3.KA CHAN PUAL [A story by -B®®]

3.KA CHAN PUAL

Ziaktu: Becky Rafa Renthlei

Shadow of the life

-B®®

[Recap]

An inpui kan chhuahsan tawh a, rilru nghet tak ka pu hmiah, fa pakhat mai mai te chu Pathian zarah ka enkawl huphurh lo. Mahse, ka hmangaih leh min hmangaihtu na tuara ka enkawl phâk lova a awm âi chuan a hun tawp thleng raka amah ngaihsaka enkawl turin rilru ka siam fel hmiah; ka kum a la nau a, ka la râi zui. Chuti nimahse, atan eng pawh hmachhawn ka huam a ni tawp mai, a hmuh phâk loh leh ka hmuh phâk lova awm turin ka duh lo. 

Lalrinkima, u Mapuia hi ka enkawl tur, ka Chanpual liau liau a ni tih chunglamin min hriat tîrnaah ka pawm.

Eng kim huamin a duh emaw duh lo emaw ka luhkhung tawp mai ang. Chhuanlam tur ṭha tak, a hnar theih miah loh tur ka pum chhungah hian a awm miau a lawm.

'Zomuanzual, chhel takin aw..' tiin ka infuih ru sauh sauh a.

-B®®

U Atei te inah kan chhuk leh tawh a, u Ropuia phone nghalin zan lama lo phei turin ka hrilh a, "Mate, nupui neiin chhungkua din ka tum ve a, ka hlawhchham a nih kha, nang erawh chuan i hun ṭha bawhpelh reng reng suh ang che," a lo ti hmiah.

"Mama hian a hmangaih che a, doctor sawi rûk danin kum khat vel bâk hun a nei tawh lo maithei, a cancer stage hi a sâng tawh a, a hun laia 'Chemo' ei chi an pêk kha a taksain a chhiatpui zawk em maw ni, ka pa khan a thup tlat a, chemo tih sawi lovin doctor nena inthurualin damdawi dang ei angin an rin tîr a, a pawi hi ka ti lutuk, eng pawh a lakah tih tum la ka dang dawn miah lo che, ka thlâwp zel zawk ang che," u Atei pawhin a ti ve bawk a, ka phur sawt.

Zanriah kan eikham a, ka u a rawn thleng ve ta bawk a, ruahmanna min siampui se ka tih vanga ko ka ni.

U Mapuia natna leh tuna a awm dan, kan inbiakna zawng zawng engkim ka hrilh fai kelh a, zêp khan awmzia a nei tlat tawh lo, kan tlai tawh mah mah emaw tih mai zawk tur a ni a, a hun tawp thlenga a kianga chênga amah tihlimtu nih ka tum ruh tlat tih ka sawi tlang vek bawk.

"Mate, ka nu leh pain min dem dawn a, min haw kumkhua mai thei, palâi tîra dan pangngai zawh turin hun kan ngah tawk si lo, Atei nen naktukah Mapuia hnenah chuan kan dah ang che, i tawrh chhel a ngai dawn a nia, keimahni lam aṭangin i û ka awm a, Mapuia lam aṭangin Atei a awm bawk a, hlauthawng reng reng suh ang che aw, amahin a hmangaih che tih kan hriat angin amah leh amah a inhrechiang bawk, tlawm leh zah dawn lova i paltlang a ngai, Pathian zarah eng êm a ti lo ang a, in pahnih fa, i pum chhunga ṭhanglian mêk a hmuh nitin chuan a rilru a thlâk maithei asin, nangmah i pawimawh ber," nghet charhin a ti duah bawk.

Kan sum neih dan dinhmun te kan sawi dun a, kei chu sawi ngai lo, engmah nei lo ka ni, ka u zawkin ama khâwl ve chêng singkhat min pe a, u Atei'n, "Ka nu leh pa huat rawn ka ni ve tho dawna ka lo tlawh thei dawn lo che tih ka hria," tiin singkhat min pe ve bawk a, a hmingin singhnih ka nei ve ta, hetia an tih kherna chhan chu kan chhungte ve vein min rem tih pui dawn lo tih an hriat avangin kan hma hun kan sawi thei lo a, min venpui tihna a ni deuh ber.

Min ruahman pui dan chuan naktuk chawhnu lamah u Mapuia hnenah min dah dawn a, ka û in engkim ka sawi ngai lovin a sawi vek bawk ang. 

