KA HLAU A NI.

KA HLAU A NI. 

Ziaktu: Becky Rafa Renthlei (-BRR)

Zân tirah ka muhil thei si lova dar 12 rîk dawn a ruaiah ka muhil ve chauh va, min zaina avangin pang leh zung zung theih ni hek suh. 

Ka muhil tui ta maw tihah ka khêl na lutukin min ti harh leh ta a, chiang mang lova mengin ka inlet ṭawih ṭawih a, ka khum bul âwl laiah chuan mipakhat a lo ding reng mai! 

Ka mitvai emaw tiin mit ka'n nuai nawk nawk a, ka mitvai chu a ni bîk hauh lo! 

Hmeichhe pakhat ka khum bulah hian a lo tei sek a, a châng leh ka khum hnuai te a bih thul, khum leh khum inkâr âwlah te chuan dîm em em hian a tei kual a tei kual a. 

Damdawi inah damlo mu pangnga chauh kan awm a, light off kan duh zawk avangin zan dâr kua vel khan an off tawh bawk, verandah êng chuan Female medical ward chu a chhun êng ruih thung. 

Ka khum awmna hi a kil ber number 7 a ni a, khum sawmlehpahnih awmin khum inkârah âwl a thui angreng viau. Zaipui tuar ka nih vángin inzai ho mutna ṭhin khumah ka mu ta kha a ni a.

Lockdown a nih vang nge damlo admit an tam lo viau; awmpuitu pawh pahnih chiah an awm a! Nurse duty pahnih an awm bawk. Serious lutuk kan awm loh avangin Male medical ward lamah damlo pakhat an buaipui a, keini ward lam chu kan reh ruih mai.

Ka mutna ep chiahah Dialysis ti lai a mu a, ani hi a na deuh ber leh an buaipui tam ber a ni. A hmêl ka la hmu lo, an zâr hliah tlat vang a ni pakhat, ka khum ding lamah thawhah, nu upa lam ṭawng duh leh kawm nuam zet a mu a, ka inzai zawh hlimah pawh fiamthu thawha min lo nuih hmasa bertu niin ka ngaina fû. 

A bâk chu bangkil tâwpa nula pum nâ mu leh raipuar pakhat an ni tawh mai. Anni pahnih hian awmpuitu an nei lova, kei leh dialysis ti lai chauh hian riahpuitu kan nei.

Mi dawihzep ka ni hran lo va, chu nu che tla chu ngun lutuk hian ka en a, mak ka tih rualin eng vanga ka khum hnuai chu bih seka vei chhên nge a nih ka hre lo, ka khum hnuaiah eng mah a awm lo tih ka hre chiang lutuk tlat. 

Vawi li lai a rawn bih hnuah damlo dangte khum hnuai zawng zawng a bih phei leh ta den den a, zawi muangin a che a ni ber, a hmel hmuh chian tumin ka ṭhu chhuak ta a, zinglam dar khat a ri chiah. 

Thâwm dim takin a vei dên dên reng a, a kut a phar hiang bawk. A duh ang a hmu zo lo nge ka khum záwnah bawk chuan a rawn kûn phei leh ta a; thinrim, hlau ru deuh si hian, 'Eng nge i duh?" tiin ka lo zâwt a.

Min chhâng miah lo!

Ka puansin laia inkhuh ṭhain ka mu leh ta a. Hlau tho mah ila, duh anga ka chêt ṭhat theih loh vangin ka haider lui a ni zâwk mah.

Minute sâwm dawn ka inkhuh phui hnu chuan a lum êm avangin ka puansin keuvin mit ka lên ruai a, thli a thaw nasa kher mai. Damdawi in reh ruihah chuan thli thaw vûk vûk bak thâwm dang ri hriat tur a awm lo.

Ka zun a chhuak ta. 

Nichina ka hmuh nu kha hmuh tur a awm ta miah lo a, ka zun siakna an phâwi tawh avangin cheh mai thei din hmuna ding khawpin ka tâi a puar ûl nen, dik tak chuan toilet awmna a hla si, thawhchhuah ka huphurh tak zet. Min zaina lâi lah chu a na ngut ngut lehnghal a.

