'DAWIHZEP PA' MIN TI

'DAWIHZEP PA' Min ti.

Ziaktu: Becky Rafa Renthlei (B®®)

March thla ṭan tir a ni a, khaw vawt lutuk zualpui pawh a reh chho ve tawh.

Zanriah ei khamah meizial zu pahin Tv ka thlir a, en tur mumal pawh hre lo chuan ka hmet kual dun dun a.

Ka nu kut sil zo lo ṭhu ve chuan, "En tur i hre lo a nih kha, news kha han ti teh," a ti a.

"Eng zahna nge pawh ka hre lo," tiin remote chu a ṭhutna bulah ka theh pheia room lamah ka luh san nghal daih.

Ka phone charge lai phawiin ka en nghal a, ṭhianpa ruata missed call a lo awm dul mai, a sawi tur pawh ka hre nghal, chhunah damdawi in bulah min ko ding meuhvin lui kal turin min sawm tak kha maw le.

Ani hi tlêmin keini aiin a û deuh a, kum inthlau viau chu ni lo mah ila, lui kala 'Sangha man' tih vel hi chu peih ve tak a ni.

A kal dawn a piangin min sawm ve ziah lehnghal. 'ka peih teuh lo' tia ka chhan zin tawh teh reng nen min sawm a ṭhulh duh chuang dér lo nia.

'Ka peih lo' ka tih na chhan pawh hmânah kum li liam ta vel kha niin ka hria, amah nen hian kan kal ve tawh a; ka vawikhat kalna a ni nghe nghe, a sawi nawm hmel êm avangin ka zui ve ta kha a ni a.

Kha tia rama kan Sangha man sa bela han chhuma meipui bula duh tawk maia han lim nghek kha chu nuam ve tak a ni. Chu bakah ṭhian zaho-a tumah venthawn ngai loa duh dan dana han awm kha a nuam êma khatiang thlâkhlelh vanga zui ve mai chauh ka ni nghe nghe.

Keini khawpuia awm tan chuan lui kalna tur hi a vângin a hla ve êm bawk a, haw lam mawlh mai kha, ka inchhir êm a ni; a hmunah kan mansa kan ei a, hawn a lawi kan nei lo bawk nen chhungte mitmei vén a na duh viau.

Kha mi ṭuma kan haw lam kawng chho lutuk mai, feh kawng pawh tluk lo hnim bawk si-a kan kal lai te khân ka rilruin 'vawi khat mah ka kal leh tawh lo ang' ka ti chho mawlh mawlh a, sim hmak chi-ah ka ngai a ni deuh ber. Min sâwm nawn leh pawhin chhuanlam fahrah tê tê hmang hian ka hnar fithla hmak zel.

Amaherawh chu, ka ṭhian kawmngeih ve tak tak, têttê aṭanga ka kawm ṭhin te nen an han kal a, hlawhtling lutuk maia an lo haw ṭum hi chuan 'ka lo kal ve mai mai lo a ni aw' tih chang hi chu ka nei leh lawi si. Ruata zui hi chu a hlimawm dangdai ve a, hruai tur a mual mual an lo awm ve zel a ni ang, an kal deuh fo mai. 

Ruata ka va call back a,  "Ṭhianpa, eng nge ni ta?" ka'n ti hluai a, a sawi tum chu hre tho mah ila, ka zâwt lui leh ngat, kei misual hian, "Vawiina ka thil sawi kha," a rawn ti ta ngei a. 

Kan ṭhianho hi chu fiamthu kan duhin kan fiamthu pawh sáng tak a ni, min kawm ngai vak lo tan phei chuan ngeiawmna lai pawh kan nei ta ve ang.

"Lo tum ve la, naktuk zing dâr 6 velah chuan chhuah hman kan tum dawn nia," a rawn ti nghal zat bawk a.

"Leh ngawt ṭhin a, a vawt bawk si, bakah ka nuin a rem tih pawh ka ring lo, ka dam ṭha vak lo a," tiin ka la hnial ve fan.

