawnna zauh tumin hma a la mek bawk a ni.

Ka duhdan min zah sakin office hun chhung chuan Matt chu ka boss a ni a, chutiang bawkin keipawh a secretay Hazel cade ka ni. Kan hnathawh hun chhungah țhahnem ngai takin kan thawk dun a, meeting a neihnaah pawh a kut leh ke berah min hmang bawk. Staff dangte lakah pawh kan in kungkaihna engmah hriatthiam theih turin kan tilang ngai hek lo.

In lamah erawh chuan breakfast leh dinner kan kil dun ziah a, zan lamah pawh ka pindan min țawmpui châng a nei fo. Mahse, ka khum te lutuk chu a sawi sel țhin. A chhan pawh a pindana riah hi nuam ka ti lo a, amah zâwkin min pan mai zel a ni. Party leh dinner eiin pawn lamah a hun a hmang ngai meuh tawh lo a, chu chuan ka thinlungah thu tam tak a sawi thung a ni. Min thlakhlelhna tihlan a hreh hauh lo bawk, ka tel theih lohna hmunah chuan chhuanlam siamin a kal lo ve mai țhin a ni.

Vawiin hi tunkara kan hnathawh tawpna ber tur a ni a, chu pawh chawhma lam chu kan hmang zo der tawh. Chawhnu hian hospital-ah Lisa (a secretay hlui) naupai a fuh chiah loh avangin an zai dawn a, Matt chuan kal ve tura min duh thu a sawi a, ani erawh chu business thilah inhmuhkhawm angaih vangin a kal ve thei dawn lo a ni. Lisa kha ka ngainat zawng tak a ni a, hospital-ah chuan kal ve ngei pawh ka tum.

Ka office-ah Matt chu lo lutin "Hazel, i in peih dawn tawh em? Ka driver hian a hmun thleng a dah dawn che nia, haw lam erawh chu keima'n lo hruai che ka tum thung ang, a țha em?" a ti a.

"Ka thawmhnaw hi thlak ka duh a, apartment lamah lêt leh phawt ka duh"

"Ok, ka kal ve thei lo chu pawi ka ti ngawt mai duhtak"

"I hman veleh min rawn zawm ve dawn nia, driver chu hrilh buai duh lo mai rawh bike ka keng mai ang" ka tih chuan a nui suk a.

"I tih ka ring reng a; ok, fimkhur la chanchin ka rawn zawt dawn che nia" tiin ka hmuiah fawp zeuhin min chhuah san ta a.

Tunah chuan ka bike khalh pawh a sawisel tawh ngai lo. Ka duh hun hunah ka keng chhuak ve mai zel a, min rintawk zia leh khalh thiam min tih thu pawh a sawi fo țhin. Ka nuna a lo lantirh kha chuan ka ngaina hauh lo, tunah erawh a tel lova awm harsa ka ti ru viau tawh zawk a ni.

Apartment ka thlen chuan ka inthlak sawk sawk a, velvet kekawr dum leh kamis hring duk body fit ka ha a, running shoe ka bun leh tawp bawk a, simple taka lan hi ka duh dan a ni. Ka bag leh bike chahbi lain hmanhmawh zet hian aparment chu ka chhuahsan ta a.

Hospital ka thlen chuan Lisa pasal Howard zawngin an awmna lai vel Matt-a sawina hmunah chuan ka hawi kual a.

"Puih theihna che ka nei em Miss?" Ka bul lawka doctor uniform var sar ha lo ding chuan min lo ti a.

"Dar hniha operation ti tur Lisa Stantley leh a pasal Howard hi khawiah nge ka hmuh theih ang?" ka lo ti vat a.

"Wow...Hazel, i ni ang maw! Ka rin aiin i rawn thleng hma, Matt khan min lo phone a kan in nang lo țhelh a nih hi" nelawm zeta nui chung hian a ti leh a.

"Oh, Matt chuan angaihtuah kim hle mai" ka ti sap a.

Matt mai mai chu! Min hrilh lâwk ve tur a nia.

"Edward Stantley, Howard-a nau chiah ka ni e" tiin a kut rawn phar chhuah chu lo vuan vatin "Hazel Cade" ka ti ve a.

"Kan kal nghal dawn nia, Lisa pawh inzaina pindana an nawr luh hmain i hmu duh ang chu"

"Awle ka lawm e, Mr.Stantley" tiin lift a alut chu ka zui ve nghal a.

"Hazel, Mister tih vel kha chu dah țhain Edward emaw Ed tia min koh theih chuan ka lawm khawp ang" a la nui sâng renga he pa hi a nelawm tak zet, doctor ngainatawm tak a nih ka ring nghal hmiah.

"Ok...Ed, Lisa chu ngaihtuahawm a ni lo ang tiraw?"

"Ni lo e, kum upat hnua naupai a nia, tlemin harsatna anei deuh mai chauh a ni. Hlauhthawn tur a awm lo" a ti mai a, Lift a din takah chuan chhuakin Lisa awmna cabin lam pan chuan min hruai a, kan inbe chhunzawm tawh lem lo.

Lisa-in min lo hmuh chuan "Hi, Hazel" nui var var hian min lo bia a. A hmel chu a dângin a chauh hmel kher mai.

"Hi, ka rawn tlawh lawk thei lo che a, min hrethiam dawn nia"

"In buai dan tur ka hria alawm, Matt phei chu ka phût ngam lo hrim hrim" a tih chuan ka nuih a za hle a. He nu hian engkim hi a hrethiamin a bula awm a hahdam thlak tak zet, rei lo teah an zai mai tawh dawna hlauthawng hmel a pu miah lo lehnghal!

Nurse leh doctor te lo lutin operation room lamah Lisa chu an hruai ta a. Howard leh kei chauh chu kan awm ta. Rilrua vei nei tih hriat zet hian Howard chu a ngawi ngul a, biak a huphurhawm hle mai. Mahse, haider luiin a darah ka vuana "Lungngai mah ta che, engkim a țha vek mai ang" Ka tih chuan ka lam lo hawiin "Hetiang tur tih hriata Lisa kha nau lo pai tir loh tur a nia" ati sup a.

"Țha takin naute chu an zai chhuak em em ang, Lisa hian naute hmelțha tak a pe ngei ang che" tiin țhu hahdam rih tur chuan mitmei ka hmuh zauh a.

"Ka hlauthawng tak zet a ni Hazel, min awmpui tura i lo kal vangin ka lawm khawp mai, Ed lah chuan min awmpui hman der bawk si lo a, ka lawm hle a ni" Tiin a sam chu a tuai puat a.

"Coffee emaw intur engemaw lâksak tur chein min duh em?" ka tih chuan "A lawmawm ngawt ang, min hrethiam hram dawn nia ka awmdan avang hian" tiin inthiam lo zet hian a nui deuh a.

"Ka hrethiam che alawm, an rawn chhuah hma chu i kiangah awm reng ka tum dawn nia" ti a kalin coffee lam sak tur chuan hospital cafe chu ka pan san ta a.

Cofee no hnih kenga ka kir leh pawh chuan Howard chu a țhutna ngaiah ala țhu reng a. Ka pen thawm hriain alo dâk chhuak a, coffee chu ka pe vat a, a nupui angaihtuah hle tih ka hmuh hian Matt ka hrechhuak lo thei lo.

Hetiang dinhmunah hian ding ve ta ila min ngaihsak ve angem? Ka thil ngaihtuah chu atthlâk hle in ka hre leh hnuhnawh a, nupa pawh kan ni lova hetiangte chu beisei ngam tur ka ni lo. Chu thil chuan min ti nâ zawk mai.

Thlakhat pumhlum țhak kan inkawp tawh a, min duh thu a sawi fo bawk, nupui lam erawh chu athâwi pawhin a sawi ri ngai hauh lo. Kei hi tun thla ka thi neih hun bi a pel tawh tih ka hrechhuak zawk mai. Hun dangah pawh bawhpelh châng ka nei zauh zauh țhin tho a, invênna kan hmang ngai hauh lo, a rang lama incheck up ka ngai a ni. Matt-a rilru puthmang dik tak ka hriat miau loh avangin sawi lan erawh ka tum lo thung.

"I coffee kha in rawh Hazel" Howard rawn țawng avang chuan ka lo ingaihtuah leh vak a ni tih ka hre chauh. Zia lo thei a nia!

"Taxi in ilo kalah ka ngai ngawt a, min awmpui rih i tum chuan Ed khan a thlah haw dawn che nia" a tih zawm leh a.

"A ngai lo ang, bike ka keng alawm"

"Maw! i uang chu a ni lo maw, fiamthu hun a ni miah lo a nia" mak ti fe a min en chunga a tih chuan ka nui sak a.

"Uang lo ve, ka keng tak tak alawm car-a chuan vel ai chuan a awlsam hle asin"

"Wow... i inhmeh hle tak ang, i incheidan ațang khan lo awih ve mai tur a nia. Matthew secretary in bike a han khalh tur chu inrem lo riauin ka lo hriat vang a nia. Ti-elah min ngai lem lo ang chu maw.." inthiamloh hmel tak hian a ti a.

"Ngai hran lo e, Marton clee-ah chuan bike nen hlir office ka kal țhin alawm. Hetah chuan office a hnai êm a, ka keng khât khawp mai" ka ti țha ve mai a, Matt nen kan kal dun țhin tih erawh ka sawi lang kher duh lo.

Darkar hnih dawn pawnah kan awm tawh a, Matt tehreng pawh chu a va lo kal har ve mawle; meeting an zo daih tawh awm sia. Ka bag a ka phone ah chu phawrhin ka en a, min rawn call miah bawk si lo. Mak chu ka ti ve deuh!

Inzaina pindan țanga Lisa an rawn nawr chhuah meuh chuan a tlai tawh hle a, naute mipa 3kg a rit an zai chhuak a, ka lawmpui tak zet. Lisa erawh chu ala harh chhuak rih lo a, ngaihtuahawm a ni lo tih erawh Edward chuan a sawi.

Matt hmel erawh chu hmuh tur a awm lo mai ni lovin, vawikhat pawh min rawn phone lo, ka call bik awm lo emai...

Lisa fapa chu a țha reuh hle a, naute hmel ka hmuh chuan engtin emawni tak hian ka awm a. Damdawi dawrah kal ngei ka ngai a ni, ka lei tur pawh ka chiang thlap engtinmah awm lo mahila, ka inhriatchian vat angai a ni. Thlakhat aia tam kan mudun tawh a, invenna kan hmang hauh lo a hunlai khan ngaihtuah chhuah nachang ka hre lo chu â ka inti tak zet. Matt paw'n a hmang bik lo tih ka hre tlat.

Dar ruk a rik chuan Lisa pawh a harh tawh a, chau tih hriat zet hian a nui lui hram hram a. "Hazel, haw tawh la dinner ei turin Matt a'n a nghah che ka ring tlat" a ti a.

"Hazel chu dinner kilpui ka tum alawm" Edward chuan a lo ti ve thung a.

"Matthew i hlau lo a nih phawt chuan kei chuan țha ka ti" Lisa chuan min rawn enin a nui sak a.

"A ngai lo e, ka lawm lutuk tlat ka haw tawh zawk mai ang, Lisa sawi ang khan Matt tih lunghnur ka duh hauh lo Ed," ka tih chuan țawng tumin a ang zuau a, ka kuta ațawng tur lo dang chatin "Nidangah i remtih chuan kan la ei dun zawk dawn nia, tunah chuan ka kal rih phawt ang" tiin Lisa chalah chuan ka fawp zauh a.

"Ka thlah tal che remti la" ala ti hram a.

"Ka haw thei alawm bike ka keng a, thlah chi pawh ka ni lo"

"Ok, i bike dahna thleng chu ka thlah ang che" ati ve ta a.

Howard kawngkaa lo lut mek chu ka mangțha hnuin Ed nen chuan cabin chu kan chhuahsan ta a.

Ka bike dahna kan thlen chuan Edward chu zawn nei niawm tak hian a hawi kual a, Matthew a zawng tih ka hre mai. A duh a hmu lo a niang chu bike a ka țhu chu min en vang vang a "Dinner emaw lunch pawh a remchang zawk zawk min la kilpui ngei  ka beisei a nia Hazel," ati a.

"Lutuk tlat, kan la sawi țha leh dawn nia"

Bike chu tinungin helmet ka khuma, ka chevel min en reng tih ka hriat avangin kal thuai ka duh a ni.

"Good night Hazel, tluangtakin le, fimkhur la"

"Naute kha min lo biak dawn nia, good night" tiin ka tlanchhuah san ta a, side glass ațang chuan min thlir rengtu Edward chu ka ban dinglam ka phar khum zauh a. Chak fê-in hospital chu ka tlanliam san ta a.

Ka hmanhmawh bawk nen pregnancy test kit ka lei tur kha ka theihnghilh daih! A va'n zia lo tak!

Tlanmuang deuhin kawngpui sira damdawi dawr kawtah chuan bike chu ka dintir a, chhuk zawkin ka mamawh tur chu ka lam a, rai tur chuan ka in beisei hauh lo. Mahse, kan khawsak danin zir miau hek lo le ka lei ve phawt mai niang chu.

Aparment ka thlenga inchhung ka luh chuan a reh deuh țhiap bawk, Donald leh Matthew hmel hmuh tur a awm lova, Matt hi ala haw lo zawk nge ni? Hah, ka ngaihsak viau nachhan tur ka hre bik lo, 'chanchin ka lo zawt ang che' ti si khan a reh hmak a, ngaihven ka tum lo.

Ka pindanah ka chho tlang nghal a, inbualin dinner eitur chuan ka chhuk leh a, tumah an la awm chuang lo. Mak ka ti viau mai! Matt awm lo pawh ni se Donald-a zawk tal pawh awm awm tak a nia. Eitur erawh chu peihsa diamin dawhkanah a inchhawp thung, țhutchilhin ka ei nghal mial mial a, hospitalah khan engmah ka ei lo a, coffee no khat ka inbak kha chu ka ril a țâm tak zet.

Breakfast room ka chhuahsan chuan Donald nen kan intâwk a.

"Sir, chuan pawn lamah dinner a ei chhuak a Miss" Donald chuan alo ti a.

"A lo haw nge a lo phone che?"

"A lo haw zawka a thawmhnaw thlâkin a kal leh nghal a"

"A țhat chu chawlh hahdam ka duh a" ti deuh hmakin ka pindan lam ka pan san daih a. Ka awmdan chu a mawi lo viau tih ka hria mahse, ka lungawi lohna hi ka thup thei ngang lo.

Ka khum, Matt nena kan lo mutdun fo tawhnaah chuan ka mu a, chanchin min hrilh turin vawikhat pawh min biak a tum hauh lo a ni tih ka hriat hian ka chhungril a na veng veng mai. Tun țum chu eng chhuanlam pawh hmang rawh se ka ngaidam mai mai tawh lo ang. Hospital ka pan dawn khan țha ber leh min duat tak niawm fahranin min thlah vel a. Enge ka tih theih lo en ang che Matthew Faulkner i laka ka awmdan vang khan i duh duh a min awmkhum tur hian dikna i nei lo tih ngaihtuah chungin ka mu ta hmak a.

Ka muttui lai chu thawm engemaw hian min tiharh hlawl a, tho chhuakin ka awmhmun kawr leh kekawr chu ka inthawlh sawk sawk a. Dim zet leh thawm neih hlau zetin step chu ka zawh thla țham țham a, Study room luhna bulah hian hmeichhe pakhat hian a pheikhawk sang zet alo phelh mêk a, ka en reng lai chuan rawn ding chhuakin a jacket hâk chu phelh lehin a hnuaia a thawmhnaw hâk kawrfual tawngchham zet nen chuan a ding ta tau mai a.

Study room kawngka inkhar phui lo ațang chuan eng a lo chhuak raih bawk a, a chhungah Matthew a awm tih chiangtakin ka hre thei a ni.

"Matt darling... 'scotch' ka hmu miah lo i house keeper kha ka hmu bawk si lo a, i inbual zawh tawh chuan nangma'n min lâk sak mai la"

A hmel hmu lo mahila Kelly Benison âw a ni.

Ka thil hmuh chuan min shock em vangin chet ngaihna hre lovin ka ding khawng lah a. An rawn haw dun a ni tih hrilh hranpa ngai lo vin ka hre mai. 'Ni lo'! tiin ka thinlung chu a rum a, hei vang hi a nih chiah hi min biak tum lo a a ngawih hmak nachhan, bumin ka awm tihna mi!?

Tunah hian engthilnge thleng leh dawn? Matthew leh a nula kawp awmdun hi ka thlirliam mai mai dawn nge buaina siamin ka sual ka chhuah zawk dawn?

Study room ațang chuan Matthew chu lo chhuakin Kelly bulah chuan a ding a, inbual zo hlim tih hriat tak hian a fai sar bawk.

"Matt, i secretary â zet kha kan thlim leh dawn nge tihian kan ding reng dawn?" Kelly chuan Matthew nghawnga kuah pah chuan a ti a.

Kelly kuahna chu phelhsakin ka dinna lam pan chuan alo phei a, min hmu hauh lo. Ka dinna ațang chuan pen sawnin an pahnih chuan ka hmachhawn ta a. An hmel chu a buai nak mai!

"An lo sawi țhin angin mi pahnih a inkawp rem theih a, pathum erawh chu kan tam lutuk a ni Matt," mahni inringtâwk zet leh kha faka ka țawng chhuak chu phâwk zetin min en dun a.

"I ngaih ang kha a ni lo ania Hazel" Matt chuan chhum hmak hian a ti a.

"A tawk e Matthew Faulkner, hun nuam tak in hmang dawn nia" ti a inherin ka pindan pan chuan step-ah ka chho hmak a.

"Wow! Thil ka hresual a ni ngei ang, Miss intimuki a thinrim tlat" Kelly țawng ngeiawm zet chu ka hre pha tho nain chhan erawh ka tum lo.

"Nang kha lo ngawi hmak rawh, i pheikawk leh jacket kha la la chhuak nghal rawh"

"Mahse, kum hnih zet kan lo inkawp ve tawh a, i tih tak tak ka ring lo Matt darling,"

"Chhuak rawh tunah" Matthew țawng chhuak ram zet avang chuan ka ding deuh dat a.

"Kha'ng kar rei vak lo kal taah pawh khan min rawn pan reng tho kha Matt. Nidangah pawh kan inhmuthiam lo fo a, kan sawifel leh mai țhin tunah pawh kan sawifel thei reng tho alawm" Kelly chuan a tih zawm leh a.

"Chhuak rawh ka tih chu, kawngkhar awmna i hriat kha, Kelly" Matthew âw-ah chuan thinrimna alang tel tawh a. Mahse, Kelly chuan a hlau lo a nih hmel.

"A pawi hleinem darling, pathum pawhin nuam takin hun kan hmang ho thei alawm, min la inhmel hriattir hauh lo lehnghal i secretary thar nen khian" a ti leh zat zat a.

Chu nu chetdan leh țawngkam chu ka ngei em avangin zuk chhuk leha inchapchar law law ka châk kher mai. Mahse, Matthew thiam loh a ni a, a hmeinu zawk zu tih vak kha țul ka ti lem lo mai pawh a.

Matthew chuan, "Kelly, ngawi la chhuak ang che. Chahbi pawh kha hnutchhiah nghal ang che" a ti tuarh a.
Chahbi maw! He apartment chahbi hi Kelly chuan alo nei ve a nih chu! Hah.. A lo nih vel hlawm hi a, ngaithla chhunzawm duh tawh lovin ka pindanah ka lut a, chhunglamah ka kalh nghal thlap bawk.

Khumah chuan ka thawmhnaw hâk pawh phelh lo chuan ka mu kawm chal a. Keimah Hazel Cade pangai, mipa ngaihsak lo leh vawt raih kha nih leh ngei tumin rilru ka siam a, ka mit chu chhingin ka rilru natna theihnghilhin leh Matthew hlatsan tur chuan thu ka ti tlu ta a. Ka thei angem ka hre lo. Mahse, ka thei ngei tur a ni.

Ka harh leh chuan ala hma hle a, vawiin saturday a ni hlauh chu atihzia hle mai, nizan kan boruak tehhrep vang khan Matthew kianga awm ka châk hlawl lo a ni.

Tho chhuakin ka inphihfai a, ka pum ruak lutuk chu hnawhkhah dan zawn angai phawt a ni, duh leh chumi hnuah ka mu leh mai ang. Khua ala eng lo va, choka lam panin ka chhuk thla a light chu tiengin, coffee leh cake ka ei mai niang chu.

Breakfast dawhkan chu țhutchilhin coffee sa ver vawr chu ka in hlek hlek a. Chuti chung chuan Matthew leh Kelly inbiakna kha ka ka ngaihtuah lêta thinrimin thaw ka la hak a. Matthew rilru hriat chian chu alo har lo teh e, min lo bum char char chu a ni sia ka tih lêt ve dan tur hi anat phah lo anih pawhin a hrehawm chu a ti ve khawp ang.

Vawilehkhata ri deuh dat awm chuan min ti phu zawk a. Kawngkhar inhawng ri ni hian ka hria, thâwk pawh thaw țha ngam lo hian ka no chu dimtein dawhkanah ka dah a, ka hlau rilru deuh viau. Apartment chhungah chuan tu emaw alo lut tlat a ni. Kawngkharpui lamah chuan ke pen ri khauh khauh hi arawn awm a, a ring hle mai tun ang zîng lutukah tunge niang? Rukru em ni ang? Matthew chu auh vak mai ka rilruk a. Mahse, a mu daih tawhin ka ring, bakah Kelly nen khan an lo awm dun thei. Tih buai ka duh lo.

Choka chhung chu misual han hmachhawnna tur hmanrua zawngin ka melh kual a, 'frying pan' vawnbân sei deuh chu ka hmu ta a, zawite a kal pheiin a lian ber chu ka la ta chat a. Choka kawngkhar lam chu thawm dim zet hian ka pan phei ta a.

Țhutkhawmna pindan sofa-ah chuan Matthew chu lungngaih hmel zet hian alo indawm kun reng a. Ka tum loh deuh hmu ka ni bawk a, chet mai nachang ka hre lo, ka thil ken chu hnunglamah ka thukru vat a. Mu miah lo tih hriattak tak hian a sam chu ka hmuh hnuhnun ber ang khan ala awm a, a thawmhnaw pawh angai vek ala inbel bawk. A hmeinu nen chuan an mudun lo phawt chu a nih hmel. Nge a va thlah zawk pawh ka hre hrep lo e a!

Ka en reng lai chuan Matthew chu rawn dâk chhuakin a mit tuifianriat ang maia paw muk raih chuan min rawn en ve ta chiah a. Rawn ding chhuakin ka lam panin alo kal a, mak takin ka chesawn thei țhak lo!

"Hazel" tiin ka kawngah chuan arawn vuana, a hmel țha takah chuan inthiamlohna leh hrehawm tihna alang thei.

Ka thinrimna leh rilru natna kha rawn thar lehin Matthew ke-ah chuan ka chhuih chawrh a, min vawnna chu a thlah chiang kher mai, chu chu remchangah lain ka pindan lam panin ka tlan a; frying pan ka ken pawh chu khum bul dawhkan chungah chuan dahin kawngkhar ka kalh leh thlap a, bang ngheng chuan thâwk ka la ham ham phawt a, ka pum chu a rawn let but but a, damlo mai dawna inhriain bathroom lamah chuan ka tlan phei ta chawn chawn a.

                  Chapter-12

Eng mihring nge ka nuna ka lo sengluh hi; ka thianghlimna kum 23 chhung ka lo vawn ve țang țang kha ka hlan ve a nih kha! Matthew ka ngaihtuah zawng ringawt pawh hian ka luak thei tak ngial dawn. Ka duhthlanna ngei kha tunah chuan min tina tu a ni si.

Bathroom bang ngheng chuan ka ding a, ka hmai phih lehin tui chu ka in khawlh khawlh a, chu chuan ka luak chhuak chu ati reh deuh huai mai. Ka pindanah chuan lutin test kit ka lei kha ka phawrh chhuak a, keimahah danglamna engmah lang rih lo mahse hriatchian thuai ka duh a ni.

Test kit chu bathroomah luhpui lehin huphurh ru zet chuan ka intest ta a, rei fe ka nghah hnu paw'n en ngam lawk lovin darthlalanga ka hmai dâng lêp chu ka melh vang vang a. Ka mitmeng lunghlu ang maia hring nghalh țhin kha a dul raih a, ka nun dan danglam ta dâwrh hi ka thiam loh liau liau a ni.

Hreh zetin test kit chu ka en a, ka thil hmuh avang chuan ka khur dar dar a, bathroom chhuatah chuan ka țhu thla hnawk a. Naupai ka inbeisei hauh lo. Mahse, ka dinhmun hriatchian duh vanga intest ka nia, nau ka lo pai reng si! Ka thinlung hian pawm thlap lo mahse kei hian naute chu ka duh alawm, hun rei tak mal taka ka lo awm țhinna kha he naute 'ka fa' hian arawn thlak ngei ang.

Ka âtna avang hian mahni ka indem viau rualin mawhphurhna erawh lâk ngei ka tum. He naute hi ka theihtâwpa țhain ka enkawl anga Matthew erawh hrilh ka tum hauh lo. Company inremsiamnaah khan Thorn company in ngai a awh leh hunah ka lêt thei ang tih a ni a. Mahse, ka tum hauh lo. Ka bânna theh lutin ka flat-ah ka kir leh phawt anga chuta țang chuan hna dang ka zawng ve tawh mai ang chu.

Ka khumah chuan chau zetin ka țhu a.

"Hazel, kawngkhar hi lo hawng teh" Matthew-a âw in a rawn tih takah chuan ka țhu țha vat a. Kawngkhar herhna chu ari rawk rawk a, a kik pah mawlh mawlh bawk. "Hazel, kan inbiak a ngai a ni" a rawn ti leh a.

Kawngka chu a chum ring zual sauh a. "Khawngaihin Hazel, lo hawng teh. Biak che ka duh tak zet" A âw thám deuh ruai chuan ka thin a ti ur zual sauh a. Lemchanna vek duh duh huna âw tidanglam thei, huh...Ka hawng nguar ang.

"Kal bo rawh," ka ti vin țhak a.

"He kawngkhar hrep hi hawng vat rawh" tiin a aia ring chuan a chum leh a.

"Ka hawng chuang lovang"

"Vawithum ka chhiar a i hawn loh chuan ka tichhe nghal a ni mai"  a rawn tih leh chuan luhlul zetin ka țhut ngai chuan ka țhu ngar a. A kalsawn duh mai bik chu ka ring lo. Luhlul ve ve chu inrem a har a nih hi, duh leh ti chhia se a apartment alawm le!

Thawm a reh ta vang vang a, khumah chuan muin puanin ka inkhuh ta daih a. Kawngkhar lock ri rawk rawkah chuan hlauthawng fê-in rang zet hian ka țhu chhuak leh a, hetianga hlauthawnga min siam reng dawn a nih chuan hmundangah insawn ka ngai dawn a nih hi.

Kawngkhar chu inhawng țhuaiin Matt chu chak zet hian alo lut a.

"Hazel," tiin ka darah chuan vuanin, "Engvanga khatia inkalh khum tlat nge i nih le...?" thinrim lutuk hian a ti a, ka darah chuan na zetin a hmer a.

A âwmah chuan lo chum dawt dawt chungin "Min thlah nghal rawh" tiin ka țe tuar a. Min pawt thovin alamah min kuah hnai a, chu chu duh lovin a ke a pet leh ka tum a. Matt chuan alo hrethiam tawh a ni ngei ang a tawlh hnung thuai a. Mahse, min vawnna chu a thlah duh chuang țhak lo. "Kawlh lutuk mai!" a ti sup a.

"Hazel, inbengdai rawh" dam deuh zawk hian ati leh a. Mahse, engahmah ka ngai duh chuang lo.

"Engmah sawi tur kan nei lo, thil thleng zawng zawng kha inbumna vek, nang hian min bum a ni. I hmel ka hmuh loh hunah ka inbengdai chauh ang" vawt raih hian ka ti salh a.

"I ti tak tak lovang," Matt chuan a ti hrawk a, alamah chuan min pawt țha leh a. A thinurna tihreh nan ka hmuiah chuan a fawp a, chu chu duh lovin ka thle kawi sek a. Mahse, Matt chuan ka lu-ah vuan betin ka kawngah nghet tak hian a chelh tlat a. Talchhuah ka tum pawhin tháah ka hneh miau si lova, duhthawhna leh thinurna inkawp hian min fawp lui zel bawk a.

Chutianga min fawh reng takah chuan ka chhungrilah hian amah mamawhna leh duhna hi a rawn insiam a. Tisa thila a zeina hmang chuan min hneh a tum tih ka hrethiam vat bawk. Inhneh tir ka tum tawh lo, rilru fîm put tumin ka insangmar țha leh ta zawk a.

"Min thlah rawh" changfaka ka tih chuan rilru natna niawm tak hi a mitah chuan alo lang zawk a. Ka mitah chiangtaka min enin "Min dawnsawn danah khan i thin a ur hle tih ka hria a, kan inkar tih tawp hi i duh ta em ni?" zawi sup hian min zawt a.

"Chu chiah chu a ni, sawi ka tum" ka tih chuan a thaw hawk.

"Tuna i thilsawi kha a âtthlâk hle mai Hazel, min ring lo a ni tiraw" ati hriam hraih a, "Kelly chungchang kha chu ka sawifiah thei, tlaia ka lo phone loh chhan chungchangte nen pawh a inzawm vek, i lawm lo ang tih chu ka hria. Mahse, ka insawifiahna hi ngaithla ve phawt rawh" ati deuh duah a.

