1.24-89 [A Becky Rafa Story]

1.HO MAI MAI-Becky Rafa Renthlei

Pâwl thum lek kan la nih lai khan ka sikul bân a pianga Chakai khawrh khâ ka âtchilh bur ṭhin a; hmeichhia mah ni ila khêl lovin ka uniform ka thlâk zawhah ka tlânliam ṭhin kha a nia! Khâng hun lai kha a lo ngaihawm ta ber mai.

'Morning star' sam dumna bûr khat 'cheng ruk' man khân kan ṭhianzaho sam kan han dum ve ngei ṭhin a, tle mang si lo hian a thim bul a, su fai ṭha thiam hek lo, a beh hian zuk beh tlûk thei a!

Vawikhat chu ka ṭhiannu nen Rûl kan that ve a, 'A mît a ṭha lutuk' tia mî sawi thâwm kan lo hre ve nen a mît lâk chhuah tumin Rûl vun kan lip ta a lawm maw le, chhungte hriat lovin kan Bêltê ka ru chhuak a, ka ṭhiannute inah kan chhum teh reng a nih kha! Awi! A hmin thei si lo a chhungte an lo haw kan hlau si, Rûl sa sak deuh ṭung kan han pet fun fun kha chu a tui lêm lo a nia! A mît ber lah chu ka lo hawlh keh ve si a, kha fer fer tak a ni.

Ni e, khâng hun kha ka va ngai si êm! High sikul kan han rap chho ve a, 'Uniform mahnia sûk vek tur' tih kan hotute'n thuchhuah an siam si, keini taima lutuk lo leh inthlahdah em em maiin kan ha su ve kha 'OK' Sahbawn-in kan han nawt phuan a, tleuh fai ṭha peih hek lo, ruahsurin min nan ṭumin a phuan ta buah buah mai. Ka zak ve det.

Sikulah pawh a ninhlei pâwl leh luhlul fâl ni ta na na nâ chu ṭhiante zingah 'Boss' dinhmun ka hauh kum tluan a ni deuh ber! "Milem min siam la, kuhva ro ka lo pái ang che" kan classmate te'n an tih avângin ka note bu khat dulin ka'n siam ta ṭhin a, an hmelchhe thei nasa mai sia e, lâwm takin kuhva ro khawr khat nen kan inthleng nghauh nghauh mai zel chu a nia.

Zirtirtute'n "Nang, i zir chhuah hunah eng nge nih i tum?" Tia min zawh ṭuma ka chhânna khâ ava hawihhâi lo si êm! "Driver" ka tih chuan ka ṭhiannu a nui khêk nasâ! Ni e, ka lo ngaihtuah thui lo êm atin ni! Tûn thleng hian min chhaih fiam nân tak an la hmang fo ṭhin.

Mi hrisel lo tih takah Rûlhût pâi ka chîng tlat a, ka hnâr leh kâ aṭanga a lo chhuah ṭumte khân zah chu sawi loh uan nân ka la hmang zui a, "Kei chu ka e chhuak ṭhin" an tih vek laia luak chhuaktu nih te kha kan la hlimpui chu a nia ho firfiak ngei e.

Ka Chakai khawrh kawng ka bo peka mi fu huanah ka lût ta hlauh mai le! Tam lutuk sâtthluin ka fêp hrep a, ka haw dâwn chuan fu kûng ding suau chu 'A tam êm mai' tih pahin ka'n sâtthlu ta ṭeuh kha a nia. Ka sual vâng em em pawh ni lo vin ka lo â êm a ni.

Vawikhat pawh ka sikul kal peih lo lutuk kha tuihâwkah ka ṭhu pek a, kan 'Sir' a lo kal ta si,  "Eng ati nge khatia i ṭhut reng dâr a ri ṭêp a nia" a tih chuan "Ka tawlhthlú a.."

