THE RAPSAGYAN FAMILY (Completed)

THE RAPSAGYAN FAMILY[Completed]

Ziaktu: Becky Rafa Renthlei

[-B®®]

He story hi a vawikhat nân a changtupa pahnih, a changtunu pahnih an awm dawn a; tin, ka story hmasa, Rapsagy, Segundo, Ka thlah lo'ng che tih leh Nâo Vá story chhiar lo te chuan in hrethiam dawn lo tih ka'n sawi hmasa ang e.

RHAPSODY(Sawi hawnna)

Zirsangliana (of Rapsagy)fapa neih chhun Rafael Remruattluanga nupui neih hun tur leh nî te an sawi fel vek hnuah; a nupui tur chuan pasal dang a ûm ta mauh mai le!Mokawr pawh tunlai anga hmeichhia mahni-a intum chawp tîr duh lovin Zirsanga te nupain a hranpa liau liau an order sak kha a ni a; mahse, eng nge thleng ta hi? Rafaela thinrim lutuk leh zak bawk si chuan mokawr manto lutuk mai chu a hâl ral ta a; mahse, a nunah hmeichhe dangdai zet a tawng ta tlat mai le.

##

Zosangmawia, Lalfakhlua (of Segundo) fapa upa zawk ve thung chu Forensic lamah a thawk a, a nau Lawmsangzela nupui nen an inkâr boruak a fuh thei ta meuh lo. Zosangmawia'n Lalmuanpuii hi a nu dik tak a ni lo tih leh a nu chu Zomuankimi a ni tih a hre chhuak ta bawk nen an chhungkaw boruak rit lutuk chin fel hleih theih loh chuan buaina a thlen tam ta ngei mai! A pa ṭhianpa Zirsanga fanu upa ber Duati nen an inkârah hmangaihna a lo piang ta! Nau hial a lo pâi tâk si-ah chuan an chhungkaw hnih inkâr inrem phahna tur nge ni ang a, kumkhua atân an inhmêlma zâwk dawn?

"Ka fanu tân hian kan iai che a ni hauh lo; mahse, nu leh pa ti hmingṭha zâwng ni lo leh a mualpho zâwnga in khawsa dun hian min tina hle a ni." Zirsangliana ṭawngkam kha fak chu chhungkaw inhmuhkhâwmna a ngaihthlak atân chuan a chang ṭha khel khawl hlê mai. Ni e, Duati, an fa hmasaber a'n râi ringawt hi thil zahthlak tak a ni, chu pawh an chhungkaw ṭhian fapa, Zosangmawia fa lehnghal!

Chapter-1

Bial zaipawl member kan kim ṭhep ṭhawp tawh a, kum thara a hmasaber atan hla kan zir dawn a ni. Member thar inhmel hriat tîrna hun kan hman laiin hmeichhe pakhat sâng ṭha zet leh ngo sar hi a rawn lût ve chhak chhak a, a hmêl en reng reng pawhin a zakzum tih a hriat reng mai.

Member list ka'n en chuan a hming awm ang leh an vêng tur ka rin hriat thei miah lo va! Tlar hmasa ber ṭhutna âwlah a ṭhu tharh a, ṭawngṭai turin a kûn vei thlap bawk!

Zaipawl conductor term hnih ka chelh tawh a, ka nu leh pa kaih hruaina hnuaia thu awih zir ka nih angin nun sual leh kawhmawh bâwlin ka awm ngai lêm lo.

Hla zir kan ṭan hma chuan thil pawimawh sawina hun leh kan kal phung turte ka sawi a;nichina lo lût hnuhnung ber khân min en duh hlê-in ka hria!

"Le, member aṭangin sawi duh emaw ngaimawh zâwng inneih chuan hun rei lo tê sawina hun kan hawng zawk ang aw," tiin ka ṭhutna lam ka pan nghal a.

Tumah sawi tur an awm dâwn ta lo emaw ka tih hnu-in nichina hmeichhe rawn lût kha a rawn ding chhuak a, ka rin loh lam daih zuk sawi a!

"A kal tlâi ber ka ni nachungin ka sawi lo thei lo," a âw a thian zui kharh a, zak hmêl a pu nain zak lo anga lan a tum hle tih ka hre thei.

"Kan conductor khân lo ngai haw lo la, i sam(Lu) meh dan kha bial zaipawl conductor ve meuh tih a tân chuan a hmuhmawh awm deuh lo maw!?" Dam thlap leh zâwi raih hian a rawn ti ta a.

A thil rawn sawi chhuah kher kher chuan min ti zak hle mai;mahse, ngaimawh zâwng sawina hun atâna kan hawn a ni a, inkhak chi a ni der si lo. Chutih rualin ka sam Vikings hairstyle-a ka meh, ka nu leh pa phalna thlap kha a rawn sawisêl chat a nia, a ngam salh salh hle mai.

"Kan inchei dan leh kan sam tih dan te, kan pâwn lam lan dan hian kan mizia tam tak a pho lang a, zaipawl member ni lo; tlangval hawk lak sam ang mai pu chunga Solfa vai kha a rem teh ṭeuh lo ka lo ti ve a ni e," tih zawm lehin lawm thu a sawi hnuah a ṭhu nghal hmak nia.

Veng hrang hrang pali aṭanga lokal khâwm nula leh tlangval mahni kohhranah pawh zai thei chin ṭhah hmâ a, ka sam a rawn sawisel chu ka chhungril takin ka zak hliah hliah. Min hresa ṭhenkhat te erawh an lo ṭhen ṭhâ hlawm a, chu nu min tih dan chu a dik viau; mahse, a helh awm riau si a, ka boruak hîp lai a ti danglam dâwrh alawm le.

Kei hi Rafael Remruattluanga ka ni a, 5'11 laia sâng niin ka pa Zirsangliana hmaifang ka chhun hlauh thung. Ka nu Vety doctor strick ṭhak mai Remruatfeli kaih hruaina hnuaiah kum 29 ka lo ni ve ta reng a, ka û chiah Duati nen kan inkârah kum khat a tla thung.

Kan sumdawnna Glass House enkawlin ka pa in a theih ang angin min puibâwm bawk a, Aizawla kan awm nghehna pawh ṭhangkhat lian zet a ni ta. Tunah hian ka ngaihzawng Ramthansangi nen inneih tumin ka chhungte'n palâi an kal tîr mek a, kum hnih pum ṭhak kan inzui hnuah, ka nu leh pa duh dan ngeia Biak in hawnga inneih kan tum ta a ni.

U Duati erawh ka pi leh pu te hnenah Lungleiah a awm tam zawk a, ka nu leh pa, kei leh ka nau hmeichhia, kan nula nen tuna kan chênna inah hian kan awm a ni.

Fapa neih chhun ni mah ila min duat khu chûk hran lo;mahse, ka mamawh erawh min ngaihpawimawh sakin nupui ka neih tur chungchângah pawh ka nu leh pa'n min nawr zâwk mah.

"Nupui neih har lutuk pawh thil ṭha ber a ni lo va, nu leh pa kan la dam ṭhat lai hian neih fel mai a ṭha. Bâkah inzui rei lutuk te pawh hi a ṭhat lohna chen a awm ve tho a nia," tia ka nu leh pa sawi ka hre zing malh malh hlê.

Ramthansangi te nen vêng khat kan ni a, amah a chhiat loh bâkah nula pharvar tia sawi tur a ni lêm lo nen thawmhnaw dâwr lian tak an nei a, ka nu leh pa mit a tlung hle.

Zaipawl inhmuh khâwmna hmun aṭanga ka chhuah rualin kha nu kha ka mitmei ru deuh a; a scooty nen a lo tlân liam hman chiah. Biak zui ka duh viau nain tihngaihna awm miau hek lo le.

Naktuk zân hi kan palâi kal leh hun chiah a ni a, an sawi fel ka ring tawh bawk. Kan in lam panin ka inkhalh haw ve ta a, hmanni lawkah car thar kan la a, chu pawh mo hruaina tur hisâp paha ka pa thlan a ni nghe nghe. A hmâ a kan car leh ka nu Bike pawh keima'n ka hmang tam ber a, tûn hi ka hriat theih chinah ka nu in Bike vawithum a neihna a ni tawh.

Aman khalh vak tawh lo mah se u Duati lo haw chângin a hmang ve ṭhin a, a zia phian.

"Rafa, in va bâng har ve," Ramtei msg ka hmuh chuan ka nui suk a, kohhran lamah a inhawlh lawr lutuk lo nain a mawi tâwk chuan a tel ve tho.

"A la tlai loh hi.." tia ka chhân chuan, "Lo phei rawh," ati zui zat a.

A la tlâi chhe lo rêng bawk a, Ramtei te in panin ka imkhalh thla leh ta a. An in kawta bike lo ding chuan ka mit ala deuh; tûn hnai aṭang khan he bike neitu hi a lêng ve zauh zauh a. Mahse, 'Ka ṭhian' tia a sawi miau avangin rinhlelhna em em ka nei hran lo. Lalfamkima a lêng tih ka hriatna chuan min ti hnual deuh.

Nui har har thâwm ka hre hmasa ber a, an veranda-ah ka ding vâng tawh a, zan dar 9 a ri awrh chauh a ni. Mipa aw thûm lam deuhvin, "Rafaela ai chuan ka duat zawk daih ang che," atih ri ka hre zawm zat a.

"Rafaela te chuan min hmangaih alawm," Ramtei chhânna avang chuan ka thin sa phat ka beng dai hrâm.

Ni e, bial zaipawl conductor ve meuh ka ni a, ka thinrimna leh lungawi lohna tam tak pawh hi ka tilang ve zen zen lo, ka thinrim tâwpah erawh tu fâ mah ka hlau lova ka zah hek lo. Chu chu ka pianpui mizia a ni.

In chhûng ka luh ruala anni pahnih inhnaih zeta lo ṭhu dun chu hmuh kân a har ang reng;mahse, mipa thîkthu chhe ber ang ziazânga tih lan erawh ka tum hauh lo, palâi kan tîr mêk a, Famkima nen an inkawmngeihzia a sawi fo ṭhin avangin chuti lutuk turah ka'n ngai lo deuh ngawt a.

"Ehe! I lo thleng dêr elaw?" A bula ṭhutna âwl min kawh hmuh nghâl a.

Ramtei pawh chhâng lo chuan Famkima bulah ka ṭhu a, "I va lêng hma ve, inhmuh a khât hlê mai." Tiin ka nui lui suk a.

Kan ngaihtuahna zawng zawng kan hmêlah lantir kher loh tur tih ka nu min hrilh kha ka hrereng ṭhin, nakinah Famkima chungchâng hi Ramtei la sawi pui ngei ka tum ta a. Palâi kal lai laia mipa dang in lêng neih hi thil mâwi pawh va ni suh.

Kan chhumgkaw zia leh Ramtei te khawsak phung hi a châng chuan inpersan hlê in ka hria a, amah ka duha ka hmangaih ve êm avangin ka palzam lui deuh ṭhin.

Ka nu leh pa mit a tlun mai piah lamah nula nalh leh hmelṭha tak a ni a, a sam coffee rawng lam lek lek leh a vun ngo angreng tak te chu hmuh a hah dam hle bawk.

Sawrkârah hna nghet nei lo mah ila kan chhungkaw châwmna tur hi chu Glass house aṭangin kan la lût viau.

A bialpa nghet ka lêng tawh miau a, Famkima pawh polite tak hian a haw turin a ding chhuak ta a, ka lâwm thu tak a ni.

"Ramte, naktuk zan kha palâi lokal leh hun a nih kha aw," ka ti sup a. Famkima chhuak tawh tur kawngka bula a ding chat chu ka hmu ru reng.

"Ka hria alawm, i nu leh pa an hmanhmawh tawh bawk sia, keini ai aiin an lo buai a," tih pahin min nghêng hnai ṭalh ṭalh a.

"I kawr tur pawh ka nu leh pa'n an order dawnin ka hria kan sawi fel vek tawh kha, sawi buai awih loh," ka tih chuan ka mal rawn hmer salhin, "A zahthlâk e, keima hâk tur te chu ka inbuaipui thei reng alawm,"

Mipain hmeichhe mothuam an tum tawh lo va tunlaiah chuan; mahse, ka nu leh pa'n tumsak ngei an tum tlat, hnial theih miah loh. Inrem sa ang deuh kan nihna zâwnah kan sawi lâwk vek a, Ramtei chhungte pawhin min hnial thei bik lo kha a ni a, naktuk zana palâi an kal leh chuan a hun leh ni chauh bituk a ngai tawh dawn tihna a nia.

"Famkima hi a rawn lêng zing mah mah lo maw?" Nelawm vak lova ka tih chuan, "Sawi leh ṭan dawn e, ani thîk a ngai lo ka tih tawh kha," thinrim duh miah lovin a nui sâng a.

"Ṭhian mipa ngah lutuk hi ka rilrem zawng a ni vak lo, tun hi ka sawi tâwpna ni rawh se," ka ti ve ngat a.

"Rafael, ka ṭhian ka tih chuan ka ṭhian a ni mai, tun hi kan thleng tawh a, innei mai tur kan ni bawk, rilru tih dum viau loh tur aw, i nihna nen a inrem lo," ka mitah min en kalh a, dâwtsawi hmêl a put loh avangin ka ngawi zui ve ta a.

Duh thawh leh uar taka ka fawh bâk hi tisa lam thil eng mah ka tih pui ngai lo, eng mah ni lo mah ila Pathian rawngbawlin ṭhalaiah ka theihtawpin ka inhmang ve a, ka nun pawh ka uluk viau ka phâk tawkah.

Zan dâr 11 dâwnah ka haw ta chauh a, ka chhungrilah nupa nih châkna a awm a, chhungte phalna thlap lehnghal chuan a dân a dang dawn êm asin.

##

"Zosangmawi," i nu ka ni lo tih tu nge sawi? Ka nu Lalmuanpuii thinrim awki vin ṭhat chu ka melh rum ûl a. Min bum ni a ka hriatna hian min tina hlê.

"Ka nu dik tak i ni nge ni lo, tih chiah a ni ka hriat duh," tiin tukverh bulah ka va ding a, ka pa a hna thila a zin lai a ni a, ka nu Lalmuanpuii nen chiah kan awm lai chuhin he ka thu hriat hi ka sawi chhuak ta kha a ni a, pa Zirsanga ka zawh lahin min chhâng ṭha duh dêr lo.

Ka hriat tirh tê ata tawh tuna ka nu lo hi nu dang ka neih âwm ka hre lo va, Lawmsangzela ka nau-in thla thar maiah nupui a nei dawn tih ka hriat ruala ka thu hriat tel chu Lalmuanpuii hi ka nu tak tak a ni lo tih leh Zomuankimi, a nau fapa ka ni tih hi a ni.

Ka nu thinrim hmel sen awp awp chu hmu reng mah ila ka zah zo tawh lo. "Ka nu dik tak hre chhuak tur hian ka bei dawn khawp mai, ka hrechhuak ngei bawk ang," tih pahin ka room kawngkhar ka tlawh ri bur a, ka kalh zui nghâl hmak.

Ka wardrobe-a whisky ûm hnih ka dah chu pakhat phawrh chhuakin rûi hnâp khawpa in ka tum a ni.

Kei hi Zosangmawia ka ni a, Lalfakhlua leh Lalmuanpuii te fapa upa zawk niin ka hna aia ngaihpawimawh ka nei lêm lo khawp mai. Chuti a nih vâng chuan inah ka awm tam lova ka pa sumdawnna workshop pawh ka tuipui pha meuh lo. Ka nau Lawmsangzela kutah ka dah hlâwm tawp a, kan unau hian kan inhmangaih hle bawk.

Thla thar maiah nupui a nei dawn tih ka hriat hian ka nuih aza deuh, a û zawk min neih khalh a tum miau si a, a nupui tur Lunglei lam mi Rinsangpuii pawh ka la hmu chhin eih lo.

Thinrim inseh ruh ṭeuh chungin whisky no khat ka tlâk pawp a, ka hna thawk tur hi chuan lem zeuh ṭûl châng a awm ve ṭhin.

Ka nu dik tak hmêl eng tin nge ka hriat theih ang, tuna Lawmsangzela nena kan nu inṭâwm hian min duatin ka nu tak a ni lo tih hre miah lo khawpin min enkawl a ni a, police a ni nâ a, a fate min enkawl danah sawiselna tur ka hre lo. Mahse, ka lakah zêp annei tih ka hriat nî aṭang khân ka be khât ta khawp mai.

Ngaihzawng erawh ka kum phû lovin ka nei tam tawh a, tlangval lerh tia min sawi pawh hi thil ni âwm tak a ni. Ka nei rei thei lo mai pawh a.

Pa Zirsanga fapa Rafaela nen kan naupan lai chuan kan inkawm ngeihin unau ang maia in en ṭhin kha kan ni a, tunah erawh zirna avangte leh hna thil avang te in kan inkawm uluk ta viau lo. Kan inhaw ta tihna pawh a ni chuang lo a.

Ka nu ṭawng lâwng lâwng ri ka hre pha reng a, a thinrim hlê tih a aw aṭang chuan ka hre mai, ka zawh dan teh tawp kha a mawi chiah lo tih ka hre tho a;mahse, kawng dang awm bik hek lo, ka mizia nen a in pha man tawkah ka ngai.

Nupui neih chu sawi loh a tin pawh ka la tinzawn hmain ka nauvin min neih khalh dawn chu a ni a, 'min dinpui rawh' a la ti tak deuh deuh a.

Whisky ûm chanve dâwn ka in hnu chuan ka thluak vir mup mup thunun tur pawhin ka insawrbing thei meuh lo chu a ni e.

"Zosangmawi, kawngka rawn hawng rawh," ka nu bawk.

"Ka ṭawng i hria em? I u Duati a lokal a nia," tiin kawngkhar a rawn sâwi dawt dawt a, Duati hi Rafaela û chiah a ni a, ka zah deuh ṭût ṭhin.

Vawikhat mah 'u Duat' tiin ka la ko ngai lo a, ka mâwl biak tawp zel, nula nalh leh mahni lu zo veh vawh a ni a, a naute nen inkawm ṭhin mah ila ka be tam lutuk lo, a kianga ka awm hian mi thunun theihna riau a nei tih ka hre tawh tlat alawm.

"Hey, Zosang, kawngka lo hawng rawh," tiin ka room kawngkhar a rawn bêng dat dat a, rûi mah ila ka hawng lo ngam teuh lo.

Lâi ru zetin leh ka nu laka ka thinrimna dah ṭhain kawngkhar ka hawng ta a.

B+>[BeckirafARenthleI]<+®®

THE RAPSAGYAN FAMILY

Becky Rafa Renthlei(-BRR)

Duati of Rapsagy.

Zosangmawia room lian hek hawka ka pên luh rualin zu rim a nam nghal huk a! He pa hian eng nge a hriat le? A mah a lianin a sâng ṭha si a, kawngka biang vuana âwn deuh ṭaiha a ding chu kal pêlin, "Zu in kha a nuam viau em ni?" Tiin a khum bula semi sofa inhûng-ah chuan ka ṭhu tharh a.

"Eng nge i lo tih dâwn?" Sehchilh nawk nawka min chhânna chu engah mah ngai lo hian, "Zu in kha thil ṭûl ber a ni lo a nia, hetah lokal teh," tiin ka hûi a.

Kiai suk chung hian, ''ka u Duati i ni lo tiraw?'' Lung nih loh hmêl zetin atih zawm leh a.

"I pianpui û ni lo mah ila nang aia upa ka nih avangin 'u Duat' tia min koh tho a ngai," ka ti lui ve ngat.

"Hus! Ka ko nguar ang che," kal ngîl tum, thei si lo hian a rawn pên phei ang nawk nawk a; hun dang chu ni se ka hau hrep ang. Mahse, zu rui hau hi awmzia a awm lo tih ka hrechiang tawh a, ka hau duh a nih chuan a ruih reh hun ka nghâk mai tur a ni.

Khumah zangthal zâwngin a mu a, a mitmeng davâ zet aṭang chuan a rûi hlê tih ka hre mai, nu Muanpuii'n nichin mai khân a thinrim chhan min hrilh tawh a, Zosangmawia nu dik tak ka hre reng; mahse, kan chhungkaw kâ aṭanga chhuak tur a nih loh vângin ka sawi thiang lo hrim hrim.

"Ka nu dik tak ka hre duh," a rûi ṭawng nawk nawk haider sakin a kiangah ka va ṭhu a, a hriat duh tak hre tur hian a luhlul a chhuah dawn tih ka hre sa vek bawk.

Kei hi Duati ka ni a, Zirsangliana leh Remruatfeli te fa upa ber niin M.com ka zawh felna pawh a rei tawh a, tuna ka hna hi a nghet lo mah nise nuam ka ti viau, ka pi leh pu te chênna hmun Lungleiah ka awm tam zâwk mah.

Ka nu leh pa aṭanga kan chhungkaw ṭhian nu Muanpuii ta tur kawrlum ka nu'n pe tura min tih avangin an inah ka va kal ta kha a ni a; Zosangmawia rûi bûr ka va hmachhawn ang tih ka ring pha lo hrim hrim. He pa hian eng lai mahin min ngaina ngai lo tih hre mah ila ka be lui ṭâng ṭâng zel.

Kei aiin kum thumin a naupang zawk nghe nghe a, Rafaela nen an inkawm tam khawp mai. Kan naupan lai kha chuan kan inkawm nasa a, nula/ tlangval kan nih hnuah ka hmu zen zen ta lo. Forensic lamah a thawk a, hna nghet a neih tâk hnu-ah hian vawihnih khat bâk ka hmuh leh pawh ka hre lo.

"Ka nu dik tak ka hre duh," a ngai bawk a rawn sawi chhuak leh ta! A shirt hâk lai hlih tumin a lo ṭhu chhuaka chu pawh chu a ti hleithei lo a chhâ chu a ni e.

"Zosang, ṭawng ṭawng lo khân muthilh tum rawh, tlangval puitling i ni tawh a, khatia awm kha thil zahthlâk tak a ni," a kawr hlih theih loh phelh sak turin khumah ka lawn kâi nghal a, nau ang maia ka en ṭhin a ni bawka chuti tehchiamin ka vêngthâwng lo.

"Duati..."

A ve lutuka! A u rual ka ni a, ka hming te chuan min la ko ve a.

A kawr ka phelhsak zo chiah tihah a kut ding lam rawn pharin ka nghâwngah a uai hnâwp a ni ber. Amah a rit si a, ka chelh hneh teuh lo! Nu Muanpuii ka ko ta ringawt a.

"Eng eng ni ta?" Hlauthâwng hmêl pu chungin a rawn tlân lût a.

"Zosangmawia em em hi chu, zu in hi a chîng dawklak a, a pa lo haw hunah a châk lovang, Duati, tikhân lo awmpui rawh aw, i nu ka lo hrilhfiah mai dawn nia, ka thil tih lai a laklawh si a; bâkah tunlai chu a kianga awm tur hian min duh vak lo." Nu Muanpuii ṭawng bawrh bawrh lai chuan Zosanga pheikhawk ka lo phelhsak ve thung a.

Kan chhungkaw hnih hi kan inpawh em em a, kei phei chu min duat hle, fanu a neih loh vângin min ngaina a; a thil siam eng eng emaw pawh min pe fo ṭhin. Zosanga khuma let ngût chu a nu'n a thlêk vang vang hnu-ah kan pahniha awm turin min chhuahsan ta a, tlailam dar nga a ri chiah.

Ka nunah mipa sawi tham ka nei lo a, ka zirlai ngawt ka buaipui avangin ngaihzawng mumal ka nei meuh lo. Mahse, tun hnai deuh aṭang khân ngaihven ve deuh chu ka nei, Lalnunpuia a ni a, Lungleia DFO nilai a ni nghe nghe.

Zosangmawia muhil hmêl chu uluk lehzualin ka en ta a, a sam dum fai sar leh a mithmul buk lam deuh te, a hnar ngûl sâng vah te chu a nalh riau pek. A lerh êm avang hian ka be ṭha peih vak lova, Rafaela nen an inkawm phei chuan nula chanchin lo sawi tur an hre miah lo.

A ruangâm sei zuar te chu a hmuhnawm ang reng, kawr a ha tawh lo va, a jeans kekawr kâwng a lo phelh thâwl vek tawh bawk. Nula tam tak tân chuan duh loh chi ninghal lo chuan, damdawi hmanga injection ngai lo tih hriat takin a thisen zâm a fiah kalh a, a vun ngo hluak lo mah se a 'pa' ru riau alawm. Mipa lerh hi ka ngaithei dêr lo pek a(h).

Nilo, ka unaupa ang hiala ka en hi ka lo chîk ve em em a, zahthlâk lutuk. Khuma a phone dah a rawn rîk chuan chhân sak pawh ka tum hran lo; mahse, vawithum lai a rîk nawn tâkah chuan ka pick ta a, "Khawiah nge Zosanga?" Hmeichhe aw tliang ral ri chu ngaihno a bei teh chiam lo. "Tunge i nih?" a ti zui leh zat a.

"Keimah Duati, Zosanga a muhil a, nakinah lo be mai rawh aw.." ṭha takin ka chhâng mai a.

"Tunge i nih? A phone engtin nge i lo chhân theih a, zanin a dine out tur chuan ka inpeih tih lo hrilh rawh aw," a ti leh zung zung a.

"Min lo hrethiam la, zanin chuan a chhuak thei kher lo ang, a u Duati ka ni e.." ka ti leh a.

"Û hmeichhia a lo nei a nimaw! Nge, tunlai style-in a u lem lem?"

"A mah i la zawt dawn nia, ka dah," hmak mai a.

Khatiang mihring dîlchhut lutuk biak reng kha ka mizia nen a inrem awkawng lo ve a.

Zosangmawia tehreng pawh hi hetia han chahthlâk rêng rêng, hna nghet a neih hnu hian a mizia a dang ta tlatin ka hria a, ngaihzawng a nei leh duahin a nia ka rin, ama pualin Grand i10 car a nei a, in a nei hrang thlap bawk. A nu sawi dan phei chuan Lawmsangzela, a nauvin nupui a neih hunah in dan a tum a niawm e.

A phone gallery ka lo en mial mial lai chuan a rawn luak thut a, ka phu nasa teh e.

"Hey, i va'n che khir tak.." a luak puat puat a, ka sandal pawh a luak khum vek nia!

Nu Muanpuii thinrim lutukin a rawn lut a, "Duati, bathroom-ah kuah phei ila kan leih harh dawn nia," Zosanga a sâwi nawk nawk a, a rawn rûm ṭuah ṭuah ringawt.

Chumi hnu chuan thei leh thei lovin bathroom lamah kan kuah phei ta a, "Mahni in-control zo lo khawpa han awm chu leh!" Shower hnuaiah kan dinpuia amah chauh a phuh theih bik si lo nen kan huh tel ve ta vek a.

Tiang em ema a nu thinrim hmel hi ka la hmu lo, a taksa huh pawh ngai pawimawh lo hian a fapa harh hma Shower hnuaiah kan ding ta a, pakhat mahin ka phunnawi lo! Mak takin Zosangmawia khawngaihna riau ka nei tlat nia, ti hian a nu tak pawh hre lovin a awm ve mawp mawp chu a ni si a, thudik a hriat hunah engtin tak ngai ang maw. A nâ in a hrilhhai dawn mang e.

Nu Muanpuii tân mihrang ka nih lêm loh avangin a fapa thawmhnaw a thlâksak lai chuan ka lo ṭhu ve reng a. "Min khawih suh, keimahin ka ti thei," Zosanga aw vîn ṭhawt avang chuan ka phu zawk, a nu kut a vai kiang sawk a.

"Min khawih a ngai lo a, min buaipui ka ngai hek lo, ka nu dik tak awmna min hrilh hma chuan ka harh fîm hmel hmuh inbeisei suh ang che," rûi chhia angin a lang tawh miah lova a mit sen rûm mah se intih harh a tum hle tih ka hre mai.

"Mama, tiang khân ṭawng ṭhin suh, i inchhîr palh ang e," a nu in a tih chuan rum zet hian a melh a, chutah kei min en lehin, "Haw tawh rawh, an lo ngaihtuah ang che," a ti dam leh thlup lawi si.

"Duat, chaw ei ve rawh aw, kan va siam ang a, Mama nen in ei dawn nia," thinrim lo ang taka nu Mp-i a ṭawng chuan mak ka ti viau. Zosangmawia a hlau tihna ni lovin a thinrim duh miah lo tihna zawk a nia, nichin lawka a hmêl leh tuna a hmêl chu dang tawh tak a ni.

Police te hi an duhnaah an insûm thei viau tih ka hriat phah. Ani pawh a pension ve ṭêp tawh a; police tih takah a ri leh ṭhak zel.

"Ani kha chelh ve a ngai lo, ka va thlah ang e," Zosanga'n a tih chuan, "Chaw ka ei ve dawn alawm le, ka rualin ei la chumi zawhah min thlah dawn nia," ka ti ve tlat a, a nu mitmei ka man thiam miau hek.

Zanriah kan kîl chhung zawngin Zosanga a ṭawng miah lova, an nula leh nu Muanpuii erawhin min be char char thung. Lawmsangzela workshop aṭangin a lo la haw ve lo a; ani hi chu a rilru a tluang purh tih ka hria.

Nichin maia rûi chhe zet kha rûi lo ang hmiahin a lang leh tawh a, a sam huh chap leh a hmêl tûm hmuk te chuan hmâna Zosangmawia kha anna pakhat mah a nei lo, chaw pawh a ei tlêm viau.

"Duati thlah chu i tum em ni?" Tia a nu'n a zawh chuan, "Amaha haw tîr nân a tlai tawh i ti lo em ni? A nu in a ngaihtuah tawh ang chu, nu tak tak tân fate ngaihtuah a na dâwn lovem ni?" Mei nei takin a'n ṭawng lui leh kher a, ngeiawm thiam ve tak a ni.

"Thlah ka ngai lo a nia, Taxi a tam lutuk," tih pahin dining table ka thawh san a.

"Ka thlah ang che ka tih chuan ka thlah ngei bawk ang che," chhân zui theih miah lohvin a kal sawn zui nghâl daih, an nula pawh a hawi phâwk hrâ alawm.

"Fimkhur turin hrilh rawh aw, ka ngaihtuah zia i hriat kha, hmun danga a lên kawi ai chuan in inah pawh riak mai rawh se, i nu leh pa ka hrilh tawh kha, in hnena a awm chuan ka ngaihtuah lo a nia," tia nu Muanpuii ṭawng lai chuan a room lamah thil a tiri bur bur a, a naupan chhiat thlâk ang reng.

"Mama luhlul dan em em hi chu aw, a nu ka ni lo tih lo sawi tu hi ka hriat chhuah hun hunah a châk lovang, ṭawng theih lutuk leh mi chhungkaw inkâra inrawlh tam lutuk ho hi ka hua a nia," ati zui bawrh bawrh a.

Chaw eina vêl tihfel ve ka tum chuan an phal lo nasâ, "Mama bulah khân va phei rawh, i lakah chuan a thinrim ngam loh kha," room lam panin min nawr dat dat a.

Zosanga room kawngkhar ka hawn rualin ka kutah a rawn vuan chat a, a rûi leh ta emaw ka ti hman. "Ruati hnenah ka û angin i lo insawi vel a ni maw, a neitu thu lova phone khawih hi mi mâwl zia," a ti nghut a.

"A ri bengchheng êm alawm,"

"I ta a nih loh chuan ka thil eng mah khawih tawh suh ang che, Ruati nen kan dine out dawna;mahse, ka thlah phawt ang che."

"Khati chung khân chhuah i tum a maw!?" Khum bula a whisky in bâng chu a jacket chhung lamah a pâi a, ruih leh a tum tihna.

"Ka û i ni lo ka tih tawh kha, eng lai mahin û angin ka en ngai lo che a, ka en bawk hek lo ang che."

A ṭawng dan ngeiawm zet chu ka run zâwng tak a lo ni ve kher nen, "I û nih ka châk ring suh, nih pawh ka la tum chhin ngai lo," tih pahin kawngkhar lam ka pan a, min thlah lo mah se hâwnna tur tezawng ka nei ve chiang em mai.

"Ka thlah dawn che tih i hriat kha," dawhkan chunga a wallet dah la in min zui chhuak nghâl a, ka inthlah tîr dawn lo chiang, duhsaktu pawh hre hlei lo, a duh duh a sawi ve ringawt a, a thinrimna ka chunga lantîr kher hi thil ṭûl ber a ni lo.

Nu Muanpuii ka mangṭha hnuah Zosangmawia lo ding reng haiderin pâwnah ka chhuak ta a. Ka hnungah a lokal tih a pên ri khap khap aṭangin ka hre mai.

"Rafaela a awm em?" Tia min biak chuan ka chhâng duh miah lo a.

"I beng a ngawng ta thut em ni, nge, ka phone i lo pick vanga ka ṭawng kha i ngai haw zâwk?" Dam thluama tiin ka bânah a rawn vuan a.

"Min thlah ka ngai lovang, nanga zurui thinchhe zet kiangah khân ka awm peih ring suh," min vawnna thinthlâk tumin ka tâl chat chat a.

"Nasa ve siah, i nasa mah mah," car kawngkhar hawngin min nawr deuh dat a.

"Zosangmawi.."

"Eng nge, i upat zawk avang khân ka hmingpuma min koh kher a ngai hran lo, lût rawh," tiin min ṭhut luh tîr hrâm nia.

Nu Muanpuii zah viau lo ila chuan ka chuang lo chiang teh ang chu.

"Ruati nen in chhuah dawn chuan i tlai vek ang e," ka ti sap a.

"Lo buai duh suh, ka buaina tur a ni," a sawi zawh rualin driver seat-ah a rawn ṭhu lût a, a hmel nelawm loh zet hian tunge a chhun pawh ka hre hrep lo ve a, thinchhe keh lutuk.

Chak zeta min tlân chhuahpui chuan ka ngawi ngal a, a zu pâi kha ka hre chhuak rauh rauh mai, midang bulah khatiang zât a in zo a nih chuan a che fuh miah lovang.

Ruati kianga a kal lohna tur chhuanlam ka siam ngei a ngai dawn a nih hmel.

##

Rafael Remruattluanga of Rapsagy

Ramtei nen ka inhmuh zan aṭang khan nithum a liam tawh a, kan inneih hun tur ni leh thla pawh an ruat vek tawh. A rûkin ka nui suk suk a, bial zaipawl conductor ka ni a, kohhranah mawihnai taka nupui ka nei tur leh ka members puite nuamti hmêl tur ka mitthla phei chuan ka phûr tawh viau.

Mokawr leh thil ṭûl dang en turin remchâng hmasa berah kan chhuak dâwn a, ka nu leh pa pawh an phûr ngang mai. U Duati a lo haw phei bawk a, ka dinpui tur Zosangmawia biak ngei ngei ka ngai bawk, a hnaah chawlh lâk te a ngaih dawn avangin hrilh hriat ran a ṭha hrim hrim.

Ka room ka chhuahsan chiah tihah, ka rilrua lo awm mêk, Zosanga leh u Duati rawn inzui lût ka hmu zui zat a, a hmêl phelh phung chu nidanga ka la hmuh ngai loh thil a ni.

"Hey bro, lo call che ka tum," ka tih chuan a kiai suk ringawt a.

"Rafa, ih..Zosanga hian englo a pâi.." nui var var chunga ka u thil sawi chu ka man nghal vat.

"Rafael, naktukah kan inbe dawn nia, zanin chu ka hman lo," chhuah leh nghâl zuk tum a!

"Ang lo lutuk, lokal teh.." ka pan hnai nghâl a, a hmêl a pha dui nia.

Zosangmawia te inah u Duati a lêng tih ka lo hre miah lova hria ila chuan ka phei ve tur a nia, ka buai lutuk avang hian ka hrilh har deuh em maw ni.

Naktukah a ti tak nâin zaninah amah a lokal thova sawipui ngei ka tum nghet tlat, a kianga ka din chuan zu rim a nam thar thar a, a koki-ah vuanin room-a luhpui ka tum chuan a ṭang deuh ṭung a; ka û a melh nghâl vat bawk.

Anni pahnih hi engtik laiin nge an lo innêl hman, tunhma aṭang tawhin Zosanga hian ka û a zah tlat zel a, zanin chu a kam nam deuh nen a zahlohna a dah ṭha tepawh a ni mahna.

"A bialnu nen an chhuak dawn a tikhawtlai lo mai rawh," u Duati'n a lo ti ta rêng a.

"A mi Zosang?"

"A tlai tawh em mai.." ati leh lawi si.

"Zosang, kal duh tawh lo mai rawh kan inah lo lêng la, kan inkawm dawn nia," ka u in atih leh chuan a nui suk a, a rui chiang he mihring hi.

Chu mi hnu chuan ka room-ah kan lût dun ta a, ka rin ang chiahin a zu pâi a rawn phawrh nghâl vat a, "Heta in i phal chuan ka lo lêng ang a, i phal loh chuan ka haw ang," an ti nghal ringawt a.

Sim tîr tum mah ila Piantharna tak tak a neih chuan si loh chuan ka tân pawh a zu in sawisel reng hi a nuam miah lo.

"Ka room-ah chuan in lo la, u Duati room balcony-ah va in rawh, ka nu te lo haw hmain,"

"I û in min hau anga sin.."

"Hau lovang ka sawi dawn alawm lokal rawh,"

Ka û room-ah lût turin ka mitmei a, no leh tui laksak tumin choka lam ka pan thung a, ka tih tur a ni miah lo; mahse, titipui ngei ka duh bâkah zilh tepawh ka duh a, chuvanga in phal mai ka ni.

Ka nu hian zu in a ngaithei der lo, tun hmain ka pa hian a lo in nasa deuh niawm tak a ni, an lo lêt hma a in zawh hman tîr ngei ngei a ngai.

"Naa, in belh tawh suh, tlaiah pawh tikhawp khân i rûi a, i nu thin arim êm kha,"

"Tih thinrim ka tum rêng alawm, kan chhungkaw boruak i hriat ve loh chuan min khap tum duh suh, ka rilru nâ hi tuman in hrethiam lo," Zosanga leh ka u inbiakna ka hriat chuan tlêmin mak ka ti deuh.

An inbe tam lo a, an in chu e kha ngai hek lo, a hma phei chuan ka û awm laiin Zosanga a lo lêng ṭha duh lo kha a ni a, tunah ka û hriat vek thil eng nge an chhungkuaah thleng tih ka hriat ve loh a awm em ni? An inkawp lo tih chu ka hre chiang bal thung a.

Room-a ka luh ve hnu chuan an ṭawng tâwp chat a, balcony lamah kan chhuak dun ta a.

"Nupui ka nei dawn tih i hria tiraw?" Ka'n ti hmasa tê tê a.

"Hre nêlnual e, ka nu-in a sawi alawm,"

"Ka ṭhian atâna ding turin ka duh che a.."

"Tak tak aw," a phûr hmêl ngang mai.

"Nang lo dinpui tur ka nei lo a, Ramtei hnenah pawh ka sawi zing khawp mai che." Ka tih chuan, "Kan thawmhnaw inbel tur ka tum i i phal chuan ka ding dâwn chiang,"

"Teuh lo, keima'n ka ngaihtuah vek ang, naktûk tûk lehah kan chhuak dawn nia," ka ti a.

"Hey, a hmingin hna nghet ka nei ve a, ka tum ngei tur a ni," tiin nokhat a tlâk pap a, in ve tura min nawr ngai lo hi thil mak tak a ni. 'Zuheh' tia sawi tur ni lo mah se a in zauh zauh ṭhin tih erawh ka hriat hnu vek a ni tho.

"Chi loh lutuk.." ka nui hawk a.

"Ka neih ve hunah i tum thung dawn nia," ati awlsam leh mai a.

"Ramtei ka phone anga i din theih tur thu ka hrilh chuan a lawm ve ngawt ang," ka phone phawrhin ka call zui nghâl a.

Vaaithum a ring ral ṭhak hnuah mipa in min rawn chhâng chu ka sa zak mai.

"Khawnge?" Ka ti mâwl tawp a.

"A inbual.." Famkima aw hi engtikah mah ka hai ngai lovang.

Tunah zan dar 9 a pêl tawh a, Ramtei inbual hun a nih pawh ka hre lo, ka hna aṭanga ka haw tlai avangin lên ka tum loh thu ka sawi a, bâkah innei mai tur kan nih vangin lên tlut tlut kha a mawi vak loh ka tih vâng a ni.

"Ka rawn call tih lo hrilh ang che," ka ti ve hmak a.

Thîkthu tih lan hun a ni tawh lo tih hre mah ila ka lawm tehchiam lo. Zosanga makti hmel chuan min ti hrilhhai bawk.

Ramthansangi zaninah ka biak ngei ngei a ngai a ni tawp mai.

B+>[BeckirafARenthleI]<+®®

THE RAPSAGYAN FAMILY

Becky Rafa Renthlei(-BRR)

Chapter-3

Rafael Remruattluanga of Rapsagy

Zosangmawia rûi chuan a bialnu Ruati a hnê thu leh ngaihzawng neih a tui loh thu a sawi chhên a, ka mood a off vek tawh. Ramtei inbual hlâna Famkima'n phone a lo chhâng zet kha chu paidam a har ṭalh ṭalh ê.

Mahse, fiahna awm miah lova thîkthu pêk chhiat viau hi thil ṭha ber a ni lo a; hmaichhanah erawh ka sawi nawn ngei a ngai dawn a ni. Amah Famkima tak pawh warning pêk hial ka duh a, innei mai tawh tur kan nihna lâiah hmingchhiat palh pawh thil awl tak tur a ni bawk.

Zan dâr 11 ah u Duati'n ei tur min rawn siam a; Zosanga meng sen rûm ngun taka en chung hian, "I hringnun tihchhiat vek i duh loh chuan zu in hi bansan rawh, unau hrilhin ka hrilh che a nih chu," ngaihno bei tehchiam lovin a ti a.

"En teh, ka û i ni lo tih vawi tam ka sawi ngai suh se, Rafa, i u hian Ruati hnenah 'a u Duati ka nia' a lo ti pek a.." a ti leh nawi nawi a. Ka nui hawk.

"I û ang ang tho alawm, keini te chu unau ang maia in en kan ni a, a sawi sual hran hleinem," ka tih chuan, "Ka u lovang e.." ner sak chungin zuk ti ṭâlh a.

Ka nu leh pa lo haw hma a mut fel tîr hman kan duh avangin ka room-ah kan kuah lût ta a, hetiang te chuan engtin nge a inkhalh haw tehreng ang ni. Ka room-ah, ka kianga mu turin ka ti ta a.

Ka whatsapp-a Ramtei msg tlar thla dul chu ka chhiar thla dan dan a. In sawi thiamna vek. Tûn hma aṭangin midangah rinhlelhna tur chhe tê mah ka hre ngai lo, tun hnai inneih kan tum aṭang hian kan pahnih inkâr boruak a dang ta deuh tlata hriatna ka nei nghê nghê.

Naktuk hian Bial zaipawl uniform lam a ngai a, hmeichhe lam form buaipuitu te ka hruai tel a ngai dawn bawk a, ka rawngbawlna hi Ramtei hian min support viau lo mah se min dâl ngai lo hrim hrim, amah zawk ka hau tama a nun zalên ru riaute hi miin an hriatpui lo na a, kei chuan ka hre kar.

A ṭhat lohna sawi fak tur hre si lo hian a nun a dahlau ru riau tih te ka ngaihtuah kâi zêla ka dam meuh lo.

Zosanga a muthilh fel thlap hnuah ka room chhuahsanin TV dahna lamah ka phei a, ka nu leh pa an lo la meng nia!

"Bawiha, Zosanga chu eng nge a an a?" Ka pa'n min zâwt sup a.

"A muhil tawh, eng hian nge tibuaia hetia rilru mumal pawh pu thei lova a awm tlat ni!" Tiin ka nu bulah ka ṭhu ve a.

"Kan thusawi tur hi ngun takin ngaithla ang che, Duati chu kan hrilhfiah tawh a, Zosanga nu dik tak hi a thi tawh a.." mak tih lutuk vângin ka meng deuh kâwk.

"Maw!" Awih lo lutukin ka nu leh pa ka melh tawn chhên a, chutah,"A nu, a pianna nu hi Zomuankimi a ni a, i nu Muanpuii phirpui naupang zawk a ni, Zosanga a neih dâwn ṭêpah car-in an accident ta kha a ni a, Zomuani boral hnu hian i pa Faka'n a nupuia û Muanpuii hi nupuiah a nei leh ta a ni." A aw a thian kharh a, he ti ang rêng rênga ka pa inti mi tak hmel hi ka hmuh pawh ka hre lo.

"A nih Lawmsangzela hi..?" Tia ka zawh chuan, "Ani saw chu Muanpuii leh Fakhlua fa a ni a, a nihna takah chuan Zosangmawia nen an en hrang ngai lo, a fapa a rîla rah nen a enkawl dan a ngai reng; Zosanga phei hi chu Muanpuii'n harsa tak kâr aṭanga a enkawl a ni a, khâng hun lai khan Faka rilru a hah thei a nia, an in dang ve rap rap alawm," ka pa thusawi chuan ka beng a verh hle mai.

"Zosanga hi ṭha taka hrilh mai tur alawm lê." Tiin ka maimitchhing vang vang a, mak ka tih dan leh min den dan pawh heti hi a ni a, ani Zosanga tân phei chuan hriat chi pawh va ni suh.

"Eng tin pawh zâwt che sela, a unaupa leh a ṭhianpa i nih angin a kal sual tur i vên tlat a ngai a nia, nakinah a nu leh pa in a hun an tihah chuan an hrilh mai ang, mihring ṭawng thei lutuk ho hi ka haw teh a nia," ka nu in a lo ti ve bawk a.

"Zosanga'n i hriat ringin a zâwt mai thei che, i kâ vawikhat pawh âng suh ang che, i nupui tur Ramtei pawh hrilh hriat kher a ṭul lo a nia, a nu leh pa kâ aṭanga a hria a nih loh chuan a na lutuk ang," an thusawi chu dik ka ti khawp mai.

Chumi hnu chuan nupui ka neih tur chungchâng kan sawi leh a, nu leh pa thlauhthla zâwng leh an natna thlentu ni lo tura ka nupui ka enkawl dan tur nen lam min hrilh, "Fapa mal, kan neihchhun i ni , i û leh i nau i thlahthlam tur a ni lo a, zan khat mitchhin pawh lo tâwk ila i farnute hi i kuta awm anni tih theihnghilh ngai suh ang che," ka pa, Zirsangliana hi chu ka va'n ngaisâng tak êm.

Ka nu nen thinrim inṭhen ngai khawpa an inhauh ka la hre lo va, ka naupan laia zû a in zeuh zeuh lai pawhin ka nu in dam thlap leh zahawm taka a hau ṭhin kha erawh ka la hre rêiruai chauh.

Thingpui kan in leh tê tê hnuah mu turin ka phei san ta a, ka nu hi chu a ṭawngtam lêm lova thil a sawi ve zen zen lo bawk. Zilh kan ngaihnaah pawh ka pa zawk hian min zilh mai ṭhin a ni.

Rilru nuam lo zetin Zosanga bulah ka va inthawlh ve ta a, ka khawngaih a ni tawp mai, hna sâng tak neiin a duh duh nei mah se la a nun chhungril a hlim lo tih ka hre ve tlat. A nau Lawmsanga a hmangaihzia pawh hriatpuitu ka ni a, ka lainat telh telh.

##

Ramtei te dawr ka thlenin zing lam dâr 11 a ri tawh a, min hmuh veleh, "Ka msg pakhat mah min reply lo," a lo ti nghâl a.

"Famkima'n a reply thung ang che chu," ka ti ve ngat.

"Rafael, tun lai i mizia hi a mak ka ti, palâi in tîr fel tê tê a, midang i thîk leh si.."

"Ka thîk tih i hriat chuan kâwm lo mai rawh, tun ang huna mipa in lêng dang neih kha thil mawi a ni lo tih i hriat ka ring," ka ti ve zel a.

"Famkima i sawina a nih chuan ani nen kan inkârah eng mah a awm lo, i duh chuan ka awm laiin zawt la, be rawh," thinrim meng ling hlar chunga tiin min en kal a.

"Ka zawt lovang, engtikni-ah mah ka zawt lo ang, ka ngaih dan a nih loh chinah chuan keimah Rafaela dik tak i la hmachhawn dawn nia, insiam la, Zosanga te nen kan thawmhnaw tur en a hun tawh, hun kan ngah lo tih i hriat kha, ka ṭhian pa leh ka unaupa ni bawkin min din pui thei tur hi ka lawm hle a ni, Sangzuali pawh kan sâwm phei mai dawn nia," thinrimna leh ka lungawi lohna dah ṭha hmiahin ka ti zung zung a.

Mak tih hmel taka min enna chu ka hre lo der thung, Sangzuali hi Ramtei ṭhian nghet a ni a, a dinpui tur a ni bawk.

After 2 hours

Kan thawmhnaw hâk tur kan order fel vek hnuah Zosangmawia bialnu Ruati kan han hmu hrâm pek a, ka ngainat zawng a ni leh tlat lo.

Ramtei nen an inhriatsa avangin nêl tak hian an inbe bawrh bawrh a, keini pahnih erawh kan nui suk suk chauh a ni. Mokawr tur ka nu leh pa'n a man an tum vek dawn a, hawh chawp kha ka nupui turin a duh leh tlat lo va, a bîk liau liau kan order ta kha a nia, a namai dawn lo khawp mai.

Amaherawh chu fapa mal nupui nei tur ka ni a, kan phâk tâwka a ṭha berin min buatsaih sak dawn tih ka hre miau alawm.

Bial Zaipawl form lam turin kan kâwi leh a, mipa thawmhnaw zâwk keiin ka buaipui a, hmeichhe hâk tur lo buaipuitu chu hmân zana ka sam chungchânga min khak faktu Lalrindiki lek kha a lo ni.

"Rafael, scooty-ah ka phur sêng si lo a, i car-ah kan dah ṭhen mai dawn em ni?" Nui sâng hian min rawn bia a, ka hmingin min ko hmasa ve ngei.

"Pawi chuang hleinem, i duh leh avai khân lo dah la, kan inah kan dahkhâwm rih mai dawn nia, zanin hlazir a ni a, ka lo keng leh mai ang aw,"

"A va'n ṭha dawn tak, i kal dawn tih hriata i kuta dah law law tur a nia," polite takin a ti siam siam a, hmân zâna a ṭawngkam nen chuan dang lam tak a ni. A thawmhnaw inbel simple zet te, a hmaia make-up hmuh tur tlêm riaute chu a hmêl hmuh tinuamtu a ni.

Ka ṭhiante ho nen inhmel hriat tîrna ka nei a, Ramtei mitmeng alh deuh phât chu ka man reng, zaipawla ka tel a duh vak lohna chhan pawh a thîkthu chhiat vang a ni tih ka hria a, Pathian rawngbawl aia thlan tur chuang ka nei lo tih ka inhriat vângin ka ngaipawimawh duh lo mai a ni.

Uniform thar diai chu Zosanga leh Diktei nen car-ah kan dah lût a, Ruati leh Ramtei phun sep sep ri ka hre pha reng, 'Bial zaipawl ngaihzawng neih chu hun âwl an nei lo teh a nia, nupa innih hunah a chhuahsan reng dawn che a nih kha' tih ang reng vel.

Zosanga bialnu hi mi rilru tluang pangngai a nih ka ring lo bur.

Diktei nen zâna pawisa intifel tura inbiak kan ngaih thu leh hlazir bânah ka lên tur thu sawiin Ramtei an dawrah ka drop a, chumi hnuah Ruati, Zosanga nen kan in lam panin kan tlân chhuak leh ta a, nizan aṭangin a la haw miah lova kan inah a motor pawh a dah ringawt.

In kan thlen chuan a car a awm miah lo!

"Nu Mafel, khawnge ka car?" Tiin ka nu a ko lâwng lâwng a. Kan nula zawk lo chhuakin, "Pi chu Vawk damlo jection turin an lo ko a, a kal chiah, u Duati'n i car a hmang a, lo sawi mai rawh ati a rei dawn lo." A rawn ti ta a.

Zosânga a nui rei leh dawn lo e, ka û nen an inbakkaih leh dawn chiang. Eng ati nge ani pawh a lo hmansak reng reng ni!? Zan lama kan hlazir tur en lâwk a ngaih vângin room-ah ka luh san ta a.

##Zosangmawia of Segundo

"Zosang, in workshop-ah ka pa car kan check tîr daih a, ka lo hawh sak che, min hau vaih," Duati'n a rawn luha min hmuh rual rualin a rawn ti lût a.

"Petrol man min pe rawh.." ka nui duh miah lo va, ka lâi deuh em maw ni!?

"Uikawm sia e, i hlawh kha zu in nân i hmang ui tawp si lo a, vawikhat lek i car hman pawhin a man min dîl a nia," a ti nai nai a, ka nuih aza deuh.

'Nula senior' ti a sawi tur ni lo mah se, kei aiin a upa hlek a, Duati hmel ṭhat zia hi chu aw, Rafaela û ni lo se chuan ka bêm chiang ngawt ang.

"Kan inah chaw lo ei leh la, zanin tlaiah.." a pheikhawk a tlawhphelh nghâl a, a ke ngo zet leh a ketin fai ṭhah te chuan ka mit a la hlê.

"Ka car i hman manah kan inah min phei pui la, ka inthlâk ve phawt ang a," kan ina chaw ei ai chuan hmun danga awm ka châk zek zek.

Kar leh hian ka nau nen Lungleia kal kan ngai a, chumi hma chuan kan inah chaw ei ka tum tawh lo, ka pa zin lo haw hma ngeia ka thil hriat duh hi hriat fel vek ka tum bawk.

Mak takin Duati bula ka awm hian ka hahdamin nui hmêl ka lantir thei ve chauh, ka chhungte pawhin anni bula ka awm chuan min ngaihtuah lutuk lo tih ka hria a, chuvanga sâwm ka ni.

"I lo ei leh dâwn tihna mi?"

"Dawn e, ka lo awm char char rih ang, i nau nupui neih hma chu,"

"A ṭha hlauh e, nimin tlâi ang khân i nu chhâng tawh miah suh, thu dik tak chu nakinah i la hre mai ang, lokal rawh phei ang," a ti leh a.

Ka kianga ṭhu chu ka mit sirin ka melh leh zeuh zeuh ṭhin, Ruati nen kan khaikhin chhin vel a, Duati a sâng filawr lak. Ka ngaizawng tihna ni lovin ka ngaisâng ve hrim hrim, kawng tluanin a ti ti phei a, Rinsangpuii ka nau nupui tur fel atih zia leh a hmel ṭhat thu te a sawi a,

"Lungleia i kal hunah min hruai ve rawh aw ka pu te inah kan thleng dawn nia," a la ti tak deuh deuh a.

"I peih te chuan, engtik thleng nge chawlh i lâk?"

"Thlakhat chiah chiah, nang zawk?"

"Thlahnih ka la a, ka nau te inneih zawh law law-ah ka ṭan ang," ka tih chuan, "Ka inti thu ang chu aw, Lawmsangzela te inneih hunah chuan,"

In kan thlen tâk avangin kan ṭawng chhun zawm ta lo va.

In a haw te hi ka huphurhin ka hnê ngawih ngawih, ka nu ka hmangaih lo tihna a ni lo a, min duat zia leh min ngaihsak zia pawh ka hria; mahse, ka nu dik tak an zêp tlat tih ka hriat ni aṭang khân ka na ngawih ngawih a, ka chhungril thlengin min fan chhuak vek.

In chhunga kan luh chuan kan nula leh a ṭhianpa chiah an lo awm a, ka nu awmna zawh ka tum ûk a ka ṭhulh leh. "Lokal rawh ka room-ah," tiin Duati ka mitmei a, kan nula hnenah ka nu kalna a lo zâwt mek, inneihna thil vel buaipui a ngaih tawh avangin chawlh a la a, thlathar mai khi ka nau nupui neih hun kha a ni tawh bawk.

Duati nen ka room ah kan inzui lût a, inbe hluah lo mah ila nuam tihna riau ka nei.

"Ih, Zo, Zu in leh i tum em?" Khumah a ṭhu tharh a.

"In dawn chiang, eng ati nge?"

"E, i in leh chuan ka in ve duh a.." ka rin loh deuh vin a ti a.

"A ṭûl lo nasâ, hmeichhe tân in a ngai lo hrim hrim," ka thawmhnaw thlâkna tur la chhuakin bathroom bulah ka ding a, "I in chuan ka in anga i in loh chuan ka in lovang," ka mitah chiang takin min en kalh nia!

"Tikhân lo ṭhu la ka lo chhuah hunah kan ngaihtuah ṭha ang," tiin ka nui suk a, bathroom-ah ka luh san ta a.

In tîr ve chhin ka châk ta riau, min nêl viau angin lang mah se eng kawng emaw takah min zahna a nei tih ka hre ru ve kar a, nu leh pa hmuh phâkah a awm bik lo a, a rûkin a lo ti ve zauh zauh ṭhin a ni mai thei.

Shower hnuaiah dingin ka inphuhtîr sang sang a, nizan ka ruih dan em em kha thil mak a ni. In ve ṭhin mah ila khatiang em em kha chuan vawikhat mah ka rûi ngai lo a, kan chhungkaw boruak ti hi ni lo se la chuan ka nu in min councelling leh ngat ngat tawh ang chu.

Ka taksa tisa chuang tlâi hmuh tur awm miah lovah chuan shower gel ka hnawih phuan buah a, ka nun khawhar rûkna ngaihtuah duh lova ruih hnâp ka châk kher mai, ka pa lo haw hma chu kan inah riah leh chaw ei ka tum lova, a ṭûl a nih leh Hotel-ah ka insawn mai ang.

"I rei lutuk, i thi der em ni?" Duati aw ka hriat rualin ka meng chhuak chauh va, minute engzat nge ka inbual pawh ka hre lo, ka ding rei thawkhat a ni ang, khua a thim ruih tawh.

Ka khumah a bawkkhup zawngin a lo awm a, a phone a lo kheuh leh ngar ngar tawh. Ka chhuak min lo hmuh ve leh, "I nu a lo haw a, kan inah chaw i ei dawn tih ka hrilh tawh aw,"

"Engtin nge atih?"

"Hmun dangah chhuah tîr suh, zu te kha in tawh suh se, ati," tiin a nui sak a.

"Zosanga nen kan in dun dawn va ti rawh, i duh ve a ni lawm ni?" Ka tih chuan, "I chhe lutuk, i sawi vaih," tih pahin a rawn ṭhu chhuak a,"I in chuan ka in ve tak tak dawn a nia, chuan kan inah kan phei dawn nia," bathroom lam panin a phei a, a shirt hâk sen hlar chu a inhmeh vei phian, an unau an tê chhe lo bawka Duati phei hi chu a luck riau ang.

Bathroom-a a luh hlânin ka room kawngkhar ka kalh hmak a, a duh phawt chuan in ve rawh se; mahni a in kerh kerh aiin a nuam zâwk mahna. Royal stag ûm khat ka la dah chu phawrh chhuakin shot glass ah ka thli nghâl a, ka room-ah hian Mini fridge ka kawl a, tui la tura chhuah dûk dûk ka ngai hran lo, keimah Zosangmawia hi ka intodelh thlap tur a ni.

"Min thlit kêp ve em?" Ka towel in a hmai a hru nawk nawk a, make up tel lo phei chuan a fai sar mai.

"Kêp chiang e; ring deuh deuh khân ṭawng lo la mi hriat i duh loh chuan,"

"Naa, an hre awm lo em mai," ka bulah rawn ṭhu in no a ban zui zat a, ner nâwnga a in lai chuan ka nui suk suk. A hmêl nen a va inrem lo tak.

"Hey, i chhe keh, tikhân min en kur suh," tih pahin ka no tura ka tih zâwk a ban zui leh zat a, thaw lova a in lai chu ka lo en reng.

"I nau ka hrilh dawn a nia,"

"I ngam chuan hrilh la, khawvel leh chatuan thlengin ka be tawh nguar ang che," biang sen ṭâwn ṭâwn chungin a ti ta a.

Titi barh barh chung zelin no li zet zuk in zo vek a, a mitmeng lian lam deuh phî chiai te, a biang sen tâi hlar mai te chuan a hmel ṭhatna ati zual, Duati zu in pui hi thil ṭha a ni miah lo; mahse, a kianga awm ka thlahlel ru riau si a, ka hnial duh ta lo a ni.

Zân dar sarih a rîk meuh chuan a nui bâwk bâwk a, ka phone-a thlalak te enin ka khumah kan bawk a, ka nu laka ka thinrimna ka theihnghilh hial nia maw le.

"Duati, Mama nen hetah chaw ei ula.." ka nu aw a hriat rualin rang zet hian a inperh tho a, "Kan dine out dawn, kan hmanhmawh lo mai mai," chawp leh chilhin dâwt a sawi hmak, ka nuih a za ngei mai.

"A nih chuan kal tawh rawh u, a tlai zêl," an ring ṭha bawka a rawn sawi buai chhin eih lo.

"Kan dine out dâwn em ni?" Ka nuih a za tulh tulh.

"Dawn e, ina kan ei te chuan min hre vek anga sin, ka nu te kan hrilh ang e," ati liam puat a.

"Tih dan ka hria, kan inah ei ila, i nau in hla azir dawn thova in inah kan in chhunzawm dawn nia," ka tih chuan, a phur ngang mai.

Khuma ka mu lai min pawt thovin, "Lokal rawh, i thinrimna kha dah ṭha la, i nu pawh ṭha takin bia ang che min hriat chhuah i duh loh chuan," ka hnial ta bik lo.

Kan pahnih chiahin dining table kan kîl a, ka nu leh kan nula chuan ka nau chaw eiah an la nghâk, kan ei hma ngai lo hrim hrim bawk a.

Duati fin zia leh a rilru neih zia ka hriat belh thung, rûi angin a lang miah lova kan mimal nun tel miah lo hian kan naupan lai leh ka hna chungchâng min zâwtin a sawi bawrh bawrh a, ṭha takin ka chhâng ve zel, zanriah kan ei chhung zawngin ka nu mit tikham zawngin a awm lo tih ka hre kar.

Zû a in ve tih pawh an hre lo ta rêng a, an ina ka riah tur thu leh naktuk zingah ka lo haw ang tiin ka nu ṭha takin ka biak ve phah nghe nghe. Duati an ring tâwk bawk a, ka zu in pawh min hau ta lo.

Ni e, henu têteuh hian mi hneh theihna riau a nei tlat a, ka ngaihzawng Ruati ai pawhin ka ngainain ka hahdam pui zawk, kan chhungkaw ṭhian a nih vang ni lo vin Duatbiki kha a ni miau a, ka ngaisâng ru tlat alawm...

B+>[BeckirafARenthleI]<+®®

THE RAPSAGYAN FAMILY

Becky Rafa Renthlei(-BRR)

Chapter-4

Zosangmawia of Segundo

Duati nen ka car-in kan inphur chhuak leh ta a, dik tak chuan dine-out lam a lang lo hrim hrim, a room thâwl nuam zeta inkawm ka châk daih zawk.

"Zo, kan in a kal chu i ti tak tak em ni?" A meng deuh chiaia ka hriat chu le.

"Kal dawn e, khawiah nge kan kal chuan ang a? In inah ka lo riak dawn alawm,"

Chhe tê mahin ka rui ve lo va, ka lu a kâi deuh chang chang chauh kha a ni a, zanriah kan eikham hnu phei chuan eng teh ual a ni tawh lo, Duati'n a in tam zawk daih!

"Kan in a kan in vaih chuan min hre chhuak palh ang e aw, lêng mai ila.." nui sak chung hian min rawn nuih tlawn a.

"Lêng ila; mahse, chhuanlam ṭha lutuk i siam ngei chu a ngai ang." Ka ti ve ta a. Eng ati nge a thusawi apiang hi ka 'umn, e' zel ni! Tih lungawi loh ka hlau ru deuh nge ka hriat si loh.

"A nih chuan ka nu kan bia ang e," a phone phawrhin nu Mafeli a be zui ta nghal a, tiang em em a dâwt sawi han hneh sawh chu leh! Amah ka en a, a inrem hlawl lo.

"Nu, Zosanga ṭhianpa a damlo a, Durtlâng hospital-ah kan tlang aw, an inah chaw ka ei tawh a nia," tiin min rawn melh a, ṭawng tuma ka âng zuau chu, 'Lo bengchheng suh' tih nân a kutin a hmui a hup zui bawk a.

Damlohna chhuanlam kher chu ṭûl ka ti lutuk lo. Mahse, a sawi zo vek tawh si a ka ngawi rih ta zâwk a.

"Dâwt sawi i va'n awlsam em em ve," phone a dah rual rualin ka lo ti nghâl a.

"Dâwt pawi lo chi a nih kha, hremhmun tlâkna tham loh," a nui duh miah lo lehnghal.

"Nang tê hi i chhuak ru hrât viau a ni ang,"

"Teuh lo, ka nihna lo puiah min hmeh bel tum suh," tukverh lam a hawi zui daih a, a kal duhna hmun zawt hmasa lo vin Ngaizel lamah ka tlân pui ta a. Eng mah a sawi nawi lo.

City bus dinna hmun kan tlân pel a, min rawn en zawk pah hian, "A rem laiah ding la, thui deuh kal kher a ngai hleinem," a tih chuan ka kiai suk ringawt.

Hmun reh lai deuh zawngin car ka hung rem a, tui leh dispo, car-ah ka dah sa bawk a, "In vat vat ila kan haw dawn nia, rui miah suh," ka ti nghut a.

"Rui lo in maw ka in ang, chutiang tura in ai chuan ka in lo law law mai ang e." a ti ve hmak.

"I nasa e, ka nu te'n an ring ṭha ve em em che a,"

"Zosangmawi, i ṭawng tam mah mah, mipa ṭawng peih deuh ka ngaina lo,"

"A nih chuan i duh tâwkin in la mawh ka phur lovang," tiin a in tur ka thlit sak nghal a, ka lo hriat ṭhin Duati leh tuna ka kianga ṭhu hi mihrang hlak annih ka ring rum rum. Hmeichhe zu heh ber niawm taka hetia a awm hi mak ka ti ru viau a ni.

Ṭawng miah lo hian a zâwn zatin no thum a in a, Linkin Park hla 'Burn it down' a play bawk a, a nungchang hi mak ka ti lo thei lo!

A hmeichhia mahin 'no thum a in tawh a' tiin kan thâwk khat ve ta pap pap kha a ni a, kan boruak a dang ta zar mai le! chaw ei khama in kan ni bawk a, kan ti thei dûn teh e, ûm khat kan in zo lek lek tawh tihah,"Haw dawn ang hmiang," tiin a kutah ka va chelh a, a che eih lo.

Min be tuitam hran lo va, kei pawhin ka be miah lo, mahni in in in kan in pawp pawp si a, ani hi a lo chatthla em maw ni.

"Duati..." min chhâng lo mai ni lo vin car hnung seat ngheng hian a mit a chhing chial a, a hmui sen chek leh a biang fai sar chuan ka chhungrilah engtin emawni tak min fan tlat nia!

A dârah vuanin ka sawi dat dat a, a kut a rawn chêt chuan ka nghâwngah nghet zetin min rawn kuah a, a phun sap ri hre mah ila eng nge a sawi ka hre miah lo thung.

"Hey, Lalduat, harh rawh a tlai tawh a nia," a biang leh ka biang sîk tîrin ka nawr deuh a, a rûm ṭiah ṭiah ringawt!

Tunah zân dar 11 a ri tawh a, heti ang chunga hruai haw ka ngam teuh lo mai. Thinrim rilru tâwt ṭûnin a harh hun ka nghâk ta ringawt a.

Ka phone a rîk pawh chuan ka pick lawk duh lova, nu Mafeli a la ni zui.

Duati anga dawt sawi mai tur ka hre teuh lo mai, vawi hnih a ring ral ṭhak hnu-ah Duati phone a ri leh ta a, ka harh kâwkin ka hria, an fanu neih chhun a ni a; an ngaihtuah viau ang tih te chu lo hriat ve awm tak.

"Zosang, eng tikah nge in lo haw dawn? I phone chhâng si lovin Duati phone i rawn chhâng lawi si a," phone ka pick rual ruala nu Mafeli ṭawng dam thlap ka hriat chuan ka inthiam hlawl lo.

"Nia, ka ṭhianpa hi a zual deuh a, kan ngaichâng lawk, a phone ka lo ken sak a nih hi, inchhunga ken luh chuan i lo call a ring deuh sia, pawnah ka awm rih a.." dâwt mar nalh lutuk kan sawi chu le.

"Chanchin tal rawn sawi tur alawm, i pa Zira'n a ngaihtuah êm a, tlaivar in tum em ni?"

"A awm dan a zir in aw, a zia deuh chuan kan lo haw dawn nia, in inah ka lo riak dawn tho a; Duati chu i be duh em?" Ka'n ti khaw mawi ve a. 'Aw' a tih vaih chuan ka chhe vek a ni mai.

Vanneih thlâk lutuk hian, "Duh lo e, kan lo mut san ang che u," ṭha tê-in a ti hlauh a, ka thaw huai huai mai.

Kan Duatbîki lah chu 'kahthlâk' ang dêrin a muhil sâk sâk a, a mut dan rem lo zet chuan ati buai eih lo. A hmai fai vang leh a mit hmul dum kual raih te, a âwmbâwr kawh lah te chuan ka mit ala lo ka tih chuan dâwt ka sawi tihna. A nalh thlâwt.

Mipa thisen lum, phûr ṭha zek zawk tân chuan hnuai lamin 'North pole' a kâwk mai dawn alawm le.

"Zosang.." min ko chunga rawn meng diar diarin a kut pahnih ka lamah a rawn phar a, he nu têreuh hian min ruih hnan chiang! Nge, min lo duh ru viau zawk?

'A dik lo' a ni tih hre reng chungin min kuah theih nân a lamah ka inher a, a rem teh ṭeuh lo.

Dik tak chuan ka thinlung hian a hnar miah lo, amah ka ngaihsanna te, ka zah rûk riauna chhan te kha ka lo duh rûk vang a ni thei mai em?

Chumi hnu chuan ka rilru thlâkin a hnung seat-ah ka sawn chho ta a, no khat dang in belh lehin ka thluak nu but chu thunun tumna ka nei ta lo. Kan chhungkaw inṭhian ṭhatna leh inpawhna te pawh zah zo lo hian Duati hmuiah ka fâwp ta a. A taksa ka deh ruala keimaha danglamna rawn awm ṭan erawh thunun ka tum hlê.

Mak takin chutia ka fawh chuan min rawn chhâng lêt a, a uar tân tân a nia.

"I harh em?" A beng bulah ka phun sup a.

"Umn.."

"Duat, i chiang maw, keimah Zosanga," ka rilru-ah hlauh thâwnna a awm deuh vanga ka hming sawi lang kher ka ni.

"Harh e.." Ṭhut chhuah tumin a rawn che chhuak a; ka phal lawi si lo.

"Vawikhat chiah.." tih paha ka fawh leh chuan a hma ang bawkin min rawn chhâng leh a, ka kut, thunun tu awm ta lo na na nâ chuan a shirt chhânah a âwmbâwr ka khawih ta a.

Ni e, ka zêp peih lo, ka ît a ni.

"Zo.."

"Umn.."

"Dâr engzat nge?" A mit meng a fîm ṭan ta, ka va'n ui tak.

Seol hmahruai ka ni tih inhre chungin whisky ka lo pâi ṭeuh lo kha ka inchhir ngei mai, hmeichhe zu rui awmpui hi ka rilrem zawng a ni lo nachungin Duati hnaih theihna a nih chuan ka pawti ther tê lo.

"Dar 10," awlsam lutukin dawt ka sawi leh ta.

"Pack khat vel ala awm, in leh la kan haw dawn nia," ka tih chuan, "Ehe! Kan va'n in tam em em," zuk ti a! A awm dan pakhat mah a hre lo nge, a tider tih pawh ka hre lo.

Min hnial loh avangin whisky ka in bâng zawng chu tak ṭha zet hian ka pe leh ta a, ka rilru-ah inthiam lohna awm mah se ka inthiam chawp lui ta vel.

Chumi hnu chuan duh tawk leh chin tawk awm miah lovin kan infâwp mial mial a, a hmeichhiatna tawh ka tum erawh chuan min dang chat.

"Duati, eng tin mah ka ti dawn lo che," min chhang lo hian min rawn fâwp a, hmeichhe dang nise ka ten ngawt ang; mahse, Duati a ni tlat a, ka haw phal lo nasâ.

Tlêmin kan rui a reh ta deuh bawk a, kan boruak sosâng lutuk tur a zia chho ṭan ta. Ka thinlungah amah duhna leh thlâkhlelhna a awm tih ka hria; mipa ka nih ang ngeiin bul ṭan pui ka tum nghet hmiah a, Ruati nen kan la inṭhen fel lo erawh a zia lo chu ka ti deuh.

Zing lam dar hnihah kan haw ve ta chauh a, "Zosang, min ngei em?" A sawi zawh rualin leh lam a hawi zui daih a, mak takin ka khawngaih tlat nia! Nuam lo a ti hmêl te chu hmuh hrehawm ka ti a, "Eng vangin nge ka ngei ngawt ang che, nula/ tlangval kan ni a, ka u i nilo tih ka sawi lovem ni?" Ka ti hmiah.

"Hus.." a nui zui hak a.

"Thudik ka sawi tih i hriat kha, naktuk zanah bul kan ṭan ṭha ang, min hnial tum miah suh," ka ti tlang nghal a.

"Engtia bul ṭanin?"

"Nang leh kei hi kan inkawp thei alawm, midang hriat ve kher a ngai lo,"

"I â a mi? Awihawm loh lutuk." Mak min tih hmel zetin min en a.

"Â lo e, kan awm dan hi a ṭha ka ti lo, hetiang ti tur chuan inngaizawng kan nih a ngai a, bul kan ṭan ang."

"Naa, i la rui a mi, nang aiin ka upa zawk a, bâkah..."

"I kum ka hria, ka kum i hre bawk, chuti chung chuan min fawp ve tho alawm.." pehhêl miah lova tiin kawng lam chauh ka en a.

"Rawn sawi chhuah kher a ngai lo, i bialnu Ruati ka ngam lo palh ang," a nui lui kher a.

Ka duh tak ka hre ta chiah e, 'Ruati a sawi chhuah chuan min duh ve tihna a ni ang a, a sawi lan miah loh chuan a ruih vãnga min ngaih sak mai maiah ka ngai ang' tiin ka lo ngaihtuah nauh nauh kha a ni a. Min duh khu chûk lo mah se min iai lo tih ka man thiam ve tlat. Ka nui suk a.

A nu in a lo call thu leh ka chhân dan zawng zawng ka hrilh vek hnu-a, in kan thlen meuh chuan zing lam dar thum a pêl tawh. Mahse, kan insawi mar nalh êm a, min man chhuakin ka ring bik lo.

Garage-a car ka dah lai pawhin min nghâk rân a, min luhsan daih ka rin nen ka ring sual leh ta. In ngaina lutuk anga lan kan duh lo ve ve tih pawh ka man thiam vek a, "Zosang, Rafaela room-ah em ni i riah ang?" Eng mah thleng lo ang hmiahin a in-control leh thlap tawh.

"Â, ka ti harh palh ang, mikhual room ka hmang ang e," ka ti ṭha ve mai a; a chhungte an mu reh ṭhap tawh a, kan awm dan hre ve si se hek lo, a nu pawh a lo tho chhuak miah lo. Chu erawh ka lawm thu tak a ni.

Duati'n a room-a min kalsan dawn chuan vawikhat tal fawh leh hrâm ka tum a, a duh tawh teuh lo,"I hun a zo tawh e," meng phelh phang chunga tiin min kal san ta a.

Inthiam lohna pakhat mah ka nei tawh lo, kan haw dawn khân tihpalh thilthu-ah a nu leh pa an la men tâkin ka ti a, a sam pawh ka hûi mâm sak vek a, a hmêl pawr lutuk tur pawh a lang zia awm deuh.

Ka ngaihzawngte zingah Ruati hi ka kawp rei ber a ni hial mai thei, hmeichhia ka hnê zung zung a, zû ka inpui thei deuh vek bawk. Nupuia neih duhna rilru ka put miau loh avangin ka pawiti em em lêm lo.

Duati erawh ka rin loh danin awm mah se ka ngaizam thei tlat nia. Ka nu laka ka lungawi lohna zawng zawng pawh vawm bo ang duak alawm le.

Rit deuh lûk chungin ka mu ve ta a, ka chhungril erawh a hlim ru riau thung si.

Duati of Rapsagy

After 4hours

Rafaela'n ka room kawngkhar kik paha min koh chuan peih lo zetin ka meng chhuak a, zu ṭhing rim ka nam huam. 'Lalpa leh' kawngka ka hawng a nih vaih chuan min man chhuak dawn chiang lutuk.

"Ka harh e, ka inbual law law dawn," tiin ka âu lâng lâng a.

"Kan tlai vek dawn a nia, pangpar order tur a nih kha aw.." tia min lo chhângin a kal kiang ta a.

Kar li hnuah ka nau Rafael Remruattluanga'n tiam tlat e, a tih dawn avangin a theih ang angin kan inhmakhua a, pangpar pawh a hun taka khâwi a nih theih nân order sa vek kan tum bawk a, vawiin hian kan chhuak dawn tak alawm.

Nizan Zosanga nen kan awm dan kha ka zak lutuk hi ka sa chhuak vek thei. He pa hian mi hîpna a ngah bâkah amah hrim hrim hi a puitling ru riau a, ka ngaina tih ka zêp peih lo.

Lalnunpuia ai chuan ka duh fê zawk; mahse, kan chhungkaw hnih inpawhna avang hian tih lan a rem lo a, bâkah hmeichhiain mipa pãk huam hi ka ngei zawng tak a ni.

Uluk lutuka inbualin ka hâ pawh nidang zawng aiin ka nâwt uluk. Zu in zeuh zeuh ka chîng tih ka chhungte'n hria se min hlap er nasa ngawt ang; mahse, mipa bulah erawh ka in ngai lo a, Zosanga kha mipa vawikhat ka in puina a ni.

Nizana min fawhna te kha ka hre chhuak rauh rauh a, a lerh tih hre reng chungin leh ngaihzawng a nei tih hre vek chungin ka hnaih lui a nia, tenawm ka inti. Bul ṭan a duh a, engtin nge ka chhân ang aw...

Ka insiam peih vek hnuah muang chângin room ka chhuah san ta chauh a.

"Û, i muang thei e.." Rafaela hmanhmawh hmel ka hnuhin ka in thiam lo det.

"Ka hman.."

"Thil eng emaw tal ei rawh, kan tlai ta sa sa. Zosanga paw'n a nghâk chhuak zo lo che," ati liam puat a.

"Maw!?"

"Zosanga maw le, i thawh hma khan a haw tawh, a nu in a rawn ko a, Lungleiah Lawmsanga te an kal dawn a, ka nu leh pa pawh an kal daih tawh," atih leh chuan mak ka ti tulh tulh.

"Eng ati nge a?" Zosanga a kal ve tihna mi le.

"Lawmsangzela nupui tur kha a damlo leh a, nu Muanpuii leh ka nu leh pa, Lawmsanga nen an kal, Zosanga'n workshop a nghah a ngai alawm," bike chahbi vai lauh lauh chung hian min rawn kal pel a, Zosanga a kal lo tih ka hriat chuan ka thaw huai.

"Restaurant-ah ka inhnawhpuar mai ang, kal ila.."

Ka nau nen bike in kan chhuak ta a, pangpar kan order fel vek hnuah MC- ah ka luhkawi pui zawk a, Ramtei leh mipa pakhat inkâi riala lo chhuk ka hmuh chuan Rafaela ka kheuh zauh a. Tu mipa nge a kal pui tih ka hre hran lo.

Ka nau a ding chat a, anni chuan min rawn hmu ve lo a ni ang, main gate lamah an phei a, Rafaela hmel dur khap khap ka hmuhin thil fel lo a awm tih ka hre thiam mai.

"Mâm.."

"Haw ang.." a ti nghal hmuk a.

"Eng nge a, Ramtei kalpui kha tunge?"

"Ka lo va haw ang a, bike lo hawn mai rawh aw," a sawi zawh rual rualin chahbi min pe a, min kalsan nghal vang vang.

Ramtei hi ka hrechiang lutuk lo a, khatiang hmel Rafael-an a putna chhan pawh rin dan ka nei lo rêng rêng.

Ka phone a rawn ri ve zat a, Zosanga lek.

"Mutna châng hre si lo, thawhna châng hre bawk si lo," a rawn ti a.

"I chhe lutuk,"

"Ka chhe lo a ni ang, nizanah.."

"Zosangmawi, i kâ a kaw mah mah," ka ṭawng ring bawk si a midang ka ṭawng hre phâk an awm nge awm lo ka hawi kual leh rih a.

"Tunah khaw'nge i awm a?" atih chuan ka awmna hmun leh kan thiltihte ka hrilh zung zung a, Rafaela'n min hawsan tih ka sawi a, "Workshop-ah ka awm, lo phei rawh," a ti ta a.

"Ka hman rih lo a.."

"I hman reng kha aw, nizana i pic hi i duh chuan lokal rang rawh,"

"Eng ka pic maw!?"

"I duh chuan lokal la," phone a off zui hmak. Nizan khân ka thlâ a lo la ru em mawni le! A châk lo viau ang.

An workshop lam panin chak zetin ka inkhalh phei ta a, min ti mualpho dawn lo tih hre mah ila ka rilru a nuam lutuk lo.

An workshop ka thlen chuan hmanhmawh fê-in manager room ka pan a, kawngkhar inhawng aṭanga ka thil va hmuh erawhin ka pên lai a ti tâwp chat.

Zosanga leh hmeichhe pakhat sam buang zet hi an lo infâwp ngâwng ngâwng a, ka pum a let nghal but. Ka lut lui ang nge lut lovin ka chhuak leh ang tih ka inngaihtuah lai takin a hmeichhia chuan min rawn hmu ta a.

Min melh no lo khawp mai, a mit dum zetin a hnawih tih mai lohah chuan a hmelṭha kher mai. Ruati a ni tih ka hre nghal bawk.

Hmai chhanah chiang takin hmu lo mah ila Zosanga phone-ah ka hmu nual tawh tlat a.

"Zosang..." ka aw a dam thlap.

An pahniha min rawn hmachhawn chuan khaw dang hawi miah lovin ka lo en ve tlat a, an zah loh chuan ka zak bik lo.

Nizanah tiang khan a awm a, tunah a bialnu..

Induh larhin ka pên lut ve ta a..

B+>[BeckirafARenthleI]<+®®

THE RAPSAGYAN FAMILY

Becky Rafa Renthlei(-BRR)

Chapter-5

Duati of Rapsagy

Zosanga mitmeng thim mâka inthiam lohna lo lang chhuak chu ka hmuh hmaih hauh lo. "Ka lo tibuai che u elaw?" Ruati ka en duh miah lo a.

"Ti buai lo e.." tia min lo chhângtu chu Ruati a ni. Ka helmet ken mak tih hmel zetin a la en hâ zui a; ngeiawm ang reng tak hian a hmui a ner sak. He nu hi ka ngainat zâwng a ni dâwn miah lo, Zosanga bialnu a nih vâng ni lovin a mizia hrim hrim hian mi a hîp lo ka ti.

"Zosang, pic chu.." nelawm thei ang bera nui luiin sofa hnai berah ka ṭhu ve ngat.

"Ruat, hei hi Rafaela û Duati a nih hi, hman zâna i call lo chhângtu kha," Ruati bulah ṭhuin a thawmhnaw inbel chu a inhmeh leh kher mai.

"E he, i u Duati kha maw, ka rin loh dân deuhva kan hmuh chu le, chibai le," a kâ thlum mah se a mitmeng erawh a ling phât! Hmeichhiate hian kan hmeichhiatpuite rilru hi kan hre thei riau asin.

"Min ring chhin turin vawikhat chiah kan la inbia a, chu pawh rei lo tê chauh, rin sual deuh pawh a awm tho e." Ti ve ngatin phone ka bih san daih a. Helai hmun hi pathum tân a chêp mah mah a, "Ti khân lo inkawm rawh u, zanah kan inhmu dawn nia," Zosanga ka siai sak a. A lo nui suk.

Ka mizia zawng zawng hre lo mah se zahzum a vanga sawi tur haihchham mi ka ni lo tlat a.

"Kal rih suh, Ruati hian thil dang tih tur a nei tho a kan thlah lawk ang e, zanin kan programme tur duan a ngai a nia, inneihna tur thil vel pawh.." ti zung zungin a bialnu kum hlun, sofa-a ṭhu tûm vuau chu pawt tho-in "Min lo hrethiam la, i lo lan hun hi a fuh viau lo," tiin kawngkhar lam a panpui ta a.

A jeans hâk da lam tawh fai zet te, a shirt var hâk te chu holam viau angin lang mah se a inhmeh thlup, Rafaela sam ang Vikings style han pu ve chhin se a inhmeh ang chu aw.

Zosanga rawn luh leh lai chuan ka nu nen kan inbia a, Serkawn hospital-a an luh chhoh thu leh Rinsangpuii ṭhat vak loh thu a rawn sawi a, "Duati, i nau in lamah a awm tho a, Zosanga kha i lo va ngaihven dawn nia, a chhungte tumah an awm si lo a, a lo rui leh viau ang e, i bula a awm chuan a nu ngaih a ṭha deuh." A rawn tih chuan ka nuih a za tlat pek.

"Rafaela bia la, amaha awm a hreh loh chuan ka va phei dawn nia." Ka nu nen kan inbiak zawh hnu-ah Zosanga'n ngun zeta min lo en chu ka hmu hmasa ber a.

"I chhe lutuk, min en kur zel suh,"

"I nu khân eng nge a sawi a?" Tiin a nui suk a.

Kan inbiak dan vel ka hrilh chuan a nui chhuak hawk a. "Chutia an phal rau rau chuan kan 'bushing' leh dawn em ni?" A ti ta a. Ka phûr ngang mai.

"Chiah aw.."

"Lunch ei phawt ila, kan mechanic hian lam na tur a hria alawm kan tîr dawn nia."

"Aih, ka lo va haw ang a, inthlâkna tur vel leh ka mamawh tur ka va siam ang e, in inah ka lo phei ang." Ka tih chuan, "Min vêng tu zawk hi vên lêt i ngai leh ang a, zanin chu kan hnianghnar tawh viau ang." Ka bulah rawn ṭhu in ka koki-ah a vuan a.

"Bike hi dah a ngai hrim hrim alawm,"

"Ok, tikhan haw hma la, ka lo sâwm haw ang che." Lunch pawh ei dûn ta lo chuan an workshop kawt thleng min thlah a, "I inhmeh hle mai," zawi supa a ṭawng ri chu ka hre pha reng. Bike ka khalh nasat vang hian ka confi rêng a ni.

Zosangmawia hi ka duh ṭan tih ka hria; mahse, amahin eng mah a sawi hmasak loh chuan sawi chhuaktu nih ka tum lo a, Ruati chungchâng pawh sawi ngam tur ka ni bik hek lo. Lalnunpuia ka nei ve tho a, ngaihzawng nghet tia sawi tur ni lo mah se kan inkawp zeuh zeuh.

Rafael Remruattluanga of Rapsagy

Thinrim lutuka ka u ka kalsan hnu khân Ramtei leh Famkima ka umzui ta kha a ni a, eng nge hmuh ka inbeisei ka hre hran lo, rinhlelhna mak tak mai ka nei tlat si a, Famkima car pawh Taxi hmangin ka la umzui ta zêl a, Ramtei te dawr lam an pan miah lo!

Sikulpuikawn lam an pan a, Hotel Esquire kawta an chhuk lai ka hmuh meuh chuan ka chhungril a na nghâl vawng vawng, Ramthansangi hian dâwt min lo hrilh char char tihna em ni? Ka umzui ang nge umzui lovang tih ka ngaihtuah fê hnuah 'Engkim a ruh lang râwta' hriat fiah ngei ka tum ta law law a.

Taxi aṭanga chhukin Hotel-ah ka lût chho ve ta a, anmahni tak chu ka hmu mai lo; tu hmingin nge an book tih hriat tumin counter nghâktu ka zawt a, a sawi duh miah lo lehnghal a. Mahse, Famkima license xerox min hmuh tîr chuan engkim ka man thiam ta vek mai. Room No.202 double room an hauh tih thlengin ka hrechhuak ta vek a, an awmna hmuna han chhoh kher erawh mipa ka nihna leh ka chapona hian a duh miah thung lo.

Nula leh tlangvalin hotel room an book a nih chuan 'an ṭawngṭai dawn lo' tih ka pa Zirsangliana hming ka hriat bel tlukin ka hria alawm le.

Thinrim teh mah ila rîk hluai ka tum lo va, inneihna erawh ka puitlin thei dawn lo a nih hmel hetiang a nih chuan; thudik puanga ngaihdam min dîl a nih chuan thu hran le, chupawh chu ka ngaidam ang tihna a ni chuang lo.

Tlangval ka nih hnu-a ka ngaihzawng neih awm chhun Ramthansangi ka hmangaih ngawih ngawih leh engkim atana huama ka inpêkna te kha eng mah lo-ah a chan tîr a, ka thinrim lutuk hian khua ka hmu lo ang tih ka hlau mang e.

Ka rawngbawlna leh kohhran te ka nu leh pa zah dan tur thlengin ka chhût chhuak hman vek. Hotel ka chhuah san lai pawh ka hre mumal lo va, eng tin nge ka chhungte ka hrilh ngam ang a, ka nau chiah hi Bangalore aṭangin kan inneih hmang turin naktuk tûk lehah a rawn chhuak dawn lehnghal.

Kan in panin ka haw leh ta a, rilru ṭawngṭaina ka neih pawhin ka natna min chhâwk eih lo. Tûma chim buai lohva inbun ruah ka châk ngawih ngawih a, eng mah sawi chhuak lo hian kan inneih ni ka nghâk thleng tho dawn nge, ka nu leh pa a rang lamin ka hrilh dâwn tih hian ka thluak a luh ngut ngut a, in ka thlen pawhin ka zawi hnawk thei.

Mual pho ka ngai ngam dawn em ni? Ka zaipawl puite phur zia ka ngaihtuah kâi a, u Duati meuh pawhin chawlh a rawn la hma ve a, phur takin a lo haw a nia, Ramtei kawr hâk tur mana kan sum sen te engkim ka ngaihtuah chhuak dap a ni ber. Sofa-ah ka ṭhu hnawk a, ka mittui hnâm sak chu mipa mah ni ila ka dang zo lo.

Ka zahawmna chhe vek tur te nen lam ka ngaihtuah kai a, ka kun tlawk tlawk mai. Ka phone a rawn rîk chuan phur lo zetin ka en a, ka nu a ni.

"Bawiha, zan hnih vel kan riah a ngaih hmêl a, Zosanga kha a nu'n a ngaihtuah deuh sia, nangmahin emaw i u emaw khân in lo va ngaihven dawn nia, tunlai a rilru i hriat kha.." a rawn tih chuan ka thaw a ipik zual.

"Lo ngaihtuah duh suh u, hlazir leh neuh neuh kan nei sia, u Duati phei mai rawh se aw.." ka ti a.

Tun ang hetiang boruakah Zosanga zu rui leh rilru nâ hnem tur chuang ka awm bik lo, u Duati phei zawk se, ka hmelah engkim a man thiam leh vek dawn si a, mahni-a awm ka duh ber.

Ka nu nen kan inbiak zawh hnuah ka pa in hna chungchang min sawipui zawk a, Lawmsangzela aiin karkhatin ka nei hma dawn kha a ni a, anni pawh a nupui tur damdawi inah an luhpui leh rih chu a ni sia, engkim hi a buaithlak zo vek.

U Duati room aṭanga a lo chhuah chuan Zosanga te ina kal tur leh in lam lo ngaihtuah lo turin ka hrilh ve ngial a, zanin hian kan inah hla kan zir dawn nghe nghe a, refreshment min buaipui turin Ramtei te ṭhian dun ka sawm kha a ni a, ka thil hriat rûk leh ka thinrimna pawh tih lan a rem rih dawn lo chu a ni si a, ka paltlang thei ang em.

Pathian vang chauhvin ngawih ka chuh rih a ngai tih ka hria, kan inneihna tur hi Pathian remruat a nih loh chuan dâltu lian tak a awm dawn tho. Mualpho chu thuhran ni se, ka ngawi rih phawt ang. Tiin rilru ka siam ta zawk a; Ramtei erawh dâwp chhuah ngei ka tum ruh hle thung.

Ramtei'n min lo call lai chuan inbual tumin bathroom ka pan tawh a. Ni e, thinrimna tih lan vak vak a ân chhuah chiam te hi kan chhungkaw zia a nih loh vângin ṭha takin ka chhâng tur a ni.

"Rafael, zanin kha ka hman lo mai thei," phone ka pick rualin a rawn ti nghâl a.

"Engvang chuan, a hma pawhin sawi ve tur alawm.." ka ti sup a.

"Nia, ka inthiam lo lutuk, dawrah kan buai deuhva kan haw hma thei pawhin ka ring lo." A rawn ti leh zat zat a, hun dang chu nise ka awih em em ang; mahse, tun hun a nih miau avangin ka awih chhete eih lo.

"A ṭha alawm, kan nula ka lo buaipui tir ang e," tiin phone ka off hnan hmiah a, thinrim loh ka tum tehrêng nen a aw ka hriat leh dâwt chiang lutuk a sawi tih ka hriat leh ngat kha chuan ka ti hleithei der lo.

Inṭhen ang tiin va sawi tehreng pawh ni ila, innei mai tur kan ni tawh a, a thlen ngam chin a piang thlen ngam phawt hi ṭhain ka hria, thudik hi zêp pawh tum ila a lo lang chhuak leh tho ṭhin.

After 3hours

Phur lo zetin ka insiam a, member ṭhenkhat an lo thleng tawh bawk nen theihtawp chhuahin hlim hmel ka pu lui hrâm hrâm a, Rindiki hmel ka hmuh miah lo! Ani tê kha a fel reuh riau a, hlâ a zir dawn lo a nih chuan rawn phat hmasak awm tak.

Ṭanna hun Zualbawiha'n a hman zawh hnu-ah thlan hliam chung hian a rawn lût ve hlawl a.

"Eng ati em em nge, kan kal tlai dawn a nih chuan information pek ṭhin tur, ngawi renga tlai ringawt hi mimawl zia a nia," ka lo ti nghut a. Ka boruak hap a fuh lo nen ka thinrim hlur tawh.

"Tihpalh lutuk, ka scooty ke a thêp a, ke in ka lo kal a.." a sawi zâwng pawhin a la thaw hliam hliam a.

"Tun ṭum chu kan hrethiam ang che, a lehpekah chuan kan tlai dawn emaw kan kal thei lo a nih chuan inhrilh ran a ṭha khawp mai, bial zaipawl chin tawh hi chu ngaihpawimawh a ṭha." Ka ti zui hrâm a, midang lo phun deuh mar mar pawh ka ngaipawimawh peih lo.

Assistant conductor-in min kaihruai a, ka thluak a châwl lo hrim hrim, Ramthansangi ringawt ka ngaihtuah a, zanin pawh hian Famkima nen bâk an awm dun leh tawp nang.

"Rafael, eitur vel hi in nula saw ka lo siampui mai dawn em ni, a buai êm mai," Diktei ka beng bulah a rawn phun sar sar a, ni dawn tak, eng mah ka ngaihtuahpui miah lo tih ka hrechhuak chawpchilh a.

"I peih te chuan.."

"Peih loh theih a ni hleinem.." ti sapin min kal san ta a. He nu hi mi danglam ve tak chu a ni, a mizia hrim hrim hi a zâwi raih a; mahse, a hunah erawh hmangchâng a hriain a ri fak fak thung a. Â ni lo, ka thil ngaihtuah hi thil ṭha pawh va ni suh.

Kan uniform thar tur hâk chhinna hun kan neih lai chuan ka phone a ri sek a, hlazir lai hian ka silent tlat ṭhin. Tunge tih hriat tuma ka en chuan Ramtei a ni tlat.

Chhâng duh lovin ka off hmiah. Ka tihtur a hre veka tlaia phone ka off san a vang khân a lawm lo tepawh a ni mahna.

Hmeichheho ka room ah an inthlâk a, mipa ho erawhin an awmhmunah an ha chhin mai a, Diktei form ha chhin ve hman lova buai em em ka hmuh chuan choka lamah ka phei ve ta a.

"I inpeih veleh i form tur ha chhin ve rawh aw.." ka ti sup a.

"Ah, ka tâwk chiah alawm, hâk chhin a ngai tawh lo, a hmunah khân ka lo tifel diam tawh," tiin a nui var var a.

"Eng lo, rilru hahna i nei em ni?" Tia min zawh chuan ka nui lui suk a.

"Nei ve e, mi famkim ka ni lo a.."

"I nupui nei tur phûr lutuk a nih mai chu a.." a nui zui kar kar a, ka va ngei reuh tak.

Ka tum loh deuhvin ei tur te ka buatsaih pui ta zawk a, midang an zai ṭhap ṭhap lai pawhin cake leh coffee vel siamin kan buai dun hle a; tuna kan hlazir lai hi kan thiam nâl fu tawh a, hemi zawhah hian kan inneihni-a min sak sak tur an zir leh dawn a ni.

"Dikte, va ṭhu tawh rawh, Nuni hian lo buaipui zui tawh rawh se," ka ti ta a. Chuti lo chu zawhna min zâwt thiam si a, ka duh loh thleng thleng sawi a awl dawn tlat.

Ramthansangi nena kan inkâr avang hian ka ṭhiante leh ka rawngbawlpuite hmaah hlim lo hmel lan tir kher a ṭûl em ni?

Zosangmawia of Segundo

Duati'n min lo call chuan workshop aṭangin ka la haw lo a, an inah hlazir an awm dawn thu leh sawm kher ngai lovin kan inah a lo va kal tur thu a rawn sawi a. Zanin chu nizan ai khân ruahmanna felfai zawk siam ka tum bur.

Ka duhna leh îtna a inchen reng avangin pawisak vak neih lah ka tum hek lo.

Whisky pawh ûm thum zet ka hâwn a, mitmei ven tur a awm dawn bawk si lo, phûr tak ka ni.

In ka thlenin eirawng a lo bâwl mawlh mawlh tawh a, chhuna a thawmhnaw inbel kha ha tawh lovin tawnzau dum leh cotton kekawr a inbel tawp. Amah ka ngaihsan ve em emna pakhat chu an hausa a, a duh duh nei thei a ni chung hian a inchei uchuak ngai miah lo.

An glass house aṭangin sum an lalut hnem a, a nu Vety director a ni bawk a, amahin hlawh a la nei zui bawk, hmeichhe dang nise a nun dan ang hian an nung tawp lovang.

"Hey, i va buai awm ve.." a bulah dingin a Arsa kan tui hmel zet rim chu ka hîp lut vang vang a.

"Ka lo inhmakhua, in nula kha a inbual rih a.." min en chuang hlei lo va.

"A nih chuan inpeih la, ka lo va inbual ang." A bianga ka fawh zauhna chu a ngai haw lem lo.

Ka inbual chhung zawng pawhin amah ngawt ka mitthla a, zanriah ei hma ngei a bushing pui ka tum.

"Zo, ka hman tawh," tih leh ka room a rawn luh a rual a, a hma ang khân min zah ṭît ṭêt tawh bik lo. A tih dan pangngaiin ka khumah a ṭhu leh ât a, towel nen chauhva ka ding chu engah vak a ngai lem lo a nih hmel.

"Ka bag-ah khân a awm lo phawrh chhuak la, kan mamawh tur i hriat tawh kha," rang zeta tho chhuakin Mini fridge-a mi tui vawt ala chhuak a, shot glass pahnih nen Whisky a phawrh dawn emaw ka tia, chuti ni ta lo chuan room a chhuahsan nalh! A khawsazia têreuh hi a mak ngawt mai.

Arsa kan la khu vat vat plate in a rawn chawi lût a, "Zanin tlai chu nuam singkhaw.." a nuih zawnga a ha var rual ṭhap rawn lang chu a nalh kher mai.

"Chin tawk i neih a ngai a nia, tun bâk hi kan in dun tawh lovang," thutak zawka ka tih chuan a ner sak a, "Min inpui pawh chu i va hreh awm ve, ka in lo anga nimai lawm," a ṭhutna aṭanga tho chhuakin khum sira a chapal dah a bun sawk sawk a.

"Tun bâk ka tirêng alawm le.."

"Ka in lovang, tunah pawh ka in lo law law ang," room chhuahsan a tum chuan ka hlauthawng leh si, "Duat, ka fiam mai mai che a nih kha, thinrimna tur a awm lo lokal rawh,"

"I ṭawng peih sia maw, thil ṭul lo sawi sawi hi sim rawh,"

"Lokal rawh, i ṭawngṭai dawn te a nih loh chuan.."

"Zosangmawi.."

"Eng nge?"

Kawngkhar bulah a la ding tlat a, Arsa a lâk hlan khan boxer ka lo ha hman tawh a, kawr erawh ka ha lo. A bulah kalin, "Puitling zawk si tihtauh te chu a.."

"I ṭawng peih êm alawm,"

"Sorry.."

Chumi hnu chuan ka khumah inngheng riala ṭhu dunin kan shot leh ṭan ta, a nau te inneih tur chungchâng a sawi barh barh a, a ṭawng chhungin no thum ka in hman, ani erawh chuan no khatna pawh a la in zo lo.

"Zanin tlai chu i speed a muang hle mai," tih pahin a no ka chhunkhah sak leh a.

"Lungngai suh, muangchângin le.." ati duh chauh.

Ṭawng reng chungin no li vel a in zo ta maw tihah kan Duatbîki dik tak a rawn lang ṭan e.

"Vawiinah min ko tê tê a, tu emaw i lo awmpui a.." anti ṭan phawt a.

"Ka koh a ni hleinem, amahin a rawn kal alawm," thudik tak ni, vawiin khân Ruati a lokal dawn tih ka hre bik lo a, kan intawng fuh palh mai mai a ni.

"Ruati hi i duh viau em?"

"Aih.."

"A nih min duh em?"

"Aw, duh,"

"Hus! Zosangmawia'n min duh a nih chu.." meng kal ralh chunga tiin a nui hak a.

"Eng nge, ka duh che alawm, nang pawhin min duh tih ka hria,"

"Zak lo mai sia e, insûm rawh," a nui kar kar a, ka run angreng, ka naupan zawk vang hian min nuihzat deuh nge ni.

"Min nuih kher a ṭul lo ang, ka duh che a ni tih fiah tura min duh chuan," no khat dang tlâk papin a mitah tak ka en a, zan dar riat a ri chiah bawk. Zanriah ei lam kan ngaihsak miah lo va. Tunah hian ka pa, Lalfakhlua inah kan pahnih chiahin kan awm a, he hun ṭha hi bawhpelh ka tum lo nasâ.

Ani pawh a meng davâ ṭan a, a hnâr leh biang vel a sen tât bawk.

"Zosang.." sawi zawm tur nei niawm takin a âng zuau a, a ngawi leh hmak.

"Kan awm dan hi khawiah mah a ri chhuak tur a ni lo, thinrim leh eng emaw pawh thleng se, ngawih kan tum ve ve dawn nia," ka ti sa thlap a.

"Ruati hnena ka sawi i hlau chiang," sehchilh deuh naka tiin a mit a chhing diar diar a, a mut a chhuah hmel hle.

"Chutiang lam a ni lo, i mut a chhuak a nih kha, rei lo tê chhing sek la, i harh hunah chaw kan ei dawn nia,"

"Ok, i khumah ka mu mai ang aw," a sawi zawh rualin a let tap a, a maimitchhing nghal hmiah. Min hlau lo ve chiang a nia, min ring tâwk bawk.

Be zui duh tawh lovin tlêm ka inbelh leh a, ka mut a chhuak nghal rawih rawih thei nia, nizan ka mu tlem bawk nen Duati ka mut ṭhat tîr hnuah amah kuah chial chungin ka mu ve ta a. A che map lo.

After 2 hours

Dangro zetin ka harh hlawl a, ka bula muhil hmêl ka hmuh chuan ka harh deuh kâwk, ka kâwnga min kuah chung leh ka âwma bei thlap chunga muhil Duati hmel chu ka melh vang vang a, a sam hnawk niai leh a hmui kau tiar te chuan ka mit a la hlê.

"Hey.." min chhang lo, ka ril a ṭam miah lo a, ka rui a reh deuh kuar bawk. Dimtê in a kut ka dah sawn sak a, tui in turin ka tho chhuak ta a, mipa dang nise an chhuah lo chiang ang chu. Kei pawh hian ka chhuah lo maithei, ka thil ngaihtuah avang chuan ka nui suk a, nuam ka va han ti tak.

Mipa tâna hnar mai mai loh tur hmêl a nei a, a pian nise a dik vei thlap bawk, zu a in emaw in lo emaw kei hian ka duh chiang alawm. Kan kum inthlauhna hian eng pawi mah a khawih sih sah lo.

A muthilh hlânin no hnih ngawt ka in belh leh a, tunlai zu ka in nasat dan em em hi, ka nu vang vek a ni.

"Zo.." a mu lai a rawn che ṭalh ṭalh a, ka hming a lam hmasa ber. Rang lutukin ka pan phei a, "Muhil leh rawh a la hma," a harh vaih chuan haw a tum dawn sia chelh ngei ka tum.

A bulah ka inthawlh sawk sawk a, a shampoo hman rim chuan ka hnar a verh zar. A hmui bul chêtah, "I duh belh em?" Kan ti ngei a, ka va sual si êm.

Min chhâng lo hian amah zawkin min rawn fâwp a, ka beisei loh lutuk thil a nih vãngin chhân letna chang pawh ka hre mai lo.

Duhthawh leh uar taka min fawh tân tân tâkah chuan thlarau sual hnathawh a rawn lang ṭan dawn chiah. Ka kut chêtin a taksa mâm han chu ka chûl lawr dan dan a, min dan chu sawi loh hre awm pawhin a awm lo. Ni e, hmeichhe zu in ka hriat ho chu an heti tlat zel.

Mahse, Duati lakah chutiang rilru chu ka pu miah lo va, amah ka duh vang zawkin chêt ka la hmasa mai a ni.

Fâwp reng chunga ka chul kual reng tâkah chuan ka mipatna a rawn nung ṭan tih ka hria, ani pawh rawn meng chhuakin min en chiang kher mai, eng mah phei chu a sawi hran lo.

"Duati..."

"Umn.."

Min hnial se chuan engtin mah ka tizawm ngamin ka ring lo a, engtin mah min tih tâk lohah chuan ka huangtau sawt. A kekawr kawngah zen lûtin a hmeichhiatna hnâwng chap chu kut lâwngin ka khawih ta a.

Ka thisen zawm a ni lo a, kan inkarah inṭhian ṭhatna em em a awm hek lo. Chuti a nih chuan ka tân engkim tih a thiang a, min dâltu an awm hek lo.

Muangchâng leh dam raih a fâwpin a taksa leh rilru neih ngei ka tum nghet ta. Zosangmawia hian a inchhir lehna tur thil ati ngai lo a, tuna ka tih mêkah pawh hian ka inchhir loh ka beisei.

B+>[BeckirafARenthleI]<+®®

THE RAPSAGYAN FAMILY

Becky Rafa Renthlei(-BRR)

Chapter-6

Duati of Rapsagy

Ka lu hai chiai chiai leh ka taksa sa ham ham te ka ngaihtuahna; tisa châkna avanga buai niai chu hai der ka tum ngial a, ka thei lo a chhâ chu a ni e.

Zosanga taksa, chuangtlâi hmuh tur awm miah lo leh a bân thahrui ngah hmêl taka thisen zâm pâwng ṭalh te chuan mipa a nihzia a tilang chiangin 'tem ve chhin duhna' sual hnathawh min neih tîr tlat nia.

Duh thawh taka ka taksa a chûl lâwr dan dan lai chuan mit ka chhîng tlat a. Nuam ka ti, ka chhungrila hmeichhe nihna rawn lang ṭan pawh thunun tum mah ila, zu hnathawh vangin ka in- control thei lo rêng rêng.

Min fawhna uar taka ka chhân lêtna chuan amahah phûrna a siam zual sauh em maw ni, ka tawnzau hak lai min hlih sakin bra nen ka mu ta a, chu pawh rei lo tê hnu-ah khum kil lamah a theh phei leh nawlh a, mumang nuam tak mang ang mai ka ni.

"Ka kîr thei tawh dawn lo tih i hria tiraw?" Ka beng bula a phun sup ri chuan min ti tîm leh deuh; a thawmhnaw inbel a lo hlîp vek tawh, mipa saruaka awm ka vawikhat hmuhna a ni a, ka zak ru chem chem.

"Zo, vawikhat ka in leh thei ang em?" Ka dang a ro huam a, ka rûi a reh ṭan.

"No, rûi chhe lutuka awm chi i ni lo," a sawi zawh hma-in a mipatna chuan ka hnuai lam a nawr salh a; ni e, kum 32 na ka hmang mêk a, a chhia leh ṭha thliar thiam rual ka ni bawk. Mipat hmeichhiatna lamah vawikhat mah ka inhnamhnawih ngai lo a, tûn hi ka thlen thui ber a la ni.

Zosanga hmêl tisa châkna avanga phelh phung leh meng sî sap te chuan min âikaih a ni ber mai. Duhthawh taka kan infawh mawlh mawlh laiin ka taksa chhungah a rawn lût ta a, ka phu chiang kher mai; ani pawh a châwl dat a.

"Duati...Ni lo..." a inbengkhalhna a bân chu a khûr dar dar a, a che lai a châwl chiang teh a nia. "Eng nge?" Keima ṭawng ngei pawh ka hre ṭha hleithei lo.

"Eng lo, ka bei...sei lo..." bah deuh nawka a ṭawng phei chuan ka lo zak chem chem, ka hmeichhiatna thîp hlar chuan eng pawi nge kan khawih tih min hriat chhuah tîr nawn sak a.

"Tâwp san suh aw.." ka chungah ala bawk reng a, chêt erawh a che chhunzawm lo. Ka châk huam vang pawh ni lovin anih tur ang a ni zo vek tawh tlat a, "I inchhir dawn loh chuan ka inchhir bîk lo ang." Ti supin ka ngaihtuahna hriat tum ang mai hian chiang mangkhêngin min en a, a rui chhe hran lo, keipawh ka harh deuh kâwk.

"Ngawi reng la, chhunzawm rawh, i ṭawng leh chuan.." ka sawi zawh hma hmain min rawn fâwp ta nghâl a, dimtêa che-in a thil tih lai a chhunzawm leh ta a, chêt ngaihna hre miau hek lo, a nghawngah nghet zetin ka lo kuah ringawt.

"Duati.." thaw hawk chunga ka hming a lam nawn leh rualin ka sîrah a rawn mu thla ta a, nuam han tih em emna sawi tur ka hre lo; zû ka in vângin ka tih loh tawp tur ka ti a, ka taksa chhungrila mipa lo lût hi midang ni lovin Zosangmawia kha a ni tlat a, inngaihzawnna lam sawi ri lo mah ila kan chêtzia hian engkim a hril vek.

En pawh en ṭha lo hian min kuahna a kut chu dah sawn sak ka tum a, "Min hua em?" Tia min zawh chuan, "Ka duh thlanna a ni e," ti chauhvin ka chhâng.

"Kan inkârah midang an inrawlh tawh tur a ni lo, nangpawhin ngaihzawng i neih chuan ṭhen la, Ruati ka ṭhen bawk ang," a ti hmiah.

Ka ngawi reng a, min kuahna tinghet sauh chung hian, "Ka ti tak tak a nia, midang hmuhah tih lan kher a ngai lo va, kan pahniha kan hriat chuan a tâwk mai."

"Khawngaih takin ṭawng tawh lo la.."

"Min huat phah nân leh min biak duh loh nâna i hmang a nih chuan, Zosangmawia hian eng nge a tih theih i lo en dawn nia," min hnungchhawn zâwngin a inlet a, ka thluak nu but te a kiang ṭan bawk nen zawimuanga tho vin bathroom lam ka pan san ta a.

Uluk theih tâwpin shower hnuaiah ka in nuai phuan a, nichina kan chêt dan kha sex hmang dik tak kan ni, hmeichhe nikhua lo ang bera tâlin zû ka in a, chutah ka ngaihzawng nimiah lo mipa lakah ka thianghlimna ka hloh zui bawk a, eng nge ka thluakah hian awm ta le!?

Room chhunga ka luh leh chuan Zosanga muhil thaw sâk sâk ri ka hre hmasa ber. Harh fîma ngaihtuah ka duh loh vângin dimtê hian whisky bottle nen choka ka pan leh ta a.

Tlâi lama ka thil siam pawh a ngai ngaiin a lo la awm a, Oven-ah Arsa tilumin chawhmeh dang ka chhuang lum nghâl bawk a, ka pum a ri rawk rawk tawh.

Nichina ka awm dan zahpui awm zet kha ngaihtuah kîr duh eih lo hian whisky no hnih ka in lui leh ngat a, chumi hnu chuan chaw ka ei ve chiah.

Zu in rûk zeuh zeuh ching mah ila hetiang em ema tam hi ka pian a hnu lamah ka in ngai lo, Zosanga puh ka tum lova keima duh thlanna vek a nih vângin a mawh pawh ka phur ngam mai tur a ni dawn lo em ni?

An in zau leh nuam zetah chuan ka hawi hrek hrek a, ka lû pawh a hai leh chhah tawh.

Ka nau, kan tê ber lo haw hunah chuan tuna ka nun dan hi bânsan vek a ngai tawh ang, Saidingpuii hi kan naupang ber a ni a; Bangalore ah lehkha zirin ala awm a, Rafaela te inneih hmang turin a rawn chhuak dawn a ni.

Sofa-ah duh dah zetin ka ṭhu a, a khât tâwkin ka lem zauh zauh bawk, tûma mitmei vên tur a awm si lo, nuam singkhaw a ni ringawt; Zosanga pawh ka va ngaihven teh rûai hran lo va, zinglam dâr thum a rîk meuh chuan whisky no engzât nge ka in tâk pawh ka hre hrep lo e, men pawh ka meng ṭha thei tawh lo.

Dam lai chên antih ṭhin kha hei bâk bâk a ni bîk tawp nâng.

After 4 hours

Ka beng bula min ko sek sek ri chu hla tak aṭanga lo ri chhuak ang maiin a hla dû a.

"Duati, Duatbik, tho tawh teh.." Zosanga aw ka hriatin muangchâng hian ka meng chhuak ta a.

Ka hmai bul sêtah lo kûnin thawmhnaw eng mah a inbel lo. A âwm ruak kûng te, a khabe ruh kual invuah nghet churh te chu ka hmu chiang teh e.

"Nge min koh chhên?" Muthilh leh tumin ka maimitchhing zui zat a.

"Hey, dâr eng zât nge i hria em? I pa in a ni lo a nia," a nui hawk a.

Ni dâwn tak.

Thawh chhuah tuma ka inbengkâng chuan thawmhnaw eng mah ka inbel awzâwng lo, nizana ka inbual zawh hnu khân thawmhnaw ka ha chiang; nâ, eng mah a bâk hriat theih pawh ka nei îk lo.

"Zosangmawi, khaw'nge ka thawmhnaw?" Ka meng chiang tawh râp. Ruihna thlarau sual keimahah eng mah a awm tawh lo va, ka lû erawh a na pingling!

"Min puh leh ringawt suh, nizanah i hlîp a ni ang chu, ka muhil daih alawm," ka pum chûl hauh hauh chungin dam thluam hian min chhâng a.

"Min khawih rih teh suh.."

"Engvangin?"

"Ih, min khawih dâwn loh avangin.."

"Huhu! Ka khawih theih lohna chhan tur che kawng thum sawi la.." a kut la sawn chuang miah lo hian ka lâipawng bâwr vel a zût kual zai zai a, chimawm sateh e.

"Min khawih chhên lo la a ni mai," a bâk hnial dan vak ka thiam tawh lo.

"A rûka ka bialnu, ka tâ i ni tih theihnghilh miah suh aw, midang an rawn inrawlh chuan ka chêt dan tur hi i rin phâk bâk a ni ang, hawlhpawlh or chawhpawlh ka duh lo," chiang fek fawka tiin min fawh a rawn tum nghâl ringawt nia.

"Zosa..." sawi pawh ka sawi zo hman lo, a hmuiin a rawn kharchhilh hmiah a, min fawhna dam raih leh ngênngâwl zet chu ka hnar phal bik lo. A tâ a min ngai a nih chuan ka ni mai ang, ka tâna mipa hmasa ber nunah thû ka neih theih nân leh nghet taka min vawn theih zâwk nân ṭan ka khawh ve tawh ang chu.

Chumi hnu chuan Zosangmawia ta ka ni nawn leh ta. Dîp dâltu awm miah lova hmangaihna min chenpui meuh chuan second rei lo tê chhung nawmna vawrtawp ka tem hman. Nizana chiang mang lo kha rui lo hai lo-a kan tih nawn leh meuh chuan a dân a dang ta zar mai.

"I ta ka nih chuan, ka ta i ni ve tihna, Ruati chingfel ang che.." a bâk eng mah sawi duah lo hian a kâwngah ka kuah a, "I nunah mipa dang an awm em?" A aw zâwi sup chu ka hre ṭha thei mang lo.

"Maw!?"

"I nunah mipa kawl lai i neih chuan Khengbet ngam ve ang che," a nui hawk a, a thil sawi dan hmang te hi a common lo mai sia e, a hnung zâwnah ka nui dîr ngar ngar.

"Khengbet e a.."

"Lalduat, ka fiamthu lo a nia," a nui ru ve reng sia ka va ngei mai mai tak.

Zosanga te in kan chhuahsan meuh chuan tlailam dâr hnih a ri tawh a, an nula pawhin min ringhlel chuang ṭhak nâng.

An Workshop-ah min pênpui zawk a, dârkar khat vel kan awm hnu-in kan inhnawh puar nghal bawk a, kan in lamah kan phei leh ta a.

Ka nu leh pa, naktukah chauh an lo haw dawn a, zanin hi free taka kan inhmuh theih hun hnuhnung ber a ni rih.

Rafaela leh Ramtei inbe miah lova lo ṭhu ngâwi dun reng kan hmuh chuan Zosanga nen signal kan inpe zauh a.

{Rafael Remruattluanga of Rapsagy}

Inah keimah chiahin ka awm a, ka pa nen kan inbiak zawh hnu-in u Duati call ka tum a, a tlang thei ṭhak lo. Zosanga nen an inkâwm ngeih hi a rûk tak chuan nuam ka ti ve reng. Ramtei nen kan inbe zui tawh lo a; nizan kan hlazir dawna min lo call leh message min lo thawn pawh ka reply lo hrim hrim.

Glass house ah pawh kal lovin ka hnuai chiaha awm Rinawma ka tîr tawp a; Ramtei leh Famkima hotel-a an lût dun lai kha suangtuah loh ka tum pawhin ka thluak a luh ngut ngut.

Computer room-ah lûtin kan hlazir leh tur ka xerox mek laiin, "Rafael.." Ramthansangin aw ka hriat chuan ka che map lo.

Kan in thleng thlenga a lokal duh pawh ka ring miah lo va, ka chhungte an awm lo tih pawh ka hrilh si loh.

"Rafael, lungawi lohna i nei em ni?" Fel ber niawm taka min rawn nuih te hlei hlei hian ka thinrimna a chawk tho.

"Lungawi tur ka ni em ni? Inneih i duh lo a nih chuan min hrilh tlang law law la, hetia inti hming chhe kher lo hian." Ka tum loh tawpin ka sawi chhuak ta.

"Eng nge i sawi awmzia?" A ter nghal at a, ngeiawm zeta min melh ralh chung hian, "Min neih chu i duh leh chiah si nange?"

"Ramte, min bum thei mah la Pathian i bum thei dawn chuang lo a nia, Hotel Esquire thleng khan umzui lo che ila chuan i nihna dik tak hi ka hre chhuak dawn lo tihna a nia, i duh chuan Famkima chu nei la, kan inneihna tur hi ka ṭhulh leh e." Kut hnungsuihin ka ding a, ka awkâ dam mah se a chang ṭha khawl khawl khawp mai.

"Remruattluang, i duh duh sawi ringawt suh," tiin min rawn din hnaih a, chêt pawh ka che lo, ngun takin a hmêl ka en a, eng ang pawhin hmelṭha mah se pakhata lungawi lo hmeichhia hi nupuiah neih ka tum rêng rêng lo, chu chu vawiina ka ngaihtuah chhuah thar a ni.

"Kei nen inneih tumin palâi an kal fel vek tawh a, tûn aṭanga kâr thum a ral leh chuan innei mai tawh tur kan ni, i duh danin kal la, ka nu leh pa ka lo hrilh dawn nia," ka ti hmiah hmiah.

"Kei aia i thlan zawk chu pan ta che, ka tâ tur ni lo na na nâah ka inhambuai dawn lo, mualpho ngai mah se," ka tih zawm leh a.

Thinrimin vawikhat mah ka la ânkhum ngai lo a, tûn ṭum erawh dam chhung daih thutlûkna kan siam tawh a, min zah lo ka ti ve tlat, min zah lotu hi engvangin nge ka zah bîk lêm ang.

"Rafael, i hrethiam lo a nih kha, khawngaih takin ka insawifiahna hi min ngaihthlâksak ve phawt rawh," thaw hak chunga tiin chair-ah a ṭhu zui hnak a, a lan dan buaichuar tak chu a inhre dêr si lo.

"Ka hmangaihna haidera midang pantu chuan a tâwp thlengin pan law law ang che, Pathian zarah ka paltlang thei em em ang,"

"Rafa..!"

"Vawikhat chauh i thusawi ngaithla duh lo leh thiamthu sawina hun pe lo che a kaltîr tur che hian mi ṭha famkim ka ni bîk lo, ka hmangaihna che hian rinawmna a keng tel a, hmangaihna hi duh duha nawh reh theih a ni lo tih i hria ang chu maw?"

Ni e, a duh ang sawina hun pe lova kan inkâr hi tihtawp ka tum bik lo, inngaizawng satliah anga inṭhen thut thei dinhmunah kan ding tawh lo a; kohhranah vawikhat an puang tawh bawk, chuvangin a duh ang sawina hun pêk hi mi â ber tân lo chuan tih ngei tur a ni.

"Nimin khân Famkima bialnu Singapore aṭangin a rawn thleng dâwn a, hotel kha ka book pui mai a ni, ka ṭhian a ni tih vawi tam i bulah ka sawi kha, khawngaihin ka thusawi hi awih rawh, a ṭûl a nih chuan Famkima pawh ka ko mai ang," mittui tling pama min chhânna chu ngawi rengin ka lo ngaithla a.

"Engtin pawh min puh la insawithiamna tur ka nei lo; mahse, kan inkârah eng mah a awm lo a, a ṭhian ka nih angin ka pui mai a ni."

"I ṭhian nen chuan khawlâiah emaw MC-ah te inkaih kher a ngai tihna a nia," ka ti nghut a.

"Min hmu em ni?" Zâwi raihin ati leh a.

"Ka hmuh loh che in ka sawi dawn em ni? Ka nupui ni mai turin mipa dang kutah vuanin hlim takin an kal a, chutah hotel an la pan zui; i dinhmunah inchan la i lawm ang em? I nui thei bîk dawn em ni?" Ka ti ve zel si.

Ka thinrimna zawng zawng ka bunruah vek loh chuan ka puakkeh takngial dawn.

"Min ngaidam rawh, khawngaihin Famkima pawh ka biain ka kâwm leh tawh lovang, ka tiam a che. Hetiang em em hian i thîkin a ni lo zâwnga i ngaihtuah ka ring pha lo atin ni," a mittui a far fap a.

"Mipa ka ni a, ka nu leh pa fapa neihchhun ka ni bawk, an zahna thlentu nih hi ka duh miah lo, nang pawh an duat che in kan inneih hma hauh aṭangin duhsakna an lantir che a, i awm tawh dan leh ka laka i rilru put hmang nangmahin i hrechiang ber ang, ngun takin inngaihtuah nawn leh rawh, i lakah ka lungawi lova, Famkima hi vawi engzat nge ka sawisêl, i ṭan char char ṭhin a ni lawm ni?"

"Khawngaihin, hetiang em ema i thinrim pui ka ring lo, min hmangaih a nih chuan i hrethiam ang, ka hmangaihzia che i hriat kha," a ṭhutna aṭanga rawn tho chhuakin ka kâwngah min kuah a, "I thin tih rim ka duh lo, ka tihpalh takzet," ti sapin ka hnungzâng leh a hmâi a sîktîr a, "Kan inkârah eng mah a awm lo takzet tih Pathian hmingin ka sawi e,"

"A ṭha alawm, thudik i sawi a nih chuan ngaihdam theih lohna chhan tur che a awm lo; mahse, ka rinna che ti chhe lo tur hian fimkhur tawh rawh, ka thinrimna i tawng baw palh ang e." Ka ti zui leh hrâm a.

"Ka hria, hetiang dinhmunah kan ding tawh a, min hmu nikhua lo rêng rêng hi nâ ka ti," a tih chuan, "Kha leh chen, a kum têl teh meuh kan inzui lai khân vawikhat mah hetiang buaina hi kan nei ngai lo, ka kâ ka âng ve a nih chuan sawi tur a awm tihna a ni mai." Ka la damkim meuh lo chu a ni e.

"Thinrim tawh suh, Famkima leh a bialnu kan ko phei anga engkim an hrilh fiah dawn che nia," atih tâk zêlah chuan ka lo ring sual deuh a nih ka ring ta a.

"Midang hnamhnawih kher a ngai lo ve, a ṭûl a nih chuan thudik ka la hre chhuak tho ang, kan mualpho dan a inchen dawn miah lo tih te kha chhût tel ve la, keiin ngaihzawng nang lo ka nei lo a, nangin midang i lo kawp chuan a zak tur chu kei ni lovin nang leh i chhungkua anni,"

"Ka hria alawm, nang mahah engkim ka pe fai vek, midang an awm lo," ṭap ṭeuh chunga atih meuh chuan,'ka awih lo' tih tlat chi ninghal lo chuan.

Thudik a sawia rinna ka nei ve ta hial a, kei pawh duh aiin ka thîkthu a chhe deuh a ni mai thei.

"Kan inkârah mi mdang an tlazep thiang lo a, kumkhat lek innei tura Biak in hawng tur kan ni hek lo, Kumkhua leh chatuan atana thu tiam tur kan ni tih theihnghilh ngai suh ang che," ka thinrimna zawng zawng dah ṭha-in ka lam hawi turin ka kuai her a, mittui tling pam chunga min entu ka nupui la ni mai tur Ramthansangin hmuiah chuan lungchim takin ka fâwp ta a.

Mipa, hmangaihna vawng nungtu ka nih chuan ka che chhuak hmasa tur a ni rêng a ni. Ngaihdamna tel lovin a inrem theih loh a, hmangaihna dik takah chuan ngaidamtu nih a pawimawh bawk.

Ramtei ka hmangaih zia hrechiang ber tu chu kei leh amah hi kan ni a, tun dinhmunah lungawi lohna nei mah ila dâwt a nih miau chuan ka thinrimna ka dah ṭha mai tur zuk ni reng a.

"Remruattluang, ka hmangaih che, min ringhlel tawh suh aw," dingdihlîp âk âkin min rawn fâwp nawn leh a, "Kei pawhin ka hmangaih che, ka lungawi lohna turin awm tawh lo la kan inrem a ni mai."

Chumi hnu chuan kan inneih tur chungchâng sawi dunin kan room thar turte ka entîr ta a, engkim kan phâk tâwka ṭha berin kan buatsaih ve a, kan inchung chiah hi kan nupa room tur atan ka nu leh pa'n a ruahman fel vek.

Tuna ka room erawh Saitei'n a hmang dawn chhunzawm tawh thung dawn a ni.

Ramthansangi laka ka thinurna pawh thil hriat fiah loh vâng ni-a alan tâk vangin kan inrem leh ta chu a nia.

Ka chhungte hnena ka lo sawi lang hman lo kha Pathian remruat a ni ngei ang.

Inngheng riala phone kan bih dun leh meuh chuan ka chhungril a hlim veng veng.

Ka û leh Zosânga lo luh lai chuan kan ngawi reng thung.

B+>[BeckirafARenthleI]<+®

THE RAPSAGYAN FAMILY

Becky Rafa Renthlei(-BRR)

Chapter-7

[Zirsangliana & Remruatfeli of Rapsagy]

Ka fapa neih chhun Rafaela nupui neihna tur pawh kâr hnih chiahin a dang tawh a, kan nu Mafeli nen ngun taka kan ngaihtuah hnuah amah Bawiha biain palâi kan tîr ta kha a ni a, Ramtei nen an inzuina a rei thawkhat tawh viau a ni.

"Zirsang, Bawiha te hi hetia an inzui reng chuan mualpho palh te a awm thei a, mihring hma hun a hriat loh hi maw, inzui reia sâwn thlâk ta mai mai lah an tam, chuvangin anmahni an inhmangaiha inneih an duh chuan mo neih mai hi a ṭha zawk lo maw?" Mafeli'n atih vânga tun din hmun hi thleng kan ni.

An room thar tur inchungah kan siam tîr a, engkim peih a ni deuh thaw tawh, Aizawla kan awm hnu hian kan inneih lai anga ruaipui buatsaih ang kha a rem tawh loh avangin Catering turin kan be fel vek tawh, chhûng leh khat ṭhenrual kan ngah ve bawk nen sum a hautak viau dawn a ni.

Kan nu-in Gp a withdraw leh kan fate tâna kan khâwl joint account siama kan dah zawng zawng deuh thaw hman kan tum a ni a, a namai lutuk lo, thil man a to chho nen kan hun lai ang khân thil a tih zung zung thei loh a; mahse, Rafaela na na nâ hi chu fapa mal mah nise a nun dan a zahawma kan chhuang ru ve viau, a nu nen pawh atâna insên hi kan huam thui hlê.

Duati pawhin a hlawh aṭangin singnga a rawn thawh ve a, Saitei kan fanu naupang ber zirna a tum sak avangin khâwl a lawi a nei thei bik lo a, naupang chhia anni tawh lo bawka an hrethiam ve mai. Ṭhianpa Fakhlua te showroom-ami Asta i.20 Loan-a kan lâk pawh kan la vawmhlum zo bik lo a, anni lamin Lawmsangzela nupui neihna tur an buaipui ve si a, kan inpuitawn lutuk thei lo.

Faka pawh an workshop thilah a zin a, zanin hian a rawn thlen hman ka beisei.

Zân dar ruk velah Rafaela thinrim hmai sen ṭeuh ka hmuh meuh chuan ka insûm zo lo a chhâ chu a ni e.

"Bawiha.." ka biakna hre lo ang hmiahin a room-ah a lût tlang nghâl a, kan nu umzui tura ka tih chuan,"Nghâk lawk ang," ati dam thlap.

Dârkar chanve hnu lawkah Rafaela thinrim âu râwl chuan kan inchhung a khâwk rum rum a, ka fapa neihchhun aw-a thinrimna vawrtawp ri chhuak chuan ka lairil a fan chhuak vek. Nimina mokawr thuam famkim kan hawn chu a pack na bâwm nen rawn pawm chhuakin sahsawm a tum ta mai!

"Remruattluang..." a vawikhat nân Mafelin a fapa a hmingpumin a ko tuarh a, eng nge thil awmzia kan hre eih bawk si lo.

"Ka nu, ka pa, min ngaidam rawh u.." a aw a zawi hle a; a mittui far fap chu ka hmu reng. Chutih lai vêkin ka phone a rawn ri ve chiah bawk. Ramtei pa min lo call na a ni.

"Hello.."

"Zirsang, kan va zak ve le.." Pu Thana aw hniam ruih leh inthlahrung awkî chu ka hai bîk lo.

"Eng nge thil awmzia?"

"Kan fate inneihna tur chu ṭhulh a ngai ta, a pa hian khawhawi ngaihna ka hre lo chu a ni e; Ramthansangin Famkima a ûm a, an inru..."

"Eng maw i sawi?" Ka vîn hauh lo a, ka thinlung erawh chhun angin a na thung.

Ramthansangi, kan fapa nupui tura kan hual leh kan thlansak ngei maiin kan chhungkua min zah lova mipa dang a ûm chuan kan chhungkaw mualphona a va thlen thui dâwn ve le.

Mafeli'n Rafaela thinrim tlân chhuak a umzui bawk a, kan chhungkuaa thilthleng hi ava mak ngai ve maw le. Saitei ṭap pûr chungin a rawn phei ve bawk a; "Ka pa.." sawi pawh sawi zawm thei lovin a ṭap chhunzawm lehnghal.

Ni e, kan fate hian mi fate tluk lo mah se hmingchhiatna sawi tur an nei lova, zirna kawngah nise rual kan awt bik lo. Rafaela ngat phei hi chuan nu leh pa te a chawimawi thiam em em a; a zah dan tur leh a rawngbawlna thlengin ka ngaihtuah chhuak lo thei lo.

Zosangmawia leh Duati an rawn lût a, "Ka pa, engah nge hrehawm intih? Rafaela zawkin nupui a ru pawh a ni lo a, Ramthansangi zawkin alawm le um.." thinrim lutukin a rawn sawi ve leh bawk a, ka ṭhutna ngaiah pawh ka ṭhu hleithei lo a chhâ chu a ni.

Sitting room leh choka inkârah ka vei tawn chhên a, inlêng an rawn lang ṭan ta bawk, mi hian thil an hrethei si a, zak eng ang mah ila mi hmuhah tih lan erawh ka tum miah lo.

"Duati, Zosanga nen khân i nau va zawng rawh u le, lirthei nen a chhuak bawk si a, i nu kha rawn haw tîr thung u la." Nichina ka thinrimna zualpui kha reh tawhin ka ṭawngkam pawh a dam ta thlup!

Saitei kal ve a tum chuan ka remti ta lo a, a u Duati anga rilru sak nei a nih loh bâkah ṭhenrual ṭha lo lêng te thingpui lum a ngai a, an inneihna tur kâr hnih chiahin a dang tawh a, khawpumah a thang chhuak vek tawhin ka ring.

Nu leh pa tân khawhawi ngaihna awm lo mah se kan thû ni miau hek lo.

Rafaela thinrim tawngbaw ngam tur chuan a lêt a tuar ngam ngei tur a ni.

[RAFAEL REMRUATTLUANGA]

Ka thu hriat hi thudik a ni em?

Zaipawl thilah ka chhuak lawk a, Ramthansangi phone a ṭanga min rawn betu chu tudang ni lovin a unaupa a ni.

"Rafael, a pawi ka ti, ka hlauh ang ngeiin Ramtei leh Famkima chu an inru ta e, thlathum mi nau a lo pâi lâwk tawh a, a aiawhin ngaihdam ka rawn dîl mai loh chuan.." a ṭawng ban chap a, sawi ve tur reng reng ka hre lo.

Ka thinrimna ai mah chuan ka hmangaihna avanga ka hriat reng ka hriat loh derna te, ngaidamtu thinlung ka putna te kha ka ngaihtuah kîra hrehawmna leh zahna min thlen tu chauh a ni si.

Ka rawngbawlpuite hmel hmuh chu sawi loh, ka chhungte zak lutuk turte hian min ti nâ a; nau pai reng chung si a min bum duhna thinglung te, hmânni a hotel-a ka hmuh pawh khân kan dinhmun te chhuikîrin ka ngaidam ta kha a ni a, Biak inah vawikhat an puang tawh a, engtin nge hringnun hi ka hmachhawn tâk ang le, zahna leh mualphona hlîr a ni mai.

A mokawr tur nimin tlaia lo thleng ka hmuh ringawt pawh hian ka thinrim a so bulh bulh a, ṭawngṭai lam a lang tawh lo, Chempui nen mokawr kengin ka chhuak ta a, engvangin nge ka sahsawm loh ang? A ha tu turin midang min ûm san duh tawk lovin hun rei tak min lo bum char char hi ka ngaidam ngai lovang.

Kan garage-ah mokawr thinrim engphiara ka sahsawm vek hnuah kan car thar la chhuakin ka tlân chhuak ta kha a ni a; ka nu'n bike-in min umzui tih hre mah ila din ka tum miah lo. Ka zahna hian khawi hmun nge min hruai thlen dawn tih hre lo mah ila kan inah ka leng hlawl lo.

An pahniha thah duhna rilru hial pu mah ila chu erawh ka ngaihtuah duh lo lui thung. Ka mit meng mah ila khua ka hmu lo a ni ber e.

Ka phone vawi eng emaw zât ri te chu ka ningin ka kham ngawih ngawih a, ka switch off ta nghe nghe.

Tlânbona tur chuang ka hre lova, ka hmazawn kawngpuiah chak theihtawpin ka tlân mawp mawp a ni ber. Tanhril road ah tlan thlain ka hma a scooty rawn tlan chhuak thut chu ka su teuh kher mai. Hau hrep tumin ka ding dawt a, Scooty khalhtu pawh a ding chawt tho.

A helmet khum a phelha a hmêl ka'n hmuh chian meuh chuan Lalrindiki lek!

"Rafael, engtizia nge..?" Ka biak hmain a rawn ṭawng chhuak hmasa a, ani pawh hian kan chanchin a hre vek tawh ang chu.

"I hriatsa min zawh tum suh, i tlânna tur kawngpui hi en ngun la i him ang," ka ti nghut a.

"Hey.." ka ṭawng dan chu mak atih hmel kher mai.

"Lalrindik, min be khawtlai lo hian haw rawh, tun angah helaiah eng thil pawimawh nge tih tur i neih a.." ka dinhmunah hian hmeichhia hi ka be châk chhete eih lo.

"Inbengdai la.." ati dam leh thlap a, ka car hûnna lamah rawn kualin, "Eng din hmunah pawh ding la, harsatna hmunah pawh awm la, phatsan ve ngai lo tur che i nei tih theihnghilh ngai suh." A sawi awmzia ka hre miah lo; ka chhânna pawh nghâk chuang lo hian Scooty a hûnna lamah a lêt leh hmak.

Henu hi chu a zia a dang ve hrim hrim tih ka hriatna a rei tawh. Biak zui emaw chhân tumna rilru lah ka pu hek lo.

Zosangmawia tal ka lo hrilh hre ve lo a, ani chuan tih dan tur kawng emaw hmalâkna tur pawh a hre mial maithei asin.

Diki tlân liam hnu chuan keipawh ka tlânchhuak ve leh ta a, Ramrikawn ka thleng fel tihah min rawn tlân pêltu car chu Zosanga ta a ni. Min rawn zawng tih ka hrethiam nghâl a, ka nu bike ka hmu chhunzawm tawh miah lo thung.

Zosanga leh ka u Duati hmêl ka hmuh chuan thinrimna namêm lovin min tlâkbuak leh ta. Min hmangaihtute zah dan tur ka ngaihtuah chhuak leh nghal. Ramthansangi hmêl hmu chiah ta ila engtin nge ka tih ang aw..

An tlânna hmun eng mah ka hre lo va, mahse an tlânbo chatuan tawp nâng. Engtikniah emaw an lo lêt leh ngei dawn tih ka chiang sak.

"Hey bro..i va tlân chak rem rem ve le.." Zosanga a nui suk nia.

"Haw rawh u, keimaha awm fâl ka duh."

"Bawiha, khatiangin a nêp zawng rilru pu reng reng suh, hetiang ang hmeichhia i neih a ngai lo tur hi lâwm zawk ta che." Ka û in a lo ti ve bawk a.

"Ka zak a ni.."

"Zak mah la engtin nge i tih chuan ang?" Zosanga'n ka dârah min rawn kuaha Whisky rim a nam leh thar thar tawh.

"Mahni chanah a tlâk loh chuan sawi a awl nia," ka ti nghut a.

Ramthansangi leh Ruati kha an inkawm ṭhin a, Zosanga hian engkim a hriat ve vek beisei lo mah ila eng emaw zât chu a hriat ka ring.

Zosanga'n kiai suk chunga whisky ûm a rawn lek chhuah chuan ka kâ a lût tura ka duh ngai hauh loh zû in ve duhna rilru ka pu ta a.

Ni e, zu in ila chatthla hmiah ila ka zahna leh mualphona kiam mah suh se min chhâwk mahna...

B+>[BeckirafARenthlel]+®®

THE RAPSAGYAN FAMILY

Becky Rafa Renthlei

Chapter-8

[ZOSANGMAWIA of Segundo]

Car chhungah kei, Duati leh Rafaela kan ṭhu a, ka rilru sual êm vâng pawh ni chuang lovin Rafaela rilru na hmêl ka hmuh hian ka lo na ru ve ngawih ngawih. Mi piangthar ṭha hluah ka nih tlat loh avangin zû in hian eng emaw chen min chhâwk thei tih ka hria. Chuvangin, Rafaela pawh zanin na na nâ chuan in pui ka tum chiang teh e.

A û Duati a awm ve tlat sia a inthlahrun ka hlauh vângin, "Duat, ka car hi khalh haw la nakin deuhah i nau nen kan lo haw ang," ka tih chuan rum fahranin min rawn melh a, "Zu in kher kha thil ṭûl ber a ni lo," Duatbiki ṭhin hi a.

"Lokal teh," tiin Rafaela lam ka hawi leh a, "I û hi car thleng ka va thlah lawk ang e, hmeichhia kan mamawh rih lo," ka tilui ve ngat.

Duati tûmbâr enin ka nui suk a, a thinrim leh tîk têk ang chu.

Ka car hunna lamah hruai pheiin, "Kan inkâr leh i zu in chungchâng i nauvin a hriat kher i duh em ni? Mâwl riau zel suh," a luh nân car kawngkhar ka hawn sak a.

"Ka in ve kher dawn hleinem.."

"A ve lutuka che, kan in lâi i hmuh phawt chuan i châk dawn chiang; ka thusawi zawm la i nu leh pa thil awmzia hrilh pahin i lo han haw hmasak kha a ṭha."

"A lo nih tak chu.." ngeiawm zetin a nui sak a, "Min hnar i châk viau chuan ka mamawh bik lo che," car tinungin ka biak leh hman hma hian a tlân chhuak zui ta nghal a. A upa zawk si hi a titau peih a nia, âtna riau a nei leh tlat ṭhin.

Ka kiangah a nih loh chuan khawi hmunah mah zû a in tur a ni lo. A nau bulah ngat phei chuan, Duati hmingchhiat hi ka duh lova tunah pawh râi thei dinhmunah a ding tih ka hria, ka rilru tenawm vâng nge, râi tura ṭawngṭai hial ka duh. Mahse, chu êm zawng khenbeh ka nih loh nân ka ti ta lo chu a nia.

Lungawi lo zeta a tlânliam chu ka thlir zui ta lo. Rafaela rilru natna ṭâwmpui turin rûi hlê ila a ni mai.

Ka nu dik tak hre lovin kum 28 ka awm a nia, keimaha ka awm chângin ka ngaihtuah leh veng veng zel. Tun lai hian Duati nen kan inzui tam a, ka nau nupui neihna tur buaipui a ngaih vângin ka ngawi rih mai mai a ni. Ka nu min hringtu hre lo hian ka awm chatuan dawn lo a ni tawp mai ni.

"Rafa, bro.." A hmêl thinrim avanga dur khup chu hmuh kân a har teh a nia. A û ka thlah liam chhung khân a lo in hman nge maw ni! Car chhungah zu rim a nam huam a, ani meuhin zu in duhna rilru a pû a nih chuan a na viau tihna.

"Zosang, ka zahna min thlentu hi ka chhuah dawn hauh lo a nia," ti supin dashboard-a whisky chu a rawn phawrh chhuak a, tui pawlh miah lovin zuk in pawp a!

"No, khatiang chuan in suh, i pum a ngaihtuahawm lutuk ang, i natna ka hriatthiampui che a; i lam ka ṭang tlat bawk, Ramthansangi leh Famkima'n an bum man che hi a to fer fer khawp ang." Ka inseh ruh nasâ.

Mipa nun ṭha, nu leh pa mualphona thlen sak hlau rêng rêng kha hmeichhe pakhat vangin a mualpho pherh hrep ta chu a nia, eng vangin nge a nat loh teh lul ang ni.

Kan pahniha zû kan in dun meuh chuan mumang ang mai a nia lawm le. Ruih tuma in a ni bawk a, no engzat nge a in tawh ka chhiar sêng lo, kei erawhin eng tham mah ka in lo a, whatsapp aṭanga Duati min rawn biakna ka chhiar chuan ka nuih a za lo.

"Zosang, lo hawpui tawh rawh, hrai ruih kher a ngai lo a nia," he nu tak hi chu, eng mah zêp hnihne nei lo hian a sawi tlang râwt zel.

"Rui chhum hmawk pawh ni se, ka dem lo."

"I dem emaw dem lo emaw, lo hawpui mai rawh," ka chhiar zo hman chiah min rawn call nghâl a, "Zosang, rawn haw rawh u, kan inah chhungkua kan kim ṭhap a nia, i pa pawh a lo thleng tawh," zâwi sapin a rawn ti leh a.

"Ok, lo ri hluai lêm suh." Phone min off san leh hmiah.

Rafaela meng phî chiai leh ṭawng nawk nawk chu passenger seat-ah ka nawr phei a, an inneihna tura an insen tawhna zawng zawng te ka ngaihtuahpui phei chuan Ramthansangi ka haw hlur thei nia!

Duati leh Saitei pawh an zak tih ka hria, a bîk takin Saitei a ni leh zual a, Duati erawh upa ber a nih vâng hian a nau ang êm êmin a chiâi lêm lo.

Muangchângin in lam panin ka hawpui ta a.

An inah ka chhungte an phei vek tih ka hre tawh a, Duati'n min ânkhum mai thei, dik tak chuan kei aiin a upa tak na-a puitlin lohna riau a nei ve tho.

Rafaela te in chhawngthum chu a lo la êng uar a, lirthei ding a awm nual bawk.

Ramthansangi nuṭa pa bike pawh ka hmu a, hetiang chuan inchhungah ka luhpui lo tawp ang. An farnu vânga ani bial zaipawl conductor meuh rui chhe lai an hmuh hi thil ṭûl ber a ni lo a, an hmuhsit phah ai chuan kawng dang ka dap mai tur a ni. Duh leh chhungkua chu lo ṭhu khâwm se la, an thu leh hlâ ka hre leh vek dawn tho.

Duati ka call nghal a, vawithum zet a ring hnu-ah pawh a la duh eih lo. Titau peih sia maw!

Rafaela car chhungah ka mut tîra pâwn lamah ka kalh hmiah. Kan thlen hun an lo nghâk reng dawn si a, kei mah tal ka inlan loh chuan a fel dawn si lo atin ni. Huphurh ru zet chung hian in lam panin ka phei ve ta a.

"Zosang, khaw'nge?" Kawngka ka kân rualin nu Mafelin a ti nghâl a. Eng dâwt nge ka sawi tâk ang?

"Eng lo, ka room-ah a awm, mahni-a awm fâl rih a duh a.. " ka rin ai daihin ka sawi mar nalh, inchhungah ka rin loh deuhin mi an ṭhu tam daih. Zaipawl member ṭhenkhat ka hmu bawk.

"A nih tur ang a ni zo tawh a, thil ṭha lo te kha tih a tum ngawt ang e, va ngaih ven leh rawh.." ka pa, Lalfakhlua'n ka mitah chiang taka min en chungin a rawn ti a, dâwt ka sawi tih a man thiam a ni ngei ang.

Pa Zirsanga hmel erawh hmuh a nuam lutuk lo, sitting room pangngaiah tute nen nge mawni an inkâwm a, an hmêl ka hmu chiang thei chiah lo. Kan Lalduati hmel hmuh tur a awm ve miah lova a room-ah a tawm nge Saitei nen an awm dun tih pawh ka hriat si loh.

Hmeichhe pakhat hleitling zet hi ka dinna lamah a rawn phei a, atu vak mahin an ûksâk lutuk hran lo. A sam sei angreng tak leh a mitmeng lian lam deuh te chuan engtin emawni tak a hmêl a ti ṭha riau.

"Khawnge Rafaela?" Ka beng bulah min zawt sap a, midang chuan an hre tham lo ang.

"Eng atan nge i tih, ka sawi zawh chauh kha,"

"Dâwt sawi i thiam lo em mai, a awmna dik tak i sawi loh chuan keiman ka zawng dawn a nia," dam thlapin a ṭawng tho; mahse, a nelawm hran hauh lo.

"I duh leh zawng la ti nia, kan in pâwn lamah kan kalh vek, chahbi i nei em ni?" Ka ti nghut a, khawi lam hmeichhia nge hriat ka tum hran lova ka hre bawk hek lo.

"Tanhril lamah a kal a, ka hmuh lai kha chuan a thinrim hle bawk, a rawngbawlna hlamchhiah phah nân leh mualpho tâka a awm hi ka duh miah lo a nia," a ti fak fak a. Tu nge a nih rin dan ka nei thiam ta deuh, zaipawl member zinga mi a nih loh pawhin a ṭhian hnai a ni mai thei.

A nu leh pa te hriat lohvin thudik hrilh ila, kan in lamah hruai phei ve nghe nghe ila aṭha mial ang a.

"Car-ah sâwn a mu a, i duh chuan va awmpui rawh, a rui a reh hma chuan kai tho duh suh aw, midangin an zawh palh che pawhin sawi chhuak suh ang che, kan inah kan phei dawn nia, Duati ka va hmu lawk ang e.." tiin car chahbi ka pe nghâl a. Mak takin henu hi ka mi rin zâwng a ni tlat!

Tunah zînglam dâr khat a ri tawh a, he in chhunga thil lo thleng hian mut ati chhuak eih lo. Chu nu chhuah fel vek hnuah chauh Duati room ka pan a, midang ho ṭawng nak nak te chuan min ngaihven lo hlauh.

Chhunglamah kawngkhar a lo kal lo ve teh tlat a. Khumah ṭhu in eng emawni a lo ziak niap niap a, ka lût thâwm a hriat ve reng ka ring, vawikhat pawh a lo hawi chhuak lo! A thil tih lai a chhunzawm miah miah nia.

"Ka call engvangin nge i pick duh loh?" Khumah ka ṭhu thla ve nghâl a.

Min chhâng duh miah lo.

"Duati.."

"Zosangmawi, i duh duha i tih kâwi theih ka ni lo a nia.." ti nghatin min melh râm râm a, ava han hmelṭha si ve le.

"Eng nge ka tih kâwina che?"

"Zû kan in dunin kan mu dun pawh a ni mahna i thu thu-a ka awmna chhan tur a awm miah lo a nia, Rafaela zu in pui kher kha thil ṭûl a ni lo, chhe lutuk mai."

"A bula in ka phal loh vâng khân min haw ringawt suh, i tâna ṭha tur ka sawi a nih chu," a thil ziah lai dahsawn sak ka tum chuan a phal îkhaw lo.

"Ka duh leh ka in anga, duh leh ka in lovanga i sawi tur a awm miah lo,"

"Lalduat, khatiang zâwng khân maw min chhân dawn?" Ka ṭawng ring ṭha ngam si lo, ani pawh chuti tho.

"Ka chhân che i duh loh chuan min be lo la a ni mai," induh larhin lehlam a hawi a, "Ka ta i ni, mipa dang ta i ni lo, i tâna mipa hmasaber ka ni tih ka hriat ang bawkin i hria, min nam nûl tum miah suh,"

"Zosang leh.." a pen ken laia min vawm chuan ka hawi sawn hman. Thinchhe si, hmelṭha tho bawk si.

"I râi a mi, i va thinchhe ve." Ka nui zui suk a, ka hriat nawn tîr kher duh hrim hrim.

"I zak lo lutuk.." a râwl a ring ṭha ngei mai.

"A nia lawm, vawihnihah khân pakhat a insiam thei, kan vanneih viau chuan a spare nen."

"Awi, awi! I zak lo lutuk.." ka lu ah lehkhabu-in a rawn vaw fawk a, insûm theihna hi ava tlachham tak; mahse, ka thinrim duh miah lo.

"Rafaela te anga inphatsan hi ka duh dâwn lo a, thla tharah i period loh chuan min hrilh ang che, ka nau te inneih ni ah pawh ka kiangah zel i awm ang tih hre bawk la, hawlhpawlh ka duh loh ang chiahin chawhpawlh nun ka duh lo bawk." Awkî sân hauh lova ka ṭawng thlup chuan min en reng a, chutah, "Ka tihsual man têl ngam lo tura hmeichhe nêp ka ni lo a, kei mahin ka in enkawl thei bawk." A la ti hrâm.

A dik tak chuan a upat zâwk vang hian tlâwm a hreh em em a, min chhâng dang ṭhak ṭhak thei, hmeichhe dang anga ṭawng tam duah chi ni phei se chuan a ngeiawm ṭhin reuh ngawtin a nia ka rin.

A nau te inneihna a sukuk tâk si ah chuan Lunglei lamah min phei san ka hlau ru zek zek. Ka duh tih phat buai ka tum lo ang chiah hian eng din hmunah pawh ding se kan kum hian min daidan ka duh dawn lo bur.

"Hey, thinrim tawh suh," tiin a samah ka chûl a, a ner sak.

Chumi hnu chuan Rafaela awmna leh nichina min zâwttu chanchin te kha ka hrilh a, ka ring dik chiah an zaipawl pui, Diki a nih thu leh nun kawng ṭha lo lam a zawh an hlauh êm vângin zanin hian a rawngbawlpuite an lo lang ve a nih chu.

Vawiinah phatsan a ni tih a inhre chauhva, a tawrhna hi ala nasa dâwn chauh. In lêng haw thâwm a awm tâkah chuan kan pahnihin room kan chhuahsan ve ta a, Duati nen min rinhlelhna chhete eih annei lo hi mak ve tak a ni. Mahse, chhungkaw inpawh leh naupan lai aṭanga lo inzui tawh kan nih vâng tepawh a ni mahna.

Ka nu leh pa, Duati te inah an riak dawn a, an riah ka ring sa hrim hrim. Kei erawh chu ka dâwt sawi vângin kan in lamah phei a ngai a, Rafaela ala harh loh phei chuan Diki kha thlah a ngai maithei. Duati hruai chhuah ve chi a nih loh avangin garage thleng min thlah, uluk pinglingin ka fâwp hrâm, a rei lo mai pawh a.

"Zosang, mi hmuh phâkah leh pawn lamah tikhân min fâwp ringawt tawh suh," a ti sap a.

"Khatiang kha chu thlarau sual hnathawh zîngah ka chhiar tel loh vângin min hmu tu apiang chuan kan chanchin an hre dawn tihna a nih kha, a chhan chu room-ah kan tawm reng thei lova, hmun fâl reh reih rawihah kan awm reng thei lo bawk, chuti a nih chuan khatia tih zeuh zeuh kha ka sim thiang lo," ka ti hmiah.

"Sawi thui thei, kal tawh rawh, in thlen hunah min lo text dawn nia,"

"Yes ma'am,"

"Zosangmawi i chhe keh.." hmanhmawh zetin min luh san ta a. Mahni aia upa ngaihzawn hi thil hlimawm tak a ni tih ka hriat phah. Ruati kha kum khatin a naupang zawk a, a inla no thei viau ṭhin kha a ni a;kan Duatbiki mizia nen a inpersan sih sah teh e.

Rafaela car ka hawn chuan a la mutui hle a, a sîrah nichina nula Diki kha a lo la ṭhu ve reng.

"Dikte, engtin nge i haw ang, a in ṭhang si lova chuti maia a harh chu ka ring lo." Driver seat-ah ka ṭhu rem nghâl a.

"Min hrethiam la, a harh laia awm ngei ka duh sia engtin nge ni ang le," nuam lo atih hmel viau. Eng nge tih atum hriat sak mah suh ila Rafaela tân a hlu hle a ni.

Ka nu leh pa an riah tur thu te, zîngah chaw an nghala ka rin thu tepawh ka hrilh nghâl vek a, "I chhungte i vênthawn loh chuan kan inah lo phei mai rawh, zîngah i haw mai ang a," tiin rem ka ruatpui a.

"Nia, ka nu te thil awm dan ka hrilh tawh a, kan tlaivâr maithei tih nen, inpahnihin tlân hmasa ula, scooty in ka lo zui ang che u, in in awmna ka hre si lo va," a phone khawih niap niap pahin a ti vei thlap.

"I mualpho phahna turin che miah suh, ka kiangah a awm chuan ngaihtuahawm a ni lo a nia, zan in bâk chu hetiang hian a awm bîk nâng."

"Chu tak chu a nia, kohhranah a pawimawh si a, a nihna zawng zawng piah lamah hmeichhe pakhat vâng mai maia a nun a tihchhiat hi ka rem ti lo, engtin ti thei lo mah ila hmâ lâk ve hrim hrim ka duh," tiin car kawngkhar dimtê hian a hawng a, a scooty dahna lam panin a phei ta a.

Ka ṭhiana erawh kahthlâk ang maiin a muhil hmiah. Kei ni ta ila Ramthansangi te inah ât sovin ka va sarâk maithei a ni. Ani ve thung chuan amaha tuar a thlanga a puitling viau ka ti. Ruih hi a ṭha ka ti lo a; mahse, kan hun tawng azirin ruih a ṭûl ve miau si a..

Kan in pana ka tlânpui lai chuan a rawn rûm ṭuah ṭuah a, fiah vak lo hian, "Ramte," atih ri ka hre reng.

Rafaela buma mipa dang pan santu hi Pathian hian a ngaidam duh ang em aw, ka ti mai mai; mahse, Pathian ka ni lova chhânna pawh ka nei chuang lo.

Kan tlân chak bawk nen rei lo tê-ah in kan thleng thuai a, Diki pawh a rawn thleng chawpchilh ve nghâl. Nula mak dangdai tak a ni! An inngaihzawn ka ring hran lova tlaivar huama Rafaela buaipui a tum hi a fakawm thlâwt. Ramtei a tawn hma te khân lo tawng hmasa se ṭha tur a nia.

Rafaela rûi zawi zet chu mikhual room-ah kan kuah lût a, a harh dâwn hnaiin ka hria.

"Zosang, i duh chuan mutsan rawh ka lo awmpui ang, ka mamawh che chuan ka lo ko vat dawn che nia," khuma mu a ṭhianpa melh zauh chungin a ti a.

Duati hnenah in-report ka la ngai bawk nen ka pawm zawng tak a ni.

A mamawh tur ang tui in tur dahna leh bathroom awmna te ka kawhhmuh hnuah ka room lam ka pansan ta a.

[LALRINDIKI]

3:00Am

Zing lam dâr thum a rîk chuan ka lo chhing ve sek nge luak bawrh bawrh ri-ah ka harh zawk a.

Rafaela khuma bawkkhupin chhuatah lamah a lu a dah a, a luak chu niin!

"I ṭha em?" Hetiang hian mipa zurui ka buaipui ang tih ka ring pha lo. A sam, vikings hairstyle-a a meh chu a thur chhap a, a mit sen rûm te chuan ka hriat ṭhin Rafaela kha anna pawh a nei lo. A hmêl erawh a ṭhat ngai rengin a ṭha thung.

"Ramthansang, min hnaih suh," a châla dawm tuma ka va khawih chuan ka kut avai per sawk a, ka phu zawk.

"Rafael..."

"Ka hming pawh lam ri tlâk i ni lo.." a bâk hriat zui theih miah loh hian a riat nâwi mai mai a, ka nihna leh ka dinhmun ngaihtuah chuan tûna ka awmna tur hmun hi a dik lo. Mahse, fuih emaw hetiang nun a neih chhunzawm lohna tura chhawmdawl ka tum ve tlat.

A luak ka then fai vek hnu-in bathroom-ah hmai ka phih san a, ka va chhuah leh chhuan lukham nghêng hian lo ṭhu âwnin mit a chhing a, ka thâwm a hria nge rawn meng chhuakin chiang tak hian kan inmelh ta rân a.

"Dikte..." a makti hmel chu hmuhnawm tak a ni.

"Yes, keimah, Lalrindiki.."

"Eng..!?"

"Hahdam la, ka sawi fiah dawn nia," ka ti dam thlap.

Ni e, ani ka buaipuina chhan hi ka hrechiang alawm, Rafaela te ang mi rilru nghet tlet tlawt hian a chhe lam kawng a zawh chuan a tâl na khawp ang. Chu chu ka phal miah lo.

Ka phal lo takzet, a bul ka ṭan fuh chuan a tâwp ka khar ṭha ngei bawkin ka ring...

B+>[BeckirafARenthleI]<+®®

THE RAPSAGYAN FAMILY

Becky Rafa Renthlei

Chapter 9 & 10

[LALRINDIKI]

Rafaela mutna ep-ah ṭhut hmun ka rem ve a, mak min tih hmel zet hian min en reng, a rui ala reh fel lo tih ka hre tho va; mahse, nichin ai kha chuan a zia ta deuh.

"I harh tiraw?" A mitah tak ka en a, ka rilru tak chuan hrehawm ka ti ve tho, mipa ka ngaihzawng nimiah lo leh ka ṭhian ṭha pawh ni si lo zankhaw tairêk thlenga han ngaihven tâk chu(h).

"Harh e, eng nge hetah i tih?" Zawi supa min chhân chuan, "Khawngaihin hetiang hian awm suh, kan hmabâka rawngbâwlna hmachhawp tam tak te kha i theinghilh ta em ni?"