U Ropuia pawh a riak ve ta law law a, ka thil tih tum hi kei ang kum naupangtê leh chawmhlawm mai tan chuan a khirhin a va harsa dawn si ve le. Mahse, khang kum kal ta zawng zawnga min hmangaihna leh min dawh theihna te ka rulh lêt vena tur atana ti ka ni a, kan fa lo la piang tur hi a kianga ṭhanlen tira a hun tawp kharpui tu nih ka tum tlat.

Khua a vara u Mapuia hnen aṭangin eng mah ka dawng lo, a reh hmiaha ka ti tak tak ngamin a ring lo te pawh a ni mahna.

Thawmhnaw tih tham ka nei lo, ka chanchin an hriat hunah ka chhungte an lungawi dawn lova min ngaihsak duh miah dawn lo tih ka hriat vangin chawhma lamah u Atei nen ka mamawh zualpui tur kan lei a, Trolly suitcase pakhatah ka inhnawh leng vek. Incheina thawmhnaw phei chu kan en buai lo hrim hrim, damlo enkawl tur tan inchei ngai hek lo.

Kan pathuma an in kan pan laite chuan ka zâm ru ngawih ngawih a, na takin min lo ṭawngkhum mai ang tih ka hlauva ka thâw a sa phat phat.

U Atei a kal hmasaber a, a dawtah ka u, keiin a hnung berah ka zui a, an in lian leh reh ruihah chuan kan pên lût ta a, an nula awmpui Diki khan chhuat a lo nâwt a, hawi zak zak chungin, "Tumah an awm lo, pu Mapuia a muhil," a lo ti nghauh a, "A ṭhat hlauh chu, i awm alawm," u Atei'n a ti ve hmak.

In chungah kan inzui chho ta ṭhâm ṭhâm a, ka va inthlahrung ru ngawih ngawih tak, ka thâ a khur hial.

Kawngkhar pawh kik lovin u Atei'n a nam hawng rawp a, khumah u Mapuia bawkkhup zawngin a lo mu a, a muhil nge muhil lo a hriat loh.

Ka u nen khum bula sofa-ah kan ṭhu a, ka suitcase erawh kawngkhar bulah kan hnutchhiah a, "Mama, kan lo thleng a nia," tiin a û darah a sawi nawk nawk a, thawhphan awm miah lovin u Mapuia a rawn ṭhu chhuak hlawl. A room-a lo awm te chu a mal tê têin min en diat diat a, a hmel a rum ûl mai.

"Eng nge in lo tih dawn? Ropui, i nau hi hawpui leh rawh," a ti nghut. 

Tuna a landanah chuan damlo hmel a pu lo, nimin lam aiin a lang thar vûk a, a hmaa ka hriat ṭhin u Mapuia kha a ang leh ta deuh. A mutna avangin a sam a thur chhap a, a mitmeng a fîm kâk thung, a vun erawh a dawldang deuh tih lohah chuan a danglamna engmah ka hre lo.

"Mapui, ngun takin ngaihtuah rawh, nupui ka neih lai khan chhungkua din ve tumin ṭan ka la nasa asin; mahse, ka nupuiin min uiresan ni khan ka khawvel a tawp emaw ka ti hial, beidawnna leh zahna ka paltlang a, Lungleia i lo awm lai leh kan ina i lo tâl tam lai zawng zawng kha chhut let la, Nánoi naupangtê a la nih lai pawha thlah lova vuan tlattu i nih kha, nu leh pa te hi kan lei Pathian chu an ni teh meuh mai; mahse, a ṭha lo lam a nih chuan an thu a kâwi a ngila kan zawm loh hun te a awm ve tur a ni," tiin a thaw chhuak hawk a.

"Ka farnu thutlûkna hi ka zahsak a, a naupai chungchang leh kan lo kal chhan hi kan chhungkuaah hretu awm chhun ka ni, a lama ka ṭan nachhan pawh eng dang vang nilovin in inhmangaih tih ka hria a, kan inhmangaih hun chhung hi a rei lo teh asin, hun in la neih lai hian in inchhirna tur eng thil mah ti lo ula ka duh, in lam chu fapa awm chhun ka nih angin ka lo chingfel ang, nangpawh fa u ber i nihna angin i mawhphurhna hlen ngam ve la ka duh khawp mai," tiin a sawi ta dap dap a.

"Mama, i lam ka ṭang zel ang," u Atei'n a lo ti ve bawk a, kei erawh sawi tur hre lovin ka ngawi reng thung.