"I ṭhu lâi ka hmu reng che alâwm, tho la ka rualin kal ang che, i form pawh a ro har lovang," ka zui lo ngam teuh lo, a hnung lamah nasa zeta chhiatkhumin ka zui ve ta hnak hnak a..

Kan kawmthlangah Vâi Bawngpu an awm a, fanu 'Shanti' annei bawk a, keini ṭhianho ninhleiin a nu leh pa awm loh hlânin a êk kan eitîr leh ta pek! Min man chhuah ni khân vawi engzât nge ka pa'n min hlap er ka hre ta lo. Ka ṭhiante paw'n vuak an tuar ve vek tho.

Hmalam hun thlir nachang hre lova kan talkual mai mai chhungin kum a lo liam a, kan nula titih ta reng mai!

#######

2.Khatia sumo seat full ṭhapa passenger chuang te zingah, kei mah chiah hmeichhe awm chhun khâ ka ni a.

Leite dâi kan thleng ta maw tihin, kan chuanna sumo a ding ta thut mai le; kan lo inring tehchiam lo nen hma lamah kan bu suau va. Phunnawi chiam tuma ka kâ ka ân rualin kan hmaa thil awm chuan min thunun chiang kher mai!

Kawng sir hnaih lamah Rûl lian leh sei lutuk a lo inkham zuar chu niin! Driver chîl tura an hrilh chuan a lo duh îkhaw lo mai!

"Motor a tluang duh lo, bâkah ka hlau hrim hrim," ati mauh mai le, Kan chuanpui dang mipate an chhuk fai vek a, chhuk ve ka tum chuan ka pa'n ka bânah vuanin, "Lo chhuk ve miah suh ang che, inrawlh te kha i lo tum ngawt ang e, hmeichhe inrawlhna chi a ni lo a nia," ati chang fak a.

Ni e, ka pa tluka min hrechiang tu an awm lo, hâwkdâk vang hrim hrim pawhin ka chhuk duh ang tih a ring thiam tlat alawm.

Mipa hovin Rûl an en ṭhap a, a thah dan tur an rêl tepawh a ni mahna. Ka chhuk châk zek zek a, ka pa ka hlau deuh si; minute sawm dâwn an din hnuah eng mah an la ti ta lo fo chu ka thinin a tuar ta lo.

Motor aṭangin ka chhuk ṭhêm ṭhêm a, an hnungah ka va ding ve ta a; mak tak maiin chû Rûl chu a che miah lo a, a meng kur bawk nen râpawm tak a ni; ka boot bun lawk lam deuh chu phelhin an hnung lam aṭang chuan ka tlân phei thut a, Rûl lû-ah ngei mai ka'n hlap ta kha a ni a. A kâ aṭanga Sazu puar hêrhuar lo pawk chhuak nawlh chu kawngpuiah a let thla hlawm tawp a. Na zet zeta vawi eng maw zât ka hlap chuan midangho pawhin a remna lai laiah an lo vaw ve bawk a, a thi chiang a nia.

Ni e, kha Rûl khân Sazu a dawlh laklawh avangin a lo che châng thei lo lek chu niin!

"Motor-ah lût rawh.." ka pa zak hmêl leh thinrim hmêl chu hre lo der hmiahin ka boot leh lam khâi chung hian kan chuanna Sumo ka pan ta nghauh nghauh a.

A lianin a sei ṭha bawk a, Sumo hnungah driver in an hnûk deuh ngei a(h) kan chuan puite'n min en hrek hrek mah se 'keimah' ka ni miau hek.

Leite kan chhuahsan hnu lawkah Dumka kawng lâiin kha Rûl kan hnuh kha driver lei chhawnah an lo dîl a, ₹800/-laiin a hralh ta.

"Mami, ₹500/- tal hi nei ve rawh," tia min pêk a tum chuan 'A ngai lo, ka duh lo' tiin ka lo ṭang ve tumhrang a; mahse, min pêk luih tlat a tum vângin ka Rûl hlap bingbilet man ₹500/- lai chu ka hûm haw ve ta ran nia.

