1.NAOM (Mizo Love Story) -B®®

1.NAOM [Mizo Love Story]

Ziaktu: Becky Rafa Renthlei

B®®

Shadow of the life

"Khawiah nge i fa a awm?" Ka kianga ding thinrim tih hriat fahrana min melh tu chu mak ti takin ka en a, a eng chu hria ni maw! A aw râwl a ring hauh lo naa thinrim insûm tih hriat fahran hian a kut a hûm ruh tlat bawk.

"Eng nge i sawi awm zia?" Ka lo ti lêt a.

"Dâwt min hrilh tum miah suh, i fa chu khawiah nge a awm? A pain a kawl nge, khawiah chiah nge a awm?" A ti leh a, a ngaihna ka hre hlawl lo! 

"En teh, i hre sual a ni ngei ang, ṭhu ve phawt la, kan sawi dun dawn nia," tia ṭhu tura ka mitmei chuan túm bûr chung hian ka khumah a rawn ṭhu thla a, a mitmeng fiah zet chuan ngun lutuk hian min en a, ka zâm lek lek.

Ani hi kum 16 liam taa ka kawm ngeih leh eng kima min hre thiamtu a ni ṭhin a, zan khat thil thua a nu leh pa an boral aṭang khan inbiak chu sawi loh vawikhat mah a hmel ka hmu nawn tawh lo; tunah ka hmaah ṭhuin zawhna min zâwt mêk chu a ni a, engvanga ka fâ chungchâng min zâwt chiam nge  maw a nih le. 

"Naom, pasal kum thum zet i nei a, fa ka nei lo tia dâwt min hrilh tum duh suh," a ti leh a.

"Pasal nei mah ila, fa ka nei hleinem i hre sual duai a nih chu..." ka tih chuan, mit chhîng sawk chung hian, "Dâwt a ni lo tak tak maw? I damlo tih ka hriatin rang takin ka lo thleng nghal a nia, dâwt min hrilh vaih chuan a pawi ang," zuk ti ṭâlh a.

Ni e, kum thum zet pasal ka lo nei tawh ṭhina kan inṭhenna pawh kum nga lai a ni tawh bawk. Fa erawh kan nei lo a, ka taksa lama harsatna ka neih em em vang pawh ni lovin khuanu ruat kan ni lo a ni ang e, keimah tê chauhvin ka pa inah ka lêt leh ta kha a ni a, ani hian eng mah a hre zîktluak lo tih ka hrethiam mai.

Pâwl riat aṭanga pâwl sawmpahnih thleng khan kan inkawmin kan inzui châwt a, a nu leh pa a ruala an boral hnuah a zirna chhunzawm lovin a bo zui ta vang vang a ni a, khalai hunah khan mobile phone a la awm lova a chanchin hriat zuina ka nei tawh lo.

Tunah kum 16 hnuah a hmêl ka hmu leh taa ka hai hauh lo, hmâna ka ṭhianpa leh ka innghahna ka eng kim ni ṭhin Liansangzuala tho kha a la ni. A hmêl erawh a lo puitling ta.

Ngun deuhva min en chung hian, "A lo rei ta hle mai, thla thum chawlh ka laa ka nu leh pa lungphun tura lo haw ka nia," dam deuh zâwk hian a ti a. 

"E he, i nu leh pa lung in la phun na nge?" Tia ka zawh chuan, "I zawhna a mâwlmang lutuk, lungphun turin ka lo haw ti na na na a.." a ti leh nghut a. Thin chhe mang e.

"Aw, ti ṭha ve mai ta che..." ka ti nghat a. 

"Rinawm takin i tân kum 16 ka lo awm tawh a, i chanchin ka ngaihven reng bawk. Nang erawh chuan ka thî nge ka dam tih pawh i ngaihsak lo a nia," lungawi lo tih hriat ngawih ngawih hian a rawn ṭawng leh a. A sawi awmzia ka hriat loh avangin ka hawihai viau.

"Kum 16 hnuah tun hi ka vawikhat hmuh lehna che a ni a, i la thi lo chu a ni phawt a, rinawm takin min nghâk maw?..." tia nui sânga ka chhán chuan, "Ngawi mai rawh, thi pawh ni ila eng atan vak i ti tawp nang," tiin chiang kêk kâwk hian min melh a, tun hmaa ka hriat ṭhin ka ṭhian pa kha anna rêng a nei lo. Tuna mi hi chu mipa inringtawk tak leh nelawmna nei reng reng lo angin ka hmu.

"Pasal i nei a, in inṭhen hnuah ngaihzawng nghet i nei leh tawh a, i lerh mah mah." Zawi sup hian a ti leh a.

