1.24-89 [A Becky Rafa Story]

'KA STAR'

Ziaktu: Becky Rafa Renthlei[B®®]
Short Story

An khua a zin tura min sâwmna chu vawi eng emaw zât ka pehhêl tawh a, ani hi ka ngaihzawng a ni miah lova ṭhian inkawm ngeih tak pawh kan ni chuang lo. Kei aiin kum thumin a upa zawk a, engtin tin emaw social media-a ka tawn sabawp ve chauh a ni.

A nung chungin vawihnih chiah ka la hmu a, chu pawh a ṭhiante nen chaw eikhawm anneih ṭumin a ni a; kal ve tura min sâwm ngawrh êm vânga kal ta ka ni.

Facebook-a ka post comment  a react char char te, messenger lama min biak zeuh zeuhna tih loh chu atîrah eng teh ual kan ni bik lo va; a pic post-ah erawh a chhe lo lawr lak.

A vun a ngo teh puak lo a, a mitmeng lian lam deuh leh a hnar ngûl sâng vah chuan Mizo mipa an lohna riau a nei a; 'ani hi thlahpawlh a ni ang' ka ti rilru hial. Mahse, amah ka hriat chian tâk hnuah mizo tlangval ngei a ni tih ka hre leh ta tho a; 5'11 a tling hialin ka ring. A ruangâm dik thlarh te chu ka lo en leh zuk zel a, ngaizawng lo mah ila ka iai chuang lo.

Aizawl aṭanga Km hnai têah an awm a, keini tân pawh an awmna khua hi dârkar li tlân vel a nih ka ring.

Messenger aṭanga a number min lo pêk chuan phûr zetin ka save nghal a; mahse, ka va be hmasa ta chuang lo. Amah zawkin min rawn be ta a,

"Apui, keimah Thomas-a..."

"Yes, ka hria.."

"Min lo biak hmasak ka ring ve em em a.." a tih chuan rang zet hian, "Min biak hmasak loh chuan biak che ka tum teuh lo," dik takin ka chhâng a.

A ni rêng bawk. Mipa ka be hmasa ngai lêm lo.

Thu ho tê tê sawiin kan inbe ta fo a.

Nia, kha ta ṭang khan nitin chipchiar lutuk tak maiin chanchin kan inhrilh ziah. Aizawlah kan awm ve ve a, ani pawh a hnathawhna hmun a nih vângin an khaw lamah a haw vak ngai lo a.

A û in pasal a nei dawn a, mipa awm chhun a lo ni bawk nen nimin piah mai khan a haw ve ta kha a nia, Aizawlah awm mah ila inngaizawng kan nih loh bâkah ṭhian ṭha tia sawi tur kan ni bawk si lo a, kan inhmu tam lo khawp mai. Whatsapp-ah erawh kan inbe nasâ..

"Apui, zan hnih riak lekin lo zin ve la, ka lo hruai ang che." Whatsapp aṭanga min rawn biak chuan, "Zin chhan tur a vâng ve e.." tiin ka chhâng a.

"Inneih i rawn hmang dawn alawm, lo zin ve hrim hrim rawh," tihtak zetin min sâwm a, naktuk chawlh a ni a, duh chuan ka zin thei reng.

"Min lo hruaia min thlah leh thlap dawn chuan ka peih reng," ka'n ti ve ngawt a. Ka pharvar em em vang ni lovin zin khawthawn khâ ka châk ve  hrim hrim a.

"Tak tak aw.." tiin min rawn call nghal a, naktuk zingah Bike-in a lo kal dawn tih a rawn sawi. A âw-a phurna rawn lang chhuak ka hriat chuan mak deuhvin ka lo phûr ve ringawt.

Thomas-a nen kan inkawm dan hi a fair ve ang reng a, zû a in zeuh ṭhin thu leh rui khawpa a in ngai loh thu te pawh ka hre vek a, fapa mal a ni a, an duat êm avangin an hau ngai vak lo. A nu leh pa leh a û tuna pasal nei tur nen hian an khawsa a, a û te pahnihin pasal annei daih tawh bawk.

A sawi ang tak takin a tûk dâr sawmpakhat velah Aizawla kan in luah a rawn thleng dêr tawh! Ka nau Zuala nen in kan luah a, ani hi Hrangbana College-ah a kal a, kei erawh Soil lamah ka thawk thung. Ka nu leh pa, ka nau pâwl sawm zir lai nen kan khuaah an awm a, ka pa hi Middle school zirtirtu a ni.

