5.KA CHAN PUAL [A Story by -B®®]

5.KA CHAN PUAL

Ziaktu: Becky Rafa Renthlei

-B®®

Shadow of the life

[Recap]

Kan ri hluai a, motor tlân thawm a reh tâk hnuah Atuni âwm nghengin ka ṭap ta a, ka nu leh pa an inthiarfihlim ta rih. Rei fe ka ṭah hnuah u Mapuia'n, "Atun, kan room lamah han chhohpui la, ka nu leh pa ka'n be lawk ang e," tiin ka samah chul thuakin a kalsawn ta a.

"I u kha ka ngei e, hmeichhia ve si, a ṭan che ka rin tehreng nen sual lutuk mai," Atuni'n a la ti veleh chhawng.

"Min haw kumkhua tawh dawn a nih kha..." ka ti sap a.

"Pawi ti reng reng suh, kei leh Atei û hmeichhia i nei tih hrereng ang che," tiin min thlamuan a, ka lawm veng veng.

Ni e, min tuithlâr dawn mah se, Zomuanzuali hi ka thutiamah ka ding nghet tlat ang.

Mit nuai nawk nawk chungin inchungah kan chho ta a...

***

Kan khumah ka ṭhu a, ka ṭah a chhuak ngawih ngawih; mahse, rilru nêp deuh pua ṭah ka duh si lo. U Mapuia a lo la chho lo a, Atuni nen khumah kan ṭhu dun a, ka û buai duh ta lo mai, 'Atun' tiin ka ko ve hmiah a, min sawisel bik chuang lo.

"I duh leh ṭap vak vak rawh, i nu leh i u Mami kha an mak ka ti, nau i pai tih pawh an hre ve vek a, kan thiam chu ka ti vek bik lo naa mahse, kan inah mualpho huamin i lo lut a, an zak dawn lutuk, a  nih tur ang a ni zo vek tawh tho a, sual chhuaha khatia ṭawng kher kha chu a ṭha miah lo ka ti," tiin Atuni a âng bawrh bawrh a, a inhnawih dum nasa mai sia amah hre ṭhang tan lo chuan hlauhawm tham a ni.

"Min pawh ṭhen tum tlat se, hma la bawk se engtin nge kan tih ang?" Tiin ka zawt leh rih a, "Hlau duh mahta che, ka awm hi, min ring rawh," a''n ti ve ngei a.

"I u Ropuia khan a lainat che tih ka hre vek, a number min lo pe la biak ka lo tum dawn nia, â, ka phone number pawh i nei lo tak," a ti leh rih a.

Number te kan inpêk tawn hnuah, "Lunglei panin an haw nghal ka ring lo a, naktukah an lokal leh ngei ang, palai tira sawi fel an duh loh chuan tihian i awm hlen nghal daih ang a, a nih loh pawhin Delhi-ah kan chhuk rih dawn nia, ka u incheck up a ngai tho a.." a la ti tak deuh deuh.

Ka rin loh dan hlirin ani hi a ché, u Atei sawi dan ang deuhin a rilru a chhe miah lo tih ka hre ta bawka ka ngaina ṭan der.

U Mapuia a lo chhoh tâk avangin Atuni a chhuak zui ta a, ka thâw a la sa phat phat, auMami thinrim hmel lutuk leh ka nu rilruna hmel kha ka mitthlâah a châm reng a, ka naupan lai ata tawh atu te pawhin min duat rawn a, ka mamawh eng mah neih loh ka nei ngai lo, tunah an duh loh leh an huat zawng takin ka awm ta si a, ka ngeiawm ngawt mai.

Mahse, duhthlan tur ka nei bik lo êm a ni.

"Mu ang," u Mapuia'n a ti hmuk a, room-a a lo luh aṭangin minute tam a liam tawh ang, eng mah a sawi lo a, thinrimna nei niawm takin a tûm hmuk.

"I duh chuan mu rawh, ka intifai lawk dawn," tiin ka tho nghal a.

"I chhungte chuan min lo va duh lo awm em em ve, min hmusit niin ka hria," a tih leh tâkah chuan, "I chhungte pawhin min duh chuang bik hleinem," ka ti ve sap.

"Duh lo che mah se, in inah dah lêt che an tum lo a, i thlavang ka hauh bawk, i u Mami'n min ngaihzawn vang vek a ni," a ti ta a. Mak ka lo ti nasa.

"Eng maw i sawi?" Tiin ka inher nghal zawk!

"I u Mami'n min ngaihzawn thu ka sawi maw le, eng mah sawi lova ka ngawih bona chhan pakhat pawh a ni a, phone i nei si lova i nu ka call in min be duh ngai lo, Mami ka rawn biaa a nau bialpa kha min ngaizawng tih a sawi, i la naupan thu leh kan inneih a rem dawn chuang lo tih zawng zawng sawitu leh i nu leh pa rilru tikawi tu pakhat chu Mami hi a ni tih ka'n sawi law law ang e, tenawm lutuk," a ti ta nek a.

