9. A MAK! A Becky Rafa Renthlei Story

9. A MAK!

Ziaktu: Becky Rafa Renthlei 

-B®®

Shadow of the life

[Recap]

A meng hriam hraih a, lungawi loh hmel takin, "Mitthi tawh chu ni lo se, a hming i lam rual khan ka kalsan ang che maw le," a ti hniam ruih. Ka harh chiang ngei mai.

Ka bialpa kum hlun, ka inghahna tur ni-a ka lo ngaih ve ṭhin Lalnunhlua a liam ta.

Ka khawngaih êm avangin ka mittui a far lo thei lo..

Zobiakmuana ngaih dan tur lam dâwn lêk lovin ka ṭap chhuak ta nge nge a.

Thi mai turah a indah bîkin ka ring lo. A mawi lohna hliahkhuh turin min la rawn pan tak hrâm hrâm a, atana rinawm reng ṭhin Chawngdingpuii hian nunna ka pe thei si lo. A tih sual Siam ṭha tur tak ngial pawhin hun a nei ta ngang si lo a..

"Nunhlu..." tiin ka ṭap ta tlawk tlawk a. 

&&&*

Ka ṭah chhung zawngin Zobiaka a ngawi reng a, hun dang, ni dangah kha chuan min thlamuanna thu chhâk chhuakin min hnêm ṭhin a; mahse, tunah chuan che eih lo hian ka bulah a mu a, kan inkârah feet khat dâwn a awl duai.

Ka pangngai tâk deuh hnu chuan Zobiaka lam hawiin ka in let a, a maimitchhin tlat avangin a muhil nge a harh tih a hriat loh.

"Zobiak?" Min chhâng lovin a ngawi reng.

"I muhil em ni?" Tia ka biak leh chuan, ram hmuk hian, "Khatianga i ṭah bengchhen reng te chuan engtin nge ka muthilh theih ang?" Ngaih dan ni lo lutuk tih hriat takin  min rawn en a.

"A nih chuan muhil rawh, ka ṭah a chhuak tawh hleinem," dam thlapa tiin ka inlet thak a.

"Ṭap leh rawh, zanin hi Nunhlua vanga i ṭah tawpna ni bawk rawh se, amah vanga i ṭap lai hmuh leh ka duh tawh lo a nia, ṭap zo vek rawh," ngeiawm rawngkai lek lek hian a ti a. Eng vanga lo thinrim ve ngawt nge maw a nih le!

"I sual mai mai êm mai, duh hun hunah a ṭah theih em ni? Ka chan hi i chanah han dah ve chhin teh i nui bîk miah lo ang," ka ti ve ta a.

"Ka nui lo réng alawm, a duh ang kan tih hlawhtlinsak tawh a, a nu nise a lawm lo zawkah te a la ṭang a, ka insûm nasa hle tih hria ang che, eng nge i la ṭah fô. I la ngai ngawih ngawih nge i la hmangaih zâwk?" Khauh fura tiin a ṭhu chhuak hlawl.

A ṭawng dan kher kher chuan ka thin a khei zar mai. "Zobiakmuan hre rawh, nang chu kâr khat emaw vel lek ka la hria che a, ani nena khaikhin che hi ka duh lo hulhual. Mahse, kum kha leh chen atan rinawm takin ka lo awm ve a, min bumin ka natna thlentu ni mah se; Nunhlua ka ngainat êm êm kha a la ni reng, haw lo tur leh ngaidam tura min hrilhtu chu nangmah i ni, huain a lakah rilru chhe tak pu ila eng nge ka tân hlâwkna tur awm?" Thinrim eng phiarin ka ti ta piap a, ka ṭawng zawi lem lo bawk.