"Ka rin aiin i lo thleng hma," tih pahin ka bag zipper ka zip a, zanhnih lek riak tur ka ni a, eng teh ual ka keng lo.

"Ka rawn chhuak hma alawm,"  Sikret a ṭan ve nghal a, a mitmeng mawlh hi. Nitin zantina inbe na na nâ chu kan innêl viau.

"Kan chhuah tlai lutuk chuan a chi loh a nia, ruah a sûr mai thei," ka bag lain a chhuak nulh a, Thingpui takngial pawh in lo hian kan chhuak ta a.

A bike fâi zet ka hmuh chuan ka chuang châk kher mai. Ka khalh thiam ve sawlh sawlh a, khawpui chhungah lo chuan ka tlân ngam ve viau; ka nau Zuala hian a nei a, harh fâl ta chu ka chuhpui ve fo ta mai.

Ka bag lian vak lo chu a hnungah a ṭâwn bet a, "Hmanhmawh ang," ti supin a lâwn zui nghâl a, keipawh ka chuang rang teh e. Racksack dum a ak a, a chhungah eng em em ak lo nge a thêp viau.

Mipa ṭawngtam a ni lo a, ngawirengin kan chuang mawp mawp a ni ber. Keia pawh hi ka â deuh a ni ang hetia ka zui ve ngawt. Mahse, mak takin engkimah ka ringtawk a, ka ngaih chu a ṭha viau lawi si.

Ngaizel kan pêl fel a, kawngsirah hian eng nge kan tih dawn pawh sawi lovin a ding thut a, "Thil ka'n lam lawk," zuk tia! Kei pawh chuan hnial lêm lovin ka zui ve mai a, amah a sângin a palian roh si a, a bula kal a nuam riau.

Whisky ûm hnih leh Local fun hnih a la a, mak ka ti ru viau nain eng mah ka sawi chhuak lem lo. Inneihna a an in tur a nih ka ring ve ringawt. Chumi hnu chuan, "Nghet deuhvin min kuah rawh aw, kan tlân chak tawh dawn a nia," a ti sup a, a va'n ṭawng tlêm ngawih ngawih tak.

Kan tlânchhuah leh hnu chuan ka'n kuah ve bawk a, a bag-ah a puar tâk deuh vâng chuan ka kuah nghet ṭha hleithei lo. Falkawn kan thlenin a ding ta nge nge a, "Kha ak rawh, a rit vak lo," tiin racksack chu min ahtir mawlh mawlh a, ama'n ah ve mai awm khawi laiah emaw duty te lo awm se keimah min man thei ve tlat.

"Hey, ka ah kher a ngai em ni?" Ka ti leh hnuhnawh a.

"Ak rawh, a rit lo.." thil dang sawi zui tawh lo hian min tlânchhuahpui ta a. Bike hnunga ka bag a ṭawn beh khân min rawn nêk deuh nen amah ka hnaih lo thei ta lo.

Hreh zet chung hian a taksa lumna tem pha turin ka kuah ta a. Ka rin ang chiah, rei lotêah a taksa lumna ka hre vat a, a rimtui hman rim pawh ka hre zauh zauh. Min be tam lo mai ni lovin min be mang lo a ni mai, ka ngawi hlê hlê.

Thomas-a te khua hi kan tlânpelh bâk vawikhat mah ka la kal lo a, âtna thlarau sualin min man tlat a, ka zui ve ngawt  chu a nia.

Hmuifâng kan thlen chuan a ding leh ta a, "Tlêmte in hlek ang," ati sup a.

"Â, chi nang min tlukpui ang e," ka ngaih dan a nih vak loh avangin ka tûm hmak a.

"A ang lo lutuk, teuh lo mai.." tih pahin whisky chu a thli zui nghal a, nokhat a tlâk hmak. "Apui, thli a thaw sia in ve rawh i taksa a lum deuh ang a, i rui chuang lo ang.." tiin no chanve min thlitsak ve a, ka in duh lo.

"In rawh, a rim pawh i nam pha lo ang, ka ti tak tak.." atih chuan kei mimâwl hian thuawih deuhvin ka'n in vei pap kha, tui lo zawk zawk chu a ni lo e.

