HMANGAIHKIMA KHA

HMANGAIHKIMA KHA

Ziaktu: Becky Rafa Renthlei(-BRR)

Zan khat chu ka û nen tui taka kan muhil lâi hi thâwm mak deuh hian min ti harh ve ve a, ani nen hian khum khata mu dun kan ni.

Thim thama mu kan nih avangin che lo hian thâwm lo chhuahna lam chu kan ngai cháng a; mahse, mak deuhvin kan thâwm hriat chu kan harh chian veleh a reh hmiah.

"Eng nge ni a?" Tia ka zawh chuan, "Ka hre lo," a ti zawi sap.

"Ka hlau deuh," tiin ka rizai sin chuan ka in khuh ṭha sauh sauh a, ani pawhin a hlau deuh tho chuan ka hria; mahse, û zawk na na na chu hlau anga lang duh lovin, "Eng mah hlauh tur a awm lo, muhil leh ang," tih pahin min rawn kuah a, dâr zât en tur pawhin a thim êm a, eng mah kan hmu thei chuang lo. 

Kan mut khan sawmpakhat a pêl tawh a, zan lâi chu a ni tawhin ka ring. Thâwm dang lam eng mah kan hre zui ta lo bawk a, muthilh tumin kan chhíng leh ta a.

A tûk khua a vara eng mah kan sawi chhuak lo ve ve. Mahse, min ti harh tu eng emaw tak chu a awm tih erawh kan unauvin kan hre ru kar. 

Zan a lo ni a, zan dang ang bawkin in lêng kan nei a, kan in lêng tlangval te fiamthu thawhah ring zet zetin ka lo nui ve a, kan unau hi paruk, hmeichhia pangnga leh mipa pakhat kan ni a; hmeichhe rual awmna in tih takah in lêng kan nei ngah thei viau.

Kan in lêng zinga pakhat chuan, "Tun lâi chu thaw ri an sawi zing riau mai a, mihring hah thaw ri huam huam ang hi hria an lo awm nual a ni awm e," a tih chuan ka û nen kan in melh zauh! 

Nizana kan thawm hriat kha thaw ri sûk sûk ang deuh hi ni tlatin ka hria. Mahse, muhil harh chiang mang lo kha kan ni a, kan sawi chiang ngam bîk chuang lo.

Chu pa vêk chuan, "Nizanah pawh kan ṭhenawm nu in a lo hria a, an pa a ko harh zo si lova 'ka tlaivar ṭhak' a ti," a la ti zui a(h). Rilru a nuam fahran lo, ka û nen kan inmelh kan inmelh ringawt. 

Midang te pawhin sawi tur an lo hre neuh neuh a, ramhuai lam pangah pakâiin zan dâr sawmpahnih kan meng thleng ta a. 

In lêng an haw fel hnuah kan mutna room, in hnuaiah kan chhuk ve ta a, ka û chuan, "Thâwm kan hriat leh vaih chuan ka pa kan kâi tho tawh dawn nia," a ti a, ka bu nghat nghat.

Mahni phone ve ve kheuhvin rei ngial kan meng leh a, ka û muthilh hnuah pawh ka la meng, kan room light pawh kan off lo va, nizan kan thil hriat avang leh zanina kan in lêng te thil sawi vang khân thim thama mut kan hreh ru ve ve a, êng kan ti thim duh ta lo kha a ni a.

Chu tia phone khawiha ka type zuah zuah lai chuan thaw ri hulh hulh thâwm ka hre leh ta thut a, ka phu nghâl zawk! Vawikhat mai pawh ni lo, vawi hnih vawi thum a rîk sûk sûk tâkah chuan hlauhnain ka thâuvah min manin ka û mutui lâi chu ka ko harh ta a.

"Eng nge?" Tih pahin chiang mang lo hian min rawn en a.

"Thâwm kha ka hre leh a nia, ngaithla ve mah teh," ka tih chuan a meng chiang teh e, a kutah nghet tak hian ka vuan a, ṭawng zawm tawh lovin thâwm chu kan ngai cháng leh a, rei vak lovah a rawn ri leh ta! 

Nichin âi mah khan a ring tawh zawk a, kan mutna bang dep, ṭhenawm te in hnuai panna step inkâr vel aṭanga rawn ri chhuak niin ka hria. 

