A MAK! A Becky Rafa Renthlei Story

7. A MAK!

Ziaktu: Becky Rafa Renthlei 

-B®®

Shadow of the life

[Recap]

Zobiakmuana ni li chiah ka la hriat nen hian inneih kan tum ang maw? Ka bialpa ṭhianpa a nih bâkah a ṭhianpa thihna ni thum emaw lek a la liam a, hetiang thu kan han sawi ta mai hi a mak leh ta!

Thil thui deuh leh hmangaihna thu sawi dun lo mahila a chêtzia leh a awm danah hian tuna min duh chawp mai mai a ni lo tih ka hrethiam ve tlat.

Chawngdingpuii hi hneh ka va awlsam ta si ve. Hei pawh a mak tho....

&&&*

Nunhlua te in kan thleng a, a nu leh pa an lo awm a, keini pahnih inzui lût chu min lo en duh ang reng. An fapa ṭhianpa leh an fapa bialnu kha inhre ṭha tak angin kan lût miau alawm.

"Ah..nangni pahnih teh tlat chu! Zobiak, i va rawn lang khât ve," pi Lawmin a lo ti sawk sawk a, ani hi chu a duhzawngah a ṭawngkam a ṭhain mi tih lawm a thiam a, a thinrim ve thei lo emaw tih hial tur a ni. 

"Nia, ṭhianpa phone kha ka la kawl reng si a, a kawl tur dik takin in kawl ve a hun tawhin ka hria," tih pahin Zobiaka chuan Nunhlua phone a rawn phawrh a, a chhunga Video zozaite kha a delete sak em ka hre lo. Khuma ka dah a lâk hnu khan ka hmu nawn tawh lo hrim hrim a, en lêt châkna pawh ka nei hrep lo ve.

"Nia, Bawiha phone i lo kawl ṭhat sak hlauha kan lawm tak tak a ni. A hun lai khan eng mah kan lo ngaihtuah mumal mang si lova min rawn hrilh lo phei la chuan a awmna chin kan hre tawp nang, engti tiha Apuii nen lokal rual thei teh tlat nge in nih?" Tiin keimah min melh a. 

"Apuii hi ka rawn sâwm alawm," ka chhan ngai lova Zobiaka zawkin a chhân chuan mit khap miah lo hian min en ngar a, min ringhlel deuh em maw ni.

Mahse, eng mah sawi lem lovin, thingpui kan duh leh duh loh min zawt teh hlauh a, kan hmanhmawh thu leh phone pe tura kal kan nih thu Zobiaka'n a hrilh hnuah, "Lokal lawk teh," tiin pi Lawmi chuan min ko hrang a, ka va zui hreh mai mai e.

Ka mitmeiin Zobiaka ka râwn a, "Kal suh'' tih melh hian min melhin ka hria. "Kan hmanhmawh deuh a, mahnia lokal ngawt aiah kan rawn insawm phei a nih hi.." ka lo ti ve a, "Apui, biak che ka duh alawm, a rei lovang," ti deuh tlat hian pi Lawmi chuan ka bânah a vuana Nunhlua room-lamah min hruai tlang nghal. Hnialna hman pawh a awm tawh lo.

Zobiaka'n min lo zui a tum chuan, "I pa Ngheta nen khan lo inkawm rawh u, a fâla biak duhna ka nei," Zobiaka melh zauhin a ti deuh nghat.

Tukverh bulah inkuangkuah thánin pi Lawmi a ding a, a hmelah nelawmna reng reng hmuh tur a awm tawh lo. Min hnungchhawn zâwnga ding a ni a, "Zobiakmuana nen in inkârah khan eng nge awm, ka fapa âia a ṭhat bîkna eng nge, a hlawh tam vang maw?" A rawn ti a.

"Eng nge i sawi awmzia?" tia ka zawh chuan ka lam hawiin a rawn inher a, "In inmelh dan kha ka hmu lo emaw i ti a ni ang e, nu tling ka ni a, mi mitmei hrethiam lo tur khawpa mâwl lah ka ni hek lo, ka fapa kalsanin ani saw i pan em ni?" Nelawm lo lutuka a ṭawng chhuah chuan ka sa ve phat.

