1.24-89 [A Becky Rafa Story]

1. 24-89 

Ziaktu: Becky Rafa Renthlei

-B®®

THU HMA

He thawnthu '24-89' hi ka inbuatsaihna a rei tawh a, chhungkaw lamah damlohna, thihna, harsatna hrang hrang avangin ka ziak hleithei meuh lo a; mahse, a turtu a nain ka ziah châk êm êm thawnthute zinga mi a ni. Chuvangin, ka hlut a, inbuatsaih hun chhung pawh a rei ngar ngar khawp mai tih ka'n sawi hmasa duh a ni e.

230223

Khua a thim lek lek tawh a, ka duty-na aṭangin ka in luah ka thleng ve chiah a, mahni chauha awm tih takah ei leh inah ka hautak lova, ka in luah zau fahran lo-ah hian inlêng vawikhat mah ka la nei lo a; a chhan pawh thla hnih érh áwrh chiah ka la awm vang a ni.

Unau pahnih chauh kan ni a, ka u Vanlalṭana hi Serchhipah a awm a, ka nu leh pa an boral tawh tih ka'n sawi tel nghal ang e, Serchhip khaw hlun kan ni lo a, ka nu lam aṭanga ka pi leh pute khua a ni a, ka pa hi zu heh luat avangin kum ruk ka nihin a boral a, ka nu erawh chu doctor ka zir hlanin thluaka khawsikpui lutin a boral thung a, ka u Vanlalṭana bâk thisen zawm ka nei lo.

Nu leh pa nei lo ka ni ta mai hi tun hun thleng hian ka la tuar dam thei lo chu a ni ber e. Ka u hi a fel êm zâwka ka zirna zo tura min fuihtu leh min hnêmtu ber a ni bawk. Sawrkârah hna chhetê a nei ve a, ka nu pension sum hlawm kha in sak nan leh ka zirna senso atan kan hmang ta a ni.

Dr.Ngurthantluangi (MBBS, MS General Surgeon) ka ni a, Super Care Hospital Shillong-ah thla hnih ka thawhna chiah a ni bawk, private hospital a nih vang leh ka thawhna a la rei loh êm avangin ka thawhpui tlem a zâwng tih loh hriat mumal ka la nei vak lo bawk. Rim taka doctor ka lo zir vena ka nu ka hmangaih leh min hmangaihtuin a chhawr hman lo hi ka thâ a na ngat ngat hle bawk.

Ngaihzawng nghet nei lai ka ni a, thla ruk kan inkawp pum fel chiah a, Lalrinnunga niin ka zirpui leh engkima min hrethiamtu a ni. An chhungkaw chanchin sawi tur zîktluak ka hre lo a, Champhai khaw chhuak tih leh a nu leh pa an la dam tih bâk han sawi thui vak tur ka hre lem lo, ka ring tâwka ka zawt dil chhût lo a ni ber. A hun a tihah chanchin kimchang min la hrilh turah ngai ang aw.

Zanriah tur ka buatsaih laiin ka in luah kawngkhar tu emawin a rawn kik dawt dawt a, ve teh mialin! A la tlai chhe lutuk lo bawk a, ka va hawnsak ve mai. 

"Dr.Ngurthani a awm em?" Tia min zâwttu chu chîk zetin ka en a, keimah ka nih thu ka hrilh nghal bawk a. Helaiah Mizo min hmelhriattu ka lo nei ve reng a nih dawn hi!

"Madam, khawngaih takin i lokal lawk thei ang em, helai velah Mizo doctor han koh mai tur kan hre si lo a, nangmah hi min rawn kawhhmuh a," tiin hah hmel tak hian a thaw huam huam a.

"Eng thilah, khawi lai velah?" Tia ka lo zawh chuan chu pa hnung lam aṭang chuan mipakhat a rawn pên lut a, ka sawmna pawh nghâk lo hian dining chair pawt chhuakin a ṭhu hmak.

Chair-a ṭhu zawk chuan, "Jeho ka ni a, ka patea farm house-ah a inhliam palh hlauh a, damdawi ina kal a duh tlat loh avangin kan rawn ko tawp che a ni e, a thlawna lokal turin kan beisei lo che a nia, i tha hah man pawh a tlêm chhe lo ang," hniam ruih leh nelawmna tel miah lova 'Jeho' intiin min biak chuan koki sân âk chung hian, "Zanriah ka ei lawk ang a, in awmna lai min hrilh ula ka rawn kal dawn nia," ka lo ti ṭha ve mai.

Jeho bawk chuan, "Min lo hrethiam la, kan hmanhmawh êm mai, Farm house-ah i ei ve mai dawn nia, keini pawhin engmah kan la ei bîk lo," ti nghut chung hian a Sana bun lai a bih zuk a, Mask a vuah tlat avangin a hmel awm dan tur ka sawi thiam chiah lo. A palian hle a, chu zawng chu a ni mai.

Kawngkhar rawn kik hmasatu zawk erawh kha chu a dinna ngai kawngka bulah a la ding reng a, a palian viau lo. Mask pawh a vuah lem lova Mizo mipa pangngai hmelpu leh mitmeng zim lam deuh a ni.

"Ka thil ei min nghâk lawk ula, ka haw ve chiah bawk si a," tiin ka lo chhâng dam thlap a.

"Madam, thih leh dam kâr a ni a, rilṭâmin i thi hman hauh lovang, khawngaihin lokal hmasa rawh," tiin Jeho intipa chu a ding chhuak a, a kekawr ipte zen thún chung hian, "Buatsaih, kal ang, doctor emaw nurse dang koh tur dap leh zawk ila, kan tifuh ang, ani lo an tam êm mai," a ti hmuk a. Nuam ka ti chiah ta bîk lo.