A dik tak chuan ka peih thlawt lo a ni, kei hi chu a hrim hrimin ram kal, lui kal, daivah tih vel hi ka mi sa lo ve bawk a; ka peih loh chu thu hran ni se, tlangval thaza rual si hi ka nêp tlat. Hei vang hian ka chhungte pawhin an phal vak ngai lo. 

An fapa duat lai Lalmalsawma hi ka ramvachal teh chiam lo.

Ruata chuan, "Tum ve hram  mai rawh, ka sawm tlatna chhan che pakhat chu, hei kan tum lawk vek tawha Zoa leh Lalhruaitluanga'n an ṭhulh leh thuta ka thinrim zia hi, mi nêp an nih hi vawikhat mah ka kalpui leh tawh lo ang," a rawn ti nghal tún tún a.

"A nih tu tu te nge kal dawn hrim hrim a," ka ti a.

"A nuam i ti viau ang, i ṭhianpa Fela leh Rinpuia, kei nen a ni mai, i lo tel ve chuan pa li kan ni dawna zan hnih bak kan riak dawn hlei nem," a ti leh zung zung a, ka rilruin 'Lalrinfela a kal ve dawn amaw! Hmela chu(h) eng mah min hrilh duh lo vel a, tlaiah pawh a lo pêng reng si a, ani a kal theih phawt chuan ka va'n kal thei awm e aw' bâkah an rawn hawn ṭhat hlauh chuan a insawi thei leh dawn lutuk tlat.

Rinfela hi chu, ka thianpa ve ngawih ngawih, naupan lai aṭang tawha inkawm, school pawh lut dun char char kan ni a, a mizia ka hre hnehsawh viau, fapa mal a ni ve tho a, chhungte duat rawn, hna pawh thawk ngai lo, eng vak mah thiam a nei lo a, a nêp ve hle bawk; pawisa erawh chu a ngah thei khawp mai, a nula mi em em bawk a, a rilru erawh a chhe lèm lo.

Ruata bawk chuan, "I nu chu ka lo dilsak dawn che em ni?" A ti leh zel a, "Â a ngai chuang lo, ka lo dil lui dawn nia; mahse, ka dam ṭhat vak loh vangin min kêp deuh ka ngai ang," ka ti ve zaih bawk a.

Ken ngai tur te ka zâwt ve ta nge nge a, kal loh theih ninghal lo chuan.

Buhfai no 3 vel leh chaw chhumsa, mutbu zângkhai deuh ken tur tih a sawi a, zing dâr ruka chhuak tur kan ni a, kan kalna tur hi Darzo bul a ni tih a sawi tel bawk.

Tichuan lui kal tur chuan ka in ruahman ve ta a, ka nuin phal lo viau mah se ka thil tum ve tawh hi chu ka tum luih tlat zel avang hian min dang duh ta bik lo. Tin, nidang ang lo takin ka phûr ta phian, ka ṭhiante an kal ve dawn bawk nen ka insiam zung zung a.

Ka alarm tone set Linkingpark hla chuan min ti harh chiang kher mai, phone ka'n en a, dâr 5:49Am a lo ni tawh a, missed call vawi li ngawt a lo awm tawh bawk. Ruata vek a la ni zui! Message ka thawn nghala ka insiam mek tih leh ka inpeih har dawn lo tih vel.

"Hei kawngpuiah kan nghak ṭhap tawh che a nia, dar 6 chhuah kan tih kha, kan kalna tur a hla ve deuh si a, lo hmanhmawh deuh teh," tiin min rawn tur sek tawh.

Ka pa silai thûlkhung nizana uluk taka ka tih fai leh a mu paruk, khawl siam ngei mai chu ka ak a, ka chhuak chho ve ta a.

Kawngpuiah min lo nghak ṭhap tawh a, Rinfela chuan, "I va rei ve, tunah dâr 6:30 a ri tawh a nia, lui kal tur inchei vak a ngai em ni? Tiin a nui ṭhû.

"Nêp deuh kal pui chu a, puih ngai reng hruai chu a hahthlâk dawn hle mai maw, luiah chuan mipa ang tak in awm tum ve hram ang che aw," fiamthu titak deuhvin ka chhâng ve zat. 

Duh aia kan tlai tâk deuh avangin muang khawtlai tawh lo hian kan chhuak ta a.