"A ṭha a nih chu, mitthi tawh ngaia ṭap kûr reng bula awm ai chuan inthiarfihlim ila a ṭha zawk, i tân a lo hlu hleuh hleuh êm a nih kha, i kianga ka awm reng chung pawhin a hming lamin min ṭah khum a nia, hei hi chu ka hrethiam thei lo a ni e," tih pahin khum thawhsan tum hian a che chhuak a, "I thîk em ni?" Tiin ka zâwt a.

"Thîk e, thîk teh reng mai," ti nghut nghutin khum aṭangin a chhuk a, a bânah ka va man hman hrâm.

"Ramdini chungchâng ka sawi hlek pawhin i thîk min ti a, tunah nangin i ṭhianpa i thîk ve leh a; huis, i tân thîk a ngai hleinem, ani te chu a awm tawh lo a, a nun tâwi lutuk leh a tih sual siam ṭha hman îk lova a boral ta mai kha ka khawngaihin ka lainat asin. Lo kal teh hetah hian," tiin ka mutna bul âwl laiah chuan ṭhu turin zaizir hian ka hrilh a.

Túm búr chungin a lo ṭhut ve tâk hi.

"Nangmah hnaihtu mipa tawh phâwt chu ka thîk vek, ka ṭhianpa pawh ni se," a la ti hrâm nia.

"I ho lutuk, i sawi ang khân zanin hi a tawpna ni rawh se aw, ka mumangah ka lo hmu a, min hmangaih thu leh a tihpalh liau liau a ni tiin min hrilh asin. Eng ang pawhin awm dun tum leh mahila a theih tawh hleihnem, thík duh tawh miah suh," dam thlapa ka hrilh fiah tâkah chuan lungawi famkim rih lo mah se, a hmêl hmuh a nuam ta deuh.

"Chuti a nih leh min fâwp thei," a'n tiah.

Ka ṭahna avanga ka mit bûi châk te, ka hnar thip hlur leh sen hlar te chu dârthlalangah ka va hmu thut a, ka va han hmelchhe mai mai tak. Ka nui zui hak a.

"Min nuih elaw?" Tiin, ka lamah a rawn tawlh a, "Ka hmêl hi..." tih pahin ka biang sa ham ham chu ka dawm vang vang a, "Ka mitah chuan i hmelṭha, nang aia hmelṭha hmuh tur an tam mai; mahse, nangmah Chawngdingpuii hi i hmelṭha ber aw.." nui suk chunga tiin ka khabeah a rawn dawm a. 

"Min fawh hmasak hma loh chuan ka muhil dawn lo," a ti leh tlat tawh.

A thusawi záwmin ka lamah ka kuai kuna ka fawp hmasa ta nge nge e. 

Min nawr lui lo mah se zanin zantîr aṭang khan fawh ka châk zek zek. Mipa mak danglam tak a ni a, chu âia la mak zawk chu ni reilote ka hriat mipa laka rinna ka nghat ngam êm em mai hi a ni. A tel ve tawhnaah chuan ka ngaih a ngam zân a, min biain ṭawng sek lo mah se amaha zahawmna leh ṭhatna inphûm ru hi ka hmuh hmaih tlat lo.

Dimtea fawp de de ka ni a, ani erawhin a duhthawh mai siah. Mahse, a phurawmin a nuam lawi si.

A bâk la duh belh viau mah se, ka rilru put hmang a hriat chian tawh avangin ui deuh chung hian min thlah a, "Ka ning a nia, hetia inthlaha in kalsan ngai sek hi, hahdam deuhin kan muhil ve tawh ang chu tih laiin i ṭap leh a, khua a vâr ringawt dawn," tia a phun ve tâkah chuan ka nui kar kar a, a va inhmeh lo tak.

"Mama phalna thlapa lo riak i ni a, i duh chen chen ka bulah i mu thei," ka lo ti a, nui huk chungin, "Nilengin mu ila a ni mai alawm," a sawi zawh rualin ka kawr hnungah a kut zen lutin ka Bra kilhna a hmet pelh zeuh a, chimawm a nia. 