Helaia ka awm chhung reilotêa min ko hmasa bertute an ni a, chu bâkah, ka Mizopui an la ni lehzel nen, doctor koh chhuah harsa leh lainatna nei lo anga min sawi ka duh bik miah lova, "Anih min lo nghak rawh u," tiin ka phone leh bag ṭhutthlenga ka dah chu ka ban zat a, Gas ka off leh hnuah eng mah pawh ei ta chuang lovin chu mite pahnih chu ka zui chhuak ve ta a. Ka doctor bungrua erawh Buatsaiha kha ka khâi tîr thung. Mizo tlawmngaihna hi khawi hmunah pawh kan hmang chhuak thei tih rilru ka put vang a ni.

Mizoramah hi chuan doctor an ni emaw nurse pawh nise kan inko lâwp lâwp zel a. Helai hmunah te chuan a thlâwnin doctor leh nurse pawh an inko ve mai mai tawh lova; chhungkhat hnaivai chu thuhran daih a nia. A dan a dang deuh lo thei lo.

"Buatsaih, Motor khalh la, doctor nen hian a hnung seat-ah kan han ṭhu ang e," tiin Jeho chuan kan bul lawka 'Force Gurkha Xtreme' tih inziak kuau awmna lam chu a pan nghal a, hetiang Custom Jeep hi chu helai vela mi neinung hovin an khalh ṭhin tih ka hre ve, Bolero a ang deuh a, an Modify ti ila a dik ber ang, company kut chhuak a ni lo thung.

Jeho chuan a hnung kawngkhar a hawng zui zat a, lût nghal mai lova ka din khawmuan tâkah chuan, "Kan hmanhmawha kea kal phâk lek a ni lo a nia," ti supin min nam lût titih. Ka va ngei e.

"Keimahin ka ṭhu lut ve thei reng," ka ti ve nghat a, nelawm vak lova min rawn melhin, "I muang châng mah mah alawm, kan hmanhmawhna rilru nen a inmil lo," a ti duh lek.

An motor en hian hetiang nei zo tur chuan an rethei hran lovang tih a hriat a, mihausa chapo deuh hi ka ngaihtheih zawng anni dêr lo lehnghal. An sum neih chhuangin an duh duha min tirh kâwi an tum a nih teh chuan ka duai hauh lo ang.

Motora kan chuan chhungin min be tuitam lo khawp mai, ka pum a ri raih raih a, a mask vuah lai phelhin Jeho chuan min rawn melh a, "Madam, farm house kawng hi a thui deuh hlek a, keimahniin kan thlah leh mai dawn che nia," dam deuh zawka tiin min en vung vung a, a mitah ka lo en lêt ve kalh a.

A ngo hran lo a, Mizo ṭawngin ṭawng mah se, hnamdang hmêl a pu deuh. Hmai dung sei lam niin, a hnâr bang a sang ṭha hle a, hmelṭha tia sawi tur a ni lo naa a chhe hran chuang lo. Ka mihring nêl zawng tur a ni lo sa. A mitmeng a hriamin a nunrawn hmel ka ti a, a taksa a inphut viaua a sâng bawk. 'JEHO' hetiang hming han put ngawt mai chu (h).

Dârkâr khat dâwn kan tlan hnuah 'JK Poultry and Goat Farm' tih inziahna hmunah kan tlan lût ta a, zan thil mah ni se, a hmun hma a zau tih a hriat reng. 

Umiam Farm (Meghalaya) thleng rakin ka zui ta chu a nia, ka awmna, ka thawhna hmun aṭangin 25 Km chuang zeta hla a ni nghe nghe. Traffic Jam-ah kan tâng hlek hlek a, kan chhuah hlim khan zan dâr 7 vel a ni a, tunah zan dâr riat a pel fel tawh bawk. 

'Min rawn kohna leh min panna a hla hle mai' tih ka lo ngaihtuah daih a, eng tin nge khalai hmunah khan ka thawk tih leh ka in luahna chena an hriat theih dan ka hre bîk lo, ka hming an hrechiang êm êm bawk si. Â, Mizo dik tak ka nih ve vang te pawh a ni mahna. Anni chu Shillonga inbengbel an nih duh hmel a, an khawsak phung enin an tlângnel tih a hriat mai.

Motor aṭanga ka chhuk hnuah Jeho leh Buatsaiha chu ka zui ve dat dat a.

Room pakhat zau fahran lovah kan lût ta a. Khuma mipakhat na tuar let reng chu ka pan nghal a, a Malpui ṭhui ngai khawpin a kâk zauin a thûk a, a nâk hnuaiah chutiang bawk chu a awm leh a, an lo tuam ve luklak naa thi chhuak pawh a la reh lo. Engvanga damdawi in panpui lo nge an nih ang? Tih zawhna ka rilruah a lo awm hmasaber.

Jeho lam hawiin, "Kan hospital-ah hruai ang," ka ti nghal a. Chutah, ṭhen sak chung hian, "Hospital-a hruai kan duh loh vang alawm kan rawn koh che, rang takin buaipui rawh," a ti hmuk a, ngaihdan ni lo lutuka amah melh kâwk chung hian, "Min mamawhtu zawk chu nangmahni in ni a, thu min pe hlek suh," ka lo ti ve hmak.

"Hmanhmawh mai rawh.." a ti leh sup ringawt.

Ni e, ka hmanhmawh ngei chu a ngai ang, a thi chhuak hi ka titawp a nih loh chuan nikhua a hre lo chhunzawm ang a, kan tâlbuai ngei dawn. Damdawi ina kal an duh chuang bawk si lo, mi mak ve tak annih dawn hi!

Rang takin ka che chhuak ta a, kei leh kei lo angin ka kut a khur dar dar thei nia.