Bike kan keng vek.

Kawngah chuan din pawh ding khawmuang lovin kan tlan par par a, Tuipui khua  chu zing dar 10:30 velah kan thlenga thingpui dawr lo awm hmasa berah lut nghalin kan chaw pai te chu kan phawrh a,  tûk ṭhuan eiin kan tlân leh nghal. 

Tuipui Lei thui zet chu kan han zawh ta a, a hnuai tuipui zau zet maiah hian tla palh ta ila keini ang tui hleuh thiam ve ngawr ngawr tan chuan, thih ngei ngei na hi a ni ringawt alawm le, Lei kan zawh kâi a, chho zawng hlirin dârkar eng emaw zât kan tlân leh hnu chuan a hma bera tlan Ruata chu a ding ta a, keini pawh kan ding ve ta hlawm a.

Kawng bula in bulah chuan bike kan hûng hlawm a, in tihah thlâm a ni zawkin ka hria, kan bike te kan lock vek hnuah chuan thlâm bula kawng zau vak lo, ramhnuai lama chhuk thla vutah chuan kan inzui thla ta hnak hnak a, kan kal rei tial tiala a chhuk tial tial.

Thui fe kan kal leh hnu chuan, a ram pawh a ṭhain, a pik ṭan ta khawp mai, lui luang ri pawh a hriat theih ṭan ta, kan phur tlangin kan kal rei tawh bawka kan thawm pawh a ṭha chho ta viau. Kan kiu rûih rûih a, Ruata chuan min lo khap vat a.

"Thawm dim deuh teh u, silai keng kan awm kha, sa kah induh lo em ni," a tih chuan kan tawp chiang kher mai, kei phei chu ka nuih a za lek lek zawk maw le. Silai kengtu kha ka ni miau a.

Lui kan han thlen meuh chuan, tlai lam dâr 3 a lo ri ṭep tawh mai, a hmun a ngâw ṭha ang reng a, van lam chu eng viau mah se kan awm na lai vel erawh a thim deuh khuih.

Ruata chuan, "He lai hi a lui mawng lam a ni a, he lui hian Tuipui kan kal lama kan hmuh kha a fin a, Sangha pawh hi a ṭha phian a nia, he lai bawr vel ah hian buk sa ila, kan hmanhmawh a ngai, duh aiin kan tlai deuh tlat," tih pah chuan kan bul vel chu a en kual thuak thuak a.

Fela kheuh zeuh pahin, "Khu lai changêl hnah khu zu la ang le," ka ti a, kan chhuk nghal a.

Bûk sak kan tumna hmun kan thlen chhoh leh chuan Ruata leh Rinpuia an lo awm tawh hauh lo! A ngaihna hre lova kan hawi vak vak laiin kan bul lawka tui chu a rawn ri ta burh burh a, kan va han phu chiang kher ve le. 

Chu ve leh za em ema nui riin a rawn chhunzawm nghal bawk a, nui ri awmna lam kan han hawi chu Rinpuia chuan pum dawm meuhin min lo nuih anih chu(h) "In va'n dawih tak he lamah lo chho r'u tiin min lo hûi a, khi ṭhâ chung hian an awmna lam panin kan inzui chho ve ta a.

Thui lo te kan han chhoh chuan, lui  luang lai kam chiah zâwl zau ve deuhah bûk tur an lo ruahman chu lo niin a rem khawp mai, kan han che sang sang a, a ṭhenin a chung leh bang te kan lo khuh a, rei lo tê-ah zan hnih daih vel chu kan sa zo ta mai.

Thing tuah tur kan fawm khâwm zawh meuh chuan khua a thim titih tawh.

Ruata'n, "Chaw lo chhum la,  kei niin thlang lamah lén kan zu deng ang e, naktuk zing hmeh tur tal pawh kan man chuan a zia dawn em asin, kan lo let leh hunah chaw chu kan ei dawn nia, sangha te pawh kan hmeh ang chu, a hmin har hleinem, zanriah ei khamah a hnâr lam kan hrût chho thung dawn nia," tiin rem a ruat zung zung a, ka rilru tak chuan ka huphurh khawp mai, ramvachal leh tlangval huaisen tak ka ni hran lo a, mahni chauhva bûk lo nghah chu ka châk tehchiam lo.