"Ka nunah inrawlh tum suh, Diki.."

"En teh Rafael, hetia i awm hian i nupui tur chhungte'n an hmusit phah thei che asin." Ka ti dam thlap.

"Min hmusit mah se eng nge pawi, mahni thutiam zah zo lo mihring hi eng atan mah ka ti lo, nang pawh i awmna tur hmunah awm la, min buaipui duh vak lêm suh," thinrim insûm taka a ṭawng chu ka run ang reng; mahse, ka duh thlanna a buaipuia ngaihven ka ni a, ka thinrim lang ngam hlek lo.

"Hun kha leh chen Pathian rawng i lo bâwl tawhna te kha chhui kîr la, hmeichhe pakhat rinawm loh vânga nun kawng ṭha lo zawh kher a ṭûl em ni? Inngaihtuah chiang rawh,"

"Diki, zaipawlah kan tel tlâng a ni maithei, ka mimal nunah erawh hmeichhia ka mamawh tawh lova; tin,min ngaihsaknaah ka lawm, ka lawm tak zet, chumi avang chuan kan inṭhian ṭha ta tihna a ni lo, dâr engzat nge?" Tiin min zâwt daih a.

"Dâr li a ri tawh.."

"Scooty i ken chuan min haw san la, i ken loh leh ka va thlah dawn che nia," min nin hmel tak hian a thaw chhuak hawk a, a hmêl ṭha zet, mahse, thîp râm chu a ngainatawm tehchiam loh.

"Ka ti tak tak, khawngaihin ani vâng khân i nun tih chhiat tum miah suh aw, bial inkhawmpuiah hla remna tur te kan nei a, i tel lovin engtin nge kan tih theih ang? Pathianin rem atih chuan i tâ tur dik tak a la pe êm êm ang che."

"I sawi thui mah mah, nula heti chen chen mipa bula awm hi a him lo a nia," a ner suk a, a sam hûi chhoh thuak pah hian, "Hmeichhia hrim hrim hian min hnaih lo ula a ni mai," ti lehin a mutna aṭang chuan a rawn tho chhuak a, "Sual duh ila chuan tûnah pawh hian 'min ngaizawnga min umzui zêl,' tiin ka sawi thei reng a nia."

"Rafael!" Ka ti ṭhat a.

"A ni dâwn rêng asin, mihring hi kan lan dan ang kan ni vek lo a nia, Pathian hnenah kan inneih tur chungchâng ka thlen vek, min chhânna hi pawm thiam har ka ti, min chhuahsan phawt mai teh," min ngaihnêp hmel tak hian ka lam a rawn hawi a; a rilru put hmang inthlâk ta dâwrh hi mak tak a ni. Heti ang zawngin a ngaihtuah ang tih ka ring pha lo rêng rêng.

"A ṭha alawm; mahse, ka la duh tâwk miah lo a nia," ka ṭhutna aṭanga tho chhuak ve in a bulah ka va ding a, 5'5ft a sâng ka ni a, Rafaela lakah chuan ka lang hniam rawih! 'Thau' ti a sawi tur a ni lo a, a taksa a inphut hlê; ka hmuh tirh phat aṭangin ka mit a la nghâl rêng bawk a, a sam meh dan common lo tak te, a hmel ṭha zet leh 'pa' rûkna riau a neih te hi ka hmu thiam vek. Ka mipa duh chi a ni tih ka hre nghâl a; mahse, zaipawl member ka ni a, ani conductor a ni bawk nen ngaihzâwng rilru ka pu lo hrim hrim.

Nupui a nei thuai dawn tih leh kohhranah pawh vawikhat an puang tawh tih te, an inneihni ah hla kan rem dawn tih ka hriat te khân ka hnual ru viau; mahse, rilru chhiat vâng ni lo vin nupui nei mai atân chuan ka lo ui ve ringawt a, kei hi zaipawl member-ah chuan ka junior ber, term thar an din leh hnu-a tel ve chauh ka ni a, Rafaela ka hmuha a mizia ka hriat tam poh leh ka chhungrilah tawk che tu a awm tlat si.

Min thlah a tum chuan ka duh bîk lo, bâkah khua a êng deuh uau tawh a, chuti tehchiama inkawm ngeih kan ni bawk si lo nen a inthlahrunawm ve reng. A rûih lai te khân ka chhungril a lo na ru nget nget khâ a nia, zak lo ka inti; mahse, an inneih ṭhulh anih tâk vanga mipa nep ber khawsaka a khawsa tur hi ka ngaingam lo a ni ber mai, zah pawh dâwn lovin ka umzui chu a nia.

"Diki..."

Scooty-ah ka chuang vek tawh a, min rawn koh chuan ka lehhawi vat. Kut kuangkuah thâna dingin car a nghêng a, a sam thur chhap leh a mitmeng sen rûmte chuan a ti lang pa hle. Rafaela hi chuan mi star rawn a hlawh rêng a ni.

"Ṭha takin in enkawl rawh aw, i rawngbawlna aia hlu he khawvelah eng thil mah thlan tur a awm lo a nia," ka la ti hrâm.

"Hus!" A kut ding lam pharin a kiai suk a, ka tlânliam san ta.

Rafaela nuna inrawlh hi ka tum nghet tlat a, ka rawngbawlna phatsanin ka pan dâwn tihna a ni lo; a nun ngai kalsana sual rawng a bâwl hi ka phal lo mai a ni.

Kei hi Lalrindiki ka ni a, kum 25 ka pum ve chiah, ngaihzâwng pahnih chiah ka nei ve a, chu pawh ka tleirawl lai a mi daih tawh an ni. M.A ka zo fel âwrh chauh va, lehkha thiam thei uchuak ka nih loh avangin ka kal ve bek bek zel a, hna mumal sawi tlâk ka la nei lova ka nî te pheikhawk dawr ka nghâk ṭhin a, Bangalore-ah rei fê ka awm a, sâp ṭawng erawh ka hmang nâl phian.

Mizoramah nikum kum tîr khân ka rawn haw chho a, unau pahnih chauh kan nih avangin ka û Vanlalrohlua hian min duat viau, nu leh pa kan la nei bawk. Ka lo haw chhoh apiangin kohhran leh khawtlângah ka phâk tawkin ka inhmang ve ṭhin a, kumin hian bial zaipawlah min dah ve teh tlat! Ṭhalai inkhawmah ka solo ve zauh zauh ṭhin a; zai thiam khu chûk ka nih ka hre hran lo.

Tling lo inti tak chungin leh mahni insit chungin rawngbawlna ka vuan ve a, nu leh pa min fuihtu leh zilhtu ka la neih vang hian ka lawm ṭhin; ka û pawh High school zirtirtu a ni a, ka nu in eng mah a thawk lo thung, ka pa erawh forest lamah a thawk a, a pension hnai tawhin ka hria.

Zaipawl kan in-form tirh aṭangin Rafaela hian ka mit a la nghâl a, mi pangngai nun angin nung mah se amahah zahawm rûkna riau a awm tih ka hria; chhungkaw khawsak hniam zawk zawk annih ka ring lo bawk a, ka rin ang chiahin an ina hlâ kan zir ṭum khân ka ring dik tih ka hria.

A nu leh pa, an unau an hleitlingin an hmelṭha hlawm hle a, mipa awmchhun a ni tih ka hriat khân sual lam kawng zawh lova zaipawl conductor a ni thei hi a nu leh pa an fakawm thlâwt. A u Duati kha vawihnih ka hmu tawh a, a luhlul hmêl viau nain misual a nih ka ring hran lo, a chhe lovin a nalh zuih a, a nu hmêl hlauh. Rafaela chuan a pa a chhun thung, an tê ber hming ka hre lo a, nizan kha ka vawikhat hmuhna a ni.

A nupui tur hian âtna chikhat a nei nge a lerh ve hrim hrim, hetia engkim peih vek tawh hnu-a midang inrûk tîr hi a ngaihtuah tâwi ka lo ti ve ringawt a, ka ṭhiante sawi dan hmangah an inzui rei tawh viauin a lang si. A tenawm thlâk lutuk deuh ka ti, nei leh duh lo tur chuan an insênso hma te khan sawi mai âwm tak a nia. Â, ka ngaihtuah thui poh leh â ka ti a ni mai.

Kan in ka thlen chuan zinglam dar nga a ri ṭêp a, ka chhungte tumah an la tho lo. Ka mut ve hlek loh phei chuan dâwr pawh ka nghâk thei nâng. Hausa lua kan ni lova kan zirnaah sum eng emaw zât kan hman bâkah kan in hnuai luah theih tura siam kan duh bawk avangin ka ni te dawrah ka inhlawh ve ta kha a nia, mahni inchâwm ve hi ka duh reng reng.

Rafaela hmêl mitthla chungin ka khumah ka mu diai a, a nupui tur Ramthansangi kha ala inchhir ve ngawtin ka ring; mahse, Rafaela hetia a tâl kual mai mai chuan an hmusit dawn lutuk, hmeichhe rilru hi chu a mak a; nau thla thum mi dâwn pâi chunga inneih thutiam chham tum reng reng! Pathian pawh a zah lo em maw ni?

Ka theih tawp chhuah ka'n tum ve chhin poh a ni ang chu, ka zah theih lohna zawng zawng sâwmkhâwm takmeuh vin..

[RAFAEL REMRUATTLUANGA]

Rindiki tlânliam ka thlir zui vawng vawng a, a mize mak dan em em hi! Kan inhriat tirh aṭang khân vawi tam kan la inbe hauh lo. Chuti chung chuan nizanah min lo awmpui ve ngar ngar a ni si a, ka nunah hmeichhia seng luh ka tum tawh lo a, phuba la tur êmin thawk chhuak lo mah ila Ramthansangin leh Famkima'n zahna leh mualphona min thlen man hi chu a man an pêk ve ngei a ngai ang.

Ka pum let but but tih reh tumin fridge-a tui vawt ka in khawlh khawlh a, zu in kha a ṭha lo. Mahse, ka chhungril na ut ut leh zahna namên lo hi harhfîma hmachhawn ka ngam ngang lo.

Pathian hnenah ṭawngṭaiin kan inneihna tur pawh ka thlen thlap a, 'i remruat a nih loh chuan harsatna min siamsak rawh tiin ka dîl, nimahsela, palâi kan tîra a fel tâk thlupah khân a remruatna hnuaiah inneihna kan buatsaih ngei dawn' tiin ka hlim hlê a nih kha. Mahse, inṭhen mai pawh nilo, sâwn pai sa-in min lo kawp a, an la inru zui hian min ti na em a ni. Pathian hi a awm tak tak pawhin ka ring ta lo.

Nilo, a awm chu a awm a; mahse, ka tân a awm ve lo, rawngbawlnain awmzia a nei lo a, nu leh pa thuawih leh humsual dâi miah loh pawhin awmzia a nei hek lo. Chuvângin, ka nun hi ka duh danin ka hmang tawh ang, ṭha ka tih lam kawng ka zawh tawh mai dawn a ni.

Nu Muanpuii te nupa an lo haw lâi chuan sitting room-ah ka lo ṭhu a, kan inah an riak tih pa Faka'n sawiin, "Rafael, i nu leh pa rilru tur ngaihtuah la, an natna belhchhah zâwngin awm tum lo hrâm rawh aw, nizan khân i nu pawh a insûm thei lo lek lek a nia, nang aiin an zakin an mualpho lo bîk lo a nia," atih chuan ka ngawi reng.

"Zosanga nen em ni zû in in?" Min zâwt leh a.

"Aih.."

Zosanga puh ka tum reng reng lo, ka duh thu-a in ka nia, ani hmer tel kha ka duh eih lo.

"Zosangmawia pawh hi nun dan chin tâwk a hre lova heti renga zu a in a nih chuan nakinah a la tuar ngei ang," Pa Faka ṭawng laiin Zosanga a rawn chhuak a, "Ka nu dik tak min hrilh ula in thu ka zawm a ni mai, ka lâka zêp inneih chhung hi chuan in thu anga ka awm beisei bîk suh u, lokal rawh Rafa, ka room-ah," Pâwr zet hian a ti a, a pa hmela mak tihna lo lang chu ka hmu reng.

A hma khân Zosanga hi ka ṭan vak ngai lo a, a nu leh pa-in an duat êm vângin; mahse, tunah chuan pa Faka te nupa hi thiam ka ti bîk miah lo, a nu dik tak hrilh mai se, zêp anneih kher hi eng nge a ṭûlna? An ti mah mah, an fapa an tina rei mai mai a ni.

Zosanga nen a room-ah kan lût ta a, engtin min ti lêm hlei lo va.

"Zosang, engtik nge i hna i zawm dâwn?" Khumah ka mu thla nghal a, ka penṭawng luak chhuak a reh thei lo.

"Matea te inneih zawh veleh a nimai, eng nge?"

"Ka ti mai mai, ina awm pawh ka châk lo, Lunglei lamah phei ve daih ka duh u Duati rualin.."

"Engtikah nge i û a phei dâwn a?"

"Nupui ka neih dawn tâk si loh-ah chuan a phei vat ang, châm chhan tur a nei lo e, Lunglei nuam ati zâwk alawm," ka tih chuan, "I u hian ngaihzawng a nei ngai em?" Tiin min zâwt thut a.

"Ka hre lo, biak chu a neiin ka hria mahse, ka chiang lo aw.."

Zosanga nui suk ka hmuh chuan a ngaihna ka hre lo deuh, hepa mize inthlâk zung zung hi chu ka hre ṭhang tawh tlat alawm.

An inah tûkṭhuan ka ei ve nghâl a, Lawmsangzela te inneihna thil tur buaipui angaih vângin anmahni tâwkah an buai hlê, pa Faka bungraw lo hawn workshop lamah dahpui te a ngai bawk nen an inah nilêngin ka awm ta ringawta, tlaia ka pa min lo hruai tura a lokal chuan ka zah ru hle.

"Bawiha, lo phei tawh la, chhungkua a sawi tur te pawh kan nei ve alawm," dam thluamin a ti a.

Ni e, heti reng hian ka awm kumkhua thei dawn hleinem, ka pa inah ka haw tho tho angai dawn a, inlêng neuh neuh erawh atu amah biak ka tum lo hrim hrim.

Pa Faka nen an inbiak chhungin Zosanga room-ah ka lût a, "Hey, zanah lo phei ang che, i râlthuam nen khân.."

"In ve tawh lo la ka duh maw le, nizan kha chu ka khawngaih che a;mahse, hetia chhunzawm kher hi thil ṭha a ni lo," ani leh ni lo angin a thutak vei phian.

"Rawn phei ang che, i awm loh te chuan ka khua a har alawm,"

"Ok, ka lo tum dawn nia,"

Zosanga hian ka nat dan tur min hriatthiam pui tih ka hria a, ka unaupa leh ka ṭhian a ni kawp vek bawk nen tun dinhmunah chuan amah ka thlahlel hle a ni.

Ka pa nen kan in lama kan phei chuan ama'n car a khalh a, a kum aiin a la lang naupang daih. Zirsangliana fapa ka ni hi ka inchhuang ṭhin, a chhan chu ka pa, pa ṭawngtam lo rilru ṭha tak hi miin an ngaina a, 'i pa i chhun si' min tih te hian ka lawm thei viau.

"Bawiha, tun ṭum zet chu ka thâ a na hle a ni," steering vuanin a insehruh hle a, "Ramthansangin kan chhungkua min zah lohna hi chu thuhran nise nizana a nuṭa pa ṭawng dan kha paidam har ka ti hle a ni, chuvangin chhungkuain thil sawiho ila, i pi leh pu te pawh kan chah phei ang," a ti hmak mai le.

"Eng nge a sawi a?"

"Rafaela hian ka farnu ngaihsak aia tih tur ṭûl a ngah êm a, hetiang hi chu hmeichhiate hian an peih vak lo, in fapa zâwk pawh hian midang a lo nei mai thei asin.Tiang vel kha a ṭawng duh dan a ni a, thu dik tak min hrilh la, chuta ṭang chuan i pa hian hmâ ka la ang, Ramtei'n heti tak maia zah pah nei lova a lo râi lâwk leh, midang a ûmsan che hi, nang mah i dik lo hmasa em ni?" A tih chuan vuak chawrh angin ka nâ.

"Min ring miah nange, ani hetia a awm vang hian keimah pawh min ringhlel amaw!?" Ka lâwm lo tih ka âw ah alang chhuak chiang hle bawk.

"Ka rin loh lam che a ni lo, hetiang boruak kan neih laia i chanchin a chhe lam zawnga puh an tumna che hi ṭan chhan kan neih ve a ngai, rinawm lo hmasa zawk anga an sawi che phei chuan kan mualpho dan a thuah hnih dâwn em asin,"

Thinrimna te, huatna te leh tualthah duhna rilru ka pu kawp vekin ka hria, "Pa, thudik chu i hriat kha, ani lo hi ngaihzawng ka nei lo va," tiin hmannia hotel-a ka hmuh dan leh ngaihdam min dîl dan zawng zawng ka sawi meuh chuan ka pa Zirsangliana hmêl chu 'ṭo' haw tur ang maiin a dur khup a, "An mi tih dan hi kan ngawi hlen hauh lovang," a bâk eng mah sawi zawm tawh lovin chak lutuk hian car a khalh a. A nia sin, ka pa thinrim hian khua a hmu lo maithei.

In kan thlen chuan ka farnu pahnihte leh ka nu, kan nula te nen an lo ṭhu ṭhap a.

"Mafel, insiam rawh, Ramthansangi te inah kan kal ang," ka pa aw a dam lo khawp mai.

"Eng nge, thu thar hriat belh in nei em ni?" Ka nu in a lo chhâng dam thlap thung.

"Ramthansangi te chhungkua hian hetia min ti kâwi mai mai leh dâwta min puhna hi ka ngawi dawn lo reng reng," tiin nichina ka hrilh zawng zawng kha kan kim vek laiin a sawi ta phiar phiar a, "Awi, ava han zak lo tak, " u Duati takngial pawh a thinrim hmel khawp mai.

"Khatiangin a punlun zawngin che duh mahta che u, ngun takin ngaihtuah ula, thiamchan tum lutuk pawh a ṭha ngai lo, ngawi thei nih te hi mifing zia a ni a, dinhmun thu hlaah nise min tluk lova, inneih ṭhulh pawh kan sawi hmasak a ni lo, mi hian hmuh dan leh ngaihdan chin annei vek alawm, an ina kan va kal khân eng mah kan siam ṭha tawh dawn chuang lo, chhungkaw zahawm kan nihna zawk tur chu; hre lo ang hmiaha kan lan hi a ni, kan insenso a tam tawh tihte mai mai, kan dam anga Pathian zarah kan thawk leh mai dawn alawm anni vâng khân chaw vawikhat kan nghei hauh lovang," ka nu in ati ve ta a, ani hi zawng ngun taka thil ngaihtuah mi a ni a, a sawi dan kî pawh a dik tho ka ti.

"Mafel, atîra ngaihdamna rilru ka put sân teh lul nen, ka fapa thusawi ka hriat hnu-ah leh, nizana a û ṭawngkam kha ngawihna chi niin ka hre lo min zuam tam mai mai," ka pa thinrim chu inchhungah a vei nghut nghut a, a fate hi min ṭan uchuak ngai lo, kan naupan laia ṭhiante nen eng emaw buaina kan neih châng pawhin an inrawlh ngai miah lo a, an ngawi mai ṭhin.

Tûn ṭum zet chu ka pa thinrim hi bengdaih mai mai chi a ni lo. Kan inneihna turin hun rei tawh tak aṭanga kan sum khâwlsa eng emaw zât an hmang tawh lehnghal nen kan na tlâng a ni.

"Zirsang, room-ah i lût lawk teh ang," ka nu leh pa an pindan lam panin an phei a, "Pa, ka nu kal ve lo se, kei leh nang Rafaela nen va kal ang u, Ramthansangi awm lo mah se kan lawm lo a ni tih leh kan thinrim ve hle tih an hriat a ṭha," u Duati'n a lo ti hmarh hmarh a, ani hi chu Saitei nen an mizia a inang miah lo a; a kawlh hrâ.

Kan unauvin kan awm a, "Û, ka lokal ve ang," Saitei ka bulah a rawn ṭhu a, a ṭap nasa hle tih ka hre mai, ani zawng rilru no chi a ni ve a, kan la hnem ve leh angai a nia, mipa awmchhun ka nih ang hian ka farnute hi ka hmangaihin ka ngaihsak hle a ni.

Reingial ka nu leh pa an pilbo hnuah zanriah ei a hun a, u Duati'n ava ko ta a.

Mipa ka nihna leh Remruattluanga ka nih chhung hi chuan eng emaw tak ka ti ve ngei ang.

Chapter-10

After 10 hours

[ZOSANGMAWIA]

Lawmsangzela ka nau pawh Lunglei aṭangin a rawn thleng tawh a, a nupui tur Rinsangpuii hmêl chu ka rin loh lam daih! Zâwiâwi lam a nih ka ring deuhva chutiang ni ta lo chuan a lû a zawh hmel veh vawh khawp mai.

A pianphungah ṭhat lohna eng mah a nei lo a, a ngainatawm reuh phian, ka nau nen engtia inchhar nge tih ka hre vek tawha kan mo atân îaina pakhat mah ka nei lo. Forensic expert keimah Zosangmawia hi ka nauvin nupui min neih khalh zân dâwn a ni a, nuih a za deuh, ka senior ve ta tihna a ni thei mai em?

Duatbîki te inah ka kal ta miah lo a, a chhan pawh ka nu leh pain chhungkaw thil sawi duh tepawh annei ve anga tia min hrilh chu ka pawm ta deuh. Ka ngai ru veng veng a, whatsapp vela inbiak ka duh khawp meuh lo a ni e.

Karleh nilai hi an inneih nî tur a ni tawh a, kan buai rep rep tawh a nia, biak in hawng ngeia a nei tur hi ka lawmpui viau a, kei chu a rûka ka famkim loh avangin dân angin ka nei thei lo, neih pawh ka tum chhin lo. Duati a râi phei chuan chuti hlauh, râi lo pawh nise Biakin hawnga neih ka tlin tawh lova ka nihna anga lan ka ngam thung. Piangthar ṭha hluah lo mah ila sex hmang tawh na na nâ, 'Famkim' anga lan mawi tum kha ka rilrem zawng a ni miah lo ve tlat mai a.

"Zosang, i lo phei dawn tawh em?" Duati'n whatsapp aṭangin min rawn bia a, vawiin hian pangpar leh Cake order puiah ka sawm kha a nia, a phûr teh a nia.

Ka phei nghal tur thu leh tlai chaw ei nghal tura inring turin ka hrilh a, zanin chu thu pangngai sawipui ka tum ve mial.

An in ka thlen chuan veranda-ah min lo nghâk a, a nalh leh pek hlê. Henu hi ka hmuh zin poh leh ka hmu hmelṭha tulh tulh a, ka rilru-ah Ruati rêng a lang tawh lo. Kan inkâr ka ti tawp vek tawh bawk.

"Zo, kan dawrah pên lawk angai aw.." a nui sâng a, a sam hnunglamah hraw pui puiin a phiara kekawr dum leh kamis body fit avar leh a duma ṭial a inbel tawp a, simple angin lang mah se a thawmhnaw hâk man a tlâwm lo tih ka hre mai.

"Hmanhmawh ila.."

Car-ah a rawn ṭhu lût a, a rimtui hman rim chuan ka hnar a verh leh zar. An Glass house-ah kan pêng a, Rafaela leh a pa an lo awm, an pathumin eng eng emaw an sawi hnuah pa Zirsanga chuan ka kutah pawisa min pe a, "Zosang, Cake man tur ka lo tum ve ang e," hnial chi miah loh hian a ti ta a.

"A ngai lo, a ngai rêng rêng lo," ka'n tikhawmawi ve bawk a, awmzia a awm lêm lo. Thil dang eng eng emaw an buaipui bâkah Cake man lehzel tum tîr chu a zia lo ka ti ve reng. Mahse, pa Zirsanga kha a ni miau a, Duati chaw ei nghal tur thu leh ka lo thlah leh ang tia ka sawi chuan, a nui suk a, "Fimkhur ula, mi sawi kâi turin awm loh tur," zuk ti hrâm a.

Rafaela pawh hlim angin lang mah se a hmêl dul ruih aṭang chuan a nun a hrehawm tih ka hriatpui vek, Duati tel lovin ka la kâwm ang chu.

Dawr kan chhuahsan hnu-ah, kan monu tur Rinsangpuii chhungte lo pheina tur Sumo hire turin counter kan pan leh ta a, Sumo pathum a tâwk ang antih vângin lo biak lâwk kan tum deuh a ni. Valpuia sumo leh Zira Sumo, Freddy nen an pathumin ka be lâwk ta thlap a, tih tur neuh neuh ava'n tam tak. Inneih hi tih mai mai a ni dawn lo tawp mai ka ti.

Lunglei Sumo counter kan chhuahsan chiah tihah Duati a ding chat a, a enna lam ka va en ve chuan Ramthansangi inchei parh zet leh Famkima inkai rial chungin an lo ding niin!

"Hey, Zosang, vawikhat tal ka kâ ang lova kal tîr ka tum miah lo," thinrim insûm zet hian ati ta a. Kal a'n tum nghâl ringawt pek a.

"Chi loh lutuk, tûn hi in ṭawngkhumna hmun leh hun a ni lo a nia,"

"A teuh lo, a zah ngawih ngawihna tur vawikhat chauh thil sawi ka duh lokal rawh.." ka bânah vuanin min pawt ṭâng ṭâng a, 'Aw' ka tih loh chuan amahin a va tâwng duh leh tak tak ang.

"Duat, vawikhat chauh ka thusawi hi zâwm ve la, in nâ a ni tih lan tîr kher kha ṭûl ka ti lo, chu ai chuan eng atân mah inngai lova, inngaihsak miah lo tih lan tîr zawk tur alawm, lokal rawh keiman tih dan ka hria,'' tiin a bânah nghet zet hian ka vuan a, an lo dinna hmun chu ka pan pui ta a.

Lâwm lo mah se pawi ka ti lo, a chhan chu mi mizia ka hre ve thawkhat.

"Famkim, i dam maw?" Dam leh zâwi ruihin ka va be hmasa a, Duati ṭawng tum chu mitmeiin, "Eng tik nge mo kan lawm ang aw," ka tih chuan an pahnihin an inmelh ralh a, "Ka hre lo le, Ramtei pa te hian an remti ngût ange maw," nuam lo tih hmel takin a ti ta a.

"Rem tih lohna tur a awm em ni, mualpho tawh chuan tih vat hi a ṭha, tiraw Duati?" Tiin ka signal zeuh a, "Nia, a nih tur ang anih tawh chuan tih huk mai tur," a nui lui thiam hi ka'n ti khawp a, a mitmenga huatna bo ṭhakin zuk meng thiam a!

"Englo Duati..?" Ramthansangi zak hmel chu ka hmu reng.

"Kan kalsan phawt mai ang che u, min sâwm ve loh chuan kan vûi double dâwn a nia," Duati ṭawngkam meinei zet; mahse, huat ngam si loh chuan an ngaihtuahna a ti thui ve ngawt ang.

Kan kal sawn hma-in anmahni zâwk an inthiarfihlim ta a.

"Kha kha a nimai, i hria maw.." tih pahin Duati lû ah ka nem zeuh a, "I chhe keh," a bâk a sawi zawm tawh lo.

Chumi hnu chuan Cake leh pangpar kan order fel vek a, ka nu leh pa laka ka lungawi lohna pawh ka lan tîr tawh rih lo.

"Inneih ni-a kan hâk tur thawmhnaw en leh lawk ang," tiin car hûnna lam ka pan pui a.

"Ka nei sa vek," tia min chhân chuan, "Kan theme kha i nei maw?"

"Aw, i nu in kan ta tur a rawn dah phei a, kan ṭhui tîr alawm,"

"Ok, a nih chuan ka hâk tur min enpui thei tihna."

Phunnawi miah lovin min kalpui ve leh ta a, engkimah ka dah pawimawh vek chu ka ti lo, readymade kekawr kan en lai chuan ama duhthusam thlap ka lei ta a.

Duati tih lungawi loh hi ka hreh ru riau a, tlai lama kan bushing na tur ngaihtuah turin workshop lamah kan lêt leh a, kan mechanic ka tîr mai ṭhin, hmun danga ka awm lai chuan ka insûm ve viau ṭhin a, tun lai hian ka bei uar deuh; a chhan pawh Duatbiki nen kan tih dun ṭhin vâng a ni.

Workshop-ah ka pa a lo awm a, kan thiltih kan report fel thlap, "Duati, i pa ka be tlang thei miah lo a.." a lo ti a.

"Glass house-ah ka nau nen an awm, kan be ve chhin ang e aw," ka pa leh Duati inbiak laiin kan mechanic ka lo be ve thung a, sual lam kawng âwn tur hi chuan a tluang leh purh zel!

After 4 hours

Ka room balcony zau ṭha hek hawkah insi rialin kan ṭhu dûn a, inbual hmain pack hnih kan ti hman, hetia free taka kan awm chung hian vawikhat mah inbual rual tih vel hi ka tihpui ngai lo. Ani hi chu ka dah special ve viau, ka chhungte an lo la thleng miau lo a; tlailam dar li a pêl chauh.

"Zo, kan inngaizawng tawh tihna a ni em?" Leh heu heu mai a, tlêma a kâi deuh hian sawi âwm loh deuh a sawi leh nulh zel. A kum anga a awm loh châng lah a tam.

"Lutuka che, kei lo ngaihzawng i nei lova, kei lo mipa dang kawp i tum tur a ni lo, a chiang em?" A khabe-ah dawmin hnai lutuka ka en a, kan hmui a insi lo chauh.

"Yes, sir Zo.." a sawi zawh rualin min rawn fâwp a, ka duhthawh leh nghâl em em ringawt. Hmun fâlah chhuah ka tum tawh lo hrim hrim, ka ta ni tura ka duhna hian a turin min tur sek sek lo chauh.

Uar leh duhthawh zeta kan infawh ngialna chuan atak ram dai thlen duhna bawk min siam leh ta. Ka khumah, kan inah, ka hnuaiah a mu leh ta kâk mai.

A taksa mâm leh nâl han te, a vun paw phiai te hi mipa dang khawih atân ka phal lo nasâ, ka nei a nih loh chuan tu fa mah hian annei lovang. A âwmbâwr kawh lah khuhtu awm lova lang vâr hai te, a rûi mitmeng te chu a sexy hle a ni, ka hming lam sap paha min kuahna chuan phurna min siambelh sauh a, mipa tâna hnar phal loh tur taksa a nei miau alawm.

"Ka ta i ni, i ni zêl bawk ang," a taksa chhungah ka luh chuan min chûl kual ruai a, kan tih hmasak ber ṭuma a zahna ang kha hmuh tur a tlêm sawt.

Tisa châkna hrithla ni lovin ka duh tak ka mutpui miau a, ka chhungril a hlim leh veng veng.

"Ka inbual hmasa ang e," bathroom-ah a lut zui nghal a, zak angin lang lo mah se a zak tih ka hrereng. Ka farnu anga ka en theih miah loh nachhan te, kan naupan laia ka zah rûk riau ṭhinna te kha a chhan ka hrethiam ta, tûn ang hun hi kan lo thlen dawn vâng a ni chiah mai.

Duati phone a rik chuan chhân loh ka tum ûk a; mahse, mipa hming a ni tlat! Nunpuia.

"Hello.."

"Duati, i lo mak hle mai," chupa awki sâng zet ri chu ka haw nghal hlur.

"Duati ka ni lo.."

"Tu nge?" A hma ai chuan a aw a nêm deuh.

"Keimah.." ka hming sawi lan a ṭûlna kher ka hre lo.

"Duati ka lo be lawk dawn em ni ang,"

"A inbual a, nakinah lo call mai rawh," ṭha takin ka chhâng ve teh tlat. Ani pawhin phone a dah zui ve hmiah.

Tunge a niha khati vaka rawn vîn ngam tur mipa khân eng nge alakah thuneihna a neih? Sex hmang lo mah se an lo inkawp ru reng em ni ang? Ka hriat chhuah theih nân khatiang ṭawngkam chhâkchhuak ka ni bawk. Zosangmawia hi tû hmeichhia mahin an bum mai mai tur a ni lo.

Bathroom aṭanga a lo chhuah veleh be miah lovin ka lût ve nghâl a, ka thin arim deuh tlat, atân eng mipa nge a nih hre fai vek lo mah ila ka thîk nghal em em ringawt nia!

Fai sara ka sual ka tlenfai lai chuan Duati ka hisâp hrâm. A nalh thlâwt reng a ni. Min hmangaih thu a sawi lova a ruih loh lai phei chuan inngaizawng ang pawhin kan lang lo, Zosanga a ṭhian satliah ka ang ber. Mi hriat duh lo tu kha keimah ka ni a; mahse, ka rilru a dang ta tlat, ka ta a ni tih miin hria se, min chuh buai lo deuhva rinna ka nei.

Room-a ka va luh leh chuan amahin a lo in leh pek a, ka hau duh lêm lo, hau ila a titau leh anga kan boruak a chhe mai mai zawk, hmun danga in a nih loh bâkah ka room-a in a ni tho a, ngaidam leh mai ang, mahse, Nunpuia chungchâng erawh zawh chhuah ngei ka tum thung.

"Zosang, ka phone i pick em?" Amah zawkin a rawn sawi chhuak a.

"Aw.."

"Ka phone-a miin an lo call chuan an be duh che anih ka ring lova, keimah min be duha lo call a ni, i lo chhân kher kha a ṭul lo," a ti nghat a.

"Min be duh ka tia mi, Nunpuia ka lo chhâng chu i va la na awm ve a.."

"Ka la nâ a ni lo, thil ṭûl berah ka ngai lo mai zawk," min melh rum âl a, a sam hnâwng chap te chuan ati lang fai sar.

"Ani kha i eng nge a nih, thudik sawi ang che," ka ti tlang hmiah.

"Lalnunpuia a nih kha, min ngaizawngtu.."

"I ngaihzawng ve em?"

A ngawi ta vang vang a, "In inkawp tihna a ni maw?" Ka tih chuan, "Lungleia ka phei hunah kan inkâr ka sawi fel ang, inngaizawng nghet chu kan ni lo," nuam ti chiah lo niawm tak hian hnuai lam a bih a.

"Keiin Ruati ka chinfel laiin nang chuan min lo kawp kual a.." ka thinrim êm vângin kut ka hum ruh nasâ.

"Ka kawp kher lo che u.." insawi thiam a tum poh leh a sawi buai ting ting mai dâwnin ka hria, "Lalnunpuia i chinfel hma chuan min rawn be tawh suh, ka room aṭang hian chhuak rawh.." ka lo in ve bawk nen ka thin a ram ngei mai.

"Zosangmawi.."

"Chhuak phawt rawh.." duh aiin ka vîn mah mah.

"Ka chhuak dawn lo, ka chhuak miah lovang," tihpahin nokhat dang a inthlit leh a, dan ka tum chuan ka kut a vai per sawk a, ka thinrim kher mai.

Hetiang em em a nasa hi a nih ka lo ring pha ngai lova, ka ring phal lo zawk. A duh ang a in zawh hnuah min en miah lo hian a purse a la a, "Mangṭha le," chhuah tuma kawngkhar a pan chu ka thinin a tuar ta lo.

"I duh duha tihkawi theih ka ni lo," hawi sawk khawpin a hmaiah ka bêng ta ṭhuai a, ka inchhir nghal bawk.

"Zo.." mittui tling pap chunga ka hming alam chuan ka inthiam lo ru ngawih ngawih a, mahse ka tihtur ang ka ti zo vek tawh si..

Khuma Duati ṭhu ngawi ngal chu enin whisky ka tlâk pap pap a, ka lû a hai chhawk.

Mipa nêp ber anga kut ka'n thlâk chu le..

A sawhkhâwk engtin nge a awm ang tih hre mah suh ila ka la thlah phal chuang lo..

Ngawi rengin inbe miah lo hian kan awm ta a...

B+>[BeckirafARenthleI]<+®®

THE RAPSAGYAN FAMILY

Becky Rafa Renthlei

Chapter-11

[ZOSANGMAWIA of Segundo]

Khuma Duati ṭhu reng chu ka melh leh zauh ṭhin a, hnuai lam bih ngar chung hian a kut tin a kheuh nauh nauh a, a ṭah ka rin tehlul nen ṭah chu sawi loh biak ṭawng huphurhawm khawpin zuk ngêng a! Hetiang em ema luhlul leh nasa a nih ka ring ngai lo, khatia chhuak tura ka tih khân hmeichhe dang te chu nise thinrim eng phiarin an chhuak tau tawh ang. Ani erawh a dang zar, whisky nokhat a va in lui leh ngat a nia! Ka lo hrechiang lo hlê mai.

Hmeichhe kut thlâk ching mipa nih ka duh lova Duati chungchângah hi chuan ka duh loh tawp tur ka ti ka ti ta mai.

"I duh chuan min bêng leh la," chiang kelkawl hian ka mitah min en a, a rûi ṭawngah ngaihsak ka duh kher mai.

"Duati.."

"Lalnunpuia nena kan chungchâng hriat duh i neih chuan va call la zâwt ta che, ka nu leh pa hian vawikhat pawh kut min la thlâk ngai lo," khum thawhsanin tukverh bulah ava ding a, "Kan thil hriatchian loh hi chu ngawih san ngam a ṭha, zû ka in in kan mudun pawh a ni thei e; mahse, hei hian hmeichhe lepchiah leh kawplâwr ka ni tihna a ni kher lo," fel fai thlap hian a ṭawng a.

"Duati, mipa dangin an ngaihsaka an ngaihven ve che hi ka duh lo, ka ben chungchângah che kha chuan tihpalh takzet, ka insûm hman lo atin ni." A bulah ka va ding ve a, a dârah vawn ka tum chuan, "Min khawih reng rêng suh, Zosang.." vîn miah lo leh dam thlap hian a ṭawng a.

"Ka khawih loh che in tunge khawih ang che, Nunpuia khawih chu i duh zâwk em ni, ka ta hi midangin min chuh pui ka duh lo tih ka'n sawi nawn leh ang e," ka ti hmiah.

"Tûn dinhmun hi kan thleng tawh a, kan inkârah inngaizawngte tih tur ang kan ti vek bawk; heti chunga mipa call vawikhat lek leh i la hmuh miah loh, a chanchin pawh i hriat miah loh hi i thîka min ben phah si a nih chuan inkawp hi ka duh lo, i duh angin kal la ka duh angin ka kal bawk ang," a aw aṭang pawhin a thinrim hlê tih ka hre mai, min hnungchhawn mah se a hmêl awm dan tur pawh ka ngaihruat thiam vek.

"Zû hi in lo ila chuan tuna kan thinrimna te hi eng mah lo a ni ang, kan insiam ṭhat ve ve angai," ka tih chuan a ner sak a.

"Inkawp lo tur kan inkawp a ni ang e, kan duh zâwng a inang si a, chuvang chuan inrem a har a nih hi, tihian ṭha tak angin kan hun liam tawh theihnghilhin a hma ang khân awm leh ang," a tih chuan ka ngaih dan a pêl ta.

"Ka mutpuia sex ka hmanpui tawh na na nâ ṭhian angin ka en ve ngai lo, chutianga mipa holam leh nêp ka ni lo bawk, i duh ang chuan awm rawh," ka sawi zawh rualin room ka chhuahsan hmiah.

Inṭhen ka duh lo tih ka hria; mahse, tûna inhau chiam hian awmzia a neih ka hre lo a; Duati bânsan hi chhetê mahin ka tum hek lo, a râi leh râi loh ka chian hma chuan khawdangah pensan ka tum lo bur. Inngaihzawn lai pawh nise inhau laia ngawi zâwk kan awm loh chuan a khirh bâkah a aia chhia kan thleng leh mai ang, Duatbiki ngat phei chu a upa zawk a ni a, thei ve a inti bawk; chuvanga ngawih chuh mai ka ni.

Garage bulah ka ding vang vang a, ka chhungte tumah an lo la haw lo.

Mipat hmeichhiatna kan hmang zo chauh a, inrem chu sawi loh kan innghirngho phah tho; a ṭha ber hriat a har a, Duati lo chhuak chuan biak pawh min be lo hian kawngpui a pan thla a, ka car-a chuang a nih vângin haw lehna tur a nei dawn lo.

"Ka lo thlah ang che.." hre lo ang hmiahin a kal lui ngâng ngâng a, chaw eiah ka sawm ve bawka ei pawh a ei ta lo.

Taxi-lo tlân chu pharin vawikhat pawh hawi lêt lo hian min chuan san ta a; â, a thinrim lai chuan eng pawh sawi ila min ngaithla duh chuangin ka ring lo.

Keima thiam loh a nihna chen a awm a, zû te kha inpui lo ila chuan ṭha tê tê in kan inkawm mai tur, tuna thil thleng vanga a rilru ka nei lêt thei lo a nih chuan ka na dâwn tih ka inhria. Ka pa lo haw lai pawhin ka room-ah ka tawm daih a, a hma ang khân kan inchhungkhur pawh nuam tihna ka nei tawh lo, ka nu dik tak hriat chhuah tum hian vawi tam mi ka zâwt tawh a, min hrilh thei tumah zuk awm lo va.

Zanin hian ruang en dik tur ka nei a, Lawmsangzela ka nau hruai ka tum kha a nia, Rinsangpuii nen an bazar an lo la haw loh avangin keimaha ka kal mai a ngai dawn a ni. Forensic lama thawh hi ka tum ber a ni a, ka nu hian police ni turin kan unau hian min duh; mahse, atu mah mahin kan ûksâk lo va, ka nau pawh hian ka pa workshop a enkawl daih.

Ka chhungte lo haw hmain zanriah ka ei hmasa a, kan nula-in min en hrek hrek ka hmuh chuan, "Min en reng lo khân i hna thawk rawh," ka ti nghut a. A hmâa kan nula kha a tluk tlat lo, chhungkaw thil engkim hriat a tum vek a, min veh deuh reng hi a ni mai. Ka huat zâwng tak, chêt erawh a che fel thlup thlup viau thung.

Duati ngaihtuah ru reng chungin ka insiam mial mial a, zû pawh ka inbelh ta chuang lo, ka room-ah a rim te a la nam hialin ka hria, henu ka duh dan em em hi mak tak a ni.

After 4 days

Vawiin hi mo hruai tura Lunglei kan pan ni tur a ni a, Lawmsangzela, pa Zirsanga te nupa leh ka nu leh pa-in car pakhat an hmang dawn a, kei leh Duati, Saitei, leh Rafaela nen kan inphur thung dâwn.

Vawi tam Duati biak tumin ka call a, whatsapp lama ka biak pawhin min chhâng duh lo hrim hrim, an inah vawithum ka kal tawh a, hmuh tur a awm ngai miah lo bawk. Rafaela in nghâk turin an ti zeta a duh teuh lo, kal a tum bur a, zu a in zeuh zeuh tih ka hria; Duati nen kan in bâk kha vawikhat tê mah ka inzui tawh lo teh tlat.

Sumo pathum kan biak sa te chu Lunglei lam sumo vek annih avangin thil buaithlâk eng mah a awm lo a, vawiinah kan chhuak anga tluang taka kan thleng thei a nih chuan man hlanna neiin naktukah kan lêt leh nghâl dawn niawm tak a ni. Nilaini hi an inneih hun tur a ni tawh a, a rûk tak chuan ka châk ve reng, Duati nen loh theih lohvin kan inhmuh angai dawn a, min pehhêl thei tawh lo ang.

Pa Zirsanga te chhungkuain car an keng dawn lo a, a chhan pawh nu Mafeli te hi Lunglei khawchhuak annih vângin a nu leh pa Duati pi leh pu te an la awm a, chutah chuan kan innghat vek dawn zankhat bâk riah kan tum chuang lo va chance tepawh ka nei mahna.

Kan inpeih fel vek hnuah Pa zirsanga'n ṭawngṭaina hun a hmanga chumi hnu chuan Lunglei panin zing dar sarihah kan chhuak ta chauh a.

"Nu, Zosanga car-ah chuang ula Saitei nen Lawmsanga te bulah kan lo chuang daih ang," Duati'n atih chuan rum zetin ka va melh a, engah mah a ngai lo.

Vanneih thlâk lutukin a nu'n a lo hnial hlauh a, "I pa Faka te nen sawiho tur eng eng emaw a awm a, tikhân in unauvin chuang zawk rawh u," ati ta kha a nia, a rûkin ka nui vur vur.

Rafaela nen a hmâah kan ṭhu a, Duati te unau a hnungah an ṭhu thung, an hmuh lai leh an hriat laia inngaizawng anga lan kha a rem si lo a; mahse, car pakhata chuan dun hrum hrim pawh ka la duh tho.

Sikulpuikawn kan thleng chiah tihah, "Zosang, ding lawk teh" Rafaela'n a ti a, a enna lam ka en ve chuan Ramtei leh Famkima hi zin bag nen an lo ding a, Sumo an châng nge eng nge an tih pawh ka hriat si loh. "Engtin mah va ti suh, kal ang, tuar viau anga i lan kher a ṭul lo," tiin car ka tinung nghal a, ka tlân zui daih.

Rafaela hmel dur khap khap chu ka hmu reng a, Saitei leh Duati an ṭawng lo. An unauva an inkawmngeih tehlul nen Ramtei vang hian Rafaela hlim hmel in lamah hmuh tur a awm tawh lo a, chuvangin, in nghâktu pawh dah lovin kan kal vek phah.

Sialsûka chaw kan ei lai pawhin Duati a ṭawng duh miah lova dik tak chuan awm ve lo angah min ngai a ni deuh ber. A nau nen thil eng eng emaw sawiin a pi leh pu chanchin an sawi phûl luai a, keini mipa pahnihte erawh kan ṭawng kawng tluan.

Tlailam dar thum rîk hma deuhvin Lunglei kan lût ta a, Pukpui ṭawngṭaina hmunah ka pa te'n min lo nghâk a, ka nau phûr hmel lutuk hian nupui neih ve duhna rilru min put tir hial!

Kan monu tur hi Revenue-ah a thawk a, a puitling reuh phian, a nungchang pawh a ṭhat hmêl ka ti a; mahse, a hrisel lutuk lo tih erawh ka hria. Rafaela nen thil tih rûk kan tum avangin Duati leh Saitei an hnawk ṭan. Kan Duatbiki pek ka tum tawh lova Rafaela nen kan pahnih chiahin kan ti tawh ang, kâi deuh chhah lo hi chuan mipui zingah ka ṭawng ve ngai mang lo tlat a.

LUNGLEI 6:00pm Duati

Ka pi te kiangah ka awm leh ta, Saitei an hmuh lohna a rei tawh bawk a, an lo ngai viau, kei erawh ka awm tamna leh ka hnathawhna hmun a ni a hmelhriat pawh ka ngah, zanin dar riat hi man inhlan hun tur a ni a, keiniho kan kal ve dawn lova puitling ho chiah an va lang dawn a ni.

"U Duat, i phone.." Saitei ka phone keng vâ chungin a rawn kal a, ka ṭhiannu Becky lek!

Ani hi ka kâwm tam lo nâin whatsapp lam aṭangin kan inbe ngun viau, an awmna vêng a hla deuh bawk nen kan inhmu zing lutuk thei lova Lungleiah ka awm tih a hria a ni ngei ang. Lawmsangzela ṭhiannu a ni nghe nghe.

"Hello.."

"Lalduat, naktukah lo lêng ngei ngei ang che," a'n ti nghal tawp a.

"Naktukah kan haw leh nghal dawn, Lawmsanga te inneihnaah kal i tum lo em ni?"

"Tum e, ka rualin kal la, a nih loh pawhin i rualin ka lokal ve ang, ṭhian pawh ka nei dawn lo asin,"

"Sumo-ah kal kan tum dawn nia," tiin Sumo an hire ho kha ka sawi nghal a, an vaiin a lo hre vek lehnghal. Zosanga car-ah chuan ka tum tawh lo hrim hrim Becky a kal theih ve dawn phei chuan Sumo-a chuan ka duh fê.

Kan inbiak laiin Rafaela leh Zosanga an lo lût a, zanriah pawh an la ei lo, an thiltih rûk ka hre veka sawi chhuah kher tum lo mah ila Zosanga ka ngei hluah hluah, hmanni-a min tih dan te kha ka run em em a, a tel lovin hei leh chen ka lo awm tawh a, tun ataka ka awm theih lohna chhan tur ka hre lo, ka phone hmang lai chu ngun zetin min rawn en a, a ner suk.

Becky nen kan inbiak zawh hnuah ka room lam pana ka kal chu Zosanga'n ka bânah a rawn vuan a, "Min pehhêl i tum char char chuan kan inkâr hi ka sawi chhuak ang," a ti ta a.

"I ngam chuan sawi la, i duh phawt chuan sawi ta che," ka ṭawng ring ṭha ngam bawk si lo.

Dik tak chuan ka chhungte'n an hriat chhuah ka hlau ngawih ngawih a, Zosanga hi ka duh lo a ni lo, a mize ngêng lutuk te mipa a ni tih a inhre lutuk te hi ka haw tawp.

"A ṭha alawm, zaninah engkim ka sawi ang," tiin ka bânah a hmer salh a.

"Tiang zâwng kha chuan min vau lo mai teh," tiin ka room lam ka pan san a, min zui tih ka hre tho, zu rim a nam ham ham a, tih thinrim chi a ni lo tih hre tho mah ila a khawsak phung hi ka ngei laklawh.

"Duati, inṭhen ka duh lo a nia, min hre lo der anga i lan leh chuan eng nge ka tih theih lo en rawh," khumah min nem ṭhu hnawk a, thâwm bengchheng ka chhuah ngam teuh lo. A rûi hian thil ni lo lo a sawi chhuak ang tih ka hlau ru zek zek tawh.

"Zosangmawi, nunphung pangngaiin awm ve mai rawh aw.."

"Ka ta i ni tih sawi chhuah hi ka hreh miah lo a nia, châwm hlawm pawh ka ni lo a, nang pawh i ni lo, Biak in hawnga inneih kan tlin chuang lo tih thlengin ka sawi dawn em ni?" Ati hmiah hmiah a.

A thil han sawi duh dân chu ka ngei kher mai, "Lawmsangzela nen in mizia a inpersan em em nachhan hi i nu Zomuan..." ka sawi zawh hmain ka hmui ka hup chawt a.

"Eng ..eng.. maw...!?" Ka kawr âwma ṭhâmin, "Tu maw ka nu chu.." a mitmenga mak tihna huatna, awih theih lohna rawn lang zut zut ka hmuh phei chuan ka thil sawi pawi zia ka hre chiang hle mai.

"Eng lo..Zosang kha chu.." phat kâwi ka tum ngial a, rum lutuka min melh chuan ka ṭawng zawm ngam tawh lo.

"Ka nu dik tak hming i sawi loh chuan hre rawh, kan inkâr leh thil thleng zawng zawng hi ka sawi chhuak vek ang, eng 'Zomuan' maw, sawi nghal rawh.." a thinrim lutuk chu a âw a khur ti tih a; kan awmna hmunin zir phei se chuan kut min thlâk duh mai thei, hetiang em ema Zosanga thinrim hmêl hi vawikhat mah ka la hmu lo a, ka ṭawng sual ngei mai.

"Khawngaihin Zo.."

"I sawi duh lo a nih chuan tuna i rawn sawi chhuah dan leh Lawmsangzela nena kan inan lohna nu hrang kan ni tih hi zanin hian ka sawi chhuak khawp ang," min vawnna thlahin chhuatah a vei nghut nghut a, kan chhungkaw thurûk sawi chhuak tu ka ni ta hi pawi ka ti ngawih ngawih.

"Min hrilh dawn em?" Nichin ai khan a aw a dam deuh tawh a, khumah rawn ṭhu thlain, "Duati, ka duh zia che i hria, khawngaihin ka nu dik tak hi i hria a nih chuan min hrilh rawh, eng pawh i chungah thleng se ka venghim tlat ang che," thinrim awkâ nimiah lo hian ati leh a.

"Sawi tur ka nei lo.." ka ti sap a.

"Ka nu dik tak hriat ka duh zia i hria a, nang chuan engkim i hre vek chungin ka lakah i zep a nia, a ṭha e, min hrilh lo ngam a nih chuan i thû thû le.." a thinrim zualpui a reh ta deuh chuan ka hria, a en ngai a en reng a, ka awm ve tih hria ang pawhin a lang leh tawh lo.

"Helaia ka awm ve rengna chhan tur pawh a awm hleinem," tiin a tho vut a, "Khawnge i kal dawn?" a kawrah ka va pawh chuan, "Khawiah vak nge ni anga, Aizawlah maw le, min duhsak lo tu leh thurûk nei ṭhip ṭhep kiangah ka awm a ṭûl ta lo," a ti hmiah.

Ka nu te an lo la haw bawk si lo, Zosanga Aizawla a lêt a nih phawt chuan a chhan an zâwt ngei dâwn a, kan chungchang bâkah a nu chungchâng thlengin a ri chhuak dawn a, chu chu ka ngaingam bawk si lo.

"Zosang.." zawi têin ka ko sap a.

"Min lo duh tak tak ngai lo tih ka hriat phah a ka lawm e, kei chuan khâng hun rei lo tê kan inkawp chhung pawh khâ ka thlahlelin ka ngai che a, vawi tam biak che pawh ka tum; mahse, min thinrim khum ngar ngar a, Duati, engtikah mah ka theihnghilh dawn lo che tih ka hria, min hringtu ka nu pawh hre lo fahrah ka ni a, ka dem lo che; i nunah erawh ka rawn inrawlh tawh ngai lo ang," a ti ta a.

"Zo, i ngaih dan a dik lo,"

"Thudik chu a bo hlen thei hleinem, nau i pai chuan min lo hriat tîr la, inneih i duh dawn lo tih ka hre tho nain ka mawhphurhna erawh hlen ka rawn tum ang," room a chhuahsan zui hmiah.

Ni lo, eng pawi nge ka sawi tâk. Rang lutukin ka ûm chhuak ve nghâl a, Saitei inbual zo vin mak tih hmel taka min en pawh ka pawisa tawh lo. Zosangmawia, car-a a lût tur chiah ka va nangching a, "Inbia ang," ka tih chuan min chhâng lo.

Car kawngkhar hawng zauvin zah pawh dâwn lo hian ka nem rawk rawk a, a luhlul zia ka hria, Aizawlah a lêt duh tak takin a nia ka rin.

Driver seat-ah ka ṭhu ta thung a, ani passenger seat-ah a tawlh phei thung.

Sawi ṭan dan tur ka hriat mai loh avangin ka ngawi vang vang a, "Sawi tur i neih loh chuan min ti khawtlai suh," a lo ti hman hmawh.

"Ih, khawiah mah i sawi chhuak lovang tih min tiam phawt rawh," ka'n ti hmasa tê tê a, "I sawi chhuah chuan emaw ka nu leh pa, i chhungte'n ka sawi a ni tih an hre tur a ni lo," ka tih zawm leh a.

"A ṭûl viau a nih loh chuan i hming tih lan loh ka tum, an lo hre ta a nih pawhin i lamah a tâwp thlengin ka ṭang ang." A ti nghut a.

"A hmasaberah chuan chhungkaw thu hla sawi chhuak tu ka ni hi ka dam chhungin ka inthiam thei ngai dawn tawh lo tih min hriat sak dawn nia, kan inkâr tih tawp i duh pawhin ka dang lovang che," ka ti leh tê tê a, chutah, "I nu dik tak chu nu Muanpuii hi ni lovin a phirpui a nau zawk Zomuankimi a ni," ka ti tlang nghâl pawp.

Engtin mah min chhâng lova min en bawk hek lo.

"Khaw nge ka nu chu?" Rei ngial a ngawih hnuah min rawn zawt a, "A pâi lai che hian a chuanna motor a-accident a, a boral tawh, vanneih thlâk takin nang chu an zai chhuak hman che a, i nu erawh a neih hnu lawkah che a thi ta a ni." Ka tih chuan a thaw chhuak hawk a, a kutah nghet takin ka hmer sak. Engtik laiin nge ka va vawn tih pawh ka hre lo.

"Chuan.." a ti sup a.

"I nu a boral tâk si-ah chuan nu Muanpuii hian a enkawl ta che a, chutih lai chuan i pa nen hian an innei ta a ni," tiin ka hriat tlângpui ka sawi par par a.

"Tenawm dun lutuk.." tiin hma lam ngun tak hian a en a.

"Zosang, a zawng zawng ka sawi ve vek thiam lo, i rilru tihahdam la, nakinah anmahni ngei emaw ka nu emaw pawh ila zawt chiang dawn nia, eng mah hrechiang lovin thu tlûkna siam rih suh,"

"Kan la hria ang chu," ti chauhvin min chhâng a, a hmêla natna, lungawi lohna rawn lang chhuak te chu ka hmuh hmaih bik lo, a mit khap chiah se chuan mittui a far ngei ang. Ka âwmah kuahin a samah ka chûl sak a, "I tân ka awm reng ang," tiin ka hnêm lêt ve ta.

Ni e, a thinrimna te a lungawi lohna leh mal intihna a neih fo ṭhin te kha tireh turin Zosangmawia kiangah a ban phakah awmin ka vuan tlat ang. Ka tâna mipa hmasaber hi chuti maiin ka thlahthlam dâwn bik lo...

B+>[BeckirafARenthleI]<+®®

THE RAPSAGYAN FAMILY

Becky Rafa Renthlei

Chapter-12

[Duati & Saitei]

Zosanga nen rei fê car-ah kan awm tawh a, inchhung lam pawh ka ngaihven miah lo, Saitei'n min lo koh chuan kan chhuak ve ta chauh a, Rafaela nen chaw an ei lâi te chuan a mit meng a dul ruih a, ka sawi loh tawp tur ka sawi palh tih ka hria; mahse, engtik ni-ah emaw chuan a la hrechhuak dawn tho tho a, Lawmsangzela te inneih tibuai zawng leh khaihlak zâwnga chimawm a chhuah loh hrâm ka beisei.

"Û, u Zosanga nen hian in inkârah eng emaw a awm ve a ni lo maw?" Ka beng bulah Saitei'n min rawn hrilh ru a; "Teuh lo lutuk, a nu chungchângah harsatna a nei a," tiin a tlângpui ka hrilh ve a, Saii hi chuan Zosangmawia nu dik tak tih vel hi a chipchiarin a hriat ka ring vak lo.

"A thinrim hmel êm a," a la ti zui ṭâlh a, Rafaela nen an inbe lem lo va. Ka nu te ho an rawn haw chuan an ri hluai a, Lawmsangzela hlim hmêl ka hmuh phei chuan ka lo nui ve var var, a bialnu a hmangaih zia leh natna khuma a awm chung pawha a thlah miah lo te kha ka lo chhuang ru ve ngawih ngawih a.

"Duati, Saitei nen i room-ah mu ula, Rafaela leh Zosanga mikhual pindanah riak mai se, in unau khân mutna va siam sak ula," ka nu in tih tur min hrilh zung zung a, naktuk hian Aizawlah kan lêt lehnghal dawn avangin puitling ho an titi nak nak a, pa Faka leh nu Muanpuii erawh chuan Zosanga hmêl nelawm vak loh chu an hmu thiam nge, an melh leh zauh ṭhin.

Zanin tlai hian man eitute leh man hlântu te pualin Rinsangpuii te chhungkuain chaw ei an siam a, keiniho chuan kan ei ve lo. Lawmsangzela ṭhian tur ka la hmu ve miah lo a, Aizawl lam mi a hmang turah ka'n ngai deuh ngawt kha a nia.

Nichina ka thil sawi aṭang khân Zosanga'n min ngaihven tawh miah lo a, khawnge an chhuah rûk pawh ka hmu hman lo, Rafaela nen annih tawh chuan hmuh hman hian an awm lo rêng rêng. Zinglam dârkhatah ka zun chhuakin min ti harh a, ka room-ah bathroom a awm loh vângin common bathroom lamah ka phei a, sitting room ṭhutthlengah Zosanga a lo mu meng reng nia!

A en ngai a en reng a, puan pawh a sin chuang lo. Bathroom aṭanga ka chhuah leh pawhin a awm dan ngai chiahin a lo la awm a, ka thil sawi khân a rilru a luah hlê a nih ka ring. Inthlahrung ru tak chung hian ka va pan hnai a, "Zo.."

Ka mitah tak min enin a rilru a nat hmêl hle a, hnem ka duh; mahse, kan awmna hmun hian a zir hlawl si lo.

"Helai hmuna kan awm lai leh i nau nupui neih fel hma chuan khawngaih takin i thinrimna tilang suh aw, hei leh chen an enkawl tawhna che kha theihnghilh lo la," dam thlapa ka sawi chuan min chhâng chuang lo, ngun taka thil ngaihtuah hmêl a pu zâwk.

"Kum 28 ka ni ve tawh a, tûn thleng thleng a ka nu dik tak ka la hre lo leh ka lak aṭanga an zêp hi hriatthiam har ka ti," a chal a dawm vang vang a, kan ṭawng ri an hriat phâk ka hlauh vângin ka îp ru hle, dik tak chuan Zosanga nena kan chungchâng hi ka chhungte'n an hriat chhuah ka hlau em em a, thla thar nân nithum chiah a awm tawh bawk. Ka thinlungah hlauhthawnna lian tak a awm a, ka thlâ a muang thei tawh lo a ni.

"Duati va mu rawh," tiin a ding hluai a, kei pawh min pawt tho ve nghal zat bawk. "Ka ngai lutuk che, ka ngai takzet che," tih pahin ka hmuiah a rawn fâwp ta a, a rui tawh lo tih ka hria.

Ka hlauhthawn êm avangin ka fâwp lêt ṭha ve ngam lo, he inah hian ka nu leh pa bâkah a nu leh pa an awm bawka eng tik hunah pawh rawn tho chhuak thei reng anni. Thlamuang taka infawh der derna chi ninghâl lo chuan..

"Ka kiangah awm reng ang che, eng dinhmunah pawh ding la phatsan che ka tum lo tih i hre dawn nia," eng a sawi tumna nge ka hriat sak lo va, ka hlauhthawnna erawh a hma aiin a nasa daih, thil ṭha lo lo thleng hnai tur anga hriatna ka nei tlat!

Chumi hnu chuan room-ah ka luhsan ta a, Zosanga naupan lai leh a chanchin hre vek lo mah ila a nu leh pa hian an hmangaih tih ka hria; mahse, nu Zomuani lung phun hmasa lova a û, nu Muanpuii nupuia a nei kha miin an dem em em a, vawikhat chu kan inah ka sawi chhuak nghe nghe a; "Duati, i pa Faka te chhungkaw chanchin miin an sawi pawhin ngawi tlat ang che u, eng mah thu chiang sawi tur in hre ve lo," tiin ka pa'n min khak tawh.

Muhil thei lovin ka let kual sek a, naktuk hian Zosanga car-ah Rinsangpuii te ṭhian dun an chuang anga, Lawmsanga'n a khalh tawh dawn bawk, kei leh Saitei, Sumo-ah kan chuang ve thung ang a, Becky pawh a lo inring vek tawh bawk. Inneih boruak zo se kei pawh ka hna zawm a hun titih mai dawn lehnghal.

Rafaela nupui neih ṭhulh a nih aṭang khân kan chhungkaw boruak a dang vek a, a hma kan pha tawh lo tih ka hre bawk; Saitei a chhuk hunah leh kei ka awm loh phei chuan ka nu leh pa an khawngaihthlak ngawtin ka ring. Ka nau lah ṭawng tam teh hluah a ni mang si lo va, ngaihzawng nei leh vat se a zia berin ka ring.

(Dârkar 5 hnu-ah)

LALMUANPUII OF SEGUNDO

Mafeli nu leh pa te in kawtah Sumo pathum leh car pali a ding ṭhap tawh a, ka fapa naupang zawk Lawmsangzela'n nupui a nei ve dawn ta chu a nia, ka thinlung takin ka lawm a, a û in nupui neih lam a ngaihsak miau si lova a nau zawk a che chhuak hmasa ta nge nge e.

Zosanga nu tak tak ka ni lo tih ka fapa in a hre chhuak hi ka na ngawih ngawih a; kan chhungkaw boruak hi engtik ni-ah emaw chuan a chhe dâwn tlata hriatna ka nei, Zosangmawia leh Lawmsangzela hi ka en hrang lo hrim hrim a, ka rîla rah ang chiaha ka en a ni a, Zosanga phei chu hrehawm tam tak paltlanga ka enkawl a ni lehnghal a, ka hmangaih ngawih ngawih a ni.

Sumo pathum bâkah Rini(Rinsangpuii) te lamah lirthei nei an awm neuh neuh bawk a, Zosanga car-a Lawmsangzela teho chuang tur chu an buai ta deuh nak mai. Ka hlauhthawn ang chiahin, "Ka car a nia, khawiah mah ka chuang sawn dawn lo," Zosangmawia ṭawng chang fak chuan ka thin a khei zar mai. Mi hriat laia khak lah chu thil mawi a ni si lo. Mafeli nu leh pa te in kawtah kan ding ṭhap tawh a, Rinsangpuii hmela mak tihna lo lang te chu ka zahna tizualtu a ni.

Sumo driver pakhat kan bulah lokalin "kan chhuah har chuan kan thleng tlâi dawn a nia," a la tizui. Zosanga lah a car chhungah a ṭhu tlat a, ka thin a rim kher mai, Zira te chhungkua car keng lo turin kan lo hrilh ve tingtang bawk nen a buaithlak zo vek.

"Faka, Zosanga saw ṭha takin va hrilh teh," ka tih chuan a fapa awmna lam panin a phei a, an naupan lai zawng zawngte a kan thu an awih ṭhin nen ka nau fapa anih rin harsa khawpin a luhlul ta chu a nia, a nu ka ni lo tih a hriat aṭang phei kha chuan min zah chu sawi loh min be ngai mang tawh lova inneih boruak nen a la ri chhuak lo ni berin ka hria.

Faka thlen hma lawkin Zosanga car-ah Duati a lût a, an thusawi hre pha lo mah ila ava hau a ni ngei ang, Zosanga leh Duati, Saitei leh hmeichhe pakhat hi Valpuia sumo-ah an chuang ta dial a, Duati khân engtin nge a va thlêm tih ka hre lo nain ka lawm viau, tlêma tlêmah kan mualpho teuh kher mai.

Chumi hnu chuan Lawmsangzela te ṭhian ho chu a û car-ah an chuang ta a, ka thaw huai mai, Faka tân pawh a fapate hi han hau chiam dawn se hauna tur vak an awm bik lo, Zosanga zu in zeuh zeuh tih loh hi tun hmain buaina kan nei ngai hek lo.

Mo kan nei dâwn lehnghal a, eng nge kan la hmachhawn ang ni.

[Zosangmawia]

Ka car hman te an la tum ve khanglâng a, ka thinrimna an tawngbaw teuh kher mai. Ni e, ka nu dik tak chu Lalmuanpuii ni lovin Zomuankimi a ni a, a thi tawh bawk, kan têt laia kan ina awm ṭhin nu Siami khân a hriat chian ka ring tlat.

Nu Siami kha kan awmpui kumhlum a ni a, kan in aṭanga pasal nei a ni tain ka hria, khawiah tak nge an chên ka hre zui ta lo a, ka nu leh pa emaw ka nau hian an hre mai thei a ni, thudik ka hai lan vek hunah chuan an nasa lo viau ang.

Duati'n min rawn thlêm lo se chuan vawiin hian ka thinrim ka puakkeh ngeiin ka ring; mahse, vawilehkhata ri chhuak pawp ṭhin mipa ka ni lo va, bâkah Duati hmakhua thlir tel ka ngaih vângin ka ngawi mai chauh a ni. Ka nu leh pa rum zeta ka melh hnuah Sumo chhungah ka lût ve chauh a, Saitei driver bulah a ṭhu a, mo lâwm tur midang pali bâkah kei, Duati leh a ṭhiannu Becky, chu zawng chu Sumo khatah kan chuan ho a, driver pawh a fel ang reng.

Thenzawl kan thlenin Hotel-ah chaw kan ei a, Vantawng hotel-kawta lo ding hmeichhe pathumte chuan min en duh hle, Becky leh Duati'n an pan nghâl a, an in kuah chûk chûk ka hmuh chuan ka nui suk.

"Zosang, hei ka ṭhiante hi hmelhriat ve rawh," Duatbiki a nui var var a, a thawhpuite nge, a eng nge annih pawh ka hre ve lêm lo.

"Hei hi Thelma a nia, chuan Lianthangpuii leh Hmingthani annih hi," tih pahin "Ka ṭhianpa Zosangmawia, Forensic expert a nia," tia chhuang taka ka hming leh ka hnathawh a sawi chuan ka nui leh suk.

A ṭhiante ho chuan kan chaw ei man min tum sak an tum tlat avangin ka hnial duh ta bik lo a, Duatbiki zawng a hawiher a zau a, ṭhian pawh a ngah phian.

'Inneihnaah min sawm ve lo va' tia min chhaih fiam chuan, "Ti khân lokal tawp ula ka buaipui vek ang chu," ka'n ti ve ngei a. Ka thinrimna dah ṭha-in an zingah ka nui ve hawk hawk a, Becky erawh a ṭawng tam lo khawp mai. In en tîr pah tura kal a ni a, a thâ a za lo a ni mahna.

Inngai hlawm viau mah se kan chhuah a hun leh tâk avangin kan kalsan ta a, "Duati, i nau Rafaela saw min lo biak la," Hmingthani ṭawng ri sap chu ka hre pha reng. An la upat hmel hlawm lutuk lova an nui ṭhâ reng mai, Hmingthani ber hi Aizawlah ka hmu tawh thânin ka hria a, nakinah Duati ka la zawt ang chu.

Mo hruai tih takah Rinsangpuii te lam an sahâwk phian a, ka boruak ken hian zir deuh phei se chuan nuam ka ti viauin ka ring, Saitei leh driver Valpuia(NÂO VÂ-a achangtupa kha) an inbe thei phian a! Kan Saii ṭawng duh loh loh nen Hmuifâng velah a nui ar ar ve tlat.

Khua a nawm lutuk loh vângin chhûm a zîng mup a, Duati min si chêtin a ṭhu a, a kutah ka vuan deuh ngar. In hauvin intithinrim ṭhin mah ila rei lotê hnuah kan inrem ve leh mai zel.

A ṭhiannu Becky erawh chuan kan chuanpui midangte a titipui ve luam a, mahni ngaihsak zâwng zâwng kan buaipui a ni deuh ber.

Lawmsangzela te inneihna turah hian ka sum khawlsa ka thawh ve nual a, amaherawh chu Sawrkara hna nghet nei awmchhun ka nih vâng hian ka tihturah ka ngai hmiah, ani erawh chuan ka pa workshop a enkawl a, annupa eizawn nân an hman zui pawh ka ring, annu hi Revenue lama thawk a ni a, a chhunzawm dawn nge aikal a dah dawn tih ka hre lo.

Aizawl kan thlenin tlailam dar thum a ri vel chiah a, Rinsangpuii te hi a nî te inah an inghat dawn a, keini lam tân buaipui vak an ngai lêm lo.

"Duati, naktuk kan buai dawn sia lo riak daih la," in kan thleng tawh a, "Ka nu te hnenah nangman dîl rawh," atih chuan ka phûr nasa.

Kan sumo hman driver Zira leh Siana, Valpuia te chaw eiah kan sawm nghal vek a, Saitei leh Valpuia an la 'in chu e kha' viau.

Ka nu leh pa hmel ka hmuh hian chawplehchilhin ka thin a rim zel a, chuvanga Duati pawh riak tura sâwm ka ni, nu Mafeli te hnenah ka sawi chuan an lo phal ve mai a, "Ina rawn lêt ngai lovin naktuka a mamawh tur la phei nghâl ula, a ṭûl ṭûlah in lo tîr dawt dawt dawn nia," atih chuan ka nuih aza hlê.

A rûkin ka room-ah ka riahpui lovang tih tunge sawi thei, sih sah mai a...

Rafaela pawh a duh ber ṭhian hruai tura ka tih kha a zâwm ṭha viau, nula pakhat ka la hmuh ngai miah loh a rawn kalpuia ka room-ah an pack leh hlek. Ka hau dawn eih lo, Ramtei vanga a nun hrehawm zia ka hriatpuia mi pangngai a nih vângin hmuh theihah a tilang lo mai mai niin ka hria.

Tlailam chaw ei zualpui an reh tawh a, Rafaela leh a ṭhiannu ka room aṭanga an rawn chhuah chuan an kâi hmel chhâ chhâ khawp mai, "Hey, Zosang, Nupuii hi ka va thlah lawk anga ka lo lêt leh ang," a kiai zui suk a.

"I u Duati a rawn riak dawn thova zanin chu ka âwl ang che." Ka tih chuan a ṭhiannu nuih azat hmêl viau.

Rafaela te ka thlah zawh hnuah ka nau ka be leh zawk a, chumi hnu chuan Duati nen ka room-ah kan inkhung ve ta.

"I in pawhin rûi khawpin in suh ang che," min han vau lâwk nghâl ringawt a.

"I in ve dawn em?" Tia ka zawh chuan, "Dawn lo, ka peih lo," a ti ve teh tlat. Mak deuhvin chutia a tih chuan ka lâwm lo nghâl ringawt nia! Ka ngaihzawngte zu in turin ka duh ngai miah lova an in hian ka ngei deuh tlat zel; mahse, Duati lakah chutiang rilru chu ka pu ve miah lo hi mak ka ti a, in ve ngei se ka la ti tho.

"Zosang, ka thil sawi chhuah kha tumah hrilh suh aw," nuam lo a tih hmel em em a, "Ka sawi dawn lo, sawi pawh ni ila i tâna pawi turin ka ṭawng miah lovang," tiin ka hnem a, no hnih ka in hnu-ah, in ve tura ka nawr sek tâkah chuan a in ve leh ta nge nge a, "Mi hriat tur leh midang hnaihah va kal miah suh ang che, naktukah pawh ka bulah hlir awm la, mipa dangin an ngaihven che ka remti miah lo a nia,"

"Nangpawh hmeichhe dangin an bâwr leh vaih che chuan ka nasa tawh ngawt ang," a nui zui hak hak a, a kawr hâk hlîmin a pumah ka chûl sak a, "Ka fa tur a awm nge awm lo inchawi ang hmiang," ka tih chuan, "Chutiang sawi suh," tiin a ṭeu hlar.

"Eng nge, ka fa pâi i duh lo em ni?"

"Duh loh vâng ni lovin, kan chhungte an nasa awm êm mai,"

"Nasa ang hmiang, kan inru mai dawn alawm, Duati, i duh phawt chuan tunah pawh kan innei thei reng, dân anga inneih kan tlin loh rau rau chuan inru daih ila, Lawngtlai lamah ka nu te khuaah kan awm dawn nia," thutak zawka ka tih chuan, "Ka hnâ hi.." ati tawi tak a.

"I tân hnathawh a ngai lovang, ka châwm thei che," ka ti hmiah.

A dûlah zûtin a âwmbâwr, a vun mâm han mai ka kut lâwnga ka tawh leh meuh chuan keimahah danglamna a awm leh ṭan dêr tawh; mahse, zanriah kan la ei loh bâkah, tih tur neuh neuh kan la ngah si a, ka insûm nasâ.

In control theih loh ka hlauh êm avangin fawh pawh ka fâwp duh lo a, ka rin ang chiahin ka room kawngkhar an rawn kik ta dat dat a. Rang lutukin Duati bathroom lamah a tlân lût nghal a, ka nui chhuak teuh kher mai. Thil ṭha lo tih hi chuan kan in thiam lo hû zel.

Kawngkhar ka hawn a hmeichhe lo ding ka hmuh chuan ka nui tâwp chiang teh a nia.

Ruati ka bialnu hlui mitmeng vãp ham nen kan inhmachhawn ta rân a.

"Eng nge i rawn tih dâwn?" Ka ti nghut a.

"Min luh tir ve phawt la.."

"Eng nge i rawn tih dawn ka zâwt che a nih chu," kawng ka kian duh dêr lo. Chutih lai mêkin Duati a rawn chhuak ve ta a, Ruati nen min hmuh dun chuan mak atih hmel kher mai, eng mah sawi lo hian khum lam a pan a, a titau leh ang tih mawlh ka lo hlau.

"Inngaizawng ni si lovah chuan in awm dan hi a mak ngawt mai," tiin Ruati a rawn pên lût a.

"I lo inrawlh a ngai lovang," ka ti sup.

"Zosangmawi, tunah hian nau thlathum mi ka pâi tih hria la, i fa a ni bawk, ka phone i chhân duh loh vângin ka lokal a ngai ta a nih hi," Semi sofa-ah a ṭhu thla hnak a, 'ka awih lo' tih chi ninghal lo chuan. Ruati nen vawi tam sex kan hmang miau sia.

Duati ka va melh zauh a, "In pahnih khân a fâla inbiak in duh em?" Tih pahin kawngkhar a pan a, "Hun min pêk theih chuan ka lawm viau ang," Ruati'n ati dam thlap.

"Duati, tikhân lo awm ve rawh, a duh ang sawi rawh se," ka tih chuan chhuah luih ṭâlh a tum a, "Lalhmangaihzual, chhuak suh ka tih chu.." a pên lai a tawp chawt. Tûn hi a hmingpuma ka vawikhat kohna.

"In pahniha chungchângah sawi tur ka nei ve hleinem," tiin ka mitah chiang tak hian a en a, a rilru a nat hmel khawp mai. Rilru hahna dangin min rawn delh a ni ngawt alawm le.

"Ruati, min vêngthawng duh suh, ka lo va chhuak ang e," tiin ka koh hman hma hian a chhuak ta tho va, chelh din hman a ni lo, a luhlul ve bawk em a.

"I rai tak tak em?" ka room ah ka vei nghut nghut a.

"Hetiang dâwt sawina chi a ni em ni?"

"Thlathum a nih si chuan min hrilh har hle mai,"

"Ka ngam ngang lo a ni, damdawi kha ka ei ve ziah sia, eng berah khân nge ka theihnghilh tih ka hre lo a ni," a ṭah a chhuah hmel hle a, Ruati hian naute a duh lo tih ka hria, Duati lo lan hmaa ka sawi pawhin damdawi ei a thlang zawk ziah a, chuvangin awih sak loh ngawt chi a ni lo.

"Eng pawh nise tun dinhmunah chuti maiin rilru ka siam thei lo a, inneih boruak hi zo fel se, kan chungchâng leh naute chungchang kan sawi dun ang," ka tih chuan, "Aw le, ka lo hrilh hun che hi a dik lo tih ka hria; mahse, ka phone i pick duh bawk si lova tihngaihna ka hre lo a ni." Ani leh ni lo angin a ṭawng zawi hlê a, hrehawm tihmêl a pu bawk.

Kan inṭhen chhanah khân Ruati thiam loh a awm lova keimah zawkin Duati ka ngaihven san vâng a ni tih ka hria.

Taxi-a lokal a nih vângin thlah haw ka tum ta a, choka lama Duati leh Valpuia, vawiina kan chuanna sumo driver lo inbe mawlh mawlh chu ka melh zawk a, min rawn hmu ve lêm lo.

Ruati fa pai hi ka fa a nih takzet chuan tlânchhiatsan ka tum miah lo, amah Duati ka phatsan ta tihna ni lovin ka mawhphurhna hlen chhuah hi ka tih tur a ni tih chiang takin ka hria.

Rilru phîr zet chungin car ka la chhuak a, Ruati te vêng lamah kan tlan zui ta nghâl a.

Ka tihsual man ka têl dâwn a nih pawhin ka tuar ṭâng ṭâng mai a ni ang chu; mahse, Duati kalsan hlen tur anga ka inngaihtuah erawh chuan ka chhungril a na vawng vawng si.

[RAFAELA]

Nupuii ka ṭhiannu ka thlah haw hnu chuan a la hma hlê a, Zosanga te ina kal lah ka peih tawh si lo, kan ina awm pawh nuam ka ti chuang lo. Ngaihzawng neih tumna rilru ka pu tawh lova, Nupuii hi lehkha ka zirpui ṭhin a ni a, Zosanga te inah ka hruai ve mai mai a ni.

Kalna tur dang hre hek lo. Kan inah ka haw leh ta nge nge a, kan sitting room-a lo ṭhu ka hmuh chuan mak ka ti kher mai! Diki leh ka nu an lo titi bawrh bawrh a, henu hian eng nge a hriat a min umzui reng ni!

"Bawiha, i ṭhiannu hian a nghâk reng che," ka nu'n a tih chuan ka nui lui ngial a.

"Diki, i lokal rau rau chuan thil ka thawn ang che aw," tun hi hun remchâng tak niin ka hria, bial zaipawl aṭanga ka bânna lehkha envelope-a ka dah sa vek chu ka va la a, ka nu leh pa ka hrilh hre lo hrim hrim, tun ka din hmunah hian bial zaipawl nih ka tlin dawn lo tih ka hriat vânga hetiang thil hi ti ka ni.

Diki ka pêk chuan a lo hrethiam a ni chêk ang, "Rafael, i ngaihtuah chiang lo a ni," ati sap a. Ka nu a inthiarfihlim tawh a, kan pahnih chiahin kan ṭhu a, zu ka in vangin ka ṭhut hnaih duh lo.

"Ka ngaihtuah vek tawh a, bân hi ka tih ngei ngei tur a ni, a rêng rêngah eng nge min buaipui chûk a!?" Ka ti ve deuh ngat.

"Nia, zak lo pawh min ti mai thei; mahse, hmeichhe pakhat rinawm loh vânga i nun a chhiat vek kher hi ka phal lo a ni," a ti sap a.

"Min duh tih sawi tum hlek suh," ka ti hmuk a.

"Ka duh miau che avangin ka sawi lo thei lo, kan duhsak zawngte hi chu sual lam kawng zawh turin kan duh lova, chutiang chiah chuan keipawhin a ṭha lo lam kawng i zawh hi ka phal lo a ni, hun min pe rawh," zak chung chunga sawi a ni tih a hmai sen ṭâwn ṭâwn aṭang chuan ka hriatsak thei.

"Hmeichhia ka mamawh lo.." ka ti tlang tawp a.

"I mamawh apiang i hnaih kher tur a ni lova, i mamawh loh te pawh i neih tel a ngaih châng a awm ve asin, ngun takin inngaihtuah la, bial zaipawlah tel leh rawh ka ti lo, inrawlh theihna pawh ka nei chuang lo, mahse,i nihna ang ang hian ka pawm che a, i tân theihtawp ka chhuah ang," tiin a ṭhutna aṭangin a rawn ding chhuak a.

"Ka zahtheih loh vânga lokal ka ni lo, mahni duh sawi ngam lo tur khawpa hmeichhe nêp ka nih loh avangin he thu sawi tur hian ka lokal a ni," inringtawk taka tiin ka lehkha pêk kha a hum a, kawngka lam a pan ta a.

Amah a nulian si a, zahawm tak a ni. Mahse, Ramthansangi vâng hian tu hmeichhia mah ka ring leh thei tawh lovang.

"Muttui mangṭha le," a tih pawh chuan ka chhâng eih lo.

Mahni-a awm tam ka mamawh ber a, Diktei hian min duh tak tak nge tak tak lo tih ka la en chhin ve ang chu.

Scooty tlân liam thâwm a reh raih thlengin ka dinna ngaiah ka ding reng a, mihring hi an hmêl en ang ngawt anni lo tih ka hre thar nawn leh ta.

Nui suk chung hian ka room lam ka pan ta a...

B+>[BeckirafARenthleI]<+®®

THE RAPSAGYAN FAMILY

Becky Rafa Renthlei

Chapter-13

[ZOSANGMAWIA]

INNEIH NI-AIZAWL

Ka nau te inneih ni tur a her chhuak ta rup mai le, 'Tiam tlat e' tih chham tu tur unaupa ka nei chungin kei erawh ka phûr chhete eih ta lo! Ka hun tawngin a zir lo bawk nen ka hnual ruih thei nia.

Nizan Ruati ka thlah hnu khân Duati biak ka tum a, Facebook messenger, whatsapp leh Sms, call thlengin min block fai vek a, ka thiam lo tih ka hria; mahse, ka na ngawih ngawih thung si a nih hi, Ruati a lo râi kher hi pawi ka ti tlawk tlawk a ni ber mai.

Lawmsangzela dinpui tur Lalrinmawia lo thlen lai pawhin ka la insiam miah lo va, min tur chhên lehnghal. Ka nu leh pa an insiam peih ap tawh a, ka nau te inhmangaihzia ka hriatchian êm avangin ka awt ru hial, ani chuan a hmangaih ber nupuiah a nei dawn chu a ni ta a; kei ve thung chu chawplehchilhin ka tihsual man ka tuar chho mêk si.

Kan chhungte ho an rawn thleng kim thawkhat tawh a, ka nu te lam an lokal mang lo, unau pahnih chiah anni tih ka hria a, a phirpui a thi tawh tih pawh ka hria; mahse, thi tawh khâ ka nu a ni tih ka mumangah pawh ka la ring chhin ngai lo. Tu emaw ber ka chanchin zawh ka tum deuh kha a ni a, atu amah zawh tur an awm lawi si lo!

"Zosang, insiam rawh le.." ka nu room-ah a rawn lût a, a hmêl hlim sarh te chu ka haw ngawih ngawih.

"Ka insiam dâwn reng,"

"Tun hi i lungawi lohna tih lan hun a ni lo tih hria ang che, ka ngawih reng avang hian min palzût i tum a nih chuan i tisual hle dawn tih inhria la; he khawvelah hian vâk vâk mah la keini aia hmangaihtu che an awm lo," thinrim angin lang lo mah se a lâwm lo tih a ṭawng dân aṭangin ka hrethiam lutuk tlat.

"A nih a hnu, nangmahni khâ inbuaipui rawh ula, inneih hi zo se, ka in dang nghâl ang," ka ti hmiah.

"Ê, i thu thu a ni alawm, i hlawh tel lo pawh hian Pathian zarah kan khawsa ve thei khawp mai; tûn dinhmun i thlen theihna chhan te hi i ngaihtuah ngai a nih chuan hetiang mai mai hian min ṭawngkhum lovang," dam thlap, nelawm hauh si lo hian ati leh a, ka nu police Lalmuanpuii kha a ni miau a, ka chhâng thui duh lo.

"Insiam la, vawiin i khawsak phungah kan chhungkaw mualpho theihna a thleng a nih chuan a pawi khawp ang," tih pahin ka coat hmâ a târ tur Rose pâr mal khat chu khumah a theh thla a, min enzui tawh miah lo hian room a chhuahsan nghal bawk.

Dik tak chuan ka pa ai mahin ka nu hian min kuah tam zawk tih ka hria, a strick êm vâng hian ka nau hi chuan ka pa a bêl tam thung a, bâkah sumdawnna thila min zin san fo avangin ka pa aiin ka ngaina mah zawk.

Duati ṭawng lâng lâng ri ka hriat chuan rang zet hian ka inthlâk a, henu âw ringawt pawh hian min tidanglam zung zung thei hi thil mak a ni.

"Zosanga kha va tur deuh rawh, dâr rîk a hnai a nia," ka pa nen an inbia ni ngei tur a ni, "Puitling a nia lawm a duh angin awm rawh se," Duati ṭawngkam kha fak chu ka pa'n man thiam lo mah se ka hre ru kar.

A ruala kal loh ka la hlau fan, chhungkaw ho ṭhutnaah pawh Duati te chhungkua nen ka ṭhu ho vek dawn a, ka rilru natna dah ṭhain hlim ber anga ka lan a ṭul tlat si. Rafaela leh Diktei rawn inzui lût ka hmuh chuan an imhmeh ka ti hliah hliah a. Diktei ka type chi ni lo mah se Rafaela tân a ṭha thlâwt.

A pian dik thlarh te, a sam a thlah thlap te chuan ati lang nu hnâp a, puan bih pawh a inhmeh zaih zaih hlê a ni. Duati erawh chuan puanchei bihin a kawr hâk senno chu a inhmeh viau a, Diktei nen unau ni zawk awm tak anni.

"Rafael, car i rawn keng em?" Ka siai suk a.

"Keng e, u Duati leh Saitei hruai tel an ngai sia," tiin Diktei a melh zauh va, he mite pahnih hi an inzui ve tak tak ta nge ka hre ta hauh lo.

Vest, vutbuak rawng ka inbel ang chiah Rafaela'n a ha ve bawk a, kan thawmhnaw inbel en phei chuan nalh tak kan ni.

"Saite, Zosanga leh u Duati kal dun se keini chu Diktei te nen kan kal ho leh dawn nia," Rafaela'n atih chuan ka rilrem zawng tak a ni.

Mak takin Duatbiki pawhin eng mah zuk sawisel miah lo a!

Chumi hnu chuan Rafaela remruatna angin kan kal ta a, ka nu leh pa leh pa Zirsanga te nupa erawh a rualin an kal thung. Anni chhungkua hi chu kan hmaih thiang lo mai ni lovin kan thisen zawm te aia kan hnaih zawk anni.

"Duati, eng ati nge min block kher a..?" Car chhungah kan awm tawh a.

"Eng mah sawi dun tur kan nei tawh lo, thinrima inhau kher hi ka duh lo a nia,"

"Ka duh bîk hleinem, ka dinhmun hi a khirh êm asin, khawngaihin min hrethiam rawh ka duhzia che i hriat kha," ka ti sup a.

"Duh leh hmangaih pahnih nei ka ngaisâng lo, i nunah rawn inrawlh ka tum lova kei chu puitling ka ni tawh, Ruati hi kei aiin a naupang zawk a, i fa a pâi bawk, thlahthlam lovin enkawl la tichuan thilṭha ti i nimai," a vawikhat nân Duati awkâ dam leh thunei aw tak ka hre ve ta.

"A râia ka fa a nih tak tak chuan nupuiah ka nei ang; mahse, lo râi ve ta la engtin nge kan tih tâk ang?" Tia ka zawh chuan, "Ka tih sual man tuar ngam lo tur ka ni hleinem, chutianga hmeichhe rilru nêm lah ka ni hek lo, ka hmâa awm a piang ka hmachhawn ngam a ngai a, ka hmachhawn bawk ang," Biak in kawt kan thlen tâk avangin a ṭawng zawm ta lo a.

Duati hian min lo duh tak tak ngai lo em maw ni ka ti hial. Tiang em ema inringtawka a ṭawng hi mak ka ti, nge, nizan lamah a sawi tur a lo ngaihtuah lâwk diam tawh zawk.

Mipui an tlim hmur a, kan workshop lama thawk te leh showroom lama mite pawh an rawn nalh viau, Duati kutah kâiin kan chhungkaw ṭhutna tur lam ka panpui ta a, min hnial bik chuang lo.

Ka nau hlim hmel leh êng sar ka hmuh meuh chuan ka thinlung takin ka lawmpui, harsatna hmun aṭang te, kal thei miah lo hmangaih taka a vawn ngei Rinsangpuii a nuṭapain a rawn kaih luh lai chuan ka thaw chhuak hawk a,a hmelṭha kher mai, a sam a chhîp ah vial tawmin an chei simple hlê a; mahse, a inhmeh viau si. Kei hian eng tikah mah hetiang hun hi ka hmang ve thei dawn lo tih ka ngaihtuah kâi nghâl a, pawi ka ti viau.

Ka kianga ṭhu Duati hmêl ka en chuan Rinsangpuii leh Lawmsangzela a en ngun ngang mai. Eng nge a ngaihtuah tih a hmêlah a lang miah lo a, Rinsangpuii ai chuan Duati a hmel ṭha daih zawk ka ti.

A hnâr ngûl sâng vah leh a mithmul sei er sang te, a vun paw phiai te hi mipa dang tân ka phal lo bur. Pastor-in thû a chham tîr lai te, zungbun an inbun tîr lai te chuan ka ngaihtuahna a kal thui khawp mai.

"Pathianin a zawm tawh chu mihringin ṭhen suh se," Pastor aw fiah kâk chuan ka thinlung a dêng dawt.

Mipui tam tak zingah chuan mit ka lên kual a, ka rin loh deuh ka hmu ta tlat mai le! Kan naupan laia kan ina awm ṭhin nu Siami khâ ka hmu a, ani pawhin ngun deuh hian min lo thlîr ve reng bawk. Ka nau aiin min kuah tam fê zawk a, duat pawh min duat ṭhin; ka thluak a vir zawk a, ka nu chanchin kimchang zawh ngei ka tum ruh hlê.

Chhungkaw aiawha thusawi hunah ka pa Lalfakhlua a ding a, sumdawng mi tih takah a sawi ṭhain a sawi tâwi fel khawp mai. Nu Mafeli leh ka nu an ṭhu dûn a, a hmêl a hlim viau bawk, vawiin ni a hlim lo awm chhun chu kei leh Duati hi kan nih ka ring.

"Zosang, inkhawm bânah kan inah min dah nghâl rawh aw," Duati'n min hrilh ru sap a, min haw âwm angin a lang lêm lo.

"Ṭawng rih suh, miin an en ṭhup che a nia," ka tih chuan a hawi chhuak ve leh chiah. An en duh bîk riaua hriatna ka nei tak tak a, Aizawlah a awm tam lova ka bialnu emaw ti tâwk an lo awm leh tho vin ka ring.

Duati hmingpum hi Lalhmangaihzuali a ni a, a tîra an phuah phei chu Lalruatsangi tih a ni; mahse, a nu leh pa hming kaihkawp a nih vângin koh dân tur buaithlâk an ti a, a pu, a pa pa hming phuah zâwk Lalhmangaihzuali tih hi a pu hlen ta niawm tak a ni, a hming taka koh hi a haw hle tih a nu'n a sawi nghe nghe. A nulât hnu thleng hian 'Duati' tia koh a hlawh ta zawk a, a hmingpum hria an tam lo khawp ang.

Inkhawm kan bâng fel a, thlalâk hun chhung a rei ngei mai; ka kham ru hluah hluah tawh a, Duati nen kan inzui zak zak reng a, kil khat aṭanga min thlir rengtu ka hmuh chuan ka nuih a za eih lo. Ruati hmêl sen ṭân leh thinrim mitmeng ka hmu nghal a, kan chezia min lo thlir reng tih ka hre mai. Inneihnaah hian kan sâwn lo tih ka hrechiang a, zak lo chu ka ti ve reng.

Kan telna awm chi-ah kan tel kim thawkhat tawh bawk a, a zualpui kan in lamah kan kal tawh bawk. Car-a Duati ṭhu lut tur chiah chu a kutah tu emaw hian a rawn man chat a, tunge a nih ka hriat chuan ka sa zak. Ruati lek!

"Duati, nizan khân Zosanga nen kan chungchâng i hre vek tawh si a, vawiina in awm danah mit i tikham hle mai," tiin a nawr deuh sawk a. Min hmu an awm nge awm lo ka hawikual vat. Tute mahin min ûksâk lo tih ka hriat chuan, "Ruati, helai hmun hi khatiang sawina hmun a ni lo," ka ti nghut a.

"Zosangmawi, i lo tenawm hle mai, nizanah ṭha tê tê in min thlaha tunah tihian inngaizawng ang chiahin mi hmuhah in khawsa leh a," rum zet hian Duati a melh bawk a.

"Ṭawng lo khân car-ah lut rawh, buaina ka duh lo a nia," thinrim ru ṭûna ka ṭawng chuan Duati car-a ṭhu lût tawh chu a rawn chhuak ṭha leh ngat a, ka duh hauh loh boruak ṭha lo a thleng dawn chiang.

"Ruati, in inkârah inrawlh ka tum lo, in rawlh rawh tiin min ngen chiam mah la ka inrawlh hauh lovang; tin, a kum thu hla-ah pawh nang aiin ka upa zawk a, Zosanga nen inpahnih inkâr hi chu chingfel mai rawh u, min hmer tel suh," a ti ve ta khauh mai le.

"In pahnih khân car-ah lût rawh u," Ruati ka mitmei ngial hnu-ah min chhâng lo hian a lut ve mai, Duati erawh a dinna ngaiah a ding ngar a, an pahnihin ka phur kawp duh tihna nilovin mualpho a hlauhawm ve bawk si.

Chutih lai chuan nu Siami'n min rawn ko ta hlauh mai! Tun hi ka chungchâng zawhna hun ṭha tak a ni si, lehlamah Ruati leh Duatbiki kalsan chi niin ka hre bawk si lo; mahse, hmeichhe pahnihte aia pawimawh nu Siami thil zawh tur ka nei tlat, "Tikhan lo awm lawk rawh u," rang mangkhêngin ka kalsan ta a.

Ka car tlân liam tur ka hmu vuai, driver seat-a ṭhu chu Duatbiki a ni bawk. Koh din hman ni hek lo, ka en liam ta ringawt a, Ruati a la phur zui.

[DUATI, LALHMANGAIHZUALI)

"Ding rawh, ding nghâl rawh," Ruati au ṭhat ṭhat chu engah mah ngai lovin ka tlânpui puat puat a, ka car khalh thiam zia kan show hlek ang e, tiang te-a min ṭawngkhum vel chu le.

"Lalduat, i beng a ngawng em ni?"

"Ngawng lo ve, min hâu leh min ânkhum i châk bawk a, hun thâwl ka pe dawn che alawm i duh tâwk i sawi thei ang," kan in lam panin ka tlan zêl a, a thinrim mitmeng chu nasa tak a ni.

"Thi rawh, i chawh.." ṭawngkam a duh tui lo mai mai asin.

"Lalruatkim, ṭawngkam chhe deuh deuh khâ min chhãkchhuah khum rêng rêng suh," he nu kher hi chu ka hlau lo nasa em mai. Min zah lo tu hi eng vangin nge ka zah bik ang.

Kan in kawt kan thlen chuan ka chhuk tharh a, min zui pawh tum lo hian car-chhungah a ṭhu tlat a, ka mizia chhete eih hre lova min han ṭawngkhum chu le..

"Puitling takin inbe teh ang lokal rawh," ṭha takin ka ko a.

"Eng mah sawi tur ka nei lo, Zosanga hi kalsan rawh chu bâk i lakah duh ka nei lo.."

"Zosangmawia te chhungkua nen kan inzawmna i hria em?" Dam thlapin ka ti ve kher a.

"Hria e, in inpawh zia pawh ka hria, mahse, in inkâr erawh unau anga in en lohna chen in nei, mi â ka ni lo a nia," ati hmak hmak a.

"Unau ang chuan in en lo ve, tunah hian râi lo la chuan ani nen hian chhungkaw phalna thlapin kan inneih ka ring; mahse, hmeichhia ka ni a, i din hmun tur hria a kiansan ka ni, tun hma anga ṭhian leh unau kan nih anga awm thlangin nangmah thlahthlam lo tur hian ka hrilh tih hre rawh, a chhia zawng zawng min puh erawh chuan i rin phâk bâkin ka nasa ang," ka ti hmiah a.

"In inkawp tihna mi?" Mak a tih hmêl hle a.

"Inkawp lo ve, innei duh pawh ni ila kan nu leh pa te hian min dâl miah lovang; mahse, nangmah a nei tawh che a, a thinlung hneh tum mai rawh, in inkâr chingfel tur hian i puitling tawh, hna nghet a nei a, i tâna ṭha i hria a nih chuan kei min tâwng lovin a rilru hneh tum la, fahrah siam suh u.." ka tih leh chuan a ngawi ta rauh rauh a.

"Ruati, ngun takin ngaihtuah la, Zosanga nen innei dawn ta ila ka hnial lovang, ka mipa duh chi a ni a, ani pawhin min duh bawk; mahse, hetiang innih tâkah hian ka inthiarfihlim ang, a mualpho ka duh lova, nang pawhin a chhiatna tur leh an chhungkaw mualphona turin awm tum bik lo ang che, puitling taka sawi dun ka duh vânga he ta hruai che hi ka ni," dam thlapin ka ti a.

"Duati, naute hi ka duh lo a, dik tak chuan damdawi ka ei ziah ṭhin, mahse, ka lo theihnghilh palh hlauh avangin tihian ka duh lohna hmunah ka awm phah a, Zosanga hian min hmangaih lo tih ka hria, ka dinhmun hi a khirh asin," nichina a hmêl chang rât kha bo vekin a ṭah a chhuah hmêl viau.

"Chutiangin ngai mah ta che, mipaah pawh pa tak a ni a, a mawhphurhna a hlen chhuak em em ang, amah pawhin naute a awm chuan nupuiah ka nei ang, tiin ka hnenah a sawi nghe nghe," ka ti ve zel a.

"Ka lawm e, ka rin dan a dik loh che avangin min ngaidam rawh aw, ka rilru a hah êm a ni," car aṭangin a rawn chhuak a, "Zosanga te in thleng ka thlah lêt dawn che nia, a thinrim pawhin chhâng duh lo la, rilru hahna dang siam belh lo hrâm la ka ti khawp mai," tiin ka fuih hlauh.

Zosangmawia ka duh ta lo tihna a ni miah lo a, ka kum anga puitling ka nihna lan chhuah tir hun a ni zawk, tunah naute in thlathum hmêl a hmu tawh si a, Zosanga nuna ka lo inrawlh ve chhên hi mahni hmâ a sial thlâk ka ti. Amah pawhin chiang takin 'nupuiah ka nei ang' tiin min hrilh tawh a, ka na lo chu ka ti hauh lo; mahse, mi inkâr tichhetu niha fahrah siam ai chuan ngawi renga tuar ka thlang zawk.

Ruati nen kan inah kan lut a, tumah an awm ka rin loh teh lul nen Rafaela leh Diki innghêng rial hian an lo ṭhu dun a, mo lawmna lamah an kal emaw tih lai lai a! Ruati leh Ramtei kha inkawmngeih tak anni, Rafaela'n kan pahhniha min hmuh dun chuan Ruati a melh rum ûl a, "Kan inah eng nge i rawn tih dawn?" A ti nghut.

"Bawiha, ka rawn hruai zawk, tikhân inkawm ula kan chhuak lehnghal.." tih pahin Ruati ka mitmei vat a, a lo man thiam nasâ.

Diki erawh a zah hmel viau a, an inṭhut hnaih ve bawk êm 8a ni.

Kan in aṭanga kan chhuah chuan Ruati phone a ri char char a, kei chu Zosanga'n min call tlang thei dawn lo tih ka hria, a car kan keng daih si a min ngaihtuah ve fia fia ang chu.

"Chhâng rawh, Zosanga a nih chuan.." driver seat-ah ka ṭhu lût nghal a.

Kan awmna chin leh an ina kan phei tur thu hrilhin Ruati a ṭawng vîn ang reng, Zosangmawia a rawn pâwr a nih ka ring hmiah bawk.

"Duati, engkimah min puih ka beisei dawn a nia, Ramtei chungchânga Rafaela'n min hua pawh kha a âwm ka ti tho; mahse, eng mah ka hriatpui lo tih min hriat sak rawh aw," tiin a thaw chhuak hliai a, rilru hahna lian tak a nei tih mi â ber tan lo chuan a hriat vek. Mi â lah ka ni miah si lo.

"Theihtawp ka chhuahpui ang che tiin tiam thei lo che mah ila, ka lo fuih ve dawn nia," tih bâk sawi vak tur ka hre bik lo.

Ruati chana ka indah vanga hetiang thutlûkna hi siam ka ni a, zû in lo ila chuan khatiang khân kan awm ãwm chai si lo, a pawi tur ang ang tawng baw tura ka inhuam a ngai a ni mai.

Biak in kawt kan chhuahsan laia ka thinrim nên vawm bo ang duakin ka thawveng hawk tawh a. Ka chhungrilah erawh chuan engtikah mah Zosangmawia nen kan inkawp leh thei dawn tawh lo tih ka hria a, ka na ru veng veng.

Ruati pawh a ṭawng phei barh barh a, Ramtei tenawm a tihzia leh Rafaela a khawngaih thu a sawi ve luam bawk a, "Ka ṭhiannu mah nise ka dem ve thlâwt, nichina lo ṭhu ve kha a bialnu em ni?" Tia min zawh chuan a nih loh thu leh zaipawl member a nih thu chauh ka sawi a,"Ramtei aia ṭha Pathianin a la pe mai ang," ati ve ngial.

Zosanga te inkawt kan thlenin chaw an lo ei mêk a, mi an tam ngei mai!

"Hmangaihzual, i pa car a ni lo tih i hria ang chu maw," Zosanga hmel dur khup leh a aw ngaihno bei lo zet ka hre hmasa ber a.

"Ka pa car a ni ka tia mi?"

"Mâwl lutuk.." tiin Ruati a melh leh a, "I awm lohna tur hmunah i awm tam mah mah, ka thlah ang che. Hmangaihzual, lokal sawn miah suh ang ," a ti zui leh a, a mood a ṭha lo viau a ni ngei ang. Ka hmingpumin min ko ve vak vak ringawt a.

"I thu lo, ka haw dawn," tia kalsawn ka tum chuan, "I ngam chuan kalsawn la, eng nge ka tih dawn lo thlir ang che," vawikhat pawh min en tawh lo hian Ruati car-ah a luh tîra chak zetin an tlânchhuak zui ta a.

Nichina Zosanga rawn ko tu kha ka hrechiang lutuk ringawt, ka thin a phu ru dep dep a, boruak ṭha lo a thleng dawn tih ka thinlung hian hriatna a nei tlat bawk.

Chhungkaw thurûk ka lo sawi chhuak ta kher kher kha a la pawi dawn chauh a nih hmel, Zosanga'n min vau nân a hmang zel tawh mai si a, kan inkâr thilah chuan eng mah hlauhna chhan tur ka nei lo; mahse, a nu diktak hming ka sawi khâ pawi ka ti vawng vawng..

Zosanga lah thin butut nei a ni a, ka hming a sawi chhuak a nih vaih chuan ka nu leh pa te tân a pawi thui dâwn tih ka ngaihtuah thleng pha ve chiah a, ka hrehawm ngei mai...

A lo haw nghah thlen loh ka tum zet nâin eng emaw thleng dawn tlata hriatna ka nei si a, ka haw lui ngam ta lo.

Saitei te ka va zawng ve ta ringawt kha a nia, ka thla a muang der si lo...

B+>[BeckirafARenthleI]<+®®

14.THE RAPSAGYAN FAMILY

Becky Rafa Renthlei

Chapter-14

[ZOSANGMAWIA te Chhungkua]

Nithum hnu-ah.

Ka nau te inneih aṭangin ni thum a liam tawh a, nu Siami thu min hrilh zawng zawng kha ka tân chuan thu thar leh ngaihthlâk nuam zawk zawk a ni hauh lo mai. Ka nu hming an zêpna chhan te ka nu lung pawh an phun hma hmaa a û a nupuia a neih lehna chhan ka hriat meuh chuan ka tliak hnâwp a ni. Ruati ala rai zui a, Duatbiki pawh râi thei dinhmunah a din vângin ka thaw a ipik hle a, damdawi ei rawh tih mai ka duh rum rum tawh.

Kan inchhunga ka luh chuan ka nu leh pa chiah an lo awm a, tûn hi ka lungawi lohna sawi chhuah hun a ni ta.

"Ka nu Zomuankimi a ni tih hi engtia rei nge zêp in tum?" An pahniha an ṭhutna ep chiaha ka va ding a, puitling ka nih tawh vângin ka lungawi lohna leh ka ngaih dan ni lo sawi chhuak ngam tura ngaih ka ni.

"Zosangmawi," ka pa'n ati ṭhawt a, a awka vîn ka vawikhat hriatna.

"Zomuankimi leh Lalmuanpuii unau anni a, a nau zawk fa ka nih si chuan ṭha takin min hrilh thei lo em ni? Zêp hlen theih in inring a nih chuan intisual chhiava a nih chu, thudik haichhuah lohvin a awm ngai lo a nia," ka thimrim êm avangin ka aw a zâwi lêm lo khawp mai.

"Zosangmawi, i nu leh pa min zah lo hle mai," ka pa thinrim a rawn ding hluai a; mak takin ka hlau chhete eih lo nia! Ka nu erawh a ngawi ngal a, a en ngai a en tlat.

"Mahni nau lung phun hma hma a pasal han neih leh nghal te chu, chupawh nau te pasal hlui lehnghal,"

"Engkim i hriat vek loh chuan sawi ve pawp pawp suh, Zosangmawi, ka fapa upa zawk i ni a, i nu hian i natna tur leh i tâna ṭha lo tur vawikhat tal a tih i hria em?"

"Ka nu dik tak in zêp tih mai loh chu, Duati'n sawi lo phei se chuan ka nu hming pawh ka hre tawp nâng," ka ti hmiah hmiah a.

"Eng maw i sawi? Duati'n i nu chungchâng a sawi a maw?" Ka nu rawn ṭawng chhuak ve ta chauhva, ka tum loh lutukin Duati hming ka lam palh ta hlauh. Nu Siami zawk sawi lan tum ka nia, ka rilru a luah êm avangin Duatbiki hming ka lam phah.

"Aw, Duati te kan awmpui ṭhin nu Siami ngei pawhin a sawi, ka document pawimawh zawng zawngah ka nu hming Lalmuanpuii tih vek a ni a, Zomuankimi tih pakhat mah a awm lo," ka tih leh chuan a hma aiin ka nu a hawi phâwk.

"Mate, i hre sual a ni lo maw, i pa hian i nu hmingah ka hming dah a tum pawhin ka phal ngai lo, tun ang hun hi kan la thlen ka ring a, chuvangin i birth certificate-ah pawh ka nau Zomuani hming asin ka dah," tiin a aṭang ta tlat a.

"In dah lo, tuna ka hna ka interview lai pawh khân i hming a awm," tia ka sawi chuan ka nu a tho tharh a, ka pa thinrim hmel dur khup chu hun dang nise ka hlau ngawt ang; mahse, tun hun a ni miau si a, rei lo te hnuah ka birth certificate a rawn keng chhuak a, ka kutah min rawn pe ta a. Ka en chian chuan Zomuankimi tih pakhat mah a awm lo, Lalmuanpuii tih vek!

"Hetianga chiang finfiahna a awm chung pawh hian in la ṭang ngam a nia, ka nu thi ta hmai khâ in zah ve eih lo em ni?" Certificate chu an lamah ka theh phei a, ka nu'n an enchian chuan sofa-ah a ṭhu thla hnawk a, kei min en lovin ka pa a en ve ta thung.

"Faka, Certificate hi i tidanglam em ni?" Zawi sap hian a zawt ta a.

"Tikhân inpuh kual duh suh u, min enkawl tawhna zawng zawngah lawmthu ka sawi e, ka pa, ka nu dik tak hre tur hian dikna ka nei lovem ni, thudik min hrilh hma ula tun ang êm hian ka na lo tur, hun kha leh chen ka nu tak emaw tiin la lo en che a, mahse, nangni erawh chuan thudik in zêp ngar ngar thei a nia, mi te'n min nuihzat âwm mang e.." ka mittui a tling pap. Min enkawl danah ka vûi a ni hran lo, thudik an zêp hi ka hua a ni.

Ka nu a ṭhutna aṭangin a tho chhuak tharh a, "Faka kan inbiak a ngai ang, chumi hma chuan Zirsanga te nupa phone la rawn phei turin hrilh rawh," a ti hmak.

Pa Zirsanga te nupa a kohna chhan ka hre miah lo a, Duati hming ka sawi lan vâng kha a nih ka ring ta ber.

Duati nu leh pa, amah Duati nen an rawn lan meuh chuan kan boruak a dang ta zar mai le.

Sitting room-ah ka awm ṭhap a, Duati a lokal ve dawn tih ka hre miah lo, nge ka pain a va call in a ko tel ve tih pawh ka hriat si loh.

"Duati, Zosanga hnenah ka fapa a ni lo tih leh a nu chanchin engtiang chiahin nge i sawi?" Ka nu thinrim mitmeng chu namai lo tak a ni. Duati a kûn ngal a, nu Mafeli leh pa Zirsanga hmela mak tihna lo lang chhuak ka hmuh phei chuan an fanu hming ka lam ri ta kha pawi ka ti lutuk.

"Muanpui, eng nge thil awmzia?" Nu Mafeli'n kei leh Duati min en tawn chhen a.

"Mafel, a zia lo khawp mai, ka nau Zomuani chungchâng Duati hian Zosanga a lo hrilh a, eng chen chiah nge a hrilh tih leh thu dik zîktluak a hrilh vek em tih hi ka hriat duh chu a ni," ka nu ṭawng tam lem lo ni a ka lo hriat ṭhin kha a mizia a dang vek a, Duati ngun takin a en bawk, ka pa leh pa Zirsanga erawhin eng mah an sawi lo.

"Kan chhungkaw chungchâng midangin an sawi hi chu kan khap thei lova; mahse, Duati, ka fanu ang chiaha ka enin kan chhungkaw chungchâng sawi chhuah kan duh miah loh a sawi ta hi nâ ka ti hle a ni, in naupan laia thil thleng a ni a, a kimchang pawhin in hre hek lo, nu leh pain ṭha kan tih hunah kan sawi chhuak mai ang chu. Le, Duati, Zosangmawia nu dik tak chanchin i hriat leh kei a enkawl seiliantu nen hian eng anga unau inhmangaih nge kan niha i pa Faka ka neihna chhan zawng zawngte hi i hria a nih chuan sawi rawh," police a ni bawka a awkâ dam angin lang mah se ati mai mai lo ti ka hre chiang.

"Hmangaihzual, i nu Muanpuii zawhna che chu chhâng ta che," Duati a ngawih reng avangin a nu a rawn ṭawng chhuak ve a, dik tak chuan an fa hmasa ber a ni a, an duat zia hrechiang tu ka ni bawk. Duati hnenah i hming ka sawilang lovang tiin ka lo intiam ve tawh bawk nen hrehawm ka ti ru ngawih ngawih.

"Nu Muanpui, min ngaidam rawh, ka tihpalh a ni." A sawi zawh rualin a inhnît faih a, a tlân chhuak zui ta nghâl a. A nu leh pa'n an umzui ka rin nen an ngaihsak miah lo.

"Zosang, Duati khân engtikah nge a hrilh che, in naupan lai pawha inkawm tlem ber inni a, hetiang vel vang lek hi a nih hi inlo inzui kâwi reng," nu Mafeli a thinrim kher mai. "Vawikhat mah Hmangaihzuali nen hian inkawm tawh suh ang che u, rawn haw teh se a châk lo khawp ang," tiin ka nu leh pa hnenah ngaihdam a dil a, "A pawi kan ti lutuka, hetiang hi a thleng ang tih ka mumangah pawh ka la ring chhin lo, Hmangaihzuali hian min ti zak hle mai," ati leh a.

"Zosang, i nu aia hmangaihtu che hi an awm lo tih hria la, i nu leh pa inneih chhan dik tak i hriat duh chuan kan sawi thei reng," pa Zirsanga'n atih chuan, "Dâwt bâk a ni lovang, ka birth certificate-a ka nu hming inziak pawh an hre fuh lo a nia, he inah hian ka chên ve reng a ṭulna ka hre nek lo ve." Tih pahin ka room lam ka pan nghâl a.

"Ê, i thu thu alawm, nu leh pa hmangaihna pawh hre duh lo chu i duhna hmun apiangah i kal thei ang," ka pa ṭawngkam chuan min kher zar.

"Aw le, ka chhuak ang, ka chhuak khawp ang," tiin ka room ah ka lût ta a, Duati kha umzui ka duh; mahse, min haw dâwn lutuka ka ngam ngang lo a ni e.

Ka nu leh pa inhnial thawm te, pa Zirsanga te haw thâwm te pawh ka hre vek a, ka thinlung na lutuk hi engtia tih reh chi nge ka hre ta lo.

"Faka, thudik min hrilh rawh engvangin nge Zomuani hming kha ka hmingin i lo thlâk a!" Ka nu awki sâng zet chuan ka beng a verh zar mai.

"Muanpui, a hunlai kha chuan thil ṭha ti-ah ka inngai ve asin," ka pa aw a inthiam lohna rawn ri chhuak chu mak ka ti kher mai.

"A tîrah pawh ka sawi vek kha, Zomuani fapa a ni a, thi tawh mah se thlâk ka duh lo, Zosangmawia hian thudik ala hrechhuak dawn tih ka sawi lovem ni, ka hriat miah lova i thil tih hi a nasa mah mah, kan inneih dawn te, i nu leh pa thusawi zawng zawngte i theihnghilh ta em ni," ati zui leh phiar phiar a, ka ngaithla thei tawh lo. Hetiang em em a ka nu thinrim hi ka la hre ngai bawk hek lo.

Ka nu Zomuani ni ta pawh nise engvangin nge anni pahnih hi ka nu Lungphun hmaa innei nge annih, ngaihtuah tur a tam lutuka ka â thei tak ngial dawn. Ka phone lah chu a ri chhen a, tunge tih ka en chuan Duati a ni.

"Duati..." ka ti sup a.

"Zosangmawi, i lo tenawm kher mai, engtikah mah ka ring leh tawh ngai lo vang che," a inhnît zui hlap hlap a, Duati meuh a ṭah chuan a rilru a na hle a ni ngei ang. Ka thiam loh vek a ni.

"Ka nunah vawikhat mah rawn inrawlh tawh lo la, ka hmuh phâka awm atan pawh ka duh lo che," ka chhân zui hmain phone a off daih, a hma khan min block fai vek kha a nia, a thinrimin min haw hle tih ka hre mai, a âwm rêng a ni.

Ka nu leh pa inhnial thawm te chuan ka thluak a luh ngut ngut a, whisky ka dah ṭhat chu ka la chhuak leh ta nge nge a, zanin rum rumah chuan chhuah ka tum hran lo, naktukah Quarter ka mamawh thu ka sawi anga ka insawn chhuak chauh ang.

Whisky no li zet ka in hnuah khumah ka bawk thlawp a, Duati ka ngai ngawih ngawih, kei hian ka thlah hlen thei dawn lo tih ka hre chhuak tawh bawk.

Ka lo muhil sek a ni ang, ka pa in in min ko pah hian min sawi nawk nawk a, ka meng ṭha hlei thei lo.

"Bawiha, tho teh, Duati ala haw lova a awmna chin i hria em?" A tih chuan ka ṭhu chhuak hlawl a, ka sana bun lai ka bih vat, zinglam dar thum a ri tawh.

"Maw! Engtin nge in hriat?" Ka ti hû a, "A pain min lo phone.." a ti tawi tak a.

Khawiah nge a awm ang le, ka rûi a reh ta deuh bawka ka tâlbuai tih tih.

"Tho la, a rûka kan zawn a ngai a nia, a phone a switch off daih bawk si.." rilru hah tih hriat takin a thaw chhuak hawk a. Ani aiin ka mangang lo bik lo.

A luhlul zia leh a lunglen zia hrechiangtu ka ni a, a dinhmun tur ka ngaihtuah phei chuan ka hlauthâwng zek zek.

A chungah thil ṭha lo a thlen vaih chuan kei hian ka tuar ber ang.

Khum thawhsanin ka inha lum sawk sawk a, ka pa pawh ngaihven tawh chuang lo hian ka chhuak ta a...

B+>[BeckirafARenthleI]<+®®

THE RAPSAGYAN FAMILY

Becky Rafa Renthlei

Chapter-14&15

[ZOSANGMAWIA te Chhungkua]

Nithum hnu-ah.

Ka nau te inneih aṭangin ni thum a liam tawh a, nu Siami thu min hrilh zawng zawng kha ka tân chuan thu thar leh ngaihthlâk nuam zawk zawk a ni hauh lo mai. Ka nu hming an zêpna chhan te ka nu lung pawh an phun hma hmaa a û a nupuia a neih lehna chhan ka hriat meuh chuan ka tliak hnâwp a ni. Ruati ala rai zui a, Duatbiki pawh râi thei dinhmunah a din vângin ka thaw a ipik hle a, damdawi ei rawh tih mai ka duh rum rum tawh.

Kan inchhunga ka luh chuan ka nu leh pa chiah an lo awm a, tûn hi ka lungawi lohna sawi chhuah hun a ni ta.

"Ka nu Zomuankimi a ni tih hi engtia rei nge zêp in tum?" An pahniha an ṭhutna ep chiaha ka va ding a, puitling ka nih tawh vângin ka lungawi lohna leh ka ngaih dan ni lo sawi chhuak ngam tura ngaih ka ni.

"Zosangmawi," ka pa'n ati ṭhawt a, a awka vîn ka vawikhat hriatna.

"Zomuankimi leh Lalmuanpuii unau anni a, a nau zawk fa ka nih si chuan ṭha takin min hrilh thei lo em ni? Zêp hlen theih in inring a nih chuan intisual chhiava a nih chu, thudik haichhuah lohvin a awm ngai lo a nia," ka thimrim êm avangin ka aw a zâwi lêm lo khawp mai.

"Zosangmawi, i nu leh pa min zah lo hle mai," ka pa thinrim a rawn ding hluai a; mak takin ka hlau chhete eih lo nia! Ka nu erawh a ngawi ngal a, a en ngai a en tlat.

"Mahni nau lung phun hma hma a pasal han neih leh nghal te chu, chupawh nau te pasal hlui lehnghal,"

"Engkim i hriat vek loh cbuan sawi ve pawp pawp suh, Zosangmawi, ka fapa upa zawk i ni a, i nu hian i natna tur leh i tâna ṭha lo tur vawikhat tal a tih i hria em?"

"Ka nu dik tak in zêp tih mai loh chu, Duati'n sawi lo phei se chuan ka nu hming pawh ka hre tawp nâng," ka ti hmiah hmiah a.

"Eng maw i sawi? Duati'n i nu chungchâng a sawi a maw?" Ka a rawn ṭawng chhuak ve ta chauhva, ka tum loh lutukin Duati hming ka lam palh ta hlauh. Nu Siami zawk sawi lan tum ka nia, ka rilru a luah êm avangin Duatbiki hming ka lam phah.

"Aw, Duati te kan awmpui ṭhin nu Siami ngei pawhin a sawi, ka document pawimawh zawng zawngah ka nu hming Lalmuanpuii tih vek a ni a, Zomuankimi tih pakhat mah a awm lo," ka tih leh chuan a hma aiin ka nu a hawi phâwk.

"Mate, i hre sual a ni lo maw, i pa hian i nu hmingah ka hming dah a tum pawhin ka phal ngai lo, tun ang hun hi kan la thlen ka ring a, chuvangin i birth certificate-ah pawh ka nau Zomuani hming asin ka dah," tiin a aṭang ta tlat a.

"In dah lo, tuna ka hna ka interview lai pawh khân i hming a awm," tia ka sawi chuan ka nu a tho tharh a, ka pa thinrim hmel dur khup chu hun dang nise ka hlau ngawt ang; mahse, tun hun a ni miau si a, rei lo te hnuah ka birth certificate a rawn keng chhuak a, ka kutah min rawn pe ta a. Ka en chian chuan Zomuankimi tih pakhat mah a awm lo, Lalmuanpuii tih vek!

"Hetianga chiang finfiahna a awm chung pawh hian in la ṭang ngam a nia, ka nu thi ta hmai khâ in zah ve eih lo em ni?" Certificate chu an lamah ka theh phei a, ka nu'n an enchian chuan sofa-ah a ṭhu thla hnawk a, kei min en lovin ka pa a en ve ta thung.

"Faka, Certificate hi i tidanglam em ni?" Zawi sap hian a zawt ta a.

"Tikhân inpuh kual duh suh u, min enkawl tawhna zawng zawngah lawmthu ka sawi e, ka pa, ka nu dik tak hre tur hian dikna ka nei lovem ni, thudik min hrilh hma ula tun ang êm hian ka na lo tur, hun kha leh chen ka nu tak emaw tiin la lo en che a, mahse, nangni erawh chuan thudik in zêp ngar ngar thei a nia, mi te'n min nuihzat âwm mang e.." ka mittui a tling pap. Min enkawl danah ka vûi a ni hran lo, thudik an zêp hi ka hua a ni.

Ka nu a ṭhutna aṭangin a tho chhuak tharh a, "Faka kan inbiak a ngai ang, chumi hma chuan Zirsanga te nupa phone la rawn phei turin hrilh rawh," a ti hmak.

Pa Zirsanga te nupa a kohna chhan ka hre miah lo a, Duati hming ka sawi lan vâng kha a nih ka ring ta ber.

Duati nu leh pa leh amah Duati an rawn lan meuh chuan kan boruak a a dang ta zar mai le.

Sitting room-ah ka awm ṭhap a, Duati a lokal ve dawn tih ka hre miah lo, nge ka pain a va call in a ko tel ve tih pawh ka hriat si loh.

"Duati, Zosanga hnenah ka fapa a ni lo tih leh a nu chanchin engtiang chiahin nge i sawi?" Ka nu thinrim mitmeng chu namai lo tak a ni. Duati a kûn ngal a, nu Mafeli leh pa Zirsanga hmela mak tihna lo lang chhuak ka hmuh phei chuan an fanu hming ka lam ri ta kha pawi ka ti lutuk.

"Muanpui, eng nge thil awmzia?" Nu Mafeli'n kei leh Duati min en tawn chhen a.

"Mafel, a zia lo khawp mai, ka nau Zomuani chungchâng Duati hian Zosanga a lo hrilh a, eng chen chiah nge a hrilh tih leh thu dik zîktluak a hrilh vek em tih hi ka hriat duh chu a ni," ka nu ṭawng tam lem lo ni a ka lo hriat ṭhin kha a mizia a dang vek a, Duati ngun takin a en bawk, ka pa leh pa Zirsanga erawhin eng mah an sawi lo.

"Kan chhungkaw chungchâng midangin an sawi hi chu kan khap thei lova; mahse, Duati, ka fanu ang chiaha ka enin kan chhungkaw chungchâng sawi chhuah kan duh miah loh a sawi ta hi nâ ka ti hle a ni, in naupan laia thil thleng a ni a, a kimchang pawhin in hre hek lo, nu leh pain ṭha kan tih hunah kan sawi chhuak mai ang chu. Le, Duati, Zosangmawia nu dik tak chanchin i hriat leh kei a enkawl seiliantu nen hian eng anga unau inhmangaih nge kan niha i pa Faka ka neihna chhan zawng zawngte hi i hria a nih chuan sawi rawh," police a ni bawka a awkâ dam angin lang mah se ati mai mai lo ti ka hre chiang.

"Hmangaihzual, i nu Muanpuii zawhna che chu chhâng ta che," Duati a ngawih reng avangin a nu a rawn ṭawng chhuak ve a, dik tak chuan an fa hmasa ber a ni a, an duat zia hrechiang tu ka ni bawk. Duati hnenah i hming ka sawilang lovang tiin ka lo intiam ve tawh bawk nen hrehawm ka ti ru ngawih ngawih.

"Nu Muanpui, min ngaidam rawh, ka tihpalh a ni." A sawi zawh rualin a inhnît faih a, a tlân chhuak zui ta nghâl a. A nu leh pa'n an umzui ka rin nen an ngaihsak miah lo.

"Zosang, Duati khân engtikah nge a hrilh che, in naupan lai pawha inkawm tlem ber inni a, hetiang vel vang lek hi a nih hi inlo inzui kâwi reng," nu Mafeli a thinrim kher mai. "Vawikhat mah Hmangaihzuali nen hian inkawm tawh suh ang che u, rawn haw teh se a châk lo khawp ang," tiin ka nu leh pa hnenah ngaihdam a dil a, "A pawi kan ti lutuka, hetiang hi a thleng ang tih ka mumangah pawh ka la ring chhin lo, Hmangaihzuali hian min ti zak hle mai," ati leh a.

"Zosang, i nu aia hmangaihtu che hi an awm lo tih hria la, i nu leh pa inneih chhan dik tak i hriat duh chuan kan sawi thei reng," pa Zirsanga'n atih chuan, "Dâwt bâk a ni lovang, ka birth certificate-a ka nu hming inziak pawh an hre fuh lo a nia, he insh hian ka chên ve reng a ṭulna ka hre nek lo ve." Tih pahin ka room lam ka pan nghâl a.

"Ê, i thu thu alawm, nu leh pa hmangaihna pawh hre duh lo chu i duhna hmun apiangah i kal thei ang," ka pa ṭawngkam chuan min kher zar.

"Aw le, ka chhuak ang, ka chhuak khawp ang," tiin ka room ah ka lût ta a, Duati kha umzui ka duh; mahse, min haw dâwn lutuka ka ngam ngang lo a ni e.

Ka nu leh pa inhnial thawm te, pa Zirsanga te haw thâwm te pawh ka hre vek a, ka thinlung na lutuk hi engtia tih reh chi nge ka hre ta lo.

"Faka, thudik min hrilh rawh engvangin nge Zomuani hming kha ka hmingin i lo thlâk a!" Ka nu awki sâng zet chuan ka beng a verh zar mai.

"Muanpui, a hunlai kha chuan thil ṭha ti-ah ka inngai ve asin," ka pa aw a inthiam lohna rawn ri chhuak chu mak ka ti kher mai.

"A tîrah pawh ka sawi vek kha, Zomuani fapa a ni a, thi tawh mah se thlâk ka duh lo, Zosangmawia hian thudik ala hrechhuak dawn tih ka sawi lovem ni, ka hriat miah lova i thil tih hi a nasa mah mah, kan inneih dawn te, i nu leh pa thusawi zawng zawngte i theihnghilh ta em ni," ati zui leh phiar phiar a, ka ngaithla thei tawh lo. Hetiang em em a ka nu thinrim hi ka la hre ngai bawk hek lo.

Ka nu Zomuani ni ta pawh nise engvangin nge anni pahnih hi ka nu Lungphun hmaa innei nge annih, ngaihtuah tur a tam lutuka ka â thei tak ngial dawn. Ka phone lah chu a ri chhen a, tunge tih ka en chuan Duati a ni.

"Duati..." ka ti sup a.

"Zosangmawi, i lo tenawm kher mai, engtikah mah ka ring leh tawh ngai lo vang che," a hnît zui hlap hlap a, Duati meuh a ṭah chuan a rilru a na hle a ni ngei ang. Ka thiam loh vek a ni.

"Ka nunah vawikhat mah rawn inrawlh tawh lo la, ka hmuh phâka awm atan pawh ka duh lo che," ka chhân zui hmain phone a off daih, a hma khan min block fai vek kha a nia, a thinrimin min haw hle tih ka hre mai, a âwm rêng a ni.

Ka nu leh pa inhnial thawm te chuan ka thluak a luh ngut ngut a, whisky ka dah ṭhat chu ka la chhuak leh ta nge nge a, zanin rum rumah chuan chhuah ka tum hran lo, naktukah Quarter ka mamawh thu ka sawi anga ka insawn chhuak chauh ang.

Whisky no li zet ka in hnuah khumah ka bawk thlawp a, Duati ka ngai ngawih ngawih, kei hian ka thlah hlen thei dawn lo tih ka hre chhuak tawh bawk.

Ka lo muhil sek a ni ang, ka pa in in min ko pah hian min sawi nawk nawk a, ka meng ṭha hlei thei lo.

"Bawiha, tho teh, Duati ala haw lova a awmna chin i hria em?" A tih chuan ka ṭhu chhuak hlawl a, ka sana bun lai ka bih vat, zinglam dar thum a ri tawh.

"Maw! Engtin nge in hriat?" Ka ti hû a, "A pain min lo phone.." a ti tawi tak a.

Khawiah nge a awm ang le, ka rûi a reh ta deuh bawka ka tâlbuai tih tih.

"Tho la, a rûka kan zawn a ngai a nia, a phone a switch off daih bawk si.." rilru hah tih hriat takin a thaw chhuak hawk a. Ani aiin ka mangang lo bik lo.

A luhlul zia leh a lunglen zia hrechiangtu ka ni a, a dinhmun tur ka ngaihtuah phei chuan ka hlauthâwng zek zek.

A chungah thil ṭha lo a thlen vaih chuan kei hian ka tuar ber ang.

Khum thawhsanin ka inha lum sawk sawk a, ka pa pawh ngaihven tawh chuang lo hian ka chhuak ta a...

15.THE RAPSAGYAN FAMILY

Becky Rafa Renthlei

Chapter-15

[Duati, Lalhmangaihzuali]

Ka rin phâk bâk a ni. Zosangmawia vanga ka chunga thil thleng hian ka nu leh pa hmai êng min hmuh tîr ngam lo chu a ni ber e. A nu leh pa chu thuhran ni se, ka zak hluah hluaha engtin nge a sawi chhuah theih zawk le!? Sawi lo tura a intiam vek hnuah tikhân kan chhungkaw hnih hriatah min chhuahchhâl a ni a, a nu thinrim hmel kha ka damchhungin ka theihnghilh thei dawn em ni?

An in aṭanga ka chhuah khân zan dar 7 vel a ni a, ka mittui tla fap fap chu ka duh lo kher mai; ka chuanna taxi driver-in min melh zauh zauh a, ka kal duhna hmun ka hrilh hnuah kan in panin kan tlân chhuak ta a.

Vanneihthlâk kan ti dawn nge tumah ka hmu miah lo, Saitei erawh a room-ah a ri rak rak a, thâwm dim zetin ka insiam ta a. He lamah thawmhnaw ka dah tam lutuk lo va ka pi te hnena awm ka nih vângin insiam hautak tur pawh a awm lêm lo bawk.

Ni e, tun dinhmun atan chuan ka nu leh pa hmaisa tawn ka huphurh êm a ni.

"Ka pu, Lunglei thleng min hruai thei ang em? haw phei ka ngai thut a," Taxi driver hnena ka tih chuan min en vung vung chung hian, "Thei tehreng mai," tiin ka hmanna man zat tur a sawi a, to chu ka ti deuh. Mahse, ka duhnain min tur nasat êm vangin ka pawiti zo ta lo.

Kan in ka chhuahsan lai tumahin an hre lova Zosangmawia ka huatna a nasa kher mai.

Lunglei leh Aizawl hi darkâr ruk vel kan tlân tlangpui a, zanriah ei sa ka nih vângin chu ai hmaa kan tlân thlen hman ka beisei. Ka phone pawh biak tlang theih loh turin ka switch off hmiah tawh bawk.

Ka thlatin hunbi neih a hnai tawh a, ka râi lo a nih hlauh chuan khatiang sual, tisa châkna leh zû in tih vel khân ka nun an tibuai leh tawh lovang tiin thu ka tiam hial. Ka ruak lo ta a nih pawhin ka tihsual man tuarin ka damchhung hun ka hmang ve tawh dawn tihna a ni mai.

Zosangmawia ka nunah sengluh tumna ka nei tawh lo va; amah vânga ka mualphona hi a nasa mah mah a ni.

Driver chuan min besawm peih hle a, rin aiin fiamthu a duh zêk! Kei aiin kum hnih khata a upat zawk ka ring, "Nula ṭahbelh deuh hi ka phur thei tak tak a ni,'' a nui hawk hawk a, nichina ka mittui tla lai kha min hmu tih ka hre mai.

"Kan hun tawng a zira ṭah a ngaih châng tepawh a awm ve a nia," huatah la duh lovin ka ti liam puat a, ka mimal nun erawh min zawt thui bik miah lo.

Thenzawl kan thlen lai chuan Zosanga te nen kan zin ho lai kha ka hre chhuak a, ka lung a lêng veng veng.

Zinglam dâr li-ah Lunglei, thlamuang taka ka lo awmna ṭhin, min hmangaihtu ka pi leh pu te kiangah ṭap ru fap fap chungin ka lût ta a.

"Duati, i nu leh pa an mangang lutuk," ka pu in min lo be nghâl a, an muhil miah lo tih ka hre mai.

"Min ngaihtuah lovang, min ngaihtuah nise mi zîngah khatiangin min ti nâng," ka ti ve tlat.

"He lama i lo phei thu ka hrilh hriat loh chuan nizan zankhuain a rukin an zawng tawh che, Saitei leh Rafaela phei chu nangmah zawnga an chhuak kha an la haw lo a nia." Sitting room-ah ka ṭhu râna ka khawvel pin zia hi.

"Kan tu hmuh hmasak ber i ni a, kan duatin kan hmangaih em em che; mahse, i dik lohnaah ṭan che kan tum lo a, i nu leh pa tluka hmangaihtu che an awm lo a nia," ka pi ṭawng ban chap chu chhân enah pawh ka en lo.

Councelling class ka pi leh pu hnen aṭangin ka kal mial mial a, thinrima âng erawh anni lo thung. Ka pu phone aṭangin ka pa in a rawn call a, min biak duh thu leh titau chunga in ka chhuahsan an lawm lo hle tih a rawn sawi tel bawk. "Pu, ka be dawn rih lo tih hrilh rawh," ka ti ve hmak. Ka dik lo tih chu ka hria; mahse, zawhna min zawt duh emaw hriat duh annei a nih pawhin Zosangmawia te in kher ni lo; kan inah min zawt mai tur a ni.

Ka nu a thinrim hle a ni ang ka pi hnenah, "Chhungkua min ti zaka a sawi loh tur a sawi vângin Faka te nupa tunah hian an buai mêk, Muanpuii Lawngtlaiah phei a tum a kan buai hle tih leh a thiltih pawizia kha hre rawh se," a rawn ti a niawm e.

Ka room-ah lutin khumah ka ṭhu vang vang a, ka phone pawh ka charge duh ting tang lo. Nu Muanpuii kha a thinrim hle tih ka hresa a Zosanga leh keima thiam loh liau liau a ni. A vawikhat nân ka thinlung tâwt lutuk chu lukhama hmai phûmin ka ṭap chhuak hawk a; rei fê ka ṭap khûr ngat ngat a ni ber mai; ka sawi loh tur ka sawi vanga ka tawrhna leh Zosanga laka ka awm dan te ka ngaihtuaha midang tân ka phal lo; mahse, a bialnu hlui a râi bawk si, ka hrehawm ngawih ngawih. Ka hmaah eng nge awm dawn tih hre lo mah ila ka tum erawh tih ruh a ngai viau dawn a ni.

Khawvar fel vek hnuah ka mu ve ta chauh a, ka ngaihtuahna kal bing lutuk tur duh lovin thildang ka ngaihtuah lui ṭâng ṭâng.

[Zosangmawia]

Aizawl

Duatbiki ṭhian te tumah hriat ka nei mumal lo, Aizawl khawchhung Hotel leh a awm duhna hmun tur ka zawng deuh vek tawh a, hmuh chu sawi loh a bo hian ka bo hul hlauh. Ka nu leh pa an mangang viau tawh a, zinglam dar thumah beidawng zetin kan inah ka lêt leh ta kha a nia.

"A rûka Zosanga birth certificate i lo thlâk kha ka lawm lo, kan nupa inkarah thu rûk a awm ngai lo khân ka hria a," In chhunga ka luh rualin ka nu aw ka hre hmasa ber a, va pawh mai duh lo hian kawngkhar bulah ka ding ta a.

"Muanpui, ka rilru i hriat kha, i nau fa i hmangaihzia ka hria; i rîla rah nimiah lo hmangaih takin i enkawl a, a nu hming i put loh chuan tunge pu ang, ka fapa hian a nu a thi tawh tih a hriata a nat dan tur ka hriat vânga khatianga ti ka ni. Min ngaidam rawh." Ka pa awki a hniam hle na a, ka nau te nupa innei thar tepawh an rawn tho chhuak bawk a, nizan khan an rawn dîk dâk miah lo. Mahse, ka lawm viau zâwk.

Rinsangpuiin ka nu leh pa a melh tawn zak zak a, a ngaihna hre hmel a pu lo! Mo thar hmel kan hmuh ruala kan chhungkaw thiltawn chu duhawm lo tak a ni.

"Mate, innupa khan lo ṭhu teh u," ka nu'n Lawmsangzela te pahnih a ko a, a sawi tur awm ang ka hre sa, kei, a pianpui unaupa anga a lo ngaih hi nu hrang kan ni tih a hriat hunah a rilru a va na dawn êm. An thusawi tur ngaihtuah thui duh lovin ka room-ah ka luhsan ta a.

Duati hlir ka rilruah a awma ka lo hmangaih hlê a ni tih ka hriat chhuah phah bawk. Ka nu leh pa inhau thawm kârah ka ngaihtuahna hmun hran daihah a awm thung a, zah pawh dâwn lovin pa Zirsanga ka va call ve ringawt.

"Zosang, ngaihtuah duh suh, a lung a lian si a, tunah chuan a pi leh pu hnen a thleng tawh a nih chu, keini pawhin amah kan be thei bik lova a pu in min rawn hrilh a," atih chuan ka thawveng huai huai nachungin kan inkãr hlat zia ka ngaihtuah zui nghal bawk.

"Ka thiam loh vek a ni.." ka tih chuan, "I thinrimna bengdai la i nu leh pa inkar chhe tur kha dan tum ang che mipa i nih chuan, i nu lung a awi lo hle tih ka lo hria a; mo innei tawh lehnghal, chhungkaw mualphona a thleng thei tih theihnghilh miah suh, i nu Zomuankimi kha Muanpuii phirpui naupang zawk a nih tih i hria tiraw, a fa ang chiaha hrehawm tuara a enkawl che i nia, an rilru tihnat a ṭha lo," duhthawh takin a rawn ti ve leh a.

"Engkim ka hriat fiah hunah chauh ka dam ang," tih chauhvin ka chhâng.

Duati pa nen eng eng emaw kan sawi hnu chuan khumah ka ṭhu hnawk a, Ruatkimi lam rêmg rêng ka lo ngaihtuah lo, ka fa a pai chu a ni si a, ka chunga harsatna thleng zozai hi chinfel dannkawng ka hre mawlh lo.

"Ka nu, inngaihtuah chiang rawh, i tel lovin kan awm thei lo ang.." Lawmsangzela rilru na lutuk aw ri ka hriat chuan ka phu zawk a, nichin khân ka kalsan daih kha a ni a, eng thil nge thleng? Rang lutuk hian sitting room lam ka pan a, tukverh bulah ka nu kuthnungsuiha ding leh ka pa indawm kun ngâih te, Rinsangpuii sawi tur hre lova hawihai zet leh ka nau Lawmsangzela mit sen rûm te chu ka hmu kim hman vek.

"Faka, inṭhen hlenna tur a ni lova kan chhungkuaa thil thleng hian min ti chau zo tawh chuvangin rei lo tê Lawngtlai lamah ka lo va awm rih ang e," ka nu aw dam raih phêna natna lo chhuak chu ka hriathmaih miah lo.

"Muanpui, kum tam tak kan chênghovin chhungkaw hlim tak kan ni ṭhin a, tunah fanu thar kan nei ve chauhva hetiang rilru put hi a ṭha lo, duh leh Zosangmawia hi chhuak mai rawh se, a nu ah a pawm thei lo che a nih rau rau chuan amah a inenkawl thei tawh alawm, a sâwn thlâkna nen chuan innei se inhrang chang rawh se." Ka pa thusawi avang chuan ka khawng awt thei nia!

Ruatkimi râi thu an lo hre vek tawh tih ka hre miah lo, ka sawi chhuah lah a ni hek lo.

"Ka pa.." ka ti nghut a.

"Zosangmawi, i naupan lai ata tawh i duh ang kan pek theih loh che leh kan enkawl danah che eng nge lungawi lohna i neih sawi rawh, sâwn i thlâk tih kan hre lo emaw i ti elaw, nu leh pa tihming ṭha zawnga i khawsa thei ngang lo a nih pawhin kan zahna tur leh natna thlen ringawt hi em ni i lo suangtuah ṭhin?" A thinrim awki a sâng lo. Mahse, chhungril aṭanga lungawi lo tâwpkhâwk lo ri chhuak chu ka hai miah lo.

"Faka duhtawk rawh, Mate, nangni nupa pawh va mu rawh u.." tih pahin ka lam a rawn hawi a, ka nu mitmenga natna thûk tak lo lang chu ka chhiar thiam ve in ka hria.

"Ka nu, Lawngtlaiah i phei angai lovang, keimah ka chhuak ang e, ka tel lovin in hlim zawk ang, nia Ruati khân ka fa a pai tehmeuh mai, nupuiah ka nei bawk ang," ka sawi zawh rualin ka inher vut a, car chahbi leh ka wallet nen kan in ka chhuahsan ta a. Ka hminga min koh ri hre mah ila hnunglam ka hawi chhin eih ta lo.

Chak lutuka tlânin kan office lam ka pan a, a la hma hle si a tumah an awm dawn lo tih ka hre tho nâin quarter ruak a awm em tih tal ka hriat a ngai. Ka nu leh pa in, ka ta ve ngawih ngawiha ka lo ngaihah khân ka leng ta si lo, ka mittui far tir ka tum tawh lo va, mipa ka nih ang ngei hian hrehawm a lo thlen châng pawha zuankahlen ka tum lo bur.

Quarter ka thlen chuan zinglam dar sarih chauh a ni a, tu inah ber nge ka luh dawn pawh ka hre lo.

''Sir, i hma hle mai," Mahruaia ka hnuai chiaha thawkin min lo be hmasa mial a.

"Nia, Quarter ruak kan nei em?" Ka ti nghâl tawp.

"Pahnih a awm a, hmânnia i sawi kha i tifiam emaw ka lo ti asin."

"Teh suh ei, parawl ka ngai tlat," za vak lo hian ka nui suk a. Min zawt thui bik lem lo.

Chumi hnu chuan Quarter ruak lamah min pheipui ta a, a zau fahran lo khawp mai; in luah man chawia hmun hrana awm ai chuan office kalna tur a hnaih sawt tihna. Ka rilruah Duatbiki a rawn lang zawk a, ani chu awm se bungrua engkim min ngaihtuahpui anga hlim takin kan awm mai tur. Mahse, a rilru ka hrechiang ve a tun dinhmunah hian min be tawp lovang.

Mahruaia'n min buaipui vek a tum thu leh a ṭul chuan chawlh lak a hnial loh thu min hrilh a ka hahdam huai huai. Nu leh pa ina nuamsa taka awm ṭhang ka ni a, inchhungkhur thil ṭul leh buaipui tur ka hre tehchiam lo. An inah tûkṭhuan ka ei ve ta nghal a.

Ka chawlh lâk a zo lek lek tawh a, Ruati pawh ngaihsak a ngai viau tih ka hria, a râi thu ka nu leh pa in an lo hre daih kha mak ka ti a, zawh chhuah nachâng ka hre lawi si lo.

Nilêngin ka in luah ami tur bungrua buaipuiin hun kan khawhral a, a ṭûl zualpui kan leiin Mahruaia te chhungkuain min buaipui vek bawk a, ka thawmhnaw leh bungraw ṭhenkhat lâk chiah ka hmabâk ta. Ka in dan tak tak an ring lo nge vawikhat mah ka chhungte'n min rawn be lo va, zan dar sarih velah ka bungrua la tura kan in ka pan chuan huphurh fia fia tak ka ni.

Inchhung ka luh rualin Rinsangpuii ka hmu hmasa ber a, chaw ei a lo siam mêk, min en zawk ringawt a, min be lêm lo. Ka nu leh pa ka hmuh loh avangin ka room-ah ka lût tlang nghâl a, ka thawmhnaw ka siam zui hmiah hmiah. Mipa tih takah thil tesep ka nei lo bawk a, rei loteah ka insiam zo ta thuai a, lehkhabu leh document pawimawh zawng zawng eng mah a bo a bâng awm lovin ka khawrh chhuak fai dap.

"Bawiha, i inngaihtuah chiang maw," ka nu lo luh lai ka hre miah lo.

"Ka tel lo vin in hlim zawk ang," tih chiah ka sawi.

"Bawiha.." min rawn kuah a tum chuan ka ding sawn daih a, ka chhungril chuan a ngai ngawih ngawih; mahse, thudik min hrilh duh lo va an zêp hi a lian tham êm a ni.

"Ka kal ang e, lo in enkawl ṭha la.." ka bungrua ṭhenkhat khaia ka chhuah chuan engtin min ti lo, ka car -ah ka thiar lût zel a; a tawpna bera Laptop leh woofer ka chawi chhuah dawn meuh chuan, "Bawiha, Zosangmawi, i ti lutuk deuh a ni," a mittui luang zawih zawih ka hmuh chuan ka insûm thei lo ṭêp a ni. Mahse, he ina ka awm ve reng hi a rem tawh lo.

Kan in zau pui mai chu a tawp nan vawikhat ka enkual a, ka nau nen kan toys room erawh ka melh kân daih thung. Rinsangpuiin min rawn pan a, "U Zo, inngaihtuah ṭha leh rawh, Lawmsanga rilru nâ thawidam thei tu tur ber i nia a hmangaih êm che hi.." a ti sap.

"I awm tawh alawm, ka haw lo che u a, ani chu an fa tak, an rîla rah a nia tihian hlim takin awm tum rawh u," ka ṭawng dam thlup, ka pa leh Matea ka hmu miah lo, dining table-a eitur chi hrang hrang inchhawp ṭeuh pawhin kîl tu a nei lo va, mit khap kâr leka kan chhungkaw boruak dang ta vek hi thil mak tâwp a ni.

[Kâr thum hnu-ah, RAFAELA]

Glass house-ah nilêngin ka awm a, kan inhralh ṭha em em mai lehnghal! Tunlai ka awm dan hi a ṭha lo tih ka hria; mahse, sim duhna thinlung ka pu miah lo hi mak ve tak chu a ni.

Kan inneih ṭhulh a nih tâk hnu leh u Duati awm loh aṭang hian kan inchhungkhurah hlim ni hmel kan hmu khât khawp mai, tlai tin zû ka in ziah a, rui khawpin in bûk bûk lo mah ila Ramthansangi vânga ka zahna leh mualphona a tinêp deuh chuan ka hria. Ka pa'n vawithum vel chu min khak tawh a, hun dang nise ka zah dawn nen, ka chhâng ngai lo nachungin a thusawi ka zawm lêm hlei lo va.

Diktei'n min be ngun ngat ngat khawp a, a mizia tereuh hi ka lâwm viau; mahse, ngaihzawng angin ka en duh miah lova min duh thu pawh a sawi vei hmiah kha a nia. Ramthansangi vang hian tû hmeichhia mah ka ring zo tawh hek lo.

Ka ngaihtuahna kâwma ka lo ṭhut lai chuan hmanhmawh zetin Diktei a rawn pên lût a, a helmet a la pawm ṭât zui.

"Zanin chu chaw lo ei ve rawh aw, ka birthday a nia," a nui sâng a, ngeiawm deuhva ka ṭawngkhum pawh hian a haw duh miah lo.

"Min sâwm bichilh hle mai.."

"Naa, phone pick duh hek lo che, whatsapp-ah min reply duh bawk si lo," ka ep chiahah ṭhuthmun a rawn rem ve a, a rimtui hman rim chuan ka hnar a verh zar maw le.

"Dikte, kan bâng tlai dawn sia ka lokal lo mai ang," ka tih chuan ngaih dan nih loh hmel zet hian a nui lui sak a, "I lokal loh chuan ka thin arim ngawt ang, ti ila i duh thlanna a nia ka nawr lui thei lo che; mahse, min ngaihpawimawh sak chuan ka lawm viau ang," a ti zui sap a. A ṭhu khawmuang dawn emaw ka tia, min melh zauh chung hian, "I nuna ka inrawlh hi i duh lo viau a ni tiraw?" Tih pahin a tho chhuak a, ka chhânna pawh nghak tawh miah lovin a chhuak daih! Ka hrilhhai letling zawk.

Famkima leh Ramtei pawh an la inzui zel tih ka hria a, inneih erawh an chhungte'n an rem tih loh avangin an in chhuahsan ve ve in hmun dangah an khawsa dun tih ka hre ve leh vek a; ngaihtuah loh ka tum pawh hian an chanchin min hrilh tum phêt ka tawng leh ṭhin. Thla hmasa ami ni mah se nimina thilthleng ang maiin ka thinlungah a thar zela huatna ka pai ṭung bawk. Hmangaihna hi a awm tak tak pawh ka ring ta lo.

Diktei chhuah hnu chuan ka nu'n min rawn call a, u Duati a dam ṭhat loh thu leh hospital-ah an admit thu a rawn sawi a, khatia thinrima Lunglei a pan hnu khan tumah min be ngai lova kei leh Saitei takngial pawh min be duh lo hrim hrim; mahse, a chanchin kimchang ka pi te hnen aṭangin kan hre vek zel tho va nitin a hnaah a kal ziaha chaw erawh a ei tlêm viau tih nen lam kan hria, a luhlul êm a chuti maiin a lungawi dawn lo tih kan hresa vek bawk.

Ngaihtuahawm a ni lo tiin rawn sawi mah se ka nu Lungleiah phei a tum tho a, u Duati an hmangaihzia ka hrechiang a, a lakah thinrim mah se damdawi in meuh riak lut ta chu engvangin nge an ngaihthah teh lul ang ni.

Zu in leh mai loh chu tih tur ka hre miah lo. Diktei min sâwmna lah kha kal tumna ka nei si lova pâwna chhuah pawh ka châk chuang hek lo. Ṭhian ka mamawh lova ka kawm ve ber ṭhin Zosanga lah kawm hleihtheih a ni bawk si lo, ka nun buaichuar ru zet hi mite'n an hmu thiam ang tih ka hlau ru em em a, Ramtei vanga ka mualpho hnu hian Biak in kawng ka zawh ta lo. Dâwr ka nghahna pawh ala rei lova pâwn ka chhuak tam lêm lo khawp mai.

Whisky nokhat ka lem hman ṭâwk tihah Diktei'n min rawn call a, chaw ei tura min nghah tawh thu leh kal ngei ngei tura min duh thu bawk a rawn sawi leh ta; min zar mah mah! Zaipawl khat ni ṭhin mah ila tunah chuan nihna pakhat mah ka nei tawh lo va ka inhnûk dâwk vek tawh bawk. 'Keimah Rafaela mi tlahlang, zero' dik tak ka ni. Ka khabe hmul tlêmin a sei ta bawk nen ka sam Vikings style pawh a 'bin' theih zân tawh a, ka landan dang lam hû hi ka chhungte'n an ngaina lo viau ta ve ang. A hma aiin ka chêr bawk.

"Ka rawn kal dawn lo, min lo nghâk duh suh u," tiin ka chhang nghut a, kohhrana inhmang tak ni mah se min ngaihven hûrhna hian ka lâwmna a siam belh îkhaw lo, hmeichhia hrim hrim hi thinlung taka ngaihven duhna rilru ka pu chhin tawh hek lo.

"Rafael, i lakah hian ka beidawng dawn lo, chaw i rawn ei dawn lo a nih chuan ka rawn pe mai ang che," zuk ti ṭalh a!

A ve lutuk a! A birthday a ni a, ṭhian ṭha tam tak a sawmin ṭhalai, a rawngbawlpui ho pawh an tel ngei dawn, zu nam chunga va intheh dere vel kha ka rilrem zawng pawh ninghal lo chuan.

"I duh leh min lo pe la ti nia.." phone ka cut zui hmiah. Min rawn pe ngam dawn lo tih ka hriat vang a ni.

Zan dâr sarih hnulamah laklawh thil a nih loh chuan kan inhawng tawh ngai lova dawr pawh ka khar fel vek tawh bawk. Keimahin a chhungah ka inkalh khum a, tuma chîm buai lohva awm hi ka thlahlel ngawih ngawih. Social media hian ka nunphung a tikhaihlak miah lo hi ka vanneihna a ni a, zai ngaithla pahin zû ka tem hlek hleka a va nuam si êm..

"Rafael..." dawr kawngka tu emaw hian chûm dat dat chungin min rawn ko a. Tun ang hunah tunge ni ang? Ka nu em maw ni le!

Ka thil inna vel ka thukru nghal a.

Kawngkhar an la rawn chûm ta fo. Kâi deuh chhâh chunga tho chhuakin ka va hawng ta a.

Lalrindiki inpawm bâwr ṭân nen kan inmelh ta rân a.

"Ka lo pe dawn che ka tih kha.." min namkiangin dâwr chhungah a rawn lut a, he nu em em hi..

"Ehe..zu rim hlir a nam.." ala ti zui.

"Nam ang chu ka in alawm, min buaipui aia tihtur dang ṭha zawk i hre miah lo em ni?" Ka tih chuan, "Hre lo, hre teuh lo," tiffin box pali dawhkanah a chhawp chhuak a, chimawm ru ve tlat.

"Diki.."

"Eng nge?"

"I ti ve mah mah," sehchilh naka ka ṭawng chuan min en vang vang a, "Ti mah mah ang chu, i luhlul êm alawm.."

"Luhlul lo kâwm la ngaihsak mai rawh.." ka ti nghut a.

"I nasa ve siah," tih pahin tiffin a hawng diat diat a, min eitir nghal a tum em maw ni.

Hauvin ṭawngkam ngeiawm hmang mah ila eng tehchiamah a ngai reuh lo. "Zu in kher kha a ṭul chu ka ti lo va; mahse, i duhthlanna a nih miau te chuan in ta poh che," ka mitah tak min en kalh a, a hmel ṭha tih chu ka hria, zanin hian ka hmu hmelṭha zual bawk.

"Ka in rêng alawm,"

"In leh rawh, in deuh char char rawh," tiin a nui duh miah lova, "Ka lo thlitsak dawn nghe nge che em ni? Mipa zu in tur ka vawikhat thlitsakna tepawh a ni ve ang a," ala ti tak deuh deuh.

"Lalrindik," a bulah kal hnaiin a dârah ka kuah a, tûn hi keima duhthu ngeia ka vawikhat kuahna a ni.

"Yes, ka hmingpuma min koh hian ka nihnaah ka chiang sawt,"

"A nih chu.."

"Ni e.."

Ka mipa rilru a rawn chhuak ṭan, mitmei ven tur a awm lo tih leh min duh a ni tih ka thinlung hian a hriat tlat avangin fawp turin ka kûn hniam ta a, a hawisawn ka rin nen, a teuh lo. Confi lutukin a rawn dâk âr a, a mimeng fîm leh fiah kalh chu a zahawm hliah hliah!

"Dikte.." ka sawi zawh rualin ka fawp ta a, min chhâng lo va min hnar chuang lo, a dinna ngaiah a ding ngar a, rei ngial ka fawh hnuah a kut chêt zeuhvin ka kâwngah min rawn kuah ta a, a hmui nêl thep leh a rim tui veng veng te chuan ka thluak a tih nut belh sauh.

"Rafael..duh tawk la.." inlahrang pahin ati dam thlap a, ka mitmeng phelh deuh phung chu keimah ngei pawhin ka hre thei.

"Ka la duhtawk lo mai thei," nui suk chungin sam ka tuai chho puat a, zak hmel a pu deuh tlatin ka hria..

"Naa, chaw kha ei phawt rawh, nge i in leh dawn?" Tia min zawh chuan dawhkan bulah ka phei nghal a, a awm laia in em em te chu thil tihchi a ni lo nasâ. Zu ka in tih hre mah se kha leh chen zaipawla ka lo kaihhruai a ni a, a hmuh laia in kher ka tum lo.

Ka rilru a hria nge, "Rafael, i duh chuan in rawh, kan duhthlanna hi a pawimawh bera kan thlan sual erawh chuan a tuartu keimahni kan ni tih hriat tel a ṭha, ka lo inthiarfihlim ang e," zawi sapa tiin ka chaw ei tur a siam nghâl a, zahawm ka ti ru viau. Mahse, chaw ei hmaa ka in loh chuan nakinah inna hun ka nei tawh dawn si lova, a bânah kaiin, "I hmuh lai khera in ka duh lo, zu ka in tih hre mah la," tiin Dârthlalang cut na room-ah ka luhpui ta a.

"Ka rei lovang, tikhan min lo nghâk rawh aw.." nuam ka ti lo deuh.

"Tehreng mai, inthlahrung suh," ati fel ât a, ka kalsan ta a.

Diktei hian ka zu in a phal lo tih ka hria, ka inna pawh a la rei lo rêng a, mahse, min dâl zawnga a ṭawng miah loh leh thinrim anga a lang duh miah loh hi ka hrethiam pha lo. Min hau hrep ka rin nen, hmanhmawh zetin nokhat ka tlâk pawp a, in ṭhang ka nih loh avangin ka in tam thei lo. Ka pum sa thla ham ham a reh hma hma-in chaw ka ei zui ta nghâl a.

Hmeichhia ṭheuh ṭheuh an mizia a dang teh e, zan dar kua a hnai tawh a, a birthday a ni bawk nen engtin nge a lo chhuah theih tih ka zawt miah lova min ngaihsak tlat hi lehlam takah chuan a nuam ru phian. Nichina ka fawh te khân mak takin a bâk duhbelhna thinlung ka pu tlat a; mahse, inngaizawng kan nih loh avangin ka ngaihtuah thui duh lo.

"I eikhamah ka haw ang," ka bulah a rawn ding a, ka chaw ei lai min en reng.

"I duh chuan tunah haw la, tiffin hi chu naktukah ka lo dah mai ang,"

"Aih, eikham phawt rawh,"

"Dikte, min hnaih tam poh leh i nã a ni mai," ka tih chuan, "Ka nat lohna tura awm dan chu i hriat kha.." tiin min en vang vang a, "I nihna ang ang hian ka pawm che, mahse, awmna ngai renga awm, a ṭha lo tih hrereng chunga sual lam kawng âwn tlat mipa i niloh hrâm ka beisei.."

Ka eina vel a tifel zung zung a, ṭawngkam khat mahin ka chhâng lo.

"Ka kal ang e, nangpawh haw nghal rawh aw.." ati leh a.

"Ka thlah i duh em?"

"Scooty ka keng, mangṭha le.." tia kal nghal a tum chuan ka ui deuh tlat.