Patling hah taka thaw ri hulh hulh ang mai hian thâwm chu a awm a, "Ka pa ko mai ang," ka û beng bulah ka va ti sap a, "Tho rawh," tiin a tho zui nghal a, a hlauh hmel nasa, kei phei chu hlau tak ka ni.

Chu mi hnu chuan in chungah ka pa kâi tho turin kan chho dun ta a, kan han koh chuan rang tak hian a lo tho chhuak a, min thlamuan ve ang chu tih nâk laiin, "Eng pawh ni se, Chem leh Tuboh kha in chhawp phawt ula, zuk mu leh rawh u le," a ti ta a, ka va ngei mai mai tak. 

"A hlauhawm loh a nia, hlauh tur a awm lo" ti tala min ṭawng thlamuan ka rin vei nen, kan hmanraw inchhawp tur min pe a, "Chhuk tawh rawh u le, khua a vâr ṭêp a nia," a ti duh chauh.

Lunghnur zetin ka û nen kan room-ah kan chhuk thla leh ta hnà hnà a, ka hlauhna khan min la kiansan lova ka khûr ru der der reng mai.

Mahse, nichina kan thawm hriat kha hriat tur a awm ta rih lova, ka pa hmanraw min ken thlâk tîr chu kan khum bulah kan inchhawp ve rân bawk a, rilru erawh a nuam viau lo.

Ka û pawh a muhil thei ta bik lova phone khawihin kan meng ta reng a, zing lam dar li a pêl âwrh tihah a ngai tê bawkin kan mutna bang depah a rawn ri chhuak leh ta sûk sûk a, kan pahniha inmelhin kan hawi tang hrâ mai, "Chem kha lo la rawh," ka û in a tih chuan, "Eng mah pawh hmuh tur a awm loh hi.." ka lo ti zawi sap a.

Thâwm lah chu a ring telh telh mai si. 

Hlau chung chungin kan khum hnuai te kan bih a, wardrobe leh lehkhabu dahna phên zawng zawng kan en pawhin eng mah kan hmu lo; thâwm pawh a la awm ta zêl mai. Keini'n thâwm kan neih tawh te chuan a reh ve mai ka ring a nia, a teuh lo! A ring zual zêl emaw tih mai tur a ni.

A tawp a tawpah ka pa kan ko leh ta nge nge a, kan room ah min chhukpui dawn emaw kan ti a, chutia ti ta lo chuan pâwnah min hruai chhuakin, ṭhenawm te in hnuai panna stepah min chhukpui ta, a Torch light ken chuan ngun deuh hian a chhun thla pah zêl a, a hnungah kan unauvin kan zui ve dat dat bawk a. 

Chu tah le, Thàw ri ring zet kan hre leh ta phut mai, kei phei chu ka phu nasa lutuka ka pa ka nêk nghâl rawk rawk.

Ri lo chhuahna chu ka pain a chhun ta a, kan mutna bang leh step inkâr âwlah chuan 'UṬAWK' lian lutuk meng kul hi a lo bawk a, a lo in hampuar ṭhin chu niin! Ka pain Torch light-a a chhun lâi reng pawh chuan a inhampuar a, a ri sûk sûk a, a thêp leh ṭhin a, "Hei mai mai hi alawm in hlauh le, a râi a nih nghe nghe hi," tih pahin a bula Mau bung chuan a thâi sawn ta daih a. 

Thâwm a reh zui hmiah.

Ka nuih a za bawk si, ka thinrim bawk si a, kan lêt leh lam chu kan nui ṭhâ reng mai.

"Dàwih lutuk loh tur, a enga mah hma hian in phî ruai zel mai," tiin min mut san leh ta a.

Ka û nen kan nui char char.

Dàwihzep hi chu mahni intih hrehawmna chi khat a ni a, a engah mah hma hian han huai ve phawt mai ila, kan huai sual lo châwk a nia.

Ni e, hetiang thuar tham vel kan nih lai hian zan khat chu in lêng te haw hnuah kan unauvin TV kan en a. Zan dâr sawm a pêl tawh.