"Ninawm suh aw.." ka tih chuan, "Organ pahnih hi ka khawih min phalsak rawh, chuan ka muhil ang," zuk ti a, a nui miah lo lehnghal.

Nia, nulat tlangvalna kawngah chin tâwk a thliar thiam a, organ pahnih chu khawih mawlh teh se. Hah! Ka nuih a za. A thil sawi dan kher kher hi.

Ka harhin khua a hnîm ruih a,  dâr erawh a tlai tawh hle. 

Choka lamah Mama leh Ṭanpuia an ṭawng bawrh bawrh a, Zobiaka a la mutui ngang mai. Insi miah lovin kan lo mu a, ka hriat hnuhnun ber lai kha chuan ka âwmbâwrah a kut a nghat chiang. Tunah lem a mu ngil ṭha at at khawp mai.

A hmai fang dik zet chu ka thlêk vang vang a, hmelṭha vur ni lo mah se a 'pa' tlat. A biangki ruh sâng vah leh a khaberuh in vuah nghet charh te chuan mipa tih mawh a ni tih a tilang. Mahse, a duhnaah ani aia hmeichhe ngaihsak thiam mipa an tam vak bîkin ka ring lo.

Dimtein ka thawhsana a duh chen chen han mu phawt teh se. Ka inphih fel fai hnuah ka chhuak ve ta chauh a, Mama leh Ṭanpuia'n tukṭhuan an lo kîl a, nui chung hian, "In inhau thawm ngaihthlak khan ngaih a ṭha deuh a, in reh hmak chuan a zia lo tlat, thil ṭha lo in ti lo maw?" Tiin a nui nasa zual sauh a, "In chhia, eng nge min eisan rikngawt," lái takin ka lo ti a.

"Ui ui, eirawng kan bawl veka nangni delhhlumsa ei tum ang maiin in mu thung a, Mate, zak ve rawh aw.." tiin a chaw thleng nen a rawn tho chhuak a, Ṭanpuia a nui suk suk.

"Tak takin, kan hmanhmawh deuh a, u Zobiaka a awm tho bawk nen kan eisan ta mai che u, i hnaah i tlai ang e," a ti a, Mama hi zawng ka nau a nih vang pawh ni lovin a hming hi a pu zo a nia. A fel ve riau.

Ṭanpuia a chhuak hmasa a, Mama chhuah dawnah Zobiaka a rawn tho ve chauh. Mut a hmu ṭha lo rei tawha ka kâi tho duh lo kha a ni a, ka hna lam erawh ka tlai deuh dawn tih ka sawi tawh thung. 

"Chaw ei nghal ang, a tlai lutuk tawh," tiin chaw ei ka siam nghal sawk sawk a, "Aw le, ka lo intifai ang," tiin bathroom a pan ve mai.

Chumi hnu chuan office ah min thlah kâwi a, ka chhuk dawnah, "Apui, zanin hian Tlabung pana ka kal ngei ngei a ngai tawha ka zán tlan dawn aw.." tiin min hrilh ve chauh. 

"Zingkâr hma deuhah chhuak zawk la," ka ngaihtuah êm avangin ka ti a.

"A theih tlat loh, zaninah ngei ngeia ka chhuah a ngai, min thlah ka phût a nia, in bân hunah min lo call la, ka lo hruai ang che aw," dam thluama tiin ka kal liam hma chu a tlan chhuak duh ṭhak náng.

Nilengin ka rilruah Zobiaka a awm a, zanah kher kher zin chhuah hi chu ka ngaina tawh lo nasa.

Whatsapp aṭanga chanchin inhrilh leh in-text chhên ang kha a peih ve lo a ni ang. Hmingi te in a thlenin a rawn call zuai a, ka puan hawh pawh ka thawn ve tâk hrâm kha. Khami ni-a ka thawmhnaw inbel tur min pêk kha a man pêk ka tum ngiala a duh lo hulhual, "Ka hnen aṭanga thilpêk i dawn hmasak ber a ni a, a man ka phût lêt lo." A ti tlat.

