ENCHANTE LOVE SORENO
(Quieres Casarte Conmigo?
Becky Rafa Renthlei
Chapter-21
MJS Penthouse
Los Angeles
1:45 Am
Amelia Evans.
Jerome-a awm lo chu ka ruak nghal huaiin ka hria a, Luis ka hua tihna nilovin a piang hma lutuk hi ka thin a ur lek lek a ni. Zai tâwk lo ila chuan ka pasal tân ṭangkaina tlem tal ka nei ve tur a nia, Jerome khan min thlamuan a tum ve viau a, mahse, boruak inlumlet dan hi ngaih a ṭha mawlh lo.
"Ma'am, i muhil theih meuh nange?" Christy leh Jacinta ka kiangah an awm ve reng a, Luis hi pindan hranga riahtir chi ni a kan hriat loh avangin kan room-ah ka awmpui ve mai a ni. An pahnihin enkawl an inhuam em em a, ka hmuh phâk lova awm turin ka duh lo a ni ber mai.
"Darkar ruk chiah an la thang a, Sam kha msg thawn chhin teh, Jerome-a amuhil em tih te han zawt chhin la," Sofa-a Christy ṭhu chu ka melh zauh a, kum sawmhnihpakhat chauh a nia, thiam thil angah reuh phian hi a ngaihsanawm ka ti.
"Ma'am, Ramon Salia hi hmaichhanah i hmu ve tawh em?" Jacinta'n ham bâi bâi chunga atih chian, "Hmu tawh e, a kiangah nikhat pumhlum ṭhak hun ka hmang tawh alawm," Jacinta makti hmel chu nuih lêt sakin, "Ka fiamthu lo a nia, pa hmelṭha tak a ni, Jerome a tluk mah suh se, American mipa-ah chuan a chhelo lawr lak," ka sawi zawh rualin an nui ta hak hak a.
"Shh..In nui ring lutuk, Jess, Joe ai thlâwt chuan Ramon Salia hi a chhelo daih zawk, dam ṭha ila chuan kan han thlêm dun tur a nia,"
"Ma'am, engmaw i sawi?" Joe chu lungnih loh hmel zetin a lo lut ve chiah a, ka thusawi a hre hman chiang!
"Englo, Ramon Salia aia i ṭhat thu maw le," ka nuih za lutuk chu ka insum hrâm hrâm a. Ka nuih anih vaih chuan Joe'O Hara ka ngam lovang. Jaja!
"Ma'am, i sawi kha ka hre vek," tihpahin a chhuak tau nghat a, Jacinta lah chuan hlauhthawn hmel tâwkin min rawn en a, chutah zawng insum miah lova za lutuka ka nui chu min en tawp.
"Zan lai laia, nuihna tur in hmu chu a lawmawm khawp mai," Pindan chhunga rawn lut ka hmuh chuan ka nui tawp chawt a, engtin nge tun angah a rawn luh theih, Dalmas-a thawmhnaw inbelin Eliaz Sanchez chu Kawngkaah a ding a, a pisol hûmlai chuan ka chal zâwnah a tin vâng bawk!
A awmzia chu security kaltlangin Dalmas a that tihna a nia, engtia chêt lâk chi nge ka hre mai lo. Ṭhuihhruai a nei em tih lah hriat pawh va ni suh.
"Wow, Eliaz, engtin nge i lo luh theih ka zawt lo mai ang che, i pistol kha dah thla la.." dam thlapa ka ṭawng chuan Jacinta leh Christy chu an inmelh zauh a, 'Engtinmah ti suh u,' ti a ka mitmei chu an man thiam nge an ngawi reng a.
"Amelia, i lo ropui ta hle mai, i pasal awm loh hlan hian eng thil nge ka lo tihpui ang che aw," a pistol ken lai chu a kekawr kâwngah zepin min rawn pan hnai a.
"Engvak nge kan tih anga, tun hma ang khan intur kan dawm leh ang chu mawle.." ka tih chuan mitko san âwkin min en a, Luis muhil chu melh zauhvin, "I fapa chu, American ui note ang maiin a mutui a nih kha.." tiin hnai fahranah a bih a, kutthlâk lo turin ka insum nasat a ngai viau.
Game khelh hlek angai dawn a nih hi..
'Elias, ka naute pahnih hi han hmelhriat ve ta che, bodyguard thawmhnaw inbel chu i inhmeh lo em mai, Jerome-a thawmhnaw inbel zawk la, amah a awm chuang hleinem," nui sak chunga ka tih chuan a ngaihna hre vak lo hmel a pu!
"Jess, whisky kha lo thli ta che," ka ti nghal zung zung a, ka bum thei dawn em chu ka hrelo nâa ka bei chhin phawt ang chu le..
"Ma'am, Luis hi ka pindan lamah ka lo awmpui dawn em ni ang," Christy chu a ṭhutna aṭanga tho chhuakin Elias bulah chuan a rawn ding a.
"Ah, Elias hian a hmu châk ve ang chu ka ti deuh," tihpahin khum kil lamah chuan dimtêin ka tawlh chho a, "Khumah khan ṭhu rawh Elias, i lokal hun hi a fuh viau ania, hman zan avang khan min ngaidam thei lo anih pawhin min theihnghilh sak tal la, ka pasal awmlaia khatia i ṭawng kha i tidik bik miah lo ania," tlawn pah titihin a mitah ka en kalh a, a nui ta suk mai.
"Amel, tlem talin min duhna i la nei ve tiraw?" Elias chuan ka bânah a rawn vuan a, whisky rim a nam huk mai!
"Hahdam rawh, ka nauteho hi ka chhuahtir anga kan sawi dun dawn nia,"
Jacinta intur chawi chunga a lokal chuan wine nokhat ka la a, Elias in whisky a ban thung, kan chêt nalh viau chuan hliam tuar miah lovin kan rêk bet thei dawn a ni.
"I fapa hi dahsawn teh a hmel hmuh a ninawm tlat," Elias chuan meng sen rûmin Luis chu a melh a, hundang nise chuan ka kick bu lâwp duhin a nia ka rin ni! Mahse, tunah zawng thil tihchi pawh ni nghal lo chuan, pistol pawh kan nei ve hleinem..
"Luis hi pindan dangah in lo kalpui dawn em ni ang," Ka fapa muhil melh zauh chunga ka tih chuan î he lovin Jacinta'n a pawm nghal a, engtia chêt lâk tur nge tih ka hriatthiam loh vangin Luis awm lo hian a him hmasa phawt tih ka hria.
Elias nen chauh kan awm hnu chuan wine ka tem hlek hlek a, zanlai a pel tawh a, ka pum a ruak bawk nen in tam chu thil theih loh tluk a ni. Elias erawh chuan whisky pawh nohnih ngawt a tlâk tawh a, rui chhiah nilo mah se akai nuam tawk vel chu a ni tawh hrim hrim.
"Engtin nge helai hmunah hian i lo luh theih?" Ka rilru luah bertu a ni tlat a, hriat chhuah ngei pawh ka tum.
"Thil harsa a ni hleinem, i pasal chhuah hma daih khan Penthouse kawtah ka awm tawh," tiin Elias chu a nui vur vur a, a mitmeng hur hmel zet pawh ala pangngai reng.
"Nangmahin maw!?"
"Ni ang chu mawle, he hmunah hian mipahnih ai chuan pakhat tân luh a awlsam fê zawk," tihpahin ka dar leh hnungzâng a rawn zut a, ka lo insangmar ṭalh ṭalh thung. Che phut lo turin ka no chu nghet zetin ka vuan a, ka duh aiin ala rui lo tlat! A hur tâwk lekin a nia ala awm ni..
"A nih chuan bodyguard thawmhnaw inbel kha eng nge a ṭulna?" Ka ti sap a.
"Amelia intifing viau teh suh, zanin hian ka that hreh miah lo che a nia," ati tak nâin ka hnute bâwr vel chu a melh rûn a, ît tih hriat taka a chil lem khulh ri chu a ring kher mai.
"Enteh, ka pasal neihna chhan hi i hria nge hre lo..!?" Tih ka zawh chuan a no a intur la bâng zawng chu a tlâk pawp a, chutah chiang deuhva min enin, "Engah nge ka hriat lohvang? I pa nena kan ruahman alawm," nui huk chunga atih chuan ka phu zawk!
A hmaa ka lo rinhlehna ṭhin kha a dik ngei ka ring ta tlat bawk!
Ka pa hian sum a duh vangin pasal min neihtir chûk chûk a, leibâ rulh tur tamtak a neih tho rualin eng emaw tak tum a nei tih hi ka rin hriat a ni.
"Ka pa chuan eng ber nge Jerome-a lak aṭang hian a duh a?" Zaidam viau pawh a har ṭan ta. Mahse rik hluai hun lah chu a ni hauh si lo.