"Fela hian lo chhum zawk se", tiin ṭan ka'n khawh deuh a, Ruata vek chuan,  "Ani chaw chhum ei ai chuan nghei ṭhak pawh ka duh zawk," nui sûng hian a ti a, an insiama an kal chu a ni nghal mai.

An hmeh én lan theih chhung ka thlira bûk kawtah mei ka chhem a, zanriah tur ka buatsaih ṭan ta a.

Van lam ka hawi a, Arsi pawh a hmuh theih loh, kan bûk chhehvêl a ngâw khupa boruak a dái nuam phian.

Chu tia ka chaw chhuan ka en reng lai chuan, kan bûk chhak lam aṭangin hnahthel rap bawrh bawrh ri ka hre tlat  mai! Ka hawi nghal zawk a; mahse, eng mah ka hmu lo, a reh leh ta daih a, ramsa eng emaw a nih ka ring, ngaihsak lem lo chuan mei chu ka chhawm ṭha a, hnahthel rap ri bawk chu ka hre leh ta, ka mei tuah chuan a en pha lo chiang nasa mai si a, a rîkna lamah beng ka chhi uluk viau.

Ka awm hmun erawh ka sawn chuang lo. 

A reh leh vung vung bawk si, ngaih ṭha vak lo hian kan hmarcha hmui ken phawrhin purun chu changel hnahah ka zai lêp a, thâwm a reh rei ta viau mai, ngaih ṭhat loh rûkna ka nei hran lo. 'Ramhnuaiah te chuan thâwm danglam te chu a awm ve bawk ang chu,' tia ka ngaihtuah lâi tak chuan kut bêng thek thek ri ka hre ta tlat! 

Ka va'n hawi rang tehlul êm, ka ṭhiante'n min rawn tih ṭhaih a nih ka ring a, Fela leh Rinpuia uangthuang vel an ni leh pek ang.

"Fela, Rinpui," tiin ka ko a, min chhângtu an awm lo a reh hmiah. Za deuhva nui ker ker ri bawk ka hre chhunzawm leh ta, ka awm a nuam ta lo riau. 

Ka ṭhian te aw a ni lo tih ka'n ngaihthlâk ngun deuh chuan ka hre chawpchilh mai, bûk ah chuan ka tlan lut nghal a, silai ka va chuh ve ngial, hmeh en nen bûk chhung aṭang chuan "Tu nge, tu nge" ka ti a.

Nui ri khâ hriat tur a awm tawh lo a, ka hmeh énin a tlin tâwk ka chhun ve bawk a, eng thil mah hmuh tur a awm lo. Silai han hmeh puah rîk ngawt chu a chiin ka hre bawk si lo, ka awm a nuam lo tak zet tawh. Hnahthel rap ri niawm tak erawh a khât tâwkin ka hre reng tho.

Buk chhûngah chuan ka tawm ta vang vang a, minute 20 dawn ka ngaihchan hnuah thawm ka hre ta lo. Ngawi rengin ka ṭhu a, a reh rei tak êm vang pawh ni lovin ka chaw chhuan kha ka suan loh chuan a dik dawn in ka hre lo a, hreh tak chungin pawnah chuan ka va chhuak a, ka bêl chhuan chu ka suana mei ka tuah belh vak bawk a, ngam leh ngam lo hian thâwm lo chhuahna lam ni a ka hriat chu ka hmeh en chuan kan chhun leh ta a, ka ngaih ṭha mawlh hek lo î. 

Ekhai! Ka va'n phu chiang kher ve le, kan bûk chhak lawk mei éngin a chhun phâk lek thing lian pui ngheng hian kan veng ami pi Engzuali chuan mit tla lek lekin min lo en renga a ṭhen ṭhaw bawk. Mak tih luat vangin ka phu zawk a ni ber e.

En chian chu sawi loh rang lutukin bûk chhungah chuan ka tlan lut nghal a, ka silai vuan chuan ka ṭhu tawm chawih.