Kan kawngkharpui a rawn in hawng ṭhuai a, ka phu nasa ngang mai. 'Thli a thaw' ti dawn ila chutiang ri va pakhat mah hriat tur a awm lo bawk a, mak ti ru tak chung hian kawngkapui khar ṭha tur chuan ka kal ta a.

Pawn lam chu kan in bul street light in a chhun êng ruih a, mi teivâk an awm meuh tawh lo.

Kawngkhar dim têa khar ṭhain ka kalh zui nghal bawk a. 

Ka mut a chhuah êm avangin ka û TV en pawh nghâk ta lo chuan ka mut san ta nge nge a.

Chutia tui taka ka mut bawrh bawrh lai chuan YMA information aṭanga âu thâwm lo chhuak chu chiang mang lo zetin ka hria a, muthilh leh tumin ka inlet lui ṭâlh; mahse, "Tun maiah khân Tv.Lalhmangaihkima kum 42 Khuangchera section a mi chu Accident vangin a boral a, khawtlâng mipuite ka'n inhriattîr a ni e." A'n ti chiah chu ka harh chiang ngei mai.

U Hmangaiha hian kan upa ber a ngaizâwng ṭhin a, tlangval ria lam lu kawlh tul mai a ni a, a hmelṭha lem lo bawk.

Ṭhalai vek kan nih avangin kan unauin kan tho chhuak vek a, chanchin hrechiang tur leh a ṭûl ṭûla pui turin mitthi in lamah kan chhuak chho ve ta a.

Eng tia accident nge a nih pawh kan hre chiang bik lo, kan section lam hian tun thlaah mitthi pathum lai kan nei tawh!

U Hmangaiha hi chu a lo tei lût zing ve a, kan kalna tur ngawih ngawih ni vein ka hria; mitthi in kan thlenga ṭhalai hmuh tur an awm nual tawh, 'mi fate hi chu an bengvarin an ṭuan a ṭha mang e' ka ti rilru nauh nauh a.

Ka û chiah Rini hian Hmangaiha û chu engtia accident nge tih a zawt ta a.

"Zan tîrah a chhuaka a rawn haw har vak lo, puan ka ṭhui laklawh deuh nen a rawn haw lai pawhin ka be lo a, a room-ah a lut tlang daih nghe nghe, tukverh a hawng thâwm chu ka la hriaa chumi hnu rei vak lovah thil ri dawp ka hriat avangin Mama room lamah chuan ka lut phei ve nghal a," tiin a insût leh rih, "A pindan a lo ruak huai sia tukverh inhawnga ka zu dâk chhuak chu a bawkkhup zawng hian a lo awm a," tiin a hmuh dan a sawi ta a.

Hemi hnu hian ṭhenawmte kai thovin an zuk en a, a lo thi fel der tawh. U Hmangaiha te unau hi pathum an ni a, pakhatin pasal a nei tawha a u Mami nen hian an la awm, a nu a la dam bawk. Amah hi Hindi teacher a ni a, a thiam viau, zû in a chíng tih lovah chuan a nungchang a sual lem lo.

A ruang post-mortem kha a nuin a phal lo fithla ṭhak a, mak ka lo ti hle. Mahse, a rûi tih an sawi thawm erawh kan hre ve.

Tlaivarpui tur a nih vangin keini unau pawh haw lova awm tlang kan tum a; kan upa ber Ausiami nen a ruang kan kil ve ta a, ka u phei chu a mittui a tla ve fap fap, kei erawh ka hul hiau. 

Ngaizawng lêtin duh hluah hluah angin lang lo mah se amah ngaizawngtu kum hlun kha a ni ve a, ka û tan chuan a hrehawm ve thovin ka ring.

A lu an tuam vâr lûk a, a hmai a khem nasa viau, a eng lai nge a sawh tih pawh hriat va ni suh. Post-mortem an duh miau si lo a, dîl chhut lutuka zawh kha thil nuam pawh ninghal lo chuan.

Zanlai a pêl a, ka û nen zung turin kan chhuak ve ta a, mi an tam khawp mai. Zirtîrtu te a ni ve bawk a, veng ṭhenawm lam pawh an rawn kal ṭhahnem angreng.