"Ka awih lo, ka u in chutiangin a ti lo ang," ka ti a.

"I duh leh awih lo la, nangmah ngeiin thudik zawn chhuah tum mai rawh, ka mu dawn," a ti zui hmuk.

Chumi hnu chuan a mu nghal daih a, kei erawh ka ṭhutna ngaiah ṭhuin thil chi hrang hrang ka ngaihtuah kual chiam a; u Mapuia nena kan inkawp theihna chhan hi auMami vang a ni si a, tunah khatiang thu kha u Mapuia hnen aṭangin ka hre leh bawk si, dâwt nge thutak ka thliar thiam tawh lo, ka rilru a buai vek.

Ka phone a rawn ri a, tun ang huna min lo call ngam tur chu ka chhungte chauh an ni; ka ring dik chiah bawk, u Mapuia tih harh hlau takin veranda thlang lamah ka chhuahpui a, u Ropuia ni lo se chuan ka pick-up lo ang.

"Mate, kei tih loh an thinrim hle a, tun dinhmunah chuan inrem a har khawp ang, naktuk zingah ka nuin lokal leh a sawi a, engtin nge ni ang aw... khata i awm reng chuan tuma hmaizah lovin an hnûk chhuak duh mai ang che, Atuni khan min rawn bia a, ruahmanna siam vat rawh u, Mapuia pawh hrilh nghal rawh," a rawn ti zung zung a.

"Chanchin ka lo sawi leh ang,'' tiin kan inbiakna ka titawp a, u Mapuia kai tho turin room ah ka lut a, khumah a lo ṭhu reng.

"A ruka biak ngai khawpa pawimawh chu tu nge ni ta ang?" A ti a, a lawm lo tih a hriat hliah hliah.

U Ropuia nen kan inbiak thu leh a thil sawi te kha ka hrilh nghal a, min chhâng dawn tawh lo emaw ka tih hnuah, "An lokal ta a nih leh i haw anga a ni mai alawm, kei te chu pasal atana neih tlâk tak tak ka ni ve tawh hleinem, nangmaha fa enkawl i zuam loh vangin min rawn pan a ni mai lo maw Zomuan," a ti hniam ruih a, a thilsawi dan a vang chuan ka lawm lo takzet.

"U Mapui..." tiin ka vin ṭhat a.

"Sawi dik loh ka nei em ni? Lunglei aṭanga min luhkhung tura i lokal vang vang hi chhui chian tham chu a tling ni." A ti leh nghut nghut a, ka thin a rim ve ta.

"A nih a hnu, chhui chian a ngai a nih chuan chhui chiang la thudik zawng chhuak ang che, a hma pawhin ka sawi vek tawha tun ataka min han rinhlelh thar leh vel, fa pakhat te zawng inhlawhfa chawp pawhin ka enkawl thei tih hre rawh misualpa..." tiin min chhânna pawh nghak lo hian room ka chhuahsan a, min ko ri hre mah ila tun atan chuan a bula awm ka peih rih lo.

In hnuai ka thleng thlaa Atuni room kawngkhar bulah dingin ka ko ang nge ko lovang tih ka inngaihtuah hnuah ka call ta a, vawihnih a ring hman chiah tihah a rawn pickup a, "Náno..." tia thil dang a sawi leh hma hmain, "I room pawn lamah ka awm," tih leh phone dah ka rual a, rang takin a rawn hawng nghal.

Min pawt lut nghal nawk nawk a, zan dar 12 a pel tawh. 

"Eng nge thil awmzia, khawiah nge ka û?" Tia min zawh chuan ka ṭap lo chauh. Inhnît hraih chungin thil awmdan ka sawi a, ka sawi chhung zawngin min be buai lo. U Ropuia nen kan inbiakna pawh ka hrilh ve vek a.

"Tikhan lo awm rawh, ka u ka han bia ang e," a tih lai takin u Mapuia a rawn lut ta a.

"Rawn chho rawh, mut a hun..." a ti hmuk.

"Mama, hetianga buaina inneih laia lo thinrim kikawi kha a ṭha miah lo a nia, Nánovi tan pawh a hrehawm tur zia i chhût lo em ni? Â lutuk.." Atuni'n a ti bawrh bawrh a, "Engmah i hrethiam lo, naktukah a chhungte an lokal nawn leh dawn chuan hruai haw rawh se," a nau thusawi eng atan maha ngai lo niawm takin u Mapuia a ṭawng a.

Ka lo ngawi reng.

