1.24-89 [A Becky Rafa Story]

VINGANCA(Revenge)

 Ziaktu: Becky Rafa Renthlei[B®®]

"I thutiamah i ding ang tiraw?" Ka hmâa mipa ding chu a mitah ka en kalh a.

"Ding dâwn e a, min ring la..." a nui suk a,  "Ani nen khan sawi dun tur kan nei tawh lo va, ka tân chuan mitthi nen danglamna a awm lo." 

Zawi supa a ṭawng chhuah chuan rin ka duh kher mai.

Ka bialpa thar, ka ṭhian ṭha ni bawk Joela nen Veranda-ah kan ding dun a, tlangval hmelṭha tak a ni a, a luck-in ngaizâwngtu a nei thei hle! Kei ai chuan kum liin a naupang zawk a, kan inkawmngeih chu thu hran, innêl leh inpawh taka thil sawi dun fo ṭhin kan ni a, a bialnu nen thla hnih liam ta khân an inṭhen ta kha a ni a, a tîr chuan tuar na hlê.

"I duh phawt chuan ka sawi ṭhat sak leh ang che, i thinrim inhrîkthlâkna atana kei min kawp tum i nih chuan min bum dawn hauh lo a nia," tiin ka vau lâwk a.

"Afel, ka ti tak tak, ka ṭhian ṭha ni lo la chuan hmânah ka ngaizawng daih tawh ang che; mahse, i hmai ka zah vângin leh Mami'n min duh êm vang khan ka ngawia ka inthup mai a nia," ka dinna bulah rawn pheiin ka kiangah a lo ding a.

"Ṭhian ṭha nena inkawp hi thil ṭha a ni lo; mahse, ka duh che a, nang pawhin min duha tun hi kan thleng ta a, rinawm lo hmasa zawk chan erawh a chãu turah ngai ang," ka ti tlang hmiah.

Joela nen kum tam tak inzuiin a bialnute pawh ka hriatpui vek ṭhin. Mihring rilru hi a lo danglam thei khawp a, khatia inkâwm reng chung khân engtik laiin nge amah ka lo duh hman ka hre miah lo! Ani pawh chutiang tho chuan Mami nen an inṭhen aṭangin min duh thu a sawi tlang pawp a, ṭhian ṭha kha inngaizâwng kan lo ni ta!

Tu mah min hriatpuitu erawh an awm miah lo thung a, inkawm ngeih tih takah kan inngaihzawn an ring lo te pawh a ni mahna!

"Mami hnenah i kîr leh a nih chuan ka thinrim mai ni lovin nang nena kan inkâr ṭha zawng zawng hi a chhe tawh dawn a, engtikni-ah mah ṭhian kan ni ngai tawh hek lo ang." Tia ka sawi leh ṭâlh chuan ngaih dan nih loh hmêl takin min rawn en a, "Min hrechiang a ni lawm ni, min ring ta che," a ti leh mai a.

Ka rin loh vang ni lovin eng emaw min kam rengtu awm ang mai hian, ka ngaih zuk ṭha miah lo a!

Joela kan in aṭanga a chhuah hnu chuan ngun takin ka inngaihtuah a, a hmel a ṭha, min duhsakin min duat viau tih pawh ka hria; mahse, inngaihzawnna lam hawia han kal thut kha ka zak ru deuh tlat nia.

Mami nen hian kum thum lai inkawp tawh anni a, an inkar ṭha lo leh buaina anneih pawhin ka chinfel pui fo ṭhin. Tun ṭuma an inṭhenna chhan erawh chu Joeala'n zû a lo in a, Bike-in a chesual ta kha a ni a, vawi tam Mami hian rui chunga lirthei khalh lo turin a hrilh ṭhin. A thusawi awih duh lova a rui leh ngat kha an inkâr tichhetu a lo ni ta, theihtawpin Joela'n ngaihdam dil mah se a ngaidam duh si lo a, kei ngei pawhin an inrem lehna tura hmâ ka lâksak ngial pawhin awmzia a awm ta ngang lo a ni e.

"A duh duhin rûi se, a thu thu-a awm a duh bawka awm mawlh rawh se, ani lo mipa an tam lutuk," tia Mami ṭawng ri a hriat khan Joela a beidawng ta.

Thlahnih hnuah kei, a ṭhiannu hi tihtak tê-in min bêm ta a, a rilru hriatsak vek mah suh ila a hmâ aṭanga min duh thu leh ani aia ka upat zawk avangin a sawi hreh tih a sawi. Atîr chuan 'Aw' ka pawh mai lo a; mahse, mak deuhvin chhân duhna rilru ka pu ta tlat.

An inṭhen aṭanga thla hnih leh ni khatnaah kan inngaizawng ve ta a. Nichin khan a whatsapp message-ah Mami nen an inbiakna ka hmu thuak a, ka chhiar kim hman loh avanga amah rin lohna thu chhâkchhuak ka ni.

Inkawma innêl sa tawh kan ni bawk nen kan inkar boruak a nuam phian a! Tisa thilah inzawmna nghet tak kan nei lo chung pawhin alakah ka lungawi a, ka lakah pawh a lungawi ve viau chuan ka hria. Ka rinhlelh tura a awm em em pawh ka hre hran lo a, a tân rinawm takin ka awm ve miah miah.

Joela nu leh pa, unaute nen pawh kan inpawhin engkim kan sawi tlâng thei vek a, hriat loh kârah thla ruk teh meuh kan inzui ve ta. Kan ina chuangkai tam ta chu annêlin antîr ve bawrh bawrh a, a lo lang zing malh malh khawp mai.

"Afel, zaninah ka rawn lêng thei dawn lo aw," a whatsapp message ka chhiar zo chiah a.

"Engvang chuan?"

"Ka chhungte an chhuak vek, in ka nghâk a, lo lêng rawh,"

"A chi loh lutuk, zana lo kal te chu.."

"Lo lêng ve mai la, ka lo hruai lawk ang che aw," a tih deuh tlat avangin ka nu hnenah dâwt vâr sawiin ka chhuak ta a. 

Kan in kawtah Joela lo ding nen hmanhmawh lutukin an in lam kan pan ta a. Zanah ka chhuah ngai loh vângin ka rilru a nuam chiah lo. An in kan thleng a, a sawi ang tak tak khân a tu-a mah an lo awm lo va, ka thâwl huai. Hmeichhe tân zâna mipa pan dûk dûk kha thil mawi pawh va ni suh. Mahse, a mak khawp mai, a turtu a nat hi chuan pawisak neih a har khawp mai.

"Fel, inneih mai ka duh, ka châwm zo lutuk ang che," ka bulah rawn ṭhu-in ka dârah min kuah a, ani nen thla ruk kan inzui tawh ka tih kha, vawi hnih khat sex hmanpui min tum ve tawh a, ka hnar fithla hmak, a tîr chuan a lâwm lo khawp mai a, inṭhen hial ngam khawpa ka ṭan tâkah chuan min nawr lui leh tawh ngai lo.

"Inneih hi thil namai a ni lo va, bâkah hna nghet ka neih hma chuan pasal neih ka tum lo," tia ka chhân chuan ngun zet hian min melh a, "Thil namai a nih loh vang alawm ka sâwm che, pasal neih hun lo pawh i ni tawh lo," tiin ṭan a khawh ve tlat.

Joela hi neih ka hreh a ni lo va; mahse, pasal neih hrim hrim ka zuam rih lo a ni ber. A nu leh pa pawhin fa mo an ît tawh thu an sawi ve fo a, ka bengkhawn lutuk lo.

Zan dang zawng aiin min thlahlel zual emaw tih mai tur hian min si chêtin a ṭhu a, a ṭawng tam loh ngaihtuah phei chuan ani leh ni lo angin a sawi hnem phian! A khât tawkin min fawp leh zauh ṭhin, ka hnial bik chuang lo a. "Awm dun reng ka châk," tih pahin min nghêng hnai sauh va a kut pawh a hlei ru riau. Tu mitmei mah ven tur awm ta lo leh inngaizawng ta na na nâ chu, insum theih loh chin a thleng dâwna ka hriat avangin, "Duh tâwk la," tiin ka phun sap a, a nui suk ringawt.

"Min iai ve ngawt mai," lawm chiah lo tih hriat deuh hian a inla hrang nghal a, "En teh Joel, kan pahnih tana ṭha tur zawk ka ngaihtuah vang a nia, thinrim suh," a kutah vawnsak tumin ka ban a, a lo duh lo nasâ! "Min thlahlel ve miah lo tu ngaihsak reng hi eng nge maw a sâwtna le? Ka thlah ang che," ti hmukin a tho chhuak nghal a, ka hrilhhai ang reng.

"I hrethiam lo a nih kha," ka tih chuan, "Hrethiam e, ka hrethiam vek, ṭhian ṭha ang bâk hian min en thei tak tak lo," ti leh ṭâlhin min pawt tho zui nghal a, kawngkhar lam min panpui a tum chuan ka duh bik lo.

"I thinrim em ni?" Ka dinna ngaiah ka ding lui tlat a.

"Thinrim e, ka nupui nih i duh lo a, thil engkimah min hnar dan tur i zawng ngar ngar zel tih ka hria, Mami kha ka ngai ṭhin ngawt mai," atih tâkah chuan ka sa ve phat.

"Ê, chutiang chuan maw min tih dawn? Nang mah hian min lo duh tak tak lo a nih hi," tiin min vawnna ka thingthla sawk a, kawngkhar lamah vung tawkin ka chhuak zui ta a, hmanhmawh lutukin kan in lam panin ka tlâna min koh lawm lawmna pawh ka chhâng ta lo.

