6.A MAK! A Becky Rafa Renthlei Story

6. A MAK!

Ziaktu: Becky Rafa Renthlei 

-B®®

Shadow of the life

[Recap]

Khawvar thlengin Zobiaka khumah ka mu ve ta a, vawikhat mah kan muhil lo. A khât tawkin min fâwp zeuh zeuh a, a aia thui pawh a kal chuang lo a, min fawh kâr lakah ngun taka thil ngaihtuah tih hriat deuhin a mûk viau zel. Kan ṭawng meuh lo a ni ber.

Ni e, an chawlh hahdam theih lohna chhan leh keini pahnih atana mi pawimawhte min tibuai tlat hi a chhan a awm ngei tur a ni. Hlau miah lova hmachhawn theih ka va châk si êm...

&&&*

Khua a vâr fel a, Zobiaka pawh a thlenna lamah a chhuak chho tawh a, inngaizawng ang deuh reuhin kan awm a nih tâk ber hi. Ṭawngkain sawi lo mahila kan inkârah eng emaw a awm tih kan hre ve ve, chuti ni lo se infawh vak vak thu awm suh. 

A insawi angin Mama a lo haw lo a, Ṭanpuia erawh zinglam dâr sarih velah a lo haw thunga a mu nghal daih.

Nizan lam kan boruak ngaihtuah duh miah lovin eirawng ka bâwl mial mial a, ka hnaah kal lovin Nunhlua te inah kal ngei ngei ka tum bawk. 

Tûkṭhuan ka eikhama Nunhlua te ina kal turin ka insiam zui nghal a, nimina Zobiaka û Hmingi puan ka bih hawh kha ka hawn tîr theihnghilh avangin ina ka awm loh tur thu leh kan ina rawn lam mai tura hrilhin ka call a, "Apui, a nu leh pain eng pawh lo sawi se i thil hmuh leh hriat eng mah hrilh suh aw," a rawn ti a. A chhan ka zawh chuan, "An fapa neih chhun chanchin a chhe zawnga sawi an duh dawn lova i tân a pawi thei aw," tih bâk eng mah a sawi belh lo. 

An in ka thlenga tu vak mah an lo awm lo va, Pu Ngheta Nunhlua pa leh putar pakhat an lo titi a, Nunhlua nu pi Lawmawmin min hmuh chuan, "Apui...'' tia ka hming lam pah hian ṭah a'n tum nghal ringawt. Min rawn kuah a, ka lo kuah lêt ve mai bawk a; mahse, ka ṭah a chhuak hlawl lo. (Nunhlua nu leh pa hi pu Ngheta, pi Lawmi tiin ka sawi zel tawh ang)

Pi Lawmi chuan Nunhlua room-ah min kuah lût a, "Bawiha, Apuii a lokal a nia, a hrilhhai asin, ka fapa i ti mak lutuk êm mai," tiin a ṭap ta hawm hawm a, ka mittui a hnâm sak. A dik taka sawi chuan inneih tepawh kan sawi ru ve tawh a; khatiang thil kha tawng hrep lo ila chuan ka ṭap nasa viau ang. Mahse, ka chhungril a hel laklawh tawh a ni. Hetiang thil hi ka lakah ti mah se thi tur êm chuan ka duh hauh si lo.

A duh tâwka a nuin min ṭah khum hnuah, "I hmel hmuh nawn ka lo inbeisei reng a, a ruang lah kha YMA kan dil nasat vanga kawl rei thei chauh kan ni a, âw, mite hi chu an va ṭha tak êm; ka fapa neihchhun heti maia a liam hi chu ka ngai thiam thei hlawl lo a ni e," ti lehin a insût ṭan leh ta. 

Hnem dan vak ka thiam lo a, Nunhlua khumah ka ṭhu a, ka'n hawikual deuh chuan banga Calendar intâr chuan ka mit a la deuh tlat. Nidangah pawh ka hmu fô nain ka mit la riautu thil ka hmu tlat alawm! 