"I nei leh duh lo tihna em ni?" Tia a nauvin a zawh chuan, "Neih tlak ka ni lo a, ka natna avang hian rei ka dampui kher lo maithei; chuvangin a chhungte'n an huat phaha an tuithlar dawn ai chuan haw mai rawh se, Náno, hriat thiam tum la, tunah chuan mut a hun, engmah sawi belh ka tum lo a nia, Atun, nang pawh inrawlh thui lutuk suh," tiin khuma ka ṭhu chu min pawh thawh a tum a, ka ṭang ve tlat.

"I thih leh dam chungchangah thu kan nei lo, nang pawh i duh hunah i thi thei kher lo," ka lo ti a, 

"Ṭawng ṭawng lo khan chho ang," tia ka bânah vuanin min penpui a, ka zui chho ve ta tho.

"Náno, lungngai miah suh aw, khua a var anga boruak a ṭha mai ang," tia Atuni'n min biakna ka chhân hmain u Mapuia'n room min chhuahsan pui daih. Min la chelh nghet nghet em em zui a(h)

Khumah min ṭhut tîr a, "I chhungte thu awih rih phawt mai rawh, an phal lo chung chung ka kianga i chên hian i rilru a dam dawn miah lo a nia, enkawl seiliana keh thei dawma dawmtu che an ni. Chuvangin, naute nen in inenkawlna tur ka pe dawn che u nia, mu ang le." Hnial theih miah loh hian a ti a, ka mittui a far fap.

"Min hawtîr dawn tho tho chuan u Ropuia ka'n bia ang e, min lo hruai rawh se, innei tak tak tur pawh ni hlei lo chu i bulah ka mu dawn bîk lo," ti ve tlatin khum aṭang chuan ka tho a, ka thawmhnaw tlemte ken luh kha lâk chhuah tumin wardrobe awmna lamah ka phei a, "Náno, ka sawi tam dawn miah lo a nia, lo mu rawh, vawithum ka chhiara i lo mut loh chuan..." a ti a.

"I duh zât zât chhiar rawh, i rilru a lo chhe em mai, kan in enkawlna tur pawh min pê duh suh, min pêk tum mah la ka pawm dawn chuang lo, min duh lo tu na na na chu ka tibuai lo ang che,'' ka ti ve hmak hmak a, khum aṭanga rawn tho chhuakin engmah sawi lo hian min lo pan a, thawmhnaw ka pawm khawm chu min phihthlâksakin chhuatah a theh thla a; "Ka sawi tam lo ang ka tih kha,'' tia a ṭawng zawh rualin min pawm thut a, ka lo ṭê ṭhat.

Dim deuh hian khumah min nghat a, "Ka thu angin awm la, ka thusawi zawm bawk la i tan a ṭha a ni mai," tiin min kuah bet zui tlat.

"Lalrinkim, hmela... i zak.." ka sawi zawh hmain ka hmui chu a hmuiin a rawn khar chhilh hmak, dam leh ngenngawl zetin min fawp zui a, ka lo tâl ve nasa. Mahse, eng hu-ah a ngai lo nge min kuahna a thlahdul eih lo.

Thiam leh zei taka min fawh rengna chuan amah min thlâkhlelh tîrin ka lo chhâng ve ta a, chutah min thlah leh thutin, "Ka duatnu.. thinchhete.." tiin a nui huk a, ka va ngei tak.

Ka thawmhnaw inbel min hlihsak lai te chuan thinrimna nei lo ang maiin ka lo pui ve sawk sawk a, ṭawng lovin kan inthlâkhlelhna chêt ziain kan tarlang a ni deuh ber.

Nichin lawka kan inhnial vena te kha chu vawm bo ang duak a ni mai. Inrem leh inpawh takin tisa nawmna kan insiam tawn a, min kuahna thlahdul deuh chung hian, "Tuna i rilru ang kha pu reng ang che," tih chiah a sawi, a sawi awmzia pawh ka hriat si loh.

Engtik laiin nge ka muthilh tih ka hre lova, ka harh leh chuan keimah chiahin ka lo mu tawh a, u Mapuia hmêl hmuh tur a awm lo, room chhung a fel duak a; nizana chhuata ka thawmhnaw a thehthlâk pawh kha hmuh tur a lo awm tawh lo.

Muangchânga tho chhuakin ka intuai fai a, auMami ka ngaihtuah chhuah apiangin ka tâwt vek zel. U Mapuia thusawi kha a dik tak tak a nih chuan tenawm ka tiin phakar ka ti lutuk, ka unaunu hian ka bialpa a lo ngaizawng tak tak a nih chuan ka ṭawng chhuak ve ang.