"Afel...." min rawn um chu niin!

Thaw hlawp hlawp chung hian kan veranda ka rap ta a, ka hawi lêt tawh lo.

In chhunga ka luh rualin phone ka switch off nghal hmiah a, Mami hming kha lam ri kher lo se chuan a thinrim pawh ka thlêm mahna. 

Midang nena tehkhin nih hi ka duh lo va, ka duh ngai bawk lo ang.

Joela hi ka hmangaih tih ka hria, ṭhian anga kan in en lai aṭang tawhin ka duhsak em em a, hetia kan inkawp chhoh tâk hnu pawh hian ka thlahlelin ka ngai veng veng ṭhin. Mahse, zanina a awm dan teh thut kha ka hriat thiam chi pawh a ni mai mai lo e a.

# Darkar 10 hnu-ah

Phone ka on rualin whatsapp message a rawn lut ṭuk ṭuk a, group message leh Joela msg tam tham zet ka hmuh chuan ka chhiar thla ta ngar ngar a.

"Afel, tihpalh, min hrethiam rawh, i tel lovin ka awm thei lo ang," tih vel te, "Nang lo chu tumah ka duh lo, min ring rawh aw," a message pakhat mah ka chhâng lo. Ka rilru a na nget nget a, a bialnu hlui sawi chhuah kher kha ka rilrem zawng a ni bik lo.

Tûkṭhuan kan ei laia ka phone a rawn rik chuan chhân loh ka tum zet na a, ka nu'n chhâng tura min tur sek avangin ka hnial duh lo. Ka rin ang chiahin Joela a lo ni a, ka off leh hmak.

Chhunah insûk tur ka ngah êm avangin ka nu dawr kal pawh ka zui ta lo a, whole-sale dawr lian tak kan nei a, ka pa hlawh tih lohah chuan kan ei ber a ni. Zai ngaithla pahin machine-ah ka insu a, ka kâwnga min kuahtu an awm chuan ka phu zawk. Joela hlim hmel eng phât nen kan inhmachhawn ta rân a, nizana ka thinrimna kha vawmbo ang duak a ni!

"Thinrim tawh suh aw, ka thiam loh vek a ni, min kalsan chuan ka awm thei lo ang," a hmui hnâwng chapin min rawn fawp zauh a, "Mami chungchang vawikhat mah ka hriat turin sawi lang tawh suh ang, nizan kha a hmasa ber leh a tawp ber ni rawh se,"

"Yes, tihpalh takzet, i inringtawk lutuk leh i chhungril pawh lo ang tlata ka inhriatna hian mim tina ṭhin a ni."

Chumi hnu chuan eng mah tih hreh nei miah lo hian min ka insûk sa min tleuhpui char char a, private school-ah a inhlawh ve a, school chawlh lai a nih vângin a rawn lêng tih ka hria. Nilêngin inrem takin kan awmdun leh ta a, ani lakah hi chuan ka thinrim rei thei ngai lo rêng a ni, a chhan chu, naupang zawk a nihnaah hian eng emaw chenah dawhtheihna ka nei a, ka hrethiam leh tlat zel.

Whatsapp group pakhata ka awmnaah hian mipa nawi deuh a awm ṭhin a, min fiam zuk zuk a chin bâkah private-te hian fiamthu a rawn thawh leh vak zel, a dp ka en a, kei ai chuan kum hnih khat velin a upat ka ring. Ngaihzawng nei ka nih vâng in vawikhat mah ka reply ngai lo, "Induh nu, misual chapote," smiley dah tlar tuar chunga min rawn thawn te hian ka nuih aza tlat zel. Nitin msg pakhat tal a lo hnutchhiah ve ziah ṭhin a, mipa mak tak a ni.

"Tunge hepa hi, eng ati nge a lo biak ve ziah che a," Joela ngaih dan ni lo hmel ka hmuh chuan ka hrilhfiah vat a. "Hrilh rawh, thu ho mai mai rawn thawn tawh lo turin hrilh rawh aw, tunlai mipa te bul ṭan dan a nih hi," thîk tih hriat zet hian min melh a.

"Ka reply ngai loh kha."

"Chu pawh nise a ṭul lo, keiman ka hau dawn em ni?"

"Ngawihsan mai mai rawh, ka invêng thei e."

Password kan inhriatsak ve ve avangin social media kan khawih dan zawng zawng kan inhriatpawh sak vek a, kan fair ve riau, a phone pawh ka duh duhin ka khawih thei tho va min sawisel ngai lo. 

Joela fel ve na em em chu ka mamawh hunah koh theihin a awm zel a, min care em em bawk.

Hun a kala keini pahnih paw'n buaina kan nei lem lo, nitin school kalin a chhuak ziah a, zan lamah erawh khêl lovin a rawn lang ziah thung. Kei pawh nitin dawrah ka ṭhu a, mahni tâwkah kan buai dun viau.

Inneih vawi tam min sawipui tawha tunah chuan hnial ka tum tawh lo, "Afel, hetia inzui reng hi a mawi pawh a mawi lo, nupui pasal nei rual kan ni tawh, i chhungte lo sawipui ve la," a ti leh ta. Ngun taka ka ngaihtuahin Joela aia min duha min hmangaihtu leh min duattu hi ka hmu tawh lo maithei asin.

"Aw le, ka lo sawi dawn nia," ka ti ve ta nge nge a. A lungawi hmel ka hmuh chuan ka nui ve ta var var a.

Dik tak chuan lo innei ta pawh ni ila, harsa bakberh chuan kan awm bîkin ka ring lo. M.Com ka zawh hnuah hna zawng mai lovin kan dawr hi ka nghâk ta kha a ni a, hna neih chu ṭha tho mah se Joela nu leh pa'n an remtih ka ring lutuk lo. Inchhung khur ngaihtuah mi anni miau a.

Joela'n min hawsan hnu chuan ka ngaihtuahna kâwmin sofa-ah ka ṭhu vang vang a, chutih lai tak chuan Mami, Joela bialnu hlui thinrim mitmeng kawlh hra hian a rawn lût hlawl!

"Lalnunfel, i lo tenawm hle mai, mahni ṭhianpa ngawih ngawih han ngaihzawn chu leh.." zâm map lo hian min rawn chhuahchhal ta a.

"Mami..."

"Joela ṭhian ṭha ber chu a bialnu i lo ni ta a.."

"Eng nge sawi i tum chiah," dam thlapa ka chhâng thei chu ka inchhuang ru viau.

"Joela nen kan inkar chhiat lai chuhin i rawn inrawlh a, kan inkawp leh daih tawh,   min ṭhen thei tak tak lo tih lo hre ve mai mai rawh," a tih leh sak sak chuan ka sa ve phat.

"A ṭha e, in inkawp leh tih ka lo hre lo a nih chu, amah Joela ka lo bia anga pakhat ringawt sawi ka ngaithla dawn lo," ka ti hmiah.

"A nih a hnu," tiin kawngkhar lam a pan a, "Mate, Mama, lo kal la.." tiin a âu lãng lãng a, tunge a koh pawh ka hriat si loh!

Minute khat hnu vela ka kianga min hmachhawn zawnga ding pahnihte hmâah chuan sawi tur reng reng ka hre lo.

Joela, nichin maia nupuia min sawmtu leh Mami inti thei hmel ka hmuh meuh chuan ka zak ru chem chem.

"Min ṭhen thei lo tih leh kan inkar a ṭha leh tawh tih Nunfeli hi hrilh ta che," a ti ta sak sak a. Joela'n ka mitah tak min enin, "Afel, tihpalh.." tih chiah zuk sawi a.

Chumi hnu chuan anmahni pawh ngaihsak tawh lovin ka room lam panin ka tlân lut ta a. Rilru natna ai chuan zahna leh mualphona tâwp niin ka hria.

Engtin nge khatianga rilru chhia kha ka lakah a put theih? Ka mittui far zung zung chu hru tâwkin an thâwm ka ngaithla a, a reh ṭhiap. An chhuak ta a nih ka ring a, ka thinlung na lutuk tihreh nan thâwk ka la kâwk kâwk a, ka mittui pawh dan rual a ni lo. Ka va mualpho si êm..

Ni e, ka hrechiang emaw ka tih khan min lo bum lek a nih chu, ka ṭhian, ka engkim ni a ka lo hriat lehnghal!

Khatiang boruak kan tawn hnu aṭang khan ni thum a liam leh tawh a, Joela hmuh chu sawi loh, a rim a ra pawh ka hre lo. Mami hi a thlah thei dawn lo tihte chu lo hriat awm tak a ni a, ka ât man ka têl a ni ber mai.

Whatsapp group lama min rawn fiam zuk zuk tupa khân a chín ṭhan a la sim miah lo. Nitin a hun ngaiah min la rawn fiam reng a, a khât mawi tâwkin ka be ve ta zauh zauh. 'Vala' tiin a indah a, a ngainatawm phian. Fb ah friend request min rawn thawn bawk a, messenger lamah min be leh zauh ṭhin. Thu tak erawh a sawi lêm hlei lo va!

"Afel, Joela leh Mami hi an lo inzui leh tawh a ni maw?" Sangtei'n atih chuan ka bu nghat a, Joela hming sawi rîk ringawt pawh hian ka na ru veng veng. Luhlul hle lo ila chuan ka be hmasa tawh ngei ang; mahse, tlâwm zâwk nih ka tum lo va, phatsantu lah ka ni hek lo. A tenawm leh rinawm lo zawk mahin min biak a tum loh te chuan ka intei tê îkhaw dawn lo.