Min riahpuitu ka cousin kaih thawh tumin ka ko a, a harh thei ṭhak lo. A hnâr ri kûk kûk a, 'Nurse duty an awm kha maw' tiin inti huai lui tak hian ka tho chhuak ta ṭhem ṭhem a. Ka kal chak thei si lo. Damlo khuma mu te an mu tui hlawm hle a, tu mah tho chhuak ve pawh an awm ka hre hek lo.

Kawngkhar hawngin Toilet ka pan ta a, corridor zau tak te chu a reh vung vung a, Male ward lam pawh an thâwm hriat tur a awm chuang lo. Ka zun a chhuah lutuk tawh vâng nge ka zung thei lawk lo lehnghal vei nen ka duh aia rei ka ṭhut phah! Nichina ka thil hmuh kha ngaihtuah loh hrâm hrâm ka tum a, ka hmu sual em ni zawk?

Ruah a rawn tla phuar phuar a, thli thaw pawh a hma aiin a nasa zawk. 

A ri vûk vûk mai.

Ka zun zawhah muangchâng hian ka khum lam ka pan leh ta a. Atu amah an la harh ta chuang lo; mahse, thâwm danglam eng mah a awm lo a, nichina hmeichhia ka hmuh kha hmuh tur a awm bawk hek lo. Rilru ṭawngṭaina neiin ka mu ve leh ta a.

Muthilh chu sawi loh, ka harh telh telh.

Ka phone hmet êngin dar zât ka en a, khawvar a la hnai îkhaw lo mai. Mut chhuak lo ta na na na chuan 'Pc Hras-a thawnthu chhiar' chu ear phone vuahin ka ngaithla ta a, mit ka chhîng chial.

Ka hlauh rûkna khân min la kian san lutuk lo bawk a, uluk zet hian thawnthu, keima ziah ngei mai chu inhnem nâna hmangin ka ngaithla zawm ta zêl a.

Chutia uluk taka thawnthu ringawt ka ngaihtuah lai tak chuan thil ri deuh bur ka hre ta a!

Ka ear phone hlîpin ka hawi kual nghal vat, tukverh a lo inhawng chu niin, chu chu thli a lo thâwt vak khan a lo invaw ri zel a lo ni a. Khâr ṭhat tumin zawi muang hian ka inbengkáng a, a chhan chu ka la che ṭha thei tlat lo a.

Chutia ka insiam rem lai tak chuan kan awmna ward kawngkhar a rawn in hawng ta a, current a thim zui hmiah. Mahse, Generator on sa a nih vangin veranda light pakhat a rawn êng nghal vat tho. Chutah le, kawngka aṭanga hmeichhe pakhat kûn deuh chunga lo kal phei khên khên ka hmuh meuh chuan ka thin a phu dup dup. 

Nichina mi tho kha a nih ka ring.

A tih dan pangngai ang chiah khan Damdawi in khum hnuai tin a rawn bih phei leh ta diat diat a, koh pawh ka tum lo, ka en reng ringawt. A hmêl ka hmu thei si lo a, Shawl niawm tak a awrh bawk a, pawnfen a fêng. A thâwm han dim thiam zia em em chu thil mak a ni! Harh sa lo ila chuan muhil te tih harhna tur khawpa thâwm ring zuk nei miah lo va!

Ka khum piah chiaha thawhah mu ve kha a hnâr sâk sâk a, chu mi khum hnuai chu a bih leh mêk. Bih satliah hi a ni lo, a hawi kual ruaia a bân chêr hmel zet chu a phar dâ bawk.

Ka khum zâwn a lo thlen chuan thim mah se mutsan ka tum miah lo. Ramhuai niin ka hre lo tlat a, min en miah lo hian ka khum hnuai a rawn bih nawn leh ta a, kei chu khumah 'ṭhu mu' deuh hian ka awm, inzai ho mutna ṭhin khumah ka mut vangin lukham lam kha nghen theih nghâl hian a sâng ûr a, ka harh tih a hre lo nge chu nu chuan min en lo hrim hrim.