Vawiin hi kâr khat leh ni thum kan inhriatna chiah a la ni a, chu pawh a Auto khalha ka chuan ni aṭanga chhûtin a la ni zui. Chutiang ni mah se thil tam tak kan tawngin kan ti dun a, inngaizawng satliah te aiin kan inpawh zawk mah ang. Hun rei tak inhre tawh ang mai kan ni.

Ka nu leh pate pawh Krismas hmangin lo haw an tum a, an tel lovin thla hnih dâwn kan la awm a ngai. A ninawm ka ti. Nunhlua boral an hriat khan min ngaihtuah vangin ka nu lo chhuk thlâk a tum tawh kha a ni a, mahse; Mama zawkin 'A ngai lo' tiin a lo hnial a, an rawn chhuk ta lo.

Kan bân veleh Zobiaka ka call a, kan bâng tawh tih ka hrilh rualin a rawn chhuah nghal tur thu a sawi. Eng chena rei nge an châm dawn a sawi lang lo a, a dik a dik chuan ka huphurh a ni. Kan inah rawn riak reng thei lo pawh nise koh phâka a awm hrim hrim khan ka thlâ a ti muang.

Office kawtah ka lo nghâk a, nidangah a hmel a nelawm lo viau ṭhin a, tuna a lan dan phei hi chu nelawm loh tak a ni. A huat thu kan sawi palh ang tih a hlauhawm.

"Le, kal ang le.." a ti vut a.

Kan kalna tur ka zawh chuan, "I hre mai ang," ti chauhin min chhâng. A ṭawng tuitam lo thei si.

'Tourist Lodge' Zotlang lam pana min tlânpui chuan a ngaihna ka hre lo tulh tulh. Zanina zin tur angin a insawi bawk si a, thil han zawh lahin min chhâng ṭha duh lo leh nghal. Inhau ka peih loh vanga sawi nawi lo mai mai ka ni.

Lodge kan thleng a, room nuam zetah min hruai lût a, a thlen man pawh a to viauin ka ring. 

"Zanriah kan kîl dun anga chumi zawhah ka thlah ang che, chuan, kei ka tlang nghal ang, intihfai i duh pawhin a theih vek aw.." tiin ṭhutna lo hnai berah a ṭhu thluang duai. Kei amah hlat thei ang berah ka ṭhu thung.

An hnathawh hi a chipchiarin hre ve lo mahila ka peih zawng a ni lo.  Zin a ngai zing si. Director lai te chu a ni ve bawk si a, a hnuaia thawk te tan a ninawmin a nia ka rin. A nelawm si loh.

"Kan inah kan ei mai lo va, helaia man chawia han awm leh rih te chu a," ka lo ti niah niah a.

"Ka thlenna dik tak zawk alawm, a hla deuha ṭhiante bula awm a lo thlâkhlelh awm ve bawk nen ka chho peih ta lo mai mai a nih hi," a ti awlsam êt. 

Inbual ka duh leh duh loh min zawt leh a, inthlâkna tur ka neih loh thua chhângin ka lo hnial a, "Chutiangah buai a ngai lo, va intifai rawh, rei lo la.." a ti a.

"Ka haw thuai dawna a buaithlak mai mai," tiin ṭan ka lo khawh ve tlat. Min hnial ta bîk lo.

"Lokal lawk teh..." tih pahin Bedroom-ah min hruai phei a, a zinna tur thawmhnaw khuma lo awm darh phung chu, "Min insiampui la," a ti a. Ka lo bu nghat.

"Ken duh deuh bik te i nei em?" Tia ka zawh chuan, "Ṭha i tih apiang kha dah rawh, ka inbel thei vek," a ti leh mai a, ava buaithlâk tak. 