"I pa duh ber chu i hminga awm Enchante Hotel kha neihlet leh a duh a ni, i pasal phuahchawp hian a phal ngût ange maw chu le.."
Elias thusawi chu mak ka ti tulh tulh a, ka hotel leitu kha Jerome hi tihna a lo nimaw! Vawikhatmah a thâwi pawhin a sawi chhin eih ngai lo kha a nia, engtin nge ka lo hriat loh theih!?
"Ka pa-in hotel neih lêt duh ni ta se, nangin eng hlâwkna nge i neih ve chuan anga..!" ka tih chuan rui tih hriat taka meng phelh phung chungin, "Nangmah hi mawle, i pasal ber a thih te chuan i hmingin engkim a awm dawn ngei a, fapa i nei bawk nen, engvangin nge nichin mai khan i fapa kha ka kahhlum loh tih i chhut miah nange? Hmanraw ṭangkai lutuk tur a nih hi.." tiin ring lutuk mai hian a nui a, a sakhmelah tak bêng lo turin ka inhûm ruh ṭang mai.
"Thil harsa a nih loh chu, ka pasal te chuan Spain pawh ala thleng tawp nâng, hlim takin intur dawm ila kan mu dawn nia, khawvar hmain helai hmun kan chhuahsan thei dawn chuang hleinem," tiin ten chung chung chuan a biangah ka fawhsak zauh a, a nui tawp chat!
"Min la hmangaih ka ring reng a ni," tihpahin ka hnute rawn khawih a tum a, chu erawh chhuanlam siamin ka hnar hrâm.
A no ah whisky tak ṭha tawk tak ka thlit khahsak leh tê tê a, zawhna pakhat ka la nei, ka zâwt chhuak ngei bawk ang.
"Querida(Duhtak) Ka pa nen ṭangkawp ni ta ula, Ramon hi engvanga inrawlh nge a nih?" Zawi sap a ka zawh chuan a ngawi vung vung a, chutah nui suk chung hian, "I pa nen ringawt te chuan eng ruahmanna mah kan puitlin thei hleinem, Ramon puihna tello chuan penthum pawh pen a har asin, ani hian i pasal Estates kha a duh thung a ni," a ṭawng ring vak tawh bik lova, a rui thawkhat hle tih ka hre mai.
"A ṭha e, ṭhuihhruai i neih chuan ko la, hetah mikhual pindan eng emaw zat kan nei alawm, darkar thum tal mu hahdam ila khawvar hunah ro hran kan rel dawn nia," ka tih chuan, "I pasal lâktlâk loh zet anga bodyguard nei turah min ngai deuh em ni? Keimah chauh ka ni, keimah..." tiin a bu lâwp lâwp a, a no ken lai chhuhsakin kan nupa khumah chuan ka muttir ta a, hetia ka tih mai loh te chuan min zaina ala dam fel lo nen tharum thawh chi ka ni der si lo.
Tuna ka hriat duh ka hriat tâk zawng zawng pawh kha a lo luh tirh khan kutthlak ila chuan ka hre hauhvin ka ring lo.
He mihring tenawm zet, rul ang maia vervek hi kum thum chhung ka lo zui tawh a, a mizia ka hre hneh ve tho. Khuma Elias-a rui hnar bur bur chu en leh vang vangin kan pindan chu zawi muangin ka chhuahsan ta a.
Ṭhutkhawmna pindanah Joe leh Jacinta chuan Dalmas-a hliam an lo buaipui a, Elias khan a bekah pistol-in a chhu a, nikhaw hre lova a awm laiin a thawmhnaw hlipin a rawn inbel tih a hriat mai. Dalmas chuan thawmhnaw pawh ala ha ta chuang lova, Sofa-ah kekawrte nen a mu zar nia!
"Joe, kan room-ah chho ula, Elias khi han phuar hlawm rawh u, store room-ah in dah lut dawn nia, Dalmas chu ka lo awmpui ang," ka tih chuan min en hau a. An rilru ka hriatpui mai, kut ka thlâk emaw an ti a nih ka ring.
"Ma'am, i ṭha em?" Jacinta'n min ngaihtuah hmel zeta atih chuan, "Ṭha lutuk tlat, in hmanhmawh loh chuan khi 'Phivawk' khi a lo harh mai ang," tiin Dalmas a mutna lam chu ka pansan ta a.
"Dalmas, i pindan panin i kal thei angem?"
"Yes, ma'am," tiin a mutna aṭanga rawn tho chhuakin a ṭhu ṭha a, ka nêl teh hûrh lo nâa tlangval fel tak a nih ka ring.
"Zinglam darthum a ri tawh a, engmah thil thleng a awm tawh lo turah ngai ang, Joe leh Jess an awm a, chawl hahdam rawh le,"
"Gracias ma'am (ka lawm e, madam)" a pindan kawngkhar thleng ka hruai a, Christy leh Luis awmna ka pan ve ta a.
Apartment BA 181
Malaga.Madrid
Spain
Mateo Ignacio
Darkar thum liamta khan Spain dam takin kan thleng ta chu a nia, Sam leh Jefe an chawl hahdam a, tunah chêt lâk rup theih anih loh avangin Jefe Apartment-ah intur dawmin ka ṭhu khawmuang ta vel mai mai a nih hi..
Ka boss housekeeper Salome hi a mu ve ngai miah lo nge, tunah pawh chokaah cake a la ur tlut tlut a, Spain kan kal apiangin eitur tuihnai tak tak min chhawpchhuah tur zuk nei reng zel a..!
Spain Embassy lam aṭangin ralthuam an rawn dah dawn a, kan mamawh tur ang kan chah ho chu a kim vek tawh a. Joe video min lo thawn ka hmuh chuan mak tiin ka mengphar âwk mai!
Jefe te nupa khumah chuan Elias Sanchez a mu hnar bur bur a, a thawmhnaw Jacinta'n a phelhsak mêk tih ka hmuh chuan ka nui suk. Madam hmel erawh alang ve miah lo a, Joe chu ka call ta a.
"Yes, Mateo..." Joe aw zangkhai leh puam ṭalh hi hriat a nuam ṭhin khawp mai.
"Eng nge thil awmzia?" Ka tih chuan a nui huk huk nia mawle.
"I madam in thiam thil a show leh hlek a, zanin phei chu kan kut hmâwr pawh kan chêt hman meuh lo," tiin thil awmzia a rawn sawi zung zung a, Dalmas in hliam a tuar tih a sawi erawh chuan tlêmin a âw a dul deuh.
"Tikhan engtia tih nge in tum?" Ka tih chuan, "Madam duh danin store room-ah kan dah dawn mawle.."
Joe nen kan inbiak laia ka dâk chhuak chuan Jefe kawngkhar bula lo ding reng chu ka hmu ta a, kan thusawi engzat nge a rawn hriat ka hre miah lo. An nupa khuma Elias a mu tih a hriat vaih chuan a nupui a ngaihtuah leh hle dawn tih hriatsa a ni.
"Ignacio, tunge i biak?" Jefe aw chang fak avang chuan ka tîm deuh a.
"Ih..Joe mawle,"
"Penthouse lamah thilthleng a awm em ni?" Ti a min zawh leh chuan sawi mai dan tur ka hre lo a, ka sawi loh chuan nakin lawkah hrechhuak leh ta se min dem lutuk dawn tih ka hria.
"Englo, Jefe..Elias Sanchez kha Penthouse-ah a lut a.." tihpahin Joe video min lo thawn chu ka entir ta a, a hmel ruh nghal ṭalh ṭalh chu hmuh a nuam viau lo.
"Kan nupa khumah he pa hi a mu a maw!" thinrim lutukin phone chu min pe lêt a.
"Jefe, i ngaihdan ang kha a ni lo, madam hmel pawh alan ve miah loh kha.." ka tih chuan, "Ka nupui hmel alang lova, ka fapa hmel a lang hek lo, Joe kha call la, kan nupa room cctv record min lo thawn rawh se," ati ta chheu chheu mai le.
"Jefe, hahdam rawh," tiin Joe min hrilh ang chin chu ka hrilh ve leh ta nge nge a, a hma ai zawngin a thinrim hmel zual! Kei hian sawi loh tur ka sawi em mawni!
"Joe chu keiman ka'n bia ange," tiin a pyjama hak ipte aṭang chuan a phone phawrhin Joe a call ta a, cctv record pawh tuna thawn nghal turin a hrilh bawk a, phone a dah hnuah rum zet hian min rawn melh leh phawt a..
"Ka hnuaiah kum kua i thawk tawh a, hmânni lawkah ka unaupa ang maia ka en thu che ka sawi lo vem ni?" Jefe thinrim hmel dur khup chu ka en a, a sawi tum pakhatmah ka man thiam lo.
"Ka nupui neihna kumkhat pawh ala tling lova chuti chung chuan amah in ṭan zawk a nia," cupboard lam panin a kal vut a, whisky umkhat rêk chhuakin tui pawh pawlh lo chuan a in ta khawlh khawlh a, a englaiah khan nge tih dik loh ka neih tih pawh ka hre tawh lo.