Zing lam dârkua a ri tawh a, inhnuai panin ka chhukthla a, common room-a lo ṭhu te ka hmuh chuan ka pên tawp chat, atu amah an ṭawng lo a, ka nu, auMami leh u Ropuia, kan mâkpa leh u Mapuia nu leh pa, Atuni pawh tiamin ka thawm hriain an rawn hawi chho a, min thlir ṭhap.

"Náno, chaw lo va ei rawh.." Atuni'n a ti a, ka nuin min melh no lo khawp mai. Ngawi rengin choka lamah ka pheia Diki'n ka ei tur a lo buatsaih nghal a, a hmaa min en ang ngawt kha chuan min en ta lo deuh. "Hruai haw an tum che pawhin duh miah suh, i u Mami saw a ṭawngthei zet zawt si.." zawitê hian a ti a, ka nui hak.

"Eng nge a sawi a?" Tiin ka zawt a.

"In inneih a rem loh thu leh engti kawng pawhin u Mapuia mâkpa atan an pawm loh tur thu a sawi a, a zak lo hi ka ti.." ṭawng ring ṭha ngam si lo hian a ti leh a, ka sa ve phat.

"A thu lo em mai.." tiin ka hmaa awm ang ang chu ka kâah ka hnawh lut mawlh mawlh a, ka helh nghâl áwl áwl.

"Zanin tlaiah u Mapuia nau Thlamuana a lo thleng dawn, Náno, fimkhur ang che," a ti leh a.

"Eng ati maw?" Ka lo ti hû.

"Inveng fimkhur la a ni mai, amah i hmu anga i hrethiam mai ang," a ti leh mai a, ṭhutkhawmna lamah ka pa Zoliana'n eng eng emaw a sawi a, a ṭawng zawih êm avangin ka hre pha chiah lo. Nizan anga boruak rit leh ni nuai nuai ang kha chu a ni ta lo deuh.

Min rawn koh tâk avangin ka phei ve ta a, Atuni bula ṭhutna âwlah chuan ṭhuthmun ka rem ve a, auMami a meng rum ál a, ka nu pawh chuti tho.

Chutah ka nu, keima nu dik tak chuan heti hian thu a sawi ta a.

"Náno, engtikah mah Rinkima hi kan pawm dawn lo a, i u Mami rilru a tihnat hrep tawh hnuah phuba lâk nan nangmahah a ṭuan leh a; i mâwl luatah a bum thlu che a nih ber hi, tunah hian kan rualin i lo haw dawn nge, dam chhung atan kan inzawmna chhu chatin an chhungkua hi i thlang zawk dawn? I duh thlang rawh le," dam raihin a ti ta a, mit ka khap zak zak.

Ka awm loh lai khan eng thil tak lo sawi tawh ang maw?

"Nu, i ti tak tak em?" Lawi râtin ka zawt a.

"I thisen zawmte nge i thlan dawn Rinkima, keini chuan engtin pawh awmin mualpho mah la, ka fanu i nih angin ka tuamhlawm zel ang che, Rinkima i thlang zawk a nih chuan kan inzawmna zawng zawng a chat ang," fiah fakin a ti leh a, "I lo chhuk hma khan engkim kan lo sawi tawha i duhthlanna an zahsak dawn che, a ni lawm ni pu Zo?" Tiin u Mapuia pa lam a hawi a, a lo bu nghut.

Reife ka ngawih hnuah, "Nu, ṭha takin kan inneih phal mai ula buaina a awm lo ang, min hmangaih tak tak a nih chuan u Mapuia pawm ula, hetiang buaina hi kan nei lo mai dawn alawm," ka ti sap a.

"Zomuanzual, min nêk luih tum reng reng suh, i duhthlanna chiah kan nghâk a nia, nangmah avanga buai buai hi ka peih lo tih hre rawh," a ti leh hmak a; midang tumah an ṭawng ve bawk si lo, an ngawi hmak a, u Mapuia pawhin engmah a sawi lo. Nizan khan "An lo hruai dawn che chuan an rualin haw ang che" a ti a, mahse, amah ber a ngawi leh tlat bawk si a, ka mut hlan khan keimah duhthlan tîr turin an lo ruahman a nih ka ring ta ber.

Ka khuh kharh a, pu Zoliana te nupa ka en hmasa bera eng nge an ngaihtuah tih a hriat theih loh, auMami leh kan mâkpa ka en leh a, min lawm lo tih a hriat hliah hliah; Atuni ka en a, min khawngaih hmel a pu. U Ropuia mitah tak ka en leha zaidamna leh min lainatna hmel ka hmu, amah han biak ráwnna hun awm tawh hek suh. Ani chuan u Mapuia vuan turin min duh tih ka hria; a tawp berah u Mapuia hmel ka en a, a dâng deuh lap a, ka mitah chiang takin min en lêt a, eng nge a ngaihtuaha eng rilru nge a put ka chhiar thiam lo.