He lai ram palailêng, kan veng aṭanga hla lutuk leh nghalah ani khan eng nge a tih ang? Bâkah ani kha chu ramhnuai chu sawi loh, pâwnah pawh a chhuak thei tawh lo kha ni a, ka nu pawhin zan hnih lai a menpui ve tawh nghe nghe. Hrawk cancer a ni a, khum betin thla ruk vel a awm tawh, ka va'n ngaituah nasa hman tak.

A hmel mawlh mai kha, min nuih ang chuan a lang tak naa a mitmeng a fírin a meng thîp râma thihna rim a nam tel tlat.

Chu tia ka inngaihtuah buai nasat lai chuan kan bûk lam panin thâwm ka hre leh ta, a rawn hnai zela mahse; tunah chuan pi Engzuali ka hmuh lohna lamah a ni thung.

Thâwm pawh a rawn hnai telh telh a, ka silai chu ka chawi kang a, ka kâp pawp ang ka tih lai takin, "A va vawt ve, thing tuah tur a awm tawh lo em ni?" tih ri chuan min va han ti lawm tak, ka ṭhiante an ni tih ka hriat chuan ka silai ka tung ṭha nghal a, bûk aṭanga chhuah pah chuan, "In rei lutuka ka lo muhil ṭep alawm, in man ṭha em khawi maw in sangha man chu ka ti a," ka hmeh en chuan ka thil hmuh na lam kha ka chhun kual hrâm; mahse, eng mah hmuh tur a awm chuang lo.

Mak ka ti ru hle.

Ruata'n an Sangha man chu rawn phawrhin rinai takin an lo man ṭha phian, "Duh aiin kan thleng thuia Sangha a lo tam phian si a, i lo ning hman em, i duh tawk kha chhum la, a bak kha chu kan rêp dawn nia," tiin a rêpna tur a siam nghal mawlh mawlh a.

Ruata hi chu a taima bawka a bula ram kal hi a hahdamthlakin nawm pawh a nuam reng a ni; mahse, kei zawng ka rilruah eng dang a awm thei lo, ka thil hmuh kha hrilh nghal vek mai ka duh a. Mahse, dâwih min tih ka hlau bawk nen 'min ti nâ pawh nihlei lo, an rilru ka ti nuam lo mai mai zawk ang' ṭhianpa Fela'n a hriat ve phei chuan kan buai phah vek dawn tih ka hria a, hrilh rih loh mai ka tum ta zawk a.

Ka awm erawh a nuam thei hlawl tawh lo. Pi Engzuali kha a thi a nih ka ring nghet bur.

Zanriah kan ei khama kan tih nek nek chhungin dâr kua a pêl fel der tawh. Ruata chuan, "Kan vaiin chho ila, kan Sangha rêp mek hi chu a tam lutuk lo bawk a, Fela, nang lo va dah ṭha rih mai rawh, kan lêt leh hunah kan chhunzawm leh mai dawn nia," a tih chuan ka rilrem zawng tak a ni.

Mahnia bûk lo nghah kha ka zuam lul tawh lo ve. Nêp ka inti; mahse, ka thil hmuh khà ka hmu sual tlat si lova fiah turin ka huaisen tâwk bawk si lo. Ka lungphû pawh a la pangngai lo nasa.

Tichuan kan vaiin kan chhuak ta a. Sangha pawh kan man ṭha khawp mai, bûka kan let leh meuh chuan zinglam dar 2  a ri tawh a, mei te kan han ti nung leh a, kan sangha rêp pawh a tam tham viau.

Ruata chuan, "Ti hian mei hi kan invil chhawk a ngai dawn a, Sawma, nang lo va mu ta che, naktuk lamah daivah te poh i duh ang, keini chu chhunah pawh kan mu thei a nia, zing lamah lenkhang te kha kan en leh a ngai dawn si a," a tih chuan, ka hnial duh ta lem lo, ka mu ta a.

Ka mu tui bawk a ni ang, ka harh leh chuan ṭhianpa Fela chu a lo la hnar nasa mai, "Hei, hei tho ang, i zak lo mi," tiin ka sâwi vak vak a, ani nen hi chuan kan in ngamtlâk zual ka tih tawh kha.