Jefe hian a nupui a hmangaih tih ka hriatpuina leh inrem takin awm se tih ka duh bâk chu eng thilmah an inkârah hian ka inrawlh lo. Venhim hi ka hna a ni a, chu chu ka ti mai chauh a ni.
Ka phone a rawn vibrate chur chur chuan ka en vat a, Joe tho a ni.
"Joe, eng nge?"
"Cctv record ka lo thawn che kha lo en rawh, engmah paih ṭhen a awm lova, a ngai ngaiin ka rawn thawn che, Jefe pawh ka thawn tho a, madam thil tihdan hi ka hrethiam miah lo, tunah Elias kha store room-ah kan khung fel tho si a.." rilru buai tih hriat takaJoe ṭawng chu ka bengkhawn tawh lo, ka piaha 'Jefe' thinrim lutuka phone bih chunga ding chuan ka mit ala daih zâwk!
"Joe, duhtâwk lawk ang, video chu ka lo en ange..''
Phone ka dah hnuah Jefe lam panin ka pên phei a, whisky bottle chu nghet taka hûmin a thaw kâwk a, a kuta a thil ken lai chhuhsakin a phone a madam hmel lo lang chu ka hmu ta a.
Madam(Amelia) leh a ex- boyfriend (Elias) chu khumah inhnaih fê in an ṭhu dun a, intur dawmin madam chu a nui sâng a, zawhna a zawh reng reng Elias chuan ṭha takin a chhâng zel bawk. Ka hriat fiah loh tam tak pawh ka hriat phah ṭeuh mai. Felipe Lopez pawh a inrawlh ngei a ni tih alang reng tawh a, mahse, engvanga madam hian Elias biangah te hian fawp kher nge a nih! Madam hmel lah chu alang ṭha em em a..!
Mak ka tih em em chu Madam in,
"Thil harsa a nih loh chu, ka pasal te chuan Spain pawh ala thleng tawp nâng, hlim takin intur dawm ila kan mu dawn nia, khawvar hmain helai hmun kan chhuahsan thei dawn chuang hleinem," ti a Elias bianga a fawp kher hi Jefe tân paidam chi a ni lo! Kei takngial pawh ka thinrim hlur mai.
"Bumhmang, hmeichhe tenawm, in pafa hian ka zuah lo ang che u.." Jefe thinrim lutuk tihngaihna hre lo chu hnem vak dan pawh ka thiam lo.
Madam te pafa hian an lo bum reng tihna a nia, nilo, a ni thei dawn em ni?
Tukkhum dawmin ka hmalam ngun takin ka en a, tunah lah Spain-ah kan awm daih si a, Jefe nen minute eng emaw zat ngawi renga kan ṭhut hnu chuan khua a var ṭan tawh a, Los Angeles leh Spain hi kan 'time' a inan loh avangin anni tân chuan chhunlai vel a ni tawh ang.
"Ignacio, Sam kaitho la, Felipe Lopez chênna hmun kan pan ang," ati sup a.
"Mahse, Jefe.. engmah hmanrua an lo la dah si lo a," ka tih chuan kiai suk chung hian, "Kut leh ke kan nei alawm, ka insiam dawn a, nang pawh insiam ang che, min zui dawn chuan.." ti supin a pindan a pan zui nghal hmiah. Hnial ngam chi pawh ni nghal lo chuan..
Sam chu kai thovin thil awmzia ka hrilh ve nghal a, Video a en lai chuan a ner leh suk suk ṭhin a, "Ignacio, madam hian thil tum nei lovin hetiang hian a khawsak ka ring lo," a rawn ti bauh nia.
"I mit kha i meng a nih chuan a lanchian viau kha le, an nupa khumah hahdam takin a bialpa hlui a kawm thei a nia, kan ṭan sual deuh a ni ngei ang," ka tih chuan Sam chu a ngawi reng a, ngaihdan nih loh hmel zetin, "Madam hi ka hrechiang ve tâwk, a tawp thlengin alam ka ṭang zel ang," ti hmukin a Radilo boot chu a bun mawlh mawlh a, Haji! Buaina thuah thum kan hmachhawn a ni ringawt a lawm le..!
"Tunah pawh Elias nen an tlanbo lo tih tunge hria!?" Ka ti vei hmuk a.
"Ignacio, an tlanbo a nih phawt chuan tuna report i dawn ang chiah khan i dawn em em ang, Christy hnen aṭang pawhin ka dawng bawk ang," inringtâwk zeta atih chuan dik ka ti viau lawi si.
Chumi hnu chuan ngawi rengin kan insiam dun mawlh mawlh a, engzata tam nge beih tur kan neih tih pawh hriat va ni suh, ka Pistol chu a pâiah khungin kawnghren ka hreng leh phawt a, Sam nen thawmhnaw inang vek kan inbel ziah ṭhin bawk. Jefe hian eng nge a inbel ve dawn tih ka ngaihtuahpui hauh lo.
Kan inpeih thlap hnuah Living room-ah Jefe nghakin kan ṭhu a, Whisky nokhat ve ve Sam nen kan lem leh hman hrâm..
Pen ri thlap thlap ka hriat rualin ka no chu dawhkanah ka dah a, Jefe hmel thim mâk mai leh a mitmeng fiah kâk chu ka hmu hmasa ber. Nichin khan whisky tuipawlh loh kha a in ngei si a, tunah lêm rui hmel chu sawi loh tawhkhirh hmel zet a pu zawk!
A sam a zuah lai khan Mafia boss niawm takin a 'Pa' a, tuna alandan phei hi chu 'Pa' tak a ni.
A chhip sam leh a bek lam chu a khuih pial vek a, Armano Jacket dum leh a hnuaiah shirt dum body fit a inbel bawk a, a darpharh hlai zet chu a lang chiang ngei mai, ralthuam engmah pai hmel a pu lova; a boot leh a kutkawr thlengin a dum vek a ni a, hrechiang hle lo ila chuan Mafia boss emaw ka ti ngeiin ka ring. Mahse, ka boss Jerome Evans zawk kha a ni tlat si.
MJS Wine Company hnehsawh taka enkawltu leh a bodyguard thlenga enkawlna ṭha petu, a nupuiin a bum tih a hriat pawha buai chiai mai mai lo Jerome Evans|Mourizo Soreno hi ka phatsan ngai lovang.
Apartment kawta Lamborghini (Tracking super car) ah chuan kan lut ta a, khua a var fel tawh a, Sam chuan car khalhin front seat-ah Jefe a ṭhu a, kei, a hnung seat-ah ka ṭhu thung.
Jefe chuan hmalam ngun takin a en a, a thinlung nat dan tur hi ka hriatthiampui phâk ve in ka hria.
"Jefe, madam i be tawh em?" Ka tih chuan a ngawi rûn a, min chhâng dawn tawh lo emaw ka tih hnuah, "Vawi ruk ka call tawh a, a pick thei lo, a buai rih a ni a nge," ati sup a.
"Joe emaw Jacinta emaw tal ka be dawn em ni ang,"
"Joe kha bia la, Amelia khan vawiin ngei hian ka Penthouse chhuahsan rawh se, ka fapa kha a hruai tel duh a nih chuan a hruai tel thei ang, zawhna dang a zawh belh hma che in line i cut dawn nia,"
"Mahse, Jefe..!?"
"Ka sawi ang chuan ti rawh, anni pafa tihchhiat mai mai theih ka ni lo, ka hmangaihna hai dertu hi ka mamawh lo tih ka'n sawi nawn leh ange.." thinrim insûm zeta atih chuan Sam chu a thaw hawk a,
"Jefe, madam insawifiahna ngaithla miah lo a chhuahtir chu a finthlâk miah lo a nia," Sam an atih chuan dik ka ti ve tho.
"A insawifiah duh a nih chuan ka awmna leh ka number a hria alawm, nizan chungchang pawh pakhatmah min hrilh lova, zawh fiah ka tumin call a chhâng leh chuang si lo, a duh chuan Elias Sanchez chu a zui thei ang," zawh zui ngam tawh miah lovin a pistol chu a check ṭha daih nia. Dam thluam angin lang fo mah se a duh lohna chinah chuan mipa a ni tlat!
Joe biak tumna ka nei miah lo. Spain kan chhuahsan hmain boruak engemaw danglam a thleng hman ngeiin ka ring, madam ka ṭan vang nilovin ralkhat aṭanga thu tawp siam erawh ṭha ka ti lo ve tawp mai a ni.
Joe ka biak loh vanga hrem ka tuar hmain Ramon Salia kutah ka thi hman mahna, Sam te anga bialnu te mithnawih tih pherh tur pawh ka nei ve chuang hleinem..
Sam leh Joe te an thi palh a nih chuan Jacinta leh Christy an ṭap emaw kha a ni anga, an mithnawih a pherh dawn tih ka hrechiang êm..