"Lalrindik, tuna i awm dan ang hian mipa dang ngaihven suh ang che." A kutah vuanin kawngka lam ka panpui a, "Ka ngaihven i duh loh chuan..." a bâk a sawi zawm tawh lo.

'Chu e kha' pawh ti tawh chuang lovin a tlanliam thleng ka thlir reng a, hmeichhe mak dangdai tak chu a ni. Ka lo hriatchian loh zia ka hrechhuak awn awn bawk.

Ka nunah hmeichhia ka senglut leh te a nih chuan Lalrindiki hi a ni ngei ang. Mahse, tun maiah chuan thutlukna ka siam thei lo..

Hmeichhe vânga zahawmna hlauh, mualpho zo chiah Rafaela nunah hian hmeichhia an lang rih lo a ni ber e...

B+>[BeckirafARenthleI]<+®®

THE RAPSAGYAN FAMILY

Becky Rafa Renthlei

Chapter-16

[RAFAELA- Aizawl]

Diktei'n haw hnu chuan dâwrah ka châm khawmuang tawh bik lo. Saitei a chhuk leh tawh bawk nen kan nula leh ka nu leh pa chiah inah an awm a; kei leh u Duati vangin ka nu leh pa an hlim meuh lo chu a ni e.

In ka thlenin a tlai tawh angreng viau a, ka pa sitting room-ah a lo ṭhu a, phone in tu emaw a lo be mawlh mawlh. "Eng ang pawhin thinrim se thiam thu sawi tur i nei miah lo tih inhria la ngawi zawkah ṭang rih phawt rawh," zawi supa a ṭawng ri chuan ka beng a verh lutuk lo.

Pa Fakhlua te nupa inkar a ṭha lutuk lo tih ka hre thawi a, ka boruak tawnin a zir lo nen ngaihven hûrh ka peih lo va room-ah ka luhsan ta a. Phone hi a ṭûl tê-ah lo chuan ka khawih khât khawp a, Ramtei nen kan inṭhen hnu aṭang phei hi chuan nei lo nen danglamna a awm lo tih theih hial a ni. Ka inbual zawh vek hnuah ka mu nghal hmak a ruih pawh ka rûi tawh lo.

"Ka thleng tawh aw," dar sawm rik hmaa min lo thawn tawh Diktei msg ka open ve chiah a, "Birthday chaw tui tak min ei tira ka lawm e," a vawikhat nan ka reply ve mial.

"Remruattluanga ka ngai," rang zetin min rawn chhâng a, ka msg a châng reng emaw tih hial tur a ni.

"Min ngai duh suh, ngaih man ka awm lo."

"Man nei mipa ka ngaisang lo."

"Man nei ka ni ka tia mi?" Tiang vel mai mai hian rei fe kan inchhâng ta zak zak a, "Mipa chhîp sam zuah hi mawi ka ti thar tlat," Lalrindiki mai mai chu(h).

"Inpa zuah tir la," ka ti ve ngat a.

"Kan pa thar turin a zuah mêk a, a inhmeh khawp mai; mahse, a khabe hmul nen a inrem lo ka ti deuh," Hus! A sawi vangin ka khabe ka'n tuai ringawt a, "Muhil rawh ka mut a chhuak," data ka off san hmiah a, duh aiin ka chhâng tam mah mah.

Ramthansangi ka tawn hma khan ani hi lo tawng hmasa ta ila ka duh zawng tak tur a ni. Mahse, tunah chuan hmeichhia ka mamawh tlat lo va, nge, ngaihzawng satliah atan ka nei ve ngat dawn em maw ni.

Tui taka ka muhil lâi ka nu in min rawn kai tho a, ka va tho peih si lo êm..

"Mama, Lungleiah i pa nen kan kal dawn a, i u Duati a luak reng a ni awm e, ṭha takin in lo nghâk ang che aw, dâwr pawh ngaihthah chuang suh," tiin ka khum a siam nghal zung zung a, u Duati damlo chuan an thinrimna a bengdai a ni ngei ang; ka khawngaih reuh, Saitei ai chuan kan inpawh zawk a, kal ve duh viau mah ila in lam ngaihtuah a na si a, ka lo awm poh a ni ang chu.

An tlânliam hnuah dâwra kal turin ka insiam ve ta chauh a, car ka lakchhuah laiin Famkima leh kan inchhak chiaha nula senior deuh tawh rawn inphur chhuak ka hmuh chuan ka ner sawk. Mi inngaizawng ṭha lai tibuaia ru ngam ngat tu hi hnek thal tawp lo turin ka insum nasat a ngai viau; mahse, an rinawm loh man ka tuar dawn lo va ka tuar ngai bawk lovang, Ramtei pawh haw viau mah ila a tihsual man leh min bum man chu amah vêkin ala seng ang chu.

Ka phone ah lai a rawn ri a, zinglam darkua a pel chiah. Lalrindiki'n min lo call ve teh tlat!

"Rafael, dâwrah i kal dawn em?"

"Kal dawn chiah eng nge? Duh aiin ka chhâng rang.

"Fibre glass lo lei ka tum a.." a ti sap a.

"Aw kan nei, lokal rawh ka awm dawn alawm,"

"Ok.." biak zui hman miah lovin phone a dah leh hmak. A châng chuan a khawsazia hi mak ka ti ṭhin. Min duh thu tlang takin a sawi tak nâ a, nêlawm takin a awm zui duh leh miah lo va! Nizanah pawh zu nam chungin ka fawp a; min dâl hran lo a, inlâk hran pawh a tum chuang lo a nih kha. Hmeichhe awlsam tak a ni lovang tih erawh ka thinlung hian a hre thung.

Dawr ka thleng a, Puia, kan nau chhawrin a lo hawng fel leh vek tawh.

Dik tak chuan Sawrkar hnathawh hi ka châk ngai lo hrim hrim a, ka pa sawi dan takah 'lehkha thiam sawrkara hna nghet neih tum kher ai chuan kan thiam tawk mila thawh tur zir leh zawn hi a finthlâk' atih kha dik ka ri riau ṭhin. Kan dawr hi kan ei bêl ber a tling chho tawh a, ka nu hlawh leh u Duati hlawh nen phei chuan kan ziaawm viau; Saitei zirna hi a hautak deuh a ni mai a, amah bâk châwmhlawm kan neih loh vânga nupui neih kha huphurh lo ka ni bawk.

'Nupui neih' sawi hi chuan Ramtei ka hrechhuak nghal ziah. Famkima kha ka mi rin zâwng a ni ngai lo, Ramtei erawh ka ring em em a, ka rin ang a lo nih tâk si lovah hian ka nâ in hmeichhe dang ka hmuh hniam phah bawk. Diktei rawn lut lai ka hmuh tâk avangin ka ngaihtuahna kâwm tawh lovin ka inthingharh nghal a.

"Good morning Rafa..." a nui sâng a, a hmai make-up tel miah lo chu hmuh a nuam phian.

"Morning, 'Rafa' tia koh ka duh lo aw, Lalrindik," ka ti nghut a.

"Ka ko duh thung che alawm, Rafa.."

"I duh apiang tih nghâl i tum chuan i che fuh lutukin ka ring lo," ka nui duh miah lova, mak ti hmêl a pu deuh.

"A ṭha lawm, Remruattluang tia koh i duh zawk leh ka thiam tho a nia,"

"I nasa ka ti, nang aiin ka upa zawka ka hmingpum tezawng lam ri ve teh suh, i hria maw Lalrindik.." tihpahin a tukkhumah ka nem zauh a, ngaihdan nih loh hmel zeta min enin,"Chimawm lutuk.." ati leh nghat a. Ka chhâng tawh lo.

Chumi hnu chuan Fibre glass kan zawrh lai en puiin ka hrilhfiah zel a, ka mize pangngaiah mipa ṭawng duh ka ni lo va; mahse, dawrah hi chuan customer ka ngaihsakin ka be ve luam zel. Ka hnathawhah ka chiang a, inchei vur na hmun a nih loh vângin Jeans leh Shirt ka inbel tlangpui.

A duh ang chiah a lei fel hnu-ah motor chân a tum a, ka khawngaih ta deuh.

"Ka lo thlah ang che," a dinna bulah ka va chhuak phei ve a, "Min thlah kher ka phût lo," zuk ti hmak a.

"I phût vânga thlah tum che ka ni lo a nia," min hnial zui hmain a thil lei chu ka car hnungah ka dah sak hmiah a, Puia hnenah ka chhuah lawk tur thu ka sawi nghal a, Diktei nen an in panin kan inphur chhuak ta a.

"Ngaihzawng i nei nge nei lo?" Traffic jam-a kan din laia ka zawh thut chuan a hawi buai nak. "Nei lo e, ka nei ngai lo,"

"Engvanga kei hi min buaipui tlat si nge i nih?" Nizan aṭanga ka rilru kam rengtu ka sawi chhuak ta nge nge e.

"Buaipui ngai i nih vângin, ka lo ngaihdanah chuan mipate hi ka dah sâng hle a, in inneihna ṭhulh a nih khan hmalam pan i tum ka lo ring ve tawp; mahse, chutiang ni ta lo vin i rawngbawlna i thlauhthla fai vek a, hmeichhe phakhat vanga i zahawmna neih let tum aiin hniam lam i pan a, Rafael, dik tak chuan hetia zu i in te hian ka lo na ṭhin.." fiah fel fakin a ṭawng a, min en miah lo bawk.

"I chanah indah ve chhin la i hrethiam mai ang." Ka tih chuan, ka lam hawiin min en deuh vang vang a, "Ka indah chhin vang lawm i hnaihah ka awm zel, Ramtei ang vek kha hmeichhia hi kan ni lo tih i hriat theih nân bul ṭanpui che ka inhuam," tiin ngun tak hian hmalam a thlîr a.

"Ramtei kha ka hmangaiha, ka hmangaihna hi chuti maiin a reh dawn lo bawk; mahse, bul ṭan ve hrim hrim i duh chuan ka lo inngaihtuah ang e,"

"Tak tak maw?" Mak a tih hmel viau.

"Tak tak ni e, inngaihzawnna satliah aṭanga bul ṭan i duh chuan ka hnial lovang che," a hmeichhia zawkin min nawr ngat ngat te chuan engvangin nge ka tlânchhiat bik lem ang le. Ka mal lutuk tur te leh ka khawharnate hi min hnêm deuh mahna.

Diktei te in kan thlen chuan a thil lei ka dah luh sak vek a, an in pawh a nuam reuh kher mai. Thingpui in tura min sawmna pawh ka hnial ta lo. Amah ka duh ta hluah e tihna ni lovin mahni tâl tâla ruih leh rîkngawt kha ka hnê deuh.

"Zu in vak vak kher kha a ṭul lo tih hre turin i upa ve tawh." Sofa-ah ka ṭhu a, ani'n thingpui a siam thung.

"Khatiang kha alawm ka peih loh, ka tih tur leh tih loh tur min hrilh chhên dawn chuan bul ṭan ka peih lo a nia, ṭan loh law law a ṭha." Ka ti tlang hmiah.

"I mak ka ti, zu in lovin kha leh chen i awm a, i lo piangthar tak tak miah lovem ni? Mihring piantharna dikah chuan hrehawm a lo thlen pawhin sual kawng zawh châk ngawih ngawihna nun kan neih pawhin chhel takin an paltlang ṭhin, ati sualtu zawk ni lo i lo intih hrehawm ve rîkngawt khan, Ramtei pum a na dawn lova a nuihzat ang che.. inngaihtu.."

"Lalrindik...!?" Vin lutuka a ṭawng laklawh lai ka lo dan chah chuan min melh no lo khawp mai.

"Ka nunah rawn inrawlh tawh suh, ka eng mah i ni lova i eng mah nih pawh ka duh lo." Ka ṭhutna aṭanga tho chhuakin min koh lawm lawmna pawh ka haider hmiah. A ṭawngkam meinei leh kha fek fek kha ka ngaihthlâk zelna chhan tur ka hre lo. Chak zeta ka tlanchhuak chu an tukverh aṭangin min rawn thlir tih side glass aṭangin ka hmu reng.

A duh ang mipa ka nih loh chuan min hnaih lo mai rawh se, keimahah hian ṭha famkim a awm vek bik lo tih ka hria, â.. ka ngaihtuah thui peih tawh lo. Lalrindki hnimhnaih loh hi ka tân a ṭha a ni mai.

Lung ni lo zet hian Glass house-ah ka kîr leh ta a. Ka nu in min rawn call a, damdawi inah an tlang nghal thu leh u Duati a riahpui dawn tih a rawn sawi a, u Duati ka ngaihtuah ru viau nain tih theih vak ka nei lawi si lo.

Dâwra awm pawh nuam ka ti tawh lo. Nichina ka thinthawk thut zualpui khâ a reh tawh a, bul ṭan ve chu khawi lamah, rei lotê kan inbiak chhung pawhin Ui leh Kêl thlun pawlh ang mai kan nia lawm maw le. Lakrindiki te ang mi fêkfawn lutuk hi ka type a ni lo a ni ang e.

[Duatbiki of Lunglei]

Ka nu a rawn phei dawn tih ka hriat chuan hlauhthawnnain ka khat nghâl. Engtin nge chhuanlam ka siam tâk ang le? Nimin piah aṭang khan ka pum lam dik loh vâng nge chaw ka ei thei ṭhak lo a, ka pute chuan ka luhlul vânga ei lovah min ngai ringawt. Min hau chhên lehnghal a, ka period hun a pêl tawh a; inrinhlelh loh theih ni hek lo. A rûkin test kit ka lei ta kha a ni a, ka rindan a dik bawk.

Kei hian Zosangmawia fa ka pai ngei a, inrinhlelhna tur chhete eih a awm ta lo. Ka tihsual man ka têl dawn ta nge nge e. Ka nu leh pa hriat lohvin engtin nge ka thup theih tehlul ang. Ka intest zo bathroom aṭanga ka chhuak chiah chu ka khawhmuh a fiah lo ruai a, chu chu ka hriat hnuhnun ber kha a ni.

Ka harh leh chuan Serkawn hospital-ah ka lo awm diam tawh a, ka nî Arini mitmeng chang fak ka hmachhawn hmasa ber.

Ni Arini hi ka pa Zirsangliana nau chiah a ni a, ka nu Remruatfeli nau pute Bawiha nen an inneih tâk avang khan koh dan turah ka buai viau a, mahse, 'pite' tia koh ai chuan 'Ka nî' tiin ka ko hlen ta zawk. Tuna ka awmna ka pite inah an mo a ni a, ka hriattirh chuan mak ka ti viau kha a nia; mahse, ka nu in chiang taka min hrilhfiah khan ka zawt leh ngai ta lo. Kum rei fe fâ annei lo a; an fanu ang chiahin min duat bawk. Ka ngainain ka zaha tuna a hmel lan dan nelawm lo tak pawh hi ka dem lo. Ka râi tih a hria a ni mahna.

"I lo harh tawh maw..?" A nui lui ngial a.

"Umn..tui tlêm ka in thei ang em?" Tui min pek pahin min melh vang vang a, "Duati, kan hmangaih tehlul che nen hetiang tur hian ka lo beisei miah lo che a, i pi leh pute bâkah i nu leh pa rilru a na dawn mang e.." a thaw hak a, pehhêl kual lova a sawi danah ani pawh a na hle tih ka hrethiam.

"Ni...!?" Sawi ṭan dan tur hre lovin ka chhing vang vang a.

"Tunge a pa, kei leh doctor tih loh chuan an la hre lova a sawi chhuaktu nih pawh a hrehawm dawm hle a ni." Ati leh a.

"Khawngaihin sawi lo hrâm rawh, min zêp sak la a mawh ka phur vek ang."

"I â mai mai em mai, zep hlen theih nise thuhran; mahse, a la lang chhuak dawn tho tho a nia chuvangin kan sawi ran hi a ṭha zawk." A ngaihdan a nih loh hmel khawp mai.

"Ni, tun ṭum chauh chu ka thusawi min ngaihthlaksak ve rawh aw," tiin Zosangmawia nen kan inkar zawng zawng ka hrilh fai vek a, a bialnu râi thu thlengin ka sawi bawk. "Duati..." a mittui a hnâm sak mai.

Ni e, an tu hmuh hmasak ber ka ni a, keimahah rinna a nghat em em bawk. Zosanga nen kan inkâr ṭha ni sela chuan a zahthlak dan a nêp druh tur; mahse, a bialnu a lk rai hmasak bakah nupuia neih a tum tih thlengin ka sawi a ngai ta si a, tlâwm ka inti a ka zak viau a ni.

"Khawngaih takin min thup sak la, ka nu leh pa chu a hunah ka hrilh mai ang, Zosanga ngat phei chu hrilh hriat ka tum lo hrim hrim a, ka nî, hmâ min lâkpui la transfer min dilsak rawh.." ka ti ta thlâwt a. Min khawngaihna mitmeng chu ka hmuh hmaih bik lo.

"Eng pawh nise theihtawp ka chhuah dawn, kan zêp hlen thei dawn lo tih erawh i hriat kh," beidawng tih hriat takin a thaw chhuak halh a, kei pawh ka dang tehchiam bik lo, ka nu leh pa, Rafaela mualphona te ka ngaihtuah kâi a, nu Muanpuii te chhungkuain an hriat ka hlau ngawih ngawih min haw nasa mai si a.

Ka nî nen tih dan tur kan rel fel veka, doctor pawh amahin a be thlap a, zêp rih kan duh thu a sawi chuan a lo hrethiam ve mai. Naktukah ka hna transfer dilna theh luh a tum thu te, thla thum a tlin hma ngeia inpeih fel a ṭul tih thlengin a ngaihtuah kim dap a, ka nî nge nge, harsatna hmuna ka din laia min puih a inhuam hi ka lawm ngawih ngawih.

Chumi hnu chuan duat takin fuihna thu ṭha min hrilh a, chhel taka awm tur leh Pathian remruat a nih chuan Zosanga nen pawh kan inrem leh mai ang tih a sawi lai chuan ka ner nasa hle. Zosangmawia ka huatna hian 'Van a tawng' ka tih chuan a uchuak deuh mai thei; mahse, kan thurûk min phawrhsak zan a ṭang khan ngaidamtu thinlung ka pu thei tawh lo.

Zan lamah ka luak ngat ngat avangin ka nu leh pa an va hrilh ta tih ka hriat chuan pawi ka ti hlê. 'Lalpa, ka nu leh pa te chu hriat tîr lul suh,' tiin ka dil hial a, ka nau vanga an zahna pawh thla tam a la ral lo. Tunah an fanu chhuan em emin duhthlanna mawlmang tak ka siam vângin an zahna khua ka tisei dawn a ni si a, ka ṭah a chhuak ru et et reng mai.

Zosanga number ka nei tawh lova Social media-ah ka block fai vek bawk. Ruati chan aia ka chan a chhe ta zawk hi demawm ka inti a, ka duh tak hnena ka taksa ka hralhna man ka têl dawn ta. Zû leh mipat hmeichhiatna ka kaikawpa ka hma hun thui tak ka thaichhe ta vek a ni ber.

"Mate, Duati.." ka nu hlauthawng hmel ka hmu hmasa ber a, inah pawh pêng lovin damdawi in an rawn pan tih a thawmhnaw inbel aṭang chuan ka ring thiam ve mai. Ka pa erawh chuan chîk takin min en a, tûn nihnih thum maia ka chêr deuh kuam hi mak ati pawh a ni mahna.

"Nu, pa.." ka ṭah a chhuah êm avangin ka ṭah loh nân ka heh ka pet ngar ngar.

"I dam leh thuai dawn alawm, doctor pawhin ṭhatpuina tham thil a ei lo lutuka a Bp a hniam a nih hi, atih che kha Pathian zarah i zia leh mai ang," ka sam hnawk niai min chul mâm sak a, ka pa pawh khumah rawn ṭhu in min en deuh vung vung reng!

"Mafel, Arini awm chhung hian in lamah haw phawt ila riak turin kan kal law law dawn nia, Bawihi, inbual ve phawt te kan duh a i nî nen lo awm leh rih ula tiraw!?" Ati dam thluam.

Ka nu leh pa hmel ka hmuh hian min hmangaihzia ka hre thar a, Aizawl aṭanga Lunglei pana ka tlân chhan ka thinrimna kha hre hmêl an pu tawh lo. Hei vang tak hian ka inthiam lo ru ngawih ngawih thung si.

"Ka ṭha alawm.."

"Û, in haw dawn chuan muangchâng lo ula tiffin rawn keng pahin lokal hma intum dawn nia," ka nî in a tih chuan ka nu te pawh haw turin an ding chhuak ve ta a, min ngaihtuah em em tih ka hriatna hian ka ṭah a ti chhuak. An hriat chhuah hunah an mittui a far leh dawn si a.

"Fimkhur hle ang che, ka zêppui che tih an hriat vaih chuan i nu ka ngam dawn miah lo a nia, Duati, dik tak chuan ka mang i ti ang, transfer tehreng che pawh nise engtin nge i inenkawl ang, ṭha tê tê a i pâi puitling a nih chuan an hre chhuak dawn si a, ka hah hluah hluah.." ka nu te chhuah hnuah ka nî in ati leh hap a.

"I hming vawikhat pawh ka sawi ri lo ang, bâkah puitling ka ni tawha ka inngaihtuah thei a nia, naute hmel an hmuh meuh te chuan an dam mial mai thei asin," ka ti ve tlat. Tun atana hrilh nghal zawng ka ngam ngang lo a ni. Zosanga nu leh pa huatthu ka sawi tawh a, chhungkaw thurûk ka sawi avanga an rilru nâ a dam hma hma a hetiang thu dêngkhâwnf sawi leh te zawng a lêt ka tuar ngam rih lo a ni ber a.

Zosanga chanchin leh a nu leh pa min tih dan te, ka nu in min hau dan zawng zawng ka nî ka hrilh vek chuan ka thâwl huai huai.

"I tum tiruh la, beidawng ngai suh ang che, vawikhata hmeichhe pahnih râi kawp thei mipa hian ngaihdam a phu lo." A tih chuan ka rilrem zawng tak a ni.

A dik a dik chuan ka nu leh pa lakah hian ka rilru a dam bik lo. Khatia Zosanga te ina min ṭawng khumna kha paidam harsa ka ti ve tho va; mahse, ka damlo min ngaihsak avanga Lunglei thleng thlenga rawn kal ve ta chu ka thinrimna ka tilang duh lo mai a ni.

(Darkâr thum hnu-ah)

Ka nu amahin damdawi inah a rawn kal a, ka pa erawh in lamah a awm tih a sawi. Ka ni nen chaw kan ei ve luklaka ka nu hmel a hlim vak lo.

"I Thu awih loh man i tuar chho zel a nih hi, i tih dik loh zawk pawhin min tihtauh khum ngam a nia," a tâwp tâwpah a rawn sawi chhuak leh ta.

"Nu, Zosanga hnena ka hrilh kha sual a ni lo, huat tura sawi pawh ka ni hek lo."

"Zosanga nen vawikhat pawh in inzui leh chuan i châk lo khawp ang, nu leh pa rilru tinatu reng reng an tluang ngai lo," a ti leh ṭâlh a, ka chhâng buai peih ta vel lo. Mut chhuakin min zem chiai chiai a, ka chhîng ṭan chiah tihah ka nu phone a rawn ri a ka meng chhuak zawk.

"Rawn kal pawh nise ka be tuitam lo khawp ang, kan Lalduati nen inhmu tam lo se a ṭha a ni mai," tia ka nu chhânna avang chuan beng ka chhi ru kar.

Tu nge lokal ta ang? Zosangmawia a nih ka ring deuh thut thut a, damdawi inah ka awm tih a hriat phawt chuan a rawn kal loh atâkah..

Hlauthawng ru dep depin ka nu ka melh a, ani lah a lungawi loh hmel nasa si. A hma khân,'Nau i pai a nih chuan min hrilh ang che' atih tak kha maw le. A teuh lo, ka hrilh chuan Hmangaihzuali ka ni lo tihna a ni ngei ang.

Ka nunah tû mipa mah hian hmun an chang tawh tur a ni lo. Ka fa pa Zosangmawia ngat phei chu biak leh hi ka tum tawh lo..

Rawn kal rawh se a ngam a nih phawt chuan..Hmachhawn dan tur thiam lo ka ni bik hleinem..

B+>[BeckirafARenthleI]<+®®

 

THE RAPSAGYAN FAMILY

Becky Rafa Renthlei

Chapter-17

[Zosangmawia & Duati]

Ka quarter-ah keimahin ka tâl ve rak rak a, zantin ka nau Lawmsangzela'n min rawn call ziah a, rilru ka thlâk theih nân thil chi hrang hrang a rawn sawi ṭhin. Unau inkawmngeih leh inhmangaih tak kan ni a, ani huat kher hi thil ṭul a ni lo tih hriain ṭha takin ka be zel a, kan inchhunga thil thleng pawh a hnen aṭangin ka hre fai vek.

Ka nu Muanpuii pawh Lawngtlaiah kârkhat châm turin a zin tih thlengin ka hria; Ruati nen inneih dan tur kan sawi dun mêk a, ka hlawh a tam tham tawh bawka harsa lutukin kan awm lo turah ka ngai; ka rilru tihrehawmtu ber chu Duatbiki a ni. Min huain min be duh lo mah se ka ngai ngawih ngawih a, eng ang pawhin nawr lui mah ila ka lam a lo hawi ka ring tawh si lo. A chhan chu hmeichhe luhlul leh tih mawh tak a ni si a.

Tlai lam dâr nga ari tawh a, ruang en dik ngai ka neih vângin ka la tâwi khawmuang a, nu leh pa in chhuahsan chu lehlamah a khawhar thlâk. Zanriah eikhama kan han titi nak nak te kha a nuam ve a, ka nu hmêl hmu miah lova ka seilian leh a phirpui in min enkawl avanga khawvela châmbâng mai ka ni. Ka nu rual khân lo thi ve law law ila tih châng ka ngah ta.

Forensic expert Zosangmawia hi engtikah emaw chuan ka ruang an la hlawm ve dawn a ni si a, ka hmangaih miah loh nupuia neih ngai khawpin ka nun a hniam ni berin ka hria. Zawi muangin ka in luah ka pan a, ka phone a rawn rîk chuan ka chhâng lo ṭep a ni. Ka nau leh bawk.

"Mâm, u Duati kha damdawi inah an admit a, a nu leh pa an phei ve nghâl," atih chuan ka ṭêk chhawk. A nu leh pa Lungleiah an kal nghal a nih chuan a serious a nih ka ring. An inkar boruak a ṭha lo tih ka hria a, ka rilru a nuam ta lo.

Eirawngbawl sawk sawkin chaw ka bâr luklaka a chanchin hrechiang tura phone tur tumah ka nei lo, amah lahin min block tlat bawk si.

Ka pa call kan tum ngial a, tlâwmah ka la vei nen, Rafaela ka call ta zawk a.

"Nia, a chau deuh thut a, Serkawnah an admit a, ka nu te an kal sia ka kal ve ta lo." A rawn ti a, thildang zawh thui pawhin sawi tur tehchiam a hre bik si lova Ruati hriat lohvin Lunglei zan tlân ka tum ta a. Min lo be duh lo pawh nise a ṭhat leh ṭhat loh tal hriat ka duh ve hrim hrim. Nau a pâi vaih chuan a thusawiah khân a ding nghet dawn si a.

Ruati ka call leh tê tê a, inneih ṭhat pangngai kan phâk loh avangin tlân kohva koh mai kha kan titlu a, palâiah kan thawhpuite pahnih leh Mahruaia ka sawm mai a ni ang chu.

Nu leh pa hriatpuina tel lovin nupui neih ka tum ta rup mai si a, ka hmangaih leh ka thlâkhlelh zawk lah ka neih phâk a ni si lo. Ka tihsual a lian tham êm a, ka tuar a ngai a ni mai.

Lunglei ka thlenin zinglam darkhat a ri chiah a, Serkawn hospital kawtah ka ding vâng tawh. Gate an kalh tlat si a, hmelhriat han biak mai tur lah ka nei eih si lo. Duty bulah kalin luh ka dîl ngial a, a tîr chuan a phal mai lo; mahse, thuhnuairawlh tak leh zah pawh dâwn lova ka dil tâk tlut tlutah chuan min hawnsak ve hrâm. Ka lâwm tih piah lamah ka lawm a ni tawp mai.

Ka lan dan pawr fap chu ka induhkhawp lo viau na a, tihngaihna awm hek lo le, chak zetin female ward ka pan chho ta a.

Kawngkapui tlêma inhawng deuh aṭang chuan ka hmuh phâk chin ka thlir a, bed no.22 a ka Duatbiki muhil hmel pawh ka va hmu ta ngei.

A sam phiar dul hnak te a hmêl dâng zet te chuan khawngaihthlâ a la reuh, a mutna bulah a nu a ṭhu a, ka pawh ngam angem aw! Dik tak chuan nu Mafeli hi nêl viau mah ila hmân zan aṭang khan min haw deuh tlata hriatna ka nei bawk nen ka tîm deuh. Mahse, mipa ka nia helai thleng thleng kal ve ta chu engvangin nge ka luh ngam loh ang.

Dim tê-in ka pên lut ta a. Cabin-ah an awm lo hi Pathian hnenah lawmthu awm rawh se. Sum an nei viau chunga General ward-a an awm hi mak ka tiru deuh a, ka lawm thu erawh a ni si.

"Nu Mafel.." ka huaisenna zawng zawng sâwmkhâwma ka koh chuan a thil chhiar lai dahin min rawn en a, a mitmeng chang fakah chuan eng nge a ngaihtuah ka chhiar thiam lo.

"I lokal a ngai kher hleinem.." tih sap pahin a fanu a melh zauh a, kan inhmuh loh kâra Duati hmêl tla deuh kiam ka hmuh chuan ka inthiam lo viau.

"A ṭha em? Doctor te'n engtin nge an tih?"

"A ngaihtuahawm loh, a muhil ve deuh chiaha Pathian zarah eng êm ati lovang,"

"Ka thiam loh vek a ni." Ka ti sup a.

"Nia, duh aiin in inkawm tam a, thil pawi insawi chhuah phaha chhungkaw inkar intichhia hi a pawi ngawt mai, a rêng rêngah i nu leh pa chhuahsan kher kha a ṭûl em ni?" Ṭawng ring ṭha ngam chiah lo; mahse, sawi chhuah ngei ngei duh si hian ati leh a.

"Nia, puitling ka ni tawha ka inhaikuak a hun ve tawh," tih chauhvin ka chhâng a, "Ruati kha engtin nge i tih dawn? Duati hnaihah hian awm tawh lo la ka duh khawp mai, in inkâra awm hi ka hrethiam lo emaw inti ang e, kan lo ṭha en lutuk che u a, keima thiam loh tak pawh a ni." Ka mitah min en chat a, Duati nen an va han inang ngawih ngawih tak.

"Duati hi ka duha ka hmangaih bawk; mahse, ka dinhmun a khirh ém a ni," tiin ka sawi tlang hmiah.

"Chuvang rêng chuan mipa i nihna angin bansan la, bakah thisen inzawm ni lo mah ila kan inpawh zia i hriat kha, nangpawh Rafaela nen ka en dan che u a hrang chuang lo. Chuvangin ka thusawi zawm la Duati hi kalsan rawh," ati ta hmiah hmiah a.

"Ruati hi râi lo se chuan ka bãnsan lovang, fahrah siam belh ka duh loh vang leh amah Duati vâng liau liauvin ka kal ang." Nghet charha ka ṭawng chhuak thei chu mak ka inti.

"Nu, Tui..." a rawn meng siar siara min hmu lo nge a maimitchhing leh daih. Vawikhat tal inbiak leh ka duh asin.

A harh chhunzawm tâk loh avangin hrilhhai zet hian a bulah ka ṭhu a, "Ti harh lo mai rawh, bâkah a hmuh loh che hian a tan a ṭha zawk. Nangmah vangin kan fanu in a rûk a râlin in a chhuahsana Zosang, nang ni lo la chuan ka nasa khawp ang, Duati nen in inkawm aṭang hian a mizia a dang hret hret tih ka hre ve a nia, a nu ka nih hi.."

"Ka tihpalh liau liau a ni, hman zan khân a hming lam rîk ka tum lo tak zet, ka thinrimin khua ka hmu lo a," Duati kut che zeuh zeuh ka hmuh vángin vawn tumin kut ka phar chhuak a, nu Mafeli mitmeng hriam ṭha zet ka hmuh tâkah chuan ka vuan ngam ta lo.

Chêt buai leh hamhaih pawh awm miah lovin Duati a rawn ṭhu chhuak hlawl a,"Zosangmawi, ka hmuh phâkah engtin nge i la awm ngam zâwk," thinrim insehruh ṭang ṭha zeta a ṭawng chhuah chuan min chhun ngâih mai. Ka na zawk tak tak!

"Duati..."

"Mualpho i duh loh chuan tunah chhuak nghâl rawh.." rum zeta min enin a mitmeng huatnaa khat chu a hriam hraih hraih khawp mai.

"Mate, mu rawh, a rawn tlawh zawk che a nih hi helaiah thawm nei suh u," Nu Mafelin a tih chuan a nu a melh râm râm a, "Ani nen sawi tur kan nei lova a lokal ve na tur a awm bawk lo, kan inzawmna a tawp tawh," zawi fiah takin a ti leh nghat a.

"Nu Mafel, khawngaihin rei lo tê ka be fâl lawk thei ang em, chuan ka haw lehnghal mai ang."

Kan pahniha min entawn zak zak chungin,"Ṭha takin sawi dun ula midang mitmei vêng ang che u," tiin a chhuak zui ta nghâl a.

"Duati, min ngaidam rawh.." a kut vawn ka tumna chu duh lovin a thukru daih a.

"Zosangmawi, mipa i ni emaw ka lo ti a, mahni thutiam zah zo lo mihring hi ka hua, ka nu leh pa te i chhungte lakah min ti mualpho hle a ni." Min en ngar chunga sawi ni mah se zâm hmêl a pu lo.

"Ka thiam loh a ni, nau i pai em ni?" Ka rinhlelhna ka sawi chhuak ta nge nge e.

"Pai mai mai lo, pai pawh ni ila ka hrilh kher lovang che." A ti hmak a.

"Min hrilh lo mah la ka hre tho vang,"

"Nupui pahnih i nei thei lo ang chiah khân pasalah neih che ka tum lo a nia, ka eng mah i ni tawh lo a, i ni ngai hek lovang," lukham nghêngin a ṭhut dan a siam rem a, khawdang ka hawisan thei lo a chhâ chu a ni.

"Chuti, nau i pai a ni maw, ka fâ.." ka awki a ring lo a, a hretham chang chang chauh ang.

"Pai lo, ka pai ai chuan damdawi ka lo ei leh mai ang." Ngeiawm lutuk hian a nui lui kher a, damdawi a lo ei tak tak em mawni.

"Tenawm nu leh.." ka thin tâwt lutuk tih reh nân ka thaw chhuak hawk a.

"Tenawm chu kei ni lovin nangmah Zosangmawia mi lerh i ni e, ka nunah vawikhat mah lo lang tawh suh." Damdawi in reh ruihah chuan a aw a fiah ṭha ngang mai. An muhil vek nge an muhil der tih pawhka hriat si loh. A hmaa ka hriat ṭhin Duati kha hmuh tur a awm tawh lova a meng kawlh hrâ reng mai.

"Ni e, ka tenawma nang pawh i bâng chuang lo. Ka fa tihtlãk nâna damdawi ei hnial lo tu pana Lunglei thleng thleng ka kal hi ka â tawh a ni ngei ang," ka ti ve ngat a.

"Min chhuahsan phawt mai rawh, i hmel ka hmuh hian ka luak dawn," luak tur ang takin an awm der vel a, ka haw lutuk. Tiang em ema chimawm leh sual han chhuah chu a inhmeh hlawl lo.

"A ṭha e, ka kal ang, mahse, nau i paia ka hre chhuak a nih chuan a pawi khawp ang tih lo hria ang che, ka fâ chu ka fa a ni mai; Zosangmawia hian eng nge a tih theih i la hria ang chu, ka fa avanga ka hmangaih miah loh nupuia neih ka tum a nih si chuan duh leh pathum, pali pawh ka kawp ang chu," ka thinrim ṭawng a ni bawk a, ka dîm duh bik lo.

"Kal mai teh..." min tih chuan ben lawlh ka duh hial!

Khumah a saisîr zawnga mu-in min hnungchhawn nghal hmiah a, ka tlawmngaihnain a daih ta bik lo. "Hmangaihzual, ka laka i awm anga easy khân mipa dang lo awmpui tawh suh aw, i che fuh dawn miah lo a nia," min chhân lêtna pawh ngaihthla tawh chuang lovin ka chhuah san ta.

Nu Mafeli biak ṭhat pawh ka tum ta lo. Chak zetin hospital ka chhuahsan ta a, khatiang em ema min hawtu kha ka la hre ngai lo mai ni lovin ka la tawng lo. Gate duty lawm thu ka hrilh thuak a, car-ah ka lut ta a, zinglam boruak vawt vur chuan ka nun ati ippik zual.

Ka inkhalh haw lehnghal ang nge rei vak lo ka muhil ang tih ka ngaihtuah zawk hnuah Lungleia châm chhan tur pakhat mah ka nei lo tih inhriain Aizawl lam ka pan leh ta a.

Lalduati ngaihtuah loh ka tum poh leh huatna mitmenga min enna khan min ti nâ. Ka phu tâwk ni mah se ka na vawng vawng..

[LALRINDIKI & RAFAELA]

Rafaela ka biak lohna nihnih a ni tawh a, ka khua a har ngawih ngawih. Vawi tam call tumin a number ka hmet chhuak a, ka ngam ngang lo. Hetiang em em hian ka vei ang tih ka hre bîk lova a hmêl leh a taksa inkhaithli zaih te kha ngaihtuah loh ka tum pawhin ka mitthlâah a lo lang zel.

Ka hna aṭanga ka haw tlâi deuh avangin bazarah ka lût thla a, Zion Street-a mipa leh hmeichhia rawn chho chuan ka mit an la riau. Rafaela ṭhianpa Zosanga kha niin ka hria a, a hmeichhia erawh ka hmuh âwm pawh ka hre lo. Anni pahnih chuan min hre hmel an put loh avangin min kalpel mai a, biak enah pawh ka en chuang lo.

Chawhmeh ka en kual lai chuan mipa nui ri ka hria a, "Ka hman tawh lo, lokal zawk rawh," tia a ṭawng thâwm pawh ka hre zawm nghâl. Rafaela aw a ni. Bazarah eng nge a tih ang a? Hnung lam hawiin ka inher ta a, ka ring dik chiah; Rafaela leh nula pakhat chhe lo zet hi inhnaih takin an ding dun a, an inhmeh thlâwt.

Hmeichhia ka ngaihsak peih lo, ka nunah tumah seng luh ka tum lo titu khân hmeichhe dang a kalpui leh nghal a nia, tenawm mang e, a khabe hmul a lo mêt ṭhen hlek a, a vikings sam erawh bin lêtin a inhmeh kher mai. Min rawn hmuh ka hlauh em avangin rei pawh ka en duh lo.

Hman zan lawkah min fawp a, ka duhna zêp miah lova ka tih lan avang khân min hmusit tepawh a ni mahna. Zaipawl conductor-a aṭan lai aṭang tawha ka star a ni a, ka zah theih loh vang ni lovin amah hnaih hrim hrim khâ ka thil duh a ni.

Ka chawhmeh leina bula an rawn din tâkah chuan biak loh ka hreh êm avangin, "Rafael, in bazar elaw," ka ti sap a.

"Min hmuh reng hi, ka awmna hmun i hre thei hle mai, nge min lo zui ru zawk?" A ṭawng zâwngin zu rim a nam hak a, a hmeichhe hruai pawh a ruih hmel tho.

"Ka zui rûk awm che ka lo hre lo va.." ka ti sap a.

"Kan intawng fuh a nih dawn chu," a nula hruai chuan a rawn ti leh a, ka run kher mai.

Ka lo be ta kher kher kha ka inchhir viau bawk. Kalsawn tuma ka inher chuan, "Lalrindik, min zui reng hi bânsan la, zu in ṭhin i duh loh chuan chu chu zui mai rawh.." a sawi zawh rualin a ke chungah ka rap sawk a, min vawnna a thlah nghâl, "Ka zui loh turte list-ah i hming ka lo ziak lang ang e, Remruattluang," ti nghauhvin ka pênsawn ta a.

"I nghal mah mah.." min rawn nam lêng lawp tu chu Rafaela ni lovin kha nu kha a ni.

Kalsan tum kha ka ni a, mahse ka tlâwm nguar ang, anni zurui mahi min zah loh chuan engvangin nge ka zah bik ang a!? Teuh lo.

"Nangnu kha, mipain duh duha zu an inpui theih hi ka ngaisang khu chûk lo, i kalpui pa nen khan mi inang, sa inang innih kha.." rum deuhvin ka'n melh ve ngei a, "E ê ê.." chu nu rawn kal tum chu Rafaelan a bânah a vuan a, "Ngaihsak duh suh, min duh dertu a ni ve a, ngaida rawh.." ati salh a, ka lo zak chem chem. A ṭawng ring angreng bawk nen min thlir deuh ṭhupin ka hria.

"Ka tihpalh..." zak lutukin ka tlân sawn ta nghal a, ka scooty dahna hmun ka thlen hma ka ding ta lo.

Khatiang khera min ṭawngkhum kha nâ ka ti a ka zak bawk. Rafael Remruattluanga hi ka lo hrechiang lo hlê tih ka hriat phah a, a hmel ṭha mah se khâkna hlirin a khat si.

Vawikhat mah ka be tawh lovang tiin rilru ka siam ta a..

B+>[BeckirafARenthleI]<+®®

THE RAPSAGYAN FAMILY

Becky Rafa Renthlei

Chapter-18

[Duati of Lalhmangaihzuali]

(Thlakhat hnu-ah)

Khatia thinrim hmai dur khupa Zosanga chhuah hnu khân puanin ka inlukhuha ka mittui dan rual lohvin a rawn luang zawih zawih a, ka thianghlimna ka hloh mai bâkah thinlung taka ka ngaihven; mahse, ka sawi chhuah ngam si loh kha ka chân tih ka inhria.

Hospital-ah ni hnih leh zan thum ka riak a, ka nu leh pa rem ti lo chung Aizawlah ka haw ta lo. An kiangah ka hlim lova ka taksa a danglamna lo lang chhuak tur an hmuh ka duh loh vang a ni pakhat. Rafaela paw'n zû a in nasa tih ka hria, hmâna kan chhungkua kha engtikni-ah mah kan nei leh ngai dawn tawh lo tih ka hre bawk.

Nî Arini puihnain min transfer fel ta, ka lo rin dan chuan Lawngtlai emaw Serchhip tih vel a nih ka ringa chutiang ni ta lo chuan Champhai lamah min dah ta daih, duh ai chuan a hla deuh nain ka lawm viau. Ka naupai pawh thla hnihna a pum ṭêp tawh a, vanneihthlâk takin ka haw lo nge raino insawisel ka la nei lo. A rûkin ka nî nen kan inbuaipuia Champhaia ka in luah tur tifel tura kal erawh ka nî in a phal lo bur. "Nau a la tê a, fimkhur tluk a awm lo" tiin ka putea leh Rafaela hruaiin an kal ta a, ka nu a phunnawi lo ve teh tlat.

Zosanga chanchin eng mah hriat ka nei tawh lo a, ka chhungte pawhin an sawi lang lo hrim hrim, "Duati, i nunah mipa i seng lût duh a nih pawhin, Zosanga ni suh se, amah a fel viau rualin a nu leh pa chunga a awm dan hi ka haw riau a, hnîmhnâi tawh suh ang che," tiin damdawi ina ka awm lai khan ka nu'n a sawi.

"Aw" pawh ka ti lova "Aih" ti pawhin ka chhâng chuang lo.

Aizawl kal leh pawh thih hrehin ka hreh tawh a. Tunah chuan puitling ka ni tawha ka hmakhua sut kuak a ngai a, nu leh pa thlazar hnuaia ka awm loh hun a thleng ta tak tak tih ka hrethiam. Lunglei DFO Lalnunpuia lah chuan min be chamchî a, rei vak lo ka be ṭha ve hman; mahse, Zosanga vângin ka thlauhthlâk a ngai a, hmeichhiain sâwn kan pai hian kan chan a chhiatzia ka hrethiam uar uar bawk. Kei phei chu ka fa paina pa beisei tur a awm miah lo va. Dam chhung hun zahnain ka hmang ral dawn a nih hmel. Ka kawppui thlanin sâwn a thlâk kawp miau si a.

Ka room-ah ṭhu in ka pum la puar miah lova thêp zaih chu ka chûl a, ka tihsual man têl tîr lo tur leh enkawlna ṭha ber keima tawkah pêk ngei ka tum ruh tlat.

"Duati, chaw kan ei dawn," ka pi in min rawn koh chuan rang zetin ka shirt hâk inhlîm chho vek chu ka pawt thla sawk sawk a. Min transfer-na tluang purh hi Pathian ṭanpuina a ni ngei ang. Ka nu leh pa, ka pi leh pu te erawh an lâwm lo nasâ.

Zanriah kan kîl lai chuan, "Duatbawih, kan hmuh phâk lovah i awm tawh dâwn a, sawisep kâi zawng leh nun pawlawhin awm rêng rêng suh aw, kan tu hmuh hmasak ber i ni a, i unaute en tawn turin i nun uluk hrâm hrâm i tum dawn nia," ka pu in a tih chuan ka mittui a far fap a, min hmuh hlau zetin ka kâah eitur ka hnawh lût tawp tawp a; rei lo tê ah ka mualpho dawn tih ka hriatna chuan min ti na lo thei bik lo.

"I nî te nupa naktukah an lo chhuk dâwn a, thlah nân che chawhlui kan buatsaih anga i thawhpuite pawh i sâwm vek dawn nia," min duhsakna leh min duatna ṭawngkam ka dawn apiangin inthlahrunnain ka khat.

Kan nula Mabiakin min melh hrek hrek tih ka hre renga nuam lo ka ti viau. Ka lem theih ngang loh avangin ka tho chhuak hlawl a, ka room-ah bawk ka lût leh ta a.

Ka phone-a voice record-na ka hmeh chhuah chuan ka thutiama ding turin ka inhûm ruh a, ka thutiam hi ka hriat nawn fo a ṭûl dâwn avangin record-a dah thlap tum ka ni.

"Kei, Zirsangliana leh Dr Remruatfeli te fanu Lalhmangaihzuali kâ ah hian zû reng rêng farkhat pawh a lût leh tawh tur a ni lo. Ka in leh in hria emaw ka nam a nih chuan pawisa min chawi tîr ula ka tlânchhe lovang; mahse, pawisa ka lo nei remchâng lo a nih chuan ka biangah min bêng dawn nia. Hei hi ka tiam e." Ka sawi zo chiah keimahin ka nui ta chiam a, ka'n ngaithla chianga ka nuih a za tulh tulh. Mak deuhvin ka rilru pikna te zuk reh huai a! Chumi hnu chuan a dang dang ka record leh ta vel a, zan darkua thleng zak ka buaipui hnuah ka duh tâwk ve hrâm.

Ni e, a hlim lo zâwng leh a nguai zâwnga ka ngaihtuah apiangin ka chau zo va, ka râi loh phah dâwn dêr si lo. Mahni ka inhrem mai mai a ni.

Whatsapp chat ka en thla diat diat a. Lawmsangzela, Zosanga nau message a lo awm teh tlat! Ani nen hian kan inbe tam lutuk lo nain ka status a view ve ziah a, nupui a neih hnu hian mumalin kan inbe ta lo. Min û en viau avangin ka duat ṭhin a, Rafaela leh Zosanga khân an thlim zing khawp mai.

"Biak tlang i har hle mai, ka msg i chhiar hunah min lo call rang rawh aw.." ka chhiar zawh chuan ka call ta nghâl a. Vawithum a ring ral ṭhak.

Ngaih ṭha vak lo hian ka ken tur thawmhnaw ka siam san ta rih a, nithum hnuah Champhai pana kan chhoh tawh dâwn avangin office bânah ka inpack ngat ngat a, ka nî te'n a ṭhen ṭhen an keng chho tawh bawk. Ka nu remruat angin ka pa car hlui zawk ka kawl dawn a, ka lawm ru viau.

Ka phone a rik chuan Lawmsangzela a nih ka ring nghal mai a, ka ring dik chiah bawk.

"U Duat, biak i har ngat ngat hle mai, U Bawiha bialnu Ruati kha a inawkhlum a.. kar leh Zirtawp khi inkoh an tum ni kha a nia.." ka phu zawk a, "Maw!?" Ka âw a lâwi titih.

"Tlailam dar thum khân an store room-ah thi sa in an hmu a, kei pawh ka kal a ka haw chiah."

"Enteh, Ls,..." sawi mai tur ka haihchhama ka thluakah Zosanga a rawn lang nghal. Ka chhungte'n eng mah min hrilh lo hi mak ka ti. Rafaela takngial pawhin min hrilh miah lo a, ka nu te'n an khap bet a nih ka ring.

Lehkha pahnih a hnutchhiah a, Zosanga ta tur pawh a tel tih leh a û lehkha zawk chu mipui vantlang hriatah tlangzarh a nih loh thu te, Police leh Zosanga chiahin an chhiar tih thlengin a rawn sawi a, mak ka tih rualin Ruati'n naute a duh loh thu a sawi te kha ka hre chhuak chawpchilh a, ka thâuvah min manin ka khur der der.

"U Duat, khawngaihin ka û be hrâm rawh aw, kan inah a rawn lêt duh tawh si lova naktuk hian Ruati an vûi dawn chauhva ka nu leh pa phei chu a be lo hrim hrim, kan nu kalsan chi a ni si lova.." atih chuan ka khawngaih ang reng.

"Nia, ka lo be dawn nia," ka ti tâwi tak a, biak erawh ka tum miah lo.

"Ka lawm e, i thu a zâwm deuh ang, keini sawi ai chuan.." kan inbiak zawh hnu in khumah ka ṭhu hnak a, ka ngaihtuahna a vâk thui kher mai. Zosanga'n an in a chhuahsan tih te leh Ruati nen inneih an tum tih eng mah ka hre lo a, â, amah nen kan inbiak tawh ngai loh avangin a chanchin eng mah ka hre lo atin ni.

Ka nu a thusawiah dingin Zosanga te chhungkaw chanchin vawikhat mah a rawn sawi ngai lo a, in enkawl ṭha tur leh a hun taka damdawi ei tura min hrilh bâk a sawi ngai lo. Rafaela chanchin erawh Saitei hnen aṭangin ka hre zauh zauh a, amah ka biak chuan a insawi fihlim nalh thei khawp mai.

Ruati nun hre thui lo mah ila eng emaw tak chuan a tibuai tihna a nia, a fa paina Zosanga nen inneih an tum laia han inawhhlum te chu a chhan tur ka chhui chhuak pha lo. A lehkha hnutchhiahah chuan eng nge in ziak ang? Ka rilrua zawhna awm zut zut chhânna ka neih siloh te chuan ka mut a tichhuak eih lo.

Khumah ka let kual sek a, a tâwp a tâwpah ka nu ka call ta nge nge a. "Ruati kha engvanga in âwkhlum nge?" Ka ti nghâl tawp a.

"Tunge rawn hrilh che?" Ka zawhna pawh chhâng lovin min zâwt lêt nghal.

"Min hrilhtu an pawimawh lo, in kal ve em? Zosanga i hmu em?"

"Duati, hahdam rawh, i taksa a chak si lova kan lo hrilh duh lo ve bawk che a, naktukah i pain hrilh a tum tho che a.." a ti a.

"Engvanga in âwkhlum nge!?"

"Eng lo a nia, a naupai kha a duh lo a, Zosanga hmai a zah vângin an inneihna tur kha a pawm ve ringawt a ni awm e, thu chiang ka hre chiah lo nain damdawi leh zû a tih pawlh a, a rilru hah nen khatiang thil kha ati ta niawm tak a ni. Ngaihtuah duh vak suh, Zosanga te chu mipa luhlul a nia, a inchingfel em em ang," a ti tel hrâm a.

"Ka khawngaih e a.." ka tum loh deuhvin ka ti sap a.

"I pa Faka te nupa vanduaj zia hi, Zosanga vang vek a ni."

"Puh reng teh suh, Ruati inawhhlum chungchangah pa Faka te an lo zah daihna chhan tur ka hre ve lo." Tiin Zosanga thlavâng ka hauh a.

"Nu i nih ve hunah fa te laka kan rilru puthmang i hrethiam mai ang, in enkawl ṭha la, Champhaiah chuan kan hruai dawn che nia, i nî kan tibuai em mai, Rafaelan car pakhat khalh se la," tiin thil dangah a pakai ta a.

'A ngai lo' tia hnial a sâwt dawn lo tih ka hriat avangin ka hnial duh ta lo. Kan inbiak zawhin zan dar sawmpakhat a pel tawh a, ka muhil thei dawn lo tih ka hria, TV en turin ka tho chhuak ta a.

Ruati hmêl ka mitthlaah a châm reng a, Lawmsangzela te inneih ni a ka phurh te leh kan inbiak dan te engkim ka ngaihtuah chhuak dap. Zosanga rilru tur pawh ka hrethiam a, ka khawngaih ve tho.

A hmêl pa hrâk leh a vun ngo uchuak hauh lova sen deuh te, a bek hmul sîntê-a chhuk raih te leh a sam dum hlap te kha ka theihnghilh dawn lo. Hmangaihna kan chên dun lai nen lam zan tin ka mangah ka hmu lo chauh a nia, vawikhat tê pawh amah ngaihtuah lova muthilh ka neih awm ka hre hek lo. Ka duh taka ka inpekna mipa hi ka theihnghilh thiang lova ka theihnghilh ngai hek lo ang. Mahse, chumi avang chuan ka kîr leh dâwn tihna a ni lo a, ka natna thlentu mipa hnaih loh hi ka himna a ni.

Sofa-ah ka mu kawm chal a, hlau ru riau e ti lo chuan ka room-a mut aiin ka hahdam daih. Naute ṭha taka ka pai puitling thei a nih chuan ka neih dawn hnaihah ka nî ka chah anga, ka chhungte erawhin an hriat hun hunah hre tawp rawh se tih kha ka thutlûkna a ni. Ka hrilh dawn teuh lo.

'Senior' tia sawi tur ni lo mah ila ka dinhmun khirh lutuk leh ka chhungte'n Zosanga fa a ni tih an hriat hun tur te, nu Muanpuii te nupa mawlh ka hlau, min haw ngawih ngawih mai sia e. Ka sawi loh tur ka sawi vângin an fapain an inchhungkhur a chhuahsan ta si a, min haw mah se ka dem lo. Ka tuarchhuah ni ala thleng ve mawlh ang.

Ruati leh Zosanga te ngaihtuah rauh rauh chungin ka chhing ta vang vang a...

[Keimah Rafaela]

Glass house ah nitin ka awm a, zû ka in tam telh telh a, tlaitin ka in ti ila ka sawi sual lovang. Ka pa'n min khak ta zeuh zeuh bawk a.

"Mama, kan hun lai te ngaihtuahin eng emaw chenah hriatthiamna rilru ka pu ṭhin, i nu rilru a na hle tih i hre dawn nia, in naupan laia ka in ṭhin lai te kha i la hre pha a nih chuan a tlai hma hian sim tum rawh, Ramtei vanga zu in i chîng hi a pawi khawp mai, i dinhmunah ka indah chhina ka hau duh ngai lo che; mahse, duh aiin i in nasa mah mah.." nimin tlaiah duh aiin ka rûi a, bike aṭanga chhuk ṭha hlei thei lo kha, kan in luh dawnah rui lo anga lan tum khân inkuangkuah thân chungin ka lût vei ngial a, min hrechiangtu ka nu leh pa hian hai mawlh hek lo. A tûk zîng aṭangin councelling class ka kal ngar ngar. Ka nin tawpah dawr nghãk turin ka chhuahsan tawp.

U Duati an transfer dawn avangin Champhaiah kan chho vek dawn a, thih hrehin ka hreh, Diktei ka hmu tawh ngai lova min be ngai tawh lo bawk. Hmanni tlaia ka tih dan kha ka inthiam chiah lo nain ngaihdam erawh ka dil duh chai lo.

Zan tina min betu leh whatsapp aṭanga min wish ziah tu a ni a, tlêm chuan ka khua a har ru ve deuh. Ngaihtuah loh ka tum pawh hian a hmêl fai vang leh min tlânchhiatsan lai kha ka mitthlâah zuk lang ziah a, biak hmasak ka tum ngai lo.

Tlailam in tur ngaihtuah tuma ka chhuak chiah chu Zosanga chak lutuka rawn tlân nen kan intawk a, rem leh rem lova min rawn koh chuan mak ka ti deuh!

"Rafael, lo lêt la inbe lawk teh ang," hlauthâwng hmêl a put bâkah a lan dan a dik lo rêng rêng.

Car hung remin kan dawr kawta min lo nghahna lamah ka phei a, a hmanhmawh hmel nasâ.

"Ka rualin lokal rawh, Ruati a thi.." a ti sup a.

"Eng a..?"

"Tun mai khan Ruati a thi tih min rawn hrilh a, min lo zui ve rawh," tiin ka darah min kuah a, a hlauthâwng hmel chuan min ti hrilhhai viau. Ruati leh Zosanga an inkawp ṭhin tak. Inneih an tum bawk, ka harh deuh kâwkin ka hria.

"Ruati leh Ramtei best friend anni a.." ka ti nghut a.

"Chutiang sawi a hun lo, tikhan min zui tawp rawh, ka ṭhian ṭha i ni a, ka unaupa i ni bawk, keimah chauhva min hmachhawn tir loh ka beisei." Bike ati nung nghal a, zui loh chi ninghal lo chuan.

Chak zetin Ramtei te veng lamah min tlânpui ta a, a thih chhan pawh ka zâwt tawh bik lo. Jam-ah kan tâng deuh reng a, a phun sup ri hriain, "Hlauthawng mah ta che, a hun takah kan thleng em em ang," tiin ka hnêm a.

Ka nupui turin min phatsan mah nâ ka ti a, ani lehzel thihna avangin an innei thei dawn lo tih ka hriatin thinlung takin ka lainata ka tuarpui bawk.

Ruati te in kan thlen chuan mi an lo zi nuk nuk tawh a, Zosanga an en duh khawp mai. A hmun kan thlena kan thu hriat chuan min dêng na zual. Ruati chu thih pangngaia thi ni lovin a lo inâwkhlum chu niin! Zosanga hmêl dâng sâwp sâwp ka hmuh chuan a tider lo tih ka hria; bâkah Ruati thih dan a hre lâwk lo tih ka hre nghal bawk.

"Bro, insûm rawh aw.." a hnungah ka bêng thak a. Police lamin a ruang an la thla mek a, mipui luh an phal teuh lo. Kawngkhar inhawng huau aṭanga ka hmuh hmasak ber chu Ramthansangin a ni. Famkima dârah beiin a ṭap tlawk tlawk a, hun dang chu nise ka khawngaih ngawt ang; mahse, tun hun a nia, a ṭhianṭha ber leh kan inneiha best atana hman a tum ve ngat Ruati thihna hian a dêng na khawp ang le.

Ruang en an phal lo tak nain Zosanga erawh an rawn ko nghâl nalh a, Forensic-a thawk a nih bâkah a nupui ni mai tur a nia an dang ngam lo. Zui luh pawh ka tum bik chuang lo va.

Ramthansangi leh Famkima inkuah chuan ka thinlung a tawk zar mai. Duat taka ka kuah ṭhin, tihchhiat ka phal ngai loh; vawi tam hun remchang hmu chunga sex ka hmanpui phal loh kha mipa dang fa paiin min phatsan tih ka hrechhuak nawn awn awn a ni ber.

Tun hunah tak hian ka kianga ding tur hmeichhia ka va han mamawh si êm. Mal takin mihring vei sup sup kârah ka ding a, ruang pawh an rawn la chhuak ta. Postmortem tur a nih vângin an phur chhuak leh ta a; Zosanga nen kan zui tâk vângin Ramtei te ka hmu zui ta lo. Zanin hian tlaivarpui a ngai dawn a, ka ṭhiana hi hawsan chi ni hek lo. Ramthansangi te hmel ka hmu zankhua dawn a nih hmel a.

(Darkar 6 hnuah)

Zosanga duh danin hotel hnai berah kan inhnawh puar a, a ṭap lova a ṭawng mang lo bawk. A mizia ka hriatchian êm avangin ka phunnawi lo a, a awm awmin ka awmtir tawp.

Ka rilruah thlarau sual hnathawh a rawn lût pek a, Ruati te ina kalpui tur a tan Diktei sawm ka tum ta a, a vawikhat nân ka call hmasa ve ta. A pick lawk lo lehnghal a, vawihnihnaah a rawn chhâng ta chauh.

"Tunge aw..?" Nelawm tehchiam loh hian min rawn chhâng a.

"Dikte, keimah..."

"I aw aṭangin ka hre thei lo che, ka dah mai dawn. Hmelhriat loh ka be hman lo," ati hmak a.

"Lalrindik, keimah Rafael Remruattluanga," ka tih nghut chuan a ngawi ta vang vang a.

"Zosanga ṭhiannu a boral a, ka rualin lokal ve rawh.."

"Ha, ka hman lo ang tih ka hlau khawp mai, ka ṭhianpa ṭhiannu a boral ve a, kan kal a.." dam thlapin min chhâng a.

"Ka lo hruai ang che, inah lo awm rawh,"

"Inah ka awm lo, kan chhuak daih tawh, a pawi khawp mai, min lo hriatthiam theih chuan mitthi in kawtah ka awm tawh a, ka dah ang e.." ka chhânna pawh nghâk lo hian a dah nghal hmak.

A mizia a la ngai reng. Dam thlap angin lang mah se thin tertek a nei tih ka hre tawh a, hruai ngei ka tum ruh tlat, Ramthansangin runluih nân hrim hrim leh amah hnaih ka duh vângin.

Kan in ei puar hnu chuan Ruati te in lamah kan chhuk leh ta a, ṭap thâwm karah inchhung panin kan inzui lût ta a. Zosanga bialnu thih chhan chu damdawi leh zu a tihpawlh vanga rilru kal sual a ni daih. Ka ṭhiana zak hmel hian hmeichhia ka huatna a tipung sawt.

"Rafa, rei lo tê ruang kîl ve ang aw.." tiin ruang awmna min panpui a, innei mai tur anni bawk nen a chhungte'n ṭhutna an lo kian dial a, kan va ṭhu ta a. Mipa na nâ na chu a ṭap miah lo a, a rilru a na hle tih erawh ka hriatpui thung.

Ṭawng chiamna hmun a nih lih avangin ka ngawi ngur a, hnuai lam ka bih deuh tlat. Min en en rengtu awm ang tlata hriatna ka nei a, zawi muangin ka dâk chhuak ve ta a. Kawngkapui hnaih lam ṭhalai ṭhutna tlar hmasaber dawttu-a ṭhu mitmeng bial kal nen kan inmelh ta rân a.

Lalrindiki kalna hmun leh ka kalna a thuhmun, ka mit lasawnin a kianga ṭhu mipa chu ka en leh a, kei ai chuan a upa zawkin ka ring, tlangval sam kir deuh bap nen an ṭhu dun a, mipa chuan a beng bulah eng emaw a sawi sap sap reng bawk.

An pahnihin ngun fê hian ka melh a, Ramthansangi te nupa an rawn lût ve chiah bawk a, a naupai a langsar viau, ka enna lam chu Lalrindiki pawhin a en ve tih ka hria a, min rawn melh kher. He nu hi engtin emaw tak ka la ti dawn khawp mai.

Ka phone phawrhin whatsapp aṭangin ka va be ta a.

"Pâwnah lo chhuak lawk teh, ka be duh che.." tih tê mai hi.

"Min hai a ni ang, hmannia bazara i hruai kha ka ni lo aw.." Min reply na ka hmuh chuan ka ner ru sawk a.

"I nih loh avang khan min rawn zui rawh ka ti rêng a ni." Amah ka va melh pah a, a tûm hmak. Ka mitmeia min zui tura ka tih chuan a kûn daih a, Zosanga hnenah ka chhuah tur thu leh ka rei lovang tia tiam chungin ka chhuak ta a.

Lalrindiki erawh a ṭhutnaah a ṭhu ngar a, min en tawh lovin a bula ṭhu pa nen eng emaw an sawi.

Min rawn zui chhuak lo a nih chuan kawng dang ka dap chhuak leh tho vang.

"Keimah Rafaelan ka be duh a nih chuan ka be mai tur a ni. A lakah Rilru kâwi ka pu pawh nihlei lo."

Ramthansangin ṭap ri hian ka luak a ti chhuak. Ani lo hmeichhia an awma ka tawng a ni tih lantir ngei ngei ka tum bur..

Chumi atan chuan Lakrindiki hi ka thlang fel ta....

B+>[BeckirafARenthleI]<+®®

THE RAPSAGYAN FAMILY

Becky Rafa Renthlei

Chapter-19

[Rafaela & Diktei]

Ruati te in kawt, thim chinah ka ding a, Lalrindiki lo chhuah hun ka nghâk a. Minute 15 lai ka nghah hnuah pawh a la rawn lang lo cheu! Whatsapp aṭang bawkin ka va be leh a.

"Lo chhuak rawh, ka nghâk reng che a nia," tia ka va biak chuan min reply lawk lo.

"I lo chhuak dawn nge, mi mitmei veng miah lovin ka rawn hruai chhuak dawn che"

"Lalrindik." A zâwn zatin vawi thum ka thawn a, a en ve ta ṭâwk.

"Duh duha i koh chhuah theih ka ni lo." Leh tlat mai a.

"Ok, ka koh chhuah theih i nih loh chuan a ṭhat chu.." Ruati te tuizêm dahna bulah ka phei a, ka hmai ka phih fai vang a; zanin hian zu far khat pawh ka in lo va, ka chhîp sam sei lam deuh ka bin hlâwm tawp chu tuia tihuhin uluk zet hian ka siam a, a lo chhuak duh lo a nih chuan tih dan dang ka hria alawm.

Ṭhalai thî a ni bawka mi an tam viau, mi hausa chhungkua tih takah an in leh an kawt, an ṭhenawm te in thlengin a khat nghûk a, Lalrindiki luhlul reuh zia ngaihtuah chhuakin ka nui suk.

In chhungah ka lût leh ta a. Zosanga pawh ruang kîlin a la indawm kun ngar ngar. Kei erawh ka ṭhianpa bula lêt ta lo chuan Lalrindiki te ṭhutna lam ka pan phei a, vanneihthlâk deuhvin a bula ṭhu hmeichhia kha a lo awm lova rang mangkhêng hian a ṭhutna âwl ka luah ta a.

"Rafael..." a lo ti sap a.

"Yes," amah en lo hian tlêmin ka ṭhut hnaih hlek.

"Insawn rawh, Apuii kha a lo ṭhu leh dawn a nia," min melh râm râm a.

"Tû ṭhutna bik mah a ni lo, a âwl apiangah kan ṭhu mai tur a nia, i ṭhiannu chu a lo ṭhu leh duh a niha min rawn pan chat chuan kan pahnihin kan kian dawn nia," a beng bulah ka va phun sup a, a ner sak. Sam kir bepbup pa hian min en duh riau; 'Ṭîk' pawh a lo tih vaih chuan ka ṭeu hle ang.

Zai a kal lo hlê maia a khât tâwkin ṭap thawm a awm leh zeuh zeuh ṭhin a, zan lai a ni ta. Zosanga a ṭhutna aṭangin a la tho chhuak miah lova police in a kuta envelope an hmehbel kha ka hmu reng. Eng tak ni ang maw! Ka lakah zêp a nei khât viau ṭhin kha a ni a, kha thil pawh kha min la hrilh ngei ka ring.

Diktei nen kan ṭhu dun chu min rawn melh zauh a, ruang kîl ka duh rualin Ramthansangi te nupa an ṭhu hnai lutuka ka thâ a za lo.

"Rafael, Dina nen hian kan zung lawk dawn a nia," Diktei'n atih chuan ka ngaih dan a ni leh ta lo.

"Ani kal tel kher a ṭûl lovang ka hruai ang che," ka ti nghut a. Eng vânga hauh ta bur nge ka nih?

"Lutuka che, ngawi renga thawhsan tawp aiah che polite chhuahin ka hrilh che tih inhria la min zui duh suh," min ti lêt erh, zâi thâwm ring viau lo se chuan a râwl a ring ngawtin ka ring.

"Lokal rawh," tiin a kutah ka vuana Dina atih pa lam hawi chung hian, "Keiman ka'n chhuahpui ang e, kan ṭhutna hi lo zuah la," ka tih chuan a mitmeiin Diktei a râwn a, Diki warning nân a kutah ka lo hmer vak.

"Din, kan lo lêt har lo ang," ati ta nge nge a.

Ka ṭhutna aṭanga tho chhuakin Diktei kutah ka la vuan tlat a, a ṭang ṭung nia! Mipui kan paltlang dawn avangin ka vawnna ka thlah a, ka hnungah min rawn zui ve ta. Tuma mitmei vên ka tum lo, atu amah ka en hek lo.

Pâwn kan thlenga Vantlâng zun in lo chu pan mai tur a awm si lova a tîm deuh a ni ngei ang, a ding chat a.

"Hey, kawngkhar pawh a awm si lova mi an lokal ang e," min en chho hâ a, a sam chhâwllêng chuan a hmâi a zar nge a kutin a hui kiang a. A hmêl fai vang leh a mit hnawih dum lam deuh chu a inhmeh ang reng. Lalrindiki hi nula hmelchhia a ni lo rêng a ni.

"A ho lutuk, hmun dang pan tur a awm si lo a.." ṭha takin ka chhâng ve tlat.

Mi inah luhpui dawn ila Veranda velah ṭhu an tam bawk si.

"Hmun dangah kan kal mai dawn em ni?" Ka tih chuan a zun chhuah tawh thu a sawi leh lawi a.

"Lût rawh, ka lo vêng ang che." Tiin zun in hnaihah ka kal puia a hreh hlê tih a hmêlah a lang reng.

A zun a chhuak tawh ngang a ni ang, min huatna leh ngeina dah ṭhain a lût ta a, eng mah sawi sel lo hian midang lokalin an hmuh mai loh nân zun in kawngkaah ka din hliah a, ka nuih a za deuh. A chhan chu hetiang ka tih hi a ngai ang tih rin ngaih pawh ka hriat si loh.

A rawn chhuah leh chuan zak hmel a pu deuh a, êngin a hmaiah a chhun raiha a mitmeng dam raih leh a biang sen deuh ṭân te chuan ka mit ala hlê.

"Dikte..." hnaih hrat pahin a hming ka lam sup a.

"Lût ang, rei deuh chhuah a mawi lo," tia min kalpelh a tum chuan a kutah vuanin, "Bul ṭan kha ka duh e," ka sawi chhuak ta.

"Ka duh tawh lo." A ti hmak a.

"Engvangin?" Ka vawnna thin thlâk tuma chêt a lâk chuan ka vuan nghet sauh a, "Hun ka pe che a, ka tih ngai hauh lovin a vawikhat nân ka hnaih che; mahse, min tih lêt dan chu i hriat kha.." a rilru a nâ tih ka hria.

"Ka tihpalh, bul ṭan ila kan thei ta ngang lo a nih chuan thuhran nise..."

"No, Rafael..ka rilru ka thlâk tawh.." ati tlat.

"Rilru thlâkna hman ala awm lo, kei ngei pawhin ka thlâk lo a nia, Lalrindik, ka duh che tih hi vawi tam ka sawi ngai lo se.." ka tih chuan ka mitah chiang takin min en a, "I rûi em?" Zuk ti a!

"Rûiin min hria em ni?" Ka nui nghal suk.

"Ka hriat loh vânga zawt che ka nia,"

"I hriat duh chuan.." tih pahin a inrin hman hma hian a kâwngah kuahin ka lamah ka pawt hnai a, ṭawng tuma a âng zuau chu a hmuiah ka fawp ta a.

Rei erawh a ni lo. Kan awmna hmunin zir miau hek lo le. Ka thlah nghâl vat a,"Zu rim i hria em?" Ka ti hniam chhak a.

"Aih hre lo, eng lo..."

"Rui lo hai lova ka fâwp che a nih chuan ka duh che tihna, zû ka in miau loh avangin ka nam lovang.." ka inringtawk kher mai.

"Chhe siah.." a nui sak a. A lâi hmêl ka hmuh chuan ka nuih a za hle. A hma khân engvanga belhchian tum lo nge ka nih le!?

"Lût tawh ang," tih pahin min hnungchhawn nghal a, a puan bih a siam ṭhat chuan hnunglam aṭangin a kâwngah ka kuah a, "Remruattluang, a hun lo.." bah naka tiin ka kut min dah sawn sak a tum a, mak takin ka thlahlel thar riau maw le!

A rimtui hman rim pawh ala ngai reng, a tukkhuma hmai phûm chung hian a sam ka hnîm vang vang a, a shampoo hman rim ka hnârah a châm veng veng. "Dikte, zanin hi kan bul ṭanna ni rawh se aw.." tia ka sawi nawn leh chuan a ngawi reng.

Chumi hnu chuan eng thâwl ru deuh hian Ruati te in lamah ka pheipui leh ta a. Nu leh pa an hâw ṭan a, ṭhalai deuh hlir kan awm a nih hmel. Ruang bula ṭhutna la âwl ka panpui chuan a tâwi khawmuang hrat a; ka haider sak hmiah.

Zosanga bulah ṭhut hmun ka rempui ta a. Kan ep chiaha ṭhu te chu Ramthansangi te nupa anni.

Makti hmêl taka min enna chuan ka ngêng a chhun eih lo. A ṭahna mit a bûi chûk a, a hmelṭha tak ṭhin kha a dul raih bawka ka nupui nimai tur ka thlazar hnuaia hlim taka awm thei khân min phatsan tlat si a, amah vanga ka rilru nâ kha dam kim lo mah se a hma ang em em kha chu ka ni ta lo deuh.

Rei fê min en hnuah Diktei a en leh a, kei min en dan leh ani a melh dan chu a hrang hlauh. Huatna mitmengin a ni a en ni. A huat ngawtna chhan tur a awm lova Diktei zia leh a mize inpersan em em te chu ka ngaihtuah mai mai.

Ramtei hi a nulian pangngai viau a, a hmel pawh a ṭha, nitin dâwr nghak ṭhin a ni a, a inchei peih viau bawk. Mahse, ngun zâwka ka en hian tun hma anga hlim hmel kha a pu ta lo deuh chuan ka hria; a boruak tawnin a zir loh vang tepawh a ni thei tho a.

Amah aiin Diki hi a la sâng zawka tlêmin a chêr deuhin ka hria. An pahniha ka han khaikhin chhin pawh hian Diki a lawr ta zawk tlat a, rilru nghet pu a kawp ngei tumin rilru ka siam ta. Tun maiah theihnghilh thei dawn lo mah ila hmalam pan ka tum miau chuan engvangin nge ka theih loh bik ang.

Famkima'n Diki nen min emtawn zak zak a, he pa hi vawikhat tal hnek lova chhuah ka ui mang e; mahse, anni vânga mualpho belh leh ka tum tawh lo. Zâi thawm a reh a, chhungkaw lam aṭanga thusawina hun an hman chhungte chuan a rûkin Diki kut ka vuan zâl zâl a, a ṭang ngam teuh lo. Ruang kîlin kan ṭhu miau sia. A nuam letling phian.

A hma a min ngaihven lai khân lo be ṭha ila tun ai hi chuan kan inpawh âwm daih sia, ka lo â ngawt mai, Ramtei deusawhna ni tho mah se amah hian min hîp ve hrim hrim ni ta berin ka hria. Hmeichhia ka en chhin lehna tur tepawh a ni mahna.

Dâr khat velah ei tur an rawn sem a, Zosanga'n eng mah a ei lo. Mûk taka inngaihtuah a ang mah zâwk, ka khawngaiha ka lainat viau rualin tih vak ngaihna ka hre bik si lova han ṭawng chiamna hmun lah a ni hek lo. Refreshment lam a zawh hnu chuan mipakhat hi kan bulah lokalin,"Rafael, zâi hi han kai hruai ve tawh teh u, zai a har em mai," a rawn ti a, ka duh teuh lo.

Ka hnial viau pawha min nawr luih deuh tâk tlat si-ah chuan Diktei ka hrilh ru a, "Hla châng lo sawi rawh aw, bial zaipawla kan awm lai pawhin i sawi ṭhin kha," tiin ka sawm ve leh chhâwng a, a duh lo nasâ.

"A ang lo lutuk, Dina te bulah ka va insawn ang e, zâi chu va hruai rawh," ati awlsam êt a, kalsan ka duh bik si lo. Min nghâk anga an lan tâk tlat si ah chuan ṭawng mar mar thâwm a rawn awma hreh takin zâi hruaina lamah ka phei ve ta nge nge a. Zosanga bulah Diktei ka hnutchhiah ta ringawt a, ka inthiam lo viau.

Bial zaipawlah hun rei fê ka conductor tawh a, Aizawl veng hrang hrangah hla kan rem fo ṭhin. Ka hriat miah loh te pawhin min lo hre nawlh a, zanin pawh hian ka nun buaichuar hre zîktluak si lovin min rawn hmehbel a nih ka ring. Tlânchhiat duh viau mah ila ka chungah mi mit a fu tlat a, ka hnial duh ta lo.

'Khawvel hi bo mah se Isua ka nei' tih hla fân raiha ka'n sakpui tâkah chuan ṭhalaiin min zâwm ṭha viau a, zâi pawh a kal ṭan e. Zinglam dar li thleng teh meuh ka zâi tluan zaka ka hrawk a thîp hlur. Ka zai lohna a rei ta deuh atin ni.

Diktei pawh ala haw bik lo. Dina atih pa bulah khân a ṭhu dawn emaw ka ti a; mahse, chutianga ti ta lo chuan Zosanga bulah a ṭhu tluan ve tlat! An innêl em em pawh a ni lo a, hei tak hi a fel ka tihna a ni rêng bawk. Ka âw a chau ve ta deuh bawk nen min rawn thlâk ta a, ka lawm kher mai.

Khua avar a, Diktei kan ruala kal a nih loh avangin a ṭhiante ruala haw a duh thu a sawi chuan ka phal lo deuh dâwn a; mahse, car ka keng si lo a, Zosanga nen kan haw rual a ngaih vângin ka dang ta lo. Ui ru ṭeuh chung hian ka thlah ta a, a ṭhianpa Dina nen inhmel hriattîrna min nei a, ka rin loh deuhvin a ṭhiannu bialpa lek kha a lo nia ka nui suk.

"I tân kha nu kha a ṭha rêng a ni, chhuah tawh miah suh," Zosanga'n ati ngial a. "Vawiin lamah ka ṭâwiawm leh law law ang che, a thi tawh chu a thi tawh nise rilru tihnual miah suh aw," ka tih chuan min en vang vang a, "Rafael, i puihna ka la mamawh dâwn chauh a nia," bike tinung pahah tiin lâwn turin min mitmeia a sawi awmzia ka hre chiah lo nain, "Tehreng mai," tiin ka chhâng ve tho.

Chumi nî nilêng chuan Ruati te inah kan awm a, vûina hunserh zawha thlalâknaah pawh ka tel ve thlap. Zosanga an en hrek hrek a, Ruati râi thu an hre fur bawk nen ka ṭhiana tân khawhawi ngaihna a vâng ngawtin ka ring. Khatia Ramteiin min kalsan lai kha ka chan a, thihna phei chu a nat dan tur ka mgaihtuah thiam pha lo.

Thlân khura kuang an thlâk meuh chuan Zosangmawia, mipaah pawh inla pa lehzual mit aṭangin mittui a far kauh a, ka hmuhhmaih bik lo. "Pathianin i ta tur dik tak a la pe ang che," a hmaa ama'n min hnemna ṭawngkam ngei ka chhâk chhuah chuan a thaw hawk.

"Ka hmangaih lova, ka khawngaih a ni." Tih chiah a sawi. Mak ka ti naa ka sawi chhuak lêm lo.

Champhaia kal tur ka ni tih inhre rânin zan lamah lan ka tum tawh lova Diktei te inah kal ka duh tlat.

"Naktukah zin ka ngai sia zanin chu ka lokal thei lo ang aw," In lam pana kan kal laiin ka sawi chhuak ta chauh va.

"Mahni chauh chuan ka huphurh asin," tiin ka zinna hmun tur leh eng nge ka tih dawn tih te, ka châm rei leh rei loh tur min zawt vek a.

"U Duati an transfer-a, ka nu leh pa nen kan dah chho dawn, amaha in luah tur a ni si a, nihnih khat kan châmpui ka ring," ka tih chuan a hmêl a danglam vek.

"Duati an sawn maw!?" Ati hû a.

"A hrilh miah lo che mi, nangni pahnih hi in lo inbe ngai tawh lo tak tak elaw,"

"Be ngai lo, i û chanchin eng mah hriat ka nei hleinem, min haw êm a, chuvang alawm min puih ka ngai ang ka tih rêng, tunah chuan thil sawi vek a rem lo, ka thlah ang che," ati a.

Kan in lam pana kan tlân laiin, u Duati luhlul a tih thu leh ka nu a ngei thu te a sawi a, "Kei chu vanduai tur rênga piang ka ni aniang, ka nu tak hre lovin hun rei tak ka awm a, ka duh ber nei thei lovin ka awm leh a, nu leh pa in chhuahsan ka ngai bawk a, hna ṭha tak ka nei hman hi Pathian malsawmna ka dawn chhun a nih hi," atih phei chuan ka khawngaih ang reng. An buaina te kha ka hre ve bawka ka nu a ngei pawh hi a âwm tho mai. Huatah ka lâksak duh lo.

(Darkar li hnu-ah)

"Lo lêng rih lo mai rawh aw, ka nu te an inhmukhawm dawn a," Diktei message ka chhiar chuan ka ner sawk a, ka down vek.

"Lo kal ngei ngei ka duh asin, naktukah zin ka tum a." Ka tih chuan, "I lo haw hunah kan inbe dawn nia, bâkah sawi vak tur pawh a awm lo." A rawn ti leh kher. Ka lakah a rilru ala hmin zân lo tih ka hria a, ka dem lutuk lo. Hmannia ka ṭawngkhum dan kha a mawi chiah lo deuh bawk a.

"Ka hmuh ngei che a ngai, ka lokal anga rei lo tê rawn chhuak lawk mai rawh, a bâk ka phût lo." Ka ti leh ṭâlh a. Min chhâng duh tawh miah lo nia. Sual thiam reuh sia, a kum phû lovin a fing reuhin a nia ka rin. Kei ai chuan a nau hret.

Shirt dum hain Jeans pawdâng ka inbel tawp a, MK jacket hâk mai theih turin ka pai bawk. U Duati car kawl tur hi ka khalh khât tawh dawn sia tiin ka keng chhuak ta a, zan dar ruk a pêl âwrh chauh.

Zosanga'n a in luaha kal hmasa tura min tih avangin a la hma bawk nen chu lam pan chuan ka inkhalh chhuak ta a.

Quarter lian vak lovah a lo inbeng muk angreng phian!Ramhlunah ama pualin in a nei a, an la sa zo lo deuhin ka hria. Zu a in zeuh zeuh tak nângin rilru a nei riau a, nu Muanpuii fa tak a ni lo tih a inhriat hma daih khân tuna an in pui hi Lawmsangzela kutah awm se a niin in hrang chan a lo tum diam tawh.

Kei erawh fapa mal ka ni si a, ka nu leh pa, ka farnute pahnih tân ka awm a ngai thung.

"Ka rin aiin i hmâ!" Tiin dawhkâna whisky ûm min kawh hmuh zauh a, in ka tum lêm lo. A la in tam lo a ni a khat thuâk

"Zanin chu dry a ngai.." ka ti vei ngial a.

"Innu khân in a phal lo em ni?" Nui kur kur chunga min zawh chuan, "Phal leh phal lo tur pawhin kan inkawp ṭan dawn chauh," tiin a hmâa kan boruak kha ka hrilh thuak thuak a.

"Chuti chu ngam deuh salha i chêt theih nân nokhat in rawh," zuk ti ṭâlh a.

Min nawr sek sek tâkah chuan ka'n in leh hrâm kha. Ka in tam lo mai pawh a.

"Ruati nen inneih hial kan tum tâkah chuan tiin bungrua ka leikhawm a, lehlamah chuan hmuh an hrehawm," a rûi lungpuam ṭawng mah ni se ka hrethiam lutuk tlat.

"Ka hmangaih lo i ti sia, neih i tum tho si,"

"Ka mawhphurhna hlen chhuah nân, fahrah siam ka duh loh vang leh i u Duati'n nei tura min tih vâng a ni." A ti ta a.

"U Duati ṭhin hi a.." ka ti nghut a.

"Rafael, i û hi ka duh tih i hria tiraw, Ruati râi lo se chuan Duatbiki ka kalsan lo tawp ang," a aw aṭang chuan rilru pik leh na tak tuar ni maiin a lang. A han koh dan te rêng rêng chu...

"Hus! U Duati nen maw.." ka nuih aza hlê a, a fiamthu emaw ka ti zâwk.

"Nui ringawt suh, Ruati a râi tih kan hriat hmain kan inkawp ve zawk alawm, ka nau nupui neih ni khan kan boruak a dang ta veka Ruati'n i û hnenah eng eng emaw a lo sawi a, a ni'n a lo khawngaih sia min nawr ngat ngat." Thutak zeta atih chuan mak ka ti ru viau.

"U Duati chu bêm ṭha leh la, i duh viau te chuan," ka ti liam puat a, "I û luhlul zia i hre lo a nih kha," tiin a tlângpui a sawi a, ka nu pawh a sawi kâi leh a, Zosanga hi ka û tân ka iai miah lo; unaupa neih ka châk nâk lai a.

"Hun han liam deuh se, ṭan min lâkpui ang che," no khat dang min thlitsak leh pahin a ti a, ka nui suk ringawt.

Dikteiin min lo call ta a, an in bula dâwr kawta min lo nghah thu leh dârkâr khat vel a hman tur thu a rawn sawi chuan ka hlim veng veng.

"Ka kalsan mai ang che, nangpawh kal tawh rawh." Dikteiin min nghah thu ka sawi tel hrâm a, "Kalna tur dang inneih loh chuan in hi min lo nghahsak ula ka lo haw har lovang," ati ve ngial a, rem châng ka va'n ti tak.

Amah nen kan chhuak rual ta nghe nghe a, "I inbelh duh chuan" tiin a dahna hmun min la hrilh thlap zui. Min duhsak ṭhin a nia.

Chak zetin Diktei te in lam panin ka tlân chhuak a, min lo nghahna hmun Dawr kawt ka thlen chuan car kawngkhar a luh theih nân ka hawnsak a, zawhna min zawh hmain ka tlân chhuak nghâl.

"Khaw'nge kan kal dawn?" Hlauthâwng aw deuh hian min zawt a.

"I hman rei si lova hnai têah kan kal dawn nia,"

"Dârkâr khat bâk ka hman lo ka tih kha." A ti nghat a.

"Yes, ka hria." Zosanga quarter kawtah car-ka tiding chawt a, a makti hmêl ka hmuh chuan, "Zosanga a awm lo, tumah vênthawn tur an awm lo a nia," tiin car aṭangin ka chhuk a, a hreh hmel asin.

Zosanga ina ka hruai luh chuan a hawi kual hrek hrek a, "Zu rim a nam!" A ti ta chiah e. Car chhungah khân a sawi lang miah lo a, ka nam vak lo a nih ka ring ve ringawt.

"Awihawm loh.."

"Rafael lo kûn hniam teh," a tih chuan thuawih deuhvin ka kûn zuk a, min vawnbeh a tum chiang.

"Eng ati nge i in leh kher a, inrem i duh lo em ni?" Ati ta khauh mai.

"A hmaa ka in lai pawhin min hnar chuang hleinem," fawh tuma ka kûn hniam chuan a thle sawn sek a. "A hma a hma i ti dawn a nih chuan a hma a min ṭawngkhum dan kha ka sawi chhuak ve dawn em ni?"

"Lalrindik, khirh viau suh.."

"Kha leh chen ka dawh che a, engah mah min ngai bik hleinem," tiin Sofa-ah a ṭhu hnak a, ka ṭhu thla ve nghâl.

"Zu in hi ka duh rêng vang a ni bik lo, ka ti laklawh atin ni, ka in chatuan dawn pawh a ni lo a, thinrim phah nâna hman kher chu.." ka ti ngat a.

"Tuna i sim loh chuan eng tikah mah i sim lovang," min en kal a, a thutak hle bawk. "Ka la sim ang chu min nghâk deuh la,"

"Ka duh che ka tih vâng khân min zuam reng reng suh, ka dawhtheihna a pêl lam hret tawh a ni." A ti leh hmak a.

Ka haw ngam teuh lo. A hmaa ka rilru ang kha ka pu ta miah lo tih ka hriat chuan mak ka inti.

"Hun kan nei tlêm si, inhau reng te chu a fair lo," dimtêin a khabeah ka dawm sak a, a tûm bâr tak nain ka fâwp chak zek zek.

Chutah duhthawh leh uar zetin a hmui nêm thep chu ka fâwp ta a, min chhâng duh miah lo. A aia uar leh duhthawh zawka ka fawh zui zêl tâkah chuan dam thlap hian min fâwp lêt ve ta a.

Min duh tih ka hria, kei pawhin ka duh bawk. Mahse, ka nunah thil tamtak a thleng tawh a, ka serious viau angem chu ka hre lo.

"Ka zin hlânin lo rinawm ang che." Ka hmui ka lâksawn rual rualin ka sawi nghal.

"Rinawm te chu ka thiam zâwng alawm, nangpawh i han lerh viau tur a ni lo," a ti ve sap a.

"Chu zawng hlauthâwng duh suh, pakhatah ka lungawi.." ka tih chuan, "Kan la hria ang," ati duh lek.

Mipat hmeichhiatna lam zawnga kawm tumna ka nei lo zaninah hi chuan thil tam tak kan sawi dun a, ani pawhin ka nunhlui pakhat mah a sawi chhuak lo hi fing ka ti a, ka ngaisâng thar riau. A khát tâwka ka fawh leh a âwmbâwr duhthawh taka ka khawih bâk eng mah ka pêl bîk miah lo.

"Keimahah duh khawp lohna i hmuh chuan min hrilh ang che.." tiin ka malchungah ka pawt kâi a, "Zu in leh i sam hi.." a nui var var a, ka sam hi a ngaihthei hlawl lo. Mahse, tûn dinhmunah chuan meh ka tum si lo a.

Kan bul ṭan dan a fuh chho dâwna ka hriat vângin ka hlim phian...Lalrindiki zawng a danglam bîk rêng a ni. Duh huam lo mah ila ka duh tho...Hus!

[Duatbiki of Champhai]

Champhaiah kârhnih ka awm tawh a, Rafaela leh ka pa an haw hmasa a, nimin khân ka nu a haw ve chiah. Ka in luah zîm têah ka tei rak rak a, ka khua a har hle mai.

Ka pi leh pu in min ngaihtuah em em a, ni Arini te nupain min rawn phone âwl lo bawk. Zosanga chanchin ka hre tam lo a, Rafaela khân min sawipui teh a tum kha a nia, ka pehhêl zar zar.

Ka nî bâkin ka naupai an la hre lo chu a nia, insawiselna ka nei lo hlauh hi ka lawm a nia, chaw mumal ka ei thei lo lutuk hi a hrehawmna ber chu a ni.

Zan dar riat a ri tawh a, ka inbual zo inthlâk lovin bathrobe nen chaw ka ei teh ngawt a, mahni-a awm chu inthlahdah a awl dawn hle mai.

Hmelhriat sawi tham ka la nei lo. Ka thawhpui tlêm a zâwng ka hre ṭan chauh.

Kawngkhar kik dat dat ri ka hriat chuan rang zetin ka ding chhuak a, tun ang hunah tumah lokal tura beisei ka neih âwm ka hre si lova ka hlau ru deuh.

"U Duat, kawngkhar lo hawng teh.." kan ṭhenawm tleirâwl Sangsangi aw ka hriat chuan ka thaw huai huai.

Inthlâk tawh lêm chuang lovin ka va hawng nghâl a, nui var var chung hian, "I lo lêng dâwn em ni?" Ka ti a, a hnunga mipa ding ka hmuh erawh chuan mak tih lutuk vângin ka mitsulh thei.

Zosangmawia hmêl chang rât leh mit thim raih chuan chiang zetin min en a, Sangsangi chu awm lo se ka mualpho ngei ang. "Duati, kan lo lût thei ang em?" A ti dul raih a.

Luh tir loh ka duh; mahse, thilmawi a ni si lo, ka chhân hmain an pahnih chuan min kal pêlin an rawn lût ta a.

Bathrobe nen chauhva ka ding chu min enin, "Inthlâk i duh chuan lût rawh ka lo nghâk ang che," tiin Sangsangi hnenah lawmthu a sawi zui nghâl a, ani pawh a chhuak vat.

Zosangmawia nen kan inhmachhawn ta rân mai le..atu amah kan ṭawng lo. Chîk takin min enchhuak dap nia...

Ka thin phu dat dat ri chu a ring lutuka a hre pha hialin ka ring

"Lang lo tura thuhrûk a awm lo angin i zêp hlen thei dawn si lo.." a aw chang fak chuan ka chhungril thlengin a fan chhuak vek a, ka tîm dai mai.

A lokal chhan hre mah suh ila tum mumal a nei ngeiin ka ring bawk. Ni e, engpawh thleng dawn se ka hmachhawn ngam a ngai a ni mai...

B+>[BeckirafARenthleI]<+®®

20-31THE RAPSAGYAN FAMILY

Chapter-20

[Zosangmawia & Duati]

Champhai

Ruatkimi boral aṭang khân kârhnih a liam tawh a, dik tak chuan rilru natna chhan tur pakhat mah ka nei tawh lo. Ka hmangaih lo tih ka hriat chian angin ani pawhin a hrechiang bawk a; mahse, lainatna nei lo tawp chu ka ni bîk lo, a thih dan a mualpho thlâk a, nupuia ka neih mai tur ka fâ pâitu chu zû leh damdawi hman sual avangin a in âwkhlum tih a ni tawp mai.

Mahse, a lehkha min hnutchhiah erawh police hotu ṭhenkhat te nen kan thlîr ho ta kha a nia, pakhat zâwk a chhungte ta tur niin ka chhiar vek tho. Ka inhnamhnawih loh zia pawh a lang chiang khawp mai. Amaherawh chu, khatianga nun beidawnna Ruati'n a lo nei kha ka khawngaih viau. Kha leh chen inkawp ve kan ni a, rilru a kal thui khawp mai.

Duati Champhaiah an sawn tih ka hriat khân ka rilru a mangang titiha min huain min ngei viau mah se ka thinlung hian a thlah thei si lo. Rafaela lamah ṭan ka khawh ta ringawta ka beisei aia ṭhain hna a rawn thawk. A û ka duhzia a hre bawk a, theihtawp min chhuahpui ta rêng a.

"Rafa, khawngaihin thil min tihsak rawh," tia ka ngenna chu a û hruaia an kal khân theihtawp min chhuahpui; mahse, Duati'n a thusawi a ngaithla duh lo tih a sawi. Doctor lehkha a û kawl lai, damdawi ina a awma an discharge-na thlâ min lâksak tura ka ngenna min tihhlawhtlinsak kha ka lawm lutuk tlat.

Ni e, a hma aṭangin ka inringhlel daih tawh. Zû ka in loh pawha ka chau nghulh te leh ka zawi ngawih ngawih ni kha thla tam a la ral miah lo. Ruatin a râi thu min hrilh te kha chuan thlathum a tling thuak kha a ni a. Ruati naupai vâng chu a ni lo phawt. Duatbiki a rai tlata hriatna ka nei miau a, a finfiahna ka nei dêr si lo.

Damdawi inah a awm tih ka hriat khân fiahna neih ngei tumin ka tlân ta chûk chûk a, ka duh ang erawh ka hmu lo; mahse, a hmêl ka hmuh khân a natna nena inrem miah lovin a dawldâng tih ka hre thung. 'Thudik ka hre tho ang' tiin ngawih ka chuh ta zâwk a. Hmeichhiain ka fâ a pâi a nih chuan zêp hlen theih a ni dawn lo tih ka hre ve tho.

Duati Discharge card-a doctor damdawi ziah kha Aizawla ka ṭhianpa ka check tir thlap. Ani puihnain nau a pai ngei tih ka hre ta a, a chhan chu in lama eizawm tur kha raipuar damdawi deuh vek a ni. Nu Mafelin damdawi in aṭangin a hruai chhuak lo tih leh a nî nen an chhuak tih pawh Rafaela kâ aṭang thovin ka hria. A nî hian engkim a hriatpui vek tihna a ni.

Discharge card-a damdawi an chawh hming thlâ la tura ka tih khân Rafaelan eng atan nge tiin min zawt ngei a, mak ati tih pawh ka hria "Ka ngaihtuah êm a, damdawi tepawh ka la thawn ve ang chu," tiin ka inpha hul hrâm. A awih nge awih lo pawh ka hrechuang lo.

Ruatkimi a boral tawha thudik ka hre tawh bawk. Hmangaihzuali lakah erawh ka lawm lo khawp mai. Ka thiam loh ni mah se "Nau i pâi chuan min hrilh rawh aw," ka ti ṭâwk ṭâwk a nia, ka lakah lungawi lo pawh nise zêp hlen theih a inring reng reng em mawni.

Rafaela te'n an rawn hawn san hnuah chhoh nghal ka tum a; mahse, a nu a la châm tih ka hre leh si a, ka nghâk ta kha a nia.

Nimin mai khan nu Mafeli a rawn haw chiah bawk. Ruati boral vêl vângin ka hnaah chawlh min pe a, bâkah a thû pha chin ka nih tawh avangin chawlh min pe rei bawk. On call duty turin min dah zet a; chu pawh an cancell leh a, ruang en dik tur a awma Aizawla ka awm lai a nih chuan min koh tur thu erawh an sawi a, ka hnial hran lo. Kan hnaah hian kan rim lutuk lo bawk.

Nizanah ka nau Lawmsangzela ko vin ka car ka check tir thuak thuak a, Champhaiah ka kal dawn tih ka sawi chuan eng mah min zâwt lo. Mi ṭawng tam a ni lova ka nu leh pa hrilh hre kher lo tura ka hrilh chuan a ngaih dan a ni vak lo. "Mâm, i nun i uluk loh chuan i che fuh lo tulh tulh ang, ka nu leh pa'n an hmangaih êm che hi," a ti sup.

Ka hmâ a thinrim mitmeng alh phât chu zâm map lovin ka en a.

"Ka inah hian eng mah tih tur i nei lo," bathrobe chauh inbela ding Duatbiki chu ka melh reng a.

"Tih tur ka neih leh neih loh chu i la hre dawn alawm, thawmhnaw pangngai va inbel rawh," ka tih chuan rum fê hian min melh a.

"Ka inah thu min pe suh, mahni thutiam zah zo lo mipa hi eng teh ualah ka ngai hleinem," ati sak sak a.

"Hmangaihzual, ka lakah zêp tumin Australia-ah pawh kal la, ka fâ hi ka rawn zawng zel ang," ka ti hmiah.

"Maw!? Eng maw i sawi Zosangmawi?" A aw a fiak ṭhak.

"I pum chhunga nautê kha ka fa, ka siam, ka ta ve tho a ni tih ka sawi nawn chhên ngai suh se, Zosangmawia hi mi â ka ni lo." A dârah dawmin ka sâwi nawk a, hlau hmêl a pu deuh.

"Min khawih suh tenawm pa,"

"Ka khawih i duh laia kan siam kha zêp chatuan tum mah la chunglam khian rem a ti lo. Hmangaihzual, hetiang em ema rilru kâwi hi i put ka lo ring lo asin, thawmhnaw pangngai inbel la inbiak kan ngai, thui tak motor ka rawn khalh a, inbual ve phawt ka duh," tiin ka vawnna ka thlah a, ka bag car-a ka dah la turin ka chhuak nghal hmiah.

Ni e, kei ai chuan a upa zawk a; mahse, mipa ka nih angin ka mawhphurhna hi hlen ngei ka tum bur. Ruatkimi ka hmangaih hauh loh mah neih ka tum chuan ka thlâkhlelh ngawih ngawih Duatbiki hi chhuah ka tum lo nasâ.

Inchhunga ka luh leh chuan hmuh tur a awm lo, a room-ah a ri rak rak a, tibuai tawh lovin ka inthlâkna tur leh towel ka la a, bathroom-ah ka luhsan ta rih.

Ka nun buaichuar leh khirh zet hi tunah chuan hmachhawn hmiah hmiah ka tum tawh a, tû mitmei mah vên ka tum lo bawk.

Fai zeta ka inbual chuan ka harh sawng sawng. Champhaiah hian vawithum ka kal tawh a, Duati nen kan boruak a fuh dawn rih lo tih ka hriat vângin zanriah ka ei sa vek. Kei ang thova luhlul a ni a, kan inṭhen dan ngaihtuah phei chuan min be ṭha dawn lo tih ka hre sa vek.

A in luah a nuam reuh phiana bungrua erawh a tam vak lo. Fridge lian vak lo a awm a, TV tih vel eng mah a awm lo, a luahna a la rei lo bawk nen âwm ka ti ve tho. Sitting room ah Sofa pahnih leh long chair pakhat a awm a, carpet pawh a thar a inphah. Parda pawh a thar ni ngeiin ka hria.

Sofa hi chu anmahni ta hlui kha niin ka hre deuh. Hmeichhia mahni chauhva awm te chu a hlau lo em maw ni.

Room aṭanga a rawn chhuah chuan cotton kekawr leh shirt lian hlup a rawn inbel a, min huatna mitmeng ka hmuh kân hek lo.

"Zosangmawi, hetah riah ka rem ti dawn lo a nia," a ti nghat a.

"I remti emaw remti lo emaw hmun dangah riah ka tum lo. Ka thusawi hi ngun takin lo ngaithla ang che." Tiin ka ding hluai a, tukverh bulah kal pheiin ka kekawr ipte ka zen thân a, ka sawi ngei ngei a ngaih vâng leh min lo dawnsawn dan tur ka hriat loh vângin ka zâmna tih lan ka tum lo.

"Sawi vat vat la chhuak rawh.." a ti leh hmak a.

"I nau pai kha tu fa nge?" Zâwi supin ka zawt ta a. A ngawi reng.

"Eng anga phat kual tum pawh ni la, kei hian ka fa i pai a ni tih ka hrechiang hle a ni. A hma khân Ruati a râi vângin leh min puh tlat avang khân finfiahna ka nei si lova khatiang ang thutlûkna âthlâk kha ka siam a ngai ta a." Tiin ka châwl dat a.

"Tun ṭumah hi chuan i râi tih ka hriat phat aṭangin thutlukna dik siam tumin ka inngaihtuah ngun viau bawk. Ka nu dik tak a thi tawh tih i hria a, ka nu unaunu in min enkawl tih pawh i hre chiang bawk a, ka fa hi keimah anga a awm ka duh lova ka phal bawk hek lo. Min nei turin ka nawr dawn lo che a, i râi thu pawh i chhungte'n an hre hek lo. Chuvangin tihian ka luhkhung mai dawn che a ni, ka tân a mualpho thlâkzia leh Ruati thihna la rei loh zia ka hria, palâi tîrin inneih duh mah ila i nu leh pa'n an remti dawn lo. A chhan chu i nu khân a fanu hnaih lo tur che hian warning min pe tawh tlat a ni. A hmingin hlawh i neia keiin ka nei bawk a, Pathian zarah kan harsa lovang tih ka tiam a che. Ka fa hi nu leh pa tak kârah enkawlna ṭha a dawng tur a ni." Mar pâta ka ṭawng chu uluk zet hian a ngaithla a.

"Luhkhung te chu sawi duh lo mai rawh, tunah khân chhuak mai teh. Zosang, ât so tawh suh," a thinrim hle tih a awkî aṭangin ka hre thei. Thinrima âng hluai chi hmeichhia a nih loh vângin a râwl a ring hran lo.

"Chhuak lah lo e, ka awmna tur hmun dik takah ka awm mêk a ni. Enkawlna ṭha ka pêk theih sâng ber che i dawng ang." Ka ti hmiah.

"Kal mai teh, ka nunah rawn inrawlh lo la, ka tibuai hek lo ang che." Tiin Gas dahna bulah a va ding teh ngawt a, "Ruati boral chu pawi ka tihpui khawp mai che, a ruala sâwn pahnih thlâk thei mipa ka ngaisâng lo mai ni lovin ka ten," a tih zawm leh a.

"Ka kal dawn miau si lova, nupa anga awm i duh lo a nih pawhin i pum chhunga ka fa ṭhang lai ka hmuh theih nân ka hmuh phâkah i awm ang, min hnial emaw kal bo i tum a nih chuan i nu leh pa hnenah palâi ka tîr dawn tih hria la.." a rilru hneh tura ṭawngkam chhâkchhuah ka tum hran lo.

Keima duh dan, rilru ka siam fel vek tawhna hi sawhsawn ka tum lo a, a pasal anga min pawm hma chu a kiangah ka chêng ang.

"Zosangmawi, tenawm chhekeh pa.." rang lutukin ka dinna lamah a rawn phei a, a remna lâi lâiah min chûmin min ham bawrh bawrh nia. Ngawi rengin a che mial mial a, keiin ka dawh tawp thung, ka bân rek phei chu a ham thï deuh nge a thip nghâl vâwt vâwt.

"Eng ang pawhin kut min thlâk mah la, ka Duatbiki i nihna hi bânsan ka tum lo. Ruati thi kha Pathian remruat a nih ka ring, ka duh ber Hmangaihzuali a râi si a.." ka tih chuan a che tâwp chat a, thaw hak hak chung hian chhuatah a ṭhu thla riai riai, ka khawngaihin ka lainat, a rilru ka hliam nasat zia ka hria a, keimah vânga a mualphona pawh ka hre vek. Mahse, ka bânsan thei bik lo a ni.

Dim têa kuahin kaihthawh ka tum a, a lo duh îkhaw lo. "Min tawk suh," ka bân a vai per lawp a, nasa ve tîk têk tak a ni. Ka haw phal chuang lo.

"Ruati thihna pawh kâr tam a la ral lova, zahna châng i hria a nih chuan zak ngawih ngawih tur i ni," din chhuah paha atih chuan ka ner sawk.

Zaninah chuan eng mah kan sawi kaw chuang dawna ka hriat loh avangin ka bag-a Laptop phawrh chhuakin ka charge a, sofa-ah ka riak mai a niang chu. Ka luhkhung tawh tlat si a, rilru thlâk lah ka tum dêr lo.

Chumi hnu chuan room-ah a lût ta daih a, ûmzui ka tum hran lo. A laka ka tihdik loh siam ṭhat nân hun ka la nei tih inhriain mualpho ka pawisa lo va rilru nghet ka put na nâ na chuan min kalsan bikin ka ring lo. Ka nu leh pa, a chhungte pawh an mualpho dawn a; mahse, a fa pâina pa hian ka phatsan loh phawt chuan hlimna kâwl a la ên ka beisei ve tlat a ni.

Ka hna erawh a buaithlâk dâwn khawp mai. Chawlh ka lâk chhung chu khawi mah kal lovin ka awm char char thei anga, ka zawm leh hma ngeia ruahmanna felfai ka siam erawh a ngai dawn ta. Nupui châwm thei lo nih ka duh teuh si lo.

Ka chau ve bawk nen ka lo muhil a ni ngei ang, ka zun chhuakin min ti harh a, Puannuam pakhat ka lo sin thlap. Min sintîr tu ka chian êm avangin ka nui suk a, beiseina thar ka neih belh sauh bawk. Duati hian min duh ve tih ka hria, chuvânga a thianghlimna pawh min hlân a ni tih ka chiang a, a rilru nâ thawi dam tur hian theihtawp ka chhuah ngei ang.

Zing lam dar thumah keimahin ka nui suk suk a, hmeichhia ka luhkhung ang tih hi ka mumang chhâwng thumnaah pawh ka la mang chhin lo. Ka bân min ham pilhna thip sep sep chu enin a hmêl ka suangtuah nghâl a, ka rinawma leh ngaihsakna, ka inpêkna a hriatchhuah hunah chuan min ham tawh bîk nâng.

Khawvar thlengin Laptop-ah games ka khêl ta vêl mai mai a, a û in ka fa a pâi tih leh ka luhkhung tih a hriat hunah Rafaela'n engtin tak ngai ang maw. Ka chhungte pawh an rilru a na dawn a, a chhan chu chhungkaw inpawh leh inngaina tak kan ni a, min rinna tichhiain an fate'n humsual kan dâi ta si.

Duati lo thawh hmain eirawng ka bâwl vek a, keimaha ka awm tâk chinah khan loh theih lovin eisiam ka ngai a, ka thiam ve nual hman. Thil pakhat buaithlak deuh chu hna nei a ni si a, a inah mipa kawl a nei tih an hriat hunah a mualpho ngei dawn, chu chu ka duh si lova tun aṭang hian zawhna ka dawng a nih chuan 'a pasal' tiin ka inhmelhriat tir a ngai tihna.

Duatibiki pasal Zosangmawia, a dik ta thlap e.

"I in a nih loh chuan eng mah i khawih ve a ngai lo, chaw ei la chaw eikhamah haw ang che, i laka ṭhat ka chhuah ve theih awmchhun a ni." Room aṭanga a rawn chhuah rual rualin a ti nghâl a. Mi mah thawk ṭha intih nâk alai a..

A sam thur chhap leh a mit hnuai a val kalh danah a mu tam lo tih a hriat reng.

"Min huatna dah ṭha la, rilru tikhauh tawh suh aw, hetia min tih vak vak hian rilru ka thlâk phah dawn lo a nia," ka ti ve zêl.

A hmai phih laiin kawngkhar an rawn kik a, a hawi phâwk hrâ.

"Duati, vawk chaw ka lo la dawn," hmeichhe pakhat a rawn au lâng lâng a, kawngka hawn sak tumin ka tho chhuak ta a.

"Zosang..." a sawi zawh hmain kawngkhar ka hawng hman.

Nu upa tawh lam nen kan inhmachhawn ta rân a, "Ê, mikhual i nei elaw..." inchhungah a rawn lût a.

"Aw...ih.." Duatin a chhân hma chuan, "A pasal Zosanga ka nia, ka rawn awm ve rih deuh dawn a nih hi.." ka sawi zo chiah, Duati hmai sen ṭâwn ṭâwn leh thinrim mitmeng bial kal nen kan inmelh sak.

"A nih chu, lo inchibai ang, Duati, pasal i nei ṭha vuah vuah hle mai," tiin a nui hak hak a. Nuam ka ti.

A chhuah hnuah hmaisâ ka tawng leh ngei dawn e. A hun lai chuan dawng mawlh mawlh ila, ka dawng kumkhua bik nâng...

[Rafaela & Diktei]

Lalrindiki nen kan inzui ve ta, an inah pawh ka lêng ve ta zauh zauh a, an felin an polite chhungkua a nia. Tunah pawh sitting room balcony ah kan ṭhu dun a, Guiter ṭha zet keng chhuakin ka zâi ngial. Min lo zawm ve zauh zauh bawk a, a kianga awm a hahdam riau.

Zan tina lên a rem lova zaipawl hlazir leh kohhran programme-ah a tel ve duh nen duh angin kan inhmu tam thei lo khawp mai, chhûnah a hman bawk si lo. Zû ka la in zeuh zeuh tho a, min khak ka rin viau lâiin rûi chhia a ka awm a nih loh chuan a ngawi thei viau.

Champhai aṭanga ka chhuk hnu khân nam deuh chungin vawikhat ka lêng a, "Zu hi in suh tih ka tum lo, nangmah ka duh che chuan i zia zawng zawng leh i ruihna te pawh ka duh tel tihna a nia, mahse, ka sawi tawh ang khân insiam ṭhat tum lo leh ruih i thlang tlat a nih chuan dawhtheih loh hun ka nei ang, min duh tak tak tu chuan ka huat zâwng a tilui duh kher dawn lo tih ka chiang si a," a ti tlang hmiah.

"Tûn thut thutah chuan ka thei mai lo," a ngai tê bawkin ka chhâng leh.

"Nangmahah hian ṭha zawng zawng hmuh ka tum kher lo a, chuti a nih rual chuan kan inkâr tichhe thei tur i nunah a bet a nih erawh chuan tihbo tum ve la, keipawh min duh khawp lohna sawi mai rawh," tiin min en tlat a. Zahawm ka ti.

"Min duh em em la a nimai," ṭawngkam ka thiam lo thei si, dam leh fel thlapa min khak hian chhân dan tur ka haihchham tlat zel.

A phone a rawn rik chuan a hmet busy daih a, engah vak ka ngai lo. Mahse, vawithum ngawt a hmet busy tawh a, "Pick ta che, tunge a, ka hriat ve chi a ni lo nge?" Ka tih chuan a ngawi reng.

"Kan inkarah mipa dang an tlazep tur a ni lo. Kei aia midang duh zawk i neih chuan fair takin sawi ang che, ka rinna tichhe suh ang che," ka ti nghut a.

Tîm dai chung hian, "Kan thawhpui Nghaka a nia, min ngaizawng ṭhin a," ati sap a.

"Ani chu i duh em ni, i be ve ṭhin nge?"

"Be ve zeuh zeuh..."

"Inngaihzawnna lam a rawn sawi leh chuan thudik hrilh ang che, rinawm lo hi ka hua," ka ṭhutna aṭangin ka tho chhuak a, haw ka tum nghal.

"Rafael..."

"Yes, ka haw ang e.."

"I thinrim lo tiraw, Nghâka chu ka lo hrilh dawn nia," dam thlapa tiin ka car hûnna thleng a lokal a, "Bul kan ṭan chauhva a tâwp chhe taka khâr i duh loh chuan ka lakah rinawm la i tân ka rinawm ang." Min chhânna pawh nghâk lo hian car-ah la lut ta a.

"I thlen hunah ngawi reng lovin lo sawi ve la," atih chuan ka kiai suk. Min ngaihtuah tih ka hria a, whatsapp tih vel khawih hi ka peih tehchiam loh avangin ka inreport lo zeuh zeuh ṭhin a, a ngaithei vak lo.

"Tehreng mai, min lo nghâk la," car ka tinung nghâl a.

"Naktuk chu min kalpui hman ang em?" A ti teh daih. "Hman ka lo tum ang, bye aw.." siai sak chungin ka tlânsan ta a.

Naktuk hian mo ṭhiana a ṭanna tur a ṭhiante inah min hruai a tum a, ka châk vak lo. Inneih boruak leh a behbawm hian ka hun liam tawh min hriat chhuahtir ṭhin vangin ka phur viau lo a ni. Mahse, kan chhuah dunna hmasa ber tur a ni ve a, ka hnial duh ta bik lo.

Diktei danglamna chu thil a hrethiam em em a, tihtauh tih vel a chîng ve vak lo. Engkim hi a dam zâwngin a thîr vek emaw tih mai tur a ni a, a duh loh naah erawh a nasa ve tih chu ka hria.

Ramtei nena kan chungchang vawikhat mah a la tiri chhusk lo te hi thil mak a ni. Min zawh ka ring ṭhin a, a thâwi pawhin a sawi chhin eih lo. Hetia tluang taka kan inkawp a nih chuan pangngai takin ka chhungte ka la hmelhriat tîr ve ang.

Ka nun dan siam ṭha turin min tur sek lo mah se, a nun dan zahawm ru riau hi ka ngaisânga insiam ṭhat duhna rilru ka pu ve ta deuh..

Lalrindiki hi midang tân ka phal lo tih pawh ka inhrechiang thawkhat ta..rilru nghet nei tur hian hun tam kan mamawh lo tih ka hriatfiah belh sauh....

(Dah loh aiah ka dah hrâm a ni. Ka mit a phê ruai)

B+>[BeckirafARenthleI]<+®®

THE RAPSAGYAN FAMILY

Becky Rafa Renthlei

Chapter-21

[Zosangmawia & Duatbiki]

Champhaiah ni thum ka awm pum ve tawh a, Duatbiki nen kan inkârah hmasawnna a awm lo. A in luah zîm tê-ah chuan min hre lo der ngar ngar a ni deuh ber.

Chhunah office a kal daih a.Kei, inah ka awm thung. Luhkhung hming ka pu ve ta sa sa, a tâwp thlengin beidawng lovin a nia ka beih dawn ni. Beidawnna hi chak lohna chikhat a ni a; ka fa in mipa dang 'apa' tia a koh ai chuan Zosangmawia hian hrehawm tuar a ngai a nih pawhin ka tuar mai tur a ni. Ka tih sual siam ṭha turin khua a la tlâi lo tih ka hre bawk.

Zû ka in ta rih lo a, inlâk fel ka tum em em vang ni lovin zu in hi thil ṭha ber leh harsatna chin felna kawng a nih loh vang a ni.

Ka hnaah chawlh ka nei rei tawh si lo nen ka hun a chêp takzet tawh a, ani lah hi ala luhlul ngâng ngâng mai sia e, a nu leh pa hnenah palâi tirh rum rum ka duh hial tawh.

Tlai lam dâr nga a ri tawh a, ei rawng pawh ka bâwl zo diam tawh a, Duati a lo la haw lo! Ni danga a lo thlen hun a ni daih tawh a, dik tak chuan mipaah pawh 'pa' inti ve tâwk tak mai hetianga tlâwm a ngai ta hi ka ngaihtuah chian phei chuan ka thâ a nâ. Zanin tlai hian style thar ka hman ngei chu a ngai a ni, amah duh huam anga ka lan hian a inluling mai mai niin ka hre ta ber.

Zan dâr rukah a rawn thleng ta chauh a, zan dang angin ka be hmasa duh ta lo a, zanriah pawh ka eisan hmiah. Eng tin nge a awm zêl tih hriat châkin ka mitmei ru zauh zauh a, "I ril a ṭâm tawh em?" a pheikhawk tlawh phelh pahin a ti a. Min be hmasa ve tlat!

"Ka ei tawh,"

Mak tih hmêl taka min enin, "I ei tawh maw?

"I lo haw chin tur ka hria em ni? Whatsapp leh call-ah pawh i haw tlai tur thu i sawi thei," ka ti nghut a.

"Sorry..." inthiam lo ve tak tak te pawh a ang dawn dawn alawm le.

Chumi hnu chuan amah ngaihsak miah lovin Laptop ka bih zui daih a, chaw ei a insiam a, nuam lo ti hmel a pu. Amah ngaihsak miah lova ka awm tâk ngar ngarah chuan ka bulah rawn ṭhu thla-in, "Zosang, hetia chên dun reng hi thil mawi a ni lo tih i hria ang chu maw?" A ti sap a.

"Ni lo e, hming chhiat huamin ka rawn pan rêng che a ni, ka tih sual siam ṭha tur leh kan fâ a fahrah loh nân tiin Aizawl aṭangin ka rawn tlân vang vang a, Ruati kha chu ka nun hlui thil a ni a; nang nen kan inkawp hnuah vawikhat mah ka rinawm loh san che ka hre lo. Mahse, min lo duh tak tak ngai lo a ni tih ka hre chhuak tawh a, naktuk hian ka haw ang e, ka ta tur ni lo na na nâa inbarh luih ṭalh hi ka tum tawh bîk lo." Ka tih chuan, Laptop min khupsak thak a.

"Ka hlauthâwng a ni, Zosang, khatiang rilru natna kha tawn leh ka duh tawh lo," hmalam ding takin a en a, a rilru tur ka hrethiam rûak.

"Tunah chuan ka luhkhung tawh che a, palâi tirh kâwi vel ai chuan nakinah i nau Rafaela phone mai la, ka luhkhung thu che hi sawi vek rawh, ani'n i nu leh pa a lo hrilh dawn nia," tiin ruahmanna ka siam ta a, a hreh hmel khawp mai.

Ka hna chungchâng eng tin nge ka tih dawn tih leh ama hna chawlhsan a duh loh thu a sawi nghâl bawk a, ava khirhkhân tak.

Kan awm dan tur te sawi dunin inneih an rem tih chuan invuan kher lovin ka quarter-ah lo lût ta mai se, tih thlengin kan sawi dun a. Zanin ka tactic hman chu a thawk ṭha kher mai.

Zan dar kua a ri a, a nau Rafaela a call ta a.

"Mâm, Zosanga'n min rawn luhkhung," han sawi mawi leh pehhêl pawh awm lovin a ti nghal tawp a, ka nui suk.

An inbiak danah Rafaela'n fiamthu emaw a ti a ni ngei ang, kei mah min rawn be ta a.

"Zosang, tak tak a ni em?" A'nti nghal tawng a.

"Aw ni e, ni thum ka awm tawh, i û hi ka duh ka tih kha, tunah ka fâ a pâi mêk bawk," tia ka sawi zo chiah chu, "Zosangmawi..." thinrim lutuka tiin phone a off zui hmiah. A harsa ber lai tur kan ṭan ta.

An fanu duat, tihmêlhema an chhungkaw zahna thlensaktu hi min ngaidam duh dawn em ni? Ka nu leh pa an zakin an rilru a na leh dawn mang e. Mahse, Duatbiki hi hloh leh ka duh tawh si lo.

"Zosang, an thinrim dawn mang e, tlanbo mai ang," min rawn hnaih sauh va, ka lo kuah thuai.

"Mizoram zimtêah hian tlanbona tur a awm lo," ka ti sup a, dik tak chuan ka rilru a hah ve tho. Nu Mafeli phei chuan min hua tih ka hria a, Duati'n ka fâ a pâi tih a hriat hunah eng tin tak min ṭawng khum ang maw.

"Inneih an phal lo mai thei a ni," sofa-ah inkuah rialin kan ṭhu dun a, nimin leh niminpiah lam thleng kha chuan amahah beisei tur a awm lo ni hialin ka hria a; mahse, zanin zet zawng a danglam ta.

"An phal loh leh transfer ka dîl ang a, Champhaiah kan awm mai dawn alawm," ka ti awlsam hmiah.

"Ka chhungte hmaisâ tawn ka huphurh a ni," a thaw chhuak hap a, a rilru a hah tih ka hria. "Lungngai lo la, nang mah chauhvin eng mah i hmachhawn ka phal hauh lovang, i tân ka awm tih hria la.."

"Kan la hria ang chu.." a hâm zui bâi bâi a, raino a ni a, duat a ngai tih ka hria, "Khumah va mu tawh rawh, ka hruai ang che," ka tih chuan, "I lo mu ve dawn lo em ni," ati ta khauh mai le.

"Ka mutna tur dik tak a ni a, min phalsak har em a ni," lungawi vak lova ka chhân chuan a nui sak a, "Ka be ṭha duh che hi lâwm hle rawh," zuk ti kher a.

"Hmangaihzual!"

"Ka hmingpumin min ko kher suh, Zosangmawi,"

Kei mahni pahnih, Duatbiki leh Zosanga dik tak kha kan ni leh, a khum 4ft lekah chuan inkuah rialin kan mu ta a, ka luhkhungna man a to teh e, kan inhmangaih thu kan sawi hauh lo; mahse, tisa thil leh a behbawmah kan inrem hle a ni. A taksa chûl lâwr dan dan pahin, "Khawi hmunah pawh awm la, ka Duatbiki leh ka fa hi thlahthlam ka tum lo," ka tih chuan min siai sak a, zak hmel a pu.

Tunah a naupaiin thla thum hmel a hmu lek lek tawh a, tun aṭanga thla ruk a liam chuan, naute hmel thar kan hmuh ve ngei ka beisei.

Chu zawng aia kan buaina chu a nu leh pa leh ka chhungte anni ta. An thinrim kan pal dai thei dawn em ni? Duati an hmangaihzia leh an duatzia ka hre chiang ropui si.

[Zirsangliana In Aizawl]

"Mama, eng maw i sawi?"

Rafaela tukverh bulah a ding a, kan nu Mafeli thinrim âng thâwm a ṭha ngat ngat hle. Kei ngei pawh thinrimnain min tuam hlup hlup ti ila ka sawi sual lo ang. Kan fanu, kan duat leh keh thei dawma kan dawmin ka ṭhianpa fapa fa a pai a nia, mualphona zawng zawng hi kan ta niâwma mawi a ni. Em em a na!

"Ka pa, Zosanga'n a luhkhung tawh ber te chuan innei mai se," ka fapa thu sawi chuan min tithinur sauh thung.

"An innei lovang, zahpuiawm dun lutuk, an duh dan dan hi han tâl phawt teh se, ka ngaihsak dawn lo reng reng, Hmangaihzuali pawh fing awm tê si, âtna thlarau sual dawng pawla ṭan tlat mai," a nu in a tih chuan dik ka tihpui viau.

Faka te nupa an rawn thleng tawh a, anni pawhin ngaihdam min dîl nasâ, a bîkin Muanpuii a inthiam lo em em a, a fapa awm danah, "Ka enkawl dan a dik lo a ni ang e, Mafel, Zirsang, a pawi em mai," mittui tling pap chunga atih chuan kan nu pawh a inbengdai ta deuh.

"Kan fate-ah hian duat leh tih bîk kan nei hran lo; mahse, Duati hi kan hmuh hmasak ber a ni a, a pi leh pute rilru a na dawn em mai, a upa te pahnih hi an nau te entawn tlâkin an nung hlawl lo," Mafeli'n a tih zawm leh chuan Faka a bu nghat nghat a.

Zosangmawia hian a nu leh pa chhuahsanin quarter a luah hrang tawh a, Ramhlunah in sak lai a nei bawk. Nu leh pa thlazar hnuai ni lovah han tâl chhin dun se eng nge an an ang aw. Duati kan hmangaih lo a ni lo a, thu ṭha tam tak kan hrilh chung pawha min palzam lui tlat hi ka fanu mah ni se hrem a ngai a ni mai.

Faka nen ruahmanna kan siam zung zung a, naktukah lo chhuk thla nghal tura hrilh turin leh hmaichhanah thu sawi ka tum tih hrilh turin kan ti bawk a. Rafaela hnenah a û call nghal turin kan hrilh bawk a, ani pawh a thinrim hle, Lawmsangzela te nupa an ngawi reng a, Saitei ram dangah a awm vângin kan la hrilh hre lo.

"Hello, U Duat..." loundspeaker-ah a dah vek a.

"Aw, mâm, i hrilh tawh em ni?" Mut chhuak aw zetin a rawn ti a, keini thinrim eng phiara kan awm laiin anni enghelh nei ṭhak lovin an mu a nia.

"Hrilh e, naktuk zingah inpahnih khân rawn chhuk rawh u, an thinrim viau a nia," a ti a.

"Mâm, chawlh ka la si lo va.."

"Hmangaihzual, i hna teh hrep kha theihnghilh rawh, lo chhuk tura kan hrilh che u a nih chuan min hnial reng reng suh ang che u," Mafeli thinrimin a va chhâng ta a. Muanpuii leh Faka en chung hian, "In thiam loh a awm lo, nun phung an hre lo lutuka kan hrem a ngai, duh duh dana awm tum ringawt mai," a ti leh nghat nghat a.

Saitei ai hian Duati hi a hauh nâ tih ka hria. Rafaela chungchangah kan mualpho pherh êrh tawh a, boruak a reh ṭan chauhva Duati a heti leh si, zahthlak zozai lutuk.

"In thinrim ang tih chu kan ring; kan tihpalh liau liau a ni," Zosanga aw a ni ve ta thung. "Bawiha, naktuk zingah Duati kha lo chhukpui rawh aw," Muanpuii'n a ti dam thlap a.

"Min pawh ṭhen in tum dawn chuan kan lo chhuk dawn lo," Zosanga ṭawng dan chu hun dang nise ka nuih a za ngawt ang. Puitling angin lang mah se, an naupanna a lang fô ṭhin.

Mafeli leh Faka an thinrim fâl a, a bîkin kan nu a ni zual. A lo zirtîr leh a chhuan ve em em a fanu khan sâwn pâiin a mipain a la luhkhung zui. Chutah a fa paina pa, kan chhungkaw ṭhian hnai tak, thisen zawm ang maia kan neih a ni a, chhungkua kan mualpho êm a ni.

Zan dar 12 velah Faka te chhungkua an haw phei a, Zosanga an hnenah chêng tawh lo mah se an fapa a nihna a bo si lo a, thil a khirh telh telh. "Zir, I rilru ti paukhauh ang che, Duati leh Zosanga hi inneih kan phal lo a ni lo a, hrem rih anngai zawk." Khuma kan mut tawh hnuah a ti sap a, a nu anga luhlul tho a fanu hian eng tak dâi thleng ang i maw!

[Dârkar 17 hnuah] Zosangmawia of Segundo

Nizana Duati leh a chhungte an inbiak zawh hnu khân vawikhat mah kan muhil tawh lo. Kei pawh rilru hrehawm takin ka let kual sek a, Duatbiki mittui a tla fap fap reng bawk nen khawvar rualin kan insiam a, eng pawh hma chhawn ngam turin Aizawl pan kan tum ta.

"Zosang, eng tin nge ka hma chhawn ngam ang le, ka nu thinrim a nasa thei si a," khuma kan la mut laiin ka kâwngah min kuah a, hmeichhe chak tak leh rilru paukhauh a ni tih mah ila, a nau pai nen a taksa a chak lo em em a, rilru haha awm tîr chi pawh ninghal lo chuan.

"Eng mah lo sawi ve lo la, kei mah hlirin ka chhâng dawn nia, a nih leh inneih phal lo ta se, i chhungkua kalsanin min zui duh ang em?" Tiin ka zâwt ta a.

"Ih, eng lo, an thu sawi dan azirin, â..an phal ang," a thaw chhuak halh a. Ni e, a rilru vawi tam ka lo tina tawh a, min zui duh lo mah se ka dem chuang lo. Eng pawh hma chhawn thiam tura puitlin zir ka ngai a, Duati hian min phatsan ta a nih pawhin ka thiam lohna chen a awm tho.

Zing dar nga rîk hmain Champhai kan chhuahsan ta a. A front seat-a ṭhu, ka fa pâi mêktu hmêl ngui nghiai ka hmuh hian, kei mah ka inhuatna a zual. Mahse, anih tur ang a ni vek tawh a, inchhirin awmzia a nei lo tih hrechiang tu ve ve kan ni.

Kawng tluanin tihhlim ka tum a, kan hma bâk ko tak hian min uai rit dun hle. Nizana kan mut dun khân sex kan hmang miah lo a, luhkhung mah ila ka rilru a inthiam thei chuang lo. Zu in châkna sualin min beihna chu hneh hrâm hrâm ka tum fan a, rui lo hai lova an chhungkua hma chhawn ngei ka tum ruh hlê.

Nu leh pa inah chaw kaw puar ei ngam lo tur din hmunah kan ding tih ka hriat vângin, hotel-ah zanriah ka eipui diam. Keini pahnih thil tisual hian chaw kan lam ngam dawn lo a, ka quarter-ah kal pawh ni ila eirawng bawl chawp vek a ngai dawn tho tho.

"Duati, i nu a thinrim zual bîk dawn tih hria la, ṭawngkam khat mahin chhâng suh aw, sawi ngai tur leh ngaihdam dil a ngai a nih pawhin ka dîl mai ang," tiin ka hrilh lâwk diam a, hmeichhia hi zawng ṭawng insumkar loh te an ching ṭhin a, thinrim laiin duh loh pui sawi chhuah a awl. Chuvanga hrilh lâwk ka ni.

Kan inpuiah luh kâwi chhan tur kan neih loh avangin Duati te in lam kan pan tlang nghal a, zan dar riat a ri fel âwrh.

"Ka va huphurh tak..." ka kutah nghet zetin a hûm a, a hmai a thlan dap bawk. Kei pawh ka zâm em em a, kha leh chen ka chhungkua, ka ṭhian leh duh duha ei tur ka lam ngamna in chhungah thil tisualtu pahnih kan lût dawn a ni a, mipa mah ni ila ka huphurh ve tho.

Duatbiki lo chênna ṭhin, a pa in kawtah car ka tiding ta dat mai le. Min hmuaktu chu sawi loh, 'Ṭîk' rawn titu takngial pawh an awm lo a, kan car pawh ka hmu tel, ka nu leh pa an thleng tawh tih hrilh hranpa kan ngai lo a; hun dang chu nise min lo chiau-au ngei ang. Mahse, tun hun ni miau hek.

"Zo..." a kut thlan dap chu ka tûai tûai a. "Min ring rawh, boruak ṭha lo a awm dâwn a nih chuan kan chhuak daih dâwn nia," ka ti a.

Kawngkhar hawngin kan lut ta a.

Sitting room êng pup leh zau zetah chuan kan chhungte ve ve an ṭhu kim ṭhap. Saitei tiam lo vin. Ka nau Lawmsangzela te nupa pawh an lo ṭhu ve bawk a, tu mah an ṭawng lo.

"Kan lo thleng..." zawi supin ka ṭawng chhuak hmasa ber.

"Kha laiah khân ṭhu rawh u," Duati pa aw chang fak ri chu hriat a nuam lo kher mai. Inkai rialin ṭhutna tur min kawh hmuhna lam kan pan a, atu amah an ṭawng zawm tawh lo. Duatbiki a khûr dar dar a, ka dam chhunga ka hun tawng tawhah ala zahthlâk ber awm e, kei phei chu Ruati lakah leh ka nu lakah mualphona ka lo tawngbaw tawh a, khâng zawng zawng ai pawh khân tun boruakah hian ka zak zâwk.

"Hetiang khawpa kan hmangaih che u a, enkawlna ṭha indawng chung pawhin nu leh pa mittui intitla duh a nia!" Ka pa (Lalfakhlua) aw chu a ram ṭha khawp mai. "Zosangmawi, harsa taka mualpho huama kan enkawlna che min thung rulh danah hian i lâwm ang chu maw!?" A ti leh nghut a, Duatbiki hming a lam ri lo ringawt pawh hi ka lawm tho tho.

"Ka pa, kan tihpalh a ni..." tih chiah ka sawi.

"Ka fanu tân hian kan iai che a ni hauh lo; mahse, nu leh pa ti hming ṭha zâwng ni lo leh a mualpho zâwnga in khawsa dun hian min tina hle a ni," Zirsangliana ṭawngkam kha fak chu chhungkaw inhmuhkhâwmna a ngaihthlak atân chuan a chang ṭha khel khawl hlê mai.

"Nu leh pa mualphona thlenin min zah lo hle tih alang reng a, kan thunun theih loh fâ hi kan mamawh bîk hauh lo, upa ber ve ve inni a, in tân thi leh thau pawlhin hna kan thawk lovem ni? Mahse, entawn tur hnutchhiah ai chuan kan chhungkaw inzawmna te tihchhiata inrem loh tîr min tum tihna a ni em? Hmangaihzual, thu ṭha kan hrilh lo che em ni? A upa zawk leh rilru nei tur zawkin i nau anga i en, Zosanga i kawp hi ka awih thei lo." Nu Mafeli aw khur dar dar chuan a thinrimzia a tar lang.

"Nu Mafel..." ka ti ṭhawt a.

'I nau anga i en, Zosanga..' tih kher! kan thiam lova kan dik lo tih kan hre ve, chuvangin hreh chung chungin min kohna pawh hnial ngam lovin kan haw a, an duh tâwk tâwka min ṭawng khum tluar tluar kan ngai kher bik em ni?

"Zosangmawi, ṭawng hlek suh..." ka pa'n a ti vîn ṭhak a, eng mah ka sawi zawm tawh lo. Duatbiki mittui tla ka hmuh leh lek phei chuan ka thin a sa phat thei nia. Mahse, thiam thu sawi tur kan nei eih si lo.

"Ruati lakah i hmingchhe zo chauhva, Rafaela ni se a mualphovin zu hmunah a tâl a, kan fate vânga kan zahna hi eng tikah tak tâwp ang maw!" Nu Mafeli bawk a ṭawng chhuak leh! Ka nu, Muanpuii vawi khat mah ala ṭawng lo a, Lawmsangzela te nupa leh Rafaela pawh an ṭawng chuang lo.

"In duh danin in kal ta sa sa, nu leh pa thu inzah lo a, mahni duh dana awm in thlang zâwk tih alang reng, Hmangaihzuali luhkhung tu chuan a tawp thlengin vuan ang che. Nang pawh, a fa pâiin i mualpho tawh bawk a, inpahnih khân in hma hun tur thlîr ula; nu leh pa thlazar hnuaia awm hi in duh tawh lo a ni ang e. Hlawh innei a, inngaihtuah tawh ang che u." Pa Zirsanga'n thu tawp a sawi meuh chuan Duatbiki a insût ri hraih a, Rafaela pawh ṭawng tumin a âng zuau; mahse, a ngawi leh ta.

Ni e, kan phu tâwk chiah a ni. Kan tih dik loh man kan têl ve ngam tur alawm.

"Lo kal rawh Duati..." thinrim insûm zeta tiin ka pawt tho a, Rafaela leh Lawmsangzela rilru na hmêl ka hmuh hmaih lo. Ka lo rin dan chuan min hau anga, eng kim ruahmanna min siamsakin min sawi rem ka ring kha a nia! Mahse, pa Zirsanga sawi hmangah khan an chhungkuaa tel turin min duh lo tihna a ni. An lo rêl lâwk vek tih a hriat a, duh lohna hmunah kan awm bîk lo ang.

"He inchhung hi vawikhat mah ka rawn rap leh tawh lo ang..." Duatbiki'n thinrim mitmeng sen râm chunga a tih chuan a bânah vuanin kawngkhar bul kan thleng tawh a, "Hmangaihzual, zahna châng hre ve rawh..." a nu a rawn ding hluai a, ka nu in a lo chelh thung.

"Duh lohna hmunah kan awm lui bik lo ang," ka ti ve hrâm a, Rinsangpuii, Lawmsangzela nupuiin rum zet hian min rawn melh ve khanglâng a, ka run kher mai. Ve lutuk a!

Chumi hnu chuan car-ah Duati ka ṭhut luh tîr phawt a, a en ngai a en reng. A rilru na lutuk hian thil ṭha lo a ti ang tih ka hlau zek zek a, "Duati, ka kalsan lovang che. Kei mah vanga i tawrhna hi a thlâwn lo ang," ka sawi zawh rualin a rawn ṭap chhuak ta a, a ring hran miah lo. Mahse, chhungril ber aṭanga lo chhuak tih hriat takin a insût hlap hlap a, ka âwmah kuah beiin a samah ka chûl hauh hauh a, ka mittui a hnâm sawk.

Duati ṭap ri leh a thinlung nâ ka hmuh hian tum ruhna min siam thung si.

Ka quarter lam panin muangchâng hian kan tlân chhuak ta a, kan ngawi dun reng. Sawi mai tur a vâng ve êm a ni, nu leh pa kan zah loh em em vang ni lovin, kan induha kan dai sual a ni ve mai. Kha ti teh hrepa inṭawngkhum te chu a fair lo êm a ni.

Quarter kan thleng a, tu khaw kha hriat lohvin nupa anga kan awm dun a ngai dawn ta. Man leh mual sawi fel chu thuhran, chhungte duh loh ni-a kan inhriatna hian min tina ta ber mai. Ka khumah inkuah chialin kan mu a, "I rilru ti nêm lo la, kan induh tawna kan rinawm dun phawt chuan hma bâk êng tak kan nei a nia aw," tia ka hnemna chuan a ti nui leh ta. A zawng zawngin nui lo mah se, nichina a hmêl ngui riai kha a paih bo ve ta deuh.

"Naute kan neih hunah an en ve miah lo ang, khawlaia min biak an tum pawhin kan hre lo der tlat dawn nia," ka tih chuan za lutukin a nui ta hak hak a.

"Duati, min ngaidam rawh, vawikhat chiah ka lo pawm ve, antih pawhin kan phal lo ang," tiin a pumah ka kut a dah a, "Naute, nang leh i pa lo chu neih ka nei ta lo," a ti zui sap a. A thu sawi chuan ka chhungril a nghawr nghîng dat.

"A nu leh nang mah lo chu neih ka nei bîk chuang lo," a sawi ang chiaha ka sawi ve tâkah chuan, "Chimawm suh, kiri.." a ti a, ka Duatbiki dik tak a lo lang ṭan ta. Kei aiin a upa hlek zâwk a; mahse, mipa na na nâ chu min thlamuanpui chawp ve mai turah ka ngai.

"Certificate nei lo mah ila, chhungte hriatpuinain nupa kan ni tih ka puang e, zanina kan tih tur mitthla zut zut chungin kan chanchin bâk sawi tur an hre bîk chuang lo ang," a fiamthu tih hre mah ila a nih duh hmel viau.

A ṭahna vânga a mit bûi châk te, a mitmenga min duhna leh ngainatna lo lang chhuak te hian, ka Duatbiki hlutzia min hriat nawn tîr si. Duh thawh taka ka fawhna chu uar takin min chhâng lêt a, kan duh emaw duh lo emaw, nupa kan ni ve chiang. A chhan chu Champhaiah ka luhkhung a, zaninah a nu leh pa hriatpuina thlapin, nupa ni turin a pa in kan chhuahsan tlat atin ni.

Tîmna leh vênthawn nei miah lova hmangaihna kan chen dun leh meuh chuan a hma aiin kan inpawh zual sawtin ka hria.

Mahse, chhungkaw khaiding turin, nu leh pa leh unaute tel miah lova ka nupui leh ka fa enkawl a ngai thung dawn.

[Rafaela Remruattluanga of Rapsagy]

Zosanga leh ka û te chhuah hnuah ka âng chhuak ve ta a. U Duati antih dânah ka lâwm lo hle, Zosanga lakah pawh ka thinrim viau nachungin, hetiang tak hian ka û a hmangaihin a duh tih ka lo hre lo atin ni. Kan inchhung aṭanga inkâi chunga an chhuak turte kha kei leh Diktei-ah ka chan a, ka na ru vawng vawng. Zosanga ang khân ka ti ve tho vin ka ring. Eng tin nge a tih kha? 'Duh lohna hmunah awm kan tum bik lo' zû in ve ṭhin mah se a puitling tih ka hriatna a rei tawh a, zanin zet kha zawng ka chhungril an ti na pha tlat. Ka nu leh pa ka dem hlâwm tawp bawk.

Mi fa te tih loh dan a ni bîk lo a, anpahnihin innei se tun ai hian kan inpawh zawk daih ang. Mahse, nu leh pa thutlûkna hnial zut zut turin ka nun dan a ṭha chiah si lo atin ni.

Ina awm reng ka nin vângin Dikteite inah lên ka tum ta, ani nen hian tihtakzetin kan inzui ve ta. Kan chhungkaw boruak ipik lutuk leh kan mualphona hi lan chhuah hun a la awm dawn a, mi kâ aṭanga hre lovin kei mah ngeiin hrilh ka duh.

Dar kaw pelh hnuah an in ka thleng a, Veranda-ah tute nen emaw ni an lo ri nawk nawk a, ka kal dawn tih ka sawi lâwk lo. Min hmu phut chu mak a tih hmel viau a.

"Ehe! Rafael..." a rawn ding chhuak nghal a.

Diktei ka duhna chhan pakhat chu mi dang hmuhah min zahpui ngai lova min ngaihsakna a ti lang fo ṭhin hi a ni.

"Ka lo tei phei mai mai," ka ti sup a.

"Lo kal la, lo ṭhu ve rawh," ṭhutna tur min kawh hmuh nghal a. Hetianga ṭhiante nena awm nuai nuai hi zanin ka boruak tawn nen a inrem lo. Ka tâwt deuh ṭûn. Whatsapp aṭangin inhmuh fâl ka duh thu leh sawi tur ka nei tih ka va thawn a, a phone en turin ka mitmei nghâl bawk.

Mi â ni lo ta na na nâ chu ka mitmengah eng emaw a chhiar thiam a ni mah na, inchhungah min luhpui ta a, a ṭhian teho erawh an la titi char char a, an ṭhenawm leh an inhnuai luah tute anni awm e.

Sitting room-ah kan ṭhu dun a, a nu leh pa'n common room-ah TV an en thung.

"Thil dik lo a awm em ni, Ramtei nena inchungchâng tho kha mi?" Zuk ti daih a! Vawikhat mah a hriat laiin Ramthansangin chanchin ka sawi áwm ka hre miah lo. Mahse, mi titi tui ber leh an sawi bân theih loh a la tling reng tih ka hria.

"Ni lo e, u Duati te zawk a nia," tiin a tlângpui ka hrilh ve ta a, ka awkî aṭangin ka rilru a nâ tih a man thiam a ni mai thei. "Hrehawm ti mah ta che, naute hmêl an hmu anga i nu leh pa pawh an dam mai ang, i û pawhin a haw kher lo ang che," a ti ve ngial a. Ka rin dan chiah, a dam zâwnga thil a thlir zel ṭhin hi a fakawm ka ti.

"Nia, mi kâ aṭanga i hriat chuan i zak dawn sia ka lo hrilh ve che."

"Kan duh danin thil hi a thleng vek thei lo a nia, nang pawh ngun takin inngaihtuah la, Pathian mi hriat i ni a, hetiang mualphona leh zahna inchunga lo thleng zawng zawng te hi a kohna cheah ngai thei la ka duh ngawt mai, a ṭha zawk lo chhuahna tur a nih hi chuan khawdur a thlen te a ngai ve a nia," a vawikhat nân ka kutah nghet takin a hmer a, "Harsatna tâwk lo chhungkua an awm ngai em ni? chuvangin, Pathian koh tam a ngai niin ka hria," a ti daih.

"Dikte..."

"Umnn, i û i hmangaih tih ka hria alawm, a nat pawh i phal lo, Zosanga ni se i unaupa ang chiaha i en a ni a, i din hmun tur ka hria asin," dam thlapa a ṭawng sap sap chuan ka hahdam sawng sawng thei nia!

A hmêl no sar leh a sam hnunglama a vial tawm tawp te, a shirt hâk thâwl lam deuh te chîk zet hian ka en a, hmeichhe dang neih ve loh zahawmna amaha hian ka hmuh belh zel. Min duh huam angin a lang chuang lo a, ka awm ve naah erawh min ngaihsak viau lawi si.

"Naktuk em ni i ṭhiante inneih kha?" Thil dangah ka pakai ta daih a.

"Aw, i lo kal ang tiraw?" A ti zui zat a.

"Nia, ka lo tum ang, kan dâwrah ka lo nghâk dawn che nia,"

A hma kha chuan kalpui tumna ka nei lo a; mahse, ka rilru ka thlâk hlauh. Min mamawhnaah leh tel ve tura min duhnaah chuan kalpui ve zel ṭhain ka hre ta. Inhmuh khât lutuk hi chuan a ṭha sa pawh a chhe thut thei tih ka hre ve tlat tawh.

A nu leh pa an men ve reng avangin rei pawh ka ṭhu ta lo. Ka bike dahna thlenga min rawn thlahin, "Fimkhur rawh aw, i thlen hunah min lo hrilh la.." a nui var var a, a hmêl hmuh a va nuam si êm.

Ani hi chuan ka nihna ang ang hian min pawm a, zu ka in pawhin ka ruih laiin min hau ngai miah lo. Ka harh fim hnuah ṭha takin a sawi mai ṭhin, a tih lohnaah erawh a nawr luih theih miah lo a, a hmaa rilru ka pêk loh ngaihtuahin tunah chuan ka nghet ru ve riau tawh. Amah vang hian Ramthansangi theihnghilh châng pawh ka ngah phah rêng bawk.

Kan in ka thlenin ka nu leh pa an lo la meng a, biak pawh ka tum lo.

"Rafael, i u Duati te kha lo va be pawp reng reng suh ang che," ka pa'n a tih chuan ka ding chat a, "Ka thu thu.." ka ti hmuk.

"An tana ṭha lo tur kan ngaihtuah lo tih hria la, kan thu sawi zawm ang che," a tih leh chuan chhâng tawh lovin ka room-ah ka luhsan ta a.

Ka nu leh pa ka zah viau nain tun ṭumah kher hi chuan u Duati lamah ka ṭang, anti ve mah mah a ni. Vawikhat mah a ṭap lai ka la hmu lo a, kan naupan lai pawhin a ṭap ka hmu khât. Mahse, zanina a rilru na hmel kha chu ka theihnghilh theiin ka ring tawh lo.

Diktei ka thlen tawh thu hrilhin whatsapp lamah kan inbe zawm ta a, tunah rih hi chuan Lalrindiki hi ka tân a ṭha ber.

Nupui nei turin rilru buatsaih nghal lo mah ila amahah ka bei nghet thung si...

B+>[BeckirafARenthleI]<+®®

THE RAPSAGYAN FAMILY

Becky Rafa Renthlei

Chapter-22

[Rafael Remruattluanga & Diktei]

Diktei ṭhiannu te inneihnaa kal turin ka induang zaih a. Suit dum dak hlarh leh kamis pâwl thianghlim zet ka inbel vang chu nge, nizan ka mu ṭha lo lutuk hmêl thim deuh kha a hliah khuh vekin ka hria.

Glass house-ah ka bialnu nghâkin ka ṭhu diam tawh a, Diktei nen hian bial zaipawlah khân kan awm dun rei hman lo a; ani chu 'term' thara an rawn dah chauh kha a nih vângin, bial hming ang hian chhuah dun kan nei tam lem lo. Tin, mi hmuh turin inzui kan nei mang lo.

Dâr 11 a pêl ta tihin kan dawr kawtah Taxi a rawn ding a, Lalrindiki rawn pên chhuak chu uluk zet hian ka lo thlir a. A sam rawng hi sawi thiam a har, a dum hlap chu a ni lo deuhin ka hria, a hmai fang dik thlap leh a hmui nude colour chu a inhmeh hle mai. Kan thawmhnaw inbel rawng tur inhrilh eih si lo vin kawr fual taksa rem zaih, a pâwl a rawn inbel ve nia! A pheikhawk bun sâng zet kaihna pawh a pâwl tho. Hetiang thawmhnaw inbel chung hian vawikhat mah ka la hmu lo, a inhmeh thlâwt.

"Min lo nghâk rei tawh em? Scooty ken ka tum a; mahse, ka ṭhulh leh.." nui sâng hian min rawn pan a, ka fâwp hrep châk.

"Car ka keng alawm," tih pahin a châwn no nalh zet chu ka melh zauh a, "Puan i bih ang chu tih nâk a lai a.."

"Â, ka kawr thar hi ka inbel ve châk si a.." ka bulah a rawn ding a, a pheikhawk bun a sâng bawk nen ka beng a thleng zân. Nula tê taktê kha a ni lo hrim hrim a.

"Ok, kan nau coffee la turin kan tîr ang e, a la hma deuh.."

Coffee kan nghah chhungin thlâ kan la dun ve ngei. Zêp lo-ah chuan kan inhmeh ka ti. Ka sam vikings style chu ka bin tawp a, spray nen ka siam uluk viau bawk. A tîr leh hmanni thleng kha chuan ka sam a sawisel ṭhin a, kar hmasa vel kha niin ka hria, a sawi tawh ngai miah lo!

Lalrindiki hi ka en cheuh cheuh a, ka duh telh telh. Ka ṭawng tlêm lutuk hi hrehawm tih châng ka ngah mai, ani pawh nula ṭawng tam a ni hran lo a, sawi tur kan haihchham dun viau zel. Zu ka in hian tlêmin ka ṭawng duh deuh a, chuti tih loh-ah chuan sawi tur a lawi ka hre miah lo.

"Rafael, ruai ṭheh ve nghal ila, i hreh loh chuan..."

"Teh reng mai, hmel hriat ka nei ve vak si lo a, min kalsan loh ka beisei," ka tih chuan a nui ar ar a, "Ka bulah hlir i awm dawn nia, inkhawmnaah pawh kan ṭhu dun ang,"

"Chiah maw! Ka sam hi..."

"Solfa vai lai pawhin i zuah tho alawm le, ngai thu tak lo la.." ani leh ni lo angin a ti ve ta tlat! Ka nui ruh ruh.

Ramhlun South-a a ṭhiannu, a thawhpui ni bawk te inneihnaah chuan kan kal ta a, "Bike i keng ṭût ang tih ka hlauh zia," a ti sap a.

"Teh suh ei, mi zawng zawngin min hmuh kher ka duh hleinem," tiin a kut ding lamah ka tawk zauh a, infawh aia thui kan kal dun ngai lo, amahin a duh loh chu thu hran ni se, a tîr khan tisa thil thlenpui duhna rilru ka pu vak lo. Kawp satliah kha ka duh tawk viau a. Mahse, vawiina a inchei dan ka hmuh hian ka mipatna zuk kai tho tlat a! Ka ît a ni ber mai, tenawm hian a!

A sam kâwi deuh ngal chu a vei lam darah a hûi liam tawp a, sîr zawngin min rawn melh leh zeuh zel. "Nakinah ka status en ang che," a tih chuan ka nuih a za deuh. Kei aiin a naupang zawk a, a pumrua a len avangin a kum aiin a lang upain ka hria.

Zosangmawia quarter-a kan awm dun zan khan a âwmbâwr duh thawh zetin ka khawih tawh a. A takah ka la hmu miah lo bawk! Kohhrana inhmang ṭhin ka nih bâkah a hun lai khân chawhpawlh nun ka nei lo a; Ramthansangi, ka bialnu hlun pawh kha sex ka hmanpui ngai lo. Kha vang kha em ni ang Famkima min ûmsan tâk?

Biak in kan pan ding nghal a, Aizawl mi ta na na nâ chu hmelhriat hmuh tur an awm nuk mai, ka rin loh deuh ka hmu nghe nghe! Ramthansangi leh Famkima, biak in veranda-ah an lo ṭhu a, a pum pawh a puar lian ve ta. Kei misual rilru kâwi a lo chhuak tlat pek nia! Diktei kutah vuanin, "Inchhungah ṭhutna a awm loh chuan veranda pawh ka pawiti miah lo a nia," ka ti sup a.

Nui sâng chung hian, "VIP kan ni a lawm, mipui zawng zawng kal pêlin, hmeichhe chhungte ṭhutna lamah kan kal ang chu le," a ti ta a. Ka hnial duh miah lo. Mi zingah min zahpui lo a, kei pawhin ka zahpui bîk lo tih ka lan tîr ngei ang.

A sawi ang chiahin kan ṭhutna tur usher te'n min kawh hmuh a, hmeichhe lam 'theme' kha a pâwl lo niin! Rem leh zel ve. Mipui mit kan chunga fu ṭhup chu engah mah ngai lovin kan lût ta a. Confi lutuka kal, ka hma ami Lalrindiki chu ka zui ve ta a.

A ṭhiannu Rempuii te inneihna chuan ka ngaihtuahna a ti thui viau a, Ramthansangi kha rinawm se chuan hetiang hun hi ka paltlang ve ngei tawh ang a. 'Tiam tlat e' tia an chham lai chuan Diktei ka melh zauh a, a lo en ngun ngang mai.

Inkhawm programme a zo a, thlalâk hun an siamah vawi thum lai kan lang ve. Biak in kawta kan din laiin mipakhat kan bulah a rawn ding a, "Dikte, i lo hûng chhe lo êm a, min kalsan pawh kha a âwm e," a rawn ti hmuk a. Tu nge a nih hre lo mah ila ka sa zak.

"I lo sawi tur a awm lo," tia Diktei'n a chhân chuan chu pa chu a ner suk a. "Smart boy duh ṭhin khan Street boy i lo thlang ta a," ti lehin ka lu meh dan a thlêk vang vang a, ka insûm thei lo ṭêp a ni.

Min kalsan hnuah, "Kha pa kha tu nge?" Tiin ka zawt ta a.

"Nghaka, Lalnghaksanga a nih kha.."

"Min kawp a ni maw, kan inzui tirh pawhin whatsapp lamah i be ṭhin," ka tih chuan a ngawi ta rauh rauh a, ka thin a rim kher mai.

"A ṭha e, hmeichhia hi rin tlâk in awm lo a nih hi, bumtu vek," min chhânna pawh nghâk lo hian ka car dahna lam ka pan ding nalh a, ka thâ a na ngat ngat hle mai. Kha pa nen khan an inkawp laiin kei ka lang a, ani aia min duh zawk vangin ani kha a kalsan tih a hriat reng alawm. Tenawm hlawm lutuk.

"Rafael..."

Hmanhmawh lutukin car chhungah ka lut a, min umzui tih hre mah ila, ka nghâk duh bik ṭhak nâng. Chak lutuka ka tlân chhuak chu min thlir zui vang vang tih side glass aṭangin ka hmu reng.

Mi dik famkim chu ka ni lo. Mahse, bum kâwi mai mai theih tura awm ka tum tawh miah lo thung. Ramthansangi avanga ka mualphona kha a tawpna ni rawh se.

Glass house-ah ka lêt leh nghal a, Hussain-a kan chhawr lai chu zu la turin ka tîr leh ta nge nge e. Wine shop an khâr tawh avangin whisky lamna tur a vâng phian a, local erawh hmuh tur a awm zauh zauh thung.

Tlai lam dar thum a pêlh hnuah Hussain-a a rawn lêt a, ka in ṭan leh ta. No thum zet ka in hnuah ka meng sen râm a, ka coat hâk lai hlipin ka kamis bân ka thlep chhîng sauh sauh va, ruih hle tumin ka intin tuah ṭha leh ta a. Thil ṭha ber a ni lo tih hre mah ila, tun lai kan boruak tawn hian zuk keng tel miau hek le.

"Rafael," Lalrindiki aw ka hriat chuan ka thil inna vel ka thuk ru sawk sawk a. Dâwr thleng thlengin min umzui ang tih pawh ka hriat si loh!

"Rafael, khawiah nge i awm?" Store room piah chiaha pindan zim tê ka chawlh hahdam fô-na ṭhin rawn panin min ko pah zel a. Kawngkhar a rawn hawng ta a, sofa chunga duhdah deuha ka ṭhu chu min thlêk vang vang chung hian, "A lo in leh ta," a ti sap a.

"Ka in duh a ni mai a ni,"

"Ka hria alawm, insiam rawh le, chaw ei turin kal ang," ka bulah a rawn ṭhu thla a, a rimtui hman rim ka hriat ringawt pawhin danglamna ka nei nia maw le.

Nichina khan thinrimin ka kalsan a, ani erawh thinrim lo ang hmiahin a awm thung.

"I duh leh, Nghaksanga hruai la," ka ti thûm chhak a.

"Rafael, i hriat chian loh chuan sawi mai mai suh, Nghaka nen vawikhat pawh kan la inngaizawng lo," a ti nghat a.

"Ka lo tibuai che u tih a hriat reng a lawm le, min bum tum duh suh," tih pahin ka lamah ka pawt hnai dâwrh a, a lo inring bîk lo a ni teh chêk ang chu, ka biang si chêtin min rawn thlawp a, ka fâwp zui nghâl hmiah.

A tîr chuan duh lovin a ṭang kawh tlat a, duh thawh, dam leh uar taka ka fawh luih tâkah chuan a inthlah dul tial tial tih ka hria, rûi chhia ka ni hran lo nain ka hai chhalh tho. Tisa châknain min tur et et a, a kawr fual hâk tawm deuh chu remchangah lain a taksa, a malpui ka chûl lawr ta dan dan a, ka thâw a bul hak thei nia!

Ka thinrimna leh tisa châkna hi Hremhhmun lamah ka liampui nghâl loh. Shala...

"Hey, insûm rawh..." ani pawh a danglam tih ka hria. Ni danga ka khawih pawh duh ṭha mang lo khân ka nghâwngah min kuah chial a, min thlah phal bîk teuh lo! Min thlêm ka tih chuan a ni mang si lo a.

"Ka ta ni rawh, mi dang an inrawlh ve ka duh lo, ka ta chauh ni rawh," ka phun sup a, a kawr hâk hnung zipper ka pawh phelh chuan, "Rafael..." a ti thâm ṭiak a, a taksa lumna ka nghen rual chiah khan ka hnuai lam pawh a nung chiang teh e! 'Ka thil in vang' tia puh ka tum lo a, tisa châknain ka tuihâl tlat si a ni.

Fawp pah reng chungin a kawr fual hâk chu a kâwng thleng rakin ka nawr tawm a, a vun no zet leh a âwmbawr kawh lah chuan min hîp zar mai.

"Rafa, duh tawk rawh, Remruattluang..." min nam sawn tumin a ṭang ta ngat ngat a, ka luhlul tulh tulh thung si. "Vawikhat chiah," tiin a bra kilhna ka pawt phelh zui ta nghal a, a kâwng achin chung lam khuhtu awm lova lang ta vek chu ka vawikhat hmuhna!

"Ka thu sawi ngaithla teh, i rûi a nih kha.." a tih lawm lawm pawhin ka bengkhawn eih lo mai ni lovin ka hai der hmiah.

"A ṭha e, i duh ang chuan awm ta che, ka dâl lo ang che; mahse, rûi chung chuan ka thianghlimna hi min lâksak suh aw.." a ṭap lo chauhva ka harh chhuak zawk bawk.

"Thu dik min hrilh em?" A âwm ruak kângah ka lu ka nghat a, a thinphu dap dap ri pawh ka hre pha hial! Kei pawh ka dang lam bîk chuang lo.

"Tu mipa mah sex ka la hmanpui lo, min ring rawh; mahse, i lungawina tur a niha kan inṭhen dawn ai chuan i duh angin che rawh le, i ta nih hi ka duh ber," amah zawk chuan dim tê hian min rawn fâwp a, a taksa khuhtu awm lo, sa ham hama min nêk chuan insûm ka va harsat si êm!