Pi Lawmi pawh ngaihsak ta lo chuan Calendar intârna ka pan hnai a, ama thlalâk hnuaiah ní leh thla a tlar thla dal a. Mahse, ngun deuh zawka ka en chuan a 'background' ah thlalâk dang a lang tel tlat. A room-ah ka lut fo a, kum tin a hmêl lanna Calendar a nei ziah ṭhin tih ka hria, ka chîk ngai lem lo mai pawh a; Calendar-a thlalâk dang fiah vak lova lo lang chu ngun leh chîk zawka ka en tâkah chuan mipa leh hmeichhia in hmatawna inkuah lai hi a ni a, mipa zawk chu hai rual lohvin Lalnunhlua a ni. Ka chiang e. 

Hmeichhia zâwk erawh tu nge a nih ka hre lo hrim hrim! An nghawngah an inkuah tawn ve ve a, a fiah loh êm avangin en chian fê a ngai. A hmeichhia zâwk khi keimah ka ni lo a, a u Manuni pawh a ni lo tih ka hria.Tu nge ni ta ang?

"Apui, i rilru tur ka hrethiam aw..ka fapa hian nang aia hmangaih a nei lo tih ka hria a nia, tuna a accident pui pawh hi a ṭhiannu a nia, kan inah pawh hian a rawn kal ve fô tawh," tiin ka dinna bulah pi Lawmi a rawn kal hnai a, a mit a sen râm a, kei lah chuan rang fahran hian, "Hetah a lokal tawh maw?" Ka lo ti vat.

"Kal tawh e, an zin dawn tlaiah khan a rawn hruai a, i ṭhiannu te khuaa i kal thu leh Ramdini thlaha kal a tum thu a sawi a, amah Ramdini tak pawh khan min dîl nasa ve si a, ka lo phal ringawt alawm maw le, a pawi ka ti lutuk. Lo kal tîr lo ila chuan ka fapa a la dam tur a nia," a ti sap sap a.

"Ramdini chu i hrechiang em?" Tia ka zawh chuan, "Hrechiang e, Mamita i awm hlan khan an ṭhianho chaw an rawn ei a, â..Bawiha ṭhiannu kha chu a fel, a nikhua reuh riaua ka ngaina asin, ngaih loh lamah ngai lo la, nang tih lohah chuan ka ngainat ber a ni. Bawiha ṭhian hmeichhiate zingah chuan.." a ti a, ka ner ru nasa.

Mamita ka awm chhung te chu kum thum a ni a, kan inngaihzawn aṭanga thla lina velah ka kal nghal deuh mai kha a ni si a, ani nen kum thum kan inzui tling tawh bawk a; khatih chhung zawng khan Ramdini nen hian min lo kawp char char em ni ang? Ka haw khât lutuk bîk lo a, rinhlelhna tur ka ngaihtuah lêt ngial pawhin ka hre lo a nih ber.

"Apui, i tân a tha nat thlâk ang tih pawh ka hria a nia, mahse, eng mah ngaih huat tur a awm lo aw, a ṭhiannu a thlah a ni ve mai a, an vanduai ta a nih hi," a fapa thlavang hauh zeta a ṭawng chhuah chuan, "A kal tur thu min hrilh lo a, Ramdini tih hmingpu ṭhian a neih awm ka hre ngai lo bawk a, min hrilh duh lêm loh thil eng emaw a awm zâwk a ni ang," ka lungawi loh êm avangin ka ti ve hmiah.

"Kha ti ang zawngin ngai kâwi mah ta che, a nu ka ni a, ka fapa te chu ka hrechiang ve thawkhat, nang nena inneih a duh thu pawh min hrilh tawh a," a rawn tih leh chuan, Calendar lam ka kâwk a, "Ngun deuhin khi thlalâk khi han en teh, nu Lawm, mi â ka ni bîk lova atana mi pawimawh a nih loh chuan khi thlalâk khi a dah ka ring lo, keimah ka ni lo chiang a," ka ti ve sak sak a, ka thin a rim thar zual hlê.

