8.A MAK! A Becky Rafa Renthlei Story

8. A MAK!

Ziaktu: Becky Rafa Renthlei 

-B®®

Shadow of the life

[Recap]

Ka mut kawr inbel chhun pawh a phih sawk sawk a, a thaw huam huam bawk a, a chêt dan mak tak mai chuan min ti hlau ta tlat. Thlamuan tuma ka lo hnaih hrawt hrawt kha ka inchhir ṭan der.

A hnuailamin min do rûn a, min fawhna erawh a dam ta deuh. "Apui..." ti supin min chhuk melh a, ani leh ni lo angin a meng phelh phung a, "Lalnunhlua nen in mu dun tawh em?" Tia min zawh chuan "Aw" tih nan ka lo bu nghat a, chu veleh rang taka tho chhuakin khum bul chair-a a thawmhnaw dah a inbel sawk sawk a, a thinrim tih hrilh hranpa ka ngai lo.

Ngawi rengin a chezia ka thlir reng a, va pawha biak luih pawh ka tum duh bîk lo.

Room kawngka bulah dingin, "Inngaihtuah ka mamawh, ka lo lêt leh ang," tiin a chhuak ta a. Khua a vâr tawh bawk.

&&&*

Khumah ka ṭhu a, Nunhlua nen kan mu dun em tih min zâwt a, "Aw" tiin ka chhâng. 

Mu dún han tihah khan tuna amah nen kan mu dun ang deuh tho hi a ni a, vawikhat mah sex kan hmang lo. Ka pian tirh aṭanga tun kum 32 thleng hian mipa pakhat mah Sex ka la hmanpui lo hi ka inchhuan vena a ni. Pathian min vênna a ni bawk.

Nunhlua pawhin kum thum chhung khan vawi eng emaw zât chu min beisei tawh. Mahse, ka hlutna hi a hun hmaa hman chhuah tumna ka nei ngai lo a; min nawr lui lo naa kan inhau phah fô. A duh ang ka pêk loh vang a ni mahna Ramdini pawh a kawp ni. Mahse, ka inchhîr phah chuang lo. Zobiaka khan a ngái kâwi tih a hriat reng a, sawi fiahna hun awm lovin a chhuak zui ta kha a ni a. Hahthlâk siah. 

Office kal tura ka insiam laiin Mama a lo haw a, Zobiaka chungchâng min zawt a, zinga a chhuah tawh thu ka hrilh chuan, "Office thleng ka lo thlah ang che, min lo nghâk rawh," a ti a. Ka nghak ta a.

Zawmi chungchâng pawh ka zâwt ve tho a, office panin kan chhuak ta a; ka thawhpui ṭhenkhat Nunhlua nen kan chungchâng hre ve te chuan râlna sum min pe ve hlawma han dawn loh ngawt dawnin a ni mang si lo. A nuam lo vel vek a ni mai. 

Zobiaka'n vawikhat mah min rawn be lo a, kei pawhin ka be bîk lo. Tlai lam dâr thum velah office chhuahsanin ka haw ta daih a, khawi hmun mah hi nuam ka ti thei tawh lo a ni ber. Ka nun a chêp takzet.

Rinkimi pawh Aizawlah incheck-up turin tukin khan a kal a, Call-in inbe kher lo mahila whatsapp lamah chanchin kan inhrilh tawn zel tho.

Zobiaka mawlh mai kha, a be hmasa zâwktu nih ka hreh ngar ngar si a, a awm dan hriat thiam har zet hi buaithlâk ka va'n ti tak. A rûkin ka ngai veng veng a, kan in zaupuiah tih tur hre lovin ka tei kual ka tei kual ringawt. 

Khatia kan ina thâwm ka hriat bâk kha chu eng mah min tibuai chhunzawmtu ka neiin ka tawng tawh lo a, hlauhna êm êm pawh ka nei tawh lem lo. Nimahsela, nizana Zobiaka awm dan vang khan a zin tur zawk hi ka ngaihtuaha Tlabung a hla ve bawk nen kawng lakah buaina a tâwk ang tih mawlh ka hlau tawh.