Kei erawh mak tih vangin ka meng phâwk hrâ! A chanchin chhe te eih pawh ka hriat loh laiin ani chuan ka chanchin a hre hneh hle tih ka hre mai. 

"Sangzual..." ka'n ti hluai a.

"Eng nge, mak i va ti awm ve a? Kum 16 chhung khan eng nge ka tiha eng hna nge ka thawh tih tal te pawh min zâwt ve dawn lo em ni? Ka kum zât tih loh chu ka chanchin eng mah hriat i nei lo bawk," Ngaihno bei lo zet hian a ti leh a.

A dik chiah, kei aiin kum thum chauhvin a upa a, a school luhna an sawn zin êm avanga in classmate thei chauh kan ni. Kan inhmuh hnuhnun ber khan kum 19 a ni a, tunah chuan kum 35 a ni tawh tihna. Lehkha thiam thei leh rilru chak tak a ni nghe nghe. Mahse, an chhiat tawh avang khan a tum ang pawha awm thei lovin a bo pil hmiah kha a ni a; an khua tak hi chu Lawngtlai a ni a, Lungleiah school kalin a rawn awm ṭhin a ni.

"Engtia lo lang ve hlawl nge i nih? Lungleiah in rawn insawn chu ka ring si lo a..." tihpahin khum aṭanga thawh chhuah tumin ka inbengkàng a, ka chêt rualin min rawn ban vat a. 

"Mamawh i nei em ni? Tho duh suh, ti khan sawi la ka lo laksak dawn che nia," ka bâna vuan chungin dam thlup hian a ti leh lawi a; nichina a lungawi lo hmel kha chawplehchilha reh nghalin min ngaihtuah tih hriat zet hian min en a, ka nui hak.

A lo danglam ta tak zet a ni e.

"Sangzual, chaw ei la, zanin chu riak ve ngei ngei ang che.." ka room-ah ka nu a rawn lut a, ngainá tih hriat tak hian Sangzuala a nuih var var bawk.

Thil mak a ni lo. Tun hma khan kan inah a chuangkai tam a, ka chhungte zawng zawngin an ngaina vek. Hetia a rawn lang thut hi mak ti hmel an pu miah lova mak ti awm chhun chu kei mah chauh ka ni.

"Min sawm lo mah ula, ka riak dawn chiang," nui ruh ruh chunga Sangzuala'n ka nu a chhân chuan ka lo nui ve tawp. 

"Ti khan lo inkawm r'u, chaw ei dawnah ka lo ko dawn che u nia," tiin ka nu a chhuak zui nghal a, ka room hi tlêma fâl deuh a nih avangin leh in luh pawlh nuai ka duh loh ṭhin avangin ṭûl têah lo chuan ka chhungte an lo lût ngai mang lo. Ka dam a ṭha lo deuha tun ni hnih thum hi an rawn lang zing chauh zawk a ni.

Liansangzuala chu khum aṭanga tho chhuakin ka room tukverh thlang lam bulah a ding a, pâwnlam a thlîr a, min be zawm tawh lovin ngun taka thil ngaihtuah niawm tak hian a chal a chuar leh zauh zel, tun hmaa a hmêl kha a la paih vak lo; mahse, tunah chuan tlangval puitling dik tak hmêl a pu tawh thung.

A sam dum tak ṭha zet chu a kâwng ang reng viau, vun ngo mi a ni ngai lo hrim hrima a háng chhe chuang lo bawk. Mizo mipaah chuan a sâng pâwl a ni ngei ang, a taksa a inphut nalh ru riau. A(h..) ka va han en chîk tak. 

Kan inah lokalin min be hmasa lo phei se chuan biak hmasak huphurh awm khawpa hmêl nelawm loh zuk pu tawh a!

"Liangsangzual, nupui i nei tawh em?" Bang nghengin ka ṭhu a, ani tukverh bulah ala ding reng thung.

"Ka hmingpumin min ko ṭhak suh.." a ti hmuk a.

"Eng nge? I hming alawm..." ka tih chuan, "Ka hmingpuma min koh leh chuan..." tia sawi zawm duh lo luiin a ngawi zui daiha ka khum lam rawn pan pah hian, "Nupui nei hmel ka pu em ni?" Tiin a nui suk ringawt.

"I nei ve tawh ang, a hrim hrimin min rawn tlawha ka lawm tak tak," ka ti leh a, khua a thim deuh ruai tawh a, kan ina riah a tum tak tak a nih ka ring. 

"Nei mai thei, nei lo mai thei, ka lo hawna a la rei hleinem, ni thum chauh alawm ka la awm, chuan 'Naom-lerhi' hmu turin ka lo tlân vang vang," tiin a nui suk a, a ha var rual ṭhap rawn lang chu a nalh vei phian. A in uluk viau a ni ang, ruih theih thil ti hmêl a pu hauh lo. 