Jeho leh Buatsaiha hmuh laiin chu pa hliam chu ka ṭhui ta a, hmanraw chikim ka neih bik loh avangin leh min rawn koh khan a nat dan engmah ka lo zawt si lo a, anni lahin min hrilh hek lo. Ka va nikhua lo mai mai e.

Nachhawknain ka jection a. "Damdawi inah chuan hruai ngei ngei ang che u, thisen a hloh hnem tawha ngaih ṭhaa awmna chi a ni lo," tihpahin ka kut ka sil mawlh mawlh a, kan inbuaipui chhung kha dârkâr chanve aiin a rei daih.

Damlo khuma mu melh zuk chung hian, "Naktuk lamah kan hruai ang, tun atan chuan amah pawhin a duh lo a, duh nise engvangin nge kan hruai loh teh lul ang," tiin Jeho chuan Buatsaiha a en daih a, "Zanriah tur eng emaw lo va siam rawh le, kan doctor hi a ril a ṭâm tawh ang," a ti leh a.

A patea ni-a a sawi hi a ni thei dawn em ni? Amah aiin a upat hmel hlek chauh a, mak ka ti ru deuh.

"Hei hi i patea chu a ni chiah maw?" Tia rinhlelhna mitmeng nena ka zawh chuan, "Thil zawng zawng hriat tum suh, kan koh chhan che a zo tawh a, engzat nge pawisa kan pek dawn che," a lo ti hmuk.

"Ngai lo mai rawh se, tihian a damdawi tur ka ziak ang a, in lo pe chhunzawm dawn nia, damdawi inah hruai thei ula ka la duh fan; mahse, phurh chêt rih loh pawh a pawi chuang lo," ti leh lawi siin Jeho pawh ngaichâng lo hian ka chhuak ta a.

Ka phone leh ka bag kha an Motor-ah khan ka hnutchhiah tih ka hre chawpchilh a. La turin ka kal zui nghal a, 'Farm house changtlung tak a nih hi maw le' tia ngaihtuah chungin motor kawngkhar ka hawng a, ka bag leh phone a lo awm tawh awzâwng lo! Ka in kan chhuahsan lai pawhin ka keng tih ka inhre ve reng. Chutia ka lo inzawn buai lai chuan Buatsaiha khan min rawn ko ta a.

"Madam, ei tur kan peih fel tawha kan eikhamah ka thlah haw ang che," a rawn ti a, ani hi chu a ṭawngkam a pangngai ve deuh.

Dawhkan pakhat kîlin kan pathum chuan kan ṭhu ta ṭhap a, ei ve duh lo pawh ni ila, an ei kham hun ka nghah tho tho a ngaih hmel a, ka ril a ṭâm ve bawk si nen ka ei ve ta mai.

Ka bag leh phone awmna Buatsaiha ka zâwt a, Jeho melh zawk chung hian, "I dah ṭha a ni lawm ni bro?" Tiin a zâwt veleh chhawng a, a lo bu nghut ringawt.

Mizo an ni naa an nelawm lohvin biak an châkawm hlawl loh. Mahse, ka tuang tichhah luiin ka ei mial mial a, anni pahnih pawh an ṭawng zawm tawh rih lo a, anmahni han hlauhna em em erawh ka nei bîk miah lo.

"Ka intleuh zuai ang a, tikhan lo awm la, Buatsaiha'n kan damlo lo awmpui se ka thlah ang che," tia Jehoa'n min biak veleh, "En teh, a tlai tawh em mai, naktuk duty tur ka ni a, min thlah hmasa mai rawh," rang fahranin ka lo ti a.

"Min nghâk peih lo a nih chuan i haw theih dan tur i inngaihtuah a ngai a ni mai, inbual hmasa lova thlah che ka tum der si lo," hniam ruiha tiin min melh kur a, mahni thu duh tih hriat reng reng, "Ka phone leh ka bag min pe rawh," ka lo ti nghat.

"Ka inbual zawhah aw doctor.." ti sup chung hian a kal sawn daih a, umzui ka tum chuan, "Eng ang pawhin nawr mah la, a sawi ang bâk khan a rilru a sawh sawn chuang lovang, i duh leh helai hmun hi lo en kual rawh," Buatsaiha'n dam thluam hian a ti a. Ka tûm bûr ringawt.

JK Farm en kual tura kal ka ni lo a, an mi sawmna ka lo pawm ta kher kher chu ka inchhir ṭan tawh. Ka phone lah min pe duh si lo a, an tel lovin ka tan haw ngaihna a awm lo tih ka hre ve kar bawk si. Minute sawm dawn ka din hnuah damlo mutna lam kha ka pan leh ta a, kan chaw eina hmun aṭangin tlema va kal ve hlek a ngai.

Jeho patea mutna kawngkhar pawh hawn ka tum a, chhunglamah a lo inkalh tlat! Buatsaiha leh Jeho bâk helaiah midang ka hmu si lo a, kan damlo lah kha kawngkhar kalha tho thei ziazâng a ni si lo. Mak ka tih êm avangin in hnunglam aṭanga hêl kualin tukverh zâwnah ka va ding ta a. Dârthlalang phen aṭanga ka thil hmuh chuan min ti phu chiang kher mai.

Jeho patea mutna khum sirah mipa lian tak, inzuah buk zet hi a lo ding a, Pistol a húm bawk a, damlo khuma mu tin chung hian, "I harh tih ka hria a nia, khawiah nge i dah? I dahna hmun i sawi loh chuan nungdamin i chhuak lovang," tiin damlo chau zet chu a lo vau khur khur a, a âw a ngainatawm hlawl loh.