Eirawng ka bâwl zawh vek hnuah Sofa-ah ka ṭhu âwn diai a.

Nunhlua hi hmanhmawh ang reng tak hian ka lam panin a rawn kal a, Suit dum leh Kamis sen duk a ha ve teh tlat a! "Chawngdingpui, kan inah va kal la ka phone kha va la rawh, va la ngei ngei ang che, " tiin min nam kat dâwr dâwr a, "Lalnunhlu, i duh duh dana min tihkâwi tum suh, Ramdini nena in awm dan zawng zawng ka hre chhuak vek tawh a nia," tiin ka âu tuar tuar a.

Rilru nat hmel tak hian, "I hre chhuak har ngawt asin, ka thiam loh a ni. Ramdini khan a naupai tih tlâk a tum vangin a tawrh tur dik tak a tuar a nih kha, min ngaidam rawh aw Apui, ka hmangaih che asin," a ti a, "I thi tawh a ni lawm ni," mak ti taka ka zawh chuan, "Mi nung ramah ka rawn kîr dawn tawh lo, khawngaih takin ka ngenna che hi min tih hlawhtlin sak rawh aw.."

"Ramdini nena kan Sex video kha min delete sak lul rawh, ka nu leh pain an hmu tur a ni lo, ka phone pattern an hre lova; a hretu awm chhun chu nang leh ṭhianpa Zobiaka in ni, min puih ka ngai a nia, tunah hian eng mah an la hmu lo, ka phone kha an la hawng lo hrim hrim, Apui..hahdam taka ka chawlh i duh chuan kan inah kalin video leh thlalâkho kha va paih bo rawh," khawngaih thla la zet hian a ti a. A mangan hmel tak zet.

"Khawngaih takin Apui... Apui... " min koh lawm lawm lai chuan pawttu awm ang mai hian ka en reng laiin tukverh lamah a phe vuai a, a bo zui daih! Ka âu lova ka ṭawng lo hrim hrim.

Ka bân dinglam mu churh churh avang chuan ka harh hlawl. Ka bul vel ka en kual a,  tumah hmuh tur an awm lo, Sofa-ah rem lo zetin ka lo muhil reng chu niin! Ka mumang lamah betu ka nei tih hrilh chawp ka ngai lo.

Nunhlua nen kan inbiak dan kha chiang takin ka la hria a, a damlai hmel ang chiahin a ṭha a, a lan dan pawh hmuh hrehawm a ni hek lo. A thusawi zawng zawng pawh a tak ang maiin ka bengah a châm zui vang vang, min ko lawm lawm chung khan tukverhah a chhuak niin ka hria a, thlanglam tukverh chu panin ka en nghal vat. A lo inhawng hiai a, Parda a phe hlep hlep bawk. Tho chhuak vatin tukverhah ka va dâk a, eng mah hmuh tur a awm lo, tlai lama rannung hrâm ṭhin tih loh thâwm dang awm lovin a reh ṭhiap.

Ni e, mihring ve tho a ni a, tisual thei a ni. Ka laka a awm danah ka lawm lovin ka rilru a na ngei mai. Mahse, kei aia hmangaihtu leh keh thei dawma dawmtu a nu leh pain a awm dan leh a chanchin chhia zawng zawng te, khatiang video ṭawp leh tenawm kha an hmuh a duh bîk lo tih a hriat mai. A dam laiin khatiang ni mah se; kei, a rin ngam leh amah ring êm êmtu hi a tih sual pawmin ngaihdam min dîl a nih kha maw le. A siam ṭhat theih leh a tih danglam theih tawh lohna hmunah a awm tawh miau si a, a thlarau talin a nu leh pa natna leh zahna thlen a duh lo tihnaah ka ngai ber. A pawi vawng vawng teh e. Nun lem lutuk neiin eng tin nge kei nen kan lo inkawp theih zâwk!?

A Mak a ni. Lalnunhlu!