Chhang lova ka ngawih reng vang chuan "I la thutak lutuk a nih kha, kan inkar a tawp tawh tih ka hrilh che kha min ring hram rawh. Nakinah chuan Kelly chungchang hi fiamthu thawh nan kan la hmang mai mai zawk ang" Matt chuan a tih zawm leh a.

A mitah tak chuan en sakin "Nang chuan i nuihpui mai thei, kei chuan ka thei chatuan lo..." uar zetin ka ti hmak a.

Inherin khumah chuan ka țhu thla hnak a. "Ka room a ilo kal fo pawh hi ka duh tawh lo, i duh duha min palzut dawn anih chuan ka insawn chhuah mai angai dawn a ni." Ka ti sak sak a.

"I chetdan hi i ti lutuk deuh lo maw Hazel! Kha hmeichhia lo kal kha ka thiam loh a ni lo" ati leh a.

"I thiam loh a nih loh chuan keima thiam loh tihna mi ni ta!?" ti-el zetin ka ti hmak a.

"Chhuanlam engmah siam ka tum lo, kan inkawp lai khan apartment chahbi spare chu a kawl ngei alawm ka pha lo. Mahse, nizan khan ka hruai haw lo"

"Kan inzawmna a tawp tawh, sawi belh tur ka nei tawh lo" Ka tih chuan Matt chu a ngawi vang vang a, mit zim san chung hian min en a "Kei chuan tawp tir ka tum lo, ka secretary țha tak leh ka bialnu hi khanu vang khan chân ka tum lo tih ilo hre dawn nia" mahni inringtawk zeta tiin kut kuangkuahin chiang fê hian min en a.

"Engpawh ni se min chhuahsan phawt mai teh" ka ti ta ringawt a. Matt chuan min hnial dawn emaw tiin ka lo inring ru deuh ran a. Mahse, engmah sawi chhunzawm tawh lovin pindan chu chak fê hian a chhuahsan ta a, ka thaw huai mai. Tlem tal ka mut loh chuan ka chau lutuk dawn, khumah chuan mu lehin ka chhing ta vang vang a.

Muhil thei si lova mut reng chuan awmzia a nei pawhin ka hre tawh lo. Thaw halh chung hian khum ațang chuan ka tho a, Matt nen kan inkar tawp tura ka tih khan ka rilru a na lo a ni lo. Mahse, naute hi ngaihtuah tel angai tawh si. Ka pum chhungah ka thisen ringin a awm tawh a, ka sum khawl sa hmangin engemaw chen chu hnathawk lo pawhin ka awm rih thei ang. Mahse, rei chu min daih hauh dawn lo, ka bike kha hralh mai ila a țha ange. Weekend a ni bawk a, Matthew hriat lohin ka flat-ah haw zuai ka tum a ni.

Sana ka en chuan lunch ei a hun țep tawh a, inbual turin bathroom-ah chuan ka lut ta a. Tui lum chuan ka inbual ta sar sar a, eng chena rei nge tui chuan ka inkhawh tir pawh ka hre lo. Mahse, Matthew vanga ka rilru natna leh ka taksa sil țhûm chu a tih harh ngei ka beisei. Muangchang hian ka sam chu shampoo-in ka su a, sahbawn la lehin Matthew hnu hma awm miah lova nuai reh tum hian ka inhnawih leh nghal a. Awmzia erawh a awm lo tih ka hre thung. Tuia ka intleuh zawh hnu chuan bathrobe hain towel chuan ka lu ka tuam hlan a.

Drawer-a hairdryer chu la-in dressing table țhutthlengah chuan ka țhu a, ka sam chu ka ti ro leh te te phawt a. Ka chenna hmuna hahdam taka awm ka châk tak zet a ni. Matthew hriat loha kal chu ka duh dan ber a ni a, a fingin experience a ngah si a, ka hrilh vaih chuan thiam takin awm turin min thlém ang a, a hmanruaah sex a hman leh phei chuan ka hnial zo lovang. Amah ka duh miau avangin, alakah chuan insum theihna ka nei ngang lo tih ka hria.

Matthew laka ka chak lohna hi tih lan loh dan ka zawn a ngai a, inthunun turin țan lâk fê ka ngai dawn a ni. Thawmhnaw hain ka mamawh tur bag-ah ka khungsa a, Matthew awm loh veleha chhuak thei turin, anih loh pawhin dâwt var ka hrilh tawh mai aniang chu.

Rinhlelhawm lo thei ang bera ka lan angai tih hriain min lo koh hma ngeia lunch ei tura chhukthlak ka tum bawk.

Țhutkhawmna pindan ka thlen chuan Matthew ka hmu hmasa ber a, min lo nghak niawm tak hian dawhkana eitur inchhawp chu ei lovin chanchinbu a bih san daih a. Ka thâwm a hriat ve leh lo dâk chhuakin mitmeng chang deuh tak hian min melh a.

"I bo rei vang vang hle mai Hazel, ka sawitur ka la sawi zo lo a nia, eitur hi lo ei la inbia ang" ti hmukin eitur lam chu a melh a.

"Ka ei dawn lo ka ti hleinem, diktak chuan lunch eitura lo chhuk ka ni. Nang be tur nilovin" ka ti ve hmak a.

"Ok, i thinchhe lutuk hi engtia han tih chi nge maw ni dawn le!"

"Min enliam mai mai rawh, ka nunah inrawlh tum tawh suh" tiin plate-ah eitur chu ka suak chhuak a, ka eichâk hauh lo. Mahse, ka naute hian a mamawh tih ka hriat vangin ka ei luih a ngai.

Wine chu ka lem hlek a, Matt paw'n ngawi rengin intur a inthlit a, min biak a tum tawh bik lo. Kan inkar chu a hla deuh dawrh hian ka lo hre hmanhmawh a, a tuartu niawm zawk tak te chuan ala awm lehnghal a. Hrep tak hian!

"Kan inkâr tihtawp kha chu ngaihtuah duh suh, a thleng dawn chuang lo" a sana bun lai melh zauhvin Matt chuan a ti a.

"Titawp lo mah la keimahah chuan a tawp tawh. I hmeinu kha'n in 'affair' tihtawp a hreh viau kha chhunzawm leh rawh u" ka ti hmak a.

"Ni lo, ințhen i duh bik miah lo nizana thilthleng vang khan, min hrem i tum mai chauh a ni" ati leh tlat a.

"I ngaihdan dan le..."

"Tuna inbiak hian awmzia anei chuang lo a nih hi, lo inngaihtuah țha leh ang che Hazel. Hospitalah Lisa tlawhin ka kal dawn a, tuna i awmdanah kha chuan ka ruala kal tur pawhin sawm che mahila awmzia a nei dawn lo tih ka hria, khawiahmah lo chhuak suh ang che." Tiin Matt chu thoin ka chhanna pawh nghak lo chuan a pindan lam a pan nghal nulh a.

Ka va'n lawm tak chhuahsanna hun remchang tak a ni.

Ka phone la-in apartment kawtah chuan ka chhuak thla ta a. Taxi hman tur ka zawn mai angai dawn a ni, bike khalha darkar thum dawn lai tlan chu ka pum chhunga naute tan hian ațhat ka ring hauh lo. Edward chu phone-in taxi, Marton clee thlenga ka kalna tur min lo biaksak turin ka ti ta ringawt a. Matthew apartment kawtah ka lo awm tur thu ka hrilh chuan mak a tih hmel viau! A awm tho e.

"Pawnah awm lo khan inchhungah lut la, ka lo lêt leh hunah boruak pangai kan neih theih ka beisei Hazel" Matt chuan ka hnung lawk ațang chuan a lo ti a.

"A țha lawm, i lo lêt har loh hram ka beisei" Ka tih chuan mitko san âk hian min en a.

"Kal lo tura min duh chuan ka kal lo thei reng a nia"

"Kal rawh hmuh che an beisei a nia, ka lo awm thei lutuk tlat min ngaihtuah suh" țawngkam pangai tak chuan ka ti leh a, a kal loh te chuan ka ruahmanna a chhe vek dawn asin. Min hriatchhuah loh nan pangai thei ang bera ka lan a țul alawm.

"Ok, lo kir vat ka tum dawn nia duhtak" tiin ka biangah chuan min fawp zauhva, garage lam a pan ta a. Edward ka phone kha a hre hman lo a ni ngei ang, lungawi awm tak chuan Ferari car-a alut chu ka thlir reng a, a kal chhuah hma loh ka thlamuang thei der lo. Matt chak zeta tlan liam chu ka thlir zui vang vang a.

Inchhungah chuan lutin ka pindanah ka tlang nghal a. Ka inthlak sawk sawk a, ka mamawh tur thunsa thlap ka dahna bag chu khai chhuakin apartment kawtah chuan taxi chu ka lo nghak ta a. Tunah dar thum a ri tawh a, tluangtaka ka flat ka thlen meuh chuan zan dar sarih a ri tawh dawn a ni. Ka hmanhmawh ru viau tawh zawk.

Minute sawm dâwn ka din hnu chuan taxi pakhat lo kalin ka zawnah tak alo ding a, ka lut nghal thuai a, ka flat lam pan chuan Westminster chu kan chhuahsan ta a. Donald khan min hmuh loh hram ka beisei. Apartment ka chhuahsan dawn kha chuan Matthew room a tifai tih ka hria a, min en zui êm lo ang chu.

Taxi driver chu pa upa lam deuh a ni a, a țawngduhin kawngtluan chuan fiamthu a thawh a, a fiamthu thawhah chuan ka lo nui leh hak hak țhin. Ed nena kan inhmuh hunah lawmthu ka sawi ngei ang.

"Miss, Marton clee kan thleng tawh e"  ti a, min sâwitu an awm chuan ka lo muhil daih a ni tih ka hre chauh a. Tun hnai mai ațang khan mut ka awlsam thar ta riau mai.

"Awle, ka lawm lutuk e, coffee tal lo in ta che" Fare pek paha ka tih chuan "Ka lawm e, ka lêt leh nghal mai ang. Zinglamah hna pawimawh tlanna tur ka nei a" tiin ka bag chu min khai chhuahsak a.

"Ok, tluangtakin i kal dawn nia" ka tih chuan a lu bu nghatin nelawm tak hian a nui a.

"Dam takin le Miss" Taxi-ah chuan lutin a tlan chhuak ta nghal a. Ka flat chahbi chu phawrhin kawngkhar kalhna chu ka hawng a. A chhung ka luh chuan enkawl fai țhat tih hriat zet hian hmuh a nuam hle a, Gary a ni ngei ang chu...

Ka phone phawrhin Gary chu ka phone ta a, mak ati viau tih ka hria. Mahse, engmah min zawt hauh lo. Dinner ka la ei lo a, ka flat-ah eitur kawl ka nei lo bawk ngaihtuah chhuah nachang reng reng ka hre lo kei hian, ka thluak ka hmang thei hlawl lo Matthew Faulkner vang vek a ni!

Matt ka ngaihtuah chhuah chuan ka awm lo tih a hre tawh ngei ang a, engtin tak awm ang maw! Bike a en hmasa ber anga, a lo awm dawn si. Min ngaihtuah tak tak anih chuan a mangang khawp ang le. Bike-a kal chhuak turah min ngai ngeiin ka ring a 'ka bum ve thiam tho che' ti sapin ka nui chhuak hak a.

Ka inbual fai sar a, Gary em em pawh chu a va rei ve mawle! Ka țamchhawl lo chauh tawh.

Darriat chiahah doorbell ri ral ral chu ka hre ta a, ka vei tawn sek chu tawp chawtin kawngkhar hawng tur chuan ka phei vat a.

Kawngkhar ka hawng chiah chu Gary nen kan in hmachhawn ta ran a, denims leh jumper ka hâk chu chal chuar deuh nang hian a en a. "Lut turin min sawm dawn lo mi" nui var vara atih chuan a bânah vuanin inchhungah chuan ka hruai lut a.

Wine rawng velvet jacket leh kekawr dum lian hnek hnawk a hâk chu a inhmeh reuh hle mai. A sam buang kir zet chu a thur chhap a. A hmel chu a lang buai deuh nak bawk, a awm tho e, ka lo ngaih tawh zia ka hrechhuak leh chiah. Mahse, ngaihzawng ang nilovin ka țhian ang zawkin. Bike chungchânga vawikhat ka biak tih loh kha chu kan inbe zawm ta miah lo a, min sawisel leh ngei pek ang chu.

"Hazel, chaw i ei tawh em?" Min ngaihsak țhin dan ala ngai reng.

"Ei lo, ka lo phone che khan ka thleng ve chiah, ilo ken ka ring a nia, ngaihtuah chhuah nachâng i hre miah nange!" Ka tih chuan hamhaih hmel zet hian a nui a.

"A, ala hma tho alawm, i ril ațam viau tawh em?" nuihzat hmel tak hian a ti a.

"Țam tehreng mai," ka ti ve mai a.

"Ka la ei bik lo a, dinner kan ei dun thei anih chu, i bike khan ka lo lêng ziai ziai mai mawle"

"Hmelhem pakhat pawh ka hmuh chuan i châk lo ang" tiin a sam chu ka tuai thur sak a, hepa hi a thutak ngai lo reng reng nui reng ringawt mai!

"Flat ațanga hla lo te-ah Chinese restaurant a awm kha an la khar miah lo ang, ka zuk la dâwn a mi?"

"A buaithlak viau loh chuan, ka țamchhawl țep" âw ngaihnobei zet chuan ka ti sap a.

Gary chu nui sakin "Buaithlak lo ve, Chinese chaw chu ka duh ve tawh tlat" tiin a ding chhuak nghal a. "A va lawmawm ve, kan eidun ngei ang i hmanhmawh viau loh chuan, eipui tur i nei lo ange aw" tiin ka fiam lêt zauhva.

"Hazel"

"Umh" tih pahin ka en chho ha a.

"Kawngkhar thleng min kalpui la?" a tih chuan makti zetin ka en a!

Kawngkhar awmna chu pen nga awm vel lek anih avangin chutianga kalpui a han ngiat chu mak ka ti deuh dawn a, Gary mizia a ni miah lo. Zanin a awmdan hi ka hriat țhin Gary kha a ang lo.

Ka makti hmel a hmuh chuan "Ka rei lovang, eitur duh deuh bik te i nei em?" A ti leh a.

"Vawksa leh thil thlum lampang, salad leh wine" tiin ka hrilh deuh duah a.

Nui hakin "Nula, mahni duh pawh hrechiang ngat chi hi ka ngaihsan zawng leh duh zawng a ni" a ti sap a.

"I duh maw" fiam paha ka tih chuan,

"Duh tehreng e!" tiin ka biangah a tuai zauhva "Ka rei lovang" ti nawn lehin a chhuak ta a.

Gary rawn kir leh hma chuan ka phone chu vawithum lai a ri a, Matthew vek a ni. Ka chhâng nguar ang! Phone chu ka switch off hmak a. Ka nunah hian ani aia pawimawh hi an awm leh tawh lovang tih ka hria. Mahse, awlsam takin ka inhneh tir dawn tawh lo. Josh pawh biak ka la tum lo, a hnena thawh leh ka tum chuang tawh lo bawk a, thawhțan lamah ka kir thu ka hriattir tawh mai ang chu..

Dawhkana plate ka lo dah chhuah lai chu hmuin Gary chu a meng phar awk a, ka haider hmiah thung step-a, a ke pen ri kha ka hre tlat alawm. A eitur rawn ken luh chu dawhkanah chuan dahin a jacket chu a hlip a, a hnuaia a shirt hâk chuan a darpharh chu a ti lang chiang hle a, Matthew ka hrechhuak zawk mai.

Chutah kan ril a țam dun bawk aniang ngawirengin kan eidun ta mawlh mawlh a. Gary wine rawn lei tel chu tui ti tak hian ka lem zauh zauh, hepa hi chuan ka duhzawng hi chu a hre ve chiang alawm!

"I nuih nachhan kha min hrilh ve la" ka hawi chhuah chuan Gary chu lo ei puar tawhin hahdam awm tak hian chair-ah chuan țhuin, ngun zet hian min lo en reng a.

"Hetianga dinner kan kil dunna kha arei tawh sia. Tequila kan in insiak țum kha ka lo ngaihtuah mai mai alawm" ka tih chuan a țhu ngil zawt a.

"Hazel, ka ngai tak zet che. Rilru hahna i nei anih chuan min hrilh hreh hauh suh, i mitmeng dul raih kha ka hmuh hmaih miah lo a nia" a ti a.

"Ka chau deuh mai chauh ania, chutiang engmah a awm lo" ka tih chuan min zawt zui tawh lem lovin sitting room lamah chuan min kai phei a.

"Kan eina vel ka sengfel chhungin lo țhu hahdam rawh" tiin Gary chuan sofa-ah chuan min țhuttir a.

"Nangma'n i lam vek tawh a, a sengfel lam chu ka tih ve tur alawm Gary, engemaw i hriat le?"

"Min hnial suh, tikhan lo țhu hahdam rawh ka rei lo ang" tiin chokaah chuan alut leh nghal daih a. Min ringhlel chu a ni em lo ang chu maw? Nge, ka inngaihbel zawk!?

Doorbell ri chuan min ti phu zawk a, tun ang hunah tumah lokal turin ka beisei hauh lo. Gary pawh chuan hriain choka ațang chuan lo chhuakin kawngkhar lam chu a pan a.

Kei erawh thinphu dap dap chungin sofa-ah chuan ka țhu tawm chal a, kawngkhar inhawng thawmah chuan dâk chhuakin Gary leh Matthew inhmachhawn ran lam chu ka melh a.

"Matt!"  ka ti chhuak sap a.

Gary pawh hamhaih tih hriat tak hian chetsawn nachang hre lovin ading reng a, a beisei loh tawp a hmu a ni tih a hriat mai.

"Mr. Seymour ilo awm ve ka ring hauh lo" tiin Matthew zawk chu țawng chhuak hmasaah a țang a.

"Min hmuh ang hian ka lo awm chu anih hi, Mr. Faulkner" ati ve hmak a.

Matthew lam chu melhin "Enge rawn tih i tum, hei hi i aparment a ni lo a nia, chhuak leh nghal rawh" ram hmaka ka tih chuan, ka țhutna lam panin chak fê hian alo pen phei a.

"Mr. Faulkner, Hazel sawi ang khan min lo va chhuahsan mai la" Gary chuan thinrim insum zet hian alo ti a.

"Seymour, Hazel nen kan inkârah hian inrawlh tum suh. Min chhuahsan zawk rawh" Matt chuan inringtâwk zetin ati hmuk a.

"Matthew" ka âw chu a fiak țhak mai.

"Ka sawi dik a ni law'm ni Hazel, i țhianpa awm ve hian țangkaina anei hauh lo" a tih zawm leh a.

"Chhuak tur chu kei ni lovin, nang zâwk kha i ni" Gary chu thinrim zet hian a rawn țawng chhuak a, Matthew chu a pan hnai lui ngat bawk.

Gary lam hawi chuan Matt chu inherin, chiang zeta amit en kalh chung hian "Vawithum ka chhiar hmain chhuak ang che, min nawr lui suh"

Gary chuan thinrim zet hian Matthew-a kawr âwmah chuan a țham sak ta a, chu chu Matt chuan duh lovin Gary hmaiah tak chuan a hnek ta siah a. A ri ațang chuan a na thawkhat ang tih ka hre mai.

"Gary" tia au țhatin, Matt lam chu ka hawi a, "Eng thil nge ti a i inhriat Matthew Faulkner!?" ram hmaka tih pahin Gary bânah chuan ka chelh a, sofa-ah chuan ka țhuttir a, Matt erawh chu chesawn map lo hian a dinna ngaiah a ding ngar a, a thinrimna thunun tum tih hriat tak hian a kut chu a hum ruh tlat bawk.

"Gary, ka thlah ang che min chhuahsan rih mai rawh, ka inbuaipui thei" ka tih chuan lungawi lo hmel takin engemaw sawi tum hian a kâ a âng zuai a. Ka mitmeia kal tura ka tih chuan min khawngaih hle tih ka hria. Mahse, min hnial zui lo.

He Matthew luhlul zet hi a chhuak dawn lo tih ka hria, pathum awm na'n chuan ka flat hi a zim mah mah a ni.

Gary chuan kawngkhar kan pan pah chuan rum zetin Matthew chu a melh a, "I ti ná a nih phawt chuan ka ngawi mai mai lo tawp ang. Hazel, min ngenna vang chauhin ka kalsan ang che" cho zet hian a ti a. Matt erawh chuan Gary țawng chu hre awm paw'n a lang lo.

Gary ka thlah zo inchhunga ka luh leh chuan ngawi ngul hian Matt chu sofa-ah chuan a lo țhu a.

"Min chhuahsanin kha mihring kha i pan a, ka neih loh enge a neih Hazel?"

Chhâng lova ka ngawih reng avang chuan țawng chhunzawm lehin,

"Kan inkâra inrawlh tum chu tupawh ni rawh se, ka en liam mai mai lovang tih hre rawh" ti leh hrawkin, min hnaih zet hian a rawn țhu thla ve a, ka darah chuan na zet hian hmerin "I luhlul lutuk leh ngéng lutuk hi enkawl dan ka hre khawp mai" ti supin min sawi deuh nawk nawk a, ka thil tawn tehhrep hian min ti chau nghulhin ka hria, ka thil eina ala rei lo bawk nen ka luak a chhuak ut ut tawh. Matthew chuan min vawnna chu a thlah duh der lo lehnghal.

Ka pum chu let but but a, ka chalah thlanfîm a bawl țak țak a, ka luak chhuak chu insum tumin ka thaw hawk bawk a, sofa ațang chuan ka ke chu dah thlain dinchhuah ka tum a, ka luhai lutuk vang chuan ding hleithei lo hian ka âwn ta riai riai a, engmah ka hre chhunzawm tawh lo.

Ka harh leh chuan ka khumah keimahin ka lo mu a, pindan chhung eng uarh chuan ka mit men ati nuam lo hle mai. Thil thleng kha ngaihtuah chhuakin khawnge Matt!? Thawh ka tum chuan luhai bawk chuan min tibuai lehin lukham chu ka delh leh riai riai a, chau zetin ka mutdan ngai chuan ka mu leh ta zawk a.

Pindan kawngkhar chu inhawngin Matt chu tray chawi hian alo lut a.

"I lo harh tawh elaw Hazel, min ti mangang lutuk. Engtin nge i awm?" Hlauthawng zet hian min zawt mawlh mawlh a.

"Ka țha, luhai satliah a nih kha" ka tih chuan a ner sak a "Tuilum hi in rawh, thildang engmah bawnghnute takngial pawh i kawl si lo," tiin khumah chuan alo țhu thla a, ka kutah vuanin "Doctor koh ka tum a ka phone a thi hmak bawk si, i phone dahna ka hre bawk si lo" a ti sup a.

Ni tak, ka phone kha ka swich off hnuah cupboard chungah ka dah daih tak a lawm le.

"Doctor ka mamawh lo, min kalsan tawh zawk rawh mut hahdam ka mamawh mai zawk a ni" ka ti ve țalh a.

"Teuh lo, tun dinhmunah hian kalsan che ka tum lo. Ah, chupawh ala ni mai lo, engtikahmah kalsan che ka tum lo, ngaihtuah duh suh kha lam kha chu" nghet charh hian ati a.

"Matt, kan inkâr a tawp tawh, bânna theh luh kher ngai lovin hriatthiam tum rawh. Aparment-ah kir leh ka tum tawh lo ang bawkin, i hnenah pawh kir ka tum tawh chuang lo" ka țawng chu a zawi hle nain a hre pha tho tih ka hria.

"Kelly vang kha anih chuan ka sawifiah thei ka tih kha Hazel, ti hian awm lo teh i inhmeh lo"

"Ka ti tak tak Matt, hna thawh tur dang ka zawng mai ang"

"Josh Thorn hnenah lêt leh i tum tih ka hria, min bum lovang Hazel Cade. Thorn hnuaiah i thawk leh a nih chuan ka tih tur chu i hriat kha" thum chhaka a tih chuan ka sa ve phat mai.

"I duh duh chu ti rawh, Josh hnenah ka thawk dawn lo, i hnenah pawh ka thawk dawn lo. I lungawi em?" ka ti tuarh a.

Ka thusawi ngaipawimawh lo zet hian "Karlehah America-ah sumdawnna thilah ka kal dawn a, ka lo haw veleh kan innei ang" Matthew âw-ah chuan mahni inrintawkna a lang chiang hle mai.

"No.." ka ti sap a.

"Yes, inneihna tel lo chuan ka pawt bet zo lo che anih hi, i thu i duhin min hnial reng bawk si. Ka insawifiahna ngaithla duh lovin i duhdanin arukin ka apartment i chhuahsan a, ka en liam mai mai dawn lo che sweetheart, kan innei khawp ang" a ti nghet charh a.

 "I duh duh sawi ringawt suh" ka thinrim bawk si chuan sawi mai tur pawh ka hre lo.

Ka khabeah chuan dawmin "Ka sawi hi ka ti ngei zel, ka duh chu ka nei zel bawk țhin. Ka chanchin hi zir deuh la a țha ang, kum 21 mi lekin nu leh pa tel lo a sumdawnna ka tungding thei a nih chuan ka hmeichhe duh pakhat nei tur hian ka upa ve tâwk tawh kum 34 ka nih tawh hi Hazel, ka duh che a, neih ngei che pawh ka tum bawk"

A mimal chanchin hriat ka nei tlem hle tih ka hria, zawh chian châkna ka nei deuh thut a "Kan la hria ang chu, khawnge i nu leh pa te emaw i chhungte pawh an awm?" ka tih chuan mitmeng buai nak hian "I hre duh maw! Tun țum chauh hi ka sawi dawn avangin nguntakin ngaihthla ang che" ti leh rihin a pheikhawk chu a tlawh phelh a, khumah alo lawn zui zat a, bang ngheng chuan țhuin min en chuang lo hian a hmalam chauh chu nguntak hian a melh ran a.

Matt chuan a hrawk chu then kharh pahin "Ka naupan lai zawng khan London khaw daifem 'Villa' ah kan chhungkua ka nu leh pa, ka nau Danielle te nen cheng țhin a, chhungkaw hlim tak kan ni bawk. Ka pa chuan sumdawnna Electronic company neiin țhahnem ngaitakin a thawk țhin, a hnungzui turin min duh hle țhin bawk.

Keipawhin hnial lovin ka graduate veleh ka pa sumdawnna chu zawi zawiin ka zir chho ve zel a, nuam pawh ka ti hle a ni. A tawi zawngin kum 21 ka tlin hnulawkah Danielle kum18 tlin lawmna nei turin pawn lamah kan chhungkuain dinner kan eichhuak a, chumi kan hawlam chu ka pa te chuanna car Mercedes chu chesualin a hmunah an boral nghal a, Danielle chu hospital-ah a boral thung. Kei erawh chu bike a kal ka nih vangin ka him hlauh a, ti hi ka ni ta a ni.

Kum naupangtein kan sumdawnna chu ka enkawl chho ve a, share holder engemawzat an awm ve bawk a, buaina neuh neuh kan nei fo mai. Chuti chung chuan tun dinhmun hi ka thleng ta a. Ka nunah hmeichhiain hmun an chang meuh lo, party leh dinner tih velah chuan kawp chu ka nei ve țhin ka zêp lo. Kelly pawh ka nuna i lo lan hma a mi a ni, nang ka tawn che kha'n kan inkâr a tawp fel tawh" a sawi zo chiah chu a thaw huai a.

Mak ka ti kher mai, a chhungkua a chân vek a, chuti chung chuan sumdawnna liantham leh zau tak a enkawl thei a nia mi mak tak a ni. A hmelțhain a hausa hle bawk si. Hmeichhia duh duh thing thei khan kei min neih a duh tlat chhan hi ka hrethiam lo a ni. Min hmangaih thu a sawi ngai lova, min duh thu erawh asawi fo thung. Hah..tisa in it tawnna mai mai bâk a ni lo.

"Tui lum pawh chu i in chuang si lo a, muhil rawh i chau lutuk ang" ati zui a.

"Nangpawh muhil rawh, zingah i lêt mai dawn nia aparment-ah chuan"

"I bula mu tura min sawmnaah ka ngai mai dawn tihna mi" nui suk hian a ti a.

"A ni lo tih chu i hriat kha, sofa-ah hian mu mai rawh" ka tih chuan lungawi lo zet hian a rum nghat a, ka hre lo der hmiah thung.

"Pathian hmingin khatiang hmelpu khan min en reng teh suh!" Matt chuan thinur tak hian a rawn ti chhuak thut a.

"Engtinmah ka tih loh che hi" cho âr hian ka ti let ve a.

"Ka thin tirim zawngin khawsa tawh suh, chuti lo chu i damlohna kha haiderin i khumah hian hmangaihna ka chenpui mai ang che" tiin a kawr hâk chu a phelh a, ka puansin chu keuvin ka kawngah min kuah a. Ka in sangmar țun chu hriain "Hahdam la muthilh tum rawh, kuah che ka duh mai a nia" ati sap a.

Min kuahna chu duh lo viau mahila hnial turin ka chau lutuk tawh, banga sana intar ka en chuan zinglam dar thum a pel tawh a, țhu chhuakin tuilum Matt-a lo ken chhoh, dai vek tawh chu ka inkhawlh khawlh a, amah hlat thei ang ber chuan ka mu ta a.

"Min kuah ve rawh Hazel, thinrim tawh suh khawngaihin" Matt âw chu a thám deuh țuak a, ka chet lawk loh vang chuan a mah chu lo tawlh pheiin min si chet chuan a mu a, ka pumah chuan kuah lehin ka nghâwng zawnah chuan a thâw lum ham ham a. Chu chuan ka taksa chu a ti danglam leh der tawh, inthunun tumin ka chhing ta vang vang a.