No khat dang min pe leh a, chu pawh ka in zo leh vek! Bâkah a dal viauvin ka hria, zû in ve ngai lo mah ila a tak leh a dal chu ka hre ve ê.

"Helmet hi khum rawh aw," Kan tlân chhuah dawnah a helmet khum lai phelhin min khumtir a, Rei pawh châwl lovin kan tlanchhuak leh ta.

A chhîp sam buk deuh lai thliin a chhêm chuan a phe siau siau a, a fai hmel kher mai. Ka lû a hai vei chhalh a, ka chuang nuam ta riau. Ka kut ka malchunga ka dah chu a veilamin a rawn ban a, "Min kuah rawh, nghet takin min kuah rawh.." a âw hniam ruih chu ka hre pha chang chang.

A sawi ang chuan ka kuah leh ta a, nichina ka tîmna ang kha vawm bo ang duak a ni mai. Kuah thlap chungin a hnungah ka beia chak fêin kan tlan zel a, nuam sihsah ve le. Inbe khuchûk lo mah ila a nuam ru ta riau, nui sak chung hian ka kuahna ka ti nghet ta sauh a.

"Hey, Apui..." kan thleng a nia. Bike ding datah chuan ka phu zawk a, a chângin ka lo muhil deuh em maw ni!

Thomas-a te in kawtah kan lo ding tawh a, ka harh kâwk.

"I che nawi miah lo a nia," nui suk chung hian in chhungah min hruai lut ta a.

Zu rim ka nam deuh huamin ka hria; tu teh vak an awm lo a, a nî chiah zuk awm a!

"In lo thleng chiah nain ka haw mai ang aw, Mampui, naupang ringawt an awm sia.." a nî in a tih chuan "Aw le, in min lo nghahsaka a tihzia hle mai, hei hi ka ṭhiannu Apuii a nih hi.." kan inchibai lai te chuan ka îp char char. Thomasa'n min ena a nui leh suk zel.

A chhungte Aizawlah an lokal vek chu niin! A cousin nen chiah an awm a, a hma khân min hrilh se chuan ka kal miah lo ang; mahse, tihngaihna a awm tawh si lova nuam ti awm deuh hian ka nui lui ta vel.

"Ka hrilh sa che chuan i lokal duh dawn si lo va.." ka inbual dawnah ati duh lek a, ka ngei a nia. An in pawh a pangngai khawp mai, hausa tia sawk vul chûk tur ni lo mah se an khawsak a harsa lo ang tih ka hre mai a, ama room min kianin a û room a hmang dawn tih a sawi.

Dik tak chuan a û room min luah tir tum se ka duh miah dawn lo a, a rem hre phian. Darkar li chiah chiah kan tlân a, in kan thlen khan tlailam dar li a ri ṭêp.

A cousin Kimkimi bazar kal a lo haw lai chuan eirawng kan bawl a, rui ang pawhin a lang lo rêng rêng.

"Kimkim, zanin tlai chu thil tê tê kan ti dawna i duh ve em?" An inpawh hle tih an inbiak vel dan aṭang chuan ka hre mai a. "Apuii'n atih ve dawn chuan ka duh," nui var var chungin min rawn melh a, ka ngaina nghal mai, kan inrual vêlin ka ring deuh.

Chaw ei hma aṭangin kan in ṭan ta a, tam phei chu ka in lo. Mahse, zu ka in ve ngai si lo a,  Thomas-a room tukverhah dâkin ka'n luak tak tak mai a!

"Awi! Ka khawngaih e, eng ati nge i pek ve rîkngawt?" Kimkimi hlauthawng aw hre mah ila ka incontrol thei ngang lo. Ka luak ngat ngat a ni ber.

"A zia mai ang, Apui, tihpalh lutuk.." Ka chalah min dawm sak a, ka rilru a harh kar a; mahse, ka pum a let nasa êm a ni.

Rei ngial min buaipui hnu chuan mut chhuakin min zem chiai chiai a, ka chhîng ta riai riai a.

Ka phone riin min tiharh a, zan dar riat chiah a ni. Ka rui tawh lo bawk. Zuala, ka nau a lo ni a, kan inbiak laiin Thomas-a alo lût a, a tûm bûr.