Mahse, a insawi ang hi a nih chuan nula thianghlim a ni. Ka tân a inpumpêk tih chêtziain a tar lang tawh a, eng vangin nge ka tihchhiat lêm ang? Ka ta a nih belh chhah dawn lo va, tlang taka thu dik min hrilhna hian ka chhungrilah lâwmna a siam thung.

"I thawmhnaw ka lo hâk ṭhat tîr ang che," tiin nichin maia ka phelhsak a bra chu ka kilh ṭhat sak thlap a, ka kut a khûr dar dar, tlangval thaza rual ka ni a, ka lo lem ve hlek nen ka chhungril a la sa ham ham thei maw le.

A kawr pawh ka zîp sak leh vek a, "Ka ta i ni, mi dangin 'ka ta' tia an sawi che ka duh loh a, kum tam tak i lo vawn him tibawrhbângtu nih ka duh lo, ka insûm thei e," ka âwm nghêngin ka kuah bei vang vang a, mittui hnâm sak chung hian, "Ka lawm e, Rafael, nang pawh ka ta i ni," a ti ve sap a.

Ka inthununa a va chhe teuh êm!

"Chaw ei turin min nghâk tlat sia, kal ve ang aw," a sam pawr phang a siam ṭha mawlh mawlh a, sofa hnunga ka coat dah chu lain, "Thinrim tawh suh aw, midang min neihsan a nih loh chuan i tân ka awm reng ang, â, zu rim ka nam vek," a'n ti leh rih a. Ka nui hawk.

"Min hrethiam la, no khat chiah ka in leh ang aw, ka rui miah lo a nia," ka tih chuan, "No khat bâk a theih loh a nia, in suh ti mah ila, ka thunun theih i ni lo, sim duhna rilru erawh i put thuai ka beisei, zu i in hian ka na ṭhin tih min hriatsak la," tiin a ding hliai a, "I in chhungin ka lo intuai fai ang," ati awlsam êt.

Min hauvin min ânkhum hrep pawh ni se ka dem lo ang. Mahse, dawhthei taka min enna hian sim duhna rilru min puttîr tlat nia. Tunah erawh chuan thlah hmak hi harsa ka la ti rih a, ka in chatuan dawn lo tih pawh ka inhre bawk.

A chunga ka thinrimna te kha vawm bo ang duak niin, dar li pelhah inneihna ruai ṭheh turin kan tei chhuak dun leh ta a, "Nghaksanga kha vawikhat mah hnaih tawh suh ang che, ka nunah hmeichhia ka seng lût lo ang chiah hian kei mah chauh i thinlung phêkah khân khâr hnan rawh," steering herh pap chunga ka tih chuan, "Nang mah bâk ka nei hlei nem, i ta ka ni ka tih chuan ka ni a ni mai," inring tâwk takin a ti ve tlat.

A ṭhiante'n chaw eiah an lo la nghâk a, zu rim ka nam deuh avangin ka inthlahrung dûk. Mahse, Diktei'n eng kimah min ngaihsak a, chaw ei kham veleh ṭhu khawmuang lovin kan chhuak leh ta a, mi zîngah zahpuiawm khawpin min ngaihsak hluak lo a, zu rim nam mah ila ka zahna tur ṭawngkam khat mah a chhâk chhuak lo. Ka zu in hi a lâwm tihna lah a ni hek lo, inhnial ai chuan a hai der zawk a ni tih ka hria.

Ka car hunna kan thlen chuan mipa aw râwl ring tak kan hre hmasa ber a, "I duh ber Remruattluanga car-ah chuan chuang ta che, kal rawh," Famkima thinrim awkí a ring ṭha kher mai. A meng sen rûm a, ka car bumper a lo pêt chu niin!

"Famkim?" Ka ṭawng a ring hran lo naa an hre pha a ni ngei ang, Ramthansangi hlauhthawn hmêl takin a rawn hawi a, Diktei'n ka bâna a vawnna chu a en chîk hle bawk.

"Famkim, lo kal rawh, haw ang," tia hruai hran a tum chuan a duh teuh lo. "Remruattluanga ve mai mai ka hlau hleinem," a ti chhar chhar a, ka thin a rim ve ta.

"Ka car kha i kut hmawr leh i ke hmawr pawha i dek leh a nih chuan a pawi khawp ang," tiin ka pan hnai rûak a, Diktei'n min lo chelh vat. "Khing duh suh, a rûi êm a nih saw.."

"Ramthansang, i bialpa nge i pasal hi kal sawnpui rawh, ka thinrimna a tawngbaw palh ang e," ka tih chuan tîm dai chung hian Famkima pawh sawn a tum a, Diktei hi awm lo se chuan ka hnek thal tawp ang. Kut thlâk ka châk zek zek.

"Mate, car-ah lo va lût la.." tiin Diktei ka mitmei zauh a, "Nang pawh lo kal rawh, buaipui tlâk annih loh kha, an pahnihin an ching fel thei lutuk ang," tia driver seat lam min panpui chuan ka hnial duh ta lo.

"Nang kha, lo ṭawng ve miah suh," Ramthansangi aw fiak zet chuan Diktei pên lai a ti tâwp chawt. Muangchânga inherin, "Keini chu kan inching fel thei a, i ṭhianpa kha a rui si a, mualpho palh a hlauhawm êm mai, kan kal ang e," a ti dam thlap. Famkima ṭawng nawk nawk leh Ramtei hmêl dur khap chu chhe tê pawhin kan ngaih ven duh ta lo.

Anmahni ngaichâng tawh miah lovin, muangchâng hian kan tlân chhuak ta zâl zâl a, nui suk chung hian, "A pair-in kan lo insual lo a ni," ka ti ta a.

"Hus! A râi lian tawh sia, thil tihchi ninghal lo chuan, i ho.." a nui vei hak hak a. Ni e, ani ang nula vengva tân khatianga inrawlh tezawng a duh tawp nâng, mi â a ni si lo a. Kan Ramthansangi khân eng thilah mah a tluk lo a ni ber e.

An ina thlah nghâl lovin lenpui ka rîlrûk ta a, hun thâwl ṭha kan neih ve chhun hi bawhkân ka tum bik lo. Inhriat chian kan la mamawh dun êm a ni.

"Round mai mai i duh em, a la hma si a," ka melh zauh a, "Duh tho e, Ramtei nena in inkâr hi hriat ve ka phu in ka hria, eng vanga Famkima khan la thîk che nge a nih?"

"Ka hre bik lo, a ruih vâng a ni ang,"

"Eng kim chiang takin sawi dun ang aw, zahthlak lutuk..." a ti sap a.

Ni e, ruai ṭheh zo an haw nuk nuk a, a zawng zawngin min hmu lo mah se thil mawi chu a ni lo alawm, Famkima lah a ṭawng ring ropui si, anpahnih khan anhlim khu chûk lo chu a ni phawt a.

Ramtei nena kan inkâr leh kan inṭhen chhan chiang tak hi a vawi khat nân a ṭobul aṭangin Lakrindiki hrilh fiah ka tum ta a. Ani pawhin tûn hi vawikhat min zawhna a ni nghe nghe, a thîk tepawh a ni mahna...

[Zosangmawia & Duatbiki]

Khawvar dawnah ka harh hlawl a, Duati thlanin a lo bual huh vek! Kaih thawh ka tum zet naa ka khawngaih leh si.

Nizanah âm taka hmangaihna kan chen dun hnuah tui takin a muhil siai siai a, a rilru natna theihnghilha a muhil thei hi ka lawm hle a ni. Nu Mafeli leh pa Zirsanga te, Rafaela chenin ka dem ve thlâwt. Ka nu leh pa te pawh ka dem em em tho rualin kei chu mipa ka ni a, ka zir lo bawk; mahse, Duati erawh a tihsual vawikhatnaa hetia anti nghal hi an thiam ka ti miah lo.

Chawlh la miah lovin ka hruai thla tawp bawk si a, a hna, a tuina hi bansan tîr ka tum lo. An pu biak dan tur ka ngaihtuah rauh rauh a, kan boruak tawn fuh lo mah se ka nupui a ni tawha hei hian min ti hlim ber. Ka ta chu ka venghim ang.

Khawvar rualin dim tê hian ka thawhsan ta a, chawhmeh leisa pakhat mah kan nei si lo a, a mut tui êm vangin bazar turin ka chhuahsan ta a. Ka hnaah chawlh ka nei tawh bik si lo, dik tak chuan ka rilru a hah ru ve ngawih ngawih a, ani râi no amah chauhva lêt tîr ka ngai ngam bawk si lo. Naktuk hi hna ka zawm ni a ni a, vawiinah Champhai pana kan chhuak a nih loh chuan tihngaihna a awm tawh lo.

Dar ruk velah ka quarter ka thleng leh chiah a, ka bazar thuak thuak a ni deuh ber.

"Ehe! I lo harh tawh elaw," khum sirah ngui bârin a lo ṭhu a, thawmhnaw hâkthlâk pahnih khat bâk a keng lo a, ka khawngaih reuh hlê. A nu leh pa ina nuamsa taka awm ṭhin kha kei mah vângin a hrehawm ka ti lo thei lo.

"Khawiah nge i kal daih a?" Tia min zawh chuan, ka bazar thu ṭha takin ka hrilh a. "Min kai tho mai lo a.."

"I mutui sia ka khawngaih che a," a biangah ka fâwp zauh a, zing lam luakchhuak a la nei ta lo fo, ṭha taka enkawlna a dawng a nih loh chuan a rilru hah leh nâ hi chuti maia reh chi a nih loh avangin ama tân leh naute tân a pawi thei tih ka hre ve tlat.

Kan pahnihin eirawng kan bawl dun ta a, "Chaw eikhamah muang khawtlai lovin Champhai kan pan dawn nia, vawiin chiah chawlh ka nei si a, Duati, hreh viau mah ila tihngaihna a awm rih ngang lo a ni e. Ka dah chho phawt che anga ka hna zawm hun naktuk a ni mai tawh bawk nen a aia ṭha ruahmanna siam tur ka hre mai lo a ni." Tiin tukverh bulah ka va ding a.

"Chawlh i lâk belh thei ang em?" A ti sap a.

"Ka hre lo le, ka lo tum ve chhin ang a, nang mah tal hian chawlh la thei la chuan hetah kan awm dun thei tur a nia," rilru hah zetin ka thaw hawk a. A rilru hrehawm laia amaha awm tîr em chu ka ngaingam si lo.

"Min transfer fel chiah a, chawlh lâk chu inthlahrun a na dawn e, naute neih dawnah loh theih lohvin lâk a ngai anga.."

A sawi dik chiah. A ngheta thawk a la ni lo bawk nen kan din hmun a khirh hle mai.

Rilru bulbâl nei lovin Champhai kan pan ta poh kha a ni a, kawng tluanin ruahmanna chi hrang hrang kan siam a, kan thu tlûkna ni ta ber chu, zaninah Aizawl panin ka lêt leh nghal anga, chawlh ka dil belh ve phawt dawn a ni. Inthlahrunawm viau mah se Duati ngaihtuah a na êm atin ni.

"Zosang, nupa kan ni em?" Tia min zawh chuan, "Ni e, remchang hmasa berah kan inkutsuih ṭha dawn nia, min lo hrethiam la, hetiang hian min thlahthlam ta sa sa, an mahni tel lo va din chhuah kan tum dawn nia aw, i hna i bansan lo tur pawh hi a ṭhatna chen a awm, GP withdraw ka tum anga, Ramhluna ka insak saw khawrpum kan tum ang, hrehawmin ka siam lo ang che," duat takin a samah ka chûl a, min rin mai loh chu tih theih dang a nei bik rih lo.

Kâwlkulha kan chawlh laiin a nî, Arini'n a rawn call a, a ṭap lek lekin ka hria, a rilru no zawnga a ngaihtuah ka duh loh avangin phone ka chhuhsak ta a, "Keimah Zosanga, lo ngaihtuah duh rêng rêng suh, theih tawp ka lo chhuah dawn nia; mahse, ka hna ka chinfel chhungin lo awmpui thei la ka duh khawp mai," ṭha takin ka sâwm ta a.

"Nia, ka ngaihtuah êm mai, a nu lah chuan min rawn ânkhum hrep a, kan inhnial alawm," thinrim tih hriat deuhvin a ti a.

"Khawngaihin hun lo insiam hrâm rawh, ni thum tal lo awmpui thei la chuan chumi chhungin inchinfel ka lo tum dawn nia,"

"Ok, ka lo tum ang." Ka thaw huai mai, Duati nî hi ka hmu ve tawh a, a fel viau.

Kan chhuah tlâi êm avangin zan dar 10 dawnah kan thleng chauh a, Duati a chau hle. "Zosang, naktuk zingah chhuk mai la.." khumah chau zetin a mu a, chaw pawh a ei peih lo. A hmel pawr fap ka hmuh hian hrehawm ka ti ngawih ngawih.

"Kalsan che hi ka hreh tih i hria tiraw? Mahse, ka inreport ngei ngei a ngai tawh a, Forensic lam chu i hriat kha, an strick viau mai,"

"A ṭha alawm, ka ngaihtuahawm loh ang, mahni chauhva awm ka huphurh mai mai maw le," a ti dam raih.

Rilru hah nen chawpchilh deuh deuhvin kan zin bawk si a, ngaihtuah a na ngat ngat hle.

Zan riak thei din hmunah ka ding tawh si lo a, Aizawl pan turin ka insiam leh ta a, "Ka ngai ngawt ang che," mittui parawl ṭeuhvin min kuah a, ani meuh a mittui a tlâk tawh chuan hun harsa tak a paltlang tihna a ni.

"Kei pawhin ka ngai dawn che," duh thawh zetin ka fâwp a, ka thlah phal lo. Tisa thil ni lovin ka thinlung takin ka ngaiin ka kalsan phal lo. Mahse, amah nuam taka awm tîr tur chuan hna ka thawh a ngai si.

Car-a ka ṭhut luh meuh chuan a mittui a tla ta nge nge a, "Lo kir vat rawh aw," ṭah aw ṭeuhva a tih leh lek phei chuan hrehawm ka tihna a zual.

Kal lo thei ka nih si loh avangin muangchâng hian ka hmangaih leh ka fa nu tur Duati chu ka tlân liamsan ta a, ka mittui a hnâm sawk. A mamawh hun lai bera ka awm thei lo hi pawi ka ti a ni. Ka lan theih chhung min thlir a, ani pawhin min hmangaih thu sawi lo mah se min hmangaih hle tih ka hriat phah.

Ka tlân chak par par bawk a, darkar 10 a ral meuh chuan ka quarter-ah chau zetin ka ṭhu fel chiah. Duati ka call nghal a, a nî a lo chhoh theih loh tur thu min hrilh hmasa ber, "Zo, ka ṭha a nia, min ngaihtuah suh aw, i tih tur tifel phawt rawh," a la ti ve ṭâng ṭâng.

Ka inbual fai sawk sawk a, office panin ka chhuak lehnghal a, tun ṭum chu nupui neih chawlh lâk a ngai ta thung. Man leh mual inhlân lo mah ila, naute a neih hma ngeia inkutsuih ka duh ve tlat. Duati chân hi ka zuam lo a, a tel lovin khawvel hi eng mah lo mai a ni tih ka hria.

Ni lêngin ka hnaah ka buai a, chawlh pawh ka dîl belh leh ta, min pawmsak êm ang chu. Duatbiki chanchin ngaihvenna hun alawi ka nei lo; mahse, ani pawh a hnaah a kal ve tho a, ngaih ṭhat lohna tur a awm lo a ni ang.

Zan dar riatah ka haw chauh a, ruang en dik tur kan neih vângin ka haw hma hman ngang lo a ni e. Ka phone ka en chuan 7missed call zuk awm a! Duati call vek a la ni zui.

Rang lutukin ka call back ta a.

"Hello, Nu Ruati ka nia, Duati a chau thut a, hospital-ah kan admit..." ka bîng mupin ka hria.

"Eng..eng tik..." ka ṭawng chhuak ṭha hlei thei lo.

"Darkar khat kal ta khân, a in luahna nu ka nia, a nu leh pa hrilh a duh si lo a, nang mah kan lo call che, tunah chuan a muhil rih aw, a Bp a hniam lutuk a," a rawn ti zung zung a.

Ka thluak a buai vek. Kan inbiak tawp hnuah ka chung chiah a mi, kan pu ber ka va phone ta tawp a. Ka chawlh dil min phalsak loh chuan ka hna hi ka bânsan a ngai tihna a ni mai, Duatbiki leh ka fa aia hlu ka nunah tumah an awm lo.

Rilru nuam lo zetin ka vei sek a, kan pu lah chuan call a pick thei ṭhak lo. Ka ngaihtuahnaah ka chhungte leh a chhungte an rawn lang a; mahse, amah Duati pawhin hrilh a duh lo a, tlâwmah ka la ve tlat. Min thlahthlam tawh a, keimahni-a inbuaipui turin thu tawp an sawi tawh kha maw le.

A nih nih ni turin kan pu pawh call nawn tawh chuang lovin, thawmhnaw ken tur ka siam sawk sawk a, Champhai pan leh nghal turin ka inbuatsaih ta a.

Chân ngai a awm a nih pawhin ka chân ngam mai tur a ni...

B+>[BeckirafARenthleI]<+®®

THE RAPSAGYAN FAMILY

Becky Rafa Renthlei

Chapter-23

[Zosangmawia & Duatbiki of Champhai]

Kan pu thu hmu lovin Champhai lam ka pan ta vang vang a, Duatbiki ngaihtuah chung rengin car ka khalh uluk viau. Kei leh zel ka fimkhur loh chuan thil tihchi a ni tawh lo.

Kawng lakah vawi thum chiah ka châwl a, amah Duati chanchin hriat tumin ka phone a; mahse, a awmpuitu hlirin min lo chhâng a, 'naute pawh a ṭha e' tiin sawi mah se la, ka ngaih a ṭha lutuk lo. DM Hospital-ah an lo admit tih zawng kha ka hriat chhun a ni mai.

Champhai ka thlen meuh chuan ka mit a thîpin ka chau takzet. Nu leh pa thu awih lovin an pawi kan sawi ngei mai; harsatna hmuna kan din meuh chuan ka mawhphurhna san zia pawh ka hre chiang telh telh a. Keimahni-a inhaikuak a ngai a, tuna ka hna hi ka chân ta a nih pawhin hna dang ka zawng leh mai ang.

Duati in luahah pawh pêng kâwi lovin damdawi in ka pan tlang nghal a, natna khuma mu, ka Duatbiki hmêl dawldâng tak ka hmuh chuan ka lainat kher mai Nu Ruati, a in luahna nu nen an lo awm ve rân a, min lo hmuh veleh, "Zo, ka ṭha a nia," a ti sap a. Nuih luih tum ngial mah se a thei lo a chhâ chu a ni e.

Investigation eng eng nge antih tawh tihte ka zawt zung zung a, doctor ka hmu duh tih ka hrilh nghal bawk. Minute 15 hnu velah doctor nen kan inbe ta a, "A Bp a hniam bâkah chawlh hahdam a mamawh a, Iron lam a tlachham bawk," tiin thil dang a sawi nual. "In duh chuan civil hospital lamah insawn ta che u, keimah ka zin dawn a, in enkawl a awlsam zawkin ka ring," a tih leh chuan ka rilrem zawng tak a ni.

A zan zanin Champhai vengsang lamah kan inphur chho leh ta , ka awm ta bawk a, nu Ruati pawhin min hawsan ta a. "I hlauthawng em?" Duati a phun sap a.

"Hlauthawng chiang e, ka ngaihtuahna zawng zawng i luah vek,"

"Ka ṭha ve leh mai ang, eng mah hlauhthawn tur a awm lo a nia," min thlamuan tum tak hian ka kutah a hmer vang vang a, chhungte ngaihsaktu kan nei lo tih kan thinlungin a hre ve ve a, kan inpawhna pawh a thûk sawt.

A nî hrilh ve ṭhaa kan hriat avangin ka call ta a, a ngaihtuah hle. 'Ka u Mama te nupa hi an ti mah mah' a rawn ti hlak hlak a, Duati a lainat thu a sawi bawk. "Zosang, a hna kha bansan turin ti la, kan hnenah lo awm mai rawh se, kan enkawl thei alawm, a pi leh pu-in an ngai ngawih ngawih bawk si, Lungleiah lo pheipui rawh," a ti a.

"Ni lo ve, ka kutah an dah fel tawh a, theih tawpin ka enkawl ang, ka fa leh a nu aia pawimawh zawk ka nunah an awm lo, ka nupui a ni tawh," ka ti hmiah.

A nî nen kan inbiak zawh hnuah cabin an peih fel tawh bawk a, kan lut ta a. A taksa a chau tih a hriat ngawih ngawih a, a muhil deuh reng a ni ber.

Zinglam dar thum a ri chiah a, a rawn luak ta bawrh bawrh a, ka hlauthawng ngei mai. Ka rilruin ka ṭawngṭai ve hial. Mahse, night duty-in an rawn buaipuiin luak danna an pe nghal a, a muhil leh ta. Ka hlauhthawn lutuk vang nge ka pangngai hlei thei lova ka phone a rawn rîk chuan makti zetin ka en a, kan pu a ni.

"Zosang, i call ka lo hmu pek lo a ni e, tunah ruang en dikna hmun aṭangin kan chhuak chiah a..." a tih chuan ka harsatna tawh thu leh chawlh lâk dilna pawh nghâk hman lo a Champhai ka pan thu te, Duatbiki chungchang chenin ka hrilh fai ta vek a, ka harsatna dik tak ka hrilh hi a ṭha ber.

"Ê, lungngai mah ta che, i chawlh dîlna chu kan pawmah ngai hmak rawh, nupuite tluka hlu an awm hleinem," tiin a nui huah huah a, ani hian Ruati nena kan chungchang pawh kha a hria a, vanduai min ti viau. Mahse, Duati chungchangah erawh eng mah a sawi buai eih lo.

Lawm thu ka sawi ve luam a, "In enkawl ṭha ula, dam te chuan hnathawhna khua a la tlai hleinem, kan mamawh huna koh theiha i awm kha a tawk mai, on call duty," a ti awmsam êt. Ka va lawm si êm!

Champhai ka thlen zan chuan chhin khat tê mah ka chhîng lo a, Duati ka veng tlaivar zak. Khawvar thlengin buaina dang kan tâwk tawh lo a, khum âwlah ka lo muhil ve sek a ni ngei ang, Duati phone riin min tiharh ta a. Ani erawh chu a la mutui ngang mai, drip bur li a kal zo vek tawh a, Iron bur khat a kal leh mêk bawk.

Duati nu call a ni. Pi Remruatfeli

"Hello, keimah Zosanga.." ka ti nghut a, ka be châk hlawl lo.

"Duati eng tin nge a awm a, eng ati nge eng mah in rawn sawi loh? A nîin min rawn hrilh lo se chuan eng mah kan hre dawn lo tihna a nia," Zuk ti a.

"Ka awm alawm, ka enkawl thei.."

"Zosangmawi, a nu ka nih hi i hria maw, ka fanu a nih kha," a aw a ring ngang mai.

"Hre teh reng mai, keimahni-a inenkawl turin min ti a ni lawm ni, Pathian zarah eng êm kan ti bik lo ang min ngaihtuah suh u," ka ti hmiah.

"Amah kha ka lo bia ang e," dam deuh zawka a tih chuan, "A muhil rih, kan tih dik loh man kan têl a, a chin fel pawh kan ko-ah a tla tho.." tia ka chhân chuan, mahni thu duh tih hriat zet hian phone a off hmak. Duati hian a nu a nih hi a lo chhun ber mai.

Rawn kal te hi an tum ang tih a nia ka hlauh ni, Duati rilru an hmin leh mai ang. Chawlh ka nei tawh bawk a, tihian a ṭhat chhuah hma chu ka awmpui rih mai dawn a ni.

"Zo, tu nge a?" Ka ṭawng ri a lo hria nge min zâwt ta a.

"I nu a nia,"

"Eng nge a sawi?" A nu nena kan inbiakna ka hrilh ta vek a, "Min thlahthlam tawha an ngaihven ka ngai lo ve, i awm alawm," a tih chuan ka thinlung takin ka lawm.

"Kan lungawi lo kumkhua ang tihna a ni lo a; mahse, tun dinhmunah rih hi chuan lungawi a harsa êm a ni," ka ti a.

"Ka nu leh pa mah ni se, ka haw ngawih ngawih," a ti sap a. A rilru tur ka hrethiam.

Ultrasound leh blood test neuh neuh a nei a, naute a ṭha vek tih ka hriat chuan ka nui suk. Kan nunah a bet tel tlat tawh a, dam taka hospital a chhuahsan thei a nih chuan court-ah kan innei mai ang. Court-a inneih hi inṭhen leh mai mai a harsa a, kan pahnih tan a ṭha ber.

Tlai lamah damdawi in chaw ei ai chuan tiin inah eirawng bawl turin ka hawsan zawk a, amah a harh ṭha tawh a, nurse duty erawh ka chah uluk hle.

(Darkar hnih hnuah)

Inbual fai sarin hospital ka thleng chho leh ta a. Duati room-a lo ṭhu te ka hmuh chuan maktiin ka mengphar âwk! Saitei leh a ṭhianpa Valpuia (Lalfakawma of NÂO VÁ) an lo awm teh mial.

"Ehe! Nangni pahnih chu..." ka ti a.

"En teh, u Zosang, ka chhungte hriat lohvin a nia kan lo kal," Saitei'n a tih chuan ka bo tulh tulh. An inru em maw ni le.

Chutah Valpuia zawkin thil awmzia a sawi ta a. "Saitei lo haw hun tak tur hi naktuk tûk leh a ni a, inboruak leh a nu leh pa tih dan a u Duati'n a hrilh vangin nimin khan a rawn flight a, Lengpuiah ka zuk hmuak alawm, an inah kal lovin Champhai kan rawn pan nghal, sawi chi miah loh, a haw hun tur pangngaiah ka chhukpui leh mai ang," tiin a nui vei suk a.

Cabin-ah kei leh Duati, Saitei leh Valpuia hlim deuhvin kan awmho ta a, zankhat chiah an riah theih dawn avangin hospital-ah awm an tum ruh hle. Hmeichhe fa na na nâ chu an lo inhmangaih teh e.

Ka nau te inneih dawna Lungleia kan kal khân Valpuia hi vawikhat ka hmu tawhin ka hria, a personal life ka hre lo nain a fel hmel riau a, Saitei nen 'an in chu e kha' tepawh a ni mahna. Ka thil ngaihtuah avang chuan ka nui suk. Pi Remruatfeli'n a duh lo ve tho angem le? Duati nu strick zia hrechiangtu ka ni a, anni tal hi chuan buaina tawk lo se ka ti viau.

Cabin chhungah kan ri ve nak nak a, Saitei'n a û tuilumin a hru fai dap a, a rûka lo kal mah ni se kan lawmin kan hlim. Valpuia nen kan inkawm thei phian bawk, pathlawi a nih thu a sawi phei chuan ka nui chhuak teuh kher mai. Kan pi ber hian eng tin tak ngai ang maw?

"U, naute inneih hunah ka lo awmpui dawn che u nia," a tih chuan Duati ka melh zauh a.

"Zosanga'n tumah pawm tir a phal dawn lo," a nui zui kar kar a.

"Ka nu te'n an pawm châk dawn si a.." tiin Saitei a ngawi zui ta vang vang a, thil thui tak a ngaihtuah tih ka hre mai.

"Kan chhungte an lo kal chuan kan thi der vek anga a ni mai," fiamthu-a sawi ni mah ila, Duatbiki hian a hre leh kar mai ang. Ani hi a lung a lianin a luh lul si a, chuti mai mai chuan a chhungte hian an pawh bîk hauhvin ka ring lo. Kei pawh ka chuti tho bawk. Rinsangpuii ve teh chai kha, min melh rum ve khanglâng a, a pawi kan sawi pawh nihlei lo. Lawmsangzela nupui hi chiangkuanga ka biak pawh ka hre hrep lo e.

Saitei te lo riah zan chuan eng mah harsatna kan nei ta lo a, damdawi leh thil ṭûl lei ngaiah an mawng a zâng dun zak zak khawp mai. Duati kan nan an haw dawnah Valpuia'n ₹3000/- lai a pe a, kan hnial fê pawhin a ṭang ve tlat. Chhungkuaah pawh hmangaihtu leh lainattu a nau Saitei tal ala awm a, ka thawveng huai.

Inngai viau mah se, a rûka lo kal annihna hre rengin Aizawl min pansan ta a. Keini pawh in lama treatment lâk chhunzawm turin min chhuah ta bawk a. Buaina pakhat kan su kiang ta. Nithum leh zan hnih hospital-ah kan riak hman. A thawhpuite pawhin an rawn kan liam liam kha a nia, "Nula emaw tih lai laia pasal lo hûng reng che in.." anti fiam nuk hlawm.

Ni e, keimah Zosangmawia hi a pasal ka ni miau alawm.

A in luah zim tê-ah kan chêng dun ve ta rak rak a, tu mah dîp dâltu kan nei lo bawk nen a nuam phian.

"Zo, ka inbual ve thei tawh ang tiraw?" Khumah a ṭhu thluang diai a, ka hmuh sual nge a dul a puar ve tlatin ka hria! Ka ngaihbel zawk nge.

"Thei e a, Chief minister fanu ni mah suh la, ka bual ang che,"

"I chhia, i chhe lutuk..." a nui hak hak a.

"Ka chhe lo a ni ang, i pum chhungah nunna thar ka thun thei miau a.." tiin ka hnaih rûak a.

"Zak lo siah, i va'n zak lo tak.."

"Ruih lai te chuan zah hriat a har ve e, a lo pian hunah whisky rim a nam loh hrâm ka beisei," ka nui chhuak hawk a.

"Zosangmawi, i kâ kha, a kaw lutuk, a lo nam ta a nih chuan i thun vek a lawm le," a nuih a za ve tho chiang e.

Bathroom nuam tak, shower hnuaia inbual ṭhin kha chêp tâwkah kan inhnawh a. "Zo, ka leng lo, a chêp êm a ni," a tih chuan ka nuih a za kher mai.

"Tuar hram hram rawh, kan in tur Ramhluna mi kha, kan sak pum hunah bathroom nuam tawk kan siam dawn nia," tiin a hnung ka nawhsak hauh hauh a, a vun mâm leh nâl han chuan ka hnuai lam zuk control vat a! Ani damkawr rai lehnghal, ka sawi ngam teuh lo.

Kan hausa emaw, rethei pawh ni ila, inchhungkhur nuam leh changkang taka 'de de dei dei' tih ai chuan hetia inhmangaih leh induat theia kan awmna in hi ka thlang fê.

Chhungkaw member kan pun belh hma ngeia kan chênna tur in lian deuh zawn hmasak hi ka tih ngei tur a ni.

[Zirsangliana te nupa]

Kan nupa khumah muhil thei lovin ka tâl sek a, Duati leh Zosanga ka ngaihtuah ngei mai. Zirsanga pawh a muhil thei bik lo a ni ngei ang, a zung sek a, kan inbe lêm lo. Kan lo ti lutuk deuh em ni ang?

Mi fate pawhin an ti lo a ni bik lo a, ṭha te te in an sawi rem sak a, keini nupa rilru erawh a dang hlauh. Rafaela mualphona nen Duati chungchang kan han hre thut kha kan chi-ai a ni ber.

Damdawi inah a awm tih kan hriat leh lek phei chuan kan ngaihtuah em em a, Zosanga ka han biak lah khan a lawm lo tih a chiang reng mai si a, anmahni-a inchingfel tura kan lo ti ta kha pawi kan ti hle.

Faka leh Muanpuii pawh chanchin kan hrilh vek a, anni pawhin Champhai pan rum rum an duh a; mahse, Zirsanga zawkin, "Mi luhlul pahnih anni alawm, kan kâ kan âng ta sa sa, ngawi rih phawt ang u," a ti ta kha a ni a. Duati, kan fa û ber a duat zia leh a hmangaihzia hrechiangtu vek kan ni a, kan hnial duh ta lo.

Faka erawh a rilru a nuam zân lo a, "A chhe ber thleng palh ta se kan mualpho dawn asin," a ti nghe nghe.

Saitei pawh a rawn thleng tawh a, a u nen an inbia nge hlim hmel min hmuh hleithei lo. A pa chu a be ve zauh a, kei phei chu vawikhat mah min be lo hrim hrim, ka biak pawhin a rûl tawk lek lekin min chhâng hmek hmek a, "U Duatin naute a neih hunah ka awmpui ang," a ti ngat. Ka chhâng lêm lo.

A û kan hua-ah a ngai tlat a, puitling rilru pu ve se kan duh vang a ni. A ṭhianpa Valpuia nen an inkawm ve zauh zauh a, Zirsanga'n a be thei fû. Saitei ai chuan a upa zawk daihin ka ring a; mahse, pa ṭha tak a nih hmel, a dam thlup mai.

Rafaela bialnu neih leh pawh kan hre tawh a, zû a in tlêm ta. In chhungah a awm tam lo a, Ramtei nen an inkawp lai khan kohhran thilah tih loh chuan a chhuak khât khawp mai. Mahse, veng khat na na nâ chu Ramtei nen an in zui ve fô. A nun chhiat phah vek nan a hmang dawn emaw tih laiin Diktei a lo lang hlauh a, a zia chho ṭan viau e. Zaipawl hla zir leh hla rem velah ka hmu zauh zauh. Nula hleitling tak a ni.

Duati naupan lai te ka ngaihtuah a, a pi leh pu leh a nî Arini'n an hauh zia ka ngaihtuah mai mai a, hman zan lawkah pawh kan inhau nek. Ka pianpui, ka nau Bawiha nen an inneih avangin kan inngam zual a, Zirsanga nau chiah hi Arini a ni thung. Hmêlah chuan Duati hian a chhûn a, Saitei'n min chhûn thung. Rilru paukhauh leh luhlul thu-ah Duati hi keimah hlauh a ni lawi si. Chuvangin, tun din hmunah pawh chuti maiin a lungawi dawn lo tih ka hria a, kan be chhunzawm ta rih lo mai chauh a ni.

"Muthilh tum rawh, eng êm anti lo ang," tiin Zirsanga'n min rawn kuah a. "Fate enkawl kan lo thiam tawk lo a ni e," a ti leh sup. Engtin mah ka chhâng lo.

Rafaela lo haw thawm kan hriat tâk avangin eng thil mah kan sawi zawm ta lo. Ka fanu te nupa erawh ka mitthla rauh rauh thung.

[Lalrindiki]

Rafaela nen kan lêng chhuak ta kha a ni a, Ramtei hian ka rilru a luah reng! Vawikhat mah an chungchang ka la zawt chhin ngai lo a, tlângkam aṭanga ka hriat leh Ramtei vangin bial zaipawl a bânsan tih kha ka hriat chhun a ni mai.

Eng emaw thil tih nikhuaah kan inhmu thei em em a, huat hmêl taka min melh fo ṭhin hi paidam harsa ka ti.

"In inṭhen hnuah in inbe tawh ngai lo em ni? Tia ka zawh khan, "Vawikhat tê mah ka be tawh lo, a number pawh ka delete vek, kei aia a thlan zawk Famkima fa a pai tawh a, ka biakna chhan tur a awm lo," tiin min chhâng.

"A nih leh vawiin tlaia Famkima ṭawng khan awm zia a nei em?"

"Kha chu ka hriatpui hauh lo. Dikte, a hun lai khan ka duhin ka hmangaih ngei mai; mahse, min duh lo tu umzui hi ka tum lo a, hnunglam hawikîr duh tur khawpa mipa nêp lah ka ni hek lo. Nang hi tawng lo che ila, ka tân awm lo ta ni la, ngaihzawng ka nei kherin ka ring tawh lo." A ti ta a.

"Chuan..." a kutah nghet taka hûmin a mitah ka en kalh a.

"Khawvel inhmangaihna hi a chuai thei a, a dal thei bawk. Kan hmangaih ni-a kan hriat te'n nasa taka min hliama min tih nat emaw, kan rinna min tihchhiatsak hian kan hmangaihna zawng zawng kha a lo dâi ve a, huatnaah a chang ṭhin. Chuvangin, ka tan rinawm la, keipawh ka rinawm ang," a ṭawngkam a fiah fel ngei mai.

"Lota nupui kha hnung lam a hawi kîr avangin Chikhâwnah a chan kha, Ramthansangi avang hian hnung lam hawiin Chikhâwnah chan ka tum miah lo, chu chu ka rilru dik tak a ni," ti lehin a nui suk a, "I awih lo mai thei, mipat hmeichhiatna hi ka la hmang bik lo asin, chawhpawlh nun ka duh lo a, tisa châkna nei lo ka ni bîk hleinem; mahse, ka nupui turin min bum tih ka hriat khan sex ka lo hmanpui lo kha ka inchhir ṭhin," steering wheel a kut ding lamin a hûm nghet sauh a.

"I awih em?" Tia min rawn zawh thut chuan ka phu zawk.

"Eng maw?"

"Aw, sex ka la hmang lo tih chu maw le.."

"Awih lo, awih deuh..." ka nui ta char char a.

"Engvangin nge i awih loh a? Vawiina ka chêt dan vang khan em ni? Ka bânah a rawn hmer a.

"I hrât hmel hrawt hrawt e..." uang deuhva ka lo chhân chuan, "Kan test dawn em ni? Ka zei i ti.." a nui ta a, ka nuih a za ngei mai.

"Test lo mai ang aw, kan chhungkuain kan lawm e.."

"Lalrindik, over miah suh.." ka lam hawi turin a rawn insiam rem a, "Vawiin tlai khan i virgin thu sawi lo la chuan Paradise ka tem tîr ang che maw le.." a ti ve ngial.

"I nasa lutuk, i nasa mah mah.. i.." ka sawi zawh hmain min rawn fâwp ta a, "Ramri kham pêl suh aw, Paradise kal turin ka la inpeih lo a nia," inla hrang paha ka tih chuan, "I inpeih har âwm.." lung lovah pawh a la bîk lo.

"Han rinawm em em phawt mai la, a bâk chu a tla chawpin," ti sapin, ka ṭhut dan ka siam rem a, a mitah tak en chung hian, "Bansan tur i la ngah lutuk, zu hi sim tum ang che, zu in mi pasalah ka duh lo," ka ti ta a.

"Ka tum ang," tih bâkin min chhâng lo.

Kan in thleng min thlah hnuah, "Zu rim ka nam sia, ka lo lût lo mai ang aw.." a tih chuan ka ngaih dan a pêl leh ta.

"Rafael, lo lut mai mai rawh, hmun dangah pên kawina tur i nei te a nih loh chuan,"

"Nei lo e, i nu te an lo awm ve reng hian ka inthlahrung," a ti sup a.

"A ṭha lawm, mangṭha le.."

"Mangṭha tia thlah ka duh lo," a ti leh lawi si.

"Mang chhia le, muttui em em le,"

"Lalrindik.." tiin min zui lût leh ta nge nge.

A ni lah tak a, kan ina a lo kal a piang hian hun thawl ṭha kan nei khât lutuk! Veranda thlanglama kan ṭhu thla râwih te a nih loh chuan ka chhungte an awm ṭhap zel.

"Rafael, i u Duati te chu eng tikah nge in sawi rem dawn?" Ka pa zawhna chu mak ka ti kher mai.

Ani pawhin mak a ti a ngei ang, min rawn melh nghal a, "Ka hre rih lo le, ka u Champhaiah a hna a zawm thar chauh a,"

"A nih tak chu a, pasal nei rual anni ve tawh alawm, Zosanga pawh hna nghet nei sa a nia, an workshop-ah sawn ka lût ve zeuh zeuh zel a, nimin khan an monu a lo awm teh khiah a, an sawi thâwm ka lo hre mai mai maw le," a tih leh tâkah chuan ka lo thâwl huai. Ka sawi emaw a tih ka hlau hman nasâ.

Ka pa nen an inbiak chhungin, inthlâk turin ka luh san ta a.

Rafaela hi chu a lâr ve a, kohhrana a inhman lai pawhin an duh rawn thei hle. Kan zaipawla mi Siamsiami pawh hian a duh tih ka hria; ka status a view ziah a, vawiina kan thlalâk ka dah thar pawh kha a lo en hmasa leh ber. Status leh fb velah ka luangliam khât mai pawh a. Mahse, inneihnaa kan kalna dress kha chu a mawi thlâwt. Kan nalh dun ka tih êm avangin ka dah lo phal lo.

Min fiam ta sap sap rêng a, X bial zaipawl ni mah se ka zahpui lo a, ka Rafaela aia duh hi ka nei bik lo. A nun siam ṭhat erawh ka mawhphurhna a ni a, theih tawp ka chhuah ang.

Kan in kawta âu vak vak ri ka hriat chuan room aṭangin ka tlân chhuak vat a. Tu áw nge tih pawh ka hre lo.

"Rafael, Zawnga lo chhuak rawh.." a ring ṭha mai sia ka va zak tak.

"Chhuak suh, keimah kan chhuak ang e," Rafaela ding uaih tawh chu ka pa'n a nem ṭhu leh a, "Famkima leh bawk maw!?" a ti chhuak sup a.

Ka pa hnungah kalin ka bih dâk dâk a, Ramtei leh mipa pakhat hian Famkima an lo pawt nawk nawk a, thil awmzia ka man uar. Kan in thleng thlengin min rawn umzui a nia, zahthlak ve le.

"He laiah buaina kan duh lo, haw vat rawh u," ka pa'n a ti a.

"Remruattluanga ka hmuh hma chuan ka haw lo ang, kha zawng sen kha.." tiin a tâl chiam a, ka pa phêna ka ding chu ka samah a rawn man hman tlat. Min phih zui dawrh a, ka pai chawn chawn mai! "Rafael..." ka au tuarh a.

Eng tik laiin nge Rafaela a lo chhuah ka hre bik lo. Famkima hmaiah a hnek ṭhuai a, "Ngam leh ngam chu insual mai tur," ti supin a pêt leh nawk a. "Duh tawk r'u" ka pa ṭawng thawmah Rafaela che leh tur a tâwp chawt.

"Mate, eng tin nge a tih che?" Tiin min rawn pan a, "Ramthansang, ka hmuh phâkah nangni pahnih hi in rawn lang leh a nih chuan eng thil mah ka pawisa tawh lo ang," ti thûm chhakin min kuah a.

Mipakhat lo ding ve khan Taxi-ah a nawr lut nawk nawk a, "Rafael, tihpalh.." Ramtei zak hmel chu ka hmuh hmaih bik lo.

Chumi hnu chuan inah kan lût a, a thinrim a la inbengdai hleithei lo. "Ka ngawih rengna hi min nawr nân an hmang leh a nih chuan a pawi khawp ang, Dikte, i na em?" A ti zui zat a.

"Na lo e.."

"A lehpek a awm leh a nih chuan..." a sawi zawm duh tawh lo.

"Puitling zawk leh rilru nei zawk i ni a, ngaidamtu thinlung put a ṭha e," ka pa-in a lo ti ve bawk.

Zan dar 10 velah a haw ta chauh a, a lung a la âwi zân lo deuh chuan ka hria.

Ka pa khân ṭhelh lo se chuan a sawp nasa ngawtin ka ring. Aia upa a zahna kawng hrim hrimah pawh a ngaihsan awm ka ti. A tlân liam hnu fe-ah ka lût ve ta chauh a, Ramtei kha a inchhir tawh ngawtin ka ring, Rafaela aia a thlan kha a ropui fahran lo chu a nih ber kha.

Rafaela nun siam ṭhat hi ka mawhphurhnaah ka ngai a, a nun ngaiah a lêt leh ngei theih nan ṭan ka la sauh sauh ang. Kohhran tana mi ṭangkai ni turin ka duh êm a ni. Pathian mi hriat a ni si a...

B+>[BeckirafARenthleI]<+®®

THE RAPSAGYAN FAMILY

Becky Rafa Renthlei

Chapter-24

[Rafaela & Diktei]

Khatia Famkima te nena kan intih buai zan aṭang khan kar khat a liam tawh a, Diktei nu leh pa hmai zah a na ngei mai. Hna nei lai a nih vangin zan lamah bâk kan inhmu meuh lo a, tunah rih chuan kan inkâr pawh a ṭha ve tawh viau. Social media khawih ṭha peih lo khan amah vângin whatsapp ka bih ve ta zut mai.

"Tlaiah ka lo pêng dawn a nia, zanin chu dinner ka treat ang che," a whatsapp message ka chhiar zo chiaha ka nui suk. Nitin dawr ka nghâk a, Lunglei lam leh Lungsen ami tur Glass eng emaw zât thawn a ngai bawk si a, ka hman ka ring chiah lo. Mahse, a vawikhat sawi ve na a ni a, hnial erawh ka hreh viau.

"Vawiin chu kan buai deuh a, ka hman hma lo ang aw," tia ka reply chuan, "Kei pawh ka hman hma lutuk dawn lo, min nghah ka ngai zâwk mai thei a nia,"

"Ok, ni rawh se," ama'n sawi tur a vawrh chhuak a nih si loh chuan titi khawmawi tur ka hre ve hlawl lo va. Ramtei pawh khan min hau tamna ber a ni a, "Ka ṭhiante pawhin an ngainat loh nachhan che hi chu i ṭawng tlêm lutuk hi a ni ber," min ti nghe nghe, Diktei nen kan inkawp hnu pawh hian chuti maiin ka mizia ka sim thut thei si lo nen hrehawm ka tu ṭan deuh.

"Rafael, ka fanu nena in inkâr hi hre lo kan ni lo a, Pathian ṭih chunga bul inṭan lo a nih chuan eng tihna mah inni chuangin ka ring lo. Pathian dah pawimawh hmasa ang che u," hman zana a pa min zilhna kha ka bengah a ri nawn tlut tlut a, zahawm ka ti thar viau bawk. Kâr khat chhung hian zu ka la in leh miah lo a, a chhan pawh an chhungkaw hmai ka zah vang a ni.

Pick up- ah glass an hlân chhungin ka lo intifai ve a, ina hawna hman awm tawh hek lo. Khua a thim ṭan tawh bawk nen ka hmanhmawh ru et et a, Diktei lo thlen laiin ka inpeih ve chiah. A rawn inchei nalh reuh hle mai.

Khawiah nge kan chhuah dawn? Eng emaw lawm tur nei ang maiin a lawm le a awm le!

"Thawmhnaw hâk thlâk ka keng ve miah lo a nia," ka tih chuan, Nui var var chung hian, "Ka hria, kha le.." a bag aṭangin ka inbel tur a rawn phawrh chhuak ta a, ka ngaih dan a ni ta chiah lo.

"Hetiang inpêk hi ka ngaina lo a nia, ka mamawh leina tur chu ka nei," ka lo phûr ve na zawng zawng a chuai nghal.

"Eng vangin, ka present che a ni mai a.."

"Chu tak chu alawm ka duh loh," ti nghutin tukverh lam ka pan daih a, "Hmeichhiain thil min leisak hi ka dawng ngai lo, keimah ka inngaihtuah thei a, thleng leh mai rawh," ka ti hmiah.

"Rafael, eng nge maw i hriat le? Ngaihkawih tur eng thil mah a awm lo a nia, online-a ka chah a nih kha, i inhmeh ka rin avangin.." a ti sap a.

"Ka mamawh zawng zawng min tum sak thei a nih loh chuan eng mah min lei sak tawh suh, kal ang.." tiin ka ta tura a lei Jeans paw duk leh Shirt dum chu a bag-ah ka khung sak a, "Tuna ka inbel lai nena min zahpui a nih chuan kan inah ka va inthlak lawk ang e,"

"I rilru a va mak bawk ve, Ramthansangi ka ni lo a nia, keimah Lalrindiki zawk," a thinrim hle a ni ang, a biang a sen ṭân a, chêt pawh a che sawn duh map lo.

"Ramtei sawi kai a ngai lo, dinner chu kan ei dawn nge dawn lo?" Kawngkhar bulah dingin ka nghâk reng a, min melh zawk chung hian, "Ei lo mai ang, ka haw zawk ang e," a ti ve hmak.

"I thu thu le," a bâk eng mah ka sawi zawm lo a, min rawn kal pêlh pah hian, "Ka thil pêk che chu i tân inbel a harsa viau a ni ang maw, a ṭha alawm, ka pe lo tawp ang che,"

"Dawn duh lohna chhan ṭha tak ka nei tih i hriat hunah min pêk duhna rilru i la pu fo a nih chuan ka lo dawng ang e, dinner ṭhulh phahna tur êm ni lo mah se min kîlpui peih miau loh te chuan," min chhân zuina pawh nghâk lovin ka car dahna lam ka pansan ta daih a.

Ka nu hian vawi tam min hrilh tlat alawm, "Nupui pasal inneih hmaa thil inlei sak vak vak hi thil ṭul ber a ni lo. I pa nen kan inneih hma hian a bialnu hmasa hnen aṭangin present a dawng fo a, an inṭhen hnuah a rawn dîl lêt leh si a, i pi leh pu te thlengin an rilru a nat phah a, pêk lêt leh dawnin a lo inbel ve tawh tingtang nen thil zahthlak ta a ni." Tiin min hrilh tawh. Chuvangin, Ramtei'n min present a tum pawhin ka hnial tlat ṭhin. Tun hnuah hian ka lo dawng ang tih ka hlau tawh zawk, a kumkhaw sawi a tling dawn bâkah kan la inṭhen zui bawk si.

Car ka tih nun rualin Diktei a rawn chhuak a, ngawi reng hian a front seat-ah a rawn ṭhu nalh a, "Ka thilpêk i dawn theih lohna chhan chu sawi rawh le, Ramthansangi a tel a nih loh chuan.." a hma lam ngun takin a en ding ngar a, a kut a hûm ruh hle bawk.

Ka nu leh pa chungchang leh min tih dan zawng zawng chu ka hrilh ve ta a, "Ho têah mualpho leh hming chhiat a awl si a, invên theih rengah hi chuan mualpho nawn ka tum tawh lo," tiin ka tlân chhuahpui ta a, kan in ka panpui hmiah.

"Hmeichhia zawng zawng kan inang vek kher lo a nia, tun ṭum chu min dawn sak la, inhau phahna tur êma hlu a ni lo aw," ka malpuiah a rawn tawk zauh a, "Rafael, thin chhiatna te, rilru let buta thinrim rîkngawt te hi kan sim dun a ngai, chuti lo zawng, rei kan daih hauh lo ang," a ti ta a.

Dik ka ti, hmeichhia vânga mualpho leh nat ka hlauh tawh êm avangin ka lo ṭawng na deuh a ni mai thei.

"In inah elaw kan kal dawn?" Kan in kawt kan thleng chiah a.

"Aw, ka insiam ve ang chu, a nih loh pawhin zanriah kan ei nghal daih dawn nia,"

"Ang lo lutuk, a zahthlâk.."

A hreh chung chung inah ka hruai lût ta a. Kan nula chauh zuk awm a!

"Khawiah nge an awm vek a?" Tia ka zawh chuan, "Saitei chu a ṭhianpa nen damlo an kan a, i nu leh pa erawh pa Faka te inah an kal."

U Duati te chungchâng an rêl a nih ka ring mai a, vawikhat mah ka la be ve lo. Zosanga pawh ka be chuang lo. Min dem tawh ngawtin ka ring a; mahse, inthiamna chen ka nei tho. Khati khawpa kan inpawh chung khan eng mah min hrilh ve duh lo a, min hrih ni se tun ai hian ṭan lâkpui dan pawh ka hre zawkin ka ring. An â dun hi ka ti lutuk a.

"Lo kal rawh ka room ah," Diktei hruai luh ka tum chuan a duh miah lo. "Min hlau em ni? Ka room pawh ila hmuh loh kha,"

"Ti hian ka lo ṭhu zâwk ang e," a ti deuh tlat. Mahse, hruai luh ve ngei ka duh si a, "Shower ka neih chhungin ka hâk tur lo thlang la," tiin ka luhpui ta nge nge a. Ramtei kha chuan mitmei ven tur a awm loh hi chuan min zui lût ziah a, an mize inpersan lutuk hi a châng chuan mak ka ti ve tho. Hmeichhia ṭheuh ṭheuh.

A thawmhnaw min chahsak pawh ka pawm ta nge nge a, ani tih thinrim hi ka chhungrilin a duh lo pawh a ni mahna.

Shower-ah ka intleuh zuai a, towel nen ka va chhuah chuan ka wardrobe-a ka thawmhnaw a lo keu leu lawr dan dan a, min hmu thut chu a lai ringawt.

"I inthlâk chhungin ka lo va chhuak ang, kan tlai lutuk ang e," a sen ṭâwn ṭâwn thei nia. "Kha hei hi aw..." tih pahin Velvet Jacket uk leh Shirt dum a rawn phawrh chhuak a, cotton jeans dum nen, khumah a rawn theh thla a, chhuah tuma a pên chiah chuan a bânah ka man chat. "Eng tin mah tih ka tum lo che," ka sawi zawh rualin ka lamah pawt hnai sauhvin a hmuiah ka fâwp ta a. A ṭang nasa ngang mai.

"Vawikhat leh tlêm.." duh thawh zeta ka fawhna chu min chhâng lêt ve ta a, towel chauh ka ven avangin min dek ṭha ngam lo! "Rafae..." inlâk hran tumin a thaw halh a.

"Ka ta i ni, ka ta chu fawh a thiang," ka thlah phal lo nasâ, inbual zo chauh ni mah ila ka taksa a lum leh ṭan der.

Khumah ṭhuin ka malchungah ka pawt ṭhu a, a kamis kilhna chung ber ka phelh chuan ka nghâwngah a hmai a phûm daih. Kut lâwnga ka han tawh chiah hian tisa châknain min fan nghâl zel. Mahse, kan pahnih tâna pawi tura tih puitlin tumna rilru ka pu lo.

"Rafael, i kal thui lutuk ang e.."

"No, fawh che a, kuah che hi ka duh mai a nia," ka lamah kuai kûnin ka fâwp leh ta ngâwng ngâwng a, hetiang hian phurna leh châkna nasa ka neih ngai pawh ka hre lo. Ka nghawngah kuah chialin min fawp let ve mial mial a, ka kut pawhin khawih tur lai a bawhkân hauh lo, ka hnuai lam nunna neia a rawn thawh chuan amah a do rân tih pawh ka hria; mahse, ka inthunun theih lohna tura chêt lâk ka tum miah thung lo.

Rei ngial kan infâwh hnuaah ui tak chungin ka thlah ta nge nge a, "Ka nupui tur thianghlimna lo lâksak thawt thawt leh, ka invawnna tibawrhbâng tur khawpa mipa chak lo ka ni bîk lo a nia, Dikte, intuai mâm rawh le," ka pawt tho ve nghal a, a zak tih hai rual a ni lo. Rûi lo hai lova ka duhthawh ṭum ber a la ni hialin ka ring. A kamis hâk hma lam kilhna inhawng hiau aṭang chuan a âwmbawr a lang phîr ṭhaih a, hmeichhe îtawm tak a ni.

"I duh thawh thei mah mah, khatianga i chêt fô chuan insum theih loh chin kan la nei ngei ang," insiam ṭha mawlh mawlh pahin a ti a.

"A teuh lo, ka inthunun thei, ka inthununna pêla chêt ka tum lo tih i hre dawn nia aw ka duatpui.." nui suk chunga ka chhân chuan, "A Rafaela thlâk êm mai, Duatpui, tia koh ka duh lo."

"Engtia koh ka koh nge i duh ber?"

"Dikte, Diki, ka hming pangngaiin.."

"Yes miss.." ka nuih a za kher mai. A nû zêm tho nain a no hluak lo tih ka hriat phah.

A thawmhnaw min thlansak chu ka inbel zung zung a, muang khawtlai lovin kan inzui chhuak ta a. Zan dar sarih a ri ṭêp, ani nena kan awmndan hi a thianghlim ka ti a, eng tikniah emaw chuan nupa kan nih hun a la thleng ve ngeia rinna ka ta tlat.

Lalrindiki aia ṭha hmeichhe dang ka tawn ka ring lo a, ani pawhin kei aia ṭha a tawng kher lo ang.

A nu leh pa a chhungte'n kan inkar an hre vek tawh a, keini pawh chuti tho. Mahse, u Duati te chungchâng avang hian eng mah chiangkuangin min zâwt lo a, ka la hrilh fiah ve ang chu. Ramthansangi inchhirnna tur hian zahawm taka nupui neih leh ngei ka tum.

Ka zu in ṭhin pawh sim duhna ka nei lian telh telh a, Pathian rawng ka phâk tawka ka bâwl loh chuan nun hlimna tak tak ka tem chhin ngai dawn lo tih pawh ka hria.

Pathian aia thlan zawk leh ngaihsak zawk ka neih apiangin ka nun a tlahniam a, kan chhungkua pawhin harsatna kan neih tam phahin ka hre nghe nghe.

Ka kianga ṭhu, Diktei melh zauh chung hian, "Ka tan rinawm la, i tan ka awm ang," tih chiah ka sawi.

[Duatbîki te nupa. Thla li hnuah]

Zosanga chawlh lâk a zo dawn ta. Ka taksa pawhin ngai a awh chho ṭan tawh a, ai kal tîrin ka hlawh a zat ve vein kan insem a, chu chu Zosanga ruahmanna a ni. Bansan ka duh bik lo tih a hrechiang a, ani pawh GP withdraw turin a inbuatsaiha a theh lût fel vek tawh.

Kei aiin naupang hlek mah se mipa nge nge, a ngaihtuahna a puitlingin ruahmanna a siam zung zung a, chêng dun thei dinhmunah kan ding rih lo bawk nen kan inkar boruak a khirh hrep. Court-a inneih a duh thu a sawi chuan kan inhnial hrep a, ka nau neih zawhah muangmara inneih ka duh zâwk tia ka chhân avangin a lawm lo hle.

"I pasal atana min duh tak tak lo a nih chuan tun hi sawi fel hun a ni," a ti hmuk a. "Ka duh lo a ni lo, chhungte'n min ngaihsak lo ta sa sa, nupa angin kan khawsa tho va, an tel lovin kan inngaihtuah thei tih kan lantir ve a ngai alawm, court-a kan inneih chuan a zahawm lo ve asin, chu ai chuan naute pian hunah mawihnai deuh zawkin kan inkutsuih ve ang a.." tia ka thlêm chuan a ngawi ngul a, tunah pawh tukverh bulah dingin pawnlam hla tak a thlir a, hrehawm chu ka ti ve reng.

"Zosang, ngun taka kan ngaihtuah a ngai a nia, min rin ngam a ngai," ka ti leh sap a.

"A ṭha e, i duh ang chu ni rawh se, ni hnih hnuah ka chhuksan tawh dawn che a, weekend apianga lo tlawh che ka tum dawn nia, in thawhpui fanu Kimkimi ka be tawh a, ka awm loh chhungin a lo riahpui ṭhin ang che, weekend-ah a haw zel thung anga, a hlawh ka rawn tum ang," hnial chi miah lovin a ti a. Eng mah ka sawi nawi ngam lo. Min ngaihtuahzia ka hria a, hnial chi pawh ninghal lo chuan.

Ka hlawh a zat ve chiah ka chan tâk avangin pawisa min rawn thawn tur thu a sawi bawk a, inthlahrung lo tur leh ei leh in theihtawpa tiṭha turin min hrilh ngun khawp mai.

Kan chhungte chanchin ve ve kan sawi lang tawh ngai lo a, Saitei erawh kan be zauh zauh a, in lam chanchin kan hre ve vek zel tho. Lawmsangzela nupui Rinsangpuiin nau a la pâi lo fo va, incheck up turin Mumbai an pan tih te pawh kan hre vek. Nu Muanpuii pawh Lawngtlaiah a phei leh tawh a, pa Faka'n kar tawp apiangin a va fin a ni awm e, atu amahin min rawn ngaihsak lo bawk a, rilru na ṭhin mah se tuar chhuah hun kan la nei ang tiin Zosanga'n min fuih fo ṭhin.

Ka pum pawh a puar ve êk êk tawh a, bazar leh insûk a ṭûl apiang Zosanga'n a ti vek a, zu pawh a in ta miah lo. A hna chungchangah erawh an rawn be zut a, ama tawkah a buai ve viau. Min duatna leh min ngaihsakna a ṭhulh phah chuang lo a, a hma ai zawngin ka ngainaa min hawsan hun tur ka huphurh ngawih ngawih.

"Duati, vawiinah incheck up turin kan kal dawn kha chaw ei ang le," nichina a lungawi lo hmêl kha hmuh tur a awm leh tawh lo.

Tûkṭhuan kan ei a, ka thil ei pawh a tui sâwt viau. Saitei sawi danin Rafaela pawhin zu a in tawh lo niawmin ka hria a, ka lâwm viau. Mahse, vawikhat mah min rawn be ve lo erawh ka rilru a na deuh.

Civil hospital-ah bawk in check up turin kan chhuak leh ta a, car a rawn ken avangin tei chhuah kan awlsam dun hle. Ama thawmhnaw bâl chenin a su vek a, min phût chhin lo hrim hrim, kan in luah zîm tê pawh a enkawl ulukin a fâi viau. Zosanga ka lo hriat ṭhin kha hmuh tur a awm mang tawh lo! Amaha puitlingzia lo lang erawh ka duhzawng tak a ni lawi si.

"Lei ngai tur list siam la, kan bazar dawn nia, ka awm loh hunah i tân a buaithlak palh ang," a tih chuan, "Ka lo inngaihtuah ve mai dawn alawm, min ngaihtuah lutuk a nih kha.."

"Min hnial zuah zuah lo la, ka peih lai hian chêt vat vat tur, pen i humin naute a hmêlhem êm lovang chu.." a nui ta hawk hawk a, ka va ngei mai mai tak.

A châng chuan ngun zet hian min thlêk leh vung vung zel a, ka pum te a rawn chûl leh ringawt zel.

"Kâr a hla tawh dawn si a, ka hmuh phâk lova i awm tur hi ka ngaihtuah êm che a ni," a ti tawp.

Tiang em em a, min duat hi ka rin phâk bâk a ni a, ka ngaisang ru viau bawk. Keimah vânga a insênna zawng zawng te, a hahna zawng te avang pawh hian a huatthu sawi ka duh bik miah lo.

Chawhnu pum bazarah kan kal a, lei tur inchhungkhur thil a hre viau.

Min hawsan dawn zanah, "Duati, indîm hle ang che, koh phâkah ka awm dawn si lo a, ka ngaihtuahzia che hre reng chungin aw.." min kuah chungin a ti leh a, min chhuksan a hreh ngawih ngawih tih ka hria. Mahse, thlakhat zet kan awm dun tawh a, a hna chân a duh loh chuan a haw ngei ngei a ngai si. A hlawh zât leh a khâwl zat ka hre vek a, harsa lutukin kan awm lo ang tih ka chhut thiam pha ve.

Hmangaihna chen dun kawngah pawh a insûm thei ngar ngar viau a, zanin erawh a duhâm ve viau. "Tih nat che hi ka phal lo a, midangin i natna an thlen pawh ka duh lo," tih hi a sawi tam ber a ni.

Inngai viau mah ila, inkalsan hun a thleng ta.

"Min thlah duh suh, in en liam hi thil hrehawm tak a ni," a tih tlat avangin a haw dawnah ka thlah ta lo. Mittui far fap chungin, "Zosang, ka hmangaih che," tiin ka phun chhuak sap a.

B+>[BeckirafARenthleI]<+®®

THE RAPSAGYAN FAMILY

Becky Rafa Renthlei

Chapter 25

[Zosanga & Duatbiki]

Champhai aṭanga ka haw thlâkna pawh kâr hnih a tling ve ta, ka chaw ei a tui lo a, ka rilru luah bertu chu Duati a ni. Nitin zantin inbe mah ila ka ngaihtuahnaah amah bâk zuk awm miah lo a! Hun dang nise zu in ka tum leh ringawt ang. Mahse, kan inkar chhe thei thil a nih vangin chhe tê pawhin ka in duh tawh lo.

Zing lam dar li a ri a, thlakhat zet ka mut pui Duati tel lo chuan ka harh leh nge nge e. Lawmsangzela, ka nau missed call ka hmuh chuan ka call back vat a.

"U, i ṭha em?" A ti a, ka ṭhat thu tawi têin ka sawi.

"Mate, min ngaihtuah duh mah ta che, i û hi ka inenkawl thei alawm," tiin âw ka thian kharh a, kan nu hrang mah se ka hmangaihna a nêp phah chuang lo. Bâkah kan nu te ve ve unau pianghmun an la ni tho a, thisen hrang kan ni tlat lo a.

"Inngaihtuah ṭha leh la, nu leh pa do zâwnga awm hi a ṭha lo asin; mahse, ka nu leh pa pawh an dik ka ti chuang lo." Ati záwi raih a.

Rei ngial kan inbiak hnuah kan chanchin kimchang ka hrilh vek a, ka nu leh pa erawh hrilh hre lo turin ka ti thung. Anni lo hi he khawvelah nu leh pa ka nei lo tih ka hria; mahse, fate'n kan lo zir lo deuh anih pawhin hetiang em ema min ti hi ka ngaithiam thei bîk lo a ni. Duati ni se rilru na takin a awm a, nau a pâi tih an hre chunga chháwmdawl chu sawi loh, an ngaihthah hmiah bawk a, a ni em em lo.

"Rinsangpuii pawh a dam a ṭha lutuk lo a, a thï a pût zeuh zeuh," atih chuan, a rang lama incheck up tur leh ngaihthah lo turin ka chah ve a; ka nau nupui hi a sualna sawi tur hre lo mah ila, hman zana Duati te in kan chhuahsan dawna min melh rum ve ringawt kha ka ngaithiam lutuk lo deuh.

Rei fê kan inbiak hnuah a dah ve ṭâwk.

Mumbai-a an incheck-up na result pawh min hrilh zuai zuai kha a ni a, a nupui Rinsangpuii hrisel lohzia hrechiang reng chunga nei kan ni a, ka nu leh pa pawhin an ngaisak vut vut viau a ni awm e.

GP fund withdraw turin ka intheh lût fel tawh a, ka nun dan hmasa leh tun hun chu inpersan tak a ni ta! Zu leh sa hmunah ka tâl tawh lo a, ka hma hun thlîrin theih tawp chhuah a ngai tih ka hrechiang tulh tulh.

Ka phone a rawn rîk chuan rang zetiin ka chhâng a, Duati hnen aṭangin a ni.

"Zo, kan nautê a che tlatin ka hria," Hello, ka tih rual ruala a thusawi chuan min ti nui hawk.

"A ni maw, i hresual a ni lo maw?" Ka ti a.

"Hresual mai thei, sual lo mai thei, nakinah a chêt nawn leh chuan ka lo hrilh ṭha ang che, thil i ei ṭha em?" A ti zui daih a.

Kei aiin upa zawk mah se pangchanna rilru a pu ve tho a, Kimkimi, kan nauvin zantin a riahpui ta a, weekend ah chuan amah tlawh tura kal hrâm ka tum.

"Lo inenkawl ṭha la, nangmah i ṭhat chuan nautê a ṭha tel zêl tihna," tia ka fuih chuan, "Lo lungngai lo la, theih tawpin ka lo in enkawl ṭha dawn nia," ati vei thlap.

Chumi hnu chuan eng eng emaw sawiin kan titi chhunzawm a, a nu leh pa number a block tih a sawi tel. Thil ṭûl ber a ni lo nain sawi buai sak ka tum lo a, rilru natna tawp khâwk kan chunga a lo thlen hi chuan duh loh loh hi tih a lo awl a nih dawn hi.

Pathian hnenah hun rei tak ata tawh ka ṭawngṭai ngai lo a, keima nun nawmna tur ngawt ka ngaihtuah ṭhin. Mahse, Duati leh kan inkâr te, kan chhungkaw boruak avangte hian ṭawngṭai duhna rilru ka pu ve ta hial. Piantharna dik tak ka la nei lo a, ngaihsak pawh ka ngaihsak ngai hek lo. Mahse, Pathian, engkim tithei leh min siamtu hi chu a awm ngei tih ka hria.

Ka khumah ṭhuin chunglam ka melh vang vang a, a vawikhat nân ka ṭawngṭai ve ta. Chham tur alawi pawh ka hriat si loh. Hus!

[Rafaela leh Diktei]

Famkima nen kan buai zan aṭangin ní a liam thui deuh tawh a, kan kohhranah Vanlalsailova te team-in crusade an rawn nei mek a, zanin hi a zanhnihna a ni. Diktei'n chhim ve tura min sawmna chu hreh teh mah ila hnial ka hreh êm avangin ka insiam ta poh chu a nia.

"Rafael, Pathian tel lova inngaihzawnna hian rah ṭha a chhuah dawn miah lo a nia, tisa thil taka kan inpawh zia hrechiangtu ve ve kan ni a; chuvangin, tuna kan awm dan hi chu a ṭha zîktluak lo, Pathian kan dah pawimawh hmasak a ṭha," tia a sawi kha ka bengah a ri nawn tlut tlut.

Zan dar ruk a ri chiah tihah Biak in lam panin ka chhuak ve ta a. Ka va huphurh si êm. Ramthansangi nen kan inṭhen aṭangin kan Biak inah vawikhat mah ka kal ta lo kha a ni a, tuna thla tam a ral hnu hian huphurh tak têa huphurh chungin ka pen chhuak leh ta, ka nu leh pa'n makti hmel takin min thlîr zui vung vung tih ka hria.

"Hey, i va hma ve.." Diktei'n min hmuh veleh a rawn nuih var var a, ka kiai suk.

"Kha kha a ni mai, Scooty kha kan in kawtah dah i duh zawk em?" Ka tih chuan, "A ngai chuang lo, hetah pawh a him tho ang," ati ṭha mai a.

A in chei dan mawlmang zet chu ka en thla ta dan dan a, puan dum bihin, kawr dum leh vara ṭial hi a ha a, a pheikhawk bun pawh a dum tho, a sam sei angreng tak chu a thlah siau a, a fai hmel bawk. Ka hriat tirh ata make up-a hman vul chûk ka hre ngai lo, Lalrindiki kha a ni tlat a.

Mipui zi nuk nuk kârah inthlahrung ru dûkin Biak in chhung kan pan dun ta a.

"Phur chin piah lam" tih thupui hmanga Vanlalsailova thusawi chuan ka chhungril a kher nget nget.

Kha leh chen Pathian rawngbawl inti a, zaipawl conductor ka nih chhung khan ka phur chin leh nuam ka tihna avang te, ka pianpui felna leh ṭhatna, ruihtheih thil tihbuai loh ka nih vang mai a, ṭha ta viaua inngaihnate khan alangah rawngbawlna min chelh tîr tih thlengin ka ngaihtuah kâi a; thu sawi ngun taka ngaithlatu Diktei, ka kianga ṭhu ngei pawh hi a ṭha lo lam kawng ka zawhpui lo chauh tih ka hriat chhuah meuh chuan Pathian mamawhna dik tak, nun tuihâlna awmzia ka hre ve chiah.

Kan chhungkua, kan unau, ka nu leh pa thlengin ka ngaihtuah kâi chho zel a, harsatna leh zahna, mualphona lo thleng zawng zawng te hi amah kan hnaih theih nâna a remruat a ni tih ka hrethiam uar.

Inkhawm kan bâng a, Diktei nen kan in lam panin kan inphur thla ta a.

"Naktuk zan kan inkhawm leh dawn em? A tawp zan a ni tawh si a," ka mitah chiang takin a en kal a.

"Inkhawm e a, ka lo sawm ve thung ang che," tia ka chhân chuan rinhlelh hmel takin min en ṭha leh ngat a, "Min ṭhulhsan vaih chuan.." ati leh hrâm.

"Vawilehkhata ṭhat thut hi a har a, mahse, hun min pe rawh aw.." a kutah vawn sakin chiang tak hian ka en a, a mit menga hriatthiam lohna, mak tihna lang dawt zut chu ka hmu reng.

Keimah Rafael Remruatttluanga hian nun kawng dik zawh ka tum ṭan mek a ni.

Ka room balcony ah kan ṭhu dun a, Saitei'n inlêng a neih avanga inchhunga ṭhu lût lo kan ni. Valpuia(NÂO VÁ) nen an nui dun hak hak a, Saitei hian mipa a kawm bawrh bawrh leh in lêng a neih ka hriat vawikhatna a ni bawk. U Duati ang lo takin a ngawichawi a, a zakzum bawk.

Tuna lo lêng pa hi chu a puitlin hmel bâkah u Duati ai pawhin a upat zawk ka ring. A sâng ṭha hle a, kan inchen ka ring deuh ngawt, a chanchin kimchang hriat ka nei lo a, Aizawl khua tho a ni tih chauh chu ka hriat chhun a ni.

Diktei hawna tur a hla deuh si a, thlah ka tum ta a, Scooty a rawn keng hlauh zawk a, atihzia phian.

"Zanin chu min ngai lo riau," tiin a ṭhutna aṭangin a rawn tho chhuak ṭalh ṭalh a, "I ngaih dan a nih chu, fawh hrep che ka châk zia hria la, min fawh hmasak ka ring," a nui nghal hak a. A hma ai chuan inpawh tawh tak kan ni.

Ka room lam aṭanga chhuah a duh loh vângin sitting room lamah ka kualpui a, ka room thar, Ramtei nena kan hman dun tur in chunga mi kha luah lovin inhnuaia ka room ngai ka hmang leh a, ka nu leh pa'n Saiteii an hmantir daih. Pawi pawh ka ti chuang lo.

Choka lam aṭanga ka nu lo chhuakin Diktei a hmuh chuan a nuih var var a, "Dikte, naktuk tlaiah chaw lo ei ta che," tia a sâwm chuan mak ka lo ti hle.

"Ah..ih.." Diktei a hamhaih viau.

"I chhungte bulah lo sawi la, Rafaela hi i lo hrilh leh mai dawn nia," ala ti tak deuh deuh a, ka nu hian Diktei chungchâng hi min zawt ngai vak lo. Eng emaw tak ruahmanna a nei a ni chiang.

"Aw le, zanah inkhawm leh kan tum sia a rem phian mai thei a nia.." tiin an inthlah ta kha a nia. Diktei tlân liam tur chuan bân min rawn vai khum zauh a, a lan theih chhung ka thlir zui vang vang a, kan inhriat dan te ngaihtuahin beidawng miah lova min ngaihsak tlatna hian rah ṭha a chhuah ngei ka beisei.

In chhunga ka luh leh chuan, "Rafael, i dam maw, i ti ṭha bik hle mai," tiin Valpuia'n min lo bia a, ka inkhawmna thawmhnaw kha ka la thlâk lo a, "Nia, Vanlalsailova thu sawi ngaihthlak a châkawm alawm," ka ti ṭha ve mai.

Rei vak lo an bula ka ṭhut hnuah chokaah ka lut leh a, ka nu'n Vawksa chhum tur a lo buatsaih mek a, "Diktei kha chaw eiah i sawm dawn tih min hrilh lâwk lo a.." dam thlapin ka zawt a.

"Nia, ka ngaihtuah chhuah chawp a nih kha, a fel reuh riau mai,"

"I û in a lo be mial che em?" Atih zawm leh daih a.

"Aih, be lo, u Duati in tihdan hi chu ka lawm vak lo a nia, Ni Arini pawh a thinrim viau kha," ka ti a.

"An tana ṭha tur zawk alawm, nu leh pa zahna châng an hre lo lutuka, Zosanga pawh a ni tho, kan fa annihna a bo dawn chuang lo a, anmahni hian han tâl ve nawk nawk phawt teh se. I nu Muanpuii pawh a rilru a hah teh kha.." ati a.

"U Duati chu remchangah ka la be ve dawn nia," tiin choka ka chhuahsan a, min chhânna pawh ka hre zui ta lo.

Ka mut fel vek hnuah Diktei message whatsaap ami ka chhiar nui vur vur a.

# Chaw lo ei kha ka tum a nia, i mother India lo hrilh rawh aw.. smiley a tlar phei dal.

# Ka lo hruai dawn che nia, in khawm dress lo keng nghal la.

Naktuk hi Sunday a ni a, zing lam chu an kohhranah a inkhâwm dawn a, zan lamah kan Biak inah kan inkhâwm ve thung ang.

Zu in châkna neih loh thu awm bîk suh. Keimaha ka awm hi chuan ka in leh châk tlat zel. Mahse, ka nun hluiah kîr leh tumna ka nei tawh lo a, Ramtei hnena kîr ka tum lo ang bawkin Lalrindiki te, ka chhungkua leh kohhran tãna innghahna tlâk nih ka tum bur.

Rei fê whatsapp ah kan inbia a, Zosanga status ka view chuan ka nui suk. "Ka Duatbiki ka ngai veng veng," tih a dah ngei.

An inhmangaihzia ka hriatchian êm avangin an thutlûknaah ka dem lo ve ve a; mahse, engtikni ah emaw chuan Pathian vanga kan insuihkhawm ka la ring ve tlat.

SUNDAY 4:00PM

RAFAELA

Ka nu leh Saitei'n eirawng an bawl a, Diktei chungchang an sawi pawh ka hre pha vek.

"Rafaela tan chuan ani tluka ṭha an awm lo ang; mahse, Ramtei pawh kan ngai ṭha em em kha a nia, kan lo ring sual viau tho mai, kohhran bêl lo ai chuan kohhran huang chhunga tâl tam nge nge chu a dan a dang deuh turah ngai ang," ka nu in a ti.

Diktei sâwm tura ka kal chhuahin tlailam dar li a ri tawh a, vawiin nilêngin kan inbe mumal lo. Kan inkhawm ve ve a, inkhawm bânah ka mut daih avangin ka be bik lova, zu hmuna awm ka nih loh vang nge ani pawhin min rawn ngaihven khu chûk lem lo a, a hma ang kha chu nise min phone leh sek tawhin a nia ka rin.

Diktei miziaa mak ka tih rûk deuh chu, zu ka in regular viau lai khân thinrim inṭhen ngam khawpin min hau ngai miah lo. Zu in mi a huatzia erawh ka hre ve tho a, inneihnaa kan kal ṭum pawh khan ka thinrimin ka in leh a nih kha. Mahse, dawhthei takin min nghâk a, hmalam hun thui tak thlîr duh mah suh ila, tih nat hi ka hlau ru ve tlat. A mihring tak pawhin..

"Kan Lalrindiki chaw eiah te in lo sawm a," inchhunga ka luh rual rualin a nu a lo nui ṭhâ a, "Zan lamah Crusade chhim ve leh kan duh sia, a remchâng êm a," tiin ṭhutna min kawh hmuhna lam ka pan a, amah Diktei tak chu ka hmu lo.

Room aṭanga Diktei a lo chhuah chuan bag pakhat a rawn chhuahpui a, a inkhâwm dress tih ka hre mai. Nui var var chung hian min en a, "Ka zak leh deuh," zuk ti a.

"Zak rual i ni tawh hleinem, puar deuh khan i va ei dawn nia," a nu in a lo ti ve bawk a, ka nuih a za deuh. Kei aia a naupan zawk vang nge duat rûkna riau ka nei a; chuti a nih rualin a hmaa ka mualpho tawhna avang khan ka invêng ru rân lawi si.

Zanriah kan kîl hmain chhung inkhawm kan nei a, hei hi chu kan tih ṭhin dan a ni ve a, ka pa Zirsangliana'n hun a hmang a, Diktei nen kan ṭhu dun a, Saitei leh ka nu an ṭhu tlâng bawk. Kan nula awmpui ṭhin kha an khuaah a haw ve lawk a, kan tlêm phah sawt.

"Dikte, zanriah min rawn kilpui theia kan lawm viau a nia, kan chhungkaw boruak chu sawi hranpa ngai lovin i hre vek tho a, veng chhungah sawisep kan kâi viau bawk. Bawiha nen hian in inkawp dan hre vek lo mah ila, Pathian in hriat a ṭûl, mihring induhna ringawt hi chuan rei a kal theih lova a pawimawh hmasa ber chu Pathian a ni tih inhriat a ṭha hlê," ṭawngṭai hmaa ka pa thu sawi chu dik ka ti viau.

Chumi hnu chuan inpawh tlâng takin zanriah kan kîlho ta a, u Duati awm lo erawh rilru a nuam zân lo. Kan hnenah awm tam lo mah se tuna a awm loh dan nen a boruak a inan loh avangin hrehawm kan ti ru ṭheuh.

VALPUIA OF NÂO VÁ

Sunday zan a nih vangin ka inkhâwm ve hrâm a, ka nupui Vanlalthlamuanpuii boralna pawh kum thum zet a liam ta.

Sentei thih dan kha mi kut tuar a nih avangin hun rei fê ngai ka awh thei lo kha a ni a, a thlanlung pawh mawihnâi takin ka phun tawh bawk. Mahse, amah thattu Lalthlengliana, a pasal hlui erawh hriat chhuah hma a ni ta hlauh a, hunlâia ka thinrimna khan Van a tawng hial awm e.

Dam chhunga lungin tâng tura a chungthu rêl a nih hma khân thin thiin ka muhil ngai meuh lo. Phuba lâk duhnain min tur et et a, ka unaunu Lungleia awm te pawhin kum khat dâwn min rawn awmpui a, Thlengliana chungthu an rêl fel hnu, nun phung pangngai ka zawh ve ṭan tihah min lêtsan chauh a ni.

Tunah chuan pathlâwi ka lo ni ta a. Saitei ka nuna a lo lan hma zawng kha chuan ka nunah hmeichhiain hmun an chang lo mai ni lovin ka ngaihsak tawh ngai miah lo.

Nizan lamah an inah ka lêng leh a, nupui nei lova awm reng ka tân a ṭhat loh bâkah Saitei chân mai ka hlau a, kan kum a inthlau deuh tih lovah chuan harsatna em em awm lo turah ka ngai.

"U Valpui, inkhawm bânah lo lêng rawh aw.." whatsapp aṭanga min biakna ka chhiar zo chiah, ka nui suk.

Kan inkawpna a la rei lo nain thinlung taka ka kawm theih awm chhun a ni. A u Duati nen an inngai em em a, Champhaia ka han zinpui pawh kha ka inchhir miah lo, Duati kha a ngaihawmin a fel a, Saitei a duhawm thung.

Lalfakawma hian nupui pahnihna ka nei leh dawn a nih ngat chuan Saitei a ni ngei ang. An chhungkua pawh an pangngai a, Duati leh Rafaela erawh a upa lam ni mah se an rilru a la puitling chiah lo ka ti. Misual anni tihna ni lovin.

Sentei thih ni khân Thlengliana kha lo that ve ta ila Saitei hi ka tawng awm si lo a, vawikhat mah sex kan la hmang lo a, hmanpui tumna pawh ka nei lo. Pathian hmaa thu ka tiam dawn a nih chuan fair takin le. Saitei hian 'u Valpui' tia min koh hian nuam ka ti riau, a nu Remruatfeli leh a pa Zirsangliana pawh ka ngaina phian.

An ina lêng turin ka insiam ta a, ka nupui hlui nena kan thlalâk banga intar chu enin, "Sente, ka tidik lo a nih chuan min ngaidam rawh aw, ka hmuh phâkah, ka kiangah awm lo mah la, ka thinlungah i châm reng asin," tiin ka phun chhuak sup a. Engtikah mah Vanlalthlamuanpuii hi chu ka theihnghilh dawn lo; chumi a nih rualin amah ngaia ka tawrhna khan ziaawm lam a pan tawh a, hma lam pana chhungkua ka din ve hi a hun tawh a ni.

Khawvelah hian mal ngawih ngawiha awm reng tur ka ni bîk dawn em ni?

Saitei zirna ala laklawh si a, kuminah chuan inneih sawina chi-ah ka ngai lo. A zirlai te han zo fel ve phawt se, a nu leh pa rem tihna ngeiin nupuia neih ka tum tlat.

A hlawhtlinna erawh chunglam kuta awm a ni thung.

B+>[BeckirafARenthleI]<+®®

THE RAPSAGYAN FAMILY

Becky Rafa Renthlei

Chapter 26

[Zosangmawia leh Duatbiki]

Thlakhat hnuah.

Vawiin hian Champhai lam panin ka kal dawn a, tuna ka kal tumna chhan hi chu kârkhat lâi Duatin chawlh a nei a, ka hnena hruai thlâk ka tum vang a ni. Tunkar liam ta chhung zawng khân buaipui tur ka ngah êm avangin duh ang pawhin ka ngaihsak ṭha hman lova, zanah ni se ka hna thil buaipui a ngai leh si, ka hah takzet.

"Zo, fimkhur takin lo tlân rawh aw, min lo hruai kher pawh a ngai lo a nia, Sumo service a tam teh reng nen, keimahin ka lo chhuk thei reng alawm," inthlahrung takin ati a.

"Ka lo hruai ang che tiin ka sawi tawh a, ro hran rawn rêl lo la aw," fiam thu titak deuhva ka chhân chuan, "I chhia, i chhe mah mah," a ti hlak hlak a.

A râi no thinchhiat zualpui a reh tawh a, thla hmasa lam khân kan inbe rei thei lo; huat tur a hre mai sia, phone kan dah tau leh nge nge zel.

"Lo zin thlâk chu ka mamawh ve reng, thawmhnaw tihtlâk inbel tur ka nei lo a, ka tâwt vek tawh, helamah ṭhui tîr tur hmel hriat ang vâng ropui si." A ti nang nang a, sawi buai sak ka tum lem lo, a chhoh tirha a thawmhnaw ken bâk kha eng tehchiam a lei zuiin ka ring lo a, a dul a lo lian ve ta deuh nen inbel tur a vâng duh khawpin ka ring. A nulât lai titawh mai ang, nau a pai hmaa a thawmhnaw te kha chu hâk zawm chi ninghal lo chuan.

Kan monu Rinsangpuii nen nimin khân Civil hospital bulah kan inhmu a, "U Zo, in ṭha em?" Tia min zawh chuan ka bu nghut. Min biakzui hlau ru zetin ka kal sawn daih kha a nia. Ka nau nupui nen hian kan in 'Chu e kha' vak lo pawh a ni mahna.

Champhai lam panin zing dar 8 ah ka chhuak ta a, ka sum khâwlsa pawh GP a lo chhuah hma chuan ka khawih che ngam tawh lo. Duati nau neih hunah kan tâl buai lutuk ang tih ka hlau a, kan nu leh pa te lam, atu mah mahin ban buai kan duh dâwn si lova ka inren ru viau.

Kâwlkulh ka thlenin, Duati Nî, Arini min lo phone a.

"Zosang, Duati eng mah ka la hrilh lo a, nimin tlaiah a pi inchung step aṭangin a lum a, Serkawn hospital-ah kan admit a, ngaihtuahawm chu a ni lo." A rawn ti a, Champhai lam pana ka kal tur thu leh amah Duati hruai ka tum tih ka sawi chuan, "Ngaihtuahawm a ni hran lo a, in rawn lêt leh hma chuan hrilh duh lo law law mai rawh aw, a dinhmun a zirin chanchin ka lo hrilh dawn che nia," ati ta a.

Ni Arini hi Duati pa farnu dik tak a ni a, Nu Mafeli nau chiah nen an innei ve thung a, chhungkhat an innei tihna a nih ber chu.

Muangchâng lovin Champhai lam ka pan zui leh ta a.

Ka nu dik tak Zomuankimi chanchin pawh ka hriat belh tam tawh viau a, ka pa Lalfakhlua thawhna hnuai; Hyundai company-a a thawh laia chesual a ni tih thlengin ka hre tawh bawk. Tuna ka nu, Lalmuanpuii nen unau pahnih chiah anni a, kei ka lo pian tâk si-ah chuan ka nu phirpui hian nuhrawn, thisen hrang daihin min enkawl ai chuan ka pa a nei ta tih pawh ka hre tawh bawk.

Mahse, ka lungawi lohna ber chu, engkim chiang taka min hrilh lo hi a ni. Ṭha taka min hrilhin anni lo chu nu leh pa ka nei lo tih te kha min lo hrilh tawh nise ka lungawi daih tawh ang, kum sawmhnih chuang zet an zêp a nia, hriat thiam a har ve êm atin ni.

Champhai ka thlenin khua a thim tawh a, Kâwlkulha ka awm lâia ka biak bâk kha Duati ka be nawn tawh lo a, a in luah kawtah car tidingin rei lo tê ka nghâka ka thâwm a hre lo nge a rawn dîk dâk miah lo!

Kawngkhar ka kik chuan min lo chhâwn vat a, "Lo lût rawh.." a aw ka hre leh thei ta, ka nui suk. Ka car thâwm hria ni se min lo hmuah ka ring; Kawngkhar ka pawt hawng ta a, Duati nen kan inhmachhawn ta rân mai. Sawi mai tur a haihchham a ni ngei ang, a âng phiau a, mit a khap fak fak bawk..

"Ah..Zosang.." a lâi lutuk hmêl ka hmuh chuan ka nui chhuak teuh kher mai. Thlanglam tukverh lam panin a kal sawn daih a, a upa zâwk nisi hian laih deuh ṭût a ching.

"Min fawh pawh i tum lo a.." ka ti sup a.

"Tenawm suh..." tiin min la en ta chuang lo.

A pian hmang chu chiang takin ka en ta a, a pum a puar ve âk tawh a, Kurta thâwl lam deuh inbel mah se a hriat vek tawh tho. Slipper pan thlep a bun bawk a, a ke ṭhiah fai zet pawh ala ngai reng. A sam chu a chhîpah a vingvial chho vek a, a biang sen ṭân te chu ka hmuh hmaih hek lo.

"Min lo call hmasa la chuan ka lo hmuak tur che a nia," ati chhuak sap a.

"Min hmuak angah inngai hmiah rawh, ka ngaih zia che hi," tih pahin ka pan hnai ruak a, a kâwngah ka kut dinglama kuahin veilamin a khabe ka dawm a, kei hian fawh ngei ka tum. Chutah kûn hniam riai riaiin a hmuiah ka fâwp ta a, a hmui nêl thep ka fawh leh meuh chuan ka rin phâk bâkin ka lo ngaih zia ka hre chhuak.

Ani pawhin min min fâwp lêt ve mial mial a, a pum chhunga ka fa, keima fa ngei awm chu pâwnlam aṭangin dîmte hian ka chûl kual a, ka chhungril a hlim veng veng.

In fawh reng theih ni bîk hek suh, mitmeng thim raiha min en chung hian, "Inbual la, chaw ei ka siam dawn che nia," ati ta a.

Tunah chuan man leh mual inhlân lo mah ila nupa dik tak angin kan khawsa chho tawh a, an in kan chhuahsan dawn khân kan nu leh pa te ve ve hriatpuina a nih tlat avangin Duati lakah inthlahrunna pakhat mah ka nei lo. Ka nupui ni turin leh ka enkawl turin ka kiangah an hnutchhiah tih kha ka hriat chhun a ni mai.

Chaw ei min siam a, "Nangmah chauhva ei bîk chu a fair lo êm mai," tia min rawn kîlpui chuan angaihna a hria ka ti. Hmangaihna dik tak inpe tawn tur hian sawi liam mai maia sawi kûr nguai lam a ni lo. Chêtziaah tam tak kan lan tîr thei a ni tih ka hriat phah bawk.

A in luah zîmtê-ah chuan kan pahnihin kan awm ve leh ta rak rak a, Kimkimi kha ka chhoh dawn avangin an in lamah a haw ve a, zanin chiah Champhaiah kan awm anga naktuk zingah Aizawl panin kan chhuk leh nghal ang.

Zan mutnaah pawh kan buai ta lo.

Duati bulah sawi buai ngai miah lovin ka mu hmak a, 'inbual rual ang' tia ka sâwmna erawh min hnial thung. A zak deuh a nih hmel.

"Aizawla kan chhuk hunah i incheck up dawn nia," khumah muin ka kuah chial a, "Ka in check up-na ala rei lo a, a ngai kher pawhin ka ring lo," ani pawhin min kuah nghet hle.

"Doctor khân nupa nun hman min khapsak lovin ka hria," nui ṭhâ chunga ka tih chuan, "I zak lo, khatiang ringawt ngaihtuah suh," ati tak naa min hnaih chêtah a mu tho.

"Eng vangin nge ka zah lêm ang, ka fa nu tur i ni a, ka Duatbîki i ni bawk," a taksa lum ham ham leh a mitmeng de sar te chuan min hîp leh zar tawh. A naupai vanga a hnute lian ta sawt te, a mawngbâwr khal leh er deuh tân chuan ka hnuailamah nunna thar a siam a, thunun ka tum eih lo.

Dîm leh duat taka hmangaihna ka chenpui zawh meuh chuan zân dar sawmpakhat a pêl duai tawh. Ka âwm ruak kûngah chuan beiin a muhil ta sâk sâk a.

Pastor hriatpuina tel lo nu leh pa hriatpuina ringawt hi ka duh khawp lo a, a rang lama inkutsuih ngei ka duh bawk. A man chungchângah erawh chuan palâi an inah tirh ka tum ṭâlh tho a, min rem duh lo a nih leh Lunglei lama a pite bulah ṭan ka khawh leh tho ang. Kan thlavang hauhtu Ni Arini ala awm tal alawm le.

A tûk zinga ka harh ve meuh chuan nî a lo chhuak uar tawh a, Duatbiki zâi rât rât chu ka mut hmunah ka ngaihthla reng a, eirawng a bâwl a ni ngei ang. Chaw ei khama chhuak tur kan nih tho avangin ka hmanhmawh khu chûk lêm lo.

"Zosang, chaw ei a hun dawn a nia lo tho tawh rawh," Room-ah rawn kalin khumah a ṭhu a, ka lo maimitchhing tlat.

Vawihnih vawithum min kohnaah pawh ka chêt duh tlat loh avangin, "Thider ziah kher suh.." a sawi zo hman chiah tihah ka nui chhuak ta nge nge a, "Min va puh chhe deuh ve," tiin ka âwmah ka kuai bet a, a ṭang leh ṭeuh tawh. "Hey, a hun leh hmun thliar ve rawh aw, kah pah deuh deuh hian min khawih suh," ati deuh hlar.

A thinchhe reuh hlê tih hi chu ka hriat hnu vek tawh a ni a, ngáia ka neih mai a ngai.

Tûk ṭhuan kan ei khamah muangchâng lovin Aizawl kan pan leh ta a. A pi dam loh thu erawh ka hrilh hre ta lo.

"Ka nu te i hmu ngai em, Rafaela te pawh," tia min zawh chuan ka hmuh ngai loh thu leh an hnen aṭanga eng chanchin mah ka hriat loh thuin ka chhâng a, ka nau Lawmsangzela nena kan inbiakna pawh ka hrilh ve vek.

"Lawmsanga rilru hi chu a ṭha êm a, a hmangaih bawk che a, chuvangin a theihna chin chinah kan ngaihsak dawn nia. Saitei leh Valpuia kha an inkawp ve deuh deuh tak tak a, kum 12 in an inthlau," a sawi pahin a ner nâng a, ka nuih a za.

"Hmeichhe tân te chuan mahni aia upa an ṭha alawm, hmeichhia an upat zawk hi chuan a buaithlâk," tiin kawngpui lam ngun takin ka thlir a, "Chuti chu kei aiin i naupang zawk sia, a ṭha lo tihna a ni maw?" Tiin min zâwt lêt khauh.

"Keini pahnih chungchâng kan sawi lo, kei aia i upatna a tlêm êm mai," Ka ti a.

"Mahse, ka upa zawk tho, kan chhuk thu hi Saitei kan hrilh ve ang e, a lo lêng duh mai thei a, Rafaela pawh remchangah ka bia ang," ati leh a, a nau te pahnih a hmangaih zia ka hrechiang a, eng mah sawi buai ka tum lova Rafaela reh ta hmak erawh ka lâwm chiah lo mai pawh a.

Aizawl kan luh hmain Hruaia ka phone a, ka in chahbi pawh a kutah ka dah nghe nghe kha a nia, eirawng min lo bâwl kêp tur thu an sawi. Ṭhian kâwma ka tuallim lohna chin pawh thla a tling tawh a, ka quarter ṭhenawma mi, ṭhianpa Hruaia tih loh chuan kan chanchin kimchang an hre lo va, kan pu erawh chipchiar takin ka hrilh thung.

"Zosang, ka nu leh pa te hian min huat tak tak i ring em?" Tia min zawh thut chuan chhânna pêk mai dan tur ka hre bik lova, "Kan thiltih sual a lian tham a, bâkah kan chhungkaw inṭhian ṭhatna ti bawrhbângah min ngai takzet a nih chuan min haw mahna, min haw tak tak lo nibse min rawn ngaihsakin min lo be em em ang, eng pawh nise an lak aṭang hian eng mah beisei lo ila kan na lo a ni mai." Ka ti deuh duah.

"Min biak loh chhung chu ka be hmasa dawn bik lo, dam tea naute kan nei thei a nih chuan an en pawh ka phal dawn lo tih ka sawi kha ka ti tak tak," a thinrim thar leh dawna ka hriat avangin ka thusawi lai ka thlâk ta daih a.

Ramhluna kan in sak chhunzawm ka tum thu leh pawisa pawh holam mai maia, hman a rem rih lo tihte ka hrilh hre ta zâwk a, "Ka khâwlsa pawh a hman theih tho," a tih chuan, "Kha kha chu tikhân dah rih rawh, pawisa mamawh loh tak tak a awm lo a, kan indaih ta ngang lo a nih chuan duh leh kan khawih chauh dawn nia," tiin ka chhâng.

Ni e, engkimah puitlin kan zir a ngai a, chhungkua kan din tak tak dawn ta.

Zosangmawia hi ka dam ṭha a nih phawt chuan ka nupui fanau te hrehawmin ka siam lo ang.

LALFAKAWMA(VALPUIA) NÂO VÁ

Saitei pi Lungleia mi, a nu nu a chêtsual avangin hmanhmawh takin min rawn bia a, an motor khalhtu tur an awm loh avangin Saitei leh a nu kal an duh si a, Rafaela kal tîr an tum ut ut a; mahse, Glass house, an dawr nghâktu tur an awm dawn loh avanga keimah min bia an ni. Saitei pa chu a ṭhianpa nen Mualvûmah car dahin an kal bawk si a, ka u te tlawh pahna remchâng alawm tiin áw ka pawh hmak.

Kawngtluanin Saitei leh a nuin Duati chungchang an sawi phei a, "A lo bia che a nih chuan ṭha takin chhâng la, nagma'n va be hmasa kher suh ang che," tia a nuin a hrilh chuan a ṭeu teh e. A u hi a ngaisânga a zah thiam bawk. Hmannia ka han tlawhpui pawh kha sawi lan chi ni hek suh, ka ngawi ral ta vel mai mai.

Thenzawl kan thlenin thingpui kan in zawk a, Duati'n Saitei a rawn call ta a, Aizawlah an lo chhuk niawm tak a ni. A nu'n Saitei a melh no vak lo. Nu Mafeli hi nu rilru lian, a tih loh lamah chuan luhlul tlat a nih ka ring a, a fanu Duati hian a lo chhûn ber a nih hi.

Lunglei kan thlenin Serkawn damdawi inah Nu Mafeli a pêng nghâl a, Saitei nen kan tlân tlang thung. A la hma bawk nen motor sil turin Tlawng(Zobawk) ah kan kal ta a, Sethlun kâwna dâwr inhawng pakhat chu ka Sumo khalh laia ka dawr ve fo ṭhin a nih vângin Surf leh ei tur nepnawi kan lam phei a, Saitei nen hian hun thâwl; kan pahnih chauhva awmna hun ṭha kan nei khât khawp mai.

"U Valpui, i u te inah em ni i thlen ang?" Tia min min zawh chuan, "A nih mai loh chuan, i pi te bula ka lo thlen ve chuan i nu te ngaih dan a ni lo palh ang," ka ti a.

"A ho e, kan hruai i nia, kan bulah lo thleng ve mai la," a ti leh sap a. A rilru a thianghlima rilru kâwi pu a min sawm a ni lo tih ka hriat sak bawk.

Anmahni Car kan ken avangin tlêm chuan ka tân a buaithlak deuh, ka thlenna lamah 'hawn phei rawh' min ti si lo a, ka haw pheina tur indap chawp ka ngai tih sawi lan ka duh bik lo va. Muang châng lovin Car kan sil dun ta a, a kamis hâk lai phelhin Tawnzau nen a awm a, a kekawr tlâng a thlep chhing bawk. A vun no leh mâm han chuan ka mit ala kher mai.

A âwmbâwr lian fahran lo; mahse, kawh vah lawi si chu ka melh leh zauh zel a, tisa thil tak pawhin ka ît tih phat buai ka tum lo. Mipa hrisel ṭha, thotháng ṭha tak tan chuan ani nula tituai nalh zet chu ka ît lo thei bik lo.

Car kan sil zawh hnuah kan ei tur pâi cold drinks leh chips kan ei lai chuan, "Saite, i zirna hi chhunzawm tawh lo mai la, innei mai ang," tiin ka sawi chhuak phawng a.

"Â, ka u te pahnih ti hi anni si a, ka nu leh pa rilru a na lutuk dawn asin, bâkah pasal neih chu..." sawi zawm duh lovin a ngawi ta daih a. Ani tân khua ala tlâi lo; mahse, keiin kum sawm li ka hnaih tawh a, ka hmanhmawh tawh tih lam min chhûtpui miah lo chu ka run riau.

"Chu, pasal atan min duh vak na nge?" Ka ti chang fak a.

"Chutiang lam pawh a ni lo, ka zirnaah sum tam tak an sêng a, tun lai kan chhungkaw boruak nen ka tân thiltih chi a ni rih lo," a sawi zawh rualin hnuai lam a bih nghâl daih.

"Lo zir chhuak ta pawh ni la, chhuanlam dang i nei leh tho ang," ti hmukin ka ding chhuak hluai a, "U Valpui..." ati sap.

"Haw ang, kan kum inthlauhna te pawh chhút ve la, tin, pathlawi ka ni bawk..." a vawikhat nân pathlawi ka nih thu ka sawi chhuak ve ta, Saitei'n makti hmel taka min enna chu ka hai der lui tlat a. Kan inhriat ṭantirh leh vawiin ni thlen hma loh hi chuan pathlawi, nupui sûn tawh ka ni tih ka la sawi chhuak lo.

"I va inzêp thei deuh ve.." ati vei hmak.

"Zêp leh zêp loh tur pawhin sawi dunna tur hun thâwl ṭha kan nei ngai hleinem, ka nupui a thi tawh a, a thih aṭanga ka hmeichhe ngaihsak awm chhun i ni bawk, i duh chuan inngaihtuah ṭha leh ang che," ka ti tlang hmiah a.

"A lo nih tak chu, min duh thu i sawi thei a, nupui ṭhen tawh i ni tih erawh sawi a har viau tihna a ni maw?" Atih chuan a hmêl en chian tumin ka lehhawi a, min lo melh ve chiah bawk. A mit menga awih theih lohna leh mak tihna rawn lang chu ka hmu thiam vek.

"Nupui neih hun tawh ka ni a, ka nupui boralna pawh kum thum a liam tawh, min iai a nih chuan inngaihtuahna hun i nei ka tih tawh kha, haw ang," tih nawn leh pahin ka inseng khâwm nghal mawlh mawlh a, a che chhuak duh ṭhak lo. A ṭhutna ngaiah a ṭhu tlat a, a melh ngai a melh reng bawk a, thlêma tih hliau hliau tumna ka nei lém lo.

Chumi hnu chuan vawikhat mah inbe leh tawh lovin kan haw ta a, atîra ka hrilh hre lo kha thiam ka inti bîk lova; rilru helhkam neiin ka awm reng phah, mahse, tunah chuan engkim ka sawi vek tawh a, ka thawveng huai thung.

Saitei nen inṭhen tur anga ka indah chhin hian ka rilru a na lâwk. Mahse, pathlâwi ka ni tih sawi chhuak lova ka zêp khan mahni inthiam lohna nasa tak ka neih phah a, a rilru dik tak ka hriat phahna tur a ni mahna.

Hmangaihna dik takah chuan nuthlawi leh pathlâwiin kawngro a su vak dawn em ni?

A pi te in kan thlen hnu-ah pawh min be lo hrim hrim a, biak ka tum bik lo. A nî Arini khan min lo be bawrh bawrh a, thingpui in tura min sâwmna erawh ka hnial thung.

Saitei pawh ngaihsak zui lo hian Auto Rickshow cháng turin ka chhuak ta a, ka û te nupa ei zawn nân ka Sumo pakhat kha ka pe ta kha a ni a, keiin Guwahati service leh Lunglei to Aizawl service ka la nei a, keima tâwkah ka intodelh ve viau.

Mahse, lirthei hi chu tihfuh leh fuh loh kâr a hlat êm avangin ka nu leh pa pension min hnutchhiah khâ ka hmang zo ta lo a, tlêm azawng ka la kawl tel ve bawk.

Saitei bîkah hi chuan ka thîkthu a chhe hma em em a, an ina ka lên laia phone a hman pawhin ka check sap thlap zel. Sentei kha nupui fel tak a ni a, a zawng zawngah in ang lo mah se Saitei nen an mizia a inang deuhvin ka hria.

Ka u te in ka thlenin min lo lâwm hle a, Saitei nena kan inkar pawh ka hrilh ve vek ṭhin. "Nupui neih leh tumna rilru i pu hi ka lâwm, atu apawh ni se i duhthlanna hi dál ka tum lo a, a neitu tur i thu ber," tia a sawi khân ka lawm hle. Ani lo hi unau pianpui ka nei si lo a.

Whatsapp aṭang tak ngial pawhin kan Saiin min rawn 'chu e kha' lo a, ka ngai veng veng. Damdawi inah a riak ta nge tih pawh ka hriat si loh. A online reng a, zan dar riat vela a whatsaap status ka view sak chuan, "Ka rin loh lam daihin min dêng a, min denna hi a na mah mah.." tih a lo dah.

Nie, ani tân chuan hriatthiam a har ngawt ang, a rin em em mipa khân a lakah zêp ka lo nei miau si a, hun thâwl pêk ṭhaa ka hriat vangin ngawihsan rih ka tum ta a.

Mahse, Lalfakawma hian ka ngawihsan hlen thei ang em? Ka hre lo.

RAFAELA LEH DIKTEI

Khatia Laldindiki kan ina chaw a lo ei zan aṭang khân kan chhungkua nen kan in pawh zual a, "Bawiha, kan fapa neih chhun i ni a, i duh thlanna kan dah pawimawh ber, Diktei pawh duhin hmangaih mah la, engkimah Pathian râwn hmasa zêl ang che," tia ka pa thu min chah chu hriat reng ka tum.

Tunah nupuia neih nghal ka tum rih lo.

Vanlaisailova te Team- rawngbawlna ka chhim ve kha Pathian remruat a nih ngei ka ring. Pathian mi hriat, a rawngbawltu lo ni tawh ka ni a, 'tlu mah ila ka tho leh ang, ka tlu hlen tur a ni lo' tiin thu tlûkna fel fai tak ka siam tawh.

Thla li aia tam zu hmunah ka tâl a, ka nun dan chhuanawm loh leh zahpuiawm zet kha inawpbehtir ka tum miah lo thung. Lalrindiki vang pawh ni lovin Pathian mamawhna dik tak ka neih vang zawkin thinlung takin ka ṭawngṭai ve thei ta.

Khami zan inkhawm bân khân Sailova te Team-in kan inah thingpui an rawn in ve a, an Musician Ar-eLa nen kan titi ve luam, "Zaipawl conductor ṭha tak i ni tih ka hria a, i rawngbawlna tura Lalpan a pêk che hi tlânchhiat san suh, Pathian hian a rawngbawl tur mi tam tak a nei ṭeuh a, keini hi a hranpain min mamawh lo, keimahni zawkin Pathian kan mamawha chuvangin kei ngei pawh hian ka sual chung chungin ka ko ṭhin a ni, kan fel vang leh kan ṭhat vanga ṭawngṭai tur ni lovin; kan sual êm vang zawka amah hi kova ṭawngṭai tur kan ni zawk." Tia a sawi khan ka ngaihtuahna ati thui khawp mai.

Tunah chuan nun bul ṭan ṭhat tumin rilru ka siam a, Diktei'n min puih a inhuam reng bawk.

Ka pi a chêt sual avangin ka nu leh ka nau Lungleiah an phei a, dawr nghah a ngai bawk nen khawi mah ka pêng thei lo. Ka pa Mualvumah a kal a, kan inchhungkhur tan hian theih tawp chhuah ka ngai takzet, tun hma anga chhungkaw hlim tak leh inpawh tlâng tak kan nih leh theih nan, a siam ṭhat hna hi ka mawhphurhna a ni.

Chutia ka inngaihtuah ngut ngut lai chuan, u Duatin min lo call teh mial!

"Rafael, Aizawlah ka lo chhuk a nia," a rawn ti a.

Zosanga'n a hruai thu leh ka dam ṭhat leh ṭhat loh te min rawn zawt a, ani hi chu ka ngai viau. Mipa ka nih vangin eng mah ka sawi tuitam lo mai pawh a, Diktei nen kan chungchâng te pawh min zawt nual a, kan pahnihin lêngah min sawm a, lén ngei pawh ka tum bawk.

Rei fê kan inbiak hnuah a dah ve ṭâwk. Sawi tur a ngah thei siah.

Diktei nen whatsapp lamah kan inbe char char a, a hna a ṭan leh tawh avangin kan inhmu ṭha thei vak bik lo. Zan lamah erawh chuan khêl lovin ka lêng a.

"Rafael, ka message dawn hi ka lo sreenshot ang aw," ati a.

"Rafaela te ang zu duh lutuk leh chapo hi engtin nge i duh zawk"

"Ka duh duha ka kawih phar theih a nih kha," tih vel screenshot a rawn thawn a, a thawntu number a dah tel bawk. Mahse, ka hriat zâwng a ni lo a, a number pawh ka nei hek lo.

"Khatiang kha chu kan la tâwk dawn chauh, min rin ngam leh i tân a ni a, min rin ngam loh pawhin i thu thu a ni, sawi chiam dan tur ka hre lo a nia," tiin ka chhãng a.

"Ka hria alawm, ka ring che tih pawh i hriat kha, i nun ngaia i lêt loh na tur leh hmalam i pan theih nan theih tawp ka chhuah dawn nia," a ti thliam a.

Kan Lalrindiki nge nge, a puitling ṭhin teh e.

U Duati lo haw thu ka hrilh a, lenpuiah ka sawm nghal bawk. Zosanga quarter-ah an awm tih ka hria a, anni pahnih lunglian lutuk hi ngaihtuah tham a tling. Pa Faka te nupa pawh an khawngaih thlâk tho a; Lawmsangzela nupuiin nau ala pâi lo, an incheck up fo tih ka hria a, Zosanga te'n naute an neih chuan an inrem leh mai ka ring ve ringawt.

Customer kan neih tâk avangin chulam chu ka ngaihven san ta a. Ramtei pa lek!

"Rafael i dam maw? Inhmuh a va khât ve," tiin dawr chhungah a lo lut a, a hma anga ka rilru kha chu ni se ka chhâng miah lovang kei misual hian. Mahse, tun hun a nih miau avangin, "Dam e, nangni in dam maw? Eng nge i duh ve teh mial?" Ka ti ṭha ve mai.

"Kan dam ṭha e, dârthlalang tlêm azawng ka duh a," tiin a en kual a, "Kan nau teho nen khan lo inbuaipui rawh u," tiin dârthlalang cut-na tur a thar kan lei chu ka check san ta a, amah hi pa sual a ni hran lo. Ṭawng tlêm leh rilru dam thluam mi a ni.

Famkima nen kan buai deuh hluai zanah khan Ramtei pa missed call vawi thum ngawt ka hmu a, ka call back ta miah lo tih ka hrechhuak chawpchilh.

Ramtei pa chhuah hnuah Diktei hna kal haw a rawn pêng a, a thu rawn sawi chuan min dêng zawk.

"Ramtei kha kan inah a lo va kal a, ka nu leh pa hnenah in chungchâng leh in tih dan vel a va sawi chiam a ni awm e, inrawlh loh chu ka duh a; mahse, ka nu leh pa hnen thleng thlenga lo sawi kha ka lawm vak lo," a ti a, thinrim lo anga lan tum mah se a thinrim ru hle tih ka hre mai.

"Eng ber nge a sawi?" Ka tâwi tak a.

"Ka sawi sêng mai mai lo, min zah lo êm mai," ati nghat a.

Ramthansangi mai mai chu(h)

"Kan ngawih reng chuan min zuam tulh tulh dawn a, eng emaw talin hma la rawh," ati leh sap a.

Nichin mai khân a pa a lo kal reng si a, lo hre hma ila chuan ka lo sawi tur a nia.

"Dikte, eng pawh ni se, hun liam tawh a mi a ni a, anmahni dik loh zawk ni mah se mualpho nawn leh ka tum miah lo, in tãn dawnsawn a hrehawm ang tih hre tho mah ila, tun ṭum chu ngâwi rih ila a lehpek a awm a nih ka nu leh pa ka lo hrilh dawn nia," ka ti ta zâwk a. Ka chhungril taka huatna inmûng erawh thunun ka tum hle.

Insiam ṭhat ka tum ve ṭan chauh a, Setana thlarau sual hnathawh a lo lang ṭhin. Diktei te tân lah a nuam miah dawn lo a, nupa chu lo ni tawh ila a tih dan dan a awm zawk a, tun atan chuan Ramthansangin chhuahchhâla hau mai loh chu tih theih vak ka nei bik lo atin ni.

Famkima a nei tawh a, a eng chu nge a beiseia buaina tur an dap reng ni. Ka lawm lo takzet.

"Tun ṭum chu kan ngawi rih ang a, a lehpek a awm leh a nih chuan keimah ngeiin ka hmachhawn tawh ang," ati hmiah.

"Ok, lo kal rawh ka thlah ang che," tiin kan nau te chu dawr khar turin ka hrilh a, tlai lamah hi chuan customer kan ngah lutuk tawh lo. Hardware lam an in hawng rei deuh a, chu erawh ka nghâk vak ngai lo. In lamah chahbi leh an pawisa hmuh an rawn submit zel mai.

Diktei te in lam panin kan inphur thla ta a.

Luh kâwi tum pawh ka ni hran lo nain a nu in min koh tâk si-ah chuan ka lût ve ta a. Vawiina an thil tawn min sawipui duh a nih ka ring, ka ring sual lo reng bawk a.

"Rafael, Ramtei te min tih dan chu Diki'n a hrilh tho che ka ring a, kan chhungkua hi eng ni lo mah ila min zah lo hlein ka hria, hmanzanah nise kan in kawtah buaina an lo siam tawh a, kan ngawi zel a, vawiinah amah Rami a lo kal leh a, hetiang boruak hi kan tawn ngai loh thil a ni a, kan lawm viau lo." A hmêlah pawh a lung a âwi hlawl lo tih a hriat reng mai.

Sawi tur ka haihchham kher mai. Ṭawng tam zawk zawk ka ni lo bawk nen ka ngawi reng a, "Hetia, anni chhungkaw laka buaina kan tawh fo dawn chuan in inkar thlengin a nghawng thei a nia, i nu leh pa hnenah pawh hrilh hre ve la ṭhaiin ka hria," atih zawm leh chuan, "Ni e, ka lo sawi dawn nia," ka ti ta ringawt a.

Diktei'n min thlah lai pawh chuan ka la ngawi reng a, ka zak ru ngawih ngawih.

Mihring rilru hi a lo mak khawp mai, nunphung pangngai zawh lova anmahni vanga ka nat ngawih ngawih lai khân eng buaina mah min thlen lo. Diktei nen kan inzui aṭang hian kan inkâr tihchhiat tumin min tibuai sek a, eng maw ti taka chêt ka lâk ngei chu a ngai dawn a ni.

Diktei nen kan inṭhen phahna tur a nih phei chuan ka duh îkhaw lo mai.

Rafael Remruattluanga hian thinurna ni lovin ṭhatnain hneh ka tum zâwk dawn lovem ni?

B+>[BeckirafARenthleI]<+®®

THE RAPSAGYAN FAMILY

Becky Rafa Renthlei

Chapter 27

[RAFAELA LEH DIKTEI]

Kan ina ka haw thlenin kan nula a lo awm tawh a, an khaw lama a zin kha vawiin hi a lo thleng hun a ni tak alawm le.

"I va rawn thleng hma ve?" Ka tih chuan, "I nu in kan awm dawn si lova rawn zîng chhuah mai rawh min ti a, i ril a ṭâm tawh em?" A ti a.

"Ṭâm lo e, hmanhmawh duh suh, ka pa a la haw lo em ni?"

"Tu mah an awm lo, pu chu a lo haw hma dawn lo a ni lawm ni?" Tiin min zâwt lêt a, ka pa nen kan la inbe miah lo. Ka call zui ta nghal a.

Pa Faka te in an thlen tawh thu leh a rawn phei dawn tih a sawi chuan ka nui suk suk a, an inkawmngeihzia em em hi, nupui anneih hnu thleng pawhin rinawm takin an la inkáwm zel a, an fakawm ka ti. Ka nu nen rei vak lo kan inbiak leh hnuah inbual turin ka lût ta a.

Tunah chuan Rafaela hlui kha ni tawh lovin, a thar hlak ka ni tawh a, ka nun dan pawh a hma ai zawnga uluk a ngai ta. Ka rilru dik takah chuan Pastor zir ve ka rilrûk a, chhungkuaah eng mah ka la sawi lang lo. Mihring lam thiamna aṭang chuan ka qualifiction in a phâk a; mahse, Pathian lam aṭang zawk erawh chuan ka bil hle. Mahse, ka phâk ang tawka a rawngbawl ve duhnain min tur nasa em em a, Diktei tak ngial pawh ka la sawipui chhin lo.

Pastor zir hi tih namai a ni dawn lo tih pawh ka hria a, a lo berah kum li zên zâwn a ngai bawk. Chutah ka zir duh thu kan tualchhung kohhranah hrilh hriata dîlna theh luha a ngai hmasa a, ka nun dan hmasa hrechiangtu kan kohhran hruaitute hian min phalsak ang em? Eng pawh nise Pathian kutah engkim kawltîr phawt hi a him ber.

Ka khum bul chhuatah ṭhingṭhiin ka ṭawngṭai ta tawp a.

Khawvel thila ka chân tur pawh a namai dawn lo. A chhan chu fapa mal ka ni a, ka nu leh pa ro luahtu tur ka ni bawk. Chhungkaw harsa kan nih loh bâkah ka pi leh pute thlengin belh tlâk vek an ni a, Diktei pawhin ka ṭhat duhin bei mah se kum li ngawt min nghâk peih kher dawn em ni.

Ka pa lo haw lai pawhin ka room-ah ka la tawm reng a, zanin hian sawipui ngei ka tum. Ramtei chungchânga Diktei te chhungkaw lawm lohna pawh ka pa hrilh ka tum bawk a, zanriah kan kîl laiin engkim ka sawi chhuak ta a.

Ka pa Zirsangliana ngaih dan a pêl hle.

"Keini chhungkua min tibuai lo a, Diktei te chhungkua an va tibuai daih chu anmahni mawng hlîm anni; mahse, kan chungchâng a ni a, Rami nu leh pa kan va be dawn nia, thinrima ṭawng kher a ngai lo a, kan ngawih ral mai mai erawh chuan an pâwngpawrh tulh tulh thei tlat," a ti ta a, ka pawmpui hle.

Ka pa hian a pãwng atakin a ngaih dan ni lo pawh hi a sawi zen zen ngai lo va, ka nu erawh hmeichhia tih takah a ri leh hluai zel. Pastor zir chungchâng ka sawi chuan, "I nu te lo haw ve phawt se, kan rêl ṭha dawn nia, Pathian kohna che a nih chuan dàl ka tum lo, kan neih chhun ni mah la kan ui ngam hek lo che," a ti.

Hemi zan hian Ramthansangi te in lamah ka pa nen kan inphur thla dun ta a.

Kum tam tak ka lo lên luh ve na Ramtei te in kan thlen chuan ka pa'n doorbell a hmet ri rang rang a.

"Lo lût rawh," Ramtei pa'n min lo chháwn a.

Kan hmêl an han hmu phut chu mak anti hle mai. Ramtei û mipa pawh a lo awm a, "Ehe, Zirsanga te pafa chu eng nge in duh teh mial, lo lêng ṭhu rawh u," tiin min lo be sawk sawk a.

"Eng emaw han sawi kan duh deuh a, Rafaela leh Ramtei chungchangah," tiin ka pa'n ṭhut hmun a rem a, "Eng lam nge ni rêng rêng a?" Ramtei pain a lo zâwt var.

Kan kal chhan dik tak ka pain a sawi ta a.

An fanu Diktei te ina a kal thu leh, kan chungchâng a sawi dan chu thinrim ni miah lo ṭawngkam pangngai dam thlup hian a sawi chhuak ta a. "Hun liam tawh a mi a ni a; tin, Diktei te chhungkua thleng thlenga lo va inhnam hnawih kha thil tih chi niin ka hre lo, mihring ṭha famkim kan awm lo a, keini lam pawhin tih dik loh tam tak kan neiin ka ring a, Pathian hmingin ngaihdam kan dîl tak meuh che u," a ti dam thlup.

"Ramthansangi nikhua loh dan em em hi chu aw, a zahthlâk hle mai, thu ṭha tam tak kan hrilh chung pawhin ngawhngawl a chhuah tlat mai si a, Famkima nise a rûi reng ringawta rei pawh an inkawp ngûtin ka ring lo," rilru hah hmêl takin a ti ta a.

"Eng pawh nise, hun liam tawh a nia, keini lam chuan eng teh vakah kan ngai tawh lo; mahse, Diktei te an lawm chiah lo a, hmán zanah an in kawtah buaina an siam a, Famkima'n Diki kut a lo thlâk deuh nen boruak ṭha lo zâwk a awm ang tih kan hlauva zah pawh dâwn lovin kan lo kal tawp a ni ber," ka pa'n a ti leh a.

An fanu an zilh tur thu leh a ṭûl a nih chuan hruai haw mai pawh pawi an ti lo tih nen lam pa berin a sawi a, vêngkhat kan ni a, keini lam tân thil sawi chhên a nuam bîk bawk si lo, a zahthlâkna chen a awm ve tho.

Thingpui te in khawmuangin zân dar 9 velah kan haw chho ta a.

"I nu hnenah eng mah sawi duh lém suh aw, a ṭûl ber lo." Ka pa nen sitting room ah kan ṭhu a, Diktei chungchang pawh ka sawipui nual.

"Bawiha, Pastor hna hi tih namai a ni lo a, châk vang te, hna hmuh nân leh hna zahawm a nih vánga dîl ve ngawt chi a ni lo a, Pathian kohna âw dik tak i hria a nih loh chuan dil buai loh khâ a finthlâk, i nu ngaih dan leh i unaute ngaih dan tur pawh a nih tho ka ring," a ti a.

"Ni e, Pathian thu thu a ni a, ka duh dan hi Pathian duh dan a lo ni lo thei bawk, a châk thu-ah chuan ka châk miah lo a; mahse, khawvelah kan châm hlen dawn lo a, Pathian aia thlan zâwk leh ka nawmsakna tur ka ûm apiangin kan chungah harsatna, zahna leh mualphona kan tâwk a, Pathian tel lo nun kha a hahthlâk," zãwi supa ka chhân chuan a bu nghat nghat.

Nitin dawrah ka kal a, sum leh pâiah chuti tehchiama buai kan ni lo. Ka nu leh Saitei pawh Lunglei lamah an la châm a, ka piin hmâ a sâwn mawh viau. Kum 68 a ni ve tawh a, thawhhah a nei tel bawk nen chuti maiin damdawi in an chhuahsan thei bik lo.

Diktei min rawn call a, dawrah kan buai êm avangin ka chhâng hman lo. Dârkar hnih hnuah ka be hman ta ṭâwk a.

"I u Duati te ina lên kha ka hman a nia," a rawn ti a, vawiin hi sawrkar chawlh a ni tak alawm le.

"Dawrah kan la buai lutuk, ka hman hun tur ka sawi thei lo," ka ti a.

"I hman hun hunah min lo hrilh mai dawn nia aw," a ti ṭha ve mai.

Kan pahnih inkârah buaina dang kan neih belh tawh lo, nun phung pangngai zawhin zan lamah ka lêng ziah a, a chhungte pawhin Famkima te nupa chanchin an sawi ri leh ta miah lo val, boruak a ṭha thawkhat e.

Ka hman ve meuh chuan chawhnu dâr hnih a ri tawh a, Diktei call-in u Duati te inah kan kal ta a.

"Rafael, min haw ve ringawt em ni, biak hmasak loh chuan min biak reng reng i tum lo mai," an in chhunga kan luh rualin u Duatin min lo chhuahchhál nghal a. Diktei a hmu tel ve chu mak ti awm hmel pawh a pu lo.

A tháuvin a dul a puar ve âk tawh a, a hmêl ka hmuh leh chiah hian ka khawngaih reuh viau. Luhlul ta ngang a ni a, chuti mai chuan ka nu leh pa lakah a lungawi ka ring miah lo bawk.

"Dikte, i va fel ve i lo kal ve duh a..." Tiin Diktei chu ngun tak hian a en a, "Nia, inhmuh a khât êm alawm," a lo ti ve mai.

Zosanga a hnaah a kal thu leh tunkâr bâk châm a tum loh thu a sawi a, ka pi damloh chungchâng ka hrilh a, ka nu leh Saitei an kal tih ka sawi tel bawk.

"Eng ati nge eng mah min lo hrilh ve loh le?" Lungawi chiah lo hian a chal a chuar nâng a, "A ngaihtuahawm loh a, lo hrilh kher che an duh lo tepawh a ni mahna, bâkah hria pawh ni la i kal thei dawn chuang lova..." ka ti a.

"Ni ve tho mai, nakinah ka nî ka lo va be dawn nia, ka pa a dam ṭha em?" Tiin min zawt a. Ka nu chanchin eng mah min zâwt ve lo.

Chaw ei tura min sâwmna erawh kan hnial a, ₹10000/- ka ken sak pêk ka tum chuan a la duh miah lo! Zosanga hlawh tam mah se ama hlawh ala tlêm a, eng emaw tala puih ve ka duh vang a ni.

"Kan mamawh leina tur kan nei ve alawm, min ngaihsaka ka lawm lutuk," a ṭah a chhuah hmel hle.

"In nei ang tih chu ka hria a, mahse, la ve hrim hrim rawh, in enkawl ṭha la damdawi lei nan i hmang dawn nia," tiin ka pe lui tlat a, ka u a ni a, ani lo hi û dang ka nei lo, nu leh pa lakah ti dik lo tu ni mah se ka hmangaihin ka zah hlê bawk.

Zosanga a lo haw har bawk nen nghâk chhuak lovin kan haw ta a. Diktei leh Duati pawh an innêl ve tawh viau a, mi â ni lo ta na na na chu an inkawm bawrh bawrh a, kan inchhungkhur chanchin eng mah an sawi chhuak lo.

Car-a kan ṭhut luh hnu-in u Duatin bân a rawn vai a, dik tak chuan ka khawngaih; a nau pai nen nu leh pa ngaihsak hlawh miah lovin tihian a awm ve nâw nâw a, Zosanga nen kher an lo inkawp bawk si, awlsam taka inneihna buatsaih theih a ni reng a, ka nu leh pa te leh pa Faka te rorêl dan eng mah ka hriatpui bawk si lo. Mahse, u Duati theihtawpa chhawmdawl leh ngaihsak hi ka tih mâkmawh a ni.

"An awm dan hi a nawm hmêl e," kan tlânchhuah hnuah Diktei'n ati a.

"Nuam anga lang hi a nuam kher lo a nia, anni pawh mawihnai taka innei thei kha a ṭha lo lam kawng an zawh hmasak vangin nu leh pa thinurna an tawng bua a, tihian rilru pangkhing takin an awm phah a nia, awt mah ta che," ka ti sup a.

"Hlawh an nei ve ve a, ngaihtuahawm anni hleinem..." atih chuan, "Pawisa ringawt hian eng mah a chingfel thei lo a, chhungkua inrem leh Kristian chhungkaw dik tak din tluka hlu a awm lo," tiin ka chhâng.

An in kan thlen tâk avangin thil dang kan sawi zawm ta lo.

"Ka fâwp châk che," a kutah ka vuan a, Car aṭangin kan la chhuak lo va, "Naa, min lo hmu palh reu reu ang," a nui zui hak hak a.

Mipa thisen lum ka ni a, dîm baksak lova fawh ka châk takzet. Mahse, a hmunin zir miau hek lo le.

Chumi hnu chuan a tlâi tawh deuh bawk nen pêng khawtlai lovin in lam ka pansan ta a, thianghlim takin inngaihzawnna kawng a zawh theih tih Ramtei aṭang khan ka lo hre daih tawh a; rinawmna a pawimawh hle tih pawh ka hre tel bawk.

Lalrindiki hi inneihna thutiam ka chhampui hmâ loh chuan chêtsualpui tumna ka nei lo.

"Hmangaihtu der tlansan ngam la, rinawmna phatsantu hnâwl ngam rawh, chunglam pêk dik tak nghâk chhuaktu tãn chatuan daih thu tiam a awm si a," he thu hi ka thinlungah a châm reng ṭhin.

[LAWMSANGZELA OF Ka thlah lo'ng che]

Ka nupui Rinsangpuii nen kan inneih aṭangin thla a ral tam tawh a, nau a la pai lo! Ka lo suangtuah ṭhin inneihna hlimawm kha ka ban phâkah a awm ta lo ti ila ka sawi sual lo vang, kan nupa inkâr a ṭha lo tihna ni lovin kan chhungkaw boruak váng zawk hian kan hlim tur angin kan hlim thei lo a ni ber.

Ka nu leh pa inkârin tun hma a pha tawh lo a, ka nu nise Lawngtlaiah a awm daih a, kâr tawpah ka pain a fin ve chauh zel. Kan nupain kan in zaupuiah kan awm rek rek a, workshop lam enkawl angai bawk nen Rinsangpuii khua a har thei hle.

Ka û in kan in a chhuahsan ni aṭang khan hlim ni hmêl kan hmu tawh ngai lo a, nupui ka lo nei hman tawh si. Ka nupui mitmei ven a na duh khawp mai.

Chutia ka lo inngaihtuah vung vung lai chuan, "Lawmsang, vawiin chu bazar ve ka duh a, min hruai hman angem?" Rinsangpuiin min rawn bia a.

"Hman lohna chhan tur a awm hleinem, workshop kal pahin ka dah zawk ang che, i hman hunah min lo phone mai dawn nia," tiin ka chhâng a. Awmpui kan nei tawh rih lo a, kan hautak lutuk loh avangin ka nupuiin engkim eirawngbawl leh insûk thlengin ati vek a, lungawi lo hmêl min hmuhtir ngai lo. Ka nu leh pa pawhin an duat fû.

Israel point thleng ka thlah ta a, a natna pawh khan ziaawm lam a pan zel a, insawiselna lutuk a nei lêm lo. Mahse, nau a pâi lawk lo hi hrehawm atih thu vawihnih vel a sawi chhuak ve. Kan inneih hnuah Lunglei vawikhat chiah kan la kal a, a pa'n a ngaihtuah hle tih ka hriat avangin ka be nitin deuhthaw.

Ka u nen kan nu a hrang tih ka hriat hlima ka rilru a nat em em lai khan zan hnih chu a rûkin zû ka in ve a, ka nupui ngaih dan a pêl viau, "Zû i in vang khan unau pianghmun innih phah dawn em n? Tun ṭum chu ka ngaidam ang che, a lehpek a awm leh a nih chuan ka ngawi ral mai mai hauh lovang," thinrim aw zawi sapa min hâu aṭang khan ka in zawm tawh lo.

Workshop-ah kan buai thei si a, a châng chuan kan chhungkaw boruak theihnghilha hna ka thawh hrep châng awm. Mahse, ina ka haw hnu hian ka rilru natna kha a lo thar leh ṭhin a, ka u room-ah ka va lût leh nge nge zel. A bungrua eng mah hmuh tur awm ta lo te hian ka thin a tirim thar zel a, ka nupui hmêl hlim lo ka hmuh tîr châng lah a tam.

Tunlai tak phei hi chuan kan nupa inkâr hi sawi fak tham ni si lo hian a nuam lo ru riau a, nupa nun pawh kârkhat aia rei kan hmang tawh lo. A langah kan inbe ṭha vel mai mai niin ka hre ber.

Rinsangpuiin min rawn phone har tâk êm avangin keimah zawkin ka call a, vawi thum ngawt ka call hnuah pawh a ring ral ṭhak zel. 'Ka missed call a hmuh hunah min lo call back ve mai ang chu' tiin hna ka thawhsan a, tlai lam dar nga thleng pawhin min rawn be lo hrim hrim. Taxi hmangin a haw a nih ka ring ta a; mahse, in ka thlen chuan kan kalsan ngaiin ala inkalh reng! Ka pa niminah Lawngtlai panin a kal tawh a, eng em em nge atih le?

Thinrim ru ṭeuh hian kawngkhar kalhna ka hawng a, chahbi spare ka kawl vanga hawng thei chauh ka ni.

Call ka tum tawh bîk lo a, a duh hun hunah rawn haw rawh se. Lungawi lo ru zet hian kan room ah ka lut a, ka phone a rawn rík chuan rang zet hian ka en a, ka û lek! Ka be hmasa a nih loh chuan kan in a chhuahsan hnu aṭang hian vawikhat mah min rawn be hmasa ngai lo, mak ti rilru zet hian ka chhâng ta tho a.

"Mate, inah i awm em?" A rawn ti a. Ka awm thu leh eng vanga min lo be teh thut nge tih ka zawh chuan, "I nupui a lo kal a, Duati a rawn ânkhum chiam a ni awm e," a ti ta a.

"Eng a? Kan nu a lo kal maw?" Ka ti hû a, mak ka ti kher mai.

"Aw, hnaah ka kal daih a, ka awm loh hlanin Duati a lo ṭawngkhum deuh niawm tak a ni, hetiang chuan a ṭha dawn miah lo a nia, Duati lah a thinrim em em bawk si a, lo sawi dun rawh u. Ka chungchâng eng mah i nupui khân sawi ve tur a nei lo a nia, ka haw lo che u a, bâkah keima chunga lungawi lo a nih chuan min be mai se la, Duati hnena sawi lo vin.." dam thlupa a tih chuan ka zak ru hle, ka u hian min hmangaihzia ka hria a, kei pawhin ka hmangaih bawk. Eng rilru pu-in nge a lo va kal ve ngawt le?

"A zia lo hle mai, u Duati chu ngaihdam min lo dilsak rawh aw, kan nu pawh ka lo be dawn nia," ka ti a.

Phone ka dah hnu lawkah Car thawm ka hria a, Parda keuvin pawn lam ka en a, Car sen aṭanga ka nupui lo chhuak chu makti takin ka thlir ta a, driver seat-a ṭhu ka hmu thei lo thung. Tu nge rawn thlah ta ang? Ngaihzawng te hi a lo nei ru reng em ni zawk? Chu zawng ni theiin ka hre si lo.

In chhung a rawn luh rual chuan min en zawk a, eng mah a lei lo nge kut ruakin a lo haw! Bazar tur ang khân a insawi ve si a, ka ngaih dan a pêl hlê, room-ah a lut tlang nghal a, ngawi rengin ka zui lut ve a, khumah ṭhuin a pheikhawk a lo phelh mawlh mawlh a, en pawh min en lo.

"Ka missed call i hmu awm reng si a," ka rin aiin ka aw a dam.

"Hmu e, ka buai deuhva ka lo call ta lo che a nih kha," dam thlapin min chhâng a.

"Eng nge ka u te inah tih tur i neih le? Eng vanga u Duati lo va ânkhum ngawt nge i nih? I pawi a sawi em ni?" Tia ka zawh chuan, "An lo hrilh che ka ring reng a, Duati hi tupawhin in ṭan vek a, ka hriat loh laia in inbiak tepawh kha ka sawi chhuak duh lo a nih kha, ani nen eng nge sawi tur inneih? I û fuihpawrhtu a nih saw, tenawm dun lutuk," zuk ti hrep a.

"Rinsangpui, i duh duh sawi ringawt suh, ka û chungchang eng mah hriat i nei lo a, i inrawlhna tur pawh a awm lo." Thinrim sehchilh nawk nawka ka ṭawng chhuah chuan chiang kêk kâwk hian min melh a, "Zosangmawia te nupa hi ka hua a nia, nu leh pa zahna châng hre si lo, chapo dun si, nang lah hian i ṭan ve em em a," ati leh a.

"Ṭawng tawh suh.." ka bêng teuh kher mai.

"Ka hrilh ang che, Lawmsang, kan inneih hnu aṭang hian hlim ni hmel kan hmu lo, i u te vang vek a nih hi, ka ngawih reng avang hian ka lungawi ta tihna a ni bîk lo a nia, kan nupa inkâr pawh a chhiat phaha Zosanga hetiang hian awm lo se chuan kan chhungkua kan hlim ang, a fuihpawrhtu chu Duati vek a ni," thinrim thaw chham lek leka a ṭawng chuan chhân ngaihna reng reng ka hre lo.

"Rinsangpui, i sawi thui mah mah," tiin kan room ka chhuahsan ta a. Pathiana innghat tlattu ka nupui chhuan ve em em khan hetiang rilru kâwi lutuk a pu ta hi mak ka ti lutuk. Zanriah pawh ka bulah a rawn kîl lo a, eirawng lah a bâwl hek lo, kum chanve êm pawh kan la innei lo a, ka û a huatna chhan tur awm ang ka hrethiam lo a, u Duati a puh dan leh lek phei kha chu a awm ang lo lutuk.

Hemi zân hian a vawikhat nân kan mu hrang ve ta. Kan room-ah towel leh inthlâkna la tura ka luh zawk bâk ka lût nawn tawh lo a, ka va luh lai tak hian Rinsangpuiin phone a hmang. A pa te a bia niin ka hria, ka chhungril a tâwt up up a, buaina hian min kiansan thei lo a nih ber hi maw.

[VALPUIA LEH SAITEI]

Lungleiah zan hnih ka riak tawh a, Saitei piin hmâ a sâwn lutuk loh avangin an châm rei dawn tih an sawi a, keia tân awm ve reng a ṭûl loh avangin vawiinah Aizawl pana chhuah ka tum kha a nia. Saiteiin vawikhat mah min rawn be lo. A upa zawk leh puitling zawk ka ni a, ka call leh ta nge nge a.

Vawi tam biak tumin ka call a, a hmet busy zel! Sual reuh lutuk. Ka ngaiin a hmêl hmuh ka châk ngawih ngawih a; mahse, min biak duh miau loh avangin beidawng zet hian ka ṭhianpa Siana sumo in Aizawl ka pan ta a.

An haw duh hunah Arini pasalin a rawn thlah dawn niawm tak a ni. Nu Mafeli pawhin haw lam chauh chu Car khalh theih a in beisei bawk a, min mamawh tawh lo a ni mahna, ka hlawh min pêk an tum khân ka la duh lo a, "Ka tih ve theih tâwk a nih kha" tiin eng mah ka lâksak ta lo.

Ni e, pathlawi, kum sawm thum pariat ka ni tawh a, Saitei tân pawh iai awm ka nihna chen a awm ve bawk. Kan ta tura Pathian ruat a nih loh chuan neih tumin ṭan khawh eng ang mah ila ka nei thei chuangin ka ring lo. Mahse, bânsan hlen lo turin theihtawp erawh chhuah ka la tum ve fan.

"Ka nupui boral hnu-a ka ngaisak leh ka duh awm chhun i ni a, min kalsan hmasa a nih loh chuan kalsan che tumna ka nei lo a nia, i rilru dik tak tlang takin min hrilh thei la ka lawm viau ang," tiin whatsaap lamah message ka hnutchhiah tawp.

Rilru pangkhing zetin ka in luahah ka lût leh ta a.

Vanlalthlamuanpuii(Sentei) ka ngaih a zual hlê mai, ani khân ka fa pai chungin mi kut a tuar kha a ni a, ka ngaihtuah thui phei hi chuan ka chhungril a na vawng vawng zel.

"Lalpa, Saitei tal hi chu min lâksak suh," tiin ka phun chhuak sup a.

Ka whatsaap tone a rik chuan rang zetin ka hawng nghal a.

Duati, Saitei û a ni ve teh tlat.

"Valpui, ka nau nen in boruak a ṭha lo em ni?" tih min rawn zâwt.

Kan inhnial dan vel chipchiar taka type in ka chhâng a, a u Duati a hrilh ang tih te chu lo hriat awm tak.

"A nih tak chu maw le, ṭha deuhvin awm rawh u, a upa zawk leh thil hrethiam tur zawk i ni a, dawh hrâm hrâm rawh aw; a lung áwi ve leh mai ang," a ti leh a.

Ka rin aiin a thil thlîr dan a zau daih, a upa ber a ni bawk a, rilru zau tak puin min rawn bia tih ka hai bîk lo. Ngaih dan thar neiin ka nui ta suk suk.

"Beidawnna hi sual hnathawh chikhat a ni a, engkimah beidawng lova bei ṭâlh ṭâlh te chuan hlawhtlinna an chang ṭhin," tih a nih kha maw le.

Saitei hmêl mitthla chungin khumah ka tlu zâl ta a.

[ZOSANGMAWIA LEH DUATBIKI]

Ka quarter-a ka lût chiah chu Duati mitmeng thîp râm ka hmachhawn hmasa ber.

"En teh, Zosang, ka thinrim lutuk," a lo ti nghâl bawrh bawrh a.

"Eng nge? Ka'n ṭhu châwl ve phawt ang a," ka tih chuan inthiam chiah lo niawm tak hian a ngawi zui ta rih a, a hmêl lan danah lungawi lohna lian tak nei a ni tih hrilh hranpa ngai lovin ka hre mai.

"Sawi rawh le, eng nge ni ta?" Tia ka zawh chuan,

"Vawiinah in monu Rinsangpuii a lo kal a, i nu leh pa laka i helna chhan te hi keima fuihpawrh vek che niin a sawi a, ka lawm miah lo a nia, a fel lutuk tiin ka lo fak ve ṭhin a, mahse, vawiina min ṭawngkhum dan aṭang khan ka lo ring sual hle tih ka hre mai. Nge, anmahni hnenah ka chungchang i lo sawi zâwk?" A ti a.

"Eng mah ani hnenah sawi ka nei lo," ka ti hmuk a.

"Ka thin arim riau a nia, hrilh ang che, ka ngaih dan a pelh chinah chuan eng mah pawisak ka nei bik lo. A pawi eng nge ka sawi a, khatia min ṭawngkhum ve rîk ngawt, Lawmsangzela pawh ka hrilh ang, ka huata ka rêl leh ka fuihpawrhna che ka hre lo." Atih zawm leh.

"Duh tawk tawh la, ka lo haw ve chauh a, khatia thinrim te chu a ṭha nâng, keiman ka lo be dawn nia," tiin ṭha takin ka chhâng a. Ka thinrim ru viau tho.

Eng nge ka chungchang sawi ve tur a hriat, hmânni lawka lo awm a ni a, thu kal lam leh haw lam pawh a hre lo va, a lungawi lo a nih chuan Duati hnena sawi mai lovin min hrilh mai tur a nia, a chêt dan chu ka lawmzawng a ni lem lo.

"Hrilh ngei ngei ang che, i sawi ngam lo a nih pawhin keimah ka va kal mai ang," ati leh tãn tân a.

"Ka sawi ang ka tih tawh chu, ka nau pawh ka lo be dawn nia," tiin bathroom-ah ka luhsan ta a.

A in âng thinrim leh tak tak dawna ka hriat vanga kalsan ka ni. A duh lohnaah a nasa ve mai sia e.

Ka inbual zo ka va chhuah leh chuan chaw ei a lo siam a, thinrim ang pawhin a awm leh tawh lo.

"Vawiinah Rafaela leh Diktei an lo lêng a, Rafaelan ka in enkawlna tur Singkhat min pe a," a ti a.

"Eng a? I chhungte sum hi chêng khat mah kan mamawh lo, pekîr leh vek rawh," ka sa phat mai. Ka chaw bar lai pawh bar zawm lovin ka chhâng nghal a.

"I ngaih dan ang kha a ni lo, Rafaela min pêk alawm, ka nu leh pa ta ni lovin, a lo kal tih pawh an hre hleinem," a ti sap a.

"Chu pawh ni se, pe leh ang che, chaw ngheiin awm dawn pawh ni ila, i chhungte thawh chhuah rin ai chuan mi hnuaiah ka inhlawh mai ang," ka ti chang fak.

"A tírah chuan ka lâksak duh bik lo a, mahse, min ngaihtuahzia ka hria a, ka la ta a nih kha, thinrimna tur eng mah a awm lo, ka nu leh pa tirh pawh a ni lova, keiman lêng tura ka sawm vang zawka lo kal annia lawm," tiin min en a, inthiam chiah lo hmêl a pu.

"Keiin ka ngaihtuah lo che em ni, Rafaela ngat phei chuan vawikhat mah min rawn be ngai lo a, ka ṭhian, ka unaupa ang hiala ka en a ni. Ka awm loh lâi denchhena lo kalin pawisa an pe che a, ka lâwm viau ring suh," ka ti hmiah.

"Zosang, i ngaih dan a dik lo a nia.." a chaw thleng sengin a tho zui daih a.

"A dik lohna ka hre lo, Champhaia i awm lai pawhin a rawn ngaihsak che em ni? Tun ataka ṭhat rawn chhuah der kha engah vak ka ngai lo, i chhungte pawisa thawhchhuah tel lo pawh hian Pathian zarah kan awm thei, min hmusit tam mai mai," ka tizui leh bawrh bawrh a.

"I rilru a mak hle mai, min pe pawh nise eng nge a pawi vakna, ka nau a ni alawm," thinrim vîn lek leka min chhân chuan chaw ka bâr zawm thei tawh lo. Rum zet hian ka melh a, "I nau chu i ṭan hle mai, chêng khat mah an lak aṭanga lak ka tum lo mai nilovin ka mamawh lo, i pe lêt dawn nge dawn lo?" Ka ti nghut a.

"Dawn lo, ka nu leh pa tirh chu nise ka dawng lovang; mahse, chutiang a ni lova arilru tih nat kher tumna ka nei lo," tiin thleng a sil zui mawlh mawlh a.

"A ṭha e, i unaupa rilru tih nat i hlauva, ka rilru tihnat i duh zawk a ni maw?" Ka tih leh chuan, "Zosangmawi, i ti ve mah mah, i sawi loh tur tur sawi suh," ṭap lek leka a ṭawng leh chuan ka la duh tawk thei lo.

"In aṭanga kan chhuah dawn khan ṭawngkam khat maha kan thlavang hauhtu kan nei lo, mittui nen a nih kha kan chhuahsan, i damloh leh buaipui ngaia i awm pawhin Saitei chauhvin a ngaihsak che a, tun ataka ṭhat rawn chhuah kha ka ngaih dan a ni lo a ni mai, an tel lova khawsak tum ila, kan rethei ta a nih pawhin kan tuar mai turah ka ngai, chuti a nih loh chuan kan inrem lo ang," ka ti hmiah

Ṭawngkam khat mahin min chhâng lova room ah lutin rei vak lo hnuah a rawn chhuak leh a, en pawh min en lo hian kawngkhar hawngin a chhuak ta a.

Kei, ka lo thinrim ve bawk si nen koh pawh ka ko zui lo. Khawiah nge a kal dawn tih eng mah a sawi lo a, kalna tur chuang a neiin ka ring lo bawka a lo lêt har lo turah ka ngai.

Zan dar kua a rîk pawhin Duati a lo la lêt lo va, ka call lahin a pick thei bawk si lo. Pâwnah chhuakin kan ṭhenawmte in, a kalna tura ka rin deuh ka zawn pawhin khawiah mah a kal lo! Helaiah a la tlângnel lo va, hriat abar a neih pawh ka hre chuang lo va, ṭhianpa Hruaia te nise an mu diam tawh bawk si. Rilru hah zetin in chhungah ka tei sek a, a luhlul zia ka hre tawh a, chuti maiin a lungawi leh lo vang.

Pawisa pe lêt leh tur khân ka ti a, zaninah va pêk a tum em ni ang? Chu zawng thil tih chi ninghal lo chuan. An in leh ka quarter te chu ke-a thlen phâk mai mai a ni lo. Motor pawhin minute 15 dawn kan thang ṭhin a nia, Hmangaihzuali hi chuan rilru atihah ṭhin mang e.

Amah zawnga an in lama kal ka duh bîk si lo, dâr sawmpakhat pelh hretah a rawn lut ta hlawl a, "Khawiah tehhrep nge i kal a?" Ka thinrim êm avangin ka sáwi deuh nawk a, min chhâng lo.

"Hmangaihzual, ka ngaihtuah che tih i hre lo em ni?" Ka tih leh chuan, "Min be reng suh, mut ka duh a nia," tih ringawtin min chhang a, ka vawnna tâl pîtin kan room ah a lût tlang nghal daih.

Hus! Luhlul si, thinchhe tho bawk si, a ngaihna hi ka hre lo, ani hi engtia enkawl chi nge maw ni dawn ni.

Lungawi lo zetin room ah ka lût ve ta a, khum kil lamah a thawmhnaw pawh thlâk lovin a lo mu kawm ngal a, puan pawh a sin chuang lo.

"Duati..." dam deuh zawka ka koh pawhin zuk che duh map lo a!

A awm awm hian han awm phawt teh se, naktukah a dan a dang deuh mahna..

Ka thawmhnaw hlipin khumah ka lawn ve ta a, thinrim eng ang mah ila, amah kuaha mut ka la duh tho. Dimtê hian a kâwngah ka va kuah a, "Min khawih ṭhak suh," ati vin hlar.

"Ka khawih loh che in tunge khawih chuang ang che, ṭhenawmpain maw?" Ka nui hawk a.

"Min han khawih leh vaih, ṭhutthlengah ka mu ang," a la ti zui.

Hmn..zanin atan chuan a thinrim tih rehna tur ka hre lo, tihian mu ve phawt teh se. Ka chau ve deuh bawk nen rilru hahna tur tam bawk, thaw chhuak hawkin ka maimitchhing ta a....

B+>[BeckirafARenthleI]<+®®

THE RAPSAGYAN FAMILY

Becky Rafa Renthlei

Chapter 28

[ZOSANGMAWIA LEH DUATBÎKI]

Duati muhil thei lo tho sek chuan min tiharh a, a kil lama mu a nih vangin a thawh apiangin min kân zêl a ngai a, raipuar hi an zung zing deuh nge a tho sekin ka hria.

Dâr thum rik dawnah pawh ala vei chhên a, khatia titau chunga a mut hnu khân ka va ngaihven em em bik lova, leh lam hawiin ka mutsan ve daiha ka muhil tlang ta a nih ka ring. Nâ a nei nge, a thinrim muhil thei lo zawk?

Ka tho chhuak ve ta nge nge a.

"Nâ i nei em ni?" Tiin ka zâwt a, Sofa-ah ṭhuin ngun zet hian hma lam a thlir a, ka biakna hre awm ang pawhin a lang lo. "Duati, i nuam lo deuh em ni?" Ka ti nawn leh a, chutah min rawn enin, "Va mu leh rawh, eng mah nâ ka nei lo," ati hmak.

"Thinrim reng lo la, muthilh tam i tân a ṭha tih i hriat kha," ka tih chuan, "Lo chhuk miah lo ila ṭha tur a nia," ti sapin a tho chhuak a, a ṭawng duh dan hi ka ngei leh thut zel.

"Chu, min va hnê awm ve, ka bula awm chu hrehawm i lo ti ngawih ngawih em ni?" Ka ti ve ngat a.

"Inhau tur ringawta helaia awm ka duh hleinem, naktukah Champhai panin ka chho leh daih dawn," a sawi zawh rualin room-ah a lut zui hmiah a, min ngaipawimawh lo deuhva hetia a awm ṭhin hi ka huat tâwk a tling viau zel. Rang zet hian room-ah ka zui lut ve ta a.

"Duati, inhau tur ringawta hruai thla che ka ni lo, thinrimna tur i zawn chhung chuan i hmu zêl ang, ka thinrim a nih chuan ngawi la min chhâng lo mai rawh, helai hmun hi i pa in a ni lo a, i upa zawk a ni mahna; mahse, mipa ka ni a, i pasal ka ni bawk. Atu ve ve pawh kan insiam ṭhat a ngai, chhungte kalsanin kan invuan a, hetiang mai maia awm tur a ni ngai lo." Tiin ka vei sek a.

"Ka pa in a ni ka ti lo, i in a ni e, kei chuan eng mah sawi ve tur ka nei lo bawk, tih tak takah chuan vawiinah pawh Rinsangpuii lo kal lo se chuan hetiang boruak hi kan nei lovang, bâkah Rafaela chungchâng i sawi danah pawh khan ka lawm lo, pawisa pawh ka pe lêt ang, ka pe vek ang," ati hmarh hmarh a.

A thinrim hlê tih ka hre mai. Nichin khân ka lo ṭawng tam deuh nge, â.. eng mah hi a dik thei lo. Thil sawi hlekin a ṭeu hlar zel bawk si.

Chhâng zui duh tawh lovin khumah ka lâwn a, "Mu rawh, hetia inhnial reng hi a sâwtna a awm lo," ka tih chuan ngawi rengin a rawn lâwn ve mai a, Sofa-a a mut daih ka hlau kha a nia; mahse, chutiang êm a thleng ta bik lo e.

Ka harh leh chuan khua a var tawh a, zinglam dâr sarih a ri tawh, office kal a ngai si a, ka tho chhuak ta a. Duati a la mutui hle a, ka kai tho duh ta rih lo.

Eirawng ka bâwl vek a, chaw ei ka siam peih vek hnu-ah ka ko harh ta chauh a.

"Tho rawh le, Duat nu..." ka lungawi lohna dah ṭhain dimtê hian ka sawi a. "Ka la mu rih dawn min ko chhên suh," a maimitchhing leh nghal daih a, "Chaw ei ka siam vek tawh a nia lo tho tawh rawh le, keimah chauhva tukṭhuan kîl ka tum lo a nia," tiin a thawh hma chu din tlat ka tum.

"En teh Zosang, ka ei peih lo, i duh chuan nang mahin ei mai rawh," vîn zeta min chhân avangin ka dawhtheihnain a tlin leh ta lo.

"Ṭha takin i bulah hian thil a sawi theih reng reng loh, chaw rawn ei rawh, i ei duh lo a nih chuan ka ei luih tir dawn khawp mai che, nang mah chauh inngaihtuah lo khân nautê te kha ngaihtuah tel ve rawh, i hmâ i sial mah mah," ka ti ta a.

A rawn tho chhuak ta a, min melh rum ngang mai.

Chaw ei dawhkan a rawn kîl ve bawka a chaw a thai kual vel mai mai. Amah nghâk lova ka eisan avangin ka kham san ta a, eng mah tih tham ala ei lo tih ka hmu ru reng.

"I chaw kha ei la, Sangha ka suahsa kha ei zo bawk ang che," nelawmna tel miah lova ka tih chuan thinrim titau chung hian a ei nghal tâwn tâwn a, lem pawh a lem ṭha thei lo, "Ei pangngai khan ei ve ta che, i duh duha min namnûl tum reng reng suh, i tana ṭha lo tur hi ka sawi khât khawp mai," tiin ka din chilh tlat a, en pawh min en duh lo.

"Nautê ngaihtuahna chãng hre bawk si lo, mahni chauh inngaihtuah zêl mai, i ei zawh hma chuan rawn tho chhuak hlek suh ang che," ka ti leh a, a lem thei ngang lo nge a tilui zawk? A mittui a tling pam a, vawikhat mah a ṭawng chhuak lo.

Insiam turin pindanah ka luhsan ta rih a, hetiang em em hian a sual reuh tih ka hre lo. Chimawm si, luhlul tho bawk si, a nu leh pa kianga seilian a ni lo a, pi leh pu te'n keh thei dawma an dawm kha a ni ve a, a sak ṭalh ni berin ka hria.

Ka insiam peih vek hnu-a ka va chhuah leh chuan, "Zosang, ka ei lui thei tawh ngang lo," mittui parawl kiangin ati sap a. "Ei zo rawh," tiin a bâk eng mah ka sawi zawm lo.

"I ei zawh hma chuan office kal ka tum miah lo a nia, kawngkhar hi pâwn lamah ka kalh ang a, tumah an lo lût tawh lo ang, mamawh i neih leh min lo call dawn nia," ka ti leh a.

"Khatiang zawng kha chuan min vau duh suh..." tiin thawh chhuah a'n tum ringawt a, a thlêng ami pawh ala ei zo tawp si lo va, a tho tur chu nem ṭhu lehin, "I ei zawh hma lo tho chhuak suh tih ka sawi lovem ni?"

"Ka ei thei tawh lo, ka puar tawh ka tih chu," zâwi raihin a ti ta a.

"Vawikhat mah khatiangin awm tawh reng reng suh ang che, ka duat lutuk che a awm dan tawk i thiam lo a nih hi," ka tih leh chuan, "A lo nih tak chu, min duat lo tawp la ti nia," a sawi zawh ruala lo tho chhuakin chiang zet hian min en a, "I chhungte'n an duh duh min sawi khumin min ṭawng khum a, a thinrim zawkah i la ṭang lehnghal," tiin mitmeng nelawm loh zet hian min melh leh ngat.

"Chutiang sawi thui a ngai lo, ka chhungte lak aṭangin eng thil mah ka beisei lo a, nang pawhin chutiang chuan ti ve ang che, an tel lova awm kan tum ta sa sa helaia lo inhnial ve vak vak pawh a ṭul lo. Rafaela pawisa pe kîr la, Rinsangpuii ka lo kamkhat ang e, i lungawi em?" Ka tih chuan a ngawi reng.

Hnaah kal a ngai tawh si a, hmanhmawh zetin ka chhuak ta a. Min thlah tur pawhin min zui chhuak lo a, inhnialna hun ka nei tawh bik lo nen thinrim ru ṭeuhvin office lam ka pan ta a.

Ka thawhna hmun hi kan quarter aṭanga hla lo tê a ni a, Car ken ngai lovin ke-in ka kal mai zel. Vawiin hian nimina ruang kan en dik kha report siam a ngai a, tun lai chu ka hah takzet. Office lam hna a hahthlâk si, in lamah chuti bawk.

Rafaela hi engkim ka hrilh ngamna, unaupa anga ka en leh 'ka ṭhian' tia ka lo sawi ve ṭhin a ni a, a û nen tiang boruak kan neih aṭang hian min rawn be pawp lo mai ni lovin min hre lo ang hmiahin a awm a, ka ngaih dan a ni chiah bik lo a ni.

# Duatbîki

Zosanga'n min chhuahsan hnu-ah thinrim rilru na bawk siin ka insu a, ka naupaiin thla nga hmel a hmu tawh a, a hma ang khân ka viak a ṭha lutuk lo.

Rinsangpuii ka ngaihtuah chhuah apiangin ka thinrim et et a, an ina va kal mai duhnain min tur ut ut, chu êm zawng ni chiahin ka hre si lo. Khatia min rawn ânkhum ve vak vak, nimin khân ṭawng ngaihna ka hre lo a nih ber kha maw! Lawmsanga call ka tum zet naa ngawih rih ṭhaa ka hriat vangin ka call ta lo, Zosanga khan a va be ta em ka hre mai mai lo e a.

Saitei'n min rawn biaa ka pi damloh thu leh ngaihtuahawm a nih loh thu a rawn sawi a, ka hriselna chungchâng min zâwt nual bawk. Valpuia nen an inhnial thu te, 'pathlawi alawm a lo nih' atih khan mak tihna ka nei miah lo a. Amah Valpuia misual ni-a ka hriat loh avangin ka va be ráwih a, inrem takin awm leh se tih hi ka duh dan a ni. Saitei hi a rilru a no a, Valpuia te ang puitling sa hi atan a ṭha ber. A rualpui tezawng atan an ṭha lo mai ni lovin rei an daih dawn lo tih ka hmuin ka hre tlang sa vek.

Zosanga laka ka thinrimna ala reh lo a, Rafaela a chhuah chhe lutuk leh a pawisa min pêk pe lêt leh tura min ti kha ka run lutuk tlat. Ka nute hriat lohvin min pe tih ka hriatpui avangin Zosanga pawh ka hnial ve ṭâng ṭâng a, dik tak chuan inhau hi ka duh bik lo; mahse, Rafaela a huat thu a sawi khan ka thin tertek a chhuak lo thei lo a ni.

Dâr khat rîk dawnah ka insu zo ve chauh a, Zosanga thawmhnaw rem ṭhat tumin a wardrobe ka tiruak vek a, envelope pakhat ka hmuh chuan eng teh vakah ngai lovin khumah ka theh thla a; mahse, mak deuhvin hawn châkna ka nei ta tlat! A inchár phui bawk si lova khumah ṭhu-in ka hawng ta a, kut ziak fel fai thlap, hmeichhe kut ziak tih hriat deuh hi a lo tlar thla dal a, ka chhiar tak tak hmain a ziak tu ka en hmasa leh phawt.

Ruati a ni!

Ruati hi Zosanga bialnu hlui inâwkhlum ta kha a ni a, chhiar ka chãk zual sauh. Bawp khawkherhin uluk zawk hian ka chhiar ta a.

"Zo, he khawvela awm ve tur leh nang nena nupa nih hi eng lai mahin ka tinzawn ngai lo. He thu i chhiar hunah hian kei chu ka awm tawh dawn lo a.