"Ropui, i hrethiam lo a nih kha, hawpui leh zawk rawh," u Mapuia'n a la ti ṭalh a, ka inrawlh a hun ta chiah.

"In pahnih khan min chhuahsan tawh mai rawh u, ka lo inchingfel ve mai ang, ka û, min ngaihtuah suh.." ka ti a, mitmeiin hrethiam turin ka ngen pah bawk a, a ngaihdan chu a nih hmel vak loh.

Min chhuahsan tura ka nawr luih deuh tlat avangin u Atei nen an chhuak ta nge nge a, u Mapuia nen chiah kan awm ta.

Tlailam dar thum a ri ta bawk a, min be lo a, ka be bik hek lo. Ngawhngawl chhuahin sofa-ah ka ṭhu ve ngar a, ani khumah ṭhuin phone a khawih thung. Min hau hrep ka ring deuh kha a ni a, eng tin mah min ti bîk miah lo!

Lunglei kan chhuahsan aṭangin rilru thlamuangin ka la awm lo a, nizan ka mu tlêm bawk si, ka chau tawngkhawng a ni ang e, ka lo muhil daih chu niin, ka harh leh chuan ka mutna hmun ka hai ṭhelh a, sofa-ah ka lo mu tawh miah lo.

U Mapuia khumah keimah chauhvin ka lo mu a, ka muthilh lai khan min pawm sawn a nih ka ring, khua a thim vek tawh. 

A room zau leh fel fai thlup chu ka melh kual a, bathroom pawh a nei hrang vek, chumi ka hriatna ringawt pawh chuan min tilawm. 

U Atei sawi dan hmangah khan a naute pahnih hi Delhi-ah in luahin an khawsa a, a naupang zawk Thlamuana'n lehkha a la zir a, u Atei nau chiah hi Mahindra company-ah Manager niin an pa ber pu Zoliana a pension tawh a, a nu Biakliani erawh chu Health worker niin nakumah a pension dawn tih a sawi. 

An hausa em em pawh hi thil mak a ni lo. Lungleia a lo awm ve zawk laia a in luah pawh kha a phuisui ka ti rêng a ni. Keini chhungkua pawh rethei bakberh ni lo mahila anni lakah chuan eng ual kan ni lo. Pu Zoliana'n min iai ngawih ngawih pawh kha a demawm hran lo e. Anni te chuan chawmhlawm pakhat bâk an nei ve hleinem.

Sum tam tak an nei awm si a, Delhi lamah treatment la lova helaia a la awm mai mai te hi mak ka ti tulh tulh. A pa hian eng rilru tak pu ang maw?

Khum aṭanga tho chhuakin bathroom-ah ka inphih harh a, ka ril a la ṭâm em em zui. 

"Náno..." tia min ko ri ka hriat chuan rang takin bathroom aṭangin ka chhuak a, tray-a ei tur chawi chung hian u Mapuia room ah a lo ding a, thinrim hmel a pu hran lo. 

"Lo ei rawh aw, avai khan ei zo vek ang che," a ti a, ka nui hak.

"Kei chuan ka ei tawh a, i ei fel hnuah sawi dun tur kan nei," tiin ka chhânna pawh nghâk lo hian a chhuak zui daih a, damlo pawh a ang mai mai lo. A nelawm loh em ema chuzawng chu a ni mai.

A sawi vang pawh ni chuang lovin ka ril a ṭâm ve bawk nen ka ei fai vek. 

Ka ei zawh dawn lamah a rawn lut a, zak lo anga lan ka tum hram hram a, "I va ei thei reuh e," tiin a nui huk.

"Pahnih tan ei a ngai alawm.." ka lo ti a.

"I kawr kha han hlim chhin teh, ka lo en.." a tih chuan thuawih deuh hian ka hlim a, nui kur kur chung hian, "A puar chai silova" antiah.

"A la puar mai dawn alawm, i hmanhmawh a nih kha.." tiin ka eina vel ka tifel a, "Tikhan dah tawp rawh, nakinah Diki'n a rawn la mai ang," a ti a.

"Tihian i room-ah kan tawm reng mai dawn tihna em ni?" Tia ka zawh chuan, "Tawm lovang, ka nu leh pain min rawn ko ṭepin ka ring a, i muthilh hlan khan ka hrilh tawh alawm," dam thlupin a ti ta a. 