"Ka awm chhung na na na hi chuan ka birh deuh tlut mai dawn che a nia," thu tak deuh zawk hian a tih zawm leh a.

Eng rilru pu-a sawi nge a nih hre mah suh ila, ka lo lawm ve ringawt. 

Mizoramah a awm lo tihna a ni ngei ang, dîl chhût taka zawh erawh ka tum lem lo. Ka nuin min rawn koh tâk avangin engmah kan sawi zui ta lo a. 

Kan unau hi pathum kan ni a, a naupang ber ka nih vang nge kum 30 ka tling tawh chung hian min la naupang chei deuh viau a, Ka û te pahnihin nupui an nei ve ve tawh a, an hnathawhna hmunah awmin an rawn haw khât ang reng khawp mai.

Kan upa ber Chhandama hi 1st Battalion MAP niin tunah Aizawlah an khawsa a, fa pahnih an nei tawh. Ka û chiah Lalchhanhima ve thung hi chu Revenue-ah thawkin Champhaiah an awm thung a, a nupui te khua a ni nghe nghe. Fa an la nei lo a, an inneihna pawh a la rei bîk lo.

Ka nu hi High school zirtirtu niin tunah chuan a pension ve tawh, ka pain sawrkârah hna nghet a nei lo a, ran vulh a tui hle thung. An fanu neih chhun hi min duat viau a, BA ka zawh hnu lawkah an rem ti lo chung Dingngheta nen kan inru a, rei pawh innei lovin leh fâ pawh nei hman lovin kan inṭhen leh ringawt. 

Kan inṭhen chhan miin hriat an tum teh naa kan sawi lo ve ve. Vantlângin an inrinsiak a ni ringawt, tun thlengin kan chhungkua leh an chhungkua bâk hian kan inṭhen chhan an hre mumal lo.

Nuthlâwi lêng leh tih takah fâ pawh nei lo ta chu nula angin ka awmzui leh mai a, hna sawi tlâk ka nei hek lo, kan inneih lai khan Urban-ah mi âi ka kal ve zawk a, kan ina ka haw leh hnu hi chuan inchhung sekrek khawih ka hna a ni mai. 

Kan inṭhen aṭanga kum hnih a ral hnu khan ka u Chhandama te bulah ka awm deuh char char a, ngaihzawng serious vak lo pakhat ka nei ve hman. Mahse, thla li lek kan inzui hnuah zu in a chîng ta riau a, ka ṭhen hmak.

Mithianghlim ni lo ta chu lerh viau lo mah ila, keima tawkah ka hawiharh ve viau tawha kan inṭhen hlima zahna leh mualphona, mahni inkiltawihna rilru ang kha paih bovin keimah dik tak Naom Lalmuanpuii, harhvang leh luhlul ru zet kha ka ni leh ṭan ta. Rual ka pâwl lutuk lo tih mai loh chu nunphung pangngai ka zawh ve ṭan.

Zanriah kan kil chhung zawngin ka nu leh pa, Sangzuala an ṭawng char char a, a hnathawh chu ka rin loh lam daih! Assam Regiment niin Lucknow-ah a lo awm char char a, a nu leh pa thih aṭanga rei lo te hnuah a kal tih a sawia ka hre ve chauh bawk.

An unau hi pathum tho an ni ve a, amah a upa ber. Farnu pakhat leh nau mipa Kimkima a neia a farnu hi chu tlai khawhnua piang a nih avangin a naupang fâl deuh.

Sangzuala en paha ka pain, "I loan lâk te chu i rûl zo dawn tawh em?" Tia a zawh chuan amah ka va en a, "Zo ve thei hrâm, in sak ṭhat kha ka hmanhmawh si a," tiin a chhang a.

"Nang zawng rilru i nei a, in ṭha deuh bâkah i naute pahnih i enkawl puitling titih tawha ka chhuang ngawt mai che," ka pain a tih zawm leh chuan sawi tur ka hre ve lo rêng rêng. Ka nu leh pa hian eng chena tam nge Sangzuala chanchin an hriat bîk le!?

Zanriah kan ei kham a, ka room lamah ka insaseng leh nghal daih a. Ka zunkawngah hnâi a tam avangin khawsik ser ser ka nei reng a, kan in entîr tawh avangin tlêm chuan ka zia deuh, Sangzuala hian ka dam ṭha lo tih eng tin nge a hriat tih hi ka la hre ta chuang lo.