"Khatia hawi hrek hrek lo khan i thutlûkna sawi vat la, helaia awm reng hman kan ni lo a nia," ka nu bawkin a ti leh a, ka run ngei mai.

U Mapuia khan 'neih tlâk ka ni lo' tiin haw turin min hrilh a; ni e, ka neih chhin phawt loh te chuan engtin nge neih tlâk a nih leh nih loh ka hriat reng ang. 

Ka hmangaihna hian phatsanna a keng tel lo a; kha leh chen min hmangaiha min nghâk tih ka thinlungin a hre ve kar si. Tin, a fa ka pai mêk a, a damchhung hun tawitea a fa kianga hlimna a tem ve theihna tur a nih phawt chuan eng pawh ka huam mai tur a ni dawn lo em ni?

Natna avanga inphatsan hi ka hua a, Pathian hmaa thutiam ni rih lo mahila chân ngamna nun hi ka ngaisâng zawk.

"Zomuan..?" Pa Zoliana'n min koh chuan ka ngaihtuahna aṭangin ka harh zawk.

"Nu.." tiin ka thisen zawm te chu ka melh kual a,  "Ka fa in pa koh tur a neih loh ai chuan kan inzawmna hi chat mai rawh se, duhthlang tura min siamtu inni bawk a, ka duhthlanna chu u Mapuia kianga chén hi a ni e." Ka ti ta a. 

A reh duk. 

Ka nu leh auMami'n min melh tlawk tlawk a, u Ropuia a thaw huai thung.

"Kan in chhung saw vawikhat mah rawn rap leh tawh suh ang che, i chhuahpui bâk eng thil dang mah rawn beisei bawk hek suh, Mami.. kal ang u le.." tiin an tho chhuak a, u Ropuia a chhuah lai chuan ka mittui dan rual lohin a rawn luang a, inhnit hraih chung hian kan room lamah ka tlân chho ta a, khumah ṭhuin chhuak lutuk hian ka ṭap ta a.

An kal liam tur ka en ngam ngang lo. Ka nu leh ka û te an ni miau alawm, engah nge ka nat loh tehlul ang, thisen zawm ka nei ta lo.

Ka neih chhun chu ka pum chhunga ka fa leh a pa Cancer natna vei mêk chauh hi an ni ta. Kei kum naupangte hian engtin nge hringnun ka hmachhawn thiam tâk ang. Risk ka la tak meuh a ni.

Hmangaihna dik hi a thâmral thei lo a, inphatsana bo mai thei a ni hek lo. Fahrah siam lo tura pawimawh ber chu nu leh pa an ni. Kei Zomuanzuali hi nu ka ni ve thuai tawh dawn, ka thutlukna siam namai lo tak hi ka tuar chhuak ṭhak tur a ni.

Rei tâwk fang ka ṭah hnuah ka chau nghulh a, ka luak a chhuak ut ut bawk nen bathroom-ah ka va luak ta nghek a, ka pum a let but but. Rilru hah reng rengin hun ka hmang a, ka taksain a zo lo tepawh a ni mahna.

Khatia ka chhoh hnu aṭang khan tumahin min rawn chím buai miah lo a, min hném tur tumah ka nei lo, u Mapuia leh Atuni an reh hmiah bawk a; ka phone a rawn rîk chuan rang takin ka ban a, auMami a ni.

Chhan loh ka tum zet naa kan inbiak tawpna tepawh a nih tâkah, "Sawi rawh.." ka ti mawl tawp a.

"I û ka ni tawh lo tih hria la, keini aiin ani thusawi i ringin i pawm zawka i la chawh ngawt ang, kan chhungkua hi i biak pawh phâkah kan awm tawh dawn lo tih hria ang che." A rawn ti tawn tawn a.

"Aw le..." tiin phone ka dah nghal daih.

Whatsapp-ah ka lut a, u Ropuia tih loh midang zawng zawng, ka nu thlengin min block fai vek; an che rang hle mai. Ka pa erawh chuan whatsapp a khawih ve loh avangin ka call chhin a, ani pawh chuti tho. Engkim an hre vek tawh tih ka hrethiam a, ka mittui a tla nawn leha a ri erawh chuan ka ṭap tawh lo.

Chau zetin khumah ka mu a, Diki'n thingpui leh a hmeh tur a rawn dah chhoh lai pawhin che map lo hian ka melh ngai ka melh tlawk tlawk a, ka nu ṭawngkam mal tin kha ka ngaihtuah lêt a, kei aiin auMami an ring zawk tih te, ka pa thlengin an hmin fai vek a; u Ropuia chiah lamṭang ka neia ani lah mipa a ni a, thil sawi sawi mi a ni ve si lo. Ka tâwt up up.