"I duh duh sawi ringawt lo la, ani i tih saw Zobiaka a ni a, ka laka i fapa awm dan tenawm lutuk ka lo hrechhuak har hi ka thiam loh a ni, ka lo mâwl a ni, min bum char chartu kha kum thum chhung teh meuh rinawm takin ka lo zui ve a ni a, engkim i hriatpui ka ring hial." Ka ti ve sak.

"Dingpui, inhniala inhau ka duh miah lo naa khatiang zawnga ka fapa chungchâng sawi ka duh lo hulhual, ama awm tawh loh hnuah ngat phei chuan, ka fanu ang chiahin ka en che a; a chanchin a chhe zawnga sawi turin i pawi eng nge a sawi?" Chang faka tiin min en kur a, a meng thîp hle.

"Kei min buma a bialnu pakhat zawk Ramdinin a fâ a pâi tih ka hriat loh ring miah suh, tun huna sawi chhuah hi ka duh lo takzet." Ka sawi chhuak ve phawng mai.

Min ben tum niawm takin a kut a lek chhuak a, ka lo tawlhsawn dâwrh. "Nangni pahnih inkawp duh vanga ka fapa dâwt muhluma i han puh chu le, Chawngdingpui i nasa hle mai," tiin a ṭawng khûr dar dar a, a hre lo tak tak nge a hre lo der tih pawh hriat va ni suh.

"En teh, thudik a nia ka sawi, ka nat dan hi tumahin min hriatpui lo, kum thum chhung Ramdini nen min kawpa chutah khanu khan a fa a la pai zui, thla hnih lai a ni tawh, thla hnih..." ka ti nawn nghat a, ring tak taka ṭawng lo turin ka insûm nasa hle. Buaina dang ka duh belh hlawl lo.

"Dâwt, dâwt vek i sawi," tih pahin min rawn hnaiha ka kawr âwmah ṭhâmin, mi â ang mai hian, "Ka fapa chungchang dâwt phuahchawp ngialnganin han sawi leh teh, i châk lo ang aw," fiah kâka tiin min thing nawk a, a nu lian si a hlauhawm tham a ni. Ka thin a phu nasa. Ka hlau bawk.

"Apuii sawi kha eng mah dâwt a ni lo, nu Lawm," Zobiaka aw thâwp sat ka hriat chuan ka lehhawi vat a, eng tik laiin nge a lo luh ka hre miah lo.

"Zobiak, i ṭhianpa lamah nge i ṭan dawn henu lamah hian," zuk ti a!

"Thudik engkim hretu ka ni a,  i tan ngaihthlâk nuam dawn lo mah se, thudik tak i hriat a hun tawh," Zobiaka bawkin a ti leh a.

"In pahnih khan chhuak rawh u, vawikhat mah kan inah rawn lang leh tawh suh ang che u, Chawngdingpui hre rawh, ka fapa laka i awm dan  hi ka ngawih bo pui mai mai lovang," inthunun tum taka tiin Nunhlua room aṭanga chhuak tur chuan min nam dawt dawt a. A inzah loh thlâk ka ti ve det. Nam chhuah ngai khawpa sual lian tham ka ti der si lo.

"Lokal hi ka châk hauh lo aw, engkim thudik i hriat hunah i fapa tan ngaihdam rawn dîl reng reng suh ang che, a chhan chu ka ngaidam ngai lovang," ka ti ve ta hmiah. Ka va huai si ve le! 

"Awi, awi.. i lo nasat hi le.." a la ti hrâm.

Zobiakan ka kutah a vuana eng mah sawi tawh lovin Lalnunhlua te in kan chhuahsan ta a, pu Ngheta'n, "Dingpui, in va hmanhmawh vut vut ve," tia min lo biakna pawh ka hre lo der hmiah, thinrim luat vangin ka khur dar dar. An inchhun nufa kher mai.

Motor chhungah inbengdaih tumin ka thaw halh halh a, mi zaidam ka ni hran lo. Mahse, ka nu rual zet a ni a, tin, a fapa a chân vanga a natna a thûk dawn tih ka hriat vangin ka duh ang pawh ka sawi ve ta lo kha a ni a, ka va insûm thei lo teuh ve le. Thudik hi chu a ngêt ngai lova a tlo bawk a, tunah hre chhuak lo mah se, eng tikni-ah emaw ngaihdam dîlin an la rawn kal ngei ang, mi pangngai an nih ve chuan.