Khuma mu lah chuan thei leh thei lo hian amah tintu chu a melh ṭâwk ṭâwk a, a chhâng dawn emaw ka tih laiin amah vautu a kun hniam lai tak chuan a hmaiah chil a chhâk ta a. Rúm dut chung hian chu paliana chuan kan damlo chal leh Pistol kaw hmawr chuktuah chungin, "A ri hre pha mah se, chhantu i nei lo helai Farm ah hian," tiin Pistol a hmet puak ta a. Mit ka chhing sawk a, ring taka ṭê chhuak chung hian ka tlan chawn chawn a, pan ber tur pawh hre lovin ka râk tuar tuar a, khatiang thil ka mit ngeia ka hmu kha ka awih thei lo.

Hlau leh thlabâr taka ka tlan lai chuan ka bânah tu emaw hian a rawn man chut a, ka hmui a hup nghal hmiah bawk. Mitthi hmu ve fo mah ila, inthahna kher hi chu ka ngaina lo, ka mumangah pawh ka la hmu chhin lo hrim hrim, ka tiril a khûr zaih zaih a, kha damlo ka buaipui zawh chiah kha dârkâr khat ral hmain mitthi a ni leh si, chu pawh dimna nei miah lova kah hlum a ni.

"Vawikhat pawh awrâwl chhuahin han bengchheng leh vaih teh, i thluak ka kâp darh vek ang," titu awki hniam chhak leh chang fuk chu Jeho áw a ni.

Amah hmachhawn thei turin min kuai her lawp a, mitmeng rum úl leh hriam hruiha min melhna chu ka râp êm avangin en pawh ka en rei ngam lo.

"I thil hmuh kha i hmu lo aw.." ti hmuk chungin min pawt lêt dâwrh a, chutih lai tak chuan, nichina hmuihmul ngah zet paliana kha a rawn thleng ve ta a. 

"Jeho, kha nu chungchâng kha ngaihtuah a ngai dawn a nih kha, a mitmu kan ker chhuak dawn em ni ang, min han bihthla ve khanglâng a, khung bo rawh," ti supin ka mitah chiang takin min melh kul a, Mizo ṭawng a hmang; mahse, a mitmengah thlahpawlh tih a hriat, a sen rûm a, a râpawm a ni tawp mai.

Khur hlak hlak chung hian Jeho ka melh a, min vuan nghet nasa si a, tâl chhuah tum mah ila, thil theih loh tluk a ni.

"Ka pate (uncle), ani hi chu ka kutah dah rawh," tiin Jeho chuan a patea lamah min nawr sawk a, Buatsaiha pawh a rawn thleng ve ta. Min chhan theih beiseiin ka va melh ve bawk a, beisei a bo. Anmahni ang thova rumin min melh nia.

"Kan mi tlâktlai lo pa ruang kha phum bo vat ula, he nu kâ hi inhnawhphui zawh hnuah Kêl pa hur bulah va mut tîr rawh u," Paliana chuan a ti leh chhur chhur a, Jeho patea chu hei zawk hi a nih ngei dawn hi. Nichina mi an thah tâk kha chu a patea nih ngaihna a awm lo. Tu chu nge ni ta ang?

Jehoa'n ka hmui hupna a thlah hnuah, "Min kal tîr rawh u, khawngaih takin, khawiah mah ka sawi chhuak lovang," tia ka ngenna chu an bengkhawn eih lo. Tlan chhiat tumin ka insangmar a, vawilehkhatah ka tlân ta phut a, Farm hungna êm pawh ka tlân thlen hmain Jeho bawk chuan min rawn nangching lehnghal a, ka tukkhum samah ṭhâmin min pawt ding chawt a, ka âu leh vak. 

"Tlan chhuah lam kha chu beisei duh suh," ti vin ṭhawtin min pawt dawr dawr a, "Min thlah rawh, Zawnga, min thlah rawh.. min kal tîr rawh u," tiin ka âu ve tak naa ka âw hre phâk mi pathumte chuan an hre lo der hmak. 

Kêl in tlar phei pût leh Khuai khâwina hmun te, Âr in leh ran chaw dahna in pêl rakin min hnûk a ni hrim mai. Kei lah rîl pawh thlâk ang maiin ka ṭê phei vawn vawn a; ani erawhin ṭawngkam khat mah chhâk chhuak tawh lo hian, in pakhat buhpawl tam tak intiang vûm thûr awmna hmunah chuan min nam lût ta a. 

"Khatah khan i duh tâwkin i râk thei ang, ka kalsan lai chea i awmnaah khan awm ṭha hle hle la chuan him damin kan thlah mai tur che a nia, mahse, tunah chuan i lo piang ve ta hi i inchhír ngawih ngawih tawh zawk ang," nunráwnnaa khat mitmenga min melh ngur chung hian a ti ta a.

"Ka sawi chhuak lovang, min kal tîr hrâm rawh," ṭap ṭeuh chungin ka la ti ve hrâm a, "Hmeichhia i nih kha, ka ring lo che," a ti leh hmiah.

"Jeho...khawngaih takin, naktukah duty ka ngai asin, mawh, ka ngen a che," mittui far fap fap chunga ka ṭawng lai chu min en zuk a, "Ṭawng tawh suh, ka that hreh bîk lo che a nia," tia a sawi zawh rualin kawngkhar a khar ta a. Kawngkhar ti ila, a phui chiah lo, pawnlam a hmuh theih vek a, Tala lianpuia min kalh hnan lai pawh ka hmu vek. Chahbi a ak zui bawk a, âu vak vak emaw râk chiam pawh ni ila, helai hmunah hian chhantu ka nei lo tih ka inhrechiang ngang mai.

Thil ṭha ti tura kal kha thil ṭha lovin min nang a, Mizo tak tak an nih rinna pawh ka nei tawh lo. Misual rual intêlkhawm zingah ka inbarh lût tih a hriat reng mai.