Ka va huphurh si êm. Engkim ka huam ti mahila, a nu leh pa meuh hmachhawn tur chuan ka la nau mah mah. Mahse, zakzum viau e ti lo hian ka duhnaah chuan ka ṭawngtheiin ka nghal fâl nalh. Unau zinga naupang ber duat rawn ka ni a, ka huaibâk leh thut ṭhin.

Rei nghah pawh ngai lovin a pa, pu Zoliana te nupa an rawn lut ta a. Awi Lalpa leh.

A sâng ṭha hle a, a kum ngaihtuah phei chuan la tlangval tak a ni. A hmel a rum úl a, a tarmit phen aṭangin min melh rulh a, a nupui erawh chu a hmui a pan hláng a, 'ba êk ngo' kan tih ang chi deuh hi niin ka hria, a thinchhiat hmel mai siah, ka hlau ru zek zek.

A fapa pawh melh lovin min rawn en a, "Zomuan, kan inah hian i awm a rem dawn lo a, tlang takin ka'n sawi ang e, ka fapa nupui atan ka duh lo che, kum thum liam taa ka rilru put dan ngai reng kha ka la pu bawk a nia, i mualpho tam hmain kan dah lêt ang che," a ti ta a, kei, u Mapuia, a nu kan ngawi ṭhap. 

A duh duh han sawi phawt teh se.

"Kum 22 emaw chauh i ni a, i naupai kha chhuanlamah hman tum miah suh, hmabâk êng tak i la nei a, i senso, i inenkawlna tur i duh zat sawi la ka pe ang che," a tih leh chuan ka ter ve at.

"Nangmah ka nei dawn lo che, nangmah ka luhkhung lo bawk che, u Mapuia alawm ka neih dawn, i fa nilovin ama fa hi a nia ka pái," dam thlapa ka ṭawng lai pawhin a nupui nu Biakliani erawh chuan mit khap miah lovin min en kur.

"I chaltlai reuh hle mai, ka fapa hian Cancer natna a nei tih i hria a, nang ang nula naupang tak hian a sum leh pai bâk duh i nei lo, chu chu ka hre chiang, in kum inthlauh zia te ka chhût vek, ka thusawi zawm la, tunah hian i u hnenah kan dah ang che," a ti leh khur khur a.

"Cancer zawng zawng an thi vek kher lo, a natna hrereng chungin eng ati nge treatment a lâk si loh, sum tam tak in neih te chuan enkawlna ṭha pe ta che, ama hlawh pawh a tam lutuk, i hmâ i sial mah mah," zah duh bik miah lovin ka ti ve zel a, min ben châk hmel khawp mai, a kut ding lam a phar uaih a, rum lutukin min rawn melh a, ka rin loh deuhin u Mapuia a ṭawng ve ta tlat.

"Ka pa, Nánovi hi in pawm thei dawn lo a nih chuan kan chhuak ang, kan sumdawnna a zât ve hi ka kuta awm a ni a, ka hna chelh chungin Highway contract ka thawk tih i hriat kha, Bawngkawna kan in saw ka hminga awm a nih angin in hrang kan chang bawk ang, Cancer hospital a hnai bawk a, kan tan in enkawl a awlsam dawn tihna a nih chu, kum thum chhung ka ngawi tawh a, a chhungte kalsana min vuan tlattu hi hnar ka tum lo," a ti ta hmiah mai le.

"Lalrinkim..." a nuin a ti fiak nghal ṭhak.

"Ka nu, nang pawh hmeichhia ve tho i ni a, hrethiamber tur i ni, a hmain a nu leh pa rilru inti hel tawh a, tun ṭum chu ka ngawi dawn tawh lo, a nuamah pawh a hrehawmah pawh min zui duh a nih chuan ka kiangah a awm ang, ka enkawl anga ani pawhin min enkawl bawk ang," a tih leh zel avangin nu Biakliani a ṭawng ngam ta miah lo.

"A ṭha e, tikhan awm ula indan a ngai lo ang, a nu leh pa kan bia anga in awm zel dan tur chu a hriat mai dawn a lawm," awihawm loh khawpa damin pu Zoliana'n a ti leh lawi si a, mak ka ti hle.

Pu Zoliana'n "Zomuan, i rilru sawhsawn hlek suh ang che..." tiin min vau thung. Ka chhâng ta lo.

Min chhuahsan hnuah Diki'n ka thil eina vel a rawn seng a, min huat hmel tawp. 

"Khawiah nge ka mut ang?" Tia u Mapuia ka zawh chuan rang zet hian, "Ka bulah.." a lo ti a.