Ka harh leh meuh chuan ka room chu a eng uarh tawh a, Matthew mutna chu dan pangaiin a ruak leh tawh. Ka lunghnur ru riau pek nia!

Inphih faiin choka lamah chuan ka chhuk thla a, choka kawngkaa ka dâk lut chiah chu Matt-a thil kan rim chuan ka luak ti chhuakin ka uak tuarh a.

"Hazel, i țha em engtin nge i awm?" Matt chu rawn tlan phei nghalin min ngaihtuah tih hriat tak hian min kuah vat a.

"Ka ril țam vang a niang" ka ti ta ringawt a.

"Țhu la, ka inpeih a ni mai" tiin ka țhutna turin chair chu a pawt chhuak a, ka luak chhuak nghulh reng chu engvang nge ka hrethiam bik lo!

"Artui kan, coffee leh toast hei bak chu i flat-ah siam tur a awm lo" tiin dawhkanah chuan a chhawp a.

"Ka hria alawm, nakinah ka lei mai ang"

Artui kan chu ei tumin fork chuan ka hawlh a, "A rim chu..." ka sawi zo hman tawh lo. Tho chhuakin rang lutukin bathroom lam panin ka tlan a

"Hazel" Matthew âw-ah chuan manganna ri a tel.

Ka ding hman tawh lo, bathroom-a commode-ah chuan ka luak a, ka hnungah Matt chuan zawite tein alo chûl a, ka kam chu țhuahfaiin hmai ka phih nghal bawk a, chau zet hian inherin Matt nen chuan kan in melh ta ran a.

"Hazel, nizan khan Gary nen thil țha lo inti mi? Diktakin min chhâng rawh!"

"Engmah chutiang a awm lo, artui kan rim kha ka hriat vang alawm" țha takin ka chhâng a.

"I awmdan hi a țha miah lo, zêp i nei a nih vaih chuan a pawi khawp ang, artui kan te chu i duh lutuk tih ka hria, apartment-ah pawh i ei fo. Kan siamdan a inang reng thildang a awm tiraw? Dâwt tel lovin min hrilh teh" sofa-a min țhuttir pah chuan a ti leh a.

"Engmah chutiang a awm lo, ka pum dik loh vang a niang" ka ti țalh a, naupaiin hetiang hian an awm țhin emaw ni le.. Ka rilru a buai tak zet. Ka hrilh dawn der si lo.

"Umn, a țha alawm, kan hrethuai ang chu" ati hmak a.

" Enge i sawi awmzia" ka ti sap a.

"Mi mâwl ka nih loh hi Hazel, insiam rawh hospital-ah kan kal ang"

"Maw! Ka duh teuh lo" ka ti hlar a

"I duh emaw duh lo emaw, kan kal khawp ang" Matt chuan hnial lo turin min duh tih hriat tak hian ram hmakin ati leh a.

"Ka duh lo; Matt ka țha alawm" ka tih chuan "I insiam dawn nge ka siam kher i phût?" ti a min pawm nawlhin pindan lam chu min pan pui nghal hmiah a.

Matthew Faulkner luhlul zia hi chuh...!

©<++++[BeckirafARenthlei]++++>®

                      Chapter-13

Duh lo engang mahila hospital-ah chuan min hruai lui dawn tho, ka kal duh lo a nih pawhin min pawm thleng țhak duh ang.

Khumah chuan min nghatin "Insiam rawh le, dam țha takin awm la ka duh alawm, i nat hian ka na ve țhin tih min hriatsak dawn nia" Matt țawngkam dam thlapin a tih chuan dik ka ti ru viau. Incheck up ka tum tho a, hetia awm reng hian awmzia a nei lo tih ka hre ve tho a ni.

"Ka inthlak chhungin breakfast kha lo ei chhunzawm la" thinrim lovin ka ti ve ta zawk a.

"Ka lo nghak zawk ang che, engtin emaw i awm palh khan a buaithlak" ati leh tlat a.

Darkar chanve hnu chuan hospital 'lobby' ah min koh hun nghakin kan țhu ran tawh a. "Westminster-ah chuan awm ila, doctor nghaka kan țhut reng hi a ngai lo tawp ang" Matt chuan ngaihdan nih hmel vak loh hian a ti a. Ka chhang buai peih lo, dawhtheihna a tlachham lutuk hi chu kan buai fo dawn a nih hmel.

Doctor pindan ațanga nurse lo chhuakin ka hming a lam chuan luh tumin ka dingchhuak a. Matt pawh tho ve nghalin ka bânah min vuan a, luh ve a tum tih ka hre mai.

"Lo lut duh suh engtinmah ka awm dawn hleinem, rei lo te chauh a ni ang" ka tih chuan a duh lo deuh dawn a. Mahse, lo țhu rih tura mitmei ka hmuh chu hrethiamin lungawi chiah lo niawm tak hian min vawnna chu hreh zet hian a thlah ta a, ka awih lo zawk Matt hian awlsam takin ka thu a zawm ve a nih chu thil mak tak a ni!

Khawl hmanga ka pum doctor-in a en zawh chuan zawhna hrang hrang min zawt țeuh bawk a, ka naupai chu thlakhat leh karhnih a nih thu pawh a sawi tel. Țhat lohna ka nei lem lo bawk a, thil eițha tur leh indim viau turin min chah ngun hle.

"I va rawn kir hma ve?" tiin Matt chuan a kawrbân thlep chho chung hian a ti a. A hmelțha tak mai chu a nûr nang a, zawhna tam tham zet min zawt leh ngeiin ka ring.

"Ka rei lo ang ka tih kha, thil eitam tur leh indim deuh turin min hrilh, luhai satliah ka tih reng kha" min zawh hmain ka sawi zung zung a, naute chungchang hi a hre tur a ni rih lo.

"Chu chauh chu maw, thudik tak a ni em?" Matt chuan min ring chiah lo deuh a nih hmel.

"I hriat chian duh chuan Matt, engahnge doctor i zawh mai loh ang?" ka ti hmak a.  A zawt tak tak a nih vaih chuan ka chhe vek a ni mai. Mahse, hetia ka tih mai loh chuan min ringhlel mai dawn sia.

"A țha lawm ka ring che" mitko san âk hian Matt chuan ati ta hlauh a, ka thaw huai thei nia.

"Kal ila, lunch leh dinner tur tlem azáwng leia kan bazar loh chuan eitur engmah kan neih loh kha" thildang sawiin a rilru lâkpen dan ka zawng ta daih a.

"Ka penthouse-ah kan lêt dawn, hetah hian nangmah a hnutchhiah che ka tum lo, tuesday-ah America-ah ka kal dawn a, hna i thawk peih lo a nih pawhin ka inah chawl hahdam ang che" ati a.

"Ka hna hi zawm ka tum tawh lo Matt," car kawngkhar hawng sawk chunga ka tih chuan alo nui mai a.

"Indim rawh, khatia i chêt sawk sawk chuan luhaiin i tlu leh ange!" Driver seat-a țhut pah chuan ati deuh nghat a. A kianga hna ka thawh zawm zel te chuan min hrechhuak vat dawn asin, chu chu ka duh hauh lo.

Ka flat lam pan chuan kan tlan chhuak ta a, dawr lian deuh mamawh kan lam theihna tur hmun kan thlen pawhin Matt chuan car ati ding duh țhak lo. Ka rilru a buai tak zet, a penthouse-ah engtin nge ka kir ve theih ang! Chhuanlam dang ka zawn ngei angai a ni.

"I zin dawn tho chuan ka flat-ah ka awm rih anga, i lo haw hunah min lo hruai mai la" inti fel fahranin ka âw chu ka ti nêm lui vel a! Huh...

"Le! Puitling angin naupang duat sual anga awm lovin, awm tum rawh le. I flat kan thlen hunah i mamawh tur lakhawm la, kan chhuak nghal ang min hnial tawh suh" Matt chuan zaidam tak hian ati a.

"A țha lawm mahse, thil pakhat min tihsak ve ka phût a nia" ka tih chuan car chu tidingin ka flat kawt kan lo thleng reng tawh a.

"Inchhungah kan sawi zawm dawn nia" tiin ka chhanna pawh nghak lo hian min pawm nawlhin step chu min zawh chhoh pui ta a. Chu chu duh lovin ka tal kual sek a, ka ke chu ka leng vak vak bawk a.

Ning tih hriat tak hian "Lo che sek suh, ka pawm thleng dawn tho che tih i hriat kha" tihpahin kawngkhar záwnah chuan min nghat thla ta a.

Kawngkhar ka hawn chhung pawh chuan ka tlansan hlau niawm fahran hian ka darah min vuan tlat a, he pa khawsazia hi ka hrethiam thei thlawt lo! Inchhung kan luh pawh chuan min nawr kal hi a ni deuh ber, min vawnna chu a thlah chuang eih lo nia.

"Enge tih sak tur che a min duh chu sawi tawh rawh le?" Matt chuan khauh deuh far hian min zawt a.

Ka chil lem khalhin "Nizana i chetdan kha a mawi lo hle tih chu i hre phawt anga. Gary kha ngaihdam dil turin ka duh che a ni" ka tih chuan a lamah min pawt hnai nghal ruak a.

"Nangtè hian engmaw ti tura min duh chu han sawi nawn leh teh" ti tuarhin thinrim zet hian min sawi deuh nawk a.

"Matt, ka lu ahai a nia min thlah teh"

"Ngaihdam dil maw!? Ka dil nachhan tur ka hre lo a phu tawk chiah a nih kha" ti lehin min vawnna chu a thlah thut a, ka inring lo bawk nen ka pai deuh dat a.

"Hrep tak che hian!" tih sup pahin sofa-ah chuan min țhuttir ta a.

"I dil lo anih chuan, London-ah ka zui bik lo ang che" ka ti ve tlat a.

Thinrim zet hian tho vutin kawngkaah chuan a chhuak a, na zet hian a rawn nam khar leh țhuai a, ka phu zawk mai a chetdan mak zet chuan min ti hamhaih lutuk a, umzui nachang pawh ka hre lo.

Rei fê keimahin sofa-ah chuan ka țhu tawh a, Matt kha khawiah nge a kal tak ang? London panin a chhuak ta a nih ka ring. Min kalsan turin ka ti fo a, ka duh angin a chhuak ta. Mahse, ka hlim chuang hauh lo. Matt tel lo a awm tur anga ka indah chhin ringawt pawh chuan ka mittui a tla dawn ta mai a, ka hmangaih a ni. Matthew hi ka hmangaih tak zet a ni.

Ka pum chhunga naute ka ngaihtuah chhuah phei chuan rilru natna hian min fan chhuak vek a, luhlulin Matt hi do reng țhin mahila min kalsan meuh chuan ka na leh si. Ka mittui chu dan rual lohin a rawn far ta zawih zawih a, ka nun hi engtianga nasain nge min thlaksak tak le...!?

"Hazel?" ti a ngaihsak aw taka min kohna chuan Matt chu a awm ve tih min hriattir chauhva. A lo luh lai ka hre lo reng reng, engtia rei nge ka țhut tawh pawh ka hre lo.

"Hazel" tiin ka lu-ah chuan a dawm a, ka sam hnawk niaih mai chu a kut dam thlap chuan min chul mam sakin ka mittui tla chu ka kut hnunglam chuan ka hru zui a, ka khap sak sak a.

Matt chu țhu hniamin ka malchunga ka kut dah chu a vuan a, a hmel țha tak chu a lang dam thlap a, nichin maia a thinrimna kha hmuh tur a awm tawh lo.

"Țap teh suh, i inhmeh lo" a ti sup a, dam leh duat tak hian ka mittui chu min hruksak a, min tawhna dam thlap chuan hmangaihna chenpui min duh a ni tih a mitmengah chuan ka hmu thei a ni. Min kalsan lova ka bula a awm vang chuan țah leh mai hlauvin ka hmui chu ka pet fan fan a. Amah vanga ka rilru no ta lutuk hi ka duh hauh lo a; mahse, ka thunun thei si lo.

"I țap lai hmuh hi ka duh lo, ka tihpalh tak zet a ni" thám deuh, zawi angreng tak hian ati a."Engthil mahin a tihnat che hi ka phal lo" ti lehin ka mit, mittui vanga de sar sar chu a en vang vang a.

Matthew mitmengah chuan thutiam hlimawm tak alang chhuak a, min hmangaih ve phei se chuan kan dam chhung nun hi hlim takin kan hmang dun mai tur; mahse, min hmangaih thu vawikhat pawh a sawi si lo, kei ngei pawh hian ka hrechhuak ve chauh a nia. A mitmengah chuan hmangaihna min chenpui ngei dawn tih ka hria, tumruhna a lang tel tlat. Engmahin a dang zo chuang lovang min mamawhna chu hai der duh viau mahila ka luhlul thei tawh bik lo. Rilru natna bawk em niang? Engmah ka hma hun tur ngaihtuah thui duh lovin tun hun chauh hi ka ngaihtuah mai aniang chu ka hmangaih miau si alawm le...

Matt chuan min pawm thovin ka pindan lam chu min panpui thauh thauh a, hetia min pawm vel hi ngaiah ka nei hman hial tawh. Zahthlak zawk hian!

Khumah chuan min nghat thlain khum tlangah chuan a țhu ve zat tih matress han hniam ta deuh satah chuan ka hre mai. Ka taksa pengtin mai chu a en kual ta dan dan a.

"He khawvela ka hmeichhe hmuh tawh zawng zawng zingah nang anga min hîp leh dangdai hi ka hre lo. I nalhin i hmelțha ber mai" thám deuh țuak hian Matt chuan ati a. A mitmengin a chhui tawh chu a kut chuan a zui zat zel a, lo dan pawh tum ila ka thei chuang lovang. Min rawn tawh phat khan thildang zawng zawng chu theihnghilhin amah chauh ka ngaihtuah tlat a ni.

Ka taksain Matt a hipna chu atir bera kan hun hman ang tho khan danglamna a awm chuang lo. Mahse, tunah chuan chincháng ka hre ta deuh zawk mai pawh a. Ka tan chuan mipa hmasa ber a ni a, midang an awm thei tawh lovang tih pawh ka thinlung hian a hria a ni.

Naute chungchang chu hrilh ka duh deuh thut thut hman a. Mahse, kan inkâra thil awm hi a tihchhiat ka hlau deuh bawk si. Engtikah emaw chuan ala hre tho tho ang hunin a la hril ang chu!

Matt chuan a thawmhnaw inbel chu a phelh a, ka hâk lai pawh min hlih sakin khumah chuan min muttira ka bula alo mut ve pawh chuan hawisawn nachang hre lo hian ka lo en veng veng a, a lamah min pawt hnaiin kan taksa chu a insi chial a, muangchanga min rawn fawpin hmangaihna tuipuiah chuan kan pil dun ta vang vang a.

Vawi engemaw zat nawmna vawr tawp min thlen puia hmangaihna kan chendun hnu chuan Matt âwm nghengin ka muhil ta siai siai a.

Ka harh leh chuan khua atlai ruih tawh a, ka bula tui zeta Matthew muhil chu thlék vang vangin a chalah ka fawp zauhva. Ka ril țam lutuk chu eitur engemaw tal ngaihtuah tura ka thawh ngei angai tih ka hria.

Thawmhnaw ka inbel zung zung a, dawhkana tui inchhawp chu ka in khawlh khawlh a, eitur lei tura ka chhuah ngei a ngai engmah siam tur kan nei lo.

"Min thawhsanin khawiah nge kal i tum sweetheart" Matt âw chu a fiah țha hle a.

"Ka ril a țam hle a nia, eitur engemaw ngaihtuah angai Matt"

"Yes, ka hria thawmhnaw ka inbel chhungin lo insiam la kan chhuak nghal ang, hetah kan awm reng thei lo tih i hriat kha Hazel duhtak"

"Maw! Tunah kan chhuak dawn maw ka ril ațam ka tih chu" ka țeu hlar a.

"Kawngah kan inhnawh puar dawn
 nia, insiam rawh le" ati leh a.

Hnialin awmzia a nei lo tih ka hria, ka thil vel chu bag-ah khung zung zungin Matt chu ka pe a, a lo ban ve vata inhnuaiah min hruai thlain, flat chhung chu a enkual thuaka pawnah min hruai chhuak lehin, kawngkhar pawh ama'n a kalh fel leh thlap bawk. A chezia chu ngawirengin ka en liam ve tawp.

London kan thlen meuh chuan zan dar sawmpakhat a ri deuh thaw tawh a, kal kawngah vawihnih chawlin a vawikhatnaa ka thil ei chu Matt chuan mak ati hle a nih kha. Khatianga tam kha ka ei ngai tlat si lo a, London kan thlen hma lawkin restaurant-ah min chawlhpui leha 'i duh táwk ei leh rawh le' nui sâng chunga min tih kha chuan ka zak ve deuh.

Apartment chhung kan luh chuan a ngaite hian Donald hmel pawh ka hmu leh ta alawm. Amah lah chu a nui ang vur vur a, bungrua tihtham kan nei lova Matt chuan a tir bo ta vat reng a, ka nuih a lo za hle a ni. Matthew tihdan mai mai chu!

Țhutkhawmna pindanah intur kan dawm dun a, ani'n whiskey a in laiin kei erawh chu wine chiah in a phal thung  engemaw a hriat tehreng ni!

"Hazel, America-ah chuan lo kal ve i duh em? I duh phawt chuan ka hruai ang che" Matt âw dam thlap chu ngaihthlak a nuam hle a.

"Ni lo e, i awm loh chuan office-ah thil țul tam tak khawih tur a awm dawn asin" ka ti a.

"Hna lam kha chu dahțha rawh, i kal ka remti miah lo, midang ka ruai mai ang. Chawlh hahdam i mamawh"

"Ka țha tih i hriat kha, a reng rengah i house keeper nen chauhva nileng lenga hun hman ka peih lo" ka tih chuan a nui suk a.

"Umh, intur lam kha chu dahțhain inbual dun ang kan mamawh" ti leh daihin, ka no ken chu min dahthlak sak a, a pindan lamah min hruai chho zui nghal hmiah mai. A tih ang ang chuan thuawih tak hian ka zawm ve zel tawh mai chu a nih hi.

Matt chuan "Naktukah rei lo te tal office kan kal angai dawn a, chuvangin shower neih zawhah kan mu dawn nia" inti thunei fé hian a ti leh a.

Bu nghat chung hian "Keipawh inbual chu ka mamawh in ka hria" tih  pahin ka thawmhnaw hâk chu ka khawih zauh a. Mahse, fai duhna vang ngawta a sawmna chu pawm ka ni lo tih ka inhre ru kar thung. Matt chu lawm tak hian a nui a, darkar chanve aia rei mah shower nan hun kan hmang leh a.

Dressing table hmaah dingin ka sam chu ka khuih a, ka hnungah Matt chu lo dingin thawp deuh sat hian "Ka tana i hlut zia hi engtin nge ka hrilhfiah ang che le.." a ti a.

Ka khèl bawrah chuan a kut chu nghatin ka 'robe' hâk chhanah chuan a kut lumna chu ka hre thei a. "Hlimtakin ka nun hi nangnena hman ka duh a ni, i thei ang tiraw Hazel,?" Darthlalanga ka hmel lo lang chu a thlir vang vang a "Ka ta i ni, ka ta chauh, chu chu theihnghilh tawh hauh lovang che" ati leh sap a.

A kut chu tawlh chhovin, a taksa lum ham ham chuan ka taksa chu fanin ka thin a phu dat dat a, ka darah chuan vuanin a lam hawi chuan min kuai her a, a mitmeng chu a thim raih bawk. Ka  hrawk a ro nghal halh mai.

"Ka lo kir veleh kan innei dawn nia, midangin min chuhpui hma hian" nui suk hian ati leh a. Aw pawh ka ti lo a, inneih chu ka duh reng em?

"Ka lo inngaihtuah dawn nia" ka ti chhuak thei hram a.

"Awle, min hnial loh hram ka beisei" Matt chu a hmel a hlim ta deuh, a mitmeng pawh a eng deuh sar a, "Âtthlak tak chuan min hnar lo hram ang che" tiin a khum zau zetah chuan min hruai pheiin ka robe hâk chu min phelh sak a, a towel ven pawh a phelh ve nghal bawk a, dimte hian min muttirin ka bulah chuan a lo mu thla ve nghal a, min kuah chial chung hian a muhil ta a.

Kei erawh muhil thei lovin ka meng reng a, ka naupai chungchang hi a hriat hunah engtin nge a tih ang? tih ringawt ngaihtuah chuan ka muhil thei der lo. Ka pang kham țhûm tireh turin ka inlet thak a, Matthew muhil hmel chu ngun tak hian ka en a, a sam buk lam lek lek chu a chalah a kawi niaih a, a hnarngul sang vah leh khabe ruh kual invuah fuh tak te, a hmui fawh chakawm taka chhah lam lek lek chu a  chip hmak bawk a, a hmel țha thlawt a ni.

Hmeichhe pakhat chunga rinawm reng chu a thei kher angem? Kelly tih vel hmeichhe dang pawh Matthew hausakna leh hmelțhatna hian hmeichhia a hîp hle a ni.

Hetiang thil ka ngaihtuah zel chuan ka dam chhung nun hlim lohna hlirin ka hmang thei ngei ang. Chuvangin ka hma hun atan leh ka fa tan hian thutlukna diktak ka siam ngei a ngai a ni. Matt hian min dawhthei em em a, hmeichhe dang melh leh hlimna dang zawn chu bansanin min la hmangaih ve mial maithei a sin. Ka hmangaih ang hian.

Mutchhuakin min zem ve ta chiai chiai a, engthilmah ngaihtuah duh tawh lovin ka mit ka chhing ve ta a.

"Hazel, duhtak"

Matt âw chu ka hre ruai ruai a, mumang ramah bawk chuan chen leh tumin ka chhing leh a.

"Hazel, harh teh breakfast eitur talin lo tho la, i mu leh dawn nia" Matt chu a nui zui a. Peih lo zet hian meng chhuakin ka hmai si țep a lo kun Matt mitmeng eng sar chu ka hmachhawn hmasa ber a. Ka hmuiah fawp zauha inlahrang lehnghalin "Mut duh nu" tho ve tawh rawh nui var varin a ti a.

"Umh, dar engzat nge?

"Dar riat a ri chiah, inphihfai la breakfast ei ang, Donald a'n a peih vek tawh" tiin bathroom pan chuan min hruai a.

Matthew-a bathroom chu ka flat a ka pindan tluk thawthanga zau a ni. Shower a inbualna pawh pahnih a awm a, Spa te nen lam a awm thlap. Bathroom chhungah chuan Matt rim ala nam vang vang thei a, hmanhmawh zet hian ka intifai ve sawk sawk a.

Minute nga aral leh chuan breakfast dawhkan kilin Matt kiangah ka țhu leh der tawh.

"Eichâk zawng leh ei duh loh i neih chuan Donald i hrilh zel dawn nia" tiin Matt chuan ka plate-ah salad chu min suah sak a. Amah chuan Lemon juice leh toast chauh a ei thung.

"Tehreng mai, chawhma chauh maw hna kan thawh dawn?" tiin ka zawt sap a.

"Umn, zaninah party naah kan kal dawn nia, i duh chuan chawhnu lam chu bazar nan hun i hmang thei ang"

"Wow, nuam dawn ve, naktuk i zin dawn sia inthlahna angreng maw?"

"Ni lo e, ka kianga i chen hnu hian pawn lamah hun kan hmang khât em a ka ti mawle" Matt chuan a ti țha ve mai a. Min duat ta lutuk hi awmdan ka thiam dawn lo. Ka lai viau a ni...

"Hazel... i rilru thlak leh nan ala tlai lo a nia. America lamah chuan lo kal ve mai rawh," tiin Matt chuan min thlém leh a. Chutianga min sawm nawn leh chu mak ka ti kher mai, kal ve mai ka duh ut ut a. Mahse, chu ngaihdan chu duh lovin, "Ni lo e, ka lo chawl hahdam zawk ange" ka ti daih a.

"I tih tlat chuan le" tiin ka chalah a rawn fawp zauh a.

"Kan kal dawn a mi, i breakfast kha thawhsan i hreh viau loh chuan" Nui deuh chung hian Matt chuan a ti a. Ka plate-a eitur awm zawng chu bang awm miah lo hian ka lo ei zo vek chu niin! Ka ei zawh lai ka hre miah lo. Haa.. ka danglam tak tak tawh a nih hi...!

Ka computer screen chu ka melh vang vang a, darkar li lai ka țhutchilh tawh. Office kan thlen hnuah Matt-a ken tur list siamin ka buai char char a, ani paw'n a office ala rawn chhuahsan miah lo.

Matt kha'n bazar turin min ti a, mahse, ka tum hauh lo. Party na a hâk tur chu ka nei ve pahnih khat chu, ka hna ka zo thawkhat tawha apartment lamah haw turin ka insiam a, Matt chu ka office-ah lo lutin "Min haw san mai angai dawn a ni duhtak" a rawn ti a.

"Office-ah chuan Hazel, tih tur aw.." chimawm ka lo chhuah zauh a. Matt chuan nui suk chung hian "Ka thlah lo mai ang che, hna laklawh ka nei a" a ti  leh a.

"Ok, ka kal mai" tiin ka ding nghal a. Matt chuan lift-a ka luh thleng chuan min thlir reng tih ka hria, nuam ka ti riau min care vel dan hi.

Ke a kal tam ka mamawh tih hriain aparment chu ke in ka thleng zak a. Khawiahmah peng khawtlai hman pawh ka ni lo, zanin atan inbuatsaih ka ngai tlat. Lunch pawh ka ei hman ta miah lo kha a nia, Donald-a siam ka ei tawh mai ang chu.

Cheese sandwich leh bawnghnute chu tray ah dahin balcony lama dawhkan inhûngah chuan ka chawi phei a, ka thawmhnaw thlak lovin ei leh in lam tih hmasak kha ka mamawh miau a. Ka ken phei zawng chu ka ei zo vek a, Matt chu a hma berah dar thum hmain a lo haw ka ring lo. Hun thawl tak ka nei tihna, Ka pindanah chhoin uluk zetin ka inbuala, bathrobe hain ka sam chu towel chuan ka tuam hlan a.

Wardrobe chu hawngin zanina ka hâk tur thawmhnaw thlan chhuah nghal ka tum bawk a. Ah, wardrobe-a ka thawmhnaw dah pakhatmah a awm lo, drawer chu hawng lehin ka under wear vel pawh hmuh tur a awm lo reng reng, mangang zet hian ka thaw chhuak halh a, enge thil awm zia ni ta!?

Hmanhmawh zetin bathrobe nen chuan pindan chu ka chhuahsan a, Khawnge Donald pawh hi a awm tehhrep le!

"Donald" Vin fé hian ka ko tuarh a.

"Yes, buaina i nei mi Miss?" Choka lam ațang chuan a rawn chhuak a.

"Khaw'nge ka thawmhnaw zawng zawng hi a awm, tunge dah sawn?" Ka thinrim țun mai, ka phalna la hmasa lo a ka thawmhnaw an khawih tur ka ngaihtuah ringawt pawh hian ka thinrim hluah hluah. Ka mimal thil lutuk under wear zawng zawng midangin an khawih hi ka duh lo bur.

"Sorry, a pindana sawn vek turin Sir, khan min hrilh a ni" Donald chu a nui sawng lehnghal a!

"Engmaw i sawi!? Ka ti tuarh a.

"Sir,in a pindan lama dah vek turin thu min pe ka ti anih chu.. Miss, tih dikloh ka nei em ni!? A la ti tak deuh deuh a. Chhang tawh lovin Matthew pindan lam pan chuan thinrim zetin ka chho leh a.

Matthew tehreng pawh chu min hrilh láwk lo in engtin nge atih theih? A pindanah chuan lutin a thawmhnaw dahna wardrobe chu ka pawt a, alo la inkalh vek zui. Hreptak hian!

Ka hawi kuala khum sir dinglama thawmhnaw dahna tura siam niawm tak wardrobe lian zet chu ka hmu ta a, pan vatin ka hawnga ka thawmhnaw, inkhai fel țhap ka hmuh chuan rang zetin ka phihthla hmawk hmawk a Matthew khumah chuan ka vawm phei zel a, ka thinrin bawk nen ka che buan buan a ni ber mai.

"Hazel...Engthil nge i tih a?" ram hmak a ti ri ka hriat chuan ka inher vat a. Matt chu pindana rawn lutin khuma ka thawmhnaw invawm khawm thûr chu mak tih hmel zet hian a en a!

©<++++[BeckirafARenthlei]++++>®

                  Chapter-14

Room chhungah chuan Matthew chu necktie phelh mawlh mawlh pah chuan a ding run a. Ka chétdan chu mak a ti hle tih a hriat mai. A khum lam chu a en deuh ngar a, a thinrim nge alawm tih pawh a hmelah chuan a hriat theih loh.

"Eng thil tehhrep nge maw ni...?" Matt âw ah chuan lungawi lohna ri a tel. Min biakna chu hre lo derin khuma ka thawmhnaw chu lain ka pawm țûn a, kawngkhar lam pan chuan ka kal a.

"Ka biak che hi Hazel, khang thawmhnaw te kha khaw'nge dah leh i tum?" Min biakna chu ngaipawimawh duh lovin "I va rawn haw hma ve" ka ti hmak a.

"Hma lo, a hun chiah zawk niin a lang. I thiltih tum hi i sawifiah dawn lawm ni?" tiin min rawn dinchilh a. Ka kawr pawm bawr lûk chu enin mitmeng chang zet hian min melh leh a.

Kawngka bulah chuan inpawm bawr țeuh chung chuan ka ding ran a, ka țawngchhuak leh a nih chuan ka thinrimna hi ka thup thei dawn si lova, kawngkhar chu ka hawn mai theih loh avangin ka ding mai chauh kha a nia.