Ka nu leh pa te nen thingpui hâng inin sitting room lamah an awm a, Lungleiah chhungte an nei ve tho sia kan ina rawn riah a tum hi mak chu ka ti ru deuh. Mak deuh maiin tun hmaa ka nel ang khan ka nêl teh chiam mang tlat lo, a nungchang zawi ruih te hian a ti hlauhawm zâwk em maw ni.

Regiment-ah kum 16 teh meuh han ṭan chu ka ngaihtuah zâwng pawhin ka lo huphurh lâwk hial. Thla thum chawlh a nei tih kha a sawi tawh a, a nu leh pa thlan siam tum a ni tih a sawi tel tak kha maw le. 

Kan inkawm ṭhin lai khan min duatin a neih ang ang te kha ui lovin ei tur pawh min pe ve zel ṭhin a, zirna kawngah pawh kei aiin a ti ṭha zawk ziah. Mipa ṭawngtam tia sawi tur a ni hran lo a, kei nen erawh chuan inngaihzawnna kawng tih loh chu eng kim kan ti dun ti ila ka sawi sual lo ang.

Ka room kawngkhar a rawn inhawng a, "I zia deuh em, chaw i ei tlêm hle mai," tiin khumah a rawn ṭhu thla a, lukham sira ka phone dah ban zui zatin, "I password sawi rawh," a ti a.

"Sangzual, eng nge i tih a?" Tiin, ka phone chhuhsak tumin ka va ban a, "I phone ka check dawn, i phone thil ti theiah hian eng eng nge awm hriat ve pawh a châkawm a lawm le," a ti deuh hmuk.

"Zak lo siah," tih pahin ka melh kâwk a, "Pasal nei thawt thawt lo khan min lo nghâk thei lo em ni?" Zawi supa tiin ka kut pahnih a hmer kawp a, a la chelh nghet em em zui.

"Eng vangin nge ka nghah ngawt ang che, i chanchin eng mah hriat tur a awm hleinem, inngaizawng lai pawh kan ni lo a, i duh duh sawi ringawt suh," tihpahin ka kut a vawnna phelh tumin ṭan ka khawh a, engah vak a ngaih loh hmel, min thlah duh chuang der lo.

"Ka mitmei hre thiam duh hek lo che, mahse; tunah chuan ka chhuah tawh dawn miah lo che a nia, Dingngheta tih vel ai chuan ka ṭha zawk," induh tâwk zet hian a ti leh a, ka ngei a nia.

"A hma khan min duh ṭhin tihna mi?" Tia ka zawh chuan nui chung hian, "Ngaihtuah lêt leh mai rawh, i thluak a thâwl thei ema engmah i hre thiam ngai lo," a ti leh a, mak ka ti takzet. Khang hun laia min ngaihsakna leh min duatna zawng zawng te kha ka la hre vek; mahse, min duh vang a ni ang tih rin ngaihna ka hre ngai lo.

"Ka ngaihtuah lêt peih tawh lo, kum a liam tam tawh êm mai..." ka ti deuh kher a.

"A dik, tunah chuan puitling kan ni ve ve tawha kan duh zâwng leh duh loh zâwng pawh kan sawi ngam tawh a lawm. A bîkin experience ngah zawk i ni a, hun kal tawh kha dah ṭhain zanin aṭang hian bul ka ṭan ang, i ṭhianpa Liansangzuala kha ni tawh lovin i bialpa nghet nih ka tum tih kha lo hria la.." tîm map lo leh zâm miah lova a ṭawng lai chuan sawi ber tur hre lovin ka lo ngawi rauh rauh.

"Naom, zan hnih bâk ka châm thei dawn rih lo a, inngaihtuah nân zan hnih hun i nei a nih chu, nupui neih hun ka ni ve tawh a, midang zawn buai ka tum lo tih hre tel ang che," a tih zawm leh a, "I kâ a kuaa i ṭawng ve mai mai a nih kha, inngaizâwng chi kan ni lo, i sawi tawh kha ka hre lo der ang," ka ti a.

"Ka sawi angin ka awm ang, i nu leh pa engkim lo zâwt ang che," tia min vawnna thlahin a ding chhuak a, "I room leh lam, i u Chhanhima room hluiah hian ka riak dawna min mamawhna i neih chuan min ko dawn nia," tiin min en tawh lo hian ka room a chhuahsan nghal vut. 

Ka mumang emaw ka ti rum rum, a duh duh a sawi a, min ngaichâng eih bawk si lo, a mizia khâ mak ka ti thlâwt. Chutah inngaihzawnna lam hlir min la sawipui zuia Sangzuala hi a â a ni ngei ang. 

Lukhamah ka lû nghat chawrhin ka maimitchhing vang vang a, tunhmaa a hlim hmel leh nui hmel ngaihawm zet kha mitthla leh ka tum pawhin nichina a hmêl nelawm loh hlir bâk ka mitthla thei lo. 