Kan inkawp chhunga ka rinawm lohna man ka têl taah min ngaihsak mai dawn nia. He nautê, ka pum chhunga ṭhanglian mek hi ka duh lo a, ka hua, ka haw ngawih ngawih. A chhan chu i fa a ni tlat lo a.

Khatia tia kan inkawp reng lai khân zankhat chu ṭhiannu Ramtei te nen kan lêngho a, zû pawh kan in nual; mahse, ka in turah khân dandawi an lo pawlh a, ka hre miah lo. Dâwt ka sawi lo a nia aw..

Chutia zû leh damdawi ka ruih pawlh lai chu remchangah hmangin Ramtei ṭhian rawn hruai Ui hur ang maia zi ruai Famkima khân min mutpui ta a ni.

Vawikhat mai duh tawk lovin zankhua deuh thaw khan nawm chenna atan min hmang a, mi fel leh ṭha ni lo mah ila hetiang thil tenawm ti tur hian ka huaisen tawk lo tih i hriat kha. Ramthansangi, ka ṭhiannu ngawih ngawih khan a mipa kawp lai Rafaela thlah phal si lovin Famkima nen an inkawp ru a, chu chu ka hriat chhuah tâk avanga hetiang ruahmanna tenawm hi siam anni tih pawh ka hria, ka rilru harh mah se che chhuak thei ka ni tlat si lo a, kan sex video kha Ramtei nge Famkima zawkin kawl ka hre lo.

Famkima'n min mutpui aṭanga thla hnihnaah ka rai ta a, ka fa pa chu Famkima a ni. Mahse, ani puh ta lo va nang mah ka puh ta daih che kha min ngaidam rawh aw, duh thlan tur ka nei tlêm êm a ni. Famkima ka puh chuan kha sex video kha tih chhuahah min vau si a, nang nena kan mut dun hnuhnun ber leh ka naupai thla a inmil ta lova i lakah dâwt ka sawi leh ta.

Duati nen in inkawp pawh kha thinlung takin ka lawm a; a chhan chu neih tlâk ka ni lo a, Famkima mihur inhrîkthlâkna chauh ka nih vang a ni. Zosang, min ngaidam rawh tiin ka ngen ngam lo che a, khawngaih takin thu dik erawh min hriat saka kha video kha neih kir dan min zawnsak hrâm turin ka ngen a che.

Hming chhiat leh mualphona zawng zawng phurh tîr che mah ila nang lo chu rin ngam ka nei si lo.

A tawp berah chuan thil tisual titu hian pasalah ka nei ngam lo che a, khaw êng engtikah mah thlamuangin ka hmachhawn ngam dawn lo tih ka hriat vangin ka duh thlanna, thihna kut vawt chu ka thlang ta.

I mawhphurhna hlen chhuah tuma palâi i lo tirh zan te khan ka ṭap tlaivar ṭhak.

Duati kha i tan a ṭha a, i hmangaih anga hmangaihtu che a nih kha, thlah reng reng suh aw.."

Ka chhiar zo chiah chu ka thaw chhuak halh a, Ramthansangi leh Famkima ka haw ngawih ngawih, Zosanga rilru hre mah suh ila, eng emaw tala ṭangkai ve ka tum ruh tlat.

Ruati thihnaa mawh phurtu dik tak chu Famkima leh Ramthansangi anni. Tenawm dun lutuk, Ruati din hmun kha keimahah ka in chan a, ka luak lo chauh. Lehkha envelope-ah khung tuma ka ban leh chiah chuan, "Hmangaihzual, tu thu-in nge kha thil kha i khawih?" Zosanga thinrim aw hriam hruih chu a ring miah lo a, ka che ngam tawh lo. Zâwi muanga dâk chhuakin Zosanga hmêl, ṭo haw tur ang maia dur khup chu ka en ta a.

"Ih..eng lo.." ṭawng pawh ka ṭawng chhuak ṭha thei lo. Hetiang em ema a thinrim hmel hi ka la hmu ngai tlat lo atin ni.

Thinrim lutuk tih hriat zet hian ka kuta lehkha chu min phih thlâksak a, eng mah sawi zawm tawh lo hian a chhuak nghal daih! Tunah office bân ala hun tawp si lo a, engti turin nge a lo haw le? Ka zawt ngam tawh dêr si lo.

Inngaihtuah harh thutin Zosanga chhuak ta chu ka ûmzui a, a Car tlán liam tur bâk ka hmu hman tawh lo.

'Lalpa, eng thil pawi nge ka lo tih le?'

Rilru nuam lo zetin in chhungah ka lut leh ta hna hna a, Aizawla ka lo chhuk ta kher kher chu pawi ka ti vawng vawng.

Tui lo zetin ka tih tur ka ti chhunzawm leh ta a, Ruati lehkha hnutchhiah khan ka rilru a luah reng avangin Zosanga a thinrim tih pawh ka hre chang leh tawh lo.

Zanriah ei hunah pawh a lo la haw lo a, ka inthiam loh êm avangin ka phone ngam bîk si lo. Hrehawm ka ti ngawih ngawih.

Nupaa insiam hi thil awl âi a ni hauh dawn lo. Keini pahnih ngat phei chu man leh mual eng mah tih fel a la ni lo lehnghal a, a rûkin ka haw chho leh mai dawn em maw ni, chu lah chu thil tihchi niin ka hre bawk si lo.

Chumi zan zankhua chuan Zosanga a lo haw ta lo a, vawikhat ka call a, "Min ngaihtuah duh suh, zanin atan chuan i kianga awm kha châkna pakhat mah ka nei lo," tiin a off nghal hmiah.

Ni e, ka thiam loh vek a ni.

Kan khumah muhil thei lovin ka let kual sek a, a vawikhat nân ka chhungkua ka ngai ve ta. Nu leh pa thlazar hnuaia rilru hahdam taka awm thei kha tunah chuan thawpikna leh hrehawmna in min hual vel a, Champhaiah chho leh dawn ila tunah eng motor mah tlân tur a awm dêr si lo. Zosanga lakah ka thinur ru ṭeuh a, nizanah pawh ka thinrim ve reng. Mahse, hmun dangah ka riak bo ve kher lo, keimah chauhva he ina min hnutchhiah hi ka ngaithiam lo hul hual.

Zan lamah ka mut ṭhat loh êm avangin ka tho tlâi hle a, chokaah thawm hriat tur a awm vangin Zosanga a lo haw tih ka hre mai.

Muangchâng hian ka tho chhuak ta a.

"Zo..." zawi têa ka koh chuan min chhâng lo a, a aia ring deuh zawkin ka ko leh a, min la chhâng ta chuang lo. Hun dang chu nise a hmingpumin ka ko leh ngei ang; mahse, ka ngam ta ngang lo a, eirawng bâwlin a che vut vut a, min biak chu sawi loh en pawh min en duh lo.

Ngawi rengin tûkṭhuan kan ei a, min chhâng duh chuanga ka rin loh avangin ka be lui tawh bîk lem lo. A insiam mawlh mawlh a, min chhuahsan leh daih.

Hetianga awm reng ai chuan Champhaiah chhoh ka tum ve ta a. Thawmhnaw leia bazar ka tum ve kha a nia, chu pawh ka ti ta lo. Sumo counter phone-in ticket ka la a, dâr sawm chhuak tur ka hauh ve hmiah.

A nih nih ni ila, kan thuawih loh man kan têl zel a nih ber hi.

Ka thawmhnaw siamin Zosanga inah eng mah hnutchhiah ka tum lo a, a vaiin ka pack vek. Chumi hnu chuan Taxi ka châng a, counter lam ka pan ta vang vang a.

Hringnunah hian a nuam hlir kan ban phâkah a awm lo a ni tih ka hriat chhuah phah.

[LAWMSANGZELA]

Ka nu leh pa an awm lo chu hrehawm ka ti ru khawp mai. Kan nupa inkâr a chhe telh telh ti ila dâwt ka sawi lo vang.

Hmân zana kan riah hran aṭang khan zan thum a liam tawh a, chaw kan ei dun lo a, kan mu tlâng tawh hek lo.

Rinsangpuii thawh hmain workshop ah ka kal daih zel a, ka haw hnuah pawh min biak loh chuan ka be hmasa duh bik lo.

Hmeichhia zawk a dik lo chung pawhin tlâwm a tum miah lo a, inṭhen ka duh ta tihna a ni chuang lo. A tih ṭhin pangngai a ti vek zel tho a, ka nu leh pa boruak ṭha lo nei pawh hrehawm ka tih tawh teh reng nen keini lehzel chu inrem taka awm kha ka duh dan a ni a; mahse, engkim hi a harsa em em vek a nih ber hi.

"Lawmsang, Lungleiah zan hnih khat riaka zin ka duh a," Workshop kal tura ka insiam laiin room ah a rawn lut a.

"A ṭûl kher lo, nupa chu inhauh châng a awm a, lungawi reng theih loh hun te pawh a awm ve ṭhin, nu leh pa bula kal zel hi thil ṭha a ni lo a nia," ka ti a.

"Ka nu te pawh ka dil vek tawh a, an phal alawm le, Lawngtlaiah an châm rih dawn tho va.." a ti leh a.

"Ka nu leh pa'n phal mah se keiin ka phal lo alawm, i thinrimna kha dah ṭha la in en lêt rawh, ka laka thinrim i ni lova ka û vang a nih chuan a aiawhin ngaihdam ka dîl a che, kan hnenah chêngin ṭawngkam a rawn nei pawh nihlei lo," tiin ka ding chhuak hluai a, a lâwm lo tih a mitmengah a hriat reng.

"Zan hnih khat bâk ka riak lovang, tlãn tur pawh ka ni lo a.." a tih chuan, "Kei chuan kal ka phal lova i kal lui ṭâlh a nih leh i thu ni rawh se," a bâk eng mah sawi ka tum tawh lo.

"Ka thu thu a nih chuan ka kal ang," a ti hmak.

Eng rilru nge a put ka hre hrep lo ve. Ka lakah lungawi lohna a nei a nih chuan ṭha takin sawi se a sut kian dan ka zawng mahna. Chutiang ni lovin a rûk a ralin Duati a lo va chhuahchhál a, ka hrethiam nek lo e a.

"I duh ang chuan ni rawh se, Pathian hmaah thu ka tiam tawh a, a ṭhen hmasa zawktu-ah ṭan ka tum lo. Ka phalna tel lova kal tur i ni tih kha theihnghilh lo la.." ka sawi zawh rualin min chhânna pawh nghâk tawh lo hian ka chhuak zui ta daih a.

Workshop ah pawh hlim hmêl ka lan tîr thei lo achhâ chu a ni e. Ka nu ngaih ṭha lovin min rawn biaa eng mah ka sawi thui duh lo. Kan inrem lohna bul ṭanna kha ka û a ni a, Rinsangpuii awm dan a zirin nakinah ka la hrilh ṭha ang chu..

[SAITEI]

Ka piin hmâ a sawn lutuk thei si lova duh aiin kan châm rei ta a. Vawiin hian keimahin Aizawlah ka phei dawna ka nu erawh a la châm rih ang.

U Valpuia nen mumalin kan la inbe lo a, a whatsaap message ka view vek zel tho. Ka rin loh dan lutukin pathlawi a lo ni bawk nen ka rilru a buai takzet. Kan inhriat tirh khan min hrilh tlang nghal ni se ka hrethiam tur a nia, eng vanga zêp char char nge a nih le! A nupui hmasa 'a thi tawh' tia sawi kha thil harsa niin ka hre lo a, min bum ang tlata hriatna ka nei.

"Saite, ka tihpalh takzet, lo phei la sawi dun ang," a ti a.

Ka chhâng ta chuang lo. Dik tak chuan inṭhen hlen tur anga ka ingaihtuah hian ka na lâwk a, ka hmangaih tih ka hre bawk. A nupui chanchin eng mah hriat ka nei lo a, u Duati ka va zâwt ve bawk a, eng mah a lo hre bik lo.

Kan kum inthlauhna hi chu eng teh vakah ka ngai ngai hran lo a, ka rualpui leh kei aia naupang nen inngaihzawn ai chuan ka duh fê. Min ngaihtuah ṭhin bâkah min duatin min ngaihsak em em a, ka chhungte mitmei tikham zawngin vawikhat mah a awm ka hre hek lo. Ka tân ani tluk an awm lo tih hre mah ila pathlawi a nihna hian min tina tlat lawi si.

Ka haw tur thu pawh eng mah ka hrilh lo a; mahse, kan in kawta a Bike lo ding ka hmuh chuan mak ka ti kher mai. A lo lêng taima ve a, a Bike tezawng ka hai lo chiang e.

Inchhunga ka luh chuan a lo ṭhu tak tak nia!

"I rawn thleng tluang a, i lo haw tur thu hre hma ila chuan counter-ah ka lo hmuak tur che a nia," tiin a nui suk a.

A thawmhnaw inbel a inhmeh leh hle.

Dik tak chuan a chhe lo thlâwt.

"Ka sawi loh pawhin i hre tho alawm," ka ti sap a.

"I nu ka bia a, ka zâwt alawm," ati awlsam êt. Ka nu a biak ka ring pha lo hrim hrim a, min ngaihtuah takzet tih ka hriat phah. Chuvangin hmel hlim lo ka hmuh tir duh ta bik lo a.

Ka Bag-te min khai luhsak vek a.

"Thil min hawn ka beisei miah lo a nia," atih chuan ka nuih aza hle. Kei aia a upa zawk chung hian min rualpui kawm hmiah hmiah thiam a, nau anga min en châng lah a tam. Dawhtheihna a ngah hle bawk.

Kan nula a buai bawk si a, ka room-ah kan inzui lut ta nge nge a.

"Ka ngai tawh lutuk che, min kalsan suh aw," tih pahin ka hmuiah a rawn fâwp a, ka ngaih êm avangin ka hnial phal bik lo.

Uar theihtawpa kan infawh bâk eng mah beisei a nei ngai lo a, tun ṭum erawh a dan a dang ta deuh, ka âwmbawrah chûlin min kuah hnai sauh a, "Min kalsan lo vang ti raw?" A ti sup a.

Ka hmui lasawnin ka chhoh melh a, ka nui ve ta sak a, ka kalsan dawn lo tih sawi chhuah kha ka zak tlat. Mahse, a hrethiam tho.

Chumi hnu chuan inngeih takin kan awm chhunzawm a, pathlawi a nih dan leh a nupui hmasa nena an chungchang erawh remchanga sawi atan ka khêk ta a.

Ngawih bo pui ka tum lo a, ka hmangaih tak tak a nih chuan a nihna ang ang hian ka pawm mai dawn lovem ni? Nunhlui nei vek kan ni si a...

[Rafaela leh Zirsangliana]

Ka pa nen dawrah kan awm a, vawiin hi bungraw lo thlen ni a ni a, a kim leh kim loh en uluk a ngai bawk nen ka pa nen kan kal ta kha a ni a. Customer an tam si, phone khawihna hun pawh kan nei ṭhaṭhum lo.

Mahni hna ve ve kan buaipui lai chuan Zosanga a rawn lût hlawl a, "Rafael, Duati pawisa i pe em ni?" Tiin min zawt khauh.

Ka pa awm lai khera min zâwt chu ka ngaih dan a ni vak lo a; mahse, dik taka chhângin, "Pe e, kan lo kala i lo awm si lova damdawi lei nan tiin ka pe a nih kha," ṭha taka ka chhân chuan a ner sawk a, "Ka enkawl thei a, a mamawh leina tur chu Pathian zarah ka nei ve," tiin pawisa ka dawhkanah a rawn dah a, biak zui hman loh hian a chhuak leh nghal daih.

U Duatin engkim a hrilh vek tih ka hre thiam a, an nupa inkâr a ṭha lo tih ka rin hriat mai. Rilru kâwi pu-a pe ka ni lo a, a hlawh a tlêm si a, ka pi leh pu te hnena a awm lai ata tawh duh duh nei ṭhang a ni a, Zosanga lakah a duh te pawh a sawi ngam lo ve theia ka rin vanga pe ka ni. An nupa inkâr tih chhiat tuma pe ka ni miah lo asin le.

"Bawiha, i û i tlawh tih i sawi lo va," ka pa'n atih chuan Diktei nen kan kal thu leh damdawi leina ka pêk thu ṭha takin ka hrilh a, "Ka u a ni a, ani lo û dang ka nei hek lo, bâkah azawng a zain kan ngaihsak pawh a ni lo a, keiina ka lo huata ka tlawh duh loh ngawtna chhan tur a awm hleinem" ka ti a.

"A dik alawm, kan huat vanga ti kan ni bik lo a, i nu nen kan ngaiin kan ngaituah takzet; mahse, kan kâ kan âng tawh a, puitlin phah nâna an hman hlauh chuan atihzia dawn êm asin," hrethiam taka min chhân avang chuan ka thawveng huai.

"Zosanga hi chuan a pa a chhûn fuh khawp a, ani pawh huat loh tur, a kum a la puitling lo a, thin butut nei mi a nih vangin thil a dâwn thui lo mai zâwk a ni, a hma ang khan be bawrh bawrh la, thu ṭha hrilh tam a mamawh a nia," ati leh zel.

Ka pa hi chuan thil a ngaituah zauva a ngaih dan ni lo pawh a sawi ve zen nen ngai lo. Kan hmeichhe ho hi chu an kawlh hrâ reng mai a, Saitei pawh zaidam angin lang mah se a duh lohnaah a nasa ve tho ang, ka nu fanu a ni miau alawm.

Diktei chungchâng te sawiin, "Pathian ngaihsak chhungkua anni a, i tâna Pathian ruat a nih takzet chuan dâltu awm lovin in innei em em ang, rilru nei ula Pathian bêl tlat ang che u," tiin min hrilh nghe nghe.

Zosanga min rawn tih dan kha a hmaa ka mizia ang la pu ni ila chuan ka chhâng hrep ang. Mahse, Pathian neitu kan inti a nih chuan insum theihna tepawh kan nei tur a ni dawn lo'm ni.

Zanin tlai hian Diktei nen chaw eia chhuah kan tum ve a, ka hmanhmawh ru viau. Ka pa hnenah, "A zualpui ka tihpui che anga i lo buaipui zawm thei ang em?" Ka ti a.

Nui suk chuang hian, "A la hma êm mai, Diktei pawh ala haw bîk nang, dar li velah i haw phei dawn nia," tiin dârthlalang cut-na min pe a, ka tih tur ka hai lo chiang kher mai.

Zanin hian Diktei hnenah Pastor hna dil ka tum thu hrilh ka tum vanga hruai chhuah tum ka ni a, engtin tak min ngâi ang maw.

Min hmuhsit phah nân a hmang êm lo ang chu...

B+>[BeckirafARenthleI]<+®®

THE RAPSAGYAN FAMILY

Becky Rafa Renthlei.

Chapter 29

[DIKTEI LEH RAFAELA]

Tlai lam dar nga ari tawh a, ka rin aiin Rafaelan min lo sâwm har a, tun lai kan boruak chu a nuam kher mai. Pathian hnenah kan inngaihzawnna chungchâng hi zantin ka thlen ziah a, amah hmangaih viau mah ila Pathian a tel si loh chuan harsatna in min tlâkbuak leh thovin ka ring.

Crusade kan chhim aṭang khan a nun nasa takin a inthlâk danglam tih ka hria a, amah tihnual zawng leh a rilru natna tura awm ka tum miah lo. Keiman ka zir phawt chuan eng emaw chenah ka thu a zâwm ve ang tih rinna lian tak ka nei bawk.

Ar El-a, Sailova Team Musician nen khan rinaiin an inkawm thei phian a, Rafaela hian 'ṭhian' tia sawi tur mumal a neih ka hre lova Zosanga kha a ni mai a, a û nen hetia an awm aṭang hian mumalin an inkawmin an inbe tawh pawhin ka hre lo. A mal tlat a ni deuh ber.

Solfa thiam tak a ni a, zaipawl intihsiaknaah best conductor vawi hnih lai a ni tawh bawk. Chuvangin inthlah dah taka nun hmana zu hmuna tâl mai mai kha Pathian hian rem a tihsak lo niin ka hria; atan hun ṭha, khawngaihna hun a siam sak ni berin alang.

"Pathianin rem atih chuan nakinah, zaipawl conductor te pawh i la ni leh anga, kan Studio-ah Track kan la siam dun dawn nia," Ar Ela khan a ti nghe nghe, tlangval fel leh rilru zau tak niin ka hria a, ka ngaizâwng ta tihna lovin Rafaela nen an miziaah inanna deuh annei a, ka ngaina ve tawp.

"Dikte, i inpeih tawh em?" Rafaela inchhungah a rawn lut a, pawn lamah hian chaw eiin kan la chhuak dun miah lo a, inneihnaa kan ei leh an ina ka ei bâk kha kan pahniha kan chhuah dun awm pawh ka hre lo. Zanin hian eng nge a hriat teh reng ni, sawm tak têin min sawm a, kan ei chhuak ve dawn ta nge nge e.

"Ka rin aiin i muanga ka inpeihna a rei lutuk tawh," Jacket ha ṭha mawlh mawlh pahah ka tih chuan, "Nia, ka pa'n min tîr leh alawm le, duh aiin ka tlai," ati ṭha ve mai.

A inchei dan chuan ka mit ala zar thei nia.

Off-white rawng denim jacket a ha a, a hnuaiah shirt dum body fit a ha bawk a, Jean kekawr dum leh a boot bun lawk lam deuh chu a inhmeh thlâwt, Smart boy kha a ni ngai lo hrim hrim a, a sam Vikings style pawh ka sawisel sak ngai ta lo, a uchuakin a sei hek lo a, amah ti Rafaela tu ni miau hek.

Ka sâng ve viau chung pawh hian a beng pawh ka chen miah lo a nia, a taksa inkhaithli thlarh te, a hnar ngûl sâng vah te hi alawm amah ti hmel ṭha tu chu; mipa dang anga lerh khu chûk a ni lo a, pakhata lungawi chi a nihna hi amah ka duhna chhan a ni bawk.

Chumi hnu chuan muang khaw tlai lovin kan chhuak ta a, min hruaina hmun tur a sawi loh avangin ka hre bik lo.

Falkland lamah kan tlân ta zel a, Bon Appetite kawtah Car a tiding ta a, rin aiin a lo lûn reuh lehnghal. Mahse, a neitu nu niawm tak thâu lam deuh mitmeng fiah kâk chuan hmel hlim tak hian min lo chhâwn a, kan ṭhutna tur pawh Rafaelan a lo hauhsa vek tawh chu niin. Chu nu chuan, "Puar deuh khan ei rawh u aw, i pa te an lo lang khât hle mai," tiin Rafaela a bia a, an inhriat ṭhat hmel hle.

A dawhkan hauhsa chu a awmna tlêmin a fâl deuh a, rui lo hai lova kal a ni bawk a, a dan pangngaiin a ṭawng tam lo kher mai. Keimah zawk ka ṭawng loh phei chuan sawi tur em em a hre lo a, a mize dik tak hi chu hre ṭhang tân lo chuan a nelawm loh.

"Eng nge i ei ang?" Tiin Menu min pe a, "I duh duh kha chah rawh ka ei thei vek," ka ti a.

Kan ei tur chah kan nghah lai chuan thu tak zet hian min en a, "Dikte.." zawi supa min kovin min en deuh vang vang a, sawi tur pawimawh tak a nei tih ka hrethiam mai. Min ṭhen a tum deuh tihna em ni ang!

Chutah dawhkan chunga ka kut dah chu rawn banin a hûm vang vang a, "Ka nun hlui leh vawiin ni thlenga ka nun dan hrechiangtu ber i ni a, khawvel thila ka tlân apiangin harsatna, mualphona leh zahna ka tawng zel tih i hriat kha, Pathian rawngbawl ve hi ka duh; mahse, hmanni lawka ka awm dan te ka han chhût lêt a, mi min hmuh dan tur leh kan chhungkua an thlir dan tur pawh ka hria; mahse, min kohna hi ka hnial ngam lo a, hnial thei tur pawhin ka chak tâwk lo, Pastor zir ve duhna rilru ka pu a, ka mihring duhna ringawt ni lovin min kohna a ni," a ti ta a.

Ka rin loh deuh a rawn sawi chhuah avang chuan ka thaw halh a, ka lawm bawk si.

"Kei chuan dál ka tum miah lo che a nia, hetiang hun hi alawm ka lo beisei, mi sawi dan leh thlir dan a pawimawh ber lo a, Pathian kohna i hria a nih tak zet chuan tlânchhe suh." Ka ti sap a.

"Ka lawm e, hemi chungchâng sawipui che ka duh vanga hruai chhuak che ka ni bawk. Ka mihring mihrinna chuan a châk hlawl lova khawvel hi nuam ka ti a, full time-a rawngbawl hi ka la tinzawn ngai miah lo; mahse, Pathian aia thlan zawk ka tân neih a rem ve tawh lo a, kan pahnih ngei pawh hian inneih duhin tum mah ila chunglamin rem atih si loh chuan dáltu kan nei tho ang," a tih leh chuan dik ka ti lutuk tlat.

A hmêl tak rünah chuan fiamthuna pakhat mah a awm lo. Ngun taka thil ngaihtuah hmêl a pu.

"I thu tlûkna hi ka pawmpui che a, i tân bâng lovin ka lo ṭawngṭai zel dawn nia," ka ti vei thlap.

"Ka lawm e, ka nu rawn haw se la, chhungkuain kan han rêlho anga engkim ka lo hrilh ve dawn che nia, kohhranah dîlna theh luh angai ang a, an remtih hlauh chuan chu chu Bial committee in an pass loh chuan ka zir thei dawn chuang lo, eng pawh nise Pathian kuta awm kan ni e," a ti a, zanriah tur an rawn peih fel tâk avangin kan ngawi zui ta rih a, ka chhungril a hlim veng veng, atana ka ṭawngṭaina kha chhânin a awm dawn ta.

Ka Rafaela, bial zaipawla tel tirha ka lo ngaihsan em em leh ka lo duh rûk kha kei aiin Lalpan a lo duh zawk a ni. Thinlung takin ka lawm a, an kohhran pawhin an pawmpui ngei ka ring tlat.

Zanriah tui tak kan ei hnuah muang khaw tlai lovin kan ei man te a pe fel a, Bon Appetite chu kan chhuahsan ta a.

Kawngsir reh lai deuhvah kan din chuan a ngaihna hre lo zet hian ka en hâ a, nui suk chung hian, "Ka fawp châk che, vawikhat chiah," tih pahin a lamah min pawt hnai a, ka lo insiamrem ve vat. Rawn kûn hniamin ka hmuiah a rawn fâwp ta a, uar takin ka lo chhâng lêt ve. Ani anga mipa insûm thei hi ka nunah ka la tawng lo a, ka tawng leh tawh pawhin ka ring lo.

Rei ngial kan infawh hnuah min thlah ve ta ṭâwk a, "Ka zir dawn tak tak a nih chuan kum li chhung min lo nghah a ngai dawn sia, i thei ang maw!?" Tiin min zawt a.

"Kan inhriat hma zawng kum 28 a ni a, kum li nghah te zawng ka dam a nih chuan ka theih lohna chhan tur ka hre lo, i Lalrindiki hi i tân ka awm reng tih i hriat kha," ka chhânna chu a rilrem zawng tak a ni teh chêk aniang chu, "I senior hman vek tawh dawn a nia," a nui hawk a, "Nang pawh i senior ve dawn tho.." kan boruak hahdam raih hi ava nuam si êm.

An inah pawh pêng lovin kan in lam kan pan nghâl a, a rawn lêng zui dawn tih ka hrethiam mai.

"Rinawmna leh Pathian ṭihna tel lo chuan kan inkâr a ṭha ngai lovang," Car-aṭanga ka chhuah dawna a thu sawi chuan ka ngaihtuahna ati thui hle bawk.

Ramtei khatia a lo awm kha anni tân lungawi thlâk loh mah se ka tân erawh ka hmangaih leh ka duh ngawih ngawih min hnaihtîr tu a ni lawi si. Ramthansangi kha haw lova lawmthu hrilh tlâk a ni.

'Pathianin kan ṭhatna turin engkim a thawk ṭhin' tih hi rin ngam a ngai tihna.

Rafaela hi zawng, a tih tawh lam zawnga ti tlur ang chi mipa kha a ni a, tunah hetiang rilru a pu a nih chuan damchhung daih a ni ngei ang tih ka hria..

Rilru hlim zetin inchhungah kan lut ta a, ka chhungte hrilh hlán ka nghâkhlel hle.

[LAWMSANGZELA]

Rinsangpuiin ka thu sawi enga tan maha ti lovin Lungleiah a phei ta tih ka hriat chuan ka lung a awi lo hle a, a in sawi angin zan hnih khat mai a awm ta lo va, zanin hi zan li a riahna a ni tawh.

A thlen tawh thu whatsapp aṭanga min rawn hrilh bâk kha chu eng mah a rawn sawi tawh lo a, a nau mipa nen kan inbe ta zawk a.

"In boruak a ṭha vak lo em ni?" Tia min zawh khan thil nih dan chiang takin ka hrilh vek. A dam loh lai ata tawh a nau nen hian kan inkawm ngeihin thu chhia a ṭha kan sawi dun ve ṭhin a, "Ka û thiam loh a nih chu, ka lo hau ang e," ati nghe nghe.

Rin aia a châm rei tâk avangin ka nu leh pa'n min zâwt ta nge nge a, ka u vanga thinrim a ni tih ka sawi chuan ka pa ngaihdan a pêl riau.

"Zosangmawia kan chênpui pawh a ni tawh lo a, in nupa inkâr ṭhat loh vanga haw chu nise ka hrethiam, bâkah nu leh pa awm loh laia hetia haw ngawt hi thil tihchi pawh a ni lo, va hruai ang che, in inneihna ala rei lova mi hriat tam hma hian rawn hruai haw rawh," ati hmiah.

"Tlân angin a kal si lova.." ka tih chuan, "Chuti a nih leh lek phei chuan a lo haw a ngai a nih chu, pasalte tel lova mahni ina kal sek te hi a mawi ngai lo a nia, mi sawisep kâina a ni, natukah va hruai ang che," a ti deuh tlat.

"Nupa chu inhau chãng a awm a, inhau ngai lo nupa an awm miah lo ang, in inneihna thutiam kha ngaihtuah kir ula, inrem tum rawh u, tlâwm zawk in awm loh chuan in innei rei hek lo ang, thinrimin va ṭawng lo la, in lam kan buai deuh sia ka lo hruai mai che, tiin ṭha takin i va dâwr dawn nia," a tih zawm leh a, ka nu hnaah laklawh deuh a awm vanga an lo haw rih dawn loh thu leh ka thang chhung chu Workshop khâr rih turin min ti a, ka hreh ngang mai.

Dik tak chuan hman zana min ṭawngkhum dan kha paidam harsa ka ti a, kan inngaihzawn lai zawng leh kan inneih thla li chhung khan vawikhat mah khatianga zah lova min ṭawngkhum kha ka la hre ngai lo.

Tun ṭum chu a vawikhatna te a ni a, tlâwm zawkah ka ṭang rih ang a, a lehpek a awm leh a nih chuan ka ngawi tawh hauh lo ang. Ka û lakah a lawm lo a nih pawhin ṭha taka sawi mai tur a nia, rilru tê ber ang hrima inchhuahchhál tih vel te zawng a ṭhing lutuk tlat. Ka nupui mah nise tun ṭûmah hi chuan thiam ka ti hlawl lo a ni.

Ka nu leh pa hmâi ka zah êm avangin Rinsangpuii hruai tur chuan Lungleiah ka kal ta a.

Dârkar ruk hnu-ah

Car ka hûng fel chiah tihin ka nupui leh mipa pakhat Bike in an rawn thleng ve chiah a, Helmet full face a khum vangin a hmêl ka hmu thei rih lo. Ka kal tur thu ka hrilh lâwk lo a, va ṭhâwn thut tum ka ni.

"Sp, ka lo pêng lo mai ang aw, Aizawlah i lêt leh dawn chuan ka nu te rualin kal la," amah rawn phurtu pa chuan a ti a.

"Nia, kan inhrilh ṭha leh dawn nia, office lamin an peih fel hnuah ka awm loh pawhin ka nau kutah i lo dah mai dawn nia," Rinsangpuii leh chu pa inbia chu ka ngaithla reng a, ka Car a hmu awm reng sia min biak pawh a tum miah lo em maw ni!

Chutah min hmu thut anga awmin, "I lo phei tur thu i sawi lâwk lo a," ati sap a.

"Nia, ka tum thut.." ti chiahin ka chhâng.

"Venpui, hei hi ka pasal Lawmsangzela a nih hi, Lawmsang, Venpuia," tiin satliah zet hian min inhmel hriat tir a.

Venpuia, Lalvenpuia.. he pa hi ka hrechiang khawp mai. A hmêl ka la hmu lo tak nain a hming tezawng ka hre bel hneh lutuk. Rinsangpuii bialpa hlui, a dam loh tâk avanga rinawm loh santu ngei mai kha.

Ka chhungrilah thîkna a rawn awm a, ni rei lo tê a va châm chhungin a bialpa hlui nen an lo inzui tihna maw.

Venpuia chuan a Helmet phelhin min rawn chibai a, a nui hmêl phakar hmel zet chu hnek chawrh a châkawm. 'Â ka thil ngaih tuah dan a ṭha lo' dam thluam hian, "Kan nu i lo buaipuia a lawmawm hle mai," ka ti ve ngat a. A nui lui ngial.

Chutah ka chawhmeh lei ho Car aṭanga dah chhuakin, "Rsp, lo khai lût ta che," ka ti a.

Venpuia lam hawi hian Rinsangpuii chuan, "Ka luhsan ang che aw.." ala ti hrâm.

He pa hi chu a theihnghilh hlen thei tak tak dawn lo a nih hi. Mahse, amah hruai tura kal ka ni a, ka lâwm lohna tih lan ka tum rih lem lo.

In chhunga kan inzui lut a pain min lo hmuh chuan, "E he, i lo kal dawn tih kan hre miah lo a," tiin min chibai vat a. Ka puzawn hi pa ṭha leh rilru tluang tak a ni a, ka ngaina bawk.

Sawi lâwk lova ka kal thut avanga thupha chawi pahin, a fanu hruai phei ka tum thu te ka sawi nghal a, "Nia, rin aiin a châm rei ta sia, Bawiha thlah phei turin ka lo be zo chiah a.." ati ṭha ve mai. Lungawi lova haw phei a ni tih a sawi lang lo a nih ka ring.

Ka nupuiin eng mah a lo sawi ve lo a, thingpui min siamsak ban pah hian, "Naktuk zingah kan phei nghâl mai dawn em ni ang, in lam a ngaihtuahawm deuh si a," âwka dam thlapin ka bia a.

"Ka nu te an lo la phei lo em ni?" Tiin min zawt a.

"Eng emaw hna thilah lak lawh annei a, an châm rih deuh ang,"

A pa a awm ve tlat avangin min be ṭha der vel ni berin ka hria. Min ngai ang pawhin a lang duh der lo.

Zanriah kan ei laiin Bawiha'n, "Naktukah in phei dawn chuan thil ka thawn ang che u aw.." ati a.

"Ka phei ve dawn lo, Revenue lamah tih fel loh ka la nei," ati hmak.

"Aw, inpahnih khan phei ula, helam chu keiman ka lo buaipui mai ang," a nauvin a chhân chuan, "Ka châm ve theih lai a nia, duh leh Lawmsanga phei mai rawh se," tiin a tho zui daih a, kan boruak a nuam ta lo khawp mai.

A pa hmai zah viau mah ila sawi loh theih ni tawh hek lo le. A bul aṭangin kan chungchâng ka sawi ta vek a, Rinsangpuii tak chu room ah a lut daih. Thiam thu emaw pawh a sawi chuang lo.

"A nih tak chu, eng mah kan lo hre ve lo a, a zia lo hle mai, in pahnihin phei ang che u, nu leh pa kalsanin pasal a nei tawh a, duh ang anga tâl tur a ni lo reng reng," tiin a fanu a ko phei a, hnial theih miah loh tur hian, "Naktukah in pahnihin phei ang che u, i nat lai leh harsatna i tawh lai zawng zawnga thlah lova vuantu che a ni a, pasal innei a nih chuan a nuam ringawt in ûm tur a ni lo, hrehawm ni leh ṭah ni te pawh inla nei ang a, eng emaw hleka rawn haw kha ka rem ti miah lo a nia," tiin a zilh pah bawk.

Ka nupuiin rum zeta min melhna pawh ngaihven lo hian, "Kan nupa inhau kan ni lo a, ka û pawh kan hnenah a chêng chuang lo bawk a, ka thiam lohna chen pawh a awm ve tho, inrem taka awm hi ka duhdan a ni a, ka nu leh pa te duh dan a ni bawk," ka lo ti ve a.

Chumi zan chuan a room-a khum zau vak lovah chuan kan mu dun leh ta a. Lalvenpuia chungchâng erawh remchanga sawi atan ka khêk.

Ka nupui kuah chungin ka chhíng ta riai riai a, a ni pawhin min kuah ve tho...

(VALPUIA)

Saitei nen kan inkâr a ṭha leh ta. Ka rin ang chiahin a rilru a thianghlima ṭhat chhuaha ka biak reng na na na chuan a thinrim rei ta bik lo.

Ka hmangaih miau a, tlâwm zâwk nih ka hreh bawk hek lo.

Vawiin hian a ṭhiante ho nen an picnic a, kal ve min dil thlap. A tîr chuan ka phal lo a, hetiang picnic tih vel luklak hi ka ngaina lo a, ani pawh kal ka phal lo deuh kha a nia. Mahse, a châk ve êm avangin a hmun thleng ka va thlah ve ta tho a, kei erawh insurance tih fel ngai ka neih vangin ka tel ve ta lo. 'Tlaiah ka lo lam leh ang che' tiin ka hrilh sa a.

A nu a awm loh hi chuan zalên a inti ve a, nu Mafeli kha Strick anga lang miah si lo hian a fate a ngaihtuah tih ka hria. Duati chungchâng kimchang pawh ka hre ve vek a, "Kan Lalduati hi chu a ngaihna a awm lo, a pite hian an duat khaw lo vek tawh," a ti ṭhin.

Tlai lam dar li velah Saitei ka phone a, a pick thei ṭhak lo! An la buai deuh a nih ringin ka ngaichâng a, dar nga a rik tawh hnuah pawh min rawn call back ta si lova ka ngaihtuah êm avangin ka call nawn leh ta a.

Mipa hian a lo chhâng a.

"Khawnge Saii?" Ka ti nghal tawp.

"Eng lo, â.." a ṭawng lai lo dang chatin chaw in ei tawh em? Tih ka zawt a, An ei tawh thu leh Saiteiin a la ei lo tih a sawi chuan, "A phone kha lo dah ṭha ang che," tiin ka off nghal hmiah. Eng emaw tak thil dik lo a awm tih ka hrethiam mai.

Darkar chanve hnuah an picnic na hmun ka zuk thleng a, Saitei ṭhiannu Maawmi hnenah chuan, "Khaw nge i ṭhiannu?"

Rûi tih hriat zet hian, "A chatthla, khûtah..." atih chuan a bãnah kaiin a sawina lamah chuan ka hruai thla ta a, Zû a in tak tak a nih vaih chuan a châk lo viau ang.

A sawina hmun kan thleng thla ta a, ka hlauh ang ngeiin Saitei chu hmeichhe pathum hian an lo ṭhutchilh a, a ruih hmel hle bawk.

"U Valpui, Ruatkima'n Apple juice leh Whisky inpawlh a pe a," hmeichhe pakhat hian a lo ti a.

"Tu nge Ruatkima chu?" Tia ka zawh chuan, "Saitei bialpa hlui kha" a ti leh a.

Saitei pawh ngaihsak ta lo chuan Ruatkima zawng turin ka chho leh ta a. Amah Ruatkima ber pawh ka hre si lo a, ka'n zawt chawp leh rih.

A ṭhianteho nen zu an lo in a, a kawr âwmah ṭhâm lawpin, "Engzat fakauva tam nge Saitei zû i pek?" Ka aw a dam lo khawp mai.

"I hriat ve tur a awm lo," tia min chhân chuan ka hnek teuh kher mai. Mahse, ka tân chuan naupang ang lek anni a, "Rûi lo la chuan ka zilh hlek ang che maw le," tiin ka nam dawrh a, a pai deuh chawn chawn.

Lo kal tir ve loh tawp tur a nia.

Chumi hnu chuan amah Saitei ka buaipui zawm ta a, hau ringawt mah ila awmzia a nei rih si lo a, ngawi reng hian Car seat hnungah ka mut tir a, an ina hruai haw chi pawh ninghal lo chuan.

Ka in lamah ka phur tlang ta a.

Hetiangho rual inkawm khawm hi alawm buaithlâk. A harh hunah councelling class ka neihpui ngei ka beisei..

[ZOSANGMAWIA]

Khatia thinrim taka in ka chhuahsan hnu lawk khan Court-a ka theh luh tur death Certificate ka theihnghilh avangin ka lêt leh a.

Kan room-a ka luh chuan thil fel lo a awm tih ka hrethiam nghal. Duati zin bag leh a make-up chhawp chhuahsate kha pakhat mah alo awm tawh lo a, min chhuahsan tih hrilh hranpa ngai lovin ka hrethiam ve mai.

Khawiah nge a kal tâk ang?

An inah chuan a kal dawn lo tih ka hre sa a, Lungleiah pawh a phei ka ring chuang lo, a chhan chu a huat ber a nu a la awm tlat a, Champhaiah chhoh a tum a ni ngei ang.

Ka lehkha lâk tur pawh la ta lo chuan Car-in Champhai Sumo counter ka pan ve ta nghal a, he nu em em hi chu, hmangaih hle lo ila chuan a duh dan anga awm tîra kalsan daih tawh tur ka ni. Mahse, ka hmangaihna hian hriat thiamna leh dawh theihna a keng tel a, dan anga kan la inneih fel loh vang hian a inluling ni ta berin ka hria.

Counter ka thlenin eng Sumo mah a la chhuak lo a, Duati hmêl pawh ka hmu chuang lo, ka hawihai kher mai.

Hmelhriat zawh tur îk ka hmu bawk si lo a, chutia ka din reng lai chuan Taxi pakhat hi counter hnai ber kawtah chuan a rawn ding dat a, a chhunga chuang a lo chhuk chuan ka mi zawn ngei a ni. Kan Lalduatmisuali..

Ka ngaihtuah dan avang chuan ka nui huk a, hria se a duh lo mai mai ang chu.

An dinna lam panin ka va pawh phei ve ta a. Min hmu thut chu a meng phâwk kher mai!

"Min dan buai tum miah suh," a'n ti nghal ringawt a.

"Ka tel lova kal duhna rilru i pu kha thlarau sual hnathawh dik tak, hremhmun tlâkpuina tham a nih kha," ka ti a, mak deuhvin ka thinrimna kha vawm bo ang duakin zuk reh hmak a.

"En teh, helai hmunah hian inhnial buai ka duh miah lo a nia," tia Counter pan a tum chuan a bânah ka vuan a, "Pathian hmaah thu tiam chatuan daih kan chham law law dawn em ni? Hetia kawh mawh bãwla i awm fo chuan eng mah tih hreh ka nei dawn miah lo a nia, chhungte kalsanin ka vuan che tih hre nawn leh rawh," ka ti zawi sup.

"Kei pawhin ka vuan ve tho che, nang mah bîk hi insawi ziah suh," a ṭawng ring ṭha ngam si lo a, a ticket cut-na counter-ah chuan luhpuiin rokhawlhna avanga a kal theih loh tur thu ka sawi a, 'kal dawn ṭepa ṭhulh a nih vangin pawisa pawh kan la kir lovang,' ka tih chuan Counter nghaktu pa chuan, 'A zat ve chauh hi kan lo la ang e,' ati a, Duati tihngaihna hre lo thinrim hmai sen ṭân chu ka hmu reng.

Mi â ni hek lo. Hetiang hmunah min hnial ngam dawn lo tih ka hre ve kar.

Ka Quarter lam panin kan inphur phei leh ta nge nge a, ka nuih aza thut zel a khawsak phung hi. Fing awm tê si hi âtna thlarau sual a dawng leh thut zel.

Quarter kan thlenin dim lo baksak hian Car kawngkhar a nam khar ṭhuai a, a titau te hi a namai lo sia e.

"I thawmhnaw kha chu tikhan dah rih mai rawh, office ah ka hruai dawn che," ka ti a.

"Eng a? In office ah eng thil mah tih tur ka nei lo," a bag-ah lai a hâi zui rak rak a.

"Ka awm loh hlana khatiang tih i chin dawn chuan nitin ka rualin office-ah i kal ve ang," ka ti leh a.

"I â tawh a nih hi, ka kal nguar ang," tih pahin room-ah a lut daih a, ka zui lût ve nghâl.

Khumah tûm bûr hian a ṭhu a, a bulah ṭhu thla ve in, ka kuah a, "Le, thinrim tawh suh aw, nautê khan a tuar palh ang e," Duat takin a samah ka chûl sak a, "Thinrim thei lo mihring kan awm lo a, kei pawh ka ni tho; mahse, nupa chu rei tak in thinrim khum loh tur," ka sawi zawh rualin a hmuiah ka fawp a, a ṭang kawh tlat.

Thlah duh miah lovin ka fawp lui zel a, khumah ka kuah mu ta a, thâah min hneh hek lo. Ka bawpin ka kherh bet tlat a, a chêt theih lohna chu remchângah ka lo la vat a, a shirt hâk thâwl lam deuh hlimin a pum puar ve tawh takah chuan ka fâwp kual dan dan a, a âwmbâwr ka ṭhâm zui salh.

"Zosangmawi.." thei leh thei lo hian a rawn dâk a, "Yes, chu chu ka hming a ni," ka ti sup.

"Tenawm chhe keh pa, tho vat rawh," a tih leh chuan a aia uarin ka fâwp leh a, zâwi muanga a inthlah dul hret hret chu ka hre thei reng. Ka fawh dan pawh a dam ta deuh a, a kawr hâk inhlim chho huai chu a lu lam aṭangin ka pawh chhuahsak a, chutiang zelin a thawmhnaw inbel dang pawh.

Ni e, kan tan hmangaihna chen dun a thiang a ni.

Ka ta, ka Duatbiki liau liau a nia. Thinrimna tih reh dan ṭha ber chu hmangaihna chen dun a ni. Nupa inkârah thiang lo a awm lo a, ka ta a nih nawn leh meuh chuan thlanin min ti hnâwng dun chap.

Chumi hnu chuan kan intleuh dun zuai zuai a, ani pawh a lung a awi ta.

"Tenawm siah, chimawm bawk si.." tiin a nui ṭhâ.

Inah amah chauhva awm a ning thei si a, office-ah ka hruai ve ta daih a, nuam ati phian. Lehkha chin fel ngai zawng zawng a thiam ang ang min tihpui vek a, kan inkâr hnawk leh thinrimna tur eng mah kan chhâk chhuak lo ve ve.

Tlaiah pawh zanriah tur kan buatsaih dun a, bazar a duh thu leh a theih ang anga naute puan te pawh in lei khâwl ve a duh tih a sawi chuan, "Kan pahnihin kan kal dawn nia," ka ti a.

Kârkhat chauh awm dunna hun kan neih avangin tih thinrim loh hrâm hrâm ka tum ve tlat tawh a, nau pai nen rilru hahna tur a ngah ve viau ama tawkah. Zanah pawh âm takin hmangaihna kan chêndun leh a, ka hmangaih zia hi hria se, sual a chhuah miahin ka ring lo. Mahse, ka ngaihtuahna ang tho hi a lo pu ve maithei bawk.

Min kuah chiala muhil ka Duati hmêl fai vang leh thâu ta deuh chu ka thlir vang vang a, 'I kum ang hian i awm si lova tiraw?' Ka ti chhuak sup.

Duatbiki a nih angin ka duatna leh ngaihsakna a mamawh a, ka thinrim, thin butut pawh insûm hrâm hrãm ka tum ve tawh a, a nu leh pa kalsana a zui, Zosangmawia hian enkawl dan ka thiam ṭhin lo atin ni...

Hmangaihna chuan ngaihdamna leh dawhtheihna a keng tel si a...

B+>[BeckirafARenthleI]<+®®

Ka duat zia che u hi, tihian story pakhat ah a changtute pali ka rawn dahsak che u a, thawnthu pali chhiar zel ang inni...

He story hi a common lo tih kan sawi hram ang e, a ziaktu tan lah a hahthlak bawk a, characters hrang ṭhiau, achangtupa leh achangtunu te mize hrang hrang kha ziah a ngai si a, namai lo deuh a ni. Naktuk zan aṭang chuan tlemin ka ti danglam hret ang.

THE RAPSAGYAN FAMILY

Becky Rafa Renthlei

Chapter-30

[ZOSANGMAWIA LEH DUATBIKI]

Nau puan leh ka thawmhnaw tur leiin Zosanga nen kan chhuak a, Aizawlah zan nga ka riak tawh a, zan thum chiah ka awm thei ta. Kan in lei kim thawkhat tawh bawk nen Ramhluna a in sak lamah kan phei leh ta a. Thla thar aṭangin chhunzawm a tum tih a sawi.

Ka rin aiin sum a nei zêk a, a bank account-a awm zât pawh ka hriatpui ta thlap. Nupa tak tak anga khawsa chho kan ni bawk a, thil min hrilh chipchiarin 'zankhat mit chhin pawh ka lo tâwk thei a, in nufaa in awm ve nan he in hi kan sak vat vat a ngai' atih chuan ka ṭeu hlê. Inhauvin tihtauh khum fo mah ila a tel lova awm ka zuam lo a, tunah phei chuan kei ai hian rilru a nei zâwk mahin ka hria.

'Forensic expert Zosangmawia' a inhmeh hliah hliah, a hnaah a tuiin a rin tlâk a ni ang, an pu pawhin a duhsak hle a, kei thleng pawh hian min be chhe ngai lo. In sak hi tih namai a ni lo tih ka va hmuhpui hian ka hre chiah, ka hlawh ka lo khâwl ve pawh hmang turin ka ti a, "Tikhan lo khâwl rih rawh, nautê kan neih hunah te pawh kan mamawh dawn a, chhungte tihbuai ka duh lo tih ka sawi tawh kha.." a ti hmiah.

Rafaela pawisa min pêk kha niminah pe kîr turin ka va kal a; mahse, Zosanga'n a lo pe vek! Ka lung a awi chiah lo naa inhau leh ka duh tawh loh avangin ka ngawi ral ta vel mai mai.

"I chau tawh em?" Ni a sa hle a, ka thlantuiin min leih char char, bazarah ke-in ka kal ve chiam a, ka ke aritin a vûng deuhva; mahse, Zosanga ka hrilh hran lo.

"Tih pawimawh em em tih tur kan neih lem loh chuan haw mai ka duh," ka ti a.

"I chau a nih kha kan haw dawn nia, exer i lâk ṭhat loh chuan i inzo lo thuai dawn a ang riau, naktuk zing aṭangin ka lâkpui an che aw," a ti a, ka ngaihtuah zawng ringawt pawhin ka peih lo. Mut ka duhin thil ka ei ṭha si a, ka thâu tawh ngang mai, "I bial hmuih a nia" nui suk sukin a ti nghe nghe.

"Min lâkpui peih ngût ang maw?" Ka tih chuan, "Peih e a, nangma tãn vek a nia i insan mar ve deuh a ngai ang," ka luhna turin car kawngkhar a hawng a, kan inhau loh hi chuan a nuam tih ka hria; mahse, tihtauh hi a nuam ve bawk sia, ka râi hian min duat zual tih ka hre ve kar a, min ngaihsak thei vut vut viau.

In kan thlenin tlai lam dar li a ri tawh a, "Inbual rawh le, ei rawng ka lo bawl ang," tiin kan thil lei vel a dah fel zung zung a, Zû a in tawh ngai lo a, kei phei chuan ngaihtuah pawh ka ngaihtuah chhin tawh ngai lo. Ka naupaiin thla nga hmêl a hmu a, ka pum a puar viau!

Thawhṭan zinga chho turin Sumo ticket min lâksak diam a, tun ṭum chu min thlah thei dawn ta lo. Ka vûi lova a hnaah a buaizia ka hriapui avangin ka phût lo hrim hrim bawk.

"Duati, Arsa hi nangman siam rawh aw," bathroom-a ka awm laiin min rawn au a.

"Aw, tikhan lo dah tawp mai rawh..."

Ka inbual zo ka va chhuah leh chuan phone a lo hmang a, "Kan lo phei nghal ang, dar eng zatah nge a chahthlâk?" Tia a zawhna vang chuan ka hawi phâwk nasa! Tu nge thi?

"Duati..." phone a dah hnuah min rawn pana a âwmah min kuah beia angaihna ka hre lo tulh tulh.

"I pi a boral a nih chu..." pehhêl awm miah lovin a sawi tlang nghal pawp a, sawi mai tur ka hre lo.

"Maw! Eng eng a? Dâwt vek..." ka ti thâm ṭiak a, engtin nge a nih theih? A ngaihtuahawm lo an tih vangin Saitei a lo haw khân ka hre ve sia, eng nge a awm zia, ṭahna châng pawh ka hre lo.

Chutih lai chuan ka phone a ri chhên a, Zosanga'n a va chhâng a, Rafaela nen an inbe thâwm ka ngaithla reng. Loundspeaker-ah a dah a. Ka naupan lai aṭanga min duattu ka mamawh, harsat engkima min thlamuantu leh min fuihtu ka pi boralna chuan min dêng na kher mai. Ka ṭah a chhuak lo a, mak tihna hlirin ka khat.

"Insiam ang aw, an tlaivarpui dawn a, Rafaela te pawh an insiam mêk, anni angin kan tlânchak ve thei awm si lo a, a chhuah lam kan hma a ngai, intipachang rawh le.." ati a, ka dinna ngaiah ka la ding reng a, ka kâwngah kuahin room ah min luhpui ta a. Ka ngaihtuahna a mang vek.

Vawilehkhatah ka ṭap chhuak ta phawng a, Zosanga'n a âwm nghengin min kuah a, "Ṭap rawh le, ka duat nu..ṭap bawrh bawrh rawh, i pi chu a awmawm tawh zawk asin, natna leh lungngaihna awm tawh lohna hmunah a kal tawh si a, a dama te hi kan pawimawh a nia," tiin min hnem mawlh mawlh a, ka ṭah chhuak zualpui a reh hnu chuan inhnît faih faih chungin ka insiam ve ta a.

Champhaia chhoh ka tum khan ka thawmhnaw ka khungkhâwm sa vek kha a nia, eng chen nge Lungleiah kan châm dawn ka hriat loh avangin a bul ṭangin ka siam ṭha leh ta a, "Saw lamah i thawmhnaw tam zawk a la awm a ni lawm ni, eng mah keng vak duh suh,"tiin a thawmhnaw a hâkthlâk tur a siam ve a, a phone leh ka phone a inrik chhawk reng.

Ka pi thih dan kim chang eng mah ka la hre lo a, nichina Zosanga rawn call tu kha Lawmsanga a nau a ni. Rafaela khan min hrilh tumin a rawn call a, ka nu leh pa chuan min hrilh hriat an tum lo nge an reh ṭhiap. Ni e, anni chuan min hrilh lo tawp ang, an fanu atan min duh tawh lo a, min ngaihsak tawh ngai lo tih ka lo theihnghilh atin ni.

Aizawl kan chhuahsanin zan dar sarih a pel tawh a, ka ṭap nawn tawh lo.

"Zo, kan thlen hunah ka nu leh pa'n an be hmasa che a nih loh chuan be miah suh aw, an lakah hian ka lawm lo takzet zet, Rafaela khan min lo hrilh lo se chuan anni chuan min biak pawh an tum lo a nia, an ti ve mah mah.." ka ti a, ka sawi zawng pawhin ka ṭah a chhuak.

"I duh danin le, ka chhungte pawh an kal vek dawn a, atu amahin an be hmasa che a nih loh chuan be bik suh ang che, lungngai lo la, i kiangah ka awm zel ang," a ti ve hmiah.

Keini pahnih chu chhungte en hran kan ni tawh a, rilru kan neih rãn a ngai.

Ka pa leh Rafaela, kan car pakhat zawkin an kal dawn a, Saitei leh Valpuia a hranin an kal ve dawn bawk. Lawmsangzela te nupa chu kawng lakah an awm a, Sialsuk aṭangin an lêt leh niawm tak a ni. Ṭhenrual ṭha zuitu pawh an awm ve nualin ka ring a, Zosanga nu leh pa Lawngtlai aṭangin an phei ve mêk bawk a, thihna avangin chhungkua kan inhmu khâwm dawn chu a nia, engtin tak awm hlawm ang i maw. Keini nupa tih loh chu an inti leh ṭhêm ṭhêmin a nia ka rin.

"Ka pi thi hi ka la awih thei lo," ka ti sap a.

"A thawhah a rawn nasa thut a, rei vak lovah a chatthla zui nghal a ni awm e, nimin lam aṭangin oxygen an pe tawh a, keini hian eng mah kan hre ve lo a, i nî pawhin rawn hrilh ve awm tak che," Zosanga aw a lawm lohna rawn lang chhuak chu ka hai bîk lo.

"Ka ni hi chu a tâl buai chi a ni ve a, ka pi damlo ngaihsak lêk lova ka awm hi ka inthiam lo ngawih ngawih," tiin ka insût hraih a, hetiang din hmunah hian ding lo ila chuan ka buaipui ve tur; inthiam lohna hlirin ka khat.

"I awmna hmun leh kan awm danin zir miau hek lo, tihngaihna a awm lo a nih hi, eng pawh nise inti pachang la, i ṭah a chhuah pawhin ṭap bawrh bawrh rawh; mahse, ruang kîl kha a ṭha lo anti tlatin ka hria," a ti a.

Chutiang ngaih dan hmanlai lutuk chu ka hriat ve si loh.

"Kan naute chuan a pi a hmu ve dawn ta lo chu a nia, a hmuh châk dawn nen," ka ṭah a chhuak leh ringawt tawh. Thenzawl kan thlen hma chuan vawikhat mah kan châwl lo a, mahse, Thenzawl kan pelh aṭangin ka zun a chhuak sek a, kan ding zing ta malh malh hle mai.

Mualṭhuama kan din laiin Rafaela te an lo thleng ve a, "U in ṭha em?" Min ngaihtuah hmel kher mai, Diktei a front seat-ah a ṭhu a, a hnungah ka pa, kan ṭhenawm, pa Lawma te nupa an tel ve bawk.

"Kan ṭha e, Duati zun a chhuak zing deuh a, kan hmanhmawh ve thei lo a, lo va kal hmasa rawh u," tiin Zosanga'n a chhâng a, "Muangchang leh fimkhur tak khan lo tlan ula," ka pain a ti ve ngei.

Min tlân pelh hnuah muang chângin kan tlân chhuak ve ta a, ka pa mitmenga min ngaihtuahna lo lang kha ka chhiar thiam vein ka hria; an fa hmasa ber ka ni a, min ngaihtuah ve awm êm mai. Min hua angin lang mah se an chhungrilah min lainatna anneih ka ring tho.

"Tun lai Rafaela mizia hi a danglam riauvin ka hria," Zosangan a rawn ti chhuak thut a. Ka hmuh dan ve tho, "Nia, zu a in lohna kha chu a rei tawh a," ka ti a.

"Chulam pawh ka ti chiah lo," tiin hmani a pawisa a dah kîr thu kha a sawi chhuak ta a, "Min lo hnial hrep ka ring a nia, eng mah a sawi lo va.." a ti leh a.

"Rafaela hi chuan min hmangaih a, nang pawh a ngaina che, tun kan boruakah pawh hian lo ngai reng rawh, ka nu leh pa awm lai pawh nise min ngaihsakna ati lang em em ang, a hma pawhin min ṭan reng a, a ṭawng tlêm em avang hian eng mah a sawi tam lo mai pawh a, nang pawhin huat ena en lovin ani hi chu be bawrh bawrh rawh," ka ti deuh duah a.

"Nia, nichin pawh khan kan sawi nual," a ti ṭha ve mai.

Lunglei kan thleng ta.

Ka lo seilenna ka pi leh pu in kan thlen meuh chuan ka kawchhung a ti deuh nghulh a, mi vei sup sup kârah Zosanga'n min kâi a, ka thâ a khûr titih.

"Duati, i kiangah ka awm ka tih kha..."Zosanga aw dam ruih chu ring lo mah se ka hre pha tho.

Ni Arini'n leh Saitei'n ṭap chungin min lo hmuak a, ka hmêl an han hmuh meuh chuan ṭap thawm a ri nghal chuah chuah, ka pi ruang an dahna khum min panpui lai te chuan ka mit a fiah lo, Ni lo, thidang mai dawna inhriatna ka nei a, ka khûp a sâi dar dar!

Ka pu-in min lo kuah a, "Nu-i i tunu Duati a lo thleng a nia, i lo lâwm dawn lovem ni?" Ka pu meuh a ṭap ta.

Ka mittui kârah ka pi ruang chu ka va melh a, a hmel ṭha tak ṭhin kha a dâng lap a, 'a thi' tih hi awih har ka la ti. Ka nu leh Zosanga nu an ṭap a, Rinsangpuii pawh ka hmu ve.

Boruak uap lutuk leh rit lûk te, ṭap thâwm ri chuah chuah bawk si chu ka zo lo nge, ka âwmah hnawhtu a rawn awm a, ka ṭap chhuak thei bawk si lo. Zosanga leh ka pu-in min chelh lo se chuan ka tlu mualpho ngei ang.

"Mut hahdam tîr rawh u," Rafaela ṭawng chu hla tak aṭanga lo ri chhuak angin ka hria a, ka khaw hmuh a thim ta riai riai a...

Ka harh leh chuan ka nî te nupa khumah ka lo mu a, Zosanga leh Rafaela titi chu ka ngaithla ta a, ka harh tih an hre lo a nih ka ring.

"Ka pi hian a duat a, u Duati pawhin ka nu leh pa aiin a ngaina zawk, an hnenah kum 24 a awm a nia, a hriselna a ṭha reng reng em? Engtikah nge naute in neih ang?" Tia Zosanga a zawh chuan, "A hmaa damdawi ina a awm tih loh kha chu amah pawh a ṭha riau, thil pawh a ei ṭha ve reng, November thla tawp lama neih a inbeisei a, tunah thla ngana a hmang ve mêk," a ti a.

Ka tui in a hâl êm avangin Zosanga ka ko ta a. "Zo, Tui.." ka meng chhuak nghal a.

"I lo harh tawh elo..? Nâ i nei em?" A ti vat.

Lu thing nar nar chung hian Tui ka dil leh a, la turin Rafaela a kal ta a.

Saitei a rawn lût ve chiah bawk.

Thawh chhuah tumin ka inbeng kâng a," U, mu hahdam rih rawh," min rawn hnaih nghal ruak a, a ṭahna avanga a mit bui lâk te chu ka hmuh hmaih lo, "Ka ṭha alawm," ka ti sap a.

Ka naute pahnihin min ngaihsak zia ka hriat hian ka hnuk a ulh ringawt. Zosanga pawh mâkpa ang a ni ve tawh mai a, Rafaela nen thil ṭûl buaipuiin an phe vat vat a, an inkârah inhuatnain hmun a chang ta lo a ni mahna.

Ka nu hmêl ala rawn lang lo a, Saitein min awmpui tho avangin Zosanga pawhin min chhuahsan ve ta rih a, a chau tawh ngawt ang. Ṭhalai an zâi ri ṭhap ṭhap a, zinglam dar thum a ri tawh a, ka rin aiin ka harh har.

Valpuia rawn luh laiin Saitei thingpui la turin a chhuak ta a.

"I lo harh tawh maw?" Tiin khum bula Chair hnai berah a rawn ṭhu a, "Kan ngaihtuah lutuk che a, i taksa a chak lo a nih kha," atih zawm leh a, ani hi chu a puitling tawh a, ṭawng tam mah suh se ka ngaina ru riau.

"Ka nupui a boral hnu khan mitthi inah ka kal tawh ngai miah lo a, tun hi ka vawikhat kal lehna chauh," a ti sup a. A chanchin eng mah hriat ka nei lo a, pathlawi a ni tih Saitei min hrilh bâk kha hriat em em ka nei hek lo.

"I nupui a thi tawh maw?" Hriat belh châkna hlirin ka khat a, ruang kîl ve an phal si lo a, naupai laiin a ṭha lo zuk ti tlat hlawm a, hetia mut mai loh chu tih theih em em ka nei lo bawk nen ka tho chhuak duh ta rih lo kha a nia.

Saitei thingpui no thum chawiin a lo lût a, kan in lai chuan Valpuia'n ka zawhna kha min chhâng ta tho a.

"Nia, a boralna pawh a rei ve tawh, Vanlalthlamuanpuii a ni a, Sente tiin kan ko mai ṭhin. Nuthlawi a ni a, fa erawh a nei lo thung, a pasal Lalthlengliana kha zu duh ve tak mai a ni a, veng khata awm kan ni nghe nghe, Sentei nen an inneih laiin ngaihzawng dang a neihsan ta a; a hnawt chhuak a, chumi a haw tur chu ka Sumo-ah a rawn chuang ve a, kan inhmêlhriatna hmasa ber a ni. Amah Sentei tak kha chu ka hmu fo a, a hna kal tur anpa hian nitin a thlah ve tho ṭhin," tiin âw a thian kharh a, Saitei pawhin ngun takin a ngaithla a, "Sawi zawm leh rawh," ka tih chuan..

"Khatia an inṭhen hnu khan a pasal chuan nupui dang a nei zui ta a, Sentei kha zakzum leh ngawichâwi deuh mai a ni a, kut a thlâk nasa thei hle tih an ṭhenawmte khan an sawi fo; mahse, mi nupa inkâra inrawlh a rem loh avangin an ngawi zui ta mai mai a, an inṭhen hnu, nupui a neih leh hnuah pawh tibuaiin pawisa te a dîl ṭhin a, atîr chuan ngaihzawng angin ka en lo. Mahse, a nun kha a khawngaihthlak a, venghimtu a mamawh tih ka hriat khan ka ngaihven a, rei lo teah kan inngaizawng ve ta a, nuthlawi mah ni se ka duhin ka hmangaih viau, a hun lai khan, a pa phalna thlapin kan innei ta nge nge a. Â, ka thil sawi hun hi a fuh lo," tiin a ngawi zui ta daih a, Saitei a melh pah zauh bawk.

"I sawi chhuak ta sa sa sawi zo vek rawh," Saitei chuan a lo ti ve bawk a, chutih lai chuan ṭap thâwm a rawn awm leh a, ka nu âw a ni.

Ka nu, Remruatfeli ṭap ri ka hriat chuan ka chhungrilah chë a awm, a ṭap lai ka la hmu lo a, lungchhe taka a ṭap ri chu ngaihthlâk a hrehawm hle.

Zâi ri a rawn awm leh tâk avangin leh Saitei'n Valpuia a tur sek avang chuan a sawi zawm leh ta a.

"Kan inneih hnu lawkah nau a pâi ve ta a, mak deuh maiin khatia kum thum chhung pasal a nei chung khan nau a pai miah lo! Mahse, kan han inneia awlsam têin a pai leh mai sia thil mak tak a ni, Guwahati ka service vanglai a ni a, a naupaiin thlaruk hmêl a hmuh chuan loh theih lohvin ka zin a ngai ta a, ngaih ṭhat lohna em em pawh nei lovin ka kalsan a, ka thang hlânin mi kut a lo tuar ta a ni.." sawi zawm lovin a châwl dat a, a hun lai kha a ngaihtuah a ni ngei ang, ngun deuh hian hmalam a thlir a, rilru na hmêl a pu bawk.

Chutah sawi zawm lehin, "Min rawn hrilh hnu lawkah Guwahati aṭang chuan rang takin ka tlân haw ta a, ka han thlen chhohvin biak tlâk awm tawh lova ka hming erawh vawikhat a lamin ka hria, ka dawmhlum hman ṭâwk a ni." Tiin a sawi ta a. A sawi zawng ringawt pawhin rilru natna thûk tak a la nei tih ka hai lo.

"Tu thah nge? Zawitêin Saitein a zawt sap a.

"A pasal hlui Lalthlengliana zurui khân ka awm loh lai chuhin a vit alawm," chu vangin zû hi ka hua. Zû in lo se chuan a that kherin ka rung lo. Tiin a tho zui ta daih a, Saitei hmêla inthiam lohna lo lang chhuak chu a chhan hre mah suh ila mak tihna deuh ka nei.

"U Valpui..Sawi zo law law rawh,.." tia Saitei'n a bâna a vawn chuan a ding chat a, "Sawi zui vak tur pawh a awm tawh lo, a hunlai khan Thlengliana thah duhna rilru ka pu a, tual vawihnih that ang a ni, a chhan chu ka nupui khan ka fa thla ruk mi a pai mêk a, an pahnihin ka chân tihna a nih chu; chuvanga pathlawi lo ni ta ka ni bawk,"

"Ka nupui thih aṭangin tu hmeichhia mah ka ngaihsakin ka ngaihven ngai tawh lo a, Saite, ka nupui thih hnua ka ngaihsak leh hmasak ber i ni. I lakah hian a der rilru ka pu lo a, Lalfakawma hian a mai maiin ka kawp lo che tih hi hria la ka duh, i û hriat laia ka sawi nachhan pawh, thil i dawngsawng thiam ṭhin lo a; i u hi thu hretu a ni nghal mai," tiin a nui suk.

Kan Lalsaii a ngawi reng.

"Pathlawi ka nihna chhan hi ka lerh vang a ni lo a, ka nupuiin min thihsan vanga pathlawi chauh ka ni, min iaia min duh lo a nih chuan sawi theih ka nei lo a; mahse, kei chuan thinlung takin ka ngaihsak che a, ka duh bawk che," ati leh hmiah.

Mipa ka ngaihsan zâwng tak a ni. Tlang taka thil sawi mi, zêp nei hni hne chi a ni lo bawk tih ka hrethiam mai. Ka nau tân hian ani tluka ṭha mipa an awm lovang.

Saitei melh zauh pah hian, "Ngun takin inngaihtuah la, ani kha chhuah hlek suh, midang nei dawn ta se i rilru a na tho ang," ka ti a, ka sawi lai hian Valpuia a awm tawh lova a chhuak tawh thung.

"Nia, inṭhen hlen tur anga ka inngaih hian ka rilru a na zêl," ati ta a.

"Eng mah thawk lo pawh ni la, i hrehawm a phal dawn lo tih ka hmu tlang vek, pathlawi tih mai mai, fa hrawn enkawl tur leh chhungte mitmei ven tur pawh nei lo a ni a, Pathianin i tâna a ruat a ni maithei asin," ka ti deuh ngei.

Saitei ka bulah a rawn mu a, Valpuia chungchâng sawi tawh lovin Rinsangpuii min tih dan vel kha ka sawi ta a, min ngei pui hle.

Ka pi ka ngaihtuah chhuah apiangin ka hrehawm a, khawvela kan awm chhunga hmu tawh ngai lo tura ka ngaihtuah phei chuan ka tâwt up up zel. Khua a var ta bawk a, ka tho chhuak ve ta a, Saitei erawh a chau deuh a ni ang a muhil a, ka kai tho duh ta lo.

Ka pi ruang an dahna hi anmahni room pangngaiah khan a ni a, ka room luah ṭhin erawh an hawng dar ve lo. Ruang kîl ka duh viau nain ka nîin, "Naupai laia ruang kil hi upa in an duh miah lo a, fimkhur thu hlaah thu awih mai ta che," min tih tlat avangin ka tilui ngam bik lo a, chhün dar 12 ah vui tur a ni a, ka bag kha ka room-ah an daha ka rin vangin chu lam chu ka pan ta a.

Ka nu leh nu Muanpuiin min en hrek hrek tih ka hmu ru reng. Vawikhat mah min la be lo a, min be mah se a ṭûl hle a nih loh chuan chhân ka tum miah lo. Misual pahnih annih saw.

Ka room-a ka luh chuan ka khumah Rinsangpuii a lo ṭhu a, a ṭap ve nge a mit a bui châk. Khatiang khan min chhuahchhal lo se chuan tun ang hunah te hian kan inbe ve bawrh bawrhin ka ring a, amah hi Lunglei khaw hlun a ni a, Revenue-a a thawh lai aṭang daih tawha ka hmel hriat a ni.

Min en zawk a, a phone a bih zui daih a, 'kan in alawm le' tiin ka zahpah duh vak bik lo. Ka wardrobe hawngin ka thawmhnaw inkhai ka en lawr dan dan a, ka kalsan ngai ngai khân ala awm vek. Ni Arini pasal Bawiha hi ka nu nau pianpui dik tak a ni a, a nihna takah chuan ka putea tur a ni a; mahse 'u Bawih' tiin ka ko daih.

U Bawiha hian min ngaihsakin min duat a, ka room-a furnature tam zawk hi ama min ngaihtuahsak vek anni. Ka pi leh pu tiam lovah min duat ber tu a ni bawk.

"Duati, hman ni kha..." Rinsangpuii a rawn ṭawng chhuah chuan rang fahran hian ka inher a.

"Sawi chhuah leh ka duh tawh lo, i duh ang ang khan min puh la, Zosanga ka fuih pawrh ni-a i hriat leh i thu a ni mai," ka ti hmak.

Min en vang vang hnuah, "Kan in chhungkhur boruak a nuam lo lutuk a, inrem tawh ula ka ti.." a tih leh chuan, "Zosanga hnenah sawi rawh, kei chuan eng mah sawi ve tur ka nei lo, i nu leh pa pawhin engkimah min dem fai vek a, vawiin ni thleng hian an ngaihsakna kan dawng ngai lo," ka ti zui bawrh bawrh a.

"Ka hria alawm, eng ati nge sawi chhuah loh tur kha i sawi kher, i ngawi ve mai mai thei lo em ni?" a tih leh chuan ka sa zak. "Hmanni lawkah i rawn awm a, eng mah i hre ve lo, i duh duh kha sawi ve ringawt suh," ka thin a rim leh tak tak dawn. He nu hi engtin nge maw ka tih dawn ni, a ṭawng peih siah.

"I ṭawng theih lutuk vanga buaina hi thleng a ni, Lawmsanga pawh vawikhat mah rawn phone tawh suh ang che, thisenah inchhûnna pawh in nei lo a, i rawn phone leh vaih chuan ka ngawi tawh dawn miah lo a nia, Zosanga anga rilru kâwi a put ve hi ka duh miah lo," zuk ti hrep a.

"I va han zak lo em em, i zah loh dan hi sawi ngaihna ka hre lo, mi rilru chhe deuh hi chu an tluang ngai lo a nia," ka ti ve sak.

Atu amah mah kan ṭawng ring ṭha ngam si lo, rum zeta min rawn melh lehin, "Nang alawm zak thei lo le, i ṭawng theih lutuk vang anih hi tuman an ngaihsak duh loh che," tiin a tho a, ka chhâng duh ta lo.

A rilru chhiat dan em em kha, kei aia naupang zawk a ni a, mi rilru tluang pangngai ni se, tun ang kan boruak tawnah hian khatiang thu kha a chhâk chhuak hauh lovang. Mi chhiat tawh laia a belhchhahna tur lo zawn phêt..

Ka thawmhnaw hâk tur thlangin inbual turin ka lut ta a, ṭahbelh ka ni hran lo a, ka ṭah vak vak loh avang hian ka pi boral hi ka tuar lo tihna a ni hek lo.

Min hmangaihtu pakhatin an kiam leh ta, tih hi ka hriat chhun a ni mai.

Vui hun a thleng a, Zosanga ka kianga a awm reng. Ka pu in chhungkaw aiawha thu sawina a nei a, ka pi damloh dan te chipchiar takin a sawi a, ka rinn ai daihin a pachang.

Thlanmuala an kalpui hmain thlalâkna hun an nei a, 'A fanu Remruatfeli te chhungkua' tia an lam lai chuan kal ve tumna pawh ka nei lo hrim hrim, an chhungkaw member-ah min chhiar tel tawh lo khân ka hria. Chutia kal tum lova ka din reng lai chuan, Rafaela lo kalin min rawn hruai ta a, chhungkaw thlalâknaah ka tel ve hrâm.

Pa Faka te chhungkuain thlâ an lakpui ve bawk a, Zosanga a kal duh miah lo. Ka rilru ang tho kha a pu ve niin ka hria a, ka dem hran lo. Mahse, ani pawh Lawmsanga'n a rawn hruai ta a, mi an tam si a, hnial chi ni hek lo, a tel ve tâk kha.

Chutah, ka rin loh deuhvin 'A tunu Duati te nupa' tiin an rawn lam ve ta a, Zosanga nen kuang kilin kan ṭhu dun ve thlap. Ka nu leh pa tihtir chu a nih ka ring chiah lo. Ka nî te nupa tih a nih ka ring mah zawk.

Thlanmual lam an panpui dawn meuh chuan áwrâwl chhuahin ka ṭap chhuak ta a, a hmaa ka ṭah theih lohna kha a rawn chhuak ta vek emaw tih tur a ni! Rafaela'n min rawn kuah ta a, thlanmuala ka kal ve thei lo tur ringawt pawh hi hrehawm ka ti.

Ni e, khawvel inṭhenna ramah hian kan hmangaih te leh min hmangaihtute kan la inkalsan zel dawn si.

Rafaela leh Zosanga nen in lamah kan chhuk ta a, "Zosang, thlanah kal ve ka duh sia, lo awmpui rawh aw," Rafaela'n tiin min ngaihtuahzia a mitmengah a lang reng a, Diktei ai pawhin min ngaihsak zawk. Mahse, Diktei pawhin vuivai hmel a pu bik lo. A fel ka ti takzet.

Dârkar thum hnu-ah.

"Duati, i ṭha em?" Ka nu ka bulah a rawn kal a, ka hre lo der tlat.

A hma zawng pawhin min ngaihsak lo a, tun ataka min han biak leh vel kha ka rilrem lo.

"I luhlul ngaiin i la luhlul reng a ni maw?" A ti sap a, ka chhâng duh chuang lo. Mi mitmei a veng deuh bawk nen min kalsan ta a.

Rinsangpuii leh Lawmsanga lo lût ka hmuh chuan, Rinsangpuii runluih nan Lawmsanga ka be ta a, "Biak tlang i har hle mai, i u chanchin lo hrilh hma nachang i hre hlauhva kan lawm lutuk, kan thlen hma theih phah a.." ka sawi zawh rualin Rinsangpuii ka va en a, a meng no lo khawp mai.

"Kawng laka kan awm laiin Saitei'n min lo hrilh a, ka u ka lo phone ve nghal a nih kha," a ti dam thlap. He pa rilru hi a a ṭhat vei nen nupui rilru dum zet a nei a, ka khawngaih tlat.

"Zanin khawiah nge in riah dawn?" Ka tih chuan, "Kan nu hi chu an in lamah a riak phei ang a, kei erawh hetah ka riak ang, ka pa te pawh an riak vek dawn a.." a ti a.

"A ṭhat chu eng emaw sawipui duh che ka nei aw.." ka'n tih ngei kha.

Keimah Duatmisuali hian chimawm ka chhuah ve thei chiang êm mai...

Valpuia leh Saitei in zui ve dat dat chu ka thlir a, an inlen hleih sia ka nuih aza ru hle, Nu Muanpuii leh Zosanga an lo indin chilh a, eng nge an sawi ka hre pha lo nain Zosanga hmela thinrimna lo lang chhuak chu ka hai lo. Pa Faka erawh ka hmu zui ta lo a, ka nu leh pa chu inlêng kâwmin an titi tui viau.

Kan chhungkaw buaina neuh neuh hi tu vak mahin an hriat ka ring lo a; mahse, Zosanga nen kan chungchang erawh sawi a awm deuh chuan ka ring.

Rafaela leh Diktei rawn lutin ka bulah an rawn ṭhu a, anni pahnih hi chu an ngaihtuahawm loh, an fîm kar mai zawng a nih hi...

Champhai lam Zosanga'n a be tawh a, kan chhiat tawh thu hrilhin ni nga lai chawlh min pêk belh a, ka lawm viau.

Ka Zosanga hian thil a lo ngaihtuah kim ber a nih hi. A theih hrâm chuan tihtauh khum tawh lo ka tum..

Min hmangaih tih ka hre si a...

B+>[BeckirafARenthleI]<+®®

THE RAPSAGYAN FAMILY

Becky Rafa Renthlei

Chapter-31

[DUATI]

Vawiin hi thlân nghah ni a ni a, rei tak châm thei kan nih loh avangin Zosanga'n naktuka haw a rawt a, ka nu leh pa an la châm khawmuang dawn a; Diktei pawh a châm dawn niawm tak a ni. Rafaela erawh thil ṭul tam tak tih tur a nei a, chubâkah in lam ngaihtuah a na deuh si a, naktukah a haw ve tho dawn.

Nizan kha ṭhalai zan hmasa ber a ni a, Lunglei lamah hi chuan ṭhalaite khawhar inah an kal ṭha thei riau a, a bîkin ka pi te vêng hi anni zual, zai boruak pawh a nuam viau mai; hun kha leh chen ka lo awm ve-na a nih vangin hmel hriat ka nei nual.

"Duati, inpa chu min hmelhriat tîr dawn na nge?" Ka kawm ve fo ṭhin, Hmingsangi ka bulah a rawn ṭhu a, thingpui lum tura lo kal a ni a, nula tlawntlai ṭha zet leh nui duh deuh mai hi a ni a, kan inrual vel ang.

"Naa, Zosanga a nih hi, Zo, hei hi ka ṭhiannu Hmingi a nia.." tiin Zosanga, tukverh bula ding nen chuan inhmelhriat tîrna ka nei a, "In inneihnaah pawh min sawm ve lo va.." fiamthu titak deuhva atih chuan a beng bulah, kan la inneih ṭhat loh thu leh naute neih zawh lam kan nghâk tih ka sawi a, "Min sâwm loh vaih, Aizawl zin chance a ni mai," tiin a nui zui var var.

Upa lam te an rawn kal tâk avangin ka inthiar fihlim ta a, nizan khan ka room pangngaiah Zosanga nen kan riak a, room-a kan luh dawnah ka nu-in min melh 'Shalla' viau. Man leh mual kan la inhlan fel loh avang hian mu hrang turah min ngai deuh em maw ni? A teuh lo, a theihna a piangah run luih zel ka duh. Mi awm ve lo se chuan min kamkhat lehin a nia ka rin.

Kan mutnaah Zosanga nen kan titi a, "Nimin khan i nu in eng nge a sawi a?" Tiin ka zawt a.

"Mi mit tikham zawngin awm miah suh ang che, an mâkpa pawh i la ni lo a, lo chêt ve sek a ngai lo ati," tia a sawi chuan nu Muanpuii ka ngei reuh hlê.

"Kan chungchangah sawi ve tur annei tawh lo, inneih ṭhat tîr chu sawi loh, tihian min thlahthlam hmak a, tun ataka lo inrawlh pawh a ṭûl lo, ka nu nen an sawi dun leh pek a ni ang," ka sawi zâwng ringawt pawhin ka thinrim leh nghâl ringawt.

''An hnaihah hian awm tam lo ila, kan nu leh pa an nihna a bo dawn chuang lova min mamawhnaah awm tum zawk ang aw, an ṭanpuina tel lo-a awm theih tum a ṭha, fa û ber ve ve kan ni a, engtik ni-ah emaw chuan anmahni zawkin min la mamawh em em ang," tia a sawi chuan dik ka ti hle.

"Rilru kan neih rân a ngai tihna a nih ber chu," a ti leh a.

Hemi zan hian Rinsangpuii nen kan inchhân dan kha ka hrilh ve vek a, ka thinrim hle tih ka sawi tel bawk.

"Engah mah ngai duh mah ta che, keini aiin an awhawm lo daih zâwk, Pathian zarah hna kan nei ve ve a, in hmun ni se kan nei sa a, chhungkua tak tak kan din ṭêp alawm lungngai lo la.." a ti dam thluam. A châng hi chuan kei aiin a upa zâwk emaw ka ti leh thut zel.

Ka pumah chûlin, "Le, mutthilh tum rawh le, i chau lutuk ang," a ti a, a kianga hi chuan ka him a, ka thlâ a muang bawk.

Thingpui lum ho chu Saitei nen a theih ang angin kan pui ve a, Valpuia pawh a la haw lo; ani tân awm ve reng kha thil nuam a nih loh avangin zanin tlai hian Aizawl a pan dawn a, ka nauvi hian a huphurh lâwk hle.

YMA member-ah ka lo la awm ve reng chu niin! Ka hmelhriat ṭha zual ten min fiam ve nak nak a, 'I dul a puar lian êm mai, hmeichhia i nei ang' Hmingi khân a ti nghe nghe.

"Lo ti ve duh suh," an ti chung chungin no ka lo sil ve a, rei pawh ka la sil hman lo tiha ka pum a rawn na ta! Na satliah mai pawh ni lo hian ka mawng hlâwm zawng zawng nen a rawn na chhuak vek, thlan fimin min leih a, ka thâw a sa phat phat. Saitei ka ko ta chûl a, midang pawhin min rawn ngaihven nghâl thuai a, Zosanga pawh a lo thleng rang hle.

"I ṭha em, a na viau em?" Min pawm nawlh a, chhân pawh ka chhâng thei lo lo, ka heh ka pet fan fan a, tunah nau neih hun a la ni lo a, eng vanga ka pum na vak nge tih rin dan eng mah ka nei lo bawk.

"Damdawi inah tlânpui nghal ang," Zosanga'n atih chuan ka hnial peih lo.

Car-hnung seat-ah dimtê hian min nghat a, "Saite, ṭhutpui rawh aw," ati leh zung zung a, ka nu leh nu Muanpuiin kal ve an tum chuan, "Kan inbuaipui thei e," ati nghut.

Civil hospital min panpui nghâl a; mahse, Gynae doctor a dam loh avangin 'Serkawnah hân chho nghâl mai rawh u,' an lo ti leh si a, Serkawn min panpui leh ta a. Vanneih thlâk takin Doctor Chhanhimi leh pu Rammawia an lo awm hlauh. Hmanhmawh takin Ultra sound kan ti nghâl a, Zosanga lo luh ve a tum chuan an phal lo. "Ka nupui a ni a ka ngaihtuah alawm," ati deuh tlat.

Ultrasound ka tih chhungin a lo awm ve ta nge nge a, bâkah ka pum a nat êm avangin an chhuahtir duh lo a ni mahna. Nachhawknain min jection nghal kha a nia, tlêm chuan ka zângkhai ta deuh.

"Phìr i pai tih i inhre hrim hrim em?" Tia doctor'n min zawh chuan ka hawihai nasa teh e.

"Aih, hre miah lo.." ka ti sap a.

"Phìr niin alang a, an tawlh thla fual êm a nih hi, eng mah hlauhthawn tur a awm lo a nia, thla nga lek ni siin i pum a puar ka ti rêng a ni," nui suk suk chunga pu Rammawia'n atih chuan Zosanga a nui suk.

"Hahdam i mawmawh a, i hahdamna tur a nih chuan damdawi ina awm pawh a pawi miah lo. Mahse, in lamah châwl hahdam theia i inhriat tho chuan awm kher pawh a ngai chuang lo a," tiin Zosanga lam a hawi a, "Innu i duat deuh a ngai dawn a nih hi, eng mah hna hahthlâk khawih tir loh tur, thla li chhung chu indim a ngai a, damdawi ka chawh ang a, thlakhatah vawihnih tal incheck up ang che u," tiin a hrilh ta a.

Champhaiah vawihnih kan incheck up a, phìr tih an sawi miah lo. Utrasound vawihnih kan ti tho bawk si a, min hrilh duh rih lo a nih ka ring ta zawk a, ka chhungril a hlim veng veng, Pathian zara kan dam chuan phìr kan nei dawn chu a ni si a, ka nâ ka theihnghilh vekin ka hria, Zosanga erawh a ngawi rûn a, a lawm nge lawm lo tih pawh ka hriat si loh.

Doctor Chhanhimi leh Pu Rammawia an felin biak annuam khawp mai. Serkawn doctor leh nurse te hi tunhma aṭang tawhin an polite tih an sawi ka hre fo ṭhin a, tuna ka pi a han awm pawh khan ka nî in a fak viau.

Nimin ka pi ruang ni-ah pawh khan nurse senior pahnih Chami leh Maremi kha an lo tel atih tak kha maw le. Doctor room kan chhuahsan chuan damlo in entîr ho ṭhutna atana an siamah ka nu leh nu Muanpuii, Saitei an lo ṭhu ve a, ka bia nge be lovang tih ka inngaihtuah lai takin, Zosanga'n, "In lo kal duh a, kan inbuaipui thei alawm amah pawh a ṭha e," ati sup. Naute chungchang eng mah a sawi lo chu ka lo lâwm ve em em a.

"Duati..." tia ka nuin min lo biak a tum chuan lehlam ka hawi daih.

'Hmangaihzual' tia thinrim lutuka min ko ri kha ka bengah a châm reng. Min ṭawngkhum dan zawng zawng te leh 'Keini aia i thlan zawk Zosangmawia chu pan rawh' a tih lai te kha nimina thil thleng ang maiin ala chiang a, ka dik lo tih pawh ka hria; min hau duh anih pawhin ka nu a ni a, min hau thiang. Mahse, khatiang chhungkaw inhmuhkhawmnaa min ṭawngkhum báwih báwih kha ka lâi a dam thei lo.

Tun thlengin Rinsangpuiin min hmuhsit phah nan a hmang a, ka nu hi ka ngaisanga ka zah bawk. Mahse, tuna kan boruak hi chu chuti maia dam chi a ni lo atin ni.

Min biak theih tura ka awm miau loh avangin nu Muanpuii nen Car-in an chhuk hmasa ta a, keini pathum erawh damdawi min chawh te leiin kan la khawmuang a, ka pum nâ reh fel hmak lo mah se nichin ang êm kha chu a ni tawh lo. Thil ei sual ka nei zawk emaw ka ti hial.

Zosanga'n, "Champhaiah pawh chho rih lo mai rawh aw, pawisa te chu duhtawk chin a awm lo a, a hmaa i aikal tirh kha kan be leh dawn nia, râlkhata awm zawng inngaihtuah a na êm mai, ka hmuh phâkah awm rih la a ṭha ber," atih chuan ka hnial ta lo.

Ka tana ṭha tur a ngaihtuah vang zawk tih ka hria a, "Ka in luah khi.." ka tih chuan, "Ngaihtuah buai duh suh, in luah tur a vang a, nakinah kan la mamawh tho ang," ati awlsam êt.

In kan thlen hnuah pawh ka room-ah ka mu nghal hmak a, in lêng neuh neuh an la awm bawk nen a boruak ka zo ṭhin lo ni berin ka hria. Ka muhil ṭêp tihah ka room kawngkhar a rawn inhawng a, nu Muanpuii a lo lût ta a, ka be châk hlawl lo. Ka muhil der dawn nge ka thi der zawk ang, hah! Ka thil ngaihtuah dan mai mai chu(h).

"I harh tih ka hria a nia," tiin khum bulah a rawn ding a, "I nu rilru tih nat hi nuam iti em ni? Amah vanga khaw êng hmu thei i ni a, chutiang chiah chuan Zosanga pawh ka fapa a ni a, amah avang hian mi hmâisa vawi engzat nge ka tawn tih in hre lo, nu-in a fahrin a hmangaihzia hi in hrethiam phâk lo zawk ang. Tunah chuan nu i ni ve dawn tawh a, rei lo tê-ah fa i nei ang a; chumi hunah chuan tuna i rilru ang kha i pu tawh kher lo mai thei a nia, ka huat vang chea sawi ka ni lo a, i nu rilru tur hi ngaihtuah ve ṭhin la, a biak che chuan ṭha takin chhâng ang che." A ti ta a. Ka ngawi reng.

"Ka thu sawi tur hi ngun takin ngaithla ang che, Zosanga pawh nakinah remchângah i la hrilh ve dawn nia," tiin ṭhut hmun a rem a, ngun takin hmalam a thlir a, a kut pahnih suih zawmin a khûpah a nghat bawk a, eng tak sawi ang maw?

"Tunah chuan ka chau rih em mai, remchâng dangah min hrilh mai la," ka ti sap a.

"Tun bâka sawina hun remchang a awm lo, naktukah Lawngtlai panin kan chhuak dawn a, nangni pawh haw phei in tum a ni lawm ni?" A tih chuan ka bu nghat.

"Ngun takin lo ngaihthla rawh le, tun hi Zosanga ka enkawl dan dik tak ka sawi chhuahna hmasa ber tur a ni bawk. I nu leh pa bâk hian thu chiang eng mah an hre lo," a hrawk a thian zui kharh a.

"Ka nau, ka phirpui hi Zomuankimi a ni a, i pa Faka nen rei pawh an inzui hma hian ka pa in min boralsan a, chuta a thu hnuhnungah chuan 'Faka, ka fate hi i kutah ka dah a, lo enkawlin lo chhawmdawl ang che aw' tiin a thih dawn darkârah khan a chah a ni. Hetih hun lai hian Zomuani leh Faka kha inneih an tum vek tawh a, palâi pawh an kal tawh a, ka pa khan Faka kha a ring tawk em em a ni. Tichuan ka pa boral hnu-ah a thu hnuhnung chu zah sakin an innei ta a, an hlim hle bawk. Kei erawh Lawngtlaiah hna ka nei a, nu kan nei tawh bawk si lova keimahin ka awm ta a ni." Chiang deuh hian min rawn en a, a mit menga khawharna niawm tak lo lang chu ka hmu reng.

Tihian a sawi zawm leh ta a, "A tâwi zawngin kan sawi ang e, Zomuani khan nau a pai vat a; mahse, vanduai thlâk takin an accident ta a, Motor estimate siam tura an kal kha an chesual a, a hmunah a thi lo a, damdawi in an panpui hnu-ah a naupai an chhanhim hrâm a, ani erawh a boral zui ta a, chu nautê chu Zosangmawia hi a ni, a hming pawh keima phuah a ni a, naute ala tê si a, Nestogen nen kan châwm ta a, chung hun lai chuan ka hnaah chawlh lain i pa Faka te inah ka awm a, Zosanga hi thla thum a tlin hma chuan ka hna ka zawm bik lo. I nu leh pain a theihna chin chinah min buaipui ve vek a, Zomuani leh Faka inneih khan i pa hi mopa ṭhianah a ṭang nghe nghe, i hriat angin ang tlangval lai aṭanga inkawm tawh anni a, vawiin ni thlengin vawikhat pawh anla inthlah chhin lo." A thu sawi chu ngun deuh hian ka ngaithlaa ngaihnawm ka ti bawk si.

"Zosanga a la tê si, ka hna zawm a hun tawh bawk si, an awmpui Siami kutah a dah loh theih ta lo a, ka hna zawm turin Lawngtlai ka pan leh ta a, Bawiha ka ngaihtuah zia chu i hrethiam mai ang. Faka nu hi a strick bâkah a hun lai khan a sual ve a, min mil lutuk lo; atirah chuan min duat viau a, hmeichhe pakhatin dâwta a puh vangin lock up- ah Faka kha zankhat a riak ve a, kha ta ṭang khan a nu nena kan boruak a fuh thei ta lo. Min puh titih a, ka inrawlh miah si lo a; Tin, a rûkin transfer an lo dîl a, eng mah ka hriatpuina tel lovin; tichuan Lawngtlai aṭangin Aizawl Kulikawn Outpost ah min sawn ta dawrh a, Zosanga hi ka enkawl chhunzawm leh ta a ni, thla nga chauh a la ni a, Faka te inah bawk ka awm leh ta kha a nia.

An in aṭangin hna ka kal ṭhin a, Faka nu nen kan inkar boruak a ṭha lo telh telh a, loh theih lohvin ka in dang ve ta a, Faka phalna thlapin Zosanga hi ka laa ka enkawl ta bawk a, khang hun lai khan hlim ni ka hmu meuh lo, ka nau fa kha ka hmangaiha a nawmna turin theihtawp ka chhuah asin. Chumi hnu chuan Faka pawh an rawn hnawt chhuak ti tawh mai ang, keimah vangin a rawn chhuak ve ta a, a nu leh pa khan Faka an hmangaih lo ni hialin ka hre ṭhin a, hmun danga kal ta lovin min rawn pan a, a fapa nen kan pathumin kan chêngho ta a, loh theih lohvin kan innei ta a ni ber mai.

Ka nau pasal hlui a ni a, neih ka hreh zia i hrethiamin ka ring. Mahse, ka pa thuhnuhnung kha behchhanin Faka'n ṭanfungah a hmang ta tlat a, tin amah a lo chhe lo a, kei min duh ve viaua alan tãk si-ah chuan Zosanga fahraha nuhrawn hrawn tir kha ka phal bik si lo. Faka sawmna chu ka pawm ta a, a nu leh pa hriat lohvin kan innei ta a ni. Tuna in awm dan nen inanna lai pawh a nei ang chu," ati leh a.

"A nih eng ati nge Zosanga engkim in hrilh mai loh?" Tiin ka zawt ta khauh a.

"Hrilh chu kan tum alawm, puitling tak tak a nih hunah ṭha taka hrilh hi kan tum reng a; mahse, mî ṭawngtheih a zârah tun hi kan thleng ta a ni. Zosanga kan retheihpui zia leh a pi leh pu hnen aṭangin chêng khat mah kan dawng lo a, tuna kan workshop hi GP ka puk leh Faka khawlsa tlem nena kan din a ni a, Aizawla a hna kha loh theih lohvin bansan a ngai a, a chhan chu a rûkin a pa'n transfer min lo dilsak leh a, Lawngtlaiah bawk kan lêt a ngaih vang a ni. A ngheta thawk a ni lo a, amahin bul a ṭan chho ta a, Pathian zarah tihian kan kal chho bek bek a, Zosanga hi chu ka hrin ni mah suh se, ka hmangaiha ka hahpui bawk a, ka duat bawk. Lawmsanga nen ka en hrang ngai lo, ka duat zawk emaw anti fo ṭhin." A sawi zo chu thâwl huai ni awm tak hian a thaw hak a.

"Heng zawng zawng ka hrilh nachhan che chu, a zîktluak eng mah hre si lovin min haw ringawt a, sawi loh tam tak ka la nei bawk. Zosanga ka hmangaihzia hi hria la, kan inrem leh theih nana hma la turin ka duh che a ni, ka thu sawi eng mah a ngaithla duh si lo va, ka hnenah rawn hruai kîr leh rawh," ati zuai raih.

"Ka hre lo le, a luhlul zia chu i hriat kha; engkim min min hrilha ka lawm e, theihtawp ka lo chhuah ang," ka ti ve a.

"Ka lawm e, Duati ka haw lo che u a, i nu leh pa pawhin an haw lo che, rilru puitling tak pu la, nu leh pa zah thiam apiang an ding chhuak ṭhin," tiin ka samah a rawn chûl a, ka khawngaih ru viau.

Zosanga vanga a natna hi a thûk tih ka hriatthiampui phâk tlat.

Min chhuahsan hnu chuan a thil sawi kha ka ngaihtuah lêt a, dâwt a sawi lo tih ka hre bawk.

Zanriah ei hunah pawh ka tho chhuak ve ta lo a, ka mut hmunah ka nî in min rawn pe a, ka nu leh pa te nena dawhkan khat kíl ka huphurh êm a ni.

Zosanga'n Valpuia a thlaha a lo la lêt lo a, ṭhalai lo kal khâwm an ṭîn hnuah ka nîin min ko a, "Lo ṭhu phei ve zawk la, chhungkuaa sawi tur pawimawh a awm a," a rawn ti a.

'Kan chungchang a nih vaih chuan ka kal sawn daih ang' ti rilru chungin ka va chhuak phei ve ta a. Mahse, ka rin loh lam daih.

Rafaela'n pastor hna dil a duh thu leh 'chhungkua kan awm kim laia sawi hi a ṭha e' tiin an lo ri nak nak a, mak ka ti kher mai. Diktei pawh ala awm ve a.

"Tûn hi sawina hun ni chiah lo mah se kan kim ve lai a ni a, Pastor hna hi tih namai a ni dawn lo tih in hre tho ang a, Bawiha hian Pathian kohna a dawng tak tak a nih chuan hnial chi-ah ka ngai lo. Bâkah keini chhungkua hian Pathian aia thlan zâwk tur eng mah kan nei hek lo," ka pa Zirsangliana'n atih chuan tumah an ṭawng lo a, Rafaela ka va en a, a lo thu tak ngang mai.

Ka nu hmêl erawh a dul raih thung a, thil ngaihtuah mûk tak hmêl a pu.

Pa Faka'n, "Ni e, ama duhthlanna a ni a, Pathian tel lo nun hahthlâkzia kan hrechiang vek, hetiang zir duhna rilru a pu ringawt pawh hi a ropui ka ti, Rafael, theihtawpin kan lo ṭawngṭai pui ang che," a ti ve bawk a.

Eng eng emaw an sawi hnu-ah ka pu chuan, "Lalpan i hma a hruaisak zel ang che ka tupa.." tiin Rafaela a chibai a. Ka chhungrilah hlimna leh lâwmna a awm veng veng, Diktei ka khawngaih reuh a; a chhan pawh an inkawpna a la rei lutuk si lova kum li ngawt mai a han awm bo san tur kha ka lo khawngaih lâwk ve ringawt.

Ka chungchang sawi an tum chuan ka tho tharh a, room lam ka pan daih.

Zosanga nen min pawt ṭhen êmin ka ring lo a; mahse, tun vut vutah inneih an remti dawn lo tih ka hria. Rinsangpuii hmêl ka hmuh apiang hian ka thin arim thar ziah a, zaninah pawh a ṭhu tüm bûr a, an nupa inkâr a ṭha lo nge, helaia rawn kal a ngai hi a lawm lo tih pawh ka hre mai mai lo.

Thla khat hnu-ah

Aizawlah, Zosanga nen kan awm dun ve ta rak rak a, ai kal ka nei leh tawh a, thawven khat chuan ka thawveng. In pawh kan khawih zawm ve ta bawk a, in lamah an chhûn thingpui hmeh tur ka siam a, hnathawk zinga pakhat hian a lo lam mai zel. A hma anga thil holam lei mai mai te kha ka bânsan ve ta a. Zosanga hlawh kan ring deuh tawp a, ka hlawh chu zât leh zâta insem kan nih avangin Champhaia ka in luah man kan pêk phei chuan tihtham chan ka nei dawn lo.

Ka pum a puar sâwt viau a, ka inzo lo telh telh. Zingtin exer min lâkpui a, hahdam ka mamawh tih doctor in a sawi vang kha nge, ka chêt ve hlek hi chuan min hau ve ziah. Mahse, a hna nen, insakna lam nen a buai lutuka tlêm tala chhâwk zangkhai ka tum ve hrâm hrâm. Thingpui hmeh tur siam leh eirawng bawl deuh chiah ka ti ve a, chu pawh kâr tawp chawlhah chuan aman min chhâwk leh vek zel.

Rafaela nen kan inbe zauh zauh a, Saitei pawh a zirna chhunzawm turin Chennai-ah a chhuk leh tawh a, ka ngai reuh hle. Kan inah Valpuia vawihnih a rawn lêng ve a, Saitei a ngaih thu leh a zirna a zawh veleh nupuia neih a tum thu a sawi a, "Hmanni khan picnic naah zû leh juice inpawlh an lo pe a, kan inhau deuhva.." atih chuan sawi vak ngaihna ka hre lo. Kei pawh zû ka in vângin tihian ka awm phah a, Saitei tal hi chuan in lo se ka duh.

Valpuia te ang mi puitling, innghahna tlak mipa hi Saitei hian a tawng leh kherin ka ring lo a, ka lo duhpui ve em em ringawt. A chhe lo ropui si.

A hmaa an lo sawi lâwk tawh ang khan Rafaela pawhin pastor hna a zir duh thu Tualchhung kohhranah an thlen tawh a, ngun taka anngaihtuah hnu-ah remtih sak a ni a, tunah hian Bial Committee in an ngaihtuahho leh phawt anga chuta an pawmpui chuan personal interview a nei leh dawn a ni. Ka nu leh pa te nen inbe lo mah ila in lam chanchin ka hre ve zel tho.

Nu Muanpuii thu min chah erawh Zosanga ka la hrilh lo a, a chhan ber pawh a buai thei lutuka hetiang sawina hun hi ala awm ngang lo a ni. Lawmsanga te nupa inkâr boruak erawh a ṭha vak lo tih Zosanga'n min hrilh a, ka ngaihven khu chûk lêm lo.

Rinsangpuiin nau ala pâi ta lo.

A hma kha chuan khawngaihna rilru ka pu ve deuh a; mahse, khatia min ṭawngkhum aṭang kha chuan ka rilru a dang daih, Zosanga pawh hian a mil lutuk lo tih ka hria a, mipa a nia a sawi chhuak lo mai mai zawk a ni.

Ka pi thihna khân chhungkaw boruak tlêmin a her danglam deuhvin ka hria, a hma ang khan ka nu pawh ka haw hlur tawh lo a; mahse, ka be ngai chuang lo.

"Duati, lo chhuak lawk teh," Zosanga'n pawn aṭangin min rawn ko a, ka va chhuah chuan, "Eng nge?" Ka ti a.

"Min lo hmuak khât lutuk a," tiin ka káwngah a kuah a, a va ho tak.

"Naa, apawimawh hmel tehreng nen.."

"Ka pawimawh alawm, i tana mipa pawimawh number one ka nih hi," a nui zui suk a.

"Chhe siah, kiri..." ka tih chuan, "Ka Duatbiki ṭhin hi a.." a ti duh lek.

Inkuah rialin inchhungah kan lut a, ka hmangaih ang chiahin min hmangaih tih ka hria a, a lâwm loh zawngin ka awm khât ta khawp mai. Nupa nun kan hmang khât viau naa kan inpawh em em tho.

"Nautê pahnih kan neih hunah ka va buai dawn êm.." a ti a.

"Pakhat ve vein inkawl sem ila.." fiamthu deuhva ka chhân chuan a run ngang mai. "A teuh lo lutuk, kum thar aṭang chuan i hna pawh i zawm tawh lo mai thei a ni. Taka, ka nauvin phir inneih chuan pakhat kan kawl ve ang a tia, eng nge i..." a sawi zawh hma hmain, "A sawi pawh sawi ri hlek tawh suh, Rinsangpuii bulah sawn ka fa ka dah nguar ang," uar fahran hian ka ti a.

"Ka ti mai mai a nih kha, nu leh pa kianga an seilen a ṭha ber," ati leh lawi si. Ka thinrim hman ṭêp alawm le.

Zosanga hi zawng thutak viau ṭhin mah se eng emaw chenah hona riau hi a nei ve a, hmanni-ah pawh, "Chhunah ka kal bosan daih zel che sia, bialpa i lo nei ru reng tawh lo maw?" Min han tih chu! A hnunga ben pah hian, "Nangman neih i tum zawk a nih chu.." ka ti hmak a, a nuih aza teh e.

Kan nunah midangin hmun an chang lo va, inhnial leh intihtauh khum châng nei fo mah ila hetiang lamah hi chuan kan rinawm dun ve tlat. Social media lamah pawh kan in hawlh lawr dun lo khawp mai. Phone-ah kan buai lo a, kan pahnih bâk tute mah kan ngaihsak lem lo bawk.

Zanriah tur kan pahniha siam dunin kan inbual dun leh thlap a, chaw kan ei lai mêkin, kawngkhar tu emaw hian a rawn kik a, lo lut tura ka hrilh chuan hmeichhe pakhat ngo zet, hmel fai vang hi a rawn lût ta a. Tu nge a nih ka hre ve lo.

"Zosang, zanin kha i rawn ṭhulh ka hlau a, ka lo sawm tawp che.." a ti ta a.

Zosanga hmêl ka va en chuan inthiam lo hmêl a pu deuhvin ka hria, ka ngaihbel vang nge pawh ka hre lo.

"Hlimpui, ka la inpeih lo nasa sia min kalsan rih mai dawn em ni?" A ti a.

"A la hma em mai ka lo nghâk ang che," Hlimpuiin atih leh chuan, "Eng nge in tih dawn a?" Satliah zet hian ka zawt a.

"Ah, Zosanga'n a sawi na nge?" A ti hâ a.

"Sawina hman pawh ala awm lo, tikhan lo ṭhu rawh, ka hman har lovang," Zosangmawia zung zung hi a! Zâwt nawn duh tawh lovin ka thleng ka seng a, "In hmanhmawh chuan insiam rawh, ka lo tifel ang," ka ti deuh hmak.

Zaninah programme a nei tih eng mah a sawi lo a, a hrim hrimin zanah a chhuak ngai si lova eng tak chu ti dawn ni maw.

Chumi hnu chuan insiam peih vekin room aṭang hian a rawn chhuak a, "Duati, Hlimi birthday hi a nia, ka va kal ve lawk ang e, min lo nghâk duh lo la aw, kan thawhpui thar a nia. Hlimi, kan nu a nih hi, Duati..." dam thlup hian a ti a, ka tan pawh huat tur eng mah a awmin ka hre lo.

An pahnih chuan an inzui chhuak ta a.

Ngaihzawng tih velah hi chuan eng mah ngaih ṭhat lohna ka nei lova keimahah a bei nghet ve hian ka hria, nichin pawh khan min hrilh theihnghilh a ni zawk ang.

Zinglam dar khatah a lo lêt ta chauh a, ka la harh kar.

"Ka Duat nu..." a ṭawng dan aṭangin a rûi tih ka hre mai. Ka meng duh miah lova muhil ang chiahin ka awm lui tlat.

"Ka Duatmisualnu..." ti lehin khumah a rawn ṭhu a, zu rim a nam huam bawk.

Kha leh chen a in tawh lo a, zanin ataka rawn ruih viau, ka ngaih dan a pêl ru hle mai. Mahse, ngawih ka chuh rih ta zawk a...

A thawmhnaw phelh ri te pawh ka hre vek a, meng dere chunga kan en chuan a kekawr pawh a phelh ṭha hlei thei lo, chutah irhfiak awkin a luak ta bawrh bawrh a...

Engtin nge a va awm hre fai vek lo mah ila zû a rawn rui kher erawh ka ngawihbo pui dawn lo tih ka hria..

Zosangmawia awm dan mai mai chuan ka thin atirim hle mai...

B+>[BeckirafARenthleI]<+®®

32-48THE RAPSAGYAN FAMILY

Becky Rafa Renthlei

Chapter-32

Zing lam dar thum a ri tawh a, ka muhil thei tawh lo hrim hrim, Zosanga luak ka then fai hnu-ah ka mu ve chauh a, kan room zau vak lo chu zu rim hlirin a khat. Amah lah biak tlâk lohvin a muhil zui daih a, ka ngei kher mai.

Zan khat a chhuak ve dêk dêk a, a rawn rui haw nghal a, chhuak ve tlâk pawh a ni lo.

Hlimpuii birthday lawma a kal chu a va che hle a nih dawn hi, a nihna dik tak sawi duh chuan Zosanga te ang kumah hi chuan puitling rilru put a har ve ngawtin ka ring ṭhin. Amah a hmêl ṭha a, a hleitling si, hna tihtlâk tak a nei bawk a, Pathian aṭanga simna tak tak a nei a nih loh chuan chuti maia zû hi a nghei ka ring miah lo. Mahse, mak takin khatia nu leh pa in kan chhuahsan hnu aṭang khan ka sawi ngai miah lovin a in ta lo vang vang a, ka lawm ru hle kha a nia, a nun ngaiah a lêt leh a nih chuan kei nen kan inkawp thei dawn lo tih pawh ka hmu tlang sa vek.

Muhil thei tawh lovin ka tho chhuak ta nge nge a, luhlul eng ang mah ila, ka chhungte ka ngai vawng vawng. Tun ang hunah hian ka mal zia ka hre thar a, ani chu mipa a ni a, a inngaihtuah thei bawk. Kei, raipuarah pawh nêp lutuk chi leh mahni inbuaipui hlei thei lo hi Zosanga tel lo chuan eng ka ni dawn lo a, chhungte ngaihsakna dawng pha lova pasal neih chu hrehawmna a inṭan dawn chauh ni ta in a lang.

Ei rawng ka bâwl zawh vek hnu-ah a rawn tho chhuak a, ṭawngkam khat mahin ka be lo. Ngawi rengin chaw ei ka siam a, ka eisan hmiah. Bathroom-ah rei fê a va inkhung a, a lo chhuah leh meuh chuan ka ei kham titih tawh.

Ani pawhin min be bîk lo a, min bia pawh nise ka chhâng kherin ka ring chuang lo. Ka mittui a hnai kuara mahni inkhawngaihnain ka khat.

Chaw a ei chhungin room-ah ka tawmsan daih a, ka va chhuah leh chuan a eina a lo seng fel diam tawh a, tukverh bulah dingin pawn lam a thlir vung vung. Vawiin hi Inrinni a ni a, office chawlh a lo ni kher chu pawi ka ti. Keimah chauhva awm a, mut ka châk ngawih ngawih.

"Duati..." tia min kovin ngun deuh hian min en a, ka ngawi reng.

"Min hau dawn lo em ni?" Zawi sup hian ati leh a.

"Hau i ngai hleinem, i duh thlannaa in i nia, tuman i kâah an tulh lui lovang che, i duh phawt chuan in zel rawh, hlim taka awm hi i duh lo a ni ang e," ka ti sap a. Ka rin aiin ka ṭawng dam, ânkhum hrep awm tak a nia; mahse, chutiang thlarau sual chu dawng miau hek lo i.

"Ka tihpalh, ka in khât lutuk tawh a, ka tisual deuh alawm le, ka tihpalh tak tak.." tiin ka bulah a rawn ding a.

"Zosang, nun bul ṭan ṭha turin kan in leh lo kan chhuahsan a, zû hi in duh lo ka ni bîk hleinem, ka in theih zia pawh i hriat chian kha; mahse, zû avanga nun hlimna kan neih i hria em? Mawihnai taka innei ve thei tur kha chhungte ti thinrimin tihian kan awm a, kan dam loh harsat manganah pawh tumah koh tur kan nei lo. Ka innghahna i ni a, zankhat lek i chhuak ve a, tiang khan i rawn awm a nia, ka rilru a na lo ka tih chuan dâwt ka sawi tihna a ni ngei ang. Ka na ngawih ngawih tih hi hria ang che." Ka ti ta a.

A ni rêng bawk a, tunah nau kan nei ṭêp tawh a, hetiang mai maia a awm chuan eng mah kan ni tak tak chuang hian ka ring lo.

"Ka tihpalh ka tih chu..." a bâk eng vak a sawi lem hlei lova.

"Ni rawh se, i tihpalh avang khan kan inkâr boruak ṭha sa a chhe vek tih i hria ang chu tiraw?" Ka ti ve ngat.

"I mak ka ti..." a thinrim zawkah a ṭang em maw ni?

"Mak e, ka mak alawm, birthday lawm tur si chuan eng mah min hrilh bik em ni, rawn sawm lo che sela hriat pawh ka hre tawp nang, zankhua deuh thawin keimahin ka awm a, min ngaihtuahna chhe tê mah i nei lo. I la rawn rûi haw zui a nia," ka ti vîn ṭhak.

Min chhânna pawh ngaithla zui duh tawh lovin ka chhuak ta daih a, khawiah mah kalna tur pawh ka hre lo. Kan inah ka kal ngam bawk si lo. Kan dawrah Rafaela a awm tawh ka ring a, chu lam chu ka pan ta ringawt a.

Bazar haw lam an tei suau suau a, ka hâk lai nen chauhva chhuak ka ni a, chêng khat mah ka ak lo. Phone pawh ka ak chuang lo a, muangchangin kan glass house lam ka pan ta hna hna a, ka thuawih loh rah ka seng mêk niin ka hria; kan inah te ka pi leh pu inah pawh keh thei dawma an dawm leh duat rawn ka ni a, Zosanga ka tawn aṭangin ka nunphung a inthlâk ta vek chu a nia, harsat mangan leh intih thiam lohah ka chhungte lo chu pan tur ka neih loh zia ka hriat phah.

Dawr ka thleng a, zing dar 10 a pêl tawh a, a lo inhawng hlauh. Inthlahrung ru takin ka lut ta a, Rafaela a lo awm tak tak a, 'ka pa awm se chuan ka chhuak leh daih ang' ka ti rilru kha a nia.

Min hmu thut chu mak atih hmel kher mai, "A va pawimawh awm ve.." tiin ngun tak hian min en a, sawi mai tur ka hre lo.

"Zosanga nen in inhau em ni?" Tia min zawh chuan ka sawi ang nge sawi lovang tih ka inngaihtuah leh tê tê a, sawi loh ṭha-in ka hre ta zawk a, "Hau hran lo e, ka lo tei phei mai mai," ka ti sap a, a awih hmel vak loh.

"Zû a in leh em ni?" Fing taka min zawh chuan dâwt sawi kher a ṭûl lovin ka hria a, birthday naa a kal thu leh a ruih thu ka sawi ta nge nge a.

"Ngun takin ngaihtuah la, hmingchhiat mualpho zawng zawng innei zo tawh a, Pathian in hriat loh chuan eng tikah mah chhungkaw hlim tak inni ngai lo ang, atu ve ve pawh in insiam ṭhat a ngai tih hriat a ṭha," ati dam thlap.

Rafaela puitlin sâwt zia ka hmuhin ka chhuang ru hle.

Thu ṭha tam tak min hrilhin fanau enkawl chungchanga kan pawimawhna te a sawi nual bawk a, ka nau mah ni se ka zah ru ngawih ngawih. Ramtei vanga khatia a awm pawh khan kei chuan Ramtei kha ka hua a, amah Rafaela ngawr ngawr kha ka ṭana a fuihpawrh zawng khan ka ṭawng ṭhin a, ani erawh chuan Zosanga dem mai lovin a û hi min zilh zawk a, ka va tluk lo si êm.

A kiangah nilêngin ka awm ve ta a, customer te a buaipui laiin keiin pawisa ka lo dawng ve zel a, nuam ka ti ta phian. Zosanga vanga ka thinrimna pawh hre chang lo lêkin ka lo inla buai ve em em a.

Khaw thim dawn hnaihah dawr a khar ve ta chauh a, "In in thleng ka thlah ang che aw, thinrim awm angin lang duh miah lo la, a biak hmasak loh che pawhin biak luih ṭâlh tum la, tlâwm zawka ṭan a ṭha ngai e.." a tih chuan harsa mah se tih ngei ka tum.

Man inhlan hma hmaa inṭhen leh te zawng a mualpho thlâk lutuk anga sin. Mahse, amah Zosanga'n a zir ta ngang lo a nih chuan thu hran ni se.

Kan quarter luah kawtah Car ati ding a, "Ka luhpui dawn che em?" A tih chuan, "Aih, keimahin ka lut zawk ang e.." ka ti a. Min hnial lem lo.

"Ni e, ka rawn lan ve chuan a thinrim tam mai mai, tikhan a theih chin chin dawh hrâm hrâm la, chuta i tuar thei ta ngang lo a nih leh min lo hrilh dawn nia," a ti dam thluam. Ka nu leh pa hrilh lo turin ka ti bawk a, ani pawh 'Aw le' ati ve mai.

Rafaela tlân liam tur chu bân ka vai khum zauh a, ka nuṭa pa hian min lo ngaihtuahin min ngaihsak takzet tih a tharin ka hriat belh.

In chhungah ka lut ta a, Sofa-ah Zosanga a lo ṭhu a, Laptop a lo khawih mawlh mawlh a, min hmuh veleh eng mah sawi lovin Laptop a bih leh daih a, "Chaw eiah min lo nghâk em ni?" Inti huaisen lui takin ka zawt ta a.

"Nghâk hran lo e, i ril a ṭam chuan ei rawh," a ti sup a.

"I ei tawh nge la ei lo?" Ka ti leh a.

"Ei lo, nakinah ka ei ve mai ang," ka zawhna ang chin chiah chiah chauh min chhâng a, min be peih awm lo hle mai.

Rafaela min hrilh ang chin chu ka zo tain ka hria, be zui tawh bik lovin bath-robe ka la a, inbual turin ka luhsan ta daih a.

Amah zawk rawn haw tlaia rûi a ni a, a thinrim zawkah ala ṭang a nia, a ṭûl fê a nih loh chuan ka va'n be hmasa tawh awm lo e.

Thinrim rilru hrehawm zetin ka pum puar ve tawh tak chu ka chûl a, Zosangmawia vang hian ka rethei tulh tulh dawna hriat ka nei, inṭhen ta ila fa pahnih pawmin ka lêt emaw a ngai ang a, ka nu leh pa thu awih lova kal ka ni zui bawk nen ngaihtuah pawh ka ngaihtuah thui ngam lo.

Inṭhen ka ngam lo tihna erawh a ni bîk chuang lo a.

Bathroom-aṭanga ka chhuah chuan chaw a lo ei mawlh mawlh a, min en zawk duh chauh. Ka ngaih dan ni lo teh mah se ṭawng chhuah ka tum bik miah lo a, thil ngaihtuah chhuah ka nei.

Ei tur ka lei khâwl ho khân zanin chu ka inhnawh puar theiin ka ring a, a theih chhung chu chaw ka'n ei lo chhin ang e. Engtin nge atih teh reng. Ka ngaihtuahna thar avang chuan ka nui ru var var a, nakinah a awm loh hlânin dawrah kal ka tum ru rân a, naktuk sunday a ni si a, ka inhmakhua a ngai.

A chaw eina a tih fel vek hnu-in room-ah a rawn lut a, kei ka chhuak thung. Bâl bawma ka insuk ro tawh ho ka dah khâwm ka thleh fel laiin inchei deuh hian a rawn chhuak a, ka mitsirin ka hmu ru reng. Mahse, en anga lan ka duh loh avangin ka thil tih lai ka chhunzawm char char a, a duh dan danin han tâl phawt teh se.

Car chahbi nen a chhuak leh ta a, ngaihzawng a nei a nih loh pawhin zû a in leh dawn a ni ngei ang.

A tlân liam fel ta maw tihah pawisa kengin dawrah ka kal ve nghal zat a, chaw pangngai ei lo pawh hian nautê nen kan awm thei lutuk tlat. Artui pali chhûmin ka kalsan a, mahni duh dan ve ve-in awm ila ti nia.

Ei tur tam tham tak ka lei chu thuhrûkna mai ka hre lo lehnghal a, ka zin bag pakhat âwlah ka dah ta ringawt a, a hmu êm lo ang chu.

Artui pum hnih ka ei a, bawnghnute no hnih in lehin chhangthâwpah butter ka tât a, ka ei leh nual. Keimah ringawt inngaihtuah ila ei vak pawh a ngai lo tur a nia; mahse, ka pum chhunga ka nautê pahnih te tân ka ei a ngai si.

Eng mah ei lo ang chiahin khumah ka mu ta thân a, whatsaap group nâwinaah ka va type ve ṭeuh kha. Mut chhuakin min rawn zém a, ka maimitchhing ta a.

Ka harh leh chuan zing lam dar nga a lo ri tawh a. Zosanga mutna a ruak huai a, a lo haw nge haw lo pawh ka hre lo. Zung turin ka tho chhuak ta a, Sofa-ah a lo muhil a, puan pawh a sin lo. Dimtêa kûn hniamin ka hnîm ta a, zu rim a nam hak hak. Nizan anga tam kha a in lo a ni mai thei, tunah chuan ka bula mut pawh a duh ta lo a nia, ngaihzawng a nei a nih ka ring nghet bur tawh.

Khumah rilru na takin ka mu ta a, ka mittui tla tur chu duh lovin mit ka nuai nawk nawk a, min rawn luhkhung laia a thu sawi te kha ka benga a ri nawn awn awn mai. Inhauvin inti thinrim fo ṭhin mah ila mut hran êm hi chu kan ti ngai lo. A phone check sak tumin dim tê hian ka tho leh ta a, a la mutui hle. Side table-a a phone dah chu ka hmet êng ta a, a in lock ta thlap mai le!

A hma te kha chuan phone kan inkhawih thleng mai mai kha a ni a, kan lock lo ve ve. Phone chu a ngaiah dah lêt lehin room-ah ka lût ta a. Mahse, finfiahna eng thil mah ka neih loh avangin ngawih rih ṭhain ka hria a, min buma ngaihzawng dang a nei tak tak a nih chuan azêp hlen theih a ni bîk nâng.

Ṭawng ri lâwng lâwng thawmin min tiharh a, ka lo muhil leh sek a ni ngei ang. Zing darkua a ri dêr tawh.

"Aw ka lo tum dawn nia, Car sil ka duh deuhva i lo kal ve duh em?" Zosanga aw ka hriat chuan beng ka chhi kar, phone-in mi a bia tih pawh ka hrethiam mai a.

"A nih chuan ka lo sâwm ang che, inah min rawn sâwm tawh lo la.." Hlimpuii a bia tih hrilh hranpa ka ngai hauh lo. Ka chhungrila thîkna rawn awm chu tih reh tumin ka thaw chhuak hliai a. Hetiang a lo nih vang hi em ni ang nupa nun te kha min hmanpui khât tâk! Ka chhungrilah zawhna tamtak chhânna ka neih si loh a awm a, tun hnai aṭanga inkawp chu anniin ka ring ta hauh lo.

Tenawm lutuk..

Ka rin tâwk êm avang leh min duat ṭhin êm avang te khan rinhlelhna ka lo nei ngai lo a; mahse, chuti mai chuan ṭhen ka tum bîk hauh lo. Engkim chiang taka ka hriat hunah hmâ ka la ve chauh ang.

Phone a hman lai chuan ka va tho chhuak lui ve ngat a, chaw ka ei lovang kha ka ti ve a; mahse, rilru ka thlâk ta hlauh. Amah pawh ngaichâng miah lo hian a eirawng bawl sa chu ka suak hmiah hmiah a, chaw tam tawk inkhawrhin ka ei ta a, min en reng tih ka hria. Min hau vaih teh se, a thlen ngam ngam ka thleng ve ngam.

Mahse, min hau lo mai ni lovin min be lo hrim hrim.

A thlëng tur a rawn la a, dawhkan khatah kan kíl ve tho. Tu nge luhlul zawk kan en ang chu. Inbe miah lovin kan ei dun mawp mawp a, ei hmasa zawk ka nih angin ka tho chhuak hmasa ta a, ka eina thleng ka sil nghal vek bawk.

Thawmhnaw sûk ka thleh bâng kha ka chhunzawm leh a, keima thawmhnaw chiah ka thlep a, Zosanga thawmhnaw erawh a ngai ngaiin ka dah vek. Ka pawisa khâwl kha ka hre ru rauh rauh a, tam chu ni lo mah se inren taka ka hman chuan hna ka zawm leh hma thleng chu min daih hrâm ka beisei. Zosanga insak nân te khan lo thawh ve hman ila ka va rethei dawn tak.

Kan Zosangmawia pawh a chhuak leh ta a. Ka ui der chhin eih lo.

Nilêngin movie ka en a, tlaiah eirawng ka bâwl laiin rin loh deuh in lêng ka nei ta tlat.

Ka nu a ni.

"Duati, i ṭha em?" In chhunga a rawn luh rualin chîk zet hian min en a, eng vanga lo kal ve ringawt nge maw a nih le? Mak ka ti viau.

"Ah.. umn..ṭha e, eng nge ni ta?" Pangngai taka kan inbiak lohna chin pawh ka hre tawh lo. In chhung chu a melh kual a, chutah min en lehin, "I lo haw daih duh em?" A ti ta a.

Min zawhna chu mak tih loh rual a ni lo.

"Ka lokal chu mak i va ti awm ve a, Zosanga a chhuak tih ka hria a nia.." dam thlapin ati leh a.

"Nu...." sawi ṭan dan tur ka hriat loh avangin ka ngawi dat a, ka nu Remruatfeli hian eng emaw tak hriat a nei a ni ngei ang. Chuti ni lo se lo kal nachhan tur a nei lo rêng rêng.

"Duati, engkim ka hria a nia, Zosanga'n ngaihzawng a neihsan che tih pawh ka hria, i mit i meng lova eng mah i hmu thiam lo a nih kha, nizanah i nu Muanpuii leh Rinsangpuii an inti thiam lo deuh a, Zosanga chungchangah, tah chuan a sawi chhuak a.." tiin ngun tak hian min en reng a, ka rilru hriat a tum pawh a ni mahna..

"Engtin nge Rinsangpuii chuan a hriat a?" Tia ka zawh chuan, "Zosanga bialnu hi Rinsangpuii te lam hnai a nih hmel. Chiang takin ka hre bik lo a, i nu Muanpuiin min rawn hrilh a, Duati lo va ngaihven rawh min tih vangin ka lo kal, keini chuan eng mah hriat kan nei lo, Rafaela ka zâwt a, eng mah a lo hre bîk si lo a, keimah ngei ka lo kal phah ta a nih hi.." a ti a.

"Chuan, engtia awm turin nge min beisei a.." a rûk tak chuan ka zak ngawih ngawih a, anmahni kalsana ka zui ve kha heti mai mai hian a tâl ta chu a nia, kan inah pawh haw ila ka rilru a nuam chuangin ka ring lo. Inthlahrunna tur hlir a ni mai.

"Kan hmangaih che a, engtin pawh awm mah la kan fanu i nihna a bo dawn chuang lo, inneih ṭhatin inla innei chuang lo a, zahthlâka lâk loh tur; mahse, i duh thlanna kan zahsak che a, Zosanga pawh dem tur a ni chuang lo a nia, nang aia naupang zawk kha a nia, rilru puitling tura beisei nghâl ngawt chi pawh a ni bik lo a nia," ati daih a, min hau hrep ka rin vei nen, sawi ve tur pawh ka hre lo.

"Indim i ngai a, nangmah chauh inngaihtuah thei i ni tawh lo a, nautê ṭha taka nei tur chuan hrisel ṭhat te a ngai asin, fa neih hi tih mai mai a ni lo a nia," a tih zawm leh bawrh bawrh a.

"Nia, tihian ka han ngaichâng rih phawt ang a, a awm danin a zir ta ngang lo a nih chuan ka lo haw dawn nia, ka huat vang che u a lo haw duh lo ka ni lo a nia aw, eng emaw hleka thinrima haw kha ka duh lo mai a ni zawk, chanchin ka lo hrilh leh ang che u," ka ti ve ta a.

Min hriatthiam hmêl tak hian, "Ka rin dan chiah a ni, kan ngaihsak phâka i awm hian kan thlâ a muang a, Zosanga nen pawh ṭhen kher che u hi thil ṭûl ber a ni lo tih kan hre tawh alawm, in hlimna hi nu leh pa chuan kan duh ber a ni a, Rafaela leh i pa phei chuan lo kal an remti lo a; mahse, i chin hriat hrim hrim ka duh vangin ka rawn kal lui a nih hi," a ti dam thlap.

Nu leh pa hmangaihna lo thûk zia ka hrechiang sawt.

Thingpui te a in hnu-ah min chhuahsan ta a, thu ṭha tam tak min hrilhin naute tana ṭha tur pawh a sawi ṭeuh a, pawisa hman tur ka neih leh neih loh thlengin min zâwt vek. An mahni huain ka lo be duh lo vel a, anni chuan kan chanchin ṭha lo lam an hriat veleh tlâwm zawk nih hreh lovin min rawn ngaihven nghâl a nia, ka khawngaih zawk ngawt mai, keimah min ngaihtuah rêng rêngin khang hun zawng zawng te kha an lo hmangliam awm si a.

A vawikhat nan inchhir avangin ka ṭap chhuak ta a.

Eirawng pawh ka bâwl zawm tawh lo, khumah ṭhuin ka inhnît faih faih a, ka naupan laia min duatzia te, lehkha ka zir lai zawng zawng pawha min ngaihsak zia leh rual ka awh hlau reng renga an awm te kha ka ngaihtuah chhuak vek a, anni chuan keimah lo pawh fa annei a, kei ve thung chuan Remruatfeli leh Zirsangliana bâk nu leh pa ka nei ve si lo.

Ka lo ṭap muhil daih chu niin! Hmeichhe ṭawng bawrh bawrh ri hian min tiharh ta a. Zan dar sarih a pêl awrh.

"Zosang, i kal thei ang maw? Ka lo kuah leh mai ang che," Hlimpuii aw a ni. A ṭawng danah a rûi ve tho tih ka hre mai.

An thâwm a zawi hran lo bawk.

"Umn.. ka kal thei.." Zosangmawia ṭawng dan chu leh!

Tho chhuakin ka va fin ve ta a, Zosanga hmêl phelh phung te, Hlimi meng phî chiai ka hmuh chuan ka sa zak.

"Buaipui fel law law rawh.." ka ti hmak a.

"Eng lo, Duati, duh aiin a in tam deuhva.." Hlimi'n a tih chuan, "A lang reng alawm, tikhan inbuaipui rawh u, Sofa-ah a mu ṭhin a, room-ah rawn hruai phei duh suh.." ka ti leh hmiah.

"Hmangaihzual, eng..eng maw i sawi?" Zosanga chu Sofa-ah a ṭhu hnawk a, min rawn en a, a mitmeng phê ruai chu ka huat zawng tak. Zû a ina a awm dan ṭhin chu ka hrechiang ber ang, hmeichhia nen an awm dun a nih ngat chuan sex an hmang ngeiin ka ring bawk.

Kei nen pawh Zû kan indun vanga khatianga awm ta kha kan ni a, a nupui tak takah min lo ngai ngai miah lo tepawh a ni mahna.

Hlimi nen an inbuaipui lai chuan room ah an thâwm ngaithlâin ka awm reng a, hmeichhiain an rawn thlah a nia, ka awm ve reng lai lehnghalin, a ten hian ka ten. Mahse, heng zawng zawngah hian thiam lohna ka nei ve tho, zu in mi tih ka hre reng a, rei lo tê a in loh avang khan a nghei ta tihna a ni lo. A nihna zawng zawng leh a zu in ṭhinna pawh hresa veka zui ka ni a, ka tawrh ve tur rêngah ka ngai. Mahse, ka tuar kumkhua bîk lo ang tih hi ka ngaih dan a ni.

Dârkâr hnih hnu-a ka va chhuah leh chuan Sofa-ah chêp zet hian an lo mu dun a, Hlimpuii kâwngah Zosanga'n a kuah a, ka rilru a na ngei mai. Ka ngaidam thei angem tih Pathian chauhvin a hria ang chu. Rûi lo hai lova ti chu nise ka chhuak nal nal ang a; mahse, an pahnihin a rûi tlat si a, an awm dan zawng zawng pawh an hre vek bîk lovang tih ka hrethiam ve tho.

Ka phone lain an thlâ ka lâksak ta a. Sihsah mai a. Hmangaihzuali hian eng thil nge ka tih an la hria ang chu.

'Kawppui te laka rinawm lohna hi thil satliah a ni lo, rinawmna man hi a to fer fer asin, i dam chhung zawng khan min rûl zo sêng dawn em ni, Zosangmawi." Tiin ka phun chhuak sap a.

Ka mittui dan rual lohva far chu a tawpna ni rawh se, a tih dik loh rah hi ka seng dawn lova amah vêkin a la seng dawn khawp mai. An pahniha an muhil hmêl chu vawikhat chiang deuh hian ka Click leh a, kan nupa room-ah ka lût ta a.

Hetiang em em hi chu a thlen ka ring phâk lo asin le. Mahse, nupui dik tak din hmun ka luah miau loh avangin thiam ka chang dawn bik lo a, mi te ngaihah chuan, Zosanga nula kawl satliah kha ka ni miau alawm. Nupa pawmpuina Certificate pawh kan nei dêr si lo a, kan tuh rah kan seng ṭan mêk tihna.

Khawvar dawnah Zosanga'n Hlimpuii a kai tho a, a thlah thâwm te pawh ka la hre vek. Rawn haw teh se, ka duh ang ka sawi zawh vek hma loh chuan ka chhuak lo ang. Nge, tihian luhlul chhuahin ka nau neih hma zawng ka awm lui ngat ngat zâwk dawn em ni?

Inbe lova a awm theih chhung chu ka awm thei ve tur a ni dawn lo'm ni.

Zosanga lo haw hma chu rei lo tê tal muthilh zawk tumin ka maimitchhing leh ta a.

Ka thluakah hian Bawng êk khawro hlir a awm bik hleinem maw le. A duh ang ang hian han tâl phawt teh se..

A duh thlan tîr turin ka nawr zâwk mai thei...

B+>[BeckirafARenthleI]<+®®

THE RAPSAGYAN FAMILY

Becky Rafa Renthlei

Chapter-33

[ZOSANGMAWI LEH DUATBIKI]

Ka lo muhil rei deuh a ni ngei ang, ka harh leh chuan Zosanga a lo awm tawh lo a, a hnaah a kal tih ka hre mai. Ei rawng a lo bâwl diam a, min kai tho ngam lo nge kai tho duh loh zâwk pawh ka hre lo, kei mah chauhvin chaw ei dawhkan ka kîl a, Hlimpuii nen khan an inkawp tak tak nge, thu dik zîk tluak eng mah ka la hriat loh avangin chhui chhuah ngei ka tum ruh tlat.

A hma khân keimaha ka awm tur kha min ngaihtuah deuh ṭhin avangin office-ah min hruai ve kha a nia; tukin zing lam erawh hruai enah min en ta lo a ni ngei ang. Hetiang em ema awm khaw lo tur hian ka phal lo a, ka chhungril hi chuan rin hrâm a la duh. Kan inah, ka awm ve reng laiin hmeichhia a mutpui ngam a nia! Sex an hmang lo tih hre mah ila a ten hian ka ten.

Thleng ka sil laiin ka phone a rawn ri a, ka laklawh deuh avangin ka pick ta lo, nakinah ka call back mai ang. Ka ngaihtuahna bîng mup leh ka rilru natna te dah ṭhat hrâm hrâm ka tum a, a harsa lam hret.

Min rawn call tu chu tu dang ni lovin Lawmsanga a ni! Ka call back ta a.

''Hello'' ka tih rualin, "U Duat, i va buai awm ve?" Tiin min rawn zawt a.

"Buai lutuk lo e, thlêng ka sil lak lawha chuvang mai mai chu, eng nge ni ta?" Ka tih chuan, "Lo kal ka tum a, ka û a awm lo ang tiraw?" A ti a.

A awm loh thu leh tlaiah bâk a lo lêt ka rin loh thu ka hrilh a, "Chuti chu ka lo kal nghal.." tiin phone a dah zui daih.

Eng nge Lawmsanga'n min biak duhna tur a neih? Rinsangpuii chungchâng a nih ka ring ta ber a. A û awm loh hnu hian thu chhia a ṭha hrilh ngamna tur a nei bîk tawp lo ang.

Dârkâr chanve vel a liam hnu-ah Lawmsanga a rawn thleng ta a. Min hmuh veleh, "Ka rin aiin ka hmu ṭha che, i thâu deuh a ni maw?" Tiin a nui var var a.

"Nia, ei ka duh lutuka ka in zo leh si lo a nih hi," tiin ka nuih lêt ve var var a.

"Eng lo a nia, ka lo kal chhan chu, kan nu in ka û nen in inkâr a ṭha vak lo tih leh ngaihzawng a nei niawmin a sawi a," a ti ta a, ngun deuh hian min en bawk a. Rinsangpuii mai mai chu(h) Zosanga ka ṭan vang ni lovin a ngaihzawng neih lo sawi ve chhên kha a ṭawng theih thlâk ka ti a, bâkah nu Muanpuii a hrilh tawh a, tunah Lawmsanga a hrilh leh a, mi zawng zawng hriatah tih mualpho a tum em maw ni. Ka chhungte beng a thleng tawh bawk.

"Nia, thu chiang eng mah ka la hre lo, a nei a nih pawhin ama duhthlanna a ni a, kei aia a thlan zawk chu nei ang hmiang, innu pawh chuan a va hre thei reng reng ve a; ka rin aiin innu hi a ṭawng tam, ka nu tepawhin an hre tawh a, a zah thlâk em mai," ka ti lui ve ngat.

"Ni e, ka nu nen hman zanah an inbakkaih deuh a ni awm a, ka awm loh laia thil thleng a nia, ka nu a lawm lo khawp mai, tun lai kan nupa inkâr boruak a nuam bik lo a," rilru hah hmêl takin a ti sup a.

"A hrim hrimin, a hma te khan fel ka lo tih teh rêng nen, hman ni-a min rawn ṭawng khum a ṭang kha chuan ka hmu dik thei tawh lo, Zosanga lo fuih pawrh ṭhin ni ila chuan thu hran a nia; mahse, i û luhlul zia chu i hria ang a, a duh lohnaah tumahin an fuih pawrh lul lovang.." tlang takin ka sawi ve hmiah.

"Tun lai chu thinrimna tur a zawng reng mai a, i pi boral hma lawk pawh khan Lungleiah a phei a, ka va hruai alawm, ka nu leh pa an zahawm êm a, kan inneihna ala rei lo bawk nen buaithlâk ka ti khawp mai," a tih leh a.

Zosanga awm dan leh nizana an awm dan te kha Lawmsanga ka hrilh fai ta vek a, "Innu leh mi dang hriat ka duh lo a nia, ka tawrh theih chin a pelh chuan kan dam chhunga inṭhen hlen a ni tawh mai; Pathian zarah nu leh pa ka la nei a, fa pahnih te chu ka pawm tlei thei lutuk ang," tiin nimina ka nu lo kal thu leh min tih dan pawh ka hrilh tel nghal a.

"Eng tia hma lâk nge i duh? Eng nge tihsak theih che ka neih?" Tia min zawh chuan ngaih dan thar ṭha deuh ka nei leh ta.

"Zosanga rilru tih nat hi ka tum ber a ni lo a, hetia ngaihzawng neih pawisa lova a tâl hi a rilru dik tak hriat chian ka duh khawp mai, min puih theih chuan kan inah rawn chuang kâi tam la, fâ inla neih loh avangin innu rilru put hmang dik tak pawh i hriat chhuah phah mai thei asin, Zosanga pawhin nang nena min hmuh dun fo chuan a rilru chhungril a phawrh duh mahna, nautê kan neih hmaa chhoh san erawh ka tum miah lo a, khi lama ka awm chuan ka hahdam thei dawn si lova.." tiin ruahmanna ka siam ta a.

"Ê, a ṭha tak ang, ka nupui hi ka hmangaih a, ṭhen leh mai mai atan Pathian hmâah thu ka tiampui hek lo, nang pawhin ka û i hmangaihzia ka hria a, ruahmanna ṭha tak a nih chu. Eng tiang chiaha hma lâk tur nge hre lo mah ila zanin aṭangin kan ṭan thei ang." A ti ta a.

Ka ruahmanna hi a ṭhat ngei ka beisei.

Rinsangpuii pawhin Lawmsanga a hmangaih tak tak a nih chuan a nun dan a thlâk danglam mial mai thei bawk. Chutiang chiah chuan Zosangmawia pawh a ni tho. A nau nen inkawp leh inngaihsak ang deuhva kan lan chuan a rilru put hmang a lo lang chhuak mai ang. Lawmsangzela tan pawh fâ a awhzia tih lanna remchang tak a ni dawn a.

Chumi hnu chuan inpawh takin kan titi dun a, a hun a lo thlen hma loh chuan tuma hnena sawi chhuak lo turin thu kan thlung dun ta a. Kan chhungte pawh hrilh hriat kan duh lo ve ve.

Kan titi bawrh bawrh lai chuan ka phone a rawn ri a, ka pa a ni teh tlat!

"Pa..." ka'n ti nghal tawp a.

"Duati, thil pawimawh tak sawi khâwm tur a awm a, chaw in lo ei thei ang em?" A rawn ti a.

"Ah, eng thil nge a?" Ka ngaih a ṭha lo nghâl ringawt. A chhan chu kan nupa inkâr thil zawng zawng a hriat ve ka ring lo a. Tun hnaiah kan inpawh lutuk lo bawk nen ka hriat ve ngei ngei ngai a awm tihna a nia.

"Eng ni lo e, Rafaela chungchang a nia, in lo thlen hunah chiang zawkin kan sawi dawn nia," atih chuan "Aw le, Zosanga a buai deuhva keimahin ka lo kal mai ang," ka ti ve zaih.

Zosanga hrilh hriat ka tum lo hrim hrim.

Hruai ka ngaih leh ngaih loh min lo zawh chuan ka ngaih loh thu leh Lawmsanga a lo len thu ka sawi a, "Ka rawn inthlah tîr dawn nia," ka ti awlsam mai.

Ka pa nen kan inbiak zawh hnuin Lawmsanga ka hrilh ve a, "Chuti a nih chuan in inah ka hruai che ang a, i haw duh hunah min lo phone mai dawn nia," a ti ta a. Bul ṭanna tur atan va rem sihsah ve le.

"Ka u teh rêng pawh hi a ti mak ka ti, khatiang khawp khan in inzuiin mualpho huam khan a luhkhung che a nia, thla tam êm pawh la ral hma hmaa bialnu tih vel ngaihsak leh daih, a â tawh a nih hi, zû a in chhung hi chuan eng ram ropui mah a thleng lovang," tiin a ding hluai a, "Workshop aṭanga lo kal ka ni sia ka lêt leh ala ngai a," ati a.

"Nia, ka insiam peih hunah ka lo call dawn che nia aw, ka hmanhmawh lutuk thei lo a.." Verandah thlenga thlah pahin ka ti a, "In inenkawl ṭha hle rawh aw, ani vang khan rilru ti hrehawm rêng rêng suh," tiin car-ah a lut zui nghal a, "Teh reng mai," a tlân liam hma loh ka thlir reng a, Lawmsanga rilru puitlin zia ka ngaihtuahin Zosanga ka huatna a zual sauh.

Chumi hnu chuan muangmarin ka inbual a, kan ina kal leh pawh ka huphurh viau tho. Mahse, min hmangaihzia ka hria a, ṭha taka min ngaihsak duh a hnu, eng vangin nge an lakah luhlul ka chhuah bik lém ang. Zosanga haw san erawh tun dinhmun atan chuan ka tum lo a; kut min thlâk te a nih ngawt loh chuan.

Ka inpeih meuh chuan tlai lam dar li a ri tawh a, Lawmsang call-in kan inah min hruai ta a.

Ka nu leh pa, Rafaela, Zosanga nu leh pa, te an lo awm a, Lawmsanga nena kal kan ni bawka ka zâm lutuk bîk lo. Ka pum puar lian ve tawh tak chu an en duh riauva hriatna ka nei a, ka zak ru viau.

"Duati, i ṭha maw?" Nu Muanpuiin min lo be var a, ka bu nghat.

Lawmsanga pawh awm ve tura an tih avangin a haw ta bik lo a, Rinsangpuii a tel lo hlauh. Ani kha awm ve se chuan ka lêt leh daih duh ang.

Nautê kan neih hun tur te pawh min zâwt a, ṭha takin ka chhâng zêl a, ka room hluia ka va luh chuan ka ṭah a chhuak ru hle. An thlazar hnuaia rilru hahdam leh engthâwl taka awm thei kha tihian inthlahrung dâkin ka awm phah a, Zosanga nen rûi bâk bâka kan ṭhutna ṭhin ka room balcony-ah erawh ka chhuak duh ta lo.

Zanriah kan kîl hmain kan kal khâwm chhan ber ka pa'n a sawi ta a.

"Rafaela pawh nupui neih hun a ni ve tawh a, Diktei nen an inkawp chungchâng kan hre vek a, anni lam pawhin engkim an hre ve vek bawk; mahse, Pathian kohna tih tawh mai ang, Pastor hna dîl duhna a nei ta kha a ni a, keini chuan dâlna chhan tur eng mah kan nei lo a, Pathian kutah kan hlân tawp a. Tichuan, kan kohhranah dîlna te kan han theh lut a, kohhranin anngaihtuah hnu-ah pawmsak a ni ta a, Bial Comittee ah thlen leh a ni a, anni pawhin ngun taka anngaihtuah hnu-in kan dilna min pawmsak leh ta a. Ka fapa neih chhun, ka thachhang dâwltu tura ka lo dah ṭhin Rafaela Remruattluanga hi Lalpan a rawngbâwl turin kawng a hawnsak ta a ni e. Personal interview kâr hmasa lama a neiha pawh a tling chho ta zel a, tunah chuan Pastor hna zir turin a kal dawn ta a ni." Tiin a sawi ta a.

Ka lawmpui rualin ka ṭah a chhuak et et a, min ngaihtuahtu ber leh min ngaihventu ber a ni a, ani a awm loh chuan ka ngaingam lo a ni ber mai.

Tihian a sawi zawm leh ta a, "An zir hun chhung hi kum li lai mai a ni dawn a, Diktei tân pawh thil huphurhawm tak a ni dawn a, tunah innei ringawt dawn se, anmahniin inpeih lo anla inti deuh bawk si a, ṭawngṭaipui an ngai takzet a ni. Rafaela awm dan, nun dan hrechiangtu te vek kan ni a, a nupui neih tur ṭhulh a nih aṭanga a khawsak chhoh dan te kha han ngaihtuah ila mi ṭha leh mi famkim chauh hi a rawngbawl turin Lalpan a thlang lo a, amah duhtu leh zawngtu te hi a ni hman a duh fo ṭhin. Ka fapa, i kal zêlna turah duhsakna kan hlan che a, Lalpan i hma hruaiin i hnung a dáwl zel ang tih theihnghilh ngai suh ang che," a sawi zawngin a hnuk a ulh deuhin ka hria.

Ka pa Zirsangliana hian a fapa a hmangaihzia ka hrechiang si a, khawvel thil ngaihtuah chuan an ui dawn lutuk tlat tih pawh ka hrethiam pha ve ani.

Kâr leh Nilaini hian a zirna tur hmun a pan dawn avangin chhungkuaa chaw ei khawm an rawt a lo ni a, kei pawh min hmaih bîk lo. Saitei erawh a zirna zawm leh tura kal chauh a ni a, an chah haw ta lo tih te a sawi tel bawk a, Rafaela zawng puitlin kawngah ka phâk loh a ni ṭhin rêng a ni. A û ber hi entawn tlâkin ka nung lo a nih ber hi.

Lunglei lama ka pi leh pu te pawh chanchin an hrilh ve vekin ka ring a, ka nî pawhin whatsaap aṭangin chanchin min rawn zâwt zauh zauh bawk.

"Duati te pawh hetia man leh mual inhlân lova awm reng te hi a mualpho thlâk a, nautê inneih zawh lamah pangngai deuhva insuih ṭhatna hun kan siam dawn nia, mihring aṭanga in rem tum hi chu a harsa a, Pathian vang zawka inrem tum tur, tlâwm zawk nih hreh tlatna te hi Setana lawmzawng a ni a, a hma ang khan i duh duhin lo kal ang che, eng mah inthlahrunna tur a awm lo," a ti leh a. Pa Faka a bu nghat nghat.

Kan nu leh pa te rilru puitlin zia leh min hmangaihzia nitin a tharin ka hriat belh zel a, Zosanga hi awm ṭha ni se inrem loh nachhan tur a awm tawh pawhin ka hre lo. Chhungkuaa pakhat chauh pawhin simna thinlung leh kawng dik zawh a thlan hian chhungkaw keh chhia a siam ṭha thei tih ka hriat belh bawk.

Ṭawngṭai rualna kan neih hnu-in zanriah tui hnai tak ka pa inah ka ei leh ta. Nautê phîr a ni tih ka sawi chuan an hlim tlâng dar dar hle a, Rafaela'n 'pakhat zawk hming ka phuah ngei a ngai ang' a'n ti sa ringawt a.

Kan nupa inkâr buaina theihnghilh ṭhakin hun ka hmang a, ka haw hreh ngang mai.

Lawmsanga'n min thlah dawn tho avangin ka hmanhmawh duh vak lo a, hetia awm reng hi ka duh hial tawh. Mahse, tun atan chuan a rem teh ṭeuh si lo a, zan dar riat velah kan haw ta a. Ka nu-in min ngaihtuah hlê, Zosanga awm dan a hriat vang a ni a, nu Muanpuii leh pa Faka pawhin in enkawl ṭha turin min chah ve lawm lawm.

Zosanga quarter kawtah Scooty a lo ding ran a, tuta nge ka rin hriat mai.

Lawmsanga nen in chhungah kan inzui lût ta a. Kan thil hmuh mai mai chu(h)

Sitting room dawhkanah Whisky leh no pathum a awm a, Zosanga, Hlimi, leh mipa pakhat ka la hmuh ngai loh an lo ṭhu a, kan lut min hmuh chuan inthiam lo hmêl an pu ṭheuh.

"A va nuam awm ve?" Lawmsanga'n ati khauh a, tumah an ṭawng lo.

Zosanga chuan min melh rûn a, rui chhe hmêl a pu hran lova a nau nen kan inzui lût chu mak a tih hmel viau thung.

"Chaw i ei tawh em?" Tiin min zâwt hmasa teh mial a, "Aw, ei tawh e, in ei tawh zawk em?" Dam thlap hian ka chhâng a, "Hlimi, in lo lêng a.. kha..tunge in ṭhianpa chu.." nui sânga ka biak chuan an hamhaih hmel viau.

"Nia, inpa kan lo zui haw a nih hi, Rinpuia, kan thawhpui thar tho a nia," tia Hlimin min chhân chuan, "Tikhan lo inkâwm rawh u, ka Laptop hi Lawmsanga kan check tir lawk ang e, Zosanga nau a nih hi.." tiin Lawmsanga ka mitmei zauh a, Zosanga erawh ka en duh ṭhak lo.

"Duati, helamah an awm si a, room ah kan en mai dawn nge?" Lawmsanga a zei ru tlat.

Zosanga tân pawh huat tur awm hek suh, a nau a nia, a ngaih a la ṭha rih tepawh a ni mahna.

Kan bul ṭan dan a fuh chho dawn e, ka nui ru var var a.

Laptop zah zelah kan phawrh a, Zosanga te ṭawng ri kan ngaithla vel mai mai. Chutih lai chuan Rinsangpuiin anpa a rawn call a, "Chhâng rawh, i duh dan dan khan sawi tawp la.." Lawmsanga'n a ti deuh ngei.

"Hello, keimah Duati..." ka ti sap a.

"Khaw nge Lawmsanga?" A aw a mak tihna lo lang chhuak chu haider chi ninghal lo chuan.

"Ka nu te inah chaw kan ei a, a lo haw ṭêp," ka tih chuan, "I ei ve a maw?" A ti nghat a.

"Ei ang chu, chhungkaw chaw eikhawm a nia, ka pa'n min lo sawm alawm," ka ti ve hmak.

Ani kha a rawn kal ve lo a, ka tel ve a ring pha miah lo tak ang.

"A nih tak chu.." phone a off zui hmak a, thinchhe keh a nia, kei ai pawhin a thinchhe zawk.

Loundspeaker-a ka dah vangin Lawmsanga pawhin a hre ve vek a, "A âng leh nasa ang chu aw, tun lai chu Sakawlhi ka chênpui a ni ringawt," fiamthu-a tiin kan nui ta a, kan thâwm Zosanga'n a hriat phâk ngei ka ring.

Ka rin ang chiahin room-ah a rawn lût ta a, khumah bang nghengin ka ṭhu thluang diai a, ka sirah Lawmsanga ka ṭhut ang chiahin a ṭhu bawk a, Laptop a mal chungah a dah bawk a, "Mate, innu in a ngaihtuah ang che va haw tawh rawh, Laptop chu ka lo enpui mai ang," a rawn ti ta a.

"Ka zo ṭep a, kan nu pawh ka be tawh alawm, i ṭhiante saw va kâwm rawh an hawihai lutuk ang," ati dam thlap. Kei erawh ka ngawi tlat a.

Zosanga tân pawh tihngaihna vak awm bîk hek lo a chhuak leh ta a. A ngaih dan a ni vak lo tih a lang reng.

Nizan ang êm kha chuan a rûi lo tih alang reng a, Hlimi nui har har chu ka run ang reng, zû te pawh ka in ve ṭhin tho; mahse, Zosanga kiangah chauh ka in ṭhin kha a nia, mipa dang bulah ka zahawmna hloh ṭhak khawpin ka awm ngai lo. Eng mah ni lo mah ila, kei ai chuan a nasa deuh chu a nih hi.

Hlimi te haw hma Lawmsanga a haw duh bik miah lo a, room-ah kan tawm tlat a, dâr sawm vela an haw chuan Zosanga room-ah a rawn lût a, "Mate, nang pawh va haw phei tawh rawh," a ti leh a.

"Aw le, ka rin aiin a lo tlai tawh a nih hi, u Duati bula awm hi chu a hahdam thlâk ve ngawt mai," a ti vei ngial a, kan plan-a tel lo a telh zeuh zeuh; mahse, thil ṭha tak a ni.

Lawmsanga Car thlengin ka thlah a, Zosanga erawh a rawn chhuak ve lo. A nau, a hmangaih leh a duat kha a nia, tih thinrim a duh dawn dêr si lo va. In chhunga ka luh leh chuan bath room-ah lûtin ka intleuh thuak thuak a, kan nupa khumah Zosangmawia a lo mu kur a, a kiangah mut tumna pakhat mah ka nei lo. Nizan lawkah hmeichhe dang kuahin a muhil a, ka mit ngeiin ka hmu bawk.

Sofa-a mut ka theih ve dawn loh avangin sitting room chhuatah mutna tur ka phah ta a, "Kha kha eng atan nge i phah a?" Zosanga rawn tho chhuakin ka che vel chu min thlir reng a.

"Khumah i mut dawn chuan chhuatah ka mu ang, mut hran khâ i duh niin ka hria a.." ka ti a.

"Duati..." a ti sup ringawt.

"I duhna zawk zawkah mu rawh le, i lungawina turin han awm ta che.." thinrim duh miah lovin ka ti zêl a.

"Ka rui lo a nia, khumah kan mu tlâng thei reng alawm, thinrim tawh suh," tia min rawn ban chuan ka tawlhsawn dawrh a.

"Zosangmawi, min dek hlek suh, hmeichhe dang i kuahna bân kha ka mamawh lo, i duh leh Hlimpuii bulah khân va riak rawh, a nih loh pawhin riak turin rawn sawm leh la..." ka ti hmiah. Mak tih hmêl tak hian, "Hlimi ka kuah lo e a," a ti nghut a.

"Min en teh, ka mit a del em ni? Nizanah Sofa-ah in riak dun a, ka awm lai rengin, kei aia i thlan zawk chu pan rawh, ka sawisel lovang, i duh thlang turin i zalên a nia, kei nen chuan man leh mual inhlanna kan nei chuang lo a, i nupui nihna dinhmun ka hauh ngai hek lo. I duh dan danin awm la, nautê ka neih hunah ka chhuak ang," ka tih chuan, "Kan mut dun ka hre lo ve," a la ti ngam nia.

Ka sawi chhuak ta sa sa, ka phone phawrhin, nizana an thlâ ka laksak kha ka hmuh tir ta a. Mak a tih hmel viau; mahse, kei mah hian mak ka ti lo alawm.

"I hmu tiraw? Ka rilru tur i hriat thiam ka ring, i eng tihna mah dâl che ka tum lo, i duh duhin awm la, chhuak rawh min ti pawh ni la ka chhuak thei reng," ka ti zui leh bawrh bawrh a, rin ai takin ka áw a la dam. Ring deuh deuhin âu lâwng lâwng pawh ni ila thiam ka inti ve tlat.

"Eng lo.. Duati..ka tihpalh.." a bâk thiam thu sawi tur a nei lo rêng a ni.

"I tih palh avanga ka rilru natna hi chuti mai chuan a dam dawn lo tih hria ang che, khawiah chuan nge i mut dawn?" Ka ti leh sak sak a.

"Khumah i mu ang a, kei pawh ka mu bawk ang," a la ti nia! Zak lo lutuk mai.

"Ni rawh se, i kianga ka mut ai chuan kan inah ka riak mai ang, Lawmsanga min hruai turin ka'n call ang e."

"Hmangaihzual, khatiang zawngin min vau reng reng suh, khawiah mah i riak chhuak lo vang, i kal lui a nih chuan.." sawi zo duh lovin a tâwp chaih a.

"Ka kal lui a nih chuan eng tin?" Ka ngawi mai duh bik lo. "Mu rawh," a ti nghut a.

Chhuata mutna tur ka phahah chuan ka mu ve ta a, ani pawh khumah a mu ta nge, a thâwm a reh vang vang. Ka la duh tâwk mai dawn lo, amah ngaihsak miah lova awm dan ka hre tawh alawm, thil ṭha ber ni lo mah se alakah eng chiah nge ka nih ve tih hi hriat a pawimawh tawh tlat.

Whatsaap aṭangin Lawmsanga nen kan inbia a, Rinsangpuiin a biak duh loh thu a rawn sawi a, kan plan A,B,C a zawh meuh chuan engkim a chiang uar ang.

Keimahin ka nui kar kar a, "Duati nen hian in inkawp deuh a ni lo maw?" A lo ti a ni awm e, Rinsangpuii ve lutuk hi a.

A nihna dik takah chuan Lawmsanga nen hian unau anga inen kan ni a, unau pianpui hmeichhia a neih loh vangin tun hma kha zawng zawngah pawh min û en ve a, Zosanga zawk hian min û en ngai lo.

Dâr khat thleng rak kan inbia a, naktukah Workshop-a lêng turin min la sawm zui, "Kan nu nen kan kal dawn a, kan che leh hlek ang chu," a rawn tih chuan ka nuih a za hle. A nupui a hmangaihzia ka hria a, a duat pawh a duat rêng bawk. Mahse, hrem ngai ati a nih chuan a ngai tihna a ni mai.