Ka sawi angin Calendar chu a en vang vang a, "Khi chu Ramdini a va ang ve," a han ti chiah phei chu sa tak ka ni.

"Engkim hi ka la hre chhuak vek ang," ka ti sap a.

Min en tawh lo hian khuma puan intiang vûm thûr lam chu panin, "I duh ber kha thlang phawt teh le, a û tih lohah chuan nang hi la hmasaber tur i ni e, Apui, ka fapa thih dan hi a lungawi thlâk lohvin i tan pawh mualpho tel vena tur tam tak a awm ang, mahse, kha leh chen lo inzuia inkawp in ni a, khawngaih takin a âiawhin ngaihdam ka dil a che," dam thlap hian a ti a.

Ka ngawi reng. 

Puan pawh thlang ta lo chuan, "Ni dangah ka lokal leh dawn nia," tia insût hraih chung hian Nunhlua room chu ka tlan chhuahsan ta a, nu Lawmin min koh zui lawm lawm pawhin vawikhat tê mah hnunglam ka hawi lo. 

A mitmengah khan thil thup a nei chiang alawm, zêp rûk an nei tih ka hrethiam ve tlat.

An in ka hlat fê tawh tihah ka ding ta chauh a, Nunhlua phone check ka châk zek zek. Tun hnai maia thil thleng ni theiin ka hre lo, kum liam ta zawng zawngah khan Ramdini nei reng chungin kei min kawp tih a hriat viau. Kei mi mâwl hi a sawi ang angin ka lo awma amah vanga hun leh thâ ka sen zozai ngaihtuah phei chuan lungawina tur chhetê mah ka nei lo.

Zobiaka ka call a, a pick thei ṭhak lo lehnghal. 

Ke-in muangchâng hian Auto stand ka pan a, ka hah hluah hluah. Rinkimi nuteiin min lo ko pêng a, thingpui in tura min sawmna erawh ka hnial thung. Tuma chìm buai lova mahnia awm ka châk zek zek. 

Kan in ka thlen dawnah Zobiaka'n min rawn call a, "Apui, Nunhlua te inah i awm tawh si lova tunah khawiah nge i awm?" A rawn ti a, kan in ka thlen tawh thu ka sawi chuan, "Ka rawn kal dawn, lo awm rawh aw.." hmanhmawh hmel takin a ti zung zung a.

"Zanah lokal mai rawh, tunah chuan mut ka duh.." tia ka chhân chuan, "Nghâk hman ka ni lo, i hriat ngei ngei tur thil a awm a nia," a ti leh hrâma ka chhânna pawh nghâk lovin a dah daih nia. Hepa tak hi chu(h)

Ṭanpuia class kal tur a rawn chhuak a, "Ṭana, ka ṭhianpa lokal hma min lo awmpui lawk la i hmanhmawh viau loh chuan..." tia ka lo biak khawmuan chuan mak atih hmel viau. 

"Dâr khatah kan ṭan dawn a, a la tlai chhe chuang hleinem," ati ve mai a. Inchhungah kan inzui lût ta a. Ani pawh hian Nunhlua nen kan chungchâng a hre vek tho a, hetia a boral pawh hian mipa na na na chuan eng mah min zawt lo. Min khawngaih ru ve tho chuan ka ring.

"Aupui, u Nunhlua kha engtin nge i duh le.." a rawn ti chhuak hlawl a, min en lem lo hian phone a kheuh mial mial a.

"Teh thut che chuan eng ati nge min zawh a?" Ka lo ti a.

"A lerh êm alawm, ka hrilh che chuan i rilru a nat ka hlaua ka sawi duh lo mai mai a nih kha," a ti sup a. 