A chanchin ka hriat tlêm zia ka ngaihtuaha tunah leh lek phei chuan eng angin nge a khawsak tih leh a mizia pakhat mah hriat ka nei tawh lo. 

Dim tê-a tho chhuakin sitting room lamah ka phei a, tumah an awm lo. Tunah zan dâr riat leh a chanve chauh a ni a, ka nu leh pa an la mu lo tawp ang, Sangzuala erawh ka û room-ah a awm a nih ka ring.

Ka nu te room-ah ka va lut ta a, ka pain Bible a lo chhiar a, ka nuin diary a lo ziak thung. Min hmuh veleh, "I nuam lo deuh em ni?" A lo ti vat a.

"Nuam e, a la hma sia in reh ṭhap bawk si a.." ka ti a.

"Sangzuala a chhuak lawka i pa nen ringawta ṭhut reng ka peih lova.." tiin a thil ziah lai a dah a.

"Khawiah nge a kal a?" Tia ka zawh chuan, "A hrilh che emaw ka tia, a patea tun hmaa a awmna ṭhinte inah khan a kal lawk dawn a nih kha," a ti a. Min han hrilh ṭhat ve mai awm, mu tur ni awm tak khan a chhuak vut a; a lên duh vang lek.

"Bawihi, Sangzuala rilru tur hi ngaihtuah ve la, ngun takin inngaihtuah ang che," dam thlapa tiin khuma ṭhu turin min mitmei a. 

"Nu, eng nge i sawi awm zia?" Meng phar âkin ka en a, vawiina ka thil tawn hi a mak tlat. Ka nu leh pa lah hi an lungawi hmel ropui si a, eng mah ka hre ve thiam lo.

"Ka thu sawi tur hi ngun takin ngaithla ang che, Sangzuala nu leh pa a ruala an boral thut kha i la hria ang a, kum 19 emaw lek a la nih kha, khatih hunlai khan a naute pahnih enkawl a ngai a, eng mah thawh chhuah a la nei bîk si lo a, a nu leh pa khan kum 25 a tlin huna a lâk chhuah theih turin bank-ah nuai riat an dah a, Lawngtlaia an shop-pass hralhna kha a ni a; khatia an thih thut khan posmortem lovin an phûm ta mai si a, an thih chhan chiang taka sawi fak tur hriat a ni lo. 'Lungphu chawl' an ti mai a, a pa kha a thi hmasa zawka a hnu darkâr hnih hnuah a nu a thi ve leh a," ka nu thil sawi chu mak ka ti ngei mai, chil lem khalh chung hian a ngawi dat a, chu tah ti hian a sawi zawm leh a.

"Sangzuala a fel a, a kum phu lovin a puitling reuh nen an VC te puihnain Assam Regiment lâk thar zingah a tel ve ta hlauh mai a, a nu leh pate thih aṭanga thla hnih hnu lekah a ni nghe nghe, a nau te pahnih kha a putea te nupa kutah a dah a, ama awmna ṭhin a patea te nen hian eng emaw thilah intih thiam lohna an nei niawm tak a ni, an hnenah a nau te kha dah lovin a nu unaupa te hnena a dah daih kha miin mak an ti viau. An in pui mi luah hawh tîrin a luah man a putea te khan an hûi a, amah Sangzuala khan a hlawh chanve a naute zirna atan a rawn thawn ṭhin bawk; mobile phone a la awm loh avangin a nau te pawh a be khât khawp mai." A tih zawm leh a, zawhna eng mah zawt lovin ngun lutuk hian ka ngaithla a.

"PCO aṭanga a rawn biak zeuh bâk chu amah a rawn haw ngai lo hrim hrim, kum 25 a tlin khan thlakhat chawlh lain a rawn haw hlawl a, Kimkima pawhin pâwl 12 a pass ta bawk a, Mimte-in pâwl 8 a zir ve ṭan chiah bawk a, a awmna hmun Lucknow-ah a naute pahnih a hruai thla ta daih a, an in luah man a zat ve kha a putea'n bank-ah a dah ṭhatsak zel bawk a, i rin aiin Sangzuala hi a puitling ang," tiin khum aṭanga tho chhuakin, "Thingpui kan lum ang e, i pa in a duh ang," a ti zui daih a.