Kan zung zo kan lut leh chu kan ṭhutnaah khan midang an lo ṭhu daih a, kan hawihai viau. Mahse, bangkil lamah pahnih thum vel lenna tur âwl ala awm a, chu lam chu kan pan phei ve ta ringawt a.

Rei pawh kan la ṭhu hman lo tihah Current a thim a, inverter erawh ruang awmna zâwnah a êng thung. A bâk zawng a thim vek a; ṭawng thawm a ri nawk nawk bawk. Chutih lâi tak chuan kan ṭhutna zâwn sîr lam chu a chim ta thut a, kan âu dual. Kei phei chu ka lo ṭhu duhdah angreng si a, hnunglamah ka let thla tawp.

Kan ṭê teng tung mai a, kan awmna laiah êng a awm ve si lo a, hlâu tak ka ni.

Kan ṭhutna lai hi Lei chhuat ring a ni a, bang ngheng lo deuh chiah chiahin kan ṭhu tlar kha a ni a. Ka û phei chu a râk ring ngei mai, tlangval ṭhenkhat in hnuai lamah an tlân thla nghal vat a, kan ṭhutna zâwn lungrem a lo chim chu niin. 'Ruang awm e' ti lo chuan kan phusa sup sup hlawm a, chutia kan rîk nuai nuai lai chuan U Hmangaiha ruang mutna khum bula ṭhu a nutei chu ring lutuk maiin a rawn ṭê chhuak ve leh ta.

Eng mah va hmu pha ve lo mahila a ṭê ri hrim hrim pawh chuan min râpin ka thâ a khür titih.

"Mate, lokal rawh i haw daih ang," tia Ausiami'n ka kut nghet zeta a rawn vawn chuan ka hnial chhete eih lo. 

Midangho an zîk luai luai lai chuan a rûk thei ang berin kan tlân haw ta ringawt a.

U Hmangaiha nutei khan eng nge a hmuh hre mah suh ila, thil eng emaw danglam chu a thleng a ni chêk ang a! A dik tak chuan an in hi kum thum êm pawh an la luah pum lo a  nia, lirnghing te a nih ngawt loh chuan khatia Lungrem han chim ta ngawt mai kha ngaih chu a ṭha fahran lo.

In kan thlenga khua a vâr dêt dêt tihah kan mu ve ta a. Ausiami'n min kuah nghet ngei mai. 

A tûk ruang ni-ah erawh ka kal ve ta lo a, ka û te pathum an kal thung. 

Ruang thlâk zanah pawh ka kal ta chuang lo. Hma deuhvah ka mu a, thawnthu ka type zuah zuah lâi chuan ka mutna khum piah chiaha tukverh chu a rawn ri dat dat a, a tîr chuan ka ngaipawimawh hran lo. Mahse, vawi hnih vawi thum a rawn rik tâkah chuan loh theih lohvin ka hawi phei ta a, parda a inzar vek avangin pawnlam ka hmu thei bîk lo.

Dímtêa tho chhuakin Parda inzar chu ka hlim ta a, "Awi leh" ṭê chhuak tur pawhin âw rêng ka chhuah thei lova mitmu pâwng pûr leh lu kawlh tul mai hian dârthlalang phênah min rawn bih kur a nih chu. 'Ka hlau' tih hian a sawi fiah zo dawn em ni?

Hlauh luat vângin ka petek dâwrh a, ka khawhmuh fiah lo tial tial avang chuan ka thidang dawn tih hrilh hranpa ka ngai lo.

"Hey, Mate.. mate..." min ko ri chu hlá tak aṭanga lo chhuak niawm tak a ni. Ka meng ta riai riai a, hnai zet zetah ka unaute leh ka pain min lo bih chu niin!

"I harh em, I ṭha tiraw?" tiin min sawi leh nawk nawk a, 'ka harh' tih hrilh nan ka bu nghata an thaw huai.

"Eng tin nge i awm?" Tia ka pain min zawh chuan ka thil hmuh kha ka hrilh ta vek a, "Hmangaiha bawk a nih chu, nizan khan an inah tumah riak tluantling ngam an awm hleinem, a tihṭhaih nasa lutuk," tiin ka samah a rawn chûl a, "I u ten an lo hmuh lâi chein chhuatah dâng vekin i lo mu a, in chungah ka pawm chho che alawm, i ṭha tawh tiraw?" A ti leh a.