Mitthi tawh thlâ te, Ramhuai chanchin miin an sawi te hre ve fô ṭhin mahila a takin ka tawng ang tih mumangah pawh ka la mang chhin lo. A phone kha en lo phei ila chuan eng mah ka awih leh duh miah náng. Leiminin min dan zan te ka ngaihtuah kâi a, a phone chungchâng min hrilh tumin a rawn inlâr a, mahse, hlau thlabâr zeta ka lo hmachhawn zêl avangin a sawi thei bîk lo a nih hmel.

Mama te lo haw lai pawhin ka ṭhut dan ngaiin ka la ṭhu reng a, inbual miah lovin ka la awm ngar ngar. 

Ṭanpuia nen an rawn haw rual teh mial a, an ri hlut bawk. Kei erawh nidang ang lo takin ka ngawi kar a, zanriah kan kîl lai pawhin ka ṭawng ve meuh lo. Zobiaka a la reh char char a, Mama'n, "Tlabungah u Zobiaka a kal leh si lo a, Zawmi chiah a kal alawm," tia min hrilh chuan ka dâk chhuak thuai a.

"Kan la inbe miah lo, a kal daih tawh turah ka lo ngai asin," ka ti ve ngawt a. Ngun deuha min en chung hian, "In inhau chu a ni êm lo maw, tukin aṭang tawh khan i awm dan a dik lo," a ti leh a, ka lu nat thu chhuanlamin ka inpha mar thei hrâm.

Mahni room ṭheuhah kan tawm leh ṭhap tawh a, tlai lama ka mumang bawk khan min luah leh tawh. Rinkimi te khuaa kan kala a thlâ kan hmuh te khan hetiang thu a lo sawi duh vang hi em ni ang khatia an rawn chêt vak vak. Mahse, a thih thu ka hre miau lo a, hlauh loh theih pawh ninghal lo chuan. 

Min tihlau ngei a; ngun zawka ka ngaihtuah lêtin min tih nat tum angin an awm miah lo. Keimah zawkin ka hlauh êm avangin khatiang khan ka awm mai zawk a ni.

Nunhlua hlim hmel te ka mitthla lêt a, ka khawngaih telh telh. 

A thih hnu thleng pawhin a nu leh pa rilru tih nat belh duh lovin a la vâkvai chu a ni si a. Mahse, eng tin nge a phone chu ka dîl chhuah tâk ang? A nu nena kan boruak lah a chhe nasa mai si. Ka hah hluah hluah. Mumang mai mai mah nise atak taka tawng ang maiin ka awm a, ka mut a chhuak thei der lo. Ka hnaihah rawn inlan mah se ka hlau kherin ka ring tawh lo bawk.

Ka phone a rawn rîk chuan ka phu zawk a, Zobiaka a ni teh tlat. Ka pick ang nge pick lovang tih ka ngaihtuah laiin a rawn call nawn leh a, ka chhâng ta nge nge e. 

"Apui, ka lokal dawn?" A rawn ti teh tawp a. Tlabungah a kal lo tih ka hre sa tho naa ka hre lo der tlat.

"Tlabungah i awm tawh a ni lawm ni," ti el awka-in ka lo ti a.

"Chawngdingpui, chimawm chhuah hun a ni lo a nia, ka zin lo tih i nauin a hrilh tawh che kha," a rawn ti hmuk.

"E, a nih chu," ka ti ve hmak.

"Ka lokal..." tih leh phone off a rual a, ka tihtauh khum tlat dawn zawk em maw ni. Mahse, ka ngai ngawih ngawiha lokal se ka ti lawi si. Ka rilru chu leh.

Zobiaka lo thlenin zan dar kua a ri tawh a, tukina a hmel landan ang lo takin hmuh a nuam phian.

 

A zin loh chhan ka zawh chuan, "Ka inngaihtuah harh," a ti tawi tuk.

"Eng thilah?" 