"I zak zawk em, zingah lenkhang te kan en leh vek tawh aw, ka mutna a la rei lo, nangmah kha va tho rawh," tiin a inlet hmak. Rinpuia leh Ruata chu changel hnah keng chungin an lo chho a.

"Kha i mu tui maw, rin aiin sangha kan awk tama a tihzia khawp mai, kha i bula hnah kha han hlim la," inti thei fêa a'n tih chuan ka bul lawka changel hnaha an lo khuh chu ka hlim a, an lo man belh nasa hle mai. Ka zak zawk.

Ka mut bawrh bawrh hlan khan ka ṭhian te hi an lo hah hle a ni tih ka hriatin ka inthiam lo takzet a ni.

Ruata chuan, "Vawiin chu thlang lam pangah khuan zu daivak la, keini kan lo mu ve thung ang aw, lui kawr hi i zawh zel ang a, lungpui lian deuh i hmu mai ang, ding lamah khan i kal dawn nia; mahse, kal hla lutuk lo la, hmanah kan ṭhianpa pawhin sakhi patuai a kap tawh, i kâp ve kher ang ka tihna chu a ni lo a, i vannei ve mial maithei asin," a tih chuan ka phur khawp mai.

 "Nia lo mu hahdam ula chaw eikham veleh ka zu kal chhin ang e," ka ti ta a.

Tûkṭhuan kan ei khama zial te kan zuk chawlh hnu chuan ka silai chuhin, iptepuiah chemtum ka ak a, inti Pasalṭha tak chuan ka chhuk thla ve ta a, thui fe ka chhuk hnuah Ruata sawi lungpui ni awm tak chu ka thleng ta a, ka'n hahchawl vang vang a, ding lam chu ka hawi a, thing lian tak tak leh hnim pik kârah chuan hman hmawh lo tak in ka phei ṭan ta a. Thâwm.ka dîm vei fû.

Thui fe ka kal hnu pawh chuan sava hram thawm bak hriat tur reng ka hre lo, ka beiseina a san ve teh reng nen tlâng pawng ka chuang kai a, thui vak lo ka kal leh chuan kawrte ka lut thla hlawl mai, ka hah tawh bawk nen chu tah chuan ka ṭhu ta hle hle a, kawr thlang lam chu a awih hle tih a hriat theih a; kal zui zêl lova lêt leh mai chu ṭha zawkin ka hria a, khua a tlai chak riau lehnghal.

Zial ka ṭan chiah tihah ka chhak lam ko a ṭangin lung, kut tum tiat vel hian min rawn vawm thawi fua mai, ka phu nasa lutuka tlêma tlêmah ka lum lo chauh!

Rang lutukin, "Tu nge ni?" Pâwr lutuk tak maiin ka ti tuara a reh leh vung vung lawi si.

Chu tah mak tak maiin hlauhnain min rawn man leh ta, ka hmulthi te chu a ding ur ur a, eng mah thil dang lam hmuh tur a awm miah lo. Mahse, ka chhungrilah hlauhna a awm tlat si, nizana ka thil hmuh te kha ka ngaituah chhuaka silai chu ka hum nghet sauh sauh, a hma lawka thli fîm tak ngial pawh thaw lo kha ka awmna thlang lam, áwih tlàn aṭang chuan thli nasa tak rawn tleh tur ang mai hian, a rawn ri chho vûk vûk mai leh nghal a; tlân chhiatna châng pawh ka hre lo. 

Tháwm awmna lam chu mak ti takin ka thlir renga chutah le, a rawn nui leh ta, ka hawi loh na lam ko a ṭang chuan ring lutuk hian a rawn nui khâwk rum rum a, rang lutukin nui ri lo chhuahna chu ka hawi nghal! 

Pi Engzuali kha khám ko-ah chuan a lo ṭhu tung a, min rawn nuih leh ṭhaw a nih chu(h)

Pi Engzuali a ni tih hre mah ila hlauh luat vangin ka kâp ta a, a fuh pawh ka hre chuang lo, hmanhmawh fêin ka tlânchhe zui ta a.