Kan inkâr a chhiat aṭanga kâr khatna Sunday chawhnu-ah, Joela leh Mami bike-a an inphur ka hmu vuai a, min hmu lo der tih ka hre ve kar. Ka huatna a zual sauh thung, ka ṭhian ṭha, hun kha leh chen thu chhia a ṭha min sawi dun puituin min bum hi ka na ngawih ngawih.

Sex min hmanpui a tum te khân lo duh ta ila ka ṭahna titamtu tur mai mai a lo ni dawn si. Thla ruk pum tawp inngaizawng ve ta chu eng vangin nge ka nat loh lêm ang. Chaw ka ei thei lo va, ka chhungte'n a chanchin min zawh pawhin ka chhâng duh lo hrim hrim. Ka mualphona tur hian ka kâ ân ka tum miah lo.

Anni pahnih pawhin min rawn hre chang tawh lo a, veng khat na na nâ chu inhmuh fuh châng kan nei leh zauh ṭhin. Chung hunah chuan ka hre lo der ve hmak a, ka mitsîr tak ngial pawhin en anga lan ka duh lo. Tenawm dun hian a. A hma aimah khân an inzui tam emaw tih mai tur a ni! Min runluih tepawh an ang dawn dawn alawm le.

Vala nen kan inbe ngun tulh tulh a, inngaihzawnna lam thu eng mah kan sawi ngai lo. Aizawlah lo zin a tum thu leh min hmuh ve ngei a duh tih erawh a sawi chamchî a, ka ngaihven lutuk lo. Mahse, a felin biak a nuam em em lawi si.

Ka tih ṭhin dan pangngai reng, zan tîrtê aṭangin ka online leh ngat ngat a, Social media khawih tam pâwl ka ni ngei ang. Mahse, chuti chung chuan lerh nân leh mi tâna pawi tur erawh chuan thu ka chhepchhuak ngai meuh lo. Joela nen kan inṭhen aṭangin thla hnih a liam tawh a, Mami intithei hmêl hmuh hi ka hnê hluah hluah.

"Afel, naktuk hian ka hna thilah lo zin angai a, in inah ka lo thleng dawn," private message-a Vala min lo biakna ka hmuh chuan ka nui sak a. Ralkhat aṭang hian hian min nêl ve em em a, Joela ngaia ka indawm kun tur pawh ani hian min chhâwk viau, hunawl hnawh khah nan ka be tam tih pawh ka inhria.

"I duh phawt te chuan.."

"Tak takin hotel-ah ka innghat dawn a, lo riak ang che." Smiley a tlar phei dul a, a fiamthu tih hre mah ila ka lo zak ru chem chem.

"Riak e a, i bulah ka mu bawk anga," tiin ka uang zui nghal a.

"Ka hre reng dawn a nia aw.." a'n ti ve ngial a(h).

Thu ho supsapin kan inbe leh ta nge nge a, a thlenna hotel hming erawh chu a sawi miah lo. Amah hmuh ka châk ru ve tho tih ka pha thei dawn em ni?

"Mate, Joela leh Mami hi an lo inkawp leh a ni maw!?" Ka room-ah ka nu a lo lût a, min khawngaih hmel taka min enin, "Ka rin a ang lo hle mai, a nu nen kan inhmu a, a lo sawi a, a lawm loh teh kha le," a tih chuan ka ngawi reng.

"Inkawp rawh se, kei aiin a hmangaih zawk tihna a ni a, inrawlh emaw sawi chhuah ka duh tawh lo," ka tih chuan, "Theihnghilh tum la aw, ani lo mipa an tam lutuk," tia min hnemna chu ka rilrem zawng tak a ni.

Amah beisei chu sawi loh, ṭhian anga en leh pawh ka tum tawh lo va, phubâ lâk duhna rilru ka pu hial. Mahse, chu zawng bul ṭan dan tur ka thiam chuang der lo.

Nula hmel ṭha tia sawi vulchûk tur ni lo mah ila, ka vun a paw phakin ka pian a dik vei riau! A lerh chi ka lo ni lo bawk nen mipa ka ngaihsak khu chûk lo a, Joela hi tih tak zeta ka neih hmasak ber a ni hial mai thei. Chuvangin, hetia Mami hnena min kirsan leh hi a zawng zawngin ka tuar a ni ber mai.

Zanah ni se mittui nena ka muthilh ṭum lah a tam, biak pawh châkin zawh fiah châk ru viau mah ila, ka chapona vang pawh hian tuar chhuah theih hun ka neih ngei ka ring bawk. Mami tih el nana min lo kawp tih ka hriat zan phei kha chuan ka ṭap tlaivar ṭhak. Amah ka haw em em a, ka demin ka ten bawk. Lemchang thiam tak a ni.

"Joela hian kei lo chu midang neih a tum lo tih hi lo hre nawn leh rawh," Mami Whatsapp message ka chhiar zo chiah chu ka thin a sa ngei mai. Ngawih ka chuh a, an inkârah chhetê pawha ka inrawlh lo chungin min hmusit zui zel tih ka hriat hian ka thin tertek a kai chhuak ta.

"Ê, lungngai suh, rinawmna hralh a, ṭhiannu te ngaizawng dûk dûk mipa ka nun aṭanga a chhuak ta hi ka lawm lutuk, kum kha leh chen a ṭhian ṭha tana rinawm thei lo kha maw, i lakah pawh a rinawm chatuan ka ring bik lo." Tiin ka reply ve hmiah.

"Tenawmnu, min thîk a nih kha," hei zawng hi Mami min chhân lêtna chu a ni.

Ka block zui hmiah a, Joela ka block na pawh ka open chhin eih tawh lo. Na mah ila 'ka na kumkhua tawp lovang' tih hi ka rilru dik tak a ni.

Ka nun aṭang leh ka hriat rengna aṭanga ka paih chhuah hian ka dam hma dâwn tihna a ni mai.

Vala paw'n Aizawl a rawn thleng tawh a, eng hna nge a thawh a, eng ang mipa nge a nih hre mah suh ila hmuh ve ngei chu ka tum. "Afel, zanin tlaiah chaw ei chhuak ila," tlai lam dar thum vela min lo call chuan ka lâi ve ringawt.

"Khawiah nge kan ei anga?"

"Lungngai suh, ka thlenna hotel-ah lo kal la, i him a nia," nui hawk hawk chungin a rawn uang leh pek.

"Ka him dawn te chuan..." thu ho mai mai bâkin kan inbe ngai chuang lo a, eng teh vakah ka ngai lêm lo. A ho sih sih ve a.

Chumi hnu chuan tlai lama inhmuh tumin thu ka ti tlu ve ringawt, ka nu leh pa hnenah ka dil a, "Rawn haw tlai lo la," an tih chuan ka phûr ngei mai. Pâwn ka chhuak tlêm em em a, Joela nen kan boruak an hre vek bawk a, min khawngaih tih ka hria, chuvanga phal tepawh chu anni mah na.

Tlai lam dar li a rik chuan ka insiam peih ap tawh a, Kekawr dum taksa rem zaih leh Kamis sen duk ka inbel a, converse dum ka inthawlh leh pawp, inchei vul chûk mi ka ni lo bawk nen insiam ka awlsam viau. Ka scooty nen Vala thlenna hotel lam panin ka tlân chhuak ve ta a. Mak deuhvin ka confi viau. Vawikhat inhmuhna turah te chuan zâm awm tak. Mahse, chumi letling hlauh chu ka ni.

Regency hotel kawtah ka ding vang vang a, security-in, "Eng nge i duh?" Tia min lo zawh chuan ka ṭhian hmuh tum ka nih thu ṭha takin ka hrilh a, vawikhat mah hotel Regency ah hian ka la lût ngai si lo va, nuam lo chu ka ti deuh.

"Lo kal rawh," tiin step-ah min chhohpui ta a. An lobby pawh a nuamin a thianghlim khawp mai, Vala ka phone ta a, ka thlen tawh thu leh ka nghâk reng tih ka sawi chuan, "Lo hawi la," ati thâwp sat!

Hotel ṭhut chawlhna step sira mipa ding chu ka va hmu ta a. Awi ka nu leh!

Ka hmuh tum ang rêng rêng a lo ni lo. A sângin a fai vang mai a, a khabe hmul leh a chhip sam buk deuh lai dum hlap te chu a inhmeh hlê. A hmelṭha hluak hran lo; mahse, ngaihno a bei viau lawi si. Nui suk chung hian, "Afel, kan inhmu ta nge nge e," a kut ka vawn theih nân a rawn phar chhuak a, chhe lo tak a ni. A kut dinglamah 'Titan Sana original' a la bun zui.

"Ih..." ka khuh kharha ka lai vel vek. 

Kum 30 chu a chuang tawh ngei ang, a thawhnaw inbel simple zet te chu a inhmeh phian a, a taksa a inphut viau bawk. Hotel Regency-a thleng thei a nih chuan a rethei zawk zawk lo khawpin ka ring. Chu zawng zawng chu ka ngaihtuah kim vek hman nia, râpthlâk zawk hian a.

"Lokal rawh, ka pindanah.." ka kutah vuanin a room lam min panpui ta a, ka khûr ru der der, atîrah ka zâm lo ve em em a, tunah chuan 'Ṭîk' pawh ka ti ngam dêr lo. Keimah, Lalnunfeli kha hmuh tur awm lovin ka tleirawl ṭha leh a ni ngawt alawm le.