"Tunge i nih, eng nge i zawn?" Fiah faka tiin phone ka hmet êng nghal a, min chhâng lawk lo hian a rawn dâk chhuak a, a mit leh hnâr káwn bak hmuh tur a awm lo. Tunge a nih ka hre lo hrim hrim. Damdawi inah mask kan vuah tlângpuia kei hi ka vuah thatchhiaa duty an awm loh chuan ka phelh vat zel.

"Eng nge i rawn zawn, engati nge i tei sek a?" tia ka zawh leh chuan, min chhâng duh miah lo, ka chûm chawrh mai dawn em maw ni, ka ti tak tak. Mihring a ni ngeiin ka hre bawk si a, min ti hlau zawnga chêt kha ka huat tâwk a tling khawp mai.

Hlauhna âi mah chuan 'ngeina' thinlung ka pu zâwk. Nam sawk tum rilru deuh hian a aia vîn zawkin ka zawt nawn leh ngat a, aw thâm ṭiak hian, 'Ṭhutthleng ka zawng," a rawn ti ta a.

"Chu pawh ni se, mi dang ti hlauthâwng zawnga chêt kher a ngai em ni? Ṭhutthleng chu eng atan nge i tih?" Ka ti leh a. Mihring ngei chu a ni e.

Kûn reng chung hian, "Tukverh saw a inhawng zela kalh ṭhat ka tum a," tiin muang zet hian a kal kiang ta a. 

Tukverh kalh ṭhat tuma ṭhutthleng han zawn daih, a 'â' deuh em maw ni? Chu mi hnu chuan a lo luhna kawngkhar lam panin a chhuak leh ta a. Kei pawh tukverh inhawng khar ṭha tur chuan ka tho chhuak a. 

Chu mi hnu chuan muthilh tumin ka maimitchhing ve ta a, ka sawi hmaih miah loh tur chu kan ward a mu te hi ka hre chiang lo, ka khum bul, ka hmuh phâka mu te pahnih chiah hi an hmêl ka hre chiang a, ka inzai aṭangin zanin chiah khum ka la thawhsan a, chu pawh zun siakna an phâwi tawh vang a ni. Tui leh chaw tak ngial pawh ka la ei lo hrim hrim bawk.

Khua a lo vara thâwm a tam ta bawk nen ka harh ve ta hlawl a, nizana ka thil tawn kha sawi ka va han châk tak. 

Thingpui sem leh nurse te awm laiin ka sawi chhuak ta a. Anni lah chuan mak an ti hlê, kan inbiak dan ka sawi phei chuan an nuih a za lutuk lo tih an hmêlah a lang reng. Ka cousin min awmpuitu khân a hlau fâl ngang mai bawk.

Doctor in ward a rawn fang a, ka khum opposite-a mu, an zâr hliah deuh reng dialysis ti nu kha an en a, khum aṭanga an ṭhut chhuah tir chuan ka phu zawk. Nizana ka hmuh ngei kha a ni! Ani pawh chuan min lo en ve kar a, ka melh rum ngei mai.

Kum 67 vel niin chuapa tui tling leh Kal ṭha lo a ni a, na neuh neuh a nei bawk an ti. Doctor te chhuah hnuah amah pawh a la ṭhu ve reng a, min melh zeuh zeuh a, ka 'RENTHLEI' thinchhe/ thin thawk a chhuak pek.

"Ka pi, nizana i awm ang kha chuan awm tawh suh aw, ward khata awm kan ni a, min kai tho hreh a ni emaw mamawh i neih chuan nangmah riahpuitu kha kai tho ve mai ta che," ka han ti thâwr a. Ka aw a nêlawm loh. Nizan boruak kha ka la feel thei tlat a.

A mask vuah lai phelh thlain chiang zet hian min en a, "Tukverh khi a inhawng a, kalh ṭhat ka tum a, hnuai lam kalhna a lo ṭha si lo va, chunglama kalh turin ka ban pha lo alawm, ṭhutthleng dawh tur ka zawng a nih kha, in mu tui sia tih harh che u ka hlau a," a'n ti mai chu ka nui chhuak hawk.