"Apui, dik tak chuan nizan ka mumangah ṭhianpa Nunhlua ka hmu a, ngaihdam min dîl nasa lutuk. Ka pawi a sawi miah lo nain i laka a chêt dan fair lo tak avang khan ka hua a, a phone ami thil pawimawh zawng zawng ka inthawn vek hnuah a nu leh pa ka pe kîr chauh kha a ni a, mahse maw, ka ṭhianpa a ni, ka ṭhian ṭha takin min ngenna kha ka tih hlawhtlin loh chuan ka nun a nuam dawn lo, ka khawngaih lutuk tlat; a nu leh pa zak taka an awm kha thil ṭha ber pawh a ni chuang lova kan ngaihdama a duh ang kan tihsak mai hi a ṭha lo em ni?" Tiin ka rin loh lam daih a rawn sawi a. A ṭawng thui ve ber ṭum a ni hial ang.

"Ngaihdam a dil che maw?" Tiin ka melh kar a.

"Dil e, ka mumang ni pawhin ka hre lo, hmaichhana min bia ang tlatin ka hria, tu emaw hian ka lak aṭanga lâksawn che hi a lo tum a, nang lah chuan i lo zui daih lehnghal a," tiin a ner nawk a, ka hming lam chunga 'Kal suh' a tih lai kha ka hre rauh rauh. Mahse, eng mah ka sawi rih lo.

"Tu nge maw ka lo zui daih chu le," tia nui lui ngialin ka va melh a. "Ngawi mai mai rawh, fiamthu hun a awm, tunah tak hi chuan ka thu tak teh mai a nia," a lo ti leh hmuk.

Chumi hnu chuan thu tak deuh zawkin tlai lama ka thil tawn te ka hrilh ve ta mial mial a, ngun taka inngaihtuah niawm tak hian a kûn ngul a, ka ṭawng chhung zawngin a ngawi char char. Chutah rawn dâk chhuakin, "Lokal rawh, an inah i va kal teh ang," a ti leh ta tu tu e. 

'A tlai tawh' tia ka hnial pawhin min kâi chhuak dawt dawt a, chak fe-a kan tlan chhuah chuan ka thaw hawk.  Zobiakmuana hi zawng ka hnial hneh ngang lo a ni e.

Pi Lawmi hmel hmuh ka peih lo asin le, Phone kan la lêt dawn a nih pawhin naktuk pawh hun a la awm tho si a, a thu a duh lutuk hi ka kham ṭan der.

Nunhlua te in kawtah Bolero a tiding dawt a, min ngaichâng hlek lo hian a chhuk vut bawk a, ka ûm zui dâwr dâwr. 

Vanneihthlâk takin an la mu lo hlauh. Zobiaka a lût hmasa a, pi Lawmin min lo hmuh veleh tûm hmuk chung hian, "Niminah eng nge ka sawi kha?" A lo ti nghal.

A thusawi ngaipawimawh lovin, "Nu Lawm, Nunhlua phone kha kan lo en lawk thei ang em?" Tiin Zobiaka'n pangngai tak hian a dîl a, "Nangni pahnih hmel hi ka hmu peih lo aw..." a lo ti leh hmak.

Zobiaka chuan, "A pawimawh takzet, nangni pawhin a pattern in hre chuang lo a, ka thil pawimawh a awm a nia, ka lâk chhuah theihnghilh a.." dâwt mar pâtin zuk sawi a.

"En teh, Zobiak, ka fapa phone i kawl char char a, niminah min rawn pe chauh a, kan lawm, mahse, nangni pahnih thil tum ka hriat chian hma hi chuan Bawiha phone hi hmuh inbeisei hlek suh u.." thinrim hmai sen ṭûnin ati hluk hluk a, a va buaithlâk ṭhin e.

"I hrethiam lo a nih kha, a lakah rilru chhia kan pu lo, rei lotê kan en lawk anga a bâk a ngai lo aw, kan hawnpui dawn lo kan pe lêt leh dawn che alawm," awki hniam sata Zobiaka'n a dîl leh pawhin a dinna ngaiah a ding reng a, min melh tawn zuk zuk.