"Umn ṭha tawh e, dâr eng zat nge?" Tiin ka zawt lêt a.

"Zing dar nga..." a ti heu mai.

Khatia tukverh ka va en lai kha zan dar kua vel niin ka hriaa zankhuain ka harh miah lo tihna a nih chu. An mangang awm teh e. 

"Min va han ti hlauthawng tak, kan ko nasa lutuk chea i harh thei bawk si lo, ka pain damdawi ina hruai a ngai lo, a harh leh mai ang ti lo se chuan kan tlânpui daih tawh ang che," ka u Rini'n a ti ve bawk a.

Ka pa hi pa vengva ve tak a ni a, eng emaw hriat rûk a nei a nih ka ring hial zawk. Zankhuaa harh miah lova ka awm chung pawhin damdawi inah min kalpui duh miah lo a nia, thil mak a ni.

Ṭhat lohna dang eng mah ka nei lo bawk a, kei paw'n nunphung pangngai ka zawh leh mai.

U Hmangaiha thih chungchângah erawh sawi a tam hle a, an inriak mi paruk te pawh a tihṭhaih nasat lutuk vangin an in pu chhuak fai phiar a; anmahni lam hnai an riak ta niawm tak a ni.

Ausiami phei chuan hlauh tak têin a hlau a, amahin a mu ngam ta meuh lo. "Eng nge i hlauh? Hmuh i nei em ni?" Tiin zan khat chu ka pain a zawt ta a.

A chhan pawh zanlaiah a pindanah a veisek a,   ani hi kan unau zinga upa ber a ni a, room hran a luah tawh a, u Hmangaiha thih aṭanga ni thum ni vel aṭang khan biak hleih theih loh hian a ngawi ngul a, a mu ṭha ngai miah lo tih ka pa'n a sawi.

Ka pain hetia a zawh pawh hian a chhâng miah lo a, a châng leh kut hnungsuihin a tei thuak thuak zela hrechiang hle lo ila chuan mi â emaw ka ti ngei ang. Mahse, ka û hi a â lo tih ka chiang lawi si.

Kârkhat a liama nunphung pangngai kan zawh chho ve mêk zel bawk a, dân pangngaiin in lêng te pawh kan nei leh ta bawk. Kan in lêng zinga pakhat Hnehzova chuan Hmangaiha te ina an riah zana thil thleng ti hian a sawi ta a. 

"In riak paruk kan awm a, a kil ber tukverh zâwn, lung rem chimna bul lawkah ka mu a, kan mut khâ dâr sawm vel ni tain ka hria, mahni phone ṭheuh khawihin kan titi lêm lo a. Ka zun a chhuah vangin ka tho chhuak ta kha a ni a; phone erawh ka lukham bulah ka dah thung. Bathroom- light ti êngin ka va zung ta a. Hetia bathroom-a ka awm lai hian thlanglam Tengtere kûng chu Ventilation aṭangin ka hmu phâk reng. A kâk pui aṭanga chuan mipakhat hian min lo hûi zauh zauha ka hmu sual emaw ka ti hial! Chiang deuh zâwka en tumin Ventilation aṭang chuan ka bih hnai ta a. Ka hmu sual awzâwng lo! Kan mitthi pa ngei mai chuan ṭhen ṭhû chung hian min rawn hûi a, a lu a kawlh tul a, a ha zawng zawng langin min rawn ṭhen khum leh ta. Ka hlauhna kha namên a ni lo. Mahse, mipa ka ni a, inti huai lui takin ka mutna lamah ka lêt leh ta a." Tiin a hrawk a thian kharh a. A sawi zawm leh hun nghâkin kan ngawi ṭhap.