Pindan zimteah chuan ka tei sek a, tlan chhuahna tur kawng a awm lo tih ka hmu ve vek bawk. Buhpâwl intiang zingah ka ṭhu tawm cháih a, ka hmabâk thim tak chu ngaihtuah pawh ka ngaihtuah ngam lo, 'min la pawngsual êm hleinem' tih chu ka inhnemna awm chhun a ni rih.

Shillong khaw vawh hun lai a pêl ṭan tawh a, Mizoram lam âi chuan a la vawt viau tho. Inkuah khawr hlán chungin ka ṭhu ngat ngat a, an mi thah tâk ruang kha an phûm hnuah min rawn ngaihven ka ring ve tlat a, a bâk beisei tur a vâng teh e.

Ka lo chhing sek a ni ang, mit thip hlur chungin ka meng chhuak a, nî a chhuak iar a, buhpâwl nghenga ṭhu ka nih vangin ka thak vual vek a, a thîp sup sup bawk. Chuta kârah ka dang a ro huam bawk a, tui in ka châk ngawih ngawih a, tui far khat tê mah hmuh tur a awm chai si lo.

Ka kawr chhungah zen lûtin ka inhiat nawk nawk a, ka hmai a sa hut hut bawk. Chutia ka lo inbuaipui lai chuan Tala a ri rak a, kawngkhar a rawn inhawng zui nghal bawk a, ka hmaah Jeho a rawn ding a, "Kha, saw laiah sawn tui in tur leh intihfaina tur a awm," nelawm chuang miah lova tiin thawmhnaw a rawn theh phei a, ka lo meng phar nasa mai.

Ni e, keima thawmhnaw pangngai dik tak min pe miau a, engah nge mak ka tih loh teh lul ang ni?

"Khawi aṭanga i neih nge?" Vin hlar chunga ka zawh chuan, "I in luah ami ka la..." a lo ti bung hmuk.

"Nang, Zâwngchhepa, ka in luaha kal turin tuin nge hrilh che," tih leh amah hnaih ka ruala a remna lâi lâiah ka chûm bawk a, ka bânpuamah nghet taka hmer chung hian, "I in chahbi, i phone, i thil pawimawh zawng zawng ka kutah a awm tawh a, helai hmun chhuahsana Police hnena min report te kha i lo ngaihtuah chuan theihnghilh rang rawh, nungdamin i chhuak dawn lo," ti hmiah hmiahin min nam lêng lawp a, buhpâwl intiang khawm ka va delh nawk a, biak zui hman miah lohvin a chhuak daih. 

Rei fê che lovin ka awm ngaiin ka awm reng a, ka ṭah a chhuak ngei mai. Khatiang em ema misual leh khawngaihna nei lo mihring kha Mizo mipaah an awm thei dawn em ni? Ka inah a kal a nih si chuan a dap kual nasa khawp ang; ka phone a kawl hmiah bawk nen ka thinrimin Van a tawng thei hialin a nia ka hriat.

Ka thak nasa telh telh mai si a, Jeho sawina lam panin intifai turin ka kal ve ta nge nge a, min kalh khum tawh lo tal a, tlan chhuahna hun remchâng ka nei maithei asin. Beiseina chhetê ka la nei ve e.

Bathroom a ni hran lova, ran tui pêkna tur an dawh ṭhinna tuizêm bulah ka taksa lang lai ka sil thuak thuak a, mahni phâk tawka in uluk ve tak ni ṭhin kha zan khat thil thu lekah ka hun tawng a danglam ta vek hi hriatthiam a har a ni.

Thawmhnaw fai ka inbel laiin min entu awm ang tlata hriatna ka nei a, ka hawi kual vat a; Kêl bé ri leh Âr dawkdawlâk thawm tih loh ri dang hriat tur a awm miah lo a, min entu pawh tudang nilovin Jeho misuala a ni.

A mit thim raih leh hriam zet chuan min thlîr vung vung a, kan indin hnaih lem lo.

''Nang kha, nang misual kha..." tiin amah ka kâwk a, ner sawk chung hian, "Inthlâk rang mai rawh, i kut zungṭang kha ka tan mai tur a nia," ti ram hmukin a sam a tuai puat a, ṭawng leh ka tum lai chuan engtik lai khan nge a lo thlen hman tih hriat pawh ni lo hian ka bulah khawng luhin a rawn ding a.

"Ka patea'n a be duh che a, luhlul chhuah hlek suh ang che," ti supin ka chhânna pawh ngaichâng îk lo hian ka bânrêkah manin min pawt sawk a, zui duh lo mah ila, ka zui a ngai tho si.

"I patea pakhat zawk kap hlumtu chu i patea tho maw?" Tiin za miah lo hian ka nui lui a, min melh hrâwk ringawt.

A patea inhliam thu sawiin doctor Ngurthani hi min ko chhuak a, a damna an duh vanga min ko chu an ni lo, a patea vêkin a kâp hlum leh si a, thil awihawm pawh va ni suh.

Farm House kawtah mi pali an lo ding a, paliana leh Buatsaiha ka hmuh tawh hnu an ni a, pahnih dang erawh chu hnam dang an niin ka hria.

"Jeho, kha nu kha ching fel turin ka hrilh tawh che a, i dah ṭha dawn lo a nih chuan keiman ka that ang, helai hmunah hian hmeichhia kan mamawh lo aw," tia Jeho patea a ṭawng lai chuan ka tiril a khûr dar dar a, min vau satliah niin a lang tlat lo.

"Ka pu, min kal tîr rawh, khawiah mah ka sawi chhuak lovang, min ring rawh," ka lo ti sawk sawk a.

"I sawi chhuak dawn lo rêng a ni, pakhat that leh tur hian hun tam ka mamawh lo a nia, Farm i chhuahsan ruala i tih hmasak tur kei hian ka hria a ni," min ring lo tih hriat ngawih ngawih hian a ti a, a nui huk bawk.