A sawi angin ka duh duh ka rem hmiah hmiah a, khuma ṭhuin ka chezia a thlîr reng a, min tihpui lem lo. Ken tam a tum danah a châm rei dawn a nih hmel. Minute tam fê inbe lova kan awm hnuah, "Apui, ka ngai dawn che, lokal ve mai la, i hnaah chawlh a harsa ang em?" A rawn ti a.

"Ka châwl rei tawha a harsat ka ring, bâkah i ruala kal ve ngawt a fuh lo, ka duh lo bawk," ka lo ti a.

"Nakinah kan inneih hunah chuan hna i thawh a rem dawn tawh lo a nia, i rilru siam fel ang che," a ti teh daih. Min neih hi a tum tak tak em maw ni! A sawi zing malh malh mai siah.

"Inneih sawi nan chuan a la hma deuh lo maw?" 

"Hma mai mai lo, ka rûk nghal loh che," a ti hmuk.

"Kum thum chhung ka zui nen pawh kan la innei lo a nia," ka ti nang nang a.

"Nunhlua rawn sawi lang hlek suh, ani ang ka ni ve lo, a rei leh rei lovah ka buai lo a, ka duhah ka chiang bawk." A ti ngat. 

"Kan la hria ang chu.." tih pahin khumah ka ṭhu ve a, min lo ban vat. "Kum li chhung ka nghâk chea ka tan a rei mah mah, helai hmuna ka hruaina chhan che  chu ka zin hlanin i nu leh pa ka chungchâng lo sawipui la ka duh, engkim zêp awm miah lovin hrilh fai vek la, Nunhlua lam theihnghilh tawh bawk ang che," thu pe aw taka tiin min en vung vung a.

"Ka nu leh pa hnena sawi nan chuan a la hma e, Krismas hmang turin an lo haw dawn tho a, hmaichhanah ka hrilh mai ang," ka tih chuan, "Keiman ka bia anga a ni mai alawm, i nau hnen aṭangin an phone number ka nei tawh. Ka û pawh i chungchâng engkim ka hrilh vek a, December thlaah lo chhuah an tum deuh a, ka û hming ka la hrilh lo chein ka hria Lalremruati aw.." a ti leh tawp.

"Eng ati nge engkimah hian i hmanhmawh em em le? Min nawr tu tu zel a," ngaihdan ni vak lo hian ka ti ve a.

"Hmanhmawh chhan ka nei a ni mahna. Bâkah mahnia awm ka peih tawh lo," a ti duh lek. A va ho e.

"Eng pawh nise zin phawt la, i lo hawn hunah kan la sawi ṭha dawn nia, ngaihzawng dangte hi i lo nei ru reng ang e," fiamthu titak deuha ka zawh chuan a lo ngai thutak ngang mai. 

"Pakhat a tawk aw, pakhat, i thlalak ka hmuh aṭang khan hmeichhe dangin ka rilru an luah thei tak tak tawh lo, ka ṭhianpain a kawp che tih ka hriat khan ṭawng mawi lo ni lo se ka lâwm a nia, amah pawhin ka duh che tih kha a hre vek," a ti ta mai. Mak ka lo ti nasa.

"Nunhlua'n a hria maw?" Ka lo ti hehaw a.

"Hria e, ka hrilh tlang pawpa kan inhnial phah nghr nghe alawm, Ramdini âi chuan a la thlang fan che a, mahse; Ramdini a ṭhen thei chuang lo, a naupai kha a vawi hnihna a ni tawh alawm." A ti ta a. A mak leh zual ta. 

"Eng tin nge heng zozai hi ka hriat loh theih le?" Ka ti vawng vawng. 

"I hriat loh tura ruahman a ni tlat a, a hretu awm chhun keimahin ka hrilh loh che avangin engtin nge i hriat teh  lul ang, dik tak chuan Nunhlua'n a tih nat poh che leh ka chance a ṭha; mahse, i hrethiamin i hmu thiam si lo kha i khawngaihthlak," a ti duah a, amah chawp chawp hian ka ngei mai dawnin ka hria.