Rûl sawi tâkah chuan Aizawl Zodin pheiah ka bazar haw lam Rûltuha kawng kân tur kan hmu leh tlat pek nia!

Thah ngei ngei ka duh si, hmanraw hman mai tur awm ta lo chu ka Chapal bun laiin ka hlap er ta zawk zawk khâ a ni a; ka bula hmeichhe ding ve ho an ṭê ring dial dial khawp mai. A ṭhenin an Phone phawrhin video-a cover te an lo tum bawk nen, "In lo cover vaih chuan in awmnaah khân ka rawn theh phei ang," ka ti a, an Phone an ak leh ta sap sap a.

Tihṭhaih châk viau mah ila lirthei tlân a tam ang reng si nen Rûl that lo ang hmiahin kawngpui ka kân san ta daih a. Min en zui tih erawh ka thinlung hian zuk hre kar a.

Vawikhat chu naupang inkhawmah kan û fate ka kalpui ve a, rei pawh ka la awm hman lo tihah ka pa'n mi rawn tîrin "Apu in lo haw lawk teh se," ati an rawn ti a.

Hmanhmawh baklênga tlân haw-in chutia inkhawm lai meuh meuh rawn koh tîr chu a pawimawh a ni ngei ang ka ti a, in ka thlen veleh, "Eng nge?" Ka'n ti nghal ngawt a.

"Ṭhenawmte Ârtui Rûlhlaiin a chânga zuk that lawk teh," zuk tia maw le.

Inkoh haw nân chuan a ho sehsuh khawp mai. Mahse, ka pa thu zâwmin ka sunday dress pawh thlâk ta lo chuan sasah chem ka hûm thla a; ṭhenawmte inhnuaiah ka lût ta kût kût mai.

An sawi ang chiahin Rûl chu ka hmu ta ngei a, inring phênphâwna ka sah meuh chuan thlarau nei lo tih takah  'Ṭîk' pawh ti eih lo hian a khualzin kawng ka zawh tawp tir ta.

Pheikhawk sâng nen ka Rûl thah khai vû chungin ka chho ta auh auh khâ a ni a; hah dam huaiin ka inhre nghe nghe.

Chutiang zelin, ka damlo khuma ka mu chu kan ṭhenawmnu râk chûl kabhre ta thut mai le, 'eng thil nge thleng?' Tia tukverha ka va dah chuan an Vawk chaw chhumna inah Rûl a lo tawm a, a lo hlau ngang mai.

An chempui chuhin ka'n sât a, ka la sah ṭhelh zui, a aia ulukin ka sât leh ta alawm, bung eng zâtah nge ka sah chhuah tih erawh ka hre ta mai lo. Nui suk chung hian, "A lokal leh chuan min lo ko vak tawh rawh aw," ka'n ti ngei a, ka va inla 'Hero' si êm...

Kan vengah mitthi kan nei a, ṭhalai a ni nghe nghe. Keipawh ka ṭhiannu nen pawndum sinin ruang kan zui ve a, thlanmual kan thleng lek lek tawh tihah kopanga Rûl tleng ka ṭhiannu'n an hmu hrâm a(h) ruang kan zui tih theihnghilhin ṭap thâwm kârah chu Rûl thah ngei tum chuan kopangah ka han lâwn chilh ta a, ava zia lo si êm!

Ka inhriat chhuah meuh chuan ruang zui ve hnunglama kalho an lo nui tet tet a, kei erawh ka nuih aza ta lo, hmai sen ṭâwn ṭâwn chung hian midang en miah lovin thlanmual ka pan ding ta nal nal a...

'Rambuai laia thil thleng' ti ila in awih awm si lo va, ninhlei post...

'Keimah BRR'

           B+>[BeckirafARenthleI]<+®®