"Jeho, that rawh, nung dama a awm chhung chuan kan thlâ a muang dawn lo tih i hriat kha," tiin thu tawp sawi tih hriat tak hian a inher nghut a, midang pathum lo ding sate an ṭawng eih lova, Jeho leh kei min melh zuk hnuah paliana an zui ve ta a. 

A hnu leha thil thleng chuan beiseina chhete ka lo neih ve te kha mumang ang lekah a chantîr ti ila, ka sawi sual lo ang.

Jeho chuan Fâr thing din ṭhupna hmunah min pawt kal dâwr dâwr a, ka bánrêk a vawn ngheh êm avangin a na thîp hlur, a ṭawng lova ka ṭawng hek lo. A patea thu a hnial dawn lo tih ka thinlung hian a hria a ni. "Lalpa, ka nunna min zuahsak hrâm rawh" tia rilru ṭawngṭaina neih bâk tih theih ka nei ta lo. 

"Thupêk chu thupêk a ni a, khawngaih min dîl duh suh ang che, i dam ve hian kan hmabâk tih tur kan hlen chhuah loh phah thei, ka patea'n mi a that lai i hmu kha i tan a pawi ta a ni." Tiin min nam dawt a. "Khatah khan ding rawh," ti leh supin Pistol a rawn phawrh chhuak ta a, ka mittui a tla lova, ka la ṭawng ta lo fo.

"Kan thurûk engzata tam nge i hriat kei chuan ka hre lo. Mahse, police nena inhnimhnaih kan duh lo a, thi turin inbuatsaih rawh le," zawi ruiha tiin ka chalah min tin ta a.

"Jeho, khawngaihin ti suh, min kâp suh," thâm ṭiaka tiin ka mittui a parawl kiang a. A lo ner nasa mai.

Thle bak chung hian, "Khawngaih min dil suh ka tih kha, a sâwt dawn chuang lo, nunna pakhat âi chuan nunna 10 a hlu zawk, nang hi i thi a nih loh chuan keini hian engtikniah emaw Police kan hmachhawn ni a la thleng dawn a, chu chu kan duh lo hulhual, mi â kan nih loh hi..." tia a ṭawng lai chuan a lam panin ka pên a, min la kâp bik lo, inthlahdul miah lovin min tin ngur a, ka hlau lo ka tih chuan dâwt ngialngan a ni. Ka lung a phu dup dup a, ṭap chhuak lo turin ka insangmar lui hrâm hrâm a ni ber.

"Khawngaih takin ka nunna hi min zuahsak rawh, intana pawi tur engmah ka chhâkchhuak lo ang, dam ka la duh," tiin ka hnaih phei zel a, mit khap miah lovin min en reng a.

"I thih a ngai, i thi tur a ni," a ti sup, ka chalah Pistol a chuktuah a, khûr zawih zawih chunga ka ding chu min khawngaih hmel a pu lo, thisen châka tuihâl tih hriat taka a mit sen rûm te chu en loh ka duh ngei mai.

"Thla hnih chiah helaiah hian ka la khawsa a, min koh chhuah lai khan hetiang hun hi ka tawng dawn tih ka inhre lo, thil ṭha titurin ka zui che u a nih kha, ka hmelhriat ṭha pawh ni lo kha ka hnampuiin an harsatnaa min kohna hnial lovin inthu ka zawm a..." tia ka ṭawng lai chuan, "Ṭawng tam lo mai rawh," vin taka tiin a kut veilamin ka hrawkah a rêk a, ka thâw a chham dâwn titih.

Chutah min thlah leh thut a, min phih deuh sawk bawk, "Ka tih a ngai miau si a," tiin ka thin zâwnah a pistol ken lai chuan min nawr leh sawk a, ka pai dawt.

"A ṭha e, min that rawh, min that ang che. Mahse, engtikniah emaw chuan he hmuna ka thisen luang hian i nunah nghawng a la nei ang. Mizorama ka nuṭapain a farnu leh a chhungkaw neihchhun hi min la rawn zawng dawn tih hria ang che, thil sual titu chu hrem lohvin a chhuak tawp lovang," ka ti khur hlak hlak a. 

"Ngawi tawh rawh, i kâ kha chîp la a ni mai," a tih rualin a bân a dah thla a, rum lutuka min melh chung hian, "Thih chu i hlau si a maw?" Tiin min zawt ta a.

Chu veleh a kut veilamah ka vuana a lo phu zuk. 

A kut lakángin ka âwm zâwnah ka nem bet a, "Hetah hian ka lung a phu asin, nang pawhin hmabâk tih tur tam tak neiin dam i thlahlel a ni lawm ni, keipawhin dam chhan ka nei ve, min kâl tîr rawh, ka ngen a che, khawngaih takin.." mittui luang ngiai ngiai chunga ka ṭawng lai chuan milim ang mai hian a ding khawng ut a, a hmel dur khup te chu hlau hle mah ila, a rilru hneh dan tur minute khat lek chhungin ka la zawng ve hram hram.

"Khawiah mah ka sawi chhuak lovang, min ring hrâm rawh," ka tih leh chuan, a kut a lasawn vat a, "Dam i la duh ve a nih chuan duhthlan tur pakhat ka pe ang che," a ti ta a.

"Eng, eng thil nge?" Tiin ka zâwt vat a.

"Dam i la duh a, i nunna kha i ngai hlu viau a nih chuan min nei rawh," a ti ta a. Ka lo thaw chhuak hliai ringawt.