"Ka harh tih i hriat reng kha," ka la ti ṭâlh a, "Hria e, i thinrim hmel sia ka inthlahrung alawm," a la ti zui. A pumrua ka'n en a, a lo tê in a tawi ve si a, chhuat aṭanga tukverh chunglam kalh ṭha tur chuan ṭhutthleng dawh a ngai ngei ang. Ka nui ta nge nge a.

Amah lah chuan min en kar a. Thil awm zia nurse leh kan ward ami te'n an hriat chian chuan kan nui vek. Amah 'ka pi' ber ber chu a nui nasa a, ka hming min zawh pahin, "I huai roh hle mai, kei chu tukverh inhawng ringawt pawh kha ka hlau," tiin a nui ṭhâ a, thil dang em em kan sawi zui ta lo.

Eng pawh ni se thlahrâng chu a ni lo phawt.

Nilêngin chu pitar tê nen chuan kan inkâwm ta a, a felin biak a nuam vei riau. Fiamthu pawh a duh phian a.

Zanriah ei kham thim hlim velah damlo dang an rawn dah belh leh ta a, a hmêl han en rêng rêng pawhin a nâ tih hi a hriat hliah hliah. A mit khur a thûk em em a, thisen nei lo tih hriat zetin a dâng da lap bawk.

Oxygen pawh a sâng berah an pe a, ka rin ve dan chuan rei a dam ka ring lo. Mahse, chunglam thu thu a ni a, ka sawi theih ninghal lo chuan.

An rawn admit thar chu a serious êm avangin pahnihin an men pui dawn a, keini a lo awm hmasa te ho chuan kan thlîr ṭhap. Zân dar kuaah light pakhat an off leh ta a, kan damlo thar mutna zâwn erawh a êng kalh thung, nâ tiin a vial a vial mai leh nghala hmuh a nuam lutuk lo. A âw râwl lah a ring phian a, "A na lutuk..." a tih ri ka hriat phei chuan ka lainat angreng. 

Nizan lam ka mu ṭha lo deuh bawk nen kâr lovah ka muhil ta thuai a, ṭap râwih râwih thâwmin min ti harh leh ta. Zawh hranpa ngai lovin kan damlo rawn awm thar kha a chatthla tih ka hre mai.

Nunna nei tawh lo tih hriat zet chuan chunglam a melh rû a, a awmpui tu te lah chuan siam nachâng an hre lo a nih ka ring, a kut dinglam a hûm ruh tlat bawk a; nurse duty te'n an sawngbâwl zui tâk avangin ka hmu thei ta lo. Mahse, mitthi ka hmuh tawhah chuan a la thi hmêl chhe ber awm e.

A hâ a lang ṭhû vei nen en khâ a nuam lutuk lo a, a kamsîr leh a hnar aṭangin thi chhia a baw deuh reng bawk. Ka pi tê reuh kha ka mutna bulah a rawn kal a, "Mahnia mut leh pawh a va huphurhawm ve, a hmêl ka mitthlâah a châm tlat," tiin ka mutna khum bul ṭhutthlengah chuan a rawn ṭhu a, a hlau deuh a nih ka ring.

Dik tak chuan kei pawhin ka ṭih ru riau a, khatianga chiang khân mitthi hmêl ka la hmu lo atin ni. Nuam lo tih rûkna riau chu ka nei ve tho.

A ruang an sawngbâwl rei ang reng si a, keini ward lam pawh kan hawi tang hrû mai. Nâ a lo ngah êm kher bawk a, hmeithai niin thla thum kal ta khan a fapa kum 12 miin a boralsan tih kan han hre lehzel a, nu khawngaihthlâk tak a ni.

Chutiang thuartham vel a nih lai chuan ruah nasa mangkhéngin a rawn sûr leh ta a, tukverh dârthlalang a theh rík ṭhawt ṭhawt te chuan chhungrilah hlauhna min siam tlat. 