"Hey, keimah Vala, Lalrinkima ka ni e," Semi sofa-ah min ṭhutpui ta a.

"Ih, Lalnunfeli, Afeli.." ka biang sa hut hut chu tih reh ka duh kher mai. "Afel, thlalâk aiin atakah i hmelṭha daih zawk," a ṭhutna aṭanga tho chhuakin tui in tur min rawn pe a, a va'n polite tak.

"Nang pawh.."

"Anti ve ngeiah," tiin a nui leh suk a, whatsapp velah a nâwiin fiamthu hlir khan min be ṭhin sia, hmaichhanah erawh a puitlin hmel khawp mai. Pa invawng fel  tak a nih hmel.

"I ril a ṭâm tawh em?" Ka bulah a rawn ṭhu ve a, min hnaih mah mah, ka chhungrilah hlauhthawnna a rawn awm a, amah ka hlau tihna ni lovin keimah zawk ka dik tlat lo. A mi uap a na êm a ni!

"Ṭam lo e, a la hma alawm," ka confi ve ṭhinna zawng zawng kha vawmbo ang duak a ni.

"In tur kan dawm hmasa dawn nia," a ti ta a. Eng in tur nge a sawi pawh ka hrethiam ve lo. Coffee emaw, cold drinks tihvel a nih ka ring ve tawp.

Chumi hnu chuan Mini fridge hawngin bottle ami eng emaw ni hi glass no-ah a rawn thli chhuak a, min rawn pe ta a. 

Tîm deuh dai chung hian ka in ve ta a, zu rim a nam pawhin ka hre lo, Apple rim lam a pâwl deuh, "A tui hle mai, eng nge a?" Ka tih chuan, "Thil tui tak a ni mai," a no tlâk pap pahin ati liam satliah a, ka zâwt zui ta lo.

Titi pahin no li zet ka in tawh, rûi anga lang si lo hian ka ni deuh chiai chiai a, thil mak tak a ni. Ka kum zat leh bialpa ka neih leh neih loh min zawh te chuan thu dik takin ka chhâng vek tih ka hria, Joela chungchang pawh ka sawi nual.

"Afel, kei chuan ka phatsan ve lovang che, min duhna chhetê tal i neih chuan," tih pahin min rawn ṭhut hnaih sauh va, ka dâra min kuahna chu ka haw phal teuh lo. A mak ka ti, Lalrinkima(Vala) laka ka awm dan hi a easy riau va hriatna ka nei a, ka inthunun thei dêr lo! Ka zâng húih a, ka chhungrilah thatho riauna zuk awm tlat pek a.

"Min duh em ni?" Nui ar ar chunga ka zawh chuan, ṭawngka-in min chhâng lo. Ka hmai zawnah rawn kûn hniamin uar leh duhthawh zet hian min rawn fawp ta a, a zei tih piah lamah a zei. Ka chhungrilah phurna a rawn awm a, a aia uar leh duhthawh hian ka lo chhâng lêt ve mial mial.

"Afel, i duhthlanna a pawimawh aw.." Khum zau puiah min nghatin, ani pawh a rawn lâwn zui nghal a, a kut dam thlupa min tawhna chu ka thlamuanpui viau nia! Hlaua tlânchhe tur ka nih nen, a teuh lo mai, amah ka kuah lovang tih ka hlau zek zek a, ka awm dan pawh ka hre thiam tawh bik lo.

"Afel, Lalnunfel, ka duh che, ka ta ni rawh..." ka thawmhnaw inbel min hlih sak lai te chuan ka meng peih chang chang a, a ṭawng ri erawh ka thluakin a hre fiah vek.

Hotel room zau leh reh ruihah chuan kha leh chen ka lo vawn ṭhat, ka thianghlimna chu ka vawikhat hmuhna mipa hnenah ka hloh ta. A natna ai mah chuan ka thluak nu but leh ka ngaihtuahna bîng mup mup chu a chhan ka hre thei si lo. Vawi hnih mipat hmeichhiatna min hmanpui hnuah ka lo muhil ta a ni ngei ang. 

Ka phone riin min tiharh a, Vala âwm nghêngin, amah kuah chial chung hian saruakin ka lo la mu a nih chu! Ani ve thung chu a muhil tui hle, a thaw sâk sâk a, a sam hnawk niai leh thur chhap te chu a inhmeh ngawih ngawih.

Ka nu missed call vawi hnih a lo awm a, ka call back nghal a, zan lam dar sarih a ri ṭêp a, tlai chhe lutuk chu a ni lo.

"Mate, Durtlang hospital-ah kan kal dawn a, i lo haw hunah chahbi la chawp mai rawh aw," a rawn ti hlauh.

 

"Eng nge in tih dawn, ka lo haw ṭep asin," ṭawng ring ṭha ngam chiah lo hian ka ti a.

"I pa te thawhpui a chau deuhva kan lan ve loh chuan a mawi lo ang, chahbi dahna chu i hriat kha," thil dang zawt thui tawh lo vin kan inbiakna ka titawp ta a. 

Dinner ei tura chhuak ve si khan tun thlengin eng mah kan la ei lo mai ni lovin ka dam chhunga ka theihnghilh theih tawh loh tur ser nung ka insiam ta si.

Khuma Rinkima muhil hmel chu ka ennawn leh ngat a, eng vanga mutpui ngawt nge maw ka nih le! Ka vawikhat hmuhna chauh lehnghal, zahnain min tuam hlup hlup a, ka thluak nu but kha a chhan hre lo mah ila in tur min pêk kha ka puh ta ber. Bathroom-ah lûtin ka insil thuak thuak a, ṭahin awmzia a nei lo a, ka tihsual man tuar tura ka intih paukhauh a ngai thung.

Hmeichhe nêp ber te awm danin hotel-ah mipa ka va mutpui a nia, ka intenin ka inzahpui hluah hluah. Vala min ngaih dan tur nen lam ka ngaihtuah phei chuan  khua ka hawi ngam nâng maw le.

Dimtêin tih harh hlau zet hian thawmhnaw ka inbel a, Scooty ka ken tho avangin Vala kai tho ta lo chuan Regency hotel ka chhuahsan ta a. Ka lû a rit lûk a, ka dang a ro huam huam bawk a, ka kap bâwr vel rawl ṭhum te chu haider theih ka duh hle mai. Nula thianghlim kha, 'zero' in ka haw ta, ka va chhuanawm loh si êm. Mittui hnâm sawk chungin Scooty-ah ka lâwn a, chak lutukin ka tlân chhuak ta a.

# 10:15Pm Zirtawp Zan

Khatia ka haw ta kha ka chhungte tumah an awm loh avangin, bathroom-ah rei lutuk tak mai ka inbual a, keima taksa ngeia mipa hnuhma a han awm ta hi ka chhungril a na ru veng veng. Ka ngaihzawng pawh ni lo lakah khatiang khân engtin nge ka awm theih? Min hmusit dawn mang e.

Ka phone vawi eng emaw zât a ri sek a, Vala a nih vangin ka chhâng ngam lo. A lo harh tawh tihna a nia.

"Afel, ka phone call chhâng rawh," whatsapp aṭanga min rawn biakna pawh ka reply ta chuang lo.

"Lalnunfel, ka rawn kal i duh loh chuan ka call chhâng rawh," a rawn ti leh a.

Eng nge ka sawi ang? A in tur min pêkah khân thil ṭha lo a tel a nih ka ring ta ber a,  chuti ni lo se khatia ka awm kha a ring lo.

"Sawi tur eng mah ka nei lo," tia ka chhânna chuan a ti thinrim a nih ka ring.

"Ka ta i nih kha, keimah Lalrinkima ta liau liau," a ti leh sak sak a. A hmaa ka lo hriat ṭhin Vala, fiamthu duh tak kha hmuh tur a awm ta lo.

Min rawn call leh lai chuan khumah bawkkhup zawngin ka awm a, ka chhâng lo ngam ta lo.

"Aw, sawi la..." ka aw a zawi kher mai.

"A ruka min hawsan chhan kha eng nge? Invenna kan hmang lo ve ve tih i hria ang chu maw," a awki a hniam chhalh chhalh khawp mai.

"Hmang lo e, ka tihpalh, a mawh ka phur vek ang," ka ti sap a.

"Damdawi ei ang che."

"Vala, khatiang thil sual tih tawh hnu pawha damdawi ei te zawng sawi lo mai rawh, ka tih sual man ka têl mai ang," ka ti ve ngat a. A rilru a hriat ta khawp mai, ka thinrim rilru na lutuk chuan phone ka off ta ringawt a. Vawi tam a rawn call leh pawhin ka chhâng duh ta lo.

Mittui nen zân ka hmang ral leh dawn ta.

Joela nen kan inṭhen lai khân ka na hle a, chu ai pawh chuan tuna ka natna hi a thûkin a ril zawk. Mahse, ka tihsual man têl ngam lo tura hmeichhe nêp nih ka tum tawh lo a, ka hmaah eng nge thleng dawn tih hre mah suh ila ka paltlang ngam tur a ni. 

Chhin khat mah chhing lo vin chu zan chu ka hmang ral ta a.

Mit thîp urhin zing dar sarihah ka tho chhuak a, ka hmêl dul raih leh ka mitmeng tla dâk chuan mut ka hmu ṭha lo tih a tar lang chiang hle.