"Kan la innei si lova.." zawi sapin ka lo ti a.

"Tihian kan innei chiah, min rawn luhkhung rual khan nupa kan ni tawh a hmingin.." tiin a nui ta a, ka nuih a za ve tho.

U Ropuia leh u Atei chanchin ka hrilh a, "Mama rilru ka hrechiang alawm, neih che hi a duh ngawih ngawih, a natna vang zawk khan a inla hrang a, hlim taka in awm ka duh," a rawn ti siam siam a, fel hi ka ti thlâwt.

U Ropuia erawh chuan, "Mate, chhel takin awm la, ka nu leh pate theih tawpin ka lo hrilhfiah ang e, naktukah ka lêt leh nghal dawn a, ka rawn hmu tawh lo mai ang che, nangmah vanga tawrh a ngai a nih pawhin i û hi ka lawm zawk ang, i hlim ka duh ber," a rawn ti ve bawk.

"Ka nautê hi a lo puitling tawh hle mai," tiin u Mapuia'n min kuah chial a, a khumah kan mu a, ka mut kawr hlimin ka pum a chul hauh hauh a, ka lâi hû...

"Min ti dawn em?" Tiin ka lo zawt khauh.

"Ti dawn chiang, kan inneih zan honeymoon angah ngai rawh," tia nui kur kur chung hian ka âwmbawr a rawn khawih a, a mitmenga eng emaw riau awm chu ka hai bik lo. Duhthawh taka min fawh lai pawhin ka thiam ang tâwkin ka lo chhâng let ve a, boruak a lum miah lo naa kan taksa a sa chhuak vek.

Ni e, a tan ka inpum pêk ta sa sa a tawp thleng rakin le.

A damlohna a natna leh ka naupai hre chang lo lêkin nupa nun kan hmang ve ta. Kan mut dun hmasaka rem lo zet ang kha ni tawh lovin thiam leh zei taka min sawngbawlna chuan amah min thlâkhlelh tir a, a tan ka inpeih thlap.

"Náno..mate, ka duat," tia phun supin ka âwmah a lu a nghat a, ani pawh thlanin a bual hnawng chap, a sam dum hlap chu ka lo tuai thur sak a, ka duh hluah hluah. Mualpho huama luhkhung man a va awm tak. 

"I hah em?" Tiin ka nui a.

"Teh suh ei, damdawi ei zawhah vawi hnih dang ka la peih," tiin a nui huk. 

A hnâr ngul sang vah leh a biangkí ta deuh chu ka chul a, "Kan naute hian a pa chhun rawh se, a pa, Lalrinkima hi.." tiin ka nui hak hak a, "I kum hi hresa lo ila chuan nang aiin ka naupang emaw ka ti ang," a ti ve ngei. A sawi tum ka hria, puitling min ti tihna; ka lawm ru veng veng.

Damdawi eng emaw zat mut dawnah a ei a, a mum a lian hlawm si, ka lo uak zawk zawk. 

Khawvar rualin zun chhuakin min tiharh a, u Mapuia a la mutui hle, a muhil hmel ka en a, u Atei sawi dan kha chuan kum khat bâk hun a nei tawh lo, doctor thiamna aṭanga an chhût danin, ka rilru a na ngawih ngawih a, pawl 12 ka zir laia inneih puia min sawm lai te khan lo hnar lo ila tun aia rei hi hlim takin kan awm dun dawn asin le. A pawi ka ti lutuk ringawt.

"Náno..." tia min sawi dat dattu an awm avangin ka harh hlawl a, hnai zetah u Mapuia'n min lo enin min lo ko chu niin. 

"Umn, eng nge?" Meng mang lovin ka lo chhâng a.

"Tho ang le, tukin hian doctor Linda clinic-ah incheck up rawh aw, ka hruai ang che, Israel point ah a nia a hla lo," a lo ti a, ka ṭhu chhuak nghal vat.

Ka zun zawh hnu khan ka lo muhil leh daih a, dar sarih a ri ṭep.

"Ka ṭha reng alawm, eng mah entir tur ka nei lo," tiin ka lo hnial a.

"Ka thu awih la, ina tawm reng i peih em ni? Atei te inah tukṭhuan kan ei dawn nia, i û pawh kan thlah liam lohvin," a ti sam êt.