Zan hmasa âi mahin a sûr tam lehnghal vei nen a khât tâwkin kan mitthi nu an zâr hliah chu ka melh leh zauh zauh ṭhin a. Ka pi pawh a mutnaah a mu phei ngam bîk lo.

"Zanin kan ruahsur thâwm chu a nasa riau tiraw?" Tih pahin ka locker-a flash chu a hawng rak rak a, a zâm deuh em maw ni.

"Nia, nizan âi khan a sûr tam tlat, ruang phurh  hawn pawh a huphurhawm dâwn a nih hi," ka ti ṭha ve mai a.

Ṭap thâwm kârah zing lam dâr hnih bâwr vel ni tain ka hria, ruang chu an zâwn chhuak ta a. Puana an khuh vek tawh avangin a hmêl erawh kan hmu nawn tawh bik lo.

Kan hma hun tur kan hriat miau loh avangin 'keini tuna la dam te pawh hi eng tik ni-ah emaw chuan mitthi kan la ni dawn si a,' tih vel te ka ngaihtuah kái a. Ruang ber a chhuak ta bawk a, ka pi pawh a khum panin a lêt phei ve ta a.

Damdawi in corridor-a ṭap thawm chuan beng a verh ngei mai. Kha nu thi ta khân ui tu leh ṭah tu a ngah viau a, nu eng emaw tak chu a ni ngei ang.

Muthilh tumin ka maimitchhing ve ta a, ruah a la baw tlawrh tlawrh a, mahni in luma mu ni ila nuam ka tih dawn vei nen, tun din hmun atan erawh chuan hlauhawm lamah te pawh a kal zawk. 

Chutia tui taka ka muthilh lai chuan ka hminga min ko thâwm ka hre ta a. Min awmpui tu ka cousin kha vawiin lamah a haw avangin riahpui tu ka nei lo a, tuin nge min ko ta ang? 

Ka harh deuh kâwk.

Ka mit mengin ka hawi kual a, tû hmel mah hmuh tur a awm lo. Khum chhak bera râipuar mu chu a hnâr bawrh bawrh a, ruah pawh nichin âi chuan a tla nêp ta. Thli thaw vûk vûk tih mai loh chu thâwm danglam em em pawh a awm lêm lo. Muthilh leh tuma puan ka sin ṭhat veleh ka beng bulah hian, "Muhil bîk suh, a vawt a nia," hmeichhe âw thâm chhalh ri ka hre leh ta!

Light pakhat a in on avangin kan awmna ward hi a thim lutuk lêm lo. Áw lo chhuahna lam ka hawi nghal a, khum kil ber pasarihnaah ka mu ka tih tawh kha. Tukverh parda inzâr chu thliin a chhêm lêng a, dârthlalang phên aṭanga min rawn bihtu hmêl ka hmuh meuh chuan hlauvin ka khawng lo chauh.

Kan mitthi nu mitmeng râng zet chuan chiang lutuk tak maiin min rawn melh a nih chu! A kâ a âng chup chup a, hlau hlê lo ila chuan 'sawi tur a nei a nih dawn hi a' tiin ka va hnaih ngei ang. Mahse, chutianga tih te chu khawilamah, hlauh luat vangin ka hmulthí a ding ur ur a; âu chhuak turin ka khá a chih tlat.

Rang lutuk mai hian ka puansin lâiin ka inlukhuh nghal a, ka thâ a khûr ngat ngat. Minute eng zâta rei nge ka inbilukhuh pawh ka hre lo, chutia hlauhlawpa ka awm lai chuan ka khum chhaka mu thawhah pitar kha a ṭê ṭhawt a, chu mi ri chuan ka hlauhna a ti zual sawt.

Ngam leh ngam lovin ka inkhuhna puan chu ka keu a, ka pi mutna lam ka va hawi ta a, a khumah ngil âta ṭhuin thâwk ala uluk ngang mai. A âwm a dawm tlat bawk a, "Ka pi.." tia ka koh chuan phu zuk chung hian min rawn melh a; ka mutna bul tukverh a rawn kâwk ta a. Ka hmuh ang kha a hmu ve tho tih hrilh hranpa ngai lovin ka hre thiam mai. 