Vala message lo awm tlar dul chu ka chhiar thla par par a, "Afel, tikha chuan kan inkawp tawh tih hria la, kei lo midang ngaihzawng i nei thiang lo a nia, i tan ka awm anga, ka tan i awm bawk ang," tih ka chhiar lai chuan mak ka ti rilru viau! Nizan lawkah ka râi hlauvin damdawi ei rawh min ti a, tunah inngaizawng ang chiahin a lo sawi leh si!

"Kan inkawp kher a ngaihna ka hre lo, ka laka i rilru ka hre chiang ve bawk."

Rang takin min rawn reply a, "In awmna lai lo sawi rawh, chaw eikhamah ka lo kal dawn," a tih chuan ka ner sak. A hmel ka hmu ngam dawn em ni?

"Eng mah sawi tur ka nei lo, nizan kha a bul ṭanna leh a tawpna ni rawh se," tia ka chhân chuan min chhâng lêt tawh lo.

Dâwrah pawh ka kal peih ta lo a, Inrinni a ni bawk nen ka pa chawlh neih ve chhunah an pahnihin an chhuak ta kha a ni a. Nizan chungchâng eng mah min zâwt lo. Sitting room-ah ṭhuin ka melh ngai ka melh tlawk tlawk a, nizan chugchang ka ngaihtuah thui poh leh ka thâw a ipik.

Doorbell a rawn ri a, phur lo zet hian kawngkhar ka va hawng a, kan veranda-a ding ka hmuh meuh chuan ka maimitchhîng sawk. Vala a lo ding run a, ngun zet hian min en bawk.

"Ka zawn chhuah theih che i ring lo a ni ang maw?"

"Chutiang ngaih dan ka nei lo, lo lût rawh," tih pahin ka lut zui daih a, min rawn zui tih ka hria, he pa hian ka lakah eng chiah nge maw a duh ni?

Sofa-ah ṭhuin min en deuh ngar ngar a, ka be hmasa duh dêr lo.

"Afel, nizan thil kha ka tum lâwk a ni lo a nia," a ti sup a.

"Ka thiam loh a ni e, damdawi ei tur chuan min ring lovang tiraw? Eng pawh ka chungah thleng se, ka tlânchhe lo ang," inring tawk taka ka ṭawng chhuah chuan a nui suk a, "Ka ring sual lo che, i tan mipa hmasa ber ka ni a, a tawpna nih pawh ka tum, Delhi-ah ka zin dawn a, hna thilah, rinawm takin ka tân lo awm ang che," A ti hmiah hmiah a, ava han inring tawk kher ve le!

"Inngaihzawn zui kher a ngai lo." Tiin hnuai lam ka bih zui daih a.

"Min duh ngang lo a nih chuan sawi theih ka nei lo a; mahse, ka duh ang che a min duh lêt ve a nih chuan, i tan ka awm ang," ka kiangah a rawn insawn phei a, "I dp ka en aṭang te, fb-a i thlalâk ka en apiang hian atakah hmuh che ka châk ṭhin, ka duh che tih hi zêp buai ka tum lo." 

Ka kutah nghet zet hian a hmer a, "Larinkima ka ni a, Vala tiin min ko ṭhin, kum 33 a upa niin tunah hian Horticulture department-ah ka thawk a, farnu pakhat ka nei bawk, Champhaiah kan chhungkuain kan khawsa mêk a, ka pa hi High school headmaster a ni a, ka nu pawh primary teacher a ni e, hriat duh dang i la nei em?" Tiin a chanchin tlangpui a sawi a, an chhungkua an changtlung tih ka hre mai.

"Chutiang ka hriat ve vek a ṭul lo,"

"I hriat a ngai alawm, vawiin chawhnu hian Delhi ka pan a ngai a, engkim sawi duna sawi fel vek a ngai," a ti leh a.

"A ṭha lawm," tih chiahin ka chhâng a, a lawm lo hmel erawh ka hmuh hmaih lo.

"Ka thik thu a chhia a, i bialpa hlui Joela kha i biak zui loh ka beisei, ka tân rinawm ang che," ka khabeah dawmin ka mitah chiang takin min en a, "Mi dang i nunah an tel ve a rem lo, ka ta chu ka ta a ni mai," a sawi zawh rualin min rawn fawp a, ka lâi hû.

Lalrinkima haw tur chuan min thlah hleithei lo. "Ka ngai dawn che, zan khat chauh mah ni se ka tan a hlu tih hria la, ka biak theih turin awm ang che aw," veranda thleng ka thlah a, ka duh huam ka hre hran lo. Mahse, ka duh loh pawh ka hre chuang lo.

Delhi-a a chhuk aṭangin karkhat dâwn a liam tawh a, nikhatah vawi li ngei ngeiin min rawn be ziah, a hna thila zin a ni bawk a, hunawl a nei tam lo tih ka hria, chuti chung chuan min ngaihsakin thil ka ei ṭhat leh ṭhat loh chenin min zawt thlap zel. A tîra ka rilru kha ka paih bo hret hret a, ka tana mipa hmasa ber a nih ang ngeiin rilru pawh ka pe ve ṭan ta. Min ngaihsaka min duattu na na nâ chu ka ngainain ka thlahlel telh telh lo nâkah.

Ka nun pawh a hlim chho leh ṭan ta a, kan inbiak apiangin Champhaiah min hruai a tum thu a sawi ziah. Joela pawh a ni têlin ka theinghilh chho ve zel a, Mami nen anla inzui tluang zel.

Krismas a hnai tawh bawk nen Aizawl bazar a lûn ṭan a, kan dawrah nitin ka phi buai char char a ni deuh ber. 

Vala pawh Delhi aṭangin vawiin tlai hian a rawn thleng dawn a, amah hmuak turin min beisei tih ka hria, hmuah ngei pawh ka tum bawk a, Lengpui Airport-ah Taxi-in ka tlân thla ta vang vang a.

"Hey, Afel.." ka lam panin Trolley suitcase nen a rawn phei a, a nui hmel mawlh hi hmuh a nuam. Ruih theih thilin a tibuai lo tih a lang hliah hliah, shirt dumpawl inbelin, Jeans paw dal raih a ha a, amah a palian bawk nen ka lo chhuang ru ve ngawih ngawih. Ka va duh tawh si êm!

Lalrinkima hlim hmel hian ka chhungril a ti che dat thei alawm le...

#
"Min lo hmuak tak tak a!" Nui hawk chungin a kut vei lamin ka dârah a rawn vuan a.

"Hmuak tur che in min ti a ni lawm ni?"

"Ti chiang e," Taxi stand lam panin min kuah phei ta a, ka thlâ a muang hliah hliah, rawn kun hniamin ka beng bulah, "Kan naute tur a awm tawh ang em le?" A tih chuan rum deuh hian ka melh a, a ṭawng hre pha an awm nge awm lo tih hriat tumin  ka hawi kual nghâl.

"I zak elaw? Ka kiangah, ka bula i awm chhung hi chuan i zahna tur ka thlen lo ang," tiin Taxi driver a hui zauh a, "Tunah khatiang a sawi chi loh," tia ka chhân chuan a nui suk suk duh chauh a ni.


Lengpui aṭangin hotel Regency kan pan ding nghal a, min ngaih thu leh a rilruah kei mah bâk a awm lo tih a sawi chuan nuam ka lo ti veng veng.

A room ngaiah chiah kan lût leh ta a, "In tur inpêk awih tawh loh," fiamthu titak deuhva ka sawi chuan min melh zawk a, "A ruih theih tih ka lo hre lo a ni," tih chiah a sawi.

Hman ni-a in tur min pek kha Alcolic content a lo sâng viau a nih hmel! kei, zu lam reng reng tem chhin ngai lo hian ka in tam ta phian si a, ka hneh lo a nih ka ring ta ber a.

"Dinner ei lovin min hawsan tawh lo la, hetah kan ei anga, thlah pah che-in ka lo lêng dawn nia," atih chuan ka hnial phal lo.

Inbual tura min luhsan hlânin ka nu te ka phone a, chaw ka ei nghal tur thu leh min thlah haw dawn tih ka sawi chuan, min zâwt chîk teh e. Ka insawi fel thei hrâm.

Bathroom aṭanga a lo chhuah chuan towel chiah a veng a, a taksa a nalh zêk. Palian sa ṭha pangngai a nih rualin, tisa chuangtlâi hmuh tur a awm lo a, a sam hnâwng deuh chap te, a mitmeng dam ruih te hian  mipa dik tak a nih zia a tar lang.

"I lo rinawm em?" Thawmhnaw inbel mawlh mawlh pahin min zâwt a.

"I rinawmna ang chiah khân," tia ka chhânna vang chu nge a mitmeng a dang lam deuh tlatin ka hria.

"Rinawm lo zawk chu a la hriat mai ang," khumah a ṭhu a, "Rei lo tê mu hah dam ila dinner kan ei dawn nia," a ti awlsam leh mai a. Mut kher a ṭul lo tia ka sawi chuan, "Hlauthawng suh, kuah che ka châk mai a nia," rawn ding chhuakin ka ṭhutna lamah a lo phei a, "Ka chau lutuka nang mah kuah chunga mut ka châk, a bâk eng thil mah ka ti lo ang," tiin khum zaupui chu min panpui ta a.

Eng ati nge a kiangah hian ka dang lam ziah le!?