"Sawi sawi pawh ka duh tawh lo, hrethiam em?" Ka ti a, ka thinrim leh ṭan ringawt. A hming an sawi pawh hian a ṭha lam hriat tur a awm ta mang lo hi ka tan a hrehawm zual. 

Ṭanpuia a ngawi ve mai a, thingpui ngawi rengin ka pe a, kan in kawta motor thawm a awm tâkah chuan, "I ṭhianpa a lo thleng tawh a ni ang, ka kal aw..ka thusawi kha theihnghilh daih rawh," tiin a bag nen a chhuak ta a, Zobiaka a rawn lût ve chiah bawk.

Min hmuh rualin min rawn pan a, "Ka rawn lam kual ang che ka tia i lo chhuak hman tawh a, i lungawi lo a nih pawhin a nu leh pa hriata tih lan kha thil ṭha ber a ni lo a nia, i â ṭhin êm mai," a rawn ti bawrh bawrh a, keia lo thinrim ve tawh sa chuan, "Nia, ka â, ka mâwl, mi mawl ka nih hi.." ka lo ti lêt hlar a.

"Apui..." ti supin ka bulah a rawn ṭhu a, "En rawh le, i duh engkim a awm ang," tiin Nunhlua phone min pe ta a, ka lo la vat. A 'pattern' ka hriat sa avangin awlsam tein ka hawng thei mai a, a lo la thlâk bik lo chu mak ka ti viau.

Thlalâk ka en hmasa ber a, kan pahniha thlalak a tam khawp mai, ka en tam telh telh a, hmeichhe dang thlalâk pawh a awm nual. Hmuh mawh tur êm êm ka hmu lo. Ramdini ni ngei tur pawh ka hmu ta chiah a, hai theih ninghal lo chuan, kei aiin a upa zawkin ka ring a, hmai hlai lam ngo phak mai a ni a, a hmelchhe miah lo, a sam chu a dum ngîl siau a, an inhmeh takzet. A dang pawh en tur a tam viau laiin ka duh tâwk ka hmuh tawh avangin whatsapp ka en leh ta a. 

Ramdini nena an inbiakna ka hmuh meuh chuan mak tih luat vangin hmui ka hup tawp. Râpthlâk hi ka'n ti mai mai khawp a, kei nena kan inzui hma daih aṭanga inkawp an ni tih ka hrethiam a, a tam zawk delete mah se an inhauna te keimah vanga vawi tam an inṭhenna nen lam ka hmuh phei chuan ka zak chem chem. Min bum hlum lo chauh chu a ni e.

Ka thaw halh a, Video pakhat ka en leh hnuah phei chuan ten lutuk vangin ka uak lo chauh. Zobiaka'n phone min chhuhsak a tum a, phal lovin ka room lamah ka tlan luhpui daih, min rawn man hman lo hlauh.

Ni e, Sex video hial an siam a, a phone hi kan inkawp tirh lai khan ka ensak ve zauh zauh ṭhin. Mahse, a hnuah ka rin tâwk êm avangin ka enpui tawh ngai lo a, hmun hrana awm ka ni bawk a, ka ngaihven sak lo hrim hrim. Ka phone pawh a check ngai  ka hre bîk lo.

Nunhlua phone vawm chhe lo tura ka la inthunun thei hi thil mak a ni. Ka luak a chhuak ut ut a, ka chilte a rial thei mai dawn alawm maw le. Saruak ngalngata an awm dun han hmuh meuh chuan ka na ngawih ngawih a, ka ten hluah hluah bawk.

"Chawngdingpui, kawngkhar i rawn hawng dawn nge ka ti chhe dawn?" Zobiaka awki hriam hraih avang chuan minute engzat nge room-ah ka inkhung tawh ka hre lo. Mi â ang maiin ka melh ngai ka melh reng a, ka zak a ni, ka zak lutuk... 

"Haw rawh..." ka ti vin ṭhat a.

"A teuh lo, i room kawngkhar ka tih chhiat i duh loh chuan vawi thum ka chhiar hmain rawn hawng ang che," tiin "Pakhat, pahnih.." a ti zui a, ka va hawng leh ta nge nge e. 