"Dah lêt leh rawh, he pindan hi kan ințawm tawh dawn" thinrim insum zet hian a ti hmuk a.

"Ka phalna la hmasa lo leh min hrilh láwk lo in engtin nge i tih theih zawk?" ka ti ve hmak a.

"A hranga riah fo ka duh tawh lo alawm, kan innei thuai tawh dawn a, ka pindanah hian i thawmhnaw a awm loh chuan i pindan i pan leh zel sia."  Naupang chhia zet hian ati leh a.

"Chupawh ni se min hrilh hmasa thei alawm, kan la innei lova ka pindan pangai ka luah rih ang"

"Hazel, tihmawh viau lo teh i thawmhnaw kha va khai țha leh rawh" dawhtheihna tlachham tawh tih hriat tak hian a țawng a.

"I zin daih dawn tho a, i pindan ka țawmpui che a țulna ka hre lo. Ka mimal thil lutuk midangin an khawih hi ka duh lo" ka ti lui țalh a.

"I remtih ka ring tho a, surprise che ka tum vangin ka hrilh hmasa lo che a nih kha"

"Ka remti lovah ngai mai rawh, kan mudun fo tho nain pindan ințawm a țulna ka hre lo. Ka thinlung hian dik lo a hriatna a nei tlat" ka ti zel a, mudunin inpawh takin awm mahila kan innei a nih si loh chuan thil tih chi-ah ka ngai thei meuh lo.

"A chang hi chuan i la thianghlimzia leh rilru hmanlai zet i nei tih hi ka lo theihnghilh leh țhin a ni" nui suk chung hian a ti a.

 hi ka inti hliah hliah a, Matt bulah chuan ka awm tho naa mahse, chu chuan a khum țawmpui ka tum tihna a ni lo.

"Tunah chuan ka pindan lamah ka kal tawh ange, ka thawmhnaw hi remfel leh vek angai dawn a, ka chhuah theih nan kawngkhar hi lo hawng la"

"I luhlul ve ngawt mai Hazel, min hnial ang tih lo rin ve tur a nia. Mahse, kan inkâr thilthlengte avang khan ka pindan min țawmpui chu thil awm lo pawh a ni lo tih chu i hriat tho ka ring" Matt chuan a ti a.

Kawngkhar chu min hawnsakin khuma ka thawmhnaw lâk bang zawng pawh chu amah chuan rawn keng ve-in ka pindan lamah kan inzui phei dun ta a.

"A la hma tho a, i intifai sa tawh tho bawk nen i thawmhnaw hi kan remfel law law dawn a mi?" Matt chuan nui var var chung hian ati a.

"Maw!" Makti deuh hian Matt chu ka en a. Ani hian ka thawmhnaw min remfel pui atum ania, ka awih hlawl lo!

"Dik lohna a awm a mi, nge Donald ka tir leh zawk dawn?"

"Teuh lo" ka țeu nghal hlar a.

"I tih ka ring reng a. Le, hmanhmawh ang kal chhuahna tur kan nei kha" tiin wardrobe chu hawngin thawmhnaw chu a khai fel zung zung a. He pa chét dan mak sak zet hi a lawmawm ru riau!

Matt awmdan hi adanglam sâwt viauin ka hria, ka thinrim pawh reilote-ah min bengdai zel thei a. A laka zêp ka nei hian ka rilru a tibuai  hle a ni.

Ka thawmhnaw kan dahfel zawh meuh chuan a tlai ruih tawh a, Matt chuan insiam turin min chhuahsan tawh a, keipawh muangchang lova ka insiam thuai angai tih ka hria.

Dressing table hmaah țhuin ka hmai ka chei hmasa ber a, nidanga ka tih ngai loh ang in make-up ka hmangtam deuh hlek a. Ka sam pawh sang vah hian ka bâwk khawm a, clip chuan ka kilh leh thlap a, ka bek lam sam tlemte chu ka ti uai thla ve ve bawk. Ka kawr hâk tur dahchhuah sa leh a milpui tur phekhawk sang leh purse  chu ka en vang vang a, hetiang huna hâk tur thawmhnaw hi ka ngah lo hle tih ka hria, bazar kal ka peih loh vangin ka neih zinga țha ber ka thlang ve chu a nia.

Ka kawrfual pawl chu hain a nghawng chu a zau angreng hle a, a hma  'embroydary' a chei chuan ati lang nalh hle tih ka hria, ka âwmbawr chu a lang phir deuh țhaih bawk a, ka kawr chu khup thleng awrh chauha fual a ni. Pheikhawk chu bunin 'pearl' bengbeh ka beh nghal bawk a, ka sana bun lai chu hlipin, a aiah 'pearl' tho ka bengbeh nena inchawih tak 'bracelet' ka bun leh hnu chuan darthlalang hmaah chuan dingin ka inthlêk leh ngial a.

"Wow..! Kawr nalh tak a nih kha" Matt âw lo chhuahna lam chu ka en vat a. A landan chuan thaw a tichham hial dawn a lawm le. Kawr ha lo hian awmin a áwmpharh dap mai te chu ka hmuh hmaih lo, ka taksa landan chu a thlir kual dan dan a, phûr hmel tak hian a meng de sar a. Kan mit chu a intawk chat a.

"Dinner ei lam chu kan theihnghilh mai dawn em ni?" Matt chuan a ti thum chhak a. Ka lamah chuan lo pheiin, a thil tum chu a chiang hle a.

"Hmanhmawh taka i insiam ve vat vat loh chuan kan tlai dawn a nia" ka lo ti vat a, kal sawn san ka tum chuan Matt chuan ka kutah min chelh bet ta tlat a.

"I tidik ang, ka zinna tur chungchangah kan inbe laklawh lutuk a, ka insiam lawk ta lo a ni. Hazel darling, whiskey leh soda kha min lo thlit sak ta che, zanin chu ka mamawh dawna hriatna ka nei tlat" Matt chuan a ti a.

"Motor i khalh dawn sia, nge bike kan keng dawn zawk?" Ka ti a.

"Khatiang thawmhnaw nen kha chuan bike chu khalh lul lo e darling, driver ka nei reng alawm ka mamawh huna koh mai theih tur, haw lam chu taxi-in kan haw leh mai anga, driver innghahtir reng kha ka duh lo deuh a"

"Bike khalh tumna ka nei lo, i lo ngaihtuah a nih chuan" ka ti hmak a.

"Tum pawh ni la zaninah chuan ka remti lo sa hrim hrim, ka pindanah rawn keng mai rawh aw intur chu" tiin min vawnna chu thlahin a chhuak nghal daih a.

Intithu lutuk mai!

Whiskey no keng va va chungin Matt pindanah chuan ka lut phei a. Ka thawm hriain Matt chu dinner jacket ha mek chung hian a lo hawi chhuak a.

"Ka lawm e, Hazel" tiin no chu a lo la nghal a. Matt chu a lang nalh tak zet a ni, engtik lai mai pawhin ka mitah chuan a nalh țhin. Mahse, tuna a suit hâk chuan a tilang 'pa' in mi a híp hliah hliah a, nidang zawng aiin a nalh a ni. Whiskey a in lai te chu ka en reng a, ka duhthusam lohna lai hmuh tur a awm lo.

A țha chiang a ni!

"Min en reng dawn nge kan kal dawn?" Matt chuan min fiam zauh a.

Ka zak lutuk chu ka sen vek theiin ka hria, ka en tih hre lo awm tak khan a lang vel a, Matthew mai mai chuh!

Kan kalna tur hotel kan va thlen chuan car a din veleh 'doorman' hian kawngkhar chu a lo hawng sawk sawk a. Ka zam hle mai, chu chu duh lovin thaw ka la ham ham a. Car ațang chuan chhuakin pen pawh ka la pen hma chuan Matt chu ka bulah a lo ding reng tawh a. Ka bânah kaiin hotel chhung lam chu min panpui ta a.

Hotel thim deuh ruaia kan han lut chu ka mit a vai ram ram a, tlema ka pai deuh dat chu Matt chuan min lo kuah nghet sauh a.

"Whiskey kha i lo in ve deuh em ni?" a lo ti hluk a. Nuihzat hmel tak hian min melh ralh a. A nui hmel chuan min ti tuiral thei dawn alawm le..Huh, ka thil ngaihtuah mai mai chu!

"Teuh lo mai, ka in lo hrim hrim" uar zet hian ka ti a.

"A țhat chu..." tih pahin min hmer nghet sauh a, "Le, zanin hi nuam taka nangnen hman ka duh a ni" tiin kan piah lam chu a va melh ta daih a. Matt enna lam chu ka en phei ve a, ka thil hmuh chu mak ti tak hian ka en ta reng mai a.

Feet sawmhnih vel zet a hla ah hian Kelly Benison chu a lo awm ve niin,  ani hi a tel ve a nih chuan kan boruak tur chu ka hrethiam mai.

"Saw hmeichhia saw ka vau zam tawhah ka inngai a sin le!" Matt chuan a ti ram hmak a. Min kuahna chu dahthlak sakin "A la zam chiah lo chu a nih saw!" ka ti ve salh a. Zanin kher hi chuan ka hmuh duh loh ber te zing a mi a ni Kelly Benison hi...

Matt chuan ka mitah tak chuan enin "I thik a nih ka ring" dam thluam hian a ti a, lawm hmel te chu a la pu lehnghal zawkin ka hria. Engahmah ngai lo niawm tak hian ka koki ka san âk a, Matt chu ka melh ve kar a, ka inthunun ve tlat.

"Ka tan thik kher angai em ni?" zang vah hian ka lo ti a.

"Ngai nang, ka tan hmeichhe awmchhun i ni a lawm darling. Bakah ka kalsan tawhah ka kir ngai lo" inringtawk tak hian a ti leh a.

Ka thik ve chiang alawm Matthew apartment chahbi kawl pha ve ngat kha a nia. Mahse, tihlan ka tum lo bur.

"Inring rawh le! Hei an lo thleng țep a nia" tiin Matt chuan ka kawngah a kuah a.

"I secretay thinram ve tak kha i rawn hruai ka ring reng a Matt darling" Kelly âwki sang vah chu ka lo ngei hle a.

"I ring dik a nih chu, ka hruai tur dik tak ka hruai chu i lawm chiah nange?" Matt chuan a ti lêt hmak a.

Kei erawh chuan Kelly inchei dan uchuak zet chu ka en reng thung a. Kawr sen hlar hain a taksa phuar țang mai a ni a, a kawrâwm zau zet chu zahpui lo tih hriat deuh hian a hawi sâng larh a, model nalh tak a ni tih erawh chu dâwt a ni hauh lo. A pian fuh thlarh chu mipa tan chuan itawm tak tur a ni. Pheikhawk sang zet bunin a kawrfual sir chu thui fahran hian a kak ve ve bawk a, a mal zén thlarh chu a lang thui mah mah bawk, chu erawh chu hre lo ang hmiahin a lang thung.

Kelly pawh ngaihsak chhunzawm lovin Matt chuan ka kawngah kuahin dinning room lam chu min panpui ta daih a. Hotel neitupa chuan Matt chu a țhianhlui ang mai hian a be bawrh bawrh a, kan dawhkan tur lamah chuan waiter chuan min hruai ta a.

Champagne țha ber chi chahin Matt chuan ka ei duh zawng min zawt thlap. Kan dawhkan chu lui lam sa leh thei tharlam tak tak hian a khat dul a, khawmual lam sa pawh a awm nual tho. Waiter chu champagne bur keng chuan a rawn kal a, kan no chu min chhun khahsak a.

Matt chuan a no chu chawikangin ka no ken lai chu a rawn khak zauhva. Eitur lam chu kan ei țan ta a. A tui hlawm hle a, ka duhzawng deuh vek anni hlawm. Salad an rawn chhawp chu eitumin ka suak a, cream an telh rim chuan ka pum a ti no tlat luak lo turin ka insum țang țang a. Ka plate chu nawrsawnin fian chu ka dahthla a, tui vawt an chhawp chu ka in ta khawlh khawlh a.

"Eng tizia nge..?" Matt chuan a lo ti vat a. Min ngaihtuah hmel tak hian "Salad kha i duhzawng chi a ni lo em ni?" tiin min en deuh reng a. Matthew hi chu a fing lutuk mah mah a ni. Ka inthup viau chung paw'n ka awmdan danglam a hre chat thei a nia.

"Ni lo e, ka ei hnem tawhin ka puar tawh hle a ni" ka ti ve zaih a.

"I ti tak tak maw?" Matt chuan a la ti fan a, ka khabea dawmin alam hawi tur chuan min kuai a. "I hah bawk sia, i dam țha lo tih ka lo theihnghilh palh a ni" zawi sap hian a ti a, ka ir no lai chu a chul dan dan a. Min khawihna chuan ka marphu a tirang sauh a ni tih hriain a ner deuh sak a.

"I duh chuan kan haw thei reng a nia, zan mut hma kan tan a țha tho a" dam thluam hian a ti a.

"A ngai chuang lo, ka țha e" tiin ka nui lui sâng a.

Waiter lo kal hnenah chuan "Louge lamah coffee chu kan lo in ve thung ange" Matt chuan a ti ta a.

Sofa dup nuam tak chungah hian Matt bul chiahah chuan ka țhu a. Matt chuan ka dara kuahin ka taksa chu a chul hauh hauh a, ka hmui hnuailam ka pet deuh fan fan a. Kan hun hman chu zo vat vat se tih duhna ka nei hial mai. Haw erawh Matt a'n a rawt anih loh chuan sawi hmasak ka tum lo.

Waiter-in kan coffee intur dawhkana arawn dah chu la turin ka kun hniam a, ka luak chhuak ut ut chu reh tawh se ka ti kher mai ka coffee pawh in zo lo chuan rest room lama kal ka duh thu Matt chu ka hrilh a.

"Kalpui i ngai em?" a ti a.

"Ngai lo e, ka țha lawm ka rei lovang" tiin ka chhuahsan ta a.

Rest room tukverh inhawng ațanga thli lo thaw chuan min chhemdai sawng sawng a, ka thaw chhuak nghal ham ham a. Ka luak chhuak pawh a reh huai mai thawveng deuh tak hian tukverh lam chu ka hawi a. Mahse, ka thawven chhung chu a rei lo kher mai. Kelly Benison chu lo lut ve-in ngeiawm zet hian a nui sawng a.

Ka purse a lipgloss chu phawrhin darthlalangah chuan ka in en a, ka hmui chu hnawih țhain Kelly awm ve chu hre lo ang mai hian ka awm lui tlat a.

"Matthew i han awh vel dan hi i fing khawp mai, secretary ațangin hmeiah i kaisang a nia" Kelly chuan ngeiawm zetin a ti ta a.

"Matthew ka awh dan a!!?" ka ti nawn ve ngat a, a mit hring nghalh chu no fahran lo hian ka en a.

Kelly chuan "I awk táng rang chat chat khawp mai, hetiang anga rang leh nalh hian ka thiam ve hauh lo ang" ati leh a.

"Nang ang lo takin Matt hian min neih a tum tlat, ka pawm dawn nge dawn lo ka inngaihtuah mek" ka tih chuan a meng phar âwn a. Thinrim zet hian ka bânah rawn chelhin " Dâwt i sawi, nang hian dáwt min hrilh a ni" a ti tuarh a.

"I duh leh Matt zawt la" ka ti ve sak a.

"I nei chuang lo ang, lo ngai reng rawh kan la hria ang chu Hazel Cade chaponu" tiin rest room chu a chhuah san nghawng nghawng a. Ve lutuka, ka hlau chai lo. Matt ka nei emaw nei lo emaw ani kha engatanmah ka ngai lo. Huh... Model manner hre lo zet ka ngaisang lo ve.

Kelly chu zui ve-in Louge ka va thlen chuan Matt chu ka hmu hmasa ber a.

"Kan haw mai dawn em ni? Party chu a rei dawn emai, i chau lutuk ang inlama pumbilh che ka duh zawk" tiin a ding chhuak a.  Hotel neitupa Mr.Leo kan mangțha hnu chuan hotel chu ka enkual thuak a, kan chezia rum fahrana min lo entu Kelly chu engahmah ngai lo tih hriat deuh hian ka ner khum sak a, hotel chu kan chhuahsan ta a.

Kal lamah Matthew driver khan min dah a, haw lam erawh chu taxi-ah kan chuang thung. Taxi chhungah chuan a hnung seat ngheng ur ur chung hian Matt chuan kan kal duhna hmun chu a hrilh a.

Matthew-a taksa lum thar thar leh rimtui tak chuan Kelly vanga ka insangmar țunna kha min theihghilh tir daih a. Matt lah chuan ngunthlúk fahran hian min en reng a, ka ke lang lai te chu a en ngun hle lehnghal. Ka awm nuam lo hmel chu a hmu a ni ngei ang.

"I zakzum ve ngawt mai, i luhlul tehreng nen" a ti sup a, a nui deuh bawk a.

"Luhlul min ti ziah suh, ka zakzum lo e a.." ka chhang rang mah mah.

Thaw halh chung hian car seat hnung chu ka ngheng ve a, Matt chuan ka darah lo khawihin ka nghawng hnunglam chu min tuai sak hauh hauh a. Matt hi ka nei lo a nih chuan tu mipa mah hi ka nei leh dawn tawh lo tih ka inhrechiang hle a ni. Hmangaihna hi chuan min lo ti â thei tak tak a nih dawn hi!

Apartment kan thlen chuan kawngkhar chu hawngin min luh hmasaktir a, kawngka chu kharin Matt chuan "Hazel, no kan dawm leh dawn nge mut nghal i duh zawk? tiin min rawn zawt a.

"Coke ka lo in ang" ngaihtuah chiang mang lo chuan ka ti ve tawp.

Hall dawhkanah ka purse chu dahin ka pheikhawk chu ka phelh a, Matt a'n intur dahna lam a pan lai chu ka thlir pah reng a. Coke chu tlemte no khatah a thli a, no pakhat dangah tam tawk a thli bawk a. No pahnih kengin ka lam a rawn pan a, coke tlemna zawk chu min la pe zui a. Phakar reuh mang e...!

"Hazel, ka lakah hian thup i nei tiraw? Ka hriat țhin Hazel kha nitin a bo telh telhin ka hria" Matt chuan a ti sap a.

"Engmah chutianga thup ka nei lo" ka ti vat a. Enge maw a hriat le, naute chungchang hi a hre ru emawni le...Mahse, ka ring chiah si lo.

"Rest room-a Kelly thil sawi kha ka hre vek, i chhan dan pawh kha" nui suk hian a ti a.

"Maw! Min lo zui ru a maw!?" thinrim deuh hian ka ti a. Lalpa leh...

"Thinrimna tur a awm lo, ka ngaihtuah vang chea lo zui che ka nia lawm, in țawng ngaithla tur ni lovin" a ti dam thlap a. Chu chuan ka thinrimna a ti zual zawk, mi thusawi ngaihthlak ruk te chu a!

"A lo nih hlawm tak chu, min zui tur khan i lo tir a ni hial lo maw!?" ka ti hmak a.

"Hazel..." Matt chuan vin zet hian a ti tuarh a.

Cho âr hian ka lo en let ve kalh a "Bengngawng ka ni lo aw. Kelly ka chhan lêt danah khan i lung a awi em?"

"Kelly kha zui tur chein ka tirh i ring a maw! Hreptak che hian" a ti hrawk a.

"Ka lo lêt leh pawhin kan inbiakna hre lo ang hmak leh min zui lo niawm ang takin i lang țalh a nih kha" thinrim zet hian ka ti ve zel a. "Nangni pahnih hi chu in inthlah thei tak tak chuang lo ang, ka lo inthiarfihlim ange aparment chahbi kawltu zawk nge nge" ka ti leh deuh kher a.

Chutah Matt chu thinrim lutuk zet hian ka bulah lo dingin a kut dinglam chuan ka biangah na zetin min beng ta chawrh a, a thip nghal țhawt mai.

Makti lutuk leh âng deuh pam hian Matt chu ka en a, ka mittui chu a a luang chhuak nghal zawih a.

"Hazel..." Thám deuh țuak hian Matt chu țawng chhuakin min benna kut chu dahthla riai riaiin min en ta tlawk tlawk a...

©<++++[BeckirafARenthlei]++++>®
                      Chapter-15         

Matthew min benna vanga ka biang sa hat hat chu ka kut chuan khawihin ka dawm deuh vang vang a. Țap lo tur chuan ka insum țang țang a, min ti mualpho tura ka mittui chu tihtlak ka duh hauh lo. Matthew hmelah chuan inchhirna, pawitihna leh mak tihna te a lang dawt zut a. Ka pindan pan tura ka inher chu ka bânah nghet zet hian Matt chuan a rawn vuan a.

"Pawi ka ti lutuk Hazel" a ti sup a.

"Sawi tur kan nei tawh lo niin ka hria, a tawp vek tawh" ka âw chu a zawi hle mai.

"Ni lo, a tam lutuk zawk khawngaihin min ngaidam rawh" Matt țawng chhuak pawh a zawi ve tho.

"Ni lo e Matt, zanin atan chuan engmah sawi ka duh lo. Ka pindan lamah ka kal tawh ange"

"I la naupangin thil i la run thei hle a, ka tihnat che avangin khawngaihin min hrethiam dawn nia. Ka tih loh tawp tur ka ti a ni" Matt chuan zawite bawk hian a ti leh a. Min vawnna chu thlahin "Kal rawh le, i pindanah chuan ka tibuai lo ang che" a ti leh a.

Ka pindanah lutin ka thawmhnaw ka thlak a, khumah chuan ka lawn nghal a, puan chu sinin mutthilh tum hian ka mit ka chhing tlat a. Matthew khan engvanga kut min thlak nge a nih? Ka thiam lo zawk a ni. Zanin khan min duatna leh ngaihsakna ati lang reng a, kei min kalsanin Kelly a pan hek lo, ka thiam lo der a ni. Matthew mitmenga natna leh tawrhna kha ka hmuh hmaih thei tlat lo ngaihdam dil zawk tur ka ni.

Khum ațang chuan tho thutin Matthew ka biak ngei angai. 'Hazel, inthunun rawh hetiang mi i nih ngai loh kha' tiin ka phun sap a. Tun hmaa mahni inthunun thei tak leh țawng tam lem lo kha tunah chuan ka nihdan hloh țhakin ka khawsa ta chu a nia. Ka naupai vang hi nge pawh ka hre tawh lo! Naute chungchang hi ka hrilh ngei tur a ni.

Hall ka thlen thlak chuan Matthew chu sofa-ah țhu thluangduai chung hian intur alo dawm a. Min hmuh chuan makti hmel a pu deuh!

"Matt, thil hrilh tur che ka nei" zam zet chuan ka ti sap a.

"Zaninah chuan ni lo e Hazel, ka duhtawk rih e. I pindanah chho leh rawh" a ti hmuk a. Rui hmel a pu si lo a, a țawng duh dan chu a mak kher mai!

"Thawmhnaw inbel lamte hi engtinnge niang?" tiin ka ruangam chu ngun deuh hian a thlek vang vang a. Chutah ka landan tur awm chu ka hrechhuak thut a. Ka sam dum hlap chu a hnawk niaih a, ka mutkawr bahna lah chu ka darah chuan a tla thla deuh lehnghal. Ka âwmbawr chu a lang deuh ruai ang tih ka hria, zahthlak zawk hian!

"Er...ka.... ka lo inthlak hman tawh a" ka ti ta ringawt a. Ngeiawm zeta țhen sak chung hian "Ka lo hmu a lawm" a ti leh mai a, a mizia inthlak thut chuan ka awm a ti nuam der lo.

"Matt, nichina ka țawngkhum dan che kha pawi ka ti khawp mai"

"Pawiti tur chu i nia lawm, ka nunah nang lo tumah an awm lo ka ti chungin ka thusawi i ngaipawimawh duh lo a. Ka kham tawk tawh viau e" zawi sup hian a ti a, a no a intur la bang zawng chu a tlak zui nghal pawp a.

"Ni lo Matt, chutiang a ni lo ka inthunun hman lo atin ni"

A mitmenga huatna lang chhuak chung hian "Zanin tlai khan ka bulah țhu a, midang reng reng ngaihsak lova kei chauh min ngaihven tur i ni. Chutiang ni lovin Kelly chungchangah i buai a, ka sawifiahna i ngaithla duh lo a, inbiak duh lo tu zawk kha kei ni lovin Hazel, nangmah i ni" kha fak hian a ti leh a.

"Ka tumdan...." ka sawi zo hman lo. Matt chu thinrim zet hian a rawn țawng leh a. "Sawi buai thui lo zawk mai rawh! Min huatna hi ka hmuh hmaih lo, i buaina neih hi ngaihtuahin i thin tertek chhuak fo țhin kha chu bengdai ve deuh țhin la chuan a țha khawp ang. I chetdan a puitling lo țhin hle a ni" a ti duah a.

"Chutiang kawngah chuan min hau thei bik lo ang. 'Gentleman' zawng i ni bik lo alawm, mi thusawi ngaihthlak kha a fair lo" thinur tak hian ka ti let ve a.

"Nih pawh ka tum chhin ngai lo reng a ni Hazel, i pindan ațanga rawn chhuak a, sawitur pawimawh nei i nih chuan tun hi sawi hun a ni" a ti hmak a.

"Ka rai, nau ka pai" ka inrin hmain ka țawng chhuak phawng a. Matt chuan makti hmel a pu miah lo.

"Ka hria, i lakah hian ka lawm lo hle bawk" Matt chuan a ti nghat a. Lalpa leh! Enge thil awmzia hi! Matt hian engkim a hre vek a maw!

"Mahse, engtin? I sawi awmzia ka hre lo" Ka lam pana Matt lo phei chu hlauin ka tawlhhnung hrat hrat a.

"Mi â angah min ngai em ni Hazel? I danglamna hi ka hmuhhmaih reng reng lo, i luhai te thil i ei tam ta thut leh luakchhuak reng te, inthunun thei tak ni țhin ho te a thinrim thut i ching ta hi engdang vak turah ka lo ngai hleinem" ati leh a. Ka bul maiah lo ding tawhin ka mitah chiang zet hian min en a.

"I lo hre vek  a maw!?" Mak ka ti lutuk hi ka â thei takngial dawn. Engmah hre lo ang te'n a awm der vel a.

"Hre vek bik lo e, ka ringhlel mai chauh che a ni. Nangmah entu doctor ka phone khan ka chiang ngam chauh, min hrilh hun hi ka nghak mai a ni. Ka fa a ni tih ka chiang ang bawk hian i chiangin ka hria, invenna kan hmang lo ve ve bawk a. I tan a hmasa ber ka ni tih ka hria" ngeiawm lek lek hian a ti a.

"Tenawm pa" tiin ka au țhat a.

"Tenawm chu kei ni loin nangmah zawk i ni, Gary Seymour i la pan zui... Ka that lo che hi lawm hle rawh" Matt țawng chu a hlauhawmin a hriam țha hle, a thinrim insum zet hian a thaw hawk bawk a.

Ka darah chuan vuanin min sawi deuh nawk a. Ka lo tal ve phat chuan a thin tirim zualin ka samah chuan a țham a, a kut lehlam chuan ka banrekah a hmer bawk a. Min vawnna chu a nghet em em lehnghal. Ka kut chu hnung lamah chuan min dahsakin a taksa si chet chuan min pawt hnai leh ta a.

"Min thlah rawh!" a bak chu ka sawi thei lo. A hmui chuan mi thunun tum tih hriat tak hian min rawn fawp a.

"Ni lo, ka duh lo Matt" tiin a hmui chhanah chuan ka lo ngen țáwk țáwk a. Mahse, Matt chuan ka heh chu nawr kauvin min fawp lui zel tho a. Ka bân a vawnna chu talpit tumin theih tawp ka chhuah ve bawk a, min vawnna chu a nghet tawlh tawlh thung.

Hlauhna leh thinurna, chi-aina chuan ka khat vek a. Talin awmzia a neih si loh avang chuan ka dawh ta tawp a. Min fawh chu thlahin ka mutkawr chhanah chuan a hmui chuan ka âwmbawr chu lo siin a thaw hawk a.

"Bra pawh i ha nange Hazel,?"a ti sap a. Lo chhanna hun pawh ka nei lo, ka hmuiah chuan fawp lehin a fawp uar tulh tulh a, ka thinrim tihngaihna hre lo chuan a hmuiah chuan ka seh sak ta a. Matt chuan min thlah thut a, ka pai deuh dat bawk.

"Engthil nge i tih hi, kawlh lutuk!" ti supin ka bânah chuan vuanin a pindan lam chu min panpui ta dawr dawr a. A buaithlak ta ber chu Matt hian min hrechiang lutuk tawh mah mah hi a ni. Inven dan tur pawh ka hre tawh lo.

"Hazel," tiin Matt chuan ka lo tal ve chhen chu ning tih hriat deuh hian min en a. Thinur lutuk hian ka lo en let ve bawk a, tal chhuah phèt ka la tum ve țalh tho a. Chutah Matt chuan min thlahin alamah chuan min kuah hnai salh a. "Ka hmui hi a na khawp mai" tiin a nui suk a.

"I phu tawk a nih kha" ka ti ve hmak.

"Kelly chungchangte kan hun liam tawhte theihnghilhin mu daih ang aw" thlém titih deuh hian min ti a.

Ka thinur kher mai, mut ka la duh hauh lo. Diktak chuan engkim a hre vek chunga hre lo anga a awm der vel kha ka haw hlur zawk a ni. A lo hriat vek vang a nih mai mai hi min lo duat der em em! Whiskey te kha in a lo phal lo vel a, tenawm lutuk! Mahse, duhthlan tur ka nei tlem hle tih ka hria ka hmangaih tih hi a hriat ka duh hauh lo.