A sîr zawngin a mu a, ka kâwngah kuahin thu ho mai mai a sawi a, a thil min hawn pawh nakina min pek tur thu a sawi. A sawi ang tak takin a che fair ang reng, ka pum chûl hauh hauh chung hian, "Ka thawhhah man lo awm hlauh se la, vawi hnih lai ka hah lehnghal," tiin a nui kur kur a, ka nghawk sawk.

A chau viau a ni ngei ang, rei lo tê-ah a muhil ta daih a, a biang lum vat vat leh a rim fai sar te chu ka lo thlahlel ru riau chu niin! min kuahna kut dah sawn sakin keimah zawkin ka kuah ta a. Lalrinkima hian zûn a ngah viau a ni ngei ang, ka hmangaih hmasa Joela rêng rêng ka rilru-ah a lut eih lo. Nge, ka lo hmangaih ngai miah lo zawk?


Tlai lam dar nga a rîkin ka kai tho ta a, a harh rual ruala min fawh chuan ka lo chhâng uar ve tân tân a nia, mipa leh hmeichhia, inngaizawng lai khum khata mu dun ta na na nâ chuan Seol kawt chhuah kan dai leh ta nge nge e.

Thaw hawk chunga min fawp zauh chung hian, "Ka ta ni reng ang che," ati sup a.

A hmaa sex kan hman ai khân tuna mi chu a dan a dang ta, kei ngei pawhin a nawmna ka tem pha hial a, mipa zei tak a ni tih hrilh hranpa ka ngai lo, engkimah 'a ber' nihna ka pe fai vek.


Dinner muang mara kan ei fel hnuah, kan in panin kan chhuak ta a. Ka nu leh pa mit a tlung hlê, thil bengvar thlâk tak tak sawi tur a hre ṭeuh a, titi a thiamin a awkâ dam thlup chu ngaihthlak a hahdam viau.

Silver ṭhi min lo hawn pawh amah ngeiin min awrh tîr a, ka hmangaih che, tiin sawi lo mah se min duh ve viau tih ka hria. Joela nen veng khat kan ni tih a hriat khan tlêm chuan min ringhlel hmel a pu deuh.

"Kha pa kha vawi khat tê mah hnimhnai suh ang che," tia min hrilh chu vawn reng pawh ka tum.

##

Champhaia min hawsanna thlakhat leh kar hnih a ni tawh a, kan inbe zingin hun awl zawng zawngah midang an leng lo. Vala ka hmangaihna hi chu tisa mai ni lovin ka zawng zawng a ni ta. Ka thlatin bi neih hunah ka nei lo tih ka hrilh chuan a lâwm teh e.

A tîr chuan ka hrilh ngam lo a; mahse, sawi loh theih ni hek lo le, rilru hah zeta ka awm hlauvin Aizawlah a rawn chhuk a, thla thum a tlin hunah kan inrûk tur thu leh tunah chuan training rei lo tê a neih tur thu sawiin nghak hrâm hrâm turin min ti.

"Afel, ka kiangah i chêng ve tak tak dawn ta e," duh thawh lutukin min fâwp a, "Ka hmangaih che, ka fa pawh ka hmangaih," a tih phei chuan ka râi ta hi ka lâwm zaw mah. Min hmangaih tak tak tu ka tawng miau alawm.


Inrûk ka duh lo viau na a, kan bul ṭan dan a fuh tlat si loh avangin duh thlan tur ka nei ta lo. Ka chhungte hriat hlau takin ka inthup ngar ngar a, an hre lo rêng bawk. An fanu hian hetiang thil hi ka ti ang tih ang mumangah pawh an hmu chhinin ka ring lo. Min ring ṭha êm a, an rin ang ka pha ta lo erawh pawi ka ti hlê.

Ka tih sual leh ka dai sual man ka têl a, 'Lalnunfeli, nula fel' tia an sawi 'Hero' ṭhin kha, mipa vangin ka 'Zero' ta. Tenawm intih châng ngah mah ila thil sâwt lo-ah ka inham buai duh ta bîk lo atin ni.

Krismas kan hmang zo a, zan khat chu Joela a lo lang hlawl!

"Fel, vawi khat chiah chance min pe rawh," tiin.

A rui phût a, Mami nen an inṭhen nge tih pawh ka hriat si loh. "Min bum nalh êm a, ka tân eng mah i ni tawh lo, ka ṭhian, ka ngaihzawng, a eng mah mah i ni lo," ka ti ve hmiah.

"Lalnunfel, i bialpa nen khân in inkawp rei chuang lo ang," thinrim meng sen râma a ṭawng chu engah mah ka ngai lo ve.


Ka naupaiin thla hnih hmel a hmu tawh a, vanneih thlâk takin insawiselna ka nei miah lo. Luak chhuak leh neuh neuh nei ila chuan ka chhungte'n an hre tawhin ka ring a; mahse, chutiang ni lovin ka nun a hlim a, Vala nena kan hma hun tur ka suangtuah fo ṭhin.


"Hey, Naute, ânu nen in ṭha em?" 31st zanah min rawn bia a, kei mah min ko lo hian, 'Naute' a rawn ti kher zel.

"Kan ṭha e, nang zawk?"


"Ka ngai che, tih loh-ah chuan ka ṭha mah mah, zanin chu ṭhalai pual programme a awm a, ka kal dawn aw, phat reng a nuam si lo a," atih chuan ka hnial lêm lo. Pawn lama tei chhuaha len ai chuan a ṭha fe.

Darkua vel thleng kan inbiak hnuah kan dah ta chauh a, January thla laihâwl velah min lo hruai a tum a, kum thar ni vat vat se ka nghâk hlel.


Chumi hnu chuan ka chhungte nen ei tur eng eng emaw kan siam a, zan lai inhlan ṭawngṭaina te kan hman zawh hnuah ka mu ta daih a, Vala s online reng a, min be miah lo! Ka chauh deuh avangin ka muhil ta vat a.

Zing lam dar hnih vela ka pum a rawn nat chuan ka harh chiang teh e, ka tâi bâwr vel a sa hut hut a, zun chhuak ang chiahin ka awm zui ta bawk nen bathroom-ah thei leh thei lovin ka phei a, ka  lût fel hman chiah tihah ka serh aṭangin thi a rawn baw chhuak a, ka ṭhu sawp hnawk.

Hrilhfiah ngai lovin nau ka chhiat tih ka hre mai. Ka mittui dan rual lohvin a far a, Vala bulah eng nge ka sawi tâk ang? Buaipuitu awm ta lo chu keimahin ka insingsa ve nawk nawk a, ka pum nâ lah a reh mai si lo. Mahni inkhawngaihna-in ka khat a ni ber.

A tûk kum thar ni-ah incheck up ngaihna a awm si lo. Ka pumna chhuanlamin ka inkhawm ta lo a, Vala ala reh vung vung. Chawhnu lamah tlêma ka zia tâk deuh avangin ka call ta a, hmeichhiain min lo chhâng teh mial.

"Vala ka lo be lawk?" Ka tih chuan, "Bike a khalh lak lawh lutuka ka lo hrilh mai ang," tiin a off zui hmiah. Tu nge a phurh hre mah suh ila ka sa zak mai.

Kum thar ni leh zankhuain Vala'n min rawn be lo a, a online reng chung pawhin ka message a hawng lo hrim hrim! Ka rilru natna ai mah chuan ka pum chhunga naute ka chân ta hi nâ ka ti a, naktukah in entir ve hrim hrim erawh ka tum.

2nd January

Zing hma takah ka tho a, ka taksaah na lutuk sawi tur a awm lo. Lalrinkima'n ka whatsapp message a chhiara min reply lo thung. Ka va call ta a, vawi sarih zet a ring ral ṭhak nia!

Ka nu leh pa hnenah chhuanlam siamin bazar tur anga insawiin ka chhuak ta a.


Ka rin dan a dik chiah. Ka naute chu ka lo chhiat ngei e, sawi tur a vâng a, ka bîng mup mupin ka hria, Vala ka la hrilh lo va, hrilh theih pawhin a awm hek lo.

"Mate, i nuam lo deuh em ni?" Tia ka nu'n min zawh chuan, ka pum a nawm loh thu leh damdawi eia ka zia mai tur thu ka sawi puat a, min en chîk leh pek.

Khumah ka tâp nilêng ṭhak a, ka phone a rawn rik chuan Vala a lo ni.

"Afel, ka buaiin ka chau lutuka min hrethiam rawh aw.." a rawn ti nghal tawp a.


"Aw le."

"Thinrim suh aw, in ṭha em?"

"Ṭha lo, naute a awm tawh lo," tih pahin phone ka off daih.

Ka ṭah ka hlau a ni.

Vawi tam min lo call nawn a, ka chhâng ta lo. Ka mamawh lai zawng zawng khan khawnge a awma eng nge atih ka hria em ni? Ka tuar theih bâk ka chungah harsatna a thlen ka ring bik lo.


He mi ni aṭang hian Vala nen kan inbe khât telh telh a, nau ka chhiat thu leh ngaihtuahawm ka nih lo tih whatsapp aṭangin ka hrilh vek tawh bawk.

"Kan duh danin thil a thleng vek thei lo, i rilru ti hrehawm suh," a rawn ti a. Depression ka nei lo chauh a nia, kei lo midang a neih ka ring ta tlat. Hunpuiah biak turin a awm lo a, khaw hmun kan ni si lo, hriat chian lohva puh ngawt lah a ni bik bawk lo nen chhungril tâwt lutuk vangin ka thaw chhuak leh huai zel.

