KA THIL TAWN MAK

KA THIL TAWN MAK.

Ziaktu: Becky Rafa Renthlei (-B®®)

A khua leh hming hi thup a ngaih vangin ka ziak lang dawn lova, chhiartu/ngaithla tu te'n min hriat thiamna ka ngen hmasa e.

Ṭum khat chu ka pu te khuaah kâr hnih lek châm turin ka û nen kan zin ve a, tih tur em em pawh kan nei hran chuang lo; kan zin khât êm avanga zin ve mai mai chauh kan ni. 

Kei phei chu kum kua ka niha kan chhûnga kan zin bâk kha ka kal leh ta miah lova, tunah chuan kum 27 ka lo ni ve ta reng mai. 

Ka pu te khua hi a la thingtlâng ve viau a, Vawk te phei chu an chhuah tawh bik lo naa, mahse; Âr erawh an la chhuak nasain Âr êk pawh hmuh tur a tam khawp mai. 

Kan khua aṭang hian darkâr sawmlehpakhat lai motor-a tlán a ngai a. Keini unau pawh tlai lam dar 4 vel bâwra'n an khua hi kan thleng chauh a ni. 

An in ka'n lut chu an lo lawm ve khawp mai a, kei phei chu min hmuh lohna a rei tawh bawk a, lian min tiin min chibai tâk liam liam kha. 

Mizo paah chuan a sang ve pâwl ft 5 leh inches 11 lâi ka ni ve. Ka pu tú te zingah pawh a hleitling ber ka ni hial ang. An zo Âr tui lai ngei mai min han talh sak a. Chaw pawh ka ei hnem fu. 

Khua a thiangin thla lah chu tlâng kâr aṭang chuan a rawn êng ruih a, kan veng lama ka bialnu kha ka ngai veng veng mai. Chutia pawnlam thlîra ka lo din vang vang lai chuan ka û in min lo au a, "Bawiha ka nuteii te ka tlawh dawna i lo kal ve duh em?" a ti a. Mahse, "Ka chau em mai naktuk lamah keimahin ka leng ve mai ang," tia ka chhan avangin min kalsan ta kha a ni a. 

Ka pu chuan, "Bawiha, kár leh chu Lo kan hal ve dawna lo kal ve ta che, Lo hálnaah pawh i kal tawh em ni?" min ti a.

"La kal nang, a hrim hrimin lo hal hun lai a ni em ni?" Tiin ka zawt lêt hû a.

"Nia, keini chu kan vât tlai deuh a, a tam zawk chuan an hal tawh zawk alawm, en ta che saw lai sen phût te saw lo hal mêk annih saw," tih pahin râl leh lam chu min kawh hmuh a. 

Kei, khawpui tlangval inti ve chuan a engah mah pawh ka hre ve tak tak lo. 

'Ka pu' hian min hmu khât mah se a tupa te zinga dam awm chhun ka nih tawh avangin a phâk ang tawkah min duat khawp mai. 

Thingtlâng khaw chengker taka awm annih vangin an tân lo zin a harsa a, amah a lo upa ve ta bawk nen keini unau hi min rawn chah chho a, ka nu hi a fanu upa ber a ni nghe nghe, keini lam erawh Pathian zarah kan khawsak a ziaawm deuhva ka nu leh pa hi chu an zin fo thung.

Ka motor chuang ka châu deuh bawka hemi zân hian ka mu tui ngang mai. 

Tûkṭhuan ei tura min kaih thawh meuh chuan zinglam dâr kua a ri dêr tawh. Pu te in a ni bawka inthlahrung em em lovin tûkṭhuan ka kîl ve nghal a, ka nutei te in lama len ve ka duh thu ka sawi pawhin min hnial hran lo. 

Ka û erawh nizan lamah a kal tawh avangin min zui ve lêm lo.

An inah dârkâr thum zên zâwn ka zuk awm a, zanriah ei turin min sâwm tak naa chu erawh chu ka hnial thung. Ka pu ngaihdan te a lo nih loh palh tâkah tiin.