Mahse, ûmtu ka nei ta tlat, duh lo teh mahila ka la hawi lêt hrâm. Ka hnung hlam hnih vela hla thingzârah chuan a rawn fu phei nulh a, a châng leh ka beng bulah chuan thaw huam huam ri a rawn awm bawk a, ka kut vei lamin ka'n vai ve naa awmzia a awm thui lo khawp mai.

Hnunglam ka hawi ngam tawh bawk si lo, lungpui lianpui ka thlen hma hlek chuan ka hnung lam aṭang hian min rawn nam ta vak mai, "Dawihzep pa, thi rawh," tiin min rawn nam nawn leh a, ka duh aia chakin ka thlâwk phei a ni ber. 

A la nui khâwk rum ruma ka hriatthiam theih dan ber chuan hmusit hmél taka min nuihsawh hibang ka ti ber; a hmêl lah kha a râpawmin a kuh hrû lehnghal vei nen ka la thidang lo hi thil mak a ni.

Mangang phili-a tlânchhia ka ni bawk a, ka tlãnna lam a dik em tih pawh ka ngaihtuah hman tawh bik lo. Vawilehkhatah, "Malsawm, dawihzep pa.." ti tuar chungin min rawn nam leh ta dawt a, ka invêng seng ta lo. Bawkkhupin ka tlu thlawrha ka lu a na nghal vawng vawng mai.

Ka thin a phu dawt dawt a, thawhchhuah tuma ka'n inbengkáng chu ka khawhmuh a fiah ta lo. Min nuihsawh ri leh kut bêng ri te hre vuai vuai chung hian ka bawk thla leh ta a.

Ka harh leh chuan kan bûkah ka lo awm tawh a, khua a lo thim vek tawh, Fela'n min lo ṭhutpui a, ka lu chu an lo tuam lûk bawk. 

Ka harh tih Fela'n a hriat veleh Ruata leh Rinpuia a ko vat a, an pahnihin an lo lut nghal a, Ruata chuan, "I chungah eng nge thleng, i rei sia khua a thim tawh bawk si, kan ngaihtuah lutuk chea Fela nen hmuak tur chein kan lo kal a, lungpui chungah khan lu thi buaiin i lo mu a, eng tin nge i lawn theih zawk a?" Min tih chuan, "A ni maw, ka lâwn lo hrim hrim, eng tin nge khatiang lungpui lian lutuk chungah ka lawn theih ang," ka ti ve bawk si a, a ngaihna hre lovin min thlir reng ringawt.

Thil awm dan zawng zawng kan thlen zana ka thil hmuh te nen chuan ka hrilh fai ta vek a.

Ka sawi zo chu ka thaw huai,  Fela erawhin a hlau tih ka hrethiam mai.

Dâr zât ka zawh chuan Rinpuia'n chawhma dâr 11 a rík tawh thu a sawi a, zankhuain ka harh lo tihna a nih chu.

Keimah vangin tükṭhuan pawh an lo la ei bîk lo a, Ruata'n ro a rêl zung zung a, tûkṭhuan kan ei ta hlawm a, ka thil tawn khan min la hneh bawka chaw ei a tui lo nai nai khawp mai. Mahse, ṭhiante hmai ka zah vangin tlêm chu ka bâr ve.

Ka chauh deuh vang nge chaw ei kham rei vak lovah chuan ka muhil zui ta daih a.

Chu tia ka muhil chu vawi leh khatah chiang lutuk maiin ka harh hlawl! Kan mei tuah chu a lo rêm lek lek tawha mei alh chuan kan bûk chhung a rawn èn pha chang chang chauh a ni. Ka ṭhiante lah an mutui hlawm hle a ni ang an thaw sâk sâk hlawm a.

Kei erawh hlauhnain min rawn man leh ta, ka thâ a khur leh titih! Ka hmulthi te chu a ding leh sung sung tawh, chu tih nâk a laiin, pâwn lamah chuan thawm a rawn awm leh nghal, phun ser ser ri a ni. A chângin a nui ri leh ker ker bawk a, ka mutna zâwn tak chu bûk kawngka a nih ka ring; ka lu kànin pawn lam thâwm ka hriatna lam ka va melh a. Khai! Pi Engzuali bawk kha a ni, mei chu a lo hnung puak a, a sam la tla kawlh zo lo, a ṭhen rawn sei fal bik awm te leh a hmai chêr tak, vunin a khuh ringawt ang maia a biang kî lutuk mai te, a mitkhur thûk tak maia mitmu var ré rê chuan chiang tak maiin min rawn en leh reng a nih chu(h)

Hlau tak ka ni.