"Nu Lawm, khawngaih takin reilotê kan lo en anga keimah chiahin a pattern ka hria, nangni pawhin a thlalâk en duh hun te in nei anga ka hrilh pah dawn che u nia, Zobiaka chu en tîr lawk mai rawh," dam thlapa ka lo ṭawng ve tâkah chuan, pu Ngheta zawk a rawn inrawlh ve ta a, "Eng nge maw i ui viau le, a ṭhianpain kha leh chen him takin a kawl ṭhatsaka tun ataka en phal loh; va pe rawh, an nei hlen dawn pawh nihlei lo," a lo ti ve bawk a, nu Lawmi pawh tûm búrin a kal tâk kha.

Pu Ngheta chuan keini pahnih chu ṭhu turin min hrilh a, ani hi zawng pa zaidam leh rilru tluang tih takah a bula awm a hahdam ṭhin a nia. A fapa thihna tawrh thiam an tum thu leh 'ṭawngṭaina lamah pawh min hre ve zel ula aw' tih te kha a ṭawngkam chhuak a ni a, annu nen hi chuan in ang lo vai vai tak an ni.

Zobiaka kuta phone rawn hmehbel chawt chawt chung hian, "Charge a ngai," a la ti zui. Charger a pe tel ve mial.

Zobiaka a che chhuak vat a, Phone a'n charge leh tê tê phawt a, atu amah kan ṭawng lo. Ka phone a rawn ri a, Mama a lo ni a, kan awmna chin ka hrilh chuan a lungawi loh hmel khawp mai, "In kalna tur te chu sawi ve bawk ta che u, u Zobiaka tel lo phei se chuan ka rawn hruai nghal ang che," a ti a. Ka inthiam lo ve det.

"Dingpui, naktuk lamah thlan kan tlawh dawna kan rualin kal ve ta che," tia pu Ngheta'n min sawm chuan office kal ka ngaih thu te, Sunday lamah kal ka tum tih ka sawi ve ringawt. Eng tikah emaw a thlán tepawh ka la tlawh ve ang chu.

"Ka fapa awm tawh lo mah se min rawn tlawh fo dawn nia," a ti leh a, Zobiaka ka va melh zeuh a, Nunhlua phone a lo kheuh mial mial a, a delete kim êm ang chu maw, a pattern hrilh ka tum tawh si a, paih kim loh leh tih hmaih a lo neih vaih chuan a pawi dawn êm asin.

Thingpui hâng kan in laiin Zobiaka a rawn ding chhuak a, "Nu Lawm, pa Nghet, miin in fapa chungchâng a chhe zawnga an sawi pawhin kei leh Apuii sawi a nih loh chuan eng mah ngaipawimawh suh u aw, keini pahnih âia hrechiangtu mihrangah an awm lo. Amaherawh chu, in hriat ve atana sawi ngei ngei duh ka nei a, chu chu Ramdini nen an chungchâng kha a ni." Tiin min rawn melh zauh a.

"Apui, nang pawhin huatah lo châng lo la aw.." min han ti kher a, ka hriat tawh hnu vek alawm maw le.

"Eng mah hriat belh ka duh tawh lo, a tlai tawh si a, haw phawt teh u.." nu Lawmin a lo ti hmanhmawh nia. Henu tak hi chu aw..

Mahse, pu Ngheta zawkin Zobiaka thusawi tur a ngaithla duh ta tlat. A va lawmawm si ve.

"Ramdini nen khan eng emaw boruak an neih ka ring rêng a ni, a nu leh pa emaw an chhung hnaivai an lo lan thuai ka ring," pa fing tih takah Zobiaka lam hawiin a ti chuar chuar a, ka lo îp ang reng.

Chutah, thu zêp nei miah lovin Nunhlua leh Ramdini inkawp dan te, kum thum aia rei inthlah miah lova arûka an inzui dan zawng zawng Zobiaka'n a sawi tâkah chuan nu Lawmin min rawn en a, hnuailam ka bih vat. Ka zak êm a ni. Mahse, Video chungchâng leh nautê tih vel eng mah a sawi lang lo thung. 