Ka nu chu choka lamah ka zui phei a, "Chuan eng tin zel?" Tia ka zawh chuan, "BA i zawh hnu khan kan inah a rawn kal a, i û awmna Champhaia i zin hlan kha a nia, a duh thu che min hrilh ta a, a tîr chuan mak ka ti viau; mahse, "Nu Par, in leh lo ṭha leh ka dinhmun ka sawh ngheh hunah lo chuan ka lo haw rih dawn lo a, lo hrilh rawh aw, tiin min chah a, Dingngheta ringawt i buaipui avangin engmah ka sawi ta lo a nih hi, tunah amah ngei a lo haw tawh bawk a, tuna a chanchin ka sawi zawng zawng pawh hi i awm loh hlana ama'n min hrilh a ni. Pasal ṭhen tawh i ni chung pawhin a la ngaihven che a, puitling takin sawi dun ula a ṭha ang, ani anga hmangaihtu che hi i hmu tawh lo mai thei a ni," dam thlapin a ti ta a.

"A sawi zawng zawng chu i awih vek a!?" ka lo ti a.

"Awih e, a putea pawhin min hrilh alawm, kan thu awih lovin i duh danin i kal a, tunah chuan kan thu i zawm a hun tawh, kan hmangaih che a, i nuṭate pahnih ngaihtuah ngai an ni lo, nangmah ber hi i buaithlak," lawm vak lo tih hriat hian a ner sak a, ka hrethiam ve tho mai.

"Sangzuala nen inkawp turin min duh tihna em ni?" Ka ti sap a.

"I tana ṭha tur i hria a nih chuan ngaihtuah zui ve mai rawh," Thingpui no  nen an room lamah min luhsan daih. 

Huis! Khawvel hi a va mak ve le.

A hma te khan lo hria ila ṭha tur a nia, tunah te chuan amah hi ka nêl tawh lo. Bâkah sipai nupui nih te zawng a râpthlâk lutuk. Ka ngaihtuah peih teuh lo, a awmna hmuna min hruai ve loh phei chuan kan inhmu khât awm em mai, ka nu kha va zawh leh ka châk rualin ngaihven ang deuha lan ka duh si lo a, damdawi ka ei fel hnuah ka phone khâlin ka mu ta zawk a, Sangzuala lo haw thawm ka la hre lo.

A patea hnenah kum 5 a awm a, eng buaina nge an neih ang le? Zaninah a patea te inah tho a va kal leh bawk si a, ka hrethiam teh nuai lo.

Whatsapp group-ah ka nawi vel mai mai a, phone ka khawih tam lo khawp mai. Dingngheta ka ten êm avang hian mipa hrim hrim hi tih takzetin ka be thei tawh lo ni berin ka hria.

Eng eng emaw ngaihtuah chungin ka lo muhil daih a ni ang, ka hmuia min rawn fâwptu awm ang taka hriatna neiin ka harh hlawl.

Hnai zetah Sangzuala'n min lo en a, a kut dinglamin ka biang a vuan a, vei lamin ka kut a chelh thung. 

"Eng...." ka sawi zawh hmain ka hmui a rawn hup vat a..

"Shhh..." a kut dimtea dah sawnin min rawn fâwp ta a, ka hamhaih êm avangin ka dawh mawl tawp.

Che lova ka awm chu remchanga chuhin a aia uar leh duhthawh hian min fâwp nawn leh ngat a, inlâk hran tuma ka chêt chuan nghet zeta min chelhin, "Bengchheng suh," a ti sup a, ka che ngam ṭhak nâng. 

Rei ngial min fawp a, ka chhâng lo hrim hrim, ka zak ru ngawih ngawih a, ka che ngam chuang si lo. Ka va han nêp tak. A zei hrep lehnghal!

"Zan hnih hun i nei, Dingngheta aiin ka zei zawk," ti nawn leh sakin puan min sin ṭhat tîra a chhuak daih. 

Eng ati nge ka lo dan loh, ka in ngei ru em ema ka inten ru hial. Mahse, mak tak maiin kha tia min fawh khan nuam tih rûkna ka nei lawi si. Ka thaw chhuak halh a, ṭah hrep ka châk, ka ṭah lah a chhuak chhe te eih si lo.

Min hmuh khan ka fâ awmna te min zâwt vela ka chanchin hre vek siin min dâwp kual tihna. Chhe pharvar lutuk Liansangzuala mai mai chu(h).

Ka mut chhuak a reh veka zinglam dâr khat a la ri lo deuh. Ka room leh lamah Sangzuala a ri rak raka a rawn hawna a la rei lo tih ka hre mai; a room-ah lut lovin keimah min rawn hmu hmasa tihna a ni ngei ang. Ka nu leh pa lahin an ngaisâng ropui mai sia e, dik tak chuan kei pawhin a rûkin ka zah veng veng. Mahse, a hriat erawh ka duh miah lo thung.

Mipa mak tak a ni. Ka lo hre chiang lo hle tih ka hriat chhuah phah bawk.