Thi tur an awm anih chuan keimah Mateo Ignacio chauh hi ka ni.
Felipe Lopez chênna Apartmentos beni beach kan thleng ta. Thil danglam hmuh tur a awm hran lova, a reh ṭhuap, Spanish Metron Car takngial pawh hmuh tur zuk awm lova!
Apartment kawtah Sam an car chu a tiding ta a, briefcase khat tlatin pawisa kan dah a, chu mai ala ni lo, Grape Estates document leh Hotel Enchante hralhna lehkha pawh kan keng tel vek a, kan inbiak dan a zirin tharum chu kan thawh turah ka ngai.
Engzata tam nge an nih kan hre lova, keini pathum chauh ka ni si!
"Spanish Embassy kha phone la, Apartment kawtah kan awm tawh tih hrilh rawh," Jefe ṭawng bung nghat chu ka haider hmak.
Embassy lam an inready tawh a, keini kan lut phawt anga, Metron an rawn tir nghal dâwn tih Jefe ka hrilh zawh chuan car kawngkhar chu hawngin a chhuak ta a. Sam pawh a chhuak ve nghal bawk a, ka âwmah kut dah kawkalh zauhvin ka zui ve ta a.
Security chuan a kal hmasa ber Jefe chu a lo tiding ta ngei a, "I boss Ramon Salia hnenah, Jerome Evans a lo thleng tih han hriattir rawh," thûm chhak a tiin garage lam a melh zui daih a, Madam Ducati bike bula lo ding mipakhat a hui zauh lai ka hmu hman. Tunge a nih ka hre lo.
"Mr.Elcano, min la hria em?" Chu pa lo thlen veleh chuan a be nghal a.
"Yes, i sam i zuah loh avang khan ka hai che i ring reng reng em ni Mr.Soreno," Chu pa chu a nui ta var var a.
"Manuel, ka nupui bike kha mamawhna ka nei thut mai thei a nia, Roshima venhim kha i hna tur a nih kha aw," tiin Jefe chuan Manuel ti a a koh pa koki-ah chuan a bêng thâk thâk a.
"Tehreng mai, madam chu a ṭha maw!?"
"Ṭha e, car pawh hman mai theih turin i lo buatsaih dawn nia, kan luh a hun tlat," a kiai zui suk a, Manuela chuan a kamis hâk chu keu zauhvin a chemte pai chu arawn lang ta a, "Boruak ka man thiam a nia, Mr.Soreno, i lam ka ṭang e," tiin a siai suk a, a lawmawm ru phian.
Apartmentos
Living Room
Jerome Evans
"Ramon, Felipe te nupa hi kan kutah min pe phawt ula, Estates document hi i ta a ni nghal e," Sofa-a ṭhu Ramon Salia intivei zet chu nui sukin ka melh a.
"Document chu i rawn keng ngei em tih te pawh kan en ve phawt ang chu," Ramon chuan cigarette a pak khu tual tual a, Felipe Lopez hi ka detective chhawrin a ringhlel tih kha dâwt a ni miah lo. Nizana Elias Sanchez inpuanna kha thudik tih ka hre tlat! He mite pathum hi an inthurual ṭhap tih ka hrethiam vek bawk.
"Ignacio, document kha han entir ta che,"
Ignacio chuan a rawn phawrh a, Ramon Salia leh chu pindana awm mi paruk te hmuh theih tur chuan ati lang ta a. Ramon-a hmel nui ṭhû chu a tenawm zawk!
"Felipe, car-ah min lo nghâk rawh le," ka tih chuan Ramon chu ala nui ṭhu a, "Enchante Hotel pawh ka duh tel tih kha ka sawiin ka hria," a ṭhutna aṭanga rawn ding chhuakin ka lam a rawn pan a, keipawh ka ding chhuak ve nghal chiah bawk.
"Enchante Hotel nilovin Estates kha i duh niin ka lo hria a, nge a sum faiin i duh zawk?" Tiin Sam chu ka mitmei a, briefcase chu hawngin a chhunga pawisa khat ṭûn Ramon leh Felipe an an hmuh chuan an nui tawp chat! Chu chuan Amelia pa, Felipe Lopez hi a inrawlh ngei a ni tih a tilang chiang tâwkin ka hria.
"Jacob.." Ramon Salia chuan a bula ding a nghawk zauh lai ka hmuh rualin Sam chuan briefcase chu chhin hmakin a kalh zui nghal a. Jacob ti a a koh pa chuan a Pistol pai lai a Sam chu tinin, "I thil ken kha min pe nghal dawn nge, helai hmunah hian i thi dawn?"
Ka che duh der lo, "Inbumna chu a tawp ta in ka hria, i fanu pawh mamawhna ka nei tawh lo ve, Felipe," Tiin nizana Joe min lo thawn video kha an hmuh theih turin ka tilang ta a, Ramon Salia leh Felipe-a makti hmel chu a râpawm zâwk!
"Sam hi a thi a nih chuan Amelia leh Elias pawh an thi ve nghal ang," ti a ka vauna chuan hna a thawk ṭha khawp mai, Ramon hian Amelia thih a phal lo chiang em mai.
"Tenawm pa," tih ṭhawt pahin Felipe chuan min rawn zuan a, Jacob-a pistol pawh a puak ri nghal! Mahse tumah a kâp fuh lo.
Felipe chu dimna nei miah lovin ka pêt thal tawp a, min bum chu thuhran a fanu leh zêl hmanrua a ahman vang hian thi tlâk a ni. Kan inphêk sual a ni ber tawh. Ignacio leh Ramon inhnek sawk sawk lai ka hmu vuai a! Suit dum inbel pa rawn zuang phei chu a dulah tak side table-in ka hlap a, tho leh tur a awm lo.
"Sam, kan document pawimawh ho kha la la, Manuela zuk pe rawh," ka sawi zo hman chiah, Manuela zawk chu rawn langin Sam nen an inhlân chhawng a, a chhuak tur chu Ramon Salia in zui a tum chuan, "Nang chu kal ve lo ve, i chan tur i la dawng kim lo," tih pahin ka theihtâwpa nâ in a hnarah ka hnek sak a, ka kutah thisen a kai nghal ṭhawt!
Dimna nei miah lova ka khawih lai chuan silai a ri nghal ṭhuai a, Mateo Ignacio chu a vir nghal nawk! A kaptu chu Felipe Lopez a ni.
"Ignacio," ka aw a thinrimna rawn lang chhuak chu thihna rim a ni.
Ramon Salia chhuata mu chu chhuih dawtin, "Felipe, min han kâp ta che, min kâp rawh, Ignacio ni lovin kei hi i kah tur zawk chu ka ni," ka pan hnai lui zel a, a pistol kenna kut khur dar dar chuan a dawihzep zia a tarlang mai chauh a ni.
Sam hmuh tur a awm lova, Jacob-a leh mipahnih kha a ûm chhuak ta in ka hria, chu pawh ka chiang bik lo. Metron Siren' ri ruai ruai ka hriat chuan Spanish Embassy lam an lo thleng tawh tih hrilh nawn ka ngai lo.
"Felipe..!" Ka koh rualin ka zuang nghal zawk a, a pistol hûmna kut dinglam chu ka pêt sak ta a, Pistol a puah rualin Living room bang a kaw nghal hawk!
"Dam hi i phu hlawl lo," tihpahin na lutukin ka kick zui nghal a, thi mah se pawi tihna ka nei tawh eih lo.
"Jefe..!" Ignacio aw ka hriat rualin ka dâr a thîp zawk a, chumi zawhah ka ke pawh, thei leh thei lova hawi lêtin min kaptu chu ka en a, Ramon Salia a ni.
Sofa nghengin a ṭhu a, min thah tum tih hriat lutuk hian Pistol chuan min la tin a, a kâp leh tur chu a mu a awm tawh hauh lo! A mengphar vel ka hmuh chuan kei pawh chhuatah ka ṭhingṭhi thla hnawk a, ka jacket chhunglam zenin Pistol chuan ka tin ve ta!
"Hremhmunah kal rawh, a sat lutuk pawhin rawn kir duh tawh suh ang che," ka sawi zawh rualin Ramon Salia âwmah vawihnih ka kâp ta a, ka khawhmuh fiah lo chu tihfiah tumin ka mit ka khap fak fak a, Ignacio an rilru nat hmel taka min melh chu ka la hmu vuai vuai..
Metron thâwm leh Ambulance ko ri te chu ka hre ruai ruai a, Amelia nu Miranda pawh hmu thânin ka inhria..
Chutah, ka nupui Amelia hmel leh ka fapa Luis Soreno Evans hmel ka hmuh fiah lo ta tial tial chu ka hriat hnuhnung ber a ni ta....
End of Chapter-21
©<++++[BeckirafARenthleI]++++®
(Quieres Casarte Conmigo?