"Dingpui, i tân a hrehawm zual dawn hle mai, kan fapa nikhua loh zâr i zo tel ve a nih ber hi maw," pu Ngheta'n inthlahrung taka a tih chuan ka dâk chhuak ve ta chauh a. 

"A nih tur ang a ni zo tawh a, kan tana ṭha tur zawk a ni ang e, keimah vangin i rilru tihrehawm duh suh, ka hriat tirh chuan ka naa ka zak a, amah ka haw bawk; thihna êm a chunga a thleng erawh pawi ka ti lutuk," insût hraih chungin ka ti a. An rilru natna belhchhah zawnga ṭawng kher ṭûl ka ti lem lo. An fapa min ngenna angin a duh kan tihlawhtling tawh a, eng buaina mah hian min chîm tawh lul suh se.

"Nang ni kher lo la chuan ka fapa vang hian mualpho thei reng kan ni. Mahse, i sawi angin a nih tur a ni zo tawh a,  kan lakah inthlahrung hlek suh ang che, Bawiha zawng a lo nikhua lo êm a ni," a ti tlawk tlawk.

Nu Lawmi a ngawi ngal a, eng mah sawi lova a lo awm ringawt pawh hi thil mak a ni.  A âng leh chiam ang tih ka hlauh mah nâk lai a.

Veranda thleng pu Ngheta'n min thlah a, "In pahnih hian innei daih teh u," tiin a lungngaihna tilang miah lovin hmêl hlim min la hmuh thei nia maw le, a fel hi ka ti.

Ka chhân ve hmain Zobiaka'n, "Kan innei lovang tih pawh kan sawi thei lo," a'n tiah. Â thei si. Pu Ngheta pawh a nui suk suk alawm.

Kan beisei aia ṭhain kan inthlah theia ka lawm. A tlai tawh hle naa Zobiaka nen kan in lam panin kan tlan chhuak leh ta a, ani hi lo riah a tum leh ngawt a ni ang. 

"Nunhlua nen vawi engzat nge in chêt sual?" kawng sîrah Motor tiding meuhin min zawt a, a va ṭul lo tak.

"Kan la che sual lo," tiin ṭha takin ka chhâng a.

"Dâwt min hrilh hlek suh, tukinah in mut dun thu i sawi ngei kha," lungawi lo lutuk tih hriat tak hian min melh run a.

"Kan mu duna kan che sual kher lo," ka lo tih chuan, "Chawngdingpui, ka thinrim tak tak hma hian thudik sawi rawh?" A ti vin hluk a, ka va phu nasa tak. 

"Vak vak a che, mu dun tih leh che sual tih a inang lo aw, nang nen pawh kan mu duna kan riak duna khum khatah kan mu ve tho, sex kan hmang kher em ni? Khatiang aia thui kha ka kalpui lo," ka ti hmak a.

Thaw huai chung hian, "Dâwt min hrilh vaih chuan a pawi ang aw, a pawi viau ang," ti leh hrâmin chak zet hian min tlân chhuahpui ta a. Thinrim miah lova ka chhâng thei kha mak ka inti. 

Kan in kan thlenga Mama a rawn chhuak a, thil awm dan leh kan kal chhan min zawt chhuak dap. Zobiaka'n a hrilh ve mai a, kei erawh inbual turin bathroom-ah ka lut daih. Zân dâr 12 a ri ṭep tawh a, nitina inbual ṭhin ka nih vangin ka damlo a nih loh chuan tlai eng ang mah se ka intleuh zuai ṭhin.

Ngaih ngam takin ka awm thei ta e. Zobiaka nen kan hma hun tur erawh ka sawi thei lo; hunin hril teh se.

Bathroom ka chhuahsanin Zobiaka ka hmu lo a, Mama pawh ka hmu chuang lo. Ka room-ah ka lût tlang nghal a, ka khumah a vâng tan zawngin a lo mu phar duai a, ka thâwm a hriat ruala rawn meng chhuakin, "Zanin chu ka riak leh law law ang, i nau phalna ka la tawh," ngaihsam zetin a ti puat a, "Ani thu a ni lo, va haw zawk rawh, chuan ka inthlâk duh a nia," ka ti a.