Ka nutei te in aṭanga ka hawn chhoh lai chuan YMA Information aṭangin an rawn âu thut a.

"Khawtlânga chhiat tawh thu, tûn mai khan pu Lalrodawla kum 67 chu Lo hal naah a boral a, a ruang hi záwn haw a ngaih dâwn avangin tlangval tlawmngai te Ruampui mual pan nghal turin kan inhriat tîr a ni e. A ruang hi zaninah tlaivar pui tur niin, naktukah vui tur a ni ang," tia an âu ri chu a fiah ṭha khawp mai.

Vawi hnih vawi thum an âu a, hmanhmawh zetin ka kal sawk sawk a, 'ka kal ve ang nge kal ve lo ang' hetiangah hian ka la kal ve ngai si lo a, kal ta lo ila a zahthlâk ang em tlangval ka ni ve bawk sia, tiin ka ngaihtuah nauh nauh a, kal ve ngei ṭhaa ka hriat avangin ka hmanhmawh ru kher mai.

Ka pu te khua hi khaw lian lutuk a ni lo a, in 60 bawr vel chauh an ni, ṭhalai te hi hmundang, khawpui lama lehkha zir an awm ve nual bawk. In ka thlen veleh ka û chuan, "Bawiha an âu kha i hre ve em? A lo ti nghal a.

'Aw' tih nân ka bu nghauh. Kal ve tura min tih tâkah chuan hnial lovin insiam turin pindanah ka lut zui ta a. 

"Mikhual te i ni si a, nuam i ti lo ang a, kal lo mai ta che," ka pu in a tih chuan, "Tlangval ka ni ve alawm, ka tih tur a ni e," ka lo ti ve ngial. Mahse, ahmel ka en chuan kal ve turin min duh tih ka hai chuang lo.

Chutah muangchâng lovin ka insiam zui nghal a, ka pu chuan tlangval tan a hlat lutuk loh thu leh, darkar nga vel lek kal anih thu a sawi bawrh bawrh a, ka rilru chuan hla ka ti khawp mai. Chutianga thui ke in ka kal ngai lo tih sawi lan kher erawh ka tum lo. 

Ka insiam zawh chuan khawi lamah nge kal tur tih ka zâwt hmasa leh tê tê a, ka pu vêk chuan, "I nutei te in lamah khan chhuk la, an in thlangah khan innghah khâwm tur an tih kha," a ti a. Iptepuiah chemtum ka ak a, tui bottle pakhat nen ka chhuak thla ve ta rawih chu a nia.

Ka nutei te in ka kal pel a, ṭawng ri awmna lam ah chuan ka chhuk thla ta zel a, mual zau lutuk lo hi a lo awm a, 'kan kim tawh ang em aw,' an lo ti lauh lauh a. Tlangval 30 ai chuan an tam deuh ang tih tur hi an lo awm khawm tawh a, kei mikhual ta chu min lo en duh ang reng khawp mai. 

Kei pawh eng mah sawi lem lo chuan an sirah ka zu ding ngawi ve reng a, pa upa ve lam tawh palian lutuk lo YMA hruaitu niawm tak hi a rawn ṭawng chhuak a, "Khai le, kal tur kan awm tawh lo a ni ang, kan thleng tlai lutuk ang e, a hmunah Lianmawia te ṭhian kal hmasa turin ka ti a, an thleng dawn tawhin ka ring, i kal ve phawt ang u aw, a hmun kan thlen hunah kan awm dan tur chu kan sawi ṭha leh dawn nia," a ti a. 

Tichuan, ruang zâwn haw tur chuan kan kal ta a. Kawng hi feh kawng tih takah a zau lutuk lo a, a rualin mi pathum kan kal thei ngawr ngawr. 

Rei kan la kal lo tihah ka hnunglam aṭangin tu tih hriat loh hian, "Tlangval, khawi lam mi nge i nih a, i va fel ve," a rawn ti a. 