"Ka rin âi daihin i dawh thei!" Zobiaka'n a ti ta chiah reng a.

"Thudik an la hre thuai dawn alawm, ka sawi an awih lo a nih pawhin Ramdini te chhungkaw lam an ngawi bîkin ka ring lo," ka ti a.

Nia, Ramdini khan a naupai chungchang a chhungte a hrilh lo a nih pawhin Post-mortem result-ah tal a lang êm êm ang. Tu nu leh pain nge ngawih bopui bik ang a?

Nunhlua leh Ramdini chungchâng an hre ru vek thei tho bawk. Chuvangin, a ti sual lo tu zawk ka lo hrehawm ngawih ngawih hi a ṭûl ber lo. Chuan, a nu leh pa lusûn hlim zah lo taka lo Sermon khum chiam kha ka zia nen a inmil lo bawk.

"Ka thawveng huai zawkin ka hria," tih pahin bottle-a tui ka inkhawlh khawlh a, "I nu Lawmi i hlauh êm kha aw.." nui suk chunga Zobiaka a ṭawng chuan ka nui ve ta var var a, Nunhlua te ina kan awm lai boruak leh tuna kan awm dan te chu inthlau tak a ni. Hmân aṭanga inhriaa inkawp tawh ang maiin a lakah ka ngampa ve viau tawh bawk.

Kan in lama tlân lêt lovin Zobiaka thlennaah kan kal ta zawk a, Hmingi te in tho kha a ni. A hmaa ka thil lo tawn tawh nen ka va lût châk lo tak. Ka rilru hria niawm tak hian, "Ka kalsan dawn hleinem che, eng mah hlau suh, chuan, a la hmaa rei lotê mut hahdam ka duh ka chau lutuk," tiin a mit a nuai nawk nawk a. 

"Chuti chu kan inah min thlah phawt la, chawl hahdam rih rawh, zanah i lokal mai dawn alawm," ka lo ti ve a, keimah vangin mut a hmu ṭha bîk lo tih ka hria.

"Ka bula awm loh dan ringawt hi dap ṭhin suh, kan awm dun tam a ngai," a'n ti leh deuh tlat a.

"Chutiang a ni lo aw.." tia phat ka lo tum chuan, ka biang tawk zauh chung hian, "Ka duat phâkah awm reng la ka duh, naktuk tlai lam aṭang chuan min hmu rih dawn lo a nia, kan châm chen tur pawh ka sawi thei lo," awki hniam fahrana tiin peih loh hmel tak hian a kiai suk a, a hmel ka lo en chian êm avangin hetia a awm kikawi kual vel hian 'Pa' ka'n tih tlat chu le, a va ho e.

A thawmhnaw inbel Jeans leh shirt hlipin Boxer nen a awm a, keiin vawt ka ti lek lek thung. A mu hahdam duh a nih te chuan khawiah nge ka lo awm ve ang a, ka awm a ṭûl ber hleinem maw le. Ngaihtuahna ava han tawi thei tak. "Zobiak?" Ka ko hluai a, bathroom aṭanga rawn dâkin, "Ka zo ṭêp," a ti ṭha ve mai.

A inbual zova ei tur ka duh leh duh loh min zawh leh tê tê hnuah ka dâra kuahin ama room-ah min luhpui ta a.

Khum lian vak lo a lo awm a, room chhung a fel faiin thawmhnaw dahna tur Wardrobe pakhat leh single chair tih loh eng mah a awm lo a. Khumah zangthalin a mu phar duai a, "Min hlau ang tak khan awm ṭhin suh, lo mu ve rawh.." tiin a sir lam âwl lai a kutin a bêng thuk thuk a, mut tumna ka nei lem lo. Ka zak leh ringawt tawh.

"Min thlah haw zâwk la, hahdam deuhin i mu thei a ni mai," nuam ti vak lo hian ka ti a.