"Inthlâk la, ka dál hleinem che," tih pahin a bawkkhup thawk a, a nui tih ka hre vek. Rang takin mut kawr ka inbel sawk sawk a, a rawn dâk chhuak miah lo. A fair ve a nia hepa hi chu.

Zalén ta anga inngaihna ka nei teh ngawt. Ka nauin room pakhatah kan awm dun tih a hre vek a, a û hi min ring tawk tih ka hriaa a mi rin ang ngeia awm ka tum ve tlat.

Zobiaka bulah ka mu leh ta. 

Rang takin min lo kuah vat a, a thawmhnaw inbel pawh a hlip lo. "Zanin chu thin thiin mut tum teh ang, ka ngai lutuk tawh che," a sawi zawh rualin ka nghâwng leh biang a núl thuak thuak a, a mipa rim mawlh mai hi a ni, a fai tih a hriat ngawih ngawih a, eng lai pawh hian a lang thar sar reng maia a fakawm ka ti. Mipa chengvawng tak a ni.

"Min ngai lo a ni ang i reh rei em mai," ka lo ti hlak a, nui ruh ruh chung hian, "Ni khat lek ka biak loh che pawhin i vûi a nia, hnaah ka'n buai tak tak anga e, i vûi nitin dawn a nih hi," a ti duh lek.

Insi chialin kan mu a, ka kut nghet taka vuanin, "Hlim taka awm i phû ve tawh, inneih chiah kan hmabâk tawh a nia, i nu leh pa lo sawipui la kum tharah inneih ka duh," a ti leh tawp tawh.

"Êm em a che, pasal neih ka peih rih lo," nui duh miah lovin ka ti a, "Ka luhkhung tho ang che," zu han ti a.

"I zak lo.."

"Zak deuha nang neih theih loh âi chuan zak miah lova neih che ka duh fê," tiin a nui kur kur a, a ho leh zo vek.

Ka chau ve bawk nen a awm nghengin ka chhing ta riai riai a, "Apui, hlim ang che aw, min ngaidam ngai suh, ka thiam loh a ni," Nunhlua'n ka biang a rawn tawk a, a mitmeng dul raih te, nui hmel reng reng pu lova min melh chuan, "Nunhlu" tiin ka ko sap a.

"Ka kal a hun ta, ka ṭhianpa hnaihah awm reng la, i hlim ang, ka ngai dawn hle mai che, ka thiam loh a ni.. ka ngenna min tihhlawhtlinsak a ka lawm e aw...Dingpui.. mi tenawm ka nih hi.. mi tenawm.." zawi raiha tiin ka kut a vawnna a thlah riai riai a. 

"Nunhlu.. Lalnunhlu.." tia ka ko lawm lawm chung pawhin min chhâng ta lo. A liam tur chu ka thlir reng a, chutih lai tak chuan, "I harh em?" Tia min sâwi nawk nawktu chu en tumin ka meng chhuak a, Zobiaka'n hnai fe-ah min lo bih chu niin! 

A meng hriam hraih a, lungawi loh hmel takin, "Mitthi tawh chu ni lo se, a hming i lam rual khan ka kalsan ang che maw le," a ti hniam ruih. Ka harh chiang ngei mai.

Ka bialpa kum hlun, ka inghahna tur ni-a ka lo ngaih ve ṭhin Lalnunhlua a liam ta.

Ka khawngaih êm avangin ka mittui a far lo thei lo..

Zobiakmuana ngaihdan tur lam dâwn lêk lovin ka ṭap chhuak ta nge nge a.

Thi mai turah a indah bîkin ka ring lo. A mawi lohna hliahkhuh turin min la rawn pan tak hrâm hrâm a, atana rinawm reng ṭhin Chawngdingpuii hian nunna ka pe thei si lo. A tih sual Siam ṭha tur tak ngial pawhin hun a nei ta ngang si lo a..

"Nunhlu..." tiin ka ṭap leh ta tlawk tlawk a. 

26-11-22 -B®®

B+>[BeckirafARenthleI]<+®®