"I la naupang hle a Hazel, kum 23 i tling awrh a, kei erawh chu kum 34 ka ni tawh, chhungkaw din ka mamawh ve tawh bawk. Thil engmah hi ila thlir thiam tak tak lo a. Mahse, hun kal zel hian mihring chu thil min zirtir zel a ni" ti deuh duahin ka mitah tak min en a.

Min kuahna ațang chuan talchhuakin "Chutianga naupang chhia ka ni lo, i chhungkaw din turah kei hian tel vena tur ka nei lo" ka ti hmak a.

"Le, a țha e, i thin tertek chhuah leh tak tak hmain lo va mu rawh le. Engmah ka sawi tawh lovang kan innei dawn, kan fa lo piang tur hi nu leh pa kârah a seilian tur a ni" sawi fuh inti zet hian a nui suk lehnghal a.

"Inneih chu mipahnih remtihna tur a ni. Pakhat chauh duhdan ni lovin" ka ti leh hram a.

"In ngaihtuahna hun ka pe reng che alawm, nangma hma chauh thlir lovin kan fa lo piang tur kha thlir tel bawk la. Inmehfai a, shower a inbual fai phawt ka duh a, ka rei lovang" a tizui zat a, a thawmhnaw a phelh nghal mawlh mawlh bawk.

Ka va en chuan saruak deuh thawin a lo ding a, ka hawi sawn ta thuai a. Matthew taksa chu nisa em țhan tih hriat takin a sen uk kharh a, a darpharh hlai țha takte a taksa tisa chuangtlai hmuhtur awm hauh lo chu a nalh thlâwt a ni.

Ka lamah chuan rawn pen pheiin "I zak alaw, ahma pawhin saruaka ka awm te chu i hmuh tawh tho kha" nuihza zet hian a ti a, a nui pah hawk hawk a.

"Ni chiah e, kei leh hmeichhe dang chhiarsen loh ten an hmu tawh che tih ka hria a lawm" ka kal pel thuak a.

Matt chuan ka kutah nghet fahran hian lo man betin "Engthil nge i ngaihtuah leh tak Hazel, thikthu chhiat i inhmeh lo" la nui reng chung hian a ti a.

"Eng thil mah! Mahse, saw khum kherah sawn i bulah ka mu tawh dawn lo" ka ti ve hmiah a. "Saw khum Kelly leh hmeichhe dang nen in mut fo tawhnaah sawn, hmeichhe dang nena chhiar tel tura saw khum saw luah ka tum lo" thinrim fahran hian ka ti leh a.

"Pathian hmingin Hazel, enge maw i hriat le? Khum a ni ve satliah ringawt engmah a bak a awm lo"

"Ni chiang e, khum a ni tih chu ka hmu ve reng. Mahse, nang ve thung erawh chuan saw khumah sawn i hriat sen loh tur i mutpui tawh a, chu chu ka duh dan a ni ve lo" ka tih chuan thinrim meng dur deuh khup hian min melh a, a induh tâwk vena leh chapona ka tih chhiatsak mek tih ka hria, a nuam ru riau!

"I hma i sial deuh lo maw Hazel," Matt chuan a ti deuh hmuk a, min vawnna chu a thlah ta a. " I sawi ang em emin hmeichhia chu ka kawp hnem lovin ka hria, ka chhiar seng tlat" ti lehin a bân a vai thuak a.

"Ka ngaihven peih tawh lo e a, ka mu nguar ang i khumah sawn" uar zetin ka ti leh a.

"Hmeichhia zawng zawng hi an rai hian nangmah ang hian an awm vek emawni  le..." tih zawm lehin a thaw hawk a.

"Ka hre hauh lo, min neih tum kher lo mai rawh Matt"

"Dik tak chuan maw Hazel, nang chuan tlang takin i nihna ang ang i tilang a, ka duh chhan che zinga pakhat a ni" min thlem titih hian a ti ta a.

Ka thu hriat chu leh, he pa min han hmusit dan em em hi experience ka neih loh vang mai a! "Kei te chu hnathawk țhang ka ni a, tumah rinchhan lovin keimahin ka in enkawl thei, model ka nih loh hi" ka ti hmak a. Engang pawhin ka rilru na dawn mahse ka rilru puthmang diktak hi phawrh a hrilh hriat kher ka tum lo.

"Á viau teh suh, model ai chuan mahni ke a ding ngat, luhlul leh tumruh zet, 'confi' lutuk kha ka thlang zawk. Model nun leh i nun hi chu khaikhin chi a ni lo, a inthianghlim hleih lutuk" Matt chuan nui suk hian a ti a.

"A nih chu" a bak chhan dan tur ka hre lo.

"Ka sawi awmzia chu hmeichhe pakhat zawk chu hmei tlàk lek a ni a, nang ve thung chu mipa te'n nupuia an neih duh tur ang chi i ni a lawm, darling" a ti ta a. Mipa hmangaihna hrethiam miah lo lakah hmangaihna ka hlan chu a ni si a!

"Ka thusawi kha i hriatthiam tak tak pawh ka ring lo. Ngaihdan dang i nei leh tho ang" tiin ka bulah a lo kal a, ka kawngah chuan kuahin a taksa lum ham ham hnaih thei ang ber chuan min pawt  a.

"Neih ka tumna chhan che chu naute vangte leh ka mamawh ngawih ngawih vang che a ni. Hmeichhe dang lakah hetiang hian ka awm ngai reng reng lo. Chutah nang pawhin kei ang chiah rilru i lo pu ve tih ka hriat vangin ka lawm hle bawk" thám deuh țuak hian a ti ta a. Matt chuan ka nghawng velah chuan rawn fawp thuakin "Mu tawh ang aw" tiin min sawm a.

Ka theih ang tawk hian ka kut chu hum ruhin Matt chu ka chum ta pawp pawp a. Min kuahna chu thlahin "Enge khatia min tih leh tak vak a, sawi dik loh ka nei mi? Duhtawk teh" Matt chuan tiin ka chèt dan chu mak a tih hmel hle a.

"Saw khumah sawn ka mu duh lo ka tih chu, i thusawi fahrah zet zet khan min hneh tum suh Matthew" ka ti tuarh a.

"A tawk e! Zanin chu i pindanah mu phawt mai rawh i tih theih hlawl loh chu a nih hi. Ka dawhtheihna fiah tum suh, i naupai vangah ka puh sak hram ang che" tiin bathroom-ah a lut zui daih a.

Ka pindan lamah chuan ka phei ve ta a, ka chau tak zet a ni. Mahse, ka naupai vang hian min neih a tum tih ka hriatna hian min tina lo thei lo a ni. Ka nunphung ka hloh vek tawh a, engtikahmah ka nei lêtin ka ring tawh lo. Tun maia ka awmdan te kha a mawi lo tih ka hria, ka inthunun thei tlat si lo. Matthew kiangah hi chuan ka no tlat zel a ni.

Khumah chuan muhil thei mai lo hian ka let sek a. Dik tak chuan Matt bula ka mut loh chuan khum te chu ruak huai hian ka hre tlat a. Mahse, a khum ka țawmpuiin ka na zel si.

Ka zing tho chu intihfai leh thawmhnaw inbel nan darkar chanve dawn hun ka hmang a, ka taksa chau lutuk leh ka zan mu tlem lutuk hian min nghawng zel chu nih hi. Chokaah chuan lutin bawnghnute leh chhang chu ka ei țàn țàn a, Matt chu alo lut ve bawk a Donald chu a be zawm zat a.

"Ka room a mi tur khum thar ka order a, an rawn dah hun tur phone-in an rawn sawi ang i lo ngaihven dawn nia" tiin Donald chu a mimei zauh a, ka hmu hman tho.

"Breakfast eitur paw'n min nghak hleithei lo chu a ni maw duhtak, puar tak khan ei la ei kèp tur i neih kha theihnghilh suh aw" Matt chuan ti-el deuh tak hian a ti a.

"Ka nghak ta lo mai che ni e, keimah ai chuan ka pum chhung a mi hi a rilțam zawk a, i hrethiam mai niang chu" ka ti salh a. A nui suk

"I lei li hi chu a hriam țha ve a ni ti raw!?" tiin chhang chu a țhial țawlh țawlh a mango juice chu a in leh zauh zauh bawk a chezia hi ka lo en leh reng zel.

"Airport thleng min thlah chu ka phût lo mai ang, office-ah i ban tur thu ka lo hriattir dawn nia. Secretary tur ka nei dawn ta lo a ni, ka assistant kha training vawiinah lo neihpui la, a bâk chu i tan office kal a ngai tawh lovang" Matt chuan inringtawk zetin a ti a.

"I rualin office chu ka kal lo ang tiraw?"  ka tih chuan "Kal lo e, airport-ah ka tlang nghal ang. Nangmahin i kal dawn nia, i duh leh driver pawh i hruaithei tho a" tiin a ding hluai a.

"Ke-in ka kal mai ang" tiin apple pakhat chu lain ka tho ve nghal a.

"America ka thlen hunah ka rawn phone ang che, biak theih turin lo awm la, cham rei loh ka tum dawn nia" a ti a.

"Awle boss"

"I duh chuan bazar nan hun i hmang dawn nia, bike erawh khalh phalsak i ni lo aw duhtak" tiin dawhkanah chuan credit card a dah a, a chhuak zui nghal daih a.

Insiam nan hun ka hmang rei lo hle a, office kal pawh chu ka peih lo hle mai, hall ka thlen thlak chuan Matt chu a lo ding reng a, a kal daih tawh turah ka ngai a. Mak ti zet hian ka en a.

"Min hmu leh chu i lawm vak nange?" a lo ti a.

"I kal tawh turah ka ngai a" țha takin ka chhang a.

"Ka rilru ka thlak leh a ni, naktukah kan pahnihin kan kal zawk ang Hazel"

"Maw! Ka duh teuh lo"

"Nangmah maia apartment-a awmtir che chu ka duh leh ta lo a ni. Min hnial lovin vawikhat chauh ka thu hi zawm tum ve la.." dam thluam hian a ti a.

"America chu ni lo se pawi ka ti lo Matt, i hriat vek kha ka nu te hmuh ka duh lo" ka ti hlar a.

"I hmu kher dawn tihna a ni lo. A zau lutuk Hazel, hlauhthawn tur a awm lo ka kiangah alawm i awm dawn, i nu te bulah ni lovin"

"Chupawh ni se, ka hlauthawng a lawm" ka la ti ve țalh a.

"Min ring rawh, ka venghim ang che ka tih kha, nang leh ka fa hi tuma'n an tihnat ka phal lo" ti leh in pawn lamah min kai chhuak ta daih a...

Matthew chuan a car-ah chuan min țhut luh tirin driver seat-ah chuan a țhu ve nghal a, hnehsawh zet chuan car chu khalhin office-ah kan kal dawn emaw ka tih chu hmun dang daihah min hruai ta a.

Kan kalna hmun chu ka la kal ngai loh na hmun a ni. 'Villa' lian zet kawtah chuan car chu tidingin amah pawh a chhuak nghal a.

"Lo kal rawh le Hazel, he villa hi kan chhungkuaa kan chen țhinna kha  ania, i duhzawng a ni em le?" tiin min zawt a.

Keipawh car ațang chuan chhukin Matt chu ka zui ve ta nghal a. In pianhmang chu ka en a, a nawm hmel hle mai. A sak dan chuan mi a hîp hle a "Nipui laiin a nuam dawn hle a nih hi" ka ti hliai a.

"Kan inneih hunah naute apian hmain kan insawn lut dawn nia" Matt chuan lunglen hmel zet hian a ti a. An chhungkuaa an lo chenho tawhna in chuan a rilru a tithar hle tih ka hre mai. Tunah tak hi chuan Matt chu kuaha hnem ka duh tak zet. Mahse, a duh hauhvin ka ring lo.

Darkar khat vel zet chu inlian tak mai kan fan hnu chuan chu villa a chen chu ka châk thar hle mai a. Hall pawh a zau țha hle a, a lai takah chuan inchung chhohna step nalh zet a awm bawk a, ka duhzawng tak a ni. Study room leh room dang paruk lai awm te pawh chu a zau țha hek hawk hle a, naupang chenna atana duhthusam a ni. Dinning room, dressing room te, sitting room leh library pawh duhthusam vek an ni.

Tukverh bulah chuan kal pheiin pawn lam chu ka thlir vang vang a, he hmun nuam lutukah hian Matt leh kan fate nen chengho ta ila nuam ngawt ang. Matt chuan ka kawngah a rawn kuah thut a, ka lo inrin loh em avangin ka phu deuh zawk.

"Enge i ngaihdan le duhtak, kan chhungkuaa chen chu i duhdan a ni lo mi? a ti sap a.

"Kan la inneih ém loh hi Matt, hunin a la hril ang chu" ka ti a. In lianpuiah kan pahnih chauhvin kan awm a min la kuah reng zui a, chu chuan ka tiril a fan ar ar a. Ka tan chuan Matt chu ka hmangaih a ni a, lehlamah ka haw ru deuh bawk si. A laka ka inthunun thei lo lutuk hi ka in haw tel bawk.

"Kan zin haw veleh kan innei ang ka tih kha, chhuanlam siam tawh suh. He villa hi i ngaina lo a nih chuan a dang kan zawng i duh zawng kan zawng dawn nia" dawhthei tak hian a ti leh a.

"Min nawr hmanhmawh lutuk suh, thutlúkna dik siam tura minti tu i nih kha. La nghak deuh ila ka ti mai chauh a ni" lei lam bih ngar chung chuan ka ti ve a.

"Chuti kan kal mai dawn em ni? Office pawh kal lo law law mai ang, nang ilo tel ve chinah hian ka inthlahdah sáwt riau mai Hazel Cade" ti deuh kherin car lamah chuan min hruai ta a.

Apartment kan va thlen chuan Donald chuan khum thar tur a lo thlen tawh thu min lo hrilh a, choka lamah kan thil eitur pawh a lo dah diam thu nen...!

Matt chuan fiamthu deuh hian Donald hnenah chuan "Hazel, nen hian kan khum thar chu kan va enfiah ange" a ti deuh kher a.

Donald chhuah hnu chuan "Enge khatia i țawng kher a, min ti zak alawm" ka tih chuan a ha var sar lang chuan a nui var var a.

"Nizana ka khum a mut i hreh lutuk hmel kha inhmu ve la i nui lo bikin ka ring lo. I khirh ve ngawt mai chimawm si" la nui reng chung hian a ti leh a.

"Hey, sawinawn kher a ngai lo ang aw" nuam ti vak lo hian ka ti ve a, nizan ka chetdan kha chu a mawi lo ve alawm. Ka nuam lo ti hmel chu a hmu ve a niang "Choka lamah lunch tur engthil nge Donald a'n a siam va en la ka ril a țam hle a nia" a ti ta daih a.

Kan thil ei chhung chuan kan țawng tam lo dun hle a, țawng vel ka peih hlawl lo a ni. Matt chuan arsa leh thlai vel chu a ei mawlh mawlh a, kan mit chu a intawng leh zauh zauh țhin a, rang zet hian ka hawisawn vat zel.

Matt chu vawilehkhatah a nui hawk a, hrilhhai zet hian ka en hau a!

"Enge nuihzatthlak a awm mi?" ka tih chuan "Donald chu alawm viau ang, a eitur siam zawng zawng i ei zo vek sia" Matt chu a la nui reng a.

"Maw! Chutiangin ka...." sawi zo lo dawhkana eitur plate ruak vek ka hmuh chuan mak ka ti hle a, ngaihtuah miah lo in ka lo ei vek a nih chu! Ka pumah pawh engtin nge a len reng reng ka zak lutuk chu ka biang a sa hat hat mai...

Matthew chu a la nui hawk hawk thei nia mawle! Ka zak lutuk tihngaihna hre lo chuan "Nui rawh, nui rawh ka tih luih a ni bik a mi kei leh ka pum a mi hian an mamawh tam a lawm!" thinrim lek lek hian ka ti ta ringawt a.

"Shh..." tiin ka hmuiah chuan a lo hup a "Ka hria a lawm thinrim suh tamtak i ei khan nuam ka ti. Mahse, i eitur kha enchiang tawh țhin la aw duhtak, ka soup i háwp zo vek alawm" Matt chuan a ti ta a, ka nui lo thei bik lo. Kan pahnih chuan za zetin kan nui dun ta a.

Matt chu rawn thutak deuh thutin "I nuih khan i hmelțha sawt, khatia hlim taka i nuih loh na chin kha arei ta hle mai, in hau tawh lovang aw" Nauoang chhia zetin a ti sap a.

Ka nuih a za telh telh a, chu chu Matt chuan hmuin "Nuihzatthlak ka sawi lo Hazel, ka ti tak tak"

"In hau tawh lovang, han tih ngawt chuh..!?" tiin ka la nui hak hak a.

"Inhauh tawh loh chu i duh lovem ni?" thutak zet hian min zawt leh a.

"Nupa kan nih hunah kan la inhau leh tho ang" ka ti sap a.

"Engmaw i sawi! Min neih chu i remti tawh tihna mi?" Matt chu tho hluaiin min pawt tho ve nghal a.

"Enge maw! Ka...." tiin ka sawi zawm tawh lo ka thilsawi tawh ka  hriatchhuah chuan ka hmui hupin ka meng kawk a.

"Lokal rawh le, chawl hahdam tawh rawh. Room-ah ka hruai ang che, nawr hmanhmawh che ka tum lo ka tih kha" dam thlapa tiin ama room-ah chuan min hruai ta a.

Matthew khumah chuan amah kuah reng chung leh a taksa lum ham ham kuah chung chuan ka mit ka chhing nghal vang vang a....

©<++++[BeckirafARenthlei]++++>®

               
                   Chapter-16

Ka hmuia hmui lum thar tharin min rawn fawh chuan nuamti tak hian ka zi ar ar mai a. Matthew âw hian "Tho tawh rawh le, duhtak" a rawn tih ri chu ka hre rei ruai a. Ka men chhuah chuan Matt chu ka mutna bulah a lo ding reng tawh. Kal chhuak turin a inpeih hle tawh tih a thawmhnaw hâk ațang chuan ka hre thei mai. Suit thim lam hain kamis var thianghlim zet leh a suit rawng necktie a awrh bawk a, a inhmeh kher mai!

"Dar engzatnge ni tawh...?" tiin ka țhu chhuak ve nghal a.

"Coffee in hun a ni tawh e, nizanah dinner ei lovin i mu tlang daih a ka kaitho duh ta lo che a nih kha. Hetianga mut i duh reng dawn a nih chuan keipawh ka hna hi ka țhulh fo mai dawn a ang riau! I bula mut ka duh ve zel sia" Matt chuan nelawm tak hian a ti a.

"Le, coffee in rawh le" tiin khum bul dawhkan chunga coffee no la khu vang vang chu min kawhhmuh a.

"Oh! Coffee min siam a, ka lawm e" No chu banin ka in hlak a.

"I inzawhah muangchang lo in insiam rawh aw, thawmhnaw ken a ngai lovang. Airport kan pan a hun țep a nia" ti a, a sana bunlai bih zauhvin a nui suk a.

"Ka kal ve chu a țul viau tak tak a mi Matt, i thangrei dawn loh chuan hetah ka lo awm thei law'm ni?" ka ti leh hram a.

"Kan pahnihin kan kal ang sawinawn ngai tawh suh se, ka kianga awm zel turin ka duh che" Matt chuan pindan chu a chhuahsan daih a.

America lam pan chuan thlawhnaah chuangin Matt bulah chuan țhuin ka ngaihtuahna ramah ka cheng veng veng a. Hun reitak ka chhuahsan tawh ka pianna ramah ka kal leh dawn chu a ni si a, ka nu(Lauren) leh a pasalte chhungkua ka hmuh loh hram ka bei sei hle. Ka pa thlan erawh chu tlawh ve ngei ka tum ang, tunbak hi ka kal leh tawh kherin ka ring lo.

Matt chu ka melh zauhva a malchungah chuan lehkha pawimawh a pharh a,Matt awmna apiangah chuan briefcase leh lehkha pawimawh hmuhtur a awm deuh zel tih theih a ni. Ka en reng a ni tih a hria ni ngei tur a ni, rawn hawi chhuakin min nuih suk a, a lehkha bih laiah chuan rilru a pe vak bik lo a nih hmel!

"I zam deuh em ni,Hazel? tiin ka darah min rawn kuah a.

"Zam e, kan kalna tur hian ka rilru a luah deuh ani" diktakin ka chhang a.

"I sawi tum chu ka man thiam e, hlauthawng suh tum'an an tihnat che ka remti ngai lovang" dam thlap hian ati sap a.

"Matt, ka pa thlan tlawh ka duh dawn a, tun bak hi ka tlawh thei tawh pawhin ka ring lo"

"States kan thlen hunah Baltimore kan pan nghal anga, tahchuan kan innghat phawt ang, ka hna ka thawh chhungin inlamah i lo awm dawn nia"

"Tahchuan in i nei tho a mi?" mawl hmel zet hian ka zawt a.

"Nei e, hotel-a ka thlen peih loh changa ka awmna hmun ber a lawm" a ti leh mai a. Hepa hian hmun engzatah tak in nei ang maw! A hausa lutuk mah mah a ni ka tan chuan...

"I pa thlan chu tlawh ngei kan tum dawn nia, i rilru kha thunun rawh Hazel Cade, tumruh tak kha ni leh turin ka duh che, hetianga rilru no i put zel chuan kan tumram kan thlen hmain i chau mai ang" tiin ka kawr chhanah ka pum chu a rawn chul a "Kan naute pawh hian a pu thlan chu hmuh a duh ve ngei ang!" a ti ta a.

Chawlh hahdam chu ka tum ve ngei a mahse, a har lam hret chu a ni. Ka kawng kham ut ut chuan ka awm a ti nuam lo hle a, lo zin ve lo tawp ila țha tur a nia. Matt lah chuan a lehkha pawimawh lam chu min bihsan leh daih tawh bawk si. Ka țhutnaah chuan ka chesek a.

"Khatia i chet sek chuan i chawl hahdam thei hauh lo ang Hazel, i hmel a dâng vek alawm" minute sawmhnih hnu velah Matt chuan tiin a lehkha en ho chu a dah fel a, min kuahin a darah chuan min beitir ta a "Mutthilh tum rawh, tumahin an tina in an ti thinur lo ang che. Min ring hmiah rawh" a ti a.

Ka chi-aina thup tum chuan ka maimichhing a, Matt thlazar hnuaiah chuan engkim hi a hahdamthlak a ni. Mutthilh tumin  ka chhing siai siai a Matt min kuahna vanga inthlahdul ta ka ni tih ka inhre ru rauh rauh thung.

Baltimore ațang chuan Faulkner helicopter-in Lancaster hmun kan pan leh a, Matt chenna in chu ka hmu châk tawh kher mai. Tuipui pawl ruih mai, tawp chin nei lo emaw tih mai tur te chu hmuhnawm ti tak hian ka thlir a, thliarkar nawm hmel tak takte pawh ka hmu leh zauh țhin.

Hmuhnawm ti hmel taka ka thlir chu Matt chuan a hria a ni ngei ang 'pilot' hnenah chuan "Lancaster chung kha han hrut kual teh!" tiin a hrilh a.

Tuipuikam ațanga khawmual filawr bik a ni a, thingkung sang tak tak a ding, țhulh bawk. Helicopter a țum fel meuh chuan ka inthlahdul hman tawh hle a, 'Cottage' lian lutuk lo nawm hmel zetah chuan Matt chuan min hruai lut ta a.

Matt chuan țhutkhawmna pindanah chuan min dinpui lai tak chuan palian zet hi a rawn lut ve a.

"Awle, Mr.Faulkner!" dem âw-ka tak hian a rawn ti a. "Nangmah chauhin i ni dawn emaw ka ti a" tiin ka lam a lo hawi a, chîk zet hian min en bawk a. A hmai chu a sen deuh țun a, apron var a inbel țat. Amah a lian sia a inhmeh lo kher mai! Tinge Matt hian house keeper ah mipa hlir a hman le...?

"Brett, ani hi ka nupui la nimai tur Hazel Cade a nih hi" ti a, Matt chuan inhmelhriattirna neiin Brett a tih pa chu a nuih var var a.

Brett chu makti a meng rulh chung hian min en deuh vung vung a "A hmelțha hle mai Sir, i thlan fuh ngei ka beisei" tiin a nui ve ta vur vur a.

"Tunah chuan i eitur siam tharlam tak khan han hrai phawt la, a hahdam deuh hunah cottage hi i fanpui dawn nia" tiin Matt chuan thu a pe nghal zat a.

"I lo kal dawn tih hre hmasa ila chuan English ho thingpui ka siam sak tur che a nia mahse, Mr.Faulkner hian a sawi si lova American thingpui i in mai angai dawn a ni,Miss" inthiam loh hmel tak hian Brett chuan a ti a.

"Hazel hi American ve tho alawm, kha lam chu buai angai lo ang Brett," tiin Matt chuan sofa dup zetah chuan min pawt țhu ve nghal a.

Brett chuan thingpui chu a thli a, a nui pah deuh hlek bawk a. Apple ațanga siam cake tuihmel tak chu a rawn chhawp tel bawk a, ka pumruak lutuk chuan hnawhkhah a mamawh tak zet tawh.

"Insum miah lo khan ei rawh le duhtak" Matt chuan nuih insum zet hian a ti a.

"Matt, chimawm viau teh suh!" ka ti hlak a. "A rang lama inhualna zungbun kan lei angai dawn a nih hmel, house keeper leh midang reng rengin ka 'ta' i ni tih an hriat theih nan" Matt țawngchhuak chu a ram deuh hmuk a.

"Maw! A ngai kher lo, ka secretary ti ve mai la i company ațangin ka la bang chiah hleinem!" Ka ti lui deuh kher a.

"Pathian hmingin...Hazel, min hnial lo hian awm tum ve hram teh. Ka secretary nih ai chuan ka nupui hual i nih khan i tan thil a awlsam zawk, theihnghilh țhak suh" tiin ka dul thép zaih chu a melh ngar a. Ka naupai min hriat nawn tir a tum tih ka hrethiam mai!

"A țha lawm, engtik nge zungbun chu min pek dawn?" zang vah hian ka ti daih a. A house keeper te awmlaia inhnial chu ka duh bik der lo.

Miko san âk hian Matt chuan "Lo kal rawh le, in vel hi keima'n ka fanpui zawk ang che, dar sarih leh a chanve ah dinner kan ei țhin heta ka awm chuan, thawmhnaw leiin Lancaster bazarah ka hruai ang che" tiin min kai tho zui ve nghal a.

Cottage kan fan chhung chuan Matt chuan ka kutah a chelh deuh tlat a, ka tlanbo hlau ang hrim hian! In hmalama thingkung hnuaiah chuan țhutna tur nawm hmel fahran hi a awm a chutah chuan min țhuttir a, a kekawr ipte ațang chuan box tetakte hi rawn phawrh chhuakin a hawng a. A chhunga lunghlu zungbun chu phawrhin ka kutah chuan min buntir ta a.

"Hei hi ka nu zungbun a ni a, bun turin ka duh che a ni. I tan tlemin a lian deuh tih ka hriat vangin ka siam tet tir a, ka pe lawk ta lo che a ni, min hrethiam dawn nia" Matt chuan a ti sap a.

A zungbun min pek chu ka khawih nauh nauh a, èngin a chhun zawng chuan a de deuh sep sep a, chutiang thil hlu leh man to lutuk chu bun ka inthlahrung ru riau pek a!

Inthlahrung zet a ka hrawk thian kharhin "Hei chu ka bun thei lo ang, lo ti bo palh ta ila i nu zungbun a ni sia Matt"

"Hazel, i kut ațanga i phelh loh phawt chuan amahin a thâwk chhuak lo tawp ang. Tikhan bun la inneih zungbun ka pek hma che chu phelh lovin bun reng ang che" inringtawk zet hian a ti chhum hmak a. "Hawh le, inchhungah ka hruai lut tawh ang che" tiin cottage chu min panpui ta a.

Inchhung kan luh hnu chuan Matt chuan pindanah min hruai tlang nghal a, min hruai luhna pindan chu a zim angreng hle a, dressing table pakhat leh sofa, wardrobe lian vak lo pakhat deuh chauh bungrua a awm a.

Wardrobe chu hawngin percel pahnih a rawn phawrh chhuak a, pakhat chu min pein "Kha kha inbel la, hetah hian i inthlak mai dawn nia bathroom chu saw lamah sawn" tiin pindan leh lam kawngkhar chu a kawk zauh a, percel pakhat zawk chu pawmin min chhuahsan ta a.

Darthlalangah chuan ka inen a,ka hmai chu a dâng deuh tih ka hmu. Tunhnai mai khan ka rihna a pung sawt bawk a, ka kechawn zen thlarh leh ka ring sang vah maite chu a lang chiang hle a. Ka sam dum hlap chu a thur deuh a, ka mit lunghlu ang maia hring nghalh țhin kha a thim deuh raih bawk, ka landan tehhrep chu a! Ka dul thep zaih chu zutin thla rei vak lo hnuah chuan a puar ve âk tawh tawh dawn sia, ka landan thar tur chu ka hmu châk ta riau mai...

Bathroom-ah chuan ka intifai thuak thuak a, ka hmanhmawh viau loh chuan Matt kha a rawn lut leh mai ang. Percel chu hawngin a chhunga thil awm ka hmuh chuan makti deuh hian ka thaw hak a!

Jacket buang thak leather țha chi tih hriat tak leh chumi rawng ang chiah leather tho kekawr nalh zet a lo awm a, shirt dum body fit leh American bikers boot nalh zet a la awm tel cheu bawk. Khawi ațanga a neih nge tih pawh ngaihtuah tawh lem lo chuan lawm zet hian ka inbel nghal hmiah hmiah a, avai chuan ka tawk chiah vek mawle!