"Ka bula mut i ngên leh chung mai ang, phal taka ka sawm lai che hian rawn mu hle hle la, nizanah pawh ka bula mut loh hlauvin min pan sek kha," nui lek leka tiin a rawn ṭhu chhuak a, "Hawh le, rei lote chauh a ni mai," ti nawn lehin min kuaha a bulah khawr zetin ka mu ve leh ta.

"Kha kha a ni mai alawm, mut kan hmu ṭha lo ve ve a, Tlabung kal tur ka ni bawk nen kan awm dun chhung a rei tawh dawn si lova min hnial lo hrâm rawh," ngenngawl taka tiin min kuah hlu hlu a, a káwngah ka lo kuah lêt ve mai bawk a.

"Apui, khawvel hi a mak tiraw, ṭhenkhatin an duh ngawih ngawih an nei thei lo a, a ṭhenin an neihsa duh khawp lovin an kawp a; pakhata lungawi leh rinawm hi thil har a nih loh teh lul nen," tia a ṭawng chuan Nunhlua a sawi chhan ni maiah ka ngai.

"Kum thum chhung zet min bum tih hi awih har ka la ti, ka tân mipa hi rin an harsa sawt tawh ang," ka ti ve a.

"Ka lakah rinna nghat ngam la ka duh, i duhthusam ang zawng zawng pe thei dawn lo che mahila, rinawmna leh hmangaihna dik erawh ka pe ngei ang che," inringtawk taka tiin min kuah nghet sauh a, "I tân chuan mi thar ang chauh ka la ni, ka tân erawh kum li chhung kha a rei lutuk, ka ṭhianpa ngaihzawng lo duh ve ngawt tur ka ni lo, mahse, ka thinlung ka thunun thei si lo a nih hi..min ring ang tiraw?" Zawi supin ati leh hnuhnawh a.

"Ka hre lo le, rin che chu ka duh," ka ti ve mai.

Min en vang vanga ka en lêt ṭha ngam meuh lo. A âwm zawn vel ka melh deuh tlat a, hetia inhnaih taka min kuah hian ka zâmin ka thinphu a rang sauh zel. Ani pawh a danglam bik lo; mahse, mipa zawk na na na chu kei ang êmin a zâm chhe ve lo a ni ang, min fawp hmasatu a la ni zel. 

A rawn kun hnaia ka hnar hmawrah fawp zeuhin ka hmuiah a pakai a, hnialna leh dan tumna ka nei miah lo hi a mak ṭhin khawp mai. Uar taka min fawh mawlh mawlh pahin ka âwmbâwr a tawk a, ka îp ang reng. Hei aia thui Nunhlua nen kan kal ngai lo a, min fawhna hian phûrna leh a bâk duh belhna min pêk miau avangin a chhip sam buk deuh lai bîk chu ka lo ṭhâm nghet ve salh.

"Apui..." tia ka hming lam supin ka kawr hak a hlim chho a, ka lu lamah a pawt chhuak zui nghal a, kan taksa lâwng a indeh tâkah chuan a hma aia uar fein kan infawp chhunzawm leh zat.

Ka mal leh khêl bâwr a chul ruai a, mipa a ni. A taksaa danglamna awm pawh ka feel thei vek, "Duh tâwk ang," thaw halh chunga ka tih chuan inla hrang chuang lovin a kut che reng erawh a titawp thung. 

Min nawr lui deuh se ṭang tur ka awm dawn em ni? Hepa hi ka duhin min hîp takzet tih ka pawm thlap tawh. Nunhlua nen tehkhin duh lo viau mahila, Zobiaka laka ka awm dan leh Nunhlua laka ka awm dan chu inpersan tak a ni. 

Ka thusawi vawikhat lek min thlawp a, min ngaihpawimawhna lantîra a chêt zawm tak lovah chuan a âwmah ka lu nghatin ka maimitchhing ta chial a. Hetia hahdam taka a taksa lumna tem chunga mut hi ka thlahlel tih ka pha thei lo ang.

Ka harh leh chuan Zobiaka'n min lo en renga ka meng tih a hmuh rualin ngaihawm zet hian a nui suk a, a sam thur chhap te chu inhmeh ka ti hle.

"A tlai riau tawha ka thlah ang che aw, i nauin a rawn call che a, chaw ei turin min sawm ve a nia, min hnial miah suh, ka lo ei dawn tho tho," a'n tiah. 