Mut chhuakin min rawn zèm a, ka lo muhil daih chu niin! Ka harh leh chuan bân lum thar thar hian min lo kuah a, ka harh nghâl kâwk.

Zosanga ka mutnaah a rawn mu thla ve a lo ni a, min kuah chial chung hian a lo meng kur a, ngun deuh hian min lo thlîr reng.

"Min khawih suh tih ka sawi lo em ni?" A bân dah sawn sak tumin ka che nghal a. A hre lo der hmiah. Mit pawh a khap duh eih lova min en reng. A luhlul zia ka hria a, a aia luhlul leh sual chhuah a ngai tihna.

"Zosangmawi, i duh ang anga min palzam tum duh suh, ka thinrimna i tawngbaw palh ang e," vín lek leka ka ṭawng chuan muangchâng hian a bân a la sawn a, "Thinrim tawh suh ka tih kha," a ti duh lek. A bâk insawi fiahna la awm ta chuang lo, Hlimi nen an chungchâng a sawi fiaha a sawi chhuah hmâ loh chuan ka lung awi dâwn miah lo.

Chhâng tawh chuang lo hian ka tho chhuak ta a, min dan pawh a tum bik lo! Khumah ka va insawn ṭha leh ngat a, thawh nan a la hma deuh bawk si, ka mit a kham ûrh a, muthilh leh tumin ka maimitchhing ta a. Min rawn tibuai tawh lo a ni ang, ka harh leh pawhin kei mah tê hian ka la mu ngât a, chokaa a chevel thawm erawh hriat tur a awm thung.

Dâr zât ka enin zing dar riat a pêl chauh a, a tho hma awm hle mai.

'Thinrim tawh suh' tih rîk ngawt. A awm dan leh min zah loh dan em em kha paidam chi ninghal lo chuan.

"Tho tawh rawh le, chaw ei a hun," phone ka khawih mawlh mawlh laiin a rawn lût a, a hmaa ka hriat ṭhin Zosanga kha a ang leh ṭan ta.

Vawiin hi ka incheck up hun a ni tak alawm le, ka theihnghilh hmin der.

Nidangah chuan aman min hruai ziah a, tun aṭang chuan keimaha inbuaipui ka ngai dawn ta, hrilh hriat pawh ka tum hran lo a, chaw ei a lo siam peih vek tawh avangin ngawi reng hian ka kîl a, biak enah pawh ka en lo.

"Office-ah ka va inreport phawt ang a, vawiin hi i incheck up leh hun kha a nia, min lo nghâk ang che," min en chuang lo hian ati a. A lo la hre ve reng chu a nia!

"Hruai ka ngai lo ang, office-ah in buai kha.."

"Min hnial duh suh, min lo nghâk ang che," a ti leh a.

Chhâng tawh lovin ka chaw ei lai ka ngaihven san daih.

"Mahnia inbuaipui thei pawh i nih tawh loh kha, test neuh neuh neih a ngai leh dawn a, ka fa te pahnih himna kha ka mawhphurhna a ni," ngeiawm rawng kâi lek leka a ṭawng chuan ka run lutuk tlat.

"Nia, i fate himna chu i ngaihtuah tur alawm, ka himna tur erawh ka ngaihtuah ve a ngai thung," tiin ka tho nalh a, "A kâwi zawnga lâk kher a ngai lo, i chaw kha ei zo rawh," tia min vawn beh a tum chuan ka duh îkhaw lo.

"Zosangmawi, i kut, a ten hian ka ten che.." ka ti chhuak ta nge nge a.

"Hmangaihzual?" Tih leh din chhuah a rual a, "Eng maw i sawi? Han sawi nawn leh teh." A aw râwl a ring ṭha ngei mai.

"Aw, ka ten che, hetianga awm leh mai mai tur te chuan engah nge min luhkhung, pakhat i duh tâwk lo a nih chuan i duh zât zât va nei rawh, kal rawh.." ka ti zui táwn táwn a, a chaw bâr lohna lam a bân chu rawn vaiin ka biang a ri ṭhuai a, "Ka thinrim a nih chuan ngawih tur, tih ka sawi tawhin ka hria," tiin min kal pêl a, min benna thîp vang vang chu ka kut vei lama hupin ka thlêng ken lai chhuatah ka thlauh ri bawl a, ka mittui a hnâm sawk.

Thlanglam tukverh bulah a ding a, amah pawh en tawh chuang lo hian bathroom-ah ka lut a, chhuak lutuk tak maiin ka ṭap ta a. A hmuh laia ṭah kha ka duh lo hulhual, kut min thlâkna ai mah chuan min ben duhna rilru a pu kha nâ ka ti zawk.

Ka rilru natna zawng zawng bun ruah tumin rei fê ka inkhung a, bathroom kawngkhar a rawn ben rík dawt dawt chuan ka inphih fai sawk sawka kawngkhar ka hawng ta chauh.

"Duati.." tih pahin min rawn kuah thut a, a inthiam lo hlê tih ka hria.

Tâl chhuah tum lovin min kuah ang ang chuan ka ding reng a, "Ka tihpalh lutuk, ka tihpalh aw.." zawi supa a ṭawng chhuah chuan ka tâl phut a, room-ah ka tlân lut ta a, kawngkhar chhung lamah ka kalh nghal hmiah.

Hmanhmawh lutukin ka insiam zung zung a, office kal ngei ngei a ngai tih ka hriat avangin a insiam hma ngeia chhuah hman ka tum. Amah ka chhuahsan dawn ta tihna nilovin incheck up- tura kal ka tum vang zawk a ni.

A phû tawk hremna ka pêk hma loh chuan luhlul chhuahin, hrehawm dawn mah se ka tuar mai ang.

Ka duh ang ka tih ve hunah nautê nen ka la chhuahsan ve ang chu, tûn hi a hun a la ni lo mai chauh a ni.

Taxi chângin Hospital lam ka pan ta a, Zosanga'n min rawn ûm tih ka hriat chuan driver hnenah, ka kal duhna hmun ka thlâk leh thu hrilhin kan in lam kan pan ta daih a, kan inah chuan min ûmzui ngam dawn lo tih ka hria.

Ka rin ang chiahin kan in lam ka pan tih a hriat chuan a tlân muang ta a, side glass aṭangin ka en ru zauh zauh. Ka nu inah a awm ngeiin ka ring a, incheck up naa min kalpui turin ka sâwm tawh mai ang chu...

Mahse, ka rin loh deuhvin in ka thlen chuan min rawn ûm thleng ta tho a, "Duati, kal rih teh suh.." ati thâm ṭuak.

Zosangmawia hawihai hmêl chu a khawngaihthlâk zawk. Ka chhungte nen kan inrem leh tawh tih kha a hre ve der si lo a, ka hawsan dawn taah a ngai pawh a ni mahna.

Kawngkhar ka hawn dawnah ka hawi lêt hrâm a, beidawng mitmeng dul ruiha min en chu hai derin in chhungah ka pen lût ta a....

B+>[BeckirafARenthleI]<+®®

THE RAPSAGYAN FAMILY

Becky Rafa Renthlei

Chapter-34

Zosanga pawh ngaihsak tawh chuang lovin in chhungah ka lût ta a. An nula awmpui leh ka nu an lo awm a, min hmu phut chu mak an ti deuh tih ka hre mai. Tunah zing dar kua leh tlêm a nia, ka kal tur thu ka sawi lâwk bawk si lo atin ni.

"Eng ati teh tlat nge a, i va hma ve?" Tia ka nu-in min zawh chuan, "Nia, vawiin hi ka in check hun a nia, Zosanga a hman loh hmel sia ka lo sawm che," ka ti a.

"Durtlângah em ni, engin nge i lokal?"

"Taxi ka lo hmang a, min hruai theih dawn chuan duh leh Taxi-in kan kal leh mai ang a," ka ti leh a.

"Hman lohna tur a awm hleinem, ka'n insiam ang e," tiin a tho a, ka pa leh Rafaela dawra an kal tawh thu leh Rafaela kal hmaa bungrua lâkkhawm a ngaih thu te a sawi zawm mawlh mawlh a.

Ka nu room-a a luh hlánin choka lamah ka phei a, Zosanga kha a la awm nge awm lo ka en ṭha leh ngat. Kan in piah deuh kawng thlangah Car a lo dah a, amah tak chu ka hmu lo; office kal a tum lo em ni ang! Ṭha takin engkim min hrilh se ka tân pawh a zia awm tur a ni a, chutiang ni lovin kut min thlâka ka thinrim tih hre reng chungin eng mah a sawi fiah ṭha duh lo bawk a, ngaihdam a harsa dawn hlein ka hria. Ka chhungril a la na vawng vawng thei.

Ka nu insiam zo a lo chhuah chuan thei tui ka lo in mêk a, "Tukinah chaw i ei em?" Chîk taka min enin min zâwt a.

"Umn, ei e.." ti chauhvin ka chhâng.

"In boruak a la fuh thei na nge, kut a thlâk che em ni?" Tia fing taka min zawh chuan ka bu nghat a, ka ṭah a chhuak tlat. A kim changin hrilh kher lo mah ila a man thiam vek tih ka hre mai.

"A pawi ngawt mai, i nu Muanpuii te tân tak pawh hian a hrehawm ang, an fapa ni lo se chuan ka hruai haw daih tawh ang che. Inneih pangngaia innei pawh in la ni lo a, kan thiam reng; mahse, a nu leh pa mitmei vên a ngai a, bâkah in duhthu a in chhuahsan inni bawk a, hrehawm i tawrh chak ve deuh a ngai a nih hi, inṭhen hlen i duh a nih ngawt lo chuan; nau i neih zawh hun thleng pawha a la insiam ṭha lo a nih tâk leh tih dan kan dap dawn nia," a ti ta a.

"Tunah chuan chhuahsan ka la tum lo, Hlimi nen an inkawp takzet em tih hriat fiah phawt ka tum. Tin, a rilru put hmang dik tak ka hriat loh chuan nakinah nautê min chuhpui te a tum anga kha kha ka duh lo, nia, ka chhuak a nih chuan lêt leh mai mai ka tum lova dam chhunga inṭhen hlen a ni tawh mai," tiin ka rilru dik tak ka sawi ve a.

"Eng pawh ni se kan thang chin tur a hriat si loh a, Car kan keng ve mai dawn nia, i pa emaw Rafaela emaw kha lo bia la, kan kalna chin lo hrilh rawh," tiin kan car hlui zawk chahbi a la a, kan naupan laia Bike a khalh ṭhin te khan kan ngaisâng thei a nia, ka nu anga thiam ve ka tum tlat a; mahse, ka tluk zo lo a nih ber hi, engkimah.

Zosanga Car kan tlân pelh laiin a hre lo nge eng mah a sawi lang lo la, Durtlâng hospital panin kan tlân chho zui ta a.

Zun test leh thil dang neuh neuh kan tih zawh meuh chuan chawhnu dar hnih a ri thuak tawh a, ka nu nena kal chu eng mah ka insêng lo. Aman pawisa a pe vek a, ka inthlahrung zâwk, "In dìm hle ang che, rilru leh taksa hahdam a ngai a nia," Doctor thu sawi chu ka rilrem zâwng tak ni mah se a harsa lam hret a ni.

Hosopital kawta kan awm laiin Zosanga a rawn lang hlawl a, "Nu Mafel, ka rualin haw mai se la," tiin ka nu a bia a, kei chu min en lo hrim hrim.

"Car kan keng tho a, i lokal duh a nih kha aw.." eng mah hre lo ang maia ka nu a ṭawng chuan fing ka lo tiru khawp mai. Kan inkâr boruak ṭha niawm taka Zosanga ṭawng vel erawh ka lo haw hle thung.

"I lo buaipuia a lawmawm lutuk, ka rualin haw rawh se, ka hman tawh tho a," tiin ka lam a rawn hawi ve ta chauh a, "A ni lawm ni Duati, i nu tân pawh lo thlah kâwi che kha a buaithlãk tam mai mai a," a ti dam thluam a.

"Eng lo, thil tih kâwi tur kan nei a, ka nu nen, a rualin ka kal zawk mai ang, ka lo haw har lovang," ka ti ve zaih a, a ṭhialpàwn pâwng ṭalh ṭalh chu ka hmu ru reng.

"Zosang, damdawi leh naute thil vel en kan duh a, kan inpeih hunah ka lo thlah dawn nia," ka nu'n atih chuan a hnial hreh ta deuh a ni ang, min kalsan ta a. Min melh nawn tawh eih lo. A pawi ka'n ti lo khawp a, ani nena Car pakhata chuan dun ringawt pawh ka peih rih lo.

Kan hnungah zêl a tlan a, khawiah nge kan kal dawn tih hriat a tum pawh a ni mahna. Phakar siah, thinrim loh hmêl deuhva a lan te khan chum chawrh ka lo châk a nia. Thil tum nei lo ila chuan a hmuh phâkah ka awm tawh tawp lo ang.

Khawiah teh vak kan kal lo. Damdawi leh ka mamawh zualpui leiin kan ding zawk a, kan inah kan kal nghâl daih. Naute thil en tih vel kha chu ka nu chhuanlam mai mai a ni tih ka hre ve vek. Kan in lam kan pan tih a hriat khân min tlânpêl ta daih kha a nia, a rilru a nuam lo viau ang, ka chhungte ka hrilh a hlau deuh te pawh a ni mahna.

Lawmsanga call-in incheck up-a ka kal thu leh a haw hmaa min thlah hman leh hman loh ka zâwt a, "Min lo nghâk rawh, kan nu nen kan lo phei dawn nia, dawrah a lo kal ve a," a tih chuan, "In nu a awm te chuan kan plan a fuh náng," ka lo ti a.

"A ṭha daih zawk alawm, ka tih dan tur chu a hunah i hre mai ang," tiin a nui hawk hawk hawk a. Eng ruah hmanna tak chu nei ang maw! Ka nu'n min thlah thei tho tak nain Lawmsanga nen kan ruahmanna kha tih vat vat ka duh bawk si a, ka lo nghâk ta a.

Zosanga'n min rawn call lo hrim hrim a, khatia a haw tlang hnu khan a ngawi zui hmiah.

Lawmsanga te nupa an lo thlenga Rinsangpuii a tûm bâr a, anpa a hnial ngam lo a ni ngei ang. A lo tel ve danah.

"Duati, i hmanhmawh tawh em? Nautê chu a ṭha ang tiraw?" Car-a ka ṭhut luh rualin min lo be nghal var a. A hma kha chuan 'U Duat' tiin min ko ṭhin a, tunah chuan min û tawh lo a, kan ruahmannaah hian ' in ú ṭut ṭut' kha a rem chiah lo bawk a.

"Ṭha e, indim deuh ka ngai tih loh chu eng mah an sawisel lêm lo," ka ti a.

"Nautê inneih hun chuan ka duat dawn sia maw, nei vat vat la.." tiin min rawn en zauh a, "Pathian zarah damtea kan neih theih chuan i rawn awm ṭhin dawn nia, hmeichhia nge i duh mipa?" Nui hak hakin ka lo ti ve a.

"Ka duh ve ve, phìr anni dawn sia mipa leh hmeichhia han ni hlauh se," a la ti tak tak deuh deuh a, Rinsangpuii a ngawi ngal. A biang sen ṭâwn ṭâwn aṭang chuan kan thu sawi chu a lawmzawng a ni lo tih alang reng a, nuam ka ti sauh.

Zosanga quarter kan thlen tâk avangin kan sawi zawm ta lo a, tlângnêl takin Lawmsanga a lût nghal a, Rinsangpuii erawh car ah a ṭhu tlat thung.

Lût ve tur pawhin ka sâwm buai peih lo.

A lo reh ṭhiap a, Zosanga hmuh tur a awm lo. "Tikhan lo ṭhu lawk rawh aw, kan inthlâk ang e," tiin Lawmsanga ka bia a, "Khaw nge ka û hi a awm a?" A tih chuan ka hriat loh thu-in ka chhâng a.

Kan room-a ka luhin Zosanga khumah a lo ṭhu a, ka thawmhnaw chhuatah a lo inchap darh nuai bawk.

"Eng, eng atan nge ka thawmhnaw kha i tih?" Ka râwl a ring ngei mai.

"Âu vak vak kher suh beng ngawng ka ni lo," a ti sup a.

"In ṭhen i duh chuan sawi mai ta che, ka thawmhnaw vawm darh kher a ngai em ni?" Tih pahin chhuata ka thawmhnaw darh nuai chu ka chhar khâwm a, Lawmsanga a rawn lût ve bawk.

"Eng thil nge ni ta, in va ri teh hluai ve? Duati, i ṭha em?" Tiin thawmhnaw chu min chharpui a, "Mate, lo inrawlh duh suh, ani hian kan thutiam bawh chhiain an inah a kal a, a phû tâwk hremna a hmu dâwn khawp mai," Zosanga mitmeng rum ûl chu ka hlau ru viau.

"Inrem taka awm tum rawh u, nautê in nei dawn tawh lehnghal a, Zû i in a piang hian buaina a awm ziah," ka thawmhnaw dah ṭhat mawlh mawlh paha Lawmsanga'n atih chuan, "Lo inrawlh suh ka tih chu. Hmangaihzual..i chhungte'n an ngaihsak lo che a, in aṭangin kan chhuak dun a ni lawm ni, eng vangin nge i va kal leh si.." ka bân puamah na zet hian a hmer a, min thing deuh nawk.

"Zosangmawi, i kut hi lasawn rawh.." ka âw a khûr deuh titih. Ka thinrim êm vang zawkin ka duh ang pawh ka sawi chhuak ṭha hlei thei.

"Lawmsang, i va rei ve?" Rinsangpuii a rawn lût a, chutia kan lo ding ṭhap a hmuh chuan, "Mi nupa buainaah inrawlh suh, anmahniin ching fel rawh se," a ti hmak a.

Ka thin a sa zak.

"Nang kha lo ṭawng rêng rêng suh, i lo sawi ve tur a awm lo," Lawmsanga'n a ti nghut a, Rinsangpuii a ngawi dâk.

Zosanga nena min en tawnin, "Ka û, nu leh pa kalsana i ûm a ni a, Duati pawhin a nu leh pa kalsanin a zui che a, hetiang mai maia awm tur a ni lo rêng rêng." A ti leh a.

"Lo kal rawh Duati.." tia min kaih a tum chuan Zosanga thin a thawk ta. "Lo inrawlh suh ka ti che a ni lawm ni," tiin min phih sawk a, khumah ka ṭhu hnawk. Rinsangpuiin Lawmsanga kalsawn pui a tum ve bawk a, kan thâwm a ring ṭha ang reng.

"Zosangmawi, i ngaihzawng neih hi ka hre lo emaw i ti ang e, ka nu leh pa ina ka kal chu eng nge a sualna, ka duh hun hunah ka kal ang," ka ti ta phiar phiar a, ka biang a ri nghâl sawk. A thîp êm êm mai lehnghal a, vawi hnih min benna a ni ta.

Rinsangpuii awm lai khera min bêng chu ka thâ a na ngang mai.

Lawmsanga'n a û a hnek lai pawh ka hmu hman lo. Rinsangpuii ṭê ṭhat ri-ah ka hawi chhuak ta chauh a.

Lawmsanga chuan min rawn panin, "Nau a pâi tih pawh i hria a, chuti chung chuan kut ila thlâk duh a nia, eng mihring nge i nih? Ka û chu i ni ve si a.." tiin min kâi tho a, "Lo kal rawh, in inah ka va hruai ang che. Rinsangpui, Car-ah min lo nghâk ang che," tiin nichina a thawmhnaw dah ṭhat ho kha bag ah a thun hmiah hmiah a, "Keiniin fâ kan awt em em a, nang lah chuan i fâ pâitu kut i thlâk duh a nia, Duati enkawl hi i mawhphurhna a ni tih pawh i hre tawp lovang tiraw?" A thinrim takzet tih ka hria.

Zosanga khân Lawmsanga kha engtin mah ati lêt lo kha thil mak tak a ni.

Rinsangpuii chhuah hnuah Lawmsanga'n min kuah a, ka mittui ka dang zo ta lo. A âwm nghengin chhuak zet hian ka ṭap ta a, ka ṭah nghawr zawng chuan ka puma nautê a rawn che ve ta a, mak ka ti kher mai. Ka ṭap bâng hmak.

"Lawmsang," tiin a kut pakhat chu ka pumah dah sakin, "Ka nautê a che nasa lutuk," ka ti thâm ṭiak a.

"I nat a phal lo a nih kha, kan ina lo kal nge i duh, in ina haw?" Tia min zawh chuan, "Khawiah mah a chhuak dawn lo, nang pawh khân min chhuahsan thei ang," Zosanga'n a ti hmuk a.

"Kan inah ka haw ang e, min hruai thei ang tiraw? A nih loh pawhin Rafaela min koh sak la.." ṭap chhunzawm tawh lovin ka ti ta a.

"Lawmsangzel, kut thlâk i duh loh chuan haw rawh, Hmangaihzuali i vawna kut kha dah sawn bawk la," Tiin kan dinna bulah a rawn dinga, "Kal phawt mai rawh," tiin ka ding sawn ta a.

Lawmsanga tân pawh awm zui zêlna chi ni hek lo. A nupuiin pâwnah a nghâk reng bawk si a, kal turin ka ti ta ringawt a, a hreh ngang mai.

"Hmangaihzuali ngaihven lovin i nupui ṭawng thei deuh kha khuahkhirh ang che, chuti lo chuan i tân a pawi khawp ang, nge, min ngaizawng der tura a rawih nu kha kan ko tel law law dawn?" Zosanga thu sawi avang chuan ka hawi phâwk hrâ, "Eng maw i sawi? Eng nge i sawi awmzia?" Tiin Zosanga ka melh a.

"Lawmsanga te haw hunah ka hrilh fiah ang che," tih bâk eng mah a sawi zawm duh lo.

Min ngaihtuah viau mah se a û a hlau ve deuh bawk nen hreh zetin a chhuak ta a, "Eng emaw a thleng leh a nih chuan min lo hrilh rawh aw," a la ti ve ṭâng ṭâng, a der maia min ngaihsak ni lovin min ngaihtuah takzet tih ka hria a, "Aw le," ka ti sap.

Lawmsanga te haw aṭanga minute sawm dâwn inbe lovin kan awm reng a, Zosanga ding ngawi ngul chu rum ál a melhin, "Sawi tur i neih chu sawi ta che, a nih loh chuan ka haw dawn a nia, ka dawh theih chin a pêl ta." Tiin khumah ka ṭhu a, a la ngawi reng.

"Pathian hmaa thutiam ni lo mah ila, hei leh chen hi kan chêng dunin kan inkawp a, tunah fâ hial kan nei tawh dawn a nia, i khawsak danah ka lawm lo a, inṭhen hi a ṭha zâwk niin a lang," tih pahin ka thawmhnaw ka khung khâwm ṭan ta a.

"Ka thusawi tur hi ngun takin ngaithla ang che," zawi supa a ṭawng chu ka chhâng hran lo. Ka chêt ngaiin ka che zui mawlh mawlh a, min dan pawh a tum chuang bik hek lo!

"Hlimpuii nen khân kan inngaizawng lo a, kan inkawp hek lo, kan office-a rawn thawh tirh thla hnih liam ta khân min ngaizâwng ngei mai a, amah kha Rinsangpuii ṭhiannu a ni nghe nghe. Kan ina a lên ṭumin kan chhungkaw thlalâk intâr a hmu a, ka chanchin a zâwt a, chutah chuan Rinsangpuiin engkim a hrilh vek, kan chhungkaw buaina leh kan pahnih chungchâng pawh a hrilh fâi kelh a; Rinsangpuii ruahmannain min ngaihven em em a, min zui reng a ni ber ang chu, atîr chuan rinhlelhna ka nei hauh lo a, a felin a ṭawng duh bawk a.." tiin a ngawi hlek a.

"Mahse, vawikhat office Canteen-a kan chawlh laiin Rinsangpuii nen an inbe ri ka hre ta a, ka hming leh i hming a sawi tâk sekah chuan ka ringhlel ta a. Amah mi pangngai a ni a, ka hriat duh ang zawng zawng hre tur khân ka ngaizawng der ta a ni. A birthday kan lawm zanah zû ka in pui ta a, thiam taka ka zawh pawhin eng mah a sawi ṭha duh miah lo. Mahse, a lo riah kha i hria ang a, khatah khan rûi chhia ka ni lo a nia, a phone check sakna hun remchâng ka zawng ru rân a, ka hmu ta rêng bawk a, engkim chiang taka ka hriat fiah hma kha chuan hrilh tumna che ka nei lo kha a nia..." a ti duah a.

Sawi ve tur pakhat mah ka hriat loh avangin ka ngâwi rân a, ka insiam chhunzawm ta rih lo.

"I thîk tih a hriat khân Rinsangpuii a hrilh ve zel tih whatsaap-a an inbiakna ka hmuhin ka hria a, Duati, kut thlâk che kha ka tum a ni lo a; mahse, min rin tâwk lohna kha ka hua a ni, vawikhat pawh ka rinawm lohsan ngai lo che," a ti sup a, awih tur nge awih loh tur pawh ka hriat si loh.

"Eng pawh ni se, kan in lamah ka phei ve phawt ang e," ka tih chuan, "Khawiah mah i kal dawn lo, min chhuahsan kha chu tum buai duh suh," ati hmiah.

"Ka chhuak dawn, nupui nihna din hmun tak tak ka luah ngai chuang lo, i sawi zawng zawng khi thu dik pawh ni se kut min thlâkna tur khawpa ka awm ka hre hek lo, kan inah ka haw lo a nih pawhin Champhaiah ka chho tho ang," ka ti ve zel a.

"I kal lui a nih chuan nautê kha i enkawl theih lohna turin hmâ ka la ang, tun laiah chuan hnute tui lo pawhin an châwm thei lutuk tih hria la, kei ngei pawh hi chutianga châwm len chu ka ni, ka thu sawi zawng zawng finfiahna i duh chuan hun min pe rawh, engkim ka fin fiah vek ang," inring tâwk taka tiin room chhungah a vei nghauh nghauh a.

"Khatianga invau te zawng a ṭhing lutuk.." ka nui lui hak a, mahse, thil a ti thei tih ka hriaa ka hlau ru deuh tho. A luhlul em em mai si a, a sawi zawng zawng lah awih chi niin ka hre bawk si lo. A chhan pawh a awm dan ka hmu ve vek a, lemchanna niin ka hre lo tlat a ni.

"Ka vau che ni lovin ka sawi anga i awm loh chuan ka ti ngei ang tih hria ang che, chaw ei rawh," atih zawm daih a, chaw ka la ei lo tih pawh ka hre chang tawh lo.

A sawi ang diak diaka awm loh ka tum ve tlat a, ka ei tur lei khâwl ho pawh kha ala awm nual. Chungho chu la chhuakin choka lamah ka phei pui a, engtin mah min ti lo.

A hma te khan ṭha takin min hrilh ni se kei pawhin puih dan emaw chhui zui dan tur ka hre mial mai thei a, inngaizawng tak tak lo ni se kut min thlâk ngawt lo ang, a rûk arâla mahni-a thil a tih vângin engkim a buai zo vem a nih hi. Zosangmawia chuti maia rin hi ka harsat tlat tawh.

Kan inah ka haw lui ṭâlh zawk dâwn em maw ni.

Bawnghnute ka in laiin a rawn chhuak phei ve a, "Khatiang puarna tham a ni lo, i pum chhunga mi khan tui pawh a ti ve lovang," tiin a rawn sawisel a, hun dang chu ni se ka nui nasa ngawt ang; mahse, amah ka huatna a nasat êm avangin a thu sawi hrim hrim hi ka ngai haw vek tawh.

"Ka inngaihtuah thei, naute pawh ka ngaihtuah thei bawk," ka ti hmak a.

"Vawikhat mah kan nupa buaina chungchâng ka nau hrilh tawh suh ang che, a lehpek a awm a nih chuan a pawi tawh khawp ang," ka rin ang chiahin Lawmsanga chungchâng a rawn sawi chhuak ta ngei a, "Nang ai thlâwt chuan min ngaihsak zawk," tia ka thil eina ka seng fel lai chu min rawn ban a, "Hmangaihzual, tun chiah ka sawi tawh ang, kan inkâr buainaah ka chhungte emaw i chhungte pawh ni se hrilh tawh suh ang che, tun ṭum chauh chu ka ngai dam hrâm ang che," zuk ti a! Zak lo lutuk.

"Ka hrilh chhe te eih lo, kei ai pawhin an hre hmasa a, anmahni zâwkin alawm le min hrilh," ka ngawi duh mai bîk lo.

"Rinsangpuii a nih dawn chu, saw nu saw engtin emaw tak ka la ti ang, rilru chhe lutuk mai," a sawi zawng pawhin a lawm lo tih a hriat ngawih ngawih a, a nu leh Rinsangpuii in hauh thu ka sawi chuan, "Zahna châng a hria a nih chuan ala zak khawp ang, ka nu meuh a thinrim chuan an inhau nasa hle a nih dawn chu," ngun taka ngaihtuah niawm tak hian chal a chuar nûng a, a nu hi chu a rûk takin a ṭan tih ka hre ve tlat.

Chumi hnu chuan eng mah sawi tawh lovin room-ah a lût a, kei erawh a kiangah mut ka tum lo, chhuatah bawk mutna ka siam leh ta a.

"Duati, khumah rawn mu rawh," whatsaap-a Lawmsanga nen kan inbiak laiin min rawn ko a, ka phone lukhamah ka thawlh sawk sawk a, ka muhil der zui nghal hmiah.

"I online zo chiah tih ka hria a nia, i rawn mu dawn nge ka rawn pawm tho dawn che," a lo thawh lai ka hre miah lo, ka mutna bulah a ding reng tih a thâwm hnaih dan aṭangin ka hre ve mai, chhâng duh lovin ka ngawi rân a, ka thin erawh a phu dup dup lawi si.

Chutah zo zet hian min pawm tho nawlh a, "Kan khumah sawn keimaha mut ka tum tawh miah lo a nia, ka dawh theihna hi fiah phêt tum suh," khumah dimtêin min nghat a, ka la meng chhuak ta chuang lo.

"Luhlul si, thinchhe si, huat thu chhe bawk si, Duatmisuali dik tak chu i lo nih hi," a nui huk a, ka va ngei mai mai tak.

"I duh leh huat thu chhe lo chu nei mai rawh, kal rawh.." tia ka ṭawng chhuah chuan, "I hnenah lo chuan lungawina ka hmu tlat si lo a, thinrim tawh lo la.." ati zâwi sup. Min rawn kuah zui nghâl bawk, ka duh lo ṭang vel chu engah mah ngai lo hian, "Nangmah ka kuah loh che hi, naute a nih hi ka kuah.." tiin a bân sei thlurh chu ka pumah a rawn nghat a, chimawm siah...

Ka mut a chhuak ta deuh nen hnial buai lovin ka ngawi ta rih a..

# Zosangmawia

Ka duh aia hmain ka thil chhui a lang chhuak hmaa Duati ka khawngaih rualin Rinsangpuii mize dik tak hriat chhuah khâ ka tum ber a ni a, eng vanga Duati hi haw em em nge a nih!

Ka nau nupui a ni a, a hranpain huatna chhan tur pakhat mah ka nei lo a; mahse, Hlimpuii awm dan leh thusawi a ṭangin kan nupa kâr tih ṭhen hi a duh niin a lang tlat a, Hlimi ngaihzawn der a ngaih phah, ka hlawhtling viau nain Diati rilru ka tinâ tih ka hria a, ka inthiam lo tak zet.

Kan boruak ṭhat loh aṭangin ni li lâi a liam tawh a, Duati a ṭawng tlêm em em a, ṭûl fe a nih loh chuan min be ngai lo tih theih a ni. A tih tur chin tiin chaw ei naah pawh min nghâk lovin min eisan char char a, a kham tawh hnuah min ko chauh zel. Thinrimin min ânkhum leh hrep se ka duh tawh zâwk mah.

Tuna a awm dan hi chu ngeiawm rawng a kâi a, office-a hruai ka tum pawhin a duh miah lo. A phone a lock vek a, ka nau nen an inbe ṭhin tih erawh ka hria, Lawmsanga ka hmangaih a; mahse, ka nupui laka a rawn inrawlh fo chuan ngaihtheih loh chin ka nei mai dawn. Tunah pawh ka ngaithei lo ṭan dêr tawh a, an nupa hian engtin emaw tak ka la ti dawn khawp mai.

Office-a ka awm laiin Hlimi ka room-ah a rawn lût a, "Zosang, innu te in lamah chaw i ei ve dawn lo em ni?" A tih chuan mak ka ti hle a, eng mah chaw eina chhan tur ka nei lo.

"Eng nge i sawi awmzia?" Ka thil tih lai dahin Hlimi ka zâwt chiang ta a.

"Duati nau mipa kha pastor hna zir turin a kal tawh dawn a, chhungkaw chaw eikhawm an siam a ni lawm ni! Rspi pawh kal turin an tia, a duh loh avangin an ina chaw ei turin min sâwm a, ka lokal lam khan i nau leh innu an inphur ka hmu," ala ti tak deuh deuhva..

Rafaela'n pastor hna a zir dawn maw! Huh! Ka awih lo lutuk chu ka nui chhuak hawk a.

"I hre sual a ni lo maw?" Nui ṭhâ chunga Hlimi ka zawh chuan, "Hre sual mai mai lo, Naktuk tlaiah a kal tawh dawn alawm, i awih loh leh innu khâ phone la ti nia, in Workshop pawh an khar vek," a tih lehzel avangin awih loh chi ninghal lo chuan. Rinsangpuii hnen aṭanga a hriat vek a ni ngei ang.

A sawi angin Duati ka call ta a. Vawi hnih a ring ral ṭhak hnuah ka ti nawn leh ngat a, mipa aw hniam set sawt hian min lo chhâng a.

"Zosang, Duati a inbual a, i lokal dawn lo em ni, keimah Valpuia.." Valpuia pawh a awm ve a nih chuan dâwt a ni lo tihna.

"E, Valpui, i sawi awmzia ka man lo," ka ti sup a.

"Eng lo, Rafaela thlahna programme an siama kei pawh ka kal ve a, nang mah tih loh chu kan kim viau a nia," a ti leh a.

Duatin eng mah a sawi loh avangin engtin nge ka hriat teh rêng ang. Ka nau, chanchin min hrilh ṭhintu berin min hrilh miah bawk si lo a, ka thinrim ru kher mai.

"Office-ah ka buai deuh a, ka hman ngang lo," tiin dâwt ka sawi ta ringawt a. Ka zak ru hle mai.

Kan inbiak zawh hnu chuan Hlimina nui sâng a, "Innu-in a hrilh lo che a ni maw?'' Inti hre taka a tih chuan, "Min hrilh a, vawiin hi a ni tih ka hre lo zâwk alawm," ka ti ve zaih.

"Min bum duh suh, hria ni la Duati i call tawp nâng, innu khan a ngaipawimawh tak tak lo che a nih kha," a ti leh zat zat a, ka chhâng buai peih tawh lo.

Tunah chawhnu dar hnih a ni a, Rafaela a kal dawn tih ka hre miah lo hi, keima thiam loh liau liau a ni. A tîr aṭangin Hlimi chungchâng Duati hrilh ni ila chuan an in lamah a kal lo ang a, kan pahnihin hlim takin kan awm mai tur a nia, a nu leh pa'n an hmangaihzia ka hrechianga tunah chuan min thlahthlam telh telh a nih ber hi.

Rinsangpuii sawi ang deuhvin, atu te pawh hian Duati hi chu an ṭan vek a lo nih hi a...

Rilru nuam lo zetin inah ka haw ta ringawt a, a nau neih nân thla tam nghah a ngai tawh lo a, tun anga kan boruak a kal chho zel a nih chuan min ṭhen tak tak duhin ka ring. An inah a nuamsa si, amah hmangaiha duattu te vek anni a, Saitei a awm lo lehnghal a, ṭan ka lâk deuh chu a ngai a ni.

Hreh chung chungin Duati te inah ka kal ve ta ringawt a, engtin tak min lo ti ang maw...

An in kan chhuahsan dawn lai te kha ka mitthlaah a rawn lang a, ka huphurh ngang mai. Mahse, ka tih ngei a ṭûl si

a...

B+>[BeckirafARenthleI]<+®®

THE RAPSAGYAN FAMILY

Becky Rafa Renthlei

Chapter-35

Duati te in chhunga ka luh chuan an kim ṭha ṭhep ṭhawp khawp mai, pa Zirsanga'n thu a lo sawi mêk a, hunserh an hmang tih hrilh hranpa ngai lovin ka hre ve mai; Rafaela'n min hmuh veleh a bula ṭhutna âwl chu min kawh hmuh vat a, Duati erawhin mak tih hmêl takin min en thung.

Rafaela leh Diktei an ṭhu dun a, a sir bera ṭhutna âwlah chuan ka ṭhu ve ta a. Valpuia, ka nu leh pa leh ka nau, Diktei nu leh pa te an tel bawk. Tin, ka la hmel hriat loh nupa niawm tak tuak hnih an awm bawk a, Rafaela nun inthlâk danglam kha chu ka hre ve ngei a; mahse, Pastor hna dîl duhna rilru a put phâk ka ring lo ve ringawt!

Ramthansangi nena an inṭhen laia zû ka in pui leh ka ṭhian pa, engkim ka hrilh ngamna kha a lo ni ve ṭhin a, ani chuan sual lam kawng zawh zui zel duh lovin hmalam a pan ta chu a ni a, ka tluk lo hle mai.

Rinsangpuii pawh ka hmu ve tho. Hlimpuii khan a kal dawn lo a ti ve si a, Lawmsanga bulah ṭhuin ngun deuhva thil ngaihtuah hmêl a pu.

"Hei, Zosanga pawh a rawn tel ve thei hlauha a lawmawm êm mai, chhungkua in ngeih loh leh indo zawnga awm hi Setana duh zawng leh a thil tum lian ber a ni tih kan hriat a ṭha khawp mai. Keini nu leh pa te pawh mi famkim kan ni lo a, in duh ang diak diaka kan enkawl lohna che u pawh sawi tur tam tak inhria ang; mahse, vawiin ni aṭang hi chuan inrem leh inngeih taka awm i tum ṭheuh ang u. Kan tih dik tawh loh te inhriatsak reng lovin inngaihdam tawn a pawi mawh hle a ni." Pa Zirsanga'n a tih chuan ka rilrem zâwng tak a ni a, kan inngeih loh hian tumahin an tuar lo tih pawh ka hre ve vek.

Rafaela'n thu sawina hun a nei ve ta a, ka rin loh deuh a sawi ta tlat mai.

"Pathianin a rawngbâwl tura min thlang hi ka lawm a, tlânchhiat tumna rilru ka pu deuh kha a ni a, ka ngam ngang lo a ni e, Pathian rawngbawl aia thlan tur ka nei lo a, khawvelah tlân dawn tak tak ila ka ngam chuang lo; mualphona leh zahnain min umzui zel tho tih ka hrechianga chuvangin tuna ka kawng thlan, a ṭha lam zâwk hi amah rinchhanin ka thlang ta a ni." Zawi fiah taka tiin ka nu leh pa lam a hawi a.

"Ka rilru kam em em tu sawi loh theih loh chu, Zosanga leh u Duati chungchâng hi a ni. Inrem tih chuan man leh mual te inhlan fel vel ve ila, hetia awm reng hi a ṭha lo mai ni lovin nu leh pa mualphona a ni bawk. Anmahni awm hrang anni lo a, an chêngdun reng tho bawk nen Pathian duh zâwng niin ka hre lo a, inneih ṭhata inkutsuih pawh a ṭhat rualin tun dinhmunah chuan a rem teh ṭeuh si lo a, Pathian zarah nau te han nei fel se inkutsuih chu a la theih reng tho. Tuna pawimawh hmasa ber chu man leh mual inhlan fel hi a ni," ati ta dap dap mai le.

Ka nu leh pa, pa Zirsanga te nupa ka va en a, ṭha anti nge ti lo an hmêlah a lang chuang miah lova ngun takin Rafaela thu sawi chu an ngaithla nimaiin ka hria.

"Ka kal hma ngei, zaninah pawh hian a theih lohna chhan tur a awmin ka hre lo a, zanriah kîl zawh lamah pawh hun a la awm reng mai, pa Fak, eng nge in ngaih dan?" Tiin ka pa a zâwt a, min rawn en deuh vekin ka hria, a hmaa kan boruak hretu vek kha anni a, kei pawhin chhungte rem tihna leh hriatpuinaa Duati enkawl hi ka duh ber a ni ve tho.

"Nangni lamin rem intih chuan keini pawh kan rem e, " awlsam zeta ka pa chhânna avang chuan ka hawihai ṭep.

"Keini pawhin rem kan ti e, Duati hi kan fa û ber a ni a, mawihnai takin pasal nei se tih hi kan duh dan a ni; mahse, ti hi anni zo tawh a, eng pawh ni se man inhlan fel hi a ṭha ber, mi hrang kan ni chuang lo a, tuna awmsa te lo hi chu midang koh belh tur kan nei chuang hleinem, Rafaela duhna hi tih hlawhtlin ngei a ṭha e." Pa Zirsanga'n ati ve bawk.

Chumi hnu chuan ka pa'n ka nau a be ru a, Lawmsanga a chhuak nalh. Rinsangpuii amahin a ṭhu a, nuam atih hmel vak loh.

"Man eitu tih vel kha a ngai hran lo a nia, nakinah muangmarin kan la buatsaih dawn nia, a hminga man inhlan fel phawt hi a ṭha," nu Mafelin a ti ve bawk a, an nui deuh hak.

Mizo dan pangngai anga man eitu tih vel kha ṭûl anti hran lo a ni ang e. Bâkah keini chhungkaw hnih bâk chutianga pawh leh nêl em em kan nei hran lo a, nu Mafeli thawhpui leh ka nu thawhpui te, ṭhian ṭha pangngai kan tih ang chi ho deuh vek kha a ni a, Rafaela thluak a ṭha khawp mai.

Lunglei lamah erawh chuan chhungte kan nei nual ve ve a, an sawi angin nau neih zawh lama insuih ṭhat kha a ṭha zâwk mah mai thei.

Ka huphurh ang aiin thil a kal tluang a, Duati pawhin a theihna chin chinah min ngaihsakin ka tâna hmuh hrehawmin a awm bík lo. Kan inrem lohna leh innghirnghona a dah ṭha rih te pawh a ni mah na.

Diktei a khawngaihthlâk ang reng, kum li zet mai Rafaela'n a awm bo san dawn a ni a, a kârah lo haw zeuh zeuhna hun awm tho mah se huphurhawm tak tur a ni. Ka rin aiin a puitling a, Rafaela pawh a zah thiam viau, Duati leh Diktei'n Rafaela thawmhnaw ken tur an siam a, puitlingho an titi mam mam a, Rinsangpuii'n phone a kheuh ngar ngar thung.

Kei leh Valpuia kan titi ve bawk a, kei aia û daih ni mah se min rualpui kawm bawrh bawrh a, a fel roh riau.

"Saitei awm ve se a ṭhat nen," a tih chuan, "Ani pawh a zo ve ṭêp alawm, lungngai lutuk lo la.." ka tih chuan a nui suk suk duh chauh.

An kum inthlau mah se Saitei tân Valpuia tluk an awm lovang, innghahna tlâk mipa khâ a ni miau a, kei ngei pawh hian ka tluk teuh lo. Dawhtheih kawngah te leh ruihtheih thil chungchângah hrim hrim pawh a fihlim tih a hriat ngawih ngawih a, kan Lalsaii hian a tisual miahin ka ring lo bawk.

Lawmsanga a rawn lêt leh chuan ka pa hnenah envelope a pe a, eng tak chu ni ang maw? Ka nupui man tur hi an lo dah ṭha sa tihna em ni ang?

Zanriah tui hnai tak kan ei a, "Zosang, i lo kal duh ka rin loh avangin ka sâwm duh lo che a nih kha," Duati'n ati sap a.

"Nia, duh lo mai thei, khatiang lam kha chu dah ṭha tawh rih ang aw," ka ti a.

'Kan inngeih ta viau e' tihna ni lovin a hma ai chuan kan boruak a ziaawm ta. Lawmsanga te nupa pawh an ṭawng bawrh bawrh a, an boruak a ṭha deuh tawh a ni mai thei.

Rafaela leh Diktei chu inngai tih hriat deuh hian eng emaw an sawi sap sap a, kei ni ila kum li chhung ka nghâk peih lo mai thei. Chu ai chuan inṭhen ka rawt hialin a nia ka rin.Hus! Keimah Zosanga hian.

Zanriah kan eikham a, nichina nupa ka hriat ve loh te kha, Rafaela te kohhran Chairman leh Secretary te nupa an lo ni a, Rafaela te nen hian Biak in hranga lâwi kan nih avangin atu te mah ka hre vak lo. Bâkah ka inkhâwm khât ve lulai bawk si a.

Anni hriatpuina thlap khan Duati man hlanna hun kan hmang ta a. An kohhran Chairman pu Remsanga a ṭawngṭai nghe nghe.

"Kohhranin nupa pawmpuina certificate a hlan te hi a hlu a, a pawimawh bawk, ngaihthah tur a ni miah lo a nia," tia a sawi chuan ka rilrem zawng tak a ni.

Man hlanna felfai leh awlsam tak a ni. Duati a lâi deuh ṭût. A upa ber ni si hian a heti leh tlat zel.

"Zosang, nangni tân pawh a hranpaa Bawiha rawn thlah kha a buaithlâk deuh tâkah riak ve mai ula," nu Mafelin atih chuan ka zak deuh. Em em a na.

Ka nu leh pa be tui tam lo mah ila a hmaa ka huat tlatna rilru ang kha chu ka pu tawh bîk lova,"Mate, nakinah remchangah chaw rawn ei rawh u aw," tia ka nu min sâwmna chu 'Aw le' tiin ka chhân ve tâk kha.

Thisen zawm ni ta na na na chu inhuat reng theih ni bik hek suh, 'in chu e kha' luam lo mah ila kan boruak a ṭha thawkhat e. Mahse, a hmaa ka rilru ang tho, an thlazar hnuaia awm tumna erawh ka la nei chuang lo.

Tunah chuan thawpik a kiang ta. Kâr hmasa lam kha chuan kan inṭhen mai ka ring tawh kha a nia, man inhlan Duati'n a duh ve danah inṭhen a duh bîk lo tih ka hriatna hian min tilâwm a, ka nui ru suk suk reng mai.

Ka nau te nupa an haw hmasa a, "Duati, kan nautê tur kha lo duat la.." Lawmsanga'n atih zauh chuan a chhan hre lo mah ila ka ner ru sawk. Hemi te pahnih hian ka hriat lohvin ruahmanna an nei em maw ni? A lo nih vaih chuan an nuih a za miah lo ang.

Ka nu leh pa te an la awm a, Rafaela pawh a insiam zo thawkhat a ni ang, Diktei nen room aṭangin an rawn chhuak dun a, ka hmu puitling sawt.

A taksa inkhaithli thlurh leh a pian hmang dik zuih te hi hmeichhe tam tak tân chuan hnar phal chi ninghal lo chuan, a lu meh dan common lo zet erawh tam tak tân chuan helh awm a ni. Mahse, a inhmeh tih ka hria a, Diktei pawhin atîr lam khân a sawisel ve ngei a; mahse, tunah chuan a ṭha en vel ta mai mai niin ka hria.

Pulpit-a a ding tur angin ka suangtuah chhin a, ka nui hawk.

"Zosang, min nuih suh aw," ka ṭhutna bulah a rawn ding a, a nuih aza ve tho tih a hmêlah alang reng. "I Kalvari deuh ruihin ka hria," ka tih chuan, "Nâwi siah, puitling ve deuh teh," tiin a kiai suk.

Hmanni-a pawisa ka va dah kîr laia a thinrim duh miah lo te kha a lo hetih vang a nih dawn hi. Pathian thu sawi tlawr duah pawh a ṭhat rualin a taka nunpuia chêt chhuahpuitute nunah entawn tur a awm zâwk tih hi chu ka hre ve.

Mahni mûm mûma kan rík laih laih lai chuan tlangval la naupan hmel tak hi a rawn lût hlawl a, kan lo ṭhut deuh ṭhap avangin a tîm deuh a ni ang, kohhran chairman pu Remsanga chu a pan a, eng emaw a hrilh hnu-ah a chhuak leh ta a.

A sawi pawh kan hre pha chiah lo.

Thingpui hâng a in a, a no dah pah hian, "Zira, kan ṭînsan mai teh ang che u, kha ṭhenawm te'n min lo ko bawk si a," tiin pu Remsanga chu a ding hluai a.

"A va pawimawh awm ve, eng thil nge ni ta, kan hriat ve chi a ni em?" Nu Mafelin a zâwt a.

"Á, Hmanni deuh khan Ramtei'n fapa a nei a, an nupa inkâr boruak chu inhriat tho ka ring, Famkima'n kut a thlâk nasa deuh a, nizan pawh an thâwm a ṭha khawp mai; mahse, min koh lohva lo va inrawlh kha ka duh chiah lo a, an fapa kaw ṭha lo leh luakin a bei a ni awm e, Famkima a rui si a, damdawi inah kalpui an duh a, kan taxi hman min rawn dil a nih kha, kan lo keng daih si a.." ati deuh duah a.

"A va zia lo ṭhin ve maw le, kan sâwmna min ngaih pawimawhsaka kan lawm lutuk.." pa Zirsanga nen Veranda thleng an va thlah ta a.

Ramthansangi chanchin ka hriat lohna a rei ta khawp mai.

Rafaela'n an thu sawi kha a hre ve vek a, a rilru engtin tak awm ang maw?

Nupuia a lo nei ta lo te kha a lawmawm zawk, a hun laiin zahthlâk mah se tunah chuan ani a ngaihtuahawm der si lo a, Ramthansangi aia ṭha leh fel Diktei a la nei zui bawk a, Rafaela zawng ala nihlawh chho zel dawn a nih ber hi.

Ka nu leh pa'n Ramluna ka in sak chungchâng te min zâwt a, ka chhunzawm tih an lo hre vek chu niin. A langah min ngaihsakin min ngaihven lo mah se kan thil tih engkim an hre vek tih alang7 reng. "Hlawh fa an indaih loh deuh leh workshop-a training mi pangnga vel khi chu a pawh pên theih ang," ka pain a ti a, ka 'umn e' liam ve mai mai.

Dâr sawmpakhat velah min ṭînsan ta hlawm a, Diktei thlahin Rafaela a kal a, keini nupa pawh Duati room hluiah khân mu turin kan lût ve ta a.

"Chhuatah i mu dawn nge, Sofa-ah zawk?" Duatmisualin a sual chhuah leh dawn e.

"I bulah khan ka mu ang, i man kan pe zo chauh alawm le," nui ruh ruh chunga ka chhân chuan a nui ve tawp. Min fiam mai mai tih ka hre chhuak chawpchilh bawk.

Feet li khum a ni a, ani râi dul puar tawh nen chuan kan chêp deuh mai thei. Mahse, Duati kuah chunga mut ka thlâkhlelh êm avangin ka sawi buai duh eih lo.

"Engtin nge kan inah ka kal tih i hriat?" Khumah kan mu tawh a, a sîra mut a chuh leh tlat tawh.

"In in lovah kalna tur i nei hleinem, Lunglei angin ṭhian i ngah lo tih ka hria alawm,"

"Naa, i dawkeh a nih chu, tu emaw hrilhtu i nei leh tho ang, Hlimi tih vel.." ati sap a.

'Hlimin min hrilh' tia sawi ka tum teuh lo, a thinchhe reuh si a, a ter leh at mai ang.

"Ka hre ve tawp. Mahse, Rafaela chungchâng eng mah min hrilh lo hi chu i ti mak ve khawp mai," tiin a pumah bân ka nghat a.

"Hrilh theih turin i awm hleinem, vawikhat pawh zû han in leh vaih teh aw, i châk lo nasa ang," tia min vau chuan ka nui huk.

"Ka in nachhan ka sawi tawh kha," ti ringawtin ka chhâng.

"Hlimpuii pawh ngaihzawn der kher a ṭûl tawh lo a nia, buaina a tam mai mai, kan inkâr ṭhat i duh chuan tih awm leh awm loh hre ve la, zêp neih pawh chîng tawh suh," ti lehin chiang tak hian min en a, a ti mai mai lo tih a hmêl tak rânah chuan a lang reng.

Chhân leh ka tum lai takin a pum a rawn che dat dat a, bân ka lasawn rang ngei mai!

"Duati...?" zawhna mitmeng nen ka melh a.

"An harh thawt thawt a nia, mut hunah te hi chuan mut ve mai mai awm tak." A nui chhuak hak hak a.

"A na lo em ni, i ṭha em?"

"Na lo e, an dam ṭha tihna a nih kha, mahse, a châng chuan a na ve lek lek ṭhin, an pahniha an ṭanrual chuan," a ti leh mai a.

Chiang taka ka vawikhat hriatna a nih vangin mak ka ti lo thei lo.

"Tumah i pum khawih tîr tawh miah suh, Lawmsanga pawh ni se," ka ti nghut a, hmanni khan nautê a chêt laiin a khawih tih ka la hre ve tlat.

"I awm ṭhat duh loh chuan ka la khawihtir leh mai thei a ni," ala ti zui a.

Chumi hnu chuan inkuah chialin kan mu dun ta a, nupa nun hmanpui ka châk kher mai. Mahse, ka inthlahrung ru deuh a, kan ina kan lêt leh hunah âm taka chêtpui ngei ka tum ruh tlat.

(RAFAELA)

Tunah chuan Diktei ka kalsan tak tak dawn ta. Ka huphurh ve reng mai, an inah rei vak lo ka ṭhut hnuin ka lêtsan ta kha a ni a, naktuk ka kal dawn tak takah chauh kan inhmu tawh dawn si a, uar leh duhthawh takin ka fâwp vang vang a, ani pawhin mittui tling pam chung hian, "Rafael, kum li chu a rei mah mah a ni tiraw?" A ti sap a.

"Mihring lam aṭanga chhût chuan a rei alawm; mahse, lungngai mah ta che, kan dam ṭhat te chuan hun a kal chak ê," tiin ka thlamuan ve a, dik taka sawi te chuan rei ka ti lutuk tlat, kum khat te hi chu a ral ve mai a, kum li êm êm chu a rei ve bawk êm a ni.

A nu leh pa an lawma ka thil tumah pakhat mah sawiselna annei lo ringawt pawh hi Pathian hnathawh a ni ngei ang. Sawiselin 'a ṭûl lo' ti ta tlat se ka tân a nuam lutuk lo mai thei. Mahse, min fuihna thu ṭha tak tak ka dawng zawk kha a ni a, ka lawm takzet.

Diktei'n min kuah vang vang a, "Ka ring che a, i tân rinawm takin ka lo awm reng ang," atih chuan kûn hniamin a hmuiah ka fâwp leh zauh a, "Kei pawhin ka ring che, chanchin inhrilh hriat reng te a harsa mai thei a nia," tiin ka hrilh lâwk a.

A tîr te kha chuan ka huphurh lutuk lo asin le, a hun a lo thlen meuh chuan ka hreh ru ngawih ngawih a; mahse, ka dinna ngaiah erawh mipa ka nih angin ka ding nghet tlat ang.

"Pro Pastor Rafael Remruattluanga tih emaw Rev.Rafael Remruattluanga, an tih hunah che ka chhuang dawn che sia," nui ar ar chunga atih chuan ka nuih aza kher mai. A ni lo deuh hû in ka hria.

"I ho lutuk, chutiang sawi suh.." ka ti hluk a. A nui nasa zual sauh. Ka Lalrindiki têreuh hi chuan min va tihlim si êm.

Ka rilru kam tu ber u Duati te chungchâng a fel thawkhat tawh a, ka thawveng huai. Saitei ai chuan u Duati hi ka ngaina zawk a, ani pawhin min ngaihsak em em bawk. Zosanga kawm mumala ka kâwm hman ta lo erawh pawi ka ti deuh. Ani hi a butut ve a, zû te a lo in leh mai mai ang tih a hlauhawm.

Rinsangpuii leh u Duati inkâr boruak a ṭha vak lo tih Lawmsanga'n a sawi a, hmeichhe thu hlaah ngaihsakin ka ngaihven lutuk lo a; mahse, zanin an awm dan aṭang kha chuan ṭha lo satliah a ni hauh lo tih ka man thiam.

Muhil thei lovin ka inlet sek a, ka helhhawlh zawk em maw ni?

(Thla thum hnu-ah)

Duati

Nunphung pangngai zawhin kan kal chho ve bek bek a, ka nau neih pawh a hnai tawh kher mai.

Zosanga quarter-ah kan la awm ve reng a, a insak pawh a zualpui an zo tawh a, a chhung plaster an ṭan leh mêk, ka nu leh pain a khât tâwkin min rawn ngaihven ve reng a, an khua a har tih ka hria.

Saitei lo chhuah nân thla li ala awm a, Rafaela kal hnuah vawi li vel chu kan riak phei ve a; mahse, Zosanga'n ka nau neih hma chuan 'riah rih loh a ṭha' a tih vangin kan phei khât ta khawp mai.

Nu Muanpuii pawhin min ngaihsak hle a, naute kawr leh ei tur, thei lam pang min pe uar viau.

Kâr leh hi hospital ka luh hun a ni tawh a, keimah ka inzo lo bawk nen ka pum a puar lianin ka ke a vûng nasa bawk si a, doctor'n min admit hma atum ta ringawt kha a nia. Zahthlak khawpin ka pum a puar maw le. Nulian chi ka lo ni hlauh a, chuti ni lo phei se chuan ka chhe ngawtin ka ring.

Lawmsanga te nupa an boruak a ṭha hleithei lo a, Rinsangpuii pawh kârhnih dâwn Lungleiah a châm tawh a, Lawmsanga'n "Ka ko dawn rih lo, a duh chen chen han awm teh se," ati mauh mai.

Hlimpuii leh Zosanga hmuh mawh awmin an awm tawh lo a, vawiin hian zahnih riak lekin Zosanga a zin dawn a, a hna vang ni lo se chuan kal lo turin ka ti ngei ang.

"I nu te inah emaw kan inah pawh, i duh zawk zawknaah i lo awm rih mai dawn nia," ati a. Khatia man kan inhlan fel aṭang khan Zosanga rilru a dang ta deuh nge an inah chaw vawi hnih kan ei ve a, riah êm chu kan riak ta lo.

Rinsangpuii awm laiin vawikhat kan eia a pheihnuah vawikhat dang kan ei leh.

"Kan chungah hi chuan a sual pawh a ni lo, min ngaihsak em em reng tho a, nau a pâi har lutuk hi ni berin ka hria, amah inringhlelin vawi thum lai a incheck up tawh a, Matea hian incheck a duh tlat lo a, hei hi a thinrim chhan niin ka hria. Amah Spi hi chu a ṭha vek niawm tak a ni a; anpa zâwk hi a mawh chhiat deuh a, Matea pawh a thiam chuang lo." Tia nu Muanpuiin a sawi chuan Rinsangpuii rilru tur ka hrethiam ta deuh uar.

Amah biak ve hrim hrim ṭhain ka hre ta a. A hma aṭang tawha nula fel ni ṭhin kha pasal a neih hnua a danglam chak lutuk hi thil mak tak a ni.

Diktei lunglêng pawh a rawn lang ve zauh zauh ṭhin a, Rafaela a ngaih thu leh ka nau neih hunah min riahpui a tum thu a sawi a, a fel reuh khawp mai.

Kohhran zaipawlah a taima pâwl a ni a, kan kohhrana an rawn zai ṭumin ka nu te a tlawh ve ngei. Anni pawhin an ngainaa fel antih thu an sawi ve fo mai. Inrinni apiangin Rafaelan min rawn be ṭhin a, a hmasa berah Pathian a pawimawh tih a sawi tel ngei ngei.

"U Duat, naute hming pakhat zawk kha ka phuah tur a nih kha aw," ala rawn ti ve ṭâng ṭâng. A awm loh chuan khua a har ve ruih mai.

"Duati, ka thawmhnaw i siam tawh em?" Zosanga office bâng a rawn lut a, zanriah ei khama chhuak tur an ni.

"Siam ve nelnual e, towel ka la dah lo," ka ti a.

A bag lian vak lo ka siamsa chu a en dik tê tê hnu-ah, "Kan inah nge i phei ang, in inah.." tiin min zâwt a, ngun taka ka ngaihtuah hnuah an ina ka phei tur thu ka hrilh ta a, a lâwm hmel viau.

Lawmsanga titi pui ka duh vang a ni pakhat.

Bâkak ka pasal te in a ni a, kan boruak a ṭha lo pawh a ni tawh lo a, kan in lama kal ai chuan a mâwi zawk reng reng.

Zanriah kan ei laiin, tute nen nge an kal dawn tih satliah deuh hian ka zâwt a, Hlimi hming a sawi tel ve chuan ka tui vak lo. Amah Zosanga'n va duhin ngaihsak lo mah se Hlimi'n a duh zia ka hre ve kar si a, ka rilru chu a nuam zân lo deuh.

"Fimkhur hle ang che, sawisep kâi te khân awm lo la, zû pawh in ṭhak suh ang che," tiin ka chah thlap.

"In lo vang, bâkah Hlimi te chu motor hranah alawm an kal dawn, Ruatdika nen anni dawn a, min ngaihtuah lutuk a nih kha.."

"Ngaihtuah e, i lerh êm alawm," ka'n ti hrâm a, a nui ṭha duh vak lo.

"Kan inkawp hnu leh kan inneih hnu hian vawikhat pawh ka rinawm loh san lo che," ati nghut.

"A ṭhat chu, in inah chuan min dah la, Lawmsanga inhruai tîr leh pawh a buaithlâk mai mai," ka ti a.

"Ka nau mah ni se Matea bulah awm dan chin tâwk hria la, a nupui chungchâng eng mah sawi pui suh ang che," tiin min chah.

Min ringhlel anga lang chiah si lo hian a nau nena kan inbiak leh kan inzui hi a hlau ru deuh tlata hriatna ka nei.

"Chanchin min rawn hrilh nachâng te kha hria la, eng emaw thutah biak theih loh te khân i awm ang e, ka chin a hriat loh êm hi.." tiin kan chaw eina vel ka seng fel a, ani erawh room-ah insiam turin a lût ta a.

Zosanga hi rinaiin a che fel phian a, ka rit ta deuh bawk nen in chhung pawh aman a enkawl fai deuh vek. Kan inrem leh hnu hian min duat hluau angin lang lo mah se min ngaihtuah em em a, zanah pawh ka harh hi chuan a tho ve nghal zat zel!

"Indím hle rawh aw, kan ina i phei pawhin chêt te kha tum ve lo la, indim i ngaih êm kha," tiin min chah thlap.

In kan chhuahsan dawnah min kuah vang vang a, "Lo rinawm la, min lo ngai em em bawk ang che," a sawi zawh rualin min fâwp vang vang a, ka ngai nghâl ringawt.

An in panin kan inphur phei ta a, ka nu te chanchin ka hrilh ve bawk a, Zosanga te ina ka riah tur thu ka sawi chuan, "A pawi reng reng lo, zanah i pa nen lokal kan tum dawn nia, i pa Faka hnenah khan lo hrilh la, 'ka pain wrench chu ka lo keng phei mai ang ati' lo ti ang che," a ti leh duah tawh.

Zosanga nu leh pa koh hi ka zak tlat a, a hmain 'nu Muanpui, Pa Fak' tiin ka lo ko ṭhang tawh si a, chuti maia 'ka nu, ka pa' han tih kha ka harsat a ni ber mai.

Zosanga pawhin ka nu leh pa koh danah a buai deuh a, a mâwl biak zauh zauh tih ka hre ru reng, kan nêp dun tawp. Mahse, eng mah hre hmêl an pu lo zawk a..

An in kan thleng ta a, muang khawtlâi lovin a chhuak zui ta a, "Kan chhuah tlâi lutuk chuan a chi dawn loh tlat," tiin a kal ta kha a ni a.

A room hluiah khan ka riak dawn a, kan inkawp tirh lai ka hrechhuak vang vang.

Zanriah eisaa phei ka nih vangin an chaw ei laiin Zosanga room hlui tihfai tumin hmunphiah leh chhuat nawhna ka la, "Duati, kan nulain a tifai vek tawh tikhan lo awm mai mai rawh," tiin nu Muanpuiin min rawh hrilh a, ka riah phei tur thu nichin deuh lawkah kan sawi kha a ni a, an che rang hle mai.

Lawmsanga Workshop aṭangin a lo la haw ve lo a, chaw an eisan a, "Tunlai chu chaw eiah kan nghâk ngai lo, annu a awm si lova a lo haw hma ngai lo a," tiin pa Faka'n min hrilh.

Ka nu leh pa an lo lên phei tur thu leh an thil min chah te kha ka sawi ve a, tun hmain tlângnél viau mah ila hetia famo anga ka awm hian ka inthlahrung ru dâk a, an sual tihna ni lovin an thurûk, Zosanga chungchang sawi chhuaktu ka nih vâng khan inthiam lohna lian tak ka nei. Mahse, anni chuan hre awm angin an awm duh chuang lo a, an tân chuan Duati, an fanu anga an en ṭhin ang tho khân min en tih ka hria. Mi â anni tlat lo a.

Ka nu leh pa an lo phei chuan Rinsangpuii koh chungchâng an rêl ta a, eng mah sawi ve lo mah ila an sawi ka hre ve vek.

Nu Muanpuiin, "Keimahni thiam lohna chen pawh a awm vein ka hria, Matea pawh test nei turin kan tir lui lo ve bawk a, Lawngtlai lamah kan awm san fo si a, ani fa nei bawk si lo leh hna thawh tur nei bawk si lo chu a khua a har ṭhin ngawtin ka ring, eng emaw a thawh tur te hi ngaihtuah sak ve ila, Pheikhawk dawr emaw tal hawnsak ve ila.." a ti ta a.

"Nia, anpa ni se nitin a chhuak a, Aizawl lam mi a lo ni lo bawk nen hmelhriat kawm tur leh biak tur a nei bawk si lo a, Lunglei lamah thla hnih khat an va awm ve ta zâwk se," Pa Faka'n a ti ve bawk a.

Rinsangpuii haw phei hi an thinrim ka rin teh reng nen chutiang zâwngin an ngaihtuah miah lo tih ka hriat chuan an rilru ṭhatzia ka hriat belh sauh.

Lawmsanga a lo haw ve ta bawk a, an thu rêl dan te sawiin an hrilh a, chuta Lawmsanga thu sawi chuan ka beng a verh hle.

"Ka intest vek tawh alawm, ka vannei fê a nih loh chuan fâ ka nei thei kher lo mai thei, Pathian thu thu a nih rualin doctor te sawi dan a ni a, kha ka test report kha Rspi ka hrilh ngam lo a, ka la intest lo tiin ka sawi zel a; mahse, hmanni lawk khan a lo hmu chhuak a, kei mah min zâwt lovin doctor-a lo va zâwt a, ka nupui a nih vangin leh a hma pawha ka kalpui fo ṭhin avang khan engkim an lo hrilh a, a rilru a nâ a nih kha.." tiin a sawi ta a.

A sawi zâwng pawhin a rilru a na hle tih ka hrethei mai. Atu ve ve mah an demawm loh a, fa neih chungchangah hian kan thu loh zia alang chiang hle in ka hre bawk.

"Eng mah sawi lova in zêp chu a ṭha lo hle mai, nu leh pa hnenah engkim sawi vek ni ula in buai inbuai lo ang, Phai lamah te pawh tih dan a awm mai thei a.." nu Muanpuiin a ti a.

"Eng pawh ni se, naktukah i pa leh Zirsanga hruai turin va kal rawh se, hetianga awm mai mai tur a ni lo. Nang pawh i thiam miah loh a nia, i nupui, Pathian hmaa thu i tiampui lakah zêp i nei a, hetiang tur a ni ngai lo," a tih zawm leh a.

Lawmsanga'n eng mah a sawi ve lo. Chaw a ei sawk sawk a, "Duati, lokal rawh, thil ka entir ang che," tiin a room lamah kan inzui phei ta a.

Ka pa leh pa Faka erawh Rinsangpuii ko turin naktukah an chhuak phei dawn a, ka nu pawh a kal ve thut mai thei bawk.

Lawmsanga te nupa room chu a zau ṭha hek hawk hle a, Rinsangpuii a che fel tih alang reng, hmuh mawh awm leh ṭawp eng mah awm lovin a fâi vang hlawm a, an furnature pawh a hnûm ṭha khawp mai.

Rinsangpuii diary wardrobe aṭangin Lawmsanga'n a rawn phawrh a, "A rûkin ka chhiar tîr ang che. I chanchin pawh a awm nual a nia," tiin diary chu min pe a, eng ka chanchin nge inziak ang?

Amah nen inkâwma innel bawrh bawrh kan ni bawk si lo a, ka chungchâng han ziah lanna tur ka ngaihtuah ngial pawhin ka hre lo.

Lawmsanga nen khumah kan ṭhu dun a, diary chhiar tuma ka keu lai tak chuan Zosanga'n min lo call leh rih.

"Duatnu..Keifâng kan thleng tawh aw, i mu tawh em?" A rawn ti a.

Ka mut loh thu leh ka nu leh pa an lo lên thu ka sawi a, Lawmsanga room-ah ka awm tih ka sawi lang lo. Râlkhat aṭangin a rawn thinrim leh ringawt palh ang.

"A nih chu, ka naute duat pahnih kha min lo biak la," a sawi zawh rualin a nui hawk a, avan chhe reuh tak.

Kan inbiak zawh hnu-ah Lawmsanga'n min lo en reng chu ka hmu ta a.

"Eng nge, khati vaka min lo en a?" Ka tih chuan, "Ka u hi a vannei ngawt mai, Rspi sawi dan ang deuhvin engkimah Zosanga leh Duati tih hi a ni vek a, keini nupa hi chu kan lâng lap mai," a ti ta a.

A sawi dan ka man thiam chiah loh avangin ka ngawi reng ringawt a.Diary chu ka en ta daih a.

Eng tak inziak ang maw! Ka hming lanna lai chauh chhiar tumin Lawmsanga'n a keusa chu ka bih ve ta a...

B+>[BeckirafARenthleI]<+®®

THE RAPSAGYAN FAMILY

Becky Rafa Renthlei

Chapter-36

[Duatbiki]

Rinsangpuii diary-a ka hming inziahna lai chu ka chhiar ta a.

"Lawmsanga nen kan inneihna pawh thla thum a tling ve ta. A û Zosanga vangin hlim ni hmêl kan hmu khât khawp mai. Kan inneih aṭanga ni thum emaw lekah an chhungkaw ṭhian fanu Duatbiki a rawn lang ta a. Hmeichhe fing fel tak a ni; mahse, Lawmsanga te chhungkaw thu rûk a sawi chhuah vangin ka pasala nu leh pa an lâwm lo hle a, kan chhungkaw boruak a inthlâk dawrh.

A hmêl ka hmu fo a, Lungleia a awm lai pawhin ka râlkhat hmêl hriat ve tho. He inah ka lâwi nî aṭangin engkimah Duati hming a ri a, kan nupa aiin Zosanga te nupain ngaihsak an hlawh zawk a; ka pasal ngei pawh hian Duati a ngaihsakin remchâng a hmuh apiangin a be ziah.

Pathian hnenah vawi tam ṭawngṭaiin amah thîkna rilru ka put lohna turin ka dîl ṭhin. Ka unaunu, ka mopui ni mai tur a ni a, bâkah he in chhungkhurah hian ani chu mikhual a ni hek lo, Mahse, zan khat whatsaap message ka dawn chuan min ti nâ hle mai.

Duati fa pâi hi Zosanga fa ni lovin Lawmsanga fâ a ni." Number lâwng a ni a, ka call chhin a, a ring ral ṭhak.

Ka number a neih thlap danah dâwt mai mai a nih ka ring ta lo. Kan pa hian Duati a be fo tih ka hre tlat a ni.

Zosanga hnenah sawi tumin vawi tam rilru ka siama mahse, ka ngam ngang lo a ni e.

Duati naupai chungchang kan hriat hnu lawkah Champhaiah a chho ta a; mahse, Zosanga a puh ta daih! Mak ka tiin tenawm ka ti a, Lawmsanga leh Duati kum hi a inthlau deuh a, chuvang chuan Zosanga nen an inkawp hnuhnung zawk bawk nen a puh ta a nih ka ring."

*

Ka chhiar zawm duh tawh lo. Ka thaw chhuak halh a, dâwt muhlûm chiang lutuk anih vángin sawi ve tur pawh ka hre lo.

Engtik lai mahin Lawmsanga nen mipat hmeichhiatna kan hmang dun lo mai ni lovin khum khatah pawh kan la mu dun chhin lo. Rinsangpuii hrilhtu hi ka hriat chhuah ngei ngei a ngai.

Zosanga'n hre phei se chuan min that duh hialin ania ka rin.

"Lawmsang, heng zawng zawng hi i hriat vek chuan eng ati nge i hrilh fiah mai loh?" Khûr dar darin ka zâwt ta a.

"Nizanah kha diary kha ka chhiar ve chauh alawm, hrilh fiah vak ngaiin ka hre lo, nichina ka sawi tawh ang khan ka test report ah fâ ka nei ve thei lo tih alang vek tawh a, chu chu a hmu vek bawk," a ti sup a, a rilru a nat hmel kher mai.

"Chuti ni ta se eng ati nge a haw phei kher, thu dik a hriat te chuan haw kher a ngai dawn em ni?"

"Min ṭhenna tur remchâng a melh a ni mahna, hmanni-a a haw pawh khan a bialpa hlui nen an inzui leh a, ka mitin ka hmu bawk," zâwi raih hian ati leh a, ka khawngaih lutuk tlat.

"Chu zawng ai chuan Rinsangpuii message thawntu kha kan hriat chhuah a ngai, naktuka a lo haw chuan kei mah ngeiin ka zâwt ang, muthilh tum rawh, engkim a ṭha leh vek mai ang," tiin ka hnêm a.

"Ka nun ram a chau, ka fâ i pâi tih vel dâwt muhlum kha chuan min tihrehawm lem lo, ka dam chhunga fâ ka nei ve thei lo tur hian min ti na zawk," a tukkhumah kut suihin chunglam a melh vang vang a, ka lainat thlâwt.

Chumi hnu chuan eng mah sawi tawh lovin an room ka chhuahsan ta a. Thil kal dan hi ka rin loh lam daih a ni!

Zosanga'n an thlen tawh thu min rawn hrilh a, ka mut chhuak chhuan lamin ka be zui lo.

Rinsangpuii rilru tur ka ngaihtuaha a na dawn ngat ngat hian ka hria. Keini lahin kan lo runluih ve bawk nen ka inthiam lo kher mai. Min haw ngawih ngawih pawh ni se a demawm loh a, Hlimpuii hmanruaa a hmang pawh kha ka dem ta lo.

Kei ni ila, ani ai hian ka nasa zâwk dawn a, kan inchapchar hial tawh ang chu maw le.

Khumah muhil thei lovin ka let kual sek a, atu chuan nge khatiang dâwt chiang lutuk lo hrilh ta ang?

Khawvar dâwnah pa Faka motor start thâwmin min tiharh a, Lungleiah ka pa nen an kal dawn ta tih ka hrethiam mai. Riak lova an lo haw nghal a nih chuan hetah ka la awm dawn a, Rinsangpuii thil sawipuina hun ka nei tihna, a lo haw loh chuan keimah ngeiin ka phone mai ang.

Ka mut hmunah thil tam tak ka ngaihtuah a, Zosanga room ruak ta huai te chu ka melh kual a, chhungkua hlim takin kum tam tak an chêng ho a, tunah famo an nei ṭan dêk dêk a, hlimna tur aiin lungngaihna leh zahna an tuar tam tawh zâwk.

Zosanga nen an rilru kan tina phawt a, tunah Lawmsangzela te nupa anni leh a, sum leh pâi hmansen loh awm mah se chhungkua a hlim loh chuan eng tihna mah a ni lo tih ka hre thiam ve phâk.

Pa Faka a chhuak tawh a, ka pa a sâwm phei ang a, Rinsangpuii hi a lo haw duh ang em? An inah ani pawh a nuamsa a, fanu mal ve tho a ni. A rilrua khatiang tuh tu kha ka hriat chhuah hun hunah a châk lo khawp ang. Rilru chhe lutuk mai.

Nilêngin nu Muanpuii nen naute thil tur kan buaipui a, amah ka ngaina sa bawk a, nuam ka ti. In hrang chang lova hetia awm dial dial te hi ka thlahlel ve ta riau, nakinah Zosanga ka la sawipui ve ang.

"Duati, nau i neih zawh lamah pawh helamah rawn awm rih ula, phír a nih phei chuan in nupa ringawta enkawl chi a ni dawn miah lo a nia, Bawiha lo sawipui chhin teh," a ti a.

"Nia, ka lo ngaihtuah ve lâi tak, ka nu khân helamah rawn awm rawh u ati a; mahse, Zosanga'n nuam a ti lo ang, mi mitmei venga awm hi a hreh ngar ngar mai si a.." nui chungin ka ti ve a.

"Bawiha tezawng, a naupan lai ata tawh keh thei dawma kan dawm kha a ni a, ka rin aiin a puitling zawk asin. Spi chu a lo haw duh êm ang chu maw, ka khawngaih a nia, a û zâwk i nih angin hetah awm dun ula eizawnna mumal deuh te ngaihtuah sak ta ila.." a ti leh bawrh bawrh a, keimah tak hi chuan ka châk reng.

An nulain zo chhang a kang a, min en leh hrek hrek zel. A hmaa an awmpui hmasa kha a haw tawh a, tuna mi hi chu Zosanga nen Champhai aṭanga kan chhuk tirh khân a lo awm ve chauh a, ka la hrechiang vak lo. Chêr lam sâng deuh a ni a, a hmêl pawh a chhe miah lo.

Lawngtlai ami nu Muanpuiin a rawn hruai phei a ni a, lehkha thiam thei tak a ni a, a nu leh pa accident-a an boral avangin a zirna a chhunzawm thei lo a, nu Muanpuii te in Lawngtlai a mi kha a lo enkawl ṭhin a ni.

"U Duat, Zochhang i ei ve ngam awm si lo a.." tiin Kimi chuan min rawn bia a, "Kimi, a ei tur kha a hran siamsak rawh aw, Zochhang chu ei lo mai rawh se," tiin nu Muanpuiin a hrilh a, min en zawk chung hian, "I râi lian hle mai, ka peih loh zâwng tak," tiin a nui a, a ṭawng dan tê reuh hi ka ngaina lo.

Nizana Lawmsanga a lo haw te khan a be ṭha teh hûrh lutuk a, amah Lawmsanga a fel hlauha engah mah a ngai lo zâwk a.

Dâr khat velah thingpui kan in a, pa Faka'n annu a rawn call a, "Kan lo chhuak ṭêp a nia, Matea kha workshop khâr hma turin hrilh la, annu a lo haw dawn a nia," a rawn ti a.

Rinsangpuii lo haw tur chu ka lo lâwm ve ringawt. Ani erawh chuan min haw mai siah, ka insawi fiah hmâ loh chuan ka ngawi mai mai dawn teuh lo. Mahni fa pâina zêpa mi dang puh tur khawpa hur lah ka ni hek lo. Lawmsanga nen min hmehbel tih ka hriat ringawt pawh hian ka nuih a za.

"Naktukah Bawiha a lo haw chuan hetah zanriah ei nghâl rawh u aw, in lamah pawh nang mah bâk che tur i awm chuang hleinem," tia min sâwm chuan, "Nia, Zosanga'n duh se chu hetah awm ve rih mai ila ṭha tur a nia, office-ah an buai thei si a, insûk fahran pawh ka harsat tawh," ka ti ve nang nang a.

"Rawn haw phawt se ka lo sawipui dawn nia," a ti ta a.

Thingpui te kan in zawh hnuah mu hahdam tura min tih deuh tlat avangin ka mu ta nge nge a, nizan lam ka mu ṭha lo bawk nen ka kâwng leh tâi bâwr vel a na ṭhûm a, pang pawh ka let ṭha thei hleinêm maw le.

(Dârkâr li hnuah)

Ṭawng thâwm ri nak nakin ka mutui lai min kâi harh a, ka sana bun lai ka en chuan zan dâr ruk a lo ri tawh! Ka mu rei kher mai.

Bathroom-a ka intleuh zuai zuai hnu-in ka chhuak phei ve ta a. Pa Faka te pawh an lo thleng tawh a nih hmel.

"I mu rei hle mai, ka kâi tho duh lo che a nih kha, i pa a haw phei chiah a," tiin nu Muanpuiin min lo bia a, "I phone ri pawh i hre lo a nia, Bawiha'n a lo call che a, i pick thei si lo a, keimah min rawn be ringawt alawm," a ti leh a.

"Zosanga teh sek pawh hi a, thil pawimawh tak tak a sawi leh chuang lo ang," ka ti sap a, "I muthilh thu ka sawi tawh kha, naktuk dar 10 velah an lo chhuak thei chauh dawn a, helamah zanriah ei pawh a remtih kha, aw" a ti leh zung zung a.

Rinsangpuii leh Lawmsanga room aṭangin an rawn chhuak a, "Sp, i ṭha em?" Tia ka biak chuan, "Unm, ṭha nimai," a ti sap.

Zanriah ei hmain pa Faka'n chhung inkhâwmna hun a hmang a, chhungkua inrem taka awm a ṭhat thu leh nupaa insiam tawh hnuah holam mai mai rilru pu lova puitlin zir a ngai tih te a sawi a.

"Matea te nupa pawh, in harsatna te nu leh pa hnenah sawi nachâng hre tawh ula, fâ vanga innei inni lo tih hi hriat a ṭha khawp mai, a nuamah pawh a hrehawmah pawh tia Pathian hmaa thu intiam kha ataka nunpuitu nih tum zawk tur," tia a sawi chuan Rinsangpuii ka va melh a, a mit a khap fak fak.

"Duati nau neih a hun dawn tawh a, Zosanga nen helamah awm rih se, a nu leh pa kuta dah rîkngawt tur a ni lo a, kan chhungkaw member a ni tawh a, buaipui hi kan tih mâkmawh a ni," tiin a sawi tel bawk.

Zanriah kan ei kham a, Rinsangpuii leh nu Muanpuii an titi bawrh bawrh a, Zosanga nen kan inbia a, Rspi lo haw thu ka hrilh chuan, "A bia che a nih loh chuan be duh lêm suh, invên ve kar tur," a ti deuh ngei.

Engtin ka chhâng lêm hlei lo a, Zosanga awm loh laia Rinsangpuii biak erawh ka tum tlat thung. Ka thil hriat duh khâ ka hriat hma chuan ka nun a hahdam thei lo.

Dar riat velah nu Muanpuii an rawn call a, an thawhpuinu Kulikawn outpost a duty a chêt sual thu an rawn hrilh a, pa Faka nen an kal ta a.

Kei leh Kimi, Lawmsanga te nupa Sitting room-ah kan awm a, tun hi Rinsangpuii ka biakna hun remchâng a ni tih ka hriat avangin ka ko hrang ta a.

"Sp, inbe lawk ang hmiang," ka ti a.

"Eng mah sawi dun tur kan nei lo," a ti hmak.

"Kimi, i room-ah lût la, Lawmsang, i duh leh nang pawh awm ve rawh," ka ti hmak. Heta awm zingah hian ka upa ve bera chuti a nih rualin a upa ber nupui ka ni bawk. Kimi a insaseng vat a, min en zak zak.

"Sp, ka nau pâi hi Lawmsanga fâ ni lovin Zosanga fâ a ni, khawi aṭanga i hriat nge ka hre lo a, khatiang dâwt muhlum hrilhtu che number kha ka duh a, ka zawng chhuak ngei bawk ang." Pehhêl kual lovin ka zâwg tlang hmiah a.

"Sawi thar leh ka peih tawh lo, tû fa pawh ni se ka tân danglamna a awm hleinem," tiin kal sawn a tum a.

"I ngaihdan kha a dik lo. Kan naupan lai aṭang tawhin Lawmsanga hi ka duata Rafaela ka en dan nen danglamna a awm lo. Zosanga zâwk erawh hi chuan eng lai mahin û angin min en ngai miah lo thung. Chuvangin tun din hmun hi kan thleng ta rêng a, i pasal hi ngaihzawng enin ka la en ngai lo hrim hrim," tiin ka nui lui hak a.

"A nih chuan eng atan nge in inbiak sek si, Champhaia i awm lai leh Aizawl i rawn thlen thlâk hnuah pawh i be fo tih ka hria a nia, thu dik chu a lo lang chhuak mai ang, hetia sawi thar leh pawh hi ka duh tawh lo." A ti nghat a.

Ka ngaihdan a pêl ve ta.

"En teh ka hrilh ang che, Zosanga leh Lawmsanga hi unau anni. An in hmangaihzia pawh mi pangngai i nih chuan i hre em em ang, Zosanga khatia nu leh pa laka a lungawi loh avang khan an unau an inhaw ve kher lo. In lam chanchin leh kan dam ṭhat leh ṭhat loh te an inhrilh vek ṭhin. Lawmsanga pawhin û anga min en avangin chanchin min rawn hrilh mai chauh a ni, kha message rawn thawntu che kha i sawi loh chuan ka ngawi hlen dawn miah lo a nia, dâwta inpuh hi ka duh lo a, Zosanga fâ ni na na na eng vangin nge Lawmsanga fâah puh ṭâlh in tum. Lawmsanga test report pawh i hmu a ni lawm ni? Tisa thilin vawikhat mah kan la inkâwm lo," ka sawi thui lutuka ka thâw a chhâm dawn alawm maw le.

Chutia Lawmsanga test report chungchâng ka sawi lan tâkah chuan Rinsangpuii a meng khup lap a, inthiam lo hmêl a pu bawk.

"Duati, ka rilru a buai rih.." a ti sap a.

"Buai ang chu, eng mah thu dik hriat tum lova khatia tawrh rîk ngawt tur a ni em ni? I pasal û nupui ka ni a, ka laka lâwm lohna i neih pawh sawia min zâwt ngam tur i ni asin, kha number kha min pe dawn nge dawn lo, Zosanga ka hrilh chuan boruak ṭha lo a chhuak zâwk ang e aw, a lâwm dawn miah lo a nia," ka ti leh a.

Ka pan hnâi hrat bawk.

"Lawmsanga fâ a nih loh chuan a ṭha a nih chu, sawi tur ka nei ve lo," tia kalsawn a tum leh chuan a bânah ka va man a, chu chu duh lovin min nam sawk a, ka lo inring bîk lo nen side table ka pal phei rawk rawk a, chhuatah mawng sawh dawtin ka tlu thla ta a.

"A na lutuk..." ka tih chuan, "Duati, i ṭha em?" Lawmsanga min kaihthawh tumin a che chhuak nghal a, nichin khan eng mah sawi lovin a ngawi reng kha a ni a, chutia ka tlûk chuan Rinsangpuii a ṭê ṭhat bawk.

Thawh tumin ka inbengkâng a, ka khêl a nat êm avangin ka tho mai thei lo.

Rinsangpuii te nupain ka zakah min rawn dawm a, min din chhuahpui ta a. Ka thlan fîm a tla nghal bawrh bawrh. Keimah ka rit tawh a, ka inzo hlawl si lo.

"Duati, ka tihpalh lutuk, ka tih luih a ni lo a nia aw," room-a min hruai thlengin Rinsangpuiin ati mawlh mawlh a, ṭawngkam khat mahin ka chhâng lo. Ka mawng hlâwm a na nghal ut ut.

Khumah min muttir ta a.

"Duati, engtin nge i awm..?" Lawmsanga a mangan hmel hle mai.

"Ka ṭha, ka ṭha a nia va mu tawh rawh u," ka ti a.

Rinsangpuii a khawngaihthlâk zawk. Hrehawm tih hmel deuh hian khum sirah a ding a, a tih luih a ni lo tih ka hriatsak avangin a kutah ka vuan a, "Hrehawm ti mah ta che, ka rit tawh a, ka inzo lo ve hrim hrim alawm," ka ti dam thlap.

Kan thil sawi lai pawh sawi chhunzawm lovin kan ngawi ṭhap a, an nupa inthlahrung hmel chu an khawngaihthlâk zawk.

Ka ziaawm tâk hnu-ah an nupa room panin min lêtsan ta a.

Kei erawh khumah ka mu meng reng.

Nu Muanpuii te lo lêt lai pawhin ka la harh kar a, ka khêl a na hle. Tui lum ip siam tumin ka tho chhuak ta a, zanlai a ni tawh.

Khum thawhsana ka din mar chuan tui a rawn pût ta thut mai le, a tam ngang mai si a, chhuat a huh nghâl zûih a, ka nau neih nân kâr thum lai ala awm a, ka ngaih a ṭha ta lo.

A vawikhat nân nu Muanpuii te chu kovin, "Nu, pa.." ring tâwkin ka áu ta a.

An hre thei lo nge an reh ṭhiap a, Rinsangpuii ka ko leh ta a, chutia ka inbuaipui lai chuan ka pum a rawn nâ a, na satliah hi a ni lo. Ka mawnghlâwm leh khêl te a na kual zut zut nimaiin ka hria, khumah ka ṭhu thla leh hnawk a; ka pum dawmin a aia ring zawk hian, "Nu, lokal teh u.." ka ti leh ta a. Ka áw a lâwi rât mai.

Ka thâwm an hre ta a ni ngei ang, a rual deuh thaw-in ka mutna room-ah an rawn lût a, ka awm danah an hrethiam a ni ang chu, "Faka, Matea ko la motor lo va dah chhuak rawh u," nu Muanpuiin ati nghal a.

"Duati, eng ati teh thut nge?" Tiin ka sam hnawk nuai chu min vial tawm sak a, "Sp, chhuat hi lo hru hul la,"tiin Rinsangpuii chêt ngaihna hre lova ding reng chu a tîr zui nghal a. Kei erawh ka pum dawmin ka kûn leh ṭhin.

Pa Faka'n Car a khalh a, kei leh Rinsangpuii a hnung seat-ah kan ṭhu a, nu Muanpuii leh Lawmsanga kan in luahah kalin naute puan leh kan mamawh tur vel la-in an kal bawk a, "Kan rawn tlân chho ve nghal ang," an tiin ka hria.

Nichin ai kha chuan ka pum nâ pawh a zia ta, ka khêl erawh a la na hle a, kawng rualrem lo laia kan tlân laiin ka ṭhen leh sak sak zel.

(Rinsangpuii)

Ka inthiam loh êm avangin Duati na tuar hmel chu ka melh leh zauh a, tih vak ngaihna ka hre lo. A kutah ka hüm vang vang a, keimah vang vek a ni.

Kan hnungah ka nu leh Lawmsanga an rawn inphur chho a, Durtlâng hospital kan thlen chuan an lo ngaihsak hle.

"Ka rin ai daihin i vei hma, eng mah hlauhthawn tur a awm lo a nia aw," doctor'n a lo tih chuan ka thawveng deuh huai. Mahse, ka inthiam lohna erawh a reh phah chuang lo.

"Sp, kan awm thova in duh chuan haw thla ta mai che u, i nu Mafeli te pawh an lo thleng ṭep ang," ka nu'n ati a, haw ka duh loh thu leh awm ve rih ka tum tih ka sawi chuan min hnial bîk lo.

Duati chungah thil ṭha lo a thleng ang tih mawlh ka hlau a, ka hawsan ngam ngang lo a ni e.

Zosanga eng mah chanchin an hrilh ta lo law law a, 'a lo haw dawn tho a, eng mah tih theih a nei bik chuang hleinem, kan ti thlabâr mai mai' ka pain a ti deuh tlat.

Duati nau neihna room-a an nawr luh lai chuan nghet zetin kut ka hûm a, ka ṭawngṭai ru mawlh mawlh. Thil ṭha lo a thleng a nih vaih chuan ka dam chhungin ka inthiam tawh dawn si lo va.

Ka rin aiin a tuar chhel daih a! Nu leh pa duat rawn a ni chung pawhin vawikhat mah a nâ tih pawh a sawi lo. A heh a pet fan fan lai ka hmuh te khan ka lo ṭang ru ṭeuh a, kei ka damloh hlek pawhin ka ṭeu hlar zel kha a ni a, ka tluk lo hle mai.

Kan awmpuinu Kimi'n Whatsaap aṭangin min rawn bia a, "Lo chhuk daih rawh, ani te chuan buaipuitu a ngah alawm," a ti a.

Ka chhâng lo.

Zanina Duatin min koh laia a hlauthâwng hmel kha ka hmu reng a, Lungleia ka awm lai pawhin, "Lo haw duh miah suh, Duati a lo phei a nia," a tih khan mak ka ti viau.

Kan nupaa kan inṭhen hi a duh nge, Lawmsanga chanchin chhe lam sawi tur a hre hle a, "I fin khalh chuang lovang, Duati te chuan Zosanga te unau chu a thunuai vek a, a fuih pawrh nasa thei lutuk," a tih vanga Duati pawh va chhuahchhâl ka ni rêng a, ani lah khan chhân ngaihna min hre miah lo a nih kha. Hamhaih hmêl a pu zawk mah.

Zosanga leh Hlimi inngaihzawntir vel pawh Kimi ruahmanna a nia, Hlimi khan Zosanga ṭha atih thu kan ina a lokalin a sawi a, "Sp, i ṭhiannu hi sawipui hmiah rawh, Duati saw inhre chhuak ve rawh se," a ti nghe nghe a, mahse, eng tin mah ka ti lo.

Khatiang ti tur êma rilru chhia kha ka ni bîk lo atin ni.

Mahse, Hlimi rûi khan ni lo lovin Zosanga hnenah min lo sawi a, kha ta ṭang khan Hlimi pawh ka thlah ta hmiah a. Zosanga'n min chhuahchhâlin, "I ruahmanna ṭhing deuh kha eng atan mah ka ti lo," a ti a, insawifiah ka tum hran lêm lo.

Kimi hi mi ṭha a ni lo tih zanin khân ka hre ve chiah. Message min thawntu pawh kha amah a nih ka ring tlat tawh a, ka la chhui chhuak dawn khawp mai.

Khawvar dawn ṭepah Duatin nautê a nei ta a. Hmeichhia 2kg leh 600gr ve ve an ni. Amah a châu hle an tih phei chuan ka lo hlauthâwng ngang mai.

Nautê a en theih antih chuan kan nupain kan lût vat a, an ṭha reuh kher mai. 'An hmelṭha' tia sawi tur pawhin ka hre thiam mang tlat lo. An ngo em em a, a nu leh pa an chhun chuan an chhe miah lo ang.

"Pi leh pu, kan ni ve ta," pa Zirsanga a nui ruh ruh a, pa Faka pawh chuti tho.

An fate pahnih chhungkaw boruak chawk nu bat thei khan fâ annei ta a, duat rawn anni dawn chiang sa. Thîkna rilru pakhat mah ka pu lo.

"Sp, chaw ei turin kan chhuk hmasa anga tikhan lo awm ula, kan rawn thlâk dawn che u nia," ka nuin a ti a.

Nu Mafeli te nupa leh ka nu leh pa an haw thla ta rih a, kan nupain nautê kan inbih chhâwk sek. Fa ka awt lo ka tih chuan dâwt muhlum a ni, neih ve ka châk hle a; mahse, Lawmsanga nen kan inneih chhung hi chuan kan neih a rinawm ta lo. Doctor thu sawi kha a dik takzet chuan.

Mi te pawh Phâiah kalin inkah râi ang chi te pawh kha an ti fo va, ka rilruah chuan a awm ve deuh. Mahse, Pathianin rem atih hunah kan nei ve mai ang tih hi ka innghahna awm chhun a ni.

Cabin an hauh lâwk vek tawh avangin chutah chuan kan insawn ta a. Duati a meng peih mang lo, a muhil deuh reng a, naute hmêl pawh mumalin a la hmu lo a nih ka ring.

Ka nu leh pa te an lo chhoh leh chuan tiffin min rawn ken a, kan nupain kan ei ve luk lak.

"Zanin chu ka riahpui ang a, Zosanga pawh a zin chau dawn si a, a riak peih kherin ka ring lo, peih pawh nise ani khan naute pahnih a buaipui thiam dawn si lo a.." nu Mafelin nui ṭhâ chung hian ati a.

"Amah Duatin a duh chuan ka riahpui zâwk ang a," ka lo ti vat a. Min en vang vang hnuah, "Zanin te chu han riahpui chhin la, a bâk kan sáwi ṭha leh dawn nia," a ti ve mai.

Riahpui ka tum thu ka nu leh pa'n an hriatin an lâwm hmel hle a, "Rin tur kan nei ve tawh alawm le, Mafel, ngaihtuah duh rêng rêng suh," ka nuin a ti.

Zosanga lo thlen hun tur erawh ka huphurh lâwk deuh, a hmaa kan boruak a ṭha vak lo nen ka hlau ru deuh a, ani hi chu Lawmsanga nen an mizia a hrang hlauh. A tih loh chinah chuan a butut ve viau tih ka hre tawh tlat atin ni.

Rafaela leh Saitei te pawh an hrilh tawh a ni ang, Duati phone-ah an rawn video call a, nautê hmêl an hmu ve tawh bawk.

"Awi, ka lo haw châk tawh, u Sp, an thlâ lo la la, ka lo status teh ang," Saitei'n a tih chuan kan naute thar pahnih thlâ chu ka la mawlh mawlh a, Lawmsanga a nui suk suk. Eng tak ngaihtuah ve ang maw.

"Sp, i riak thei ang maw, a chauh thlâk dawn a nia," Cabin-ah kan awm tawh a, Duati a lo harh ṭha tawh bawk.

"Riak thei e a, ka riahpui i duh phawt chuan.." ka ti a.

Hnute tui ala nei ṭha lo a, 'Nan' kan pe ta rih a, "A hnute tui awm chhun pawh hi a thûr tlat a, pêk rih loh a ṭha," Nurse in a tih vangin naute thar pahnih chuan 'Nan' an hne ve ta poh chu a nia, keimah ber pawh hi ka zei lo nasa.

A hnêk tîr dan tur te min han hrilh leh rih a, Duati pawh a nui ve tawp.

A hma lawka kan boruak kha atu mah mahin kan sawi lang tawh lo a, inrem leh inpawh takin kan titi ve luam.

Zosanga a lo thleng ta.

Cabin chhungah a rawn lût vut a, "Ka duatnu, i ṭha em?" Duat hmêl takin a nupui chalah a fâwp a, "Eng mah min rawn hrilh si lo a, kan in lamah ka rawn tlang nghâl a, ka nu'n a lo sawi ve chauh," lawm chiah lo áw kâa tiin a fate pahnih chu a bih dâk dâk a.

"Kan Lalsaii an va chhûn deuh ve," tiin a nui suk.

A sawi tâkah chuan Duati hmêl aiin Saitei an ang zawk mah a, phírah rau rau pawh inang tak an ni.

"I lo haw dawn tho sia, an hrilh ta lo che a nih kha, i rawn ngaihtuah lutuk an hlau va.." ka lo ti ve a.

"Rinsangpui, nangmah maw riak dawn?" A tih chuan ka bu nghat a, "In zei awm lo siah," a ti sup.

"Zosang, nang pawh i zei awm bik lo em mai," Duatin a lo ti ve a, ka nuih aza hle.

An nupa an inpawh tih a hriat reng a, nautê a ṭah hlekin Zosanga'n a keu ve hman ziah bawk.

"Inah ka haw ve phawt ang a, intihfai tepawh ka duh ve a," Duati hnenah a ti a.

"Nia, Spi a awm tho va kan ngaihtuahawm loh a nia," min melh zauh pahin a chhâng a, a rilru a ṭhain a tluang purh tih ka hre thiam ve ṭan.

Min hua ni se ka awmpui a duh miah lo ang. A tih loh lamah hi chuan a luhlul tih hriat reng reng.

Zosanga chhuah hnu-ah Duati nu leh pa an lo lût a, chîm luai luai ṭhaa ka hriat loh avangin ka lo inthiarfihlim ta rih a.

"I lo chhuk dawn lo em ni, thil hrilh tur che ka nei a nia," Kimi message ka chhiar a, ani khân dâwt bâk sawi tur va hre suh.

Amah nen kan inkawm ngeihna chhan pawh hi eng dang vang a ni lo. Ka nu leh pa Lawngtlaiah an awm deuh reng zel a, Lawmsanga workshop ah a kal nitin bawk nen tih tur ka nei vak ṭhin si lo a, ka kawm tur hmuh chhun a nia, thil sawi tur a hriat bãkah kei aia awm hmasa zawk a ni a, a fel ka ti ṭhin viau. Mahse, ngun zâwka ka ngaihtuah hian a rilru a lo dik loh zia ka man thiam ve ṭan tlat tawh.

Damdawi ina ka riah tur thu ka hrilh chuan, "I peih mai mai êm mai, intih mâk ṭhat vak a ngai lo," a ti a. Ka chhâng buai peih ta vel lo.

Ka nu leh pa'n ngaih ṭha takin min hawsan ta a, "Spi, eng emaw harsatna inneih chuan min ko hreh suh aw.." nu Mafelin a ti thlap.

Cabin chhungah ka lut leh ta a, naute pahnih Nan ka pêk chhâwk zak zak a, Duati ala che ṭha thei si lo a, ka tih ve theih tâwk tiin chhâwk zangkhai tumna rilru ka pu nghet tlat. Ka mopui nu chungah hian rilru chhia put ka tum lo a, ani pawhin a pu bîkin ka ring lo.

Hlimi khan Zosanga kha a duh mai sia-h. Ani mizia leh Duati mizia tezawng Lei leh Van ang a ni a, Zosanga hian Duati a duh zia leh a hmangaihzia ka hrechiang tawh viau bawk.

Tun lâi nula tam tak hi chuan mi pa ngaihzawn hi an pawisa tawh miah lo a; khatiang zîngah khan Hlimi pawh a bâng chuang lo. Zosanga a â lo hlauh zawk a, chuti ni lo se chuan sex a hmanpui hrep ang a, a duh a hmuh hunah a kalsan leh ang a, a nupui aiin a thlang dawn der si lo a.

Valpuia'n Duati a rawn call a, naktukah Diktei nen lo kal an tum tih a sawi.

Rafaela kha ka ngaisâng a, a mize dam thlup te kha ka ngainat zawng tak a ni. Mahse, kan inbe tlêm êm a, hetia a awm loh hnu hian Lawmsanga'n a sawi leh zauh zel.

Zankhuain kan muhil lo tih theih a ni. Pakhat a ṭap zo chiah a, pakhat a lo ṭap leh a, kan inbuaipui tlaivar a ni deuh ber. Ka zei lo lutuk bawk nen Duati'n min han hrilh ve bawk a, ani pawh eng teh ual a ni chuang bik lo. Nurse kan pun leh ta nge nge a.

Chhun lamah erawh châwl hahdam tura min tih avangin Duati nu leh ka nu an rawn chho a, nizan chungchâng vel min zawha ka sawi chuan an nui nasa dun teh e.

Ka pa leh pa Zira workshop-ah an kal dawn a, Lawmsanga erawh inah a awm tih an sawi. Min hruai tura chah leh kha a buaithlâk ka tih avangin Taxi-in ka chhuk a, in ka thlen chuan a lo reh ṭhiap!

Kimi pawh hmuh tur a awm chuang lo a, Workshop-a a kal dawn loh hi chuan Lawmsanga a tho hma ngai lo tih ka hriat avangin kan room-ah dim tê hian ka lut a, kawngkhar ka hawna ka thil hmuh chu leh!

Kan nupa khumah Lawmsanga tui takin a mu a, a bulah Kimi bra nen chauh a lo mu bawk a, a hnuai lam ka hmu thei lo, puanin a khuh tlat a, ka thin a sa nghal zak. Nizanah an riak dun ti dawn ila tukinah ka nu leh pa te an tho ve awm si a, Kimi a thawh loh chuan an ko tho ngeiin ka ring bawk si.

Min hmuh hmain dimtê hian ka chhuak a, ka nu ka zawh fiah hma chuan eng mah sawi rîk loh ka tum ta a.

Hei vang hi a lo nih chiah hi Kimi'n min tirhbona tur a lo zawn chhena min fuih pawrh fo.

Ka lo va han â em em ve le..

An lo inngaizawng tak tak a nih chuan a pawi thui khawp ang, Duati erawh hrilh ve vek ka tum ruh hle, ani a finga ruahmanna ṭha deuh a lo nei mial mahna...

B+>[BeckirafARenthleI]<+®®

THE RAPSAGYAN FAMILY

Becky Rafa Renthlei (-BRR)

Chapter-37

[Rinsangpuii]

Kan nupa room-a ka thil hmuh kha ngaihtuah duh lo luiin chaw ka ei a, Kimi a lo la chhuak miah lo! Lawmsanga rinhlelhna rilru ka pu deuh thut thut a; mahse, eng mah hre chiang hmasa lova sawi teh ngawt kha ka duh lem lo.

Chaw lem a sak ṭalh mai.

Ka nulât ṭhat ve hun laiin damlohnain min tlâkbuak a, ka hna, ka ngainat ve em em pawh thawk zawm thei lovin ka nauvin a chhunzawm ta ringawt kha a nia; Pathian lakah vûi ngam tur ka ni lo a, a rawngbâwltu kal tlanga damna ka chan hi khawvel sum leh paiin a lei zo lo tih ka hria.

Eng din hmunah pawh ding ila lâwmzel nun neih tumin Pathian hnenah ka inkawltîr tawh tlat. Pasal ka han neia ka hlimna aiin lungngaihna tur ka tawng hnem zâwk. Nimahsela, a nuam leh hlimawm ringawt hi ka ban phâkah a awm lo tih chiang takin ka hria.

Kan nupa room-aṭanga Kimi a rawn chhuaha min han hmu phut chu a meng buai nak a. "I lo haw lâi ka hre miah lo!" A ti a.

"Nia, in reh ṭhiapa ka ko duh lo che a nih kha, i room-ah i tawm emaw ka ti mai, kan room-ah eng nge i lo tih teh daih a!" Pangngai thei ang bera tiin ka nui lui ngial.

"Ah, inpa a tho har lutuka ka va kai tho maw le," chiang taka dâwt a sawi chuan ka nuih te pawh a za zawk.

"A duh chen chen i mut tîr mai lo a nih chu.."

"A la harh chuang lo, i duh leh nangma'n va kai tho ve mai la," tiin ka chaw eina thleng vel a sil pah mawlh mawlh a. Phakar ka ti lutuk.

Mahse, a hun hmaa ri hluai chi ka nih loh avanga ngawi hrâm hrâm ka ni. Duati ka hrilh hunah engtin emaw tak tih dan a hre em em ang. Kei angin a zum ve dûk lo a, a ngaih dan a nih loh chuan Kimi pawh a ṭim hrep duh dâwn tih ka hria. Bâkah Duati te zawng a â lo êm mai.

Lawmsanga a lo thawh chhuah hma chuan room-ah ka lût duh miah lo a, Kimi mutna hnua mut ka duh teuh lo. A tenin ka ten.

Ka mize sual zâwk kha la nei ila chuan keh nawk nawk a nia ka duh. A nui hmêl lem lutuk te hi ka ten ngawih ngawih a; mahse, insûm theih te hi a ṭha a, a Pathian thu bawk. Mi famkim ni lo mah ila dawh theihna neih te hi a ṭha ngai e.

Nizan lam ka mut ṭhat loh avangin rei lo tê mut hahdam ka tum ta a, Sofa-ah ka mu kawm ngal a, kan naute thar kha ka mitthlâah a châm reng, kei hian fa nei ve lo mah ila ka mopuinu fa hi duat leh hmangaih taka enkawlpui ka tum ruh tlat.

Ka lo chhîng sek a ni ngei ang, Lawmsanga'n min rawn sawi nawk nawk a, "Khumah va mu la, khatah chuan i taksa a na vek dawn asin," tiin.

"Dâr eng zat nge?" Tia ka zawh chuan chawhnu dâr hnih a lo ri der tawh, dârkâr thum dâwn ka lo muhil a nih chu. Lawmsanga a tho ve chiah nge ka hre lo a, tukina Kimi mut chungchâng vel kha a hre lo nge a hmêlah eng mah hriat thiam theih tur in a lang lo.

"Zanin riah leh i tum em?" Tiin min zâwt a, ka riah leh tur thu hrilhin,"Min thlah ka ngai dawn a nia, ka nu te ka han thlâk loh te chuan," ka ti sap a.

Kan thu sawi ngun taka lo ngaithla kar tu Kimi chu ka hmu lo der tlat a, ngaithla lo anga lan tum mah se kan ṭawng hre phâkin a awm ve reng a, Lawmsanga a ngaizâwng tih hrilh hranpa ka ngai tawh lo.

Ka inbuala ka harh deuh kâwk.

Damdawi in kal turin ka insiam leh ta a. Ina awm ai chuan naute pahnih leh Duati kianga awm kha ka thlahlel fê.

"Zanin bâk chu riak tawh lo la tiraw, ka û a lo haw tawh tho sia," Lawmsanga'n a ti a.

"Mipa tân khawih thiam ngaihna a awm rih lo an tê si, i û phei chuan a thiam lo tawp ang, ka han chho chhin phawt anga nu Mafelin ruahmanna dang pawh a lo nei mai thei bawk a."

"Nia, ka ngaihtuah deuh che maw le, a zâwn zâwna riah te chu i tlin loh ka hlau deuh," min ngaihtuah hmel taka tiin inbual turin a lût ve ta a.

Kimi nen chiah kan awm leh ta, thingpui ka insiam a, nidangah chuan min be hmasa zâwk ziah kha a ni a, vawiin chu a style a dang ta!

"Damdawi ina an awm chhung i riahpui dawn em ni?" Chhuat nâwt pahin min zawt a.

"Ka hre lo le, min mamawh dan azir te pawh a ni ang chu,"

"Heta an awm an chuan ka peih lo sa, Duati hi chu ka mil thlâwt lo, a ngêng si." A ti leh hmak a.

"I la hrechiang lo mai mai a nih kha, a fel reng alawm," ka lo ti a.

"Hmn, ka ngainat zâwng a ni lo, in hranga an awm hian kan tân a nuam zâwk, lo ngai reng mah rawh a rawn awm chuan in chhungkhur boruak a dang vek mai ang, an nupa hian ka ngaina lo hrim hrim," a ti zui leh bawrh bawrh a, eng mah ka sawipui duh tawh lo.

A hma kha chuan awmpui angin Kimi hi ka en ngai lo hrim hrim a, amah a ṭawng duhin a lo fel ve bawk nen a theihna chin chinah ka chêtpui ve mai zel a, eirawng pawh kan bâwl dun deuh ziah. Mahse, tunah chuan ka â dawn tawh lo, hlawh pawh mi rate aia sângin an pe tih ka hria a, a inkhâwl ṭânin a nia ka rin.

Kan nupain Durtlang lam kan pan leh ta a.

Cabin kan luh hma hmain naute ṭap ri kan hre hmasa phawta, hming an la neih loh avangin 'Bawihtei leh Bawihpuii' kan ti mai.

Ka nu leh nu Mafelin pakhat ve vea pawmin hnute an lo pe a, kan lût min hmuh chuan, an rin aia kan thlen hma thu leh an buaizia min lo hrilh nghâl.

"Zosanga office-ah inreport a ngai si a, zanin chu inpahnihin riahpui ula a ṭha ang, pakhat chauh tân chuan a hautak em mai," ka nu in a ti a.

"Nizan te khan engtin nge i buaipui theih zawk, ka thaw an ti ipik ania kan Tekeuhi te pahnih hian," nu Mafelin nui sâng hian ati bawk a, a zei tur zawka ka ngaih anni ve a, an khawr ṭût!

Lawmsanga'n naute pahnih chu a chhaih a, Duati en chung hian, "Pahnih hnih neih bîk chu a fair lo, pakhat kan kawl ve ang," tiin a fiam a, "Ṭha tê tê khan han awm phawt mai ula kan la ngaihtuah dawn nia," tia Duatin a chhân chuan Lawmsanga a nui ṭhâ.

"A neih lam tum ula, a enkawl lam chu kan hreh miah lo a nia," ka lo ti ve a, ka nuih aza hle.

Ka thlen chhoh tawh avangin ka nu leh nu Mafeli pawh haw turin an insiam ta a, Rafaela'n Inrinniah an hming a rawn phuah dawn tih an sawi.

Lawmsanga pawh ka nu te hruai thlâk a ngaih vángin a chhuak tel ve ta a. Duati rinaiin a harh ṭha.

"Min hliamna hi a na reuh riaua chuti ni lo se chuan pakhat te chu ka buaipui thei ve asin le," a ti nang nang. A inthlahrung deuh niin ka hria.

Diktei leh Valpuia an lokal thu a sawi a, "Valpuia'n mipa nise ka tih nen, ka sawp nasa ang maw le, a ti a," tiin a nui kar kar a, Duati hi chu atu tepawh hian an ngainaa tumah tihbîk nei lo hian a kâwm thiam vek bawk si a, a fel ngawt mai.

Zosanga office bâng lo kal hmain tukina ka thil hmuh kha Duati ka hrilh ve ta a, min thinrimpui ngang mai.

"Engah nge i va koh harh mai loh, i va nêp tak!" A mut dan siam remin min en deuh vang vang a, "Kimi ka hmuh khân rin lohna lian deuh ka nei rêng a ni, inpa a biak dan teh hâwrh kha, kei ni ila ka nasa ang chu," ti lehin thu tak deuh zawk hian, "Lawmsanga chuan a duh ve ti dawn ila ni chiahin ka hre si lo a, chhui chhuah kan tum ang, ka ruahmanna anga kal i duh chuan thil harsa a ni miah lo a nia," a ti ta a.

"Eng nge i ruahmanna chu?" Tia ka zawh chuan, "Zaninah damdawi inah i riak dawn tih an hre vek a, Zosanga lo kal hunah thil theihnghilh anga insawiin inah ka zuk hruai tir dawn che nia, zan laiah chuan a chi loh deuh mai theia dar sawmpakhat leh sawmpahnih inkâr velah tum ang aw, i haw an ring dawn miah lo a nia," a ti ta a.

"Naa, zanin thut thutah chuan a chi nâng, nghâk rih deuh ila," ka ti a.

"Ina i awm ve te chuan a inthup tlat dawn asin, i â siah.." a'n ti leh rih.

"Kawngkhar an kalh dawn sia, kan kaihthawh rualin an harh em em ang,"

"Harh lo tawp ang, ka nu i call mai dawn alawm, a nih loh pawhin ka pa zawk pawh,"

"Kimi hi a â lo a, i awm lai chuan eng mah ringhlelhawmin a awm lo ang, zanin bâka hun ṭha a awm lo a nia, an lo awm dun a nih hlauh chuan inhau pui miah lovin i rawn chhuak leh nal nal dawn nia," a la ti zui ah..

Zan lama kan thil tih dan tur rêlin kan titi char a, Zosanga leh Hlimi mu dun a hmuh thu te, kai tho lova an thlâ a laksak tih a sawi chuan rem hria ka ti hle. Tukin te khan a nachâng lo hriat ve tur a nia, kei hi zawng, ka ngaihtuahna a tâwi leh turh zel.

Hlimi leh Zosanga chungchâng vel te kan sawi kâi chho a, "Vawikhat pawh Zosanga khatianga a awm leh a nih chuan ka ngaidam dawn tawh lo, nupaa zêp neih ṭît ṭêt te hi ka rilrem zawng a ni lo a, a nihna tak inhrilh hriat mai tur," a ti leh a.

Kimi ruahmanna te kha ka hrilh ve ta a, message min lo thawntu, Duati naupai hi Zosanga fa ni lovin Lawmsanga fa tia min rawn hrilhtu number pawh ka pe ve ta a, zanriah ei tur an lo dah tâk avangin kan sawi zawm ta lo.

Zosanga lo thlen hnu-ah muangmarin chaw kan ei ta a, a fate pahnih chu a en deuh sek.

"Ka awm loh lai kherin in lo chhuak a, â nu induat lo si," tih vel mai mai bâk sawi tur a hre meuh lo.

Zan tîr aṭangin a piang hmasa zâwk ti tawh mai ang, Bawihpuii chu a tlei duh mang miah lo a, zan dar kuaah pawh a hnute hnêk tur siamin ka la buai zak zak. 2Kg leh 600gr tih ringawta min hrilh avang khan anpahnihin an ni ve ve turah ka lo ngai a, a û zawk hi chu 700gr a ni a, a hrâm hmel deuh, an ngo lutuk a, a pawmtu nih pawh inthlahrunawm tak a ni.

Bâkah an tê ve fahran lutuka ka khawih thiam thlâwt lo

Zosanga leh Duati'n hna chungchâng an sawiin, Champhaia an in luah pawh luah zawm tawh loh mai a ṭhat thu te an sawi a, "A ruala fa pahnih pawm hi a namai dawn lo a nia, i rin aiin a khirh ang, i hna i zawm hun tur pawh hriat a ni hek lo, chuvangin in luah khi a ṭûlna em em a awm mang tlat lo," Zosanga'n atih chuan dik ka lo ti ve viau.

Ái kal an tirh nen khan hlawh zât leh zâtin an insem a, in luah man an pêk leh phei chuan Duatin tih tham a chang lova a hlâwk vak lo atin ni.

"Kan inah lo insawn phei daih ula, kan tlêm tho si a, quarter luah kikâwi leh ai chuan in indang duh a nih hrim hrim leh kan in aṭangin tuna insak lai saw in chhunzawm ang a, inkhâwl pawh a awlsam zawk daih ang," tiin ka lo inrawlh ve a.

"Kei chu ka duh reng, awmpui kan neih loh phei chuan ka tân tihngaihna a awm lo rêng rêng, nau min lâk chhâwktu takngial pawh ka nei dawn si lo a," Duatin a ti ve a.

"Ka awm alawm, lungngai lo la,"

"Awi! Zosang, i kâ a kuaa i sawi ve mai mai a nih chu, nikhat lek chawlh lâk pawh i harsat a nia, chutah zin chhuahna tur i neih phei chuan chuti hlauh a ni mai, sawi duh lo mai teh," an nupaa an inbiakna chu nui hak chung hian ka ngaithlaa Duati sawi pawh a dik tho.

"A hun te lo thleng ve phawt se, duh leh thla hnih khat te chu awm ve mah ila a pawi lo, zin chhuahna tur kan nei leh dawn si a, in in lama awm erawh loh theih loh tâwp a nih loh chuan ka duh lo bur," a ti a.

"Kan in lamah ka awm dawn pawh ka tih si loh, chhe siah. In in alawm ka sawi le," Duati a pâwr tawh ngang mai.

"Kan in lama in lo awm chuan eng emaw chenah ka buaipui thei dawn che a, tun din hmun atan chuan quarter-a lêt leh chu thil tih chi ah ka ngai rih lo." Ka lo ti ve leh a. Zosanga hian nu leh puihna tel lova din chhuah a tum ruh hle tih ka hria a, a puitling ka ti bawk.

An inah a hlawh tel miah lo pawhin ka nu leh pa'n an châwm thei a, ka nu hlawh tiam lovin workshop aṭang ringawt pawha kan lâk tam ve zia ka hria, ka pa âi chuan ka nu hian Zosanga a ngaihtuaha a duat deuh zâwkin ka hre nghe nghe.

Zosanga nu tak tak kha thlalâkah ka hmu tawh a, ka nu nen an inang teh e; mahse, ka nu a hleitling nalh zawk.

Chutia kan titi lâi chuan Duati'n signal min rawn pe zauh a, dâr zât ka en nghal vat. Sawm pahnih rîkna tur minute 15 ala awm a, kan thil tih tur kha..

"Zo, Sp nen inah in zuk kal lawk dawn em ni? Nautê an mut ṭhat lai hian.." ati ta a.

"A tlai lutuk tawh, tunah te chuan an mu vek tawh dawn asin, bâkah gate pawh an khâr daih tawh ang," tiin a lo hnial a.

"Duty te chu a dîl theih reng alawm, ka damdawi ei lai ka keng lo a, a pawimawh asin, zing kara ei tur a ni lehnghal. Sp i kal peih mai em, ka dahna a hre awm si lo a," a ti leh nghal zat a.

Ka peih thu leh kan kal rau rau chuan sin tur pakhat lâk belh ka duh thu ka lo sawi ve a, Zosanga leh Duati mu dun ta se, kei extra bed-a ka mut chuan sin tur kan in daih dawn lo tih ka hre ve kar.

Phun nung nung chungin Zosanga a tho chhuak ta a, "Kan kal hlana an lo harh vaih chuan i buai dawn a nia aw," a ti sup.

"Nurse duty kha in chhuah pahin lo hrilh ula, min rawn ngaihven mai dawn alawm," a ti leh zel.

Zosanga nen in lam panin kan inphur thla ta a, kan tisual êm lovang chu maw.

Kan rin anga an lo awm dun lo a nih chuan kan tifuh lo viau ang. Mahse, sin tur lâk kha kan chhuanlam ve tawh mai a ni ang chu.

Kawng lakah kan inbe tui tam vak lo.

"Kawngkhar kik lovin ka pa ka call mai dawn nia," ka ti a, ka nu a rîk hluai ka hlauh vang a ni pakhat.

Ka pa chuan eng em em sawi lovin a rawn hawng mai dawn a, chu chu ka hisâp ve dan deuh a ni.

Kan in kan thleng ta a, Veranda light tih loh a thim ṭhiap tawh. An mu vek tawh tih ka hrethiam mai a, ka pa ka call ta a, vawi hnih a 'ring' naah min lo chhâng ta a.

"Hello.." a mut a chhuah hmel kher mai, ka inthlahrung ru viau.

"Pa, kawngkhar min lo hawn lawk mai, sin tur kan indaih lo deuh a.." ka ti a.

"Aw le," tiin phone a dah ta a, a hnu rei vak lovah kawngkhar kalhna a ri rak a, rawn nam hawngin, "E, Bawiha nen elo in lo chhuk?" A ti sup a.

Zosanga nen an inbiak chhungin kan room ka pan ta a, chhunglamah a inkalh tlat.

Ring vak lo hian ka kik dat dat a, a reh ṭhiap.

"Sp, mikhual room ami kha la mai la," Zosanga'n atih chuan, room-ah luh ngei ngei a ngaih thu ka sawi sap hnu-ah a aia ringin ka kik leh ta a, "Lawmsang, lo hawng lawk teh.."

Kawngkhar a rawn inhawng ta a.

Lawmsanga hmel phak chap nen kan inhmachhawn ta a.

"Eng tizia nge i lo lêt leh a?" A ti sup a.

"Thil kan theihnghilh a, i û in min lo hruai," tih pahin room-ah ka pên lût a.

Khum hnawk nuai bâk thil thar eng mah hmuh tur a awm lo.

Kan rin dan a lo dik chiah lo a nih dawn hi.

Puannuam pakhat leh showl zahzelah ka la a, chutih lai tak chuan bathroom lamah a ri deuh rak. Lawmsanga a hawi nghal vat a, kei pawh bathroom lam panin ka phei nghal a, hun dang ni se ka hlau ngawt ang. Mahse, rinhlelhna hlira ka khah tawh avangin bathroom kawngkhar ka nam rawk a, chhung lamah a inkalh tlat.

"Tu nge awm a?" Duh aiin ka vîn.

"Ka hre nâng, min lo koh khân ka harh ve chiah," dâwt sawi hmel a put loh avangin bathroom kawngkhar lam bawk chu ka ngaihven san leh ta a.

Ani pawhin mak atih hmel kher mai. "Tu nge awm?" Tih pahin a bêng dat dat a, Zosanga'n min lo ko ve chhên bawk si.

Thil tih dan tur pakhat chiah ka hria, "Chhung lamah khan awm an awm a ni. Kawngkhar kha hawn tum ang che," tih pahin hmanhmawh zet hian Kimi room lamah ka tlân phei a, ka nu leh pa makti hmel pawh ka zah zo tawh lo. Kimi room a lo ruak huai a, ka rin dan a dik tih ka hrethiam chiah.

Eng emaw thilah tihsual palh te a awm thei a, tiin khum hnuai leh tawm rûk theihna lai tur ka en vek hnuah pawh Kimi ka hmuh tâk si loah chuan kan room panin ka lêt leh ta a.

Lawmsanga'n kawngkhar a la bêng dat dat reng a, a hre lo tak tak nge a tider tih pawh ka hrethiam tawh lo.

Kan thâwm a ṭha deuh bawk nen ka nu leh pa, Zosanga te an rawn lût ve ta a.

"Kimi, bathroom kawngkhar hi i hawn loh chuan kan tichhe dawn a nia," thinrim awkâ ni miah lo dam thlap hian ka ti ta a.

Chhângtu an awm lo. Kawngka kalhna pawh ala inhawng chuang hek lo.

"Sp, eng nge thil awmzia?" Ka nu'n a lo ti ve chhên a, chhâng lovin a lo chhuah hun tur ka nghâk tawp.

"Duati te nufa an ngaihtuahawm êm mai, chho dawn teh ang," Zosanga'n a ti a.

"Kimi kha kan bathroom-ah a awm chiang, eng nge atih tih ka hriat hma loh chuan ka chho dawn lo, Lawmsang, kawngkhar hi i tichhe dawn nge.." ka ti nghat a.

An vâi chuan ka â emaw anti a ni ngei ang min en hû hlawm mai.

Kawngkhar tihchhiat kan sawi aṭanga minute rei lo te hnu-ah a bathroom kawngkhar chu a rawn inhawng ta a, Kimi Saruak deuh thaw-a lo ding chu kan en ṭhap!

Ka nu a thaw chhuak hak a. Zosanga pawh a hawi buai nak. Lawmsanga leh ka pa an ngawi ngul a, "Kimi kha lo zâwt fiah ula, ka lo haw hunah a bâk ka rawn sawi zawm ang," ti hmakin, "Zosang, kal ang le.." ka ti ta a.

"Rinsangpui..." ka pasal min kohna chu haiderin ka chhuak lui ta a. Engkim a tâwp vek tawh a, ka duh ang ka hmu tawh bawk.

Ka chhungteho hrilhhai hmel mawlh kha. A bîkin ka pa leh Zosanga an hawihai zual.

Ngawi rengin Car-ah ka lût a, ka rilru natna a thûk mai ni lovin min kher nget nget. Lungleia ka zin hlân te khan vawi eng zât tak lo awm dunin mu dun ang maw? Ka ngaihtuah thui phei chuan ka â dâwnin ka hria. Ka zahna chu thuhran ni se, Pathian hmaa kan thu tiam kha ka zah zual.

"Sp, eng nge thil awmzia?" Zosanga'n Car khalh paha min zawh chuan, "Duati zawt mai rawh, inṭhen hi ka duh lo a, ka thinrim ber lai pawhin inṭhen ka duh ngai lo; mahse, tunah chuan kan inṭhen ngei ngei a ngai tihna a nih kha." Ka ti a, ka sawi zâwng pawhin ka ṭah a chhuak, ka mittui tla tur chu duh lovin ka khap sak sak a.

"Lawmsangzela ka zâwt dawn khawp mai, eng nge kan awmpuinu nena an lo tih chu ka hre chhuak khawp ang," a thinrim hmel khawp mai.

Hospital kan thlen thlengin atu mah mah kan ṭawng tawh lo a, insût hraih chungin Duati awmna Cabin-ah kan inzui lût ta a.

Duati a lo muhil sâk sâk a, nautê te pawh an mutui khawp mai. Kan thang chhûng kha dârkâr khat pawh a tlingin ka ring lova kai tho duh lovin khum âwlah chuan ka mu ve ta rih a.

Ka ngaihtuahna a kal thui kher mai. Kohhran leh khawtlânga a kül a tâia inhmang ka pasal Lawmsangzela chuan min phatsan ta chu a ni a, eng nge thiam thu sawi tur a neih?

"Kimi lo luh lai ka hre lo" tiin dâwt a sawi mai thei, mahse, thil theih a ni tlat lo.

Chhunglamah kawngkhar a inkalh thlap a, ka va koh lai khan an pahnihin anla meng tihna a nia, ka thâwm an hriat hnuah bathroom lo chu bîkbona tur awm miau hek lo. Tenawm dun lutuk.

Zosanga pawh Duati bulah a inthawlh ve luk lak a, muthilh tum lo mah ila kan buaipui tur ber nautê an muthilh tlat avangin ka tluzâl mai mai.

Khawvela kan awm chhung hian harsatna a kiam dawn lo a, tute pawhin harsatna kan tâwk vek thei, kan harsatna tawh dan a inang lo mai pawh a. Kei pawh nun thara nunga hmalam pan ka tum tlat tur a ni, Pathian rinchhan chunga ka kal lo a nih chuan beidawnna leh zahna, mualphona ka chunga thleng mêk hi ka paltlang zo dawn si lo a.

Zosanga'n muhil lovin phone a khawih a, min rawn en leh zauh zel. Eng mah phei chu a sawi lem hlei lo va, ka phone a rawn rîk chuan ka en vat a, Lawmsanga a ni!

Ka biakna chhan tur awma ka hriat loh avangin ka hmet busy daih a, vawi sawm pali ngawt min rawn call nia!

Ka chhân duh miau loh avangin whatsaap lamah min rawn be ta a. "I hmuh ang kha thil nih dan a ni lo a nia, zîngah ka lo hruai ang che, sawi fel tur kan nei," tih a lo thawn.

"Sawi tur ka nei ve lo." Tih chiahin ka chhâng a. Nautê a rawn ṭah tâk avangin chu lam chu ka ngaihven san ta daih a, Bawihpuii zâwk a lo zung huh dup a, kan thâwmah Duati a rawn harh a, "Ehe, in lo lêt lai ka hre miah lo," inthiam chiah lova tiin Zosanga mu meng kur chu a en a, chutah min rawn en lehin a mitmei hian thil awmzia min zâwt a.

"I ruahmanna chu a ṭha khawp mai," tiin thil awm dan chipchiar takin ka sawi ta vek a.

"Duati, eng kim i hresa vek maw!" Zosanga'n kan inbiakna a ngaithla ve reng a, Duati nen ruahmanna kan siam tih a hriat chuan thil mûk taka ngaihtuah hmêl a pu.

"Kimi chuan eng nge a sawi?" Tiin min zâwt leh a, eng mah a sawi loh thu leh ka nu leh pa pawhin an hmu vek tih ka sawi a, "Awi awi, a zak lo siah, awm ve nà ila chuan ka thing hrep ang," a ti hlak hlak.

"Damdawi in inchhuahsan hun ka nghâk lo mai ang aw, kan innêl ve dawn chauha hetiang boruak hi kan tawng leh si a, naktuk chawhnu chhuak turah ka haw phei ve phawt ang e," ka ti sap a.

"A teuh lo mai, chutiangin a dáwih zâwka ṭan tum reng reng suh. Kan chhuah hun min nghãk la, i lamah ka ṭang tlat tih hria ang che, Lawmsangzela nen an lo inkawp tak tak a nih chuan ka nu (Muanpuii) a ngawi mai mai dawn lo tih hria la, a dik lo zâwk an ṭan miah lovang. Amaherawh chu, Lawmsanga'n chhuak rawh atih che chuan thuhran daih a nia, Liankimi vanga chhuah tezawng tum chhin eih suh.." a ti leh bawrh bawrh a.

Zosanga'n, "Nia, chhuah kha chu tum rih suh, ka nau ka ṭan vang ni lovin thil eng emaw dik lo te pawh a awm ve thei a, engkim kan hriat chian hunah i lungawi ngang lo a nih chuan i chhuak zâwk dawn nia, tûn thut thutah chuan hre lo der rih mai rawh," a ti ve ta bawk a.

Zosanga'n a nau a ṭan ka ring rilru deuh kha a ni a, chutiang ni lova ka thlavang an hauh tâk si-ah chuan an thu awih rih ṭhain ka hre ta zâwk a.

Khua a vara kan ngui nghiai mai. Rafaela'n rei lo tê Duati a rawn be zawk a, inrinni-ah day off anneih dawn thu leh chutah chuan naute hming a rawn phuah dawn tih a rawn sawi a, thla thum zên zâwn a awm bo ve ta. Kumin chhung hi chuan a lo chhuak dawn lo hrim hrim tih te, damlohna leh thihna a nih loh chuan chhuah a harsat thu a sawi bawk.

An unau inhmangaihzia ka hmuin ka hre tawh a, ka nau ka ngai thar riau. Unau pahnih chauh kan ni a, thu chhia a ṭha hrilhna tur hnaivai pawh ka nei hek lo. Ka pa ni se hrilh hriat chi a la ni rih lo a, ka innghahna neih chhun chu Duati te nupa hi a ni mai. Ka nau Bawiha ka hrilh vaih chuan thinrimin min rawn hruai duh ngei dawn a, tun atan chuan thil ṭha ber a ni rih bawk si lo.

Zosanga haw thlâk hmain tûkṭhuan kan ei a, in lam aṭanga inpêk zêl a buaithlâk kan tih vangin hospital chaw kan ei mai a, Duati phei chuan a ei tam phian.

Hnute tui pêk tlâk a la nei lo fo a! Nan kan la pe rih, "Hetiang reng a nih chuan a nu hnute tui hi pêk chi a ni dawn lo hrim hrim a, Nan emaw Nestogen in pêk hlen a ngai mai thei," doctor'n a ti.

Min hruai tur an lo kal chuan zinglam dar 10 a ri tawh a, Lawmsanga rawn kal lovin ka pa leh nu Mafeli an lo kal a, ka nu hmel ka hmu lo.

"Sp, zanin chu ka lo riah chhâwk ang che aw,.." a rawn ti lût a, "Ka riak tlang law law ang ka lo ti deuh a.." ka bag vel siam mawlh mawlh paha ka chhân chuan, "Pa, lo riak leh mai se in lam in buai viau a nih loh chuan.." Duati'n a lo ti ve bawk a.

Tunah khan ka pa kha, 'Pa Fak' ti lovin 'ka pa' tiin a ko ve mial! A ko tih pawh a inhre lo tawp a niang, ka pa erawh a nui suk.

Duatin a tih deuh tlat avangin zanin pawh ka riak leh dawn nge nge e, ka hreh teuh lo mai.

Nu Mafeli a awm ta bawk a, ka pa nen kan haw thla ta a, nizan chungchâng kha eng mah a sawi chhuak miah lo a; kan boruak erawh a rit ru hle. Ani hi chu pa ṭha tak a ni a, min duat angin lang hluau lo mah se a theih nachinah min ngaihtuahin min ngaihsak tih ka hria.

In kan thleng ta a, ka nu'n hmun a lo phiat a, "I chau em?" Tiin min zawt a.

Lawmsanga sitting room-ah a ṭhu a, ngun deuhvin min en a, lehlam ka hawisan hmak.

Mut ka kham bawk si lo a, inbual phawta mut ka tum ta a.

Kimi hmel ka hmu lo.

Ka inbual zo ka va chhuah leh chuan, "Sp, ṭhu lawk teh aw.." tiin ka nu'n min hrilh a, Kimi room lamah kalin a va ko bawk.

"Nizan chungchâng kha a nia, tun hi sawi hun a ni, Kimi, Spi te room-ah khân engti turin nge i kal?" Ka pa zawhna chu a chang fak mai.

"Nizanah ṭê ri ka hria a, in room lam aṭanga lo chhuak emaw tiin ka ngaichânga mahse, vawi hnih vawi thum ka hriat tãkah chuan tho chhuakin rî ka hriatna lamah ka kal ta a, Lawmsanga te room aṭanga lo chhuak tih ka hriatin kawngkhar a lo inhawng sa bawk nen ka lut ringawt a, khumah Lawmsanga chu lo muin thlan hian a lo bual huh vek a.." tiin a khuh kharh a.

"Dâwt vek," ka lo ti hmanhmawh.

"Sp, sawi zawh tîr phawt rawh le," ka pain a ti a, ka ngawi leh mai.

"Khatia Lawmsanga ka hmuh khân ka ko ta a, a harh thei bawk si lo, a harh hun nghâka ka awm lai takin Spi a lo haw a nih kha, min hmuh chuan a thinrim ka hlau si a, bathroom-ah ka tawm ta ringawt a," tiin a sawi ta a.

"Mate, sawi ve tur i nei em?" Tiin a fapa a zâwt leh a, "Eng mah hriat ka nei lo, Spi kawngkhar kik ri leh ka hminga min ko thâwm kha ka hriat chhun a ni mai," a ti ve leh a.

"Kimi, dâwt sawi kher a ngai lo a nia, dâwt hi chu zêp hlen tum mah ila a theih loh, lan chhuah hun a awm tho tho ṭhin," ka'n ti hmasa phawt a.

"Rinsangpui, min ring lo em ni?" Lawmsanga a phun sup a, "Rin che ka duh, mahse, ka mitin a hmu a, nizan thil chauh kha chu ni se ka awih ang; mahse, a ni tlat si lo va, chuvangin in pahnih khân zêp awm lovin engkim min hrilh ṭha ula ka dam zawk ang," ka ti ve hmiah.

"Eng nge i sawi awmzia?" Tiin ka nu leh pa, Lawmsanga'n min en a.

"Nimina ka lo haw pawh khan kan khumah Kimi nen in mu a, ka hmu reng che u; mahse, i muhil a, Kimi bra nen chauhva ka pasal kianga a mu ka hmuh khân eng rilru nge ka pu a inrin? Dâwt sawi duh tawh suh u, ka rinhlelh che u avanga nizan khân lo haw ka ni. Ka ring dik chiah bawk a, vawikhat tih sual hi chu thil awm thei a ni a, vawi hnih, ni zâwn lehnghala mut dun kha chu tihsual palh a ni thei lo, a ni lawm ni Kimi," ka ti sak sak a. Lawmsanga a nûr nûng a, mak atih hmel viau.

Ka nu a rawn ṭawng chhuak ve ta a, "Lawmsangzel, Lalliankim, in khawsak dan a tenawm hle mai," ati nghat.

"Nu Muanpui, ka ti tak tak, Lawmsanga nen kan inkârah eng mah a awm lo. Spi hian inṭhen a duh vângin dâwt a sawi mai mai a nih kha," Kimi'n a tih chuan ka ding hliai a, "Inṭhen duh ang te chuan min sawi duh suh, i thu sawi zawng zawng te ka sawi chhuak palh ang e," ka ti ve zel a.

"Dâwta inpuh hi ka duh lo. Lawmsanga nen kan inkarah eng mah a awm lo," tiin a ṭap deuh pûr a, sawi ve tur pawh ka hre tawh lo. Lemchan thiam ka'n ti khawp a.

"Eng pawh ni se, ka nu, ka pa, inṭhen leh mai mai turin Pathian hmaah thu ka tiam lo a, Lawmsanga'n kei aia a thlang zawk a nih chuan ka kiang thei reng," tiin ka pasal hmel dur khup chu ka en a, thiam thu sawi tur a nei ve lo nge, ṭawngkam khat mah a chhâk chhuak tawh lo.

"Kimi, i room-ah kal rawh, nang pawh Spi, va mu hahdam la, Lawmsangzela hi kan lo bia ang e, chhuah te kha i lo tum ngawt ang e aw, kan remti miah lo a nia," ka pain a ti ta a.

Tho chhuakin Zosanga te room ka pan a, kan nupa room-a luh leh pawh ka duh rih lo.

Engtin tak Lawmsanga chu hâu ang maw? Kimi dawthei lutuk kha mak ka ti a, Duati te nupa min hrilh angin damdawi in an chhuahsan hma chuan chhuah tumna rilru ka pu bîk lo.

Lawmsanga leh Kimi hi an inkawp tak tak nge tak tak lo chu hunin ala hril ang chu, tunah rih chuan an ṭang kawh ve ve si a, dâwta inphat mar pawh an thiam mang e, ka mizia nen a inrem ve lo.

Ka nu khân Kimi a chhuahtîr ka ring deuh kha a ni a; mahse, eng mah a sawi miah lo, keini aiin a fing zâwk a, ruahmanna dang a nei tepawh a ni mahna.

Duati'n Whatsaap aṭangin chanchin min rawn zâwt a, a tlângpui ka hrilh hnuah, "Naktuk hian chhuah kan dîl a, an phal hlauh chuan Liankimi chu a châk lovang," a rawn ti a. Ka thlâ a muang huai.

Duati anga huaisen nih ve ka châk. Ka dikna ngawih ngawihah pawh ka insawi fihlim zo lo deuhthaw a nia, nêp ka inti ru hle.

"Zanin pawh rawn riak chho daih ang che aw, ka nu hnenah ka lo sawi dawn nia," a ti a.

Ka nu leh pa hmâi zah viau lo ila chuan ka ṭawng na ve ngam tur a ni a; mahse, sawi dan vak pawh ka thiam chuang lo khati bâk kha chuan...

Damdawi in chhoh hma muthilh tumin ka maimitchhing ta a.

Dâr nga rîk dawnah ka nuin min kâi tho chauh a, ''I mutui lutuka ka kai tho duh lawk lo che a nih kha, i peih vak loh chuan damdawi ina riah kher pawh a ngai lo aw," tiin khumah a ṭhu a, "Sp, i rilru tur ka hrethiam a nia, Lawmsanga pawh ka hau nasa a, 'eng mah ka hre lo' tih bâkin chhân ngaihna min hre hlawl lo, ka fapa hi ka hre chiang ve a, dâwt min hrilh ka ring tlat lo, amah ka ṭan ngawr ngawr vang a ni lo a nia," zawi sap hian a ti a.

"Nimin zîngah kha chuan ka hmu chiang lutuka keimah ka lo zak zawk, Lawmsanga erawh chu a muhil a, Kimi kha bra chauh hain a kiangah a mu bawk si a, a hnuai lam puana a khuh vangin a dang chu ka hmu lo. Ni e, ka sawi tawh ang khân dâwt an sawi dùn a nih chuan eng tik ni-ah emaw a lo la lang chhuak em em ang," ka ti ve ta a.

"Ka fapa pawh ni se a dik lohnaah chuan ka ṭan dawn miah lo. Kimi chhuah tîr kan tum deuh thut thut a; mahse, keini lo belh tur a nei si lo a, a lo ṭang kawh ve bawk nen tun ṭum chauh chu Pathian hmingin ngaidam thei la ka ti ngawt mai, a lehpek a awm a nih erawh chuan keimah ngeiin ka chhuah tîr ang," a tih leh zêl avangin 'aw le' ka ti ta ringawt a.

Ina awm ka peih loh avang leh Lawmsanga laka ka lung ala âwi chiah loh avangin damdawi inah bawk ka chho leh ta a, Zosanga a lo riak dawn lo a, Duati nen zalèn taka titina hun kan nei tihna a ni mai.

Cabin chhunga ka luhin nu Mafeli haw thla turin a lo insiam mêk a, "Sp, Duati'n in nupa chungchâng min lo hrilh zo chiah a, lungngai reng reng suh, i lamah kan ṭang tlat a nia, i nu leh pa misual anni lova i nu phei chu police, dikna ngainatu a ni bawka thiam takin thu dik ala hái chhuak ang tih ring tlat rawh. Liankimi tih vel mai mai váng khan lo intihrehawm lo la.." tiin min lo hrilh ve bawk.

"Nia, ka nu nen kan sawi duna tunah chuan ka rilru tlêmin a dam deuh tawh. Mahse, vawikhat na na na chu Kimi ka la ṭawngkhum ve ang, ka duhsak teh rêng nen lâwmna châng a hre lo lutuka ka ngaih dan a ni bîk vak lo," ka tih chuan a bu nghat nghat.

Nu Mafeli haw hnu-ah Duati nen Kimi kan rêl hrep a, ka thinrimna zawng zawng kha a bulah ka bun ruak a ni ngawt alawm le.

Saitei'n a rawn video call a, kan lungawi lohna dah ṭhain kan nui nasa khawp mai. A ṭawng tlêm viau khân ka hria a; mahse, a û bulah chuan sawi tur a hre ngang mai. "Fa kan neih ve hunah chuan ka duat ngawt ang," a rawn ti a.

"Lalsai, zak ve rawh aw, i bialpa senior-a hi i vên ṭhat loh chuan i chân palh ang e," Duati chhânna chuan ka nuih ati za hle. Valpuia kha ka la hmu tam lo a, pa ṭha tak a nih ka ring ve ringawt. A strick hmel tih mai loh chu..

Bawihpuii leh Bawihteii pawh an fel, an ṭap mang lo. Zosanga'n vawi hnih a rawn call a, annu a ngai viau a ni ang. An nupa hi an awhawm ka ti a, an ngaih dan a nih loh pawhin an inhnial bawrh bawrh a, rei a daih lem hlei lo a. Zosanga ka lo hriat ṭhin kha anna pakhat mah a nei tawh lo, a nupui a duat thiamin a ngaihsak si.

Tukina a hawsan dawnah pawh, "Inren angai tih ka sawi vang khan i lo inthlahrung ang e, i ei theih zawng leh châk zawng kha chu lo ei zel rawh, kan dam anga pawisa te chu kan thawk chhuak leh mai dawn alawm," a ti thlap.

Keini ve thung chu workshop aṭanga a pawisa lo hawn a submit vek phawt a, chuta ṭang chuan kan mamawh leina tur kan dîl leh mai ṭhin. Ka nu leh pa an fel hlauh a, hrehawm phei chu ka ti miah lo.

Kimi message ka hmuh chuan open leh ka tum zet a; mahse, eng nge a rawn sawi hriat ve hrim hrim ka duh vangin ka en ta a.

"Duati bulah i awm tama i rilru a kâwi vek tawh a nih kha, inpa lakah inhnam hnawihna chhe te eih ka nei lo," tih vel a ni. Duati ka hrilh chuan, "Amah run luih nân hrim hrim rei deuh hlek lo awm kan tum dawn nia, eng nge min lo huat ve vak vak ni, hrehawm atih thleng rakin a nia ka chêt dâwn," a ti hmiah.

Duati zawng a luhlul bawk a, nu leh pa a zah thiam riau lawi si. A ngaih dan a nih loh pawhin a sawi hmiah zel a, nimin pawh khân a nu leh ka nu awm laiin, "Inrem lo ila chuan nautê pawh in en ka phal dawn lo a nia, kan inrem ta hlauh zawk a.." a ti a, a nu a nui ṭha duh vak lo.

"Ṭawng loh loh hian ṭawng ṭhin suh Duati," tih bâkin chhân dan tur a hre lo.

Ruati chungchâng te kan sawi a, Zosanga bialnu hlui in âwkhlum ta kha a nia. Ka hre ve vak lo na a, a'n sawi tak tak chuan a lo tawrh ve nasat zia ka hre ta. A hma khan Zosanga hi a che ho ve ṭhin a, a lerh ṭhin bawk. Duati a neih hnu hian a puitlin zia a hriat ta chauh a, kawppui te'n an zir a ngai tih ka hriat chhuah phah bawk.

"Kan haw hunah lungawi angin lang duh rih lo la, Liankimi kan dâwp dawn nia," a ti deuh ngei.

Nautê an mu ṭha bawk si a, rei lo tê tal chawlh hahdam nân tiin kan mu ve ta a...

B+>[BeckirafARenthleI]<+®®

He story ngaihnawm leh nawm lohna hi chu chhiartute ngaih dan dan a ni a, a phêna zir tur ka dah erawh min lo chîk sak hrâm turin ka ngen a che u. Kei misual hian. Chuan, kan upa ber min request-na a zahawm em a, zan dang zawng aiin a sei tih kha in lo hre dawn nia..

Ka lawm ṭhin e.

B®®

38.THE RAPSAGYAN FAMILY

Becky Rafa Renthlei(-BRR)

Chapter-38

[Duatbiki]

Vawiin hi damdawi in kan chhuah ni tur a ni a, Spi leh Zosanga an awm sa a, ka nu te pahnih an lo kal dawn bawk.

Keimah ngaihtuahawm ka ni hran lo nen awm reng kha a hau tak kan ti ve bawk si a, bâkah riahpuitu tel lovin ka awm thei der si lova Spi a hah ve lutuka in lamah chuan kan in pui liam liam anga a zia zawkin ka ring.

Phír ka nei dawn tih kan hriat lâwk avangin nau puan kan lei tam thawkhat viau khan ka hria a; mahse, kan han hmang tak tak chu kan'indaih' lo ta fo mai. Nu Muanpuiin eng emaw zât a lo lei belh ta a kan zia deuh.

Ka nu in an in lama phei turin min beisei deuh a; mahse, pa Faka'n, "He lamah awm ve rih rawh se, an inneih hnu hian vawi khat mah an nupain an la rawn riak lo a, tun ṭum chu kan lo pawt pêng ve ang e," a ti a, ka nu pawhin a hnial zui ta bîk lo.

Rinsangpuii a fel hle a, eng kimah min buaipui fai vek ti ila ka sawi sual lo ang, niminah Alu Chop ka ei châk thu ka sawi a, 'Ka siam thiam ve zawng tak' tiin ama siam ngei min rawn ken thlap.

Bawihpuii te unauvin hnute pangngai an ring thei lo tur erawh ka lainat reuh. Ka hnute tui pêk tlâk a ni ta si lo a, Nan an hne chhunzawm dawn ta a ni.

Lawmsanga damdawi inah vawikhat mah a rawn kal chhunzawm tawh lo a, Zosanga'n, "A inthiam lo a niang, engkim kan hre ve vek si a, remchangah ka la hau dawn nia," a ti nghe nghe.

Min hruai chhuak tur an lo thleng tawh a, kan bungrua vel Zosanga leh Rinsangpuiin an khai chhuak a, ka pa a lo kal ve hman loh avangin ka nu'n Car a rawn khalh a, Zosanga khalhah kei leh Rinsangpuii kan chuanga Bawihpuii kan pawm a, ka nu leh nu Muanpuiin Bawihtei an chuanpui ve bawk a, in lamah pa Faka, Kimi leh Lawmsanga an awm thung.

Rinsangpuii te nupa chungchâng atu amahin kan sawi chhuak tawh lo a, amah nen hospital-a kan awm lai khân ruahmanna ṭha uchuak tak kan duang lawk tawh a, chumi kan tih theih chuan Liankimi a zak chem chem ngawt ang.

Kimi nen hian kan inrual loh pawhin kei aiin a nau hret chauhvin ka ring a, eng vanga min lo huaa min ngei ve ringawt nge a nih ka hre lo. Mi, a pâwnga takin ka ngei ve mai mai ngai lo a; ka huat ve chhunah erawh a daih rei ngar ngar khawp ang.

In kan thleng ta a.

Pa Faka'n leh Lawmsangzela'n kawtah min lo nghâk a, chhungkaw member kan pung ve ta.

In chhunga kan luh hnuin kan ri nak nak a, Zosanga room hlui kha kan mutna turin an lo siam peih diam a, khum pahnih an lo dawhzawm a, a hma a mi kha chu a tê deuh anti a nih ka ring, an ngaihtuah kim thlap thlap khawp mai.

Pa Faka'n ṭawngṭaina hun hmangin naute thar pahnih Pathian hnena hlanna a nei bawk a, tlai lamah ka nu te nupa chaw eiah an sâwm nghal bawk. Kimi a buai char char khawp mai, kan awm ve neuh neuh a, ṭhenawm hnaivai naute en tur an lo kal ve bawk nen thingpui lum a ngai zing si a, mawng a hûng hman meuh lo.

"Spi, vawiin aṭangin kan ruahmanna ang khan kal kan tum dawn nia," a beng bulah ka hrilh sap a, a lo man thiam nasa.

"Spi, in nupain in bazar lawk dawn em ni ang, tlai lam chawhmeh tur lam khâwm pahin," nu Muanpuiin Spi a rawn ko a, "Keiman ka va hruai ang e, kan inah thawmhnaw hâkthlâk tlem azawng lâk ka duh bawk a," Zosanga a lo inrawlh vat a. Spi a lawm hmel hle, an nupaa inbiakna hun ṭha nei hman lêkin lovin kan room-ah hlir a awm a, a û zawk Bawihpuii hi a chang deuh chawt.

Lawmsanga a rawn lût ve a, "Bazar tur chuan insiam la," tiin annu a rawn ko a.

"I û nen kan kal dawn, Kimi kha lo pui rawh," a ti nghat.

Lawmsanga'n chhân vak dan tur a hre lo a ni ang, nautê a chhaih zui daih a, ka lo ngawi reng thung.

"Kan thiamna ngawih ngawihah hi chuan pasal te lakah tihtauh ve ngam tur, kan titaua kan lawm lo a ni tih kha hre ngei bawk se," tiin Spi ka hrilh miau alawm. A zawm ṭha ṭan e, kei pawh ka diknaa ka tihtauh chuan Zosanga a zum dûk zel.

Thawmhnaw leh ka neuh neuhho Spi a awmna ka hrilh vek a, helama kan awm rih dawn chuan mamawh ka nei nual. Zosanga pawhin hâkthlâk leh a office thil pawimawh lâk tur a nei bawk a, naktuk hian an zin chhuak thut mai thei, a la chiang rih loh.

Forensic lam hi chu an âwl laiin an âwl vung vung a, hna a rawn kal laklawh chuan a indawt zut zel. Tun lai hian ruang en dik tur annei khât deuha tlêmin a âwltháwng deuh.

Naktuk inrinni a ni tawh a, Rafaela te day off a ni bawk a, rawn chhuak thei lo mah se nilêngin a biak theih dawn a, naute hming tur phuah a hauh tlat mai si a, a pahniha phuah tîr em em chu tiin naktuk vêk hian pa Faka'n pakhat a phuah ve dawn bawk.

"Duati, sûk tur in nei em, ka insu dawn a?" Kan room-ah Kimi a rawn lut a, nautê a rawn bih dâk dâk a, "Nei ve ang, midang thawmhnaw nen sûk pawlh ka duh lo a nia, i sûk dawn pawhin a hranin aw, chuan, i tih zawhah kan room hi rawn phiat zuai zuai teh," ka ti a, a ner sak.

He nu hi kan awm chhung chuan mi pa ngaihsak hman lêk lovin kan tîr tak tak ang e, a âwl lutuka a thluakah thlarau sualin hna a thawk zel a nih hi, Rinsangpuii a dawih ve si a, a âi awhin chimawm ka chhuah dawn khawp mai.

Kimi chhuah hnuah nu Muanpuii a rawn lût a, "Vawiin chawhnu hian kan thawhpui ṭhenkhat ten naute rawn en an tuma i lo intuai hnûm ve dawn nia, inbual i duh em? I duh chuan inbual la naute kan lo awmpui ang," a ti a.

"Spi te an lo lêt phawt loh chuan hâkthlâk eng mah ka nei lo a,"

"An muttui lai hian inbual la ka duh asin maw le, ka thawmhnaw lo inbel rih mai rawh," a ti leh tlat tawh.

"Ni rawh se," tiin inbual tumin ka inbuatsaih ve ta a.

Zosanga'n min rawn call a, Diktei lo lên a tum thu leh an rawn phur phei nghal dawn tih a sawi a, vawiin chu kan ni deuh nuai nuai dawn a nih hmel.

Hemi ni nilêng hian inlêng kan nei a, kan buai khawp mai.

Zanriah ei dawnah pa Faka'n thu sawina hun a hmang a, "Pathian hruainain tû hmelṭha tak tak kan nei ve ta a, tumah inpa pêk lovin a theihna chin chinah kan inbuaipui tlâng zel dawn nia, Duati pawh inthlahrung lo la, i mamawh eng mah sawk hreh suh ang che, Spi pawh a ni tho, nakinah Duati nen sumdawnna tur eng emaw kan la ngaihtuahsak dawn che u nia," tia a sawi chuan Spi nen kan inmelh zauh.

Zanah pawh Zosanga nen kan mu mang lo, kan fa te pakhat ve ve kan buaipui a, Rinsangpuii pawh hreh chung chungin an nupa room-ah a luh ve tâk kha.

Zing lam dar hnih velah zun chhuakin min tiharh a, Zosanga kai thovin min va hruai a, Lawmsanga te room aṭanga inhau thâwm rawn chhuak chu kan hre ve ve.

"In ngaizawng lo ula khatiang khan in awm lo ang, a rêng rêngah rawn sawi chhuah leh pawh a ngai tawh lo. I dik lohnaah hian han hau che ila i ngawi renga i zâwm chuang lo," Spi a thinrim ve tak tak a nih hmel, ani leh ni lo angin a awrâwl a ring vei phian a.

"Kan inngaizawng lo ka tih chuan awih mai rawh, khatia sual chhuaha mut hran kher pawh kha a ṭul hek lo," Lawmsanga chhanna avang chuan ka nui sak a. Rinsangpuii a lo mu hrang ve ngei a nih chu.

"Kha nu mutna hnuah khan ka mu nguar ang, chu chu hre mai rawh," a ti leh tân tân a, Zosanga'n "ka va kal dawn em ni? An thâwm a ring em mai," a tih chuan inrawlh lo turin ka hrilh.

"Kan sawia fel thei ni se chu thuhran, mahse, anmahni inhauvin an lungawi lohna ve ve sawi chhuak se an zia mai ang," ka lo ti a.

"Dik tak chuan nangmah zawkin Lungleia i phei pawhin Lalvenpuia i zui leh a, ka ngawih reng avang hian min zuam reng reng suh, Kimi ang duh ni ila an tam lutuk.."

"A lo nih tak chu, i duh miah loh mutpui duh tur khawpin hmeichhia i râwp em ni? Vena chungchâng i hriat chian duh leh amah va zawt la ti nia," an thu sawi ngaithla zawm duh tawh lovin nautê hnute ka siam san ta a.

Rinsangpuii mizia enin khawia bialpa mah va nei suh. Lawmsanga thikthu chhe sawi tur hre lo râk vel mai maiah ka ngaihsak ta a.

Damdawi in kan chhuahsan aṭangin karkhat a liam tawh a, Zosanga a hna thilah Champhai panin nimin khan a kal a, "I in luah te kha rawn en fel ka tum dawn nia, thla thar aṭanga kan luah dawn tawh loh thu te pawh ka lo sawi nghal ang e," a ti a.

Rafaela'n kan fanu upa zawk hming atan Lalrinliani tih a rawn sa a, pa Faka'n a nau hming atan Zomuansangi tih a sa bawk a, Zosanga nu dik tak Zomuankimi hming chawia a sak niin a sawi.

Lawmsanga te nupa pawh buaina em em nei lovin an khawsa chho nawk nawk a, khatia an inhau tûk khan Lawmsanga'n khum thar a order a, an rawn dah hnu-ah Rinsangpuii pawh a mu ve ta. Nupa chu intih thiam loh châng te a awm fo va, kan inṭhen hlen dawn a nih loh chuan rei tak thinrim loh tur, tiin Spi ka hrilh.

Kimi nen erawh an inbe ngai mang lo. Kei mah nen kan inkâwm ber a, nimin zing khan Kimi'n thawh a haia Rinsangpuiin ei rawng a bâwk vek. Kimi lo thawh hnuah, "Hlawh neia awm i ni a, i damlo a nih loh chuan tho hma ang che," a ti ve hmiah. Ka lo nui char char.

Kimi'n Spi nen min melh tawn zak zak hnuah eng mah sawi lovin a inthiar fihlim ta a.

Nu Muanpuii bulah a lo vûi deuh a ni ang, "Rinsangpuii hian engtikah mah min mil thei dawn lo a, ka tân awm reng pawh a nuam lo," a lo ri a, "I thu thu a ni mai, Duati te an lo awm tawh bawk a, Mafelin awmpui tur dang min zawn hmuh sak thei mai ang," tiin a lo chhâng a ni awm e.

Mahse, Kimi mal zia kan hria a, a chhuak ngam tak tak chuang lo.

Saitei pawh kâr khat châwl turin a rawn haw dawn a, kan ina kan awm lo chu a vûi hle. "Khata in awm daih te chuan lo kal reng a theih dawn si lova ka lo haw chhung chauh rawn riak phei ula," a ti a, nu Muanpuii hnena ka sawiin, "Ho mai mai, duh leh amah kha lo riak zawk rawh se," ati, ka hnial duh ta lo.

Min duata min ngaihsak bawk a, ani pawh Lawngtlaia a phei a hun dawn tawh a, kan huphurh tlâng hle. A chhan pawh ka pa a kal te ve leh awm si a, Zosanga a awm bawk si lo, krimahni ringawt chuan kan buai leh a hlauhawm.

Nu leh pa pawimawhna ka hre chho telh telh a, puitling inti ve ṭhin mah ila nu leh pa âi kan awh zo tak tak lo.

Sunday a ni a, inkhâwm lovin inah kan awm a, Hlimpuii leh hmeichhe pakhat an rawn lut ve hlawl. Spi te nen an lo inkawm ve tawh ṭhin avang khan ka lo ngaihsak lutuk lo a, "Zosanga fa kan lo en dawn," tiin kan room-an an rawn lût a, chhun chhunah zu rim an nam vel!

"E he, Zosanga a van ang lo em em," ala ti zui a..

"Ang lo reng e, Saitei a ang anti vek alawm," ka ti hmiah.

"I pasal i vên ṭhat viau loh chuan i fate hi ka fa anni thut palh ang e," zak lo ka ti takzet.

"En teh Hlimi, naute in lo ena a lawmawm, mi pa ngaizawng duh tur khawpa nêp i ni erawh ka khawngaih che," ka ti a, "Ve lutuka naktuk hian inpa te awmna hmunah kan chho ve dawn a, lo ngaihtuah lutuk duh suh, ûm nga vel bâk pâi sak kan tum lo, min rawn chah a.." a tih leh chuan ka sa zak.