"In ei puar rawh aw, i chak ṭhat a ngai a nia, ka fel chu ka ti hauh lo, mahse, min mamawhna i neih phawt chuan sawi hreh miah suh." Diki'n a ti ve ngei a, ka hnuk a ti ulh e a.

"Min duhsakna hi ka hrereng ang, ka duhdanin awm thei lo mahila min puih i inhuamnaah ka lawm e," tiin ka ṭhu chhuak ve nghal a, "Nu leh pa nei tawh lo ka ni a, khatia i nu'n a tih che khan ka lo na ve ngawih ngawih, intifai la, hlim hmel put tum rawh," a ti dam thlap a, a hmaa ka lo hriat Diki kha a ang ta lo. 

Kan room min tihfai sakin chhuat a nawt vek a, sûk tur tepawh min khâwm sakin a su vek bawk. Pathian ka lamah a ṭang a ni ngei ang duhsaktu ka neih belh leh ta. 

Thlamuana chungchang zawh ka duh viau nain ka ngawi ta rih a, Atuni leh u Mapuia an lo chho ve miah lo mak ka tih thu ka sawi chuan, "Thil pawimawh an sawi dawn a ni ang, room-ah an inkhung daih.." a ti awlsam mai a, mak ka ti leh ta lo.

Diki chhukthlak hnuah ka inbual a, u Atei te ina kal turin ka insiam ta a, tukinah a hmel ka hmu si lo a, an koh tel ve ka rin tehreng nen a rawn lang ve miah lo kha mak ka ti deuh.

Ka lo insiam mawlh mawlh lai chuan u Mapuia a rawn lut a, "Khawiah nge i kal dawn?" Tiin min zawt a.

U Atei te ina kal ka tum thu leh ina tawm reng a ninawm tiin ka lo chhâng a, amah thlang nimahila min ngaihsak nêp ka ti a, ka lawm lutuk lo.

"Tun ang boruakah chhuah a ngai lo, inah awm rawh, Thlatea hruai turin Atuni nen kan kal dawn a, khawiah mah lo chhuak suh ang che," a ti nghut.

"Nangni pawh in chhuah dawn tho chu, hmun hlaa kal tur ka ni lo a, i nau te inah tho alawm le ka kal dawn.." tiin ka chhâng ve hmak.

"Inhnial mood ah ka awm lo, kan inchhunga i awm a nih chuan ka thu anga awm hi i tih tur a ni, i chhungte hnenah i haw duh zawk a nih loh chuan," zuk ti kher a.

"Rinkim..." tihpahin ka samkhuih ken lai a thlâwk fua a, a lo man chat.

"Náno, thinchhe viau zel suh, i tana ṭha lo tur ka sawi ngai lo," thinrim lem lo hian a ti ve mai a, ka melh rum em em ringawt, a nui suk duh chauh nia.

"Min hmusit hle mai, heti reng hi ka ni dawn lo tih hria ang che, i hnenah ka awm dawn ka tih vang hian i thu thuin ka awm zel dawn tihna a ni lo a nia," ka ti ve ngat.

"Ngawi tawh rawh," tiin a thawmhnaw inbel a hlip mawlh mawlh a, bathroom ah a lut zui daih.

A mize dang ta thut hi ka chhungte vangah ka ngai rih phawt ang.

A chhuah dawnah pawh min be tawh eih lo a, nizana kan boruak te kha chu mumang ang mai a ni leh tawh. Tukina ka chhungte ṭawng dan leh engtikah mah an pawm thei dawn lo tih an sawi laia a hmel ruh ṭalh ṭalh kha ka hmu reng, chuvangin tuna a awm dan hi chu ka la en liam rih mai a ni ang chu. A tân a tlawmthlâk ve êm lah tak a.

An tlan liam tur kan room tukverh aṭangin ka thlir a, u Atei te inah pawh ka kal duh ta lo law law a, ka chhungte kha an haw tawh nge an la haw lo tih hriat tumin u Ropuia ka call a, vawithum a ring hnuah, "Zomuanzual, i u Ropuia pawh rawn be tawh suh, kan tan i thi tawh, i lo tenawm zia hi, mahni u te chanâi pawh chhuhsak duh khawpa mihurherh fanu kan lo nei che hi ka zak," ka nuin a rawn ti hlawk hlawk a, ka ṭawng ve ngam ta lo.

AuMami chan âi chu u Mapuia hi maw! Eng anga tam dâwt lengvel ang maw. 

AuMami ka huatna hi a reh leh thei dawn em ni? Engkim hi a remruat vek a ni tih ka man thiam vek tawh. A damlohna avanga neih an phal lo nilovin; ka û nula senior pasal nei lo tan chuan iaina pakhat mah an nei lawi si lo. Tenawm hlawm lutuk.

Ka nu leh pa (pa Zoliana te nupa) an rawn chho a, an hmel a hlim fahran bîk lo.