Ka'n hawi chho chu pa pakhat la upa lutuk lo tur hmel fel fai zet hi a lo ni a. Kan zin chhan te ka sawi a, chu ve leh, "E, chuti ni maw, i pu te chu kan veng sa kap theia kan sawi thin alawm, tupa a nei fel hle mai che, nimin lawkah i lo zin a, hei vawiinah i lo tel ve leh nghal thei a," a ti vei luam a. Chhân vak ngaihna ka hre lo. 

'Pu Rodawla chu engtia boral nge a nih i hre mial lo maw,' tiin chu pa chu ka zawt ve a. 

'Ka chiang chiah bik lo a; mahse, an sawi dan chuan a nau nen Lohal turin an kal a, ani'n a chhip aṭangin a dep a, a nau hian a mawng lam aṭangin a dep thung a, thli a tam ve bawk nen mei a na viau a ni ang, an hâl zawh veleh thingpui in turin a û Rodawla chu a ko a, chhângtu awm lovin a reh hmiah a. A beidawng tihngaihna hre lo chuan a rin zawn ta ringawt a, a beidawn tawpah an Lo hal zawh tawh la khu rum rum kârah chuan káng dum vekin a û chu ava hmu a ni awm e, a hmel pawh a hriat tawh loh bâkah a hmin deuh vek an tia, zualko lo sawi ka hriat dan a nia, " a ti ta duah a.

Chu pa nen chuan a hmun thleng kan inchhawm thla ve ta a.

Tichuan a hmun chu tlai lam dar nga velah kan thleng thla a, mi pasarih vel an lo awm tawh a, an lo halna bul kawng puiah a ruang pawh puan duma khuhin an lo dah chho diam tawh nghe nghe. 

A zâwnna tur nen lam an lo siam fel tawh a, a váng feet 2 vel, a dung ft 6 vela seiin thingtuai leh mauphel ṭawn khawm hmangin an lo siam a, a ruang pawh chumi chungah chuan an lo hlang fel thlap tawh bawk.  

Val upa ṭhenkhat te leh YMA hruaitu te'n pu Rodawla nau Lianzika chu ruang a hmuhna lai te leh a lo awm dan te an han zawt a. 

Lianzika'n, "Khiang bul lianpui pahnih khu in hmu em?" A han ti a. Lungchhe insûm tih hriat tak hian a ngawi leh vang vang a. "Khiang lian zawk ngheng khuan ṭhu tawmin ka zuk hmu a ni," a ti a.

A mittui dan rual lohvin a rawn luang nghal zawih zawih a, an unau hian an inkawm ngeih viau tih a hriat mai. Atu ate mai pawh chu kan rilru a na a ni. 

Mei alh nasa lutukin a hual vek tawha meikhu zîng mup mup nen mei alh sen zuai zuai karah tlân lehna tur pawh hre tawh lovin chu lai Khiang bulah chuan mei alh a lo tuar däi tawp mai a ni tih hai rual lohvin kan suangtuah thiam nghal vek.

A ruang lah chu ṭhu tawma hmuh tih takah a zâwnna tura an siam chu a tlawh tlang lo chiang khawp mai. A zât ve a luah ṭâwkin a kawm ngul lehnghal.

YMA hruaitu pakhat chuan, "A ruang hi hmu ve duh in awm chuan a en hun lai tak a ni, in kan thlen hunah chuan en theih ani tawh lo ang," tih pah chuan puana an khuhna chu a'n pawt hlim ta a. 

'Lalpa leh'  lo en ve lo tawp ila ka tan a ṭha zawk tur hi a nia! 

A taksa chu a ût ruam mai a, a lu a kawlh khi phuk bawk nen a taksa chu vawk rawh zawh hlim ang maiin a khi ṭial ruk bawk a, a khi keh kâr a ṭang chuan thau chhia leh tui hnâng ban hmel deuh a pawrh tuam lehnghal! 