"In va han tenawm dun ve le," thinrim taka ka ṭawng chuan zaidam deuh hian, "Ka ṭhianpa phatsanin ka hrilh thei si lo che alawm..min ring ngama a thurûk min hrilh a, keiin eng vangin nge ka lo sawi chhuah ang, mipa tih atana mawi lo a ni. Mipa ka nih hi.." a ti leh hmiah.

"Apui, ka hrilh che chuan ka duh thu che hrilh tel i ngai dawn a, i hriat chhuah hun  ka nghâk ṭâng ṭâng a nih hi, thihna hmanga i hre chhuak ta erawh pawi ka ti. Chunglam hremna ti ngawt ila ka sawi sual ang tih ka hlau si a, a hmasa zawka Ramdini naupai kha chu Delhi-ah a tihtlâk tîr a, ka û Remruati te inah alawm an zuk thlen, mahse, chhuanlam ṭha tawk tak an nei a, ka u khan an titla lui tih a hre lo, tin, doctor hran daih a pan bawk si a," a ti ta dap dap a, râpthlâk ka ti lutuk. 

Mahni rila rah titla duh tur khawpa rilru chhia han put chu le, mihring pangngai rilru a ni thei dawn em ni?

"Sawi tawh suh, eng mah ka ngaithla duh tawh lo," tiin beng ka hup a, "Engkim hre vek la, i dam zawk ang," a ti zawi ruih.

"Ka hre duh tawh lo ka tih chu, ngawi tawh teh, mi tenawm in nih hlawm hi..." thinrim lutukin ka ti a, khum ka thawhsan zui bawk.

"Min hmer tel ve suh, a thuruk ka vawnsak avangin ka tenawm tihna a ni lo, khawiah nge kal i tum?" Chak zeta bedroom ka chhuahsan lai chuan a rawn ti a. Ka chhâng tawh lo. 

Balcony lamah ka va ding chhuak a, ka thu hriat kha a mak hi ka ti. Vawi hnih lai Ramdinin nau a pai a, chuti chung chuan kei hi atana hlu ber angin min ngaihsak a, Ramdini pawh a â ka ti. Nge, ka hriat ve loh thil dang a la awm tel cheu zawk. Ka thaw hak hak a, a lo inhriatchian loh theih ngei mai.

Zobiaka'n ka dara a rawn vawn chuan ka tawlh sawn daih a, chek hluk chung hian, "Mipa chu mipa anga awm mai tur, an tih ang ka ti ve loa ka fihlima an thuruk vawng tura min duh a nih chuan ka vawng thei lutuk tlat. Hrilh ta che ila ka thusawi i awih dawn em ni? I hriat ngai loh mipain i bialpa chungchanga thudik hrilh ta che sela i awih hauhvin ka ring lo, a chhan chu Nunhlua i ring zâwk dawn tlat tih ka hria alawm," dam thluama a tih chuan a dikna chen a awm.

Zobiaka hian heng thil zawng zawng hi a hmain min hrilh ta se ka awihin ka ring lo. Amah Nunhlua pawh zawt ila a pha hul ṭhak duh dawn tih thil chiang sa a ni bawk.

"Tikhan engkim i hre ta a, ka duhna che leh i laka ka rilru puthmang sawi chhuahna hun remchang tak ka nei tih hriain i zinna hmunah ka rawn pan che a nih kha, ka ṭhianpa ka phatsan lova ka hmeichhe duh ka buaipui ve theihna hun remchang kha bawhpelh ka tum lo bur. Mahse, i hriat kha, ka ruahman loh dan vekin thil a thleng ta si a..." tiin Van lam a hawi vung vung a.

"An thlâ khan min tibuai lo se chuan tun hun hi kan thleng lovang. Apui, Nunhlua khan ka rilru puthmang a hrechiang ve bawka nangin min hnaih theihna turin khatiang khan a rawn ché tepawh a ni mahna, ka sawi dik em?" Tiin min zawt hlauh.