Becky Rafa Renthlei
Chapter-21
MJS Penthouse
Los Angeles
1:45 Am
Amelia Evans.
Jerome-a awm lo chu ka ruak nghal huaiin ka hria a, Luis ka hua tihna nilovin a piang hma lutuk hi ka thin a ur lek lek a ni. Zai tâwk lo ila chuan ka pasal tân ṭangkaina tlem tal ka nei ve tur a nia, Jerome khan min thlamuan a tum ve viau a, mahse, boruak inlumlet dan hi ngaih a ṭha mawlh lo.
"Ma'am, i muhil theih meuh nange?" Christy leh Jacinta ka kiangah an awm ve reng a, Luis hi pindan hranga riahtir chi ni a kan hriat loh avangin kan room-ah ka awmpui ve mai a ni. An pahnihin enkawl an inhuam em em a, ka hmuh phâk lova awm turin ka duh lo a ni ber mai.
"Darkar ruk chiah an la thang a, Sam kha msg thawn chhin teh, Jerome-a amuhil em tih te han zawt chhin la," Sofa-a Christy ṭhu chu ka melh zauh a, kum sawmhnihpakhat chauh a nia, thiam thil angah reuh phian hi a ngaihsanawm ka ti.
"Ma'am, Ramon Salia hi hmaichhanah i hmu ve tawh em?" Jacinta'n ham bâi bâi chunga atih chian, "Hmu tawh e, a kiangah nikhat pumhlum ṭhak hun ka hmang tawh alawm," Jacinta makti hmel chu nuih lêt sakin, "Ka fiamthu lo a nia, pa hmelṭha tak a ni, Jerome a tluk mah suh se, American mipa-ah chuan a chhelo lawr lak," ka sawi zawh rualin an nui ta hak hak a.
"Shh..In nui ring lutuk, Jess, Joe ai thlâwt chuan Ramon Salia hi a chhelo daih zawk, dam ṭha ila chuan kan han thlêm dun tur a nia,"
"Ma'am, engmaw i sawi?" Joe chu lungnih loh hmel zetin a lo lut ve chiah a, ka thusawi a hre hman chiang!
"Englo, Ramon Salia aia i ṭhat thu maw le," ka nuih za lutuk chu ka insum hrâm hrâm a. Ka nuih anih vaih chuan Joe'O Hara ka ngam lovang. Jaja!
"Ma'am, i sawi kha ka hre vek," tihpahin a chhuak tau nghat a, Jacinta lah chuan hlauhthawn hmel tâwkin min rawn en a, chutah zawng insum miah lova za lutuka ka nui chu min en tawp.
"Zan lai laia, nuihna tur in hmu chu a lawmawm khawp mai," Pindan chhunga rawn lut ka hmuh chuan ka nui tawp chawt a, engtin nge tun angah a rawn luh theih, Dalmas-a thawmhnaw inbelin Eliaz Sanchez chu Kawngkaah a ding a, a pisol hûmlai chuan ka chal zâwnah a tin vâng bawk!
A awmzia chu security kaltlangin Dalmas a that tihna a nia, engtia chêt lâk chi nge ka hre mai lo. Ṭhuihhruai a nei em tih lah hriat pawh va ni suh.
"Wow, Eliaz, engtin nge i lo luh theih ka zawt lo mai ang che, i pistol kha dah thla la.." dam thlapa ka ṭawng chuan Jacinta leh Christy chu an inmelh zauh a, 'Engtinmah ti suh u,' ti a ka mitmei chu an man thiam nge an ngawi reng a.
"Amelia, i lo ropui ta hle mai, i pasal awm loh hlan hian eng thil nge ka lo tihpui ang che aw," a pistol ken lai chu a kekawr kâwngah zepin min rawn pan hnai a.
"Engvak nge kan tih anga, tun hma ang khan intur kan dawm leh ang chu mawle.." ka tih chuan mitko san âwkin min en a, Luis muhil chu melh zauhvin, "I fapa chu, American ui note ang maiin a mutui a nih kha.." tiin hnai fahranah a bih a, kutthlâk lo turin ka insum nasat a ngai viau.
Game khelh hlek angai dawn a nih hi..
'Elias, ka naute pahnih hi han hmelhriat ve ta che, bodyguard thawmhnaw inbel chu i inhmeh lo em mai, Jerome-a thawmhnaw inbel zawk la, amah a awm chuang hleinem," nui sak chunga ka tih chuan a ngaihna hre vak lo hmel a pu!
"Jess, whisky kha lo thli ta che," ka ti nghal zung zung a, ka bum thei dawn em chu ka hrelo nâa ka bei chhin phawt ang chu le..
"Ma'am, Luis hi ka pindan lamah ka lo awmpui dawn em ni ang," Christy chu a ṭhutna aṭanga tho chhuakin Elias bulah chuan a rawn ding a.
"Ah, Elias hian a hmu châk ve ang chu ka ti deuh," tihpahin khum kil lamah chuan dimtêin ka tawlh chho a, "Khumah khan ṭhu rawh Elias, i lokal hun hi a fuh viau ania, hman zan avang khan min ngaidam thei lo anih pawhin min theihnghilh sak tal la, ka pasal awmlaia khatia i ṭawng kha i tidik bik miah lo ania," tlawn pah titihin a mitah ka en kalh a, a nui ta suk mai.
"Amel, tlem talin min duhna i la nei ve tiraw?" Elias chuan ka bânah a rawn vuan a, whisky rim a nam huk mai!
"Hahdam rawh, ka nauteho hi ka chhuahtir anga kan sawi dun dawn nia,"
Jacinta intur chawi chunga a lokal chuan wine nokhat ka la a, Elias in whisky a ban thung, kan chêt nalh viau chuan hliam tuar miah lovin kan rêk bet thei dawn a ni.
"I fapa hi dahsawn teh a hmel hmuh a ninawm tlat," Elias chuan meng sen rûmin Luis chu a melh a, hundang nise chuan ka kick bu lâwp duhin a nia ka rin ni! Mahse, tunah zawng thil tihchi pawh ni nghal lo chuan, pistol pawh kan nei ve hleinem..
"Luis hi pindan dangah in lo kalpui dawn em ni ang," Ka fapa muhil melh zauh chunga ka tih chuan î he lovin Jacinta'n a pawm nghal a, engtia chêt lâk tur nge tih ka hriatthiam loh vangin Luis awm lo hian a him hmasa phawt tih ka hria.
Elias nen chauh kan awm hnu chuan wine ka tem hlek hlek a, zanlai a pel tawh a, ka pum a ruak bawk nen in tam chu thil theih loh tluk a ni. Elias erawh chuan whisky pawh nohnih ngawt a tlâk tawh a, rui chhiah nilo mah se akai nuam tawk vel chu a ni tawh hrim hrim.
"Engtin nge helai hmunah hian i lo luh theih?" Ka rilru luah bertu a ni tlat a, hriat chhuah ngei pawh ka tum.
"Thil harsa a ni hleinem, i pasal chhuah hma daih khan Penthouse kawtah ka awm tawh," tiin Elias chu a nui vur vur a, a mitmeng hur hmel zet pawh ala pangngai reng.
"Nangmahin maw!?"
"Ni ang chu mawle, he hmunah hian mipahnih ai chuan pakhat tân luh a awlsam fê zawk," tihpahin ka dar leh hnungzâng a rawn zut a, ka lo insangmar ṭalh ṭalh thung. Che phut lo turin ka no chu nghet zetin ka vuan a, ka duh aiin ala rui lo tlat! A hur tâwk lekin a nia ala awm ni..
"A nih chuan bodyguard thawmhnaw inbel kha eng nge a ṭulna?" Ka ti sap a.
"Amelia intifing viau teh suh, zanin hian ka that hreh miah lo che a nia," ati tak nâin ka hnute bâwr vel chu a melh rûn a, ît tih hriat taka a chil lem khulh ri chu a ring kher mai.
"Enteh, ka pasal neihna chhan hi i hria nge hre lo..!?" Tih ka zawh chuan a no a intur la bâng zawng chu a tlâk pawp a, chutah chiang deuhva min enin, "Engah nge ka hriat lohvang? I pa nena kan ruahman alawm," nui huk chunga atih chuan ka phu zawk!
A hmaa ka lo rinhlehna ṭhin kha a dik ngei ka ring ta tlat bawk!
Ka pa hian sum a duh vangin pasal min neihtir chûk chûk a, leibâ rulh tur tamtak a neih tho rualin eng emaw tak tum a nei tih hi ka rin hriat a ni.
"Ka pa chuan eng ber nge Jerome-a lak aṭang hian a duh a?" Zaidam viau pawh a har ṭan ta. Mahse rik hluai hun lah chu a ni hauh si lo.
"I pa duh ber chu i hminga awm Enchante Hotel kha neihlet leh a duh a ni, i pasal phuahchawp hian a phal ngût ange maw chu le.."