"Chaw kan ei san che a nia," ti nghutin a chhuak leh nghâl daih. Keimah zawk thinrim tur ka nia eng nge a lo thinrim ve rîk ngawt?

Muangchângin ka tho chhuak ṭalh ṭalh a, ka luak a la chhuak hlûi..

Ka mikhual zankhatnaah mualpho pherh erh-a ka'n awm chu le..

Kimkimi'n inlêng a lo nei sia, chaw ka ei ngam lo. Mahnia va insiam ve ngawt lah chu thil tihchi pawh va ni suh, pum ri rawk rawk chungin Thomas-a room-ah ka lût leh ta a, ka thinrim kher mai, amah lah hmuh tur a awm bawk si lo, rilru na ru zet chungin khumah ka mu leh ta a.

"Tho tawh la Apui, chaw lo ei rawh.." room-a a lo luh chuan ka ngawi reng a, ka ngei tlat. Zû ka in kha dik lo chu ka ti; mahse, min ngaihsak lo ka ti ve tlat.

"Ka ei peih lo,"

"I pum a ruak vek a, tlêm tal ei rawh.." a tih chuan ka inlet thak a, "Naktuk zingah ka haw mai ang aw.."

"I mumang a nih chu.." tih pahin a chhuak leh daih a, rei vak lo-ah ei tur châwi chungin a rawn lût leh ta a.

"Tlêm tal ei rawh, ka tihpalh tak tak," khumah a rawn ṭhu a, dawhkanah chaw leh chawhmeh min chhawp sak a, ka ei leh ta tho.

Ka eina vel pawh a seng fel leh vek a, a lo inbual vek tawh a, tawnzau dum leh kekawrbul dum lam deuh a inbel a, a sam pawh ala huh. Nichina ka thawh lai khan a inbual a nih ka ring ta a, ka lo thinrim ve chu ka inthiam ta chiah lo.

"Kan inah i lo riak dawn chu a nia, a mak e tiraw!?" Room-ah a rawn lût leh tawh a, min en chîk viau bawk.

"Ka riah mai lohvin ka lo zin sia.."

"Keini pahnih inkawm dan hi a ṭhat rualin a ṭha lo tho.."

"Eng nge?" Ka ti sap a.

"Ngaihzawng i nei em?" Tiin min zâwt teh daih a.

"Ka nei lo tih i hriat kha, nang pawhin i nei bik chuang lo.." ka tih chuan, "Ka nei dawn alawm, ka nei ṭêp.." a phone a rawn ri ta sia, "Min lo hrethiam lawk," tiin min chhuahsan leh ta a.

Heta ṭanga biak ve mai tur a nia chhuah kher. Ni e, ani ang te chuan ngaizawngtu a nei ṭeuh ang chu kei pawhin ka star a nia; mahse, hetia kan inkawm nêl tâk hnu hian ka tilang ngam lo hrim hrim.

A lo luh leh tâk mai si lovah chuan muthilh tumin ka inkhuh ṭha ta sauh sauh a, ka pum let but but leh luakchhuak lutuk vângin thawh tum hian ka inbengkâng a, ka kâwngah min kuahtu an awm!

Ni lo..

khua a var dêt dêt tawh a, ka bula Thomas-a muhil sâk sâk ka hmuh chuan ka phu chiang teh e. A room-ah ka mu sia a mutna a hai a nih ka ring ta ber a, dimtê in a bân ka la kâng riai riai a, a rawn meng chiang kêk kâwk khawp mai.

"Hey, i mutna tur i hai em ni?" Tih pahin ka ṭhu chhuak hlawl.

"Hai lo, ka khumah ka mu duh leh thut a.."

"A nih chuan ka insawn ang e," tihpahin tukverh ka hawng rawk rawk a, ka luak leh ta.

"A va'n mak ngat ngat ve aw.."  a rawn tho chhuak nghâl a, ka luak chhung zawng min dawm  char char.

"Thil ni lo lo ka tihpui che a, a zia lo hle mai," ati sup a, "Khua a var tawh dawn a, ka haw mai ang, min thlah kher ka phût lo a nia,"

"Teuh lo, helaia ka hruaina chhan che ka sawifiah hunah leh kan tum anga zan hnih i riah hunah keimah ngeiin ka thlah ang che.."

"Ka ti tak tak a nia.." ka âw a thâm chhalh a, ka chau vek tawh.