Ka whatsapp message a rawn ri a, ka open vat.

"Nuthlawi i ni tawh sia, i man a tlâwm deuh tawh turah ngai ang aw..." Sangzuala number tih hrilh hranpa ka ngai lo. Ka ngei lutuk.

Chhán loh ka tum zet na a,"Ka man a to lutuk tawh zâwk," tiin ka reply ve kher.

"Engvangin? Kum thum chhung Dingngheta Sakawr i lo nih tawh kha," a la rawn ti ṭâlh a.

"Eng kim thiam tawh, zir nawn leh ngai miah lova thiamsa ka ni a, ka man a to khawp mai, min lei zo dawn si lo a, bâng ngam rawh.." ka type zawh rualin ka nui sak a.

"Second hand to deuh deuha lei ho hian an zawng chhang em tih hriat ka lo tum dawn nia, Naom-lerhi," a rawn tih leh chuan ka thâ a na zawk. Min hmusit riauva hriatna ka nei a; mahse, ka haw ngam lo, ka nihna a ni tlat si.

Ani hian min duh tak tak vang pawh ni lovin min diriam a châk vang ni deuha ngaihna ka nei. 

"Sipai chu an hur duh..." fiamthu deuha tiin ka thawn leh a.

"Hur ve bawk ang chu, sipai ka nia lawm, mipa ka ni bawk.." a la rawn ti.

Kan inchhâng zan khua thei tak ngial dawna ka hriat avangin data ka off-a muthilh tumin ka chhing ta daih a. 

"Lungphun hunah chuan inchhungkuaa in lokal ka beisei dawn a nia, naktukah zing chhuah ka tum deuh a, nakinah pawh a hranpaa sawmna pêk ngaiah ka dah lo che u a, min ngaihpawimawh ngei ka beisei," Sangzuala ka nu leh pa bula a lo ṭawng mawlh mawlh laiin ka tho chhuak ve a. Dâr sarih a pêl tawh.

"Tukin lam i zia deuh em?" Sangzuala'n nui suk chunga min zawh chuan ka bu nghat a. 

Nizana min tih dan kha ka nu leh pain an hre ve si lo a, ka nuih a za lutuk lo. 

Ka room-ah a lo lût tih kha hre ta se eng tin tak ngai ang maw. Tui lum inin ka intifai chhunzawm nghal a, a tlangpuiin zinglamah chuan dâr riat leh a chanve velah tûkṭhuan kan ei tlângpui ṭhin. Rin âi takin ka ziaawm phian a, zâwi muanga chéin ka room chhuat ka phiat fai a, u Chhanhima room-ah Sangzuala a riah vangin hmun phiat turin ka lût zui bawk a; khum a lo siam fel thlap a, a helmet pawh a fai ṭha hlarh hlarh khawp mai.

Ka nuin eirawng a bawl a, ka pa Sangha chaw pein a kala a lo la haw lo, Sangzuala'n a bike a sil thunga tawnzau dum leh boxer inbelin ke lawng hian kan kawtah a ding a, a palian roh si a, ka en vung vung. Amah a in uluk ang chiahin a bike pawh a dek fai khawp mai; lirthei ka ngaina lo bawka ka 'chu e kha' lêm lo.

Ka pa a lo haw a, tûkṭhuan kan kîl laiin, Sangzuala'n CSD-a kal a tum thu leh ka kal peih ve em tih min zâwt a, ka chhân hma hmain ka nuin, "Va kal rawh, i ziaawm deuh kha, tawm sen reng tur a ni lo," tiin a lo chhâng zung zunga ka ngei hle. 

"Ka peih rih lo, inah ka lo awm zâwk ang e..." ka ti a. A dik a dik chuan ani nena inphurh chhuah ka châk tehchiam lo. A chimawm si a, ṭawngkam ṭhain kan inbe leh dawn lo tih pawh ka hre tlang sa.

"A hnai em mai, kan va kal lawk anga kan haw leh nghal dawn nia," Sangzuala'n a ti leh a, rum zeta melhin, "Bike chuang turin ka fit rih lo," ka ti deuh hmak a, ka  pain, "Mamawh lam tur te pawh kan neih ve kha, Mambawih, inpahnihin va kal rawh u.." a rawn ti ve leh a, ka ngawi daih.

Ka nu leh pa Horticulture office-ah Lei ṭha la turin an kal dawn a, Sangzuala nen CSD kal turin kan insiam ta nge nge a, ka tûm bur; ani lah chu a nui ruh ruh renga ka nu leh pa rilru a hneh thiam si, ka haw tak tak a nia.