Hnial thui duh lovin ka insiam nghal chûk chûk a, ani erawh a lo inpeih thlap tawh, jeans half pen dum a ha a, shirt Maroon colour leh chutiang rawng tho sneaker a bun a, a chhe lo thlâwt, hetianga a inthuam hi ka vawikhat hmuhna, lukhum dum a khum bawk.

In hnuaiah Diki a lo awm a, "Theitui leh biscuit kha Nánovi lo pe rawh," bung hmuka tiin a chhuak zui nghal daih. Nichina min biak dan leh an nula a biak dan chu inpersan tak a ni.

Dining table kilin ka ṭhu a, Diki pawhin ngawi rengin min rawn chhawp ve mai. 

Pu Zoliana te nupa ka hmu lo, an choka zau leh dai ruihah chuan min chhawp ang ang chu eiin ka hawi hrek hrek a, tukverh aṭangin u Mapuia'n motor a la chhuak chu ka hmu reng. A natna hresa lo ila dam ṭha pangngaiah ka ngai ngei ang.

"Náno, i huaisen hle mai, Atuni a lo haw hunah tun ang hian i la huaisen zel ang em tih kan hria ang chu," Diki'n a ti sap a, Atuni pawh ka hriat si loh.

"Tu nge chu chu?" Tiin ka zawt a, "U Atei phirpui Atuni, a naupang zawk," a ti ṭha ve mai.

"A sual viau em ni?" Ka ti a.

"Keitê a ni mai, a thinchhe si.." tih pahin a nui a, a sawi hmangah a zia tur awm ang ka hrethiam.

"Engtikah nge a lo haw dawn a?" Tiin ka zawt a.

"Nizanah piin a bia a, vawiinah Delhi aṭangin a rawn thlâwk haw dawn, lo inring ang che," a ti ta a, ka biak zawm leh hmain u Mapuia a lo lut a, "Kal ang le, kan tlai palh ang," a rawn tih tak avangin kan chhuak zui ta a.

"U Atuni a lo haw dawn tih i hria em?" Tiin u Mapuia ka zâwt a.

"Hre lem nang, a duh hun hunah lo haw rawh se, Mahindra company-ah Manager a ni a, misual a ni lo, i hmuh hunah i ngainat loh chuan i ngei viau thung ang, mi inveivung a nia," tiin a nui suk.

Pi Linda-i a fel hle mai, u Mapuia nen an inhre ṭha bawk a, "In sawiselna em em i neih loh chuan ultrasound kan ti rih lo ang aw, damdawi ṭha ka chawh dawn che nia, Mapui, i nupui chu a hmelṭha reuh hle mai, i bum nalh viau lo maw?" Tiin a nui kar kar a.

"Ka thlang thiam alawm, senior deuh deuh âi chuan Nánovi te ang hian thu an awih daih zawk," fiamthuin a niin a ti ve bawk a.

Keimah âi mahin u Mapuia a hrilh uluk zawk a, nupa nun hman chungchâng thlengin an inzawt a, ka lo zak nasa. Ka zun pawh min test nawn tîr leh tho. 

"Naute hmelṭha deuh in nei ang, a chhun che u chuan, in neih dawnah pawh kan hospital-ah ngei aw.." tiin u Mapuia a chah a, "Lutuk tlat," tiin a chhân ve kha. Ani hi chu a ṭawng tam lo ve hrim hrim a, ngaih khatah ka ngaih a ngai.

"Ṭhuthlengah rem lo lutukin kan ti a nia, kan vannei êm mai," nui hawk hawk chunga a tih chuan ka lo íp ru lutuk. 

Mahse, Linda zawkin, "Kum 30 ral kai chin te chu a chang ṭha ve tawh ang chu,'' tia fiamthu bawka a lo chhân ve takah chuan ka nui tawp.

Damdawi kan lei a, ka ei tur Apple tih vel neuh neuh a lei ṭeuh bawk, pawisa ka phawrh ve hman îk lo. 

A nau a lo be lâwk tawh bawka chaw eiah min lo la nghâk a, ka û pawh a lo thleng diam tawh a, nimin lam kan boruak nuam lo mah se, tunah chuan kan hlim tlâng hle.

"Ropui, ti hi kan ni ta si a, i nu leh pa an lungawi dawn lo tih hriat sa a ni a, inrem an duha palâi hmel hmuh an duh hma chu Nanovi hi ka hnenah a awm reng dawn tih i lo sawi dawn nia, inneihna mumal tak, man leh mual an dawn duh hunah erawh chuan ro hran kan rêl thei chauh ang," tia u Mapuia'n ka u a hrilh chuan ka lo hlim veng veng.