Nurse duty pakhat zâwk muthlu lâwp lâwp chu ka va ko mai dawn em ni ang? Anni pahnih hi an duty ṭha hle a; an muthlu lâi ka vawikhat hmuhna a ni nghe nghe. 

Ruahin bán zai rêl miau hek lo î. Hlau chung chungin ka tho chhuak ta a, mi dawihzep ka ni lo naa zanin kher hi chuan ka huai lui thei ngang lo. Khánu thi hmêl ka lo en ta kher kher kha ka inchhir khawp mai.

Hawi zak zak chung hian nurse duty na lam ka pan ta a, ka piin min zui bawk, ka khum bul tukverh erawh ka melh nawn ngam eih lo. Ka thâuah min man laklawh a, zai zawh hlim indim ngai chu ni lo ila ka tlânchhe thui khawp ang. Duty in min hmuh chuan kan harsatna min zâwt nghal a, hmeichhia vek kan ni bawka tiin, ka thil hmuh chu ka sawi chhuak ta a, ka piin ti hian a hmuh dan a sawi ve bawk a.

"Ka thâw a hah deuh avangin ruang an lâk chhuah hnu pawh khan ka muhil thei lawk lo a, maimitchhing chungin eng eng emaw ka ngaihtuah kual mai mai a, ka hmâi zawn velah thliin min rawn chhêm tâk heuh heuh avang chuan tukverh in hawng a awm emaw tiin ka meng chhuak a, tukverh lam ka hawi chuan," tiin a âw a han ti zawi a, keimah min rawn en leh tê tê phawt a, "A kil ber tukverh dârthlalang hnuai ber aṭang sawn hmeichhe pakhatin min rawn chhiatkhum vak mai alawm maw le," tia nurse duty a hrilh chuan ka hmuh nu tho kha a ni tih ka hre thiam mai. Ka pi erawh chuan zanina kan mitthi nu kha a ni tih a sawi chhuak lem lo.

"I hmu sual a ni lo maw?" Tia duty'in a zawh chuan, "A teuh lo mai, vawikhat min chhiatkhum mai duh tawk lovin min ṭhen khum hrep alawm," a ti ve tlat.

"Eng mah hlauh tur a awm hleinem, kan awm ve reng hi, kan lo veng tlat ang che u," nurse in ka pi kuah paha a tih chuan ka thlâ a muang huai. Zinglam dar li a ri dawn hnai tawh a, ruah pawh a sûr tlêm ta. Midang tih harh kan hlauh avangin thawm dim fê hian kan khum lamah kan lêt leh ta a. 

Ka ngaihbel nge mitthi nu mutna khum hlui zawn kan kal pelh lâi khan boruak a uap churh hian ka'n hriat tlat pek chu.

He mi hnu hian khawvar thlengin vawikhat mah ka maimitchhing tawh lo. Hlauhna hian ka chhungrilah min ṭhâm tlat a, saisira mu thei lo inti kha hlauh luat vangin nurse duty te ṭhutna lam hawiin khawvar thleng khan ka saisir tluan parh. Ka mutna bul tukverh kha a thâwi pawhin ka melh chhin ngam tawh lo. A râpin min râp.

Damdawi in ka awm chhunga khawvar ka nghahhlelh ṭum ber a la ni hial ang.

He mi zana duty te hian kan ṭhian dang kan ward ami te hrilh lo hrâm tura min ngen ve avangin a tûk nilêng hian kan ngawi hmak a, ka pi nen erawh a rûkin kan sawi sep sep. 

Hmu sual kan inti lo ve ve bawk, kha mitthi nu hmêl kha hai mawlh hek lo í...

Thlarau hi chu a awm ngei a, a hring hranin a rawn lang ve ṭhin tih ka hriat phah ta. Mi pawisawi zawnga inlâr an awm a, chutiang kher lo pawha inlâr an awm ve tho tih hi ka pa hming ka hriat chian anga chiangin ka hre chiang bal.

Kum a liam hma hian ka'n thâi kâwi ve leh a ni e.

B++>[BeckirafARenthleI]<++®®