Darthlalangah chuan ka in thlek leh ngial a, ka sam chu hraw zet hian phiarin ka bekah chuan sam chhawllèng a tla sap sap bawk a, ka college kal lai min ti hre chhuak lo thei lo.

"I inpeih tawh em duhtak, a hma vak tawh lo a nia" Matt chu pindanah a rawn lut chawpchilh ve nghal a. A inthuam dan chuh...! Ka thawmhnaw ang chiah chu a inbel ve a. Mahse, a buang ni lovin a dum hlang hlak a ni thung. A landan 'pa' zet chuan ka thâwk a ti chham mai dawn alawm.

Matthew pawh chuan ngun zet hian min en a, ka chhip ațanga en thla dan danin ka pheikhawk bunah chuan a tawp chat a. "I inhmeh hle mai ka rin phak bakin i lang nalh" mawi zet  hian a nui suk a.

"Nangpawh mawle Mr.Faulkner, Company board chairman chu ka hai dawn che lawm le!" ka fiam ve hlak a.

"Hey, chimawm viau zel suh tun bak hi khatiang thawmhnaw hâkna hun i nei tawh dawn lo a nia, kan kalna tur a hla lemlo bawk a ka phalsak hram che a ni" inti thunei fê hian a ti a.

"Ka hria a lawm, ka lawm lutuk" ti a, Matt bulah chuan kal hnaiin a inrin hman hma chuan a hmuiah ka fawh sak zauh a.

"Nangte hi..." tiin Matt chuan ka kawngah min kuah a, "Nangma duhthu ngeia min fawh hmasak ber na a ni,Hazel" ti lehin duhthawh zet hian min fawp ta tawn tawn a, ka lo chhang lét rang kher mai.

Matt chuan hreh hmel zet a min fawhna chu thlahin "Kal ang le, bazar kal chu tum lo ila chuan hmangaihna ka chenpui ngei ang che" tiin inhnuai lamah min chhukthlak pui ta a.

House keeper-in kan inthuam dan a hmuh chuan a nui suk a, "Hun nuam tak in hmang dawn nia" a lo ti a.

"Brett, dinner siam kep kan ngai lo ang pawn lamah kan ei nghal dawn a. Mahse, cheese burger leh sandwich bawnghnute leh salad erawh chu Hazel tan hian ilo siam thung dawn nia" fiamthu deuhin Matt chuan sawi mahse ka lo zak hle thung.

"Awle, Sir" thil inti hre zeta Brett nui vur vur reng chu ka run kher mai. A mitah chuan min ngaihsanna niawm tak a lang thung. Apartment enkawltu ai kha chuan ka nel deuh zawk dawnin ka hria.

Pawnah chuan kan chhuak a, "Min lo nghak leh lawk rawh" Matt chu hmanhmawh zetin inchhungah chuan a lut leh a. Garage kawtah chuan dingin cottage hmunhma vel chu ka thlir kual a, he hmun ngainatawm zetah hian cham reng mai ka duh. A nuamin a reh raih bawk sia.

Matt chu ka bulah lo thleng leh tawh in scarf dum ka nghawngah a rawn vet a,"Thli a thaw deuh mai theia hritlang i kai palh ang" tiin garage ah chuan min hruai lut a.

Garage chhungah chuan Mecedes car pakhat leh Bike pahnih nalh zet zet an awm a, a dum zawk chu Matt chuan pan chatin "Helmet kha khum rawh le, kan pahnih a chuan dun nge i duh a hrang ve ve a khalh?" tiin min zawt a. Ka rilru a buai ta map mai! Matt nena chuan dun ka duh rualin tun bak ka khalh theih dawn si loh chuan khalh ve ngei ka duh bawk si. Matt chuan ka thutlukna nghakin min ngaichang reng a.

"Ka hrethiam e i rilru chu, a sen zawk kha khalh la, a dum hi keiin ka khalh a nge" a ti ta hlauh a. Tihzia ngei mai..

"Ok, i tlan hmasak angai ang aw, Lancaster bazar awmna ka hre lo a" Ka ti a.

"Tlan chak loh tur, indim i ngai tih hria la ka 'speed' mil zelin ilo in adjust dawn nia" Matt chuan helmet khumin bike ah chuan a țhu vung tawh a, keipawh bike ah chuan lawn vein ka tinunga Matt hnungah zel chuan ka tlan ve ta a.

Matt khan bike a khalh duh pawh ka ring ngai lo kha a nia, khalh țhang tih hriat deuh hian a thunun hneh hle a, kawng a mam țha si nuam ka ti hle a ni. Bazar hmun kan thlen hma deuh ațang chuan kan tlanpelh ho chuan min thlir zui zel tih side glass ațang chuan ka hmu thei a, Chutia mipa leh hmeichhia 'confi' zet a bike khalh chu Lancaster hmunah hmuhtur a tam lo pawh a ni mahna! American hmeichhiate hi chu 'racer' an nih law law loh chuan bike khalh an ching tam lutuk lo, ka tleirawl laia ka khalh țhin pawh khan 'lesbian' ka nih ring an awm fur tih ka hria a ni.

Matt chuan bike chu bazar parking area-ah chuan adah fel diam tawh a, ka indah fel chu thatchhe zet hian bike nghengin min thlir reng a, a mit chuan khawdang a hawisawn thei meuh lo. Chulai hmuna lo awm ve nula leh tleirawl deuhte chuan ka hmel hmuh tumin min thlir reng a, nuam dangdai ve tlat! Helmet khum chunga bazar thu awm suh, ka phelh ve ta nge nge a...

Ka lamah Matt chu rawn pheiin ka kawngah intineitu zet hian min kuah a "Ngaisangtu i neih belh e, Hazel Cade" zawi sap hian a ti a. A enna lam ka va en ve chuan maktiin ka meng deuh kawk a...!

Bruno Marton, college ka kal laia ka țhianțha ber ni țhin kha khawi hmunahmah ka hai lovang. Ani paw'n mit khap miah lo in min en ngar a.

Matt min kuahna chu phelhin Bruno lam chu ka pan phei thuai a.

"Hazel, engthil..." Matt țawng lai chu ban ka vai khum zauh a. "Ka rei lovang" tiin ka hnungah Matt chuan min zui tih ka hre tho.

Bruno bul ka thlen chuan ka kut pharin "A rei ta hle mai Amigo's" ka ti sap a.

"Hazel, i niin ka hre reng a ni" tiin Bruno chuan min kuah vat a. Chutih lai chuan Matt chu kan bulah lo dingin "Duhtak, hmelhriat loh inkuahtir ngawt hi a âtthlak viau a ni" ram hmuk hian a ti ta a.

Bruno chu a dan pangaiin a zak leh hle tih a bengkawm sen deuh țun ațang chuan ka hre mai, ka inhmelhriattir vat loh chuan Matthew hian thil a ti khawlo vek ang.

Matt lam chu hawiin "Ka țhian țhatak Markland-a college ka kalpui țhin; Bruno Marton a nih hi" tiin ka nui var var a, Bruno "Matthew Faulkner" ti a ka sawi laia Matt ner sawk chu ka hmu reng.

Matt chuan a kut chu phar chhuakin "Mr.Marton ka hmu che chu ka lawm hle mai, Hazel-i pasal hual Matthew Faulkner ka ni e" a'n ti leh deuh kher a.

Huh... Matthew kher kher țhin hi a!

Bruno chuan Matt nen chuan min en tawn sekin "Ka lawmpui a che u Mr. Faulkner, Hazel" a ti chhuak sap a. Hun reitak in hmu tawh lo kan ni a, min hmu thut chu mak ati hle ang tih ka hria. Chubakah pasal hual ka la nei zui! Matt hian thil țul lo a sawi a ni.

"Ka kalsan phawt ang che u, ka awmna chu i hriat kha Hazel" tiin Bruno chuan Matt chu a nuih suk a, a kal ta a. A inthlahrung deuh a nih ka ring! Bruno chu hmuh leh tum ran chung chuan Matt kal sawn nulh chu ka zui ve ta a.

Chumi hnu chuan bazar hmunpui lamah chuan inkai rialin kan kal dun a, Matt chuan ka duh apiang chu ren miah lo hian pawisa a pe hmiah hmiah a, a sawisel miah lo bawk. Ka inthiam lo viau nain ka pawisa pek ka tum chuan a phal tlat lo, 'phawrh buai duh suh' a ti zel bawk nen ren baksak lo in hmang ila nimai lawm..!

Naupang thil zawrhna kan kal pelh dawn lai chuan kawrlum phiar nalh zet an khai chuan ka mit a la hle a, a zawnah chuan ka ding ta chat a. Ka thil en chu Matt chuan rawn en ve in "I duh chuan la rawh a dang pawh i duh zat zat thlang rawh" tiin a nui var var a.

Lawm zet hian dawr chhungah chuan Matt chu kaiin kan lut a, kawrlum leh kekawr naupianghlim thawmhnaw chu engemawzat ka pack tir a, Matt paw'n ka rilru hrethiam zetin mipa naupang pheikhawk chu bun hnih a thlang ve bawk. A va'n nuam tak nupa inrem tak bazar dun te pawh kan ang dawn dawn a lawm! Hah... Ka thil ngaihtuah záwng chu leh!

Dawr nghaktu chuan lawm tak hian kan thil lei chu a pack fel vek a, Matt chuan a thawnna tur hmun a hrilh thlap hnu chuan dawr chu kan chhuahsan ta a. Bike te chuan engmah phur thei hek lo le...A ni ang businessman hausa lutuk tan chuan engkim hi a awlsam vek mai a nih hi...

Bazar hmun kan chhuahsan meuh chuan a tlai tawh hle a, Matt chuan restaurant ah min luhpuiin dinner kan kil dun leh a, kan thawmhnaw hâk vang nge restaurant chhunga lo awm ho mit chu kan la hle a, ka bulah Matt awm lo phei se chuan ka zam chhe der ang. Ani erawh chuan engahmah ngai lo tih hriat zet hian a plate-a eitur awm chu a ei hmiah hmiah a. A tih ang chuan ti ve in hawi chhuak duh map lo hian ka ei ve ta mawlh mawlh a.

"Thil i zir thiam chak hle mai Hazel, Bruno chanchin kha chiang zawkin min han hrilh teh" Matt chuan wine lem hlek chung chuan a ti a.

"Ka best friend a nih kha, England-a ka pem hma zawng kha chuan a ni nen hlir khan kan inkawm țhin. Ka pa thihna khan min țhen hrang ta chauh a ni" Ka ti a.

"A fel viauin ka ring, remchangah kan haw hmain dinner ei turin kan sawm dawn nia" ka beisei hauh loh hian Matt chuan a ti ta a.

"Ka lawm e" a bak sawitur ka hre thlawt lo a ni. Ka chungah Matt hi a,țha mah mah ngaihsaktu leh duattu nei lo in kum kha leh chen ka awm tawh a, Josh leh Becca tih loh ah chuan ka hlutna min hriattirtu ber a ni. Josh ka ngaihtuah chhuah chuan thlakhat dawn kan inbe tawh lo. Mahse, Matt hian biak a remti lo tih ka hria runluih ka châk viau rualin a rilru tihnat hi hreh riauna ka nei tlat pek nia!

"I duhtawk tawh chuan kan haw tawh mai dawn em ni?" Matt chuan min ngaituah zet hian a ti a. Ka soup inbang chu in lehin ka tho chhuak ve a, counter lamah bill tifel turin kan inzui phei dun leh ta a. Restaurant-a lo awm hmeichhiate chuan Matt chu ngaihsan hmel zetin an thlir zui tih pawh ka hmu reng.

A palianin a thawmhnaw hâk chu a inhmeh hle a, a sam sei lam lek lek tawh chuan a jacket hâk nghawng chu a hawlh pha thuak a, a leather kekawr hâk chuan a mal thahrui ngah hmel zet chu a phuar deuh a. Inringtawk zet a pen thauh thauhin vawikhat pawh hnunglam a hawi chhin eih lo. Chu chuan a 'confi' zia a tilang chiang hle a ni.

Cottage lam pana kan haw chuan Matt chu tlan hmasa lehin a hmanhmawh lo hle a, ka rilruah thildang rawn lut thutin fiam ka châk ta tlat a. Tléma tlanmuang deuhvin Matt chu ka en pah zauh zauh a. Ka duhdan ang takin ani pawh chu a hma aia muang chuan a tlan a, chu veleh chak fê hian ka tlan ta thut a, Matt lo ding chu en duh miah lovin kawng chauh chu nguntakin ka en a, cottage ka thlen hnu rei vak lovah Matt pawh chak zetin a rawn tlan thleng ve a. Bike chu tidingin a helmet khum chu a phelh nghal a, rum lutuk hian min melh ta a!

A hmel dur khup ka hmuh chuan nidang angin ka hlau ta miah lo, ka nuih a za hle zawk a ni. "Enge khati vaka min en a?" Nui sang chung hian ka ti a.

"Nangte hian min tih hlauhthawn i tum vel a maw!?" tiin ka lamah chuan a rawn pen phei pawk pawk a.

"Matt, ka... fiamthu a nih kha" ka la nui zui hak hak a.

"Fiamthu-ah i ngai a nih chuan a țha e, fiamthu thawhdan kawngkhat chauh a awm hleinem" tiin ka bânah chuan chelhin inchhungah min hruai lut ta dawr dawr a.

A room ni ngei turah chuan min hruai a ka kut pahnih chu hmer kawpin chunglamah min dah sak a.Ka hmuiah chuan na zet hian a rawn fawp ta a. Mahse, a rei lo min thlah leh thutin chiang fek fawk hian min melh chhuk run a, "Ka fiamthu thawh hi nuam i tih zawng a nih ngei ka beisei" tiin ka jacket hak zipper chu a pawt ri hrawk a.

"Matt, engthil nge maw tih i tum le?" Ka  tih chuan "Romance lam fiamthu mawle" ti supin khumah chuan min hruai phei a, ka jacket hâk a phelh tawh avangin shirt nen chauh chuan ka awm tawh a. A jacket chu phelh ve nghalin a thawmhnaw inbel dangte pawh chu kar lovah a hlip ta vek a. Saruakin khum bulah chuan a ding a, en ngam lovin ka maimichhing ta daih a.

"Zak duh suh darling, i hmuh hnu vek bak thilthar ka neih belh tawh lo" tiin a nui hawk a.

"Ka room turah kal ka duh, inthlak te pawh ka duh ve a"

"Hei hi kan pahnih room tur a nih hi, hmundangah insawn tum suh. Ka awmna apiang hi i awmna tur a ni e duhtak" Ngeiawm lam lek lek hian a ti a.

"A țha lawm, chuti kan inbual ange ka rei lovang" tlawn titih deuh hian ka ti zaih a.

"Phakar chhuah tum lo mai teh, ka hrechiang ve tawk che. He i thluak bur mawi zeta i ngaihtuah hi ka hria a lawm" tiin Matt chu khumah chuan a rawn lawn a, ka thawmhnaw inbel chu ka pheikhawk chenin min phelh sak ta vek a, hnialin awmzia a nei lo tih ka hrechiang ve tlat tawh!

A taksa rihna hmanga min delhbetin dawhthawh zet hian min fawp a, chutah dam deuh zawka chhunzawmin ka lo chhang lêt ve zel bawk, kan inhip tawnna chu a nasa em a ka țangbuai peih lo, hmangaihna tuipuiah chuan pil dunin duhthawh takin kan che dun ta zawk a.

Ka țhanharh leh meuh chuan ka bulah Matt pawh a mu tawh lo zankhua deuhthawin hmangaihna kan chendun a. Khawvar dawn hnaihah kan muhil ve chauh kha a nia, sana intar ka en chuan lunch ei hun a pel daih tawh! Entin nge chutiang chen chen a rei ka mut theih zawk le...!?

Dinning hall ka thlen thlak chuan tumah hmuhtur an awm lo. Matt chu lo awm lo ta pawh ni se, khawnge Brett pawh hi le..!? Car thawm ri ka hriat chuan beng ka chhi deuh hra a, chhuah erawh ka tum chuang lo.

Kawngka lama thawm a rawn awm chuan coffee no kengin tunge hriat tumin ka kal phei a. Matt leh a bula ding ka hmuh chuan makti lutuk hian ka meng kawk! Coffee no ka ken chu ka thlauh keh ta chuai a.

"Hazel"

"Ka nu" kan țawng rual dun țhawt a. Ni lo, engthil nge thleng ta hi! Ka nu maw hetah enge a rawn tih dawn!?...

©<++++[BeckirafARenthlei]++++>®

                 Chapter-17

Ka thil hmuhin min shock zualpui areh chuan kan ngawi țhap a, ka nu hmelah chuan inthiam lohna te hrehawm tihna leh lunglenna a lang dawt zut a. Chu zawng ai chuan Matthew hian engtin nge heng thil hi a tih theih zawk? Ka nu hmuh ka duh loh zia hrechiangtu a ni a, tunah lem ka hmaah a rawn hruai leh si!

Kan ngawih chhung chu chu rei tak ni mai hian ka hria a, second hnih chhung vel lek chu a ni ang. Țawng hmasak ka tum lova ka no tihkeh chu chhar tumin ka kun hniam ta zawk a.

"Duhtak, kha kha i tih a ngai lovang Brett tifai turin ka'n hrilh ange!" Matt chuan zawi sup hian a ti a.

"Ka ti thei alawm lo buai duh suh, kan inbiak angaiin ka hria Matthew" ka ti chang fak a. Ka nu chu awmve lo ang hmiah hian ka haider thung a, a lo luh tirh a ka en bak kha vawikhat pawh ka en leh tawh lo. A fanu aia mipa dang thlang zawktu kha a ni miauva min dem thei bik lo ang.

"Hazel, i nu nen khan inbe zawk rawh u, kei chuan ka nghak thei alawm. Hunthawl tak in nei e, i tana țha lo tur ka ti lovang tih i hriat kha min ring rawh. Hnathawk turin ka chhuak dawn a khawngaihin, i nu thusawi tur kha ngaihthla hram rawh" ka hnial hman hma chuan pawn lamah a chhuak ta daih a.

"Hazel, i lo puitling ta hle mai" ka nu áw chu tunhma a ka hriat țhin ang lo tak khan a zawi raih a.

"Nu leh pa telloa mahni ke a din chhuah tum chuan puitlin angai alawm" ka ti hmak.

"Min haw hle tih pawh ka hria mahse, kei chuan ka haw ngailo che tih min hriatsak la ka duh a ni"

"Hah, ka pa thihna kumkhat ém pawh ala tlin hmain mipa dang i nei leh thei a nia, i lo ropui hle mai ka nu" ka ti salh a.

"Ka tidik lo tih ka hria alawm bawihi, i nu hian ka tidik lo takzet a ni khawngaihin min ngaidam rawh" tiin a kut vawt ngiai chuan ka kut chu a rawn vuan a. Mahse, kha leh chen amah mamawh ngawih ngawih a ka lo awm ve lai a, mipa dang pana kan chhungkuaa kan chenna hmun a chhuahsan kha ka ngaidam thei lo a ni.

"I sawi tur i sawi zawh chuan kal tawh rawh i pasal leh fa te khan an ngaihtuah ang che. Keichu i tello in tun hi ka thleng tawh inbiak leh hi ka duh tawh lo"

"I luhlul ngaiin i la luhlul reng a nih hi, i la inthlak danglam hauh lo. I pa i chhun lutuk a nih hi!" a ti ve hmak a.

"Nang chhun che ai chuan ka pa chhun chu ka la duh fê zawk, ka lawm khawp mai i mizia ang ka pu lo hi vannei ka inti. Engvanga helai hmunah hian Matt hian hian rawn hruai che nge a nih ka hrehrep lo e !?"

"Matthew hian a hmangaih vang che a ni, nu leh pa nei tawh lo a ni a, chutianga i awm ve chu duh lovin min rawn zawng chhuak a, kan inkâr țha lo siam țha turin mahse, nang chuan i duh lo a nih hmel e" a ti sap a.

"I tlai tawh a ni ka nu, ka rilru natna te kha a nasa lutuk tawh a, tunah chuan 'chhungte ka nei ve lo' tih hi ka pawm thlap tawh. Ka chhungkua chu Josh leh Becca te chauh kha anni țhin kan in i chhuahsan ni khan ka tan chuan i thi tawh a ni" Ka áw chu a zawi hle a a ri chang chang chauh a ni.

"Khawngaihtakin min ngaidam rawh, ka fanu, ka hmangaih che a sin ka thinlung hian engtikahmah a phatsan ngai lo che. I pa boral lai khan ka rilru a na em em a, ka tih loh tawp tur ka ti a ni" tiin ka nu chu a inhnit ta hlawp hlawp a. Chu thil chu ka hmuh duh loh ber a ni, inherin tukverhah chuan dâkin pawnlam hnim hring dup chu ka thlir ta vang vang a.

"Hazel, Matthew hi i tana mipa țha tak a ni. Nu i ni ve thuai tawh dawn tih ka lo hriaa ka lawmpui a che, i rilru i thlaka min ngaidam thei a nih chuan min biakpawhna tur chu i hriat kha..." a ti ta a.

"Ni e, nu ka ni thuai tawh dawn a lawm nang ang lo takin keichuan ka fa hi ka venghim ang. Pasal ka nei lo a nih pawhin ka thih thlengin ka vuan ang" hnunglam hawi chuang lo chuan ka chhang hmak a.

"Ka hria alawm i ti ngei ang tih hi, fa i neih hunah tuna ka rilru puthmang hi i hrethiam chiahin ka ring"

"Tun bak hi kan inhmuh tawh loh ka beisei" ti a, inherin ka nu mitah tak chuan ka en kalh a.

"Kan hnenah vawikhat tal chu dinner in rawn ei ve ang chu, a bak chu ka phût lovang che" a ti ve zel a.

"Kan thei lo ang tih ka hlau khawp mai, i pasal hmel ka hmuh hian ka pa ka hrechhuak zel țhin a, chu chu ka duh lo a ni."

"Ka lo beisei ang che, ka kal phawt a nge" Luhlul zet a tiin pawn lam pan chuan a chhuak ta a. Thlah pawh tum lo in ka dinna ngaiah chuan ka ding reng a, helai hmuna rawn hruaitu Matt chu ka haw hlur tawh zawk!

Ka rilru natna chu thar lehin America kan pan dawn a Matt hnena ka thu sawi te kha ka bengah a ri nawn awn awn a. He thil hi a ruahman láwk a ni, chuvanga a kianga zin ve tura min duh a ni tih chu ka hrethiam kuar mai. Lutuk hian! Room-ah chuan chhovin ka thawmhnaw hâk lai chu ka thlak sawk sawk a, nimina kan thil lei te kha a ngai ngaiin room chhuatah chuan a la awm a, percel pakhat chu kan chhuih hram kha! Matthew ruahmanna ka hre lo lutuk chu â ka inti hnuhnawh hle a, bum awlsam takah min ngai tawh ang chu...

Bike chahbi chu lain inhnuai lamah chak zet hian ka tlan thla a, Hall kawngkaa Brett lo ding chu hre lo der hmakin garage ah chuan ka lut a, nimina ka bike khalh kha lachhuakin chak zet hian cottage chu tlanchhuah sanin Markland-a ka pa thlan awmna lam chu ka pan ta a.

Kawngtluan chuan rilru mumal pu thei lovin ka awm a, ka bike khalh laiah chauh chuan rilru pek hram hram tumin kawng chu nguntak hian ka en a, darkar hnih chuang tehmeuh ka tlan hnu chuan ka pa thlan chu ka thleng ta hlawl a. Khua athim vek tawh nain thla eng chuan thlan chu a chhun eng deuh ruih a.


Kum ruk tehmeuh ka tlawh tawh loh ka pa thlanlungah chuan țhuin ka țap ta tlawk tlawk a,'Pa, i fanu ka lo kal asin min hmu tiraw? tunah hian ka pumah hian i tû tur a awm mek a sin. Ka nu hi ka ngaidam thei lo a ni, min dem suh aw' tiin ka phun sap sap a. Ka pa nena kan hun hman tawh dan zawng zawng leh kan chhungkuaa hlimtaka kan awm laite chu ka mitthlaah a lang iar iar a. Kei hian ka pa lo chu hmangaih tak tak tu ka nei ve lo, ka nun khawhar leh mal ngawih ngawih țhin kha ka naute hian min thláksak dawn a ni.

Engchena rei nge thlanah chuan ka awm pawh ka hre tawh lo, ka phone ka keng miah lo tih ka hrechhuak a. Matthew pawh ka hrechang tawh lo reng reng!

Cottage ka thlen chuan garage ah bike ka dah lut a, Matthew bulah lo chuan khawimah kalna tur ka nei chuang lo tih ka hria. Ka nun khawhar leh ruak ru riau hi tawrhdan ka thiam a ngai dawn a ni. Inchhung ka pen lut chiah chu ka bânah na lutuka rawn hmer ka hriat chuan ka țe tuarh a.

"Khawiah tehhrep nge i kal?" Matthew âw chu a chang țha khawp mai.

"Min thlah rawh, ka duhna ah ka kal thei lo a mi!?" Ka ti ve țhat a.

"Min tih mangan zia hi i hria em? I phone hi engatan nge i neih" tiin ka phone chu chhuatah a vawm darh chuai a!

"Enge maw i tih le?" tiin theihtawpa talin ka phone chhar tum chuan ka kun a. Matthew hmel chu țo haw tur ang maiin a dur khup a, hetiang em em a a thinrim hmel hi ka la hmu lo. ka hlau ru ta viau mai min khawih hrep lo turin a insum nasa hle tih a kut humruh tlat dan ațang chuan ka hre thei a ni.

"Khawiah nge i kal darkar nga lai i awm bo tawh!" Min vin tuarh a.

"Ka pa thlanah" tiin ka kal pel thuak a.

"Ding rawh.." Matt chuan ka kutah min lo man vat a, alamah chuan min pawt lét nghal dawrh a. "Khatianga kalsawn ngawt kha tum tawh suh" thinur lutuk hian a ti leh a. "Ka thusawi hi i ngaithla zo dawn a ni, phuarbeh i ngai dawn a nih pawhin..! Ka phuar bet mai ang che! i duh thlang rawh. Țhataka ngaihthlak nge tihluih che chu..!?" a ti leh hrawk a.

"Sawi ta che i duh duh chu sawi rawh" ka ti ve hmak a.

"Hetah chuan ni lo e" ti a, min pawm nawlhin a room ah chuan min luhpui a, khumah chuan min nghat chawrhin "Ka dimdawi viau che chu i beisei thei lovang" ti hmukin khum bul sofa ah chuan a țhu thla nghal a.

"I sawi tur chu sawi thuai la, ka chau a nia" tiin ngai pawimawh lo awm tak hian ka melh kar a.

"Khatiang mitmengte khan min melh chai suh Hazel, i hmel pawisawi lo zet hian i luhlulna leh chapona hi a hliah khuh chuang lo" a ti leh hrep a.

Matthew țawngdan chuan min khei zar mai!

"Chapo lo chu nei ta che, kei nilovin i duh duh chu nei rawh" ka ti ve ta phiar phiar a.

"Ngawi chip cham rawh, nang hian i tana țha tur engmah hi i hre hlawl lo, nau hi pai lo la chuan kan inkâr hi ka ti tawp tawh ang" a ti hmiah hmiah a.

"A țha a lawm, ti tawp ila ka duh ve tho. Naute hi chu ngaihtuah suh ka enkawl thei ve lutuk ang" ka ti ve zel a.

"I thei ang, i thei khawp ang mahni hringtunu thiltih sual pawh ngaidam duhlo khawp a ngéng i nia lawm. Hazel, danglam bîk niin ka lo hre țhin che a, kei hian ka lo hresual a ni" a ti ta a.

"Tlang taka min hmuhdan i sawi chu ka pawm thlap e" tiin khum ațang chuan thawh tumin ka ke ka hlang thla a. "Che suh, i chêt leh chuan ka tihdan tur che chu ka sawi tawh kha" pawr zet hian a ti leh a.

Ka che lui ngam ta bik lo, muangchanga ka ke chu hlang chhovin khum kil bang ngheng chuan ka țhu fel ât a. Ka chetdan chu hmaih nei miah lo hian min en reng tih ka hria.

"Pathian hmingin Hazel...I tana țha lo tur hian engthilmah ka ti lovang tih hi vawi engzat chiah nge ka sawi a ngaih dawn!?" Chhang lova ka ngawih reng vang chuan țawng zawm lehin "Kei hian zankhatah ka chhungkua ka chân vek tih i hriat kha, ka rilru a na hle bawk. Nangchuan nu nangmah hmangaih em em tu i la nei a, i luhlulna avangin chupawh chu i hrethei tawh lo a nih hi" a ti ta a.

"Engmah kan nufa inkâr hriat i nei lo" ka ti ve sak a.

"Hria e, ka hre lutuk zawk a ni. I nu vanga rilru na taka i awm hi kei chuan hmuh reng che ka duh lo, chuvanga helai hmuna hruai che ka ni. In nufa inkâr boruak țha lo siamțha leh turin ka duh che u a ni" a ti duah a.

"A tlai lutuk tawh Matt" ka ti sap a.

"A la tlai lo i luhlulna kha dahțhain i nu hi ngaidam tawh mai rawh, a pasal David pawh. An bulah i chéng dawn tawh chuang lova engmah hlauhthawn tur a awm lo" a ti sup a.

Ka thinlung chuan ngaihdam a duh min hringtu ka nu a ni a, ani lo hi he khawvelah nu dang ka nei chuang lo tih ka hria. Ka rilru a buai vek tawh!

"Hun min pe rawh" ka ti ta ringawt a.