"Khawngaihsanga chuan eng nge a hriat a? A sawm ve ngawt che," nui chunga ka lo zawh chuan, "Thil hotê maw le, ka hnuai chiah ami Asst Director Zawmi hi a bialnu a lawm," a ti ta a. Chuvang a ni maw Zobiaka a lo biak ṭhat a, ka hriat hnu a lo tih ve sek. Mai mai chuan. An lo inhre sa reng si a, phakar dun leh ta pek.

Khum kan thawhsan hnuah a insiam chhungin a bulah ka lo awm ve zel a, min duatna leh min ngaihsakna ka hmu tam telh telh. 

Nunhlua leh Ramdini tih vel ka ngaihtuah thui vel peih tawh lo. Mi rilru nghet ka ni a, Zobiakmuana laka rilru ka pe a nih chuan ka damchhung daih ni rawh se, a mai mai ka duh ve lo.

Zanriah kan kîl laiin Mama leh Zobiaka an titi char char a, "I û hi amahin riah tîr suh aw, ka zin chhung zawng chu zan lamah a room-ah i riak thei ang em?" A nupui ni tawh niawm taka ṭawngin Mama a bia a, ka lo meng phâwk hman.

Ka nau pawhin a chhan hre mah suh se a lo "Aw" ve mai bawk a. Chutah Zobiaka chuan zêp ṭhen awm miah lo hian engkim Mama a hrilh vek. Rinkimi te khuaa min hruai aṭanga ṭanin vawiina Nunhlua nu ṭawng dan pawh a hrilh tel vek a, Mama lung a awi tehchiam lo. A farnu neih chhun ka ni a, min hmangaih êm asin.

"U Zobiak, zanin chu hetah riak leh mai la i hreh loh chuan, naktukah in zin dawn si a, Zawmi bula awm ve ka duh a, min rin ang chiahin ka ring tâwk che a; ka û bula i awm chuan ka ngaih a ngam," awm ve lo ang maiin ka chungchang an sawi leh a, an va tiho tak. 

"A pawi chuang hleinem, mahse, thil tih lawk tur ka nei aw, dâr 10 hma chuan ka lo lêt lovang," tiin min rawn melh a, a tih tur zawh ka tum deuha ka ṭhulh leh ta zâwk. Engkima inrawlha lo hriat ve phêt tum pawh thil ṭûl berah ka ngai lo. A duh chuan min hrilh mai ang. 

A sawi angin chaw eikham veleh ṭhu khawmuang tawh lo hian chhuak turin kawngkhar lam a pan a, "I duh chuan min lo mutsan daih rawh," tia min siai zeuh chungin a chhuak ta a, ka lâi ringawt.

Mama nen kan awm a, a bialnu Zawmi min biaksan daih a, Dâr sawm hnu lama a kal tur thu a hrilh ve mai. Ṭanpuia hi chu awm lo ang vel a ni a, a awm ve chhunah pawh room ah a tawm daih zel a, bâkah lehkha a zir ngawrh ve hrim hrim bawk.

"Mate, u Zobiaka hi i tân a ṭha, pasal nei rual i ni ve tawh a, ka uiin ka ngai dawn lo che tihna a ni lova u Nunhlua vanga hrehawmna insiam belh tum miah suh, ani khan a phû hlawl lo che, ka nu leh pa pawhin a hma aṭang tawhin an sawi zeuh zeuh a, a khawsak phung mi sawi a kâi leh zeuh ṭhin, i nat an duh loh vangin an en liam che a, thi lo pawh nise in inneih hi ka ring lem lo kei chuan," a ti a, "Pasal neih tumna ka nei rih lo.." tih chiahin ka chhâng.

"Unau pahnih chiah kan ni a, Zawmi bula riah ka tumna chhan pawh nulat tlangval lam ai mahin a nu BP sâng leh Zunthlum nei a ni a, Lawngtlai aṭangin an lo tlan mek a, chuvang zawk chu. Amah Tlabungah kal ngei ngei a ngai si a, ka khawngaih a nia," tiin thu dang a sawi ta daih a, ka lawmthu tak. 