Ka bula mu Fela ka sik vak vak a, na lutuka ka sik chung pawhin a harh thei hlawl bawk si lo.

Chu tah áw thâm fiah deuh hian, "I ti harh zo chuang lo ang, Dáwiha," a rawn ti a.

Chêt chu sawi loh, ka hlau lutuk chu ka inkhuh ta ringawt. 

Thlanfîmin min bual nghal bawrh bawrh a, thâwm lah chu a lo hnai zel si, hlau chung chungin puan kâr aṭangin ka va bih a, leiah chuan kan bûk lam panin mawngtawlh hian a rawn phei a, ka thâ a va han khur nasa tehreng êm.

Ka inkhuhna chu ka hawng ngam tawh mawlh lo.

Ka rilruin ka ṭawngṭaia Pathian hming ka lam mawlh mawlh a ni ber e. Thâwm chu a lo hnai zel a, "Lalpa min ṭanpui hram rawh"  ka ti rilru leh a, a bâk chham tur ka hre hlawl lo.

Vawi leh khatah thâwm chu a reh duak a, ka'n ngaihthlâk chian pawhin kan piaha tui luang ri bak hriat tur a awm ta miah lo.

Ka va han lawm tak êm, ka hlauhna tlêmin a zia hret tihah chuan ka puan sin chu kan pawt thla dêk dêk a, karei! Ka chung zawn chiahah chuan a mit khur thûk tak leh mitmu var puap chuan hnai lutukah min lo thlêk leh ta. A thaw rim uih nghur pawh ka hre pha hial. Vai kian tumin kut ka vai buan buan bawk a, ka vai fuh erawh ka hre lo.

Thâwm ka chhuah nasa viau a ni ang, ka ṭhiante pawh an harh chiang khawp mai, Ruata chuan min rawn chelh nghal a, "Eng mah a awm lo, eng ati nge, nga ti nge?" a rawn ti a, kei lah chu ka la thlan vek a, ka la khur nasa mai, Fela pawh a rawn meng phâwk hrû.

An vai chuan min chelh bet a, ka khawsik a lo sâng hle bawk. Ka lû lah puak keh tur ang maiin a na tluk tluk a, ka châu ngawih ngawih. Zing lam dâr 4 a lo ni tawh a, khua kan nghak var a, kan haw ta vang vang kha a ni a, Fela a kal hmasa bera Ruata leh Rinpuia'n hnung an dáwl a, kawng lakah eng buaina mah kan tâwk lo.

In kan thlen chuan ka damlo zui ta nghal a, thil awm dan ka nu ka hrilh chuan, kan riah zan khan pi Engzuali chu a mar an hmu lo a, thi angin a thang hman a ni awm e. A hnuah a mar an hmu leh a; mahse, nimin chawhnu dâr 2 vel khan a chatthla ta tho.

A thlâin min tihṭhaih tih hrilh hranpa ka ngai bîk lo. Mahse, hlâu tak ka ni.

Kei erawh chu hlauhna in min kiansan hlei thei lo a, riahpui hial ka ngai. Thla tam fê chu ka pawn chhuak meuh lova pi Engliani te vêng lamah phei chuan ka dîk dâk eih lo.

Ka huaisen fahran lo tih chu ka hria; mahse, ka hmu sual lova ka mitvai a ni hek lo. Kha pitar hmelchhe zet kha ka mumanga hmuh leh atan pawh ka duh lo.

Kum 10 hial a lo vei ta. Vawikhat mah daivâkin emaw lui kalin ka tei chhuak tawh ngai lo a, ka pa silai kha mi ṭuma ka ken pawh kha hawl chhuak tu an awm ta lo.

B®®

B+>[BeckirafARenthleI]<+®®