"Ka mutnaa ka lêt leh chuan tumah an harh lo, an lo mutui hlawm kher mai, rilru nuam lo zet hian ka inthawlh ve leh ta a, phone khawih te chu khawilamah, rizai-in ka inkhuh phui hmiah. Ka mut erawh a chhuak lo hulhual, thin phu dup dup chunga ka mut lai chuan ka piah chiaha mu Duhsaka a rawn ṭê ṭhawt a; a aw râwl a ring bawk nen ka phu chiang kher mai. Rang takin ka ṭhu chhuak nghal a, midang pawh an rawn harh ve bawk, Duhsaka hlau thlabar hmêl chu a râpawm mah zawk. Bangkil lam lungrem chimna Silpoulin-a an khuhna; ka mutna zawn chu kâwkin 'A lo kal, a lo kal' tiin a thaw hlawp hlawp a, kei chuan rin dan ka nei mai. Kha mi hnu khan ka mutna bang dep chu nasa lutuka hiattu awm ang hian a rawn ri phei a, kan vaiin kan hre vek. In neitute pawh an rawn tho a, tumah mu thei alawi kan awm lo, an sawi chiang duh chiah lo naa tlaivar zan pawh khan Hmangaiha insiam chhe lai thlâ lo hmu an awm nual!" Tiin a sawi leh ta a.

Hetia Hnehzova a ṭawng mawlh mawlh lai hian Ausiami a râk ṭhawt a, a khûr nghal char char! Theihtawpa sáwiin kan kova meng â ruai chung hian, "Ka nei duh lo, ka duh lo, kal sawn rawh," tia a sapatal tâk chiamah chuan kan hawi phâwk hrû hlawm. Hmangaiha thlâin a tibuai tih hrilh hranpa kan ngai lo.

Ka pa Committee zo a rawn haw lai pawhin kan la buai nuai nuai a, Ausiami thlabâr râk ri chuan beng a luh ngei mai. Kan in lêngte pawh tumah haw kan phal bîk lo a, an la awm ṭhap. Ka pain Ausiami lu chungah kut nghatin a ṭawngṭai ta a, chumi hnu chuan kan veng ami Nurse Nunui kan kova a Bp te check sakin a jection ta a, zinglam dâr hnih velah kan in lêngte pawh an ṭîn ve chauh.

Veng chhungah Hmangaiha thlâ hmu an tam hle. A insiam chhe nasain an in leh a vêl mai bâkah kan in bul street light-in a èn phâk loh chin chiaha a ding hmu an awm nual bawk.

Ausiami pawhin zia lam a pan chho ve zel a, kan room-a ka thil hmuh erawh kha chu vawikhat mah ka  la sawi chhuak lo. Ka hlau lo tihna ni lovin sawi tam khân rilruah a rawn thar zéla ka ngawi tawp.

Tûkṭhuan kan kîl laiin Ausiami a tho tharh a, bathroom-ah a va luak chiam a, a rawn chhuak leh chu a hmêl a pawr fap mai. Ka pa ngaih ṭha lo chuan a zâwt leh ta a, "Thu dik sawi rawh, Hmangaiha nen khan eng boruak nge in neih?" Tiin.

"Pa, min ngaidam rawh u.." tia a ṭah tâkah chuan ka u Rini'n room-ah a kuah lut a, ka pa thinrim hmêl kha ka hlau khawp mai.

Ni e, ka û, kan lo chhuan rûk ve em em chuan Hmangaiha fa paiin a rûkin a lo titla a lo ni! A boral zân khan Hmangaiha'n a hre chhuak a, a thinrim rilru nain zû a lo in a; a rûi lungpuam rilru nâ ti khan a awm zui ta tih kan hriat chhuah meuh chuan eng kim a pawi zo tawh.

Khawtlâng leh veng chhung dem kan hlawh a, Hmangaiha chhungte erawh an ngawi hmiah, eng mah an hnen aṭangin ṭawngkam dêngkhâwng leh hriat nuam lo pakhat mah kan dawng lo kha thil mak a ni. 

Ausiami a inpuan tâk aṭang khan Hmangaiha thawm hriat tur a awm tawh lo a, keini chhungkua erawh chuan zahna leh mualphona kan hmachhawn mek thung.

Thil dik lo hi chu thup hlen tumin ṭan han khawh ve ṭhin mah ila; rei a daih tak tak thei lo. Lan chhuah hun a awm zêl tho.

Thlarau te hian inpuan duhna emaw an dam laia an sawi chhuah ngam loh an thih hnua sawi fiah ṭûl awm si te târ lan nân an rawn inlan fo ṭhin tih hi ka awih ve ta.

B++>[BeckirafARenthleI]<++®®