Elias thusawi chu mak ka ti tulh tulh a, ka hotel leitu kha Jerome hi tihna a lo nimaw! Vawikhatmah a thâwi pawhin a sawi chhin eih ngai lo kha a nia, engtin nge ka lo hriat loh theih!?
"Ka pa-in hotel neih lêt duh ni ta se, nangin eng hlâwkna nge i neih ve chuan anga..!" ka tih chuan rui tih hriat taka meng phelh phung chungin, "Nangmah hi mawle, i pasal ber a thih te chuan i hmingin engkim a awm dawn ngei a, fapa i nei bawk nen, engvangin nge nichin mai khan i fapa kha ka kahhlum loh tih i chhut miah nange? Hmanraw ṭangkai lutuk tur a nih hi.." tiin ring lutuk mai hian a nui a, a sakhmelah tak bêng lo turin ka inhûm ruh ṭang mai.
"Thil harsa a nih loh chu, ka pasal te chuan Spain pawh ala thleng tawp nâng, hlim takin intur dawm ila kan mu dawn nia, khawvar hmain helai hmun kan chhuahsan thei dawn chuang hleinem," tiin ten chung chung chuan a biangah ka fawhsak zauh a, a nui tawp chat!
"Min la hmangaih ka ring reng a ni," tihpahin ka hnute rawn khawih a tum a, chu erawh chhuanlam siamin ka hnar hrâm.
A no ah whisky tak ṭha tawk tak ka thlit khahsak leh tê tê a, zawhna pakhat ka la nei, ka zâwt chhuak ngei bawk ang.
"Querida(Duhtak) Ka pa nen ṭangkawp ni ta ula, Ramon hi engvanga inrawlh nge a nih?" Zawi sap a ka zawh chuan a ngawi vung vung a, chutah nui suk chung hian, "I pa nen ringawt te chuan eng ruahmanna mah kan puitlin thei hleinem, Ramon puihna tello chuan penthum pawh pen a har asin, ani hian i pasal Estates kha a duh thung a ni," a ṭawng ring vak tawh bik lova, a rui thawkhat hle tih ka hre mai.
"A ṭha e, ṭhuihhruai i neih chuan ko la, hetah mikhual pindan eng emaw zat kan nei alawm, darkar thum tal mu hahdam ila khawvar hunah ro hran kan rel dawn nia," ka tih chuan, "I pasal lâktlâk loh zet anga bodyguard nei turah min ngai deuh em ni? Keimah chauh ka ni, keimah..." tiin a bu lâwp lâwp a, a no ken lai chhuhsakin kan nupa khumah chuan ka muttir ta a, hetia ka tih mai loh te chuan min zaina ala dam fel lo nen tharum thawh chi ka ni der si lo.
Tuna ka hriat duh ka hriat tâk zawng zawng pawh kha a lo luh tirh khan kutthlak ila chuan ka hre hauhvin ka ring lo.
He mihring tenawm zet, rul ang maia vervek hi kum thum chhung ka lo zui tawh a, a mizia ka hre hneh ve tho. Khuma Elias-a rui hnar bur bur chu en leh vang vangin kan pindan chu zawi muangin ka chhuahsan ta a.
Ṭhutkhawmna pindanah Joe leh Jacinta chuan Dalmas-a hliam an lo buaipui a, Elias khan a bekah pistol-in a chhu a, nikhaw hre lova a awm laiin a thawmhnaw hlipin a rawn inbel tih a hriat mai. Dalmas chuan thawmhnaw pawh ala ha ta chuang lova, Sofa-ah kekawrte nen a mu zar nia!
"Joe, kan room-ah chho ula, Elias khi han phuar hlawm rawh u, store room-ah in dah lut dawn nia, Dalmas chu ka lo awmpui ang," ka tih chuan min en hau a. An rilru ka hriatpui mai, kut ka thlâk emaw an ti a nih ka ring.
"Ma'am, i ṭha em?" Jacinta'n min ngaihtuah hmel zeta atih chuan, "Ṭha lutuk tlat, in hmanhmawh loh chuan khi 'Phivawk' khi a lo harh mai ang," tiin Dalmas a mutna lam chu ka pansan ta a.
"Dalmas, i pindan panin i kal thei angem?"
"Yes, ma'am," tiin a mutna aṭanga rawn tho chhuakin a ṭhu ṭha a, ka nêl teh hûrh lo nâa tlangval fel tak a nih ka ring.
"Zinglam darthum a ri tawh a, engmah thil thleng a awm tawh lo turah ngai ang, Joe leh Jess an awm a, chawl hahdam rawh le,"
"Gracias ma'am (ka lawm e, madam)" a pindan kawngkhar thleng ka hruai a, Christy leh Luis awmna ka pan ve ta a.
Apartment BA 181
Malaga.Madrid
Spain
Mateo Ignacio
Darkar thum liamta khan Spain dam takin kan thleng ta chu a nia, Sam leh Jefe an chawl hahdam a, tunah chêt lâk rup theih anih loh avangin Jefe Apartment-ah intur dawmin ka ṭhu khawmuang ta vel mai mai a nih hi..
Ka boss housekeeper Salome hi a mu ve ngai miah lo nge, tunah pawh chokaah cake a la ur tlut tlut a, Spain kan kal apiangin eitur tuihnai tak tak min chhawpchhuah tur zuk nei reng zel a..!
Spain Embassy lam aṭangin ralthuam an rawn dah dawn a, kan mamawh tur ang kan chah ho chu a kim vek tawh a. Joe video min lo thawn ka hmuh chuan mak tiin ka mengphar âwk mai!
Jefe te nupa khumah chuan Elias Sanchez a mu hnar bur bur a, a thawmhnaw Jacinta'n a phelhsak mêk tih ka hmuh chuan ka nui suk. Madam hmel erawh alang ve miah lo a, Joe chu ka call ta a.
"Yes, Mateo..." Joe aw zangkhai leh puam ṭalh hi hriat a nuam ṭhin khawp mai.
"Eng nge thil awmzia?" Ka tih chuan a nui huk huk nia mawle.
"I madam in thiam thil a show leh hlek a, zanin phei chu kan kut hmâwr pawh kan chêt hman meuh lo," tiin thil awmzia a rawn sawi zung zung a, Dalmas in hliam a tuar tih a sawi erawh chuan tlêmin a âw a dul deuh.
"Tikhan engtia tih nge in tum?" Ka tih chuan, "Madam duh danin store room-ah kan dah dawn mawle.."
Joe nen kan inbiak laia ka dâk chhuak chuan Jefe kawngkhar bula lo ding reng chu ka hmu ta a, kan thusawi engzat nge a rawn hriat ka hre miah lo. An nupa khuma Elias a mu tih a hriat vaih chuan a nupui a ngaihtuah leh hle dawn tih hriatsa a ni.
"Ignacio, tunge i biak?" Jefe aw chang fak avang chuan ka tîm deuh a.
"Ih..Joe mawle,"
"Penthouse lamah thilthleng a awm em ni?" Ti a min zawh leh chuan sawi mai dan tur ka hre lo a, ka sawi loh chuan nakin lawkah hrechhuak leh ta se min dem lutuk dawn tih ka hria.
"Englo, Jefe..Elias Sanchez kha Penthouse-ah a lut a.." tihpahin Joe video min lo thawn chu ka entir ta a, a hmel ruh nghal ṭalh ṭalh chu hmuh a nuam viau lo.
"Kan nupa khumah he pa hi a mu a maw!" thinrim lutukin phone chu min pe lêt a.
"Jefe, i ngaihdan ang kha a ni lo, madam hmel pawh alan ve miah loh kha.." ka tih chuan, "Ka nupui hmel alang lova, ka fapa hmel a lang hek lo, Joe kha call la, kan nupa room cctv record min lo thawn rawh se," ati ta chheu chheu mai le.
"Jefe, hahdam rawh," tiin Joe min hrilh ang chin chu ka hrilh ve leh ta nge nge a, a hma ai zawngin a thinrim hmel zual! Kei hian sawi loh tur ka sawi em mawni!
"Joe chu keiman ka'n bia ange," tiin a pyjama hak ipte aṭang chuan a phone phawrhin Joe a call ta a, cctv record pawh tuna thawn nghal turin a hrilh bawk a, phone a dah hnuah rum zet hian min rawn melh leh phawt a..
"Ka hnuaiah kum kua i thawk tawh a, hmânni lawkah ka unaupa ang maia ka en thu che ka sawi lo vem ni?" Jefe thinrim hmel dur khup chu ka en a, a sawi tum pakhatmah ka man thiam lo.
"Ka nupui neihna kumkhat pawh ala tling lova chuti chung chuan amah in ṭan zawk a nia," cupboard lam panin a kal vut a, whisky umkhat rêk chhuakin tui pawh pawlh lo chuan a in ta khawlh khawlh a, a englaiah khan nge tih dik loh ka neih tih pawh ka hre tawh lo.