"Chutiang a theih loh, ni lo.. nang misual pa, eng thil lawi lo nge i sawi!" tiin tlan chhiat ka tum a, ka samah a rawn man a, min hnûk dawt dawt a, Fâr kûng pakhatah min nem betin a thaw kâwk a, "Vawikhat ka zâwt leh ang che, thih nge i duh min neih?" Ti nawn leh supin min nawr na sauh a, ka hlauh êm avangin thâwk pawh ka thaw ṭha ngam tawh lo.

"Eng duhthlan tur âtthlâk nge i sawi hi?" Ka lo ti a.

"Keiin that lo che mah ila, ka patea'n a that tho ang che, i duh thlang rawh, second chance a awm dawn lo, thih a ni mai," ti chhur chhurin rum lutuk hian min melh a. Hlauh luat vanga ka thidang lo hi thil mak a ni!

"Jeho, ngaihtuah chiang rawh," ka lo ti thâm ṭiak a.

"Ka nupui i nih chuan ka patea'n a that lovang che; ka venghim dawn che alawm; mahse, ka thuhnuaiah i awm a ngai thung ang, duhthlanna chu i thu thu a ni ta e," tia a ṭawng zawh rualin min vawnna a thlah dul a.

Petek nawk nawk chung hian leiah ka ṭhu hnawk a, chhuak lutukin ka ṭap ta a. 

Engtin nge he misual nupui hi ka nih theih ang? Ka dam khawchhuahna tur awm chhun chu he mi nunrawng pasala neih chauh hi maw? A ni thei lo. Ka nun a nuam ve ṭan dawn chauh a, hetiang hi ka chungah a thleng leh si.

"Tho rawh, ṭahin awmzia a nei lo," ti nghutin min phih tho lawp a, mittui kâr aṭanga melh chungin, "Phubâ ka lak ve hunah chuan tuna i thil tih hi ila inchhir ang," ka ti ve ta a, za lo zeta a nui ri te chu a ten hian ka ten.

"Min nei dawn em? Nge thih chu i thlang zawk dawn?" Tiin ka chalah min nawr leh sawk a. 

Ni e, phuba la tur tal pawha ka dam a ngai alawm. Ani nupui ka nih hian ka phuba lâkna kawng a awlsam phian ta ve ang.

Hetianga misual awmherhin min thah ngawt âi chuan, anmahni tichhe tur tal pawhin ka dam dawn lovem ni?  

"Aw le, ni rawh se.." zâwi raihin ka ti ve ta a.

Jeho nei tur leh a patea mi thah chungchâng sawi chhuak lo tura ka intiam hnuin, "Kan inremnaah hian thisen a tel tih hria la, ka duh loh dan zawnga i awm chuan a tawp kharna tur pawh thihna tho a ni ang, i ke chhep sual lo la, i hnungtawlh thiang hek lo, ngaihdamna ka nei ve lo tih hria ang che, i hrethiam em?" nghet churha tiin, "Kal hmasa rawh.." a ti leh nghut a.

A nupui ka ni ang a, ka pasal a ni bawk ang. A patea hnenah min thah loh chhan engtin tak sawi ang maw.

A patea'n ka hmêl a hmuh leh chuan Jeho zawk a melh ngur a, "I that ngam lo a nih chuan keiman ka ngam alawm, ka fapa." A ti nghut a.

"Pate, ani nen hian inremna kan nei alawm, thisena inremna, kan innei dawn bawk," tia Jehoa'n a chhân chuan a rawn inher zawk a, "Hmeichhia kan mamawh lo, i â tawh a ni lo maw, eng inremna nge ni ngai?" a ti khur khur a.

"Ka pate, ani hi kan that a nih chuan mi naran a ni lo a, doctor a ni, a aia hnawk zâwkah kan intât lût dawn tih i hria ang chu, an in aṭanga kan hruai chhuak lai min lo hmutu pawh an awm thei bawk, a dam a la ṭûl a ni mahna, ani vanga kan tih tur ṭhulh hi a ṭul ber lo, hmeichhe pakhat thah aia tih tur pawimawh kan ngah êm mai," tiin a kar ve ta a.

"A ṭha e, a ṭha e, doctor kan mamawhna pawh a la awm leh thei a, ani hi thunun ang che, i che sual tur a ni lo, chuti a nih loh chuan i patea hi min hriat chian kha," rin loh deuha Jeho patea ṭawng dam dup chu ka awih lo zâwk. A fapa chu a ring awm hle mai.

Dârkar hnih a ral leh hnuah ka chênna hmun pan turin kan inruahman ta a. Jeho-a'n bike-a min phurh a tum tih ka hriat veleh, rang tak hian, "Kha tah khan ka chuang dawn lo," ka lo ti hmak a.

"Eng vangin?" tih leh min rawn pan a rual a, "Ka ring zo lo che, ka unaupa a nih loh chuan tu bike khalhah mah ka chuang dawn lo," luhlul chhuahin ka ṭang ve tlat a, ka hlauh zia hriat tîr ka tum teuh lo. A taksa nghen emaw amah kuahte a ngai anga ka thil duh lo ber a ni.

"Buatsaih, Gurkha va la rawh," tiin nin hmel zet hian a káwng a dawm a, îhe lovin Buatsaiha pawh a kal ve mai, nizana kan chuanna custom Jeep dum dak hlarh khalh chunga Buatsaiha a lo tlan chuan ka thaw hliai a, ka thusawi min pawmpui ve mial.

Jeho nen ka chenna hmun  'Sawlad' panin kan tlan chhuak ta a.

"Ka phone kha min pe tawh rawh le," tia ka dîl chuan a ngawi hmuk a, "Jeho, vawiin hi ka duty ni a ni a, ka inreport a ngai," dam thlapa ka ṭawng leh chuan min melh zuk chung hian, "I hna i thawk zawm dawn tawh lo, ka nupui tan hnathawh a ngai lovang," a ti a.