"Ni e, chanchin ka hrilh rual rualin hruai nghal turin min ti dawn a, i sawi hi ka lo hre reng dawn nia, ka kova tla a namai lo tih Mate lo hria la, i thu zûk mai mai suh aw.." thutak zetin a ti zui, ka lo bu nghat nghat.

Hlim takin ka u kan thlah liam a, u Atei'n lêng rih tura min sawmna erawh u Mapuia'n a hnial a, "Damdawi ei ngai kan nei nual a, kan chho rih zawk ang e," tiin a chhâng a, ina haw ka huphurh. 

Atuni lo haw tur chuan min kam ru reng a, eng tak sawi ang maw?

U Mapuia te in kan lut chiah tihah, "Mapui, in chin sawi lovin in thang bo daih a, i nau Lengpui Airport-ah hmuah a ngai dawn a nia, biak tlang theihin i awm bawk si lo," pu Zoliana'n a lo ti nghal a, tukina kan chhuah chhan u Mapuia'n a hrilh sa emaw ka lo ti ve ringawt.

"Diki ka chah reng alawm, in tho hma ṭhin si loa hrilh tur che u a kaih thawh kher che ṭul ka ti lo, Nánovi incheck up turin ka hruai," a ti nghut a.

"Kha maw, zan khat a rawn riak dék dék a, nang check up ngai bawk, ani ni bawk, khua inti var lo, Zomuan, ṭhat lohna eng nge i neih?" A pa bawkin a ti leh khur khur a, chhân tumin ka âng zuau tihah u Mapuia a rawn ṭawng a.

"Naupai lai a nih hi, a ṭhat leh ṭhat loh ka hre duh a ni mai, khua kan ti vâr lo a nih chuan Bawngkawn lamah khua kan va ti var ang e, Atuni chu driver hruai tir mai rawh, ka contract thawhna pawisa hlawm i kuta awm kha ka account ah lo transfer ang che," hnial theih miah lovin a ti chang fuk.

"Lalrinkim, hmeichhe pakhat vangin khatiang khan i pa hi i chhang ngam a maw?" Tia a nu a lo ṭawng chuan, "Upa ber ka ni a, he inah hian ka chêng kumkhua thei dawn lo, Thlamuana tan ka kian zawk a nih hi, induat hliah hliah bawk a, hna nghet ka nei a, hlawh in nei ve ve bawk, eng anga tam nge in la duh belh a? Ka natna in zêp rei avanga kan tawrhna hi chhut let rawh u.." a ti ta khawl khawl a, a nuin min melh rum ngei mai. Ka tih tîr pawh ninghal lo chuan.

"Rinkim, ṭawng tawh suh, Zomuanzual, buaina i rawn thlen nasa hle mai," pu Zoliana'n a ti hniam ruih a, a hmai a sen ṭûn bawk.

"Ka hlawh in duh tâwk loh mai bâkah vawi eng zat nge dâwt hmanga contract min thawh tir tawh? Zak teh u.." u Mapuia'n a ti leh nek a. 

Ka bânah vuanin, "Lokal rawh, Bawngkawn lama kan in thar tur i va en daih ang, ka dam chhung ngei hian ka ro i khawm theih nan hma ka la bawk ang," tiin a nu leh pa ngaichâng map lo hian inchung lam min panpui ta a, pa chher chher ve le. Ka duh hluah hluah.

In hnuai lamah pi Biakliani a âng dur dur a, ka hming a chham tel nawk bawk. Mahse, min ṭan tlattu ka kiangah a dinga ka zâm lem lo.

Khumah a ṭhu hnawk a, "Ka chau..." a ti sup.

"Tui in rawh aw, eng eng hi nge ei ngai?" Tiin khum bula damdawi awm ṭeuh chu ka melh a, min en vang vang chung hian, "Khawi ka lo hrilh ang che, nidangah min pek ka phût zel dawn sia," tiin thinrim lo ang hmak hian a nui a, a damdawi ei dan min hrilh fiah nghal zel a, theihnghilh loh tumin ka chhinchhiah kar.

"Lokal teh ka naute..." tih pahin a malchungah min ṭhut tîr a, "Ka ring tawk che a, min kalsan hmasa a nih loh chuan i tan ka awm zel ang, ka natna hi inhneh tîr ka tum reng reng hleinem, ka thawmhnaw siam ang aw, Atei lo call la, kan mamawh tur min lâkkhawm pui turin lo hrilh rawh," ti zung zungin ka chalah a fâwp zauh a, a nghâwngah ka lo kuah chial.