"Ka hrethiam che alawm i tan a harsat dan tur pawh...vawikhat chauh a ni ngaidam tura ka tih che. Nu i ni thuai dawn! Kan fa hian i thil tih sual engemaw vangin haw tlat che se la hrehawm i ti dawn lovem ni!? Hazel thutlûkna dik tak siam ang che" tiin room chu a chhuahsan ta a.

Chumi zan zankhua chuan Matt chu arawn kir tawh lova, keimahin khum zau takah chuan muhil thei lovin ka mengkar reng a, ka nu leh ka pahrawn an fa te pahnih Lydia leh Jason te chu ka ngaihtuah a ngaihdam mai hi ka tan a țha zawk a ni. Matthew sawi angin kan cheng ho dawn pawh a ni lova hetia rilru dam si lova awm reng hi keimah ka inti hrehawm mai mai a ni. Ka pa thlarau pawhin ka thutlûkna chu min pawmpui ve ngei ringin ka muhil ta a.

Lancaster ațanga Markland kan pan chuan a tlai ve ruih tawh a. Matt chu ka thlutlûkna hrilhin a lawm hle a, ka nu leh ka pahrawn David Collins te chhungkua hmu turin min kalpui ta a ni.

"Kan kal tur thu hi i nu ka hrilh lawk lo a, surprise ka duh vang a nia" Matt chuan car khalh chunga min melh zauhvin a ti a.

Car seat ngheng chuan ka bu zauhva, ka huphurh viau rualin ka châk ru riau tho. Matt inchei dan chu ka duhzawng tak a ni Jeans leh kawr var a hâk chuan a ti hahdam hmel hliah hliah a.

Ka en reng chu hria niawm tak hian Matt-a mit thim raih chuan min rawn en ve chiah a. Ka thawmhnaw hâk chu melh zuaiin kawng lam chauh chu a en leh ta a. Ka kawr hâk chu a țhui a mawl hle a cream rawng kawr phiar ka taksa rem thlap leh pawnfen ka khup chen chauha fual ka fen chuan min ti lang simple hle tih ka hria a. Ka duhdan tak pawh a ni.

Ka nu te chenna hmun kan thlen chuan ka zam hle a, Matt chuan ka kutah chelh tlatin min fuih sap sap a chu chuan min thlamuan ru viau thung!


Huanah chuan pangpar a vul chuk a, ka naupan laia ka chenna hmun ngei ka han rap leh chuan ka lung a tileng hle a ni. Step ațang chuan mipa naupang kum ruk mi vel a lo tlan thla a Jason Collins chu ka hai țep alawm le! Min hmuh veleh chuan inlamah chuan tlan lêt lehin "Dad... Hazel a lo kal" tiin a au lang lang a, min hria chu mak ka ti kher mai!

Kawngkhar chu rawn inhawngin ka nu leh David chu hmanhmawh tak hian an rawn chhuak a. David hmelah chuan maktihna leh lawmna ka hmu thei a, chu chuan ka thutlûkna siam hi ka siam sual lo a ni tih min hriat nawn tir bawk.

"Bawihi, Matt, in rawn kal hi ka ring miah lo asin!" tiin ka nu chuan min kuah a, a mittui tling kalh chu ka hmu reng.

"Nia, kan hrilh láwk lo che u a, min hrethiam mai niang chu" Matt chuan polite takin a ti vat a. Phakar ve e.. a ruahmansa vek a ni reng sia!

David paw'n duat taka ka samah chulin "A rei ta hle mai Hazel," a ti ve sup a, ka lo ngaih ai daihin kan boruak chu a nuam dawn ka hahdam sawng sawng mai.

Chawhnu hun pum chu hlimtakin hun kan hmanga ka nu bulah chuan ka awm deuh reng tih theih a ni. Lydia leh Jason chuan min ngaina nghal em em a, ka naupan laia ka room chu an unau chuan an ințawm a min luh pui phét an tum, kei lah chuan țah mai ka hlauh avangin ka duh der si lo. A hnu ah phei chuan Lydia chu Matt bulah a vui ve niah niah a, Matt chuan pawm nawlhin ka bânah kaiin Jason nen kan pali chuan an room-ah chuan min hruai lut ta a.

Room chhung chu ka naupan laia ka luah ang tho khan engvakmah an ti danglam lo a, khum chhawng an dah belh tih mai loh chu a ngai deuh vek a ni.

"Hazel, nautelem khi i ta tiraw, khawngaihin ka pawm ve thei angem?" Lydia chuan toys dahna inkalh tlat lam chu a kawk a. Darthlalang a țang chuan 'ice cream doll' lo lang ka hmuh chuan ka hnuk a ulh țeuh mai.

"Mummy kha chahbi va dil la" ka tih chuan "Hazel, ta ania a lo la leh dawn a ti a, khawih a phal lo zel" a ti reuh a. Ka nu tehreng pawh chu! Ka naupan lai thil engmah a khawihtir phal lo tih ka hriat chuan ka rilru a khawih ngei mai.

"Kan pahnihin kan dil dawn nia" ti a, kaiin choka lamah chuan kan phei a, ka nu chahbi ka dil chuan mitmeng danglam deuh hlek hian min en a. Mahse, a dahna chu min hrilh ta tho a.

Chumi hnu chuan naupangte nen infiamin hun kan hmanga dinner eitura min sawm tlat avang chuan ka nu eisiam ka pui a, naupai laia in enkawl dan tur leh thil țul min hrilh hrep a ka nuih a za viau. Matt leh David paw'n sumdawnna chungchang sawi pahin intur an dawm dun a, an inmil phian a nih ka ring!

Kan haw dawn chuan car awmna thleng min rawn thlah a, Lydia chuan min chelh deuh reng a. "Hazel, lo riak ve la" a ti reuh a. Ka chhan hmain Matt chuan "Kan lo kal leh thuai ang, Hazel tello chuan zanah ka muhil thei lo a lawm" fiamthu titak zet hian a ti ve bawk a. Ka nu leh David pawh an nui tawp.

Cottage kan thlen chuan ka chau hnâp tawh. Matt, vang liau liau a chhungkua kan inrem leh hi ka lawm hle a ni. Mipa nge nge ngaihtuahna an seng zau deuh chu a ni e!

Matt chu sumdawnna chungchangah American head office nen indawrna an nei a, nitin chhuah angaih vangin keipawh ka nu te inah min dah mai a min rawn sawm haw ve mai zel a ni. Ka nun dan hahdamthlak zet chuan ka hriselna lamah pawh nghawng a nei thui viau a ni! Ei ka la thei tluang zel a, a awm ang ang hi chu ka ei zo deuh zel tih theih a ni.

Matt chu pasalah nei turin ka rilru ka siam fel tawh a, ka nu leh David te pawh rawn tel ve ngei an tum bawk. Ka pa thlanah kan chhungkuain kan kal a, hun kal tawh theihnghilha hmalam pan hi ka tihtur a ni tih ka hria. Bruno pawh kan zingah a rawn tel zeuh zeuh a, kan naute 'God father' nih a tum hle bawk. Ka nun chu hlimna hlirin a khat a. London kan thlen hunah innei turin Matt chuan ruahmanna a siam a ni.

"Holiday...hun reitak atan ruahman ka tum a ni. Markland, Chesapeake Bay lama kal chu enge i ngaihdan? tiin Matt chuan min rawn en a. A mitmeng chu a damthlapin a 'tie' chu a siam țha mawlh mawlh a, a hmuia fawp tur chuan ka dingdihlip âk âk a.

"A nuam ngawt ang chu, Lydia te bulah kan kal fo thei anga" tiin a hmuiah chuan ka fawp leh zauhva.

Ka sam towel a ka tuam bak chu thawmhnaw inbel ka nei hauh lova, business suit nalh taka a inthuam zuihna hnuaiah chuan Matt chu a khur deuh dar dar a ni tih ka hria. A laka thiltih theihna riau ka neih hi nuam ka ti ru riauva, Matt tana special tak niin ka inhriat phah bawk.

"Hazel..." âwki hniam chhak, bung deuh nghat hian tiin, a necktie suih mai mai pawh chu harsa ti hian a lang a, hreh deuh tak hian kalsawnin bathrobe chu ka ha ta a.

"Ka hria a lawm Matt! Hnathawh tur i nei tlat a...Holiday ruahman a ngai bawk si a...ațul aia rei shower nan hun kan hmang leh a... " Zangkhai fê hian ka lo sawi zung zung a.

"A țul aia rei office-ah awm ka tum lovang, chawhnu laihawl velah chuan lo haw ka tum dawn nia" Matt chuan a ti sap a.

America ațanga London kan thlen meuh chuan zinglam dar sawm a ri tawh a. Hun nuamtak kan hman hnu khan ka chhungte min ui chung chung kan hawsan ta kha a nia. Matt chuan kan inneihna tur leh holiday hmandan tur ruahman vat a tum thu min hrilh a ni.

"Vawiin chu reilote tal office ka kal a ngai tlat a, ka awm lo rei tawh tih i hriat kha" Pawiti ti hriat zet hian Matt chuan a ti leh a.

"Ka hrethiam a lawm ka kal i phal ve bawk si lo" tiin ka tum deuh hmak a.

"Hahdam takin lo awm rawh, chawhnu lamah i phone thar tur en pahin kan leng chhuak dawn nia" nui deuh suk hian a ti a. Ka phone min vawm chhiatsak kha a la hrereng tihna nia..!

"A thar țha tawk tak min lei ngei chu angai ang" uang takin ka ti ve zat a.

Matthew tlanliam tur chuan ban a rawn vai zauhva, ka ngai nghal veng veng thei nia!

A hlimawm zawnga thil ngaihtuah tlat hian nun hi a lo zangkhai mai a ni. Chokaah chuan hlim zet hian ka lut a.

"Telephone-a be duh che an awm a sin, Miss..." Donald chuan a ti a.

"Tunge a!?" Ka phone a chhia tih ka hre tho a, apartment phone number a min be tur awm hriat ka neih pawh ka hre lo.

"Sir, nen biak theih rih loh i nih thu ka sawi nain, thu a hnutchhiah lui ta thova. Mr.Faulkner awm laia sawi chhuah ka duhlo a ni" a ti deuh hmuk a.

"Engthu nge a hnutchhiah a!?

"Vawiin chhun dar khatah Higg restaurant a hmu tur chein thu a hnutchhiah a ni. Joshua Thorn a inti ta in ka hria" Lawm lo tih hriat zet hian a țawng bul hmuk a. Matthew rilru ka tihnat sak a hlau pek a niang chu hepa hian..!

Josh maw!? Engthil nge ni dawn le... min be ngai tawh miah si lo a, thil pawimawh tak a awm a ni ngei ang!

Choka ațang chuan chhuakin ka kawr hâk nena inrem chiah jacket chu ka la a, Westminster-a Josh rawn kal nachhan leh chuti taka hmuh min duh chhan tur awm chu ka ngaihtuah rauh rauh a.

Higg restaurant chu a lian lo naa a changkang hle thung. Kum kalta khan Josh leh Becca te nen kan chawl tawh a, a hmun ka la hriat tho a rin vangin Josh hian a thlang a nih ka ring.

"I lo kal thei chu ka lawm hle mai, ka hmu thei dawn lo che emaw ka ti hman tawh a Hazel," Josh chuan intur min thlit pah chuan a ti a. "Phone lo chhángtu kha atu-a pawh nise i chanchin zawh chhuah a har kher mai. Pa khirh leh luhlul zet a nih kha" a tih zawm leh chuan ka nui var var a.

"Donald a nih chu, Matt-a house keeper" Ka ti a. Josh pianhmang chu ngun lehzual hian ka en ta a, a sumdawnna tlachhe mai tur hmel a pu lova. Becca thih hnu hian hetianga hahdam leh hrisel hmel hian ka la hmu lo. Engemawtak a nun tihlim riau tu a awm aniang! Ka kalsan lai khan a sumdawnna tlachhia kha a tuar hle a, a mah puiturin min sawm a tun hi ka thleng ta a nia. Naute chungchang hi ka hrilh duh a ngem aw..!

"Thorn electronic chuan hma a sawn em, i share hloh tawh kha engtin nge ni ta zel? tiin ka zawt a.

"A fel vek tawh a lawm Matt a'n engmah a hrilh lo che em ni? kar hmasa khan company lawyer te'n an tifel thlap tawh. Matt chuan share insem pawh a duh lova, avaiin min pe vek" Lawm tih hriat tak hian a ti ta a.

Hei vang hi a nih chiah hi Josh hian hahdam hmel a put, Matt chuan a thutiam keng tlangin a țha thei ang berin Thorn company chu a tungding a ni. Josh tan chuan lawm ngawih ngawihna tur a ni ve reng a ni.

"Hazel, nangmah vangin ka company ka nei lêt leh a, ka lawm hle a ni, lo lêt leh i duh chuan a theih reng a nia" tiin a nui var var a.

Diklo taka Matthew a'n Josh nen kan inkârah ngaihdan a nei tih hria se Josh hi a nui hauh lovang mahse, hrilh hriat țul ka ti lem lo. Josh, ka unaupa ang chiaha ka en hi Matt chuan ka tlangvalpa hlui emaw tiin biak a phallo chu a ni sia. Josh, khawngaihthlak!

Kan thil ei chhung zawng chuan Josh chu a inla hrang tulh tulh a, ka mitah pawh min en țha ngam lo.

"Thil diklo a awm em ni Josh? Nidang i pha miah lo" ka tih chuan a sen deuh țáwn țáwn a. Chu chuan ka ngaih a ti țha lo tulh tulh a.

"Han hrilh dan tur che pawh ka hre mai lo a ni Hazel," tiin hmun dang daih a melh a. "Mahse, hre hmasa ber turin ka duh che a, nang chauh hi ka chhungte ti a sawitur ka neih i nia" a ti leh a.

"Engmaw ka hriat tur chu!?" Angaihna hre vak lo hian ka en kar a.

Áwki hniam deuh leh inthlahrung deuh hian "Nupui neih leh ka tum a ni, i ngaihdan tur chu ka hre hauh lo a, Becca kha i ngaina hle tih ka hria. Chuvangin hre hmasa ber turin ka duh che a ni" inthiam chiah lo hian a ti ta a.

"Tunge amah chu! Ka hriat zawng a ni em?" ka ti a, ka lawmpui hle a ni.

"Ka secretary, i aiawhtu kha" a nui pah suk a.

"Maw! I secretary maw? Ka lawmpui lutuk che Josh, keipawh hrilh tur che ka nei nual mai, hlimtaka awm turin duhsakna ka hlan a che. Becca kha kan theihnghilh ta nilovin, ani pawhin hlimtaka i awm hi a duh ve ngei ang" ka ti deuh duah a.

"Ka lawm e Hazel, min hrethiam ang tih hi ka ring tlat a ni. Nangpawhin Matt hi i hmangaih tih ka hria a, hlim reng turin ka duh che a ni"

"Kan innei thuai dawn alawm, arualin ti thei phei ila chuan a va'n nuam dawn tak. Becca vangin i rilru ti hrehawm duh tawh suh" tiin Josh kut dawhkan chunga a dah chu ka hum sak vang vang a.

Âw dam thlap leh vawt raih si hi rawn ri chhuakin "Hetah hian ka hmuhtheih tur thu che Donald a'n a sawi a" ti a, Matt chu kan dawhkan bulah chuan lo dingin Josh kut ka vawnna chu a melh run a.

"Min rawn zawm ve dawn lawm ni! Matt" Josh chuan polite taka ding chhuakin Matt chu țhutna tur a kawh hmuh vat a.

"A pawi hle mai, ka nupui hual rawn hruaitura lokal ka nia Josh" Matt âw chu a hawihhawm teh nain nelawmna reng a awm lo.

"Awle, Hazel hian holiday in hmang dawn tih a lo sawi a, ka awt hle mai che hun nuam tak in hmang dawn nia" Josh chuan a ti a. Matthew nungchang vawt leh nelawm loh viau nachhan chu ka hria, Josh nen kan inkârah hian inngaizawnna a awm tlatin a hria a, chuvanga biak pawh phal lo țhin kha a nia. Mahse, nupui a neih tur thu a hriat chuan a ngaihdan a sawhsawn mahna..!

"Min awt ang tih ka ring a lawm Josh" Matt chuan a ti kha fak a.

"Matt..." tiin a bânah vawn tumin ka va ban a. "Nakinah" ti hmukin min pawt thova, midang hmuhah chuan polite viau angin a lang na a, ka tan erawh chuan a hlauhawm ru riau thung a ni. A thinrim hle tih ka hre thei tlat..!

"In hun hman ka rawn ti khawlo a, pawi ka ti tak zet Josh" tiin kawngkhar lam chu min panpui nghal a, Matthew mitmeng chu a thim raihin a nelawm loh hle a, a hmui chu a chip hmak bawk. A hmelah chuan thinrim insum tih a hriat hle a ni.

Restaurant thleng thleng a min rawn umzui tih ka hriat khan ka rilru a nuam tawh lo. Josh mitmengah pawh khan hrehawm tihna leh manganna alang tel a, Matthew hian nasa takin Josh a pui a, chumi vang chuan tih thinrim hi a hlau hle tih ka hria a ni. A buaithlak ber lai chu Josh nen kan inkawp emaw a ti tlat hi a ni. Ka hrilhfiah ngei angai tawh ang, Matt hi chán ka duh lo...!

Pawn kan thlen chuan ka kut a vawnna chu Matt chuan a thlah ta a, ka bul hnaia awm ringawt pawh chu duhlo leh ten niawm tak hian a inla hrang nghal hmiah a. Matt chu a thinrim hle tih ka hria mahse, hetiang em em hian a thinrim ang tih ngaihna ka hre lo! Ka ring pha lo zawk, hrehawm ka ti lutuk chu thawk ka la hak a!

"Matt, i rindan leh ngaih ang khan Josh nen kan inkarah engmah a awm lo, khawngaihin ka thusawi hi awih rawh. Ka unau ang chiahin ka en a, ani paw'n chutiang tho chuan min en" ka ti a.

Ka thusawi ngaihsak lo zet hian a kut chu a phar zauhva, "I thusawi ka awih nachhan tur ka hre lo, Joshua Thorn biak ka phallo tih ka hrilh chiang tawk che Hazel, ka thusawi awih duh lovin i duhdanin i kal a, vawiin chawhnu-ah kan tih tur chiangtakin ka hrilh bawk che. I tana ka insensona leh ka dawhtheihna hian chintawk a nei ve a nia" a ti hmiah hmiah a.

"Mahse, Matt ka sawifiah thei...." Ka țawnglai chu rum zet hian min melh a, ka sawi zo hman lo.

"Kan inneih tur kha ka țhulh leh e, ka fa erawh kha chu ka thlahthlam hauh lovang, hlimtakin kan nun kan hmangin chhungkua kan din ve ang tiin ka suangtuah țhin. Mahse, chu chu vawiin ni hian i tichhe ta vek a ni Hazel Cade, ka dawhtheihna hi fiah suh ka tih kha..."

"Matt, i duh duhin min puh suh ka sawifiah thei ka tih chu...!" Ka la ti ve fan fan a.

"Ni lo e, ka thu zawm ai chuan kha pa kohna kha i ngaipawimawh zawk a, i kalna tur pawh min hrilh hre duh lovin a rukin i kal a, ka thei tawh lo a ni Hazel. Taxi-in a nghak reng che" tiin kan hma lawka car dum chu a kawk a "Apartment lamah kirin i thawmhnaw lo siamfel vek la. Ka lo haw hma ngeiin apartment lo chhuahsan turin ka duh che a ni. Naute thawmhnaw kan lei zawng zawng pawh kha i keng tel vek thei ang, engtikahmah hmuh leh che hi ka duh tawh lovang" Matt chuan thutawp sawi tih hriat zet hian a ti ta hmiah a. Inherin car-ah chuan lutin chak zet hian a tlan chhuak zui ta nghal a.

A partment ka thlen chuan Matt min țawngkhum dan kha ka ngaihtuah lêt theih chauh a, min shock zualpui a reh tawh bawk.

Bedroom-ah chuan lutin ka thawmhnaw chu suitcase-ah chuan ka rem a, khum bul dawhkan chungah chuan kan inhualna zungbun chu ka dah bawk a. Ka chhuak ang, ka chhuak khawp ang. Mahse, ka insawifiah phawt anga chumi hnuah chuan kir leh ngai tawh lo turin ka kal tawh ang.

Țhutkhawmna pindan sofa-ah chuan țhuin Matthew lo haw hun chu ka nghak ta a...

©<++++[BeckirafARenthlei]++++>®
Chapter-18

Matthew nghaka ka țhutna pawh a rei tawh hle a, ka ke kham ut ut chu tih reh tumin ka hmet nawk nawk a. Engtia khatianga min ti ngam nge a nih chu le? Bungrua a duh huna a lei tur, a duh hun hun a thehthang theih emaw min ti tihna em ni?

Ka tho thut a pindanah chuan ka vei tawn chhen a, dik lo takin Josh nen min puh a, a ngaihruatna dik loh vang mai a hetia min ti hi ka ngaizam mai dawn lo. A thuhrimah a hma pawhin Josh nen kan inkâr thil chu a ngaithei tawh lova, chuti chung chuan a hnuaia thawk turin min duh tho si. Rei ka thawh pawh a phal leh chuang lova, tunah ințhen thu a sawi leh a, a ém ém lutuk ve deuh a ni!

Tunah chuan hlimna ka neih ve chhun tlemte pawh Matthew hian min tih chhiatsak leh vek a ni. Ka insawifiahna ngaithla duh lovin ama insawifiahna chauh min ngaihthlak tir a. Hah... ka nghak chhuak tho tho ang, ka insawifiah hunah ka chhuahsan ve thung dawn a ni.

Lungawi lo zet hian sana chu ka en a, kan misual tenawmpa chuan lo haw reng reng a tum lo emaw ni chu le!? Darkar hnih kal ta khan Donald pawh a mu tawh. Zanlai a pel der tawh si, khawiah nge a awm ang? Kelly emaw tu emaw ber a pan a nih ka ring ta ber a. Experience ka nei lo hle a, hmangaihna kan chendun kawngah min duh khawp lo te pawh a ni mahna!

Ka thil ngaihtuah chu duh lovin choka lamah ka phei ta a, chutih lai tak chuan lift-lo chho thawm ka hre zui zat a. A tawp a tawpah chuan a lo haw ve ta nge nge a lawm.

Ka thin a phu nghal dawt dawt a, ka ding chawt bawk. Ka kutte chu a thlan nghal dap a, ka hmangaih thu hrilh tel lo hian engtin nge ka insawifiah tak ang aw...! Ka lo la awm ve reng avang hian a thinrim dawn tih ka hria! Pawi tawp nang kei pawh ka thinrim ve tho!

Inchhunga a lo luh chuan Matthew chu a chauh hmel hle a, min hmuh veleh rum fahran leh nelawmna tel miah lo hian "Chhuak turin ka tih che kha, enge i la tih reng?" a ti țhawt a.

A âwki ang chiah chuan "Ka hria a lawm mahse, ka sawi duh ka sawi phawt anga ka chhuak em em ang!" ka ti ve hmak.

"Hazel, ka ti tak tak a nia, a tlai tawh viau nain i phone kual tam phawt chuan riahna tur hotel chu i la hmu thei lutuk ang" vawt raih hian a ti leh a.

Sofa-ah chuan țhuin hawi sáng deuh larh chung hian "Min duh lohna hmunah hian awm luih ka tum bîk lo, ka chhuak khawp ang, min chelh pawh tum la i thei chuang lo ang" Ka ti chang ve fak a.

"A tuartu ni zawk awm te chuan țawng teh suh. Kan inrem vek tawh a, chu chu ka lo hmuh ve dan a ni, nang erawh chuan hmangaihna kan chen dun hnu ah leh ka fa hial i pai chung paw'n Josh i pan leh zel tho" a ti hmuk a.

"Ka pan reng ang chu, a nun a thilthleng thar hi a farnu ang chiah a min ngaih avangin hre hmasa ber turin min duh miau alawm" ka ti ta a.

"Chhuanlam tur dang i hre thlâwt nange Hazel, in pahnih chuan hotel room in book hial tawh lo maw!?"

Țawng mai nachang pawh ka hre tawh lo, hetiang em em a rilru kawi han put chu leh..!

"Ka kal tawh mai ange insawifiah tum hian engmah a siam țha lo ang. Nang biak reng che ka châk bik lo e" tiin ka ding ta a.

"Țhu rawh" Matt chuan rawn ti tuarhin intur chu a inthlit nghal a.

"Josh chuan a secretary nupuiah neih a duh thu min hrilh tum a min rawn pan a ni. A nupui hlui Becca kha ka ngainat êm avangin a inthiam chiah lova, chuvanga hre hmasa ber tura min duh pawh a ni reng a, ka pawmpui loh a hlauh vangin. A unaunu ang chiah a min en vanga ti a ni bawk, kan inkârah engmah a awm lo. Josh i zawt thei ang!" tiin kawngkhar lam chu ka pan a, Matt chu a țhutna ngaiah țhu rengin min ngaihven hmel pawh a pu lo.

Ka thawmhnaw dahna suitcase chu ka tan ken a rem loh avangin ka kalsan mai a niang chu, remchangah Donald bia in inthawntir dan ngaihtuah ila nimai!

Hotel-ah thlen ka tum hauh lo. Bike chahbi ka bag a ka dah chu phawrin garage lam chu ka pan a. Matt chuan min umzui ka ring deuh thut thut a mahse, a thawm hriattur a awm lo mai ni lovin a reh tlawk tlawk mai a ni.

Bike chu nawr chhuakin ka tih nun thleng pawh chuan ngaihven tu ka nei chuang lo. Ka rilru ná leh tawt lutuk chu tih reh dan awm se ka va'n duh tak!

Apartment chu chak fahran hian tlanchhuahsanin zanlaiah Marton Clee chu ka pan ta a. Bike khalh duhlo viau mah ila taxi ko buai leh turin ka tlâwm ve tawk tawhin ka hria. Kawngtluan chuan ngaihtuahna mumal pawh hmang thei lovin kawng chu nguntakin ka en a. Ka tlan chak thawkhat viau tih ka hria mahni inkhawngaihna ka nei deuh thut a, chu chu duh lovin ka ngaihtuahna la peng tur chuan chak lutukin ka tlan chhunzawm leh ta a.

Ka flat ka thlen chuan zinglam dar thum a ri tawh a, chau zet hian ka khumah muin ka chhing ta vang vang a.

Ka nun hrehawm tak chu tuar chhuah tumin theihtawp ka chhuah a, Gary te nufa tih loh chu ka chanchin tumah ka hrilh lo. Min khawngaih rualin min fuih ve reng a, thlakhat aia rei mah ka flat-ah chuan ka khawsa leh tawh a, Josh pawh ka tlawh ngai lo. Ka pum puar ve âk tawh chu a hmuh hunah zawhna chhan sen loh min zawt dawn a, chu chu ka duh lo a ni.

Matthew chanchin hriat ka nei lova, hriat pawh ka duh hek lo. Chanchinbu ka lâk ho pawh ka titawp vek a, Hazel Cade ka nia lawm le.. hei aia hun harsa pawh ka paltlang fo tawh a, ka ti thei ngei tur a ni. Hna pawh ka zawng duh ta lo law law a, nau ka neih fel hunah tha tharin ka la ngaihven ang chu...

Vawiin hi saturday a ni a, thlai tharlâm siam tur ka kawl tawh loh avangin khawpuiah kal zuai ila mamawh lam khawm ka ngai reng reng tho a.

Cotton kekawr thawl deuh leh ka pum puar ve deuh tawh khuh nan a chungah shirt tháwl lam bawk ka ha a. Bike khalh chi ka nih tawh loh avangin taxi ka hmang mai niang chu.

Green sreet dawrah chuan lutin ka mamawh ka lam khawm a, counter nghaktu chuan min dawngsawng țha hle a, ka card chu counter-ah chuan hnáwl pheiin bill a tih fel hun chu ka nghak a, ka hma lawka darthlalang liantaka ka mi hmuhte chu ka melh ta reng a.

Ka thil hmuh chuan min shock lutuka chet mai nachang pawh ka hre lo. Matthew chuan hmeichhe sam sen thar a kuah lai chu ka hmu a, lift-ah an lut dawn chiah lehnghal! Matthew chuan min hmu lova a bula kal chauh chu a ngaihsak a nih hmel..!

Ka thil lei chu khawm sawk sawkin dawr chu ka chhuahsan ta a, ka hrawk chu a tawt up up a, țap lo turin ka insum fan fan. A hmel ka hmuh chiah khan ka natna te chu a rawn thar leh nimaiin ka hria. Matthew leh hmeichhe dang maw! Kelly chu a ni miah lo! Thikna nasa tak ka nei kei hian...!

"Hazel?" ti a, min lo ko tu chu hmuh chian tumin ka khap sak sak a.

"Edward, a pawi ka ti khawp mai ka lo hmu lo che a. Enge i an?" tiin hawihhawm tak hian ka zawt a.

"Ka țha e, lum i tih hmel kher mai! Ka rualin engahnge i lo kal mai loh ang, i inpeih chuan ka thlah ang che" Ka chhanna pawh nghak lo chuan ka thil lei ho chu khaiin kawngpui chu min kánpui ta a.

"I landan chuh! Hazel, zawhna zawh vak che ka tum hran lo. In enkawl țhat i ngai hle a ni, hospital-ah emaw ka clinic-ah tal incheck up la a țha lo maw? Car-a kan chuan hnuah Ed, chuan a ti sap a.

"Ka țha lutuk, lum ka ti satliah mai a nia" ti ve tlatin ka chénna hmun chu ka hrilh a.