"A teuh lo, kum tam tak thâ leh zung sênga ka lo zir ve kha chuti maia bansan ka tum lo," ka lo ti vin hlar a, a hma ang em em kha chuan ka hlau tawh bîk lo.

"Ṭawng reng suh, tun aṭanga ni thum hnuah kan innei ang, i chenna hmun hi kan luah tel tho ang a; mahse, kan honeymoon zawhah kan inpuiah kan awm dawn tih hria ang che," a tih leh chuan, "A teuh lo.." tiin ka lo hnial leh a.

"Tlan bo emaw, kan inneihna tur ṭhulh zawnga i khawsak chuan ngaihdamna awm lovin keimah ngei hian ka kut lâwngin ka that ang che, ka hreh miah lo a nia," tiin min vau leh ta.

Ka chhâng zui ngam ta lo. Ka chhungrila amah hlauhna hian min kiansan dawn lova ni thum ral hnuah kan innei dawn tih a sawi. Eng tin nge ka hmachhawn tâk ang? 

Min that hreh dawn lo tih pawh a mitmeng rum úl aṭangte leh pawisak nei lo lutuk tih hriat taka eng lai pawha Pistol a pai reng danah te hian a hriat mai. A kekawr kâwng hnung lamah a zep tih ka hmu vek tawh. 

Ngawi renga kan tlan lai chuan ka phone a rawn ri ta a, dash-board-ah a dah a ni ngei ang. Lâk tuma ka ban veleh, "Khawih hlek suh," a rawn ti a.

"Ka inreport a ngai.." ka la ti ve ṭâlh a. A kut veilama steering bêng dawt chung hian, "Ṭawng tawh suh, ṭawng tawh miah suh.." tiin min rawn melh hrâwk a, ka thin a phu leh dut dut tawh.

Ka in luah kan thlen thlengin ka ṭawng leh tawh lo. Ka hna bansan lo tur hian ka nawr ngam ang em? Min ring zo lo nasa mai si a, nupuia min neih a tum chhan tal ka hriat hma chuan ka tuar thei ve mahna.

Mahse, ka bialpa Lalrinnunga kha engtin nge ni ta ang? Thlan tur ka va nei chau si êm.

In chhungah kan inzui lût a, ka phone rawn phawrhin screen-lock-a Rinnunga nen kan thlalâk ka dah chu ngun fe hian a bih a, "He mihring hi tunge, i pasal em ni?" Tia chang faka min zawh chuan ka ngawi reng a.

"Sawi rawh, sawi ta che.." tia min vín ṭhawtin chair a nam tawlh rawp a, ka lo ṭé ṭhat.

"Sawi vat rawh," tia min vin leh vak rualin min rawn din hnaih sauh a, Lalrinnunga ka bialpa a nih thu ka hrilh ta nge nge a. 

A insangmar ṭawlh ṭawlh lai pawh ka hmu ru reng. Ha chang ṭhial ri rap rap chung hian, "Kan inremna hi nang leh keima inkâr a ni a, mihrang pakhat lek pawhin an hriat belh a nih chuan i thi ang, i thi khawp ang," tih pahin ka khabeah a rawn dawm a, hnai zetah rawn kun hniamin, "Inremna bawhchhetu chan chu thihna..." a ti leh sup a, min nam sawn hmak.

Thlamuang taka ka lo awm vena ka inluah pawh he mihring vang hian a chêpin a nuam ta lo. Thihna hmahruai nen inremsiamna kan nei hi thil râpthlâk tawpkhawk a ni.

Rei fê kan ngawih hnuah, "I bialpa kha hrilh la, ṭhen ang che," a ti ta a.

"Ka thei lo," ka ti chhuak sap a.

"I ṭhen theih siloh chuan kei hian in inṭhen theih dan tur kawng ka hria alawm," tiin ka phone a phawrh a, a thil tum ka hriat chuan rang takin ka pan hnai a, eng sawi set set lo hian ka phone chhuhsak tumin ka va bawh rawp a, engmah pawisak ka nei tawh bîk lo.

Chu veleh, ka kut pahnih a man kawp a, chhuatah min theh dâwrh a, a ri dup. Cement chhuat a nih vangin ka mawng a na ngei mai. Thawh chhuah tuma ka inbengkan chuan chhuatah a rawn ṭhingṭhi hniam a, "Kut thlâk ngaiin awm suh, pawngsual tur chein ka inpeih reng a nia," tiin a nui lui hawk a, ka khabea dawm chung hian, "I thawhna hospital neitu message thawn la, i kal theih loh chhan chhuanlam siam ang che, message i type zawhah ka chhiar hmasa phawt ang," a la ti cheu. Min rinna pakhat mah a nei lo tih ka hre mai.

Ka phone min pe a, a sawi ang chuan ka thawhna hospital lamah report pe turin message ka type ta a, ka kut a khûr nasa lutuka ka type dik hleithei lo.

"Doctor kut khûr," tiin min nuihsawh zet hian a ṭhen sak a, ka ngawi reng.

"Hmanhmawh la, kan inpuiah kan kal dawn, i unaupa pawh zaninah chanchin hrilh ang che, hun khawhral zawnga muangchán ka tum lo a nia," a ti ta a.

"In inah chuan eng nge kan tih dawn a?" Tiin hlau chung chung hian ka zawt a.

"Nupui ka neih tur thu ka sawi ang, inneihna buatsaih rang tura hrilh an ngai a, kawhmawh bâwl suh ang che, a lêt leh tur ka sawi chian tawh kha," tia min vau leh chuan ka ngawi ta rauh rauh a.

Ni e, dam man a awm a, thih man a awm si lo. Pasal nei turin ka inbuatsaih poh a ni ang chu.

230223

-B®®

B+>[BeckirafARenthleI]<+®®