Zawmi chungchâng a sawi bawrh bawrh a, 'Nupui neih lam ka rilruah a la awm lo nain kum thar lamah chuan ka inhmakhua ve ṭan ang,' a tih zawm leh a, ka lo nui ringawt, ka nau hian puitlin lam kawng a zawh chho ve mêk a, ka lawm. Zawmi pawh ka la hmu vat turah ngai ila.

Dâr 10 a pelh hnuah pawh Zobiaka a la rawn lêt lo a, Mama a hmanhmawh tawh si, Ṭanpuia a awm tho a min kalsan turin ka ti ta ringawt a. A lâwm ngang mai.

Ka khumah ka mu meng kar a, Zobiaka a la rawn haw lo cheu! Ka va call lahin a pick thei ṭhak bawk si lo. Vawi sarih ka call hnuah phei chuan ka tinawn peih ta bîk lova; a tih tur eng mah ka lo zâwt lo kha ka inchhir leh si. Lungawi lo ngawt dawn ila a dikin ka hre chiah bawk si lo.

Ka lo chhing sek a ni ang, kut vawt takin ka hmai a rawn chûl a, ka harh hlawl. Ka muhil nghet lutuk lo a ni mai thei.

Zobiaka nen kan inmelh rân a, ka titau titih ringawt. Dâr khat a lo pêl tawh a, chu chen chen min kalsan chu ka lawm viau lo. A kut vai sawnsakin lehlam ka hawi hmak a, "Titau kan awm em?" Tiin a nui huk a, ka ngei.

"Tak takin Apui, Cadastral-ho kan ruala kal tur te nen Emergency Meeting kan nei a, kan thu a inhmu lo a, ka rawn tlai ta deuh," tia a tlai chhan sawi fiahin khumah a rawn lâwn a, nupa te pawh kan va ang si ve. 

"Ka call nasat teh reng che nen," vûi âwka deuha ka tih chuan, "Silent-ah ka dah daih a.." a ti a.

"Hetah i lo mu ve dawn em ni? Mikhual room ah va mu zâwk rawh," lehlam hawi paha tiin ka inkhuh ṭha sauh sauh a, "A teuh lo, i khumah ka mu dawn, nakin lawkah min lo ko leh tho ang, dáwih ropui si," sawi chhan nei tih hriat takin min han sawi ṭhaih titih a, sual siah.

"Tiang khan ṭawng ziah suh, a nih leh mu rawh," ka ti bak hlar. A nui ruh ruh ringawt.

Min kuah chungin a mu a, kâr lovah a muhil tih a thâwk dan aṭangin ka hre mai. Kei ve ka harh tulh tulh thung.

Nu leh pa an awm lo bawka mi ngaihah thil mâwi ni lo mah se Zobiaka a lo riaha ka bula a awm hi chuan ka ngaih a ṭha thlâwt. Mama'n "Mi sawiah buai suh, a ho lutuk, a lo riak ve a ni mai a, in inkâr tumahin an la hre chuang náng," tiin min thlamuan ve kha a ni a, ka pawm zâwng tak a ni lawi si. 

Ka pum let but but avangin ka harh hlawl a, khua a la vâr lo deuh. Zobiaka'n min khan bet tlat a, dimtein a bawp dahsawn sakin ka tho chhuak a, ka room aṭanga chhuakin Flash-a tui lum kan dah sa in tur chuan ka chhuak phei a, Zobiaka tih harh ka hlau bawk nen thâwm ka dîm hlê.

Tui lum muangchanga in chungin khaw awm dan en tum hian tukverh thlanglam parda ka keu a, chhûm a chhah ang reng. Chutia ka din ngawih reng lai chuan, "Apui... Apui..." zawitea min ko ri ka hria. Mipa aw ni tlata hriatna ka nei bawk. Pawnlam aṭanga rawn ri chu a ni lovin ka hria. Dawhkânah ka no ken lai ka nghat chawrh a, Zobiaka mutna lam ka pan vat a.

A puansin a lo tlawh hlîm vek! A let but but bawk a, harh miah si lo hian min ko mawlh mawlh a, a hmaiah thlan fîm a rawn bawl chhuak ṭak ṭak bawk. "Kal tîr rawh, kalsan rawh..." tiin a phun leh nuah nuah a, a dârah sâwiin, "Zobiak, Zobiak i ṭha em?" Tiin ka ko a, a rûm ṭuah ṭuah ringawt. 