A hmel mawlh mai kha! A mit vun a kan mar vek avangin a meng kuau a, a mitmu chu a pawk chhuak mai anga tih turin a rawn poh chhuak pur a, a hmui a kan sawr vek avangin a ṭhen ṭhû vei nen, a kut lah chu a káng kawm vek bawk a, a ke chu a tawma a ke ṭang te pawh a kâk ang ṭhû lehnghal a, ka va han râp mai mai tak.

Vawikhat ka en kha ka duh tawk viau a ni. Ka thäu-ah hian min man nghal tlat a nih chu.  

A ruang chu an khuh ṭha leh ta a. YMA hruaitu bawk chuan, "Khai le, hei khua a thim chho dawn tawha kawng a zau lutuk lo bawk nen kan vaiin kan zãwn rual thei dawn si lova kan in záwn chhawk mai a ngai dawn a nih hi. Zawn rei lutuk bik awm lovin kan inthlâk zung zung dawn nia. Vawikhatah paruk zelin kan zawn ang a, tin, hmeh det keng ten hnung kan dawl anga upa lam deuh te khan hmâ kan hruai thung ang. Hmeh dêt keng lo te khan kan meichher siam hi la u la, a rem danin in lo ên dawn nia," a ti ta zung zung a.

Hmeh dêt ka ken loh avangin meichher ansiam sa zinga a lian deuh ber leh eng ṭha ber tur awma ka rin chu ka'n thlang nalh a, a chhan pawh êng nei lova kal kha ka zah vang ni lo in, ka zuam loh vang zawk a ni. 

Ṭawngṭaina te an hman zawh chuan tlangval parukin an zawn ta phawt a, a hmaah Vâl upa deuh tawh te pangnga vel an kal a, a dang zawngin kan zui ta a, kawng a zim deuh avangin kan kal chak hleithei lo.

'Sarthi an awm hian thli a thaw duh khawp mai' anti ṭhin. Mahse, he mi ṭum hi chuan thli fîm tak ngial pawh zuk thaw eih lo a! 

A reh hian a reh tlawk tlawk a ni ber mai.

Km 1 pawh kan la kal lo ang tihah, kawng thlang lam luikawr aṭang chuan vawi lehkhatah "A na lutuk...." tia patling aw ngei mai lo ri chhuak ṭial ruai ruai chuan min tiphu chiang ngei mai. Kan ding chawt hlawm a. 

Lui kawr lam kan thlek rual ṭhup a, a aia ring hian, "A nâ, a sâ..." tia au ri bawk kan hriat leh tâkah chuan a hma lama kal te chu pên thei alawi an awm lo. Chelh din angin kan ding deuh ṭhup a. Ka chhungrila hlauhna namên lo rawn inmûng chu thunun theih ninghal lo chuan.

Midang hmai zah miah lova tlân chhiat daih a nia ka duh ni.

A hma te kha chuan ruang zâwn lo zawng te kha chu an ri nawk nawk kha a ni a; tunah chuan kan ngawi ta ṭhap mai. Kei ngat phei chu ka khûr deuh titih nia maw le. 

Thui pawh kan la kal hman lo, kawr hnaih lam kawngchhak hnim buk zapanhlo leh hrui hnawk pik lutuk kâr aṭang chuan patling aw thûm tak mai hi nasa mangkhengin a rawn ṭap ta vak vak mai a!

Ka hmaa kal ka rualpui awm vel tlangval pakhat phei chu a ṭê ṭhawt nghe nghe.

Chu tah thil uih thang saṭawih rim hi a rawn nam huam huam bawk a, mihring kâng hmui rim a nam chûk bawk.

'Ka hlau lo' ka tih chuan dâwt ka sawi tihna. Ka hmul thi a ding ur ur a, ka hmaa kal val upa pakhat chuan, "Tunge i nih, i ngam chuan rawn in lan rawh min ti hrilhhai alawm maw le," zâm map lovin a ti ta a. 

Chutia Vâal upa a rawn ṭawng chhuah tak avang chuan ka thla a muang deuh sawt.

Ruang zâwntu te mawlh kha an khawngaihthlâk. A ngai rengin an zâwn bik lova an inthlâk kual zel a, kei tak chuan ka la zawn chhâwk ve lo.