"Ê, in duh zât zât pai rawh u, ka pasalin a nupui thlâk nana a hman che ka ring lo, a chhan chu nupui tlâk i ni tlat lo a.." kan inchhâng thui dawna ka hriat vangin, a ṭhiannu hnenah, "Ani hi i kâwm zel a nih chuan miin an hmu dik lo vek ang che, min lo chhuahsan tawh ula.." ka ti dam thlap.

"A zah thlâk ngawt mai, a kâi deuhva min lo hrethiam dawn nia," tiin thupha a chawi ta a, a ṭhiannu hi chu a pangngai hmel viau.

Ka nu leh pa Lawngtlaiah an phei dawn ta a, ka huphurh ngei mai. "A upa ber i ni a, inchhungkhur enkawl i kutah a awm dawn a, neuh neuh te kha in lo nei palh ang e," tiin ATM Card leh ₹10000/- min hnut chhiah a.

"I nu leh pa pawh kan hrilh tho a, an rawn ngaihven zauh zauh tho che u ka ring." Pa Faka'n a ti ve bawk.

Saitei naktukah a lo thleng dawn a, mahse, ka pu Lungleia mi a dam ṭha lo a, zan hnih riaka phei an tum leh thut si a, ka ngei tak tak.

Ka pi boral aṭangin ka pu hriselna a tla hniam viau a, ni Arini pawh a lo zin theih loh phah. Ka patea, ka pa nau hi an chhungkuain Vaphaiah Zirtirtu hna thawkin an awm a, kan inbe ngai lo tih theih a ni. A nupui chhungte nen an inpawh zawk a, keini lam chu min ngaihsak vak lo.

Ka nu bulah, Kimi hruai tel mai tura ka tih khan, "In buai lutuk anga sin, eng êm a thleng tawh lovang, a ngam tawh kherin ka ring lo," a tih vângin ka sawi nawn tawh bik lo.

Rinsangpuii Bawihpuii riahpui min dil a, keimah chauhva buaipui ai chuan tiin ka phal ta a, a tîr aṭanga min buaipui tu a ni a, ka hmangaih ang thovin a hmangaih tih ka hria.

Kimi'n riahpui ka ngaih leh ngaih loh min zâwt ve ngial a, "Ngai lo mai rawh se" tiin ka chhâng.

Lawmsanga nen pawh an inbe em em chuang lo a, chaw kan ei lai te hian ka melh ru leh zeuh zeuh ṭhin. Keima tâwkah ka lo chîk ve em em a, hmuh mawh awma a awm vaih chuan dim baksak lovin a nia ka hau dawn ni.

Zanah Rinsangpuii te nupain Bawihpuii chu an riahpui ve ta poh a.

Kei leh Bawihteii kan mu a, Zosanga nen kan la inbe leh lo. Ka zawhna pawh kha min rawn chhâng ta chuang lo a, an hnaah an buai a nih ka ring ve tawp.

"Duati, naute puan pakhat mah a rawn keng phei hleinem," Lawmsanga a lo lut a, "A buaipui awm viau dawna in mut ṭhat theih dawn loh chuan rawn dah mai ru aw,"

"A, buaipui thei ang, Bawihpuii hi chu kan nei nghal tawh dawn a nia," a nui suk suk a, nupa ve lem fa nei lova awm ringawt chu a hrilhhai thlâk ngawtin ka ring.

A tûkah pawh ka buaipui ngai miah lovin Spii'n a buaipui ta vek a, a rualin kan bual a, "Ti hian ka awm char char ang a, in insawn hunah pawh inhruai ka phal dawn miah lo a nia," fiam thu titak deuhva a tih chuan, "I bulah chuan ka ngaih a ngam zân, Zosanga dîl la,"

"Naa, a phal awm lo em mai," a ti deuh tlat. Zosanga azahin a hlau der viau a; ka rin aiin an inbe thei phian.

"Duati, Sp, thingpui in duh em?" Kimi room-ah a rawn dâk a, tun lai a mizia a dang hlauh, min be ṭha em em a, naute puan pawh tirh ngai miah lovin a su zat zat a, a hmain khatiang khan awm lo se chuan ka ngaina thuaiin ka ring.

Kan duh loh thu leh awm ve rih turin ka sawm ta a, Rinsangpuii chhuak turin ka mitmei a, hrethiam tak hian a chhuak nalh.

Lawmsanga nen khatia an awm dun ringawt dan kha dâwp chhuah ka tum tlat.

"Kimi, Lawmsanga nen khan inni ve deuh tak tak em ni? Spi bulah ka sawi miah lo ang," tiin ka zâwt ta a.

"Ninawm, sawi chhuah ka duh tawh lo a nia," a ti nghat a.

"Ka hria alawm, kei pawh tuin emawni ka fa hi Lawmsanga fâ angin a lo chhuah a, Zosanga phei chu ka la hrilh lo, a sawitu number hi kan nei tawh a, Zosanga lo haw veleh ka chhui tir dawn a,"

"Rinhlelh deuh i nei em ni?"

"Nei e, kan chhui chhuah hunah chuan a châk lo viau ang, nang pawh ka zawhna che ṭha takin chhâng la, i tan pawh a nuam zawk ang, khatia rilru hrehawm deuhva awm kha nuam i ti em ni, min hrilh la i veng hawk mai ang." Ka ti ve zaih.

"Rinsangpuii hi ka ngei a nia, zâwiawi ang deuh hian a lang a, a teuh lo. Lawmsanga nen an inneih hma khan Lawngtlaiah nu Muanpuii te kha an awm ṭhin a, chuta ṭang chuan Lawmsanga nen kan in hre daih tawh, College pawh kan kal ho vek a, Rinsangpuii nen an inhriat hma kum nga kal ta khan kan inngaizawng ve tawh," a ti ta a.

Dâwt sawi hmel a pu lo.

"A hma chuan Lawngtlaiah hlir an awm ṭhin a, Lawmsanga nen kan inngaizawng tih hi a nu te khan an hre lo a, khatih lai hun khan Lawmsanga Aizawla a pite hnena awm turin a phei ta a, eng mah imṭhenna mumal awm lovin kan inṭha ṭhen tawp a, chumi hnu kum khat aliam leh chuan ka nu leh pa in accident an tâwk ta a, an boral hnuah chhungte belh tur mumal ka nei lo a, Lawmsanga kha vawi tam biak ka tum ṭhin a; mahse, min chhâng ngai lo." Rilru nat hmel deuh hian a thaw hak a.

"Chuan..." ka lo ti sap a.

"B.A, ka la zo lo deuh tihin nu Muanpuii te inah ka awm ta a, Aizawla an pêm tak tak hnu pawh khan an in ka enkawl sak ta zel a, Lawmsanga hi ka hua a, phuba lâk dan tur ka ngaihtuah ṭhin. Vanneih thlâk takin an awmpui ṭhin kha a hman dawn tak loh avangin Aizawlah min hruai phei ve ta a, khatih lai khan Lawmsanga leh Rinsangpuii inneihna tur vel an buaipui mêk a, ka rilru a na ṭhin hle a ni, Lawmsangzela hi ka hmangaiha mahse, ani chuan ngaihzawng satliah ang leka min ngai tih ka hrethiam chiah, â, ka sawi thui lutuk dawn.." a'nti leh rih a.

Thu dik a sawi a nih chuan ka khawngaih ve tho.

"Sawi zo vek la i thâwl huai mai ang," ka lo ti a.

"Nia, tihian nupui a nei ta a, a tîr chuan huatna rilru ka pu hran lo; mahse, kei aia a thlan zawk Rinsangpuii nen an inhau thawm ka hre zauh zauh a, amah ka duhna kha chuti maiin ala reh bik si lo a, ven thawn tur awm ta lo ta chu annu awm loh hlanin ṭan ka lo khawh ve a nih kha, neih em em ka tum vang pawh ni lovin, hrehawm ve se tihna rilru kha ka pu a ni deuh ber, fâ a nei thei lo tih ka hre ru ta bawk a, chu chu vau nâna hmangin zan hnih chu a bulah ka va mu a, ka mu tih a hre lo thunga an nupaa an buai hian Lawmsanga rilru a na ṭhin a, khatiang tawrhtir duhna vel mai mai kha maw le..." zuk ti awlsam êt a.

"A nih eng ati nge kei hi min mil loh em em a, kan inhmu ngai pawh a ni si lo a,"

"Ho lutuk, i lo awm ve te chuan kan tam belh dawn a, mitmei ven tur a tam dawn bawk a, Lawmsanga rilru tih natna hun ka nei tlem dawn asin," tiin a nui a, "Ka sual tiraw, mahse phubâ ka la ve hlek a nih kha," tho chhuakin thingpui lum turin a kal ta a.

Ka lo rin dan leh ka ngaihruat dan nen a inpersan lutuk a, Kimi pawh dem ngawt theih a ni bik lo. Ama thlirna zawnah thiam a inti ve a, Lawmsanga pawh chuti chu..

Nakinah Rinsangpuii ka la hrilh ve ang, a rilru a dam deuh mahna...

Kimi ka huatna pawh tlêmin a kiam ta deuh a, mahse pawisak a neih loh danah fimkhur tho chu a ngai tih ka hria.

Chhun thingpui kan ina nau an mu ṭha bawk nen Rinsangpuii nen an inneih thlalâk kan en dun mai mai a, "Pasal nei lo khan lo awm ta hle hle ila," a ti chhuak sap a.

"Chutiang ngaihtuah mah ta che, i nei tawha inchhìr khan awmzia a nei lo, fâ pawh a hunah, Pathianin rem atih chuan ala pe em em ang che," tiin ka hnem ve a.

Zosanga hian phal se chuan Bawihpuii hi chu kawl rih mah se pawi ka ti lo. Ka enkawl peih loh vang ni lovin an nupa ringawta hetia awm hi an hlim zîktluak lo niin ka hre ve deuh, thil dang ngaihven tur nei se an hlim zawk phian mai thei. Kan fa a nihna a bo dawn chuang lo a, hmun hla taka kalpui tur lah anni hek lo. Chhungkua hlim tlâng taka chênho hi a hlu ber ka ti ve tlat tawh.

Zanriah kan ei khama Zosanga ka call ta a, Hlimi thil sawi kha ka helh deuh tlat.

"Hlimi te naktukah an lokal dawn em ni?" Hello, a tih rual rualin ka zâwt nghal a.

"Kal dawn e, kan indaih lo lutuk a, file ken kim loh kan nei bawka an rawn dah dawn," ṭha têin min chhâng ve mai.

"Zû i chah a ni maw?"

"A teuh lo lutuk, ni lo lo hian min rawn puh lo la, ka chau a nia,"

"Hlimi'n a sawi miau sia lawm, ka hrilh ang che, ani nen eng emaw sawi kâi zawnga in awm leh vaih chuan..." sawi zawm duh lovin ka ngawi daih a.

"I duh duh hi i lo sawi ve tawp zel a, zin san tawh lo che ila a ṭha ang, ngaih dan fahrah tê tê i rawn au chhuahpui leh ngawt zel." Tiin Nautê an ṭhat leh ṭhat loh min zâwt zui daih a, Lawmsanga te'n Bawihpuii an riahpui thu ka hrilh chuan, "A ṭhat hlauh chu, i buai nêpin i hahdam ve deuh anga tiraw?" A ti dam thluam. An riahpui a phal loh ka ring deuh kha a ni a, eng mah a sawinâwi lo hlauh.

Hlimi te ṭhian dun an lokal thu te, an ṭawng dan te ka hrilh ve vek a, "Ngai thu tak duh suh, keimah i Zosanga hi ka rinawm bur," a nui zui a. Thinrim tum râna be ve ka nia, a ho zo leh ta vek.

Kan inbiak zawh hnuah nu Muanpuii te ka be leh a, "Kan châm rei deuh mai theia i nu te in lamah pawh lêng lo mai rawh aw, Matea te pathum ringawt zawng an ngaihtuahawm êm mai," ati hrâm.

Ka nu te inah ka lêng dawn tih pawh ka sawi si loh! In lam an rawn ngaihtuah hle tih a hriat mai.

Kan nufain kan mu leh ta a, room lehlama phun deuh ser ser reng ka hriat chuan chiang zâwka hriat tumin ka inbeng kâng a, kan room leh lam chiah hi Store room a ni ṭhin a; mahse, mikhual room pakhat chauh a awm avangin mikhual neih nikhuaah a buaithlâk tiin chuta tân chuan an siam leh ta kha a ni a. Inhnuai lamah store room a awm thung.

Tun ang hunah tu nge ṭawng ang a!

Chutia thâwm ngaithlaa beng ka chhit kar lai chuan nautê a rawn ṭap a, ngaihven loh chi ni hek lo, ka va ngei mai mai tak. Bawihteii hnute tur ka siam ta rih a, atu chu ni maw!

Nautê a mut fel leh meuh chuan ṭawng ri kha hriat tur a awm tawh lo a, a reh ṭhiap. 'Kimi' ka tih dawn chuan a room nen a inhlat bawk sia mipa nge hmeichhia tih pawh ka hre ta chuang lo.

Khawvar dawnah rei lo tê ka chhîng ve zawk a, phone riin min tiharh zui leh nghal.

Saitei a lo ni a, ka pu a ṭhat vak loh thu a rawn sawi a, "Bp sâng leh zunthlum a nei bawk sia, kan lo haw leh thei dawn lo," a ti a.

Ka pi leh pu te'n min duat teh reng nen an hun tawp lamah anmahni ngaihsak hleithei lova ka awm hi hrehawm ka ti hle.

Saitei hnenah erawh chuan, "Min rawn ngaihtuah duh suh u, nautê pawh an ṭha a nia," ka ti a.

Ka nu ka khawngaih takzet, a fanu lah ka lâktlâk si loh. Ka pi pawh ka buaipui ve miah lohin a boral tawh a, tunah ka pu a damlo leha chu pawh ka buaipui leh thei lo a, Saitei lo haw lo phei se chuan ka nu a mal dawn lutuk tlat. Hrehawm ka ti.

"Duati, kan room ah i lo phei lawk hman em?" Rinsangpuiin min rawn ko vak vak a, eng tak chu ni maw.

Bawihpuii ka rilruah a lo lang nghal a, hmanhmawh zet hian ka va phei ta a.

Lawmsanga chhuatah a lo mu kawm reng a, a luak nasa bawk si. An room chu zu rim a nam vut vut a, ka fanu pawmin Spi a ding ngawi rân a, a thinrim hlê tih ka hre mai.

"Eng nge thil awmzia?" Lawmsanga buaipui pawh ka tum chuang lo.

"Nizanah kan inhnial deuh a, a chhuak a, zankhuain a rawn let lo, tih hlauhthawn che ka duh loh vangin ka hrilh duh lo che a nih kha, bâkah a rawn lêt ve mai ka ringa nichin deuh khan a rawn lûta ti hi a ni mai.."

"Eng nge maw a hriata hetia sual a chhuah tlat le, ka nu te awm loh lai lehnghalin," ka lawm lo takzet, rilru hah lai lai a.

"Khaw nge Kimi?" Tiin ka zâwt a.

"Ka hre miah lo, room ka la chhuahsan lo a,"

Lawmsanga pawh ngaihsak ta chuang lovin Kimi room lamah kan inzui phei ta a, ka fanu ala pawm reng bawk.

Nizana phun ri sar sar ka hriat kha anni thei mai ang em?

Mahse, eng mah ka hriat chian loh avangin ka ngawi ta rih a...

B+>[BeckirafARenthleI]<+®®

THE RAPSAGYAN FAMILY

Becky Rafa Renthlei(-BRR)

Chapter-39

Liankimi room chu chhung lamah a lo inkalh tlat a, ala hma ve bawk nen Spi hnenah, "Kai tho rih lo mai ang, a lo thawh hunah a hriat dawn tho a, Lawmsanga kha ngaihven hmasa zâwk mai ang," tiin an nupa mutna pindan lamah kan lêt phei leh ta a.

Chhuata mu hlâwm reng Lawmsanga chu khawngaihna rilru ka pu deuh, tlangval fel leh thuawih tak khâ a ni ṭhin a, a nupui neih aṭang hian a nun dan a kháwbáw chho ni berin ka hria; Spi thiam loh em em pawh ni lovin Kimi lo inrawlh ve chhên khan thil a ti hnawk zo ni berin a lang.

Chutah, fâ a nei thei lo tih a inhre kur bawk si a, beidawn leh mahni inthiam lohna neih a awl viauin ka ring. Mahse, ruih phah nân leh hmeichhe dang ngaihven duhna rilru hial a pu hi ka dem tho si.

Kimi hi Rinsangpuii thlâkna atan a hmang duhin ka ring miah lo a; mahse, tun hmaa an lo inkawp tawhna leh inṭhenna mumal awm lova inkalsan an nih tak tak chuan a nupui laka a lungawi lohvin a pan duh tho tih a hriat reng.

Bawipuii kan room ah Spi-in a va mut leh tê tê a, chu mi hnu chuan Lawmsanga khumah kan zâwn chho ta a, ka chau hnawk thei alawm le! Indim ka la ngai bawk si a, Spi-in amahin a hlâng chho zo bawk si lo, chhuata luak vel erawh ka tih fai pui ta lo a.

"Duati, dik tak chuan haw mai ka duh tawh, hetiang ringawt hi chuan kan inpum hlen tak tak lovang, a harh hunah hâu pawh ni ila, eng mah a sawi leh duh chuang lo ang a, simna tak tak rilru a pu a nih loh chuan hetiang hi a awm fo dan tur chu a ni mai," beidawng thinrim bawk si-a atih chuan han sawi zui vak ngaihna ka hre lutuk lo.

"Nia, hriat thiam a har ê, tuar rih rawh inti ngawt dawn ila mahni chana indahin a harsa ve dawn bawk si a, eng pawh ni se tun ṭum chu hre thiam leh phawt la, ka nu leh pa lo haw hunah ala awm lui zel a nih chuan tih dan dang kan dap dawn nia, tunah hi chuan a ruih chhan leh tu nen nge an awm tih te hriat hmasak phawt a ṭha," ka ti ta ringawt a.

"Zû a in ngai tih pawh ka hre lo, Zosanga'n in a chhuahsan zan khan a rui a, kha kha a vawi khat in ka hmuhna a ni, a lo inthup char char ṭhin a ni ngei ang, zû a in chhung hi chuan kan inrem dawn chuang lo a. Zu in mi pasala neih ai chuan nuthlawi mai pawh ka hnial lo," lawm lo tih hriat ngawih ngawih hian a ṭawng zawm leh a, ka khawngaih reuh tawp.

Zing dar riat a ri tawh a, Kimi a la tho ta lo fo! "Kái tho miah lo ang, an pahnih hian mu char char rawh se, chaw eiah pawh kan nghâk lo ang a, an lo thawh pawhin ṭawngkam khat mahin biak loh tur, nang pawhin Lawmsanga ngaihsak duh bîk lo la, a bia che a nih loh chuan be hmasa rêng rêng suh aw, hrem an ngai a nih hi," tiin Spi ka hrilh a.

Keima chunga sual ni lo mah se Spi lamah ṭan zel ka tum. A dik tih ka hriaa Kimi'n engkim min hrilh vek mah se ka ṭan phah chuang lo, mi nupa inkâr buaina thlentu nih hi sual lian tak a ni.

"Mahse, zanah eng tin nge ni ang? Amah a mu hrang duh awm si lo a," rilru buai hmel takin a ti a.

"Chutiangah buai duh suh, kan khumah kan leng vek ang, i lo mu daih dawn nia, thinrima a ṭawng khum che a nih leh keiman ka lo chhâng dawn nia, mai mai a! Ka nu leh pain ka kutah eng kim an nghat a, ka hau hreh rêng rêng hleinem, a ṭûl a nih chuan ka pa (Zirsangliana) pawh kan ko phei dawn nia."

"Ka lo mu tak tak dawn a nia, a hmêl ka hmuh ringawt pawh hian ka thin a rim zel," chaw ei a siam zui mawlh mawlh a, "Nau mut ṭhat lai hian ei fel diam ang," a ti leh a.

Chaw ei a siam chhungin mikhual pindan, nizana ṭawng ri ka hriatna lamah khan ka phei ta a.

Eng nge hmuh ka inbeisei pawh ka hre chuang lo. Room chhung a la thim ṭhiap a, light on-in ka hawi kual a, Single khum bula zu bottle leh Tui bottle la in zawh loh a awm a, khum hnuai ka bih leh hrâm. Kimi Slipper khing leh lam ka hmu ta a, ka thukru nghal daih.

Ti kha chuan 'kan in dun lo' pawh ti se, a fiahna ka nei ṭha thawkhatin ka hria.

Choka lamah pheiin chaw ka ei ve ta a Spi erawh eng mah ka hrilh rih lo. A thinrim dawn nasa mai sia.

"Eng nge nizana in inhauna chhan?" Tia ka zawh chuan, "Kimi'n whatsaap aṭangin a rawn bia a, inngaihzawnna lam eng mah phei chu a sawi lo; phone aṭanga inbiak kher pawh a ngai lo, a rûka in lo inbiak ṭhin vang a nih hi a zuam em em che, ka tia, chu chu a ngai hua maw le," a ti zâwi raih a.

"A buaithlâk êm mai, dawh hrâm hrâm a ngai a nih hi, in inneihna a la rei lo a, kohhran dan anga innei in ni bawk si a, inṭhen leh ringawt pawh thil zahthlâk a nihna chen a awm ve a, chhungkaw mualphona a ni tel bawk si," Ka lo ti a.

"Nia, ka chhungte rilru a na dâwn êm asin, chuti ni lo se chuan ka haw nal nal ang, ani nen hian hma lam thlir tur kan nei pawhin ka hre tawh lo," chaw pawh a bâr mang lo rêng rêng, a ṭah a chhuah hmel bawk.

Tih tham eng mah ei lovin a tho zui daih a, kan room lamah nautê a va ngaihven ta a.

Keiin kan eina vel seng felin thleng ka sil a, kan nula Kimi a la tho ta lo. Lawmsanga phei chu a thâwi pawhin a la harh eih lo. Ka pasal ni se ka hre thiam thei bîkin ka ring lo.

Hlimi nena zû an in dun ka hmuh te khan ka na ngawih ngawih a, nau pai lo ila chuan thinrimin ka chhuak ve thovin ka ring. Spi pawh dem theih ngawt a ni bik lo.

Ka fa te pahnih kan bual zawh veka kan tih mut leh hnuah Kimi a lo tho chhuak ta a, chawhma dâr sawmpakhat a ri tawh.

"E he, chaw in ei vek tawh elo!" Inthiam lo hmêl a pu ve deuh.

"Ei loh a hun tawh hleinem," tih chauhvin ka chhâng a. Spi phei chuan eng mah a sawi lo.

"Nizan ka nuamsam lo deuh a, ka muhil thei lo a, khawvar dawnah ka muhil ve chauh," dâwt chiang lutuka a sawi vang chuan ka ngei kher mai.

Ti hian mi inah hlawh neiin a awm a, inthlahrunna pakhat mah a nei lo hi mak ka ti. Dam lo tak tak ni se kan ngaihsak viau ang; mahse, a mizia kan hre chiang tawh a, ka ngaihsak thâ pawh a tho lo.

Spi nen kan in su a, Kimi tirh kan tum tawh lo hrim hrim, inthu rual takin tih tur kan ti dun zel a, chhun thingpui in hunah erawh nau a tlei duh ta mang lo a, kan buaipui ta rih a, Bawihpuii a û zawk hi a fel a, a nau zawk erawh ṭah ṭhet ṭhet a ching khawp mai.

Lawmsanga dâr thum velah a rawn tho chhuak ve ta chauh a, a tûm bûr!

"Nizan ang khan vawikhat mah rûi tawh suh ang che, khumah pawh mu lovin chhuatah i mu a, i luak te kha innuin a thian vek tih hre rawh. Ka nu leh pa, i û hnenah pawh eng mah ka la sawi lo zawk a," tiin Spi inbual hlanah ka hau ta a.

"A rawn ko che em ni?" A ti sup ringawt a.

"Koh lohvin, Kimi ko se i ti em ni, inpahnihin zu in in dun tih a hriat vaih chuan a lawm lo khawp ang," ka ti leh a..

"Eng a? Kan in dun lo hrim hrim,"

"En teh, Lawmsang, zah tlâk chu ka ni hauh lo; mahse, ka nu leh pa awm loh veleha hetia i khawsa hi mak ka ti khawp mai, min zah lo hle-ah ka ngai," ka tih leh chuan ṭawng tumin a âng zuau a, mahse, a ngawi leh daih.

"Pathian leh a kohhran hmaah, thihnain min ṭhen hma loh zawng tiin thu in tiam a, hetianga awm tur hi a ni lo reng reng, i û in zû a in ṭhin lai pawhin hrehawm i ti a, i rilru a na a ni lawm ni, tunah nang i ni leh a, Kimi hnaihah pawh awm tam tawh suh ang che," ka ti nek.

"A hahthlâk a nih hi.." a ti leh ringawt.

"Chuti a nih chuan Spi hrehawm reng renga awm tîr hi i duh em ni? Lungleiah phei mai rawh se, amah phei chuan hetia a awm reng dawn chuan kan inpum tak tak chuang lovang ati a, a beidawng viau a nia," tiin Kimi nen an chungchâng ka hriat zawng zawng ka hrilh ta vek a.

"Innu thlâkna tur atana i duh a nih tak tak chuan Rinsangpuii hi ṭhen ngam rawh," ka ti leh bawrh bawrh a, "Duati, i hrethiam lo a nih kha, in ṭhen ka duh bik hleinem mahse, a harsa êm a ni, Kimi pawh a khawngaihthlâk tho," a tih chuan, chhân enah ka en tawh lo.

He mi ni aṭang hian sawi fak tur awm si lovin kan boruak a nuam lo a, Spi ni se kan room ah a riak ta char char a, Lawmsanga zan tin a rûi ziah a, Kimi pawh a zia a záwi ruih mai.

Zosanga ka phone ta ringawt a.

Naktuk tlai lama an lo haw theih a rin thu a sawi a, ka thawveng huai. Mahse, Zosanga a lo haw chuan Spi a khawngaihthlâk dawn bawk si, thil zêp ṭûlin ka hre lo bawk a, Lawmsanga awm dan zawng zawng ka hrilh ve ta vek a.

"Ka lo haw hma chuan ti khan lo ngawi rih ula, eng mah lo sawi suh aw, ka lo haw hunah keiman ka lo zilh dawn nia, ka nu te i hrilh em?" Tia min zawh chuan ka hrilh loh thu leh inchhungkhur boruak hrehawm ka tih thu ka sawi a.

"Lo tuar hrâm hrâm rawh u, Kimi pawh zilh deuh a ngai a nih kha, chuti a nih loh chuan chhuak mai rawh se," a ti hmiah.

Ka pu pawh tlêmin a ṭha chho leh deuh a, Saitei a lo haw ang a, ka nu a châm rih dawn niawm tak a ni.

Ni Arini te pawh lo zin an tum a, pute Bawiha hna thilah a nia, ka nu châm lai remchang chuhin Saitei te nen an lo phei rual dawn tih an sawi. Naute en an duh ve bawk a, ka nî te nupa hi chuan min duat a, min ngaihsak viau.

Rafaela pawh a reh ta vung vung mai. A zirnaah insawrbing a ngai tihte a rawn sawi a, naute hmuh a châk thu leh krismas chawlh an lo hmang thei dawn tih a sawi chuan ka lawm ngei mai. Mipa mah ni se ka ngai a, a awm ve khân ka thlâ a muang ṭhin.

Tunah october thla tawp a ni tawh a, November thla tir kha ka nau neih huna kan chhût a ni a; mahse, kâr thuma hmain ka nei ta kha a ni a, Diktei pawh hmanni-a a lo kal bâk kha chu a lo kal nawn tawh lo. Nitin hna thawkin a chhuak a, intlawh reng a harsa ve deuh atin ni.

"Duati, Bawihpuii hi a luak a nia," Rinsangpuii kan room ah a awm a, min ko ri ka hriat chuan hmanhmawh zetin room ah ka lut a.

Bawihpuii chu a lo luak bârh bârh a, a pang ka dek a, a lo sa vur mai.

"Nachhâwkna pe tho ila, en tir a ngai a nih hi.." ka ti a.

Kei ai aiin a hlauthawng zawk.

Kan thawmah Kimi a rawn lût ve a, "Damdawi ina kal turin lo insiam rawh," ka ti a.

"Kan hruai ve dawn em ni?" Spi-in a tih chuan, "Hruai mai loh te chuan, Lawmsanga koh i duh ka ring chiah si lo a,"

"Duh teuh lo mai," a ti hlar.

"Nautê Kimi kutah kan dah ngam nâng, Car ka khalh anga, pakhat ve vein in pawm mai dawn alawm, car khalh chung te chuan ka pawm thei si nâng," ka ti a.

Chumi hnu chuan Hospital lam panin kan tlân ta a.

Lawmsanga workshop-ah a kal tawh a, nizan a rui lo teh tlat. Mahse, Spi a riak phei duh chuang lo, a rawn ko bîk hlei lo a, an nupa inkâr chingchivêt lutuk hi ka hah hluah hluah.

Doctor in damdawi a chawh a, Bawihteii pawh kan entir ve nghal ta ringawt a, "An hnute hnêk in siam tak deuh a ni mai thei, an pum a mar em mai," a ti ta a, a nih duh hmel viau.

Admit a ngaih loh avangin khaw thim dawnah kan haw ta chauh a, in kan thlenin Zosanga leh Lawmsanga an lo ṭhu kur a, Zosanga'n a lo haw tur thu min hrilh miah lo!

"Surprise," tiin a nui suk a.

"I chhia a nih chu, min hrilh ve tur a lawm," tiin Bawihpuii chungchâng ka hrilh zui mawlh mawlh a, Kimi pawm lâi lâksakin, "Keima duat chu a lo dam lo a maw?" Tiin a pawm hlu hlu a, damdawi in kan chhuahsan tirh, Spi te'n an mut pui hma khan Bawihpuii hi a khawih tam a, a nau ai chuan a ngaihsak deuhva hriatna ka nei.

Keiin Bawihteii ka kuah ngun zawk a, hmangaih bîk nei lo mah ila ka kuah tam zâwk a nau hi chu ka hauh deuhvin ka hria. Bawihpuii hi chu Zosanga leh Spi te nupain an ngaihsak a, ka papêk titih.

Zanriah buatsaihin Spi nen kan buai char char a, Bawihtei luakna thil vel leh room singsain Kimi a buai thung a, Zosanga leh Lawmsanga'n naute an awm ve bawk a, kan boruak nuam lo pawh kha Zosanga a lo thlen chuan a zia ta deuh.

A lo haw tur thu a sawi lâwk lo naa a nau nen an lo awm dun danah eng emaw chu a sawi ngei ka ring. Lawmsanga hian a û thu chu a zâwm phian mai thei asin, keini sawi ve teh ngawt ai chuan.

Zanriah kan eikham a, Spi a buai ru hle, mutna chungchângah, "Eng tin nge ni ang, inpa a lo haw tawh si a?" Tiin min hrilh sar sar a, "Zosanga ka lo sawipui dawn nia, tih dan a hria ang," ka ti a.

Zosanga inbual zo a rawn chhuah hnuah ka lo hrilh ta a, "Buaina tur a awm hleinem, va ko teh an pahnihin," ati awlsam leh ringawt tawh.

Kan room-ah kan paliin kan awm a.

"Mate, in nupa hi in insiam ṭha lo a nih chuan rei in innei dawn lo tih alang reng, Duati nen kan inneih dan in hria a, nu leh pa laka kan hel pawhin keini pahnih chu nghet takin kan invuan tlat a, a tawpah chuan inremna a awm mai. Nangni chu chutiang inni ve lo a, nu leh pa phalna thlapin, mawihnai thei ang berin in innei a nih kha, in hau leh intih thiam loh châng awm mah se inrem hrâm hrâm tum tur." A ti a.

Lawmsanga te nupa an ngawi reng.

"Ka thu sawi tur hi ngun takin ngaihtuah ang che u. Inṭhen hlen thei tura in inngaia in induh tawh lo a nih takzet chuan tun hi inṭhen hun tak a ni a, Spi paw'n pasal dang a duh leh thei, nang pawhin nupui i duh leh thuai ang, khua a tlâi hma hian innih tur lam lam ni ngam rawh u, fâ fahrah tur pawh innei lo a, rilru puitling tak pu rawh u, Duati nen pawh kan inhaua kut te pawh ka thlâk hial. Mahse, nupa inrem reng leh inngeih reng hi a theih loh," tiin a ngawi dat a.

"Inṭhen hlen in duh loh chuan inrem taka awm tum rawh u, tlâwm zawk awm tum ula, zû pawh in tawh suh," tiin a nau a melh a, "Kimi nen hian inneih pawh tum ula, ka nu leh pain an remti dawn lo, chuvangin i rilru siam ang che, fâ in awt a nih pawhin in thu a nei thei inni lo a, in inneih dawn khan fa kan neih loh chuan kan inṭhen ang tiin thu delhkilh innei em ni? Mi te pawhin kum ruk te, kum sawm dawn te pawh annghâk asin, Sp, nang pawh khatiang vang khan i rilru tihnual lo la, kan ṭang tlang anga phâi lamah te pawh tih dan dapin in kal dawn nia," a ti dam thlup.

Zosanga, kei aia nau zâwk leh puitling lo zâwka ka ngaih hian ava sawi ṭha si êm. Ka ngaisâng thar sawt a, a hmel ṭha tak te hi ka 'thinlai' thar leh ta riau. Hus! Ka nuih aza e a, ka thil ngaihtuah dan mai mai chu.

"In room ah phei ula boruak ṭha lo neih tum lo hrâm rawh u, Bawihpuii in riahpui leh dawn em?" Tiin a zawt zui daih a, "Aw," tiin Lawmsanga te nupain an chhãng rual deuh ngei.

Chumi hnu chuan kan fanu upa zawk pawmin kan room an chhuahsan ta a, eng tak va ang leh ang maw.

Ka pasal thu sawi kha dik ka tiin ka pawmpui thlap.

"Sawi ṭha ve.." tiin ka nui a.

"Lalduat, lo fiamthu rêng rêng suh," a ti hluk.

"Ka ti tak tak alawm, khatiang sawi tur khan ka beisei phâk lo che," ka ti a.

"Hah!" Tia a kut ding lam phar zauh chung hian, "Mu teh ang, min bâwl dawn tlat," tiin khumah a rawn lâwn a, "Khati chung pawha an la in nghirngho a nih chuan nu leh pa hnenah hrilh mai tur," a tih zawm leh a.

"Hrilh pawh ni ila awmzia vak a awm áwm lo em mai, inṭhen a ṭha lo tih an sawi leh tawp ang a, chu zawng chu," ka ti a.

"Keini min inṭhen tîr an tum em em a, kan inṭhen thei si lo a, ka Duatbiki hian min lo duh hleuh hleuh e.." a nui suk a.

"Zak rawh aw, i chhia, i chhe siah, nangman a nih kha min duh ngawih ngawih, Lungleiah min ûm zui thul, Champhaiah min luhkhung bawk, â..ka sawi thui peih lo," ka ti a, a nui nasa ngang mai.

"Nia, ka duh rêng che alawm, ka duh che a, ka hmangaih bawk che, Duatmisual..." a sawi zawh rualin min fâwp a, ka âwmbâwr chûlin, "Ka chanpual Bawihteii te unauvin min chuhpui lo hlauh," zuk ti a.

Hmangaihna chen dun duh mah ila duhthusama ka la dam chian loh avangin a insûm ta rih a, "Zanin chu muhil hmasa la, hna tlêm thawh pahin Bawihtei ka lo vil dawn nia," tiin khum a thawhsan ta a.

A zin chau awm sia; mu hahdam se tih rilru ka lo pu deuh kha a nia mahse, hna thawh tur a neih tho chuan tiin ka mutsan ta a.

Zing lam dar khatah ka zun chhuakin min ti harh a, an pafain an mutui hle, Zosanga'n a kut vei lamin Feeding bottle a hûm a, dinglamin a fanu a kuah bawk. Hnute a pêk zawh rualin a muhil a nih ka ring.

Lawmsanga te nupa thâwm hriat tur a awm lo a, Kimi pawh a reh ṭhiap. Boruak pangngai kan tawng chho ve dawn ṭan a nih hmel.

Krismas rim a nam chho a, November thla kan chuang kâi ta dêr mai. In lamah harsatna em em leh buaina kan tâwk lêm lo bawk a, ka nu leh pa an lo haw ta rih lo.

Lawngtlaia nu Muanpuii in kha Assam type a nih vangin rawih lam a pan ve zel a, sak ṭhat an tum a, a hmun ngai tho hmangin a chhâwnga saka mi luah theih tura siam an tum deuh niawm tak a ni. Ka nu pension hun an nghâk deuh kha a ni a; mahse, kum te a lo thar chuan a ngaihtuahawm tawha an rin avangin muangchang lova sak mai an ti leh ta zawk a ni.

Ni Arini te nupa leh Saitei an lo phei tawh a, riak tura min sawmna erawh kan hnial ta. Zosanga'n," Zan hnih khat lek va riah ai chuan hetah chaw eiah sawm ila a ṭha zawk," a ti leh tlat a, ka hnial duh ta bik lo.

Chaw an lo ei ni-ah Kimi a polite hle.

Ka nî nen an titi luam a, Bawihpuii te unau thawmhnaw tur an rawn keng nual. Putea'n naute en nan ₹2000 min pe ve ngei a, ka lawm hle, Saiteiin Bawihpuii hmalamah a awrh a, Spi in a nau zawk a awrh bawk a, ka nî nen kan va bazar ta a.

"I tân thil lei a harsa awm si a, in lei âm deuh rawh," tiin thawmhnaw min enpui nual a, chaw hmeh leh inchhungkhur mamawh tur kan lam khâwm pah bawk.

Zosanga a rawn haw hma a, ka putea nen kan workshop-ah motor check tir turin an kal daih a, Lawmsanga a awmsa thung.

Ni Arini te kar khat lai châm an tum avangin ka pa Lungleiah a phei ve ta a, ka nu ala awm bawk a, mahni buai buaiin kan buai hlawm a ni ber mai.

Zanriah kan kil laiin ka nu in min lo call ta a, ka pa tlangval laia a ngaihzawng ṭhin Nuteii a thi tih a rawn sawi a, pasal ka neih hma deuh hian ka nu-in ka pa nen an inkawp lai chanchin min hrilh vek a, Nutei pawh hi amah hmu lo mah ila a hming ka hre ve lutuk tlat.

Ni Arini'n "Engtia thi nge han zawt chhin teh?" A ti a.

"A chhûl a lo cancer a, a rang chi a nih vangin thla ruk an inenkawl hman ṭâwk, a boral ringawt, a fapa pakhat a kalsan," tiin a rawn sawi a, keimah ang rual vel fapa a nei tih ka hria. Nupui ala nei lo a, Hindi teacher niin Tlabung Middle school-ah a thawk a ni awm e.

A ruang hi an khuaah phurh chhoh tur a ni a, Lunglei Civil hospital-a boral a ni a, ka pa nen kal ve an tum a, an khuaah zui thei lo mah se Lungleia thlahna hun an siamah erawh lan ve an tum tih a sawi. An tun hma lama ka pa bialnu hlui a nih vanga kal tum ni lovin helaiah chhungte awm lohna hmuna boral a ni a, an awm remchan lai a nih vanga kal tum an ni.

Ka nu hi chu a rilru a ṭha a, Nutei kha a lakah sual ṭhin viau mah se a haw zui lem lo.

Ka ni te lo riah an tum si lo a, Zosanga'n a va thlah ta a, an Car workshop ah an dah rih a, naktukah Lawmsanga'n a lo check sak tur thu a sawi.

Kan fate pahnih pawh thlá an tlin meuh chuan ka hmu lian ve âwk mai.

Saitei leh Valpuia te an inzui ve leh tawh a, kârkhat chauh chawlh a nei si a, Valpuia a khawngaih thlâk hle.

Nimina a lo kal pawh khan, "I nu leh pa bulah lo sawi ve rawh, inneih hi ka hmanhmawh tawh sia zir zawm pawh ngaiin ka hre tawh lo, Pathian zarah ani châwmna tur na na na hi chu ka nei ve a nia; a zir zawm duh ṭâlh leh pasal nei chung pawhin a zir thei reng a lawm," tiin min hrilh.

"Ka lo sawi ve ang, December ni 12 ah a lo chhuak tawh dawn a, kum thar tîrah an phal te chuan innei mai ula," ka lo ti a.

"Chu pawh chu a rei ka ti, Rafaela lo haw theih lai December ah ni thei se, in mipa neih chhun tel lova inneih buatsaih in duh dawn si lo a," a ti leh zel.

A sawi dik. Rafaela tel lova pasal neih tir ka nu leh pain an remti miah lo ang.

Valpuia duh dan pawh ṭha ka ti tho, nu leh pa kianga awm no reng ai chuan amah hmangaiha nei duhtu Valpuia neih ran hi a finthlâk ka ti ve tlat.

Pasal neih hma lutuk a ṭhat loh rualin neih har viau pawh a ṭha chuang lo. Tun hi Saitei tan pawh neih hun lai tak niin ka hriatsak ve.

Valpuia hnenah erawh chuan, "Ka nu leh pa lo haw hunah ka lo sawipui dawn nia," ka ti ta kha a nia.

Saiteiin nautê a ngai si a, ka nu leh pa an awm lo bawk nen a rawn chawlh chhungin Glass house nghah a ngai si. Chhunah lokalna hun a nei lo a, zanah ni Arini te nupa kalsan leh daih kha nuam lo a ti bawk nen, Zosanga hnenah zankhat lek riah ka dil ta a.

"In nufaa in riah theih dawn a thu a ni mai, Matea te nupa leh Kimi ringawt kalsan chi an ni lo a," a ti a.

"Zanah min va hruai lawk la, i office kal hmain min lo lam leh anga," ka tih chuan a phal ve mial.

Kan riak phei tur Spi-in a huphurh hle a, "Bawihpuii hruai lo mai rawh," a tih chuan, "A nuteiin an unauvin lo hruai rawh, anni te chuan awmna hun an ngah alawm, ati deuh tlat," tiin ka chhãng a, a lunghnur viau nain min nawr na ngam chiah si lo a, zanriah eikhamah Zosanga rualin min thlah turin a lo kal tel ve a, a khawngaih thlâk ang reng.

An nupa pawhin ngai an awh chho mek a, Kimi a inla 'hâi' lutuk ngam ta lo. Zosanga'n a lo kamkhat niawm tak a ni.

"Mi nupa inkara inrawlh chin loh tur, hetiang a nih dawn chuan kan hnena i awm a rem tawh lo ang, ṭha tak leh rilru nei taka i awm chuan heta ṭangin pasal i nei anga, eng kimah kan buaipui vek ang che, chuti ni lova tun anga i tâl mai mai anih chuan kan chêngho thei lo thuai ang," tiin a zilh.

Kha ta ṭang khan sual a chhuah ngam tawh lo a, Spi pawh a be ṭha leh duam duam tawh khawp mai, "Invêng ránin awm la, kan hnenah a awm kumkhua thei dawn lo tih hriat tur, biak dan chin tâwk thiam ang che," tiin Spi ka hrilh thlap.

Zosanga GP withdraw pawh a fel tawh a, kâr lehah kan in sak lai zawmin a chhung kan chei tawh dawn a, tunah a bang an plaster zo ṭep a, ka rin aiin a hmanhmawh. Kei chuan hetia nu leh pa thlazar hnuaia awm hi ka thlahlel a, in dan ka châk lutuk lo.

Kan in kan thlenin ka nîin nau min lâk chhawk nghal a, Zosanga leh Spi pawh dar 9 vel thleng an awm ve.

"Zingah lo inpeih hma ula, nghah inngaih chuan hun ka nei dawn lo a nia," tiin min hrilh sa a. Naktuk dar sawm pakhatah ruang en dik tur annei a, a damlo a nih loh chuan kal ngei ngei a ngai.

Ka room-ah Saitei leh ka fate pahnih nen kan mu ta a, ka nîin nu Muanpuii fel leh fel loh te, in chhungkhur chanchin min zawt a, ka nî mah ni se ka sawi ṭha duh lo. 'Min duatin min ngaihsaka hrehawm ka ti lo' tih chiah ka sawi.

Ka nu khân a sawi ṭhin chu, "Pasalte inchhungkhur chanchin pawnlamah leh chhungte bulah sawi chhên loh tur, kan lungawi lo a nih pawhin ngawih theih hi a ṭha a, nu leh pa hnena vûi zuah zuah chin miah loh tur," a tih kha ka hre reng ṭhin.

"I mopuinu Spi nen inkawm ngeih ula, nangma tan leh ani tan pawh a nuam ang," tiin ka nîin min hrilh ve ngei.

Saiteiin nen Bawihpuii te unau kan laitat a, an ṭe hleka khawih zel a tum chu ka hau a, "Ka tî an tiza.." tih pah te hian an biangah a piai leh vak zel, a â thei siah.

Valpuia chungchâng ka sawipui a, "Inneih te tum dawn hnai rawh u, ani anga hmangaihtu che i tawng tawh lo mai thei a nia," ka tih chuan, "Hna ka neih ve hma te chuan neih pawh ka la tum hleinem," zuk ti a.

"Chutiang ringawta tih loh tur, nang naupang mah la, ani nupui neih hun a ni tawh a, i nei duh tak tak dawn lo a nih phei chuan kalsan rawh, i ti na mai mai," Valpuia thlavang hauh takin ka ti a.

"Ka nu leh pa thu thu a ni mai," a ti ve ta a. Ka lo thâwl huai.

Ani hi a â roh si a, nei duh tak tak lovin a lo chhaihkual mai mai ang tih ka hlau. Valpuia pa ṭha tak a ni a, a nupui a sûn tawh a, ama sawi dan takah Saitei bâk tumah ngaihven a nei lo tak tak tih ka hria. Chuvangin ṭan lâkpui pawh ka hnial lo. Ka nau tâna ṭha tur a ni tih ka hre pha ve tlat.

Rinsangpuiin dar hnih velah whatsaap aṭangin min rawn bia a, "Bawihpuii ka ngai lutuka ka muhil thei lo rêng rêng," tih min lo thawn.

Ka rin dan vel chiah a ni, a duat si a, thlakhat aia rei a mutpui tawh a, a zun leh êk pawh a buaipui vek. Min chhâwk zangkhai ka ti lo thei lo.

"I ho lutuk, muthilh tum rawh, naktuk zanah in mu ṭha leh thei dawn si lo a, inpa kha ngên deuh tlat la," tiin ka fiam a, Smiley nui ṭhen ṭhu kha a rawn thawn tuar.

"Zanina chîmbuaitu inneih loh lai khan uar viau rawh aw..." ka va ti leh a.

"Lalduat, i zak lo lutuk, Lawmsanga a meng ve reng a nia, khatiang rawn sawi suh.." a ti a.

"In lo up down fel diam tawh zawk a ni lo maw.." ka type laiin ka nui hak a.

"Hmêli, Lawmsanga ka'n chhiartir ang e, i thil min thawn hi.."

"Hey, chhe suh..en tir ṭhak suh.." rang takin ka va reply a, ala seen lawk lo zui.

"Ka chhiar tîra a nui nasa teh mai a nia aw.." a rawn tih leh chuan, "Kiri, mu rawh u..muttui" tih ka thawn a, phone ka dah zui nghal. Ka nui ru char char a, Spi nen kan mizia a inang lo a; mahse, kan inmil ta phian a nih hi.

Ka zia hi a la deuh ṭan a, a nâwi ve leh zauh zel.

Zosanga kha a haw aṭangin a reh hmiah a, whatsaap aṭang takngial pawhin min rawn be lo.

Ka tlaivar leh tak ngial dawn, mutthilh tumin ka maimitchhing ve ta a.

Ka nu leh pa te nen zan tir khan kan in video call zuai a, "Kan awm loh veleh in lo riak a," tiin ka pa a vûi der ve ngial.

An fate min hmangaih ang chiahin an tû tepawh an hmangaih dawn tih ka hre si a....

B+>[BeckirafARenthleI]<+®®

NOTE: Kawmen lama in ngaihdan in lo sawi te, a story kal hmang tur in lo duan lawk te hian nuam ka lo ti ṭhin. Sawisel ngai lai pawh sawisel theih vek.

Whatsaap group ka siam leh siam loh kha min zawt nasa si a, ka siam a; mahse, lût chhuak insulpel zut zut awm nghet thei lo ang chi kha ka rilrem ve loh avangin join theihin ka dah chhuak lo.

Mi nghet, post theih loh chang pawha nui chunga nawi mai mai thei, leave zung zung lo te chauh a ṭha hlang, mi cial te awmkhawmna ka nei. Rapsagyan family ka post theih loh chhung zawng khan tuna ka group memberte hian rinawm takin min nghak tih ka hria a, ka ṭang mar hle a ni.

Damloh ka chîng si a, group neih ṭeuh kha ka enkawl zo dawnin ka hre lo a, phone ṭha lo leh harsatna nei te erawh chuan an leave chhan an sawi zel ṭhin. Chungho chu ka lo chhinchhiah a, an remchan hunah kan add leh zel, Tin, group Icon ah ka group member te hi an hmêl Collage a siamin ka dah vek bawk.

Ka Whatsaap group ah hian ka lang tam em em tih kan sawi tel bawk ang e.

Chuan, Natna nei chunga post ka ni a, duhthu sâm lo lai a tam khawpin ka ring a, maimitchhing chungin chhiar mai rawh u ti dawn ila a ni em em si lo a, hriatthiamna rilru pu in min lo chhiarsak hrâm mai dawn nia.

He story hi zuang dawrha type in a tawp thut thei tawh tih in lo hriat ka duh a, complete lo a bânsan ka ngaingam si lo a, ka rawn chhunzawm ve poh a ni ber e.

- BRR

Shadow of the life √ hi ka blog hming leh ka whatsaap group hming a ni a. Tin, BRR hi Becky Rafa Renthlei tih lam tawi a ni bawk e.

Gracias allé..

THE RAPSAGYAN FAMILY

Becky Rafa Renthlei(-BRR)

Chapter-40

A tukah chuan kan tho tlai hle a, Zosanga lo thlen laiin tûkṭhuan kan lo ei mêk, "Zan khat in riak dêk dêk a, thawh inhai nghal ania, Saii, tho hma ve ta che," tiin a nui ruh ruh.

"Naa, u Duati aiin ka tho hma zawk, Bawihtei hi chu zanin chiah lo riah tîr leh ula, ka enkawl thiam tho ang," tia Zosanga a dîl chuan, "Pasal nei ve tawh mai rawh, i Valpuia nen hmelṭha deuh inla siam dawn alawm," tiin a chhâng a.

"U Zosanga sual zia hi, 'I Valpuia' tih kher," ti nang nang chung hian a thleng sengin a tho ta a, ka nî pawh a nui hak.

Ani hi chu a la nau deuh bawk nen Zosanga hian fiam zuk zuk a ching a, Champhaia min lo tlawh tura an lo kal ṭum pawh khan "Lalsaii chu bialpa te i nei tawh a ni maw!" Tiin a lo fiama Saitei a zak hle.

Kan eina vel pawh ka sengpui ta lo, 'Kan lo ti mai ang, inpa a hmanhmawh si,' ka nîin a ti a,Saitei'n min va thlah ta a, thil buaithlâk ve pakhat chu an la puak tham mang si lo a, tei chhuah ve pawhin pahnih zel kal a ngai.

Fel ve tawh îk se chuan tunah pawh thlah kan ngai miah lo tur a nia, Zosanga'n car a khalh a, a front seat-ah Saitei leh Bawihpuii an ṭhu a, a hnung seat-ah keiin Bawihtei ka pawm thung.

In kan thleng a, muang khawtlai miah lovin Saitei leh Zosanga an chhuak leh nghal daih.

Spi'n, Bawihpuii a chuh nghâl tharh a, tukṭhuan an ei ve tawh mial.

Lawmsanga workshop kal turin a insiam a, nizana Spi message ka thawn kha a chhiar tak tak a nih chuan a nuih a za viau ang. A nih loh tal pawhin zak lo min ti ang, Rinsangpuii vang vek.

Kimi'n, "Duati, zan khat lek Zotlângah riah i phal em?" Tiin min dil a, ka mitmeiin Spi ka râwn a, "Kal tir rawh," hmui phuna min rawn hrilh chuan, "Eng nge i tih dawn, a va pawimawh awm ve? Ka ti a.

"Ka nu nau fa hi a awm ve a, inpawh lutuk lo mah ila 'zankhat lo riak ve la, Aizawla i awm laiin' a ti maw le, in lamah kan buai lutuk chuang lovin ka hria," a ti ṭha ve mai.

"Ê, zuk riak rawh, naktukah erawh chuan lo haw hma tum la, zû te kha i zuk in ang e aw, chhungte ina riak lova hmun danga i kal a nih chuan ka hre leh tho ang," ka ti a. He nu hi rin zawh a har tawh êm a ni

Chutia ka tih veleh chuan lâwm lo âwkâ hian, "Kher kher a che, zû ka in ngai lo," a ti hmak.

"I in ngaia ka hria alawm, chuan i slipper bun ṭhin a dum kha a pahnihin han la teh," ka tih chuan a meng buai nak.

Spi pawhin mak tih hmel fê hian min en tho a, eng mah phei chu a sawi hran lo.

"Ka slipper dum hi a khing awmna ka hre miah lo," Kimi a room aṭangin a rawn chhuak a, "I zawng ngun em?" ka lo ti a.

"Zawng ngun e, eng atan nge i tih reng reng?" Tia min zawh lêt chuan tho chhuakin ka thuhrûkna hmun aṭang khan ka va la ta a.

"I zú inna hmunah i theihnghilh a, ka thukru a nih kha, dâwt min hrilh tum tawh rêng rêng suh, mi â ka nih loh hi," ka ti ta a.

Nuam lo a tih hmel hle. Min chhâng ngam tawh lovin a inthiar fihlim ta daih a, Kimi fin ve na em em chu, thinrima ka hâu hian min chhâng ṭha duh ngai miah lo, a ngawi daih zel, mi ngawi reng ânkhûm char char te chu nuam bik hek lo. Ka ngawi leh nge nge zel.

Hemi ni hian nilêngin Spi nen kan titi a, hmanzana mikhual room-a ṭawng ri ka hriat chungchâng te leh a tûka ka va en thu te, chutah chuan Kimi Slipper pawh ka thukru tih ka sawi a, "Lawmsang hau kher chuang lo la," tiin Kimi leh Lawmsanga chungchang ka hriat ang zawng zawng ka hrilh ta vek a.

"Spi, tunah chuan in boruak a ṭha tawh a, innupa inkâr a ṭhat loh hian in chhungkhur boruak a hrehawm vek zel, ka hrilh zawng zawng che pawh kha Kimi ka zawh chhuah vek a nia, eng emaw palh nikhuaah pawh i lo invên ve nana hrilh che ka ni."

"Ka hre thiam alawm, Lawmsanga pawh hian dik takin min hrilh mai se eng emaw chenah hriat thiamna ka nei ve reng, kan inkawp hmaa thil thleng a ni a, ka tân pawh huat ngawt theih a ni bik lo. Nupa kan nih angin eng kim sawi dun mai tur a nia," a ti ve a.

Tlai lamah Zosanga a lo haw hmaa khumah nau kan awm tir a, keini'n eirawng kan bawl thung.

Ka nu leh pa'n Sunday hmang turin Lawngtlai an rawn chhuahsan a, zan hnih chiah hetah riah an tum.

"Û ber te in nghâk tur in awm tawh a, in lam chu kan ngaihtuah miah lo a nia," ka pain a ti a, an tû te pahnih an duat hle, ka pa tak hi chuan a khawih thiam lutuk lo a, a râlkhat chhaih vel ni berin ka hria.

December thla kan chuangkai chho a, Zosanga a zin zing malh malh khawp mai.

Zankhat pawh ka âng ve deuh hlek a, "A hmain hetiang em em hian i zin ngai si lo a, tunah kan buai lai leh chhangchhiat lai berin i awm hman hlawl hleinem, mi dang kal tur an awm ngang lo nge?" Ka ti hlak hlak a.

"Tun lai chu hnaah insawrbing ka ngai alawm, a hrim hrimin i phunchiar sâwt riau mai," a ti nghut a.

"En teh, nang pawh ni la kei aiin i thinchhe zawk lo ang maw, zanah naute hnute siama thawh a ngai zing si, ka muhil ve hman ngai lo reng reng, an zun leh êk tih fai chu thuhran ni se, ka chau a nih hi, Spi awm lo phei se chuan engtin nge ka awm ang aw ka ti ṭhin. Ani pawh a châu thei viau ang," ka ti mar pât. Inphût a na ṭan riau.

"Ka hria alawm mahse, tihngaihna a vang ve rih em atin ni, hna thawh ka ngai si a, in sak vil a ngai bawk a, kan inhriat thiam tawn a ngai a nih ber hi," a ti leh a.

"I zin nasa lutuk hi alawm ka sawisel, inah i awm hman rêng rêng hleinem, in pu te hnenah sawi dan a awm lo maw?"

"Sawi dan te chu awm e, an remti ang em tih zawk kha a ni," tiin a kiai suk a, ka va ngei mai mai tak.

Ka pu a ṭha chho leh tawh a, ka nu leh pa an lo lêt a, ka nî te nupa an haw phei ve thung, "Nautê han leikàng deuh se lo zin rawh u aw, i pu in a hmu châk dawn em mai," a ti nghe nghe.

Saitei chhukna pawh a rei leh tawh a, Valpuia a khua a har thei hle. A hnena ka lo tiam tawh ang ngeiin ka nu leh pa bulah ka sawipui ta a.

"Nia, zir tâwp tak tak a awm thei chuang lo a, kan dam lai hian nupui pasal te nei fel ula a zia zawk ang," ka nuin a ti.

Hetia ka sawi aṭanga kâr hnih aliam leh hnuah chhungkua min ko khawm ta a, Zosanga nu leh pa an awm loh avangin an âiawhin kan kal a, ka pu leh putea an lo kal ve bawk a, ka puin ka fate a duat viau.

Nizan hmasaah Valpuia'n palâi a lo tîr a ni awm e, Saitei ni 12 a lo chhuak thei tura kan beisei kha an lo sawn tlâi leh hlek a, december ni 16 ah Mizoram a rawn chhuak thei dawn chauh a, amah pawh an zuk râwn vek a, "In thu thu" tiin a rawn chhâng.

Rafaela'n eng mah sawi buai lovin ka nu leh pa thu a pawmpui hmiah a, tun hi palâi lokal tawp zan a ni a, chhungkua kan kim ṭhep ṭhawp viau.

Tichuan kum thar ni 8, Rafaela chhuk hma kârah kohhran dan anga innei turin thu kan ti tlu ta a. Rang vut vut viau mah se amah Valpuia kan hre chiang thawkhat a, kan hmanhmawhpui ta deuh a ni.

Saitei pawh ka zuk bia a, a awmna lamah thil a tlâwm zawk chuan rawn inlei duh thawh deuh turin ka chah a, a ngaihtuahna te hi a tâwi ve sia, hrilh chawp a ngai ziah.

Kan fate Biak ina kan hlan hun a lo thleng ve ta a.

Zosanga'n, "Nang mahin kal ta mai che, a nih loh leh Spi nen," a tih chuan ka thin a rim ngang mai.

"I fate nen hian min zahpui em ni a, eng nge nau hlan pawh chu i hreh em em," ka vîn hrep a.

"Ka inkhâwm khat sia, fate hlan dawn chauha inkhawm te chu.." a ti nia!

"I fate hlannaah pawh i inkhawm duh loh chuan eng tikah mah Biak in kawng hi i zawh lo ang, em em a che, patling i ni ve tawh a, i tlangval lai nun kha i thlah a ngai tawh.." ka lungawi loh êm avangin ka ti bawrh bawrh a.

A inkhawm khât zia ka hria a, sual ve viau mah ila inkhawm hi chu ka kal ve hrâm hrâm zel. Zosanga nen kan inzui tâk aṭang khan ka kal ngai tawh lo a, tunah chuan fate kái hruai tura kan pawimawhna ka hriat chian em avangin Zosanga pawh ka nawr reng a ni.

"Hmangaihzuali hi chu i ṭawng thui thei mah mah," a thinrim zawkah te chuan a la ṭang a.

"I zah loh phawt chuan min dinpui reng reng suh, midang indin kêp chi a ni lo a, sâwn pawm lah ka ni hek lo. Kan kohhranah chuan kan chhungkua an hre vek a, fa pahnih pawmin din ngai mah se ka ding mai ang," thinrim taka tiin room-ah ka luhsan daih.

Ka thin a va han rim ngat ngat tak.

Mí pa te chu ni se phûr takin an kal ang a, keini Zosangmawia ve chuan mawi leh mawi lo pawh a hre lo a nih hi. Luhlul si.

Tiang kawngah hi chuan Lawmsangzela a fel viau lawi.

Thinrim zetin Spi ka hrilh ve ta a, "A dinpui duh loh che leh kei man Bawihpuii chu ka lo pawm ve mai dawn nia," a ti ta a, a vûi zawng leh ka thinrimna belhchhah turin eng mah a sawi lem lo.

Lawngtlaia ka nu leh pa hnenah ka va sawi ta a, "A va nikhua lo tak, damlohna leh harsatna lian tham a nih loh chuan inkhawm ngei ngei rawh se, kan lo hrilh ang," an ti ve bawk a, tlêm chuan ka thinrimna pawh a kiam ta deuh.

Kohhran hi tu ta bik mah a ni lo a, a inhmang peih leh kohhran bêl tam apiangin neitu chan an chang mai a ni.

Keini nupa pawh kan tih dik lohna tam viau mah se nun bul kan ṭan ṭhat hi a hun tawh a, chhungkuaa pa berin hmâ a hruai duh lo a nih chuan nu ber tal ka pên chhuak ang tih rilru ka pu ve tlat.

Sunday tûk a lo thleng a, Spi nen ka fate pahnih kan bual fai a, Kimi pawh inkhawm turin ka ti ve bawk a, min hnial lo ve teh tlat.

Khatia a riak chhuak kha ka chah ang thlapin a tuk hma takah a lo haw a, a hlim tih a hriat. Chhung leh khat nei lo anga kan lo hriat ang ngawt chu a lo ni bik lo. A zuk riahna te khan an ina awm turin an lo sawm a; mahse, a hnial rih tih a sawi.

Ka nîin a lo kensak kawrfual vâr, a pâwla pâr chu an unauvin ka inbel tira an hmel inang lutuk hi hriat hran harsa khawp an ni, mihrang tan chuan. Mahse, keini chuan kan khawih tam a, upa zâwk na na na chu a lian deuh.

Tukṭhuan kan kil laiin Lawmsanga'n, "Vawiin chauh tal chu inkhawm kim tum ang u aw, chhung leh khat inṭawiawm te hi a ṭha ngai, Duati, i nu leh pa an lo inkhawm dawn em?" Tiin min zawt a.

Inkhawm an tum thu leh kan ṭhenawm ami Rindika Cameraman lo hruai an tum tih ka sawi a, an tú hmasa ber hlanna hunah hian inkhawm loh an hlau hle.

Zosanga a ngawi ngur a, biak pawh ka be lo. A duh angin awm se ka pawiti nek lo e. Thil dangah puitling viau si hian kohhran leh khawtlângah a inthlah dah a, rual a pâwl lo hle, Rafaela pawh a tluk lo.

Eng anga hna sâng chelh leh officer lian pawh ni rawh se, kohhran bêl lo leh Biak in ngaihsak lo hi chu eng emaw bil na riau annei ṭhin.

Kei ngei pawh kohhran ka thlahthlam a, zu in rûkte ka ching a, ka nih tur ang ka ni phâk ta lo tih ka hria.

Ka fate kan siam peih vek hnuah khumah awm tîrin ka insiam san ve ta a, Zosanga 'Lo en rawh, lo vil rawh' pawh ka ti duh miah lo.

Dâr rik a la hun lo deuh a, ka nu te an lo phei dawn avangin kan nghâk a, Spi nen pakhat ve ve kan áwi mu ta rih, a ṭûl a nih leh Spi'n min dinpui ve tawh anga a ni mai.

Ka nu leh pa an lo thlen hnuah Thingpui hâng te an in leh tê tê a, Kimi pawh a rawn inchei nalh zuai zuai khawp mai. Lawmsanga te nupa pawh chuti tho.

Keima tawkah ka induang nalh ve fû a, hetia ka inchei lohna chin pawh a rei ta. Spi te inneih kha puan ka bih hnuhnun ber niin ka hria.

"Khaw'nge Zosanga?" Ka nu in min zawh chuan room lam ka kâwk zauh a, kan inhnialna vel kha eng mah ka hrilh loh vangin inkhawm turah an ngai a nih ka ring.

Dâr a ri ta a. Kan room kawngkhar a rawn in hawng a, Zosanga inchei peih diamin a rawn chhuak nia!

Kamis pâwlduk body fit a ha a, kekawr dum ṭhui nalh zet leh Smart shoe a rawn bun thlap!

"Kal ang u le," tiin a nui suk a.

"I va han chhe tak..." ka nuih aza deuh bawk sia ka ngei bawk si.

"Dustmisuali run luih hi a nuam ve a," a la ti zui.

"Zosangmawi, râk râk lo mai teh, chimawm siah.." tiin ka nui ve ta a.

Ka nu leh pa, Kimi, Car pakhatah an chuangho a, keini nupa leh Spi, Lawmsanga Car in kan kal bawk a, Biak in kan hlat deuh bâkah khua a vawt lutuka ke in kan kal peih ta lo kha a nia.

Zosanga nu leh pa awm ve se kan kim dawn asin le.

Biak in kan thleng a, nau hlân tur te ṭhutna lai usher'n min kawh hmuhna lamah kan inzui phei ve ta a. Zosanga'n Bawihpuii a pawm. Loh theih loh ni miau hek le.

Biak in kawtah khân "I paw duh zawk em?" Tiin ka zawt a.

"Teuh lo, tihian ka pawm mai ang," a ti deuh tlat.

"Phír pawm chu ava hahthlák deuh ve, pa ber kan smart tluantling thei dawn lo a nih ber hi," Biak in chhung kan luh dawn ṭepah a ti leh hram a, chhân pawh ka chhâng buai peih lo.

Inkhawm an tam hle a, nau hlân tur pawh mi pakua zet kan awm.

"Ka nau duh tak, Lalrinliani leh Zomuansangi te, Pathian leh a kohhran te zinga in lo tel tâk avang leh..." tia pastor'n an lu chunga kut a nghah lai chuan kan fate pahnih an ṭê ṭhat ṭhat a, ṭah êm chu an ṭap bik lo.

Kan nupa hming an lam khân kan ṭhut hmunah kan lo ding a, kan fa te pakhat ve ve kan pawm. Zosanga a zah ka rin tehreng nen zak awm angin a lang lo a, kei mah zawk ka biang a sa vek.

Ka nu te lo hruai Cameraman khan uluk takin thlâ a lo la ve bawk a, kan fate enkawl tur hian kan theihna a tlêm zia leh Pathian tel lova enkawl a harsat dan tur ka hre thiam chiah.

Kohhran dan anga innei kan ni lo a, inkutsuihna hun tak ngial pawh hmang lo kan nih avangin ka zak ru ngawih ngawih a, a ṭhen te chuan nupa kan ni tih la hre lo te pawh an awm a ni awm e.

Inkhawm kan bâng a, "Zosanga chu nupui i nei hmelṭha hle mai, nupui i nei tih kan lo hre lo a," tih vel a ri nawk a, Bawihpuii te unau pawhin en an hlawh hle.

Ka nu'n haw a rawt tâk avangin awm khawmuang tawh lo hian an in lam kan pan ta a.

Zanin tlaiah ka nu leh pa inah chaw kan ei vek dawn a ni. Kimi a phur hle.

'Kei mahni vêng bîk ti tawh mai ang' ah inlêng an lo dâk lut neuh neuh a, Zosanga te nen hian inhnaih lutuk kan ni lo a, kea kal nan phei chuan tih tham fê a ni reuh.

Naute en tur te, Zosanga hmu châk hrim hrim te pawh an awm. Kan inah kan lêng khât sia, kan ri luih luih a ni ber mai.

Ka fate pahnih pawh ka chang hman meuh lo.

Saitei te inneih chungchang te kan sawi kâi a, ka rin aiin Valpuia'n a duh hau tak.

"Ka nupui neih hmasakah chhungte leh ṭhian te ka hûi khawm lo lutuk a, tun ṭum chu sawi hat thama tih ve ngei ka duh," ati mauh mai.

An in pawh kan la hmuhpui lo a; mahse, tlângkam aṭanga kan hriat danin a pangngai hle tih kan hre tho. Amah sawi hnâwmna tur kan hre lo a, mi pawi sawi lo chi a ni bawk a, ka nu leh pa mit a tlung viau. Zosanga nen pawh rin aiin an inkawm thei phian a, a tihzia a nia.

Zanriah ei hmain ka pa'n hunserh a hmang a, naupang chhia kan awm lo nen a bei rei zêk. Kan ṭhenawm tlangval Âr talh leh eng ilo vel min buaipui tura kan sawm Thanpuia chu Kimi nen an 'In chu e kha' riau a, Spi'n min kawh hmuh hmuh vanga hre ve chauh ka ni.

Kan haw dawnah ka nu'n, "I hnaah âi kal i dah tho si a, i nî fapa Zualtea hi i chhawr zâwk dawn em ni?" Tiin min zawt a, "Zosanga ka sawipui phawt loh chuan," tiin ka chhâng.

Ka nî fapa a tih hi ka pa farnu Zosangpuii fapa naupang ber a ni a, a fel roh riau.

Krismas dawn a ruaiah Zosanga a zin leh rih a, Rafaela pawh kar lehah a lo haw dawn tih ka nu'n a sawi a, ka hmu châk tak zet.

Ka nu leh pa Lawngtlai aṭangin an rawn haw phei tawh a, kum thar remchang hmasa berah Lawmsanga te nupa in check up-a kal turin an ti a, Spi a phûr lo hle. Lawmsanga pawh chuti tho.

Kan in sak lâi kan zo titih tawh a, Saitei te inneih zawh lamah kan insawn lût ve hman mai thei. Bawihpuii te unauin duattu an ngah bawk a, ka âwl letling phian.

Kimi leh Rinsangpuiin boruak dang lam an nei tawh rih lo a, damdawi in ka chhuahsan aṭanga chhungkua kan hlim ṭum ber a ni hial ang. Pa Faka hriselna a hniam deuh tih mai loh chu chhungkuaah eng harsatna mah kan tâwk ta rih lo.

Nau kan hlan aṭang khan Sunday zing hi chu kan inkhawm ve ta ziah a, zan khat chu ka muhil thei lo tâl velin lukhama Zosanga phone dah ka tawk fuh palh a, en châkna thlarau sual ka dawng leh tlat tawh.

Hmeichhia a ngaihven lo tih ka hre tho nachungin en châkna ka nei tlat a, a phone pattern a lo tidanglam leh chu niin. Thil dik lo eng emaw a awm a piang hian a phone ka khawih theih loh turin a dah ziah a, nupa nun pawh a hma ang khân kan hmang zawm leh thei tawh a, "Naute an leikan deuh hma chuan a dang pâi tawh rih suh aw," a tih vangin indanna ka ei mai zel.

Rafaela lo haw ni-ah hmuak turin ka nu leh pa an kal a, Diktei chanchin ka ngaihven lo mai ni lovin eng mah ka hre zui tawh lo. A reh vang vang a, anni pahnih hi chu ngaihtuahawm anni hran lo a, ka ngaih anti ṭha ve tawp.

Rinsangpuii te nupa pawhin Bawihpuii an ta hauh hlur tawh a, a hnute hnêk tur thlengin anmahni'n an lei vek. A tîr kha chuan 'a ngai lo' tiin ka hnial a; mahse, an ṭang kawh ve tlat.

"Kan fa, i hrin tho a ni a, keini aia an hmangaih lohna a tlêm ngawt ang, an tih tihin ti rawh se," Zosanga'n a ti deuh tlat.

"U Duat..." Rafaela rawn lût chu mit khap lêk lo hian ka lo en a, a chêr deuhvin ka hria.

"Awi, ka ngaih zia che hi.." tih pahin ka chibai a, a nui suk suk. Bawihtei te unau a en a, "Lalrinliani zawk khawi hi nge?" A ti deuh ngei.

"Han ring chhin teh," ka tih chuan, ngun deuh hian a en a, a û zawk Bawihpuii chu pawmin, "Hei hi.." a ti ta a. A ring dik chiah. Mak ka ti kher mai.

"Eng tin nge i hriat?" Tiin ka zâwt hrâm.

"A har vak hleinem, Saitei'n keimah min ang zawk kha Lalrinliani atia ka hre mai," zuk ti a.

A zirna chungchang leh a awmna hmun a hrehawm em tih te nu Muanpuiin a zawt a, chutia an inbiak lai chuan Zosanga phone dawhkan chunga a dah chu a rawn ri ta a, amah inbual turin a lût chiah asin le.

Tunge? Tih hriat tumin ka va en sak ta a. Number lawng ringawt. Pick loh ka tum zet naa thil pawimawh te a nih tâkah tiin ka chhânsak ta a.

"Hello.."

"Zoa a awm nange?" Hmeichhe aw thâm lam deuh hian a rawn ti a.

"Awm e, a inbual lawka eng nge ni ta?" Ka lo ti a.

"Ah, annu mi ka biak?" A tih leh rih a. "Aw, ni e," ka ti sap a.

"Eng lo a nia, Ruati nau ka nia, ka û in lehkha a hnutchhiah kha a xerox copy kan mamawh deuh a, Zoa chu min lo hrilhsak rawh aw.." a ti ta a.

"Aw, ka lo sawi tho anga nakinah lo be ṭha leh mai ta che," tiin phone ka dah ta a.

Ruati'n Zosanga lehkha a hnutchhiah kha an chhuizui ta tihna em mawni le, thil eng mah hi a sawi ṭha duh ṭhin si lo a, ti hian khingbai deuhvin a hnuah ka hre leh ṭhin sia, a ṭha tlat lo.

Zosanga inbualzo a rawn chhuah chuan ka biak duh thu ka hrilh a.

"Ruati nauvin a lo call che a, a û lehkha hnutchiah che kha a xerox copy an mamawh thu a rawn sawi a.." ka ti a.

"Ka phone a ri a nih pawhin ka awm loh chuan lo chhâng tawh suh ang che," a ti hmuk.

"Eng a?" Ka râwl a ring teuh kher mai.

"Ka sawi i hriat reng kha, ka phone a ri a nih chuan nangmah an be duh ni lovin keimah min be duha lo call anni tihna a nia, lo pick tawh suh," a ti ṭha leh ngat.

"A lo nih tak chu, ka sawi tawh kha, zêp i neih chhung hi chuan kan nupa inkâr a ṭha ngai lo ang," ka ti ve ta a.

"Thil sawi duah zel suh," a ti leh a, ka ngei êm avangin rum deuha melhin room ka chhuahsan daih.

Rafaela leh Spi te titina bulah lunghnur ru ṭeuh hian ka va ṭhu ve ta a.

Rei vak lovah Zosanga inchei deuh hian a rawn chhuak a, "Rafael, chhuah lawkna tur ka nei a, tikhan lo leng rawh aw," tiin Car chahbi a la a, en pawh min en lo.

"A va pawimawh awm vut vut ve," tia Rafaela zawhna pawh chhang lovin a nui suk a, a chhuak zui nghal.

A châng hi chuan inṭhen te ka ngaihtuah rum rum zel, inah a awm tlêm si. Bia ila a rûl tawk chauhva min chhân chang a nei a, nizan leh zan hmasa phei kha chuan a lo haw lai pawh ka hre lo. Rui lo hai lova awm a nih vang hian ka haider lui hrâm hrâm zawk a, midang phei chuan kan boruak nuam lo an hre kherin ka ring lo.

Kimi Lawngtlaiah Krismas hmang turin a haw dawn a, kan ṭhenawm tlangval Thanpuia nen khan an inkawp ve ta deuh a ni ang, zan lamah a lo lêng ve zauh zauh ṭhin.

"Va haw phei pawh ni la khawiah nge i awm chuan ang? Kan in lah kan ṭhiat daih si a," nu Muanpuiin a tih chuan, "In ṭhiat tih ka hre lo reng reng, in inah ka va awm leh ang chu ka lo tia," a ti hé haw mai.

Insak chungchang vel a hriatah ka lo sawi lo a ni mai thei. Mahse, kan titina velah a awm ve deuh ziaha hriat ve awm tak.

A hawna tur ber in kan ṭhiah tâk si-ah chuan tihngaihna awm hek lo. Hetah Krismas hman a tum ta a.

Krismas bazar turin mi an phe suau a, Spi te nupa pawh nu Muanpuiin kal ve tura a tih vangin an kal ve ta kha a ni a, keini nupa kâr boruak erawh a nuam lo ru riau si.

Zosanga zanah dar 12 hmain a lo haw ngai lo. Eng nge atih a, tu nen nge an inkawp pawh ka hre lo a, ka zâwt ngai hek lo. In chhungkhurah erawh atu mah mahin eng mah kan tilang lo a; amah pawh a thü that mai.

Zû a in pawh a ni si lo a, a phone ka hmuh phâk leh ka ban phâkah a dah ngai lo a, a hmingin a fate a chhaih peih ṭâwk. A nu leh pa leh a unaute bulah erawh a titi bawrh bawrh a, hnaah an buai a, Krismas chawlh pawh annei dawn lo tih leh on call duty in a awm dawn tih a sawi a, ṭawngkam khat mah ka chhâk chhuak lo.

Spi te bazar an lo hawin Bawihtei te unau thil tur an rawn hawn nual a, Nan pawh case hnih an lo la lâwk thlap. Anmahni vang hian ka hahdam phah tih ka hria a, Zosanga laka ka lâwm lohna erawh ka sawi lang duh lo.

Zanah ka muhil mang ngai lo a, Zosanga lo haw lai pawh ka hre zantin ziah. A fanu a lâiah ka mut tîr a, ani a sîr thei ang berah a mu a, kei a kilah ka mu thung. Ṭûl fê a nih loh chuan kan room-a a awm lai hian min be ngai lo.

Ka taksa a chau a, ka rilru a hah bawk. Chaw ka ei chhe khawp mai.

"Duati, naktukah inbazar ve dawn em ni ang, Bawiha a hman ang em?" Tiin nu Muanpuiin min zawt a, "Zosanga a hman loh pawhin keimahin ka va kal ve zawk ang e," ka ti a.

"Nia, mamawh lam neuh neuh tur kan nei bawk a, Bawihtei chu ka lo buaipui dawn nia, Kimi nen in kal dawn em ni ang?" A ti leh a.

Kimi hruai kual vel ka peih loh avangin keimaha kal ka duh thu ka sawi a, eng tin vak a ti bik lo.

Ka nu leh Saitei pawhin bazar puiah min sâwm reng a; mahse, ka boruak tawn a nuam lo êm a, 'aw' ka pawh ta lo.

Zosanga a lo haw hma teh khiah a, "Naktuk kan bazar ve dawn em ni ang? Tiin ṭha tak hian ka bia a.

"Ka hman ka ring lo," min chhâng tâwi tek tawk khawp mai. Room dawhkanah file a chhawp ṭeuh a, lehkha pawimawh a chingfel nge pawh ka hre lo, inbual tura ka luh dawn ṭepah Bawihtei a ṭap ta a, "Zosang, hnute lo siam lawk la, thawmhnaw ka hlip vek tawh sia," tiin ka au a.

Páwr fe hian, "Ka hman lo, i thawmhnaw inbel la rawn buaipui lawk zawk rawh," min han tih chu!

Thinrim rilru na zet hian bathroom aṭangin ka chhuak leh a, Bawihtei chu pawma âwiin hnute ka pe leh ta a.

Hemi zan hian inbual lovin ka mu ta ringawt a.

Zosanga muhil hmel ka en a, a khawsak danah ka lawm hlawl tawh lo. Harsatna a neia a buai a nih pawhin ṭha takin min hrilh se rilru dam takin ka awm mai tur a nia, a suahsual tukhumpawn a chhuah ni berin a lang.

A fanu buaipui hman lo khawpa buai a nih chuan kan ina riah phei ve ka tum ru ta rân a.

Bazar turin ka insiam a, Spi'n naute ngaihtuah lo turin min ti a, ka tan hian a va'n ṭha tak. Ka pa Car hman ka dil a, a lo phal ve mai bawk a, kei mahin december ni 23 ah ka bazar ve ta.

Ka nulât lai nen inthlau tak a ni.

Ka fate thuamhnaw tur ka lei phawt a, an la têt em avangin thawmhnaw hi ka ngaihsak lutuk rih lo. An ṭhansan mai mai ka ti ve deuh a, a lo a luak chhuaka lei vak vak ang chi kha ka rilrem zawng pawh a ni lo. Nu Muanpuii leh pa Faka tan kawrlum ka lei a, Spi shawl leisakin Lawmsanga Kamis ka lei sak bawk a, Kimi pawh Sneaker ori zet ka leisak ve ta a.

Zosanga thil tur enin Jockey dawrah ka lut leh a, a lakah lungawi lo mah ila ka pasal a nih tlat avangin ka hmaih thiang lo. Kamis, T-shirt leh boxer ka lei sak ve a. Jeans kekawr dum pakhat ka lei tel bawk.

Rafaela leh Saitei, ka nu leh pa a hming chauhvin ka tihsak ve a, ka pu Lungleia mi ta tur kawrlum leh mawza ka lei tel hrâm. Ka hlawh leh ka khâwl sa ka hmang ṭhen hlek a, nu Muanpuii min pek pawh ka hmang tho.

Ka tum dan chuan Krismas ni leh zan Zosanga te inah ka awm ang a, a tûk aṭangin kan inah riah phei ve ka tum deuh a ni. Thinrim lovin Rafaela awm ve lai leh Saitei'n pasal a neih tur chhuanlama hmanga dil ka tum a ni. An phal ve mai turah ka ngai.

Ka car dahna lam panin ka chho hnak hnak a, ka bâwr kher mai. Mi an tam bawk nen ka hawi lo hrim hrim a, "Bazar chhunga luh ve kher ka peih lo a nia," titu aw chu Zosanga a ni. Àw lo chhuahna lamah ka hawi phei a, lû hlir! Zosanga pawh ka hmu chuang lo.

Ka hre sual a nih ringin ka kal leh ta a, ka kê a kham bawk nen tlêma mi thâwlna lai deuhvah chuan ka ding ta a. Dawr pakhata Zosanga leh hmeichhe sam dum hlap lût lai chu ka va hmu ta a.

Ka hai lo chiang nasa. Tukin a chhuah dawna a inbel ngai tho kha a la inbel a, an hnung lam aṭanga hmu ni mah ila ka hai lo chiang sih sah.

Tu nge a kalpui tih hriat hrim ka duh vangin an luhna dawr lamah ka chhuk leh ta a. Va biaka va inhmuh tir kher pawh ka tum hran lo a; mahse, chhuahpuia ka sawm lai khan 'ka hman lo' tiin min chhâng a, a lo hman khawp hi maw.

An luhna dawr kawtah chuan dingin dawr chhung ka bih ta dâk dâk a, a hmeichhe kalpui chuan a bân veilamah a vuan a, tê lam pang ngo deuh a ni. Rem leh rem lo hian ka phone ah lai phawrhin an thlâk ka laksak leh hmiah.

Tun laiah chuan finfiahna tel lovin eng thiam thu mah a ding chang ngai thei tawh lo a, tun angah khawi office mah an buai khu chûk tawh hek lo. Ngaihzawng a nei emaw nei lo pawh ni se a duh dan hi chuan min sawp tawh lo chiang khawp ang.

Tuna ka hmuh ang hi mi nupui te'n hmu ve ta se, an pasal te kha an ánkhum chiam duh ang chu. Nimahsela, kei mah ka ni miau a, he lai hmun ualau ah hian intih mualpho ka tum eih lo.

Muangchângin, finfiahna nen thlapin le...

Kha nu kha tu nge a nih pawh ka hriat si loh..

Beidawng thinrim tâwt ru ṭûnin Car-ah ka ṭhu lût a, fâ la nei lo ila chuan ka run luih chiang ngawt ang, zaninah hian; mahse, ka ríla rah harsa taka ka hrin ka fate avangin ka ti lo mai chauh a ni.

Fanu, rangkachak aia hlu pahnih ka nei a, an tân nu ṭha tak nih ka tum dawn lo em ni?

Zosanga te ina haw hmasa lovin kan inah ka tlânkual leh tê tê a, ka chhungte tana ka lei ve ho chu ka sem diat diat a, an lâwm hle.

"Upa ber na na na chuan chhungte ngaihsakna châng i hria a, Duati kan lawm lutuk e," ka pa'n a ti. Ka hnuk te a ulh zâwk.

A hmaa an rilru ka tih natna zawng zawng avang khan ka inthiam lo zual sauh a, tunah thil beitham leh holam zet ka tihsak chhunah an lawm em em a, lawm thu min hrilh a nia. Ka nu leh pa min hmangaihna hi ka lo hre thiam har mah mah a ni.

Bawihtei te ka ngaihtuah deuh avangin rei pawh awm lovin ka haw ta a. Ka riah phei tur thu ka hrilh a, ka nu hnenah nu Muanpuii emaw pa Faka hnena min sawipui turin ka ti nghal bawk, a va tihzia tak.

In ka thlenin Spi leh nu Muanpuiin nau an lo pua a, ka thil hawn vel ka phawrh chuan an lawm ngei mai.

Zanriah tur Kimi nen kan siam a, "Duati, ka lawm lutuk a nia aw, ka lo beisei ngam miah lo asin," a ti ve ngei.

Zosanga chaw kan ei laiin a lo haw a, vawiin ka hmuh vang khan ka ngei ringawt. A laka lawm lo sa ka lo ni bawk nen ka biak thâ a tho thlâwt lo. Mahse, chhungte hriatah erawh chuan, "Chaw ei ve nghal rawh aw," dam thlapin ka ti tho.

"Bawiha, in châwl ve thei lo em ni a?" Tia a nu'n a zawh chuan, "Naktuk chiah kan kal ang a, Krismas ni chu kan off ve hrâm; mahse, koh theiha awm ka ngai thung," tiin a chhâng a.

Duh leh châwl se, duh leh châwl lo se, kan nufa tan danglamna em em a awm lo. Min buaipui khât êm mai. A hma angin ka hman tur pawisa pawh min hnutchhiah tawh ngai lo a, dîl ka tum teuh lo. A in sak chungchângah phei chuan beng ka chhu ngawng hmiah tawh a, ka hriatah a sawi ri ngai tawh lo bawk.

Ka sual ka chhuah ve chuan nuam ati bîk tawp lo ang.

Kan room-a Bawihtei ka mutpui a, "I pa a sual êm a, duat pawh a duat duh si lo che a, i pi te inah kan phei daih dawn nia," tiin ka bia a.

Ka han hawi chhuak chu, Zosanga kawngka biang nghengin a lo ding reng a, min melh rum khawp mai.

Mahse, ka hlau lo, ka hlauh loh zia chu pui tak a ni. Thil tisualtu ka ni lo a, ka fate ka thlahthlam ve hek lo. A dik lo leh fa te ngaihsak lo tu zawk chu amah a ni a, han thinrim vaih teh se, ka ngawi tawh bîk miah lo ang..

B+>[BeckirafARenthleI]<+®®

THE RAPSAGYAN FAMILY

Becky Rafa Renthlei(-BRR)

Chapter-41

[Duatbiki]

Zosanga chu room chhungah a rawn lut a, "Naupang bulah khatiang ṭawngkam kha hmang miah suh, ka duh lo a nia," tiin min melh rûn a.

"Dâwt ka sawi em ni? I sual rêng alawm," ka lo ti a.

"Duati, eng mah hre lo hian ṭawng ringawt zel suh, ka thinrim i ti belhchhah ang e." Tih pahin a thawmhnaw a phelh a.

"Ka hriat theih turin sawi ta rêng che, tun lai i awm dan hi ka kham khawp mai, eng nge i tih a, tu nen nge tih lam zawh che hi ka tum tawh lo, i duh dan ang leh i hlimna tur chuan tâl zel rawh," ka ti hmiah.

"Hmangaihzual, ngawih hun hi hre ve la, ka thinrim a nih chuan min chhâng tawh suh, kut thlâk che hi ka duh lo a nia; mahse, hmeichhe ṭawngthei deuh ka ngaina lo." Thinrim tih hriat tak hian room chhungah a vei tawn chhên a.

"Aw le, ni rawh se.." ka ti sap a.

Bawihtei khuma mu chu a zun huh ka thlâksak a, Zosanga erawh a la vei nghut nghut tho. Eng nge ka lakah lungawi lohna tur a neih?

"Naupang ngaihsak lo, duat lo hi min ti ziah a, in nawm loh hlauvin nitin hna ka thawk tih hria la, ka nau te'n pakhat an lâk chhâwk chung che pawhin phun ânna tur zawng reng mai, mí nu te pawhin fa pali pangnga an enkawla an buaipui, in inchhungkhurah i nuam lutuk a, thil pakhat lek i tih pawhin sawi reng ringawt mai," ka ngawih tawh hnuah pawh a la ṭawng zawm a, min ṭawngkhum dan chu paidam a harsa hle dawn mai.

"A nih chuan kan nawmna turin hna thawk se min ti em ni, eng emaw lai aṭang khan pawisa min pe ngai tawh lo tih i inhria ang chu maw, vawiina ka bazar dawn pawh khan chêngkhat tal min pe em? Naupang diaper leh an hnute hnêk tur vawi khat pawh i ngaihtuah ngai em ni?" Ka sawi zawng pawhin ka ṭap lo chauh tawh.

"Keiin pe lo che mah ila ka nu te'n an pe tho che alawm," a ti leh a.

"Ê, chutiang zawng chuan maw min tih dawn, min pe rêng rêng suh ang che," ka thinrim êm avangin ka kut a khûr dar dar a, Bawihtei pawmin room ka chhuahsan ta a, Krismas ni thlen nân ni khat chiah a awm tawh a, nikhat leh zan hnih te chu ka ngawi thei alawm.

Chokâah Kimi a lo awm a, "Kha lo pawm lawk teh," tiin Bawihtei ka pe a, Spi leh Lawmsanga an room ah an awm tih ka hria a, anni nupa bulah pawh sawi lan ka tum chuang lo.

Lungawi lo anga kal ka tum chuan an phal leh dawn si lo a, kan chhungkaw hnih inkâr a buai leh vek palh ang. Chuvang chuan ka tum dan pangngai ang khan kal tlang rih ṭhan ka hre zawk.

"Spi, Naktuk chhuah leh i tum em?" An room ah ka lut a, khumah Bawihpuii mut tirin Lawmsanga'n a lo chhaih a, ka rilru a na zawk. A pa dik tak lo zawkin a ngaihsakin a duat a, Zosangmawia ka huatna a zual sauh.

"Kan pahnihin chhuak ila, Zosanga a chhuak dawn em?" Tia min zawh chuan, "Ka hre miah lo, tun lai chu an buai thei lutuk a," ṭha takin ka chhâng a, dâwt sawi pawh ka ni hleinem, ka hnens a sawi dan kha a ni miau a.

"Ka nu leh Kimi an awm tho a, an awm thei lutuk ang, an fel em hi.." a ti leh a.

Bawihpuii rei lo tê ka chhaih hnuah an room ka chhuahsan ta a. Naktuka chhuah ka duhna chhan pawh ina ka tawm reng chuan ka thaw a ipik a, mahni inkhawngaihna ka zel a, chhuah thawven mamawha ka inhriat vang a ni.

Kimi nau pawm lai lain kan room ah ka lut a, Zosanga a lo inchhawp hnawk leh nuai tawh. Ṭawngkam khat maha be lovin khumah ka lawn a, a kil thei ang berah ka mu a, Bawihtei min si chêtin ka mut tîr bawk a, a pa hnaiha awm tir tumna pakhat mah ka nei lo.

A hna thawh a chhuang bawk a, Pathian zarah nei lo ka ni bik hleinem, nu Muanpuiin pawisa pêk min tum pawhin chêng khat mah lâk ka tum tawh lo a, a ṭul a nih leh ka nu te pawh ka dîl tawh mai ang. Nu leh pa ka la nei ve a, a hmingin hlawh chhe tê ka nei bawk a, ka thlâ a phâng bik lo.

Zankhuain ka mu meng kar a, Bawihtei a ṭah pawhin ka âwia Zosanga phûtna rilru ka pu duh tawh lo. Dar khat pelh hretah a rawn mu a, a phone a khawih char char tih ka hmu ru reng, engah mah ngai lo awm takin phone ka khawih lui ve ngat a, Fb-a ka account rei tak ka khawih tawh loh chu ka 'login' chawp a, ani tel lo hian tlei ka tum khawp mai.

Khawvar dawn hnaihah ka lo chhingsek a niang, Bawihtei ṭap riin min kâi harh a, an pafain an lo inbuaipui ve ngial. Hun dang ni se lungawi takin ka muhil zui leh ang a; mahse, tun hun ni miau hek, tho chhuakin, "Khawi ka lo âwi ang e," tiin khuma mu ka fanu tâl ṭet ṭet chu ka la a, min dan buai tum awm pawhin alang lo.

A muhil duh ta mai si lo a, kan room-ah Zosanga a awm kur bawk nen ka hmu peih hlawl lova sitting room lamah kan inpaw phei ta a.

Tun ṭum ka lungawi lohna hi chu chuti maia reh chi a ni tawh lo. Min ṭawngkhum nasa bawk a, min hmusit ni berin ka hria. A muthilh hnuah pawh mu tawh lovin ei rawng ka bâwl zui ta a.

Ka nu te an rawn thawh meuh chuan nau paw chungin eirawng ka bâwl zo vek tawh. "Duati, engtizia nge?" A rawn ti a.

Zing lamah nautê a mut ṭhat duh loh thu leh khua a var tawh sia kan mu lo law law tih ka sawi a, "A âtthlâk em mai, nau paw chungin che tawh reng reng suh," a ti bawrh bawrh a, Spi pawh a lo tho chhuaka Bawihpuii ala mu tih a sawi.

Kan ina ka pheipui hunah an khua a har ngawt ang; mahse, dah chi niin ka hre bawk si lo a. Nu Muanpuii hnenah Spi nen chaw eikham a chhuah kan duh thu leh nau an lo awm thei ang em tih ka zawt a.

"Kal rawh u, Bawihpuii te unau tezawng awm an hahthlâk loh êm mai," a ti fel ât. Nu ṭha tak hi chu a va ni chiang êm. Police a ni a, a ngaih dan a nih loh pawhin vawi leh khatah a thinrim phut ngai lo. Dam raih, khauh ru far si-a ṭawng dan a thiam a, ka ngaisâng hle a ni. Tin, a pasal a zah thiam bawk.

Tukṭhuan ei dawnah Zosanga a tho chauh a, nu Muanpuiin, "Bawiha, vawiin i chhuah dawn chuan innu leh Spi i rualin kal se," a ti a.

"Kal hma ka ngai dawn a, anni ka nghah chuan ka tlai vek ang," tiin ka nu a chhâng a.

"Nia, kan hmanhmawh lutuk lo nen, Saitei Scooty kan hawh mai ang, Spi i khalh thei tiraw?" Ka lo ti a.

"Thei e a, Car ai chuan kan thleng hma zawk daih ang," tiin a nui var var a. Rafaela Bike pawh ka hmang thei renga mahse, tun din hmunah chuan khalh ka zuam lo deuh a ni.

Zosanga ruala kal tumna ka nei lo hrim hrim a, amah pawhin min phur duh vak lo tih ati lang chiang thawkhat alawm le.

Chaw kan eikhama nau kan bual fel vek hnuah kan insiam ve ta a, Saitei Scooty hman ka va dil a, chhuah a tum thu a lo sawi ve bawk si, pa Faka Car dil leh ka inthlahrung tawh a, a phal tho ka ring nain a uluk ve angreng sia ka dil duh ta lo.

Ka pa Car hman ka dil a, a thar zawk aman hman a tum thu leh a hlui zawk Workshop ah Rafaela'n a check tir tih min hrilh a, buaithlâk ve; loh theih lohvin Bike khalh a ngai tihna. Rafaela ka va be leh ta a, "Ka hmang dawn lo, hmang rawh, Chahbi chu a ngaiah khan ka dah aw, ka chhuak tawh a," a lo ti hlauh a, ka va lawm si êm.

Ka dressing table ah pawisa note eng emaw zat a lo awm a, Zosanga dah tih ka hre thiam mai. Min pêk duhna thinlung tak tak a pu a nih chuan ka kutah min pe mai tur a ni a, hetia tih kual vel hi eng atan vak ka ti lo. Khawih chhin eih lovin ka insiam san daih.

Kan in thleng nu Muanpuiin Car in min va dah a ta a, "In lam ngaihtuah a ngai lo a nia," tiin min chah zui ṭâwk ṭâwk. A bulah Bike-in kan kal dawn tih ka sawi duh ta lo kha a ni a, min hau ka hlau deuh.

Rafaela Bike ka la chhuak Spi'n min hmuh chuan, "Engtizia nge, Scooty kan keng dawn lo mi, ka khalh thiam hleinem," a ti chûl a.

"Lungngai lo la, Saitei'n a Scooty a lo hmang daih sia, Rafaela ka va dîl alawm, ka nu kha ka hrilh duh lo a nih kha," tiin ka nui var var a.

"Awi! Lalduat leh! I khalh thiam tak tak em?" A hlauhthawn hmel kher mai.

"Min ring rawh, i dawih ve siah," ka nui ngat ngat a.

"Nui suh, min tlûkpui vaih chuan.." a la ti ṭâlh.

"Tlûk ka hlauh mah nâk laia, Bawihpuii te unau an khawngaihthlâk lutuk anga sin," ka tih chuan a thaw huai.

Spi hian kekawr dum tight lam deuh leh Jacket Sen duk a ha a, Sneaker sen duk tho a bun bawk, kei pawhin kekawr dum leh Jacket buang hain mufler ka awrh tel a, make up kan hmang lem lo.

Rafaela helmet ka khum duh loh avangin Saitei helmet spare ka khum ta zawk a, "En la, licence ka nei thlap," Spi ka hmuh chuan min ring ngam ta a ni ang ka hnungah a rawn chuang ve ta a.

"Selfie zuai ang..." a ti leh rih, ava ho mai mai tak.

Mahse, chutia a tih tâkah chuan vawi hnih ka hmet de ve hrâm tho.

Bazar lam panin kan inphur chhuak ta a, ka káwngah nghet zet hian a vuan a, a hlau tih ka hre mai. Ka khalh thiam zia a hre lo a ni ngei ang. Traffic Jam-ah kan tâng zauh zauh a, Spi pawh a chuan tirh ai chuan a confi ta.

"Parlour-ah kal hmasa ila chumi hnuah kan bazar chauh dawn nia," ka ti a. A phûr ngang mai.

Chumi hnu chuan sam kan colour a, mit hmul pawh leh facial kan ti bawk a, nuam kan va ti tak. Ka rin aiin Spi'n pawisa a nei reuh a, khawi a mi nge tih ka zawh chuan Lawmsanga'n a pêk thu leh a thlakhat hlawh a nauin bazar nan a rawn thawn tih a sawi a, amah hi Revenue ah a thawk ṭhin a, a nghet a ni nghe nghe. Mahse, a dam loh lai khan a nauvin a âi a kal a, vanneih thlâk takin a nau hi an thun ve ta a ni awm e. Tin, a pa hian hmel hriat a ngaha thil a ti thei ve riau bawk

Spi vanga lût thei chauh a ni a, a thla khat hlawh Krismas bazarna atana a hman ve turin a rawn thawn a nih ber chu.

Parlour kan chhuahsan hnuah naktuka ei tur vel leiin kan tei kual leh a, Sandal in ang kan lei deuh ngei. Kan inpeih meuh chuan tlai lam dar li a hnai tawh a, Bike dahna lam kan pan ta a.

Helmet khum tuma ka ban lai chuan, "Duati, inpa te saw.." Spi'n a ti sap a. Kan piah lawka Scooty dum bulah Zosanga leh nimina ka hmuh nu kha an lo ding chu niin! Min rawn hmu ve chiah bawk.

"Spi, a biak loh che chuan be suh aw," tiin helmet ka khuma min en reng tih ka hria.

"Zosanga khawsak dan hi a mak ngawt mai, rawn biak ve awm tak che," tih pahin ka hnungah a rawn chuang tharh a, "Ho lutuk, engah mah ka ngai hleinem," ka ti liam puat. Ka chhungril erawh a nâ vawng vawng si.

Zosanga'n min en reng a, a mit ko a san âwk lai pawh ka hmu, kan awmna a inhlat lo êm a, a bula ding hnenah chuan eng emaw sawiin kan lam a rawn pan ta a, a duh hun hunah min be awm bik lo em mai, ti rilru chung hian Bike ka start nghal a, pen li emaw lekin kan awmna a lo la thleng lo tihah ka tlân chhuak daih.

"Duati, ti nge?" Spi'n a ti a.

"Ani be leh turin hun kan nei tawh lo," tih chauhvin ka chhâng. Zosanga hawihai hmel leh thinrim hmel chu side glass aṭangin ka hmu reng. Zanah min ânkhum leh ngei pawh ka ring.

Zosanga te inah Bike kan hawn tlang ngam si lo a, kan inah kan va dah leh tê tê a, ka nu room ah ko lutin, "Naktuk tlaiah nu Muanpuii chu lo be rawh aw, lo riah ka duh ve sia, Zosanga'n a duh leh chuangin ka ring lo a, kan nufain kan lo riak ang," ka ti a.

"I pasal tel lova lo phei te chu a chi dawn em ni? Muanpuii pawhin a phal lo ang," a ti a.

"A phal loh pawhin ka lo riak tho tho dawn," tiin Zosanga nena kan boruak ka hrilh zuai zuai a, min ṭawngkhum dan ka sawi chuan, "Dawh theih a ngai rêng a ni, fa innei chauhva tihian innghirnghona in nei nghal a nia," lawm vak lo hian a ti a.

"Ka lo riah in phal loh leh Champhaiah ka chho mai ang, a duh duh hian ka awm tir dawn bik lo," luhlul takin ka ti ve tlat.

"Â, eng pawh ni se Muanpuii leh Faka ka lo sawipui dawn nia," a ti ve ta a..

"Mahse, Zosanga nena kan chungchang chu sawi kher rih suh aw, nakinah muangmarin ka hrilh zawk ang," ka ti leh a.

"In buaithlâk a nih hi..." tih bâk sawi tur a hre bik lo.

Spi bulah Zosanga nena kan chungchang ka sawi a, Lawmsanga hrilh lo turin ka ti a, unaute hi chu inhauvin inti thiam lo mah ila, a tawpah kan inṭan leh vek zel tih ka hrechiang tawh.

"Ka rin dan vel chiah a ni, thup tum viau mah la i hlim lo tih ka hriaa min hrilh hun ka lo nghâk tawp," Spi'n a lo ti a.

"Nia, Bawihpuii pawh ngai viau mah la, hruai tel a ngai sia, min hrethiam dawn nia," ka tih chuan, "Ka ngai ngawt ang, mahse, in inṭhen hlen dawn tihna a ni lo a,"

"Nia, a ṭha ber hriat a har a, tun ṭumah chuan tlân ang pawh ni lovin riak satliah angin ka lang dawn tho a," tiin ka tum dan te chiang zawkin ka hrilh a, ka nu min thlah tura ka koh chuan a rawn chhuak a, kan thil lei khai ṭun chungin Car ah kan lut ta a.

In kan thleng a, ka nuin min rawn zui bawk, Kimi nau pawm lai a lâksak a. Nu Muanpuiin Bawihpuii a la paw muhil thung.

"Rin aiin in thang rei lo," a lo ti a.

'Kan tlai' tiin kan inthlahrung ru deuh kha a nia, ka nu leh nu Muanpuii an titi a, riah phei chungchang te pawh an sawiin ka hria.

"Duati te an awm loh chuan khua a va har duh dawn ve," a tih ri ka hria.

Riah phei a remti tihna.

Ka nu haw phei hnuah nu Muanpuiin kan sam te chu a fak ve luam a, "Ṭhalai inni a, intuai peih na na na chu an vul rei," tiin kan thil lei a rem fel a, Kimi pawh nau awm chungchângah chuan sawiselna tur ka hre lo.

Naktuk Krismas a ni ta. Saitei pasal neih a hnai tawh hle mai, vawiinah pawh eng eng emaw buaipuiin a chhuak ve a, Valpuia inah tumah hrawn tur awm hek lo, a vannei hi ka'n ti mai mai khawp a.

Zosanga pawh a rawn haw ta a, a lo haw lai hian ka inbual daih a, ka chhuah leh chuan kan nupa khumah a lo ṭhu a, ngun taka thil ngaihtuah hmel a pu. A ṭhutna bulah tukina pawisa ka lâk tâk loh kha a lo dah a, a lawm lo tih hi a hriat hliah hliah.

"Khawia pawisain nge i bazar, ka nuin a pe lo che tih ka hria a nia," a ti a. Chhâng lovin ka ngawi reng.

"Ka zawhna che min chhâng rawh," tiin a ding chhuak a.

"Ka pawisa khâwl ka hmang," ka ti sap a.

"I khawsak danah ka lawm bîkin ring suh, Rafaela bike khalh sak te kha thil ṭul a ni lo. Nautê kalsanin i fawr kual a, chutah ngaihsak ber awm angin i awm leh a, Hmangaihzual, kut ka thlâk hreh miah lo che a nia," a aw ring lo mah se a thinrim hle tih ka hria.

Ka chhâng châk zek zek a; mahse, kan inhnial a nih chuan chhungte zawng zawngin an hre leh vek ang a, khatiang kha ka duh lo.

Ngawi rengin ka inthlâk san ta a, ka bra kilhna ka siam ṭhat lai chuan hnung lam aṭangin a rawn phih sawk a, ka phu chiang kher mai.

"Eng nge i hriata Zosang?" Ka râwl a ring ngei mai.

"Mipa dang ngaihsakna rilru te kha i lo pu ang e, ka ta i nih kha," ti nghutin khum lamah min pawt dawr dawr a, ka tâl nasa viau nain a chak si a, ka hneh ngang lo.

Chutah khumah min theh thlu ṭhuai a, ka thawmhnaw inbel chhun tlem tê chu phih sawk sawkin min delh bet zui nghal a, "Zosang, duh tawk rawh.." ka ti a, ṭawng pawh ka ṭawng ṭha thei lo.

Ka thu sawi hre lo ang hmiah hian a che zui bawrh bawrh a, dan buai pawh ka tum lo, a luhlul zia ka hre chiang em a ni. Dím miah lova nupa nun min hmanpui zawh chuan a tho chhuak a, "I nunah kei mah bâk seng luh belh i nei tur a ni lo, chuti a nih loh chuan ka that duh mai ang che," a ti leh a.

A sawi awmzia eng mah ka hre thiam lo. Tû chungchâng nge a sawi pawh ka hre mai mai lo.

"Tho la, i thawmhnaw inbel rawh," a tih chuan ka che lo hrim hrim, min thawhsan ang ngai ngai khan ka la mu a, kan pahnih chauha kan awm lai kha chu ni se ka sual lêt ang. Mahse, an in a ni a, mitmei ven tur a tam si, tlâwm ka inti a, ka mittui erawh tlâk tîr ka tum lo bur.

"Hmangaihzual, tho rawh.." a ti nawn leh sup a. Naute ṭap ri ka hre zui bawk.

Rang deuh hian khum thawhsanin bathroom ah ka tlân lût a, ka luak a chhuak ut ut, a chêt dan kha ka haw ngawih ngawih a, ngaidamtu leh hre thiamtu nih reng ka tum ta bik lo.

Zosangmawia thlen ngam chin apiang ka thleng ngam ve khawp mai.

Shower ka nei zuai a, hmanhmawh takin ka fanu ṭap la tur chuan room ka chhuahsan ta a. Zosanga erawh tukverh bulah dingin pawn lam a thlir a, ngaihzawng neiah min ngai zawk em maw ni? Zak lo lutuk.

'Mi rinawm lo chuan mi dang rinna an nei ngai lo' tih thu hi ka ngaihtuah chhuak zawk.

Ka nu leh pa, Kimi leh Spi an lo ṭhu ṭhap a, zanin hi urlâwk zan a ni a, chhungkuaa thil eiho te kan rêl ve kha a nia, châkna pakhat mah ka nei tawh lo. Ka thâ a khûr ru dar dar reng a, kan room a luh leh pawh thih hrehin ka hreh.

'Duati, inti chak rawh' tiin ka infuih ru sauh sauh a.

Kimi bialpa ve deuh Thanpuia a rawn lêng a, Spi nen kan inthiarfihlim ta rih a, ka nu leh pa pawh an room ah an lut a, Zosanga vung fe hian a rawn chhuak a, a kalna tur pawh sawi lovin Car chahbi a la a, a chhuak ta a.

A car thawm a reh fel vek hnuah kan room panin ka lut ta chauh a, ka thawmhnaw ken tur ka siam a, Zosanga hmuh loh turin ka thuk ru vek bawk. Naktuk tlaiah ngei ngeia chhuah ka tum ruh tlat a, ka haw leh tawh pawhin ka ring lo.

Zosanga hi Pathianin ka tâna a ruat a ni lo a nih ka ring rum rum tawh. Pathian hriatpuina tel lovin nupaah kan insiam a, a sawhkhâwk kan tuar mêk niin ka hria.

Kan nupa khum chu ka en a, a chuar tup a, nichina min khawsakpui dan ka ngaih tuah phei kha chuan ka chhungril a na vawng vawng.

Nu leh pa thu ka awih loh man chu natna leh ṭahna, lungngaihna a ni tih ka hrechhuak uar uar mai.

Kan chhungkua ka ngaihtuah kîr a, kan hlim ṭhin zia te kha, tunah chuan haw leh pawh ni ila nuthlawi fa pahnih pawm ka ni tawh dawn a, eng tikah mah ngái ka awh leh tawh dawn lo.

Chutiang ka ngaihtuah phei chuan ka inchhîr ru vawng vawng a ni ber mai.

Bawihtei hmel ka en a, ka lainat ngawih ngawih, khawvel hrehawmna tem turin an lo piang chhuak a, ṭahna leh zahna a nu leh pa vang hian an la tawng dawn si. Fahrah nun tem turin ka ngaihtuah phal lo, ka mittui far fap fap chu duh lo teh mah ila ka dang zo si lo.

Zû leh nulât tlangvalna nena hun ka hmanna rah chhuah hi a namai lo hle a ni. Hun liam tawh erawh ka siam ṭha thei lo a, hma lam pan ka tum ruh hlê.

Chutia ka lo inngaihtuah lai chuan Spi a lo lut a, ei tur an siam hmin tawha ei turin min rawn ko a.

"In boruak a ṭha lo hle a ni maw, ṭanpui dan che ka hre si lo," hrehawm tih hmel takin a ti a.

"Nia, a ngaihna ka hre hlawl lo, kei mah zawk thinrim tur ka nih laiin amah a thinrim hlauh a, eng mah hi ka hrethiam tawh lo takzet," ka ti zuai raih.

"Lungngai mah ta che, inhriat chhuah hun a la nei em em ang, hlim taka awm hi i phu asin, pasal kan nei fuh lo a nih ber hi.." a ti ta sap a.

"Ni e, ka haw phei ve phawt ang, tunah chuan a hmel hnuh ringawt pawh hi ka duh lo," tiin nichina min tih dan kha ka hrilh ta a. Spi a chek tlak tlak!

"A va han zak lo em em, a rûi si lo a maw?" A ti tlawk tlawk.

A ruih loh thu leh pawisa chungchâng te kha ka hrilh ve ta vek a, Kimi'n min rawn koh leh tâk avangin kan chhuak phei ta rih a.

Nu Muanpuiin Zosanga kalna min zawt a, ka hriat loh thu dik takin ka hrilh.

"Duati, eng mah ka hai lo a nia, eng vanga he tia awm nge a nih?" Tia min zawh chuan, "Ka hre lo," ka ti sap a.

"A lo haw ve mai ang, ngaihtuah lutuk lo la.." a ti ta ringawt a.

Ka thinrimna te dah ṭhain nui hmel ka lantir a, ei leh in lam kan zawh hnuah Kimi bialpa a la haw si lo a, kan mut san ta hlawm a.

Zing lam dar thuma Zosanga lo haw chu a rûi ngei mai. Eng tin nge car a rawn khalh haw theih zawk? Thil mak a ni.

Kan room kawngkhar a rawn hawn rualin, "Ka duat nu.." tiin min ko a.

Ka ngawih reng avang chuan, "Duatmi..sual.." seh chilh nawk nawkin min ko leh a, min ko ring lo hlauh zawk a. Chuti ni lo se chuan ka chhungte an harh fai vek ang.

Khumah a rawn ṭhu a, ka mu lai min sâwiin, "Vanlalduatmisual.." a sawi zo chiah a âwn ruai ruai a, a let nghal tawp.

Tenawm chheh chhuh lutuk mai.

Bawihtei tih harh hlau zetin a pheikhawk ka phelh sak a, chutah a kawr, kekawrte nen chauh a mu ta a.

Haw ngawih ngawih mah ila ka fa te pa a ni miau si a...

Lungawi lo ru ṭeuhvin ka mu ve ta a...

Khawvar rualin ka tho nghal a, ka tlaivar ṭhak ti ila dâwt ka sawi kher lo ang. A rûm bengchheng si, a khât tâwkun a ṭawngvai bawk a, a hne hian ka hnê.

Krismas ni a ni a, ka fa te inkhawmpui ve ngei ka tum. Zosanga phût ka tum lo a, a chhungte hriat laia inngeih lo anga lan pawh ka duh chuang lo. A dik taka sawi duh chuan keini chu mihrang zawk kan ni a, dik lovin sual deuh mah se an fate na na na chu a tawpah ṭanna chin an nei leh tho. Chuvangin an hriat laia lungawi lo anga lan kha thil tih chi ninghal lo chuan.

Ka fate pahnih an thawmhnaw thar ka inbel tîr a, ka mitah chuan anni aia mawi leh ṭha an awm lo.

Zosanga tih loh kan inkhawm ta vek a, kan kal dawnah pawh a la mutui hle.

Spi te nupain phûr takin Bawihpuii an hruai a, a piin Bawihtei a paw thung a, ka âwl hlauh.

An la nau viau naa Krismas tûka inkhawm pui loh ka ngaingam si lo a, an vawikhat Krismas hmannaah a pa a tel ve ta lo. Ka lo suangtuah ṭhin inneihna hlimawm kha a takah a chang zo ta lo a nih ber hi.

Mi nupa an fate nena kal ka hmuh te chu an awhawm ka ti.

Inkhawm kan bâng a, nau tê an en nak nak hlawm a, ṭha an tih thu an sawi te chuan ka lo lâwm ve em em a, "Spi, nautê innei hmelṭha si.." nula pakhat hian Spi puak lai Bawihpuii chu a bih dâk dâk a.

"Chutia mi?" Min rawn melh zauh paha tiin a nui a, a zak titih ringawt.

In kan thlenin Zosanga a lo tho tawh a, a inbual tawh a niang a fai sar mai. Min en zuk zuk a, ka ngaihsak lem lo, room-a a awmin choka lamah ka awm a, chutiang zel chuan thinrim anga lang miah si lo hian ka pehhêl char char. A fate pawh a pawm ve mial!

Thingpui in zawhah pa Faka'n chhungkaw kima thlalâk a rawt a, sitting room-a târah a ti deuh niawm tak a ni. Pawnah leh in chhungah kan la ta a, ka lungawi lohna pawh ka theihnghilh titih. Mahse, Zosanga hmel ka hmuh hian ka hre chhuak chawpchilh nghal zel.

Tlai lamah Zosanga a chhuak leh nulh a, chu lai remchang chu chuhin kan in lamah phei ka tum ta a.

Zosanga nu leh pain min thlah dawn a, Spi'n, "Kei chu ka lo kal ve lo mai ang, Bawihpuii te ka ngai dawn em mai," a ti a, ka kal tum dan hre chiangtu a ni bawk a, a hnuk a ulh deuhvin ka hria.

Kan thawmhnaw te ka siam diam tawh bawk a, quarter chahbi spare ka keng tel a, nakinah ka thawmhnaw lâk te ka la duh dawn a, Zosanga dil buai kher ka duh loh vang a ni.

Lawmsanga te nupa leh Kimi'n kan lan theih chhung min thlir a, ka rilru na mah se intih paukhauh ka tum ve tlat.

Ka pa in kan thleng ta.

Tun hmaa Lunglei aṭanga ka haw phei ṭhin lai kha chuan thlen hlan ka nghâkhlel hle ṭhin kha a ni a; mahse, tuna ka haw dan nen a inang ta si lo.

Rafaela leh Saitei an hlim hle a, nu Muanpuii leh pa Faka te nupa pawh rei fê an lêng ve.

"Zaninah Bawihpuii ka riahpui ang." Tiin, Saitei'n Bawihpuii a chuh nghal a, kan inah chuan ka zalena mitmei ven tur lah ka nei hek lo.

Zosanga hriat loha kal ka ni a, a hriat chhuah hunah eng tin tak ti ang maw? Nautê min chuhpui ang tih mawlh ka hlau a, ka hnute tuia ka chawm anni si lo a, ka ngaihtuahna a kal thui hle..

Nu Muanpuii te nupa an haw a, kei mahni chhungkaw hlang chauh kan ni ta. Min zâwt a nih loh chuan Zosanga chanchin sawi ka tum lo a; ka duh chen chen ka awm phawt mai dawn a ni...

Zanah pawh ka riah hmasaka kan mut ang tho khan Saitei a rawn insawn phei a, nau min lâk chhâwktu tur ka nei zel hi ka vanneihna a ni.

Rafaela Diktei te inah a lêng a, kan mut hnu fê-ah a rawn haw chauh.

Thlamuang taka ka pa ina ka mu leh thei hi ka va lawm si êm..

Naktuk khua var se eng nge kan hmachhawn ang tih hriat a ni ta lo...

Ka harh leh meuh chuan nî alang uar tawh a, thlasik lai te chuan nî a chhuah har teh reng nen ka va tho tlai awm em em ve le.

Saitei leh ka fate mutna ka en phei a, a ruak hiau. Min thawhsan vek tihna nge, eng nge thil awmzia!

Rang lutuk tak maiin ka tho chhuak a, ka fate ṭap ri pawhin min kai harh zo lo chu a nia.

Sana ka ena zinglam dar riat a lo pêl duai tawh a, 'Lalpa leh' Zosanga lokalin a la ta a nih ka ring ta ber a. Room kawngkhar hawngin ka chhuak a, ka pa ṭawng ri ka hriatin ka ding chawt.

"In û a ni a, in zah tur a ni, fâ neiin lo kir mah se in u a nihna a bo chuang lo a, chhawmdawl a ngaihna a piangah in chhawmdawl tur a ni a, a hmingin hlawh a nei a, a fa te leikâng se a thawk zawm leh mai dawn, amah a inngaihtuah thei bawk. I pa Faka te chhungkua dem tur a ni lo a, Zosanga pawh ṭha taka biak zel tur." Ka pa thil sawi chuan ka hnuk a ti ulh a, Saitei'n Bawihpuii hnutê a pe a, Rafaela'n a nau zawk a pawm lai ka hmuh phei chuan ka ṭah a chhuak ut ut.

Ka mutui lai pawh min kai tho duh lovin ka fate pahnih an lo buaipui diam a, ka pa ni se thinrim a hnêkin ka nau ten min zah loh a hlauh vangin thu ṭha a hrilh bawk a, ka room ah let lehin ka ṭap chhuak ta. Ka thawm an hriat ka hlau leh si. Lukhama hmai hupin ka ṭap ta tlawk tlawk a...

Khawvela min hmangaihtu ka neih chhun chu ka chhungkua te chauh hi an ni.

B+>[BeckirafARenthleI]<+®®

THE RAPSAGYAN FAMILY

Becky Rafa Renthlei(-BRR)

Chapter-42

[Duatbiki]

Riak satliah ka ni lo tih ka unaute pahnihin an hre ta chu ka thâwl huai mai. Ka nuin ka pa a lo hrilh ve veka annupa nun hi a awhawm ka ti ṭhin. Thu chhia a ṭha an inhrilh vek a, zêp ṭhen an nei hek lo. An fate min enkawl danah pawh sawisel tur ka hre mang miah lo.

An thu awih lova Zosanga nen khatia kan awm pawh khan, ka nu leh pa chu an ṭangrual tlat a, ka nu zawkin min hau laiin ka pa'n min ṭan ngai miah lo. Rafaela leh Ramtei chungchangah pawh khan a ni tho, Saitei hi hau ngaiin a awm khât ber.

Zingah pawh kan nula eirawng ka bawlpui a, ka fate pahnih Saitei leh ka nuin an awm a, Zosanga a lo kal thut ang tih ka hlau ber.

Tukṭhuan kan ei kham fel chiah tihah Spi'n min lo call a, "Duati, ka nu te leh Zosanga an inhau nasa lutuk a nia, ka pa phei chu a thinrim khawp mai," tiin min rawn hrilh a.

"Eng nge an inhauna chhan?" Tia ka zawh chuan, "A hriat lohva i riak phei kha ka nu leh pa a puh a, a thinrim khawp mai, tlaiah lo hruai che u a tum a nia," a ti leh a.

"Min hruai tum eng ang mah se ka lo haw dawn lo a ni tawp mai," ka ti ve hmiah.

"Nizan chu tumah mut pangngaiin kan mu lo, Zosanga thinrim âng kan ngaithla a ni ringawt," tiin a nui hak a, Bawihpuii te unau a ngaih thu a rawn sawi a, "Remchangah i lo leng dawn nia," ka ti a.

"A lo kal pawhin biak dan chin tawk i lo thiam dawn nia," a ti leh a.

Kan inbiak zawh hnu aṭanga rei vak lovah Zosanga a rawn lang ta a, ka rin aiin a lo kal hma! Naktuk zan velah a lo kal ka ring deuh kha a ni a, ka tisual der.

"Inbia ang," a ti nghut a.

"Eng mah sawi dun tur kan nei lo," ka ti a.

"Zanin pawh riak tawh suh ang che u, tu phalnain nge in riah sawn ve ringawt?" Thinrim ṭawng ring ngam chiah lo hian a ti a.

"Tu phalna mah ka mamawh lo, i khawsak danah ka lawm lo a, hman zana min chêtpui dan te kha ka duh zawng a ni hek lo. Min hmusit em a, i bula awm tumna hi ka nei tawh lo hrim hrim," ka ti tlang hmiah.

"Hmangaihzual, min zahna chhe tê tal hi nei ve rawh aw," a ti sup a, min ben a châk hmel khawp mai.

"Ka zah che a, kei aia naupang i ni chung hian pasal din hmun dik takah awm tîr chein ka zah che, ka phâk ang tawkah ka ngaihsak bawk che tih i hria, mahse, awm dan chin tâwk i thiam lo a, ka lakah zêp i nei a, nupa khawsak phung pakhat mah hriat i nei lo, nang nena inneih hi ka peih tawh lo," tia ka ṭawng leh nek chuan min chhâng lovin a ngawi reng a.

Chutah, "Kan inṭhen a nih chuan ka fate hi ka la ang," ka lo hlauhthawn ang ngeiin a ti ta a.

"E, i theih phawt chuan la ang che, nautê chhia leh ṭha la hre lo hi eng dan mahin a nu hnen aṭangin a la hrang thei lo, kei man enkawlna tur ka nei lo emaw ka enkawl thei ngang lo a nih chuan duh duha lâk mai mai theih a ni lo aw, a pa pawh ni mah la. Court thleng pawhin min bei la, Bawihpuii te unauvin duh an thlan theih hma loh chuan thiam i chang chuang lovang.." ka sawi zo chu ka thaw huai mai.

"I lo nasat hi le.." a ti sup.

"Nasa e, nasa lo chu va nei rawh," ka ti leh hmak a. Ka ngeiin ka haw êm a ni.

"Ngaihzawng i neih rûk te hi ka hre lo emaw i ti em ni? Fa sên pawm chungin i lerh a nia, kut ka thlâk lo che hi lawm hle rawh," thinrim insûm taka a ṭawng chuan ka nuih a za zawk.

"Nang mah ang turah khan min ngai a nih kha, nang chuan nupui nei chungin nula dang i bazar pui a, ngaihzawng ka nei ngei tih fiahna i hriat phawt chuan min hmuh rawh, nang anga midang kawp lâwr chi ka ni lo," ka sawi zawh rualin ka biang a ri sawk a, a thîp nghâl vâwt mai.

Kan thawmah ka nu a rawn kal ta a.

"Zosang, haw phei rawh," thinrim takin a ti ta a.

"A teuh lo, Hmangaihzuali te nufa tel lovin ka haw dawn reng reng lo." Tiin ka nu zu han chhâng a.

"Chuti a nih chuan i nu leh pa ka va phone ang e, Duati pawhin thiam lohna a nei ang; mahse, kut inthlâk kher hi chu ka ngaih dan a ni miah lo a nia, a hma pawhin i bêng tawh a, vawikhat pawh keini a nu leh pa hian kut kan thlâk ngai lo, thlâk ngai pawhin a awm hek lo. Kan in chhung hi i duh duha i chêtna tur a ni lo a nia, min zah lo hle mai," tiin a hau ta hrep a.

"I hre thiam lo a nih kha nu Mafel.."

"Hre thiam lo reng e, i pa Zira ka'n ko ang e, tiang mai maia rawn khawsak tur a ni lo" tih pahin ka pa a ko ta a.

Ka nu hi chu a ngaih dan a nih tawh loh chuan a nasa ve fia fia êm. Ka pa a ko zui ta a.

Zosanga'n min melh rum hle.

Ka huatna hi chuti maia reh chi a ni lo a, chuvangin awlsam tak chuan min ko haw mai mai lo ang. Ka hriat duh leh a zêp rük zawng zawng ka hriat fai vek hma loh chuan lungawi ka tum lo. Kha nu nen khan an inkawp a nih ka ring bawk.

Ka pa a lo phei chuan thil awmzia min zawt a, ka chhân hmain ka nu'n a lo hrilh a, "Nia, Zosang, tun ṭumah hi chuan a nu leh pa in a lo thleng tawh a, in nupa inkâr buaina te hre ve vek lo mah ila helamah awm ve rih phawt rawh se, insiam ṭhatna tur tam tak innei ve ve a, hetia awm hran hi thil ṭha ber ni lo mah se in ṭhat tlan zawk nan tun ṭum chu haw lo phawt rawh se, inṭhen hlenna tur a ni chuang nâng," dam thlap hian a ti ta a.

"A lo riak duh a nih pawhin ṭha takin sawi se, a rûk a râla kal kher kha a ngai lo, min zah lo ve êm alawm.." tiin ka pa hnenah ka sawi.

"Ni e, thiam thu hi chu in nei ve ve ang, lung awia lo riak satliah a ni lo a, rawn tlân a nia, chuvangin hetah awm ve rih rawh se, fa te tih fahrah chu thil ṭha a ni hauh lo; mahse, insiam ṭhat tum ve ve phawt rawh u," a ti leh a, Zosanga pawhin chhán ngaihna vak a hre bik lo nge a chhuak tau ta a.

Chak zeta a tlán chhuak chu ka en reng a, ka nu in ka room ah min hruai ta a.

"Mut hahdam tum rawh, i dâng vek a nia, naute chu kan lo buaipui ang e," a ti a.

Ka tâwt up up, kan in chhungah ngei pawh kut min rawn thlâk ngam a nia, min lo va han zah lo em em ve le. Ngaihzawng nei ang te khan min han puh vel a, zak lo lutuk.

Ka nu in min chhuahsan hnuah Spi ka va phone a, Zosanga min tih dan zawng zawng ka hrilh ve vek.

"Ama'n a neih vang a nih chu, ka ten zo vek tawh," a rawn ti a. Bungraw lâk mai ka duh thu tepawh ka hrilh tlang nghal vek, kan innei hlen tak tak hian ka ring tawh lo.

Valpuia a lo lêng a, Saitei'n engkim a lo hrilh ve vek tawh avangin min lainat hle. "Zu in mi hi chu an heti tlat zel a nia, Zosanga hi misual a ni hran lova a rilru pawh a ṭha viauin ka hria asin. Mahse, butut ve na chin hi a nei a, tikhan han awm ve rih la, inneih zawh lamah chuan a boruak a dang daih mai ang," a ti ve a.

Inṭhen hi ka cho a ni lo a, rui lo hai lo a kut inthlâk leh ngawt te hi ka ngaih dan a ni bik lo a ni. Inrem takin chhungkua din ila tih hi ka duh dan a la ni ve fan tho. Mahse, tunah chuan kan inkâr boruak a chhe êm a, chuti maia reh chi a ni lo.

Ka pa a lawm lo nasa mai si a, "In ṭhen hlen tur angin i rilru siam rawh, Zosanga nen hian in inmil lo a nih hi, mahni aia naupang neih chu dawhtheih te a ngaia nang pawh i thin chhe ve tho, insawi tur chuang bik in awm lo," tiin min hau.

Rafaela leh Diktei'n min fuih ve thung a, mihring ṭhatnaa kal hi chuan tâwp chin a nei a, dawh theih loh chin a thleng ṭhin. A pawimawh berah chuan Pathian hriat hi a ni. Pathian nei lo tu nun hi chu khawvelah pawh a nuam tak tak ngai lo. Nawm châng awm mah se tawp chin a nei tlat ṭhin. Tiin min hrilh a, a dik dawn riauvin ka hria.

[ZOSANGMAWIA]

Krismas vuakvet a zo a, Krismas ka hman tawh zawng zawngah a la nuam lo ber mai awm e.

Duati te nufa an riah phei aṭangin kâr hnih a liam tawh a, an chanchin eng mah ka hre zui tawh lo. Rafaela ka zâwt ngam si lo a, vawikhat Saitei ka va bia a, "U Zosang, ka u rilru i tina em a, inbiak inbiak pawh hi ka duh lo," tiin phone min dah khum hmak.

Khatia Champhaia ka han zin khan ka thlenna te inah Lunglei lam mi tlangval pakhat a lo thleng tel ve a, Forest-a thawk lai a ni awm e, Ramsanga ni tain ka hria.

Ka thlenna te chuan Duati chungchang te an sawi a, a pi boral pawi an tih thu te min hrilh ve a, chutia kan sawi lai chuan Ramsanga'n Duati a hriat thu leh hmelṭha an tih theih ṭhinzia a lo sawi ve a, ka nupui ka lo chhuang ru hle. Mahse, a thil sawiah beng khawn deuh mai ka neia chu chu Ramsanga te thawhnaa an pu ber nen an inngaihzawn ṭhin thu hi a ni.

"Kan pu khan a duh thei si a, a lêng ngun bawk a, an inneih kan ring vek; mahse, rin loh takin ti hian pasal a nei ta thut sia, hmanni khan kan puin, Ramsang, Duati phone number ka nei tawh a nia,' ati a, an la inbe zawm ta zel nge ka hre tawh bik lo," tiin a sawi a. Duati ka nupui a ni tih a hre lo pawh a ni mahna.

Kha pa Forest DFO kha Duatin ka bulah a sawi tawh chiang a ni. Kan inkawp tirh deuh khan, ka hriat loh hian an lo inbe ṭhin a ni ngei ang, a phone a lock vek bawk si a, kei inah ka awm tlemin hna ringawt ka buaipui a, ani a âwl a, hun thâwl a ngah bawk si. In biak nan ni lo se kha pa khan Duati phone number a neihna chhan tur ka hre lo.

Champhai aṭanga ka haw thlâk hnuah min ngaihsak nêp hle a, a hming chauhvin min bia ni berin a lang. Chhuan lamah kan fa te a buaipui a, tun hma anga min ngaihsak tâk loh avangin rinhlelhna ka nei lian tulh tulh.

Duati hi ka hmangaiha ka duh bawk; mahse, a mize dang ta hret hret erawh ka ngainat zawng a ni lo. Kei ai chuan ka fate a ngaihsak zawk a, fâ kan neih hnu phei hi chuan kan inkar a zau duaiin ka hre hial.

A nu leh pa te lam pawh ka dem ru viau tho. Pasal nei tawh a ni a, an ngaihsak uchuak leh lutuka hei hian ati luhlul zual ni berin ka hria. Nu leh pa ngaihsak kan hlawh loh lai khan kan inkâr a ṭha a, a thianghlimin a fair bawk. Tu mah rinchhan tur kan nei lo a, tunah chuan inrawlh a pui hi an tam lutuk a, thu ṭha pawh a sawi theih loh.

Kei pawh ka dik fai vek bik chuang lo. Tun lai phei chu Famkima leh Ramtei chhui chian hna kan thawk a, Ruati thih dan chungchânga inhnam hnawih kha anni a, a chhuitu te lamin a thâwi pawha sawi rik an phal loh avangin Duati tak ngial pawh ka hrilh lo kha a nia, ka inthiam chiah lo deuh.

Mahse, hetiang thilah hi chuan ṭawng tam loh hi a him ber. Famkima thil tih kha Jail tân theihna khawpa lian tham a ni a, Ruati chhungte an lungawi mai mai dawn lo tih pawh ka hria.

Vawi tam Duati ka call ṭhin a, ala duh ngai lo. Spi nen an inbe ṭhin tih ka hria a, eng tin emaw taka hma ka lâk ngei angai. A luhlul si, inṭhen hlen a duh tak tak a ang riau, office ka bân apianga ka fate pahnih nen an lo awm ve rak rak ṭhin kha a nia, kan in puia ka haw pui hi ka tisual let der a ni.

Ka hriat chhuah tâk chu, pasalte in lama duhsaktu leh ngaihsaktu an neih tam chuan hmeichhiate hian an pasal te an ngaihthah fo ṭhin tih hi.

Duati pawh a ni deuh tho. Kan pahnih chauha kan awm lai kha chuan ngaihsak tur dang leh buaipui tur kan nei lo a, kan nupa khan engkimah kan ṭang rualin kan inngeih viau, min duat a min ngaihsak ṭhin. Mahse, kan ina kan haw chiah hi chu kawm tur neuh neuh, titipui tur tih vel luk lak a ngah ta lutuk a, ka lo awm reng hman lo nen ka awm ve chhunah naupang ngaihsak an ngaia hun kan nei ta mang lo.

Saitei'n pasal a nei anga Rafaela'n a zirna hmun a pan bawk ang a, Duati te nufa ringawt te chu a nu leh pain an ngaihsak dawn lutuk tlat. An duat si.

Ka nu leh pa hnenah min koh sak turin ka ti ta a.

"Nupui enkawl dan i thiam lo em mai, kut te i lo thlâk a ni awm a, a nu leh pa an lawm lo khawp mai, ko pawh ni ila a lo haw duhin ka ring lo. I nun i siam ṭhat hle loh chuan Duati hi i chân hlen thei a nia," ka nuin ala ti zui. Ka hlauthawng ru ngei mai.

Dam chhunga ṭhen hlen atan ka phal lo a, whatsaap aṭangin ngaihdam ka dil mai dawn em ni? Ka phone call a pick duh si lo, an inah ka kal ngam chuang bawk si lo nen ka rilru a hah khawp mai.

Lalnuni, Ruati nau nen kan theih ang angin Famkima kan thlithlai ru ve a, zanah a nupui a sawisa ṭhin tih te pawh kan hriat phah. Ramtei'n Rafaela aia a thlan Famkima chu eng teh ual a lo ni lo khawp mai. An fapa lah a bawrhsawm si a, a khawngaihthlâk letling zawk.

Ka nu leh pain Duati koh an tum tâk si lohah chuan Spi lenpuiah ka sawm ta a, "Zosang, tun ṭum chu Duati rilru i tina êm a, a lo haw duh pawh hi ka ring tawh lo," a ti a.

"Nia, ka thiam loh vek a ni, ka hmangaiha inṭhen hlen ka duh miah lo," ka ti a.

"Tu nge hmanniah hmeichhia bazarpui i nei em ni, khangte kha a hria a, a hmu bawk a, a hma lawkin ama'n kalpuiah a sawm che a, ka hman lo tiin i chhâng a, a hnuah a hmu leh bawk si che u a, dik tak chuan lungawi a har ve dawn em asin," Duati thlavang hauh tak hian a ti leh a.

"Lalnuni bâk bazara kalpui ka nei lo, hmanniah pawh min hmuh reng kha," ka ti hluk a..

"Thil zep nei lo hian eng kim hrilh ṭha ve mai la, Lawmsanga pawh a ni tho, zêp hi innei ngah lutuka nupui te tan hriat thiam a har ve alawm," a tih chuan dik ka ti viau mai.

Spi nen zan lamah len kan tum ta a, kâr hnih tawp Duati tel lo a han awm chu a hrehawm lam deuh chu a ni e.

"Zosang, ka hman a nia," Zan dar sarih velah Spi'n min rawn ko a, ka nau ka hrilh fiah vek avangin min hre thiam takin annu kal ve a phal hlauh. Ka nu leh pa pawhin eng vak an sawi bik lo.

Pa Zirsanga te nupa hmai zah viau mah ila kei mah kal ngei ka duh bawk si. An in kawt kan thlenin motor a lo ding nual a, eng emaw tihpui deuh an nei nge ka hre lo. Spi ka zawt a, "Saitei leh a ṭhiante'n chaw an ei khawm a," a tih chuan ka thaw huai.

Mi dang an awm ve chuan min be chhe ngam bik nang.

In chhungah kan lut a, Duati te nufa ka hmu lo, nu Mafeli te nupa pawh ka hmu chuang lo. Valpuia a lo awm ve a, min lo be bawrh bawrh a, ka inthlahrung lo deuh.

Duati room ah Spi nen kan lut ta a, khumah ka fate pahnih an mu a, Duati'n phone in mi a lo bia a, ka rilruah Forest-a thawk pa kha ka hre chhuak zawk.

"Aw, in lam aṭanga tih theih chi kha ka duh a, nau an la tê deuh si a, chhuah lam chi chu ka thei dawn lo sa," a ṭawng chu uluk deuh hian ka ngaithla a, sumdawn a tum deuh a nih ka ring. Min ṭhen chu a tum hmel kher mai.

An inbiak zawh hnuah, "Spi, i va fel ve?" Min en kânin Spi a bia a, "Nia, naute kan ngai tawh a, kan lo lêng, tu emaw lungleng ka rawn hruai bawk a," tiin a nui a.

"Saitei te thawm a ṭha deuh a, ka inthiarfihlim daih a nih hi, Zosang, i ṭha maw?" Tiin min be ve mial. Kei mah zawk ka zum dûk.

"Umn, ṭha ni mai," tih pahin Bawihtei ka ban a, Spi'n Bawihpuii a pawm ve bawk a, ka fanu pahnihte hi ka ngai viau. Naute pawmin Spi a chhuak ta a, ka va lawm tak.

"Duati, lo haw tawh ula.." ka ti a.

"Lo hawna chhan tur ka nei tawh lo, kar lehah bungrua kan lo la ang," ati tawi tak a. Thinrim ang pawhin a lang chuang lo.

"Eng a, bungraw lâk maw?" Ka lo ti a.

"Aw, zalên i châk a, nupui fanaute ngaihsak ai chuan pawn lam nuam i ti zawk bawk a, i duh ang anga i tâl theih nan kan lo inthiarfihlim ang e," a ti ta a.

"A theih loh, bul ṭan ṭha leh ang," ka tih chuan chiang kêk kâwk hian min en a, "Ka ring tawh lo che, ka sawi vek tawh kha, a hmain Hlimi vangin kan buai hrep tawh a, kut min thlâk a, i thiam lohna ngawih ngawihah pawh i tlâwm duh ngai lo, tunah pawh hmeichhe dang i buaipuia ka lakah hian zêp i ngah em a ni, innei leh pawh ni ila eng kan ang chuang lovang," tia tho chhuakin tukverh bulah ava ding a.

"Ka thiam lo, ka thiam miah lo, mahse, chance vawikhat chauh min pe leh rawh, hmeichhe dang chungchang kha chu eng atan mah ka ti lo a nia, nang phatsan duhna rilru hi ka la pu chhin ngai lo," ka ti leh a.

"Dawt min hrilh tawh suh," tih pah hian phone a khawih a, "I whatsaap check la.." a tih zawm leh chuan a ngaihna ka hre vak lo. Mahse, ka en ve ta tho a, Lalnuni nen bazar dawra kan ding dun thlalâk a lo ni a, ka bâna min vuan lai ala ni kher zui.

"Hei chu ka sawi fiah thei.." tiin Bawihtei pawm chung hian ka pan a, "I insawi fiah nalh leh ngawt ang," a ti sap.

"Chutiang lam a ni lo," tiin Lalnuni nen kan inzui chhan kha ka sawi ta vek a, a ngawi reng ringawt.

Champhaia ka han kalna vel leh amah pawh ngaihzawng nei anga ka rin thu te thlengin ka sawi fai ta vek a, "A hun lai khan i zêp a, a chhan hriat lovin ka lakah i thinrim i hrithla a, tunah chuan a tlai tawh, ka fate nen nun bul ṭan ṭhat tumin rilru ka siam vek," a ti hmiah.

Ni e, a luhlul a, a tih loh chin a thlen chuan hmeichhia niin ka nupui mah ni se ka nawr lui ngawt thei lo tih ka hre ve tlat.

"Ngaihzawng nei leh midang bia anga min hriat te chuan engah nge min zawh mai loh, nang angin zêp ka nei ve ngai em ni? Chiang takin thu dik ka hrilh mai zel che, kan inkarah hian inrin tawnna a awm tawh lo a, inṭhen ila kan pahnih tân a ṭha zawk ang," a tih chuan, "Kan fate tih fahrah hi i duh em ni?" Tiin ka zawt a.

"Duh lo e, mahse, an nu leh pa te kan inrem miau loh chuan tih ngaihna awm hek lo. Eng pawh nise mahni aia naupang neih hi chu ka duh tawh lo, dawh theih a ngai si a, ka tlin lo a nih hi," tiin naute hnute hnêk tur a siam a, ka beidawng titih.

"Duati, bungrua chu lo la rih suh aw, i duh chen chen awm la, ka lo nghâk reng ang che," tiin Bawihtei khumah ka mut a, amah en leh vang vangin eng mah sawi tawh lo hian room ka chhuahsan ta a.

Ka nu leh pa te'n min dem vek bawk si a, Duati nu leh pa ka be ngam bawk si lo. Rafaela puihna tal ngen ta ila, aniin hmâ min laksak thei mial mahna.

Mahse, chu pawh chu thil huphurhawm tak a ni. A hmain Duati pawisa a pêk te kha thinrimin ka lo pe lêt si a, keimah hian thil ka ti khawbâw vek a nih ber hi.

Spi nen kan haw phei kawngah kan inbe mang lo. Duati nen an inkawmngeih a, hmâ min lakpui tura ngen mai ka duh rum rum.

Office kan kâi leh tawh a, ka nu leh pa ina awm reng pawh nuam ka tih loh avangin ka quarter-ah ka riak zauh zauh a, zû erawh ka thlah hmiah. Duati a tlân tih Hlimi'n a lo hre ve a, min rawn vir sek mai. Mahse, he nu hi rinna pakhat mah ka nei tawh lo a, kan nupa tân mi hnawksak a ni.

"Duati te ang hi chu an nuamsa a, pasal neiha mi ina awm tih vel an peih tak tak lo, Lungleia a awm lai pawh khan sawi a kâi ve riau," a ti a.

"Nang ai chuan a nikhua deuh zawk," tia ka chhân khan a lawm lo teh e.

Famkima leh Ramtei kan chhuina pawh a hmâwr kan bâwk lek lek tawh a, Ruati kha a lo lainat awm ngawt mai. Mahse, amah tinatute hremna kan pe thei lek lek tawh a, ka rilru pawh a nuam ta deuh.

Inrinini a ni a, quarter tifai turin kan ṭhenawm Hruaia nupui ka chhawr a, "Niminah innu te ka hmu a, nautê an lo en tîr a.." tiin min hrilh a.

Ka fa te dam leh dam loh pawh ka hre ve tawh lo a nia, kei hi ka nêp a nih hi.

Saitei pasal neih hun pawh kâr leh a ni tawh a, ka chhungte kal mah se kei chu kal ve ngam tur pawh ka ni lo, kut ka lo thlâk ta kher kher kha ka inthiam lo tulh tulh. Siam ṭhat leh ngaihna lah a awm dér si lo.

Ka nuin min rawn call a, " Rang takin lo phei rawh, i nu Mafeli'n min lo call a, naktuk zingah bungraw lâk an tum tih a rawn sawi a," tiin.

Ka thin a phu nghal dup dup mai, ka hlauhthawn ang ngeiin a thleng dawn ta.

Hmanhmawh lutukin kan in lam panin ka tlân chhuak ta a. Ni lo, inṭhen hlen ka duh lo hul hual, zah pawh dâwn lova ngaih dam ka dîl a nih loh chuan Duati hi a thu sawiah a ding tlang ngei ang.

Tlâwm a ngaih pawha tlâwm ngam turin rilru ka buatsaih ta a.

B+>[BeckirafARenthleI]<+®®

THE RAPSAGYAN FAMILY

Becky Rafa Renthlei(-BRR)

Chapter 43

[Zosangmawia]

Hmanhmawh ang reng takin kan inah ka tlân phei ta a, naktuk zingah bungraw lâk an tum a maw? "Bungrua la rih suh, i duh chen chen awm la, ka lo nghâk ang che," tiin Duati hnenah khân ka sawi a, mahse, awmzia a nei ta lo tihna em ni?

Hetiang vut vuta thil a thlen hi ka beisei lo a, ka nun ram a ti chau vek. Min hmangaih tawh lo tihna em ni ang? Chu zawng ni chiahin ka hre si lo. Fa kan nei ve chauh a, thla thum an tling ve chang chang chauh a ni a, inṭhen hlen hi ka ngai ngam lo.

Kan in ka thleng a, Kimi tiam lovin ka chhungte'n min lo nghâk ṭhap.

"Tu nge bungraw lâk chungchâng lo sawi, amah Duati'n em ni?" Ka ti nghal a.

"Ni lo e, i pa Zira zawkin.." ka pa'n a ti a.

"Inṭhen hi kan duh lo a, fâ te tih fahrah pawh kan duh lo, mahse, Duati a lungawi ngang si lo a, i pa Zira te nupa rilru a na ve viau mai. Kut te i lo thlâk a ni awm a," ka pa in a tih zawm leh chuan sawi mai tur pawh ka hre lo.

"Nu, nangma'n hrilh fiah la, Duati ṭhen hi ka duh lo, inṭhen ka duh lo hrim hrim," zah pawh dâwn lovin ka ti ta tawp a, ka nu leh pa rilru a hah hmel kher mai.

"Duati pawh ka va bia alawm; mahse, a duh ngang tawh lo. Zosanga, kei aia naupang zawk hian a duh hun hunah kut min thlâk a, ka dawh theihnain a tlin tawh bik lo, zah derin ngaihsak ila a inluling sauh a, innei leh pawh ni ila eng kan ang dawn chuang lo, ati tlat tawh. I thiam loh vek a ni, hmangaih i inti a, i awm danah i hmangaihna i ti lang leh si lo," a ti leh bawrh bawrh a, chhân pawh ka chhâng ngam tawh lo.

"Naktuk zingah an lo kal dawn a, hetah thawmhnaw tih tham a dah lo a, i quarter-ah kan kal a ngai dawn a nia, Bawihpuii te unau an khawngaih thlâk êm mai, kan tú neih chhun te anni asin le," a sawi zawng pawhin a ṭah a chhuah hmel hle.

Eng pawi nge ka khawih tâk? Ka damchhung kawppui atana ka thlan a ni a, ka lo tidik lo a ni. Ka hmangaih asin.

Eng eng emaw an sawi nual a, ka hre bar lo. Ka ngaihtuahna a chawmawlh vek a, an inah va kal tumna rilru ka pu ut ut a; mahse, ka ngam ngang tawh bawk si lo.

Ka pain, "Mu phawt ila, naktuk khua han var se an rilru pawh an lo thlâk mial mai thei asin," a tih chuan ka room lam panin ka kal ta a, beiseina chhetê chu ka la nei ve.

Rafaela hnenah tal sawi ṭhain ka hria a, ka va call ta a.

"Aw, Zosang, eng nge ni ta?" a rawn ti a.

"Eng lo a nia, i u Duati'n min be duh si lo a, bungraw lâk êm hi chu tum lo se, ka thiam loh tih ka hria a, a rilru ka ti nâ tih pawh ka inhria; a rilru dam hma chu duh leh awm rih se, ka nawr miah lo vang, inṭhen hlen êm hi chu ka ngaingam lo a ni, i û ka hmangaihzia chu i hriat kha," tiin thupha ka châwi nghâl bawk a.

"Nia, tun ṭum chu tih vak ngaihna ka hre lo che u a ni, mihring induhna leh in îtna hi chu rei lo têah a reh mai a, Pathian tel lovin in duh danin in kal nasa lutuk atin ni. Fahrah insiam belh dawn bawk a, u Duati pawh ka hrilh tho; mahse, a lungawi thei ngang si lo a, a ṭha zawk lo chhuahna turte pawh a ni mahna.." a ti dam ruih.

"Khawngaihin ṭan min lo lâkpui ta che, insiam ṭhat ka lo tum ang e," ka ti leh a.

"U Duati pawh biak ka lo tum ang aw, ani pawh a dik vek bik lo ang tih ka hre tho a nia, rilru puitlin phah nan leh Pathian koh tam nân hmang hlauh ula a ṭha dawn em asin," a rawn ti leh a.

Rafaela ka tluk loh zia ka hre chiang chho tulh tulh.

Kan inbiak zawh hnuah rilru hrehawm takin ka mu ve ta a, kan hlim hun chhung rei loh zia te, Duati thiam loh a awm loh zia te ka ngaihtuah a, ka inchhir ru ngawih ngawih, ani chu ka fate pahnih nen ka tel lovin an awm thei ang a, kei mah bawk hi awm thei lo tur leh hrehawm tuar thei lo tur zawk ka ni dawn tih ka hria.

Khawvar dawn hnaihah ka lo chhîng sek a, motor rawm tlân thawmin min ti harh leh nghal a, dârkâr hnih chu ka lo muhil ve.

Ka nu ṭawng ri leh nu Mafeli ṭawng ri ka hria a, an lo kal tawh tih ka hre thiam mai. Sana ka ena zing lam dar sarih a ri chiah a, ka thin phû a rang kher mai.

Hreh lutuk tak maiin ka tho chhuak ve ta a.

Sitting room ah an lo ṭhu ṭhap a, pa Zirsanga te nupa, Duati leh ka hmelhriat loh mipa pakhat a tel ve a, Duati'n nautê a rawn hruai lo. Rafaela leh Saitei an lo kal ve lo a, ka zâm ru takzet.

Pa Zirsanga a rawn ding chhuak a, "Ni danga kan lo kal dan nen a boruak a dang ta, duh lo viau mah ila hetiang thu sawi a ngai ta hi pawi ka ti khawp mai," tiin bul a ṭan a.

"Faka te nupa pawhin min hriat thiam ka beisei tak zet, kan fate dai sual man hi kan tuar zel chu a ni si a, anni pawh nu leh pa thu zâwm lova kal luiin an duh danin an awm ngar ngar a, a tâwp erawh heti mai mai hi niin fahrah an siam dawn ta chu a ni a, Duati pawh a thiam chuang lo, Zosanga pawh chuti tho. Tun din hmun atan chuan inṭhen fel hi thil ṭha ber niin alang," a ti ta a.

Ka nu leh pa ka va en a, sawi ve tum awm ang pawhin an lang lêm lo.

"Pa Zir, in ṭhen hlen hi ka duh lo, khawngaih takin in rilru thlâk hrâm rawh u," tiin ka ngên ta ringawt a.

Ka sawi zawh veleh rang lutuk hian Duati'n, "Zosang, inneih leh hi ka duh tawh lo, ka laka i awm dan hre chiang ber tu i ni a, vawi tam nupa inkârah zêp a awm tur a ni lo tiin ka hrilh ṭhin che, ka thu sawiin i lakah awmzia a nei lo a, i duh ang leh nuam i tih dan anga i khawsak zawm zel theih nan hetiang thu tlûkna hi ka siam a ni," fel fai thlapin a ti ta a.

"Duati, ka tihpalh takzet, tun ṭum chauh hi chu ngaidamtu thinlung pu la, i mi hriat thiamna ka ngên a che," hetiang em em hian ka tlâwm thei ang tih pawh ka lo hre lo. Mahse, ka hmangaih ka chân hlen ai chuan tiin ka ngen mawlh mawlh mai a ni.

"In pahnih avang hian nu leh pa mittui a far hnem tawh a, inngeih tak leh inrem taka in awm beiseiin man kan inhlân fel a; nu leh pa din hmun aṭang chuan hriat thiam a har asin. Eng pawh nise ka sawi duh chu, nang mahni avang hian kan chhungkaw inṭhian ṭhatna hi a chhe dawn lo a, in inṭhen avang hian kan inkawm loh phah dawn lo tih hria ang che u, in sualna avanga lo intih hrehawm pawh kan tum ve hek lo," pa Zirsanga'n a tih leh tâkah chuan an thu sawiah an ding nghet dawn tih ka chiang ta.

Tlâwm taka ka dik lohna pawma ka ngenna pawh engah mah an ngai ta lo.

Ka pa a rawn ding chhuak ve a, "Zira, kan fapa a thiam lo tih kan pawm a, Zosangmawia hian nupui enkawl dan pawh a thiam lo a nih hi, Duati rilru leh in rilru a tih natnaah ngaihdam kan dil tak meuh che u a, Duati pawhin ngun taka a ngaihtuah hnua thu tlûkna siam a ni a, kan fanu i nihna a bo dawn chuang lo a nia," tiin a sawi ve ta a.

Chumi hnu chuan kan room lama Bawihtei te unau thawmhnaw leh ama thawmhnaw awm ang ang te chu a khung khâwm a, chelh din ka duh. Mahse, mipa ka nihna angin tlâwm leh zah dawn lovin ka ṭawng ve tawh a, Duati luhlul zia leh a tih lohnaah chuan nawr luih theih a ni lo tih ka hriat chian êm avangin eng mah sawi lo hian ka en tawp.

Inneih ṭhat pangngaia innei kan nih loh avang khan thil chhawm eng mah a nei lo a, ka quarter lama kan phei pawhin lâk tur a nei tam vak lo. Champhai lama a in luahnaa a bungraw ho kan phurhthlâk kha a tam zâwk a ni a, chungho chu a lian tham deuh an ni mai, an 'Pick up' in an phur chhuak ta a. Kan ṭhenawmpa Hruaia hrilhhai hmel pawh hmuh a nuam vak lo.

Kan in pui lama awm reng kan ni a, hetia bungrua an la thut hi atan chuan a hrilhhai thlâk ngawtin ka ring.

Zing dar kua velah Duati te chu an haw ta a. Ka ruak huai, mipa mah ni ila ṭah ka châk kher mai. Ka chhungril tâwt leh na lutuk hi engtia tih reh chi nge ka hre mai lo.

Tukṭhuan kan ei naah ka pain min hnêm a, "In ṭhen hlenna tur a ni kher hleinem, tikhan rilru puitling put tum la, Duati te nufa i ngaihsak ṭhulh chuang hauh suh, naute châwmna tur pawh i hlawh aṭangin pe zel la, Duati lungawi lohna chu thu hran ni se, a nu leh pa rilru i ti na tlat a, kan tân pawh ṭawng ngaihna a vâng êm a ni. Keini ni lo phei ila chuan an in chhunga kut i thlâk leh a duh lo chung nupa nun i hman luihpui te kha court ah an khing duh ang che chu; mahse, kan inchhungkhatna leh kan inṭhian ṭhatna an zaha an sawi chhuak ta lo mai mai a nih kha," tia a sawi chuan ka zak ngawih ngawih.

Duati duh lo chung ka chêtpui zan te kha ka ngaihtuah chhuak a, a nu leh pa a lo hrilh vek tihna! Zah lutuk avang hian thih theih ni se ka thi thei hialin ka ring.

Rinsangpuiin tûkṭhuan a kîl ve lo a, an room ah a ṭap tih Lawmsanga'n a sawi. Ni e, Duati nen an inngaina a, an nupa inkâr boruak a ṭhat loh pawhin Duati a awm kha chuan a thlâ a muanga Bawihpuii an riahpui thei tawh lo tur ringawt pawh kha a lainat awm. Fa annei ve si lova ka thil tih pawi tuartu te zingah a tel pha ve a. Hrehawm ka ti hle.

Kan ina awm pawh nuam ka ti lo a, bungrua an rawn lâk zan chiah ka riak a, ka quarter-ah ka insawn ta daih a.

Duati te nufa chanchin ka ngaihven ru reng a, ka khua a har ngawih ngawih, zu in leh châkna thlarau sual ka dawng ngun ngei mai. Mahse, in tumna ka nei tawh lo a, sim duhna thinlung tak tak ka pu ve ta.

Rafaela hian min rawn biak zauh a ching ṭhin a, a û vanga min biak duh loh tih vel kha a nei ve lo. Chanchin min rawn hrilh ve fo a, Saitei te inneihah pawh kal ngei turin min rawn sawm.

INNEIH NI (Valpuia)

Ka nupui boral ta Vanlalthlamuanpuii avanga ka natna te reh fai vek lo mah se Pathianin ka ṭawngṭaina min chhânsak tih ka hria a, Saitei nen kan inneih ni a lo her chhuak ve ta!

Mihring lam aṭanga chhût chuan kan kum a inthlau a, mahse, Pathian min pêk a ni tih chiang takin ka hria.

Lunglei lama ka û te leh kan chhungte an rawn thleng kim vek tih theih a ni a, a hma khan 'tu khaw kha' hriatpui lohvin nuthlawi ka nei kha a ni a, tunah erawh a vawi khat nan mawihnai takin kohhran hriatpuina thlap nen ka nei dawn ta. Ka chhungril takin ka lawm a ni.

Saitei nu leh pa mi pangngai anni a, mipa in lamah chauh ei siam ti ila kan tih avangin pawisa rawn thawh an tum a, chu erawh ka hnial ta, an fanu an duat lai, theihtawpa an an enkawl, a zirna a zo ve chauh a, a thâ pawh chhawr hman lohvin pasal a nei dawn ta si a, kan in lama eisiamna tur hrim hrim hi chu ka tum ta vek a.

An in lamah ve thung chuan man eitute leh ṭhenrual ṭha tlem tê chauh man hlan tlâiah an eipui thung.

Zosanga leh Duati an inṭhen fel ta a, pawi ka lo ti ve vawng vawng mai. Mahse, sawi theih kan nei lo a, Saitei sawi dan hmangah Zosanga a thiam lo hle niawm tak a ni. Duati hi mi rilru tluang purh leh luhlul tak a ni a, khati khawpa inhmangaih si, nu leh pa kalsan hial duha innei kha anni a, hetia an in ṭhen thut hi mi mak tih a tling vek.

Inneih inkhawm hi chawhnu dar khat tih a ni a, ka insiam peih thlap tawh.

Court suit dum dak hlarh inbelin a hnuaiah Kamis var thianghlim tak ka ha a, ka sam pawh ka siam uluk hle. Ka ṭhianpa Hmangaihkima pawhin ka inbel ang a inbel ve vek a, keima puala car ka neih loh avangin ka û te ta kan hmang hawh dawn a, Bike leh Sumo pahnih chiah ka nei tawh a, Sumo-a mo hruai chi ninghal lo chuan.

Saitei te car hlui zawk kha hralh an tum a, ka hauh ve ringawt. Anni phei chuan lei a ngai lo anti a; mahse, ka duh miah lo, a engah mah hmaa nupuite lam chhawr ṭangkai tum vak kha ka rilrem zawng a ni ve lo.

Zosanga pawh keima lam aṭanga sawmin a inah ka va kal ve ngat a, "Min rawn telpui ngei ngei ang che, hmeichhe lampang sâwmna a ni lo a, keima pual pual liau," ka tih chuan nui suk chung hian, "Pathlawi tharlâmin ka rawn ṭawiawm ang che," a tih ve kha.

Sawrkarah hnasâng thawk a ni a, mi bright leh thothâng ṭha tak a ni tih ka hria. Forensic expert te chu kei ngei pawh hian ka ngaisâng viau.

Duati nen inṭhen mah se a duh phawt chuan nupui tur te zawng a haihchham dawn lo chiang, amah a palianin a chhe lo si, a kum ala nau bawk a, ngaihtuahawm a ni lo.

Chutiang chiahin Duati pawh a chhe lo a, a intuai peih si, a fate'n hnute pangngai an hne lo lehnghal a, tlêmin han leikâng deuh se ngaihtuahawm a ni lo. Hmêlah tak phei chuan Saitei hian a tluk miah lo.

Dâr rîkna tur minute 15 ala awmin Biak in kan pan ta a, Hmangaihkima a nui suk suk reng ringawt a, "Innu tur chu a ngo si a, zanin chu i kheh vâr pheu dawn a nih kha," tih mai maiin a râk a, Lunglei lam Sumo driver leh Aizawl lam te, Guwahati service zinga ka kawm ngeih ho pawh ka sâwm vek.