Jefe hian a nupui a hmangaih tih ka hriatpuina leh inrem takin awm se tih ka duh bâk chu eng thilmah an inkârah hian ka inrawlh lo. Venhim hi ka hna a ni a, chu chu ka ti mai chauh a ni.
Ka phone a rawn vibrate chur chur chuan ka en vat a, Joe tho a ni.
"Joe, eng nge?"
"Cctv record ka lo thawn che kha lo en rawh, engmah paih ṭhen a awm lova, a ngai ngaiin ka rawn thawn che, Jefe pawh ka thawn tho a, madam thil tihdan hi ka hrethiam miah lo, tunah Elias kha store room-ah kan khung fel tho si a.." rilru buai tih hriat takaJoe ṭawng chu ka bengkhawn tawh lo, ka piaha 'Jefe' thinrim lutuka phone bih chunga ding chuan ka mit ala daih zâwk!
"Joe, duhtâwk lawk ang, video chu ka lo en ange..''
Phone ka dah hnuah Jefe lam panin ka pên phei a, whisky bottle chu nghet taka hûmin a thaw kâwk a, a kuta a thil ken lai chhuhsakin a phone a madam hmel lo lang chu ka hmu ta a.
Madam(Amelia) leh a ex- boyfriend (Elias) chu khumah inhnaih fê in an ṭhu dun a, intur dawmin madam chu a nui sâng a, zawhna a zawh reng reng Elias chuan ṭha takin a chhâng zel bawk. Ka hriat fiah loh tam tak pawh ka hriat phah ṭeuh mai. Felipe Lopez pawh a inrawlh ngei a ni tih alang reng tawh a, mahse, engvanga madam hian Elias biangah te hian fawp kher nge a nih! Madam hmel lah chu alang ṭha em em a..!
Mak ka tih em em chu Madam in,
"Thil harsa a nih loh chu, ka pasal te chuan Spain pawh ala thleng tawp nâng, hlim takin intur dawm ila kan mu dawn nia, khawvar hmain helai hmun kan chhuahsan thei dawn chuang hleinem," ti a Elias bianga a fawp kher hi Jefe tân paidam chi a ni lo! Kei takngial pawh ka thinrim hlur mai.
"Bumhmang, hmeichhe tenawm, in pafa hian ka zuah lo ang che u.." Jefe thinrim lutuk tihngaihna hre lo chu hnem vak dan pawh ka thiam lo.
Madam te pafa hian an lo bum reng tihna a nia, nilo, a ni thei dawn em ni?
Tukkhum dawmin ka hmalam ngun takin ka en a, tunah lah Spain-ah kan awm daih si a, Jefe nen minute eng emaw zat ngawi renga kan ṭhut hnu chuan khua a var ṭan tawh a, Los Angeles leh Spain hi kan 'time' a inan loh avangin anni tân chuan chhunlai vel a ni tawh ang.
"Ignacio, Sam kaitho la, Felipe Lopez chênna hmun kan pan ang," ati sup a.
"Mahse, Jefe.. engmah hmanrua an lo la dah si lo a," ka tih chuan kiai suk chung hian, "Kut leh ke kan nei alawm, ka insiam dawn a, nang pawh insiam ang che, min zui dawn chuan.." ti supin a pindan a pan zui nghal hmiah. Hnial ngam chi pawh ni nghal lo chuan..
Sam chu kai thovin thil awmzia ka hrilh ve nghal a, Video a en lai chuan a ner leh suk suk ṭhin a, "Ignacio, madam hian thil tum nei lovin hetiang hian a khawsak ka ring lo," a rawn ti bauh nia.
"I mit kha i meng a nih chuan a lanchian viau kha le, an nupa khumah hahdam takin a bialpa hlui a kawm thei a nia, kan ṭan sual deuh a ni ngei ang," ka tih chuan Sam chu a ngawi reng a, ngaihdan nih loh hmel zetin, "Madam hi ka hrechiang ve tâwk, a tawp thlengin alam ka ṭang zel ang," ti hmukin a Radilo boot chu a bun mawlh mawlh a, Haji! Buaina thuah thum kan hmachhawn a ni ringawt a lawm le..!
"Tunah pawh Elias nen an tlanbo lo tih tunge hria!?" Ka ti vei hmuk a.
"Ignacio, an tlanbo a nih phawt chuan tuna report i dawn ang chiah khan i dawn em em ang, Christy hnen aṭang pawhin ka dawng bawk ang," inringtâwk zeta atih chuan dik ka ti viau lawi si.
Chumi hnu chuan ngawi rengin kan insiam dun mawlh mawlh a, engzata tam nge beih tur kan neih tih pawh hriat va ni suh, ka Pistol chu a pâiah khungin kawnghren ka hreng leh phawt a, Sam nen thawmhnaw inang vek kan inbel ziah ṭhin bawk. Jefe hian eng nge a inbel ve dawn tih ka ngaihtuahpui hauh lo.
Kan inpeih thlap hnuah Living room-ah Jefe nghakin kan ṭhu a, Whisky nokhat ve ve Sam nen kan lem leh hman hrâm..
Pen ri thlap thlap ka hriat rualin ka no chu dawhkanah ka dah a, Jefe hmel thim mâk mai leh a mitmeng fiah kâk chu ka hmu hmasa ber. Nichin khan whisky tuipawlh loh kha a in ngei si a, tunah lêm rui hmel chu sawi loh tawhkhirh hmel zet a pu zawk!
A sam a zuah lai khan Mafia boss niawm takin a 'Pa' a, tuna alandan phei hi chu 'Pa' tak a ni.
A chhip sam leh a bek lam chu a khuih pial vek a, Armano Jacket dum leh a hnuaiah shirt dum body fit a inbel bawk a, a darpharh hlai zet chu a lang chiang ngei mai, ralthuam engmah pai hmel a pu lova; a boot leh a kutkawr thlengin a dum vek a ni a, hrechiang hle lo ila chuan Mafia boss emaw ka ti ngeiin ka ring. Mahse, ka boss Jerome Evans zawk kha a ni tlat si.
MJS Wine Company hnehsawh taka enkawltu leh a bodyguard thlenga enkawlna ṭha petu, a nupuiin a bum tih a hriat pawha buai chiai mai mai lo Jerome Evans|Mourizo Soreno hi ka phatsan ngai lovang.
Apartment kawta Lamborghini (Tracking super car) ah chuan kan lut ta a, khua a var fel tawh a, Sam chuan car khalhin front seat-ah Jefe a ṭhu a, kei, a hnung seat-ah ka ṭhu thung.
Jefe chuan hmalam ngun takin a en a, a thinlung nat dan tur hi ka hriatthiampui phâk ve in ka hria.
"Jefe, madam i be tawh em?" Ka tih chuan a ngawi rûn a, min chhâng dawn tawh lo emaw ka tih hnuah, "Vawi ruk ka call tawh a, a pick thei lo, a buai rih a ni a nge," ati sup a.
"Joe emaw Jacinta emaw tal ka be dawn em ni ang,"
"Joe kha bia la, Amelia khan vawiin ngei hian ka Penthouse chhuahsan rawh se, ka fapa kha a hruai tel duh a nih chuan a hruai tel thei ang, zawhna dang a zawh belh hma che in line i cut dawn nia,"
"Mahse, Jefe..!?"
"Ka sawi ang chuan ti rawh, anni pafa tihchhiat mai mai theih ka ni lo, ka hmangaihna hai dertu hi ka mamawh lo tih ka'n sawi nawn leh ange.." thinrim insûm zeta atih chuan Sam chu a thaw hawk a,
"Jefe, madam insawifiahna ngaithla miah lo a chhuahtir chu a finthlâk miah lo a nia," Sam an atih chuan dik ka ti ve tho.
"A insawifiah duh a nih chuan ka awmna leh ka number a hria alawm, nizan chungchang pawh pakhatmah min hrilh lova, zawh fiah ka tumin call a chhâng leh chuang si lo, a duh chuan Elias Sanchez chu a zui thei ang," zawh zui ngam tawh miah lovin a pistol chu a check ṭha daih nia. Dam thluam angin lang fo mah se a duh lohna chinah chuan mipa a ni tlat!
Joe biak tumna ka nei miah lo. Spain kan chhuahsan hmain boruak engemaw danglam a thleng hman ngeiin ka ring, madam ka ṭan vang nilovin ralkhat aṭanga thu tawp siam erawh ṭha ka ti lo ve tawp mai a ni.
Joe ka biak loh vanga hrem ka tuar hmain Ramon Salia kutah ka thi hman mahna, Sam te anga bialnu te mithnawih tih pherh tur pawh ka nei ve chuang hleinem..
Sam leh Joe te an thi palh a nih chuan Jacinta leh Christy an ṭap emaw kha a ni anga, an mithnawih a pherh dawn tih ka hrechiang êm..