"Mâmbawih, kan haw chin tur kan sawi thei lo a, tlai lam rawngbawl i lo ti thei mai ang em, siam vak ngai phei chu a awm lo a," ka nuin a ti a, "Kan haw har dawn lo, in lam chu rawn ngaihven duh suh u," Helmet khum pahin Sangzuala'n a lo ti hmanhmawh a, a inrawlh peih siah. 

"Um.. kal rawh u, ka lo bâwl dawn nia," tiin ka chhang ta tho a.

"Khatiang thawmhnaw nen khan bike-a chuan i tum lo ang tiraw?" Ka thawmhnaw inbel thlêk vung vung paha a rawn ṭawng chhuah chuan, "Eng nge pawi, kan haw leh nghal dawn tho a ni lawm ni?" Ka ti a.

Kekawr dum zawr zet leh a chunga shirt sen ka inbel chu a ṭhat lohna em em ka hriat si loh. CSD a kal tur mai mai inchei a ṭûlna ka hre ve lo.

"Thawmhnaw pangngai va inbel rawh," tiin ka bânah vuanin room lam min panpui a, ṭang deuh ṭung chung hian, "A ho e, min zahpui deuh leh nang mahin kal mai la, inah ka lo awm ang," ka ti nghat a, "I inthlâk duh loh chuan keiman ka tihsak che a ngai a nih chu," tih leh ka kawr hâk lai vawn a ruala ka lo ṭê ṭhat.

"Sangzual, eng nge i hriat a?" Ka ti hlar a.

"Kha kha a ni mai, i ngam chuan inthlâk lo teh, ka tih tur chu i hria alawm," tia inherin room a chhuahsan a, ka ti lo ngam leh ta lo. Lawm lo zet hian Jeans leh shirt dang incheina tlâk deuh ka phawrha ka inthlâk leh ta nge nge e. 

Chu mi hnu chuan loh theih lohvin a bike khán sâng zetah chuan ka chuang ve ta a, Ninja Bike Vaki rawng fai zet hnungah Liansangzuala'n min phur chhuak ta vâwk vâwk a, a seat a sâng si a, tlâk hlau zetin a kawngah ka kuah ta ringawt. 

Kan in aṭangin a hla lem lo a, minute sawm pawh kan tlân tawp nang, a la khalh chak em em zui a, minute nga lekah kan thleng hialin a nia ka rin, hlau ru viau mah ila hlau angin ka lang duh bik der lo.

A hmun kan thleng a, "A chhungah ka lo lut ve lo mai ang aw," ka tih chuan, "Lut ang, in mamawh kha lo lam khawm rawh," a ti a. 

A sawi anga awm duh lovin ka dinna ngaiah ka ding reng a, "Naom, i pa sawi ho kha thlang rawh," ti nawn lehin Vaipa nen an inbiaa Vai ṭawng a thiam nâl khawp mai ka'n sipai pa hian. 

Ka pa sawi ho ka lâk khawm bâkah Shampoo, sahbon leh eng eng emawni a thlang nual a, ka enpui tawh lo. A thu a duh si a, hnial a sâwt lo bawk nen ka ngawi ta vel mai mai.

A sawi ang tak takin kan haw hma hle a, dârkâr khat pawh kan thang lo. Inah tumah an awm loh avangin haw ka huphurh hle a, amah nen chauhva awm ka hreh ru tlat. 

"Nizana ka zawhna che kha zaninah chhânna ka beisei dawn a nia, 'Aih' tia min chhân ka duh lo bawk," in ti vei zetin a ti a.

"Nang nena inkawp tur chi kan ni lo, min hre thiam rawh," dam thlapa ka ṭawng chhuak thei chu ka inchhuang ru viau. A ṭawng ngeiawm thiam dan ang hian chhâng ve dawn ila chuan kan inhau leh dawn sia ka insûm hrâm hrâm a ni.

"Inkawp ni lovin, kan innei dawn," zuk ti a! A hmel ka en a, a thu tak hle bawk si, he pa hian eng thlarau sual nge a dawn le?

Chhâng thui duh lovin room ah ka luhsan ta a, min zui lo teh tlat.

He ti em ema a inrin tawk danah hian ka nu leh pa'n an sawi fel tawh emaw ka ti hial. Beisei awmin ka awm pawh a ni lo a, nimin tlaiah kan inhmu ve chauh a, tun hma kha chu sawi lo ta law law ila, tun atan zan khat leh chawhma chauh kan awm dun a, nupuia min neih a tum ruh em em mai hi, a ngaihna ka hre ta lo.

Ka nu te lo haw se zawh chian ngei ngei ka tum.

Sipai nupui ni turin ka infit lo. Tlat mai a!

B®®

B+>[BeckirafARenthleI]<+®®