Inneih dâr a ri a, ka hmangaih Saitei kawrfual var a taksa rem zaih inbela lo lut chu ngun takin ka en a, a unaupa neih chhun Rafaela'n a rawn kâi lût a, an chhe lo dun kher mai.

Hmeichhe lam ṭhutnaah Saitei nu leh pa te, pa Faka te chhungkua leh an lam hnai an ṭhu a, Duati pawh a nalh kher mai, a fanu pakhat zawk a pawm a, pakhat Spi'n a pawm thung. Zosangmawia erawh ka sâwmna ngai pawimawhin mipa chhungte ṭhutna lamah a ṭhu daih a, he pa hi chu a ṭha ve tlat. A chhungte'n an en hrek hrek tih pawh ka hria. Engah mah zuk ngai lo a..

Inneih thutiam chhamna hun leh zungbun in buntîrna hun kan hmang zo a, Saitei zâk hmel chu a sen deuh ṭân.

A ṭhiannu Rampari pawh hmelchhia a ni lo, Chennai-a a zirpui tho a ni a, vawi hnih chiah ka la hmu, Pastor-in thu chah tâwi sawiin inkhâwm an tam bawk a, Biak in a khat vek, Veranda leh Hall-a ṭhu te pawh an awm bawk.

"Pathianin a zawm tawh chu mihringin ṭhen suh se," Pastor aw fiah ṭha takin a sawi chuan ka thinlung chhung aṭangin ka lo zâwm ve a, 'Thihnain min ṭhen hma loh zawng tiin Saitei vuan tlat turin ka lo intiam nawn leh,'

Inkhawm banah thlalâkna hun kan hmang a, a rei ngat ngat teh e. Saitei ṭhiante ho an hlim ber mai. Naupang chhia ni lo mah se an la puitling lo hlawm ve a, an thâwm a ṭha khawp mai.

Kan in lamah ei leh in buatsaih a ni a, khawtlâng huap deuh thawa ti kan ni bawk a, mi an tam khawp mai.

Mo hruaina hun kha a hranpaa siam lovin inkhawm banah a rawn lâwi lut nghal a, thil a awmsam phian.

Duati haw tur a mittui a parawl ṭeuh a, Saitei a awm loh chuan a khawhar dan tur ka hriatpui. Bâkah a fate lâk chhâwktu ber a ni a, hmeichhia na na na chu unauah pawh an inngai bik. Chhungkaw aiawha thu sawinaah khan pa Zirsanga a ding a, a sawi tawi fel ṭha khawp mai.

Sentei nen kan inneih laia kan room kha ti danglamin Saitei nen room thar hlak kan luah dawn a, ka nupui hlui nena kan thlalâk pawh ka dah bo ve ta. Thihna avanga ka ṭhen tâk Vanlalthlamuanpuii kha theihnghilh fai vek lo mah ila ka nupui thar Saitei tâna hmuh nuam lo tur eng thil mah dah lan ka tum lo.

Rafaela leh Diktei an awm khawmuang a, a nâwlpui an ṭîn zo tawh bawk a, ka û te chhungkua leh Rafaela te nen kan ni deuh tawh mai. Zan dar kua a ri tawh.

Diktei tel lovin Rafaela'n Saitei nen min ko hrangin kan nupa room thar turah min luhpui a, khumah ṭhu tura min tih chuan a ngaihna ka hre lo viau.

"U Valpui, hei kan hriat angin Pathian leh a kohhran te hriatpuinain ka nau nupuiah i nei ta a, kan hmangaihzia i hriat kha, in nupa nuna pawimawh ber chu Pathian a ni. Pathian tel lova bul in ṭan a nih chuan a tawpah lungngaihna, ṭahna bâk in hmachhawn dawn lo. Chuvangin zanin aṭang hian Pathian hnenah innupa kawltira ṭawngṭaina hun ka hmang anga, in lo chhunzawm zel ka duh tak zet a ni." Tiin kan lu chungah kut a nghat a, a ṭawngṭai ta a.

Rafaela puitlinzia leh a farnute tân pawha innghahna tlâk a nih zia ka hre thar. A tih lam chu ti tlat mi a ni a, Pathian rawngbawl tura a inpekna hi a ropuiin ka ngaisâng sawt. A unaute'n an faka an zah si zia te leh an ngaihtuah zia ka hria a, hetiang hun min hmanpui nachâng a hria te hi a mak ka ti.

Room aṭanga kan chhuah hnuah muang khawtlâi lovin Diktei nen an haw ve ta a, Saitei a ṭap ṭeuh. A sam duat taka chûlin, "A kal hmain chaw eiah kan sawm dawn nia," ka ti a, a lawm hmel khawp mai.

Kan nupa khum zau ṭha takah chuan inkuah chialin kan mu a, Pathian pawi khawih zawngin vawi khat mah ka la awm pui lo.

Ka nupui, ka hmangaih, a nuamah pawh a hrehawmah pawh tia thu ka tiampui ngei chu hmangaihna ka chenpui ta a.

Nula thianghlim a ni bawk.

"Hey, min dîm lo si.." a rawn ti a, sawi âwm leh awm lo pawh a hre ṭhin lo. Ka nui hawk a.

"A lehpekah chuan ka dîm viau tawh ang che," ka nui zui suk a.

Mi thianghlim ni si lo hian nula thianghlim nupuiah ka nei a, ka hlim veng veng.

A tûk zinga ka harh leh chuan Saitei'n min lo kuah chial a, a mal var hai leh a âwmbâwr lian fahran lo kawh vah si te chu ka en kham lo. A sam lukhamah a inchapdarh niai a, a hmelṭhain ka duh hliah hliah, dimtê hian a hmuiah ka fawp a, tih harh ka hlau hle.

Pastor leh kohhran hriatpuina thlapa hmangaihna chen dun chu a nuam dangdai teh e.

A la hma deuh bawk nen muthilh tumin ka maimitchhing leh ta a. Sentei nen khan an mizia te hi a inang deuh lehnghal a, ṭûl fê a nih loh chuan zinsan mai mai ka tum tawh lo hrim hrim. Ka nupui hmasa anga mi kut a tuar palh ka hlau zek zek.

Ka mutui lai phone riin min tiharh a, Saitei phone ri a ni. A la hma teh reng nen a tu chu ni maw!

Nu Mafeli lek.

Hello, ka tih rual rualin, "Valpui, Saitei a la tho ve nange kai tho rawh, mitmei ven tur awm lo mah se thawh hma tur," a rawn ti heu mai.

"Ah, a la hma em mai.." tia ka chhân chuan, "Khatia i duat ṭhan chuan a dawklak mai ang, tun aṭang khan ṭan la, nakin zelah pawh tih ṭhanah a nei mai dawn alawm," a tih leh chuan ka nuih aza ru viau. A nu hi chu a strick ve ṭhak ṭhak a, fa te kaihhruaina kawngah a fakawm viau.

Rei vak lo kan inbiak leh hnuin ka û fa te thâwm a rawn awm a, Saitei kai thovin kan tho chhuak dun ta a.

"Ka chhuak zak deuh," a'n tiah.

"I tawm reng thei nang, lokal rawh ka rualin," ka tih chuan ka kawr hnungah pawtin min zui chhuak ta a, ka u te chhungkua bâk inchungah hian an riak lo a, kan mikhual te inhnuaiah an riak thung.

Kan dinpui ve ve kan ṭhiante khan tukṭhuan min rawn kilpui leh a, kan hlim tlâng hle.

"Nimina u Zosanga in chhungkaw lama a ṭhut khan ka nui chhuak teuh lutuk," a ti a.

"Ka sâwm alawm, nang mahni lamah ṭhut kha chu a duh miah lo ang, in ṭhen tawh mah se intih chhiat kher tur a ni lo a," ka ti a.

"U Duati ati rethei lutuka ka ngei tlat alawm," a ti leh a, ka sawi thui pui duh ta lo.

Bungraw hawh tih fel ngai te ka enpui hlânin a ṭhiannu nen a thil chhawm leh a thawmhnaw te an rem ṭha a, an khawsak theih ngaihtuahin uchuak taka tam thil a chhawm lo. Ka duh dan tak a ni.

Inneih a zo tawh bawk a, Rafaela kal a hun leh dawn tawh a, Diktei nen chaw eia sawm ka rilrûk ta a.

Tunah chuan kristian chhungkua dinpui tur Pathianin min pe tawh a, ka mawhphurhna hlen chhuah ngei pawh ka tum.

Keimah Lalfakawma hian ka nupui hmangaih leh duat taka enkawl hi ka tih mâkmawh a ni.

[RAFAELA]

Ka zirna zawm tura ka kal hun a hnai tawh kher mai. Saitei te inneih leh u Duati te inṭhen boruak vel nen Diktei pawh ka hmu ṭha hman bik vak lo a, ka nu leh pa te min chah ang ngeiin ka farnute enkawl leh ngaihsak hi ka tih tur a ni a, ka theihna chinah chuan buaipui vein ka inhre bawk.

"Rafael, Bawihpuii te hi lo awmpui lawk teh, inbual ve ka duh a," tiin u Duati'n min ko a, Zosanga nen an inṭhena a lo kîr hnu hian a inthlahrungin a ṭûl tê-ah lo chuan a chhuak ngai lo.

Nau kan lâk chhâwk laiin inchhungah a theih ang angin a chë a, a intuai hnûmin peih viau bawk. Zosanga chungchâng sawipui ka tum apiangin thiam tak hian thil dang a sawi hnan daih zel a, kan in chhungkhurah hrim hrim a hming lam rîk a duh lo.

Kâr hmasa khan a fate châwmna tur pawisa dah tura lo kal a tum a, u Duati bulah ka sawi dêk dêk a, "Ani hlawh tel lo khan kan awm ve thei, rawn inrawlh duh suh se," a ti hmiah.

"Chutiang ringawtin an ti ngai lo, tun hun chauh hi ngaihtuah tur a ni lo a, nakinah eng emaw harsatna tepawh i la tâwk ve thei a," ka tih chuan, "Pathian zarah eng êm kan ti bik lo ang," a ti ve tlat.

Sawipui vak ngaihna ka hre ta bik lo a, Zosanga ka khawngaih tho bawk, a kum a la tlem ve a, puitling nghal tura beisei chi pawh a ni lo, u Duati ṭhin hi a.

An room-ah nautê pahnih ka awmpui a, an fel ve reuh khawp mai. U Duati'n fa te an nei ve ta chu a nia, Zosanga nen Champhaia an awm dun lai te, quarter-a an awm lai te kha ka ngaihtuah kâi a, an inhmangaih ṭhin teh lul nen anni pahnih pawh sawi leh sawi leh sawi hnu Pathian an hre lo lutuka chuvangin an inkârah Setana'n hna a thawk ni berin a lang.

Diktei'n min lo call a, zanah lêng turin min rawn sawm a, ka kal tur thu ka hrilh a. Kan inhmuh loh kâra a lunglen thu a sawi ve nasa mai. Ani pawh keimah ang deuh tho, inngaihzawnna chungchânga han sawi kûr nguai ang kha thiam bik hek lo. U Duati te chungchângah kan lût leh nge nge zel.

U Valpuia'n natuk tlaiah Diktei nen chaw eiah min sâwm a, amah Diki pawh ka la hrilh chuang lo, Saitei'n 'u Valpui' tia a koh vang khan ka û ve ringawt a, u Duati hi chuan 'Valpui' tiin a ko leh pek.

Zanriah ei khamah Diktei te ina lêng turin ka kal ta a.

"Rafael, i ngaihawm leh dawn hle mai," a nu'n a ti ve ngei. Ka thil zirlai hi zir lo ila chuan inneih mai pawh ka hnial lo kha a nia; mahse, Pathianin rem ati rih lo a ni ang e.

'Chunglam pêk dik tak nghak chhuaktu tân chatuan daih thu tiam a awm si a'

Diktei room balcony ah kan ṭhu a, "Kum li tawp chu a rei ngar ngar e," a rawn ti chhuak phawng.

"Min nghâk huphurh deuh em ni?" Tia ka zawh chuan nui chung hian, "Chutiang lam pawh a ni lo, i hriat ve reng kha," a ti a.

"Ka ta tur dik tak ni-a i inhriat chuan rinawm takin min nghâk thei ngei ang," ka ti sup.

"Ka lo rinawm loh zeuh chuan eng tin nge min tih ang?" Zuk ti a!

"Lalrindik, fiamthu pawhin khatiang kha sawi tawh miah suh, kei aia thlan zawk i neih phawt chuan ṭha takin min hrilh la, ka kiansan ang che,"

"I tih ka ring rêng ah.."

"Ti ang chu, ka tih mai lohvin.." hetia a sawi thâwi ringawt pawh hian ngaih ṭhat lohna ka nei nghal ringawt.

"Ka ti mai mai a nih kha, nang pawh mi dang min neihsan vaih chuan ka ngawi miah lo ang, ka lo tibuai zêl ang che," tiin a nui ta a.

A ni hi chu kohhranah a inhmang a, zaipawlah a tel regular bawk a. Tin, a phâk tawkah a nun a uluk bawk.

Chutia kan titi a kan infiam bawrh bawrh lai chuan ka phone a rawn ri a, ka nu call a ni!

Thil pawimawh bík a awm a nih loh chuan ka lên laiin min rawn call ngai miah lo a, eng emaw thil dik lo a awm chiang.

"Bawiha, Zosanga a lo kal a, Bawihtei te unau hruai phei a tum a, kan buai riau," a rawn ti a.

Diktei thil awm dan hrilh hre ve nghalin hmanhmawh takin ka hâw ta chûk chûk a.

He mite pahnih hi chuan min va tibuai tak.

Zosanga reng reng pawh hi ât so chhên loh tur a nia, hna nei lai a ni a, a enkawl tluantling thei awm tawp si lova hetia tih kâwi tih kâwi hi ka ngaih dan a pêl ta riau.

'A nu hnute tui an ring chuang lo' tih mai mai.

Lungawi vak lo chung hian kan in chhungah ka lût ta a.

B+>[BeckirafARenthleI]<+®®

THE RAPSAGYAN FAMILY

Becky Rafa Renthlei(-BRR)

Chapter-44

[RAFAELA]

Kan in chhunga inhnial thâwm chu a zâwi hran lo khawp mai. Ka nu thinrim hmêl takin tukverh bulah a ding a, ka pa pawh Bawihpuii pawmin Sofa-ah a ṭhu a, a lawm lo tih a hriat reng mai.

"Zosangmawi, Duati i zah lo a nih pawhin keini a nu leh pa tal hi chu min zah ve ang che, i pian lai te i nu leh pa harsat mangan lai khan an tân kan awm reng ṭhin. Tunah i rawn puitlinga a harsa zawng leh a khirh zawng hlirin i khawsa mai. I nu leh pa rilru nat tam zia te saw i chhût pha miah nâng," tia ka nu meuh a lo ân chuan a thinrim hlê a nih ka ring.

"Mafel, duh tawk rawh, a nu leh pa ka'n phone ang e," tia ka pain phone a phawrh chuan, thil awmzia Zosanga ka zâwt a.

"Kum êm pawh an la tling lo a, eng ati nge lâk chu i duh tlat le? Ngun takin ngaihtuah la, hna nei i ni a, nitin i enkawl hman dawn hleinem," ka ti a.

"Rafael, i hre thiam lo a nih kha, a nu hnute tui ring se chuan lâk ka tum lo ang, enkawlna tur sum pêk ka tumin a duh bawk si lo a, ka fa te an ni a, enkawla ngaihsak ka duh mai a ni, ani pawhin a enkawl theih chuan eng vangin nge ka theih loh bîk ang," a ti ve tlat.

U Duati a ngawi reng a, a nau zawk pawmin kan ṭawng chu a ngaithla ve reng.

"I office kal hlânin tu nge lo awm ang a?" Tia ka zawh chuan, "Kan inah ka awm tawh lo a, nau awm tur ka la mai ang," zuk ti awlsam êt a.

"A nu kuta an awm ai chuan nau awm tu chu i ring zawk tihna em ni?" tiin ka zâwt leh a.

"Rin zawk thu-ah chuan ring lo e, mahse, ka enkawlna dawng pha lo a an awm ai chuan a la ṭha tho tho," a ti sup a.

Minute sawm hnu velah nu Muanpuii te nupa an rawn thleng ve ta a.

"Zirsang, Mafel, a zia lo ṭhin hle mai, eng mah kan lo hre ve lo a," Pa Faka'n thupha a châwi nghal a.

Zosanga an hau a, "Thil lian tham i tih dawn reng rengin i nu leh pa min hrilh ṭhin ta che, em em lutuka.." pa Faka'n a ti nghut.

Naupang kawl chungchang rei fê kan khel a, Zosanga'n, "Anmahni châwmna tur sum a dawn dawn loh chuan pakhat ve ve in kan kawl anga a nimai," a ti hmiah.

Chu chu u Duati'n a ngaingam si lo a, a fâ mi dang kuta dah ai chuan tiin thla tin Zosanga hlawh aṭanga Bawihpuii te enkawlna tur lâk chu a remti ve ta.

"Ka duh hunah ka hmuin ka riahpui thei bawk tur a ni, a rengin thei lo mah se ka fa te hmuh min dâl suh ang che," tia u Duati a hrilh chuan eng tin mah a chhâng lo.

Ama tawkah hmeichhe fing tak kha a ni ve a, Zosanga hi hnial vak vak ta se, a thin butut a chhuak leh anga pawisak nei miah lovin a che duh mai ang. Nu leh pa kalsana mahnia indang ve ngam ngat a ni bawk a, a sual ta viau e tihna lam ni lovin mipaah pawh pa tak, 'kei ka ni' inti chin kha a ni ve a.

Inremna fel fai tak kan neih hnuah Zosanga a chhuak zui daih a, "Rafael, pawi ka ti khawp, mahse, duh thlan tur ka nei lo atin ni," tiin min hrilh.

Ka khawngaih ve tho.

Ka unaupa ang chiaha ka en a ni a, leh lamah u Duati a lo ni ve bawk a, Zosanga thlirna pawh a dik tho, dem theih em em a ni bîk lo.

ZOSANGMAWIA

Duati nen kan inṭhenna pawh kum khat lâi a ni ve tawh a, kan inbe zui tawh lo tih theih a ni. Bawihpuii a chumin a hmelṭha hle a, a nau zawk erawh Saitei chiah chiah, a chêrin a ngo veng a, an hmelah hriat hran har khawpin an in ang. An hmelṭha tih hian a khaikhâwm ber.

Ramhluna ka in sak pawh peih fel vek a ni tawh, kâr hmasa khan ka insawn lût a, Duati nen kan awmna atana ka sak hmanhmawh kha a ni ve a, mahni chauh chuan a zau mah mah a ni. Ka fate room tur pawh ka siam tel tîr vek a, kan inṭhen tâk si-ah khan ka muangchâng ta zawk a. Chuti ni lo phei se chuan ka peih daih tawh ang.

Ka hlawh hmun thuma ṭhena hmun khat ka fate mamawh lei nan ka thawn ziah bawk.

Saitei te inah ka lêng zeuh zeuh ṭhin a, Valpuia nen kan inkawmngeih vang a ni pakhat. Nitin zantin Duati te nufa ka ngâi a ni ber mai. Mahse, tum mumal tak ka nei miau a, ka la ngawi rih.

"U Zosang, i ngaih viau te chuan ko nawn leh la," Saitei'n a ti nghe nghe. Ka lên tirh chuan min be ngai lo a; mahse, ka kal ve fo tâk avangin min be lo thei ta bik lo. A hmel ka hmuh hian ka fa te pahnih ka hre chhuak ziaha ka ngai ṭhin khawp mai.

Nau a pâi puar ve âl tawh a, fiam zuk zuk ka chîn avangin a zak thei hle. Valpuia pawhin annu a duat thiam a, a ngaihsak vut vut viau. An awm dan vel ka hmuh hian Duati ka tih hrehawmzia ka hre chhuak uar uar a, ka inthiam lohna a nasa ṭhin khawp mai.

An in lama an lên apiangin Saitei'n a û leh ka fa te chanchin min hrilh ziah a, Duati paw'n ai kal a la chhawr a, thla thum hnuah a hna zawm turin Champhaiah a chho dawn tih ka hria, naupang pawh hruai a tum niawm tak a ni.

Ka rin phâk bâkin a fa te a ngaihsak a, a tual lîm lo mai ni lovin a chhuak ngai lo hrim hrim tih theih a ni. Rafaela a rawn hâw khat viau a, Diktei nen an la inkawp tluang ve zel bawk.

Kan in lam ka tlawh zeuh zeuh a, Rinsangpui'n nau ala pai ta lo. Delhi-ah incheck up- in an kal a, eng teh ual an ni lo nge hmasawnna em em an nei lova ka khawngaih nupa ve khawp mai. Duati nen khân la innei ila chuan Bawihpuii an enkawl mai tur a ni a, a duat teh rêng nen.

Ka nu leh pa'n in thar lawm an beiseia hnial ka hreh avangin naktuk tlaiah chaw ei khawm an rawt a, Saitei te nupa ka sâwm a, pa Zirsanga te chhungkua pawh hmaih theih ni bik hek suh, keima'n sawm lo mah ila ka nu leh pa'n an sawm dawn tho tih ka hria, an chhungkuain ka sawm tîr ta a, Duati a lo kal duh ka ring chiah lo.

"Bawiha, i pa Zira te nupa bungraw lain an kal daih sia, zanah chauh an lo haw dawn a, Duati te nufa i va hruai mai dawn em ni ang, i nau workshop ah a buai rih em mai," ka nu'n min rawn biak chuan a ngaihna ka hre lo. Duati te khaw'nge an kal dawn? Eng nge hruai an ngaihna chhan tur pawh ka hriat si loh.

"Khawiah maw ka hruai dawn?" Tiin ka zawt a.

"Lungleiah nautê a zinpuia dâr khat vel hian an lo thlen ka ring, Taxi chân chawp tir an khawngaih thlâk an bâwr dawn em mai, naupang pahnih nen anni si a," a ti leh a.

Lungleiah an kal tih pawh ka lo hre miah lova Bawihpuii te unau kum khat leh thla nga anni ve tawh a, a va zinpui peih mai mai tak. Ti ila, a lo awm reng tawhna kha a nia, a nî te'n an chah phei a nih ka ring ve ringawt.

"Ka lo ngaihven dawn nia," ka ti ta a.

"Duati kha naktuk tlai chaw ei khawm kha hrilh ve rawh aw," a ti leh a, hrilh em em pawh ka tum hran lo, an chhungkuain kan sawm tawh a, naupang erawh rawn kal ngei tura hrilh ka tum thung. A pi te'n an rawn hruai thei tho dawn a.

Millenium kawt ka thlenin Sumo thleng a la awm lo a, Car dahna mai tur a awm lo bawk nen dahna tur zawngin ka tlân tlang ta rih a, dâr khat a pêl hret.

A rêng rêngah Sumo-a kal ava han peih zawk, naupang pahnih buaipui a hautak dawn teh lul nen. Ke-in Mc kawtah ka lo nghâk ta a, Lunglei Sumo a rawn thleng ṭan a, eng berah nge an chuan tih ka lo zawt si lova Duati ka call ta a, vawi hnih a ring zo ṭep tihah min chhâng hrâm.

"Khawi lai nge in lo thlen tawh, i pain a lo hmuak hman dawn lo che a, Mc kawtah ka awm," ka ti a.

"Treasury square kan lo thleng a, traffic jam-ah kan tãng rih," a ti ṭha ve mai.

"Eng sumo ah nge in lo chuan?" Tia ka zawh chuan, "Mapuia Sumo" tih chauh hian min chhâng a, "Taxi pawhin kan haw thei reng a nia," ka rin ang chiahin a rawn ti ta a.

"Ka nghâk che u," tiin phone ka dah ta rih a.

Rei vak lovah an lo thleng ta a, an bâwr ngei mai. Motor aṭanga an lo chhuk chuan Bawihpuii a pawm a, mi pakhat ka la hmuh ngai miah loh hian Bawihtei a pawm thung a, an rawn chuanpui satliah nge tu nge pawh ka hre lo.

An bag vel khaisakin ka Car hunna lamah ka kal a, "Zosang, Taxi a awm reng tho a nia," a la ti ṭâlh.

"Rawn kal mai mai rawh u," ka ti hmuk, he lai hmunah inhnial ka peih lo. Chu pa ka fanu pawm tu chu kei ai chuan a upa zawk ngei ang. "Zosanga maw i nih?" Tiin min zawt a, "Aw, ni e, eng nge ni ta?" Car hawngin an thil vel ka dah luh saka eng tin mah min chhâng zui lem lo.

"Zosang, hei hi Nunpuia a ni a, Nunpui, Bawihtei te pa Zosanga a nih hi," Car-a kan luh hnuah Duati'n min inhmel hriat tír ve chauh a.

"I fel hle mai, Bawihpuii te nufa i rawn buaipui a, eng ti turin nge i lokal?" Ka ti ve luam.

"An buaipui awm loh lutuk, an fel a nia, tiraw Bawihpui?" Tiin ka fanu chu a pawm ṭha a, a hnung seat-ah an vaiin an ṭhu.

"Ka hna thilah a nia, Duati te ruala kal a remchang em a, ka Car ka hralh e ka tia, hei a thar beisei pahin ka rawn tei phei a nih hi," a ti leh a, a ṭawng a dam ruih a, a fel hmel viau. Kum 36 bâwr vel a nih duh hmel.

Duati te inah a thleng dawn tihna em mawni le? A chhuk duhna hmun a sawi mang si lo a, ka tân lo zawh kha a nuam chiah si nen ka phur ve ta zel a.

Duati te in kan thleng ta a, Nunpuia paw'n a bag vel te la chhuakin Bawihtei a pawm bawk a, chhungkua tepawh an ang zâwk mah. Ka chhungrilah thîkna a rawn awm nghal a, a tu a pawh ni rawh se, Duati hian a be ṭha êm a, ka ngaih a ṭha lo ve ringawt.

Nunpuia an inah a thleng dawn tih ka hriat leh lek phei chuan ka thin a lo rim hlur a, kan inṭhen aṭang khan mipa a ngaihsak awm ka hre miah lo. Saitei khan a sawi ṭhin a, "Chuti maiin ngaihzawng a nei awm lo êm mai, a lerh lo, a harh a, lerh ang hian a lang mai mai alawm," a ti kha a nia. Mahse, tûma hmuh phak lohah biak ṭhat bik riau a lo nei a ni mai thei.

Aizawlah hi chuan ngaihzawng a neih sawi tur ka hre lo a, an sawi ve ber pawh Forest-a thawk Lunglei ami bâk kha hriat ka nei lo, a hming pawh ka hre mai mai lo e a.

In chhungah kan in dah lut fel a, kâr tawp apiang hian ka fate ka hmu ziah ṭhin. Keimah kal lovin ka nu leh Spi'n an va la mai zel a, a chângin nu Mafelin ka nu te inah a lenpui ṭhin bawk.

Duh loh an nei lem lo a, kei pawh hian ka duh hun hunah ka pawm thei. An fel ve reuh khawp mai.

"Naktuk tlaiah in thar lawm nan chaw ei khawm kan siam dawn a, naupang rawn kalpui la," Tia Duati ka hrilh chuan a ner sak.

"Ka hman lo mai thei, nautê erawh lo dah kan tum dawn nia, Nunpuia hi Car en pui ka tum deuh a," a ti a, ka rin dan a dik, 'Aw le' tia min chhân ka ring lo rêngah.

Office-a lêt leh ka ngai bawk nen ka fanu te pawh pawm rei lovin ka chhuak ta a.

Nunpuia kha chu Duati duh chi niin ka hre lo ve ringawt. Mahse, a lo duh phian mai thei bawk a, kan inṭhen tirh khan whatsapp aṭangin ka be ṭhin a, "Pasal ka nei leh a nih chuan kei aia naupang neih ka tum tawh lo," a ti tak a lawm le.

Ka hmangaihna a la reh lo a, ka duhna lah a kiam hek lo. Chuti a nih rualin va rîm emaw ngaihsaka biak sek kha tum lawi si lo.

A chhan chu ho tê maw le, a hun lai khan a rilru ka tina êm a, rilru dam zânin awm se, amah lo hmeichhe dang ngaihven ka nei lo tih te, puitlin lam ka pan zel tih hi a hriat ka duh a, atana innghahna tlâk mipa dik tak a rin ngam ka nih theih nan ṭan ka la sauh sauh thung si. Tih sual nawn ka tum tawh lo.

Chaw ei khawm ni ah, Saitei te nupa an lo kal hmaa thla thum hnuah nautê an nei ve tawh dawn a ni.

Saitei vanneih zia te ka lo chhût mai mai a, a kum ala nau bawk a, fa pahnih khat a neih hnuah pawh ala nula dawn chauh a ni a. A tituai a nalhin a vun a nalh si a, Valpuia tân pawh duh hliah hliah a awm tho.

Hmeichhiain pasal anneih hian an vanneih leh vanneih loh chu an pasala chhungte lam ni lovin an pasal te'n an zir em em a ngai tih ka hriat chhuah phah. Duati pawh kha ka chhungte chuan duat salohvin an duat a, keima'n ka zir ngang loh avangin min ṭhen tho.

"Niminah u Duati te i hruai em ni?" Saitei'n min zawt a.

"Aw, i nu leh pa an hman si lo a, ka va hruai alawm, a lo hrilh che em ni?" Ka ti a.

"Hrilh hran lo e, u Nunpuia zawkin min hrilh," a ti ta a.

Teh daih chuan! Saitei leh Nunpuia an inhresa tihna maw?

"Nunpuia kha i hria em ni?" Tia ka zawh chuan, "Hria e, hre mah mah, Lunglei DFO (Divisional forest officer) a lawm, ka pi te ina kan zin lai pawh khan a lo lêng ziah," a'n ti mai chu, ka sa nghal zak. Eng tin nge ka lo hriat loh theih?

Kan inneih laia ka lo râlkhat thîk ve ṭhin kha Lalnunpuia lek lo niin! Ka car ah te ka la phur leh ta nghal a, amah hmu tur khan an va zin a ni ngei ang.

A hmaa ka rilru let but ṭhin ang kha la nei ila chuan Hmangaihzuali ka va ânkhum ngei ang. Mahse, khatiang thin butut neih kha thil ṭha ber a ni loh avangin zâwi zâwiin ka bânsan chho hret hret.

"I u bialpa hlui kha.." tiin ka nui lui ngial a.

"U Duati'n a duh hleinem, a hma pawhin a ngaizawng nasa thei lutuk. Nang mah a duh zawk che a, zah pawh dâwn lovin tikhan a awm a nia, i mâwl teh tuh êm a nih kha," tiin a nui ṭhâ.

Valpuia ve thung chuan, "Pasal dang a neih leh infa pakhat ve ve-in in insem ang a, nupui dang tur i melh ve mai dawn alawm, lungngai lo la.." a lo ti a.

"Nia, ngaihzawng tepawh nei ve rawh, hetia awm ai chuan i khawhar a zia deuh mai thei asin," Lalsai'n a ti bawk.

Duati hian a rilru a sawh sawn an ring vak tawh lovin ka hria.

Kimi pawh ka nu te hnenah a la awm ve reng a, a hmaa a sual teh reng nen tun hnu hian a fel ta riau. Ka inah rawn pheiin ka thawmhnaw min sûksak fo a, ka nau te nupa pawh ati buai ngai tawh lo. Spi rilru lo ṭhatzia ka hriat chian phah, khati khawp khan amah vangin an buaia Lunglei thleng thlengin a haw phah ve a nia.

Ti hian eng mah hmuh mawh pawh nei chuang lovin a tuar ṭâng ṭâng a, Kimi pawhin a zah thiam ta riau, bâkah Thanpuia nen khan an inkawp ve deuh tak tak a, "I hlawh khâwl la, a zat ve kan tumsak che anga Scooty lei ve ta che," Spi'n a lo ti a ni awm e, a lawm khawp mai. Ka nu te pawhin an khawngaih a, Saitei Scooty kha an lei chhawn sak ta a. A la thar viau.

Khalh thiam hek lo. Zirtirtu tur dang vak an awm si lo a, Thanpuia leh Spi'n an zirtir ta a, tunah te chuan bazar kal tur pawhin amahin a tlân chhuak ve ziah tawh.

Lawmsanga'n a nupui car khalh a zirtir ve bawk a, kei tih loh chu an hlim viau.

Zanriah ei hmain nu Mafeli te nupa an rawn thleng ve ta a, ka fa te an rawn hruai miah lo!

An lo luh veleh ka lo zâwt nghal a, "Nakinah an lokal ang, Duati a la inpeih lo a.." a ti a.

Duati a lo kal dawn tih ka hriat chuan ka phûr ru kher mai. A lokal ka ring lo deuh kha a ni a; mahse, ani zawng a fin bâkah nu leh pa thu awih a zir chho tawh a, kal turin an nawr deuh pawh a ni ve mahna.

An nufaa lo kal tur ni ta se engin nge an lokal ang? Bike-ah a phur awm chai si lo a, kha pa Lalnunpuia nen khan lo kal an tum a nih ka ring ta a. Ka thil ngaihtuah avang chuan ka hnual nghal ruih.

Hunserh ka pa'n a hman laiin ka in kawtah car a rawn ding a, Duati te nufa leh Nunpuia an rawn chhuak ta a, ka fanu a pawm ka hmuh ringawt pawhin ka tâwt up up thei nia!

Ka pa'n, "Lo kal rawh u Duati, kan ṭan deuh chiah," a thu sawi kâr lakah a ti a. Nunpuia erawh a ṭhu khaw muang ve ta lo, Bawihpuii min rawn pawm tir a, a chhuak leh daih!

"Zosanga leh Duati pawh ngun takin thil thlîr ula, hei kum khat aia rei in inṭhen tawh a, kârah fâ a awm tawh hi chuan tlâwm zâwk in awm te hi a ngai a nia, Bawihpuii te unau hian nuhrawn emaw pahrawn an hrawn kan phal lo a, in pahnih ve ve pawhin ngaihtuahna sêng zau ang che u." Tiin Duati nen min en a.

"Bawiha ngat phei chu i nu takin a boralsan tawh che a, i vannei hlauh a, nuhrawn, thisen hrang enkawl lovin tihian i nu û in a pawm tlei che a nia, Muanpuii i nu tak tak a ni lo tih i hriat chhuah laia i rilru nat dan te kha chhui kir la, kha i rilru natna kha Duati'n a ṭâwmpui che avangin nu leh pa in chhuahsan khawpin in awm kha, khatiang din hmunah khan in fate pahnih hi awm ve se in duh ang em, in rilru a na dawn lo em ni?" A ti ta a.

Duati ka va ena min lo en ve chiah bawk.

"Tin, mi dang nei ve ve ta ula in rilru a dam ang em, kan chhungkaw hnih hi kan la inzawm zel dawn a, kan thih hnu lam thil chu kan sawi thei lo; mahse, kan dam chhung hi chuan tuna kan awm ang hian kan awm chhunzawm zel dawn, nangni pahnih erawh in inkiltawih telh telh ang a, nu leh pa hlata awm in châk ang, fa û ber ve ve innih angin rilru siam ang che u," a sawi zawh hnuah chaw kan ei khawm chhan sawi fiahin a ṭawngṭai ta a.

Ka pa sawi zawng zawng kha dik lo pakhat mah a awm lo. Mahse, eng tin nge bul ka ṭan leh tâk ang, ka nunah hmeichhia seng luh pakhat mah ka nei lo a, tun din hmunah chuan kei aiin Duati a che rang deuh a nih hmel.

Thla thum hnuah a hna zawmin an chho tawh dawn a, tuna khaw hmuna kan awm ang hian a chanchin min hrilh hre tu tur ka nei dawn lo tih ka hria; ka fa te pawh ka hmuh phâkah an awm thei dawn lo a, amah Duati a hmelṭhain a vengva si a, dik tak chuan chân hlen tak tak dawna inhriatna ka nei tawh.

Ṭan ka lâk vat loh chuan kha Lalnunpuia, amah rawn hêl ve chhêntu hnenah min kal san hlen lovang tih tu nge sawi thei.

Zanriah tui tak kan ei a.

"Zosang, Bawihpuii hi chaw lo hrâi ve teh, i kham tawh kha," Duati'n Bawihpuii a pua a, an chaw tur plate-ah siamsa in a lo keng bawk a, ka malchungah a rawn dah ta a. A vawi khat nân ka fate chaw ka hrâi ve dawn ta. Ka nui ru suk suk mai.

Mi hmuh lai leh chhungte hriatah thinrim leh lungawi lo hmêl a pu ngai lo. Kha tia a haw phei dawna ka laka a lungawi loh viau pawh khan kan in chhungah eng mah a lungawi lohna hriat theih turin a mizia a dang lam eih lo. Hmangaihzuali hi chu a dang lam ve thlâwt.

Rafaela lo sawi fo ṭhin kha a dik dawnin a lang.

"U Duati hi chuan ka nu zia a la deuh a, tlâwm a hreh ngar ngar teh a nia, a diknaah ngat phei chuan," a tih kha ka hre chhuak.

Khati khawp khan ka tlâwmin ngaihdam ka dîl a nia, min chhâng duh lo mai ni lovin ka biak loh chuan min be hmasa ngai lo. Thi dawn pawh ni se a dikna anih chuan a ṭang kawh tlat duh ang. Duatmisuali hi!

Mi hrang teh vak an awm lo bawk a, Duati chu ka ko hrang ta a, kan nupa room tura ka buatsaih; mahse, ka luah tâk loh kha kawh hmuh ka tum a, naupang room tur te pawh enpui vek ka duh.

"Duati, lo kal lawk teh," ka ti a. Thuawih deuh hian a lo kal ve mai.

"Room ka fanpui ang che, mi dangho chuan an en vek tawh a," tiin a bânah ka vuan a, a sawisel lo ve teh tlat!

Naupang room tur atana ka buatsaih lamah ka hruai hmasa a, ka hrilh fiah pah bawk a.

"Hei hi kan inṭhen hma daiha kan lo duan lâwk tawh kan room tur kha a ni a, i tel lo chuan luah ka tum lo, tunah pawh room hran, mikhual hman atana kan siamah hlir ka riak." Ka tih chuan mak a tih hmel viau.

"Zosang, tunah chuan kan inṭhen fel tawh a, khatiang teh hrepa pasal neih kha châkna pakhat mah ka nei tawh lo," tih paha inlâk hran a tum chuan a aia nghetin ka vuan a.

"Ka pa thusawi te kha i hre lo em ni, kan fa te vang chauh pawh hian lo kîr leh rawh, chhungkuain an tuara naupangin an tuar bawk a, ka tih sual siam ṭha leh tur hian hun min pe rawh," min en turin ka lamah ka kuai her deuh a, "I mak, Zosang.." a vîn ngang mai.

"Mak lam a ni lo, a upa zawk leh ngaihtuah thui tur zawk i ni a, Champhaiah i chhoh dawn phei chuan engkim sawi fel ka duh, nge, ngaihzawng dang min neihsan tawh zawk em ni? Ka rilru-ah Nunpuia kha a awm reng avangin ka zawt ve ngat a.

"I chhia, i chhe siah.." tiin ka vawnna thin thlâk tum hian a tâl phat phat a, ka Duatbîki mizia leh ṭawngkam dik tak a chhâk chhuak leh ta.

Chutah a inrin hman hma chuan kuah betin ka âwmah ka kuah bei ta a, a rim fai sar leh a rim tui hman rim pawh a la ngai reng, a taksa nghenga ka awm phei chuan ka ngai ngawih ngawih.

"Duati..." ti supin, a khabeah ka dawm a, a mit meng buai naka awih lohna te rinhlelhna rawn lang dawt zut chu ka chhiar thiam ve.

Kun hniamin a hmuiah ka fawp ta a, a beisei loh dana ka chêt vang nge, che miah lo hian ding khawng reng, uar taka ka fawh zui tâkah chuan, ka âwmah min nem a, inlâk hran tumin a tâl zui ta a. Ka thlah phal lo.

"Zo..Zosang.." a ti thâm ṭiak a.

"Yes, keimah i Zosanga ngei ka ni.." nui suk chunga ka ṭawng chuan, "I chhe keh.." tiin a nui ve ta a.

A taksain min hnar rih mah se a thinlungah min duhna leh thlâkhlelhna ala awm tih ka hria, ka phûr ru ngei mai.

Nu leh pa kalsana ka luhkhung ve ngat Duatbiki hi neih leh ngei ka tum ruh tlat, keimah Zosangmawia hian.

Duati te nufa haw tur chu ka ui ru ngawih ngawih a, Bawihpuii phei chuan min ngên deuh em maw ni? Nge, ka in ngen tir ṭalh nang a. Hus! Ka thil ngaihtuah avang chuan ka nui hawk a, ka nu'n min lo en leh ta nghal a, ka rilru a hria a ni ngei ang, 'Duati te mangṭha rawh' hmui phunin a rawn ti a. Zei thei siah.

Ka nu thu sawi zawmin an Car awmna thleng ka va thlah ta a, Nunpuia'n a rawn hruai tawh lo ringawt pawh hi Pathian hnenah lawm thu awm rawh se. Kha pa inla officer ve viau kha ka ngaisaâng chhete eih lo. An inah te a la thleng zui a, ka ngei a nia.

Bawihpui'n min ngên ta tak tak a, rilru a ti nuam lo ve viau mai. Kan inṭhen tirh te kha chuan eng mah an la hre thiam lo a, tunah chuan ni tawh bîk hek lo, Duati hnenah, "Naktuk zanah ka lo lêng ang," ka ti ta a.

Duati'n min chhâng lova pa Zirsanga zawkin, "Lo kal tak teh, Rafaela thil tur en tîr che ka duh," a ti ta a. Nuam mai mai ve.

Ka pa thu sawi khan a hneh deuh a ni ang, nu Mafeli pawhin ṭawngkam ṭhain min be ve ta bawk a, hmâ ka sâwnah ka ngai.

Saitei te nupa erawh chu lêng rih tura ka sâwm avangin in chhungah an la awm a, mi dang zawng an haw ta.

Ka Duatbîki nei lêt leh tur hian thiam thil eng nge la hman loh ka neih? Ani kumkhuaa ṭhen hlen ai chuan theih tâwp ka chhuah mai tur a ni.

B+>[BeckirafARenthleI]<+®®

Ka story type hi ka uluk ve viau a, tihsual palh a lo awm leh zauh ṭhin a, in hmuh veleh rang lutuk tak mai khan min lo hrilh theih chuan ka lawm ngawt ang. Chhiar har deuh te a lo awm palh ang e.

THE RAPSAGYAN FAMILY

Becky Rafa Renthlei (-BRR)

Chapter-45

[Zosangmawia]

Duati te nufa haw tur chu ka ui ru ngawih ngawih a, Bawihpuii phei chuan min ngên deuh em maw ni? Nge, ka in ngen tir ṭalh nang a. Hus! Ka thil ngaihtuah avang chuan ka nui hawk a, ka nu'n min lo en leh ta nghal a, ka rilru a hria a ni ngei ang, 'Duati te mangṭha rawh' hmui phunin a rawn ti a. Zei thei siah.

Ka nu thu sawi zawmin an Car awmna thleng ka va thlah ta a, Nunpuia'n a rawn hruai tawh lo ringawt pawh hi Pathian hnenah lawm thu awm rawh se. Kha pa inla officer ve viau kha ka ngaisaâng chhete eih lo. An inah te a la thleng zui a, ka ngei a nia.

Bawihpui'n min ngên ta tak tak a, rilru a ti nuam lo ve viau mai. Kan inṭhen tirh te kha chuan eng mah an la hre thiam lo a, tunah chuan ni tawh bîk hek lo, Duati hnenah, "Naktuk zanah ka lo lêng ang," ka ti ta a.

Duati'n min chhâng lova pa Zirsanga zawkin, "Lo kal tak teh, Rafaela thil tur en tîr che ka duh," a ti ta a. Nuam mai mai ve.

Ka pa thu sawi khan a hneh deuh a ni ang, nu Mafeli pawhin ṭawngkam ṭhain min be ve ta bawk a, hmâ ka sâwnah ka ngai.

Saitei te nupa erawh chu lêng rih tura ka sâwm avangin in chhungah an la awm a, mi dang zawng an haw ta.

Ka Duatbîki nei lêt leh tur hian thiam thil eng nge la hman loh ka neih? Ani kumkhuaa ṭhen hlen ai chuan theih tâwp ka chhuah mai tur a ni.

Saitei'n min fiam zuk zuk a, "U Zosang, zanin i style kha.." a nui var var a.

"Lalsai, ngawi mai mai rawh," tiin ka nui ruh ruh, Duati hi kei aia a upat zawk avang hian ka zah deuh ṭût zel a, amah chuan a inhre miah lo thung! Saitei hian a hmu thiam a ni mai thei min fiam nân tak a hmang ṭhin a.

Zaninah khân Nunpuia chungchâng sawi chhuahna hun ka nei ta lo a, an inngaihzawn êm chu ka ring phal lo; mahse, a rawn thlen chilh ngam ve ngat danah eng emaw chu a awm deuh a ni lo maw? Ka ngaihtuah thui phei chuan thîkna rilru hlîr ka pu a, naktuk zana ka lên hunah ka sawi chhuak tho ang.

Valpuia te nupa an haw ve ta a, ka in chu zâu ka ti thar ta riau.

Duatbîki rimtui hman rim te kha ka hnarah a la châm hialin ka hria, ngaihzawng pakhata lungawi ngai lo ka ni ṭhin a, Duati nen khatia kan awm tirh pawh khan ka nunah Ruati a awm reng ṭhin a nih kha. Mahse, Ruati kalsan hlauhin Duati lakah ka insawrbing ta a, hetiang em em hian ka duhin ka hmangaih thei ang tih ka ring pha lo.

Ruati thihna chungchânga police lamin an chhuina pawhin hmâ a sâwn zel a, finfiahna mumal hmuh tur awm chhun chu a lehkha min hnutchhiah chauh kha a nih vangin tlêm chuan a buaithlâk ve deuh.

Ramthansangi leh Famkima te fapa pawh a bawrhsâwmin enkawl deuh reng a ngai a, an nupa intihbuai an chîng bawk nen tun lai hian a nu leh pa inah a haw rih niawm tak a ni. Rafaela thlauhthlaa a pan tâk Famkima hnenah nawmsakna aiin lungngaihna leh ṭahna a tawng zing zâwk. Kan chhui leh zelnaah phei chuan zû te pawh inrûk a chîng chho zeuh zeuh a nih hmel.

Rinsangpui'n whatsapp aṭangin min rawn be ve mial a, zan dâr 12 a pêl tawh.

"Duati hi a bul aṭangin rîm ṭha leh mai la, eng mah zaha lâk loh tur, ṭan i lâk loh chuan i chân hlen tak tak mai ang," a rawn ti a, eng vanga hetia rawn ti ve ringawt nge a nih hre mah suh ila, thil hriat rûk eng emaw a nei a nih ringin ka zâwt chiang ta a.

"Eng lo a nia, Nunpuia khan nupuia neih a duh a, naupang pawh buaipuia fâ anga enkawl a hreh lo niawm tak a ni. Lawmsanga ṭhianpa Ramropuia hnenah a lo sawi a," a ti ta a.

"Duati'n a duh ve em ni?" Tia ka zawh chuan, "Ka hre bik lo, mahse, hmeichhia te hi chu min ngaihsaka min duat hliau hliau hi chuan kan duh ve mai zel, Nunpuia saw ka hriat sa a nia a, Duati hi a duh êm alawm," a ti leh a.

Eng eng emaw a rawn sawi nual a, naupang pawh tùn aia nasaa ngaihven turin min hrilh bawk, ka pawm zawng tak a ni.

Kan inbiak zawh hnuah muthilh tumin ka maimitchhing ve ta a. Kan inṭhenna kum khat tling tawh mah se ka nunah thil danglam em em a thleng hran lo a, ka hnaah rim taka thawkin tun hma ang khan hmeichhia ngaihsakna ka nei ta miah lo.

Ka thinlung hian Duati lo chu a pawm thei ngang lo.

[Lawmsangzela]

Spi nen kan inkâr pawh a zia chho ve zel a, a rûk tak chuan ka zah ngawih ngawih.

Eng tikah mah fa ka pe thei dawn lo tih ka inhriatna hian ka rilru a ti hrehawm a, ka kianga tui taka a muhil te hi ka thlir leh vawng vawng zel.

Hmanni deuha kan buai chiam pawh khan ka rilru kal sual thut kha ka thunun thei lo a chhâ chu a ni e.

Kimi nen hian Lawngtlaia kan awm lai khan rei vak lo kan inkawp ve a, College khatah kan kal dun ṭhin, khang hun lai khan serious taka ngaihzawng neih ka la ching lêm lo va. Chutiang chiah chuan Kimi pawh ka ngai thu tak vak lo; Aizawla ka phei tâk thut avangin inṭhenna mumal sawi lo khan ka be lo tawp a, tun hnu-a kan ina a awm hnu hian kan inhmu leh ta chauh a.

Kha tia Spi'n a thîk em em lai pawh khan rilru na lo ka ni bîk lova, mahse, fa ka pe thei dawn lo tih ka hriat khan ruahmanna ka siam ta ringawt a, Lungleia a phei te kha ka lawm. Mahse, ka nu leh pa hmai ka zah si a, ka va hruai leh ta ringawt a ni a.

Kimi pawh ka ruahmanna ka hrilh lâwk vek a, atîr chuan min pui duh lo. Mahse, ka ngen tâk tlut tlutah khan min hnial hreh ta a, kan pahnihin ruahmanna kan siam dun ta a.

Spi hian min lo hmangaih êm a ni.

Kan thil tumah kan hlawhchhama Spi'n min hmangaihzia ka hriat fiah phah zâwk. Khata ṭang khan rilru pangngai puin kan nupa inkâr pawh a zia chho leh ta a, amah ka hmangaih êm avanga ti ka ni tih a hriat hunah min huat ka ring bîk lo.

Tunah chuan nunphung pangngai zawhin a hlimna tur leh hlim taka kan awm theihna kawng ka zawng char char tawh.

Kimi pawhin ngaihzawng a nei tawh a, ka theihna chin chinah puih ka hnial lo bawk. Spi nen khatiang boruak kan neih avang khan amah pawh huat rawn a ni a, ani zawng mi luhlul tih takah a palzam leh mai mai tawh, kei aia upa zawk a ni a, engkim a man thiamin a hrethiam hma bawk.

Delhi-ah incheck up-a kan kal pawh khan beiseina chhe tê chu kan nei ve a, "Ls, ka nu leh pa te hrilh rih lo ang aw, kan beisei anga a lo thlen loh hian a hrehawm duh a, damdawi te ei zo phawt ila chuta hma kan sawn dan azirin kan sawi zawk dawn nia," atih vangin eng mah kan sawi lang ta lo.

Ka û te nupa inṭhen erawh kan nâ a, Bawihpuii te unau kan ngai hlê. A bîkin Bawihpuii kha leh chen kan lo buaipui ve a, a han awm ta lo thut kha Spi a awm thei lo titih.

"Duati hi dil ila kan bulah a awm tîr phal ang em le?" Tiin min zawt a, a phal ka rin loh thu leh an la inneih leh ngei ka rin thu ka hrilh a, "Fa chu nei ve ila ka va'n duat dawn tak," a ti leh ringawt.

Hnem dan vak ka thiam lo a, a hmaa ka rilru a hrehawm ang erawh kha chuan a hrehawm ta lo. Eng emaw beiseina ka nei tlat nia.

Zing tin car khalh ka zir tîr ziah a, ani'n Kimi Scooty khalh a zir tir ve lehchhawng a, u Zosanga tih lohah chuan kan hlim chho ve phian. Ani erawhin min rawn tlawh khât a, ṭûl tawpah lo chuan a lo kal ta lo khawp mai.

Duati leh Nunpuia erawhin ka ngaihtuahna anti thui ve deuh a, ka û nei tawh lova Nunpuia hi a nei a nih chuan Duati laka ka rilru hi a dang tawh khawp ang. Mi hian eng eng emaw min hrilh nuala ka ngaih a ṭha lutuk lo.

Naktuk hian workshop ah chaw eikhâwm kan buatsaih dawn a, Spi pawh kal ve tura ka hrilh chuan a phur hle.

Kan mechanic 5 leh helper 9, motor parts dawr nghâktu leh bungraw sem chhuaktu te, training lai kan neih zawng zawng te nen mi 37 kan ni dawn a, ka û leh Duati a hran ve vein ka sâwm a, ka û hnenah Duati ka sâwm tih ka sawi lo a, Spi'n a lo phone diam tawh.

An pahniha an inneih leh theih hi kan duh a, kan nupain eng eng emaw ruahmanna kan nei ve nual.

Ka nu leh pa Lawngtlaiah an phei leh tawh a, in sa lai kan nih vângin helamah an awm khât khawp mai, workshop pawh ka kutah an dah tawp tawh. A châng chângin ka pa'n min enpui zeuh zeuh.

"Mate, innu hi thlathum vel training ve se kan motor parts dawr te chu a nghâk ve thei mai lo ang maw," tia ka pa'n min zawh chuan Spi ka hrilh a, ka nutei, u Zosanga nu pawhin a thiam vek tih te ka hrilh a, a phur nasa mai.

"An phal phawt te chuan ka hreh reng reng lo," a lo ti ve mai.

Thla thar aṭanga ṭan turin kan ti ve ta a. Ina eng mah thawk lo a awm kha a ning ngawih ngawih êm a, kei pawhin ka khawngaih ve ta deuh a ni.

Zanriah kan ei laiin ka û a rawn lut hlawl a, workshop aṭanga ka haw har deuh avangin kan ei har hrim hrim ve bawk a, "Mate, Ramropuia chuan eng tin chiah maw a lo sawi, Nunpuia chungchâng chu?" Tia min zawh chuan kan nupaa kan ruahmanna kha Spi'n a hrilh tawh tih ka hre mai.

"Nunpuia hian Duati neih tumin a hêl char char alawm, Lunglei lama a nî te pawh a be ṭha a nia, a ti a" tiin ka chhâng a. A ner suk.

"Amah hneh tum lo a chhungtea ṭuan te chu a, ka va lêng ang e," tiin ṭhut pawh ṭhu khawmuang lo hian a chhuak leh ta a, ava ho mai mai tak. Khatiang min zâwt tur ringawt khan a rawn pêng ania, Spi nen kan inmelh a kan nuih a za hle.

Ramropuia tih hming pu ṭhian pawh kan nei reng reng lo. Ka û a chêt hmanhmawh theih nân kan sawi ve mai mai a nih kha, ka ngaihtuah chianga ka nuih a za tulh tulh.

Hmangaihna dikah chuan inremna a awm si a.

[DUATI]

Zân dar sarih a ri tawh a, Saitei awm loh hnu hian zan lamah ka buai thei viau. Ka nu'n Bawihpuii riahpui a tum ve ngial a, a hlawhchham ṭhak! Nau han chhawnchhaih vel hi kei âi pawhin a zei lo zawk.

Kan nula Asiami nen kan in awm chhâwk a ni ber. Ka nu te chuan puak tawrh leh puak tawp tih loh chu a thiam bik hek lo. Ka pa kan pun lrh nge nge a.

Kan chaw eina vel kan seng fel chhungin Nunpuia'n Bawihtei a lo pawm a, ani pawh Car thar a lâk tawh avangin naktuk zing hian haw phei a tum a, Zosanga nen kan inkawp hma khan kan in 'chu e kha' ve viau a. Mahse, a farnu ṭawng peih deuh a awma ka tui leh ta lo.

Amah hi chu a sual pawh a ni hran lo, min ngaihsakin min duat a, a puitling ru riau bawk. Zosanga nen khaikhin râlah chuan ka fa te pa nge nge ka la thlang fan tho.

Lungleia kan phei ve zawk chhung pawh khan a rawn lang nghal a, ka fate pahnih pawh pawmin a duat vei phian! Ni Arini'n, "I ngaihsak peih tak tak chuang lo, be ṭha duh vak suh, nang te zawng Zosanga'n a la hruai haw leh nge nge ang che," inti hre takin ati ve ngial.

Ni e, Zosanga ka duhna leh hmangaihna a la reh lo a, chuti maia reh chi ninghal lo chuan.

A nun a siam ṭhat theih nân te, puitlin lam kawng a zawh theih nana hetianga thil ti hi ka ni a, amah ngaihtuah lo hian zan khat pawh ka la muhil lo. Ka ngai ngawih ngawih a, "A hmangaih tak tak che a nih chuan a fate vang pawh hian a lo kîr leh tho ang," ka pa'n a ti ve tlat.

Ka nu leh pa te pawhin inṭhen hlen hi a ṭha lo an ti ve tho a, bungraw lâk pawh kha ṭûl an ti lêm lo. "Ti hian i awm ve rih ang a, i awm rei deuh chuan a rawn lang em em ang," an ti kha a ni a; mahse, Rafaela duh dan a ni miah lo thung, "Bungraw la chuang si lova heta i awm reng chuan khawiah khan a insiam ṭha lo ang e, Zosanga mizia te zawng ka hre chiang em mai," a tih vangin Rafaela thu in kan la ta a.

Ngaihdam min dil a, theih tawpa min dang chung pawh khan ka kal lui a nia, Rafaela hian kan pahnih tâna ṭha lo tur eng ruahmanna mah a nei lovang tih ka hre chiang a ni. A thû hnial ka duh lova nakinah nu leh pa'n zankhat mit chhin tâwk se, amah bâk belh tur kan nei lo tih ka hriaa chuvangin thu ka awih mai a ni.

Chutiang vel ka ngaihtuah lai chuan amah Zosanga ngei a rawn lût ta a, ka lái hû.

Ka nu leh pa'n an lo be bawrh bawrh a, nizana a laka ka awm dan avang khan ka la zak ru chem chem. Inṭhen ni siin ka in fawh tir a nia, eng tin tak min ngai ang maw.

Ka pa pawm lai Bawihtei chu lain a chhaih zui nghal a, keimah tak chu min be lêm lo.

Nizana a sawi ang chiahin a rawn lêng ta chu a nia, Nunpuia a awm ve sia lo biak teh hûrh pawh ka zak deuh.

"Zosang, Lunglei lamah i rawn zin ngai em?" Tiin Nunpuia'n a bia a, "Ngai vak lo," tih chauhvin a chhâng. A hmêl ka va en a, eng nge a ngaihtuah tih pawh ka hre thiam lo. Mahse, lungawi hmêl erawh a pu lo deuh chuan ka hria.

Bawihpuii a ṭah tâk avangin Nunpuia'n min rawn pe a, "Ka rualin lo phei ula, ka thlah leh dawn che u alawm," a tih chuan, "Motor chuanpui atan chuan an la nau mah mah, nakinah remchangah kan lo la zin dawn nia," ka chhân hmain Zosanga'n min lo chhãn khalh a, Nunpuia hi a thîk em maw ni!

"Duati, thla leh ni 17 khian ka pa lung phun kan tum a, min rawn telpui ve la, naupang hruaiin emaw hruai lo pawhin.." Nunpuia'n ati leh hrâm a, Zosanga awm ve reng laia hetia min ti sek hi Nunpuia ka ngei phah deuh. A hma pawhin a sawi lang tawp si lo a, tuna taka han sawi vel.

Ka rin ang chiahin Zosanga chuan nelawm vak loh hian Nunpuia a en a, "Kan in hruai leh ṭêp tawh a, kei chuan zin chhuah ka phal dawn miah lova.." zuk ti a.

He mi te pahnih chimawm dun zia hi, ka nu leh pa'n kan ṭawng an hre pha lo hlauh zawk a. Asiami erawh chuan min rawn melh zauh a, a hriat thiam hmel tawp.

Zosanga chutia a ṭawng tâkah chuan Nunpuia a tho tharh a, "Naktuk thawh hma a ngai sia, ka lo va mu ang e," tiin a insaseng ta daih a, Zosanga a nui ruh ruh. A va han chhe tak.

"Zosang, i nu te eng tikah nge an lo haw dawn?" Ka nu kan awmnaah rawn pheiin Zosanga bulah a ṭhu a, "Ka hre thei chiah lo, Duati nen kan awm dan tur a zirin an lo pheiin an lo phei lovang," a ti teh daih a.

"Zosang, i duh duh hi sawi ngawt lo la," tia ka lo khak chuan, "Inneih leh hi i duh lo takzet em ni? Kum khat ka nghâk tawh che a, eng tikah mah min pawm thei tawh dawn lo a nih chuan sawi chiang law law rawh, kan nih tur lam lam kan nih a hun," ka nu awm ve reng laiin a ti leh a. Ka melh kâwk.

Thil sawi hun leh hun lo te hi a thliar ṭhin bawk si lo a, ka nu awm laia sawi te chu a, âtthlâk lutuk mai.

"Ngun takin thil ngaihtuah ula sawi dun ang che u, Duati pawh i haw leh a nih chuan rawn kîr leh mai mai kha kan remti tawh dawn lo a nia, chutiang chiah chuan Zosang, nang pawh, a rawn kir a nih chuan i koh haw mai mai theihin a awm tawh lo ang," ka nu'n ati ve bawk.

"Nia, amah nen kan lo sawi dun anga kan thu tlûkna kan hrilh leh dawn che u nia," tih pahin a fanu tê zawk pawmin kan room-ah a lût ta a, "Min zun khum chu le.." a ti sup ri ka hre pha.

"Duati, thu tlûkna dik siam ang che, Zosanga hian a hmangaih che tih ka hria a, i tuar a zuau lutuk ve bawk atin ni, dawh theihna te neih a ngai a, ka sawi tawh ang khan in lo inhruai leh a nih pawhin i aia naupang i pasal a ni tih hria la, enkawl dan thiam tawh ang che; chuti a nih rual chuan mipa a ni a, mahni aia naupang a nih vangin i namnûl mai mai tur a ni lova i pasal a nihnaah i zah thiam tur a ni," tia min zilh chuan ka ngawi reng.

Ka nu mu tura a kal hnuah kan room lam ka pan ve ta a, Bawihtei kekawr hâk thlâksakin diaper te alo hren tîr ve ngial.

"Ka Duat nu hi a, min zun khum vel a maw?" Tiin a fanu a chhaih pah a, hmuh an nuam ka ti, Bawihpuii te unau chhaih nuam tâwk vel an ni a, an lawmawm ve bawk êm a ni.

"Nunpuia kha kha tia chhân kher a ngai em ni," ka ti a.

"Ngai e, nang mahah beiseina a nei a, i tih hlawhtlinsak dawn a nih loh chuan sawi tlang mai tur," a ti hmuk.

"Ka hrilh ve thei reng alawm, a zak ang asin," ka tih chuan rawn hawi chhuakin min rawn en a, "Ani kha i duh zawk a nih chuan tun hi sawi hun a ni, a rawn thlen chilh ngam bawk che a, in inkârah awm a awm chuan inrawlh theihna ka nei lo," a ti leh hmiah.

"Zosang, Nunpuia nen min hmehbel ṭâlh tum duh suh.."

"Ka hmehbel che ni lovin tun hma aṭanga ngaizawngtu che a ni a, kan inṭhen veleh a rawn be leh che tih a hriat reng alawm, puitling kan ni tawh a, kei aia i hmangaih zawk chuan i pan thei ang," a ti a, thinrim ang pawhin a lang chuang lo a, a hmaa Zosanga ka hriat ṭhin nen khan in anna pakhat mah an nei tawh lo.

"Min ngaizawng mah se ka duh chuang hleinem," ka ti sap a.

"Lunglei aṭangin a rawn zui phei che a, in inah a lo thleng bawk a, duh lo mah la a beisei theih turin i awm tho alawm, i hlimna tur hi ka duh ber a, inṭhen tawh kan ni a, kum khat a tling hial tawh, rilru dang i pu a nih pawhin ka dem lo che, ka fate erawh ka thlahthlam ngai lovang ka dam chhung hi chuan.." dam thluam hian a ti leh a.

"I hre thiam lo a nih kha, a kâwi zawnga lâk tlat tur pawh a ni lo, a hma anga awm leh tur kha chuan ka peih tawh lo chiang a.." tiin naute hnute hnêk tur ka siam pah a.

"Ni e, khatiang kha chu a thleng tawh lo ang ka tiam a che, min la hmangaih em?" Tia min zawh chuan ka ngawi ta reng a.

"Ka zawh che chu, kei chuan nang lo chu hmangaih ka nei lova ka fate nen hian ka hmangaih vek che u, hlim taka chênho leh ka duh," ka bulah rawn ṭhuin min kuah a, han sawi chhuah mai kha ka zak deuh.

"Min la hmangaih tiraw?" Tia min zawh nawn leh chuan, "Hmangaih e...eng lo.." ka ti ve ta sap a.

"Eng lo tel lo khân sawi ṭha la.." a nui zui suk a, ka va ngei mai mai tak.

"I chhe chimawm siah.." a bâk sawi vak ngaihna ka hre lo, ka lâi em em hi a ni tawp mai.

Inngaizawng ṭantîr te pawh kan ang dawn dawn alawm.

"Ka nu leh pa ka phone ang a, palâi kan rawn tîr dawn nia, tun ṭum chu pangngai takin inkutsuihna neih ve ngei pawh ka duh, 'i nupui tak tak angin min en ngai lo,' i tih fô lohna turin," a ti a.

"Rafaela kha i hrilh theihnghilh ang e, ani tel lova inkutsuih ka duh miah lo a nia," ka tih chuan, "Ka lo hrilh ang e, Champhaiah pawh kan chhungkuain kan zin ang a, i hna hi bânsan i duh ngang loh chuan âi kal kan zawn leh rih te a ngai dawn a nia."

"Ka nî fapa kal tîr tur a awm alawm, i awm dan azirin ka bângin ka bâng lovang..'' fiamthu ti tak deuhvin ka chhâng a, "Bâng la, i thawh tur dang kan ngaihven daih dawn nia, a nghet lo lehnghal," a ti sup a.

Chumi hnu chuan thingpui ka lum sak a, Nunpuia a rawn tho chhuak ta miah lo.

Zân dar 10 pelhah Zosanga a haw ve ta a, "I room kawngkhar kalh ang che, kha pa kha ka ring lo a nia," a la ti hrâm.

Ve bawk tak chuan! Keia naupawm kha Nunpuia'n min beisei lul lovang.

He mi zan, Zosanga lo kal aṭanga kâr tâwp lamah palâi hmel kan hmu ta a, tun ṭum chu nu Muanpuii te nupa lo kal lovin mi dang an rawn tîr a, a pangngai ve ta.

Rafaela kan hrilh chuan, "A ṭha alawm, Zosanga anga hmangaihtu che hi i tawng tawh lo mai thei asin, inneih ni chauh chu chhuah ka lo dîl dawn nia, ka ṭawngṭai sak ziah che u," a rawn ti thlap.

Ka nau mah ni se ka chhuangin ka ngaisâng a nia.

Rinsangpui'n min lo call a, "Lalduat, ka lawmzia hi.. ka thî.." tiin a nui hak hak a.

"Naa, kan awm dun dawn chuang hleinem, a in tharah kan lût ve ang chu.." ka ti a.

"Awi! Mahse, a pawi chuang lo, Bawihpuii kha kan kawl ve ang aw.." a rawn ti leh a, a din hmun ka hrethiam a, kawl mah se pawi ka ti vak lo. Min hmangaihpui tih ka hre miau alawm.

"Kan la sawi ṭha dawn nia," tiin ka chhâng ve ta a.

Saitei pawhin min lo call a, "Ka râi lai khera inneih han tih, ka nalh ve thei dawn lo asin," a ti a, ka nuih a za kher mai. An inah vawi hnih chiah ka la kal a, ka chhangchhe deuh nen ka lêng tam lo khawp mai.

Palâi vawi hnih an lo kalnaah kan insawi fel ta a, Rafaela lo chhuah theih hun, kâr leh Zirtawpni-ah Zosanga te kohhran hall-a inkutsuih turin thu an ti tlu ta a.

Nunpuia haw tur khan, "Duati, nang leh kei hi chu a rem ngang lo a ni e tiraw," tiin min thlah ta kha a ni a, a khawngaihthlâk ve tho.

Diktei pawhin min rawn call a, zaipawl intihsiaknaa an zai ni a nih dawn avangin a rawn tel thei dawn lo tih a sawi a, pawi ka ti viau. Mahse, Zosanga a hmanhmawh tawh si a, sawn hlat chi ni nghal lo chuan.

Lawmsanga te workshop hovin chaw eiah min sawm a, Zosanga nen khum leh inchhungkhur bungrua en kan tum avangin kan ei ve ta lo.

"Duati, kan hnena awm reng turin duh che mah ila a theih si loh a, mi chhungkaw tana phurrit ni lovin suihzawmtu nih ngei i tum dawn nia, Pathian hre chungin Kristian chhungkua din tum ang che u aw.." tia ka pa min fuihna chu zawm ngei pawh ka tum.

Lungleia ka pu pawhin, "Ka tunu Duati te an insuih ṭhat dawn chuan kal vek tur," a lo ti a ni awm a, an vaia lo kal vek an tum.

Ka nî in ka inbel tur a rawn sawi kûr nguai a, ṭhian dinpui mai tur ka hriat loh avangin leh Aizawlah kawm ngeih bîk ka nei hran chuang lo a, ka kawm ve ber Becky lah chu a dam loh avangin a lo tel thei dawn lo a, ṭhian atan phei chuan chuti hlauh. A hman chi miah loh. Spi ṭhianah hman ka tum ta a, "Ka zak, mahse, ka zak lo.." nui ṭhâ chungin a ti a, a nâwi ve sâwt a nia ani pawh hi.

Zosanga nen ni lêngin kan tei chhuak a, bungrua pawh kan lei nual. Ka thawhpui te pawh sâwmna kan thawn ve veka Zosanga thawhpui te pawh chuti tho. Ṭhian atan a nuphal pa tur Valpuia, ka nau pasal a hmang dawn thung.

Lawmsanga hman a tum ûk a, Spi ka hman dawn avangin nupa pa chuan a chi loh kan ti ta deuh a ni.

Kan nu leh pa te ve ve an phûr a, a hma ang ngawt kha chu an ni ta lo. Senso chungchângah pawh an inhuam thui ang reng viau a, kei mah ka lo inthlahrung zawk. Dân anga innei tur pawh nihlei lo, tiin ka sawisel nghe nghe.

Kimi a'n phûr fâl mai mai khawp a, "Duati, ka inti nalh châk lutuk, Zosanga kawr thar ka lei tîr dawn, i awm loh lai khân a thawmhnaw ka su char char a nia," a ti a.

"Keima'n ka lei ang che," ka tih chuan a lawm ngang mai.

Kan fate pahnih hâk tur kan buaipui leh a, phìr annih vang hi a ni ang mi lawm an hlawh em em a, Zosanga phei hi chuan a duatin a chhuang dun hleuh hleuh khawp mai.

"Ka duatbîki te vek innih hi.." a ti deuh ngei.

"Zosanga nu leh pa pawh 'nu Muanpui, pa Fak' tiin ko tawh suh aw, ka nu ka pa tiin ko la, thil harsa a ni lo." Tiin ka nu'n min chah bawk.

Ka va hreh si êm. Ka ti ṭhang lo lutuka huphurh fia fia tak ka ni.

Saitei a insawisêl neuh neuh reng a, inneih boruak reh fel hma chuan kan inah an rawn awm ve rih dawn a, amah pawh a hriam hraih mai. Naupai a ngeih lo a nih ka ring deuh.

"Duati, lo kal teh.." Zosanga inah bungraw rem fel turin ka kal a, kan nupa room tura a buatsaihah min ko lût ta a.

"Hetia kan chêng dun leh thei tur hi ka lawm," ti supin amah si chêt hian min pawt hnai a, "Kei pawh," tia ka chhân veleh rawn kûn hniamin min fawp ta a. A duh thawh kher mai.

"Kan inneih zanah kan inṭhen chhunga min hremna man kha i pe ang," tiin a nui suk a, a va han hmelṭha tak.

A sam dum hlap leh fai sar chuan ka mit a la hle a, a mitmeng fiah kâk te hi hmeichhe dang melhna atan ka phal lo.

Ka Zosanga, keima Zosanga chauh hi a ni ka hmangaih. Ani pawhin min hmangaih si a.

B+>[BeckirafARenthleI]<+®®

THE RAPSAGYAN FAMILY

Becky Rafa Renthlei(-BRR)

Chapter-46

[Duatbiki]

Kan insuih ṭhat ni tur a lo thleng ta a.

He mi kâr tluan hian Zosanga a rawn lang mang lo! Ka lo rin dan chuan kan inrem leh tawh si a , zan tin a lo kal ka ring deuh kha a ni a, tun hmaa inhmuh sek duhna ang rilru kha a pu ta lo nge, ka rin aiin a rawn lang khât a. Thil ṭul pawimawhah phone-in min rawn be zauh zauh thung.

Kan thawmhnaw inbel turah kan buai deuh a, kawr fual hâk ve ngei ka duh laiin Zosanga'n a phal ta lo. "Mizo puanchei bih ula, a kawr lam chu in duh duh dan dan a ni mai, tun laiah kawrfual hâk an intih hmuha thil ṭul ber a ni lo," a ti deuh tlat.

A tîrah chuan Spi nen kan han hnial deuh a; mahse, ka nu leh pa pawh Zosanga lamah an ṭang ta si a, ka hnial thla zo ta lo. Hmanhmawh takin kan kawr hâk tur kan ṭhui tîr a, a mai mai kan duh lo ve khanglâng nen kan insên phah hrep.

Keiin Cream rawng ka hâk tur atan ka thlang a, Spi'n a pâwl a thlang thung, kan vun a ngo dun ve ve a, rin ai tak chuan kan inhmeh phian! Ka fa te pahnih pawhin Cream rawng kawrfual an inbel a, a pa an chhuna an sam a dum hlap.

Ho deuhvin kan nam liam mai dawn emaw tih laiin rin aiin mi an sawm zau a, ka zâm thar hnuhnawh viau. Ka nu thawhpui eng emaw zât Vety directorate aṭangin an lo kal a, Zosanga te workshop-a thawk leh training lai zawng zawng, nu Muanpuii thawhpui police lam an ṭhahnem bawk.

Chu mai bâkah ṭhenrual ṭha leh kan chhungte Lunglei lam an rawn kim viau a, ka pa unaute pawh an lo kal kim thawkhat. Patea Vaphaia awm erawh a rawn kal ve leh pek lo a, a nupui chhungte hian an control hneh nge a unaute lam a rawn ngaihsak lo khawp mai.

Chawhma dâr 11:00 a invuan tur kan ni a, Rafaela nizanah a rawn thleng tawh bawk a, kan kim viau.

"U Duat, kan hmangaih che a, tunah chuan pathian hriatpuina ngei ni tawh rawh se aw, kristian chhungkua indin hi ka duh ber a ni," tia a sawi chuan ka hnuk a ulh ringawt.

Ani zawng, khawvel thil kalsanin Pathian rawngbawl a thlang a, a farnu eng mah ni lo te min chhawmdawlin min fuih a, kan tân innghahna tlâk a ni. Diktei rawn tel thei lo tur pawi kan ti hle, Red ribbon Choir competition-ah an kohhran zaipawl an tel ve a, vawiin hi an zai hun tak a ni si a, Rafaela'n tlailama chaw ei tur talin a hruai tur thu a sawi.

Valpuia pawh a phur hle a, "Nula chhe lo deuh han dinpui tur i nei îk lovem ni? Spi te chu nu a ni si a," a'n ti ve ngeiah, Saitei a nui ṭha duh vak lo.

Ka pu in a pension pawisa aṭangin vawk pakhat man a rawn tum a, ka pa farnu, Kenedy-a nu hi Vawk pakhat man a rawn tum ve bawk a, dân anga ka nei lo chung pawhin min hlutsakin min ngaihsak hlawm em em a, ka thinlung takin ka lawm.

Hall chhung uluk tak, simple angreng zeta an cheiah chuan kan ṭhu tlar ṭhâm a, Zosanga leh Valpuia an nalh khawp mai. Suit buang uk deuh kharh an inbel ve ve a, an sâng ṭha dun sia an chhe lo thlâwt.

Kan fate pahnih ka nu leh nu Muanpuiin an pawm a, rin aiin thâwm bengchheng an chhuah lo. Hmeichhe fa annih vang nge an zia hi a zâwi ve khawp mai.

Pastor a rawn ding chhuak a, fuihna thu sawi hmasain inneihna programme kan hmang zui nghal a, a hma khan inneih zungbun ka bun lo hrim hrim a, tun ṭumah erawh chuan Rangkachak kual simple zet ka bun ve ta. A chhungah 'D&Z' tih leh kan inneih ni, thla leh kum a chuang kalh a. Zosanga'n min bun tîr lai chuan ka kut a khûr dar dar.

'Kei Zosangmawia hian, nang Lalhmangaihzuali hi.." tia inneih thutiam a chham ri chu a zâwi lem lo. Kei erawh ka zak lutuka ka ṭawng zâwi khawp mai.

Zosangmawia a thu tak ngang mai. A thawhpui lo kal zingah Hlimi pawh ka hmu zuaia he nu hian boruak a ngam khawp mai. Nautê en tura a lo kala min ṭawngkhum dan ngaihtuah phei kha chuan lo lang ve lo tawp mah se pawi tihna ka nei lo.

Inkhawm bânah thlalâkna hun rei vak lo kan hmang a, a zawng aza kha kan dinpui ta lo. Kan fanu te pahnihin pawmtu an ngah ngei mai.

"Duati, zanin chu Bawihpuii te unau kan lo riahpui ang a," Spi'n ka beng bulah min rawn hrilh a.

"In buaipui thei lo ang, pahnih em em chu," ka ti a.

"Anih Bawihpuii tal kan lo riahpui ang aw, in che ṭha thei lo palh ang," tiin a nui kar kar a, ka va ngei reuh tak.

Kan in lamah thlahna hun pangngai takin kan hmang a, nimin tlaiah keini lam chuan chaw ei kan siam tawh a, vawiin hian Zosanga inah ei tur a ni ve thung. A nu leh pa in kha an han ti zet a; mahse, Zosanga'n, "In ka nei ve tawh a, Duati lo luhna tur a ni bawk a," tiin a ina chaw ei siam a hauh deuh tlat.

An in puiah lâwi lut lovin a in tharah ka lût ta zawk a.

Inlêng neuh neuh kan nei bawk si a, kan ri luai luai mai. "Bawihpuii hi Spi ten riahpui an duh deuh a," tia Zosanga ka hrilh chuan, "Zanin chu chhungkaw kimin awm ve phawt ila naktuk zan aṭangin duh leh hruai phei se la.." a ti ta a.

Spi ka hrilh leh vat a, "A pawi lo, in awmho lehna hmasaber tur a ni a, a âwm ve tho," a ti ṭha ve mai.

Ka nu leh nu Muanpuii pawhin riahpui an tum a; mahse, Zosanga'n a remti lo tih ka sawi a, an hre thiam lutuk tlat.

In lêng an haw zo a, Valpuia pawh a haw fel chiah. Ka chau lutuk bawk nen khumah ka let tawp a, Bawihpuii te unau a pi te'n an paw muhil hlauh zawk a, chuti ni lo phei se chuan paw tur pawhin thâ alawi ka nei tawh hleinem maw le.

"Vawiin kha i nalh takzet," khumah a rawn ṭhu a, min en vang vangin, "I chau a nih kha, shower nei zuai ila kan mu daih dawn nia," a ti a.

"Hetia muthilh nghal mai hi ka duh," tih pahin ka hâm zui bài bài a, "Ni lo e, intifai rawh le, lokal rawh," tiin ka inrin hman hma hian min rawn pawm nawlh a, bathroom ah min pawm lût ta a.

"Bawihtei te.." hlauthâwng aw deuhva ka tih chuan, "An harh hman lo ang, muangchâng lo ila," ti supin a thawmhnaw inbel a hlip nghal zung zung a, kei pawh zak ru deuh hlek chung hian ka inphelh ve ta a.

A rûk tak chuan ka zak. Ka biang asa hat hatin ka hria.

Inchhung bungrua kan rem fel ni khân bathroom-ah towel leh bathrobe vel a thar hlak kan chhawp vek a, "Duati.." shower gel min rawn chulhin ka hnung ruak kâng chu a tuai hauh hauh a, "Hey, inbual vat vat ang," ka ti ta a. A nui suk ringawt.

Kan inbual zawh hnuah naute hnute siamna tur tui lum flash ah ka dah leh tê tê a, ka kalna apiangah min zui zel, "Lo va mu rawh," ka tih chuan, "A rualin le, zanin chu kum khat chhunga min hremna man pêk i ngaih kha," tiin ka kâwngah a rawn kuah a, Zosangmawia chimawm zia hi chu(h).

"Kiri..i chhia.." ka tih chuan a nui chhuak hawk a, "Ka chhe lo a niang, min duh êm kha.." a la ti zui.

Chu mi hnu chuan mu turin kan inbuatsaih ta a, kan khum feet 7 zet ah chuan kan thâwl ṭha khawp mai. Bawihpuii te unau a kil lamah a sawn chho a, "Lo harh miah suh u aw.." tiin a fate biangah a fâwp zauh a, chutah ka mutna lamah rawn tawlh pheiin a mah si chêt hian min kuah a.

Ka taksa chûl lâwr dan danin min fawp pah bawk a, tun ṭum chu nupa nun dik tak Vantlang leh Pathian hriatpuinain kan hmang dawn ta.

"Kan tlaivar ang.." a ti sup a.

"I zak lo siah.." tiin a nghâwngah ka lo kuah a, "Zak tur ka ni em ni, pa din hmun dik tak luah turin hma ka hruai a ngai alawm," a ti a.

Ni e, keini nupa tân zahthlâk a awm lo a, inpawh taka hmangaihna kan chen dun zawh meuh chuan meng tur pawh ka awm tawh lo.

Muthilh tumin ka chhing ta riai riai a.

Zinga ka harhin Zosanga te pafa an lo tho tawh a, keimah chauhvin khumah ka lo mu!

Choka lamah thâwm a awm nak nak a, Walker-ah a chuantir a nih ka ring ringawt, Valpuia ṭawng ri pawh ka hria, min kai tho lo chu mak ka ti deuh a.

Nimin tlaiah ruai ṭheh tam viau mah se chaw hmeh vel a bâng nual a, ka nu te in hnih kan suah bâkah ṭhenawm hnaivai kan sem ve bawk.

Khum thawhsanin ka chhuak phei ve ta a, ka rin aiin an lo awm tam. Ka nî te nupa an rawn lût ve chiah bawk a, an fa neih chhun hi Goa ah lehkha zirin a awm a, tlâi khawhnu-a anneih a nih vangin keh thei dawmin an dawm tak meuh.

Ka nu hian a duat em em a, a zirna senso pawh kan tum nual a, Rafaela aiin kum 5 zetin a naupang.

Ka pu pawh a lo ṭhu ve a, rei an châm thei dawn si lova vawiin chawhnu hian Lungleiah an lêt phei leh dawn a ni. Ka ngai dawn viau a ni.

Zosanga'n ka chhuak phei min lo hmuh chuan, "I mutui lutuka ka kái tho duh lo che a nih kha," a lo ti a.

"Keini a rualin kan tho thlap thlap a nia kan va inang lo deuh ve," Valpuia'n a ti a, ka nuih aza hle, Saitei a duat zia kan hre vek a, khawi kipah an inzui zel ringawt. Ni Arini phei chuan, "An ti ve mah mah," ati nghe nghe.

Zosanga nen kan inṭhen hma pawh khan khawlaia inkaih leh induat vel kha kan ti meuh lo, mi mit a kham hma tih ka hria a, ka duh lo hulhual.

Chawhmeh a chuang tam bawk sia, kan inlêng te ho chaw eiah kan sâwm ta vek a, chaw kan chhum belh nghal a, mihrang teh chiam an awm lo bawk a, a awlsam phian.

Chaw eikhamah Bawihpuii te unau Spi'n a rawn la a, ka nu leh pa te an rawn lang miah lo. Nu Muanpuii te pawh an lo kal chuang lo a, an ngaih a ṭha ta te pawh a ni mahna.

"Duati, i pu te hi kan va thlah dawn em ni ang," tiin Zosanga'n min rawn ko a, an chhuah a lo hun dêr tawh chu niin.

Ka nîin, "Nu i ni tawh a, i pasal i tih thiam leh i nihlawh a ni mai, i hna pawh thawk duh tawh suh, Zosanga hlawh a tam a, in khawsa thei tho ang," tiin min hrilh.

Ka hna bansan kha ka ui viau ṭhin kha a ni a; mahse, tunah chuan thawh chi ni pawhin ka hre tawh lo. Ka nî fapa kha ka ai kal turin kan hrilh tawh a, Spi pa insawipui tir ila a ngheta a thawh theih mai chu ka ring deuh.

Tlai lamah Rafaela leh Diktei chaw ei turin kan sawm a, naktukah ani pawh a kal leh nghal dawn sia, ka ngai lâwk viau.

Ni lêngin lut chhuak kan nei reng a, Spi'n naupang a la phei daih bawk si a, kan room chinfelna hun remchang a ni a, ka bur ta ngar ngar a.

Tlai lam dar li velah Zosanga nu in min lo call a, an ina phei tura min koh thut chuan mak ka ti deuh!

Zosanga ka hrilh vat a, "Tukinah ka pa en tîr turin an kal a, a result a ṭha lo em mawni dawn le?" A ti ta a.

Eng mah ka lo hre ve miah lo! Kumin kum tîr aṭang khan a insawisel neuh neuh reng a, Lawngtlaiah pawh vawi hnih an in check up tawh niawm tak a ni.

Nimin te khan a tâl hah ve sia a nâ a lo chhuak a nih ka ring ve ringawt. A pum lam a sawisel deuh ber.

Rafaela te chanchin hrilhin Zosanga te in lamah kan tlân phei ta a. Kan va thlen chuan an lo awm ṭhap tawh, keima nu leh pa pawh an awm tho.

"Kan lo koh thut nachhan che u chu i pa hi tukinah kan en tîr a, a insawisel zing ang reng sia ka va hruai a, biopsy an la a, a pum lam an ringhlel deuh a nih ka ring," tiin nu Muanpuiin min lo hrilh a, amah ka pa pawh a ṭhu ve tho a, nâ nei hmel pawh a pu lem lo.

Result chhuah hun tur te an sawi a, "Pathian zarah eng êm a ti lovang," ka pain a lo ti ve bawk a, kan ngaih a ṭha zân lo deuh.

Tun laiah Cancer natna a tam tawh si a, a lo ni ve palh ang tih ka hlau takzet.

Dârkâr khat dawn kan awm ve a, Zosanga pawh a rilru a nuam bik chiah lo a nih ka ring, Phai lama kal te a sawi ri deuh a; mahse, nu Muanpui'n, "Biopsy result te chhuak phawt se," a tih deuh avangin a sawi nawn ta lo.

Spi'n Bawihpuii a riahpui dawn ta nge nge a, "Nangni pawhin Bawihtei in kawl dawn tho a," a tih deuh tlat avangin kan hawsan ta a. Hetia an tih an tih chuan an la kawl hlen tak takin a nia ka rin. Mahse, an hmangaih êm a, sawisel sak ka tum lo.

Rafaela leh Diktei te nen zanriah tuihnai tak kan kîl a, "Lo haw hma thei la chuan ṭhianah hman che ka tum nen," Zosanga'n a ti a, "A chi nâng, u Duati i neih tawh kha, min lo be sek tawh lo deuh ang chu," tiin Rafaela'n a fiam ve a. Diktei nen kan nui ṭhâ mai.

Diktei din hmunah hian ka indah chhin a, ka peih loh zawng tak. Mahse, kan mizia leh ani mizia te chu inang hek lo le, Pathian hruaina hnuaiah tluang taka an inneih ngei ka beisei.

Zosanga pa chungchâng te kan sawi a, Rafaela'n, "Lungngai lutuk lo ila, Pathian zarah hlauhthawn awm a nih ka ring lo, biopsy te chu tun laiah an la deuh zel alawm," tia Zosanga bula a sawi chuan, "A awm dan ka enin ka ngaih a ṭha lo deuh alawm le," a ti a.

Zanriah eikham hnuah khawmuang lovin an haw ve ta a, Diktei te ina lên a duh thu a sawi vang a ni pakhat. Zosanga'n a awmnaa a hman turin ₹5000/- a pai a, ala duh lo deuh dâwn a; mahse, keima'n la tura ka tih avangin a la ve ta a.

Kei mah vang kher pawh ni lovin Zosanga nen hi chuan an inkawm ngeih ṭhin a, Ramtei vanga a mualpho chiam pawh khan Zosanga nen an inkawp chawt a nih kha, han lungawi lovin inti thiam lo zeuh mah se tun hma aṭanga unau ang maia seilian dun an ni a, an inhaw hlen tak tak thei lo.

Nun phung pangngai kan zawh chho tawh a, Zosanga hna ṭan hmain Champhaiah zan hnih riaka kal kan tum ta a, Bawihpuii erawh Spi'n hruai a phal lova kan hruai dawn ta lo.

Ka thawhpui Elty te inah thlen kan tum a, ka han phone diam tawh a, a phûr ngei mai. "Naute lo hruai ve ve rawh u aw," a ti a. Mahse, thil awmzia ka hrilh a, a nau zawk chauh kan hruai tur thu ka sawi.

Zosanga motor check tir turin an workshop-ah a kal ve bawk a, a pa result kan la hre lo. Hlauhthawn rûkna nei ṭheuh mah ila atu amahin kan sawi lang lo a, kan inneih ṭhat hnu hian kan in lamah kan la lêng ta miah lo.

Saitei erawh a dam a ṭha meuh lova vawi hnih kan tlawh a, a chêr kiam mai. A chângin drip te an khâi leh a, naupâi a haw lutuk hi a khawngaihthlâk zawk.

Rafaela pawh a zirna hmun panin a kal leh tawh a, tun ṭum a kal tur chu a huphurh tih a sawi ve tlat. Ka pa pawhin a ngai ve deuh a ni ang, "Han zir zo thuai thuai la kan ti hle mai, i nu nen chauh hi chuan kan khua a har ve viau a nia," a ti a.

Kan glass house nitin ka pa'n a nghâk a, upat lam an pan chho ve zela dik tak chuan ka khawngaih. Ka nu leh kan nula awmpui Asiami nen ringawt khan an ni tawh a, an khawhar dan tur ka hrethiam mai.

"Duati, in zin hmain Bawihpuii thawmhnaw lo lâk kan tum a, Kimi ka lo tîr ang aw.." tiin Spi'n min rawn call a, Kimi'n Scooty a neih aṭang hian an ṭangkai pui hle. Ani lahin chhuah vah a lo châk ve bawk nen a rawn lang zing khawp mai.

Pa Faka Lawngtlaiah a phei ve thei ta si lo a, an in sak a laklawh deuh nen nu Muanpuii amahin a phei a, anni nupa pawh 'ka nu ka pa,' tiin ka ko ve thei ta. Ka koh hmasak ber chuan ka lái vel.

Kimi a lo thleng a, Bawihpuii thawmhnaw a keng phei deuh vek.

Kan fanu a nihna a bo dawn chuang lo a, eng kimah an buaipui vek a. Hmanni khan a hritlâng âwmnâ a, Hospital-a hruai ka tumin, Spi'n, "Kei man ka hruai dawn alawm, chanchin ka lo hrilh dawn che nia, kan kuta awm a ni a, lo ngaihtuah duh rêng rêng suh, hahdam tak khan awm rawh," a ti dam thlap.

Lalrinliani hi chu Lawmsangzela te fanu emaw ti an awm nawk. Anni pawhin an sawi chiang duh bîk der lo.

"Duati, hmanhmawh deuh rawh aw, kan chhuak tlâi lutuk ang," Zosanga insiam peih diamin a rawn chhuak a, zing dâr nga a pêl awrh chauh. Champhai panin kan chhuak tawh dawn a, "Kan thlenna inah kan che ngam awm si lova," tiin nizan khan âm takin hmangaihna min chenpui a, ka lung a âwi zân.

Bawihtei ka pawm a, ani'n kan thawmhnaw Car-ah a dah lut a, kan inpeih ta.

Kan inah ka nu leh pa kan tlawh zawk ang a, chumi zawhah Lawmsanga te, Bawihpuii hmu miah lova kal kha Zosanga'n a ngaingam lo deuh a, chuvanga kal chu kan ni.

Kum khat leh a chanve an pum ve tawh a, an inang mai siah. A pu hian a hai leh zauh zel, kan hlimpui thei a nia.

Ka nuin Bawihtei a ngaihtuah hle a, "Zosang, fimkhur theihtawpin khalh ang che, naupang zinpui nân chuan a hla mah mah," A ti a.

Ka pa pawhin, "Kan hnenah awm rih mai se, in nupain han kal zawk ula ṭha tur a nia," tiin Bawihtei chu rei vak lo a pawm zawk a, pa Faka dam ṭhat loh aṭang hian ka pa nun pawh hi a dul deuh ruihin ka hria. Ka ngaihbel vang nge ka hre lo a.

"An pahnih hniha kalsan chu kan ngaingam lo deuh maw le," tiin Zosanga'n a chhâng a, ka nu leh pa pawhin eng mah an sawi zui tawh bik lo.

Kan inthlah fel hnuah Zosanga te in kan pan leh ta a, an la thawh ka rin loh avangin Spi ka call hmasa ta a.

Kan va thlen laiin Bawihpuii a la muhil a, ka pa Faka pawh a lo tho chhuak ve a, "Pa, i ṭha em?" Tia ka zawh chuan, "Nizan lam chu ka mu ṭha ve reng, min ngaihtuah suh u, fimkhur tak khan kal ula aw Bawiha," a ti dam thluam.

Zosanga'n Bawihpuii kaihthawh a tum chuan ka phal lo a, "A suakbâk mai mai, kan kalsan leh daih anga Spi te tan a buaithlâk," ka ti a, a kài tho lui ta lo.

An vaiin min thlaha kan lan theih chhung ka pa'n min thlir reng. Zosanga hi a fa hmasaber a nih angin a duat em em a, khatia suahsual rawng a bâwl lai pawh khan a chanchin a ngaihven reng ṭhin.

Nu Zomuani thlânah vawi khat chiah ka la kal a, Zosanga'n, "Naupang lian deuh se ka nu seilenna hmun Lawngtlai kan tlawh dawn nia," a ti nghe nghe.

Kawng lakah kan châwl hran lo a, kan tlân chak lêm lo. Bawihtei a muhil deuh char char a, Kâwlkulh kan thlenin rei vak lo kan châwl a, Bawihtei a luak nasa kher mai. A che buai chi ka ni lo hlauh a, a zia tak a awm. Zosanga erawh a mangang khu chûk a, ka'n hau hlak kha.

Elty in min lo hmuak a, Zosanga a hmuh chuan chibaiin kan inneihnaa a lo kal theih loh avanga pawi a tih thu a sawi ve luam a, Bawihtei pawm a tum chuan a duh ṭhak lo.

A châuin a zawk hnak mai a, hnute pawh a hne duh lo a, Zosanga a mangang leh ringawt tawh. Damdawi ina kalpui a rawt a; mahse, "Motor a rui a nih hi, a reh ve mai ang," ka ti a, a lung a awi chiah lo deuh.

Elty te hi a nau nen chauhva khawsa an ni a, an phuisui reuh viau. Aman hnathawh a nei a, a nau hi chuan Class a la kal thung. Mikhual room ah kan inhnawh lût ve ta a.

Zan riah kan eikham hnu lawkah Lawmsanga'n a û a rawn call a, "Ka pa pum a na leha damdawi inah kan kal mek," a rawn tih chuan kan rilru a nuam thei tawh lo.

Zosanga'n a nu a phone nghal a, kan tân tih theih awm hek suh, ka nu leh pa ka zuk be ringawt a, anni pawh Damdawi in panin an lo tlân ve mêk a, "Lo ngaihtuah suh u, kan awm alawm," an rawn tih chuan tlêmin ka thlâ a muang deuh.

Ka pa hian zan khat mit chhin lo tâwk palh ta se, ka nu a khawngaihthlâk dawn lutuk a, ka ngaihtuah ngam lo. Zosanga pawh kan zin châu deuh bawk nen a nguai ruih a, ka pa a ngaihtuah tih ka hre mai.

"I rilru ti hrehawm suh aw, eng tin mah a awm lo ang," tiin ka hnêm a.

"Tukin kan kal dawna a hmel ka hmuh khân ka ngaih a ṭha lo rêng a ni," a ti sup a.

"Pathian zarah eng êm a ti lo turah ngai ila, haw leh dawn ila Bawihtei a ngaihtuahawm si, naktukah office dawr kan tum anga kan inpeih hma dan a zirin kan haw dawn nia," ka ti ta a.

"Matea te nupa ringawt an awm sia ka ngaihtuah êm a ni, Bawihpuii buaipui a ngai ngei dawn a, eng tin nge an awm ang aw.." rilru hah hmel takin a ti leh a.

"Kimi ka'n phone ang e," tih pahin phone ka ban nghal a, Lawmsanga te nupain ka pa an buaipui a ngai ang a, Bawihpuii a nute Saii hnenah dah mai turin ka hrilh ta a.

Saitei pawh a dam ṭha lo viau nain tihngaihna awm hek lo. Ka nu leh pa damdawi inah an kal bawk si a, zankhuaa Kimi kuta dah kha ka ngaingam lo a ni.

Elty pawh engkim ka hrilh vek.

Zosanga a kil berah a mu a, a dawtah kei, a sîr berah Bawihtei a mu a, "Zo.." tia ka koh chuan ka lam hawiin a rawn inher a, a thu tak rûn mai.

"Duati, kan innei hman hlauh chu a tihzia hle mai, tun ang hunah te hian alawm i kianga awm ka thlâkhlelh ṭhin. Ka lungngaihna leh hrehawmna, ka natna te min ṭawmpui ṭhin tih ka hria a, i tel venaah hi chuan ka thlâ a muang ṭhin." Tiin min rawn kuah a, ka lo kuah lêt ve nghal vat.

Lawmsanga'n a rawn call laiin naute hnute ka pe a, Zosanga'n loudspeaker-ah a dah vangin a ṭawng ka lo hre ve vek.

"U, ka pa chu emergency-in an zai dawn a nih chu, ka nu pawh a rawn haw mêk, ṭawngṭai bâk tihtheih kan nei si lo a," a rawn ti a.

"Ni e, a ni khawp mai. Keini pawh kan lo ṭawngṭai dawn nia, thlaphâng rêng rêng suh u aw, eng tin mah a awm lo ang. Bawihpuii kha damdawi inah in hruai ve em ni?" Tiin a zawt a.

"A tîrah kan hruai a, Duati nuin a nute Saii hnenah a va dah ta a nih kha, damdawi in boruak a hrisel si lo a, awmpui ngam pawh a ni lo," a ti leh a.

Rei vak lo an inbiak leh hnuah phone a dah ta a.

Ama rilru pawh a hrehawm dawn teh reng nen a nau ala ṭawng thlamuan ve ṭâng ṭâng a nia. Zosanga nge nge, a puitling chho zel a ni e.

Ṭawngṭai a rawt a, a vawi khat nân kan nupain a ri hian kan ṭawngṭai dun ta a.

Manganna leh lungngaihna, harsatna kan tawh hian Pathian hnena tlûk luh a him ber.

Ka pa an zai chhungin kan muhil bik lo hrim hrim a, Bawihtei a tlei duh si lo a, kan inpuak chhawk a, kan zin chau bawk nen ka luak a chhuak hlui tawh.

"Duatnu, nang tal muthilh tum la, i chau lutuk ang," a fanu âwi chungin a ti a.

"Nang mah mu zawk rawh, motor i khalh thui ropui si," ka tih chuan, "Kan vaiin kan mu thei tihna.." tiin khumah a rawn lâwn a, a fanu a lo âwi mu diam tawh.

Mipaah pawh pa tak khan a fanu a âwi mu thlap a nia, a fel ve hrim hrim.

Ka pa an zai aṭanga darkar li hnuah ka nu'n min lo call a, ṭha taka zai a nih thu te, a pumpui pân lai pawh biopsy lâk nawn tur tih vel a rawn sawi a, a harh tawh em tih ka zawh chuan, a la harh loh thu a sawi a, ngaihtuahawm lutuk a ni lo a nih hmel.

"Naktukah inpeih fel hman tum ula, muang khawtlai lovin lo haw mai rawh u," a ti ta a.

Ka nu meuhvin haw tura min ti a nih chuan eng emaw min hrilh duh loh an nei a nih ka ring nghet tlat. Ralkhat aṭanga inhrilh an duh lo tepawh a ni mahna.

Kan inbiak zawha Zosanga ka va en chuan a lo muhil dér tawh!

A chau ve deuh a nih ka ring.

A hmêl dam thlup chu ka en reng a, a hmaia chûlin, "I kiangah ka awm zel dawn tih hria la, rilru ti hrehawm suh aw, ka hmangaih che," tiin ka phun chhuak sap a.

Zosangmawia'n kei min nei hi a inchhîr miah loh na turin theih tawp ka chhuah ang.

B+>[BeckirafARenthleI]<+®®

THE RAPSAGYAN FAMILY

Becky Rafa Renthlei(-BRR)

Chapter-47

[Zosangmawia te nupa]

Champhai aṭanga kan haw thlâkna pawh a rei leh deuh tawh a, ka pa damdawi in aṭangin a lo chhuak tawh bawk a, kan rinhlelh ang êma hlauhthawn awm chu a thleng ta bik lo.

Ka nu pawh Lawngtlai aṭangin a rawn phei tawh bawk a, "Bawiha, kan thlamuanpui che u a, in rawn lan khât hi chuan rilru a hrehawm ṭhin a nia," a tih vangin kan remchan a piangin kan lêng phei ve ṭhin.

Rinsangpui'n motor parts dawr nghah a tum ve a, training turin a inbuatsaih chho a, Bawihpuii pawh ngai viau mah se kan in lamah an rawn dah phei ta a, Duati ringawt chu a buai kan hlau deuh si a, nu Mafeli'n nau awmtu tur min zawn hmuh sak a, kum 19 bâwr vel, fel thit thet deuh mai hi a ni a, kan ṭangkaipui hlê.

Ruati thihna chungchânga police hmalâkna pawhin a tawp a thleng ta a, Famkima an zuk rêk chhuak ta kha a ni a, a nupui Ramtei erawh lâk ngaiah an dah lo a, vawiin hian Famkima Central Jail lamah an thawn thlain ka ring.

"Zosang, i tlai dawn a nia," Duati nau bual zo a rawn chhuak a, tukṭhuan ei tur ka lo siam thung a, kan nulain Bawihpuii a pua a, tunah chuan chhungkaw pangngai dik tak kan ni ve ta.

Kan inhnuai hi mi luah theih tura siam kan rilrûk ve deuh avangin Duati'n a pawisa khâwl a la chhuak ve bawk a, an in lamah pawh kan dâk phei zauh zauh. Saitei te nupa an reha an pâwn chhuak meuh lo, a nau neih a la hun lo nain a bawrhsawm lutuka in lamah an inenkawl deuh reng mai.

Nitin office ka kal a, Duati erawh in lamah awmin a ṭûl ṭûl a thawk ve a, ka rin ai takin a che peih. A taksa thau zualpui kha a reh ṭan a, amah a inuluk bawk nen a nalh sûrh mai, kei aiin a upa zawk a; mahse, a hrechiang sa lo chuan a naupang zawk emaw anti zel!

Ka pa hriselna din hmun a ṭhat tâwk loh avangin Lawngtlaia an insak kha an chhunzawm hlei thei lo a, "Bawiha, chawlh i la thei ang em, i nau nen inva kal dawn em ni ang?" Tiin ka pain min rawn bia a, upa lam anni ve tawh a, a thu sawi zawm sak loh ka hreh a, kârkhat chawlh dîl ka tum ta a.

Lawmsanga nen Lawngtlai panin ka chhuak phei ve ta a.

[Kum li hnu-ah]

Rapsagyan Family

Duati

Zosanga nena kan inneihna pawh kum li lâi a ni ve tawh a, chhungkua tak tak kan din chho ve ta.

Bawihpuii te unau Pathian zarah an hrisela Pre-school-ah kan kal tir ve a, invênna ka hman ngar ngar a vang khân nau ka pâi lawk lo a, phír enkawl hi tih namai a lo ni lo. Tunah an chhang tur ka pâi leh ta chauhva thla nga a tling vel chiah.

Saitei leh Valpuia'n fapa pahnih annei a, an fapa upa zawk Lalnunsanga a harh thawr thawr viau a, a nau Zothanpuia erawh thla riat a tling ve chiah a, a pa a chhun viau. Saitei pawh a hriselna a zia chho tawh a, "Nau hi chu ka pâi rih mai mai dawn tawh lo, ka indang char char dawn," Valpuia hnenah a lo ti a ni awm e, senior hnua fapa nei a ni bawka Valpuia'n a fate a duat em em a, Bawipuii nen an fa û zawk hi an inkawm ngeih phian.

An in chung an sak zawm zo tawh a, anmahniin an luah a, a hmaa an awmna kha kaw hnihah siamin mi an luah tîr ve bawk a, an sumo hlui pahnih kha Valpuia'n a hralh daih a, a thar lain Lunglei to Aizawl a service tîra amah chuan motor a khalh tawh lo. Ka pa te darthlalang dawr a enkawl deuh chawt.

Rinsangpuii leh Lawmsangzela te pawhin ṭawngṭai dam thei leh khawih thiam an pan aṭangin nau an pâi ve ta hrâm a, an lawmpui awm a nia, fanu pakhat sam kir, ngo vingveng annei a, ka pa Faka'n a duat teh a nia, a hmingah Rohluzuali an sa a, tunah hian kum khat leh thla sarihna a hmang ve mêk.

An awmpui ṭhin Kimi kha Thanpuia nen an innei ve ta nge nge a, an inneih sen so, a chhawm tur leh a mamawh ka nu leh pain an tum sak vek a, Thanpuia khan hna mumal thawh tur a nei hran lo bawk a, Lawngtlaia ka nu in kha an nupain an luah a, an enkawl a nih ber chu. Chhawng thum a ni a, a luah man an rawn thawn a, in bul huan enkawl pawh an kutah a awm vek.

Amah Kimi tak chuan restaurant a hawng ve niawm tak a ni.

Ka nu te awmpui ṭhin Asiami erawh ala awm tluang zel a, an ṭangkaipui bawk a, pasal neih lam kha a tinzawn lo bawk nen a senior ve fang mai. Keini pawhin kan ngainaa ka fate min duatsak êma ka duhsak viau.

Unau hmeichhia pahnih kan ni si a, ka nu hian, "In hrangah in awm ve ve tawh a, tlawh hmasak tur zawk che u pawh ka hre lo, Saitei chu a lo lêng zing zawk a, nang erawh i tlei lutuka min tlawh khât," tiin a vûi der viau.

A ni lah tak a, naupang hruai nen, inchhungkhur enkawl a lo ngai a, tunah nau ka pâi leh bawk si a, ka tân chhuah vah a har ve êm a ni. Ka nu te pawh Zosanga a hman loh chuan kan tlawh ngai mang lo. Nu Muanpuii te erawh chu kan inhnaih avangin kan tlawh zing deuh.

Rafaela naktukah a rawn chhuak tawh dawn a, kan nghâkhlel tlâng viau, Diktei nen an la inzui ve zêl a, amah Diktei tak phei hi chu kum 32 a tling ve tawh dawn, an inzui tirh khan kum 27 vel a ni a, kum li ngawt Rafaela a lo nghâk a nia, a rinawmnaah ka ngaisâng a, Pathian rawng a phâk tâwka bâwlin kohhran leh khawtlângah a inhmang chhunzawm zel.

"Â nu, putea kan hmuak ve dawn lo mi?" Bawihpui'n a ti a, a putea hian a hman phawt chuan a rawn video call ziah.

"Dawn e, chaw kan ei phei ang, i pa lo haw veleh.." ka ti a.

"Putea chuan eng nge min lo hawn ang le?" A ti leh a, inhmu tam lo mah se an ngaia an sawi ve fo mai. Ka unaupa neih chhun kha ni miau hek.

Rinsangpui'n fa a neih hma kha chuan Bawihpuii hi an kawl a, inrinni zan apiangin Zosanga'n a va hruai ṭhin, "Duat viau mah se unau awm hran reng hi a ṭha lo a, phír anni a, nakinah harsatna te pawh a awm thei," a ti deuh tlat.

Nu Muanpui'n Zosanga hmingin Lawngtlaia an in kha dah a tum a, Lawmsangzela hmingin tuna an in luah lai leh an workshop hi an dah ka ring deuh, Zosanga chu Sawrkarah hna nghet nei a ni a, kan awmna in hi a hminga awm a ni bawk a, Lawngtlai lama mi chan kher pawh ṭûl ka ti lo.

Mahse, pa Faka te nupain an ti deuh tlat si a, kan hnial ta bîk lo. Bâkah a nu Zomuankimi kha fanu naupang zawk a ni a, nu Muanpuii pawhin hna nghet a neih vangin a pa khan felfai takin thû a lo dah a ni awm e.

Chhungkaw hrangah awmin in dang mah ila, kan inpawh em em vek . Tlêmin Saitei te hi kan hlat deuh a, phone-a inbiak bâk hi chu kan lêng khât ber. An veng primary school-ah mi âi a kal ve a, ani zawng ala naupanga a chhangchhiat zualpui a reh pawhin a la ṭhalâi dawn chauh.

Rafaela te hmuak turin ka nu te in lamah kan phei ta a, Zosanga erawh chu office kal a ngai a, min dah zawk hnuah a chhuak leh ta a.

"Duati, i nau a lo chhuah hunah chaw te ei khawm ve ila, inpa hnenah lo sawi ta che," ka nuin a ti a.

"Kan ei khawm a ring sa vek alawm," ka lo ti a.

"I nau room hi a theih ang ang chu kan tifai tawh a, Asiami nen khum vel in lo va siam dawn em ni ang? Bawihpui, pawnah chhuak suh u aw.." a ti zui leh lâwng lâwng a.

Ramtei nen inneih an tum laia an room kha Saitei'n a hmang zui daih a, pasal a neih hnuah ka pa'n tih danglam a rawt a, an siam dang nual, in hnuaia a room hi chu a zîm deuh a, in chungah awm a duh tho bawk nen kan buatsaih sak ta a.

Saitei te nufa an lo phei ve bawk a, a fapa a tawrhhlelh awm leh dawn mang e. Ka thinchhe ve bawk nen ka vîn leh dawt dawt zel, Saitei a zai dam phian a, ka fa te pawh a ngaithei viau.

Ka pa nu leh pa te chuan Bawihpuii te unau hi an tu hmuh hmasak ber an nih avang leh an kuah tam avangin an ngainaa an duat deuh chuan ka hria, Nunsanga te an duat lo tihna ni lovin.

[RAFAELA]

Pathian khawngaihna zarah BD ka zo ve ta a, min kohna leh min tîrhna hmuna kal turin rilru ka siam sauh sauh.

Ka awm loh kum li chhung khan ka chhungkua Pathianin min venhimsak a, tumah ngaihtuah ngai an awm lo, u Duati fa te an felin an hmelṭhaa ka duat a nia. Saitei fapa te erawh an harh si a, Valpuia takngial pawhin, "Rafael, a nu an chhun a ni ang, an ninhlei dan em em hi, ka hau peih tawh lo," a ti a. Ka nuih aza hle.

Pro Pastor hna dîl theih hun an hawng leh ta a, ka pain, "I tum i hlen chhuah theih nân dîl ve chhin la, i tling ta a nih leh a ṭha a ni mai a, i tling lo a nih pawhin tualchhungah rawngbawlna i chhunzawm thei tihna a ni mai," a ti a, kâr hmasa khan dîlna form ka theh lût ve ta.

Medical fitness thil tel ngai a nih vangin u Duati nen Doctor-ah kan kal a, ani hi chu û ber a nih bâkah mi biangbiak a thiam bawk a, kan tifel nghal vek.

Diktei nen pawh pawh zan lamah kan inhmu ve deuh ziah a, inneih te pawh kan sawi kâi ve ta.

"Kan kum a tam chho zel a, nang pawh pasal neih hun i ni ve tawh a, palâi ka lo tîr ve tawh dawn em ni ang?" Tia ka zawh chuan, "Tunah vut vut maw?" Zuk ti a.

A kuta vuan chung hian, "Khawi hmunah pawh awm ila, eng hna pawh thawk ila kan pahniha Kristian chhungkua din ka duh, chu chu ka ṭawngṭaina a ni bawk," tiin a mitah tak ka en a, "Ka nu leh pa ka lo sawipui ve dawn nia, ka hna bansan te a ngai ang em?" A ti sap a.

"Ka hre lo le, a hun lo thleng phawt se aw.." ka ti a.

Hemi hnu hian ka nu leh pa ka sawipui ve ta a, anni pawhin rem an ti thlap.

"Bawiha, kan fapa neihchhun leh kan innghahna i ni a, i farnute'n pasal an nei ve ve tawh bawk a, i kawng zawh hi mihring lam aṭanga chhût chuan thil huphurh awm a ni, ei bâr zawn kawngah pawh in chuti teh lua dawn lo a; mahse, Lalpan a ngaihtuah ang che tih hi ka ring tlat," ka pain a ti ta a.

Chhungkua kan inrâwn khawm a, u Duati te chhungkua leh Saitei te chhungkua te, pa Faka te chhung nen chaw kan eikhawm ta a, atu ate pawhin nupui neih ṭha min tihsak vek. Lunglei lama kan chhungte pawh phone hmangin kan hrilh ta a. Ka pu a lawm hle, ka pi lungphun hma ngeia nei turin thu a rawn nei hmiah.

Diktei'n min lo call a, "Rafael, music track siam ngai kan nei a nia, Bial zaipawlho hman tur, a hmaa kan siam tir pa kha a dam ṭha lo a, kan conductor-in min rawn bia a," a rawn ti teh daih a.

"Kalpui i ngai em ni?" Ka ti a.

"Aw, ngai tho a, kan conductor-in Masky records ah kalpui turin min ti a, a awmna hmun ka hrechiang lova," a rawn ti a.

"Ka hre bik miah lo, zawh tur kan zawng dawn nia," ka lo ti ṭha ve mai. An conductor hman lo pawh ni se mipa dang buaipui thei tur an awm tho awm sia, Diktei ber kher han tirh chu mak ka ti deuh.

Diktei hruai turin ka va kal ta a, a lo insiam peih thlap tawh.

"Masky records neitu chu i ṭhianpa ve deuh kha, Vanlalsailova team a mi kha," a ti hliai a, "In mipa te eng ati nge, tirh tur an awm zawk lo em ni," tiin ka zâwt ta nge nge a.

"Awm tho e, mahse, i tan kal a awlsam zawk a, 'lo va dah tawp rawh, a bâk chu kan lo buaipui ang antia'," a ti ta a.

Vanlalsailova Team Leader leh Musician ni bawk, Ar eL-a min fuihtu kha a ni tih ka hrethiam mai.

"A nih chuan lo kal rawh, kal nghal ila," ka ti a.

An in awmna lai tak ka hriat loh avangin mi kan zâwt chawp a, an lo hre phian! Amah Ar eL-a pawh a lo awm a, Diktei nen an Studio ah min hruai lût ta a.

Music Track siam tur dah ringawt kha kan ni bawk a nakinah an conductor-in a lo buaipui tur thu te kan sawi hnuah, kan chhuak leh ta a.

Masky Recording Studio kha a changtlung viau bawk.

Pro Pastor hna ka dîlna kha naktukah a chhuak dawn a, Pathian thu thu tiin rilru ka siam. Bd zo tawh mah ila min dahna hmun a nih loh chuan Pastor nih kher a ngai lo. Kohhran aṭang pawhin rawng a bâwl theih tih ka hria.

Diktei pawhin inneih a remti ve tawh a, kâr leh hian palâi kal kan tum ta a, ka nu leh pa an phûr hle.

Diktei hi ka mihring duhna chauhva neih tum ka ni lo a, Pathian râwn chung zelin tun hun hi kan thleng a ni.

"Lalpa, ka tana ṭha lo tur a nih chuan min lâk kian sak la, ka ta tur dik taka i ruat a nih erawh chuan Kristian chhungkua kan din theihna turin leh i rawng ka bawlpui theih nan kawng min hawn sak ang che," tiin ka dîl ṭhin.

Tunah chhânin kan awm mêk niin ka hria a, kan tâna Pathian ruat a nih loh hi chuan eng ang pawhin neih tumin bei mah ila dâltu a awm ngei tih Ramthansangi aṭang khan ka zir chhuak tawh a, chuvangin dái sual ka hlau hle.

U Duati fanu te pahnihin chaw an rawn ei a, "A pute, kan inah lo riak ve la," tiin min sawm a, sawm taktea min sawm avangin zan khat na na na chu va riah phei ka tum ta a. Anmahni thlah tho an ngai dawn a, ka nu leh pa hnena ka sawi chuan, "Va riak tak teh, nupui i neih hunah i riak thei dawn si lo a," tiin an nui ṭhâ mai.

He mi zan hian Bawihpuii te unau thlah pheiin ka riak ve ta a, "I putea chu in rawn sâwm chhuak maw?" Zosanga'n a ti a.

"Ka lo riak lo ngam nâng, Bawihpuii te tih beidawn ka duh lo reng reng," tiin ka chhâng a.

Diktei ka va hrilh chuan a nuih a za hle, "Kei aiin an pawt na deuh che a ni maw?" A rawn ti ngei.

Mikhual room-ah an pahnihin ka riahpui ta a, Computer-ah games kan khêl char char a, nu leh pa, pi leh pute, chhungte thu awih tur tih te ka hrilh ve nual. Naupang rilru thianghlim anni a, tun aṭanga zirtir an ngaihzia ka hre bawk.

Zingah u Duati te nupa pawh ka hrilh a, naupang enkawl dan chungchâng ka thiam tâwkin ka sawi ve bawk.

Tûkṭhuan ei tura min sawm avangin ka ei ve ta nghal a, Bawihpui'n kan ina lên a ngen leh tlat a, ka hruai phei leh ta nge nge a.

Kan in kan thlen hnu rei vak lovah Headquarters lam aṭangin ka lehkha tur a lo thleng a, ka dîlna kha ka hre chhuak zawk. Ka pa zâwk an lo pe a, "Bawiha, i lehkha tur.." tiin ka kutah a rawn hmehbel a, ka nu a hawk phâwk ngang mai.

Probationary Pastor ka dilah ka tling ve ta. Ka nu leh pa pawh hrilh hmasa lovin ka room-ah ka lût a, lawmthu sawi ṭawngṭaina ka nei ta a.

Ka room ka chhuahsan veleh ka nu leh pa ka hrilh nghal a, anni pawhin kan chhungte hmun danga mi an phone kual bawk a, kan va lawm si êm.

A kalphungah chuan Pastoral Department hian Pastor a lak thar te hi kum thum chhung Probation Period an hmang thin a.

Hemi kum thum chhung hian Pastor Bial-ah Practical Ministry neiin Bialtu Pastor leh Bial hruaitute kaihhruaina-in Bial-ah an awm a. Hemi chhung hian Subject hrang hrang thlan chhuah hmangin Annual Exam kum hnih chhung an nei leh ṭhin a, kum thumnaah Project Writing neiin an Project ziak chu an en dik leh thin a ni. An Project ziak te pawm a nih chuan Assembly Executive Committee Meeting hmaah Interview an hmachhawn leh ang a, Executive Committee Meeting-in Ordain tura a thlan te chu Assembly ah ordain an ni dawn a ni.

Ka hma bâk ko angin lang mah se ka zirna a thlâwn lo va, Pathianin a rawngbawl tura min thlan chian zia nem nghehna niin ka hria.

Diktei hrilh hlân ka nghakhlel hle mai. U Duati'n leh Saitei'n min lo call nghal a, "Awi, pasal ka lo nei thawt thawt a ni, min han inneih tîr hman la ṭha tur a nia, a hma daih khan eng ati nge i zir loh?" Saitei'n a tih chuan ka nui chhuak hawk.

"Fa inneih leh hunah Baptima ka chantir dawn nia," fiamthuin ka ti a, a nui ring ngei mai.

U Duati a phûl ve hlut lo a, "Ka lawmpui a che, sual mah ila i tân kan ṭawngṭai fo ṭhin asin, ka chhuang bawk che," a rawn ti a, a ṭah a chhuah hmel le.

Pastoral meeting anneih hmasak berah ka awmna bial tur an rêl ang a, rei rial lova ka kal nghâl a ngaih hmel.

Diktei ka hrilh chuan ka kutah vuanin, "Ka lâwm lutuk, ka ṭah a chhuak zawk," tih pahin a insût hraih a, ka nu in Pathian hnena Lawmthu sawina neiin Diktei pawh chaw ei ve nghal turin a sawm a, hun dang nise a duh miah lovang; "Nula i nih laia i lo ei hnuhnun berna tur a ni tawh a nia," ka tih chuan nui kar kar chung hian a 'aw' ve ta a.

Ni e, kan hlima kan lawm rualin ka nu leh pa ka kalsan leh dawn chu a ni a, kan eizawnna te ka ngaihtuah kâi a, ka pa a upa chho ve tawh a, ka hna chanpual pawh chhunzawm lovin ka liamsan leh ang a, ka farnute pahnih an awm tawh bawk si lo. Dam loh leh eng emaw tawh palhah pawh an ngaihtuah awm ve tawh a, ka khawngaih ve reng.

Zan lamah nu Muanpuii te chhungkua an rawn lêng a, Lawmsanga'n, "Ka chhuang che, i tum ruhna te hi a ngaihsanawm ka ti," tiin min chibai a, Rinsangpuii paw'n nui var var chung hian min chibai ve a. "I u Duati a lâwm awm," a ti a.

"A ṭap deuhvin ka hria," ka tih chuan, "Ka ring vel a ni," a ti sap.

U Duati nen hi chuan kan inpawh êm a, Saitei hian a thîk lek lek châng a tam. Mahse, ani pawh ka duat tho tih ka hrilh khan a nui ve leh mai.

Tunah chuan beidawnna hmun, zahna leh mualphona te, zu hmun aṭang te a min khai chhuak tu, Pathian mi hman Valalsailova Team te rawngbawlna rah chhuah chu kei mahah a rawn lang ta a ni e.

Kan inneihnaah sâwm ve ngei ka tum ruh tlat a, hmannia Masky Records-a kan kal khan Ar eL-a phone number ka la a, amah kha ka hriat chhun ni miau hek. Ka la be ve ang chu.

Palâi vawikhat kan tîr tawh a, inremsa ang deuh thaw kan nih avangin a hun leh nî te sawi fel turin vawikhat palâi an kal leh ang.

Pathian zarah Lalrindiki pawh 'ka nupui' a ni ve dawn ta nge nge e.

Ramthansangi khan pasal min ûmsan lo se, tun dinhmun hi ka thleng dawn si lo a.

Eng din hmunah pawh ding ila Pathian belh tlat hi khawvel leh a piah lam ram thleng pawha kan hlimna leh lâwmna tur a lo ni zâwk si.

'Pro Pastor Rafael Remruattluanga' ka lo ni ve dawn ta reng mai.

'Lalpa, ka lawm e' tiin ka phun chhuak sup a.

##

Kan in leh a vel pawh a theih ang angin kan tifaiin kan siam ṭha a, kan in pawh rawng kan hnawih thar bawk a, kohhranah ka inreport tawh bawk a, vawi thum an ouan hnuah dân angin kan innei dawn a, duh aiin kan tlâi ṭhelh.

A chhan pawh ka awmna bial tur an rawn sawi tawh a, thla thar aṭanga ka kal nghal a ngai dawn si a, inneih tur vel nen duh aiin a chawpchilh mah mah. Innei lova kal hmasak kha kan han rêl zet a; mahse, headquarters lamin kârkhat hun min pêk belh a, nupui neih hmasak kha an rilrem zâwk niawm tak a ni.

Keimahin ka kal hmasa phawt ang a, Diktei erawh hna nei a ni a, min zui ve dawn rih lo. A hna pawh a bânsan a ngai dawn a, "I hreh em?" Tia ka zawh chuan, "I kiangah ka awm tawh dawn a, a ṭûl a nih chuan ka bâng mai ang," a ti ve thlap.

Pathian rawngbawl tur hi chuan a nuam ringawt a ûm theih loh a, kalsan neih a ngai tih ka hrilh ve bawk.

Lalrindiki zawng Pathian ṭih mi a ni a, ka kawppui tura Lalpan min ruatsak liau liau a ni tih hi ka thinlungin a hria a ni.

Ka nu leh pa erawh lawm viau mah se an fapa neih chhun ka ni a, ka tel lova kum li an awm pawh kha a hrehawm dawn teh reng nen, damchhunga anmahni hlata ka awm tur hi an rilru a hrehawm ve deuh chuan ka hria.

Bial hrang hrangah kan awm lo thei dawn lova kan vanneih hlauh chuan keimahni bialah te pawh ka la awm ve mial mahna.

Keimah Rafaela hlui kha phum bova awmin a thar hlak ka ni tawh a, khawvel thil nen insuihzawm ka tân a rem ve tawh lo.

Leia thil awm te-a innghat lovin chunglam thlir chung zelin a nia ke ka pên dawn ni.

B+>[BeckirafARenthleI]<+®®

THE RAPSAGYAN FAMILY

Becky Rafa Renthlei(-BRR)

Chapter-48

[Duati]

Rafaela te inneihna tur pawh kâr khat chiahin a dang tawh a, kan tlin tâwk ṭha bera inbuatsaih ve kan tum a, ka nu leh pa pawh an ṭang mar khawp mai.

Zosanga'n pui ve ila a tih vangin ₹20000/-kan thawh ve a, Valpuia te pawhin an thawh ve bawk. Rafaela kan ṭangkaipui zia kan hria a, tlêm tala lo chhâwk zangkhai kha kan tih ve turah kan ngai.

Saitei'n min nuihzat veleh chhawng a, "In inneih laiin ka inti nalh thei lo a, Rafaela te inneihah i nalh bik dawn lo a nih kha," tiin ka pum puar lian ve deuh tak chu a kâwk a, nitin deuh thaw kan inah kan pheia a ṭûl ṭûl kan tihpui ve bawk.

Zosanga'n min duat em em a, khatia kan inneih ṭhat leh hnu khan thinrim hmai sena inhau kan nei ta lo. Ka thinchhe lutuk erawh min khak ve zauh ṭhin.

Naupang room tura a buatsaihah khan kan nula leh kan fate pahnih an riak ve ṭan a, nuam an ti khawp mai. Saitei fapa vawi hnih a rawn riak ve a, a la haw duh lo zui. Bawihpuii nen an inngaiin an inkawm ngeih viau mai.

Rinsangpuii nen Second hand bale rizai leh bedsheet kan inhawn ṭawm a, ka hna kha ka bansan hlen ta bawk a, mahni hman chawp lei ngai lovin kan la ve theia a zia khawp mai. Nu Muanpuii a pension tawh bawk a, an workshop ah rawng kahna hmun tur an siam belh a, Zosanga car hlui kha lain an chei ṭha vek bawk a. An theih tawkah chuan min pui hreh lo khawp mai.

Kan fate ni se thawmhnaw leh an mamawh an rawn tum deuh zar zar a, a hma kha chuan Zosanga khan a duh lo deuh ṭhin a; mahse, "Bawiha, in tan veka thawk kan ni a, in hrangah pawh awm la kan fa i nihna a bo chuang hleinem," ka nuin a tih vangin a hnial ta bik lo.

Rafaela te inneih ni a lo thleng a, mi kan sawm zau bawk a, kan biak inah pawh an leng lo. A Bd zirpui Lalhunruata ṭhianah a hmang a, Diktei'n bialzai pawl member a mi a ṭhiannu a hmang ve bawk.

Pastoral Committee in a awmna bial tur an confirm tawh a, Pastor leh headquarters lama mi pawimawh an rawn kim ṭha khawp mai.

A hmaa a nun ang khan la awm chhunzawm ta se hetiang dinhmun hi a thleng dawn lo a, Pathian neitu leh a inpêkna avangin khawvel thilah mi zah kâi leh rintlâk a nih phah a, chhungkuain kan thlamuanpui em em bawk.

Mokawr Var thianghlim sar inbela Diktei a cousin-in a rawn kaih luh chuan ngun tak hian ka lo en a, Saitei'n min rawn hrilhru-in, "U Duat, Diktei hi a lo hmelṭha êm mai," a ti sap a.

A ni lah tak a, make-up nasa uchuakin a hmang lo va, hmuh a nuam tawk hle, amah a nulianin a pian a dik reuh si a, Rafaela nupui atan iaina pakhat mah kan nei lo.

Kum kha leh chen rinawm taka lo nghâktu a nih bâkah sual rawng a bâwl lai pawha thlah lova vuan tlattu, ka unaupa ṭhat duha theihtawp chhuahtu kha a ni tlat a, ka ngaisang ru hle.

Rafaela te ṭhian dun ka va en leh a, a sam dum hlap viking style-a ameh ṭhin kha tlêmin a kâwng tawh a, a inhmeh tho mai. Suit dum dak hlarh a inbel te chu a inhmeh hliah hliah a, ho mai maia kan ngaih, Zosanga nena zu an inrûk te kha ka ngaituah kâi a, a hun liam tawh eng ang pawh lo ni se, tunah chuan a rinchhan Pathian kaihhruaina hnuaiah Pro Pastor a lo ni ta, ani ang nuṭâ, tum ruh leh Pathian ngaihsak mi ka nei hi ka lawm a ni.

"Hun liam tawh siam ṭhat theih lohva inhambuai ai chuan kan tun hun zel hi a ni pawimawh ni. Hun liam tawha kan tihsual avanga indawm kun mai lovin eng tin nge hma lam ka pan ang tih ngaihtuah a pawimawh a, khawvel thil ral thei leh chuai theia innghah ai chuan chatuana nunna a pawimawh zawk," tih Rafaela sawi ngei kha ka bengah a ri nawn fo ṭhin.

Kan kohhran zaipawl leh Diktei te kohhran zaipawl, Bial zaipawl telin hlâ an rem a, hetiang hlawh zo lo hian kei chuan pasal ka nei a, ani erawh vanduaina hmun aṭangin koh tur dik tak Pathian a ko tlat a, a din hmun a châwisan sak ka ti lo thei lo.

Inneih thu tiam an chham ri pawh a ring ṭha viau. Takna riau a awm a, en tawn tur amahah hian ka hmu nasa khawp mai. Ka nu leh pa pawhin an chhuang tih ka hria, fapa mal duat sual theih loh Rafaela kha a ni miau atin ni.

Pa Faka te nupa leh Lawmsangzela te chhungkua pawh kan hnung chiahah an ṭhu a, Bawihpuii leh Rohluzuali an ṭhutpui a, ka nuin Bawihtei a ṭhutpui thunga kan âwl letling hlauh.

Valpuia leh Zosanga erawh mâkpa annih angin inkhawm chhung chauh an awm ve a, thlalâkna hun kan hman zawhah a ṭûl ṭûl ti turin in lamah an haw hmasa a, Zosanga phei chu zing aṭangin kan in lamah a chhuak tawh.

Inneih buatsaih hi thil namai a ni lo a, Catering tih kan tum deuh kha a ni a; mahse, mi an tam dawn êm avangin ruai pangngai kan buatsaih ta zawk a, Bâwng pakhat leh vawk pahnih kan talh a ni. Rafaela nupui neih tum hmasaka Ramtei khatianga a lo awm te kha a hun laiin na mah se Pathianah nun thar a neih phah hlauh.

'Pathian hian kan ṭhatna turin eng kim a thawk ṭhin' tih chiang takin ka hriat phah.

Thlalâk chhung a rei deuh bawk nen kan hun a zo a, Saitei leh Rinsangpuii te nen in lamah kan lo va haw hmasa ta a. Diktei nu leh pa te lam pawh an hlim ve viau chuan ka hria, an mâkpa turah hian an lung a awi ve ngei ka ring.

[RAFAELA]

Ka nupui lo ni ta Lalrindiki nen khum khata mudunin nupa kan nihna kan nem nghet a, chunglam remruatnaa innei kan nih miau avangin a malsawmna kan dawng nasa khawp mai.

Ramthansangi nena inneih kan tum lai te kha ka ngaihtuah lêt a, a hun lai khan duh leh hmangaih viau angin lang mah ila, kohhran lam ngaihsak mi a ni lo a, ka duhna dah lianin inneih puiah ka sawm a, a hlawhtlinna pe theitu lam ka lo thlîr miah lo atin ni.

Rilru nâ avangin zu hmunah ka tâl a, bial zaipawl conductor aṭangin ka bâng bawk a, zû hian hlimna leh hahdamna min thlen loh zia ka hriat chian phah bawk. Diktei nen kan inkawp tirh lai te ngaihtuahin Pathian min pêk liau liau ka ti ve tlat.

Keini chuan hma lam hun tur kan hriain kan dâwn phâk lo a; mahse, min dintu leh siamtu, min hre fiah fai vektu hian ka tâna ṭha tur kawng min kawh hmuh zawk a lo ni.

Kan eizawnna dârthlalang dâwr te pawh a enkawltu tur awm chhun ni mah ila, ka kalsan a ngai ta si a; mahse, ka âiawh tur mâkpa ṭha tak Valpuia min pe leh tho. Ka nu leh pa enkawla châwm zâwk tur ni mah ila kei aia thil tithei chunglam ami hnenah ka hlân fel vek a, ani'n min ngaihtuah sak dawn tih ka hre si a.

Ka awmna tur hi Mamit district-a pastor bial pakhatah a ni a, Diktei ka hruai ve thei rih dawn lo thung. Ama hnena ka sawi pawhin, "Khawi hmunah pawh awm ila, pumkhat kan nihna a bo lova i rawngbawlnaa ṭawiawmtu nih hi ka tum ber a ni," a ti thlap.

Ka nu leh pa erawh chuan hruai ve turin min ti a; mahse, ṭûl ka ti ber lo. Nakinah hruai loh theih loh hun ala awm ngei dawn a, tuna tan chuan kan in te ka nu leh pa, ka chhungkua hi lo bêlchiang se a ṭha zâwk.

U Duati leh Saitei'n an ngaina sa a, Zosanga'n ho deuh deuhva fiam a ching ṭhin. Anni chhungkua pawh an ngaihtuahawm tawh lo a, piangthar ṭha hluai angin lang lo mah se an tun hma nun an thlah fel ve ṭan ta.

Lawmsangzela te nupa pawh fâ nei thei lo anga kan ngaih kha an ni a, Phâi lamah doctor thiam vawi eng emaw zât pan mah se fâ pe thei tu chu Pathian chauh a ni tih an hriat theih nân ṭawngṭai dam thei leh khawih thiam an pan aṭangin nau an pai ve ta kha a ni a, doctor thiamna bâkah a pawimawh hmasa ber chu Pathian bawk a ni.

Rinsangpuii nulât laia a damloh te khan doctor-ah damna famkim a chang lo a; mahse, a damna chu Pathianah zawk a ni. A mi hman Bethel ministry kal tlangin a dam ta a nih kha. Pathian hian kan mamawhna zâwn ang zelin kan kawng tur a lo ruat a, chu chu zawh thiama amah beisei tlattu te a ti beidawng ngai lo.

Kan inneihni khan Masky Recording studio neitupa Ar eL-a pawh kan sawmna ngaipawimawhin a lo tel thei a, Bible min present a, a chhunga Pathian thu inzep (Book Mark) ka chhiar chuan he thu hi a lo a ni a,

"Ephesi 3: 20

Tichuan, keimahnia thawk ṭhin thiltihtheihna ang zêlin, kan dîl leh kan ngaihtuah zawng zawng aia nasa zâwk ti theitu hnenah ngei chuan chatuanin, chhuan zawng zawng thlengin, kohhranah leh Krista Isuaah chuan ropuina awm rawh se. Amen"

Ka chhiar zawh veleh bible chu khupin, Pastor anga rawngbawla ka kalna apiangah he Bible hi ken ziah ka tum ta a ni.

Pathian mi hman te hi an ropuia a hman theih tura min thlang hi ka lawmna tizualtu a ni. Vanlalsailova te Team khan kan kohhranah crusade lo nei ta lo se ka nun ngaiah ka la awm lovang tih tunge sawi thei?

Kan inneih aṭangin kâr hnih a liam tawh a, Diktei pawh a hriatsa chhungkuaa lâwi lût kha a ni a, a tlângnel ve nghal mai.

"Rafael, eng eng nge i ken dawn?" Kan room aṭangin Diktei a rawn chhuak a, naktuk hian Mamit lam panin kan kal tawh dawn a, ka pain min thlah dawn a ni. Diktei kal ve a tum a, ka remti ta lo.

Pasal te awm lo pawha in lama awm thiam a zir ṭan nghal a ngai a, ka kianga a awm theih hun tur Lalpan rem min ruatsak mai ang.

Ka thawmhnaw ken tur siam turin kan nupa room-ah kan lut ta a.

[Thla li hnuah]

Zosangmawia

Duati nau neih a hun tawh avangin Durtlâng hospital kan pan leh ta a, tun ṭum chu a vei rei phian mai.

Zing lam dar hniha kan kal kha a tûk leh tlâi lamah a nei ta chauh a, pumna saa lût kan ni leh nghal, dik tak chuan ka mang a lo ang ru deuh tawh a, tih vak ngaihna awm hek suh, pâwnah a nu leh pa leh Diktei te nen kan nghâk ṭhap a.

Rafaela'n "Kan lo ṭawngṭaipui reng che u a nia," a tih vangin ka thlâ a muang deuh. Ka nupui hi ka hmangaih a, ka fate pawh ka hmangaih bawk.

Kan fate pahnih Rinsangpuii'n a lo awm ringawt a, Saitei a hnaah kal a ngai si a, mi ai kal a nih vangin chawlh a la hreh deuh niawm tak a ni.

Pa Zirsanga leh nu Mafeli te haw thla rih tura kan tih pawhin an duh tlat lo. Duati an hmangaihzia ka hre chiang tawh a, ka nawr lui ngam ta bik lo a, tlai lam dar nga bâwr velah fapa kan nei ta tih nurse-in min rawn hrilh chuan ka lawm kher mai.

Amah Duati an la rawn nawr chhuak lo a, upat lam a pan chho ve zela mipa kan nei ta bawk nen tun bâk hi chu nei tawh lo mah se ka pawi ti vak lo.

Spi ka phone nghal a, naute thar kan neih thu leh Bawihpuii te unau rawn hruai turin ka ti a, ka nu leh pa erawh a hranin ka hrilh thung.

Ka nu a lawm ngei mai. An vaia lo chhoh an tum a, ka fapa 3kg leh 700gram a rit niin a hmel a fai vung mai. 'Second Zosangmawia' Hus! Ka nui suk suk ringawt.

Duati an rawn dah chhuak a, chau tih hriat tak hian min rawn en a, "A hmel ṭha i ti em?" Tia min zawh chuan, "Ka hmel hi ṭha i tih leh tih loh a ni mai," nui ruh ruh chung hian ka chhâng a.

"I chhia, i va han chhe tak," thei leh thei lo hian a ti sap a, a nuih a za ve reng tih ka hria.

Chutah, thu tak deuh zawk hian, "Ka duat nu, fapa min hrinsak avangin ka lawm e," tih pahin a biangah ka fâwp zauh a, a zak leh ringawt tawh. Kei ka'n zah loh sih sah mai nen, ka nupui laka lawm thu ka sawi ve na ni miau hek le.

Khawi hmunah mah ka Duatbîki hi ka zahpui ngai lovang.

"Mi dang awm ve laiin khatiangin ti tawh suh," a ti a.

"Ho êm mai, i hmuiah ka fawh nghâl loh," tia ka chhân chuan a meng kal deuh ralh a, Bawihpuii te unau an lo thleng ta bawk nen min chhâng zui tawh lovin a fanute a ngaihsak ta a.

An nau thar an han hmu chu an inchuh titih a, an inbih chhâwk sek mai. "Âpa ka ta tur tiraw?" A nau zawkin a ti heu mai.

Naupang awm rei an phal si lova pawn lamah ka hruai chhuak ta a, Rinsangpuii leh ka nu leh pa'n an en ve bawk a, "Patling i ni ve tak tak ta," min tih chuan ka nui suk.

Lawmsanga ten fapa pakhat tal han nei ve se chuan kan lawm a kim tur. Tunah Spi'n nau a pâi ve ṭan a, thla thum pawh ala tling lo, a hriselna a ṭha phian a, insawiselna em em ala nei rih lo chu a nia.

Rafaela'n min lo phone a, "Zosang, i nui reng antia a dik em?" Tiin a a nui hawk hawk a, "Nuih lohna chi ninghal lo chuan, i fa te'n ka fa te an ngam dawn ta lo phawt chu a nia," tiin ka fiam a, a nui nasa khawp mai.

Thla li lai Mamitah a awm ve tawh a, a chhuk aṭangin a lo la chhuak chho lo. Mahse, kar leh nilai ni khian meeting kohhran thilah annei dawn a, nihnih lek châmin a rawn chho lawk dawn niawm tak a ni.

A khât tâwkin a û a rawn be ziah, kei pawh min be ve fo a, naupang a duat a, 'a putea' hi chu an lam sek mai a ni.

Cabinah insawn kan dil a, Diktei'n zanin chu a riahpui phawt ang a, naktuk zanah Spi emaw ka nu emaw an riak ang, nu Mafeli'n riahpui a tum deuh kha a nia, a kâwng herh ala dam chian loh avangin a zuam meuh lo tih a sawi.

Saitei te chhungkua an rawn lang lo va, Valpuia'n Rafaela ai awhin an dawr a nghâk nitin a, vawiin pawh hian bungrua a rawn thlen dawn avangin a lo chho ve thei ta lo a ni.

Ani hi zawng a puitling a, ka tluk lo khawp mai.

Rafaela te'n fa anneih ve hunah "RAPSAGYAN FAMILY" Member kan pung leh sawt dawn tihna a ni mai.

[Diktei]

Damdawi inah u Duati awmpuiin ka awm reng a, zan thum ka riahpui hnuah Spi'n zan hnih a riahpui ve a, tunah chuan damdawi in an chhuahsan tawh a, in lamah ka nu nau bual turin nitin a phei ve thung.

Ka hna ka ngainat em em pawh tunah chuan ka thawk zui thei ta lo a, Pastor emaw Pro Pastor nupui tân Sawrkar hnathawh a rem tawh si lo a, kan inneih hma lawk khan ka bâng fel ve ta a.

Mihring lam aṭanga thlir chuan uiawm tak a ni. Mahse, Rafaela lo sawi fo ṭhin angin, "Kalsan nei lo hian Pathian rawngbawl a harsa a, kan kalsan erawh a inang vek kher lo, ruih theih thil tichunga Pathian rawngbawl a rem lo a, nulât tlangvalna kawng zawh chungin a rem hek lo," tiin min hrilh ṭhin.

Ka nu leh pa thar te an fel a, an phâk tawkin min duat thiam viau. Kan in lamah ka lêng ngai mang lo a, "Va lêng ve rawh, kal ve rawh," min tih pawhin a ṭûl hle a nih loh chuan ka lang khât khawp mai.

Rafaela nen kan inbe ziah a, a hna zawm thar pawh nuam a tih thu a rawn sawi a, meeting turin a lo haw zawk dawn tih a sawi chuan ka lawm ngang mai.

Kan inneih aṭanga kâr thumnaah min kalsan ta kha a ni a, ka ngai veng veng zel. Mahse, kan inngaihzawn lai ang a ni tawh lo a, a nupui ka nih tawh tlat avangin tawrh chhel zirnaah ka ngai ve tlat.

Sipai te pawhin kum rei tak tak an nupui te an thang bosan a, eng nge ka theih loh bik ang ti zawngin ka ngaihtuah ve mai.

U Duati te naute hmêl ka hmuh khan ka awt rilru khawp mai a, eng tikah tak nei ve ang maw.

Saitei te nupa hi chu an rawn lang zing deuh a, u Duati tak phei hi chu a lo kal khât khawp mai. Min rawn be ve zauh zauh ṭhin a, upa ber a ni bawk a, a puitlingin a nu leh pa a zah thiam ka ti viau.

Kan inneih ni te khan ka rin phâk bâkin mi an tam a, keini lam chu thu hran, Rafaela te vuavang leh neuh neuh an tam khawp mai. Hetiang nun a lo nei ta hi thinlung takin ka lawm a, atih lam chu ti tlat mi a ni a, 'a ni chu ni, ni lo chu ni lo' tia rilru nghet pu a nihna hi amah ka ngaihsanna chhan pakhat a ni bawk.

Vawiin tlaiah Rafaela a lo thleng dawn a, a theih ang angin ka lo inbuat saih ve a, zan hnih chauh mah ni se ka thlahlel ngawih ngawih, hrehawm ka tih leh tih loh min zâwt fo a, inthlahrung lo tur leh mahni in anga ka awm thiam phawt chuan ka tan a nuam ang tih a rawn sawi zing khawp mai.

Tlai dar nga velah kan in kawtah car a rawn tlân lût a, rang fahran hian ka tlân chhuak nghal a.

Car aṭanga rawn chhuak ka pasal hmel fai vanga nui hmel rawn lang ka hmuh chuan a awmna lam panin ka pên phei ta a.

"Hey, i ṭha maw..?" Tiin ka dârah a rawn vuan a, ka ṭah a chhuak ringawt.

"Umn..aw.." ka ti bah nak a.

A hmel ka han hmuh leh chiah hian ka lo ngaihzia ka hre thar.

"Dikte.." ti leh supin in lam min panpui ta a.

Ka nu leh pa an lo chhuak bawk a, "Bawiha, ka rin aiin i lo thleng hma," ka nu in a ti a.

"Nia, kan rawn chhuak tlâi zawk êm a," tia chhângin in chhungah kan inzui lut ta a.

Kan nula nen a thil lo hawn vel la turin pawnah kan chhuak leh a, chawhmeh a rawn hawn nual. Thawmhnaw eng mah a rawn keng lo a, a tam zawk inah a awm tho a 'a ngai lo' a ti te pawh a ni mahna.

A lo haw tih a unau te ka hrilh ve nghal a, an nuṭapa hi an ngaiin an zah der tih ka hriat vanga phone ka ni.

"Ka lo kal thei dawn si lo a, nang mahni lo lêng mai r'u'' u Duati'n a rawn ti a. Saitei te chuan zanah lo kal an tum tih an sawi.

U Valpuia glass house aṭangin a lo la haw thla lo a, a lo haw thlâk apiangin pawisa a rawn submit thlap a, thlakhatah engzat chiahin nge an inchhawr ka hre lo naa a taimain a rintlâk khawp mai.

Zanriah kan ei kham a, Saitei te lo kal hmain U Duati kan va tlawh zawk a, an naute hian a pa hlauh a chhun! Rafaela pawhin a lâwmin a pawm ve a, a û a zah thiam zia ka hmuh hian a entawn tlâk ka ti. Tun hma te kha chuan u Duati kha a tâl ho ve ṭhin viau a, khati chung pawh khan a ngaihsakin a duat em em reng tho.

Bawihpuii te unau pawh a hmingin thil a hawn sak ve a, a putea hi chu an ngaisâng ve chiang a nia, a chhawn chhaih peih si. Kei thleng pawhin min nêl ve tawh viau.

Rei awm thei kan nih loh avangin kan haw leh ta vat a, Saitei te chhungkua leh pa Faka te nupa an rawn phei bawk a, ṭhenawm in lêng pahnih khat kan nei bawk.

Chutia kan lo rîk laih laih lâi chuan YMA Information aṭangin chhiat tawh thu an rawn puang ta thut mai le!

"Pu Lalfamkima leh Ramthansangi te fapa Lalpekkima chu tun mai khan Civil Hospital-ah a boral a, khawtlâng mipuite kan han inhriat tîr a ni e," tiin an rawn âu ta thut a, naktuk dar sawmpahniha vûi tur a ni.

Kan ngawi ṭhap a, kan hawi phâwk hlawm ngang mai.

Ka nuin, "Ramtei te fapa hrisel lo ve deuh kha a nih dawn chu, a upa ber kha, a pa lah Jail-ah a tâng daih mai si a, a va han pawi ve maw le," a ti ta a.

Rafaela ka va en a, ngun taka thil ngaihtuah hmêl a pu.

Saitei'n, "Ka û laka khatia a awm vang kha a ni ang, an tluan loh em em," a rawn ti chhuak phawng a.

"Saite, khatiangin an sawi ngai lo, Pathian hian kan tih sual an zelin hremna min pe nghal se dam tlâk kan awm nâng, chunglamin hun a ti tihna a ni mai," Rafaela'n a ti ta a.

Ka nu leh pa pawh kal ve an tum ta si a, keini nupa erawh in lo nghâk turin min ti a, pa Faka te nen an paliin an chhuak ta a. Saitei te pawh rei awm lovin an haw ve nghal bawk.

"Khawvelah hian kan kum hlun dawn si lo a, Ramtei pawh Pathian a hre lo êm a, khawvel thilah tlânin a rinawmna a hralh a, Famkima pawh chuti tho, Pathian hremna ni lovin, Pathianin amah an hnaih theih nân kawng a hawnsak niin ka hria," Rafaela'n a rawn ti chhuak ta a.

"I khawngaih em?" Tia ka zawh chuan, "Tuna ka rilruah chuan khawngaih e; a hma ang rilru kha la pu ni ila chuan a dan a dang viau ang," a ti sup.

Ni e, ani zawng a rilru a ṭha êm a, thil eng kim hi a dam zawng zelin a thlir tawh a, a fakawm a ni.

Ka nu leh pa nghâkin TV kan en a, inngheng riala ṭhu dunin kan titi sap sap a, a phone a rawn rîk chuan kan phu zawk, zan dâr 11 ah tu nge rawn call ang.

Kan bialtu Pastor a lo ni a. Eng ati teh tlat nge maw ni? A rawn be tlai bawk si!

Rafaela nen an inbiak lai chuan thingpui lum turin ka kal sawn ta rih a.

Thingpui no chawiin sitting room ah ka lêt phei leh a, an lo inbe zo ve chiah.

"Eng atan nge a lo biak che a?" Tiin ka zâwt ta a.

"Naktukah kan bial chhungah tho hian dân anga innei tur an awm a, 12 kha invawn hun a ni si a, helamah mitthi an awm bawk nen, vûina hun lo hmang turin min rawn ti a nih kha," a ti a.

"Eng lo.. Ramtei te fa i vûi dawn a maw?" Ka ti hliai a.

"A nih mai loh chuan, ka lo haw lâi a ni a, an hre ve vek bawk si alawm," a ti leh mai a.

Ka lo huphurh pui ve ringawt, Ramtei nena an tun hma chanchin kha an hre deuh vek si a, sawi tur apui an ngah hlawm ngawt ang.

Ka nu te lo haw hnuah ah kan la ṭhu muang a, a nat dan kimchang te ka lo zâwt ve bawk a, Rafaela erawh naktuka a programme hman tur inbuatsaih nan rei lo tê inkhung hran a duh tih sawiin mikhual pindanah a lût ta rih a.

Kan bialah hian Pro Pastor an la rawn dah thar ve lo a, tuna kan Pastor hi a indaih lo thei khawp mai. Min inkutsuih tîrtu kha a ni nghe nghe.

Rafael Remruattluanga'n Ramthansangi te fapa a vûi dawn ta a nih chu, khawvel hi chu a mak mang e.

A tûk hma takah kan tho a, kan nupain mitthi in lamah kan phei ve a, mi an tam ang reng, min lo chibai hlawm bawk a, tun hma kan boruak kha ka mitthlâah a rawn lang iar iar mai.

Famkima Jail aṭangin an rawn hruai chhuaka a fapa thlahna hun a hman ve theih nan an zuk dilsak a ni awm e.

Peka an fapa chu kuangah an lo dah tawh a, tunah hian Ramtei te in lamah an awm a, Famkima a tân tâk hnu khan an in lamah an lêt leh a ni. Kuang bulah chhung leh khat an ṭhu ṭhap a, mit bûi chûka Ramtei rawn dâk chhuak nen chuan kan mit a intawng sak.

Min en chîk hle hnuah Rafaela a en leh ta a, BD a zir tih te kha chu a hriat ve vek ka ring, Pro Pastor a ni tawh tih pawh a hre thovin ka ring a, mak a ti ngawt ang chu.

Ṭhut hmun kan rem a, Ramtei te nufa ṭap ri chuan rilru a ti hrehawm ang reng. Peka hi a hrisel lo hrim hrim a, damdawi inah vawi eng emaw zât an awm tawh a, tuna a thih chhan tak hi chu Lung vûng a ni a, kâr khat damdawi ina an awm hnuah nizan khan a boral ta a ni.

Tun hma kha leh chena a lo lên luhna inah Mitthi a vûi tur hi a mah pawhin mak a tiru ve tho vin ka ring, an hriatsa mah ni se, an en duh hû hlawmin ka hria.

Dârkâr 5 hnuah

Tualchhung kohhran upain hun a hmang hmasa a, chhungkaw âi awha thu sawi te a zawh hnuah, Pro Pastor Rafael Remruattluanga ka pasal ngei mai chu vûina hunserh hmang tur leh thu chah tâwi sawi turin an ko ta a. Ka rilruin ka lo ṭawngṭai mawlh mawlh.

Pathian thu a chhiar hnuah thu hma tlêm a nei a, ṭawng thâwm eih pawh a awm lo. Ngun takin thu sawi an ngaithla vek nimaiin ka hria, ṭap thâwm pawh a awm chuang lo. Famkima leh Ramtei kuang kîlin a lu lamah an ṭhu a, anni pawhin ngun tak hian thu sawi an ngaithla tih ka hria.

"Khawvelah hian a nuama te an nuam reng lova hrehawmna leh thihna tuar te pawhin an tuar reng bik lo. Chuti a nih rual chuan Pathian hian kan rilru put hmang a zir zelin kan chungah a thlen tîr tih hriat hi a ṭha khawp mai, kan kum hlunna tur ramah kan awm lova kan khualzin kawng kan zawh mêk zawk a ni. Kan phurh zawh loh khawpa rit kan kovah Lalpan a nghat lo bawk ang tih hi rin tlat tur a ni a, he in chhunga thihna lo thleng hi a nâ a, naupang pawisawi lo leh rilru thianghlim tak pawh an thi ve thei tho tih a târ lang chiang hle, Peka hian Vanram a kâi ngei pawhin ka ring. A nu leh pa, a pi leh pute ṭhenrual ṭha te hian amah ngaiin ui viau mah ila kan thlah liam a ngai dawn ta si a, kan fapa kalnaah hian ka kal ve ang em? Tih hi inzâwt ta ila, a dama te kan pawimawh a, khawvel inṭhenna ramah kan la inṭhen zel dawn. He thihna hmang hian he inchhungkhurah hian Lalpan ropuina chang se, piangthar tawh kan ni emaw la piangthar lo kan awm a nih pawhin eng tik niah emaw chuan kan la thi ṭheuh dawn, chutih hunah chuan khawiah nge ka thlarau a kal ang? Tih kan chhût hi a pawimawh hle a ni." Tiin a sawi a.

Fuihna thu leh eng eng emaw a sawi a, "Kan hun liam tawha kan tih sual kha thaibo thei lo mah ila, tun aṭang hian nun bula Krista nen tiin a la ṭan theih reng a, tlai lua a awm lo," tih te pawh a sawi tel bawk.

Pathian thu chah a sawi ka la ngaithla bik lo a, Pathianin a rawngbawl tura a koh a ni a, a sawi nung tak zet.

Ramtei nena an tun hma chanchinin a tibuai lova a tih tur dik tak Pathian thu leh fuihna thu a tîrtu rin chhanin a sawi mai a ni.

Malsawm ṭawngṭainaa a thlah zawh hnuah chhungkaw lam aṭangin thlahna hla tur an rawn thlang a, hemi kan sak zawh hian thlalâkna hun an hmang ang a, thlanmual lamah an kalpui tawh dawn a ni.

Vûitu Pastor-in thlâ a lâkpui hmasa ber a, ti khan a indawtin an la chho ta a. Kei erawh a sirah Rafaela nghâkin ka lo ding ve rân a, ka rin phâk bâkin a sawi ṭha, ka pasal a nih vanga fak ka ni lo a, amahah Pathian hnathawh a lo lang zawk a ni.

Pêka thih aṭangin nikhat a liam tawh a, Rafaela chhuk a hun ta a, vawiin tlâiah chhuk a tum vangin inah kan awm hlawm a, U Duati pawh nau nen a rawn phei ve. Saitei te chu an rawn riak sa a, Valpuia hna a laklawh deuh avangin a haw tlai dawn sia, naupang nen zan tîrah an lo phei kha a nia.

Naupang an ninhlei a, an rîk nuai nuai lai chuan Ramtei nuṭapa kha a lo lût hlawl a, Rafaela nen min rawn ko ta a.

A ngaihna kan hre lo dun nasa.

Bike in kan chhuk ta a. Mi an lo tam vak lo.

In chhung kan lut a, Famkima leh Ramtei'n an nupa pindanah min ko lut a, mittui tla zawih zawihin Rafaela ngaihdam an dil ta a.

"Kan tih dik lohna anga min thungrul lovin kan chungah ṭhatna i lan tîr a, i pawi leh in chhungkaw pawi kan sawi nasat zia hi ngaihdam tlâk kan ni lo; mahse, Pathian hmingin khawngaih taka min ngaidam turin kan ngen a che," Famkima'n a ti ta a.

Hemi hnu hian Pathian thu hrilhin an lu chungah kut nghatin ṭawngṭaisakna a nei ta a, ka mittui a lo tla ve hial.

"Ngaidamtu thinlung put hi a ṭha a, chu chu kan Pathian duh zawng a ni si a." ti dam thlupin a chibai ve ve a, an hlimin an lawm tih an hmelah a lang reng.

Ka pasal hi ka va chhuang si êm.

TLIPNA

Kum thum a ral leh meuh chuan 'Rapsagyan family' member thar pathum lai an awm belh ta.

Zirsangliana leh Dr.Remruatfeli (Rapsagy) tû leh fate-ah Duati'n Zosangmawia nen fa hmeichhia (phìr) leh mipa pakhat an nei a. Rafaela leh Diktei'n fa mipa pakhat kum hnih mi an nei bawk a, Valpuia (NÁO VÁ) leh Saitei'n fapa pahnih an neih bâk kha chu an neih belh ta rih lo.

Lalfakhlua leh Lalmuanpuii (Segundo) tû leh fate-ah, Lawmsangzela leh Rinsangpuii (Ka thlah lo'ng che) te'n fa pahnih hmeichhia leh mipa annei ve thung.

Vawiin Pathian ni-ah hian Pro Pastor Rafaela chu Assembly ah Ordain tur a nih vangin amah ṭawiawm turin Rapsagyan Family members a tê ber thlengin kal vek an tum.

Khawvela kan awm chhung hian sual kawng te pawh kan zawhin ruih theih thil, mipat hmeichhiatna bâwihah te kan lo tâng pawh a ni mai thei, chutiang kher lo mualphona dang pawhin kan nun a tibuai fo ṭhin ang, anni chhungkawh ho pawh tâl buaiin harsatna te tâwk mah se awmna ngaia awm reng tum lovin anmahni zâwn ṭheuhah hma lam panin insiam ṭhatna hun remchang an tlânpel lo a nih kha.

Chhungkuaa pakhat chauhvin sual rawng a bâwl pawhin chhungkua ati hrehawm thei a, pakhat vêkin a ṭha lam kawng a zawh a, Pathian a rin tlat chuan Kristian chhungkua a dinin a siam ṭha thei a ni.

"Tunah Pathian thu chah sawi turin 'Rev. Rafael Remruattluanga' i lo sawm ang," tia Chairman-in a hming a rawn lam chuan a ṭhut hmun aṭanga ding chhuakin mipui mit amaha fu ṭhup chu a en kual a, a chhungkuate ho pawh a thu sawi ngaithla turin a bîkin an ṭhu ṭhap tih a va hmu pha reng.

Tun hi Pastor a nih hnua Pulpita a dinna hmasa ber tur a ni.

A nu leh pa, Zosanga te chhungkua, Valpuia te leh Lawmsangzela te chhungkua te, Faka leh Muanpuii leh a nupui fanau leh a lâwina kohhran mipui te beng hriatah ngei, "Pathian beisei rawh'' tih thupui hmangin thu chah nung leh ropui tak a sawi ta a.

A TAWP TA

Ka thawnthu ziak eng teh ual ni lo, min hlutsaka min chhiarsak tute leh Youtube lama ngaithlatute zawng zawng chungah ka thinlung takin lawm thu ka sawi a,

He story hi a hautak hle a, ka theihtawp chu chhuah ve-in ka inhria a, a ṭha lo lai leh siam ṭhat ngai, in hmuh mawh tur pawh a awm nualin ka ring. Mi famkim ka ni lo atin ni, dam lohna leh harsatna neuh neuhvin min tlâk buak nen duh thusam lo lâi a tamin ka ring a, in mi hriatthiamna ka han dil nghal bawk e.

'THE RAPSAGYAN FAMILY' story min hlutsak tute zawng zawng chungah lawm thu ka sawi nawn leh e.

Ka next story tur 'SADIQI ALEAZIZ' nen inhmuh leh kan tum dawn nia.

Ka lawm e.

- BRR

Shadow of the life

B+>[BeckirafARenthleI]<+®®