A ṭhianpa phone khuma ka dah chu banin, "A thiam lo zawk leh a dik lo zawk ang maia awm kha bansan hmak rawh, i hriat duh engkim i zawhna leh chhânna awm thei zawng zawng kha phone-ah khan a awm vek, chuvanga en tîr che pawh ka ni rêng a, ka sawi aiin a fiah zawk," tiin ka ṭhutna bulah a rawn ding a. Sawi tur ber pawh ka hriat si loh.

Eng nge ka sawi reng ang ni? Eng mah sawi tur ka nei hleinem. Zah luat vanga thidang tur ni ila ka thidang hmasa berin ka ring. Khang hun liam ta chhung zawng khan kei tih loh mi zawng zawngin Lalnunhlua nun dan leh khawsak phung an hre awm si a, hnung lamah min lo nuih tet tet hlawm ang chu.

"Min chhuahsan phawt rawh, keimaha awm ka duh.." ka tih chuan che map lo hian, "Apui, inbengdai la hahdam tum rawh," a ti zawi sup.

"Ka thei lo... ka thei lo a nih hi.." tih pahin ka insût nghal hlawp hlawp a, ka ṭap lovang tiin rilru ka lo siam ve asin le. Mahse, Zobiaka hmela min khawngaihna leh lainatna ka hmuh hian ka hmeichhe rilru no a lo chhuaka ka ṭap leh ringawt tawh.

Ka bulah a ding renga min hnem nana min kuah emaw min khawih emaw pawh tum lovin a din ngaiin a ding ngur a, kei erawh chin tâwk awm lovin ka'n ṭah tak kha. Tun bâk hi Lalnunhlua vang hian ka mittui a tla tawh tur a ni lo. Ka mittui hi a phû lo, a phû hlawl lo.

"Duh tawk tawh la.. i chau vek ang," a rawn ti a, "A va han mak ngai ve le, engtin nge khatiang nun tenawm nei chung khan kei hi min hmangaih anga a lan der theih zawk le, Zobiak, A Mak!  a ni," ka ti thlâwt.

Hriatthiamna mitmenga min en chung hian, "Sawi tur ka hre bik lo, mitthi tawh ni lo se chuan heti em ema nâa a siam vang che hian ka khawih ngei ang," a ti hniam chhak. A thaw hawk a, min rawn kuah zui nghal a, "Ngaidam suh, ngaidam miah suh," a ti zawi leh sup.

A hma te kha chuan ngaidama a hun tawp ṭha taka khâr sak tur khan min hrilh zâwk a ni a; mahse, engkim a chin chhuaka a hmuha a hriat vek hnu hian ngaihdam a phu lo a ti ve a ni mah na. 

Mahse, ngaidam lo ni ila engtin nge ka tih chuan ang? Mitthi tawh lakah phubâ ka la thei em ni? Ka thei chatuan dawn lo, chuvang tak chuan a ni ka chhungril hi a nat ni. 

Zobiaka âwmah ka bei thlap a, ani erawh a ṭang ṭung a, a ṭawng chhuak tawh lo. Ngawi rengin minute eng emaw zât kan awm a, chutah, "Inphih fai la a nu leh pa kutah a phone hi i dah teh ang, kawl reng tlâk pawh a  nih loh hi.." a ti a.

Ka inla hrang ve nghal vat a, "Na tur i ni, mahse, a dam leh thei.." tih pahin a hmuiin ka biang a rawn fawp zeuh a, "Tidamtu ka ni lo, mahse, ka hliahkhuh thei che," a sawi zawh rualin ka kut a vuan a, "Inti chak la, anmahni hlau tur kan ni lo, min hlau zawk tur an ni," zuk ti mauh a.