A sawi dik. Kawng lakah khatiang harsatna leh hlau thlabâr khan awm lo ila Zobiaka nen eng tikah mah kan inhnimhnaiin ka ring lo hulhual. Nunhlua tan ka rinawm ngar ngar si a, keimah leh keimah ka inhaw lêt tawh zawk.

Kan zanriah tur an lo dah tâkah chuan eng thil dang mah sawi chhunzawm lovin kan ei mial mial a, ṭawng châkna ka nei îk lo. 

"Ka kal a hun dâwn tawh, ka lo haw hma loh chuan lo rinawm ang che, tu mipa mah hnaih lo la, ka thîk turin tumah innêl tîr suh ang che," nghet charhin a ti a, ka ner nawk.

Kan in pana kan tlan laiin min en zuk zuk a, ka ngaihtuahna kâwmin ka ngawi rauh rauh. 

"Ka phatsan ve dawn lo che tih i thinlung khan hre rawh se, tun hi kumina Side kan neih tawpna ber tur a ni a, ka sawi ang khan i nu leh pa lo titi pui rang la ka duh, ka biak chuan a ruh lang râwtin ka sawi dawn a nia, nuam i ti miah lovang," tiin min la vau zui. Chhe lutuk mai.

"Kal phawt mai teh," ka ti ringawt.

"Ka kal anga ka lo kîr leh ang, ka laka i feelings hre lo tur khawpa mipa tlawktlaw ka ni ve lo aw, min duh, Chawngdingpui, nang hian min duh tih ka hria, ka duh nasat zât zetin min duh lêt ve tih pawm ngam ang che," inring tawk lutukin a rawn ṭawng a, a sawi dik vek bawk si. 

Nunhlua thurûk vawng awm tak pawh a ni. A rilru pawh a nghet viauin ka ring. Thil a ti ve mai mai ngai lo a, a thusawiah a ding nghet tlat hi amah ti Zobiakmuana tu a ni tlat lawi si. "Nupuiah ka nei dawn che' tia a sawi a nih chuan hlawhtlin ngei a tum ang.

Kan in kan thleng a, muangchang hman a nih tawh loh thu sawiin a lamah min pawt hnai a, "Fawp lo chea kal ka tum lo," ti supin ka hmui a rawn si nghal a, a'n duhthawh leh mai mai khawp a, hun a nei ngang tawh si lova hreh zetin min vawnna a thlah ta nge nge e.

"Nitin rawn inreport ang che, zan lamah i nau room ah riak la, a nih loh pawhin i room-a riak turin sawm rawh aw," min ngaihtuah tih hriat takin a la sawi hrâm.

Kan awm dun ve pawhin infawh kan uar viaua a âia thui kan kal lo ve khawp mai.  Kan inhriat tirh aṭanga tun hun thleng hian vawi tam kan infawp tawh miau a, a nuam ka ti. Tisa châkna leh eng emaw lam ni lovin kan inpawh phah ve tlat. 

A lan theih chhung ka thlir a, zan dar sarihah kan in kawt aṭangin a chhuak tih ka chhinchhiah kar. Him dam taka a tum hmun a thlen ka duhsak ngawih ngawih. 

#Kâr thum hnuah#

Inrinni a ni a, Zobiaka nen kan hunawl a piangah kan inbe ziah a, zan rei pawh kan sawi thei meuh lo. Mama phei chu zan khat chiah a lo riak a, "In inbe rei thei si a ninawm, riahpui pawh i ngaih loh kha," a ti nghe nghe. A tûk zan aṭangin keimahin ka mu ve hmak. 

Min nawr nasat êm avangin ka nu leh pa pawh ka be ta nge nge e. "Amah kan hmuh ve phawt loh chuan ngaihdan siam a har, Nunhlua ṭhianpa a la ni zui a, i tisual ang tih kan hlau," ka nuin a rawn ti a, a âwm ve reng. 