"Apui, kan inbiak nasatzia chu i hriat kha, fb-a i pic ka hmuh hmasak ber aṭang khan ka ngaihven tawh che a; mahse, ka tilang duh bik lo. Hun a kal zela ka rilru i luah hneh telh telh a, kan inbiak danah beisei tur i awm ngai si lova mim ngaina tih hre tho mah ila, ka sawi dawt ngam bik lo a ni." A thaw hawk a.

"Phone aṭang mai nilova sawi ngei ka duh vangin tun hun hi ka nghâk a ka ngawi ta rih kha a nia, zû erawh ka plan-ah a tel lo a nia," ka sam pawr phang min chûl mâm sak paha atih chuan ka lâi a nia.

"Zu min intir kher lo khan sawi ve ta mai la.. "

"Lallianpui, chimawm suh.." a nui duh miah lo.

"Eng nge, luak hrep hnu-a khatiang ngaihthlak te chu a.. thlum mah se a kha tel.." ka ti ve ngat a.

"A nih chu, a nih tak chu, min duh ka ring lo rêng a ni." Tiin a tho chhuak ta a, ka chelh dawn teuh lo.

A hnu daihah a rawn lût leh a, "Ka khumah lo chuan ka muhil thei lo a nia tawlh teh," a saisir zawnga ka mut avangin a hmel ka hmu thei lo va ka nui sak.

"Thomas Lallawmsanga'n a khum min kian a; mahse, min kian lo leh ṭhin.." za lutukin ka nui chhuak a, "Ka kian leh lo rêng che a ni," ka bulah a rawn inthawlh kûk a, ka hnar ta lo. Ka kâwngah kuahin, "Hetia ka kuah châkna che hi a rei tawh.." ka bek zâwnah a thaw lum ham a, khua a vâr fel ta.

"Min kuah châktu ka neih ve chhun i nia, ka hnial phal lo che." Ka la nui kar kar a.

"Thutak ve la, ka luak tir leh mai ang che, anih loh pawhin a kua zawng zawng ka hnawhphui tal ang," amah en tura min kuai herin ka mitah chiang takin min en a, "Ka duh che," a hmui sexy zet, vawi tam ka lo zoom tawh ngei mai khân duhthawh takin min fâwp ta a.

"A kua zawng zawng hnawhphui chu ala hun lo, nghâk ve îk rawh aw..." min thlah hnuah ka la chhâng hrâm.

"Lutuk e, ṭhian leh ngaihzawng ni miah lo pawhin kha chen ka bia che a, ka nghâk bawk che, min duh ve tiraw..?" Ngaihngam chiah lo hian ati sup a.

"Duh lo che ila, ka lo zin tawp lovang.."

"Tak tak maw.."

"Thutak ni e, ka star, ka sawi ngam loh leh ka bêm ngam hauh loh kha i nia, min bêm nachang i hre tawh dawn lo emaw ka ti.."

"Lallianpuii zah loh reuh zia hi.." min fâwp leh ta. Ka theihtawpa uarin ka chhâng a, a duhthawh mai sia maw. A kua zawng zawng a hnawhphui hma ngei hian ka tih tawp a ngai.

Setana duhzawng sual ti lovin kan mu dun ve ngial a, min fight a tum lova ka âwmbâwr leh hmui erawh a rim tlat tlat hlê.

Ni e, ani nen bul ṭanin hringnun kan hmachhawn dun a, a luck lutuk erawh inhnialna titamtu a ni. Phone inkawlthleng rap rap châng pawh kan ngah a nia. Mahse, inṭhen phah nân erawh kan hmang bik lo, ka rin aiin a fair a, min zah thiamin min care viau bawk.

A û te inneih kum a nih vangin nupui neih a tum rih loh thu a sawi a, nakum kum tawp lam a tinzawn tih ka hria.

Thomas Lallawmsanga nupui nih nghâkin ka khumah ka online zuah zuah a, a rawn ṭeu leh ṭêp tawh ang chu. Rei deuh deuh phone khawih min khap a; mahse, min be tâwp hlei thei si lo a nih ber hi..

Ka hmangaih em ka hre lo. Ani chuan min hmangaiha vawi tam a sawi bawk. A nunah tû hmeichhia mah a seng lût chhete eih lo tih ka hriatna amah min duh zual tir thung si..

B+>[BeckirafARenthleI]<+®®