Ka pa chuan, "Zomuan, palâi tirh chi a ni ta si lo a, i man hlanna tur chhungte dang belh ngam tur i nei em?" Tiin min zawt a.

"Nei lo.." ka ti mawl tawp.

"A va buaithlâk dawn ve aw, i chhungte'n thu tawp an sawi ta si a, hetia man inhlan fel lova inkawl reng hi thil mawi a ni lo va, kan chhungkaw tan khawhawi ngaihna a awm náng, kan zahawmna pawh a ti hminghliau thei bawk," a tih leh chuan ka ngawi rán ringawt.

"I chhungte thu awihin haw rih mai la a ṭha tur a nia, luhlul i chhuah lui tlat a.." u Mapuia nuin a tih leh lek phei chuan hnuailam ka bih daih. Hrehawm ka ti ru ngawih ngawih.

"Â, eng pawh nise ti hian awm ve phawt mai teh, Mapuia te nen kan la rêl ṭha dawn nia," tiin a tho hluai a, ka nu erawh a dan pangngaiin a meng thîp leh hle tawh. 

Room an chhuahsan hnuah ka mu daih a, atu amah hian min lawm lo chu a ni ber e, Aizawlah chhungte kan nei tih ka hre tak nain an awmna leh engtianga inchhung nge kan nih ka hre bawk si lo. Tumah zawh tur ka tan an awm tawh lo a, u Mapuia kutah ka innghat thui hle tih hi ka hriat theih chhun chu a ni tawh mai.

Zanriah ei dawnah u Mapuia'n min rawn kai tho a, "I nuam lo em ni?" Tia min zawh chuan, "Nuam e, ka nuam mah mah," ka lo ti hmak, dâr san awk chung hian, "Vawiina ka chhuahsan che chu i lawm vak nange, ka nu leh pa nen in inbia em?" A ti leh a.

"Bia e..." 

"Náno, i rilru tur ka hrethiam a nia, ka natna i hria a, ka damchhung hi chuan i tan ka awm zel dawn alawm, hrehawmin ka siam lo ang che, min ring rawh." A ti leh lawi a, ka ner sawk.

"Lokal rawh le, chaw ei a hun a, Thlamuana pawhin a hmu châk teh che a nia," tiin a nui vei suk a, a nau hi han koh duat emaw pawh a nei bik chuang lo.

Thlamuana ka hmu chiah chu ka meng phâwk ngei mai, ka lo hmuh tum dan nen inthlau tak a ni, addict chum buang leh sual hmel tak ni turah ka lo ngai a, a teuh lo lutuk! U Mapuia hmel nen danglamna a awm lo, inang tak an ni, a ngo angreng a, a chhe lo hi a ni tawp mai, a mitmeng dum fiah kâk chuan min rawn melh a, a ner suk bawk. A chhip sam buk deuh lai chu a kir a, a bâna Sana hrawl zet a bun pawh ka hmu kim hman vek. 

A taksa a inkhaithli nalh zuih a, tisa chuangtlai nei hmel a pu lo. A kuttin thlengin a fai ṭhah a, ka en chîk mah mah.

"Kan monu thar chu i va tê ve.." tih pahin dining chair a pawt chhuak a, u Mapuia lam hawi chung hian, "I duh naupang hle mai, a hmel erawh a ṭha.." tiin awm ve lo ang maiin min sawi a, ka ngei chi. 

U Mapuia'n, "Nánovi ang hi an vâng a nia, i hmuh phâkah an tam lo khawp ang," nui chungin a lo ti ve a, Atuni a nui hak hak a, kan boruak a nuam vei phian.

Zanriah kan kîl laiin ka pain, "Palai tirhna tur kan hre ta si lova chuvangin tihian naute neih hma chu han awm ve naw naw ula, nakinah tha tharin kan la ngaihtuah zawk dawn nia," dam thluamin a ti ta a, ka nu a lo inrawlh vat a, "Indan te kha ngaihtuah tawh miah suh u, Nâno, i pasal leh i fa chiah ngaihtuah la, thil dangah inham buai suh ang che," a lo ti ve a, a sawi tum ka man pha chiah lo.

AuMami leh u Mapuia chungchang an sawi kâi ta a, ka tho nalh. Ka chaw bar a tawp chiang teh e.

"Mapuia'n i û nei lova nangmah a thlang che hi Pathian hnenah lawmthu awm rawh se, kha nu kha ka ngaina lo," Atuni'n a lo ti hlawih hlawih a, auMami haw ve tho mahila hetia an rêl bawrh bawrh hian ngaihthlâk hrehawm ka ti. Ka û a ni miau a, ka rilru a la na ve det.