Amah Zobiaka pawh ka nu nen kan inbiak dan ka hrilh a, a hrethiam viau. "I nu leh pain rem an tih chuan ka û te lo zin laiin palâi ka rawn tir dawn nia," a ti leh tawp tawh. Ka 'umm e' vel mai mai. 

Awm dun lo mahila tunah chuan inngaizawng nghet tak kan ni ta. Ka lakah a intithu êm êm a, chumi a nih rualin min ngaihsakin min care viau bawk.

Nunhlua leh Ramdini chungchâng kan sawi tawh ngai miah lo a, a thlân pawh ka tlawh ta lo. A nu leh pa pawh ka be lo bawk a, kan hma hun tur hre lo mahila tun atan chuan ka hlim ve viau bawk. Kawngpui zauh chungchângah teh ṭhat tur an neih nual avang leh Complain an tam bawk si avangin a buai thei hle tih a sawi a; chuti chung chuan a hunawl ka tan a dah hram hram ṭhin.

Ka ngai êm êm a, ani pawhin min ngai bawk a, kan inbiak apiangin inneih lam a sawi ziah. A sawi zing lutuka ka hnial nêp telh telh tih ka hria, a awm loh chiah hian ka lo duh ve hman zia ka hriat chhuah phah bawk.

December thla tîr a ni a, thlakhat aia tam Tlabunga a awm hnuah vawiin hian a rawn haw dawn a, Sunday zingah a rawn chhuak leh hmiah. "Zankhat lek châm pawh ka peih tawh lo, ka ngai lutuk che," zu han ti thlâwt a, a va nuam si êm. 

Zobiaka hmuak turin Venglaiah ka phei a, Sunday a nih vangin Auto hman tur a vâng a, Ṭanpuia ka in thlah tîr a, "Nangni pahnih hi inti ve tak tak dawn em ni?" Tiin min zâwt heu. "Kan ti tak tak chu a nih ve hi," nui chung hian ka lo ti a. "A ṭha, mipa a nih kha, i tisual lovang," a ti ve ngei.

'"Mipa a nih kha". Tih thu hi ka nau leh Rinkimi, tunah Ṭanpuian a sawi ve leh ta a. Eng vanga Zobiakmuana mipa ni sa reng si, hetia an sawi kher zel ṭhin hi ka hrethiam pha lo. A mak ka ti ve mai mai.

Venglai Traffic point bulah ka ding a, khawi lai nge an lo thlen tawh zawh tumin ka call a, hmeichhiain a lo pick daih!

"Zobiaka khawiah nge?" Tia ka zawh chuan, "A muhil rih," tiin min chhâng a, rawn hawpui a neih tur thu a sawi bawk si lo. Ka hrilhhai viau. 

Chutah, "Khawi lai nge in lo thlen tawh a?" Tiin ṭha tak hian ka zawt leh a, "I va dil chhut tak..ka hre lo kan awmna lai tak ka hre lo," seh chilh lek lekin min rawn chhâng a, a rûi a nih ka ring. Ka thin a rim lutuk a, "Zobiaka kha phone pe teh," ka ti vin ṭhak. 

"Ka pe lo phawt mai ang," tih leh off a rual a, ka va haw mai mai ve le. Ka call nawn leh ngat a, vawi thum zet ka call pawhin chhânna ka dawng lo. 

A tawk. Ka call nawn tawh nguar ang. 

Lungawi lo zetin Mizofed kawta Auto Rickshaw dinna lamah ka chhuk ta daih a, ka hmuah a ṭulna ka hre hrep lo e...

Kha nu kha atu a pawh lo ni se, ka lungawina turin Zobiakmuana a insawi fiah ve fê chu a ngai tawh ang... 

28-11-22 -B®®

B+>[BeckirafARenthleI]<+®®