Khatia Vâl upa a ṭawng aṭang khân thawm ri va hriat tur a awm zui ta rih lo a, a tu amah rilru muangin kan awm lo tih erawh ka hria.

Thawm pawh a reh rei ta viau mai, zan dâr 8:30 bâwr velah chuan ngaw thing, zing tê tê-a din tlar putna hmun chu kan thleng ta a. 

Rei lo te chawlh an rawt a, tumah ṭhu muang awm lovin kan ding ṭhap thung. Mipa rual kal kan ni bawka hlau angin tumah kan lang duh lo. Kei phei chu hetiangah hian ka vawikhat kalna a ni a; nuam ka ti lo takzet.

Hotu lamin kal an rawt leh ta a, kawng pawh a hma ai chuan a ziazâng ta. Ka meichher ken chu midang ken chhawn tîrin ruang chu ka va zawn ve ta a.

Ruang hi mi parukin kan zâwn ka tih tawh kha, ruang zâwntu ni lo a sir lama kal ho sirah chuan mi pakhat hmalama kala vei tawn sek ka hmu ta a, keini a chho zawnga kal kan ni a, ka mi hmuh pa erawh hnungtawlh zawngin zuk kal tlat a! Mak ka tih deuh avang chuan rem leh rem lo hian ka va ennawn leh ngat.

Kei, a lai sîr dinglama zawn ka ni bawk a, ka thil hmuh kha mak ka tih rûk êm avangin en chian leh tum hian sîr lam ka melh leh a, ka mi hmuh pa chuan tlangval dang pathum vel kar aṭang chuan chiang fê-in min rawn en ta kulh mai.

Karei! Kan miruang zâwn mêk pu Rodawla ngei kha a ni. Ka hai chhete eih lo.

Meichher éng sen phe zuk zuk kar aṭang chuan mit khap tur pawh nei lo meng pawng hlut chung hian ngaihno bei lo zetin min rawn melh ta kuau mai le! Ka râp êm avangin ka ṭê chhuak ṭhawt a, ka ṭê thawmah midangho pawh an ding chawt hlawm.

Eng mah an hmu ve lo nge keimah zawk min en hû hlawm a, ka thil hmuh vâng khan che leh tur awm lovin ka ding khur zawih zawih ringawt.

Chutia hlau tak maia ka awm chu min rawn bawihsawm a, ruang zâwn chu sawi loh, ka thil hmuhna lam kâwk chung chuan ka khur zawih zawih mai a nih chu. Chêt pawh ka che ṭha thei lo.

"Eng nge ni ta?" tia min lo sâwi nawk nawk takah chuan ka harh chhuak zawk a. "Kan mi zawn kha," tih bâk ka sawi thei lo. 

Ka hmêl awm dan aṭangin an hrethiam hlawm a nih ka ring, a hmaa kan thawm hriat tawh te nen thil dang vak min zawt bik lo. A tu a mai pawh chu kan tang hrû a ni e, val upa te chuan, "Nang chu lo zawn tawh lo mai rawh, mikhual te i ni sia, kan lo âwl ang che," an rawn ti a. Min ngaihtuah vang a ni tih ka hai bik lo.

Tichuan tlangval pathum chuan min kar cheh ta a, din khawmuan reng chi ni bik hek suh, kan inzui chho leh ta hnak hnak hlawm a, tumah titi leh han ri hluai an awm lo, kan fîm kâk ni berin a lang. 

Chutia tlangval pathumin min kar cheh chu a ruk tak chuan ka zak ve khawp mai, tlangval ve tho ka ni a, dáwih chan te pawh ka chang niin ka in hria; mahse, ka thil hmuh khan min ṭhâwngin ka thauah min man miau a, zah pawh a sawi hleihtheih loh. Ka hmuh ang kha hmu ve ta se hlau lo an awm bik dâwn em ni? 

Kawng zim leh chho uchuak tak mai kan thleng leh ṭan tawh a, chuta ṭang chuan khua pawh a hnai ve deuh tawh.