"Ok, i tih tlat chuan" tiin engmah sawi zui tawh lo chuan ka flat kawtah chuan car chu tidingin ka thil lei ho chu a la chhuak a. "Ka rawn lut kawi lo mai ang clinic-ah kal ka ngai a" ti lehin car chhungah chuan a țhu lut nghal a. A tlan liam thleng chuan ka thlir zui reng a. Tlangval fel tak a ni!

Ka flat kawngkhar kalhna chu hawngin inkhai bawr zet chuan ka lut a.

Țhutkhawmna pindan sofa-ah chuan thatchhe zet a țhuin Matthew chuan intur no a lo dawm a! Ka makti hmel a hmuh chuan "I chhuak rei hle mai Hazel, khatianga thil rit chawi vak kha naute tan a țhain ka ring lo" a ti hmuk a.

"Nang! Engthil....?" Țawng pawh ka țawng țha thei lo.

"I flat-a ka luh theih dan hi i tihna mi?" ngeiawm tak hian a ti a. "I best friend rinawm zet Gary Seymour khan min pe mawle...!"

"Tenawmpa" tiin a bulah chuan ka va kal hnai a, ka bag chuan a lu ah chuan ka vaw țhuai a, ka bag lock chu inhawngin a chhunga ka thil dah chu a tla darh ta chuai a.

"Hazel Cade" ti chhum hmukin a bulah chuan min pawt țhu hnawk a. Chu chu duh lovin a rem lai laiah ka lo chum zawt zawt a.

"Darling, tikhan awm teh suh i chau vek ang" tiin alamah min pawt hnai a "Ka ngai lutuk che Hazel" thám deuh sap hian a ti a. Chuti maia lungawi turah chuan min ngai emawni le!?

"Min thlah vat rawh" ka ti țhawt a.

"Khawngaihin tiang hian awm tawh suh" Matt chuan beidawn hmel zet hian a ti ta a.

"Maw!?" Matthew thusawi chuan min ti phu zawk mai!

"Hazel, ka hmangaih che" a ti leh sap a. Ka áwmah chuan a hmai chu rawn phumin a khur dar dar a. 'No' Matthew hi a țap chiang mai, engthil nge thleng ta hi! Sawitur ka hre lo.

"Matt, hetiang hian awm teh suh"

"Ka kaltir tawh ngai lo ang che, i tel lovin ka awm thei lo a ni. Khawngaihin min ngaidam rawh" a âw chu a thám deuh țuak a. Matthew te ang mipa ah pawh 'pa' lutuk kha keimah vangin a țap a nia. Awih a har a ni!

"Mahse, Josh nen inkawpah min ngai a nih kha" ka ti a.

"Ka lo tisual reng a ni. I chanchin hi ka chhui vek ka rinhlelh che avangin ka tihpalh tak zet a ni. Hrep tak hian Hazel...ka hmangaih che, ka hmuh tirh phat ațang che khan ka duh nghal che a, nang lah i chapo-in i induhtawk hle si. Min tihbuai zia hi i hre lo a nih kha!" a ti ta a.

"Ka chapo kher lo" ka lo ti vat a. Ka rilru nem țan chu thup ka duh viau nain a har a ni. Matt chuan min lo hmangaih ve reng si.

"Chapo e, i luhlulna leh induhtawkna kha ka tan chuan chona a ni. Ka ta ah siam che a, thlauhthlak che chu ka tum ngei a lawm mahse, ka hmangaih ta tlat che a ni. Nau i pai tih ka hriat khan ka lawm em em a, min hrilh hun ka nghak a, nang lah chuan min hrilh i tum der si lo. Ka rilru ang i pu ve lo ni a hriatna ka neih tak avangin America-ah khan i rilru hneh tum ranin ka hruai che a. Ka hneh ta reng bawk a..." tiin a thaw hawk a.

"Tum neisa ranin maw min hruai?" ka ti sap a.

"Ni e, nau i pai takah kha chuan min hmangaih ve theih mai ka ring kha a nia. Mahse, Josh i hmu tih ka hriat khan ka insum thei ta ngang lo a ni. Hazel, ka ta chauh ni turin ka duh che mipa dang an awm tur a ni lo. Țhian pawh ka thik vek" a ti ta a.

"Mi mawl pa, ka hmangaih reng țhin che a lawm, ka hua che ni a ka hriat lai pawh khan ka hmangaih tho che"

"I ti tak tak em ni? Min fiam teh suh Hazel" a ti a.

"Ka fiam lo che a sin" ka ti thuai a, va kuah vawng vawng a, a hmuiah chuan fawh a, min rinhlelhna te chu tihbo sak ka duh a. "Nang lo chu mipa dang ka tan an awm thei lo, a hmasa ber i ni a, a tawp ber pawh i ni ang. Josh nen khan min hmehbel tlat a, putar lam deuh duh turah min ngai a mi!? ka nui sak a.

"Josh chenna hmuna ka hmuh hmasak ber che khan inpawh hmel takin in awm duna khatiang ang khan ka bulah hian i awm ve ngai lo" Naupang chhia zet a tiin a tum deuh bur a. Ka nuih a za viau nain ka nui ngam lo!

Engemaw chen chu ka mitah Matt, chuan min en deuh vang vang a, chutah min pawmbet ta thlawp a. "Hazel, min chhuahsan zan khan ka â mai dawnin ka hre hial a sin. Josh kha ka thik tlat vangin umzui lo tur chein ka insum nasa hle a ni" a ti ta a.

A hmuiah chuan ka fawp zauhva,"Ka hmangaih che. Nangmah chauh, englaipawhin ka hmangaihna che hi a nasa a, ka sawifiah thiam lo zawk" ka ti sap a.

"Hazel..." thaw hawk chung hian a lo ti a. Ka hmuiah Matt chuan fawp vang vangin "Kan inkârah tumah an tlakzeh ka duh lo" tiin ka ir velah chuan a fawp thla dan dan a. Chutia midang a sawi takah chuan vawiina hmeichhia nen ka hmuhdun kha ka hre chhuak ta a.

"Matt, tunge vawiina hmeichhia i kalpui kha!?" ka zawt lo thei lo. Mitmeng danglam deuh hian "Min hmu tih ka hre lova, i doctor tur Vero-i a nih kha. Kei hian a țha ber zel tihsak che ka duh" a ti ta a.

"Doctor ka nei tho sia, a ngai kher dawn a mi?" ka tih chuan "Hazel, nangmah kal ngai lova, inlama kan koh thei tur a nih kha. London-a doctor thiam ber leh lar tak a nia sin, naute țha taka neih kan duh chuan kan mamawh alawm" tiin ka kawr hâk chu hlim chhovin ka pum chu a chul a.

"I kut hi lasawn teh, ka thil lei ho hi rem fel ka duh" ka ti a.

"Hmanhmawh suh darling, ka tihpui vek ang che" nui suk chung hian a ti a.

Ka pindan lam min panpui lai chuan Matt nghawngah chuan ka lo kuah a,"Nangmahin ka awmtir dawn tawh lo che" Matt chuan a ti zui ta sap a.

*
*
"NUI RAWH LE...duhtak....vawiin ni hi i tana hlimawm ber tur a ni asin" Suit buang thak ha, Matthew Faulkner chuan ka kut dinglam nghet taka chelh pahin ka beng bulah a rawn phun sar sar a.

Ka kawr hâk chuan ka dul puar ve âk tawh chu a hliah hneh hle a. Ka nu leh David chuan America ațangin a bîk liau liau a ka hâk tur a an rawn ken a ni. Lydia leh Jason chu an phur hle a, nuam an ti hle tih ka hre mai.

"Kei Matthew Faulkner hian Hazel Cade......" tiin Matt âw chu Biakin chhungah chuan a fiah țha hle a, kan inneihna thutiam min hriatpuitute zawng zawng chuan a thusawi engkim chu chiangtakin an hre thei vekin ka ring!

Mopa thutiam a ring țha bawk a, duhthu a sam hle aniang ka sawi ring ve dawn em? Tih hre châk niawm tak chuan a reh deuh țhup a, "Kei Hazel Cade hian Matthew Faulkner....." tiin fiah fel tak chuan ka sawi ve a. Matt lo nui var var chuan min ti lai viau!

Zak deuh tak chung hian Matt chu ka melh chho hram a. A mitmeng tuifinriat ang maia paw muk raih chuan hmangaih tih hriat takin min lo en a. Thutiam hlimawm tak min tiam tlat tih a mitmengah chuan ka chhiar thei a ni.

"He zungbun hi ka nupui i ni tih lantir nan ka buntir a che...." tiin diamond zungbun nalh zet chu min bun tir a, kei paw'n a tih ang chuan bun tir vein, Matt chuan ka kut chu lakangin a fawp zauhva.

"Nupa in ni tih ka puang e" Pastor țawng pawh a ring khawp mai!

Pawnah chuan lawmpuina min lo hlan sap sap a.

"Monu kha fawp tawh rawh le" rawn titu lam chu Matt nen chuan kan en a, Josh leh a nupui hual chu inkuah rial hian an lo nui var var a. Min lawmpui hle tih ka hria, Matt chuan nui sângin bân a vai khum zauhva.

Ka mokawr hâk chu inhmeh min tih hmel zet hian Matt chuan a enkham thei lova, Min pawm kangin chhuang tih hriat deuh hian min virkualpui a, chutah ka hmuiah chuan fawp vang vangin 'camera' chu a de chuai chuai bawk a...

Thlalák chhung rei lutuk tur chu Matt chuan duh lovin a titawp ta thuai a, ka chauh lutuk a hlau deuh nge...!?

Faulkner Villa-a reception an buatsaih chu ropui vak turah ka lo ngai lem lova, mahse a boruak chu a hlimawm kher mai. Thingkungah chuan light a eng de sep sep a, a phe zeuh zeuh bawk. Matthew-a rawih ho te chuan engkim a țha ber chi an hmang tih a hriat hliah hliah a, ei leh in pawh duhthusam a ni.

Ka nu leh David chu kan dinna lamah eitur plate chawi chungin an lo phei a "Matt, inneihna ropui tak a ni e, eitur pawh a tui tak zet. He thil hi engemaw a nih reng reng le!?" ka nu chuan tiin a plate chu Matt hmaah a rawn keng a.

"Bar-be-gued ribs, Texan ho siam dan a nih kha" Matt chuan a ti a, chu thil chu a tuihmel hle mai, tlemte ei ve tuma ka ban chuan Matt chuan "Ni rih lo e, i ta tur chu nakinah" ka beng bulah ati sap a.

"Làm hnuhnung ber va hauh ve tawh ila, a pawi lovang chu darling...chuan kal nghal ila" Matt chuan a ti leh sap a.

"Honeymoon țan thuai i châk a ni maw?" tiin ka fiam zauh a.

"Ka nupui raipuar hi belhchian ka châk tawh. Ka hmanhmawh dan i hrethiam pha kher lovang" nui suk hian a ti a.

Rimawi tumtute bulah chuan Matt chuan min hruai phei a, hla sak tur a hrilh hnu chuan "Min lampui a hun ve tawh tak zet a ni" tiin ka kawngah a rawn kuah a.

'Don viago' hla mawi zet chu a rawn ri chhuak a, music rem chuan kan làm dun ta a. Aw tháwp sat hian Matt chuan "Ka hmangaih che, Hazel" a ti ta a.

Matthew mitmeng sexy lutuk chuan min en reng a, midang làm ve te chuan min en țhap tih ka hria. Mahse, ka zak duh tawh bik lo, Matt chu ka hnaih sawt a, ka kawngah lo kuah nghet salhin "A aia hnaiin le" a la ti cheu a...

Villa-ah kan riak dawn emaw ka tih chu a la ni lo fo, Matt lah chuan min hrilh duh țhak lo! Kan misawmte an haw zo tawh a. Kan inneihna tipuitling tur chuan khawi hmun nge kan pan dawn ka hre miah lo.

Thlawhna pindan nuam em em a sofa chungah chuan ka țhu sawp niaih a, pawn boruak thim tak chu ka va bih a. Hnuai lam hla takah chuan eng ka zuk hmu leh zeuh zeuh țhin. Ka bulah chuan Matt chu țhuin a coat hâk chu a phelh tawh a, a kamis hâk kilhna pawh a hawng țhen nual tawh bawk. Villa kha Faulkner private jet-in kan chhuahsana Markland America kan pan turah ka ngai ve hmiah.

"Hetiang kawrfual ha chunga hotel-a ka luh chuan nuam ka ti dawn miah lo a nia" ka ti nang nang a.

Nui chungin "Hazel, chuan a haider leh thei tho ang" chimawm zet hian a lo ti a.

"Minute reilote chhungin ka inthlak fel hman vek ang" Ka la ti ve țang țang a. Ka mokawr hâk hlih a phal tlat lo chu mak ka ti viau a, ka zawt hreh ve deuh a ni!

"Tikhan reilote awm ve rih rawh a hrehawm viau a nih chuan thuhran nise, kha kawr i hâk hun kha ka lo nghakhlel țhin hle a nih kha, chutia phelh leh mai atan chuan ka phal rih lo. I inhmeh lutuk tlat darling!? a ti ta a.

"A chang hi chuan ka hrethiam lo țhin che a ni Matt!" ka ti sap a.

Matt chu lo nui sukin kan inneih zungbun ka bunna chu a tuai hauh hauh a, "Kumkhua atan he thil hi phelh tawh lo turin ka duh che" a ti sap a, zunbun inang chiah kan bun chuan min ti hlim veng veng mai.

"Nang pawh mawle" ka tih chuan a nui hawk a. "Engtin emaw tak min chhan lêt ka ring reng a, he i mizia induh larh hi ka ngaina țan tlat" tiin a lamah chuan min kuah hnai a, min fawp ta vawng vawng a.

Thlawhna a țanga kan chhuah a car lam kan pan lai chuan Matt chuan ka intihpalh hlau zet chuan ka kutah nghet zet hian a vuan tlat a, kan kalna tur hmun hming chu driver a hrilh zauhva, a chétdan chuan ka nuih a ti za hle.

Markland chu a mawi hle a, In lianpui ding var vo mai kawtah chuan driver chuan car chu tidingin a chhuak vat a ka țhutna lam kawngkhar chu rawn hawngin min hruai chhuak a. Matt chu ka bulah rawn dingin "He in hian a lo lawm a che, i tan liau liau a ka lei a nih hi Hazel. I duh chuan a hming i phuah thei ang" ti a, min pawm nawlhin  inchhungah chuan min pawm tlang zel a. Bedroom zau takah chuan min nghatin ka bulah chuan a ding a.

"I love you Hazel, i âw ri hi ka hmangaih a, i kutin min tawhna hi ka thlahlel hle bawk, i nui hmel hi ka thlir ning ngai lovang, hlim taka nuih tir che ka duh a,damchhunga hlim taka awm tir tur che in keimah hi ka pe che a ni" Matt chuan a ti ta a...

A taksa lum ham hama min kuah chuan, ka hriatnate chu lo nungin Matt nghawngah chuan ka kuah chial a.

"I pasal kiangah mu ta che, wife" tiin min sawm ta a....

©<++++[BeckirafARenthlei]++++>®
           
             Last Chapter-19

Ka mokawr hâk chu Matt chuan ui hmel tak hian min hlih sak a. A thawmhnaw inbel pawh a phelh ve nghal vek bawk. "I bula ka awm reng chung pawh hian ka ngai tho che" Matt âw chu a thám deuh chhal a.

Reilote chhung chu mit khap miah lo vin kan inen deuh vang vang a.

Ka taksa láwng chu chúl kual dan danin "Naute kan neih zawh veleh mokawr ha chungin a hranpa hlauhvin shooting neih leh ka la duh dawn a nia" a la ti ta fo a.

"Vawiina mi zozai kha engtia tih nge i tum, mokawr lawm rual pawh i ni tawh lo" ka ti hlak a.

"Hazel, i thawmhnaw hâk inhmehzia kha i hre lo a nih kha, ka en kham thei lo che" tiin ka pum tlém a puar deuh chu a chul a, "Hei hian a ti lang sexy khawp mai che" tih kher pahin a nui suk a. A mitmeng eng thil emaw ngaihtuah tih hriat tak, phûr leh nghahhlelhna vanga thim deuh khap chu ka hmuh hmaih bik lo.

Ka hmuiah chuan fawpin a tir chuan dam thlap leh chhanlêt phut zet hian bul a țan a. A rei tulh tulha min fawp uar telh telhin khum zau zetah chuan min hruai phei ta a. Ka taksa a chul kual reng avang chuan ka lo rum ve hak hak bawk. Matt taksa khauh țang mai pawh chu lo danglamin, zauthauna nasa tak avang chuan a khur deuh dar dar a. Nupa kan nihna nemnghet lehzual turin hmangaihna chu ám takin min chenpui ta a. Duhthusam ram, suangtuahna ang maia nuam leh hlimawma kan paltlang hnu chuan Matt tháw chu a la pangai lo hle a, a lamah min kuah hnaiin ka áwmah a lu nghat chial chung chuan a muhil ta a. Keipawh mutthilh tumin ka maimichhing ve ta bawk a.

A tuk zinga ka harh chuan hlimna nasa tak hian min la tuam reng a. Zankhuain Matt chu min kuah chungin a muhil a nih kha, tunah pawh a bawp chuan min la khan chial a, a la muhilin ka hria.

Matt tih harh hlau tak chung hian bathroom-ah ka intifai sawk sawk a. Room-a ka luh leh chuan Matt chu a lo harh reng tawh. Zahna nei hauh lo hian saruaka ka awm chu min thlir reng a. Fiam ka châk deuh thut "Mumang ram lamah i la chéng nge, tikhan min thlir reng dawn Matt"

"Nangte hi...." ti a lo thovin ani pawh chuan a taksa khuhtu awm lo chu zahpui hauh lo hian min rawn pan a.

"Hazel.." tih sap pahin ka sam chu hnung lamah chuan min huihkian sak a. A darah chuan min kuah beiin min ngaihsak tak zet a ni tih a cheziaah chuan ka hre thei. Matt hian min hmangaih hle a ni tih ka ringhlel hauh lo.

"Vawiin hian chawlh hahdam ka lo ti mai lo a ni! Thawmhnaw ha tawh ang le. Ka pizawn te an rawn thleng thuai ang 'Lounch' in ka hruai chhuak ang che u. Lydia leh Jason pawh tiamin" a ti ta a.

Jeans kekawr bul hâk tuma ka phawrh chu Matt chuan phal lo vin, a aiah kawr paw duk nem thap mai wardrobe-a mi chu phawrh chhuakin "Khatiang kha chu ha tawh lo ve darling" tiin kawrfual chu min hâktir sawk sawk a.

"Strick viau tur a ni lo a nia duhtak" tiin tum chak hmel takin ka hmui chu ka han tipawrh a. Chu chu hria niawm takin ka hmuiah chuan a fawp zauh a "Taksa lang tam lutuk thawmhnaw hi kan 'cancelled' thei tawh ang ka nupui luhlul te!" a tih chuan ka lo nui tawp.

Kan lunch ei tur, Brett-a min siamsak keng chuan Chesapeake lama kal tur chuan kan chhuak ta a. Kan chhuah hma lawkin ka nu te chhungkua pawh an lo thleng chawpchilh ve bawk a.

"A hun takah kan lo thleng a nih hmel!" David chuan tiin Jason leh Lydia chu kan lam panin a rawn kai a. Naupang pahnih phur lutuk hmel chuan min ti harh sawng sawng thei nia!

Tuipui chungah chuan Matt-a Lounch-ah chuangin kan bengchheng kher mai! Thliarkar, thing din țhulhnaah chuan lunch ei turin kan chawl ta a, lunch ei hma chuan tuiah rei fe kan chéng leh te te a, ka nu hmel hlim sarh mai ka hmuh chuan ka chhungril hi a hlim veng veng mai. Matt chu ka bulhnaiah zel awmin Lydia chuan min zui ve zel bawk a. He naupang hian min ngaina hle tih ka hria, Jason nen chuan ka unau tak takah ka pawm hmiah tawh bawk.

London-a kir leh pawh chu ka châk fahran tawh lo. Ka chhungte hnaiha awm hi ka thlahlel ru riau tawh tlat! Ka thil ngaihtuah chuan min ti ngui ta deuh raih a. Ka awmdan danglam chu Matt chuan alo man thuai a "Darling, i rilru ti hrehawm duh suh, i nu te chu kan tlawh fo dawn nia" a ti ta a.

"Engtin, company enkawl i ngai sia, chutia zin bo fo chu a theih nang!?" ka ti sap a.

"Hazel, company chuan min mamawh reng tho dawn. Mahse, ka nupui leh fa-te hlimna hi ka mawhphurhna a ni. Ka hnuaia thawk rintlak tak tak an awm țeuh a lawm, naute kan neih hnu ațang chuan in lamah hna ka thawk tawh ang" a ti leh a.

"Maw! I ti tak tak a mi?" Ka lawm lutuk  chuan Matt chu ka kuah ta chuk chuk a.

"Naupang chhia zeta awm hi i bansan thei dawn lo chu a nih hi" Matt chuan a ti sup a.

Markland-a kan awm chhung zawng hi kar thum a ni a, ka nu te chhungkua nen kan inpawh zual khawp mai. Ka nau neih hma chu kan zin thei dawn tawh lo tih Matt chuan min hrilh láwk thlap. Lydia leh Jason chuan naute thar hmuh loh an hlau hle a, kan neih veleh Matt a'n hruai intiam chungin kan hawsan ta a nih kha.

Hun hi dam chuan a lo kal ve duak duak mai. London-a Matthew apartment-a kan chenna pawh thlathum dawn a ni ve leh tawh a, ka pum pawh a puar ve tawh viau. Donald nen pawh kan inkawm nel ve ta deuh hlek bawk a. Min ngaina sawt ve khawp mai. Eitur chungchangah erawh chuan inhnial cháng kan la neih zeuh zeuh, a chhan pawh mut ka duh lutuk vang hian breakfast ka nang lo fo țhin a, chutiang hunah chuan keimaha insiam mai turin min ti țhin. Min siam duh ngai meuh lo.

"Coffee i in dawn em, Madam?" Donald chuan a rawn ti a.

"Min siam dawn tihna nge, keimahin ka insiam leh dawn!?" Ka tih chuan a țhen suk a.

"Exer lâk tam i tan ațha tih ka'n sawi leh hram ange Madam!" He pa tak hi chu aw...Matt nen tlai tin deuh thaw kan walk a, zing lama ka tho hma thei lo hi a vei bur a niang!..

"Ka hria e, coffee chu min pe dawn nge?"

"Yes, ka rawn dah dawn nia" tiin choka  lamah a lut nghal daih a.

Coffee no dawm chungin verandah-ah chuan ka țhu a, nitin lehkhabu chhiar tih loh chu engmah ka ti ngai lo. Incheck up tur tak ngial paw'n kal a ngai lova, Vero-i a rawn kal zel bawk si. Matt hian min duat khaw lo zo tak ngial dawn! Jaguar car rawn tlan lut mek chu ka thlira Matt a lo haw chiah e.

"I lo va haw hma ve" ka bul a lo thlen chuan ka ti sap a.

"Chanchin thar ka nei a, vawiin lam enge i lo tih le!" tiin ka chalah a fawp zauhva.

Lehkhabu chu kawkin "Khatiang chhiar kha a ni leh mai" ka tih chuan a nui var var a.

"Naktuk ațang chuan office ka kal dawn tawh lo, i kiangah nitin hun ka hmang thei tihna nih chu" Matt chuan a ti ta a.

"Ngati, ka țha lawm nau neih zawh hunah chauh i ti sia" ka ti vat a.

"Hazel, sum tam tak thawhchhuah hi a hlu em em a, mahse, kan neih sa pawh hian kan damchhungin nuam sa takin kan awm thei. Chuvangin duh tawk tak tak a awm thei lo a, company chairman ka ni reng tho dawn alawm, mawhphurhna zawng zawng ka la vek tawh dawn lo tihna mai a ni" a ti deuh duah a.

"Tunge, i thachhang dawltu tur?" dil chhut takin ka zawt ve kher a, hetia keimah vanga a company thlahthlam ngawt hi țha ka ti lo a ni.

"Joshua Thorn mawle" a ti ta a.

"Josh maw! Lalpa leh..."

"Nie, a hmaa Thorn company leh Faulkner ka kawp ang khan, Josh hian a enkawl ve rih dawn a ni. Min hnial ka ring hauh lo duhtak" a ti zui zat a.

"Ka pawm thlap, engtik nge Josh chuan a hna chu a țan dawn?"

"Naktuk ațangin office a lo kal țan ang" nui sâng hian a ti a, ka lawm hmel chu hmuin Matt chuan min kuah a "Lut ang le mamawhna che ka nei e" a'n ti ngei a!

Hringnun hi hetiang khawpa hlim hian ka hman ka ring ngai lo kha a ni a. Tunah chuan ka nunah hlimna tam tak a lo thleng zut zut a ni ber mai.

Veranda-ah Matt chuan kan fapa Rafael Matthew Faulkner Jr. thla khat mi lek a pawm lai chu ka en reng a. Hmangaihna avanga kan inkâra piang nausen chuan hlimna nasa tak min pe a ni.

Ka pasalin min tiam tawh ang ngeiin Villa-ah kan insawn tawh a, an chhungkaw chenna hlui chu naupang țhan lenna a tana duhthusam a ni.

Matt chuan kan fapa chu duat leh ngaina tih hriat tak hian a en reng a, ka thinlung chu hlimna hian a khatliam a ni ber mai, ka pasal chu ka hmangaih em a ni. Kumkhat zet kan innei ta a. Matt paw'n nitin min hmangaihna a lantir fo țhin.

Donald a'n champagne a rawn chawi chhuak a, Matthew hmel chu ka en a, hlimna avangin a éng sar mai.

"Engtikah nge an lo thlen dawn, ka pizawn te chhungkua chu!?" Matt chuan min rawn zawt a.

"An rawn thleng țep tawh ang, Lydia ka hmu châk tawh" ka tih chuan Matt chuan "Jason pawh mawle" a lo ti vat a.

Hmangaihna leh zahna mitmeng hian Matt chuan min en a, "Ka nun hi i ti danglam vek a, i luhlul ang bawkin i lo tuarchhel hle mai, fapa hmelțha leh duhawm tak min pek vangin ka lawm e. Hmangaih che hi ka tan tih loh rual a ni lo Mrs. Faulkner" a ti ta a.

"Keipawhin ka hmangaih che, Matthew" ka ti ve sap a.

Matt chuan a fapa pawm chung chuan min rawn kuah a, "I chhungkua hi ka chhungkua anni ve tih min hriat sak la, hlim taka i awm ka hmuh hian ka hlim țhin a ni. Lydia pawh a duh phawt chuan kan hnenah a chêng thei ang" a ti a. Lydia ka ngaina tih a hre tlat a!

Ka lamah Matt chu rawn kun hnaiin duhthawh zet hian min fawp a, min fawhna chuan thil tam tak min tiam a ni. Naute țap thawmah chuan kan ințhen hrang ta hram a.

"Kan lo ngaihsak lo deuh che em ni?" Tiin hnute ka hnék tir a. A țap bang nghal hmiah. A mit paw raih chuan a pa chu a en kiau reuhva, Matt chuan duat tak hian a samah a chul sak a.

"Hazel, kan lo thleng a nia..." Lydia rawn áu lang lang chu dawngsawng turin ka tho a.

"Nangmah mai chuan kal bik lo e darling, kan chhungkuain kan lo welcome ang chu" Matt chuan a ti  sap a. Naute pawm chung chuan Lydia te hmuak turin Villa kawt chu kan pan ta a....


EPILOGUE

"Hazel, car kan keng thei reng a nia" Matt pawh chhang lém lo chuan jeans kekawr ka ha a, jacket ka hâk leh hnu chuan ka inthlákna tur dahna bag khai chung chuan bedroom chu ka chhuahsan ta a.

Vawiin hi Lisa fapa piancham a ni a, kan chhungkuain kal kan tum a ni. Matt chuan car ken a duh viau rualin kei erawh chuan bike ken ka tum leh tlat pek a...!

"Le, ka inpeih e" tiin Matthew te lam hawi chuan ka nui sak a.

"Tunge ka ruala kal dawn?" ka tih chuan "Mom, keimah" ka fapa chuan a ti vat a.

"Keipawh" Lydia chuan min rawn zui a.

"Yes, Rafa (Rafael) min lo zui rawh le, Lydia nang pawh"

"In fair lo hle mai" Matt chuan nui chunga tiin a rawn tho ve nghal a.

"Dad, bike-ah ka chuang ve duh a lawm, kan rualin lo kal ve la" Rafael chuan a pa bâna pawt tlat chung chuan a ti a.

"Yes, my boy...i nu hian thil țul lo a ngaihtuah a ni ti raw!?" tiin a nui var var a.

"Ka rualin in kal dawn nge tikhan in ding reng dawn!" ti a, chahbi lain pawn lam ka pan a.

"I chák e Hazel, bike chuan kan kal dawn nia Rafa kha phur la keiin Lydia, inhnungah kan rawn zui dawn che u nia" tiin garage lam pan chuan kan chhuak ta a.

Ka bike-ah chuan ka țhu vang tawh a, Rafael chu ka hnung seat-ah Matt chuan țhut tirin ka kawngah nghet taka kuah turin a hrilh pah mawlh mawlh a. Kan nufaa tlan chhuak hmasain Matt leh Lydia chuan kan hnungah min rawn zui ve bawk a..

Ka dam chhunga hlim taka min siam tumtu ka pasal Matthew chu bân ka vai khum zauh a, ka hnunga țhu ka fapa Rafael Matthew Faulkner ngaihtuah rán chung chuan zawi muangin ka tlan a...


                    THE END

©<++++[BeckirafARenthlei]++++>®