"In dan kher ka phût lo a nia, i tawrh theih chuan ka tuar thei vek," ka lo ti ve ngei.

"Ni lo ve, nau mipa ka la neia nakina ka hmabâk tho a ni, an duh duha an ânkhum che ka rem ti reng reng lo, i lo kalna a hlat hlat nen..." tiin a nui ta a.

Chumi hnu chuan muangchang lovin u Atei ka bia a, a lo phur ngei mai. "Ka rin aiin a thleng hma," zuk ti a.

A û a ngaisanga a zah a, a hmangaih tih ka thinlungin a hria.

A thawmhnaw kan pack mawlh mawlh laiin room kawngkhar a rawn inhawng rawp a; pu Zoliana a rawn lut leh ta a, nichina a hmel sen ṭul kha hmuh tur a awm vak tawh lo, a lo inbengdai tawh pawh a ni mahna. Mahse, nelawm loh tak a ni.

"He in hi kan thu lova i chhuahsan lui a nih chuan 'Ka pa' tiin min ko tawh suh ang che, i nupui hi ka damchhungin ka pawm dawn lo tih hre nawn leh la, kan thu zawma i dah let leh a nih chuan he in leh lo, ka ro zawng zawng i khawm ang, i duh thlang rawh le?" Pu Zoliana aw dam thlup chu ngaihthlâk a nuam fahran lo. A râpawm zawk.

"Mama, i ngaihtuah chiang lo mai mai a ni, i fa chhuanlamah hmangin a nu leh pa hian hmanruaah an hmang lo tih i hria em ni? A nuṭa neihchhunin phal takin i hnenah a rawn dah tawp te kha an rilru ṭhat vangah ngai hlek suh, i rosum, i hausakna an duh vang a nih kha, a kum zât chhut la, Lungleia i awm lai zawng zawng pawhin a hnar che a ni lawm ni, an tawlhpanalah i tawlhthlu a ni," dam leh nghet churh hian a tih zawm leh a, u Mapuia a la ngawi reng a, a thawmhnaw a siam zawm mial mial.

"Mama, i pa hian i chhiatna tur ka ngaihtuah ngai lo, ka fa hming koh i ni asin," ṭah aw ṭuaua a tih leh tâkah chuan u Mapuia a rawn dâk chhuak a, a pa mit takah enin, "Ka chhiatna tur i duh loh chuan Nánovi nu leh pa hnenah palai tir la, kan inneih ngei ngeina turin hma la ang che, tichuan kum thum chhung ka natna i lo zêp tawhna kha ka ngaidam ang che, chuan he in hi ka chhuahsan lo bawk ang," tiin a kar ve ta a.

Pu Zoliana a thaw hulh.

"Zomuan, in hnuai lamah lo inthiar fihlim lawk la, ka fapa hi a fâla biak ka duh tlat.." tiin min rawn en a, mitmeiin u Mapuia ka ráwn ve thung.

"U Mapui..." tiin a âwkâ ka ngaichang a.

"A ṭha alawm, tun bâk hun ṭha a neih tawh loh tâkah zuk chhuk la, nakinah ka lo ko dawn che nia," dam têin a ti ta a.

Ka hnial ta lo.

Ka phone lain an pahnih chuan ka chhuahsan ta a.

An pafa inkârah hian ka hriat ve loh eng emaw chu a awm a ni. Tun maia thil thleng ni lovin a hma aṭang daih tawha inmúng a nih hmel bawk.

U Mapuia nau Thlamuana a la awm ve reng a, eng vangin nge an fa u ber hian in a chhuahsan an hlauh em em, eng emaw zêp rûk an la nei cheu a ni ang. A natna reng an thupsak rei em mai. Tin, nupui nei mai tur ang leh hualsak neia insawi siin tun thlengin an la neihsak bawk si lo.

Thil mak a ni. 

Ka hriat chhuah ngei a ngai, hriat ka tum ru ta rân a, a pa khan ka awm loh hlanin thiam takin a rilru a sawhsawn sak thei bawk.

Atuni an chah haw rum rum bawk a, thil fel lo chu a awm a ni...

Kei min duh lohna phêna thil inthup leh inphûm ru hi eng nge ni ang?

-B®®

Shadow of the life

B+>[BeckirafARenthleI]<+®®