Kawng a zim em vangin kâr cheh reng theih ka ni bik lo va, bakah thâwm a awm nawn leh lêm lo bawk nen a reh ang reng khawp mai.

Kei erawh nuam lo tihna-in ka khat a, ka hlauh lah a reh hek lo. A chhan pawh chutia kan inzui chhoh ṭhâm ṭhâm lai chuan kan sir hnim buk aṭang chuan min en reng tu awm ang tlat hian ka hria a, ka sir tawn tawn chu ka melh chhâwk sek ringawt; eng mah phei chu ka hmu nawn lo. Mahse, min en tu chu an awm chiang a ni.

Chutia kan kal zel lai chuan kawng a zim si, hnim pik sang tak tak kara kal kan ni a, ka beng bulah hian aw thâm deuh ṭuák hian, " I va dawih ve mikhual pa," min rawn ti thut a nih chu(h)! 

Ka hlauh êm avangin ka Chem-ah chu ka phawi a, ka beng vei lam, áw ka hriatna lamah chuan ka vai vak vak ringawt a, hnim mai mai a ni bawk nen ka lo vai na viau a ni ang, thâ zawng zawng hmanga vai ka ni bawka hnim a pe thla sun thei nia!

Tawngpâwng vai chiam ka ni bawka, ka balance hlohin a thlangah ka tla thla ta a.

Hnim buk bawh thlain ka lum ta vak mai a, ka meichher ken pawh ka thlauh daih tawh, thui fê ka lum hnuah kawr te tuiah ka tla lut ta a.

Ka thluak a fîm vek a, tui aṭanga chhuah ka tum chuan ka ke rêkah kut hit lutukin min rawn hmer ta vak mai a. Ka thâ a khur zawih zawiha, tlân chhiat tumin ka tha neih tâwp ka sâwmkhâwm tak meuh meuh chung pawhin min vuantu vawnna chu a nghet êm a ni.

'Tu nge min chelhtu hi' tia ka'n en chian nâk chuan pu Rodawla khan ût ruam leh mengkul chung hian min rawn en a. 

A hmui káng sawrbâwk ṭup chu thim thamah alang ruai ruai a, a hâ pawh kuh zetin a lang bawk a, bawkkhup chungin ka ke rekah a lo vuan reng chu niin! 

"Che hlek suh dawihzep pa," tiin a nui ṭhû a, ka va han râp ngawih ngawih tak. 'Ka thi ngei dawn a nih hi' tiin ka inngaihtuah a, ka rilru a fîm em em lawi si.

Chutia hlau thlabâra ka awm lai chuan ka chhak aṭang hian, "I ṭha em? i na em," tih ri ka hre ta a, tlangval pa li sihdêt nen an rawn thleng thla zui ve nghal bawk.

Chutia thãwm dang a rawn awm tâkah chuan ka hlauhna kha tlemin a kiang ta deuh. Mahse, ka tha khûr a la reh lo thung.

Eng tik laiin nge ka ke vuantu khan a thlah ka hre hman miah lo.

Kei aia û deuh pahnih chuan an sihdêt chuan min chhun a, pahnih dangin min rawn kâi chhuak ta a, ka kerêk na ut ut vang chuan ka ner sawk mai.

Rang takin ka ke an chhun vat a, nichina min hmerna kha a lo duk kual ruih a, ka rap ṭha ngam ta hauh lo.

"Engtizia nge, i ke chu, eng thil nge i hmuh?" Tiin min zâwt sek sek a, ka chhang thei lo, ka hrawk chu hnawhtu awm ang maiin a ping ṭup a, awrâwl ka chhuah thei lo.

Tlangval pahnih chuan min kuah chho ta a, ka lo lum thui ang reng khwp mai; mahse, ka kerêk tih loh na dang eng mah ka nei hlek lo.

Kha pa hlir mai kha ka rilruah awm tlat a, kawng kan thlen chuan min lo nghak vek.