Joela a rawn tei lût leh zauh ṭhin a, min be lo vin a chhuak leh daih zel. Ka nu a be tlângpui a, hun kha leh chen kan ina tâl a ni bawk a, an be chhe thei bik lo mai ni lovin thil mawi pawh va ni suh.

Messenger aṭanga min rawn betu hmeichhia chu ka hriat zawng a ni miah lo. "Vala hi rawn be tawh suh, kan inkâra inrawlh tum hi thil âtthlak a ni," a rawn ti a.

"A pawi hle mai," tia ka chhân chuan, "Pawi i tih chuan inthiarfihlim ang che, thla ruk dawn kan inzui tawh a, i lo lan aṭang hian kan inkâr a buai vek, mi â i nih loh chuan bansan rawh."

"Amah Vala hnenah ka lo sawi dawn nia," ka ti ringawt a.

Thla ruk lai inzui tawh annih chuan kei hi kawp ka ni. Min lo kawp reng tihna! Kan inhmuh hmasak ber aṭang khân ka che fuh lo kual vel vek a, ka zahawmna tichhiain Pathian pawi ka sawi bawk a, hremna ka tuar a nih hi.

Mipa rin tlâk tu mah an awm lo, chu chu tuna ka rilru put hmang a ni ta.

Lalrinkima zawh chian ve hrim hrim ka tum ta a.

Ka call chiah tihah a lo pick nghal, "Afel...." a ti dam thlap a.

"Min kawp tih ka lo hre har lutuk a ni," ka ti a.

"Eng maw?" A vîn ngei mai.

"Min kawp tih ka hriat chhuah i ring lo em ni?"

"Dâwtin min rawn puh lo mai teh, nang mah zawkin Joela i la duha ka fa pawh i tihtlâk kha," thinrim lutuka min chhânna chuan ka thin tertek a kai chhuak ve ta.

Nichina ka msg dawn kha ka screenshot -a ka va thawn ta a, a reh zui hmiah. Kha nu hming kha Sawmi a ni a, an inkârah eng emaw awm lo se khatiangin min rawn ti ngawt lo ang tih ka hre thiam ve tlat. Mi â ka ni lo.

Zanah Malsawmi chuan min rawn call a, min hau nek a, ṭawngkam a duh tui si lo, ânkhum hrep châk mah ila mi inngaizawng kâra tlazep anga ka lan si avangin ngawih ka chuh ta ringawt.

"Lalrinkima nen hian inneih tum kan ni a, kum hnih kan inngaihzawn hnuah kan inṭhen a, thla ruk liamta kha bul kan ṭha leh tawh, nang duh duha a mutpui theih kha a neih duh che ring suh," a tih leh phei chuan ka na ngei mai.

"Ka thiam loh a ni e, hlim takin awm rawh u,"


"Ni e, i thiam lo, i thiam miah lo, tenawm lutuk mai, vawikhat pawh i be leh tih ka hriat chuan ka rawn kal chilh tawh ang che, tu nge ka nih i hre lo a nih kha," a rawn ti leh táwn táwn a, ka zak ngawih ngawih. Ka naupai chungchangte kha a lo hriat phei chuan ka zahna ava thui dawn êm.


Malsawmi nen kan inbe zo chiah tihah Vala'n min rawn be ve leh thung a, "Afel, min ngaidam rawh, Sawmi aiin ka duh zawk che, nang nen chuan thil tam tak kan paltlang tawh a, nang mahah chauh ka awm ang, ka ti tak tak," inthiam lo tih hriat lutukin a ṭawng zawi sup a, phone ka off san leh hmak.

Eng ang mipa nge maw ka nuna ka seng luh hi!

Malsawmi'n whatsapp aṭangin min la rawn ṭawngkhum bâwih bâwih a, ka thinrim ka puakkeh ve ta.

"I duh duhin min rawn ânkhum tawh suh, i eng mah ka ni lo tih hria la, ka thinrim tawng baw hlek suh ang che, Lalrinkima nen chuan inkawp ula, ka tibuai lo vang che." Tiin ka reply ve hmiah.


"Ni e, min tibuai lo rêng rawh,"

"Vawikhat pawh min rawn be leh a nih chuan Lalnunfeli hi ka ngawi dawn hauh lo a nia, a tisualtu i bialpa kha hau la, nang mah duh khawp lova rinawm loh santu che kha hau ta che, kei ni lovin.."


"I nasa hle mai," tia min chhân hnu-ah, min block zui hmiah.

A ni rêng a, Rinkima alawm rinawm lo, keiin ngaihzawng a neih leh neih loh pawh ka hre lo va, sex ka lo hmanpui kha ka thiam lovin ka tidik lo; mahse, ngaihzawng nei lai a ni tih ka hriat miau loh te chuan..

Ka boruak tawn ipik zet chuan ka lu a luh ngut ngut a, vanduai ka inti. Mahse, ka ta lo tur a ni ang e, tiin rilru erawh siam ka tum hrâm hrâm thung.

Hetia Malsawmin min rawn biak aṭang hian Rinkima a rawn lang tam zual a, min call tlut tlutin whatsapp nen, Sms pangngai nen, bul ṭan ṭhat a duh thu te, Malsawmi aia kei min thlan zawk thu a sawi chamchî bawk. Amah ka lo duh ve na zawng zawng te kha tenawmah a chang zo va, min ti natu tih nat lêt ve duhna rilru ka pu ta tlat mai le.

Joela leh Vala hian ka nun min tih chhiatsak a, ka hliam hi eng tik ni-ah mah a reh dawn lo tih ka hre kar.

Ni e, ka thianghlimna tibawrh bângin ka tih sual chu a ni ngei mai; mahse, dâwta min buma min kawptu te pahnih hi an chan tâwk ka la pe ve ngei ang.

January thla tawp lam kan chuangkai a, dawr pawh ka nghâk leh zeuh zeuh tawh a, ka chhungte'n ka chanchin leh ka chunga thil thleng eng mah an hre ta lo. Joela leh Mami an inṭhen a, "Afeli ka hmangaih a, neih lêt leh ka tum," Mami hnenah a lo ti a ni awm e.

Min nei lêt ang; mahse, kei mah dik tak Lalnunfeli hi chu eng tikah mah a nei lêt tawh dawn si lo. Nitin vawi khat tal dawrah a rawn lang ziaha ka be chhe ngai lo, Vala'n theihtawpa ngaihdam min dîlna pawh îhe lovin ngaidam ang chiahin ka lang hmiah a, a lo zin dawn nghe nghe.

Ka hring nun phuahchawpah a lemin ka nung der dawn a ang viau. "Afel, Joela a lo lêng ṭhin tih ka hria a nia," Vala message ka chhiar chuan ka nui sak a.

"Nia, ngaihdam min dila inngaihzawnna thu erawh ka thlunpui miah lo," ka tih chuan, "Ani kha be tam suh, i lakah bâk rilru ka pe thei lo a, ka tih sual ang khân i tisual ve hlauh ang e, ka hmangaih che," duhsak ber ni awma a rawn tih chuan ka nui liam mai mai.

Vala lo thlen hun tur dâr zat ka hre lo a, engin nge a lo kal tih pawh ka hre chuang lo. Amah ka ngaihsakna leh ka duhna kha a ni têlin a tla hniam hret hret a, Joela nen pawh inngaizawng ang deuh thawin kan awm tho. Tisa thilin ka kâwm lo a, amah chuan mi hnenah, "Kan inkawp leh tawh," tiin a lo sawi tih ka hria. Mahse, ka pawiti lêm lo.

Mami hmai sâ ka tawng lo teh tlat.

Dawr bungrua ka rem fel mawlh mawlh laiin mi pakhat a lo lût a, "Nunfeli ka hmu lawk thei ang em?" A aw thûm fiah fel riau chuan ka beng a verh zar! A hmel en tumin ka hawi lêt ta a.

Ka piah chiaha mipa ding chu mizo nge vâi a nih hriat hran har khawpin zuk hmelṭha a! A sâng mai bawk sia maw, a sam dum hlap chu a thur chhap a, a chhip buk lai pawh a kir deuh em maw ni.

"Kei mah ka nia," tih pahin ka va din hnaih a, ngun lutuka min enin, ka chhip aṭanga ka ke hmawr thleng a en chhuak vek. Nghal lutuk.


"Yes, Lalawmpuia ka ni a, Revenue lam aṭangin aw, tuna in awmna ram saw teh ṭhat a ngai dawn a, i pa kan be tlang thei tlat lo. Nang mah be mai tur che in min rawn kawh hmuh, in ṭhenawm te'n" a ti hniam chhak a.

"Â, eng mah ka hre ve hleinem,"

"I pa biak han tum ve chhin la a ṭha lo maw, ka khawmuang hman lo a nia," a la ti zui a.

"Um, lawk aw.."

Ka pa ka call nghal a, a tlang thei tlat lo. Ka nu Serchhipah inkhawmpui hmangin a zin daih bawk si.

Ka pa ka biak tlang theih loh thu ka hrilh chuan, dawr khara amah zui turin min ti ta a. Thil tihchi pawh ninghal lo chuan! Customer awm lai lai a.

"Naktukah lo kal leh mai la, eng mah ka hre ve si lo," tiin ka hnial a, "Hun kan nei reng lo a nia, chutiang ka hman lo,"

Hnial ngam tawh hek lo le. Kan nula chhawr hnenah ka chhuah lawk tur thu ka sawi a, Lalawmpuia nen bike-in kan in lam kan pan ta a, kawng lakah vawikhat mah min be lo.