Thi tur an awm anih chuan keimah Mateo Ignacio chauh hi ka ni.
Felipe Lopez chênna Apartmentos beni beach kan thleng ta. Thil danglam hmuh tur a awm hran lova, a reh ṭhuap, Spanish Metron Car takngial pawh hmuh tur zuk awm lova!
Apartment kawtah Sam an car chu a tiding ta a, briefcase khat tlatin pawisa kan dah a, chu mai ala ni lo, Grape Estates document leh Hotel Enchante hralhna lehkha pawh kan keng tel vek a, kan inbiak dan a zirin tharum chu kan thawh turah ka ngai.
Engzata tam nge an nih kan hre lova, keini pathum chauh ka ni si!
"Spanish Embassy kha phone la, Apartment kawtah kan awm tawh tih hrilh rawh," Jefe ṭawng bung nghat chu ka haider hmak.
Embassy lam an inready tawh a, keini kan lut phawt anga, Metron an rawn tir nghal dâwn tih Jefe ka hrilh zawh chuan car kawngkhar chu hawngin a chhuak ta a. Sam pawh a chhuak ve nghal bawk a, ka âwmah kut dah kawkalh zauhvin ka zui ve ta a.
Security chuan a kal hmasa ber Jefe chu a lo tiding ta ngei a, "I boss Ramon Salia hnenah, Jerome Evans a lo thleng tih han hriattir rawh," thûm chhak a tiin garage lam a melh zui daih a, Madam Ducati bike bula lo ding mipakhat a hui zauh lai ka hmu hman. Tunge a nih ka hre lo.
"Mr.Elcano, min la hria em?" Chu pa lo thlen veleh chuan a be nghal a.
"Yes, i sam i zuah loh avang khan ka hai che i ring reng reng em ni Mr.Soreno," Chu pa chu a nui ta var var a.
"Manuel, ka nupui bike kha mamawhna ka nei thut mai thei a nia, Roshima venhim kha i hna tur a nih kha aw," tiin Jefe chuan Manuel ti a a koh pa koki-ah chuan a bêng thâk thâk a.
"Tehreng mai, madam chu a ṭha maw!?"
"Ṭha e, car pawh hman mai theih turin i lo buatsaih dawn nia, kan luh a hun tlat," a kiai zui suk a, Manuela chuan a kamis hâk chu keu zauhvin a chemte pai chu arawn lang ta a, "Boruak ka man thiam a nia, Mr.Soreno, i lam ka ṭang e," tiin a siai suk a, a lawmawm ru phian.
Apartmentos
Living Room
Jerome Evans
"Ramon, Felipe te nupa hi kan kutah min pe phawt ula, Estates document hi i ta a ni nghal e," Sofa-a ṭhu Ramon Salia intivei zet chu nui sukin ka melh a.
"Document chu i rawn keng ngei em tih te pawh kan en ve phawt ang chu," Ramon chuan cigarette a pak khu tual tual a, Felipe Lopez hi ka detective chhawrin a ringhlel tih kha dâwt a ni miah lo. Nizana Elias Sanchez inpuanna kha thudik tih ka hre tlat! He mite pathum hi an inthurual ṭhap tih ka hrethiam vek bawk.
"Ignacio, document kha han entir ta che,"
Ignacio chuan a rawn phawrh a, Ramon Salia leh chu pindana awm mi paruk te hmuh theih tur chuan ati lang ta a. Ramon-a hmel nui ṭhû chu a tenawm zawk!
"Felipe, car-ah min lo nghâk rawh le," ka tih chuan Ramon chu ala nui ṭhu a, "Enchante Hotel pawh ka duh tel tih kha ka sawiin ka hria," a ṭhutna aṭanga rawn ding chhuakin ka lam a rawn pan a, keipawh ka ding chhuak ve nghal chiah bawk.
"Enchante Hotel nilovin Estates kha i duh niin ka lo hria a, nge a sum faiin i duh zawk?" Tiin Sam chu ka mitmei a, briefcase chu hawngin a chhunga pawisa khat ṭûn Ramon leh Felipe an an hmuh chuan an nui tawp chat! Chu chuan Amelia pa, Felipe Lopez hi a inrawlh ngei a ni tih a tilang chiang tâwkin ka hria.
"Jacob.." Ramon Salia chuan a bula ding a nghawk zauh lai ka hmuh rualin Sam chuan briefcase chu chhin hmakin a kalh zui nghal a. Jacob ti a a koh pa chuan a Pistol pai lai a Sam chu tinin, "I thil ken kha min pe nghal dawn nge, helai hmunah hian i thi dawn?"
Ka che duh der lo, "Inbumna chu a tawp ta in ka hria, i fanu pawh mamawhna ka nei tawh lo ve, Felipe," Tiin nizana Joe min lo thawn video kha an hmuh theih turin ka tilang ta a, Ramon Salia leh Felipe-a makti hmel chu a râpawm zâwk!
"Sam hi a thi a nih chuan Amelia leh Elias pawh an thi ve nghal ang," ti a ka vauna chuan hna a thawk ṭha khawp mai, Ramon hian Amelia thih a phal lo chiang em mai.
"Tenawm pa," tih ṭhawt pahin Felipe chuan min rawn zuan a, Jacob-a pistol pawh a puak ri nghal! Mahse tumah a kâp fuh lo.
Felipe chu dimna nei miah lovin ka pêt thal tawp a, min bum chu thuhran a fanu leh zêl hmanrua a ahman vang hian thi tlâk a ni. Kan inphêk sual a ni ber tawh. Ignacio leh Ramon inhnek sawk sawk lai ka hmu vuai a! Suit dum inbel pa rawn zuang phei chu a dulah tak side table-in ka hlap a, tho leh tur a awm lo.
"Sam, kan document pawimawh ho kha la la, Manuela zuk pe rawh," ka sawi zo hman chiah, Manuela zawk chu rawn langin Sam nen an inhlân chhawng a, a chhuak tur chu Ramon Salia in zui a tum chuan, "Nang chu kal ve lo ve, i chan tur i la dawng kim lo," tih pahin ka theihtâwpa nâ in a hnarah ka hnek sak a, ka kutah thisen a kai nghal ṭhawt!
Dimna nei miah lova ka khawih lai chuan silai a ri nghal ṭhuai a, Mateo Ignacio chu a vir nghal nawk! A kaptu chu Felipe Lopez a ni.
"Ignacio," ka aw a thinrimna rawn lang chhuak chu thihna rim a ni.
Ramon Salia chhuata mu chu chhuih dawtin, "Felipe, min han kâp ta che, min kâp rawh, Ignacio ni lovin kei hi i kah tur zawk chu ka ni," ka pan hnai lui zel a, a pistol kenna kut khur dar dar chuan a dawihzep zia a tarlang mai chauh a ni.
Sam hmuh tur a awm lova, Jacob-a leh mipahnih kha a ûm chhuak ta in ka hria, chu pawh ka chiang bik lo. Metron Siren' ri ruai ruai ka hriat chuan Spanish Embassy lam an lo thleng tawh tih hrilh nawn ka ngai lo.
"Felipe..!" Ka koh rualin ka zuang nghal zawk a, a pistol hûmna kut dinglam chu ka pêt sak ta a, Pistol a puah rualin Living room bang a kaw nghal hawk!
"Dam hi i phu hlawl lo," tihpahin na lutukin ka kick zui nghal a, thi mah se pawi tihna ka nei tawh eih lo.
"Jefe..!" Ignacio aw ka hriat rualin ka dâr a thîp zawk a, chumi zawhah ka ke pawh, thei leh thei lova hawi lêtin min kaptu chu ka en a, Ramon Salia a ni.
Sofa nghengin a ṭhu a, min thah tum tih hriat lutuk hian Pistol chuan min la tin a, a kâp leh tur chu a mu a awm tawh hauh lo! A mengphar vel ka hmuh chuan kei pawh chhuatah ka ṭhingṭhi thla hnawk a, ka jacket chhunglam zenin Pistol chuan ka tin ve ta!
"Hremhmunah kal rawh, a sat lutuk pawhin rawn kir duh tawh suh ang che," ka sawi zawh rualin Ramon Salia âwmah vawihnih ka kâp ta a, ka khawhmuh fiah lo chu tihfiah tumin ka mit ka khap fak fak a, Ignacio an rilru nat hmel taka min melh chu ka la hmu vuai vuai..
Metron thâwm leh Ambulance ko ri te chu ka hre ruai ruai a, Amelia nu Miranda pawh hmu thânin ka inhria..
Chutah, ka nupui Amelia hmel leh ka fapa Luis Soreno Evans hmel ka hmuh fiah lo ta tial tial chu ka hriat hnuhnung ber a ni ta....
End of Chapter-21
©<++++[BeckirafARenthleI]++++®
Huiham.... Ka hah.... Ka tang ltk..
ReplyDelete