"Chawngdingpui, kal suh..min kalsan suh..." a rawn tih leh tâkah chuan a hma aia vînin ka koa ka sâwi leh nawk nawk a, fiah vak lova meng buai nuai chung hian, "Ka ti lovang, ka ti miah lovang.." a la ti ta fô.

"Harh rawh, harh ta che maw le.." a biangah ka bênsak thek thek a, fiah lutuka rawn mengin ka hrawkah a rawn rêk ta mai, ka hamhaih nasâ.

Theih tawpin ka tâl ve naa a thâ a chak mai si a, ka thaw a chham dawn titih. Thei leh thei lo hian a hminga koh ka tuma ka hlawhchham. Ka khaw hmuh fiah lo tial tial avang chuan men luih ka tuma vawilehkhatah min thlah thut a, a thaw hawk hawk a, min hmu ang pawhin a lang lo. Ka khuh nghal bawrh bawrh a, tlêma tlêmah ka thi lo chauh a nih hi le..

Khuh bawrh bawrh chungin khumah ka let thla tawp a, tâl chhuah tuma ka ṭanna lamah ka taksa ala ṭang ṭung a, ka hlau ru hlê bawk. Zobiaka lam ka va hawi a, chunglam melhin a meng kur a, min ngaihven lo hrim hrim.

A harh nge a thi tih pawh hriat hran loh khawpin thâwm nei lo leh che miah lo hian a mu a, en ngun viau lo ila chuan a thi emaw ka ti tak tak ang. A thin záwn phu dat dat ka hmuh vangin minung a ni tih ka hria a, dimtea tawlh hnaiin, "Zobiakmuan.." ka ti sap a, a che miah lo.

"Zobiak?" Tia ka koh nawn leh tâkah chuan khap fak fak chungin min rawn en a, a mitmenga thinrimna leh lungawi lohna lang chhuak chungin min melh a, a biangah dimtein ka chûl a, "Hahdam rawh, inthlahdul la, ka mitah en rawh le..." khaw kâr kawnga min thlamuan ṭuma a tih ang chiah khan ka ti ve a, a hlauin a thlabâr ve kher lo. Mahse, mawlhtu leh eng emaw mumang lamah tibuaitu a nei tih a lang reng.

A lû tlêma her sawnin min rawn en a, a mitmeng thûk leh ril, hriam hrâkah chuan thil chi hrang hrang a lang dawt zut.

Dimtea kûn hniamin dam thlap hian ka fâwp hmasa ta a, min chhâng lêt lo. A dawh mâwl tawp. Inlahrang duh lovin ka fawp lui ngáng ngáng a, chutah min lehthal thutin, min bawh bet a, ramsa koham ang mai hian min fâwp zui bawrh bawrh a, a thinrimna keimahah hrîkthlâk a tum ni berin ka hria. 

Ka mut kawr inbel chhun pawh a phih sawk sawk a, a thaw huam huam bawk a, a chêt dan mak tak mai chuan min ti hlau ta tlat. Thlamuan tuma ka lo hnaih hrawt hrawt kha ka inchhir ṭan der.

A hnuailamin min do rûn a, min fawhna erawh a dam ta deuh. "Apui..." ti supin min chhuk melh a, ani leh ni lo angin a meng phelh phung a, "Lalnunhlua nen in mu dun tawh em?" Tia min zawh chuan "Aw" tih nan ka lo bu nghat a, chu veleh rang taka tho chhuakin khum bul chair-a a thawmhnaw dah a inbel sawk sawk a, a thinrim tih hrilh hranpa ka ngai lo.

Ngawi rengin a chezia ka thlir reng a, va pawha biak luih pawh ka tum duh bîk lo.

Room kawngka bulah dingin, "Inngaihtuah ka mamawh, ka lo lêt leh ang," tiin a chhuak ta a. Khua a vâr tawh bawk.

Nia, Nunhlua nen kan mu dun tawh ngei alawm mahse... 

26-11-22 -B®®

B+>[BeckirafARenthleI]<+®®