In kan thleng a, a mi hruai lo awm sa te nen kan ram chin an teh zui ta a, eng mah pawh ka hrethiam lo bawk nen ka hawi vel mai mai. Ka phone number min dil a, "Thil dang vang a ni lo a nia, i pa biak tlang a har si, i phone lo ngaichâng ang che," a ti hmuk a, awm khawmuang eih lo vin an tlân liam nghâl daih.

Ka number pawh ka pêk ve tâk kha, chhe keh sia, Taxi-in dawrah ka lêt phah ringawt.


"Afel, ka lo thleng dawn tih i hre reng sia," Vala dawrah a lo ṭhu tawh a, ka luh veleh min lo chhuahchhâl nghal. A ṭhat ngaiin a la ṭha reng a, a hmel ka hmuh hian Malsawmi kha ka hre chhuak zawk. Ka va ten mai mai tak.

Eng tikah mah ka thinlung hian a pawm tawh dawn lo tih ka hre chawpchilh bawk.

"Thil ṭûlah ka chhuak zawk a.." ka'n ti khawmawi ve bawk a, "Min ngaihsak ka phût ngam lo, mahse, ka lo thlen laia i awm ka beisei ve a,"

"Ka awm hman lo ka tih chu, ka buai alawm," ka ti nghat a. Hotel-ah a thleng leh a nih ka ring, bungrua eng mah a lo keng lo a, ka pum zawn vel a en uluk hle. Ni e, a fa titlaah min ngai a nih kha maw le, a rukin ka ner zui sawk a.

"I buai êm mai, zanah ka lo kal dawn nia," tiin min chhuahsan ta a, ka thaw huai.

Zan dar sarih velah Vala a rawn thleng a, rei pawh a la ṭhut hman hmain Joela a lo lût ve ta tlat mai le!

Vala hi chuan Joela nen kan chungchang a hre vek a, Joela zawk hian eng mah a hre ve lo. Zanin hi phubâ ka lâkna hun ṭha a ni mai ang em? Min tinatu te pahnih na lai hmel hmuh hi ka tum ber a ni.

"Vala, hei hi Joela ka ṭhianpa a ni a. Joel, ani hi ka ṭhianpa tho Champhaia mi Vala a nih hi," zâm map lovin ka inhmel hriat tîr a. Rinkima thinrim mitmeng a dur ṭha khap khap khawp mai. Joela paw'n lâwm hmel a pu chuang lo.

Mihring hian eng emaw thil dik lo a awm hi chuan hriat theihna riau kan nei teh chêk a ni ang chu. Joela lunghnur zetin a haw hmasa a.

"Lalnunfel, kha pa nen khan min lo kawp a maw?" A ti ta.

"Kawp lo e.."

"Dâwt min hrilh suh, amah hnaih lo tur khân vawi eng zat nge ka hrilh che," a ti khur khur a, a thinrim leh na hmel hi eng tikah mah ka theihnghilhin ka ring lo.

"Nang chuan Malsawmi i nei alawm, kei aia i thlan zawk nen khan hlim takin awm rawh u, Joela nen kan inkawp lo a, kan inkawp leh ngai tawh lovang, chutiang chiah chuan nang pawh ka ngaidam chatuan dawn lo che, ka tih sual man têl ngam lo tura nêpah min ngai hauh suh." Ka ti hmiah.

"Fel, vawikhat chauh hun ṭha min pe leh la.."


"Ka mamawh hun lai che leh naute vanga ka nat ngawih ngawih lai khan ka tan i awm lo a, midang tan i awm lawi si, chuvangin ka lo kîr dawn tawh lo."

Ngaihdam min dîl fê hnuah pawh ka rilru ka sawh sawn thei ngang si lo a, "Nang aia hmangaih leh duh ka nei lo, i rilru i thlâk hlauh a nih chuan min hrilh rawh aw, ka tihpalh takzet a ni," tiin min chhuahsan ta a.

A thlâwna nat leh ṭah ka tum lo, man a nei vek a ni. Joela message pawh chhiar tham fê a awm.

"Ka ṭhian i ni kumkhua tawh lo anga, ka nunah vawikhat mah i rawn lan ka phal tawh ngai lo ang," tiin thutawp ka sawi thei ta.

Ngaihzawngte lakah pawh rinawm thei lo chu nupa pawh ni ila an rinawm thar thut lovang tih hi ka ngaih dan a ni.

"VINGANCA (PHUBÂ)" lâk ka tum hran lo; mahse, anmahni tihsual vêk an tuar lêtah ka ngai hmiah.

Kei pawh ka tih sual vangin vawi engzat nge ka ṭah, ka mittui hi a thlâwna far tir ai chuan, na chung chung pawhin ka tuar mai tur a ni. Lalrinkima erawh ka thianghlimna ka hlan a ni a, ka dam chhungin ka theihnghilh dawn lo tih ka hria; mahse, chu chuan ngaihdamna a keng tel si lo.

'Vinganca' ti chhuak sapin khumah ka mu ta a. An pahnihin ka block fai vek, a tâwp ka khar fel tain ka hria. Nui sak chung hian ka whatsapp chat list-a a chung ber number hlang ringawt chu ka open a.

"Lalnunfel, revenue lam aṭangin aw.." tih ka hmuh chuan kha pa Lalawmpuia kha a ni tih ka hre nghal.

"Ka khum aṭangin aw, Lalawmpui.." tiin ka reply a.

"I chhe reuh.."


"I sam kir a nih chu.." Emoji Negro samkir kha ka va thawn a. Min rawn call zui nghâl.

"Nunfel.."

"Revenue lam bawk em ni?" Tiin ka lo chhâng a.

"Ka pa in aṭang zawkin, keimah Awmhmelṭhaa, i duh deuh kha.." a nui zui hawk a.

Fiamthu hlira kan inbiak hnuah, "Naktuk zanah i pa be turin ka lo lêng dawn a, lo inbual fai la aw, ka bêm thut mai thei che," zuk ti a!

"I hlawhtling nguar ang," ka ti sap a.

"Kan la hria ang chu, Lalnunfeli kum 28, M.com hna hmu lo, fanu mal duat sual thlêmthlu thei lo tura zei lo ka ni lo e," a nui hawk hawk a, ka chanchin a lo chhui a maw!

Kan inbiak tawp hnuah a pic pakhat a lo thawn a, chhe lo fia fia tak a ni.

"Lo ngaizawng thawt thawt lo la, amah Lalawmpuia'n a lu nung ngeiin a la rawn bêm ang che."

"Ok, han tum chhin ta poh che.."

Zinglam dar thum thleng rak whatsapp aṭangin kan inbia a, ka hriat ṭhan ang maiin ka nêl nghal.

Joela, Vala, tih vel ka ta tur ni lo puia inhambuai ai chuan, zalên taka he pa biak hi ka thlang fê. Ngaihzawng nei turin ka la inpeih lo a; mahse, ka nei tawh lovang pawh ka ti chuang lo. Khawvel inhmangaihna hi chuan tâwp chin a nei a, a dal thei bawk.

Ho sih sah em mai.

Lalawmpuia nen thla li tâl tap kan inbiak meuh chuan, a 'Tekeuhvi' ka ni ta. A hmel ṭha-in a hleitling si, khawi hmunah mah min zahpui ngai lo a, a thu sawiah a ding chat chat tih ho mai maia kan inbiak lai aṭang khân ka hre tawh.

An inah chaw ei turin min sawm a, zak chung chungin ka va ei ve tâk kha. Ka hun tawng zawng zawng ka hrilh fai vek hnuah pawh a rilru chhe tê mahin a thlâk lo. Fapa mal a ni a, a nu leh pa, a cousin nen chauh an chêng a, a û chiah hian pasal a nei tawh thung.

"Tekeuh, office aṭangin ka lo tlang dawn," min rawn call a.

Nitin hnaah a kal a, zan lamah erawh a regu viau, ka nu leh pa hnenah 'min neih tîr tawh ula' tia a sawi chuan kan nui vek.

Innghahna tlâk ka ta tur dik tak hi chu a bo ka ring lo rêng a ni.

Thlariat hnuah Awmhmelṭhaa nen 'Tiam tlat e' tih kan chham ve ta. Amah avangin ka zahawmna ka hloh tawh kha ka nei kîr leh tih ka hria a, nui suk chunga 'Tekeuh' tia min koh tawh hi chuan ka thinrim rei thei ngai lo.

Kei aiin kum liin a upa a, 6 ft laia sang niin a kianga chuan ka tê rât mai. "Dam loh nikhua eng i lo fahranah pawh, i pasal hian ka hliahkhuh hneh vek che." Min fawh kâr laka a tih chuan ka nui chhuak hak a.

VINGANCA ah ka buai lo. Ka pasal sam kir laiah fâwp zauhvin, "Sam kir, thinlung kir lo hi ka hmangaih thung alawm," ka ti vei ngial a, "Zak lo reuh mang e.." ati duh chauh.

Min hmangaih tak tak lo tu, hmangaihtu der vawn reng ai chuan, chunglam pêk dik tak, kan chan tur beidawng lova nghah hi a finthlâk ber.

Kan nupa khum zau zetah Sex ni lo vin Hmangaihna kan chen dun ta. Min kuah chial chunga muhil, Lalawmpuia tan ka rinawm chatuan ang.

Ka tan a rinawm tih ka hre si a.

B+>[BeckirafARenthleI]<+®®

Tun kar tawp lamah 'The Rapsagyan Family' nen inhnuh kan tum dawn nia.

Gracias
-BRR