Thlamuana'n min melh zauh zauh a, kan mit leh mit a intawng thei chat chat khawp mai, rang takin ka hawisawn thuai zel a, amahah hian eng emawni ka hriat fiah thiam si loh hi a awm tlat. 

Diki thlengsil puih ka tuma a lo phal lo nasa. "Ṭhu mai mai rawh, ka ti thei lutuk," a lo ti ve ngei, henu mizia hi a mak a nia, a nelawm khuchûk lo nain ka ngaina thuaiin ka ring.

Atuni leh u Mapuia'n doctor an biak laiin balcony ah ka lo ding a, ka hnunglam aṭanga min rawn kuahtu an awm chuan ka phu zawk, tunge tih hriat tumin ka inhera Thlamuana nen kan inhmachhawn nghal siah!

"Eng nge? Eng vanga min lo..." ka sawi zawh hmain ka pum puar ve ṭan chu a rawn tawk zauh a, "Ka û fa a ni tak tak em?" Tiin min zawt a nih chu!

"Eng a? I û fa a nih lohvin tu fa nge nise i lo tih a?" Ka lo ti hriam hrâk a, a nui huk.

"Nangni ang hi chuan a hausakna denchhenin in umzui duh dawn tih ka hria alawm, chuti maia awlsam chuan i duh i nei dawn lo a nia; min paltlang hmasak angai ang," zawi supin a ti ta a, a ṭawng chhungin khawdang hawisawn lovin min melh ngat ngat bawk.

"Lo inrawlh duh lo mai rawh.." ka ti a.

"Ka la inrawlh dawn chauh, chuvanga lo haw ka ni bawk, ani Cancer lehnghal nangang nula naupang leh hmelṭha takin i umzuia i luhkhung hi chhan a awm a ngei tur a ni, ka la hrechhhuak thuai ang," inring tawk takin a ti ta a.

"Ka luhkhung chhan i hriat duh chuan sawi a har vak hleinem, ka pum chhung ami vang hian a ni e, ka fa hi fahraha seilen tir ka tum lo, a pa kiangah, a pa damchhung hian a awm tur a ni," ka ti ve ngat a, a nui leh huk a, ngampa taka ka darah rawn vuanin, "Zomuan, ka û hausakna hi chhete mahin a zâr i zo dawn lo tih hria ang che," tia rawn kun hniamin ka beng bulah zawi sup hian, "A thi ṭêp tawh.." a ti ta a.

"Zâwnga leh..." tia insum hman lova ka ṭawng chhuah rualin a meng rum sawt a, "Ka sawi kha dâwt a ni lo, nitin a thih ni a hnaih zel," ti lehin a jeans kekawr hâk ipte a zena inchhung lamah a lut ta a.

Lalthlamuana fapa duat sual, damdawi ti ṭhin anga an sawi leh ruihtheih thil duh lutuk anga ka lo hriat kha a ni thei lo. Tuna mi, ka hmaa ding kha chu tlangval inringtawk tak leh thluak nei a ni, mi satliah a ni lo tih ka thinlung hian a hre tlat.

U Mapuia natna chungchangah pawh hian amah bâk rinhlelh tur ka nei lo a, Atuni leh Atei, ka nu leh pa te hi chu Thlamuana control-na hnuai vekah an awm tih ka hrethiam ta mai, kei erawh min bum lovang.

"A thi ṭêp," tia a sawi thei a nih ngat chuan eng emaw hriat rûk a nei a nih loh pawhin ruahmanna dang eng emaw a nei a ni ngei ang.

"Náno, Mate.. chho ila.." tia u Mapuia aw ka hriat tâkah chuan ka thaw huai a, a rang thei ang bera incheck-up tura ka hmin a ngai.

U Mapuia nen kan room lam pana kan chhoh laiin, "Mám, intur kan dawm dawn lo em ni?" Tiin Thlamuana'n a u a rawn bia a, ka lo melh rum nghal.

"Dawm dawn chiang e, lo chho rawh, kan room ah aw.." tiin u Mapuia'n a chhang a, ka túm hmak. Mahse, hmun danga an awm dun ai chuan an kianga awm ve ka duh si avangin ka hnial duh ta lo a, Thlamuana'n min rawn zui chho ve ta a, hepa hmelṭha vawr hi ka ring hlawl lo. 

A zu in turah damdawi a pawlh lovang tih tunge sawi thei? 

A û lakah hian rilru ṭha a puin ka hre ve tlat lo.

Min melh dan leh min en dan hi ka rilrem zawng a ni miah lo bawk. Amahah hian mi hîp theihna leh hneh theihna riau a awm tih ka hriatna hian min tilawm lo bawk.

Thlamuana lakah hian fimkhur a ngai tih Diki min hrilh kha ka hrechhuak chiah.

-B®®

Shadow of the life

B+>[BeckirafARenthleI]<+®®