Ka inphih fai chhungin phone a lo hmang a, a hna chungchangah an inbia niin ka hria. Nu Lawmi te ina kal leh ka hreh rualin an fapa chungchâng sawi chhuah ka châk zek zek a, sawi ṭan dan tur erawh ava vâng si ve. 

"Apui, Nunhlua chungchâng a nu leh pa hriatah eng mah sawi chhuak lo la ka duh, phone kan pe anga kan chhuak leh nghal dawn nia," a tih chuan ka ngaihdan a ni lo ang reng.

Ṭawng tumin ka âng zuau a, "Khawngaih takin tun ṭum chauh ka thusawi zawm la, a bâk chu ka kutah dah vek ang che, i tân ka awm reng ang tih ka sawi lovem ni?" Tia a ṭawng zawh rualin a lamah min pawt hnai a, "I tana ṭha tur zawk leh a nihna dik tak i hmuh chhuah theih nan chunglamin kawng a hawnsak che-ah ngai la, accident tâwkin boral lo se chuan tun thlengin eng mah hre lovin i la awm dawn asin, a dam zawnga thlir thiam a ṭha. Umm..i thei ang tiraw?" A ti leh a, tuna a ṭawng dan hi chu pa leh fa inzilh ang vel kan ni.

"Ka tum dawn nia," ti chauhvin ka chhâng. 

"Vawiin nilênga ka rilru luahtu pakhat ka ti phawt anga kan kal dawn nia," tiin a rawn kun hniam zui zat a, min fawp leh dawn tih hrilh hranpa ka ngai lo, a fawh theih turin ka lo dâk chho ve hâ a, a hmaa inthiam lohna rilru ka lo put ve te kha vawm bo ang duak a ni tawh. Ka thawveng huai ti ila a dik ang.

Rei ngial kan infawh hnuah ka thinrimna te leh lungawi lohna te dah ṭhain a Bolero-ah ka chuang lût ta a, a duhnaah hi chuan min ngaihsakin min duat thiam tih pawh ka hriat belh phah. Mahse, a ṭawng tam lo ve lulai êm a ni.

Nunhlua khawsak dan mak ka tih rualin tuna ka awm dan pawh hi a mak tho. Kâr khat êm pawh ka la hriat loh mipa hi ka ringin ka infawh tîr tlut tlut a, keimah Chawngdingpuii dik tak kha a bo ṭhen ta tepawh a ni mahna.

"Nihnih chiah Lungleiah ka awm tawh dawn a, i hnaa i kal a nih loh chuan lo chhuak tam suh ang che, zanah phei chuan khawiah mah kal chhuah loh tur, i nau hnaihah awm zêl la, a rang thei ang bera lo lêt leh ka tum dawn nia," Nunhlua te in pana kan tlan chhuah hnuah a ti a, Zobiaka awm lo tur chu ka lo huphurh lâwk sa.

"Khawiah nge i kal dawn, i haw dawn em ni?" Tia ka zawh chuan, "Haw dawn lo e,  khawthlang lamah hna chinfel tur tlem ka nei a, ka rei lo ang," a ti dam thlup.

"Tihian kan inngaizawng tihna mi?" nui lek leka ka zawh chuan, a nui ve suk a, "Ngaizawng chiang e, kan innei thuai ang, inzui rei hi hnawk a tam duh.." a'n ti awlsam êt a, ka hnial duh lem lo.

Zobiakmuana ni li chiah ka la hriat nen hian inneih kan tum ang maw? Ka bialpa ṭhianpa a nih bâkah a ṭhianpa thihna ni thum emaw lek a la liam a, hetiang thu kan han sawi ta mai hi a mak leh ta!

Thil thui deuh leh hmangaihna thu sawi dun lo mahila a chêtzia leh a awm danah hian tuna min duh chawp mai mai a ni lo tih ka hrethiam ve tlat.

Chawngdingpuii hi hneh ka va awlsam ta si ve. Hei pawh a mak tho....

25-11-22 -B®®

B+>[BeckirafARenthleI]<+®®