"I na em, eng tin nge i lum theih a? fimkhur angai asin, thlanglam hi kawr ruam vek a ni a, a hnim êm vangin a lang thei lo a nih kha, ram chinchang i la hre lo ve bawk atin ni." Kan zinga upa ber chuan a lo ti a.

Kei erawh ka ngawi reng ringawt, ka thil hmuh khan min luah hneh lutuka hlauhna namen lo-in min tlâkbuak mêk avangin ka in la pa hleithei lo chu a ni e.

in thlen vat vat kha ka chak zek zek tawh a, 'eng vanga keimah kher min ti buai nge a nih' tih hi ka zawhna neih chhun chu a ni mai. 

Pu Rodawla thlâ hian mikhual ka nih vangin min zuam deuh pawh a ni mahna tu nge hria?

In lam pan tuma kan insawngbawl leh lai chuan nui ri vak vak thawm, kawr kam aṭang chuan a rawn chhuak leh ta a, a khêk hian a khêk uar uar a ni mai. 

A nui ri chuan ka tirilah min ṭhâm a,  tlêma la nau deuhho phei chu an meng phâwk kher asin. An hlau ve tih an hmel aṭang chuan ka hre thei, hlauh loh ngawt chi a ni bik tlat lo.

Vâl û deuh chuan, "E khai, kan thil tawn hi a ṭha dawn tlat lo, i kal thuai thuai zawk teh ang u, hei khua pawh kan hnaih tawh hi, kan mikhualpa kha he lamah hian lo chho teh se," a ti nghal zung zung a, ka va han lawm tak.

 A hmasa lamah Vâl upa deuh te kiangah chuan min kal tir ta a. Ka hlauhna zawng zawng reh vek lo mah se tlem chuan ka zia deuh tawh.

Ka thil tawn eng mah min zâwt lovin thil dang min sawi pui lui bawk a, ka zia phah khawp mai.

A khât tawkin nui thawm te, na tuar ṭê thawm te chu a awm reng tho a, kan hmanhmawh ru vek tih ka hria, khua kan lût dawn hnai tawh a, kan thâwm hriat pawh a záwi telh telh. 

Ruang hmuak tura lokal te nen kan intawh tâkah chuan thlâ pawh a muang ve ta deuh. Mahse, kan zavaia mak kan tih leh a hnu thleng pawha kan sawi bân theih loh chu, chu lai mual min lo hmuaktu te awmna kan thlena ruang kan han nghat kha kan zawn ṭan tirha káng kawm vek si, a bawp pahnih ngil takin a thluang zar a, a bân kawm ngul te pawh zuk ngîl zar a! Eng tik laiin nge chutianga a lo awm tih a záwn tu te ho pawhin an hre lo. 

A râp hian min râp ngawih ngawih tawh.

in kan thleng a, kei chu tlaivar naah pawh kal tawh lovin ka haw tlang nghal hmiah. Muthilh te chu khawilamah, khawsikin min man nghal a, ka pu te min biakna pawh ka chhâng lo hrim hrim.

Kha putar kang ût hmêl râpawm zet leh a nui ri te kha ka bengah a ri nawn tlut tlut a,  ka û hnenah haw ka rawt nghal nghe nghe. 

Hemi zan zankhua hian chhinkhat tê mah ka chhing lo a, ka thil tawn mak zet chuan min luh ngut ngut a ni ber e.

A tûk khua a lo var a, ka û hnenah haw ka duh thu ka sawi leh a, ka pu te pawh eng mah ka hrilh lo. 

Ruang awm laia haw kha an remti vak lo nachungin ka nawr nasat êm avang leh ka hmêlah thil dik lo a awm tih an hriat vangin motor min biaksak ta nge nge a, min zawhna eng mah ka chhâng duh lo a, sawi chhuah kher pawh ṭûl ka ti hek lo.

Zinglam dar 10 ah kan khaw lam panin ka û nen kan haw ta vang vang a, vawikhat mah ka zin nawn leh ta lo..

B+>[BeckirafARenthleI]<+®®